Кин со Кузьма Куликов? Нырысь учкыса, кулэтэм мултэс юан кадь. Зэмзэ но, Кузьма Иванович Куликовез тодо пыдлось удмурт гуртъёсын но, Европаын но, солэн нимыз тодмо учёнойёслы но политикъёслы, государствоен кивалтӥсьёслы но студентъёслы. Озьы ке но, кин со сыӵе? "Вань сыӵе удыс - удмурт калыклы дурбасьтон" материалэз лыдӟе 4-тӥ-5-тӥ бамысь. Туспуктэмез М. Менландшинлэн. Алла КУЗНЕЦОВА, кылбурчи: Муспотон эшъёсы, туганъёсы, ӵыжы-выжыосы, мынам яратоно калыке! Анайёс но апайёс, чебер пиос, нылъёс, муспотон нылпиос! Тӥледлы туж но туж сӥземе потэ шуд. Асьме удмурт калыкмылы нырысь ик мед пыӵалоз оскон. Дыр вуоз ай, асьмеос но ӟеч уломы. Одно ик осконо солы. Одӥг куронэ вань: ойдолэ, огкылысь кариськыса, вань сюлмысь чидатскыса уломе, нокыӵе шуг-секытлы ум сётӥське. Ми, удмуртъёс - чидась калык. Асьмеос ке ӧм чидалэ, кин чидалоз на. Владимир ДРАЧЕВ, спортъя заслуженной мастер, Россилэн 2000-тӥ ар понна чемпионэз: Мон Ижевскын куноын ке но, ас дорам кадь ик потӥсько. Шуныт мылкыдо, каньыл сямо удмурт калыкез Выль арен ӟечкыласа, нырысь ик сӥзисько юн тазалык. Асьме странаын оломар но луылэ ке но, тросгес малпаське ӟечез сярысь. Котьку ик мылкыдмыя уг луы ке но, кунэрскыны уг яра. Азьлань мыныны сюлмаським ке, ӟечез, умоез одно ик вуоз. Пинал спортсменъёслы дэмласал сюлмысьгес тыршыны. Тыршемлэн емышъёсыз соку ик уг кисьмало, нош соос одно ик вуозы. Огвакыт мынам но номыр ӧз пишмылы. Нош ужам юнме уг луы. Тани удмурт музъем вылын нош ик Россилэн чемпионэз луи. Ваньмызлы - шуд но бур! Нина ПАРАМОНОВА, спортъя международной классэн мастер, Италмас гурт администрацилэн кивалтӥсез: Ваньмызлы ик сӥзисько юн тазалык, выль азинсконъёс, кинлы - дышетсконын, кинлы - ужын. Удмурт калыкелы но, мукетъёсызлы но - ӟеч улон. Медаз луэ вал урамъёсын кураськисьёс, медло ваньмызлэн тырмыт уксёзы, сиён-юонэн тыр медло ӝӧк вылъёссы. Ваньмызлы ик - умой мылкыд. Анатолий МАМОНТОВ, Россиысь калык артист: Вань калыклы, удмуртъёслы но, ӟучъёслы но, бигеръёслы но - ӟеч кылъёс гинэ вераме потэ, тазалык соослы, шуд но бур! Ньыльдон ар ужасько ни "Италмас" ансамбльын, удмурт калыкме туж яратӥсько, тодӥсько солэсь искусствозэ. Кӧня кужыме тырмоз на, мон сое сёто удмурт калык искусстволы. Со - дуннелэн но, Россилэн но искусствозы. Соин ик шумпотыса ужасько, малпасько, вань калыклы умой уж лэсьтыны быгато на ай шуыса. Лидия Чернова Выль арлы - пӧсь мылкыдын Ой, потэ ук шедеме Туж "Паймымон бусые"! Якубович Лёняен Эх! потэ чупаськеме! Сюлэмы ини дыртэ... Алоз, дыр, только картэ. *** Синмаськи кильтро Пельшлы. Йӧно. Чебер. Кельышлы. Кутэме уг лу асме, Туж потэ ӟыгыртэме... Нош лулы алэ лушкем: "Пересь сурно! Возьыттэм!" *** Мон Арканов Аркашез Гочатны луоз, кожай. Учыртӥз сьӧд очки пыр - Куалектӥз сюлмы дыр-дыр. Уд шуд вылэм "лек ӝушен". Уд йӧт бордаз янгышен! *** Ӟечбур, Винокур! Гажасько тонэ укыр. Мон тынэсьтыд трос уг кур: Пальышты гинэ шорам - Ӝик-ӝик ӟыгырто бордам! Ӟечкылало Кун Кенешлэн депутатъёсыз Выль дауре выжыса Карим Касимов, акциосын "Глазовский завод "Металлист" огазеяськонлэн валтӥсь тӧроез: - 2000-тӥ арез умой йылпумъям. Огъя ваньбур поттонмы кык поллы йылӥз, нош миымен ӵошатыса - одӥг куиньмослы. Предприятимы ялан выльдӥське но выльдӥське, туэ асфальтэн шобыртӥм азбармес, поттыны кутским кӧня ке выль пумо продукция (гур эстон агрегатъёс, слесарь тисъёс но ужан дӥсь), пыӵатӥм усто ужан амалъёс но умоятӥм продукцилэсь ӟечлыксэ. Табере изделиосмы кунгож сьӧры но кошко. Нош туннэ сюлмысьтым ӟечкыласько быдэс коллективме но бырйисьёсме Выль арен но сӥзисько туэ уката бадӟымесь вормонъёс басьтыны. Ваньдылы шудо но тыр улон. Николай Сычёв, Ижысь тылобурдо вордон фабрикалэн кивалтӥсез: - Курег пуз басьтонъя миымлы планмес мултэсэн тырмытӥм но толэзьлы быдэ 10-11 миллион манетлы сиён вузаськом. Коллектив огсыр ужа. Тылобурдо утисьёслэсь уждунзэс одӥг но ӝыны поллы будэтӥм но шорлыдын 1700 манет басьто. Выт тыронъёсмы ӧвӧл, ваньзэ дыраз сётъяськом. Туэлы малпанъёсмы бадӟымесь. Выльдом куинь курег гидъёсмес, отчы туала ӟеч оборудование басьтом но пуктом. Солы 7-8 миллион манет висъялом. Туэ но йылэтом курег сюдӥсьёслэсь уждунзэс. Выль ар азьын ужасьёслы концерт возьматӥм. Кырӟаз Валентина Пудова. Куинетӥ дауре выжыса, 400 мурт ужасьёсме, Киясаысь но Пичи Пургалась бырйисьёсме газетты пыр лулысь-сюлмысь ӟечкыласько Выль арен но мылкыд карисько ваньмызлы тазалык но бадӟым шудбур. Геннадий Абросимов, Сарапулысь "Радиотехника" огазеяськонлэн валтӥсь тӧроез: - Ортчемез ар трос умойзэ сётӥз. Ваньбур поттонмес 34 процентлы йылэтӥм. Быдэстӥм пайда басьтонъя планмес. Дыраз тыриськом уждун но выт. Туэ йылпумъялом 138 квартираем улон юрт лэсьтонмес. 102-ез квартира вуттэмын ни. Со сяна, чакласьком 8 выль вузъёс (одӥг фазаен электросчётчиклы воштос ёзъёс но калыклы вузъёс) поттыны но 100 выль ужан интыос усьтыны. Нош ачим татын 40 ар ужасько ни. Вал слесарь, технолог но 1965-тӥ арысен директор луисько. Соин ик предприятиысьтым 100 ужасьёсме но округысьтым бырйисьёсме выль даурен ӟечкыласа, мылкыд карисько ваньдылы капчи мылкыд, шудо улон но тазалык. Николай Сорокин, Глазовысь вина пӧзьтӥсь заводлэн директорез: - Кылем ар ми понна юбилейной вал, ЛВЗ пусйиз кылдэмез дырысен 100 ар тырмемзэ. Сӥё-дано ужрадъёс ортчытӥм миым май толэзе. Та празднике быдэс республика пыриськиз, шуыны луоз. Адямиослы вунонтэм кылиз Геннадий Заволокинлэн концертэз. Со пусйымон вал Глазов но Удмуртия понна. Ужъёсмы сярысь ке верано, 2000-тӥ арез умой йылпумъям, вамышъёссэ будэтэ спирт пӧзьтон заводмы. Со милемлы юрттэ коньдонэз шыръяны (кулэсмизы транспортлы расходъёс). Коллективе вис карытэк сюлмаське калыклы вылӥ ӟечлыкен юон пӧзьтон сярысь. Сое асьсэос басьяськисьёс дунъяло. Ужасьёсме но бырйисьёсме выль даурен ӟечкыласа, ваньмызлы сӥзисько азьланезлы юн оскон но шудо-буро улон. Вераськиз Г.РОМАНОВ. Мӧзмыт уз луы Выль арлэн нырысетӥ толэзез но туж узыр тунсыко ужрадъёсын. 12-тӥ-13-тӥ январе Удмурт кун филармонилэн юртаз аслэсьтыз кылзӥсьёссэ люкалоз Удмурт Элькунысь калык артистка Валентина Пудова. 13-тӥ январе ик Андан ӵыжатӥсьёслэн культура дворецазы ортчоз Удмурт Элькунысь калык артисткалы Леонора Мамонтовалы сӥзем ӝыт. 23-тӥ январе Драмая удмурт кун театрын луоз шаерысьтымы туж тодмо крезьгурчиез, Ленин комсомол нимо премилэсь лауреатсэ Николай Шкляевез данъясь ӝыт. Удмурт театрез яратӥсьёс понна та нуналэ возьматэмын луоз шаерысьтымы тодмо драматурглэн Степан Широбоковлэн "Ой, чебер нылъёс" пьесаезъя спектакль. 25-тӥ январе Драмая удмурт кун театрын ик ортчоз Удмурт Элькунысь калык артисткалэн Валентина Меняйлолэн ӝытэз. Актриса мылысь-кыдысь шудоз шаерысьтымы егит драматурглэн Владимир Котковлэн "Пинал мылкыд-юмал йӧлпыд" пьесаезъя спектакльын. Е. Ромашова. Дас ар ини Туэ, 3-тӥ январе, дас ар тырмиз "Чагыр, чагыр дыдыке" радиоверанлы. Чакламын со покчи удмурт нылпиос понна. "Удмуртия" кун телерадиокомпанилэн "Ингур" радиоезлэн "Уй кизилиосыз" но алигес ӵапак вал та радиоверанэз дасясьёс. Журналистъёс Галина Баженова, Надежда Степанова кылзӥсьёслы веразы та радиоверанлэн ортчем сюресэз сярысь. Соосын ӵош асьсэлэсь малпанъёссэс ивортӥзы "Чагыр, чагыр дыдыклэн" нокинэн воштонтэм адямиосыз - Тэшкыли но Кузьгубей (Мунё театрысь артистъёс Алевтина Степанова но Александр Перевозчиков), Удмурт радиоысь режиссёр Леонид Гусев, мукет адямиос. Радиоверанлы дас ар тырмемлы сӥзем ӝыт ортчоз 3-тӥ феврале Мунё театрлэн юртаз. Е. Ромашова. Нош луоз пӧртмаськон Вашкала аръёсы та йылолэз калыкмы чидатэк возьмалляз. Малы ке шуоно, пӧртмаськон нуналъёсы соос быгатылӥзы асьсэды котькызьы возьматъяны: маскара вераськыса но, кырӟаса-эктыса но, куноосты утялтыса но... Пӧртмаськон нуналъёс нырысь ик ортчо вал сӥзьыл, луд ужъёс бырем бере. Соку коркась корка ветлылӥзы, чебер дӥсяськыса. Нош толалтэ, толшорлэн кутсконаз, вожо нуналъёсы - шуш дӥсяськыса. Ми городын та пӧртмаськонъёсты огазеямы. Куноостӥ ветлыкумы, пӧламы луо чебер дӥсяськемъёсыз но, шушань пӧрмытскемъёсыз но. Озьы ке но, вань калык ми шоры паймыса но шумпотыса учке. Туэ но шулдыр сяммес ум куштэ. Куатетӥ но сизьыметӥ толшор нуналъёсы коркась корка кырӟаса, эктыса, шудыса, маскаръяськыса ветломы. Н.ВОЗИСОВ. Шӧкыч Магазинъёс тырмемын кунгож сьӧрысь ваем сиён-юонэн. Дырын-дырын кылӥськод: сыӵе-сыӵе кунысь ваем сильысь сыӵе-сыӵе висён шедьтэмын. Нош асьмелэнъёсыз коткасьёсмы но бӧксӥсьёсмы мӧзмыт улонэ вуизы - соосты вордон пумен кулэсме угось. Курег: - Кунгож сьӧрысь визьмо дядяйёслы луыса, йыры пуртылэсь мозмытскиз ай. Суредэз И. Азимовлэн. Кивалтӥсен кенешон Мед луоз ӟеч вожъяськон Игорь Николаевич Семенов вордскемын 1951-тӥ арын 20-тӥ декабре. Гороскопезъя - Стрелец. Кизилиос верамъя, юн сямо, улонын шуг-секытэз чидась, вормись мурт. Дӥсьтыса басьтӥське котькыӵе уж борды. Туэ 28-тӥ ноябре Удмурт парламент И. Н. Семеновез бырйиз аслыз кивалтӥсе. - Игорь Николаевич, тӥ капчиен кадь пыриды парламентлэн ужаз. Асьтэлы кызьы потэ? - Палэнысен дунъяны умойгес, дыр, но ваньмыз озьы уггес пӧрмы на. Та ужын мон воштӥ Александр Александрович Волковез. Соин трос лэсьтэмын. Нырысь ик, дасямын ӟеч команда. Депутатъёс котькыӵе ужпумез валаса сэртто-пертчо, огъя кылэ вуыны капчи. Юрттэ Кун Кенешлэн депутатэз луэме, собере кык арлэсь ятыр кивалтӥ Можга городысь администрациен. Ваньмыз со уж вылын шӧдӥське. Зэмен но, парламентлы тӧрое пуктысалзы ке та удысэз воксё шӧмъямтэ муртэ - секыт йӧтысал. Мон трос дышетски Александр Александровичлэсь, кызьы сессиосты но нуыны, музон ужпумъёсты но чакланы. Конечно, ваньмыз малпамъя уг пӧрмы на, мон сое шӧдӥсько. Тыршисько кенешъёсты зӥбыт, лад-лад нуыны, пушкын куддыръя ӝуа ке но. Озьы ик кулэ, дыр. Пӧсекъясь юанлы пӧсекъяса ик вазид ке, номыр умоез уз пӧрмы. Кудзэ-огзэ верамъёсты "ньылыны" но быгатоно. - Кун Кенеш азьын сылӥсь ужпумъёс трос. Кудӥз соос пӧлысь, тӥ сямен, ӝегатскытэк сэрттэмез-пертчемез кулэ каре? - Нырысь ик, законъёсмес кулэезъя инъян. Данакез кулэ каро выльдэмез- тупатъямез, ӝыныез дугдытэмын прокурорлэн куронэзъя. Соосты туэ арын нырысетӥ сессиын ик учкыны кулэ. Интыосы гожтэтъёс ыстэмын. Отысь али вуо ни кыӵе ужпумъёсты нырысь ик эскерон ласянь веранъёс но дэмланъёс. Умоен пусйысал депутатъёслэсь бюджетэз кутон но юнматон бордын ужамзэс. Со кык толэзь кыстӥськиз. Нырысетӥзэ лыдӟем бере 200 пала воштон но ватсан пыртэмын вал, ӵектон вуиз бюджетлэн инъетэзъя Законэз воксё но кутонтэм сярысь. Тау депутатъёслы, соослэн валанлыксылы, чиданлыксылы. Огъя кылэ вуонъя комиссия кык нуналзэ уйшорозь пукиз - но пумаз-йылаз вуттӥз Законлэсь инъетсэ, отчы эшшо 16 тупатон пыртыса. Озьы вордскиз 2001-тӥ арлы бюджет. Республикамылэсь валтӥсь документсэ кутыны быгатӥм Выль ар азьын. Со - ӟеч тодмет но азьланезлы оскон, нырысь ик, калыкмы понна. Улон-вылонмы туэ ӧжытаклы ке но капчияны кулэ. - Тӥ вордскемын арлэн пумаз, ЪЪ даурлэн шораз, выль даурлэн кутсконаз кивалтӥськоды Удмурт парламентэн... - Ваньмыз озьы тупаз. Удмурт Республикалэн азьланяз кызьы радъяськоз экономикаез, потоз Президент, Кун Кенеш, Правительство бордысь. Со понна милемлы кыл кутоно луоз. Оскисько, куспамы ог-огмес валаса, ог-огмылы юрттыса ужалом шуыса, политика удысын но ваче пумит мынонъёс медаз луэ. Калык тае шӧдоз ни матысь дыре. Ӧжытгес "сиён" шедёз вожвылъяськонъёсын бугыръяськись журналистъёслы но: сыӵе учыръёс кулэсмозы. Ужалом одӥг кыткетын, бугырес вакытмылэсь бервылъёссэ радъян бордын. - Астрологъёс верамъя, котькуд адямилэсь улон сюрессэ, пе, кизилиос югдыто. Тӥ таин соглаш-а? - Та верамез трос пол кылылӥ ни, сюлмыным уг оскиськы. Котькудӥз адями, мон сямен, улон сюрессэ ачиз лёге. Но улонын, зэмен но, олокыӵе но учыръёс пумиськыло. Куддыръя оскытэк но оскод. Воршудэя мон - Стрелец. Кун Кенеше Тӧрое быръён азязы семьяе юри гороскопме чаклаз. Отын ноябрьлэн ӵапак 27-29 числоосаз мыным туж ӟеч нуналъёс сӥземын вал, уката но 28-тӥ число пусъемын умой ласянь. Кызьы тодӥськоды, самой та нуналэ, Кун Кенешлэн 13-тӥ сессияз депутатъёс мыным асьсэлэсь оскемзэс веразы. Та уже выжыны дэмлан вазьгес сётэмын вал. Мон кема малпаськи, котыр ласянь ас быгатонлыкме чаклай. Собере гинэ соглаш луэмме верай. Мынам сямы сыӵе: вань веранъёсты кылзо, но решение ачим куто. Мурт йырын улыны дышемын ӧвӧл. - Тӥ вордскемын но будэмын крестьян семьяын, гурт ужез пичиысен шӧмъямын. Кызьы учкиськоды музъемез вузан-басьтон шоры? - Россиысь Кун Дума ужа Музъем сярысь кодексэз кутон бордын. Вераськонъёс пӧртэмесь. Депутатъёс пӧлын ӧжыт ӧвӧл гыроно-кизёно муосты но вузан понна уж нуисьёсыз. Мыным сыӵе политика уг кельшы. Музъемез вузлы пӧрмытыны уг яра. Солэн кузёез мед луоз одӥг - государство. - Кыӵеен адӟемды потэ удмурт калыкмес? - Дышетскемен, йӧно, йыг-йыг ужась сямо, ас кылыныз вераськись. Мон шумпотыса туннэ кылзӥсько городысь ульчаосын, тарнспортын удмурт кыллэсь чузъяськемзэ. Ог 10-15 ар талэсь азьло ик югдур пӧртэмгес вал на. Соку тросэз асьме пӧлысь кепыраса поттылӥз анай кылзэ. Али городысь школаосын но усьтэмын нимысьтыз классъёс, удмурт кылъя но литературая нуисько урокъёс но факультативъёс. Азьланяз та уж эшшо золгес мед радъяськоз. Со шӧдскымон инты басьтоз национальной кадръёсты будэтонын. - Таӵе веран но вань: удмурт адями, пе, бадӟым кивалтӥсь луэ ке, ас выжызэ вунэтэ. Шонер-а со? - Мон мукет сяменгес шуысал. Вань асьмелэн одӥг урод висёнмы, солэн нимыз - вожъяськон. Кин ке ӧжытак вылӥегес тубыны шедьтэ ке, сое гинэ ук, вань ӵыжы- выжызэ йырйыны кутско. Учке ай бигеръёсты. Соослэн но куспазы олома но луылэ, вылды, пумиськыло тупамтэ дыръёссы но. Нош кыӵе ке уж борды кутсконо ке - ваньзы ӵош, борддор кадь ог-огзы понна султо. Тодам лыктэ одӥг учыр. Финляндие конгрессэ ветлыкумы, Кузьма Иванович Куликов мыным юан сётӥз: тодӥськод-а, Игорь Николаевич, удмурт адямилэн кыӵе самой ческыт сиёнэз? Мон ас поннам малпасько: перепеч, табань... Верамме витьытэк, ачиз ик юанэзлы валэктон сётӥз: удмуртлэн самой ческыт сиёнэз - удмурт. Азьланяз та сяммылэсь кызьы ке но мед куштӥськомы вылэм. Одӥг кылысь, куспамы тупаса улӥм но ужам ке, удмурт калыклэн, удмурт кивалтӥсьлэн данэз шӧдскымон вылӥе ӝутскоз. Со пайдаен берытскоз быдэс шаермы понна. - Игорь Николаевич, вераськонмы вадьсаськиз выль арлэн, выль вакытлэн кутсконэныз. Соин валче ма сӥзьысалды "Удмурт дуннеез" лыдӟисьёслы, элькунамы улӥсьёслы? - Нырысь ик - юн тазалык. Котькуд семьяе шуд мед каръяськоз, вань чебересь малпанъёсты мед быдэсмозы, вань кырсез мед кылёз ортчем аре. Мон чакламъя, 2000-тӥ ар республикамы понна оскон сётӥз, та улонын ваньмыз урод ӧвӧл шуыса. Бырйим нырысетӥ президентмес, пусйим кунлыкмылы 80 ар тырмон нуналзэ. Политика туж ӧз воштӥськы. Со ик луонлык сётэ азинскыны но экономикамылэсь радлыксэ юнматыны. Гурт удыс но пыд вылаз султӥз, музъем ужасьлэн улон-вылонэз ӧжытаклы капчиялоз. Но со понна ӟечгес тыршоно. Промышленность продукция поттонзэ арлы быдэ будэтыны кулэ 10-15 процентлы. Пусъеме потэ: Удмуртиысь данакез предприятиос пыд вылазы султӥзы ни. Соос Россиын но, дуннеысь мукет странаосын вузаны ярамон вуз потто. Оскисько, элькунысьтымы калыкмы визьмыныз, шуг-секытъёсты вормыны быгатэменыз, усто ужаменыз ас данзэ эшшо но вылэгес ӝутоз. - Игорь Николаевич, тӥледлы но газетмылэн нимыныз сӥзиськом ваньзэ умойзэ гинэ. Малпанъёсты мед быдэсмозы! - Тау. Вераськиз Людмила Медведева. Удмурт Республикаысь Кун Кенеше быръёнъя 2 номеро Чеховской но 54 номеро Левобережной округъёсъя ватсаса депутатъёс быръён сярысь Удмурт Республикаысь Быръёнъя комиссилэн постановлениез Удмурт Республикаысь Кун Кенешлэн депутатъёсыз А. А. Волков (Глазов городысь быръёнъя 54 номеро Левобережной округ) но Н. А. Харина (Иж городысь Индустриальной ёросысь быръёнъя 2 номеро Чеховской округ) ужзэс дырызлэсь вазь быдэсъямысь дугдэмен, Удмурт Республикалэн "Удмурт Республикаысь Кун Кенеше депутатъёсты быръён сярысь" Законэзлэн 26-тӥ ёзэтысьтыз "0" подпунктысь 1-тӥ люкетсэ, 84-тӥ ёзэтысь 1-тӥ люкетсэ лыдэ басьтыса, Удмурт Республикаысь Быръёнъя комиссия пуктэ: 1. Удмурт Республикаысь Кун Кенеше быръёнъя 2 номеро Чеховской но 54 номеро Левобережной округъёсъя ватсаса депутатъёсты быръёнэз ортчытоно 2001-тӥ арын 18- тӥ мартэ. Удмурт Республикаысь Кун Кенеше 2 номеро Чеховской но 54 номеро Левобережной округъёсъя ватсаса депутатъёс быръёнъя комиссиослэсь полномочиоссэс быдэсъялозы Ижысь но Глазовысь быръёнъя комиссиос. Удмурт Республикаысь Быръёнъя комиссилэн тӧроез Д. Н. Талантов. Удмурт Республикаысь Быръёнъя комиссилэн секретарез Н. А. Глухова. Ижевск город, 2000-тӥ арын 27-тӥ декабре. � 55. 6 Усьтэмын выль маршрут Выль ар азьын Ижысь администрация бадӟым кузьым дасяз Строительёслэн городоказы улӥсьёслы. Татын усьтэмын троллейбусъёслы 14-тӥ маршрут. 13-тӥ маршрутлы кивалтӥсьёс пумит луизы, шудтэм лыдпус, пе, городмылы кулэ ӧвӧл. Иське, шутэтскон нуналъёс бере Строительёслэн городокысьтызы предприятиосын тыршисьёс уж дуразы капчиенгес вуозы. Уго берло дыре татысь транспортэ пуксьыны шуг вал. Э.КУМАЧЁВА. Нина Андреевна ОБРАЗЦОВА, Алнаш ёросысь депутатъёслэн кенешсылэн тӧроез: Котькыӵе ке но, 2000-тӥ ар мышкамы кылиз ни. Трос гинэ вал отын секытэз, пумиськылӥз умоез но. Мон чакламъя, тужгес но юн зӥбиськиз музъем бордын ужась, гуртын улӥсь калык. Со адске уждун вылын. Кудӥз воксё уксё уг басьты, кудӥз - улыны- вылыны вормонтэм ӧжыт. Маин возиське шуоды? Мар вордэ, мар будэтэ - со чотын. Арня нуналэ вазь ӵукна ик гуртоос базар пала кыстӥсько, кин ыжзэ, кин ветылзэ яке ошпизэ нуэ бадӟым осконэн. Вузаны быгатӥсез - шудо. Но тросэз ӝыт пал нош ик вузэнызы берто. Озьыен, семьязы эшшо арнязэ-кыксэ уксётэк пукоз. Со гинэ ке луысал. Сюлэмез позыртэ газлы, тыллы будӥсь дунъёс. Таизэ кызьы, маин тыроно? Чагыр эстӥськонлэн вуэмезлы гуртоос туж шумпотӥзы вал, нош туннэ амалтэк малпаськод: оло, пуэн дунтэмгес луысал? Вуись аре потӥсько одӥг куронэн: мед капчиялоз крестьян калыклэн улонэз, ужамезъя уждун мед адӟоз. Ма шугъяськытэ? Музъемез вузан-басьтон ужпум. Отчы ваньмыз мерско, нош ужасез шӧдылытэк но кылёз, солэсь уз но юалэ. Малы-о промышленникъёс та югдурез сэрттонэ- пертчонэ сокем зол лякисько? Неужто колхозник заводлэн ужаз пыриськоз, валэктонъёс сётоз? Мон валамъя, школаын кузё - дышетӥсь, больницаын - врач, нош музъемлэн кузёез - крестьян калык. Солэн аслаз визьмыз, кужымез, быгатонлыкез тырмоз сюдӥсь-вордӥсьсэ утялтыны. Дышетскем адямиосмы гуртын али трос, егит кивалтӥсьёсмы ужаны пӧрмыто. Выль арлэн, выль даурлэн кутсконаз вазиськеме потэ вань удмурт калыкмылы: юн сылэ атай музъемды вылын, эн оске пӧяськись политикъёслы! Куд-ог дыръя асьмеос туж чаляк вылӥысь косэмъёсты быдэстоно кожаськом, собере гинэ валаськом юмоке шедеммес. Вуись вакытэн ӟечкыласа сӥземе потэ тазалык, чиданлык. Удмуртъёс котьку но огазеяськыса, бӧлякен-бӧлякен улӥзы, азьланяз но вашкала сяммес утьыны мед быгатом. Шӧкыч Серем пырыос Шугектон Арганчи Миклайлэн яратоно кырӟанэз вань: "Мон уг кӧл, дыр, ӵукна ӟардытозь". Зэмзэ но усто кырӟан. Только вот алмашиз со, Выль ар уе ӧз удалты. Уногес шампанской ӟымыръям, шӧдске. Эшъёсызлэсь бере кылемез ӧз поты, луоз. Нош та юонэз Миклай уг чида - кӧтыз кизерме. Озьы ке но, мылкыдзэ шукыясь каремез потӥз. Калык вож кыз котыр берга, шулдыръяське, нош Миклай сёросын чызйиське. пумен яратоно гурзэ нёжъя: "Та уе но уз лу кӧлэме..." Мар шуод, шумпотонэн артэ вамышъя на вылэм шугектон. Батон но басьтӥ Пуклёез котькӧня писэн кока, куараез уз воштӥськы: суйдэ гинэ ранӟытод. Озьы ик, лэся, Митырка Опочен но. Кылыд пульдымон тышкаськид ке но сое, сё аслэсьтыз кароз: кионлэн нюлэскы учкемез музэн. Тынылем бераз анаез кайгырыса чабкиськиз: - Э, пие, сизьымез вылэ вуытэк, кышно вошъямысь уд дугды, дыр. Ньылетӥеныз малы кӧжыды ӧз пӧзьы? - Ӝыны ар улытозям, аслаз уксёеныз куинь сукыри нянь гинэ басьтӥз, - нёръя Митырка Опоч. - Эн алдаськы, - вогъяське ньылетӥ кышноез. - Эшшо кык батон басьтӥ на. Мын но вераськы туала егитъёсын. Тӧдьыез ке кырсёме, сьӧдэз но гужоме ук. Кый ӧз юртты Выль ар уе, куное мынон азязы, Айбат Маня картсэ ыль ӟазег кӧйын сюдӥз. Уд, пе, кудӟы. Соиз мырдэм но кызьы нагыль-нагыль кӧез ньылӥз ик. Нырысь-валысь кудоосызлэн ӝӧк сьӧразы йӧн-йӧн пукиз, со ӵектэм сюмыкъёслэсь ӧз палэнскы. Оскиз, дыр, кышноезлэн визь-кенешезлы: уг погра, пӧй. Нош ӝӧк сьӧрысь потыкуз, дэмӟыса сямен ӟус улэ вуиз. "Кадалӥ, лэся, - малпаз понназ. - Ӟазег кӧй но ӧз юртты бере, туклячилэн мылкыдыз урод вал, дыр. Со дыре ик Айбат Маня куалькак ымзэ усьтӥз: - Валлэн пыдыз ньыль ке но, канжаське, нош адямилэн кык гинэ ук. Соиз но озьы, сиён-юон дыръя ог-огдэ валам дуно. В. Агбаев. КИЧӦЛТОН "Пукон корка" пукыны уг ветло Ох, вожъяськымон ик улонз. Пичи Пурга ёросысь Улын Юри гуртын улӥсь песянай- песятайёслэн. Пенсия но калыклэсь пӧртэм уг басьто (ай тросэз кема но секыт ужамзы вылэ обиде уськытэмын), висёнъёс но палэнтӥзы уг ортчо, мукет но шуг-секытъёс, куректонъёс пельпумъёсазы зӥбисько, озьы ке но, соос шудоесь. Аслам синъёсыным адӟи арлыдоослэсь шумпотонзэс, кырӟась мылкыдзэс. Ма, мон гинэ ӧй. "Пукон коркаенызы" тодматскыны юриос юри ӧтчазы "Удмурт дуннеын" ужасьёсты. Соос но мыным пӧяны уз сётэ. Тани Владимир Беломорскихлэн фотоаппаратэзлэн синмыз но кырмыштэмезлы быдэ синйылтылӥз пачылась мылкыдъёсты. Нош Юлия Александрова бертон сюрес выламы но весь тодаз вайылӥз мыло-кыдо песянайёсты-песятайёсты. Юри палъёсын та пумиськонэз радъяны юрттӥз Нина Шутова, Пичи Пургаысь одӥгаз вузкаронтӥын ужась. Тросгес калык мед, пе, тодоз ас палъёсызлэн ӟеч ужъёссы сярысь. Гурт калыксэ данъяны сюлмаськемез понна туж тау солы. Бадӟым тау шуиськом пумиськонэ вань ветлэмъёслы но. Юриос милемды дуно куноосты сямен сылалэн-нянен, кырӟанъёсын пумитазы. Но ми туннэ со понна гинэ ӟеч кылъёсмес ум вераське. Тужгес но пусйымонэз но адӟем карымонэз - "Пукон корка" гуртысь арлыдоослы юрттэ та секыт улонмес капчиятыны. Со сярысь ми табере газет лыдӟисьёсмылы но вераны быгатӥськом. Мар бен, ужъёсынызы тодматыны кыл сётом асьсэлы юриослы, кин сослэсь ӟечгес тодэ "Пукон корка" сярысь. Пётр Гусев, Улын Юри администрацилэн кивалтӥсез: - Районамы кылдытӥзы калыклы улон-вылонын юрттэт сётонъя центр. Малпаськом, малы со Пургалан гинэ ужаны кулэ, ойдолэ гуртын но лэсьтомы со вылем центр. Вераськимы калыкен, соос умоен лыдъязы та малпанэз. Озьы куинь ар талэсь азьло гуртамы усьтӥськиз "Пукон корка". Инты но солы сюриз. Куке но отын общежитие порма вал, городысь юрттӥськыны ветлӥсьёсты отчы интыяллязы. Пургалась центрын ужасьёс но та кичӧлтонмес умоен лыдъязы. Радъялэ, пе, ваньзэ, ставка но со понна шедьтом. Но коньдон ласянь соослэн секыт вылэм. Собере, та ужен вырисьлы кӧня ке уждун висъязы но, ӝыныез пенсиез солэн усиз. Озьы Христинья Михайловна "Пукон коркаен" кивалтэ ас мылкыдызъя, нокӧня но коньдон басьтытэк. Нош малпаськыны та пумысен кулэ вылэм центрын ужасьёслы, адями туж кулэ ужен выре угось. Государство ласянь юрттэт шӧдӥськысал ке, адямиос котькуд гуртын тазьы ик огазеяськыны быгатысалзы. Нош милесьтым адӟем карисьёс вань ни, "Пукон коркалэн" ужъёсыныз тодматскыны мукет гуртъёсысь но ветло. Нош макем бадӟым шумпотон вае со гуртоосмылы. Мӧйыослэн туж потэ ог-огенызы пумиськылэмзы. Кинлэн ке, оло, семья куспазы кыл но уг тупа, куд-огез огназы пуко доръёсазы. Огазе люкаськыса пересьёс верало азьло сюрессэс, али улэмзэс. Улыны мылкыдзы нош ик ӝутске. Мӧйыослы трос-а бен кулэ. Шуныт кыл мед луоз, кӧня ке юрттэт. Туэ тани профилакториямы дунтэк эмъязы. Умой, куке та ужын вань кин вылэ пыкъяськыны. Сыӵеос пӧлы пыртыны луоз Лидия Петровна Александроваез - ветеранъёслэн кенешсылэсь кивалтӥсьсэ, Яков Парамонович Петровез - гурт тӧроез, Христинья Михайловна Петроваез. Соослэн но мукетъёсызлэн ӟырдыт мылкыдынызы мӧйыослэн "Пукон корказы" ӝужа. Яков Петров, гурт тӧро: - "Пукон корка" котыраз огазеяз гуртысьтымы ӟырдыт мылкыдъем арлыдо калыкез. Котьку вазиськы соослы, коть уин сайкаты, нокыӵе ужлэсь но уз палэнтӥське. Быгатэмзыя колхозлы но, гурт калыклы но юртто. Гуртамы парк усьтэмын, отын но мӧйыос утялтӥсько, шайвылэз но соос тупатъяны юрттӥзы. Шутэтсконын но, ужанын но пенсионеръёслэсь адӟем карыны кулэ. Кызьы соос пинал дыръязы дышемын ужаны, али но сыӵеесь ик - егитъёсын со ласянь секытгес огъя кыл шедьтыны. Соос ик концертэн но ветло. Кызьы бен уз пот юрттэм сыӵе адямиослы? Гуртамы 810 ке улӥсез, 110-эз пенсионеръёс, 22-ез соос пӧлысь инвалидъёс. Куатезлы анайёслы герой ним сётэмын, ньылез вань на соос пӧлысь. Ужын азинсконъёссы понна гуртысьтымы вить мурт орденэн пусъемын, соос но куинез гинэ кылизы на. Тросэзлэн пенсионеръёслэн пӧртэм данъян грамотаоссы вань. Секытэз адӟемын ке но, мылкыдзы соослэн капчи. Котькытчы мын, таослэсь мон нокытын уг возьдаськы. Асьсэос но туж быгатыса пумитало лыктэм калыкез, Ижевскысь-а, Пургаысь-а соос медло. Гурт калыкез но уг вунэто. Адямиосты вордӥськем нуналэнызы ӟечкыласьком радио пыр. Кырӟаны усточи песянайёсмы ӵукна ик вуо ни крезьгуро ӟечкыланэнызы. Кызьы уд дунъя сыӵе мылкыдзэс Елена Афанасьевалэсь, Александра Сачковалэсь, Зоя Васильевалэсь, Лидия Александровалэсь. Галина Ермакова, библиотекарь: - Таӵе корка усьтэмзылы ми, егитъёс, туж шумпотӥськом. Пушкыз солэн нырысь-валысь буш вал. Котькуд кортӵогзэ, бумагазэ, шпалерзэ, ӝӧксэ но асьсэос тупатӥзы. Пересьёслэн котьмалы мылкыдзы вань, котьку юа - вералозы, валэктозы. Соос ке ӧй луысалзы, азьлозэ но вунэтысалмы ни. Нош кыӵе кылъёс пересьёс шедьто, дышетскемзы ке но пичи. Самородокъёс мон шуысал соосты. Валентина Никонова, клубен кивалтӥсь: - Клубын ужасьёслэн нимынызы тау шуэм потэ мӧйыослы, та коркалы. Секыт ужаны луысал соостэк, тодыны кулэ угось вашкала сямъёсты, йылолъёсты. Мӧйыос котькытчы пырисько. Сӥзьыл трос ужрадъёс ортчытӥмы: сӥзьыл бал, гурт кенеш, Удмурт Республикалы 80 ар тырмонлы радъямы частушкаослы праздник. Христинья Михайловналэн планъёсаз пӧртэм ужрадъёс чакламын, милемды но бордазы ӧтё. Кемалась малпаськом ни Киясово районысь Уддяди гуртэ потаны, Зоя Алексеевна Мазитовалэн ужъёсыныз тодматскыны. Транспорт ласянь шуггес. Елена Афанасьева (Лелёк апай), пенсионер: - "Пукон коркатэк", ог-огенымы адӟиськытэк улэммы но уг луы ни - мӧзмоно. Милемлы трос юрттэ гурт тӧромы Яков Парамонович. Нош Христинья Михайловнамы муш мумы кадь: лыктыны но лыктытоз, эктыны но эктытоз, кырӟаны но кырӟатоз. Солэн капчи мылкыдыныз татчы лыктӥськом. Пичи дыр но, егит дыр но секыт вал, пенсие потыса ке но шулдыръяськом ни шуиськом. Вераны кулэ, Лелёк апай пенсие потыса ини кылбуръёс гожъяны кутскиз. Гожъя вордӥськем гуртэз, ортчем даур сярысь. Котькыӵе ортчись ужрадлы нош ик чебер кылъёс шедьтэ, ёрос газетэ но гожтэ ужъёссы сярысь. Игнатьева Ольга (Патӥ апай), пенсионер: - Дышетскеме ӧвӧл, отӥ но татӥ ужаса ветлонъям дауре ортчиз. Улӥсько ни, азьвыл адӟемъёсме, курадӟемъёсме малпаса. Пиналъёслэн али котьмар вань, нош ми куттэм пыд ветлӥм. Сизьым арлэсь кема трактористын ужай, нош вань со курадӟемъёсы понна пенсия туж ӧжыт сёто. Нылпи но ӧвӧл, утялтыны, чакланы нокинлы. Ярам ай, "Пукон коркае" вань калыкез ӧтё, мон но потӥсько. Коркан улыны мӧзмыт, шудэм-серектэм ке но адӟисько. Адямиосын, эшъёсын пумиськиськод, вераськиськод но, кӧтын каньыл луэ. Михаил Спиридонов, шаерчи: - Тямыстон ньыль арес луоз ни мыным, котьмае адӟыса вуттӥ. Улон секыт вал. Гуртъёс сярысь, ужасьёс сярысь статьяос гожъясько. Ёросмы сярысь книга поттыны малпаськом, одӥг томез дасямын ни. Арлыдъёс ке но вань, ужам потэ. Дышетскись пиналъёс но мон доры весь юалляськыны ветло. Христинья Петрова, "Пукон коркалэн" кивалтӥсез: - Школаын кема ужаме бере ӵектӥзы пересьёсын ужаны. Я шуыны соку ик ӧй дӥсьты, гуртам бертыса юаллясько, пӧй. Тани табере куинетӥ арзэ ужасько ни. Ӧраз пыри кадь, нокытчы мукет азе ӧй кошкысал ни. Пересьёс но мон борды дышизы. Аслым но соос нэнэе, дядяе кадь ик пото. Ӵошен кӧня ужрадъёс ортчытӥм ни. Милемыз табере тодо Киясаын, Уваын, Татарстанын но. Республикаын но ужаммес синйылтӥзы ни, дипломен но данъян грамотаен пусйизы, 400 манет премия сётӥзы на. Лыктыкумы та коркан номыр ӧй вал. Тусьты-пуньы, чай юон ӵашаос, самовар пересьёс дорысьтызы ваизы. Кыӵе ке пумиськон ортче ке, пӧраськемъёсын лыкто. Паймисько та юри пересьёслэн мылкыдзылы, одӥг семья кадь улӥськом. Милемын одӥг юртэ интыяськемын библиотека. Лыдӟиськеммы потэ - лыдӟиськиськом. Чай ке юоно - улӥ этажаз магизинмы вань. Почта но, ветеринарлэн кабинетэз но та юртэ ик интыяськемын. Нош сылэ та юрт Юрилэн шорсюлмаз. Правление но, сельсовет но туж сюлмаськизы "Пукон коркамес" усьтыны. Нокызьы но со медаз ворсаськы вал. Дорамы лыктӥсьёсты сӥё-дано кутӥськом, асме но озьы ик пыртӥзы пӧлазы. Соку "Пукон коркаен" кивалтэ вал Любовь Михайловна Иванова. Мон ужатозь, вить муртэ пыртӥм, нош кулӥз ни со куспын дас вить мурт. Пӧлысьтымы кошкемъёсмес ум вунэтӥське, синпельлы кельтэм арбериоссэс но син азямы возиськом. Ужмес радъяны юрттэмзы понна туж бадӟым тау карем потэ библиотекаын, клубын ужасьёслы. Марлы ке ёрмиськом ке, сельсоветэ вазиськиськом. Мар но ӧм карысалмы, кытчы но ӧй мынысалмы, вылды, уксё ӧвӧл. Транспотлы но туж ёрмоно. Ираида Тимофеева, удмурт кылъя но литературая дышетӥсь: - Та корка милемыз но туж кыске. Пересьёс школалы но туж юртто. Планъёсамы котьку пыртылӥськом соосын пумиськонэз. Вожъяськыса учкисько "Пукон корка" шоры. Ми но таӵе арлыдэ вуим ке, мед луозы таӵе пумиськонъёс. Али ик сюлэмшугъяськисько ни со сярысь. Калыкен ужам вылысь пенсие потыса туж мӧзмыт луоз. Пиналъёсын али секытгес луиз ужаны, мылпотэмзыя уло соос, мултэссэ уз лэсьтэ. Но песянай-песятайёсын соос шумпотыса пумисько, ярато кылзыны улэм-вылэмзы сярысь. Тау тӥледлы быгатонлыкъёсты понна. Ӟырдыт сюлэмъёсты мед кылёзы пинал калыклы но. Та веранъёс борды ми но итӥськиськом. Малпасько, Улын Юриысь "Пукон коркалы" шудо сюрес сӥзёзы лыдӟисьёс но. Кин ке, оло, вожъяськоз пересьёслэн тазьы улэмзылы. Кинлэн ке аслаз но мылкыдыз ӝутскоз та выллем огазеяськон кылдытыны. Нош кинлэн ке верамез потоз асьсэлэн но синмаськымон ужъёссы сярысь. Л.МАЛЫХ. Туспуктэмъёсыз В.Беломорскихлэн. Президентлы Выль арен ӟечкыланъёс Удмурт Республикалэн Президентэзлы Александр Волковлы Выль арен трос ӟечкыланъёс вуизы. Шуныт кылъёс гожтэм Россилэн Президентэз Владимир Путин. "Россия выль дауре выже аслаз кужымезлы но азьланезлы оскыса, - шуэмын ӟечкыланын. - Выль ар мед ваёз бадӟым азинсконъёс, ваньзэ умойзэ гинэ. Тазалык но шуд Тӥледлы, Тӥляд ӵыжы-выжыостылы но матысь адямиостылы!" Озьы ик ӟечкылан ыстӥллям Россия Федерациысь Правительстволэн Тӧроез М.Касьянов, вице-премьеръёс В.Христенко, И.Клебанов, В.Матвиенко, Россия Федерацилэн Президентэзлэн администрациеныз кивалтӥсьлэн воштӥсьёсыз А.Абрамов но Д.Козак, федеральной министерствоослэн но ведомствоослэн кивалтӥсьёссы, Россия Федерациысь Федерация Советлэн но Кун Думалэн комитетъёссылэн тӧрооссы, Кун Думалэн депутатъёсыз, Татарстан Республикалэн Президентэз М.Шаймиев, Мордовия Республикалэн Тӧроез Н.Меркушкин, Россия Федерацилэн улосъёсысьтыз администрациослэн тӧрооссы, Удмурт Республикаысь городъёслэн но ёросъёслэн интыын аскивалтонъя ёзъёссылэн тӧрооссы, предприятиослэн но организациослэн кивалтӥсьёссы, ужась коллективъёс но нимаз адямиос. Удмурт Республикаысь Кун Кенешлэн пресс-службаез. Дано депутатлэн дано ужъёсыз Воткаысь быръёнъя 43 номеро Пугачев округысь бырйисьёс Удмурт Кун Кенешысь асьсэлэн депутатсылы Валентин Иванович Кудиновлы 58 куронэнынызы вазиськизы вал. 2001-тӥ арозь быдэстэмын 31-ез. Тани соос пӧлысь кӧняез ке. Городысь 12 номеро но Первомай шор ёзо школаосысь отличникъёслы 100 манет стипендия тыриське. Нылпиосты ӟечгес дышетон вылысь, кыкетӥяз школае басьтэмын компьютер, фотоаппарат но вуриськон машина. Первомай посёлокысь нылпи садлы 100 квадратной метр линолеум басьтэмын. Нефтяникъёслэн микрорайонысьтызы телефон станция выльдэмын. Али йылпумъяське ватсаса 200 номер пуктон, озьы станциын табере ужалоз 1000 номер. Азьланьтӥське Свято-Георгиевской черкез лэсьтон. НГДУ-лэн одӥгаз вуж цехаз, сое тупатъям бере, му вӧй поттӥсьёслы пичи профилакторий усьтэмын. Эмъяськем сяна, ужасьёс отын быгатозы тренажёръёсын сӥльвирзэс юнматыны но шутэтскыны. Ӧсъёссэ выльысь усьтӥз нылпиослы спортъя комплекс, отчы ветлӥсь пиналъёслы басьтэмын спортинвентарь но дӥськут. 128 пенсионерлы но сӧсырлы эстӥськон пу басьтыны но вайыны коньдонэн юрттэмын. Пугачев, Партизан, Лесной, Комсомольской но Григорьевской урамъёсын улӥсьёслэн асьсэ коркаосазы газ пыртэмын. Депутатсылэн ӟеч ужъёсызлы Вотка калык бадӟым тау каремзэ вера. П. Николаев. Тодмо нимъёс но нуналъёс (январь) 4. 65 арес тырме механикая Чепца заводысь рабочий-новаторлы, СССР-лэн Кун премиезлэн лауреатэзлы Юрий Иванович Фоминыхлы (1936). - 65 арес тырме инженер-механиклы, технической наукаосъя докторлы, Ижевскысь кун технической университетысь профессорлы, РФ-ысь технической наукаосъя академилэн действительной членэзлы, Россиысь но Удмуртиысь наукая дано ужасьлы Олег Иванович Шавринлы (1936). Вордскемын со Завьял ёросысь Сентег гуртын. 5. 80 ар талэсь азьло (1921) Вотской автономной областьлы административной центр каремын вал Глазов город. 1921-тӥ арын 10-тӥ июньысен областьлэн центрез луиз Ижевск. - 80 ар талэсь азьло (1921) РСФСР-ысь ВЦИК тупатӥз Вотской автономной областьлэсь границаоссэ. 10. 35 ар талэсь азьло (1966) йылпумъяськиз Минибаево (Татарстан) - Ижевск газопроводэз лэсьтон. - 80 ар тырме Советской Союзлэн Героезлэн Василий Михайлович Михайловлэн (1921-1944) вордскемез дырысен. Войналэсь азьло со ужаз Воткинскысь машиностроительной заводын. Военной лётчик Сталинградысен Югославиозь ож сюресэз ортчиз, со кык сю пол ӝутылӥз самолётсэ омыре. Быриз 1944-тӥ арын. 12. 90 ар тырме куинь Слава орденъёслэн кавалерзылы Петр Иванович Плетневлы (1911-1956). Вордскемын со али Селта ёросысь Мокроусово гуртын. - 10 ар талэсь азьло (1991) потӥз "Известия Удмуртской Республики" газетлэн нырысетӥ номерез. 15. 65 арес тырме венгер литературоведлы, удмурт но мукет финн-угор литератураосты эскерись-дышетӥсьлы Петер Домокошлы (1936). 16. 85 ар тырме удмурт кылбурчилэн, журналистлэн Прокопий Макарович Чайниковлэн (1916-1954) вордскемез дырысен. Вордскемын со али Вавож ёросысь Удмурт Куашкам гуртын. 17. 105 ар тырме РСФСР-ысь но УАССР-ысь дано врачлэн, тазалыкез утёнысь отличниклэн, тодмо хирурглэн Владимир Федорович Фирекельлэн (1896-1968) вордскемез дырысен. Вордскемын со Вавож черкогуртын. 20. 60 ар талэсь азьло (1941) кутскизы Удмурт кун хорлэн Свердловск областьын концертъёсыз. Мынӥзы соос 21-тӥ февралёзь. 21. 105 ар талэсь азьло (1896) Иж заводын усьтӥськиз калык библиотека- лыдӟиськонни. - 40 ар талэсь азьло (1961) Удмурт музыкально-драматической театрын нырысьсэ возьматэмын вал композиторлэн Г. А. Корепановлэн "Наталь" нырысетӥ удмурт операез. - 35 ар талэсь азьло (1966) кылдытэмын Удмурт АССР-ысь историяя но культурая памятникъёсты утёнъя общество. - 55 арес тырме В. Г. Короленко нимо ӟуч драматической театрысь актёрлы, режиссёрлы, Удмурт Республикаысь искусствоосъя дано ужасьлы Владимир Иванович Сафоновлы (1946). 22. 85 ар тырме Удмурт драматической театрысь актрисалэн, Удмурт АССР-ысь дано артисткалэн Анна Григорьевна Колесниковалэн (1916-1947) вордскемез дырысен. Вордскемын со али Алнаш ёросысь Ромашкино гуртын. 23. 75 арес тырме инженер-механиклы, технической наукаосъя кандидатлы, профессорлы, Удмурт Республикаысь наукая дано ужасьлы, 1965-тӥ-1972-тӥ аръёсы Ижевскысь механической институтлэн проректорезлы, 1972-тӥ-1986-тӥ аръёсы Удмурт кун университетлэн ректорезлы Борис Николаевич Шульгалы (1926). 25. 90 арес тырме Социалистической Ужысь Геройлы, Ижевскысь механической, Воткинскысь, Ижевскысь машиностроительной заводъёслэн азьвыл директорзылы Петр Александрович Сысоевлы (1911). - 55 арес тырме Удмурт Республикаысь Национальной театрысь актрисалы, Удмурт Республикаысь калык артисткалы Валентина Ивановна Меняйлолы (1946). Вордскемын Глазов ёросысь Порпи гуртын. 27. 65 арес тырме Удмурт АССР-ысь калык художниклы Семен Николаевич Виноградовлы (1936). Вордскемын Алнаш ёросысь Шайтангуртын. - 55 арес тырме Удмуртиысь кун но общественной ужасьлы, Удмурт Республикаысь калыкез дышетон удысысь дано ужасьлы Антонина Михайловна Лисиналы (1946). Вордскемын Кизнер ёросысь Макан-Пельга гуртын. - 45 ар талэсь азьло (1956) быдтэмын Бемыж ёрос. Кылдытэмын вал со 1935-тӥ арын. Солэн бадӟым люкетэз пыриз Кизнер ёросэ, кылемез - Грах ёросэ. 28. 105 ар талэсь азьло (1896) Сюмси черкогуртын усьтэмын вал дунтэк лыдзӥськонни. - 65 арес тырме партийной но кун ужасьлы, Удмуртиысь культура удысысь дано ужасьлы Зинаида Яковлевна Боткиналы. Вордскемын Игра ёросысь Шербет гуртын. З. Я. Боткина ужаз УАССР-ысь Министръёслэн Советсылэн Председателезлэн воштӥсез луыса, кивалтӥз Удмурт Республикаысь историияя но культурая памятникъёсты утёнъя всероссийской обществолэн Удмурт люкетэныз. Январе - 80 ар талэсь азьло (1921) Сарапулын ужаз удмурт егитъёслэн нырысетӥ Всероссийской конференцизы. Конференция умоен лыдъяз 1920-тӥ арын ноябре Вотской автономной область кылдытонэз, егитъёсты ӧтиз калык хозяйствоез но культураез ӝутонэ пыриськыны. - 80 ар талэсь азьло (1921) Сарапулын лэсьтэмын вал странаямы нырысетӥез "Комта" самолёт. Солы испытаниос отчытэмын вал 1921-тӥ арын ноябре Москваын. - 65 ар талэсь азьло (1936) кылдытэмын Удмурт кун хор но эктонъя ансамбль. 1968-тӥ арысен со луиз кырӟанъя но эктонъя "Италмас" кун ансамбль. 1997-тӥ арысен солы сётэмын академической статус. Январе-мае - 30 ар тырме (1971) "Иж-2125", "Иж-2715" автомобилистъёслы кун испытание ортчытэм дырысен. Та выль машинаос 30 сюрс километръем шуг сюресэз ортчизы. - 25 ар талэсь азьло (1976) СССР-ысь Связья министерство поттӥз П. И. Чайковскийлэн Воткинскысь музей-юртэзлэн тусыныз маркаен конверт. Композиторлэн вордскем городэзлы сӥзем куинетӥез почта издание луиз со. Дасяз Е. Ушакова, Удмурт Республикаысь ЦДНИ-лэн иворъёсъя но документъёсты печатланъя отделэзлэн кивалтӥсез. Спорт Мед удалтоз ни Кызьы ивортӥмы ни вал, ортчем арлэн пумаз Россиысь биатлонистъёс ӵошатскизы "Иж винтовка" приз понна. Огдыре ик соос нюръяськизы странамылэн 2000-тӥ ар понна чемпионэз луон понна но. Со сяна, та ӵошатсконъёс ик возьматыны кулэ вал: кин странамылэн сборной командаяз пыроз на но дуннелэн чемпионатаз пыриськоз. Пусйыны кулэ, кужмоосыз биатлонистъёсмы та нуналъёсы пыриськозы ни Дуннелэн Кубокез понна кӧня ке ӵошатсконъёсы. Нош феврале Словениын ортчоз дуннелэн чемпионатэз. Кин бен пыриськоз отчы? Кыӵе мылкыд кельтӥзы Ижевскын ӵошатсконъёс? Та пумысен вераны курим Россилэн сборной командаезлэсь валтӥсь тренерзэ А. А. Голевез. - Ижевскын ӵошатсконъёс котьку но дуннеын ортчоноосыз азьын быръён стартъёс нуылӥзы. Пӧртэмесь ӧй вал таосыз но. Россилэн быдэс сборной командаез татын вал. Ӵошатсконъёсы ӧз пыриське Павел Ростовцев но Виктор Майгуров гинэ. Соос ӧжыт висьыны ӧдъязы но, тренеръёслэн советсы стартъёслэсь мозмытӥз. Куд-ог юанъёс вал Сергей Рожов пумысен. Со 20 иськеме бызьылӥз, ассэ урод ӧз возьматы. Ижевскын ортчем ӵошатсконъёсын ми эшшо кыксэ спортсменъёсты чакламы на. Но сборной командаямы воштӥськонъёс ӧз луэ ни, шуыны луоз, ватсаса кутомы на Сергей Коноваловез гинэ. Со странамылэн чемпионэз луиз угось. Сергей нырысь Европалэн чемпионатаз пыриськоз, собере лыктоз Словение, дуннелэн чемпионатаз. Озьыен, командаямы пыроз тямыс мурт: Ростовцев, Рожков, Майгуров, Кобелев, Прокурин, Драчев, Кочкин ноКоновалов. Стартэ бен ньыльлэсь тросэз уз потэ. Кужымзыя ваньзы ик соос одӥг кадесьгес. Дуннелэн кубокез понна ӵошатсконъёслэн куинь этапъёссы бере чаклалом ни, кин кыӵе сюрес вылэ потоз дуннелэн чемпионатаз. - Александр Андреевич, нош ма верасалды удмурт пиосмы сярысь? - Кызьы верай ни Алексей Кобелев сборное пыртэмын. Нош Иван Черезов но Максим Максимов сярысь верано ке, соос кык арзэ дасяськизы ни егитъёслэн сборной командаязы, мыным ужаны кылдӥз ни соосын. Номыр уд шуы, кужмоесь пиос. Соосын артэ ик пуктысал Алексей Чуринэз. Таиз странамылэн чемпионатаз бронза медаль утӥз но спортъя международной классэн мастерлэсь куронъёссэ быдэстӥз. Та егит пиос Кобелевен ӵош юнме шорысь ӧз ворме ук эстафетаын но. Куиньназы соос вить кужмоосыз кӧлын вал 20 иськемъем сюрес вылын. - Нош кугес сюрозы меда соос странамылэн сборной командаяз? - Мон малпасько, матысь дыре, шуом, ар-кык ортчыса. Соосты ыштыны гинэ уг яра, син азьын возёно, одно ик юрттыны тыршоно соослы. Таяз аре трос гинэ бадӟымесь ӵошатсконъёс луозы, пыр-поч дасяськоно вуоно Олимпиадалы. Соин ик сборной командаямы тямыслэсь троссэ спортсменъёсмес ум кутӥське. Нош Олимпиада бере та лыдпусэз дас кыкозь вуттыны малпаськом. Озьы луонлык кылдоз егитъёсты но пыр- почгес чакланы. Нош будӥсь "кизилиос" вань. Тани Прокурин, Кочкин егитъёс пӧлысь алигес гинэ пиосъёс пӧлы выжизы ай. Нош асьсэды возьматӥзы ини, "Иж винтовка" приз понна ӵошатсконъёсын призъёс луизы. - Мар сӥзьысалды спортэз яратӥсьёслы, Удмурт шаерамы улӥсьёслы Выль аре? - Нырысь ик, юн тазалык. Эшъяське физкультураен но спортэн. Улонады тросгес мед луозы серекъян-шумпотон вакытъёс. Нош милям осконмы вань, "висисьёсмес" шумпотыны быгатом шуыса. Озьы кылдӥз ини, валтӥсь биатлонистъёсмы Выль арез пумитазы кунгож сьӧрын. Мар бен, мед удалтоз ни соослы, куасъёссы шаплы мед ширтозы, синъёссы лэчытэсь медло. Ф. Никитин. ЛЭЧЫТ УЖПУМ Бусыосын веттаське етӥн Ю-нянь, картофка, етӥн - соостэк шаермылэн улонэз ӧй вал. Тужгес но данъяллязы етӥнэз. Кӧня кырӟанъёс, веранъёс кылдӥзы соин валче. Шуылӥзы: кытын етӥн - отын миллион, буртчинэд ке вань, улонэд но бусьтыр. Етӥн тужгес но удалтылӥз уй пал районъёсын, соин ик, вылды, сое "уй пал буртчин" нимазы. Етӥнэз уже кутон понна Удмуртиын ужаны кутскизы заводъёс, пумен соос дасо пала луизы. Туннэ нуналлы етӥн шуккон заводъёс ужало Ярын, Юкаменскын, Балезиноын, Кезын, Зураын, Шарканын, Можгаын, Уваын, Нылгаын, Селтаын. Тросэз кузь сюресэз ортчизы ини, уноезлэн угось улон вакытсы 30-тӥ аръёсы кутскемын. Заводъёслэсь радъяськем ужзэс выльдӥськон зуркатӥз - тросэз хозяйствоос етӥн будэтонлэсь куштӥськизы. Технологиез чакланъя етӥн - секыт культура, минерал сылалъёстэк, пӧртэм гербицидъёстэк, техникатэк сое будэтыны уг луы. Начармем хозяйствоослы етӥн будэтонэн вырыны секыт луиз. Государство та ужлы дотациос висъялляз ке но, хозяйствоослы коньдон 1-2 ар ортчыса гинэ вуылӥз. Со куспын соеинфляция шуон сиылӥз. Тӥни озьы етӥн бусыослэн быремзы нырысь ик льнозаводъёсты шуккиз. Шуге-леке сюрем заводъёс пӧлын туннэ Балезиноысь етӥн шуккон завод но. Заводлэн историысьтыз. Ужаны кутскиз 1932-тӥ арын. 70-тӥ аръёсы басьтэм азинсконъёсыз понна солы "Вылӥ культураен завод" ним сётэмын. 1977-тӥ арын отын 126 адями тыршиз, 70-эз "Коммунистической ужысь ударник" нимъёсын пусъемын. Заводын ужазы буфет, медпункт, теплица, клуб. Коллектив данъяськылӥз емыш садэныз но улон коркаосыныз. Валтӥсь интые пуктэмын вал ужасьёс сярысь сюлмаськон. Мар бен табере? Ваньмыз, маин данъяськылӥз завод, туннэ ӧвӧл ни. Ӟеч улон сярысь тодэ вайыто туспуктэмъёсын альбомъёс гинэ. Заводэн кивалтон нылкышнолэн ненег пельпумъёсыз вылэ погыльтэмын. Кылем арын татчы директоре быръемын Валентина Александровна Шиляева. Кивалтӥсь луэмзэ со ачиз но валаса ӧз вутты. Нош со дырозь завод тямыс толэзь ужатэк сылӥз. Сое ужатон понна одно ик 2,5 сюрс тонна етӥн (сырьё) кулэ вал. Но малпамъя ӧз луы - одӥг сюрс тонна гинэ дасяны удалтӥз. Балезино районысь тросэзлы хозяйствоослы кылем арын кӧс гужем люкетӥз. Собере заводлы бадӟым изъян тылпу ваиз на. Балезиноысь льнозаводэ етӥн вортто та районысь хозяйствоос ик: "Мир" (татын со кылем арын тужгес но удалтэмын вал), "Авангард", "Рассвет", "Правда", "Сергинский", "Заря", "Свобода", Мичурин но Киров нимо хозяйствоос. Етӥнэн юрттэмзы понна льнозаводлэн директорез туннэ соослы тау каре. Но ӟеч кыл гинэ вераны уг луы - сырьё понна хозяйствоослы коньдонэн берыктоно. Нош кытысь сомында коньдон шедьтоно? Завод аслэсьтыз продукцизэ быгатыса вузаны кулэ на ук. Валамон ини: котькыӵе кивалтӥсь аслэсьтыз вуззэ дуногес вузаны турттэ. Сотэк мар пайдаез ужамедлэн. Но тумошо луыса кошке: Россиысь Правительство етӥнлы (сырьёлы) 1800 манет дун тупатӥз, Удмуртия - 2100 манет. Вылаз ик, Россилэсь рыноксэ ас продукциенызы ӵоксало ни Белоруссия но Западысь кунъёс. Соин ик етӥн мертчанлэн дуныз усе. Сыӵе ик югдур азьланяз но возиськиз ке, заводъёс ноку уз узырме, угось соос переработкаен уг выро, полуфабрикат нерге гинэ потто. Соин ик туж кулэ вылэм республикаямы одӥг коть сыӵекомбинат пуктыны. Балезиноысь льнозаводлэн директорез гинэ туннэ со сярысь уг малпаськы. Со вань льнозаводъёслэн сюлмаськонзы. Етӥн шуккон заводъёс чотын туннэ узырмо куиськисьёс (текстильщикъёс) гинэ. Соос ик дунъёс но тупато. Нош етӥн шуккон заводъёслэн кузёоссы курасько. Кураськытэк уг луы Валентина Александровналы но. Етӥн будэтӥсь хозяйствоослы коньдон берыктон вылысь, кредит курытэк ӧз луы. Висъязы. Удмурт Республикаысь Правительство "Етӥн" программа юнматӥз бере, юрттэт сётонлэсь ӧз палэнскы. Но куинь толэзь ортчыса, сётэм коньдонэз берыктоно луоз. Быгатоз-а со куспын завод ас югдурзэ тупатыны, директор меӵак вераны уг быгаты. - Ас шуг-секытъёсмес, оло, вормыны быгатысалмы, но туж люкето азьвыл аръёсы люкаськем пунэм тыронъёс, - шуэ Валентина Александровна. Нош соос миллион манетлэсь но трос ини. Та уже басьтӥськыкум кулэ вылэм, лэся, заводмес банкротэн яланы. Но мар на табере. Ярам, районлэн администрациез юрттыны выре, газъя, электрокужымъя люкаськем тыронъёсты ворсаны луонлыкъёс шедьтэ. Етӥнэн вырон технологиез Валентина Александровна кутсконысеныз пумозяз тодэ, коллектив но тодмо, ма, татын со 1983-тӥ арысен ужа ини, соин ик котькуд ужасьлэн улон-ужан сюресэз син азьын. Солы, егит директорлы, секытгес йӧтэ хозяйствоен, экономикаен герӟаськем ужъёсты вормыны. Заводлэн оборудованиез, техникаез 90 процентозь вужмемын ини. Сое ӵем тупатъяно луэ, нош выльдыны коньдон уг тырмы. Со сяна, ялан чакласа возёно котельноез, чылкытатӥсь сооружениосты. Сюлмаськоно поттэм продукциез келян-вузан сярысь. Пӧртэм предприятиосын кусыпъёс тупатытэк, заводлэсь ужамзэ син азе уд пукты. Соин ик Балезиноысь льнозавод мукет предприятиосын кусыпъёссэ вылӥ дунъя. Туннэ заводлэн продукциез кошке Перме, Челябинске, Сарапулэ. Умой ужан кусыпъёс кылдэмын Зураысь етӥн шуккон заводэн. Балезиноос туннэ ӵектыны быгато: дэралы мынӥсь мертчан, лэсьтӥськисьёслы - куж но ватин, вуриськон фабрикаослы - синтепон. Мертчанлэн кылем-мылемъёсызлэсь векчи но зӧк гозы пуно. Со сяна, татын ыж гон тугыны басьтӥськизы на. Шуг-секытъёс шоры учкытэк, коллектив ужаны тырше. Берло аръёсы солэн лыдыз кулэсмиз, али татын 90 мурт ужа. Пичи уждунзы шоры учкытэк но адямиос возисько. Ма, тросэз татчы 18 аресысен ик лыктэмын ук. Табере кошкыны но нокытчы, ортчем аръёс но думыса возё ни. Ужасьёслэн шоро-куспо арлыдзы 45 арес, егитъёс татчы ужаны уггес лыкто. Нош заводлы туннэ ик туж кулэ оператор, электрик, теплотехник. Зэмзэ но, мар возьма соосты татын? Не оскымон уждун, не квартира. Приватизация пичи завод понна туж умойтэмен берытскиз. Азьло аръёсы завод чотын ваньзы дунтэмен квартираос басьтӥзы. Собере соосты асьсэлы басьтӥзы - приватизировать каризы. Нош эшшо кӧня ке дыр ортчыса, квартираоссэс вузаны кутскизы. Нош кыӵе пайдаез солэсь заводлы? Нокыӵе. Ыштонъёс гинэ. Заводлы али капчи ӧвӧл ке но, татын басьтӥськиллям кык квартираем корка пуктыны. Сотэк уг луы, собере ужасьёслы но улыны кыӵе ке коть оскон пыӵатоно. Директор тодаз ваиз, школаын дышетскыкум, пе, тазьы кышкатылӥзы: "Урод ке дышетскид, льнозаводэ мынод". Но егитъёс кырсь уж шоры учкытэк мынылӥзы, угось льнозаводын квартираос висъяллязы. Тӥни сыӵе ужпумъёс пӧлы выемын республикаысьтымы одӥгез вашкалаез етӥн шуккон завод. Мукетъёсаз со выллем заводъёсын югдур сыӵегес ик. Ӟеч ужаменыз, оло, Зураысь льнозавод гинэ али висъяське, татын быгатӥллям Голландиен валче ужан кусыпъёс тупатыны. Нош балезиноос асьсэос ай етӥнлы кузё луыны туртто. Со понна ик заводзэс акциосын огазеяськонлы пӧрмытӥзы. Но пыд вылэ султон капчи уж ӧвӧл вылэм. Государстволэн юрттэмезтэк азьлань вамыштыны шуг луоз. Огез шумпоттэ: етӥн берытскиз бусыосы. Т.БАННИКОВА. Туспуктэмъёсыз В.Беломорскихлэн. Валентина Александровна Шиляева - Балезиноысь льнозаводлэн директорез. Кызь вить ар талэсь азьло солы верасалзы ке, та заводын ужаны кылдоз шуыса - ӧй оскысал. Но татчы огдырлы ужаны пыремез бере, кошкыны ӧз ни быгаты. Нырысь ялан паймылӥз: кызьы озьы чагыр сяськаё будослэсь мертчан пӧрме. Егит нылашез та ужлы дышетскыны Костромае ыстӥзы. Озьы огшоры лаборантысь технологозь, мастерозь, инженерозь но директорозь будӥз. Предприятиез ӝутон понна кивалтӥсьлы ялан выль ужан амалъёс утчано луэ. *** Усто етӥн будэтӥллям ас бусыосазы "Мир", "Авангард", "Рассвет" хозяйствоос. Мастер-контролёрлэн Галина Мурашовалэн мылкыдыз буйгамын. *** Заводлэн котельноез ӧжыт ке но пайда вае. Шунытэз вузатэк уг луы. Шунытлэн кузёез Надежда Журавлева но оператор Виль Боталов ужзэс оскымон быдэсъяло. ШӦКЫЧ Зарни чорыг Туала выжыкыл Пушкинлэсь зарни чорыг сярысь выжыкылзэ лыдӟемды вань, дыр. Мон но сое пичи дырысеным тодӥсько. Тодам ваисько, лыдӟеме бере пинал визьмыным жаляй вал: эх, мон песятай мед луо вылэм, ма но ӧй курысал соку чорыглэсь. Бен, аръёс ортчизы, йыры пужмераськиз. Кутӥ ук, кутӥ зарни комокез. Уд оскиське-а? Берло аръёсы гуртмы воксё пичи кылиз. Коркаез дас тямыс сяна ӧвӧл ни. Улӥсез нош - дас укмыс. Вочакез - пал кышноос. Ми гинэ Одотеным - пар нерге. Гужем гуртамы улон пӧзе ке пӧзе ни. Выллапал бусыез нефтаос сад-бакчалы басьтӥзы. Машинаосынызы шур-шар гинэ сопалась тапала ветло. Нош толалтэ шим-шим. Пуны утэмез гинэ но шер кылод, ява. Тани туэ но лымы трос усиз ни, выль арлы ик сюрес пытсаськиз. Бускель гуртысь магазин но дорамы ветлэмысь дугдӥз. Кышноосмы асьсэос нянь пыжыны кутскизы. Милемлы, пересьёслы, трос-а кулэ. Вот эмъюмтэк улыны ум быгатӥське. Кинлы ке маке кулэ луэ ке, монэ бускель гуртэ ысто, мын ай, пе, ветлы командировкае. Пересь дядяелэсь кылем паськыт куасъёсты кутчасько но - азьлань. Тани туннэ Миквор Анна пыраз: йыры, пе, висе, цитрамон коть кулэ, пе, вал. Ма карод, сюрес вылэ дасяськоно. Одоте пудо уте вал. Кылӥсько, тыпыр-тапыр гинэ тубатъёс кузя бызе. - Педор, ӧд кошкы на-а? - шуш куараен кеське. - Эн дырты, маке трактор куара кылӥське кадь. Корказе потыса, ӵошен кылзӥськиськом. Зэмзэ но, дырын-дырын мотор жургетэм чузъяське. Ӝыны час ортчиз, дыр, ульча кузя бульдозер лымыез донгыса кошкиз. Бӧрсязгес ик пичи автобус лыктэ вылэм. Ӵапак Миквор Анналэн коркаез вадьсы дугдӥз. Кӧня ке воргоронъёс потӥзы, Анна доры пыризы. - Сахалинын улӥсь пиез бертӥз, луоз, - шуиз Одоте. - Уть, машинаез но кыӵе. - Озьы, озьы, Сергеез уксё трос басьтэ шуэ вал, - соглаш луисько соин. Асьмеос нош ураме ялан учкиськом. Тани Анна потӥз, бызьыса сямен ми пала дыртэ. Ӧз пыры, укно улэ кариськыса кеськиз: - Одоть, Педор, дорам лыктэ. Депутатэ кандидат вуиз. Калыкен, пе, вераськеме потэ. Ӝогак дӥсяським, Анна доры вамыштӥм. Ивор гуртэ чаляк вӧлме, тани мукет кышноос но вуизы. Коркан люр-ляр шуэ ни. Колхоз тӧромы Корепанов, куаразэ будэтыса, веранзэ мытӥз: мон, пе, Веселовский кандидатлэн оскем муртэз, собере юлтошсэ ну ушъя ук, ушъя ук. Уть, фамилиез но кыӵе, Веселовский, усто ужбергатӥсь, пе... Собере ачиз Веселовский ачиз сярысь мадиз, программазэ усьтӥз. Веранзэ йылсаса куриз: вералэ, пе, мар кулэ, юрттыны тыршо. Ачим но валаса ӧй вутты, кызьы дӥсьтонэ тырмиз. Киосме посыса шуисько: Соломон Исаевич, толалтэ сюресмы быре, куас вылэ султоно луэ, нош мынам соос туж секытэсь, капчизэгес уд кузьмалэ-а. Кузьмало, шуэ. Ӧй оскы вал, сётэм кылзэ быдэстоз шуыса. Ӵуказеяз ӝыт колхоз тӧромы ӵыж-выль, мамык кадь капчи куас вуттӥз, пластиклэсь, пе, лэсьтэмын, ботинкаосыз кулэсь, чильк-вальк кисьтасько. - Ӵукна ик бускель гуртэ бызьыло, - шуисько Одотелы. Нош кузпалы йыркурзэ ватытэк согиз: - Шедьтӥськод ук ма курыны. Ачиз ветлӥсь дӧдьы кур вал, снегоход, шуисько. Телевизорысь адӟылэмед вань ук. Лымы вылтӥ тӧлери кадь ширтысал. Кышное шонер вера, малпай ас поннам. Учыр ӵуказеяз ик тупаз. Мукетыз кандидат, таяз радэ Шириновский фамилиен, гуртамы лыктӥз. Кури ведь лымы вылтӥ ширтӥсь дӧдьызэ. Ӵуказеяз оскем муртэз, колхозысьтымы валтӥсь зоотехник, ӵыж-выль снегоход вуттӥз. Одоте шумпотӥз ук! Табере, шуэ, асьмелэн но машинамы вань. Нош мынам сюлмы ӧзгес буйга. Ас поннам малпасько: ӵуказе эшшо одӥгез кандидат вуиз ке, мон солэсь эшшо но дуногес кузьым куро ай. Вазь ӵукнаысен ик машина куараез возьмаса пуки ни. Нуназе бере Миквор Анна вадьсы джип шуонзы дугдӥз. Ӧтемез витьытэк, ульчае потӥ. Колхозысь валтӥсь инженермы валэктӥз, депутатэ кандидат Кусинский, пе, дорады лыктӥз. Вераськемзэс-марзэс витьыса ӧй улы ни. Кусинскийлы киме мычи, ӟечбуръяським. Толалтэ, шуисько, сюресмы быре, гуртмылы бульдозер кузьманы ӧд быгатысалды-а, ачим ик ворттылысал, ньыльдон ар тракторен ужай ук. Быгато, шуэ кандидат. Ӵуказеяз ӝыт укно улам бульдозер сылэ ни вал. Одоте чабкиське гинэ на, таӵе шаплы луэмдэ витьтон ар ӵоже ӧй шӧдылы вал, пе. Аслым ачим но паймисько. Улон дышетэ улыны. Зарни чорыг кутон понна зарезь дуре но ветлоно вылымтэ. Вуоно толалтэ но чорыгалом ай, Одоте, мукет быръёнъёс матэкто ук. Ю.МИХАЙЛОВ. Кизилиос верало Ыж (Овен) 21.03-20.04. Улон кужымды дуртӥз пачыла. Но мылкыдды сыӵе ӧвӧл, со нуналаз олокӧня пол вошъяськылэ. Соин ик асьтэдыз кияды кутыны тырше. Малпаськытэк лэсьтэм ужды уродэн берытскыны быгатоз. Таяз арняе маке утыны, бадӟым вуз басьтыны, пунэмдэс берыктыны быгатоды. Тросгес дырдэс семьяяды Ош (Телец) 21.04-21.05. Тросгес дырдэс сӥзёды юртъер котырын ужъёслы. Шутэтскон нуналъёстэс улон интыдэс чеберъянлы яке магазинъёстӥ калтыртонлы висъялэ. Эн вунэтэ тазалыкты сярысь, мугордэс кыдатэ. Таяз арняе тужгес но бадӟым пайда сётоз кӧс утён. Солы моӵты ӧз тырмы ке, коть мултэссэ эн сиське. Эгызоос (Кыктоос, Близнецъёс) 22.05-21.06. Мылкыдды медаз юскиськы вал. Мултэс керӟегъяськон тӥледлы медаз люкеты. Таяз арняе лэчыт кылъёс, чурыт вераськонъёс сярысь вунэтэ. Угось соос керетонозь вуттыны быгатозы. Сазь малпаське, озьы ужады азинсконъёс басьтоды. Кисло-кусло (Рак) 22.06-23.07). Ужан удыстылы тросгес кужымдэс но визьдэс сётоно луоды. Эн малпалэ, со уногес дыр кулэ кароз шуыса. Тӥ киын ваньмыз: уждэс планъя радъялэ, утчаськон сярысь эн вунэтэ. Озьы улондэс чутрак воштыны быгатоды. Лев 24.07-23.08. Тӥ асьтэдыз котыр ласянь шудо адямиен лыдъяськоды. Кизилиос таӵе мылкыддэс уката юнмато на. Таяз арня тужгес но удалтоз ужбергатӥсьёслы азьвылгес чаклам ужпумъёссэс быдэсъянын. Нимазъяськон сярысь вунэтэ. Матысь адямиды юрттоз ужан нунал ӵоже жадемдэс няськатыны. Нылмурт (Дева) 24.08-23.09. Асьтэдыз кияды возьыны турттэ - вань ӵектонъёсты ӟечен лыдъяны эн тырше, вань тодмоостылэсь чаклаське. Таяз арняе коньдон ужпумдэс быдэстыны быгатоды. Пятницае выжон уе адӟем уйды вуоно арня вискын улонады пыӵалоз. Весъёс 24.09-23.10. Таяз арня вискын азьвыл мытэм ужъёстэс йылаз-пумаз вуттэ, азьланезлы ужпумъёс чаклалэ. Яратоно мурттэс вӧсь карыны эн дыртэ. Тазьы асьтэдыз но, матысь адямидэс но шуге-леке шедемлэсь утёды. Скорпион 24.10-22.11. Арняды огыр-бугыр ортчоз. Трос сюлмаськонъёсын пумиськоды. Ужантӥяды пыр-поч тыршоно луоды. Улонады выль тодматсконъёсын сэрен бадӟымесь воштӥськонъёс ортчыны быгатозы. Асьтэдыз асьтэос тодэмды-валамды потэ ке, шутэтскон нуналдэс огнады ортчытэ. Ыбылӥськись (Стрелец) 23.11-22.12. Сюлмо луэмды, улон шоры аспӧртэм учкемды семья улондэс тупатыны юрттоз. Нош ужантӥяды лул-кужымдэс шыръяны тырше - токма супыльтонъёслэн пайдазы ӧвӧл, мултэс дырды гинэ быроз. Таяз арняе мылкыдды ӵем вошъяськоз. Сюро кеч (Козерог) 22.12-20.01. Семья улонысьтыды ужпумъёсты ужан удысады но шӧдӥськозы. Юн мылкыдды юрттоз азьвыл чаклам ужпумъёстэс быдэстыны но вуонооссэ чакланы. Таяз арняе вордскем пинал туж быгатӥсь но шудо луоз. Ву кисьтась (Водолей) 21.01-19.02. Таяз арняе утчаськыса, ӝутскем мылкыдын ужамды тӥледлы азьпала шӧдскымон вамыш лэсьтыны юрттоз. Азьвыл чаклам малпанъёстэс одно ик улонэ пыӵатыны тырше, ӝегады ке, пумтэм ужпумъёсын пумиськоно луоды. Чорыгъёс 20.02-20.03. Семьяосты туж витё ни, шутэтскон нуналъёстэс тӥ соосын ортчытоды шуыса. Озьы ик каре. Егит муртъёс та арня вискын чылкак выль удыс борды басьтӥськыны быгатозы. Сюлмо ужамдэс кивалтӥсьёс синйылтытэк уз кельтэ. Ӟеч тыршемлэн емышез но ӟеч. Кивалтӥсьёс юнматэмын 2000-тӥ арын 30-тӥ декабре Удмурт Республикалэн Президентэз Александр Волков юнматӥз Удмурт Республикаысь Правительстволэсь членъёссэ. Удмурт Республикалэн Президентэзлэн указъёсыныз юнматэмын: Удмурт Республикаысь тазалыкез утёнъя министре - Сергей Геннадьевич Шадрин; Удмурт Республикаысь культурая министре - Людмила Ивановна Пескишева; Удмурт Республикаысь кунсьӧр кусыпъёсъя министре - Виктор Аркадьевич Викулов; Удмурт Республикаысь калыкез дышетонъя ммнистре - Любовь Григорьевна Захарова; Удмурт Республикаысь нациосын ужан политикая министре - Владимир Николаевич Завалин; Удмурт Республикаысь печатья но иворъёсъя министре - Сергей Флорович Васильев; Удмурт Республикаысь инкуазь узырлыкъёсъя но инкуазез утёнъя министре - Алесандр Владимирович Кулагин; Удмурт Республикаысь гурт удысъя но сиён-юонъя министре - Владимир Петрович Невоструев; Удмурт Республикаысь калыкез улон-вылонын утёнъя министре - Светлана Ивановна андреева; Удмурт Республикаысь лэсьтӥськонъя, архитектурая но улон-вылон политикая министре - Валерий Фёдорович Загайнов; Удмурт Республикаысь вузкаронъя но бытовой юрттэт сётонъя министре - Пётр Парфельевич Пономарёв; Удмурт Республикаысь экономикая министре - Валерий Николаевич Захваткин; Удмурт Республикаысь Граждан оборона ужпумъёсъя но шугадӟонъёслэсь утиськонъя кун комитетлы тӧрое - Тамази Георгиевич Габричидзе; Удмурт Республикаысь Егитъёсын ужан политикая кун комитетлы тӧрое - Андрей Иванович Гальцин; Удмурт Республикаысь Наукая, вылӥ но шор профессиослы дышетонъя кун комитетлы тӧрое - Виктор Евграфович Шудегов; Удмурт Республикаысь Ужбергатонъя кун комитетлы тӧрое - Михаил Петрович Зайцев; Удмурт Республикаысь Ужъя кун комитетлы тӧрое - Сергей Самонович Фефилов; Удмурт Республикаысь Физической культурая но спортъя кун комитетлы тӧрое - Гарий Ильич Кремер; Ветеринарияя валтӥсь управленилы кивалтӥсе - Удмурт Республикаысь министре - Геннадий Николаевич Бурдов. Удмурт Республикаысь Правительстволэн составаз пыртэмын: Владимир Филиппович Щербаков - Удмурт Республикаысь югдурез утёнъя министр; Вячеслав Иванович Куншин - Удмурт Республикаысь Музъем узырлыкъёсъя но му кутонэз радъянъя кун комитетлэн тӧроез. Та нуналэ ик Удмурт Республикалэн Президентэз юнматӥз Удмурт Республикалэсь "Республикалэн 2001-тӥ арлы бюджетэз сярысь" Законэз. Удмурт Республикаысь Правительстволэн пресс-службаез. "Венец". Адӟиды-а эктэммес? Инмар котькуд адямилы кыӵе ке но быгатонлык сётэ. Кинлы - вераськыны, кинлы - пӧраськыны, кинлы - техникаез валаны, нош кинлы - эктыны. Пинал дыръяз ик адями шӧдэ, мар солэн тужгес но пӧрме, соин ик яратоно удысаз кыстӥське. Шаркан ёросысь пичи Альцы нимо гуртысь Эдуард Князев туж яратэ вылэм эктыны. Дас классэ йылпумъяса, культпросветучилищеысь хореографияя люкетаз быгатонлыксэ волятэ. Армия бере эшшо эктонъя вылӥ образование басьтэ но "Италмас" ансамбльын ужаны кутске. Кык ар отын ужаса вуттэ. Быдэс странаын воштӥськонъёс луо. Э. Князевлэн кунгож сьӧры потаны луоно ансамбль кылдытыны малпанъёсыз вордӥсько. Озьы 1990-тӥ арын "Венец" нимо ансамбль ужаны кутске. Ар ортчыса, Москваын шулдыръяськон программаослэн нырысетӥ калык куспо ӵошатсконазы нырысетӥ инты басьто. Учкисьёс соослы тужгес синмасько. Венецъёс лауреат луыса берто. Со сяна, егит ансамбльлы ньыль страна доразы ужаны ӵектэ. Озьы эктӥсьёс кунгож сьӧрын - Румыниын, Турциын, Болгариын, Франциын - ужало, асьсэлэн репертуаразы трос пӧртэм калыкъёслэсь эктонъёссэс пырто. Али "Венец" ансамблез кунгож сьӧрын туж умой тодо ни. Нош Удмуртиын "Венец" алигес гинэ эктыны кутскиз ай. Со сяна, программазэс кӧня ке тупатӥзы но, солист басьтӥзы А. Ложкинэз. 2-тӥ декабре соос дас арессэс Национальной театрын пусйизы, Выль арлы сӥзем программае но пыриськизы. С. Петрова. САЛОН КРАСОТЫ С помощью небольших уловок можно достичь великолепного объема и изумительного блеска Пощадите свои волосы! 10 причин заболеваний Порой по своему незнанию даже парикмахер может нанести ущерб здоровью ваших волос. Старайтесь оградить себя от всего, что может повредить им. 1. Даже щадящая химическая завивка, если ее делать более трех раз в год, может нарушить структуру волос. Лучше время от времени делать завивку волос у корней, позволяющую увеличить их объем у основания. 2. Не проводите самостоятельно осветление более чем на три тона. В противном случае волосам может быть нанесен непоправимый урон. 3. Не используйте ежедневно лечебные препараты: волосы станут тяжелыми, потеряют объем. 4. Если вы пользуетесь феном, то сушите волосы от корней, фен держите на расстоянии не менее 15 см от волос. 5. Не следует слишком интенсивно вытирать мокрые волосы полотенцем либо сразу же их расчесывать. Мокрые волосы очень легко рвутся. 6. Как бы это ни было удобно, не надо все время использовать продукцию"2 в 1". Это негативно сказывается на состоянии волос: они лишаются упругости. 7. Не злоупотребляйте лаком: сплошная пленка затрудняет доступ воздуха к волосам, и состояние их может значительно ухудшиться. 8. Химическая завивка и окрашивание одновременно � слишком большая нагрузка на волосы. 9. Резинки, используемые в хозяйстве, не применяйте для волос. Для них существуют специальные матерчатые резинки. 10. Если не срезать секущиеся концы, то состояние волос будет ухудшаться. Куртка из толстых шерстяных ниток. Вязанье - столбики без накида. Крючок � 4. Спинку, рукава и капюшон вяжите нитками основного цвета. Для полочек и отворота капюшона используйте нитки отделочного цвета. При вывязывании полочек выполните разрез вертикального кармана. Для этого, довязав до начала разреза, вяжите отдельно каждую часть полочки на высоту разреза, затем соедините обе части и довязывайте по выкройке. Отделочные клапаны для карманов вяжите по высоте разреза столбиками без накида более тонкими нитками. Свяжите два точно таких же клапана и пришейте на кокетку. Манжеты рукавов вяжите спицами � 3,5 резинкой 1һ. Связав детали, сшейте сначала спинку и перед. Края полочек обвяжите по лицевой стороне столбиками без накида более тонкими нитками. Вшейте "молнию", затем рукава, пришейте капюшон. ДОМАШНИЕ ЗАБОТЫ Мебель и правильный уход за ней Чтобы мебель служила долго, за ней следует регулярно ухаживать. При этом надо помнить, что для нее (одинаково вредны и повышенная сухость, и чрезмерная влажность. Сокращают ее век пыль, близкое расположение к батарее и даже прямые солнечные лучи. Полированную и лакированную мебель ежедневно протирают мягкой тряпкой, используя препараты для ее обновления. Вместо специальных препаратов можно использовать кипяченный стакан пива с кусочком воска. Едва теплую массу нанести на мебель, дать ей высохнуть, а затем натереть шерстяной тканью. Чтобы мебель блестела, хорошо смешайте полчашки оливкового масла и столько же винного уксуса. Этой смесью протрите поверхность мебели (только не красное дерево!). Затем, не слишком усердствуя, как следует поработайте сухой мягкой тряпкой. Можно почистить мебель тряпочкой, смоченной в молоке, вытерев затем насухо шерстяной или бархатной тканью. Красное дерево освежают, протирая влажной, хорошо отжатой тряпкой, а потом льняной тканью вытирают насухо. Либо протирают тряпкой, смоченной репейным маслом. Неполированная мебель очищается от пыли сухой мягкой тряпкой, а раз в неделю пылесосом с мягкой насадкой. Время от времени ее можно протирать влажным тампоном, а при сильном загрязнении помыть мыльной водой и насухо вытереть. Матовую мебель можно очистить скипидаром по направлению древесных волокон. Не пользуйтесь для данного вида мебели полирующими средствами. Они оставляют на поверхности жирные пятна, которые потом трудно удалить. Ореховое дерево протирают смесью оливкового масла и красного несладкого вина (в равных частях). После того как состав немного подсохнет, мебель полируют куском фланели. Мягкая мебель нуждается в уходе не меньше, чем любая другая. Обивку следует чистить пылесосом или щеткой. Пылесосить надо полосами в одном направлении, извлекая пыль из самых глубоких щелей. Щетку при этом необходимо обернуть двойным слоем марли, смоченной соленой водой (1 ч. ложка на 1 л воды). При ежедневной уборке протирайте очищенную от пыли обивку влажной шерстяной тряпочкой (на 1 л воды 1 ч. ложка моющего средства). Потом вытрите ее сухой тканью. Плюшевую или бархатную обивку нельзя пылесосить, чистить щеткой. Необходимо протирать ткань по ворсу мягкой тканью, смоченной в теплой воде. Металлические детали мебели, потем- невшие и потускневшие, можно очистить высокоэффективными пастообразными средствами или домашними препаратами: смесь из нашатырного спирта (30 г), мела или зубного порошка (15 г) и воды (50 г). Фланелевой тряпочкой протрите фурнитуру, а суконной натрите очищенный металл до блеска. Такой же эффект дают питьевая сода, лимонный сок, разрезанная пополам луковица. Кухонную мебель, покрытую эмалью и отделанную пластмассой, моют раствором любого стирального порошка (1 ст. ложка на 1 л воды). Применение соды, мыла и чрезмерно горячей воды (выше 500) приводит к потускнению окрашенной мебели. ПОЛЕЗНЫЕ СОВЕТЫ Многие интересные суккуленты � гастерии, сансевиерии, эхеверии и другие � можно разводить листьями и даже частями листьев. После тщательного подсушивания срезов такие черенки плотно сажают в крупнозернистый песок, который увлажняют умеренно. Обычно через месяц образуются корни, а затем при основании листьев � молодые растеньица. Их аккуратно отделяют и сажают по одному в маленькие горшочки с землей, а старый лист (если он не слишком сморщился) возвращают в песок. Пройдет время, и около листа опять появятся новые детки. Комнатное цветоводство У одних цикламен погибает сразу же после того, как его приносят в комнату: загнивают листо- вые черешки. У других плохо цветет: листья сочные, сильные, а цветков мало. Жалуются и на то, что цветение начинается преждевременно, цветки слабые и быстро отцветают. Все это, конечно, происходит от неправильного ухода. Цикламен � растение не столько нежное, сколько своеобразное. Он относится к числу тех немногих растений, которые цветут зимой, в "глухое" время года, когда почти все другие цветы находятся в состоянии покоя. Цветение цикламена продолжительно � с октября по март. Растение это ценно еще и тем, что очень долговечно: при правильном уходе оно живет в комнате до 30 лет. Лучшее время для приобретения цикламена � октябрь. У хороших, здоровых растений сильные, сочные листья расположены низко, крепко держатся на клубне. Не надо стремиться выбрать цветущий экземпляр, лучше взять тот, у которого больше бутонов. На одном растении бывает до 30 и более непрерывно распускающихся цветков. Для дальнейшего развития растения имеет значение и глубина посадки клубня: он должен находиться в земле только до половины. Во время цветения цикламен требует прохладного места и много света, но температура воздуха ниже 10 градусов тепла уже нежелательна. Поливать в это время нужно регулярно, но чтобы вода не попадала на клубень и листья. Как раз загнивание цветочных и листовых черешков и происходит от неправильной поливки и высокой температуры помещения. После того как цветы отцветут, их осторожно удаляют до самого клубня. Желтые листья срезают у основания вместе с черешками. К весне у цикламена начинают подсыхать листья. Это естественное явление: растение переходит в стадию покоя. В это время надо уменьшить поливку, но совсем прекращать нельзя � достаточно поливать раз в неделю. В начале лета горшок с клубнем ставят в затененное место, желательно на свежий воздух. Земля должна быть умеренно влажной. Когда начнут появляться маленькие листочки, цикламен надо пересадить. Старую землю заменяют полностью. Свежую почву приготавливают из смеси перегноя, листовой и дерновой земли с добавлением песка (1:1:1:0,5). При пересадке загнившие корни надо удалить. Для цикламена нужен небольшой горшок (13-14 см) с хорошим дренажем. Но если горшок слишком мал, наблюдается преждевременное и чрезвычайно слабое и кратковременное цветение. После (пересадки растению необходимо светлое, но не солнечное место и слабая поливка. При правильном уходе на цикламене начнут появляться новые листья. Размножают цикламен делением клубня и семенами, но посев семян в комнатах затруднителен, так как молодые растения требуют специального ухода. Гнили моркови в период хранения Главную опасность для моркови во время зимнего хранения представляют гнили корнеплодов. В этой статье мы расскажем о наиболее опасных из них и мерах борьбы с этими болезнями. Фомоз, или сухая гниль, проявляется главным образом в виде двух форм � сухой гнили корнеплодов, развивающейся при хранении, и засыхания семенных кустов в поле. На семенниках образуются вначале темные полосы и пятна с лиловым оттенком, часто на них выделяется клейкая масса, в дальнейшем пораженные участки высыхают, становятся серыми. Если рядом с семенниками находятся растения моркови первого года, то возможно и их заражение. Чаще всего это бывает во второй половине лета и даже осенью, в конце вегетации, когда фомоз интенсивно развивается на семенных кустах. На черешках и жилках моркови первого года пятна удлиненные, серовато-коричневые, пострадавшие ткани становятся хрупкими. В ряде случаев инфекция, попадая на головку корнеплода, вызывает загнивание верхней части корнеплода. Но в поле она проявляется слабо и редко. Гниль начинает активно развиваться при хранении: на поверхности корнеплода образуются серые, слегка вдавленные пятна, ткань под ними сухая, часто трухлявая, коричневая (в отличие от черной гнили). При быстром развитии гнили в трухлявой ткани могут появляться пустоты, выстланные слабым белым налетом грибницы возбудителя. Больные корнеплоды при высадке или совсем не дают растений (если была поражена верхушка корнеплода), или дают больные кусты, от которых в дальнейшем может произойти массовое заражение семенников и растений первого года вегетации. Таким образом, основной источник фомоза для растений второго года � высаженные больные корнеплоды. Кроме того, возбудитель заболевания может сохраняться на растительных остатках, на которых остается жизнеспособным до двух-трех лет. Для растений первого года источником инфекции могут быть как семенники, так и растительные остатки. Возможно также распространение инфекции и семенами. Черная гниль, или альтернариоз, на моркови первого года развивается незначительно, обычно во второй половине вегетации. На нижних листьях появляются бурые пятна, покрытые слабо заметным черно-зеленоватым налетом, состоящим из спороношения гриба. Пятна разрастаются и часто занимают всю поверхность, листа. Такие листья буреют и отмирают, а гриб по черешку попадает в верхушку корнеплода и вызывает в дальнейшем его загнивание. На корнеплодах заболевание проявляется в виде сухой гнили, которая внешне сходна с фомозом: пятна также сероватые, слегка вдавленные, сухие. Во время хранения они усугубляются. Главным отличительным признаком черной гнили от фомоза на корнеплодах служит цвет больной ткани: на срезе она угольно-черная (у фомоза коричневая), резко ограниченная от здоровой ткани. При высадке зараженных маточников семенники засыхают или, если остаются, дают низкий урожай и зараженные семена. Белая гниль вызывает размягчение мякоти корнеплода, но при этом она не изменяет своей окраски. Поверхность моркови покрывается белой ватообразной грибницей, с помощью которой возбудитель болезни переносится при прямом контакте на соседние корнеплоды, поэтому в хранилищах белая гниль развивается обычно очагами. Со временем на грибнице образуются крупные (до 1-3 см) черные склероции. В этой форме инфекция накапливается в поле и хранилище. Летом, в период активного роста, корнеплоды заболевают редко. Если заражение и происходит, то гниль развивается медленно. После уборки, когда корнеплоды находятся в периоде покоя, гриб быстро распространяется в тканях. Подвяленная, переохлажденная, несвоевременно убранная (недозревшая или перезревшая) и выращенная на одностороннем или избыточном азотном удобрении морковь поражается белой гнилью особенно сильно. При высадке больных корнеплодов в поле они, как правило, сгнивают, а если кусты из них и развиваются, то быстро выпадают, иногда в самом начале вегетации. В борьбе с корневыми гнилями важное место занимает агротехника. Корнеплоды, выращенные при повышенных дозах азота, поражаются сильнее, чем при использовании комплекса минеральных удобрений с преобладанием фосфорных и калийных. Для посева следует отбирать семена от здоровых растений. Хорошие результаты дает термическая дезинфекция семенного материала при температуре 52-53 оС в течение 15-20 мин. При чередовании культур в севообороте следует учитывать, что альтернариозом кроме моркови могут поражаться петрушка, сельдерей, пастернак. Необходимо уничтожать пораженные растительные остатки, соблюдать оптимальные сроки посева и уборки, тщательно отбирать корнеплоды при закладке на хранение, подготовить хранилища к загрузке корнеплодов; очистить, побелить, продезинфицировать с помощью сегры-дымка (гранулы, состоящие из серы и селитры, применяются из расчета 25-30 г на 1 м2) или серных брикетов (таблетки, состоящие из серы, калиевой селитры и диатомита, 25-35 г на 1 м2). Очаги гнили надо удалять и засыпать выбранные места смесью песка с известью- пушонкой или мелом. Оптимальный режим хранения для моркови: температура 1-2 оС, влажность воздуха 80� 85 %. Вопрос-ответ У нас на клубнике, листьях моркови и других культур появляется как бы пена � в виде слюны, мокрая, пенистая, если трогаешь �растирается. Что это? Весна у нас в этом году была влажная, но мы и в прошлом году отмечали такую же "пену", хотя лето было сухое. Опасно ли это? Причина вашего беспокойства � слюнявка-пенница. Эта довольно распространенная цикадка получила свое название в связи с тем, что ее личинки живут погруженными в выделенную ими пенистую слюноподобную жидкость. Она предохраняет их от высыхания и других неблагоприятных факторов. Взрослые насекомые пестрой окраски � от светло-желтых до черных тонов. На надкрыльях хорошо видны по два продольных косых белых пятна. Длина взрослой цикадки 10 см, она способна летать и прыгать. На зиму насекомые откладывают желто-оранжевые яйца в листовые черешки и молодые стебли земляники и других травянистых растений. Весной отрождаются личинки. Вначале они белые, затем становятся зеленовато-желтыми. Они сосредоточиваются на нижней стороне листьев, в основании цветковых кистей или в разветвлении листовых черешков, иногда на завязях. Личинки цикадок высасывают сок и вызывают морщинистость листьев, уродливость и недоразвитость завязей. Особенно сильно пенница размножается в годы с сырым и теплым летом. Избавиться от этого вредителя вам поможет правильный уход за растениями, исключающий загущенное размещение (разреживание, своевременное удаление сорняков). В случае массового появления цикадки целесообразно до начала цветения или же после сбора урожая применить карбофос (75 г 10 %-ного препарата на 10 л воды), раствор зеленого мыла (200 г на 10 л воды). Эффективно также опыливание зараженных личинками растений известью-пушонкой. Пиво и наше здоровье Врачи уже давно подтвердили пользу пива для человека. Родоначальники многих современных сортов и марок пива, средневековые монахи, широко использовали этот напиток в лечебных целях. В ХВ-ХВИ веках в Европе были распространены розовое, полынное, шалфейное, розмариновое, медовое и тому подобные сорта пива, обладающие целебным эффектом. Сегодня, взяв пример с виноделов, пивные компании активно продвигают образ здорового потребления пенного напитка. Сравнительно недавно на международном симпозиуме пивных производителей в Брюсселе были обнародованы результаты исследования, которые подтверждают, что умеренное употребление пива во многом сходно по своему благотворному влиянию на организм с умеренным потреблением вин. Пиво улучшает общее состояние организма, а также уменьшает риск сердечнососудистых заболеваний, так как снижает уровень холестерина в крови. Благодаря действию некоторых витаминов и микроэлементов пиво успокаивает нервную систему и укрепляет кости. Кроме прочих полезных эффектов, пиво, более чем на 90% состоящее из воды, утоляет жажду и позволяет восполнять потерю жидкости в организме. При этом пиво выгодно отличается от безалкогольных газированных напитков тем, что не содержит многочисленных искусственных добавок: консервантов, подсластителей и красителей, а также жиров и сахара, вызывающих кариес. Что касается полноты, которой часто отличаются любители пива, то все большее число медиков считает причиной ее появления не пиво, а общее действие алкоголя, стиму- лирующего аппетит. Дробление солода и несоложенного зерна Приготовление затора Фильтрование затора Кипячение сусла с хмелем Отделение сусла от хмелевой дробыны Осветление, охлаждение и аэрирование сусла Сбраживание пивного сусла Дображивание и созревание пива Фильтрование Розлив пива в бутыли и бочки Готовое пиво Производство семян огурцов, устойчивых к низким температурам Получению ранней продукции теплолюбивых овощных культур препятствуют понижения температуры до заморозков. Сорта устойчивые к низким температурам созданы, но нет условий для их размножения. Особенно элиты-основы семеноводства. Известно, что отсутствие непрерывного из поколения в поколение отбора ведёт к потере хозяйственно-полезных признаков, в том числе и устойчивости. Отбор на холодостойкость начинается по скорости прорастания семян через 12-14 часов при температуре выше 20 �С до 100%. В процессе прорастания различают последующие фазы: физическая - семена поглощают воду и набухают; биохимическая - превращение нерастворимых запасных веществ в растворимые; морфологическая - начало роста зародыша. На прорастание семян влияют факторы: вода, температура, состав воздуха. Вода обуславливает процессы прорастания, семена впитывают её с огромной силой. Вода, обуславливающая процесс прорастания, может иметь различную температуру, разное время нахождения в ней, погружение в воду или нахождение во влажной среде. Температура - второе необходимое, при которой начинается прорастание. Это одна из важнейших видовых особенностей растений - величина минимальной температуры прорастания их семян, а так же количество тепла, необходимое в течении всего периода от начала прорастания до полных всходов. Огурец - одна из наиболее теплолюбивых овощных культур. Наиболее благоприятные температуры для прорастания семян 25-35 �С и требуется очень много тепла (сумма температур более 300 �С) и могут прорастать выше 12 �С. Длительные воздействия температуры 8-10 �С может привести к гибели растений. При 3-4 �С заморозков растения огурца не переносят. Наиболее чувствительные к холоду молодые всходы огурца - в фазе семядолей. По многолетним с 1977 по 1998 гг. оценкам гибридов и сортов огурцов на холодостойкость отмечено: в зависимости скорости прорастания при активации, т.е. содержание семян во влажной среде при температуре выше плюс 20 �С 12 часов, не закончив биохимическую фазу, могут начинать рост даже при температуре плюс 1 �С. По нашим наблюдениям в процессе набухания и активации ферментов происходит одновременно рястяжение и деление клеток. Начало роста завершается прободением семенной кожуры корешком. Для активации ферментных систем, для дальнейшего растяжения и деления клеток необходима определенная сумма температур. Особо высокая температура необходима в период активации ферментов по сумме не менее 150 �С. Например, семена огурца Г-5 прорастают при сумме температур 152,2 �С при температуре от +3,4 �С до +6 �С до 30% холод 8-82%. Из растений, выращенных из отборных семян, отбирают устойчивых к заморозкам, если они выращиваются рассадой выносим на мороз. Отбор холодо-заморозкоустойчивых растений проводим посевом семян в грунт одновременно, сроки посева ранних зерновых культур обычно в начале мая. Здесь происходит естественный отбор на холодостойкость. Весенние заморозки проводят отбор на устойчивость к заморозкам. Холодо-заморозкоустойчивость передаётся по наследству. В ходе роста и развития кроме устойчивости ведём отбор по хозяйственно ценным признакам на скороспелость, дружность созревания и отдачи урожая, устойчивость к болезням и по другим признакам. П. САРАЕВ, научный сотрудник Лабазинского опорного пункта Поволжского НИИСС. Посадите кондиционер Это растение с розеткой узких длинных листьев можно увидеть во многих домах. Она удивительно неприхотлива: может расти и в теплой, и в прохладной комнате, только света ему надо побольше - тогда белые полосы по краям или в центре листа выглядят особенно красиво. Но не такое уж оно и простое, как кажется на первый взгляд. Американские исследователи установили, что именно хлорофитуму принадлежит первое место в очищении воздуха и улучшении микроклимата помещений. И действует это растение не хуже любого кондиционера, но только если ему самому хорошо живется под нашей крышей. Хлорофитуму не много требуется. Что касается почвы, то годится любая садовая земля, к которой надо добавить немного крупнозернистого, хорошо промытого песка. Каждую весну растения желательно пересаживать в новую землю и корни при этом обрезать не следует - в них находятся запасы питательных веществ. И очень большой горшок брать не стоит - только сантиметра на 2-3 больше в диаметре, чем предыдущий. Если старое растение сильно разрослось и прямо в горшке образовало несколько розеток - точек роста, можно очень осторожно их разделить и посадить каждую отдельно в небольшой горшок. А молодые розетки на концах плетей лучше не отделять - с ними растение выглядит гораздо интереснее. Очень хорошо смотрится хлорофитум в подвесном кашпо, сплетённом из веревки или шнура в технике макраме. Причем к белым нитям для оживления можно добавить немного красных. А можно, отказавшись от привычных горшков, сделать миниатюрный садик, поместив в широкую плошку или другую подходящую посуду несколько растений: одно высокое, например сансевьеру - "щучий хвост", абутилон - комнатный клен или обычную герань, а сбоку - небольшой хлорофитум. Завершит же композицию какая-нибудь стелющаяся по земле и слегка свисающая травка традесканция, линархя, обыкновенный плющ. Такие композиции очень эффектны и не займут много места в комнате. Иногда зимой, особенно в прохладном помещении, на листьях хлорофитума появляются коричневые пятна - это результат чрезмерных поливов. Кроме того излишняя влага в сочетании с холодной землей очень опасна для корней - они могут загнить. Если же у хлорофитума подсыхают кончики листьев, значит в комнате слишком сухой воздух или растению не хватает питания. Но подкармливать хлорофитум, как и большинство других комнатных растений, надо летом. Как видите, хлопот с растением - "пауком" не так уж много, а польза от него весьма ощутима. Посадите у себя в доме зелёный кондиционер и "Почувствуйте розницу". Если Вас заинтересовало это растение, пишите. Высылается каталог + 1 пакет семян бесплатно в Вашем конверте с обратным адресом. Писать по адресу: 461037, Оренбургская область, Бузулукский район, с. Ново-Александровка, Литвинову М.А. ПУСТЬ БУДЕТ ПРОЧЕН ВАШ СОЮЗ Ах, семья, наша крепость и счастье, наша забота и хлопоты, и любовь, и слезы, и ссоры, и примирения, наша радость и, к сожалению, иногда и печаль... Так хочется, чтобы в Новом году плохого было поменьше, а светлого, хорошего, радостного побольше! Давайте-ка сейчас, на его пороге, подумаем над своими семейными дедами и честно признаемся себе, так ли уж безого- ворочно всегда правы именно мы, не можем ли и мы что-то в себе изменить, чтобы избежать ссор и непонимания, чтобы наш супружеский союз был прочен и не омрачали его мелочи жизни... Поможет в этом шутливый тест, который предлагают польские психологи. Итак, милые МУЖЬЯ, делаете ли вы упреки жене по поводу того, что... � она ходит дома в бигуди, � смеется, неизвестно по какой причине, � курит, � подолгу болтает с подругами � или сидит в парикмахерской, � любит лакомства, даже если при этом полнеет, � а вот на кухне возиться не любит � да еще в последнее время слишком усиленно занимается своей внешностью � уж не появился ли "другой"? � А самое главное � задает массу вопросов во время передачи хоккея или футбола! Теперь просим ответить ЖЕН: упрекаете ли вы мужей за то, что... � ему только бы телевизор смотреть � или валяться на тахте, вместо того чтобы проверить уроки у сына! � Снова прожег дырку в скатерти, � зеркало в ванной пастой обрызгивает, � слишком разборчив в еде, � придя домой, никогда не поцелует, а буркнет: "Привет!", � при этом сам одежду не уберет, как положено, а бросит где попало, ноги как следует не вытрет, � мусор не вынесет, � и вообще приятели ему дороже, чем жена! Ответы могут быть: "Да" � 3 балла, "Нет" � 1 балл, "Иногда" � 2 балда. А теперь подсчитаем очки. До 10 БАЛЛОВ: ваш союз идеален! И в новом году у вас не будет оснований упрекать друг дру- га. 11-14 БАЛЛОВ: вы можете порадоваться, ваш муж (или жена) � человек благоразумный и рассудительный, с миролюбивым характером, всегда снисходителен к маленьким недостаткам вашей натуры. 15-19 БАЛЛОВ: ваш спутник (или спутница) жизни имеет характер неустойчивый, при неудачах падает духом и старается вину переложить на вас... Постарайтесь закалить его дух и волю! 20-24 БАЛЛА: очень жаль, но посоветовать нечего... Вас, может быть, и не за что упрекать, вы очень стараетесь сохранить мир в семье, А вот ваш избранник совсем другого характера, привычек, жизненных установок, чем вы! Чтобы сохранить ваш союз, ему (или ей) нужно изменить себя. 25-27 БАЛЛОВ: скажем прямо, что вы имеете дело с человеком раздражительным, придирчивым, ворчливым. Это плохо, конечно, но взаимная любовь и терпение помогут избавиться от этих недостатков. Обеспечить картофелю забег в развитии Проходя между домов дачного кооператива, я обратил внимание на участок картофеля, отличающийся различным развитием растений: одни растения еще только всходили, а другие, с шикарным развитием, выбрасывали соцветия и начинали бутонизировать. Сорт картофеля был один - Жуковский ранний. Такие различия в развитии были благодаря выполнению простого способа, не требующего больших затрат. Огородники знают, что всходы непроросших клубней картофеля появляются на 20-25 день после посадки. Это является бесполезными затратами времени, отпущенного климатом на вегетацию. В период от посадки до всходов клубней в почве осуществляется только рост проростков, а процессы фотосинтеза и накопления органических веществ не происходят. Цель работы: Сократить период от посадки картофеля до всходов, ускорить их появление, продлить безморозный вегетационный период, уменьшить губительное влияние засухи и фитофтороза, увеличить урожай и содержание в клубнях крахмала, белка, витамина С, получить вкусные, рассыпчатые при варке клубни. Выгода картофелевода: Предотвращается обламывание наиболее продуктивных проростков. Всходы появляются через 6-7 дней после посадки клубней в почву. Продлевается безморозный вегетационный период на 14-18 дней, за счет этого получается прибавка урожая 90-120 кг с сотки. Благодаря увеличению времени вегетации в клубнях увеличивается содержание крахмала на 2-3%, белка - на 1,5-1,6%, витамина С - на 25-30 мг на 100 г сырой массы. Клубни становятся вкусными и рассыпчатыми. Технологические особенности способа: В январе-феврале картофель слоем 1-2 клубня помещают в целлофановые мешочки с прорезями в освещенное место при т=12-18�С. Через каждые 10-15 дней клубни переворачивают и опрыскивают водой или раствором, приготовленным из 4 г азотно-фосфорно-калийных удобрений и 1 л воды. Посадку осуществляют на глубину 4-5 см с последующим подсыпанием почвы к стеблям до образования гребней высотой 23-25 см. При выполнении этого способа следует обратить особое внимание на подбор сортов. Это могут быть новые, высокоурожайные сорта, устойчивые к болезням и колорадскому жуку: ранние сорта - Удача, Жуковский ранний. Вятка, Скороплодный, Заря, Эффект, Резерв, Невский; среднеспелые - Голубизна, Луговской, Талисман, Вестник, Родник, Ресурс. Все они дают урожай до 1500 кг с сотки. Рекомендуется выращивать не менее двух ранних и среднеспелых сортов. Эффективность способа: Длительное содержание семенного картофеля до посадки в условиях теплого, освещенного помещения оказалось весьма эффективным для получения ранних всходов и максимального урожая как в летний период, так и при уборке урожая осенью. Сравнение эффективности нового способа проводились с известным способом проращивания клубней на свету в течение 35 дней. Всходы у ранних сортов картофеля - Удача, Жуковский ранний - при новом способе проращивания появлялись на 7 день после посадки. Уже на 3-й день после посадки из образовавшихся почек на проростках клубней стали появляться молодые ростки, а из корневых бугорков - мощная корневая система. У клубней при обычном способе проращивания в это время она отсутствовала. Забег в развитии по сравнению обычным способом проращивания был 8 дней. Растения при новом способе проращивания были выше на 15-20 см. Стебли у них мощные и облиственные. Забег во всходах по сравнению с непроросшими клубнями составлял 18 дней. У среднеспелых сортов (Голубизна, Луговской) забег в развитии по сравнению с проращиванием составлял 30-35 дней составлял 10 дней. При учете урожая в конце июня раннеспелые сорта обеспечивали урожай соответственно 550 и 630г, а при обычном способе проращивания 310 и 380 г с куста; среднеспелые - соответственно 310 и 280 г, при обычном способе проращивания - 200 и 180 г с куста. В период уборки сорт Жуковский ранний дал урожай 1150 г, а сорт Удача - 1350 г с куста, тогда как при обычном способе проращивания 730 и 820 г с куста соответственно. Для сравнения местный материал при обычном способе проращивания дал урожай 340 г с куста. Поэтому приобретение новых высокоурожайных сортов картофеля является одной из важнейших задач любителей-картофелеводов. Вопросы по адресу: 140052, Московская обл., НИИКХ, Серебреникову Владимиру Серафимовичу. В. С. Серебреников, кандидат с.-х. наук. ПОЛЕЗНЫЕ СОВЕТЫ От ста недугов - облепиха Целебное свойство этого необычного растения, ветки которого по осени прямо-таки облеплены желто-оранжевыми ягодами ( не отсюда ли и название - облепиха?), давно уже известно. И с каждым годом число почитателей целебной ягоды растет. У каждого, наверное, есть свои рецепты обработки облепихи. Ее сушат, из нее делают варенье, кисели, желе, перетирают с сахаром. Но вот одну из наиболее ценных составных частей ягоды, масло, которого она содержит до восьми процентов, получить в домашних условиях не так-то просто. А лечебные свойства масла прямо-таки поразительны: оно помогает ранам быстрее зажить, утоляет боль, лечит язвы, заболевания слизистых. Сегодня я рекомендую вам способ приготовления облепихового масла дома. При всей его простоте он позволяет практически полностью экстрагировать из облепихи ее целебные вещества. Возьмите 500 г мытых ягод облепихи и в течение получаса кипятите их в 500 г подсолнечного масла, взятого без осадка. Кипятить нужно не на открытом огне, а в водяной бане или на пару. Вскипятив, охладите и, предварительно процедив, выжмите остаток через марлю или, что лучше, через капрон. Затем соедините оставшийся жмых с процеженным маслом и снова кипятите полчаса. Эту операцию нужно проделать три-четыре раза. После последней фильтрации вылейте полученное масло в стеклянную посуду с широким горлышком, накройте ее, скажем, тарелкой и дайте настояться дня два. Затем аккуратно удалите верхний слой, разлейте масло в стеклянные чистые банки и простерилизуйте, как вы делаете это при домашнем консервировании. Масло готово. Хранить полученный продукт нужно обязательно в холодном (прохладном) темном месте. Свои целебные свойства такое самодельное масло сохраняет около полугода. Попутно хочу отметить, что облепиха созревает обычно в конце сентября, но ее плоды держатся на ветках практически до самой весны, так что, если вы будете готовить облепиховое масло два раза в год, у вас всегда будет под рукой свежее ценное лекарство. Прежде чем употреблять облепиховое масло внутрь, обязательно посоветуйтесь с врачом. И еще - запомните, что при расстройствах желудочного тракта и острых холециститах употребление облепихового масла противопоказано. Н.ГУСАРОВ. Вдоволь покуражившись над нами природными катаклизмами и катастрофами, Дракон уходит в 12- летний отпуск, передавая 24 января 2001 года в 16 час. 8 мин. власть над Землей Змее, которая будет править до 12 февраля 2002 года. Бойтесь озлобления в наступившем году стальной Змеи, ибо оно приведет вашу жизнь на грань катастрофы! И напротив, доброта придаст вам мудрости и стимулирует проявление лучших качеств Змеи. В год Змеи будьте внимательны к природе: на нарушение экологии она ответит землетрясениями, наводнениями и другими внезапными катаклизмами. Что сулит год Змеи каждому знаку Восточного Зодиака: Для КРЫСЫ (МЫШИ) (...1948-60-72...) - В деловом отношении не слишком удачный год. Однако вы можете преуспеть в творческом труде, музыке, искусствах и литературе. Удобный год для написания мемуар и стихов. Не откровенничайте с Лошадью, Обезьяной и Собакой! Выберите себе в друзья Буйвола, Кота (Зайца, Кролика) и Дракона. Для БУЙВОЛА (БЫКА, БИЗОНА) (...1949-61-73...) - удача в делах, но проблемы в семейной жизни. В этом году ему не рекомендуется менять брачного партнера и вообще вступать в брак. В своих действиях ему нужно воздерживаться от применения насилия. Держитесь подальше от Змеи, Лошади и Козы, дружите с Крысой, Свиньей и Котом! Для ТИГРА (...1950-62-74...) - напряженный деловой год. Чтобы не потерять своих позиций в жизни, он должен избегать бездействия и лени, расширять среду своего влияния. Хорошо сочетать дела с поездками и путешествиями, можно отправиться в длительную экспедицию. Не вступайте в тесный контакт с Обезьяной, Петухом и Собакой, дружите с Котом, Драконом и Змеей. У КОТА (ЗАЙЦА, КРОЛИКА) (...1951-63-75...) - продуктивный год. Особенно хорош он для людей гуманитарных профессий � журналистов, философов, преподавателей, писателей. Не следует только близко к сердцу принимать супружескую измену. Сторонитесь Обезьяны, Петуха и Собаки, дружите с Драконом, Лошадью и Козой. У ДРАКОНА (...1952-64-76...) в год Змеи авторитет, деньги, продвижение по службе, любовь, открывает возможности блеснуть своими достоинствами. Замечательный год! Не следует только увлекаться необоснованными авантюрами. Можете полностью доверять Змее, Тигру и Коту и держите ухо востро в общении с Буйволом, Петухом и Обезьяной. Для ЗМЕИ (...1953-65-77...) - великолепный год, причем чем он теплее, тем лучше. Исполнение желаний, успех в предприятиях, увлекательные любовные приключения В сложных ситуациях всегда найдется безопасный выход. Только не следует вступать в конфликт с законом! Гармония вам обеспечена во взаимоотношениях с Козой, Змеей и Собакой. Держитесь подальше от Крысы, Буйвола и Свиньи. Для ЛОШАДИ (...1954-66-78...) - трудный год. Многое из того, что придется вам делать, покажется глупым и нецелесообразным, а сделать по-своему не будет возможности. Придется приспосабливаться! Вероятна большая, но недолговечная любовь, поэтому ничего не следует приносить ей в жертву. Дружите с Козой, Змеей и Драконом, избегайте Крысы, Буйвола и Свиньи. У КОЗ (ОВЕЦ) (...1955-67-79...) немало поводов для радости: год сулит много интересных занятий и сплетен, доходы из неожиданного источника, популярность в обществе. Но не следует слишком уж открыто тянуть одеяло на себя и пастись в чужом огороде! Лучшие друзья Змея, Лошадь и Собака. Вероятные подруги - Буйвол, Обезьяна и Свинья. Для ОБЕЗЬЯНЫ (...1956-68-80...) год Змеи благоприятен. Вы хорошо вписываетесь в общество, занимаетесь полезным и прибыльным делом, во многих вопросах просто необходимы. Однако не дайте обуять себя гордыне! Кооперируйтесь с Петухом, Собакой и Свиньей, не доверяйте Змее, Лошади и Козе. У ПЕТУХА (КУРИЦЫ) (...1957-69-81...) ожидается беспокойный год. Возникшие неожиданные проблемы, только справишься с одной � выплывает другая... Но разнообразие ситуаций поддерживает интерес к жизни. Наиболее докучливой представляется семейная проблема. Водите дружбу с Обезьяной, Драконом и Собакой, избегайте Буйвола, Змеи и Лошади. Для СОБАКИ (...1958-70-82...) год Змеи нехорош. Собака несчастлива, потому что не понимает сама себя. Но в конце концов ее озарит открытие, и в следующий год она перейдет в новом, более высоком духовном уровне. В бытовом же отношении жизнь ее будет идти, как и шла, без особых событий. Поддержку она найдет у Собаки, Змеи и Свиньи, опасаться следует Кота, Дракона и Петуха. У СВИНЬИ (КАБАНА) (...1959-70-83...) в наступающем году � финансовый успех и невезение в любви, но в целом больше беспокойства, чем радостей. Свои чувства ей лучше держать в крепкой узде. В деловой сфере будет регулярно везти, если рассудок не затмит эмоции. Дружить лучше с Крысой, Буйволом и Драконом, а сторониться � Змеи, Тигра и Петуха. Феликс Величко. Стул для самого маленького Изготовить стульчик для малыша таким, как его выпускает промышленность, по силам, на- верное, лишь очень опытному столяру. Мы же предлагаем более простую модель, которую легко выполнить в домашних условиях с минимумом материалов и инструментов. На рисунке 1 видно, что стульчик для малыша устанавливается на обычный стул и прикрепляет- ся к его спинке шнуром в четырех местах. Ребенок сидит на стульчике, упираясь ножками в сиденье взрослого стула, а заградительный щиток, находящийся несколько выше крышки стола, не дает малышу упасть. Придвинутый вместе со стулом к обеденному столу, малыш будет чувствовать себя равноправным членом семьи, сможет перенимать у взрослых правила поведения за столом. О последнем надо постоянно помнить родителям малыша � как бы ни был тот мал, все увиденное и услышанное отпечатывается в его сознании очень прочно. Поэтому нельзя откладывать воспитание культуры поведения за столом "на потом", когда ребенок подрастет, � он все понимает уже и сейчас, когда вы впервые посадили его рядом с собой. Стульчик, на который вы посадите рядом с собой малыша, разборный. Собирается из двух бо- ковинок (4), сиденья (5), спинки (6) и заградительного щитка (3). Все детали скрепляются между собой так, как показано на рисунке 2. То есть "ушки" спинки, сиденья и заградитель- ного щитка продеваются в "окошки" боковинок, а затем клинышками круглого сечения, которые забиваются в отверстия "ушек", все детали стягиваются. Для надежности крепления частей стульчика необходимо отверстия в "ушках" просверлить так, чтобы при простом соединении деталей (без стягивания клинышками) часть этих отверстий приходилась на толщину боковинок (рисунок 2). Тогда при забивании клинышков отверстия будут как бы вытягиваться из боковинок и соединение деталей стульчика будет прочным и надежным. Все детали стульчика изготавливаются из листа многослойной фанеры толщиной не менее 6 мм. При выпиливании заготовок по приведенным размерам надо не забывать про "ушки", на них не- обходимо добавить с каждой стороны по 20-25 мм плюс толщина боковинок. Вначале заготавливают все детали с "ушками" (ширина "ушка" у основания 35 мм). А по ним размечают и пропиливают "окошки" в боковинках. Их удобно выпилить обыкновенным лобзиком. Не забудьте просверлить четыре отверстия в боковинках для шнуров, которыми детский стульчик будет крепиться на взрослом стуле. Еще потребуются 10 клинышков из прочной древесины длиной по 45 мм и диаметром с одного конца 12 мм, с другого � 6 мм. Все детали надо тщательно прошкурить, особенно кромки, заовалить углы, покрыть лаком или окрасить в яркие, но не кричащие тона. В украшении стульчика можете проявить свой ху- дожнический талант в полной мере: например, расписать спинку и боковинки цветами и закрепить потом роспись лаком. Старший брат малыша тоже в силах внести свою лепту в украшение стуль- чика � хотя бы выжиганием какого-нибудь рисунка. Нашлось бы дело и маме: подобрать крепкий надежный шнур для крепления, рассчитать необходимую длину отрезков, предусмотреть на концах шнуров узлы, шарики или пуговицы, не позволяющие малышу выдернуть их из отверстий в боковинках тогда, когда стульчик не привязан к спинке взрослого стула, а просто стоит на полу. А. БЕЛОРУССКИЙ, архитектор. От редакции: мы приглашаем наших читателей поделиться своим опытом домашних мастеров. Присылайте описания своих изобретений. К открытию пляжного сезона Вы уже приобрели модный купальник? Теперь осталось приобрести к нему гладкий красивый животик Укрепляет прямые мышцы живота Лягте на спину, ноги слегка согните в коленях - это уменьшит нагрузку на поясничный отдел позвоночника. Руки сцепите "в замок" и заведите за голову. Подбородок прижмите к груди. Старайтесь приподнять торс как можно сильнее. Повторите упражнение 10 раз. Тренирует косые мышцы живота Сядьте и слегка приподнимите вытянутые ноги. Затем всем корпусом развернитесь влево и одновременно притяните к груди левое колено. Вернитесь в исходное положение и повторите это упражнение в другую сторону. Повторите по 8 раз с каждой стороны. Избавляет от жировых отложений Сядьте. Ноги приподнимите под прямым углом. Для сохранения равновесия поддерживайте голени руками. Постарайтесь напрячь мышцы живота как можно сильнее. Медленно опустите ноги. Повторите 10 раз. Повышает общий тонус мышц В положении сидя отклонитесь назад и обопритесь руками о землю. Обе ноги вытяните под углом примерно 45 градусов и попеременно то подтягивайте их к груди, то снова выпрямляйте. Можно также пару минут покрутить педали воображаемого велосипеда. Кое-что о молочных продуктах Как определить недоброкачественность продуктов Фальсификация сметаны. Чаще всего в сметану подмешивают творог, крахмалистые вещества, соду и т.д. Примесь творога легко узнать, если слой сметаны положить на тонкое стекло и размазать. Посмотрите на свет. Если видны крупинки - значит подмесь творога несомненна. Подмесь крахмала в сметане можно узнать с помощью нескольких капель настойки йода. Хорошая сметана окрашивается йодом в желтый цвет. Если есть примесь крахмала на стекле получится окраска сметаны в синий цвет с явно обозначенными зернами. Минеральные примеси (мел, гипс, известь) осядут на дно стакана, наполненного кипятком, в который брошен кусок сметаны: надо лишь дать ему отстояться в течение 3-5 минут. Фальсификацию масла в виде примеси жира определяют так: небольшой кусочек масла положите на стеклянную пластинку и плотно накройте другой пластинкой. Если на эту пробу, заключенную между стекол посмотреть через увеличительное стекло, то примесь жира проявится множеством красивых звездочек, отливающих всеми цветами радуги. Молоко. Капля хорошего молока тонет в воде и не растекается на ногте. Хранение Сыр храните целым куском, завернув в чистый влажный белый лоскут отдельно от других предметов, при температуре не выше 10-15�. Сохранение молока. Чтоб молоко в жару не скисло, в горшок с молоком нужно положить несколько листьев хрена. Так молоко сохранит свою свежесть в течение нескольких дней. Сохранение масла в свежем виде. Масло кладут в сосуд со слабым водным раствором винно-каменной кислоты (на 6 литров воды столовую ложку кислоты). В таком виде масло сохраняется около 2 месяцев зимой и 1 месяц летом. Воду следует переменять: зимою - каждые 4-5 дней, летом - каждый день. А прабабушки наши делали так... Не спешите выбрасывать прогорклое масло. Залейте его холодной водой, добавьте чайную ложку питьевой соды и все перемешайте. Слив воду, прибавьте к маслу стакан молока (на 1 кг масла) и прокипятите. Получился отличный продукт для приготовления различных блюд. Второй способ. Растопите испорченное масло, снимите сверху пену и опустите в него хорошо обожженную корку хлеба, которая вберет в себя весь неприятный вкус и запах масла. Через 2-3 минуты корку следует вынуть. Не оставляйте молоко в алюминиевой посуде - оно приобретет неприятный вкус. Щепотка соли, добавленная в молоко предохранит его от скисания. Чтобы дольше сохранить молоко, перед кипячением в него нужно добавить немного сахара (пол столовой ложки на 1 л молока), а после того, как молоко вскипит, дайте ему остыть открытым. Такое молоко 2-3 дня не прокиснет. А летом вместо сахара можно добавить - соды (на кончике ножа). Сыр не заплесневеет, если положить в сырницу кусочек сахара. Чтобы сыр не высыхал, заверните его в чистую ткань, смоченную в соленой воде. Брынза сохранится дольше, если посуду в которой она находится, сверху накрыть намоченной в холодной воде и хорошо отжатой тканью. Если творог оказался кислым, смешайте его с равным количеством молока и оставьте на час. Затем творог откиньте на дуршлаг и дайте молоку стечь. ДИЕТОЛОГИЯ Кого бодрит, а кого с ног валит Кофейные бобы � это семена кофейного дерева, родиной которой считается Эфиопия. Название его связывают с арабским словом "кафка", что означает "вино". В самом деле, в действии кофе и вина на организм человека можно усмотреть нечто общее � оба напитка возбуждают, оба вызывают пристрастие. Согласно легенде сильный тонизирующий эффект кофейных бобов людям помогли открыть козы, которые, наевших их, долго резвились, не испытывая потребности во сне. Отношение к кофе всегда было противоречивым. Оказывается, он может выступать в трех обличьях: быть напитком, лекарством или ядом. Определяется это индивидуальными особенностями организма. Еще академик И. П. Павлов писал, что в зависимости от типа нервной системы кофеин в состоянии повышать или тормозить процессы возбуждения в нервной клетке. Большинство людей после чашки кофе чувствуют прилив сил, бодрости. Но есть люди, у которых даже небольшое количество напитка вызывает учащенное сердцебиение, шум в ушах, головную боль. Описаны случаи потери сознания от одного только запаха кофе. Если вы чувствуете, что кофе вредит, не пейте его, если слишком возбуждает � уменьшите дозу, если не можете без него жить � подумайте, не становитесь ли вы кофеманом. И все же в преддверии новогоднего торжества хочется порадовать любителей кофе одним из праздничных рецептов. Итак, кофе со взбитыми сливками: на 200 г воды берется 1 ч. ложка свежемолотого кофе (с горкой) и 1 ст. ложка взбитых сливок. Кофе вместе с сахаром (по вкусу) залить кипятком, поставить на с огонь и довести до кипения. Как только начнет подниматься пена, снять кофейник огня. После отстаивания гущи разлить кофе в чашки, наполняя их на 3/4 объема. Сверху положить взбитые сливки. АЗБУКА ЛЕКАРСТВ Календулы мазь является антисептическим и противовоспалительным средством. Выпускается в банках по 15 и 40 г, содержит настойку календулы. Применяется наружно для смазывания пораженных участков кожи при порезах, ожогах и т.п. В качестве побочных действий в редких случаях возникают аллергические реакции. Применение мази противопоказано при повышенной чувствительности к компонентам препарата. Калефлон - покрытые оболочкой таблетки, содержащие очищенный экстракт цветков ноготков лекарственных (Салендула оффициналис). Препарат оказывает противовоспали- тельный эффект, а также стимулирует репаративные процессы при заболеваниях желудочно-кишечного тракта. Применение калефлона показано в составе комбинированной терапии язвенной болезни желудка и двенадцатиперстной кишки и обострении хронического гастрита. Препарат назначают после еды по 1-2 таблетки 3 раза в сутки. Курс лечения 3-4, но не более 6 недель. Побочно могут возникать ощущение горечи во рту, чувство жжения в эпигастральной области, а также аллергические реакции. Противопоказания к применению калефлона в настоящее время не выявлены. ОБМЕН ВЕЩЕСТВ Лук против остеопороза Стоит ли говорить о том, какие неприятности причиняет людям остеопороз. К сожалению, попытки предотвратить хрупкость костей посредством диеты не принесли ожидаемых результатов. Ни содержащийся в молочных продуктах кальций, ни богатая фитоэстрогенами соя пока не могут уберечь людей от переломов. Подобная задача, вероятно, под силу другим хорошо знакомым продуктам. Именно их употребление, судя по результатам эксперимента, привело к заметному увеличению костной массы и по- вышению "насыщения" костной ткани минералами у крыс. Этими веществами богаты петрушка, помидоры, огурцы, салат, чеснок и особенно репчатый лук. Так, введение в ежедневный рацион крыс 1 г лука увеличило содержание в их костной ткани минералов на 18%. Остается надеяться, что чудесные свойства лука и других овощей рас- пространяются и на людей. КАК ЗИМОВАТЬ ЗЕЛЕНЫМ ПИТОМЦАМ? Вопрос не праздный. Дом становится особенно уютным, когда за окном стужа, а на подоконнике - цветник. Растущие в тепле и заботе цикламены, зигокактусы, хризантемы бросают вы-зов своим пышным цветом даже са-мому лютому морозу. Пожалуй, больше всего не любят комнатные растения ноябрь. Пора и впрямь неблагоприятная: конец осени-начало зимы. Короткие пасмурные дни и длинные теплые ночи могут отразиться на здоровье ваших нежных питомцев. Запас пи-тательных веществ, накопленных летом, быстро расходуется при не-достатке света и избытке тепла в натопленных комнатах. Тут нужна ваша помощь. Самая главная забота в это вре-мя - продлить растениям световой день: устроить подсветку люминес-центной или же обыкновенной эле-ктрической лампочкой. Зажигать, когда стемнеет. Естественный и искусственный свет должны вме-сте составлять 10-12-часовой день. Чтобы растения распустили свои красивые бутоны, им понадо-бится прямое освещение. Теперь о тепловом режиме. Здесь много особенностей. Напри-мер, алоэ, аспидистра, аукуба, дра-цена, лимон, зигокактус, фикус, ци-перус и другие к температуре без- различны, выносят любую. Тепло-любивые - бегония королевская, антуриум, сенполия (узамбарская фиалка) - любят повышенную, от 15 градусов и больше. Герани, гортензии, камелии, при-муле, розе, фуксии по душе прохла-да. Цикламен же вовсе не выносит комнатное тепло. "Вкусы" растений учитывайте непременно. Известно, что на подо-коннике, ближе к стеклу, темпера-тура на 3-4� ниже комнатной. Этот климат подойдет камелии, примуле, герани, фуксии, гортензии. Розам и цикламенам зимнее жи-лище можно оборудовать... между рамами. Там им будет комфортно, так как в этот период они находят-ся в состоянии покоя. Насыпьте опилки, закройте их пленкой или клеенкой, сверху положите асбест, а на него - две обычные лампочки по 40-50 ватт на длинном шнурке, чтобы удобно включались в сеть. Внутренние рамы не замазывайте. Цветы не любят сквозняков. Про-ветривая, накрывайте их газетами, между рамами - картоном. Можно также сделать форточке постоян-ный козырек. Полив - одна из самых каприз-ных процедур. Частый - вреден, так как земля внизу горшочка не просыхает, закисает. Нижние ко-решки загнивают и растения, как правило, гибнут. Растения, сбросив-шие листья, поливайте еще реже, но не допускайте пересыхания. Это относится и к цветам, находящимся в покое: клубневым бегониям, глок-синиям, цикламенам. А какою должна быть вода? На-ливайте ее в емкости заранее и держите в комнате: вода отстоит-ся, температуры сравняются. От теплой воды растения идут в рост, холодная - плохо всасывается корнями, и цветок может погибнуть... от недостатка влаги. Непри- годна для полива кипяченая вода, так как в ней нет воздуха. Струю сверху направляйте ближе к краю горшочка, следите, чтобы земля не размывалась. Уплотненную почву обязательно рыхлите. Время от времени растения нуж-но опрыскивать или обмывать из лейки, под душем. Землю не за-будьте закрыть. Можно протереть листики мокрой тряпочкой или ки-сточкой. Комнатные вредители не появят-ся совсем или погибнут сразу после появления, если обмывать листья вначале мыльной, а затем чистой водой. Мыло вредно для корней, поэтому следите, чтобы оно не по-пало на землю. Зимой тоже нужны подкормки, но более редкие, чем летом. Цветущие растения подкармливайте от поя-влений бутонов и до конца цвете-ния. Остальные - раз в две-три не-дели. Помните, что им "по силам" усвоить питательные вещества только слабой концентрации. Креп-кие растворы обжигают корни, при-водят к гибели цветов. Вы можете заготовить крепкий раствор предва-рительно, взяв 1 ст. л. полного ми-нерального удобрения на пол-литра воды. А когда наступит время под-кормки - размешайте 1 ч. л. гото-вого раствора в 0,5 л воды. Иногда на литр поливной воды можно добавить чайную ложку мо-лока или же использовать воду, оставшуюся после мытья молочной посуды, тарелок с мясными и рыб-ными блюдами и свежего мяса. Та-кая необычная подкормка даст рас-тениям все необходимые питатель-ные соли. Мясную воду нужно обязательно процедить через марлю, иначе кусочки жира затруднят до-ступ воздуха к корням. Однако не все растения нуждаются в подкорм-ке. Исключение - больные, недав-но пересаженные и те, что находят-ся в покое. Пересаживать цветы можно и осенью, но больше подхо-дит ранняя весна. Воспользуйтесь этими несложны-ми советами, и вы увидите, что ваши зеленые комнатные питомцы будут здоровыми, крепкими, пора-дуют вас красотой и ароматом цве-тов. Л. ПРОКОФЬЕВА. Какой размер горшочка для выращивания рассады томатов лучше всего использовать? Размер горшочков определяется длительностью периода, в течение которого растение будет в нем находиться. Обычно у огородников-любителей рассада до высадки в грунт 50-70 дней растет в молочных литровых пакетах. Это, конечно, не оптимальный вариант. В таких горшочках 60-70-дневной рассаде уже тесно, ей лучше было бы расти в емкостях более 1,3 л и диаметром около 12 см (у молочных пакетов - 7,5 см). МАСТЕРСКАЯ ПЕРЕДЕЛОК Расти, пальто, большое... Ах, сколько "отживших" свое вещей скопилось в шкафу! Старый свитер и мужские рубашки с протертыми воротниками, кусочки драпа и пушистого меха. Жалько выбрасывать! А это вовсе и не нужно делать. Сегодня мы открываем "Мастерскую пределок", и эти "ненужные" вещи будут здесь как нельзя кстати. На дворе мороз, а из рукавов пальто � вы заметили � торчат детские ручки, да и подол стал заметно короче. Самое простое � удлинить вещь по низу и пришить манжеты к рукавам. Для этого подойдут искусственный мех, натуральная цигейка или же кусок драпа, по тону близкий к цвету изделия. Это поможет старому пальто "перезимовать". Но есть другой, более изящный вариант. Выбирайте. Пальто должно "вырасти" за счет вставки, планки и манжет. Подыщите куски драпа в тон или контрастные по цвету с изделием. Подойдет и трикотаж плотной вязки � ваш "бывший" свитер или юбка. Не забудьте распороть их по швам. Старый материал нужно почистить или постирать, тщательно отгладить. ДЕТАЛИ КРОЯ ВСТАВОК (на чертеже заштрихованы) 1. Спинка 1 дет.(со сгибом) 2. Передняя полочка 2 дет. 3. Манжета 2 дет.(со сгибом) 4. Карманы 2 дет. 5. Планка 2 дет.(со сгибом) 6. Воротник 2 дет.(со сгибом) Чертежи выкройки даются в масштабе 1:10 без припусков на швы. Припуски на швы � 2 см. Воспользовавшись этим вариантом, вы можете из пальто 24-26-го размера сделать 28-30-й размер. Последовательность работы Распорите боковые швы пальто до пройм, отрежьте материал под проймой примерно по линии груди. Теперь выкроенные детали стачайте сначала с верхней, затем с нижней частью пальто. Швы обтачайте, прострочите боковые линии. Подготовьте планки, сострочив с изнанки уголки. Отпорите края воротника. Пристрочите планки к двум передним полочкам лицевыми сторонами. Выверните, приметайте с изнанки на руках, отгладьте. Полочки готовы. Сделайте петли, пришейте пуговицы. Стачайте боковые стороны манжет. Пристрочите манжеты лицевой стороной к краям рукавов, выверните, приметайте с изнанки. Пальто можно украсить декоративными карманами и воротником из той же дополняющей ткани. На выкройке даются их размеры и форма. Не забудьте о подкладке и ватине. Их можно перекроить заново, если они пришли в негодность. Увеличить же лучше всего по низу изделия. Отделочным материалом можно "украсить" и шапку. Если вы, дорогие "портнихи", будете аккуратны в работе, терпеливы и займетесь переделкой с вдохновением, то зимний комплект у вас будет оригинальным и вполне новым. Удмурт Республикаысь Правительстволэн Граждан оброна ужпумъёсъя но шугадӟонъёслэсь утиськонъя комитетэзлы тӧро юнматон сярысь Удмурт Республикалэн президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Габричидзе Тамази Георгиевичез юнматоно Удмурт Республикаысь Правительстволэн Граждан оборона ужпумъёсъя но шугадӟонъёслэсь утиськонъя комитетэзлы тӧрое Удмурт Республикалэн Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 31. Габричидзе Тамази Георгиевич Вордскиз 1951-тӥ арын 18-тӥ ноябре Грузинской ССР-ысь Зестафони городын. Грузин. Дышетскемез вылӥ. 1974-тӥ арын йылпумъяз Саратовысь вылӥ военно-химической командной училищеез "командной, военно-химической, радиоактивной арбериослэсь утиськон" специальностья, 1984-тӥ арын - Химилэсь утисконъя военной академиез "командно- штабной, оперативно-тактической, химической войскоосысь офицер" специальностья. Пусъемын 3-тӥ степенё "За службу Родине в Вооруженных Силах СССР" орденэн, "За боевые заслуги", "За безупречную службу", "60 лет Воруженных Сил СССР", "70 лет Вооруженных Сил СССР", "За гуманитарную помощь" медальёсын, Россиысь МЧС-лэн "Почетный знак МЧС России" мӧля вылын нуллон знакеныз, "Гражданская защита. За Успехи", "Гражданская защита. За заслуги" мӧля вылын нуллон знакъёсын, нимтулэн пыӵал тӥрлыкен, Удмурт Республикаысь Правительстволэн Данъян грамотаеныз. 1969-1970 - 92 номеро передвижной механизированной колоннаысь рабочий, Адлер город. 1970-1974 - Саратов ВВХУ-ын курсант. 1974-1981 - Прибалтийской военной округын служба. 1981-1984 - Химилэсь утиськонъя военной академиысь кылзӥсь, Москва город. 1984-1992 - Закавказской военной округын служба. 1992-1994 - Удмурт Республикаысь граждан оборона ужпумъёсъя но шугадӟонъёслэсь утиськонъя штабысь ожлы дасянъя отделлэн кивалтӥсез. 1994-1997 - Удмурт Республикаысь граждан оборона ужпумъёсъя но шугадӟонъёслэсь утиськонъя штаблэн кивалтӥсез. 1997-2000 - Удмурт Республикаысь Правительстволэн Граждан оборона ужпумъёсъя но шугадӟонъёслэсь утиськонъя комитетэзлэн тӧроез. Удмурт Республикаысь Егитъёсын ужанъя кун комитетлы тӧрое юнматон сярысь Удмурт Республикалэн президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Гальцин Андрей Ивановичез юнматоно Удмурт Республикаысь Егитъёсын ужанъя кун комитетлы тӧрое Удмурт Республикалэн Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 32. Гальцин Андрей Иванович Вордскиз 1961-тӥ арын 10-тӥ мае Удмурт АССР-ысь Пичи Пурга ёросысь Сосновка посёлокын. Ӟуч. Дышетскемез вылӥ. 1983-тӥ арын йылпумъяз Ижевскысь механикая институтэз "радиоаппаратураез выльдон но поттон" специальностья, 1997-тӥ арын - Кун службая Урал академиез "кунэн но интыын кивалтон" специальностья. Пусъемын Удмурт Республикаысь Правительстволэн куинь Данъян грамотаен. 1978-1983 - Ижевскысь механикая институтын студент. 1983-1988 - "Ижевский мотозавод" производственной объединениысь 47 номеро цехысь сменалэн мастерез, Ижевск город. 1988-1990 - ВЛКСМ-лэн Октябрь райкомезлэн секретарез, Ижевск город. 1990-1995 - Октябрь ёросысь Калык депутатъёслэн кенешсылэн быдэсъясь комитетэзлэн егитъёсын ужанъя, физкультурая но спортъя отделэзлэн кивалтӥсез, Ижевск город. 1995-1996 - Ижевск администрациысь егитъёсын ужанъя комитетлэн тӧроез. 1996-2000 - Удмурт Республикаысь Егитъёсын ужанъя кун комитетлэн тӧроез. Удмурт Республикаысь Ужбергатонъя кун комитетлы тӧрое юнматон сярысь Удмурт Республикалэн президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Зайцев Михаил Петровичез юнматоно Удмурт Республикаысь Ужбергатонъя кун комитетлы тӧрое Удмурт Республикалэн Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 33. Зайцев Михаил Петрович Вордскиз 1957-тӥ арын 28-тӥ мае Ижевск городын. Ӟуч. Дышетскемез вылӥ. 1981-тӥ арын йылпумъяз Ижевскысь механикая институтэз "полигон установкаос" специальностья. Пусъемын Удмурт Республикаысь Правительстволэн Данъян грамотаеныз. 1974-1975 - Ижевскысь электромеханической заводысь 14 номеро цехысь радиоаппаратурая слесарь-сборщике дышетскись, кыкетӥ разрядэн слесарь-сборщик. 1975-1981 - Ижевскысь механикая институтын студент. 1981-1984 - "Ижевский мотозавод" производственной огазеяськонысь 5 номеро цехын инженер-технолог. 1984-1989 - комсомоллэн "Ижевский мотозавод" производственной огазеяськонысь комитетэзлэн секратарез. 1989-1990 - "Ижевский мотозавод" производственной огазеяськонысь 23 номеро цехлэн кивалтӥсезлэн воштӥсез - стажёр, цехлэн кивалтӥсезлэсь ужзэ быдэсъясь. 1990-1992 - "Ижевский мотозавод" производственной огазеяськонысь 23 номеро цехлэн кивалтӥсез. 1992 - "Иж-Темп-Холдинг" АО-ысь кадръёсъя отделлэн кивалтӥсез, кадръёсъя службалэн кивалтӥсез, Ижевск город. 1992-1993 - "Иж-Темп-Астро" страховой обществолэн директорез, Ижевск город,. 1993-1994 - "Ижтранс-Полис" АОЗТ-лэн директорезлэн воштӥсез, Ижевск город. 1994 - "Страховое агентство "Сафон" ТОО-лэн директорез, Ижевск город. 1994-1995 - Удмурт Республикаысь Экономикая министерствоысь пичи ужбергатонлэн экономикая отделэныз кивалтӥсь. 1995 - Удмурт Республикаысь экономикая министрлэн воштӥсез. 1995-1999 - Удмурт Республикаысь Правительстволэн Пичи ужбергатонлы юрттонъя но азинтонъя комитетэзлэн тӧроез. 1999-2000 - Удмурт Республикаысь Ужбергатонъя кун комитетлэн тӧроез. Удмурт Республикаысь Физической культурая но спортъя кун комитетлы тӧрое юнматон сярысь Удмурт Республикалэн президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Кремер Гарий Ильичез юнматоно Удмурт Республикаысь Физической культурая но спортъя кун комитетлы тӧрое Удмурт Республикалэн Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 34. Кремер Гарий Ильич Вордскиз 1947-тӥ арын 19-тӥ июле Удмурт АССР-ысь Балезино посёлокын. Еврей. Дышетскемез вылӥ. 1973-тӥ арын йылпумъяз Удмурт кун университетэз "физической воспитание" специальностья. Пусъемын Удмурт Республикаысь Правительстволэн Данъян грамотаеныз. "Россия Федерациысь физической культурая дано ужась", "Удмурт Республикаысь физической культурая дано ужась". 1964-1965 - автомашинаосты тупатъяса дышетскись, электрослесаре дышетскись, а/я 38, Глазов город, Удмурт АССР. 1965-1966 - 4 номеро цехысь промышленной электроустановкаосты уже кутонъя электромонтёр, а/я 38, Глазов город. 1966-1968 - Советской Армиын. 1969 - механикая Чепца заводысь электромонтажник, Глазов город. 1969-1973 - Удмурт кун университетын студент, Ижевск город. 1973-1986 - егитъёслэн республикаысь спорт школазылэн директорез, Ижевск город. 1986-1987 - "Прогресс" хоккей командалэн кивалтӥсез, Глазов город. 1987-1989 - "Ижмаш" производственной огазеяськонысь 13 номеро жилищно- коммунальной управлениысь участоклэн кивалтӥсез, Ижевск город. 1989-1990 - "Ижсталь" хоккей командаысь тренер-администратор, Ижевск город. 1990-1991 - "Зенит" футбол клублэн тӧроезлэн воштӥсез, Ижевск город. 1991 - УАССР-ысь Физической культурая но спортъя кун комитетысь спортсооружениосъя валтӥсь инженер, Ижевск город. 1991-1994 - Удмурт Республикаысь Физической культурая но спортъя кун комитетысь "Ижспорт" центрлэн директорез, Ижевск город. 1994-1999 - Удмурт Республикаысь Физической культурая но спортъя кун комитетлэн тӧроезлэн воштӥсез. 1999-2000 - Удмурт Республикаысь Физической культурая но спортъя кун комитетлэн тӧроез. Удмурт Республикаысь Ужъя кун комитетлы тӧрое юнматон сярысь Удмурт Республикалэн президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Фефилов Сергей Самоновичез юнматоно Удмурт Республикаысь Ужъя кун комитетлы тӧрое Удмурт Республикалэн Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 35. Фефилов Сергей Самонович Вордскиз 1955-тӥ арын 8-тӥ январе УАССР-ысь Красногорск ёросысь Кокман посёлокын. Ӟуч. Дышетскемез вылӥ. 1984-тӥ арын йылпумъяз Ижевскысь гурт удысъя институтэз "гурт удысын механизация" специальностья, 1995-тӥ арын - Удмурт кун университетэз "экономика но ваньбур поттонэн кивалтон" специальностья. Пусъемын Удмурт Республикаысь Кун Кенешлэн Данъян грамотаеныз, Удмурт Республикаысь Правительстволэн Данъян грамотаеныз. 1969-1971 - 1 номеро ГПТУ-ын дышетскись, Ижевск город. 1971-1973 - Ижевскысь машина лэсьтон заводысь 252 номеро цехысь механосборочной ужъёсъя слесарь, Ижевск город. 1973-1975 - Советской Армиын. 1976-1979 - Ижевскысь машина лэсьтон заводысь 252 номеро цехысь механосборочной ужъёсъя слесарь, Ижевск город. 1979-1982 - "Ижмаш" производственной огазеяськонысь 227 номеро отделын инженер- технолог, Ижевск город. 1982-1984 - "Ижмаш" производственной огазеяськонысь 254 номеро цехын валтӥсь мастер, Ижевск город. 1984-1993 - "Ижмаш" производственной огазеяськонысь 254 номеро цехлэн кивалтӥсьлэн воштӥсез, Ижевск город. 1993-1995 - Удмурт Республикаысь Вылӥ Кенешлэн Промышленностья, транспортъя, связья но электрокужымъя ялан ужась комиссиезлэн тӧроез. 1995 - Нациос куспын но улосъёс куспын экономика ласянь ужпумъёсты эскеронъя центрлэн ёзэзлэн директорез, Ижевск город. 1995-1999 - Удмурт Республикаысь Правительстволэн Ужъя комитетэзлэн тӧроез. 1999-2000 - Удмурт Республикаысь Ужъя кун комитетлэн тӧроез. Удмурт Республикаысь Наукая, вылӥ но шор профессиослы дышетонъя кун комитетлы тӧрое юнматон сярысь Удмурт Республикалэн президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Шудегов Виктор Евграфовичез юнматоно Удмурт Республикаысь Наукая, вылӥ но шор дышетонъя кун комитетлы тӧрое Удмурт Республикалэн Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 36. Шудегов Виктор Евграфович Вордскиз 1952-тӥ арын 5-тӥ декабре Удмурт АССР-ысь Кез ёросысь Тортым черкогуртын. Удмурт. Дышетскемез вылӥ. 1975-тӥ арын йылпумъяз Удмурт кун университетэз "физика" специальностья. Физико-математической наукаосъя доктор, профессор. 1970-1975 - Удмурт кун университетын студент, Ижевск город. 1975-1980 - Ленинградысь кун университетлэн аспирантураяз стажировка, дышетскон. 1981-1990 - Удмурт кун университетысь вычислительной центрысь инженер-электрик, ассистент, валтӥсь преподаватель, доцент, Ижевск город. 1990-1993 - Ленинградысь кун университетлэн докторантураяз дышетскон. 1994-1999 - Удмурт кун университетысь выль материалъёслэн физиказыя но механиказыя кафедраысь профессор, наука ужъя проректор, Ижевск город. 1999-2000 - Удмурт Республикаысь Правительстволэн тӧроезлэн воштӥсез. Удмурт Республикаысь Музъем узырлыкъёсъя но му кутонэз радъянъя кун комитетлы тӧрое юнматон сярысь Удмурт Республикалэн президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Куншин Вячеслав Ивановичез юнматоно Удмурт Республикаысь Музъем узырлыкъёсъя но му кутонэз радъянъя кун комитетлы тӧрое Удмурт Республикалэн Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 37. Куншин Вячеслав Иванович Вордскиз 1944-тӥ арын 12-тӥ июле Ижевск городын. Ӟуч. Дышетскемез вылӥ. 1969-тӥ арын йылпумъяз Казаньысь кун университетэз "астрономогеодезия" специальностья. Пусъемын кык медален, Удмурт Республикаысь Правительстволэн Данъян грамотаеныз. "Геодезияя но картографияя отличник", "Дано геофизик". 1961-1963 - Казаньысь кун университетын студент. 1963-1966 - Советской Армиын. 1966-1969 - Казаньысь кун университетын студент. 1969-1972 - СССР-ысь Министръёслэн Кенешсылэн Геодезияя но картографияя кун управлениысьтыз (ГУГК) 2 номеро предприятилэн 27 номеро экспедициысьтыз инженер- геодезист, Свободный город, Амур улос. 1972 - СССР-ысь Министръёслэн Кенешсылэн ГУГК-ысьтыз 2 номеро предприятилэн 27 номеро экспедициысьтыз партиен кивалтӥсь, Свободный город, Амур улос. 1972-1973 - СССР-ысь Министръёслэн ГУГК-ысьтыз 2 номеро предприятилэн 27 номеро экспедициысьтыз валтӥсь инженерлэн воштӥсез, Свободный город, Амур улос. 1973 - СССР-ысь Министръёслэн Кенешсылэн ГУГК-езлэн Хабаровскысь топографияя техникумысьтыз отделениен кивалтӥсь, Хабаровск город. 1973-1977 - СССР-ысь Министръёслэн Кенешсылэн ГУГК-езлэн Хабаровскысь топографияя техникумезлэн директорез, Хабаровск город. 1977-1981 - СССР-ысь Министръёслэн Кенешсылэн ГУГК-ысьтыз 9 номеро предприятиысь 168 номеро экспедицилэн кивалтӥсез, Ижевск город. 1981-1982 - СССР-ысь Министръёслэн Кенешсылэн ГУГК-ысьтыз 9 номеро предприятиысь 168 номеро экспедицилэн Ижевскысь геодезияя бюроезлэн кивалтӥсез, Ижевск город. 1982-1988 - СССР-ысь Министръёслэн Кенешсылэн ГУГК-ысьтыз 9 номеро предприятилэн геодезияя Удмурт контораезлэн кивалтӥсез. 1988-1991 - СССР-ысь Министръёслэн Кенешсылэн ГУГК-ысьтыз "Уралаэрогеодезия" производственной огазеяськонлэн Удмурт люкетэзлэн кивалтӥсез. 1991-1999 - Удмурт Республикаысь Ижевск городысь Музъем узырлыкъёсъя но му кутонэз радъянъя комитетлэн тӧроез. 1999-2000 - Удмурт Республикаысь Музъем узырлыкъёсъя но му кутонэз радъянъя кун комитетлэн тӧроез. Удмурт Республикалы калыкез улон-вылонын утёнъя министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Светлана Ивановна Андрееваез азьло быдэсъяно ужезлэсь мозмытыса юнматоно Удмурт Республикалы калыкез улон-вылонын утёнъя министре Удмурт Удмурт республикалэн Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 17. Андреева Светлана Ивановна Вордскиз 1948-тӥ арын 15-тӥ ноябре Татарской АССР-ысь Мартовской ёросысь Ӟуч Дюм-Дюм гуртын. Ӟуч. Дышетскемез вылӥ. 1979-тӥ арын йылпумъяз Удмурт кун университетэз "промышленностез радъян" специальностья, квалификациез - "экономист". Пусъемын "За доблестный труд. В ознаменование 100-летия со дня рождения В. И. Ленина" медален. "Удмурт Республикаысь калыкез улон-вылонын утён удысысь дано ужась". 1964-1967 - ВЛКСМ-лэн Ленин райкомаз технической секретарь, Ижевск город. 1967-1968 - ВЛКСМ-лэн Ленин райкомаз инструктор, Ижевск город. 1968-1972 - ВЛКСМ-лэн Ленин райкомаз школаосъя комсорг, Ижевск город. 1972 - Ижысь машина лэсьтон заводлэн кадръёсъя отделаз валтӥсь инженер, Ижевск город. 1972-1975 - "Знание" огазеяськонлэн Ленин ёросысь организацияз кыл кутӥсь секретарь, Ижевск город. 1975-1977 - КПСС-лэн Ленин райкомезлэн ужез радъянъя ёзаз секретарь, Ижевск город. 1977-1984 - Ленин ёросысь Калык депутатъёслэн кенешсылэн быдэсъясь комитетаз секретарь, Ижевск город. 1984-1994 - Ленин ёросысь Калык депутатъёслэн кенешсылэн быдэсъясь комитетэныз кивалтӥсьлэн воштӥсез, Ижевск город. 1994-1995 - Ленин ёрос администрацилэн тӧроезлэн воштӥсез, Ижевск город. 1995-1999 - Удмурт Республикаысь Кун Кенешлэн улон-вылонэз радъян политикая, ужъя, тазалыкез но инкуазез утёнъя комиссиеныз кивалтӥсь, Ижевск город. 1999-2000 - Удмурт Республикаысь калыкез улон-вылонын утёнъя министр. Удмурт Республикаысь Ветеринарияя валтӥсь управленилы кивалтӥсь - Удмурт Республикаысь министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Бурдов Геннадий Николаевичез азьло быдэсъяно ужезлэсь мозмытыса юнматоно Удмурт Республикалы Ветеринарияя валтӥсь управленилы кивалтӥсе - Удмурт Республикаысь министре Удмурт Республикалэн Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 18. Бурдов Геннадий Николаевич Вордскиз 1951-тӥ арын 22-тӥ июле Татарской АССР-ысь Алексеевск ёросысь Красные Горки гуртын. Ӟуч. Дышетскемез вылӥ. 1973-тӥ арын йылпумъяз Казаньысь ветеринарияя институтэз "ветеринария" специальностья, 1992-тӥ арын - Москваысь Всесоюзной научно-исследовательской кун институтлэсь аспирантуразэ. Ветеринария наукаосъя кандидат. Пусъемын Россия Федерациысь Гурт удысъя министерстволэн Данъян грамотаеныз. "Россия Федерациысь дано ветеринарной врач", "Удмурт Республикаысь гурт удысъя дано ужась". Удмурт Республикаысь Правительстволэн премиезлэн лауреатэз. 1973-1974 - Удмурт АССР-ысь Завьялово ёросысь пӧйшур вордонъя "Ижевское" хозяйствоын ветеринарияя врач. 1974-1976 - Советской Армиын. 1976 - Пермь областьысь пӧйшур вордонъя "Пермское" хозяйствоын ветеринарияя врач. 1976-1982 - Удмурт АССР-ысь Завьялово ёросысь тылобурдо вордонъя "Вараксино" фабрикаын ветеринарияя врач. 1982-1987 - ӟеч выжы тылобурдо вордонъя "Увинский" совхозлэн директорез, Ува посёлок, Удмурт АССР. 1987-1989 - старшой научной ужась, ыж вордонъя научно-исследовательской лабораторилэн кивалтӥсез, Ижевск город. 1989-1994 - республикаысь ветеринарияя лабораторилэн директорез, Ижевск город. 1994-1999 - Удмурт Республикаысь Ветеринарияя валтӥсь управленилэн кивалтӥсез. 1999-2000 - Ветеринарияя валтӥсь управленилэн кивалтӥсез - Удмурт Республикаысь министр. Удмурт Республикалы печатья но иворъёсъя министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Сергей Флорович Васильевез азьло быдэсъяно ужезлэсь мозмытыса юнматоно Удмурт Республикалы печатья но иворъёсъя министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 19. Васильев Сергей Флорович Вордскиз 1959-тӥ арын 1-тӥ январе Удмурт АССР-ысь Глазов городын. Удмурт. Дышетскемез вылӥ. 1981-тӥ арын йылпумъяз Удмурт кун университетэз "ӟуч кыл но литература" специальностья, 1984-тӥ арын - Ленинградысь кун университетысь ӟуч литературая кафедралэсь аспирантуразэ. Филология наукаосъя кандидат, доцент. 1976-1982 - Удмурт кун университетын студент, ӟуч но советской литературая кафедраын ассистент, Ижевск город. 1982-1984 - Советской Армиын. 1984-1987 - Ленинградысь кун университетын стажёр - исследователь, аспирант. 1987-1995 - Удмурт кун университетысь ӟуч литературая кафедраын ассистент, доцент, Ижевск город. 1995-1997 - Удмурт Республикаысь Правительстволэн Нациосын ужанъя комитетаз валтӥсь специалист, кивалтӥсьлэн воштӥсез, Ижевск город. 1997-1999 - Удмурт Республикаысь Кун Кенешлэн пресс-службаезлэн кивалтӥсез, Ижевск город. 1999-2000 - Удмурт Республикаысь печатья но иворъёсъя министр. Удмурт Республикалы кунсьӧр кусыпъёсъя министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Виктор Аркадьевич Викуловез азьло быдэсъяно ужезлэсь мозмытыса юнматоно Удмурт Республикалы кунсьӧр кусыпъёсъя министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 20. Викулов Виктор Аркадьевич Вордскиз 1957-тӥ арын 10-тӥ феврале Украина ССР-ысь Кировоград городын. Украинец. Дышетскемез вылӥ. 1984-тӥ арын йылпумъяз Удмурт кун университетэз "история" специальностья, 1997-тӥ арын - Москваысь калык кусыпъёсъя кун институтэз "кун ужез радъян" специальностья, квалификациез "историк", "специалист - юрист". 1974-1976 - Кировоградысь лётно-штурманской училищеын курсант. 1976-1983 - граждан авиацияя Урал управленилэн Ижевскысь огазеям авиаотрядаз диспетчер, Ижевск город. 1983-1992 - правоез утёнъя ёзъёсын ужась, Ижевск город. 1992 - Удмурт АССР-ысь Министръёслэн Советэнызы кивалтӥсьлэн юрттӥсез, Ижевск город. 1992-1995 - Удмурт Республикаысь Мукет кунъёсын экономика удысын кусыпъёс возёнъя кун комитетэн кивалтӥсьлэн воштӥсез, Ижевск город. 1995-2000 - Удмурт Республикаысь кунсьӧр кусыпъёсъя министр. Удмурт Республикалы нациосын ужан политикая министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Владимир Николаевич Завалинэз азьло быдэсъяно ужезлэсь мозмытыса юнматоно Удмурт Республикалы нациосын ужан политикая министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 21. Завалин Владимир Николаевич Вордскиз 1957-тӥ арын 20-тӥ январе Удмурт АССР-ысь Яр ёросысь Лэзя гуртын. Удмурт. Дышетскемез вылӥ. 1979-тӥ арын йылпумъяз Ижысь гурт удысъя институтэз "агрономия" специальностья, 1987-тӥ арын - Свердловскысь вылӥ партийной школаез. Пусъемын Удмурт Республикаысь Правительстволэн Данъян грамотаеныз. 1979 - Яр ёросысь "Россия" колхозын старшой агроном, Удмурт АССР. 1979-1980 - Советской Армиын. 1980-1985 - ВЛКСМ-лэн Яр райкомаз нырысетӥ секретарь, Яр посёлок, Удмурт АССР. 1985-1987 - Свердловскысь вылӥ партийной школаын кылзӥсь (слушатель). 1987-1988 - Яр ёросысь "Новая жизнь" колхозысь парткомлэн секретарез, Удмурт АССР. 1988-1998 - Яр ёросысь "Новая жизнь" колхоз правлениен кивалтӥсь, Удмурт Республика. 1998-2000 - Яр ёрос администрацилэн тӧроез, Удмурт Республика. Удмурт Республикалы лэсьтӥськонъя, архитектурая но улон юртъёсты возёнъя министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Валерий Федорович Загайновез азьло быдэсъяно ужезлэсь мозмытыса юнматоно Удмурт Республикалы лэсьтӥськонъя, архитектурая но улон юртъёсты возёнъя министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 22. Загайнов Валерий Федорович Вордскиз 1945-тӥ арын 24-тӥ апреле Киров областьысь Котельнич городын. Ӟуч. Дышетскемез вылӥ. 1975-тӥ арын йылпумъяз Всесоюзной политической институтэз (Москва город) "промышленностьын теплоэнергетика" специальностья, 1979-тӥ арын - Москваысь калык хозяйствоя институтэз промышленной производствоез радъян" специальностья, 2000-тӥ арын - Москваысь тодон-валданэз будэтонъя но лэсьтӥськон удысын кадръёсты дасянъя институтэз "ЖКХ-ын но лэсьтӥськон удысын менеджмент" специальностья. Пусъемын "Ветеран труда" медален, мӧля вылын нуллон "Отличник нефтяной промышленности СССР" знакен, "Почётный работник ЖКХ России" знакен, Удмурт Республикаысь Кун Кенешлэн Данъян грамотаеныз, Удмурт Республикаысь Правительстволэн Данъян грамотаеныз. "Россия Федерациысь ЖКХ-лэн дано ужасез", "Удмурт Республикаысь калыклы улон-вылонын юрттэт сётон удысысь дано ужась". 1959-1963 - Воткинскысь машина лэсьтон техникумын дышетскись, Удмурт АССР. 1964 - му вӧй поттонъя "Первомайнефть" управлениын мастер, Отрадный город, Куйбышев область. 1965-1967 - "Якутзолото" трестлэн Нижний Куранах горнообогатительной комбинатысьтыз цехен кивалтӥсь, Якут АССР-ысь Алданск ёросысь Нижний Куранах посёлок. 1967-1970 - нефть но газ поттонъя "Первомайнефть" управлениын валтӥсь инженер, Отрадный город, Куйбышев область. 1970-1973 - КПСС-лэн город комитетаз инструктор, Отрадный город, Куйбышев область. 1973-1975 - нефть но газ поттонъя "Первомайнефть" управлениын цехен кивалтӥсь, Отрадный город, Куйбышев область. 1975-1984 - "Коминефть" огазеяськонлэн му портонъя трестэныз кивалтӥсьлэн воштӥсез, управленилэн кивалтӥсез, Усинск посёлок, Коми АССР. 1984-1985 - "Удмуртнефть" огазеяськонлэн Ижевскысь нефть но газ поттонъя управлениеныз кивалтӥсьлэн воштӥсез, Удмурт АССР. 1985-1987 - "Удмуртэнерго" огазеяськонын валтӥсь инженер, Ижевск город. 1987-1988 - Устинов ёросысь Калык депутатъёслэн кенешсылэн быдэсъясь комитетэзлэн тӧроез. 1988 - Удмурт АССР-ысь жилищно-коммунальной хозяйствоя министр. 1988-1997 - Удмурт Республикаысь жилищно-коммунальной хозяйствоя огазеяськонлэн валтӥсь директорез. 1997-1999 - "Удмурт Республикаысь жилищно-коммунальной хозяйствоя "ТПО" кун предприятилэн валтӥсь директорез. 1999-2000 - Удмурт Республикаысь лэсьтӥськонъя, архитектурая но улон юртъёсты возёнъя министр. Удмурт Республикалы калыкез дышетонъя министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Любовь Григорьевна Захароваез азьло быдэсъяно ужезлэсь мозмытыса юнматоно Удмурт Республикалы калыкез дышетонъя министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 23. Захарова Любовь Григорьевна Вордскиз 1950-тӥ арын 6-тӥ ноябре Удмурт АССР-ысь Ижевск городын. Ӟуч. Дышетскемез вылӥ. 1973-тӥ арын йылпумъяз Удмурт кун университетэз "английский язык" специальностья. Пусъемын мӧля вылын нуллон "Отличник народного просвещения Российской Федерации" знакен, Удмурт Республикаысь Правительстволэн Данъян грамотаеныз. "Удмурт Республикаысь калыкез дышетон удысысь дано ужась". 1968-1972 - Удмурт АССР-ысь Ижевск городысь 56 номеро школаын старшой пионервожатой. 1972-1977 - 73 номеро школаын англи кыллы дышетӥсь, внеклассной но внешкольной ужез радъясь, Ижевск город. 1977-1984 - КПСС-лэн Индустриальной райкомаз инструктор, пропагандая но агитацияя ёзэн кивалтӥсьлэн воштӥсез, Ижевск город. 1984-1987 - КПСС-лэн Удмурт обкомезлэн пропагандая но агитацияя отделаз инструктор, Ижевск город. 1987-1994 - Устинов ёросысь Калык депутатъёслэн кенешсылэн быдэсъсь комитетэзлэн тӧроезлэн воштӥсез, Ижевск город. 1994-1996 - Устинов ёрос администрацилэн тӧроезлэн воштӥсез, Ижевск город. 1996-1997 - Устинов ёрос администрацилэн тӧроез, Ижевск город. 1997-1999 - Удмурт Республикаысь калыкез дышетонъя министрлэн воштӥсез. 1999- 2000 - Удмурт Республикаысь калыкез дышетонъя министр. Удмурт Республикалы экономикая министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1.Валерий Николаевич Захваткинэз азьло быдэсъяно ужезлэсь мозмытыса юнматоно Удмурт Республикалы экономикая министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 24. Захваткин Валерий Николаевич Вордскиз 1965-тӥ арын 21-тӥ октябре Ижевск городын. Ӟуч. Дышетскемез вылӥ. 1990-тӥ арын йылпумъяз Ижевскысь механикая институтэз "лобась аппаратъёс поттон" специальностья,1992-тӥ арын - Удмурт кун университетэз, "экономика но производствоен кивалтон" специальностья. 1983-1987 - Чуйков нимо вылӥ военной командно-инженерной Краснознаменной училищеын курсант, Пермь город. 1987-1990 - Ижевскысь механикая институтын студент, Ижевск город. 1990-1993 - нефть кыскон машинаос лэсьтон заводын инженер-экономист, Ижевск город. 1993-1994 - Удмурт Республикаысь Экономикая министерствоын экономист. 1994 - Удмурт Республикаысь Экономикая министерствоын промышленностьлэн экономикаезъя ёзэн кивалтӥсь. 1994-1996 - Удмурт Республикаысь экономикая министрлэн воштӥсез. 1996 - Удмурт Республикаысь экономикая министрлэсь ужзэ быдэсъясь. 1996-1999 - Удмурт Республикаысь экономикая министрлэн нырысетӥ воштӥсез. 1999-2000 - Удмурт Республикаысь экономикая министр. Удмурт Республикалы инкуазь узырлыкъёсъя но инкуазез утёнъя министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1.Александр Владимирович Кулагинэз азьло быдэсъяно ужезлэсь мозмытыса юнматоно Удмурт Республикалы инкуазь узырлыкъёсъя но инкуазез утёнъя министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 25. Кулагин Александр Владимирович Вордскиз 1957-тӥ арын 1-тӥ январе Таджик ССР-ысь Душанбе городын. Ӟуч. Дышетскемез вылӥ. 1978-тӥ арын йылпумъяз Москваысь кортъя но сплавъёсъя институтэз "полупроводникъёс но диэлектрикъёс" специальностья, 1983-тӥ арын - СССР-ысь Наукаосъя академилэн Музъемлэн физикаезъя институтысьтыз аспирантураез. Физико-математической наукаосъя кандидат. 1978-1980 - Таджик ССР-ысь Геологияя управленилэн Лымшор геофизика экспедициезлэн сейсмологической партияз инженер-электронщик, геофизик-оператор. 1980-1983 - СССР-ысь Наукаосъя академилэн Музъемлэн физикаезъя институтысьтыз аспирант, Москва город. 1984-1986 - "Удмуртгеофизика" ГТП-ын воштӥсь геофизик, Ижевск город. 1986-1992 - "Геофизика" ГТП-лэн тематикая партиеныз кивалтӥсь, Ижевск город. 1992-1998 - акциосын "Удмуртгеофизика" огазеяськонын валтӥсь геофизик, Ижевск город. 1998-1999 - Удмурт Республикаысь Музъем узырлыкъёсъя комитетэн кивалтӥсь, Ижевск город. 1999-2000 - Удмурт Республикаысь инкуазь узырлыкъёсъя но инкуазез утёнъя министр. Удмурт Республикалы гурт удысъя министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Владимир Петрович Невоструевез азьло быдэсъяно ужезлэсь мозмытыса юнматоно Удмурт Республикалы гурт удысъя министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 26. Невоструев Владимир Петрович Вордскиз 1959-тӥ арын 4-тӥ ноябре Удмурт АССР-ысь Юкаменск ёросысь Гулекшур гуртын. Удмурт. Дышетскемез вылӥ. 1987-тӥ арын йылпумъяз Ижевскысь гурт удысъя институтэз "гурт удысэ механизациез пыӵатон" специальностья. "Россия Федерациысь гурт удысысь дано ужась". Нимыз пыртэмын Удмурт Республикалэн Данъян пул вылаз. 1974-1978 - Глазовысь совхоз-техникумын студент, Удмурт АССР. 1978-1980 - Советской Армиын. 1980-1987 - Юкаменск ёросысь "Трактор" колхозын валтӥсь инженер, Удмурт АССР. 1987-1998 - Юкаменск ёросысь "Трактор" колхозлэн тӧроез, Удмурт Республика. 1998-2000 - Юкаменск ёрос администрацилэн тӧроез, Удмурт Республика. Удмурт Республикалы культурая министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Людмила Ивановна Пескишеваез азьло быдэсъяно ужезлэсь мозмытыса юнматоно Удмурт Республикалы культурая министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 27. Пескишева Людмила Ивановна Вордскиз 1948-тӥ арын 11-тӥ ноябре Удмурт АССР-ысь Сюмси ёросысь Сюрек гуртын. Удмурт. Дышетскемез вылӥ. 1973-тӥ арын йылпумъяз Удмурт кун университетэз "биология" специальностья, 1995-тӥ арын - кун службая Урал академиез "кунэн но интыын кивалтон" специальностья. Пусъемын Удмурт Республикаысь Кун Кенешлэн Данъян грамотаеныз. 1967-1969 - Ключевка восьмилетней школаын биологилы но химилы дышетӥсь, Ключевка посёлок, Сюмси ёрос, Удмурт АССР. 1969-1981 - "Знамя" ёрос газетлэн редакцияз гожтэтъёсъя ёзэн кивалтӥсь, Сюмси село, Удмурт АССР. 1981-1985 - Сюмси райсоветлэн исполкомаз ЗАГС ёзэн кивалтӥсь, Удмурт АССР. 1985-1990 - Сюмси ёросысь Калык депутатъёслэн кенешсылэн исполкомаз секретарь, Удмурт АССР. 1990-1992 - Сюмси ёросысь Калык депутатъёслэн кенешсылэн тӧроезлэн воштӥсез Удмурт АССР. 1992-2000 - Сюмси ёросысь Калык депутатъёслэн кенешсылэн тӧроез, Удмурт АССР. Удмурт Республикалы вузкаронъя но калыклы юрттэт сётонъя министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Петр Парфельевич Пономарев азьло быдэсъяно ужезлэсь мозмытыса юнматоно Удмурт Республикалы вузкаронъя но калыклы юрттэт сётонъя министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 28. Пономарев Петр Парфельевич Вордскиз 1949-тӥ арын 10-тӥ июле Воронеж областьысь Острогожск ёросысь Ближняя Полубянка черкогуртын. Ӟуч. Дышетскемез вылӥ. 1968-тӥ арын йылпумъяз Пермьысь вузкаронъя техникумез "калыкез сюдонъя технолог" специальностья, 1974-тӥ арын - Москваысь вузкаронъя заочной институтэз "вузкаронын экономика" специальностья. Пусъемын Удмурт АССР-ысь Министръёслэн Кенешсылэн Данъян грамотаеныз, Удмурт Республикаысь Правительстволэн Данъян грамотаеныз. "Удмурт Республикаысь вузкарон удысысь ветеран", "Удмурт Республикаысь юрттэт сётон удысысь дано ужась". 1964-1968 - Пермьысь вузкаронъя техникумын дышетскись. 1968 - Ижевскысь столовойёслэн трестысьтызы 72 номеро столовойысь производствоен кивалтӥсьлэн воштӥсез. 1968-1969 - Ижевскысь 60 номеро столовойын пӧрась. 1969-1971 - столовойёсъя нырысетӥ трестысь 29 номеро столовойлэн кивалтӥсезлэн воштӥсез, Ижевск город. 1971-1972 - 55 номеро столовойлэн филиалэныз кивалтӥсь, Ижевск город. 1972-1981 - Ижевск городысь Калык депутатъёслэн кенешсылэн быдэсъясь комитетаз вузкаронъя ёзэн кивалтӥсьлэн воштӥсез, ёзэн кивалтӥсь. 1981-1985 - "Росторгодеждалэн" Удмурт вузкарон базаеныз кивалтӥсь (али - Россия Федерациысь Вузкаронъя министерствоысь оптовой вузкаронъя Удмурт предприятиез), Ижевск город. 1985-1994 - Удмурт АССР-ысь вузкаронъя министрлэн воштӥсез. 1994 - Удмурт Республикаысь вузкаронъя министрлэсь ужзэ быдэсъясь. 1994-2000 - Удмурт Республикаысь вузкаронъя но калыклы юрттэт сётонъя министр. Удмурт Республикалы тазалыкез утёнъя министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Сергей Геннадьевич Шадринэз азьло быдэсъяно ужезлэсь мозмытыса юнматоно Удмурт Республикалы тазалыкез утёнъя министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 29. Шадрин Сергей Геннадьевич Вордскиз 1954-тӥ арын 31-тӥ мае Удмурт АССР-ысь Можга гоподын. Ӟуч. Дышетскемез вылӥ. 1977-тӥ арын йылпумъяз Ижысь медициная кун институтэз "врач- лечебник" специальностья, 2000-тӥ арын - Россия Федерацилэн Президентэз бордысь кун службая Российской академиез "кунэн но интыын кивалтон" специальностья. Пусъемын Удмурт Республикаысь Правительстволэн Данъян грамотаеныз. "Удмурт Республикаысь тазалыкез утён удысысь дано ужась". 1971-1977 - Ижевскысь медициная кун институтын студент. 1977-1978 - Горький чугун сюреслэн Ижевск станциезлэн больницаяз врач- терапевт, Ижевск город. 1978-1979 - Горький чугун сюреслэн Ижевск станциезлэн больницаяз врач- ординатор, Ижевск город. 1979-1981 - Советской Армиын. 1981-1986 - "Нефтемаш" заводлэн 9 номеро медсанчастяз старшой терапевт, валтӥсь врачлэсь ужзэ быдэсъясь, валтӥсь врач, Ижевск город. 1986-1989 - Ижевскысь медициная училищелэн директорез, Ижевск город. 1989-1995 - "Ижсталь" огазеяськонлэн 2 номеро медсанчастяз валтӥсь врач, Ижевск город. 1995-2000 - Удмурт Республикаысь тазалыкез утёнъя министр. Удмурт Республикалы югдурез утёнъя министр юнматон сярысь Удмурт Республикалэн Президентэзлэн указэз Удмурт Республикалэн Конституциезлэн 92-тӥ ёзэтысьтыз 7-тӥ люкетэзъя пуктӥсько: 1. Владимир Филиппович Щербаковез азьло быдэсъяно ужезлэсь мозмытыса юнматоно Удмурт Республикалы югдурез утёнъя министре Президентэз ужзэ быдэсъян вакытлы. 2. Та указ кужыме пыре сое гожтэм нуналысен Удмурт Республикалэн Президентэз А. А. Волков Ижевск город, 2000-тӥ арын 30-тӥ декабре � 30. Щербаков Владимир Филиппович Вордскиз 1955-тӥ арын 1-тӥ январе Омск областьысь Нижнекамск ёросысь Борисовка гуртын. Ӟуч. Дышетскемез вылӥ. 1980-тӥ арын йылпумъяз СССР-ысь МВД- лэсь Горький городысь вылӥ школазэ "правоведение" специальностья, 1993-тӥ арын - Россиысь МВД-лэсь академизэ "правоез утёнъя ёзъёслэсь ужзэс радъян" специальностья. Юридической наукаосъя кандидат. Пусъемын "За личное мужество" орденэн, куинь медален, Удмурт Республикаысь Правительстволэн Данъян грамотаеныз. 1972-1975 - граждан авиацияя Омскысь лётно-технической училищеын курсант. 1975 - Магадан областьысь Шмидтовск огазеям авиаотрядын авиатехник. 1975-1976 - Октябрь революция нимо заводысь 42-тӥ отделын электромонтёр, Омск город. 1976-1980 - СССР-ысь МВД-лэн Горький городысь вылӥ школаяз кылзӥсь. 1980-1981 - Омск городысь Ленин ёросысь ОВД-лэн БХСС-аз инспектор. 1981-1983 - Омск областьысь УВД-лэн БХСС-аз инспектор. 1983-1986 - Омск городысь Советской ёросысь ОВД-лэн БХСС-аз ёзэн кивалтӥсь. 1986-1987 - Омск областьысь УВД-лэн УБХСС-лэн 1-тӥ ёзэныз кивалтӥсьлэн воштӥсез. 1987-1989 - Омск областьысь УВД-лэн Омск городъя БХСС-аз ёзэн кивалтӥсь. 1989-1990 - Омск областьысь УВД-лэн БХСС-аз ёзэн кивалтӥсь. 1990-1991 - Омск областьысь УВД-лэн УБХСС-лэн кивалтӥсезлэн воштӥсез. 1991-1992 - Омск областьысь УВД-лэн СКМ БЭП-лэн кивалтӥсезлэн воштӥсез. 1992-1993 - криминальной милицияя службаен кивалтӥсьлэн воштӥсез, Омск областьысь УВД-лэн БЭП ёзэныз кивалтӥсь. 1993-1995 - УВД-лэн кивалтӥсезлэн воштӥсез - Омск областьысь УВД-лэн личной составеныз ужанъя службаеныз кивалтӥсь. 1995-1996 - Омск областьысь югдурез утёнъя управленилэн кивалтӥсезлэн нырысетӥ воштӥсез - криминальной милицияя службалэн кивалтӥсез. 1996-1998 - Россиысь МВД-лэн Экономика удысын йыружъёсъя управлениеныз кивалтӥсьлэн воштӥсез, Москва город. 1998-2000 - Удмурт Республикаысь югдурез утёнъя министр. Висёнъёслы - пум Та нуналъёсы 60 ар тырме Ижысь санаторияя служба кылдэм дырысен. Туннэ городын санэпидемнадзорлэн 6 центрез усьтэмын. Отысь ужасьёслэн тышеменызы пум понэмын уноезлы паласькись висёнъёслы. Шер пумиськыло маляриен, полиомиелитэн, А группаен гепатитэн курадӟисьёс. Ог ньыль ар талэсь азьло бугырскиз вал дифтерия. Эмъясьёс та кышкыт виёнэз но вормыны быгатӥзы кадь. Озьы, ортчем арын 5 мурт гинэ соин черлаз. Жаляса верано, 1961-тӥ арын шаерамы вуиз шыр висён, ӵемысь пумиськылэ лемтэй висён. Но котькуд мылкыд карись соизлэсь но, таизлэсь но висёнлэсь утиськыны быгатэ, прививка пуктыса. Санэпидемнадзорын ужасьёс таӵеосты шумпотыса гинэ пумиталозы. Та нуналъёсы трос калык лыктэ грипп висёнлы пумит вакцина басьтон понна. Э. Кумачева. Кыкетӥез - тужгес йӧноез Кылем ар понна берлосьсэ ортчиз удмурт культурая "Дэмен" огазеяськонлэн кивалтэтэзлэн кенешез. Отчы быръем эшъёс котыр ласянь эскеризы 2000-тӥ арлы пусъем ужпумъёслэсь кызьы быдэсмемзэс, дасязы выль арлы планлэсь инъетсэ. Кызьы тодмо, туэ 110 ар тырме удмурт кунлыкмес кылдытӥсьлэн Трокай Борисовлэн вордскемез дырысен. Калыкмылэн батыр пиез вань улонзэ сӥзиз но сётӥз асьме кунмес кылдытонлы но удмуртлыкмес кужмоятонлы. Куӟебай Гердэз сямен ик Трофим Борисовез но юнме шорысь тюрьмае пуктӥзы. Отын ик со, мискинь, висьыса но пумозяз жуммыса кулӥз. Жаляса верано луэ: Трокай Борисовлэн дано ужъёсыз сярысь тросэз удмуртъёс тыро- пыдо уг тодо на. К.Куликовлэн, С.Шихаревлэн, Н.Павловлэн но Н.Кузнецовлэн гинэ книгаоссыя, гожъямъёссыя батырмес син азязы пуктыны тыршо, луоз. Юбилеез яркыт но паськыт пусъёно вылэм котькытын. Солэсь нимзэ Можга педколледжлы сётон сярысь куронэн дэменчиос трос пол вазиськылӥзы ни пӧртэм интыосы, кивалтӥсьёслы. Дано удмурт пимылэсь нимзэ одно ик сётоно вылэм огезлы коть дышетскон интылы, музейлы, библиотекалы, урамлы. Таин валче котькытын ортчытоно кенешонъёс, бадӟым научно- практической конференция, кыӵе ке но конкурс, шуом, дышетскисьёслэн творчествозыя, историмес тодэмзыя. Оскиськом: та уже шаерысьтымы Кун Кенеш но, Правительство но, министерствоос но, творческой огазеяськонъёс но одно ик пыриськозы. Т.Борисовлэсь юбилейзэ данэн пусъён пумысь устоесь ӵектонъёс сётӥзы А.Разин, Н.Кузнецов, П.Князев, В.Осипов, З.Байтерякова, А.Сапожникова, Р.Рождественская, Р.Разин, В.Савельев но музонъёсыз. Озьы ик кенешемын вашкала йылолъёсмес - Пӧртмаськонэз, Быдӟымналэз, Герберез, Вилез но мукет шулдыръяськонъёсыз - чын удмурт сямен пусъён сярысь. Та кенешонын 2000-тӥ ар понна Трокай Борисов нимо премиен пусъён сярысь диплом сётэмын Грах ёросысь удмуртъёслэн сӥё-дано азьветлӥсьсылы, удмуртлыкмес ӝутонын кужымзэ жалятэк ужась йӧно нылкышнолы, нялтас вералом на, Трокайлэн выжыысьтыз ик эшмылы Альбина Владимировна Тарасовалы. Сюлмысьтымы ӟечкыласьком выль лауреатэз. Сӥзиськом азьланяз уката бадӟымесь азинсконъёс, тазалык но шудбур. Выль арен, ӟырдыт сюлэмо эшмы! Кылем арын таӵе ик дипломен пусъемын вал А.А.Разин. Кин луоз 2001-тӥ арлы лауреат - ӵектэлэ, гажано юлтошъёс, асьтэлэсь кандидатъёстэс. Кирилл ЛОМАГИН. Устоосыз быръемын Ижысь участковой инспекторъёс куспын конкурс вазенгес ялэмын вал ни. Та нуналъёсы солэн нырысетӥ люкетэз йылпумъяськиз. Городысь витяз ик ёросын тодмо луизы устоосыз милиционеръёс. Табере кылиз на соос пӧлысь тужгес чырмытсэ, визьмозэ бырйыны. Конкурс чурыт куронъёсъя радъямын. Котькуд участковойлэсь, шонер ыбылӥськыны, йыружъёсты сэрттыны-пертсыны быгатэмзэ сяна, эскеремын ас музъем вылаз (участоказ) чылкытлыкез чакласа воземзэ. Озьы кузётэк кылем котькуд пуны-коӵыш "пыд пуктыны" быгатӥз инспекторлы. Со сяна, участокын медам луэ регистрацитэк улӥсьёс но. Пусйыны кулэ, туала арын та куронъёсты быдэсъян секыт йӧтэ. Уго тросаз участокъёсын уг тырмо огшоры телефонъёс, рациос гинэ но. Соинтэк-а та удысын ужаны мылкыд карисьёс ӧжыт. Али Ижын 216 инспектор интые 144 мурт лыдъяське. Со пӧлысь ог 10 процентэз гинэ удысын дас арлэсь кема ужа. Кылемъёсыз - егитъёс. Э. Кумачева. Ӟечкылан 1957-тӥ арын Можга педучилищеез но 1962-тӥ арын Ижевск пединститутысь историко-филологической факультетлэсь удмурт люкетсэ ӵош йылпумъям яратоно, дуно эшъёсме: Альбина Журавлёваез (Охотникова), Александр Байметовез, Людмила Христолюбоваез, Леонид Загребинэз, Александра Романоваез, Александра Рябчиковаез, Мария Решетниковаез, Евдокия Кайсинаез, Эльвира, Клавдия, Тамара Широбоковаосты, Екатерина Семеноваез, Валентина Суроноваез, Валентина Мироноваез, Анна Волковаез, Таисья Осотоваез, Маргарита Сунцоваез, Наталья Малковаез, Эльвира Игнатьеваез, Роза Багратионоваез, пичи дырысен ӵош шудэм, дышетскем эшме Мария Алексееваез но мукет нылъёсмес, пиосмес ӟечкыласько Выль арен, выль даурен! Сӥзисько юн тазалык, шуд, капчи мылкыд, йыр вадьсады чагыр инбам, улонысь ваньзэ умойзэ гинэ. Ортчем улондэс малпаса Эн висетэ сюлэмдэс. Аръёс ортчо шуыса Эн оскытэ асьтэдыз. Азьпалады трос гинэ Шудо аръёс мед луозы. Быдэ вуэм нылъёсты-пиосты Сюлэмдэс мед шунтозы. Ваньдэсты гажаса, Баграш-Бигра школаысь дышетӥсь М. К. Баграшова (Артемьева). Гажано эшъёс, кинлэн "Удмурт дунне" газет пыр ӟечкыламез потэ ӵыжы-выжыоссэ, тодмооссэ, эшъёссэ, коньдон ыстоно редакцилэн таӵе расчётной счётаз: ИНН 1834300211, р/с 40603810300000010020 ФКБ "Газпромбанк", к/с 30101810300000000853, БИК 049401853, ОКПО 13051252, ОКОНХ 87100. 426039, г.Ижевск, Воткинское шоссе, 10-й км, тел. 44-41-00, 44-43-44. Газетлы гожтӥськемъёс тырыны кулэ 15 манет, нош кин ӧз гожтӥськы - 30 манет. Коньдон тырем сярысь квитанциез ыстоно ӟечкылан гожтэтэн ӵош, нош кин газетлы гожтӥськиз - ӟечкылан гожтэтады почтаын печать пуктытоно на. Гожтэтъёстэс кӧня ке нуналлы вазьгес ыстэ - ӟечкыланды бере медаз кыльы. Гурт калыклы кузьым Декабрь толэзьлэн пумаз Пичи Пурга ёросысь Аксакшур культура юртын туж тунсыко ужрад - элькунысьтымы сӥё-дано кырӟасен Геннадий Ганьковен пумиськон ӝыт - ортчиз. Артистэз яратӥсьёс но гажасъёс клубе трос гинэ люкаськиллям. Нош кӧня юанъёс вал! Кыӵе пӧртэмесь но маскараесь соос. Юан-веранъёс вискын Г. Ганьков аслэсьтыз сюлэме пырымон чебересь кырӟанъёссэ нёжтылӥз. Учкисьёс эшшо но эшшо солэсь кырӟанъёссэ курылӥзы. Геннадий Ганьков паймытӥз на мукетыныз но: калыкез серекъятӥз музон адямиослэн куараосынызы вераськыны быгатэменыз. Со Ельцин но вал, Горбачёв но. Баянэн но огдыре ик гитараен шудэмезлы но синмаськизы. Тросэз угось туала вакытэ фонограммаен дышемын ни кырӟаны. Нош Ганьков быдэс ӝытэз аслаз улэп куараеныз шулдыртӥз. Гурт калык солы шуд но тазалык азьланяз чебересь крезьгуръёс, бадӟымесь вормонъёс сӥзиз. Л. Яковлева. Тау кареме потэ Выль ар азьын Удмурт театре "Сельсовет Маня" спектакле ветлэмъёс ӝытсэс урод ортчытӥзы шуыса ӧз ӧпкеле , дыр. Ваньмызлэн мылкыдыз умой вал. Пусйымон соиз: сценарист Ар-Серги шедьтэм секыт мылкыдын улӥсь муртлэсь мылкыдзэ ӝутыны амал. Мынам тужгес но тау кареме потэ Валентина Загуляевалы. Туж-туж зол син азе пуктӥз со Сельсовет Манялэсь тусбуйзэ. Та ролез понна гинэ сое шуыны луэ, дыр, быдӟым удмурт артистка. Шӧдӥське: Валентина Александровналэн али самой вылӥе ӝутскон вакытэз. П. Скобелев. Кизилиос верало 15.01-21.01 Овен (21.03-20.04). Арнялэн кутсконаз саесъёстэс пужалляса уж борды басьтӥське. Гань-гань пукиды ке, асьтэлэсь мылкыддэс но, эшъёстылэсь мылкыдзэс но куашкатоды. Шуг-секытъёслэсь эн кышкалэ. Оло нош огинтыын лёгаськись ужасьёстэс вырӟытыны быгатоды, соос сётэм кылзэс мырдэм-мырдэм быдэсъяны кутскозы. Нуналлы быдэ яратоно муртэныды пумиськылыны уд быгатӥське ке, средае соин одно ик адӟиське. Четверг - ӟеч нунал семьяын яке юртъер котырын выль уж мытыны, кылсярысь, квартирадылэсь туссэ воштыны. Эшъёстылы укыр эн оскиське, соос пӧлысь кин ке но тӥледды эрекчаны быгатоз. Телец (21.04-21.05). Понедельнике тӥ кышкасьтэм луоды. Яратоно адямидылы мылкыддэс усьтыны быгатоды яке кивалтӥсьтылы вань верано кылъёстэс вералоды. Эн куректэ, со учыр бере выль ужан инты утчано луиды ке. Выль удысады но ӝог будоды, тӥ кадь ужез яратӥсь муртъёсты котькытын но дунъяло ук. Вторнике - секыт нунал, тӥ туж ӝог жадёды, нош четверг - чылкак мукет вакыт, выль ужъёслы инъет кылдытон нунал. Мултэс куаемдылэсь кышкаськоды ке, пятницае трос эн сиське, курытсэ эн юэ. Шутэтскон нуналъёсы котькуд кылдэс чакласа вералэ, угось кышкытлык вань, семьяяды керетон пуромоз шуыса. Эгызоос (22.05-21.06). Арнялэн нырысетӥ нуналъёсаз мылкыддылэсь кылзӥське. Сюлэмдыя уж борды басьтӥське. Эшъёсыныды пумиськылэ, чеберъяськон арбериос басьтэ. Тазалыктэс кыдатыны юрттозы кырын юмшан, кӧс утён. Изьыны вазьгес выдэ. Средае семья кусыпъёсты тэшканы быгатозы. Матысь адямиостэс вӧсь эн каре. Та ласянь быдэс арня ӵоже чаклаське. Арня нунал пайдаё луэ коньдон ужпумъёстэс быдэстон понна. Кемалась малпам вуздэс, дӥськут яке чеберъяськон арбери, басьтэ. Ӝыт яратоно муртэныды яке ӵыжы-выжыосыныды пумиськылэ. Кисло-кусло (22.06-23.07). Вторнике кулэ луоз матысь адямиеныды кенешон. Со юрттоз мылкыддэс ӝутыны, асьтэлы оскондэс юнматыны. Та нуналэ тырше яратоно муртъёсыныды гинэ пумиськылыны. Четверг - секыт нунал спортсменъёс, озьы ик пӧртэм ӵошатсконъёсы но конкурсъёсы пыриськыны мылкыд карисьёс понна. Нылпиосыныды кусыпъёсты сӧриськозы. Покчиостылы уз кельшы, тӥ соослэн ужъёсынызы тунсыкъяськиськоды шуыса. Ужан арняды усто йылпумъяськоз - тӥледлы тунсыко удыс яке ужпум висъялозы. Субботае тодмоды яке ӵыжы-выжыды секыт висьыны усем яке кулэм сярысь ивор кылыны быгатоды. Лев (24.07-23.08). Арняды умой кутскоз. Понедельнике трос вераськоно луоды эшъёыныды, ӵыжы-выжыосыныды, бускельёсыныды, гожтэт яке телеграмма ыстоно луоды. Та нуналэ тужгес удалтоз дышетскисьёслы, нош средае - суредасьёслы но музыкантъёслы, озьы ик ог-огзэсты яратӥсь муртъёслы. Пятницадэс одӥг ужлы сӥзёно луоды. Сое быдэстыны куроз кузпалды яке ӵош ужась эшты. Со вакытэ туж сак кариське. Коньдонэн суп-сап выремды, мултэс оскиськонды секыт югдуре вуттыны быгатозы. Эн дыртэ малпаськытэк маке пумысен кылдэс сётыны. Арня нуналдэс семьяяды ортчытэ. Озьы асьтэдыз шудоен шӧдоды. Тӥледлы ӟеч кылъёс вералозы адямиос, кудъёссэ тӥ асьтэос вылӥ дунъяськоды. Дева (24.08-23.09). Арнялэн кутсконаз кышкыт ӧвӧл уждэс воштыны. Тӥ ӝог будоды, тӥледды ӵош ужасьёсты гажалозы. Дышетскиськоды ке, занятиостэс эн келлялэ. Ӟеч дасяськемын ӧвӧл ке но, экзаменъёсы но зачётъёсы ветлэ, эн кышкалэ, ӟеч отметкаос басьтоды. Вуоно кык нунал ӵоже тазалыктэс чаклалэ, уката ик сюлэм висёнъёсын курадӟисьёс. Субботае но арня нуналэ матысь адямиосыныды керетыны быгатоды. Асьтэдыз кияды кутыны тырше, угось сотэк ченгешонды кема кыстӥськоз. Басьяськыны эн дыртэ - ӟеч вуз уд быръе, коньдондэс токма куштоды. Нош миськон но утялтӥськон ужъёсты капчиен радъяськозы, дырдэс но трос уд быдтэ. Весъёс (24.09-23.10). Понедельнике удалтоз яратӥсь муртъёслы. Вторнике ӵош ужась эшъёсыныды кусыпъёсты юнмалозы. Тӥледлы юрттыны ӵектӥськозы бадӟым опытэн, быгатӥсь адями. Эн вунэтэ тазалыкты сряысь, Оло нош та нуналысен зарядка лэсьтыны кутскоды. Четверге - ӟеч нунал дышетскисьёс, наукаен вырисьёс понна. Озьы ик быгатоды выль кусыпъёс радъяны но азьлооссэ юнматыны. Субботае тӥ мултэс асьтэлы оскиськиськоды, озьы ужъёстэс кулэезъя малпаськытэк быдэстыны быгатоды. Азьланяз со сярысь жаляно медад луэ вал. Скорпион (24.10-22.11). Арнялэн нырысетӥ нуналъёсаз тазалыкты лябӟыны быгатоз, соин валче хронической висёнъёсты сайкалозы. Асьтэдыз секыт эн каре, мултэс эн сиське, курытсэ эн юэ. Среда шуд ваёз ог-огзэс яратӥсьёслы. Субботае кузпалэныды яке ӵош ужась эшъёсыныды коньдон ужпумъёсты эскероно луоды. Соин валче куспады споръяськонъёс кылдозы. Арня нуналэ семьяяды кыӵе ке шудо учыр луоз, оло нош пичияк коньдон но басьтоды. Стрелец (23.11-21.12). Тӥляд сыӵе вакытты - интыяды пукыны уд чидаське. Мытэм ужды йылаз-пумаз вуттымтэ ке, вырӟытэ сое. Малпамдылэсь тросгес коньдон кулэ луиз ке, эн жалялэ. Пайдаез бӧрысь бадӟымгес луоз. Средае анай-атайёсыныды мукет матысь адямиосыныды кусыпъёстэс тупатыны тырше, соосын азьвыл керетӥды ке вал. Четверге - тӥ понна вузан-басьтон нунал. Кинэ ке эрекчаны, асьтэлы мултэс барыш поттыны эн тырше, асьтэдыз пӧялозы. Субботае тӥледды витё уно пумиськонъёс, кенешонъёс. Дасяське ӟырдыт споръяськонлы. Тӥледын пумитъяськисьёс луозы. Малпандэс эн воштэ, соку одно ик вормоды. Козерог (22.12-20.01). Вторнике арлыдоосын но кивалтӥсьёсын кусыпъёсты шуггес радъяськозы. Зэмлык тӥ палан ке но, вожвылъяськыны эн выре. Ӵектонъёсты- дэмланъёсты чалмытак гинэ сак кылзэ. Арнялэн шораз пазяськон мылкыдды шуге-леке вуттыны быгатоз, кышкытлык вань, кыӵе ке дуно арберидэс коньдондэс ыштоды шуыса. Шутэтскон нуналъёстэс гурт ужъёсты быдэстонлы яке шутэтсконлы сӥзе. Машинаен кытчы ке потыны малпаськоды ке, одно ик чаклалэ, тӥяськемын ӧвӧл-а со. Сюрес вылын шудтэм учыре медад шеде вал. Водолей (21.01-19.02). Понедельнике удалтоз ужбергатӥсьёслы, искусство удысын тыршисьёслы. Тӥляд ужамды-бызьылэмды потэ. Таӵе мылкыдды синмаськымон, но мае ке чутрак воштыны эн дыртэ. Ӵуказеяз но югдур уз воштӥськы, тӥ пӧртэм ужпумъёсты капчиен быдэстоды. Кивалтӥсьёс ужасьёсынызы одӥг кыл ӝог шедьтозы. Ӟырдам мылкыдды юрттоз семья ужъёстэс но йылаз-пумаз вуттыны. Нош четверге бадӟым ужъёслэсь палэнске. Бадӟым юондыръёсы но эн пыриське. Арня нуналэ мытэм ужды одно ик пайдаё луоз. Чорыгъёс (20.02-20.03). Арнялэн нырысетӥ нуналаз ик магазинъёсы вамыштэ - кемалась малпам вуздэс басьтыны дыр вуиз. Вторнике уз удалты студентъёслы. Шугъяськоды, экзаменъёстэс сётыку. Четверге автомобилен ворттылӥсьёслы сюрес вылын сак луоно. Субботае яратоно муртэныды эн споръяське. Одӥг кыл уд шедьтэ, йыркур, вожан, ог-огдэ янгыше уськытон мылкыдды гинэ пуромоз. Та нуналэ аракы мултэс эн юэ, угось кышкылык вань, тазалыкты лябӟоз шуыса. Арня нуналэ пӧртэм конкурсъёсы, лотереяосы пыриськыны быгатоды. ШӦКЫЧ Маскарчиос Кизьнод - пиньтэм кылёд Миквор городысь квартираезлэн укно янак вылэ интыяськиз но тамак пукккетыса пуке. Олён картэз шоры куаретытэк ӧз чида: - Мар озьы укноын чечег кадь пукиськод? Лобӟыны-мар шедьтод куинетӥ этажысьтыд. Кышномурт палэнскыса гинэ вуттӥз, картэзлэн кесяськемез кылӥське ни. - Мар луиз? - кушетскиз Олён. - Кизьныны шедьтӥ но, лэсьтэм пиньёсы музэ усизы, - ӧжыт уг бӧрды Миковр. Собере ӝогак гинэ дӥсяськиз но ураме потӥз. Воргоронлэсь турын пӧлтӥ утчаськемзэ бускельёсыз синйылтӥзы. - Мардэ ке ыштӥд, оло, Миквор? - Пиньёсме утчасько ай. - Тон мар-о, Олён, картэдлэсь пиньёссэ пыргытӥд ке шат? - бускель кышномурт соку ик Миквор кышно доры юалляськыны вуиз. Марзэ-созэ тодыса ини, кӧтыз лыч сузьымон гориз. Кӧня ке улыса Миквор но пыриз, киосыныз йыр бордаз кутӥськем. - Ой, быриз ук вить сю манет, быриз, тани учкы, - тӥяськем пиньёссэ кышноезлы возьматӥз со. Т.ПЕРЕВОЗЧИКОВА. Шаркан район, Вортча починка гурт. ТОЛ БАБАЙЛЫ - ГОЖТЭТ Корольёс но королеваос Синвуоссэ ӵушылӥсь нылоксэ анай буйгатэ: - Эн бӧрд, нылы, та празднике тонэ юнме ӧз ӧте ук. Ӵок ойдо дуно кузьым тыныд ӧз ке сюры, озьы ке но, уждэ умоен лыдъязы. Шоколадэн но утялтӥзы, мороженой но сиид, спектакль но учкид, ёлка котырын но эктӥд, шулдыръяськид выжыкылысь геройёсын ӵош. Мӧзмыт шат вал тыныд? - Ӧй. Но азьланяз мон Тол Бабайлы уката но умойгес гожто, суредъёсме но, пужыятэм ужъёсме но ысто солы, - нылашлэн бусаськем синъёсыз сайкытазы. Республикаысьтымы Почта кусыпъёсъя управление Егитъёсын ужанъя кун комитетэн ӵош Выль ар азьын ялӥзы вал "Тол Бабайлы - гожтэт" конкурс. Та ӧтёнлы шаерысьтымы куинь сюрслэсь ятыр нылпи вазиськиз. Та нылаш музэн ик котькудӥз оскиз, вылды, солэсь гожтэтсэ Тол Бабай одно ик синйылтоз, умоен лыдъялоз. Нош егитъёслэн "Редуктор" культура дворецазы 4-тӥ январе ортчем празднике лыктыны шуд усиз куинь сю пала нылпиослы но соослэн анай-атайёссылы. Нимысьтыз кылдытэм комиссия уен-нуналэн, шуэм сямен, нылпиослэн гожтэтъёссы но киужъёссы пӧлы выемын вал. Ох, капчи ик вылымтэ та уж, озьы ке но, устооссэ бырйыны кулэ. Бырйизы, дворецлэн фойеяз нылпи киужъёсын но гожтэтъёсын нимысьтыз адӟытон но радъязы. Маиз но ӧвӧл отын: кылбуръёс, мадиськонъёс, пӧртэм куронъёс, ӟечкыланъёс. Соосын артэ суредъёс, пужыятэм, чильпам ужъёс, ас вурем-лэсьтэм шудонъёс. Пиналъёслы Тол Бабай гинэ кузьмаськыны уг быгаты вылэм, тросэз нылъёс но пиос кунгож сьӧрысь ассэ Санта Клаусэз но паймытысалзы быгатэменызы. Шаерамы таӵе ужрад кыкетӥзэ ортчиз ни. 2000-тӥ арез пумитаку, Тол Бабайлы сюрс вить сю пала нылпи вазиськиз, нош празднике ӧтемын вал кык сю нылпи. Но кызьы адӟиськом, ужрадэ пыриськисьёслэн лыдзы пумен йылэ. Соин валче нылпиослы юрттӥськыны мылкыд карисьёс но йыло. Егитъёсын ужанъя кун комитетлэн тӧроез Андрей Гальцин но Почта кусыпъёсъя управленилэн тӧроез Юрий Кайгородов оскытӥзы: соослэн та кичӧлтонзы сямлы пӧрмоз. - Нош кутсконэз та ужрадлэн туж огшоры вал. Котькуд Выль ар азьын Ижевскысь почтамтэ люкасько нылпиослэн гожтэтъёссы, киужъёссы, суредъёссы, - шуэ Юрий Михайлович. - Мар кароно соосын? Нырысь адӟытон гинэ радъямы вал, собере конкурс ортчытыны малпам. Конкурс бере, иське, вормисьёс но луыны кулэ. Нош вормисьёслы - кузьым. Пичиос пӧлын ужез тужгес устоен лыдъямын вал Ижевскысь сизьым аресъем Аня Кастильолэн. Сое шумпоттӥзы небыт мунёен. Нош Сьӧд зарезь дурысь "Орлёнок" шутэтскон лагерьын гужем шутэтскыны шуд усиз Сарапулысь Аня Братухиналы. "Удмуртия" росгосстрах тросэзлы нылпиослы страховой полисъёс сётӥз. Кун Кенешлэн депутатэз луыса, Юрий Кайгородов нимаз кузьым висъяз Кез ёросысь Вуж Гыя гуртысь Алексей Максимовлы. Солэн кылбурен гожтэтэз герӟаськемын вал угось депутатлэн уженыз но. Ческыт кузьымъёсын но мунё шудонъёсын нылпиос пусъемын вал аспӧртэмлыко ужъёссы понна но. Тани Шаркан ёросысь Вортча починка гуртысь куинь братъёс Сергей Ефремов, Алексей но Семён Ложкинъёс картонлэсь лэсьтӥллям кыйлэсь дворецсэ, ачиз кый но вӧзаз интыяськемын. Нош дворец вылын - пиослэн гожъямъёссы. Сергей кылем арын но вормисьёс пӧлы шедиз вал, братъёсызлэсь но мылкыдзэс лӧпкытӥз Тол Бабайлы гожтэт ыстыны. Макем шумпотӥзы пиос ӧтенлы, табере зэмос Тол Бабаез но адӟыны кылдоз, пе. Конкурсэз радъясьёс ӧз палэнтэ удмурт кылын гожтэтъёсты но. Таоссэ эскерыны ас вылаз басьтӥз "Удмурт дунне" газет. Усто гожтэт ыстэм дас нылпи озьы ик пыриськиз та шулдыръяськонэ. Удмурт егитъёслэн "Шунды" дэменлыксы вормисьёслы "Шундыкар" лагере кык путёвка висъяз. Со кузьымлэн кузёосыз луизы Пичи Пурга ёросысь Сергей Андреев но Алнаш ёросысь Байтерег гуртысь Ирина Тарасова. Дуно кузьым ӧз ке но басьты, макем лӧптэмын Шаркан ёросысь Кечгуртын улӥсь сизьым аресъем Юля Хохрякова. Та солэн кыкетӥ вормонэз ни. 2000-тӥ арын ик пыриськиз вал "Миша" журналысь "Я и мои права" конкурсэ. Со поннаЮлялы алигес гинэ кузьмазы фотоаппарат. Ёлка котырын бергамзэ анаез Ольга Дмитриевна фотое пуксьытӥз ни. - Мон королева кадь, - лӧптэмын нылаш, - празднике нуыны дорам машинаен лыктӥзы. Ёросысь почта ёзъёс сюлмаськизы угось пиналъёсты но соослэсь анай-атайёссэс та шулдыръяськонэ вуттыны. Тол Бабай нылпиосын люкиськиз, ыстэм гожтэтъёсты лыдӟыны солы вуоно Выль арозь дыр тырмоз. Л.МАЛЫХ. Сарапулысь Аня Братухина. Сергей Ефремов, Алексей но Семён Ложкинъёс празднике лыктӥзы песянаенызы Екатерина Яковлевнаен ӵош. Туспуктэмъёсыз В.Беломорскихлэн. Ӟечкылан Вордӥськем нуналэныз ӟечкыласьком Можга городын улӥсь Валентина Михайловна КАМАШЕВАЕЗ. Матысь адямиосызлы котьку юрттыны дась луэмез, ӵыжы-выжыоссэ дунъямез понна тау карыса, кема аръёс ӵоже шудо но тазалыко улон сӥзиськом. Кайгуос палэнтӥд мед ортчозы, нош шудэд медаз пега. Нылпиосыд котьку шумпотон но ӟеч ивор мед ваёзы, семья кусыпъёсты таӵе ик шунытэсь мед луозы. Котьку егит, чырткем лу тон, апай! Тынад ай ваньмыз азьпалан - Кык пол куамын ӧвӧл ай со арлыд, Капчи но пачылась тыныд мылкыд. Гажаса но яратыса ӵыжы-выжыосыд. Россиысь прессалэн нуналэныз! Ивор вӧлмытӥсь ёзъёсын но полиграфияя предприятиосын ужасьёсты ӟечкыласько праздникенызы - Россиысь прессалэн нуналэныз. Кунлэн улоназ прессалэсь бадӟым интызэ, кулэлыксэ дунъяса, нимысьтыз таӵе нунал юнматэмын вал. Дасэтӥ арзэ ини пусйиськом сое. Нош Россиысь печатьлэн историез кутске странаын ивор вӧлмытӥсь нырысетӥез ёз - "Ведомости" газет бордысен. Иворъёсъя ёзъёс тросэз юн утё Россиысь журналистикалэсь йылолъёссэ, валтӥсь ужпумен лыдъяло калыклы ивор басьтыны но ас малпанзэ шара вераны конституциен юнматэм правозэ быдэсъяны луонлык кылдытонэз, зэмлыклэсь палэнскытэк, югдурез валаса возьматонэз. Удмуртиын потӥсь газетъёс-журналъёс мыло-кыдо пырисько шаермылэн, ужась коллективъёслэн улоназы, соос ӵош ортчизы пӧртэм шуг-секытъёс пыр. Озьы эшшо но зол йылӥз газет-журналъёсты дунъян. Со сярысь верало Россиын прессалы сӥзем фестивальёсын но конкурсъёсын басьтэм вормонъёс. Журналистика синучкон пыр кадь возьматэ быдэс улонэз. Медаз пӧрмы со кун властьлэн ёзъёсыныз нюръяськон арберилы. Оскисько, азьланьын но тӥ лыдӟисьёстэс шумпоттоды лэчыт ужпумъёслы сӥзем материалъёсыныды, ӟеч адямиос сярысь гожъямъёсыныды. Мыло-кыдо пыриськоды республикаын экономикаез ӝутонэ, улон-вылон удысэз юнматонэ но политикаез азинтонэ. Сӥзисько юн тазалык, удысады выль азинсконъёс. Удмурт Республикалэн Президентэз А. А. Волков. БЫШКИСЬ ЕЗ СЬӦРЫН Вал ньыль пыдын ке но ӵемтылэ Адями шеде пытсэт сьӧры. Визь люкалоз-а меда со? Дышоз-а законъёсты гажаса улыны? Таӵе юанъёсын алигес мон вуылӥ Ижысь 9 номеро колоние. Отын пумиськи пытсэт сьӧры шедем удмурт пияшен А.Н.Снегирёвен. Ӝикыт но чылкыт дӥсяськемын со. - Вордски но будӥ Игра станциын, йылпумъяй шор ёзо школаез, - ачиз сярысь лад-лад мадьыны кутскиз Александр. - Атае гурт котырын ма но со лэсьтэ, уже уг пота, муми - пилем пулъёсты бырйись. Ми куать кузя нылпиос, мон - самой покчиез. Вазь кышнояськи. Аслым али 19 арес, пимылы арес но вить толэзь. Пукисько ни 1 ар но 3 толэзь. Татчы дорам ветло муми, варманае, кузпалы, маке курисько - ваё. Тамак уг кыскиськы. Лыдӟиськисько. Специальность басьтыса ӧй вуы. Механизатор луэме потэ. Скал кыскон фермаын ужай вал, скал кыскон аппаратъёсты чакласа-тупатъяса вози. Уждун толэзяз ог 800 манет тырылӥзы. Возимы парсь, тылобурдо. Ветыл басьтӥм. Юртъер вӧзамы бакчамы пичигес вал. Бусые дас сотка висъязы на. Но отын музъемез урод вал, картофкаез чик ӧз удалты... - Саша, озьыен, картофка лушкаса шедид?- юай мон. - Бен. Куинь кузя огъёзъёсыным бусыысь бичаса кельтэм картофкаез лушкам. Быдэн куинь мешокен тырим но бертыны потӥм. Столовой дорысен участковой кырмиз. Куиньнамес ик быдэн куинь арлы пуктӥзы. Амнистия улэ ӧм шеде. Вуоно арын 1-тӥ сентябре, кык ар тырмиз ке, условно-досрочной амалэн бертыны тыршо. Нарушениосы ӧвӧл, татысь самодеятельностья коллективын арганэн шудӥсько. Улонмы чидамон, но пытсэт сьӧрын сюлэм пилиськыны турттэ, пиме киям возьысал, кузпалэлэсь туж мӧзмисько, ужаме потэ, предмы Василий Степанович Данилов выльысь уже кутыны пумит ӧвӧл. - Татчы шедемед уз ни поты, дыр? - Коть зарни клетка медло, но кулэ ӧвӧл. Ноку но татчы медам ни шедьы. Уг ни лушкаськы, озьыен, уг шедьы. Кӧня уждун басьто, кӧня картофка будоз - тырмоз. Эрикысь эшъёсылы таӵе дэмланме верасал: ноку но медаз шедьылэ соос пытсэт сьӧры, медаз лушкаське, мултэс медаз юэ, калык пӧлын ассэды умой мед возёзы. Александр Снегирёвен люкиськиськеммы бере, колониен кивалтӥсьлэн воштӥсез Ф.М.Якупов валэктӥз: - Та пияшлы оскыны луэ. Ми доры со шедьыны кулэ ӧвӧл ни. Амнистия бере, Фаттах Мангумович верамъя, колониысь мозмытэмын 254 адями, 37 муртлэн пукон дырыз кулэстэмын. Условно-досрочной амалэн толэзьлы быдэ ог 25-30 адями дырызлэсь вазь потэ. Библиотекарь Виталий Буторин пуктэмын 7 арлы, 4 ар ортчем ни. Сарапулысь пияш 18 арес дыръяз вина юыса мукет кудӟем муртэ жугем, ӝоб кылъёсын куаретэмез понна. Соиз дораз бертэм, больницае мынэм интые, выдэм но кулэм. Пияш туж ӧпкеле, адямиез но улонлэсь люкиз, ачиз но дышетсконзэ куспетӥ кариз шуыса. Техникумез со заочной амалэн дышетскыса йылпумъям ни, университетэ пыремез потэ. Шонер сюрес вылэ султон вылысь, Виталий ялан лыдӟиське, тужгес но кельшо историяя книгаос. Чида, кылзӥське, азьлань улонэз сярысь рос-прос малпаське. Колонилэн азбараз пуктэмын туж чебер пу черк. Сое ӝутӥллям асьсэос пытсэт сьӧрын пукисьёс. Табере пушсэ вутто ни, асьсэос ик суредаса обросъёс ошыло, куд-огъёссэ палэнысь но кузьмаллям. Кивалтэ та ужен огез пукись мурт Александр Поздеев. Солы 15 ар сётӥллям вылэм, армиын мукет солдатъёсын ӵош командирзэс виемзы понна. Ӝыны дырзэ Александр пукем ни. Пытсэтын со инмарлы матэ кариськем, эрикын улон-вылонзэ чылкыт ӧретӥ ӧръяны малпа. Дыр вуоз, зоналэн пичи ӧсэз усьтӥськоз но, соос эрике потозы. Калыкын шуо: "Валлэн пыдыз ньыль ке но, ӵемтылэ". Но ведь шуо на: "Ассэ утисез инмар но уте". П.СКОБЕЛЕВ. Валэктэ юрист Сэрегез нуэ адвокат Лилия Шкляева Дано донор Трос аръёс ӵоже вирме сётъяй висисьёслы. 25 ар талэсь азьло со понна басьтӥ вал "Почётный донор" гадьпус (значок-а, медаль-а шуоно?). Нош удостоверенизэ ӧз сётэ, курыны но ӧй дӥсьты. Табере, пенсие потыкум, сыӵе документ туж кулэ вылэм. Нош вир басьтон станциын шуизы: вуж бумагаосты шедьтыны уз луы ни. Ма кароно? И. Воронцова, Ижын улӥсь. "Россиысь дано донор" гадьпус сярысь положениез Россия Федерациысь Правительство юнматӥз 1995-тӥ арын 26-тӥ августэ. "Россиысь дано донор" гадьпус ышемын ке, кыкетӥзэ сое уг сёто. "Россиысь дано донор" но "СССР-ысь дано донор" ышем удостоверениос выльысь лэсьтӥсько тазьы. Адями гожтэ курон (заявление), отын пусъе нырысетӥ удостоверение басьтэм арзэ, удостоверениезлэсь номерзэ, сое кинлэсь сётэмзэ. Яке куре вир басьтӥсь учреждениысь справка, отын пусъемын медло сётэм вирлэн яке плазмалэн лыдыз. Та бумагаосты ыстоно Москвае, Россиысь Гематологияя но трансфузиологияя институтэ (адрессэ вералозы вир басьтон станциын). Соосъя Россиын Тазалыкез утёнъя но медицина промышленностья министерствоын лэсьтозы выль документ. Вир сётонэн герӟаськем документъёс утисько 50 ар ӵоже. Соин ик Воронцова эшлэн осконэз вань выль удостоверение басьтыны. Быдэ вуымтэ ужась Быдэ вуымтэ нылме больницае санитаркае огдырлы гинэ кутӥзы. Шуизы: кӧня ке ужалоз но учком, яралоз-а со милемлы, уз-а. Эскерон дыр (испытательной срок) солы тупатыны луэ шат? В. Лузина. Якшур-Бодья район. Россия Федерациысь Уж сярысь законъёсысь кодекслэн 21-тӥ ёзэтэз (статьяез) озьы лэсьтыны уг лэзьы. Больницаысь кивалтӥсьёс, быдэ вуымтэ муртлы эскерон дыр тупатыса, законэз тӥяло. Пиме пуктӥзы... Кема малпаськи, дорады вазиськоно-а, ӧвӧл-а шуыса. Пие, урод адямиосын кушласькыса, ульчаын эрказъяськылэм. Кудӟем адямиослэсь дӥськутъёссэ, изьыоссэс, коньдонзэс талаллям. Зэм, мон огпол но ӧй адӟылы озьы капыръям котырзэ. Ваньзэ киултылӥзы, вылды, укылтэм юлтошъёсыз. Приговор чурыт вал: пиме куинь арлы пуктоно но ваньбурзэ талано. Пуктӥзы. Талазы. Пие пытсэтысь мозмиз но, выльысь лыктӥзы ваньбурзэ таланы. Сояз учыре, пе, кӧня кулэ сомында котырзэ ӧм басьтэ вал. Паймод но бырод: вань улытозям шат сое озьы ниёзы? Вань-а сыӵе закон? И. Афанасьева, Можгаын улӥсь. Вань сыӵе закон. Нимаське тазьы: Россия Федерациысь йыртэмам понна тупатон кодекс (уголовно-исправительной кодекс). Приговорысь вань ваньбурез талан сярысь люкетэз быдэстэм бере, таламтэ ваньбур шараяське ке, приговор кутӥсь суд яке приговорез быдэсъян интыысь суд таизъя ваньбуръя кутэ на нимысьтыз определение. Ваньбурез выльысь таланы луэ таӵе учыръёсы: приговорлэн кужымез ӧз ышы на (адями судэ шедьылэмын лыдъяськон вакытэ), янгышам мурт та ваньбурез басьтыны таланы вуттӥз шедёно коньдонэн, ваньбур уг сюры таланы лэзьымтэ арбериос пӧлы). Кык интыын ужасько Мон школаын арняяз кӧня ке урок нуисько. Ваньмон дыръям базарын грузчикын ужасько. Таяз шӧдскымон тросгес уждун вуэ. 1998-тӥ арын мыным школаын доходъя налог ласянь льгота тупатӥзы, квартира басьтыны юрттыса. Табере кытын мыным сыӵе льгота луыны кулэ - школаын-а, базарын-а? А. Заколюкин, Ижын улӥсь. Выт (налог) басьтӥсь ёзтӥ сётыны кулэ вань барышъёсты сярысь декларация. Соя отын рос-прос валэктозы кыӵе пайдаысь кӧня льгота басьтондэс. Квартираямы уло муртъёс Милям квартирамы лыдъяське кӧня ке муртлэн ваньбурез. Нош отын огмы но ум улӥське, отчы аренда сярысь огкылъя лэзимы муртъёсты. Ми пӧлысь кин-о барышысь выт тырыны кулэ? С. Поздеева, Играын улӥсь. Улон интыдэс арендае сётон сярысь огкылын (договорын) барышез кинлы сётон сярысь нимысьтыз верамтэ ке, со люкиське, квартира кузёос куремъя. Озьы ик люкиське тыроно выт но. Судэ вазиськиз но... ӧз лыкты Йыртэманэн герӟаськымтэ граждан ужъёсын судын пумисько истец (судэ вазиськись) но ответчик. Кылылэме вал, судэ куд-ог ответчикъёс уг лыкто шуыса. Нош мынам ужам (мон ответчик) ӧз вуы истец. Мукетъят но ӧз лыкты ке, ачизтэк суд решение кутыны быгатоз-а? И. Романов, Ижын улӥсь. Сыӵе заочной нимаськись решениез кутыны луэ ответчик лыктымтэ дыръя но истец соглаш кариськыку. Нош истец судъян дырез тодыса вылысь кыкетӥзэ но ӧз вуы ке, судья решение кутыны быгатэ солэсь куронзэ эскерытэк кельтыны. Нылпиен кышно ваисько Улонам тунсыко югдур кылдӥз. Мон кузпал ваи нылпиен кышномуртэ. Кышное куре квартираямы сое прописать карыны. Марысь мар ке со быгатоз-а улон интыелэсь ог люкетсэ аслыз карыны? В. Баталов. Тӥ ӧвӧл гожтӥллямды: кӧня кузя улӥськоды квартираяды, со приватизировать каремын-а, кыӵе быдӟалаез. Нош интыды приватизация пыр асьтэлы басьтэмын ӧвӧл ке, отчы кинэ ке пыртыны но прописка (табере со нимаське пусъён яке регистрация) лэсьтыны яра, татын улӥсь но пусъем ваньмыз быдэ вуэмъёс соглаш кариськемъя гинэ. Озьы кутэм муртъёс мукетъёсыз сямен ик право басьто улон интыез кутыны. Отӥяз семьяысь адямиос луэмысь дугдыса но сыӵе правозэ уг ышто. Ватсаса быръёнъёс 2001-тӥ арын 18-тӥ мартэ ортчоз Удмурт Республикаысь Кун Кенеше быръёнъя 2 номеро Чехов но 54 номеро Левобережнье округъёсъя ватсаса депутатъёсты быръён. Удмурт Республикаысь Быръёнъя комиссия тодматскыны дэмла быръёнъя округъёслэн схемаенызы но быръёнъёс азьын чаклам ужрадъёсын. Удмурт Республикаысь Кун Кенеше ватсаса депутатъёсты быръёнъя округъёслэн гожъёссы Быръёнъя 2 номеро Чехов округ (Ижевск город) Округе пыро: Воткинск шоссе урамысь 68, 70, 72, 76, 78, 80, 80 а, 82, 84, 86, 88, 90, 92, 92 а, 94, 96, 98, 100, 102, 102 а, 104, 108, 110, 112, 114, 122, 122 а, 124, 126, 128, 128 а, 130, 132, 132 а, 136 а, 138 а, 142, 158, 160, 162, 164, 166, 166 а, 166 б номеро юртъёс; Джержинский урамысь 11, 13, 15, 17, 19, 21, 21 а, 23, 25, 27, 29, 33, 35, 37, 39, 43, 45, 47, 49, 51, 53, 59, 61, 63, 65, 67, 69, 71, 75, 77, 79, 81, 83, 85, 87, 93, 95, 99, 101, 103 номеро юртъёс; Депо проездысь 2, 4, 5, 6 номеро юртъёс, республикаысь клиникая 1 номеро больницалэн стационарез, 7 номеро медсанчасть, нылпи ваён 5 номеро юрт; республикаысь клиникая 1 номеро больницалэн нылпи ваён юртэз; Воткинск шоссе урамысь 17 номеро юрт; республикаысь клиникая 1 номеро больницалэн общежитиез; Пищевик посёлокысь юртъёс. Быръёнъя 54 номеро Левобережье округ (Глазов город) Округе пыро: Толстой урамысь 37/11, 41, 47, 49 номеро юртъёс, Пектин урамысь 2, 4 а, 6, 8, 12, 16 номеро юртъёс. К.Маркс урамысь 1,3, 5, 7 номеро юртъёс, Калинин урам. Быръёнъёс азьын ужрадъёсты ортчытон дыр: - депутатэ кандидатъёсты ӵектон но округъёсысь (улосвылъёсысь) быръёнъя комиссиослы ивортон, кандидатлы дурбасьтыса кинюртэмъёс люкан - быръёнъя округъёслэсь схемазэс печатлам нуналысен туэ 15-тӥ февралёзь; - кандидатъёсты пусъён понна, документъёсты округъёсысь (улосвылъёсысь) быръёнъя комиссиосы сётон - туэ 15-тӥ февралёзь 24 часлэсь бере кыльытэк; - депутатэ кандидатъёсты пусъён - туэ 20-тӥ февралёзь; - быръёнъёс азьын ӧтён-ӝуткан уж - депутатэ кандидатэз пусъем нуналысен туэ 16-тӥ мартэ 24 часозь; - пусъем кандидатъёслы ӧтён-ӝуткан уж нуыны эфирын дыр но газетъёсын инты висъян - туэ 21-тӥ февральысен 16-тӥ мартозь; - улосвылъёсысь быръёнъя комиссиосын куараосты пусъем дырлэсь вазь сётон - туэ 3- тӥ мартысен 14-тӥ мартозь; - участокъёсысь быръёнъя комиссиосын куараосты пусъем дырлэсь вазь сётон - туэ 15- тӥ мартысен 17-тӥ мартозь. ШӦКЫЧ - Каргетэммы кивалтӥсьёслэн пелязы ӝог кылӥськем - электротыллы дунъёс нош ик будо, эстӥськон но трослы дуноялоз, пе. "Дунъёс сьӧры уиськыса вуттыны уг луы. Пенсиосты йылэтэм каро, уждунэз будэто, нош шумпотонэз чельы йыл быдӟа но ӧвӧл: электротыл интые сюсьтыл ӝуатыса пуком, машина питранъёсты куасьёсын но велосипед питранъёсын воштом. Сюрес дунъёсты будэтозы - гуртын пуком". Редакцие вуэм гожтэтъёсъя. Суредэз В.Шиловлэн. 9 номеро колониын алигес ӧсъёссэ усьтӥз выль черк. Сое вӧсяз, дан-буро кариз Ижевск-Удмурт Епархиен кивалтӥсь архиерей Николай. Пытсэт сьӧрын пукисьёс кема возьмазы та юртэз. Табере соос татын котькуд нунал вӧсяськыны быгатозы. Уго черк но Инмар оскон сёто, лулпушез юнмато, чылкыт, сайкыт малпанъёс кузьмало. Туспуктэмез С. Воеводинлэн. Вордскемзэс та нуналъёсы пусъё: Назаров Михаил Иванович - Удмурт Республикаысь Правительстволэн тӧроезлэн воштӥсез; Фефилов Сергей Самонович - Удмурт Республикаысь Ужъя кун комитетлэн тӧроез; Кельмаков Валентин Кельмакович - Удмурт кун университетысь профессор; Алашеева Алевтина Анатольевна - Удмурт кун университетысь дышетӥсь, "Удмурт дунне" газетлэн редакциысьтыз азьвыл ужась; Пономарёв Владимир Алексеевич - тодмо тодосчи (учёной) но политик. Аб. 411. Удмурт пиосмурт, 39/170/66, ужлы но коньдонлы уг ёрмиськы. Улон интые вань: куинь комнатаен кирпич юртэ, хозяйствое, музъеме. Кузпалы кулэмын, будо кык быдэ вуымтэ нылпиосы. Вина уг юиськы. Капчи но шулдыр мылкыдо, шудӥсько арганэн. Тодматскысал шулдыр, капчи мылкыдо ас ёзо яке егитгес нылкышноен, пумит ӧвӧл нылпиосызлы. Улон сярысь пумиськыса вераськысалмы. Аб. 412. Удмурт пиосмурт, 34/182/70, юонэн уг эшъяськы. Улэ гуртын, ужа шофёрын. Коньдон пӧлын уг пыласькы, но ёрмыса но уг улы. Вань сад-бакчаез, улыно-вылыно коркаез. Тодматскысал 25-35 аресъем нылмуртэн. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Кун Кенешын 9-тӥ январе люкаськылӥз Кун Кенешлэн Президиумез. Со кутӥз Кун Кенешлэсь дас витетӥ сессизэ 2001-тӥ арын 13-тӥ феврале люкан сярысь постановление. Сессилэн ужанрадаз пыртыны чакламын дас сизьым ужпум. Соос пӧлын уно законопроектъёс но нормая актъёс: "Удмурт Республикаын наркотикъёсын но наркоманиен нюръяськонъя 2001-тӥ-2003-тӥ арлы ужрадъёс" программа сярысь" Кун Кенешлэн постановлениезлэн инъетэз, "Удмурт Республикаысь Кун Кенеш" но "Удмурт Республикаысь Сюресъя фондлэн 2001-тӥ арлы бюджетэз сярысь" законъёслэн инъетъёссы. Дас витетӥ сессиын озьы ик эскерыны пусъемын "Удмурт Республикаысь Правительство сярысь", "Удмурт Республикаын инвестициосын ужанэз радъян сярысь законэ воштонъёс но ватсанъёс пыртон", "Удмурт Республикаын калыкез уже интыян сярысь" законъёслэн инъетъёссы но мукет ужпумъёс. Кенеше люкаськемъёс юнматӥзы Президиумлэсь, ялан ужась комиссиослэсь 2001-тӥ арын нырысетӥ паларлы ужан планъёссэс. Озьы ик юнматӥз кун служащийёслэн Реестразы ватсанъёс пыртон пумысен постановлениез. Со герӟаськемын республикалэн улосвылаз миръясь судьяослэсь институтсэс кылдытонэн. Кун Кенешлэн Президиумезлэн постановлениеныз кутэмын Красногорск, Дэбес, Яр, Сарапул ёросъёслэн Уставзы. Президиум умоен лыдъяз "Кун Кенешлэн Аппаратэзлэн структураез сярысь" постановление воштонъёс пыртонэз. Кун Кенешлэн Аппаратэз 24 муртлы кулэстэмын луоз. Кенешез нуиз Кун Кенешлэн Тӧроез Игорь Семенов. Удмурт Республикаысь Кун Кенешлэн пресс-службаез. Выль арын ӟеч азинсконъёс! Удмурт Республикаысь Кун Кенешлэн но ас нимыным ӟечкыласько республикаямы потӥсь газетъёсын но журналъёсын ужасьёсты но ветеранъёсты Россиысь пресалэн нуналэныз! Берло дас ар ӵоже республикаямы потӥсь изданиослэн лыдзы трослы йылӥз. Иворъёсын тодматэм сяна, соос яркыт возьмато калыклэсь огъя улон-вылонзэ, кун властьлэн вань ёзъёсызлэсь ужзэс эскерон-чакланъя пайдаё амал луо. Ас малпандэ, мылкыддэ шара вераны луонлыкез лыдъяло туала обществолэн бадӟым вормонэныз. Со дыре ик кун но общество журналистэз куро солы сётэм эрикез валаса кутыны, котькуд учырез пыр-поч сэрттыны-пертчыны, калыклы дыраз но шонер ивор вуттыны, зэмлык понна нюръяськыны. Ивор вӧлмытон удысын вань тыршисьёслы сӥзисько юн тазалык, шудо-буро улон, ӵуказе нуналлы оскон. Выль арын выль азинсконъёс тӥледлы! Удмурт Республикаысь Кун Кенешлэн Тӧроез И.Н.Семёнов. "Выль даурлэн нылпиосыз" Таӵе проект дасяз вал выль ар азьын Нылкышноослэн "Гармония" лигазы. Выль даурез пумитан уе вордскем пичильтокъёслэн нимъёссы тодмо луизы соку ик. Та часъёсы Ижевскысь 14 семья быдэс адямилы йылӥз: 8 ныл но 6 пи нырысьсэ шокчизы та вие. Озьы луэ ке шуыны, пичильтокъёсты пумитанлы кутскон сётэмын вал часъёслэн 12 пол шуккемзы бере, ньыль минут ортчыса ик. Городысь Ленин ёросысь Оксана но Сергей Михайленкоослэн вордске Ева нылзы. Вераны кулэ, егит анай-атайёс "Гармония" лигалэн дасям проектэз сярысь уг ке тодо вылэм, даурлэн кыкетӥ луэм пиналызлэн Алексей Жуковлэн анаез Светлана та сярысь азьвыл ик кылылэм. Светлана пияшказэ 1 час 30 минутэ 5 номеро нылпи ваён юртын вордӥз. Ӵапак та пичильтокъёс - Ева но Алёша - басьтозы Нылкышноослэн лигаенызы дасям дуно кузьымез - чек книжкаез. Али та счётын 35 сюрс манет лыдъяське, но пиналъёслы 7 арес тырмытозь со шӧдскымон йылыны быгатоз на. Малы 7 аресозь? Анай-атайёс чек книжкаысь коньдонэз талэсь вазь басьтыны уз быгатэ. Вераны кулэ, Евалэсь но Алексейлэсь ӧжыт гинэ беромыса вордскем пиналъёс но палэнэ уз кыле. Соос ваньзы ӧтемын луозы 14-тӥ феврале - Яратӥсьёслэн нуналазы - Нылкышноослэн лигаенызы радъям ужрадэ. Отын соосты витёзы ӟечкыланъёс, кузьымъёс. Та дырозь выль даурен ӵош вордӥськемъёслы ӵапак 40 нунал но тырмыса вуттоз. Калыкын юнме уг верало, дыр, ук, пиналэз нырысь нуналъёсаз кыре-буре поттаны уг яра шуыса. Кинлы тунсыко, йылпумъяса вералом на. Выль ар уе вордскем 14 пинал пӧлысь 4-ез - Ленинской, быдэн 3-ен Индустриальной но Октябрьской, быдэ 1-ен - Первомайской но Устиновской ёросъёсысь луо. Кыкез пинал вордскиз 6 номеро нылпи ваён юртын. Э.КУМАЧЁВА. Выль даурын кутӥськозы Азинлыко йылпумъяз ортчемзэ арез Ижевскысь электромеханикая "Купол" завод. 1999- тӥ арен ӵошатыса, вузъёсты поттон ог кык поллы йылӥз но 184 процентлы вуиз. Нимысьтыз техника поттон огъя производствоын 98 процентсэ басьтэ. Озьы ик йылэ калыклы кулэ луись вузъёсты поттон но. Зэм, татын куд-ог тырмымтэос вань на. Нырысь ик бадӟымгес саклык висъяно вузъёслэн ӟечлыксылы но соослэсь асдунзэс кулэстонлы. Соин ӵош ик предприятиын ялан будэ уждунлэн быдӟалаез. Миым со, кылсярысь, будӥз 1,8 поллы. 1999-тӥ арен ӵошатыса, кылем арын уждун йылӥз 177 процентлы. Кылдо выль ужан интыос но. 1991-тӥ арын 13 сюрс ужась ке вал, али отын ог 12 сюрс адями тырше. Коньдон ласянь югдур заводын умой ке но, Россиысь Обороная министерстволэн пунэм тыронэз кыле на. Али со ог 60 миллион манет лыдъяське. Ож тӥрлык лэсьтон бордын тырше валтӥсь конструкторлэн спецтехникая 011-тӥ отделэз. "Антеен" но "Росвооружениен" ӵош контрактъя кунгож сьӧры вузамын "ТОР-М1" комплексъёс, специалистъёсын, полигонын ӟеч ортчизы "ТОР-М1" но "Саман М" изделиосты эскеронъёс. Кызьы тодмо, "ТОР-ёсты" кунгож сьӧры вузаны алигес гинэ кутскизы ай. Со дырозь соосты СССР-ысь Обороная министерство гинэ басьтэ вал. Валтӥсь конструкторлэн отделэз Россиысь армие келям вузъёссэ сак эскерыса возе. Кылсярысь, отделын ужасьёс пыриськизы войскоослэн "Оборона-2000" дышетсконазы. Предприятие выль техника дасянъя ужъёссэ ялан азьланьтэ. Лэсьтэмын но эскеремын МТО АГЗ изделиос, ӝоген вуттозы "Барьер-1" но 9Ӑ31М машинаосты. Таосыз ини выль даурын кутӥськозы. Н.ЛЯЛИН. Шӧкыч Серекъялод оло бӧрдод Янгышазы Паймымон гожтэт басьтӥ ай мон та нуналъёсы. Оло шумпотоно, оло бӧрдоно. Йыроберме кормаса пукисько ни ай, шиме но пыдлогес ватӥ - юнме адямиез лексьыны медам шедьты, пӧй. Нош ужпум тани ма бордын. Очей Толиен уртче сояз арын ялӥм вал конкурс пӧртэм тумошо учыръёслы, серемес веранъёслы. Трос гинэ адямиос вазиськизы. Устооссэ гожтэтъёсты газет баме но вуттӥмы. Та конкурсэ шуыса ик, редакцие гожтэт вуиз Шаркан селоын улӥсь Эмилия Горемыкиналэсь, отын со верам анекдот выллем кӧня ке мадёнъёс. Одӥгез. Мынам юрттӥсе ӧжытак чебертоно кожаз гожтэтэз: пӧртэм мадёсъёсты огазеяса, улонысь учыр порма пӧрмытӥз. Малпаськом, Эмилия Семеновна та пумысен вожзэ ӧз потты. Со понна огыр-бугыр ӝутскем Шаркан районысь Кулак-Кучес гуртын. Вот таиз ини паймымон! Табере котькуд юморескаысь, серемес учырысь, анекдотысь асьмеды тодманы турттом но гожтӥсь вылэ ожалскомы ни шат?. Ярам, гожтӥсь вылэ гинэ ке луысал. Таяз учыре юнме муртэ янгыше уськытыны туртто. Кыл шеронэ шедем Кулак- Кучесысь Эмилия Васильевна Шкляева (нимыз одӥг шуизы, вылды, нош Горемыкина - псевдонимез), тон, пе, "Шӧкыче" сыӵе статья гожтӥд. Паймеменыз нылкышно редакцие вазиськиз: "11-тӥ августэ "Шӧкычын" потӥз "Валтӥсь но юрттӥсь" нимын улонысь учыр. Тани та статьяез Кулакын лыдӟиллям 27- тӥ ноябре. Мон вылэ пож ву киськаны кутскизы. Нош мон асме янгышен уг лыдӟиськы бере, газет пыр валэктон сётыны курисько: Кулакысь лыдӟисьёс шонер мед валалозы, та статьяез Эмилия Васильевна Шкляева ӧз гожты шуыса..." Ӧйтӧд, арлыдо нылкышнолэн ассэ шонере поттыны турттэмез но уз кельшы ни меда гуртоослы, шиме поттыны ӧй туртты ке но. Шӧкыч уром. Ми шуиськом: "Рахмат!" Алигес гинэ вал кадь ай со. "Удмуртия" ГТРК-лэн сюлмаськеменыз вордскиз бигер кылын нырысетӥез "Хаерле кич!" передача (удмурт сямен "Шулдыр ӝытэн!"). Нырысь-валысь капчиен ӧз сётскы передача. Сое дасясь журналист Ирек Шарипов но куарая режиссёр Хатып Мингазов сяна, студиын бигер кылэз тодӥсьёс нокин ӧй вал. Нош программа бордын уно адямиос ужало ук - режиссёр, солэн юрттӥсез, видеооператор но павильонысь оператор, мукет специалистъёс. Но "Хаерле кичез!" дасясьёс вакчи дыр куспын кужмо но юн коллектив кылдытыны быгатӥзы. Тележурналистъёсты сюресъёс вуттӥзы Казане, Татарстанысь уно ёросъёсы, Удмуртиысь районъёсын улӥсь бигеръёс доры. Озьы татар калык умойгес тодматскыны кутскиз ог-огзылэн улэм-вылэменызы, ужъёсынызы, трос гинэ чузъяськизы эктон-кырӟан гуръёс. Передачаез дасянын туж бадӟым юрттэт сётэ бигеръёслэн общественной центрзы (ТОЦ). Нимысьтыз вераны кулэ Ирек Шарипов сярысь. Ачиз вордскиз Агрыз ёросысь Крынды гуртын. Со Алнаш ёросысь Юмьяшур, Варзи-Ятчи но Ляли гуртъёсын артэ ик. Бигеръёс но удмуртъёс котьку но тупаса улӥзы, ог-огзы доры куное вуылӥзы. Журналист передачаяз уг вунэты асьме калык сярысь но вераны. Со сяна, Ирек Шарипов бигер кылын потӥсь "Янарыш" газетлэн валтӥсь редакторез но луэ на. Та нуналъёсы телепередачалы тырме дас ар. Ми, редакциын ужасьёс, ӟечкыласьком бигер эшъёсмес та нуналэн но шуиськом: "Рахмат!". Н.БАЙТЕРЯКОВ. Матысь быдэстоно ужъёс Удмурт Республикаысь Правительстволэн Тӧроез Юрий Питкевич ортчытӥз министерствоослэн но ведомствоослэн кивалтӥсьёсынызы бадӟым кенеш, азьпал вакытлы чаклам ужпумъёсын тодматӥз. Со пусйиз: Правительство умой ужаз республикае федеральной программаен висъяны чаклам инвестициослэсь быдӟалазэс утён ласянь. Та ужпумез ик азинтыны Москвае арня вискын кошкизы тросэз министръёс. Кылсярысь, Ижевск пыриськоз жилищно-коммунальной удысысь куд-ог объектъёсты интыысь асваньбуре выжтонэн герӟаськем ужпумез эскеронэ. Озьы ик вераськон мыноз Ижысь автомашина лэсьтон удысэ Япониысь вуоно кредит пумысен. Матысь нуналъёсы министерствоос но ведомствоос йылпумъянъёс лэсьтозы ортчем арлы. Правительстволэн нырысь быдэстоно ужпумъёсыз пӧлын - городъёслэн но ёросъёслэн администрациосынызы бюджет пумысен огкылъёс гожтон. Удмурт Республикаысь Правительстволэн пресс-службаез. Нуналзэс пусъё бадӟым ӧтчамен Петр И эксэйлэн 1722-тӥ арын 12-тӥ январе поттэм Указэзъя кылдытэмын вал Сенат бордын ужась генерал-прокурорлэн должностез. Со ик луиз Россиысь одӥгезлэн вашкалаезлэн кун институтлэн - прокуратуралэн кылдэмез. Озьыен, та службалы туннэ тырме ни 279 ар. Прокуратуралэн азинскон сюресэзлэн вань вакытъёсаз ик солэн валтӥсь удысэз но нырысь быдэсъяно ужпумез вал законъёслэсь быдэсъяськемзэс эскерон-чаклан. Кун властез но правовой кунлыкез юнматон вакытэ прокуратура азьын уката но бадӟымесь ужпумъёс сыло. Законъёсты быдэсъян ласянь чурытэсь куронъёс пуктэ со азе Россилэн Президентэз В. В. Путин но. Со сярысь ик вера Россиысь прокуроръёслэн толон ужаны кутскем бадӟым ӧтчамзы но. Нырысетӥез та выллем ужрад ортчем вылэм кыдёкысь куамынэтӥ аръёсы. Озьыен, туала вакыт выльысь кулэ кариз странаысьтымы вань прокуроръёслэсь кенешсэс радъяны. Отчы пырисько улосвылъёслэн, городъёслэн но ёросъёслэн прокуроръёссы. Та бадӟым ӧтчамлэн ужаз пыриське республикаысьтымы но 33 прокурор. Делегациенымы кивалтэ Удмурт Республикалэн выль прокурорез В. К. Зыкин. Прокуратураын вань ужасьёсты туннэ сюлмысь ӟечкыласьком праздникенызы. Нош быдэс странаысьтымы прокуроръёс асьсэлэсь нуналзэс бадӟым кенешонэн пусъё бере, юн оскон кылдэ, право ласянь югдур азьланяз шӧдскымон тупатскоз-юнмалоз шуыса. Ф. Никитин. Шӧкыч Серемес зулён Николай Никифоров Господибожемой... Господибожемой!.. Йыр пушкам сизьым черк гырлыосты огӵош жуго кадь. Ма, кытын- о таӵе пичияк веръяны шедьтӥ мон толон? Ӧжытак веръясько ке, чылкак йырвизьмы сураське. Ма дауртэмме, кинэн но кытын кунояськемме ик вунэтӥсько. Ваньзэ, лэся, курыт ву гылтыса сьӧраз нуэ. Кузпалэ но вӧзам кӧлымтэ. Оло, солы но "мусоесь" кылъёсме вераны вутски? Жингырто ай ӵош ужась эшелы. Одно ик лад-лад валэктоз. Ӵемысь уго аслам экскурсиосы сярысь Семонлэсь юалляськыса тодӥсько. Алло, алло, Семон! Семон, тон-а та? Куараед малы ке куажылэн сямен ӟазыртэ. А- а, тон, иське? Кылзы ай: йыры туж висе, шори пилиське ни. Кытын меда веръяны шедьтӥ мон толон? Мар, мар? Кубыз Витялэн вордскем нуналаз юмшамы?! Инмаре- куазе! Ма, ми соин сазь дыръя пуныен коӵышъёс сямен ваче пуриськыса улӥськомы ук. Бен, шонер. Мон сое Наталеным вожасько. Кызьы-о вожатэк? Быжзэ чечег сямен ӝутъяса ветлэ ук Натале. Истинно шонер вераськод, Семон. Нылпиосмы зэмен но пӧртэмесь: то горд, то ӵуж, то бабля йырсиё вордско. Тодӥсько, тодӥсько мон аслэсьтым йырси тусбуйме. Ӟучъёс верамъя, пепельный цвет. Кӧня рюмка юи меда? Ог яке кык? Господибожемой! Кубыз Витя доры пыратозь ик кык поштоп юим? Ма, кыкнамы-а? Инмаре-куазе! Ма, кытчыям пыриз со мынам? Мон уго эсэпсэ валаса юисько вал. Нош Витя доры ма муген кожимы? Шулдыръяськем куараоссэс кылӥм, оло? Господибожемой! Иське, Наталез утчаса пырим? Со но отын вал шат? Тӧрын ик пукиз шуиськод. Вот, мунчокузё, вупери! Ӵош ужало шуыса, кузпалэзлэсь лушкемен казак воргорон доры шат кожано? От, бля..! Семон, нош кинъёс вал на отын? Трос калык вал шуиськод. Иське, бригадирен артэ пуким? Нош кызьы мон сое дугдытэк серекъясь каром? Уг валаськы: лад-лад, дыртытэк мадь ай, Семон. Господибожемой! Йыраз пуконэн шуккеме бере, дугдытэк горыны кутскиз, иське, бригадирмы? Ой, ой. Ма, мар тамаша та?! Али но горе меда? Малы-о больницае жингыртыса юаны косӥськод? Ма-а, Инмаре-куазе! Озьыен, бригадирмес ӝог юрттэт сётӥсь машинаен нуыса кошкизы? Уф-ф, сюлэмы ик огшаплы йыгаськемысь дугдӥз та кӧшкемыт иворедлэсь. Семон, нош маке-маке кузьым понӥ-а мон Кубыз Витялэн ӝӧк вылаз? Всё же вордскем нуналыз вылэм ук. Суменак коньдонме куштӥ, луоз. Макмыр веськатыны но кыльымтэ. Господибожемой! Ма, неужто закускалэсь кылем куинь килька чорыгъёсты кузьым интые сётӥ? Ой, алла-бисмалла! Вождэ эн вай, Семон. Йыркурен сэрен бигер сямен вӧсяськыны кутскиськем ни. Семон, мукет номыр ӧй йыринты, дыр, ук? Мон юи ке, чалмыт пукисько кадь. Мар-р серекъяськод? Мынам гумырам оп! шуыса выллань тэтчеме но ӧвӧл. Нош тон, монэ мыскыл карыса, олокыӵе нуддист эктон сярысь мадиськод. Господибожемой! Неужто выл дӥсьёсме куяса ик эктӥ? Ой, ярам, ярам. Шумпоттӥд монэ. Ярам ай плавкиме куштытэк кельтыны йӧн шедем. Возьытлэсь ачиз инмар утё шуэм, дыр. Йыры пилиське ни, Семон. Туннэ гинэ макмырме веськатысал но мукетъят чик ӧй юысал ни. Я, я, мыскыл эн кары. Малы-о кикы музэн одӥг кылъёсын силиськод шуиськод? Зэмзэ но уг юы - куштӥсько. Господибожемой! Ма, малы-о главнойзэ вератэк, олокудня супыльтыса пукиськод? Иське, Кубыз Витялэн аракыез кылиз на? Ой, шумпоттӥд монэ, ой шумпоттӥд. Ярам, ярам, ӵошен ветлом. Пумиськомы куинь топольёс вӧзын. Тау, тау ивортонэдлы. Господибожемой! Кубыз Витя гинэ макмырен курадӟемме адӟыса мед жалясал. Уть, инмаре! Тянь-Шань гурезе но вуылӥзы ни Ижысь Октябрь ёросысь Нылпи творчествоя центр усьтӥськем дырысен кызь ар тырмиз. 1980-тӥ арын 32 номеро школа Пионеръёслэн юртсылы пӧрмытэмын вал. Со аръёсы кивалтӥсез Тамара Рябова тодаз вае: "Та шуныт коркан ог-огдэ валан, яратон, ог- огедлы юрттон кузёяськизы. Туж чебер ортчылӥзы нылпиослы но мӧйыослы сӥзем ӝытъёс. Ми нырысетӥосыз пӧлысь ужаны кутским шуг сямо нылпиосын, соос понна кылдытэмын вал "Ромео и Джульетта" клуб. Котькуд гужем пиналъёсты Краснодаре келяллям. Юртмы инкуазь утёнъя бадӟым уж нуиз. Синмаськымон вал агитбригадамы но. Туристъёсмы олокытчы но вуылӥзы, 1987-тӥ арын соос кивалтӥсенызы Людмила Калентьеваен Тянь-Шань гурезь вылэ тубазы. Ужаз асьмелэн пресс-центрмы. Огъя вераса, туж шулдыр но эшлыко улӥм". Туала арын ваньзэ тае быдэстыны секыт, валамон ини, коньдон тырмымтэен. Нылпи организациос быремен, татын ужан амалъёс но кӧня ке воштӥськизы. Ачиз юрт табере нылпи творчествоя центр шуыса нимаське. Бен, вазен кадь ик туннэ но татын пӧртэм студиос, ансамбльёс, клубъёс но огазеяськонъёс ужало. Тужгес но зол ужало крезьгуро "Камертон" театр-студия, "Джем" студия, кырӟанъя "Звёздочка", "Отрада" но "Лесная сказка" ансамбльёс. Татчы ветлӥсь нылпиос пӧртэм конкурсъёсы пыриськыло, праздникъёсты шулдырто. Центрысь студиосы ветлӥсь нылпиослэсь суредъёссэс, горд сюйлэсь "пӧрам" мунёоссэс, куэм дӥсьёссэс адӟыны луэ пӧртэм адӟытонъёсысь. Пиос шумпотыса дышетско пулэсь но зӧк кагазлэсь пӧртэм арбериос - машинаос, пичи шыкысъёс, мунёос - лэсьтыны. Шор площадьысь Выль ар кызэз но арлы быдэ таос ик чеберъяло. Ужало на центрын шаертодонлы, туризмлы сӥзем кружокъёс. Нылпиос мылысь-кыдысь дышето кылъёсты. Нош англи кылэз дышетӥсь нылъёс но пиос понна котькуд ар олимпиадаос ортчытъясько. Соос кунгож сьӧрысь лыктэм куноосын тодматскыло. С.ПЕТРОВА. Удмурт кун университетысь профессор Виктор Васильевич Туганаев шаерамы туж тодмо адями. Ачиз со инкуазен, будосъёсын юнгес герӟаськемын ке но, та улон- вылонысьтымы вань удысъёсын ик туж тунсыкъяське со. Малы ке-а ӵапак Виктор Васильевич басьтӥськиз Удмурт Республикамылэсь энциклопедизэ дасян борды но. Кызьы шуэ Виктор Васильевич, синмез усьто, мылкыдэз ӝуто уно пӧртэм пумиськонъёс. Тани таяз учыре но ӟырдыт вераськон пуромиз Тартуысь профессорен, история наукаосъя докторен А. Ю. Петерсонэн. В. В. Туганаевен кенешонэз лыдӟе 2-тӥ бамысь. Храм усьтӥськоз куартолэзе Воткинскысь му вӧй поттӥсьёслэн микрорайоназы лэсьтӥське Свято-Георгиевской храм. Попечительёслэн кенешенызы кивалтыны оскизы Удмурт Республикаысь Кун Кенешлэн депутатэзлы академиклы Валентин Кудиновлы. Кылем арын черкез ӝутонын бадӟым ужъёс быдэстэмын ни. Кылсярысь, сентябре куполаз кирос юнматэмын. Туэ май толэзе святойлы Георгий Победоносецлы сӥзем храмын нырысетӥ вӧсяськон ортчоз. Выль черк Воткинскез уката но чебер кароз. Б. Никитин. Удмурт Республикалэн Президентэз Александр Волков Ижысь цирк лэсьтон интыын ортчытӥз кенеш. Лэсьтӥськонъя 6 номеро управленилэн кивалтӥсез Александр Курбатов Удмуртилэн Президентэзлы ивортӥз, цирк лэсьтон ужъёс чаклам графикъя мыно шуыса. Кылем арын уже кутэмын 50 миллион манет коньдон. Та вакытэ мыно цирклэсь герӟась ёзъёссэ инъян ужъёс, соосты гужемлы йылпумъяны чакламын. Собере лэсьтӥськисьёс кутскозы юртлэсь борддоръёссэ ӝутыны, нош сӥзьыллы липетсэ вуттыны малпало. Вань чаклам ужъёс дыраз быдэсмизы ке, толалтэ 2001-тӥ-2002-тӥ аръёсы луонлык кылдоз выль юртлэсь пушсэ лэсьтон-чеберъян борды кутскыны. Александр Волков вылӥ дунъяз лэсьтӥськисьёслэсь ужзэс. Цирк ӝутонэз огсыр радъян понна, туэ но коньдон дыраз висъямын луоз. Уй палан пумиськонъёс Кылем арня пумын ортчиз Яр но Юкаменск ёросъёсысь Калык депутатъёслэн кенешъёссылэн сессизы. Отчы пыриськиз Правительстволэн Тӧроез Юрий Питкевич но. Кызьы тодмо, Яр ёрос администрацилэн тӧроез Владимир Завалин юнматэмын нациосын ужан политикая министре, нош Юкаменск ёрос администрацилэн тӧроез Владимир Невоструев - гурт удысъя но сиён-юонъя министре. Соин ик сессиын тросгес вераськон мынӥз кадръёсын но ужез радъянэн герӟаськем ужпумъёс сярысь. Сессилэн ужаз пыриськем сяна, Юрий Питкевич кенеш ортчытӥз сюрес лэсьтӥсьёсын. Та удыс вылӥ верам ёросъёсын ӟеч азинске. Кылсярысь, Юкаменск ёросын лэсьтэмын 5 километр сюрес, туэ эшшо 5,9 километр лэсьтыны чакламын на, со герӟалоз Юкаменскез Яр ёросысь Ворца гуртэн. Нош кылем ар ӵоже гинэ та ёросъёсын сюрес лэсьтонлы коньдон висъян куинь поллы йылӥз. Туэ но удыслы бадӟым юрттэт сётэмын луоз. Удмурт Республикаысь Правительстволэн пресс-службаез. Шер, эше, перодэ Республикаысьтымы Кыл кутытонъя управленилэн (УИН) вань аслаз газетэз. Нимаське со "Ступени" шуыса. Алигес со пусйиз 38 ар тырмонзэ. Газетлы сӥзем ужрад ортчиз 1 номеро колониын. Нош малы отын? Малы ке шуоно, та колониысь гожъясьёс, общественной корреспондентъёс, кызьы соосты татын нимало, бӧрсьысь витетӥ арзэ ини нырысетӥ интыын мыно мукет колониосысь гожъясьёс пӧлын. Со сярысь "Ступени" газетлэн праздниказ люкаськемъёслы ивортӥз солэн редакторез Сергей Воеводин. Татын тужгес но ӟеч ужа гожъяськыны яратӥсьёслэн секцизы, пусйиз со. Ӵемысь огазе люкаськыса кенешо газетэ гожтоно яке печатлам ужъёс пумысен. Секциен туж быгатыса ужаз пытсэт сьӧрын пукись Исламов А., со трос адямиосты та удыс борды кыскыны быгатӥз. Огдыре ик со кивалтӥз библиотекаен но. Кыкезлы ик ужезлы вань сюлэмзэ сётыса тыршиз. Солы тау каро эшъёсыз, гожъяськыны мылкыдзэс бугыртэмез понна. Ноку та ужен вырымтэос киязы ручка кутӥзы но ӧз янгышалэ. Пӧрмиз ук кылбурзы но, серемес вероссы но. Тодазы ваизы улонысь тунсыко учыръёсты, малы гожтонтэмез соосты газетэ? Мед лыдӟозы эшъёссы но. Тӥни озьы пумен тросгес но тросгес гожъясьёс люказ ас котыраз Исламов А. Нош кивалтӥсьёс адӟытэк ӧз кельтэ солэсь тыршемзэ. Ассэ лачмыт воземез но ӟеч ужъёсыз понна сое пытсэтысь куинь арлы вазьгес лэзизы. Юрттӥзы ужан интыен но. Дэмлазы лэсьтӥськон удысэз. Выль эшъёсыз мурт ӧз каре пытсэт сьӧрысь вуэм адямиез, оскизы улон шоры мукет синмын учкыны кутсконэзлы. Исламов А. ӝабыр- ӝабыр басьтӥськиз уж борды. Кык арня ужамез бере ик сое бригадире бырйизы ини. Колоние кылем эшъёсыз шумпото со понна, со дыре ик жаляло но сыӵе эшсы кошкемысь. Газетлы сӥзем ужрадэ лыктыны бадӟым мылкыдыз вылэм, но уждэ куштыса уд пегӟы ук. Соин ик телефон пыр ӟечкылам гожъясь эшъёссэ. - Оскиськом, шедёзы ӟеч кивоштӥсьёс, - веранзэ йылпумъяса шуиз Сергей Борисович, - азинтозы утскем ужез, соос милям нырысь юрттӥсьёсмы луозы. "Ступени" газетлэсь пуштроссэ эшшо но узыргес, паськытгес карон пумысен малпанъёссэ вераз Кыл кутытонъя управленилэн кивалтӥсезлэн воштӥсез Александр Бояркин. Та газетэз, колониын пукисьёс сяна, мед быгатозы лыдӟыны вань мылкыд карисьёс, шуиз со. Газет киоскъёсы но мед вуоз. Нош со понна зол тыршоно луоз. Солэн бамъёсаз пытсэт сьӧры шедемъёс сярысь гожъямен ӵош вунэтоно ӧвӧл мадьыны сыӵе адямиосын артэ ужасьёс, соослэн сюлмаськонъёссы, кулэяськонъёссы сярысь но. Нош управлениын тыршисьёс пӧлысь кӧня мурт ожмаськиз ини чечен музъем вылын, куд-огез огпол гинэ отчы ӧз вуылы ини. Оскем ужез ӟеч быдэсъямзы кӧня тау карон кылъёс верамын. Калык но мед тодоз со сярысь. Соин ик ми но, управлениын ужасьёс, тыршом газетлы визь-кенешен но, коньдонэн но юрттыны. Ӵемгес ортчытъялом газетъёсын, журналъёсын тыршисьёсын, писательёсын, кылбурчиосын пумиськонъёс. Милям гожъясьёсынымы ӵош мед сэрттозы-пертчозы гожъяськон удысъя ужпумъёсты, мед тодматозы асьсэлэн ужан амалъёсынызы. Нош туннэ пытсэт улэ шедемъёс доры куное лыктэм кылбурчи Владимир Нишуков. Солэн кыбуръёсын кык книгаез потэм ини. Соос пӧлысь унозэ со туннэ лыдӟиз. Туж сак кылӟизы сое залын пукисьёс. Уго соос пӧлысь тросэз кылбур гожъян бордын тыршо. Сцена вылэ потыса, соос но лыдӟизы кылбур чуръёссэс. Владимир Алексеевич кузьмаз аслэсьтыз книгаоссэ. 1 номеро колонилэн кивалтӥсез Сергей Авраменко тау кариз газет бордын тыршисьёслы. Тужгес но устоосызлы синпель кузьымъёс сётӥз. Азьланяз но газетлэн праздникез ми дорын ик мед ортчоз, шуиз со. Гожъясьёсмылэн перозы котьку лэчыт мед луоз. Ӟечгес гожъяськон сярысь ик сюлмаське татын пукись Леонид Батуев но. - Ноку гожъяськеме ӧй вал, - шуэ со. - Ӧй но малпаськылы, куке но та ужлы дышо шуыса. Нош табере ма но со йӧндырисько ини, веросъёс, колониын ортчись ужрадъёс сярысь гожъясько. Сюлэм ачиз кулэ каре ини сое. Йырез ужатоно, сотэк татын воксё пашмод ук. Леонид Прокопьевич милям газетамы но табере гожъяськыны мылкыд кариз. Ӝоген, оло, "Удмурт дуннелэн" бамъёсаз печатлалом солэсь вакчи веросъёссэ, улонысь учыръёссэ. Е. Камашева. Паймод, ява! Матэктэ газет, журнал поттӥсьёслэн нуналзы. Но 13-тӥ январе ӟечкылаломы асьме лыдӟисьёсмес но: угось тӥтэк, тӥляд иворъёстытэк ми ма меда карысалмы? Тау! Газетчи котькытчы вуэ, котьмае кылэ, адӟе. Сыӵе уго солэн ужез. Но ма но уг луы вылэм улонын? Уката ик - газет поттӥсьлэн улоназ... Тани мон но, ёрос газетын кызь тямыс арлэсь ятыр ужаса, трос гинэ тунсыко учыръёсын пумиськылӥ. Лыдӟомы-а? Кылтэмъёс но верасько вылэм... - Тани кельтӥсько туспуктэмъёс: таяз номере сётод. Ачим "Рассвет" колхозэ потало ай: отын, пе, бусы ужзы умой мынэ, - озьы шуыса, фотокорреспондентмы машинаен ширтӥз. Кулэ бере - лэсьтоно. Кызьы уд юртты эшедлы? Бусые кошкемъёс ӝытлань гинэ вуизы: оло губилы кожаллям, оло Кырыкмасын пыласькиллям? Ӵуказеяз фотокормы газетэз усьтӥз но... пуконысьтыз ӧжыт гинэ ӧз усьы. - Ё, п, р, с, т! Мар лэсьтӥд тон?! "Туэ кутсало 6 сюрс центнер ю тысь!" Ма, со комбайнер пичи дырысеныз кылтэм, бакомемын. Ой, быри, быри!.. ...Ма, кытысь-о тодоз егит ужась, сыӵе комбайнер но вань шуыса? Огшоры гинэ ужась вылымтэ ай со - эсьма, орденэз но вылэм. Тӥни озьы. Кечато-кечато дэреме... Вормон нунал азьын газетын трос гинэ патретъёс потӥзы. Усто ужам туспуктылӥсь: ушъязы. Ӵуказеяз редакцие жингырто: озьы но озьы - янгышез вань кадь. ...Оже ветлэм мурт ас патретэз шоры учке но пайме: мыйыкез солэн, дэремез но аслаз кадь ик. Нош ку ай со доры газетысь пыразы меда? Ярам, азьвыл Вормон нуналлы лэсьтӥзы вал кадь, соин ик ӧз вала кадь. Песятай газетсэ шумпотыса утялтӥз. Муспотон нунокъёсыз (внукъёсыз) Иж заводысь бертӥзы ке, одно адӟытоз. Кузпалыз гинэ, очкизэ сопала но, тапала но карыса, пересьсэ сизьдӥз ик: "Тоже мыным Будённый, нош ку ай меда тон таӵе кечато-кечато дэрем нуллӥд? Со дэремдэ мон тямыс ар талэсь азьло пыдлёгетлы кесяй вал", - шонертӥз со шумпотэм картсэ. Озьы луыны но кулэ ведь. Оже ветлэм огез мурт улэ Мушегын, нош таиз - воксё сьӧрлось гуртын. Соиз гинэ ма ай? Туспуктылӥсь эмеспизы вылэм. Дыртонъяз-а, мар-а сурам тушо дядяйёсты. Газет лыдӟись ӧз но вала кадь - кельшо но кельшо. Нош варманаез векчи виятэмзэ эмеспиезлы кема гинэ ӧз адӟытылы. Нош, пе, кинэн ке суралод. Кык "Тылгизьы" Сизьымдонэтӥ аръёсы ёрос газетын ужась егитъёс практика шуонзэс ортчо вал Ижысь газетъёсын. Огпол, аран вакытэ, ми мынӥм Пурга палась "Искра" колхозэ. Оло, губи но вань шуыса, сикетӥ гинэ потӥм бусые. Учкиськом - кык комбайн сылэ. Ма таӵе? А шуизы азьмынӥсь колхоз... - Тани быдэс нунал сылӥськом ини - машина ӧвӧл ю тысь нуыны. Тӥяськем-а, мар-а? - лулӟылэ огез комбайнер. Ми Юра Мальцевен (соку со "Удмуртская правда" газетын ужа вал) дасяським ини фельетон гожтыны. Бертыкумы эше маке паймытскиз. Ма, "Искра", пе, удмурт колхоз, нош асьмеос бигеръёсын вераським ук. Берытским. Соку гинэ тодӥм: комбайнеръёс, мӧнняос сямен ик "Искра" колхозысь, но бускель Огырчи ёросысь, Бигер шаерысь. Ох, сётысалыз милем редактор "Тылгизьы"! Гуртъёс, бусыос артэ, колхоз ним но соку одӥг кадь вал - сураны кема ик ӧвӧл. Одӥг буква понна Ужысь бертыкум, ёрос клубысь контролёр, Валя апай, туж шумпотыса вераз: - Ой, толон кӧня калык вал клубын! Ма, индийской кино кожаллям-а, мар-а - адямиез лачак. Эсьма, пиньтэм пересез но, ымдурысьтыз йӧлэз али гинэ куасьмем пиёкез но билетэн сыло. Ӝыны толэзьем планэ соку ик тырмиз. ...Кылзӥсько Валя апаез (асьме гуртысь уго) но, сереме потэ кадь. Няньлы пыракум, афиша шуонэз учки вал. "Гобсек" кино ваиллям. Нош ерпечкаос со кыл пуме "с" буква ватсаллям. Огшоры мелэн. Кин адӟиз, кин кылӥз - пельысь пеле вераз. Быдэс клуб тыр калык вуэм. "СССР-ын секс ӧвӧл", - шуиз вал телевизор пыр Ленинградысь чебер апай. Озьы вылымтэ. Соин ик кин но лыктымтэ кино учкыны! Нош француз писатель Оноре де Бальзак отын янгыш вылымтэ. Кин лыдӟиз солэсь "Гобсек" повестьсэ, тодэ: книгаын чылкак мукет ужпум ӝутэмын. Ачим но лыдӟи: тодӥсько. Геннадий Парфёнов, Кияса ёрос газетын ужась. АДӞЕМ КАРЫМОН Пеймыт уйысь югыт тылси Муртлэн висёнэз, пе, муртлы уг йӧты. Та верамен котькудӥз соглаш уз луы, малы ке шуоно, адями пӧлын но котькыӵе адями вань. Умойёсыз тросгес. Соос вылын возиське оскон, берга югыт дунне. Туэ сӥзьыл Воткинске люкаськылӥзы быдэс Россиысь военной продукция поттӥсь заводъёслэн кивалтӥсьёссы. Пӧртэм улосъёсысь вуэм куноос мыло-кыдо тодматскизы Удмуртиысь кибашлыослэн ужъёсынызы. Пырак ттын ик, "Юбилейный" дворецын, басьтӥзы адресъёссэс, азьланяз кусып тупатон понна. Бадӟым предприятиосын артэ аслэсьтыз вузъёссэ интыяз Ижевскысь "Спутник" УПП но. Выставкаез учкисьёсты паймытӥз ляб адӟисьёслэн яке воксё но сукыр кылемъёслэн киосынызы поттэм продукция. Осконтэм кадь, нош ужзы тани - калык азьын. Та адӟытон ик вуттӥз Карл Маркс ульчаысь ньыль этажъем юртэ. Ӟечгес тодматскем потӥз "Спутникысь" коллективен, нимаз адямиосын, соослэн улон-вылонэнызы но шугъяськонъёсынызы. Мылкыдзы шуныт, сюлэмзы небыт Чилясь гӧрен шобырскем кызьпуос пӧлы ватскем горд кирпич юрт дораз ӧте тылобурдо чипсэм куараен: "чи-ип! чи-ип!" Шыпытак гинэ вандэ ӵук омырез. Дырын-дырын кылӥське ӧс усьтэм-пытсам. Озьы кутске татын выль ужан нунал. Юрий Трифонович Хозяйкин кылемын кузё интые. Валтӥсь директорзы Наиль Мухаметович Вахитов кошкемын Москвае, командировкае. Воштӥсез - оскымон. Та удысын Юрий Трифонович ужа ни ньылетӥ арзэ. Дышетскемезъя - юрист. Йылпумъяз Удмурт кун университетэз. Вордскемын Игра районысь Сундур гуртын. Одӥг ар но удмурт кылэз дышетыны ӧз ке но кылды, анай кылыныз туж чылкыт, вольыт вераське. Жаляса верано, берло дыре Юрий Трифонович воксё адӟемысь дугдӥз. Палэнысь пырем мурт тае уз но шӧды: кабинетлэн кузёез туж шаплы ужа телефонъёсын, ӝегатскытэк шедьтэ кулэ документъёсты, папкаосты. Вераськон куспамы гинэ олокӧня пол жингыртӥсьёс луизы. Тани Иранлэн заказэз пумысен юало. - Та странаен куинетӥ арзэ ужаськом, тросъёс лэсьтӥськом, - валэктэ Ю.Т.Хозяйкин. - Кусыпъёсмы кылем арысен кутскыса паськытазы, предприятимы выльысь улӟиз. Ми понна тужгес но секытэз вал 1992-тӥ ар. Ӵапак соку куашказ машина но мотоцикл поттон производство. Заказъёсмы быризы, ужасьёсмес кулэстоно луим. Туннэ но ай вань мылкыд карисьсэ кутыны ум быгатӥське, ӝыныез пала азьвыл ужасьёсмы гуртазы пуко. "Спутник" нырысь ик сюлмаське шуге-леке шедемъёсты интыян сярысь, синтэмъёс сяна, вань бак кылемъёс. Зэм, соос пӧлысь огез но ассэ инвалидэн уг лыдъя: котькудӥз станок доры кыстӥське. Шонер пусйиз, дыр, Юрий Трифонович: ужась муртлэн сюлмыз небӟе. Ачиз но со ваньмон дыръяз сад-бакчаысьтыз уг пота. Пиеныз ӵош веранда лэсьтӥз, корказэ чеберъяз, тэк пукыны воргоронлы ноку. - Коллективмы милям одӥг семья кадь, куспамы туж тупаса, ог-огмес гажаса улӥськом но ужаськом, - вераськонамы пыриське "Удмурт кенешлэн" татысь ёзэзлэн кивалтӥсез Елена Апполоновна Сырых. Сямызъя - тылгизьы. Кылыз но, вамышез но - ӵош. Цехысь цехе лобаса кадь ветлэ, котькуд 500 ужасьсэ нимын-тулын тодэ. - Куиньмос люкетэз татын - удмуртъёс. Кылем арын юри нимысьтыз соосты гожъяй. Туж потэ удмурт сямъёсмес, кылмес улӟытэме. Ведь ми огмы но ас кылмес дышетымтэ. Мон али но сюлмы вӧсь луыса тодам ваисько школа-интернатэ вуэмме. Удмурт семьяысь потэм 7 аресъем нылпиосты отын чутрак люко анай кылзылэсь. Урокъёсмы но ӟуч сямен. Нокин но уг учкы: валаськод-а дышетӥсьлэсь валэктэмзэ, уд-а. Мыным удалтӥз. Кыкез воспитательмы удмурт вал. Соос бордын ик шунай, удмурт сямен вераськи. Кызьы ке но та ужпумез зол-зол кутскыса ӝутоно вал! Асьмелэн ведь ляб адӟисьёс, синтэм кылем нылпиос понна удмурт букварьмы гинэ но ӧвӧл. Бигеръёс кемалась соя ужало ни. Та кӧтвисён Елена Апполоновна понна тужгес но бадӟымез. Быгатысал ке, из гурезез но берыктысал ни, сюлэмзэ буйгатон понна. Туж оске "Удмурт кенешлы", вань удмуртъёслэн ӧтчамзылы, солэсь но куаразэ кылозы шуыса. Чупрес сямыныз Елена Апполоновна та шуытозь тодматӥз предприятилэн цехъёсыныз, отысь ужасьёсын. - Татын бумага пӧзьто, формаосы кисьто, пӧсь гурын куасьто но тани таӵе курег пуз тырон касссетаос пӧрмо, - радэн-радэн вӧлдэтозь люкам ужзы шоры возьматэ со. - Заказ трос. Удмуртиысь тылобурдо вордон фабрикаос сяна, вазисько шаермылэн палэнысьтыз но. Рабочийёсмы куинь сменаен ужаса но вань куронъёсты быдэстыны уг вуо. Огласянь со умой. Тамында заказ вуысал ке мукетъёсаз но. Тодматскиськом бумага пӧзьтӥсен Александр Ермаковен. Татын со - ньылетӥ арзэ. Вордскемын Алнаш районын. Коллективез кельше, ужез мынэ. Мылкыдыз каньыл. Нош вераськыны Сашаен ноку - машина дугдылытэк "сиён" куре. - Табере мыном пластмасса цехе. Татын 5 кузя ужало, ваньзы - удмуртъёс. Лэсьтӥськом дӥськут ошылыны чепылетъёс (прицепкаос), штора сузьетъёс, массаж коверлы шарикъёс, унитазлы ёз, ӧс кутон но мукетсэ. Кин ма куре. Ву пазян гумыос но поттӥськом. Та нуналъёсы полиэтилен сырьёмы быриз, соин кӧня ке сылӥмы. Но чыры-пыры ужъёс вань. Алнаш палан вордскем Алевтина Данилова но Сюмсиысь Екатерина Мерзлякова татчы вуизы, Факелысь школаез йылпумъяса. Кыксы но удмуртъёс, туж кыстӥсько ас калыксы борды. Кырӟанъя ансамбле но ветлэмзы потэ кадь, но куарамы, пе, ӧвӧл, кепыраськом. Нош кырӟан татын (со сярысь кылпум потӥз бере) жильыртыса кисьтӥське. Ансамбленызы кивалтэ Виктор Петрович Алексеев, туж мыло-кыдо, шулдыр мылкыдо адями. Нырысьсэ огазе люкаськизы кылем арын. Сюлэмзы лычсузьымон кисьтӥзы ас мылкыдзэс, ӟыч-зыч кырӟазы яратоно гуръёссэс. Люкаськизы но - ӧз люкиське ни. Озьы ик вордскиз та коллективзы. - Музыкалы мон нокытын но нимысьтыз ӧй дышетскы, - кепырасагес вера ас сярысьтыз Виктор Петрович. - Пуксисько но крезьгурез тупатӥсько, собере шудӥсько. Выль кырӟанъёсты радиоысь магнитофонэ гожтӥсько, партиослы люкисько. - Та синмаськымон воргорон одӥг нунал коть кырӟатэк улэ меда, - шуо кивалтӥсьсы сярысь ансамбле ветлӥсьёс. - Арган кутэ ке, дунне улӟе. Шунды сиос но ваньмыз музъем вылэ кыстӥсько кадь. Сыӵе шумпотон пыртэ коллективезлэн улоназ Нылга ёросын вордскем зӥб-зӥб сямо пиосмурт. "Туж дышетскеме потэ!" Адями ас чеберзэ, шудзэ ноку но пумозяз умой-умой уг, дыр, вала. Кинлы ке но уг яра ымныр тусыз, мукетыз возьдаське горд йырсиезлэсь, куинетӥез - мултэс векчи яке таза сӥльвиро луэмезлэсь. Палэнысен учкыса, ваньмыз со тумошо, серемес кылӥське. Шудлэсь шудзэ уг утчало, шуо сыӵе дыръя. "Спутникын" Елена Апполоновна тодматӥз милемыз туж мусо егит кышномуртэн Ольга Кузьминаен. Пиез сярысь со ачиз ӧй ке поттылысал, чиед мугоро Оляез нылаш гинэ шуысалмы, дыр. Вордскиз Можга районын, дышетскиз Факелын, шор образование басьтӥз Свердловск областьын. Ой, шыплы ук! Вераськон куспамы пумен ужзэ лэсьтэ, пумен сомында ӟеч кылъёс вераны вуэ коллективез, пиез, дышетӥсьёсыз сярысь! Шораз учкыса, амалтэк малпаськод: неужто таӵе йӧно, визьмо нылашез инкуазь маин ке обидиз? Озьы ке, юртты ук, юртты быдэсмымтэ малпанзэ быдэстыны. Юртты будӥсь пиезлы чагыр инбамез, ворекъясь кизилиез, югыт нуналэз адӟыны! - Мынам туж юн дышетскеме потэ на - Свердловскын мон йылпумъяй литературной классэз. Аттестатам - ваньмыз сямен "5"-ёс вал. Али жалясько: оломалы азьланяз нокытчы но дышетскыны ӧй мыны ни. Табере уг, дыр, быгаты экзамен сётыны - программаос воштӥськемын, тросэз вунэмын. Оля ляб адӟе, очки солы уг тупа. Пиез но сыӵе ик вордскиз. Тӥни малы егит анайлэн сюлэмыз кык полэс чигиське. - Пие дышетске Якшур-Бодьяысь школа-интернатын. Кыстӥське техника борды. Али ик котьмае, компьютерез но тупатъяны быгатэ. Ачим нокыӵе образование ӧй басьты бере, сое одно ик дышето. Мынэсьтым ӟечгес мед улоз. Зэмзэ вераса, Оля Кузьминалы ужез уг кельшы. Картон коробкаосты тупатон солы мӧзмыт но акылес потэ. Коробкалы заказ вуэ Сарапулысь пыдкутчан вурисьёслэсь но тылобурдо вордон фабрикаосысь. - Та участок алигес гинэ усьтӥськиз, вылез директормы тыршемен. Ужаме потэ шуныт, чебер интыын, татын юзмыт, пеймыт. Сыӵе мылкыдыз Олялэн. Азьланяз солэн но цехез умой пала воштӥськоз, дыр. Нылкышно киос ма понна-о? Тани куд-ог отделъёссы копак вож будосъёс пӧлы ышемын. Отын шуныт, шулдыр, мылкыдзы но тулыс куазь кадь. Олялэн но цехез азьланяз мукетгес луоз, дыр. Сыӵе чырткем, йӧно нылкышнолэн задор сямыз йӧӟектэм омырез но шунтоз. Эшъёсыз солы одно ик юрттозы. "Спутникын" нокинэ но уг люко, тоно-моно уг каро. "Спутник" - одӥг сюлмаськонэн, одӥг шумпотонэн- куректонэн улӥсь семья. Тае валан понна пыралэ котькудаз цехе. Ижевскын нылкышноослы колготки поттыны кутскемзы сярысь ивор городын ӝог вӧлмиз. Ӟечлыкезъя но кельшиз. Нош кытын но кин сое поттэ? "Спутник", татчы интыяськем фирма. Ляб адӟисьёслы - нош ик уж. Нылъёс, нылкышноос соосты чебер пакетъёсы тыро. Кызьы уд паймы замок бичасьёслы-лэсьтӥсьёслы! Сыӵе векчи, син улын мырдэм адскись ёзъёсты зарни киос, мукет сямен вераны кыл но уд шедьты, кийыгыриенызы олокызьы гинэ интыяз пукто. Адӟись мурт но сокем шаплы уз ужа. Раиса Алексеевна Морозова али быдэсъя мастерлэсь ужзэ. 25-тӥ арзэ татын. Данъяськыса гинэ вера эшъёсыз сярысь: ужаны но мастересь, кырӟаны но мылкыдоесь. Та нылъёсыз сӥземын Галина Геннадьевна Петровалы но Эдуард Владимирович Черновлы. Машинаослы замок лэсьтӥсьёс озьы тыршо, - кибервылзы одӥг шектэк но, нокыӵе изъянъёстэк но мед ортчоз. - Милемлы осконзэс медаз ыштэ, заказ сётыны медаз кышкалэ, - коллективез понна кыл кутыса вера Раиса Алексеевна. Та дырозь солы ӵыжектоно ӧз луылы на. Адямиез ужлы уж дышетэ. Тау депутатъёслы "Спутник" ӧжытак гинэ куашкатэк кылиз. Вакчи дыр куспын таркамын вал сомында кусыпъёс, 1500 муртлы ужан интыос. "Спутник" кылиз ас кожаз: коть ул, коть быр. - Мон туннэ тау карон кылъёсме верасько Кун Кенешысь депутатъёслы, отысь ялан ужась комиссилэн кивалтӥсезлы Софья Эльфатовна Широбоковалы. Соос милесьтым вазиськонмес валазы, ӝегатскытэк эскеризы но предприятимес выт тыронлэсь мозмытӥзы. Тӥни малы "Спутник" выльысь улӟиз, - шумпотэмзэ вера Ю.Т.Хозяйкин. Зэмен но, республикалэн бюджетэз вылын та вамыш бадӟым ыштонэн уз берытскы, нош пичи коллектив понна - азьлане мынон. 2001-тӥ арын но депутатъёс валалозы, дыр, ӧлексы кылемъёслэсь сюлмаськонзэс, уж вылын возьматозы юрттыны дась луон мылкыдзэс. *** Ма шуод, одӥг музъем вылын, одӥг инбам улын улыса но, асьмеос туж пӧртэмесь. Кӧня пӧламы кырсь малпанэн, сьӧд сюлэмен улӥсез... Соос мыным малы ке но жаль пото - инмар уго сыӵеосты туж зол обидем ни, улонзэс пиртэш, асьсэды калыклы адӟемпотонтэм карыса. Нош "Спутник", отын ляб адӟисьёс, бак кылемъёс ке но ужало, син азе пуксе пеймыт уйысь пиштӥсь югыт тылси выллем. Соос кыстӥсько шунды пала. Тӥни малы ӝытлы быдэ культура юртазы жингыртэ кырӟан, нош спортзалын бадӟым ӵошатсконъёслы дасясько зэмос батыръёс, Россилэн но дуннелэн чемпионъёсыз. Уез нунал воштэ, уродзэ - ӟечез, вужзэ - вылез. Озьы ик улон радэз мед визылалоз та бадӟым ужась семьялэн. Людмила МЕДВЕДЕВА. Владимир Беломорских (фото). Прессаын ужасьёс! Сюлмысьтым ӟечкыласько тӥледыз Россиысь прессалэн нуналэныз. Печатлам яке эфирын чузъяськем кылъёслэн кужымзы бадӟым, соослэн дунзы нуналмысь будэ. Сыӵе кылъёслэсь кулэлыксэс политикъёс кемалась валазы ини. Пётр И эксэйлэн кичӧлтэмезъя, 1703-тӥ арын потыны кутскиз "Ведомости" газет - Россиын иворъёс вӧлмытӥсь нырысетӥез ёз. Туннэ но гожтэм кыл бадӟым инты басьтэ странаямы тупаса улонэз утёнын, обществоын югдурез огсыр возёнын. Оскисько, тӥляд зэмлыко материалъёсты, югдурез котыр ласянь дунъясь иворъёсты юрттозы улон-вылон но экономика удысъёсын кылдэм секыт ужпумъёсты шонер сэрттыны-пертчыны. Ялан утёды журналистикалэсь ӟеч кутсконъёссэ, выльзэ утчан сямез, калык йылолъёсты, герӟалоды соосты туала нуналлэн куронъёсыныз. Сӥзисько юн тазалык, шуд, ужады азинсконъёс. Тӥляд гожтэм-верам кылды мед ваёз калыклы шумпотон но оскон. Удмурт Республикаысь Правительстволэн Тӧроез Ю.С.Питкевич. Дано нимен пусъемын Удмурт Республикаысь Кун Кенешлэсь депутатсэ академикез Валентин Иванович Кудиновез "Удмуртнефть" акционер огазеяськонэз кылдытӥсь, шуыны луэ. Нош Выль ар азьын В.И.Кудиновлы "Рыцарь науки и искусств" дано ним но "Разум. Доблесть. Честь" пус сётэмын. Россиысь Естественной наукаосъя академия соин пусъе тужгес дано адямиосты. Нош Россиысь Инженеръёслэн академизы Валентин Ивановичлы сётӥз "Россиысь дано инженер" ним. Б.СЕМЕНОВ. Дуннеез югдытон - книга бордын "Удмуртия" издательстволы - 80 ар Удмуртиын книга поттон удыс ас сюрессэ мытӥз 1920-тӥ арысен, куке РСФСР-ысь Наркомнацлэн Удмурт комиссариатэз кылдытӥз нимысьтыз издательской отдел. Нацимес ӝутӥсь-улӟытӥсь Куӟебай Герд бордысен кутскыса, книга поттон пыр калыкез югдытонлы кужымзэс сётӥзы Михаил Петров, Филипп Кедров, Тимофей Шмаков, Степан Широбоков, Василий Широбоков, берлогес - Алексей Ермолаев, Николай Васильев, Михаил Федотов но трос мукетъёсыз. Удгиз, собереяз "Удмуртия" книгапоттонни пыр югыт дуннее вордскизы но Россиысь трос национальностьем литературалэн зарни фондаз пыризы Кедра Митрейлэн "Секыт зӥбет", М. Коноваловлэн "Гаян" романъёссы, М. Петровлэн "Италмас" поэмаез, Г. Красильниковлэн "Тонэн кылисько", "Арлэн кутсконэз" романъёсыз, Ф. Васильевлэн, В. Семакинлэн, О. Поскрёбышевлэн, В. Романовлэн, Г. Ходыревлэн кыбуръёссы. Кылдэмез дырысен туннэ нуналозь "Удмуртия" издательство поттӥз ог дас сюрс пӧртэм книга, соослэн огъя тиражзы 81 миллионозь вуэ. Со пӧлысь ӝыныезлэсь уноез - удмурт кылын. Книгаослэн пӧртэмлыксы сярысь верало букварьёс но алфавитъёс, учебникъёс но пособиос, кылбугоръёс (словарьёс), нылпи но чеберлыко литература. Аръёс ортчемъя воштӥськылӥз книгалэн тусыз, улонын интыез. Но ас кужымзэ, кулэлыксэ со ӧз ышты: дуннеез югдытыны кутскемез дырысен книга ас бордаз люка пӧртэм-пӧртэм тодон-валанъёсыз. Визьнодлы дышетон - солэн валтӥсь ужпумез. Милям но ужамы та нуналозь ик азьпал удыс луэ учебно-педагогической литература поттон. Берло аръёсы озьы ик дасяны кутским вылӥ дышетскон заведениосысь студентъёслы учебникъёс но пособиос. Тодосчиос, кылсярысь, вылӥ дунъет сётӥзы К. В. Павловлэн но М. И. Шишкинлэн, Л. В. Юдиналэн но А. В. Юдинлэн, А. Я. Губергрицлэн, озьы мукет авторъёслэн пособиоссылы. Соос пӧртэм удысъёсъя: "Системный анализ экономики региона", "Металлургические и топливные шлаки в строительстве", "Непосредственное исследование больного", "Практические вопросы флебологии", "Классификация важнейших сосудистых заболеваний". Издательствомы ялан сюлмаське, книгаосмы вылтуссыя но чебересьгес, пуштроссыя но ӟечесьгес мед луозы шуыса. Куд-ог изданиосмы дипломъёсын но премиосын пусъемын Россиын но кунгож сьӧрын адӟытонъёсын. Вылӥ ӟечлыкен ужаны тыршеммы емышъёссэ сётӥз таӵе сериосын: "Библиотека удмуртского романа "Италмас", "Зарни крезь", "Библиотека для удмуртских школ", "Библиотека для детских садов". "Удмуртское народное искусство" фотоальбом понна издательстволы 1989- тӥ арын сётэмын Удмурт Республикалэн кун премиез. Татчыозь тубем гурезь йылысенымы умой адӟыны луэ ӝутсконъёсмес но, нюко-гопо усёнъёсмес но. Рынокен экономика юн шуккиз книга поттонлэсь бурдъёссэ. Берло дасо аръёсы дотация чотын потӥсь книга унолы кулэсмиз, тиражез но воксё усиз. Та вакытэ прозаез поттӥськом 1000-1200 экземплярен, поэзиез 500 гинэ. 90-тӥ аръёсын ӵошатыса, та лыдпус 20-30 пол кулэсме. Нош книгалэн асдуныз ялан будэ: толэзьысь толэзе дуногес усё бумага но мукет материалъёс, типографиын быдэстоно ужъёс. Книгаосмес асдунзыя вузаны ум быгатӥське бере, тросэз соос издательство понна пайдаен уг берытско, соин ик уно ыштонъёс адӟиськом. Тазьы вераны луэ интыысь авторъёслэн, удмурт но ӟуч гожъясьёсмылэн книгаоссы пумысен. Республикамылэн бюджетысьтыз дотация чотын коньдонэз ӧм адӟысалмы ке, издательство куашкасалыз-бырысалыз. Кун Кенешлы но Правительстволы утисьёсмылы музэн тау кариськом. Милемын артэ вожмаськыса ужало мукетъёсыз но книга поттӥсь организациос. Бере кылёнтэм понна пӧртэм амалъёсыз кутӥськом. Ӝынызэ мында книгаосмес поттӥськом заказъёсъя. Нош самой бадӟымез заказчикмы - Калыкез дышетонъя министерство. Ӵош пусйылӥськом азьпал дырлы планъёс. Арлы быдэ огкылъя чаклаське 15-16 пӧртэм учебно-методической литература поттыны. Заказчикъёс чотын милемлы вазисько мукет огазеяськонъёс, нимаз адямиос но. Озьы берло куинь аръёсы данак ёросъёс куризы асьсэ сярысь книгаос печатланы. Шаертодонъя литература узырмиз Завьял, Як.- Бодья, Кез, Сюмси н Вавож районъёслы сӥзем книгаосын. Научно-популярной но справочной изданиос потӥзы Воткинск, Удмуртпотребсоюз, Удмуртиысь православной храмъёс сярысь. Якшур-Бодья но Пичи Пурга ёросъёсысь Быдӟым оже пыриськемъёсты буре ваён книгаос печатламын. Тӥни озьы, заказъёсъя поттӥськись литература чотын ужмес паськытатыны быгатӥм. Но милемлы трос тыршоно луоз на, изданиосмылэсь научной пуштроссэс умоятон, чеберлыксэс ӝутон ласянь. Трос ужано луоз книгаосмес вӧлытон, мукет организациосын вошъяськон пумысен. Издательстволэн коллективез та ужпумъёсты быдэстыны быгатоз шуыса малпасько: татын ас ужзэс ӟеч тодӥсь адямиос ужало. Учконо ке, кӧня кужым сётэмын вал "Удмуртская Республика" энциклопедиез поттонлы. Вань книгаослэн книгазы кадь со луэ. Быдэсак огазея шаермы, калыкмы сярысь тодонъёсыз. Улонысь учыръёс, фактъёс сяна, татын вань тужгес тодмо адямиос сярысь чуръёс но. Макем трос кужым понэмын та уже, со сярысь вера таӵе лыдпус: 800 книга баме тэриз 4600 научно-справочной статья, 1200 иллюстрация но 75 карта. Книгаез дасяку, редакторъёс асьсэос ик ӵемысь гожтоно луо вал статья. Нош Ижевскысь республиканской типография ваньзэ лэсьтӥз, энциклопедия дыраз мед потоз но усто быдэстэмын мед луоз шуыса. Полиграфилэн вань туала луонлыкъёсыз кутэмын вал. Издательстволэн ортчем сюресэз возьматэ: калыклэсь улон-вылонзэ ӝутонын, культуразэ, науказэ азинтонын, выль адямиез будэтонын книга номырин воштонтэм кужым луэ. Соин ик удмурт кылын книга поттон - со кунмылэн огъя ужез. Оскисько, азьпалан но милемлы та данлыко ужамы юрттозы гажано авторъёсмы, суредасьёс- оформительёс, полиграфистъёс но книга вузан удысын ужасьёс. Вениамин Ившин, "Удмуртия" издательстволэн директорезлэсь ужзэ быдэсъясь. "Удмуртия" издательствоын 80-тӥ аръёсы ужамъёс. Газетмы соос дорын "вордске" Котькуд газетлэн выль номерез "вордске" журналистъёслэн перо улысьтызы. Собере гожтэм материалъёс секретариатэ вуо, компьютеръёсын ужасьёс, номеръя редакторъёс, корректоръёс пыр кузь сюресэз ортчыса, полиграфияя комбинатын ужасьёс доры. Али татын печатласько 50-лэсь уно газетъёс, кылсярысь, "Удмурт дунне", "Ӟечбур!", "Удмуртская правда", "Известия Удмуртской Республики", "Долг", "Янарыш", "Панорама", "18-й регион", "Труд", "Комсомольская правда" но уно мукет газетъёс. Тросэз изданиос пото пӧртэм буёлъёсын. Сыӵе луонлык кылдӥз Германиысь "Унисет-60" кужмо машина ваемзы бере. Асьме дорын газетъёссэс озьы ик потто Пермь но Киров улосъёс. Комбинат со сяна журнал, книга, пӧртэм коробкаос но дася. Ужа нимысьтыз заказъёсъя но. Ӵем дыръя куинь сменаен но тыршоно луэ. Азьвыл типографиын ужан герӟаськемын вал тазалыклы кышкыт ваись цинкен, свинецен. Табере кутӥське офсет амал, олифаен сурам буёлъёс. Ойдолэ, асьмеос но ӝамдэлы газетмес поттӥсьёс доры кожаломе. Н. БАЙТЕРЯКОВ. 1. Туспуктэмъёсъя монтаж лэсьто мастеръёс Римма Пластинина, Ольга Золотарёва но монтажист Татьяна Будменцева. 2. Токарьтэк Сергей Трухановтэк ужаны уз быгаты одӥг ёз но. 3. Газетъёсты печатланъя цехын ужасьёс. 4. Та цехлэн кивалтӥсез Александр Шилов но шеф-печатник Александр Белых али гинэ "кисьмам" номерез эскеро. 5. Газет поттон удысын кема ужам мурт Валентина Семенова. 6. Фотонаборъя цехысь инженер-электронщик Евгений Назаров но фотооператор Дмитрий Кабанов. В. Беломорскихлэн туспуктэмъёсыз. Ог-огмес валан уз лу мултэс Калыкын юнме уг верало ук, кытчы усемме тодысал ке, азьвыл ик куро вӧлдысал шуыса. Но та сярысь ялан "вунэтӥськом" кадь. Соинтэк-а нуналлы быдэ шудтэм учыръёс луо. Таӵе "вунэтон" сяммылы тужгес ӧпкелё тылпу кысӥсьёс. Уго толэзьлы быдэ шаерамы 40 пала тылпу потон учыръёс луо. Нош со "горд атас" шуонэд лопыръяськыку, тылпу кысӥсьёслэсь вуонозэ секундэн чотаськод-ладъяськод. Жаляса верано, сюрес вылэ потэм пожарнойёсты санэ ум понӥське. Машиналэсь югыт ӝуатэм тылъёссэ но, сиреназэ но водительёс кылымтэ, адӟымтэ улэ карисько. Котьу сямен ик тылпу кысӥсьёсты уг шумпотто Ижевскысь сюресъёс. Гужемзэ соос выро-гопо ке, толалтэзэ лымыен согиськемын луо. Тани Выль ар шутэтсконъёс азьын гинэ луэм учыр но паймытэ. Ижысь лымыен тырмем Красноармейской урам артэ кык машина тэронтэм сюбегам. Озьы тылпу кысонэ дыртӥсь машина сое быдэсак басьтыса ортчоно луиз. Ӵапак та вакытэ пумитаз лыктыны кемдӥз "Нива". Ӧз, сюрессэ ӧз сёты со тылпу кысӥсьёслы.Пожарной машина ачиз дугдоно луиз. Со понна "Нива" лымы пуктэмъёс валлин "горданез" ортчыны малпаз. Ӧз пӧрмы: пожарной машина улэ пограз. Озьы "Нивалэн" кузовез ярантэм луиз, со сяна, сӧсырмиз ачиз водитель но. Кин янгыш та учыре, эскероз следствие. Но одӥгзэ али ик вераны луоно: водительёслэн ог-огзэс валамзы, гажамзы сюрес вылын трос шудтэм учыръёслэсь палэнскыны юрттысалзы. А. Емельянов. Огдырлы толэзь "кысылӥз" Туэ толалтэ сайкыт куазё нуналъёс туж ӧжыт: я пилемо улэ, я пелляське, я бус вӧлске. Соин ик толэзез но, шундыез но шер адӟиськод. Но 9-тӥ толшоре куазь ӟырт- ӟырт кезьыт кариськиз, шунды но возьматскиз, инбаме бадӟым кӧмеч быдӟа тыр толэзь но ӝутскиз. Астрономъёслэн верамзыя, ӵапак та нуналэ Музъемлэн вужерез Толэзез быдэсак Шундылэн югытэзлэсь пытсаны кулэ вал. Ӟуч сямен сое "полное лунное затмение" шуо. Инкуазьын таӵе учыръёс туж ик ӵем уг луыло, араз ог куинь пол. Но Толэзьлэсь пытсаськемзэ котькытын ик огдыре адӟыны уг луы. Шуом, одӥгаз аре сое адӟыны быгато Америкаын улӥсьёс, мукетаз аре сое учкыны кылдоз Европалы гинэ. Туэ удалтӥз асьмелы но. Куд-ог ивортонъёсъя Толэзь Музъемлэн вужереныз ӵоксаськыны кулэ вал 21 час 45 минутэ. Мынам та учырез адӟылэме ӧй на вал бере, тунсыкъяськоно кариськи. Верам дыре балконэ потӥ. Инбамын одӥг пилем но ӧвӧл, толэзь юг-юг пиштэ. Отын нокыӵе воштӥськонъёс уг адӟисько на. 10 час 30 минут. Шунды ӝужан паласен толэзь пеймытаны ӧдъяз. Ог 12 час котырын солэн ӝыныез сьӧд виштыен басьтэмын ни. Ӝыны час ортчыса, Толэзь быдэсак "кысӥз", котыраз гинэ югыталэс кульчо пиштэ на. Нош 2 часэ уин Толэзь быдэсак усьтӥськемын ни вал. Зэм, ӵукна кыдёкысь "куномылэсь" пиштэмзэ адӟыны ӧз ни кылды. Сое нош ик ворсазы пурысь пилемъёс. Музъемысен Толэзёзь 356400-406700 иськем луэ, шуо тодосчиос. Асьмеос солэсь 59 процент люкетсэ гинэ адӟыны быгатӥськом. Диаметрезъя Толэзь Музъемлэсь ньыль поллы пичигес, секталаезъя - 81 поллы. Уин Толэзьын 169 градус кезьыт возиське, нуназе - 122 градус пӧсь. Н.БАЙТЕРЯКОВ. Дышетӥсьёсты дася 1970-тӥ арын Удмурт кун пединститутлэн удмурт люкетаз, Дэбес педучилищеез йылпумъямез бере, туж вылӥ дунъет басьтыса, дышетскыны пыриз восьтэтгес мугоро, суд йырсиё нылаш. Солэн ӵош дышетскись эшъёсыз тунсыко адямиос вал. Татын дышетскизы куинь Васильеваос, куинь Ивановаос. Соос пӧлысь огез луэ та нылаш - Аля Иванова (табере - Алашеева). Та группа "крезьгурез яратӥсь" вал, шуыны луоз: огез Аля Иванова баянэн шудӥз, мукетыз - гитараен, куинетӥез - арганэн, нош кырӟаны татын тросэз ярато вал. Иванова Алялэн группаез мында концертъёсын ёросъёсы, гуртъёсы нокин ӧз пота, дыр. Дышетскыны пыризы пединститутэ, нош йылпумъязы университетэз. Соин ик тазьы кырӟало вал: "Институтэ пырид-а но, университет луиз, университет луиз..." Алялэн группаез "научной" но вылэм: татын дышетскизы вуоно тодосчиос - филология наукаосъя докторъёс М. Г. Атаманов, Т. Г. Владыкина, филология наукаосъя кандидатъёс Л. Н. Долганова, А. Ф. Шутов, педагогика наукаосъя кандидат В. М. Ившина. Кудӥз журналист луиз, тросэз, валамон ини, асьсэды школаын дышетон удыслы сӥзизы. А. А. Алашеева вордӥськиз 1951-тӥ арын толшоре Кез ёросысь Пеган гуртын. Йылпумъяз тямыс классъем Вуж Сири школаез. (Алевтина Анатольевна али жаляса тодаз вае: кыкез ик та гуртъёс пичи гуртъёсты быдтон вакытэ быриллям.) 1975-тӥ арын университетэз йылпумъямез бере, А. А. Алашеева ӟуч кылъя но литературая дышетӥсь луыса ужа Кез ёросысь шор ёзо Стеньгурт школаын. 1977-тӥ�1979- тӥ аръёсы "Советской Удмуртия" газетлэн редакцияз корректор вал. 1979-тӥ арысен Алевтина Анатольевна ужаны кутске Удмурт кун университетысь удмурт кылъя но литературая кафедраын, 1989-тӥ арысен - удмурт кылъя но солы дышетон методикая кафедраын. Ужан удысэз - туала удмурт кыллэн морфологиез, удмурт но ӟуч кылъёслэн ӵошатон грамматиказы. Трос аръёс ӵоже А. А. Алашеева пайдалыко ужаз студент группалэн кураторез луыса. Мылысь-кыдысь пыриське удмурт кылъя пӧртэм пумо олимпадаос ортчытъянэ. Тодон-валанзэ будэтъяз педагогика тодонъёсъя ӝыт университетын, МГУ-ысь ФПК-ын. 1993-тӥ арын Алевтина Анатольевналы быгатыса ужамез понна сётэмын "Устоез дышетӥсь" сӥё-дано ним, со сяна - час. А. А. Алашеева йылпумъяз Россиысь Наукаосъя академилэн Кыл тодонъяинститутэзлэсь аспирантуразэ. Ужъёсыз сӥземын удмурт кылысь ужпумъёслы но уй пал удмурт вераськетъёслы. Али тырше удмурт кыллэн морфологиезлы сӥзем уж дасян бордын. Вордӥськем нуналэныз сюлмысьтымы ӟечкыласа, ми, ӵош ужась эшъёсыз, Алевтина Анатольевналы бадӟым шуддбур но ӟеч тазалык сӥзиськом, дышетон удысаз азьло кадь ик трос аръёс ӵоже пайдалыко ужаны мылкыд кариськом. А. ШУТОВ, Удмурт кун университетысь дышетӥсь, доцент. Эктэлэ на! Таяз кӧснуналэ, 13-тӥ январе, "Металлург" культура дворецын ортчоз Удмурт Элькунысь калык артисткалы, Россия Федерациысь дано артисткалы Леонора Викторовна Мамонтовалы сӥзем ӝыт. Леонора Викторовна Мамонтова вордӥськиз 1940-тӥ арын 25-тӥ декабре Москваын. 1958-тӥ арын йылпумъяз Москваысь хореографияя училищелэсь калык эктонъя люкетсэ (дышетӥз И. А. Моисеев). 1964-тӥ арын луиз "Италмас" ансамбльысь эктӥсь. Аслэсьтыз устолыксэ тужгес ӟеч возьматыны быгатӥз "Пичи гырлыосын эктонын", озьы ик - "Пужыос", "Зимонька" эктонъёсын. Леонора Викторовна ас ужаз пыӵатыны быгатӥз удмурт калык хореографиез, азьланьтӥз Россиын эктон амалэз. 1965-тӥ арын кивалтыны кутскиз ансамбльысь балет группаен. 80-тӥ аръёсы кужымзэ эскере балетмейстерлэн удысаз. Сюлмысь пыриськылӥз "Ӟуч тол", "Белорус сӥзьыл" фестивальёсы, кырӟанъя но эктонъя ансамбльёслэсь устолыксэс учконлы сӥзем ужрадъёсы. Ансамблен ӵош трос пол поталляз кунгож сьӧры. Кӧня ке ар ӵоже ини Леонора Викторовна Мамонтова мылысь-кыдысь дышетэ егитъёсты. Дышетэм адямиосыз пӧлысь тросэз али ужало кунысьтымы пӧртэм театръёсын (тужгес тодмоосыз - Л. Кунакова (Санкт-Петербург), Н. Рогозина (Одесса). 1992-тӥ арын "Италмас" ансамбльын кылдытӥз калык эктонъя нылпи школа-студия. Покчи пиналъёс асьсэды сцена вылын туж усто возьматыны быгато ни. Данакез ужало но ини кырӟанъя но эктонъя "Италмас" кун ансамбльын. Ачиз Леонора Викторовна Мамонтова куамын сизьым ар эктӥз сцена вылын. "Италмасын" ужакуз, кытчы ке, палэнэ, кошкон сярысь ӧз ик малпаськылы. Кызь ар эктэмез бере, Москваысен тодмо балетмейстер Игорь Александрович Моисеев Анатолий Васильевич Мамонтовлы огпол шуиз: - Та адямиез эн ышты - сотэк ансамбляд ваньмыз куашкалоз. Учкисьёсты эшшо дас сизьым ар шумпоттӥз на Леонора Мамонтова. Тужгес яратӥз сое гуртын улӥсь калык. Леонора Викторовна ӧз ик чакласькылы угось: выж вылэ-а, нюр вылэ-а учыралляз - эктӥз но эктӥз. 1976-тӥ арын Леонора Мамонтова луиз Удмурт Элькунысь калык артистка, 1987-тӥ арын - Россия Федерациысь дано артистка. Вордӥськем нуналэныз но юбилей ӝытэныз ӟечкыласа, Леонора Викторовна Мамонтовалы сӥзиськом азьвыл кадь ик шӧртчи сэзьлык, капчи ыртӧл кадь задорлык, ӝуась тыл кадь ӟырдытлык. Эктэлэ на! Л. В. Мамонтова. Гажано эшъёс! Сюлмысьтым ӟечкыласько Тӥледыз Россия Федерациысь Прокуратуралэн нуналэныз! Тӥляд уждэс ӟеч валаса но быгатыса быдэсъямды бордысь потэ кунлэн но страналэн огсыр азинсконзы. Тӥ ас ужъёсыныды юрттӥськоды асьмелэсь кунлыкмес юнматыны. Тӥледлы оскемын туж секыт но со дыре ик дано удыс - Россилэсь законъёссэ быдэсъянэз эскерон-чаклан, котькуд адямилэсь конституциен сётэм правооссэ утён. Сӥзисько ужады бадӟым азинсконъёс, юн тазалык, тупаса улон но шудбур. Удмурт Республикая валтӥсь федеральной инспектор С. В. Чикуров. "Спутниклы" подписьёс: 1. Елена Апполоновна Сырых. Та тылгизьы сямо кышномурт кивалтэ "Спутникысь" удмурт огазеяськонэн. 2-3. Раиса Алексеевна Морозова 25 ар ужа ни машина тунгонъёсты бичан бордын. 4. Тӧдьы юсьёс но кылдо быгатӥсь нылкышно киос улын. Та штораос чеберъялозы котькуд квартираез, коркаез. 5. Тани со - Ольга Кузьмина. 6. Виктор Петрович Алексеевтэк улонзы , оло. мӧзмытгес луысал. Со ук ӝытлы быдэ кырӟанэн, крезьгурен бугыртэ сюлэмъёсты. 7. Уж мынэ ке мылкыд умой. Алевтина Масалева ки пыр пото сю, сюрс пар нылкыно колготкиос. Фотоосыз Владимир Беломорскихлэн. Тани кыӵеесь ми вал, кыӵе луимы! "Тодмалод-а, уд-а" сэреге туспуктэм шедьтыны шуг ӧвӧл кадь. Геройёсмылы асьсэлы но тунсыко: али уго соосты ваньмыз сямен тодмало, нош пичи дыръязы со сярысь ӧз но малпаськылэ на, вылды. Соин ик асьсэос но тунало: тодмалозы-а, уз-а? Зол-а воштӥськиськем кӧня ке дасо аръёс ӵоже? Мукет ласянь шугъяськон кылдэ: ваньмыз соку ик тодмазы ке, мар шудонэз? Нош ӧз ке тодмалэ, уката ӝож. Выль ар праздникъёсы но та сярысь сюлмаськыса улӥ. Но лыдӟисьёсмы ӧз ӝожомытэ. Нырысетӥ нуналаз жингыръясьёс трос ӧй вал ке но, шонер валэктон сётӥз Пичи Пургалась Евгения Шалаева. Молодец, городъёсты но азьпалтӥз. Я, тӥляд тодэмды потэ ни, кинъёс соос - тодмо но тодмотэм ымныръёс? "Нырысетӥез, конечно, Светлана Кибардина. Кыкетӥ-куинетӥ классын дышетске, дыр, ай. Ой, нош дотово мусо ук! - ангесысьтыз гопсэ чиньыеным зӥбеме потэ..." - гожтэм Пичи Пурга ёросысь Шор Кечолысь Нина Ермокина. Нырысетӥ туспуктэм вылын - зэмзэ но али "Удмуртия" ГТРК-ысь журналист но передачаосты нуись Светлана Кибардина. Светланаез ваньмыз сямен вазиськемъёс тодмазы. Куинетӥзэ но Нина Анатольевна шонер тодэм. Тани кызьы гожтэм со: "Таиз ачиз кузёды - Алексей Петрович Шкляев. Туспуктэмез Дэбес педучилищее пырыкуз лэсьтэмын, дыр. Ой, деловой, серьёзной". Туж шонер. Туспуктэм вылын - зэмзэ но туж серьёзной кивалтӥсьмы - Алексей Петрович Шкляев. Тазэ но ваньмыз сямен соку ик тодмаллям, кыкез гинэ лыдӟисьёсмы А.Шкляевлэн тусысьтыз "тодмаллям" актёрез Леонид Романовез но Валерий Митрофановез. Тани али гожто эшшо одӥг фамилия. Ой, кыӵе ӝоже усёз Нина Анатольевна. Со уго малпа, кыкетӥ туспуктэм вылын пичи Толя Уваров шуыса. Жаляса верано луэ, матын но ӧвӧл. А ведь тӥ сое туж ӟеч тодӥськоды, Нина Анатольевна! Концертъёсаз кидэс пӧсьтымон чабылӥды но, луоз. Валатскиды-а? Бен, таӵе вылэм пичи дыръяз вуоно кизили - одӥгез тужгес дано кырӟасьмы Михаил Ворончихин. Учке ай, синъёсыз ну копак сыӵеесь ик ук. Жаляса верасько асьмелэсь пичильтык "сьӧлыкмес". Михаил Тимофеевичлэсь укыр пичи дыръяз лэсьтэм фотозэ быръеменымы-а, мар-а тазэ туж тодмо адямиез тросэз суразы. Кин но ӧз шуэ сое! Очей Толя, Павел Вершинин, журналистъёс Владимир Михайлов, Виктор Ивашкин, Валерий Сидоров... Егит нылъёс, конечно, сое туала кумирзы - Алексей Ложкин - кожазы. Но ӝыныез соку ик тодмаллям яратоно кырӟасьсэс. Тани Воткинск ёросысь Мунчогуртысь Ираида Емельяновна Васильева Михаил Тимофеевичез соку ик тодмам. 1980-тӥ арын (кылем дауре!) ми доры, пе, концертэн вуылӥз. Туж шулдыр кырӟа, калык чабе, чабе, сцена вылысь кошкыны уг лэзьы. Соку, пе, тӥни синмысь синме адӟи но туссэ ӧй вунэты ни. Вот кызьы! Ивортонэныз ӵош ӟеч кылъёс верам кырӟасьлы Кизнер ёросысь Полина Павловна Киселёва но. Со Михаил Тимофеевичез ӵемгес концертъёсын вуылыны куре, клубъёс одно тыро луозы шуыса оскытэ. Ма, Ворончихинлы реклама кулэ ӧвӧл, сое ваньмыз тодо. Тӥни сыӵе дано "ымныръёс" шудӥзы тӥледын Выль ар азьын, лыдӟисьёсмы. Соослэсь ик кузьым куре табере. Серекъясько, вождэс эн вае. Ма, серекъятэк но озьы ик луэ - одӥгез "герой" уго асьмелэн кивалтӥсьмы. Нош редакция котьку кылзэ быдэсъяны тырше. Кызьы ялӥм вал, синпель кузьым сётӥськом котькинлэсь вазь ивортэм куинь муртлы. Ваньмыз соос валэктон сётӥзы телефон пыр. Гожтэт пыр шонер ивор сётӥз Кияса ёросысь Зинаида Архипова гинэ, но гожтэтэз туж бер вуиз. Мар бен, тани соос - шудоос: Пичи Пургалась Евгения Шалаева, Пичи Пурга ёросысь ик Вуж Монья школаысь дышетӥсь Нина Архипова, Вотка ёросысь Ираида Васильева. Сюлмысьтымы тау кариськом ваньмызлы конкурсамы пыриськемъёслы. Мылкыддэс эн куашкатэ, азьпалан - выль конкурсъёс. З.РЯБИНИНА. ВАЛЭКТЭ ЮРИСТ Сэрегез дася адвокат Лилия ШКЛЯЕВА Сазьтӥськытӥзы Дорам шӧмогем бертӥ. Сокем ик ӵаш-маш ӧй кары кадь. Нош лэсянтэм кышное сурым ӝутӥз но милицие жингыртӥз. Монэ нуизы вытрезвителе. Яра шат дораз вуэм муртэ отчы ворсаны? П.Н. Учкоме "Милиция сярысь" Россия Федерацилэсь Законзэ. 11-тӥ ёзэтысь (статьяысь) 11-тӥ люкет валэктэ: милиционеръёс быгато вытрезвителе яке югдурез утёнъя отделысь дежурной люкетэ вуттыны но сазьтӥськытозязы отын возьыны кудӟем муртъёсты, таосыз лыктэмын ке трос калык люкаськон интые, кытынзэс уг валало но кер-нор карыны быгатозы. Улон юртысь воргоронэз яке кышномуртэз сазьтонние нуыны луэ вӧзысьтыз адями милицие гожтэтэн вазиськыса гинэ, таиз лыдъя ке, кудӟем мурт солэн тазалыкезлы, улонэзлы но ваньбурезлы кышкытлык кылдытэ шуыса. Нылы аналтӥз пизэ Аслад пиналыд сярысь урод кылъёс вераны чебер ӧвӧл ке но, мон пумам вуи ни. Нылы укмыс аресъем пизэ куштӥз мон вылэ. Сое уг сюды-ворды но уг дися-кутча, коньдонзэ мыным уг сётъя. Кызьы нылы киысь пизэ законъя талано? Песянай. Нылпизэ вордонлэсь палэнскись кышномуртлэсь анай-атай правооссэ таланы луэ законъя. Озьы вера Россия Федерацилэн Семья сярысь кодексэз. Со понна вазиськоно прокуратурае, опекая но попечительствоя ёзэ яке быдэ вуымтэосын ужанъя комиссие. Нылдылэсь анай правооссэ куке-соку талазы ке но, пидэс вордонлэсь со уз мозмы. Законъя алимент тыроно луоз. Выт пумысен Ас коньдонэным басьтӥ вал одӥг комнатаен квартира. Сое огкылъя (договоръя) воштӥ предприятилэн куинь комнатаен квартираеныз. Мынам пайдаысь (доходысь) выт (налог) тыронын льгота луоз-а? А.Пестерев, Ижын улӥсь. Та пумысен 1998-1 номеро закон кутэмын 1991-тӥ арын 7-тӥ декабре. Нимыз тазьы: "Физической лицоослэсь подоходной налог сярысь". Со выт тыронэз кулэстэ юртъер лэсьтӥсьёс яке квартира басьтӥсьёс понна. Квартираостэс тӥ предприятиен воштӥды ке, огкадь дунын лыдъяса (1 комнатаен квартира - 3 комнатаен квартира) нокыӵе льгота уг тупатӥськы. Куинь комнатаен квартира понна тӥ ватсаса дун тыриды ке, та дунысь ик льготая пичигес выт басьтӥськоз. *** Нылме дышетӥсько кун университетын, но ачим дунзэ тырыса. Вытъя мыным кыӵе ке льгота вань-а? И.Афанасьева. Вылӥ верам закон куре выт тыроно огъя барышысь (доходысь) куштыны нылпиосты вордыны быдтэм дунэз. Ар куспын 15 сюрс манетозь басьтӥды ке - кык пичи уждун мында; 15 сюрс - 50 сюрс манет понна - кык пичи уждун мында сыӵе толэзёзь, ку барыш 15 сюрс манетэз ортчиз; одӥг пичи уждун мында - барыш 15 сюрс манетэз ортчем бере. Пенсия но прописка Пенсиме будэтоно шуыса, выль документъёс люкай но райсобесэ нуи. Нош мыным шуо: тон Игра районысь кошкемед ни, нош Ижын пропискаед ӧвӧл на. Соин ик бумагаосме ӧз басьтэ. Шонер-а валэктӥзы мыным? К.Корепанова. "Россия Федерациын пенсиос сярысь" Россия Федерацилэн Законэз номыр уг вера пенсия тупатонын регистрация (прописка) пумысен. Россия Федерацилэн Граждан кодексысьтыз 20-тӥ ёзэт улон интыен лыдъя сыӵе интыез, кытын адями ортчытэ тросгес дырзэ. Юрттэт курыса, тӥ вазиськыны быгатӥськоды улонын шугадӟонлэсь утёнъя (социальной защитая) сояз ёзэ, кытын возё пенсияя уждэс (делодэс). Курондэс отын ӧз быдэстэ ке, валэктонзэс тӥледлы гожтыса мед сётозы. Соку тӥляд праводы луоз вылэгес ёзэ яке судэ вазиськыны. Малы уже уг куто? Олокӧня интые уже куриськи ни. Нуны ваёнэ матэктэ шуисько ке, соку ик ӧс шоры возьмато. Конституция ваньмызлы огкадесь правоос сётэ ке, малы монэ озьы ултӥяло? Монэ кыӵе ке закон уте меда? С.Смольникова. Вань сыӵе закон - Россия Федерацилэн Уж сярысь законъёсыныз кодексысь 170-тӥ ёзэт. Со алэ нуны витись яке утялтӥсь нылкышноосты та муген уте кутытэк кельтыны. Уг ке басьто, кивалтӥсьёс тӥледлы мугзэ гожтыса валэктыны кулэ. Таӵе гожтэтэн тӥляд мынэмды луоз судэ. Нокыӵе мугтэк уже кутӥсьтэм кивалтӥсез кыскыны луэ уголовной кыл кутон улэ (Россия Федерацилэн Уголовной кодексысьтыз 145-тӥ ёзэт). Сое тырытыны быгатозы бадӟым штраф. Сбербанкын коньдонэ "ӝуаз" Мон вордски 1920-тӥ арын. 1989-тӥ арын сберкассаын люкаськем коньдонэ 6 сюрс манетозь вуиз. Валля арын-а, азьвылгес-а (вунэтӥ ук!) мынам ёзъёсылы тыризы компенсация шуонзэс - одӥг сюрс манет-а, шай-а вал кадь. Берлогес потӥз выль закон: Быдӟым оже ветлэмъёслы арлыдзы шоры учкытэк сётӥське компенсация. Мон, фронтовик, сбербанке мынӥ, нош мыным коньдон ӧз тыре. Малы.? А.Королёв. Мугез таӵе, дыр. 1922-тӥ арозь вордскемъёслы компенсация азьвылгес сётэмын бере, табере номыр но тырыны чакламын ӧвӧл ни. Пунэмен доллар сётӥ Матысь тодмое, ужбергатӥсь-челнок, Турциысь вузъёс вайыны шуыса, пунэмен коньдон куриз. Долларъёсы, нокыӵе пайда вайытэк, "сапегын" кыллё вал бере, соосты сётӥ, тодмоелэсь гожтэт (расписка) басьтӥ. Тодмо юристэ берлгес шуиз: сыӵе уж (сделка), пе, законъя ӧвӧл. Шонер-а со вераз? Быгатоз-а тодмое пунэмзэ тырытэк кельтыны? Суд но мыным уз юртты шат? Р.Вяткин. Тодады вайытом Россия Федерацилэн Граждан кодексысьтыз 140-тӥ ёзэтэз: Россия Федерацилэн быдэс улосвылаз (территорияз) законъя тырон амал - манет. Зэм, доллар озьы ик эркын ветлэ кадь, но сое кутон радъяське нимысьтыз законъя. Озьыен, законлы тупасьтэм амалэн лэсьтэм ужлы нокыӵе кодекс уг дурбасьты. Но... Распискаын яке огкылын, оло, верамын вал: валюта кутӥське эквивалент чотын. Шуом, пунэмен тырон лыдъяське манетэн, нош доллар кутӥське курсэз тодон вылысь. Соку осконды вань долларъёстэс суд пыр берыктыны. Дышетскем ар пыре-а стаже? Районысь потребобщество монэ куке-соку дышетскыны ысъяз вузкаронъя техникуме. Табере, пенсие дасяськыкум, тодэме потэ: отын дышетскем аръёс пырозы-а огъя ужам стаже? Т.Корякина. Огъя ужам стаже пыре профессилы дышетскем дыр - кадръёсты дышетонъя яке дасянъя но соослэсь тодон-валанзэс будэтонъя школаосын, курсъёсын, шор яке вылӥ заведениосын, аспирантураын, докторантураын, ординатураын дышетскем аръёс. Трос тунсыкоез Таяз арняе ортчизы но ортчозы на культуралы но искусстволы сӥзем пӧртэм ужрадъёс. 9-тӥ январе Ижысь искусствоосъя кык номеро нылпи школаын вал чеберлыкез валаны дышетӥсь шаер кенеш. 10-тӥ январе шаерысьтымы Калык киужъёсъя юртын усьтӥськиз "Тодамы ваиськомы азьлозэ - кылдытӥськомы туалазэ" нимо адӟытон. Возьматӥськизы музейёсъя но выставкаосъя М. Т. Калашников нимо комплексысь усточиослэн пӧртэм амалъёсын быдэстэм киужъёссы. 13-тӥ январе "Металлург" культура дворецын ортчоз Удмурт Элькунысь калык артисткалэн, Россиысь дано артисткалэн "Италмас" ансамбльлэн валтӥсь балетмейстерезлэн Леонора Мамонтовалэн ӝытэз. Со сӥземын луоз эктӥсьлы куатьтон арес тырмонлы. А. Апаева. Удмурт Элькунысь Национальной театр 23-тӥ январе Шаерысьтымы тодмо крезьгурчилы Николай Егорович Шкляевлы 75 арес тырмемлы сӥзем ӝыт. Возьматэмын луоз тодмо драматурглэн Степан Широбоковлэн "Ой, чебер нылъёс" пьесаезъя кык ёзэн крезьгуро комедия. Чузъяськозы Николай Шкляевлэн крезьгуръёсыз. Ӝытлэн кыкетӥ люкетаз - ӟечкыланъёс. Кутскоз 18 часын. 25-тӥ январе Удмурт Элькунысь калык артисткалэн Валентина Михайловна Меняйлолэн юбилеезлы сӥзем ӝыт. Возьматэмын луоз шаерысьтымы егит драматурглэн Владимир Котковлэн "Пинал мылкыд - юмал йӧлпыд" пьесаезъя кык ёзэн тунсыко комедия. Ӝытлэн кыкетӥ люкетаз - ӟечкыланъёс. Кутскоз 18 часын. 31-тӥ январе Вячеслав Ар-Серги "Сельсовет Маня" кык ёзэн тунсыко комедия. Кутскоз 18 часын. Юалляськоно 78-79-81, 78-45-92 номеро телефонъёсъя. Удмурт Элькунысь Национальной театр 27-тӥ январе "Капи-кап, капи..." Крезьгурчилэн Алефтина Корепановалэн азвесь сюанэзлы но творчествоезлы сӥзем ӝыт. Концертэ пырисько: эктонъя "Венец" ансамбль, Ольга Зорина, Светлана Смагина, Фаина Будина, Валентина Загуляева, Валентина Меняйло, Евгения Медведева, Алевтина Романова, Михаил Ворончихин, Пётр Романов, Сергей Сава, Алексей Ложкин, Вячеслав Краснопёров. Кутске 17 часын. Юалляськоно 78-79-81, 78-45-92 номеро телефонъёсъя. Кырӟан но веран огазеяськизы 17-тӥ январе, туэ понна нырысьсэ люкаське "Удмурт кенеш" огазеяськонлэн Пичи кенешез. Со эскероз данак ужпумъёсты. Пичи кенеше лыктэмъёс быръёзы "Удмурт кенеше" огазеяськонлэн тӧроезлы воштӥсьёс, культурая, политикая, экономикая но музон удысъёсъя комиссиослы валтӥсьёс, огазеяськонлы кивалтэт. Нуназе вадес луоз быдӟым удмуртлэн Куӟебай Гердлэн вордӥськемез дырысен сю куинь ар тырмонлы сӥзем ужрад. Лыктэмъёс кенешозы Куӟебай Герд но удмурт кыл ужпумъя. Та удысъя ик нимысьтыз вераськоз педагогика наукаосъя кандидат Валентина Михайловна Ившина. Куӟебай Гердлэн вордӥськемез дырысен сю куинь ар тырмонлы сӥзьыса ик та нуналэ чузъяськозы калык кылосэн пачылмем кырӟанъёс-веранъёс. Е. Ромашова. Нырысьсэ кырӟалоз 27-тӥ январе быдэс дуннеысь крезьгурез яратӥсьёс пусъёзы бадӟым лыдпусэз - сю ар тырме опера кылдытъясь быдӟым крезьгурчи Джузеппе Верди улонысь кошкем дырысен. Та билейлы Удмурт Элькунысь Операя но балетъя кун театр сӥзиз крезьгурчилэсь "Травиата" операзэ - та уж дасямын дас ар талэсь азьло. 25-тӥ январе та спекткльын нырысьсэ кырӟалоз калык куспо конкурсъёслэн лауреатсы Наталия Ермакова. Аспӧртэмлыко но тунсыко кырӟасез Ижын ӟеч тодо. Та вакытысен Наталия кырӟалоз Операя но балетъя кун театрын. Джузеппе Вердилэн юбилеезлы сӥзьыса быдэстоз "Травиата" спектакльысь Виолетталэсь партизэ. В.ЛАГУНОВ. Нылпиосын пумиськозы Вуоно пуксёнэ, 16-тӥ январе, шаерысьтымы Культурая министерстволэн кенешъёс ортчытъян висъетаз луоз тунсыко ужрад - суредан удысэз яратӥсьёс пумиськозы покчи усточиослэн школа-интернатазы дышетскись пиналъёсын. Асьсэлэн ӟеч пушъетъёсынызы шумпоттозы быдӟым тыложе пыриськемъёс Борис Пензин, Иван СемаНин, егит суредась Вадим Костылев. Е.КУЗНЕЦОВА. Шаерамы нырысьсэ Усьтӥськиз "Удмурт етӥн" магазин Выль ар азьын Удмуртилэн шоркараз - ортчиз тунсыко но аспӧртэмлыко ужрад. Пушкинской урамысь "Аэрофлот" билет вузан юртын нырысьсэ усьтӥськиз "Удмурт етӥн" ("Лён Удмуртии" магазин. татын вузасько етӥнлэсь гинэ куэм, керттэм но вурем дӥськут но музон арбериос. Магазинэз усьтӥз "Азинскон" ("Развитие") огазеяськон (ООО). Директорез Александр Васильевич Лаптев. Со юнэсь кусыпъёс тупатӥз Костромаысь "Большая костромская льняная мануфактура") акционер огазеяськонэн. Татын ваньмыз сямен вузаськоз солэн продукциез. Басьяськисьёслы етӥнлэсь дӥсь кельшиз. Со уго кема чида, чебер пуке, уг посӥськы, но тужгес пусйымонэз - мугорлы капчи но шуныт. Таин валче таӵе веран вань. Антарктидае калык куспо экспедиция мынэм. Данакез адямиос сое мырдэм чидаллям, итальянецъёс гинэ капчиен улӥллям. Малы? Соос етӥн дӥсен лыктӥллям. Тӥни кыӵе умой но усто етӥнлэсь дӥсь! "Удмурт етӥн" магазинэз усьтонэ трос калык люкаськиз. Горд басмаез нырысь ик вандӥзы Кун Кенешлэн Тӧроез Игорь Семенов, гурт удысъя но сиён-юонъя министрлэн воштӥсез Василий Наговицын, "Азинскон" ООО-лэн валтӥсь директорез Александр Лаптев. Ужрадэ пыриськизы Кун Кенешысь, Правительствоысь но министерствоысь мукет кивалтӥсьёс но специалистъёс. Татчы озьы ик ветлӥзы Кез, Зура етӥн заводъёслэн директоръёссы Виктор Данилов, Анатолий Максимов но музон куноос. Удмуртия вашкала дырысен уй пал буртчин будэтэ, нош ӵыжы-выжыосмы, песянайёсмы но анайёсмы етӥнлэсь кыӵе чебер дӥсь: дэрем, ӵушкон, выжлёгет - куо вал. Улон воштӥськиз, табере таин юн кибашлыос гинэ выро на, ужъёссэс адӟытонъёсын возьмато. Нош Киясаысь куиськисьмы Зоя Алексеевна Мазитова быдэс дуннелы тодмо ни. Россиын али 25 улос етӥн будэтэ, элькунмы котьку сямен 14-тӥ-15-тӥ инты басьтэ. Но берло аръёсы, выльдӥськон но рынокен экономикае потон вакытэ, та дуно культураез юнме шорысь вунэтыны ӧдъям. Етӥн заводъёсмес пытсаськон калэ вуттӥм. Югдур умояны кутскиз "Етӥн" кун программа кутэм бере. Кун Кенеш но Правительство та удысэз улӟытонлы шӧдскымон инты висъязы. Тани миым, 2000-тӥ арын бюджетысь 5,2 миллион манет юртэт сётэмын. Со мынӥз кидыс но техника басьтыны. Нош туэ коньдон 3 поллы уногес вуоз, кун бюджетын 17,4 миллион манет уксё висъяны учкемын. Со пӧлысь 6,5 миллионэз туала выль техника басьтыны кутӥськоз. Оглом пусйыса, программа улонэ пыӵа. Кылсярысь, паськытало етӥн бусыосмы: миым 7,8 сюрс гектар ке вал, туэ со 12,3 сюрс гектар луоз. Урожаймы но будэ. Валля арын котькуд гектарысь 2 центнер треста басьтӥм ке, миым со 4,7 центнер люкаськиз, нош мертчан басьтӥм 3,8 сюрс тонна. Та лыдпусэз 8 сюрсозь вуттыны ужпум пуктэмын. Ведь Удмуртия 1913-тӥ арын 12,5 сюрс тонна мертчан шукке вылэм, быдэс дуннеын ӝынызэ пала, етӥнэз будэтэ вылэм. Азьланьын югдурез уката умоятон вылысь, Гурт удысъя но сиён-юонъя министерство чакла выль "Етӥн" программа дасяны. Со 2002-тӥ-2006-тӥ аръёсы быдэсъяськоз. Нош нырысетӥ программалэн пайдаез шӧдӥське. Тани Зураысь етӥн завод пунэм амалэн ужась цех пуктӥз ни. Со сьӧры мукетъёсыз но уисько. Бен, уй пал буртчин будэтон - со капчи уж ӧвӧл. Азьвыл ваньзэ сямен киын быдэсъязы. Кун Кенешлэн Тӧроез Игорь Семенов но етӥн шуккемзэ тодаз ваиз, нормаез лэсьтон вылысь, пе, трос пӧсяно вал. Али етӥн будэтонъя но утялтонъя ужъёс капчиязы, вуо выль усто машинаос. Берло дыре асьсэос но етӥн заводъёс та культураез будэто ни. Туж умой со. Геннадий Романов. ДУНЪЁС Чагтыл эн кесялэ Дунъёслэн будэмзылы паймемысь дугдӥм ни, но дышыны ӧм ик дыше на. Тани алигес но Ижевскын улӥсь лыдӟисьмы шугъяськонзэ вераса жингыръяз. Верасько, пе, выль арысен тыллы кык полэс дунъёс будозы. Озьы-а со? Ӧвӧл, соку ик буйгатыны быгатӥсько мон лыдӟисьмес. Но тӥледыз умой-умой оскытон понна ми Дунъёсъя но тарифъёсъя кун комитетлэн кивалтӥсезлэсь Олег Белобоковлэсь валэктон курм. - Кылем арын 14-тӥ июне милям комитетэнымы кутэм "Удмуртэнерго" ОАО-ен сётӥськись электрокужымлы дунъёсты вошъян сярысь постановление вылэ пыкиськыса, туэ 1-тӥ январьысен шаерамы электрокужымлы дунъёс дас процентлы будӥзы. Но промышленной предприятиос понна гинэ. Калык электрокужым понна дун тыроз азьвыл сямен. Чагыр эстӥськонлы 18 процентлы дун будоз 20-тӥ январьысен. Таиз но промышленной предприятиос понна. - Нырысь предприятиос азе курон пуктоды, собере калык азе. Озьы уз луы-а? - Сотэк уз луы. Тыллы дун калык понна будоз мартысен. Зэм, дунъёсты трослы будэтыны нокин уз сёты. - Озьы ке но... Малы тыллы дунъёс маке мукетлы сярысь ӵемгес вошъясько? Кин янгыш - "Удмуртэнерго"? - Озьы шуыны уг яра. "Удмуртэнерго" - со сыӵе ик басьяськись. Со ачиз электрокужым басьтэ федеральной оптовой рынокысь, услугаос понна дун тыре "Россиысь ЕЭС" РАО-лы. Нош отын дун тупатэ нимысьтыз комиссия. Номыр уд кары. Но сокем эн чигиське, югыт нунал но тани кузя ни. Ма, собере тодады вае Приморьеез, Украинаез, Дальний Востокез... Шуг-леке шедемъёс али копейказэс гинэ ӧвӧл, манетсэс но ӧй жалясалзы, дыр: Чубайслэн лампочкаез мед гинэ ӝуалоз. Уй но, нунал но. З.РЯБИНИНА. "Удмуртэнерго" ОАО-ен сётӥськись электрокужымлы тарифъёс (предприятиос понна) Вылӥ кужымлы Шоро-куспо кужымлы Пичи кужымлы Промышленной предприятиос (750 кВт электрокужым кыскисьёс): договоръя - толэзяз 122 манет 126 манет 750 кВт-озь электрокужым кыскись промышленной предприятиос 51 коп. 52 коп. 55 коп. Тылын ужась чугун сюрес транспорт 51 коп Гурт хозяйствоос, фермер хозяйствоос 45 коп. 45 коп. 45 коп. Бюджет чотын улӥсь вуз поттӥсьтэм предприятиос 47 коп. 47 коп. Бюджет чотын улӥсь организациос: нылпи садъёс, школаос, интернатъёс, пӧртэм дышетскон интыос, эмъян но тазалыкез утён, культурая но искусствоя, калыкез утёнъя учреждениос (июньысен августозь) 43 коп. 43 коп. Тыло реклама 55 коп. Урамъёсты югдытон 39 коп. Электрокотёлъёсты ужатон понна 31 кВт-лэсь трос кутӥськись электрокужым - уин 21 коп. - мукет дыръя 1 манет 04 коп. 1� � � а=Р/яя 2 А! 8 Ё9Р Р � � ъ � � т � яя - П� - а=Р/яя 2 И( а=Р Р И( яяяя Тимес Неw Роман Цыр 0Цоуриер Неw Цыр Бырйисьёслы ивортон Удмурт Республикаысь Кун Кенеше депутатъёсты быръёнъя улосвыл комиссия быръёнъя 2 номеро Чехов округысь бырйисьёслы ивортэ комиссилэсь адрессэ: Пушкин урам, 276 номеро юрт, 216-тӥ комната, 22-69-83 номеро телефон. Комиссилэн ужан дырыз: - понедельник, четверг - 9 часысен 16 часозь; - вторник, среда, пятница - 9 часысен 16 часозь; суббота, арня нунал - шутэтскон нуналъёс. Быръёнъя улосвыл комиссия. КУӞЕБАЙ ГЕРД НИМО ПРЕМИЕН ПУСЙЫНЫ ДЭМЛАСЬКОМ Жадёнэз уг тоды 1998-тӥ арын кезьыт толшор нуналъёсы Удмурт шаер пусйиз быдӟым удмуртлэн кылбурчилэн Куӟебай Гердлэн вордӥськемез дырысен сю ар тырмонэз, нош мон соку Юкаменск но Красногорск ёросъёсысь школаосын дышетскись пиналъёсты тодматылӥ быдӟым тылож вакытэ Карелиын ожмаськем батыръёсынымы. 1969-тӥ арын 2-тӥ июле пумиськылӥ Карелиысь Медвежьегорск ёросын улӥсьёсын (татын ожмаськиз Ижын кылдытэм 313-тӥ стрелковой дивизия - со сярысь книга но гожтӥ). Берлоез пумиськонэ пӧйшур вордӥсь (татын чайыосты будэто) "Повенецкий" совхозын вал. Медвежьегорскысь военкомлэн водителез пеймыт Сандормох нюлэс шоры возьматыса шуиз: "Татын туж трос адями быриз..." Кӧня ке ар ортчыса гинэ тодӥ: татын ватэмын вылэм удмурт калыклэн быдӟым пиез - Куӟебай Герд но (нялтас вераны кулэ: 1955-тӥ арын тодматски солэн вынмуртэныз - Удмурт пединститутысь историяя факультетын дышетскисен Юрий Чайниковен)... Сюрес вылэ тазьы ӵемысь потасько бере, Иже олокызьы но берытскылоно луэ. Кытӥяз - пудэн. Зэм, визьмо но валась водительёс дун ноку уг басьто... Та ветлэмъёсы сярысь огпол ивортӥ Удмурт радиоысь журналистъёслы Светлана Пикулевалы, Сергей Касаткинлы но Вячеслав Михайловлы. Мынам верамъёсы тужгес яраллям Вячеслав Дмитриевич Михайловлы - улон шоры сайкыт синъёсын учкыны быгатӥсь журналистлы, усто кылбурчилы. Вячеслав Дмитриевич мылысь-кыдысь юалляськиз Брест крепостез утисьёсты утчаме, 313-тӥ стрелковой дивизиысь офицеръёсын пумиськылэмъёсы, Карел телевидение пыр вераськеме сярысь. Ваньзэ лулысь-сюлмысь мади солы. Нош 1998- тӥ арын, май толэзе, Удмурт радио пыр Вячеслав Михайловлэн "Ялан ӝуась тылэз утись" нимо очеркез чузъяськиз. Солэсь азьло нокин ӧз ик малпаськылы та пумысь (зэм, тодмотэм воинъёсты утчаме сярысь "Советской Удмуртия" газетэ кызь вить ар талэсь азьло гожъяз Николай Тебетеев). В.Д.Михайлов - жадёнэз валасьтэм журналист. Солэсь синйылтылэм учыръёссэ тросэз уг ик адӟыло. Паймемысь уг ик дугдылӥськы сомында кужымезлы. Радиоез кылзӥсьёс тужгес ярато "Аргурезь" веранъёссэ. Миым, 22-тӥ феврале, журналистэн Иван Аркашевен ӵош вуылӥ Пичи Пурга ёросысь Улысь Кечол гуртэ - партизан отрядлэн командирез Иван Фёдорович Очеев доры. Быдӟым тыложысь ветеран но туж синмаськыса мадиз Выль Монья гуртысь аспал эшезлэн В.Д.Михайловлэн радиоверанъёсыз сярысь. Вячеслав Дмириевичлэн ивортонъёсысьтыз тодыны луиз ини Куӟебай Гердлэн ӵыжы-выжыосыз, милициысь майор Виктор Татаринов, азьветлӥсь дышетӥсьёс, музъем ужасьёс, быдӟым тыложе пыриськемъёс но тодмо тодосчиос сярысь. В.Д.Михайловлэсь ужъёссэ вылӥ дунъя азьвыл дышетӥсь, шаерчи, Эгралэн (Игралэн) сӥё-дано адямиез Клавдия Сергеевна Грахова но. Со шуэ: - Вячеслав Дмитриевичлэн радиоверанъёсаз котьку шӧдӥське вордӥськем палъёстэ яратон. Котьку соос ӟеч дасямын луо. Мыным аслым но огпол гинэ пыриськыны ӧз кылды "Аргурезь" веранъёсы. Удмурт радиолэн визьмо, ӟеч мылкыдъем, эсэпсэ валась корреспондентэз котьку паймытэ шӧдтэк шорысь кылдэм юанэныз. В.Д.Михайлов озьы ик быръемын "Удмурт кенеш" огазеяськонлэн исполкомаз. Трос пол вормылӥз пӧртэм конкурсъёсын. Алигес пыриськиз Быдэс дуннеысь финн-угор калыкъёслэн Финляндиын ортчем куинетӥ бадӟым ӧтчамазы. Вань сюлмысьтыз яратэ вордӥськем шаерзэ. Оскисько: Вячеслав Михайлов басьтоз быдӟым удмурт тодосчи, кылбурчи, дышетӥсь, ас калыксэ вань сюлмысьтыз яратӥсь но гажась быдӟым удмурт Куӟебай Герд нимо прмиез. В.ПОЗДЕЕВ. Прокуратуралэн нуналэзлы сӥзьыса Прокуратураын ужасьёс 12 январе ас праздниксэс пусйизы. Солы сӥзьыса Удмурт Республикаысь Прокуратураын ужасьёс но ас кенешазы люкаськылӥзы. Солэн ужаз пыриськизы Кун Кенешысь, Правительствоысь, Удмурт Республикая Федеральной инспекциысь адямиос, правоосты утёнъя но судъёсъя ёзъёсысь кивалтӥсьёс но прокуратураысь ветеранъёс. Республикаысь прокуратуралэн ёзъёсаз туннэ 300 адями пала тырше. Умой ужало Ижысь, Воткинскысь, Глазовысь, Дэбесысь прокуратураослэн коллективъёссы, пусйиз Удмурт Республикаысь прокурорлэсь ужзэ быдэсъясь А.Борзенков. "Удмурт Республикаысь сӥё-дано юрист" ним сётэмын Грахов ёросысь прокурорлы А.Юшковлы но республикалэн прокуратураысьтыз старшой следовательлы Л.Чувашовалы. Россия Федерациысь Генеральной прокурорлэн приказэзъя "Россия Федерацилэн прокуратураысьтыз сӥё-дано ужась" знакен пусъемын прокуратураысь кадръёсъя отделлэн кивалтӥсез А.Чигвинцева. Нош Воткинск ёросысь прокурорлы О.Орденколы нимысьтыз ож тӥрлык сётэмын. Вунэтэмын ӧвӧл ӵошатсконъёсы пыриськемъёс но. Синпель кузьымъёс басьтӥзы устоосыз следовательёс А.Попов, Р.Казаков, кун обвинительёс - В.Собина, Н.Морозова, делопроизводительёс С.Метелева, З.Агафонова, И.Крючкова. Удмурт Республикаысь Правительстволэн Почёт грамотаосыныз пусъемын Воткинск прокуратураысь старшой следователь О.Денисова но республикалэн прокуратураысьтыз прокурор Т.Мардашева. Т.МИРОНОВА. Правительство выльдӥське Удмурт Республикалэн Президентэз Александр Волков кенеш ортчытӥз Президентлэн но Правительстволэн администрациезлэн кивалтӥсеныз Александр Горяиновен но Удмурт Республикалэн Президентэзлэн Россия Федерацилэн Президентэз бордын ялан ужась муртэныз Андрей Саковичен. Пумиськон дыръя Александр Волков юнматӥз Президентлэн но Правительстволэн администрацизы сярысь Положение. Александр Горяиновлы ӵектӥз администрациез выльдон ужъёсты азинтыны. Правительстволэн мукет ужпумъёсызъя но вераськон мынӥз. Москва коньдон висъяз Правительстволэн Тӧроез Юрий Питкевич пумиськылӥз республикаысь городъёслэн но ёросъёслэн йыръёсынызы. Кенешын валтӥсь инты басьтӥз таиз арлы ужпумъёс чаклан. Кылем арлы йылпумъянъёс возьматӥзы: экономика но улон-вылон удысъёсын ӟеч пала воштӥськонъёс вань. Республикалэн бюджетаз планлэсь вылтӥ 500 миллион манетлэсь ятыр коньдон пыртэмын. Вылӥ ёзъёсын ужез умой радъяса нуон луонлык кылдытӥз федеральной бюджетысь Удмуртилэн кулэяськонъёсызлы туэ 1,6 миллиард манет коньдон висъяны. Правительстволэн ужан интъетэз луэ "Удмуртиез азинтон" программа, кудзэ умоен лыдъяз республикалэн Президентэз Александр Волков. Ӝоген та документ йылаз-пумаз вуттэмын луоз. Правительстволэн Тӧроез администрациослэсь кивалтӥсьёссэс тодматӥз министерствоослэн валтӥсь ужпумъёсынызы. Люкаськемъёс азьын вераськизы министръёс Сергей Касихин, Наталья Харина, Виктор Савельев, Николай Хохлов, Михаил Назаров, Владимир Щербаков но мукет эшъёс. Пумиськонэ ветлӥз Кун Кенешлэн Тӧроез Игорь Семенов. Удмурт Республикаысь Правительстволэн пресс-службаез. Удмурт Республикаысь Кун Кенешлэсь дас витетӥ сессизэ люкан сярысь Удмурт Республикаысь Кун Кенешлэн Президиумезлэн постановлениез Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь сессизэ люкано 2001-тӥ арын 13-тӥ феврале 10 часын Ижевск городын. Удмурт Республикаысь Кун Кенешлэн Тӧроез И. Н. Семенов. Ижевск город, 2001-тӥ арын 9-тӥ январе. � 194-ИИ. *** Сессиын эскерыны чакламын: Удмурт Республикалэн "Удмурт Республикалэн Кун Кенешез сярысь" Законэзлэсь инъетсэ; Удмурт Республикалэн "Удмурт Республикалэн Правительствоез сярысь" Законэзлэсь инъетсэ; Кун Кенешлэн "Удмурт Республикаын историяя но культурая памятникъёсты утён" 2001-тӥ-2003-тӥ аръёслы нимысьтыз программаез сярысь" постановлениезлэн инъетэз но мукет ужпумъёс. Колбаса - сӥятэм сӥльлэсь Таӵе бадӟым сӥль комбинатэ пыраме ӧй на вал. Цехъёс но участокъёс вӧл-вӧлэсь, сӥлен ужасьёслы но колбаса лэсьтӥсьёслы номыр уг люкеты. Соослэсь ужзэс капчи уд шуы. Котькудӥз аслэсьтыз оскем ужзэ яратыса быдэсъя, тросэз пыд йылаз сылэ. Данакез кышномуртъёс, тужгес секытсэ бергато пиосмуртъёс. Тани валтӥсь технологен Ольга Васильевнаен ӵош нырысь ик лыктӥм колбаса келясьёс доры. Тае экспедицияя участок шуо. Кивалтӥсьсы таза воргорон Олег Лозовой. Фотокормы сое колбаса сузьетэн ик туспуктэм. Татчы вуэ ваньмыз дась продукция. Сое мертало но басьяськисьёслы келяло. Участокын мылысь-кыдысь тыршо ньыль весовщикъёс но сомында ик грузчикъёс. Соос котькытынлэсь вазь ӵукна 7 часэ ужазы вуо но нуналлы быдэ 10 тонна ёрос колбаса келяло. Тужгес но чырткем тырше весовщик Наиля Гайсина. Солэсь адӟем каро мукетъёсыз но. Тӥни соин ик нуналлы быдэ Иже гинэ 60 интые колбаса вуттыны быгато. Озьы ик сиёнзы кошке Воткинск, Чайковск, Пермь, Можга городъёсы, Играе но музон интые. Комбинат продукцизэ аслаз машинаосыныз но нуллэ, куд-огез басьяськисьёс асьсэ транспортэн вуо. Экспедициын адямиосты уг ӝегато, шумприч ужало, сбытъя отделлэн куронъёсызъя колбасаез келяло, ӝытазе складэ куто. Ваньзэ умой, шонер мертало-лыдъяло. Сотэк ас чырты вылад но, пе, пыртод. Но сыӵе учыръёссы ӧй на вал, син медаз усьы. Берло дыре сӥль комбинатын выль амалъёсты но пыӵато. Кылсярысь, магазинъёсысь адӟыны луэ вакуум амалэн пакетэ тырем вандылэм колбасаез но ӵынатэм сӥлез. Басьяськисьёслы со юн кельше, сыӵе сиён кема уг сӧриськы, номыр уг луы, ческыт шӧмыз уг быры. Татын кык кибашлыос Людмила Колганова но Валентина Смолина лулысь-сюлмысь тыршо. Нырысез кышномурт комбинатын 30 ар ужа ни, эшез - 18 ар. Талэсь азьло соос пельнянь пӧрало вал. Али уг лэсьто ни. Кык чырмыт нылкышноос котькуд нунал 150-лэсь уно колбаса но ӵынатэм сӥль пакетъёс лэсьто, аппаратсы чылкыт ужа, асьсэос - пуртэн ювелиръёс кадь сиёнэз вандыло. Котькытын уж пӧзе. Тани колбаса тырон участокын 6-тӥ арзэ мастер луэ ни Елена Старикова. Со вань ужъёсты быгатыса бергатэ, нылкышноос сортъёсъя колбаса лэсьто, сӥль тыро. Участок пичи ӧвӧл, 30 мурт ужа. Соос кык сменаен тыршо. Котькудӥз азьын одӥг ужпум сылэ - сӥлез валаса тыроно. Полуавтоматэз, кылсярысь, ӟеч ужатэ Тамара Садакова. Со, пе, дорысьтымы кошкылӥз но выльысь комбинатэ лыктӥз. Нош сӥль корась (фарш лэсьтэ) Любовь Митрошкина 29 ар ужа ни. Вуим сӥль дасян интые. Таяз уката тросгес адями тырше. Самой кема, 43 ар, ужасез луэ Вера Данилова. Пичи Пурга ёросысь Капустино гуртын вордӥськем чырткем кышномурт татчы пинал дырысеныз лыктӥз. Нырысь вал пудоез вандонын, али сӥлез лыэз бордысь люкылонын ужа, обвальщик луэ. Ужзы каньылэн уг сётскы. 14 кузя пыд йылазы тыршо, ваньзэ киын быдэсъяло. Нокыӵе странаын но та уж угось капчиятымтэ на. Мастер Зоя Федотова Сарапулысь сиён-юон техникумез быдтэмын, ужъёсты шонер радъя, куспазы тупало, ог-огзылы котьку юртто. Кӧняез ке нылкышноос сӥль пушкысь сӧнъёссэ висъяло. Таиз но ас кожаз уг лэсьтӥськы, лэчыт пурт сяна, быгатэм кулэ на. Вера Данилова куинь ар талэсь азьло пенсие потӥз ке но, ужысь уг улляло. Таӵе лулысь-сюлмысь ужасез уго быдэс сӥль комбинатысь уд шедьты. Солэн дышетскисьёсыз но оскем ужзылы ӝог дышо, дышетӥсьсылэсь адӟем каро, сьӧраз уисько. Туж умой со. Вожъяськись адямиос татын кема уг возисько, асьсэос кошко. Кышномуртъёс капчи мылкыдын ӟеч ужаны тыршо. Соос ведь тодо, колбасазы кошке больницаосы, нылпи учреждениосы, школаосы, пересьёслэн юртъёсазы, санаториосы но музон азе. Огазеяськонын самой секытэз, дыр, сӥль-кӧй цех. Конвейертӥ лыкто вандэм пудо (скал, ош, парсь). Котькудӥз ас ужзэ быдэсъя: одӥгъёсыз кузэ ниё, мукетъёсыз пыдъёссэс вандыло, вераоссэс утялто но музон. Цехлэн кивалтӥсез Анна Мерзлякова ваньзэ син азяз возе. Сотэк, пе, кызьы ческыт сиён лэсьтод. Вуим производственной лабораторие. Котыр чылкыт, ӝӧк вылын сыло микроскопъёс но пӧртэм музон приборъёс но аппаратъёс. Производственно-ветеринарной отделлэн кузёез Ольга Зайнагутдинова татын 21 ар ужа ни. Нырысь техник-химик вал, собере лабораториез оскизы, нош валля арын - отделэз. 1980-тӥ арын со йылпумъяз Можгаысь ветеринарной техникумез, али Ижысь гурт удысъя академиысь зооинженерной факультетлэн ньылетӥ курсаз тодон-валанзэ будэтэ. Лаборатория вазь ӵукна ик ужаны ӧдъя. Куать часэ уже лыкто, келяно продукциез ваньзэ учко-чаклало. Соослэн син азьысьтызы номыр уг ышы. Соин ик нокыӵе ӝожтӥськонъёс ӧвӧл. Туннэ нимысьтыз пусъем потэ врач-бактериологез Энже Халиловаез. Казаньысь ветеринарной институтэз йылпумъямез бере, татын 10 ар ужа ни. Микроскопез но мукет аппаратураез умой ужа, юмоке ӧз шедьылы на. Лаборатория, кызьы шуо, комбинатлэн синмыз но пельыз. Техник-химик Гузалья Ахмадишина, бактериолог Алевтина Трошкова, Энже Халилова чаклало, кызьы цехъёсын быдэсъяло санитарилэсь куронъёссэ, учко оборудованиез, поттэм колбасаез, вузэз, колбаса пӧзьтэмез, ӵынатэмез, сӥлез, сӥль но лы пызез, лэсьто бактериологической исследованиос но музон. *** Йылпумъяса вераме потэ: Ижысь сӥль комбинат ("ИМКО") азинскон-ӝутскон сюрес вылэ потэ. Со шумпотымон. Сӥль завод городын но шаерамы нош ик данзэ шедьтэ, трос но ӟеч колбаса поттэ. Тани алигес со Соцгород микрорайонын аслэсьтыз фирменной магазинзэ усьтӥз. Азьланьын соос уката тросгес, котькуд районын 1-2 мед луозы. Нош таӵе предприятиосмы уногес луизы ке, кунгож сьӧрысь одӥг грамм но колбаса, сӥль кулэ уз луы. Сӥль комбинатысь капчи мылкыдын кошкиськод но котькуд магазинысь утчаськод но басьтэм потэ сыӵе колбасаез, ӵынатэм сӥлез, пакетэ бинялтэм сиёнэз, кудӥз вылэ огшоры гожтэмын "ИМКО". Г. Романов. Бамез дасязы Геннадий Романов но Владимир Беломорских (фото). Валтӥсь директор Леонид Бриллиантов. Врач-бактериолог Энже Халимова. Валтӥсь-технолог Ольга Филипских но отделлэн кивалтӥсез Ольга Зайнагутдинова. Директорлэн воштӥсез Сергей Максимов. Весовщик Наиля Гайсина. Экспедицилэн кивалтӥсез Олег Лозовой. Мастер Елена Старикова. Цехлэн кивалтӥсез Анна Мерзлякова. Вакуум амалэн колбасаез пакетэ тырисьёс Людмила Колганова но Валентина Смолина. Берлоез зарни медаль. Тамында дипломъёсыз но медальёсыз. ОЛО ОСКОД, ОЛО УД Эн туналэ Сьӧд Толэзь дыръя Толэзез Музъем вужерлэн сайяменыз йырин адямиослэн шӧдонзы кужмоя, ӵемгес мылкыдзы вошъяське, куатаськисьгес луо. Собере Меркурий Водолейлэн пусаз пыроз, связьын но транспортын тӥяськон учыръёс луозы. 13-тӥ январьысь 14-тӥ январе выжон уе кизилиос ало тунаськемлэсь, юэмлэсь (та вакытэ Сьӧд Толэзь Нептунэн герӟаське), соин ик та уй шумпотон уз вайы. Югдур тупатскоз 19-тӥ январь бере. Мылкыд умоялоз, ӵемгес удалтыны кутскоз. Лэчыт ужпум Киысь вольтче ке биньгозы Берло аръёсы удмурт журнал но газет бамъёсын ӵемгес но ӵемгес потылыны кутскизы Фатихян Пукроковлэн удмурт калыклэн но кыллэн кылдэмез но азинскемез сярысь статьяосыз- усьтосъёсыз. Огшоры газет лыдӟисьёс (историк но филолог луисьтэм муртъёс) соосыз туж тунсыко потыса лыдӟо, куд-ог дышетӥсьёс - кызьы мон кылылӥ вераськемзэс - удмурт кылъя но литературая урокъёсын уже куто, нош зэмос тодосчиос со гожъямъёсыз пӧртэм сямен пумитало: одӥгъёсыз вылтӥ кариськыса мынь гинэ пото (мукетъёсыз киынызы шонто, куинетӥосыз кылымтэ-адӟымтэ амал карисько. Умоесь-а, уродэсь-а Ф. П. Пукроковлэн статьяосысьтыз малпанъёс кулэ-а соосыз дасо сюрсъем тиражен потӥсь журнал-газет пыр калыке вӧлмытыны. Со пумысен печатьын вераськонъёс уг ӝутскыло. Соиз валамон но, угось Фатихян Пукроковлэн усьтосъёсыз (откровениосыз) сыӵе осконтэмесь но йӧспӧртэмесь (уйпал удмуртъёс шуысалзы: "номырлы пыронтэмесь") - зэмос тодосчиослэн соос борды йӧтскылыны ик кизы но ымзы но уг пыры. Кепыр потоно соосыз наука куреамъя эскерон борды басьтӥськыны, со понна дырез но кужымез быдтыны. Ма, кинлэн-о потоз на туала вакытэ вылӥ тодонлыкен адями(ос)лы дыр быдтыса валэктэмез: "кык пол кык - со ньыль" (сизьым ӧвӧл), "Волга Каспий зарезе усе" (Сьӧд зарезе уг), "зэмос адямиос (соос пӧлын, мынам малпамея, удмуртъёс но...) сьӧлыко Музъем-аныкаймы вылтӥ ветло (кизилиос вискытӥ уг вамышъяло)"..? Нош со вискытӥ Фатихян Пукрокович гожъя но гожъя, статьяосыз пото но пото, вылӥ дышетскемо журнал-газетчиос соосты печатлало но печатлало... Тани али но "Удмурт дунне" газет (2000-тӥ арысь 28-тӥ шуркынмон, 146-тӥ номер) лыдӟисьёссэ шумпоттӥз выль кузьымен - Ф. Пукроковлэн "Одӥг выжыысь ӧвӧл меда?" трактатэныз. Эскером гожтӥсьлэсь та статьяысьтыз куд-ог марӟан пырыоссэ, ваньзэ чакланы-тэкшерыны ӟигар но дыр но уз тырмы, угось соос кырымен но сузен шырыт пазьгемын газет баме. "Кырымен" шуэмысь, ӵапак та удмурт кыл бордысь, пе, пӧрмемын Крым топоним но: "Мынам малпамея, Крым кыл удмурт кырым кыллэсь пӧрмемын: малы ке шуоно, та шормуӵ кельше усьтэм кырымлы " (Ф. П.). Нош "куанер" тодосчиос (янгышен, конешно!) гожто: антик вакытэ та палшормуӵез (Крым - шормуӵ ӧвӧл) нимало вал Таврида шуыса (отын улэм тавр калыклэн нимыз бордысь), шор дауръёслэн кутсконазы - Херсонес (отысь со вакытысь грек карлэн нимызъя), ЪВ даурысен гинэ со тодмо луиз Крым нимын - отысь турокъёслэн Эски- Крым кар нимзы бордысен. Ачиз крым кыл герӟаськемын монгол хэрэм, крым бигер кермен - "изкар, юнматэм кар" шуэмен (Е. М. Поспелов. Школьный топонимический словарь. М., 1988. 102-тӥ бам). Ф. Пукроковлэн кудӥз меда ӵыжы-выжыез (ӵужмуртэз сярысь бӧрысьгес вераськом на ай) ЪВ дауре Крыме ветлӥз но солы Кырым ним поныса кельтӥз? Солэн, шӧдске, кияз картаез но вылэм ини, сотэк кызьы-о со адӟысал та палшормуӵлэсь кырымлы укшамзэ. Таиз визьпыры нялтас гинэ киргатэмын на ай, зэмос визькудые Фатихян Пукрокович асьмеды выйтэ "Большой немецко-русский словарь" пыр: "усьтӥ но немец ( кылъёсты удмурт кылъёсын ӵошатыны кутски" (Ф. П.). Немец кылэз но солэсь историзэ тодыны чик кулэ ӧвӧл. Малы кулэ на этимологической шуон кыллюкамъёсты, калыкъёслэн историзы сярысь гожтэм ужъёсты лыдӟыны!) Озьы удмурт кыллы тупась "ньыльдон вить кыл шедьтӥ немец кылысь" (Ф. П.). Ярам коть, ваньмыз ик 45-ез кыл статьяяз ӧвӧл сётэмын, соку со кылъёс пумысен уйбыртэмез вить газетэ но ӧй тэрысал. Тани, кылсярысь. Анай. Та кыл, пе, бигерысь басьтэмын ӧвӧл: "ведь тюркъёс дунне вылэ потӥзы куатетӥ дауре гинэ, нош урал выжы олокӧня аръёс ӵоже улэ ини... Алнаш палъёс анае шуэмзэс анэ шуо... " (Ф. П.). Андан логикаен валэктэмын (шонергес ке, ӧвӧл валэктэмын - ивортэмын, тодытэмын, азьверамын...)! Нош мон борды, огшоры адями борды, норисько таӵе юанъёс. Нырысь ик, кыӵе тодон-валанэз вылэ пыкиськыса, автор ивортэ, тюркъёс ВИ дауре (кытысь?) потӥзы шуыса? Кыкетӥез, мар меда люкетысал удмуртъёслы, ВИ даурысен ХХ-е вуытозь, анай кылэз бигеръёслэсь асэстыны? Та кыл финн-угоръёсыз пӧлысь удмуртын гинэ пумиське, нош тюрк кылъёсын ваньмаз сямен вань. Куинетӥез, кыӵе гогыеныз анай кыл бурмемын "Большой немецко-русский словарь" борды (автор огъя луись удмурт-немец кылъёс сярысь вераськон ӝутӥз вал кадь)? Ньылетӥез, мар выльзэ ватса алнашъёслэн анэ шуэмзы та кыллэсь этимологизэ сэрттон-пертчон ужпуме? Тӥни со выллем амалэн валэктэ удмурт кылтодон удысысь выль азьверась (пророк) данак удмурт, немец, француз, бигер, инд; перс но трос мукет кылъёслэсь но нимъёслэсь кылдэмзэс. Эшшо кӧня ке: "динг, тинг (народное собрание у древних германцев) - татышлыослэн гуртъёссы кӧня ке динъёслы люкиськыло " (Ф. П.). Татышлы диалектысь дин (мынам тодэмея, татышлыос ӟин шуо кадь) кыл бордысь кылдэмын, пе, вылӥын нимам вашкала немец кыл. Азьланяз ватсамын на авторлэн мудрон малпанъёсыз, кызьы динг кыл пумысь г куара усьыса кылдэм ӟин "кенеш, ӧтчам" кыл но бӧрысь сураськем "шайтан, пери, чёрт" щуэмез возьматӥсь музон ӟин кылэн. Шонергес ке чаклано, татышлы но мукет палэнысь удмурт вераськетъёсысь кыкез ик ӟин кылъёс нокызьы но герӟаськемын ӧвӧл немец динг кылын, куара усёнлэн но татын нокыӵе ужез но быжыз но ӧй вал. Одӥгез ӟин - "люкаськон, ӧтчам, кенеш" шуэм - кылдэмын сыӵе ик пуштросъем бигер жиен кыл бордысь. Мукетыз - "шайтан, пери, чёрт" шуэмез - басьтэмын бигер кыл вамен перс кылысь, ӟуче но со вуэмын (джин). Ддурстен (испытывать жажду) - удмурт сямен дурыстэм" (Ф. П.). Уг тодӥськы, кызьы кылдэмын немец дурстен кыл, нош удмуртэзлэн структураез туж огшоры: дур-ыз-тэм. Та выллемесьгес луо: азьтэм-бертэм, пумтэм-йылтэм но мукет. "Удин - инмысь васькем уд; один - инмысь васькем од" (Ф. П.). Озьыен, бесермянин - со инмысь васькем бесерман, татарин - инмысь васькем татар, осетин - инмысь васькем осет, вятчанин - инмысь васькем вятчан, вашкала ӟуч поганый половчанин - инмысь васькем поганый половчан... Берло вить кылэз мон ватсай, Фатихян Пукроковичлы юрттоно кожаса. Оло нош, марзэ ке сурай? "Минка - Мюнхен карлэн вакчиятэм нимыз" (Ф. П.): "Башкириысь Татышлы ёросысъ Улын Балтач гуртын улэм Минка нимо купец". "Нимъёс сярысь вераськон потӥз бере, созэ но иворто на. Швейцариын ӝужыт гурезё интызы нимаське Адула. Мынам Адолло нимо ӵужмуртэ вал (Ф.П.). Тӥни озьы ньыпылак гинэ ваньмыз валэктэмын. Кызьы? но малы? выллем юанъёсын йырез чик суратэк-тӥятэк. Озьы ке но, таин валче мынам вань ик кык ватсанэ. Нырысетӥез. "Удмурт дунне" но со выллем мукет удмурт изданиос, кудъёсыз черодэн печатласа поттыло Ф. Пукроковлэсь уръёссэ, мед вазиськысалзы вань удмуртъёслы, кулэм но улэп ӵыжы-выжыоссылэсь (тужгес ик ӵужмуртъёссылэсь) нимъёссэс люканы курыса. Сыӵе список кылдытӥмы ке, быдэс дуннеысь инты нимъёсыз та шуытозь валэктыны быгатысалмы. Кутскон понна: Люция Васильевна Таракановалэн (И. В. Тараканов профессорлэн кузпалыз) вынызлэн нимыз Африкан вал - Африка материклэн нимыз сэрттэмын-пертчемын! "Удмуртъёс пӧлын пумисъкыло Герман нимо адямиос" (Ф. П.) - тӥни тӥледлы Германия кунлэн нимыз. Нош кӧня асьмелэн гуртлы быдэ Ира нимо нылъёсмы-кенакъёсмы - Иранын нокызьы но со мында уз лу (Иранлы ним, конешно, удмуртъёс сётӥллям. Кыкетӥез.Башкириысь Татышлы ёрос - со Музъемлэн но инсьӧрлэн гогызы история но кыл удысысь мае гинэ уд валаське, отчы мынэлэ но ваньмызлы валэктон шедьтоды. Чик шугъяськытэк тододы, кин но мар со "Авестаысь" покчи инмар Менюк, кыӵе ке Сэрван инмар, немец зарг (гроб) кыл но пумтэм-йылтэм пумиськись кылъёс но нимъёс. Ветлэлэ, уд жалялэ: нокыӵе этимологической шуон кыллюкамъёс кулэ уз луэ (калыкез нош отын зэм ик туж мыло- кыдо). Зэм, берло дыре Фатихян Пукрокович Татарстанысь кукмор но балтач удмуртъёсыз но обиде уг ни кельты. Тани татын но со уже кутэ кукмор удмуртъёслэсь акашка кырӟанзэс: Арскын но лыктэм турогоед Гурлалоз бусы шоръёсад. Арскын но лыктэм акашкаед Гурлалоз баскись выжияд. И. М. Нуриевалэн "Песни завятских удмуртов" (Ижевск, 1995) книгаяз та кырӟан 13 пол пумиське (пӧртэм гуртъёсын турлы муртъёслэсь гожтэмын). Но ваньмаз учыръёсы кылысь кылэ сямен одӥг выллем. Нош Фатихян Пукроковлы сое одно ик ас сяменыз тупатъяса сётоно луиз. Малы, шуиськоды? Кылзэлэ ассэ Фатихян Пукроковичез: "Арийёс эфирез, дуннелэн лулыз шуэмез, Акаша шуо вал, Кукмор но Балтач палась удмуртъёс Будӟынналэз Акашка шуо. Соослэн таӵе зоутсы но вань: "Арысь но лыктэм тюрагаед Бусы шоръёсын кырӟалоз, Арысь но васькем Акашкаед Тубат но дорын гурлалоз... " Зэм, али тубат кылзэс бигер сямен верало ини � баскич шуо... Нош арийёсын удмуртъёс куке но туж матысь кусыпъёс возьылӥллям. Со вакытысь Йырйыл (Полярной) кизилилэн нимыз Тубан вылэм - удмуртъёс но арийёс отчы тубало вылэм " (Ф. П.). Ну, кызьы-мар? Зол ведь, отэ?! Но, кӧня ке кыл радызъя. Малы кукмор удмуртъёслэн "тюрагайзы", арскын (ар ортчыса) интые, арысь лыктэм, мыным шуг валаны. Нош малы Акашказы арысь васькем (арскын лыктэм интые) - кызьы шуо, вератэк но валамон: Ф. Пукроковлы та огшоры гинэ сэбед кырӟанэз пуштросэзъя одно ик арийёсын, Акашаен но Тубан (?) нимаськись Уйшор кизилиен герӟано вал. Вот и герӟаз, паллян синзэ но кыньыртытэк. Только вот малы акашка арысь ваське меда? Угось арийёслэн улон интызы кизилиын ӧй вал, соос отчы дырын-дырын гинэ тубаллязы (улысь кеносысь вылысяз кӧланы тубам кадь!), нош асьсэос улӥзы Индиын. Вашкала удмуртъёслэн арийёсын ӵош кизилие тубамзы мар гинэ ай, эшшо тодады вае на статьяысь, мар лэсьтӥськем дунне вылын Ф. Пукроковлэн "син азяз": "Инбур кылын (легендаын) вераське: удмуртъёслэн небегзы (книгазы) вылэм. Нош кыӵе вал со � тодӥсь ӧвӧл ни. Мынам сюлэмы шӧдэмъя, со Авеста вал. Астрологъёслэн верамзыя, арийёслэн мукылчинзы, Заратустра, ... вордӥськемын Каракулино палан, Кам дурын (укнозы шур пала учке вылэм). Ӵапак со, Заратустра, гожтэм дунне вылысь нырысетӥзэ инбуро небегез - Авестаез... " (Ф. П.). Ну вот, тпру! Вуим, лэся. Табере валамон ини, кытысь пото Ф. Пукроковлэн статьяосыз- вӧтъёсыз: соос чик но тодослэн куронъёсызъя гожтэмын ӧвӧл, "сюлэмыз шӧдэмъя" сазнамын. Одӥг сюлэмшугъяськон мынэсьтым йырсазьме вис карытэк портэ: кулэ-а меда котькуд гожтэмез (со Фатихян Пукроковичлэн ке но), газет-журнал баме вуттыса, одно ик вань калыке вӧлмытыны? Мон сямен, нокызьы но уг яра, малы ке шуоно, соос пайда гинэ ӧвӧл, эшшо ке бадӟым изъян ваё. Одӥг ласянь, калыке пыӵато чылкак янгыш луись валатонъёсыз, малпанъёсыз, идеяосыз. Бен, научной трактатъёсыз лыдӟем интые (со понна книгаез шедьтоно на ай, дун тырыса басьтоно сое, лыдӟыны кужым но дыр быдтоно, одӥг пол лыдӟемен валаны но катед оло тырмоз, оло уз). Фатихян Пукроковичлэсь газет-журнал баме вакчияк но капчияк гожтэмъёссэ лыдӟы но тӥни: тон ини туала адями - гульым выжыозяд выль тодон-валанъёсын пачылмытэмын. Эшшо ке кыӵе тодон-валанъёсын - коть сыл, коть погра! Нош со вакыт ик данак зэмос научной ужъёс - удмурт калыклэн историезлы, кылызлы, сямъёсызлы, фольклорезлы но о. а. сӥзьыса гожтэм книгаос - лыдӟисьёс доры уг вуо, озьы ик кыллё Удмурт академической институтлэн но Удмурт университетысь удмурт филология факультетлэн ӝажыосазы лыдӟисьёссэс юнме витьыса. Уг ярато асьмелэн удмуртъёсмы (удмурт кылъя но литературая дышетӥсьёс гинэ но) книга басьяны но соосты лыдӟыны! Соослы, шӧдске, тырмыт ини Ф. Пукроковлэн статьяосыз выллем публикациос но. Жаль... Мукет ласянь, таӵе амалэн статьяос сазнан зэмос тодосчиослэсь секыт ужзэс серекъям- мактамлы но ултӥям-мыскыллямлы пӧрме. Ма, зэм ик, нокыӵе институтъёсыз йылпумъяны кулэ ӧвӧл; аспирантураосын дышетсконо ӧвӧл. Кинлы кулэ на куддыр уйёсыз изьытэк, пумтэм- йылтэм научной ужъёсыз лыдӟыса пукыны, историысь но кыллэн азинсконысьтыз кыӵе ке закономерностьёсс шедьтон вылысь?! Кыллюкамез усьтӥд, отысь мар тынад бур яке паллян син шорад ӝимиз, сое гожтыса басьтӥд, соос вылын аслэсьтыд кылдэ кӧня ке шерид - научной уж дась. Кылсярысь, туала финн-угор кылъёсын кылдэмзыя огкадесь трос сю кылъёс шедьтэмын ни ке, соос трос дасо финно-угроведъёслэн кык-куинь даур ӵоже ужам емышсы. Нош Фатихян Пукрокович кыллюкамъёсыз усьтӥз гинэ но, визьпумъянъёс (выводъёс) дась ини: "ог-огзылы ваче тупась ньыльдон вить кыл шедьтӥ немец кылысь. Финн кылысь � ньыльдонзэ гинэ "', "китай кылысь тямыстонэз кыл тупа удмурт кылысь тамында ик кыллы... Вьетнам кылысъ но трос кылъёс тупало удмурт кылъёсын " (Ф. П.). Вашкала Римысь Юлий Цезарь император шуэмъя, лыктӥ, адӟи, ворми! Нош удмурт журнал-газетъёс син куспын дась ини быдэс удмурт калыклы ивортыны Фатихян Пукрокович Пукроковлэн выль но выль вормонъёсыз сярысь. Таин валче мон чылкак паймисько журнал-газетъёслэн редакторъёссылы но отын ужасьёслы. Ваньзы ик соос вылӥ дышетскем адямиос кадь, озьы ке но зэмос наукаез висъяны уг быгато тодослы (наукалы) пародилэсь; одӥг кудые кисьто лыдӟисьёслы зэмос кулэ луись тодон- валанъёс сётӥсь корреспонденциез но буш гожъянэз. Ма, собере журнал-газет бам - соослэн гинэ асваньбурзы ӧвӧл кадь, со - кунлэн но калыклэн узырлыкез, соин ик сое шыръяса но пайдаен уже кутыны ӧй люкетысал. Гожтонме гожтӥ но, материалме кытчы ке печатланы сётэмлэсь азьло мур малпаськонэ уси. Асьмелэн публика дышемын ӧвӧл критикалы. Ужысьтыз янгышсэ пусйид ке, одно ик ас вылаз басьтоз - ма понна, пе, ай та монэ сокем адӟонтэм каре? Тани али но яке ачиз Фатихян Пукроков, яке мукет кин ке малпалоз: малы ай та В. Кельмаков Ф. Пукроковез сокем кока, мар уродзэ лэсьтӥз меда солы Пукроков? Мон гажасько Фатихян Пукрокович Пукроков нимо писателез, кылбурчиез, драматургез, шумпотыса лыдӟисько солэсь чеберлыко произведениоссэ. Литература удысын со усточи. Нош тодослэсь асныро валзэ кытке ке, биньгозыез дышымтэ киысьтыз вольтче но дӧдьыез витьымтэ ширтонъёсы шебеля. Кулэ меда соку пырыны отчы, кытын тон специалист ӧвӧл? Тырмысал, дыр Фатихян Пукроковлы Пегас вылын ворттылыса но. В. Кельмаков, Удмурт кун университетысь удмурт но финн-угор кылтодонъя кафедраен кивалтӥсь, кылосбур тодосъёсъя доктор, профессор. Редакцилэсь. Автор сямен ик, редакция но та гожтэт пумысен мур малпаськонэ усиз. Солэн пуштросэныз "Удмурт дунне" оглом соглаш. Милемды В. К. Кельмаков шонер пыкылэ, наука котыртӥ бергась гожъямъёсты мур эскерытэк печатласьком шуыса. Соглаш кариськем уг поты гожтэтлэн пӧмыныз (формаеныз). Отын уно вал Ф. П. Пукроковез ултӥясь кылъёс: вож, уйбыртон но мукет. Соосты газет баме ӧм лэзе. Ф. П. Пукроковлэн та гожтэтлы пумит маке веранэз вань ке, солы малпанъёссэ шараяны "Удмурт дунне" эрик сётоз. Сӥземын шаерысьтымы одӥгезлы бадӟым предприятилы - Ижысь сӥль комбинатлы Леонид Бриллиантов: "Дауръёс воштӥськон вакытэ вискын выльдӥське огазеяськон" Леонид Бриллиантов республикаямы сокем тодмо кивалтӥсь ӧвӧл на. Ижысь сӥль комбинатлэн валтӥсь тӧроез луиз миым 13-тӥ январе, нош 50 арессэ пусйиз 5-тӥ августэ. Быдэс улонэз сӥземын та удыслы, 28 ар тырше ни мясокомбинатъёсын. Ужан сюресэз кутскиз огшоры рабочийысен. Собере вал мастер, цехлэн кивалтӥсез но предприятилэн тӧроез. Леонид Семенович вордскиз Одессаын, ялан ужаз Украинаын, нош дорамы ӧтизы Пенза городысь. Кузпалэныз 3 ныл будэтӥз. Кылем арын гужем Ижысь колбаса лэсьтӥсьёслэн ужъёссы газетамы гожъямы ни вал. Со дырысен 1,5 ар ортчиз. Кызьы бен мыно туннэ ужъёссы, кызьы йылпумъяло 2000- тӥ арез, кызьы мыто выль даурез но али кыӵе малпанъёсын уло? Та но мукет юанъёслы валэктонъёс сётэ "ИМКО-лэн" валтӥсь директорез Леонид Бриллиантов. - Леонид Семенович, ойдолэ, вераськонмес кутском сӥль комбинатлэн кылдэмез но ортчем сюресэз бордысен. - Шаерамы, зэмзэ но "ИМКО" луэ одӥгез самой бадӟымез но мӧйыез предприятие. Сое пуктон, музъем висъян сярысь решение кутэмын вал 1931-тӥ арын 14-тӥ октябре, нош ужаны кутскиз, ньыль ар ортчыса. Туэ коллективлы 65 ар тырмиз. Ас вакытаз со быгатэ вал городысь калыклы тырмыт сӥль но колбаса сётыны. Но шоркармы 50-тӥ-60- тӥ аръёсы кылын вераны луонтэм ӝог ӝутскиз-паськытаз, нош сӥль завод огинтыяз сылӥз. Югдурез, улонлэсь куронъёссэ чакласа лэсьтоно вал бадӟым сӥль завод. Озьы ик со луиз. Нырысь пуктӥзы сӥль-кӧй поттон цех, холодильник но музон производственной юртъёс. Тӥни озьы 1963-тӥ арын город сьӧры, Сарапулэ нуись сюрес дуре, пуксиз выль куронъёслы тупась предприятие. Шаерамы таӵеез завод ӧй на вал. Магазинъёс тырмизы ческыт сӥль сиёнъёсын: вузаськизы чеснокен лэсьтэм пӧртэм колбаса но сӥль продуктъёс. - Валамон, данакез та иворъёс басьтэмын архивысь но комбинатлэн историысьтыз. Нош собере предприятие кызьы азинскиз, кыӵе воштӥськонъёс ортчизы? - Совето аръёсы комбинат ялан паськытаз. Сӥль но колбаса кошке вал Москвае, асьмелы но тырме вал. Но странаямы выльдӥськон кутскон, рынокен экономикае выжон вакытэ Ижысь сӥль поттонъя комбинат усьтэм амалэн ужась акционер огазеяськон ("ИМКО") луиз. Шуг-секытъёслы чидатэк, предприятие каллен-каллен ужан ӧрзэ ыштӥз, гуньдӥз, куашкан калэ вуиз, шуыны луоз. Озьы 1998-тӥ арын 2-тӥ июле таӵе ӟеч коллектив банкротъёс пӧлы шедиз. Сыӵе решение кутӥз республикаысьтымы Арбитраж суд. Предприятие лыктӥзы выль кивалтӥсьёс. Мукет сямен вераса, кылдытэмын вал палэнысь кивалтон, выль команда. Со вакчи дыр куспын быгатӥз вань ужъёсты ӟеч радъяны, тыронъёсты берыктыны, адямиослы быдэс ар ӵоже тырымтэ уждунзэс сётыны но огсыр ужанэ потыны. Но улон сӥль поттӥсьёс азе уката бадӟымесь куронъёс пуктэ. Рынокын ас интыдэ шедьтон вылысь пыӵатоно вал выль амалъёсты, туала технологиосты. Сотэк уго ӟеч но ческыт сиён-юон уд потты. Нош со нырысь ик герӟаськемын оборудованиез выльдонэн, колбаса лэсьтонъя усто линиос усьтонэн. Ведь завод вордӥськем дырысеныз вуж оборудованиен ужа (кӧнязэ ке вератэк - Г. Р. ). - Леонид Семенович, тӥ гольык азе но, куашкам предприятие но ӧд лыктэ. Шонер-а со? Со пумысен мар верасалды? - Та ужпумез котькызьы бергаты, но ваньмызлы валамон: предприятиез ӝегатскытэк выльдоно. Сое мон чеберъяськон вылысь уг вераськы. Тани 1997-тӥ арын комбинат кык но ӝыны миллион манет изъян адӟиз. Югдур мукет пала берытскиз миым, предприятие пайдаен ужаны ӧдъяз. Но со вал нырысетӥез, банкрот бере, шӧдскымон азинскон. Пусйыны кулэ, берло дыре огазеяськонын трос ужрадъёс кутэмын. Нырысь ик, выльдэмын производство, кылсярысь, котельнойзы пытсан калэ вуттэмын вал. Шедьтӥзы коньдон но тупатъязы. Али умой ужа ни. Ӟеч-ӟеч выльдӥзы технологической оборудованизэс, компрессорноез, утизы лабораторизэс, холодильниксэс. Огъя вераса, комбинатын вань ужъёсты валаса, шонер радъязы, дисциплинаез юнматӥзы, лушкаськон учыръёсты дугдытӥзы. Котькытын порядок тупатӥзы. Озьы син азьын ужъёс вырӟизы. Но огазеяськонлэн сюлэмшугъяськытӥсь ужпумъёсыз ӧвӧл ни уд шуы. Умоез - вузкарись организациос "ИМКО" пала берытско, солэсь колбасазэ тросэн басьтыны кутско. Со шумпотымон. Мугез тодмо. Коллектив ГОСТ-лэн куронъёсызъя гинэ ужа, ӟеч колбаса но сӥль поттэ. Колбасаязы ватсэтъёс уг тыро, вылӥ ӟечлыкен сӥль гинэ поно. Соин ик ӝӧк выламы ческыт сиён вутто, но дуныз ӧжыт вылӥынгес - умой сӥль понна уго тросгес тыроно. Комбинатын зол кутэмын ветеринарной, технологической но санитарной эскерон. Котькуд ёзын со юн шӧдӥське. Азьло азбараз ик кӧня жуг�жаг, силё люкаськемын вал. Табере ваньмыз со чылк-чылк утялтэмын-ӵужемын. Мукетсэ но пусъеме потэ. "ИМКО" пала берытскизы гурт хозяйствоос. Огдыре соос татчы сюрессэс ыштӥзы, солы мышкин берытскизы ни вал. Табере огазеяськон соослы азьвыл тыронъёссэ берыктӥз но сӥль вузам понна коньдонзэ со нуналэ ик сётэ. Озьы гуртысь ваньбур поттӥсьёсын огазеяськонлэн кусыпъёсыз пумен юнмало но паськытало. Тани берло дыре татчы тужгес трос пудо вутто Завьял ёросысь "Восточный" совхоз, "Родина", "Россия", гурт кооперативъёс, Сарапул районысь "Удмуртский", Пичи Пургаысь "Молния" но мукет хозяйствоос. Огазеяськонэ озьы ик сӥль ваё Якшур-Бодья, Вавож, Алнаш, Ува, Грах ёросъёс но мукетъёсыз. Комбинатэ мултэс сӥльзэс вузало фермеръёс но нимаз адямиос. Нош азьло со, калыклэсь пудозэ басьтыса, соослэн куремзыя гинэ колбаса лэсьтэ вал. Туннэ татын чылкак музон югдур. Огазеяськон али зэмзэ но куинетӥзэ вордӥськыны ӧдъя. Нырысез бадӟым выльдӥськон вал 1965-тӥ-1975-тӥ аръёсы. Соку сӥль заводэз паськытатонъя но кужмоятонъя нимысьтыз ужрадъёс кутэмын. Малы ке шуоно, Ижын ӝутскиз бадӟым автозавод, город юн ӝог будӥз. Кулэ вал трос сиён-юон. Со дыре одӥг смена ӵоже завод 65-70 тонна сӥлез переработать карылӥз но 22 тонна колбаса лэсьтылӥз. Комбинат куинь сменаен ужаз. Трос сӥль кошкылӥз Москвае но. Соку уго ӧй вал али мында колбаса лэсьтӥсьёс но мясозаводъёс. Кыкетӥзэ "ИМКО" вордӥськиз, банкротысь потӥз, шуыны луоз, кылем арын. Табере кутскиз куинетӥез. Таиз самой дуно усёз но кема кыстӥськоз. Мугез тодмо. Огазеяськонлэн вань оборудованиез вужмемын, куд-огез пуктэмзы дырысен вошъямтэ. Производственной юртъёсты но выльдыны дыр вуэмын. - Леонид Семенович, нош кин тӥляд самой матысь юрттӥсьёсты? - Валамон, нырысь ик - воштӥсьёсы, соос пӧлысь Сергей Максимов. Бур кие, шуыны луоз, валтӥсь технологез Ольга Филипскихез. Ведь котькинлы тодмо, калыклы сиён- юон поттонын шӧдскымон инты басьтэ технологиез быдэсъян. Одӥг ёзаз коть сое ӧд чакла ке, тод ни, колбасаед ческыт уз пӧрмы. Соин ик Ольга Васильевналы юн оскисько. Со - бадӟым опытэн усто специалист, татын 18 ар ужа ни. Милям мыно поточной линиос, номыр кылем-мылеме уг кошкы. Сыӵе ужан амалъёс тупатэмын. Соин ик производстволэн котькуд люкетаз, пудо кутонысен колбаса поттытозь, юн эскерон пуктэмын. Ваньзэ сое син азяз возе валтӥсь технолог. Собере шаерамы одӥг предприятиын но таӵеез ӧвӧл. Вандэм сӥль уг лошъяськы, сӥятӥське но холодильнике кошке. Котькытын - цехъёсын, сӥлез вандылонын, сӥль коранын (фарш лэсьтонын), холодильникын - пӧртэм температура возиське. Сӥятэм сӥлен гинэ ужаськом. Матысь юрттӥсен озьы ик лыдъясько Ольга Зайнагутдиноваез. Со кивалтэ производственно-ветеринарной эскеронъя отделэн. Переработка удысысь котькуд предприятиын нимысьтыз инты басьто лаборатория но ветеринарной эскерон. Сотэк уго ӟеч сиён уд потты, вылаз ик, шудтэм учыръёс но луыны быгатозы. Соин ик огазеяськонамы ужъёсмес валаса радъян сярысь трос сюлмаськиськом. Предприятимылы секыт ке но йӧтэ, лабораторимы улэ, со Чехиысь басьтэм оборудованиен ужа. Шаерысьтымы сӥль заводъёс пӧлысь милям гинэ таӵе ӟеч лабораторимы вань. Соин ик пудоез учкон но санитарной эскерон туж зол пуктэмын. Огазеяськонамы радъямын нимаз государственной ветеринарной чаклан. Соос кыл куто республикаысьтымы управление азьын гинэ. - Тӥляд данды Австралиозь вуиз ни, нош колбасады кытчы тросгес кошке? - Ми котьку пыриськиськом пӧртэм адӟытонъёсы (выставкаосы) но ярамаркаосы. Со юнме уг луы. Басьяськисьёслы сиёнмы кельше. Соин ик данакез продукцимы пусъемын уно дипломъёсын но медальёсын. Ваньзэ вераса но уд быдты. Туэ тани нимаз сертификат басьтӥм. Предприятилэсь колбасазэ сыӵе вылӥ дунъяз "Австралиана Дискавери Маркет" ("АДМ"), калык куспо огазеяськон (ассоциация). "ИМКО-лы" сётэмын 2000-тӥ арлэн предприятиез" приз. Удмурт Республикалэн кылдэмез дырысен 80 ар тырмон азьын, 28-тӥ ноябре - 1-тӥ декабре, Ижысь экспоцентр Йӧ дворецын ортчытӥз "Сиён-юон-2000" (Продиндустрия- 2000") адӟытон. Отын "Украинская" сорт колбасалы сётэмын И степенен диплом но зарни медаль. Нош туннэ ужъёсмы сярысь вераса, вань луонлыкъёсмес кутыны ум быгатӥське на. Озьы ке но, толэзьлы быдэ шорлыдын 200 тонна пала колбаса поттӥськом. Продукцимес 400-лэсь трос предприятиос, организациос но магазинъёс басьто. Сиёнмы мынэ ни бускель Татарстан, Башкортостан, Киров, Пермь, Тюмень улосъёсы. Комбинат колбаса лэсьтэ басьяськисьёслэн куремзыя гинэ. Одӥг куиньмосэз (30 процентэз) со элькунлэн палэназ кошке. Колбасамес адямиос умой басьто, ӟечлыкез вылӥын, мукет интыосын лэсьтэменыз уд ӵошаты. - Леонид Семенович, азьланезлы кыӵе малпанъёсын улӥськоды но 2000-тӥ арез кызьы йылпумъяськоды? - Юандылэн кыкетӥ люкетэз бордысен кутско. Ужъёсмес яркыт возьмато лыдпусъёс. Тани 1998-тӥ арын 1200 тонна сӥль поттӥм, 1999-тӥын - 738, туэ 11 толэзьскын - 1644, нош колбаса со аръёсы ик 518, 1006 но 1580 тонна. Быдэс ар ӵоже туэ 1800 тонна ёрос колбаса вузалом. Азьланезлы сайкытэсь малпанъёсын улӥськом. Соос нырысь ик герӟаськемын оборудованиез но технологиез воштонэн. Оглом пусйыса, комбинатэз быдэсак выльдыны ичизэ 1,5-2,0 миллион доллар коньдон кулэ луоз. Соин ик али утчаськом юрттӥсьёс (инвесторъёс). Выль оборудование басьтыны чакласьком кунгож сьӧрысь. Малы ке шуоно, Россиын сӥль комбинатъёслы сыӵе ӟеч но туала куронъёслы тупаса техника уг поттӥськы. Али ужаськом, вераськонъёс нуиськом ни Германиысь но Австриысь фирмаосын. Ми малпаськом сосиска лэсьтонъя выль линия усьтыны. Республикаямы таӵе оборудование одӥг сӥль комбинатын но ӧвӧл на. Выль машинаос луонлык сётозы уката ӟечгес но ческытгес сиён поттыны. Вылаз ик, со кемагес возиськоз. Басьяськисьёс но вузкарисьёс сыӵе продукцилы шумпотозы. Соин ӵош ик выльдом на музон технологической оборудованимес. - Таиз ар быремен но выль даур вуэмен валче, мар верасалды? - Бен, дыр туж ӝог ортче. Шумпотыса ватсаме потэ, выль даур ӵогиськон вискын сӥль комбинатамы зэмос выльдӥськон кутске. Кужыммылы оскиськом, юрттӥсьёс шедёзы шуыса малпаськом. Нош 2000-тӥ арез умоен келяса, вань ужасьёсмес ӟечкыласько лыктӥсеныз но выль даур мытэмен, мылкыд карисько котькудӥзлы шудо но таза улон. Выль арын выль азинсконъёс басьтыны! Вераськиз Геннадий Романов. Ижысь сӥль комбинат - шаерамы одӥгез бадӟым но огсыр ужась предприятие. Али со усьтэм амалэн тыршись акционер огазеяськон (ОАО "ИМКО") нуналлы быдэ шорлыдын 6 тонна ёрос колбаса поттэ. Холодильниказ 1800 тонна сӥль тэре. 350 пала ужасьёсыз ӟеч мылкыдын тыршо. Берло дыре 30 выль ужасьёс кутэмын. "ИМКО" пумен кузёмытэ вамышъёссэ но выльдӥськон сюрес вылэ потэ. Али 70 пумо толэзьлы быдэ 200 тонна пала колбаса поттэ. Политика Арня ӵоже дуннеын, странаын, шаерын Та нуналъёсы НАТО-лэн радъёсаз лек керетон пуромиз. Со кутскиз Италиысь но Португалиысь кӧня ке солдатъёс лейкемилэсь кулэм бере. Ваньзы ик соос Босниын но Косовоын ожмаськонъёсы пыриськиллям. НАТО-ысь данакез кунъёс со понна США-ез янгыше уськыто. Угось та страналэн армиез гинэ Югославиын уранэн снарядъёсты но ракетаосты уже кутӥз. Сыӵе ивор али гинэ шараяськиз. Кызьы вераз Италилэн премьер-министрез Джулиано Амато, со но та сярысь номыр но уг тоды вылэм. Россиысь военнойёслэн чакламзыя, Югославилэн бадӟым люкетэз уранэн кырсёмытэмын, тужгес ик секыт югдур Албания вӧзысь улосъёсын. Ӵапак отын интыяськемын вылэм Италиысь контингент. НАТО-лэн сербъёслы пумит ужрадэз "Милосердный ангел" шуыса нимамын вал. Югославиысь калыклы со бадӟым кышкытлык ваиз. Кызьы ивортӥз иворъёсъя БЕТА агентство, уно мурт пыктос висёнъёслэсь быриз ни. мар луоз азьланяз, нокин вераны уг быгаты. Тодосчиослэн ивортэмзыя, урам котыр инкуазез 4,5 миллиарл ар ӵоже кырсёмытэ. Нош инженер-электронщик Милан Стеванович малпа, НАТО-лэн пуштытъямъёсыз Балкан полуостровын инкуазез чутрак уродмытӥз. Юнме шорысь-а, пе, миым гужем Европалэн та люкетаз чидантэм кӧс улӥз. Нош таяз Выль аре 18 градус шуныт вал. Таӵе куазез пересьёс но, пе, тодазы уг ваё. Вашингтон шуэрскемын: уран шорсюлэмо пыӵал тӥрлыкен югдур НАТО-ез куашкатонэ медаз вутты вал. Та вакытэ угось Западысь данакез кунъёсын кужмо демонстрациос ортчо, анай-атайёс пиоссэс Косовое келяны пумит луэмзэс верало. Пусйыны кулэ, Балканын Россиысь ожгарчиос но тупаса улонэз утё. Военнойёслэн верамзыя, одӥг ӟуч солдат но уранэн кырсёмытэм интыосын ӧвӧл. Россилэн Президентэз Владимир Путин выль арын нырысетӥзэ кунгож сьӧры потаз. Со Азербайджанэ вуылӥз. Кык Президентъёслэн будон сюрессы одӥг кадь кутскем. Гейдар Алиев 1949-тӥ арын кунэз кышкытлыклэсь утёнъя нимысьтыз школаез йылпумъям вылэм. Аръёс ортчыса, ӵапак та дышетон заведениын ик Владимир Путин но чекистэ дышетскем. Вераны кулэ, таӵе тодмет кык кивалтӥсьёслэн ваче кенешонъёссылы эшлыко мылкыд пыӵатӥз. Оскон вань, кунъёслэн берло аръёсы сӥям кусыпъёссы ӝоген шунаны кутскозы. Владимир Путин но Гейдар Алиев юнматӥзы кык документ. Кутэмын декларация, кудӥзъя Россия но Азербайджан одӥг кылэ вуизы Кавказын тупаса улонэз утён пумысен. Мукетыз документ сӥземын Каспиез люконлы. Кык кунъёслэн пыжъёссы зарезь кузя эрико уяны быгатозы. Люкылэмын луозы му вӧй кыскон но чорыган интыос гинэ. Владимир Путин озьы ик оскытӥз, Россия Азербайджанлы Нагорной Карабахен герӟаськем югдурез но азербайджан - армян кусыпъёсты тупатыны юрттоз шуыса. Кылем арняе Чечняын ышиз "Врачи без границ" огазеяськонлэн муртэз, США-лэн гражданинэз Кенни Глюк. Сое маскаосын тодмотэм муртъёс кырмиллям. Та дырозь тодмо ӧвӧл на, кытын американецез ватыса возё. Чечняысь огазеям группировкалэн командующиез Валерий Баранов верамъя, К. Глюкез кырмизы Ахмадов вынъёс. Арнялэн пумаз Россие Европаысь Кенешлэн Парламент Ассамблеяезлэн (ПАСЕ) делегациез лыктӥз. Со эскероз Чечняысь югдурез. Тодады вайытом, ар талэсь азьло та огазеяськонын Россиез куара сётонлэсь палэнтӥзы вал, Чечняын, пе, адямилэн правоосыз тӥясько. Мар шуоз меда ПАСЕ-лэн делегациез таяз учыре? Кылем арня вискын газетмы лыдӟисьёсты республикамылэн Правительствояз пырем муртъёсын тодматӥз. Данакезлэн кивалтӥсьёсмылэн ужан опытсы узыр. Тани, кылсярысь, премьер Юрий Питкевич Правительтствоын 1993-тӥ арысен ужа. Нош котькинлэсь "мӧйыез" - вузкаронъя но калыклы юрттэт сётонъя министр Петр Пономарев. Пётр Панфельевич быдэсъясь ёзъёсы, со вакытысь Министръёслэн Кенешазы, 1985-тӥ арын лыктэм. Нош котькинлэсь егитэз - 35 аресъем Валерий Захваткин, экономикая министр. Выжыоссыя учконо ке, Правительствое пыризы ӟучъёс, белорусъёс, украинецъёс... Удмуртъёс - куать кузя. Мар шуод, выль Правительстволы вормонъёс сӥзем потэ. Республикамес азинтонын со зэмос азьветлӥсь мед луоз. Ю. Александрова. Ӟеч муртлэн эшез но ӟеч Война бере Улын Юри гуртмы сокем бадӟым ӧй вал на. Татчы бызем кенакъёс, лыктэм дышетӥсьёс но першалъёс сяна, сьӧрлось лыктэм калыкъёс чик ӧй вал. Соин ик гурт. Со улӥз аслаз ӵыжы-выжыысьтыз потэм нюжаосыныз. Бератаз гуртмы зол будыны кутскиз, пӧртэм сэрегъёсысь калыкъёс трос гинэ вуизы. Ӟеч муртэ со ноку урод уз кары. Таин валче ноку вунонтэм кылизы тӧромылэн Михаил Никандрович Фёдоровлэн верам кылъёсыз: "Оло ачим ӟеч, оло юри калык визьмо но чидась - мон туннэ нуналозь ӧй кылылы нокыӵе пыкылон кылъёсты. Бадӟым тау соослы, монэ, соку гинэ армиысь бертэм, но кузпалыз сьӧры лыктэм муртэ, ужаны дышетэмзы, кыдатэмзы но кулэ дыръяз визь-кенешен юрттэмзы понна". Туннэ Михаил Никандрович пусъе аслэсьтыз 50 арессэ. Со али ӝужыт гурезьлэн самой вылӥяз. Татысен таба вылын кадь адӟисько улон бугорлэн шумпотонэн но кайгуэн пӧлэстӥськем гердъёсыз. Котькуд герд бордын вань ма сярысь малпаськыны. Сое туннэ, Юриын гинэ ӧвӧл, районын но, удмурт шаерамы но ӟеч тодо. Вань улонэз герӟамын гуртэн, туж пичиысен тодӥз секыт крестьян ужез. 8-тӥ классэз быдтэмез бере, туж потэ вал педучилищее мынэмез, но анаезлэн тазалыкез лябен, чебер малпанэз тӧлъя тӧлӟиз. Колхоз валъёсты сюдыны кутскиз, комбайнеръёслы юрттӥськиз. Яратӥз шуныт тӧлъя тулкымъяськись ю бусыосты, нош тодон- валан басьтон мылкыдыз ноку ӧз кысылы. Горд аттестатэн быдтӥз 2 номеро СПТУ-ез. Тыршемзэ дунъязы Прибалтикае мынон путёвкаен. Макем бадӟым шумпотон вал со! Армие кошкемезлэсь азьло пумиськиз но синмаськиз Улын Юриысь Люда нимо ныллы, кузпалъяськизы. Службаын дыръяз вордскиз нылзы. Армиысь бертыса, кышноез бӧрсьы Улын Юрие лыктӥз. Нырысь-валысь ужаз электрикын, собере калыкен ужаны быгатонлыксэ валаса, комсомолецъёслэн огазеяськонэнызы кивалтыны оскизы, бригадире бырйизы. Вить ар ужаз сельсоветлэн тӧроез луыса, нош 1990-тӥ арын колхоз тӧрое бырйизы. Дас ар ӵоже кивалтӥз Киров нимо колхозэн. Секыт вадесэ тупаз солы кивалтыны. Соин ӵош ӧз вунэты тодон-валанзэ будэтыны. Глазовысь совхоз-техникумез но Удмурт кун университетэз быдтӥз. Таиз ини кузпалэныз Людмила Ильиничнаен ӵош басьтэм вормонзы. Нылпиос пичиесь шуыса, пыдзэ ӧз пукты со. Берло дыре Людмила Ильинична но кивалтон уж борды басьтӥськиз, со школалэн директорез. Удыссэ капчи уд шуы, но вӧзад валась эшъёсыд, кузпалыд вань ке, ваньмыз капчиенгес сётӥське. Фёдоровъёслэн семьязы адӟем карымон. Куспазы тупаса уло. Адӟем карымонэсь нылпиоссы но. Света нылзы ӵукналы быдэ радио пыр удмурт шаерен ӟечбуръяське, шуд но бур сӥзе. Пиез историк луиз, Ирина нылыз Ижевскысь лицейын дышетске. Фёдоровъёслэн кык муспотон внукъёссы вань ни. Со-а шумпотон ӧвӧл? Выль аре но та семьялы мед удалтоз. В.Васильева. Пичи Пурга черкогурт. Инмарлы оскисьёс - фронтлы Быдӟым Отечественной война аръёсы Атыкай музъеммылэн эрикез понна вань калык нюръяськиз. Удмуртиысь духовенство но вань Совето Союзысь калыкен ӵош пыриськиз тушмонэз пазьгонэ. Войналэн нырысетӥ нуналъёсаз ик республикаысьтымы ужась храмъёсын вӧсяськонъёс дыръя лыдӟемын вал Ӟуч православной черклэн кивалтӥсезлэн Митрополит Сергийлэн вазиськонэз. Отын со духовенствоез но оскисьёсты ӧтиз Атыкай музъеммес утьыны но быгатэмзыя коньдонэн юрттыны курыса. Черкын ужасьёс но инмарлы оскисьёс пӧлын та вазиськон бадӟым инты басьтӥз. Кутскиз Горд Армилы юрттон вылысь коньдон люкан. Кун банклэн Удмурт ёзаз нимысьтыз счёт усьтэмын вал Дмитрий Донской нимо танкъёсын колонналы но Александр Невский нимо авиаэскадрилилы. Родиназэ мур гажаса, война аръёсы банке аслэсьтыз коньдонзэ кӧня ке пол сётӥз Ижевскысь Успенской черкысь священник В.А.Стефанов. 1942-тӥ арын 29-тӥ декабре Валтӥсь Главнокомандующийлы И.В.Сталинлы гожтэтаз со вера: "Мон, духовной пастырь, сюлмысьтым куректонме верасько фашистъёсын огдырлы киултэм музъем выламы курадӟись вынъёсмы но сузэръёсмы понна. Горд Армия тушмонэз ӝоггес мед улялоз шуыса, ӟуч музъеммес со юрӟым фашистъёслэсь ӝоггес мед мозмытоз шуыса, мон Госбанке аслэсьтым люкам 273000 манет коньдонме сётӥ. Курисько Тӥледыз, Иосиф Виссарионович, со коньдонэн 2 самолёт лэсьтыны, соослы Александр Невскийлэсь но Дмитрий Донскойлэсь нимзэс сётыса. Та кышкыт машинаос мед пунэмзэ берыктозы Гитлерлэн гыжкалъёсызлы". Быдэс Отечественной война ӵоже В.А.Стефанов 569500 манет коньдонзэ сётӥз. Со понна И.В.Сталинлэсь кӧня ке пол тау карон гожтэтсэ басьтӥз. Сарапулысь Георгиевской черк Дмитрий Донской нимо танкъёсын колонналы висъяз 50000 манет. Отын ужасьёс но пусъемын вал Валтӥсь Главнокоандующийлэн ӟечкылан телеграммаеныз. 1943-тӥ�1945-тӥ аръёсы странаез утёнъя фондэ Ижевскысь Успенской черкысь настоятель Г.Т.Грачев сётӥз 263500 манетсэ, Воткинскысь Преображенской черкысь настоятель В.А.Шамшурин висъяз 220000 манет, 100000 манетлэсь уно коньдонзэ сётӥз Сарапулысь Георгиевской черкысь настоятель Н.И.Шерстенников. Удмуртиысь инмарлы оскисьёс, тушмонэн нюръяськон кужымез юнматон но огазеян вылысь, трос ӟечсэ лэсьтӥзы. Черкъёсын ужасьёс вӧсяськонъёс дыръя калыкез ӧтьылӥзы фронтлы ӟеч уженызы юрттыны, быгатэмзыя коньдон люканы. Озьы Ижевскысь Успенской черке ветлӥсьёс война аръёсы 1456000 манет люказы, 500600 манет висъяз Воткинскысь Преображенской черк. Духовенство сюлмаськиз войнаын сӧсыр кылемъёс но гордамеецъёслэн семьяоссы сярысь. Та ӟеч ужлы, кылсярысь, Сарапулысь Георгиевской черк сётӥз 105000 манет. 1944-тӥ арын гинэ черкъёс (1945-тӥ арын 1-тӥ январьлы республикаямы 11 ужась черк лыдъяськиз) но Удмуртиысь духовенство Обороная фондэ, Горд Армиысь боецъёслэн семьяоссылы юрттон фондэ, мукет ужъёслы асьсэлэсь 1107988 манет коньдонзэс сётӥзы, 371950 манет тыризы госзаймлэн облигациосыныз, 3365 манетсэс висъязы сиён-юонэн но арбериосын. Черк юрттӥз анай-атайтэк кылем пиналъёслы. 1944-тӥ арын Сям-Можгаысь черк Уваысь нылпи юртлы сётӥз 3000 манетсэ, Воткинскысь черк городысь куанер пиналъёслы юрттӥз 6000 манетэн. Ӟеч ужъёссы понна уно храмъёсысь настоятельёс медальёсын пусъемын вал. Со сяна, тросэз священникъёс Родинамес киязы пыӵалэн но утизы. Уноез кышкасьтэм луэмзэс возьматӥзы. Воткинскысь священник И.И.Баландин армие басьтэмын вал 1941-тӥ арын июле. Кышкасьтэм луэмез понна пусъемын Горд Знамя орденэн. Грах ёросысь Новогорское черкогуртысь храмлэн настоятелез П.М.Коновалов ожмаськиз 1942-тӥ арын 4- тӥ мартысен 1945-тӥ арын 2-тӥ августозь. Солы сётӥзы "За победу над Германией в Великой Отечественной войне 1941�1945 г.г." медаль. Кизнер ёросысь Короленко черкогуртысь священник Ф.Е.Красильников пулемётчик вал. 1944-тӥ арын келязы 1-тӥ Белорусской фронтэ, мозмытӥз Польшаез, войнаез йылпумъяз Германиын. Секыт аръёсы котькытын сямен шӧдӥськиз: инмарлы оскисьёслэн лыдзы будэ. Инмарлы оскон улыны но ужаны кужым сётылӥз. Но со вакытэ черкъёслэн лыдзы ичи вал, тужгес но гуртъёсын. Но, калыклэн куремезъя, отчы но священникъёс вуылыны тыршизы. Черке адямиос ветлӥзы фронтэ кошкемъёс понна вӧсяськыны, курылӥзы Вормонэз матэктыны. А.КАСАТКИНА, Удмурт Республикалэн кун архивысьтыз валтӥсь специалист. Лыдӟись вера малпанзэ Вазиськоно ке, мед кылёз куара Ярало мыным "Удмурт дунне" газетысь материалъёс, Удмурт радиоысь передачаос. 26-тӥ декабре потэм газетады "Вакыт куремъя гожъяське" статьяяз Н. Моряков мынэсьтым малпанме но ӵектонме азьпалтыса мур эскерем Михайловлэсь ужъёссэ. Ваньмыныз мон соин соглаш луисько. Вячеслав Дмитриевичлэн "Аргурезь" программаез но нимаз адямиослы сӥзем очеркъёсыз сюлэмез бугырто, удмурт но ӟуч сямен чылкыт вераськемез бордаз кыске. Азьланяз но солы усто азинсконъёс басьтыны но Куӟебай Герд нимо премилэн лауреатэз луыны сӥзисько! Г. Корепанов. Ижевскын улӥсь. СПОРТ Куас сюресъёс вылын Спортъя но тазалыкез кыдатонъя Г.А.Кулакова нимо комплексын куинь нунал ӵоже мынӥз Удмуртилэн куасэн бызьылонъя чемпионатэз. Спортсменъёс арлыдзыя куинь пӧртэм группаосъя ӵошатскизы. Нырысетӥ нуналаз пиосъёс, юниоръёс но пинал пиос дас иськеме бызьылӥзы, нылкышноос, юниоркаос но пинал нылъёс - вить иськеме. Соку ик пусъём: та сюресъёс вылын таяз учыре кужмо луэмзэс возьматӥзы егитъёс. Тани вить иськемез котькинлэсь шаплы ортчиз но абсолютной чемпионка луиз Шарканысь пинал нылаш Екатерина Воронцова. Нылкышноос пӧлын вормисез Играысь Наталья Русскихез но со 27 секундлы азьпалтӥз. Нош дас иськемъем сюрес вылын, воргоронъёсты но азьпалтыса, абсолютной чемпион луиз Шарканысь ик юниор Максим Вылегжанин. Воргоронъёс пӧлын вормись Воткинскысь Алексей Русаков, куинь секундлы кыльыса, кыкетӥ луиз. Куинетӥ интыын но пинал спортсмен - Сарапулысь Максим Стяжкин. Пусйымон соиз но: та стартъёсын вормисьёс спортъя мастерлэсь куронъёссэ быдэстӥзы. Ӟечкыласьком соосты. Тунсыко ӵошатсконъёс ортчизы чемпионатлэн кыкетӥ нуналаз. Быръемын вал нырысетӥ нуналаз пӧртэм арлыдоос пӧлысь быдэн 16 кужмоосыз спортсменъёс. Таосыз но люкемын вал на ньыль группалы. Спортсменъёс стартысь ньылен-ньылен пото но 1,5 иськемъем сюресэз кӧня ке пол ортчо. Котькуд группаысь нырысетӥ кык интыосы потэмъёс ӵошатсконзэс азинто, нош кык бӧрысьёсыз ӵошатсконысь пото. Озьы, финалозь вуэмъёслы стартэ куинь пол потоно луиз. Финалын асьсэ арлыдоос пӧлын вормисе потӥзы Воткинскысь Алексей Русаков, Шарканысь Александр Мезенцев но Андрей Вахрушев, Играысь Наталья Русских но Сарапулысь сузэръёс Надежда но Валентина Новиковаос. Куинетӥ нуналаз кузесьгес сюресъёс вылын нюръяськон мынӥз. 30 иськеме бызьылонын пиосъёс но юниоръёс пӧлын вормизы Играысь Виктор Копысов но Шарканысь Александр Мезенцев. Нош пинал пиос пӧлын 15 иськемез ваньмызлэсь шаплы ортчиз Сарапулысь Максим Стяжкин. Нылкышноос но юниоркаос пӧлын 15 иськеме бызьылонын вормизы Играысь Наталья Русских но Сарапулысь Наталья Замараева. Нош пинал нылъёс пӧлын 10 иськемъем сюрес вылын но чемпионка луиз Шарканысь Екатерина Воронцова. Куинь нунал ӵоже ӵошатсконъёслы йылпумъянъёсъя командаос пӧлын нырысетӥ куинь интыосты утӥзы Ижевскысь Ленинской, Индустриальной но Шаркан ёросъёсысь спортсменъёс. *** Удмуртилэн таиз чемпионатэз дырызъя Россилэн чемпионатэныз вадьсаз. Куасэн бызьылӥсьёсмы валлян ӝутскем мылкыдын пумитазы шумпотымон иворез. Асьмелэн землякмы Воткинскысь Сергей Крянин 50 иськеме бызьылонын Россилэн чемпионэз луиз. Табере со странамылэн сборной командаяз пыртэмын но дуннелэн чемпионатаз пыриськоз. *** Та нуналъёсы ик куспазы ӵошатскизы спортысь ветеранъёс. 40-49 аресъемъёс пӧлын вормизы Играысь Вениамин Ефремов но Воткинскысь Зоя Николаева. Мӧйыосызгес пӧлын нырысетӥ интыосты утӥзы Ижевскысь кузпалъёс Лидия но Евгений Андреевъёс. Нош 60 ареслэсь мӧйыос пӧлын вормизы Воткинскысь Николай Бушмакин но Ижевскысь Александра Чубукова. Ф.Никитин. Кылдӥз воткаослэн огазеяськонзы Ижевскын та нуналъёсы ортчиз выль огазеяськонлэн нырысетӥез кенешез. Отчы люкаськылӥзы вотка палъёсын вордскем-будэмъёс. Землячестволэн валтӥсь ужпумез - Воткинск городлы но ёрослы азинскыны юрттон, соослэн улоназы котькуд ласянь пыриськон, будӥсь пиналъёслы шаердэ, вордскем палъёстэ яратон мылкыд пыӵатон. Огазеяськонлы кивалтӥсе быръемын Александр Владимирович Кузнецов, республикаысьтымы Эскеронъя кун комитетлэн тӧроез. Юалляськыны луоз 75-25-00 телефонъя. В.КОЗЛОВ. АРХИВЫСЬ МАТЕРИАЛЪЁСЪЯ Удмуртия ХХ дауре 1969-тӥ ар Та ар Удмуртиысь гурт калык понна пусйымон вал СССР-ысь вань колхозникъёслэн ӧтчмзы ортчемен. Отын кутэмын вал Колхозлы уств. Лыдэ басьтэмын 1935-тӥ арысен воштӥськонъёс. Музъем ужасьёс хозяйствоез нуыны, пӧртэм ужпумъёсты быдэсъяны бадӟымгес эрик басьтӥзы. СССР-ысь Министръёслэн Кенешсы кутӥз гурт удыслы квалификациен нылкышноосты уногес кыскон сярысь постановление. Озьы сюрсъёсын кышномуртъёс луо трактористъёс, машинистъёс, шофёръёс. Яр ёросысь "Дружба" колхозысь трактористкм, Социалистической ужысь герой Ф.В.Васильева вазиськиз Удмуртиысь нылъёслы, механизатор луыны ӧтьыса но куамынэтӥ-ньыльдонэтӥ аръёсы сямен выльысь нылкышно трактор бригадаослэсь данзэс ӝутыны курыса. Йылпумъяськиз колхозникъёслы коньдонэн уждун тыронэ выжон. Ож бере гурт калык сылал, керосин, тыл поттон но огшоры басма гинэ басьяны быгатэ ке вал, табере октыны кутскизы ни чебер дӥськут, мебель, техника. Но дунне вылын котькытын ик шыпыт ӧй вал. Даманск шормуӵ пумысен споръяськон ӧжыт гинэ ожлы ӧз пуромы. Китайысь тушмон мылкыдо адямослэсь омырскылэмзэс палэнтон вылысь нюръяськыкуз, бырыны шедиз Яр ёросысь Баяран гуртысь пограничник Валентин олотарёв. Оскымон ужаны ӧдъяз промышленность. "Буммаш" завод лэсьтӥз картон поттон машина. Механикая завод поттыны ӧдъяз ыбем бере гильзазэ сэрпалъясь, кык гумыё "Иж-26 Е" пыӵал. Сарапулын тросэн поттыны кутскизы "Кама" мисьтаськон машинаосты. Шӧдскымон азинскиз нефть поттон, 4-тӥ октябре кутскиз "сьӧд зарниез" кыскон. Ар пумозь 100 сюрс тонна кыскемын вал. Утыр нефть понна кунгож сьӧрысь асьмелы долларъёсын но тырыны кутскизы ни. Умой улыны кутскеммы бере, азинскиз спорт. Удмуртиын ортчылыны ӧдъязы бадӟымесь ӵошатсконъёс. Соос пӧлын: "Иж винтовка" приз понна биатлонъя ӵошатсконъёс, Сарапулын - конькиен бызьылонъёс. А.ДЕРЮШЕВ, Удмурт Республикаысь ЦДНИ-ын ужась. Удмуртиысь делегация Москваысь Колхозникъёслэн съездазы. Ува ёросысь Архангельскын нефть поттыны кутскизы. Кизилиос будо Кылемаз кӧснуналэ Удмурт кун филармоние нош ик трос калык люкаськылӥз - адямиос яратыса кылзӥзы Удмурт Элькунысь калык артисткалэсь алентина Пудовалэсь кырӟамзэ. Котьку сямен, Валентина Тихоновна калыкез шумпоттӥз чебер но жингрес куараеныз. Таяз учыре но чузъяськизы данак выль кырӟанъёсыз. Удмурт Элькунысь калык артисткаен ӵош концертэ пыриськизы Россия Федерациысь дано артистъёс Александр Перевозчиков, Николай Широких, Удмурт Элькунысь калык артист Владимир Варачёв, Удмурт Элькунысь дано артист Павел Васильев, Удмурт Элькунысь искусствоосъя дано ужась Евгения Копысова, мукет адямиос. Та ӝытэ ик аслаз устолыкеныз люкаськемъёсты паймытӥз Валентина Тихоновналэн аспал адямиез - Шаркан ёросысь Бӧня черкогуртысь покчи нылаш Юлия Никитина. Шаркан музъем вылын будо на, иське, ворекъясь кизилиос. Юлия Никитина мед азьланьтысал Валентина Пудовалэсь яркыт но синмаськымон сюрессэ. Е.КУЗНЕЦОВА. Кемалы тырмоз на Андан ӵыжатӥсьёслэн культура дворецазы но трос калык люкаськылӥз кырӟанъя но эктонъя "Италмас" ансамблез концертъёссэ - со быдэсак сӥземын вал Удмурт Элькунысь калык артисткалэн, Россия Федерациысь дано артисткалэн Леонора Мамонтовалэн юбилеезлы. Котькуд сямен ик таяз учыре но "Италмас" шумпоттӥз учкисьёссэ. Азьвыл кырӟанъёсаз но эктонъёсыз артэ вал туалаосыз. Сцена вылын мылысь-кыдысь эктӥзы артистъёс Леонид Смагин, Салават Абдуллин, Елена Ермолаева, Наталья Повышева, Александр Чураев, Вячеслав Королёв, Сергей Ожегов, Николай Запальских, Анжела Иловайская, мукетъёс. Жингыртӥсь куараоссэс ӧз кесялэ сузэр-анайёс Алевтина но Евгения Медведеваос. Быдэс ӝытэз тужгес яркыт буёлэн чебермазы покчиос - Леонора Викторовналэн туала дышетскисьёсыз. Дано юбилейзэ пусйись Леонора Мамонтова ваньмызлы сюлмысьтыз тау кариз. "Италмас" ансамбльлэн валтӥсь балетмейстерзэ ӟечкылазы Удмурт Элькунысь Кун Кенешлэн Тӧроез Игорь Силез Тӧроез Юрий Питкевич, солэн воштӥсез наталья Харина, Удмурт Элькунысь культурая министр Людмила Пескишева, Ижлэн йырыз Анатолий Салтыков, мукет адямиос. Леонора Викторовналэн пальышась тусбуйыз шоры учкыса оскиськод: кемалы тырмоз на солэн тудву музэн ӧръяськись задореныз. Е.МАКСИМОВА. Спорт Вормисьёс пӧлын - асьмелэнъёс Тазалыкез кыдатонъя "Тазалык" комплексын йылпуъяськиз акциосын "Ижмаш" огазеяськонлэсь теннисэн шудонъя нырысь инты понна усьтэм ӵошатсконъёсыз. Та турнирлэн данэз пумен будэ, таиз лыдызъя тямысэтӥ вал ини. Отчы пыриськизы удмурт шаерысьтымы но Россилэн пӧртэм сэрегъёсысьтыз спортсменъёс. Таяз учыре тужгес но син шоры йӧтымонэз вал Москваысь дас куать аресъем теннисистка Галина Фокина. Со ик нылкышноос пӧлын вормисе потӥз. Пусйыны кулэ: Г. Фокина Кремльлэн Кубокез понна ӵошатсконъёсы но пыриськылӥз ни. Нош асьмелэн Юлия Бородинамы куинетӥ интые потӥз. Пиосъёс пӧлын, берпуметӥ пумиськонын Ижевскысь Алексей Ивановез вормыса, нырысетӥ интыез утӥз Екатеринбургысь Сергей Новоселов. Дас ньыль аресозь спортсменъёс пӧлын вормисе потӥз кортлэн кузёез Маша Перевощикова. Нош солэн Дима выныз вормисе потӥз дас кык аресозь пиос пӧлын. Бызьылӥсьёслы ӟоскытгес Йылпумъяськизы Удмурт кун университетлэн вакчи сюресэ бызьылонъя усьтэм ӵошатсконъёсыз. 60 метрез ваньмызлэсь шаплы ортчизы Анна Гетлих но Илья Бобров. Нош могӟетъёсын 60 метре бызьылонын вормисе потӥзы Яна Иескова но Анатолий Домрачев. Озьыен спортлэн гужем удысъёсыз толалтэ но уг вуно. Соиз умой ни. Нош мукет ласянь ке учконо тумошо но йӧтэ. Та ӵошатсконъёс ортчизы 28 номеро школалэн резинаен шобыртэм коридраз. Шоркарамы капчи атлетикая нимысьтыз манеж вань вылысь, бызьылӥсьёслы вуоно сезонлы таӵе ӟоскыт интыын дасяськоно луэ. Мар бордын бен мугез. Тренерлэн Юрий Малковлэн верамезъя, манежын, пе, сюресъёс шиповкаен бызьылыны чакламын ӧвӧл. Нош та сярысь малпаськыны уг луы вал шат манежез лэсьтыку ик. Н. Корякин. Возьматӥськом усто но огсыр ужась предприятиез - Балезиноысь литейно- механической заводэз Шаерамы таӵе предприятиос чиньыен лыдъямон. Со бен уг потты нокыӵе ож тӥрлык, ракетаос, зенит комплексъёс но мукетсэ. Огазеяськонлэн вузъёсыз, нырысь-валысь учкыса, чыры-пыры кадь гинэ. Но арбериосыз калыклы кулэ. Тани, шуом, гуртын улӥсь одӥг адями но гур пуктыны уг быгаты заводлэн тӥрлыкъёсызтэк (чугун плитаос, пичи но бадӟым ӧсъёс но музон) Нош кӧня мурт кулэяське солэн алюминий посудаезлы, пичи корт гуръёсызлы, предприятиос - автомашина ёзъёслы, канализация люкъёслы (пытсэтъёслы), тылпу кысон оборудованиезлы, нянь пыжон формаосызлы но мукетызлы. Тӥни кӧня люкаське, ваньзэ уд но вера. Предприятие - усьтӥськиз война бере, 1948-тӥ секыт аре. Со вал "Литейщик" артель. Совето власть дыръя будӥз, паськытаз но завод луиз. Нош выльдӥськон но рынокен экономикае потон вакытэ кыкетӥзэ вордӥськиз, шуыны луоз. Тужгес но азинскиз но рынокын ас интызэ шедьтӥз предприятие выль директор Николай Князев лыктэм бере. Ас вылаз со кышкатэк басьтӥз куашкан калэ вуэм, мырдэм шокась заводэз. Табере со луиз элькунамы одӥгез усто но огсыр ужась предприятие. Визьмо выль кивалтӥсь коллективын быгатӥз вань ужъёсты ӟеч радъяны но огазеяськонэз пыд вылаз йыг-йыг зол пуктыны. Туннэ газетамы басьтэм вормонъёссы сярысь маде усьтэм амалэн ужась "Балезинский литейно-механический завод" акционер огазеяськонлэн валтӥсь директорез Николай Иванович КНЯЗЕВ. Вань мотоциклъёсты лыдэ басьтозы Удмурт Республикаысь ГИБДД-ын ужасьёслэн чакламзыя, берло дыре сюресъёс вылын туж уно луизы мотоциклэн документъёстэк ворттылӥсьёс. Ӵемысь адямиос, машина басьтэмзы бере, мотоциклзэс кузьмало, нош техпаспортсэс вылез кузё вылэ гожтыны вунэто. Азьланяз таӵе югдур медаз ни луы шуыса, туэ шаерысьтымы вань мотоциклъёсты лыдэ басьтозы, соин ик соослэн кузёооссы таяз аре документъёссэс но техосмотр ортчытонзэс кулэезъя мед радъялозы. П. Скобелев. Вань удмуртъёслэн ВИИИ ӧтчамзылэн удмурт калыклы вазиськонэз Уно дауръёс ӵоже улытозяз, удмурт калык котькыӵе вакытэз адӟылӥз. Вал ӝутскон но куашкан, шумпотон но куректон дыръёсыз. Выль дауре выжон азьын сизьым сю витьтон сюрсъем калык секыт югдуре учыраз. Пӧртэм мугъёсын сэрен удмуртъёс кунэн кивалтон ёзъёслэсь палэнтэмын, шуыны луоз. Озьы бере, удмурт калык быроз шуыса кышкытлык кылдэ. Соин валче шугоме культурамес, кылмес, сямъёсмес-йылолъёсмес азинтон. Умойтэм югдурез возьматэ Кун Кенешлэн кыкетӥ ӧтчамаз депутатъёсты быръён но - со бере республикалэн парламентаз удмуртъёслэн лыдзы 11 процентозь кулэсмиз, Удмурт Кунлы нырысетӥ Президентэз быръён но, куке вормыны ӧз быгаты удмурт калыклэн дэмлам кандидатэз. Республикаямы выжы калыклэсь кулэяськонъёссэ умой-умой чакламтэен, шаерамы улӥсьёс ог-огзылэсь люкемын, ваче пумит пуктэмын. Та югдур уката но уродмыса кошке Россиын губернизация ортчытон сярысь вераськонъёсын сэрен, малы ке шуоно, сыӵе ужрадъёс удмурт калыклэсь кунлыксэ быдтон сюрестӥ нуо. Ми, Вань удмуртъёслэн ВИИИ ӧтчамазы лыктэмъёс, вазиськиськом вань удмурт калыклы политика ужпумъёсы сэзьгес пыриськыны но удмурт нацилэсь кунлыксэ быдтонэз дугдытонъя юн ужрадъёс кутыны ӧтьыса. Асьмеос умой валаны кулэ: азямы сылӥсь ужпумъёсты мукетыз нокин но уз быдэсты. Асьмеос ултӥянэз шыпыт гинэ чидаса улӥм ке, удмурт калык азьло басьтэм азинсконъёссэ но пумен ыштоз, талалозы асьмелэсь инкуазь но мукет узырлыкъёсмес, удмурт калык ачиз но бырон калэ вуоз. Асьмелы дышетскыны кулэ политика удысын нюръяськыны. Возьматоно, удмурт калыклэн общественной огазеяськонэз республикаын кужмоосыз пӧлы пыре шуыса. Асьмеос валаны кулэ ни: ӵош, огазе кариськыса гинэ утьыны быгатом калыкмылэсь ӵуказе нуналзэ. Нацимес утён но азинтон понна, асьмелы, ог-огмылы йыркурмес вунэтыса, азьлань мыныны кулэ. Асьмелы огазеяно республикаын улӥсь мукет калыкъёслэсь ӟеч улон понна тыршемзэс. История возьматэ, республикаын улонэз умоятон понна, секыт вакытэ адямиослэсь вань кужымзэс уже кутыны кулэ шуыса. Озьы гинэ шуг-секытъёсты вормыны луоно. Асьмеос, удмуртъёс, валтӥсь кужым луыны кулэ, малы ке шуоно, асьмеос татын - выжы калык. Асьмелы бордамы бинёно ваньзэ, кин республикаысьтымы улонэз умоятон понна тырше. Удмуртиын котькуд улӥсьлы асьмеос пайдаё ужан вылысь оскымон луонлыкъёс кылдытыны кулэ. Со понна палэнсконо керетонъёслэсь, юнгес кусып тупатоно бускель улосъёсын но финн-угор огазеяськонэн. Вань удмуртъёслэн ВИИИ ӧтчамзы удмурт калыклы мылкыд каре аслэсьтыз кулэяськонъёссэ утёнын юн, кышкасьтэм ӟырдыт но кужмо луыны. 6-тӥ толсур 2000-тӥ ар, Удмурт Республика. Валэн ворттыло... городын "Удмуртнефть" объединенилэн генеральной директорезлэн, Кун Кенешлэн депутатэзлэн, академиклэн Валентин Иванович Кудиновлэн дэмламезъя но коньдонэн юрттэменыз 1992-тӥ арын ни Воткинскын кылдытэмын вал конно-спортивной школа. Школалэн директорез В.Новиков вера: - Али городын улӥсь но валэз яратӥсь нылпиослы кылдытэмын ни кык группа, валэн ворттылыны ветло 56 нылпиос. Табере соос устоесь спортсменъёс луизы ни. Зэмос жокейёс кадь адӟисько, нимысьтыз вурем дӥськутэз дӥсяса. Эсьма, пиштӥсь бирдыоссы вылын но валлэн суредэз пуктэмын. Ворттылыны басьтэмын на энеръёс, нош кыткыны - сиес тӥрлык. Валамон, тунсыко ужрад нылпиосты выль быгатонлы дышетэ но урамъёстӥ юнме калгонлэсь, тамак кысконлэсь но мукет урод ужъёслэсь палэнтэ. Вылаз ик, нылпиос понна со ваньмыз дунтэк радъямын. П.СКОБЕЛЕВ. Экономика ужпумъёс "Ижъёслы" - вож сюрес Кылем арын шаерысьтымы данакез предприятиос шумпотымон ужазы. "Ижмашын" сяна, дырыз дыръя уждун тырыны кутскемын, шер пумиськылӥзы арняяз куинь-ньыль нуналэн ужанъёс. Автозаводын югдурез ӟечгес радъянын юрттысал машинаосты кредитэн вузан. Но Кун Кенешысь Промышленностья, инфраструктураез азинтонъя, вузъёсын но юрттэтъёсын ужанъя комитетлэн тӧроез Виктор Кушко верамъя, "Ижъёс" туннэ сотэк но самой дунтэмъёсыз луо. Оло, нырысь ик эскероно, машинаосмылы тыро-пыдо реклама лэсьтыса. Озьы-а, тазьы-а, но предприятиосмес "ужатон" амалъёс утчано. Угось 2001-тӥ арлы бюджетэз быдэсъяку, тросгес пыкиськоно луоз соос вылэ. "Одӥгез буйгатэ, - вераз Виктор Кушко. - Му вӧйлы будӥсь дунъёс заводъёс вылын сокем уз шӧдӥське. Но электрокужымлы дунъёслэн будэмзы соослы шӧдскымон пыдпуктэт луоз". Та депутатэн кивалтоно комиссия шаерысьтымы предприятиос понна вуоно арлы куд- ог льготаос тупатыны быгатӥз. 1 процентлы ӧжытгес тыриськонъёс юнматэмын му вӧй кыскись предприятиос понна. Матысь дыре ужаны кутскоз электрокужымлы но шунытлы, куд-ог сиён-юонъёслы, транспортлы но улон интылы дунъёсты эскеронъя огдырлы кылдытэм комиссия. Виктор Кушко жаляса вераз, выль арысен квартира понна дунъёс 60 процентозь будӥзы шуыса. Но улон интызы понна компенсация басьтӥсь семьяослэн лыдзы трослы уз йылы. Кылем арын таӵе юрттэт сётӥськиз уждунзылэсь 12 процентсэ квартиразы понна тырись семьяослы. Туэ та лыдпус 15 процентозь гинэ йылтэмын. Уз пӧрмы предприятиослэн юртъёссэс городлы сётон но. Та понна бюджетысь 100 миллион манет гинэ висъямын, кулэ луись 250 миллион манет интые. Шугъяськытэ мукетыз но. Берло дыре паськыт вӧлмиз калыклы дунын юрттэт (услугаос) сётон. Тазьы ужанлы тужгес но синмаськизы тазалыкез утён удысын, санитарияя службаосын тыршисьёс. Угось калык кисыысь лыктӥсь коньдон нокинэн уг лыдъяськы-чотаськы. Таӵе ужпумъёс эскеремын вал Промышленностья, инфраструктураез азинтонъя, вузъёсын но юрттэтъёсын ужанъя комитетлэн тӧроеныз В. М. Кушкоен радъям пресс- конференция дыръя. Вераськон йылпумъяськиз "госзаказ" шуонэн. Кызьы ивортӥз Виктор Михайлович, али шаермылы куать ракета дасяны куремын - мукет заказъёс ӧвӧл. Пусйыны кулэ, федерацилэн бюджетлэн шаермылы 1 миллион манет мында тыронъёсыз люкаськемын. Э. Кумачева. Николай КНЯЗЕВ: "Выльдӥськон сюрестӥ вамыштӥськом" Трос-а бен элькунамы таӵе визьмо, быгатӥсь но азьпала учкись кивалтӥсьёсмы? Уно уд шуы, нош соос пӧлысь одӥгез луэ Николай Князев. Со тужгес данэ потэмын Балезиноын, тодо ни сое республикаямы но солэн палэназ. Предприятие син азьын узырме, ӝутске, дуно металлэз уно миллионъёсын лыдъяське. Николай Князев вордӥськемын но будэмын Удмуртиын, Ува районысь Пужмезь-Тукля гуртын. Туэ солы 15-тӥ ноябре ӝыны даур, 50 арес, тырмоз. Ижысь Гурт удысъя институтэз (али со академия) 1974-тӥ арын йылпумъяса, кӧня ке ужаз вордӥськем ёросысьтыз "Дружба" колхозын, мастерскоен кивалтӥз. Собере егит специалист вуиз Балезино районысь "Путь к коммунизму" колхозэ, пуктӥзы валтӥсь инженере. Сое ӝог адӟизы, басьтӥзы гурт удысъя управление, оскизы госсельтехнадзорез, собере валтӥсь инженере юнматӥзы. Кӧня ке кивалтӥз гуртын лэсьтӥськонъя ПМК-ен. Нош выльдӥськон кутскем бере ӧтизы литейно-механической заводэ, пуктӥзы валтӥсь инженере, нош 1992- тӥ арын 13-тӥ июле бырйизы валтӥсь директоре. Тӥни та дыр ӵоже предприятие тодмантэм воштӥськиз но выльдӥськон сюрес вылэ потӥз. - Николай Иванович, вакчияк вералэ вал заводлэсь ортчем сюрессэ. - Война бере умоятоно вал калыклэсь улон-вылонзэ. Котькытын, гуртын но, каллен- каллен кутскизы лэсьтӥськон ужъёс. Кулэ вал гур пуктон но музон пӧран тӥрлыкъёс. Тӥни озьы, улонлэн куремезъя, 1948-тӥ арын Балезиноын кылдытэмын вал "Литейщик" артель. Берло со пумен кужмояз, паськытаз но луиз литейно-механической завод. Собере выль воштӥськонъёс кутскизы рынокен экономикае выжон вакыт. Соку модалы кадь пӧрмиз предприятиослэсь нимъёссэс вошъян. Милям завод 1992-тӥ арын луиз эштос (ТОО), нош валля арын пӧрмытэмын усьтэм амалэн ужась "Балезинский литейно-механический завод" акционер огазеяськон (ОАО). Тӥни выль дауре но тазьы ик потӥм. Акциосмы данакез ужасьёсмы киын. - Кызьы тодмо, тӥ куашкан калэ вуэм предприятие лыктӥды. Заводэз выльдыны мар бордысен кутскиды? - Директоре быръемзы бере одӥг муртэ но, воштӥсьёсы но специалистъёс пӧлысь но, ужысь ӧй улля. Дэмен, огъя кужымен нырысь ик басьтӥським рынокез дышетон борды. Тодоно вал, кыӵе выль продукция поттоно, кытчы вузано но мукет ужпумъёсты. Радъям фасонной изделиос (сантехника) поттонэз. Вузъёсмы интызэс шедьтӥзы. Соин ӵош ик пыӵатӥм туала модельной оснасткаез. Та ужез туж вакчи дыр куспын, 6-8 толэзьскын, быдэстӥм, ужатыса эскерим кык-куинь арняскын. Та вакытэ нуналаз быдэн 12 час ужаллям, суббота-арняосы но ӧм шутэтскылэ. Малы ке шуоно, шуг-секытысь потыны кулэ, ведь 1992-тӥ�1993-тӥ аръёсы предприятие банкрот луэ ни вал. Озьы ик пусъеме потэ тани мае. Калык уж шоры мукет синмын учкыны, ваньзэ малпаськыса лэсьтыны ӧдъяз. Ватонэз ӧвӧл, заводэ лыктыкум, татын данакез пытсэт сьӧрысь потэмъёс но юисьёс вал. Тросэз соос асьсэос заводэн люкиськизы. Та ужрадъёсын ӵош бадӟым инты висъям басьяськисьёсын ужанлы, продукцилэсь ӟечлыксэ ӝутонлы, вузъёсмес клиентъёслы нуллонлы но музонэзлы. Озьы ик огкадьгес возим вузъёслы дунъёсты, рентабельностез 5 процентлэсь вылэ ӧм ӝутылэ. Ваньмыз со юрттӥз басьяськисьёсты завод пала берыктыны. Сотэк угось рынокын ас ӝажыдэ, ӧрдэ уд шедьты, рынокын астэ юн зол возёно, кулэ но ӟеч вузъёс поттоно, озьытэк тонэ лёгаса кельтозы. - Нош али кыӵе продукция поттӥськоды, кызьы арез йылпумъяды но мар выльзэ пыӵатӥськоды? - Меӵак пусйыса, ялан выль вузъёс лэсьтӥськом, ассортиментэз паськытатӥськом. Азьло тросгес выриськом вал адямиослы гур пуктон арбериос поттонэн. Со понна ик завод усьтэмын вал. Али но та ужлэсь ум куштӥськиське, калыклы со кулэ. Берло дыре лэсьтӥськом алюминийлэсь кисьтэм посуда: кастрюляос, ӵӧж, ӟазег пыжонъёс, табаос, котёлъёс но музон. Азьланьын чугун посуда но лэсьтыны кутском. Нош кӧня кулэ нянь пыжисьёслы формаос! Ваньмыз соос пӧртэмесь, посуда сямен ик алюминийлэсь кисьтӥсько котыресэсь, пачкесэсь но музонэсь. Нянь пыжись заводъёслы продукцимы кельше, уно интыосы со кошке. Балезиноысь кибашлыос озьы ик дышизы ву кыскон колонкаос лэсьтыны. Странаямы сое трос поттӥсьёс ӧвӧл. Соосты котькуд гуртысь но посёлокысь адӟод. Городъёсын но ичи ӧвӧл, нимаз коркаосын улӥсьёс отысь ву басьто. Нош кин уг тоды канализация, водопровод пытсэтъёсты (чугун люкъёсты). Автомобиль сюрес вылтӥ тырыны соос туж секытэсь но юнэсь луо. Озьы ик тодмо ни зор ву кошкись решёткаосмы. Нош выль коркаос лэсьтыку, паськыт кутӥське канализацияя гумыосын фасон люкетэз. Вылез сярысь ке верано, миым кутским машина поттӥсьёслы ёзъёс лэсьтыны. Иж мотоциклъёслы, кылсярысь, кисьтӥськом гильзаос, маховикъёс, нош КамАЗ-ёслы - сцепленияз дискъёс но пытсэтъёс (крышкаос). Вань мукет но выль вузъёс поттонъя малпанъёсмы. Соосты азьло юн чакласьком, ужатыса эскериськом. Нош 2000-тӥ арез, чик ушъяськытэк, умой йылпумъям. Тани кӧня ке лыдпусъёс. Валля арын, 1998-тӥ арен ӵошатыса, 2,5 пол трос чугун ӵыжатӥм, нош миым, 1999-тӥ арын сярысь, - 1,3 поллы ятыр. Туэ 10 процентлы тросгес лэсьтыны чакласьком. Урод уг мыны буёло корт кисьтон: 1999-тӥ арын 2,3 поллы уно лэсьтӥм, миым - 7 процентлы, нош туэ 5 процентлы йылэтом. Оглом вераса, ортчем арын 20 процентлы тросгес продукция вузам но пайдаё, огсыр ужам. Табышмы арысь аре йылэ. Берло кык ар ӵоже 100-лэсь уно выль ужан интыос усьтӥм. Ваньмыз-ӧвӧлэз ужасьёсмы 300-лэсь ӧжыт гинэ ятыр. Милям котькудӥз ужась трос ваньбур поттэ, фондоотдачамы бадӟым. Тӥни соин ик, вылды, районын котькинлэсь трос выт тыриськом, нокыӵе бюджетъёсы но фондъёсы тыронъёсмы ӧвӧл. Продукцимы кошке Москвае, Дагестанэ, Чувашие, Татарстанэ, Пермь, Рязань, Приморье, Магадан, Иркутск, Томск улосъёсы но музон интые. Вузъёс поттӥськом басьяськисьёслэн куремзыя, нош келяськом контейнеръёсын, вагонъёсын, автотранспортэн коньдонзы вуэм бере гинэ. Предприятие ялан выльдӥське. Алюминий цехын вентиляцизэ воштӥм, котельноймес газэ выжтӥм, кафель плитаос тырим. Ужан условиосмы умоязы, санитарилэн куронъёсызлы тупасесь луизы. Сое пусйиз Глазовысь межрайонной санэпидемстанция но. Али выльдӥськом чугун кисьтон производствоез: лэсьтӥськом компрессорной, электромеханической отдел, цехъёсы, участокъёсы ӝоген газ вуоз. Соку ужан условиосмы уката умоялозы. Миым озьы ик ӟеч-ӟеч выльдӥм административной юртлэсь кыкетӥ этажзэ, туэ куинетӥзэ тупатъялом но стеклопластиклэсь чебер пыран-потан корказь лэсьтом. Туэ вуттом термической участокмес, выльдом тырон-ӝоктон (кран) хозяйствомес, пыӵатӥськом мукет туала выль ужан амалъёсты. Чугун ӵыжатон производствоын кылдытом газифицированной модельёсъя ӵыжатон участок, вагранкаысен кутскыса индукционной гуръёсын легированной андан ӵыжатом. - Николай Иванович, оглом вераса, азьланезлы малпанъёсты бадӟымесь. Производстводы ялан выльдӥське, нош ужасьёсты сярысь кызьы сюлмаськиськоды? - Та ужпум милям нырысетӥ интын. Коллективын кутэм огкылъя самой пичи уждун 380 манет тупатэмын. Миым уждунмес кык пол будэтӥм, кык пол 13-тӥ уждун сётӥм, озьы ик тыриськом дивиденд. Ужасьёслы тазалыксэс юнматыны дунтэк путёвкаос сётъяськом. Валля арын 5 мурт санаторийёсы ветлӥз, миым - 6 адями. Туэ уката уногес висъялом. Миым нырысьсэ кылдытӥм художественной самодеятельность. Ачим но хорын кырӟасько. Кылем арын коллективлы быдэс районын нырысетӥ инты басьтӥз. Заводын 70 кышномурт ужа. Корт ӵыжатон - со капчи уж ӧвӧл. Соин ик ужасьёсмы пенсие пото 50 но 55 аресысен. Кызьы верай ни, котькуд цехын но участокын ужан условиосмес умоятӥськом. Азьланьын но тае ум вунэтэ. - Нош улон инты лэсьтӥськоды-а? - Ум. - Малы? - Адями улон интызэ умоятон сярысь ачиз сюлмаськыны кулэ. Ми умой уждун тыриськом. Али 30 семьяос асьсэлы юрт пукто. Огазеяськон соослы котьмаин юрттэ: дунтэк транспорт сётэ, коньдон висъя, вазьгес уждунзэс тыре но музон. Асьсэлы ужасьёслы корка лэсьтон сярысь 1992-тӥ арысен вералляй, но йӧ вырӟиз 1997-тӥ арын гинэ. Али дорамы егит калык лыктэ, коллективлэн шоро-куспо арлыдыз - 35 арес. Туж умой со. Егитъёс асьсэ сярысь сюлмаськыны ӧдъязы. - Кин тӥляд самой матысь юрттӥсьёсты? - Мыным трос юртто производствоя воштӥсе Александр Чайников, валтӥсь инженер Леонид Чибышев, музон специалистъёс, ужысь ветеранъёс но мукетъёсыз. Ми асьмеос ужасьёсты дышетӥськом, нош туэ кутском выль сямен, туала куронъёсъя кивалтӥсьёс дасяны. Милемлы озьы ик бадӟым юрттэт сёто Волгоградысь но Липецкысь андан ӵыжатонэн герӟаськем научно-исследовательской институтъёс. Тодосчиос юртто выльзэ пыӵатыны, электрокужымез шыръяса кутыны но мукет. Котельнойын арлы быдэ 150 сюрс манет уксё шыръяське. Миым азбармес гинэ 400 сюрс манетлы асфальтэн шобыртӥм, 15 пумо автомашинаос басьтӥм но производствоез выльдыны трос коньдон висъяськом. Милям трос кема но семьяен-семьяен ужасьёсмы. Соос пӧлы пыро Касимов выжыос но мукетъёсыз. - Николай Иванович, берлоез юанэ. Асьтэ семьяды но выль даур сярысь кӧня ке вералэ вал. - Яратӥсько калыкен ужаны, сад-бакчаям берганы, автомашинаен ворттылыны, инмарлы оскисько сюлмыным. Кышное но татын ик ужа. Ныл но пи будэтӥськом, нылылэн нылыз вань ни. Пие Ижысь Гурт улонъя академиез йылпумъя. Общественной ужлэсь ноку ӧй палэнскылы. Институтын староста, комсомольской организацилэн секретарез вал. Анае Анна Петровна Князева но сузэре Галина Ивановна Чиркова пусъемын Трудовой Горд Знамя орденэн. Сузэре озьы ик луэ Удмуртиысь тазалыкез утёнъя дано врач но кивалтэ районысь валтӥсь больницаен, Кун Кенешлэн депутатэз вал. Миша вынылы но Россиысь му вӧй поттон удысысь дано ужась ним сётэмын, нош ачим луисько республикаысьтымы промышленность удысысь дано ужась. ХХИ выль дауре коллективе но, ачим но капчи мылкыдын потӥм. Ужасьёсме 2001-тӥ выль арен ӟечкылай, ваньмызлы сӥзи шудо улон, тазалык, ог-огмес валаса но юрттыса выль ужан вамышъёс. Азьланезлы юн оскыса выль дауре выжим. Геннадий РОМАНОВ. Валтӥсь директор Николай Князев. Административной юрт. Валтӥсь специалист Зямиля Касимова но нылыз экономист Татьяна Сайтгареева. Атайзы но заводын 26 ар ужаз. Слесарь-ремонтник Марат Касимов. Бухгалтер Альфия Касимова. Модельщик Виталий Дмитриев. Заводын 28 ар тырше ни. 6-тӥ разряд сётэмын. Ӵыжатэм кортэз формае кисьто. Директорлэн воштӥсез Александр Чайников. Валтӥсь инженер Леонид Чибышев. Формовщик Николай Перевозчиков. Туспуктэмъёсыз Владимир Беломорскихлэн. Кызь ар ортчиз ни Макем ӝог ортчо вылэм аръёс. Тани та туспуктэмлы но туэ апрельлэн кутсконаз тырмоз ни 20 ар. Зэм, со дыр ӵоже улонын котьмаиз но вал ини - огсыр вакытъёс но, бугыръяськонъёс но. Та фотоснимокез Михаил Егоров пуктӥз Москваын, Горд площадьын. 1981-тӥ арын Родинамылэн шоркараз ортчизы удмурт литературалы но искусстволы сӥзем нуналъёс. Вазен сыӵе ужрадъёс ӵемысь ортчылозы вал. Асьме делегация соку улӥз "Россия" гостиницаын, ӝытъёс но таӵе нимо ик киноконцерт залын ортчылӥзы. Кырӟанъя но эктонъя "Италмас" ансамбль бадӟым концерт сётӥз Чайковский нимо залын. Суредасьёслэн адӟытонзы радъямын вал. Нош писательёс уно предприятиосы, коллективъёсы вуылӥзы. Жаляса верано луэ, Герман Ходырев но Семён Самсонов пӧламы ӧвӧл ни. Н.БАЙТЕРЯКОВ. Туспуктэм вылын (паллянысен буре): Герман Ходырев, Кирилл Ломагин, коми писатель Виктор Пулькин, Семён Самсонов, якут писатель Виктор Санги, Александр Шкляев, та чуръёслэн авторзы но Олег Поскрёбышев. Нырысетӥез Горд книга Туэ гужем шаерамы потыны кулэ Удмурт Республикаысь будосъёсъя нырысетӥез Горд книга. "Удмурт университет" издательствоын солэн макетэз дась ини. Республикаысьтымы Котырысь инкуазез утёнъя министерстволэн куремезъя книга бордын ужазы Удмурт кун университетысь тодосчиос. Та выллем книга бордын учёнойёслэн ужан амалзы вань ни: 1989-тӥ арын поттэмын вал "Шер пумиськылӥсь но бырыны кутскись пӧйшуръёс но будосъёс" книга. Со дырысен дас арлэсь кема ортчиз ни. Нош бырыны кутскись будосъёслэн лыдзы ялан йылэ. Удмуртилэн Горд книгаяз пыртэмын луозы ог 200 пумо будосъёс. Лэсьтэмын чебер буёло суредъёс. Книгаын ог 250 страница, тиражез 1500. Сое келялозы шаерысьтымы библиотекаосы но школаосы. С.Сырыгина. ТОДМАТСКОМЕ ЛЫДӞИСЕН НО АВТОРЕН Тюменьын улыса но эшъяське газетэн Лыдӟем гинэ ӧвӧл, трос аръёс ӵоже газет бамъёсамы Тюменьын улӥсь Н.Яковлев печатлалляз пӧртэм корреспонденциоссэ. Алигес со редакциямы вуылӥз но кӧня ке материалъёссэ кельтӥз. Николай Яковлевич вордскемын но будэмын Кияса ёросысь Вужгуртын. Солы али 77 арес ни, но чырмыт на. Кытчы гинэ вуылымтэ со аэродромъёс но соос котыре сюрес лэсьтонъяз? 1949-тӥ арын Ростов-на-Дону городысь военно-инженерной училищеез йылпумъяз. Сюрес лэсьтонъя техник-строитель луиз. Вал мастер, валтӥсь мастер, прораб, инженер, валтӥсь инженер но отделлэн кивалтӥсез. Москва, Новгород, Пермь, Тюмень областьёсын, Литваын, Латвиын, Кавказын (Сталинлэн дачаез дорын), Башкириын аэродромъёс но сюресъёс лэсьтӥз. 1965-тӥ арысен улэ Тюменьын. - Укмыс сюлэсь ятыр удмуртъёс уло Тюменьын. Мынэмын соос отчы Башкириысь, Татариысь но Удмуртиысь. Кылдытэмын ни удмуртъёслэн землячествозы, школаын дышетскись уноез нылпиос анай кылынызы верасько, - маде Н.Я.Яковлев. - Ваньзы туж ярато удмурт газетъёсты но журналъёсты. Кыӵе ке удмурт книга киямы шеде ке, сое лыдӟиськомы, киысь кие сётъяса. Мон ачим но азьло ялан басьялляй "Советской Удмуртиез" но "Удмурт дуннеез", "Кенеш" но "Инвожо" журналъёсты, но, жаляса верано луисько, берло дыре югдур воштӥськиз, палэнын удмурт изданиослы гожтӥськыны секыт луиз, собере почта ящикъёсысь газет-журналъёсты лушкалляны кутскизы. Соин мыным вордскем гуртысьтым анаелэн Маня нылыз "Удмурт дуннеез" люкаса келя яке ачим бертылыкум нуисько. - Нош Удмуртие бертэмды уг поты-а? - юасько мон Николай Яковлевичлэсь. - Потэ вылэм, но мон удмуртлык понна мултэс нюръяськись адями. Олокытчы уг шедьы- а? - серектэ со. - Ми нылыным кенешом ай бертон сярысь. Но со ужа на, монэным ӵош улэ. Но вань на мынам мукетыз нылы но пие, таосыз уло вордскем гуртам... Яковлев мадиз на палэнэ кошкем дӥсьтӥсь, ужась но визьмо удмуртъёс сярысь. Уноез, пе, ужало Тюменьын устоесь инженеръёс луыса. Огез удмурт кышномурт - архитектор, огез удмурт воргорон институтын ужам. Уноез ужало дышетӥсьын, эмъясьын, тросэз луэмын ужбергатӥсь. Асьсэ легковой машинаосынызы пырак Удмуртие, Башкирие но Татарие бертылӥсьёс вань, шуиз со. Нош ужзэ ӟеч пӧрмытӥсез удмурт ужбергатӥсь выль ӟучъёсын артэ туж кильтрес, бадӟым юртъер ӝутэм. Ужъёсыз трос дыръя вемеяз ӵош ветлӥллям Башкириысь, Татариысь но Удмуртиысь удмуртъёс. Йылпумъяса, газетмес кема аръёс ӵоже лыдӟисьлы но газетмылэн авторезлы Николай Яковлевлы (Элька Микулайлы) сӥзем потэ, со кема но таза мед улоз, редакциен кусыпсэ медаз ышты шуыса. Газет угось узыр аслаз лыдӟисьёсыныз но гожъясьёсыныз. Нош улӥын сётӥськом мӧйы автормылэсь кӧня ке гожъямъёссэ. П.СКОБЕЛЕВ. Туспуктэмез В.Беломорскихлэн. Чирдӥсь уӵылэсь вайзэ уг чиго Зорлэсь ватӥськыса, мон асфальт сюрес дурысь караул корка пыри. Отын пуке вал воргорон. Юай нимзэ-тулзэ, кытын вордӥськемзэ. Тон, пе, монэ уд тоды, мон Сальяла али гинэ улыны лыктӥ, гуртмы Кам ву возёнэ шедемен быриз, соин кошконо луимы. Вераськеммыя кылӥськом: сюрес вылтӥ гуретыса ортчыло машинаос. Кошкизы "КамАЗ", "Жигули", собере "Москвич". Мон солы пайми: мотор гуретэмъя, чик учкытэк, машиназэ вераз. - Малы тон крезьчилы ӧд дышетскы яке кырӟась ӧд луы? - юай мон солэсь. - Крезьгурлы мылкыды пичиысен вордскиз вал. Ас поннам дыши арганэн шудыны. Урамысен выль гур кылылӥ но соку ик арганэ пыртылӥ, бӧрысь но ноку со гурез ӧй ни вунэтылы. - Соку дышетскыны мыноно вал. - Кулэ вал, дыр. Но атаелы арганэн шудэме чик ӧз кельшы. Арган куара поттӥсько ке, туж вожез потэ вал. Огпол арганме кутэм но тӥрен кораса куштэм. Пудо, пе, утёно, колхозын, пе, ужано. - Выльысь дышетскыны кутскы ук. - Мон табере мӧйы ни, дыр ортчиз... Нош мынам сюлмы ик вӧсь луиз. Малы озьы крезьгурлы бадӟым мылкыдо пияшлэсь будон сюрессэ ӵогоно вал? Оло, солы крезьгур улонын бадӟым сюрес усьтӥськысал? Мон та сярысь ӧй но мадьысал, но чылкак мукет учырен пумиськи на. Тюменьын улэ Арцеръёслэн семьязы - картэз, кышноез но кык пизы. Ваньзы эктон пуктӥсьёс, ужало "Зори Тюмени" ансамбльын. Ог 25-30 кунъёсы потазы ни. Та нуналъёсы атайзы вуылӥз Иже бадӟым пиезлэн люкиськем кышноез доры. Со улэ куать аресъем нылыныз. Песятай юромо ветлӥз внучказэ Ижысь Тюмене нуыса концертсэс возьматыны. Тӥни кыӵе югдур. Пичи дырысеныз нылашез эктонэз яратыны дышето. Нош Тюмене солань- талань ветлон али дунтэм уг сылы. Кин ке, оло, малпалоз, та адями узыр, дыр, шуыса. Арцер искусствоя институтын кафедраен кивалтэ, толэзяз 1200 манет басьтэ. Кӧня ке тыро на ансамблен кивалтэмез но кружок нуэмез понна. Но со вала: внучкаез, аслаз семьяяз сямен ик, крезьгурез дунъяны мед быгатоз, пичи муртлэсь чеберлы бадӟым мылкыдзэ мӧйыос сӧро ке, со - сьӧлык. Элька Микулай. Утчасько инмарлы сӥзем кассетаос Огнуналэ, Тюменьысь Кияса ёросэ бертыса улыкум, радио пыр удмурт проповедез кылзӥськи. Сое лыдӟиз удмурт тодосчи но диакон М.Г.Атаманов. Кылзӥськи мон туж сак, ваньзэ валаны турттыса. Сюлмам мур пыризы вань валэктэмез, вань вӧсяськон кылъёсыз. Мон сое кылзӥськысал нуналысь нуналэ, арысь аре. Аслым но, вордскем гуртысьтым ӵыжы-выжыосылы но, Тюменьысь тодмоосылы но кузьманы басьтон вылысь, магнит лентае гожтэм проповедьёсты утчай, но нокытысь ӧй шедьты. Кырӟанъёсын лентаос трос, нош проповедьёсыныз ӧвӧл одӥг но. Соин юри пумиськылӥ асэныз М.Г.Атамановен. Солэн но кассетаосыз вылымтэ. Жаляса верано луисько, удмурт гуртъёсын черкъёс но священникъёс ӧвӧл на. Нимаз коркаосы кассетаостэк проповедьёс кема уз вуэ. Соин туж умой луысал проповедез кассетаосысь кылзӥськыны. Тӥни соин мон туж но туж курисько Удмурт радиоын ужасьёсыз но, ужбергатӥсьёсыз но, вань мылкыд карисьёсты но М.Г.Атамановлэсь удмурт кылын проповедьёссэ кассетаосын вӧлмытыны. Инмарлы оскисьёс соосты туж шумпотыса кылзӥськысалзы. Элька Микулай. ГОРОД УЛОНЫСЬ Утчасез шедьтоз Туннэ нуналлы Ижевскысь калыкез уже интыянъя службаосы ог 3 сюрс 200 адями вазиськемын. Со пӧлысь 68 процентэз нылкышноос но 4,1 процентэз сӧсыръёс луо. Ортчем ар ӵоже ужан интылы ёрмисьёслэн лыдзы ог 20 процентлы кулэсмиз. Городысь предприятиослэн ужаны кутскемзы ӟеч шӧдӥськиз та вылын. Трос ужасьёсты доразы кутӥзы ни "Буммаш" ОАО, "Аксион-Холдинг" ОАО, али но татын кулэясько фрезеровщкъёслы, токарьёслы, шлифовщикъёслы. Мултэс ужасьёс ӧвӧл пӧртэм пумо лэсьтӥськон организациосын но. Тэк уз пуке каменщикъёс, сантехникъёс, слесарьёс, электрогазосварщикъёс, стропальщикъёс. Уж интыянъя службаос уг палэнтӥсько калыкез профессилы дышетон бордын ужанзэс но. Соослэн кичӧлтэмзы ужын али 2 сюрс 59 мурт пӧртэм курсъёсын дышетске. Кылем арын таӵе курсъёсты 1 сюрс 753 мурт йылпумъяз вал. Со пӧлысь 97 процентэз соку ик ужан инты но шедьтӥз. Э.КУМАЧЁВА. Данзэ уз ышты "Тюрагай" хорлы миым Куатьтон вить ар тырмиз. Солэсь мӧйы коллективъёсты али уд шедьты ни. "Тюрагайлэн" сюресэз вольыт ӧй вал. Куараез но куддыръя чалмылӥз. Сизьымдонэтӥ аръёсы Валерий Яковлевич Митрофанов, мон но юрттэмъя, ансамблез нош ик люказ. Со дырысен усточиос асьсэды калык азьын туж синмаськымон возьматыло. Валерий Яковлевич кытын гинэ ӧз возьматылы ни чебересь, шаплыесь удмурт нылъёсты, пиосты! Удмуртъёс туж зол ярато мушез. Азьло аръёсы рос-прос семьялэн бакчаез тыр муш умортоос сыло вал. Али но удмурт гуртъёсын сыӵе семьяос вань на. Нош мушъёс мумытэк быро. "Тюрагаез" мон лыдъясько муш мумыен. Со бордысь кылдылӥзы ансамбльёс. Татын тыршылэм Надежда Полякова али кивалтэ культурая училищеысь "Инвугур" ансамблен, нош мон татчы ветлэм адями кылдытӥ "Инвожо" ансамбль. Та коллективъёс али дас ньыль ар талэсь азьло но асьсэды синмаськымон возьматъяло калык азьын. Та нуналъёсы мон вераськи "Тюрагай" ансамбльлэн кивалтӥсеныз Валерий Митрофановен. - Валерий Яковлевич, тӥ кызь вить арлэсь кема ини ужаськоды "Тюрагаен". Вуылӥды пӧртэм ёросъёсы, улосъёсы, кунъёсы. Соос пӧлысь кудӥз тужгес тунсыко, вунонтэм вал? - Ёросъёс пӧлысь - Шаркан, Вавож, Кизнер, Грах, Можга. Улосъёс но элькунъёс пӧлысь - Свердловск, Тула, Татарстан, Башкортостан. Кунъёс пӧлысь - Эстония. 1981-тӥ арын вуылӥмы Москвае - пыриськимы удмурт литературалы но 1987-тӥ, искусстволы сӥзем нуналъёсы. 1991-тӥ аръёсы - "Шире круг" телефестивале. - Кин "Тюрагайын" адӟем карымон? - Валентина Кондратьева, Елизавета Ившина, Юлия Ипатова, Геннадий Салтыков, Владимир Борисов, Анна Карпова, Владимир Белых, Александр Тронин. - Егитъёс пӧлысь кинэ пусйыны луысал? - Рушания Хизбуллинаез, Ирина Шушковаез, Алексей но Ирина Филипповъёсты, Жанна Вахрушеваез. - Ортчем арын "Тюрагай" трос концертъёс возьматӥз - кыӵе шумпотонъёсыз но сюлэмшугъёсыз вал? - Тужгес бадӟым шумпотонмы "Металлург" культура двореце интыяськыны быгатӥм. Сокем трос концертъёс ӧм возьматэ. "Ижмаш" дворецысь уллямзы бере люкано вал калыкез - выль кырӟасьёсты, эктӥсьёсты. Соин ик дырмы туж ик ӧй вал. - Кыӵе мылкыдын, кыӵе малпанэн выжиськоды выль аре, выль дауре? - Осконэн! Оскисько: "Тюрагай" вуоно арын, вуоно даурын но кылёз. Оскисько: со бурдъяськоз на, пушъёз, юнмалоз, нош ик данъяськымон луоз. Алигес "Металлург" дворецын ортчиз дано "Тюрагай" коллективлэн юбилей концертэз. Калык зал тыр люкаськылӥз. Тросэз пӧлын вал хоре азьвыл ветлэмъёс но "Тюрагаез" юбилееныз ӟечкылазы "Удмурт дунне" газетлэн редакциысьтыз усточи Светлана Яковлева, кырӟазы, шудӥзы "Инвожо", "Андан" ансамбльёс, кырӟаз Вера Любомирская, ӟечкылазы городысь но ёросъёсысь кивалтӥсьёс. Концерт бере "Тюрагайысь" азьло артистъёс ӝӧк сьӧрын пумиськизы отчы ветлӥсь туала усточиосын. Н. Возисов. Тыловай валъёс Москваысь медаль ваизы Берло аръёсы Дэбес ёросысь "Колос" эштослэн Тыловай фермаяз рос-прос басьтӥськизы валъёсты вордон борды. Та ужен сюлмысьтыз выре А. А. Юферев. Азьло аръёсы со ужамын колхозлэн тӧроез, сельсоветлэн исполкомезлэн кивалтӥсез луыса. Али - хозяйстволэн кивалтӥсезлэн вал вордонъя юрттӥсез но селекционер луэ. Фермаын 80 вал. Александр Аркадьевич кык валэныз сӥзьыл вуылӥз Москвае адӟытонэ. Отын солэн вятка выжыысь Магомет но Ганна валъёсызлы вылӥ дунъет сётӥзы - дипломен но кык азвесь медален пусйизы. Туспуктэмез С. Катаевлэн. Генераллэн погонъёсыз сётэмын Налогъёсъя полицилэн федерациысь службаезлэн Удмурт Республикая управлениез (УФСНП) 2000-тӥ арын ужамезлы йылпумъянъёс лэсьтӥз. Выт бичан удысын кылем арын реформа кутскиз, соин ик управлениын ужасьёслы пӧртэм воштӥськонъёсты чакласа ужано вал, шуиз УФСНП-лэн кивалтӥсез генерал-лейтенант Владимир Варламович Лепихин. Россилэн Президентэз кичӧлтонэн потӥз на матысь дыре коньдон ужпумъёсъя полиция кылдытон сярысь. Ортчем арын выт бичанъя 482 тырмымтэос шараямын вал. Ӝыныез со пӧлысь туж трос коньдон тыронъёсын герӟаськемын. Соос пумысен уголовной ужъёс ӝутэмын, кык но ӝыны поллы йылэмын экономикаын лэсьтэм йыружъёс. Соосты шараямен валче, государстволы 214 миллион манет берыктэмын, 1999-тӥ арен ӵошатыса, со лыдпус куинь поллы тросгес луэ. Республикалэн бюджетаз, кун но бюджетэ пырисьтэм фондъёсы вань берыктэм коньдонэз лыдъяно ке, управлениысь котькуд ужась ар ӵоже быдэн 885 сюрс манет тыр пайда поттӥз. Налогъёсъя полицилэн коллегиезлэн ужаз озьы ик пыриськиз Правительстволэн Тӧроез Юрий Питкевич. Со Россиысь Президентлэн генерал-майор звание сётон сярысь указэныз тодматӥз но Удмурт Республикая УФСНП-ысь кивалтӥсьлэн нырысетӥ воштӥсезлы Андрей Синильщиковлы генераллэсь погонъёссэ сётӥз. Удмурт Республикая УФСНП-лэн пресс-службаез. Гын сапеглы сиземын Сыӵе нимо адӟытон толон усьтӥськиз изобразительной искусствоосъя музейын. Возьматӥське отын живопись, декоративно-прикладной искусство, пиналъёслэн суредъёссы. Адӟытонэз радъяз дизайнер Александр Телин. Выставка сӥземын пӧртэм пумо пыдкутчанлы. Отын ик радъямын луоз гын сапегъёсын вузкарон. Ӝыныез тол азьпалан на бере, оло, кезьытъёс но луозы. Дыртэлэ гын сапег басьтыны. Н.СЕРГЕЕВ. "Вуюись" ваньмызлы пиштоз Глазовын национальной культураослэн центрзылэн "Радуга" газетсы потыны кутскиз. Со "Иднакар" газетлэн инъетэз луэ. Выль газетэз но солэн редакцияз ужасьёс ик поттӥзы. С.ПЕТРОВА. Гурт улон Егит киостэк музъем начарме Тодӥськоды-а, кыӵе удысъёс тужгес но бордазы кыско гуртысь егитъёсты? Республикаысьтымы Егитъёсын ужанъя кун комитетэн кылем арын октябре ортчытэм эскеронъёс возьматӥзы: тросэз егитъёс мынысалзы дышетон, культура, тазалыкез утён удысъёсы. Нош гурт ужъёслы синмаськемзэс веразы юалляськемъёс пӧлысь 6 процентэз гинэ. Со гинэ мар, дас тямыс-кызь кык аресъем егитъёс 30-40 процентэз пыраклы люкиськысалзы гурт улонэн. Ярам ай, гуртысь егитъёс ваньмыз ик музъем бордысь ишкалскон мылкыдын уг уло. Сыӵеос пӧлы пыртыны луоз Инна Федороваез. Ужа со Шаркан ёросысь гурт хозяйствоя "Мувырское" предприятиын зоотехник луыса. - Дышетски Асанысь совхоз-техникумын. Горд диплом сётӥзы. Малпасько вал на экономистэ дышетскыны Гурт хозяйствоя академиын, но конкурс укыр бадӟым вал. Собере мылкыды сӥялскиз. Кӧня ке арзэ ужасько ни аслам вордӥськем гуртам. Одӥг арзэ фермаен кивалтӥ. Секыт вал, дышетсконме соку гинэ быдтэмын. Кема ужамъёс, мӧйыос пинал карылӥзы. - Нош туннэ кыӵе сюлмаськонъёсын улэ гуртысь одӥгез валтӥсь специалист? - Пудо котькуд нунал дырыз дыръя сюдэмын мед луоз. Чкаласько, азязы пуктэм ужпумъёсты ужасьёс кулэезъя мед быдэсъялозы. Кунян сюдӥсьёсмы тани кык сменаен ужало. Пудо понна но со умой - котьку син азьын уло, асьсэлы но ужасьёслы капчигес. Сюро таза пудо хозяйствоямы 880 йыр, 290 кысконо скалъёс, 29 вал вордӥськом. Нырысетӥ сюлмаськонмы: скал йырез йылэтоно вал. Сӥльлэсь трос пайдаез ӧвӧл, нош йӧлэн коньдон поттыны луоно. Туннэ нуналлы милям югдур секыт уждун тыронэн. Азьло ми вал "Воткинский завод" предприятилэн подсобной хозяйствоез. Соку уждун толэзьлы быдэ басьтылӥм, гурт калык ёрмыса ӧз улы. Кылем арын февраль толэзьысен милемды ас бурд улаз басьтӥз Шаркан ёрос администрация. Коньдонэн улэмзы выльысь адямиослы секыт. Мукет хозяйствоос та вакытэз ас вылазы кемалась шӧдӥзы ни, шуг-секытъёс зӥбемлы дышемын. Но калык мылкыдзэ ӧз куашкаты, пудомы ӧз ке быры - улом ай. - Трос пудо вордон понна фермаос но йыг-йыгесь луыны кулэ. Тӥляд со ласянь кызьы? - Кылем арын тупатъян-выльдон ужъёс лэсьтӥм кунян вордон гидын. Выль скал гиж пуктыны кутским. Уждунэн ӝеганъёс со лэсьтӥськон ужъёс бордысь но пото. Но сотэк азьлане вамыштыны секыт луоз. Тупатъяны кулэ ни пудо сюдон гидъёсмес но. Шумпотӥсько, куинетӥ арзэ ужа ни кунян ваён отделенимы. Куинь-ньыль толэзьзэ вож кунянъёсты отын возиськом. - Нош маин шумпоттӥськоды ӟеч ужасьёстэс? - Аран вакытэ механизаторъёслы ю-нянь висъяло, нош пудо утисьёс та ласянь палэнэ кылё. Соин ик ужпум пуктӥм: ӟеч ужасьёслы кунян сётоно. Шуом, группаын 25 скал ке, 24 кунян басьтыны кулэ - 95 поцентлы планэз быдэстоно. Валя арын озьы кык мурт кунян басьтӥз. Но шуг-секытъёс кылдо. Ю тысез люкыны кӧня ке центнерен но люкыны луэ, нош кунянлэсь быжзэ уд сёты ук. Тросгес тодэм потэ вылэм мукет хозяйствоослэсь ужан амалъёссэс. - Шуг-секытъёсты тырмыт ке но, кыӵе ке азинсконъёсын ушъяськыны быгатӥськоды, дыр? - Чакламъёсмыя пудоез искусственно шудытон трослы дунтэмгес усе. Собере, озьы котькуд пудо-животъя нимысьтыз учёт нуылы луэ. Хозяйствоямы милям кык осеменатор. Куинетӥ арзэ та ужын тырше ни егит специалист Алексей Медведев. Техник-осеменаторъёслэн кылем арын районын ортчем ӵошатсконъёсазы со кыкетӥ инты басьтӥз. Хозяйствоысьтымы пудо утисьёс пӧлын тулыс конкурс ортчытӥськом. Бырйиськом устооссэ ужасьёсты. Соос пырисько ни районын ортчись конкурсъёсы. Кылем арын ик ӵошатскизы машинаен йӧл кыскись операторъёс. Вормизы милям ужасьёсмы. Нырысетӥ инты басьтӥз Нина Ивановна Широбокова, нош кыкетӥзэ - Алевтина Васильевна Варламова. Нош республикая Нина Ивановна ньылетӥ луиз. Йӧл кысконъя хозяйствомы районын ньылетӥ интые потӥз. Нуналаз 8,3 литр йӧл кыским. Скаллы быдэ 3 сюрс 150 килограмм луоз, малпасько, со урод ӧвӧл ни. Кылем тулыс секыт вал фуражен. Одӥг условной йырлы 15,5 центнер сиён дасямын вал, нош туэ - 25,6 центнер. Кык толэзьзэ сюдыны, оло, со узгес ик тырмы. - Ужасьёс ласянь кыӵегес югдур хозяйствояды? Егитъёс палэнэ уг кошко-а? Тырмыт-а специалистъёсты? - Хозяйствомы милям бадӟым, кӧня ке гурт пыре. Ваньмыз ужасьёс 170 кузя. Котькуд нунал фермаын 70 пала адями тырше. Нош фермаосмы вань Мувырын, Пашурын, Вукогуртын. Егитъёс гуртэ трос кылё. Фермаын но ужало соос. Специалистъёсмы но ваньмыз сямен егитэсь. Оло, опытмы уг тырмы, соин но шуг-секытъёс кылдыло. Кивалтӥсьмы Михаил Леонидович Анисимов куинь арзэ ужа ни. Дышетскемезъя со зоотехник, пудо вордон удысысь ужпумъёсты ӟеч вала. Специалистъёс сярысь ке верано, милям ӧвӧл агрономмы, ветеринар кулэ. Но егит специалистъёс понна квартира ӧвӧл, соин пегӟемзыгес потэ дорысьтымы. Корка пуктыны мылкыд карисьёслы ссуда сёто ке но, лэсьтӥськон туж дуно усе. Ми но тани корка пуктыны басьтӥським анай-атайёсын. Коркамы та вие липет улэ пуксиз ни. Азьлогес ӧм ке басьтӥськысалмы, та уж борды, али корка пуктон сярысь вераськон ик ӧм ӝутысалмы. Правительство гурт удыслы тросгес саклык мед висъялоз вал. Тазьы ик луиз ке, азьланяз гуртын улон уката но секытгес луоз. Егитъёс уз мынэ гурт ужъёслы дышетскыны, нош специалистъёстэк гуртэз уд ӝуты. -- Инна, мӧзмыт уг поты-а гуртын улон? - Мӧзмыт, милям гуртамы клубмы но ӧвӧл угось. Егитъёслы нокытын ваньмон дырзэс ортчытыны. Ярам, кыӵе ке бадӟым ужрадъёслы школа висъя актовой залзэ, спортзалзэ. Столовойын но куд-ог пумиськонъёс ортчо. Но таӵе бадӟым гуртлы клуб кулэ ик вылэм. Юонэн эшъяськисьёс но милям трос гинэ - со понна коньдон котьку шеде. Тросэз пиос кышнояськымтэесь, со но улонлэн шуг-секытъёсыз бордысь потэ. Л. Малых. Артилеритэк ӧй вормысалмы Артилерия войнаын, бадӟым ожмаськонын вал инмар интыын. Быдӟым Отечественной войналэн пумазгес артиллерия туж но туж бадӟым юрттэт сётӥз асьме армилы. Озьы вал Курск дугаын, озьы вал Белоруссиез тушмонлэсь мозмытонъя ожъёсын. Нош таиз ожмаськон ортчиз "Багратион" ним улсын. Со вал Быдӟым Отечественной войнаын туж бадӟым ожъёс пӧлыз одӥгез. Артиллеристъёслэн кызьы ожмаськемзы сярысь вера ожысь но ужысь ветеран Михаил Спиридонович СПИРИДОНОВ (со вакытэ взводлэн командирез). Улэ со Пичи Пурга ёросысь Улын Юри гуртын. - 1943-тӥ арын февралёзь мон Свердлов областьысь Сухой Лог посёлокын (али город) одессаысь артиллерийской училищеын офицеръёсты дасянъя сизьым толэзьем курсъёсын дышетски. Шолья посёлокын (асьме элькунысь Камбарка ёрос) бичазы бадӟым кужымо 107- тӥ гаубичной артиллерийской бригада. Офицеръёс пӧлысь монэ но отчы келязы. Ньылетӥ дивизионэ снарядъёсъя командире юнматӥзы. 1943-тӥ арын сентябре мон воштӥ 12-тӥ батареяысь кыкетӥ ыбылӥськон зводлэсь командирзэ Серёгинэз. Сое, сӧсырмем лейтенантэз, госпитале келязы. Мон младшой офицерлэн синмыныз адӟеме сярысь, Отечественной войналэн историезлэн ог люкетэз сярысь гинэ (1943-тӥ арлэн пумысеныз 1944-тӥ арын гужемозь) верало... Гитлеровецъёслэсь Смоленск областез мозмытыса, 1943-тӥ арын деабре асьме войскоос вынлыко Белоруссилэн музъемез вылэ вуизы. Али но син азям пуксе на ноябре Орша дорын тушмонлэн ыбылӥсь орудиосыз шоры ыбылэмъёсмы, нош декабре Витебск дорын ожмаським ни. Тани Витебск дорын ыбылӥськеммы сярысь дневнике гожъямъёсысьтым куд-ог лыдпусъёс: "1943-тӥ арын 23-тӥ декабрь. Ыбылӥськыны кутским 9 час 40 минутэ. Цель - 4 номеро участок. Фугасной гранатен, пуштытъян фугасной, 9-тӥ заряд. Снаряд 100 килограммъем. Снарядлэн ӝоглыкез секундскын 327 метр. Быдтэмын бетон пыр потӥсь 12 снарядъёс но 28 фугасной английской гранатаос, 40 пичиятэм зарядъёс". 1943-тӥ арын 28-тӥ декабре 17 часын 12-тӥ батареямы Витебск палась Иванькино гурт дорысь бусые интыяськиз. Ыбылӥськыны дасяськеммы бере вуиз бригадлэн штабезлэн начальникез, визьмо, адямиос сярысь сюлмаськись майор Вадим Васильевич Бегачев. Со милемлы, нырысетӥ ыбылӥськон взводлэн командирезлы лейтенантлы Николай Осипович Савинченколы но мыным, кыкетӥ ыбылӥськон взводлэн командирезлы, ожлы умой инты бырйыны косӥз. Мынам вераме потэ личной составысь куд-огзэ. Со орудилэн командирез сержант Василий Сергеевич Орлов, наводчик сержант Георгий Иванович Безымянный (войналэсь азьвыл таиз Киевысь Державной университетлэн электроакустической факультетэзлэн деанэз вал), Сергей Павлович Абраменков - сержант-наводчик, Сергей Семёнович Сёмин, Иван Петрович Егорин, Иван Фёдорович Кулаженков, Фёдор Николаевич Люлин. Семён Тимофеевич Петров (1901-тӥ арын вордскемын), солэн пиез Петров Пётр Семёнович но мукетъёсыз ыбылӥськон интыын ваньзэ кулэзэ лэсьтӥзы. Кынмем сюез ломен, киркаен, тӥрен корамы. Ужмес ӝытозь быдтӥм. Батареялэн командирез старшой лейтенант Александ Семёнович Морозов ӝытазе 8 час котырын ваньмызлы ӵош ыбылыны команда сётъяны кутскиз. Ыбылӥськыкумы дорамы легковой машинаен "Правда" газетлэн фотокорреспондентэз Михаил Калашников вуиз. Газетын возьматыны кулэ, пе, уин артиллерилэсь бадӟым кужымен ӵош ыбылэмзэ. Снимок умой пӧрмем, сое ми 1944-тӥ аын 1-тӥ январе потэм "Правда" газетлэн нырысетӥ номерысьтыз адӟим. Кинлы ке тунсыко потӥз ке, со газет вань на Ижевскысь 50 номеро школалэн музеяз (40 лет Победы ульча). Снимок улэ гожтэмын: "Бадӟым кужымен артиллерия тушмонэз Витебск дорын ыбылэ". Нырысетӥ орудие дорысь тодманы луэ взводлэсь командирзэ лейтенантэз Н.О.Савинченкоез, орудилэсь командирзэ сержантэз Краплин Кузьма Даниловичез, наводчикез сержантэз Лукерчик Василий Николаевичез, кыкетӥ орудие дорысь - взводлэсь командирзэ лейтенантэз М.С.Спиридоновез, орудилэсь командирзэ старшой сержантэз Орлов Василий Сергеевичез, наводчикез Безымянный Георгий Ивановичез. Лыдӟисько 28-тӥ декабре ыбылӥськем сярысь гожъямъёсме: "...Ыбемын 42 снаряд, 12 пичиятэм но 30 быдэс зарядъёс". Котькызьы ыбылоно луылӥз: куддыръя трос, куддыръя ӧжыт. Кӧня ыбылон пуктэм ужпум но мишень бордын вал. Ыбылӥм ДОТ-эз, ДЗОТ-эз, танкъёсты, орудиосты, огинэ люкаськем тушмонэз. Ыбылӥськон позициосмес ӵем вошяллям. 1944-тӥ арын 1-тӥ январе выжон уе нюлэскы дугдӥм. Савинченкоен кезьыт буш тылыс шедьтӥм. Быдэн 100 грамм спирт сётъязы но, милемлы шуныт, шулдыр луиз. Но шутэтскыны, шулдыръяськыны ӧз кылды. Выль ар кутскытозь, кӧня ке минут гинэ кылиз на вал - милемыз тревогая ӝутӥзы но позицимес резь-куаж воштӥм. Войнаын расписание ӧвӧл, кытын но ку изьыны. Одӥг нунал но ыбылӥськытэк ӧм кыльылэ. 1944-тӥ арын 11-тӥ январе милемыз, лейтенантъёсты Кругловез но Спиридоновез но ньылетӥ дивизионысь кык солдатъёсты, передовое пехотаын ожмаськисьёс доры ыстӥзы. Отчы час дасэ мыныку вуим. Милемыз роталэн командирез пумитаз но соку ик алӥз: "чаклаське, соос матын". Со дырысен 57 ар ортчиз, но ожмаськон дыръя адӟемъёсы йырысьтым уг потало. Мар адӟим пехотинецъёс дорын? Ог 30 метр кузьда гу. Пуӵъёслэсь тылыс бичамын, вылаз векчи гинэ сюй пазямын. Асьмелэнъёс урод интыын - бусыын, немецъёс - нюлэскын. Милемыз соос адӟо, нош ми - огзэ но ум. Оборонаын озьы кема сылод шат? Огшуэмен ыбылыса быдтозы. Пехоталэн гудӥськыны нокыӵе тӥрлыкез ӧвӧл. Сапёрлэн лопаткаеныз кын сюез пыргытыны кӧня дыр кулэ! Соин уд утиськы. Мон соос дорысь кошки, номырин юрттыны быгатымтэеным куректыса. Соос дорысь ог 200 метре гинэ кошкыса вуттӥм, кутскиз ук тушмон артиллериеныз ыбылыны. Сюосын снарядъёс пушто, чалепъёссы шулало, ӵаштырто, ӟукырто. Эшъёсы пичи воронкае тэтчизы, мон но отчы ик. Огезлэн эшмылэн пельпумаз корт чалпе йӧтыса кошкем. Мон ас поннам малпаса люкиськисько ни мемиеным но дядмиеным: "Ӟуч лу, мемие, ӟеч лу, дядие". 100-150 метрын нюлэс, эшъёсы - отчы. Мон оннам кыли. Малпасько, виизы ке, татысь тонэ нокин уз шедьты - мон но тэле бызи. Адӟисько сылӥсь танкез, сьӧраз пегӟисько. Табере мыным кышкыт ӧвӧл ни, кожасько. Мон дорысен метр но ӝыны кемын зӧк кыз сылэ. Снаряд кыз выжые пыриз, но ӧз пушты. Шудэ вылэм на. Мырдэм- мырдэм асьмелэнъёс доры вуим. Соос милемыз улэпен адӟыны уг ик малпало ни вылэм. Тушмон витьымтэ шорысь кужмо ыбылыны кутскемен, бригадамы 72 адямиосты ыштӥз. Кулӥзы бригадалэн командирез Георгий Иванович Полуместный (Сибирьысь вал), батареяослэн командиръёссы капитан Матюнин (Ленинградысь), старшой лейтенант Иванов но мукетъёсыз. Сыӵе трос эшъёсмы быремен, 12-тӥ январе 24 орудиосысь 24 пол ӵош ыбылӥм тушмонлэн ыбылӥськон орудиосыз но солдатъёсыз шоры. Та ыбылӥськонэн кивалтӥз старшой лейтенант Тимченко. Со нуналэ ик радъямын вал командирмес Смоленск городысь шайвылэ ватон (отчы ик ватэмын 1812-тӥ арын Отечественной войналэн геройёсыз). Ватӥмы ӝож музыка шудэм улсын. Ньылетӥ дивизионысь отчы ысъязы монэ. Бригадалэн командирез луиз полковник Богданов Никита Меркулович. 1944-тӥ арын гужем. 3-тӥ Белорус фронтлэн командованиез (командующей генерал- полковник Черняховский Иван Данилович) дася Белоруссиез мозмытонъя "Багратион" операция. 1944-тӥ арын 23-тӥ июне бригадамы Крынки станция пала интыяськиз. Милям орудиосмы Витебсклы 30-40 иськемын сылӥзы. Тушмон котькызьы но городэз сётонтэм туртӥз. Соин войскоосмылэн азьпалазы, Витебск доры, туж зол кужмоятэм оборона кылдытӥз. Ог-огзылы 100-200 метръёсын дзотъёс сылӥзы, штрумовой орудиосты но музъеме ватэм танкъёсты утьыса. Озьы куинь рубежъёсын оскымон утьыны дасяськизы войнаын вормон понна та кулэ городэз. Инжнерной куронъёсъя тужгес но юн дасямын вал нырысетӥ рубежзы, кудӥз кылдытэмын куинь позициослэсь, соос пӧлысь котькудӥзлэн вал куинь муресь траншеяосыз (мон соосты адӟи), кудъёсыз куспазы герӟаськемын ветлон интыосын. Татын оборонаын сылӥзы юн дасям 206-тӥ, 246-тӥ, 22-тӥ охранной пехотной дивизиос. Тӥни со кужмо утиськись инты пыр потыса, танкъёсмылы но пехотамылы азьлань мыныны луонлык кылдытоно вал. Немецъёслэн обороназылэсь азьпал люкетсэ пазьгоно вал. Ми сое пазьгим, сюрсъёсын пехотинецъёслэсь улонзэс утьыса. 26 июне Витебск мозмытэмын вал. Но мозмытӥсьёсты пумитаны нокинлы луиз, город буш вал. мозмытон нуналэ городын лыдъяськизы на ваньзэ- ӧвӧлзэ 28 адямиос гинэ. 3-тӥ июле мозмытэмын Белоруссилэн шоркарез Минск. 3-тӥ Белорусской но Прибалтийской фронтъёсысь войскоосмы юрттӥзы "Багратион" операциез ӝоггес йылпумъяны. Ми пыримы Западной Белоруссилэн улосвылаз. Сыӵе зол шуккет сётэмын вал, немец войскоосын огыр-бугыр луиз. Переправаос дорын сюрсъёсын ярано автомашинаос шофёръёстэк сыло. Машинаосынызы йырин ӧй вал ни соослы, пегӟыса йырзэс утьыны турттӥзы. Нюлэсъёстӥ, бусыостӥ, гуртъёстӥ калгизы немецъёслэн йыромем командаоссы. Сютэмесь, кырсесь, тэйӟемын, кесяськпм дӥськутэн немецъёс бакчаостӥ ветлӥзы, сугонэз, огречез, картофкаез ишкыса. Коркаосы пыраллязы, нылкышноослэсь курег, курег пуз но йӧл курыса. Сыӵеосты ми адӟимы Западной Белоруссиысь Радошковичской волостьысь. Со интыости 1812-тӥ арын куать сю сюрс адямием армиеныз ортчиз Наполеон Россиез киултон понна. Немецъёс ветлӥзы пичи но бадӟым группаосын, киосазы трос пыӵал тӥрлыкен. Июльлэн кутсконаз бригадамы интыяськиз кунгож дурысь пичигес шурлэн бур пал ярдураз. Татӥ кунгож ортче вал 1939-тӥ арын 17-тӥ сентябрёзь. Соку Горд Армия Западной Белоруссилэн улосвылаз пыриз но, СССР-лэн кунгожез кыдёке шунды пусён пала воштӥськиз, польша но Литва дорозь. Шурлэн паллян палаз вал Волоки гурт, ми отчы ӵем вуылӥм. Со нуналэ отчы мынӥмы ми, лейтенантъёс Матвеев (мордвин, Гумбинен городын бырыны шедиз), Семёнов Василий (чуваш), Спиридонов (удмурт), медицинской службаысь старшой лейтенант Григорьев (ӟуч) но автоматэн старшой сержант. Ми доры куалектэм нылкышноос бызьыса вуизы но ивортӥзы, немецъёс коркаостӥ но бакчаостӥ лушкаськыса ветло шуыса. Соос татын улӥсьёсты Хатынь гуртысь калыкез сямен, быдтыны быгатысалзы. Ми улӥсьёсты утьыны малпмы. Ӟег бусыетӥ мынӥськом. Немецъёс милемыз адӟо, шорамы ыбылыса-ыбылыса пегӟо. старшой лейтенантлэн киыз пыр пуля потӥз. Котькудмес виыны быгатысалзы. Соосты нюлэскы уллямы. Шӧдтэк шорысь кыралэ огез бӧрсьы огез кесяськыса но киоссэс ӝутыса потыны ӧдъязы немец солдатъёс. Одӥгез, кыкетӥез, куинетӥез, ньылетӥез... дасэтӥез... дас витетӥез... Кӧня кузя бен соос, киоссэс ӝутыса ялан пото но пото. 50 лыдъямы. Ми состы штабе ваимы. Мукет нуналаз мон мыноно кариськи толон ветлэм сюрестӥмы ик. Басьтӥ кык солдатъёсты - аслам взводысьтым ик Жуков Алексей Егоровичез но разведотделениысь Киселев Алексей Алексеевичез. Потӥмы уйшор бере куинь часын. Со сярысь нокинлы ӧм вералэ. Эшъёсмы ческыт уммен кӧло вал. Киосамы - кык автомат но пистолет. Асьмлэнъёслэсь ог кунь иськемлы кошкимы ни. Нюлэс дуре вуим. Адӟисько, азьпаламы пичиесьгес кызъёс но ньылпуос будо, отысь ӵын ӝутске. Ми, зӧк писпуос сьӧры ватскыса, выдӥмы. Немец потӥз (соку ик тодмамы картуз нырызъя), кӧс улвай бичаз но берен тылскем доры кошкиз. Милемыз ӧз шӧды. Мон малпай: ми ӧжыт кузя но эшъёсмылэсь кыдёке кошкемын ни. Но тушмонэз но озьы гинэ уд лэзьы ук... Нюжтӥськыса тылскем доры мыныны ӧдъямы. Тылскем дорысь эшшо одӥгез солдат палэнскиз, зӧк кыз доры султӥз но "бушатскыны" кутскиз. Синъёсмы ваче вуизы. Со мон шоры учке, мон - со шоры. Всё, маке но кароно. Вылӥе ыбисько. Омыре ыбылыса лэзизы эшъёсы но. Адӟиськом, куакъёсысь пото одӥгез, кыкетӥез, куинетӥез, ньылетӥез, витетӥез... Кӧня меда соос татын? Милемыз трос кузя мед кожалозы шуыса6 шуласьком, "Ура!" кесяськиськом. Соос 12 вылэм. Одӥгез тылскем доры кылем. Соос нюлэс дуре потӥзы, киоссэс ӝутыса. Азямы нуиськом. Ми пӧлысь котькудмылы ньыльлэсь трос пленнойёс усё. Пӧлысьтызы одӥгез мыным вазе: "Пук не делай, я цех. Пук не делай, я цех". Трос пол озьы вераз. Мон пилоткаен вал. Пилоткае шоры возьматыса, трос пол шуиз: "Я лублу, я лублу". Синкылиосын бӧрдэ но ялан одӥг кылъёссэ вера... Ми ӧжытак берегес кылимы азьпалан мынӥсьёслэсь. Гадь кисыысьтыз фотокарточка поттӥз, отын - егит чебер кышномурт но кык пичиесь нылъёс, аслаз нылъёсыз, дыр. Туж ӝож бӧрдэ, пилоткаысьтым кизилие шоры возьматыса, ялан вера: "Пук не делай, я цех, я лублу". Мон нокызьы валаны уг быгатӥськы, мар вераны турттэ со. Бератаз валай. Эн ыбы, мон чех, мон кизилиез яратӥсько шуэ вылэм. Мынытозямы умоесь эшъёс луимы. Чехословацкой посольство пыр сое утчаме потэ вал, но утчаса ӧй вутты. Табере жалясько утчамтэысьтым. Волоки гуртэ шутэтскыны интыяськимы. Ӵукна, куазь умой, тылобурдоос кырӟало. Война но ӧвӧл кадь. Нош соин ӵош ик ми нуиськом со немецъёсты, кудъёсыз асьмелэсь музъеммес саптаса ветло но асьмемыз киултыны туртто. Пленэ кутэмъёсмы огазе люкаськизы но сиёнзэс пуньыен люкыны кутскизы. Вань сиёнзы вылэм пичигес пуйыын. Пызьзэс пуньыен люкизы. Мукет номырзы ӧй вал. Сютэмесь. Сиёнлы ёрмеменызы ик бакчаостӥ, коркаостӥ кург пуз но йӧл курыса ветлӥзы, дыр. Ми доры лыктӥзы кӧня ке нылкышноос. Озьы сиён люкыны выремзэс адӟыса, жаль потӥллям, шӧдске. Одӥгез мон доры лыктӥз но юа: - Соослы сугон вайыны уг яра-а? - Вай, мед сиёзы. Кыкетӥез лыктэ, таиз но юа: - Йӧл вайыны уг яра-а? - Вай, мед юозы. Куинетӥез лыктэ: - Нянь вайыны уг яра-а? - Ваиз. Соку мон малпай: инмаре, макем чылкыт но быдӟым асьмелэн советской адямимы, толон гинэ тушмонэн лыдъяськем муртэ туннэ йӧлын но нянен сюдэ бере. Кӧтсы тырымон сиськизы. Но нокудзы нылкышноослы тау ӧз каре. Пленэ сюремъёсты ӝутӥ, асьмелэнъёс пала мыныны вырӟим. Вуж граница дуртӥ бызись шур дуре мыноно. Тани со но. Нош шурлэн сопалаз быдэсыз сямен бригадамы люкаськемын. Солдатъёс пӧлысь кин ке верам, луоз, ми "пӧйшураны" кошким но ӵукназэ сиськон дырлы вуом шуыса. Мукет сыӵе учыръёс сярысь, куке ньыль кузя ӝыны взводлэсь трос немецъёсты пленэ кутылӥзы, мон ӧй адӟылы но ӧй кылылы ни. Пленнойёсме Радошковичие, военнпленнойёсты люкан интые келязы. Огъя вераса, котьмазэ адӟиськиз, котьмазэ чидаськиз, соин секыт орудиослэн артиллеристъёссы ож мышкын гинэ улӥзы шуыса вераськонъёс чик но шонересь ӧвӧл. Татӥ бызе му вӧй Асьмелэн шаертӥмы газэн но му вӧен уно гинэ гумыос ортчо. Со "вирсэръёсты" эскерыса возё но музъем узырлыкез шунды пуксён пала келяло нимысьтыз станциос. Вань со Пичи Пурга черкогуртын но. Кивалтэ соин Михаил Леконцев. Туэ ужын бадӟымесь азинсконъёсыз басьтэмез понна но Удмурт Республикалы 80 ар тырмонлы сӥзьыса, со пыртэмын республикалэн Данъян пулаз. Нош та нуналъёсы Михаил Тимофеевичлы вордскемез дырысен 50 арес тырмиз. Гажано эшсэс ӟечкыланы ветлӥзы УРНУ-ысь (нефть сётӥсь гумыосты эскеронъя Удмурт управление) кивалтӥсьёс, ӵош ужась эшъёсыз. Ми но ӟечкыласьком йыг-йыг удмурт воргоронэз зарни юбилееныз. Н.ЛЯЛИН. В.Беломорскихлэн туспуктэмез. Книгаен поттоно Ортчем арын, толсур толэзе, Удмурт радио пыр гудыръясь куараен лыдӟизы вашкала удмуртъёсмы сярысь кылбур. Нырысь радиоверан бере ик чылкак пайми: кытысь кин меда туж паймымон вакыт сярысь гожтыны быгатэм? Собере эшшо но эшшо кылзылӥ на. Берло тодӥ ини: сое гожтэм туж визьмо, удмурт калыкез гажась ӟуч кылбурчи Михаил Георгиевич Худяков. Солэн та ужезлэн данэз сярысь мон уг вера. Мынам вераме потэ визьмо удмурт тодосчиосмы - Даниил Александрович Яшин но Василий Михайлович Ванюшев - сярысь. Та адямиос ӧй ке басьтӥськысалзы Михаил георгиевичлэсь гожъямзэ удмурт кылэ берыктон борды ноку но нокин со сярысь ӧй тодысалзы. Ӝож: туж вазь кошкиз асьме пӧлысь Даниил Александрович. Василий Михайлович Ванюшевлы сямен, музъемозь йыбырттэм потэ, та бадӟым уж лэсьтэмез понна. Эпосэз радио пыр удмурт кылын лыдӟыны но туж дано артистлы дэмлаллям. Солэн гудыръясь куараез котькуд кылзэ, лач-лач интыясь, ӧжытак вис карылыса, кылзӥсь адямилэн сюлэмаз лякылэ кадь. Евгений Андреев интыын мукет артист лябгес куараен лыдӟысал ке, сюлэмез позыртыны ӧй быгатысал, дыр. Туж жалясько: магнитофонэ ӧвӧлэн, артистлэсь лыдӟемзэ быдэсак кылӟыны, гожтыны ӧй быгаты. Эшшо шумпотӥ соизлы: "Кенеш" журналысь ачим лыдӟи быдэс эпосэз. Василий Михапйловичлы воксё пайми ини: кызьы-озьы сомында кыл шедьтыны быгатэ? Тазалыкед мед луоз, Василий Михайлович, азьланяз но. "Кенеш" журналысь та эпосэз выльысь но выльысь, нуналлы быдэ сямен, пичиен-пичиен лыдӟылӥсько. Молитваез кадь, валаны тыршыса. Асьме вакытмылы туж тупа кадь потэ. Та эпосэз книгаен но поттыны луысал. Журналлэн лыдыз сюрс вить сю гинэ - со туж ӧжыт. Та книгаез сю витьтон сюрс поттыны кулэ вылэм. Котькуд удмурт семьяе мед вуысал со. Удмурт шаерын улӥсьёс гинэ ӧвӧл, мукет интыосысь адямиос но тодматскыны мед быгатозы. А.ИВАНОВА. Журналистъёсын пумиськонъёс Юрий Питкевич: "Табере политикае но пыриськоно луоз" Таяз арняе журналистъёсын Правительстволэн Тӧроез луыса нырысьсэ пумиськиз Юрий Питкевич. Со вакчияк возьматӥз республикаямы социально-экономической югдурез но рос-прос валэкӥз люкаськемъёслэн юанъёссылы. - Кылем арын ужаммылы быдэсак йылпумъянъёс лэсьтымтэ на, - мадёнзэ кутскиз премьер-министр. - Но сое оглом урод ӧм быдэстэ. Экономика кӧня ке юнмаз, будэ уждун тырон, капчигес шоканы ӧдъяз социальной удыс. Выльдӥсько техника но ужан амалъёс. Но шаерамы ӧжыт вуэ на палэнысь юрттэт (инвестициос). Январьлэн пумаз-февральлэн кутсконаз арлы йылпумъянъёс тодмоесь луозы. Собере вань предприятиослэсь ужамзэс пыр-поч учком, сэрттом-пертчом, кун кенешъёс ортчытъялом. Бадӟым вераськон нуом гурт удысэз азинтон, солы юрттон пумысен. Матысь 4 ар ӵоже улонэ пыӵатом "Азинскон" ("Развитие") кун программаез. Сое дасянлы шӧдскымон кужымзэ сётӥз Александр Волков. Дуннеын му вӧйлы, дун огкадьгес (1 баррель 22-24 доллар) возиськиз ке, республикалы огсыр ужаны но азинскыны луонлыкъёсмы луозы. Со озьы ик герӟаськемын Россиын огъя югдурен но. Ӝоген йылпумъялом ни правительстволы кивалтӥсьёсты юнматонэз. Вераськон мынэ премьерлы нырысетӥ воштӥсь но кык министр (промышленностья, эстӥськонъя, энергетикая но связья) утчан сярысь. Правительствое пыртэмын Валерий Загайнов. "Ижмаш" огазеяськонлэн ужамез сярысь вераса, солэн акциосын контрольной пакетэз Россия киын, 19 процентэз гинэ Удмуртилы сётэмын. Отын выль автомашинаос ("Шкода") поттон ласянь уж мынэ. Таин ӵош ик ужпум эскериське солэсь асдунзэ кулэстон ласянь. Сотэк, валамон, рынокын интыдэ уд шедьты, бадӟымесь заводъёс пачкатозы чебересь но дунтэмесьгес машинаосын. Асьме машиналэн асдуныз 3,5-4,5 сюрс долларлэсь трос медаз луы вал. Шаерамы му вӧез переработать каронъя завод пуктон пумысен Юрий Степанович ватсаз, асьмелэн, пе, нефтьмы сокем ӟеч ӧвӧл, сераез трос. Соин ик башкиръёс му вӧймес переработать каро, Сибирьысь усто нефть ватсаса. Республикалэн сыӵе луонлыкез ӧвӧл, шуыны луоз. Но главноез: завод пуктыны коньдон, инвесторъёс ум шедьтэ. Вылаз ик, бускель республикаысь му вӧй заводъёслэн кужымзы тырмыт уг кутӥсько на. Лыдпусэн вераса, асьмелы выль завод ӝутыны ичизэ 600-800 миллион манет ватсаса уксё шедьтоно. Кун бюджетысь сомында коньдон уд потты. Правительствоын али тодмо ни: тӧролэн воштӥсьёсыз пӧлысь кин кыӵе ужпумъёсты, министерствоосты но ведомствоосты нуоз. Александр Горяиновлы, кылсярысь, оскемын иворъёс вӧлмытон но калыкъёсын ужан удысъёс, нош Михаил Назаровлы - гурт хозяйство, вузкарон но нянен герӟаськем ужпумъёс. Бен, гурт удысын югдур капчи ӧвӧл. Туэлы кун бюджетысь гурт хозяйстволы 13 процент уксё висъяны учкемын. Но со тырмыт ӧвӧл ай. Миым 400 миллион манет кун юрттэт ке сётэмын вал, туэ - 500 миллион чакламын. Со сяна, 260 миллион манет кредит вуыны кулэ. Туэ шаерамы нырысьсэ 200 тракторез дорамы тупатъялом. Лизинг амалэн кӧня ке выль техника басьтом. Юрий Питкевичлэн верамезъя, мон, пе, политик ӧвӧл, тросгес экономикаен выри, но табере, пе, политикае но пыриськоно луоз. Сое куре выль уж, бадӟым оскон. Г. Романов. ТАЗАЛЫК "Бӧрдэ" висемдылэсь азьло Тол кошкон сярысь матын но уг малпаськы ай. Туэ ӟырт кезьыт уг улы ке но, со аслэсьтыз лэсьтэ: адямиосты пыд вылысьтызы погыртэ. Йӧвалеген йырин гинэ ӧвӧл, ӵемгес - гриппен но мукет кынмаса висемъёсын, пыэдэн. (Зэмзэ ке, гриппез кынмаса висён шуыны уг луы, малы ке шуоно, со вирус, нош кынмаса лябӟем мугор капчиен сётске котькыӵе черлы.) Туэ тросэз гриппен висизы ни, но тужгес кышкытэз - азьпалан ай. Толэзь пумын со тросэн вӧлмоз. Эпидемия дыръя шорлыдын висьыны усе 10-15 процентэз арлыдо калык но 20 процент нылпиос. Грипп тужгес кышкыт луэ пересьёс, сюлэмынызы но шоканэнызы курадӟисьёс понна. Таӵе адямиос ӵемысь сое уг чидало, пневмония кутэ, инфаркт, инсульт шукке. Туж ӵем грипплэн бервылыз бронхитлы, астмалы, энцефалопатилы пӧрме. Соин ик висьыны кутскемдэс шӧдэмды бере ик вазиське врачлы. Но умойгес луысал солэсь утиськыны. Туннэ нуналлы тужгес оскымон луэ вакцина, малы ке шуоно, али тросэн вӧлмем гомеопатической эмъюмъёс, аспиринъёс-парацетамолъёс но калык амалъёс (турын-куаръёс, паросъёс...) гриппез уг эмъяло, инфекциен уг нюръясько, вӧсез гинэ зӥбломыто. Нош вакцина мугорын грипплэн вирусэзлы пумит антителоос кылдытыны кутске, со 1,5-1,7 поллы уте грипп паласьконлэсь, солэн секыт бервылъёсызлэсь. Ми, эмъясьёс, одно ик прививка лэсьтыны ӵектӥськом нылпиослы (соос ӵемгес висё), больницаосын, вузкаронын, транспортын, школаосын но мукет трос калыко интыосын ужасьёслы. Прививка лэсьтӥське сентябрьысен декабрёзь, инактивированной вакцинаен луэ али но. Мар юрттоз на утиськыны, вакцина сяна? Аптекаосын дунтэмен вузасько ремантадин, арбидал, дибазол, оксолин мазь, аффлубин, интерферон, продигиазан, элеутероккок но трос пӧртэм витаминъёс. Висёнэз алон понна та эмъюмъёсты юоно эпидемия азьын. Со сяна, ваньмыз тодо, трос витамин сиён-юонысь басьтыны луэ шуыса. Витаминэн тужгес узыр луо лимон, ягмульы, нюрмульы, легезь, сокъёс, минерал вуос, нош сӥзьыл но тол ӵоже нунал быдэ сугон-чеснок сиемлэсь синкылидэс ке кисьтӥды, грипп палэнтӥды ортчоз. В.ДАНИЛОВА, республикаысьтымы инфекциосты алонъя отделениысь валтӥсь врач. ВАЛЭКТЭ ЮРИСТ Сэрегез дася адвокат Лилия ШКЛЯЕВА Киыныд сётод... ...пыдыныд утчалод, шуо. Мон но сыӵе учыре сюри. Сузэрелэн ӵыжы-выжыосызлы кӧня ке сюрс манет сётӥ. Квартира но ӧз басьтэ, коньдонзэс но ӧз берыктэ. Кытчы вазиськоно - милицие-а, судэ-а? А.ПОЛЯКОВА, Ижын улӥсь. Гожтэтын ӧвӧл верамын авторлэн мылкыдыз. Ма карыны медэ Полякова эш - коньдонзэ берыктыны-а, ӵыжы-выжызэ пуктыны-а? Киыныд сётэмдэ пыдын утчан вылысь вазиськоно судэ. Умойгес луоз - адвокатэн ӵош. Малы? Сотэк таӵе ужез келяны но кема ӧвӧл. Юристэн ӵош утыны осконды чарак будоз. Вылаз ик, таизлы быдтэм коньдондэс, оло, отӥяз тыроно луоз ай ачиз пунэмаськись. Зэм, таӵе мылкыддэс тӥ азьвылгес ик вераны кулэ иск сярысь куронады (тазэ но гожтыны юрттоз адвокат). Иск борды тэчоно юристлы дун тырем сярысь квитанциез. Котьма ке но, адвокатэн герӟаськыны тӥ пумит ке, ас кожады тазьы карыны быгатӥськоды. Нырысь ик дасялэ пунэмаськисьлы гожтэт, тупатэ солы коньдонзэ берыктыны дыр. Та бумагаез заказной шуиськись гожтэтэн келяно, ыстэм муртлы сое сётэм сярысь тӥледлы почта мед ивортоз. Собере тӥ пунэмаськисен гожтэт пыр ик возьматыны кулэ тыриськонлэсь быдӟалазэ. Соку адями озьы лэсьтыны пумит ке, та ужлэсь куштӥськоно. Гожтэтын пусъем дыр ортчыса, искен куронэз нуоно судэ. Таиз нырысь ик решение кутэ тӥледды кун пошлиналэсь мозмытон яке мозмытонтэм сярысь, пунэмаськисьлэсь ваньбурзэ арестэ басьтон яке басьтонтэм сярысь. Собере суд учке ассэ ужпумез. Тӥ пала дурбасьтӥсь решение юнматэ ке, тазэ быдэстыны тӥледлы юрттоз ни судысь пристав. Полякова эш мылкыд каре ке пунэмаськисез уголовной кыл кутон улэ кыскыны, мед вазиськоз милицие. Зэм, отын уголовной уж ӝутыны юн пумитъяськозы. Милициын валэктыны быгатоно: адями коньдон пунэмаз, берыктонтэм вылысь чакласа. *** Олокӧня ар талэсь азьвыл судэ вазиськи, кыдёкысь ӵыжы-выжые пунэмен тыронзэ уг берыкты шуыса. Пичи Пурга районысь суд, мыным дурвайыса, решение кутӥз. Нош пунэмаськись уг сёты уксёзэ - ӧвӧл, пе. Судысь исполнитель доры ветлыса, олокӧня пыдкук пӧськытӥ - пайдаез ӧвӧл. Со выжиз ни мукет уже. Ма кароно? Н.К. Пичи Пурга район. Судысь исполнитель (пристав) вылэ озьы ик ӝожтӥськон гожтыны луэ. Ужзэ со тырмыт уг лэсьты яке чик уг быдэсъя шуыса вазиськоно Пичи Пургалась судэ ик. Пие бертэ армиысь Школа бере пие колхозын ужаз, собере армие кошкиз. Ӝоген бертыны кулэ. Кылэме вань: выльысь колхозэ кариськиз ке, солы коньдонэн юрттыны кулэ. Вань-а сыӵе закон? Ю.КУЗНЕЦОВА, Можга район. Сыӵе закон нимаське тазьы: "Военнослужащийёслэн статуссы сярысь". Россия Федерациысь Правительство та ужпумъя ик 1998-тӥ арын 25-тӥ ноябре кутӥз 1394 номеро постановление. Армилэсь азьвыл кытын ке ужам но армия бере отчы ик берытскем муртлы хозяйство кылдытыны коньдонэн юрттэт сётӥське куинь толэзьскын. Юрттэтлэсь быдӟалазэ тупато администрация но профсоюз, со ӧжытсэ вить пичи уждунлэсь ичи медаз луы. Мыжыке вуттылӥз кыдёке Юэм дыръям ульчаысь тодмотэм адями котыре тэбини но плащсэ кеси. Пуки. Потӥ. Табере ваньмыз мон шоры чиньыенызы возьмато кадь: со тюрьмаын вал. Вал ке, мар бен? Адями виисьёс гинэ отын пуко шат? Нош ваньмызлы озьы уд вера. Вань-а осконэ, мон асме пукымтэ адямиен лыдъяны быгато шуыса? В.П. Вань. Закон чакла, пӧртэм йыртэман учыръёс но кыл кутэмъёс бере пӧртэм дыр ортчыса, адямиосты судэ шедьылэмтэен лыдъяны. Нош кин ке, эрике потыса, ассэ умой ласянь гинэ возьматэ ке, суд сое пукымтэен лыдъяны быгатэ тупатэм дырлэсь вазьгес но. Со понна вазиськоно улон интыысь судьялы. Таиз сыӵе решение кутыны пумит ке, ар ортчыса, выльысь солы курон гожтыны яра. Дуно билетъёс Чугун сюрес вылын билетъёс чарак дуноязы. Вылаз ик, кассир мынам дас но ӝыны аресъем нылылы нылпи билет ӧз сёты. Соку кызьы осконо 5-10 аресъем (включительно, пе) пиналъёслы дунтэмгес билет вузаське шуэмлы? И.ГОРДЕЕВА. Сое тазьы валано. Дас ареслэсь бадӟымгес пиналлы кулэ ни "мӧйы" билет. Пиналы ӧлексы Одӥг тодмо кышномуртлэн пиналыз куинетӥ группаен инвалид. Анай пенсие потӥз 50 аресысен. Мынам но нылы ӧлексы, нош пенсие уг лэзё. Малы? Татын гинэ но блат шуон кулэ ни шат? А.Андреева. Дэбес район. Сыӵе пичи гожтэтъя шонерак валэктон сётыны шуг. Пиналысен ӧлексы муртлэн анаезлы пенсия 50 арескысен сётӥське, кык курон быдэстэмын ке. Нырысетӥез: пинал 8 ареслэсь бадӟым медло. Кыкетӥез: анайлэн огъя ужам дырыз ичизэ 15 ар медло. Кӧня сылэ ужан инты? Республикаямы ужан интыосты утёнъя но выльёссэ кылдытонъя 2000-тӥ�2003-тӥ аръёслы радлык юнматэмын. Сое кулэ каризы экономикаын воштӥськонъёс. Трослы кулэсмизы ужан интыос, йылӥз ужзэс ӵемысь уретылоно луыса тыршисьёслэн лыдзы. 1990-тӥ арозь ӝыныезлэсь ятырез ужан интыос ӝыны нуналэн яке ӝыны арняен гинэ кутӥськизы. Но берло кык аръёс ӵоже, экономикаын шӧдскымон воштӥськонъёс луэмен, та лыдпус 9 процентозь кулэсмиз. Эскеронъёс возьматӥзы: матысь аръёсы экономика удысэ пыриськемъёслэн лыдзы йылоз но 2003-тӥ арлы ватсаса 15,4 сюрс адями уже интыямын луоз. Озьы ке но, вань мылкыд карисьёслы уж шедьтыны луонлык уз кылды на. Соин валче нош ик йылыны быгатоз ужлы ёрмисьёслэн лыдзы. Калыкез уже интыянъя ужпумез вылӥ верам документын чакламъя быдэстыны пӧрмиз ке, ужтэк кылемъёслэсь огъя лыдзэс 9,4 процентысен 7,8 процентозь кулэстыны луоз. Дунъямын котькуд ёрос понна одӥг ужан интылэн дуныз. Со ог 180 сюрс манет сылэ, нош ужан интыез утён дун - 39,2 сюрс манет. Оглом ужаны мылкыд карисьёслэсь куронъёссэс быдэстон понна кулэ луоз 4,1 миллиард манет коньдон. Кутэм документын озьы ик пыр-поч валэктэмын вуз поттӥсь предприятиосын, пичи ужбергатонын но мукет удысъёсын ужан интыосты утёнъя но выльёсэ кылдытонъя нырысь ик быдэстоно ужпумъёс, валтӥсь ужрадъёс. *** Правительство юнматӥз 2001-тӥ�2004-тӥ аръёслы "Анайлэн но пиналлэн тазалыксы", "Туберкулёз", "Сахар диабет" нимысьтыз программа дасян сярысь постановление. Та программаос понна кыл кутоз Тазалыкез утёнъя министерство. *** Россиысь федеральной службалэсь улосвылъёсысь коньдон ужпумъёсъя (ФСФО России) ёзъёсызлэсь ужзэс ӟечгес радъян понна, Удмурт Республикаын кылдытэмын ФСФО-лэн люкетэз. Солы квалтӥсе юнматэмын Шуклин Сергей Борисович. Кутэмын Удмурт Республикаысь Правительстволэн туэ нырысетӥ паларлы ужан планэз. Удмурт Республикаысь Правительстволэн пресс-службаез. Родиналэн наградаосыныз пусъемын Россия Федерацилэн Президентэзлэн Указъёсыныз Россия Федерацилэн кун наградаосыныз пусъемын Ужын вылӥ вормонъёссы, калыкъёс куспын эшъяськонэз но ӵош ужанэз юнматонын бадӟымесь азинсконъёссы но кема аръёс ӵоже пайдаё тыршемзы понна. Эшъяськон орденэн Боровик Юрий Иванович - акциосын "Удмуртэнерго" огазеяськонлэн валтӥсь директорез; Шмаков Дмитрий Никифорович - иерей, Покров старообрадческой общиналэн настоятелез, Ижевск город. "За заслуги перед Отечеством" орденлэн ИИ степенё медаленыз Торхов Игорь Степанович - акциосын "Ижсталь" огазеяськонысь управленилэн кивалтӥсезлэн воштӥсез. Пенсия тыронэз радъянын пайдаё тыршемез понна За заслуги перед Отечеством" орденлэн ИИ степенё медаленыз Моряков Владимир Михайлович - Удмурт Республикаысь ёзэныз кивалтӥсь. Нефть но газ поттон удысын бадӟымесь азинсконъёсыз но трос аръёс ӵоже пайдаё тыршемез понна Россия Федерациысь нефть но газ поттон удысысь дано ужась" сӥлы карон ним сётоно Павлова Татьяна Юрьевналы - акциосын "Удмуртгеофизика" огазеяськонысь валтӥсь геофизиклы. Удмурт Республикаысь Правительстволэн пресс-службаез. "Возьмаськом шундыез кадь" Туннэ газетмылэн бамаз куноын бускель Татарстан Республикаысь. калыкез дышетон удысын ужасьёс. Римма Николаевна Зайцева тырше Кукморысь нылпи садын воспитатель луыса. Людмила Пантелеевна Яковлева удмурт кылъя но литературая дышетэ та ёросысь ик Сутэр Починка школаын. Кыкназы ик соос дышетскемын Удмурт кун университетлэн филологияя факультетаз. Элькунамы вуылӥзы удмуртъёслэн тямысэтӥ ӧтчамзылэн делегатъёсыз луыса. - Тӥ ӧтчамлэн делегатъёсыз вал бере, ойдолэ вераськонмес со бордысен ик кутском. Кыӵе дунъет сётысалды ӧтчамлэн ужамезлы? Мар возьмаськоды вал солэсь? Р. З. Милемды туж шуныт мылкыдын пумитазы Удмурт Элькунын. Ӧтчамлэн ужамез кельшиз, ог-огмес валаса, умой ужамы кадь. Кулэ муртэ бырйим "Удмурт кенешлы" кивалтӥсе. Татарстанам бертыса, шумпотыса верало калыкелы, асьмеос вань на дыръя удмурт калыкмы уз быры шуыса. Л. Я. Ӧтчамлэн оглом ужез кельшиз. Трос визьмо адямиосын пумиським, асьмелы трос кулэзэ басьтӥм. Быръем муртъёсын ми соглаш луиськом. - Нош тӥляд ёросады кылдытэмын ни-а "Удмурт кенешлэн" ёзэз? Р. З. Милям со кылдытэмын. Но мукет ёросъёсын ӵошатыса, лябгес ужаськом на. Солэн ужаз тросгес мыло-кыдоосты кыскыны кулэ. - Тӥ кыкнады ужаськоды калыкез дышетон удысын. Соин ик вераськонмес выжтысал бускель Татарстанын удмурт кылэз дышетон, удмуртлыкез утён пала. Кызьы радъяське тӥляд та ласянь ужды? Удмурт программая ик дышетӥськоды-а? Л. Я. Удмурт кылэз дышетон, мон сямен, Татарстанын умой радъямын. Ми ум шӧдӥське, удмуртъёслы татын ӟоскытгес шуыса. Татын удмурт кылэз Удмуртиын сярысь но ӟечгес дышетэмзы потэ шуысал. Нылпиос анай кылзэс туж ярато. Нош удмурт программая ужаськом, шуыны уг луы. Часъёс ӧжытгес висъямын. Ӟуч но удмурт кылъёсын ӵош бигерзэ но дышетӥськом. Удмурт но бигер кылъёслы одӥг мында дыр сётӥське. - Нош литература, методической пособиос ласянь шугъяськонъёс уг луыло-а? Л. Я. Та ласянь ми вазиськылӥськом Иже. Куронъёсмес быдэстыны пумит уг луо. Асьме роно уг быгаты литератураен юрттыны. Туннэ нуналлы дышетскон книгаосмы тырмо. Гожтӥськиськом удмурт газет-журналъёслы. Туж юртто "Кенеш", "Инвожо" журналъёс, укыргес ик - "Вордскем кыл". Алигес печатламын вал Алнаш ёросысь дышетӥсьёслэн "Мынам Удмуртие" сценариез. Соя ми туж тунсыко, шулдыр удмурт ӝыт ортчытӥм. Нимамы сое "Удмурт Элькунлы - 80". - Нош кылэмды вань-а ни, Удмурт Республикаямы анай кылэз дышетонэз азинтонъя концепция кутэмын шуыса? Л. Я. Кылӥм ни со сярысь. Туж шонер малпамын. Со дышетӥсьёслы но юрттоз. - Людмила Яковлевна, тӥ дышетскондэс азинтӥды Удмурт шаерын. Гуртъёсы экспедициосы но потады, луоз. Ӵошатэ вал, Удмуртиысь яке Татарстанысь пиналъёс юнгес кыстӥсько удмурт кылэз дышетон пала. - Ми палась пиналъёс юнгес кыстӥсько кадь анай кылзы пала. Школаямы ӟучъёс, бигеръёс но удмуртъёс дышетско. Нокин но удмурт кылэз кулэ ӧвӧл уг шуы. Бигеръёс но удмуртъёсын удмурт сямен верасько. Удмуртъёс уг возьдасько анай кылзылэсь, бигер сямен но верасько. - Нош кыӵегес югдур нылпи садын? Таиз сярысь Римма Николаевна умойгес вералоз, дыр... Р. З. Садикамы ветло бигер, ӟуч, удмурт пиналъёс. 1992-тӥ арысен ини мон удмурт нылпиосын кружок нуисько. Удмурт кырӟанъёсты, калык веранъёсты дышетӥськом. Мынам туж потэ вылэм, удмурт семьяосын вордскемъёс анай кылзэс медам вунэтэ шуыса. Соин ӵош ик пичияк кӧтӝожме но верасал. Мон покчиосты удмурт кыллы, сямъёслы дышетӥсько, нош отӥяз уже уг азьланьтӥськы. Кукмор посёлокамы удмурт дышетӥсьмы ӧвӧл угось. Ньылез школаосмы удмурт лыдъясько ни, нош одӥгаз но удмурт кыллы уг дышето на. Соин но жаляса верасько, уже уретӥське кадь йӧтэ мыным. Озьы ке но пиналъёс уз вунэтэ ни анай кылзэс. Соос огдыре ик бигер, ӟуч кылъёсты тодӥзы ке но, ноку но, удмуртэн пумиськыкузы, удмурт сямен ӟечъяськытэк уз кошке. Сыӵе ини милям сяммы. Татарстанын удмуртлыкмес Удмуртиын сярысь юнгес гажало кадь потэ. Тани шуом Удмурт Элькунэ вуиськом ке, татысь чик но ум кылӥське чебер, чылкыт удмурт кылын рос-прос вераськемез. Нош тӥ ми доры вуиды ке, чик уд ёрме, удмурт калык тӥледлы одно ик удмурт сямен вазёз, бигер - бигер сямен, ӟучез - ӟуч сямен. Вераме потэ тани мае но. Садамы ӵош ветло удмурт но бигер покчиос. Нош удмурт кырӟанъёсмес кырӟаськом ке, сыӵе шумпотыса кылзо, кылъёссэ уг валало ке но, кырӟаны дышетско. Туж ярато удмурт гуръёсты. Тани музыкальной кивалтӥсьмы милям бигер, нош удмурт гуръёсты туж яратыса шудэ. Тӥляд кылды сыӵе небыт, крезьгурлы тупась, эктонъёсты задоресь, шуэ. Ог-огмес валаса, гажаса, огкылысь ужаськомы. - Кызьы тӥ верады, "Удмурт кенешлэн" ёзэз ёросады лябгес ужа на шуыса. Нош кыӵе юрттэт возьмаськоды? Кызьы Удмурт Элькунэн кусыпъёстэс юнматыны луысал? Р. З. Аслам удысэя ке верано, милемыз, удмурт воспитательёсыз, тодон- валанъёсмес будэтыны мед ӧтьылысалзы Удмуртие. Милемыз нулло Казане, бигер садикъёсы. Нош бадӟым мылкыдмы вань удмурт садикъёслэн ужан амалъёсынызы тодматскыны. - Нош школаос ласянь ма верасалды? Л. Я. Римма Николаевналэн вераменыз мон соглаш. Удмуртилэн палэнысьтыз Удмурт кыллы дышетӥсьёсты но Иже ӧтчаны амал мед шедьтысалзы. - Собере воспитательёслы но, дышетӥсьёслы но аттестациос ортчытъяло ук. Кызьы тӥлесьтыд ужъёстэс дунъяло Татарстанын? Р. З. Ас сярысьтым ке верано, монэ шумпотыса пумитало. "Хоровод дружбы" шуыса нимам праздникъёс ортчытъяку, отчы одно ик пыртыны туртто удмурт программамес но. Таин валче Удмуртиысь эшъёсмылы куронмес вераме потэ. Дорамы ӧтьылыкумы, пумит медам кариське вал соос. Ӵемгес мед вуылысалзы ми пала артистъёс, учёнойёс. Вуэмен гинэ ӧвӧл, сцена вылын эктэм-кырӟамен, вераськемен но ӧвӧл, соос калык пӧлы мед потысалзы, туж возьмало ми палан соосты. Бигеръёс, ӟучъёс пӧлын удмурт кылэз кылзон - со сьӧд пилем сьӧрысь потэм шунды кадь ми понна. Соин котьку но возьмаськом Удмурт шаерысь куноосты, соос асьсэ чылкыт кылынызы мед вераськысалзы. - Таӵе сюлмысь потэм кылъёсын куное ӧтемды кулэ муртъёслэн пелязы одно ик вуоз, малпасько. Людмила Пантелеевна, нош удмурт дышетӥсьёслы кин дунъет сётэ? Л. Я. Ужъёсмылы дунъет сёто роноысь бигер методистъёс. Нош кылэз тодытэк, кызьы дунъяло, асьмеос но ум тодӥське. - Шуом, садикысь воспитательлэсь тыршем-пӧсямзэ пӧртэм шудонъёс, праздникъёс пыр дунъяны капчигес, кылэз тодытэк но, син шоры пуксись суредэз валаны луэ. Нош удмурт уроклэсь мынэмзэ кылэз тодытэк валаны шуггес ик, дыр. Асьтэос но тани верады ни, тӥледыз Иже мед ӧтьылысалзы шуыса. Оло нош тӥляд ужан амалъёсыныды тодматскыса, валтӥсь удмурт педагогъёс, методистъёс дунъясалзы но ронояды ӵектон-курон келясалзы ке, шонергес ӧй луысал-а? Л. Я. Туж шумпотысалмы таӵе амалэз улонэ пыӵатыны луысал ке. Тросэз учёнойёс но ог-огзэс тодо, пумиськыло ук, одӥг валанэ вуысалзы. Сыӵе ӵектон-дэмланъёсъя кылэз тодӥсьтэм специалистъёслы асьсэлы но каньылгес луысал ужмес шонергес дунъяны. - Тау мыло-кыдо верамды понна. Гуртоостылы удмурт шаерлэсь салам вералэ. Р. З. Тӥледлы но тау милемын вераськыны мылкыд каремды понна. Удмуртлыкмес уртче утьыны тыршом. Вераськиз Федор Никитин. Ӟечкыласьком! Вань дунне вылын туж умой адями Анна Егоровна Боталева. Улэ со Завьял ёросын. Та нуналъёсы эшмы вордскем нуналзэ пусъе. Ми но итӥськиськом уно ӟечкыланъёс вӧзы. Юн тазалык, шуд, тыро улон сӥзиськом! Гажаса - Раиса Моторина но Валентина Еманова. Капчи тополь мамык кадь лэйка мылкыд... Вордӥськем нунал! Кин гинэ уг возьма сое. Егит муртлэн мылкыдыз тополь мамык кадь лэйка, эктэ но кырӟа. Ӝоггес бадӟым луэм потэ уга. Мукет сяменгес пумитало вордӥськем нуналзэс арлыдоос. Соослэн сюлэмазы шумпотон интые мӧзмыт нюжаос тросгес кылдо ни. Укыр секыт вакытэ ортчиз соослэн пинал даурзы. Кытын ай вал вордӥськем нунал сярысь малпан, кӧтыд сюма, вылад дӥсянэд ӧвӧл. Табере кыдёке берлане кылизы секыт война аръёс, мӧйымизы со вакытэ вордскемъёс, огез бӧрсьы мукетыз кошко шутэтскыны, тросэз сопал дуннеын кӧло ини. 20-тӥ январе аслэсьтыз 60 арессэ пусъе Пичи Пурга ёросысь "Норья" эштослэн кивалтӥсез С.И.Соколов. Солэн но мӧзмыт малпанъёсыз пычей сямен сӥсъяло, луоз, мӧйымыны валасьтэм сюлэмзэ. 60 ар ӵоже вамышъям сюрес вольыт но небыт гинэ ӧй вал. Вал со читыр-чутыр но, йыръёно луиз чурыт изъёсты, чидано луиз кужмо пельтӥсь тӧлъёсты. Валамон, уродэныз ӟечез гинэ валче полэстӥськыса, улонмы тунсыко луэ. Собере улонлы ӝожтӥськыны но яра меда? Тазалыкед, суй-пыдыд, йырыд бордад ке, аслыд ик дурыны кулэ шудбурдэ. Соин, дыр, Семён Иванович тазалыксэ юнматон сярысь туж сюлмаське, спортэн эшъяське. Ӵукна 5 часын султыса бызьылэ, кезьыт вуэн пылаське, собере задор мылкыдын уж дураз вамыштэ. Тӥни малы 60 аресаз но егит мурт кадь адӟиське: веськрес мугоро, ымныр тусыз но чик гужамтэ, йырсиез но гӧрен басьтымтэ. Син медаз усьы, но шуггес на солы аслэсьтыз арлыдзэ сётыны. Озьы ке но, ортчись аръёс асьсэлэсь басьто. Нылпиос угось пыд бере лёгисько ни. Солэн ортчем сюресэныз лыдӟись эшъёсме ӟечгес тодматон понна, вазиськи аслыз юбилярлы. - Вордӥськи но будӥ Завьял ёросысь Троицкое гуртын. Кезьыт толсур уе, анае мыным, укмысэтӥ нылпиезлы, дунне вылэ улон кузьмам. Уг тодӥськы, шумпотӥз-а анае, синвуаськиз-а мон вордскемысь, но бордаз ӝикак ӟыгыртыса, шудбур сӥзиз, дыр, шуыса малпасько. Вордскем берам ӝыны ар гинэ ортчыса, шимес война кутскиз. Атайме но кык агайёсме оже басьтӥзы. Кема гинэ возьмаз анае соослэсь берытскемзэс. Нош атае ноку но ӧз вуы, пыраклы ож лудэ кылиз. Туж куректыкуз, анае монэ бордаз ӟыгыртылӥз, озьы буйгатыны выриз, дыр, мӧзмись сюлэмзэ. Пичи киосыным ӵушылӥ мон солэн бам вылтӥз васькись чилясь синвуоссэ. Валасал ке соку анаелэсь сюлэмзэ... Ачим атай луыса, нылпиосме будэтыса, кайгу пыр потыса гинэ валай солэсь мылкыдзэ. Нош быгатӥ-а меда солэсь сюлэмзэ шуныт кылъёсын шунтыны яке вӧсь гинэ карылӥ-а? Али но туж жалясько. Сопал дуннее кошкыса но, анае весь вӧзам поръя кадь потэ. Ма шуод, чырткем вордэм монэ анае, ӝожтӥськыны номырлы. Котьма борды басьтӥськылӥ туж капчиен. Дышетски умой, пыриськылӥ школалэн котькыӵе ужъёсаз, котькуд ар бырйылӥзы учкоме. Норьялась средней школаез йылпумъяме бере мынӥ гурт хозяйствоя институтэ дышетскыны, но конкурсъя ӧй ортчы. Ӝожомыса ветлыкум адӟи артистэ дышетскыны кутон сярысь ялонэз. Отын но ӧз удалты. 2-тӥ турзэ ортчон нуналэ военкоматэ ӧтизы, повестка возьманы косӥзы. Озьы куинь ар служить кари. Армия бере сельхозинститутэ пыри. Отын дышетскыкум пумитай визьмо, зӥбыт нылашез, кузпалъяським. Вордскиз нырысетӥ пимы. Дышетсконмес йылпумъяса берытскимы дор паламы. Отын кузпалы Серафима Константиновна 5 ар ӵоже колхозэн кивалтӥз, мон ужай инженерын. Бератаз та секыт кивалтон удыс борды басьтӥськи. Нырысь Кияса ёросын, собере дэмлазы Пичи Пурга ёросысь Байситово гуртын выль кылдӥсь "Заря" колхозэн кивалтыны. 8 ар ужай. Трос гинэ лэсьтӥським со дыр ӵоже: выль школа, автовес, нош тужгес но шумпотымонэз - сӥзьыл-тулыс пыраны луонтэм гуртэ асфальт сюрес кыскимы. Ма быдӟа шумпотон гурт калыклы! Кылдытӥмы на туж адӟем карымон художественной самодеятельность. Вуримы чебересь костюмъёс, басьтӥмы арганъёс. Отын ортчизы кадь потэ самой шудо аръёсы! Но ӟеченыз ӵош котьку малы ке уродэз вамышъя. Озьы ке но, сыӵеосызлы сюлэмы чиданы мед быгатоз, нош умоез дуннеын улытозям умоен мед кылёз. Тани 11 ар нуллӥсько ни колхоз кивалтӥсьлэсь сиессэ. Али ужасько "Норья" эштосын. Кивалтӥсьлэн ужез котькытын одӥг: вазь султоно, бер выдоно, лумбыт бызьылоно, созэ- тазэ утчано. Кивалтӥсьлэн нокызьы но гань-гань улэмез уг луы. Куддыр ваменэс луытэк йӧныз ӧвӧл. Кылзӥськы калыкедлэсь но малпаськы ай йырыныд, ӟечъёссэ дэмланъёсты пеляд поныса. Тодӥськод, кыл аслыд кутыны кулэ шуыса. Туж яратӥсько вазь тулысысен бер сӥзьылозь бусыосты котыръяны, гуретӥсь тракторъёсты, машинаосты кылзыны. Юнме ӧй бырйы ук сельхозинститутэз, культура удысэ мыныны быгатонлыкъёсы котыр ласянь вал ке но. Сюлэмы бурдъяське, зарни ю-нянен тулкымъяськись бусыосты но сяськаен ворекъясь возьёсты адӟыса. Ю-нянь ке ӟеч, ӝӧк выл но тыр, озьы бере калыклэн улонэз бусьтыр, мылкыдыз капчи. Уг яра вунэтыны арлыдо адямиосты. Соос вылтӥ погыльскиз войналэн вань секытэз, быгатэмея юрттӥськомы ю тысен. Арлы быдэ пусйиськом соослэсь дано нуналзэс. Трос-а кулэ на мӧйы муртлы? Кулэ дыръяз эн вунэты шуныт кыл вераны но сюлэм висёнзэ кылзыны. Ӝытъёсы яратӥсько книга, газет лыдӟыны. Тодматскисько азьмынӥсь хозяйствоослэн ужаменызы. Гуртоосынымы ӵош вуылӥськомы театре, тодмо адямиосын пумиськылонъёсы. Ваньмыз городэ ветлыны уг быгаты, соин ик гуртамы но куноосты ӧтчаськомы. Адями умой шутэтске ке, солэн мылкыдыз ужын но, семья куспаз но капчи. Асме шудоен лыдъясько. Мемей-дядяе мыным кузьмаллям бадӟым лулпуш узырлыксэс. Вӧзам - гажась, яратӥсь но валась кузпалэ, вордэм нылпиосы. *** Семён Ивановичез ӟечкыласько 60 арес тырмонэныз. Сӥзисько солы юн тазалык, шудбур, мед быдэсмозы чебересь малпанъёсыз, визьмыз котьку сайкыт медло. Васса Васильева. Пичи Пурга черкогурт. С.И.Соколов сцена вылын. Фотоез В.Сырыгинлэн. Шӧкыч Фельетон Тубытоз-а пирамида рае? Ӟеч лэсьтэм но адямилы юрттэм музэ, пе, уз усьы, куке-соку ӟечен ик берыктӥськоз. Шуге-леке сюрем муртъёсты "Оскон тылси" ("Луч надежды") пирамида шудонэ кыскыса, шӧртчи дядяйёс но апайёс малпазы, дыр, рае шедьыны. Ӧйтӧд, вуттоз меда соосты синсузёнтэм пагӟа инбам сьӧры, нош пӧяме шедемъёс инмар дорозь вуозы ик, дыр, асьсэ куронъёсынызы но ӧпкелёнъёсынызы. Ма, кызьы-о сотэк? Утисьёссы соослы сӥзизы ук нокыӵе шуг-секытъёстэк 218 сюрс 700 манет коньдон басьтыны. Оскисез оскиз но, табере инмысь коньдон усемез нуналысь нуналэ возьма, луоз. Эн возьма, со коньдон визьмо муртъёслэн кисыязы шильыртэ ни. "Оскон тылси" нимаськись шудон чакламын, пе, инвалидъёслы юрттыны. Нош вордӥськем сыӵе визьмо малпан Свердловск областьын. Шудон пумысен иворез вӧлмытӥсь пӧртэм ёзъёс, Интернет пыр ялонъёс сётыкузы, визьлюкъёс ӧвӧл возьдаськиллям Россиысь инвалидъёслэн огазеяськонзылэсь (ВОИ) пусъетъёссэ асьсэ ужазы кутыны. Адямиослэсь йырзэс поромытыны турттӥсьёс озьы ик оскыто, шудон ортчытӥське "Россиысь инвалидъёслэн огазеяськонзылэн коньдонэз чотын, шуге-лке сюрем та адямиослы юрттэт сётон понна", озьы ик "вань люкаськем коньдон мыноз Россиысь инвалидъёслэн огазеяськоназы, сертификатъёс дасянэ но ужрадэз вӧлмытон ужъёсы кутӥськемзэ вератэк".Россия Федерациысь Антимонопольной политикая но ужбергатӥсьёслы юрттонъя министерстволэн Свердловск улос управлениез нимысьтыз эскеронъёс ортчытӥз но шудон радъясьёслэсь ужзэс умойтэмен лыдъяз. Мукет сямен вераса, со, пе, адямиосты пӧяса шудонэ кыскон. Та сярысь ужпум кутэмын 2000-тӥ арын 9-тӥ ноябре. Озьы ке но, рае сюрыны мылкыд карисьёс ӧз буйгатске, "узырмыны" турттӥсьёсты утчаса, Россиысь пӧртэм улосвылъёстӥ кураськыса вело. Палэнэ ӧз кельтэ Удмуртиез но. Малпазы, вылды, республикаысьтымы инвалидъёслэн огазеяськонзы быдэс Россияя умойёсыз пӧлы пыре бере, кисызэс но узырмытыны быгатозы со чотын. Но огазеяськонын визьмо адямиос пуко вылэм. Шуизы, юрттэмды сокем потэ ке, милям расчётной счётмы вань. Таосыд берытскизы но кошкизы. Ӧз, кытчы ке палэнэ ӧз мынэ. Инвалидъёслэн огазеяськонзылэн ёрос ёзъёсыз но трос гинэ угось, Воткае но, Якшур-Бодьяе но сюрес усьтэмын. Собере, та огазеяськон сяна но, инвалидъёслэн ужпумъёсынызы шаерамы сю пала мукет огазеяськонъёс выро. Ӧйтӧд, кин кызьы, вылды, пумита утисьёссэс, но возиськыны кулэ ик вылэм пирамидае пыронлэсь. Гырпумдэ куртчыны берло уд сузьы ни. Нош кинэ янгыше уськытод, ас мылкыд каремедъя шудонэ пыриськид ке? Россиысь инвалидъёслэн огазеяськонзылэн кивалтӥсез А. Ломакин вань улосъёсысь огазеяськонъёсы шудонэ пыриськонлэсь алон гожтэтъёс келяз. Та пӧечи шудон понна огазеяськон кыл уз куты. "Оскон тылси" шудонэз радъясьёсты кыл кутыны курыса, ВОИ озьы ик вазиськиз югдурез утён ёзъёсы но. Л. Малых. Вазиськисьёс кык пол йылозы Кылем арын Удмурт Республикаысь Кун Кенеше вуиз 2370 гожтэт. Азьвылаз аре сярысь, со кык пол пала тросгес. Республикаямы улӥсьёслэн вазиськонъёссы пумысен вераны курим Кун Кенешлэн Тӧроезлэн секретариатысьтыз гожтэтъёсъя но адямиосты кутонъя секторлэсь кивалтӥсьсэ В. А. Косолаповез. - Вуо пӧртэм ужпумъёсъя гожтэтъёс. Соос пӧлын - куриськонъёс, ӝожтӥськонъёс. Ваньмыз герӟаськемын адямиослэн улон-вылонын пумиськылӥсь шуг-секытъёсынызы. Вань нимтулзэс вератэк гожъясьёс. Кылем арын куамын укмыс сыӵе гожтэт вуиз. Валамон, вань бадӟымесь ужпумъёс, соосты вакчи дыр куспын быдэстыны уг луы. Нош адямиос ӵемысь вазисько нимысьтыз ужпумъёсъя, кылсярысь, социальной удысъя. Туала вакытэ адямиосты туж сюлэмшугъяськытэ улон инты, уждун, уже интыяськон пумысен ужпумъёс. Вань гожтэтъёс пӧлысь 594-ез яке 25 процентэз герӟаськемын социальной удысэн, нылпиос понна тыронъёс, пенсиосты выльысь эскерон, коньдонэн юрттэт сётон но мукет. 376 гожтэт вуиз улон интыосты умоятыны куронэн. Азьвыл арен ӵошатыса, со 2,5 пала тросгес. Валамон, али квартираос дунтэк уг сётӥсько. Нош кулэяськисьёс трос гинэ. Жаляса верано луэ, ӵапак та ужпум туала вакытэ укыргес но секытэн быдэсъяське. Миым вуэм кык сюлэсь трос гожтэтъёсазы но вазиськонъёсазы адямиос куро уголовной но граждан ужъёсты выльысь эскерыны, уноез герӟаськемын правоез утёнъя ёзъёслэн уженызы. 1999-тӥ арын та выллем ужпумъёсъя 160 гожтэт вал ке, миым та лыдпус кык сюэз ортчиз. Пумен тросгес вазиськонъёс луо вузкаронэз, коммунальной но бытовой юрттэт сётонэз радъян ласянь. Тани гуртъёсты басьтоно ке, зэмзэ но татын бытовой юрттэт сётон аналтэмын, шуыны луоз. Тужгес секыт югдур кылдэмын юртъерын кутӥськись техникаез тупатъянэн. Соин ик адямиослы юрттэт куриськыса вазиськоно луэ властьлэн вылӥ ёзъёсаз. Вань вуэм гожтэтъёс пӧлысь 1.840-эз меӵак келямын Кун Кенешлэн Тӧроезлэн секретариатаз, озьыен, гожтэтъёсъя но адямиосты кутонъя секцие. Со пӧлысь 888-эз гожтэт ыстэмын министерствоосы но ведомствоосы, интыосын аскивалтонъя ёзъёсы. - Озьыен, малпан кылдэ, уноез адямиос Кун Кенеше вазиськытэк но быгатысалзы, соослэн гожтэтъёссы улӥ кивалтон ёзъёсы ик берыктӥсько бере. - Озьы. Тани вуэм гожтэтъёсын пусъем ужпумъёс пӧлысь ог куиньмос люкетэзъя ужрадъёс кутыны луысал интыосын. - Нош маин озьы луэ со? - Интыосын кивалтӥсьёслы оскон ӧжытгес яке адямиос кытчы меӵак вазиськыны уг тодо но Кун Кенешез быръё? - Соиз но, таиз но вань, дыр. Но чылкак тазьы ваче пумит люкыны уг луы. Интыосын уг ужало шуыны уг луы. Шуом, куддыръя куд-ог вазиськонъёс пумысен интыосы жингыртӥськод но тодмо луэ, созэ яке мукетсэ ужпумез сэрттон-пертчонын номыр шугез ӧвӧл шуыса. Вань, дыр, татын интыын аскивалтонъя ёзъёслэн но янгышсы. Адямиос уг тодо бере кытчы вазиськыны, озьыен, калык пӧлын валэктон уж тыро-пыдо радъямтэ. - Вячеслав Александрович, миым, азьвылаз аре сярысь, Кун Кенеше кык пол пала тросгес вазиськонъёс но гожтэтъёс вуэмын. Тӥ сямен, маин герӟаськемен со? - Мон шуысал, со герӟаськемын Республикамылы президент быръёнэн. Данакез вазиськисьёс, бырйисьёс оскизы, луоз, быръёнъёслы дасяськон вакытэ троссэ ужпумъёссэс сэрттыны-пертчыны быгатозы шуыса. - Адямиослэсь ӵемысь кылоно луылэ ӝожтӥськонъёссэс. Отчы, татчы, пе, вазиськиськод, пайдаез ӧвӧл - тоже тӥ доры вуэ гожтэт. Азьланяз кыӵе солэн сюресэз? - Котькуд гожтэтэз ми лыдӟиськом, пыр-поч эскериськом, нимысьтыз пусйиськом. Собере чакласьком, пичи ужрад кутыны кулэ пусъем ужпумъя. Юанъёс кыӵе ке министерстволы яке ведомстволэн уженызы герӟаськемын ке, гожтэтэз соослы келяськом. Сыӵе учыре одно ик ужпумез быдэсъямез эскерыса возиськом. Кутэм ужрадъёс сярысь ивортӥськом ми доры вазиськисьёслы. - Озьыен, одӥгез но вазиськон уз ышы-быры... - Озьы. Но ужпумъёс, адямиослэн куронъёссы туж пӧртэмесь угось. Одӥгзэ нунал куспын быдэстыны луоно, нош мукетызлы ар но, трос но кулэ луэ. Таӵе учыръёсы адямиослэсь вазиськонъёссэс нимысьтыз чакласа возиськом. Миым, кылсярысь, нимысьтыз чаклан вылысь пусъемын вал котькуд ньылетӥез вазиськон. - Нош ялан ужась комиссиосты басьтоно ке, кудӥзлы тросгес вазиськонъёс вуо? - Трос гожтэтъёс вуыло законностья, адямиослэн правооссыя, социальной политикая комиссиосы. Соиз валамон, ӵапак та комиссиослэн ужзы тужгес но юн герӟаськемын улон-вылонын ӵемгес пумиськылӥсь ужпумъёсын. Собере пусйытэк уг луы тани мае но. Гожтэтъёсын вазиськисьёс сяна, трос гинэ луо Кун Кенешлэн, ялан ужась комиссиослэн кивалтӥсьёсынызы меӵак пумиськыны мылкыд карисьёс. Миым, кылсярысь, Кун Кенешлэн Тӧроеныз, солэн воштӥсьёсыныз но комиссиослэн тӧроосынызы кутэмын вал 1270-лэсь трос адями. - Жаляса верано луэ, уноез бырйисьёс асьсэ округъёсъя депутатъёссэс но уг тодо. Соин но ӵемысь гинэ тӥледлы вазиськыло. Трос-а сыӵе учыръёс? - Трос гинэ. Та ласянь мон верасал: азьвылгес ик ми кенешим депутатъёсын, лэсьтӥм бырйисьёсын пумиськылонъя график, печатламы сое газетъёсын. Жингыртӥсьёс яке гожтэтэн вазиськисьёс луо ке, ми соослы ваньзэ ивортӥськом, юрттӥськом депутатъёсын герӟаськыны. - Нош кытысь тросгес гожтэтъёс вуо? - Ваньмыз пӧлысь 194-ез яке 53 процентэз гожтэтъёс вуэмын Ижевскысь. 28 процент палаез вазиськонъёс вуо гуртъёсысь. Азьвылэныз арен ӵошатыса, миым кык пол трос гожтэтъёс вуизы Игра ёросысь, куинь пол трос - Камбарка ёросысь, нош Кизнер ёросысь вазиськисьёслэн лыдзы сизьым пол йылӥз. Озьыен, вераны луэ, та ёросъёсын данак ужпумъёсты интыысь аскивалтон ёзъёс гинэ быдэстыны уг быгато шуыса. Вераськиз Ф. Никитин. Вуко нош изэ но изэ Алнаш ёросын нянь пыжыны ярась ю тысез изыны вуко нырысь ик пуктэмын вал "Прогресс" эштосын. Туймыйылъёслэсь адӟем карыны ӧдъязы мукет хозяйствоос но. Усто пызь потто ни Ильич нимо, "Большевик", "Молодая гвардия", "Решительный", Суворов нимо колхозъёсын. Нош Писэйгуртэ вуко лэсьтӥзы ужбергатӥсьёс. Вылӥ ӟечлыкен пызь изо та гуртын но "Решительный" эштосын гинэ. Соин ик татын черодъёс кылдо. Выль вуко пуктыны чакла "Нива" эштос но. Л. Ушаков. Туннэ шудэ Галина Владыкина Галина Владыкина. Удмурт Республикаысь калык артистка. Театрлэн сцена вылаз шудӥз ни 100-лэсь уно рольёсты. Кылем арын Галина Михайловналы тырмиз 50 арес. Солы сӥземын газетмылэн 4-тӥ но 5-тӥ бамъёсыз. 1973-тӥ арын Москваысь Б.Щукин нимо вылӥ театральной училищеез йылпумъяса, Удмурт театре выль кужым вуиз. Кызьы бен пумитаз егит артистъёсты республикамы? Тани ма гожтэ Борис Саушкин "Удмурт театр. Ортчем вамышъёс" книгаяз: "Вылӥын верамын вал ини, гужем пумын Удмурт театре нош ик выль кужым - егит артистъёс - вуиз шуыса. Вить ар талэсь азьло, соосты Москвае дышетскыны лэзьыкузы, абитуриентъёслы зарни гурезьёс сӥзизы, шуыны луоз. Дышетскондэс быдтыса бертэм берады ик, пе, котькудды выль патер басьтоды, ужан инты но дась луоз. Нокыӵе шуг- секытъёсын пумиськоно уд луэ. Дышетскыкуды республикамы пичиен-пичиен коньдонэн но юрттоз. Культурая министерство но театр тӥледын, пе, ялан кусып возёз... Лӧптэм мылкыдын кошкизы егит пиос но нылъёс Родинамылэн шоркараз дышетскыны - одӥгаз сӥё- дано вылӥ дышетскон заведение. Дыр ӝог ортчиз, бертон дырзы но вуиз. Сьӧразы куинь спектакль ваизы. "Бедность не порок" сяна, А.Афиногеновлэсь "Машеньказэ" но Р.Шериданлэсь "Дуэньязэ". Кызьы бен пумитазы артистъёсыз Ижевскын, мар дасязы Культурая министерстволэн но театрлэн кивалтӥсьёсыз сётэм кылзыя? Шонерак вераса, номыр ӧз. Ужан интызы музыкальной труппаен валче одӥг юртын ик. Сотэк но люкыт театре 15 мурт ватсаськиз на. Тужгес но юн шугъяськизы егит артистъёс патеръёс дасямтэысьтызы. Нош ик общежитие выллем номеръёсын - гостиницаын - костаськыны ӵекто. "Вить ар ӵоже чельыеныды но выретӥллямтэды!" - йыркурзэс кивалтӥсьёслэн синмазы ик верало егит специалистъёс. Ужпум тазьы ӧй вал, конечно. Патеръёс курыса, министерство но, театр но трос пол вазиськылӥзы горисполкоме, Министръёслэн Советазы. Нош отын валась ӧз луы тэльмыремзэс. Егит артистъёслэн дэмен йыркуръяськемзы чемоданъёссы вылын пукон забастовкалы пӧрмиз. Кӧня ке дыр соос чутрак пумит вал гостиницае интыяськыны. Сьӧразы ваем котыръёсынызы нунал лумбыт, уже пыриськытэк, театрлэн фойеяз пукизы. Но югдурез воштэмзы ӧз луы. Кытчы пырод, мар карод? Берен Москвае уд шонты ук. Зэм, огез, тужгес но шӧртчиез, Павел Мурашов (со ачиз Удмуртиысь ӧй вал), кошкиз ик Москвае. Озьы со группаысьтызы кӧня ке муртлы мукет городъёсысь театръёсы выжыны кутскон сётӥз. Пӧлазы дышетскем нылъёс Р.Ильина но Т.Клабукова чик но ӧз бертэ, дышетсконзэс быдтон азязы иностранецъёслы бызизы. Кӧня ке ужамзы бере, ньылез актёръёс Удмуртиысь кошкизы. Труппае дасэз гинэ кылиз". - Галина Михайловна, туэ бертэмды дырысен тырме ни 28 ар. Кыӵегес бен улэ та вакытэ театрды, кызьы ужало щукинецъёс? - Щукин нимо училищеез быдтэмъёс уноез театрамы ужало. Куд-огез кошкиз. Кин но со уго удмурт кылэз умой уг тоды вал. Кыкез кошкиз Грузие, Тбилисие, кыкез бызьыса кылизы. Основной составез бертӥз татчы. Али ке но ужаськомы театрын, валтӥсь артистъёс луиськом. А ми бере лыктэмъёслы, уфимецъёслы, маке но ӧз кельшы, уноез кошкизы. Пиосгес кошкизы. Оло асьсэды та театрлэсь вылӥынгес шуыса лыдъязы, оло ми ӧм кельше. Уг тодӥськы. Соос быдэс "Катанчи" кылдытӥзы. Нош малпасько, соос Удмурт театрлы бадӟымгес пайда сётысалзы. Озьы ик асьсэлы но, республикамылы но. Озьы ваменъяськыса соос туж ик вылӥе ӧз ӝутӥське кадь. Филармониын сыӵе группаос трос, кужмоосызгес но вань. Тани собере ГИТИС-эз быдтэмъёс бертӥзы. Отысь но куать адями гинэ кылиз на. Зэм, кык гинэ кылизы на. Тожо пазяськизы. Ну, соос трос но ӧй вал. Удмуртъёс но ӟучъёс ӵош дышетскиллям. Ӵош быдтыса, уноез ӟуч театре мынӥзы вал. Оло, со вылтӥяськем кадь потоз, но щукинецъёс кадь кужмоосыз ӧвӧл. Соослэн ужамзы сярысь вераськонзы уногес. Щукинецъёс кадь ужаны нокин но уг быгаты. Нырысь ик театрын зол-зол ужаны кулэ. Талант - со талант. Но со вӧзы ужаны быгатэм кулэ на, кулэ на ужез яратыны. Сотэк тон номыр но уд басьты. Тани щепкинецъёс пӧлын вань кадь ужаны быгатӥсьёсыз, ужаны яратӥсьёсыз. Ну и талантливойёсыз но вань. Таосынызы ужаны умой режиссёр кулэ вал, умой кивалтӥсь кулэ. Соослэсь тросэзлэсь устоесь артистъёс пӧрмысалзы, дыр. - Асьмелэн ведь удмурт режиссёръёс ласянь югдур туж ляб. Нош ваньёсыз пӧлысь, Галина Михайловна, кинэ пусйысалды кадь? - Кинэ бен? Али бен театрын Ушаков сяна нокин но ӧвӧл. Леонид Григорьевич Романов. Но со выжыкылъёсты гинэ пуктэ. Зэм, Ушаков сяна нокин ӧвӧл. - Нош ма верасалды Александр Вершинин пумысен? - Вершининэз мон пусйысал. Вершинин со умой режиссёр, кужмо режиссёр. Солэн фантазиез зол ужа. Со быгатэ кызьы ке но артистэз ас палаз кыскыны. Вот, кылсярысь, мон ужаны ке кутскисько, о-о, пьесаысь номырзэ уг адӟиськы, уг валаськы. Только оскиськисько режиссёрлы. Вершининлы мон быдэсак оскисько. Кӧня ке репетициос бере ини, со быгатэ возьматыны мар пӧрмоз пьесалэсь, мар верамез потэ солэн вуоно спектакльын. Роль но син азе пуксе. Али Вершинин кадь режиссёр нокин ӧвӧл кадь потэ мыным. Оло, куддыръя "и не в ту степь" но кыске, кулэтэм пала но кыске кадь но. Но сое тупатыны луэ, ачидъя берыктыны луэ. - Нош драматургия ласянь кыӵе малпанъёсты? Гожъясьёс но, пьесаос но вань кадь ини... - Зэм, драматургия асьмелэн туж ляб на. Тани алигес туж трос пьесаосты лыдӟимы. Галина Романовалэсь но, Алексей Шкляевлэсь но... Туж уно пьесаосын тодматским. Но тани вераськом соослы: "Тазэ ӧжытак тазьыгес, созэ озьыгес кароно вал". Но основной линизэс уг нуо. Кытчы ке но берыкто, основной линиез ыше. Палэнэ кожо. Соослэн олокӧня событиоссы но малы ке одӥгысьтыз событиысь ӵемысь мукетаз выжыло. Шуом, веросын сое возьматыны луэ. Нош сцена вылын сое кызьы возьматод? Многособытийность луыса кошке. Основной линиысь кожо но берытскемзы уг луы ни. Асьсэос но йыромо, артистэз но йыромыто. Нош куронэн вазиськиськод ке, тупатъямзы уг луы ни яке тупатъямзы-а уг поты. Соос малпало, лэся, ужзы быдэстэмын ни шуыса, малпало: умой пьеса пӧрмемын. Собере кыкетӥзэ, куинетӥзэ уг ни ваё. Ваё ке но, шер ваё. А сотэк кызьы ужлод? Тани али ӟуч пьесаосты но ум шедьтӥське ни. Азьло зӧк журналъёс пото вал - "Театр", "Соверменная драматургия". Отын луыло вал пуктыны ярамонэсь выль пьесаос. Али со журналъёс, оло пото на, оло уг ни. Соос ми доры уг ни вуо. Отын волятэм, пуктыны луоно пьесаос луозы вал. Нош асьмелэн авторъёсмылэн ужъёссэс йылозяз-пумозяз вуттэмзы уг луы. Уг но поты, лэся. - Нош драматургъёс пӧлысь али кинэ тӥ лыдъяськоды самой кужмоеныз? - Мон "кисьмам" драматурген лыдъясько Толя Григорьевез. Но таид туж шер вуттэ ук пьесазэ, туж шер вуттэ. Кӧня возьмаськом ини сое. Мон ведь солы заказ но сётӥ вал ини, бенефисэлы мед гожтоз шуыса. Кылзэ но сётӥз, гужем но лыдӟо шуиз. Сӥзьыллы тынад бенефисад вутто шуыса кыл но сётӥз. Таки ӧз вутты... - Ведь со гожтэ ке, сач-сач гожтэ ини. - Бен, гожтэ ке гожтэ ини. Ми солэсь пьесаоссэ ум тупатъяське. - Тӥ солэн кыӵе пьесаосаз шудӥды? - "Атас Гириын", "Эмезь кисьмакуын", "Лусвуын" ӧй шуды, собере "Парсьпи но эмеспи". - "Атас Гириын" тӥляд Дарья милиционердылэн ролез туж зол пӧрмиз вал... - Ой, нош кӧня ми соин нырысь курадӟим вал!. Нырысь ӧз пӧрмылы. Нокызьы шедьтыны ум быгатӥське вал характеръёсты. Берло нуналъёсаз гинэ, спектакль дырозь, сцена вылэ потытозь кык-куинь нунал кылем бере ӧрзэ шедьтӥм кадь. Ушаковмы, режиссёрмы, милемыз тышкаське, уд ужаське, шуэ. Кыӵе ке но характер шедьтыны кулэ, пе. Озьы одӥген но кыкен пӧрмиз кадь. Пуктӥм ведь. Али но шудэм потэ на. Кин тодэ, оло, выльысь выльдом но. Учкисьёс будо ук. Мӧйыос уг ветло ни театре. Выль учкисьёс будо. Выжыкылъёсты тани ум куштӥське. Кӧня ке дыр ортчыса, ми соосты выльдӥськом, нош ик шудӥськом. - Табере, Галина Михайловна, театрысь потоме но мукет сюрес вылэ кожоме. Тунсыкъяськиськоды-а политикаен? - Уггес, политикалэсь палэнскыныгес тыршисько, малы ке шуоно, кутскиськод ке пушказ пырыны, сюлэм вӧсь луэ, йыр пороме. Нервной луоно. Соин ик палэнскиськогес. Нош быръёнъёс дыръя ӧжытак пыриськыны турттӥсько, аслэсьтым мылкыдме вераны тыршисько. - Нош Выль арез кинэн пумитады? - Выль арез пумитай эшъёсыным. Милям коркаямы артистъёс уло ук. Катя Яковлева, Надя Маркова, мон, Слава Байков, Валя Загуляева. Вот озьы. Одӥг коркан нокытчы потатэк юмшаны луэ. - Табере тани асьмеос выль дауре, выль вакытэ выжим. Вань-а солы осконды? Оскиськоды-а воштӥськонъёслы? - Кызьы осконтэк улод меда? Оскон одно ик кыльыны кулэ. Мон оскисько. Оскисько, егитъёс милесьтым умойгес, узыргес улозы, тросгес уксё басьтыса ужалозы шуыса. Мон ас поннам но оскыны тыршисько. Мынам но азьпалан ужанэ трос на ай. Ой, кема ужано на. Пенсиозь гинэ но дыр трос на. Оскисько, азьпалан умоесь рольёсы луозы шуыса, оскисько, театрлы выль юрт но ӝутозы шуыса, оскисько, отчы уно учкись ветлоз шуыса. - Нош мар али верасько ай театрлы выль юрт пумысен? - Нокин но номыр уг вераськы ни. Воксё чал-чал луиз. Тани кылӥмы, выль министр но пуктӥллям шуыса. Ми али шутэтскиськом, соин ик номыре но ӧм тодылэ, нокинэ но ӧм адӟылэ на. Уже потэммы бере, оло, тодматозы ни выль министрен. Оло, таиз министр юрттоз выль театр лэсьтыны? Ми то отчы выжыса ум вуэ ни, дыр. Но егитъёслы отчы потыны шуд мед усёз ини. - Галина Михайловна, тӥледлы но выль театрын ужаны шуд ед усёз на. Мар бен, ужады выль азинсконъёс тӥледлы, мед луозы устоесь, тунсыкоесь рольёсты! Выль дауре инмар мед юрттоз тӥледлы! - Тау. Туэ февральлэн шорвадесаз драмая Удмурт кун театр пусъёз 70 ар тырмонзэ. Вераськонамы озьы ик пыриське Россия Федерациысь дано артист Геннадий Соловьёв. Таизлы, театрысь одӥгезлы мӧйы актёрлы, 16-тӥ январе "шуккиз" ини 69 арес. Соин ик нырысетӥ юанмы Геннадий Соловьёвлы. - Геннадий Капитонович, кыӵеен син азяды пуктӥськоды на Галина Владыкинаез? - Галя Владыкина вуиз Удмурт театре Москваысь Щукин нимо училищеез быдтэм бераз. Мон сое нырысьсэ адӟи Гогольлэн "Женитьба" пьесаезъя спектакльын. Отын со шудӥз пересь кышномуртлэсь рользэ. Тӥни соку мон отысен ик чаклай: талэсь актриса пӧрмоз! Собере та спектакльын шудӥсь пиос армие кошкизы. Поторочин интые монэ пыртӥзы. Ми та спектаклен ветлӥм Свердловск улосысь Красноуфимск городэ. Татын но ӵошен кӧня ке пол шудӥм. Отын со мыным сцена вылын нырысетӥ партнёршае вал. Отысен мон сое эшшо но мургес валай, шӧдӥ: та бадӟым актриса луоз. Озьы ик луиз. Кызь сизьым ар куспын со тро-о-ос спектакльёсын мынам кышноосы но вал, дусымъёсы но. Ми соин тро-трос рольёс шудӥм. Мон сое учкемезъя ик, выросэзъя ик валасько, мар со вераны турттэ, маин со аслаз образаз пырыса улэ. Быгатэ возьматыны адямилэсь образзэ. Котькыӵе ролез. Басьтом тани "Атас Гириез" ик. Учкисьёс сое ӟеч тодо. Кыӵе со отын ветлэ! Ветлэмез но, куараез но отын солэн воштэмын кадь. Табере шудӥськом "Яратэ - уг яраты" спектакль. Та башкир драматурглэн удмурт кылэ берыктэм пьесаез. Отын со мынэсьтым кышноме шудэ. Кыкнамы но сизьымдонлэсь ортчем пересьёс. Но кыӵе ми отын шудӥм! Кыкнамы но одӥг адями кадь вал. Кыӵе яратӥм вал ми со рольёсмес. Милям отын сыӵе кужмо дуэт вал. Мон малпасько, учкись сое дунъяз, дунъяз спектаклез но. Табере "Дор" спектакль. Алексей Шкляевлэн, удмурт драматурглэн пеьсаез. Отын ми соин нош ик ӵош "пумиським". Нош ик огмес-огмы валаса шудӥм та спектаклез. Али ке но жаль, малы сое милям администраторъёсмы, театрысь кивалтӥсьёсмы палэнтӥзы. Спектакль сыӵе умой мынэ вал, учкись ӟеч пумита, вала. Кык аръёс ум шудӥське ни сое. Галя Владыкинаен ми отын нош ик кышноен картъёс. Милям сое гуртъёсы поттэммы ӧз луы, малы ке шуоно, декорациез отын туж бадӟым, гуртэ поттыны уг луы. Но малпаськысалыд ке, бадӟымесь клубъёсы поттыны луысал. Луысал. Собере Галя Владыкинаен ми шудӥм "Бызьыны вуэм песяйёс" пьесаын. Та спектакльмы али но мынэ. Татын со мынам нош ик ӟеч партнёршае. Отын ми огмес огмы уката но мургес валамы кадь. Ӝутскем мылкыдын кылдытӥмы образъёсты. Отын мынам ньыль кышное, ньыль дусымъёсы шуод-а, мара. Со комедиын пересь пенсионеръёсты мон гуртам нуыны малпасько. А соос огназы кылем пересьёслы юртын уло. Одӥг кылын вераса, Галя Владыкина бадӟым, ӟеч, усто актриса. - Геннадий Капитонович, артистъёс ведь азьвыл радио но телеспектакльёсын трос шудылӥзы, удмурт кылэ киноосты берыктон бордын ужазы. Берло дыре спектакльёсты шер адӟод-кылод ни. - Зэм, табере сыӵе ужъёс ялан шергес но шергес потало. Оло ГТРК-лэн коньдонэз ӧвӧл, оло выль кивалтӥсьёслы со ужъёс чик но кулэ ӧвӧл. Жаляса тодам ваисько мон со аръёсты. Адями театрын бадӟым артист ке, ма веранэз: сое телевидение но радиое ӧтё. Владыкиналэн кылыз туж умой пуктэмын, йырыз ужа, сюлмыз ужа, характер кылдытыны быгатэ. Артистлы мукетыз кулэ ӧвӧл. Мугорын чебер, куараез чебер. Кырӟаны быгатэ. Со ик луэ артистлэн узырлыкез. - Геннадий Капитонович, сое учкись ӟеч артистка шуыса умой тодэ. Нош огшоры улонын со кыӵе адями? - О-о! Огшоры улонын компанейской, кырӟась. Котькыӵе кырӟанэз тодэ. Тани гастрольёстӥ ветлыку, о-о, курисько солэсь: "Галя, яратоно кырӟанме кырӟа ай". Кыӵезэ шуыса юа. Мон шуисько: "Раиса Нефёдоваен дуэттэс". Пушкы тыре, соосты кылзыса. Табере улонын кыӵе шуиськод бере, о-о, солэн гуртаз спектакльёсын кык пол вуылэме вань. Со Яр ёросысь Тум нимо гуртысь. Кытысь потэмын солэн нимыз, мон созэ ӧй юалляськы, уг тодӥськы. Но вераме потэ, анаез солэн кыӵе мусо, кыӵе мылкыдо. Доразы пыракумы сюдӥзы, утялтӥзы, сектазы. Сыӵе ческытэсь сиёнъёс пӧразы, али ке но кыл йылам. Собере мылкыдэз ӝутыны, калыкез пумитаны быгато. Ӵыжы-выжыосыз но, гурт калыксы ӟеч мылкыдоесь. Алнаш калык кадь потӥз мыным. Верасько но чылкыт. А то ведь уй палъёс мукетгес верасько, но соослэн кылзы лымшор районъёслы тупа. Озьы потӥз мыным. Улонын со туж умой адями, огшоры. Вылтӥяськись ӧвӧл. Наш-наш бадӟым удмурт актриса, удмурт нылкышно, удмурт нылаш. - Тани Галина Михайловнаен алигес пумиськылыкумы сюлэмшугъяськемзэ вераз удмурт драматургия но режиссёръёс пумысен. Та пумысен тӥ кызьы малпаськоды? - Удмурт драматургия но режиссура пумысен мон кемалась ини сюлэмы куректыса- бӧрдыса верасько: асьмелэн удмурт драматургия туж ляб, гожъясьёс ӧжыт. Соос тросгес луысалзы ке, ӟучъёс сямен ог-огенызы ӵошатскыса сямен ужасалзы ке, соку, оло, быгатонлыксы будысал. Пьеса гожтон - со туж шуг маке. - Нош янгышъёссы мар бордын кадь? - Янгышсы ӧвӧл, мон сое янгыш уг шуиськы. Со асьме калыклэн выжыез сыӵегес-а, мар- а. Театр кылдэм дырысен одӥг Гаврилов вал. Садовников кӧня ке пьеса гожтӥз. Собере кин вал? Петров. Одӥг-а, мар-а "Батрак" гожтӥз. Всё! 30-тӥ, 40-тӥ, 50-тӥ, 60-тӥ аръёсы кинъёс вал? Ӧй вал ук. Со асьмелэн висёнмы, Удмурт театрлы со бадӟым, секыт куректон, шуод-а, мар-а. Соин ик ми ужано луиськом ӟуч пьесаосын, соосты удмурт кылэ берыктыса. Тыршиськом соосты удмурт карыны, удмурт шӧм пыртыны. Но кудӥз пӧрме, кудӥз уг. Лябгес гожто асьмелэн малы ке но. Мур философиен, наш-наш, горд сюез, сьӧд сюез уг потто, муре уг пыро асьмелэн гожъясьёсмы. Вылтӥзгес кошко. А вылтӥзгес кошке ке, ми, артистъёс, пушказ пырыны ум ни быгатӥське. Мар борды ӝабыртӥськыны уг луы. - Режиссёр бордысь тросэз потэ ук. - Конечно. Режиссёр бордысь но. Со но милям висёнмы. Удмурт режиссёръёсмы лябесьгес. Мон нимтулъёссэс уг вера ни но. Тани весь верало, Михаил Покчи-Петров зол режиссёр вылэм шуыса. Малы? Малы ке шуоно, со зэмзэ но дышетскиз зол режиссёр дорын, Юрий Завадский дорын. Со Моссовет нимо театрын валтӥсь режиссёр луыса ужаз, ГИТИС-ын дышетӥз. Петров отын дышетскиз вить ар.А со дыр куспын йыре ма но со кыле, дыр, сюлме но. Со тӥни ӟеч ужам. Ми сое ӧм ни адӟе. Со улонысь вазь кошкиз уга. Вить-а- куать-а спектакль со пуктэм Удмурт театрын. Соос туж золэсь вылӥллям. Мӧйы артистъёс верало со сярысь. Мон сое адӟылӥ. Со дышетскыкумы огпол гинэ Ленинградэ вуылӥз. Монэ адӟиз но шуиз: "О! Мынам Гамлетэ вань, Отеллое вань!" Озьы пельпумам чабкылыса вераз. Быдтӥды ке, бертӥды ке, одно ик пуктом, шуэ. Ӧз кылды. Малы режиссёре ӧжыт дышетско? Ведь сое шедьтыны кулэ, режиссёр театрез пичи дырысеныз мед яратоз. Сыӵе адямиез гинэ ыстоно дышетскыны. Но удмуртъёс пӧлысь сыӵе адямиез шедьтыны туж шуг. Соос, оло, дас-кызь ар куспын одӥг пол вордӥсько. Собере гуртоослэн но та удысэ кыстӥськемзы уггес поты. Зэм, дышетскыны мылкыд карисьёс вань. Мыно, кык ар дышетско. Кык ар куспын режиссёр луыны шуг. Малы ке но артистэз ньыль-вить ар дышето. Нош режиссёр курсъёсы ветлэ. Но соослэн пьесаез пуктыны фантазизы уггес тырмы. Режиссёр артистлэсь вылӥынгес луыны кулэ, артистэз дышетыны кулэ. Но тодон-валанзы уггес тырмы. Адями режиссёр луыса вордӥськыны кулэ. Со ӟеч режиссёръёс бордын дышетскыны кулэ. Со артистэз азатыны (бурдъятыны) мед быгатоз! - Геннадий Капитонович, асьмеос та бадӟым ужпумъёс сярысь вераськонмыя, Галина Владыкинамы сярысь вунэтӥм кадь. Кызьы со кутске ролез бордын ужаны? - Кызьы быгатэ ини. Котькуд артистлэн аслаз секретэз. Кызьы со ужа, соизэ мон уг вера тыныд. Мон ачим но уг тодӥськы, кызьы ужасько. - Алигес Галина Михайловна юбилейзэ пусйиз... - О-о, солэн али самой кын корт куртчон дырыз! Солэн улоназ трос ӟеч рольёс мед шедёзы! Мед шумпоттоз удмурт калыкез, удмурт учкисьёсмес. Ассэ но, театрез но мед ӝутоз. Солы трос ужано на ай. Н. БАЙТЕРЯКОВ. Тазалык Кулэмлэсь утёз... конфет Мыным туж кельше "висемлы быдэ уд кулы" веран. Дырын-дырын ойгетыса кылльыкум со юрттэ но кадь. Наукалы кемалась тодмо ни, адями аслыз ачиз оскыса чальгес бурме шуыса). Но вань улонлы зэмзэ но кышкыт луись висёнъёс. Соос пӧлы пыро эпилепсия (кулыса усьылон, аллергия, бадӟым вирзӥбет, астма, сюлэм висёнъёс, сахар диабет. Но малы ке ӵапак таӵе висисьёс ӧжытгес ӝожтӥсько, висёнзэс ватыны тыршо но... куло. Татьяна Григорьевна нырысетӥ арзэ ужа вал ай. Со нуналэ стационарын дежурить кариз. "Скорой" йырсазьзэ ыштэм кышномуртэз ваиз. Ульчаын, пе, кыстаське вал, юэмын, шӧдске. Татьяна Григорьевна висисез учкиз но юэмзэ ӧз шӧды. Ма, тусызъя но кышномурт сыӵелы уг тупа. Олокызьы но сазьтӥськытыны выриз, уг пӧрмы. Оло нош талэн диабет, - йыраз шуккиз солэн. - Глюкоза! - кеськиз со медсестраезлы. Вирсэраз шприцысь вань эмъюмез лэзьыса но ӧз вуттэ, кышномурт синъёссэ усьтӥз. Мукетыз учыр урод йылпумъяське. "Скороез" ӧтизы милицилэн отделенияз. Егит кудӟем пиосмуртлэн, пе, тӧдьы горячка. Врачъёс соку ик валатскизы, маке но мукет шуыса. (Тӧдьы горячка юэм дыръя уг луы, со кутске кема юэм бере вис карыку). Озьы ик вань, воргорон диабетэн курадӟись вылэм, милициын ужасьёс валаллямтэ, солэн кома шуыса. Жаль, но машина таяз учыре ӝегаз. Виктор дас вить ар сахар диабетэн курадӟе ни вылэм, но ужан интыяз возьдаськеменыз-а, интыез понна кышкаменыз-а, висёнзэ ватыны тыршылӥз. Со нуналэ уж дуразы пичильтык шулдыръяськон ортчытӥллям. Сиськемезлэсь азьвыл со аслыз инсулин пуктэм (кисыысьтыз берло шприцсэ шедьтӥзы), пичияк ӟузем. Транспортэн дораз бертыкуз шугектэм, голлюцинациос кутскиллям. Котырысьтыз вина зын лыктэ вал бере, сое милицие келязы. Туж ӝож соиз - адямилэсь улонзэ утьыны луэ вал огшоры сахар юдэсэн. Но Викторлэн висёнэз сярысь ӵош ужась эшъёсыз ӧз тодылэ, карточказэ со сьӧраз ӧз нуллы. Врачлэн-эндокринологлэн Александр Коровинлэн лыдъямезъя, кулон учыре ӵемгес вуттэ гипогликемия (мултэс инсулин луыку но вирын сахар тырмымтэ дыръя). Со кылдэ, адями аслыз мултэс инсулин пуктэ яке инсулин пуктэмез бере ӧжыт сиське ке. Гипогликемия бере висись комае усе, сое отысь поттыны шуггес ни. Но луонтэм ӧвӧл. Дыраз шӧдӥсь гинэ мед луоз. Кызьы юрттоно гипогликемиен курадӟисьлы, вӧзын врач ке ӧвӧл? - Адями сазь ке, юалэ, уг висьы-а со диабетэн. - Эскере кисыоссэ, сумказэ - диабетэн висисьёс сьӧразы сахар юдэс но диагноззы сярысь записка нулло. - Понэ кыл улаз сахар, конфет яке маке мукет голькыт маке. Секталэ голькыт сокен, кока-колаен. - Ӧте "03" машинаез. Но нырысь ик вазиськем потэ асьсэлы висисьёслы: улонды дуно ке, эн возьдаське висёнды сярысь эшъёстылы ке но вераны. Висён - со шек но, урод сям но ӧвӧл. Тӥ асьтэос но али тодады ваиды, луоз, кызьы кулыса усем бускельдэс вытрезвителе нуллӥзы, кызьы кытын ке кунояськемез бере сюлэмыз кутэм пенсионерез кудӟемын шуыса кондуктор трамвайысь улляны выриз... "Скоройлэн" ведь ӝегаллян сямыз вань, нош жалясь адямиос (ну одӥг ке но!) вӧзэ котьку сюро. З. Рябинина. Выль нюлэсъёс куашетозы Миым кылдытэмын "Алнашысь гурт лесхоз" кун учреждение. Табере нюлэс вузанэз со быдэсак ас вылаз басьтӥз. Ёросын нюлэс ужъёс быдэсъясько 5218 гектар вылын. Трос лэсьтӥсько писпуосты мерттон ласянь но. Куиняз школаосын - Асангуртын, Писэйгуртын но Байтеряковоын - кылдытэмын пужым но кыз будэтонъя питомникъёс. Нош Туймыйыл школаын дышетскисьёс нырысетӥ писпуоссэс мерттӥзы ни. Н. Сергеев. Выль дауре кытчы меда вуомы? Ортчем 2000-тӥ арлэн но ХХ даурлэн пумазы удмурт калык понна вунонтэм луиз кык учыр: Вань удмуртъёслэн ВИИИ ӧтчамзы но Дуннеысь финн-угор калыкъёслэн ИИИ конгрессы. Таяз удмуртъёслэн азьветлӥсьёссы пӧлысь кызь мурт ветлӥз. Валаськом: Финляндиын ортчем бадӟым ӧтчам котькуд делегатлы трос малпаськонъёс ваиз но калыкен вераськыны-кенешыны бадӟым мылкыд сётӥз. Со малпанъёссы-мылкыдъёссы сярысь 28-тӥ декабре лыдӟыны луиз ини делегатлэн Е.М.Виноградовалэн "Удмурт дунне" газетэ гожъямысьтыз. Озьы ик радио пыр кылзӥмы В.Д.Михайловлэсь, Р.И.Яшиналэсь но В.Я.Митрофановлэсь кенешемзэс. Та ивортонъёс - делегатъёслэн калыкен кенешонзылэн кутсконэз гинэ ай. Азьланяз, ХХИ дауре выжыса но выль арез кутскыса, удмурт азьветлӥсьёслы туж трос ужано луоз на. Оскисько: сюлмысь кенешонъёс, пумиськонъёс "Удмурт кенеш" радъялоз ай. Кылзыны быгатомы ик, дыр, В.К.Тубыловлэсь, И.Н.Семёновлэсь, К.И.Куликовлэсь но мукет азьветлӥсьёслэсь калык азьын рос-прос сюлмысь вераськемзэс. Малпасько, удмуртъёс люкаськылыны быгатозы Удмурт кун филармоние, Драмая удмурт кун театре яке - мукет интыосы, "Удмурт кенеш" калыклы со сярысь дыраз ивортыны тыршиз ке. Зэм, куддыръя кивалтӥсьёсмылэн но иворъёсты вӧлмытӥсьёслэн сыӵе сюлмаськонзы уг тырмы. Ужрадъёссы сярысь верало одӥг-кык нуналлы гинэ азьло. Уг тодо на, лэся, мар со реклама (ялон), вукылэс луэм телевиденилэсь но адӟем каремзы уг поты. Та ласянь дышетскыны кулэ Ижысь ветеранъёслэсь. Арлыдоослэн кенешсылэн тӧроез Б.Г.Аминов, Россиысь ветеранъёслэн ӧтчамазы ветлыса, аслэсьтыз малпанъёссэ, кылэмзэ-адӟемзэ калыклы ӝегатскытэк, пыр-поч но туж валамон мадиз Ижысь мӧйыослэн клубазы. Озьы ик мед тыршысалзы "Удмурт кенешлэн" азьветлӥсьёсыз но. Табере вазиськеме потэ тодосчиосмылы, соосты выль арен но выль даурен сюлмысь ӟечкыласа. Тужгес но кылчиосмылы, удмурт кылмес чылкытатыны, узырмытыны кемалась гинэ тыршисьёслы. Озьы луиз: "Удмурт-ӟуч словарь" соослэн укыр сюлмо тыршемзылэсь азьлогес потӥз - 1983-тӥ арын. Кылемаз даурын выль кылбугор поттыны кужымзы но дырзы ӧз ни тырмы. ЪЪИ даур ӧз ӝегатскы ни - соослэн малпамзылэсь вазьгес вуиз, лэся. Кылемаз дауре Удмурт Элькунысь Кун Кенешлы кыл сярысь закон кутыны дыр ӧз тырмы. Таиз даур тодосчиосмылы тырмоз-а кемалась малпам но кутскем ужъёссэс быдэстыны? Вормозы-а могӟетъёсыз? Выль даур вуэмен валче, кылчиосмылы калыклэн бадӟым куронэз вань: вань удмуртъёслы валамон но ӝот-ӝот валэктэ ни вал, кыӵе выль кылъёсты улонэ пыртыны дэмласькоды но кыӵеосызлэсь куштӥськыны ӵектӥськоды? Али журналистъёслэн, писательёслэн гожъямысьтызы но, удмурт кылын лабыртӥсь чиновникъёслэн вераськемысьтызы но дырын-дырын кылӥськод на выль кылъёсты сураса-пожаса, юн малпаськытэк кутэмзэс. Кылсярысь, кыӵе учыръёсы верано таӵе кылъёсты: кун, элькун, шаер, улос, улосвыл, ёрос но государство, страна, республика, область, губерния, уезд, край, автономной республика, территория, район, сельсовет. Вазенгес губерния, уезд кылъёс архаизм лыдъяськылӥзы, нош табере туала монархистъёслы ярало та кылъёс: котькытын кузёос - губернаторъёс кылдӥзы. Россиын ичи лыдъем калыкъёсты вунэтыны туртто, оло? Ма выльзэ тодӥзы та пумысен Конгрессэ ветлэм делегатъёсмы? Кытчы мынӥськОмы асьмеос? Мон сямен, выль даурын тодосчиосмылэн, чылкыт удмурт кыл понна нюръяськисьёслэн, нырысетӥез быдэстоно ужпумзы - рос-прос кыллюкам поттон. Озьы ик выль (яке вунэм) кылъёслэсь пуштроссэс валэктӥсь кылбугор поттоно вылэм. Со юрттэтъёс мед вуозы котькуд школае, библиотекае, гуртэ пӧртэм тубатъёсын сылӥсь кивалтӥсьёс доры. Асьмелэн али политико-административной справочникмы но вужмемын ини, сурамын- пожамын, радъямтэ, шуыны луоз. Тодытэк уд улӥськелэ, макем сураса гожъяськомы гуртъёслэсь удмурт но ӟуч нимъёссэс. Та ужъёсты быдэстытэк, гажано тодосчиос, туннэ трос ужпумъёсъя вераськонды буш супыльтонлы пӧрме. Маланъёстэс малы ке уд шараяськелэ "Удмурт дунне" газет пыр но. Л.Фёдорова. "Удмурт кенеш" огазеяськонлэн Устинов ёросысь ёзаз быръем мурт. Шӧкыч Маскарчиос Кызьы скалме визьмай Ог ӵукна анае вазь ик сайкатӥз но шуэ: мон туннэ ёросэ мынӥсько, ку вуо - уг тодӥськы, пыдын бертоно луиз ке, ӝегало но. Скалэз тон кыскод ни. Нырысь ик быжзэ пыд бордаз думылы - шонаськеменыз кыскыны уз сёты. Ведраен ву поттыса, нонокъёссэ умой-умой миськы. Дыртытэк гинэ, лӥятыса, маялляса кыскыны кутскы. Пичи ӟус липет улын сылэ, пуксьыса ужа, жадёд. - Яралоз, - шуисько, - адӟеме вань, кызьы скалэз кысконо. Ӝытпал скалмы бертӥз. Поттӥ кык ведра, одӥгез - скал кыскыны, нош мукетыз - вуэн. Нырысь ик скаллэсь быжзэ думылӥ, собере, ӟус вайыса пукси но, нонокъёссэ миськи. Скал нош сылэ секыт ӝуштыса но ӝоместыса. Ог ӝыны ведра йӧл люкаськиз ини, шумпотӥсько, быгатӥсько шуыса. Со куспын жон! вазиз но ведрае олокытчы пезьдӥз, монэ копак йӧлын пылатыса. Ачим но ӟус вылысь тыбыр вылам гаӵолтӥськи. - Ах тон ӵыжаськиськод?! - - вожомыса пыд йылам султӥ. Кытысь-марысь ки улам боды сюриз. Скал кышкаменыз борс! карыса гидкуазетӥ ворттылэ, нош мон - скал сьӧры. Озьы бызьылонъям валаса но ӧй вутты: скалэ, азь пыдъёсыз вылэ лэзиськыса пырс гинэ мурӝолэ ышиз. Осто инмаре! Мар уж та! Кызьы бен отысь скалме поттом на? Мон но сьӧраз ури- бери пыри мурӝолэ. Ачим др-р куалекъясько. Скал нош мынэсьтым но зол кышкатскемын, мырдэм шока.Тани-тани ӝушез пилиськоз. Мурӝол ӧс дорысь ӧжыт гинэ палэнтӥськи но, скалэ, кызьы пыдесъяськыса пыриз, озьы ик тыпыр-тапыр потӥз, ӧжыт гинэ асме лёгаса ӧз кельты. Потӥ мон но. Бодые киям. Адӟисько: анае гидкуазь шорын сылэ. Бодыме ишкалтыса, липет йылтӥ бакчае сэрпалтэ вал но, соиз укно пияла борды мырӟиськиз. Жингыр- куангыр кылӥськиз азбар тыр. Тае адӟыса, анае душес кадь ик бордам кырмиськиз но корка валтӥз. Гур вылысь гын сапегез басьтыса, ну тыре ук, ну тыре ук, кытчы сюрем монэ. Олокызьы мозмытски но ӟус улэ пегӟи. Анае - мон сьӧры, мон - со дорысь. Кызьы скал мурӝолтӥ борс! карыса бызьылӥз, мон но, жоб куараен кесяськыса, ӟус ултӥ ньыль пыд йылам бызьылӥсько. Мырдэм дугдыны валаз анае, ачиз но скал кадь шокась луиз. Та учыр бере ноку но скалмес ӧй жугы ни: туж вӧсь луэ вылэм. Л. Александров. Можга город. Нимыз весяклы кылёз Таяз арня нуналэ, 21-тӥ январе, Владимир Ленинлэн (Ульяновлэн) кулэмез дырысен тырме 77 ар. Берло дыре солэсь нимзэ туж ик ӵем уг поттыло ке но, мӧйы коммунистъёс, куд-ог егит адямиос но Владимир Ильичез ӟечен тодазы вайыло. Солэсь нимзэ али ке но нулло шаерысьтымы городъёсысь но ёрос центръёсысь ульчаос, куд-ог колхозъёс но совхозъёс, интыязы ик сыло памятникъёс. Возиське на солэн Мавзолеез но. Озьыен, Ленинлэсь нимзэ озьы гинэ куштыны уг луы вылэм. Нырысетӥ ӟуч марксистъёс пӧлын вал Владимир Ульянов, большевикъёслэсь партизэс, коммунистъёслэсь партизэс кылдытӥсь но солэн азьветлӥсез. 1887-тӥ арын дас сизьым аресъем егит пи Казаньысь студентъёслэн демонстрациязы пыриське. Сое мукет эшъёсыныз ӵош куто но пытсэт сьӧры келяло. Озьы Ленин султэ революция понна нюръяськонэ. Маркслэн но Энгельслэн ужъёсыныз тодматскыса, В.И.Ленин юн марксист луиз. Солэн кивалтэмезъя 1917-тӥ арын 25-тӥ октябре (7 ноябрь) Россиын вормиз Быдӟым Октябрь революция. Партилэн ХИИИ конференциез бере пролетариатлы, советской калыклы, быдэс дуннеысь пролетариатлы, быдэс дуннеысь азьмынӥсь калыкъёслы туж бадӟым куректон вуиз: 1924-тӥ арын 21-тӥ январе кулӥз Владимир Ильич Ленин. Солэн кулэмез сярысь ивор вань советской адямиосты, рабочийёсты но быдэс дуннеысь зибем калыкъёсты вераны луонтэм секыт куректонэ уськытӥз. Партилэн ЦК-езлэн соку ик люкаськем пленумез "Партилы. Вань ужаса улӥсьёслы" вазиськон кутӥз. Калык В.И.Ленинэн быдэс арня ӵоже люкиськиз. Куазь туж кезьыт ке но вал, адямиос уй но нунал мынӥзы Москваысь Союзъёслэн юртазы, пырак азелы умме усем вожденызы берпуметӥзэ адӟиськон понна. Аслэсьтыз атайзэ, дышетӥсьсэ но матысь эшсэ бадӟым куректонэн келяса, В.И.Ленинэз ватон нуналэ ваньмаз городъёсын но гуртъёсын советской калык вить минутлы ужзэ дугдытылӥз. Фабрикаослэн, заводъёслэн, паровозъёслэн быдэс странаын котькытын ӝож кесяськемзы улсын В.И.Ленинлэн мугорыныз коросэз (гробез) Горд площадьысь Мавзолее пуктӥзы. Советской калыкен ӵош юн куректӥзы быдэс дуннеысь пролетариат, вань ужаса улӥсьёс. Быдэс дуннеысь рабочийёслэн вожденызы люкиськыса, В.И.Ленинэз ватон нуналэ тросысьтыз капиталистической кунъёсысь рабочийёс ужзэс вить минутлы дугдытылӥзы. Ленин кулэм бере РКП(б)-е 240 сюрс рабочий пыриз. Со яркыт возьматӥз рабочий класслэсь но солэн партиезлэсь люконтэм луэмзэс. Бен, В.И.Ленин - со странамылэн историез. Солэн нимыз весяклы кылёз. Н.ЛЯЛИН. Москваын пумиськонъёс Удмурт Республикалэн Президентэз Александр Волков пумиськылӥз Россия Федерацилэн Президентэзлэн администрациысьтыз Экономикая управлениезлэн кивалтӥсеныз Антон Данилов-Данильянэн. Пумиськонын пыр-поч вераськон мынӥз республикамылэсь экономиказэ азинтон ужпумъёсъя. Александр Волков ивортӥз: республикаямы ваньбур поттон кылем арын 115-117 процентлы йылӥз. Нош 1999-тӥ арен ӵошатыса, экономикаын огъя азинсконъёс будӥзы 8 процентлы. Удмуртиын шӧдскымон кулэсмиз ужтэк кылемъёслэн лыдзы. В.Данилов-Данильян вылӥ дунъяз шаерамы улон-вылон но экономика удысъёсын кылдэм югдурез, со пусйиз: 1999-тӥ�2000-тӥ аръёслы йылпумъянъёсъя Удмурт Республика пыриз тужгес но огсыр азинскись улосвылъёс пӧлы. Озьы ик вераськон ӝутскиз Россилэн Президентэзлэн Ижевскысь "Купол" заводэз вузан-басьтонъя Указэзлэн инъетэз пумысен. Та проектъя заводлэн вань акциосыз кунлэн луозы. Нош кун солэсь ог люкетсэ висъялоз "Концерн "Антей" компанилы. Бадӟым люкетэз кылёз Удмуртилы. Огкылын вераса, "Концерн "Антей" завод пумысен вань ужпумъёсты сэрттоз-пертчоз Удмурт Республикалэн Президентэныз ӵош. Со нуналэ ик Александр Волков пумиськылӥз Россия Федерациысь промышленностья, наукая но технологиосъя министрлэн воштӥсеныз Сергей Митинэн. Соос вераськизы "Шкода-авто- Удмуртия" инъетэз ӝоггес улонэ пыӵатон пумысен. Удмурт Республикаысь Правительстволэн пресс-службаез. Нош ик чузъяське тодмо крезьгур Асьме пӧлысь данакез, тужгес ик арлыдо адямиос, Выль ар уе шумпотыса кылзӥзы вуж гимнлэсь берытскемзэ. Со чузъяськем улсын одӥг поколение гинэ ӧз буды уго, тӥни малы куд-огез синвуаськиз но, ӟеч тодмозэ пумитаса сямен. Выль дауре Россия выжиз СССР-лэн кун гимнэныз. Александр Александровен кылдытэм крезьгурез мукетыз ӧз вошты. Озьы ик странамылэн историяз, культурая зарни фондаз весяклы кылёз та композиторлэн "Священная война" кырӟанэз. Со герӟаськемын 1941-тӥ арен, Советской Союз понна тужгес но кышкыт вапумен. Александровлэн кырӟанэз улсын фашизмлы пумит ожмаськонэ султӥз вань калык, быдэс страна. Москваысь консерваторилэн военно-дирижерской факультетэзлэн деканэзлэн воштӥсез луыса ужакуз, генерал-майор Александров кылдытӥз но ачиз кивалтӥз Советской Армилэн кырӟанъя но эктонъя тодмо ансамбленыз. Со ик гожтӥз Сталинлы, Горд Армилы сӥзем кырӟанъёс. "По долинам и по взгорьям" кырӟанлэн авторез но - Александр Александров. Туннэ тодматӥськом Россилэн туала гимнэныз. Кылъёсыз - Сергей Михалковлэн. Нырысьсэ чузъяськиз 2001-тӥ аре выжон уе. Россия - священная наша держава, Россия - любимая наша страна. Могучая воля, великая слава - Твое достоянье на все времена! Припев: Славься, Отечество наше свободное, Братских народов союз вековой, Предками данная мудрость народная! Славься, страна! Мы гордимся тобой! От южных морей до полярного края Раскинулись наши леса и поля. Одна ты на свете! Одна ты такая - Хранимая Богом родная земля! Припев: Широкий простор для мечты и для жизни Грядущие нам открывают года. Нам силу дает наша верность Отчизне. Так было, так есть и так будет всегда! Припев: Укмыстон ар тырмоз Сарапулысь драмтеатр дышетскись пиналъёслы "Золушка", "Аленький цветочек" выжыкылъёсъя дасям спектакльёссэ возьматылӥз. Нылпиос толалтэ шутэтскыку, режиссёр Виктор Сажин пуктӥз "Приключения Буратино" спектакль. Со кутскон азьын покчиос Тол Бабаен но Лымы Нылэн ӵош шулдыръяськизы Выль ар кыз котырын. Ваньмыз кызь вить спектакль возьматэмын. Сое учкиз вить сюрс куать сю нылпи. 20-тӥ январе артистъёс шумпоттозы начар семьяосысь пиналъёсты. Со сяна, драмтеатр али дасяське Москваын ортчоно гастрольёсызлы. Отын со возьматоз тодмо ӟуч кылбурчилэн Иван Елагинлэн пьесаезъя спектакль. Сое дася валтӥсь режиссёр Юрий Синин. Ноябрь толэзе театр пусъёз кылдэмез дырысен укмыстон ар тырмонзэ. В. ЛАГУНОВ. Буре вайыса Улыны дыртӥз Пичи Миша атаез кулэм бере вераз: "Мон тужгес дуно эшме ыштӥ". Тазьы верасалзы, дыр, трос адямиос. Владимир Танаев туж лякыт, каньыл сямо, котьку капчи мылкыдо воргорон вал. Серекъямез но маскаръяськемез котьку паласькылӥзы котырысьтыз адямиослы. Эшъёсызлы но, ӵош ужась муртъёсызлы но весяк каньыл вал Владимир Юрьевичен артэ. Но егит пиосмуртлэн улон сюресэз тужгес ӟардон вакытаз шуак чигиськиз. Кылем арын, 22-тӥ январе, со сюриз машина улэ. Кин тодэ ини: оло, юри но сое виизы? Угось йыркуръяськисез трос шедьылӥз. Владимир Танаев куамын ньыль аресказ подполковник луиз. Эшшо но вылӥегес ӝутскон пиштэ на вал. Дуно адямизытэк кылизы кышноез, Татьяна Михайловна, витетӥ классын дышетскись пиез, Миша, но дас вить аресъем Полина. Татьяна Михайловнаен пумиськылыкум, со ӵемысь учкылӥз пиез шоры. Йырберзэ маялтэ но шорам пальыша: - Кельше ук Володялы... Татьяна Танаева картсэ ӵемысь тодаз вайылэ. Но калык пӧлын ноку уг возьматылы кайгузэ, куректонзэ. Синвуосыз, кыре потытэк, пушказ куасьмо. Володя вордскиз огшоры крестьян семьяын - Кияса ёросысь Колошур гуртын. Анай- атаез - удмуртъёс. Но пияшлэн удмурт кылыз ӧжытак шенгыльгес луиз. Ачиз верамъя, пичи дыръяз ӵемысь висьылӥз, санаторийёсын быдэсмоно луиз. (нош отын пиналъёс - ӟучъёсгес). Школаын Володя шӧртчи вал. Зэм, дышетскыны но вуылӥз. Школаез йылпумъякуз, зарни медаль сётыны медо вал. Кык усточиос пӧлысь директор бырйиз ӟуч нылашез. Медаль но одӥг гинэ висъязы. Володялы юри "ньыль" пуктӥзы. Егит пилэн Удмурт кун университетэ пыремез потэ вал. Но мылкыдыз малы ке шуак воштӥськиз. Володя кошкиз Перме. Дышетскыны кутскиз военной училищеын. Татын ик тодматскиз вуоно кышноеныз. Татьяна соку дышетскиз Пермь университетын. Пумен банкын ужаз. Нош ог-огзэс егитъёс пумитазы эктон клубын. Кык толэзь ортчыса кузпалъяськизы. Володя соку витетӥ курсын вал ини. 1985-тӥ арын Танаевез ужезъя келязы Архангельск пала. Татьяна огдырлы кылиз Перме. Соку со нылпи ваёно вал ини. Берлогес кошкиз картэз доры - Мирный городэ. Отын Танаевъёслы кема улыны ӧз кылды. Эшшо ке Владимир тодон-валанзэ йылэтыны малпаз. Пырыны быгатӥз академие. Кузпалъёсты келязы Москвае. Уродос гинэ улон инты висъязы. Пичи Мишалы соку ӵапак одӥг арес тырмиз. Нош отӥяз Танаевъёсты туж кема сюдӥзы "ческыт кампетъёсын". Ку басьтозы соос ӟеч-ӟеч улон инты - тодмо ӧй вал. 1994-тӥ арын, академизэ йылпумъяса, Владимир Юрьевичез нош ик ыстӥзы Мирные. Татьяна нылпиосыныз ӵош кылиз Москвае. Татын Танаевъёслы туж юрттӥз Владимир Степанович Лебедев. Котькытчы вазиськылӥз со, юрттэт курыса. Йӧно воргорон сюлмаськемен, Владимир выльысь "бертӥз" Москвае. Вуиз выльдӥськон шуон вакыт. Танаевъёслэсь улон интызэс "талазы". Дун тырыса, мурт дорын улыны кутскизы. Владимир ужаны интыяськиз Инсьӧры лобанъёсын кивалтон центре. 1998-тӥ арын Сергей Александрович Маев доры - Ожтыллэсь утиськонъя министерствое выжиз. Татын каньылгес: туж кыдёке ветлонэз ӧвӧл, эшшо ке соку ик подполковник ним сётӥзы. - Маевен Володя тодматскиз Владимир Степанович Лебедев пыр. Сергей Александрович угось Удмуртиын вордскемын. Озьы ик герӟаськемын Удмурт шаерлэн Москваын ялан ужась ёзэныз. Нош Володя отчы ӵемысь вуылӥз. Владимир татын ужаз, нокыӵе дун басьтытэк, ас мылкыдзэ лӧпкытъян понна гинэ. Со татчы вуэм бере, удмуртъёслэн пумиськонъёссы задоресь но тунсыкоесь луизы. Та пумысен Владимир Степанович Лебедев вера: - Володяен ми оъёзъёс ӧвӧл ке но, вакчи дыр куспын туж матысь эшъёс луимы. Со монэ компьютерен но ужаны дышетӥз. Удмурт шаерлэн Москваын ялан ужась ёзаз вань сюлэмзэ поныса тыршиз. Мон Владимир Юрьевичез та ужезлэсь куштӥськыны туж трос пол курылӥ. Угось со уж дурысьтыз соку ик ми доры вуылӥз. Уйёссэ куддыр ӧз ик кӧлалля. Весяк компьютер сьӧрын пукылӥз. Солы дэмлалляй удмуртъёслэн "Герд" дэменлыксылэн тӧроезлэсь интызэ мукетызлы сётыны. Но Володя чутрак пумит вал. Ма бен, сотэк милям ужъёсмы сокем каньыл ӧй радъяськысалзы. Ведь сое вань удмуртъёс яратӥзы. Котькинэн одӥг кыл шедьтылӥз. Михаил Григорьевич Шаклеин суредасьлэсь берпуметӥ аръёссэ но со буёлаз. Пичи мурт кадь лӧптӥз арлыдо суредась, Володя солы ожын дано луэм командиръёслэсь тусбуйёссэс суреданы дэмлаку. Владимир озьы ик туж юрттӥз Михаил Щепкин нимо Вылӥ театр училищеысь егитъёсты келян ӝытэз радъяны. Узыр адямиосты но син куспын шедьтӥз. Кыӵе шумпотӥзы егитъёс!.. *** Владимир Юрьевич тодмотэм адямиосын огкыл туж чаляк шедьтылӥз. Но малы ке ӵемысь шедьылӥз шудтэм учыръёсы. Кышноез тодаз вае: - Кылем арын, май толэзе, вал со. Володя ужысьтыз бертэ. Метроын поездъёс Ӧжыт ветло ини. Калыкез но ичи. Владимир весь учкылӥз часэз шоры. Платформаысен огпол ӧжытак мыкырскиз: - поезд уг лыкты-а? Валаса но ӧз вутты - кин ке сое вань кужмысьтыз донгиз рельсъёс вылэ. Нош поезд тани-тани вуоз ини. Ярам: кыӵе ке воргорон потыны юрттэм. Платформа вылэ тубемез бере ик поезд вуэм. Адямиос чиптэм-чаптэм ышиллям. Кинлы вазиськоно? Эшшо ке пельпумыз юн куректыны кутскем - эшлыэз чигем. Мынэм станциысь адями доры. Нош соиз Володялы сю грамм сётэм - тазьы, пе, куректэмез зол уз шӧдӥськы. Собере милиция но ӝог юрттэт сётӥсьёс вуиллям. Володя сярысь кин ке шуэм: кудӟемын вал, ачиз поезд улэ кечырскиз. Тӥни кызьы. Мон Володялы весь паймылӥ. Малы со котькытчы бызьыса кадь кошке вал? Весяк мар ке борды кутскылӥз. Со яратӥз вань выльзэ, тунсыкозэ, быдэсак отчы выйылӥз. Бен, ваньзэ лэсьтыны вуттэ вал со. Дыртӥз, туж дыртӥз улыны. Оло, шӧдӥз, инмар солы ичи дыр висъяз шуыса?.. Марина Костылева. Удмурт кыл узыр Кылем арлэн пумаз "Кенеш" журнал поттӥз Генрих Перевощиковлэсь "Шелеп" повестьсэ. Мон туж тунсыкъяськыса лыдӟи сое. Малы ке шуоно, "Шелеп" яркыт возьматэ туала вакытэ писательлэсь Андрей Васильевич Соловьёвлэсь шуге-леке сюремзэ. Таӵе аспӧртэм кылъёсын Генрих Перевощиков гинэ гожъя. Асьме удмурт кыл узыр, сое быгатыса кутоно. Генрих Ксенофонтович Перевощиков азьвыл ужъёсаз сямен ик "Шелеп" повестяз но улонысь мукет туж кулэ ужпумъёсты сэрттэ-пертче. В.ЧЕРНОВ. Газетлы - 10 ар Туннэ "Известия Удмуртской Республики" газетысь эшъёсмы пусъё изданизылы 10 ар тырмонэз. Огыр-бугыр вакытэ вордӥськиз та газет. Компартилэн кужымез лябӟиз ни вал, нош Советъёс биньгозыез киязы рос-прос возьыны ӧз быгатэ на. Вылӥ Кенешлэн депутатъёсыз кема курадӟизы выль изданилы кивалтӥсь юнматонэн. Валентин Тубылов но Юрий Кедров ӵектӥзы соку "Удмуртская правда" газетысь кылкутӥсь секретарь луыса ужась кылбурчиез Герасим Иванцовез. Ӧз янгышалэ. "Известия..." вакчи дыр куспын аслэсьтыз ымнырзэ шедьтӥз, лэчыт пиньзэ но возьматъяны кутскиз. Задор мылкыдо коллектив адӟем карымон ужаз. Газетчиос пӧртэм ӵошатсконъёсын, возьматонъёсын вормылыны ӧдъязы. Туннэ республикаямы ӟеч тодмо Александр Алексеевлэн, Людмила Вернерлэн, Светлана Крюковалэн, Ольга Евсеевалэн, Николай Танаевлэн (таиз "Удмурт дуннеын" ужамын, али Правительстволэн пресс-центраз валтӥсь специалист луэ), Валерий Чиньковлэн но данак мукетъёсызлэн нимъёссы. Газет выль вакытаз выже. Дас ар талэсь азьло кылдытэм ӟеч сямъёс азьланьын уката мед юнмалозы. И.КРИЧЕВ. ШӦКЫЧ "Шӧкычлэсь" гороскоп Кинэ мар возьма Кыйлэн араз Ыж (Овен). Котькуд ӝӧк сьӧрын туж сӥё-дано куно луоды. Уката ик удалтоз нылкышноослы - йырез поромытӥсь яратон пӧлы выёзы. Ош (Телец). Иназ мынозы кузь сюрес вылэ потанъёс-командировкаос. Эгызоос (Близнецъёс). Нылкышноослэн быдэсмозы "льӧль" малпанъёссы, нош воргоронъёс выёзы "чагыр" вӧтъёссы пӧлы. Кисло-кусло (Рак). Арлэн кутсконаз кӧтты тырымон юэ сур: Кый кышкатъяське сурез курыт юонъёсын оградэ пуктонэн. Арыслан (Лев). Кыйлэн араз но эксэй луэмды потэ ке, ар ӵоже йырси ӵышконтӥослэсь палэнтӥ ортче. Нылмурт (Дева). Чаклаське паллянэ нуись сюресъёслэсь - ас интыяз кузпалды туспуктэмзэ кузьмалоз. Весъёс. Кемагес тунаса улӥды ке, уд шӧдэ Кыйлэн ымаз пыремдэс. Скорпион. Шиостэ кузь лэзья но, "выль ӟучъёс" пӧлазы пыртозы. Но кулэ-а со тыныд: кызьы пырид, озьы ик палдод. Ыбылӥськись (Стрелец). Пукыӵ ньӧлдэс киысьтыды лэзьыны эн дыртэ: матысь дыре быръёнъёс уг чакласько. Сюро така (Козерог). Утыны яратӥсь но куртчылӥськись пуныез жильыен думыло. Тодады возе: тӥ пуны ӧвӧл. Ву кисьтась (Водолей). Кызьы зарезез омыръяса уд быдты, озьы ик курыт юонлэн пумаз-йылаз уд вуы. Малы соку кужымдэ но дырдэ юнме быдтод? Чорыгъёс (Рыбы). Кыӵе чорыгасьлэн визнаназ сюрод, соя ик куронъёстэ мерталод. Суредэз И.КЕЙКО. Оскон Шундылэн ӝужамез но шумпоттэ Улонэз бусыетӥ ортчонэн ӵошатыны уг луы. Мар луоз вуоно аре - тодыны шуг. Ма, кӧлыны выдыкуд, куазьлэсь ӵукна кыӵе луонзэ но уд тодӥськы. Берганын бызьылӥсь коньылэн сямен, дауред но ортче. Вуэ сыӵе дыр, ну валаськод - улон ортчиз. Тросэз адямиос понна та вакыт лыктэ одӥг пол, нош инвалидъёс сое ӵемысь шӧмало, пыд пуктэтъёс улоназы ӧжыт уг пумисько угось. Шуге-леке сюремъёс понна шундылэн котькуд ӝужамез гинэ но шумпотон вае ни. Нош шугъяськонъёссы соослэн трос: озьы-а, тазьы-а - ваньмыз висён борды биниське. - Ми кадьёсты больницае басьтэмзы уг поты ни, нош йӧнатскыны кулэ, эмъюм ӧвӧл. Алигесэн аслам уксёеным коляска басьтоно луи. Вужезлэн поглянъёсыз быризы. Каллен ас кужыменым ик операцие мыныны дасяськисько. Азьло дыре инвалидъёслы курортэ путёвкаос сётъязы Совето Союз куашкам бере мыным но кык пол ветлыны удалтӥз, - вера нырысетӥ группаен инвалид Виталий Павлович Шихарев. Пиосмуртлы куамын куать арес. Машина улэ сюрыса, со коляскаен ветлӥсь луиз. - Нырысь оскон вал, йӧнало, пыдъёс вылэ султо шуыса. Инвалид луэмме бергес валай. Мон огнам ӧвӧл, татын , коляскаен ветлӥсьёс, куинь кузя, ньылетӥез эшмы Выль Шудьялан улэ. Гужем пумиськылӥськом, адямиосын вераськиськом, машинаен Алёша доры гуртэ потаськом. Толалтэ шуггес. Урамын кезьыт, дорын пуконо луэ, ялан телевизор учкисько. Пенсилэн быдӟалаезлы уг ӝожтӥськиськы, но инвалидъёс сярысь закон пыр-поч малпамтэ йӧтэ. Сюлэмшугъяськытэ инвалидъёслэн лыдзылэн будэмез. -Бускель нылкышно роддомын ужа, солэн верамезъя, али туж шер таза нылпиос вордско. Малпасько, кунгожъёс усьтӥськемен валче, асьме доры уката но пӧртэм висёнъёс вуо. Алнаш ёросысь калыклы улон-вылонын юрттэт сётонъя отделлэн кивалтӥсезлэн воштӥсезлэн Клавдия Кузьминалэн верамезъя, нырысетӥ группаен инвалидъёс ёросын 150 пала, кыкетӥ групаен - 705, куинетӥ группаен - 291, 138 нылпи инвалид. 138 мурт Быдӟым оже пыриськемын. Шуг-секытъёсы ваньмызлэн Виталий Павлович Шихаревлэн сямен ик тырмыт... Бадӟым шугъяськонзы эмъюмъёс ласянь. Нырысетӥ, кыкетӥ группа сётэмъёслы но нылпи инвалидъёслы со дунтэмен сётъяськыны кулэ, но та луонлык уг быдэсъяськы. Ярам ай, сахарной диабетэн, бронхиальной астмаен но куд-ог мукет висёнъёсын курадӟисьёслы сыӵе юрттэт сёто ик. Умой ни соиз - коммунальной юрттэт, радио но телефон, электротыл понна огъя транспортэн ветлонын пичиятэм дунъёс тупатэмын. Инвалидъёс сярысь законын кутэм ужпумъёс тырмыт уг быдэсъясько ке но, адямиос сярысь сюлмаськем ёросын шӧдӥське. Бӧрсьысь куинетӥ арзэ ортчытӥзы ни арлыдоосты но инвалидъёсты сӥлы карон толэзь. Озьы ик ортчыло нылпи творчестволы сӥзем фестивальёс, татын пырисько инвалид пиналъёс но. Соос понна радъямын луо Выль арлы шулдыръяськонъёс. Кылем арын Варзи-Ятчи курортын эмъяськизы ёросысь огъя висёнэн дас тямыс инвалид, кыкез Чернобыле ветлэмын, куать путёвка висъямын вал висись нылпиен анайёслы. Вань та пичи шумпотонъёс кӧнялы ке но узырмыто огсыр ортчись нуналъёсты. Нош кин юрттоз куинь вордӥськем нылпиослы но соослэн анай-атайзылы Мария Тимофеевна Павловалы? Ваньмыз ик нылпиос церебральной параличен курадӟо. Гуртсы райцентрысь палэнэ интыяськемын бере, зор-кот дыръя но лымыяку, пырын-потыны шугъяськоно. Эмъяськонлы матэгес луон понна, нылкышно Алнаше улон инты куре. Ёросысь кивалтӥсьёслэн юрттыны тыршемзы пайда ӧз вайы. Выль улон юртъёс кемалась уг пуктӥсько, кузётэм квартираосты но та вие уд шедьты. Ярам, висись нылпиосты эмъян сярысь сюлмасько. Туэ гужем соос тазалыксэс юнматӥзы Варзи-Ятчи курортын. Нылпиос вордӥськем бере, ёрос администрация та семьялы кузьмаз коляска. Анайлы юрттӥськись но висъяз, нылпиосты утялтыны социальной ужась али но юрттэ. Берло дыръёсы пенсия тыронын ӝеганъёс ӧвӧл ни, быдӟалазэ но будэто. Соин валче инвалидъёслэн азьланезлы осконзы но йылэ, иське, улом ай. О. Кожанова. Шулдыр ортчиз Котькуд Выль арлэн кутсконаз "Дэмен" культурая огазеяськон ортчытъя удмуртлыкез яратӥсьёслэсь шулдыр пумиськонъёссэс. Со радъяське вуж выль арлэн кутсконаз, пӧртмаськон нуналъёсы. Отчы уноез лыкто чебер но пӧртмаськон дӥськутэн, шудо- кырӟало-экто та удмурт йылоллы сӥзем гуръёсты-сямъёсты. Туэ, 2001-тӥ аре, сыӵе шулдыръяськон ортчиз культурая "Ударник" центрын. Трос сюлэмзэс, дырзэс, мылкыдзэс та ужрадлы сётӥзы "Дэменлэн" кивалтӥсьёсыз Альберт Разин но Клавдия Исупова. Котьку сямен та ужрадэ сюлмысь пыриськизы Завьял ёросысь Пироггуртысь фольклор ансамбль, Ленин районысь "Ӟардон" коллектив. Туэ но Соос чебер, рос-прос дӥсяськыса лыктӥллям. Валамон ини, мынам но "Ожо-вожо" ансамбле ноку ик таӵе праздниклэсь уг палэнскы. Ми дас ньылетӥ арзэ та пӧртмаськонъёсын шулдыръяськиськом ни. Туэ но "Ударникын" пӧртмаськон чебер ортчиз. Н.ВОЗИСОВ. ШӦКЫЧ Павел СЕМЁНОВ *** Пие, мын ай. - Уг, уг мын. Пие, лэсьты. - Жадисько. Пие, чаль, шыд пӧземын. - Мон али ик, бызисько. Пие, дышетскы. - Уг пот. Пие, ужа. - Эн еры. Пие, ме али коньдон. - Ма, али ик мон, сэрыт! Пие, мар-о? - Ма, марым. Кытын-о тон? - Марымын. Кытын-о бон со марым? - Ма, марым ук - тюрьмаын. Пусъемын кузьымъёсын Ижевскысь устоосызлэн участковой инспекторъёслэн нимъёссы тодмо луизы кылем ар пумын, куспазы радъям конкурс йылпумъяськем бере. Табере соосты ас дораз сӥё- дано пумитаз шаерысьтымы югдурез утёнъя министр В. А. Щербаков. Куинез устоез инспекторъёс дуно кузьымъёсын пусъемын. Таос пӧлы шедизы Октябрь РОВД-ыс, Алексей Широбоков, Индустриальной Ильнус Гусейнов РОВД-ысь но Устиновской РОВД- ысь Рафик Керимов. Вераны кулэ, Октябрь РОВД-ысь инспектор Алексей Широбоков азьвыл аръёсы радъям конкурсын но вормисе потылӥз ни. Со ик пыриськиз вал Нижний Новгородын ортчем Россиысь устоосызлэн участковойёслэн ӵошатсконъёсазы. Э. Кумачева. Кизилиос верало (22.01-28.01) Ыж (Овен) 21.03-20.04. Таяз арняе эшъёсыныды кусыпъёсты юнмалозы. Понедельнике соос пӧлысь одӥгез тӥледлы азьланьын юрттыны ӵектӥськоз. Солэн пельпумъёсыз вылэ вань шуг-секытъёстэс ӧд куштэ ке, эшъяськонды юнмалоз гинэ. Вторнике коньдон ужпумдэс быдэстыны быгатоды. Вазиське кивалтӥсьтылы, возьматэ солы, тӥ усто ужась шуыса. Четверге коньдондэс шыръялэ, пунэмен сётыны эн дыртэ. Умой луысал, гань-гань пуксьыса чакласалды ке, кытчы но кӧня уксёдэс быдтӥськоды. Ош (Телец) 21.04-21.05. Вторнике ческыт сиемды потоз. Сьӧраз эн ортче, асьтэдыс асьтэос ворме. Ӝӧк сьӧрын пукытозь, спортэн выре, тодон-валан люкалэ. Оло нош сюсьтыл ӝуамъя малпаськоды-дунъялоды, кызьы ортчиз таиз толэзьды. Шутэтскон нуналъёсы умой-умой шутэтске, номыр но эн лэсьтэ. Люканы быгатоды эшъёстэс. Кӧттырмон сие-юэ, тазалыктылы номыр кышкыт ӧвӧл. Эгызоос (Кыктоос, Близнецъёс) 22.05-21.06. Понедельнике тӥ мултэс лек но керӟег луоды. Озьы вӧзысьтыды адямиосын, озьы ик анай-атайёсыныды керетыны быгатоды. Эн дыртэ соосын кусыпъёстэс чутрак вандыны, тырше матысь адямиостэс валаны. Средае коньдондэс ыштыны кышкытлык вань. Субботае яратоно адямиосыныды ченгешоды. Таяз учыре но муртэз ынгыше уськытыны эн выре. Кылдэм югдур понна, оло, асьтэос кыл кутыны кулэ - малпаське. Кисло-кусло 22.06-23.07. Арня ӵоже сюлмаськонъёсты пумтэм луозы. Тани средае мылкыдды куашкалоз, тазалыкты лябӟоз. Кулэ луоз коньдон, оло нош пунэмаськоно луоды. Четверге ужан интыяды югдур ӟырдалоз, эшъёсыныды споръяськоды. Чаклаське, шуккиськыны медад шеде. Субботае нылпиосыныды но одӥг кыл уд шедьтэ. Эн куректэ - арня нуналэ тӥледлы яратонын удалтоз. Лев 24.07-23.08. Вторнике ужан интыяды азинсконъёс басьтоды. Со понна асьтэдыс кияды кырмыны кулэ. Дыр вуиз азьланезлы малпанъёстэс усьтыны, ӵош ужась эшъёстылы, ӵыжы-выжыостылы сётэм кылдэс быдэстыны. Четверге кивалтӥсеныды керетыны быгатоды. Арня нуналэ шутэтске, семьяеныды ӵош театре, киное, выставкае, магазинъёсы ветлэ. Со мылкыддэс тупатыны тужгес пайдаё амал. Нылмурт (Дева) 24.08-23.09. Таяз арня вискын азьвыл мытэм ужъёстэс йылаз- пумаз вуттыны тырше, выльёсыз борды басьтӥськыны эн дыртэ. Четверге ужантӥяды коньдон пумысен керетон пуромоз. Отчы пыриськыны эн дыртэ - кык тыл вискы шедёды. Ӝыт мултэс эн сиське, люкаськем килограммъёстэс куштыны секыт луоз. Весъёс 24.09-23.10. Вторниктэс семьядылы сӥзелэ, пиналъёсыныды шудэ яратоно уженыды тодматэ. Среда ӟеч нунал дышетскыны, лекциос лыдӟыны. Асьтэды асьтэос укыр секыт эн каре, мултэс эн сюлмаське, тазалыкты сярысь тросгес малпаське. Четверге туж усто луоз, выль уждэс мытыса. Субботае сак кариське: кышкытлык вань, юртъер котырады ужаку яке машинаеныды ворттылыкуды шуккиськоды шуыса. Скорпион 24.10-22.11. Понедельнике но вторнике юртъер котырады, квартираяды ужаны мылкыдды пуромоз. Оло нош кыӵе ке техника, шуом, пылесос яке мисьтаськон машина, басьтоды. Та нуналъёс - ӵыжы-выжыосыныды, эшъёсыныды, бускельёсыныды пумиськылон вакыт. Мылкыдды капчи бере, асьтэды шудоен шӧдӥськоды. Нош четверге пӧсекъяно луоды ӵыжы-выжыды пумысен, озьы ик квартираысьтыды газ, шунтӥськон тӥрлык, электрокужым пумысен. Ыбылӥськись (Стрелец) 23.11-21.12. Арнялэн кутсконаз коньдон ужпумъёстэс быдэстыны шӧдтэк шорысь шудо учыр кылдоз. Ужады рос-просгес ужаны тырше, эрикогес луыны тырше. Но кивалтӥсьёсыныды кусып возе, вань куронъёстэс быдэсъяны но ужантӥяды дыраз вуыны тыршелэ. Четверге кынманы эн шеде. Пятницае ӵош ужась эшъёсыныды одӥг кыл шедьтыны уд быгатэ. Тазалыкты лябӟыны быгатоз арня нуналэ. Шунытгес дӥсяське, пӧсяськоды ке но, тӧл шуккемлэсь утиське. Сюро кеч (Козерог) 22.12-20.1. Понедельник - ӟеч нунал выль ужъёстэс мытыны. Мултэс эн пӧсекъялэ гинэ. Асьтэлы асьтэос оскиды ке, ваньмыз пӧрмоз. Вирзӥбетэн курадӟисьёс чакласькыны кулэ. Четверге коньдондэс ыштыны быгатоды. Эн тулкымъяське, чидатске, юн кариське. Ӝыт умой-умой шутэтске. Ӵуказеяз мылкыдды секыт луоз на. Эн дыртэ сое эшъёсты, ӵыжы-выжыосты вылэ кисьтыны. Таӵе учыре пӧсь мунчо туж юрттэ. Сузэръёсыныды-вынъёсыныды кемаласьгес ӧд пумиськылэ ке, арня нуналэ, оло, соосты люкалоды. Озьы ик шумпотон кузьмалозы нылпиосты яратоно адямиды. Ву кисьтӥсь (Водолей) 21.01-19.02. Арнялэн кутсконаз дышетскисьёслы, визьмын ужасьёслы, ужбергатӥсьёслы удалтоз. Среда но таӵе нунал на, но йырдэс укыр секыт эн каре. Субботае шуккиськонлэсь утиське, тужгес ик сюрес вылын руль сьӧрын. Ӵош ужась эшъёстэс лэчыт кылыныды вӧсь эн каре. Арня нуналэ эшъёсыныды но яратоно муртэныды пумиськылэ. Туж умой луоз, тазалыктэс юнматӥды, чылкыт омырен шокады, спортэн выриды ке. Чорыгъёс 20.02-20.03. Понедельнике ужантӥяды эшъёстэс огазеяны тырше - валче ужан синмаськымон азинсконъёс басьтыны юрттоз. Средае аракы яке зол кужымен эмъюм мултэс эн юэ - тазалыктылы кышкытлык вань. Чакласа улэ покчиостэс - мултэс керӟегъяськемзы, оло, висемзы бордысь потэ. Четверге дышетскисьёслы "пӧсяно" луоз. Тодон-валанды ляб ке, оскон ӧжыт, экзаменын умой дунъет басьтоды шуыса. Арня нуналэ яратоно адямиеныды валче анай-атаеныды керетоды. Соин ик таӵе пумиськондэс берлыгес кельтыны тырше. Умойгес, магазинъёсы потады ке, туж кулэ луись вуз басьтоды, мылкыдды но уз куашка. Экты, экты, газетэ, Кез палась гожтэт вуэм! Кылем арын редакцие лыдӟисьёслэсь сюрс пала гожтэт вуиз. Редакциын мынам уже ваньмызлэсь тунсыкогес, дыр. Гожтэтъёсъя отделын ужасько бере, котькуд ӵукнае кутске выль гожтэт лыдӟон бордысен. Нуналлы быдэ тонэн но редакциын ӵош ужась эшъёсыныд ӟечъяське кудӥз ке но лыдӟисьмы, улэм-вылэмез сярысь вера яке огшоры гинэ тау каре. Нош куд-огез гожтэт тырмемын кӧтӝожен, со юрттэт курыса вазиське. Нуналлы быдэ сямен редакцие вуо ялонъёсмыя тодматскыны мылкыд карисьёслэн гожтэтъёссы. Ми соосты соку ик печатланы тыршиськом - мед удалтоз адямилы чальгес. Но тужгес но "пӧсь йӧтэ", конечно, юристлы. Нуналлы быдэ солэсь визьнод курыса вазисько шуге-леке шедем лыдӟисьёсмы. Музъем паен герӟаськем юанлы огаз номерамы валэктон сётӥськом ни, вуоно арняяз нош ик сыӵе юан вуэ. Соиз валамон: котькудӥз юаськись мурт аслаз фамилиез улын сётэм валэктонлы гинэ оске уго. Паймоно кадь, но трос юанъёс вуылӥзы та дырозь удмуртъёслы тупасьтэм югдуръя: семья куспазы яке семьязы куашкам бере ваньбурез но нылпиосты люконъя. Ар ӵоже арнялы быдэ сямен юристмы Лилия Шкляева тӥледлы валэктонъёс сётъяз. Кинэ ке солэн гожтэмез буйгатӥз, кинлы ке оскон пыӵатӥз, дыр, нош кин ке, аслыз дурбасьтон шедьтытэк, газетмес палэнтӥз. Конечно, адями сямен Лилия Алексеевналэн ваньдэсты шумпоттэмез потэ, дыр, но со - кылбурчи ӧвӧл ук, нош юрист закон вылэ пыкъяськыса валэктон сётэ. Тӥ зэмлыкез тодон вылысь гожтӥды вал ук, озьы-а? Кылем аре кунмы пенсионеръёслы олокӧня пол чечы пуньы мындаен пенсия будэтъяз. Коньдонэзлэсь трос веранэз, кӧтӝожез луиз. Арлыдо муртлэн йырыз воксё сураськиз: кызьы-озьы, мон сомында ужай но тамында басьтӥсько, бускеле йӧназ ӧз ужалля но мынэсьтым кызь манетлы трос басьтэ. Шонер-а мыным тыро пенсия, уг алдало-а? Таӵе гожтэтъёс туж трос вуизы гужем. Ми Калыкез улон-вылонын утёнъя министерствоысь специалистъёсын ӵош тыршим тӥледлы валэктонъёс сётъяны. Али ке но сюлэмысьтым уг поты Алнаш ёросысь нылашлэн Лена Синицыналэн гожтэтэз. Анаелэн жалезлы чидатэк гожтӥсько, шуэм со. Гуртын, пе, уждун пичи, нош нылпи пособизэ солы малы ке но уг сёто. Конфет-пряник понна, пе, ум возьмаське, коть агаелы школазэ быдтэмез понна костюм басьтом шуиськом вал... Леналэсь гожтэтсэ газетэ поттытозямы ик "ышем" нылпи пособиез мукет гуртысь шедьтӥзы. Нош Ижевскысь нылпизэ огназ будэтӥсь анайлы Нурия Халиповалы уж дураз пособие сётъяны уг ик малпло вылэм. Нылкышноез алдаса возиллям, али пособие уг тыриськы ни шуиллям. Кулэ интыосы жингыръяммы бере, нылпиезлы сюрс манетлэсь трос пособие ӵуказеяз ик сётӥзы. Та выллем югдурысь потыны юрттӥм эшшо кӧня ке нылкышноослы. Шумпотӥськом, газетмы коть кӧня ке муртлы юрттыны быгатӥз шуыса. Но жаляса верано луэ, котьку озьы уг луы. Ми номырин юрттыны ум быгатӥське эрказмем нылпиосынызы йырин курадӟись анай-атайёслы. "Маке но каре пиеным. Юэ, лушкаське, милемды вӧсь каре... Милиция но уг юртты..." Ми тыршиськом сыӵе учыръёс сярысь, специалистъёсын кенешыса, материалъёс гожъяны, но солэсь бадӟым кужыммы ӧвӧл. Ум быгатӥське колхоздэс тӥледлы ӝегатэм уждундэс сётыны косыны. Кассазы зэмзэ но буш ке, ми ма карыны кулэ? Конечно, ми быгатӥськом тӥ доры командировкае потаса зэмос югдурез возьматыны, мугзэ утчаны, но луоз-а тӥледлы солэсь капчигес? Нош уждунэз суд пыр курыны луэ, эшъёс. Со сярысь юристмы гожъяз ни. Редакцие тросгес гожтэт вуыны кутске, кыӵе ке конкурс ялыкумы. Озьы туэ Очей Толи олокӧня бинет басьтӥз. Серемес чуръёсын но юморескаосын шумпоттӥзы сое лыдӟисьёсмы. 2000-тӥ аре тулыс пусйим Вормонлы 55 ар тырмонэз, сӥзьыл бырйим шаермылы нырысетӥ президент. Ваньмыз та бадӟым ужрадъёс сярысь газетмы трос гожъяз. Соос пӧлын вал лыдӟисьёсмылэн но ужъёссы. Гожтэт басьтэм бере нырысь ик син усе, конечно, адрес вылэ. Туэ тросгес гожтэт ысъязы Можга но Шаркан ёросъёсысь. Но туж шумпотылӥм Яр, Кез, Селта, Сюмси ёросъёсысь вуэм кӧня ке гожтэтлы. Та районъёсын уго газетмес туж ӧжыт лыдӟо. Тау кареммы потэ ялан гожъясь эшъёсмылы. Кылем ар ӵоже милемды тужгес ӵем шумпоттылӥзы Киров улосысь Николай Никифоров, Дэбес ёросысь Митрофан Мосов, Глаз ёросысь Галина Баженова, Пичи Пурга ёросысь Васса Васильева, Можгалась Иван Образцов, Ижевскысь Владимир Чернов, Виктор Поздеев, Ольга Никитина. Та лыдӟисьёсмы милемлы котьку тунсыко ивор, верос, статья вутто, асьсэлэн ужъёсынызы газетмылэсь пуштроссэ узырмыто. Туж бадӟым тау ваньмызлы! Куспамы вераськыса, туэ тазьы кенешим: 2001-тӥ ар ӵоже тужгес трос но тунсыко гожтэт ыстэм муртъёслы "Удмурт дуннеысь" Тол Бабай ар пумын кузьыменыз шумпоттоз. Зинаида РЯБИНИНА, гожтэтъёсъя отделын ужась. Тазалык Эмъя астэ ачид *** Кылем арын толалтэ туж зол оло пыэдэн, оло гриппен виси. Шуак ӟырдай, ныры вия, йыры висе. Пичи гуртын улӥсько бере, нокыӵе врач но, медпункт но ӧвӧл. Аптечкаысьтым но анальгин сяна номыр ӧй шедьты. Висьыку сием уг поты бере, весь кубиста ву юыса улӥ. Кымесам, пельпумъёсам, пыдкӧтъёсы вылам кубиста куарзэ тырылӥ, шунамезъя вошъялляй. Оло со юрттӥз, лэся, ӵуказеяз ик пудоме но ачим утялтӥ ни. Ӟырдаме ортчем бере нырме картошка пар вылын шунтылӥ, чеснок ву тырылӥ. Антонина Степанова. Кез ёрос. Мон висьыны кутскемме шӧдӥсько ке, соку ик сьӧд пӧсьтурынэн сю грамм водка юисько. (Тросгес уг яра). Тодӥсько пыэдэн утиськон трос мукет амалъёс, но таиз туж юрттэ. Только висьыку мунчоын париськыны уг яра, уката урод луоз. Валерий Бехтерев. Ижевск. Вераме потэ ӟеч кыл Социализме вуылӥ кадь Туэ 18-тӥ октябре туж лек висьыны уси. "Ӝог юрттэт сётӥсь" машина республикаысьтымы инфекционной клинической больницалэн кӧтпуш висёнъёсты эмъян отделенияз вуттӥз. Озьы малпамтэ шорысь тодматсконо луи та эмъяськон интыен. Городысь куд-ог больницаосын эмъяськеме вал ини бере, тазэ мукетъёсыныз ӵошатыны, татын ужась адямиослы дунъет но сётыны дӥсьтӥсько. Кузь, чылкыт коридорын чал-чал, нокин эли-кеби дыртыса, керӟегъяськыса ветлӥсь ӧвӧл. Вӧл-вӧл бадӟымесь палатаосын югыт, шуныт но туж чылкыт. Валесъёс вылын син мальдымон тӧдьы миндэр - валес котыр. Ваньмыз гань-гань мылкыд пыӵатэ - висись муртлы ӝоггес йӧнаны луонлык кылдытэмын. Туала улонын кылдэм шуг-секытъёсты лыдэ басьтоно ке, сиён ласянь но ӝожтӥськыны сьӧлык луоз. Гуртысьтыз валес котырын эмъюмъёсын татчы нокин уг лыкты: больницалэн ваньмыз аслаз. Вань кулэ эскеронъёс - пӧртэм анализъёс, электрокардиограмма, ренгеноскопия, узи, ректороманоскопия но мукетыз - нокытчы потатэк но дунтэк лэсьтӥсько. Кулэ ке мукет висёнъёсты эмъясь специалистъёсты но вутто - кардиологез, эндокринологез, невропатологез яке мукетъёссэ. Та эмъяськон юртын быръем ужзэс яратӥсь адямиос тыршо, котькудӥз ас удысаз вань сюлэмзэ, тодэмзэ, быгатэмзэ сётыны турттэ. Юатэк ӧй чида: - Конкурс пыр потэм муртъёсты гинэ шат татчы ужаны куто? - Уг, - шуэ медсестра. - Ми ваньмы туж яратӥськом быръем ужмес, котькуд йӧнам висись понна шумпотӥскьом, уже капчи мылкыдын ветлӥськом. Татын висисьёсты уг висъяло пересь-а тон, егит-а; узыр яке начар; чебер яке шӧтэм - ваньмыз сярысь огкадь сюлмасько. Та больницаын кызь нуналлы гинэ ке но социализм вакытысь улонэ берытскылӥ кадь. Эмъясьёс пӧлысь нимысьтыз кинэ ке висъяны туж шуг, озьы ке но, бадӟым тау шуэме потэ Анилина Петровна Малышевалы. Солэн быгатыса кивалтэменыз, отделениын туж шуныт мылкыд кылдэмын. Озьы ик тау кылме верасько Антонина Иосифовна Мотыревалы, йӧнатӥсь докторелы, висисьёслы небыт кылъёс шедьтэмез, соосты котькуд ласянь пыр-поч эскеремез, йӧнамзылы оскон пыӵатыны быгатэмез понна. Выль ар азьын ваньзэсты та больницаын ужасьёсты ӟечкыласько но жаляса шуисько: шундыез но уг лу кузьмаме, сяська но газет пыр уг лу ыстэме. Тау каронме верасько сюлмысьтым потӥсь ӟеч кылъёсын. А. Вахрушева. Ижевск. Суредасьлэн ӝытэз Операя но балетъя кун театрын дасэтӥ арзэ ини тырше солэн валтӥсь суредасез - Удмурт Элькунысь искусствоосъя дано ужась Владислав Анатольевич Анисенков. Та дыр ӵоже Владислав Анатольевич дасяз ни кӧня ке бадӟым уж - быгатӥсь киосыныз чебермаз "Севильский цирюльник", "Русалка", "Флория Тоска" операосты, "Коппелия", "Собор Парижской Богоматери" балетъёсты. 21-тӥ январе театрын луоз Владислав Аниссенковлы сӥзем ӝыт. Соку возьматэмын луоз П.И.Чайковскийлэн "Пиковая дама" операез. Сое но чебермаз Владислав Анатольевич. Та нуналэ тужгес шумпоттыны кулэ Россиысь дано артист Владимир Алексеевич Рылов. "Пиковая дама" спектакль мыныку, со дирижёр луоз. Владимир Алексеевич дэмламъя ик Москваысь ӧтемын вить кырӟась. Соос пӧлысь одӥгез луоз Бадӟым театрысь солист Евгений шапин. Палэнэ уз кыле Операя но балетъя кун театрысь усточиос но. Спектакльёсы пыриськозы Удмурт Элькунысь калык артист Валерий Дёмин, Удмурт Элькунысь дано артист Александр Каманицын, артистъёс Дмитрий Шиврин, Александр Артемьев. В.ЛАГУНОВ. "Заря" - 100-осыз пӧлын Можга ёросысь "Заря" эштос пыртэмын Россиысь устоосыз 100 гурт хозяйствоос пӧлы. Татысь бакча сиён будэтӥсьёс арысь аре ӟеч азинсконъёс басьто. Кылем арын соос 80 процент пайда басьтыса ужазы. Республикаямы та дырозь таӵе хозяйствоос кык гинэ вал: Завьялово ёросысь "Путь Ильича" колхоз-племзавод но "Правда" огазеяськон. Э. Васильева. Ӟеч ужалод - вормисе потод Республикаысьтымы Инвалидъёслэн огазеяськонзы кылем арын ялӥз вал устоезлы предприятилы конкурс. Та вакытлы огазеяськонын 90-лэсь ятыр предприятие лыдъяське ке но, ӵошатсконэ пыриськыны мылкыд каризы кӧняез ке гинэ. Устоеныз лыдъямын Ижевскысь вузкаронъя "Сови-центр". Кыкетӥ интыез басьтӥз Можгаысь вузкаронъя но калыклы юрттэт сётонъя "Мост" предприятие. Воткинскысь нянь пыжонъя "Нива" предприятие куинетӥ луиз. Ваньмыз ик соос пусъемын коньдон премиен. Конкурс туэ но азьланьтӥськоз. Таяз учыре вормисьёсты тросгес коньдонэн "дунояны" малпало. Л. Кимова. Город улонысь Ӟечлыксы вылӥынгес Ӟеч сямлы пӧрме ни кадь Ижевскысь нылпи садъёслы, санаторийёслы, нылпи юртъёслы сиён-юон ӵектӥсь предприятиос куспын конкурс ортчытъян. Тазьы ужан амал кельшиз городысь администрацилы: вузъёслэн дунъёссы - дунтэмгес нош ӟечлыксы - вылӥынгес. Кылем арын конкурс ортчытыса, город бюджетысь ог 5 миллион манет шыръямын вал. Отын вормем 22 предприятие но пӧртэм огазеяськон ар ӵоже вузъёссэс муниципалитет кулэяськонъёслы дасязы. 2001-тӥ арлы ужбергатӥсьёслэн нимъёссы ӧжытак воштӥськизы. Туэлы радъям конкурсэ пыриськыны 56 мылкыд карись люкаськиз вал. Но со пӧлысь 7-езлэн куриськонэз пӧртэм мугъёсъя соку ик палэнтэмын. Таос пӧлы ик шедизы Ижысь 5 номеро нянь пыжон завод, "Удмуртия" огазеяськон - 2000-тӥ арын конкурсын куронъёсты тыро-пыдо быдэсъямтэзы понна. Озьы туэ 23 предприятие вормисен лыдъямын. Город бюджетысь ог 7 миллион манет шыръяськыны кулэ. Э. Кумачева. "Ӟечбур!" лыдӟод, шуныт ветлод 29-тӥ толсуре "Ӟечбур!" газетлы 15-тӥ шуркынмонозь быдэс арлы гожтӥськемъёс пӧлын лотереяен шудон ортчиз. Кык муспотон нылъёс Алина но Настя Лукинаос, ог-огенызы вошъяськыса, лототронэз бергато. Квитанциослэн номеръёсынызы жетонъёсты бугыръяло. Сюлмо тыршо. Тани-тани тодмо луозы ни Шаркан трикотаж фабрикалэсь керттэм дӥсьёссэ утӥсь пиналъёс но дышетӥсьёс. Жюри сак чакла. Жетон лыдпусъёс 100,200 котыртӥ бергало: угось ваньзэ-ӧвӧлзэ 230 адямилэн квитанциез редакцие вуиз. Тани соос, шудоос: Марина Почесова (Аксакшур гурт, Пичи Пурга ёрос); Андрей Демидов (Бобья-Уча гурт, Пичи Пурга ёрос); П. А. Власов (Александрово гурт, Можга ёрос); Саша Панфилов (М. Воложикья гурт, Можга ёрос); Алена Петрова (Чем.-Куюк школа, Алнаш ёрос); Лена Черняева (Зямбай гурт, Вавож ёрос); Алиса Ефимова (Суроново гурт, Шаркан ёрос); Марина Осипова (Синяр-Бодья гурт, Кизнер ёрос); Марина Каракулова (Юски гурт, Кез ёрос); Люда Никитина (Кукмор ёрос, Вуж Юмья гурт, Татарстан); Дышетӥсьёс пӧлысь удалтӥз Пичи Пурга ёросысь Итэш школаысь Х. И. Васильевалы но Якшур-Бодья ёросысь Мукши школаысь В. В. Абросимовалы. Бадӟым тау тӥледлы, лыдӟисьёсмы! Азьланяз но газетмес ӵемгес учкылэ-бугыръялэ, оло, конкурсъёсы, викторинаосы пыриськемды пичияк ке но шумпотон вайылоз. Ми туж оскиськом. Нош керттэм дӥсьёс тӥледыз возьмало ини редакциын. *** Быдэс классэн гожтӥськемъёслы но нимысьтыз конкурс ялӥмы вал. Вормисьёс луизы Пичи Пурга ёросысь Вуж Монья школаысь 8-тӥ "а" классысь пиналъёс. Соос утӥзы фотоаппарат. Таӵе ик кузьым басьтозы Татарстанысь Балтаси ёросысь Шор Кушкет школаысь 5-тӥ классын дышетскисьёс. Вормисьёсмес ӟечкыласькомы но туспуктэмъёсыныды ӵош выль ужъёстэс витиськомы. Кузьымъёстэс басьтэмды луоз "Ӟечбур!" газетлэн редакциысьтыз. Быгатысалзы ке, умой луысал одӥг нуналэ, 26-тӥ январе 12 часлы лыктыса. Вань ке, сьӧрады вае нылпиостылэсь ИНН-зэс, ӧвӧл ке - асьтэлэсьсэ. Одӥгез утӥсьмы, Можга ёросысь Александрово школаысь Женя Власов, кофтазэ нуллэ ни. Утоз шуыса, пияш азьло ик оске вылэм. Мар бен, тазьы ик мед удалтоз солы азьланяз но. "Ӟечбур!" газетлэн редакциез. Туспуктэмез В. Беломорскихлэн. Юонэн но эрказъяськонэн нюръяськон 1999-тӥ ар 2000-тӥ ар Будӥзы яке кулэсмизы (поцентэн) Юыкузы, кудӟемен ӝегатэмын но милицие вуттэмын 152108 152203 +0,1 со пӧлын быдэ вуымтэос 2654 2344 -11,7 Сазьтӥзьконние интыямын 8571- 85691 -0,02 Милицие тыриськон тупатэмын 107222 100986 -5,8 Ужъёс судэ келямын 3911 4152 +6,1 Ас мылкыд каремзыя юонлэсь эмъяськыны келямын 750 87 -88,4 Нылпиоссы ульчаосын юыса возьматскемзы понна анай-атайёссылы протокол гожтэмын 1647 1650 +0,2 Пиналъёсты кужмысь сектамзы понна протокол гожтэмын 640 461 -27,9 Быдэ вуымтэослы аракаы узамзы понна протокол гожтэмын 343 352 +2,6 Вордскемзэс та нуналъёсы пусъё: Степнова Зоя Ивановна - "Сактон" ЗАО-лэн валтӥсь директорез; Медведев Юрий Иванович - "Бланкиздат" издательстволэн кивалтӥсез. Политика Арня ӵоже дуннеын, странаын, шаерын Та нуналъёсы быдэс Америкаын огыр-бугыр вал: ортчизы выль быръем президент Джордж Буш кивалтон биньгозыез кияз кутонлы сӥзем ужрадъёс. 20-тӥ январе вал инаугурация. Билл Клинтон табере - огшоры гражданин. Политикъёс дунъет сёто солэн тямыс ар ӵоже ужъёсызлы. Данакез пусъё солэсь визьмо политик луэмзэ, но соин ӵош верало, 42-тӥ президент США-лэн улоназ чутрак воштӥськонъёс ортчытыны ӧз быгаты шуыса. Кызьы гожтэ "Вашингтон таймс" газет, дуннеын но, пе, Клинтон ляб луэмзэ возьматӥз. Сербилэсь, Ираклэсь, Афганистанлэсь, Суданлэсь улосвылзэс пуштытъян изъян гинэ ваиз. Табере Америкалэн тушмонъёсыз валазы: США-лы пумит но нюръяськонын ракетаосты уже кутоно. Билл Клинтон озьы ик историе кылёз президентэн, кудзэ кыскизы импичмент улэ нылкышноен Моника Левинскиен матысь кусыпъёсыз но со пумысен эрекчаськемез понна. Нош кызьы меда дунъяло азьыл президентсэс огшоры американецъёс? Ӝыныезлэсь ятырез сое зэмзэ гажало. Юалляськонъёс но возьмато: Клинтон быръёнъёсы куинетӥзэ пыриськыны быгатысал ке, со одно ик вормысал. Мар понна бен ярато Клинтонэз? Котькыӵе со мед луоз, малпа огшоры американец, но потэмын калыкысь. Юись сюратаен но вить пол бызьылэм анаен будэтэм мурт Тӧдьы юртэ пырыны быгатӥз. Кылем средае Джордж Бушлэн инаугурацияз мынӥсь Павел Бородинэз, Россилэн но Белорусилэн Союззылэсь кун секретарьзэ, Нью-Йорк аэропортын ФБР кырмиз. Швейцариысь прокуратура Бородинэз янгыше усьткытэ кырсь амалэн коньдон поттэмез но сое Швейцариысь фирмаос пыр уже кутэмез понна. 2000-тӥ арын 31-тӥ январе швейцарецъёс Бородинэз дуннеын утчан (международный розыск) сярысь ялӥзы. Озьы Павел Павлович Белоруссие гинэ потаны быгатылӥз. Западысь мукет кунъёсын сое соку пытсэт сьӧры келясалзы. Озьы ик луиз Америкаын. Пусйыны кулэ, США но Швейцария куспын правоез утён удысын валче ужан сярысь тупанкыл но гожтэмын. Бородин тае тодытэк ӧз улы, дыр. Но дӥсьтонэз тырмиз, малпаз, оло, инаугурация вакытэ американецъёс керетон пуромытыны уз тырше шуыса. Аналитикъёс пусъё, Бородинлы тюрьмаын кемагес пуконо луоз. Вужез президент Билл Клинтон юрттыны ӧз вутты ни, вылез президент Джордж Буш шонтӥськыны быгатоз, кылдэм югдурез валаса ӧз вутты на шуыса. Мукетыз муг - США-ын закон туж зол ужа, соя президент суд вылэ зӥбыны уг быгаты. Нош Бородин оске: судын со ассэ шонере поттоз. Мар шуод, одӥгаз странаын президентэз вань калыкен быръё но данъяло, нош мукетаз вылӥ кивалтӥсьсэс виё. Ортчем арня вискын бырыны шедиз Конго Республикалэн (азьвыл Заир) Президентэз Лоран-Дезире Кабила. Сое аслаз ик охранникез абем. Конгоын кема дыр ӵоже ини пӧртэм выжыос куспын ожмаськон мынэ. Кабила пала дурбасьто Раундалэн но Угандалэн правительствооссы, нош Конгоысь демократия понна огазеяськонлы - Зимбабве, Ангола но Намибия. 18 толэзь талэсь азьло та кык кужымъёс одӥг кыл шедьтӥзы вал. Но Кабила солэсь палэнскыны кутскиз. Озьы ожмаськон выль кужымен пуромыны ӧдъяз. Калык президентэзлы оскемысь дугдӥз, армия но куашканы ӧдъяз. Пусйыны кулэ, Кабила 1960-тӥ арын ай дурбасьтӥз вал Патрис Лумумбалы, Конгоысь нырысетӥ правительстволэн кивалтӥсезлы. Лумумба трос кужымзэ сётӥз Конголэн эрикез понна, угось вордскем музъемез 1960-тӥ арозь Бельгилэн колониез вал.. Лумумбаез кивалтонлэсь палэнтӥзы но странаысь уллязы. Бӧрысьгес со лушкем берытскиз, пичизэ нылзэ ватон понна. Но Лумумбаез кырмизы но 1960-тӥ арын 17-тӥ январе ыбизы. Вераны кулэ, Патрис Лумумбалы туж зол дубасьтэ вал Москва. Кабила но ватӥськыса кема улоно луиз, со дыре кужым люказ. 1996-тӥ арын, восстание ӝутыса, властез кияз басьтӥз: национальной партиосты пытсаз, аслаз азьвыл эшъёсыныз Раундаен но Угандаен керетӥз. Та ик сое быронэ вуттӥз Выль арысен ик Россилэн кивалтӥсьёсыз секыт ужпумен выроно луизы: странамы Париж клублы пунэмзэ берыктыны кулэ. Сое ӝегатыны дыр ӧвӧл ни, нош тырид ке - кунлэн экономикаез воксё куашкалоз. Нош кредиторъёслэн витемзы уг поты ни. Россия коньдон поттэ ук, шуо соос, кылсярысь, му вӧй вузаса ик. Нялтас вералом, ОПЕК-е пырись кунъёс нефть поттонзэс нош ик кулэстӥзы. Соос кышкало дунъёс мултэс усемлэсь. Тани 1998-тӥ арын 1 баррель нефть воксё 10 доллар сылэ вылэм. Ортчем арня Россиысь кӧня ке улосъёсын йыр быръёнлы йылпумъянъёс лэсьтэмын. Тани Тюменьын вормиз Россилэн Президентэзлы дурбасьтӥсь Собянин. Нош Ульяновск улосын (со пыре Приволжск округе) кивалтыны кутскиз Александр Шаманов. Чечен ож пыр потэм генераллы улосысь уноез ужаса улӥсьёс дурбасьтӥзы. Ю. Александрова. Россилэн Президентэз ыстӥз гожтэт Кылем ар пумын Сарапулысь калык писатель Лидия Федорченко-Шемякина берло потэм "Жизнь во дворцах" но "Императорские сокровища" книгаоссэ келяз вал Москвае, Россилэн Президентэзлы шуыса. Владимир Путин таӵе гожтэтлы шуныт вазиськон но ас кинюртэменыз "От первого лица" книга ыстэм. "Атыкай музъеммылэсь историзэ дунъямды но данъямды понна бадӟым тау. Ортчемзэ тодэ вайыса, асьмеос кыдатӥськом осконмес но кужыммес", - гожтэ Президент. Н.Липина. Россиын, Удмуртиын но бускель улосвылъёсын йыружъёсъя югдур Улосвыл Ваньмыз Будӥзы яке кулэсмизы (процентэн) Шараямын Быдэ вуымтэосын лэсьтэмын Азьвыл пукемъёсын Кудӟемъёсын Ульчаосын Ваньмыз Будӥзы яке кулэсмизы (процентэн) Ваньмыз Будӥзы яке кулэсизы (процентэн) Ваньмыз Будӥзы яке кулэсмизы (процентэн) Ваньмыз Будӥзы яке кулэсмизы (процентэн) Россия 2552367 -1,6 75,6 195426 -6,2 651522 -5,9 442656 -9,3 163498 -6,5 Удмуртия 30126 -7,5 73,9 2078 -16,7 7639 -15,8 5111 -22,9 1768 -5,9 Пермь улос 81652 -13,4 67,9 7693 +1,3 22571 -6,8 16729 -11,5 6309 -25,5 Башкортостан 48138 +3,7 86,2 3499 -3,2 10625 -4,7 9720 -9,3 2430 -4,9 Татарстан 70238 -2,7 77,5 4056 -3,5 12126 -4,0 8566 -4,7 4124 -6,0 Киров улос 29719 -3,3 76,1 2721 -2,8 7272 -1,4 6528 -8,0 1368 -29,2 Курган улос 42294 -0,3 63,6 2217 -12,8 8515 -12,3 7469 -9,1 945 +7,3 Оренбург улос 41365 -11,3 81,4 2318 -15,2 8610 -12,1 6192 -14,9 556 -24,8 ГОЖТӤСЬКОН-2001 Вай, эше, бур кидэ Республикаямы потӥсь газет-журналъёсын лыдӟись матэгес тодматскысал ке, соослэн тиражзы трослы йылысал - удмурт кылын потӥсьёсыз сярысь верасько, удмуртъёс понна сюлэм бӧрдэ угось. Газет-журналъёсын тодматскон, пумиськонъёс, сюлмысь вераськонъёс, озьы ик пӧртэм конкурсъёс, лотереяен шудонъёс лыдӟисьёслэсь лыдзэс шӧдскымон йылэто вылэм. Со сярысь верало Алнашын, Балезиноын, Глазовын, Ижевскын, Играын, Кизнерын, Кезын, Пичи Пургаын, Можгаын, Якшур-Бодьяын, Ярын 13-тӥ декабрьысен 25-тӥ декабрёзь ортчытэм гожтӥськисьлэн нуналъёсыз. Та ёросъёсын гожтӥськон лябгес мынэмен, республикаысьтымы Почта кусыпъёсъя управление, шаерысьтымы кун газет-журналъёсын огазеяськыса, гожтӥськон йылпумъяськон азьын эскерон выллем ужрад ортчытыны малпаз. Солэн кулэлыкез сярысь лыдпусъёс асьсэос верало. Та нуналъёс ӵоже гинэ та ёросъёсын 5811 изданилы гожтӥськемын, со пӧлын: кун газет-журналъёслы - 2558, ёрос газетъёслы - 1952. "Удмуртская правда" газетлы гожтӥськиз 1016 мурт (тужгес но трос гожтӥськемын Ижевскын - 192, Балезиноын - 170, Играын - 164); "Известия Удмуртской Республики" газетлы - 567 мурт (Ижевскын - 129, Ярын - 106); "Ӟечбур!" газетлы - 212 (Пичи Пургаын - 55, Алнашын - 42, Ярын - 42); бигер кылын потӥсь "Янарыш" газетлы - 13 (ваньмыз Можгаын); "Инвожо" журналлы - 42 (Пичи Пургаын - 12); "Кизили" журналлы - 130 (Алнашын - 35, Ярын - 26); "Кенеш" журналлы - 80 (Можгаын - 20; Алнашын - 15); "Вордскем кыл" журналлы - 23 (Пичи Пургаын - 7; Можгаын - 6). "Удмурт дунне" газетлы гожтӥськон йылӥз 475-лы, ёросъёсъя тамында лыдпус люкаськиз: Алнашын - 98, Балезиноын - 30, Глазовын - 6, Ижевскын - 10, Играын - 45, Кизнерын - 16, Кезын - 22, Пичи Пургаын - 153, Можгаын - 70, Якшур-Бодьяын - 12, Ярын - 13. Кин ке, оло, гожтӥськонзэ юри берпум нуналлы кельтӥз вал, кӧня ке дыр ӵоже люкиськемез бере кин ке выльысь яратоно газетэныз пумиськиз, нош кин ке нырысьсэ гожтӥськиз "Удмурт дуннелы". Котькызьы медло ни, тӥ - милемын ӵош, нош ми - тӥледын ӵош. Малпаськомы, эшъяськонмы кема аръёслы кыстӥськоз. Выль даурлэн нырысь нуналъёсысеныз ми тӥледды пыртӥськом зэмос эшъёсмы пӧлы. Нош тодэмды потэ-а, кӧня милям соос? Туж трос. Зэм, кӧнязэ ке кызетӥ дауре киргатыса кельтӥм, нош потэ вылэм эшшо но тросгес коркаосы йыгаськеммы. Ыштонъёс но шедьтонъёс 2000-тӥ арын 1-тӥ январьлы газетмылы 12500 мурт гожтӥськемын ке вал, таяз арын сюрслэсь ятыр лыдӟисьёсмес ыштӥм. Тани Шаркан районын "Удмурт дуннелы" почта пыр кылем арын гожтӥськиз вал 1600 мурт, нош туэ 1-тӥ январьысен газетмес басьтыны мылкыд кариз 1289 мурт: Республикаысьтымы Почта кусыпъёсъя управленилэн Шаркан районысь ёзэзлэн кивалтӥсез Виктор Мушин лыдӟисьёсмес ыштэм мугез валэктӥз адямиослэн ӧжыт но ӝегаса уждун басьтэменызы. Мувыр почта ёзын та районъя тужгес но трос гожтӥськисьёс вал - 185 мурт, туэлы гожтӥськиз 121 адями. Татысь почта ёзлэн кивалтӥсез Татьяна Наговицына лыдӟисьёслэсь ӧжыт луэмзэс озьы ик валэктӥз гурт хозяйстволэн секыт югдуре шедеменыз. "Удмурт дуннеез" Можга палъёс но трос лыдӟо, но лыдпусъёс татын но кулэсмизы. Кылем арын вал 1228, нош туэ - 1127. Сыӵегес ик югдур мукет районъёсъя. Но вань шумпоттӥсь лыдпусъёс но. Алнашын кылем арын 1780 мурт ке гожтӥськиз, туэ - 1886; Пичи Пургаын вал 1580, луиз 1671. "Удмурт дуннеез" тужгес но ӧжыт басьто Каракулино (3) но Камбарка районъёсын (4). Республикаямы потӥсь мукет удмурт кун изданиос сярысь ке верано, таяз арын 1-тӥ январьлы почта пыр тамында гожтӥськемын: "Ӟечбур!" - 3428, "Кизили" - 1177, "Кенеш" - 911, "Инвожо" - 878, "Вордскем кыл" - 666. Шумпотӥськом , "Ӟечбур!" газет понна, солэн тиражез туэ кык поллы йылӥз. Татын шӧдӥськытэк ӧз кыльы выль валтӥсь редакторлэн Надежда Лопатиналэн нылпиослы гзет шоры выль синмын учкемез. Ӝоген тодон вормисьёсты Почтальонъёс но лыдӟисьёс чидатэк возьмало ни, луоз, конкурслы йылпумъянъёсты. Выль лыдӟисьёсмы, оло, уг тодо мар сярысь вераськон мынэ. Газетмес 30 экземплярлэсь ятыр гожтэм почтальонъёс пӧлын туэ ортчытом лотерея. Шудоез утоз "Завьяловский" санаторий-профилакторие путёвка, луозы на мукет синпель кузьымъёс. Пусйытэк ум кельтэ газетмес тужгес но трос вӧлмытӥсь почтальонэз. Шудоез лыдӟисьмы но жадиз ни, дыр, ошпиез возьмаса. Ӧжытакчидалэ на. Вань ёрос почта ёзъёсысь устоез почтальонъёсъя ивортонъёс вуизы ке, ӝегатскытэк пуксёмы лотерея шудонъя комиссия кылдытонэ. Малпаськомы, февраль толэзьлэн нырысетӥ нуналъёсаз кыкезлы но конкурслы йылпумъянъёс лэсьтомы ни. Беромиллям Таиз ивортонмы Ижевскын улӥсь лыдӟисьёслы. Куд-огез бере кылиллям "Информпечатьлэн" киоскъёсыз пыр гожтӥськыны, табере паймо кытысь газет басьтыны. Киоскъёсын гожтӥськон ялэмын вал бере ӝыны арлы яке быдэс арлы, гожтӥськоно луоз ни почта пыр. Яке газет потон нуналъёсы киоскысь дунэн басьтоно. Татын нош ик шуг- секытъёс кылдыны быгатозы: басьясьёс луымтэен, газет котькудаз киоскын уг вузаськы. Соин ик, юанъёсты кылдӥзы ке, вазиське редакцие. Л.МАЛЫХ. Куинь даурын улэ ни Сю ареслэсь ортчем песяй-песянайёсмы асьмелэн чиньыен чотамон гинэ кылемын. Соин ик таӵеос шоры котьку ик паймыса но, оло, вожъяськыса но учкиськод. Сарапул ёросысь Агриппина Килина туэ 104 арес тырмонзэ пусйыны дасяське ни. Дас укмыс даурлэн пумаз вордскыса, табере со кызь одӥгетӥ дауре вамыштӥз. Тазалыкеныз Грушапай ушъяскьыны уг быгаты ни ке но, ассэ чупрес возе на - быгатэмъяз пиналъёсызлы, соослэн нылпиоссылы юрттыны тырше. Пичиысен ик со узыръёслэсь нылпиоссэ утьыса улӥз, собере госпитальысь сӧсыръёсты утялтӥз, заводысь станокъёс дорын сылӥз, нюлэс кораз... Ужтэк пукемез ӧвӧл. Оло, соин но таӵе кема улыны кылдӥз солы, малпа ачиз Агрипина Федоровна. Н. Липина. Куанеръёслы - дунтэк газет "Знамя Октября" ёрос газетсылы туэ тросэз юкаменскъёс гожтӥськыны ӧз быгатэ. Нош 1-тӥ толшоре соослы газет вуыны кутскиз. Кызьы озьы? Ёросысь почтаын но администрациын ужасьёс куспазы кенешизы но, калыклы улон-вылонын юрттэт сётонъя фондысь коньдон висъяса, ёрмыса улӥсьёслы 2001-тӥ арлы газет гожтӥзы. Ужтэк кылемъёслэн нылпиоссы но, оло, выль ар кузьымтэк кыльысалзы. Но кивалтӥсьёс нылпиос сярысь ӧз вунэтэ. 14 аресозь 50 пиналъёслы дунтэк салам сётӥзы. Эшшо 100 нылпилы быдэн 60 манетэн коньдон висъязы на. П. Николаев. Валтозы тужгес чупресъёсыз Кылемаз арняе Удмурт кун филармонилэн юртаз лулысь-сюлмысь радъяськиз "Удмурт кенеш" огазеяськонлэн Пичи кенешезлэн ужез. Люкаськемъёс эскеризы данак кулэ ужпумъёсты. Пичи кенеше быръемъёс тодматскизы исполкоме дэмлам адямиосын, пӧртэм удысъёсъя комиссиосын, соослэн тӧроосынызы, озьы ик юнматӥзы эскерись комиссилы кивалтӥсь, "Удмурт кенеш" огазеяськонлэн тӧроезлы воштӥсь. Исполкоме таяз учыре но ӵектэмын шаерысьтымы йӧно, визьмо, дано адямиос. Сюлмаськытӥсь ужпумъёс бордын кӧня ке ар ӵоже тыршозы "Удмурт кенеш" огазеяськонлэн тӧроез Валентин Кузьмич Тубылов, шаерысьтымы удмурт нылкышноослэн огазеяськонзылэн тӧроез Галина Аркадьевна Никитина, Дэри ёросысь "Путь Ильича" колхозлэн-племзаводлэн тӧроез Валериан Арсентьевич Никитин, "Удмурт кенеш" огазеяськонлэн Ижысь ёзэзлэн кивалтӥсез Илья Михайлович Байметов, Удмурт кун филармонилэн чеберлыкъя кивалтӥсез Валерий Яковлевич Митрофанов, Дышетӥсьёслэсь тодон-валанзэс будэтонъя институтысь дышетскон книга поттӥсь ёзлэн кивалтӥсез Нина Игнатьевна Малых, калык депутатъёслэн Можга райсоветсылэн тӧроез Иван Вилорьевич Окулов, Удмурт радиоысь журналист Вячеслав Дмитриевич Михайлов, "Удмурт кенеш" огазеяськонлэн Балезино ёросысь ёзэзлэн тӧроез Лидия Фёдоровна Иванова, Ижысь электромеханикая "Купол" заводысь конструкторъёслэн бюрозылэн йырыз Илья Михайлович Викторов, Драмая удмурт кун театрлэн тӧроезлэн воштӥсез Геннадий Семёнович Корепанов, Удмурт кун университетысь улон-вылонъя факультетлэн деканэз Анатолий Васильевич Ишмуратов, Эгра (Игра) ёросысь "Ӟардон" ("Рассвет") колхозлэн тӧроез Иван Петрович Чирков, Удмурт элькунысь Нациосын ужан политикая министерствоысь валтӥсь удысчи Ирина Михайловна Зорина, Глаз пединститутысь дышетӥсь Сергей Михайлович Бабинцев, Удмурт егитъёслэн "Эрик" огазеяськонзылэн тӧроез Алексей Семёнович Терентьев, "Удмурт кенеш" огазеяськонлэн "Герд" газетэзлэн редакторез Александр Алексеевич Вахрушев, Удмурт кун университетысь кылтодонъя факультетысь дышетӥсь Галина Николаевна Шушакова, калык депутатъёслэн Алнаш райсоветсылэн тӧроез Нина Андреевна Образцова, "Удмурт кенеш" огазеяськонлэн кыл кутӥсь секретарез Елена Константиновна Александрова, юрист Олег Юрьевич Юскин, Башкириысь вань удмуртъёслэн огазеяськонзылэн тӧроез Ренат Биктимирович Галямшин. Кӧня ке ар ӵоже ужалозы политикая, пӧртэм ужпумъёсты радъянъя, иворъёсын герӟаськем ёзъёсын ужанъя, наукая, дышетонъя, лулчеберлыкез, тазалыкез утёнъя, экономикая но экологияя комиссиос. Соосын кивалтозы ас удыссэс тодӥсь-валась адямиос. Та нуналэ ик быръемын "Удмурт кенеш" огазеяськонлэн тӧроезлы воштӥсь. Та ужез табере быдэсъялоз Удмурт кун университетысь дышетӥсь, калыклы тодон-валан сётӥсь адямиослэн ёззылэн йырыз Галина Николаевна Шушакова. Ӧтчаме люкаськемъёс озьы ик тодыны быгатӥзы Куӟебай Герд нимо премилэсь выль лауреатъёссэ. Соос - шаерысьтымы тодмо этнограф Удмурт Элькунысь Куӟебай Герд нимо шаеръюртын ужась Серафима Христофоровна Лебедева но тодмо гожъясь Удмурт Элькунысь Писательёслэн огазеяськонзылэн тӧроезлэн воштӥсез Никвлад (Владимир Яковлевич) Самсонов. Лыктэмъёс азьын ӟырдыт вераськиз Удмурт Элькунысь Кун Кенешлэн Тӧроезлэн нырысетӥ воштӥсез Павел Николаевич Вершинин. Пичи кенешлэсь ужзэ радъяз "Удмурт кенеш" огазеяськонлэн тӧроез Валентин Кузьмич Тубылов. Е.РОМАШОВА. Шаерысьтымы ёросъёсын но городъёсын йыружъёсын нюръяськон Ёросъёс но городъёс Ваньмыз йыружъёс Будӥзы яке кулэсмизы (процентэн) Шараямын (процентэн) Ёросъёс но городъёс Ваньмыз йыружъёс Будӥзы яке кулэсмизы (процентэн) Шараямын (процентэн) Устинов 2246 - 7,3 73,8 Грахово 143 -19,2 87,2 Индустриальной 2319 -1,8 70.4 Дэбес 237 -12,2 93,6 Ленин 2463 - 11,8 68,7 Завьялово 1234 - 22,5 69,3 Октябрь 2821 3,4 64,6 Мгра 573 -16,5 87,6 Первомай 3017 +2,2 63,8 Камбарка 466 -18,8 87,4 Ижевск город 12868 -4,4 76,8 Каракулино 315 -11,8 86,0 Воткинск ёрос 2596 -11,7 74,2 Кез 437 -9,3 93,1 Воткинск город 1995 -14,2 73,8 Кизнер 437 -9,3 93,1 Глазов ёрос 499 -17,2 80,2 Киясово 256 +13,3 94,1 Глазов город 1949 -9,9 70,5 Красногорье 225 -2,2 91,4 Можга ёрос 949 -5,0 86.2 Пичи Пурга 510 -0,4 89,0 Можга город 588 -5,9 84,8 Селта 230 -2,5 95,1 Сарапул ёрос 620 -14,4 77,2 Сюмси 368 -39,4 80,3 Сарапул город 2432 -10,2 68,8 Ува 696 -14,1 75,2 Алнаш 255 +12,8 86,6 Шаркан 236 -22,4 89,0 Балезино 550 +12,2 75,8 Юкаменск 168 -3,4 83,3 Вавож 245 -5,8 93,9 Якшур-Бодья 465 -11,4 82,1 Яр 223 +4,2 83,3 Кышномурт ӧз ваты арлыдзэ Сюрес вылын шудтэм учыръёслэсь утиськон удысын, ГИБДД-ын, кышноос сокем трос ӧвӧл. Нош полковникъёс чиньыен лыдӟымон - быдэс Россиын куинь гинэ. Огез - асьме кун инспекциын Татьяна Осетрова. Татьяна Александровнаез ӟеч тодо лыдӟисьёс но, телевизор учкисьёс но. "Удмурт дуннеын" со кӧня ке ар ӵоже поттылӥз ГАИ-лы сӥзем пичи газет. Полковник арлыдзэ уг ваты. Алигес солы 50 тырмиз. Ватэм гинэ ӧвӧл - аресэныз данъяське. Кызьы сотэк? Тусыныз но, мылкыдыныз но пинал лейтенантлы кельше уга. Татьяна Осетроваез та нуналъёсы ӟечкылазы Правительстволэн тӧроезлэн воштӥсез Николай Хохлов, югдурез утёнъя министр Владимир Щербаков, "Удмурт дуннелэн" уно но мукет организациослэн кивалтӥсьёссы. Куноос пӧлын вал кык нылкышноос- полковникъёс - Ставропольысь, Ростов-на-Дону городъёсысь лыктэмъёс. И. Никитин. Юрттыны котьку дась Россия Федерациын кӧня ке ар талэсь азьло кылдытэмын Шугадӟонлэсь утиськонъя министерство. Табере интыосын солэн ёзъёсыз кылдытэмын. Тани Сарапулын сыӵе служба ужа ни. Отын али куать кузя кужмо егит воргоронъёс тыршо. Отрядэн кивалтэ А.Д.Головченко. Зэм, отрядлэн ваньмыз кулэ оборудованизы ӧвӧл на. Но сётэмын ни легковой машина. Головченко ачиз 10 ар ӵоже альпинист луэ бере, уно тӥрлыксэ отрядэ ваиз. Кулэ на та чырмыт пиосмуртъёслы кортэз вандыны, бетон плитаосты ӝутъяны, ву пушкы лэзиськыны тӥрлык. Городысь предприятиос юрттӥзы ке, уж азинскоз. Пусйымон соиз, шуге-леке сюремъёслы юрттыны котьку дась луись адямиос Сарапулын шедизы ни. П.СКОБЕЛЕВ. Усто токарь но дышетӥсь Кыдёкысь Пенза городысь 17 аресъем пияш Александр Заплетин 1966-тӥ арын Ижевске вуиз. Ужаны "Буммаш" заводэ пыриз. Егит токарь ужез борды мылысь-кыдысь басьтӥськиз. Озьы ужаны мылкыдзэ бурдъялляз солэн мастерез но. Ӝоген Александр одӥг смена ӵоже нормазэ 110-115 процентозь быдэсъяны кутскиз. Ӟеч детальёс лэсьтыны быгатэмез понна вакчи дыр куспын солы лэзё продукцизэ ас нимыныз (клеймоеныз) поттыны. Кӧня ке дыр ортчыса, Александр Ивановичез бригадире пукто, табере со ачиз дышетэ ни егит токарьёсты. Татчы соос вуылӥзы, Ижысь 17 номеро училищеез йылпумъяса. Егитъёсты ужаны ялан дышетылэмез понна со арысь аре одӥгез устоез наставник луылӥз. Заводын ужатозяз токарьлэн ужезлы со 30 муртэ дышетӥз. Александр Иванович - заводлэн огез сӥё-дано ветеранэз. Со - быдэс улонзэ ялан одӥг интыын гинэ тыршем адями - ялан сюлмаське коллективез сярысь. Ас семьяез сярысь кадь куректэ ужын кыӵе ке шуг-секытъёс кылдылыку но сюлмысьтыз шумпотэ коллективезлэн азинсконъёсыз понна. В. Беломорских. Чеберлыклы дышетско Юкаменскысь искусствоосъя школалы туэ апреле 30 ар тырмоз. Та юбилейзэс тунсыко пумитаны дасясько дышетӥсьёс но, дышетскисьёс но - вань ӟеч ужъёссэс дано нуналлы сӥзё. Тани Залина Митюкова пианиноен ӟеч шудэ. Бӧрсьысь куинь ар ӵоже со дышетӥсеныз Н. Шамшуринэн ӵош Ижевскын ортчылӥсь конкурсэ ветлӥз. Выль ар азьын Залина Ижевскысь ИИ степенё дипломен бертӥз. Чеберез валан егитъёслы пыӵа кырӟан-эктон пыр. Пинал артистъёс концертъёсын вуылӥзы ни "Шунды", "Ладушка" но "Кызьпу" нылпи садъёсы, ёросысь культура юртэ. Апреле бадӟым концерт возьматозы асьсэ школаын, юбилейзылы сӥзьыса. Нош универмаге пырисьёсты нырысь ик палёмыто искусствоя школаысь нылпиослэн чебер суредъёссы: натюрмортъёс, портретъёс, инкуазь, графика. Тросгес суредаллям дышетӥсьлэн М. Бабинцевлэн классъёсысьтыз пиналъёс. Бен, чеберлы дышетон будӥсь пиналэз пичи дырысеныз тунсыко улонэ ӧте. П. Николаев. Чечняысь гожтэт Кез посёлокысь Филонида Михайловна но Леонид Александрович Мироновъёс Чечня Республикаысь Веденской ёросысь тау карон гожтэт басьтӥзы. Соослэн Сергей пизы отчы вуылӥз Пермьысь милиционеръёсын ӵош, ужъя командировкае шуыса. Ассэ визьмо, кышкасьтэм воземез но азяз пуктэм куронъёсты дырыз дыръя но ӟеч быдэсъямез понна, Удмуртиысь милиционер "За отличие в службе ВВ МВД" гадьпусэн пусъемын. Э.ВАСИЛЬЕВА. Одӥгез шумпоттэ, мукетыз сюлэмшугъяськытэ, шуэ Удмуртиысь МВД-лэн министрез В.Ф.Щербаков Удмурт Республикаысь югдурез утёнъя министр милициысь генерал-лейтенант Владимир Щербаков журналистъёсын пумиськыкуз, соку ик ивортӥз: - Удмуртиын югдур капчи ӧвӧл. Со секыт вал кылем арын но. Йыртэмасьёсын нюръяськем сяна, милиция пыриськиз Россилы но Удмуртилы президентэз быръёнэ. Бадӟым ужрад ортчытӥськиз "Вихрь-антитеррор" операциен валче. Милям ужасьёсмы ке но уг тырмо, тырмыт коньдон ке но уг висъяло, милиция ужа, ас азяз пуктэм ужпумъёссэ быдэсъя. Милицилэн куд-ог ивортонъёсысьтыз. 9-тӥ январь: "Таяз уй-нунал ӵоже Удмуртиын 48 йыруж лэсьтэмын, 42-сэ милициын ужасьёс шарязы ни. 11 пол вал ваньбурез лушкан учыр, 1 пол - автотранспотэз. Ульчаосысь палэнтэмын 474 кудӟем мурт, соос пӧлысь 195-ез кӧлӥзы сазьтӥськонниын. Эразъяськемзы понна коньдон тырон тупатэмын 172 муртлы. Милиция 46 пол потаз "урмем" семьяосты буйгатыны. Сюресъёс вылын вал 1 шудтэм учыр, 1 адями сӧсырмиз. Вал 4 тылпу, 2 мурт вӧсь луиз. Устинов РОВД уговловной розыскын ужасьёс ӝегатӥзы 29 аресъем воргоронэз. Со янгыше уськытӥське Сабуров ульчаысь 31-тӥ юртысь но Союзной ульчаысь 71-тӥ юртысь улон интыосы лушкаськыны пырамез понна. Куд-ог лушкам ваньбур шараямын солэн квартираысьтыз. Вормонлы 40 ар ульчаысь 92-тӥ юрт дорын ӝегатэмын азьвыл суд улэ шедьылэм 21 аресъем Роман. Со наркотик вуза вал. Первомай ёросысь "Звёздный" бар дорын героинэн кырмемын "Удмуртнефть-бурение" акционер огазеяськонысь 17 аресъем слесарь Александр. Завьялово РОВД-ын ужасьёс шараязы Ӟуч Вожой гуртлэн магазинысьтыз аракы лушкасез, та гуртысь ик 21 аресъем Константинэз. Выль ар шулдыръяськонэз ортчытыку, со 2,6 сюрс манетлы курыт ву поттэм. Та уе ик Воткинск ёросысь Кельчино черкогуртысь пенсие потэм В.-лэн коркаяз укнозэ басьтыса тодмотэм мурт пырам но сиён-юонзэ поттэм. Уин "ужам" вылэм та гуртысь ик 8-тӥ классын дышетскись 14 аресъем Алксандр..." 15-тӥ январь: "Союзной ульчаысен героинэн ӝегатэмын Александр. Пытсэт сьӧрын пукылэмын ни. 15-тӥ январе потон уе Игра ёросысь Факел посёлокысь 60 аресъем Валентин ӵош юэмзы бере, вожаса 70 аресъем кузпалзэ Лилияез жугиз. Кышномурт со уе ик кулӥз. 22 час 30 минутэ Сарапулысь Советской ульчаысен 18 аресъем В. пияшез куинь тодмотэм пиос дугдытӥзы. Пуртэн кышкатыса дӥськутсэ но мукет арбериоссэ талазы. Нечкино селоысь азьвыл пукем куинь егит пиос ӝегатэмын. Воткинскын улӥсь пенсионерлэн квартираяз усьтон бырйыса пыраллям но 1,7 сюрс манетлэсь унолы электроприборъёс "маялтӥллям". Лушкаськемез понна ӝагатэмын пенсионерлэн со ульчаысь ик улӥсь 21 аресъем бускелез Артём. 15-тӥ январе выжон уе Якшур-Бодья ёросысь Кыква гуртлэн фермаысьтыз 120 кило секталаем кунян лушкамын. РОВД ӝегатӥз та гуртын ик улӥсь воргоронъёсты - Василиез но Андреез. Кунян сӥлез уин "яратӥсьёс" табере кыл кутоно луозы..." 16-тӥ январь: "Ленин ёросын героинэн вузкарыкуз ӝегатэмын 16 аресъем Марина. Озьы ик Строительёслэн городоказы героинэн кутэмын 19 аресъем Татьяна. Милиция солэсь 3,37 грамм наркотиксэ шедьтӥз. Устинов ёросысь "Старт" автокооперативысь шедьтэмын Омскысь кылем арын 20-тӥ декабре лушкам ВАЗ-21093 автомобиль. Ӝегатэмын 26 аресъем ослопъёс Андрей но Николай. Нырысетӥез пытсэт сьӧрын пукыны вуэм ни..." 17-тӥ январь: "Ӵукна 9 часэ мыныку, Бородин ульчаысь "Лучано" кафелэн кассая аппаратысьтыз татын азьвыл ужам 23 аресъем Алексей шара лушказ 46 сюрс манет. Пегӟыны ӧз вуы, Октябрь РОВД но ведомствое пырисьтэм интыосты возьмасьёс йыртэмасез кутӥзы..." 18-тӥ январь: "Со нуналэ 7 тылпу вал, 4 мурт быриз, одӥгез сутскиз. Кык адями ӝегатэмын героинэн. Вить часын ӵукна Воткинск ёросысь Болгуры станциысь Железнодорожной ульчаын улон юрт ӝуаз. Ӵынэн ӝокаса тылпуын быризы кык пенсионеръёс - 89 аресъем Александра но 59 аресъем Степан. Мугзэ валэкто: тылпу потӥз юэм йырын чакласькытэк тылскемлэсь. Куинь часын ӵукна Балезино посёлоке интыяськем войсковой частьын тылпу потӥз. Сутскиз мунчо. Отын быриз 50 аресъем Геннадий. Юэменыз со кышноеныз кусыпсэ ыштӥз но улыны мунчое выжиз. Таиз но тылпу аракыен герӟаськемын..." Татын басьтэмын кӧня ке нунал гинэ, сётэмын кӧня учыр гинэ. Нош соос, оло, часлы быдэ луыло. Асьмеос уго милицилэсь ужзэ ӵем дыръя адӟытэк но кельтӥськом, тодамы ваиськом кулэ дыръяз гинэ. Кызьы меда оглом ужаз милиция ортчем арын? Огъя верано ке, югдур каллен ке но, пумен умояны ӧдъя. Миым йыружъёслэн лыдзы 7,5 процентлы кулэсмиз. Со тужгес но шӧдӥськиз Грахово, Завьялово, Камбарка ёросъёсын. Ӧжытгес пумиськыло юромо виылон учыръёс. Югдур лякытгес луэ ульчаосын, быдэ вуымтэос пӧлын. Умоя йыружъёсты шараян но соосты судозь вуттон. Автомототранспортэз лушкан кулэсмиз 16,6 процентлы. Йырзэс ӝуто на радъям йыруж лэсьтӥсь гыжкалъёс. Соос 1999-тӥ арын укмыс адямиез виизы, 53 пол секыт сӧсыртылӥзы. Кыл кутытонэ кыскемын 211 йырвандӥсь. Тужгес но сюлэмшугъяськытэ наркомания. Та секыт висён ялан аля но аля, тужгес но егитъёс пӧлын. Нош наркоман со туж кышкыт луэ. Усыкмытӥсь суретэз шедьтон понна со котьма лэсьтыны быгатоз - лушкалоз но, тышкалоз но, виёз но, тыл но поноз. Со дыре ик наркотик вузасьёс миллионъёс пӧлын "пыласько", шуыны луоз. Правоосты утён органъёс, ФСБ но мукет ёзъёс кылем арын 164 килолэсь уно (117 миллион манетлы) наркотикъёсты талазы. Кӧня мурт утемын вал секыт висёнлэсь. Зэм, буйгатскыны уг луы на. Наркотик вуттон сюресъёс пытсамын ӧвӧл на, соослэн лыдзы ялан йылэ. Выжыоссэ ялан мургес но мургес лэзе "вож кый". Юыса уно йыружъёс лэсьтӥсько котькуд городын, ёросын, гуртын. Соос тужгес но шараяськизы Вавож, Грах, Сюмси ёросъёсын. Али аракы пӧзьтонлэсь ватскись ӧвӧл ни, "зын вуэз" шара виято. Берло дыре, тужгес но городъёсын, вузасько спиртэн дунтэм суретъёс - лосьонъёс, одеколонъёс. Соосты юыса адями шузиме. Вал ини ӵош юыса ог-огзэс виылон учыръёс но. Мукетыз сюлэмшугъяскытӥсь югдур. Пыӵал тӥрлыкен но пуштӥсь арбериосын вузкарон. Кылем арын гинэ таламын Калашниковлэн 18 автоматэз, асьсэ киын лэсьтэм 78 пыӵал, 14 граната. Пумиськыло пыӵал тӥрлык лэсьтон заводысь лушаськон учыръёс, миым со 2 пол шараямын вал. Эшшо вань на мукетыз но секыт висён - дуно но сьӧд кортъёсты лушкан, вузан но соосты басьтон. Али лошъяськись кортэз уд шедьты ни. Вандыло езъёсты, тӥяло лифтъёсты, "сузяло" сад-бакчаосты... Шуоды, нош милиция кытчы учке? Милиция нюръяське. Али корт басьтыны сётэмын 10 лицензия гинэ. Нош огвакытэ республикаямы кортэз басьтонъя кутэм законэн лицензия басьтыны быгатэ вал котькудӥз мылкыд карись. Со закон Россия Федерацилэн Законэзлы уг тупа вал. Табере югдур воштӥське. Верало на таӵе учырез. Унояз улосъёсын светофоръёс но ӧвӧл ни. Соосты корт люкасьёс лушказы. Табере ульчаосын регулировщикъёс сыло ни. Соин ик ми вань светофоръёсмес ватсаса сваркаен юнматылӥм. Тӥни сыӵе улонэ вуим. Министрлы сётэмын вал таӵе юан но: "Кылем арын "Березовая роща" шутэтскон лагерьысь чиптэм-чаптэм ышиз Наталья Зорина. Со пумысен маке тодмо-а ни?" Кызьы ивортӥз Владимир Щербков, та учырез эскерыса возе Удмурт Республикалэн Президентэз но. Ышем нылашез утчан ласянь туж бадӟым уж лэсьтэмын ни. Уно пиналъёслэсь юалляськемын. Вань осконтэм адямиос но. Кусыпъёс тупатэмын куд-ог улосъёсын, татӥ ортчылӥсь "дальнобойщикъёсын" (озьы нимало кузь сюрес вылэ рейсъёсын потась водительёсты - Н.Б.). Журналистъёс тунсыкъяськизы Ижевскысь автозаводэн но. Уго азьвыл аръёсы отын лушкаськон пушъемын вал. Отысь воштос ёзъёсты гинэ ӧвӧл, быдэс мшинаосты но капчиен поттылӥзы. Заводын ужаз радъям мафия. Владимир Филипповичлэн верамезъя, али предприятиын югдур воксё мукет. Отын ужа асьсэлэн милицизы. Табере лушкаськон сярысь веранэз ик ӧвӧл ни. Котькытын ушъяло асьмелэсь тылпуэн нюръяськисьёсмес. Соослэн данзы быдэс Россилы тодмо. Кылсярысь, Россиын ик тылпуэз кысыны шорлыдын 1 час кулэ, нош асьмелэнъёс "горд атасэз" ӝыны часкын лапкато. Но та удысын тыршисьёслэн улон-вылонзы капчи ӧвӧл. Нырысь ик, соослэн уждунзы ичи. Али тани быдэс управлениея 52 водитель уг тырмы. 75 процентэзлэн автотранспортлэн ужан дырыз ортчемын ни. Ярам, алигес 5 выль машина басьтӥзы ик. Но со зарезьысь шапык выллем гинэ. Вань на эшшо одӥг шумпотонзы. Алигес 16 этажъем юртэ тубыны луоно пагӟа ваизы. Но, кызьы вераз генерал-лейтенант, городэ туж уно этажо коркаос ӝутонлэсь куштӥськоно. Табере, гажано лыдӟисьёс, республикаямы кылдэм югдурен умойгес тодматон понна сётӥськом Удмуртиысь МВД-ысь дасям таблицаосты: Тӥни югдур озьыгес луыса кошке. Нош мар вите асьмеды туэ, выль даурлэн нырысетӥ араз? Кызьы пусйиз Удмурт Республикаысь югдурез утёнъя министр В.Ф.Щербков, нырысь чакламъя, со таӵегес адӟиське. Выль законъёсты кутэмен, выт тыронъя системаез воштэмен валче, йыружъёс йылыны быгатозы экономика удысын яке кылем арын мында ик кылёзы. Кулэсмозы тужгес секыт йыружъёс, тужгес но адямиез быдтон учыръёс, ӧжытгес кыльыны кулэ семья куспын керетонъёс. Экономикаын ӟеч воштӥськонъёс адӟисько бере, со улонын но ӟеч ласянь шӧдӥськыны кулэ. Но сюлэмшгугъяськытэ наркомания. Со азьланяз но будоз. Н.Байтеряков. Ӧтиськом кенешыны Удмуртэз дышетэ бигер удмурт? Мон вордӥськи Татарстанысь Кукмор ёросын. Малы верасько со сярысь? Мыным али витьтон арес. 1989-тӥ арысен улӥсько Можга городын. Ӟеч тодӥсько удмурт но бигер кылъёсты. Школаын дышетскыкум, милям гуртын ваньмыз сямен "Советской Удмуртия", "Молот" но мукет газет - журналъёсты басьто вал. Милемыз тямысэтӥ классозь удмурт кыллы туж ӟеч дышетӥзы. Отын али но озьы ик дышето удмурт кыллы. Школаез йылпумъяме бере мон армие кошки, ужай Кукмор посёлокын, огвакытэ ик быдтӥ МВД-лэсь академизэ. Та дыре удмурт газетъёсты лыдӟыны туж шер кылдылӥз. Ма веранэз, али Можгаын улыса но, мон сое одӥг-одӥг гинэ лыдӟылӥсько. Но тани син шорам йӧтӥз Леонид Федоровлэн "Быдэс даур ӵоже сюлэм бӧрдонъёс" статьяез. (потэмын 2000-тӥ арын 3-тӥ октябре "Удмурт кунлы 80 ар" рубрикаын). Со гожтэ, али, пе, быдэс Удмурт кунын, солэн вань ёросъёсаз удмурт кылэз дышето. Со одӥг но шонер ӧвӧл. Мон трос ветлӥ Можга но Вавож, Кизнер но Грах ёросъёсысь гуртъёстӥ. Туж шер кылылыӥ удмурт пиналъёслэсь асьсэ кылынызы вераськемзэс. Можга город сярысь ке верано, татын али гинэ (одӥг-кык ар талэсь азьло) удмурт кылэз дышетыны кутскизы, со но ваньмаз школаын ӧвӧл. Нош Можгаын 9 шор ёзо школа. Али мон дышетон удысын уг ужаськы ини, но азьлогес ужай, соин ик та сярысь туж умой тодӥсько. Гуртъёсы мынӥськод ке, пиналъёс тросэз ӟуч кылын верасько, асьсэ анай-атай кылынызы вераськыны возьдасько. Кин янгыш солы? Малы 1980-тӥ-90-тӥ аръёсы Удмурт кунын удмурт кылэз кулэ уг каро? Бигеръёсыз, башкиръёсыз, поръёсыз басьтӥд ке, соос асьсэ кылзэс ноку но ӧз куштэ, уз но куштэ. Казане-а, Уфае-а, Йошкар-Олае-а мынӥськод, отын тросэз калыкъёс асьсэ кылынызы верасько. Ярам, со гинэ луысал ке. Малы бен та республикаосын мукет нациен калыкъёсты асьсэ кылынызы дышетыны пумит уг луо. Татарстанын удмуртъёсты удмурт кыллы дышето, поръёсты - пор кыллы, чувашъёсты - чуваш кыллы, мордваосты - мордва кыллы. Мынам сое тодэме потэ: Удмуртиын огшоры гинэ верасько-а, удмурт кылэз дышетӥськом шуыса яке зэм но дышето? Тани Татарстанын но Башкортостанын удмурт учебникъёс уг пото, ӧз но потэ. Озьы ке но, дышетӥсьёс книгалы Иже ветло, сюлмасько нылпиосты ас кылзылы дышетыны. Тани али вералэ тӥ мыным, кӧня удмуртъёс ужало тӥляд редакцияды, яке удмурт радиоын? Кӧняез соос пӧлысь вордӥськемын Ижын, Глазовын, Сарапулын, Вотка карын, Можгаын? Ну коть кудаз ке но ёрос центрын? Азьло ик верасько, сыӵеос туж ӧжыт, дыр, яке воксё ӧвӧл. Тӥляд ужасьёсты ваньзы ик вордӥськемын гуртъёсын, соос пӧлысь тросэз Татарстанын яке Башкортостанын. Тае вераса нош ик одӥг юан кылдэ, Татарстанын но Башкортостанын вордӥськем удмурт егитъёс кытын дышетскыны кулэ? Шуоды, вань Удмурт кун университет, мукет институтъёс но университетъёс. Нош кинлэн ке педагогической колледжъёсын удмурт кылэз пыр-поч дышетэмез потэ ке? Удмуртиысь педколледжъёсын Татарстанын но Башкортостанын вордӥськем удмурт егитъёсты басьтэмзы уг поты. Верало ке но но, ми, пе, ноку пумит ӧвӧл шаермылэн палэнысьтыз лыктэмъёсты дышетыны. Но со вераськон гинэ. Кӧня муртлэсь юалляськи ини мон со пумысен, тросэз сыӵе мылкыдзэс верало. Та гожтэтэз кинэ ке но янгыш карон понна мон уг гожтӥськы. Мынам тодэме потэ, ку Удмурт кунын умой-умой дышетыны кутскозы удмурт кылын? Ку асьме калык удмурт кылын возьдаськытэк вераськоз? Эшшо одӥг паймытӥсь югдур. Удмуртиын тросэз удмурт кыллы дышетӥсьёс - Татарстанысь яке Башкортостанысь вуэмъёс. Соос ас вакытазы быдтӥзы Удмурт кун университетысь удмурт филологияя факультетэз. Юан кылдэ: малы Татарстанысь удмуртъёс Удмуртиысь удмуртъёсты дышетыны кулэ? Татарстанын удмуртъёс трос ӧвӧл но асьмеос огинын мед уломы шуыса, соос мед дышетозы нылпиосты удмурт кыллы ас вордскем интыосазы но. Мон умой тодӥсько Вавож ёросысь Волково школаысь дышетӥсез В. А. Ганеевез, Пичи Пурга ёросысь Гожня школаысь В. А. Герасимовез. Соос кызь вить арлэсь кема ини удмурт пиналъёсты удмурт кыллы дышето. Таосты сяна но, Татарстанын вордӥськем удмурт кыллы дышетӥсьёсты трос тодӥсько. Шонер-а, янгыш-а верасько мон, уг тодӥськы, но ас малпанъёсылы но юанъёсылы валэктон туж шедьтэме потэ вал. Н. Семенов. Можга город. Аръёс но адямиос Дышетӥсьлэсь тусбуйзэ дыр уг пужмерты Милям семьяямы куать мурт вал: песянае, атае, анае, апае, агае но мон. Ваньмы пӧлысь мон шудоез вылӥськем. Ӵапак школае мынон аресам гуртамы школа усьтӥськиз. Кин тодэ, кыӵе луысал улон сюресэ, та аре школа ке ӧй усьтӥськысал. Апае мынэсьтым тямыс ареслы бадӟым. Арвазь школае одӥг ар гинэ ветлэм. Апае гинэ ӧвӧл, солэн эшъёсыз но дышетсконзэс куштӥллям. Мылзы потымтэ, лэся, шуныт коркась потыса, куинь иськеме лымы но дэри коласа ветлыны. Агае мынэсьтым куинь ареслы бадӟым. Соин одӥг аресъем пиос гуртамы вылымтэ. Арвазь школае бадӟым пиосын ветлӥз. Аресын пичи бере, мугорын но эшъёсызлэсь пичи вал. Пичи мугорыз понна солы "таракан" ним сётӥллям. Анайлэн вожез потэ вал озьы шуэмзылы. Исазы ке но агайме, дышетсконзэ ӧз кушты, ньыль классъем школаез йылпумъяз. Куамынэтӥ аръёс - шукырес аръёс: колхозъёсты кылдытон, кулаке поттон, "тушмонъёсты" утчан. Милям пичи гуртамы но одӥг семьяез кулак карыны шедьтӥллям. Колесниковлэсь семьязэ, гуртын сое Параня Олексан шуо вал. Юртъерзы, мукетъёслэн сярысь, туж зол вал: сыӵе юртэ тылобурдо но пырыны пась уз шедьты, шуо калыкын. Азбаразы пырон-потан капказы но зӧкесь юбоослэсь лэсьтэмын. Пудо- животсы но трос вал кадь, соослэн ик кенэм вӧй поттон машиназы но вал. Быдэс гуртамы солэн гинэ горд кирпичлэсь пуктэм кеносэз али но сылэ на. Колесниковлэн куинь пиосыз ачиз кадесь ик йыг-йыг таза мугороесь. Бадӟымез Петька нимо, мынам апаеным ог ёзо вал, Сергей нимоез мынэсьтым одӥг ареслы бадӟым, Сёмка покчи пиез вить ареслы пичигес вал мынэсьтым. Быдэс гуртамы та семьяез гинэ кулак карыса юртысьтызы поттыса, Сибире келязы. Кӧня отын улӥзы уг тодӥськы, но берен бертыса, музон юртын улыны кутскизы. Покчиез пизы али но отын улэ. Куамынэтӥ аръёс шукырес вал. Кинлы бӧрдон, кинлы шумпотон. Милемлы, школае мыныны вуэм пиналъёслы, шумпотон. Гуртамы школа усьтӥзы Колесниковъёслэн юртазы. 1930-тӥ арын Кармыжын но школа усьтӥськиз. Нырысетӥ сентябре ми нырысьсэ школае вамыштӥм. Милемыз пумитаз чиль-чиль сьӧд йырсиё, очкиен, небыт куараё пинал пиосмурт. Вылаз ӝикыт вурем сьӧд костюмез, тӧдьы дэремез, сьӧд галстукез. Сыӵе тусбуё кылиз мынам сюлэмам но йырам нырысетӥ дышетӥсе. - Ӟечбуресь, пичи эшъёсы, мон тӥляд дышетӥсьты луо, монэ Алексей Васильевич шуоды, фамилие Попов. Партаос ньыль муртэн пукымонэсь вал, пӧртэм буёлэн буямын, кудӥз сьӧд, кудӥз бусӥр. Пуксьылӥмы кинлэн кинэн пукемез потэ. - Табере монэ тодӥськоды ини кызьы шуыны, дыр вуиз тӥледын тодматскыны. Мон валай ини, татын удмуртъёс но, ӟучъёс но шуыса. Дышетӥсьмы азьпалан сылӥсь ӝӧк сьӧры пуксиз но милемыз нырысь партаысен гожъяны кутскиз. - Мон Ермилов Андрей - Кармыжысь. - Мон Егоров Иван - Кармыжысь. - Мон Бояров Андрей - Кармыжысь. - Мон Степанов Иван - Кармыжысь. - Тынад, мертчан йырси, кызьы фамилиед? - шуыса юа мынэсьтым. - Мон Егорова Анна - Кармыжысь. - Мон Михайлова Евдокия - Кармыжысь. - Мон Кунавина Елизавета - Кармыжысь, таиз удмуртомем ӟуч ныл. Дальше пойдём шуыса ӟучъёсыз гожъяны кутскиз. - Я Червяков Фёдор - из Богородска. - Я Шикшинский Илья - из Богородска. - Я Исаков Василий - из Богородска. - Я Абрамов Федор - из Богородска. - Я Неведомская Мария - из Богородска. - Я Миронова Валентина - из Богородска. - Я Перепелкина Аида - из Богородска. - Мон Туканов Александр - Полякысь. - Мон Плотников Иван - Полякысь. - Мон Смолина Зинаида - Полякысь. - Мон Попова Александра - Полякысь. Таиз милям дышетӥсьмылэн сузэрез вылэм, сое берло тодӥмы ини. Озьы ортчиз нырысь тодматсконмы. Собере милемлы киямы книгаос сётъязы. Вож обложка вылын бадӟымесь тӧдьы букваосын "Пичиос" гожтэмын. Ӟуч нылпиослы кыӵе книга сётъязы, уг тодӥськы ни. Алексей Васильевич шоро-куспо, чиед мугоро, туж лякыт сямо адями, солэсь вожпотэм ымнырзэ ми ноку но ӧм адӟылэ. Либыт гинэ небыт куараен валэктылӥз букваосыз но доска вылэ гожъяса возьматылӥз. Агаеным арес кусыпмы бадӟым ӧй вал, соин ик мон весь со бордынгес будӥ. Со школаысь бертэ но урокъёссэ дасяны кутске. Мыным туж тунсыко потылӥз солэн гожъяськемез, лыдӟиськемез. Школае мыныкум, мон букваосыз тодӥсько вал ини, лыдӟиськыны гинэ уг быгатӥськы на. Та нырысез дышетӥсьмы Поляк гуртысь вылэм, со сярысь ми туж ӝог тодӥмы, солэн сузэрез милемын ӵош одӥг классын вал, Попова Александра (гуртазы Василька Санӥ шуо вал сое). Дышетӥсьмы нуналлы быдэ пиналъёсын ӵош аслаз гуртаз бертылӥз, лымы усьытозь - пыдын, толалтэ - валэн. Урокъёс бырытозь, валзы школа азбарын сылӥз. Милям школаямы дышетӥсьёс малы ке туж ӵем вошъяськылӥзы. Алексей Васильевичмы но ар но ӧз ужа кадь, олокытчы ышиз. Сузэрезлэсь тодӥмы, сое, пе, Мултан педтехникуме директоре пуктӥллям. Милям гуртамы со кадь дышетскем муртмы та вакытэ ӧй вал на. Отын ужакуз ини отпусказ бертылыкуз одӥг гужем нуналэ кузпалыныз милям гуртамы лыктӥллям, оло адскыны, оло асьсэдыз возьматыны. Мон соосыз адӟи магазинмы дорысь, кинэн ке вераськыса сылыкузы. Тодэ вал, кыӵе синмаськыса учки мон соос шоры! Таӵе интеллигентъёсмы гуртамы ӧй вал на. Кыӵе классын дышетскемме уг ни тодӥськы, но та адӟем суред вунэтонтэм кылиз син азям. Дышетӥсьёсмы ӵем вошъяськемен, кудӥзлэсь нимъёссэ но тодыса ӧм вуылэ, оло мон гинэ сыӵе, оло вунӥз ини. Но одӥгзэ умой тодӥсько: тросэз дышетӥсьёс пиосмуртъёс вал. Нош одӥг пол вуиз туж чебер нылмурт, Наталья Михайловна шуиськомы вал, фамилизэ уг ни тодӥськы. Милям бускелямы улӥз, Олён апайёс дорын. Чиль-чиль сьӧд йырсиез берлань сынаса йырбертӥз чилясь маин ке огазе керттэмын, скрепка шуэ вал сое. Ми йырсынэз сяна ум тодӥське вал угось. Векчи гинэ мугоро, сьӧд юбкаен, кузь саесо лемлет буртчин кофтаез тӧлъя ву тулкым кадь лопыръяське, ураметӥ ортчыкуз. Милесьтым алачалэсь вурем дэреммес бодыен гинэ лопыръялод. Мон нырысьсэ адӟи со вылысь сьӧд буртчин чулкаосыз, ӝужыт пыдберо туфлиосыз. Канава вамен потыкуз, кузь, урдэстӥз кыремо сьӧд юбказэ, пыдесэзлэсь вылӥ ӝутыса вамыштэ вал. Сыӵе мусо дышетӥсьмылэн котькуд вамышез син шоры йӧтылытэк ӧз кыльылы. Кытысь меда вал со мусо удмурт дышетӥсьмы, кытчы меда кошкиз, мукет дышетӥсьёс сямен ик? Оло мукет школае поттӥзы, оло бызиз, оло ми ӧм яралэ солы? Со кошкем бере, мукет егит дышетӥсь вуиз, Григорий Михайлович Ульянов. Йыг-йыг пичи гинэ мугоро, туж чырткем, ветлыкуз пыдъёсыз музъем вылэ ик уг йӧтыло кадь, пӧсь кӧльы кадь шуо сыӵе адямиосыз. Таиз дышетӥсьмы кема гинэ ужаз школаямы. Мон куинетӥ классын дышетскисько вал кадь соку. Дышетӥсьмы зол-зол кырмиськиз ми борды. Ас малпамезъя милемыз пуктылӥз парта сьӧры: ӟучен удмуртэн, нылэн пиен сураса. Мон кык ӟуч пиос вискы шеди. Кӧня бӧрдӥ, соосын пукеме потымтэен. - Ку дышоды ӟуч сямен умой вераськыны, ялан озьы пукоды, - шуиз дышетӥсьмы но тӥни. Мар вералод дышетӥсьлы пумит. Нош малы одно ик пиосын артэ пуктылӥз, ӟуч нылъёс но вал ук. Тазьы пуктылэмез кемалы ӧй вал, ми берен асьме сямен, кинлэн кинэн пукемез потӥз, озьы ик пуксьылӥм. Сотэк но быгатэммыя куспамы ӟуч кылын вераськылӥмы. Григорий Михайлович дышетӥсьмы туж шумприч вал, капчи мылкыдо, серекъяны кутске ке, синвуосыз потымон серекъялоз. Нош урок дыръя классын сыӵе чалмыт, кутлэсь лобӟемзэ но кылод. Со ӧз яратылы урокын бергаса пукисьёсыз. Дышетӥсь валэктыку кылзоно, бергаса пукид ке, мар валалод, шуоз вал. Кыӵе вал со вакытэ методика, табере шуг ни тодэ вайыны. Но куд-ог учыр сярысь верало ик. Оло шонер лыдӟеммес эскерон понна, оло саклыкогес мед луомы шуыса, милемыз шара лыдӟиськыны дышетэ вал: одӥгез лыдӟе, ваньмы со бӧрсьы чиньыенымы нуллӥськомы, одӥг кыл но медаз кыльы шуыса. Предложениез быдтытэк ик дышетӥсь шуак дугдытэ но мукетсэ азьланьтыны косэ. Кин ке ӧз тоды ке лыдӟисьлэсь кытчы дугдэмзэ, отметка но улӥгес пуктэ. Саклыкед ӧвӧл, шуэ. Дышетскись пиналъёсыз сярысь туж сюлмаське вал. Кин ке одӥг-кык нунал школае уг ке лыкты, одно ик доразы мыноз. Богородск гуртысь Червяков Федя кык-куинь нунал-а, мар-а ӧз ветлы. - Анна, ойдо Богородске ветлом, Федя сярысь тодоно ук, - сыӵе кылъёсын вазиськиз мыным дышетӥсе урокъёс бере. Огнам мынэме, пе, уг поты. Дышетӥсь сьӧраз ӧте бере, кызьы уд мыны. Богородск кыдёкын ӧвӧл, иськемен ӝыны гинэ. Федяослэсь корказэс пиналъёс возьматӥзы. Федя дораз вал. - Малы школае уд ветлӥськы, Федя, оло секыт висьыны усид, мон сюлмаськисько ук, - лыктэммылэсь мугзэ валэктэ дышетӥсь. - Пимы йыры висе шуыса ӝожтӥськылэ, - пизэ жаляса валэктэ анаез. - Пуксе, жадиды, дыр, пыдын лыктӥды ук. Нош таиз кин, кытысь нылаш? - Со мынам сузэре, - оломарлы монэ сузэре шуиз дышетӥсе. Федя мыняса учке ми шоры, со тодэ ук, мон дышетӥсьлэн сузэрез ӧвӧл шуыса. Сыӵе ик дышетскись, эшшо одӥг парта сьӧрын пукиськом. Федялэн анаез милемыз чаен сектаса келяз, пиез понна сюлмаськеммы понна тау шуыса. Нялтас Шикшинский Илья, Исаков Вася доры но пырамы. Берен Кармыже бертыкумы ну серекъя ук, ну серекъя дышетӥсе. Ачим но валаса ӧй вутты, оло марлы сузэре шуи, пе, тонэ. Ӵок ойдо, отын номыр уродэз ӧвӧл. Ветлэммы туж умой луиз, табере тодӥськом ини кытын улэмзэс. Мукетъят но милемыз дышетӥсьмы сыӵе муген ик Поляке нуллӥз. Мон верай ини, агае Арвазь школае ветлэ шуыса. Весь ушъяське аслаз школаеныз. Милям школамы бадӟым, укноосыз паськытэсь, вӧлдэтэз ӝужыт, классмы бадӟым, югыт. Школаеныз озьы ушъяське бере, мынам аслам синмыным адӟеме потӥз. Одӥг ӵукна агаеным дорысь ӵош потыса кошким. Атаен анае ӧз но валалэ, мон, аслэсьтым урокъёсме кельтыса, агаелэн школаяз кошки шуыса. Зэм ик Арвазь школа бадӟым вылэм. Школае вуи ини бере, доре огнам уг берты ни ук, агаеным ӵош классэ пырим. - Кытысь таӵе нылаш вуиз ми доры? - каньыл гинэ либыт куараен вазиз дышетӥсь Людмила Викторовна. - Тани татчы пуксьы, урокын эн вераськы, эн берга, шыпыт пук, нокинлы эн люкеты, - шуысамынэсьтым ӧжыт бадӟымгес нылашен артэ пуктӥз. Со дышетӥсьёслэн Валя нимо нылыз вылэм. Переменае Валя монэ китӥм кутыса школаетӥ нуллӥз. Тӧдьы булкаен ческыт чаен сектаз, доразы пыртыса. (Соос школаын ик висъет сьӧрын уло вылэм). Людмила Викторовна ӟуч ке но, ӟеч вераське вал удмурт кылын. Нош нылпиоссы воксё удмурт кадь чылкыт верасько вал, эшъёссы удмуртъёс вал уго. Озьы одӥг нуналэ мон "экскурсие" ветлӥ артысь гуртэ, мурт школае. Али паймисько ини, кызьы дӥсьтӥськем, атай-анайлы вератэк, агае сьӧры калъяськыны. Ӵуказеяз нокыӵе янгыш лэсьтымтэ мурт кадь аслам школаям мынӥ. - Анна, кытын вал тон толон, школае ӧд ветлы, дорад но ӧй вал, мон пырай тӥ доры, - озьы пумитаз дышетӥсе. - Мон агаеным Арвазь школае ветлӥ, солэсь школазэ адӟеме потӥз. - Яраз-а бен агаедлэн школаез, бадӟым-а? - Яраз, - шуи но соин вераськонмы быриз. Атайлэсь, анайлэсь тышкаськемзэс уг тодӥськы ни. Озьы юатэк-вератэк эн кошкылы, шуизы. Соос милемыз ноку уг тышкасько вал, лякытэн гинэ визьмаса вераллязы. Мынам атае чорыганы но пӧйшураны яратэ вал. Тол но, гужем но чорыгмы ӧз бырылы ӝӧк вылысьтымы. Толалтэ эшъёсыныз лудкечаны ветлылӥзы. Котькуд пӧйшурасьлэн толалтэлы паськытэсь пӧйшуран куасъёсыз луыны кулэ. Милям но сыӵе куасъёсмы вал. Одӥг пол нуназе кадь югыт толэзё ӝытэ Григорий Михайлович ми доры пыриз, атаен мар ке со вераськиз но мыным вазе: - Анна, ойдо атаедлэн куасэныз бусые нискыланы потом, учкы али, кыӵе шулдыр уй. Монэ алӥсь ӧз луы. Озьы ми одӥг пар куасэн кыкнамы юг-юг тӧдьы лымыё бусыетӥ Макан гурт пала потӥмы. - Монъя вамышъя, ато лымые месӥськомы, вамышмы ке ӧз тупа. Мон - солэн мышказ, куасъёс вылын, кусказ зол кырмиськыса мынӥсько. Зэм, уй паймымон югыт. Вужерак-вужерак ортчылӥсь пурысь пилемъёс турын бӧмъёслы укшало, толэзез ватыны турттыса кадь инметӥ ортчыло. Бусыетӥ кема ӧм ветлэ, но ӧжытлы дугдыса сылӥмы, толэзё инме учкыса. - Кызьы малпаськод, толэзь-а сыӵе ӝог кошке, яке пилемъёс-а? - исаса кадь юа дышетӥсе. - Толэзь, - шуисько. - Озьы адске гинэ со. Пилемъёс тӧлъя туж ӝог кошко. Толэзь но огинтыяз уг сылы, со каллен мынэ. Тазьы куасэн ветлэмме ноку уг вунэтӥськы, мыным со туж тунсыко потӥз. Али малпамея, Григорий Михайлович, огшоры гинэ вераськыса, инкуазез валаны дышетӥз кадь монэ. Кема-а, ӧжыт-а ветлӥмы - милемыз анаен атай пӧсь чаен возьмало вылэм ини. Григорий Михайловичмы тумошо адями вал. Со котькыӵе пӧртэм аресъем адямиосын огкыл шедьтэ, нылпиосын но, егитъёсын но, мӧйыосын но. Урокъёс бере ураме шудыны, лымыен лэзяськыны потӥськом ке, со но милемын огкадь кариськыса шудэ. Ми сое, котькуд ласянь йырысеныз пыдозяз лымыен пазяса, лымы адямилы пӧрмытылӥмы. Гуртамы салазкиен нискыланы пичи гинэ гурезьмы вал. Гурезь шуон со нылпиослы гинэ вал, зэмзэ ке верано, со огшоры нялмыт инты. Нылкышноос татӥ тол но, гужем но шур вулы васькаллязы. Толалтэ пеймыт луытозь, отын ми нискыласьком. Дышетӥсьмы но ми пӧлы вуылӥз, пичи дырзэ тодаз вайылӥз, вылды. Ма со ачиз но милесьтым куать-сизьым ареслы гинэ бадӟымгес вал кадь. Со милям гурт калыкмы кадь сыӵе ик дӥськут но, пыдкутчан но нуллӥз. Толалтэ, уд но оске, школае кутэн ветлылӥз. Юг-юг тӧдьы бинялтонэз пыдесозяз ӝикытак кутгозыен керттылэмын. Огпол олокытысь-марысь нош ми пӧлын ини. Бояров Андрейлэсь салазкизэ кутӥз но, гурезь йылысен ик пыдъёсыныз зол донгиськыса, гурезь уллань ширтӥз. Ачиз но валаса ӧз вутты, лэся, визыл кошкись шурлэн кынмисьтэм интыяз салазкиеныз валче дӥськутэныз маиныз пырак вуэ пуксиз. Со суредэз адӟыса, ми воксё бакомимы. Туж ӝог бызьыса, ваньмы шур дуре васькимы. Дышетӥсьмы ачиз но жӧломыса кадь, салазкизэ но вуись поттытэк, ыбем пукыӵ сямен тэтчыса потӥз. Эбыльмыны вуэмезлэсь азьло, гурт пала бызиз. Андрей салазкизэ ачиз поттӥз ини вуысь. Дышетӥсе ӵем пыралля вал ми доры, соку ми дорын улӥсь Митька (озьы шуо вал гуртоос) вузчиен эшъясько вал, апаелы синмаське вал кадь. Кӧня улӥз ми дорын вузчи, вераны уг ни быгаты. Аслаз Нынек гуртаз ик вузчиын ужаны кутскем шуыса кылӥськиз. Ми туж шер улӥмы асьме семья коже. Нош улӥсь вуиз. Оло сельсовет ӵектэм, оло ачиз, оло кин ке дэмлам, оло вузчи Митька. Таиз егит нылаш, сельсоветлэн секретарез, Ульяна Гаврилова, Нынекысь ик вылэм. Мон сое Уля апай шуисько вал. Со ми дорын улыку, Кармыже олокытысь-марысь фотограф вуэм. Бемыжысь-а, мар-а. Одӥг тулыс нуналэ, апрель вал кадь, лымы шунаны кутске ини. Шунды син мальдытон зол пиштэ. Ульяна Гаврилова (Уля апай) туж дыртыса пыриз коркамы. - Анна, чаляк дӥся со лемлет сяськаё чебер платьядэ, асьме доры фотограф лыктоз. - Мынам карточка вылэ пуксеме уг поты, уг мыны мон, - шуисько. - Ойдо чалякгес, эн пумитъяськы. Тодӥськод-а, кыӵе чебересь потом асьмеос карточка вылэ. Тани Вася агаед но дорады, куиньнамы ик пуксём. Со куспын ми доры дышетӥсе вуиз, оло азьло ик вераськиллям соос, кин тодэ. Монэ кужмысь поттӥзы азбаре. Бадӟым капкамы вадьсы скамья пуктӥллям, монэ асэныз артэ пуктӥз. Милям мышкамы султӥзы дышетӥсе но агае. Ӵапак яркыт пиштӥсь шунды шоры, син мальдэмен учкыны ик уг луы, мынам бӧрдэме ик потэ ини. Мыным чик но кулэ ӧвӧл со портрет шуонзы. Та вал мынам нырысез фотое. Синъёсмы сюбегесь, путэт вискытӥ учко кадь, шунды мальдытэмен. Ӵок ойдо, кыӵе потӥмы, сыӵе вань ини туспуктэмын. Озьы но тупаны кулэ вылэм. Дышетӥсе Ульянов, ми дорын улӥсь ныллэн нимыз Ульяна. Дышетскон армы бырем бере, одӥг нуналэ ми доры нош дышетӥсе пыриз. Милемыз ньылетӥ классэ поттон ар вал со. - Монэ табере тӥледыз уг ни дышеты, тӥляд школаяды уг ни ужа, монэ мукет школае келяло, интыяло. Тӥледлы вератэк кельтэме ӧз поты. Милемлы со ивор паймоно кадь потӥз, ми со борды дышеммы вал ини. - Мон тӥ доры одно ик вуо на, йырсие, туше пурысьтазы ке но, одно ик лыкто. Мон тӥ доры аслам семьяе доры кадь ветлӥсько вал, тӥ борды дыши вал ини. Зэм ик та дышетӥсез гурт калык туж яратӥз. Ми доры пыраллякуз, атаен каллен гинэ оломар но сярысь вераськылӥзы, мон ӧй но валалля, пелям но ӧй поны соку. Куддыръя бер ӝытозь но пукылӥз. Озьы одӥг ӝытэ пукыкузы атаелэсь верамзэ пелям понӥ. Армиысь бертэмез бере атайме гурт калык старостае быръем. Грамотаез, пе тырмоз, улонэз адӟем, калыкез валась, лякыт сямо, мултэс вераськисьтэм шуыса. Соку мон нырысьсэ тодӥ, атае староста вылэм шуыса. Григорий Михайлович кошкем бере, атае ӵем гинэ тодаз вайылӥз сое, апае но мӧзмись тусо луиз, шулдыр мылкыдыз быриз. Ми доры со ноку но ӧз вуылы ни. Куинь классэз быдтытозямы, Кармыж школаын ялан одӥг гинэ дышетӥсь ужаз. Ньылетӥ классэ потэммы бере, кык дышетӥсь ужаны кутскиз. Одӥгез арлыдо нылкышно дышетӥсь Екатерина Алексеевна Павлова, кыкетӥез казакпи егит дышетӥсь Валериан Павлович Астахеев. Екатерина Алексеевна кыкетӥ но ньылетӥ классъёсыз дышетӥз, Валериан Павлович - нырысетӥ но куинетӥ классъёсыз. Та аръёсы школамы борды азбар палаз таизлэсь бадӟымгес корка-юрт пуктӥзы. Табере кык бадӟымесь классъёсын нимаз кык дышетӥсь ужал. Берло пуктэм выль школа висъетэн кыклы люкемын, бадӟым палаз - класс. Пичи висъет сьӧры классысен пыроно вал. Та висъет юри лэсьтэмын палэнысь лыктэм дышетӥсьёслы улон понна. Та висъет сьӧрын улӥзы Екатерина Алексеевна Галя нимо пичи нылыныз, со уг дышетскы на вал. Екатерина Алексеевна лякыт сямо, небыт куараен, ӧжытак мыньпотыса вераське, ноку но ӧй шӧдылы вожпотыса вераськемзэ, анае кадь визьмаса вераськылӥз. Ӧжытак губырскыса, либыр-либыр, кышкаса кадь вамышъя вал. Мугорызлэсь ӧжытак шексэ ватон понна, вылды, лопшогес вурем платья но костюм нуллылӥз. Сьӧд кузь йырсизэ шори люкыса, йырбераз чучыртыса нуллэ вал. Пичи йӧно Гали нылзэ мунёез кадь дӥсялляз. Чебер басмалэсь вурем ӟуч платьяосыз син шоры йӧтымонэсь, чебересь вал. Дышетӥсьмы нылзэ огназ будэтӥз. Ньылетӥ классэ вуытозямы, Екатерина Алексеевна Кармыж школаын тямысэтӥез дышетӥсьмы вал кадь ини. Нуналъёс, толэзьёс, аръёс огзэс огзы воштыса ортчо. Таизлы но дышетскон арлы пум вуиз. 1934-тӥ арын Кармыж школаын нырысетӥез выпуск луиз. Милемлы дас одӥг арес луиз. Школамылы ньыль арес. Районысь юри ӧтизы, дыр, фотографез, нырысетӥ выпускез туспуктыны. Та туспуктэм ӧй ке кыльысал, ваньмыз вунысал. Фото шоры учкыса, со ортчем аръёсам вуисько, ӵош дышетскем эшъёсме тодам ваисько. Ваньмызлэн фамилиоссы но гожтыса кельтэмын. Али, та визьмыным, туж шумпотӥсько, кызьы тодам лыктэм ваньзэс гожтыса кельтыны. Кыкез ик дышетӥсьёсмы милемын ӵош. Табере ми витетӥ классэ потэмъёс. Оло шумпотоно, оло курдано. Сюлмаськонэз но куректонэз уногес вал, дыр, угось матын "семилетка" школаос ӧвӧл. Азьпалан мукет школа, мукет дышетӥсьёс. Та сюлмаськонмес одӥг арлы ӝегатӥзы быдэс выпускез берен кыкетӥ арлы ньылетӥ классэ кельтӥзы. Кинлэн малпамезъя озьы каризы, кин вералоз на табере. Оло со умойлы. Ма, ми туж пичиесь но али: Васильевскысь "семилетка" - сизьым иськемын, Бемыжысь - тямыс, Нынекысь - укмыс. Пичи адямиослы капчи-а луысал сомында иськеме пыдын ветлыны, тужгес но толалтэ, оло воксёлы люкиськысалзы дышетсконлэсь. Ньылетӥ классын кык ар пукеммы бере, куамын витетӥ арын эшшо огпол поттӥзы витетӥ классэ, ӧз ни жалялэ, вылды. Удмурт гуртъёсысь: Арвазьысь, Кармыжысь, Маканысь, Полякысь нылпиос Нынеке ветлыны мылкыд каримы, лэся. Богородскысь пиналъёс - Бемыже, ӟуч школае, ветлыны вераськиллям. Куд-огез кык ар ньылетӥ классын пукемъёс азьпала дышетсконзэс воксёлы аналтӥзы. Кармыж школаез быдтэммы сярысь сётэм кагазмес кутыса (ог тямыс-укмыс мурт вал кадь), Нынеке кошким. Школаез шедьтыса, учительское пыримы. Мон аслам синъёсылы ӧй оскы, ӝӧк сьӧрын тодмо дышетӥсь пуке, Людмила Викторовна Бабушкина. Милесьтым свидетельствомес кияз басьтыса, ваньмылэсь отметкаосмес учкылӥз, фамилиосмес гожъяз. Егоров Иванэн милемыз кыктоос ӧвӧл-а шуыса юаны вуиз ик но ачиз ик вераз, ӧвӧл, дыр, пе, тустыя уд кельшиське. Улон инты сярысь но юалляськиз. Улон интыды, тодмоосты, ӧвӧл ке, общежитиын улоды, нуналлы быдэ бертылыны секыт луоз. - Мон Егоров Васялэн сузэрез, со татысь сизьыметӥ классын дышетске, со патерын улэ, мон но соин ӵош карисько, дыр, - валэктӥсько дышетӥсьлы. - Тодӥсько агайдэ, туж лякыт сямо пияш, дышетске но умой, нырысетӥ классысен тодӥсько сое, - шуэ Людмила Викторовна. Сыӵе сюлмаськыса вераськемез милесьтым сюлэммес небӟытӥз. Табере ми агаеным арняяз одӥг нуналлы гинэ бертылӥськомы. Анай-атаелэсь, апаелэсь туж мӧзмисько. Пичи аресысен палэнэ кошкыса дышетскон - со туж секыт маке. Та аре кӧня ветлӥ Нынеке, вераны уг тодӥськы ни - дышетсконме кутӥ но куштӥ. Мынэсьтым адӟем карыса-а, эшъёсы но дышетсконзэс аналтӥзы. Гуртын улӥсь адями тодэ: юртъер вань ке, пудо-живот вань ке (сотэк сютэм кулод гуртын) семьяын котькудӥзлы уж тырмоз. Гуртамы ваньмызлэн шуныт гидъёссы ӧвӧл. Соку гинэ вордскем ыжпиосыз, кечпиосыз, куазь шуныт луытозь, коркан возьылӥзы. Со пичи макеосыз утялтыны, кыре поттылыны мыным "оскизы". Ӟазегъёслы, курегъёслы сиён тырон но мон вылын. Та нуназе ужан ужъёс. Нош толалтэ кузь уйёсы ваньмыз ки ужлы сӥземын. Апае керттӥськыны, пужыятӥськыны, чильпаськыны дышетылӥз. Туж бадӟым тау солы, та аресозям апаелэн дышетэм ужезлэсь ӧй люкиськылы. Анае дышетылӥз. Етӥн мертчанэз черсыны мыным уггес оско на вал, уд быгаты векчи нюжа лэсьтыны шуыса. Мыным куж но яра вал. Та толэ киужъёсын вырыса ортчиз. Ӵапак дышетсконлэсь палэнскыса дорын пукон арын милям школаямы выль дышетӥсь вуиз, Маканысь Иванов Василий Иванович. - Анна, вуоно аре одно ик Нынекад дышетскыны мын, эн аналскы, берло туж жалялод, бӧрдод, ӧпкелёд, сыӵе учкымон, чырткем нылаш дышетскытэк кылид ке, бадӟым янгыш луоз, - озьы визьмалляз дышетӥсь. Атаен анайлы но вералляз: эн возе сыӵе нылдэс асьтэ бурд улады, медаз аналскы. Кӧня ке адями, оскыса но сокытэк, дорысьтызы потӥллям ик, но инмысь номыре адӟиллямтэ. Ӵукна со сярыс быдэс гурт тодэ вал ини. Агае со нуналэ урокъёсыз бере Нынекысь бертӥз, кӧс нунал вылэм, вылды. Мон соку ик солы выль иворез вераны дыртӥ. Агае кылзӥз, кылзӥз но кутскиз ук серекъяны. Мон солы эшшо валэктӥсько на: пӧртмаськись. Возьпум пала кошкем. Агае серекъямысь дугдӥз но ачиз мадьыны кутскиз. - Пӧртмаськись, пӧртмаськись. Мон ачим сое адӟи, киыным но йӧтылӥ, - шуэ агае. - Ми возьпум пиосын сюрестӥ бертӥськом вал Нынекысь. Бусыын, сюреслы кыдёкын ик ӧвӧл, бадӟым воздушной шар кылле. Милемлы туж тунско потӥз, кытысь татын та быдӟа шар кылле, уг ӝутӥськы. Шар доры бызьыса мынӥмы, оло кин ке потоз шуыса пушкысьтыз. Нокинэз уг адӟиськы. Шарлэн корзинаяз но тубамы - нокинэз но, номыриз но ӧвӧл. Мон агаелы котьку но оскисько вал, со ноку но юнме уз супыльты. Агаелэн верамез гурт калыкез буйгатӥз но кадь, ӧз но. Валасьгес воргоронъёс асьсэлэсь малпанъёссэс но вераллязы. Туж паймоно учыр: кытысь, малы та шар ми пала вуэм? Ми, кӧня ке пиналъёс, шарез учкыны ветлӥмы, сое Арвазе ваемзы бере. Одӥг муртлэн бадӟым кеносаз понӥллям. Та шар сярысь кинлы ке но ивортылӥды, дыр, оло гожъязы но, дыр. Угось ми пала тазьы нуналлы быдэ воздушной шар уг усьылы. Ньылетӥ классын кык ар пукыса, одӥг арзэ эшшо чик дышетскытэк дорын улыса, кык армы милям юнме быриз. Оло асьмелэн дышетсконмес азьланьтэммы потӥз, оло визьмо адямиослэн косэмзы сюлэмамы йӧтӥз. Ми, кӧня ке нылъёс но пиос, нош Нынекысь школае ветлыны кутскимы. Куд-огезлэн мылзы ӧз поты ни дышетскыны, ньыль классэз быдтыса, дышетсконзэс аналтӥзы. Вася агае, сизьым классэз быдтыса, Иже кошкиз. Кин ке ӝуткам, ремесленной училищее пырыны, полиграфистэ дышетскыны. Одӥг ар бере, туж секыт висьыса бертӥз. Асьме гуртысь адями, Кизнерысь вокзал дорысь шедьтыса, дорозямы валэн ваем. Солэн одӥгез пыдыз вылэ лёгиськемез чик уг луы ни вылэм. Анай, тае адӟыса бӧрдыны кутскиз: - Талэн пыдыз сисьмыны кутскем ук, мар каромы табере. Ӟуч сямен сое гангрена шуо. Сыӵе бадӟым куректон вуиз милям семьяямы. Гуртамы эмъясь но ӧй вал та дыре. Ӵуказеяз атаймы, Васямес валэн уробое пуктыса, Грахе нуиз. Больницае кельтӥллямтэ агайме, ньылпу вӧй сётӥллям сьӧраз висись интызэ зыраны. Та вӧез кӧня ке шапык пӧсь йӧлын сураса юыны дэмлаллям эшшо. Гурт калык но паймем таӵе учырлы: кин мар вера, анай ваньзэ лэсьтэ. Лапас пыдсысь пырдыса кылем турын-куарлэсь сурет лэсьтэ. Пу вышкые, сое тырыса, пӧсь ву кисьтэ, агайме отчы пуктэ. Озьы нуналлы быдэ. Кин ке но верам, вылды: вал кыедэз пӧсятыса, ӟустариен бинялтыса, висись интыяз ляконо, пе. Сезьыен пӧзьтэм йӧл но удыны дэмласьёс луиллям. Ярано эшшо: скалмы асьмелэн, йӧл басьтоно ӧвӧл. Озьы нуналлы быдэ гужембыт анай пизэ, кызьы быгатӥз, озьы эмъяз. Кызьы меда вашкала адямиос, одӥг букваез но тодытэк, пӧртэм-пӧртэм амалъёс тодо вылэм? Чигиськем лысьӧмез но, шуккиськемез но, йырвиым зуркамез но асьсэос тупатъяло. Милям шурысьтымы изъёсыз но эмъяськонэ кутылӥзы, мон сое ачим но октылӥ, песянае косыку, изэз вумус шуо вал. Соин йӧнатылӥзы пудо-животъёслэсь чигем яке шуккиськем пыдъёссэс. Коттэм ӟустариез вумусэн майталэн кадь зырало, висись интыез бинялто, вылтӥз кызьпу туен юнматыса кертто. Агаелэсь пыдзэ но соин эмъязы кадь. Таӵе амалъёын гужембыт йӧнатскыса, агае сӥзьылпал ини бодытэк ветлыны кутскиз. Та аре ик, ас пыдыныз Можгае мыныса, педучилищее дышетскыны пыриз. Милям семьямылы вераны луонтэм шумпотон вал со. Кӧня дышетскыса вуимы ми та бадӟым юртын, вераны уг ни тодӥськы, татчы штаб кылдытӥзы, милемыз уллязы, пӧртэм-пӧртэм школаосы люкылыса, куинетӥ сменаын дышетскыны каризы, вить часысен уин дас одӥг часозь. Педучилищелэн вокзал сьӧрын тэрымон общежитиез вал. Инты ӟоскытэн кык кузя кӧлаллямы одӥг кроватьын. Самой шудо, вал куамын укмысэтӥ ар. Вераны луонтэм шумпотон вуиз атайлы, анайлы - угось доразы, семьяязы кема возьмам юрттӥсьсы вуиз: агае, ачиз ужаса, уксё поттэ ини. Нырысь басьтэм уждунэзлы быдэс картон коробка пряник басьтэм, дасо килограмм вал кадь отын. Каллен-каллен дӥськут но басьтылыны кутскиз: аслыз сьӧд костюм, тӧдьы дэрем, галстук. Синмаськымон егит казакпи луиз ини агае. Эсьмаса, йырсиез но пуштрес бабыльскыны луыны кутскиз. Кӧня ке толэзь бере куинь пыдо-куко фотоаппарат басьтӥз. Атаймылэн кема малпамез каллен быдэсме ини. Калык пӧлын вераны ӧз дӥсьтылы, син уськытозы шуыса. Семья пушкамы гинэ вералляз: - Мынам кадь ӟечесь нылпиосыз нокинлэн ӧвӧл. Аслам коркам дышетӥсе, аслам фотографе вань. Каллен-каллен милемыз но дӥсяны-кутчаны кутскиз ини агае аслаз уксёеныз. Уждунлы быдэ кудмылы ке но одно ик мар ке басьтылӥз. Одӥг пол мыным платьялы кык пумо басма басьтэм, апаелы - сяськаё ӵужалэс полсатин кышет.. Тӥни озьы дышетскем муртлы азьпалан ӟечгес улыны сюрес усьтӥськылӥз. Но визьмо мурт ассэ калыклэсь вылӥе ноку ӧз пуктылы. Соин ик, вылды, сыӵе адямиез калык гажялляз. Вужере кылем аръёс пыр но дышетӥсьлэн тусбуйыз сайкыт адӟиське. А. Иванова, ужысь ветеран. Кармыж школаысь дышетскисьёс, 1935 ар. Куинь-ньыль муртэз сяна, ваньзы соос Быдӟым Отечественной войнаын быризы. Французъёслэн сиёнзы - кышкыт Францилэн улосвылаз сюро таза пудо пӧлын вӧлмемын тужгес но кышкыт висён - энцефалопатия. Со пудолы но, адямилы но бадӟым кышкытлык вайыны быгатоз. Соин валче республикаысьтымы ветеринарияя валтӥсь кун инспектор Геннадий Бурдов алэ отын лэсьтэм вузъёсты шаерамы басьтон-вуттонлэсь огдырлы возиськыны. Франциысь вайыны лэземын ӧвӧл сюро таза пудоез, ӟеч выжы уськытыны пудо ёзвиосты, скал сӥлез, солэсь дасяса пӧртэм сиёнъёсты, шунтэм вӧез. Тазалык понна тужгес кышкыт луо � 22 "Цорес д Аннор", � 29 "Финисиерц" , � 35 "ИИИе тт Вилаине", � 49 "Маин ет Лоире", � 50 "Манехе", � 52 "Маыенне", � 61 "Орне", � 72 "Сартхе", � 85 "Вендец" департаментъёсын лэсьтэм консерваос. Ижысь но ёросъёсысь госветинспекторъёс та пумысен ивортыны кулэ вань вузкарон организациослы но фирмаослы. КУН КЕНЕШЫН Эскерон эскерисьёслы гинэ, лэся, кулэ Кун Кенешысь Эскеронъя кун комитетэ кылем арын 19 гинэ ӝожтӥськон вуэмын, соос но укмысэз сяна эскерымтэ. Малы озьы луэ? Шат ӝожтӥськыны номыр вылэ ини? Яке адямиослэн та комитетлы осконзы ӧжыт? Мон сямен, зэмзэ ик, Эскеронъя кун комитетлэн кужымез сокем ик бадӟым ӧвӧл. Со уг быгаты кыӵе ке чурытэсь законъёс кутыны, уг быгаты янгышам кивалтӥсьёсты кыл кутон улэ кыскыны. Но быгатэ тырмымтэосты шараяны но со сярысь кытчы кулэ ивортыны, кылсярысь, прокуратурае, налогъёсъя полицие но мукет вылӥ кивалтон ёзъёсы. Эскеронъя кун комитетлэн тӧроезлэн Александр Кузнецовлэн верамезъя, ортчем арын кутымтэ вал закон администрациослэсь кивалтӥсьёссэс бюджет коньдонэз тус-тас каремзы понна кыл кутон улэ кыскон сярысь. Зэмзэ но сыӵе законлэн инъетэз дасямын ни ке но, Кун Кенешысь депутатъёс сое юнматыны уг дырто. Валало, дыр, сыӵе закон соослы пумит но луыны быгатоз шуыса. 2000-тӥ арын вань ёросъёслы кредитъёс висъямын вал, улоннилы черодын сылӥсьёс корка пуктыны яке квартира басьтыны мед быгатозы шуыса. Но куд-ог ёрос администрациос кредитъёсын ас учкемзыя кузёяськизы. Озьы "тыршеменызы" кредитъёс ас ӵыжы- выжыоссылыгес сюрылӥзы. Адямиослэн ӝожтӥськемзыя, Эскеронъя кун комитет та ужпумез эскериз Сарапул, Каракулино ёрос администрациосъя. Законэз тӥяса висъям кредитъёс администрациосы берыктэмын ке но вал, азьланяз но сыӵе умойтэм учыръёс уз ни луэ шуыса оскон ӧвӧл. Угось нокыӵе амал ӧвӧл кредитэз умойтэм висъям понна кивалтӥсез законъя кылкутытыны. Кызьы шуиз А. Кузнецов, комитетлэн ортчем арын ужамезлы йылпумъянъёс лэсьтымтэ на. Но одӥг лыдпусэз вераны луэ ни: ар ӵоже 140 эскерон ортчытэмын. Таяз арлэн кутсконаз чакламын эскерыны Воткинскысь радиотехнической оснащениея (РТО) заводлэсь югдурзэ. Азьло отын 6 сюрс пала ужасьёсыз вылэм, нош приватизация ортчытэм бере 150 адями сяна кылемын ӧвӧл ни. Валамон, заводэз кузёлы вузан татын умойтэм сюрестӥ кошкем. Заводлэн куинь филиалэз вань на, но отын но заводлэн азьвыл ваньбурез тус-тас каремын. Кузнецовлэн ивортэмезъя, туэ озьы ик эскеремын луоз Кун Кенешлэн Тӧроезлэн резервной шуон фондысьтыз коньдонлэн кытчы кошкемез. Татын но, шуиз со, куд-ог умойтэм учыръёс шараясько. Эскеронъя кун комитетлэн валтӥсь ужез - бюджет уксёлэсь кутӥськемзэ чакласа возён. Асьме правительство выль аре выжиз, бюджетъя кодексэз законэ юнматытэк. Соин ик сыӵе законлэн ӧвӧлтэмез шуг-секытъёс кылдытоз бюджетэз чакласа возёнын но. Мукет сямен вераса, сыӵе югдур Эскеронъя кун комитетлы ужаны уз юртты, люкетоз гинэ. Комитетлэн мукетыз ужез - бюджетэ пырисьтэм фондъёсты эскерон. Соос пыр но республикаысь уксё кулэтэм интыосы кошке. Мон кемалась ӵектӥсько ни, шуиз А. Кузнецов, АПК-лэсь фондзэ быдтыны, но ӵем дыръя комитетлэн со выллем куронъёсыз лыдэ уг басьтӥсько. Озьыен, тырмымтэосты шараян но мукет эскерон ужъёсты нуон асьсэлы эскерисьёслы гинэ, лэся, кулэ. Т.БАННИКОВА. АРХИВЫСЬ МАТЕРИАЛЪЁСЪЯ Удмуртия ХХ дауре 1970-тӥ ар Тямысэтӥ пятилеткаез йылпумъян аре тупаз кык праздник: Ленинлэн вордскем дырысеныз 100 ар тырмон но Удмурт автономилы 50 ар тырмон. Ар ӵоже вань ӟеч ужъёс сӥземын вал та юбилейёслы. Январе ортчиз калыкез гожъян, Удмуртиын со вакытэ улӥз 1 миллион 417 сюрс адями. 11-тӥ апреле ортчиз Ленинлы сӥзем коммунистической субботник. Нуналскын поттэмын 3 миллион манетлы пӧртэм вузъёс. Соос пӧлын 600 мотоцикл, 90 легковой машина, 800 пыӵал но трос мукетыз. Юбилеен валче Данъян грамотаосын пусъемын вал Ижевскысь машина поттӥсьёс но андан ӵыжатӥсьёс, Игра леспромхоз, Каракулино ёросысь "Удмуртский" совхоз, Сарапул ёросысь Коминтерн нимо колхоз но трос мукетъёсыз. Удмуртиысь сюрсъёсын азьмынӥсьёс пусъемын вал медальёсын. Ижевск горсовет Труд урамлы сётӥз Ленинлэсь нимзэ. Ленинлэн вордскем нуналаз, 22-тӥ апреле, усьтӥськиз паськыт экранэн "Ударник" кинотеатр, Воткинскын - машзаводлэн выль поликлиникаез, чакламын вал нуналаз 700 висисьёсты кутыны. Удмурт автономилы 50 ар тырмон азьын Ижевск автозаводлэн валтӥсь конвейерез ужаны кутскиз. Ижевскын ортчиз научно-практической конференция. Отчы пыриськизы Москваысь, Ленинградысь но мукет городъёсысь тодосчиос. 2-тӥ ноябре СССР-ысь Вылӥ Кенешлэн Президиумез УАССР-ез Октябрь Революция орденэн пусйиз. Угось Удмуртия кужмо промышленностен но гурт удысэн шаерлы пӧрмиз. 7-тӥ октябре республика тырмытӥз вить аръем планзэ. Промышленностьын вузъёсты поттон будӥз 76 процентлы, 80 процентэз азинсконъёс ужазинлык будэм чотын басьтэмын. Вылӥ ӟечлыкен пото ни вал 10 изделиос. Удмуртия поттэ вал 36 процентсэ мотоциклъёсты, 13 процентлэсь унозэ легковой автомашинаос, 9 процентсэ шонер ужась станокъёс. Ю-няньлэн удалтонлыкез ӝутскиз 1,5 поллы, сое кунлы вузанъя план тырмытэмын 4 арскын. Колхозъёсысь но совхозъёсысь 12- езлы азьмынӥсьёслы Социалистической Ужысь Герой дано ним сётэмын. Бусыосын тросгес луизы тракторъёс, комбайнъёс но машинаос. Умоязы эмъяськыны луонлыкъёс. Кез, Балезино но Ува посёлокъёсын ӧсъёссэс усьтӥзы выль поликлиникаос. Висисьёсты эмъя ни вал 3500 врач. Вить арскын усьтэын 74 шор ёзо школа. Таяз арын шор ёзо школаез йылпумъямзы сярысь аттестат басьтӥз 15 сюрс дышетскись. 1965-тӥ арын сярысь, со куинь поллы уногес. Куинь ар ӵоже тупатъян ужъёс ортчем бере, Воткинскын выльысь усьтӥськиз П.И.Чайковскийлэн музей-юртэз. Ижевскысь Арсеналлэн юртаз нуллӥзы ни кун шаертодонъя музейлэсь экспонатъёссэ. Глазовын усьтӥськиз нылпи художественной школа. Удмурт кылбурчи Гай Сабитов нырысьсэ кылдытӥз сонетъёсын тугоко. Та ар калыклэн тодэ ваёнъёсаз кылёз Сьӧд зарезь дурын луэм кышкыт учырен. 15-тӥ октябре "Аэрофлотлэн" Батуми-Сухуми рейсэз дыръя бырыны шедиз 19 аресъем стюардесса Надежда Курченко. Со дышетскиз Глазов ёросысь Понино школа-интернатын, собере пионервожатой луыса ужаз. Быремез бере пусъемын Горд Знамя орден. А.Дерюшев, Удмурт Республикаысь ЦДНИ-ын ужась. Ижевскын улӥсьёс пусъё Ленинлы 100 ар тырмонэз, митинг ортче 1970-тӥ арын 20-тӥ апреле. Коньдон уг тырмы Алигес Пичи Пургаысь гурт удысъя управлениын эштосъёслэн кивалтӥсьёсынызы кенеш ортчиз. Вераськон мынӥз тулыс ужъёслы дасяськон сярысь. Уксё кулэ пунэмъёсты тырыны, уждун сётыны, техникаез дасяны, удобрение но кидыс басьтыны. Нош со ёросъя ог 40 миллион манет уг тырмы. Кытысь шедьтозы - тодмо ӧвӧл. Н. Филимонов. Сюресъёс но шудтэм учыръёс Шудтэм учыъёс 1999-тӥ ар 2000-тӥ ар Будӥзы яке кулэсмизы (процентэн) Ваньмыз пусъемын 1681 1668 -0,8 со пӧлысь адями бырон учырен 243 224 -7,8 Ваньзы быризы 280 250 -10,7 Соос пӧлыс пиналъёс 24 8 -66,6 Сӧсырмизы 1898 1877 -1,1 Соос пӧлысь пиналъёс 256 255 -0,4 Предприятиосысь но организациосысь водительлэн янгышеныз шудтэм учыръёс 192 196 +2,1 Соос пӧлын юэмъёсын сэрен 31 47 +51,6 Нимаз транспорт возись водительёсын шудтэм учыръёс 900 898 -0,2 Соос пӧлысь юэмъёсын сэрен 253 240 -5,1 Пыдын мынӥсь-ветлӥсьёслэн янгышенызы шудтэм учыръёс 566 550 -2,8 Правилоосты тӥямзы понна предприятиосысь но организациосысь водительёс ӝегатэмын 57204 64195 +12,2 соос пӧлысь юыса 1668 2025 +51,3 Правооссы таламын 920 976 +6,1 Нимаз транспорт возись водительёс правилоосты тӥямзы понна ӝегатэмын 306394 339130 +10,7 соос пӧлысь юыса 11738 11719 -0,2 Правооссы таламын 4295 4672 +8,8 Правилоосты тӥямзы понна тыриськон тупатэмын пыдын мынӥсь-ветлӥсьёслы 18592 22026 +18,4 ГИБДД-ын ужасьёсын шараямын йыружъёс 953 957 +0,4 Шедьтэмын но ӝегатэмын лушкам автотранспорт 1046 922 -5,2 Удмуртиын тужгес ӵем пумиськылӥсь шудтэм учыръёс: - пыдын мынӥсь-ветлӥсез мырӟон 824 842 +2,2 - шуккиськон 357 341 -4,5 - Бекмыльскон 270 259 -4,1 - могӟетэн шуккиськон 86 79 -8,1 - велосипедистэз лёган 47 43 -8,5 - сылӥсь транспортэн шуккиськон 33 26 -21,2 - мукет учыръёс 61 74 +21,3 Тямыс адӟытонысь - сизьым диплом "Можга нюлэс комбинат" акционер огазеяськон мебель лэсьтэ. Ваньзэ - писпулэсь. Удмуртиын сяна, сое шумпотыса басьто асьмелы матысь улосъёсын. "Вузэдлэсь ӟечлыксэ тодэмед потэ ке, возьматыса эскеры мукет интыосын но", - шуэ можга мебельщикъёслэн маркетингъя (вузкаронэз радъянъя) специалистсы В. Китаев. Можгаос пыриськытэк ӧз кыле Поволжье но Урал улосъёсын ортчем адӟытонъёсы. Ветлэмзы юнме ӧз луы. Отысь ваизы 7 диплом но тау карон гожтэт. Но дан утчан понна гинэ уг нуо отчы вузъёссэс. Пӧртэм интыосысь басьяськисьёс синмаськизы Удмурт шаерысь вылӥ верам мебельлы. Синмаськизы - тросэн басьтӥзы. Озьы можгаос палэнын но уксё потто. Кызьы ке асьсэлы, озьы ик республикалы ватсаса пайда ваё. П. Николаев. Та егитъёс дышетско Удмурт кун университетысь финн-угор но огъя кылтодонъя кафедралэн аспирантураяз. Кивалтӥсьсы - кыл тодон наукаосъя доктор профессор Валентин Кельмакович Кельмаков. Туспуктэмез В. Беломорскихлэн. Блюхер но татӥ ортчем Сайкыт малпанъёсын потӥськод та музейысь. Со интыяськемын Юкаменск ёросысь Верх.-Уня школаын. Граждан но Быдӟым Отечественной ожъёс ас бервылъёссэс та музъем вылэ но кельтӥзы. Тодмо полковедецлэн но бӧрысь маршаллэн В. Блюхерлэн дивизиез, "тӧдьыослы" пумит нюръяськыса, Юкаменск палъёстӥ но ортчиз. Музейын люкамын Быдӟым ожын быремъёслэн туспуктэмъёссы - дорысьтызы ожмаськыны кошкыса, соос гурт калыксы но ӵыжы-выжыоссы понна пыраклы егитэсь кылизы. Туала егитъёс тодыны кулэ Вормон понна улонзэс сётэмъёсты! Озьы лыдъя музейлэн кивалтӥсез Валентина Георгиевна Феофилактова но. Та школаын со ӝыны даурзэ дышетэ ини, со пӧлысь 25 арзэ - музеен кивалтэ. Ӟуч кылъя но литературая дышетӥсьлэн музей бордын сюлмысь ужамез сярысь та ёросысь ик журналист Н. Бушмелев "И дороже, и родней" книгаяз туж шунытэсь кылъёс гожтэм. Дышетӥсьлэн тыршемез "Знак Почёта" орденэн но пусъемын. Та чырткем но мыло-кыдо кышномуртэн пумиськемелы туж шумпотӥсько. Солы аслэсьтым "По следам подвига" выль книгаме кузьмаса кельтӥ. Оло, со музейлэсь стендъёссэ но узырмытыны юрттоз. Школаысь музей ас шаереныд но солэн адямиосыныз данъяськон мылкыд кельтэ. В. Поздеев, отставкаысь капитан, Ижевск город. Музейлэн кивалтӥсез В. Г. Феофилактова. Трокаез буре ваизы Миым Алнаш ёросысь Улын Асан гуртын Трофим Борисовез буре ваёнлы сӥзем фольклор праздник ортчиз. Нырысетӥ интыос огдыре кык коллективлы сётэмын - Алнаш ёрос культура юртысь "Тюрагай" агитэкспресстеатрлы "Мунчоын" но сям-каксиослы "Вӧсь нерге юмшан" йылолъёссы понна. "Тыло вӧсь" йылолзы понна Удмурт Туймыйылысь коллектив пусъемын кыкетӥ интыен. Нош куинетӥ интыос огдыре куинь коллективлы сётэмын - Улын Асангуртлы ("Йырпыд сётон"), Алнашысь музейёсын ужасьёслы ("Шорт миськон") но Улын Асангуртысь кыкетӥезлы "Тугоко" коллективлы ("Шыр сюан"). Н.ВОРОНЦОВ. Югдур Шудонысь шуд утчасьёс Пытсэт сьӧрын пукисьёс алэмын ке но коньдонэн шудонлэсь, куд-огезлы туж кельше, лэся, лэчыт пурт вылтӥ ветлон. Номыр шоры учкытэк, соос шудо. Шудо но туж тросэн коньдонзэс келяло. Ваньзэ "адӟыны дышем" киослы пумит секыт угось мыныны. Ма, шудыны пӧрмытӥськод ке но, кӧня ке мурт тон пумит лушкемен вераськозы но "гольык" кылёзы. Татын тужгес но ярато выль адямиосты: "лохотрон" ужа, нош "лох" азьло ик тодмо. Секытгес адямиез шудонэ кыскыны. Но дышем муртлы сьӧлтэтъёс пуктыны номыр шугез ӧвӧл. Кема аръёс ӵоже шудэм мурт ӟеч психолог луэ. Качано адямиез со котыр ласянь эскере: ляб интыоссэ шедьтэ, коньдонэз, узырлыкез пумысен тодыны турттэ, ӵыжы-выжыосыз сярысь юалляське. Нош тырыны быгатӥсьтэмзэ администрацилы, асьсэлы ярантэм адямилы пумитъяськисе пукто яке ляльчи интыын ужато. 1 номеро исправительной колониысь следствиосъя 3 номеро изоляторын пукись З-ов Иванлы эшъёсыз картаен шудыны ӵектӥзы. Таиз соглаш луиз. Нырысь огшоры гинэ шудӥзы, Иванлы соку туж удалтӥз. Кин ке но шуиз, оло, пе, коньдонэн шудом. Таяз учыре Иванлэн 30 сюрс манет тыронэз люкаськиз. Валамон ни, тамында коньдон З-ов тырыны ӧз быгаты. "Эшъёсыз" буйгатӥзы, со чотын мынозы, пе, тыныд вуэм посылкаос но мукет передачаос. Соку кин ке нош ик лӧпкытӥз: шуд но, вань келямдэ выльысь берыктод. Иванлы ӵектон кельшиз. Шудон кӧня к час пала кыстӥськиз: я З-ов келя, я мукетъёсыз. Но кызьы азьло ик чакламын вал, шуд Иванлэсь берыктӥськиз. Мар котырез вал, ваньзэ ӵош пукись эшъёсызлы сётоно луиз. Ярам, изоляторын ужасьёс пыриськемен, Иванэз мукет колоние келязы. Но таин гинэ ӧз йылпумъяськы солэн адӟонэз. Ӵош пукем эшез одӥг нуналэ та колоние ик вуиз. Ӟеч сямыныз ноку ӧз висъяськылы бере, Иванлы соку ик вераз: яке тырондэ тыриськод, яке "ултӥямъёс" пӧлы пырод. Тодӥз на, автомобилез вань шуыса. Вузаны курыса, доверенность гожтыны косӥзы. Нош ик пыриськытэк ӧз луы куспазы. Та вакытэ З-ов "эшъёсызлэсь" палэнтэмын. Мукетыз учыр. Пытсэт сьӧры шедьыса, Т-ин Сергей аслыз юлтошъёс бырйиз "крутоесьгес" пукисьёсты. Выль эшъёсызлэн син азьысьтызы усёнтэм понна, картаен но шудыны пумит ӧз луы. Нырысь солы удалтӥз, соин валче мылкыд но лӧптэмын. Но кемалы ӧз кыстӥськы инметӥ лобамез. Тыронэз 15 сюрс манет люкаськыса, анай-атаезлы вазиськытэк ӧйлась. Ӧд ке, пе, юрттэ, асме ачим быдто. Одӥг гинэ пизылэсь улонзэ утён понна таосыз бадӟым квартиразэс воштоно луо пичиезлы. Но та учыр Сергеез но ӧз визьмаськыты. Со азьло сямен ик шудӥз, трос коньдон келялляз. Шуг-секытъёс кылдэмен, тазэ но шуд утчасез мукет колоние выжтоно луиз. Но тыронэз сьӧраз ик кошкиз. Татын "счётчик" аслэсьтыз ужзэ азьланьтӥз, Сергейлы маза ӧз сётэ тэк пукыны, весь шудон пӧлы кыскизы сое. Нош ик анай-атаез пизы понна дурбасьтӥзы. Но люкаськем тыронъёсыз солэн ньыль ар ӵоже нуналысь нуналэ йылӥзы. Та вакытэ Т-ин пуке 9 номеро исправительной колониын, коньдонэн шудыны яратӥсьёслэсь люкемын. Та выллем учыръёс туж трос вераны луысал. Нокыӵе алонъёс уг юртто узыр опытэн пукисьёслы таӵе амалэн байкыны. Нош тютюпиослы но четлыке пырыны мылкыд карисьёслы соос уз ёрме. Мар веранэз, таӵе учыръёс пытсэт сьӧрын пукисьёс пӧлын гинэ уг кылдо. Шудонысь шуд утчасьёслы пумит амало пӧйшурась котьку шедёз. А. Марчуков. Милемын ӵош эктӥз калык Огвакытэ удмуртъёс вунэтыны кутскизы ни вал ас сямъёссэс-йылолъёссэс. Нош куатьтонэтӥ-сизьымдонэтӥ аръёсы мынам кемалась тодмое, эше Анатолий Андреевич Митрофанов со сямъёсты-йылолъёсты выльысь улӟытыны кутскиз "Ижмаш" культура дворецын. Отчы ветлыны ӧдъязы удмуртлыкез яратӥсьёс. Соос возьматылӥзы асьсэ палась кырӟанъёсты-эктонъёсты. Таӵе ӝытъёсы ик мон эшъёсме люканы кутски. 1987-тӥ арын кылдытӥ "Инвожо" ансамбль. Инвожо сяськаез пичиысен ик яратӥсько вал. Коллективам но та синмаськымон будос кадь ик егитъёс люкаськизы. 1987-тӥ арысен ик кутскимы пӧртмаськыны, тодмоосмы дортӥ кырӟаса-вераса, эктыса-маскаръяськыса ветлыны. Нырысь поталлямы коньывуон-шуркынмон толэзьёсы, нош али ветлӥськомы толшорлэн кутсконаз. Туэ но, шуг-секытъёс шоры учкытэк, кык нунал пӧртмаськимы. Монэн ӵош вал милициын ужась Николай Рябов, медсестра Светлана Макарова, заводын ужась Раиса Туйматова, чугун сюрес вылын тыршись Вячеслав Чирков, сантехник Юрий Николаев но солэн кузпалыз Алевтина. Ми пӧлын асьсэды умой возьматӥзы кузпалъёс Юлия но Юрий Грязевъёс, Татьяна Смелова, Светлана Грязева. Уйшорозь пӧртмаськеммы бере потӥм Ижысь Карлудэ. Валамон ини: луим тужгес тунсыкоосыз. Тубим бадӟым сцена вылэ. Отын кырӟам-эктӥм, нош бӧрысь ӵукнаозь шулдыртӥм калыкез йӧ городын. Ваньмыз ми борды итӥськизы. Н. Возисов. На основании постановления Правительства Удмуртской республики от 15.01.01 г, � 9 "О мерах по реализации Указа Президента Удмуртской Республики от 30 декабря 2000 года � 38 "Об Администрации Президента и Праительства Удмуртской Республики" Аппарат Правительства Удмуртской Республики ликвидируется: Заявление о требованиях кредиторов принимаются по адресу: г. Ижевск, ул. Пушкинская 214, комната 142 в течение двух месяцев с даты опубликования настоящего заявления. Телефон для справок: 25-82-65. Ликвидационная комиссия 19.01.01. Меӵак вераськон 2001-тӥ арын 26-тӥ январе Удмурт Республикая валтӥсь федеральной инспекторлэн С. В. Чикуровлэн общественной приёмнояз луоз телефон пыр "Пичи ужбергатон удысын выт тырон" ужпумъя меӵак вераськон. Юанъёс сётэмды луоз табышез азьпала лыдъяса басьтэм выт, вузкарыса поттэм коньдонысь выт тырон, ужбергатӥсьёслы пенсия тупатон пумысен но мукет ужпумъёсъя. 16 часысен 18 часозь 25-40-61 номеро телефонъя тӥляд юанъёстылы валэктон сётоз республикаысь Ужбергатонъя кун комитетлэн тӧроез М. П. Зайцев, Россия Федерациысь Вытъя министерстволэн Удмурт Республикая управленияз но Россия Федерациысь Пенсиосъя фондлэн Удмурт Республикая ёзаз ужасьёс. Общественной приёмнойлэн адресэз: Ижевск город, Карл Маркс урам, 274 номеро юрт. Город улонысь Муртлэн ӟепез котьку шунытгес ук Ижевскысь транспортэн мынон-ветлон дунъёслэн будэмзы сярысь вераськонъёс вазенгес вӧлмизы ни. Но соослы ӝот-ӝот йылпумъянъёс кылем арня вискын гинэ лэсьтэмын. ИПОПАТ-ысь но "Ижгорэлектротрансысь" кивалтӥсьёс татчыозь "визьмозэгес" сюрес бырйизы: городысь транспортэз но бырон калэ медам вуттэ, калыклы но сокем вӧсь медам луы вылэм. 2001-тӥ арын городысь транспортлы бюджетысь 67 но ӝыны миллион манет висъяны чаклаське. Кылем арен ӵошатыса, со кӧнялы ке тросгес. Но электрокужымлы, воштос ёзъёслы будӥсь дунъёс ватсаса висъяськись коньдонэз соку ик ньылыны дасесь. Кыле кык гинэ сюрес: маршрутъёсты кулэстоно яке дунъёсты будэтоно. - Маршрутъёсты кулэстон пумысен вераськонъёс ӧжыт ӧй вал ни, - шуэ ИПОПАТ-лэн кивалтӥсез Михаил Копосов. - Туннэ городысь транспорт сотэк но калыкен тыраз ветлэ. Тужгес секыт югдур кылдэмын Строительёслэн городоказы. Троллейбусъёслы выль, 14-тӥ маршрут усьтэм бере, татын со кӧня ке тупатскиз ик ке но. Автобусъёсы шуг пуксьыны Октябрьлы 10 ар урамын, тужгес но ӵукназэ, студентъёс дышетсконэ дыртыку. Али Ижевскын ӵукналы быдэ 396 автобус сюрес вылэ потэ. Со пӧлысь 28-эз - городысь маршрутъёсъя, 32-ез - городлы матын но 22-ез городлы палэнын маршрутъёсъя. Толалтэзэ сад-бакчаосы ветлӥсь маршрутъёсы пытсаса, автобусъёс город кузя лэземын. Озьы выльысь усьтэмын 10-тӥ, 13-тӥ маршрутъёс, ватсаса автобус ветло 8-тӥ, 19-тӥ, 21-тӥ, 31-тӥ, маршрутъёсъя. Но тулыс вуэмен сад- бакчаос выльысь улӟозы ук?! - Ижевскысь транспортэз Владивостокын, Уфаын но куд-ог мукет городъёсын кадь чылкак куашкатэм уг поты, азьланьтэ веранзэ Михаил Копосов - Вазенгес таосыд дунтэк мынон-ветлон тупатӥзы вал. Табере гырпумзэс куртчыло: ӝыныез троллейбус- автобусъёссы сӧриськемын, сюрес вылэ потыны ярантэм луэмын. Бен, таос вӧзы усьыны секыт ӧвӧл. Ижевскысь но ог 70 процентэз транспорт вужмемын, тупатъянэз кулэ каре. Нош туэ бюджетысь 24 миллион манет гинэ висъяськоз, 10 трамвайлы Чехиысь электрообрудование басьтон понна. Троллейбус вадьсын сылэ ноль, иське, сое одӥг но басьтыны чакламтэ. Озьыен, кызьы ке но утялтоно, сузяно луоз вужъёссэ ик машинаосты. Нош транспортникъёслэн лыдъям-чотамзыя, таосты туала манеръя ке но возён понна, одӥг пала мынон сюрес туннэ 3 манет но 17 копейка тыр усе. ИПОПАТ-ын но "Ижгорэлектротрансын" ужасьёслэн мылкыдзы куашкамын. Соос уг тодо, кызьы калык учкоз февральысен дунъёслэн будэмзы шоры. Одӥг пала мынон табере 3 манет луоз. Но сотэк уг луы, пе. - Асьмелэн туж трос льготникъёсмы, - вераськон борды итӥське "Ижгорэлектротранслэн" генеральной директорез Вульф Беселев. Туннэ нуналлы транспортын дунтэк ветлӥсь 191 сюрс адями лыдъяське. Пенсионеръёс, сӧсыръёс, трос нылпиё семьяосысь пиналъёс сяна, таос пӧлы пыртэмын МВД-ын ужасьёс, прокуроръёс, судьяос, депутатъёс - ваньмыз ог 60 пумо профессиос. Соос огзы но транспортникъёслы нимысьтыз коньдон тыро-пыдо уг висъяло. Нош кулэ вылэм, - бугыръяське Вульф Беселев. Шӧдӥське, матысь дыре ИПОПАТ-ын но "Ижгорэлектротрансын" ужасьёс гижысь- пиньысь басьтӥськыны туртто дунтэк ворттылӥсьёс борды. Соос кылпум поттылӥзы ни МВД-ын ужасьёслы льготаосты быдтон сярысь, Югдурез утёнъя министерство та понна нимысьтыз коньдон ӧз висъя ке. Пенсионеръёс пумысен но куд-ог юанъёс кылдыло. Соослэн пенсизы бадӟымгес усе ай, куд-ог удысъёсын тыршисьёслэн уждунзы сярысь. Кылсярысь, дышетӥсьёсын, нылпи садъёсысь ужасьёсын, медсестраосын ӵошатыса. Со сяна, нуналлы быдэ транспортын ворттылӥсьёс ӵемгес проездной билет басьто. Та но транспортникъёслэн кисыязы пырем кадь луэ. Угось кылем арын лыдпусъёсъя, проездной билетэн ветлӥсьёслэн одӥг мынон сюрессы 1 манет тыр гинэ усиз, студентъёс - 42 копейка, нош школаын дышетскисьёс 22 копейка тыр ворттылӥзы. Таӵе бугрес вераськон пуромиз кылем пятницае мэриын ортчем пресс-конференция дыръя. ИПОПАТ-ысь но "Ижгорэлектротрансысь" валтӥсь кивалтӥсьёсынызы ӵош татчы лыктӥллям мукет специалистъёс но. Ваньзы соос валэктыны тыршизы кондукторъёслэн но водительёслэн секыт удысын тыршемзэс. Соосты но, пе, валаны кулэ. Кулэ, дыр. Э. Кумачева. Ческытсэ но, курытсэ но - шори Удмурт Республикаысь прокуратуралэн коллегиезлэн кылем пятницае ортчем кенешоназ лэсьтэмын 2000-тӥ арын ужамзылы йылпумъянъёс. Кенешонэ пыриськизы Удмурт Республикаысь Кун Кенешлэн Тӧроез И. Н. Семенов, Правительстволэн Тӧроезлэсь ужзэ быдэсъясь Н. И. Хохлов, правоез утёнъя, судъя ёзъёслэн кивалтӥсьёссы, городъёслэн но ёросъёслэн прокуроръёссы. Прокуратуралэн миым ужамезлы йылпумъянъёс сярысь ивортон лэсьтӥз Удмурт Республикалэн прокурорез В. К. Зыкин. Кызьы пусйиз Владимир Кузьмич, миым прокуроръёс асьсэлэн ужазы тужгес но бадӟым саклык висъязы законъёсты быдэсъямез эскерон-чакланлы, кунлыкез юнматонлы, экономикаын йыртэман учыръёсты алонлы, адямиослэсь правооссэс но эрикъёссэс утёнлы. Россилэсь Конституцизэ но законъёсты тӥян учыръёсты алон но палэнтон вылысь, прокуроръёсын сюрслэсь трос протестъёс но укмыс сю представлениос сётэмын. Прокуроръёслэн постановлениоссыя но представлениоссыя 800 пала кивалтӥсьёс кыл кутытэмын. Удмурт Республикаысь покуратураен нимысьтыз ужрадъёс кутэмын республикалэсь законодательствозэ, быдэсъясь властьлэсь но интыын аскивалтонъя ёзъёслэсь актъёссэс федерацияя законъёслы тупамон карон ласянь. Ар ӵоже республикаысь кун властьлэн правоя законлы тупасьтэм 35 актъёсыз шараямын, соосъя 27 протест но 2 представление сётэмын. Со сяна, ёросъёслэн прокуроръёсынызы шараямын интыын аскивалтонъя ёзъёслэн правоя законлы тупасьтэм 300-лэсь уно актъёссы, со пӧлысь 120-ез экономика удысэн герӟаськемын, 100-эз - адямиослэсь правооссэс но эрикъёссэс утёнэн. Прокуратураысь следовательёсын сэрттэмын-пертчемын 1500 уж. Шараямын 380-лэс трос адями виисьёс. Кырмемын адями виылӥсь маньяк Окунев. Азьвыл судэ шедьылэм Савиновен ӵош соос пинал нылъёсты эриктэмаллязы но виылӥзы. Окунев улытозязлы пытсэт сьӧры пуктэмын. Озьы ик 10 аресъем нылашез эриктэмамез но виемез понна кыл кутытэмын азьвыл судэ сюрылэм Аникеев. Шараямын но кырмемын бандитъёслэн ньыль огазеяськонзы, одӥгаз 16 мурт пыре вал. Сэрттэмын-пертчемын нефтепроводысь му вӧез лушкасьёс пумысен уголовной уж, 17 мурт кыл кутытэмын луоз. Прокуроръёсын воштэмын уголовной ужъёсты законэз тӥяса дугдытон сярысь 2 сюрс пала решениос. Правоез утёнъя ёзъёсын ужасьёсын законэз тӥян учыръёсъя прокуроръёсын 120 представление гожтэмын, соосъя милициысь 100-лэсь трос ужась кыл кутытэмын. Судъёсы келямын 20 миллион манет тыр пала 2,5 сюрс иск. Прокуроръёслэн 166 миллион манет тыр искъёссыя арбитраж судын 125 уж эскеремын. Ёросъёсысь прокуроръёсын сётэмын быдэ вуымтэос сярысь законъёсты тӥян учыръёсъя 350 представлениос, 210 кивалтӥсь кыл кутытэмын. Законэз тӥян учыръёсты алон, югдурез утён ласянь мукетъёсызлы адӟем карымон ужазы Ижевскысь, Воткинскысь, Сарапулысь, Октябрь, Дэбес, Ува но куд-ог мукет ёросъёсысь прокуроръёс. Соин ӵош ик, республикая йыртэман учыръёс 7,5 процентлы кулэсмизы ке но, югдур ялан сюлэмшугъяськытэ на. Озьы ик трос на быдэ вуымтэос пӧлын йыртэман учыръёс, егитъёс пӧлын паськыт вӧлме наркомания. Правоез утёнъя ёзъёслэсь кужымзэс ӟечгес ӧръяно экономикаын йыртэман учыръёслы, кузьым бичась кивалтӥсьёслы пумит нюръяськонэ. Огъя йылпумъянъёс лэсьтыса, Удмурт Республикалэн прокурорез В. К. Зыкин прокуратураын ужасьёс азе бадӟымесь куронъёс пуктӥз. Со нимысьтыз пусйиз нырысь быдэстоно ужпумъёсты. Соос пӧлын - интыын аскивалтонъя ёзъёслэсь, министерствоослэсь но ведомствоослэсь правоя актъёссэс, городъёслэсь но ёросъёслэсь уставъёссэс Россилэн Конституциезъя но законъёсызъя тупатъян, экономика удысын йыртэман, бюджетъя но налогъёсъя законъёсты тӥян учыръёсты алон но шараян. В. К. Зыкин вань прокуроръёсты нимысьтыз алӥз, законъёсты быдэсъянэз эскерон- чаклан, ужъёсты дыраз сэрттон-пертчон понна нырысь ик соос кыл куто шуыса, озьы ик оскемзэ вераз, Удмурт Республикаысь прокуратураын ужасьёс азязы сылӥсь ужпумъёсты быдэстыны быгатозы шуыса. Прокуроръёслы законъёсты быдэсъян, выльёссэ дасян удысын уртче ужаны ӧтьыса вазиськиз Кун Кенешлэн Тӧроез И. Н. Семенов. Туж бадӟым удыс оскемын тӥледлы, шуиз со. Нош ужамды-тыршемды понна ӟеч кылъёс верамен ӵош курысал тани ма сярысь но: куд-ог азинсконъёс, вормонъёс сярысь вераськонъёсмы медаз пӧрме вал ушъяськонлы. Медаз луы вал тодмо кырӟанын сямен: ческыт емышъёсты ӵошен бичм, нош курытсэ - огнам. Вань секытсэ огъя кужымен гинэ вормом. Ф. Никитин. Чечы - сиён но, эмъюм но Та вакытэ, толалтэ нй вазь тулыс адямилэн тазалыкез лябоме, витаминъёсын сиён ӵем уг шедьылы ни, басьтоно ке соос туж дуно усё. Кемаласен асьмеос тодӥськом ни мушъёслэн чечызылэн пайдаез сярысь. Со мугорез юнматэ, кужым сётэ, висёнъёсты ворме. Котькинлы ик тодмо, Пифагор математик кема улӥз шуыса. Со нуналлы быдэ чечы сиылэм. Нош Авиценна гожъяз: "Кема егит улэмед ке потэ, чечы си, тужгес но 45 арес тырмем бере". Озьы ик эмъюм луэ мушъёслэн прополиссы (клейзы), уктозы (перга), сюрелзы (пыльца), муш йӧлзы (маточное молоко). Дэмласько чечылэсь но прополислэсь кӧня ке эмъюм дасяны. Тани соос: 1. Бронхитлэсь, кызэмлэсь чечыен эмъяськон: 100 грамм шырбыж турынлэсь (подорожниклэсь) куаръёссэ, сяськазэ но чылкыт миськем выжызэ 200 грамм вуын пӧзьтоно 10-20 минут. Со вуэз сӥсъяно, отчы ватсано 100 грамм чечы, сое сурано, юоно нуналаз 3 пол сиськемлэсь азьло, 1-2 гучык яке 1-2 пуньы. 2. Нырпуш ке висе (насморк), нырул ке котме, ӵем кизьнылӥськод ке, тазьы лэсьты: ыль горд кушманэз миськоно но вуштоно, солэсь соксэ 2 пуньы чечыен умой сурано. Чечыё горд кушман сокез ныр пушкы лэзёно. 3. Тросэз кызэмлэсь тодо таӵе эмъюмез: сьӧд курыт кушманэз умой миськыса (кӧмзэ паланы уг яра), йылзэ вандоно, пушсэ пуртэн вуштыса (гоп мед луоз), отчы 2-3 пуньы чечы пононо. Собере 3-4 час ӵоже тусьтыын шобыртыса возёно. Кызӥсь пиналъёслы сое сётоно сиськемлэсь азьло нуналаз 3-4 пол пичи пуньыен, умойгес луэ эмъяны кӧлонзы азьын. 4. Пиналъёслы кызэмлэсь дэмлало на таӵе эмъюм: чечыез но оливковой вӧез ӧжыт гинэ шунтоно, собере пичи пуньыен сиыны сётъяно нуналаз 3-4 пол (1 пуньы чечы вылэ ватсано 1 пуньы оливковой вӧй). 5. Ньылон пуш висьыку (ангина), ты висёнлэсь (воспаление легких) таӵе мазь (сурет) лэсьто: 10 грамм прополисэз векчи юдоно, сурано шунтэм 100 грамм скал вӧйын, пӧсятоно 60 градусозь, собере марля пыр сӥсъяно пичи банкае. Юыны кулэ пичи пуньыен, нуналаз 2-3 пол пӧсь йӧлын, одӥг час пала сиськемлэсь азьло, озьы юоно кык толэзь ӵоже. 6. Кизьнылэмлэсь (насморклэсь) таӵе эмъюм дасяно: 20 грамм векчи юдэм прополисэз сурано скал вӧйын, лэзёно 1 пуньы мында шундыберган вӧй,умой-умой сурано, ваньмыз ик 100 грамм пала луоз. Та мазез ӵукна но ӝытазе пичи ватаен ныр пушкы пононо но кӧня ке возёно. 7. Пӧськылэсь яке ки вылысь яратосты зыраны прополислэсь таӵе мазь лэсьто: прополисэз (ог 10 грамм) векчи вандылыса яке пырдытыса дасяно. 100 грамм пала шунтэм парсь кӧез (вӧез) пӧсятоно но отчы ватсано дасям прополисэз. Сураса ӧжытак шунтоно, собере чылкыт марля пыр лэзёно пичи пиялае, лач-лач пытсаса возёно холодильникын, пеймыт азьын. Зыраны кулэ кӧлон азьын. 8. Диабет висёнлэсь куто таӵе эмъюм: мушъёслэсь уктозэс (перга) яке сяська сюрелэз (пыльца) сурано ог 20 грамм скал вӧйен яке чечыен, собере ӵукна но ӝытазе ӝыны час сиськемлэсь азьло сое сиёно. М. Михайлова. ПИЧИ ГУРТЪЁС Сепъёс Данъясько доренызы Алнаш-Грахово сюрес вылын куинь гурт сылэ: Карйыл Утчан, Шорын Утчан но Вуж Утчан. Кемалась кылдэмын соос. Нош ог 70 ар талэсь азьло Шорын Утчан бордысь яна потэм починкалэсь историзэ кылэм-адӟемъёс шедёзы на. 1928-тӥ арын Шорын Утчан гуртэ Алнаш волостьлэн мэрлыко утёнъя (социальной обеспечениея) мэрлыкез утёнъя (социальной обеспечениея) ёзаз ужась Пётр Шарапов лыктӥз но выль ивор ваиз. Мылкыд карисьёсты выль починка кылдытыны лэзё, пе. Отын колхоз ӝутоно луоз. Мукет интые улыны выжисьёслы кун юрттоз, шуиз со. Тае кылыса, Шорын Утчанын уноез улӥсьёслэн мылкыдзы бугыртӥськиз. Кӧня ке семьяос выль интые кошкыны соку ик соглаш луизы. Азьмынӥсьёс Афанасий но Григорий Дружинъёс, Иван Орлов, Димитрий Алашеев, Никифор Сапаров но Даниил Орлов бырйыса-бырйыса починкалы инты шедьтӥзы: Шорын Утчанлэсь ӝыны иськемлы улӥынгес, нюлэслы матын. Татӥ ик Варади шур кошке, лымшор пала мыныса, со Утчанка шурен пумиське, отӥяз соос ӵошен ини Колтымак шуре васько. Выль гуртлы 280 гектар музъем висъямын вал. Со пӧлысь 80 гектарез - нюлэсъёс но куакъёс. 22 семья выль интые мынӥз. Соку ик колхоз кылдытӥзы, "Серп" шуыса нимазы сое. Тӧрое юнматӥзы Харитон Богомоловез. Нырысь-валысь "Серп" ужаны кутскиз тулыс бусы ужъёс бордын. 90 гектар вылэ со валэс юос кизиз. Колхозын ужасьёс ас кидыссэс со понна сётоно луизы. коллектив азьын бадӟым ужпум пуктэмын вал: умой йылпумъяно тулыс бусы ужъёсты. Озьы ик улон коркаос но юртъеръёс пуктоно. Лэсьтӥськон понна 18 гектар нюлэс висъязы. 1929-тӥ арын сӥзьыл выль починкаын вить семья корка пырон ортчытӥзы ни. 1930-тӥ арын кун серпъёслы дас сюрс манет ссуда висъяз. Та коньдонэн колхоз нырысь ик басьтӥз кизён, турнан но кутсаськон арбериос, озьы ик герыос, тӧлӥськон но вал кыткон тӥрлыкъёс. Граховоысь вал вордон заводысь вятка сортъем ӟег кидыс басьтӥз. Со бӧрсьы ик серпъёслэн ю-няньзы ӟеч удалтӥз: гектарысьтыз соос быдэн 30 центнерен поттӥзы. Татысен починкаос пыд йылазы султыны ӧдъязы кадь. Но 1936-тӥ арын "Серп" колхозэз огазеязы Шорын Утчанысь Пастухов нимо колхозэн. Война вакытэ 1944-тӥ арын таос выльысь "Серпазы" ик люкиськизы вал, но кемалы ӧз. 1951-тӥ арын та котырысь вань пичи колхозъёслэсь одӥг бадӟым Мичурин нимо колхоз кылдытӥзы. Татчы шедизы Серп, Шорын Утчан, Карйыл Утчан, Мырк Ошмес, Вознесенское, Ласточкино гуртъёс. Ай отӥяз, 1957-тӥ арын, Мичурин нимо эштосэз "Большевик" борды сётӥзы на. Озьы Алнаш районысь "Большевик" колхоз одӥгез бадӟымез луиз. Быдӟым Отечественной ож кутскыку, Серп гуртын 31 семья лыдъяськиз. Войналэн нырысетӥ нуналъёсаз ик татысь 33 воргорон фронтэ келямын вал. Со пӧлысь 18-эз ожысь ӧз берытскы ни. Кылемъёсыз нош висись, сӧсыр луыса вуизы. Война бырем бере, татысь егитъёс мукет гуртъёсы, городэ кошкылыны кутскизы - улӥсьёслэн лыдзы син куспын кулэсмыны ӧдъяз. Соин валлин Серпез "неперспективнойёс" пӧлы пыртӥзы. Но гуртоос чидазы, вормизы. Серпсылы бырыны ӧз сётэ. Эсьмаса, табере соос данъяськыны быгато татысь потэм пиосынызы, нылъёсынызы: Юрий Иванович Медведевен, со печатья министр луыса ужаз, али "Бланкиздатэн" кивалтэ, Маргарита Дмитриевна Дружининаен, Казаньысь физико-математической факультетлэсь аспирантуразэ йылпумъяса, али со Тольятти городысь кун университетын ужа, Владимир Евсеевич Алашеевен - таиз удмурт телевидение кивалтэ. Гуртэ кылемъёс пӧлын но данак гинэ синмаськымон адямиос. Туннэ татын ваньмыз ог 30 хозяйство лыдъяське. Улӥсьёс пӧлын вань гинэ пенсие потэмъёс но, ӧжыт ӧвӧл пичи пиналъёс но. Гуртоос огкылысь, куспазы эшъяськыса уло. Ӵошен оско улонлэн чеберскемезлы. Е.ОРЛОВ, Серп гурт. Прагаын пумиськон 19-тӥ январе Прагаын пумиськылӥзы Россиысь огшоры ож тӥрлыкъя агенстволэн валтӥсь директорез А. В. Ноздрачев, промышленностья, наукая но технологиосъя министрлэн воштӥсез С. Г. Митин но Чехиысь "Шкода-Ауто" предприятилэн правлениезлэн тӧроез В. Кулганек но правление пыртэм мурт К. Вульф. Россиысь куноос тодматскизы "Фольксваген" концернын туала югдурен н азьланьлы пусъем ужрадъёсын. Татысь кивалтӥсьёслы ӵектӥзы эшшо одӥг пол рос-прос сэрттыны- пертчыны "Шкода-Авто-Удмуртия" проектъя ужпумез, та огъя предприятие пумысен асьсэлэсь малпанъёссэс, дэмланъёссэс веразы. Уго та проект Россилэн но Удмуртилэн но экономикаязы бадӟым инты басьтэ. Соин ик республикаямы выль автомобильёс поттонъя дэмланъёсты, ӵектонъёсты Россиысь Правительство но Удмурт Республикалэн Президентэз "Фольксваген" концернэн кивалтӥсьёсын валче сэкерыны чаклало. Удмурт Республикаысь Правительстволэн пресс-службаез. АРХИВЫСЬ МАТЕРИАЛЪЁСЪЯ Удмуртия ХХ дауре 1971-тӥ ар 30-тӥ мартысен 9-тӥ апрелёзь Москваын ортчиз КПСС-лэн ХХИВ съездэз. Со СССР-ын азинскем социализм лэсьтэм сярысь ялӥз. Верамын вал, "совето калык" выль валан кылдӥз шуыса. Съездын кутӥзы 1971-тӥ�1975-тӥ аръёслы вить аръем план. Соя калыклэсь улон-вылонзэ уката умоятыны чакламын вал. 70-тӥ аръёсы экономикаен центрысен кивалтон кужмояз. Тросгес коньдон висъяськиз обороная промышленностез азинтыны, нош калыклэсь улон-вылонзэ умоятонлы кулэсмиз. Нылпиос ичигес вордскемен но адями кулон учыръёс йылэмен, калык хозяйствое выль ужась кужым ичигес вуыны ӧдъяз, гурт калык тросэн городэ кошкыны кутскиз. 1971-тӥ арысен экономика огинтыяз сылыны кутскиз, соин 1985-тӥ арозь та вакытлы бӧрысь "огинтыын сылон" ("застой") кыл сётӥзы. Озьы ке но, СССР-лэн дуннеын интыез пумен кужмояз. СЭВ-е пырись кунъёслэн кусыпъёссы юнмазы. Ӵемысь пумиськылӥзы СССР-лэн но США-лэн вылӥ кивалтӥсьёссы, соос ож тӥрлыкез кулэстон ласянь уно пол огкыл гожтылӥзы. Удмуртиын 70-тӥ аръёсы умой азинскиз промышленность. Укмысэтӥ пятилеткалэн нырысетӥ араз Ижевскысь машина лэсьтӥсьёс 71 сюрслэсь ятыр "Москвич" поттӥзы. Январе кун эскеронэз ортчиз "Иж-2715" фургон машина. Урод сюресъёстӥ 30 сюрс иськемез сӧриськытэк ортчемез бере, сое тросэн поттыны ӵектӥзы. Кутскемын вал "Иж- Юпитер-3" но "Иж-Планета-3" выльдэм мотоциклъёсты поттыны. Феврале тямысэтӥ пятилеткаын басьтэм азинсконъёссы понна Ижевскысь машина поттӥсь но андан ӵыжатӥсь заводъёс пусъемын вал Октябрь революция орденъёсын. М.Т.Калашников техника наукаосъя доктор луиз. Мартэ 100 ар тырмиз Вотка заводын нырысетӥ мартен гурлэн ужаны кутскемез но Уралын нырысьсэ мартен андан ӵыжатыны кутскем дырыен. Удмуртиын дышизы нефтез ӝог кыскыны. Сое келян вылысь, Киёнгопысен Набережные Челныозь 260 иськем гумы кыскемын. Лэсьтӥськон ужъёс мынӥзы промышленностьын но гурт удысын. Глазовын пуктэмын "Химмаш" заводлэн нырысетӥ люкетэз. Можга ёросысь "Пычасский" совхозын лэсьтыны кутскемын 20 сюрс парсь вордымон комплекс, Глазовын - 200 сюрс курег вордымон птицефабрика, выльдэмын-тупатъямын Ижевскысь но Вараксиноысь курег вордон фабрикаос. Гурт удыс лябӟыны кутскиз. Укмысэтӥ пятилеткалэсь нырысетӥ арлы планзэ элькунмы ӧз тырмыты. Йӧл кыскон синӥз, скалъёслэн но ыжъёслэн лыдзы кулэсмиз, ю тысь вузан план ӧз быдэсмы. Юрттон вылысь город ю-нянь октон вакытэ трос ужасьёссэ гуртэ ысъялляз, но пӧртэм мугъёсын таӵе юрттэт сётэмлэн пайдаез ӧз луылы. Куд-ог колхозъёсын но данаказ школаосын азинскиз кролик вордон. Азинскиз космосэз эскерон. Орбитаысь "Салют-Союз" научной станциын космонавтъёс нырысьсэ кема ужазы - 23 нунал. 11-тӥ сентябре улонысь кошкиз Н.С.Хрущев, ватӥзы сое семьяез но матысь эшъёсыз гинэ. Новодевичьей шайвылысь шайгу вылаз памятник лэсьтӥз скульптор Эрнс Неизвестный. 24-тӥ сентябре Ижын усьтӥськиз "Ижсталь" йӧ дворец. Нылпиосты крезьгурлы но суреданы дышетон умояны кутскиз гуртъёсын но. Глазов ёросысь Пониноын усьтӥськиз музыкая школа, Можгалан - суреданъя школа. 11-тӥ ноябре ужзэ мытӥз Удмуртиысь художникъёслэн нырысетӥ съездзы. Н.МЕЛЬНИЦЫНА, Удмурт Республикаысь ЦДНИ-лэн директорезлэн воштӥсез. Грах ёросысь "Новогорский" совхозын куро люкало. 6575 войсковой частьлэн командованиез кайгыре Чечня Республикаысь Гудермес городын ожъёс дыръя 2001-тӥ арын 21-тӥ январе Пишоха Александр Валентинович бырыны шедемен валче но мур куректэмзэ вера ӵыжы-выжыосызлы но матысь адямиосызлы. Люкиськон луоз 2001-тӥ арын 26-тӥ январе таӵе адресъя: Ижевск город, "Металлург" культура дворец, 11 часысен 13 часозь. Удмурт Республикалэн Президентэз, Удмурт Республикаысь Правительство кайгыро Чечня Республикаысь Гудермес городын ожъёс дыръя 6575 войсковой частьысь майор Пишоха Александр Валентинович бырыны шедемен валче но мур куректэмзэс верало ӵыжы-выжыосызлы но матысь адямиосызлы. Алексей Шкляев Синъёс но нылъёс Син эмъян больницаын гожъяськыны секыт. Кин ке понна быдэс дунне ышемын тём- тём пеймытэ, кин но со адӟе тӧдьы марля пыр гинэ. Мон отчы кемдӥ миым 13-тӥ ноябре, Дуннеысь синтэмъёслэн нуналазы (вань сыӵе маке но). Отын кылэм-адӟем учыръёсты пумозязы валаны мыным кулэ луиз кык толэзьлэсь ятыр. Озьы но чуръёсы дыго-мого кошкизы. Чебер пияла Югыт коридорысь туала ӟусъёс небытэсь. Дасо кузя черодын пукиськом - ум сылӥське. Лазер сиен эмъяськыны котьку трос калык люкаське. Куддыръя пичияк керетонъёс пуромыло. Огез копак уг адӟы ке но, чалмыт улэ, мукетыз оглом таза ке но, черодтэк пырыны выре. Тани кытысь ке ӵуш-паш вуиз егит нылаш. Ымнырыз чебер но етӥз. Черодмес пазяны ӧдъяз, йӧ гурезьёс пӧлтӥ уясь ледокол музэн. Нош куинез бадӟым мугоро кышноос палэнэ ӧз кепырске, ӧсэз аспӧртэм улэп кульчоен пуннязы. Нылаш но ӧз куалекты. Огзэ чебер синзэ чиньыеныз зӥбиз но пыльтчытӥз. Со огшоры пияла протез вылэм. Сингопез копак буш. Кыкез нылкышноос палэнэ тэтчизы. Куинетӥез гинэ ӧсэз возьма на. Нылаш лек шиетӥз: - Тон, песянай, тодскод-а, малы мон палсин кыли? Верало. Кемалась сифилисэн висисько. Али но дорады лыктӥ отысь, заразной больницаысь. Направлениме возьматом-а? Чебер нылок котырын, кык-куинь вамышын, одӥг мурт но ӧвӧл ни. Эмъясь лазер си пала нуись сюрес шал-шал бушаз. Егит висён Та учыр кемаласьгес вал ке но, больницаын ӧз вунэтэ на. Огаз палатае понӥзы сизьымдон сьӧры выжем песянаез. Йӧнатыны выро арня, кык, куинь - падиез ӧвӧл. Эмъюмъёс ву сямен пайдатэк кошко мугорыз пыртӥ. Тодмо ӧвӧл ни, кинлэн йыраз нырысь ик шуккиз пересьлы эшшо огпол рос-прос анализъёс лэсьтыны. Вассерманлэн реакциез возьматӥз: таид но юн кемалась кутэм вылэм сифилис. Песянайлы визь тырыны кутскизы: - Кызьы тӥледлы возьыт ӧвӧл? Сыӵе арлыдо маке... - Марлэсь мыным керпотоно? Егит висёнэн черламын бере, асме весь егит ныл кожасько. Билет дун Эмъян удыс - аспӧртэм конвейер. Огез лыктэ, мукетыз кошке. Кык арнялэсь кема троссэ ик уг возё. Туннэ кошкыто кыдёкысь районысь вуэм нылашкаез. Нош со пыкиське: - Автобусэ билет басьтыны коньдонэ ӧвӧл. Городын ӵыжы-выжыосы ӧвӧл. Кельтэлэ на монэ кӧня ке нуналлы. - Соку коньдоно луод-а? - серем пыр юало. - Бен. Шедьто мон коньдон. - Кытын ужаса? - абдрало эмъясьёс. - Соиз ини секрет. Кӧня ке нуналскын нылаш узырмиз. Тумбочкаяз дуно сиёнъёс адско. Нош кошкыны уг дырты: - Доктор, кӧня ке манет гинэ уг окмы на билетлы. Туннэ ке ӧй, ӵуказе шедьто ни. Секрет мактал шараяськиз шӧдтэк шорысь. Больницаын вань нуль этаж шуон (сыӵе шуныт интыез гулбеч яке мурӝол ниманы сьӧлык). Нуназе татын валес котырез мисько-куасьто, йырси ӵышко. Пичияк сиськон инты но вань кадь. Нош уин... Уин чебер нылок дышем ӵапак татын "ужаны". Куд-ог воргоронъёслэн синзы гинэ висе, музон нёредъёссы тазаесь. Вирзы шудэ, кӧйзы голя. Соос ик синмаськиллям та нылоклы. Нылашкаез уллям бере, гулбече пыртӥсь ӧс борды ошизы тунгон. Кобла йыр быдӟа маке. Чылкыт шапык Удмурт кышноосты сокем урод кареме уг поты. Уката ик - туалаоссэ. Асьме нылъёсмы ведра-карнан улын уг губырско ни. Соин ик ӟуч но бигер нылъёслэсь шушанесьгес ӧвӧл. Кин тодэ, туннэ финн-угор дуннеын сямен ик, удмурт чеберинаос ӵуказе быдэс дуннеын, оло, тужгес даноесь лыдъяськозы. Нош шор арлыдоос пӧлын... Жаляса верано луэ: асьсэды трос калык пӧлын йӧн-йӧн возьыны быгатӥсьёсмы трос ӧвӧл. Огаз палатае пыртӥзы веськрес мугоро, пезьгыт вӧлъям пельпумо кышномуртэз. Ӵуказеяз пал синзэ марляен шобыртӥзы ке но, чеберзэ ӧз ышты. Монэ со бакомытӥз, шорам удмурт сямен вазьыса. Мон оскысал, со ассэ еврейка, полька, чешка шуысал ке. Нош удмурт... Ымныраз одӥг вишты но ӧвӧл. Нош лулаз - вишты гинэ мар - оломар мурда бороздаос вылӥллям. Гуртын Ирина кадь ӟеч аракы виятӥсь ӧй вал. Воргоронъёс лӧпшало: - Туннэ жӧломиськод, ӵуказеяз коть кытӥыд ке мед висьысал. Йырыд чылкыт- чылкыт, ошмес ву бере кадь. Кышноос вожъясько: - Кызьы сыӵе дун пӧзьтӥськод, Ира? Синкыли но синкыли... Синкыли вуттӥз зэмос синкылие. Бургы вӧзын сылон буш ортчымтэ. Суд картсэ келяз юэмлэсь кужмысь бурмытон интые, кык бадӟым пизэ - школа-интернатэ, муспотон Алёназэ - нуны юртэ. Мугор пушкын кивалтӥсь законъёсты валаны шуг. Куректӥсь Ириналэн сюлэмыз но, мусэз но таза кылизы - синмыз лябомиз. Йырбераз аръян порыен шуккизы но, дунне кысыны ӧдъяз кадь. Толэзь пала эмъяськиз. Огназ кылем егит кышномурт дораз ӧз берты ни, Иже лыктӥз. Пересь кышномурт дӥне улыны пыриз. Таиз кунокуа понна дун но ӧз куры. Нимамы мӧзмытозь, кык кузя шулдыргес луоз, пе. Нылпиоссэ Ирина ого-кыкто ӧз карылы ке но, пиосын герӟаськем сюлэм яра пумен зӥбломиз. Нош Алёназэ вунэтэмез уг луы. Утчаны ӧдъяз - сое басьтӥллям мукетъёс. Таоссэ шараяны закон уг лэзьы. Нылкышно отчы-татчы куронъёс келяз. Борис Ельцин дорозь вуиз гожтэтэз: "Аслам нылпие, мынам виры, огназ, анаез улэп луыса вылысь. Малы адями уг вала адямиез?" Солы "адямилы сямен" валэктӥзы: нылдэ вордыны басьтэм муртъёслэн правоссы зэмос анай-атайёслэн кадесь ик. Соку Ирина ассэ буйгатыны выль амал шедьтӥз. Со гожъяны кутскиз... нылызлы...: "Мон тонэ аракыен воштӥ вал. Кызьы монэ музъем чида? Тодӥськод меда, тонэ муртъёс будэто шуыса? Шӧдӥськод меда зэмос анаедлэсь чигиськемзэ? Выль анай-атаед ми картэным сямен медаз жугиське". Таӵе гожтэтъёс люкен-люкен ни. Нокытчы ыстэмын ӧвӧл. Ачиз Ирина соосты лыдӟыны возьдаське. Муртлэн гожтэтъёсыз кадесь пото, пе. Нош пуштроссэс тодэ: "Оло, верантэм бадӟым сьӧлыке понна ик инмар монэ синтэм кельтыны турттэ". Кык арняскын Ириналэн синмыз чарак умояз. Эмъясьёс буйгатӥзы: сукыр кылён кышкытлык чик ӧвӧл, пе. Соос татысь ваньзэс лӥятыса келяло. Адӟисьсэ но, ӝыны адӟисьсэ но, копак адӟисьтэмзэ но. Вож эмъюм Паймоно кадь: син эмъян больницаын чылкак сукыр (адӟисьтэм) муртъёс одӥг-ог гинэ. Мукетъёсыз ваньмыз ямен ик кӧня ке но адӟо. Тӥни малы дас витё аресъем нылаш милям син шорамы чаляк йӧтӥз. Чебер йырзэ укыр сьӧрланьтыса воземезъя валастким: таид : копак уг адӟы. Зэм, синъёсыз сокем лултэмесь ӧвӧл, кӧня ке солань-талань бергало. Арлыдо кышноос Катяез зол жалязы. Синтэм кылемезлэсь мугзэ нокинлы ӧз вералэ. Арня пала чакламе бере мон котьма ке но соин кенешоно кариськи. Котьма шу, но пӧламы генералъёс но ефрейторъёс ӧвӧл, ваньмы ми одӥг кадесьгес нимын - висись. Соин ик кайгумес сокем ум ватӥське. оскиськомы: мышкад тонэ уз серекъялэ - жалялозы. Катялэн куректонэз номырин мертантэм вылэм. Вордскем кыдёкысь гуртын. Куатетӥ классын, вань ёзъёсыз сямен ик, улӥз кызь иськемысь черкогуртын, интернатын. Отысь воспитатель ӝытазе пиналъёсты кыре улля. Кӧлон азяды кӧня ке тӧлатскелэ, пе. Апреле нунал кузьгес ни. Вторник ӝытэ Катя ульчае потӥз, номыр умойтэмзэ малпатэк. Шуак татчы вуизы сизьым кузя пиос. 14-17 аресъемъёс. Ваньзэсты сямен ик Катя тодма школая. Куд-огез кудӟемын. Пиос Катя котырысь векчи шалякаосты уллязы. Нылашез суйёстӥз кырмизы но ышыг интые нуизы... Мазэ-созэ пумозяз валаса, нылаш соку ик аслыз шуиз: асме быдто. Зэм, интернатын нокин ӧз тоды сыӵе кӧшкемыт адӟонэз. Нылаш ӵуказеяз чалмыт улӥз. Урокъёсын пукиз жӧломыса. Йыраз одӥг малпан: кыӵе амалэн быроно? Тодаз ваиз: дораз кемаласьгес дасясько ни пунызэс виыны. Атаез вӧзын со куке- соку усто пӧйшурась вал. Нош вал дӧдьы ултӥ кыльыса, пыдзэ сӧсыртӥз, нюлэскамысь дугдӥз. Тӥни сое быдтоно ни шуыса, мемиез, скал сюдӥсь, фермаысь вуттӥз кыӵе ке эмъюм - дарпил-а, дерпил-а. Соин, пе, пудоослэсь муссэс йӧнато. Нош гуртын дарпиллы шедьтӥллям музон "уж" - пуныосты виылон. Субботае Катя бертӥз. Вить пинал пӧлысь дорын нокин ӧвӧл. Мемиез но сузэрез Пермьысь базаре кошкемын. Атаез колхоз ужын. Корка пушез утялтонназ нылаш тодэ: эмъюм кылле сервантын, пластмасса посудаын. Али но татын. Тани соос - паськытэсь вожалэс таблеткаос. Катя соку ик кыксэ ньылӥз, ву юиз но кулыны выдӥз. Учкиз на час шоры. Ӝытазе куать час. Номыр но гожтыса ӧз кельты. Та ӝытэ ик укмыс часэ шарак! сайказ. Дораз адямиос вань ни. Нош маке умойтэм дауртэмзэ ӧз ятвылтэ. Отӥзэ вӧтам кадь тодэ на. Арня нуналэ ӟырдэктӥз. Мемиез шуиз: школае уд мыны. Понедельнике но вторнике уйжомыса кыллиз. Средае горд киросо машина сое Кезэ вуттӥз. Арня-а, мар-а ортчыса - Иже. Огаз больницае, мукетаз, куинетӥяз... Мар та таӵе? Корка пушкын, пеймытгес азьын, Катя адӟе. Ульчаын котырак вӧлске обрат кадь нап бус. Собере юрт пушкын но пумен пеймыт луиз. Отӥяз дунне кысӥз. Кык арня возьыса, сое дораз лэзизы. Тодмо пиез, куинь арлы зӧкгес (бадӟымгес) маке, та корка сюрессэ соку ик ыштӥз. Со понназ дораз ветлыны кутскизы следовательёс. Зэм, огзэ но укылтэмез ӧз пуктэ - ежесь на, пе. Вылаз ик, таосыдлэн ӵыжы-выжыоссы кыл вӧлдӥллям: милемды, пе, нерад каризы ни, кузьым (взятка) курыса. Туэ ёзъёсыз укмысэтӥ классэ ветло ни. Катя уг дышетскы. Брайльлэсь шрифтсэ валэктыны юрттӥсь ӧвӧл. Зэм, корка пушкын оломар но лэсьтыны выре. Тодэ, кытын кыллё картош, кеньыр, сӥль, сылал, пурт. Я огназ, я кинэн ке ӵош пӧра. Кулэ дыръяз пыре гулбече но, чуланэ но. Нылашлэн яратоно шудонэз но вань. Керттӥське - сэрттэ, керттӥське - сэрттэ. Анай-атай басьто толэзяз 200-300 манет. Катялэн пенсиез миым 500 вылэ вал. Эмъюмъёс - дуноесь. Нош басьятэк уг луы. Сотэк кызьы оскод та бурмонлы? Сотэк малы улод на? Катялэсь юасько: - Табере яд уд юы ни, дыр? - Адӟом ай, - лякытак гинэ вазиз со. Огшоры чай сярысь вераз кадь. ВОРМОНЛЫ - 55 Скалъёс утизы быронлэсь Балезино ёросысь Ӟаныгурт чебер, шулдыр интые пуксемын. Лудъёс та палан ӵошкытэсь, кытӥ-отӥ соосты люкыло тэльёс, жильыр-жильыр бызись пичи шуръёс. Гуртлэн шунды ӝужан палаз туж бадӟым лысо нюлэс куашетэ. Отысь кыз писпуосты дун вуэныз секта кадь татӥ ортчись Люк шур. Вашкала дыръя пересьёс та шур вылэ бадӟым тымет ӵыпиллям вылэм, отчы вуко пуктылӥллям. Но 1936-тӥ арын туж пӧсь но кӧс ар тупаз. Кизем ю-нянь, етӥн бусые ик куасьмиз. Кышкытлык кылдӥз, гуртоос сютэм кылёзы шуыса. Соин ик колхоз кенешын та тыметэз лэзьыны вераськизы. Озьы ик лэсьтӥзы. Кӧня чорыг кылиз со тымет пыдсысь турын пӧлы! Ми, пичиос ай, чипейёсты, киынымы кутылыса, кин маин быгатэ гуртэ нуллӥм. Гуртоос сое куасьтыса пызь изылӥзы. Озьы калык кышкыт сютэм кылёнлэсь мозмытэмын вал. Колхозамы та аръёсы кык бригада ужаз, котькудаз ог витьтон мурт. Со сяна, нылпиос гужем каникулъёс дыръя анай-атайёссылы юрттылӥзы. Колхоз дырыз дыръя кунлы ю-нянь, турын, етӥн, сӥль, йӧл, ыж гон, курег пуз келянъёссэ быдэсъяз. Озьы арысь аре со юнмаз. Гуртын лэсьтэмын вал пудо вордон гидъёс, ю-нянь кутсан но возён итым. Улон огсыр ӧръяськыны ӧдъяз. Но ваньзэ куашкатӥз сьӧсь война. Огшоры гужем нуналэ ми, нылпиос, ю бусыысь жуг- жаг турынэз уриськом вал. Нуназеян котыр дорыамы Наговицыно гурт кенешлэн тӧроез Анатолий Федотович Калинин лыктӥз. Со милемыз огазе люкаськыны куриз но шимес ивор вераз, немецъёс война ялытэк асьме кун вылэ бомбаос куяло, пе. Соос уг жаляло пересьёсты но, нылкышноосты но, пиналъёсты но. Каргам тушмон быдэс дуннеез киултыны малпам. Тӥни озьы. Та бӧрсьы ӵуказеяз ик гуртысьтымы егитэсь, кужмоесь, ужез яратӥсь куать воргорон войнае кошкиз. Пӧлысьтызы огез гинэ берытскиз фронтысь, со но - сӧсыр луыса. Нош Ӟаныгуртысь ваньмыз 42 воргорон ож бусые кошкиз. Со пӧлысь 26-ез пыраклы отчы кылиз. Берытскемъёсыз пӧлысь но уноез кема ӧз улэ ни, висьыса улонысь кошкизы. Тани басьтом гуртысь Лекомцевъёслэсь семьязэс ик. Илья Михайлович кузпалэныз ӵош куать пи будэтӥзы: Фёдор, Илья, Петя, Гриша, Володя но Аркадий. Та пӧлысь витез ож бусые ик кылизы. Аркадий, самой пичиез, фронтысь бертӥз вал, но вить вынъёсыз ӧвӧлысь но анай-атаез война вылтӥ сютэм кулэмзылы чидатэк со ӝоген кулӥз. Озьы тямыс муртъем семья 1941-тӥ�1945-тӥ аръёс ӵоже одӥгтэм быриз. Фронтэ кошкем сяна, тросэз гуртоос быризы сютэм улонлэсь. Соин валлин трос нылпиос война вылтӥ сирота кылизы. Соос пӧлын - мон но. Озьы ке но, вордӥм пудо-живот, юртъер котырез утим. Пичи-а тон, бадӟым-а, пудоед вань-а, ӧвӧл-а - государство азямы одӥг кадь куронъёс пуктылӥз: 18о килограмм йӧл, 120 курег пуз, 40 килограмм сӥль, ыж гон но мукет бакча сиёнъёс вузано. Колхозын ужам понна трудодень гинэ гожтылӥзы, копейка но коньдон ӧз тыре. Озьы ньыль ар тырмыт сиён-юонтэк, сылалтэк курадӟим. Ёрмим спичкалы но. Тыл поттылӥм, бензинлэсь кызьпу сенькиез анданэн яке кӧльыен шуккылыса. Куд-огезлэн таиз но ӧй вал ай. Таӵеос вазь ӵукна ик учкылӥзы, кинлэн муръёысьтыз ӵын потэ шуыса. Отчы ик мынылӥзы эгыр понна. Уг тырмы вал пу но. Дорын мӧйыос ӧвӧлысь, дас-дас ньыль аресъем нылпиос, пила, тӥр кутыса, мур лымы вылтӥ нюлэс кораны ветлоно луизы. Даурен будӥсь кызъёс корт кадь золэсь, пинал кужымлы сётскисьтэмесь. Тау пересьёслы, тырмыт гид, кенос, лапас лэсьтэмзы понна - туж ёрмон дыръя соос но эстӥськон пулы яразы. Ми, войналэн нылпиосыз, валам, та секыт вакытэ кунлы бадӟым юрттэт кулэ шуыса. Колхоз бусыын но пудо вордон фермаосын ӧз тырме ужась киос. Озьы пинал дырмес "вунэтоно" луим. Тужгес "пӧсь" йӧтылӥз гужемзэ. Тулысысен кутскыса ик бусы ужъёс куасалтыны кутско. Собере турнан дыр вуэ. Та вакытэ бадӟымъёсызгес нылъёс но пиос киязы кусо кутоно луылӥзы, пичиосызгес - мажес. Турын дасянэз ӝегатскытэк, ӝог йылпумъяно. Тодмо ӧвӧл, отӥяз кыӵе куазед луоз, собере ю бусыос но кисьманы кутскозы. Иське, арано, кутсано, ю-тысь шертоно, етӥн шукконо но тышкано... Пересьёс ю тысез син кӧльызэс кадь утьылӥзы, солы ик дышетӥзы милемыз но. Косилкаен арам бере, одно ик пиналъёсты бусые усьыса кылем шепъёсты бичаны косылӥзы на. Валъёсты фронтэ келямысь, уже кутоно луиз ошъёсты, скалъёсты. Мискиньёс, соос гинэ но кӧня чидазы! Но тросэз семьяос со скалъёслы луыса гинэ сютэм кулонлэсь кылизы. Озьы ке но, котькин сямен ик ӟаныгуртъёс но вормонлы осконзэс ӧз ыштэ, секытлы ӧз сётске. Нюръяськизы. Вормизы. Г.ЛЕКОНЦЕВ. Та чупрес, котькытчы вутскись кышномуртэ инмар ачиз улонзэ пиналъёсын герӟаны косӥз, дыр. Куамын ньыль ар талэсь азьвыл Юкаменск ёросысь Ежево школае лыктыса, Г. И. Волкова нылъёсты, пиосты лякыт сямо луыны, ужез яратыны, тодон- валанъёсты дунъяны дышетӥз. - Пиналъёстэк улонме син азям ик пуктыны уг быгатӥськы, - усьтэ мылкыдзэ Галина Ивановна. Соосын ужаса, ачид но егит луиськод. Пиналъёслэн визьзы лэчыт, сюлэмзы чылкыт, пӧяськыны дышымтэ на. Юнме шат соосты "улонмылэн сяськаосыз" шуо? Дышетӥсьлэн вань кужымзэ сётыса, дырзэ жалятэк тыршемез, Калыкез дышетонъя удысысь отличник нимын пусъемын. Нош ваньмон дыръяз Галина Ивановна кылбуръёс гожъя, соосты ёрос газетазы печатла. - Организаторын ужакум, кыӵе ке ужрад ортчытыны дасяськыкум, сценарий малпакум яке кинэ ке ӟечкыланы косыкузы, кылбур гожтон борды кутсконо луи. Табере чуръёс асьсэос сюлэмын вордӥсько. малы мон шумпотӥсько, шугъяськисько, мар сярысь сюлмаськисько - ваньзэ кагаз вылэ кисьтӥсько. И. Лукина. Адямиез утёнлы дышетскозы Таяз арняе Ижевскын ужаны кутскоз страхованиея ужпумъёслы сӥзем научно- практической конференция. Сыӵе ужрадлы кичӧлтон сётӥз Россиысь Приволжск федеральной округлэн кивалтӥсез Сергей Кириенко. Конференцилэн нырысетӥ кенешез ортчоз 24-тӥ январе Ижысь кардиоцентрын. Со юнме шорысь ӧвӧл, угось берло аръёсы асьме республикаын калыкез висёнъёслэсь страховать карон умойгес радъямын медицина удысын. Ужрадэ люкаськемъёс тодматскозы ог-огзылэн страхованиен вырон амалъёсынызы. Кылсярысь, эскерозы, кызьы та ужез умойгес радъяно промышленностьын но жилищно- коммунальной хозяйствоын. Туннэ Удмуртиын ужа ни 35 пала страхованиея компания. Приволжск федеральной округысь вуэм специалистъёс со компаниослэн ужаменызы но тодматскозы. Ужрад кыстӥськоз 26-тӥ январёзь. Сое радъязы Удмурт Республикая Валтӥсь федеральной инспекторлэн службаез но Удмурт Республикаысь Ужбергатонъя кун комитет. Т.МИРОНОВА. Кылизы но гольык келязы Кык лушкаськисьёслы аспӧртэмлыко пунэмзэс сётӥзы Киров улосысь "Искра" сад- бакчаез возисьёс. Уго берло кык арняосы гинэ татысь но бускель кооперативъёсысь 30- лэсь уно коркаос "сузямын" вал. Тужгес но кышкасьтэмъёсыз воргоронъёс возьмаськыны кенешизы. Соку ик одӥгзэ юртлэсь ӧссэ ломен бералтыкузы кык егитъёсты кырмизы. Соосты шыр гольык кылизы, дӥськутсэс но пыдкутчанзэс сутӥзы, асьсэды кезьыт куазен "юмшаны" лэзизы. Сюрес вылэ потыса, вӧзтӥзы ортчись машинаосты дугдытыны медо вал. Одӥгез но водитель ӧз дугды. Куанеръёсты жалязы ГИБД-ын ужасьёс. Лызэктэм бакча сузясьёсты соос городэ вуттӥзы. Соиз паймымон: одӥгез но милицие заявление ӧз гожты. Озьы ик сад-бакча возисьёс но. ИМА-пресс. Правительствоын Огкылэ вуизы Правительстволэн Президиумез берло кенешаз дасо пала ужпумъёсты эскериз. Калыкез дышетонъя министр Л. Захарова ивортӥз дышетскисьёс пӧлын туэ спортъя тол шудонъёсты ортчытон сярысь. Со луоз 2-тӥ-4-тӥ мартэ Шаркан черкогуртын. Нош гуртысь дышетскисьёслэн спортъя куинетӥез фестивальзы усьтӥськоз туэ инвожо толэзе Красногорскын. Та ужрадъёс радъямын луозы Россия Федерацилэн "Президент ӵошатсконъёс" программаез улсын. Но кызьы шуиз министр, та кык районъёслы ӵошатсконъёсты ортчытон понна, республикалэн бюджетысьтыз но коньдон висъяны учкемын. Архитектурая но лэсьтӥськонъя министр В. Загайнов таӵе ужпумъя валэктонъёс сётӥз: радлык тупатэмын куд-ог гражданъёслы Россилэн но Удмуртилэн бюджетъёссы чотын квартираос висъян сярысь. Сыӵе кичӧлтонэн министерствое вазиськем "Чернобыль" союз. Солэсь куронъёссэ лыдэ басьтыса, табере улонни басьтыны огъя радлык тупатэмын Чернобыле но "Маяке" огазеяськонын радиация улэ сюремъёс, туала ожъёсын сӧсырмемъёс но озьы ик азьвыл республикаосысь кужмысь кошкытэм адямиос. Гурт удысъя но сиён-юонъя министрлэн В. Невоструевлэн ивортонэз герӟаськемын вал Красногорск ёросысь "Прогресс" колхозлы коньдонэн юрттэт куронэн. Татын Рождествое выжон уе парсь вордон гидлэн липетэз куашкам. Тӥни озьы но луылэ! 2000-тӥ ар талэсь азьло гидын Иисус вордӥське, нош татын кык мумы парсьёс улонэнызы люкисько. Отӥосаз, 100 пала парсьёс огдырлы калыклэн гидъёсазы пыртэмын. Та учырлэсь мугзэ тазьы валэктӥзы: парсь гид, пе, 1977-тӥ арын пуктэмын вал уно куронъёсты чаклатэк. Кылсярысь, гидлэн кирпичъёсыз песокен гинэ, пе, лякылэмын. Угось со аръёсы цемент шоры тазьы учко вылэм: со, пе, тазалыкез уродмытэ. Соин ик со дыре пуктылэм гидъёс гинэ ӧвӧл, школаос но, цементтэк пуктылэмын. "Прогрессын" луэм учыръя Правительстволэн Тӧроезлэн воштӥсез Н. Хохлов (со нуиз та кенешез) ӵектӥз нимысьтыз эскерон ортчытыны. Но та колхозлы коньдонэн юрттыны Правительстволэн Президиумез пумит ӧз луы, 150 сюрс манет висъямын луоз. Россилэн Правительствоез выль дунъёс тупатӥз ни нюлэслы (древесиналы). Но асьме республикаын матысь дыре солы дунъёс уз на воштӥське, соин ик гуръёссэс пуэн эстӥсьёс та пумысен сюлмаськыны кулэ ӧвӧл, шуиз коньдон ужпумъёсъя министр В. Бельтюков. Президиумын мукет ужпумъёс но сэрттэмын вал. Кылсярысь, 2004-тӥ арын республикалэсь тодмо нуналъёссэ пусъён но бадӟым ужрадъёсты ортчытон сярысь. Т. Банникова. 3-тӥ феврале Пичи Пурга ёросысь Шорын Юри школа кылдэмез дырысен 70 ар тырмонзэ пусъе но та школаез йылпумъям муртъёсты люка. Ужрад кутске 10 часын. Илья Клебановен пумиськон 24-тӥ январе Удмурт Республикалэн Президентэз Александр Волков Россия Федерациысь Правительстволэн Тӧроезлэн воштӥсеныз Илья Клебановен пумиськылӥз. Удмурт Республикалэн Президентэз ивортӥз "Шкода-Ауто" чех предприятилэн кивалтӥсьёсыныз 19-тӥ январе Прагаын ортчем кенешонъёс сярысь. Илья Клебанов пусйиз, "Шкода-Ауто" фирмалэсь автомобильёссэ поттон понна, Удмуртия тужгес тупа шуыса. Пумиськон дыръя озьы ик вераськон мынӥз "Ижевский электромеханический завод" ФГУП-лы валтӥсь директор юнматон сярысь. Вуоноез дугдон инты - "Удмуртия" вузкарон юрт" Тазьы нимаськоз Москваысь Марьино районысь одӥгез транспорт дугдылон инты. Уго "Удмуртия" вузкарон юртлэн данэз ӝог вӧлмиз татын улӥсьёс пӧлы. Алигес мон но вуылӥ та юртэ, тодматски отын ужасьёсын, басьяськисьёсын. Пырем бере ик син шоры йӧто Ижын, Можгаын, Кезын йӧллэсь дасям сиён-юонъёс, "Иммар" ОАО-лэн но Сарапул фабрикалэн ческыт сиёнъёссы. Кеньыр но макарон изделиос - Ижысь, аракы - Глазовысь но Сарапулысь. Удмуртиысь вузъёс пӧлын вань Москваын лэсьтэмъёсыз но. Озьы соосты луэ ог-огенызы ӵошатыны. Кылсярысь, Москваын дасям "Кристалл" водка 507 манетлы дуногес Сарапулын но Глазовын поттэмъёсызлэсь. Ӟечлыксыя но соос вылӥынгес, пусъё басьяськисьёс. Та бадӟым магазинысь туннэ шедьтод республикаын лэсьтэм-дасям 1180 пумо вузъёсты. Эшшо 33 предприятие мылкыд каре на вузъёссэ Москвае келяны. Басьяськисьёс шумпотыса басьто Ижевскысь "Сактон" фабрикалэсь дӥсьсэ. Выль ар азьын радъямын вал паськытатэм вузкарон. Ортчем ӝыны толэзен ӵошатыса, куинь нунал куспын тросгес дӥськут вузамын вал. Москваын улӥсьёс асьме дорын лэсьтэм сиён-юонэз дунъяло вылӥ ӟечлыксыя, тужгес но - йӧллэсь дасямъёссэ. Соин ик вузкарон юрт соосты тросэн басьтэ но ог куамын магазинъёсы келя. Нош "Иммарлэн" сиёнъёсыз Владимир улосэ но татысь кошко. Магазинлэн данэз Марьинолэн палэназ но вӧлмиз ини. Мукет микрорайонъёсын улӥсьёс но татчы сюрес лёгизы ни. Татын, зэмзэ но, дунъёс трослы улӥынгес. Уго "Удмуртия" вуз поттӥсьёсын меӵак кусып возьыса ужа. Вузкарон юрттэз усьтыку, Кун Кенешлэн Тӧроез, нош али Удмурт Республикалэн Президентэз Александр Волков бадӟым азинсконъёс сӥзиз вал. Солэн мылкыд каронэз нуналысь нуналэ быдэсме. Е.ПЕТРОВ. ВАЛЭКТЭ ЮРИСТ Сэрегез дася адвокат Лилия ШКЛЯЕВА Коркае кезьыт... Улӥсько коммунальной квартираын. Омыр 15 градуслэсь зол уг шуналля. Домоуправление олокӧня пол ветлӥ ни. Мастер меӵак вера: - Тау шу, Владивостокын сямен тылэз уг кысыло на. Электрогур басьты но шунскы. Зэм но вань шат Приморьеын сямен ӟонгыраны кышкытлык? Нокыӵе закон асьмеды уз утьы-а? Мар кароно, ар ӵоже 6-7 толэзьзэ пӧсь ву ӧвӧл ке? К.Корепанова, Ижын улӥсь. Кынмыны кышкытлык вань-а, ӧвӧл-а - тазэ закон уг тоды. Нош закон тӥледды оскымонгес мед утёз шуыса, тэк пуконо ӧвӧл - бергано. Нырысь ик домоуправление (жилучастоке, ЖЭК-е) нуоно курон (заявление). Пуштросэз таӵегес медло: кватираям кезьыт улэмен но (яке) пӧсь ву вуымтэен курисько улон инты понна дунме кулэстыны. Татчыозь тӥ сыӵе дунэз быдэсак но дыраз тырылӥды бере, праводы вань сётымтэ юрттэт (шуныт, пӧсь яке кезьыт ву, газ, электрокужым) понна дунлэсь мозмытскыны. Шӧртчи адямиос тазьы но лэсьто. Кынмыса висьыны усё но йӧнатскыны быдтэм коньдонзэс берыктыны куро. Валамон ини, со понна люкано эмъюм понна чекъёс, уждунъя справкаос но музон бумагаос. Кынмон - со мораль ласянь но изъян адӟон. Таизэ пунэм тыронзэ домоуправление мед берыктоз, куре закон. Кынмаса висемлэн мугъёсыз трос. Нош врач тӥледлы юрттыса валэктыны яке гожтыны мед быгатоз: тӥ уродэ усиды квартирады кезьытэн сэрен. Тӥ кадь "йӧнтэм" адямиен ченгешонтэм понна, домоуправление, оло, соглаш луоз улон инты понна дунэз кулэстыны. Нимаз адямилэн предприятиез Эшъёсы весь алылӥзы: нимаз муртлэн вузкарон предприятияз, ЧП шуонэ, ужаны эн ёрсаськы. Ӧй кылзӥськы но аслым ик урод лэсьтӥ. Предприятимы нырысь чупрес бергаз. Берлогес лябомиз но, кузёмы милемыз оген-кыкен улляны шӧтаз: штатэз кулэстэмен валче, пе. Тузэм муртъёс интые ӵыжы-выжыоссэ кутэ шуыса, мон судэ вазиськи но, монэ уже берыктӥзы. Прилавок сьӧры султыны ӧй вуы, кузёмы выль амал шедьтӥз. Ваньдэсты, пе, ужысь мозмытӥсько, предприятие быремен валче. Дорамы зэмен ик лыктӥз нимысьтыз комиссия. Озьы-тазьы вырон сямен, мынам ужан дырам (стажам) вис кылдӥз. Азьланьын со пенсие вылын но, оло, шӧдӥськоз. Вань-а югдурез тупатон амал? А.Шкляева, Вотка город. Вань. РСФСР-лэн Граждан процессъёсъя кодексэзлэн 13-тӥ ёзэтэз (статьяез) косэ судлэсь решенизэ одно быдэстыны. Озьыен, суд тӥледды берен уже берыктыны косэмен валче, тӥ лыдъяськиськоды уже кутэмен. Вал-а та вакытэ дорады предприятиез быдтонъя комиссия, ӧй-а - со вылэ медаз чӧлске. Предприятие ӧвӧл ни лыдъяське, та сярысь огъя кун реестр гожтэм бере гинэ. Соин ик тӥляд луонлыкты вань висатэм стаждэс выльысь "итыны". Пенсие дасяськон Берло аръёсы ужысь кошки но утялтӥ мемиме. Со - нырысетӥ группаен инвалид, аслаз номыр каремез уг луы. Ӧжытак курдасько но: утялтэм аръёс пырозы-а огъя ужам стаже? В.Васильева. Пичи Пурга ёрос. Сокем ик кышканэз ӧвӧл. Россия Федерацилэн "Кун пенсиос сярысь" Законэзлэн 92-тӥ ёзэтысьтыз "б" люкет вера: нырысетӥ группаен адямиез, ӧлексы (инвалид) пиналэз, туж пересь муртэ утялтэм дыр ужам вакыт сямен ик пыре огъя стаже. Зэм, со понна басьтоно эмъясь учреждениысь бумага, со мед валэктоз: вылӥ верам адямиос кулэ каризы утялтэмез. Вунэтыны уг яра мукетсэ но. Ог люкетэз адямиос пенсизэс лыдъяло нимаз коэффициентъя (индивидуальный коэффициент пенсионера - ИКП) Россия Федерацилэн 1997- тӥ арын 21-тӥ июле 113-ФЗ номеро "Кун пенсиосты лыдъян но будэтон радлык сярысь" Законъя. Татын санэ басьтӥське страховой нимаськись ужам стаж. Таяз уг сюро дышетскем дыр, куинь аресозь нылпиез утялтэм дыр, нылпиослэн картъёссы вӧзын ворсам военной городокъёсын улэм вакытсы, ӧлексыез но пересь муртэ утялтэм дыр. Сыӵе коэффициентэз кутыса лыдъям пенсия - "выль пенсия", сотэк лыдъям пенсия сярысь - "вуж пенсия" сярысь, бадӟымгес луэ. Соин ик адями ачиз мед быръёз ни пенсия лыдъян амалэз. *** Ӵыжы-выжые, арлыдо кышномурт, егит дыръяз бызиз вал фронтысь бертэм воргоронлы. Таиз, сӧсыр маке, кема улытэк кулӥз. Нылкышно бызиз мукетызлы, оже ветлымтэ муртлы. Таиз но улэп ӧвӧл ни. Табере тодэмез потэ: нырысетӥ картэз понна ватсаса пенсия уз тыре-а? Аслаз кышномуртлэн райсобесъёстӥ ветлыны мочез ӧвӧл ни. Соин ик куриз "Удмурт дуннее" вазиськыны. В.Никитина. Шаркан ёросысь Сосновка черкогурт. Шонер ке валай, ватсаса пенсия - со сюдӥсез ыштэмен валче тупатӥськись маке. Жаляса верано луэ: вылӥ верам кышномуртлэн сыӵе правоез ӧвӧл. Тани ма валэктэ 1995-тӥ арын 7-тӥ мае кутэм "Быдӟым атай" музъем понна оже пыриськемъёслы но Быдӟым атай музъем понна ожын быремъёслэн кышнооссылы пенсия сётонэз умоятон сярысь" Закон: пересьмыса яке ӧлексы кыльыса пенсие потэмъёс - ожын быремъёслэн кышнооссы - сюдӥсьсэс ыштэмен валче кыкетӥ пенсия басьто, выльысь уг бызьыло ни ке. Кинъёсты лыдъяло ожъёсын валче кулэмен? Тани соос: фронтын быремъёс, сӧсырмыса кулэмъёс, нош озьы ик 1941-тӥ арын 22-тӥ июньыен 1945-тӥ арын 10-тӥ�11-тӥ маёзь ивортэк ышемъёс. Пие адскыны уг берты Пиме армие басьтӥзы но Мурманск сьӧры келязы. Гожтӥз вал, адскыны бертылоз шуыса. Нош югдур воштӥськемен сэрен лэзиллямтэ. Тодэме потэ: солдатъёслэн отпусклы правозы вань-а? Вань ке, кӧня? С.Савельева. Завьялово ёрос. Миым, 2000-тӥ арын 26-тӥ июне, Россилэн Президентэз юнматӥз 1775 номеро Указ. Вераськон мынэ уй пала, солы ӵошкась интыосы, улонлы но тазалыклы изъян ваись улосъёсы келям солдатъёс но матросъёс сярысь. Соослы азьвыл 10 сутка отпуск сётъязы ке, табере - 30, сержантъёслы но старшинаослы - 20 интые 35. Кинлы но ку отпуск висъян сярысь решение куто командиръёс. Удмуртия: выль даур Вырӟон Быдэс дуннеен ӵош асьме республика но выжиз выль дауре. Кыӵе азинсконъёсын, кыӵе шуг-секытъёсын вуиз со та дыре? Ма лэсьтоно, улонмес умоятон понна? Кызьы паськытатоно сюбег интыосмес? Та пумысен вераськон нуыны турттӥськом ми, газетчиос, "Удмуртия: выль даур" рубрика улын. Котькуд пятница номерын тыршом сюлмаськытӥсь ужпумъёсъя материалъёс печатланы. Удмурт Республикаысь Кун Кенешлэн Аппаратысьтыз иворъёсъя но анализъя отдел дасяз шаермылэн 2000-тӥ арын азинскемезъя отчёт. Кыӵе бен суред син азе пуксе, отысь лыдпусъёсын тодматскыса? Промышленностьын миым 53 миллиард 266 миллион манетлы ваньбур поттэмын. Валля арен ӵошатыса, со 17 процентлы уногес. Йылаз-пумаз вуттэмын 227 сюрс квадрат метр улон инты. 1999-тӥ арын сярысь 4 процентлы уногес. Шоро-куспо уждун 1704 манет луиз (декабрь татчы пыртымтэ на). 40 процентлы кулэсмиз ужтэк кылемъёслэн лыдзы. Али сыӵеос - ог 22 сюрс мурт. Пусйымон азинсконъёс басьтэмын химия удысын, машина лэсьтонын но металлообработкаын, буёло корт кисьтонын, полиграфиын. Ваньмаз отын ваньбур поттон 1,5 пол но солэсь унолы йылӥз. Обороная министерстволэн кулэяськонъёсызлы вуз лэсьтон но ар куспын 57 процентлы будӥз. Шӧдскымон уногес поттэмын нюлэс материал. Ар ӵоже 27418 автомобиль лэсьтэмын. 1999-тӥ арен ӵошатыса, 84 процентлы тросгес. Но асьме Правительство азе, кызьы тодӥськоды, 30 сюрс машина поттыны ужпум пуктэмын вал. Ӧжытак ӧзгес пӧрмы. Озьы ке но, автозаводлэн пыд йылаз султэмез шумпоттэ. Шӧдӥське ни со бюджетэ вуись коньдон вылын но. Выль даурлэн нырысетӥ араз асьме кибашлыос мылкыд каро ужазинлыксэс кык пол йылэтыны но конвейерез умой-умой ужатыны. Сӥзём соослы выль вормонъёс. Мотоцикл поттӥсьёсмы сокем зол ӧз ужалэ, шуыны луоз. Ар пумын 25212 сыӵе транспорт лэсьтэмын (102,8 процент). 23666 тонна - тамында кылем арын асьме республика сӥль поттӥз. Солэсь азьлоезлэсь 18 процентлы уногес. 6 процентлы йылӥз йӧл но солэсь сиён-юон поттон. Но агропромышленной комплексын огъя югдур сокем шулдыр ӧвӧл на. Таблица яркыт возьматэ гурт хозяйствомылэсь берло дас ар ӵоже уллань васькемзэ, ялан курадӟемзэ. Огъя ваньбур (валовая продукция) поттон отын ӵошатэмын 1990-тӥ арын ужаменымы (соку поттэм ваньбур 100 процент чотын басьтэмын). 105 100 102,5 95 95,1 90 91,9 93,0 85 82,2 84,2 80 84,2 75 78,7 78,8 70 1990 1992 1993 1994 1995 1996 1997 1998 1999 2000 Пӧртэм пумо хозяйствоосын миым 1152 сюрс гектар муос киземын-мерттэмын вал. Со ог 40 сюрс гектарлы ичигес, 1999-тӥ арен ӵошатоно ке. Ю тысь 596 сюрс тонна люкаськиз. Солэсь азьло арын 478 сюрс тонна вал. Гектарысьтыз кутсамын 11,1 центнер ю-нянь. Ӵошатон понна: 1997-тӥ ар - 15,1 центнер, 1998-тӥ ар - 8,8, 1999-тӥ ар - 8,1 центнер. Картофка кылем арын ог 20 процентлы ӧжытгес копамын. Гектарлы быдэ со 105 центнер гинэ урожай сётӥз. Берло вакыт понна - тужгес ичи лыдпус. Кулэсмиз бакча сиён будэтон. Но татын тани мае пусйыны кулэ. Тысё культураосты, етӥнэз ваньзэ сямен будэто ке гурт хозяйствоя огазеяськонъёс, предприятиос, музъем ужанысь музон удысъёсын суред мукет. Адямиослэн асьсэ бакчаосазы, участокъёсазы будэтэмын кылем арын 86,5 процентэз картофка но 85 процентэз бакча сиён. Соин ик огъя республикая соосъя лыдпусъёсты тае чакласа дунъян. Та толлы гуртоос ӟечгес дасяськизы. Котькуд пудолы дасямын вал 20 центнер пала сиён. Валля арын сярысь со ньыльмос люкетлы уногес. Но пудо вордонын огъя югдур сокем шумпотымон ӧвӧл. Пӧртэм формая кылдытэм хозяйствоосын туэ нырысетӥ январьлы 455,7 сюрс йыр сюро таза пудо. Со 4,3 процентлы ичигес, ар талэсь азьло дырен ӵошатыса. Весь кулэсме на парсь лыд. Соос али 266 сюрс кылемын. Татчы пыртэмын калыклэн ас дораз будӥсь пудо но. Гурт хозяйствоя предприятиосын лыдъяське 168,2 сюрс парсь. Ар ӵоже соослэн лыдзы 12 процентлы синӥз. Тӥни сыӵе лыдпусъёс. Соос возьмато элькунысьтымы экономикаын умой пала вырӟонэз. Данак удысъёсъя ӟеч воштӥськонъёс шӧдӥсько. Бен, тырмымтэос но ичи ӧвӧл ай. Озьы ке но, огъя йылпумъянъёс азьланьын огсыр улонлы оскон кылдыто. Озьы медло. И. Максимов. Ягулысь черкез тӥяны кутскон вакытэ (1930-тӥ аръхёс) лэсьтэм снимок. Сое ӝутыны выризы дас кык ар ӵоже, нош вылӥ люкетсэ сэрттӥзы син куспын. Преображенской черк та дыре. Снимок лэсьтэмын кылем сӥзьыл. Михаил Берестов черк котырын ӝутскем мылкыдын ужа. Отец Михаил. Ӟечкылан Милям тӥляд газетты пыр ӟечкыламмы потэ Итэш гуртын улӥсь мамамес Александрова Раиса Федоровнаез юбилееныз.. 26-тӥ январе солы 50 арес тырме. Вордскем нуналдэ пусйыса, Семьяед сюлмысьтыз ӟечкыла Шудбуред шур выллем мед бызёз, Медаз шедьтэ ноку кайгуос. Ми тыныд сӥзиськом тазалык, Али кадь ик кужым, чырмытлык, Висёнъёс сярысь вунэты тон, Ялан лу шудбуро, гажано. Секытэз адӟытэк мед улод, Малпанэд котьку мед быдэсмоз. Шумпотон сюлэмдэ мед шунтоз, Куректон палэнтӥ мед ортчоз. Пиосыд, кенъёсыд но нылпиосыдлэн нылпиоссы. 02 ивортэ Нош ик наркотикъёс 19-тӥ январе милициын ужасьёслы "удалтӥз" наркотикен вузкарисьёсты ӝегатон ласянь. Ижевскысь 42-тӥ ПТУ-ын дышетскись 20 аресъем Наталья ваньмон дыръяз коньдон поттыны дышем, наркотик вузаса. Со ӝегатэмын героинэн, ӝутэмын уголовной уж. Со нуналэ ик шоркарысь Пушкинской ульчаысен героинэн шедиз 23 аресъем Антон. Пытсэт сьӧрын азьвыл пукылэм пияш келямын изоляторе. Ижысь ик Молодёжной ульчаысь 16-тӥ юрт дорын героин вузакуз кырмемын 19 аресъем Валерий. Таиз но тюрьмаын "кунояськемын" ни вылэм. Пытсамын изоляторе. Устинов ёросысь Труд ульчаысь 56 номеро юрт дорысен милиция шарае поттӥз героинэн узырмыны малпась апайёсты - 25 аресъем Натальяез но 29 аресъем Оксанаез. Изьытэк но, коньдонтэк но Уд но оске, ява, табере воргоронъёслэсь дуно кулэсь изьыоссэс нылкышноос но таланы дышиллям. Октябрь ёрос милициын ужасьёс "Изьы" ужрад ортчыткузы кырмизы Иринаез. 29 аресъем шӧртчи нылкышно уин 15-тӥ январе Киров ульчаысь 111-тӥ юртлэн подъездаз Латыпов гражданинлэсь йыре пононзэ ишкалтэм. 9-тӥ номеро троллейбусысен Т. воргоронлэсь нуназе куазен кисызэ сузяллям, 684 манет коньдонзэ но дкументъёссэ маялтӥллям. "Щипачез" (озьы шуо кисые но сумкае пырасьёсты) кутыны юрттӥзы ГИБДД-лэн патрулья службаяз ужасьёс. Игерман гуртысь Игорь ӝегатэмын, лушкам ваньбур таламын. Сӥль сиемзы потэм Дас укмысэтӥ январе выжон уе Якшур-Бодья ёросысь Селычка посёлокын сылӥсь "Василёк" закусочнойысь ог 60 кило пала сӥльзы ышем (3 сюрс манет тыр). Уйшоре сӥль сиемез потыны кутскем та посёлокысь ик 18 аресъем Артёмлэн. Ваньбур кузёосызлы берыктэмын. Та уе ик Яр ёросысь Бармашур гуртлэн фермаысьтыз "пыдъяське" скалзы. Дунтэк шашлык сиемзы потэм вылэм Яр посёлокысь Андрейлэн но Александрлэн. Соос пудоез пуртъяны вуиллям ни вылэм. Табере соосты пытсэт сьӧрын, оло, лы гинэ йырйыны кылдоз на. Завьяло ёросысь "шабердинское" эштосысь вал гидэ пырыса, тодмотэмъёс 50 аресъем возьмаськисез тышкало но валэз потто (со 8 сюрс манетлы дунъямын). Милиция одӥгзэ лушкаськисез шедьтэ. Со Люк селоысь 21 аресъем Вадим вылэм. Эшъёссэ утчало. Вал гидаз берыктэмын. Юо, юо но жугисько Воткинскысь Ижевской ульчаын улӥсь 63 аресъем пенсионер Николай но солэн кышно луонэз нергеез 67 аресъем Римма ӝӧк сьӧры нырысь ӝутскем мылкыдын пукизы. Юизы, шулдыръяськизы. Собере керетон пуромиз. Воргорон кышномуртэ йырсазьзэ ыштымоназ тышказ. Со гинэ ӧз тырмы, бензин кисьтыса, тыл понӥз. Нылкышно кулӥз. Школае зарниен эн ветлэ Берло дыре ӵем пумиськыло пичи нылъёслэсь зарни угыоссэс талан учыръёс. Соосты школаын яке подъездъёсын лушкало тодмотэм егит нылъёс но нылкышноос. Анай-атайёслы тодазы вайытэммы потэ: кулэ меда пиналдэс школае дуно сылӥсь чеберъяськонэн келяны? Тани, кылсярысь, 22-тӥ январе ог 13 час котырын городысьтымы Баранов ульчаысь 67-тӥ юртын зарни арбериостэк кылиз 8 аресъем Рината. Со нуналэ ик 30 номеро школалэн туалетаз ӵуж кортлэсь угыоссэ талазы Юлиялэсь. Кыказ учыре ик лушкаськись апайёс нылъёсты кышкатонэн вормизы. Удмурт Республикаысь Югдурез утёнъя министерствоысь пресс-службалэн ивортонъёсызъя. Детский санаторий "ЛАСТОЧКА" У нас собран уникальный арсенал здоровья. ЕСТЕСТВЕННЫЕ методы оздоровления: АРОМАТЕРАПИЯ, МУЗЫКОТЕРАПИЯ, ЦЗЮ-ТЕРАПИЯ (лечение полынными сигарами), ВОДНО-ГАЛЕЧНАЯ ДОРОЖКА, ЛЕЧЕБНЫЕ ВАННЫ, КОКТЕЙЛИ, широкий арсенал ФИЗИОТЕРАПЕВТИЧЕСКИХ ПРОЦЕДУР. Ждем всех, кому от 3 до 10 лет. г.Ижевск, ул.Ухтомского, 15. Тел.76-38-77. Мылкыдыз ялан пинал Удалтэ берло кык аръёссэ Драмая удмурт кун национальной театрлы. Отысь уноез артистъёс но отын ужасьёс пусъё юбилейзэс. Толон валлян гинэ вордскемез дырысен 75 арес тырмиз крезьгурчилы, республикаысьтымы искусство удысын дано ужасьлы Николай Шкляевлы. Нош толон Удмурт театрын ортчиз элькунысьтымы калык артисткалэн Валентина Меняйлолэн бенефисэз. Со валтӥсь ролез шудӥз Владимир Котковлэн "Пинал мылкыд - юмал йӧлпыд" пьесаезъя комедиын. Н. Лялин. Валентина Меняйлова. Нырысетӥ удмурт профессор Семен Иванович Ворончихин вордскиз 1902-тӥ арын 20-тӥ июне туала Балезино ёросысь Ягошур гуртын. 1920-тӥ арын йылпумъяз Глазовысь дышетӥсьёсты дасянъя семинариез. Собере дышетскиз Ярославль но Томск университетъёсысь медициная факультетъёсын. 1926-тӥ арын Семен Иванович эмъясьлэсь дипломзэ басьтӥз. Ижевске берытскыса, хирургия удыс борды басьтӥськиз. 30-тӥ аръёсы ужаны кутскиз Ижевскысь Медициная институтын. Быдӟым Отечественной война аръёсы С. И. Ворончихин республикаямы валтӥсь хирург вал. Трос лэсьтӥз ож бусыын сӧсырмем содатъёсты йӧнатон понна. 1948-тӥ-1952-тӥ аръёсы кивалтӥз Ижевскысь медициная институтэн, 1959-тӥ-1969- тӥ аръёсы - факультетской хирургияя кафедраен, улонысь кошкытозяз 1982-тӥ арозь профессор-консультант. С. И Ворончихин профессор луиз 1947-тӥ арын. Наука удысын ужъёсыз сӥземын лы висёнъёсъя, пуш ёъёсты эмъянъя, вӧсь луэмез былтонъя (обезболивание) ужпумъёслы. РСФСР-ысь дано врач. Пусъемын Ужысь Горд Знамя 3 орденъёсын, "Знак почёта" орденэн, медальёсын. С. И. Ворончихинлэн нимыз 1967-тӥ арын пыртэмын УАССР-лэн Почёт книгаяз. Тодматскон сэрег Аб.413. Удмурт пиосмурт, 41/170, гороскопъя - Весы, Кабан, кышнояськылымтэ, улэ городын анаеныз ӵош, вань сад-бакчазы. Тодматскысал лякыт сямо ужез яратӥсь 30-35 аресъем нылкышноен. Аб.414. Удмурт пияш, 25/177/72. Гороскопъя - Скорпион. Улӥсько Можга ёросын анай- атаен ӵош. Вина уг юиськы, тамак уг кыскиськы. Тодматскысал 25 аресозь, улон интызэ воштыны соглаш луись нылмуртэн. Аб.415. Удмурт нылкышно, 27 арес, гороскопъя - Овен. Тодматскысал улон интылы но коньдонлы ёрмисьтэм пиосмуртэн. Валамон ини, юонэн медам эшъяськы. Аслам сямы урод ӧвӧл. Редакцилэсь. Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Журналистъёсын пумиськонъёс Нырысь быдэстоно ужпумъёс Кызьы ивортӥм ни, Удмурт Республикаысь прокуратуралэн коллегиезлэн кылем арня вискын ортчем кенешонэз сӥземын вал законъёсты быдэсъямез эскерись-чаклась ёзъёслэн миым ужамзылы йылпумъянъёслы но соос азьын сылӥсь нырысь быдэстоно ужпумъёслы. Нош таяз арняе республикамылэн выль прокурорез Владимир Кузьмич Зыкин но солэн воштӥсьёсыз пумиськылӥзы журналистъёсын. Республикаямы югдурен вакчияк тодматыса, Владимир Кузьмич пресс-конференциын бадӟымгес саклык висъяз туэ арлы чаклам ужрадъёслы. Кызьы пусъемын вал, Россиысь прокуроръёслэн 11-тӥ-12-тӥ январе ортчем съездазы вераськыкуз, Россилэн Президентэз В. В. Путин прокуратуралэн ужамезлы вылӥ дунъет сётэмен ӵош ик азьланезлы трос бадӟымесь ужпумъёс пуктӥз. Тӥни соосты быдэсъянэн ик юнгес герӟаськемын луоз прокуратуралэн ужрадлыкез. Кылем арын республикаямы йыртэман учыръёслэн лыдзы 7 процентлэсь трослы кулэсмиз. Азьвыл арен ӵошатыса, 10 процентлы кулэсмизы укыргес кышкыт йыружъёс, со пӧлын адями виён учыръёс. Озьы ке но, ар ӵоже 30 сюрс йыруж лэсьтэмын. Таӵе югдур ик тужгес но сюлэмшугъяськытэ, шуиз В. К. Зыкин. Соин азямы сылӥсь нырысетӥез ужпум - ӧвӧл сётоно йыртэман тулкымлы паськытаны. Та ласянь правоез утёнъя вань ёзъёс уртче, огкылысь ужаны кулэ. Нош соослэсь ужзэс огазеян-радъян оскемын ӵапак прокуратуралы. Нош куд-ог радикал-демократъёс туала тужгес шуг югдуре прокуратуралэсь удыссэ сюбегатыны тыршо. Тани Кун Думалэн кӧня ке депутатъёсыз прокуратуралэсь ужзэ асьсэ сямен радъяны ӵекто. Нош кызьы пусйизы Россилэн Президентэз В. В. Путин но Федерацияя Советлэн Тӧроез Е. С. Строев, прокуратура сярысь законлы сыӵе ӵектосъёс чакламын кунлыкмес лябӟытон понна. Радикал-демократъёслэн ӵектонъёссылы соос чутрак пумит луо. Туэлы пусъем ужрадъёс пӧлысь одӥгез валтӥсез луэ республикамылэсь законъёссэ, интыын аскивалтонъя ёзъёслэсь правоя актъёссэ Россилэн законъёсызъя тупатон. Интыосын кутэм данак валтӥсь законъёсъя та ласянь миым ик трос лэсьтэмын ни. Кылсярысь, Приволжье округе пырись 15 улосвылъёс пӧлысь 13-езлэн Конституциоссы Россилэн Конституциезлы тупамон каремын. Та ужпум быдэстымтэ на Татарстанын но Башкортостанын гинэ. Округъя озьы ик выльысь эскеремын но Россилэн законъёсызъя тупатэмын правоя 900-лэсь тросэз акъёс. Али прокуратура понна та удыслэн кыкетӥ люкетэз кутске. Одно ик лыдэ басьтоно но выльысь эскероно интыосын аскивалтонъя вань ёзъёслэсь правоя актъёссэс. Кылсярысь, Удмуртиысь городъёс но ёросъёс пӧлысь сизьымезлэн гинэ уставъёссы Россилэн законъёсызлы уг тупало. Тазьыгес ик вераны луоз республикаысьтымы экономикаын коньдонэз уже кутон ласянь но. Татын но прокуратураын ужасьёс тужгес но дӥсьтыса басьтыны кулэ бюджет но выт бичан сярысь законъёсты пӧртэм ёзъёсын кызьы быдэсъямез эскерон- чаклан борды. Тани алигес арбитраж азьын эскеремын Удмуртиысь одӥгаз ёросын шараям йыртэман учыр сярысь уж. Одӥг коммерческой ёзлэсь пунэмъёссэ тырыны бюджетысь 700 сюрс манет пала коньдон кутэмын. Тӥни озьы, коммерсантъёс ужбергатыны ӧдъяло, собере куашкало, тыронэ пыро, озьы бюджетысь уно коньдон тӧлъя кошке. Та ласянь прокуроръёс азе тужгес но юнэсь куронъёс пуктӥськом. Коньдон ужпумъёсты, бюджет сярысь законъёсты эскерон-чаклан но быдэсак сямен оскемын прокуратуралы. Кызьы пусйиз Россилэн Президентэз В. В. Путин, прокуратура ас вылаз басьтыны кулэ правоез утёнъя вань ёзъёслэсь кужымзэс йыружъёслы пумит нюръяськонэ огазеян, соослэсь ужзэс чаклан-радъян. Таӵе ужпум пуктӥськом вань ёросъёсысь ик прокуроръёс азе. Соос киязы кутыны кулэ йыружъёслы пумит нюръяськонэн кивалтонэз. Россилэн Президентэз но Генеральной покурор нимысьтыз пусйизы адямиослэсь правооссэс утёнъя ужпумъёсты. Жаляса верано луэ, пӧртэм законъёслэн укыр вужмеменызы валче, туж трос уголовной но гражданской ужъёс мултэс кема но палдурес эскерисько. Туала куронъёслы уг тупало ни РФ-лэн уголовно- процессуальной кодексэз, Арбитраж суд сярысь законъёс, одно ик пусйыны кулэ ни ужъя но музъемъя выль кодексъёсты. Нимысьтыз саклык висъяськоз адямиосты законэз тӥяса янгыше уськытон учыръёсты эскеронлы. Кылсярысь, миым гинэ республикаысьтымы прокуратуралэн ёзъёсаз куриськонэн но ӝожтӥськонэн 18 сюрс мурт вазиськиз. Со пӧлысь котькуд ньылетӥезлы вазиськисьлы дурбасьтыса ужрадъёс кутэмын. Озьыен, адямиос милесьтым уг кышкало, юрттэт курыса вазисько. Озьы ик нимысьтыз чакласа возьыны кулэ янгыше уськытэмъёсты кыл кутытонлэсь законъёслы тупамзэс. Судъёс асьсэ понна ужало угось. Нош судэз радъянъя законъёс туала вакытлы уг тупало ни бере, луыло янгышан учыръёс но. Вылӥ верам ужпумъёсты быдэсъян понна нырысь ик юнэсьгес куронъёс пуктыны тыршом асьме ужасьёс но правоез утёнъя вань ёзъёс азе, пусйиз В. К. Зыкин. Тужгес но следовательёс азе. Миым тани янгыше уськытэм 14 муртлэн ужъёссыя соосты шонере поттон сярысь приговор кутэмын вал. Татын вераськон мынэ адямиосты законэз тӥяса пытсэт сьӧры интыян сярысь. Ар ӵоже адямиослэн вазиськонъёссыя 200 пала вуэм ужъёс шараямын но нимысьтыз учётэ кутэмын. МВД-ысь 100-лэсь ятыр ужасьёс сыӵе ватэм ужъёссы пона кыл кутытэмын. В. К. Зыкинлэн верамезъя, республикаысьтымы прокуратура азязы сылӥсь ужпумъёсты быдэстыны дась, солэн вань ёзъёсаз тодӥсь-валась, вылӥ дышетскем адямиос ужало. Собере ватсаз на, выль прокурор вуэмен валче, пе, интыосын вошъянъёс, кадръёс ласянь выль сямен "ӵужон" уз луы. В. К. Зыкин журналистъёсын тазьы нырысьсэ пумиськылӥз бере, солы трос гинэ ачиз сярысь юанъёс вал. Ваэктонъёс сётыса, со пусйиз журналистъёсын огкылысь ужаны дась луэмзэ. Ф. Никитин. Туспуктэмез М. Менладшинлэн. Улонды сярысь но малпаське Россиын вань поттэм мотоциклъёс пӧлын ӝыныезлэсь уно инты басьто "Иж" маркаен машинаос. Валамон ини, дыр ортчемъя мотоез яратӥсьёслы сюлмаськон вуэ - мотоциклэз тупатъяно, воштос ёзъёс басьтоно. Зэм, соос али котькытын вузасько - базарын но, магазинын но. Бен, воштос ёзъёс базарын кытӥяз дунтэмгес усё, но котьку ик-а меда соос оскымонэсь? Басьяськисьёслэсь правооссэс утёнъя комитетэ воргорон вазиськиз. Со базарысь дуно сылӥсь коленовал басьтэм. Автосервисын тунсыкъяськем со пумысен. Кӧня ке дыр ортчыса со шудтэм учыре шеде. Мугъёссэ автосервис вылэ погыльтыны тырше. Эскерон возьматӥз: коленовал пуктэмын шонер, но со лэсьтэмын вылэм урод ӟечлыко кортлэсь. Соин ик вань янгышез усе воштос ёзэн вузкарись вылэ. Таӵе учыръёс ӧжыт уг пумиськыло. Соос ваньмыз герзаськемын адямилэн улонэныз. Соин ик ӟеч малпаськелэ - кытысь но кинлэсь басьтыны оскымонгес. Шуом, магизнын вузъёс но трос, отысь сертификат но курыны луэ, нош вузкарисьёс пайдаё валэктонъёс сётозы. Нош базарын вузкарись нырысь ик сюлмаське вуззэ ӝоггес донгыны, ӵем дыръя со вунэтэ чек сётон сярысь. Собере со ӵемысь "ышылыны" яратэ, вузэзлэ ӟечлыкез сярысь но кыл уг куты ни. Китайысь шӧртчиос но куд-ог ёзъёсты лэсьтыны дышизы ни. Но сыӵе "кибашлыослэн" узъёссы ГОСТ-лэн куронъёсызлы уг тупало, лэсьтэмын но соос технологиез тӥяса. Соин ик басьяськисьёслы таӵе дэмланъёсмы: кык пол дун тыронтэм но кык пол вуз басьтонтэм понна, воштос ёзъёсты басьялэ нимысьтыз магазинъёсысь (фирмалэн упаковкаеныз, вузлы чекен, быдэсак интрукциен). Отын возьматэмын мед луоз вузэз поттӥсь заводлэн кытчы интыяськемез. Тодады вайытӥськом: бсьяскисьёслэсь правооссэс утёнъя выль законлэн куронъёсызъя, басьяськись, вузэзлэсь шек интыоссэ кык арскын ке шарая, со заводэ вазиськыны быгатэ котькыӵе учыре, гарантилы паспортын пуктэм дыр учкытэк. Кылдэм югдурысь потыны амалды вань! Вылаз ик, "Ижмаш-Мото" акционер огазеяськонлэн нимысьтыз магазинэз усьтӥськиз. Отын вылӥ ӟечлыкен гинэ вузъёсты дэмлалозы. Телефонэз - 54-21-11. Шуо ук: "Чурыт сямо адями кык пол тыре". Озьы ик, коньдондэс тӧлъя-буръя лэзем сяна, улонды сярысь но малпаське! Со дуногес. Школаос пытсасько, грипп вӧлмемен Январьлэн ӝыныысеныз йылыны кутскиз кынмаса висисьёслэн лыдзы. Туннэ нуналлы ОРВИ- ен 18 сюрс 800-лэсь ятыр адями курадӟиз ни, со пӧлысь 2 сюрс 200-эз - гриппен. Азьло аръёсын ӵошатыса, со 41 процентлы ятыргес луэ. Кылем арня вискын шӧдскымон йылӥз пиналъёслэн висьыны усемзы, тужгес но школаын дышетскисьёсызлэн. Таин валче Ижевскысь ньыляз школаосын дышетскон дугдытэмын вал. Эмъясьёслэн чакламзыя, берло куинь аръёсы кадь ик, туэ но тужгес вӧлмемын А группаен грипп. Со укыр кышкытъёсыз пӧлысь уг луы, соин ик эпидемия каньылэн ортчоз шуыса оскон вань. Республикая туэ 69 сюрс 858 мурт грипплы пумит вакцина пуктӥз, со пӧлысь 14 сюрс 996-ез - нылпиос. Эпидемия дыръя висисьёслэсь лыдзэс кулэстон вылысь, Ижевскысь санитарияя службаын ужасьёс пӧртэм ужрадъёс ортчытъяло. Э.КУМАЧЁВА. Буре ваёзы 30-тӥ январе Удмурт кун филармонилэн юртаз ортчоз Удмурт Элькунысь калык артистэз Николай Дмитриевич Вахрушевез буре ваёнлы сӥзем ӝыт. Кырӟанъя но эктонъя "Италмас" ансамбльлэн, Удмурт радиолэн но телевиденилэн хорысьтызы артист, Удмурт кун филармониысь лекторийысь, Александр Невский соборысь кафедра хорысь кырӟась - улонысьтыз ньыльдон арзэ Николай Дмитриевич искусстволы сётӥз. Чебер но яркыт баритон куараеныз Николай Дмитриевич сюлмысьтыз кырӟалляз калык кырӟанъёсты, туала крезьгурчиослэсь кырӟанъёссэс, озьы ик - операосысь ариосты, романсъёсты. Валтӥсь кырӟась луыса пыриськылӥз Ижын но Москваын ортчылӥсь концертъёсы. Лулысь-сюлмысь кырӟалляз чылкак люкиськонтэм эшъёсыныз - Вячеслав Фатеевен но Николай Копысовен ӵош. Удмурт Элькунысь калык артистэз Николай Вахрушевез буре ваён ӝытэ пыриськозы Валентина Пудова, Николай Копысов, Вячеслав Фатеев, Евгения Копысова, кырӟанъя но эктонъя "Италмас" ансамбль, "Удмуртия" кун телерадиокомпанилэн академи хор капеллаез, Удмурт кун филармониысь крезьгуръя лекторий, эстрада кырӟанъя "Шулдыр ӝыт" ансамбль, джазовой инструментъя кун оркестр, шаерысьтымы крезьгуръя училищеысь кубызчиослэн (скрипачъёслэн) ансамбльзы, Александр Невский соборысь кафедра хор. А.АПАЕВА. Вордскемзэс та нуналъёсы пусъё: Журавлев Виталий Анатольевич - Удмурт кун университетлэн ректорез; Желудов Григорий Владимирович - Кыл кутытонъя Удмурт управленилэн кивалтӥсез; Гольдфарб Вениамин Иосифович - техника наукаосъя доктор, профессор; Фоминых Анатолий Аркадьевич - республикаысь Правительстволэн Химия ож тӥрлыкез быдтон ужпумъёсъя комитетлэн тӧроез; Лисина Антонина Михайловна - калыкез дышетонъя министрлэн воштӥсез; Прохоров Александр Аркадьевич - Шаркан ёрос администрацилэн йырыз; Лузина Галина Ивановна - Удмурт радиоысь тодмо журналист. Ойдолэ ярамтоме Гердэз! Быдӟым удмуртлэн Куӟебай Гердлэн вордӥськемез дырысен сю куинь ар тырмонлы сӥзьыса, Удмурт кун филармонилэн юртаз ортчиз кылбурчиез буре ваён ужрад. Куӟебай Герд но удмурт кыл ужпумъя вераськиз педагогика наукаосъя кандидат Валентина Михайловна Ившина. Асьсэлэсь мадёнъёссэс отӥяз ивортӥзы Удмурт Элькунысь Писательёслэн огазеяськонзылэн тӧроез Егор Егорович Загребин, Драмая удмурт кун театрысь актёр Геннадий Иванович Бекманов, тодосчиос кылтодон наукаосъя докторъёс Василий Михайлович Ванюшев, Фома Кузьмич Ермаков, мукетъёс. Сюлэмез туж вырӟытӥз Удмурт Элькунысь калык артисткалэн Фаина Ивановна Будиналэн но Удмурт Элькунысь дано артистлэн Евгений Вениаминович Андреевлэн Куӟебай Гердлэсь но Ашальчи Окилэсь кылбуръёссэс лыдӟемзы. Быдӟым удмуртэз буре ваён ужрадэ пыриськисьёслы ӟеч мылкыд кузьмазы егит кылбурчи кырӟась Илья Пельтемов, покчи усточиослэн школа-интернатазы дышетскись пиналъёс. Куӟебай Герд нимо премилэсь выль лауреатъёссэ Пичи кенешысен ик ивортӥз премиосъя комитетлэн тӧроез история наукаосъя кандидат Людмила Степановна Христолюбова. "Удмурт кенеш" огазеяськонлэн тӧроез Валентин Кузьмич Тубылов соосты сётӥз кузёоссылы - шаерысьтымы тодмо этнографлы Серафима Христофоровна Лебедевалы но тодмо гожъясьлы Никвлад (Владимир Яковлевич) Самсоновлы (табере вань лауреатъёс дас укмыс кузя ини). Ужрадэз дасясьёс отӥяз ялӥзы: Кузьма Павлович Чайниковез буре ваёнлы сӥзем вуоно пумиськонъёсты азьланяз ортчытъяно ни Куӟебай Гердлэн вордӥськем палъёсаз - Вавож ёросысь Гурезь-Пудга гуртын. *** Татчы лыктэм котькуд адямиез малпаськыны косӥзы, дыр, Драмая удмурт кун театрысь актёрлэн Геннадий бекмановлэн кылъёсыз. Бугырес нуналъёссэ тодаз вайыса, Геннадий Иванович мадиз: - Куӟебай Гердлы сӥзем юбилей ӝыт азьын, пинал актёрез воштыны ӧтьыса, режиссёр мыным сюлмысьтыз вазиськиз: "Геннадий, юртты!" Мон шуи: "Сыӵе адямиез возьматыны дасяськон понна, куинь нунал гинэ тырмоз шат?! Уг, уг дӥсьтӥськы!" Куӟебай Гердлы сӥзем бадӟым ужмес сцена вылэ поттон азьын театрысь ик куд-ог эшъёсы бугыръяськизы: - Малы кулэ на та спектакль?! Та адямилэн юбилеез ортчиз ини!.. *** Кузьма Павлович Чайниковез буре ваён нуналэ бадӟым шуд усиз: премилэн лауреатэныз писатель Никвлад (Владимир Яковлевич) Самсоновен ӵош Куӟебай Гердлы сӥзем синпелет выжые улэп сяськаос понӥмы. Ӵуказеяз юри ортчисько тодмо ульчаетӥ - бадӟым йыро льӧль герберъёс интыязы ӧвӧл ни. Синъёсылы оскытэк, соку ик учки музэ - кезьыт лымы вылын льӧль бурдъёссэ лэзьяса кылле чылкак одӥг гинэ улэп лул. Юрттэт курыса, соку ик ӝогак вамыштӥ Калык киужъёсъя юртэ (татын, азьвыл совпартшколаын, Кузьма Павлович Чайников берло нуналъёссэ ужаз). Вазиськи тодмоелы Светлана Боталовалы. Ульчае векчи дӥсь коже гинэ потыса, нылмурт пыдныр йылыныз кема бугыръяз кезьыт лымыез - мукет льӧль бурдъёсты ӧз ни шедьты. Одӥгез гинэ, тужгес чидасез, кын пушкын но татчыозь улэп возиськем... Паймеменым чылкак чабкиськыса вазиськисько Светланалы: - Толон гинэ сяськаос интыязы вал. Уй куспын кин меда утялтӥз?! Нылмурт чик ӧз абдра туннэ куд-огезлэн ассэ туж берланес воземезлы: - Туэ ичи шат измем сюлэмъёс, ульчаосты мыдлань-азьлань волятӥсьёс?! Мугоры огдырлы пумиз кадь. Сюлэмы жугиськемысь дугдӥз. Нош син азям шуак кылдӥзы тӧдьы лымыез гордмась вир шапыкъёс... Ойдолэ ум возелэ ни пушкамы нокыӵе йыркурмес - ойдолэ яратоме Гердэз! Е.ВИНОГРАДОВА. Дурбасьтыны малпало Удмурт Элькунысь Кун Кенешысь бюджетъя, вытъёсъя но коньдон ужпумъёсъя комиссия эскериз культура удысысь дуно макеосты утён сярысь ужпумез. Историяя но культурая памятникъёс (нош соос кык сюрслэсь ятыр) туэ чылкак уг утисько. Культурая министерство ивортэмъя, соос пӧлысь ӝыныез шугадӟонэ вуэмын. Югдурез эскерон возьматэ: ыштонъёс нырысь ик герӟаськемын кунэн кивалтонысь шекъёсын. Нимысьтыз кылдытэм программа тӧдьы виштыосты палэнтыны чакла. Со сяна, сое дасясьёс малпало: программа юрттоз туризмез азинтыны, культура удысысь ваньбуренымы шаерамы, кунамы, сьӧрлон улӥсьёсты тодматыны. Комиссиысь адямиос, программалэсь вылӥ дунлыксэ лыдэ басьтыса, солы дурбасьтыны малпало Удмурт Элькунысь Кун Кенешлэн сессияз. Ӧтчамез нуиз бюджетъя, вытъёсъя но коньдон ужпумъёсъя комиссилэн тӧроез Софья Широбокова. Удмурт Элькунысь Кун Кенешлэн пресс-службаез. Кизилиос верало (29.01-4.02) Ыж (Овен) 21.03-20.04. Арнялэн кутсконаз мылкыдды капчи луоз, пӧртэм ужпумъёсты быдэстэмды потоз. Интыяды эн пуке. Кужымдэс, быгатонлыкъёстэс пайдаё ӧръяны быгатэ. Тыршемдылэн емышъёсыз средае, оло, шӧдӥськозы ни. Та нуналэ коньдон басьтыны быгатоды. Яратон эшеныды кусыпъёсты но ӟеч радъяськозы. Нош арня пумын чакласьконо луоды ни. Бадӟымесь вузъёслы коньдон эн быдтэ. Кынмамлэсь утиське, укыр кезьыт напитокъёс эн юэ. Ош (Телец) 21.04-21.05. Кизилиос возьмато, понедельнике ужантӥяды удалтоз, ватсаса уждун басьтыны быгатоды. Та нуналэ ик эшеныды сӧриськем кусыпъёстэс тупатыны тырше ай, тӧлӟем яратонды выль кужымен ӝуатскыны быгатоз. Пятницае мылкыдды умой ик уз луы. Соин ик ужъёстэс быдэстыны пычкиськыса сямен эн выре. Асьтэлы урод гинэ кароды. Эгызоос (Кыктоос, Близнецъёс) 22.05-21.06. Вторнике кивалтӥсьёс азьын дандэс будэтыны быгатоды. Ӵектонъёстэс, кичӧлтонъёстэк кышкатэк вералэ. Ужантӥдэс воштыны малпады ке, курдаса эн пуке, дӥсьтысагес азьпала вамыш лэсьтэ. Пятницае ужантӥяды шуг-секытъёс кылдыны быгатозы. Соин ик эн керӟегъяскье, асьтэдыз секыт эн каре. Кышкытлык вань, шуккиськоды шуыса, соин ик машинаеныды мултэс эн ворттылэ. Кисло-кусло (Рак) 22.06-23.07. Арнялэн кутсконэз тӥ понна шудо луоз. Ужантӥяды но, семьяяды но югдур туж умой радъяськоз. Средае матысь ӵыжы-выжыдэс яке эштэс пумиталоды. Пятницаысен тӥ понна пӧсь вакыт кутске. Та нуналъёсы пӧртэм шуг-секытъёс, керетонъёс луозы, коньдон ужпум кылдоз, тазалыкты но лябӟоз. Лев 24.07-23.08. Вторнике кузпалэныды, туганэныды кусыпъёсты юнмалозы. Эшъёсты пӧлын но асьтэдыз ӟеч ласянь возьматэмды потоз. Сьӧраз гинэ эн ортче, адямиос вылэ мултэс зӥбон пайда уз вайы. Четверге тазалыкты сюлмаськытоз, ужантӥяды секыт кенешонъёс луыны быгатозы. Та нуналэ ум ӵектӥське шулдыръяськон ужрадъёсы пыриськыны, аракы юыны. Умой луоз, гуртады огнады шутэтскиды ке. Нылмурт (Дева) 24.08-23.09. Понедельнике документъёсын, коньдонэн герӟаськем ужъёстэс быдэстэ. Налогъёсъя инспекцие ветлонэн эн ӝегалэ, декларацидэс дыраз дасялэ. Вторнике тазалыктэс чаклалэ, куазья дӥсяське. Субботае юртъердэс тупатъян борды басьтӥськыны быгатоды. Та понна туж ӟеч вакыт. Мытэм уждэс одно ик йылаз-пумаз вуттоды. Арня нуналэ кыдёке сюрес вылэ эн потэ, кышкытлык вань, пӧртэм шуг-секытъёсты пумиталоды шуыса. Весъёс 24.09-23.10. Арнялэн нырысетӥ нуналъёсыз огсыр ортчозы. Понедельнике удалтоз политикъёслы но калыкен ужасьёслы карьеразы будон ласянь. Вторник - ӟеч нунал бадӟым ужпумъёсты чаклан, чеберъяськон арбериос басьтон, яратон понна. Секыт йӧтоз пятницае мултэс керӟегъяськоды, асьтэдыз кияды кутэмды уз луы. Кузпалэныды, туганэныды кылды уз тупа. Соин ик та нуналдэс творчестволы, дышетсконлы сӥзе. Скорпион 24.10-22.11. Ужантӥяды быдэстымтэ ужъёсты пумтэм. Соос одӥгез но быдэстонтэм ӧвӧл, кужымды тырмоз, мылды-кыдды гинэ мед луоз. Та нуналэ кыӵе ке тырмымтэосты гинэ но асьтэлы ӟечен берыктыны быгатоды. Арнялэн кыкетӥ люкетаз шуг-секытъёсын пумиськоды. Маке лэсьтыны тыршоды ик, но пайдаез уз луы. Семьяосыныды, эшъёсыныды керетоды. Асьтэдыз кияды кутыны ворме. Куддыръя малпаськытэк верам одӥг кыл но бадӟым ыштонэн берытске. Ыбылӥськись (Стрелец) 23.11-22.12. Понедельнике улэмды потыны кутскоз. Та нуналэ пумиське яратон адямиеныды. Эн вунэтэ пиналъёсты сярысь, асьтэос но, покчиос пумтэм шумпотон ваёзы. Эн оске, понедельник - секыт нунал шуыса. Кыӵе ке висён тӥледды сюлмаськытэ ке, средае эмъясь доры ветлэ. Секыт нунал - пятница. Мылкыдды но, ӟигарды но ӧвӧл, соин ик секыт эн кариське. Вӧзысьтыды адямиос юрттыны уз дыртэ, асьсэлэн но ужпумъёссы уно ук. Эн кынме, кезьыт сиён- юонлэсь палэнске. Сюро кеч (Козерог) 22.12-20.01. Арнялэн кутсконаз семья ужпумъёсты быдэстыса умой луоз, шуом, тупатъян ужен вырыны яке кыӵе ке бадӟым вуз басьтыны. Средае тазалыктэс чаклалэ, умой луоз кӧс утьыса. Та уе адӟем вӧтъёс данакез зэмало. Шутэтскон нуналъёсады но эн вунэтэ тазалыкты сярысь, уката ик сюлэмды сярысь. Пайдаё луоз чылкыт омырын юмшан. Ву кисьтӥсь (Водолей) 21.01-19.02. Арнялэн нырысетӥ нуналаз удалтоз ужбергатӥсьёслы, та нуналэ пӧртэм кенешонъёс, вераськонъёс умой ортчозы. Ӵуказеяз семьяосыныды улыны тырше, вылтусты сярысь сюлмаське. Кыӵе ке вуз басьтэмды потэ ке, одно ик магазинэ кожалэ. Пятницае асьтэ транспортэныды мултэс эн ворттылэ. Техникады тӥяськыны быгатоз, сюрес вылын но мултэс ӝегатсконъёс луозы. Суббота удалтоз яратӥсьёслы. Чорыгъёс 20.02-20.03. Понедельнике кема дыр ӵоже сюлмаськытӥсь черъёсыныды нюръяське, тыршемды юнме уз луы. Палэнысь "халтура" ӵектӥзы ке, пумит эн луэ, ватсаса коньдон семьядылы мултэс уз луы. Четверге яратоно муртэныды кусыпты тэшкалоз. Ӝытазе нылпиеныды шуг-секыт кылдоз. Со вылэ мултэс эн зӥбе, умой луоз, сюлмысь вераськыса. Пресса Иван Лебедев Эрик но курик Азькыл интые Я, жадем журналистъёс табере каньылак шокчыны быгато ни... Ӧвӧл, ужаса пӧсямын ӧвӧл соос. Шулдыръяськыса жадемын. Зэм-зэм. Ма, чида ай сомында праздникъёсты. Чоталом-а? Декабрь шорын - "Вордскем кыллэн" юбилеез. Отӥяз Выль ар но, Ымусьтон но, оломар но... 13-тӥ январе - тужгес бадӟымез нунал. Гожъясь-верась юлтошъёс дас ар ӵоже ни пусъё Россиысь прессалэсь нуналзэ. Туэ но зол гинэ юмшазы. Ужын ӧжытак шуэтскизы но, арня ортчыса, огазе люкаськыны выль муг шедиз - "Известия Удмуртской Республики" газетлы но, пе, дас ар тырме. Нош ик - гуляй, Вася! Фу-у-у, табере толэзьзэ коть гань-гань ужаны луоз ни. "Кенеш" журналлэн 75 аръем юбилеёзяз. Тӥ малпаськоды, ми "Правда" газетлэсь вордскем нуналзэ вунэтӥм-а? 5-тӥ май ноку но йырысьтымы уз тӧлӟы. Ай со гинэ ма? Вань на уго калык куспо нуналъёсмы. Соосты но пусйытэк ум кельтэ. Тӥни озьы. Праздникъёс ласянь журналистъёс вань мукет удысъёсын ужасьёсты трослы азьпалто. Озьы гинэ уд суты. Но эн малпалэ, гожъясь-верасьлэн быдэс улонэз шулдыръяськон шуыса. Матын но озьы ӧвӧл. Серем пыр мадёнэз уретыса, тӥледын ӵош, гажано лыдӟисьёс, кенешем потэ прессаын кылдэм югдур пумысен. Удысамы уго трос гинэ шугъяськытӥсез но люкаськемын ни. И. Ог 20 ар талэсь азьло журналистъёс пӧлын таӵе веран вӧлмемын вал. Мар, пе, огазея лобась кутэз но ужась министрез? Газет, данъяськыса валэктылӥзы шӧртчиос. Созэ но, тазэ но уго газетэн быдтыны луэ вал. Лэчыт статья бӧрсьы интыысьтыз туздырем бадӟым кузёосты туннэ уд шедьты ни, дыр - тон коть миллион доллар лушкам мурт сярысь гожты, адямиед кизьноз гинэ ке шат. Вакыт чылкак воштӥськиз уго. Прессалэн улонамы интыез воксё мукет луиз. Ойдолэ нош ик азьлозэ тодэ ваём. Соку (70-тӥ-80-тӥ аръёсы) шерез семья ӧз басьтылы Москваын потӥсь одӥг ке но газетэз. Гуртоос яратӥзы "Сельская жизнь" но "Труд" газетъёсты, городын тросэз гожтӥськылӥзы "Комсомолкалы" но "Советской спортлы". Семьяын коммунист вал ке, отчы одно ик вуылӥз "Правда". Пиналъёслы но потылӥзы нимысьтыз изданиос. 1990-тӥ арын центрысь куд-ог газетъёслэн лыдзы ог 30 миллионозь вуиз. Огъя вераса, Москваын потӥсь изданиослэн тиражзы, интыосын печатласькисьёсыныз ӵошатыса, ог вить пол вылӥынгес вал. Отӥяз югдур музон пала берытскыны ӧдъяз. Ог вить ар талэсь азьло улосъёсысь пресса лыдызъя азьпалтӥз Москваын потӥсьсэ. Малыез валамон кадь. "Ӟырдам" учыръёс сьӧры уиськыса но политикаен укыргес вырыны кутскыса, быдэс страналы ужась журналистъёс вунэтӥзы палэнын улӥсьёсты, соослэсь шугъяськонъёссэс. Мукетыз муг герӟаськемын дунэн. Куинетӥез - газетъёслэн ӝегаса вуэменызы. Тиражъёс кулэсмизы бере, центрысь изданиосты интыосын печатламысь дугдӥзы. Соин ик адямиослы матэгес луизы республикаын, областьын яке ёросын потӥсь газетъёс. Туэлы лыдпусъёсты учконо ке, центрысь изданиослэн огъя лыдпуссы интыосын поттӥсьёсызлэсь кык пол ичи. Югдур пӧртэм ӧвӧл Удмуртиын но. Ваньмызлэсь трос (ог 10 сюрс пала) дорамы вуэ "Спид-инфо" Кин малпаз, шаерамы таӵе аспӧртэмлыко газет валтӥсь луоз шуыса? Берло аръёсы йылӥзы "Аргументы и факты" газетэз яратӥсьёс (эн суралэ "АиФ" Удмуртии" нимо изданиен). Котьку сямен ик али но республикаямы гажало на "Комсомольская правдаез" но "Трудэз". Озьы ке но, асьме дорын потӥсь газетъёслэн лыдзы шӧдскымон тросгес. Интыысь пресса лыдӟисезлы, зэм но, матынгес. Шӧдӥськытэк уг кыльы мукетыз но. Удмуртиын (ма, музон улосъёсын сямен ик) али пото туж трос пӧртэм газетъёс. Пӧлазы котькыӵеез вань. Соин ик огшоры адями куддыр чылкак пайме, дыр: одӥг учыр сярысь газетъёс воксё пӧртэм сямен гожто. Урод ӧвӧл со. Лыдӟись уго бырйыны быгатэ. ИИ. Быдӟым Ленин шуиз: газет огъя пропагандист но огъя агитатор гинэ ӧвӧл, со огъя организатор но луэ на. Юнме шорысь озьы ӧз вера. Ӵапак сю ар талэсь азьло со кылдытӥз "Искра" газет. Малы? Бен, бадӟым малпанзэ улонэ пыӵатон вылысь. Пӧрмиз ук. Калыкез огазеянын печатьлэн интыез туж шӧдскымон вал. Выльдӥськон кутскемен, асьмеос дыртӥм азьло лэсьтэм ужъёсмылэсь мозмытскыны, вань ӧтёнъёсты кулэтэм карыса палэнтыны. Владимир Ильичлэсь верамзэ но мыдлань малпанъёс пӧлы пыртыны ӧдъямы кадь. Бен, озьы шуим. Но улон вераммыя гинэ уг мыны ук. Прессаез выль кузёос эрике лэзизы ке но, солэсь кужымзэ ӧз вунэтэ уго. Мар-о кыдёке ветлонэз? Басьтом асьме элькунэз ик. Кыӵе ке шӧдскымон ужрад ортчытоно ке, власть кун газетъёслэсь тиражзэс уно пол йылэтэ но котькудӥз адями доры мылкыдзэ вуттыны тырше. Конституцие-а воштон пыртоно, юалляськонэз-а азьло чакламъя радъяно, созэ яке тазэ кандидатэз-а вормисе поттоно - сыӵе вакытэ, шуом, "Известия Удмуртской Республики" газетлэн лыдыз чутрак будэ. Соку нокин уг но учкы ни ватсаса ыштонъёс шоры - уго пусъем ужпумез быдэстон вылынгес луэ. Озьыен, Ленин дыръя сямен ик, али но кивалтӥсьёс али но печатез уже куто, калыкез ас палазы берыктон понна. Бен, Россиын табере та ласянь шуггес луиз ни. Кун изданиослэн лыдзы шӧдскымон кулэсмиз, нош эрико (независимой) шуиськись пресса я кузёослэн ымазы учке, я котькуд учырез ватсаса коньдон поттонэ берыктэ. Кин тодэ, та бордын но, дыр, странаямы реформаослэн ӝеган мугзы. Уго вылӥ кивалтӥсьёс но огшоры калык вискын бадӟым вис кылдытэмын. Тӧроосмылэн ӟечъёсыз но малпанъёссы адямиос дорозь уг вуо, соосты валэктӥсь-марась ӧвӧл. Калык куддыр мазэ-созэ валаса уг вутты. Малпан медаз кылды, мон эрико прессаез кун борды думыны ӧтисько шуыса. Уг. Созэ гинэ верам потэ: государстволэн ивор сётыны медло котыр ласянь эскерем- чаклам и политикаез. Сотэк калыкез огъя уже кыскыны нокызьы но уз луы. Валамон, берло аръёсы журналистъёс азьын сылӥсь куронъёс воштӥськизы ик. Али шуо: пресса куинь ужпумез быдэсъяны кулэ. Нырысетӥез - котьма сярысь ивор вӧлмытон. Кыкетӥез - дышетон, тодон-валанэз адямиос дорозь вуттон, мукет сямен вераса, просвещение. Куинетӥез - лыдӟисьлы-учкисьлы-кылзӥсьлы шутэтскыны, ваньмон дырзэ ортчытыны луонлык кылдытон. Быдэсъяло-а редакциос та куронъёсты? Кин кызьы, вылды. Котькудӥз уго соосты ас сяменыз валэктэ. Тани шаерамы тодмо луэм "МК в Ижевске" издание пӧртэм учыръёсысь, маке но "сулятэмзэ" шедьтыны выре, кинэ ке коть куртчыны тырше. Кыӵе ке пумиськон бере - отысь журналистъёс котьмалэсь азьло возьматыны туртто ужрад бӧрсьы ортчытэм юондырез. Тодмо артист ӝытсэ радъя - одно ик утчано шакрес интыоссэ. Та дыре ик, кылсярысь, "Удмуртская правда", уно дасо аръёс ӵоже волятэм сямъёссэ утьыса, котьма сярысь йыг-йыг, оскымон гожтэ. Та ласянь ми но, "Удмурт дуннеын" ужасьёс, тыршиськом соиз яке таиз учыр сярысь мултэс пӧсекъятэк, лад- лад мадьыны. Уго журналистлэн нырысетӥ ужез - ортчем яке луоно ужрад сярысь ивор лыдӟись доры вуттон. Нош со ачиз ини мед дунъет сётоз вераммылы. Озьыгес ик тодон-валанэз вӧлмытон ласянь. Кудӥз ке издание сое азьпала поттэ, мукетыз туж ик кулэен уг лыдъя. Таиз ласянь мыным кельше алигес гинэ кык арессэ пусъем "Центр" газет. Отын пӧртэм ужпумъёсъя пыр-поч валэктонъёс печатласько, соос огъя улон шоры учконэз паськытато, малпаськыны косо. Куинетӥ ужпумез быдэсъянын пусйымон ужа "Афродита" огазеяськон. "Субботняя газета" сяна, со поттэ кроссвордъёсын, серемес мадёсъёсын, маскара суредъёсын дасо пала пӧртэм изданиос. Калыклы соос кельшо. Газетмылэн лыдӟисьёсыныз пумиськылыку кылоно луэ пыкылонэз: "Удмурт дуннеын", пе, шер печатласько ваньмон дыръя капчиен лыдӟымон тунсыко материалъёс, йырез номырин тӧлатыны, шуо. Верамазы зэмез вань. Ми тыршом куронэз азьланьын лыдэ басьтыны. ИИИ. Маин эшшо висъяське на туала пресса азьлоезлэсь? Коньдонлы ёрмеменыз. Бумага бсьтон, печатлан, газетэз лыдӟись доры вуттон туж трос пол дуноямен, печатьын ужасьёс уксё поттыны пӧртэм амал утчано луо. Соин ик отысь но татысь адӟиськом пӧртэм предприятиослэн, фирмаослэн улэм-вылэмзы сярысь материалъёсты. Шуоды, соос вазен но вал. Озьы, но соку журналистъёс кыӵе ке коллектив сярысь мадьыкузы, ӟечсэ возьматэменызы ӵош тырмымтэосты но шараяллязы. Нош али? То-то. Ваньмыз умой. Кивалтӥсь уен-нуналэн сюлмаське ужасьёсыз сярысь (юнме шат солэн портретэз газет бамын тужгес бадӟымез?), ваньбур лэсьтон нуналмысь паськыта, басьясьёс вузъёсты ур-вар каро... Ма но уд гожты, ява. Уго, кызьы шуо, кин коньдон тыре, со ик крезьгур куре. Бен, озьы гожъяса, редакцилэн кассаяз коньдон пыре ик. Но отын умойтэмез но вань ук. Лыдӟисьлы югдурез мыдланьтыса яке чеберъяса возьматон пайда вае меда? Туала прессалэн мукет но выль тодметэз кылдӥз на. Бадӟым инты басьтэ табере реклама. Со шоры пӧртэм синмын учкыны луоно. Куд-огез отысь аслыз туж кулэ ивор шедьтэ, мукетыз сое уг но учкы. Котьма ке но, рекламатэк газетэз туннэ шер пумиталод ни. Та ласянь республикаямы висъяське "Ижевск вечерний" гинэ. Утисез- вордӥсез узыр луэмен, вылды, со дунын иворъёс чик но уг печатла. Куинетӥ пӧртэмлык герӟаськемын ӟечлыкен. Со шӧдскымон будӥз. 70-тӥ аръёсы газетъёс ту-у-уж бадӟым юбилей нуналъёсы гинэ буёло потылӥзы ке, табере сыӵе изданиослэн лыдзы пумтэм-йылтэм. "Инфо-Панорама", "18-тӥ регион", "Центр" но мукетъёсыз ас лыдӟисьёссэс арнялы быдэ шумпотто турлы буёлъёсын ворекъясь газетэн. Ма, сьӧдэн-тӧдьыен потӥсь изданиос но кие кутымон луизы. Офсет амалэ выжыса, газетъёсысь табере вань туспуктэмъёсты но умой адӟыны луэ, букваос но бусаськемын ӧвӧл ни. Таӵе воштӥськонъёс шумпотто журналистэз но, солэсь ужамзэ дунъясез но. ИВ. Пресса но политика, номыр уд шуы, люконтэм валатонъёс. Журналистикалэн политикаен юн герӟаськемез тужгес но яркыт адӟиське быръён вакытэ. Кызьы ке эшлэсь кыӵезэ валаськод секыт учыр дыръя, озьы ик ивор вӧлмытӥсь ёз аслэсьтыз вылдӥсьсэ куштэ быръён нуналъёсы. Кӧня ке толэзь ортчиз ни ке но, оскисько, уноез лыдӟисьёс тодазы возё на, вылды, кылем сентябре-октябре элькунамы ӟырдам югдурез. Вот соку котькудмылэсь ик кӧтмес газетъёсын тырмытӥзы кадь! Почта ящикъёс пачылмизы пӧртэм изданиосын. Улонысь кошкемъёсыз но газетъёс выльысь султӥзы ук. Мон верасько "Золотая провинция" нимозэ. Но солэн пуштросэз копак воштӥськиз. Нырысетӥ "улоназ" со элькун властез, кун Кенешез, солэсь кивалтӥсьсэ котькуд номераз быдтыса куштэ вал ке, табере кутскиз соосты олокызьы но вылэ ӝутыны. Мар луиз меда? Нырысетӥ классэ ветлӥсь пинал но валэктоз, дыр - газетлэн зэмос кузёез воштӥськиз. Зэм но, ӵуж газетлэн "анаез" но, "АиФ Удмуртии" еженедельник - мукет пала учкыны ӧдъяз. Кӧня чернила, кӧня газет бам сӥземын вал республикалэсь кивалтӥсьсэ сантэманлы но шоркармылэсь мэризэ данъянлы! Огкутскемен ваньмыз вунӥз, лэся. Тӧл чутрак музон луиз. Кытысь но кӧня коньдон быриз сое воштон понна - созэ тодӥсь ӧвӧл. Но лыдӟисез озьы гинэ уд пӧя. Газетчилэн эрказмем нылмурт сямен возиськемез шӧдӥськытэк уг кыльы. Адямиос сыӵе изданиослы осконзэс ышто. Соин ик тиражзы но кулэсме. Куд-огез ӧз вунэты на, вылды, "Неделя Удмуртии" нимо газетэз но. Кызьы гинэ ӧз чеберъяське сое поттӥсьёс: ми эрикоесь, ми нокин шоры ум учкиське, ваньзэ тышканы быгатӥськом... Маин быриз озьы атасъяськемзы? Вождэс эн вае, "Неделялэн" я соиз, я таиз адями улэ выдылыны кутскемез, быронэ вуттӥз. Куке но 100 сюрслэсь ятыр лыдын потӥсь издание син азьын куашказ но табере историе гинэ кылиз на. Шаермылы вылӥ кивалтӥсь быръён вакытэ ваньмыз сямен изданиос кандидатъёсъя люкиськизы. Данакез, валамон ни, вормисез вылэ ужазы. "День" но "Ижевск вечерний" премьер-министрез ӝутыны выризы. Кун Думалэсь азьло депутатсэ котыр ласянь чеберъязы "Купол" медиа-холдинге пырись газетъёс но телерадиокомпаниос. Павел Вершининэз кутсконысеныз пумозяз утиз "Герд" газет гинэ. Кужмо тушмонъёсын ожмаськонэ пыриськон сое шӧдскымон кыдатӥз, тросэзлы дышетӥз. Котьма ке но, выльысь кулэ луиз ке, та егит издание нюръяськонэ дӥсьтысагес но валасагес "тэтчыны" быгатоз ни. Малы тае верано луиськом? Быръён вакыт умой возьматӥз асьме газетъёслэсь "Эрико" луэмзэс. Озьы ӧвӧл шат? Эрик сярысь котькӧня кесяськы, но кузёед гозызэ ӧз лэзьы ке, кыдёке уд кошкы. Уго туннэ котькуд изданилэн редакторезлэн тыбыр сьӧраз зӧк кисыен яке бадӟым властен мурт сылэ. Бен, огез ассэ чик но уг шарая, мукетыз кузё луэмзэ уг ваты. Но пуштросэз одӥг - независимой нимаськись газетъёс ӧвӧл. Эрик меӵак герӟаськемын курикен. Соин ик котькинэ куртчылыны быгатон сярысь верась журналистъёс шоры мон мыньпотыса учкисько. Бен, быгатод, шуисько. Кузёед лэзиз ке. Яке ужан интыдэ воштэмед потӥз ке. В. Тӥни сыӵе адӟиське мыным прессаын кылдэм югдур. Радиоен но телевидениен герӟаськем ужпумъёсты, трос пазяськонтэм вылысь, юромо палэнэ кельтӥм. Кин но со журналистикаез ньылетӥ власть шуыны турттэ. Быръем, быдэсъясь но судъясь властьёс бӧрсьы, пе, тӥ мынӥськоды. Озьы верамен соглаш нокызьы луыны уг быгатӥськы. Пресса - туж аспӧртэмлыко маке. Куддыр со кыӵе ке ужан тӥрлыклы укша, мукетъят - кивалтонэз но обществоез герӟась выжлы пӧрме. Котьма ке но, прессалэн кужмыз юн. Со быгатэ калыкез ӟеч ужъёсы ӝутыны но, адямиослэсь мылкыдзэс копак куашкатыны но. Котьмалэсь кулэез, вылды - ваньзэ чакласа, малпаса лэсьтон. Милемлы ӵемгес тодэ вайылоно врачъёслэсь "изъян эн вай" куронзэс. Озьы ужам ке, журналистъёсты гажан но обществоын йылоз. Прессалы сётэм эрик ваньмызлы пайдаен мед берытскоз. Эскерись-чакласьёс огазеямын Россия Федерацилэн Генеральной прокурорезлэн В. В. Устиновлэн 2001-тӥ арын 22-тӥ январе поттэм приказъёсызъя улосвылъёсысь транспортъя но нимысьтыз прокуратураос пыртэмын Россия Федерацилэн субъектъёсызлэн прокуроръёссылэн кивалтон улсазы. Соос асьсэ удысъёссэс ик нуозы, эскерыса-чакласа возёзы законъёслэсь транспортын, таможнялэн ёзъёсаз но нимысьтыз чаклано объектъёсын кызьы быдэсъяськемзэс. Туннэ нош ик Выль ар Шунды ӝужан пал календарья асьмеос выль даурез нош ик пумитам 23-тӥ январе. Соку ик кужыме пыре Кый, зодиакья со сюрес усьтэ Драконлы. Япон калыклы Выль праздникъёс пӧлысь одӥгез бадӟымез праздник. Выль ар гырлылэн сю тямысэтӥзэ шуккем куараез котькудӥзлы арлыдзы вӧзы эшшо одӥг лыдпус ватса. Та нунал азьын вордскем вож нуныез но аресъемен лыдъяло ни. Китаецъёс понна Выль ар тулыслэн но яратонлэн праздниксы. Ар люкиське 24 нуналъем кык арняослы. Нырысетӥез лыдъяське тужгес но яратоно арняен. Соин ик меӵак вераны луэ: туэ уноез нуныос вордскозы октябрьлэн пумаз. Соку сӥзьыл вуэ бере, нылкышноос бусы ужъёслэсь мозмемын, ӝӧк вылъёс узыр бакча сиёнэн но емышъёсын. Тамаш ПИНТЕР Сьӧд но тӧдьы Эгыр, эгыр, эгыр. Чырты выжыозям вуиз ни со. Вуоно арняе та складысь кошкисько, - шуисько. Лукач, верамме пеляз но уг поны, дыртытэк гинэ куя эгырез. Бугыръяське тӧдьы, югыт инбам. Нош ӝокыт омыр милемыз зӥбе, шоканы секыт. - Пыласьконо вал, - шуисько. - Берлогес. Таиз берпуметӥ вагонмы, - вазе Лукач. Кык арня ӵоже ни шапык но зор ӧй вал. Адӟемпотостэм пӧсь. Мӧзмыт синъёсын учкисько шур пала. Возьмаськисьмы шуиз: туннэ, пе, куамын ньыль градус пӧсь. Адӟод но кылёд, эгыред ӝуаны кутскоз. Ярдурын, улыггес интыяз, воргорон сылэ. Со вылын тӧдьы штани. Дэремезлэсь бирдыоссэ пертчылэм. Кыӵе вожъяськисько али мон солы. Нап, сьӧд тузон пушкын ужаськом. Артысь чугун сюрес кузя паровоз вуттэ буш вагонъёсыз. Лопатаме сэрпалтӥ но эгыр люк вылэ пукси. - Та адями ужан понна гинэ ӧвӧл вордскемын, - шуисько. - Малы бен соку ужаськод? - юа Лукач. - Уг ни ужа. - Котькуд кӧс нуналэ складысь кошкисько, шуиськод. - Табере зэмзэ но кошко ни. Чидантэм луиз. Ветлӥськод, парсь кадь кыжмыса. Тыбырыным умой-умой пыкъяськи вагон борды. Синъёсме вошъятэк учкисько шур вылэ. Ярдурын шокатэк кадь сыло подъёмной кранъёс. Кӧльыё ярдурын - ящикъёс но мешокъёс. Соос вылын пуко кускозязы кылиськем пиос - шур вылын ужасьёс. - Мын ук ресторанэ ужаны. Отын, эсьмаса, официант ке луид, юг-юг тӧдьы дӥсен ужалод, йӧтылымтэ нылаш кадь, - иса Лукач. - Кулэ-а, йырад лопатаен вутто? - Сӥялскы. Пуксиз монэн артэ. Мугортӥз мунчоын кадь пӧсям ву бызе, йырсиез котмыса ӟугмаськемын. Ымныраз сьӧд-сьӧд виштыос. Со шоры учкисько но, асме адӟисько кадь, кыӵе мон луо. Пукиськом. Каллен гинэ эгырез бугыръяськом. - Кинлы ке но эгырез но тырыны кулэ ук, - шуэ со. - Акыльтӥз! Акыльтӥз! Уд валаськы-а? - Кытын ке но ужано. - Тодӥсько. Умой ик ужмы асьмелэн, зэм-а? Тон озьы шуиськод ук. Татын сомында коньдон люканы луоно. Вератэк но валамон, асьмеос та ужамы вылӥ кивалтӥсьёслэсь но уно коньдон жильдӥськом уга. Ой! Кыӵе акыльтӥз ни мыным весяк тае кылыны. Мон сое тонтэк но тодӥсько. Бен, коньдон. Юрӟым манетъёс! Нош кулэезъя ӧз ке тыре? Соку мар? Ӧскем потэ ни мынам, та уж шоры учкыса! - Тон та ужедлэсь возьдаськиськод, - шуэ Лукач. - Уг возьдаськиськы. Но кыӵе уж, пе, та? Мон ымнырме ӵушылӥсько. Дэмласько солы кысконме. Шунды пель йылъёсмес ик ӵушка кадь. Инмысь пӧзись корт кисьтӥське, кожалод. Мон зоньтӥськи. Вырӟеме но уг поты ни. Ма, талы паймонэз но ӧвӧл. Арня но ӝыны чик дугдылытэк, уен-нуналэн вагонъёсы эгыр тыриськом но тыриськом. Котыр учкы, котькытын эгыр но эгыр. Складын гурезь ӝужда ик эгыр. Кузесь транспортёръёс но отчы уг сузё. Нош машинаослэн соос вискытӥ потэмзы уг луы ни. Пото ке но, юн курадӟыса. - Пичияк куртчем каром-а, мар-а? - юа Лукач. Мон шпала вылэ сялӟиськисько. Ньылонам шокчыны луонтэм тузон. - Куртчом. Ми уллане ваським. Пуксим вагон вӧзы. Татын ӧжыт салкымгес. Сюме юзматон понна, мон кема юи. Мылы потытэк сиськыны кутски. Тодам лыктӥз журналист. - Тодӥськод на-а журналистэз? - юасько. - Бен. Мар-о нош? - Солы умой. Тани солэн ужез - уж ке уж, зэм-а? Нунал ӵоже отчы-татчы вуэ. Нош бухгалтермы кыӵе со шоры учкиз. Чыртыяз ошиськыны дась вал. Кофта улысьтыз кызьы гадьёсыз ӧз потылэ. - Мар тон со журналист вылэ омырскид? - Огшоры гинэ. - Журналист луон понна визь кулэ. Школаез быдтоно, - шуэ Лукач. - Кӧня ке ар талэсь азьло одӥг нылашез тодӥсько вал... Кыӵе мон жади! Лукачен луэм учыр али мыным чик но кулэ ӧвӧл. Мон сое сю пол кылӥ ни. Зэмзэ вераса, ог-огмы сярысь ми ваньзэ тодӥськомы. Общежитиын койкаосмы гинэ но артэ сыло. Ӝыт ке вуэ, кутскиськом ни ми соин асьмелэсь лушкем малпанъёсмес вераны, муспотонъёсмы сярысь бӧтьыртыны. Учконо ке, улон сыӵе ик урод ӧвӧл. Котькуд толэзь ми кык сю форинтсэ сберкнижкае понӥськом. Ужаммылы нокин уг ӝожтӥськы, уг тышкаськы. Кытӥяз сыӵе нуналъёс луо, дас тямыс час пичи но ялкарытэк тыршоно луэ. Нош берло дас нуналзэ кыӵе йӧтӥз!. Складын ужасез ӧжыт, вагонъёс вуо но вуо. Бен, чидан чигиське вал ни но, туннэ ӧжытак пумаз вуим кадь... Ужмес дырызлэсь вазь быдтӥм. Шунды озьы ик ӵушка. Шур дурысь юр-яр куараос кылӥсько. Моторлэн тачыртэмез кыдёке шуккиське. Улон интыямы вуытозь, вань жадем быре кадь. Тӥни озьы котькуд нунал. Нырысь ик мон душ улэ пырисько. Умой ик тазьы ву улын сылыны. Мугорме куэ ӵыжектытозь щёткаен зырасько. Майтал но пӧсь ву мугорез чидантэм бышко. Йырысеным пыдозям мугоры яра луэмын кадь. - Кытчы ке мыномы-а? - юа Лукач. - Мыном, дыр. Общежитие та вакытэ калыкез ӧжыт кыле. Мӧйыосыз вератэк. Коньдонэн картаен шудо. Комендантлэсь лыктэмзэ шӧдо ке, коньдонзэс вато. Ми дӥсяськиськом. Берлозэ коньдон басьтыкумы ми кыкнамы но одӥг кадь, одӥг тусо буртчин дэрем басьтӥм. Миськиськод ке, туж каньылэн кырсез кошке. Тӥни со дэреммес ик дӥсяськом. - Кытчы-о? - юасько. - Ульчае потӥм ке, мар ке но малпалом, - шуэ Лукач. Ӝытозь калтыртӥм. Ульчаосын туж трос калыкез. Яркыт но капчи дӥсяськем нылкышноос калго. Мыным туж умой. Мон чылкыт, чебер. Малпалод, ноку но со эгыр тузон пӧлын ӧй вал. - Татчы! - дугдэ Лукач. Татчы ке татчы. Мыным озьы но, тазьы но яра. Пыриськом. Гостиницалэн холлысьтыз сюриськом югыт но чылкыт ресторанэ. Ӝӧк котырын небыт пуконъёс. Уяса выллем ветло официантъёс. Тыл ӝуамъя чиля паркет. - Буш интыос ӧвӧл, - шуэ официантъёслэн кивалтӥсьсы. Кияз кӧня ке форинтме донгисько. Со йыбырттӥз: - Одӥг минут, гажано куноосы. Синучкон азьын чеберъяськи, галстукме тупатӥ. Ваньмыз умой кадь. Палэнысенгес учкисько, штани кукъёсы кузь уг адӟисько-а. Милемыз официант ӝӧк сьӧры ӧтиз. Отын пуко вал ни кык нылкышноос. - Вождэс эн вае, мукет номыр но дэмланы уг быгатӥськы ни, - пелям сипыртэ официант. Милемын нош мар, милем таиз но умой. Эшшо ке сыӵе чебересь нылкышноос пуко ӝӧк сьӧрын. Каллен гинэ, дыртытэк кофеен чашазэс бугыръяло. Адӟисько, учерак-учерак ми шоры учкыло. Лукач нырысьсэ сурен бутылказэ бушатэмез бере султӥз. Ӵыж-горд йырсиёзэ эктыны ӧтиз. Мон ӝӧк сьӧры кыли. Ӵошен. Таиз кышномурт тӧдь-тӧдь йырсиё. Векчи куско, бордаз йӧтскид ке, тӥяськоз кадь. Нош куэз... Шораз учкисько но, малы ке син азям пуксе пияла чияпу. Вераськон мытыны уг дӥсьтӥськы. Кышкасько, монэ тэргалоз. Кема учкисько солэн тӧдьы чиньыосыз шоры. Таӵе ик мынам йӧтӥськеме потэ соос борды. Мон шоры одӥг пол сяна синзэ ӧз ӝутъя. Одӥг гучык сурме юи, ӧти сое эктыны. Ымамы ву ӟузем кадь, кыл но поттылытэк, чилясь паркет вылын ӟечыраськом. Асме кызьы возьыны уг валаськы. Йыры поромемын, быдэсак кортнамын кадь. - Пияла чияпу. Тӥни кызьы шуисько мон тӥледыз ас поннам, - могасагес солы вази. Со серекъя. - Малы? - Кельшиськоды. - Бен-а? - Озьы. Кудды тӥляд ненег. - Эшшо кыӵе на? - Ӧвӧл. Мукет номыр ӧвӧл... Маке юомы-а? Мон сое сур бар доры ӧтисько. Пуксимы ӝужытэсь пуконъёс вылэ. Дэмласько солы маке но сиён басьтыны. Мед быръёз сое, ма сиемез-юэмез потэ. Валатэк кыли, мар шуиз официантлы... Ӧжыт улыса, милемлы ваё кыӵе ке но сур, нош со пушкын уя пичи гинэ йӧ. Мон возьдаськисько юаны, кызьы нимаське та юон. Чильпырась сюмыкъёсмы артэ лякиськыса кадь сыло. - Кельше-а? - юа нылмурт. - Юаськод на, мынам та тужгес но яратоноез юонэ, - пӧясько сое. - Кыксэ вае на! - Барын ужась кышномурт пальышаса учке. Йырыныз шона. - Курисько кык "Уайтледи"! - Бен укыр дуно ук, - шыпыртэ нылаш. Мон йӧтскисько ки бордаз. Со уг дырты кизэ палэнтыны. - Мед луоз дуно. Нылаше номыр уг вера. Пукиськом. Кыдёкын ик ӧвӧл, оркестр шудэ. Кыӵе ке но итальян кырӟанэз нёжъяло. - Ӵем-а татчы ветлӥськоды? - юасько. Нылаш чильпырась сюмыкез шоры учкыса шуэ: - Учкисько ке, тӥ ӵемгес вуылӥськоды кадь. Мон пельпумъёсме ӝуткасько. Уд вера ук, нырысьсэ мон татын шуыса. Кӧнялы ке йырме берыктӥ. Лукач, горданеныз эктэм карыса, ог интыязы лёгаськыса сыло. Шыпыт, вераськытэк, крезьгур пушкы выйыса. - Эшты-а? - йырыным соос пала шонтыса юасько. Йырыныз озьы ик шонтӥз. Бабля йырсиез кымес вылаз усиз. Со йырсизэ тупатӥз. Чебер! Синме вошъятэк учкисько шораз. Чыртыысьтыз вирсэрез тэтча. Улытозям таӵе чебер нылашен ӧй на тодматскылы. Сием-юэммы понна тыриськыны шуыса, коньдонме поттӥ. Адӟисько: нылаш паймыса учке зӧк коньдон пуйы шоры. - Тӥляд трос-а коньдонды? - Трос ик ӧвӧл. - Кытын-о тӥ ужаськоды? - Туж-а со тӥледлы кулэ? - Ӧвӧл. Мон журналист, - шуисько. Ачим но валатэк кыли, малы мон озьы шуи. Со мынэсьтым киме кутэ. Ми ортчиськом ӝӧкъёс вискытӥ, вуиськом эктӥсьёс доры. Пиосмуртъёс синзэс вошъятэк нылаше шоры учко. Чузъяське каллен гинэ крезьгур. Нылэз бордам кыскисько. Бам вылысьтым солэсь йырсизэ шӧдӥсько. - Кызьы нимаське та эктон гур? - Котькызьы мед луоз, туж-а тодэмед потэ? - Уг, - шуисько. Лукач нылкышноеныз ми вӧзтӥ уяса кадь ортчизы. Йырме соос пала берыктыса, Лукачен ваче синмынымы кырмыштӥм. Озьы мон шӧдытыны медӥсько вал, вераськон вань шуыса. Нош со шляпа но шляпа, номыре уг вала. Соин сэрен тани ваньмыз йырчукин кошкоз. Оло нош кошкиз ни. Нылаш тодӥз ке, мон сое пӧяй шуыса, со монэ куштоз. Номыре валасьтэм адями та Лукач. Эшшо ке вӧзтӥмы пальпотыса ортче. - Пуксём, - ӧтисько нылашез. Курисько на официантлэсь эшшо одӥг стакан сур. Нылашлы но лэзисько. - Али ке но шӧдӥсько йырси бордысьтыды зынэз, - шуисько шыпыт. - Уг яра со сярысь. - Маке умойтэмзэ-а шедьтӥ вераны? - Ӧд. Ӝӧк вылын милям чиньыосмы ог-огзы борды йӧтскыло, шудо. Котькуд чиньызэ бӧрсьысь бӧрсе кутылӥсько, маяллясько. "Лукачлы одӥг бутылка коньяк пуктытэк уз луы, - малпасько. - Со ке ӧй луысал, та ресторанэ ӧм пырысалмы. Нылашен но ӧй тодматскысал". Ӧжыт улыса, ӝӧкмы доры дугдӥз кыӵе ке но пиосмурт. Тӧдьы йырсиё. Кузялэсгес ымныро. - Яра-а тӥледыз? - юаз со. - Кӧня пол тыныд верано, эн ветлы сьӧрам, акыльтӥд ни, - чурыт-чурыт вераз нылмурт. Ачиз оркестр пала учкиз йырзэ урдыса. - Зол ик тӥ сое палэнтӥды, - шуи мон, пиосмурт кошкем бере. - Уг валаськы ни, кӧня пол солы верано, монэ эктыны медаз ӧтьы шуыса. Уг вала бере уг вала. Шудэ барабан. Нокин но эктыны уг поты. Нош вӧлдэтын каллен гинэ бергало пӧртэм буёло лампаос. Нылаш кытчы ке но пыдло учке. Мон нош ик йӧтски солэн кияз. - Кыӵе умой, тӥ татын. Со туннэ мон дорысь одӥг вамыш но ӧй кошкысал. - Со сярысь эн ни малпалэ туннэ. Нылашлэн чылкыт ымныраз учкисько. Кыӵе мыным удалтӥз, малпасько. - Ми дорын ужа со, - шуэ. - Корт ӵыжатон цехын. Котькуд нунал, кыӵе ке но муг шедьтыса, мон доры конторае пыре. Уг валаськы, кызьы со дӥсьтэ мон доры пырыны... Ы-ых! Кӧтвеськантэм куараез. Кизэ мозмытӥсько. Быдэс стакан сур лэзи. Юисько. Мыным ӝокыт. Лябӟытӥсько галстукме, дэремелэсь вылӥ бирдызэ пертчылӥсько. - Юнме тӥ солы вождэс поттӥськоды, - кужмысь верай. - Туннэ нуналысен солы пум, - шуэ. Собере киыныз шона. Куке мыкыртӥське, мон солэн кофта улаз синмыным пырисько. Чупано кадь ымдуръёсыз небытак усьтӥсько. Маке но солы верано. - Одӥг пол ке но потэ ук соин эктыны. Нылмурт мон шоры дол-дол учке. - Мар-о луоз, одӥг пол эктӥды ке? Шӧдӥсько, аслам мугортӥм пӧсь керӟег тулкым ортче. - Соин? - юа со. Киям стакан. Солэсь вогыриоссэ кырмисько. - Монэн мынӥды ук. Ымдурзэ кырыжтыса серекъя. Сур юэ. - Тӥ демократ! - шуэ со. - Мон грузчик. - Конечно! - Конечно. Мыня. - Мон грузчик. Со ини коскаса серекъя. Артысь ӝӧк сьӧрын пукисьёс ми пала берытско. Стаканме киысьтым киям берыкъясько. Ымныраз сурен пазьгем потэ ни. - Мон кудӟемын ӧвӧл. Монэ синъёсыныз веша. Шудэ крезьгур. Бергало буёло лампаос. - Мон одӥг пол ымныр шораз учкыса тодӥсько, - шуэ со, - кин кыӵе адями. Мынам киосы куалекъяло. Мон султӥсько. Со номырзэ уг вала. Кучапи сямен учкыса кыле. Официантлы ӧс дорысен дас форинт мычисько. Дорам лыктӥз Лукач. Ма луэмез тодыса, горданеныз люкиське. - Ярам асьмеос дырыз дыръя кошким, - ульчае потэм берамы шуэ со. - Нылаш визьмо ик вылымтэ. Тодӥсько вал азьло одӥг нылэз. Ымаз ву ӟузем кадь ветлӥз сьӧрам. Мӧзмись синъёсыныз портыса. Мон нош верасько... Лукач маде. Та учыр мыным туж тодмо. Сю пол ке но кылӥ ни, солэн веран куспаз уг пыриськы. Мадьяр кылысь берыктӥз В.БИКУЗИНА. Толон но туннэ Гурт черклэн секыт даурез И. Ӟечбур, выль даур! Пӧлысьтымы кин ке коть туннэ уг малпаськы меда вакытлэн воштӥськемез сярысь? Котькудӥз тырше ортчемзэ син азяз пуктыны, лэсьтэм янгышъёссэ лыдэ басьтыны, азьланезлы сюрес пусйыны. Капчи ӧй вал ЪЪ даур. Ма, тазьы учконо ке, кудӥз меда ӵошкыт ортчиз? Котькуд вакытлэн уго аслаз вормонъёсыз, аслаз ыштонъёсыз. Туннэ мадем потэ асьме элькунын христианстволэн историез сярысь. Одӥг черк вылын. Уго кызьы ке шапык ву возьматэ быдэс зарезьлэсь кыӵезэ, озьы ик нимаз храмлэн ортчем сюресэз шарая улонысьтымы зӧк сӥлэсь пуштроссэ. Со понна бырйим Ижевск вӧзысь Ягул гуртысь Преображенской черкез. Малы? Со интыяськемын городлы матэ. Командировкае яке нюлэскы мынон сямен отӥ ӵем ортчылыны кылдэ. Собере мукет но мугез вань на. Ӵапак туэ гужем 100 ар тырме та черкез лэсьтон сярысь решение кутэм дырысен. ИИ. Быдэс Россилэн историез, отысь данак калыкъёслэн культуразы люконтэм герӟаськемын ӟуч православной черклэн азинскон сюресэныз. Тае асьмеос тужгес но шӧдӥм кӧня ке ар талэсь азьло, Русез Христианствое выжтэм дырысен 1000 ар тырмонэз пусйыкумы. Соку шӧдскымон йылӥз историмес, выжыосмес ӟечгес тодыны- эскерыны мылкыд карисьёслэн лыдзы. Со шӧлкын адямиос пыр-поч басьтӥськизы аналтэм черкъёсты улӟытон но выльёссэ лэсьтон борды. Октябрь революция дорозь Россиын котькуд улӥсьлэн вордскемез но, быдэ вуонэз но, азьланьын улэм-вылэмез но, кулэмез но черкен герӟамын вал. 1917-тӥ арын кивалтонэ вуэм выль кузёос калыкез кужмысь люкизы осконзылэсь. Соос косэмъя, 20- тӥ-30-тӥ аръёсы пытсазы-куашкатӥзы уно сю храмъёсты. Судтэк-мартэк ыбизы трос священникъёсты. Кызьы гожтэ одӥгаз книгаяз республикаысьтымы тодмо шаерчи Евгений Шумилов, Удмуртиын соку вань черкъёс пӧлысь быдэс кылиз куиньмос люкетэз гинэ, нош мудоръёс (обросъёс) пӧлысь таламын вал 99 процентэз. Совето власть, жаляса верано луэ, черк юртъёсты пытсамен но киросъёсты куямен гинэ ӧз тырмытъяськы. Тани 20-тӥ аръёслэн пумазы газетъёс ивортэмъя, Воткинскысь комсомолецъёслэн бригадаоссы лом но кувалда кутыса тарказы черк вӧзысь шайвылэз. Сыӵе ик учыръёс вал Сарапулын но мукет интыосын. Шайгуос вылысь памятникъёсты, киросъёсты но изъёсты пыргытыса, егитъёс со векчиятэм изэз сюрес лэсьтонэ нуллӥзы. Война азьын Удмуртиын, ма, мукет улосъёсын сямен ик, вылды, паськыт вӧлмиз "Черкъёсын усьтом клубъёс!" ӧтён. Но та ужез но кивалтӥсьёс тыро-пыдо радъяны ӧз быгатэ. Данак интыосын клуб кылдытон берытскылӥз чебер суредам борддоръёсты наш-наш буёлэн зыранэн но висъет пуктылонэн. Архитекторъёсын чаклам куронъёсты тӥямен, отын но татын азьло черк юртъёс син азьын куашканы кутскизы. Ваньмыз та умойтэм учыръёс вал Ягулын но. Татысь черк ас даураз, нош со быдэсак тупа ортчем даурен, оломае но адӟоно луиз. ИИИ. Ягулын но со вӧзысь гуртъёсын улӥсьёслэн ас доразы черк лэсьтон сярысь малпан ЪИЪ даурлэн пумаз ик кылдӥз. Элькунысьтымы Валтӥсь кун архивын возиське Вятка духовной консисториысь (епархиен кивалтонысь) Сарапул правление ыстэм гожтэт сярысь ивортон. Отын верамын, консистория Ӟуч Вожой, Ягул, Вуж но Выль Марасан гуртъёсысь, Крестовоздвиженский но Михайловский починкаосысь улӥсьёслэсь черк пуктон сярысь куронзэс ыстэ но сое эскерыны косэ шуыса. Валэктонэз 1899-тӥ арын 24-тӥ февралёзь Вяткае келяно, пусъемын документын. Вылӥысь косонэз быдэстыса, Сарапулысь духовной правление быръем протоиерей Вячеслав Бережнев вазиськеИжевско-Нагорной волостьысь правление, верам, гуртъёсын улӥсьёслэн музъемзылэсь быдӟалазэ юаса. Ужпумез котыр ласянь эскерон йылпумъяськиз Вятка духовной консисторилэн 1900- тӥ арын 27-тӥ октябре кутэм указэныз. Отын, кылсярысь, верамын, Ӟуч Вожойын яке Ягулын нимаз приход кылдытон сярысь куронэз чакласа (озьыен, черк пуктон инты чотын кыкез но гурт учкемын вал - И. Л.), соглаш кариськоно Ягулын черк ӝутыны, со понна тупамон инты висъяны но коньдон, нянь люканэз Ижысь заводын тупатэм кабъя радъяны. Указын озьы ик шуэмын: черкез ӝутоно архитекторлэн проектэзъя, солэн кивалтэмез но ялан чакламез улсын. Со понна ӵектэмын удысэз валась оскымон крестьянъёслэсь лэсьтӥськон комитет кылдытыны. Бадӟым ӧтчаме люкаськыса, 1901-тӥ арын 12-тӥ июне инмарлы оскисьёс кенешизы черкез излэсь ӝутыны. Лэсьтӥськон комитетлы кивалтӥсе бырйизы Ижысь священникез Алексей Спасскиез. Отчы озьы ик пыртӥзы Никита Русский, Захар Ломаев но Василий Набоких крестьянъёсты. Храмез ӝоггес ӝутон вылысь, гурт калык котькудзэ мӧйы воргоронэз арлы быдэ та уже кык манет висъяны куриз. Озьы куать ар ӵоже ог куать сюрс манет люканы чакламын вал. Но со но ӧй тырмысал пусъем малпанэз быдэстыны. 1901-тӥ арын гужем шорын священник Алексей Спасский вазиське Сарапулысь епископлы Владимирлы Иж заводысь куд-ог вукоосын пызь люкан ларьёс интыяны куронэн. Со озьы ик турттэ вал коньдон бичаны кружкаос пуктыны. Духовной правление нырысетӥ куронэз быдэстӥз, кыкетӥ ӵектонлы пумит луиз, кружкаысь коньдонэз лушканы мылкыд карисьёс шедёзы шуыса. Ижысь шаерчилэн Анатолий Майерлэн гожтэмезъя, черкысь староста вань юрттӥсьёсты нимысьтыз книгаын пусйылӥз, пызез вузам чотын люкаськем уксёез сберкассае сётылӥз, сое утён но йылэтон вылысь. Тӥни озьы тысен-пырыен бичазы черклы коньдон. Храмлы проект дасян борды басьтӥськиз та палъёсын соку туж тодмо архитектор Иван Аполлонович Чарушин. Солэн чертёжъёсызъя лэсьтэмын, кылсярысь, Нечкино, Докша, Июльское, Люк гуртъёсысь черкъёс. Но Чарушинлэн тужгес пусйымон ужез - Ижысь Михайловской собор. Со куамынэтӥ аръёсы быдэсак куашкатэмын. Али асьме властьёс но мылкыд карисьёс коньдон люкало, туала ЦУМ вӧзы выльысь бадӟым но учкымон черк ӝутон вылысь. ИВ. Лэсьтӥськон комитет туж чакласа бырйиз, кызьы шуо, подрядчикез. Та пумысен вузкаронэ (торге) пыриськизы сарапул купец Михаил Петрович Пореев, иж купец Николай Николаевич Бодалев, крестьян воргорон Готовихин но Вятка губерниысь Уржум уездын улӥсь Никифор Михайлович Мамаев. Берлоез тужгес но ичи дун тупатӥз. Сметая чаклам 10 сюрс интые, со ӵектӥз храмез 6 сюрс манетэн ӝутыны. Озьы куд- ог ужъёсты со ачиз чотын лэсьтыны басьтӥськиз. Валамон ни, Мамаев ик вормиз ӵошатсконын. 1904-тӥ арын 3-тӥ августэ Алексей Спасский вазиськиз Сарапулысь епископлы Михейлы 22-тӥ августэ, арня нуналэ, черк лэсьтонэ нырысетӥ из поныны куронэн. Со дырлы, пе, крестьянъёс ӟегез аралозы но кизёнэз йылпумъялозы ни. Озьы ик луиз. Черк ӝутонэ калык мыло-кыло пыриськиз. Инмарлы оскисьёс отчы вань кужымзэс, быгатонзэс сётыны тыршизы, дорысьтызы ваньбурзэс нуллӥзы. Удалтымтэ аръёс луэмен но Ижысь пыӵал тӥрлык поттон заводын ужъёс кулэсмемен, Ягулын лэсьтӥськон туж шуген мынӥз. Соин ик кенешемын вал черк ӝутонэ Вятка губерниысь гуртъёсын коньдон люканы. Озьы ивор вуиз Елабугаозь но. Отысь сӥё- дано вузкарисьлэн Фёдор Черновлэн ӟеч ужъёсы висъям коньдонэныз кузёяськись совет ягулъёслы 10 сюрс манет сётӥз. Та шырыт адямилэсь нимзэ гуртоос али ке но буре вайыло на. Огъя вераса, Ягулысь черкез 1915-тӥ арын сентябре гинэ вӧсязы. Петр но Павел апостолъёслы сӥзьыса, солы Петропавловской ним сётӥзы. Нош нимаз приход татын эшшо но бергес - 1917-тӥ арын 28-тӥ мартэ - усьтӥзы. В. Секыт адӟон витиз Ягулысь черкез 20-тӥ аръёсы но. Тазьы учконо ке, сомында курадӟонэз пырпотыса ул но ул вал ини, шумпотты вал калыкез, юнматы вал адямиослэсь ӟечезлы осконзэс... Ӧз, озьы ӧз луы. Октябрь революцилэн Нева ярдурысен ӝутскем тулкымез пыдлось гуртъёсы но вуиз. Ягул котырын но кутскиз власть понна нюръяськон. Историкъёслэн эскеремзыя, та гурт кӧня ке пол киысь кие выжылӥз. Огшоры калыклы куректон "тӧдьыослэсь" но, "гордъёслэсь" но вуылӥз. Черклэн шунды ӝужан палысьтыз горд кирпичлэсь борддорын али но адӟисько пуля бервылъёс. Граждан ож вакытэ татын я "тӧдьыос" "гордъёсты" ыбылӥзы, я соосыз таоссэ. Кӧня вир кисьтӥськемын черк дорын - созэ нокин но уз тоды ни. Храм вӧзын - кык вырйыл. Алигес отчы пулэсь кирос но пуктӥзы ни. Татчы ватэмын, шуо, священник Михаил Елисеев кузпалэныз. Но шаерчиос та дырозь огкылэ вуыны уг быгато на шимес учыр луон дыр пумысен. Одӥгъёсыз верало, священникез 1930-тӥ арын виизы. Со, пе, вань зарнизэ государстволы сётымтэ. Мукетъёсыз, кылсярысь, отец Михаил, черкын али ужась священник, малпа, соку адямиосты храм вӧзын ӧз ыбылэ ни шуыса. Соин ик вераны турттэ, со учыр граждан ож дыръя вал шуыса. Та ласянь чӧлске черке ветлӥсь Анна нимо кышномуртлэн кылъёсыз вылэ. Али Ӟуч Вожойын улӥсь мурт 1914-тӥ арын вордӥськемын. Солэн верамезъя, пичи ныл дыръяз со черк дорысь лапас улысь адӟем кык вием муртъёслэсь шӧйёссэс. Кин тодэ ини, оло, озьы ик вал. Котьма ке но, 20-тӥ аръёсы черк ужаз. Вошъяськизы священникъёс, вошъяськизы адями кусыпъёс, но храмын ужасьёс быгатэмзыя весь тыршизы калыклы оскон вайыны. Но сыӵе улон пумен кысыны ӧдъяз. Атеистъёслэн кузь кизы Ягулозь но сузьтӥськиз. 1930-тӥ арын 23-тӥ январе Ижысь горисполком татысь черкез пытсан сярысь решение кутӥз. Кык толэзь ортчыса, сое юнматӥз Удмурт облисполком. Храмысь ог 150 пала дуно арбериосты кытчы ке нуизы. Отысь паркетэз гинэ но утялтӥзы. Сое, пе, бӧрысь Ижысь одӥгаз магазинэ вӧлдӥзы. Черк йылысь киросъёсты куязы, гырлы шуккон интыез сэрттӥзы. Пусйымон потэ гуртоослэн мадемзы. Храмез куашкатонэ пыриськем воргоронъёсты, пе, инмар умойтэме вуттӥз. Одӥгез черк липетэз сэрттыку ик усьыса сӧсырмем, мукетсэ ыбыны шедьтэм кудӟем ӵыжы-выжыез, куинетӥез колхоз трактор улэ учыртэм. Тодыны уг луы, оло, та малпам маке гинэ. Озьы ке но, со верамъёсын яркыт адӟиське калыклэн инмарлы пумит мынӥсь муртъёс ласянь мылкыдыз. ВИ. Ягул сельсовет черклэсь юртсэ утён сярысь туж ик ӧз сюлмаськы. Корт липетэз гуртоос сэрттӥзы, нош выльзэ лэсьтон сярысь ӧз малпаське. Ӟеч проектъя рос-прос ӝутэм юрт, зор-кот шедьыса, пумен отӥ но татӥ куашканы-пилиськылыны кутскиз. Ма, шӧртчи адямиос но сьӧлыклэсь кышкамысь дугдӥзы кадь - мае нуыны луэ вал, ваньзэ асьсэ азбаръёсазы кысказы. Куд-огез кирпич борды но кутскиз ни вал. Номыр ӧз пӧрмы, курег пузэн сураса лэсьтэм раствор кирпичез юн "кырмыса" возиз. Жаляса верано луэ, адямиос но куазь ярантэм каризы черклэн гулбечаз инъям гурез. Али кылемын на отчы сьӧд эгыр васькытъян дырдыос гинэ. Гур туж ӟеч вылэм. Со шунтэ вал выжез но, черклэсь пушсэ но. Борддоре нимысьтыз лэсьтэм пасьёстӥ шуныт омыр быдэс юртэ вӧлскиз. Мӧйыослэн верамысьтызы туала пересьёс тодо на, татын котьку но огкадь шуныт возиське вылэм шуыса. Черке лыктэмъёс толалтэ ӧз кынмылэ, гужем ӧз пӧсялэ. Бадӟым праздникъёсы отчы ог 650 мурт но люкаськылӥз, шуо. Черкез пытсам бере солэсь юртсэ сётӥллям - уд оске - огъя закодлы. Бӧрысь сое бакча сиён возён интылы пӧрмытӥллям. 50-тӥ аръёсы татын клуб усьтӥллям. Отын ик огдыре ужазы парикмахерской но милицилэн нылпи комнатаез. Уно аръёс ӵоже алтарь интые лэсьтэм сцена вылын чузъяськиз крезьгур, егитъёс эктӥзы-шулдыръяськизы, отын ик кусыпъёссэс "тупатылӥзы". Мыжыкен но пуртэн. Озьы ик будӥзы. 80-тӥ аръёслэн пумазы Ягулын кылдӥзы уен-нуналэн ужась ларёкъёс. Отын вузкаризы аракыен но мукет шузимытӥсь вузъёсын. Валамон ни, йыртэман учыръёслэн лыдзы син азьын будӥз. ВИИ. Горбачевен ялэм выльдӥськон, ӟечсэ но адӟытэк кельтыны уг яра, гуртоослы оскон сётӥз. Россилэн президентэз черк юртъёсты калыклы берыктон сярысь указ поттӥз. Ягулъёс бурдъяськизы. Соос интыысь но ёросысь кузёос дортӥ куронэн бызьылыны кутскизы. Сюлмаськемзы юнме ӧз луы. Нырысь соослы лэзизы черк вӧзысь огаз юртын Ижысь Александро-Невской соборысь священникен службаос ортчытъяны. Бӧрысь храмлэсь шунды ӝужан палзэ берыктӥзы. 1996-тӥ арын сётӥзы ни быдэс юртэз. Выльысь улӟытэм черклы Преображенской ним тупатӥзы. Уно аръёс ӵоже таркаса возем юртэз выльдон борды инмарлы оскисьёс но шоркарысь ӟеч лэсьтыны тыршисьёс мылысь-кыдысь басьтӥськизы. "Буммаш" завод та уже кык миллион манет висъяз. Власть но юрттыны выриз. Гуртоос ӟеч кыл верало соку югдурез шонер валам муртъёслы - Вылӥ Кенешлэн тӧроезлы Валентин Тубыловлы, культурая министрлы Геннадий Чайниковлы, ёрос администрацилэн кивалтӥсезлы Галина Баталовалы. Соос трос кужымзэс сётӥзы храмез улӟытон ужлы. 1997-тӥ арысен черкын ужа отец Михаил Карпеев, 1974-тӥ арын Чебоксары городын вордӥськем егит воргорон. Ягулын улон интыез ӧвӧлэн, со уг быгаты на храмын нуналлы быдэ служба нуыны. Но нимысьтыз тупатэм радъя вуылэ татчы, нылпиосты пылатэ, егитъёсты венчать каре. Кулэ дыръя гуртоос сое ӧтё адямиез берпум сюресаз келяны. Толэзьысен толэзе воштӥське черклэн пушкыз. Июльское гуртысь ваем одӥгез оброс "бӧрдыны" но кутскиз ни. Нырысетӥзэ озьы луиз Сербия вылэ бомбаос пуштылыны кутскон нуналэ. Бӧрысь - бадӟым праздник вакытъёсы. Берлозэ святойлэсь синвуаськемзэ оскисьёс адӟизы Пукро дыръя. Ягулысь храме туннэ ветло азьло приходэ пырись гуртъёсын улӥсьёс, Хохряки посёлокын, со котырысь тюрьмаосын ужасьёс. Трос гинэ луыло Ижысь вуэмъёс но. Улӟытэм черклэн данэз пумен паськыт вӧлме быдэс шаерамы. Озьыен, храм улоз, храм калыкез шумпоттоз на. ВИИИ. Пичи гинэ висъетын, черкысь сиськон интыын вераськиськом отец Михаилэн. Ӝужыт, веськрес мугоро егит воргорон дыртытэк гинэ маде яратоно ужез сярысь. - Мон туж оскисько, - шуэ со, - черкмес куке но быдэсак выльдыны быгатом шуыса. Архивысь тани чертёжъёсты но шедьтӥм ни. Туж учкымон но аспӧртэмлыко юрт вылэм. - Асьме епархиын вань меда реставрациен нимысьтыз вырисьёс? - юасько священниклэсь. - Кытын, пе. Москвае яке мукет дано городъёсы вазиськы вал - трос коньдон кулэ. Кытысь сое шедьтод? Узыр муртъёс али трос луизы ке но, югдурез шонер валасьёс ичи на. Мыным туж кельшиз одӥг тодмо Богословлэн верамез: "Асьме черк сыӵе адямилы укша, кудзэ зол-зол тышказы, со бӧрсьы адями али гинэ пыд йылаз султыны кутске, нош солы вальс эктыны ӵекто ни". Озьы ук? Дасо аръёс ӵоже религиез лёгаса возизы, табере со осконэз арскын-мар берыктыны луоз кожало. Озьы уз пӧрмы. Ӟеч йылолъёсты калык пӧлын улӟытон понна кулэ уно дыр. Адямиос черке кыстӥськыны кутскизы ке но, тросэз Осконлэсь мур пуштроссэ уг вала на. Куддыр татчы кун учреждение музэн лыкто: вот тон вай мыным и всё - точка. Юыса но пырыны уг кепырало. Озьы ми ужаны ум быгатӥське. Котькудӥзлэн пушказ, йыраз валанэз медло. Пиналзэс пылатыны ваисьёсты но коть Евангелиез нырысь учкыны-лыдӟыны куриськом. Сотэк нокыӵе ужрадлэн пайдаез уз луы. - Отец Михаил, нош тӥледыз ма вуттӥз черке? - Со сюрес капчи ӧй вал. Пинал дыры шуген ортчиз - сюратаен будӥ. Анае но сюлэм шунытсэ тырмыт кузьмаса ӧз вутты кадь. Озьы ас кожамгес улыны дыши. Туж яратӥсько вал лыдӟиськыны, тужгес но кельшылӥзы ӟуч историен герӟаськем книгаос. Ачим чуваш выжыысь ке но, сюлмыным яратӥ ӟуч культураез. Дышетскыны пыри Москваысь текстильной институтэ. Огпол эшъёсын мынӥм Сергиев Посад городэ, адӟим отысь черкъёсыз, монахъёслэсь хорзэс. Со ик луиз улонэз воштон сярысь малпанме быдэстонын берпуметӥ шапык. Валай: черкын, религиын, православиын зэмос улон. Озьы тӥни... - Быгатӥськоды ке, вералэ вал, ку меда Россиын умой-умой дунъяны кутскозы дауръёсын утем ӟеч сямъёсты? - Шуг вераны. Со понна государство оскисьёсын чылкак мукет кусыпъёс тупатыны кулэ. Асьме общество, тупатскем интые, арысь аре уродме. Учке ай, кинлы синмаськыса, кинлэсь адӟем карыны тыршыса будо пиналъёсмы? То-то уго. Вир кисьтӥсьёс, йырвандӥсьёс, шайтан кадь олокыӵе но улэп макеос - тӥни кин туннэ кузёяське экранын но нылпи сюлэмын. Уг вераськы ни СПИД, наркотикъёс но трос мукетыз сярысь. - Ма бен лэсьтоно, югдурез коть талэсь урод каронтэм вылысь? - Экономика ӧжытак юнмаз ке, государство висъяны кулэ православной гимназиос, школаос, мукет дышетскон интыос усьтыны-возьыны тырмымон коньдон. Валамон, сюлмаськоно дышетӥсьёс сярысь. Соку коть 5-10 процентэз пиналъёс чылкыт сюлэмо будозы, асьме лулчеберлыкез утёзы, бӧрысь кивалтон удысэ вуозы но обществоын огъя суредэз умоятыны тыршозы. Юнме шат, шуом, еврейёс асьсэ нылпиоссылы быдэсак дунтэк дышетсконниос возё?.. Монэ туж шугъяськыто асьме егитъёс. Гуртамы, со сокем бадӟым но ӧвӧл ук, ар ӵоже гинэ ньыль мурт виемын. Туж тросэз сямен юон вылэ чӧлскемын. Данакезлэн йырсазез коньдон поттонэн сураськемын. Сыӵеослы нылпиоссы кулэ ӧвӧл. Озьы ке но, ваньмыз асьмелэн ыштэмын ни шуыны уг турттӥськы. Тросэз уго адями бордысь потэ. Валаз ке со улонэзлэсь дунлыксэ, возиськоз, ассэ кияз кутыны тыршоз. ИЪ. Та статьяез дасян вакытэ Ягулын улӥсьёсын но пумиськыны кылдӥз. Вераськон олокыӵе но вал. Мынам тодам тужгес но кылиз пенсие потон арлыдаз вуись Михаил Берестовен кенешон. Удмурт воргорон, кылзэ вунэтэм ни ке но, валаны вала ик ай. - Мон али черк котырын ужасько, - шуиз со. - Тани туннэ пу пильылӥсько. Тодӥськоды-а, кулэмелэсь азьло туж потэ вал та чеберлыкез берыктыны. Тулыс колокольня ӝутыны кутском. Кирпич но дасям ни. Черк шоры коть табере умойгес учко. А то мон пичи дыръя кирос нуллэм понна школаысь но улляло вал, ява. Горд тушо воргорон шоры учкыса, сое кылзыса, ачид но амалтэк маке но ӟеч уж борды кыстӥськыны кутскиськод кадь. Сыӵе ик мылкыд кельтӥз дышетӥсь Елизавета Базелева. Со вань улонзэ ортчытӥз школаын. - Инмарлы осконэз кема ар ӵоже выризы адӟемпотостэм карыны, - вера кышномурт. - Мон но ӧй дӥсьтылы мылкыдме усьтылыны, но инмар весяк сюлэмам улӥз. Котьку но ас поннам коть шуылӥ: "Остэ Инмаре, эн кушты монэ..." Гуртоосын пумиськонъёс дыръя ик валаны луиз: берло аръёсы черке пумен тросгес егитъёс кыстӥсько. Умой тодмет, дыр, со. Ъ. Тӥни сыӵе кузь луиз Ягулысь черк сярысь веран. Солэн дауръем историез читыр- чутыр кошкиз ке но, выль вакытэ со шонерскем сюрес вылтӥ выжиз. Таяз даурын коть малпамтэ кожонъёс, улӥе лэзьконъёс медам луэ ни вал. Кин но ма бордысь со потэ? Вылӥысь косэмъя гинэ-а озьы луэ? Оло, асьмемын но, адямиосын, герӟаськемын черклэн азьланьын сюресэз?.. Иван Лебедев. Арлэн дышетӥсез Дышетӥсьёс куспын ӵошатсконъёс асьме республикаын арысь аре ортчыло ни. Дышем сямъя ужрад куинь люкетлы люкиське. Нырысетӥ люкетаз пыриськыны мылкыд карисьёс рефератъёс дасяло. Туэ Дышетӥсьёслэсь тодон-валанзэс будэтонъя институтэ 28 реферат вуиз вал. Но комиссилэн учкемезъя, ӵошатсконлэн кыкетӥ люкетаз 20 дышетӥсь гинэ лэземын вал. Соос куспын ик Ижысь 42 номеро школаын-лицейын кык нунал ӵоже радъяськиз нюръяськон. Отчы туэ пырисько республикамылэн пӧртэм ёросъёсысьтыз дышетӥсьёс, кылсярысь, Кезысь, Сарапулысь, Воткинскысь. Асьсэдыз усто возьмато гурт школаосысь егит дышетӥсьёс но. Ӵошатскон йылпумъяськоз Ижысь "Металлург" культура дворецын 26-тӥ январе. Дышетӥсьёслэн ужрадазы пыриськозы дышетскисьёс но. Палэнэ уз кыле мумы-бубыос но. Т.МИРОНОВА. Студентъёс данъяло святоез Номырзэ уг валаськы, малы 25-тӥ январез кудӥз Татьяналэн нуналыз шуэ, кудӥз - студентъёслэн? А.Вахрушева. Як.-Бодья ёрос. Малы ке шуоно, христиан календарья та нунал Татьяналэн лыдъяське. Инмарлы оскисьёс та святоез - трос курадӟонъёс пыр потэм-чидам нылкышноез туж сӥлы каро. Малы Татьяналэн нуналыз вань, нош Еленаослэн, Елизаветаослэн, Екатеринаослэн... ӧвӧл? Вань, но со сярысь тросэз кыӵе святойлэсь нимзэ нуллӥсь адямиос уг но тодыло. Нош Татьяналэсь нуналзэ данъяны кутскизы студентъёс. Угось ӵап та нуналэ - 12-тӥ (25-тӥ) январе - 1755-тӥ арын императрица Елизавета Москваын университет усьтон сярысь указ поттӥз. Со дырысен та нуналэ студентъёс шулдыръясько, ог-огзэс сессилэн йылпумъяськеменыз ӟечкылало. Зэм, асьсэлэсь праздниксэс пусъё на соос 17-тӥ ноябре. Но таиз нунал - быдэс дуннеысь студентъёслэн праздниксы. Огкылын вераса, сессиысен сессиозь шулдыр уло та студентъёс. З.РЯБИНИНА. ШӦКЫЧ Игорь ТИХОНОВ Визьмо луод - тросгес бӧрдод Басня Гондыр вордӥськем нуналаз Пӧйшуръёсты кот(ы)раз люказ. Сюдӥз-сектаз, нош бератаз Шахмат пулзэ усьтӥӟ-вӧлъяз. Нюръяськыны ӧтиз Кечез. Ӟичы, малпаз, дыр, кескичгес. Нош Кеч соин сыӵе шудӥз - Бӧрсьысь бӧрсьы куинь мат пуктӥз! Гондыр выриз серекъяны Кудӟемез вылэ чӧлскыны. Но малы ке куалекъяса Шуиз: "Шудом эшшо кайта". Но кайтаез ӧз вить ачиз - Ӵуказеяз приказ поттӥз. Штатэз кулэстэмен йырин Кечез кошкыны куремын. Берыктоно, пе, патерзэ, Сотэк фирма туж-туж ёрме. Ма, пересь Лось но туж кынме (Со табере Кечез воштэ). ____________________ Мултэс визьмо луэменыз Кечмы озьы бомже кылиз. Потэ ке шуныт улэмды Эн пуктэ "мат" кузёдылы. Витьтон арессэ пусйиз 24-тӥ январе шаерысьтымы крезьгуръя училищеын ортчиз татысь дышетӥсьлы Рашит Салихович Хисматуллинлы витьтон арес тырмонлы но солэн училищеын ужаны кутскемез дырысен кызь ар тырмонлы сӥзем ӝыт. Р.С.Хисматуллин дышетэ фаготэн но гобоен шудыны. Дышетэм егитъёсыз тодон-валан отӥяз люкало ни консерваториосын. Соос пӧлысь тросэз луо пӧртэм конкурсъёслэн лауреатъёссы. Ачиз Рашит Салихович - комсомоллы куатьтон ар тырмонлы сӥзем конкурслэн лауреатэз. Пусъемын дипломъёсын, данъян грамотаосын. А.Апаева. ДАРТ Юмша! Гужем вӧсяськод ай (студентъёсты ӟечкылан интые) Ну ма, студентъёс, ваньмытскиды-а? Сессилэсь, шуисько. Праздникъёсын тӥледыз пыкылыны сьӧлык. Мар студент со, сесситэм дыръя но политологиез йыръе ке? Вылаз ик, соосты ачиз инмар косэм праздниксэс кык пол пусйыны: 17-тӥ ноябре но 25-тӥ январе. Ну со вӧзы эшшо студентэ пырон, стипендиез миськон, нырысетӥ зачётэз сётон, экзаменэз "провалитьтон", Выль ар, Ымусьтон, экваторе вуон... Но ведь кызьы ке диплом басьтытозь вуоно. Ми дышетскон вакытэ экваторез ортчем муртъёс асьсэлы туж оскисесь луо вал. Ньылетӥ курсъёс табере уз уллялэ ни, дыр, шуылӥзы ке, витетӥос - уз! гинэ. Но мылкыдъя гинэ котьку уг лу. Мар бен каро студентъёс, диплом кызьы ке киязы мед ик вуоз шуыса. 1. Дышетско, дышетско, дышетско (таӵеосыз Горд диплом басьто, но институтысь дэра бӧз кадь кӧдэктыса пото). 2. Атайзылэн кисыез ке зӧк, кузьмасько. 3. Профессоръёсын блатсы ке ӧвӧл, котькыӵе амалэн кылдытыны тыршо. 4. Шпаргалкалы оскисько. 5. Вӧсясько. Берпуметӥез сярысь. Вылӥ верам праздникъёс дыръя студентъёс остэ, инмаре! но шуыны вунэто ке, экзамен азьын Вылысь Кузёлэн нимыз ымысьтызы уг ик пота. Со гинэ ма? Черке мыныса Николай Угодниклы сюсьтыл пукто, молитва лыдӟо. Нош общежитиязы вуыса ӝытбыт сотонаен шудо: кинлэсь ке лулзэ (ӵемгес Пушкинлэсь) ӧтьыса юаллясько: кыӵе билет сюроз, кӧня пол профессор, экзамен мыныку, тамак кыскыны поталоз? (Со куспын кинлэсь ке шпаргалка курыны.) Кӧлон азязы книгазэс миндэр улэ поно но нош вӧсяськыны кутско. Инмар медаз кушты, шуо экзамен-зачёт азьын мисьтӥськыны, дӥськут воштыны. Но али со уйбыртонъёс но, инмар но гужем сессиозь вунэмын. Али - каникулъёс, нош соос бере - праздникъёс, праздникъёс... Мон гочасько тыныд, студент. З.ВАХРУШЕВА. Туспуктэмез К.Семёновлэн. Африкан агаез тодӥсьтэмез ӧвӧл Дэбесын таӵе учыр сярысь веразы: пиосмуртъёс тамак кыскыны кутскиллям но, Африкан Поздеев вӧзысьтызы соку ик кошкем, нош табере соин артэ тамак арато ке, асьсэос, пе, тамак кыскисьёс со дорысь палэнско ни. Угось 70 аресъем ужысь ветеран чик уг гажа тамак кыскисьёсты но, аракы юисьёсты но. Зэм, егит дыръяз со вина но юэм, тамак но кыскем. Но урод сямъёсызлэсь куштӥськыны кужым шедьтэм. Табере котькуд нунал, вазь ӵукна ик султыса, туж капчи дӥсяськыса бызьылыны пота. Мӧйы спортсмен ёросын ортчись вань ӵошатсконъёсы пыриське, ӵемысь вормисьёс радын луэ. Тӥни соин Африкан агаез Дэбес котырын тодӥсьтэмез ӧвӧл. Туспуктэмез С.Катаевлэн. ДАРТ Кизилиозь тубат Одӥг пагӟа, кык пагӟа, куинетӥяз пыд кугӟа Тросэз ӵош дышетскем эшъёсы дышетӥсьын ужало. Соин одӥг-ог пумиськылыкумы трос тунсыкозэ мадё, куддыр серем потэ, куддыр - бӧрдэм. Алигес Людмила маде. - Тодӥськод-а, - шуэ, - туэ дасэтӥ классэз сётӥзы. Сыӵе тунсыко вылэм бадӟымъёсын ужаны. Дас куать аресказы соос бадӟымесь ни, улон-вылон сярысь но вераськыны луэ. Выль ар азьын тани завучмы профориентацияя уж, пе, ну, нырысь-валысь мылкыдзэс юа. Озьы пиналъёсылы кин луон сярысь анкета сётъяй. Тросэз, конечно, бухгалтер, экономист, ужбергатӥсь, банкир гожтӥзы, али дышетӥсь яке врач луон сярысь туж ӧжытэз малпаське ни, созэ ачид но тодӥськод. Но монэ паймытӥз одӥг нылашлэн валэктонэз. Мон, пе, луысал кизили! Вот визьтэм - татчыозь кырӟамзэ но кылылэммы ӧвӧл, табере, пе, кизили луо! - Ма, со, оло, мукет удысын кизили луон сярысь гожтӥз? - Ӧ-ӧз. Мон соин бӧрысь вераськи ук. Спонсор, пе, шедьто но, уксё ваньзэ лэсьтоз. Ольга зэмзэ но туж синмаське артистъёслэн улэм-вылэмзылы. Городлы матын улэ бере, Ижевске ӵем концертъёсы ветлэ. Бен, тунсыкоесь туала егитъёс, асьсэлы туж оскисесь-а шуод. Со бен туж умой сям, мон вожъяськисько сыӵеослы. Мар уродэз, нылашлэн тодмо артист ке луэмез потэ? Котькудӥз нылаш пичи дыръяз синучкон азьын "микрофонэн" берга. Ольгалэн кин луон сярысь малпаськемез гинэ но ушъямон ни, куд-огез школазэ быдтыса но йырзэс кытчы карыны уг валало. Мукет ласянь, кулэ-а сокем оскыны, син сузёнтэм малпан сьӧры уиськыны? Ну шедьтод тон узыр "дядяй", потод вакчи юбкаен сцена вылэ, нёръялод пычкиськыса, нош пумитад - кизер кичабонъёс но одӥг гинэ сяська керттэт (созэ но матысь тодмодэ кузьманы косӥд). Озьы, вазь-а, бер-а, тон ачид валалод, йыромид шуыса. Мар бен кулэ, кизили луон понна? Секыт-а со сюрес? Сыӵе юанъёсын вазиським ми асьме удмурт кизилилы Надежда Уткиналэн но эшшо одӥг кизилилэн - Любовь Быковалэн - продюсерезлы Александр Козыревлы. А.К. Мар кулэ? Туж трос коньдон. З.Р. Ну шуом, шедьто мон коньдон, собере мар каром? А.К. Усто продюсер утчалоды, но уд, дыр, шедьтэ. Асьмелэн соос туж ӧжыт, Удмуртиын шоу-бизнес уг азинскы уго. Вылаз ик, визьмо продюсер ваньзэ уз куты - малы солы дыр но коньдон быдтонэз кырӟаны чик но быгатӥсьтэм муртэн? З.Р. Озьыен, коньдон гинэ ваньзэ уг лэсьты... А.К. Кызьы вералод ай? Бен, мон куд-огезлы озьы ик верасько: юнме кужымдэс эн быдтэ. Но адями туж-туж куре ке аранжировка лэсьтыны, со понна ӟеч коньдон ке ӵектэ, малы лэсьтонтэмез? Вазь-а, бер-а, ачиз ик валалоз, солы мукет сюрес сӥземын шуыса. З.Р. Нялтас вералэ ни соку, кӧня сылэ али одӥг кырӟанлы аранжировка? А.К. Москвае потон понна ке, кык сюрс. Татын гинэ кырӟаны чакламын ке, шӧдскымон дунтэмгес. З.Р. Кытысь егит муртъёслэн сомында коньдонзы? Вожзэс медаз вае Любовь Быкова, Володя Катков, соос но... А.К. Ӧвӧл, ӧвӧл, мар тӥ? Та кырӟасьёсме мон ачим утчай-шедьтӥ. Соку ик валай, таослэсь мар ке но пӧрмоз шуыса. З.Р. Шудпуйыос. А.К. Озьы гинэ шуыны уг луы. Продюсерлы пунэмзэ соос берлогес берыкто, но кырӟасьлы, калыке потытозь, тодмо луытозь, ту-уж трос ужаны кулэ. З.Р. Надежда, нош тон кызьы малпаськод? Н.У. Коньдонтэк, конечно, али туж секыт. Но адямилэн туж бадӟым мылкыдыз ке луиз, со быгатоз малпанзэ быдэстыны. З.Р. Таланттэк но? Н.У. Уз. З.Р. Соку кызьы тӥ валэктысалды туала эстрадаысь "кизили зорез"? Тани Лена Зосимовалэн атаез узыр но - пожалуйста. Али кыӵе ке де...л кадь "Децл" вань. Н.У. Бен, ваньмыз со вань, но кемалы-а? Быгатозы-а соос асьсэдыз яратытыны? Тани Лена Зосимоваез мон кемалась ӧй адӟылы ни. З.Р. Соку таӵе юан: секыт-а талантэн муртлы кизили луыны? Н.У. Асьме дорын гинэ ке - ӧвӧл. Удмурт егитъёслэн али туж трос луонлыксы асьсэды возьматыны. Азьланяз кырӟаны малпаськись мурт кӧкыысен кырӟаны кулэ. Инмарен сётэм быгатонлыкез дуно изэз сямен волятоно, учкись азьын со мед ворекъялоз. Мон тани туж бер сцена вылэ потӥ (25 аресысен), али со сярысь жалясько, нош Таня Ишматова вазь кутскиз. Малпасько, солы капчигес луоз. Тӥни сыӵе мынам ӵектонэ - кырӟано, кырӟано, кырӟано. Пӧрмоно кадь ке, тӥледыз одно синйылтозы, фестивальёсы лэзёзы. Ӵапак отысен куд-огез понна инӧс усьтӥське. Тӥни сыӵе малпанъёс. Кинлэсь ке соос мылкыдзэс куашкатӥзы, дыр, кинлы ке оскон пыӵатӥзы. Конечно, умой луысал, асьме удмурт эстрадамы вылэ кизили зор усьысал ке, но кулэ-а асьмелы бездыт пырыё зор? Эсьма, мед луоз ӧжыт, но яр-яр. З.РЯБИНИНА. Конкурс ялэмын Удмурт Республикаысь Экономикая министерство ӧтё конкурсэ пыриськыны. Кизер эстӥськон, минерал сылалъёс, будосъёсты утись эмъюмъёс басьтыны-вузаны мылкыд карисьёс вазиськыны быгатозы таӵе адресъя: Ижевск город, Пушкин урам, 214 номеро юрт, Правительстволэн юртэз, Экономикая министерство, 78-тӥ, 84-тӥ комнатаос, телефонъёс: 25-00-22, 25-90-55. Возьматыны возьыт ӧвӧл ке Можгаысь пияла поттон "Свет" завод кемалась ни тодмо аслаз ӟеч пияла вузъёсыныз. Табере, акциосын огазеяськон луыса, отысь коллектив уката ӟеч ужаны тырше. Миым со кунамы но дуннеын адӟытонъёсы, конкурсъёсы пыриськылӥз но отысь вормисен бертылӥз. Коллективлы Казаньысь "Юзмыт юонъёс но посуда" адӟытонысь диплом сётэмын. Мексикаысь маркетингъя Национальной институтлэн Генеральной Кенешезлэсь ваизы "2000-тӥ ар понна ӟечлыкъя калык куспо кизилизэ". Выль технологиез уже кутыса, капчитэм бутылкаос поттыны кутскемзы понна, Сибирьын ортчем ярмаркаын сётӥзы Бадӟым зарни медаль но диплом. Можгаысь пияла поттӥсьёс пусъемын на "Сибупак-2000" дипломен но Удмурт Республикаысь Правительстволэн премиеныз. Нош огазеяськонлэн валтӥсь директорез В.А.Мохначев Россиысь устоосыз менеджеръёс пӧлы пыртэмын. П.СКОБЕЛЕВ. ДАРТ Яратэ, уг яраты Вералэ яратэмдэс шара! Ӟечбур, егит эше! Туж шумпотӥськом, тон туэ но милемын шуыса. "Дарт" туэ но тыршоз егитъёслэн улэмзы-вылэмзы сярысь тунсыко материалъёс гожъяны, тӥлесьтыд ужъёстэс печатланы. Нош эшшо тӥлесьтыд конкурсъёсы мыло-кыдо пыриськемдэс лыдэ бсьтыса, ми туэ выльёссэ ӵектом. Тани туннэ ик тӥ быгатӥськоды ни "Яратонэ мынам" конкурсамы пыриськыны. 14-тӥ феврале асьмеос Яратӥсьёслэсь нуналзэс пусйиськом. Соин валче таиз конкурсмы но сӥземын луоз яратонлы, синмаськонлы. Тӥляд туж но туж тунсыко яке сюлэмез бугыртӥсь учырды вань яке синмаськемды сярысь ваньмызлы кылымон верамды потэ? Вералэ ук, усьтэ мылкыддэс. Малпасько, гажан муртты дунъялоз тӥлесьтыд дӥсьтондэс. Ужъёстэс возьмаськом 9-тӥ февралёзь. Вормисьёслы, котьку сямен ик, Егитъёсын ужанъя кун комитет но редакция синпель кузьымъёс дася. Гурт удыс Кынартэм пудо уг бӧксы Кылем арняе гурт удысъя но сиён-юонъя министерство паськытатэм коллегизэ ортчытӥз. Эскеремын огез валтӥсь ужпум: пудоез толйытон. Кенешонэ ӧтемын вал ёросъёсысь гурт управлениослэн кивалтӥсьёссы. Соос сяна, ужрадэ пыриськизы вылӥ кивалтӥсьёс но: Кун Кенешлэн тӧроезлэн воштӥсез П. Вершинин но Правительстволэн тӧроезлэн воштӥсез М. Назаров. Нош гурт удысъя но сиён-юонъя выль министр В. Невоструев понна таӵе кенешон нырысетӥез бадӟым ужрад вал. Пудоез толйытон 240 нунал кыстӥське, куд-ог хозяйствоос понна со огсыр мынэ, нош куд-огез понна - туж курадӟыса. Огъя республикая пудо сиён тырмыт кадь дасямын, пудо йырлы быдэ 19,1 центнер усе (азьвыл арен ӵошатыса, со 30 процентлы тросгес). Но пудо сиёнлэн ӟечлыкеныз ушъяськыны уг луы. Озьы бере со шӧдӥське ини пудолэн тазалыкез, продукцилэн ӟечлыкез но асдуныз вылын. Кылсярысь, кыӵе куроен сюдӥськом меда пудоез?.. Сое тодон понна "Удмуртский" агрохимцентр 15 сюрс тонна куроез эскериз. Со пӧлысь ӝыныезлэсь трос куроез 3-тӥ класс пӧлы пыртоно яке нокыӵе куронъёслы тупасьтэмен лыдъяно. Я, куро урод ке, урод ни, шуом, но уката но умойтэм мукетыз: куд-ог хозяйствоын со воксё но ӧвӧл. Сыӵе учыръёсы загонъёсын сютэм возиськись пудолы кыз вайёсты коть ворттоно, отын каротинэз вань, шуэмын вал кенешонын. Ӝыны тол гинэ ай ортчиз ни, нош 22 хозяйствоын туннэ куро-турынлы ёрмо, 32 хозяйствоын - жалем сиёнъёслы, 132-аз пудоез нокыӵе концентратъёстэк сюдо. Вылаз ик, 12 ёросын зоотехникъёс уг тырмо, озьы ик 12 процентлы кулэсмиз техник-осеменаторъёслэн лыдзы, 22 процентлы - йӧлэз эскеронъя лаборантъёслэн лыдзы. Ваньмыз со шӧдӥське йӧл кыскон вылын. Куинь толэзь ӵоже огъя республикая одӥг скаллэсь, шорлыдын вераса, 520 килограмм йӧл кыскемын нош Кияса ёросын эшшо но ӧжыт - 309 килограмм гинэ. Пудо-сиёнзы тырмыт дасямын Игра, Шаркан, Алнаш ёросъёсын.Трос йӧл кыско Сарапул, Игра, Каракулино ёросъёсын. Туннэ нуналлы тужгес но секыт югдурзы Яр но Кияса ёросъёсын. Татын пудозэс тросэн сӥльлы вандо, кысконо скалъёссэс утён сярысь ӧжыт сюлмасько. Кылсярысь, Яр ёросын "Рассвет" хозяйствоын скалъёссэс 112 йырлы кулэстӥзы, "Новая жизнь" хозяйствоын - 15 процентлы, "Прожекторын" - 19 процентлы. Коллегиын пусъемын вал таӵе тодмет но: кытын ляб сюлмасько гурт хозяйствоосты ӝутон сярысь, отысь егитъёс но пегӟо. Со муген быдэсак ас эрказ лэземын шуыны луоз "Яжбахтинский" хозяйство. Татын та дыре кивалтӥсьсы но ӧвӧл. Та ласянь чурыт куронъёс пуктэмын вал Яр ёрослэн администрациеныз кивалтӥсьлы А. Трефиловлы. Нош Кияса ёрослэн администрациеныз кивалтӥсьлы Н. Вдовинлы дэмламын меӵак ужрадъёс кутыны пудо толйытонэз радъянъя. Татын пудо сиён котькинлэсь но урод дасямын. Ёросын парсь вордонлэсь куштӥськемын ӧвӧл ке но, солэн пайдаез уг шӧдӥськы. Ыж вордонэн тросэз ёросъёс уг ни выро. Нош кытын соос вань на, бадӟым саклык уг висъяськы. Тани Яр ёросысь "Зотовское" хозяйствоын ӟеч романовской выжы уськытэмын вал. Но пудоез возьыны кынарзы ӧвӧлэн, лэся, гурт кивалтӥсьёс ыжъёссэс "Прогресс" колхозлы сётӥллям. Мискинь ыжъёс татын но кулэтэм луиллям кадь - соосты сютэм но утялтытэк возе. Котькуд ёросын ужа гурт удысъя управлениос. Но соослэн кивалтӥсьёссы специалистъёсын шер пумиськыло, соослэсь кылзэс уг юало. Управлениосын кивалтӥсьёслы ӵемгес гуртъёсы потано, ӵектӥз министр В. Невоструев. Соку, пе, оло, соослэн но данзы вылӥынгес луоз. Гурт удысъёс управлениослы косэмын: - туэ 1-тӥ февралёзь пудоез толйытонъя йылпумъянъёс лэсьтыны; - пудо сиёнэз ӟечлыко но тырмыт дасян понна, золгес кылзэс юано агрономъёслэсь; - пудо вордон удысэ специалистъёсты кыскон понна нимысьтыз ужрадъёс кутоно. Сыӵе постановление кутыса, коллегилэн кенешез йылпумъяськиз. Ужрадын тросгес дыр висъямын вал уй пал хозяйствоослэн пудо толйытонзылы. Татысь кивалтӥсьёсты гуртысь специалистъёсын ляб ужамзы понна трос гинэ курлазы. Но коллегилэн решениосаз соослэсь нимъёссэс ӧз пыртэ. Жалязы, лэся. Коллегиын кутэм решениослэсь быдэсъяськемзэс чакланы оскемын министрлэн воштӥсезлы В. Наговицынлы. Т. Банникова. КОНЬДОН УЖПУМЪЁС Вытъёсты исьнерен уд люка 2001-тӥ арын 1-тӥ январьысен улонэ пыӵатӥське Налогъя кодекслэн кыкетӥ люкетэз. Сое кылдытӥсьёслэн чалкамзыя, выт бичанын воштӥськонъёс Россилэсь бюджетсэ, пе, юнматыны кулэ. Но котькыӵе реформаос кинлы ке пайда ваё, нош кинэ ке - обидё. Сыӵе малпанэ вуиськод, РФ-ысь Вытъя службалэн Удмурт Республикая управлениысьтыз специалистъёсты кылзыса но. Та дыре соослы секыт йӧтэ, Налогъя кодекслэсь выль ёзэтъёссэ экономистъёслы валэктон вылысь, соослы трос дышетсконъёс ортчытъяно луэ. Начармозы яке узырмозы-а ёросъёслэн бюджетъёссы? Жилищной фондэз но социально-культурной объектъёсты возем понна, налог табере уз басьтӥськы. Кызьы тодмо, та удысъёсысь бюджетэ уката но трос коньдон лыктэ вал. Кӧня ке дыр ортчыса воштэмын луоз вузкаронъя налог (налог с продаж.) Ёрос бюджетъёслэсь ыштонъёссэс берыктон понна, отчы табере кошкоз предприятиослэн но организациослэн прибыльысьтызы басьтэм налог пыроз. Солэсь быдӟалазэ тупатэ ас коже кивалтон ёз. Прибыльлы тупатэм налог 5 процентлэсь вылӥын луыны уг быгаты. Специалистъёслэн лыдъямзыя, прибыльысь басьтэм налог бюджетъёсты уз тупаты, пе. Зэмзэ ик, кызьы улоно ёрослы, кытын, кылсярысь, ӧвӧл бадӟым но усто ужась предприятиос. Вузкаронъя налог сярысь ке верано, Россилэн тросаз улосъёсын со кутэмын вал, социальной удыслы коньдонэн юрттон понна. Но быдэс Россия али бадӟым базарлы пӧрмытэмын ни бере, нырысь ик со налоглы вузкарисьёс (ужбергатӥсьёс) пумитъяськыны кутскизы. Озьыен, вузкаронъя налоглэн пайдаез ӧй вал бере, Налогъя кодексын со куштэмын. Ёрос бюджетэ кылё на таӵе налогъёс: музъемлы, адямиослэн ваньбурзылы, рекламалы но лицензиослы. Музъемлы налог учкемын 0,1-2 процентозь (тупатэ ас коже кивалтон ёз). Куд-ог налогъёсъя, кылсярысь, валютаен герӟаськем ужъёсъя федеральной законын меӵак ӧвӧл верамын, соос ёрос бюджетэ кыльыны кулэ шуыса. Сыӵе налогъёсъя ужпумез Россия Федерация, пе, эскере. Огъя верано ке, специалистъёслэн лыдъямзыя, Налогъя кодексын чаклам воштӥськонъёс ёросъёслэсь бюджетъёссэс 8-12 процентозь кулэстоз. Уждун кулэсмоз 13 процентлы? Кема аръёс ӵоже асьме уждунысь 1 процентэз басьтӥське вал подоходной налог шуонэ. Со налог люкаськылэ вал бюджетэ пырисьтэм фондъёсы: Пенсиосъя, Страхованиея но Уже интыянъя кун фондэ. Табере подоходной налог быдтэмын. Со интые чакламын выль налог - физической лицоослэн доходъёссылы налог. Нош кызьы тодоно котькуд адямилэсь доходъёссэ? Сое тодон вылысь тупатэмын огъя социальной налог (ЕСН). Солэн быдӟалаез тазьы учкемын: 13 процентэз налог басьтӥськоз уждунысь, 30 процентэз - дивидендъёсысь но иностранной гражданъёслэсь валютая тыронъёссылэсь, 35 процентэз - рекламаысь, утонъёсысь, призъёсысь (солэн быдӟалаез 2000 манетлэсь трос ке луиз), кредитъёсысь но мукет кыӵе ке пайда басьтэмысь. ЕСН кошкоз бюджетэ пырисьтэм фондъёсы, Уже интыянъя кун фондэз вератэк (туэ 1-тӥ январьысен солэн ужез дугдытэмын). Выль налог малпамын, гражданъёслэсь медициная страхованилы, пенсиослы правозэс умойгес быдэстон понна. Кызьы бен лыдъяськоз налог адямилэн уждунысьтыз? Шуом, кинлэн ке уждуныз 1000 манет, нырысь учкемъя, отысь налоге кошкыны кулэ кадь 130 манет, но выль налогъя уно льготаос но экономистъёслэн кылзыя "стандартной вычетъёс" чакламын. "Вычет" шуонъёс, кылсярысь, тупатэмын ачиз ужась мурт понна (400 манет), дышетскись нылпиез понна (300 манет), огназы улӥсь кышномуртъёс но воргоронъёс понна но мукет. Соин ик 1000 манет быдӟа уждунысь куштӥм ке 700 манет (ужасьлэн одӥг гинэ ке быдэ вуымтэ нылпиез), уждунысь лэсьтэм "вычетъёс" бере кылёз 300 манет. Озьыен, 300 манет вылысь гинэ 13 процент налог басьтӥськоз. Выль вуэм кодексъя нокыӵе налог уз басьтӥськы: - пособиосысь, стипендиосысь но компесациосысь; - спортсменъёслэн сиськемысьтызы; - ужысь кошкемъёслэсь (уволить каремъёслэсь); - алимент тырисьёслэсь; - доноръёслэсь; - кун но международной премиос басьтэмъёслэсь; - материальной юрттэт сётэмысь (солэн быдӟалаез ичи уждунлэсь 12 поллы трос ӧвӧл ке); - тазалыкез юнматыны чаклам путёвкаосысь; - сад-бакчаын яке ас хозяйствоын будэтэм продукцилы (адямилэн со сярысь справкаез ке вань); - сирота нылпиез (24 аресозь) дунын дышетэмысь; - кузьымъёс, призъёс басьтэмысь (соослэн котькуд дунзы 2000 манетлэсь вылӥын ӧвӧл ке). Озьы ик налогъёслэсь мозмытэм организациос, кытын ужало И, ИИ, ИИИ группаен инвалидъёс, инвалидъёслэн огазеяськонъёссы, наукая, спортъя, культурая, дышетсконъя, тазалыкез юнматонъя организациос. Валамон, одӥг статьяын гинэ Налогъя кодексэ пыртэм воштонъёс сярысь уд гожты, ваньзэ пыр-поч тодон понна, специалистъёслы вазиськоно. Ватсам дунлы выт 1998-тӥ арын 1-тӥ апрелёзь НДС-лэн 75 процентэз федеральной бюджетэ кошкылӥз. Нош 1999-тӥ�2000-тӥ аръёсы НДС тазьы люкиськиз: Россилэн бюджетаз 85 процент, улосъёслэназ - 15 процент. 2001-тӥ арын НДС-эз быдэсак федеральной бюджетэ висъяны чакламын. Озьы ке но, законъёс бордын ужасьёс соин соглаш уг карисько: Россилэсь но улосъёслэсь НДС-эн герӟаськем кусыпъёссэс законъя радъяны куро. Налогъя кодекслэн кыкетӥ люкетаз НДС-лэн быдӟалаез 20 процент тупатэмын. Отын ик пусъемын куд-ог сиёнъёс но нылпи вузъёс, кудъёсызлы ичи НДС (10 процент) учкемын. НДС тырисьёс пӧлы пыртэмын ужбергатӥсьёс, соослэн поттэм брышсы 1 миллион манетлэсь трос ке. Специалистъёслэн верамзыя, таиз курон, пе, нокыӵе мукет кунъёсын уже уг кутӥськы. Тӥни сыӵе воштӥськонъёс ортчытыны чакламын матысь аръёсы вытъёс бичан удысын. Но кӧня вытъёс, сомында ик, пе, амалъёс, сюро кескич адямиослы соосты тыронтэм вылысь. Ярам коть вытъёслэсь пегасьёслы чурытэсь законъёс учкымтэ. Нош тодэ ваёно ке историез, Пётр И эксэй дыръя сыӵе адямиосыз исьнерен но, пе, жугылӥзы, кезьыт гуэ но пытсаллязы. Асьме калыклы сыӵе амалъёс, вылды, уз ни юрттэ. Ужано, барыш поттоно, астэ но кунэз узырмытоно... Татьяна БАННИКОВА. Чагыр эстӥськон зӥбыт адямиосты яратэ Уж - семья, семья - уж - тросэзлы адямиослы ог-огенызы герӟантэм дунъетъёс. Тӥни со радъя ик мынэ "Глазовгаз" ОАО-ысь слесарьлэн Иван Николаевич Вершининлэн улонэз но. Ужез яратӥсь, востэм, зӥбыт, лякыт сямо шуизы со сярысь ӵош ужась эшъёсыз. Сыӵе сямо ик луыны кулэ, дыр, газэн оборудованиез чаклась муртлы. Ваньмыз валазы ини: газ - со туж чылкыт эстӥськон, соин ик вань предприятиос пумен со вылэ выжо ини. Но та чагыр эстӥськон адямиослы бадӟым кышкытлык но вайыны быгатэ. Газэн гумыосты, резервуаръёсты чаклатэк аналтӥд ке - пуштозы. Соин ик та уже осконтэм адямиосыз уг куто. Иван Николаевич оскем ужзэ витетӥ арзэ быдэсъя ини. Дышетскытэк но ӧйлась, та ужез валаны-тодыны шуыса, Ижевске дышетскыны ысъязы. Воргоронлэсь сюлмысь тыршемзэ адӟо, синйылто. Та удысын тыршисьёслэн нуналзы азьын солы арысь аре тау карон кылъёс верало. Т.БАННИКОВА. Туспуктэмез В.Беломорскихлэн. Нянь но, узы-боры но Воткинск ёросысь "Чайковский" акционер огазеяськон шаерысьтымы одӥгез азьмынӥсь хозяйство луэ. Миым но ужъёссы умой мынӥзы, кылсярысь, тол чабейзы гектарлы быдэ 25 центнер усиз, "московский" йыды быдэн 22 центнерен басьтэмын. "Невский" пумо картофка гектарысьтыз 135 центнер копамын кушманъёс - 200 центнер. Удалтӥз кизем турынзы но. Нош кукурузазы люкаськиз быдэн 380 (!) центнерен. Озьыен, пудо толйытон но лякытэн ортче. Хозяйствоез быдэс республикаямы тодо емыш будэтэмезъя но. Миым, 1999-тӥ арен ӵошатыса, узы-боры но уногес бичамын вал - 131 тонна. Нош сад-бакча возисьёслы писпуос вузамын 63 сюрс манетлы, узылэн мыйыкъёсыз - 30 сюрс манетлы. Туэ татын чаклало ю шертон-куасьтон выль итым ӝутыны, садлы но узы-борылы интыоссэс паськытатыны, мукет культураос сярысь уногес тол чабей кизьыны. Н. Семенов. ДАРТ КЫТЫН? КУ? МА? Ми лэсьтӥськом выжыкыл! Шуо "Шундыберган" ("Солнцеворот") огазеяськонэ ветлӥсь нылпиос. Соос уго асьсэос малпало кылбур но, верос но, крезьгур но, быдэс спектакль но! Республикаысьтымы Егитъёсын ужанъя кун комитетлэн юрттэмез улсын Ижевскын та огазеяськон 1996-тӥ арысен ужа ни. Озьыен, туэ соос юбиляръёс! Соин валче январь толэзе "Дзержинец" культурая центрын нылпи театръёслэн фестивальзы ортчиз. Отчы люкаськылӥзы Ижевскысь, Воткинскысь, Глазовысь, Завьялысь, Пичи Пургалась но Кезысь покчи артистъёс. Котькуд коллектив возьматӥз аслэсьтыз спектакльзэ, нош дунъяз соосты Москваысь критик Валерий Бегунов. Огазеяськонэ ветлӥсьёслэн вань асьсэлэн "Нылпи планетазы". Отын асьсэды шедьто пинал гожъяськисьёс но. Ужало "Аслам куарае", "Мон гожтӥсько книга", "Нылпи" галерея программаос. Ижевскысь "Акцент" издательство пинал авторъёслэсь дас куинь книгазэс поттӥз ни. (Издательстволэн директорез Т.С.Невская.) Тол Бабай, ау! Эн куректэ, нылъёс-пиос - праздник азьланьтӥське ай! Зэмосэз Тол Бабай, конечно, аслаз Лапландияз кошкиз ни, маин уродэсь удмуртъёсыз? Соосты тӥ адӟыны быгатоды на 31-тӥ январе но. 6 часын ӝыт Ижевскысь "Редуктор" культура юртын соос асьсэ удыссылэсь нуналзэ пусъёзы. Вот луозы на-а со дырозь бадӟым пуйыосазы кузьымъёссы, вераны ум быгатӥське. Вай, эше, бур кидэ! Шулдыр уло Кизнерысь егитъёс. Али гинэ Выль арез пусйизы, табере соослы нош маке кулэ. Ма, районысьтызы егитъёсын ужам отделысь специалистъёс Ираида Акачева но Юрий Краснов тэк пукыны уг сёто уго. Озьы соос алигес вань гурт администрациос пӧлын КВН ялӥзы. Вормисьёс тулыс районысь сцена вылын нюръяськозы. Нош кылем арын ортчытъям ужрадъёссэс егитъёс али но уг вунэто. Кемалы тодазы кылизы Удмурт шаерлы 80 ар тырмонэзлы сӥзем брейн-ринг. Отчы пыриськизы пӧртэм удысъёсын тыршись егитъёс: дышетӥсьёс но эмчиос, вузкарисьёс но посёлокысь рабочийёс. Ялан син азязы возьыны тыршо татын быдэ вуымтэосты. Соос понна нимысьтыз ужрадъёс ортчыло. Огкыл шедьтӥзы "шугъёсыныз" но - соос борды юнматӥзы общественной воспитатель. Озьы дунтэк, асьсэос мылкыд каремъя, быдэ вуымтэослы бадӟым эш кариськизы РОВД-ын ужасьёс, дышетӥсьёс. Но йӧнтэм пиналъёс дышетэмлы пумит эшшо золгес уродъясько, соин ик воспитательёс, индылон сётъятэк, соослы тунсыко уж ӵекто, быгатонлыкъёссэс шараяны юртто, ӵош огшоры улон-вылон сярысь мадисько. Ура! Киникулъёс! Татьяналэсь нуналзэ пусъён берло аръёсы асьме шаерын но сяме пыӵаз ни. Студентъёс понна со кык полэс праздник - та нуналэз соос, 17-тӥ ноябрез сямен ик, асьсэлэн праздникенызы йылпумъяло. Но тужгес шумпото соос 25-тӥ январёзь институтъёсын - сессиослэн йылпумъяськемзылы. Туэ но 25-тӥ январе Ижевскысь "Металлург" культура дворецын егитъёс понна Татьяналэн нуналэзлы сӥзем праздник ортчоз. Кӧня сылэ визь? 1994-тӥ арысен ини Ижевскын ужа "Ижевскысь нылпиос" программа. Нимысьтыз саклык висъямын отын визьмо нылпиослы. Соя дас тужгес но визьмоосызлы (Россиын ортчылӥсь олимпиадаосын вормисьёслы) араз быдэн сюрс манет стипендия висъяське. Трос уд шуы, но дунъямзы дуно. Умой луысал, шаерысьтымы районъёсын но асьсэлэсь "визьпогъёссэс" тазьы пусйылысалзы ке. АРХИВЫСЬ МАТЕРИАЛЪЁСЪЯ Удмуртия ХХ дауре 1972-тӥ ар СССР дунне вылын ужзэ муромытӥз но пайдаё азинтӥз. Май толэзе Москвае вуылӥз США- лэн президентэз. Огкыл шедьтэмын вал ож тӥрлыкез ичиенгес поттон ласянь, огкылэз нимазы ОСВ-1 шуыса. Соя подлодкаосысь ракетаосты кулэстыны чакламын вал. Та югдур возьматӥз ни, США СССР-ез быдӟым кунэн лыдъя шуыса. Со бордысь потэ вал Удмуртилэн но азьлань улонэз. Укмысэтӥ пятилеткаын шӧдскымон азинскиз энергетика. Июне Енисей вылын Красноярск ГЭС ужаны ӧдъяз. Удмуртие но тырмыт электрокужым висъяськиз. Азьланьскизы космосын ужъёс. Феврале "Луна-2" станция толэзьысь сюез басьтӥз, нош "Венера-8" станция Венера планета вылэ пуксиз. Июле КПСС-лэн ЦК-ез но СССР-ысь Министръёслэн Кенешсы вань егитъёслы шор ёзо тодон-валан сётон сярысь постановление кутӥзы. Соин валче Удмуртиын выль школаос пуктылыны кутскизы. Январе Ижевскын пединститут интые усьтэмын Удмурт кун университет. Со понна ватсаса выль юрт пуктэмын но эшшо огез висъямын вал на. Дышетскон кутскиз 1-тӥ сентябре. Университет, школаослы дышетӥсьёсты сяна, дасяны кутскиз техникумъёслы но вузъёслы дышетӥсьёсты, научной ужасьёсты но калык хозяйствоысь пӧртэм специалистъёсты. Январе автозаводлэн конвейерысьтыз васькиз 150 сюрсэтӥез "Москвич". Отысь конструкторъёс дасяллям на "Иж-2126" выль маркаен машина, нырысез со потӥз 1974-тӥ арын. Нош Сарапул электрогенераторной завод поттӥз 100 сюрсэтӥзэ электрохар. 70-тӥ аръёсы кунгож сьӧрысь но трос оборудование басьязы. 4-тӥ апреле Ижевскысь автозаводэ вуизы французъёс. Соос "Рено" компанизылэсь трос оборудованизэ ваизы но пуктӥзы, озьы асьмелэсь машинаосмес ӟечгес поттыны юрттӥзы. Синмаськымон ужаны ӧдъязы Ижевскысь пыӵал поттӥсьёс. Соослэн пӧйшурасьёслы "Барс" карабинзылы сётэмын вал ӟечлыкъя пус. Выль вуз тросэн келямын кунгож сьӧры. Калыклы туж кельшиз Глазовысь мебель поттонъя фабрикаын поттыны кутскем стенкаос. Бере ӧз кыле нефть кыскисьёс но. Гольяны посёлок вӧзын портэмын вал самой мурез скважина - 4750 метр. Гурт удысын кутскизы ӟеч выжы пудо уськытыны, со понна кылдытэмын совхозъёслэн нимысьтыз трестсы. Озьы хозяйствоосын скалъёслэн лыдзы кӧнялы ке йылӥз. Но бусы ужъёс шуген сётскизы. Ю-нянь удалтымтэен, данаказ колхозъёсын котькуд гектарысь 7 центнер сяра тысь ӧз люкалэ. Элькунамы ӟеч мынӥз лэсьтӥськон. 20-тӥ январе ӧсъёссэ усьтӥз "Ижевск" универмаг. Солэн вузкарон интыез 5000 квадрат метр вал. 4-тӥ ноябре Сарапулын ужаны кутскиз 600 интыен "Октябрь" кинотеатр. Глазовын вуттӥзы 105 интыем нылпи юрт. Нош удмуртъёслэн Россия борды герӟаськемзы дырысен 400 ар тырмонлы сӥзьыса, Иж тымет дурын ӝутскиз паймымон монумент. 15-тӥ июне Уваын усьтӥськиз удмурт писательлы Пётр Блиновлы памятник. Декабре Удмуртия басьтӥз аслэсьтыз куинетӥ ордензэ - Калыкъёслэн эшъяськонзы орден. Ижевскысь андан ӵыжатӥсь заводлы но Удмурт кун университетлы сётэмын СССР-лы 50 ар ним. Удмурт писатель Геннадий Красильников 1972-тӥ ар понна УАССР-ысь Кун премилэн лауреатэз луиз. Пӧртэм авторъёс поттӥзы "Природа Удмуртии" книга. Феврале Япониысь Санноро городын ортчиз Х тол олимпиада. Отын куасэн бызьылӥсёс пӧлын вормисе потӥз Галина Кулакова. Та вакытэ СССР-ын кужмоез диссидент движение кошкыны кутскизы. Сыӵеосты суд улэ кыскылӥзы. Писательлы В.Буковскийлы сётэмын кык ар тырмыны, вить ар лагерьын но вить ар ссылкаын пукон дыр Дуннеысь психиатръёслэн конгрессылы СССР-ын психиатриез политика уже утэм сярысь материалъёс сётэмез понна. Н.МЕЛЬНИЦЫНА, Удмурт Республикаысь ЦДНИ-лэн директорезлэн воштӥсез. Удмурт кылбурчи Даниил Яшин литературно-творческой кружоказ студентъёсын выль книгаез эскере. Нош ик быръён Кун Кенешамы кык инты бушаз. Мугез тодмо. Александр Волков президент луиз, Наталья Харина (со вал асьме парламентлэн кивалтӥсезлэн воштӥсез, нош вазен калыклэсь тазалыксэ утён удысын тыршиз) юнматэмын Правительстволэн Тӧроезлы социальной ужпумъёсъя воштӥсе. Соин ик 18-тӥ мартэ та округъёсъя выль депутат быръём. Глазовысь Левобережной округъя кандидат луыны дась луэмез сярысь ивортӥз ни Чепца механической заводлэн валтӥсь директорез Владимир Рождественский. Солэсь азьло та интыын ужаз Николай Ганза, нош таиз воштӥз вал туала директорлэсь атайзэ - Владимир Рождественскиез. Кин дӥсьтоз на меда егит кивалтӥсен кужымзэ мертаны? Дыр вань на, сыӵеос шедёзы, вылды. Чехов округъя (таяз пыро Ижысь Буммаш микрорайонын улӥсьёс) мандат понна нюръяськыны малпало 69-тӥ школалэн директорез Любовь Зайцева но нылпи поликлиникалэн кивалтӥсез Татьяна Брызгалова. Кыкетӥезлэн нимыз калык пӧлын тодмо. Со уго быръемын шоркарысьтымы Думае. Отын кивалтэ социальной ужпумъёсъя комиссиен. Луозы на, вылды, мукет но кандидатъёс. Нош ми "Удмурт дуннеын" ужасьёс, ивортӥськом соослы, ӝуткась материалъёссэс печатланы дась шуыса. И. Лебедев. ДАРТ Гурт луиз мурт "Дышетсконме быдтыса, гуртэ бертэме уг поты, юрттэ вал тодматскыны городысь улон интылы ёрмисьтэм пияшен", - газетысь "Тодматскон сэреге" сыӵе куронэн вазиськиз Ижевскысь одӥгаз вузын дышетскись нылмурт. Уг тодӥськы, шедьтӥз ик-а со аслыз городысь кузпал. Шедьтӥз ке но бен, та одӥг учырен гинэ туннэ нуналлы кылдэм югдур уз тупатскы. Караул! шуыны, оло, кулэез ӧвӧл, но кӧня ке аръёс ортчыса, гурт уз кыль меда вайёстэм писпулы? Котьмар кар, но город улонэз шӧмъям егитъёслэн уг пот берытскемзы куанермись гуртъёсазы. - Улон интые ӧвӧл, ужлы ёрмиськод, малы уд бертӥськы дор палъёсад? - юасько одӥгезлэсь тодмоелэсь. - А мар отын умоез вань? Клубмы йӧназ уг ужа, гурт калык уждунэз аръёсын уг адӟылы. Пиос юон вылэ чӧлскемын. Гуртэ бертытозь, базаре вузкарыны пото, - вазиз со пумитам. Гуртысь егитъёсты но, уката ик школаын дышетскисьёсты, город ас бордаз кыске, но дораз лэземез туж ик уг поты - коньдонтэмъёссэ. Дышетскыны малпад, кыӵе ке специальность кулэ - анай-атайёслэн кисыоссы шоры учкытэк уг луы. Юан кылдэ, кин соку ӝутыны кулэ куашкан калэ вуэм гурт хозяйствоез? Та ужпум сюлэмшугъяськытэ республикаысьтымы Егитъёсын ужанъя кун комитетэз но. Берлояз коллегиын вераськон ӝутскиз гуртысь егитъёсын ужанэз умоятон пумысен. Али котькуд ёрос администрациосын кылдытэмын егитъёсын ужанъя отделъёс, соослы юртто на гурт администрациосысь егитъёсын ужась уполномоченнойёс - быдэс республикамыя соос 260 мурт лыдъясько. Но со тырмыт ӧвӧл. Гуртын улӥсь егитъёслэсь ужпумъёссэс быдэстон борды басьтӥськыны кулэ вань кивалтон ёзъёс, министерствоос но ведомствоос. Республикаысьтымы Егитъёсын ужанъя кун комитет кылем арын октябре ортчытӥз шаерысьтымы 14 арескысен 30 арескозь егитъёслэн улон-вылонзы пумысен социологической эскеронъёс. Кыӵе бен огъя суред пуксе гуртын улӥсь егитъёсъя? Республикаямы ваньмыз 1 миллион 632 сюрс 631 мурт лыдъяське ке, со пӧлысь 497792- ез - гуртын улӥсьёс. Нош егитъёслэн огъя лыдзы республикамыя 434079, гуртын улӥсьёсыз - 121477 мурт. Озьыен, гуртын улӥсьёс 24 процентэз пала - егитъёс. Юалляськемъёс пӧлысь 40-70 процентсэ шугъяськытэ коньдон ласянь кылдэм югдур, 8-20 процентэзлэн гинэ басьтэм уждунзы тырме улыны. Та бордысь ик егитъёслэн шуг- секытъёссы кылдо дышетсконзэс азьланьтонын. Нылъёс но пиос ӧжыт саклык висъяло тазалыксэс юнматонлы. Тросэз дырзэс юнме, нокыӵе пайдатэк быдто, вина юо, тамак кыско. Бадӟым классъёсын дышетскисьёс азьланьтысалзы тодон-валан басьтонзэс, но шуг-секытъёс кылдо коньдон ласянь. Тросэз егитъёс ужаны мылкыд каро тазалыкез утён, дышетон но культура удысъёсын, 6 процентэз гинэ специальность басьтысалзы гурт хозяйство удысъя. 30-40 процентэз 18-20 аресъем егитъёс пыраклы люкиськысалзы гурт улонэн. Школаын дышетскись пиналъёсты тросгес сюлмаськытэ ке дышетсконзэс азьланьтон, арлыдоосызгес егитъёс улон югдурзэс умоятысалзы: соос ёрмо ужан интылы, коньдонлы, улон интылы, сюлмаськытэ нылпиоссэс дышетон. Гуртын улӥсь егитъёслэсь улон-вылонзэс котыр ласянь эскерон борды басьтӥськыса, Егитъёсын ужанъя кун комитет ас азяз ужпум пуктэ: республикаысьтымы пӧртэм министерствоосын но ведомствоосын огкылэ вуыса, азьланезлы быдэстоно ужрадъёс пусйыны. Шуом, Гурт хозяйствоя министерство дышетсконзэс быдтэм егит специалистъёсты синйылтыса возе ке но, туннэ нуналлы со тырмыт ӧвӧл. Гуртэз ӝутыны басьтӥськоно огъя кужымен. Городын улӥсь огшоры адями но туннэ вала ни: гурт калыклэн улонэз умояз ке, ӝӧк вылын но бусьтыр луоз. Но ку вуоз со дыр? Егитъёсты оскытонъёсын гинэ уд сюды ни. Университетэз йылпумъясь студентлы шуид ке, туннэ гуртад берт ужаны, нош ӵуказе улон умоялоз - уз оскы. Гуртысь егитъёс дор палазы берытскозы, соос сярысь зэмос сюлмаськон но юрттэт луиз ке. Со понна кулэ нимысьтыз программа. "Егитъёсын ужанъя кун комитетэн дасямын ни "Удуртиысь егитъёс 2001-тӥ�2005-тӥ аръёсы" программа. Гуртысь егитъёслы отын бадӟым саклык висъямын. Но программаез эскерыны кулэ на Удмурт Республикаысь Кун Кенеш, Президент. Пӧртэм муртъёсъя та уж кемагес ӝега ни. Л.МАЛЫХ. Дарт Яратэ, уг яраты... Яратонзы медам лу палдурес Котькудӥз яратӥсь ныл но пи куспын соослы гинэ тупась сям кылдэ. Тани одӥг эше яратонэныз керетытэк улыны, пе, уг быгатӥськы. Мукетъёсыз нош одӥг но урод кыл вератэк, ог-огзылы пыриськыса гинэ уло. Нош куинетӥосыз ярато ке но, мылкыдзэс усьтыны уг дырто, ог-огзылэсь чиданзэс эскеро. Огкылын вераса, котькудӥз ас сяменыз яратэ. Мон чакламъя, яратӥсьёс вискын вить пумо кусыпъёс луыны быгато. 1. Яратон - ог-огедлы юрттон. Тодады вае Билл Клинтонэз но солэсь кышнозэ. Соос вискын - ӵапак таӵе кусып. Ог-огзылы семья улонын гинэ ӧвӧл, политикаын но юртто. Таӵе кузпалъёс ог-огзэс валаса уло, соин ик улонын но бадӟым вормонъёс басьтыны быгато. 2. Яратон - творчество. Нылмурт яке пиосмурт яратонзылы ватэм быгатонлыкъёссэс усьтыны юртто. Ӵем дыръя таӵе кусыпъёс тупатӥсько трослы бадӟымгес пиосмурт (дышетӥсь) но егит нылаш (дышетскись) вискын. Таӵе кусып кемалы уг чида. Дышетскись дышетӥсезлэсь люкиськыны дыртэ. 3. Яратон - пумитъяськон. Яратӥсьёс ог-огенызы ӵош луыны уг быгато вань ӵыжы-выжыоссы, пумитъяськемен. Нылаш яке пияш куанер луэмысь. Кылсярысь, "Титаникысь" Джек но Роуз. Ваньзы пумит соослэн кусыпъёссылы, егитъёс солы уг сётӥсько. 4. Яратон - керетонъёс. Ныл но пи ялан керето, ваменъясько, куатасько, но туж чаль тупало. Ӵуказеяз нош керето ни... Кылсярысь, Скарлетт О Хара но Рет Батлер (М. Митчелл "Унесённые ветром") огзэс огзы отын ик ярато, отын ик адӟемпотостэм каро. Зэмос яратэмзэс люкиськем беразы гинэ валало. Собере ӵош луо - выльысь керетонъёс, нош ик люкиськон сярысь ченгешонъёс пото. 5. Палдурес яратон. Ой, кыӵе ӵем пумиськылэ со! Нылаш яратэ, пи сое - уг, яке пи яратэ, ныл - уг. Таӵе кусыпъёс кема уг возисько, но куд-огез пересьмытозязы озьы ик уло. Е. Никитина, Удмурт университетын дышетскись. Кысык удыс Уя, уя, ӟазеге Песятайёсмы но песянайёсмы вашкала дырысен улон инты лэсьтылӥзы шуръёс но ошмесъёс котыре. Тӥни соин ик чик паймонэз ӧвӧл, вань гуртъёсмы ву дуре пуксьылэмын шуыса. Вазен котькуд гуртлэн вал аслаз вукоез яке тыметэз. Адями угось вутэк улыны, пудо но тылобурдо вордыны уг быгаты. Адямилы нуналлы быдэ ву кулэ юыны, сиён пӧраны но мукетызлы. Удмуртъёс кемалась дырысен ӟазег вордо. Малы? Солэн ческыт сӥлез, нош тылыез- мамыкез валес котыр лэсьтыны мынэ. Вылаз ик, со трос сиён уг быдты, - ожо- турынэн, тыметын кӧтсэ тыре. Тӥни соин ик, вылды, котькуд сӥзьыл гуртъёсмес шулдырто ӟазег уллёос, соослэн ӵаж! гинэ кесяськем куараоссы. Ӟазег вордон - со выль удыс ӧвӧл. Та удысэн вырись эштосъёс ноку изъян уг адӟо. Но шаерамы малы ке та удыс ляб азинске, гурт хозяйствоослэн ӟазег вордэмзы уг поты? Мынам тодэмея, Ува районысь21 партсъезд нимо гурт хозяйство далай гинэ ӟазег вордэ, Кочур гурт дорын нимаз ферма усьтэмын. Асьсэос ик дышетскизы мамыкен тырем шуныт дӥсь (пуховикъёс) вурыны, миндэр но музонзэ лэсьтыны. Зэм, котькыӵе удыслэн но ужлэн вань аслаз шуг-секытэз но сюбег интыосыз. Но шаерамы тылобурдо вордыны умоесь условиосмы вань, котькуд гуртэз сямен шулдыртэ аслаз чебер прудэз яке шурез. Нош ӟазег будэтон - со ватсаса сӥль будэтон но экономикаез юнматон. Туннэ бен рос-прос мадём уй пал городысь "Глазовская" птицефабрикалэн ӟазег будэтэмез сярысь. Жаляса верано луэ, элькунысьтымы 7 тылобурдо вордӥсь фабрикаос пӧлысь одӥгез гинэ ӟазег вордэ. Кызьы но ку бен со татын вордскиз? Кемалась, шуыны луоз. 1977-тӥ арын фабрика Пенза улосысь ӟазегъёс басьтӥз. Со луиз выль удыслэн усьтӥськемез. Табере, котькуд вить ар ортчыса, мумы ӟазегъёс ваё, мӧйыоссэ вошто Омск улосысь "Прииртышский" кун племзаводысь ӟазегъёсын. Озьы тылобурдо выжызэс ялан умоято. Кытын бен предприятие ӟазегъёссэ возе? Одӥг фермаез, инкубаторез интыяськемын Глазов сьӧрын, нош мукетыз, самой бадӟымез Балезино районысь Битчемшур гуртын. Ушъям потэ та фабрикалэсь директорзэ Георгий Александрович Суставовез но валтӥсь зоотехникез Галина Семеновна Пономареваез. Соослэн та кичӧлтонзы но сюлмаськемзы. Выльдӥськон но рынокен экономикае выжон кутскем бере, Битчемшуре куинь корка, куинь пересь семьяос кылизы. Гуртэ сюрес ӧй вал. Птицефабрикалы секыт ке но вал, солэн кивалтӥсьёсыз гуртэз утён вылысь, ваньзэ лэсьтӥзы. Вакчи дыр куспын ӝутӥзы 8 пу корка но кирпич юрт, 5 мумы ӟазег возён гидъёс но сюрес тупатӥзы. Калык нош ик татчы улыны-ужаны лыктӥз. Табере куд-огез шумпотыса но мактаса сямен шуэ, гуртлэн, пе, гербез луысал ке, отчы зэмзэ но ӟазег суредасалмы. Верамын зэмлыкез вань. Гурт уго зэмен но юн шулдыр интые пуксемын. Вӧзтӥз кык шур бызе, котыраз вӧл- вӧл возьёс кыстӥсько, вож-вож турын-куар будэ. Нош ӟазегъёсты татчы нырысьсэ вуттӥзы 1991-тӥ арын мартэ. Со луиз гуртлэн кыкетӥзэ вордӥськон-ӝутсконэз. Нош шаерамы кӧня таӵе но шулдыр гуртъёсмы быремын-аналтэмын. Оло, Георгий Суставов кадь кичӧлтӥсьёс шедёзы но куд-огзэ гуртъёсмес улӟытозы на. Зэм, нырысь-валысь капчи ӧй вал, но кутскем ужзылэсь ӧз куштӥське, пумен паськытатӥзы. Озьы фабрика али 10 сюрс ӟазег вордэ. Котькуд мумы ӟазег араз шорлыдын 45-50 пуз сётэ, нош нырысетӥ аръёсаз 17-23 пуз гинэ люказы, табере нормая 65 процент интые, 70-75 процентлэсь уноез ӟазегпиоссы ӵогисько. Та лыдпус туж умой, мукет интыосын со 45-50 гинэ. Кызьы бен сыӵе азинскон басьто? Ваньмыз потэ ӟазегъёсты сюдэм бордысь. Асьсэос арлы былэ 1200 тонналэсь ятыр витаминъёсын узыр турын пызь изо-дасяло. Сиён пӧлазы ӵуж кушман но ватсало. Вордо одӥг рейн выжы ӟазег, соос быдэсак тӧдьыесь. Специалистъёслэн верамзыя, сьӧдъёсызлэн, пе, сӥльзы сокем ческыт уг луы, шыд лым но сьӧдгес потэ. Соин ик фабрикалэсь ӟазегпиоссэ вожмаськыса басьто. Асьсэос нимаз машинаен нулло. Иже, музон районъёсы, нош Киров, Пермь улосъёсын, Татарстанын но Башкортостанын улӥсьёс, азьло курон сётыса, Глазове лыкто. Татысь ӟазег будэтӥсьёслэсь ужъёссэс тужгес яркыт возьмато лыдпусъёс. Фабрика арлы быдэ шорлыдын 250-260 сюрс пуз басьтэ, 150-180 сюрс ӟазегпи поттэ. Ачиз со гужем ӵоже 15-20 сюрссэ гинэ куайытэ, кылемзэ хозяйствоослы яке нимаз адямиослы вуза. Ӟазегъёс турын-куар вылын чаляк будо, куинь толэзьскын соос 3,2-3,5 килограмм кыско ни. Куд-огез ньыль-вить килограммозь куаё. Озьы фабрика гужем ӵоже гинэ 45-50 тонна ӟазег сӥль поттэ но экономиказэ юнматэ. Мукетсэ но вераны кулэ. Ӟазегъёс пузамысь дугдо ке, майлэн пумаз но июньлэн кутсконаз, соослэсь тылы-мамыксэс ишко, котькудӥзлэсь 40-50 грамм люкало. Нош быдэс ар ӵоже фабрика 3-3,5 тонна тылы-мамык басьтэ. Сое пайдаё кутон вылысь, татын нимысьтыз вуриськон цех усьтӥзы. Отын вуро валес, миндэр, шобрет, мамык курткаос, пӧйшурасьёслы но чорыгасьёслы шуныт дӥсь (комбинезонъёс) но музонзэ. Ваньзэ лыдъяса, 30 пумо дӥськутсы басяськисьёс кие вуэ. Шаерамы арлы быдэ сямен ортчыло гурт хозяйствоосын будэтэм ю-нянез, бакча сиёнъёсты, дасям сиён-юонэз возьматонъя адӟытонъёс (выставкаос). Отысь котьку адӟод "Глазовская" птицефабрикалэсь тӧдьы ӟазегъёссэ. Фабрика уго ИИ степенё дипломен но пусъемын ни. Татысь ӟазег будэтӥсьёс умой йылпумъязы валля но кылем арез. Отын вань лулысь- сюлмысь тыршемез ӟазег будэтонъя бригадирлэн Борис Иванович Анисимовлэн. Со ас котыраз усто ужасьёс люказ но арысь аре выль азинсконъёс басьто. Нош ӟазег пузатонын зэмос кибашлыос луизы ни тылобурдо утисьёс Ольга Петровна но Эвелина Леонидовна Шмелеваос, Зинаида Васильевна Касаткина но Татьяна Степановна Максимова. Ӟазегъёсты куайытонын синмаськымон тырше Наталья Николаевна Буранова, нош профессиезъя устоез оператор ним сётэмын Петр Григорьевич Касаткинлы. Сюлмысь тырше ӟазег будэтонъя зоотехник Нури Бекмансуров. Дас ар талэсь азьло со йылпумъяз Ижысь гурт удысъя институтэз, татын сизьым ар ужа ни. Но ӟазег будэтӥсьёс тужгес но шумпото но тау каро директорзылы Георгий Суставовлы. "Глазовская" птицефабрикаен 30 ар кивалтэ ни. Геннадий Романов. Битчемшурысь ӟазег уллё. "Уй кизилиос" Озьы нималлям доразы куное ӧтемъёссэс "Ингурлэн" 70,4 вакчи тулкымъёсыз вылын ужасьёс. Ӝыт дас часысен уйшорозь кыстӥське та передача. Тунсыко куноос меӵак эфирын быдэ шаерысьтымы но бускель Татарстанысь, Башкортостанысь, Пермь улосысь калыкен герӟаськыны быгато. Кылзӥсьёс но мылкыдзэс телефон пыр верало. Нош кыӵе соос шумпотэмын. Яратоно артистэдлы юан сётӥськод но - со отын ик валэктон шедьтэ. Кытӥяз соосын ӵош серекъянэз но, бӧрдонэз но вань. Кытын бен, "Ингурын" сяна, сокем-сокем уксё тырытэк, матысьёссэ, эшъёссэ вордӥськем нуналэнызы яке мукет муген ӟечкыланы быгатод на. Адями вань сюлэмзэ поныса, кӧлонзэ ик вунэтыса, уйшорозь радио вӧзын пуке. Тросэз кылзӥсьёс передачаез нуисьлы Валериан Исламгареевлы синмаськемзэс верало. Угось солы зэмзэ но инмарен сётэмын сыӵе быгатонлык. Кык час ӵоже куноосызлы кыӵе гинэ но юанъёс со уг сётъя. Собере отын ик тросэз куноос шуо, туж, пе, курдам вал кык час! мар меда вераськом шуыса. Нош дыр туж ӝог ортче, шӧдыны ик сое уг луы. Арняяз кык-куинь пол сыӵе пумиськон ма мында выльзэ адямилы сётэ, угось тросэз калык газетъёсты но журналъёсты уг басьты. Нош татын ваньмыз улэп! Валериан чебер но йӧно вераське - коть удмуртэныз, коть ӟученыз. Ай со ик кырӟа но вылэм. Ушъямон! Озьыен, "Уй кизилиос" пӧлын со ачиз но кизили. Кылӥськиз вал, оло, пе, ворсалозы та каналэз, но туж но туж уг яра вылэм сое быдтыны. Адями табере солы дышиз ни, уж бере, кӧлон азяз, радио дорын гань-гань шуэтскыса пукыны быгатэ. Л. Иванова, Ижын улӥсь. Удмурт ныл бызиз Индиысь пилы Выль 2001-тӥ ар, Выль даур, Выль Вапум... Калыкын шуо, кызьы Выль арез пумиталод, озьы ик улод. Кин тодэ? Тани Уваысь Анна Сунцова, Интернет пыр кунгож сьӧрысь пиен тодматскыса, солы бызиз та Выль аре. Сюанзэс ортчытӥзы Уваын. Нокыӵе кудӟытӥсь юонъёстэк. Регистрациез ортчиллям Ижысь ЗАГС-ын. Анна Сунцова йылпумъямын Удмурт кун университетэз, англи кыллы дышетскемын. Ас специальностезъя ужаны кутскемын. Кунгож сьӧрысь эмеспи Рене Томас. Вордскемын Индиын, атаез - британец, анаез - индианка. Рене ужа компьютерщик луыса тодмо "Рейтер" агентствоын. Кузпалъяськемзылэсь азьло миым сӥзьыл со вуылӥз Удмуртие но Аннаен пумиськылӥз. Ог-огзылы кельшиллям, огъя кыл шедьтӥллям. Атаез соглаш луэм гинэ ӧвӧл, ачиз дэмлам Россиысь нылэн кышнояськыны. Егит семья, сюанзы бере Канадае куное ветлыны чакла вылэм. Оло, али отын кунояло ни егит кузпалъёс. Куспазы соос англи кылын верасько. Нош ялан улон интызы луыны кулэ пичигес пӧсь шаер - Оман. Кивалтэ соин султан, улӥсьёссы миллион но ӧвӧл, данакез - арабъёс, верасько араб кылынгес, религизы - ислам. Удмурт ныллэн таӵе вамышез лыдӟисьёсты но сюлэмшугъяськытоз, дыр. Зэм но, кызьы радъяськоз улонэз Анна Сунцовалэн воксё тодмотэм калык пӧлын, туж кыдёкын? Бен, мон тодӥсько Пичи Пурга ёросысь куинь нылъёслэн немецъёслы быземзы сярысь. Кыкез улэ Германиын, куинетӥез - Италиын. Ваньзы нылпи вордо-будэто, дышиллям ни мурт кыллы но культуралы. Куд-ог дыръя доразы бертало яке асьсэлэсь ӵыжы-выжыоссэс отчы куное ӧтьыло. Но анай вордэм нылзэ ӵем адӟыны уг ни быгаты. П. Николаев. Удмурт университетлэн "атаез" Борис Шульгалэн нимыз люконтэм герӟаськемын шаерысьтымы калыклы вылӥ тодон-валан сётонэн. Ӵапак со усьтӥз но ӝутӥз Удмурт кун университетэз. Табере та вузлэн данэз быдэс дуннелы но тодмо ни. Б.Н.Шульга - инженер-механик, техника наукаосъя кандидат, профессор, Удмурт Республикаысь наука удысын дано ужась. Со кортъёслэсь юнлыксэс эскеронъя специалист. Шульга 1965-тӥ�1972-тӥ аръёсы Ижевскысь Механикая институтын проректор вал. 1972- тӥ арысен 1986-тӥ арозь кивалтӥз Удмурт кун университетэн, 1986-тӥ�2000-тӥ аръёсы - татын ик кивалтӥз техникаен герӟаськем ужпумъёсъя кафедраен. Та вакытэ - УдГУ-ысь дышетскон методикая центрлэн директорез, лыдӟе лекциос. Верамы ини, университетэн Борис Николаевич Шульга кивалтыку кылдытэмын вузлэн наука удысэз азинтонъя выль инъетъёсыз, паськыт сюрес сётэмын вал математикая моделированилы, экономикалы, электрохимилы, правоведенилы, мукет удысъёслы. Со ужан вакытэ дасямын наукаосъя 26 доктор но 73 кандидат, усьтэмын 5 выль факультет, 17 кафедра, дышетскисьёсты кутон йылӥз куинь поллы. Россия Федерациысь Калыкез дышетонъя министерстволэн куремезъя, Б.Н.Шульгалэн кивалтэмез улсын дасямын школаын 12 ар ӵоже дышетонлэн техника удысын одӥгез инъетэз. Борис Шульга пусъемын "Знак Почёта" кык орденэн, Калыкъёслэн эшъяськонзы орденэн, правительстволэн уно наградаосыныз. Та нуналъёсы Борис Николаевичлы 75 арес тырмиз. Ми но удмурт калыклэн нимыныз ӟечкыласьком сое дано юбилееныз. Шуд но тазалык сӥзиськом! Б.НИКИТИН. Бюджетысь коньдон радызъя люкемын Удмурт Республикаысь Коньдон ужпумъёсъя министерстволэн ивотэмезъя, туэ 24-тӥ январьлы бюджетысь пӧртэм удысъёсы 285,9 миллион манет висъямын. Со пӧлысь 93,5 миллионэз келямын ёросъёслы но городъёслы дотациос чотын. Бюджет удысын ужасьёслы уждун тырон понна 30,8 миллион манет сётэмын. Калык хозяйстволэн удысъёсызлы 68,7 миллион манет висъямын. Отысь 11,1 миллионэз мыноз гурт хозяйстволы, 31,4 миллионэз - промышленностьлы, лэсьтӥськонлы. "Етӥн" программаез быдэстонлы нимысьтыз 4,0 миллион манет висъямын. Городъёслэн бюджетъёссылы улон юртъёсты но социальной удысэз возён понна коньдон тазьы сётэмын: Ижевсклы - 10,0 миллион манет, Глаховлы но Сарапуллы быдэн 5,0 миллион, Камбаркалы - 2,0 миллион манет. Со сяна, 49,9 миллион манет келямын социально-культурной удыслы. Нылпи пособиосъя кутэм тыронъёсты ворсан понна 12,0 миллион манет сётэмын. Лыдэ басьтэмын на куд-ог программаос. Кылсярысь, "Сахарный диабет" но "Молодежь Удмуртии" программаос. Соослы висъямын 0,7 миллион но 0,4 миллион манет. Т.МИРОНОВА. Кенешон Ӝыны час министрен Сомында дыр висъяны быгатӥз гурт удысъя но сиён-юонъя выль министр Владимир Петрович Невоструев. Солы нырысьсэ ортчытоно вал министерстволэсь паськытатэм коллегизэ. Пырись-потасьёс вискын гинэ министр доры кемдӥ. "Ярам, ӝыны час пала вераськом - шуиз со, - но солэсь трос уг быгатӥськы". Озьыен, чыры-пыры юанъёсты палэнтыса, вераськонмы радъяськиз валтӥсь ужпумъёс бордысен. - Владимир Петрович, али кивалтонэ лыкто 50-тӥ-60-тӥ аръёсы вордӥськемъёс. Со аръёсы дышетылӥзы вордскем палъёсыныд данъяськыны, музъемез утьыны-гажаны. Музъем сярысь закон но, кодекс но Россиын кутымтэ на, озьы ке но, музъемез вузаны лэзён сярысь трос гинэ верасько. Кызьы тӥ учкиськоды та ужпум шоры? - Музъемез вузанлы мон пумит. Со сярысь вераськонъёс пайдатэмесь. Тани газетъёс ик гожъяло: куд-ог интыосын музъемез вузаны туртто ик вылэм - но басьтӥсь шедьымтэ. Мынам малпамея, та ужпумез али ӝутыны ик кулэ ӧвӧл. Туннэ асьме калык солы дась ӧвӧл на. - Озьыен, тӥ соглаш луоды "Удмуртилэсь экономикаын кулэяськонъёссэ утёнъя движенилэн" куронъёсыныз? - Малпанъёсмы тупалозы, дыр. Но бадӟымгес саклык висъяно ужлы. - Тӥ шуыны турттӥськоды политикае ӧжытгес пыриськоно? - Озьы, озьы. Нырысетӥ интые экономикаез пуктоно. Ваньмы сое ӝутон борды басьтӥським ке, пайдаез тросгес луоз. Тани валлян дорам пыраз одӥг хозяйстволэн председателез. Колхозазы 100 ужасьсы но 140 скалзы. Одӥг скалзылэсь куинь литр гинэ йӧл кыско. Со - экономика шат?! Али дӥсьтысагес уже кутоно хозрасчёт шуонэз, котькуд хозяйствоын мед луозы визьмо экономистъёс. - Кылем арын шуд усиз Юкаменск ёросэ вуылыны. "Трактор" колхоз - со тӥляд азьвыл кивалтоно хозяйстводы вылэм. Паймыса учким Палагай гуртын йыг-йыг сылӥсь коркаос шоры. Ку меда вань гуртъёс сыӵе адӟем карымонэсь луозы? - Куке котькуд хозяйствоын йӧн-йӧн кивалтӥсь луоз. Тросэз уго кивалтӥсь бордысь потэ. Жаляса верано, сыӵе кузёоос уг тырмо. Кылдэм югдурысь потон понна правительствоен ӵош "Кадръёс" программа дасямын. Ӝоген со юнматэмын луоз. Кадръёсты дышетон понна 9,5 миллион манет висъяны учкемын. Со сяна, 5 миллион манет висъямын на специалистъёслы, кудъёсыз аналтэм хозяйствоын ужаны мылкыд карозы. Коньдон мыноз соослы юртъер басьтыны, уждун тырыны. - Сыӵе мылкыд карисьлы мар быдӟа уждун тупатыны учкемын? - 1,5 сюрс манет пала. Со сяна, пособие сётӥськоз на. - Аналтэм хозяйствоосы мыныны мылкыд карисьёс вань-а ни? - Вань. Соосын ужаськом ни. - Кыӵе юрттэт луоз куашкан калэ вуэм хозяйствоослы? - Азьпала улонзы сярысь нырысь ик соослы асьсэлы малпаськоно. Дотация ваньмызлы висъяськоз но... йӧл вузамзыя. Матысь дыре чакласьком вань районъёсын кенешъёс ортчытыны. Отын ик тупен-тупен вераськом, кыӵе юрттэт кулэ соизлы я таизлы хозяйстволы. Куд-огезлы, оло, ёрос администрацилэн гинэ юрттэмез тырмыт луоз. Та ужез 15 мартозь быдэстомы, дыр. - Тодӥськом, гуртъёсын техника уг но тырмы, уг но выльдӥськы шуыса. Кызьы малпаськоды таӵе югдурысь потыны? - Малпаськом 100 трактор но 100 комбайн басьтыны. Со сярысь вераз вал Президентмы но. Техника висъяськоз, хозяйствоос пӧлын ӵошатскон ялыса. Асьме бусыослы тупалогес "Беларусь" МТЗ, "Енисей", "Дон" комбайнъёс. гусеничной тракторъёс. Соосты ик тыршомы басьтыны. - Ӝоген матэктозы тулыс бусы ужъёс. Кызьы мынэ ни солы дасяськон? - Специалистъёсты со пумысен ӧм на люкаллялэ. Но али мыр-мыр ужаськом эстӥськонэз тырмыт дасян ласянь. Апрельлэн кутсконаз хозяйствоослы ГСМ басьтыны коньдон висъяськоз. Правительстволэн со сярысь постановлениез дась шуыны луоз ни. Но отын ГСМ-лы учкем коньдон (80 миллион манет) милем ӧжытгес потэ. Соин ик со бордын ужано луоз на. - Гурт удыслы бюджетысь туэ кӧня коньдон висъяськоз? Тырмыт-а со? - Бюджетын учкемын 13 процент. Со лыдпус кык поллы тросгес луысал ке, оло, шугъяськонъёсмы но кулэсмысалзы. - Владимир Петрович, туннэ асьмелэн 3,5 сюрс пала фермер хозяйствоос ужало. Республикамы понна со лыдпус ӧжыт ӧвӧл кадь. Кызьы тӥ малпаськоды, гурт хозяйствоез фермеръёс яке колхозъёс ик-а ӝутозы? - Фермеръёслэн кулэяськонъёссы сярысь мон вераськыны дась ӧвӧл ай. Соосты огазе ӧй на люкалля. Но тазьы малпасько: колхозъёстэк азьлань ум мынэ. Асьме калык дышемын дэмен, ӵош ужаны. Со дыре ик фермеръёслэсь но ӧвӧл палэнсконо. Соослы учкемын АПК-ез азинтонъя фондысь юрттэт сётыны. - Егит дыръяды тӥ малпаськоды вылэм колхоз кивалтӥсь луыны. Малпанды быдэсмиз. Нош министр луон сярысь...? - Нокыӵе карьера шуон сярысь ноку ӧй малпаськылы. Министре пуктон сярысь иворез тужгес но секытэн пумитаз кузпалы. Ачим сярысь вакчияк верано ке, вордскем гуртам "Трактор" колхозэн 12 ар кивалтӥ, собере Юкаменск ёрос администрацилы тӧрое юнматӥзы, та ужын кык но ӝыны ар вал. Отын ужаса, мон золгес кыдай, ас поннам туж трос тодон-валан басьтӥ. - Семьяды Иже улыны выжиз-а ни? - Улонние татын ӧвӧл на ай. Семьяе улэ Палагай гуртын. Пие дышетске гурт удысъя академиын, нылы - 7-тӥ классын, "витьлы" гинэ дышетске. - Владимир Петрович, тӥлед кышкыт ӧз поты-а куашкан удысэн кивалтон борды басьтӥськыны? - Мон меӵак озьы ӧй верасал, гурт удыс асьме республикаын сокем секыт югдурын ӧвӧл. Пермь, Курган, Свердловск улосъёсын ӵошатыса, сокем урод ум адӟиськиське. Гурт калыклы ужаны мылкыд сётӥд ке, со гурезез берыктоз. Гуртъёсын удмуртъёсгес уло, нош соослэн ужаны быгатэмзы тодмо. - Выль паспортъёсын адямилэн национальностез пусйымтэ. Озьы ке но, кыӵе выжыысь тӥ потэмын. - Бесермян выжыысь. Но вуж паспортам ай "удмурт" гожтэмын. Владимир Петрович Невоструев гурт удысъя но сиён-юонъя министрлэсь ужзэ толэзь но уг быдэсъя на ай. Али гинэ секыт ужаз выйыны турттэ, соин ик ас воштӥсьёсыныз, специалистъёсыныз та нуналъёсы бер ӝытозь ужано луэ. "Ӧй вал келяно тулыс бусы ужъёслы дасяськонэз. Таиз уж али тужгес но валтӥсез", - шуиз министр. Татьяна Банникова. Офицеръёсты дасялозы Шарканын Шаркан ёросысь военкомат 10 толэзьем курсъёс усьтэ. Отын дасялозы мотострелковой, танковой, артиллеристской, разведывательной взводъёслэн, ротаослэн, батареяослэн командиръёссылы воспитательной ужъя воштӥсе дышетскыны мылкыд карисьёсты. Курсъёсты радъяло Казаньысь артиллерияя военной университетлэн ёзэз но Челябинскысь танковой институтлэн Казаньысь ёзэз. Курсъёсты йылпумъямъёс лейтенант луыса пото. Отчы куто запасэ потэмъёсты 27 аресозь. Н.НИКИТИН. Лэчыт ужпум Сюлэм уг чида палдуресэз Туэ 16-тӥ январе кылъя профессор Валентин Кельмаков "Удмурт дуннеын" печатлаз "Киысь вольтче ке биньгозы..." гожтэтсэ. Со пыкылӥз удмурт писателез Фатихян (Федор) Пукроковез, удмурт кылъёслэсь кылдэмзэс вылтӥз гинэ эскере шуыса. Редакция соку кылзэ сётӥз: та материал пумысен малпанъёссэ шараяны эрик луоз Ф. Пукроковлы но, музон лыдӟисьёслы но. Та нуналъёсы Фатихян Пукрокович вуттӥз гожтэтсэ. Мон паймемысь уг дугдӥськы кылчиосмылы. Котькуд наукалэн вань философиен герӟаськем шугесь гердъёсыз. Нырысь ик кутсконо огъя ужпумъёсты эскерыны, собере ини потоно аслад удысысьтыд гердъёс вылэ. Жаляса верано луэ, Удмурт кун университетын наукалэн ужпумъёсыныз яке чик уг выро, яке шер-тур гинэ. Котькыӵе наука борды куртчиськемлэсь азьло ог-кык кылын ке но валэктоно, мар со сыӵе огъя наука, учыр (факт), закон, метазакон. Тани Куӟебай Герд гожтӥз "К вопросу о происхождении вотяков. Удины и уды (вотяки)" уж. Отын возьматэ тямыс удин кылэз: чэли (чорыг), ус (ош), кодж (корка), беинк (пеймыт) но мукет.Одӥг лингвист но та кылъёсты рос-пос ӧз эскеры, малы ке шуоно, асьме тодосчиос лыдъямъя, та фактъёс научноесь ӧвӧл. Зэм но, мар сыӵе луоз со - удмуртъёс Кавказын вылэм шуыса вераськон?! Куд-ог кылъёс тупало ке, со случайно! Асьмелэн вань ини юн пуктэм теория: удмурт культура автохтонной, мукет сямен вераса, со кылдытэмын татын, соин ик удмурт кыл мукет кылъёсын тупа шуыса вераськонъёс - огшоры супыльтон гинэ! Тӥни озьыгес малпаса, М. Г. Атаманов "История Удмуртии в географических названиях" книгаяз та тямыс кыл пӧлысь куиньзэ гинэ лыдӟисьёслы возьматэ. Зэм, куиньзэ но сураса сётэ! Чэли луэм чари, ус - уз, беинк - бейно. Кылтодосъя доктор латин ку букваез о букваен сура. Собере соос ик йырзэс урдыло: эн чуртнаськелэ милям ужамы, кыл ужпумъёсын кылчиос вырыны кулэ! Со гинэ уг тырмы, М. Г. Атаманов быръе аслыз кельшись учыръёсты гинэ, мукетъёссэ сэрпалтэ. Мон асме лингвист уг шуиськы, но сюлмы уг чида, Гердэз палдурес эскеро ке. Одӥг лингвист но солэсь кылъёссэ сэрттыны-пертчыны ӧз басьтӥськы бере, мыным, кылбурчилы но философлы, соос борды кутсконо луэ. Кодж но корка. Мар татын огъяез кадь? Кутӥ но Москваысь кури В. Гукасянлэсь "Удинско-азербайджанско-русский словарь" книгазэ. Ӧз ыстэ. Вазиськи Петербурге. Вуиз кема возьмам маке. Тодӥ: удинъёслэн кык диалектсы вылэм, одӥгаз коркаез кодж шуо, мукетаз - кож! Ура! Табере ваньмыз интыяз пуксиз. Кин мыным уз оскы, мед усьтоз берло потэм вож кыллюкаммес. Азьло дыре кеносын котькуд ю тысьлэн аслаз интыез вал. Кытын ке сое бугро шуо, кытын ке - кож: чабейлэн бугроез яке кожез, мукет сямен вераса - коркаез. Итымлэсь липем азьзэ дыре итым кож верало вылэм. Чаклалэ ай: малпаськысагес ке лыдӟиды, шӧдоды: та кылъёсын, туала пуштросэз сяна, вунэм шӧмыз вань. Уло асьсэ кожен - отдельно. Тямыс удин кыл пӧлысь ваньмызлы ик тупась удмурт кылъёс шедьтӥ. Табере шуыны луоз-а, Куӟебай Герд та ужзэ юнме гожтэм? Нош мар люкетэ туала учёнойёслы- кылчиослы югдурез тазьы эскерыны? Люкетэ учыръёсты "научнойлы" но "ненаучнойлы" лыкылон. Асьмеос зэмос исследовательёс ке, юрдыны кулэ ӧвӧл одӥг учырлэсь но. Нырысь люкано котькыӵе фактъёсты, собере - радъяно, отӥяз - валэктыны выроно. Тросэз тодосчиосмы юриспруденциысь но наукаысь законъёсын сурало. Парламентын, валамон, котькыӵе законэз юнматыны луэ: огзэ кышкатӥд, мукетсэ алдад, куинетӥезлы коньдон донгид. Наука - парламент ӧвӧл, татын "демократия" ӧвӧл, татын зэмлыклэн диктатураез! Мон лингвист ӧвӧл, мон университетын дышетскемея философ. Соин ик лингвистикаын валасько сыӵезэ, мае уг тодо асьсэос кылчиос. Ми ортчимы "лингвистикаысь философия ужпумъёс" дисциплинаез (дышетӥз академик), математикаысь логикаез. Таяз лыдъяло верам кылъёсты, ӟуч сямен - исчисление высказываний. Верам текстэз ми лыдъямы математика амалэн - формулаосын. Асьме лингвистъёслы сыӵезэ ивортӥд ке, тонэ сереме ӝутозы: вераськемез кызьы лыдъялод? Тодматским "теория вероятности" дисциплинаен но. Жаляса пусъёно луэ: асьме тодосчиос кылъёсын выро, нош мар со случайность шуон, огшоры гинэ тодо. Кык калыклэн вераськонысьтыз одӥг кадь кылъёсты шедьто ке, нокыӵе ик уг карисько: случайно! Кыкетӥез сюре - случайно: куинетӥез, ньылетӥез, сюрсэтӥез - весь случайно. Тон умой-умой исследователь ке, компьютерад пырты одӥг гинэ сюрем тупась кылэз но. Улон-вылон сяменыд, оло нош шедьтод - пырты... Сюэтӥ кыл бере гинэ гожъяны кутскид ке, вань азьло лыдӟем книгаостэ выльысь усьтыса пуконо луод. Эшшо случайность сярысь. Тросэз кылчиос лыдъяло, вераськонын куараос куамынлэсь гинэ ятыргес шуыса. Озьы бере, соос трос уг вошъясько, туж капчиен ваче тупало мукет калыклэн кылъёсыныз. Соос озьы йыромемзэс теория кожало. Нош наукаын номыр но сокем кышкыт ӧвӧл, ӝыныё гинэ тодон кадь. Математикаын вань комбинаторика люкет. Удмурт кылын 38 буква, 35 куара. Та куараослэсь одӥг куараен кылъёс кылдытӥм ке, люкаськоз 35 кыл. Кык куараен кылъёс ке кылдытъям - 1190 кыл, куинь куараен - 39270, ньыль куараен - 1 миллион 156 сюрс 640 но мукет. Вакчияк вераса, кык калык нокыӵе кусып ӧз ке возьы, соослэн одӥг кылзы но случайно уз тупа. Огез ке но огкадь ке, валамон: та калыкъёс кызьы ке но кусып возиллям (базар пыр ке но). Одӥг тодмо тодосчи оскытэ: Африкаысь кыӵе ке шаерын 50 кыл тупа венгер кылъёслы. Собере ватса на: случайно. Солэн шӧмъямез но ӧвӧл, мар со "теория вероятности". Кызьы валэктыны луэ венгер кылъёслэсь Африкае вуэмзэс? Мынам малпамея, отчы кызьы ке шедиз дышетскем венгр, сое кивалтӥсе пуктӥзы, вераськон кылыз пумен калык пӧлы пыӵаз. Витьтон кыл случайно тупам шуыкузы, серемме нокызьы кутэме уг луы. Тодам лыктэ ӵужодӥге. Солы вераны шедьтӥ: зорыку урамысь вукыремамы одӥг воргоронлэн чорыгъёсыз кошкизы. Ми кӧнязэ ке кутыны быгатӥм на, кылемъёсыз ышизы. Ӵужодӥге шуэ: - Нош ми вукырем улланьынгес шудӥськом вал. Олокытысь чорыгъёс вуизы. Соосты кутылӥм но дорамы пыжыса сиим. Серекъятэк ӧй чида. Гуртъёсмы вискын дас кык иськем! Вукыремъёсмы уг герӟасько. Тае лыдэ басьтытэк, ӵужодӥге малпам: вукырем бере, со дунне вылын одӥг гинэ, соослэн урамазы. Ярам, ӵужодӥгелы соку дас арес но ӧй вал. Но мынэсьтым серемме поттэ озьыгес ик вераськись профессор! Филологъёс но, историкъёс но философиез асьсэ наукаенызы герӟазы ке, мон гань- гань шокчо. Мыным соослэн удысазы чуртнаськоно уз ни луы. Я, мар мон шедьтӥ на удинъёслэн кыллюкамысьтызы? Соослэн 250 кылзы тупа удмурт кылэн. Малы асьмеос лентяез азьтэм шуиськом? Азьыз ӧвӧл шат солэн? Удин сямен ажгаган (гаган - отрицание). Асьмелэн та кылмы куке но ажтэм вылэм. Аш, аж удин кыл асьме сямен ужлы пӧрмем кылдэм ужтэм кыл (бездельник). Нош мар кароно ажтэм кылэн? Солэн пуштросэз воштӥське - лентяй луэ, собере адямиослы валантэм кыле. Куто но азьтэм шуыны кутско. Радлыкез валантэм, со понна шӧдӥське - та няп-няп удмурт кыл... Тани асьмеос кечырскыны шуиськом. Малы? Удинъёс из кенерзэс кеч шуо вылэм. Тӥни кытысь потэм кечырскыны кылмы! Асьмелэн вань адаш (паньтэм) кыл. Кылтодосъя доктор И. В. Тараканов кожа, со - бигер кылысь басьтэм маке. Бигеръёс но вашкала тюркъёс пӧлын адаш со друг, приятель. Асьмелэн - паньтэм, тёзка! Нош удинъёслэн адаш кылзы кутӥське паньтэм пуштросэн. Азербайджанъёс но паньтэмзэс адаш шуо. Нялтас пусйыса, 120 удмурт кыл азербайджанъёсын тупа. Азьло дыре Кавказын вылэм Кавказ Албания кун. Отын валтӥсь калык - удинъёс. Арабъёс сэстэм бере, соос пегӟиллям Балканэ. Албан сямен но адаш - тёзка. Табере асьмелэн вераммы луэ-а, адаш кылмы бигеръёслэсь басьтэмын шуыса? Со гинэ мар ай. Куд-ог диалектъёсын вань адашыны - сураськыны, янгышаны, йыромыны. Сыӵе кылзы вань бигеръёслэн но. Соос но озьы ик шуо янгышамзэс. Та кыл пӧрмемын адашысь: кык адямиос одӥг ним нулло но, пӧлысьтызы огзэ веракузы, кин ке малпа мукетыз вылэ - сураське. Озьыен, асьмеос оскыса вераны быгатӥськом: удмуртъёс бигеръёслэсь ӧвӧл, бигеръёс удмуртъёслэсь басьтӥллям та кылзэс. Ваньзэ озьы тупась кылъёсты возьматъяны кутски ке, мыным быдэс книга гожтоно луоз. Удмуртъёсты удинъёслэсь люкыны турттӥсь тодосчиос мед малпаськозы шуыса, верало на огзэ гинэ. Асьмелэн вань узенги - стремя. Сыӵе ик кылзы вань албанъёслэн но, азербайджанъёслэн но. Кытысь потэм? Учкиськом удин кылэз: кузэнку. Табере тӥни валамон: со вылэм кузэн (парен) ку, азьло кортлэсь уг лэсьтӥськы вылэм, кулэсь гинэ. Шедьтӥ на та палась мукет калыкъёслэсь но кылъёссэс. Тюркысь - ньыльдон пала (чагырез чакыр шуо, лобытэз - лобут, дырез - дар, куасьмись шурлэсь пыдэссэ - дэре). Краснодар крайысь данак курортъёс "дэре" кылэн герӟаськемын. Курд кылысь - ньыльдонлэсь трос (дыдык - додок, агир - эгыр, чырс - тирс). 190 кыл шедьтӥ аккад кылысь (вавилон-ассири). Куамын пала удмурт кылъёс тупало Эфиопиысь амхар калыклэн кылыныз: корам - коркорре, изысь пилиськем инты - сентек. Асьмелэн вань Сентег гуртмы, Сентегов, Сентяков фамилиосмы. Табере мон юасько лыдӟисьёслэсь: мынэсьтым гожъямме лыдӟыса, соослы уродгес луиз-а, яке соос мар ке но выль тодон басьтӥзы-а? Мынэсьтым, кылъя специалист луисьтэм муртлэсь гожъямзэ ӧй ке лыдӟысалзы, тодысалзы-а соос ваньзэ тае? Федор Пукроков. Редакцилэсь. В. Кельмаковлэн Фёдор Пукроков гожтэтысьтыз сямен ик, Ф. Пукроковлэн но материалысьтыз ог люкетсэ куштӥм. Мугъёсыз таӵеесь: отын вал кинэ но сое лекос мыскыллясь кылъёс, ӟучысь удмуртэ шакрес берыктэм интыос, вылысьтыз вылаз акыльтымон сётэм учыръёс. Кыл дуннее укыр мур выйытэк, редакция возьматыны выриз В. Кельмаковлэсь но Ф. Пукроковлэсь кылэз эскерон манеръёссэс (инъетъёссэ, принципъёссэс). Меӵак вералом: соос пӧртэмесь. В. Кельмаков юнгес пыкиське кыллэн азинскон законъёсыз вылэ, Ф. Пукроков - музон наукаослэн огъя законъёссы вылэ. Котьку сямен ик ми судья кариськыны ӧтиськом лыдӟисьёсмес. Витиськом кылэз огшоры гажасьёсмылэсь но, тодмо учёнойёслэсь но гожтэтъёссэс. Кылем даур: нунал бӧрсьы нунал Февраль 100 ар талэсь азьвыл (1901-тӥ) Эсер П. Карпович вииз калыкез дышетонъя министрез Н. П. Боголеповез. 95 ар талэсь азьвыл (1906-тӥ) 20-тӥ феврале Кун Кенеш пӧрмытэмын вылӥ палаталы, со ужаз Кун Думаен ӵош. 85 ар талэсь азьвыл (1916-тӥ) 2-тӥ феврале Кронштандтын пуромиз городъёслы пумит бугыръяськон. 3-тӥ феврале ӟуч ожгарчиос басьтӥзы Эрзерумез. 80 ар талэсь азьвыл (1921-тӥ) 26-тӥ феврале - эшъяськон сярысь огкылъёс гожтэмын Иранэн, 28-тӥ феврале - Афганистанэн. 75 ар талэсь азьвыл (1926-тӥ) Кылдӥз огазеян оппозиция. Кивалтӥзы Л. Д. Троцкий, Л. Б. Каменев но Г. Е. Зиновьев. Соосты партилэн вылӥ ёзъёсысьтыз куштӥзы. 60 ар талэсь азьвыл (1941-тӥ) 3-тӥ феврале кылдытэмын Кунэз кышкытлыклэсь утёнъя калык комиссариат (НКГБ). 15-тӥ феврале усьтӥськиз компартилэн 18-тӥ кенешонэз (конференциез). Со косӥз ож тӥрлык поттонэз будэтыны. 55 ар талэсь азьвыл (1946-тӥ) 25-тӥ феврале Горд армия нимаськиз Советской Армия. 27-тӥ феврале гожтэмын Монополиен эшъяськон но ог-огедлы юрттон сярысь огкыл. 45 ар талэсь азьвыл (1956-тӥ) 14-тӥ феврале усьтӥськиз компартилэн 20-тӥ ӧтчамез (съездэз). Со ялӥз тупаса улон сюрес сярысь, кутӥз 1956-тӥ-1960-тӥ вить арлы директиваос. 25-тӥ феврале Н. С. Хрущев ӧтчамлэн ворсам кенешаз одӥг муртэ мултэс данъян но солэн бервылъёсыз сярысь доклад лэсьтӥз. 35 ар талэсь азьвыл (1966-тӥ) 10-тӥ феврале судын писательёс А. Синявский но Ю. Даниель янгыше уськытэмын Советъёслы пумит валэктон уж нуэмзы понна. 15-тӥ феврале Толэзь вылэ нырысьсэ пуксиз "Луна-9" станция, со сётӥз Толэзь вылысь фотосуредъёсты. 30 ар талэсь азьвыл (1971-тӥ) 11-тӥ феврале Москваын, Вашингтонын но Лондонын гожтӥськемын ядерной ож тӥрлыкез зарезь пыдэсын утьыны лэзёнтэм сярысь огкыл вылэ. 25 ар талэсь азьвыл (1976-тӥ) 24-тӥ феврале усьтӥськиз компартилэн 25-тӥ ӧтчамез. Со юнматӥз 1976-тӥ-1980-тӥ вить арлы директиваосты. 20 ар талэсь азьвыл (1981-тӥ) 23-тӥ феврале усьтӥськиз компартилэн 26-тӥ ӧтчамез. Со юнматӥз 1981-тӥ-1985-тӥ вить арлы лыдпусъёсты. Тупатскемын вылӥ кивалтӥсьёсты йыртэмамзы понна лушкем судъян. 10 ар талэсь азьвыл (1991-тӥ) Москваысь оппозиция ульчаосы потаны кутскиз. Сӥлы карон ним сётэмын Россия Федерацилэн Президентэзлэн 2000-тӥ арын 21-тӥ декабре юнматэм 2031 номеро Указэныз энергетика удысэз азинтонын пайдаё тыршемез но ужын вылӥ вормонъёсыз понна "Россия Федерациысь дано энергетик" сӥлы карон ним сётэмын Корепанов Михаил Касьяновичлы - акциосын "Удмуртэнерго" огазеяськонысь электрослесарьлы. Удмурт Республикаысь Правительстволэн пресс-службаез. Тау гожтэттылы "Тол Бабайлы гожтэт" конкурсэ пыриськеммы понна республикаысьтымы Почта кусыпъёсъя управленилэн кивалтӥсез редакциямы та нуналъёсы ыстӥз тау карон гожтэт. Нош ми тау кариськом конкурсэ пыриськем вань нылпиослы. Шаерысьтымы Тол Бабай сомында гожтэт ноку ӧз басьтылы на вал - ваньмыз 3215 люкаськем, нош кылем арын 1635 гожтэт вуиз. Конкурсэз радъясьёс асьсэос но ӧз малпалэ, ӧтёнзылы сомында нылпи вазиськоз шуыса. Валамон ни, ваньмызлы кузьым ӧз тырмы. Озьы ке но, тужгес усто гожтэт ыстэмъёс пыриськизы Ижевскын ортчем празднике. Редакциын ужасьёслэн но Почта кусыпъёсъя управлениын ужасьёслэн азьланезлы тодэмзы потэ, кыӵегес ужрадъёсы, конкурсъёсы, праздникъёсы тӥляд тужгес но пыриськемды потэ, пиналъёс? "Тубат бӧрсьы тубат" Озьы нимаське Можга ёросын улӥсь удмурт кылбурчилэн Л.Д.Черновалэн одӥгез кылбур сборникез. Кемалась ик ӧвӧл, со вуылӥз ёросысь кылбур гожъяны дышетскись пиналъёслэн "Вало ӧр" огазеяськоназы но отын аслэсьтыз кылбуръёссэ лыдӟиз. Литературно-творческой кружок люкаськылэ Можга ёрос библиотекаын. Отчы вуылӥзы ни Быдӟым Сурд, Кватчи, Ӟуч Сюгаил школаосын дышетскисьёс. Асьсэлэн гожтэм кылбуръёсынызы люкаськемъёсты тодматӥзы дышетскисьёс Галина Попова, Ирина Семёнова, Геля Гариева но Полина Колесникова. Нылпиослэн улонэз валаны дышетскемзы - со тубатэтӥ нуналмысь одӥг лёгетэн выллань тубем выллем, тубат бӧрсьы тубат. Мӧйыез кылбурчи егитсэ дышетыны уг акыльты бере, гожъяны кутскисьёслэн выллань тубонзылы оскон вань. Соин мылкыд карем потэ: Можгаысь "Вало ӧр" жильыртыса мед ӧръяськоз. П.НИКОЛАЕВ. Пичи гуртъёсы потазы Бадӟым гуртъёсын котьма вань: школа, медпункт, клуб, магазин. Нош пичи гуртъёсын ӵемысь дасо-кызё муртлы ужамон пудо гид сяна кыльымтэ ни. Адямиос трос ке но ӧвӧл, соослэн но шулдыр шутэтскемзы потэ ук. Тае лыдэ басьтыса, Можга ёросысь культура юртлэн агитбригадаез шулдыр концертэн юри потаз пичи гуртъёсы. Акаршуре, Каменной Ключе, Комяке, Поршуре но Выль Ӟуч Сюгаилэ. Артистъёсын ӵош калыкен пумиськизы кивалтӥсьёс но. Соос пудо утисьёсты но музъем ужасьёсты ӟырдыт ӟечкылазы Выль арен, Выль даурен, Выль вапумен но Иисус Христослэн вордскем нуналэныз, кузьымъёс сётъязы. Пумиськон бере котькуд гуртын шулдыръяськонъёс, маскаръяськонъёс, ӵош эктон-кырӟанъёс ортчизы. П.НИКОЛАЕВ. Пичи гуртъёс Апачпиослы - тау карон Али ке но син азям Кез ёросысь Апачпи гуртын ортчытэм пинал дыръёсы. Азьло та гурт бадӟым ик ӧй вал. Но со чебер, шулдыр интые пуксемын. Гурезь улын - ошмес но ӵыпет, котыр лысо нюлэс ӵашетэ, отын узыез, эмезез, губиез - бичаса быдтонтэм. Тулыссэ гуртысь юг-юг льӧмпу сяськалэн зыныз артысь Дмитрошур гуртозь ик лӧсъяське. Апачи гуртын вашкала дырысен ужез гажась калык улӥз. Тужгес но куаш! кариз татын гужемзэ. Векчи пиналъёс бусыосын жуг-жаг турынэз октӥзы-калтӥзы. Бадӟымъёсызгес нылъёс но пиос, мӧйыосын ӵош, турнаны потылӥзы.Возь вылысь турлы сяськаослэсь но чебергес адӟисько вал ужасьёс! Соос зуродэз тырмытӥзы, гуртэ бертыны ӧз ик малпаллялэ. Собере вуылӥз аран дыр. Валъёс жадемысь, соосты выльёсыныз воштоно луэ вал. Нош гуртысь батыр Тёпа Петыр ӵукнаысен бер ӝытозь араз но араз: жадьылӥз, оло, ӧз - ноку но ӧз ӝожтӥськылы. Таӵе кужмо муртэз но тушмон пуля быдтӥз. Син азям пуксе Кок Егор. Пельпумъёсыз - сажень пасьта. Вал сюдӥсьын ужаз толзэ. Кыткылымтэ валъёсты ужаны дышетылӥз со. Нош соосыз, циркын сямен, кык пыд йылазы суто, вылазы пукись адямиез сэрпалтыны туртто вал. Ӧз, Кок Егор ӧз сётскылы соослы, валэз борды ӝам-ӝам кырмиськылӥз: озьы гинэ уд уськыты сое. Тушмон пуля быдтӥз тазэ но батырез. Со сьӧсь война Тёпа Петырез, Кок Егорез сяна, Апачи гуртысь эшшо ньыльдон воргоронъёсты ньылз. дӥг семьяез но со бӧрдытытэк ӧз кельты. Гуртэ огез бӧрсьы мукетыз похоронкаос вуылӥзы. Оже кошкем воргоронъёсты воштоно луизы нылкышноос, пересьёс, - соослы юрттӥм ми, векчи пиналъёс. Озьы пинал дырмы быриз. Гуртэ кылемъёслэн йыр вадьсазы пуля гинэ ӧз шула, кылемез ожын кадь ик вал: уй-нунал тыршоно, нюръяськоно. Апачи гуртэз утемзы понна, туж бадӟым тау карисько но музъемозь ик йыбырттӥсько Агафья Терентьевналы, солэн нылпиосызлэн нылпиосызлы Сергейлы но Колялы, Мария Терентьевналы, Констан Арсентьевичлы, Зоя Егоровналы. Юн тазалык но шудбур тӥледлы, гурто Апач гуртэз утисьёслы! А. Васильева. Апачи гуртын будэм мурт. Американецъёсты тортэн куноятӥзы Воткинскын улӥсьёс яратыса басьто городысьтызы нянь пыжон комбинатын пыжем тортъёсты. Та ческыт сиёнэз тужгес но уно дасяло праздник нуналъёсы. Выль ар азьын но татын со 14 тонналэсь уно лэсьтэмын вал яке 18 сюрслэсь тросгес. Кылем арлэн пумаз гинэ воткаос 6 выль пумо торт пыжыны ӧдъязы. Со - "Незнайка", "Сюрприз", "Полярный", "Пчелка", "Кокосовый" но "Шоколадно-лимонный". Одӥг номеро школалы комбинат куать бадӟымесь торт кузьмаз. Нош американецъёслы сётӥзы гурт суредъёсын торт. Сое куноос видеоплёнка вылэ пуктӥзы. Со сяна, предприятие ньыль нылпи садлы кузьымъёс басьтыны коньдон висъяз. Нянь пыжон комбинатлэсь вуззэ озьы ик ӟеч басьто Ижевскын, Чайковскийын, Пермьын, Нефтекамскын. Басьяськисьёслы тужгес кельшо пряник, сушка, сукари. Али татын 100-лэсь уно кондитер вузъёс но, 100-лэсь уно нянь но булкаос потто. Т. Горохова. Зарниен узыр ар Президент Александр Волков, премьер Юрий Питкевич, спикер Игорь Семёнов, ректор Николай Стрелков, директоръёс Владимир Гродецкий, Валентин Жебровский но Николай Юшков, композитор Александр Корепанов, режиссёр Василий Ушаков, артист Александр Перевозчиков, артистка Фаина Будина, журналист Людмила Перевозчикова... Кызьы малпаськоды, ма герӟа та дано адямиосты? Шонер. Ваньзы соос туэ 50 арес тырмонзэс пусъё. Зарни юбиляръёс туннэ кивалто элькунэнымы, азьлань нуо бадӟым предприятиосты, ворекъяло наука, культура, искусство удысъёсын. Ойдолэ сӥзём соослы шуд но тазалык. И.МАКСИМОВ. Наталь Юрттэм уз лу дэлеттэм Удмурт Республикаысь Правительстволэн Тӧроез луыса Николай Ганза кивалтон структураез ӧжытак "пужноно" кариськиз. Озьы Правительствоын кулэстэмын вал демография но семья ужпумъёсъя отдел. Со понна йылӥз Калыкез улон-вылонын утёнъя министерстволэн ужез. Кылдӥз семья но нылпи ужпумъёсъя нимысьтыз отдел, кивалтэ соин Ольга Васильевна Басс. Ужпумъёс туж трос: синйылтыса возёно но юрттоно инвалид нылпиослы, трос нылпиё но ёрмись семьяослы, анай-атайтэк кылем но семьязылы кулэтэм нылпиослы. Отдел возиське ньыль мурт вылын. Правительствоысь демография но семья ужпумъёсъя отделэз быдтэмен, шаерысьтымы семья ужъёсын вырись ёзъёс пӧлын шугъяськонъёс кылдӥзы вал: соосты но кулэтэмен уз лыдъялэ-а, пе. Кызьы валэктӥз Ольга Васильевна, министерство огкыл шедьтэ ваньмыныз. Куд-ог ёрос администрациосын семья ужпумъёсъя отделъёс огазеяськизы калыкез улон-вылонын утён отделъёсын. Нош куд-огаз соос азьло сямен ик ужзэс азьланьто. Зэмзэ но, огъя ужлы со уг ке люкеты, мар отын умойтэмез. Ӧз ворсаське "Семья" центръёс но. - Ижевскысь администрациын кылдытэмын семья ужпумъёсын вырись комитет. Соин туж быгатыса кивалтэ Галина Шамшурина , - шуэ Ольга Васильевна. - Нош Воткинскын калыкез улон-вылонын утёнъя отдел но семья ужпумъёсъя отдел огазеямын. Ужез одӥг ӧре радъямзы мукет ёросъёслы но адӟем карымон азинске. Татын усьтэмын нылпи приют, инвалид нылпиослы но соослэн семьяоссылы центр. Юрттэт сёто шуге-леке сюрем арлыдоослы но. "Семья" центр усьтӥськиз Глазовын. Татын нимысьтыз саклык висъяло оже пыриськемъёслы улон-вылонын юрттон ужъёслы. Мукет ёросъёсъя но трос умойзэ вераны луысал. Ужамы пусйымонэз со но. Ёросъёсысь улон-вылонын утёнъя центръёсын тазалыксэс гужем юнмато инвалид нылпиос, ёрмыса улӥсь но, шугъяськытӥсь семьяосысь но нылпиос. Группаын соос дас вить кузя луо. Озьы социальной педагогъёс котькудӥз доры вуттӥськыны быгато. Сыӵе ужлэн пайдаез но син шоры йӧтымон. Тросаз ёросъёсын кылдытэмын ни инвалид нылпиосын ужанъя нимысьтыз центръёс. Церебральной параличен висись нылпиос понна матысь дыре усьтӥськоз выль центр. Ижевскысь одӥгаз нылпи садын али тупатъян-выльдон ужъёс мыно. Та центръёсын сяна, инвалид нылпиос тазалыксэс юнмато санаторийёсын но курортъёсын. Тросэзлы путёвкаос висъяськом Варзи-Ятчие. Инвалид нылпиос шаерамы сюрс пала лыдъясько. Бадӟым уж нуиське трос нылпиё семьяосын. Отделамы пусъемын юрттэтлы кулэяськись 10 сюрс пала сыӵе семьяос. Семьялы но нылпиослы юрттонъя Россия Федерациен но Удмурт Правительствоен сю пала пӧртэм программаос кутэмын. Котькин мед ужалоз соосты быдэстон бордын: Калыкез улон-вылонын утёнъя министерство яке Тазалыкез утёнъя министерство, мед гинэ шӧдӥськоз солэн пайдаез? Л. Малых. НАТАЛЬ Синучкон азьын Аслым ачим - парикмахер Кыӵе ке праздник-а, вордӥськем нунал-а яке огшоры нунал - нылкышнолэн котьку но чебер луэмез потэ. Дӥськут гинэ ӧвӧл, валаса но быгатыса утялтэм йырси но нылкышноез синмаськымон каре. Но гуртад парикмахерскоед ӧвӧл ке, уксё но котьку дыръя уг тырмы, чеберъяськон борды аслыд басьтӥськытэк уг луы. Оло, кинлы ке кельшозы милям ӵектонъёсмы но. Вакчи ӵышкем йырсилы Пуштырес карон понна, йырсиез биняно бигудие: йырпыдэсысен кутскыса, чырты берозь, пельдӥнь котыръёстӥ, собере йырпыдесысен кымес дорозь но йырвӧзно (висок) котыръёстӥ. Бигудиез биняно йырси будэмъя. Табере йырез зырано йырсилы чаклам пенкаен яке лакен пызъёно. Кызь минут пала ортчыса, бигудиосты басьтоно - йырси кульчоос медаз пазьгиське. Фенэн яке котырес сынэн (щёткаен), чиньыосын йырсидэс асьтэлы тупамон каре. Вылтӥз пызъёно на лакен. Кузь йырсилы Суредын возьматэм таӵе причёска умой мед возиськоз шуыса, йырсиез сурен зырано. Лэсьтоно тазьы: ӵашае кӧня ке сур кисьтыса, ӧжытак ватсано на мычиськон пенка яке крем. Ӟеч-ӟеч суралтыса, йырсие зырано. Куасьтоно фенэн. Табере кутском причёска лэсьтыны. Вань йырсиез огазе люкаса, йырпыдэсэ быж керттоно. Котыр йырсиез векчи сынэн сыналтоно но лакен пазьгоно - пуштырскемъёсыз медаз кыле. Нош быжез векчи сынэн йырси будэмлы пумит сынано (начёс лэсьтоно). Табере пӧртэм причёскаос лэсьтыны луоз. Сяська. 1. Векчи сынлэн ныдыныз яке карандашен быжысь йырси нюжаез висъяно но азьлань сынано. Пызъёно лакен. Йырсиез сынэн волятыса, фенэн куасьтоно. Быж борды бинялтыса, йырсиез пичи тэчетэн (невидимкаен) кутоно. 2. Тазьы ик лэсьтоно луоз сяськалэсь мукет бурдъёссэ но. 3. Быжлэн шораз векчигес йырси нюжа кельтоно. Лакен пазьгыса, сое куасалтыса бинялтоно. Йырси борды шпилькаен дэмӟытоно. Со луоз сяськалэн шорсюлмыз. 4. Векчи йырси нюжа кельтыны луоз чырты котыре яке пель дортӥ. Плойкае яке бигудие бинялтыса, кульчо бабыльтоно. 5. Дась причёскаез пызъёно лакен. О.КОЖАНОВА. Суредэз С.Михайловалэн. Витё кузьымъёс но долларъёс Коммерциен герӟаськымтэ "ПЕГАЗ" организацилэн дирекциез Россиысь журналистъёс пӧлын сизьыметӥзэ радъя "ПЕГАЗ-2000" конкурс. Отын возьматэмын луыны кулэ Россиын 2000-тӥ арын эстӥськонэз, шунытэз но электрокужымез (топливно- энергетической комплекс яке ТЭК) кутонъя но шыръянъя ужпумъёс. Конкурсын вормисьёсты данъян дипломъёс, нимысьтыз кузьымъёс, озьы ик 1500 доллар (США) премиос. Конкурс пумысен пыр-почгес тодэмды луоз Удмурт Республикаысь Печатъя но иворъёсъя министерствоысь 78-57-69 телефонъя. Визьнод визьмын ик басьтӥське Выльдӥськон шуон вакытэ улон-вылонамы, зэмзэ но, олокыӵе но воштӥськонъёс луизы. Кылылымтэ-адӟылымтэез кылдӥз яке вунэмез берытскоз. Озьыгес кошкиз калыкез дышетон удысын но. Кылдо гимназиос, лицейёс, колледжъёс, институтъёс университетлы яке академилы пӧрмо, шуныт зор бере губи кадь, кылдыло пӧртэм вузъёслэн филиалъёссы. Уродэз ӧвӧл кадь татын, пыр но дышетскы, визьнод люка. Нош озьы гинэ уг луы вылэм. Удмурт Республикаысь Правительстволэн ортчем кенешоназ но юнме шорысь ӝутэмын ӧй вал пӧртэм специалистъёсты дасясь учреждениослэсь ужамзэс эскеронъя ужпум но. Кызьы ивортӥз Дышетон удысын аккредитациос но лицензиос сётъянъя комитетлэн кивалтӥсез А. В. Еременко, али республикаямы пӧртэм специальностьёслы дышетонъя 350 пала учреждениос лыдъясько. Соос пӧлысь тросэз ужало дышетскисьёсты дун тырытыса. Кызьы тодмо луиз эскерон-чакланъёс дыръя куд-огез шор ёзо но вылӥ дышетон учреждениос законъёсты тӥяса ужало. Кылсярысь, пуктэм куронъёслы уг тупало материально-технической инъетсы но дышетон программаоссы. Озьы, миым эскеронъёс бере ньылезлэн учреждениослэн лицензиоссы таламын. Соос пӧлын Ижевскысь Информатикая но телекоммуникацияя колледж. Нош Глазовысь механикая Чепца заводлэн автошколаезлы специалистъёсты дасянэн вырыны алэмын. Та школа пумысен материалъёс прокуратурае сётэмын. Кызьы пусъемын вал кенешонын дышетскисьёслэсь уксёзэс кыскыны турттыса гинэ кылдытэм учреждениос дышетон удыслэсь данзэ гинэ куашкато. Отын басьтэм дипломъёс но: кун учреждениосын сётӥськисьёсызлы уг, пе, тупало. Тӥни уноез дышетскисьёс, уксёзэ быдтыса но, юмоке сюро, басьтэм дипломъёссыя дышетсконзэс азинтыны уг быгато. Тӥни соин валче ик Алла Васильевна анай-атайёссылы таӵе визьноданэн вазиське: дышетскыны пырон азяды, уксё тыремдылэсь азьло пыр-поч тодмастке соиныз яке таиныз дышетон учреждениен. Тодыны тырше, вань-а солэн лицензиез, ортчемын-а аккредитациез, кыӵе вузлэн филиалэз яке люкетэз луэ со, кыӵе документъёс сёто отын. Визь люкам интые, вузьтэм медам кыле. Н. Корякин. Коммунистъёс "вордӥзы" газетсэс Та нуналъёсы Россия Федерациысь коммунистъёслэн партизылэн Удмурт рескомез выль газет "вордӥз". Нимаське со "Новое время Удмуртии" шуыса. Тиражез 5 сюрс экземпляр. Нырысетӥ бамаз ик вераськон мынэ куанеръёсты но пересьёсты шугадӟонлэсь утён сярысь. Со пенсиослэн быдӟалазы, дунъёслэн будэмзы. Кыкетӥ но куинетӥ бамъёсын сётэмын та дыре КПРФ азьын сылӥсь ужпумъёс. Газетын печатламын удмурт коммунистъёслэн йырзылэн Николай Сапожниковлэн малпанъёсыз, пӧртэм иворъёс, дэмланъёс. Н. Лялин. Котькуд скалэсь - 5 тонна йӧл Сомында йӧл кыско Пичи Пурга ёросысь УАССР-лы 10 ар нимо племзаводлэн Пуро- Можга фермаяз ужась дояркаос котькуд скалзылэсь ар ӵоже. Доярка П. Н. Мишкина миым скаллы быдэ 5079 килограмм йӧл кыскиз, ваньзэ - 965 центнер, ӵош ужась эшъёсыз - котькуд скалзылэсь 5 сюрс килограммлы матын, ваньзэ - 928 центнерозь. Туэ толшоре но быдэс фермаын скаллы быдэ люкаське 13 килограммлэсь уногес. Тол шорын. Геройёс. П. Николаев. Удмурт Республикаын "Ветеранъёс сярысь", "Россия Федерациын инвалидъёслы улон-вылонын юрттон сярысь", "Нылпиослы кун пособиос тырон сярысь" федеральной законъёсты быдэстонлы Федерацилэн бюджетэз чотын 2001-тӥ арын коньдон висъян радлык сярысь Удмурт Республикаысь Правительстволэн постановлениез Удмурт Республикалэн 2000-тӥ арын 26-тӥ декабре юнматэм "Удмурт Республикалэн 2001-тӥ арлы бюджетэз сярысь" 321-ИИ номеро Законэзлэсь 33-тӥ ёзэтсэ быдэстон вылысь, Удмурт Республикаысь Правительство пуктэ: 1. Юнматоно Удмурт Республикаын "Ветеранъёс сярысь", "Россия Федерациын инвалидъёслы улон-вылонын юрттон сярысь", "Нылпиослы кун пособиос тырон сярысь" федеральной законъёсты быдэстонлы Федерацилэн бюджетэз чотын 2001-тӥ арын коньдон висъян радлыкез. 2. Удмурт Республикаысь Калыкез улон-вылонын утёнъя министерстволы "Ветеранъёс сярысь", "Россия Федерациын инвалидъёслы улон-вылонын юрттон сярысь" федеральной законъёсын тупатэм льготаослы но "Нылпиослы кун пособиос тырон сярысь" законэн тупатэм пособиослы коньдон висъяно 2001-тӥ арын 1-тӥ январьысен, та удысъёслы бюджетын чаклам коньдон чотын вылӥ верам радлыкез лыдэ басьтыса. 3. Юнматоно 2001-тӥ арлы "Ветеранъёс сярысь", "Россия Федерациын инвалидъёслы улон-вылонын юрттон сярысь" но "Нылпиослы кун пособиос тырон сярысь" федеральной законъёсын тупатэм льготаослы но пособиослы чаклам коньдонэз городъёсы но ёросъёсы люкылон радлыкез. 4. Городъёсысь но ёросъёсысь администрациослы дэмлано: "Ветеранъёс сярысь" но "Россия Федерациын инвалидъёслы улон-вылонын юрттон сярысь" федеральной законъёсын юнматэм льготаослы чаклам коньдонлэсь тырмымтэ люкетсэ висъяно интыосъя бюджетысь. 5. Удмурт Республикаысь Правительстволэн тӧроезлэн воштӥсезлы Н. А. Хариналы, калыкез улон-вылонын утёнъя министрлы С. И. Андреевалы городъёсысь но ёросъёсысь администрациосын ӵош та постановлениез быдэстон пумысен ӵектонъёс дасяно. Та постановленилэсь быдэсъяськемзэ эскероз Удмурт Республикаысь Правительстволэн Тӧроезлэн воштӥсез Н. А. Харина. Удмурт Республикаысь Правительстволэн тӧроезлэн воштӥсез Н. И. Хохлов. Ижын - сьӧрлось куно Кылем арнялэн пумаз Сьӧрлось кунъёсын кусыпъёсъя министерствоын ортчиз США-ысь ужбергатӥсен - му вӧй удысысь тодмо экспертэн Норман Стэндимен пумиськон. Та нуналъёсы со ужаз Ижысь акциосын "Луч" огазеяськонын. Кӧня ке дыр ӵоже США-ысь ужбергатӥсь тодматскиз та предприятилэн маркетинг удысысь вормонъёсыныз, пластмассалэсь дасям тӥрлыкеныз, солэн улӥ яке вылӥ ӟечлыко луэменыз. Со вакытэ ик пусйиз: таӵе ик ведраосты, тусьтыосты, кобыосты, сускичъёсты соос возьматъяло Америкаын радъяськылӥсь адӟытонъёсын. Соос пӧлысь котькудӥз ньыль-вить буёло луэ. Норман Стэндим ивортӥз: Ижысь акциосын "Луч" огазеяськон пыд йылаз йыг-йыг сылэ, азьланяз эшшо ӝутскоз. Сьӧрлось куно кӧня ке кыл вераз ачиз сярысь но. Али Норман Стэндимлы сизьымдон арес. Наукаосъя доктор. Аслэсьтыз удыссэ туж яратэ. Кусып возе Америкаысь кӧня ке тодмо фирмаосын. Тодмо ужбергатӥсьлэн вашкала ӵыжы-выжыосыз но узыр адямиос вылӥллям. Ачиз со, аслаз удысэныз вырем сяна, мылкыд карисьёс понна нимысьтыз кунокуа но возе на. Иже лыктэмезлэсь азьвыл Норман Стэндим вуылэм вылэм ни Хабаровск улосэ, Ростов-на-Дону городэ. Шоркармы но солы туж ярам. Е. Максимова. Выльысь кылдоз калык дружина Уваысь коммунальной хозяйствоын ужасьёслэн ортчем профсоюз собраниязы директорзы К. А. Коняров ӵектӥз выльысь калык дружина кылдытыны. Отчы ваньмыз ас мылкыд каремзыя гинэ пырыны кулэ. Пӧрмоз-а, уз-а кивалтӥсьлэн малпанэз? Бен, нырысь-валысь шедизы дурбасьтӥсьёс но, пумит луисьёс но. Но коллективын ёросысь Кенешлэн депутатъёсыз куинь кузя. Соос ик кутскозы, дыр, та ужез, вӧзазы дежурствое потозы дурбасьтӥсьёс. Нош бӧрысьгес, дружинникъёс льготаос сётон сярысь кенешемзы бере, урамын югдурез утёнэ пыриськисьёс тросгес луозы. Владимир КОТКОВ Магнето Верос Котьма каре но, воксё уг тодӥськы ни, кытысь вуиз вал мон кие тракторлэн ужась магнетоез. Кытысь ке лушкамын ӧй вал, дыр, малы ке шуоно, тодӥсько на: мон сое котькинлы возьматъялляй. Бадӟымъёслы но. Кыӵе магнето сярысь верасько, шуиськоды-а? Ма, магнето но магнето. Воргоронъёс тодо. Нош мынам соин эшшо но пичигес дыръям тодматскеме вань. Карау коркан (возьмаськон коркамес озьы шуо) тодматӥзы. Оломар ми отчы вуим вал Дыдык эшеным. Нылъёсын возьдаськытэк шудон вакытэ вал ай со, ньыль-а, вить-а арес вал милемлы... Карау коркан шокчыны луонтэм ӵын. Сёромно отчы ик пыриськом. Трактористъёслэн серекъямзы-а, мар-а гочатӥз. А соос кучыранэз серекъяло вылэм. Ой, кыӵе тумошо со кучыран! Соку нырысьсэ адӟи. А малпано ке, собере ӧй но адӟылы ни. Воргоронъёс солэн пыдаз ез думыло но мае ке бергато, соиз тэтча, кытчы пырон инты уг шедьты. "Учке ай, гижыысьтыз тыл пазяське!" - горо гуртоос. Собере милемыз но ез борды кутскыны косӥзы. Мугортӥмы ток кошкиз. Тодӥсько на: Дыдык туж кема бӧрдӥз. Мон то ӧй, мон воргорон выжы ук. Тӥни озьы тодматски вал со магнето шуонэнызы. Табере аслам вань. Соин мар карыны но тодӥсько ини. Турын октон вакыт вал соку. Колхозлы умой азьысь, нош колхозникъёслы пырыны луонтэм интыосысь, арамаосысь турнан инты сёто. Соин ик вож турынэз, гуртэ вайыса, ураме вӧлдыса куасьтоно луэ. Сыӵе вӧлдэм турын шоры учки но, йырам одӥг малпан чилектӥз. Кузь ез шедьтӥ, сое турын ултӥ сюрес дорозь ик кыски, пумаз сэрттӥськем радиоприёмник юнматӥ. Сё, дась. Льӧмпумы улэ ватски но магнетоме кутыса витисько. Тӥ асьтэос малпаське ай, кыӵе пияш уз дугды но киыныз ик уз кырма тӥяськем радиоприёмникез? Нырысь ик Камень Миша вуиз. Со ыжъёссэ отӥ улля вал. Чилясь мае ке адӟиз, со доры матэктӥз, котырак учкиз, мыкырскиз, ӝутӥз... Отӥзэ ӧй ни адӟы: Камень Миша ой! шуэмысь, ыжъёсыз туж зол тузон поттыса пегӟизы, номырзэ валаны ӧйлась ни. Собере великез вылын бускель эше, Ромка Вова, ортчиз. Огпол, кык пол... Дугдытэк ӧз чида. Великсэ выдтӥз но камеразэ эскеремъяське, ачиз пумен багажниказ приёмникме юнматэ ини. Мон ка-ак! берыктӥ магнетоме, Ромка Вова ка-ак! тэтчиз интыысьтыз - великез но, приёмникез но кулэ ӧйлась ни. Мыным так-то жаль потӥз со: ватскем интыысьтым ураме потӥ. Лык, шуисько, маке но возьмато. Дӥсьтытэк вуиз, магнетоме адӟиз но соку ик ваньзэ валаз. Солэн атаез тркторист, ачиз но трактор чер но - тӥни. Ми соин магнетоен кема шудӥм. А кызьы шудод соин? Ма, кызьы ке шудӥм но шудӥм. Малпано ке, котьмаин шудыны луэ. Ӵуказеяз ик магнетое чиптэм-чаптэм ышиз. Котькытысь утчай - ӧвӧл. Нокинлы ӧй поттылы, мынӥ Ромка Воваослэн сад-бакчаязы. Точно - отын! Мар лэсьтэм солэсь Вова - валаса ӧй быдты. Кыӵе ке гидроэлектростанцилы укша вал. Мон магнетоме басьтӥ но - аслам сад-бкчаям, азьло интыям. Нокинлы ӧй вера. Ромка Вовалы гинэ но. Нош ӵуказеяз, вазь ӵукна ик пумиськеме бере, нош ик шудыны ӧтисько. Посӥське, тодэ уго: магнето мон дорын ӧвӧл ни. Бакчаысьтым ышемез сярысь тодэмез бере паймемъяськыны быгатоз шуыса, лэся, мынӥз ик. Учке но - магнето интыяз. Мон соку нырысьсэ адӟи адямилэсь пумен бадӟымась синъёссэ. Бӧрысь бен трос пол адӟылӥ на ай. Ромка Вова монэным трос ӧз шуды, кыӵе ке муг шедьтыса тӧлаз. А мон тодӥсько, кытчы мынӥз. Озьы ик вань - сад-бакчаяз уйжомем кадь ветлэ. Вот тыныд покус-мокус! Мар меда малпаз эше та нуналэ? Лушкам макеослэн вашкала кузёзы доры берен берытскон сямзы вань шуыса малпаз, дыр, со. Мед малпалоз: мултэс уз лу. Нош мон бӧрысь ини жаляса малпай: кузьмано гинэ вал эшелы со магнетоез. Малы со мыным, трактор котырын вырисьтэм муртлы? Вылаз ик, мон киын кема ӧз улы, выльысь ышиз. Ӧз, Ромка Вова ӧз ни басьты. Сое нуиз, луоз, лушкам макеослэсь кузёзы доры берытскон сямзэс тодӥсьтэмез. Бен, кузьмано вал Вовалы ик. Тӥни ук кыӵе тунсыкъяське со пӧртэм машинаосын... Ромка Вова али армиын. Кылиз танковой часте. Прапорщик. Танк - трактор ӧвӧл, кужмо маке. А нош вань меда солэн магнетоез? Юа мынэсьтым... Туж шер ке но, эше гуртэ вуылэ. Ми соин магнето сярысь ум вераськиське, мукет тодэ ваёнъёс уно. ЖУРНАЛИСТЪЁСЫН ПУМИСЬКОНЪЁС Кин ваньбурлэн кузёез? Куд-огез шуэ, выльдӥськон (реформаос), пе, гуньдэмын. Нош Правительстволэн Тӧроезлэн воштӥсезлэн, ваньбур кусыпъёсъя министрлэн Сергей КАСИХИНЛЭН ивортэмезъя, туннэ бадӟымесь воштӥськонъёс мыно. Со сярысь вераськон вал журналистъёслэн пумиськоназы. Кызьы тодмо, алигес юнматэмын Удмурт Республикаысь Правительстволэн ёзъёсыз. Татын вылез но вань. Кылсярысь, Асваньбуръя кун комитет интые кылдытэмын Ваньбур кусыпъёсъя министерство. Солэсь ужзэ радъялоз Сергей Павлович Касихин, та ужпумез ӟеч тодӥсь-валась адями. Берло дас ар ӵоже со кун ваньбурез вузанэн выре. Нош выль министерство азе бадӟымесь ужпумъёс пуктэмын. Табере со музъемен герӟаськем ужпумъёсты но быдэсъялоз.. Ӝоген учкемын луоз музъемез федерация, улосъёс но интыос куспын люкон. Тая Кун Дума законопроект кутӥз ни. Сое эскероз на Федерация Кенеш. Сыӵе люкон юнме шорысь угортчы. Угось интыосын музъемез уже кутонын трос тырмымтэос пумиськыло. Та ласянь Сергей Павлович уно учыръёс вераз. Выль министерстволэн туннэ ужъёсыз сярысь вераса, али со бадӟым инты висъя акционер огазеяськонъёслэн директоръёссылэн кенешъёсазы кун адямиосты пыртонлы. Соос луозы сыӵе огазеяськонъёсын, кытын вань кун ваньбур, нош федерация ваньбурен предприятиосы Москва ачиз адямиос утча. Та уж огдыре лэсьтӥське. Шаерамы 40 пала акционер огазеяськонъёсы кун адямиос ыстоно луоз. Соос сюлмаськыны кулэ производствоез азинтон но экономикаез юнматон сярысь. Али тани "Ижевский завод пластмасс" АО-лэн акциосыз 2 миллион манетлы вузамын. Со мыноз предприятиез выльдонэ, ужаны кутскоз "Зарни акция сярысь" Закон. Шаерамы 20 акционер огазеяськонъёслэн тӧрооссылэн быръем дырзы быре. Соос пӧлы пыро "Ижмаш", "Прогресс" НИТИ, "Аксион" но мукет предприятиос. Нош "ИЭМЗ "Купол" кун предприятилы али ке но выль директор шедьтымтэ. Адямиос вань, нош кинэ юнматозы - тодмо ӧвӧл на. Таин ӵош ик али уж нуиське сое вузан, акционер огазеяськон карон ласянь. Нырысь малпамын вал акциоссэ тазьы люкыны: федеральной ваньбуре 51 процент сётыны, республикалы - 25,5, нош 23,5 процентсэ коммерческой конкурсын вузаны. Но али югдур воштӥське, Москва ваньзэ акциосты, 100 процентсэ ик кияз кутыны чакла, со, пе, кун федеральной ваньбур луоз. Но отысь кивалтӥсьёс вунэто: Россия но Удмуртия куспын ваньбурез люконъя 1995-тӥ арын огкыл кутэмын. Россия Федерацилэн Президентэзлэн администрацияз со документэз лыдэ басьто, юридической кужымзэ уг вунэто. Соин ик предприятиез вузаку, республикалы одно ик акциосыз ыльыны кулэ. Кӧняез? Сое нимаз учконо-эскероно луоз. Та ужлэсь палэнскыны кулэ ӧвӧл Владимир Путин но мукет кивалтӥсьёс. Туэ озьы ик вузамын луозы Ижысь механической завод но Воткинскысь машзавод. Но али тодмо ӧвӧл на, кыӵе амалэн акционирование ортчоз. Кызьы бен ужало акционер огазеяськонъёс? Миым быдэс республикая соослэсь 13,6 миллион манет дивиденд басьтэмын. Со пӧлысь 11,2 миллион манетэз Удмуртие кылемын, нош 2,4 миллион манетэз Россие кошкемын. Но правительство уг тыршы предприятиослэсь пайдазэс ваньзэ басьтыны. Тани Можгаысь "Свет" ОАО табышез чотын 2 выль цех пуктӥз. Со табере уката тросгес ваньбур поттоз, озьыен, кун но интыысь бюджетэ уногес выт вуоз но экономикаез юнматыны юрттоз. Нимысьтыз верам потэ Сарапулысь нянь комбинат сярысь. Солэн 100 акциез кун киын. Директоръёслэн кенешазы пыртэмын кунлэн, городлэн но ужась коллективлэн адямиоссы. Со озьы каремын, няньлы но солэсь мукет сиёнъёслы дунъёсты чаклан возён понна. Акционер огазеяськонъёсын кунлэсь интызэ будэтон вылысь, али нормативной актъёс дасясько. Соя акциосын огазеяськонъёсын но интыысь унитарной предприятиосын лэземын луозы аудит эскеронъёс. Соин ӵош ик ваньбурез вузанъя программаез ужась комиссия учкиз ни. Собере кылзэс вералозы Правительство но Кун Кенеш. Но "Чепецкий механический завод" ОАО-лэн 51 процент акциосыз федерацилы сётэмын, шонергес вераса - "Твел" акционер огазеяськонлы. Нош таизлэн вань акциосыз кун киын. Ялан секыт шока "Ижмаш" огазеяськон. Со огдыре 100 миллион доллар кредит басьтылӥз. Дыр ортче, табере сое берыктоно, нош предприятие пыд йылаз уг султы. Шаерысьтымы балансъя комиссия ӝоген эскерыны кутскоз котькуд предприятилэсь ужамзэ но кызьы азинскемзэ. Правительство но выль министерство та ужлы шӧдскымон саклык висъя. Со уго люконтэм герӟаськемын экономикаез юнматонэн но калыклэсь улон-вылонзэ умоятонэн. Берытском музъем борды. Интыысь вань музъемъёс нырысь ик сётэмын луозы кунлы, нош берлоез сое выльысь интыослы дунтэк висъялоз. Сыӵе радлык тупатэмын. Геннадий РОМАНОВ. 100 усто вузъёс пӧлын Кыкетӥ арзэ ини пусъё Сарапулысь радиозаводэз Россиын ортчылӥсь "Россиысь 100 устоосыз вузъёс" конкурсын. Миым диплом сётэмын "Урал РМ-292 САЗ" автомагнитолаын "Урал-25 АЩА" акустикаен системалы. Та дыре заводын мынэ ӟечлыкез пыӵатонъя ужрад, со тупаны кулэ калык куспо стандартъёслэн куронзылы. Соку вузъёсты вузаны паськытэсь сюресъёс усьтӥськозы. Н. Мусин. НАТАЛЬ Нылпиез кубистаысь эн утча Выль дауре выжон арлэн нырысетӥ нуныез быдэс шаермыя луиз Шаркан ёросысь Мувыр гуртысь Елена но Андрей Никитинъёслэн Иван пизы, вордӥськиз со Ижевскысь больницаын. "Удмурт дунне" газет егит семьялы кузьмаз коляска. 2000-тӥ аре ик 1-тӥ январе 21 час 45 минутэ Шарканын вордӥськем нырысетӥ нунылы, Выль Пашурысь Валентина Поткиналэн Аделина нылызлы, ёрос администрация озьы ик кузьмаз коляска. Егит кузпалъёслэн Наталья но Руслан Ширбоквоъёслэн пизы вордӥськиз 2001-тӥ арын 1- тӥ январе 01 час 30 минутэ. Выль дауре нырысетӥ вордӥськем нунылы Шаркан ёрос администрация нош ик кузьмаз коляска. Кузьымен удалтэм сяна, Шаркан музъем нылпиосын но узырмиз: нуны вордӥськон кылем арын ортчиз кулон учыръёсты. Югдурез валэктыны курыса вазиським ёросысь загсэн кивалтӥсьлы Вера РАЙКОВАЛЫ. - 2000-тӥ арын ёросамы вордӥськиз 285 нылпи: 139 пи но 146 ныл. Кыкто нылъёссы вордӥськизы Шарканысь Захваткинъёслэн. Туэ но кыктоосмы вань ни. Тани Вуж Байбек гуртысь Людмила но Юрий Малых куамын арессэс ортчыса кузпалъяськизы, инмар соослы ныл но пи кузьмаз. Нылпиоссылы Ирина но Кирилл ним понӥзы. Кылем арын вордӥськем 285 нылпи пӧлысь 50-эз семьяын нырысетӥ нылпи луэ; 85-ез - кыкетӥ; 36-ез - куинетӥ, 18-эз - ньылетӥ. Сюлэмшугъяськыто карттэк нылпи ваён учыръёс. Кылем арын 101 нылпи вордӥськиз огнын анайлэсь. Паймымон соиз но: кузпалъяськон кулэсме, нош нылпиос тросгес вордӥсько. Тани кылем арын ёросамы 80 семья кылдӥз, нош 1999-тӥ арын - 108. Огласянь сое валэктыны луоз, дыр, качыян (високосной) ар кемдэмен но. Нош мукет ласянь, выльдӥськиз нылпи пособие тырон сярысь закон. Азьло кызьы вал? Огнын анай пиосмуртэн гожтӥськытэк улэ ке, нылпиез понна солы пособие уг сётӥськы ни. Табере пиосмуртэн улэм лыдэ уг басьтӥськы. Оло, соин но егитъёс кузпалъяськыны уг дырто. Азьло аръёсын ӵошатыса, ӧжытгес кузпалъясько быдэ вуымтэос. Нош семья кылдытыны мылкыд карисьёс малпаськыса гожтӥсько. Будӥзы люкиськон учыръёс: 1999-тӥ арын 21 семья таркаськиз ке, 2000-тӥ арын - 29- эз. Тямысэз кышноен картъёс кызь арлэсь кемагес ӵош улӥзы. 26-ез семья суд пыр люкиськиз, 2-ез - приговоръя. Одӥгез гинэ семья ми пыр потӥз: таосызлэн нылпизы ӧй на вал, соин ик ог-огенызы вожвылъяськонъёссы ӧз кылды. Мар вераны луысал люкиськонъёс пумысен? Асьсэды но нылпиоссэс сюдыны-вордыны быгатӥсь нылкышноослэн ярантэм картъёссылы оскиськыса улэмзы уг поты ни, палэнто соосты семьязылэсь. Туэ люкиськиз ни 1 семья, нош кылдӥз - 5 вылез. Вордӥськиз та дыр куспын 17 нылпи (кылем арын февралёзь 26 нылпи вал ни). Кузпалъяськисьёс гожтӥсько Шарканысь культура юртын. Залэз отын выль сямен чебермамын, гожтӥськон рад но егитъёслы кельше. Татчы лыкто быдэс ёросысь семья кылдытыны мылкыд карисьёс, городъёслы но кельше ми дорын. Кӧня ке кыл верасал на зарни сюанзэс пусйисьёс сярысь. Витьтон ар ӵоже улэмзэс сӥё-дано пусйыны кылем арын мылкыд каризы дас куинь кузпалъёс. Котькудӥз доры ми асьмеос потамы. Кузьымъёсын пусъем сяна, Удмурт Республикаысь Президентлэн Александр Волковлэн но ёрос администрацилэн йырызлэн Александр Прохоровлэн нимынызы ӟечкылан гожтэтъёс сётъямы. Та ужрадъёслы коньдон висъя ёрос администрация. Туэ но та ужмес азинтом. Зарни сюанзэс сӥё-дано пусйыны чаклало дас кузпалъёс. ДАРТ Умоесь, редакциын ужасьёс! Туж тау карисько тӥледлы "Йырсиосме лӧсьяло..." конкурсады пыриськеме понна чебер кузьым сётэмдылы. Табере ноку но йырсиме уг ванды ни. Эшъёсы туж вожъясько, тыныд удалтӥз, шуо. Соин ик ми возьмаськом на выль конкурсъёстэс, оло, соослы но шуд усёз кудаз ке вормыны. Эшшо огпол тау карыса Оксана Иванова. Туймыйыл гурт, Алнаш ёрос. Сюлэмыз усьтӥськемын вал Ар талэсь азьло шудтэм учыре шедьыса быриз Москваысь удмуртъёслэн "Герд" огазеяськонзылэн тӧроез, Москваысь "Удмурт дэменлык" огазеяськонын ужась Владимир Юрьевич Танаев. Туэ, 28-тӥ январе, солы тырмысал ни куамын тямыс арес. Владимир Юрьевичлэн улонэз чигиськиз вылӥе ӝутскон вакытаз. ас удысаз зэмос усточи, ӟеч тодон-валан басьтэм адями, полигонын но инсьӧры лобанъёсын кивлатонъя Центрын ужаса, отӥяз туж кулэ луиз Россия Федерациысь Обороная министерствоын. 1994-тӥ арын Москваысь удмуртъёслэн "Герд" огазеяськоназы вуыса, лулысь- сюлмысь ужаны кутскиз калыкез понна. Аслэсьтыз бырисьтэм тылкужымзэ мукетъёсызлы но сётыса. Нырысь ик вал "Герд" огазеяськонлэн кивалтэтаз, собере солэн тӧроез луиз. Владимир Танаев ялан пыриськылӥз Москваысь пӧртэм калыкъёслэн кенешъёсазы, кӧня ке ар ӵоже сое ӟеч тодо вал ини пӧртэм выжыослэн огазеяськонъёссылэн кивалтӥсьёссы. Трос калыкъем Москвалэн улон-вылоназ тужгес яркыт пытьы кельтӥзы эшъяськонлы сӥзем ӝытъёс. Соосты ортчытъян сярысь но туж сюлмаськылӥз Владимир Юрьевич Танаев. Кияса ёросысь Вуж Тӥгырмен гуртын вордӥськем пилэн улон-вылон сюресаз тужгес яркыт учыр луиз Россия Федерациысь Обороная министерстволэн Главной автобронетанковой управленияз (соин кивалтэ тодмо военачальник, генерал- полковник аспал эшмы Сергей Александрович Маев). Егит адямилэсь устолыксэ кивалтӥсьёс вакчи дыр ӵоже соку ик синйылтӥзы: подполковниклы Владимир Юрьевич Танаевлы оскылӥзы тужгес секыт ужъёсты. Зэм, сомында сюлмаськонъёсыз луэмен но воргорон весь вань мылзэ-кыдзэ сётылӥз Москваысь удмуртъёслэн "Герд" огазеяськонзылы но "Удмурт дэменлыклы". Владимир Юрьевич Танаев сюлмаськемен ортчытъямын Москвалы тямыс сю витьтон ар тырмонлы сӥзем "Москваез яратӥсько. Удмуртъёс Москваын. Лулчеберлык но йылолъёс-сямъёс" нимо ужрад, быдӟым удмурт тодосчилэн, калыкез югдытӥсьлэн, кылбурчилэн Куӟебай Гердлэн вордӥськемез дырысен сю ар тырмонлы, нырысетӥ удмурт нылкышно кылбурчиез Ашальчи Окиез буре ваёнлы сӥзем ӝытъёс. Аслаз ӟеч улонэз сярысь чик сюлмаськымтэез, огшоры адямиосты яратэмез, соослэсь кайгуоссэс но сюлмаськонъёссэс ас вылаз басьтэмез паймытъязы вӧзысьтыз адямиосты. Тужгес но яратылӥз Москва вӧзын улӥсь удмурт эшъёссэ. Соосын пумиськылонъёс куддыр уйшорозь кыстӥськылӥзы. Валче кенешылӥзы удмурт калыклэсь лулчеберлыксэ, вашкала сямъёссэ-йылолъёссэ, кылзэ утён но азинтон сярысь, чузъяськылӥзы яратоно удмурт кырӟанъёссы, нокытчы дыртытэк вераськылӥзы удмурт сямен. татын ик эскериськылӥзы шугадӟонэ шедем аспал эшъёсыдлы юрттонэн герӟаськем ужпумъёс. Нош Владимир Юрьевичлэн аслаз улон интыез но ӧй вал. Таин валче туж бадӟым тау карем потэ С. А. Маевлы, Володя бырем дырысен солэн семьяез но матысь адямиосыз сярысь сюлмаськемез понна. Владимир Юрьевичез ватон, солэн матысь адямиосызлы котыр ласянь юрттон чидатӥзы такем секыт кайгуэз. Чылкак юскиськем кузпалыз, Татьяна Михайловна Танаева, шуылӥз: "Володя бырем бере, пыд улысь музъем куашказ кадь, дунне вылын улэм ик ӧз ни потылы..." Сергей Александрович Маев туж сюлмаськемен гинэ Танаевъёслэн семьязылы Москваын висъямын куинь комнатаен квартира. Солы ордер "Удмурт дэменлыклэн" кивалтэтэзлэн кенешаз шумпотыса синвуаськем Татьяна Михайловна Танаевалы сётӥз дэменлыклэн тӧроез Сергей Александрович Маев. Танаевъёслэн семьязылы озьы ик юрттӥзы матысь эшъёсыз, "Удмурт дэменлыкысь" но Москваысь удмуртъёслэн "Герд" огазеяськонысьтызы адямиос. Со секыт кайгуо нуналъёсты но куроктонэз шори люкем адямиосты тодад вайыса малпаськод: удмурт калыкез понна макем трос лэсьтыны быгатӥз гарамурес усьтӥськем но вазиськись сюлэмо, мурт кайгуэз валась, ас шаерзэ зэмзэ яратӥсь адями. Таӵе вал но таӵе ик кылёз сюлэмъёсамы Владимир Танаев. В. Лебедев, "Удмурт дэменлыке" но Москваысь удмуртъёслэн "Герд" огазеяськоназы быръем мурт. Наталь Чыры-пыры дэмланъёс Чигиськись но кӧс йырсиез кӧня ке толэзь ӵоже миськоно нянен, шампунез но майталэз кутылытэк. Кӧня ке юдэс сьӧд нянез небӟытоно пӧсь вуын, шуныт луытозяз сӥятоно. Со напраен миськоно йырез. Чылкыт гылтэм бере йыр вылтӥ кисьтоно сӥятэм быректэм ву. Кӧсыт йырсиез миськыны луоз курег пузэн но. Одӥг курег пузэз суралтоно кӧня ке гинэ вуэн, собере йыре зырано. Кыкетӥ курег пузэз зол-зол пыӵатоно йырсие но ваньзэ сое гылтоно. Векчи, чигылӥсь но усись йырсиез тазатыны юрттоз шпинатлэн, ыль кубисталэн но лимонлэн сокъёссылэсь сурет. Ваньзэ басьтоно одӥг мында, йылтоно на кӧс вӧй. Суретэз зырано йыр куэ но йырси кузяна. Пыӵамез бере йырез миськоно. Каллен будӥсь йырсиез зыралляно ӵуж кушманлэн но лимонлэн сокъёссылэсь суретэн, нош кӧё йырсиез - кубисталэн но огречлэн сокъёссылэсь суретэн. Йырси тросэн усьыку юрттоз оливки вӧйлэн но лимон соклэн суретсы. Зырано сое уйлы, йырез миськоно ни ӵукна. Йырси усемлэсь уте касторка вӧй но. Сое йыре зыралляно толэзяз одӥг-кык пол. Возёно 6-12 час ӵоже. Йырси кӧс ке, быдэсаксэ но вӧяны луоз. Удмурт Республикалэн Президентэз, Удмурт Республикаысь Правительство кайгыро Удмурт АССР-ысь интыысь промышленностья министрлэн азьвыл воштӥсез - промышленной вузъёсъя но лэсьтӥськон материалъёсъя отделлэн кивалтӥсез. Черашний Израиль Яковлевич улонысь кошкемен валче но ӵыжы-выжыосызлы но матысь адямиосызлы мур куректэмзэс верало. НАТАЛЬ Пеляд пон Шудэд ас кияд Бызем нылкышнолы куд-ог дэмланъёс: - чеберъяськыкуд нырысь ик картэдлэсь куронъёссэ лыдэ басьты, собере ини - эшъёсыдлэсь; - ӵемгес дася картэдлэсь яратоно сиёнзэ; - эн иса "дуно" арбериоссэ: юатэк эн кутылы электробритвазэ, ящиксэ эн чылкытаты, портфеляз эн утчаськы; - картэд мадиськыку, веранзэ куспетӥ эн кары, со учыр яке анекдот сярысь ваньмыз кемалась тодо ке но; - эн курла сое пиналъёсты азьын; - чакласа эн улы картэдлэсь котькуд вамышсэ - со матысь адямиез ултӥям луэ; - эн пыкылы анайзэ гажамез но дунъямез понна; - дырын-дырын эн вунэты сое ушъяны, дэмланъёссэ кылзыны; - эн ӧтча куное картэдлэсь гажамтэ муртсэ, ачид но сыӵе муртлэсь ӧтёнзэ палэнты; - кыкетӥзэ картлы бызид ке, нырысетӥез сярысь ушъяса эн вера. НАТАЛЬ Оскод ,оло, уд? Шудэд вань ке, пиньдэ но тӥяса пыроз Троллейбусын адямиез ньыль-вить сяна ӧй вал. Кыӵе ке пересь кышномурт вӧзам пуксиз. Ас понназ маке лушкем вера. Мынам воже потӥз: быдэс троллейбус буш, нош со одно мон вӧзы пуксиз, эшшо маке вераське. Йырме укно пала берыктӥ. Мылкыды ӵукнаысен урод, ваньмыз мыдлань луэ, сыӵе дыръя нокинэн вераськем уг пот. - Малы уд кылзӥськы верамме? Ас дуннеям йыромеменым ӧй вала кинлы юан сётӥзы. Со куспын киям донгись луиз. - Кылзы, тыныд верасько ук, - вӧзам пукись кышномурт мыр-мыр шорам учкиз. Солы ог куатьтон арес. Чуко лыз кышетэн, пеймыт вож дӥсен, пыдаз пурысь сапегъёс. Кылзӥсько шуыса, йырме шонай но берен укно пала берыктӥ. Кышномурт лушкем вера: - Ӝыны ар пала ортчыса, улонад туж бадӟым воштӥськон луоз. Нош кыӵе со луоз, умой- а, урод-а?.. Вай дас манеттэ - верало. "Хм, - серектӥ ас поннам. - Уксё ке сётӥ, умойзэ вералод, ӧй ке - уродзэ". Шара номыр ӧй вазьы. - Уд оскиськы, о-о? - малпанъёсме лыдӟем кадь лулӟиз пересе. "Уг уго", - шуисько ас поннам. - Соку сак кариськы: тон гуртысь лыктэмын, доред кыдёкын, татын дышетскиськод... "Собере мар?", - малпай мон. - Вордӥськем интыяд уд улӥськы вылэм. Отысь кемалась кошкиллямды, нош атаедлэн ӵыжы-выжыосыз ваньмыз ик отын. Мон шуак луи ке но ӧй возьматы. Вӧзам пукисе веранзэ азьланьтӥз: - Али анаеныд ӵошен гинэ улӥськоды. Нош атаед? Атайдэ уд тодӥськы, тон вордӥськем берегес ик кулэм. Мынам йырсиосы выллань ӝутскизы. Йырме каллен гинэ кышномурт пала берыктӥ. Синъёссэ адӟи - куалектӥ. Соос мукетэсь вал ини, номыре ватӥсьтэмесь, мон пыр потыса, ваньзэ адӟисесь. - Оскид-а? - кылме юаз со. Мон номыр ӧй вазьы. - Улонад воштӥськонъёс луозы, возьма соосты. Но тодмоосыд пӧлын туж урод адями вань, со тонэ паськыт сюрес вылысь палэнтыны тырше. Сое тон умой тодӥськод, дыр вуиз ке, сюлмыд ачиз шӧдоз. Одӥг-кык нунал ортчыса, дорад адями лыктоз. Ныл-а, пи-а - уг вера. Салам ваёз, куно карыны дыртоз - эн басьты... Дас манеттэ сётӥд ке, верало малы уг яра. - Мынам коньдонэ ӧвӧл, - оскытыса кадь вази пумитаз. Зэмзэ но, кондукторлы шуыса, кык манетэ сяна ӧй вал. - Эх, нылаш, нылаш, мон тыныд ваньзэ верасал, кызьы со урод адямиедлэсь но утиськыны, шуддэ но шедьтыны. Мон ваньмыныз тазьы вераськон уг мытӥськы... Дӥсьтыса но дӥсьтытэк шораз учки. Пурысь синъёс мае ке ватыса но возьмаса кадь шорам учкизы. Кышномурт султӥз но троллейбусысь васькиз. Мон кудӟем кадь пукисько. Йыры верам кылъёссэ калленэн "пужнэ": "Мар солы осконэз, уксё кулэ луэм но малпа оломар но. Оло, огшоры вераськемез потӥз. Нош азьлозэ кызьы синучконысь кадь адӟиз? - нош чилектэ йырам. - Шуддэ, пе, шедьтыны юртто. Ма, шудэд вань ке, со пиньдэ но тӥяса пыроз, шуо милям". Сураськем мылкыдын общежитие пала вамыштӥ. Пагӟаетӥ тубыкум но кышномуртлэсь кылъёссэ малпасько. Дуно кузьым, пе, сётозы. Нош кин туала вакытэ дуно кузьымъёсын чик дауре пазяськоз? Шуак тодам лыктӥз, вордӥськем нуналэ матэктэ ук, соку одно кузьымъёс луозы. Ӵуказеяз дорам эшъёсы вуылӥзы. Сьӧразы шоколад ваиллям, ваньмы ӵош чай юим соин. Нош кышномуртлэн салам ваён сярысь верам кылъёсыз изьыны выдэм берам гинэ тодам лыктӥзы ай. Галина САВИНА. Положение "О Фестивале Приволжской Прессы" 1. Целью проведения "Фестиваля Приволжской прессы" (далее фестиваль) является оптимизация взаимодействия Аппарата полномочного представителя Президента Российской Федерации в Приволжском федеральном округе (далее Аппарат) со средствами массовой информации (далее СМИ), осуществляющими свою деятельность в информационном пространстве федерального округа, определение и установление новых форм взаимодействия Аппарата и СМИ, а также содействие развитию информационного пространства Приволжского федерального округа и повышение профессионализма работников региональных СМИ. 2. Подготовку, организацию и проведение мероприятий фестиваля осуществляет Организационный комитет Фестиваля (далее Оргкомитет), состав которого утверждается полномочным представителем Президента Российской Федерации в Приволжском федеральном округе. 3. Фестиваль включает в себя конкурсную программу и другие внеконкурсные мероприятия, проводимые в форме круглых столов, рабочих совещаний и тематических встреч. 4. Конкурсная программа Фестиваля состоит из двух этапов: регионального (предварительного) и окружного. 5. К участию в конкурсной программе приглашаются государственные и негосударственные СМИ. 6. Конкурс проводится по трем категориям: - Электронные СМИ; - Печатные СМИ; - Интернет-СМИ; 7. Каждая категория включает в себя следующие номинации: - Информационно-аналитическая программа (информационно-аналитическое издание), информационный проект. - Ведущий информационно-аналитической программы (ведущий рубрики в информационно- аналитическом издании), ведущий информационной рубрики в Интернет-СМИ. - Репортаж. - Сюжет о власти. Каждое СМИ имеет право участвовать в любом количестве номинации. 8. На конкурс принимаются работы, вышедшие в эфир или опубликованные в период с 13 мая 2000 г. по 31 декабря 2000 г. 9. В номинациях "Репортаж", "Сюжет о власти" на конкурс принимаются репортажи продолжительностью до 5 мин., печатные материалы объемом не более 2-х полос формата Ӓ, электронные тексты объемом не более 5 страниц текста (12 кегль, 29 знаков в строке). Каждое СМИ имеет право представить на конкурс до 3 материалов. 10. В номинации "Информационная программа (информационно-аналитическое издание) информационный проект" на конкурс принимаются работы продолжительностью до 60 мин, объемом до 36 полос формата Ӑ, информационно-аналитический сайт. Каждое СМИ имеет право представить на конкурс один выпуск программы, газеты, вышедший в указанный ранее период. 11. При представлении конкурсных материалов кандидат на участие в конкурсной программе Фестиваля должен письменно подтвердить свое согласие на использование предоставленных им конкурсных материалов в рамках передач о конкурсе и для учебных целей. 12. Участие в конкурсе - бесплатное. 13. Для участия в региональном (предварительном) этапе конкурсной программы Фестиваля конкурсные материалы представляются кандидатами Главному федеральному инспектору субъекта федерации не позднее 5 февраля 2001г. 14. По итогам регионального (предварительного) этапа конкурсной программы Фестиваля Главные федеральные инспекторы не позднее 10 февраля 2001 г. представляют в Организационный комитет фестиваля по одному претенденту на победу в каждой из номинаций по всем категориям конкурса. 15. Победителя в каждой из номинаций, а также обладателей специальных премий определяет Жюри Фестиваля, состав которого утверждается Организационным комитетом Фестиваля. В состав жюри конкурса включаются ведущие журналисты федеральных СМИ, крупнейших СМИ, находящихся на территории Приволжского федерального округа, иные лица из числа специалистов в данной сфере, а также руководители Аппарата полномочного представителя Президента Российской Федерации в Приволжском федеральном округе. 16. Главные федеральные инспекторы рекомендуют в состав Жюри Фестиваля по одной кандидатуре от субъекта федерации. 17. Лауреаты Фестиваля получают специальные дипломы. 18. Участники окружного этапа Фестиваля, не удостоенные Диплома Лауреата Фестиваля, считаются дипломантами Фестиваля и получают специальные дипломы. 19. Участники регионального этапа Фестиваля, не прошедшие для участия в окружном этапе конкурсной программы Фестиваля, получают благодарственное письмо участнику Фестиваля. 20. Специальные премии присуждаются в любой из номинаций "За государственную позицию" и "За самую независимую позицию". 21. Перечень внеконкурсных мероприятий определяет Оргкомитет Фестиваля. Наталь Ӧпкелён Пурысьтад ке - визьмаськод Та арлыдо кышномуртэн тодматскеммы ар мында гинэ. Весяк пальпотӥсь ымнырыз шоры учкыса нырысь пайми, талэн улоназ нокыӵе шуг-секытъёсыз ӧвӧл шат. Галина Алексеевналэн (нимыз воштэмын) йырыз пурысьтамын ке но, синъёсыз чагыр тылын ӝуало. Огпол монэ ӧтиз вордӥськем нуналзэ пусйыны. Куинь комнатаен квартираяз чылк- чылк. Ӝӧк тыр пуктылӥськемын: колбаса, салатъёс, сылалтэм чорыг. Нокин куноосыз ӧвӧл, мон огнам дораз пукисько. Нылпиосыз ваньмыз бурдъяськемын ни, асьсэ семьяосын уло. Картэз ӵужанаеныз сад-бакчаысь коркаязы ялкаро, пе. Возьманы нокинэ. - Туннэ пумиськи школаын дышетскем эшеным - веранзэ кутскиз со. Выпускной бал бере ӧм адӟиськылэ. Ог-огмес мырдэм тодмам. Ветлэ машинаен. Усто дӥсяськемын. Курадӟонэз адӟытэк улӥ, шуэ. Шораз учкыса, аслэсьтыз арлыдзэ уд сёты. Курадӟонъёсме, висёнъёсме мадеме бере, бышкись синъёсыныз шорам учкиз но юаз: "Тон школа бере мар карид?! Университетэ пырид, берло ужын ӝутскон сярысь малпаськид. Огкылын, тыныд карьера кулэ вал. Нош мынам малпанэ одӥг вал: умой карт шедьтоно. Аттестат басьтӥ но уй пала шонтӥ. Нылъёс отын ичи вал, бере, аслым тупамонзэ бырйыны секыт ӧй вал. Берло улонэ вӧй вылтӥ кадь кошкиз. Вань шуг-секытъёсты, сюлмаськонъёсты картлэн пельпумаз куштӥ". Та верамез бере Галина Алексеевна синъёссэ кыниз. Ымныраз малпаськон тус пуксиз. Та дыре вань курадӟемзэ, бӧрдэмзэ тодаз ваиз, дыр. Кӧня ке озьы улыса, - веранзэ выльысь азинтӥз: - Тӥни кызьы улоно вылэм. Астэ тӧдьы сяськаез сямен утялтоно. Картэдлэн тонэ утемез, яратэмез, гажамез мед потоз. Воргоронъёссы юо, ужамзы уг поты шуыса, тросэз кышномуртъёс асьсэос валъёс сямен бызьыло. Кык-куинь уже вуттӥськыны тыршо, семьязэс сюдо-дӥсяло. Шонер ӧвӧл со. Кӧт тыр сярысь пиосмурт сюлмаськыны кулэ. Толыкез ке ичи, аслыд пиосмурт кариськоно шат? Инмар со понна ик кылдытэм пиосмуртъёсты - котькудӥзлэн мед луоз удысэз, сюлмаськонэз. Кышномуртлы нылпи будэтоно, пӧраськоно, утялтӥськоно. Галина Алексеевна рюмкаосы пичильтык юон лэзиз но сябась кыл вераз: - Вань пинал нылъёслы вазиськеме потэ, тӧл йӧтэмлэсь пиосмуртлэн мугор сьӧраз ватскыны луэ ке, умой. Нош юрттӥськемез, сюлмаськемез уг шӧдӥськы ке, вань улондэ вулкан йылын кадь ортчод. Соин ик, семья улонэ кынем синмын ӧвӧл зымоно. Озьы, дыр, со. Егит дыръя пересьёслэн верамзы пель сьӧртӥ ортче, курадӟон тынэсьтыд улондэ палэнтӥ ортчоз, малпаськом. Йырсиосмы тӧдьы бусэн шобырскыны кутскыку гинэ огшоры ортчем аръёс понна сюлэм чепылляны ӧдъя. О. Кожанова. ОЖ СЮРЕСЪЁС Удмурт Маресьев 1940-тӥ арын Армие басьтэмзылэсь азьло, Виктор Бочкарёв трактор руль сьӧрын кӧня ке ужаса вуттӥз ик. Но ӝоген солы мурт шаеръёсты лёгано луиз. Горд Знамяен пусъем 212-Тӥ воздушно-десантной бригада, кытчы шедиз Виктор, интыяськемын вал Благовещенск дорысь Поярково посёлок вӧзын. - Нуналаз 12 часэн ожмаськыны дышетским. Трос саклык висъяллям киын нюръяськонлы. Бадӟымъёсызгес эшъёсмы ялан тодазы вайылӥзы 1938-тӥ арын Хасан ты вӧзын но 1939-тӥ арын Халхин-Гол шур дурын японецъёсын жугиськемзэс. Вылез таӵе ожмаськон уз пурӟы ни шуыса, оскон ӧй вал - тодаз вае Пичи Пурга ёросысь Кечёво посёлокысь ветеран Виктор Егорович Бочкарев, озьы ик луиз 1941-тӥ арын . 3-тӥ мае милемыз боевой тревогая ӝутӥзы. Куинь арня ортчыса, бригадамы вуиз ни кунмылэн шунды пуксён паласьтыз шаеръёсы. Дырын-дырын та часть вадьсысь инбаметӥ котыръязы немец самолётъёс. Нош уйёссэ Южный Буг палась кылӥськизы танкъёслэн гужгетэмзы. Озьы войналэн матэктэмез ӟеч шӧдӥськиз. Сое кема возьмано ӧз луы - 1941-тӥ 22-тӥ июне арын кышкыт ивор быдэс странае вӧлмиз. Августлэн нырысетӥ нуналъёсаз десантникъёслэн бригадазы Киев вӧзын ожмаськонэ пыриськиз. Ӵапак та луиз пулемётчиклэн Виктор Бочкарёвлэн немецъёсын нырысь жугиськонэз. Ожгарчи понна со секытэн ортчиз - секыт сӧсырмиз йырыз. Виктор эмъяськиз Казаньысь госпитальын. Отын кылльыкуз, со ӵемысь тодаз вайылӥз вордскем палъёссэ, удмурт шаерысьтыз Тургуртсэ. Вордскем гуртэз Иж шур дурысь кык иськемын гинэ интыяськемын. Татысен кыдёкын ӧвӧл бигер музъем но, Урал улосвыл но. Дор палъёсызлэсь мӧзмонэз, вормонлы осконэз ик сӧсырмем ожгарчилы выльысь пыд йылаз султыны юрттӥзы. Ож сюресъёс Виктор Бочкарёвез вуттӥзы Северо-Западной фронтысь куасэн ожгарчиослэн-куасчиослэн батальоназы. Соос понна тужгес вунонтэм кылизы та аръёсы тупам ӟырт кезьытъёс, лы пыр потӥсь уй пал тӧлъёс. Одӥг нуналэ ожгарчиосты фронт сьӧры ыстӥзы. Немецъёс шӧдӥллям таосты - шоразы лек ыбылыны кутскизы. Озьы Старой Русса вӧзысь Ильмень ты дурын Виктор Бочкарёвез тушмон пуля выльысь сӧсыртӥз, табере - кияз. 1943-тӥ арын пӧсь гужемен ефрейтор В.Е.Бочкарёв вуиз Курск дугае. Табере Виктор Егорович автоматчик лыдъяськиз. Кӧня вир кисьтӥськиз татын. Котыр кылӥськиз сӧсыръёслэн ӝуштэмзы. Вирен-ӵынэн сураськем тузон пыр ӧз адӟиськы шунды но. Сентябре асьме ожгарчиос вуизы Днепр доры. Озьы кык ар ортчыса, Виктор Бочкарев выльысь берытскиз 1941-тӥ арын августэ лёгем ож сюресъёсыз вылэ. Соку ожгарчи ӧз малпалля на, ӵапак та палан ик солэн берпум ожмаськонэз луоз шуыса. Бер сӥзьыл ни, одӥгаз лек пуромем жугиськон дыръя, Виктор Егорович вӧзын пуштӥз граната. Вирен наштаськем ожгарчиез келязы госпитале. Дас сизьым толэзь ӵоже костаськиз В.Бочкарев валес вылын, пыдъёсаз 10 операциез чидано луиз со. Дор палъёсаз берытскиз ни вормонэн, 1945-тӥ арын 30-тӥ июне, 25 арескын нырысетӥ группаен инвалид луыса. Виктор Бочкарёвлэсь кыксэ ик пыдъёссэ воштӥзы протезъёс. Ожгарчиез дораз пумитась ӧз луы, война ӵоже анай-атаез кулӥллям. Озьы война бере но, Викторлы капчияк шокчыны ӧз кылды.Но со нюръяськиз, вань секытъёслы пумит кышкатэк вамыштӥз. Ожысь ветеран 16 ар пыдкук тупатъяса улӥз, 22 ар ӵоже Кечёлысь Тургуртозь машинаен почта, нянь ворттылӥз. Гуртоосыз котьку ӟечен гинэ вазисько со сярысь. "Виктор Егорович котьку дась вӧзысь эшъёсызлы юрттыны. Орденъёсын пусъем ожгарчиез ӵошатыны луэ Алексей Мересьевен", - данъяськыса вера Кечёлысь библиотекарь Людмила Бектышева. Юнме "удмурт Маресьев" уг шуы, дыр, Виктор Егоровичез "Мир" колхозысь азьвыл бригадир Николай Гызин но. 7-тӥ январе Виктор Егорович Бочкарёвлы 81 арес тырмиз. Тазалыкез азьвыл ожгарчилэн уг шумпоттылы ни - валесысь султылэмез уг луы. Таӵе дыръя котькуд адямилы тужгес дуно шуныт киос, небыт, буйгатӥсь кылъёс. Сӥзём соосты Виктор Егоровичлы. В.ПОЗДЕЕВ, Шаерчи, "По местам боевой славы", "По следам подвига" книгаослэн авторзы. Туспуктэм вылын Виктор Егорович Бочкарёв - 1941-тӥ но 1996-тӥ аръёсы. АРХИВЫСЬ МАТЕРИАЛЪЁСЪЯ Удмуртия ХХ дауре 1973-тӥ ар КПСС-лэн ЦК-езлэн Генеральной секретарез Л.И.Брежнев США-е вуылӥз но солэн президентэныз ог-огедлы юрттон, ваче вузкарон но ожмаськытэк улон сярысь огкыл гожтӥз. Москваын ортчиз дунне вылысь тупаса улон понна нюръяськисьёслэн конгрессы. Азинскизы космосын ужъёс, январе "Луна-21" автомат станция Музъемлэн спутникез вылэ вуттӥз ас понназ ветлӥсь "Луноход-2" аппаратэз. Мартэ кутскиз партбилетъёсты вошъян. Январе Ижевскын пластмасса поттон завод лэсьтыны кутскемын. 25-тӥ январе Кама вамен вуттэмын чугун сюрес выжлэн кыкетӥ черодэз. Сарапулысь "Элеконд" завод усьтӥз 500 муртлы сиськонни. Ноябре Сарапулын ик вуттэмын укмыс этажъем нырысетӥ улон корка. Пусйытэк кельтыны уг луы промышленностьысь азинсконъёсты. Ижевскысь радиозавод "Сириус-309" радиолаеныз пыриськиз ВДНХ-лэн адӟытоназ. Сарапулысь радиозаводлэн автомобильёслы "Урал-авто-202" транзитор приёмникезлы сётэмын ӟечлыкъя пус. Сыӵе пус укмысэтӥ пятилеткалэн куинь арез куспын сётэмын Удмуртиысь 23 вузъёслы. Ижевскысь механикая заводын усьтӥськиз музей. Кыӵеесь азинсконъёс басьтӥз гурт удыс? Завьялово ёросысь "Свобода" колхозын гранулалэсь пудо сиён дасян цех пуктӥзы. Со ужаны кутскиз 24-тӥ мае. Куинь арскын Удмуртиысь пудо вордӥсьёс чакламлэсь вылтӥ 23 сюрс тонна сӥль, 17,9 сюрс тонна йӧл, 57 миллион курег пуз но 43 тонна ыж гон поттӥзы. Но урод мынӥзы бусы ужъёс. Удмуртия кун азьын пунэме кылиз, ӧз сёты 265 сюрс тонна нянь, 66 сюрс тонна картофка, 20 сюрс тонна бакча сиёнъёс но 13 сюрс тонна етӥн мертчан. Ижевскысь медучилище пусйиз 50 ар тырмонзэ. Та дыр ӵоже со 14000 специалистъёсты дасяз. 17-тӥ мае таӵе ик юбилейзэс пусйизы Удмуртиысь пионеръёс но. Апреле удмурт лыдӟисьёс пусйизы нырысетӥ нылкышно кылбурчилы Ашальчи Окилы вордскемез дырысен 75 ар тырмонэз. Гужем каникулъёссы дыръя Удмурт университетлэн кылтодонъя факультетысьтыз студентъёс фольклоръя но диалектъёсты бичанъя экспедицие потазы Сарапул ёросысь гуртъёсы. 21-тӥ мае кылдытэмын Удмуртиысь композиторъёслэн огазеяськонзы. Кырӟанъя но эктонъя "Италмас" ансамбль вуылӥз Россиысь пӧртэм городъёсы, озьы ик Москвае "Ӟуч тол" фестивале но вань учкисьёсты паймытӥз чебер дӥськутэныз, усто кырӟаны но эктыны быгатэменыз. Можгалан усьтэмын "Дубитель" культура дворец. Н.МЕЛЬНИЦЫНА, Удмурт Республикаысь ЦДНИ-лэн директорезлэн воштӥсез. Ижевскысь подшипник поттон заводысь (сборочной) подшипникъёсты бичан участокын. ГУРТ УЛОН Дорамы - Голландиысь сиён-юон поттӥсьёс Кин бен туннэ тросгес йӧл кыске, кин уногес вӧй, сыр но йӧл сиёнъёс поттэ? Ойдолэ учкоме чик вожъяськытэк кыдёкысь но пичи гинэ Голландия кунысь фермеръёслэсь но йӧллэсь сиён-юон дасясьёслэсь ужамзэс. Малы отын куинь пол ёрос асьмелэсь трос йӧл люкало но ческыт сиён лэсьто? Сое бен одӥг кылын уд валэкты. Кутском Голландиысь "МТМ" компания (огазеяськон) бордысен. Татын со - одӥгез бадӟымез но кужмоез фирма. Алигес шаерамы ветлӥз солэн кивалтӥсез Аренд Куперус. Со пумиськылӥз йӧл поттӥсьёсын, озьы ик йӧллэсь сиён-юон лэсьтӥсьёсын - йӧл заводъёслэн директоръёсынызы но тодосчиосын. Ужрадэз ортчытӥз республикаысьтымы Кунсьӧр кусыпъёсъя министерство. Нырысь ик пусйыны кулэ: та огазеяськон Россиын 10 ар ужа ни. Солэн ёзъёсыз усьтэмын Москвын, Санкт-Петербургын, Липецкын но Вологдаын. Кин тодэ, оло, дорамы но солэн адямиосыз ужалозы. Компания, быдэс дуннеысь усто опытэз люкаса, бадӟым инты висъя трос но дунтэм йӧл кысконлы, солэсь ческыт сиён поттонлы. Со понна огазеяськон уже кутэ азьмынӥсь амалъёсты, усто оборудованиез но мукетсэ. Отчы ик пыре ужъёсты ӟеч но валаса радъян, пудо выжыез умоятон но музон ужпумъёс. Тыршемзы-сюлмаськемзы берытске дунтэм йӧлын но сиён-юонэн. "МТМ" озьы ик рынокын шӧдскымон инты басьтэ ӟеч оборудование поттэменыз. Кылсярысь, бадӟымесь фермаосын скалъёсты кыскыны оборудование лэсьтэ. Со кутӥське, пудоез думетын возьыку. Компания со сяна, поттэ холодильникъёс, йӧл сӥятон аппаратъёс, йӧл возёнъя бадӟымесь танкъёс. Компания азьын одӥг ужпум сылэ - дунтэмгес сиён-юонзэ котькуд кунын вожмаськыса мед басьтозы. Соин ик соос пудооссэс ӧжытгес сюдо нянен, дасяло ӟеч силос но мукет сиёнъёс. - Нош тӥляд переработчикъёсты йӧл поттӥсьёсты туж жаляло, - шуэ Аренд Куперус. - Соос азе лябесь куронъёс пукто но урод йӧлзэс куто. Голландиын, Германиын, США-ын но музон кунъёсын югдур чылкак мукет. Отын чырс шӧмо яке кулэезъя сӥятымтэ йӧлэз матын но уз басьтэ. Со сяна, наплыксэ гинэ ӧвӧл, белоксэ (протеинзэ) но учко. Кин ӟеч йӧл вуза, валамон, солы трос коньдон тыро. Голландиын кыскем йӧл соку ик вуэ танкъёсы но секунд ӵоже 3,7 градусозь сӥя но сое отын 2 нунал возьыны луэ. Нош тӥ, пе, нуналлы быдэ йӧлдэс заводэ нуллӥськоды но кӧня мултэс коньдон быдтӥськоды. Зэм, Голландиысь фермеръёс будэто туж йӧло, голштино-фризской сьӧд-куӵо выжы скалъёс. Быдэс кунын аразшорлыдын котькудӥз 8,5 сюрс килограмм йӧл сётэ, яке нуналлы быдэ одӥг скаллэсь 28 килограмм йӧл кыско. Асьме хозяйствоосын нокызьы уд ӵошаты. Шаерамы чиньыен лыдъямон гинэ хозяйствоос но фермаос, кытын араз котькуд скаллэсь 5 сюрс килограмм йӧл люкало. Озьы шуыны луоз Игра районысь "Чутырский" кооперативысь Чемошур ферма, Воткинск районысь "Пихтовка" чорыг хозяйство, Завьялово районысь "Путь Ильича" племзавод но мукетыз сярысь. Кызьы бен Голландиын кадь йӧл басьтоно? Нырысь ик трос йӧл сётӥсь ӟеч выжы пудо уськытоно. Кыкетӥез, умоятоно пудоосты сюдонэз но возёнэз. Отын асьмелэн кадь шуныт гидъёс уг лэсьто, липет улын гинэ возё. Кунянъёссэс но озьы ик утялто, зор-кот но тӧл гинэ, пе, медаз йӧты. Котькудӥзлы пичи клетка лэсьтэмын. Бен, отын куазь шунытгес, но ведь асьмеос азьло кунянъёсмес кезьыт азьын будэтыны-возьыны ӧдъям но аналтӥм. Соос адӟем каризы. Тӥни таӵе пичи кун арлы быдэ 1 миллиард килограмм йӧл поттэ, Москваын араз 80 сюрс тонна сырзэ вуза. Ижысь магазинъёсын но солэн сиён-юонэз ичи ӧвӧл. Нош пичи йӧл завод 4 толэзьскын пукто но суткаяз со 1 сюрс тонна йӧлэз переработать каре. Оглом вераса, асьмелы вань мае адӟем карыны Голландилэсь: кызьы ке пудо вордонъя, озьы ик йӧллэсь сиён-юон лэсьтонъя. Шаерысьтымы йӧл заводъёс огкадь ӟеч уг ужало на, нош гурт хозяйствоосмы, отын мында уг шуиськы ни, 2 пол тросгес йӧл кыскысалзы ке, та удыс зэмзэ но пайда сётысал. Г.РОМАНОВ. Голландиысь сьӧд-куӵо скал. Данъяськымон город Удмуртилэн столицаезлэсь Ижевсклэсь 240 ар тырмонзэ пусйыку, республикаысьтымы улӥсьёс валазы, макем узыр вылэм городзы. Та город кылдӥз завод кылдэм бере. Солэсь азьло та интыын нюлэс но ты гинэ вал. Ярдуръёсын гинэ пичиесь гуртъёс сылӥзы. Удмурт университетлэн издательствояз кылем арын поттӥзы Игорь Кобзевлэсь туж чебер фотоальбомзэ. Отын туж шер пумиськылӥсь туспуктэмъёс возьматэмын. Ижевскысь заводын ужасьёс трос ке но вал, со город луиз 1925-тӥ арын 6-тӥ июле гинэ. Альбомысь туж трос адӟоды азьвыл фотографлэсь Д. Я. Наймушиналэсь вуж Ижевскез возьматӥсь снимокъёссэ. Азьвыл Никольской черк, кык мечетъёс но мусульманъёслэн шайгу интыязы мартен но электрогуръёсын андан пӧзьто. Нош Покровской черк интыын Калашниковлэсь автоматъёссэ бичало. Фотограф Н. Г. Пономарев Ильинской черклэсь духовенствозэ ЪЪ даурлэн кутсконаз возьматэ. Отысь пересь священникъёс ваньмыз сопал дуннее кошкемын ини, нош урдэсазы пуксем кӧня ке пиналъёс али ке но улэпесь на, дыр. Д. Я. Наймушин Ижевсклэсь ульчаоссэ тросгес возьматӥз, нош Н. Г. Пономарев яратэ вал адямиослэсь тусъёссэс пуктыны. Рефолюцилэсь азьло Пономарев "Люкс" фотосалонэн кивалтӥз, Советской власть аръёсы но татын ик директор вал. Фотоматериалъёслы ветлыкуз кынмыса, со 1929-тӥ арын кулӥз. Солэн салоназ трос негативъёсыз но фотокопиосыз кылизы.Пономарёв доры туссэс пуктыны ветлӥзы циркысь артистъёс, священникъёс, гимназистъёс, тӧдьы но горд солдатъёс. Та книгаез кияды басьтӥды ке, трос выльзэ адӟыны но лыдӟыны быгатоды. Революция бере Александро-Невской соборез "Колосс" кинотеатр каризы. Отчы пырон ӧс дорын пуктэмын вал И. Ф. Сталинлы но И. Д. Пастуховлы памятникъёс. Берло Сталинлэсь памятниксэ сузмытӥзы. Нош Пастуховлэсь памятниксэ радиолэн юртэз вӧзы интыязы. Шӧдӥське авторлэн книгазэ поттон понна мылысь-кыдысь ужамез. Со вунэтымтэ азьвыл адямиосыз. 1913-тӥ арын июне Ижевске нырысетӥ автомобиль ваем купец Петр Симаков. Сое Вяткаысь губернаторлэсь курем Ижевск городысен Кама шурысь Гольян пристанёзь ветлыны. 1935-тӥ арын Ижевскысь автогужтрестын вал 63 легковой но 141 грузовой машина, со сяна, 138 вал. Техника валэз воштӥз Хрущев кивалтыку гинэ. Бадӟым инты басьтӥзы Ижын поттэм мотоциклъёс но. Ижевскын автобусъёс ветлыны кутскизы 1932-тӥ арын. Кема ик дыр ӧз ортчы, нырысетӥ трамвайёс вокзалысен Киров ульчаозь ветлыны кутскизы. 1952-тӥ арын лэсьтӥзы выль вокзал. Михаил Егоровлэн лэсьтэм фотояз вокзал дорын возьматэмын Удмуртиысь парторганизациослэн ЪЪВИИ съездаз быръемъёс. 1934-тӥ арын Пирогово гурт дорын усьтӥзы нырысетӥ аэродром. Та аре ик 5-тӥ июле адямиос нырысьсэ лобӟизы Нижний Новгородэ. Собере ньыльдон куинетӥ арын самолётъёслы пуксьыны но ӝутскыны бетонлэсь сюрес усьтӥзы. Нош 1974-тӥ арын Вуж Мартьян гурт дорын куинетӥ аэропортэз усьтӥзы. Игорь Кобзев книгаяз озьы ик вера но возьматэ Ижевскысь базаръёсты, культурной учреждениосты но мукет интыосты. Столицамы сярысь та фотоальбом вить сюрс экземплярен поттэмын. В. Чернов. Осконлэн кужымез бадӟым Тюмень-Иж поездэ уйшоре Свердловск станциын пуксизы трос пассажиръёс. Ӵукна одӥгез синмаськымон нылкышно "Новый завет" книга лыдӟыны кутскиз. Мукетъёс со шоры учко. Мон кышномуртлы вазиськыны амал шедьтӥ: - Кыӵе издательство та книгаез поттэм, Россиысез-а, мукет кунысез-а? Вераськон ласянь со шуиз: - Мынӥсько Иже, вӧсяськон коркае. Талэсь азьло 9 ар тамак кыски, 6 ар ӵоже бышкылӥськи, наркоманъёс пӧлы шедьылӥ. Ог нуналэ эше вӧсяськон коркае нуиз. Со дырысен, тау инмарлы, тамак кысконме, бышкылӥськонме куштӥ. Инмар монэ утиз. Асьме гуртъёсын вина юисьёс но наркоманъёс ичи ӧвӧл. Алама сямзылэсь куштӥськемзы потэ ке но, уг быгато. Оло, сыӵе муртъёслы киязы кутоно "Выль сӥзён" книгаез? Соку инмар утиськыны кужым пыртоз. Н.ЯКОВЛЕВ. Выль амал ӵектӥсько Гуртъёсын парсь кӧез ваньмыз утялтыны уг быгато, сэрпалтӥсьёс но вань. Нош парсь кӧй туж умой сиён луэ. Тани Венгрия сое сылалтыса мукет кунъёсы вуза. Мынам апае кузьмаз парсь сӥль. Кӧйзэ сылалтӥ выль амалэн. Туж ческыт кадь пӧрмиз. Кикур быдӟа вандылэм кӧез тыроно кастрюляе. Тырмытоно вуэн. Пушказ ватсано на сугон кӧм. Тросгес ке - уката умой. 1 литр вуэ 200 грамм сылал пононо. Собере кастрюляез тыл вылэ пуктоно, быректон азяз тыл вылысь басьтоно. 2 нунал ӵоже возёно. Куинетӥ нуналэ кулэ 3 минут ӵоже быректыны. Ӵуказеяз кӧйзэ басьтоно, сугон кӧмъёслэсь сузяно, горд пӧсьтурын пызьнано, чесноклэсь соксэ будэтоно но кезьыт интые пуктоно. Н.ЯКОВЛЕВ. Эмъяськыны медаз шугъяське Сюмси ёросысь Пижил психо-неврологической диспансерын 104 муртлы ньыль этажъем кӧлан корпусэз лэсьтон дыго-мого мынӥз, коньдон шедьтымтэен, лэсьтӥськон ужъёс ӵемысь дугдылӥзы. 25 миллион манет бӧрысьгес коньдон висъямын вал. Диспансерез йыла-пумаз вуттӥз Уваысь "Строитель" акционер общество. Лэсьтӥськисьёслэн ужбервылзы эмъясьёслы кельшем, шӧдске. Выльысь та лэсьтӥськисьёсын ик огкыл кутӥллям. Табере, пе, сиськонни лэсьтоно, солэн инъетэз дасямын ни. П. Николаев. Ыж вордон - пайдаё удыс Пичи Пурга ёросысь "1-тӥ Май" эштосысь Куреггурт фермаын берло аръёсы ыж вордон борды басьтӥськизы. 329 ыжез но бызьылыны вуэм 95 ыжпиез утялто ыж утисьёс Сергей Моисеев (кивалтӥсьсы), Евдокия Корнилова, Анисия Моисеева но Светлана Коровина. Соос ӟеч тыршо. Али ыжпиоссы вордскыны кутскизы ни. Ыж вордо бере, ыж гон люкаське. Солэсь эштосын одеялъёс но матрацъёс вуро. Та вузъёссы басьяськисьёслы кельшо. П. Николаев. АРХИВЫСЬ МАТЕРИАЛЪЁСЪЯ Удмуртия ХХ дауре 1974-тӥ ар Таиз ар историе кылёз БАМ-ез лэсьтыны кутскемен. Отын ужазы быдэс странаысьтымы адямиос. Та аре ик Россиысь Нечерноземьеын кутскизы мелиорация ужъёс. Удмуртиысь промышленность ӟеч азинскиз. "Ижмаш" заводын поттэмын нырысетӥез лыдпус программаен ужась токарно-винторезной станок. Собере сое сюрсъёсын лэсьтыны кутскизы, вузаськиз кунгож сьӧры но. 1-тӥ апреле Сарапулысь радиозаводын поттыны кутскизы "Урал-112" радиола. Ар шорын вуз поттыны ӧдъяз Ижевскысь пластмасса завод. Ар пумын ужаны кутскиз Камбаркаысь "Корд" фабрика. Со чакламын вал ковер куись фабрикаослы сӥньыс дасяны. Ӟечлыкъя кун пус нырысьсэ сётӥзы Глазовысь вуриськон фабрикаысь вить вузлы но мебель фабрикаысь кык пӧртэм стенкалы. Азьланьскиз пӧртэм удысъёсын лэсьтӥськон. Ужаны ӧдъяз Глазовысь тылобурдо вордон фабрикалэн ог люкетэз. "Ижмашын" йылпумъямын выль гур лэсьтон, со нырысьсэ чугун сётӥз. Кияса ёросысь Ленин нимо совхозын кутскемын парсь вордон комплекс лэсьтыны. Декабре кун комиссия кутӥз Воткинск ёросысь "Киварский" совхозысь йӧл комплексэз. 1974-тӥ арын Ижевскын ужаны кутскиз выль аэропорт. Отчы нырысьсэ пуксиз "Ил-18" бадӟым самолёт. Сентябре ужаны кутскиз Кама-Ижевск водовод, озьы Ижевскын улӥсьёслэн квартираосазы ву тырмыт вуыны кутскиз, ӵыпетысь ӧжытгес кыскыса. Городэз чылкыт воземзы но благоустройствоя ӟеч ужамзы понна, Ижевсклы сётэмын нырысетӥ инты но РСФСР-ысь Министръёслэн Кенешсылэн но ВЦСПС-лэн киысь кие вошъяськись Горд Знамязы. Анданлэсь фасонной профильёс кылдытэмзы но соосты поттыны вылӥ технология но оборудование малпамзы понна, Ижевскысь специалистъёслы сётэмын 1974-тӥ арлэн СССР- лэн Кун премиез. Январе чакламын вал одӥг предприятиын, организациын, колхозын кема но умой ужам рабочийёсты но колхозникъёсты И, ИИ но ИИИ степенё Ужысь Слава орденэн пусйыны. 13-тӥ октябре Усовъёслэн семьяязы вордӥськем нылпи Ижевскысь 500 сюрсэтӥез улӥсь луиз. Озьы Удмуртилэн столицаез бадӟымесь городъёс пӧлы пыриз. 6-тӥ ноябре Сарапулысь вокзал доры пуктӥзы ОВ-3705 паровозэз, отын ялан мед сылоз шуыса. Паровоз памятниклы пӧрмиз. Та паровозэн 1919-тӥ арын 12-тӥ мартэ Сарапул ёросысь гурт калык Москвае быдэс эшелон нянь келяз вал. Глазовын ортчиз солдат анайёслэн нырысетӥ слётсы. Удмурт университетын печатласькиз нырысез многотиражной газет. Ижевскын бак нылпиослы нимысьтыз школа усьтӥськиз. Вормонъёс басьтэмын вал спорт удысын но. Ижевскысь "Зенит" стадионын нырысьсэ ортчизы йӧ вылтӥ мотоциклъёсын ӵошатсконъёс. Отчы пыриськизы РСФСР-ысь самой кужмоосыз мотогонщикъёс. Нюръяськон мынӥз быдэс Россияя нырысь инты понна. 20-тӥ феврале Галина Кулакова нош ик куасэн бызьылонъя дуннелэн чемпионкаез луиз. Пусйымонэз вал культурая улонын. Октябре машина поттӥсьёслэн культура дворецазы 50 арес тырмеменыз валче творческой ӝытсэ ортчытӥз удмурт композитор Герман Корепанов. Декабре ортчиз Удмуртиысь журналистъёслэн В съездзы но писательёслэн Х съездзы. Бадӟым шаерысьтымы вань калык шумпотыса учкиз Василий Шукшинлэсь "Калина красная" кинофильмзэ. Александр Солженицынэз уллязы кунгож сьӧры, нош куд-ог мукет писательёс асьсэос кошкизы. Сыӵе вал югдур быдэс СССР-ын. Н.МЕЛЬНИЦЫНА, Удмурт Республикаысь ЦДНИ-лэн директорезлэн воштӥсез. Сарапул радиозаводын "Урал-авто" приёмникъёсты бичало. Наталь Ялӥськом конкурс "Суредаськом семьялэсь портретсэ" Кӧня ке арзэ ини Россиын улӥсьёс 15-тӥ мае пусъё Семьялэсь нуналзэ. Та праздникез пусъён сяме пыриз ини шаерамы но. Озьы ке но, 8-тӥ Мартэз сямен та нуналэз нимаз семьяосын данъяны ӧм дыше на. Туж жаль. Со понна республикаысьтымы семья ужпумъёсын вырись ёзъёс, 15-тӥ майлы сӥзьыса, пӧртэм ужрадъёс ортчыто. Палэнэ кылеммы ӧз пот милям но. "Удмурт дунне" газетлэн редакциез республикаысьтымы Калыкез улон-вылонын утёнъя министерствоен ӵош Семьялэн нуналэзлы сӥзем конкурс ортчыто. Кыӵеен бен син азе пуксе шаерысьтымы семьялэн портретэз? Кин трос нылпиосыныз данъяське, кырӟаны-вераны, ужаны быгатэ, киужъёсыныз паймытэ. Нош кинлэсь ке но семьязэ ёрмон пачкатэ, шуг-секытъёс зӥбо. Шумпотонъёстэс но сюлмаськонъёстэс, улон- вылондэс ватыса эн возе, гожтэ редакциямы. Устооссэ гожтэтъёсты газетэ печатлаломы. Конкурслы йылпумъянъёс лэсьтом Семьялэн нуналэз азьын. Вормисьёсты возьмало кузьымъёс. Кинлэн гожтэмез потэ аслаз семьяез сярысь, ваньзэс ӧтиськом пыриськыны "Суредаськом семьялэсь портретсэ" конкурсэ. Гожтэтъёсты ыстоно 1-тӥ маёзь "Удмурт дунне" газетлэн редакцияз. "Единство" будӥз партиозь Кылем кӧс нуналэ "Единство" партилэн удмурт организациезлэн политсоветэз туэ ар понна нырысетӥ кенешонзэ ортчытӥз. Отын организацилэн миым декабре ортчем конференция бере ужамезлы йылпумъянъёс лэсьтэмын но азьланезлы ужпумъёс пусъемын. Нош 29-тӥ январе "Единство" партилэн удмурт организациезлэн исполкомезлэн тӧроез Валерий Сергеевич Суркин журналистъёсын пумиськылӥз. - Миым 27-тӥ декабре партимы нимысьтыз пусъемын ни РФ-ысь Юстицияя министерстволэн Удмурт Республикая управленияз, со сярысь свидетельство но басьтӥм ни, - пусйиз В.С.Суркин. - Та дырозь "Единство" общественной движение вал. Партимес пусъем бере ик кутскимы радъёсамы выль членэз кутыны. Туннэ нуналлы "Единство" партилэн киязы билетъёсын 138 членъёсыз лыдъяське. Матысь дыре эскеремын луозы на 1,5 сюрслэсь трос куриськонъёс. Валерий Сергеевич журналистъёслы возьматӥз 3 номеро партбилетсэ. Нырысетӥ номеренэз, пе, сётэмын политсоветлэн тӧроезлы В.Г.Хорошавцевлы. Партилэн политсоветаз ватсаса пыртэмын Россиысь Кун Думалэн депутатэз, "Единство" фракцилэн членэз, законностья комиссилэн тӧроезлэн воштӥсез Ахмед Гаджиевич Билалов. Ортчем кенешоназ политсовет юнматэм "Единство" партилэсь интыосысь организациоссэ кылдытонъя схема но политсоветлэн комиссиосызлэсь составзэс. Кылдытэмын ньыль комиссия: идеологияя, быдэсъясь но закон дасясь властьлэн ёзъёсыныз ужанъя, партилэсь ужзэ радъянъя но интыын политикая, егитъёсын ужан политикая. Нимысьтыз вераськон вал Ижевскын организациосты кылдытон ласянь. Умоен лыдъямын городысь котькуд ёросын нимаз организация кылдытыны. Городын огъя организация уз луы. Городысь думалэн кӧня ке депутатъёсызлэн ӵектэмзыя, партилэн политсоветэз эскериз Ижевскын аскивалтонъя быръем ёзаз депутатъёслэсь "Единство" огазеяськонзэс кылдытон сярысь ужпумез. В.Суркинлэн верамезъя, матысь дыре сыӵе огазеяськон кылдытэмын луоз. Отчы пырозы А.Г.Галеев, О.Г.Краснопёров, В.С.Суркин, В.Г.Хорошавцев но мукетъёсыз мылкыд карисьёс. 18-тӥ мартэ ортчоно Можга городлы йыр быръёнъёсын валче "Единстволэн" политсоветэз пыр-поч эскерыны чакла городын югдурез, кандидатъёслэсь программаоссэс. Собере гинэ кенешозы кин понна дурбасьтыны. Со сярысь ивортэмын луоз февральлэн пумаз. Нош Можга городлы кивалтӥсе аслэсьтыз муртсэ ӵектыны "Единство" уг малпа. Матысь дыре Удмурт Республикаысь Кун Кенешлэн депутатъёсыз бырйыны кулэ Россиысь Федерацияя Советэ оскем муртсэс. Нош кыкетӥзэ ӵектоз республикамылэн Президентэз. Соин валче "Единстволэн" политсоветэз солэн тӧроезлы В.Г.Хорошавцевлы ӵектӥз депутатъёсын, Президентэн но Правительствоен Федерацияя Советэ кандидатураос пумысен кенешыны. "Единстволэн" политсоветэз вуоно кенешонзэ ортчытыны чакла февральлэн пумаз. Со дырлы одӥгаз газетын печатламын луоз партилэн быдэсак программаез. Ф.НИКИТИН. Европаын кадь луэ, пе Берло дыре ужан но улон интыосты туж ӟеч но дуноенгес тупатъяны дышизы ни асьме Удмуртиын. Сыӵе ужзэс лэсьтӥськисьёс "евроремонт" шуыса нимало. Уваын сыӵе ужъёсты "Глория" фирма быдэсъя. Со туж чебересь ӧсъёс но укноос пуктылэ, борддоръёс пӧрмо синъёсты палёмытӥсь суредъёслы. Миым фирма выльдӥз Ува больницалэсь витетӥ этажзэ. Бригадаен кивалтӥз Татьяна Тратканова. Кӧня ке ар талэсь азьло паласькись висёнъёсъя отделениез тодмантэм тупатъязы вал. Кыкетӥез бригадазы алигес гинэ "Тукля" эштослэсь конторазэ тупатъяз, мукетыз ужаны кутскиз телеграфын. Пӧрмытэ, оло, уг "Глория" фирма воксё Европаын кадь ик офисъёсты выльдыны, но заказчикъёслы но калыклы ужбервылзы туж кельше. П. Николаев. Адӟонтэмзэ но адӟизы Али но син азям на телевизор пыр возьматэм суред. Концлагерьысь фашист врачъёс таза егит пилэсь йырысьтыз малпан ёзъёссэ сӧремзы бере, сӧсыртэм мурт пудо сямен музъем вылысь турынэз сиыны кутскиз. Адямилэсь визьзэ быдтыса, сое миллион аъёслы бере кельтӥзы. Али но вань на сыӵе сьӧсь ужъёс быдэсъян сярысь малпасьёс. Таӵе учыръёсын асьмеос пумиським Быдӟым Отечественной война дыръя. Соос сузмытэм юртъёс интые усьтӥзы крематорийёс. Адямиослэн кузылэсь сумкаос но нылкышноослэн йырсиосынызы тырмытэм миндэр вурон фабрикаос лэсьтӥзы. Пленэ сюрем адямиосыз крематорийын сутэмлэсь азьло зарни зундэсъёссэс, часъёссэс но мукет дуно арбериоссэс талазы, пиньёссэс кискачен ишкаллязы. Гитлер приказ сётэм вал Ленинградэз (али Санкт-Петербурге) быдэсак куашкатыса музъемзэ гырыны. Нева дурысь городэз котыртыса, сьӧсьёс сое 900 нунал артиллериен ыбылӥзы но самолётъёсысь бомбаос куязы. Туэ 27-тӥ январе Ленинградэз котыртэмлэсь мозмытэм дырысен 55 ар тырмиз. Котыртэме сюремъёс али ке но тодазы вайыло на со дырез. Соку 125 грамм нянь понна вазь ӵукна ик черодэ султылӥзы. Соос пӧлын вал 3-4 литр вирзэс сётэм доноръёс. Соос таӵе ик ӧжыт нянь басьтӥзы ке но, мултэссэ ӧз куре. Шыръям коньдонзэс соос Вормон фондэ самолётъёс лэсьтыны кельтӥзы. Сютэм но начар улӥсьёс, Нева шурысь вуэз ӟигарзы быремен, мырдэм нуллӥзы. Куд-огез весяклы сюрес вылэ ик погралляз. Югыт луэм бере, Пулково вырйылысен немецъёс городэз артиллериен ыбылыны, самолётъёсын бомбаос куяны ӧдъязы. Радио пыр тревога ялыкузы, адямиос мурӝолъёсы ватскылӥзы. Нош сютэм но снаряд йӧтыса бырем адямиосыз машинаосын пуэз сямен огинэ тырыса, городлэн пумаз дасям траншеяосы куязы но сюен согылӥзы. Война бырем бере 1955-тӥ арын татын Некрополь лэсьтыны ӧдъязы. Сое революция понна нюръяськонын быремъёсты ватэм Марсово бусыысь памятник выллем карыны ӧдъязы. 1960-тӥ арын 9-тӥ мае Пискарево шайвылэз усьтыкузы, Ялан ӝуась тыл ваизы Марсово бусыысь. Некрополе пырон дорын мраморлэсь лэсьтэм борддоре Ленинградэз утисьёсыз данъяса гожтэмын та городэз мозмытон понна нюръяськисьлэн, Социалистической Ужысь геройлэн, кылбурчилэн М. А. Дудинлэн кылъёсыз. Павильонъёсын фотодокументъёсын возьматэмын войналэсь нырысетӥ нуналъёссэ но котыртэмысь потыны быгатэмзэс возьматӥсь материалъёс. Ленинградэз тушмонлэсь мозмытонэ соку Советской Союзысь вань калык пыриськиз. Казах поэт Джамбул Джабаев соку гожтӥз: "Ленинградецъёс, нылпиосы мынам". Нева дорысь городэз гитлеровецъёслэсь утён понна улонзэ жалятэк тыршемзэ ноку но уз вунэты "Ижсталь" огазеяськонлэн дуриськон цехысьтыз азьвыл мастер но партийной организацилэн секретарез, нош война дыръя разведчик Аркадий Афанасьевич Иутин. Иутинлэн тушмонлэсь ыбылӥськон интызэ шедьтон понна, лушкем эскероно луылӥз. Собере разведчикъёс "кылъёсты" асьме штабе вуттылӥзы. Та шуг операциосы соос быдэс отделениосын ветлӥзы. Озьы командованилы юрттӥзы тушмонлэсь кужымзэ тодыны. Тазьы асьме войскоослы капчигес луиз гитлеровецъёслэсь "лябгес" интыоссэс шедьтыны но соосты пичиен-пичиен быдтыны. Озьы ик Ленинград понна ӟырдыт ожмаськизы пулемётчик Семен Акимович Завьялов, артиллерияя дивизионной взводлэн командирез капитан Павел Тимофеевич Кривокорытов. Кыкназылы ик землякъёсмылы берлогес Советской Союзлэн Героез ним сётӥзы. Фронтлы озьы ик юртӥзы пӧртэм нациё адямиос, асьсэлэсь берпум коньдонзэс но ваньбурзэс вормон фондэ сётыса. Тани Ленинградысь Бариновъёслэн семьязы война кутскемлэсь азьло куать кузя вал. Атайзы Петр Иванович вагон поттон заводын огшоры рабочийлэсь ужзэ быдэсъяз. Кышноез Прасковья Васильевна нылпиоссэ будэтӥз. Атайзы но вить аресъем нылзы 1942-тӥ арын сютэм кулӥзы. Виктор пизы партизанъёс пӧлын тушмонлы пумит нюръяськыкузы бырыны шедиз. 12 аресъем Тася нылзэс школаенызы ӵош Бадӟым музъеме келязы. Прасковья Васильевна но 20 аресъем нылзы Женя ужазы Ленинградысь 27-тӥ поликлиникаын: анайзы - санитаркаын, нылзы - медсестраын. Ленинградэз гитлеровецъёслэсь быдэсак мозмытэмзы бере, анай нылынызы вань люкам коньдонзэс Вормон фондаз сётӥзы но куризы "Месть Бариновых" нимын самолёт лэсьтыны. Та сярысь ивортон соку ик газетъёсын гожтэмын вал. Ӝоген вылӥ командованилэн Верховной Ставкаысьтыз И. В. Сталинлэсь телеграмма вуиз. 1944-тӥ арын 1-тӥ июне Ленинградысь одӥгаз аэродроме самолёт вуиз. В. Чернов. Артэ сяська но синкыли Уй пал Кавказын бугыръяськонъёс кутскем дырысен татысь пӧсь интыосы республикаысьтымы МВД-ысь куать сю виььтонлэсь тросэз ужасьёс ветлӥзы ини. Огазеям командованилэн ивортонъёсызъя асьме пиос азязы пуктэм ужпумъёсты данэн быдэсъяло. Но жаляса верано луэ, котькудӥзлы ик ожысь улэпен потыны уг кылды. Тани нош ик Ижевске Чечняысь корос вуиз. 29-тӥ январе удмурт шаермы люкиськиз Гудермес дорын бырыны шедем майорен Александр Пишохаен. Трос калык люкаськиз та нуналэ "Металлург" культура двореце. Нош ик артэ мылкыдэз ӝожомытӥсь сяськаос, курыт синкылиос. Таӵе вакытэ шыпыт гинэ куара но быдэс улосэ чузъяське кадь. Ӵош служить карем эшъёсызлэн верамзыя, Александр Пишоха зэмос офицер, оскымон командир вал, нош кузпалыз но кык нылъёсыз понна - яратоно карт но атай. Александр Пешоха вордскиз 1966-тӥ арын Ростов-На-Дону городын, йылпумъяз командиръёсты дасянъя Дзержинский нимо вылӥ училищеез. 1994-тӥ арысен службазэ азинтӥз Ижевскысь 6575 номеро войсковой частьын. Кивалтӥз боевой подготовкая группаен. Егит офицер Уй пал Кавказысь пӧсь интыосы вить пол ветлӥз. Нагорной Карабахысь, Дагестанысь, Чечняысь ож лудъёсын быдэс ар пала ортчытӥз. Берпуметӥзэ Чечняе кошкиз вал миым толсуре. 706 номеро контрольно-пропускной пункт. Татын уриськиз куамын ньыль аресъем майорлэн улонэз. 21-тӥ январе ӵапак татӥ Гудермес палась потыны шӧтазы боевикъёс. Пуромиз ожмаськон. Таӵе огыр-бугыр вакытэ чакласькон но, оло, ыше-быре. Ог кык сю метр пала интыяськем дача палась чузъяськиз снайперлэн ыбем куараез. Пуля майорлэсь бур пал гадьзэ сӥсъяз. Эшъёсыз сое Ханкалаысь госпитале вуттӥзы ик, нош улонзэ утьыны ӧз быгатэ ни. Мар шуод, воргоронлы озьы кылдэмын ни, солы оскемын кунмес, улон-вылонмес утён. Но туала вакытэ кинлы кулэ меда асьме кунамы ик вир кисьтон? Кин валэктыны быгатоз сое алигес гинэ тямыс арессэ тырмытэм Аня Пишохалы? 6575 номеро войсковой частьлэн командирезлэсь ужзэ быдэсъясьлэн майорлэн Эдуард Чеховлэн верамезъя, али Чечняе мынэмын частьысь кык сю пала солдатъёс но офицеръёс. Соос пӧлысь одӥгез рядовой Дмитрий Прокопенко командирзэ келяса Ижевске вуиз. - Мон ачим но снайпер, - шуэ Дмитрий. - Ож кутске ке, одно ик "ужаны" ӧдъяло снайперъёс. Огыр-бугыр дыръя соосты синйылтыны шуггес. Отӥяз Дималэн кӧсэктэм ымдуръёсыз сипыртӥзы на: "Отчы берытски ке, командире понна одӥгзэ-кыксэ гинэ уг...". Бен озьы, оскымон эшеныд люкиськон синкылиез поттэ, ньылонэз кӧсатэ. Ф.НИКИТИН. 02 ивортэ Коньдон потто, наркотикъёс вузаса Наркотикъёсын кушласькисьёс тужгес синмаськиллям, лэся, Ижысь Молодёжной урамлы. Соинтэк-а милициын ужасьёс татын ӵем гинэ "пумитало" героинэн вузкарисьёсты. Тани кылем арня вискын но ӝегатэмын 36 аресъем Елена Ф. Солэсь 0,13 грамм героинзэ таламын. Наркотикъёс вузамез понна ик Вормонлы 40 ар урамын кырмемын 22 аресъем Сергей З. Таизлэсь 0,42 грамм героинзэ таламын. Ӝутэмын уголовной уж. Ижысь ик Киров урамын героинэн ӝегатэмын 45 аресъем Наталья К. Кышномурт коньдон поттыны дышем, наркотик вузаса. Натальялэсь 0,22 грамм героинзэ шарае поттэмын. Лушкасько нуназе куазен Маин гинэ уг паймытъяло ни лушкаськыны дышемъёсыз. нуназе куазен талало дуно кулэсь изьыосты, кисыысь коньдонэз сузяло. Завьяловоысь милиционеръёс шарае поттӥзы та черкогуртысь больницаын Б.-лэн ышем пыдкутчанъёсызлэсь "выль" кузёзэс. Со вылэм Изгуртын улӥсь 23 аресъем Екатерина Н. Та апай вазен но суд улэ кыскамын. Сӧсырлэсь таланы капчигес, пе Сарапулысь Набережной урамын 1-тӥ группаен инвалидлэсь И.-лэсь 280 манет коньдонзэ но сумкаысьтыз 70 манет тыр басьтэм сиён-юонзэ талаллям. Милициын ужасьёс одӥгзэ лушкаськисез, 17 аресъем Альбина Н.-ез, шарае поттӥзы. Солэсь юлтошсэ Сергеез утчало. Дуно куосын дӥсяськемзы потэм Ижысь 34-тӥ школаысен А.-лэн дуно кулэсь дӥсез"пыдъяськиз". Та ужъя ӝегатэмын 17 аресъем Ирина но 21 аресъем Евгений. Евгений вазен но лушкаськылэм ни. Кылем арын декабрь толэзе со, Сабуров урамысь квартирае пыраса, 550 манет лушкам. Куноясько ук, куноясько! Улонниысь лушкаськонъёслэн лыдзы уг кулэсмы. Та ужъя кырмемын Ижысь 23 аресъем Николай Ш. но. Берло ӝыны ар куспын со ӧжытсэ 10 квартираын "кунояськыны" вутскем. Таӵе амалэн коньдон поттонлы таид синмаськем, иське. Ижысь ик М. йӧл сиыны яратӥсьёс вынъёс дышиллям "Ижмолоколэн" комокъёсыз котыртӥ "зынъяськыны". 22 аресъем Константин но 18 аресъем Максим берло куинь толэзь ӵоже ӧжытсэ 6 комок "сузяллям". Пиосыд азьвыл но суд улэ шедьылэмын. Котькытын эсэпсэ чаклано Ижысь Ленин урамысь "Дом одежды" магазин дорын милициын ужасьёс ӝегатӥзы 23 аресъем Людмила М.-эз. Солэсь 34 парнографиен герӟаськем кассетаоссэ таламын, ӝутэмын уголовной уж. Вот так, куноос! Кӧня пол верамын ни, дорады тодмотэм адямиосты эн лэзьялэ шуыса. Нош соосын ӵош ӟенелик сьӧрын пукыны но - таиз ини воксё валантэм. Воткинск заводын ужась 45 аресъем Д. "куное" пыртӥз кык тодмотэм апайёсты. Корка кузё ӵуказеяз ӵукна гинэ валатскиз, дораз куд-ог арбериосыз уг тырмо шуыса. Милициын ужасьёс ӝегатӥзы 18 аресъем Анастасия В-ез но 26 аресъем Татьяна Н.-ез. Ӝутэмын уж. Ватӥз мурӝолэ Ӝомдыны кутскем бере Завьялово ёросын шедьтэмын 55 аресъем Анатолий С.-лэн шӧйыз. Та ужъя милиция ӝегатӥз солэсь 30 аресъем Алексей пизэ. Ӵош юэмзы бере, таос куспын керетон пурӟем. Жугыса виемез бере азьвыл но тюрьмаын "кунояськем" А. атайзэ мурӝолэ ватэм. Ӝутэмын уголовной уж. ТАЗАЛЫК Кечат-вамат ез уг кортна висёнэз Берло дыре Россиын, озьы ик Удмуртиын но, чутрак ӝутскиз туберкулёзэн висисьёслэн лыдзы, тужгес ик арлыдоос, юисьёс, наркоманъёс пӧлын. Та черен курадӟисьёс пӧлын озьы ик данак пытсэт сьӧрын пукисьёс. Республикаысьтымы сыӵе муртъёсты йӧнато Ижевскысь ньылетӥ колониын. Отын ужа туберкулёзэз эмъянъя нимысьтыз больница. Милям корреспондентмы пумиськылӥз солэн кивалтӥсеныз М.В.МИХАЙЛОВЕН. - Михаил Васильевич, кылем арын Россиын амнистия ортчиз. Уно адями эрике лэземын вал. Тӥляд колонияды пукисьёс но мозмытэмын вал, дыр. Кышкытлык вань-а, пытсэт сьӧрысь потыса, соос висёнэз вӧлмытозы шуыса? - Бен, милям колониысьтымы но данак мурт дырызлэсь вазь эрике потӥз. Амнистия сярысь постановлениын пусъемын вал, соос эмъяськон курсэз быдэсак ортчыны кулэ шуыса. Со сяна, котькуд мозмытоно адями эскеремын вал, уг вӧлмыты ни-а со туберкулёзлэсь микобактериоссэ. Эрике лэземын вал микобактериосты вӧлмытӥсьтэм муртъёс гинэ. Соин ик кыӵе ке кышкытлык вань шуыса курданэз ӧвӧл. - Но куддыръя тазьы луэ: адями пытсэт сьӧрысь потэ гинэ но, визьмаськыны уг вала, нош ик йыртэма, йыруж лэсьтэ, берен колоние шеде. - Талы паймонэз ӧвӧл. Тани миым гинэ амнистия улэ шедемъёс кӧняез ке выльысь дорамы берытскизы ни. Эрико улонын соос ас интызэс ӧз шедьтэ, иське. Собере кызьы луэ, ми дорысь адями йӧнаса кошке, но больницаын эскериськон сярысь вунэтэ, учётэ уг султы. Тазалыкез сярысь чик уг сюлмаськы. Озьы колоние выльысь туж лябӟыса, секыт луыса вуэ. - Адямилэсь правооссэ утён но дунъян таӵе учыре уродэн берытске кадь. Табере нокинэ но учётэ кужмысь султытыны уг луы ни ук. - Озьы. Туберкулёзэн ӵемгес висё асьсэды киязы кутыны быгатӥсьтэм муртъёс. Я, шуом, асьсэ сярысь уг сюлмасько, но соос нуналлы быдэ мукет адямиосын пумиськыло, транспортын ворттыло, трос калыко интыостӥ ветло ук, лек эзелез пазяса-вӧлмытыса. Туберкулёз угось туж ӝог но огшоры палаське, кылсярысь, кызэм, кизьнэм дыръя пазьгиськем дыльды пыр гинэ. - Тӥляд больницаяды та ласянь капчигес, дыр. Колониын адямиез кужмысь карыны луэ. Озьы-а? - Зэмзэ но, эрикын адями мылыз потэ - эмъяське, мылыз потэ - уг. Ми дорын озьы тунаса уд улы. Соин ик эмъянын азинсконъёсмы но ӟечесьгес, шуом, республикаысьтымы туберкулёзэз эмъянъя диспансерен ӵошатыса ик. Собере берло дыре пытсэт сьӧрын пукисьёслэн йӧнатскон шоры учконзы но воштӥськиз. Соос тазалыксы сярысь тросгес сюлмаськыны кутскизы. Та вакытэ тани стационарамы 200 мурт кылле, амбулаториын 700-лэсь уно адями эмъяське. - Та мында адямиез огдыре йӧнатыны секыт йӧтэ, дыр. - Бен, туж трос ужано луэ. Но эмъюмъёс ласянь ум шугъяськиське. Коньдон милемлы федерация висъя. Специалистъёсмы тырмыт. Больницаямы 90 мурт тырше. Юрттэт кулэ луэ ке, шаерысьтымы мукет эмъяськонниосын ужасьёслы но вазиськылӥськом. - Пациентъёсты огшоры адямиос ӧвӧл. Лекъяськон, пумитъяськон учыръёс уг луыло-а? - Ужын олокыӵе вакытъёс но кылдыло. Но огъя учконо ке, данакез пациентъёсмы эмъясьёсты гажало. Пытсэт сьӧрын пукись адями понна врач эрикысь иворъёс вуттӥсь выллем луэ. Больницаямы нылкышноос но ужало, тани витез врачъёсмы - кышномуртъёс. - Тӥ нуналлы быдэ колоние пыриськоды, висисьёсын ужаськоды. Асьтэлы но туберкулёз уг паласькылы-а? - Ватытэк верасько, таӵе учыръёс вань медперсонал пӧлын но, колониысь мукет ужасьёс пӧлын но. Секыт черласьёсын ужаськом бере, висёнлэсь нокин но утемын ӧвӧл. Соин ик тазалыкмес ялан чакласа-эскерыса улӥськом. - Зэмзэ но, уждылы уд синмаськы. Асьтэлы таӵе удыс бырйиды шуыса уд жаляське-а? - Кин ке но татын но ужаны кулэ ук. Мон йылпумъяй Ижысь медициная институтэз 1986- тӥ арын. Кӧня ке ар ӵоже медициная ӝог юрттэт сётонъя службаын ужай. Колониын тыршисько 1995-тӥ арысен. Та удысэз быръемме уг жаляськы. - Туберкулёз - секыт висён. Кулон учыръёс но луыло, дыр. Пациентъёстэс жалян мылкыдды кылдылэ-а? - Бен, луэ озьы но: туннэ адями дорамы вуэ, нош ӵуказеяз кулэ. Жалян сярысь вераны уг быгатӥськы. Но висисьёс шоры учкиськод шудтэм муртъёс шоры кадь. Соос, зэмзэ но, шудтэмесь. Пытсэт сьӧрын пукон капчиен уг сётскы ук. Уката адями вала ке аслэсьтыз сьӧлык лэсьтэмзэ. Юлия АЛЕКСАНДРОВА. Лия МАЛЫХ Нылкышноос сярысь веранъёс Вуэ уз выйы, тылын уз сутскы Корка вадьсы чилясь машина дугдӥз но отысь потӥзы ӝужыт мугоро но синмаськымон тусо кык егит воргоронъёс. "Лушкам" ю тысь утчаса, кытчы гинэ ӧз вутске соос, ваньзэ йырчукин берыктӥзы, бышкаса потӥзы. Кышкаменыз но возьдаськеменыз тямысэтӥ классын дышетскись Надя куараен бӧрдӥз. Номыр ӧз шедьтэ. Сьӧрлось вуэмъёс уйлы доразы ик кӧлыны кылизы, нош ӵуказеяз сюратайзэ Леонтий Георгиевич Никоновез сьӧразы нуизы. Озьы сютэм нылкышноосты жалямысьтыз, воргорон одӥг арлы пытсэт сьӧры шеде... Колхозын ю тысь тырмымон ке но люкаськиз, гуртоослы сое ӧз люке. Со понна шыръёс но комакъёс толбыт кӧтсэс тыризы. Тулыс вуиз но, ю тысез мешокъёсы тырыса, городэ келяны косӥзы. Нош Леонтий Никоновлы оскемын вал сое возьманы-чакланы. Ваньзэ мешокъёсы тырем бере, нылкышноос сюлворизы, ӵужем бервылзэ коть, пе, сёт вал милемлы. Кык килограммен но люкаськиз-а, ӧз-а сюен суро тысь. Кинлы ке но ӧжыт потӥз, лэся, со - урттылӥськизы. Война дыръя но со бере секыт сютэм аръёсты Надя Перевозчикова улытозяз но уз вунэты. Уз вунэТы сюратайзэ но. Солэн аслаз атаез быриз войнаын, нылаш сое умой-умой тодыса но ӧз вутты - атаез оже кошкыку, солы ньыль арес котырын вал. Нош сюратаез бен юылыны яратылӥз ке но, туж визьмо но котьмалы быгатӥсь вал. Ижевскысь гурт хозяйствоя институтэз йылпумъякуз, Надялэсь диплом ужзэ со быдэсак печать букваосын гожъяз, машинкаен печатлам кадь. Сизьыметӥ классэз йылпумъяса, Надялэн туж мынэмез потэ вал Казаньысь суреданъя училищее. Анаез Таисья Степановна школаын дышетӥз, нош наглядной пособиос ӧвӧл. Соку ик дышиз тӥни нылаш суреданы. Но дышетскыны сое палэнэ ӧз лэзе, коньдон ӧвӧл, пе. Дас классэз йылпумъяса, Надя нош ик Казане куриськиз. Таяз учыре но алӥзы: сомында дышетскем бере училищее шат мынод на, пе. Озьы Шаркан ёросысь Вортча починка гуртысь нылаш зоотехник луыны малпаз. Пичи дыръяз шуылӥз ке но Мичурин луо, вормиз пудоез яратон мылкыдыз. Конкурс бадӟым ке но вал, институтэ со пыре нокыӵе шуг-секытъёстэк. Надежда Константиновна улытозяз ӧз жаля быръем удыссэ. Секыт ке но, кема ке но, уже празднике кадь шумпотыса ветлӥз. Но пинал дыръяз укыр секыт потэ вал вазь ӵукна султон. Дояркаос скал кыскыны вить часлы мыно ке, со но пыд йылаз ни, нош шудэмысь пыре вал уйшор бере. Дыр ӧз тырмылы семьяез кылдэм бере но. Гуртысь ужъёсты но быдэстоно, нылпиосты но утёно, фермаосы но дыртоно. "Идеал" колхозын ужакуз но, берло аръёссэ ёросын валтӥсь зоотехник луэмез бере но ялан малпаськылӥз нылкышноослэсь ужзэс капчиятон сярысь. Ёросэ ӟеч выжы скал уськытон пумысен Надежда Константиновна трос пол вуылӥз Москва котырысь ёросъёсы. Сизьымдонэтӥ аръёслэн кутсконазы отын скаллы быдэ куинь сюрс килограмм пала йӧл кыско вал, нош асьмелэн мырдэм кык сюрс килограммозь люкаськылӥз. Нылкышно вожъяськыса учкылӥз палэнысь эшъёссылэн нуналаз кык пол скал кыскемзылы: ӵукна тямыс часын мыно, куинь час пала ужало но доразы берто. Ӝытазе нош ик фермае мыно. Та амалэз ёросэ вӧлмытон пумысен нылкышно кема ветлӥз кивалтӥсьёс сьӧры. Нокинлэн кылэм-адӟемез ӧз поты. Кызьы косӥзы вылӥысен, озьы ик ужа, пе. Ярам, эскерон понна висъязы ик куке-соку "Победа" колхозэз. Гуртоослы туж кельшиз тазьы ужан, йӧл кыскон но йылӥз. Озьы та амалэз пумен ёросысь мукет хозяйствоосы но вӧлмытӥзы, райкомлэн нырысетӥ секретарез соку вал Эмилия Тимофеевна Габдулхакова. Со аре йӧл скаллы быдэ куинь сюрс килограмм люкаськиз, азьвыл сярысь, куать сю литрлы тросгес. Но тазьы ужан понна скалъёсты ӟеч сюдыны-утялтыны кулэ вал. Одӥгез умой: нылкышноос капчигес шокчизы. Со-а шумпотон ӧй вал ёросысь валтӥсь зоотехник понна?! Институт бере одӥг арзэ Надежда Константиновна ужаз Зюзиноын. Нош улон дасям ни вылэм солы мукет сюресъёс. Картлы бызьыса, нылмурт улыны выже Шарканэ. Фамилиез сюратаезлэн кадь луэ - Никонова. Но таиз удмурт выжыысь, нош картэз ӟуч вал. Сюратаез сямен ик, нылкышно мурт нылпиез вордэ, зэмос анай луэ солы. Нырысь лыктэмез бере ик укмыс аресъем пияш сое мама шуиз. Берло но бордысьтыз ӧз люкиськылы, весь сьӧраз ветлӥз ужантӥяз, нош аслаз муминыз кык корка гинэ виссы вал. Сузэрез но отын ик улӥз. Люкиськемзы бере кузпалъёс нылпиоссэс люко, кыкназы но выль семья кылдыто. Картэзлэн азьвыл кышноез семьяеныз ӵем гинэ вуылӥз Никоновъёс доры. нылкышно солы ӧз пумитъяськы, картэзлэсь нылзэ но аслаз карылӥз. Кузпалъёслэн кык нылъёссы вордӥськизы на. Но семья улонэз Надежда Константиновналэн капчи ӧй вал. Куд-ог дыръя картэз дорысь кошкыны но бурдъяськылӥз, но таӵе вамышлэсь возиз пиез. Ӧз быгаты анай мурт сое кельтыны, сюлмыныз бурмиз котыраз. Эшъёсыз, тодмоосыз жаляса куддыр шуо вал: - Ой, Надя, кыӵе тон шудтэм!. Нош нылкышно пумитазы вазьылӥз: - Ай кин тодэ? Зэмзэ но, карт бордын гинэ шуд вылымтэ, шуэ со, али нылпиос котырын ик шуд возиське, шӧдске. Куинез ик пиналъёсыз Никоновалэн асьсэ семьяен уло. Пиез тани ачиз но песятай луиз ни, нош анайзэ уг вунэты, весь юалляське улэм-вылэмез сярысь. Кусыпсы кыдёкын ӧвӧл. Кема аръёс ӵоже ужаз трактористын, али со - механик. Нош бадӟымез нылыз артэ ик улэ, кык нылъёсыз будо. Песянайзы туж данъяське соосын: дышетскыны но пӧрмыто, эктыны но устоесь, юрттӥськыны но вуо: пу пырто, ву ваё. Надежда Константиновналэн нылыз Татьяна Максимова шарканъёслы гинэ тодмо ӧвӧл. Со кивалтэ Нылпи творчествоя юртысь бальной эктонъя кружокен. Пиналъёсыныз трос пол вуылӥз ни Ижевскысь сцена вылэ но. Вань мукет но ужез. Со биолог, ужа ёрос санэпидемстанциын. Пичиез Наташа нылыз дышетскиз экономистэ, улэ но ужа Воткинскын. Таизлэн но сюлэмызлы кельшись удысэз вань: куасьтэм сяськаослэсь чебер керттэтъёс лэсьтэ. Ваньмон дырез уг тодылы - адямиос весь куронэн вазисько. Анайзэ но дышетӥз ни сяська керттэтъёс лэсьтыны. Надежда Константиновна туж данъяське нылпиосыныз. Ужлэсь ваньмытэк, пиналъёсыныз пукыны дыр но ӧз тырмылы. Нош соос тӥни кыӵе йӧноесь луизы: ваньзэ ас понназы лэсьтыны дышизы, ужлы но уг ёрмо. Серафимез кулэм дырысен нылкышно дас кык арзэ огназ улэ ини. Тодмоосыз жаляло шимес, мӧзмыт, дыр, пе. Но Надежда Константиновналы яра огнын улон. Секыт-а, мар-а улӥ картэн, али шутэтскисько, шуэ. Нош мукет ласянь, мӧзмыны, кайгырыны солэн дырыз ӧвӧл. 1992-тӥ арын пенсие потыса, кык арзэ ужаз на валтӥсь зоотехник луыса. Собере "Идеал" колхозэ кӧня ке дырлы кутскылӥз. Дышымтэ вылысь нырысь секыт ик потӥз уже потатэк. Но озьы вал нырысь-валысь гинэ. Гуртын пукыса но Надежда Константиновна ужлы уг ёрмы. Вордэ скал, курег, ӟазег. Гужемзэ бакчаысьтыз, садысьтыз уг ваньмылы. Утялтӥсь киез шӧдыса, емышъёс но удалто: яблок, сутэр, вишня, ирга, эмезь, узы... Уката ик удалтэ кузёлэн сяськаосыз. Кыӵеез но ӧвӧл соос Никоновалэн бакчаяз, капчигес луоз, дыр, вераны, кудӥз уг буды татын. Со гинэ мар. Берло дыре шӧртчи нылкышно эшъёсыныз ӵош кулэтэм, куасьмем шачаослэсь сикез сузяны-утялтыны дышизы. Эшеныз Галина Ивановна Оленёваен бугро но асьсэос лэсьто. Улон корказэ ву басьтӥз но, муш толйытыны шуыса, пуктэм юртаз каръяськоно луиз. Притыксэ эшеныз ӵош пуктӥзы ни. Пичи ке но, шуныт, огназлы тырмымон. наличникъёссэ но ачиз лэсьтӥз. Но таин гинэ ӧз йылпумъяськы нылкышноослэн лэстӥськон ужзы. Эшезлы но, аслыз но гид пуктӥзы. Оленёвалэн пересь анаезлы мунчо ӝутӥзы на. Лэсьтӥськон ужазы пиосмурт ки уг йӧтылы, ваньзэ асьсэос пӧрмыто. Кытысь бен кужым шедьто та арлыдо нылкышноос? Но Надежда Константиновна шоры учкыса, мынам сое чик но арлыдоос пӧлы пыртэм уг поты. Етӥз, задор мылкыдо. Ай егитъёс но синмаськемзэс куд-ог дыръя вераны шедьто. - Куинь ар талэсь азьло одӥг ӝытысен пияш эктыны ӧтиз, - маде нылкышно. - Юа, быземын-а, пе. Шуисько, дасяськисько гинэ ай. Кужмо луыны но егит возиськыны Никоновалы юрттэ, дыр, кезьыт вуэн пыласькемез но. Дас куинь арзэ тазьы дарманьтэ ни. Кык эшъёссэ но сьӧраз кыскиз. Сӥзьыл куазь но, тол куазь но уг кышкаты соосты. Нош кутсконэз вал туж огшоры. Телевизорысь адӟиз тол куазен атаеныз ӵош пыласькись пияшез. Малпаз, мар ке но вань, дыр, оскалтоно. Урамын кызь градус кезьыт, лымыя. Ошмесысь кык ведра ву ваиз. Одӥгзэ вылтӥз кисьтӥз но, быдэс мугорзэ вылӥысен улӥозь шуныт басьтӥз. Кыкетӥ ведралэсь кынмиз. Тӥни озьы, одӥг ведра вуэн тырмытэ. Мар со грипп, кынман висёнъёс уг тоды. Яратэ куасэн бызьылыны. Колхозын ужакуз но весь пыриськылӥз ӵошатсконъёсы. Тужгес но яратэ вал ки вылаз ӝуткаськыны но ыбылӥськыны. Ӝуткаськонын нокин но сьӧраз уиськыны ӧз быгаты. Мотоциклэн ветлэмысьтыз, нылкышнолэн киосыз кужмоесь вал угось. Нош ворттылоно луиз туж трос, вуттӥськыны кулэ вал бадӟым колхозысь котькудаз ик фермае. Мотоцикл куараез кылыса, нылкышноос частэк но тодо ни вал ӵукна ку султыны. Вал вылын но трос гинэ ворттылыны кылдӥз. Нош ыбылӥськыны дышетӥз Юра братэз. Надяез со ӵемысь сьӧраз кутылэ вал пӧйшураны но чорыганы. Надежда Константиновналэсь быгатонлыкъёссэ вераса, пумаз но вуыны уг луы ни. Озьы ке но, одӥгеныз эшшо тодмато на. Со баянэн но шудыны йӧндыре. Институтын дышетскыкуз кружоке ветлэм, нотаосты дышетэм. Таизлы сюрес усьтӥз кырӟаны яратон мылкыдыз. Ӟеч ужамез понна Надежда Никонова пусъемын данъян грамотаосын но "Знак Почёта" орденэн. Та дуно наградаез сётыкузы вожъяськисьёс но вал. Нош нылкышно солэсь дунлыксэ озьы ик ӧз шӧды. Кылиз со сисьмыны кутскем корка вылэ. Машина- мар басьтон сярысь малпаны ик ӧз дӥсьтылы. Ярам, пенсие потэмез бере, ужам коньдонэныз телевизор но холодильник басьтӥз. Нош солэн мында пенсиен туэ кыдёке уд мыны. Пенсия басьтыны одӥг пол кемдӥз юылыны яратӥсь дояркаен. Кӧня пол сьӧраз бызьылоно луиз колхозысь зоотехниклы. Куинь нуналэн но соиз скалъёссэ кыскыны ӧз пота, милициен кышкатъятэк ӧйлась. Со но тӥни паймиз, асьмеос, пе, одӥг мында пенсия басьтӥськом ук. "Ӵош ужам уго", - озьы гинэ вазиз на пумитаз Никонова. Но талы луыса, нылкышно уг кайгыры. Дырын-дырын сюлэмзэ чепыльтэ вордскем гуртэзлэсь, ӵош шудэм эшъёсызлэсь мӧзмон. Нокинлэсь куремзэ-косэмзэ возьматэк, гуртэн пумиськонъёс радъя. Воткинске-а, Ижевске-а мынэ, базаре ялон ошыса кельтэ. Туэлы но пумиськон нуналэз тодмостӥз ни. 26-тӥ мае со нош ик пумиськоз вордӥськем гуртэныз. Выноска Туберкулёз висён шонерак герӟаськемын адямилэн улэм-вылэменыз. Та лек чер паськыт вӧлме огыр-бугыр вакытъёсы, куке калыклэн улонэз начарме, секыт луэ. Ӵапак сыӵе югдуре кунмы шедиз берло аръёсы. Озьы 90-тӥ аръёсы чутрак ӝутскиз туберкулёзэн висисьёслэн лыдзы. Туберкулёз - паласькись висён, соин ик со нокыӵе могӟетъёсты но кунгожъёсты уг шӧдылы. Вашкала вакытэ ини врачъёс та сярысь тодо ни вылэм. Тани вашкала Персиын чахоткаен курадӟись муртъёсты таза адямиослэсь люкылӥллям. Вавилонын воргорон висись кузпалзэ куштыны быгатэ вылэм. Вашкала Римысь эмъясьёс но умой тодо ни вылэм, чахоткаен висись вӧзысьтыз адямиослы кышкытлык вае шуыса. Туберкулёзэз сайкатӥсь микробез усьтӥз немец тодосчи Роберт Кох 1882-тӥ арын. Векчи лулослы ним сётӥзы - Кохлэн бациллаез. Али сое ӵемгес туберкулёзлэн микобактериез шуо. Микобактерия адямилэн мугораз пыре тыос пыр омырен ӵош. Сое вӧлмытэ висись адями кызыкуз яке кизьнылыкуз. Микроб мугоре шедемлэн пытьыосыз пӧртэмесь луо. Шуом, мугорлэн утиськон кужымъёсыз золэсь ке, инфекциез со вормоз, висён уз кутскы. Куддыръя мугор микобактериослэсь ог люкетсэс гинэ лябӟытэ. Сыӵе дыръя уг, инфекция "уг сайка". Но адями таӵе вакытэ тазалыкез сярысь юн сюлмаськыны кулэ, шуом, аракы юон ласянь ик туж чакласьконо. Улон возьматэ: мугорлэн иммунитетэз лябӟе ке, висён кужым люканы ӧдъя, нош алкоголизмен курадӟисьёс туберкулёзэн кык поллы ӵемгес висё. Микобактериос лябӟем мугоре шедё ке, соку ини тод: туберкулёз паласькиз, адями одно ик висьыны кутскоз. Инфекциямугорлэн пӧртэм ёзъёсаз каръяськыны быгатэ. Тужгес ӵем (90 процентаз учыре) лябӟо тыос. Висёнэз шараян амалъёс сярысь верано ке, тужгес пайдаё луэ рентген эскерон. Со луонлык сётэ инфекциез вазь ик тодманы. Нош облученилэсь курданэз ӧвӧл, араз одӥг пол флюорографиез ортчонлэн нокыӵе кышкыт "бервылъёсыз" ӧвӧл. ПОЛИТИКА Кык гондыръёс одӥг гуэ ӧз тэре Соос огвакытэ, 1931-тӥ арын, вордскемын. Борис Ельцин - феврале, Михаил Горбачёв - мартэ. Будэм, кивалтонлэн тубатъёстӥз вамышъям сюрессы но одӥг кадьгес. Кыкназы ик вылӥ дышетон заведениосты йылпумъязы, кыкназы ик егитысен партиен герӟаськем уже пыриськизы. Михаил Сергеевич кивалтӥз КПСС-лэн Ставрополь крайкоменыз, Борис Ельцин - партилэн Свердловск обкоменыз. Бен, Горбачёв Ельцинэз кӧня ке арлы азьпалтӥз ик. 1978-тӥ арын сое КПСС-лэн ЦК-яз басьтӥзы, секретаре юнматӥзы. Нош Ельцин Москвае 1985-тӥ арын гинэ вуиз ай, КПСС-лэн ЦК-езлэн секретарез, партилэн Москва горкомезлэн нырысетӥ секретарез луиз. 1985-тӥ арын Михаил Сергеевич киын быдӟым странаенымы кивалтон биньгозы вал ини. Партилэсь кужымзэ лябӟытытэк, со выльдӥськонэз ялӥз. Экономикае рыноклэн тодметъёсыз пыӵаны кутскизы - кылдылӥзы нырысетӥ кооперативъёс. Ӵапак та вакытэ улонамы пыризы шара веран, демократия валанъёс. Табере шонерак вераны луэ ни: Горбачёв "вордӥз" Ельцинэз. Тросэз тодо на, луоз, Борис Николаевичлэсь 1987-тӥ арын октябре КПСС-лэн ЦК-езлэн Пленумаз янгышъёсты шараяса чурыт вераськемзэ. Мукет вакытэ дӥсьтонэз тырмысал меда солэн? Татысен кутскиз Ельцинлэн будонэз. 1991-тӥ арын со вань калыкен Россилэн Президентэз луиз, 1996-тӥ арын вылӥ кивалтон удысэ кыкетӥзэ пуксиз. 1990-тӥ арын партиысь потӥз. Со дырысен ваньзэ лэсьтӥз коммунистъёсты кунэн кивалтонлэсь палэнтон понна. 1992-тӥ арын мытӥз экономикаын чутрак воштӥськонъёсты, ар ортчыса быдтӥз Кенешъёсты. Озьы Россия понна кутскиз выль вакыт, демокртие но рыноке выжон. Бен, та кык кивалтӥсьёс кыл куто Совето Союзлэн куашкамез понна. Калык уно шуг- секытъёсты чидано луиз, али но чида. Но кыксы ик соос сюлмаськизы кунмес кужмоятон понна. Ужан амалъёссы туж пӧртэмесь вал: Горбачёв демократиен шудӥз, куке зэмос демократия ӧй вал на, Ельцин демократия кылдон но юнман вакытэ эксэйлы пӧрмиз. Туэ та кык кивалтӥсьёс пусъё 70 арессэс. Юлия АЛЕКСАНДРОВА. Удмуртия: выль даур Кыллись из улэ ву уг бызьы Та арня куспын кӧня ке ёросэ вуылыны кылдӥз. Син шоры соку ик йӧтэ таӵе суред: одӥг омырен шокаса, экономика ласянь огкадь условиосын ужаса, пӧртэм коллективъёс ваньбур поттонэз асьсэ сямен радъяло. Тани Грах ёросысь "Мари- Возжай" эштосын котькуд скалзылэсь 3 килограмм пала гинэ йӧл кыско. Нош "Родина" колхозысь бускельёссы ньыль пол трос. - Котькытын кузё луыны кулэ, - алигес калык азьын вераськыкуз шуиз Кун Кенешлэн та ёросъя быръем депутатэз Анатолий Марченко. - Тани "Удмуртторф" предприятимы кылем арын юрттӥз райцентрысь хирургияя блокез выльдыны. Али вераськон нуиськом нуналлы быдэ 250 муртэ эскерыны-эмъяны луымон поликлиника лэсьтон сярысь. Но монэ шугъяськытэ больницаысь кивалтӥсьёслэн буйгатскыса улэмзы. Уг тыршо соос удыссэс умой-умой радъяны, туала куронъёсъя улыны. Зэм но, ӟеч кузётэк умой кутскон но йылаз-пумаз уз вуы. Уно сюрсъёсын быдтэм коньдон пайда уз сёты. Та ласянь умоен висъяське "Родина" колхоз. Солэн кивалтӥсез Михаил Крестьянинов хозяйствоен дас вить ар ӵоже кивалтэ ни. Гурт улонэз ӟеч тодэ, котьмае валаса-чакласа радъяны сюлмаське. Соин ик азинсконъёс но пусйымонэсь. Кылсярысь, котькуд гектарысь татын кылем арын 24 центнер ю тысь кутсазы. Пудо вордӥсьёс но арысь аре шумпотто. Колхозлэн кузёосыз тыршо быгатэмзыя выльдыны техниказэс. Тани матэктӥсь тулыс ужъёслы но кӧня ке выль машина дасямын ни. Ваньмыз со возьматэ: бызьылӥськод-утчаськод ке, маке но пӧрме. Нош дасьсэ возьмаса улӥсьёс весь бере кылисьёс пӧлын луо. Та верамлэсь шонер луэмзэ адӟыны луэ быдэс республикамылэн улэм-вылэмез вылын но. Асьме Правительстволэн экономикаез ӝутон борды басьтӥськемез юрттӥз огъя югдурез тупатыны. Бен, кин ке шуоз, ма, со асьме кивалтӥсьёслэн пӧсямзы бордысь уг поты - нефтьлэн дуннеысь рынокын дуноямез озьы берытске. Мар ватонэз, му вӧй шӧдӥськытэк уг кыльы. Но люкаськем коньдонэз но валаса кутыны быгатоно ук. Я, ойдолэ чаклалом лыдпусъёсты. Удмуртилэн казнаяз кылем арын 1,6 миллиард манет вуыны кулэ вал. Люкаськиз 2,4 миллиард. Москва но пусъемлэсь 77 миллион манетлы уногес висъяз. Озьы луонлык кылдӥз экономикаын ӟеч воштӥськонъёс ортчытыны. Тани та таблица возьматэ промышленностьын ваньбур поттонлэсь кызьы будэмзэ (сояз яке таяз арын, азьло ортчеменыз ӵошатыса, процентэн). 120 117 115 108,3 110 105 100 100,2 95 97,7 90 88 85 86 86 80 77 78 75 70 1992/1991 1993/1992 1994/1993 1995/1994 1996/1995 1997/1996 1998/1997 1999/1998 2000/1999 Толэзьем шоро-куспо уждун ноябре 2158 манет луиз. Но 1-тӥ январьлы экономикалэн пӧртэм удысъёсызъя уждун тыронэн пунэме кылён 248 миллион манет лыдъяськиз на. Ар талэсь азьло югдурен ӵошатыса, со кык пол ичигес ке но, та ласянь трос лэсьтоно на. Одӥг муртлы толэзьлы тырмымон сиён-юон басьтон понна, декабре кулэ вал 724 манет. Арлэн кутсконаз со понна 16 процентлы ичигес коньдон кошкылӥз. Республикамылэн кивалтӥсьёсыз туэлы но ас азязы бадӟымесь ужпумъёс пукто. Куддыр отысь но татысь кылыны луэ, соосты, пе, берло дыре туж ик адӟылыны но уг кылды. Бен, Александр Волков Москва дорысь санаторийын шутэтске-эмъяське, нош гань-гань улыны маза ӧвӧл. Нуналлы быдэ сямен пумиськылэ федеральной ведомствоослэн кивалтӥсьёсынызы, асьме министръёс но дораз вуыло. Трос ужа али президентмы "Шкода-Авто-Удмуртия" проект бордын. Бен, та малпанэз быдэстон туж шуген сётӥське. Солы пӧртэм мугъёс люкето. Кылсярысь, Чехиысь "Шкода" фирма али быдэсак ини Германиысь "Фольксваген" концерн киын. Нош соизлэн Россия шоры учконэз мукетгес. Чехъёс малпало вал асьме автозаводысь бушам интыосын ужаны, нош немецъёс малпало чылкак выль азьын завод ӝутыны. Со понна асьме шаере ог 500 миллион доллар коньдон вуыны кулэ. Урод шат? Уго та уксё пӧлысь ог люкетсэ асьме "Ода" ("Орбита") машинаез умоятонэ но кутыны луысал. Удмуртиез пыр-поч эскерон вылысь, Александр Волков Прагае ветлӥз. Та уж борды вице-премьерез Илья Клебановез но кыскиз. 13-тӥ феврале ортчоз Кун Кенешлэн сессиез. Солы дасяськон мынэ ни. Эскерыны чакламын данак бадӟым ужпумъёсты. Огъя вераса, улон азинске, маке но воштӥське. Утчась муртъёс буйгатсконэз уг тодо. Соос валало уго: кыллись из улэ ву уг бызьы. И. Максимов. Выль даурлэн ректорез Удмурт кун университетлэн ректорезлы Виталий Анатольевич Журавлёвлы 1-тӥ феврале тырмиз 60 арес. Туннэ со луэ физика но математика наукаосъя доктор, физикалэн теориезъя кафедралэн профессорез. Ленинградысь политехнической институтэз 1976-тӥ арын йылпумъямез бере, со чылкак одӥг интыын гинэ, Удмурт кун университетын, ужа. 1986-тӥ арысен солэн ректорез луэ. Вылӥ дышетон заведениен кивалтонэ выльдӥськон аръёсы вуыса, Виталий Анатольевич ас ужаз но выль амалъёсты пыӵатыны турттӥз. Озьы университетэз азинтонъя чылкак выль концепция кылдытэмын. Табере Удмурт кун университет Россиын одӥгез устоез лыдъяське. Выль концепциын валтӥсь инты басьто: дышетонэз но наукаез ог-огенызы герӟан, пӧртэм специальностьёслы дышетон, университетлы коньдонэн юрттонъя пӧртэм пумо амалъёсты уже кутыса, чылкак выль система кылдытон. Виталий Анатольевичлэн кивалтэмез улсын вакчи дыр куспын пуктэмын бассейнэн спортъя дворец, сиськонни, выль дышетскон корпус, лэсьтӥське туала куронъёслы тупась библиотека. Туннэ университетын ужало 33 факультет, 11 институт, кӧня ке колледжъёс (соослэн ёзъёссы усьтэмын Кудымкар, Губкинский, Нижняя Тура, Воткинск городъёсын). Со сяна, университет возе 3 представительствозэ, 130 кафедразэ, дышетсконъя но ужъя 19 центръёссэ. Татын дышетске 21400 студент. Университет данъяське 1996-тӥ арын усьтэм Интернет-центреныз. 1300 компьютер герӟа университетэз дуннеысь мукет вузъёсын. Ректорлэн кичӧлтэмезъя, кыдёкын улӥсь дышетскисьёслы луонлык усьтэмын, компьютер пыр герӟаськыса, лекциосын тодматскыны, олимпиадаосы пыриськыны. Дышетон заведенилэн вань аслаз аспирантураез, берло аръёсы отын 200 пала диссертациос утемын. 1986-тӥ арын университетын 13 доктор но 182 наукаосъя кандидат гинэ ке вал, али татын 100-лэсь уно докторъёс но 400-лэсь уно наукаосъя кандидатъёс тыршо. Берло аръёсы университет пӧрмиз фундаментальной но прикладной эскеронъёсты ортчытонъя центрлы. Татысь учёнойёс кусып возё Франциысь, Испаниысь, Канадаысь, Италиысь, Венгриысь, США-ысь, Финляндиысь, Германиысь, Южной Кореяысь, Китайысь учёнойёсын. В. А. Журавлёв тодосчи луэменыз но тодмо. Ужъёсыз туннэ кутӥсько таӵе предприятиосын: "Ижора" (С.-Петербург), "Ижсталь", "Буммаш", "Красное Сормово" (Н.Новгород). 1991-тӥ арын солы сётэмын вал СССР-лэн Кун премиез. Виталий Анатольевич Журавлёв - Удмурт Республикаысь наука удысысь сӥё-дано ужась. Со сяна, со кык полэс академик на - Вылӥ школая международной академилэн но Естественной наукаосъя Россилэн академиезлэн академиксы. 2000-тӥ арын со пусъемын "Россия Федерациысь вылӥ профессилы дышетонъя дано ужась" мӧля вылын нуллон пусэн. Т.МИРОНОВА. Ялэмын смотр-конкурс Агропромышленной комплексын, жилищно-коммунальной хозяйствоын, калыкез дышетон но тазалыкез утён удысъёсын ужан интыосты умоятон, ужен герӟаськем шудтэм учыръёсты но висёнъёсты алон вылысь, Правительстволэн Президиумез смотр-конкурс ялон сярысь нимысьтыз постановление кутӥз. Конкурс мыноз туэ 31-тӥ декабрёзь. Отчы пыриськемъёс 2002-тӥ арын 10-тӥ январёзь городъёсысь но ёросъёсысь оргкомитетъёсы ыстыны кулэ смотр-конкурс сярысь положениын пусъем радлыкъя отчётъёссэс. Собере со отчётъёсты эскероз Элькун оргкомитет, со ик йылпумъянъёс лэсьтоз. Конкурсын вормисьёс коньдон премиосын но дипломъёсын пусъемын луозы. Та смотр-конкурсэз радъянъя комитетэн кивалтоз Удмурт Республикаысь Ужъя кун комитетлэн тӧроез Сергей Фефилов. Гуртлы юрттэт Кылем гужем йӧ зорен шуккыса быдтэмын вал Селта ёросысь "Совет" эштослэн кизем юосыз. Соин валче эштос бадӟым изъян адӟиз. Правительстволэн Президиумез та эштослы 50 сюрс манет тыр юрттэт сётон сярысь решение кутӥз. Удмурт Республикаысь Правительстволэн пресс-службаез. Нимъёсты - котьку но сюлэмъёсамы Трос-а, ӧжыт-а, но со дырысен куамын ар ортчиз ини. Инкуазьлэн тужгес но ӵыдонтэм шулдыр, чебер вакытаз ми, кык классъёсысь ньыльдон пала пиос но нылъёс, Алнаш ёросысь Удмурт Тоймобаш школаын дышетсконмес йылпумъямы. Паськыт но кузь улон сюрес вылэ потон дырлэсь вуэмзэ валатэк ик кылимы. Школаын дышетскон аръёс шӧдонтэм ӝог ортчизы угось. Тодытэк но кылимы кадь соку дуно но матысь эшъёсмылэсь кыӵе сюрестӥ вамыштыны дась луэмзэс. Яратоно дышетӥсьёсмы гинэ ваньмылэсь котькуд вамышмес син азязы возизы. Соос али но асьсэлэсь номырин ӵошатонтэм дано но секыт ужзэс милям улонын лэсьтэм вамышъёсынымы мертало. Ӵем дыръя шумпото, луоз, кытӥяз нош малпаськыло но, дыр. Директорлэн Зоя Хрисанфовна Борисовалэн туж йӧно, котьма ласянь адӟем карымон, гажамон нылкышнолэн быгатыса но валаса кивалтэмез улсын котькудӥз дышетӥсь со аръёсы лэсьтыны луонтэмзэ но быдэсъяз кадь. Милям ӵуказе нуналмы сярысь сюлмаськыса. 8-тӥ "а" но "б" классъёслэн кивалтӥсьёссы Серафима Егоровна Широбокова но Евгения Ивановна Семеновна, дышетӥсьёс Валентина Лазаревна Спиридонова, Вера Дементьевна Волкова, Тамара Михайловна Колесникова, Анастасия Никитична Борисова, Пётр Филиппович Верещагин но трос мукетъёсыз! Нылпиосты улыны-вылыны дасянын асьтэды жалятэк мылысь-кыдысь тыршемды понна музъемозь тӥледлы йыбырттӥськом, туж бадӟым тау кареммес вераськом. Ваньмыз тӥляд умой мед луоз дорады но, ужады но. Дышетскемъёс пӧлысь улон сюрес вылэ йыг-йыг султэмъёсыз мед шумпоттозы бадӟымесь ужъёсынызы, нош али парта сьӧрын пукисьёсыз - муресь тодон-валанъёсынызы. Людмила Лебедева, Ижын улӥсь. Шӧкыч Серемес верос Мотор Марья Туж мотор кышно мон. Олома но йӧндырисько. Нимы но Мотор Марья гинэ. Ваньмыз тордосэным сэрен. Со сыӵе калэ вуттӥз. Кӧт уг веська ни юэмезлы. Уй-нунал ӟистэ. Огпол дышетыны малпай. Пиналъёс Выль аре олома но пушкытъязы. Ваньзэ ӧвӧл быдтӥллям, мар но со кылем. Тордосэ одӥг ӵукна ӝуштыса ик султӥз. Кӧтсэ бушатыны потӥз гинэ, лушкемак сьӧраз мынӥ. Пуксьыса вуиз-а, ӧз-а, закодэзлэсь одӥгзэ дранчазэ ӝутӥ но, пушкытонэз ӝуатыса, отчы куштӥ. Бу-ух! вазиз но, та шутозь котырак ӵын вӧлскиз. Закодмы куашкалоз кожасько вал ни. Тордосэ отысь реактивной самолёт кадь гольык берпалын лобатӥз ук, пумен кесяське: - Ой, быри! Ой, быри!.. Пуксён инты утча кожалод. А мон аэродром ӧй дася. Вот и бызьылэ. Одӥг киыныз штанизэ возе, мукетыныз берпалзэ весь кутылэ. Интыяз на-а, ӧвӧл-а шуыса, лэся, эскере. Мунчоез дас пол котыртӥз но, парсь сиёнэн ведраям пыриз. Вань сиён музъем вылэ пальккиськиз. Парсе тае адӟысал ке, эшшо ог дас котыр гидэз котыртытысал на сое. Я, султыны выронъяз, штаниез борды канжаськыса, курег тусе выдӥз. - Ой, Марья, быри, ой, быри... Бырод тон. Уз султы ни кожасько вал, но озьы ик лобатыса, скал юонэ йырыныз мекалскиз. Аслаз куара ӧвӧл ни, бырем: Ӝуасько, юрттэ ук, юрттэ!.. - Ӝуалод, ӵынэз но тамак кенжытэм кадь гинэ вӧлске на. Албасты, солы берпалыныз отчы пыроно вал. Мазэ-созэ валатэк, бакчае вуиз. Малпасько, кенер сьӧры потӥз ке, таӵе ӝоглыкен вить минутскын бускель гуртэ но вуоз, ява. Сюрес вылаз кезьыт вуэн вышкы питыртӥ. Нош со бызьылэ но бызьылэ. Бераз ӵын куды ошемын малпа, лэся. Я, куке-соку вышкы доры вуиз но тёп! гинэ отчы пуксиз. Но кыӵе кузёез, сыӵе ик тӥрлыкез. Вышкылэн сисьмем эгесэз куашказ, тордосэ, космонавт сямен, музъем вылэ лэзиськиз. Вулэсь палэнсконтӥяз метр ӝужда пушнер пӧлы усиз: - Марья, юрты!.. Ӧт-ӧт-ӧт... Я, ӵындэмысь дугдӥз, лэся, чалмытскиз. Мунчо азьын одӥг чильым тамакамез бере юа: - Марья, мар али монэн вал? Штани киргамын, трусике чильтэр кадь, мон бордысь гидысь кадь паке. Номыр ӧй вал, шуисько. Кызьы педло потӥд, всё тамакаськод. Мунчо эгыр вылын пукид, дыр, макмыр вылад... Табере дугдоз малпасько вал юэмысь. Кытын, пе. Соку мукет амал борды басьтӥськи. Тазэ Трычысь Сидор Лена вераз. Гуртын мед пукоз шуыса, сьӧд коӵышмылэсь уй кызьзэ вити. Семьязэ сюдӥсь медло, пӧй, озьы Гордань скалмылэсь ӵукна кызьзэ басьтӥ. Котьку сак мед улоз шуыса, куӵо атасмылэсь ӝыт кызьзэ пунэмай на. Пичиен ваньзэ сурай но "Любовь гусара" ӝыныё бутылкае кисьтӥ. Полате сугон пӧлы ватӥ. Тодӥсько, нырзэ коть ӵог, вина зынэз сю иськемысь но шӧдоз. Гербер нунал вал кадь. Ӵукна бакчаысь сугон шашыен пырисько. Тордӥе пукон вылын сылэ: "Ку-ка-ре-ку!" чоръя. Пыдыныз ӵыжаське, йырыныз шона... - Ой, Педор, ма луиз тонэн?.. Педор!.. - кышкаменым бӧрдыны кутски. Врачъёсты ӧти ке, та шутозь Сарданэ келялозы... Нош со: - Ку-ка-ре-ку! Мя-у-у! Му-у-у!.. Куинь нунал озьы йӧндыртӥз. Я, коркан гинэ пук вал. Шунды султэмлэсь азьло ик гид азбаре потэ но кенер вылэ тубе. И чоръя ук, и чоръя ук... Курегъёсты уйылыны выре. Соосыз кышкаменызы кир-пазь бызьыло. Со гинэ ке луысал, скалъёс музэн ньыль пыд йылаз турын ишке. Нош коӵыш мылкыдыз ке потэ, быдэс уйзэ кеносын ортчытэ, шыр-комакъёслы маза уг сёты. Я, тыр толэзь ӝужан вакыт ортчиз но, тордосэ адями кылзэ поттӥз. - Марья, шыд ӟузьылэм потэ вал. Кеносэ потатозям, парьслы пӧзьтэм шыдме шапык кельтытэк сием. Та, пӧй, парсь сямен медаз нурскеты вал... Табере котькуд ӵукна, шунды султэмлэсь азьло, паллян пельпум сьӧрам куинь пол сялӟисько, кылме куртчисько но чиньыосме замокасько. Инмар мед утёз, но со дырысен тордосэ уг ю. Эмма Загребина. Шӧкыч Нош ик юон сярысь Кудӟем воргорон ӧсэ йыгаське но юа: - Мон татын-а улӥсько? - Уд. - Нош кин улэ? - Мон. Соку со йыгаське мукет ӧсэ. - Мон татын-а улӥсько? - Уд. - Нош кин улэ? - Мон. Куинетӥ ӧсэ йыгаськытэк ӧйлась. - Мон татын-а улӥсько? - Уд. - Нош кин улэ? - Мон. Воргорон копак шулӟектӥз ни: - Малы тон котькытын улӥськод, нош мон - нокытын уг. *** Ву шуыса, нылаш оскалтыны шедьтэ стаканэ лэзем водкаез. - Фу, кызьы тон, атай, таӵе кӧш мае ке юиськод? - А тӥ мар малпаськоды вал: атайды чечы юэ? *** Кудӟем воргорон коркась ӧссэ усьтыса вуттэ гинэ но кеське: - Кышно! Даллашы монэн, сотэк валесэз уг шедьты! *** - Нылы, атаед толон юыса бертӥз-а? - Уг тодӥськы. Бертэм бераз со мынэсьтым синучкон гинэ юаз; учкыны, пе, кулэ, кин дорамы пырем. *** Бер уин ӧсэ йыгаськем кылӥськиз. Нылкышно юа: - Кин отын? Миша, тон-а? Нокин ӧз куареты. Нылкышно ӧссэ ӧз усьты. Ӵукна ураме потэ но, ӧс азьын картэз кылле. - Малы ӧд вазьы, тон шуыса? - Мон йырыным шонай. Шӧкыч Маскаръясько нылпиос Надо ело Тол Бабайлы трос гожтэтъёс пӧлысь "Шӧкычлы" тупамонъёсыз но вал. Лыдӟисьёсмес туннэ тодматӥськом нылпиослэн ужъёсынызы. Агай кышноеныз городысь бертӥз, нош со ӟуч вылэм. Анай ӟуч сямен шуген вераське. Мунчое потыны дасяськись агаелэсь юа: - Кызьы ӟуч сямен верано Ленаедлы, мед сиськоз шуыса. -Словарьысь учкы, - шуиз агай. Анай кияз кутӥз словарь, отын гожтэмын: "кулэ-надо", "сиськыны - есть". Трос мудронъяськыса ӧз улы, кенэзлы вазиськыса, вакчияк гинэ шуиз: - Надо ело. - Чё? - юаз Лена. - Надо ело, - нош ик вераз анай. Вожез потыса, Лена ури-бери кошкиз дорысьтымы. Ӝоген агае но мунчоысь потӥз. Юа: - Кытын-о кышное? - Надо ело шуи но кошкиз, - валэктӥз анай. Агае кышноез сьӧры бызьыса уиськиз. Аня Васильева. Кизнер ёросысь Вуж Бодья гурт. Кышкасьтэм парсь Мон, Вали но Ирина азбарамы коркаен шудӥськом. Валимылэн кыл йылаз малы ке но весь берга: - Черный кабан ничего не умеет. Со кыӵе ке но кино адӟем, туж маскара, пе, вал. Нош али тани милемыз озьы иса. Со куспын коргидмылэн ӧсэз усьтӥськиз но, отысь туж бадӟым парсь потӥз, Валимы шоры туж лек учке. Соиз кышкаменыз гараже пыриз. Ворсаськыса гинэ вуттӥз, парсь йырыныз ӧс борды шуккиськиз. Нош Ирина пуля сямен бызьыса корказе тубиз. Вӧзтӥм ортчыкуз, лыз-вож луымон ик пыдме шуккыса кельтӥз. Парсь но шултыса сямен караз пыриз, мон чаляк ӧсэз ворсай. Кӧня ке улыса, Вали юа: - Бадӟым парсь кошкиз-а? - Кошкиз, - шуисько. Нош Ирина корказьысен исам каре Валиез: - Чёрный кабан ничего не боится. Надя Головлева. Кизнер ёросысь Вуж-Бодья гурт. Мылкыдэз ӝутӥсь киужъёс Вашкала аръёсы песянайёс но анайёс асьсэлэсь нылъёссэс пичи дырысенызы ик пӧртэм киужлы дышетылӥзы: куиськыны, пужыятӥськыны, чильпаськыны, керттӥськыны. Но улон-вылон воштӥськиз, кышномуртлэн ужез данаклы капчияз но кулэсмиз. Табере шобретъёсты но, чулка-пӧзьёс но магазинын вузасько. Озьы ке но, киужлы дышем нылкышноос сямзылэсь уг куштӥсько. Тани Сюмсиысь адӟытон юртын пӧртэм киужъёсын тодматскыны луэ. Та ужрадэ пыриськиллям ёросысь пенсионеръёс. А.И.Кашменских ваем чильпам салфеткаос но нылкышно дэремъёслы воротникъёс, М.М.Жукова - пужыятэм ӵушконъёссэ. В.А.Исакова чебересь юсьёсты пужыятэм, О.Н.Ашихмина йӧно койыкез улэп кадь туспуктэм. А.П.Стрижова басма юдэсъёслэсь тунсыко суред пӧрмытэм. Кельышлы керттӥськем Н.С.Пенкина, выжлёгетъёс куэм Е.С.Красинова. Пӧртэм киужъёс адӟытонэ ваемын Сюмси но Зон черкогуртъёсысь, Кильмезь посёлокысь но Харламов пристаньысь но мукет гуртъёсысь. Быгатыса лэсьтэм киужъёс учкисьёслэсь мылкыдзэс ӝуто кузесь тол ӝытъёсы маке но чильпаны, пужыятыны яке керттыны. П.НИКОЛАЕВ. Ужды тӥляд - вунонтэм Арлы быдэ "Педагогический вестник" газетлэн редакциез Россия Федерациысь Калыкез дышетонъя мнистерствоен ӵош школаос куспын конкурс ортчытъя. Йылпумъянъёс лэсьтэмын ортчись даурлэн берло аръёсаз дышетӥсьёслэн ужамзылы но. Республикаысьтымы устоосыз школаос пӧлы шедизы Воткинскысь 1 номеро шор ёзо школа, Глазовысь 2, 3, 4, 5 номеро шор ёзо школаос, нылпи юрт, Глазовысь калыкез дышетонъя центр, Ижевскысь дышетонъя 17 номеро центр, 32, 48, 50, 54, 57, 74, 83, 93 номеро шор ёзо школаос, Сарапулысь 2 номеро шор ёзо школа, Сарапулысь 10 номеро прогимназия, 18 номеро лицей но Шаркан ёросысь Кыква шор ёзо школа. Таӵе вылӥ дунъет басьтэмзы понна, Удмурт Республикалэн Президентэз Александр Волков пусъем школаосысь дышетӥсьёслы тау карон но ӟечкылан гожтэт ыстӥз. "Тодӥсько, конкурсын вормисьёс пӧлы шедён капчиен ӧз сётскы. Но ас удыстэ ӟеч тодон, пиналъёсты сюлмысь яратон юрттӥзы тӥледлы азьпала потыны", гожтэ Президент. Э.КУМАЧЁВА. Дышетӥсьёсты ӟечкылан дыръя. Туспуктэмъёсыз М.Менландшинлэн. Удмурт шаере - куное Финн-угор калыкъёсты дышетонын бадӟым уж лэсьтэ Тартуысь университет (Эстония). Европаысь одӥгез вашкала заведение усьтӥськиз 1625-тӥ арын. Татын дышетскизы Удмуртиысь уно тодосчиос. Али но отын тодон-валан басьто уно удмурт егитъёс. Вераны кулэ соослы бадӟым саклык висъяло Эстонилэн но Финляндилэн правительствооссы. Туннэ газет баммылэн куноез Ольга Кузеро. Вордскемын Эстониысь Нарва городын. Та кунын одно ик тодыны кулэ эстон кылэз, мукет финн-угор кылъёсты. Нылашез Тартуэ дышетскыны ыстӥз городлэн мэриез. Кузеро университетысен соку ик ӟечесь кусыпъёс тупатӥз асьме выжы калыкен. Нырысь тодматскиз Башкортостанысь Татьяна Миниахметоваен. Со ачиз фольклоръя тодосчи, али дышетсконзэ азьланьтэ докторантураын. Ольгалэн матысьгес тодматскемез потӥз Удмурт шаерен. Озьы со тол каникулъёс дыръя эшъёсыныз асьме доры вуылӥз. - Оля, кызьы сюрес шедьтӥды Удмуртие? - Университетысен мон синйылтӥ удмурт студентъёсты. Собере эшъяськи, кылзэс дышетыны кутски. Тӥ сямен вераськемез валасько ни, но бӧтьыртыны шугъяськисько на. Озьы ик мур-мур дышетӥсько венгер кылэз. Та странае мон вуылӥ ни. Нош Удмуртиын нырысьсэ. - Мӧзмыт ӧвӧл-а кадь татын? - Ӧвӧл! Мон нырысь ик пайми уно лымылы. Вокзалысен ик букосэ тэтчи. Калыкты но лякытгес потӥз. Шоре учкыло, пальпотӥсьёс но вань. Адямиос мылкыдзыя капчиесьгес. Тӥляд татын спортэз ярато, шӧдске. Макем бадӟымесь Йӧ дворецты, стадионъёсты. Нылпи садъёсты но чебересь. - Удмурт кун университетэ но пырады кадь? - Бен, нырысь ик син шоры йӧтӥзы студентъёслэсь ваньмон дырзэс возьматӥсь туспуктэмъёс. Быгато, лэся, шулдыръяськыны. Ми дорын та ласянь югдур мукетгес. Студентъёс но, дышетӥсьёс но малы ке "серьёзнойгес" вазисько. Соин ик кусыпъёс кезьытэсьгес кадь. - Уноез адямиос отчы яке татчы вуо ке, нырысь ик тунсыкъясько вузъёслы дунъёсын? - О-о, тӥ дорын дунъёс данаклы улӥын! Вузъёсты но трос гинэ. Кондитер вузъёс гинэ ма мында. Паймытӥзы книгаослы ичи дунъёс. Нош дуно куослэсь шубаос кӧня! Вылаз ик, уноез Россиын поттэмын. Туж ческыт потӥзы йӧллэсь сиёнъёс. Няньды но туж-туж кельшиз. - Драмая Удмурт кун театрын учкиды "Ой, чебер нылъёс" комедиез. Кельшиз-а? - О-о, усто спектакль! Кӧня шулдыр кырӟанъёсыз, эктонъёсыз. Егит артистъёс чебересь, етӥзэсь, усто шудо. Спектакль туала сямен пуктэмын. Соиз но паймытӥз - залын учкисьёсыз тыраз вал, уноез егитъёс, дышетскись пиналъёсты но ваиллям. - Шуом, тодматскиды Ижевскен. Кыӵе быдэсмымтэ малпанды кылиз кадь? - Одно ик вуылэме потэ на одӥгаз ке но удмурт гуртэ. Эстониысь куноен вераськиз Н. Байтеряков. Ольга Кузеро. М. Менландшинлэн туспуктэмез. УДМУРТ КИЗИЛИОС Туннэ героймы - Виктор Леонидович Шибанов - Удмурт университетысь тодосчи, кылбурчи. Эскере удмурт но ӟуч литератураез. Ужъёсыз асьме шаерын сяна, тодмо Россиын, Эстониын, Финляндиын, Америкаын. Со сярысь лыдӟе бамысь. Солы керемет но сётэ берекет. *** Мыным шуд усиз Виктор Леонидович дорын дышетскыны, солы диплом уж гожъяны. Студентъёс сое ӟуч литератураез ӟеч тодэмез понна гинэ уг, кыӵе ке но аспӧртэмлыко луэмез понна гажало: со ноку но уг кышкаты, уг ултӥя, уг косы. Со туж огшоры но синмаськымон маде ХХ даурысь литературалэн ӧръёсыз сярысь. Данъяське удмурт литератураен но. Сое эскеронлы сӥзе статьяоссэ, книгаоссэ. Туннэ нуналлы Виктор Леонидовичлэн укмыстонлэсь ятыр статьяез но вить книгаез потэмын. (Куинез - аслаз кылбуръёсыныз.) Ӝоген потыны кулэ эшшо кык книгаез: "Удмурт литература" антология но "Кытысь пушъе кылбур" эскерон книга. Вордӥськемын Виктор Леонидович Глаз ёросысь Котгуртын. Школазэ йылпумъямез бере дышетскемын Удмурт университетын (Ленинской стипендиат) но Ленинградысь университетын. Студентъёс Виктор Шибановез нырысь ик дышетӥсен лыдъяло, кылбурен тунсыкъяськисьёс - кылбурчиен, гожъяськисьёс - критикен, асэныз тунсыкъяськисьёс - философен но тунсыко эшен. Тӥни сыӵе турлы адями. Тодматском-а? - Виктор Леонидович, туннэ вераськонмес сётӥськом "Удмурт кизилиос" рубрика улын... - Валасько юандэс. Мон дан сьӧры уг уиськиськы. Аслэсьтым нимме ачим пӧсяса- тыршыса лэсьтӥсько. Но сое тросэз уг валало. Висъяськись муртъёсты (кизилиосты-а) удмуртъёс уг ярато уго, вожъясько, йыркуръясько. Нош пичи дыръям мынам туж потылӥз кизили луэме. Ма, 11-12 арескам со "кизили висёнэн" виси но, соин, дыр, али та висён мыным кышкыт ӧвӧл ни. - Мар вал соку? - Великен ворттылыкум пыдме чигтыса, туж кема больницаын кылли. Тӥни соку мар карыны паймемысьтым суредаськыны, кылбур гожъяны кутски. Нош бурмеме бере Глазовысь юнкоръёслэн слётазы мон Владимир Романовлы тетрадьме мычи. Отын вал кык сю пала кылбур, дас поэма но выжыкыл. Со бере кылбуръёсы "Дась лу!"-ын но "Молот" журналын потаны кутскизы. Ачиз Флор Васильев мыным гожтэтъёс ысъялляз, ушъялляз. Мон соку туж шудо вал! Вылаз ик газетъёсысь гонорар басьялляй, ачим выль велосипед басьтыны быгатӥ. Озьы 7-тӥ классын дышетскыкум мон тодӥсько ни вал, поэт луо шуыса. - Сыӵе йӧспӧртэм пиналъёсты гуртын уг ярато кадь... - Ма, мон номырин но сокем ӧй висъяськылы, гурт котырысь ужез агайёсыным ӵош быдэсъяй. Быгатӥсько турнаны но, пу но пильылыны. - Со гинэ ӧвӧл, армие но ветлӥды, озьы-а? - Бен. Шеди мон отчы Ленинградын аспирантураын дышетскыкум. Военкоматын алдазы, ракетной часте басьтом, компьютерен ужаны дышод шуыса. Мон оски ни вал, туж дыраз "буйгатӥз" Сергей Флорович Васильев. Эн оскы, пе, аспирантъёслы одӥг сюрес - стройбатэ. Озьы ик луиз. Ар но ӝыны мон Уфа котырын горд сюё гудӥ, нош ӝытъёссэ комсорглэсь ужзэ быдэсъяй, газет поттылӥ. Кивалтӥсьёс монэ ӧз яратэ (огаз кенешын юаны шедьтӥ уга, малы коньдон кык ведомостья сётъяло шуыса). Со понна монэ "гажаллязы" (вӧсь ӧз карылэ) "зэкъёс", соос ротаямы ӧжыт ӧй вал. Армиез улонлэн школаез шуо ке но, малпасько, аспирантлэн интыез институтын ик. Но али мон номыр сярысь уг жаляськы, чидамон вал, шуом. Армиын дыръям ик потӥз кылбур книгае. - Ма, соку тӥ туж егит вал, дыр, ук ай? - Егит, таиз книгае кыкетӥез ни луиз. Нырысетӥез потӥз кызь арескам (рукописе дась вал нырысетӥ курсын дышетскыкум ик). Книгае понна мон 500 (!) манет гонорар басьтӥ. Со вакытэ бадӟым коньдон. - Зол. Эшъёсты вожъяськизы, дыр. Тӥледлы, вождэс эн вае, ноку но кушем ним ӧз сётъялэ-а? - Сётъязы. Кушем ним сётонлы паймонэз ӧвӧл. Со быдэс теория. Сыӵе ним сётыло мукетъёслэсь маин ке висъяськись муртлы, берен "уллёе" берыктон вылысь: вылэ тубисьсэ уськытоно, улысьсэ - ӝутоно. - Ми но дышетскыкумы тӥледлы ним сётъям. Но гажаса, аспӧртэмлыктэс пусйыса В.Шукшинлэн героезъя "Чудик" шуылӥм. Асьтэос уд шӧдӥське-а студентъёс тӥледды золгес гажало, нош предметтэс ӟечгес валало шуыса? Малы шуом, экзаменъёсады "уг лушкасько"? - Хм, тунсыко. Нош малы "уг лушкасько"? Кулэез ӧвӧл. Адями текстэз лыдӟемын ке, мар солы сюлмаськонэз? Нош ӧвӧл ке, котькӧня мед лушкаськоз, мон шӧдо. Собере филфакын дышетскыса литератураез лыдӟытэк возьыт луыны кулэ. - Малы ке мыным потэ, литературалы мода ортче шуыса. Азьвыл тани поэтъёс кыӵе ке аспӧртэм "экстрассенъёслы " пӧрмылӥзы - калык соос пала кыстӥськылӥз, выль кылбуръёсын тунсыкъяськылӥз. - Кызьы шуод ай. Литература матысь дыре уз быры, угось солэн шорсюлмыз - кыл. Кылэз номырин но уд вошты! Зэм, со луоз мукетгес. - Тӥ ӵем кунгож сьӧры потаськоды, палэнысен астэ дунъяны умойгес, дыр. Вань-а интыез удмурт литературалэн огъя дунне литератураын? - Мон шумпотӥсько: огаз конгрессын финнъёсты но американецъёсты оскытыны быгатӥ, туала удмурт литратура огъя дунне ӧрлэсь улӥын ӧвӧл шуыса. Со туж секыт уж. Но со понна США-ын семиотикъёслэн огаз антологиязы англи кылын удмурт этнофутуризм сярысь статьяе печатласькиз. Мар со этнофутуризм? Со кык бурдъем тылобурдо выллем. нырысетӥ бурдэз вашкала фольклор ке, кыкетӥез - туала модернизм но постмодернизм; озьы ик толон но ӵуказе, гурт но город... Этнофутуристъёс туала дуннез йырин-чукин кымаськем мае ке кадь возьмато (абсурд). Кыкетӥ тодметэз - интертекст - пӧртэм-пӧртэм гожъямъёсты яке пӧртэм-пӧртэм муртъёслэсь верамъёссэс аспӧртэмлыко огазеяса сётон. Кылсярысь, кыӵе ке чеберлыко произведениын табере артэ сылыны быгатозы олокыӵе но формулаос, таблицаос, пӧртэм философъёслэн гожъямъёссы, уката ик "туалаосызлэн" (Фрейд, Ницше, Юнг, Фромм но мукет). Герой огвакытэ ик оскыны быгатоз Христослы но, Буддалы но, нош ас пушказ язычник луэменыз данъяськоз. Куинетӥез тодмет - текстъёсысь геройлэн но аслаз текстэз кылдытӥсьлэн йӧспортэм, мудрон луэмзы. - Кыӵе удмурт этнофутуристъёслэн нимъёссы шедизы со статьяе? Шумпотӥзы-а удмурт писательёс, таӵе иворез тодэмзы бере? - Туала авторъёс пӧлысь висъяй Н.Самсоновез, Л.Нянькинаез, О.Четкарёвез, С.Матвеевез, А.Кузнецоваез, М.Федотовез, Э.Батуевез, Р.Миннекузинэз, В.Ар-Сергиез. Шумпотӥзы кадь, но сур ӧз пуктэ. - Сур сярысь кылпум потӥз бере, таӵе юан. Тросэз таланто адямиос юон пӧлы выё, адямиослэн валамтэзы вылэ чӧлско. Тӥледды нокинлэн но, нокытысь но юэмен адӟылэмез ӧвӧл. Ӧз сӧры общагаын кема дыр ӵоже улон но? - Ӵапак общага ик возиз, дыр. Мон 19 ар ӵоже ялан студентъёс пӧлын улӥ. Чик веръятэк улыны уг луы, конечно. Но адями эсэпсэ валаса юыны кулэ. - Сергей Васильевен ӵош гожтэм "Зэрпаллэн вужераз" книгаяды нимысьтыз глава сӥземын асьсэды быдтӥсьёслы... - Ваньмыз кутскиз удмурт литератураез эскерон бордысен. Но малпаськон ӧрмы пыдлогес пыремен, мукет удысъёсы но выжоно луим (социологие, психологие, философие). Та уж сярысь умой вера Германиысь Смирнов профессор "Человек человеку - философ" книгаяз. Вкчияк ке, малы бен удмуртъёс асьсэды асьсэос быдто? Шӧдӥське Удмуртилэн интыяськемез но, калык сямъёслэн цивилизацилы пумитъяськемез но, постколониализм югдур но, ментальностьмылэн мифъёслы матын луэмез но. - Ма тӥ одӥг пельпум вылады куинь-ньыль воз нуиськоды кадь. - Сизьым: университетын доцент но деканлэн наука ласянь юрттӥсез луыса ужасько; 6- тӥ но 9-тӥ классъёслы дышетскон книгаос, Финляндиысь проектъя удмурт литературая антология дасясько; вуоно финн-угор конгресслы дасяськисько; "Дунне кизилиос" радиоверанъёс лэсьтӥсько (туннэлы 95 передача ни), студентъёслэн диплом уженызы кивалтӥсько, кылбур гожъясько... Мон юромо тыршисько огдыре кӧня ке ужен вырыны (сыӵе амалэз "теория осьминога" шуо). Туннэ маи ке уг пӧрмы яке вожъяськись муртъёс "пыдзэс пукто" ке, мон мукетыз уже борды басьтӥськисько. - Нормальной адями сомында ужаны уз чида. Тӥледлы шайтан юрттэ, дыр? - Ноку возьмамтэ юан! Но тӧлтэк писпу уг выры шуэм музэн, верамад зэмез вань, дыр. Зэмзэ но, 38 аресозь огъяулонниын чидаса улыкум, мыным тросгес кужым сётылӥз шайтан-керемет. Инмар озьы ӧй курадӟытысал ук. Укмыстонэтӥ аръёсы мон кылбуръёсам гожъяй вал ...Соин ик котьку инмарен артэ Мед керемет сылоз. Мынам соин Куддыр сюлмысь вераськеме потэ. ...Со ватсасал: "Куштӥз бере инмар, Мынам но юрттэме тыныд уг лу. Герӟаськемын ми - мур выжы но куар, Нош огазьын кылдытӥськом писпу. ("Пож ву" сузьетысь) Валаськод-а, Ижын сыӵе кужым борды ӧд кыстӥськы ке, адями радэ уд пот. Ижевск - постколониализмлэн шорсюлмыз. Таӵе югдурын инмарлэн гожтэм куронъёсыз - удмуртъёсты берлань колониализме кыскись кужым. (Лыдӟе "Ижын улӟе шайтан выжы гинэ" кылбурме.) - Но инмарды но копак ӧз кушты кадь... - Квартира басьтэмме вераськод, дыр? Ой, тодэ вал, макем дуно усиз мыным со пичи сэрег. Общагаын улыны мон нокызьы ӧй быгаты ни, нош квартира сётыны ӧз ик малпаськылэ. Мылкыдме шӧдыса юрттыны выриз висись анае. Со, ӝоген улонысь кошконзэ шӧдыса (ракен курадӟиз) мыным кыӵе ке амалъёс утчаны косӥз, университетысь кошкыны ӵектӥз. Мон озьы ик кари. Но аслыд "дун пуктон" номыр ӧз вайы. Укмыс толэзь чидай кивалтӥсьёслэн валамтэенызы нюръяськыны. Ӧй чидасал, ӵош ужась эшъёсы ӧй юрттысалзы ке. Тау А.С.Зуевалы (кафедраелэн кивалтӥсезлы) но А.Ишмуратовлы. Соос асьсэлэсь кылзэс веразы, дурбасьтӥзы. Лулсэр быдтэм вӧзы мон быдэс ар ужам коньдонме понӥ на, озьы гинэ ордер басьтӥ. Зэм, квартиралы документъёсы али но ӧвӧл на. - Ну, табере тӥ узыр адями. Кышнояськыны но луоно ни, дыр. - Анаелэн кулэмез дырысен ар уй ортчиз ке, одно ик вераськом. Зэм, кылбуръёсыя тодӥськод, дыр, яратонэн мыным ноку ӧз удалтылы. Нош яратонтэк, тонэ валаны быгатӥсьтэк... Малы кулэ сыӵе семья? - Малы ке но тӥляд туж начар фотоальбомды. - Уг яратӥськы фотое пуксьыны. Маин сое валэктоно, уг тодӥськы. - Мар сярысь ӧй юа на? - Шахматэн тунсыкъяськемме, тани али вузъёс куспын турнире пыриськисько. Яратоно сиён-юонъёсме... - О-о, ма, тӥ зэмзэ но огшоры! - Бен, Туж яратӥсько жарить карем картошез но пельнянез, ошмес вуэз но югыт сурез. Зинаида Рябинина. Шӧкыч Пӧллиськонъёс Американец Россие шутэтскыны кошкиз. Нунал но ӧз ортчы, со гуртаз вуэ ни. - Мар луиз? - тодэмез потэ кышноезлэн. - Тодӥськод-а, марым, - куалекъяса валэктэ американец, - мон отын тодматскыны гинэ ӧдъяй но, валай, ваньмыз сямен пиосмуртъёс СПИД-эн висё: ИваноВич, ПетроВич, АбрамоВич... *** - Ма луиз та бритваеным? - керӟегъяське картэз. - Куинетӥ нуналзэ шерисько ни, нош со сокем ӵабъя, синъёсысь тылгизьыос ик пазясько! - Зэм шу? - хняысен вазе кышноез. он соин толон картофка сузяй, лэчыт вал кадь... *** Ульча шорын ик кудӟем воргорон лошъяське. Дораз милиционер лыктэ. - Воргорон, султэлэ! - Нош кытын мон? - Киров парклэн ӟезьыез дорын. - Кылзы, лэсьты ӟеч уж, ворса вал ӟезьыосты, а то туж кезьыт. *** Воргорон аракы юэ. Четлыкын пукись попугай солэсь куре: -Васька, ну лэзь вал витьтон грамм! - Эн мерскы, аслым ӧжыт! Эшшо ке тон ӵукна макмыръяськын курод на. - Уг куры, зэмзэ верасько. - Ярам! Марысь мар ке, вань тылыосты ишко! Ӵуказеяз воргорон макмыръяське. Попугай малпаськыса четлыктӥз солань-талань ветлэ, бурдъёссэ мышказ карем. Воргорон юа: - Мар малпаськонэ усид? - Малпаськисько ай: чёртлы-а кулэ мыным тылыос? Шӧкыч Пӧрмостэм Серемес верос Малы ке асьмелэн улонамы тазьы луыса кошке - адями маиныз ке, кытӥыныз ке ӧжыт уг кельшы ке, сое весь зӥбыны, ултӥяны, олокызьы но сереме уськытыны туртто... Монэ тани вордӥськем берам ик врачъёс копак мыдрон шуиллям. Талэн, пе, паллян синмыз но пельыз бурыз интыын, нош бурыз - паллянэз интыын. Я будэмъяз, пе, берен интыязы кариськозы ай. Али врачъёс нош ик шуо: тӥляд сэпады - изъёс, пекляосады - луо, тыосады - изваска... А кытынам мынам меда цемент? Мон сое тодысал ке, али ик корка пуктыны кутскысал. Армиын но служить карыкум весь ултӥяса, серем карыса возизы. Тумбочкаме пушкытӥз гольык нылъёсын лякылӥ вал. Старшина адӟиз но шуэ: - Мар тон тумбочкаяд кӧласькод шат? Автомат сэрттыны кутскиськод, нош кесько шорам: - Тон мар, автомат сэрттӥсько яке кышномуртэз шобрет улын кылиськод? Нош алигес фотографие пукси вал, асме ӧй тодма ни. Фотоез киям бергатӥ, бергатӥ но, та мынам ӧвӧл, шуисько. - Кызьы тӥляд ӧвӧл? - паймиз фотограф, - а мон сямен, кельше кадь тӥледлы. - Учке, - шуисько, - ныры-то мынам ӧвӧл. - Да-а, кӧня ке кельше но, кӧня ке уг но. - Сэре, таиз кылле коросын, нош мон улэп ай-ко! Так-то ӝыны дунын сётӥз, мукет дыръя, пе, лыктӥд ке, умойгес лэсьтом, шуиз. Эшъёсы монэ али ке но Малыш шуо, вордскыкум талэсь пичигес вылӥськем-а, мар-а? Али но тани кык шифанер пасьта ӧвӧл бон ай, но ӧсэтӥ урдэслань кариськыса пырасько ке, нокытӥы но шедьылытэк тэрисько. Тӥни озьы, котькытын обидё, котькытын ултӥяны туртто. Сипыртэлэ вал пелям, мар кароно, кызьы утиськоно ултӥямлэсь? Е. Алешкин. Пичи Пурга ёрос. ВАЛЭКТЭ ЮРИСТ Сэрегез дася адвокат Лилия ШКЛЯЕВА Пенсия, пенсия... Мынам пенсие туж пичи - 538 манет. Улытозям 46 ар ӵоже школаын выж миськи, пу дасяй. Секыт ужын но уждунэ бадӟым ӧй вал. Пенсия сярысь юанэ кылдӥз таӵе муген. Кык нылпи будэтӥсько вал. Собере бызи пал кылем воргоронлы. Кышноез кулэм бере, таизлэн кылиз куать пиналыз. Озьы вордӥ тямыс нылпи. Ваньзы монэ асьсэлэн каро. Пенсия тупатыку, лыдэ уг басьтӥськы шат трос пинал будэтэм, вылаз ик, соос аслад ӧвӧл ке? Мария Темеева. Шаркан ёросысь Вортча гурт. Учкиськом Россия Федерацилэсь "Россия Федерациын кун пенсиос сярысь" 1990-тӥ арын 20-тӥ ноябре юнматэм Законзэ. 11-тӥ ёзэт (статья) ивортэ: льготаосъя пенсия тупатӥське вить но тросгес нылпи ваем но тямыс аресозь будэтэм кышноослы. Тӥ ваиллям кыксэ гинэ, соин ик льгота ӧвӧл. Пиосме огнам вордӥсько Кык пие вань. Огез дышетске ньылетӥ классын, инвалид кылиз, аварие сюрыса. Мукетыз - колледжын. Будэтӥсько огнам. Атайзы авария дыръя кулӥз. Ачим дышетӥсько школаын. 2000-тӥ ар понна нылпи пособие ӧй басьты. Тазьы валэктӥзы райсобесын: нырысетӥ категорие уд сюриське, одӥг пидылы басьтӥськоды сюдӥсь-вордӥсьсэ ыштэмен валче пенсия, мукетызлы - инвалид луэменыз валче пенсия, асьтэос ужаськоды, барышты, пе, пичи ӧвӧл. Шонер-а валэктӥзы? Кыкетӥ юанэ. Колледжын дышетскись пиелы сюдӥсь-вордӥсьсэ ыштэменыз валче вуэ 475 манет. Али мукетъёсызлы сое кӧня ке но будэтӥзы кадь, нош пиелэн озьы ик кылиз. Валэктӥзы: пидылы, пе, 18 ареслэсь трос ни, соин ик коньдонэз уз буды. Озьы-а со? Куинетӥ юанэ. Семьяям инвалид пие вань бере, монэ кыӵе ке налоглэсь мозмытыны яке сое ичигес карыны уг луы-а? Ваньбур яке музъем понна, шуом. Яке юртъерез пие вылэ гожтыны кулэ- а? Екатерина Андреева, Пичи Пурга ёросысь Эдэйгурт. Али дырысен пособиос тырисько нокыӵе категориостэк. Нош категоридэс тодэмды потэ ке, мынэлэ райсобесэ, юалэ: кыӵе бумагаос кулэ нырысетӥ категорилы. 18 ареслэсь бадӟым арлыдо адямиос, профессилы очной амалэн дышетско ке, сюдӥсь- вордӥсьсэс ыштэмен валче пенсия басьто огъя радлыкъя (основаниосъя) 23 аресозь. 1997-тӥ арын 7-тӥ апреле Удмурт Республикаысь Правительство кутӥз таӵе постановление: "Инвалидъёслы но инвалид нылпиен семьяослы льготаос сётон сярысь". Удмурт Республикалэн бюджетаз чакламъя, отын тупатэмын таӵе льготаос: ӝыны дун тыроно кунлэн, интыысь ёзлэн но общественной организацилэн юртъёсазы улэм понна, коммунальной юрттэт понна, телефон но радио понна. Музъемдэс но юртъердэс зэмен ик пичи пиды вылэ гожтэмды луоз, малы ке шуоно, пиналысен ӧлексы кылемъёсты вытлэсь (налоглэсь) мозмыто. Кинлы кыле корка? Атае кулэм бере, анае улыны кутске одӥг пиосмуртэн ӵош солэн корказ. Нош брак уг лэсьто. Озьы уло 13 ар, нуо одӥг хозяйство, ӵошен ик коркалы фундамент ӝуто. Кулон араз воргорон анаелы ас бордаз прописка лэсьтэ. Пиосмуртэз ватэм бере, сузэрез бызьылыны кутске, со коркаез вузан понна (таизлэн аслаз хозяйствоез вань). Калык пӧлысь кылӥськиз ини: коркаез вузамын, анаеным вераськытэк. Юанэ таӵе. Вань-а анаелэн кыӵе ке паез та юртъерын? Быгатэ-а сузэрез со коркаез анаеным вераськытэк вузаны яке ас вылаз карыны? Сыӵе дыръя кин доры вазиськыны луэ? Н.Н. Шаркан ёрос. Россия Федерацилэн Семья сярысь кодексэзъя асьме дорын брак зэмос лыдъяське, со пусъемын ке загсын. Соку кузпалъёслэсь ваньбурен но мукетыныз герӟаськем кусыпъёссэс кун уте. Брак пусъемын ӧвӧл ке, кулэм муртлэн завещаниез яке юртъерзэ анайдылы кузьмамез сярысь бумагаез кыльымтэ ке, ваньбур люконын юрттэт чот луэ регистрация (прописка). Кулэм муртлэн сузэрез лыдъяське кыкетӥ черодын кельтос басьтӥсь (наследник). Ваньбур солы сюроз, воргоронлэн нылпиосыз, кузпалыз, анай-атаез ӧвӧл ке. Ченгешонъёс кылдыку, анайды судын документъёс но адӟисьёс пыр валэктыны кулэ, юртъерын солэн паез вань шуыса. Корка мукетызлы вузамын луиз ке но, отын улыны анайдылэн правоез вань. Путёвка ӧз вуы Кузпалэлы санаторие путёвка ӧз вуы 1999-тӥ ар понна, со вань бумагаоссэ дыраз келяз ке но. Со понна компенсация тыриськыны кулэ - ӧз сётэ. Со судэ вазиськиз. Картэ ачиз судын ӧз ке луы (оло музон путёвкаен кошкоз), быгатозы-а сотэк эскерыны ужпумез? Судья шуэм, пе: тонтэк но быгатом. Шонер луоз-а озьы? М.Иванова. Селта черкогурт. Тӥ судэ ивортыны кулэ, отчы мыныны уд быгатэ шуыса. Мугзэ валэктон понна, оло, документъёс но возьматоно луоды. Тӥ судэз курыны быгатӥськоды ужпумдэс тӥтэк эскерыны. Суд сыӵе мылкыддэс лыдэ басьтӥз ке, тӥледлы ыстоз решениезлэсь копизэ. Озьы валэктэ Россия Федерацилэн Граждан процессъёсъя кодексысьтыз 157-тӥ ёзэт. Дышетскемме стаже ӧз пыртэ Институтын дышетскем дырме 1998-тӥ арын 1-тӥ феврале стажысь куштӥзы. Со, пе, уг пыры стаже. Валэктэ вал: шонер-а лэсьтӥз райсобес? Ӧз ке, луэ-а куинь ар ӵоже ичиёмытэм пенсиме берыктыны? 1998-тӥ арозь та дыр пыре вал стаже. Михаил Аверкиев. Шаркан районысь Пороз гурт. Пенсиосты кык амалэн лыдъян сярысь ми ивортылӥм ни азьвыл гожъямъёсамы. Выльысь тодады вайытӥськом. Тӥ уд ужаське но пенсия басьтӥськоды ке, пенсионерлэн нимаз коэффициентэзъя (индивидуальный коэффициент пенсионера - ИКП), пенсия тупато "Кун пенсиосты лыдъян но будэтон радлык сярысь" 1997-тӥ арын 21-тӥ июле кутэм Законъя. Дышетскем дыр соку стаже уг пыры. Тӥ ужаськоды ке, пенсия юнматӥське 1990-тӥ арын 20-тӥ ноябре кутэм законъя. Таиз нимаз коэффициентэз лыдэ уг басьты, нош институтын дышетскем дырез огъя стаже пыртэ. Улон возьматэ: коэффициентэн лыдъям пенсия, сотэк лэсьтэмез сярысь, тросгес люкаське. Ачим Шарканын, музъеме гуртын Анае кулӥз 1993-тӥ арын январе. 4,2 гектар музъем паез мыным кылиз. Ачим мон Шарканын, музъеме - гуртын. Сое сётӥ вал колхозэ арендая договорен. Нырысетӥ арзэ дунтэк висъязы 300 килограмм тысь но кык рулон турын, нош собере ваньбур сётъямысь дугдӥзы. Кылем арын лэсьтӥмы выль огкыл (договор). Колхозын шуизы: документэз нуллоно музъемъя комитетэ печать пуктыны, киям ӧз сётэ. Берло но ӧз возьматэ договормес, ӧз висъялэ тысь. Туэ сётом шуизы но, кыл вылын гинэ лэсьто. Луоз-а мынам пай музъеме понна кылем аръёслы но маке басьтэме? Дунын-а, дунтэк-а сётыны кулэ? Ачим кыкетӥ группаен инвалид, пенсие ичи, 521 манет гинэ. Мынам но сиеме потэ ук, нош коньдонэ эмъюмлы но уг тырмы. Созонова. Шаркан ёрос. Арендая огкыл сярысь валэктонъёс сётэмын Россия Федерацилэн Граждан кодексысьтыз 614-тӥ ёзэтын. Хозяйство бӧрсьысь кык яке трос пол уг ке тыры нокыӵе дун, тӥляд праводы вань огкыллэсь куштӥськыны, та сярысь куинь толэзьлы вазьгес ивортыса (610-тӥ ёзэт). Тӥлесьтыд адӟем изъяндэс колхоз берыктыны кулэ яке ас мылкыдызъя, яке суд пыр, тӥ татчы искен вазиськем бере. Нялтас пусъём: 1991-тӥ арын 11-тӥ ноябре кутэм "Музъем понна тырон сярысь" Законъя нырысетӥ но кыкетӥ группаен инвалидъёс мозмытэмын музъем понна вытлэсь. Утялтӥськом пересь муртэ Картэным ӵош утялтӥськом пересь воргоронэз но улӥськом солэн юртаз. Мар кароно, со кулэм бере юртъерез милемлы мед кылёз шуыса? Кӧня тыроно луоз документъёс понна? И.Мурашова. Вавож ёросысь Какся гурт. Кельтос (наследство) кыле законъя яке завещаниея. Пересь муртлы тӥ ӵыжы-выжы уд луиське ке, завещание кулэ луоз. Соя адями ваньбурзэ яке ог люкетсэ кельтыны быгатэ одӥг яке кӧня ке муртлы. Татын лыдэ уг басьтӥськы, соос законъя наследникъёс луо-а, уг-а. Завещаниез юнматэ нотариус. Со понна басьтӥське кун пошлина пичи уждун быдӟа. Наследстволы право понна свидетельство сылэ ваньбурлэн 2 процентэз мында, 850-ысен 1700-озь пичи уждун мында ваньбур понна - солэн 20 процентэз мында. Машинаез люкеммы уг луы Колхозын 40 ар ужаса, 1994-тӥ арын пенсие кошки. Отысь пайме басьтыса потӥ. Милемлы, куинь хозяйстволы, висъязы ГАЗ-52 машина. Огез эшмы (озьы шуод ке) автомобилез киултӥз но милемлы уг сётъя, гужембыт олокинлы но ужа. Кытысь басьтоно юрттэт? В.И. Одӥг кылэ уд ке вуиське, тӥ вазиськыны кулэ судэ. Автомобилез куиньлы люкыны уг лу бере, тӥлесьтыд пайдэс бускельды коньдонэн мед берыктоз. Квартира аслым басьтысал "Удмурт дунне" газетын "Валэктэ юрист" сэрегын адвокат Лилия Шкляева улон коркаосты но квартираосты приватизировать карон сярысь туж умой валэктӥз. Сое лыдӟыса, мон но мылкыд кари улон интыме асэстыны (кыӵе аспӧртэм чебер кыл - Редакция). Мон пенсиын ини, уг ужаськы, ачим пересьмемъя корка но мӧйыме. Липетсэ выльдоно, гурез сэрттылоно, огсямен пусйыса, тупатъянэз-выльдонэз вань гинэ ини. Нош мон чылкак огнам, семья но кылдытыны ӧй пишмыты. Инмар-а мыным сыӵе "шуд" сётэм, кин тодэ на? Вакчияк вераса, огнам коркаме тупатъяны кужыме уз тырмы. Сое аслым карысал, ӵыжы- выжыосы тупатъяны юрттысалзы, нош кулэм берам квартираме соослы кельтысал. Озьы малпаса, уж котыре кутски, бумагаос люканы ӧдъяй. Ронолэн кивалтӥсез Пётр Павлович Арафаилов мон, пе, пумит ӧвӧл. Нош заявление пӧраны шӧтай но, роноысь валтӥсь бухгалтер кытысь ке кыӵе ке "ельцинской" указ копаз: "Соя, пе, школа квартираосты приватизировать каронлы мораторий ялэмын. Зэм, приватизациен вырись ёзъёс сое уг тодо. Озьы тӥни дышетӥсь нош ик ултӥямын. Нокыӵе юрттэт, пе, эн витьы. Нош пенсия сиён-юонлы сяна уг тырмы. Дунъёс пенсилэсь азьпала йыло, сое будэтэмзылэн пайдаез уг ик шӧдӥськы. Трос ушъясько: ветеранъёсты, пе, ум вунэтӥське. Нош уж вылын чиновникъёсын сэрен калык ӝоже уськытэмын. Малы меда таӵе кык пӧртэм закон кулэ? Мар кароно табере мыным? 48 ар школаын ужай, быдэс квартираез лякымон грамотаосы, вань наградаосы. Озьы ке но, нокин сое лыдэ басьтӥсь ӧвӧл. Александр Корепанов. Игра ёросысь Шоргурт. Мораторий шуон зэм но вань. Со сярысь верамын Россия Федерацилэн 1995-тӥ арын 16- тӥ мае кутэм "Дышетон учреждениослэн статуссы сярысь" 74 номеро Законын. Борис Ельцинлэн Указэз ӧвӧл. Приватизация пыр вузамлэсь алэмын кунлэн но интыослэн котькыӵе учреждениоссы, соослэн ваньбур поттонэн (производствоен) но улон-вылонэн (социальной удысэн) герӟаськем ёзъёссы. Тӥни малы тӥледды уг лэзё квартирадэс асэстыны. Митрофан МОСОВ Офоньлэн куректонэз Верос Сьӧд Петыр Пеклаен кузпалъяськем дырысен вить арлэсь ятыр ортчиз ни, нош инмар соослы нылпи татчыозь ӧз на Кузьма. Кудзы янгыш - вераны шуг. Соин но, дыр, куспазы ӵем гинэ керетон но ӝутыло. Огпол Пекла, ӝытсэ ӝӧк сьӧры сиськыны пуксьыса, Петырлы каллен гинэ вераз: - Нылпимы ӧвӧл шуыса, вождэ эн потты ни. Ӝыны ар ортчыса, тыныд пи кузьмало. - Уд пӧяськы-а? Оло, сюлэмме буйгатӥськод гинэ, - кузпалзэ ӟыгыртӥз Петыр. Пекла ӧз янгыша: куарусён вакытэ пиез вордскиз. Петырлэн мылкыдыз чылкак воштӥськиз: кышнозэ жаляса, юртъер котырысь вань ужъёсты вазь ӵукнаысен бер ӝытозь быдэсъя. Пиналысен ик нуныяса будэтэменызы, Офонь эшъёсызлэсь висъяськылӥз, школае но мылыз потытэк ветлӥз. Кызьы но озьы тямыс классэз йылпумъяз ик. Мукетъёсыз сямен, нокытчы ӧз кошкы: колхозын ужаны ӧдъяз. Бӧрысь механизаторе дышетскиз. Нуналъёс ӝог ортчо. Табере со тракторист. Нянен эн сюд - трактор гинэ мед луоз: сокем яратэ андан валзэ. Тупатъянэз ӧвӧл ке, тракторзэ уйлы ас коркаезлэн укно улаз пуктылэ. Марысь мар ке, "валэз" ки улаз. Нош гуртын солы йыбыртъясьёс ӧжыт ӧвӧл. Огезлы пу вуттоно, мукетызлы турын-куро ваёно. Валэн - дас пол, тракторен - огпол. Со понна Офонь векчи виятэмзэ стаканэн кымалля, куртчон сярысь но сюлмаськонэз ӧвӧл. Кин маин быгатэ - утялтэ. Нош уксё ӵектӥсьёслы юн вожез потэ. Механизаторлэсь паллянын ужамзэ колхозын адӟытэк-тодытэк уг уло. Со пумысен правлениын но трос пол вераськылӥзы ни. Ассэ но Офонез отчы ӧтьылӥзы. Нош солэн, кызьы шуо, пигонэз но ӧз вырӟылы. Бӧрысь киынызы шонтӥзы, лэся. Со интыын мукетсэ, оло, тракторлэсь кемалась люкысалзы ни. Нош Офонь - одӥгез азьмынӥсь, машинаез котькыӵе куазен ужаны дась. Тӥни соин но, вылды, вераськонъёс но чалмизы. - Офонь, тазьы-а весь кузпалтэк улод? Ӝоген тыныд куамын тырмоз ни, - ялан пыкылэ пизэ Пекла. - Адӟиськод: ми пересьмиськомы, пичи нуныостэ утялтэме, вешаме, будэтэме потэ. Асьме семьялы тупась кен ваёно вал. Анаезлэн ялан огкадь супыльтэмез Офоньлы акыляк потӥз ни. Толалтэ, Выль ар азьын, дӥсьсэ воштӥз но ураме потӥз. Коркаосын пиштӥсь тылъёс шоры учкон сяменыз, йыраз бергатэ гуртысь вань бызьымтэ нылъёсты. Синъёссэ кыньыса, котькудӥзлы дыртытэк дунъет сётыны быгатоз. Ваньмыз пӧлысь малы ке но тодаз лыктӥз Кирлолэн нылыз, Соня. Школаын но соос ӵош дышетскизы. Бӧрысь, городэ кошкыса, Соня пӧртэм интыосын ужаз. Али ӝыны толэзь пала ини анай-атаез дорын улэ: пыраклы бертэм, шуо. "Мар шуод, таза мугоро, макес-кукъёс вольытэсь, буй-буй небытэсь. Мӧляез нош, сюдэм ӵӧжлэн кадь, азьлань мычиськемын: ӟыгыръямед потытэк ӟыгыръялод, ява. Бордаз выдӥд ке, эстэм гур бордысь кадь шуныт лыктоз. Оло, отчы ветлыса оскалтоно?" - малпа ас понназ Офонь. Малпанзэ малы ке но шуак палэнтӥз. Бӧрысь кытчы мынон пумысь трос ӧз курадӟы ни: пыдыз Максим Анна пала вуттӥз. Солэн нылыз, Оля, Офоньлэсь кӧня ке ареслы пиналгес. Бызьыны вуытэк, пӧяськыса пинал ваиз. Капка пытсэтлэсь шальккетэмзэ кылыса, Анна гидкуазь палась укнояз учкиз. Воргорон со куспын корказьын вал ни. Ӧсэз вӧлак усьтӥз но корка пыриз. - Пырыны луоз-а, Анна Максимовна? - Пыр, пыр... Кин бен али тон? Куараед тодмо кадь но... Петыр Офонь мон. Ӟечбуресь! - Озьы, иське: синмы лябгес адӟе ни. Атаед но егит дыръяз гудыръяса вераськоз вал. Ӟечен-а бен пырид? Татӥе лык, пуксьы. Пыд вылын сылыса вераськонлэн пайдаез уг луы, шуо. Офонь, пальтозэ куштыса, ӝӧк пала вамыштӥз, пуксиз но, пыдъёссэ ваче карыса, вераськон амал утчаны ӧдъяз. Собере шуиз: - Анна Максимовна, лыктэмелэсь мугзэ, ачим вератэк, нокызьы уд тоды. - Ачим уг ик малпаськы ай со сярысь. Пырем муртлы сотэк но шумпотоно. Ми дортӥ воргоронъёс палэнэтӥ ортчо. Бускельмы гинэ, тодаз лыктыку, одӥг-ог вуылэ ик. - Тодӥськод, луоз: кузпалтэк улӥсько, - гозызэ пуныны кутскиз Офонь. - Анаен атай маза уг сёто: корка утись, дӥсь миськись, пе, ваёно. Мон Оляед сярысь кылпум поттыны, вераськыны лыктэм вал. - Офонь, тон милемды мыскыл уд кариськы-а? Олялэн пиез вань ук, тыныд мултэс луоз со. Ачим нош ма шуыны уг валаськы, асэныз вераськоно. Тани ӝыт скал кысконзэс быдтозы ни, возьма ӧжытак. Пырем куно кема ӧз ӝегатскы. Дӥсяськыкуз "ӵуказе лыкто" шуыса вераз но коркасб потӥз. Нош Офоньлэн кылъёсыз Анналэсь сюлэмзэ бугыртӥзы. Кышномурт йыраз ваньзэ бергатэ-малпа солэсь верамзэ. Нылыныз кудласянь вераськыны кутскон сярысь малпаське. Ӧд ке поттылы, бӧрысь ачид ик куректод. Кылзы гинэ мед тупасал: оло, чик но алоно ӧвӧл? Ма, туала улонын пересьёслэн егитъёсты индылэмзы пайдатэм луэ. Ачиз тодоз: пичи ӧвӧл ни. Ачиз тодоз: пичи ӧвӧл ни. Оля ужысь бертэм бере, анаез нылызлэсь скалъёсты сюдэмез сярысь кӧня ке юалляськиз но шуиз: - Фермаысьтыд воксё уд ваньмиськы, клубе но уд потаськы. Озьы ик-а ортчытыны малпаськод егит даурдэ? - Егит даур... Кыл но ведь шедьтӥськод. Кинлы кулэ на со? - Ма, мылкыдыд ортчемын ӧвӧл ай, нылы, оло, шудэд но азьпалан? Уг поттылы шуисько вал но, вератэк кызьы чидалод. Корка пушкын кӧня ке дырлы чалмыт луиз. Оля пӧзь керттон борды басьтӥськиз. Анаез гуразь палан ӵукна пӧзьтыны картофка миське. - Маке веранэд вань кадь, анай, малы дугдӥд? - вазиз Оля. - Петыр Офонь пыраз, тон сярысь юалляське, - вуэн ведразэ кутыса шуиз Анна. Ӵош, пе, улыны кариськоно вал. - Кинлы мон "пирданэн" кулэ на? - меӵкытӥз пумитаз нылыз. Вераськон огдырлы чалмиз. Нош Оля мур малпаськонэ усиз. Ӵуказе лыктӥз ке, ма шуоно? Офонез тодэ ке но, кыӵе меда солэн сюлмыз? Отчы уд пыры ук.Нырысь чеберъяськоз, вешалоз, бӧрысь мыжыкъёссэ но веръялод. ...Оля фермаысь ужъёссэ туннэ ӝоггес быдэстыны тыршиз. Йырысьтыз нокызьы уг кошкы Офоньлэн доразы вуылэмез. Дораз бертыкуз, сюрес вылысен Маринаен пумиськиз. Огаресъемъёс соос. Кыкназы ик скалъёсты утялто но кыско. Коня ке вамышъямзы бере, Оля эшезлы шуиз: - Тодӥськод-а, ма: толон дорамы мон сярысь юалляськыны Офонь пырам. - Ой, кыче шудо тон! Озьыен, ӝоген сюанды луоз, быдэс гуртэн шулдыръяськомы, - оло серекъяса, оло вожъяськыса вазиз пумитаз Марина. Ачид мар малпаськод?- - Кин тодэ со Офонез? Йыраз кеньырез ичи кадь. Вераськон куспетӥзы нылъёс дор палазы кызьы вуэмзэс ӧз ик шӧдылэ. - Оля, учкы ай: куномы вань, лэся, - эшезлэн тыбыраз чабкыса вераз Марина. - Урам палась укноосын тылмы ноку ӧз ӝуалля. Марина корка ӧсэз усьтыса вуиз гинэ но адӟиз: ӝӧк сьӧрын атаеныз артэ, бадӟым куно сямен, гань-гань пуке Офонь. Шӧдӥське ни шӧмаськемзы но. Киосазы - аракыен стаканъёс, ымъёссы ворсаськылытэк, куспазы шалтыр гинэ супыльто. - Пудэ ӵуказе ик азбарад вутто, - аракызэ паськыт ымаз кисьтыса шуиз Офонь корка кузёлы. - Нош туннэ мон Маринаез кураны лыктӥ. Марина, дӥсьсэ воштыса, гуразь палась потӥз но, ӝӧк доры султыса, каллен гинэ вазиськиз: - Кураны? Кинлы-о нош? - Аслым. Ӵош улыны. Пересь ӧй карысал ке тон монэ. - Мон соглаш, Офонь, тыныд кузпал луыны. Коть ӵуказе ик ну. - Зэм-а, Марина? Гажанэ тон мынам... Офонь интыысьтыз ӝогак султӥз но Марина доры вамыштӥз. Бур киыныз ӟыгыртыны ӧз вуы, егит ныл кеськиз: - Кошдорысьтым, - бамаз чабкиз Марина. - Нош Оляез кытчы карод? Толон отчы ветлӥд, туннэ татчы пырид. Мусульманъёс сямен, оло, кык кышноен улэмед потӥз-а? Возьыттэм кион! - Нылы, пырем адямиез малы адӟонтэм кариськод? - ӝӧк сьӧрысь султыса вазиз атаез. - Офонь, тонэ гажаса, мылкыдзэ усьтэ ук. - Ӟеч сюлмын гажасал ке, ӟечен ик ветлысал но, - ӧз чида ни егит ныл. - Ӵуказе куинетӥезлэн ӧсаз йыгаськоз со. Асьмеды но, Оляосты но серем карыса ветлэ озьы. Мариналэн лек кылъёсызлы чидатэк, Офонь ӝог гинэ дӥсяськиз, ӧсэтӥ кызьы потэмзэ но ӧз вала. Урамын кема гинэ сылӥз. Табере кытчы вамыштоно? "Оляен ӧз удалты, Марина улляса лэзиз. Одно ик ветлоно Соня доры. Куинетӥяз сюрес удалтыны кулэ. Сое мукетъёсыныз уд ӵошаты, кылмы тупаны кулэ", - озьы малпаса, пичигес нюк сьӧрысь корка пала шонтӥз. Отын улэ Кирлолэн нылыз. Нюк доры ӧз вуы, сюрес вамен сьӧд коӵыш выжиз. "Вот лэсянтэм: тон но мынэсьтым шудме таласькод! Тьфу!" - йыркуръяськыса сялӟиз но берытскыса дор палаз кошкиз. Кык нунал ортчыса, мастерскойысен ӵош ужась эшеныз Васяен пумиськиз. Кӧня ке вераськемзы бере, Вася дораз мыныса юаз: - Мылкыдыд туннэ киренен сюкась юэм бере кадь. Оло, гуртад секыт? Оло, висьыны ӧдъяд? Кылӥськиз вал: кузпал шедьтэмед. Писпу тӧлтэк уг выры. Озьыен, зэм верасько? Офонь киыныз шонтӥз но мастерскойысь потӥз. Нокинэн солэн пумиськемез уг поты. ...Улонын озьы ни: уродэз но, ӟечез но гуртын ӝог вӧлме. Офоньлэн кышно кураса ветлэмез сярысь калык пӧлын пӧртэм вераськонъёс вӧлмизы. Дыр ортчемъя, "кышно утчась" ним но лякизы. Тӥни соин но, вылды, Афанасий Петрович туннэ но кузпалтэк улэ, ассэ ачиз ялан пыкылэ. Удмурт Республикаысь Энергетикая улосвыл комиссия сярысь Удмурт Республикаысь Правительстволэн постановлениез Россия Федерацилэн 1999-тӥ арын 11-тӥ феврале юнматэм "Россия Федерациын электрокужымлы но шунытлы дунъёсты кун ласянь радъян сярысь" федеральной законэ воштонъёс но ватсанъёс пыртон пумысен" 33-Ф3 номеро Законэзъя но энергетикая улосвыл комиссия сярысь положениез лыдэ басьтыса, Удмурт Республикаысь Правительство пуктэ: 1. Удмурт Республикаысь Тарифъёсъя но дунъёсъя кун комитетэз нимано Энергетикая улосвыл комиссия (РЭК). 2. Энергетикая улосвыл комиссилэн быдэсъян удысъёсыз пӧлы кельтоно производственно-технической вузъёслы но, коньдон тырыса, юрттэтлы дунъёсты (тарифъёсты) радъянэз, Россия Федерацилэн законодательствоеныз чаклам полномочиосты лыдэ басьтыса. 3. Постановлениез печатлано ивор вӧлмытӥсь ёзъёсын. Удмурт Республикаысь Правительстволэн Тӧроезлэн воштӥсез Н. И. Хохлов. Ижевск город, 2000-тӥ ар 19-тӥ январе. � 90. Февраль толэзе сӥё-дано нуналъёс 1 февраль, четверг: Египетын (4 дауре) улэм быдӟым святоез, преподобной Макариез сӥлы карон нунал. 4 февраль, арня нунал: быдӟым визьлы дасяськыса выт бичась но фарисей сярысь Евангелиысь мадёнэз тодэ ваён арня. 6 февраль, вторник: Петербургысь блаженной Ксениез сӥлы карон нунал. 11 февраль, арня нунал: йыромыса ветлӥсь пи сярысь Евангелиысь мадёнэз тодэ ваён арня. Та нунал ик Ӟуч кунын ЪЪ дауре оскон понна курадӟытыса виылэмъёсты буре ваён нунал. 12 февраль, понедельник: быдӟым югдытӥсьёсты осконлы дышетӥсьёсты Быдӟым Василиез, Инмар кыло Григориез, Иоанн Златоустэз сӥлы карон нунал. 15 февраль, четверг: быдӟым праздник - Кузё-Инмармес Иисус Христосэз пумитан (Сретение). 17 февраль, суббота: быдӟым визь азьын кулэм муртъёсты буре вайыса вӧсяськон. 18 февраль, арня нунал: быдӟым визьлы дасяськыса Кышкыт суд сярысь Евангелиысь веранэз тодэ ваён арня. Сӥль уг ни сиё соку. 1 февральысен 25 февралёзь - вӧй арня, средае но пятницае кӧс уг вӧзё, быдэс арня сӥль уг сиё. 25 февраль, арня нунал: прощение курон нунал. Мултэс вераськонлы, серекъян- горонлы, сӥль, кӧй, вӧй, йӧл, курег пуз, чорыг сиёнлы ымез ворсано (заговенье) 15 апрелёзь - Быдӟым нунал (Великтэм) вуытозь. 26 февраль, понедельник: Быдӟым визь (Великий пост). Быдэс арня ӵоже, субботаозь, кӧс сиськон, Пасхаозь быдэс Выль сӥзёнэз (Новый заветэз) лыдӟыса, ог Псалтирез куинь пол лыдӟыса потон. Визь дыръя сиён-юонъёс (праздникъёс) ортчытъяны сьӧлык. Утиське 8-тӥ мартлэсь. Визяса (кӧс утьыса), вӧсяськыса улон гинэ Инмар доры вуттэ, сюлэмлы шумпотон, лул-мугорлы каньылак сётэ. Гажано агай-вынъёс, сузэръёс! Инмар асьмелы визез утьыны кужым, чидан, ӟеч мылкыд мед сётоз шуыса ваелэ вӧсяськоме. Монэ, сьӧлыкоез, простить каре, мон понна но вӧсяське. Котьмае чидась кышномурт Инмын кызьы чиляса ворекъяса, пеймыт уез югдытыса кызьы уло пумтэм-йылтэм, лыдъянтэм трос кизилиос Инмарлэн юртаз - Ин эксэйлыкын, Инмарлэн данлыказ озьы ик пиштыса уло святойёс. Соос туж трос. Кинъёс соос, кызьы вераны кыл шедьтонтэм, шумпотон, куаныса улон интые сюризы? Котькудӥзлэн аслаз сюресэз вал. Но одӥгез гинэ соосты огазея: Дуннеез Кылдытӥсьлы, асьмелы улон кузьмась Инмарлы быдэс улондэ сётон, солэн курон- косонъёсызъя улон, та бырись-кошкись дуннелэн чеберлыкъёсызлэсь палэнскон но Вылысь Инмарез данъяса, Солы тэрытскыса, зӥбыт-востэм, вӧсяськыса улон. Февраль толэзе но календарез учкыса тодыны луэ, кӧня святойёсты Православной черк сӥлы карыса вӧсяське! Туннэ туж вакчияк гинэ вераломы соос пӧлысь огез - Петербургысь блаженной Ксения сярысь. Ксения вордскиз Санкт-Петербургын 18-тӥ даурлэн кутсконаз Инмарлы оскись, вӧсяськись семьяын. Быдэ вуыса бызиз эксэй юртысь хорын кырӟасьлы, полковниклы. Яратоно, йӧно кузпалыныз кема улыны ӧз кылды - таиз малпамтэ шорысь кулӥз. Ксения понна шунды кысӥз кадь: нокыӵе но чеберлыкъёс, байлыкъёс, узыресь кузпалъёс кулэ ӧй вал ни. Со ялан вӧсяськиз но ас вылаз аспӧртэм бадӟым учыр (подвиг) басьтӥз. Сое, черк-славян кылын вераса, юродство шуо: визьтэм улэ аналскиз. Вань юртъерзэ (именизэ) вузаз но кураськисьёслы сётъяз. Ачиз, кузпалызлэсь дӥсьсэ дӥсяса, ульчае, кураськисьёс, пӧлы потӥз. Узыресь ӵыжы-выжыосыныз кӧня выризы сое бордазы карыны. Ксения ӧз матэкты. нуназе ветлӥз ульча кузя, базаръёстӥ, калык люкаськон интыостӥ ветлӥз. Уйёссэ кытын сюрем, отын кӧлаз. Кӧт сюман, кынмон дыръёсыз трос вал. Вылысьтыз дӥськутэз сурыкмем бере, ик ас вылаз ӟустари ошылыса ветлӥз. Уйёсы, бусые я тэле мыныса, синвуэн вӧсяськиз кузпалыз понна, вань калык понна. Соку Смоленской черк пуктӥське вал. Уйшор уин, калык адӟымтэ дыръя, Ксения татчы лыктэ но музъем вылысь вань кирпичез йылэ ӝутъя вал. Ӟеч ужзэ калыклы ӧз возьматы, лушкемен лэсьтылӥз. Инмарлы оскись калык тырше вал сое сюдыны-вордыны, ма но со сётыны. Нош Ксения ваньзэ кураськисьёслы, шуге-леке сюремъёслы дэмлалляз. Инмарлы оскисьтэмъёс сое уни-мани каро, серекъяло, изэн лэзьяло. Ксения нокыӵе ӧз кариськы, Инмарез яратонэз сюлмаз тыл кадь ӝуаз. Нокинлы вожзэ ӧз поттылы, ваньзэ чидаз. Со тодэ вал уго Евангелиысь чуръёсты: "Покчи мылкыдоос шудоесь: соослэн Ин эксэйлыксы вань... Шонер улонэз сютэм, сю куасьмыса возьмасьёс шудоесь: соос тыр луозы" (Мф. 5:3,6). Христос азьын ассэ покчи карыса, курадӟонъёс чидаса, Инмарез данъяса улэм понназ Вылысь Инмар солы ик таӵе ӟечлыксэ возьматӥз: Ксения адӟе вал адямилэсь азьпал улонзэ. Адӟемзэ тодытэ но адямиослы шугадӟонъёсты чиданы яке соослэсь палэнскыны юрттэ. Кулэм бераз, сое сӥлы карыса, туннэ нуналозь туж трос калык ветлэ Ксениялэн шайгу вылаз. Молебен чирдо, Инмарлэн престол азяз мед вӧсяськоз шуыса, блаженной Ксениялэсь юрттэт куро. Со ватэмын Санкт-Петербургысь Смоленской черк вӧзысь шайвылэ. Гу вылаз часовня пуктэмын. Инмаре, жаля монэ, сьӧлыкоез Котькуд вакытлэн, толэзьлэн, нуналлэн аслаз тодметъёсыз, сӥё-дано дыръёсыз. Али гинэ ортчиз быдӟымесь праздникъёсын толшор, вуиз бурано, лымыё февраль толэзь. Кӧс утем бере вал ни ыммес усьтон но дунне вылысь вань емышез сиён-юон дырмы. Февральлэн пумаз кутске ини Быдӟым визь (Кӧс утён) Православной черк ас нылпиоссэ каллен-каллен дасяны кутске та сӥё-дано лулэз утёнын туж кулэ луись дырлы. Арнялы быдэ черкын верало Евангелиысь мадёнъёсты. Соос пӧлысь одӥгзэ туннэ газет бамын печатласькомы. Татын вераськон мынэ ассэ вылӥе, (фарисей) сярысь но ассэ ултӥясь, сьӧлыкъёсыз понна бӧрдӥсь, куректӥсь (выт бичась) муртъёс сярысь. ... Кык адямиос храме вӧсяськыны пыриллям. Одӥгез - фарисей, мукетыз - выт бичась. Фарисей султыса ас понназ вӧсяськем: "Инмаре! Тыныд тау карисько мон сыӵе ӧвӧл понна, кыӵе луо мукет муртъёс - адями таласьёс, ултӥясьёс, азыса улӥсьёс, яке, тани та выт бичась кадь: арнялы быдэ кык пол визясько - мар гинэ басьтӥсько, дасэтӥ люкетсэ храме сётӥсько". Выт бичась, палэнын сылыса, синзэ но инме ӝутыны дӥсьтымтэ, гадяз шуккылыса шуэм: "Инмаре, жаля монэ сьӧлыкоез!" Кин со фарисей но выт бичась? Фарисей - со Еврей кунысь вӧсяськисьёслэн партиязы пырись мурт. Соос юн утьыса возизы Моисейлэсь законзэ но вашкала пересьёс дорысь вуэм сямъёсты- йылолъёсты. Котькуд буква борды соос кырмисько, котькыӵе воштӥськонъёслы пумитъясько. Асьсэды шонер улӥсен лыдъяллязы. Выт бичасез (мытарез) огшоры калык уг яраты. Малпа сое сьлыко шуыса, малы ке шуоно, сыӵе муртъёс ӵем дыръя, калыклэсь берпум копейказэ поттыса, выт тырытылӥзы. Туж вашкала аръёсы, кыдёкысь кунын улэм та кык адямиослэн Инмар коркаын вӧсяськемзы-куриськемзы, асьсэды воземзы шоры учкиськомы но, сюлэммы нёркак луэ, кудзы ке бордысь асьмеды асьмеос тодмаськомы. Кудзылы меда мон укшасько, кудзы мынам лулылы-сюлмылы матынгес? Молитва - со быдӟым уж. Уго вӧсяськон пыр адями Ас Инмарен вераське. Аслэсьтыз сюлэмзэ усьтэ, кыӵе луэмзэ возьматэ. Инмарлэсь куриське, Солы тау каре, кӧтӝожзэ вера. Та пыр но валаны луэ - мар кулэ та адямилы, кин со? Фарисей вӧсяськон корка лыктӥз но вань сюлэмзэ поныса вӧсяськиз. Но котькуд кылаз, выросаз адӟиськиз ассэ ачиз вылэ пуктэмез, муртъёслэсь сьӧлыксэс адӟемез, соосты ултӥяны тыршемез. Ӧз вунэты ук Инмарлы тодэ вайытыны аслэсьтыз ӟеч ужъёссэ: кӧс утемзэ, вӧсяськемзэ, храме коньдон но ваньбур сёткамзэ. Выт бичась черке пыриз но муз вылысь синзэ но ӝутыны ӧз дӥсьты. Черк шоры султыса, туж куректӥз, сюлмыз бӧрдыса, сьӧлыкъёсыз понна ӧбкельыса, ӧс дорын сылӥз, нокинэ но янгыше ӧз уськыты. Сюлмаз вожпотонэз ӧй вал. Гадяз шуккылыса вӧсяськиз: "Инмаре! Жаля монэ, сьӧлыкоез!". Та мадёнэз Иисус Христос аслаз дышетскисьёсызлы вераз: "Тӥледлы верасько: соиз фарисей сярысь, таиз выт бичась, юнгес шонере потыса, дораз бертӥз: уго котькудӥз но ассэ вылӥе ӝутӥсь мурт ултӥямын луоз, нош ассэ ачиз ултӥясь мурт ӝутӥськоз" (Лк. 18:14). Гажано агай-вынъёс, сузэръёс! Тросэзлэн асьмелэн улон-вылонмы туж укша фарисейлэн улон шоры учкемезлы. Асьмеос будӥмы пӧртэм социалистической ӵошатсконъёс вакытэ. Тыршиськомы вал пӧртэм пумо балъёс, наградаос, ушъян кагазъёс-грамотаос басьтон понна. Малпаса но малпатэк котькуд ласянь, асьмеды вылӥе пуктыны тыршимы, нош матысьёсмылэсь шекъёссэс гинэ утчаллямы. Одӥг кенеш но уг ортчы вал, одӥгзэ вылӥе ӝутытэк, ушъятэк, мукетсэ курлатэк,-сантэматэк. Соин ик Инмар азьын шонер улыны тыршисьёслы секыт вал улыны. Соку но, жаляса верано луэ, али но асьмеос, Инмар азе султыса, шер дыръя сьӧлыкъёсмы но янгышъёсмы понна ӧбкелиськомы. Черке лыктыса, исповеде пыриськомы ке, ӵем дыръя асьмеды котькуд ласянь шонере поттыны выриськомы, сьӧлыкъёсмы понна кинэ ке но янгыше уськытӥськомы: кузпалы азьтэм, юись, кенэ лек; нылпиоссы укылтэмесь; бускельёсы оскисьтэмесь но трос мукет. Муртлэсь синмысьтыз чагзэ адӟиськомы, нош асьмелэнысьтыз корзэ но ум шӧдӥське. Асьмеос тодыны кулэ: асьмемыз Кылдытӥсь Инмармы вань сьӧлыкъёсмес тодэ, сюлэм чигиськонмес но адӟе. Солы кулэ ӧвӧл фарисей музэн асьмеды шонере поттэммы. Солы асьмелэн урод ужъёсмы понна ӧбкелеммы-тэльмыреммы кулэ, Кызьы шуэ дуно-сьӧлыктэм пророк, Давид эксэй: "Чигиськыса востэм улӥсьлэсь сюлэмзэ Тон, Инмаре, уд ултӥя" (Пс. 50). Зэм ик озьы. Дунне вылын одӥг адями но сьӧлыктэмез ӧвӧл. Соин ик, асьмеды вылӥе пуктытэк, вашкала святой атайёсмы музэн, ойдолэ вӧсяськоме: "Инмаре, монэ сьӧлыкоез сузя, чылкытаты. Тон азьын мон ноку но, номыр но ӟечсэ ӧй лэсьты уго, уродлэсь-кескичлэсь монэ мозмыты. Тынад эрикед мон бордын мед улоз. Янгыше сюронтэм вылысь, лэсянтэм ымме усьто но Тынэсьтыд - Атайлэсь, Пилэсь, Святой Духлэсь святой нимдэ ушъяло али но, котьку но, пумтэм вапуме. Аминь. Дасяз протодиакон Михаил Атаманов. Вӧсяськонлы сӥзем бамез кырсь азе эн куялэ. Кулэ ӧвӧл ни ке, сутэлэ. Тодмо нуналъёс но нимъёс Февраль 1. 60 арес тырмиз Удмурт кун университетлэн ректорезлы, физика но математика наукаосъя докторлы, профессорлы, СССР-лэн Кун премиезлэн лауреатэзлы Виталий Анатольевич Журавлевлы (1941). - 60 арес тырмиз инженер-механиклы, техника наукаосъя докторлы, профессорлы, Удмурт Республикаысь наука удысысь дано ужасьлы, Ижевскысь Техникая кун университетлэн механикая институтэзлэн директорезлы Вениамин Иосифович Гольдфарблы (1941). Вордскемын Ижевскын. 2. 110 ар тырме удмурт филологлэн, лингвистлэн, методистлэн Семен Прокопьевич Жуйковлэн (1891-1967) вордскемез дырысен. Вордскемын со али Глазов ёросысь Пусошур гуртын. - 85 ар тырме Социалистическй Ужысь Геройлэн, Глазовысь механикая Чепец заводын ужам рабочийлэн, рационализаторлэн Федор Петрович Макаровлэн (1916-1976) вордскемез дырысен. 3. 80 ар тырме Советской Союзлэн Героезлэн Борис Александрович Смирновлэн (1921-1949) вордскемез дырысен. Вордскемын со Воткинскын. Быдӟым Отечественной война дыръя пыриськиз Смоленщинаез, Белоруссиез, Шунды пуксёнпал Украинаез, Польшаез мозмытон понна ожъёсы. 4. 95 ар тырме Социалистической Ужысь Геройлэн, техника наукаосъя кандидатлэн, СССР-лэн Кун премиезлэн лауреатэзлэн Петр Михайлович Трухинлэн (1906-1996) вордскемез дыырсен. Вордскемын али Можга ёросысь Бадӟым Уча черкогуртын. 7. 70 ар тырме (1931) Музыкая но драмая удмурт театрлэн усьтӥськемез дырысен. Театрлэн нырысетӥ труппаяз пыризы художественной самодеятельносте велӥсьёс, городысь но гуртысь егитъёс, Удмурт клублэн ужаз пыриськисьёс. Театрлэн нырысетӥ спектаклез пуктэмын вал И. Гавриловлэн "Вало ӧр куашетэ" ("Река Вала шумит") пьесаезъя. 1974-тӥ арын театр люкемын драмая но музыкая театръёслы. Кыкетӥез 1993-тӥ арысен Операя но балетъя кун театр луиз. 8. 65 ар талэсь азьло (1936) Ижевскысь комсомолецъёс Ижевск-Москва кузь сюрес вылэ куасэн потӥзы. - 55 арес тырме спортъя мастерлы, Удмуртилэн пуляен ыбылӥськонъя сборной командаезлэн тренерезлы, Россия Федерациысь дано тренерлы Владимир Валерианович Лукинлы. 10. 70 ар талэсь азьло (1931) РСФСР-ысь ВЦИК но Совнарком Вотской автономной областьлы 10 ар тырмонэн валче областьын педагогической институт кылдытон, Ижевскын больница но нылпи яслиос лэсьтон, тазалыкез утёнэз умоятон, сӧсыръёслы мастерскойёс усьтон, Ижевскын радиовещаниея станция лэсьтон понна коньдон висъян, нырысетӥ МТС-ёс кылдытон но гуртын тыршисьёслы кӧня ке льготаос сётон сярысь постановление кутӥзы. - 70 ар талэсь азьло (1931) сӥё-дано кутскемын вал Ижевск городын теплоэлектроцентралез - ИЖ ТЭЦ-ез лэсьтон. - 65 арес тырме удмурт кылбурчилы, критиклы но литературоведлы, филология наукаосъя докторлы, Удмуртиысь культура но наука удысъёсысь дано ужасьлы Василий Михайлович Ванюшевлы (1936). 12. 60 арес тырме химия наукаосъя докторлы, профессорлы, Удмуртиысь наука удысысь дано ужасьлы, Удмурт Республикаысь Правительстволэн Наукая, вылӥ но шор ёзо дышетонъя комитетэзлэн азьвыл кивалтӥсезлы Сергей Максимович Ремесленниковлы (1941). 13. 30 ар талэсь азьло (1931) Ижевскын кылдытэмын вал нылпиослы хоръя "Удмуртия" студия. 15. 80 ар тырме Советской Союзлэн Героезлэн Леонид Васильевич Рыковлэн (1921- 1988) вордскемез дырысен. Вордскемын со али Дебес ёросысь Князево гуртын. Быдӟым Отечественной война дыръя лётчик 930 пол лобаз тушмон вылэ. Войнаез йылпумъяз Берлин дорын. 16. 80 ар тырме Советской Союзлэн Героезлэн Вадим Анатольевич Герасимовлэн (1921-1943) вордскемез дырысен. Вордскемын Ижевск городын. Пыриськиз Курск дорын ожъёсы, батыр луэмзэ возьматӥз но бырын шедиз Днепр шурез выжыса бур пал ярдурысь плацдармез возён понна ожын. 18. 130 ар талэсь азьло (1871) Вотка заводын уже лэземын вал Уралын нырысетӥез но Россиын куинетӥез мартен гур. 20. 95 ар тырме Ижевскысь машиностроительной заводысь конструкторлэн, Удмуртиысь наука но техника удысысь дано ужасьлэн, техника наукаосъя кандидатлэн Александр Александрович Модзелевскийлэн (1906-1996) вордскемез дырысен. Солэн кивалтэмез улсын кылдытэмын вал "Юпитер" но "Планета" мотоциклъёс. 21. 80 ар тырме Советской Союзлэн Героезлэн Никифор Савельевич Павловлэн (1921-1995) вордскемез дырысен. Вордскемын со Завьял ёросысь Вуж Казмас гуртын. Батыр но кышкасьтэм луэмзэ возьматӥз 1943-тӥ арын Днепр шурез выжон дыръя. 23. 100 ар тырме удмурт драматурглэн, критиклэн, публицистлэн Алексей Иванович Жомбинлэн (псевдонимез Жомбо Очей) (1901-1962) вордскемез дырысен. - 10 ар тырме (1991) Удмурт Республикаысь Ӟуч культурая обществоез кылдытэм дырысен. 24. 70 ар талэсь азьло (1931) потӥз "Молодой большевик" ("егит большевик") газетлэн нырысетӥ номерез. Бӧрысь со нимаськиз "Комсомолец Удмуртии", "Курьер". Газет потӥз 1994-тӥ арозь. 27. 80 ар талэсь азьло (1921) ортчиз Вотской автономной областез кылдытэмлы сӥзем праздник. Городъёсын но уездъёсын ортчизы митингъёс, собраниос, сӥё-дано ӝытъёс, концертъёс. Кызетӥ аръёсы 27-тӥ феврале пусйылӥськиз Удмурт автономилэн нуналэз. - 80 ар талэсь азьло Глазовын усьтӥськиз Калыкез дышетонъя удмурт институт. 28-тӥ феврале-1-тӥ мартэ. 80 ар талэсь азьло (1921) Глазовын ортчиз РКП(б)-лэн нырысетӥ конференциез. Отын ик кылдытэмын вал областной партийной организация. Соку партилэн радъёсаз 2483 сюрс мурт вал. Конференциын быръемын вал областной комитет. Соин кивалтӥз Степан Павлович Барышников. - 75 ар талэсь азьло (1926) потӥз "Кенеш" ("Совет") общественно- политической но литературно-художественной журналлэн нырысетӥ номерез. 1931-тӥ арын декабрьысен со нимаськиз "Пролетар кылбурет удысын", 1934-тӥ арысен - "Молот", 1990-тӥ арысен - "Кенеш". - 60 арес тырме биология наукаосъя докторлы, Удмурт кун университетысь профессорлы, Россия Федерациысь но Удмурт Республикаысь наука удысысь дано ужасьлы Виктор Васильевич Туганаевлы (1941). Вордскемын Алнаш черкогуртын. Феврале - 80 ар талэсь азьло (1921) дугдытъям бере выльысь уже лэземын Ижевскысь чугун кисьтон завод (бӧрысьгес - В. И. Ленин нимо завод, али "Редуктор" АО). - 80 ар талэсь азьло (1921) азинлыко тыршемзы понна Иж заводысь 101 рабочийлы Ужысь Герой ним сётэмын вал. - 65 ар талэсь азьло (1936) Можгаын кылдытэмын вал гурт хозяйствоез механизировать каронъя училище. Дасяз Е. Ушакова, Удмурт Республикаысь выль историяя центрысь иворъёсъя но документъёсты печатланъя отделлэн кивалтӥсез. Суредась пальпотэ Выль депутатъёсты быръёнлы дасяськонэз тазьы адӟе суредась В.Шилов. 1. Мултэс трос кандидатъёс люкаськиллям, одӥг-кыксэ палэнтытэк уз луы. 2. Тау оскемдылы. Мон табере тодӥсько кӧттыро улонэ сюресъёс. 3. Таосыз кизэс мон понна ӝутозы ни. ЧАКЛАСЬКЕ! Грипп - со Африкаын но грипп Грипп, конечно, СПИД ӧвӧл. Но... кышкытгес, малы ке шуоно, сое нокин но ачиз уг утча. Грипп палаське уй но, нунал но, тол но, гужем но, сьӧлыкоезлы но, сьӧлыктэмезлы но. Бервылъёсыз но каньылгес ӧвӧл. Кылем толэзе Ижевскын грипплэсь кулӥз пинал. Та висён сярысь туэ трос гожъям ни, но лыдӟисьёсмес эшшо огпол чакласькыны- утиськыны курыса ӵектӥськом паласькись висёнъёсты эмъясь врачен Нина Николаеваен вераськеммес лыдӟыны. - Нина Васильевна, мар со грипп, кызьы палаське, лыдӟисьёсмы тодо ни. Нош маин висъяське со ОРЗ-лэсь, ОРВИ-лэсь? - Зэм но, грипп туж тупа та висёнъёслы: пыэд луэ, ньылон висе, мугор ӟырда... Но грипп секытгес но кышкытгес висён. Со шуак (12 час ӵоже) кутскыны быгатэ, соку ик 38-40оС мугор ӟырда, адями лябӟе, вань быгытъёсыз, ёзвиосыз ишкыса висьыны кутско, йырыз, синъёсыз секыт луо. Бӧрысьгес зол кызыны кутске. - Кӧня нунал кыстӥське со? - Вить нунал котыр, куддыр - тросгес. Но таяз учыре утчано ни солэсь бервылъёссэ. - Ма, соос утчатэк но шӧдӥсько, дыр. - Озьы. Кытӥыз адямилэн ӵемгес висьылэ, отчы ик "сётэ": кинлэн ке йырзэ ӝутэмез уг луы, кин ке пекляосыныз куасалске. Ӵемгес тыос курадӟо, пневмония кутске. Таиз ӵемгес пиналъёс пӧлын пумиськылэ (ӵапак пневмонилэсь кулӥз пинал но). - Малы гриппен ӵемгес пиналъёс висё? Кудӥз шуэ, со, пе, пересьёслы уг но паласькы. - Пересьёс, зэмзэ но, гриппен ӧжытгес висё, малы ке шуоно, котькудӥныз вирусэн висем бере (соос трос - А, В...), мугор выльысь ӧжыт ке но пумитъяськыны быгатэ ни. Нош пиналъёслэн иммунитетсы ляб на, соин ик грипп гинэ ӧвӧл, мукет паласькись висёнъёс но чальгес паласько. - Асьмеос кызыны-кизьныны кутскиськом ке, кынмаммес янгыш кариськом. Соку малы Африкаын но гриппен висё? - Гриппен асьме дорын но гужем висён учыръёс луыло. Но толалтэ адями ӧжытгес витамин сие, мугорыз лябӟе, соин ик кынмыса висёнлы пумитъяськемез уг луы ни. Соин ик ӟеч сиськыны, шуныт дӥсяськыны кулэ. - Витамин шедьтон понна, нокыӵе адями но килограммен лимон но, улмо но уз сиы. Дась поттэмъёсыз пӧлысь кудзэ ӵектысалды? - "Ревит", "Декамевит", "Ундевит". Юоно нуналаз 2-3 пол сиськем бере, быдэс толэзь ӵоже. Сотэк пайдаез уз луы. Висьыку умой юрттэ антигриппин порошок. Ас тодэмъя антибиотикъёс но сульфаниламидъёс юыны уг яра. Гуртын улӥсьёслы, конечно, шуггес лимон шедьтыны, но со понна гулбечсы узыр кубистаен-ӵуж кушманэн, сугонэн-чеснокен. Эн висе, таза луэ. З.ВАХРУШЕВА. Вордскемзэс та нуналъёсы пусъё Александр Горяинов - Удмурт Республикалэн президентэзлэн администрациеныз кивалтӥсь; Андрей Осколков - "Удмуртнефтепродукт" АО-лэн валтӥсь директорез, Удмурт Республикаысь Кун Кенешлэн депутатэз; Виктор Хорошавцев - "Белкамнефть" АО-лэн валтӥсь директорез, Удмурт Республикаысь Кун Кенешлэн депутатэз; Айваз Марданшин - Ижевск городлэн прокурорез. Адямилэн дуныз - чиньы пасьта Озьы луиз, адямилэсь правооссэ гажан мылкыдэз улонамы пыӵатыны ӧм быгатэ. Туннэ луэ вузаны но басьтыны нылпиосты, кышномуртэ, чеберлыкез, визез, быгатонлыкез, куд- ог дыръя - вордскем музъемез но. Улонлэн дуныз пумен дунтэма но дунтэма. Кызьы потоно кылдэм югдурысь? Та ужпумъёсты пыр-поч эскерон вылысь, асьме шаерамы вуиз Россиысь калык огазеяськонъёслэн конгрессылэн вице-президентэз Антуан Аракелян. Москваысь куно вуылӥз ни Кун Кенеше, Правительствое, город администрацие. Толон Антуан Аракелян пыриськиз Правительствоын радъям "котырес ӝоклэн" ужаз. Отчы вылӥ кивалтӥсьёс сяна, ӧтемын вал трос мукет мылкыд карисьёс. Кызьы вера вице-президент, калыклэсь правооссэ утён понна, нырысь ик кутоно "Россия Федерациын адямилэсь правооссэ утёнъя кыл кутӥсь сярысь" Законэз. "Котыртэм ӝӧк" сьӧрысь люкам материалэз лыдӟыны быгатоды вуоно номеръёсысь. Э.КУМАЧЁВА. Шаермылэн куноосыз Котькуд медальлэн кык палыз вань Кылем субботае Ижын ортчиз "котырес ӝӧк сьӧрын" тунсыко вераськон. Асьме шаере вуылӥз Москваысь тодмо профессор Михаил Губогло. Со луэ Россиысь Науакаосъя Академилэн антропологияя но этнологияя институтлэн директорезлэн воштӥсез. Пумиськонэ ӧтем асьме тодосчиос Владимир Владыкин, Людмила Христолюбова, Кузьма Куликов но мукет эшъёс кенешонэз ӧръязы историе кылем ЪЪ даурлэн берпуметӥ дас аръёсыз ӵоже Россиын но Удмуртиын кылдэм югдур котыртӥ. Ма вал та дыре ӟечез, кыӵе ыштон адӟиз калык 90-тӥ аръёсы? Кызьы но мар кароно, азьланьын йӧногес улон понна? Таӵе но мукет юанъёсъя мылкыдзэс шараязы визьмо адямиос. Пусйыны кулэ: пумиськонэз радъяз Кун Думалэн депутатэз Светлана Смирнова. Та ужрад сярысь ми азьланьын мургес мадьыны малпаськом на. Нош туннэ дэмласьком Москваысь тодосчилэн Михаил Губоглолэн пумиськонэз йылпумъяса вераменыз: - Мон понна тужгес пусйымонэз потэ тани ма. Асьмеос берло аръёсы дышим ӟечгес ужаны. Тани басьтом туннэ пумиськонмес ик. Таӵе вераськонлы йылпумъян лэсьтон вылысь, азьло дыре ичизэ арня кулэ луысал. Нош табере быгатӥськом син куспын кулэ документ дасяны, пӧртэм мылкыдъёсты огазеяны но возьматыны, малпанъёсмес калык дорозь вуттыны. Вань мукет но пусйымон воштӥськонъёс. Но асьмелы али пыр-почгес эскероно тырмымтэосты. Соос ичи ӧй вал ук. Тани 1993-тӥ арын кулэмъёслэн лыдзы вордскемъёслэсь уногес луиз. Таӵеез Совето Союзын ӧй вал. Туж умойтэм учыр. Соин ик та берло дас арез куддыр мон ыштэм вакытэн лыдъясько. Уго калык ичигес пинал вайыны кутске ке, со аслыз азьлане мыныны сюресэз пытса. Та дыр тупаз на мукет ужъёсын: огъя ваньбурез нимаз адямиос яке мукет кузёос кие сётонэн но пӧртэм удысъёсын преступлениос йылэмен. Удмуртия та ласянь уг висъяськы мукет улосъёслэсь. Шоковой терапия шуон маке туж зол шуккиз адямиосты. Асьмеос солы дасяськыны ӧм вуттэ. Отысь ик ыштонъёс. Кыкетӥез шуг-секыт герӟаськемын калыкез люконэн. Учке ай котырак, адямиос пӧлын ӟеч кусыпъёс кулэсмемын ук. Асьмеос кӧня ке дасо ар ӵоже улӥм, огазеяськыса гинэ ваньзэ вормыны луэ шуыса. Нош ортчем воштӥськонъёс адямиез курадӟонъёсыныз ваче син кельтӥзы. Тани багеръёс али кирилица шрифтысь выжо латин сямен гожъяськрнэ. Институтамы ми но та пумысен кема вераським. Куд-ог эшъёс пӧлын тазьы верасьёс но шедизы: латиницае, пе, ӟуч кылэз но выжтоно. Паймод ук! Мон малпасько, сыӵе выросъёс асьмемыз люко, ог-огмес висъяло гинэ. Ма, сыӵе вамыш бигер калыкез но пӧртэм ярдуръёсы вуттоз. Татарстанын улӥсьёсыз, шуом, дышозы выль сямен гожъяськыны- лыдӟиськыны. Нош мукетъёсыз? Уго куинь ньыльмосэз бигеръёс уло асьсэ республиказылэн палэназ. Соин ик котькуд реформа борды туж чакласькыса басьтӥськоно. Али но кин ке шуыны выре: тани ук адямиос узырмизы, шукрес улыны кутскизы. Озьы со. Но уно шат асьме пӧлын березовскийёс но абрамовичъёс? Уго туж тросэз адямиос ыштон-курадӟон адӟоно луизы. Учке ай, кӧня табере кураськисьёс. Но котьмалэсь кышкытэз мукетыз бордын. Калык ыштӥз ӵуказе нуналлы осконзэ. Выльдӥськон кутскыку малпаськом вал: тани-тани мозмытском государстволэн зӥбетэзлэсь, тани-тани улонмес ас чакламмыя радъяны кутском. Вал ук сыӵе мылкыдъёсмы? Кытын соос туннэ? Дас ар улэммылы дунъет сётон понна асьмеос, тодосчиос, кыл кутыны кулэ. Наука ӧз ке шедьты ортчем дырлы шонер валэктон, азьланьын асьмеос толло янгышъёсмес выльысь лэсьтом. Промышленность Владимир Гродецкий: "Ижмаш" йыгмытгес вамышъя" Огазеяськон 2000-тӥ арын ваньбур поттонзэ 263 процентлы будэтӥз. Россиын со самой бадӟым лыдпус. ОАО берло дас ар ӵоже миым нырысьсэ 4,4 миллиард манет тыр продукцизэ вузаз но 76 миллион манет пайда басьтӥз. "Ижмаш" туэ 2 пол тросгес поттоз автомашинаос, 1,8 пол - мотоциклъёс, 2,5 пол - станокъёс, нош карабинъёс - 30 сюрслы уногес. Шаерысьтымы одӥгез самой бадӟым предприятие - усьтэм амалэн ужась "Ижмаш" акционер огазеяськон 2000-тӥ арез азинлыко йылпумъяса, умой мытӥз выль даурез. Миым со, валля арен ӵошатыса, 263 процентлы уногес ваньбур поттӥз, нош туэ эшшо кык поллы тросгес продукция люканы чакла. Оглом вераса, кылем арын огазеяськон 4,4 миллиард манет тыр ваньбур вузаз но нырысьсэ 76 миллион манет пайда басьтӥз, нош валля арын 78 миллион манет изъян адӟиз вал. Продукцизэ 3 пол тросгес вузаз кунгож сьӧры, яке 44 миллионлы. Азьло со лыдпус 16 миллион гинэ вал. Предприятиын будэ уждун тырон. 1999-тӥ арын со 38 процентлы йылӥз, миым - 59- лы, нош туэ 63 процентлы будэтыны учкемын. Кылем арлэн пумаз огазеяськонлэн кык толэзьлы мында уждун тыронэз кылемын на, яке 80 миллион манет. Трос-а со, ӧжыт- а, куке ОАО котькуд толэзе 61 миллион манет уждун тыре. Валля арын тани быдэс огазеяськонъя ваньзэ 250 миллион манет тыр уждун сётэмын, миым - 468, нош туэ 800 миллион чакламын. Шорлыдын вераса, котькуд ужась 1999-тӥ арын 1077 манет уждун басьтӥз, миым - с710, нош туэ 2796 манет луоз. Мукет ласянь ке учконо, одӥг ужась валля арын 69 сюрс манетлы ваньбур поттӥз, миым - 182,8, туэ 293,4 сюрс манет тыр луоз. Ортчем арын ватсаса 1,5 сюрс ужасьёс кутэмын, туэ эшшо 4 сюрс выль ужан интыос усьтозы на. Али быдэс огазеяськонын 25400 мурт ужа ке, туэ 29400 муртлэсь ятыр люкаськоз. "Ижмаш" мукет предприятиос сямен ик куашканы ӧдъяз 1990-тӥ арысен но ялан уллань гылӟиз 1996-тӥ арозь. Соку со, 1990-тӥ арен ӵошатыса, ваньзэ-ӧвӧлзэ одӥг дасмос гинэ ваньбур поттӥз. Каллен-каллен будыны кутскиз 1997-тӥ арын но миым одӥг куиньмоссэ продукция поттӥз ни, туэ 57 процент чакла но 2002-тӥ арын дас ар талэсь азьло мында ик ваньбур вузалоз. Предприятие валля арын 15 сюрс автомашина но 24,5 сюрс мотоцикл поттӥз, миым 27,4 но 25,2 сюрс. Туэ чаклало, 60 но 45,7 сюрс. Миым дугдӥзы "Москвич-412" автомобиль бичамысь. Али "Ода" машиналэн вылтусыз выльдэмын, чебергес каремын. "Москвич-2715" фургонлэн шобретэз воштэмын, корт каремын. Мотоциклъёссэс но выльдо. Туэ нырысьсэ 80 "Карнет" мотоцикл поттозы но вуоно арын тросэн бичалозы ни. Озьы ик кылдытэмын выль мотовелосипед но Иж-МП-1 мотопомпа. Туэ сое лэсьтозы ни. Тужгес но вамышъёссэ кузёмытӥз "Научно-производственный центр Высокоточной техники "Ижмаш" ДОАО. Миым со, валля арын сярысь, 4,4 поллы тросгес продукция поттӥз. Со нырысь ик герӟаськемын ож тӥрлыкен. Татын конструкторъёс ялан выль изделиос кылдыто. Вылез пӧлы пыро автоматъёс АК-101, АК-102, АК-107 (вылӥ классэн), нош АК-108 кунгож сьӧры гинэ кошке. Тросэн поттыны кутскозы Никоновлэсь автоматсэ но Бизон-2 пистолет-автомат. Быдэс Россиын "Ижмаш" гинэ поттэ снайпер винтовка СВ-98. Сое кылдытӥз Евгений Драгунов. Та ож тӥрлыкез тужгес басьто правоосты утись органъёс. Машина лэсьтӥсьёс озьы ик потто ӟеч снаряд. Сое высокоточной ож тӥрлык шуыса нимало. Огазеяськонлэн мукет ёзъёсыз но ӝутскон сюрес вылын. Тани "Ижстанко" ДОАО валля арын 162 станок лэсьтӥз ке, миым - 171, туэ 440 чакла. Со озьы ик ялан паськытатэ выль продукция поттонзэ. "Иж-Шкода" ӵош предприятие (СП) кылдытон сярысь верано ке, таин валче куд-ог шуг-секытъёс кылдэмын. Нырысь ик, "Шкодаез" басьтӥз кужмо немец фирма "Фольксваген". Кузёос воштӥськемен, соос выль куронъёс пукто, выль завод пуктыны музъем куро. Со понна 500 миллион немец марка коньдон кулэ луоз. Соин ӵош ик Россия "Ижмашлы" выт но таможня понна тыронъёсъя льготаос сётэ. Кулэ-а бен Удмуртилы сыӵе выль автозавод? Кулэ. Малы ке шуоно, миым Россия кунгож сьӧрысь 60 сюрс атвомобиль басьтӥз, нош "Фольксвагенлэсь" - 2 сюрс. Ваньмыз со туж дуноен вуттэмын, котькудӥз 20 сюрс долларлэсь вылтӥ. "Шкода" миым сылэ вал 5 сюрс доллар, нош асьмелы кулэ 2,5-3 сюрс долларен машина. Вань мукет малпасьёс но. Кылсярысь, соос шуо, малы, пе, асьмелы выльзэ ӝутыны, куке вуж заводлэн кужымез но интыез ӝыныез гинэ кутӥське. Отчы выль туала оборудование пуктыса, ӟеч машина бичаны линия усьтоно. Нырысь-валысь учкыса, со шонер кадь. Но Западысь инвесторъёс-юрттӥсьёс музон сямен учко, соос выльзэ завод пуктонэз дунтэмгес лыдъяло но ас кыл вылазы юн сыло. Та ужпумез котькуд ласянь бергаты, но Россия но "Фольксваген" фирма куспазы огкыл шедьтыны кулэ. Соин ик тодамы ваём кӧня ке ортчемзэ, кызьы та уж кутскиз. Россия автомобиль лэсьтонын Чехиен кусыпъёссэ азьланьтыса, "Шкода-Ауто- Удмуртия" ӵош предприятие кылдытӥз. Вераськонъёс мынӥзы 1990-тӥ арын но Россия Федерацилэн Президентэз 135 номер Указ поттӥз. Соя Россилэн Правительствоез постановление кутӥз. Отын верамын: таможня пошлина тырытэк автокомплектъёс вайыны лэзе 2005-тӥ арозь, нош ӝынызэ ёзъёссэ лэсьтыны кулэ Россия. Удмурт Правительствое вуиз бизнес-план. Отын учкемын вал арлы быдэ 100 сюрс автомобиль бичаны. Кема но трос вераськонъёс нуэм бере, 1998-тӥ арын кутэмын вал кык правительствоос куспын Протокол. Соя Чехия вить ар ӵоже 500 миллион немец марка уксё висъя. Малы ке шуоно, СП-лэн 75 процент акциосыз "Шкода" фирмае кошко, кылемез - 25 процентэз - "Шкода-Ауто-Удмуртия" ӵош предприятилы. "Ижмаш-Авто" солы сётэ вал заводлэсь ужан интызэ, 16А корпуссэ, оборудование но ужась кужым. Но татын одӥгзэ ӧз чаклалэ: "Шкодалэн" 30 процент акциосыз соку ик "Фольксваген" фирма киын вал ни. Озьы ке но, СП кылдытонъя уж ӧз гуньдылы. 1999-тӥ арын 16-тӥ мартэ Чехиын ортчиз Россиен вузкаронэз азинтонъя конференция. Отын возьматэмын вал СП-лэн инъетэз. 80 процентэз поставщикъёс дась луизы асьмелы юрттыны. Озьы 1999-тӥ арын 5-тӥ августэ гожтэмын вал учредительной документъёс, нош со арын 7-тӥ сентябре "Шкода-Ауто-Удмуртия" ӵош предприятие юнматэмын. Тӥни озьы СП кылдытэм бере одӥг но ӝыны ар пала дыр ортчиз ке но, ужъёс ӧз вырӟе но асьмеос, "Фольксваген" кие шедим. Солэн выль куронъёсыз сярысь вылӥын верам ни. Табере тодады ваём на "Гермес-92" но "Гермес-94" амалэн кредит коньдон бичан сярысь. 1993-тӥ арын апреле Россилэн Президентэз Б. Ельцин Ижысь машина лэсьтӥсьёс доры ветлӥз. Собере вордскиз Россиысь Правительстволэн 227 номеро Постановлениез. Со кутэмын 1994-тӥ арын 25-тӥ мартэ. Соя Ижысь автозаводэз выльдыны 200 миллион доллар коньдон висъяны учкемын вал (сое нимазы "Гермес-92" но "Гермес-94" кредит линия - Г. Р.). Со сяна, РФ-ысь Правительство со уксё берыктонэз ас вылаз басьтӥз. Та ужпумъя Россия но Удмуртия ласянь кутэмын вал 20-лэсь ятыр норма луись актъёс. Оглом вераса, "Ижмаш" басьтыны кулэ вал Германиысь 180 миллион немец маркалы оборудование. Нош собере мар луиз? Россиын законодательство вошъяськемен, 1992-тӥ-1994-тӥ аръёсы "Ижмашлэн" тыронъёсыз но процентъёсыз йылӥзы но оборудованилэн дунызлэсь 40 процент луизы. Сое пытсанэз Россия нош ик ас вылаз басьтӥз, ватсаса облигациос поттыса, сое нимаз акциослы пӧрмытӥз но ОАО-лэсь ваньбурзэ талаз. Озьы "Ижмаш" 14,55 процент акциоссэ ыштӥз но ваньзэ-ӧвӧлзэ 19,8 поцент гинэ кылиз на, нош Россия 25,5 процентысен 57 процентозь акциоссэ будэтӥз. Кӧня ке кыл "японский" кредит сярысь тая 1995-тӥ арын 25-тӥ феврале Россиысь Правительство 241 номеро Распоряжение поттӥз. Со герӟамын Ижысь автозавод выльдонэз йылпумъянэн, автомобильёсты буян цех усьтонэн. Соя чакламын вал 68 миллион доллар яке 7140 миллион японме уксё висъяны. 1997-тӥ арын июне кутэмын вал кредитъя тупанкыл но 15 процент коньдонэз заводлы сётыны. Миым Президент В. Путин Японие ветлӥз но куинь пӧлысь та проектэз туж кулэен но умоен лыдъяз. Соку ик со кыл сётӥз, коньдон берыктонэз, пе, ас вылаз басьтэ Россилэн Правительствоез. Тӥни таӵе уж нуиське "Ижавто" ДОАО-ез выльдонъя. Нош "Ижмаш" огазеяськон пумен йыгмытгес вамышъя. Тани вань бюджетъёсы со 1999-тӥ арын 235 миллион манет выт тыриз, миым - 330, нош туэ 812 миллион манет чакла. Со ӧжыт ӧвӧл. Геннадий Романов. Владимир Гродецкий. "Универсал" выль модель "Ода" Иж-2126 машина. "Одалэн" инъетэз вылэ лэсьтэм Иж-2717 фургон. Заводлэн валтӥсь конвейерез. Архивысь материалъёсъя Удмуртия ЪЪ дауре 1975-тӥ ар Таяз аре йылпумъяськиз укмысэтӥ пятилетка, калыкмы пусйиз Быдӟым Вормонлы 30 ар тырмонэз. Шаерысьтымы пиос ужазы ожын быремъёс понна но. Удмуртиысь 200 азьмынӥсь егит ужасьёсты но дышетсконысь отличникъёсты Москваын Вормон Знамя азьын туспуктӥзы. Удмуртиысь ужаса улӥсьёс шумпотылӥзы мукет иворъёслы но. Кылсярысь, Хельсинкиын гожтэм огкыл дунне вылын тупаса улонэз юнматӥз, озьы СССР-ен США куспысь "йӧ шуназ". Космосын асьмелэн "Союз-19" но американецъёслэн "Аполлон" корабльёссы огазеяськизы. Озьы космонавтъёс Леонов, Кубасов но астронавтъёс Бранд, Стаффорд но Слейтен ӵош ужазы. БАМ-ез лэсьтон бордын тыршиз быдэс шаермы. Удмуртиысь нырысь отчы мынӥзы глазов комсомолецъёс, нош ар ӵоже ваньмыз келямын вал 45 мурт. Удмуртиысь промышленность данэн быдэстӥз андан, укмысэтӥ пятилеткалы прокат, корт вандон станокъёс но автомобильёс поттонъя планэз. Нефть поттон, 1971-тӥ арен ӵошатыса, 5,7 поллы йылӥз. Ӟечлыкъя кун пус сётэмын 50-лэсь уно вузъёслы. Ижевскысь андан поттон заводын укмысэтӥ пятилеткалэн берпуметӥ араз нырысьсэ поттыны кутскизы корт лента, азьло сое кунгож сьӧрысь вортто вал. Ижевскысь пластмасса поттон завод полиуретанлэсь 14 пӧртэм вузъёс поттыны ӧдъяз. Автозаводын бичамын вал 165 сюрс машина. Можгалась пияла поттон "Свет" заводлы тырмиз 140 ар. Ижевскысь Связья юртын ужаны кутскизы городын но городъёс куспын ужась автомат телефон станциос, усьтэмын вераськон пункт. Укмысэтӥ пятилеткалы заданиоссэс умой быдэстэмзы понна, Ужысь Горд Знамя орденъёсын пусъемын Ижевскысь радиозавод но "Удмуртлес" огазеяськон. Воткинскысь но Ижевскысь машина поттӥсь заводъёс пыртэмын СССР-ысь ВДНХ-лэн Данъян пул вылаз. Нош гурт удыс вылӥе ӝутскыны ӧз быгаты. Вить арлы план быдэсмытэк кылиз. Ю нянь, картофка, бакча сиёнъёс но етӥн, тямысэтӥ пятилеткаен ӵошатоно ке, ӧжытгес басьтэмын вал. Соин азьланяз рабочийёсты, служащийёсты но колхозникъёсты лэзизы бакчаоссэс бадӟыматыны но сад-бакчаос возьыны. Таяз аре трос лэсьтӥськон ужъёс быдэстэмын но выльёсыз борды кутскемын. Иж ӵыпет дуре пуктыны кутскемын Пионеръёслэн дворецсы. Ижевскысь андан ӵыжатӥсьёс вуттӥзы "Ижсталь" культура дворецсэс. Со ӧсъёссэ усьтӥз декабре. Июне 50 ар тырмиз "Артек" пионерлагерьлы. Отын нырысь шутэтскисьёс пӧлын вал Сарапулысь пионеръёс, бӧрысь но котькуд аре асьмелэн нылпиосмылы отчы инты висъяллязы. Калыклэн улоназ бадӟым инты басьтыны кутскиз телевидение. Нырысетӥ сентябре ужаны кутскиз Цетральной телевиденилэн куинетӥ, дышетон программаез. Будапештын ортчиз финно-угоръёслэн ИВ Калык куспо конгрессы. Отчы ветлӥз Удмуртиысь но делегация. 13-тӥ-15-тӥ ноябре Ижевскын ортчиз научно-теоретической но методикая конференция. Со сӥземын вал нырысетӥ удмурт грамматика кылдытэм дырысен 200 ар тырмонлы. Удмурт кун университетын Р. Анкудиновалэн кивалтэмез улсын фольклоръя но этнографияя "Чипчирган" ансамбль кылдытэмын. Кырӟанъя но эктонъя "Италмас" кун ансамбль гастрольёсын вуылӥз Чехословакие. 9-тӥ октябре Андрей Сахаровлы сётэмын Нобель премия. Н. Мельницына, Удмурт Республикаысь ЦДНИ-лэн директорезлэн воштӥсез. Удмуртиысь комсомол нимо 174 номеро артдивизионысь ветеранъёс Быдӟым Вормонлы 30 ар тырмон нуналэ артдивизионлы пушка-памятник дорын. Рекламады уз вужмы Кызьы тодмо, реклама луэ пӧртэм пумо. Соин тунсыкъяськисьёс но пӧртэмесь луо. Радиоын но телевидениын одӥгзэ ик ялонэз нуналаз олокӧня пол "бергато". Нош со ӟеч-ӟеч лэсьтэмын ке ӧвӧл, акыляк потыны кутске. Но малы ке газет-журналъёсысь рекламаез асьмеос ӵем дыръя адӟытэк кельтӥськом. Котьма шуэ но, реклама одно ик кулэ. Таиныз котькудӥз соглаш луоз, дыр. Кулэ со реклама сётӥсьлы но, кулэ басьяськисьлы но. Пӧртэм интыосын реклама сётонлэсь пайдазэ ӵошатӥськод ке, фирмаослэн кивалтӥсьёссы 70 процентэз саклык висъяло печатлам изданиослы. Соиз бен валамон кадь, уго радио но телевидение реклама понна тросгес коньдон кыско. Вылаз ик, газетлэн улонэз данаклы "кузьгес", куке- соку одно син азяды шедёз. Зэм, вань солэн одӥг тырмымтэез: газетлэн даурез вакчигес, со ичизэ кык арня улэ, соин ик, рекламалэн пайдаез вылӥын мед луоз шуыса, сое ӵемгес печатланы кулэ. Но вань на вылэм одӥг ӟеч амал но. Одӥг пол печатлам рекламады быдэс ар ужаны быгатоз, кытӥяз солэсь но кемагес. Та ласянь тӥледлы юрттозы "Митра-Информ" издательствоын. Али отын поттыны дасяське адресъёсын но телефонъёсын "Ижевский гид 2001" выль справочник. Отын печатламын луозы Ижевскысь но Удмуртилэн ёросъёсысьтыз (таиз нырысьсэ!) организациос, предприятиос но учреждениос сярысь туж узыр ивортонъёс. "Ижевский гидлэн" азьвыл но данэз туж вылӥын вал. Сое дунъязы ужбергатӥсьёс но, огшоры адямиос но. Озьы луиз издательстволэн котькыӵе удыслы бадӟым саклык висъяменыз, отысь калык трос выльзэ тодылӥз, со ялан узырме но узырме пӧртэм ивортонъёсын. "Удмурттелеком" акционер огазеяськонэн валче ужаса, "Ижевский гид 2000" данаклы узырмиз "09" службалэн телефонъёсыныз. Ӵошатон понна: "Ижевский гид 99" сётӥз ке вал ог 4500 номер, "Ижевский гид 2000" печатлаз 7000-лэсь уно номер. "Митра-Информ" издательство "Ижевский гид 2001" справочникын луоз ини 12000 котыр ивортон. Реклама сётон пумысен вазиське 43-31-15 телефонъя. КИВАЛТӤСЕН ПУМИСЬКОН Кызь нунал министрлэн пуконаз Выль быръем министръёс пӧлысь одӥгез - Владимир Николаевич Завалин. Солы оскемын Нациосын ужан политикая министерствоен кивалтыны. Трос ужъёсыз вылэ чӧлскытэк, Владимир Николаевич соку ик соглаш луиз пумиськыны. Тужгес но шумпотӥ солэн ӝот-ӝот удмурт кылын вераськемезлы, небыт пальпотыса но ӟеч мылыдын пумитамезлы. - Владимир Николаевич, уждэс мар бордысен кутскыны малпаськоды? - Кутским ини, кызь нунал быдэсъясько министрлэсь ужзэ. Уг ватӥськы - юн секыт ныпъет пельпумам оши. Нош кутски тодматскон бордысен. Республикаямы та вакытэ ог 24 национально-культурной огазеяськонъёс лыдъясько. Вуылӥ бигеръёс доры. Ортчытӥм кенеш, огазеяськонзылы кивалтӥсь бырйим. Озьы ик тодматски ини азербайджанъёслэн ужъёсынызы. Кенеш люкаса, соослэсь но ужпумъёссэс сэрттӥм-пертчим. Та толэзь шорын ик Киров улосын ортчозы удмурт культуралы сӥзем нуналъёс. Комиос Удмурт центр усьтыны малпало. Дасяськоно Белоруссиен тупанкыл гожтыны... Огкылын вераса, ужъёс туж трос, но соос быдэстымонэсь. Со понна кужым но, мылкыд но тырмыт. - Нош кудӥз ужпум тужгес но валтӥсез? - Министерствомылэн нимыз ик со сярысь вера. Мар со сыӵе политика? Огъя вераса, со ог-огеныд уртче, тупаса улон но ужан, тужгес ик огкылэ вуыны быгатон. Солэсь кулэлыксэ туж ӟеч возьматӥз ини Чечня. Политикъёс огкыл шедьтымтэен, кӧня вир отын кисьтӥське, чик янгыштэм адямиос юнме шорысь быро. Кулэ ӧвӧл со ож чеченъёслы но, мукетъёслы но. Огшоры калыклы кулэ сюлэмызъя уж, ужезъя уждун, ӝӧк вылаз нянь, котыраз шудо нылпиос. - Владимир Николаевич, асьме шаерын 70-лэсь уно пӧртэм выжы калыкъёс уло. Соослэн котькудзылэн сямъёссы но, улон шоры учконзы но чылкак пӧртэмесь. Секыт, дыр, ваньмыныз огъя кыл шедьтыны. Сямдыя кыӵе тӥ асьтэос? - Туж лякыт, каньыл мурт. Сыӵеос сярысь шуо, кутэз но, пе, вӧсь уз кары. Мон юн яратӥсько калыкез. Небыт сямо луэме ик куд-ог дыръя люкетэ, нош ӵемысь, солы луыса, секыт югдурысь но капчиен потӥсько. Котькуд адями югдур шоры ас сяменыз учке ке но, быгатоно аслэсьтыд политикадэ, малпандэ, ужан амалъёстэ валэктыны. Солань-талань шонаськытэк, ас малпанэд понна юн сылыны. Калыклэсь но мылкыдзэ лыдэ басьтыса, нокинэ вӧсь карытэк, ужез одӥг ӧртӥ ӧръяны. Вожвылъяськон ноку ӟече уз вутты. Шумпотымон, асьме республикаын югдур огыр- бугыр ӧвӧл. Быръёнъёс но мукет со выллем ужрадъёс дыръя гинэ пуромыло ог-огдэ ултӥян, сьӧдман, вӧсь карон мылкыдъёс. Сыӵе учыръёс медаз луэ шуыса, асьмелы, удмуртъёслы, вань кужыммес огазеяно но шонер сюрес быръёно. - Унояз республикаосын ӧвӧл нациосын ужанъя нимысьтыз министерствоос. Нош асьмелэн вань... - Луыны но кулэ. Шаерамы сомында нациен калык улэ бере, кызьы министерствотэк? Кин соослэсь улон-вылонзэс радъялоз? - Нош тӥледды нациосын ужан политикая министре юнматэмзы малпамтэ шорысь ӧй вал-а? - Воксё малпамтэ шорысь луиз. Мон куинь арня пала курадӟытӥ йырме, лыктоно-а, ӧвӧл-а шуыса. - Мар тӥледды шугъяськытӥз? - Калыкен мон трос ужамын. Тодӥсько: соин кивалтыны капчи ӧвӧл. - Малы нош, Владимир Николаевич, министрлэн "песьтэрез" ӵапак тӥледлы, Яр ёрос администрацилэн йырызлы, шедиз? - Кивалтон удысын кызь ар тыршемме синйылтӥзы, луоз. - Озьыен, кузь вал министр дорозь вуон сюресты? - Дас классэз йылпумъяса дышетскыны пыри Гурт удысъя институтэ. Луи агроном. Кык толэзь но ужаса ӧй вуы, армие басьтӥзы. Отысь бертыса, вить ар ужай комсомоллэн райкомезлэн нырысетӥ секретарез луыса. Кык ар дышетски Свердловскысь вылӥ партшколаын. Вал парткомлэн секретарез. Дас ар кивалтӥ ёросысьтымы ик "Новая жизнь" колхозэн. Собере гинэ луи Яр ёрос администрацилэн йырыз. - Пичи дыръяды нош кин луыны малпаськоды вал? - Сыӵе арлыдын тросэзлэн малы ке военной луэмез потэ. Мынам но сыӵе ик малпанэ вал. - А тӥледлы туж тупасал военной дӥсь. - !!! Анай-атайёслэн нылпиоссэс палэнэ лэземзы уг поты ук, ялан бордазы возьысалзы. Мынам но атае сыӵе мылкыдзэ вераз. Мон ӧй пумитъяськы. - Нош асьтэлэн бадӟым-а семьяды? - Нылы дышетске Глазовысь пединститутын, пие - дас одӥгетӥ классын. Кузпалы школаын ужа, заочно пединститутын дышетске на. Ми соин одӥг институтэз, одӥг факультетэз йылпумъям. - Семья куспады кыӵе кылын вераськиськоды? - Кузпалы ӟуч бере, пиналъёсмы йӧн-йӧн уг тодо удмурт кылэз. Нош ачим будэмын чылк-чылк удмурт семьяын. Милям кадь суро-пожо семьяос туж трос. Тӥни озьы ик ыше удмурт кыл, быре солэн данэз. Соин ик ӝегатскытэк кутоно кылъёс сярысь законэз. Дас ар ӵоже со пумысен вераськон мынэ ини, нош уж интыысьтыз уг вырӟы. Али ми куспамы эскерим кылъя законлэсь инъетсэ. Таяз толэзе сое эскерыны поттом Правительстволэн президиумаз, собере - Кун Кенеше. Уноезлэн вылӥ кивалтӥсьёслэн нациен герӟаськем ужпумъёсты валамзы уг поты. Соин ик та законлэсь пуштроссэ но мыдлань валэкто. Пырак шуисьёс но вань, закон ке, пе, кутӥм, удмурт шаерын вань улӥсьёс удмурт кылэз дышетоно луозы. Юнме вераськон со, калыкез суран-пожан. Закон кулэ кылмес, нацимес, культурамес, историмес, йылолъёсмес утён понна. Удмурт кыл быриз ке, чиптэм-чаптэм ышоз быдэс нация но. - Владимир Николаевич, тӥ ветлӥды Хельсинкиын ортчем финн-угор калыкъёслэн конгрессазы. Мае отысь пусйымонзэ синйылтӥды? - Туж юн шӧдӥськиз финнъёслэн, эстонъёслэн, венгръёслэн выжы калыксылы бадӟым саклык висъямзы, кылзэс, культуразэс, сямъёссэс утьыны тыршемзы. Со куспазы вераськон кылзы вылысь гинэ но шӧдӥське. Нош асьмеос возьдаськиськом анай кылмылэсь. Столицамы но ӟуч городъёслэсь нокыӵе аспӧртэмлыкъёсыныз уг висъяськы, удмурт шӧмыз ик ӧвӧл. - Ижевск сярысь кылпум поттӥды бере, тӥледлы, гуртын улэм муртлы, секыт ӧвӧл-а городлы дышыны? - Секыт луоз городын, мон сое али ик шӧдӥсько ини. Ӵукнаысен бер ӝытозь ур-ляр вазе, машинаос куашето, ваньмыз кытчы ке дырто... Уката ик семьяе бордам ӧвӧл на, Укан селое кылемын. Администрацилэн кивалтӥсез луыса ужакум но ми весяк отын улӥм. - Нылпиосты мӧзмо, дыр, ини атайзылэсь? - Золгес ачим мӧзмисько. - Кузпалдылэсь пӧрам сиёнзэ веръямды потэ ни, луоз. Мае юнгес яратӥськоды? - А мыным ваньмыз яра. Мае сёто, сое ик сиисько. Вӧйын пыжем картошкалэсь ноку уг вуёмиськы. Сое кыл улын яж-яж вазись сылалтэм кубистаен сиыны яратӥсько. - Шутэтскон дырдэс нош кызьы ортчытӥськоды, Владимир Николаевич? - Спортэн юн эшъяськисько, тужгес но волейболэн. Шудӥсько вал ёросысь ветеранъёслэн огазеям командаязы. Арняяз одно ик кык пол ветлӥсько вал волейболэн шудыны. Татын но сомында ик ветлысал, но дыр уг тырмы табере. Озьы ке но, одӥг пол шудӥ ини "Динамоын", нош мыныны малпасько. Яратӥсько пӧйшураны. Котькуд ар кутӥськом гондыр но, койык но, кыр парсь но. Луд кеч сьӧры но бызьылыны тунсыко. Одно ик кинэ ке кутон понна ум ветлӥське нюлэскы. Чылкыт омырен гадь тыр шоканы, йыре тырмем малпанъёслэсь шутэтскыны. Инкуазьмы асьмелэн ӵыдонтэм чебер ук. - Владимир Николаевич, мар сярысь ӧй юа на? Оло, асьтэос маке йылтысалды? - Трос вераським кадь ини. - Ярам, мукет юанъёсты выльысь пумиськыкумылы кельтом. Тау вераськыны мылкыд каремды понна. Елизавета КАМАШЕВА. ЭКОНОМИКА Нюрдор-Котья утча сватья - Ми ас дыраз одӥг янгыш лэсьтӥм, - киоссэ вӧлъя торфопредприятилэн директорез Анатолий Митрофанов. - Кызьы шуо, вань курег пузмес одӥг азе тырим. Отысь ик табере шуг-секытъёс пото... Анатолий Васильевич вера "Ижмаш-Мото" огазеяськон борды думиськемзы сярысь. Вань производствозы уго та АО-ен гинэ герӟаськемын. Пӧртэм корт ёзъёс лэсьто татын Ижысь мотоцикл поттӥсьёслы. Ма, пул пилён цехсы но соос понна гинэ ужа - мотоосты басьясьёслы келяны рейка дася. Нюрдор-котьяослэн ужан тӥрлыксы но асьсэлэн ӧвӧл. 400 пала станокъёс шоркарысь кузёос киын. Соин ик татысь кивалтӥсьёслэн ваче ужъя эшъёссы азе юнэсь куронъёс но пуктэмзы уг луы. Чурытгес вераськыны кутско ке, ижъёс кышкатъясько ни: ми деталь лэсьтон инты шедьтом, тани нылгаос но заказлы ёрмыса уло... - Предприятимы али 42 пумо ёз поттэ, - веранзэ азьланьтэ директор. - Но коньдон со понна дыраз басьтыны ум быгатӥське. Январе Ижысь копейка но ӧз вуы. Декабрь понна уждун тырымтэ. Ма карыны ёрмыса, 15 мотоциклзэс басьтыны соглаш луим ни. Выль модель - "Иж-Планета-6". Коляскатэк со. Дуныз - 17 100 манет. Кинлы сое вузалом? Кык питран понна арлэсь кема ужано ук. Мон сётысал ни сыӵе дунын ик. Озьы но адямиослэн луонлыксы ӧвӧл. Тодӥськоды, луоз, "Ижмаше" кылем арын, туала верамъя, выль команда вуиз. ВАЗ-ысь, Тольяттиысь. Тазьы учконо ке, Вавожысь ужасьёс понна пӧртэмез ӧвӧл кадь. Но озьы вылымтэ. Выль кузёос та вакытэ вань кужымзэс сёто автомобиль поттонэз радъянлы, нош мотопроизводство сюрес урдсы палэнтэмын, шуыны луоз. Югдурез рос-прос эскерытэк- маратэк, "ӟырдам йыръёс" кыдёкысь (соослэн малпамзыя) эшъёссылэсь мозмытскыны туртто: малы, пе, кыӵе ке пыдлось ёросэ нуллыны кулэ детальёсты. Бен, экономистъёс сыӵеослы валэкто, лыдпусъёсын возьмато, Вавожын лэсьтэм ёз дунтэмгес усе шуыса. Озьы ке но, дыр ортче ук. Торфопредприятие сяна, Нюрдор-Котья посёлокын ваньбур поттӥсь музон организациос ӧвӧл. Сюрс но ӝыны улӥсьёс пӧлысь 316-ез татын ужа. Котькудӥз ньылетӥез - пенсионер. Посёлок сокем бадӟым ӧвӧл бере, ваньмыз ог-огзэс тодо, котькудӥз мукетыныз кызьы ке но герӟаськемын. Соин ик предприятилэн кивалтӥсьёсыз но уг быгато, шуом, ужасьёслэсь лыдзэс чутрак кулэстыны. Озьы кӧня ке ар талэсь азьло 100 мурт интые 60-зэ гинэ ужлэсь мозмытӥзы. Ог ласянь учкыса, умой кадь - адямиосты жалязы. Но экономика сыӵе ӟеч лэсьтэмъёсты уггес вала. Соин татын кулэстэмын ужан дыр, куд-огзэ, пичигес уждун тырыса, отпуске но келялляно луылэ. Но кытчы пырод - мукет амал соку ик уг шедьы. Бен, А.В.Митрофанов юрттӥсьёсыныз ӵош весь утчаське-бызьылэ. Тани али огкылэ вуо ни "Нефтемашысь" кузёосын - соослы но кулэ уго дунтэм корт ёзъёс. Мукет заводъёсын но кусып тупатыны выро. Та ласянь нюрдор-котьяослы зол юрттэ "Удмуртторф" элькун предприятилэн директорез Кун Кенешлэн депутатэз Анатолий Марченко. Солэн ӵектэмезъя, вавожъёс алигес тямыс выль станок басьтӥзы. Таоссэ тюрьмаосын мултэс луэм но отысь куке но торфопредприятие вуттэм агрегатъёсын уд ӵошаты. Кызьы шуо, ЧПУ-ен соос, числовой программной управлениен, ява. Таосыныз вылӥ куронъёслы тупась ёз поттыны луоно. Но соин ӵош мукет сюлмаськон кылдӥз - визьмо специалистъёс кулэ. Азьлоосыз компьютерлэсь кышкало. Со понна предприятие 12 егит муртэ нимысьтыз дышетскыны келяз. Али эшшо одӥг группа люкало на. Анатолий Владимирович ӵектэ чылкак выль цех ӝутыны, отчы туала ужан тӥрлык вуттыны. Пӧрмиз ке, нюрдор-котьяос йӧнъяськись "кузпалзылэсь" палэнскыны но быгатозы, выль "кен" ас чакламзыя утчаны тыршозы. Азьпалан югытэз адӟемез ик предприятилэн кивалтӥсезлы А.В.Митрофановлы суйёссэ лэзьыны уг сёты кадь. Юнме шат со таӵе секыт вакытэ но лэсьтӥськонэз улӟытэ? Кӧня ке ар ӵоже ни посёлок шорын сылэ кирпичлэсь ӝутэм 18 квартираен улон юрт. Коньдон ӧвӧлэн, сое йылаз-пумаз вуттыны шугъясько. Но али ужъёс вырӟизы. Басьтэмын ни сантехника, лэсьтэмын укно рамаос, ӧсъёс. - Туннэ нуналлы улон инты кулэ 118 муртлы, - вера Анатолий Васильевич. - Туж потэ вал предприятимылы кутскон сётӥсь муртъёслэсь улон условиоссэс умоятыны - али данакез соос барак порма коркан курадӟо на. Но пӧрмоз меда? Уго мукет но кулэяськисьёс вань. Шугъяськытэ соиз но: туала дыре адямиос дышизы, патер дунтэк басьтыса, сое асэстыны но вузаны. Номыр уд кары - закон сыӵеослы дурбасьтэ. Коркамес вуттом, квартираосты люком, нош ар куспын куиньмос палаез "тӧлӟоз". Тӥни озьы улэ-вылэ туннэ Вавож ёросысь "Нюрдор-Котья" торфопредприятие. Лыдӟись амалтэк юалоз: нош малы материалын чик верамтэ гыбед сярысь? Бен, организацилэн нимаз со кыл кылемын на, нош соин ужамысь дугдӥзы ни. Уго ёросын быризы торфен узыр интыос. Сое промышленной амалэн поттон пайда уг сёты. Бен, куд-ог быгатӥсь хозяйствоос асьсэ кулэяськонъёссылы гыбед вортто ик, но соин азьло мында вырись ӧвӧл ни. ...Нюрдор-Котьяе алигес вуылӥз Россиысь Кун Думалэн депутатэз Светлана Смирнова. Со пумиськиз мотор цехын ужасьёсын. Ужрадэ ӧтемын вал ветеранъёс но. Тодэ кылизы татын директорын 20 ар пала ужам муртлэн Теобольдт Пресслерлэн пумиськон дыръя верам кылъёсыз: - Россилэн кивалтӥсьёсыз ноку но медам вунэтэ: милям предприятимы выллем коллективъёсын югдур умой луиз ке, быдэс странаын но улон тупатскоз... Шонер пусъе ветеран. Асьмеос, зэмен но, котькуд коллективез - пичи-а со, бадӟым-а - утьыны кулэ. Котькудӥз ас интыяз - президент но, директор но, рабочий но - ӵуказе нунал сярысь малпаськыса ужаз ке, озьы ик луоз. Иван ЛЕБЕДЕВ. Шумпоттӥсь но бӧрдытӥсь сюрес 12-тӥ январе ГИБДД-ын ортчиз журналистъёсын пресс-конференция. Миым Удмуртиын, машина улэ яке аварие шедьыса, 250 адями быриз. Соослэн вал, дыр, ӵуказе улон сярысь малпанзы, кин ке но, оло, яратонэз доры дыртыкуз шедиз питран улэ. Вал, дыр, висись анаез яке атаез доры мынӥсь но. Озьы-а, тазьы-а, но бырыны шедем муртлэн семьяезлы вераны луонтэм бадӟым куректон со. Нош улонэн люкиськем муртъёслэсь лыдзэс но улонын интызэс учконо ке, соос быдэс гуртэз возьыны, ваньбур поттыны, нылпи вордыса, асьсэлы кивоштӥсьёсты будэтыны быгатысалзы. Вань на мукет но лыдпусъёс. Элькунамы кылем арын гинэ эшшо 1877 мурт машина поглянъёс улэ шедьыса сӧсырмиз. Соос пӧлысь 255-ез - нылпиос. Тӥни сыӵе югдур: йырси ик пежырске. Но улон - со улон. Азьло дыре ГАИ, нош табере ГИБДД вылын шудтэм учыръёсын нюръяськонэз ӧз радъясалзы ке, оло, дас-кызь пол уногес адями бырысал но сӧсырмысал. Сыӵе малпанэ вуоно, Удмурт Республикаысь МВД-лэн ГИБДД-езлэн начальникезлэн полковниклэн М.И.Гончаровлэн докладэныз тодматскыса. Журналистъёсын пресс- конференция кутскемлэсь азьло, со инспекциысь пӧртэм ёзъёсын ужасьёсты но вакчи дыр куспын тупен-тупен мадиз ортчем арын ма лэсьтэмзы сярысь. Ужрадэ пыриськиз Удмурт Республикаысь югдурез утёнъя министрлэн воштӥсез Р.А.Саитгареев но. Кылем ар ӵоже гинэ легковой машинаослэн лыдзы асьме шаерын 5 сюрслы йылӥз. Озьыен, шӧдскымон будӥз егит водительёслэн лыдзы но. Нош кыӵе тодон-валанэн но быгатонлыкен пуксё соос руль сьӧры? Удмуртиын али 106 пӧртэм организациосын водительёсты дышето, нош котькудӥз кыкетӥез вуоно водитель нырысь сётэмъяз экзаменэз уг ортчы. Озьыен, данакез егит водительёс руль сьӧры пуксьыны тыршо, водитель луыны дышытэк. Умой ворттылыны дышымтэ адями, оло, чакласькыны тыршоз ик ай, нош юэм мурт руль сьӧрын ассэ кызьы возе? Кинлы со валантэм? Миым эскеремъёс пӧлысь котькудӥз витетӥез водитель руль сьӧраз юэм дыръяз пуксем. Сыӵеос 15 сюрс пала люкаськизы. Нош дугдытэмын ке ӧй луысалзы? Кызьы валэктоно водительлы, руль сьӧры юыса пуксёно ӧвӧл шуыса? Кызьы валэктоно пыдын ветлӥсьлы, город урамез сфетофор дортӥ но вож ӝуакуз гинэ потоно шуыса? Кызьы валэктоно шофёрлы, урамъёстӥ чакламлэсь вылтӥ ӝоглыкен ворттылон адямиослы кышкытлык кылдытэ шуыса? Та сярысь вераськон мынӥз пресс-конференциын. Журналистъёс Михаил Ивановичлы пӧртэм юанъёс сётъязы. - Али вань сфетофоръёсты но сюрес знакъёсты выльдоно но кулэяськонъёсъя пуктылоно ке, 18 миллион манет кулэ, - шуиз М.И.Гончаров, - но туэлы та ужлы милем висъязы 6 миллион манет. Сое но уже кутыса, Ижевскын та ласянь югдур шӧдскымон тупатскоз. Но ми сюлэмшугъяськиськом табере тани ма ласянь но. Светофоръёсты шырмачъёс кесяло но пушкысьтыз дуно металлзэ ишко. Гайкаосты-болтъёсты сваркаен юнматъяно луиськомы, тупатыны выльысь усьтоно ке, нош ик сваркаез ваиськом. Кылзӥськисьтэм водительёс ласянь кивалтӥсь валэктӥз, миым куамынзэ пытсэт сьӧры келяно луиз шуыса. Нош 11-тӥ январе огзэ пегӟись машинаез дугдытӥллям сьӧразы уиськыкузы погляназ пистолетэн ыбылыса гинэ. Машина лушкамын вылэм, адямиосыз пегӟиллям, али соосты утчало. Пресс-конференция возьматӥз: отын, кытын сюрес вылын шудтэм утиськонэн нюръяськон ӟеч радъямын, алонлэн пайдаез ӟечгес шӧдӥське. Удмуртиысь калык пӧлысь ӝыныез пала Ижевскын улэ, нош автоен герӟаськем учыръёсын 40-эз гинэ быремъёс пӧлысь шоркарысь. Соин но М.И.Гончаровлэн журналистъёсты куремез потӥз, гурт калык пӧлын валэктон ужез уката кужмоятыны кулэ шуыса. Туэ сюрес вылын утиськонъя инспекцилы 65 ар тырмоз, соин асьме ГИБДД журналистъёс пӧлын нимысьтыз конкурс ялэ. Нош пресс-конференциен валче мон тодам ваи, кыӵе вал ГАИ-лэн ужан условиосыз 1966- тӥ арын, куке нырысьсэ право басьтӥ. Соку инспекция интыяськемын вал Сенной базар вӧзысь кык этажъем пу корка, кивалтӥз соин Краснопёров фамилиен воргорон. Али уже кутӥсько ни ӝог ветлӥсь машинаос, пӧртэм туала тӥрлык, кылсярысь, приборетӥ учкыса, соку ик тодыны луэ, кыӵе ӝоглыкен лыктэ машина. Озьы ке но, пусйиз М.И.Гончаров, журналистъёс валэктон радъятэк, соос огназы гинэ та бадӟым но туж кулэ ужез ӟеч уз быдэстэ. Угось адямиосты сюрес вылын быронлэсь утён - со вань калыклэн ужез. П.СКОБЕЛЕВ. Туспуктэмез В.Беломорскихлэн. Кун Кенешын Бусы ужъёслы дасяськыса Февраль толэзьлэн нырысетӥ нуналаз Кун Кенеше люкаськылӥз депутатъёслэн Агропромышленность удысъя, музъем кусыпъёсъя но инкуазь узырлыкъёсты кутонъя ялан ужась комиссизы (кивалтӥсез Л. Фролов). Отын кӧня ке ужпумъёс эскеремын: АПК-е азинтонъя концепциез дасян, Удмурт Республикалэн экологияя фондэз сярысь положение воштонъёс пыртон, крестьян но фермер хозяйствоосыз азинтонъя программалэсь инъетсэ эскерон, инкуазез утёнъя комитетлэн кылем арын ужамезлы йылпумъянъёс лэсьтон но мукет. Депутатъёс кема дырзэс быдтӥзы нырысетӥ ужпумлы. Куд-ог депутатъёс (Н. Сычев, В. Чувашов, В. Тубылов) шуизы, кӧня, пе, олокыӵе но концепциос, программаос дасямын ни, но соос быдэстытэк кыллё. Умойгес, пе, луысал АПК-ез азинтонъя меӵак ужрадъёс чакланы. Собере кыл сётӥзы гурт удысъя но сиён-юонъя министрлы В. Невоструевлы. Со пыр-поч мадиз бусы ужъёслы дасяськон сярысь, нош кыӵе валтӥсь люкетъёсыз луыны кулэ АПК-ез азинтонъя концепциын, вераны ӧз басьтӥськы. Гурт удысъя министерство - со политикая ёз ӧвӧл, шуиз со. Министерство бюджетэн герӟаськемын. Коньдон ужпумъёсъя юанъёсты вань ке, юалэ, валэкто, нош концепциез дасянъя ӵектонэн министерство депутатъёс азе ӧз потылы. Министрлэн верамезъя, та вакытэ, пе, РТС-ёсын техникаез тупатъян ужъёс мыно. Балезиноысь, Кезысь техникаез тупатъянъя станциосын 200 пала трактор люкамын. 30-эз тупатэмын ни. Нош Кизнерысь РТП-ын ужзы каллен мынэ. Одӥг тракторез тупатон 180 сюрс манет пала усе. Хозяйство понна со туж дуно. Соин ик ӝынызэ уксёез хозяйство тыре, мукетсэ - бюджет. Глазовысь "Реммаш" предприятиын 15 выль кизён-усыян машина дасямын, татын эшшо 6 сыӵе техника поттозы на, нош 2-сэ лэсьтыны басьтӥськизы мотозаводын. Кызьы вузамын луозы соос хозяйствоослы, пумозяз учкемын ӧвӧл на. Кунлэн юрттэмезъя, луэ дунтэк сётыны. Но дунтэк сётэмез куд-ог хозяйствоосын дунъяны уг быгато, техникаез уг утё, шуиз министр. Правительствоын 80 миллион манет висъяны чакламын ГСМ-лы. Со коньдонэн 10 сюрс тонна эстӥськон басьтыны луэ, быдэс республикалы 25 сюрс тонна кулэ. Висъяны учкем коньдонысь уже 10 миллионэз гинэ кутэмын, валэктӥз В. Невоструев. Одӥг тонна эстӥськонэз али 8 сюрс манетэн басьтыны луэ. Но депутатлэн Н. Сычевлэн верамезъя, дунтэмгес дунын но, пе, шедьтыны луонлыкъёс вань, тросаз заводъёсын ГСМ али кылле. Эстӥськон басьтонэз правительство пыр радъяно, ӵектӥз Н. Сычев. Гурт удысъя но сиён-юонъя министерстволы депутатъёс ӵектӥзы АПК-ез азинтонъя валтӥсь ужрадъёсты туэ нырысетӥ мартозь дасяны. Музъем узырлыкъёсъя но инкуазез утёнъя министр А. Кулагин тодматӥз экологияя фонд сярысь положенилэн инъетэныз. Со умоен лыдъямын но вуоно сессиын эскерыны ӵектэмын. Т. Банникова. Республикаысьтымы "Долг" огазеяськонлэн ёзэз ужа Сарапулын но. Кивалтэ со клубен Татьяна Кузнецова. Дасо аръёс ӵоже со Россия музъем вылысь гинэ ож бервылъёстӥ ӧз ортчы ни, трос пол поталляз Украинаысь Одесса городэ. Сарапулысь клублы та ужын ӟеч юрттэ городысь администрация но Уралысь Трастовой банклэн кивалтӥсез Сергей Гагарин. Ӟеч ужъёсыз понна Татьяна Кузнецоваез Данъян грамотаен но синпель кузьымен пусъё "Долг" огазеяськонлэн кивалтӥсез Фаиль Ибрагимов но та огазеяськонысь ик врач Татьяна Рязанцева (тазэ ассэ но пусйизы Данъян грамотаен). Туспуктэмез А. Горбунивлэн. Драмая удмурт кун театрлы туэ тырме сизьымдон ар: кылдӥз, со 1931-тӥ арын 7-тӥ феврале. Та трос шугадӟонэз но. Озьы ке но, артистъёслэн ӵуказе нуналзы сайкыт. Театрлэн сизьымдон аръем юбилееныз валче, туннэ печатласькомы татын кема ужам муртлэсь - Удмурт Элькунысь искусствоосъя сӥё-дано ужасьлэсь Борис Ефремович Саушкинлэсь одӥгзэ тодэ ваёнзэ. БЫДӞЫМ ОЖЛЭН КУАРАОСЫЗ Орден бертӥз геройлэн дораз Николай Александровлы ӧз кылды вордӥськем палъёсаз берытскыны. Трос дасо аръёс ортчыса, геройлэсь та сюрессэ пырпотӥз солэн наградаез. Куинь степенё "Слава" орден кык ар утчаз кузёезлэсь дор палъёссэ, ӵыжы-выжыоссэ. Табере, оло, бырем солдатлэн лулыз ӧжытак ке но капчигес шокчоз. Германиысь Кассель городысь шайвылъёсты утись-чаклась "Немец калык огазеяськонысь" егитъёс 1998-тӥ арын 31-тӥ июле Фюстенберг городлы матысь Одер шур дурысь шедьтӥзы куинь ватэм солдатъёсты. Соослэсь лысьӧмъёссэс Брандербург музъем вылысь ӟуч шайвылэ вато. Солдатъёсын ӵош шедьтэмын на вал орден. Немецъёс сое ысто Москваысь Егитъёслэн но нылпиослэн программаоссыя "Отечество" центре. Дасо аръёсын музъемын кылльыса, орден сьӧдэктэ, туссэ ыштэ. Но чылкытатэм-сузям бере, орденын пусъем номерез тодманы луэ: 175833. Шуг-секытъёс кылдытӥз берлоез лыдпус. Нырысь малпамъя, отын 5 цифра сылэ вал. Соин ик геройлэсь нимзэ тодон но солэсь ӵыжы-выжыоссэ утчан кык арлэсь ятыр кыстӥськиз. Орденлэн кузёез тодмо луэм бере, Удмуртиысь "Долг" огазеяськонэ вуэ гожтэт. Радио пыр вазиськыса, Николай Николаевич Александровлэн ӵыжы-выжыосыз но шедё. Нош вордӥськемын со Бемыж ёросысь (али Кизнер ёрос) Сыромак гуртын огшоры крестьян семьяын. Анаез Матрёна Григорьевна Фёдорова ньыль нылпиез огназ будэтэ, атайзы улонысь вазь кошке. Коля кыкетӥ нылпи вал. Ужа колхозын, тракторист луыса. Собере кошке палэнысь шаеръёсы коньдон поттыны. Семья кылдытыса уг вутты, война кутске. Николай Николаевичлэн сьӧраз кошкем та улонэз сярысь тодэ-ваёнъёссэ вераз Степан братэзлэн Коля пиез. Анай-атаезлэн мадемъёссыя гинэ тодэ на со бырем ӵыжы-выжыез сярысь. Тупаны но кулэ озьы, войнаын бырем солдатлэсь Николай Александровлэсь ордензэ сӥё- дано люкаськонын сёто Степанлэн пиезлы Николай Александровлы ик. Степанлэн бен мукет но кык пиналъёсыз вань на, улэп на кышноез Анна Михайловна - солы али тямыстон куинь арес. Мукет матысь ӵыжы-выжыосыз бырем геройлэн ӧвӧл ни. Тазалыкез ляб ке но, Николай Степанович кузь сюрес вылэ потыны пумит ӧз луы. Кузпалыныз Татьянаен соос Иже нуись поездэ уйшор бере кык часын пуксизы (нош уло соос Кизнерын), 3-тӥ феврале, субботае, 13-00 часлы вутскыны кулэ вал уго 4 номеро техучилищее. Татчы интыяськемын ожын бырем солдатъёсты утчанэ пыриськись "Долг" огазеяськонлэн шорсюлмыз - музеез. Орденэз сӥё-дано сётон ужрадэ вуизы республикаысьтымы "Долг" огазеяськонэ пыриськемъёс, Сарапулысь но Глазовысь ёрос ёзъёсы мылысь-кыдысь ветлӥсьёс, озьы ик Ижевскысь 4-тӥ училищеысь пиос. Огазеяськонлэн кивалтӥсез Фаиль Ибрагимов люкаськемъёс азьын орденэз сётӥз Николай Степановичлы. - Кык ар Германиын служить кари, - вера воргорон, - котькытчы вуылӥ, нош агаелэсь кытын быремзэ но кытчы ватэмзэс ӧй тодылы. Солэн но атаез Степан Николаевич войнае ветлӥз. Улэп берытскиз. Германиысен Николай братсэ пумитаны шуд усем. Макем шумпотӥзы соку Александровъёс, кык нуналзэ огазьын ортчытӥзы. Малпало вал азьланяз ӵошен ожмаськыны, но солдат сюресъёс соосты люкизы: Степан Николаевич лэсьтӥськон бригадаын вал, нош Николай Николаевич артиллеристъёслэн бригадаязы ожмаськиз. Кышкасьтэм но геройлыко луэмез понна Николаез пусйизы куинетӥ степенё "Слава" орденэн. 1944-тӥ арын 8-тӥ сентябре Варшава губерниысь Ненорент нюлэскын зол ожмаськон пурӟиз. Миномётъёс ыбылэм улсын Николай Александров куинь чигиськем телефон линиосты огазея. Слунно дорысен солэсь йырзэ сӧсырто. Вӧсь луэмез шоры учкытэк, кышкасьтэм солдат кык телефон линиез герӟа на, собере гинэ сое келяло медсанчасте. Но койкае выдыны Александров пумит луэ, нош юрттэт сётэмзы бере со выльысь строе султэ. 1944-тӥ арын 12-тӥ октябре немецъёс ласянь зол пумитъяськонъёс вал Рембельшиука ёрос дорын. Соку Николай Александровез зол контузить каре. Солдат нош ик уг учкы вӧсь луэмез шоры, миномётъёс ыбылэм улсын кык телефон линиез герӟа. Собере гинэ юрттэт курыса вазиське ни. Нокӧня но шутэтскыса уг вуы, нош ик ожмаськонэ мынэ. Солдатлэсь та подвигзэ адӟытэк уг кылё - орденэн пусъё. Николай Александров вормон нуналэз куинь толэзь гинэ адӟыса ӧз вутты. Быриз со 1945-тӥ арын 7-тӥ феврале. Кышкасьтэм удмурт егит воргорон улонзэ сётэ аслаз калыкез понна. "Долг" огазеяськонэ пырись егит пиос но нылъёс умой тодо мар со геройлыко луон но адямилэсь ышем нимзэ, данзэ берыктон. Геройлэсь ордензэ ӵыжы-выжыосызлы сётон ужрадын соос пӧлысь но устооссэ пусйизы республикаысьтымы Егитъёсын ужанъя кун комитетлэн Данъян грамотаосыныз но синпель кузьымъёсын. Л.МАЛЫХ. Театр война аръёсы 1941-тӥ арын инвожое советской калыклэн тупаса улонэз куспетӥ луиз - асьме вылэ Германия войнаен омырскиз. Ньыль ар ӵоже кыстӥськиз шимес ож. Улонмылэн нокыӵе удысэз, нокудӥз но семья палэнэ ӧз кыльы со лек адӟонлэсь. Ожтыл бырйыса ӧз улы аслэсьтыз сьӧлыканъёссэ. Дасо сюрсъёсын городъёсмес но гуртъёсмес куашкатъяз-тарказ, пӧсь тылын ӵушказ. Уно миллионъёсын лыдъясько ож бусыосын, концлагерьёсын бырем батыр пиосмы но нылъёсмы. Уно синвуос кисьтӥзы атайёстэк, кузпалъёстэк, сюдӥсь-вордӥсьёстэк кылемъёс. Удмурт театр секыт иворез кылӥз Глазовын гастрольёсын дыръяз. Татысен ик пырак фронтэ басьтӥзы театрысь воргоронъёсты Ананий Колесниковез, Филипп Бобровез, Александр Тугбаевез, Иван Поздеевез, Иван Самсоновез. Бӧрысьгес - Михаил Харинэз, Николай Хвостовез, Леонид Никитинэз. Трос шуг-секытъёсты чидано луиз театрлы но солэн коллективезлы та секыт аръёсы. Кӧнязэ ке артистъёсты, мобилизационной предписание сётыса, Ижевскысь ож тӥрлык поттон заводэ ужаны кельтӥзы. Война кутскемлэсь ог толэзь азьвыл театрлэсь ужан интызэ тыл нюлӥз. Валамон, ӝуам театрез выльысь тупатъян сярысь малпанэз но ӧй вал соку. Театрлы ужан инты ӧвӧлэн, 1941-тӥ арысен 21-тӥ пӧсьтолэзьысен ужысь кошконо луо хорысь артистъёс, быдтоно луэ оркестрез. Кулэстэмын вал артистъёслэн лыдзы но. Театрез кыӵе ке кужмо сильтӧл тарказ кадь. Театрлэн штатаз 14 мурт гинэ кыле на. 1942-тӥ арысен 1-тӥ толшорысен театр хозрасчёт амалэн ужанэ выже. Художественной кивалтӥсе пукто К. А. Ложкинэз (со фронтэ басьтонлэсь бронь сётыса мозмытэмын вал). Кема ӧз кыстӥськы хозрасчёт амалэн ужанзы. Шуг-секытъёсын ӝокатэм театрлэн йыр вылаз берпум шапык кисьтэм кадь луиз Удмурт АССР-ысь Совнаркомлэн Удмурт театрез быдтон сярысь постановлениез. Зэм, постановлениын "огдырлы" шуэмез вань. Со пичи ке но оскон сётэ театрлэн выльысь улӟонэзлы. Нош ку вуоз сыӵе дыр? Мар луоз отчыозь? Озьы сюрс иськемъёс кыстӥськись ортчись ож бусыысь курадӟон, удмурт шаере вуыса, вань куректонэн-бӧрдонэн валче быдэс коллективез "ньылӥз". Секыт ке но вал, калык чидаз, ӧз пыдесъяськы лек тушмон азьын. Фронтысь боецъёслы тушмонэз тарканы юрттӥзы искусство удысын ужасьёс но. Солдатъёслы, пыӵал тӥрлык, сиён- юон но шуныт дӥсь сяна, шуныт кыл, курадӟонзэс капчиятӥсь, огдырлы вунэтскыны луонлык сётӥсь пальпотон, кырӟан, вормонлы оскон пыӵатӥсь кылъёс кулэ на вал. Уно шефской концертъёс сётъязы артистъёс та аръёсы. Та дано уже мылысь-кыдысь пыриськылӥзы Удмурт театрын ужам артистъёс но. Кылсярысь, Удмурт АССР-ысь сӥё- дано артистка Клавдия Кузьминична Гаврилова 1943-тӥ арын фронтовой бригадаен ӵош Юго-Западной фронтэ вуылӥз. Пырак возь вылын яке ваче пуктэм кык машинаысь уно концертъёс сётъяллязы. Артистъёс фронтын ӵем пумиськылӥзы Удмуртиысь боецъёсын но. Фронтовикъёс шаерысьтымы ужаса улӥсьёслы ӟырдыт салам вераны курылӥзы. "Ми ум уськытэ асьмелэсь данмес, - шуылӥзы соос. - Кулэ ке луиз, улонмес но ум жалялэ, тушмонэз одно ик пазьгон понна!" Искусстволэсь кужымзэ фронт мышкын но валатэк ӧз улэ. Уен-нуналэн ужась калыклэсь измем сюлэмзэ маин ке но небӟытыны кулэ ук. Та ужез ас вылазы басьтылӥзы артистъёс, художественной самодеятельносте ветлӥсьёс. 1942-тӥ арын, куарусёнэ, ужан интытэк кылем кӧня ке артистъёс чотын Алнашын колхоз-совхоз театр усьтӥське. Солэн художественной кивалтӥсез луэ Кузьма Алексеевич Ложкин. Нош кӧня ке улыса, 20-тӥ коньывуонэ, УАССР-лэн совнаркомез Удмурт государственной театрез выльысь усьтон сярысь постановление кутэ. Театр огдырлы Алнаше ик кыле. Та постановлениын ик Ижевскысь заводъёслэн директоръёссылы актёръёсты театре берыктыны косэмын. Куд-огез артистъёс заводын выль профессиослы дышизы вал ини. Секыт вал Кузьма Алексеевичлы труппазэ бичаны. Но кутскем ужзэ со быдэстӥз. Театр Алнашын бадӟым пьесаосъя спектакльёс пуктылыны нырысь-валысь ӧз быгатылы. Луонлыкъёсыз ӧй вал. Скетчъёс (пичиесь пьесаос), эктонъёс-кырӟанъёс дасялляз. Гастрольёсы потаны секыт ке но вал, коллектив пӧртэм гуртъёсы вуылыны тыршылӥз. Куд-ог учыръёсы артистъёс ас котырзэс-декорациоссэс скал кыткыса нуллӥзы. Гастрольёссы ортчылӥзы Алнаш, Можга, Пычас, Камбарка но мукет районъёсын, потазы бускель Татар Республикае но. Уно шуг-секытъёсты чидано луиз артистъёслы. Искусство пыр артистъёс Родинамес яратон, асьме вылэ урдскем лек тушмонэз адӟонтэм но синазькыль карон мылкыд пыӵатылӥзы. Репертуар но озьы ик бырйылӥзы - советской адямиослэсь фашистъёслы пумит нюръяськемзэс но вормонлы оскемзэс возьматон. Таӵе мылкыдлы ӵапак тупа вал К. М. Симоновлэн "Русские люди" пьесаез. Театр та уженыз учкисьёсты, тушмонэз вормон понна, кужымзэс жалятэк тыршыны бурдъяз. Спектакльын яркытэсь образъёс кылдытӥзы А. В. Чубукова (Валя нимо советской разведчица), В. Г. Гаврилов (Глоба). "Мон кемалась таӵе роль сярысь малпанэн улӥ, - гожъяз Василий Гаврилович. - Глоба - ӟырдыт сюлэмо адями, калыклэн шудэз понна ас улонзэ но уз жаля. Капчи ӧвӧл ке но сыӵе ролез кылдытыны, артистлы со - дано уж. Вань сюлэм ӟырдыттэ, сабырлыктэ но ӟеч мылкыддэ усьтыса шудоно таӵе рольёсты. Учкисьлэн сюлмаз пыӵаса, адӟем карымон мед кылёз". Та аръёсы театрлэн репертуараз пыро А. Н. Арбузовлэн "Бессмертный", М. В. Водопьяновлэн но Ю. Г. Лаптевлэн "Вынужденная посадка", Ф. Ф. Кноррелэн "Встреча в темноте" пьесаоссы (соосты артистъёс ӟуч кылын шудӥзы). Та ваньмыз военно-патриотической темалы сӥземын. 1943-тӥ арын шуркынмонлэн кутсконаз театр Можга городэ выже. Труппа но кӧнялы ке будӥз, заводын ужам но кошкылэм артистъёс берытскизы. Репертуаре кутӥсько ӟуч но кунгож сьӧрысь авторъёслэн гожъямъёссы - А. Н. Островскийлэн "Без вины виноватые" но "Куанер улон - шек ӧвӧл" ("Бедность не порок"), Ж.-Б. Мольерлэн "Жорж Данден" пьесаоссы. Война аръёсы театрлэсь афишаоссэ удмурт драматургъёслэн пьесаоссы ӵем ӧз чеберъялэ, писательёс фронтэ кошкылэмын вал. Но тани 1944-тӥ арын коньывуон толэзе театр учкисьёссэ И. Гавриловлэн "Аннок" пьесаезъя премьераеныз шумпоттэ. Пьеса вакчиятыса, трос калыко сценаостэк пуктэмын вал. Мугез артистъёс тырмымтэ бордын гинэ ӧвӧл. Со вакытэ клубъёс но туж пичиесь вал, гуртъёсын ӵем дыръя соос огшоры улон коркаосы интыяськылӥзы. "Аннок" спектакльын ӧз шӧдӥськы гуртысь социальной тема. Нырысь интые пуктэмын вал удмурт калыклэсь курадӟыса улонзэ возьматон. 1944-тӥ арын, сӥзьыл, УАССР-лэн Совнаркомез, искусствоосъя учреждениослэсь ужзэс умоятон вылысь, Удмурт театрез Ижевске выжтон сярысь постановление кутэ. Театрлэн коллективез тае шумпотыса пумитаз. Республикалэн столицаяз выжемен валче, театрлы штатсэ будэтыны ӵектэмын вал. Выльысь кылдытӥське оркестр. Соин кивалтыны кутскиз Н. М. Греховодов. Кылдытӥське хор. Театр, вылӥ идейно- художественной спектакльёс дасян понна, творческой ужасьёсты дышетонэз радъяны, репертуарзэ национальной пьесаос, ӟуч классической произведениос чотын паськытатыны сюлмаське. М. Петровлэсь "Вуж Мултанзэ" возьматыны но К. М. Симоновлэсь "Русские люди" пьесазэ удмурт кылэ берыктыны дэмламын вал. Та ужез театр данэн быдэстӥз. 1945-тӥ арын 1-тӥ южтолэзе "Вуж Мултанлэн" премьераез ортчиз. Удмурт калыклэн азьланяз шудо улонлы юн осконэз - сыӵе вал спектакльлэн пуштросэз. "Тазьы улӥм, нош азьланяз таӵе улонэз ноку но медам адӟе ни", - гожтэ А. И. Писарев 2-тӥ южтолэзе потэм "Удмуртская правда" газетын пьесалэн огъя мылкыд пыӵатӥсь пуштросэз сярысь. Спектаклез пуктӥз К. А. Ложкин, декорациосыз Г. Е. Векшинлэн, крезьгурез Н. А. Голубевлэн. Удмурт театрлэн но радиокомитетлэн огазеям хоренызы кивалтӥз Н. Греховодов. Спектакльын трос вал яркыт образъёс. Нимысьтыз ик пусйымон Кузьма Ложкинлэн Олёшлэсь рользэ шудэмез, Васса Виноградовалэн - Наталез, Анастасия Волковалэн - Дукъяез, Анна Чубуковалэн - Онисез но трос мукетъёсыз. 1945-тӥ арын южтолэзе ик театр удмурт кылын возьматэ Симоновлэсь "Русские люди" пьесазэ. Тазэ но спектаклез учкисьёс шуныт пумитазы. Театрлэн та азинсконъёсыз коллективлэсь творческой мылкыдзэ уката бурдъязы. Озьы ке но, артистъёс ӧз тырме. Нимысьтыз дышетскем адямиос ӧй вал, фронтэ кошкылэмъёсыз бырыны шедизы. Одӥг гинэ амал кылиз: гуртъёсысь егитъёсты утчаса ваёно но артистлэн ужезлы театрын ик дышетоно. будӥсь талантъёсты утчаны артистъёс асьсэос ик мыно Селта, Нылга но Вавож районъёсы. таӵе амал трос ӟечсэ ӧз сёты. Быдэ вуэм пиос ваньмыз армиын вал. Кылемъёсыз гуртын но туж кулэ. Нылъёс но соку ваньмыз пиосъёс чотын ужазы, артист луон сярысь малпаса ӧз улэ. Война аръёсы удмурт литература, драматургиез но вераса, улонлэн куронъёсызлэсь бере кылиз. Сое 1943-тӥ арын Поволжье республикаосысь театр ужасьёслэн Казаньын ортчем кенешазы но пусйизы. Со РСФСР-ысь национальной театръёслы смотр ортчытонлы дасяськон ужпумъёслы сӥземын вал. Удмурт театр, репертуараз туала улонэз, Быдӟым Отечественной войнаысь югдурез возьматӥсь удмурт пьесаос ӧвӧлысь, та смотре ӧз пыриськы. Драматургимылэсь бере кылемзэ лыдэ басьтыса, 1944-тӥ арын оштолэзе Писательёслэн союззы республиканской конкурс ялӥз. Сое сӥзизы Удмурт автономилэн 25 ар тырмонэзлы. Конкурслэн жюрияз кӧня ке пьесаос вуизы. Соос пӧлысь кыкез войнаысь советской воинъёслэн геройлыко нюръяськемзы но фронт мышкысь тыршисьёсын ялан кусып воземзы суредамын. Л. Перевощиков "Удмурт ныл" пьесаяз батыр землячкамылэсь, Быдӟым Отечественной войнаысь героинялэсь образзэ возьматэ. Кыкез ик пьесаос ляб пӧрмиллям. Нырысезлы сценаез адӟыны ӧз кылды, мукетыз, пуктэмын ке но вал, кема ӧз мыны. Конкурсын данъян премиен пусйизы В. Садовниковлэсь "Сюан" пьесазэ, кудӥз али ке но улэ театрлэн репертуараз. 1945-тӥ арын, тулыс, война быремлэсь кӧня ке нуналлы азьло, артистъёс нош ик, дышем сямзыя бригадаослы люкиськыса, бусыын тыршисьёслы концерт возьматъяны потӥзы. Таяз учыре труппа Игра, Зура, Тыловай, Дэбес но Кез палъёсы вуылӥз. Самой та гастрольёсын ик Удмурт театрысь артистъёс кема возьмам Вормон нуналэз пумитазы. Война кӧшкемыт адӟон луиз вань советской калыкъёслы. Трос улонъёсты нуиз лек ож. Родинамылэн эрикез понна улонзэс сётӥзы Удмурт театрысь артистъёс Ф. Бобров, Н. Вдовенко, В. Иванов, Б. Лямин, Н. Растягаев, И. Самсонов, А. Седов, М. Харин, И. Шкляев. Лек ожмаськонын бырыны шедиз А. Тугбаев. Солэн артистэ нимысьтыз дышетскемез ӧй вал ке но, "Кезьыт ошмесысь" Беглойлэсь рользэ шудэмез ваньмызлы кельшиз. Война куспетӥ кариз "Улэм потэ" романлэн авторезлэсь П. Блиновлэсь, Удмурт театрлэн данак спектакльёсызлы крезьгур гожтэм композиторлэсь Н. Голубевлэсь улонзэс. Улэп кылемъёсыз но фронтысь сӧсыр луыса берытскизы. Соос пӧлын - Д. Федотов, А. Колесников, Д. Ившин, А. Полянцев. Ананий Поликарпович Колесников ожысь кык пыдтэк ик бертӥз ке но, театрын постановочной люкетэн кивалтӥз но режиссёрлэн юрттӥсез луыса ужаз на. Войналэн лек тылӝуэз пыр ортчыса, актёр но директорлэн воштӥсез луыса ужаз Дмитрий Кузьмич Ившин. Республикаысь театръёс война аръёсы трос шуг-секытъёсын пумиськылӥзы ке но, соослэн творчествозы одӥг нуналлы но ӧз кысылы. Улонэз зэмлыко возьматӥсь спектакльёсынызы, нимысьтыз дасям концерт программаосынызы артистъёс фашизмлы пумит нюръяськись советской калыклэсь патриотической мылкыдзэ ӝутыны юрттӥзы. Сётӥсь муртлэн киыз медаз начармы Пичи Пурга ёросысь "Маяк" газет трос гожъя сюлмо муртъёс сярысь: кин ке юрттэ висись пиналлы, кин ке - ёрмись муртлы, узыр - куанерлы. Редакциын ужасьёс нимысьтыз висъязы ортчем ар ӵоже тужгес ӟеч юрттӥсьёсты. Кылсярысь, Кун Кенешлэн депутатэзлэн С. К. Смирновалэн юрттэмезъя, ёросысь кӧня ке пиналъёс "Лесная страна" лагерьын тазалыксэс юнматӥзы. Ёросысь аптека нылпиослы дунтэк витаминъёс висъяз, "Италмас" нылпи сад сӧсыр нылпиослы тол но, гужем но шутэтскон интыос висъялля. А. А. Сапожников ёрмыса улӥсь семьяосысь нылпиослы гын сапег кузьмаз. "Юськи" нылпи санаторий дунтэк 96 нылпилы путёвка висъяз. Таӵе ӟеч ужъёс азьланяз но медаз вунысалзы. П. Николаев. Туэ понна нырысетӥ сессия Кун Кенешын йылаз-пумаз вуэ удмурт парламентлэн туэ ар понна нырысетӥ сессиезлы дасяськон. Депутатъёс отын эскерыны чаклало кызь пала ужпумъёсты. Соос пӧлын ик - Удмурт Республикаысь кун властьлэн ёзъёсызлэсь ужзэс радъян сярысь ужпум. Сессилы дасяськонлы ик сӥземын вал "Промышленностьын ужасьёс но ужбергатӥсьёс" депутат фракцилэн 1-тӥ феврале ортчем бадӟым кенешез. Та огазеяськон ӵектӥз сессиын "Удмурт Республикаысь Правительство сярысь", "Удмурт Республикаысь служащийёслы квалификациос сётон но азьвылъёссэ утён сярысь", "Удмурт Республикаын калыкез уже интыян сярысь" Законъёслэсь инъетъёссэс нырысетӥ эскерем бере кутыны. Ӵектонъёс-дэмланъёс верамын вал "Удмурт Республикаысь сюрес фондлэн 2001-тӥ арлы бюджетэз сярысь" Законлэн инъетэз но Кун Кенешлэсь "Удмурт Республикаысь Правительстволэсь ужзэ дунъян амалъёс сярысь" постановлениос пумысен. Нош "Удмурт Республикаын инвестициосъя ужез ӟечгес радъян сярысь" Законлэсь инъетсэ фракция чакла Правительствое выльысь тупатъяны келяны. "Промышленностьын ужасьёс но ужбергатӥсьёс" фракция умоен лыдъяз Удмурт Республикалэн Президентэзлэсь Правительстволэн тӧроезлы воштӥсе "Удмуртнефтепродукт" АООТ-лэсь валтӥсь директорзэ Андрей Осколковез юнматыны ӵектонзэ. Удмурт Республикаысь Кун Кенешлы Тӧрое быръеменызы валче, Игорь Семёнов ивортӥз та фракциысь потэмез сярысь. Удмурт Республикаысь Кун Кенешлэн пресс-службаез. Ӟеч уж но сюлмаськон вордэ Пичи Пурга ёросысь Курчум-Норья гуртын улӥсьёс шумпотӥзы вал гуртазы газ кыскемлы - эстӥськон ласянь сюлмаськонэз кулэсмиз угось. Но шумпотон вӧзы сюлмаськон но сюре. Гумыосты уго ялан чакласа возёно. Азьвыл та ужез ас вылаз "Юж-Пурга" эштос басьяз, но али эштос нимысьтыз чаклась-тупатъясь возьыны коньдон уг шедьты. Шуг-секытысь потон амал утчан вылысь, курчум-норьяос гурт кенеше люкаськылӥзы. Выльысь пуэн гур эстыны мылкыд карисьёс ӧз шеде, соин ик куспазы тазьы кенешизы: котькуд семья араз быдэн сю манет гумыосты чаклась-тупатъясь муртлы коньдон висъялоз. Дуногес усе гуртоос понна чагыр эстӥськон, но со понна майбыргес уло. П. Скобелев. ПОЛИТИКА Арня ӵоже - дуннеын странаын шаерын Кылем арня вискын Мюнхенын ужаз кышкытлыклэсь утиськонъя калык куспо конференция. Отын ӟырдыт споръяськон пуромиз США-лэн выль администрациезлэн ракетаослэсь утиськонъя радлык кылдытыны малпанъёсыз пумысен. Американецъёс шара верало ни, та понна, пе, соос дась 1972-тӥ арын кутэм огкыллэсь куштӥськыны. Пусйыны кулэ, Западысь данакез кунъёс Америкалы пумит луо. Россия но ӟырдыт кылзэ вераз. Нимысьтыз радъям пресс-конференциын Кышкытлыклэсь утиськонъя кенешлэн кивалтӥсез Александр Иванов шуиз США-лэн ачиз понна гинэ сюлмаськемез дуннеысь огсыр улӥсь югдурез зуркатоз шуыса. Ож тӥрлык поттон выль кужымен пуромоз. Конференциын Россиысь делегация ивортӥз: та вакытэ кунмылы палэнысь кышкытлык ӧвӧл, нош сюлмаськыто странамылэн улоназ кылдэм ужпумъёс. Зэмзэ но сыӵе ужпумъёс шӧдӥсько пӧртэм удысъёсын но пӧлэстӥськыса сямен шуккисько политикаын. Кынмись Приморьеысь югдурез МЧС-лэн кивалтӥсез Сергей Шойгу кыкетӥзэ эскериз ни. Солэн чакламезъя, кылдэм шуг-секытъёс понна кыл кутыны кулэ Приморьеысь администрация но "ЕЭС России" огазеяськон. Иське, коммунистъёслэн азьветлӥсьсы Геннадий Зюганов зэм верам вылэм, губернатор Евгений Наздратенко но энергетикъёслэн кивалтӥсьсы Анатолий Чубайс куспазы керето шуыса, нош курадӟе огшоры калык. Наздратенко эмъяськыны больницае выдӥз, пресс-секретарез ивортӥз, солэн, пе, сюлмыз "чутыны" ӧдъяз. Нош оппозиция валэктыны дыртӥз, губернатор, пе, озьы кыл кутонлэсь пегӟиз. Мар шуод, инмар но туэ асьмелэсь чиданлыкмес чакла, лэся. Куазь котькытын ик кезьыт улэ. Соин ик отын но татын шуныт сётонэн шуг-секытъёс кылдыло, кылсярысь, сыӵе ивор вуиз Санкт-Петербургысь но. Укмысэтӥ январе Чечняын ышиз вал "Врачи без границ" калык куспо огазеяськонлэн адямиез Кеннет Глак. Ортчем арня вискын ФСБ-лэн нимысьтыз дасям операциез дыръя американец мозмытэмын вал. Кызьы пусйизы чекистъёслэн кивалтӥсьёссы, ужрад ыбылӥськонтэк ортчиз. Йыруж лэсьтэм муртъёсты кырмыны ӧз луы. Но соослэн нимтулъёссы тодмоесь, соин ик кыл кутонлэсь пегӟыны уз быгатэ. Соин ӵош адямилы юрттэт сётӥсь огазеяськонъёс асьсэлэн ужасьёссы сярысь тросгес сюлмаськыны кулэ, соосты шуг-секыт югдуре шедёнлэсь утён понна. Вераны кулэ, Кеннет Глак лушкамын вал коньдон басьтон понна. Республикамылэн Президентэз Александр Волков шутэтсконзэ йылпумъяз но ужаны потӥз. Пусйыны кулэ, отпускез дыръя но Москваын со данак пайдаё пумиськонъёс ортчытъяз, кылсярысь, шаерысьтымы бадӟымесь предприятиос ("Ижмаш", электромеханической завод) пумысен. Нырысетӥ ужан нуналаз Удмуртилэн Президентэз 60 аресэныз ӟечкылаз Удмурт кун университетлэсь ректорзэ Виталий Журавлёвез. Собере аслаз кабинетаз пумиськылӥз но кенешиз "Ижевский механический завод" кун предприятилэн директореныз Василий Чугуевскиен, Удмурт Республиаысь валтӥсь федеральной инспекторен Сергей Чикуровен, "Удмуртнефть" огазеяськонлэн валтӥсь директореныз Евгений Богомольныен, коньдон ужпумъёсъя министрен Владимир Бельтюковен, Президентлэн но Правительстволэн Администрацизылэн кивалтӥсеныз Александр Горяиновен. Пумиськонъёс дыръя эскеремын вал шаермылэсь экономиказэ азинтонъя ужпумъёс, республикаысь кун ёзъёслэн федеральной ёзъёсын кусыпъёссы, Президентлэн но Правительстволэн Администрацизылэсь ужзэ умоятон, туэ понна бюджетэз быдэстон. Юлия АЛЕКСАНДРОВА. Правительствоын Кинлы но солы пӧсь йӧтӥз Толон Удмуртилэн Президентэз Александр Волков ортчытӥз Правительствое но солэн аппаратаз пырись муртъёсын бадӟым кенеш. Со сӥземын вал азьвыл сётэм ужъёсты быдэсъямез эскеронлы. Правительстволэн тӧроезлэн воштӥсез Николай Хохлов мадиз Воткаын ракета эстӥськонэз сутонъя завод лэсьтон сярысь но отысь радиотехнологической тӥрлыкъя заводын югдур сярысь. Таяз али ужа прокуратура. Янгыш муртъёсты судэ вуттыны кулэ. Президент лэчытэсь юанъёс пуктӥз "Ижмаш" огазеяськон пумысен. Отын югдур ӟеч ӧвӧл, автозаводлэн пунэмен тыронъёсыз весь будо. Соин валче сюлэмшугзэ ивортӥз Россиысь Правительстволэн тӧроезлэн воштӥсез Илья Клебанов но. Правительствомылэн тӧроезлэн мукетыз воштӥсез Михаил Назаров тодматӥз гуртысь югдурен. Миым котькуд гектарысь люкамын 11 центнерлэсь ятыр тысь но 4,77 центнер етӥн мертчан. Али Балезиноысь но Кизнерысь техника тупатъян предприятиос выльдо тракторъёсты. Чакламын выль комбайнъёс но музон техника басьтыны. Александр Волков таяз учыре но чурыт вераськиз. 32 "Доминатор" комбайн ужа асьме бусыосын, барыш поттэ палэнысь фирма. Ку та комбайнъёс копак асьмелы басьтэмын луозы? "Восточный" парсь вордон комплексысь коньдон ласянь югдур пумен уродме, нош кивалтон азьвыл сямен ик кельтэмын. Пудо уллёез но гыроно-кизёно муосты ум кулэстэ шуим, сыӵе курон уг быдэсъяськы. Со понна кыл куто Михаил Иванович Назаров, гурт удысъя выль министр но ёрос йыръёс. Республикаысь Правительстволэн тӧроезлэн воштӥсез - коньдонъя министр Владимир Бельтюков ивортӥз вытъёс октэм но соосты кытчы быдтэм сярысь. Министерствоосты но ведомствоосты со куриз Россия Федерациын кутэм программаосъя сэзьгес ужаны. Наукая, вылӥ но шор профессиослы дышетонъя кун комитет, кылсярысь, син азяз мед возёз Ижысь Техникая университетлы юрттонэз, Физкультурая но спортъя кун комитет, Г. А. Кулакова нимо спорт комплексэс лэсьтонэз, музон удысъёс - М. Т. Калашниковлэсь музейзэ но цирк ӝутонэз.Кызьы пусйиз Президент, Михаил Калашниковлэсь музейзэ усьтоно дано конструктор улэп дыръя, йылаз-пумаз вуттоно музъемен но ваньбурен герӟаськем ужпумъёсты. Озьы ик рос-прос радъяно улон интылы кредитъёс сётонэз но нылпи кухняос усьтонэз. Калыкез улон-вылонын утёнъя министр Светлана Андреева ивортӥз ветеранъёслы, сӧсыръёслы но нылпиен семьяослы юрттон сярысь. Та пумысен 52 закон кутэмын, данакез тырмыт уг ужало. Югдур берло дыре кӧня ке умояз. Но льготоас басьтӥсьёслэсь улон-вылонзэс каньылгес карон вылысь, министерстволэн ёзъёсаз кулэ ватсаса ужасьёс но компьютеръёс. Правительстволэн тӧроезлэсь воштӥсьсэ - ваньбур кусыпъёсъя министрез Сергей Касихинэз Александр Волков пӧсе вуттӥз автозаводысь ваньбурен кузёяськонэз выль сямен пуктымтэез понна. Президент нялтас юн-юн вераз: косэм ужъёсты быдэсъямтэ понна янгыш луисьёс кыл кутозы, оло нош ужзэс но ыштозы. А. Петров. Экономика Та ужпумлы сӥземын вал усьтэм амалэн ужась "Спецгазавтотранс" огазеяськонлэн валтӥсь директорезлэн Владимир Тумаевлэн журналистъёсын пумиськонэз. Люкаськемъёслы со мадиз 2000-тӥ арез кызьы йылпумъямзы, туэлы но азьланезлы малпанъёсыз сярысь. - Берло куинь ар ӵоже ужъёсмы урод уг мыно, - веранзэ кутскиз Владимир Алексеевич. - Выльдӥськон но рынокен экономикае выжон милемды но выль сямен малпаськонэ вуттӥз. Бен, янгышъёсмы но ичи ӧй вал. Совето Союз вакытэ троссэ вылӥын эскерылӥзы, планирование зол радъямын вал. Со кулэ. Но мултэс кивалтон дыръя, улӥослы котьку секыт йӧтэ. Ми одӥгзэ валам, шуг-секытысь, кризисысь аслад кужыменыд потоно, тыныд нокин уз юртты. Соин ик огазеяськон ялан планъя ужаз, каллен-каллен азинским, мукетъёсыз сямен ӧм куашкалэ, кызьы луиз му вӧй поттӥсьёсын но лэсьтӥськись предприятиосын. Владимир Алексеевич ортчемзэ юнме шорысь тодаз уг вайы. "Спецгазавтотрансэз" но лэсьтӥськисьёс пӧлы пыртыны луэ. Но со шугзэ-секытсэ вормыны быгатӥз. Тани матысь дыре гинэ Западной Сибирьын 250 иськем асфальт но бетон сюрес тыризы. Ваньмыз со лэсьтэмын чагыр эстӥськон кыскисьёслы. Эшшо ватсало на. Миым 4 толэзьскын Заполярьеын туж секыт условиосын, шуыны луоз, огазеяськон 40 иськем ӟеч сюрес вуттӥз. Тае нимысьтыз умоен пусйиз но ӟечлыксэ вылӥ дунъяз "Газпром" ОАО-лэн валтӥсь директорез Рем Вяхирев но. Оглом вераса, огазеяськон сюресъёс сяна, озьы ик лэсьтэ выжъёс, улон коркаос но мукетсэ. Ямалысь али выжо ни Заполярьее Уренгое ужаны. Таин ӵош ик газ поттыны ӧдъяло Туркмениын. Али странаын 20 миллиард кубометр чагыр эстӥськон уг тырмы. Соин ик вуоно арын сомында газ кыскозы ни Туркмениысь. Огазеяськонлэсь вамышъёссэ туж умой возьматэ одӥг лыдпус. Миым со 1 миллиард манет тыр лэсьтӥськон ужъёс быдэстӥз. Владимир Тумаев озьы ик умоен пусйиз, али, пе, 80 процент улэп коньдон вуэ ни, бартер амалэн ужан быдтэмын, шуыны луоз. Туж умой со. "Спецгазавтотранс" азьын кыкетӥез бадӟым ужпум сылэ - магистральной (зӧк) газ гумыосты тупатъян. Та ужен со куамын арлэсь кема выре ни. Син медаз усьы, но со дыр ӵоже бадӟымесь шудтэм учыръёс ӧй но вал, Пермь улосын гинэ миым кык учыр луылӥз. Быдэс Россиын арлы быдэ 1000 иськем газ гумыосты выльдоно ке, огазеяськон одӥг витьмоссэ, 200 иськемзэ тупатъя, яке 710 миллион манет тыр ужъёс быдэстэ. Нош та уж капчиен уг сётӥськы. Музъемез азьло гудоно, муртлэсь изоляцизэ (бинялтэмзэ) воштоно но выль гумы пононо. Ватсаны кулэ, му вӧй поттӥсьёслэн, пе, та ужзы умойгес пуктэмын-радъямын. Нош "Газпромлы" туэ 3 миллиард манетлы гумыосты вошъяно луоз. Нош "Спецгазавтотранс" миым программазэ мултэсэн тырмытӥз, 1800 миллион манет тыр вань ужъёс быдэстӥз но 237 миллион манет тыр пайда басьтӥз. Туэлы малпанъёсыз уката бадӟымесь, 2500 миллион манетлы ужъёс лэсьтыса, 280 миллион манет табыш поттыны чакла. Огазеяськон зэмзэ но йыгмыт вамышъя но пумен кужмоя- паськыта. Миым ватсаса 1000 ужась кутӥз но 5,5 сюрс муртъем предприятие луиз. Со пӧлысь 3000-эз вахта амалэн Западной Сибирьын ужа. Отын адямиослы улыны, ужаны, медицина юрттэт сётыны умоесь условиос кылдытэмын. Республика азьланьын но чагыр эстӥськонлы уз ёрмы. Удмурт Республикаысь Правительство но "Газпром" куспазы туэлы тупанкыл гожтӥзы ни. "Спецгазавтотранслы" оскон бадӟым, со шаермы понна трос лэсьтэ. Владимир Тумаевлэн кичӧлтэмезъя, Ижевскын усьтэмын "Вузкарон юрт". Со пыр элькун чагыр эстӥськон басьтэ, нош вытэз (налогез) асьмелы кун бюджетэ кыле. Нош республика трос-а, ичи-а шуод, но арлы быдэ шорлыдын 2,6 миллиард кубометр газ басьтэ. Со пӧлысь 1 миллиардэз чагыр эстӥськон "Спецгазавтотранслэн". Со сяна, али огазеяськон сюлмаське Можга районысь Карашурын музъем улын газ возён гуосы чагыр эстӥськон вуттон сярысь. Со юнме шорысь малпамтэ. Шаерамы куддыръя дыраз газ уг вуы. Таӵе вакытэ отысь чагыр эсьтӥськонэз кутыны луысал. Огазеяськон берло дыре мукет ужъёс борды но басьтӥське. Кылсярысь, Воткинскысь газ аппаратурая заводын автомашинаослы баллонъёс лэсьтонэз радъяз. Со понна элькунамы огазеяськон чакла газ сётонъя 3 заправкаос пуктыны. Али Ижын одӥг сыӵе станция вань ни. Со интыяськемын Выль Ажимов ульчаын но котьку туж кузесь машина черодъёс луо. Соин ик Владимир Тумаевлэн заправкаосыз югдурез умоятыны кулэ. "Спецгазавтотранс" умоесь кусыпъёс тупатӥз ни "Пермьтрансгаз" огазеяськонэн. Республика понна со ӟечен гинэ берытске. Тани Каракулино ёросэ 40 иськем газ гумы кыскыны малпамын вал. Но специалистъёс ваньзэ лыдъязы-чотазы но тодмо луиз, со туж дуно усе но решение кутӥзы районэ, пе, умойгес луоз "Пропан" но "Бутан" нуллыны. Со данаклы дунтэмгес усёз. Та одӥгез усто малпан. Кыкетӥез, "Спецгазавтотранс" 300 миллион манет тыр ужъёс быдэстыны "Ноябрьскнефть" огазеяськонэн огкыл кутӥз ни. Та бен шуг ужпум. Прииртыш газ кыскон интыын ӧжытсэ 60 иськем сюрес лэсьтоно. Отын чагыр эстӥськонэз трос. - Капчиез бен ӝӧк вылын, - шуэ Владимир Алексеевич. - Тазэ но арез каньылэн ӧм мытэ, январе 47 градус кезьыт улӥз, феврале котьку сямен Ледовитой океанысь кужмо тӧл пельтэ. Озьы ке но, асьме кужымен гинэ ужаськом, "Газпромлэсь" ми одӥг эстӥськон гинэ куриськом. Техникамес асьмеос выльдӥськом, возиськом спортъя юртъёсмес. Туэ вуттыны чакласьком вӧзысьтымы спортивно-оздоровительной комплексмес. Отчы трос коньдон кисьтэмын. Но огдыре Центральной стадионэз возьыны но лэсьтӥськыны ӧм быгатэ. Зэмзэ но, шаерамы одӥг предприятие но "Спецгазавторанс" кадь спортэз азинтонлы сыӵе бадӟым инты уг висъя. Со уго люконтэм герӟаськемын валтӥсь директорлэн Владимир Тумаевлэн "Газовик-Газпром" командаын футболэн шудэменыз но. Со арлы быдэ сямен ортчытъя спартакиадаос. Миым вал, туэ но апреле луоз. Озьы ик быдэс Россиын данэ потэмын теннисэн шудонъя школаез. Солэн теннисистъёсыз котьку вормисе пото. Туэ республикаямы теннисъя ӵошатскон-турнир ортчытыны малпало. Пумиськонын озьы ик вераськон потӥз, малы, пе, чагыр эстӥськонлы ялан дун будэ. Валтӥсь директорлэн ивортэмезъя, ми но, пе, мукетыз но рыноклэсь палэнскыны ум быгатӥське, со дунъёсты радъя. Но газлы дун йылэ ке но, со ноку уз луы му вӧй кадь дуно. Малы ке шуоно, чагыр эстӥськон кыскон дунтэмгес усе, нефть поттонэн уд ӵошаты, со секытэнгес сётӥське. Но Россия кызьы ке му вӧен, озьы ик газэн но узыр, уката ик Западной Сибирь, кытын ужа "Спецавтотранс". Вылӥын верай вал. Огазеяськон 240 миллион пала пайда басьтӥз шуыса. Но али жаляса пусъёно луэ: солэн 200 миллион манет ёросэз дисконт чотын быре. Мукет сямен валэктыса, со трос заём бумагаосын ужаз но сыӵе бадӟым ыштон адӟоно луэ. Берло кылзэ вералоз ни Арбитраж суд. Котьмар шу, но огазеяськонлэн ӵуказе нуналэз, азьланез умоен адӟиське, со пыд йылаз йыг-йыг сылэ. Геннадий Романов. Владимир Тумаев. ЮБИЛЕЙ Калыкезлы усьтӥз тодон-валан ӧссз Туэ 150 ар тырме нырысетӥ удмурт писательлы, тодосчилы, дышетӥсьлы но православиез вӧлмытӥсьлы Григорий Верещагинлы. Соин валче алигес люкаськылӥзы та ортчытоно ужрадэз дасясьёс Кун Кенешысь, Правительствоысь, Писательёслэн союзысьтызы, "Удмурт кенеш" ассоциациысь, ёрос администрациосысь адямиос, профессоръёс. Жаляса верано луэ, тросэз чаклам ужрадъёс уг быдэсъясько, коньдонлы ёрмемен. Но оргкомитет кивалтӥсьёсты та ужрадлы одно коньдон висъяны куриз. Туэ Г.Е.Верещагинлэсь книгаоссэ удмурт но ӟуч кылын быръем произведениоссэ поттыны, "Г.Е.Верещагин но Уралысь но Поволжьеысь калыкъёслэн этнос но культура ласянь азинскемзы" научно-практической конференция ортчытыны солэн вордскем но улэм интыосаз - Кез, Шаркан, Пичи Пурга районъёсын лыдӟиськон ӝытъёс ортчытыны, музей комнатаос но мемориал пулъёс усьтыны. Озьы ик ялэмын луоз Верещагинлэн творчествоезлы сӥзем тужгес усто научной ужлы, литературной произведенилы, сочиненилы конкурсъёс. Али школаосын ортчыло ни Верещагинлэсь творчествозэ эскерись тодосчиосын пумиськонъёс, "Удмуртия" телерадиокомпаниын возьматыны кутскизы та дано адями сярысь передачаос. К.КАКСИН. 2001-тӥ арын 8-тӥ феврале 18 часын Удмурт Республикая валтӥсь федеральной инспекторлэн Общественной приёмнояз калыкез кутоз но юанъёслы валэктон сётоз. Кыл кутытонъя управленилэн кивалтӥсезлэн воштӥсез А. Г. Шушаков. Общественной приёмнойлэн адресэз: Ижевск город, Карл Маркс ульча, 274 номеро юрт, телефон: 25-40-61. Адямилэн правоосыз Юристъёслы, пе, дунтэк ужано Туннэ асьме кунамы секыт улыны, секыт ужаны, секыт нылпиосты будэтыны. Россиысь куд-ог улосвылъёсын улӥсьёс коркаосазы шуныттэк, тылтэк пуко. Табере шер пумиталод егит семьяосты, кудъёсыз кыклэсь ятыр нылпи будэто. Туж ӝог вӧлмо "куанеръёслэн висёнъёссы", кылсярысь, туберкулёз. Уг кулэсмы секыт йыружъёслэн лыдзы. Пиос быро Чечняын... Но тужгес кышкытэз, огшоры калык уг тоды аслаз правоосыз сярысь, уг быгаты соосты утьыны. Со понна куд-ог чиновнкъёс та вылын ӟеч "ворттыло". Вань-а кыӵе ке сюрес, кылдэм югдурысь потыны? Мар лэсьтоно та понна? Кызьы ивортылӥм ни, та ужпумъёсты пыр-поч эскерон вылысь, Удмуртие вуылӥз Россиысь калык огазеяськонъёслэн конгрессылэн вице-президентэз Антуан Аракелян. Ижевсклэн куноез пыриськиз Правительствоын радъям "котрес ӝӧклэн" ужаз. Вераськон кема кыстӥськиз. Антуан Аракелян люкаськемъёсты Россиысь улон- вылонъя кылдэм огъя югдурен тодматӥз. Удмуртиын улӥсьёслэсь сюлмаськонъёссэс "усьтӥзы" Удмурт Республикаысь Прокурорлэн воштӥсез Александр Борзенков, Кун Кенешлэн тӧроезлэн воштӥсез Павел Вершинин, Законъёсты быдэсъямез чакланъя, калыкез кышкытлыклэсь утёнъя гражданъёслэн правооссыя ялан ужась комиссилэн йырыз Михаил Кокорин, Правительстволэн йырызлэн воштӥсез Наталья Харина, Удмуртиысь журналистъёслэн Союззылэн кивалтӥсез Людмила Прокашева но данак мукетъёсыз. Берло дыре шаерамы кулэсмизы юнме адямиосты янгыше уськытон учыръёс. Удмурт Республикаысь прокуратураен мозмытэмын 10 процентэз нокыӵе мугъёстэк пытсэт сьӧры шедемъёс. Эскеремын тюрьмаын пукисьёслэн улон условиоссы. Озьы шараяськиз, Ижысь 1 номеро следствиосъя изоляторын чакламъя, 1 сюрс 500 интые, 2 сюрс 700-лэсь ятыр адями "кунояське" шуыса. Татын ӵем гинэ уг тырмы сиён-юон, кӧлан интыос. Пусйыны кулэ, мукет изоляторъёсын но пукисьёс но сокем ӟеч уг уло. Ӵем пумиськыло милициын ужасьёслэн ас интыенызы "шудон" учыръёс. Соослэн ӝегатэм муртъёссэс жугемзы, кужмысь кыл кутытэмзы сярысь кылымтэос ӧвӧл, дыр. Нош кин кыл кутытоз асьсэды "ӧрӟиосты"?. Трос дыръя - нокин но. Вылӥ сылӥсь кивалтӥсьёссы таӵе тырмымтэосты адӟымтэ улэ карисько, мултэс уж ас вылазы басьтэмлэсь палэнско. Мукетыз сюлмаськытӥсь ужпум: пӧртэм судебной ужъёсты мултэс кузь кыскон. Янгыше уськытоно мурт пытсэт сьӧры донгемын ни, кӧня солы отын улоно - шуг вераны. Таӵе югдурысь потон понна, шаерысьтымы судьяослэсь лыдзэс будэтоно, вылды. Уже кутоно удыссэс ӟеч тодӥсь-валась адвокатъёсты, прокуроръёсты. Ӟеч луысал, судебной процессъёс шара ортчысалзы ке, газет бамъёсын, Интернетын возьматыса. Азьланьын тросгес усьтоно юристъёслэсь контораоссэс, секыт югдуре шедьыку, адямиос отчы кышкатэк мед вазиськозы. Та ужъёсы кысконо юристэ дышетскись студентъёсты но. "Котрес ӝӧк" сьӧрын пумиськон дыръя йылаз-пумаз вуттытэк кылиз Россия Федерациын адямиослэсь правооссэс утёнъя Удмуртиын кыл кутӥсь быръён сярысь ужпум. Асьме вылӥ кивалтӥсьёс талы чутрак пумит ӧз ке но луэ. Угось вазенгес но депутатъёс пӧлын со сярысь вераськонъёс вал - шугъяськонъёс кылдо коньдон ласянь. Э. Кумачева. ШӦКЫЧ ПЕЛЕЙӦТОН Азбар возьматэ кузёлэсь ымнырзэ Урамъёсысь лымы букосъёс борды ӵемтыкумы, кинэ меда тышкаськоно? Йӧ сюрес вылэ гылӟыса уськыку, кинэ янгыш кароно? Кызьы вераз мэриын ортчем пресс-конференция дыръя городысь Транспорт ветлон сюресъёсты тупатъянъя управленилэн кивалтӥсез О.Ф.Зорина, асьмелы, пе, чакласькысагес ветлоно, дыртытэк, лад-лад вамышъяно. Уго городысь сюресъёсты чылкытатӥсьёслэн машинаоссы но 500 интые 120 гинэ лыдъяське, ужасьёссы но тырмыт ӧвӧл. Уката ик ёрмоно азбаръёсты утялтӥсьёслы. Ма, кинлэн-о 500-600 манет тыр дворникын ужамез потоз? Озьы ке но, урамъёс чылкак кузётэк кельтэмын шуыны уг луы, оскыто вылӥ кивалтӥсьёс. - Городысь транспорт ветлэ нокыӵе ӝегатсконъёстэк, - маде Ольга Фёдоровна, - Синтэм-пельтэм тӧласькон дыръя гинэ Киров, Нефтемаш урамъёсын троллейбусъёс 40 минут пала сылӥзы. Но сюресэз сузясьёсты татын янгыш карыны уг луы. Уго пельтэм бервылъёсты сузян понна, соослы 4 час сётӥськыны кулэ. Азьло аръёсы сямен ик, туэ Ижевскысь ог 720 сюрс тонна лымы поттыны чакламын. Со понна 195 миллион манет кулэ луоз. Эшшо 7 миллион манет быроз сюресъёс вылэ сылал- луо вуттон понна. Ижевсклы со 34 тонна мында дасямын. Пусъёмы, та суретлэн 90 процентэз луо, отӥыз - сылал. Ӵошатон понна, Москваысь сюрес вылъёсы кожаз сылал гинэ пазяло. Кызьы вераз Ольга Зорина, асьмелы со мултэс дуно йӧтэ. Малпалэ ай, пе, шор столицаын толалтэзэ 1 квадрат метр сюрес 20 манет тыр уске ке, Ижевск та понна 5 манет но 40 копейка гинэ висъяны быгатэ. Гужемзэ та лыдпусъёсыд солэсь но ичиесь: Москваын - 7 манет, Ижевскын - 1 манет но 38 копейка. Но азьланяз Ижевскысь транспорт дугдылонниосы ке но кожаз сылал пазяно вылэм. Уго тол вылтӥ, йӧвалеген сэрен шуккиськыса, нуналлы быдэ ог 40адями эмъяськонниосы вазиське. Бен, туэ куазед но сыӵегес: кынтэ-шунтэ, шунтэ-кынтэ. Лымы усьыкуз ик кот луэ. Соин ик сюресъёсты йӧ кынмемлэсь сузяса вутскыны уг луы. Трос сюлмаськонъёс кылдыто липет вылэ "будӥсь" йӧос. Таосыд син куспын ӝутско. Тани кык арня талэсь вазен гинэ Пушкинской урамысь вань корка липет сузямын-калтэмын вал. Туннэ отчы коть выльысь йӧ сузясьёсты келя. - Толалтэзэ туж секыт йӧтэ урамъёсты сузясьёслы, - азьланьтэ веранзэ Ольга Зорина. - Соин ик котькуд предприятиез, организациез та уже кыскем потэ вылэм: ас музъем вылазы ке но мед сузяськозы, утялскозы соос. Жаляса верано, ӵем дыръя тазьы уг пӧрмы. Чаклалэ ай, пыдын ветлон сюресъёс интыен-интыен чылк-чылк сузямын. Но таос вӧзын ик вамыштыны луонтэм букосъёс пельтылэмын. Татысен соку ик тодам лыктэ калык веран. Кузёлэн кыӵеез азбаре пырыку ик, пе, адӟиське. Жаляса верано, Ижевскысь вольыт сюресъёсты чиньые тырымон гинэ шедьтод. Со понна соослэн кырсьсылы ӝожтӥськонъёс огез бӧрсьы мукетыз кылӥсько. Одӥгез тужгес тунсыко потӥз, пресс-конференция дыръя сюресъёсты чылкытатӥсьёслэн кузёзы ас тырмымтэоссэс предприятоис-организациос вылэ погыльтыны кутскиз. Но нялтас тужгес кырсёмем сюресъёсты пусйыны куриз ик. Соосты чылкытатом-сузялом, пе. Ха! Нош кылемъёсыз сюресъёс?! Яке городысь куд-ог сэрегъёссы юнматэм гожтэмъёсынызы асьсэды буйгато-а? Татын липетысь лымы куашканы быгатоз, чаклаське, пе! Ми тӥледлы верам вал, шуозы, асьтэос "виноват". Э.КУМАЧЁВА. Кин кивалтоз заводэн? Россиысь Кивалтон системая агентство Ижевскысь "Купол" электромеханической заводлэн генеральной директорезлэн интыезлы конкурс ялӥз. Конкурслэн куронъёсызъя ассэ кивалтӥсе ӵектӥсь куинь ар ке но кивалтон удысын ужамын медло. Озьы ик со одно ӟеч тодыны кулэ законъёсты но заводысь ужез. Конкурсэ пыриськыны лэземын ВПК-ын азьвыл ужамтэосты. Куриськонъёс но ӵектонъёс эскериськозы 15-тӥ�23-тӥ феврале. И.АРТЕМЬЕВА. ВАЛЭКТЭ ЮРИСТ Сэрегез дася Россиысь Кун Думаысь депутатлэн С.К.Смирновалэн юрттӥсез адвокат Лилия ШКЛЯЕВА Кинлы кельтос? Кельтос (наследство) пумысен гожтэтъёс редакцие ӵем вуыло. Огпол печатласьком валэктон, кык пол... Куинетӥез кин ке выльысь гожтэт келя. Оло, таиз зэмос учыр бератаз пум поноз ни огпӧртэм юанъёслы. Гуртын улон капчи ӧвӧл. Вазь султоно, юртъерез утялтоно, уже мыноно... Таисья Степановна табере огназ. Картэз кулэмын. Нылпиосыз палэнын. Городазы тодазы вайыло меда анайзэс? Нош юртъерез возёно. Гуртын кинлэн ке вань ифн сыӵе бадӟым коркаез, кеносэз, гидэз? Огназ Таисья Степановналы мӧзмыт шуыса, ваньмыз тодо. Малы ке-а бригадир татчы вуттӥз егит нылашез. Медпунктэ выль медсестра лыктэм. Солы кунокуа, пе, кулэ. Арлыдо кышномуртлы Лена кельшиз. Озьы ӵошен улыны ӧдъязы. Ныллэн сямыз но, киосыз но чупресэсь вылӥллям. Юртъер котырын весь юрттӥськиз. Таисья Степановна выльысь ӟазег вордыны кутскиз. Доразы дырын-дырын кожалляз городын дышетскыса алигес лыктэм агроном Сергей. Толалтэ лымызэс утялтэ, тулыс бакчазэс бугыръя. Ӝоген Сергей но Елена кузпалъяськизы. Таисья Степановна шумпотӥз дораз улыны кариськемзы понна. Дэмен кышъязы липетсэ, выльдӥзы кенерзэ, вордыны шӧтазы скал но парсь. Кышномуртлы копак аслаз кадь пото егитъёс. Таосызлэн Лизазы борды но сюлмыныз бурмиз. Нош арлыд люкаське. Таисья Степановна ӵемгес но ӵемгес висьылэ. Медсестра Елена луонозэ но луонтэмзэ лэсьтэ сое йӧнатон ласянь. Солы Лиза но быгатыса но быгатытэк юрттэмъяське. Огпол ӝытазе Ленаез ӧтизы гурт пумысь висись мурт доры. Таисья Степановна но Сергей огназы кылизы. Кышномурт возьматӥз завещанизэ. Вань юртъерме кельтӥсько, пе, Леналы: - Нош аслыз тае эн вера. Сямыз аспӧртэм. Кутоз но куштӥськоз ваньбурлэсь. Песянай кема ӧз улы ни. Сое ватыны нылпиосыз ӧз бертэ. Сюлэм висемзэс ивортӥзы телеграммаен. Отчы-татчы ворттылыны, пе, коньдонмы ӧвӧл. Таисья Степановна кулэм бере толэзь ортчыса гинэ кышноезлы Сергей мадиз завещание сярысь. Соос кенешизы юристэн, люказы бумагаос, тыризы кун пошлина, лэсьтӥзы кельтосэз басьтэм сярысь свидетельство. Озьы юртъерлы зэмос кузё луизы. Бератаз вуизы куноос, Таисья Степановналэн нылъёсыз. Анайзылэсь ваньбурзэ асьсэлы карыны. Соос тодо вылэм завещание сярысь. Таисья Степановна ивортэм гожтэт пыр. Но малпаллям: огшоры бумагалэн нокыӵе кужымез уз луы. Табере шуэрскизы: ваньмыз выжем Еленалы. Сузэръёс шуизы: - Коркамес асэстыны, оло, ум ни быгатэ. Нош котырзэ ваньзэ нуом. Али городэ мыном но юристэн кенешом. Юрист соосты сокем ӧз шумпотты. Граждан кодексъя ваньбур мукетызлы кыле законъя яке завещениея. Законъя кельтос басьтӥсьёс (наследникъёс) лыдъясько нылпиос, кузпал, анай-атайёс, вын-агайёс, сузэр-апайёс, песянай-песятайёс. Соос ваньбурез асэсто, законъя радлык воштэмын ӧвӧл ке завещаниен. Завещаниея котькуд адями аслэсьтыз вочаксэ яке ог люкетсэ ваньбурзэ кельтыны быгатэ одӥг яке трос муртлы. Соку уг учко, таос ӵыжы-выжыос-а, ӧвӧл-а, законъя кельтослы правозы вань-а, ӧвӧл-а. Тӥни малы завещание - огшоры "бумага" гинэ ӧвӧл. Со - югдурез радъянын тужгес кужмо документ. Озьы юрт одно выже Еленалы. Нош корка пушкысь тӥрлык? Таиз пумысен завещание ӵемысь номыр уг гожто. Со шеде законъя кельтос басьтӥсь кие, ваньбур кузё кулон азяз ичизэ ар ӵоже соин ӵош улӥз ке. Сузэръёс кемалась нимазы кариськемын бере, корка пушкысь тӥрлыклы но правозэс ыштӥзы. Соос копак шальтраса вуизы Елена дӥне. Мар но ӧз вералэ: - Сьӧд кый, тон анаймес юри шузимытӥд! - Кыӵе ке урод эмъюм сётӥд но кужмысь завещание гожтытӥд. - Собере ядэн виид! - Ми ум буйгатске! - Вань кырсь ужъёстэ шараялом! - Дась кӧт! Елена чалмыт пуке. Синмысьтыз бадӟымесь синкылиос шапыкало. Котыраз пичи Лиза берга но анайзэ бадӟым борыосын утялтыны выре. Соосты али гинэ пыртэм бакчаысь. Кышномуртлэн кыл йылаз весь берга одӥг юан: кытын бен тӥ вал, анайды висьыку? Нош сыӵе кылъёсты вераны дӥсьтонэз уг окмы. Л.Ахукова. Лушкаськиз - ӧз лушкаськы? Нокытын ужасьтэм сузэре больницае пырем но кинлэсь ке сапегъёссэ кутчам. Сое кырмиллям, пыдкутчанэз кузёезлы берыктӥллям. Сузэрме табере милициетӥ кыскало. Уголовной уж, пе, жутӥллям. Солэсь кылзэ юаны кулэ шат? Йыртэмаса ӧз вутты ук. Оло нош янгышаса кутчаз вал муртлэсь сапегзэ? А.С. Янгышаса-а, юри-а сузэрды кутчаз мурт сапегез - тазэ следствие эскероз ни. Нош зэмен ик лушкаськыны медэ ке вал, кылзэ юаны кулэ. Бен, йыртэмаса ӧз вутты. Но та учыр нимаське йыртэманы турттон (покушение на преступление). Мукет сямен верано ке, соку лэсьтэмын йыртэманы дасяськон ужрадъёс. Соос пумозяз вуттэмын ӧвӧл та адямиен герӟаськымтэ мугъёсын сэрен. Картэ юри "вредничатьтэ" Ӵошен улыкумы, картэ ужаз огаз фирмаын, кивалтӥз оделэн. Егит кышно шедьтӥз но люкиськиз. Пие понна ичигес алимет тырон вылысь, азьло фирмаяз ик документъёсъя со луэм "возьмаськись" (сторож). Тодӥсько: али но кивалтэ отделэн, жильдэ уно коньдон, но бумага вылын уг возьматы. Мар кароно, картэ медаз вредничатьты но тросгес алимент мед тыроз шуыса? Марина. Учкоме Россия Федерацилэн Семья сярысь кодексысьтыз 119-тӥ ёзэтэз. Тӥляд судэ вазиськемды луоз, алиментлэсь быдӟалазэ воштыны курыса. Суд лыдэ басьтыны кулэ тӥлесьтыд но карттылэсь валэктонъёссэс. УДМУРТ КИЗИЛИОС Кивалтонлэн крезьгурез аслаз Пумиськон дырлы дасо минутлы ӝегамысьтым Александр Прохоров мыным "выговор" сётӥз. Ӧжытак ӵыжектоно луи ке но, син азям усьтӥськиз зэмос кивалтӥсь. Ас поннам малпай, Шарканлы кивалтӥсен удалтӥз. Ёрос администрацилэн йырыз ужасьёсыз азе зол куронъёс пуктэ, иське, дырзэс тэк ортчытыны маза уз сёты. Аслаз но котькуд минутэз, часэз чакламын. Со озьы ик вылэм но. Ӝегамысьтым мон эшшо пайда поттӥ на. Администрациын ужасьёсын вераськыса тодӥ: Александр Аркадьевичез шарканъёс туж вылӥ дунъяло, котыр ласянь юрттыны тыршо солы. Курон-косонэз возьмаса уг уло, котькудӥз аслаз удысэзъя мар ке но выльзэ, азинлыкозэ утча. Огкутскемен усьто на одӥг пичильтык "секрет". Январь пумын Александр Прохоровлэн вордскем нуналыз вал. Ижевскын улӥсь шаркан дыдыос Валентина Пудова но Галина Кондратьева кырӟаны но шудыны яратӥсь кивалтӥсьлы тӥяськыны шедем арганэз интые выльзэ кузьмазы. Республикаысьтымы калык артистка шудыса-кырӟаса ик ӟечкылаз сое. Котырес лыдпус ӧвӧл ке но, Александр Аркадьевичен вераськонме мынам но вордскем нунал бордысен кутскеме потӥз. - Александр Аркадьевич, капчи-а кивалтӥсьлы вордскем нуналзэ пумитаны ужан дораз? - Хм, йӧспӧртэм юан. Зэмзэ верано ке, вордскем нуналме уж дурын чик но пусйыны уг малпаськы вал. Та нунал монэ кӧня ке паймытӥз ик. Ӵукнаысен ӝытозь ӧз чалмылы телефон. Ӟечкылан телеграмма гинэ витьтон пала басьтӥ. Ёрос администрациослэн йыръёссы, предприятиослэн кивалтӥсьёссы бордысен кутскыса, Удмурт Республикалэн Президентэз Александр Волков но Удмурт Республикая валтӥсь федеральной инспектор Сергей Чикуров ӟечкыланъёс ыстӥллям. Ужан нуналэ азьло сямен ик кыстӥськиз, но кабинетэ борды думиськысагес улоно луиз. Одӥгаз хозяйствоын кылдэм ужпумъя возьмасько вал телефон пыр жингыртэмез. Малпам ужмы пӧрмиз. Нош ӝытсэ пукимы ни семьяен, ӵыжы-выжыосынымы ӵош. - Вордскем нунал котьку но пӧртэм кузьымъёсын узыр. Нош кыӵе сямъёссэс кузьмазы тӥледлы анайды но атайды? - Атае Аркадий Иванович вань улытозяз ужаз колхозын, валтӥсь бухгалтер луыса. Со туж серьёзной адями. Малпанъёсыз но улон шоры учконъёсыз тӧл пельтэмъя уг вошъясько.Ужъёсызъя но, ассэ воземезъя но котыр ласянь адӟем карымон луэ. Анае Анна Егоровна покчи классъёсысь нылпиосты дышетӥз. Ачиз ӟуч семьяысь ке но, йырси выжыозяз ик со удмуртомемын. Кемалась пенсиын ни, но тэк пукыны уг чида: кивалтэ Гондырвайысь фольклор коллективен. Гурт калык анайме туж гажа, пӧртэм юанъёсын солы вазиське. Ӝыныезлэсь тросэз гуртоос ки пыртӥз потэмын. Пичиез но, мӧйыез но шораз нимын-тулын вазисько. Анае туж юн сямо адями, усто кузё кышно. Анай-атаелэн та ӟеч сямъёссы мон понна туж адӟем карымонэсь. Семьямы озьы икуг вунэты атаймылэсь но анаймылэсь бубыоссэс. Нырысетӥез репрессия улэ сюриз, нош кыкетӥзэ кулакъёс виизы. Соиныз но, таиныз но выжыенымы данъяськиськом. - Анайды ӟуч шуиды, нош тӥ асьтэды кинэн лыдъяськоды? Кыӵе кыл тӥледлы матынгес? - Бен, анае ӟуч, вордӥськемын со Шаркан ёросын ик. Удмурт гуртъёсын сыӵе семьяос ӧжыт ӧвӧл. Но мон асме удмуртэн лыдъясько, паспортам но атаея озьы гожтэмын. Песянаймы милям удмурт сямен чик ӧз вала, соин ик семья куспын ӟуч кылын вераським. Со сям али но семьяямы возиське. Калык азьын но ӟуч кылын вераськисько, но кулэ дыръяз удмурт сямен шалтыр поттӥсько. - Нациосын герӟаськем ужпум шоры тӥляд учконды аспӧртэмлыко, дыр? - Асьмеос, удмуртъёс, ӵем дыръя асэнымы данъяськыны но асьмеды возьматыны ум быгатӥське. Шаерамы улӥсь бигер трослы удмуртгес, дыр, ачиз удмурт адями сярысь. Озьы ик шуыны луоз белорус сярысь но. Ваньмыз потэ адямилэн национальной ужпум шоры кызьы учкемез но валамез бордысь. Калыклэсь улон-вылонзэ ӝутонын ӟуч яке удмурт луэмез валтӥсь интые пуктыны уг яра. Нырысь интыын луыны кулэ солэн Удмуртилы вань сюлэмзэ но быгатонлыксэ сётэмез, патриотизм мылкыд. Соин ик, кулэ ке мон ӟуч но, удмурт но луисько. Азямы пуктэмын Шаркан ёросэз ӝутонъя ужпумъёс - ми сое быдэстыны тыршиськом. Политика, экономика ужпумъёсты национальной ужпумъёс пӧлы выйтыны уг яра. - Александр Аркадьевич, Шаркан ёрос администрацилэн йырыз луыса, кык но ӝыны ар куспын трос азинсконъёс луизы. Мар юрттӥз тӥледлы сыӵе вормонъёс басьтыны? - Тамында дыр ӵоже улытозям котькытын но ужаса вуттӥ. Школа бере колхозын рядовой вал. Армие ветлӥ но Ижевскысь Гурт хозяйствоя институтэ дышетскыны пыри. Собере вал школаын ужан - Балтачысь пиналъёсты машиноведенилы но праволы дышетӥ. Отӥяз комсомоллэн райкомаз ӧтизы. Ужай татын куамын кык аресозь. Вал на партшколаын дышетскон, одӥг ар пала ёрос газетлэн редакторез луыса но ужай. Ачим но валаса ӧй вутты, кызьы луи райкомлэн кыкетӥ, собере нырысетӥ секретарез. Выльдӥськон вакыт кутскемен, ваньмыз огыр-бугыр луиз. Тямыс арзэ тырши ужбергатон удысын. Фирмамы лэсьтӥськон ужъёсын выриз. Рынокен экономика кусыпъёсты валан ласянь мон понна со вал бадӟым школа. Туала вакыт кулэ каре угось выль сямен ужамез, нош пӧртэм удысъёсын берган юрттэ гинэ солы. Али мон тодӥсько мар карыны но кызьы ужаны. Шуг-секытъёс кылдо коньдон тырмымтэысь гинэ. Азинсконъёс пото на вӧзад ужась адямиос бордысь но. Нош командамы милям уж борды юн- юн басьтӥськиз. Шаркан ёрослэсь социальной удыссэ но экономиказэ азинтонъя нимысьтыз программа дасямы. Али сое котыр ласянь улонэ пыӵатыны турттӥськом. - Маин данъясько туннэ шарканъёс, нош мар уродмытэ мылкыддэс? - Ёросамы азинскыны кутскиз производство удыс. Тросэз предприятиос куашкан калэ вуэмын ни вал: адямиос дырыз дыръя уждун ӧз басьтылэ, ужтэк кыльылӥзы. Котькуд предприятиея кылдэм югдурез нимаз-нимаз эскерим, шуг-секытысь потон ужрадъёс чаклам. 26 предприятие пӧлысь 18-эз пайда поттыса ужало ни, мукетъёсызлэн но азьлане вамышъёссы шӧдӥсько. Умоен пусйыны луоз керттӥськон фабрикаез, типографилэсь ужзэ, лэсьтӥськон удысэз но нюлэсэн герӟаськем ужъёсты. Ёросын туннэ поттӥськом кирпич, извастка, векчи из, чеберлыко вузъёс, колбаса, макарон, ческыт сиёнъёс, кудӟытӥсьтэм юонъёс но мукет. Валля арен ӵошатыса, вуз поттон миым трос поллы йылӥз. Осконмы вал ни, туэ шарканэз дотациос чотын улӥсь ёросъёс пӧлысь поттыны. Но кун казнае выт тыронын воштӥськонъёс луэмен, ёрос бюджет начаргес кылиз. Аппетитмес ӧжытак кулэстоно луиз ке но, малпам ужъёсмылэсь ум куштӥськиське, вань удысъёсты синйылтыса возиськом. Спортъя ёросмы республикая устоосыз пӧлы пыре ке, социальной удыс одӥгез тужгес но чутӥсез. Куке но Шаркан ёрос герӟамын вал Воткинск ёросэн. Культура учреждениос, школаос, медпунктъёс ӝутонлы саклык туж ӧжыт висъяськиз. Али та ужез интыысьтыз вырӟытыны малпаськом, трос лэсьтэмын ни выльдон-тупатъян ужъёс. Вуоно дышетскон арлы Шарканын усьтӥськоз выль школа юрт. Лэсьтӥськон уж мукет удысъёсъя но азинтӥське. Басьтом сюресъёсты асфальтэн шобыртонэз ик. Та ласянь ёросмы 24-тӥ интыын сылэ. Но югдур ӝоген воштӥськоз. Чакласькомы асфальт сюрес усьтыны Дэбесэ. Ортчоз со Зюзяетӥ котырскыса. Мукет сюресъёсты но тупатон-выльдон ужъёс мынозы. Шаркан музъем данъяське чебер инкуазен но. Дэбес пала мынонысь 16 сюрс гектар музъем Национальной парклы пӧрмытэмын. Сое уже ӟечгес кутон ласянь малпанъёсмы вань ни. Музъеммы узыр му вӧен но. Нефть поттӥсь вить огазеяськонъёс интыяськемын ёросамы. Соослэсь но луонлыкъёссэс уже кутон бордын ужаськом, но кылмы ӟечгес тупа "Му вӧй поттонъя удмурт огазеяськонэн", кивалтӥсез Николай Мизхайлович Граханцев. - Ӟеч кусыпъёс тупатӥды ни Ижевскысь Октябрь ёрос администрациен но. Кызьы таӵе малпанэ вуиды? - Командамылэн огкылысь луэмез но быгатыса ужамез пайдаё емышъёс сётэ. Шаркан ёрослэсь вань луонлыкъёссэ уже кутыса, азямы бадӟымесьгес ужпумъёс пуктӥм: утчаськоно палэнысь. Озьы потӥмы город вылэ. Вазиськимы Ижевскысь администрацие, нош отын ӵектӥзы Октябрь ёросэз. Ог-огмылы юрттон пумысен гожтӥмы огкыл. Но ёросмес узырмытон ужъёс таин гинэ ӧз йылпумъяське. Утчаськиськом. - Кунгож сьӧрысь "зӧк кисыослы" ӧд вазиськылэ-а? - Ёросамы палэнысь инвесторъёсты кыскон ми бордысь гинэ уг поты, та ужпумез эскерыны кулэ кун ёзъёсын. Дасяно на нимысьтыз бадӟым программа. Со сярысь малпаськытэк ум улӥське. Валля арын Америкае вуылӥ. Азям сылӥсь одӥгез ужпум вал ёросмес азинтонэ коньдон кыскон. Малпасько, быдэстонтэм ужпум ӧвӧл со. Оло, матысь дыре ик кутском ни та борды. - Трос нылпиё анай-атайёслэн улоназы озьы но луэ: куд-огеныз нылпиенызы соос данъясько, нош кудъёсыз ке тросгес сюлмаськон ваё. Ёросысь ваньзэ ик гурт хозяйствоосты нылпиос интые пуктоно ке, кыӵе дунъет сётысалды тӥ соослы? - Гурт хозяйствоос пӧлын вань пыд йылазы йыг-йыг сылӥсьёсыз но, лябъёсыз но. Нош сюлмаськиськод ваньмыз сярысь ик. Золъёссэ уката но азинтоно, нош лябъёссэ шуг- секытъёсысь поттоно. Котькуд хозяйстволэн быгатонлыкъёсыз но луонлыкъёсыз аслаз. Азязы кыӵе ке но ужпумъёс пуктыку, соосты лыдэ басьтытэк уг луы. Озьы азинскись хозяйствоосмы пумен-пумен йыло. Устоосыз пӧлы пыртыны луоз "Восход", "Луч", "Нива", "Родина" колхозъёсты. Ужазинлыксы тужгес но вылӥын "Эрик" колхозын. Пыд йылазы султӥзы ни нимазы люкиськем "Свобода", "Карсашур", "Гондырвай" колхозъёс. Суронъёс зол нюръясько дисциплина ласянь, азинлыксы но будэ. Секыт югдуре туннэ сюризы азьвыл подсобной хозяйствоос. Огъя басьтоно ке, кызё пала хозяйство 2000-тӥ арез азинсконъёсын йылпумъяз. Вераны кулэ на кык но ӝыны ар куспын 26 кивалтӥсьёс пӧлысь 17-ез воштӥськизы. - Ёросын котькуд кыкетӥез сямен гурт хозяйствоен кивалтӥсь - нылкышно. Пиосмуртъёсын ӵошатыса, соос шоры вазиськон но мукетгес, дыр? - Таӵе секыт ныпъетэз нылкышно пельпумъёс вылэ ӟеч улонысьтымы ӧм оше. Нош кинэн капчигес ужаны: пиосмурт кивалтӥсен яке нылкышно кивалтӥсен? Кин луэмзэс мон уг висъяськы, котькудӥныз ик ужаны тунсыко. Кулэ дыръяз кышномурт но пиосмурт сямзэ возьматыны быгатэ. Но соиз ини адямилэн сямыз бордысь потэ. Пӧртэмлыкез но вань. Азязы пуктэм ужпумъёсты нылкышно кивалтӥсьёс оскымон быдэсто, секытэн ке но сётске соослы та уж. Ӵошатоно ке, пиосмуртъёс сямзыя ӝабресэсьгес но сэзесьгес. Нош вазиськон ласянь нылкышноосын зэмзэ но небытгес вераськыны турттӥсько. - Александр Аркадьевич, таӵе йӧно воргоронлы нылкышноос синмаськытэк уг кылё, луоз? - Соиз сярысь асьсэлэсь юалэ ини. Асме мон ноку но ӧй лыдъялля ловеласэн. Кулэен но уг лыдъяськы. Мынам кузпалы вань, дышетским ми соин одӥг классын. Нылпиосы бадӟымесь ни. Нылы дышетске Челябинскысь Искусствоосъя академиын, нош пие нефтяник луыны малпа, дышетске университетын. - Нылкышноос сярысь мылкыддэс верады. Комсомолын азьветлӥсь вал. "Кавказская пленница" киноын сямен, кылиз на спорт сярысь юаны. - Спортлэн пӧртэм удысъёсыз котьку но монэ бордазы кыскылӥзы. Нюръяськонъя республикалэн чемпионэз вал. Ыбылӥськонъя, спорт амалэн ветлонъя, капчи атлетикая но ёрослэн чемпионэз луылӥ. Спортлэсь мон туннэ но уг куштӥськиськы, пырисько ёросысьтымы ветеранъёслэн сборной командаязы. - Кырӟаны но туж быгатӥськоды, шуо. - Кырӟаны быгатэмея асме нокызьы но анаеным ӧй ӵошатысал. Атаймылэн но куараез туж чебер. Кыкез ик братъёсы но, сетрае но кырӟало. Огазе люкаськиськом ке, шуом, анаймылэн вордӥськем нуналаз ик, пичи но веръятэк, кырӟан гур мытӥськомы ни. Кырӟанысь сямен ик, Александр Аркадьевич в кивалтон удысысь но шедьтӥз аслэсьтыз крезьгурзэ. Шаркан музъем инкуазьлэн чебереныз гинэ Швейцарилы медаз ӵоша, ёросысь калыклэн улон-вылонэз но трослы вылӥе мед ӝутӥськоз. Со сярысь ик сюлмаське Шаркан ёрос администрацилэн кивалтӥсез Александр Прохоров но. Лия МАЛЫХ. Кӧня йыр таза сюро пудозэ кулэстӥз Россия 1993 - 52,2 миллион йыр 1994 - 48,9 млн. 1995 - 43,3 млн. 1996 - 39,7 млн. 1997 - 35,1 млн. 1998 - 31,5 млн. 1999 - 28,5 млн. 2000 - 28,0 млн. Россия Федерациысь Госкомстатлэн ивортэмезъя. ДАЙДЖЕСТ Кӧня басьто кырӟась кизилиос? Таӵе дунэн концерт сётъяллям миым Поволжьеысь городъёсын (долларен вераса) кырӟась кизилиос: 2500 - Виктор Салтыков, Люба Успенская. 3000 - Алёна Апина, "Балаган лимитед", Сергей Крылов, Лика-стар. 3500 - Линда, Сергей Лемох, Валентина Толкунова. 4000 - Натали, "А-мега", "Блестящие", Вадим Казаченко, Сергей Минаев, Вилли Токарев, Симон Осиашвили, Ирина Салтыкова, Игорь Саруханов но Алёна Свиридова. 4500 - Таня Буланова, "Гости из будущего", "Демо", Людмила Зыкина, Алиса Мон, Гарик Сукачёв, "Русский размер". 5000 - Алексей Кортнев, Марина Хлебникова, Михаил Евдокимов, Мурат Насыров, Евгений Осин, Сергей Пенкин, Аркадий Укупник. 5500 - Лада Дэнс. 6000 - Лолита, Валерий Меладзе, Азиза, Татьяна Овсиенко, Ирина Понаровская, Валерий Сюткин, "Хи-Фи". 6500 - Андрей Губин, "Дюна", "Круг", Дмитрий Маликов, Владимир Пресняков, София Ротару. 7000 - Валерия, Леонид Агутин (Анжелика Варумен ӵош - 8000). Надежда Бабкина, Вахтанг Кикабидзе, Наташа Королёва, Борис Моисеев, Эдита Пьеха, Михаил Шуфутинский, "Стрелки". 8000 - Наталья Ветлицкая, Лев Лещенко, "Руки вверх!", Шура. 9000 - Олег Газманов, Земфира, Александр Малинин. 10000 - Юрий Антонов, Александр Буйнов, Лайма Вайкуле, "Иванушки", Иосиф Кобзон, Игорь Николаев, Кристина Орбакайте, "Любэ", "ДДТ", Александр Розенбаум. 15000 - Ирина Аллегрова, Алсу, Лариса Долина, "Машина времени". 20000 - Филипп Киркоров. 30000 - Алла Пугачёва. ("Комсомольская правда" - 19.01.2001; "Субботная газета" - 3.02.2001) Владимир Путин дурбасьтӥз Светлана Смирновалы Валлян Кремльын Россилэн Президентэз Владимир Путин пумиськиз Кун Думаысь "Калык депутат" огазеяськонэ пырись депутатъёсын. Отын вал асьмелэн быръем муртмы Светлана Смирнова но. Пумиськонэ лыктэмъёс эскеризы трос пӧртэм ужпумъёсты. Соос пӧлын - мукет кунъёслы пунэм тыронъёсты берыктонэн, банкъёслэсь ужзэс умоятонэн, нылпиослэсь тазалыксэс утёнэн герӟаськем юанъёс но мукет. Пумиськонын кыл сётэмын вал Кун Думаысь Нациослэн ужъёссыя комитетлэн тӧроезлэн воштӥсезлы С. К. Смирновалы. Со вераз национальной политикаез азинтон пумысен малпанъёссэ. Светлана Константиновна пусйиз, Россия выллем трос калыкъем государствоын одно ик лыдэ басьтоно нациослэсь кулэяськонъёссэс. Сотэк обществолы азьлане мыныны шуг луоз. Та верамен Владимир Путин соглаш кариськиз. Со пусйиз, асьме страна зэм ик туж аспӧртэмлыко но культура ласянь узыр кун луэ шуыса. Президентлэн но депутатъёслэн вераськонзы куинь час пала кыстӥськиз. Со мылкыдъёсты тодон но эскерон ужрадлы пӧрмиз. И. Лебедев. Лыдӟись вера малпанзэ Выль даурлы - вуж сӥзёнъёс Котькудӥз но адями, Выль аре выжыса, воштӥськонъёсты возьма. Туннэ ке умой улӥськомы, ӵуказе эшшо но умойгес улэм потэ. Озьы улонмылэн чеберскемезлы, кисыосмылэн зӧкамезлы оскыса выжиськомы Выль аре. Нош Выль дауре выжыку, со малпанъёслэн быдэсмонзылы уката оскем потэ. Дунне вылын котькудӥз кылдымтэ угось даурысь дауре вӧлмытыны, Ог кызь-куамын ар талэсь азьло мон ялан син азям пуктыны тыршисько вал дауре выжонэз, туж йӧспӧртэм луоз кожай. Рай шуонэ вамыштэм кадь потылӥз - котькытын шулдыръясько, пӧртэм кылын верасько, нокытын но ыбылэм-пуштылэм куараос уг кылӥсько. Кыӵе бен малпанъёсы мон вуи, Выль дауре выжыса? Азьло сямен ик музъем шармы шунды мумымы котыртӥ берга, инбамын кизилиос ворекъяло, вӧзтӥм калык огыр-бугыр ветлэ, завод-фабрикаосмы ужамъясько, гурт калык быгатэмезъя музъемез бугыръя. Депутатъёсмы, быръён кампания ортчыку, сыӵе ик чебересь кылъёсын верасько, ужась калыклэсь улонзэ чутрак умоятыны сӥзё. Бен, со, оло, озьы ик луысал, но асьмелэн монополистъёсмы алямын. Газ но нефть поттӥсьёс, электро но связь сётӥсьёс асьмемын кузёясько бере, соослэн юрттэмзыя депутат мандатъёс но осконтэм киосы сюрыло. Газет, журнал, радио-телевизор пыр нуналлы быдэ вылӥ верам монополистъёслэсь бӧрдэм куаразэс кылӥськомы: кыӵе соос начар уло! Государство уг юртты, выль оборудование уг сёты. Но государство кысконо скал ӧвӧл ук! Калыкен лэсьтэм ваньбурез киултӥзы, банкъёсын счётъёс усьязы, эшшо маке бӧрдо на. Ма, собере правительство но соослэсь гинэ кылзӥське ук: дун - тарифъёсты будэтоно - будэтом! Пӧртэм газетъёслэн бамъёсазы кытӥ но отӥ пумитаны луэ ужась калыклэсь кӧтӝожзэ но куректонзэ вераса гожтэм статьяосты. Ӵемысь пумитасько "Российская газетысь", вань "Удмурт дунне" газетын но. Сыӵе гожъямъёсты вылӥ кивалтӥсьёс, мон сямен, уг лыдӟыло, соин ик калыклэсь вань сюлэмшугъяськонзэ рос-прос тодыса уг вуо. Бен ужась калык но туэ книга-газет ӧжыт лыдӟе. Зэм, кылем аре асьмелы президент быръён компания мыныку, почта ящикъёсмес нуналлы быдэ дунтэк пӧртэм пумо газетъёсын тырмытъяллязы - лыдӟы но лыдӟы. Нош отын номерысь номераз кандидатъёсмы вылэ пож ву кисьтан гинэ вал, мар но кырсьсэ ӧз гожъялэ. Чиданы но ведь кулэ. Туж жаль, туэ кӧня ке лыдӟисьёссэ ыштӥз "Удмурт дунне". Но газетлэн дас кык сюрс оскымон эшъёсыз вань ай, та лыдпус азьланяз медаз ни кулэсмылы. Нош али лыдӟись ачиз вӧзы одӥг ке но удмурт газетэз яратӥсь будэтыны мед быгатоз вылэм. Газетын ужасьёс мед малпасалзы тунсыко статьяос, рубрикаос. Туэ тани 16 бамен газет поттыса умой вамыш лэсьтӥзы. Со кие кутымон, тунсыко пӧрме. Тужгес но мынэсьтым сюлэмме вырӟытӥз "Удмурт кизилиос" рубрика. Отысь асьмеос гажано удмурт адямиосмы сярысь тунсыко гожтэмъёсты лыдӟиськом. Оскисько, трос синмаськымон нылъёсмес но пиосмес адӟомы на газет бамысь. Озьы ик туж яратыса лыдӟи А. Ивановалэсь "Аръёс но адямиос" рубрика улын печатлам "Дышетӥсьлэсь тусбуйзэ дыр уг пужмерты" статьязэ. Мон Анна Ивановалэсь азьвыл аръёсы картэз Василий Иванов ("Советской Удмуртия" газетын кема аръёс ӵоже ужам адями) сярысь бадӟым очерксэ яратыса лыдӟи вал. Зӧк номерысь телепрограмма но радзэ шедьтӥз. Озьы-тазьы бергатонэз ӧвӧл ни, газет пушкысь программаез висъяське. Газет мед гожъясал тани мае но. Гурт калык городэ шер пота, но одӥг-ог больницае ветлыку но трамвайын дун куро. Маин пӧртэмесь ми городын улӥсьёслэсь, ми соосты ум сюдӥське шат? Возьыт ӧвӧл меда А. Салтыков эшлы? Учке али, кызьы ми Ижысь куноосты пумитаськомы: сылалэн-нянен, векчи виямзэ ум жаляське, ӟеч кылъёсмес но вератэк ум кельтӥське. Уд ке оскиське, вуылэ. Сюлэмшугъяськытэ на егитъёслэн азьпал улонзы. Адӟиськомы: школаез быдтэм беразы уноез дышетскыны пырыны уг быгато, ужан инты но уг шедьто. Соин валче сыӵе адямиос юон, калгон вылэ чӧлско, лушкаськыны кутско, пытсэт сьӧры шедё. Нош отчы сюрем адями чылкак сӧриське ук. Егитъёсын туж трос ужано, соосты дышетоно чеберзэ но умойзэ валаны, адямиез гажаны, йылолъёсмес, культурамес азинтыны. Та выль дауре ойдолэ ваньмы ваче ки кутӥськыса пыроме, улонмес кыл вылын гинэ ӧвӧл, уж вылын узырмытоме. Мед ӝужалозы асьме шаерын выль кизилиос. Н. Павлов. Кизнер посёлок. Удмуртия: выль даур Кытын меда улон байгес? Ортчем гужем вылтӥ одӥг тодмоен вераськеммы тодэ лыктэ: - Мар-о тӥ, дуннеос, ялан вашкала сямен ужаськоды на? Весь кыӵе ке сводкаос печатласькоды. Кинлы кулэ со йӧл кыскон но, мукетыз но? - Кӧня ке ар талэсь дугдӥм ни вал лыдпусъёсты сётъямысь, - шуисько эшелы. - Тодӥськод-а, лыдӟисьёс шугъяськыны кутскизы. Валаны, пе, уг ни луы кызьы ужаммес, нокинэн ӵошатыны. Соин ик берытским та амал борды. Тупаны но кулэ ук: тазьы кенешонмы куспын телефон жингыртӥз. Кӧня ке солэсь азьло газетамы сётӥмы вал Статистикая кун комитетлэсь материалзэ. Лыдӟисьмылэн куд-ог лыдпусъёсъя юанъёсыз кылдӥллям. Туннэ ми тодӥськом: сводкаос но, ӵошатонъёс но, валэктонъёс но газетмес басьтӥсьёслы кулэ. Уно лыдпус умой возьматэ кытчы мынэммес, кинлэсь кызьы тыршемзэ. Тани алигес редакция басьтӥз республикаысьтымы ёросъёслэн миым ужамзыя сводкаосты. Соос пӧлысь куд-огеныз тӥледыз тодматыны тыршом. Но али верам потэ быдэс рспубликая куд-ог выль лыдпусъёсты. Лэсьтӥськон удысысь соос. Кылем арын Удмуртиын йылаз-пумаз вуттэмын 227 сюрс квадратной метр улон интыос. 1999-тӥ арен ӵошатыса, со 4 процентлы уногес. Уже сётэмын 3259 муртлы 10 школа, Глазовын но Ижын 280 адямилы кык нылпи юрт, Грах ёросын 100 интыен клуб, шоркарамы эмъяськонъя но тазалыкез юнматонъя 240 койкаен комплекс. Пичи Пургалан усьтӥськиз нылпи ваён юрт. Можга городысь больницаын - хирургияя люкет. Газ гумыослэн кузьдалазы 169 километрлы йылӥз. Ар куспын вуттэмын 143 километр асфальт сюрес. Я, табере ойдолэ учком, кудаз меда ёросын улон каньылгес. Сое чакланы луэ котькуд адямилы бюджетысь коньдон висъямъя. Лыдпусъёс пӧртэмесь. Берло куинь ар ӵоже та ласянь азьпалан мынэ Воткинск ёрос. Солэсь азьло нырысетӥ интыын якшур- бодьяос вал. Район Бюджетысь кӧня манет висъямын (котькуд адямилы вераса) Элькунъя кыӵе интыын Предприятиосын ноябре шоро-куспо уждун 1994 2000 2000 Алнаш 1511 2642 24 2158 Балезино 1561 2475 28 699 Вавож 1550 2602 26 896 Вотка 5262 6978 1 958 Глаз 1788 2701 23 1333 Грах 1763 3363 12 1041 Дэбес 2364 3499 9 780 Завьял 2230 3525 8 869 Игра 5071 3640 7 1527 Камбарка 2019 3359 13 1286 Каракулино 4398 6626 2 1244 Кез 1734 2616 25 1190 Кизнер 1428 2290 30 889 Кияса 1918 3001 16 805 Красногорск 1655 2803 19 688 Пичи Пурга 1479 2317 29 844 Можга 1618 4154 4 811 Сарапул 3110 3977 5 928 Селта 1514 2714 21 906 Сюмси 1595 2707 22 901 Ува 1748 2948 17 833 Шаркан 2356 3291 14 1146 Юкаменск 1933 3075 15 770 Як.-Бодья 4642 5191 3 661 Яр 1434 2486 27 1012 Ижевск город 2273 3376 11 712 Сарапул город 2292 3977 6 2956 Воткинск город 2657 2821 18 1887 Глазов город 2649 3401 10 2461 Можга город 2072 2766 20 1678 Республикая 2357 3350 - Пусйыны кулэ. Ноябрьлы уждун та таблицаын возьматэ бадӟым но шоро-куспо предприятиосын, огазеяськонъёсын басьтэм коньдонэз. Социальной удысысь учреждениос лыдэ басьтэмын ӧвӧл. Малы шуоды, бускель ёросъёсын югдур туж висъяське? Ужпум бюджетэ вуись коньдон бордын. Кытын ке но (нырысь ик - му вӧен узыр районъёсын) кемалась уло ни ас доразы люкаськись выт (налог) чотын, мукет интыын бюджетсы быдэсак сямен пачылме Ижысь, республикалэн казнаысьтыз, вуэм коньдонэн. Тани Воткинск ёрос вылӥысь одӥг коньы но уг басьты, шуыны луоз. Отын тырме асьсэлэн доходзы. Кылем арын татын 165 миллион манет люказы. Нош Селталан, кылсярысь, ар куспын асьсэ кужымен 8,1 миллион манет гинэ поттӥзы (со ёрос бюджетлэн витьмос люкетэз). Валамон ни, татысь калыклы но пичигес юдэс шеде. Солэсь но начар суред Киясовоын. Татын асьсэлэн коньдонзы бюджетсылэсь 16,8 процентсэ гинэ пытсаны тырме. Пӧртэм ӧвӧл Юкаменскын. Яръёс но кыдёке кошкымтэ на. Ёрос бюджетлэн быдӟалаез пӧртэм мугъёсын герӟаськемын. Солэн улосвылаз интыяськем предприятиослэн кызьы ужамзы сяна, казнаез тырмытонын юн шӧдӥське интыысь кивалтӥсьёслэн, депутатъёслэн сюлмаськемзы. Быгатӥзы ке соос ватсаса доход басьтон луонлыкъёс шедьтыны но уже кутыны, расходъёсты кулэстыны элькун ёзъёсын огкыл тупатыны яке кудаз ке объектэ инвесторез кыскыны, бюджет чотын котькуд адямилы уногес юрттэт сётыны луоз. Тани алигес ваньмаз сямен ёросъёсын та арлы бюджетэз юнматонъя сессиос ортчо. Отчы пырисько элькун кивалтӥсьёс но: Кун Кенешлэн депутатъёсыз, коньдон ужпумъёсъя но музон министерствоосын ужасьёс, эскерись ёзъёсысь специалистъёс. Бюджетэз юнматон шуген мынэ. Куддыр лумбыт пукыса но депутатъёс огкылэ вуыны уг быгато. Ёросъёслы котыр ласянь юрттыны тырше Кун Кенешысь ялан ужась комиссилэн тӧроез Софья Широбокова. Солэн, кылсярысь, Уваысь депутатъёс азьын ӟырдыт вераськемез залын пукисьёслэсь синзэс усьтӥз, мур малпаськонэ вуттӥз. Азьланьын "Удмуртия: выль даур" сэрегамы ми малпаськом возьматыны республикаысьтымы общественной огазеяськонъёс куспын та дырлы кылдэм югдурез, ю тысь но мукет сиён-юон поттонысь азинсконъёсты но шуг-секытъёсты. Шумпотыса кылзом тӥлесьтыд но, гажано лыдӟисьёсмы, ӵектонъёстэс. И. Максимов. ЖУРНАЛИСТЪЁСЫН ПУМИСЬКОНЪЁС Городын синэ, гуртын будэ Кылем вторнике Правительствоын журналистъёсын пумиськиз шаерысьтымы калыкез уже интыянъя федеральной кун удыслэн Удмуртиысь департаментэзлэн кивалтӥсез Юрий БРУСЯНСКИЙ. Люкаськемъёсты со тодматӥз миым ужамзы но та ёзын туэ воштӥськонъёссы сярысь. Та удысын югдур оглом урод ӧвӧл. Умояз ужтэк кылемъёслы коньдон тырон, миым декабрез но туэ январез вератэк. Со герӟаськемын та ёзын выльдӥськонъёс ортчытэмен. Кылсярысь, воштэмын удыслы уксё висъян радлык. Табере со республикаямы вуоз Москваысь, федеральной бюджетысь гинэ. Оскон вань: берло кык толэзьлы со ӝоген лыктоз. Соин ӵош ик табере та удысын тыршисьёс кун ужасьёсын уз лыдъяське но одӥг куиньмосэз ужысь мозмытэмын. Матысь дыре калыкез уже интыян огсыр мынэ. Предприятиос но организациос тросгес ужасьёс куро ни. Озьы ке но, быдэс Россиен но бускель улосъёсын ӵошатыса, асьмелэн ужасьтэмъёслэн лыдзы одӥг но ӝыны поллы трос на. Соин ӵош ик тани мае пусйыны кулэ на. Матысь дыре производство каллен улӟыны кутскемен, городъёсын ужасьтэмъёс данаклы кулэсмизы. Озьы шуыны уг луы гурт сярысь. Отын калыклы уж сётон юн секытэн мынэ, уката ик толалтэ. Тани Ижын али огъя 0,8 процент ужасьтэмъёс, музон городъёсын - 1,5-3,5 процент ке, нош Красногорск районын - 11, Грах ёросын - 5,5 процент. Таӵегес ик югдур Алнаш, Каракулино, Кияса но мукет районъёсын. Департамент кылем гужем гуртысь 5,5 сюрс адямиослы огдырлы уж сётыны быгатӥз вал. Юрттӥз музъем, пудо, тылобурдо но техника басьтыны. Но со гужем вакытлы гинэ. Вылаз ик, та дыр туж вакчи. Гуртысь адямилы ӝыны арлэсь кема уж возьмано, гуртаз пуконо луэ. Табере кӧня ке лыдпусъёс верало. Миым та удысэ уж курыса 240 сюрслэсь уно адями вазиськиз, со пӧлысь 34 сюрсэз - дышетскисьёс. Валэктонъёс сётэмын 130 сюрс палаезлы но 110 сюрсэз ужтэк кылемен лыдъямын. Нош предприятиос но организациос 100 сюрс ёрос ужан интызэс ивортӥзы яке, валля арен ӵошатыса, со 15 процентлы тросгес. Туэ одӥг январьлы предприятиослы 3 сюрс пала ужасьёс кулэ вал, кылем арын сярысь, 10 процентлы уногес. Оглом пусйыса, миым 87 сюрс мурт уже интыямын, 1999-тӥ арен ӵошатыса, 20 процентлы ятыргес. Со пӧлысь 33 сюрс дышетскисьёслы но 15 сюрс арлыдоослы огдырлы уж сётэмын вал. Ватсаны кулэ, 16 сюрсэз дас нунал ӵоже уже интыямын но ужасьтэмъёс пӧлысь 5,5 сюрсэз ужбергатӥсьёс луизы. Улонэ пыӵа республикаысьтымы гурт калыклы уж сётон сярысь Правительстволэн постановлениез. Со быдэсъяськыны кутскиз валля арын. Соя данакезлы ужбергатонэ выжисьёслы льготаос учкемын. Со сяна, миым 2389 мурт юн куанер улӥсьёс квота амалэн уже интыямын. Соос пӧлысь 380-ез быдэ вуымтэос луо, 271-ез - ӧлексыос, 182-ез - пытсэт сьӧрысь потэмъёс но 344-ез - огназы но бадӟым семьяосын улӥсьёс. Шаерамы туэ 1 январьлы 22 сюрс ужтэк кылемъёс лыдъясько, валля арын сярысь 3,5 сюрслы ичигес но вань ужасьёс пӧлысь со 2,35 процент луэ, миым 2,73 процент вал. Г.Романов. Мишка - провор пороз Мордовиысь Кураево гуртысь фермерлэн Сюруть нимо скалэз алигес вань калыкез паймытэм. Со куинь кунян ваем - 25 кило секталаем оштрак но быдэн 20 килоем месъёс. Ошпилы Костя ним сётӥзы, таоссэ Валька но Галька шуыса нимазы. Анайзы юнме шорысь Сюруть ӧз луы, вылды (мордва кылын со тӥяськем сюр шуэм луэ). Со сюрзэ ачиз ик чигем, лекаськыны, пе, яратэ вал. Та учыр бере ветеринаръёс мукет скалъёссэс но эскеризы. Эшшо куинез пудозы быдэн кык кунян ваёно, пе. Та ивор быдэс улосэ вӧлмиз. Гуртэ олокытысь но зоотехникъёс вуылыны кутскизы. Соку гинэ скал кыскисьёс тодазы ваизы куиньмоослэсь атайзэс - Мишка ошез. Утчаны кутскизы. Нош со ас интыяз быжыныз сэзъяса сылэ, турын сыске. Азьвыл мукет ошъёсын со скалъёс понна ӵем гинэ жугиськылӥз. Табере порозэз егит "кенъёс" доры лэзёно кариськизы - котьма, пе, кар, ум люкетэ. Мишкаез фермае ар талэсь азьвыл ваизы вал Саранскысь, выль выжы пудо уськытон огазеяськонысь. Со но, мукет скалъёс сямен ик, голштинофризской шуон выжыысь, тӧдьыен-гордалэс тусо. Мукет скалъёсты но со ик кыкто ваёно карем, лэся. Зэмзэ но, герой! Табере быдэс фермалэн осконэз Мишкалы гинэ. Сое вешало, гажало, ческытгес но сюдо. А.ВЕЛИГЖАНИНА. Нош ик кыкетӥ инты Миым ньылетӥ кварталэ ужамез понна Россиысь потребительской кооперациысь предприятиос пӧлын Удмуртпотребсоюз нош ик кыкетӥ интые потӥз. Соин валче Удмурт Республикалэн Президентэз Александр Волков республикаысьтымы кооператоръёслы бадӟым вормонэн ӟечкылан ыстӥз. Отын, кылсярысь, шуэмын тӥ ялан огсыр ужаськоды но данды пумен паськыт вӧлме. Со басьтэмын котькуд ужасьтылэн лулысь-сюлмысь но быгатыса тыршеменыз. Александр Волков шаерысьтымы вань кооператоръёслы мылкыд кариз тазалык, умойзэ но выль азинсконъёс басьтыны. Удмурт Республикаысь Президентлэн но Правительстволэн пресс-службаез. ОСКОН Малы коӵыш ӧз шуы "мяу!" Шуд ӧй лыктысал, шудтэм учыр ке ӧй луысал. Сыӵе веранзы вань ӟучъёслэн. Паймоно кадь, но сое малы ке ӵем кылоно луэ. Тани Пижилысь психоневрологической интернатлэсь выль юртсэ сӥё-дано усьтыку но асьсэос кивалтӥсьёс озьы пусйизы. Нош учыр таӵе вал. Кӧня ке ар талэсь азьвыл ӝуаз одӥгезлэн кӧлан корпуслэн липетэз. 1956-тӥ арысен сылӥсь (та аре усьтӥськиз Пижилын интернат) ланьырскем баракез тупатъяны изъянлы гинэ берытскысал. Калыкез улон-вылонын утёнъя министерствоын тае валазы, выль юрт ӝутыны малпазы. Но дас ар талэсь азьвыл кыӵе вакытъёс вал, лыдӟисьёсмы ӟеч тодо ай: соин ик правительство инвалидъёслы вань сюлмысь юрттэмзы потыса но, номыр карыны ӧз быгаты, ужъёс йылпумъяськизы корпуслы фундамент кисьтонэн. Но та вакыт ӵоже Инкуазь адямиосты жалясьгес ӧз луы - ӧлексыослэн лыдзы кулэсмыны ӧз ик малпалля. Соос бен ноку но ӧз ӝожтӥськылэ, озьы ик улӥзы одӥг палатаын быдэн дас кык муртэн. "Увастроитель" огазеяськонысь лэсьтӥськисьёс син куспын (берло ар но ӝыны ӵоже) синмаськымон юрт ӝутӥзы. НО табере со кылёз на тодэ ваёнъёсы гинэ. Правительство шедьтӥз луонлык кутскем ужъёсты йылпумъяны. Уд оске, но ваньмыз санаторийёс но соин ӵошатскыны уз быгатэ. Куинь этажо юртын вӧл-вӧл шулдыр палатаос. Ӵыж выль, чебер шобыртэм кроватьёс, ворекъясь ковёръёс возьмало ни кузёооссэс. Табере палатаын куинь-вить кузя гинэ улозы. Нош шутэтскон дыръязы соос холлын телевизор учкыны, шудыны быгатозы. - Кызьы потытэк чидало на? - юаськом медсестралэсь Фаина Широбоковалэсь. - Нуналлы быдэ курисько, куд-огез котыръёссэ но вайылыса сэрегъёсы ватылӥллям тани. Я, кык нунал улыса выжозы ни. Выль юртэ выжемез возьмало асьсэос но эмъясьёс. Туала куронъёсъя инъям кабинетъёс трослы капчитозы соослэсь ужзэс. Процедураос лэсьтон азьын ву но пӧсятъяса курадӟонэз уз луы - табере со дасяк гумыысь бызёз. Зэм, тэк пукыны уз ик ваньме, дыр. Интернатын куинь сю висись мурт улэ. Ваньзэс эмъя куинь гинэ врач. Нош милосердиея (кызьы берыктоно сое: жалян?) отделение вуылыса татысь медсестраос но санитаркаос шоры вӧсяськем потыны кутске. Инмарен но, семьяосынызы куштэм нюж кыстаськись ӧлексыос жальмыт шоразы учко, лябӟем киосынызы котыразы кыстӥсько. Та сярысь гожтыны гинэ но секыт, нош соос юзырскытэк-маратэк, котькудзэ кунулто, Андрюшенька-Катюшенька шуыса шоразы вазьыло. Ӧжыт ке но мае ке валаны быгатӥсьёсыз утялтӥсьёссылы тау каремзэс возьматыны тыршыса кырӟало. Вань пӧлазы асьсэлэн солистъёссы но. Тани Сергей Кощеев солэсь нимзэ ялытэк кырӟаны но уг кутскы. Солы кырӟаны юрттэ Катерина. Та кышномуртлы инмар визьзэ ке сётыны ӧз вунэтысал, со кырӟась луысал, дыр. Таӵеоссэ психолог Лия Савельевна Кунавина шудогесэн лыдъя, угось ӝыныезлэсь тросэз та отделениын улӥсьёс асьсэлэсь ваньзэс-ӧвӧлзэс но уг шӧдыло (олигофренъёс). Соос уг валало, кытын ке та палаталэсь ӟечгес дунне вань на, нош толэзь-кык улыса тулыс вуоз шуыса. Зэм, туннэ тани Лия Савельевна висисьёслы возьматыны пучы вай ваиз. Тордыны кутскем бычыосыз борды йӧтскылыса кызь тямыс ар ини валесысьтыз султылыны быгатӥсьтэм Сергей шуиз: небыт. Бен, солы кельше небыт пучы, небыт валес, небыт кыл (мукет мылкыдъёс уго быдэсмонтэм). Татын ужасьёс сое валало, висись муртлэсь кайгузэ люкыны тыршо. Но интернатлэн директорез Василий Николаевич Мартынов ужасьёссэ ушъяса шугъяське но: посёлокын ӧвӧл йӧназ школа, клуб, соин адямиос кема уг ӝегало. Правительстволы инвалидъёс сярысь сюлмаськемез понна тау карыса, Василий Николаевич куриз посёлокын улӥсьёслы но тросгес саклык висъяны. ...Вашкала сямъя выль корка нырысь коӵышез лэзизы. Валтӥзы-а, шуод. Пурысь Манилэн уго нокызьы но та шулдыр корка пыремез уг поты вал, туж ӵабъяськиз. Шӧдӥсь сюлэмыз. Аслад гур вылэд шакресгес ке но, шунытгес уго. Медам кылды асьмелы огмылы но со чебер юртэ вуыны. З.ВАХРУШЕВА. Туспуктэмъёсыз А.Горбуновлэн. Нуналыз - золтэм си Вань дано нимъёс, мар гинэ луэ, басьтэмын ни кадь... Филология наукаосъя доктор, Педагогикая калык куспо академиысь академик, республикаысьтымы культура но наука удысын дано ужась, кун премилэн лауреатэз... Кылбурчи, публицист, литературовед, Россиысь Писательёслэн огазеяськоназы кутэм адями. Поттӥз "Выжыосы", "Шунды но гудыри", "Аръёсын ваче син" но мукет кылбур книгаос, нылпиослы бичетъёс. Литературамылэсь выжыоссэ, пушъемзэ йӧн-йӧн эскерись монографиосыз вань. Асьме доры вуттӥз удмурт эпосэз. Трос кужымзэ сётӥз ни Григорий Верещагинэз усьтонлы, Мултан ужлэсь туннэ нуналозь шуккиськись куараоссэ эскеронлы... Нуналыз - золтэм си кадь: огез, мукетыз уж борды кутске - ваньмыз жингыртыса кошке. Вормонтэм ужъёсыз ӝутыны юрттэ пезьгыт, юн сямыз но мугорзэ кыдатэмез, йогъёсын эшъяськемез. Визьнодэзъя - аксакал, тусызъя - казак воргорон. Нокин солы 65 арес уз сёты, ӵапак сомында тырме ке но таяз кӧс нуналэ. Улоназ эшшо но тросгес жингыртӥсь нуналъёс сӥзьыса, Василий Михайловичез ӟечкыласьком та покчи юбилееныз. Газетмылэсь эшсэ "удмурт кизилиос" пӧлы пыртӥм бере, со возъетэз усьтом матысь нуналъёсы - лыдӟелэ. Василий Михайлович Ванюшев. Туспуктэмез М. Менладшинлэн. Музъеме улэпкын согизы Йырвандӥсьёс ӧз но малпаллялэ, соосын курадӟытэм нылъёс музъем улысь улэпкын потозы но курадӟытӥсьёссэс решётка сьӧры пуктозы шуыса. ... Син азе ик пуктыны секыт, кызьы ӟеч семьяосысь кык начаресь гинэ нылъёс сокем курадӟонэз чидазы, куке соосты гуртазы келяны мылкыд каризы пиос. Со ӝытэ Ульяновскысь 17 аресъем Олеся но Самараысь куное лыктэм Лада бер ӝытозь пукизы, олома сярысь но вераськизы. Кафеысь потыса, соос "Ниваез", син шоры йӧтымон пияшез адӟизы. Со нылашъёслы киыныз шонтӥз но келяны ӵектӥз. Олесялы со нырысь осконтэм потӥз, но Ладалы Алексей Муртаков кельшиз - озьы ассэ нимаз "Нивалэн" кузёез. Вырӟизы. Сюрес вылысен эшшо одӥг пияш пуксиз на, водительлэн эшез Максим Ласточкин. Егит пиос нылъёслы анекдотъёс мадизы, ваньмыз умой вал кадь... Малпамтэ шорысь "Нива" мукет пала кожиз. "Ми пыдын гинэ кошком!" - кышкатскиз Олеся, но солэсь кесяськемзэ кылзӥсь ӧз луы ни - "Нива" нылъёсты нуиз адэ... Ульяновсклэн ышыг интыяз пиос (табере соос куинь кузя вал ини) тэльмырись нылъёсты куштӥськем юртэ пыртӥзы но быдэс уй эриктэмазы. Нош ӵукна соосты быдтон вылысь тэле поттӥзы. Собере пиослэн "шулдыръяськемзы" но потӥз, Олесялы лопата мычизы. "Кылӥськод-а, аслыд гу копа ай", - мыскылляськизы соос кужымзэ ыштыны кутскем Олесяен. Гу дась вал. Йыраз лопатаен куинь пол шуккизы но шӧй дась, со гуэ усиз. Чыртыяз отверткаен бышкалтӥзы, нош Муртаков лек интыяз кирпичен шуккиз на. Гуэз сюен но улваен шобыртӥзы. "Адямиез ватыса", пиос жадиллям, шӧдске. Ладаен дыртоно кариськизы. Ӟенеликъёсын йыраз тышказы, отверткаен чыртыяз дас кык пол бышкалтӥзы, мугорзэ, кулэмын ни шуыса, вукыреме сэрпалтӥзы но кошкизы. ... Врачъёслэн верамзыя, нылъёслы инмар юрттӥз, дыр. Сьӧсьёс кошкем бере час ортчыса, Олесялэн йырсазьыз берытскиз, гуысь потыса, вирен пыласькыса, автотрассаозь нюжтӥськыса мынӥз но сюрес шоры выдӥз. "Милемыз виизы!" - озьы гинэ вераны быгатӥз дугдэм водительлы. Собере кинологъёс кык час ӵоже Ладаез утчазы на. Реанимацие соку кулэм муртэ кадь вуттӥзы. Номыр шоры учкытэк, со но улэп кылиз. Но йыртэмасьёс ӝоген кутэмын вал. Табере Алексей Муртаков но Дмитрий Вахрунин пытсэт сьӧры пуктэмын 18 арлы, Максим Ласточкинлы сётӥзы 16 ар. Л. Велигжанина. Лушкалозы памятниктэ но Памятникъёсты но шайгуосты лушкан учыръёслы уг паймо ни. Нош мае ӵемгес лушкало? Маршаллэсь мундирзэ. 1991-тӥ арын августэ, Ахромеев маршалэз ватэмзы бере, кӧня ке нунал ортчыса, "шай гудӥсьёс" лушказы мундирзэ, бӧрысь сое 50 долларен вузазы. Бронзалэсь бюстэз. 1990-тӥ арын Санкт-Петербургысь одӥгысьтыз шайвылысь нуыны туртто вал Сергей Филипповлэсь бюстсэ. Бронзаен лаврлэсь вайёссэ. Москвалэн шорысьтыз ик дуно корт лушкасьёс вутскиллям Генштаблэн юрт вылысьтыз Жуков маршаллэн барельефаз но мемориал пулысь лушкаллям бронзаен лаврлэсь вайёссэ. Бронзалэсь клюшкаез. Москваысь Кунцево шайвылысь хоккеистлэн Всеволод Бобровлэн памятникысьтыз нуиллям бронзалэсь клюшкаез. Ассэ памятникез. Москваысь Отрадное ёросын лушкамын Саманта Смитлэн памятникез! Со пуктэмын вал, Россия но Америка куспын эшъяськонэз возьматыса. Лыдпусъёслэсь уд ватскы Бен, соослэсь нокытчы уд ватскы. Соос улонмылэсь мыддорин палзэ шонер но лэчыт возьмато. Тани, кылсярысь, война ке ӧй луысал, асмьеос мӧйы адямиосмес кытчы карыны ёрмысалмы ни. Берло дыре нуныос ӧжыт ке но вордско, татын эмъюмъёсты кутон но, абортъёс но уг люкето. Асьме дорын устоез лэсьтӥськон материал луэ водка. Ваньмыз со бордын возиське - экономика, семья, улон. Али Россиын вань улӥсьёс пӧлын 0-19 аресъемъёс басьто 26,9 процентсэ, 20-59 аресъемъёс - 55 процент, 60 но солэсь арлыдоосыз - 18,1 процент. 1939-тӥ арын 100 ужась муртлы 16,4 ужасьтэм адями ке лыдъяське вал, 1989-тӥ арын со вал 32,5, 1999-тӥ арын - 35,6, нош 2021-тӥ арозь та лыдпус вуоз 50-52-озь. Адямиослэн пересьмонзы Россиез гинэ ӧвӧл, мукет странаосты но сюлэмшугъяськытэ. Висъяны луэ Япониез гинэ. Отын туж ӧжыт нуныос вордско, со понна кема уло. Асьме дорын но мӧйымонъя лыдпусъёс туж вылӥын луысалзы. Но татын "юрттӥз" Кыкетӥ мировой война. Историямы со шимес вакыт ке но вал, но со ик юрттӥз ужась калык вылэ ныпъетэз зӥбонлэсь утиськыны. Али пенсие потӥсьёслэн лыдзы ӧжыт - 1939-тӥ�1945-тӥ аръёсы вордскемъёс, война нылпиос. Но собере калык туж ӝог пересьмыны кутскоз, улон-вылонамы туж бадӟымесь шуг-секытъёс кылдытоз. Меӵак вераны луэ, нылкышноослэсь пенсие потон арлыдзэс будэтозы шуыса. (Нокыӵе экономика но уз чида егит, ужасьтэм, сомында анайёслэн лыдзылэсь будэмзэс). Берло дыре туж ӧжыт кылизы ни сыӵе странаос, кытын нылкышноос пенсие кошко 55 аресысен. Россиын улӥ воргоронъёс соин кык полэс шуккетэз адӟоно луо. Нырысь ик, соос пенсие, нылкышноос сярысь, бергес кошко. Кыкетӥез, Пенсиосъя фондысь со коньдон басьтыса но уг вуы, малы ке шуоно, котькудӥз кыкетӥез пенсие потон арлыдозь улыса уг вуы. Азинскем кунъёсын 98 процентэз воргоронъёс пенсиозь уло. Воргоронъёслэсь кулонзэс "матэктонын" туж бадӟым инты басьтэ аракы юон. Горбачёв выльдӥськон ортчытон вакытэ юонлы пумит ужрадъёс кутэмын вал. Юонъя указ ужаз ог вить ар. Со вакытэ кулон чутрак кулэсмиз, но со дыре ик аракы пӧзьтӥсьёслэн, пӧртэм суретъёсты юисьёслэн лыдзы йылӥз. Кызьы ини берло тодмо луиз, уно миллион адямиос кулытэк кылизы вакчи дырлы гинэ. Азьвыл юытэк кельтэм стакан водказэ со 90-тӥ аръёслэн кутсконазы тырмытӥз дунтэм спиртэн. Со вакытэ уно мурт югыт дуннеен люкиськоно луиз. Озьыен, со кампания шӧдскымон пайда ӧз сёты. Зэм, со аръёсы пиналъёс ӧжытак тросгес вордскизы. Нылкышноос картъёссылы, соос уз ни юэ яке ичигес юозы шуыса, оскизы, луоз. Огъя вераса, улон но нюръяськон азьланьтӥське. Оскон гинэ медаз кысы. Л.СТОЛЯРЕНКО. ТАЗАЛЫК Лекъяськонлэн падиез ӧвӧл Котькуд адямилэн йыраз дырын-дырын таӵе юанъёс лыктыло. Мар со сыӵе улон? Ачиз адями гинэ-а солы кузё луэ? Яке котькудӥзлэн дунне вылэ вордӥськемез но отысь кошконэз инмарлэн бадӟым книгаяз пусъемын? Огпол секыт югдуре сюрыса, та юанъёслы валэктонъёс утчай, пӧртэм книгаосты бугыръяй. Маин ке соглаш луи, маин ке - ӧй. Озьы ке но, со лыдӟемъёсысь таӵе валанэн потӥ: котькыӵе учыре сюрыку, отысь потыны быгатоно. Озьы тазалыклы но умойгес. Зэмзэ ик, кинлэн бен кемагес улэмез уг поты. Но малы ке куд-огезлы улыны туж вакчи дыр сётӥське, мукетъёсызлы - 100 арлэсь но трос. Та ужпумъёс бордын али нимысьтыз институтъёс ужало. Пересьмонэз эскерись учёнойёс (геронтологъёс) та пумысен уно эскеронъёс, йылпумъянъёс лэсьтӥзы ни. Тани кызьы лыдъя Москваысь академик Д.Чеботарёв: "Улонлэн кузьдалаез генъёсын герӟаськемын. Соос гинэ котькуд адямилы улон программа кылдыто. Отчы пыро анай- атайёслэн, соослэн ӵыжы-выжыоссылэн тазалыксы но висёнъёссы. Адямилы генъёсын тупатэмын ни ке вакчи улыны, котькызьы тыршы - кемагес уд улы. Со вылэ ватсасько на улонлэн пӧртэм шуг-секытъёсыз. Туж ӧжытэзлы удалтэ инкуазен тупатэм улон мертэтсэ 5- 10 арлы кузьгес карыны". Та верамъя, адямилы номыр шат ӧвӧл ни кароно кема улон понна? Малпасько, генъёсын гинэ ваньзэ уд валэкты. Кемалась тодмо ини: 20-25 аресказ вуыса, адями будэмысь дугдэ. Кыӵе тазалыкен пумита, пе, со та аръёссэ, сыӵе тазалыкен ик ортчытоз пересьмонзэ. Азербайджанысь Ширали Муслимов 168 аресозь улӥз. Кышномуртъёс пӧлын озьы ик кема улӥз Азербайджанысь Афруз Гасанова - 143 аресозь. Кема улӥсь адямиос Азербайджанын, мукет интыосын сярысь, вить поллы тросгес. Малы? Оло, гурезё Кавказысь калыклы шунам лымы вуэз юон юрттэ? Со сярысь малпанъёссэ шарая медицина наукаосъя доктор Е.Коваленко. Арлыдо адямиослы, пе, сыӵе вуэз юон туж пайдаё луэ. Лымы ву клеткаосты куасьмемлэсь уте. Озьыен, кема улонлэн огез мугез луэ шонер сиськон-юон. Азербайджанын улӥсьёс сиён пӧранъёсазы туж валаса куто 12 пумо пала турынъёсты. Мукет учёнойёслэн верамзыя, улонэз кузьгес, пе, каре одӥг интыын улон но эсэпсэ валаса, мугорез зол курадӟытытэк ужан. Сямъёс сярысь но малпаськоно: дыртытэк, каллен улоно. Оло, зэмзэ но, вань та верамъёс гурезё улосъёсысь адямиослы тупало. Учке ай, кӧня соос, даурзэс ортчем адямиос, Кавказын уло (басьтэмын 100 сюрс адями пӧлысь): Армениын - 24,3 адями, Грузиын - 39,3, Азербайджанын - 48,3, Нагорной Карабахын - 100,0. Огвакыт шуылӥзы: кин инкуазен эшъяське, со висёнъёстэк но кемагес улэ. Соин ик, пе, бадӟым городъёсын кема улӥсьёс туж ӧжыт. Но туала лыдпусъёс-эскеронъёс со верамъёслы пумит луо. Зэм, куд-ог улосъёсын, шуом Кавказын ик, малы ке адямилэн тазалыкезлы инкуазь пайда вае, нош мукетъёсаз улосъёсын - уг. Тани басьтомы асьме шаермес ик: гуртын улӥсьёс, кылсярысь, чылкыт омырен ке но шокало, берло аръёсы улонысь вазь кошко. Воргоронъёслэн улон дырзы, шорлыдын вераса, 57 аресозь гинэ вуиз ни. 1990-тӥ арысен кутскыса, воргоронъёслэн улонзы 9,6 процентлы кулэсмиз, нылкышноослэн - 4,4 процентлы. Ӵошатон вылысь верано ке, США-ын но Австриын адямилэн улонэз, шорлыдын вераса, 76 аресозь кыстӥське. Маин со герӟаськемын? Секыт ужен, аракы юонэн, висёнъёсын яке огъя улонмылэн уродмеменыз? Урод улон условиос адямилэсь тазалыксэ шукко ик, вылды. Но татын но куд-ог юанъёс кылдо. Курадӟыса шат уло Япониын, Англиын? Озьы ке но, та кунъёсын даурзэс ортчем муртъёс озьы ик туж ӧжыт: 100 сюрс улӥсь пӧлын 0,1-0,7 адями гинэ сюрылэ. Кыӵе мугъёсын сэрен бен вакчиёме на адямилэн улонэз? Нокызьы палэнтыны уг луы висёнъёсты, тужгес но паласькисьёссэ. 60-тӥ аръёсы Совето Союзын тросэз висёнъёс быдтэмын ни ке вал, али соос выль кужымен аляло. Макем зол вӧлме Удмуртиын ВИЧ- инфекция нуналлы быдэ паймыса кылзӥськом. ВИЧ-инфекциез туннэ 376 мурт нулло, СПИД- эн 5 мурт висе. Нош тодэ ваёно ке, куинь ар талэсь та эзель асьме дорын ӧй на вал. Мукетыз висёнэн - В гепатитэн - туннэ Россиын котькуд 20-тӥез адями курадӟе. Таиз висён но ВИЧ-инфекция сямен ик палаське: вир но нылкышнолэн-воргоронлэн матысь кусыпъёссы пыр. Алясь висёнъёс сяна, туннэ туж тросэз курадӟо бронхиальной астмаен, аллергиен, кӧтпуш яраосын, сюлэм, йыр висёнъёсын. Таосыз висёнъёс кытысь меда пото? Врачъёслэн лыдъямзыя, соослы сюрес, пе, усьто пӧртэм стресс шуонъёс, мукет сямен вераса, мылкыдэз уродмытӥсь учыръёс. Сыӵе дыръя адямилэн мугор пушказ вань пыдло ватэм висёнъёсыз вырӟо. Вашкала адямиос, урод мылкыдзылэсь куштӥськон вылысь, кытчы ке но дыбыр бызьыло яке пегӟыло вылэм. Соин ик соос ӧжыт висьылӥллям. Туала общество адямиез дышетэ пушказ люкаськем мылкыдзэ ватыса яке ялан чакласькыса улыны. Зӥбыса возем мылкыд кыре уг ке поты, уг ке ӧръяськы, со мугор пушкысь кыӵе ке но люкетсэ шукке (йырез, мусэз, сюлэмез, пекляез но мукетъёссэ). Басьтомы стресс шуонэн герӟаськем кык учырез: кышканэз но вожпотонэз. Кышканлэн синъёсыз бадӟымесь, шуо калыкын. Но мар меда луэ со дыръя адями пушкын? Зол кышкатэм адямилэн вир пушказ туж трос адреналин люкаське. Соин сэрен вирсэръёс сюбегало. Адями кынмыны кутске. Нокыӵе сиён уг мыны. Сыӵе дыръя сиськыны турттоно ӧвӧл, угось ӝуш ужамысь дугдэ. Ӝуше, сюлэ люкаськем сиён сисьмыны кутске. Нош микробъёслы со ик кулэ - соос туж ӝог вӧлмыны кутско, ӝушез "сиё". Адями висьыны кутске. Нош мар луэ лек вожпотон дыръя? Синъёс гордэкто, вирсэръёс паськытало но ӵем дыръя пилиськыло. Вирын озьы ик туж трос адреналин возиське. Вир "пӧзе". Муслэн клеткаосыз сутско, ужамысь дугдо, сэп (желч) уг поты. Соин сэрен билирубин но холестерин вирын уг сурасько. Пери шуккылон учыръёс но инфаркт шуонъёс лек вожпотонэн герӟаськемын. Вожпотонэн адями ӵем ке курадӟе, ӟеч адӟемысь но дугдэ. Лек йыркур дыръя клеткаослы шоканы туж секыт йӧтэ. Озьы бере, сиськонлэн пайдаез нош ик уг луы. Зол кышкам бере сямен ик лек вожпотон пӧртэм котпуш висёнъёсы вуттэ. Сыӵе странаосын, кытын адями ялан кышкаса улэ ужтэк но улон интытэк кылемезлэсь, отын адямилэн улонэз кема уг кыстӥськы. Но котьку-а меда бадӟым куректон адямилэсь тазалыксэ уродмытэ? Тани Быдӟым Отечественной война дыръя, куке котькуд адями берло чиданэз борды возиськыса улӥз, куке котькуд семьяын кыӵе ке но кайгу вал, адямиос ӧжыт висьылӥзы. Нош война бере пӧртэм висёнъёс алязы. Озьы, лэся, луэ: бадӟым ужъёс быдэсмо ке, адями висёнъёслы сётске. Пусйытэк уг луы сое но, адямилэсь улонзэ огвыллем улон но быдтэ. Мукет сямен вераса, номыр понна нюръяськисьтэм адями аслаз бездыт улэменыз ассэ ачиз быдтэ. Озьыен, гань-гань улон но тазалыкез уг юнматы. Котькуд адямилы улон одӥг пол сётӥське. Соин ик быгатоно сое дунъяны, утьыны. Нош асьмеос тазалыкмес утьыны ум но турттӥське, ум но дышетӥське. 20-25 ар талэсь азьло Франциын, Россиын сярысь, кулон учыръёс тросгес вылӥллям. Табере сыӵе учыръёсты соос 73 процентозь кулэстӥллям. Кызьы озьы? Татын чутрак басьтӥськиллям тазалыко улон понна: куштӥськиллям тамак кысконлэсь, юнгес чакланы кутскиллям сиськонзэс, сиёнысьтызы кулэстӥллям сакырез но сылалэз, зол басьтӥськиллям инкуазез утён борды. Пумен таӵе ик ужрадъёс борды мукет кунъёс но выжо ини. Туннэ 24 кунъёсвалче огазеяськыса ортчытъяло ини тазалыкез юнматонлы сӥзем ужрадъёс. Сыӵе огазеяськонэ Россия но пыре. Озьы ке но, асьме дорын сыӵе ужъёслэн пайдазы уг на кадь шӧдӥськы. Америкаын, кылсярысь, тазалыко улонлы туж бадӟым инты висъяло. Пиналъёслы пичи дырысенызы ик таӵе дунъетъёсты пыӵато: нуналлы быдэ спортэн вырид ке, 3-5 арлы кемагес улод, аракы ӧд ке трос юы, улонэд эшшшо 5-10 арлы йылоз, нош 40 арес бере чаклано секталадэ - мугорыд 2 килограммлы секытгес ке, улонэд 1 арлы вакчиялоз. Кузпалъяськоно дыраз. 25 аресэз бере кузпалъяськымтэ мурт котькуд 10 ар улонысьтыз быдэн 1 арзэ ыштэ. Оло осконо, оло ӧвӧл учёнойёслэн таӵе лыдпусъёссылы, одӥгез валамон: американецъёслэн асваланазы тазалыко улон понна нюръяськон туннэ валтӥсь инты басьтэ. Тазалыкез утёнъя всемирной организацилэн уставаз гожтэмын: "Тазалык - со висёнъёстэк но шуккиськонъёстэк гинэ улон ӧвӧл, со котькуд адямилэсь кужымзэ, лулпушсэ утён но солэсь улонзэ умоятон". Нош тодмо ӟуч терапевт Т.Захарьин тазьы шуэм: "Тазалыко луэмед потэ ке, вошты югдурдэ, вошты уждэ, вошты улон сямъёстэ. Нош ваньзэ сое воштыны уд ке быгатӥськы, зол эн куректы". Озьыен, адямилэн тазалыкез адями киын. Т.БАННИКОВА. Тодматскон сэрег Аб. 421. Удмурт пиосмурт, 35 арес, вылӥ образованиен улӥськон Игра ёросын. Улон интылы но коньдонлы уг ёрмиськы. Тодматскысал оскымон, умой сямо нылкышноен, пумит ӧвӧл, нылпиосыз ке вань. Аб. 422. Удмурт пиосмурт, 39/167/62. Юонэн уг эшъяськы, улӥсько городын. Служить карыса, пенсие потӥ, ужасько на заводын. Коньдон пӧлын уг пыласькиськы, но ёрмыса уг улӥськы. Аслам квартирае вань шулдыр но капчи мылкыдо, яратӥсько кырӟаны. Тодматскысал 30-35 аресъем нылмуртэн. Гожтоно таӵе адресъя: 426050, г. Ижевск-50, а/я 5333. Чур бугор Та вакытэ Россиын но Удмуртиын нуналлы быдэ вордско дасо газетъёс но журналъёс, сомындаезгес ик чалмытак ышо-быро. Учкелэ ай городысь киоскез - мар но отын ӧвӧл! Гуртын югдур секытгес. Радио ӵажыртэ, телевизор антенна някырске, газет-журнал басьтыны мани-мани ӧвӧл. Ма кароно? "Удмурт дунне", ас лыдӟисьёссэ гажаса, мылкыд кариз пӧртэм газет-журнал чуръёслэсь аспӧртэм бугор биньыны. Отчы пыртыны луэ дуннеысь, кунысь, шаерысь тужгес тунсыко учыръёсын герӟаськем гожъямъёсты. Англичанъёс сое шуо дайджест, ӟучъёс - пресс-экспресс, удмуртъёс - чур бугор. Туннэ сётӥськом нырысетӥ "мильыммес". Отчы пыртэмын "Комсомольская правда", "Новая газета", "На грани невозможного" газетъёсысь материалъёс. Дасяз Н.БАЙТЕРЯКОВ. Театрлэн улонысьтыз 60 ар возьматэмын. Нош удысэз? Удмурт театрын ортчиз Борис Саушкинлэн "Удмурт театр. Ортчем вамышъёс" выль книгаеныз тодматскон. Б. Е. Саушкин - удмурт культураын но историын яркыт кизили. Тодады вае ай солэсь радио пыр вераськем куаразэ! Со кадь жингрес, паськыт но мур куараё вераськисьёс быдэс шаерамы чиньыен лыдъямон гинэ: Гай Сабитов, Милитина Гаврилова (Решитько), Пимен Касаткин. Куара гинэ-а? Удмурт культуралэн котькуд удысаз солэн пытьыез мур кельтэмын: режиссёр, артист, редактор, министрлэн воштӥсез, журналист, писатель, директор но эшъяськыны туж быгатӥсь адями. Тӥни соин но Удмурт театрын пумиськон ортчиз туж шуныт, ваньмызлы люкаськемъёслы со кельшиз. Ӝытэз нуиз Удмурт национальной библиотекаын ужась Н. П. Лимонова. Театрысь литконсультант А. Я. Евсеева вань шуныт мылкыдзэ сётыса мадиз Борис Ефремовичлэн выль книгаез пумысен, солы туж вылӥ дунъет сётӥз, ӵектӥз та книгаез ӟуч кылэ берыктыны. Удмурт театр сярысь выль книга - нырысетӥез таӵе уж, отчы люкамын вань ӟечез, пыртэмын трос туспуктэмъёс, соин альбом выллем луэмын, пусйизы артистъёс Леонид Романов но Геннадий Соловьев. Соос ӵектӥзы та книгаез азьланьтыны. Отчы пыртэмын театрлэн 60 ар ӵоже улонэз гинэ - угось 1931-1994-тӥ аръёс. Нош туэ 7-тӥ феврале Удмурт театрлы 70 ар тырмиз. Соин ик выль книга сярысь шуныт кылъёс вераса, азьланяз театрлы осконзы сярысь пусйытэк ӧз кельтэ. Сыӵеесь вал малпанъёссы Удмурт Республикаысь культурая министрлэн воштӥсезлэн С. М. Мутерколэн, филармониысь кивалтӥсьлэн В. Я. Митрофановлэн, театрлэн директорезлэн А. А. Митрофановалэн. Книгалэсь пуштроссэ мур возьматӥз, "Удмуртия" издательствоысь редактор С. В. Матвеев. Со шуиз: - Удмурт театрез мон "кыклы" тодӥсько вылэм. Борис Ефремовичлэсь книгазэ дасян но поттон сямен, книгаеныз ӟеч тодматскыса но, асэныз эшъяськыса но вуи, театрез табере "ньыльлы" тодӥсько ни". Авторлы тау каремзэс веразы артистъёс Вероника Садаева, Римма Николаева, драматург Анатолий Григорьев, художник Юрий Лобанов, режиссер Василий Ушаков но мукетъёсыз. Удмурт Национальной библиотека театрлэн фойеаз адӟытон радъям. Ӝытэ лыктэмъёс озьы ик тодматскыны быгатӥзы Б. Е. Саушкинлэн повестеныз, газетъёсы, журналъёсы но книгаосы печатлам статьяосыныз. П. Кузнецов. Туспуктэмъёсыз М. Менладшинлэн. ШӦКЫЧ Шӧдонэз ӧз пӧя Юмореска Пеймыт. Уй. Бертӥсько гуртэ. Шӧдӥ кадь, мар ке но луоз. Жугозы, дыр. Мугоры ик юзыр-кезьыр луэ. Чал-чал, урамын нокин но уг адӟиськы. Кытысь ке кылӥське гитара куара но кудӟем муртлэн кырӟан нёръямез. Вамышъян сяменым марлы ке но тодам лыктӥз улон сюресэ. Институтэз мырдэм но кызьы йылпумъяй ик, куинетӥ курсысен валай ке но токма дышетскемме. Ужаны пыри милицие. Витетӥ ар вырисько ни выллане ӝутскыны, уг пишмы малы ке но. Син азям пуксиз на кышно ваеме, люкиськеме. Чидаз бен мискинь. Нош макем учкемез потэ вал буёло телевизор, уйвӧтаз но адӟылӥз выжлёгетъёсты сузясь пылесосэз, мисьтаськон машинаез. Валаз, талэсь номыр уд потты шуыса, мукетыз доры кошкиз. Малпанъёсме вис кариз вазем куара: - Эй, вай тамактэ! Бен, бен, ваньмыз озьы кутске. Ӧд ке но сёт, жугозы, сётӥд ке но, уз жалялэ. Уг быгато-а, мар-а маке выльзэ малпаны. - Ме, кут. Но одӥгзэ кельты. А то больницаын номыр карыны луоз, - соку ик алоно кариськи. - Кыӵе больницаын? - юаз со. - Кытысь мон тодӥсько? Кудаз нуозы. Шедёзы кинъёс ке но, оло, "скороез" но ӧтёзы. - Бен, оло, али ик тонэ больницае нуоно? - нош ик юаське егит воргорон. - Марлы-о серекъяськод? Жуг но ну! - Мар понна бен жугом? - абдраз соиз. - Мон тамактэ гинэ курисько ук... Шораз умой-умой учки но, ымныр тусыз кельшиз, лачмыт адӟиське. - Йырдэ кур эн кар: хулиган кожай тонэ. Ойдо дорам пыром, тани татын мон улӥсько. Кофеен сектало, тамакалом но, - дорам такем капчиен вуэмелы шумпотыса чортӥ сое. Пумит ӧз луы. Куинь час пала бӧтьыртӥм оломар сярысь но. Солэн но улонэз мынам кадьгес ик вылэм. - Ойдо юзмыт омырен шоканы поталом на, - пукыса жадеммы бере ӵектӥз куное. - Собере мон дор палам но бертыны карисько ни. Потӥмы. Машина котыраз пияш берга, ымаз тамакез. - Ойдо ӵош кыском, - дораз матэктыса вази мон. - Ӧвӧл ни, - киоссэ вӧлъяз со. - Быдэн одӥг коть, - выль тодмое но сюлворыны кутскиз. - Ӧвӧл шуи ук! - Нылашед дорысь-а, кышноед доры-а бертӥськод? - малы ке юано кариськи. - Библиотекаысь бен ӧвӧл, дыр, - итӥськиз тодмое. - Нош тӥляд мар ужды? - керӟегъяське ини пиёк. - Я, я, буйгатскы. Тамактэ гинэ быдэн одӥген сёт но, палэнтӥськом, - нокызьы но бушен кошкем ӧз пот ни. - Макем тӥ мыным акыльтӥды! Валаса но ӧй вутты, ныр улам мыжык сюриз. Пыд вылам возиськыны вормытэк, лымые салиськи. Тодмое но вӧзам ик гаӵолаз. Со куспын пиёк машинаяз пуксиз но, тылъёсыныз шорамы мальдытыса, син азьысь ышиз. Султӥм но, ог-огмы шоры учкытэк, дор палъёсамы вамыштӥм. Шӧдӥ ук вал - жугозы. Озьы ик луиз. Галина Добрякова, Шаркан ёросысь Сильво гурт. Шаркан ёрос администрациын сямлы пӧрмиз ини, интыосы потаса, администрацилэсь нуналъёссэ ортчытъян. Ёрос администрацилэн йырыныз Александр Прохоровен ӵош калыкен кенешыны потало валтӥсь специалистъёс. Берлоез сыӵе пумиськон ортчиз 26-тӥ январе Сурон гурт администрациын улӥсьёсын. Ёрослэн та пал сэрегаз пырись гуртъёс трослы куанересь, медпунктъёссы, нылпи садъёссы, школаоссы, клубъёссы тырмымтэен. Яке соосты выльдоно-тупатъяно, яке чик но ӧвӧл. Со понна гурт администрацие пырись музъемъёс му вӧен узыресь. Солы луыса ик луонлк кылдӥз Сурон гурт администрацилэсь социальной удыссэ но экономиказэ азинтонъя кык аръем программа дасяны. Администрацие пыре куинь гурт хозяйство: "Мувырский", "Маяк" но "Суроновский". Гуртоослэн улон югдурзы татын капчи ӧвӧл, тужгес но - мувыръёслэн но маякъёслэн. Воткинскысь машзаводлэн подсобной хозяйствоосыз чотын улэмзы шӧдӥськытэк ӧз кыльы. Сурон гурт администрацие 10 гурт пыре. Соослэсь улон югдурзэс тупатыны Шаркан ёрос администрациен чаклам программая кулэ луоз 1 миллион 500 сюрс манет коньдон. Со пӧлысь 1 миллион 100 сюрс манетсэ гуртоослы висъялоз "Му вӧй поттонъя Удмурт огазеяськон". Сурон гурт администрацилы юрттыны пумит ӧвӧл Удмурт Республикаысь Дэбес ёросъя Кун Кенешлэн депутатэз Александр Фокин (Сурон гурт администрациын но уло солэн бырйисьёсыз). Гурт хозяйствоосты огзэ но обиде кельтонтэм понна, юрттэт ваньмызлы тырмымон чакламын. Тупатэмын луозы сюресъёс. Мувырын чакламын культура юрт, нылпи сад пуктыны. Кыдёкысь гуртъёсысь нылпиосты школае нуон-ваён понна висъяськоз автобус.Петыргуртэ (Ниж.-Тылое) покчиослы выль школа ӝутӥськоз. Гуртъёсы специалистъёслы улон юртъёс но пуктозы. Программаын чаклам юрттэт пӧлысь та кӧняез ке гинэ. Люкаськемъёс тодматскизы программалэн проектэныз, ас мылкыдзэс но дэмланъёссэс веразы. Жаляськоды-а СССР-ез? Кылем арлэн пумаз Россиысь калыклэсь малпанъёссэ эскеронъя центр юалляськон ортчытӥз. Сётэмын вал таӵе юан: "Кызьы учкиськоды тӥ СССР-лэн куашкамез шоры?" Валэктонъёс сётӥзы тазьы: Жалясько 75 процент Уг жаляськы 19 Валэктыны шугъяськисько 6 СССР-лэн куашкамез шоры лякытэн учко туала егитъёс. Россиысь котькудӥз куинетӥез 24 аресозь улӥсь пумысен сюлэмшугъяськытэмзэ вераз. Нош 40 ареслэсь ортчемъёс пӧлысь 82 процентэз жаляло, дас ар талэсь азьло странаез утьыны ӧз луы шуыса. Выль улон сярысь малпанъёс озьы ик трос герӟаськемын дышетскемен. СССР-лэсь куашкамзэ тужгес жаляло шор ёзо школаез йылпумъяны вуымтэос но туала вакытлэн куронъёсызлы дышыны быгатымтэос. Юалляськон возьматӥз: 80 процентэз рабочийёс но крестьянъёс жаляло Совето Союзлэсь куашкамзэ. Шоро-куспо куанер улӥсьёс пӧлын сыӵеос луо 70 процент. Нош узыр улӥсьёс пӧлын соос 50 процентлэсь ӧжытак бадӟым инты басьто, но со дыре 40 процентэз со вакытэз уг жаляло. Уноез соос пӧлысь азьвыл сярысь ӟечгес уло эркын вуыло Кунгож сьӧры, уг вато уно коньдон басьтэмзэс. В. Голованов. Партие кутозы оскымонъёссэ Ар талэсь азьло 2000-тӥ арын 3-тӥ феврале Удмуртиын кылдытэмын вал Россиысь "Единство" огазеяськонлэн ёзэз. Соку солы кичӧлтӥсьёс луизы Сергей Беркутов, Энвиль Касимов, Леонид Гонин, Виктор Хорошавцев. Та дырез соос лыдъяло Удмуртиысь "Единстволэн" вордӥськем нуналэныз. Солы сӥзьыса, асьме "Единстволэн" кивалтӥсьёсыз журналистъёслы пресс-конференция ортчытӥзы. Но шонерзэ верано ке, республикаямы "Единстволэн" ёзэз та дырлэсь вазенгес ик кылдӥз. Кун Думае быръёнъёс азьын одӥг но ӝыны толэзь вазьгес кылдыса, "Медведь" витьымтэ шорысь Удмуртиын 37 процент куара бичаз. Россилы Президент быръёнъя блокысь потыса, "Единство" туннэ партилы пӧрмиз ни. Но сыӵе вакчи дыр куспын бадӟымесь воштӥськонъёс Удмуртиысь "Единствоын" валамтэос кылдытӥзы. Кызьы шуиз В. Хорошавцев, Удмуртилы президент быръён дыръя куд-огез "Единстволэсь" валтӥсь политической линизэ ӧз валалэ, янгышъёс лэсьтӥзы. Москваысь "Единстволэн" Политсоветэз Удмуртилы президент одӥг кандидатураез ӵектӥз но сое ортчытон понна нюръяськиз. Нош Удмуртиысь "Единстволэн" куд-огез кивалтӥсьёсыз, югдурез валатэк, мукет кандидатлы дурбасьтыны кутскизы. Удмуртиын быръёнъёс ортчем бере ини "Единстволэн" Политсоветэз та огазеяськонлэн республикалэн ёзэныз кивалтӥсьсэ С. Беркутовез ужысьтыз мозмытӥз. Нош солэн воштӥсез Э. Касимов "Единствоысь" потон сярысь ачиз куриськон гожтӥз. Сыӵе вал югдур кылем арын сӥзьыл толэзьёсы. Табере "Единство" партилэн Удмуртиысь ёзэныз кивалтэ В. Хорошавцев. Журналистъёсын вераськонэ партилэн азьвылъёсыз но, туалаосыз но кивалтӥсьёссы ӵошен пыриськизы. Мар сярысь со вера? - Мон уг малпаськы, Удмуртилы Президент быръёнъёс дыръя С. Беркутов ачиз сямен гинэ решениос кутылӥз шуыса, - вераз В. Хорошавцев. - Озьы лэсьтыны сое вылӥысен косӥсьёс вал. Но ми куспын али нокыӵе керетонъёс ӧвӧл. Ми ваньмы ик Россилэн Президентэзлы В. Путинлы дурбасьтӥськом. - Ми валче ужаны кулэ, - шуиз Э. Касимов. - Мон али партилэн членэз ӧвӧл ни ке но, ас вакытаз трос кужымме понӥ "Единстволэсь" ёззэ татын кылдытон понна. Партиысь монэ нокин ӧз потты, ачим мылкыдыя отысь кошки. "Единствоын" туннэ нокыӵе люкиськон но ваче пумит сылон ӧвӧл шуыса, журналистъёсты оскытыны выризы солэн лидеръёсыз. Солэн верамезъя, туннэ, пе, партилэн кужымез ялан юнма. Отчы пырон сярысь 1800 пала куриськонъёс вань ини. Но та дырлы партие 138 адями гинэ кутэмын. Партиын зол дисциплина луыны кулэ, валэктӥз В. Хорошавцев. Соин ик отчы оскымон адямиосыз гинэ кутыны тыршомы. Та ужез дыртыса нуыны уг яра. "Единство" партие пырыны мылкыд карисьёс нырысь ик соглаш луыны кулэ солэн программаеныз но уставеныз. Ӝоген, пе, партилэн программаез "Известия Удмуртской Республики" газетын печатламын луоз. Виктор Хорошавцевлэн верамезъя, али котькуд ёросын партилэсь ёзъёссэ кылдытон уж мынэ. Но нимаз предприятиосын, организациосын солэн ёзъёсыз кылдытэмын уз луэ. Матысь дыре "Единство" пыриськоз Можга городлы мэрез быръёнэ. Быръёнъёсы пыриськон - со партилэн огез бадӟымез ужез луэ, шуиз Виктор Геннадьевич. Угось сыӵе ужрадъёс пыр луэ золгес калыкез ас пала кыскыны. Т. Банникова. Пукемлэсь уте дышетскон Берло куать толэзь ӵоже Юкаменскысь уже интыянъя службае вазиськизы 80 пала школаез но профессилы дышетон училищеез йылпумъям нылъёс но пиос. Гужемзэ таос отысь но татысь уж шедьтылӥзы ик, толалтэ вуэмен тэк пуко. Та лыдпусъёс эшшо одӥг пол возьмато, дышетскем мултэс уг луы шуыса. Котьма ке но, вылӥ образование басьтэм егитъёс улон сюрессэс капчиенгес лёго. Юкаменскысь уже интыянъя службае вузъёс бере 4 мурт вазиськемын. Н.Липина. Ческытэз яратӥсьёслы Юкаменск ёросысь нянь пыжон заводын ужасьёс пряниклы выль рецепт малпазы. Та пыжослэсь шӧмзэ соос изюм ватсаса аспӧртэмлыкогес карыны быгатӥзы. Выль амалъя дасям пряникъёс табере вузаны поттэмын. Ёросын сяна, Глазовын улӥсьёс но сое ӝоген веръяны быгатозы. Н.Липина. Президент выжоз Арсеналэ Ижевскысь Арсеналын кутскемын солэсь "Г" блоксэ выльдонъя ужъёс. Со борды басьтӥськиз "Удмуртгражданпроект" институт. Лэсьтӥськонын заказ сётӥсь луэ Удмурт Республикаысь Правительстволэн управлениез, нош сое быдэстон бордын тырше федеральной кун унитар предприятилэн нимысьтыз лэсьтӥськонъя 6-тӥ управлениез. Выльдэм юртэ интыяськоз Удмурт Республикаысь Президентлэн Администрациез. Озьы "Г" блокез выльдэмен ӵош, городысьтымы шор площаде интыяськем Арсеналлэн быдэсак юртэз лэсьтыса вуттэмын луоз. Нош Удмурт Республикамылэн столицаяз улӥсьёс но куноос понна усьтӥськоз усто но чебер шутэтскон инты. Удмурт Республикаысь Правительстволэн пресс-службаез. Дано но дуно Шорын Юри гуртмес азьло Бугрыш шуо вылэм: гуртмы уго интыяськемын Бугрыш шур валлин. Нош вӧзамы жильыртыса бызе Юри шур. Со вӧзы интыяськемын Вылын Юри, Шорын Юри но Улын Юри гуртъёс. Шорын Юриямы улӥсьёс вашкала дырысен сюлмоесь но ужаны яратӥсесь вылӥллям. Соку ик соослэн дышетскемзы потэ вылэм ини. Дас укмысэтӥ даур кутскыку ик гуртын кызь куать книга вылэм ини. Усьтӥськем школа. Дышетскиллям улон коркаосын ик. Котькуд класс нимаз юртын вылэм. 1904-тӥ арын Николай Головин ветлэм губернатор доры. Ссуда басьтыса пуктэм кык этажъем корка. Кыкетӥ этажаз школа усьтэм. Отын ужаллям Александра Петровна Попова но Евдокия Корниловна Корнилова. 1923-тӥ арын ужа Агриппина Емельяновна Мясникова. Татын ик тыршизы Александр Петрович но солэн кузпалыз (фамилизы тодмо ӧвӧл) Александр Петрович бадӟым школа пуктыны турттэ вылэм. Но пересьёс музъем сётӥллямтэ. Таиз пу школамы быдэс гуртэн лэсьтэмын 1928-тӥ�1930-тӥ аръёсы. Нюлэс сётэм кун, нош кирпич нуллӥллям Татариысь. Школа лэсьтон 2000 манет тыр усем. Нырысетӥ дышетскисьёс школае вуо 1930-тӥ арын толалтэ. Со дырысен татын дышетско Шорын Юри, Стрелка, Ошмес но Чемошур гуртъёсын улӥсьёс. Таяз школаын нырысьсэ ужаны кутскизы Александра Петровна Попова, Евдокия Корниловна Чайникова, Осип Семёнович Семёнов (таиз ожын бырем), Михаил Кузьмич Кузьмин, Иван Егорович Егоров. 1938-тӥ�1941-тӥ аръёсы ужазы Петр Гаврилович Чумаров (таиз но ожын бырем), Варвара Семёновна Семёнова, Анатолий Александрович Лобовиков, Анна Тимофеевна Кузнецова, Любовь Кузьминична Кузьмина, Ольга Терентьевна Орешникова. 1941-тӥ�1948-тӥ аръёсы - Елена Захаровна Захарова, Валентина Захаровна Захарова, Елизар Гаврилович Елькин. 1948-тӥ�1960-тӥ аръёсы - Наталья Михайловна Маркова, Мария Евдокимовна Берёзкина, Парасковья Ивановна Головина, Елена Васильевна Васильева, Татьяна Матвеевна Иванова, Михаил Демидович Пчельников, Георгий Архипович Архипов. 1960-тӥ�1970-тӥ аръёсы - Семён Иванович Марков, Мария Фёдоровна Головина, Евдокия Филипповна Евдокимова. 1970-тӥ�1990-тӥ аръёсы - Августа Евдокимовна Тихонова, Зоя Фёдоровна Берёзкина, Галина Владимировна Андреева, Александр Семёнович Марков. Али ужало Зоя Фёдоровна Берёзкина, Татьяна Николаевна Пчельникова, Елена Леонидовна Тихонова - школалэн директорез, Алевтина Филипповна Васильева, Елена Васильевна Бибикова. Дышетӥсьёсын артэ котьку вал соослэн оскымон юрттӥсьёссы-утялтӥськисьёс. Выль школа усьтӥськыку, татын ужаны кутскиз Парасковья Леонтьевна Алексеева. Собере тыршизы Анфиса Петровна Коротова, Парасковья Осиповна Муравьёва, Ирина Васильевна Шуватьева, Евдокия Ивановна Гаврилова, Александра Кузьминична Степанова. Али ужа Ангелина Алексеевна Давыдова. Сизьымдон ар ӵоже школаез йылпумъязы сюрслэсь трос пиналъёс. Уноез вылӥ тодон- валан басьтыса луизы дышетӥсьёс, врачъёс, инженеръёс, агрономъёс, зоотехникъёс. Туж тросэз ужало гуртын. Школамес йылпумъямъёс пӧлын вань туж тодмо адямиос но. Соос - тодмо кылбурчи, шаерчи Георгий Архипович Архипов, юрист Семён Кузьмич Коротов, агроном Семён Евдокимович Евдокимов (вань Ленин орденэз), Можга педучилищеын дышетӥсь луыса ужаз Дмитрий Лукъянович Лукъянов. Галактион Никифорович Головин - лётчик. Фаина Ивановна Пчельникова дышетэ гурт улонъя Йошкар-Ола академиын. Лев Семёнович Евдокимов - врач, Ангелина Семёновна Евдокимова, Владимир Семёнович Евдокимов - врачъёс. Иван Имполитович Зотов - суредась. Галина Егоровна Егорова - Удмурт шаерысь дано агроном, Владимир Елизарович Кузьмин - эштосысь инженер, Юрий Петрович Алексеев - "Рассвет" колхозлэн тӧроез, райсоветлэн депутатэз. Юрий Николаевич Бибиков - спортсмен. Александр Николаевич Головин - военной, Надежда Николаевна Головина - математик, программист. Со сяна но туж трос дано адямиосмы. Шорын Юри школаын ужасьёс. Ортчиз даур Ортчиз даур, быриз кадыр - Сюлэм висе куддыр. Вылэм меда пинал дыры? Оло, ӧй вал но, дыр. Сюмам кӧтме буйгатылӥ Тулыс турын куарен. Нуллэм потэм вожъяськонме Выйтӥ шулдыр гурен. Кулэ ӧвӧл кезьыт ошмес - Уг лу ни ке юэм, Кулэ ӧвӧл кильтрес дӥськут - Ымныр ке пересьме. Кулэ вылэм ӟеч тазалык Кудӥз вае байлык. Кулэ вылэм вордэм нылпи Кудӥз висъя саклык! Оскиськом Ильиничнамылы Арнялы быдэ мыло-кыдо учкисько "Мылысь-кыдысь" передачаез. Отын тодматскиськом уго сояз яке таяз удысын ужась адямиен. Телевидениын ужасьёс туж умой передача малпаллям. Кытысь но ку адӟысалмы ми со адямиосты? Шумпотыны но тау карыны гинэ кулэ "Мылысь-кыдысьлэн" куноосызлы но. Шаерысьтымы калыкъёслы соос ӟеч мылкыд кузьмало. Таӵе шуд усиз Пичи Пурга ёрос администрацилэн йырызлэн воштӥсезлы В.И.Панфиловалы но. Та задор мылкыдо кышномуртэз шаерамы тодӥсьтэмез ик ӧвӧл, дыр. Сотэк угось нокыӵе ужрад уг ортчытӥськы. Юсь выллем йӧно но чебер пукиз со аслыз оскем интыын. Юанъёслы валэктонъёс сётыкуз но дыго-мого ӧз луылы: соос вал вакчиесь, лэчытэсь, визьмоесь, мур пуштросъемесь. Ми, со понна "висисьёс", оло, шокчыны дӥсьтытэк пукимы чагыр экран азьын. Вакчи юан, вакчи веранысь тужгес но сюлэмам мур пыӵаз Валентина Ильиничналэн берпуметӥ валэктонэз. - Анае вералоз вал: нокинлэсь но сюлэмзэ вӧсь эн кары. Со интые, нырысь ик астэ пуктыны дышетскы, соку гинэ ӟеч валалод мурт сюлэмез. Зэмзэ но, Валентина Ильинична нокинлэсь сюлэмзэ малпатэк уз чепыльты. Соин ик сое пурга калык мур гажа. Со уг вала вылтӥяськонэз, нош адямилэн куректонэз - солэн бадӟым сюлмаськонэз. Котькудӥз кивалтӥсь Панфилова кадь бадӟым но шырыт сюлэмо луысал ке, оло, улонмы но умойгес, валанмы но вылынгес луысал. "Мылысь-кыдысь" передачаез дасясьёслэн тодэмзы потэ: кин тужгес но кельшиз ӧтчам куноос пӧлысь. Ми, Пичи Пурга ёросын улӥсьёс, Валентина Ильиничнамылы ик оскиськом, та аспӧртэмлыко нюръяськонын со азьпалан луоз шуыса. Передачаез шулдыртэмзы понна тау кареме потэ на Иваново-Самарскысь артистъёслы. В.ВАСИЛЬЕВА. ЖУРНАЛИСТЪЁСЫН ПУМИСЬКОНЪЁС Эрикез четлыкын уг утчало ни Макем трос эрик сётӥськод адямилы, сокем со огпала выже. Сотэк кызьы валано та лыдпусэз: шаерысьтымы колониосын али 11925 адями пуке. Али соос, конечно, гырпумзэс куртчыны выро ни, но бер. Эрик тросэз понна син сузёнтэм ай. Куд-огез, зэм, сое матэктытыны тыршыса, пегӟыны выро, но оперативникъёслэн дыраз шӧдӥськеменызы огезлы но "йырвандӥсьлы" кылем арын ӧз удалты. Со сяна, алэмын пытсэт сьӧрын дасяськись 1599 йыруж, пукисьёслэсь таламын 18 грамм наркотик но кӧня ке литр спирт. Шаерысьтымы колониосын огъя югдур урод ӧвӧл. Алигес Удмуртиысь Кыл кутытонъя управленилэсь ужзэ пусйизы Россиысь Юстицияя министерствоын но. Ужамзэс возьматӥсь куд-огез лыдпусъёс Россиын устоосыз луизы уго. Со сярысь алигес журналистъёсын пумиськылыкуз ивортӥз Удмурт Республикаысь Кыл кутытонъя управлениезлэн кивалтӥсез Григорий Желудов. Но лыдпусъёс сьӧрын - секыт но кышкыт уж. Капчи ӧз сётӥськы кылем арын амнистия но. Кун Думалэн пуктэмезъя, дырызлэсь вазь пытсэт сьӧрысь мозмытыны кулэ вал висись яке кун наградаосын пусъем йыруж лэсьтэмъёсты. Асьме шаерын малпазы дыртытэк ужаны. Эрике лэзьязы туж эскериськыса, секыт йыруж лэсьтэмъёссэ палэнтысагес, озьы куд-огез амнистилэсь зеӵсэ ас вылазы ӧз шӧдэ. Дырызлэсь вазь мозмытэмын 2014 мурт, 195-ез лэзьымтэ ай - соос наркоманилэсь, туберкулёзлэсь эмъясько. - Но амнистия ялэм вылысь, луэ-а со улэ шедись адямиосты пытсэтын возьыны? - ӧз чидалэ юатэк журналистъёс. - Тӥ кызьы малпаськоды: жаляно-а кызь куать адямиез вием муртэ? - вакчияк валэктӥз генерал. Туэ Кун Дума уголовной кодекслы нош саклык висъяз. 17-тӥ январе потӥз "РФ-ысь Уголовной, уголовно-процессуальной но уголовно-исполнительной кодексъёсы воштонъёс но ватсанъёс пыртон сярысь" Закон. Тани таиныз Григорий Желудов соглаш. Малы одӥг мында пукыны кулэ адями виись но сиемез потэмысь чыры-пыры лушкаськем адями? Берлозэ пытсэт сьӧры келялятэк но кыл кутытыны луысал, дыр, тыриськыны косыса. Яке малы пытсэт сьӧрын одно пумозяз возьыны кулэ быдэ вуымтэ пиналэз, со татын уг уродъяськы, кивалтӥсьёслэсь куронъёссэ быдэсъя, азьтэмъяськытэк ужа-дышетске ке? Озьы ӧжыт ке но кулэсмысал колониосын пукисьёслэн лыдзы. Нош али отын интыос уг бушалляло (ӟеч уж лэсьтыны озьы мед вожмаськысалзы). Декабре Ижевскысь 1 номеро следственной изоляторын 125 муртлы выль корпус усьтӥськиз, но со югдурез трослы ӧз вошты - "геройёс" данаклы тросгес. Вылаз ик, берло аръёссэ кышкытлык но ватсаса сюлмаськон кылдытӥз ВИЧ. Али шаерысьтымы колониосын сю сыӵе адями пуке. Лыдпус нуналмысь будэ, соин ик управление сюлмаське: выль юрт матысь дыре ик кулэ уз луы-а? Туберкулёз сярысь веранэз но ӧвӧл ни. Со пытсэт сьӧрын туж ӝог аля. Нош эмъяны коньдон уг тырмы. Ярам ай, туэ сиёнлы уг ёрмо: бюджет но тырмымон коньдон висъяз, асьсэос но колониос, кылем арын 69 миллион манет тыр вуз поттыса, 16 миллион манет барыш басьтӥзы. Асьсэ кӧтсы понна дышизы сӥль но, йӧл но поттыны, нянь но пыжыны. (Кылем арын колониос 125 тонна сӥль но 4435 тонна йӧл поттӥзы). *** Кыл кутытон - секыт уж. Та удысын ужасьёс ужало лекомем муртъёсын. Соослэсь уд возьма ӟеч кылзэс. Котькӧня тыршы пукон дырзэс капчиятыны, соос уз валалэ. Но со понна та управлениын уг но "бӧрдо", пукем адями аслэсьтыз янгышсэ гинэ мед валалоз, выльысь пытсэт сьӧры медаз ву. Со сярысь сюлмасько газетъёсын, радиоын, телевидениын ужасьёс но. Григорий Владимирович со понна журналистъёслы тау кариз, тужгес устооссэ Кыл кутытонъя управленилэн Дипломеныз пусйиз. Соос пӧлын милям газетмы но. З. РЯБИНИНА. 02 ивортэ Сарапулысь "шӧртчиос" Кӧня вераськон мынэ ни дуно но сьӧд кортъёсты басьтон-вузанэз радъян пумысен. Но со ужпумез кылӥсь-адӟись но ӧвӧл кадь, милиция гинэ дырын-дырын шарая корт чотын коньдон поттӥсьёсты. Тани Сарапулысь ужбергатӥсь Хасамов кортэз басьтэ вылэм улон интыяз ик. Азьланяз солы та ужен вырыны уз лэзе ни. *** Та городын ик кылем арын августэ лушказы вал ВАЗ-2107 автомобилез. Милиция та нуналъёсы ӝегатӥз куать егит адямиез. Соослы 16-18 арес ке но ни, нокытын уг ужало. Лушкам "корт вал" берыктэмын кузёезлы. *** Нош ик Сарапул. Таяз учыре одӥгаз пу юртын шараямын лушкемен кабак дасян учыр. Шедьтэмын 40 литр спирт, этикеткаос, пробкаос, сое бергатон механизм, печать, акцизэн маркаос, фильтр. Ваньмыз зэмос заводын кадь. Кам дурысь городын улӥсьёсты "самогонэн" секта вылэм 25 аресъем ужбергатӥсь Илья. Ыргон но латунь Йыружъёсты уно гинэ шараяло ГИБДД-лэн ДПС-ысьтыз (дорожно-патрульной служба) милиционеръёс. Куинетӥ феврале соос Ижысь Первомайской ульчаысен эскерон вылысь дугдытӥзы Алексейлэсь ВАЗ-2106 автомобильзэ. Отысь шедьтэмын ыргон езэн 6 брикет (120 кило) но латуньлэсь юдэс (30 кило). Водитель кортлэн машинаяз кызьы шедемез сярысь номыр вераны ӧз быгаты. Йыркобыяз - молотэн Та нуналэ ик Ижысь 7-тӥ медсанчасте йыркобыез юн сӧсырмыса ваемын вал 1956-тӥ арын вордскем Алексей. Бомж. Верамзыя сое Фронтовой проездысен одӥгаз коркан жугиллям 40 аресъем Любовь (таиз но бомж), 54 аресъем Геннадий (нокытын уг ужа) но коркалэн кузёез Виктор (уг ужа). Алексеез "дышетӥллям" молотэн. Жугиськон потэм мултэс ӟамыртэмзы бере. Анайзэ вие пиез Ижевскысь Барышников ульчаысь 77-тӥ юртысь одӥгаз квартираын шедьтэмын 44 аресъем Альфиналэн шӧйыз. Сое быдтӥллям гадяз но кӧтаз бышкаса. Соин валче ӝегатэмын та кышномуртлэн 25 аресъем нокытын ужасьтэм Линар пиез. Корка сузясь МВД-лэн ивортонъёсызъя, та нуналъёсы тужгес но син шоры йӧтэ Сарапулысь милицилэн ужамез. Городысь уголовной розыскын ужасьёс ӝегатӥзы азьвыл суд улэ шедьылэм 23 аресъем Дмитриез. Со янгыше уськытӥське улон интыосы тунгонъёсты тӥяса пырамез понна. Пӧязы Витетӥ феврале Ижевскысь Барышников ульчаысь 55-тӥ юртысь одӥгаз квартирае йыгаськисьёс луизы. 15 аресъем Василиез пӧяса отчы пыризы та ульчаын ик улӥсьёс 18 аресъем Алексей но 16 аресъем Илья. Пияшез тышканэн кышкатыса, соос ог 5 сюрс манетлы ваньбур поттӥзы вал. Но кузёяськыса ӧз вуэ - кутӥзы. Асьме дорын но хакеръёс Дунне вылын визьмо машинаос - компьютеръёс - кылдэм бере кылдӥзы сое "пӧяны" быгатӥсьёс но. Соосты хакеръёс шуыса нимало. Компьютер программаысь лушкем иворъёс басьтыны но изъян вайыны дышиллям Можгаысь "Ренком" ООО-ын ужасьёс - 17 аресъем Денис но 27 аресъем Ильнур. Милиция соослэсь талаз 2 дисксэс, 33 компакт-дисксэс, 130 дискетазэс. Хакеръёс Бахматовлэн предприятиезлы изъян ваиллям 96,2 сюрс манетлы, "Аюдаг" акционер огазеяськонлы - 480 долларлы (США). Соослы пумит прокуратура уж ӝутӥз. Пӧяськыса лэсьтэм коньдон Воткинск райпоысь кассир та ёросысь ик Первомайский посёлоклэн магазинысьтыз вуттэм коньдонэз (выручкаез) лыдъякуз, пӧяськыса лэсьтэм кык сюлык манет шараяз. Дасямын со буёло ксероксэн. Шедиз со коньдонэз вӧлмытӥсь но: Первомайский посёлокын ик улӥсь 22 аресъем Сергей вылэм. Героин но "героиня" Ижевскысь Ястребовский переулокысь 20-тӥ юртын улӥсь 25 аресъем Елена (нокытын уг ужа) ӝегатэмын, 3,38 грамм наркотик вузакуз. Героинэн вырись героиня ӝегатэмын. Валъёс пыдъяськиллям Миым ноябрь толэзе Каракулино ёросын чиптэм-чаптэм валъёс ышизы. Ёросысь милиция йыртэмасьёслэсь пытьызэс шедьтӥз. Ньыль пыдо "эшъёсмы" чотын узырмыны малпаллям Суханово гуртысь 21 аресъем Владимир но 18 аресъем Сергей. Нош соослы юрттӥськем Арзамасцевоысь 14 (!) аресъем пияш. Удмуртиысь МВД-лэн пресс-службаезлэн ивортонъёсызъя. Кизилиос верало (12.02-18.02) Ыж (Овен) 21.03-20.04. Арнялэн нырысетӥ нуналаз тодматскоды выль адямиен; тӥляд малпамдыя, со улонады бадӟым инты басьтоз. Кусыпъёсты кема ик уз кыстӥське, но выль эшты тӥ понна ӟеч уж лэсьтоз. Вторнике шуг-секытъёс кылдытозы кивалтӥсьёс - соослэн асьсэлэсь кужымзэс возьматэмзы потӥз. Четверге умой луоз, тодон-валан люкаса. Арня нуналэ жадемдэс шӧдоды. Зэмзэ но, дыр вуиз шутэтскыны гуртады, гань-гань пуке, час-кык мултэс изе. Ош (Телец) 21.04-21.05. Вторнике ӟырдыт верам кылъёсты кылэмын луозы, озьы данды будоз. Та нуналэ, аракы эн юэ. Четверге коньдондэс чаклалэ, кышкытлык вань, сое ыштыны быгатоды шуыса. Ужантӥяды воштӥськонъёс луозы, умоеныз ӵош уродэз но. Арня ӵоже ик тӥледлы удалтоз яратонын. Та ласянь тужгес ӟеч нунал - суббота. Эгызоос (Кыктоос, Близнецы) 22.05-21.06. Выль арня тӥ понна котыр ласянь ӟырдыт ортчоз. Понедельнике анай-атаеныды пӧсь вераськон луыны быгатоз. Ӵуказеяз ӵош ужась эшъёсыныды кусыпъёсты тэшкалозы. Четверге керӟегъяськон мылкыдды семьяяды керетонэ вуттоз. Эн дыртэ кыдёке сюрес вылэ потыны, бадӟым вузъёс басьтыны. Арня ӵоже люкаськем урод мылкыддэс физкультура пыр быдтыны тырше. Кисло-кусло (Рак) 22.06-23.07. Арняды огыр-бугыр кутскоз. Нунал куспын ужантӥяды но семьяяды пӧртэм ужпумъёс кылдылозы. Тӥ котькытчы вутскоды. Средае матысь адямиосты сюлмаськон ваёзы, кузпалды яке нылпиды висьыны усёзы. Пятницае чаклаське кыл вӧлдонъёслэсь, уте тазалыктэс. Арня нуналэ кыл сётыны эн дыртэ. Оскон ӧвӧл, сое быдэстоды шуыса. Лев 24.07-23.08. Вторнике ужантӥяды но семьяяды шуг-секытъёс кылдозы. Мукет муртъёсын кылды уз тупа, асьтэлы асьтэос нокинлы кулэтэм кадь потоды. Арня ӵоже нылпиды уно сюлмаськонъёс ваёз. Улонды ас ӧраз пыроз субботае гинэ. Нылмурт (Дева) 24.08-23.09. Понедельнике кема дыр ӵоже адӟылымтэ эшъёстылэсь иворзэс кылоды. Та нуналэ улон интыен герӟаськем ужпумъёсты быдэстыны, басьяськыны умой. Средае ӵектӥськом туж чакласькыны: одӥг чурыт кылды гинэ но керетонэ вуттыны быгатоз. Субботае тӥледды куное ӧтись луоз - эн пумитъяське. Весъёс 24.09-23.10. Арнялэн кутсконаз удалтоз крезьгурчиослы, суредасьёслы, скульпторъёслы. Средае шугъяськоды мукет муртъёсын кусып тупатыны, та нуналэ документъёс улэ эн гожтӥське, коньдон ужпумъёсын эн выре. Пятницае кивалтӥсьёсын кусыптэс тупатыны быгатоды. Малпанъёстэс пушкады эн возе, ӵектонъёстэс, дэмланъёстэс вералэ. Арня нуналэ сюлмаське тазалык сярысь. Скорпион 24.10-22.11. Кизилиос возьматэмъя, понедельнике нимады ужан пайдаё луоз. Средае уксё басьтыны тыршоды. Но вань амалъёсты умой-умой лыдъялэ-чоталэ, угось нунал тӥ понна сыӵе - яке трос коньдон люкалоды, яке трос коньдондэс ыштоды. Четверге тазалыктэс чаклалэ, мултэс эн сие-юэ. Субботае кузпалэныды яке яратоно муртэныды ченгешыны быгатоды. Но со кусыпъёстэс юнматон ласянь пайда гинэ ваёз. Ыбылӥськись (Стрелец) 23.11-21.12. Вторник - секыт нунал тазалыкты понна, шуккиськонъёслэсь утиське. Тужгес но зол чакласьконо луозы сюлэм висёнъёсын курадӟисьёс. Четверге удалтоз изобретательёслы, инженеръёслы. Сак кариське руль сьӧрын но электротылэн ужакуды. Арня нуналдэс семьяяды ортчытэ, эшъёсты доры эн дыртэ. Ческыт пӧралэ, ӝӧк сьӧрын дэмен пуке. Ваньмыз со выль кужым люканы юрттоз. Сюро кеч (Козерог) 22.12-20.01. Арнялэн кутсконаз командировкае кошкыны быгатоды. Сюрес вылэ потонды азьын эскере транспорттэс, угось сюрес вылын тӥяськиз-мараз ке, шуге-леке вуоды. Средае бадӟым вузъёс эн басьтэ. Четверге ужантӥяды но нылпиосыныды ужпумъёсын валче мылкыдды куашкалоз. Асьтэдыз кияды кутэ, юрттэт курыса, матысь адямиостылы вазиське. Та уе адӟем вӧтъёсты зэмалозы. Шутэтскон нуналъёсты асьтэлы сӥзе: яратон уженыды выре, тазалыктэс юнматэ, кельшымон вузъёс басьтэ. Ву кисьтӥсь (Водолей) 21.01-19.02. Средае тодады вае анай-атайды сярысь. Соослы тӥляд сюлмаськемды туж кулэ. Кин тодэ, оло пыкылэмзэс кылзоно луоды. Эн куректэ, соос тӥледды ярато ук. Ӵуказеяз яратоно адямиеныды секыт вераськон луоз. Споръяськонды вожан пумысен кылдоз. Субботае малпаськытэк-маратэк эн ужалэ. Дуно вуз бсьтэмды потоз. Берло гинэ адӟоды, со тӥледлы чик но кулэ вылымтэ шуыса. Чорыгъёс 20.02-20.03. Понедельнике бадӟым коньдон но дуно вуз басьтыны ӟеч вакыт. Кизилиос верамъя, арня шорын командировкае потоно ӧвӧл, я билет уд шедьтэ, я мукет шуг-секытъёс кылдозы. Со понна пятницае тӥледлы удалтоз ни. Тужгес ик ужантӥяды. Туннэлы чаклам уждэс ӵуказелы эн кельтэ. Кун ёзъёсы ветлыны быгатоды. Кема дыр ӵоже сюлмаськытӥсь висёнъёстэс эмъян пайда сётоз. Шӧкыч Серем пыр Рае кык ӧс нуэ. Нырысетӥяз гожтэмын: "Кышнооссы кивалтэм улсын улэм воргоронъёслы", нош кыкетӥяз - "Семьяязы кузёяськем воргоронъёслы". Нырысетӥ ӧс дорын кузь-кузь черод сылэ, нош кыкетӥ ӧсэ туж дӥсьтытэк гинэ лапег но чиед мугоръем воргорон йыгаське. Апостол Петр ӧсэз усьтэ но ӝотрак юа: - Тон малы таяз ӧсэ йыгаськиськод? - Кышное косӥз. Султэ, султэ куас вылэ! Туэ март толэзе Шарканын ортчозы шаерысьтымы дышетскись пиналъёслэн спортивной шудонъёс. Сое ортчытыны курыса, Калыкез дышетонъя министерстволы вазиськиз Удмурт Республикаысь Правительство. Та ужрадлы одӥг но ӝыны миллион манет висъямын. Спорт шудонъёс "президент ӵошатсконъёс" шуыса нимамын. Глазовтӥ кулон ветлэ... СПИДъя югдур нуналмысь уродме. Тужгес ӝог та чер али шыпыт но чебер Глазкарын. Али отын 171 адями ВИЧ-ез нуллэ. Ӵошатон понна: Ижевскын - 48, Балезиноын - 53, мукет ёросъёсын - кӧня ке мурт. 90 процентэз ВИЧ шедьтэмын наркотик пыр. П. Николаев. Закон законлы мед пӧрмоз Нижний Новгородэ люкаськылӥзы Поволжье котырысь улосвылъёслэн законъёсын ужанъя ёзъёссылэн кивалтӥсьёссы. Удмурт Республикаысь та бадӟым кенешонэ пыриськиз Кун Кенешлэн Тӧроез И.Н.Семёнов. Отчы ветлэмез бере Игорь Николаевич пумиськылӥз журналистъёсын, вакчияк вераз сэрттэм-пертчем ужпумъёс сярысь. Валтӥсез соос пӧлысь - федеральной но интыосын кутэм законъёсты одӥг ӧре выжтон но пайдаё ужатон. Но, кызьы пусйиз И.Н.Семёнов, тросаз учыръёсын пумиськыло ваче пумит луонъёс. Тужгес но со шӧдӥське Татарстанын но Башкортостанын. Кызьы потоно кылдэм югдурысь? - Мон малпамъя, законъёслэн лыдзы сьӧры уиськыны уг яра, - пусйиз Кун Кенешлэн тӧроез, - мед соос ӧжытгес луозы, но - ӟечгес. Федерация ласянь Удмурт Республикая нокыӵе шекъёс но тырмымтэос сярысь вераськон ӧз пота. "Котырес ӝок" сьӧрын пумиськон дыръя куд-ог регионъёслы пӧсь йӧтӥз, мугез огвыллем - областьлэн яке республикалэн аслаз шоркареныз вожвылъяськон но ваче пумит мынон. Озьыен, Кун Кенеш но Иж городлэн администрациез куспын луэм учыр али пумиськылэ мукет интыосын, законъёсты радъян капчиен уг сётскы. Ог-огедлы пумит сылонын юнме быре дыр но кужым. Кенеше люкаськылэмъёс кык нунал ужамзылы йылпумъян лэсьтыса кутӥзы туж кулэ документ. Со юрттоз интыосын но федеральной законъёсты одӥг радэ пуктыны но улонэ пыӵамзэс эскерыны. Озьы гинэ тупатыны луоно валантэм учыръёсты но законъёслэсь ог- огзылы пумит сылонзэс. Игорь Николаевич журналистъёсты тодматӥз на Кун Кенешлэн вуоно 15-тӥ сессиезлэн ужан радлыкеныз. Со усьтӥськоз 13-тӥ феврале. Чакламын учкыны 17 ужпум. Выль законъёсты сэрттэмен-пертчемен Ӵош депутатъёс эскерозы кадръёсты юнматонэз но. Журналистъёс И.Н.Семёновлы вазиськизы пӧртэм юанъёсын. Кылсярысь, кызьы со учке Андрей Осколковез Правительстволэн тӧроезлы воштӥсе пуктон шоры? - Андрей Эдуардовичез сокем трос уг тодӥськы на, но адӟисько: адями ужа, оскем удыссэ азинлыко нуэ. Правительствое дэмланэз умоен лыдъясько. - Кинэ адӟемды потэ Можга городлы кивалтӥсен? - Та инты понна нюръяськонэ пыриськиз 5 мурт. Мон дурбасьто соиз кандидат понна, кудзэ ӟеч тодӥсько но оскисько, Можга котыр ласянь азьпал радъёсын мыноз шуыса. И.Н.Семёнов музон юанъёслы но валэктонъёс сётӥз. Пусъём на, Кун Кенешлэн выль тӧроезлэн журналистъёсын та пумиськонэз - нырысетӥез. Л.МЕДВЕДЕВА. Нижний Новгородын пумиськонъёс. Туспуктэмъёсыз Н.Глуховлэн. Зарни - асьмелэнъёс киын Япон калыклэн вань пӧртэм пумо нюръяськон амалъёсыз. Одӥгез соос пӧлысь сумо шуыса нимаське. Ӵапак та амалъя Москваын алигес ортчизы нырысетӥосыз калык куспо нюръяськонъёс. Отын вормись луизы Удмуртиысь Инна Пацкевич, Санкт-Петербургысь Наталья Бабкина но Москваысь Олеся Коваленко. Соос нырысь одӥген-одӥген вормизы, собере зарни утӥзы, командае огазеяськыса. Н. Алексеев. Туннэ азьланьтӥськомы Суоми шаерысь ӵыжы-выжыосмылэсь, финнъёслэсь, "Калевала" эпоссэс печатланмес. Удмурт кылэ сое берыктӥз шаерысьтымы тодмо кылбурчи, тодосчи Анатолий Николаевич Уваров. 10. Вяйнямӧйнен Ильмариненэз Похъёлае келя Вяйнямӧйнен - мӧй но етӥз, Тӧризэ со йӧн-йӧн кыткиз, Вайыжаз валзэ со пыртӥз, Сӥессэ пыр-поч юнматӥз, Каньылак пуксиз на ачиз, Дӧдьыяз со гань-гань лэзькиз. Сэзь валзэ ньӧрын шуккалтӥз, Кузь ньӧрзэ вылаз васькытӥз. Вал ворттэ, сюрес ӝог кошке, Ворттэмез котыр шуккиське, Дӧдьы сюл гылӟе, жингыртэ, Палэзьпу буко ӟукыртэ. Ӵаш каре, мынэ, туж дыртэ, Нюръёс пыр нёжез ваментэ, Бадӟым тэль кушез пырпотэ, Усьсэаз гинэ со вуиз Кузь ӝутэм сюрес вылъёсы, Калевала яг доръёсы, Осмо пал паськыт лудъёсы. Собере тазьы со вераз, Кылымон вераз ас понназ: "Ой, кион, тон си ведӥнэз, Лек висён, тон ви лапп пиез, Кышкатӥз монэ быдтыны, Уд ни адӟы, пе, ас дордэ, Вяйнола палась кыръёстэ, Калева палась лудъёстэ". Вяйнямӧйнен зол-зол шӧтаз Тункылъёс кырӟан гур бордаз. Сяськаясь кариз со кызэз, Зарниё луиз вож лысэз. Йылыныз инмозь кыз ӝутскиз. Пилемез йырыз пырпотӥз. Вайёссэ инмын шонертӥз, Соосты со пур-пур кариз, Синпӧртма, тункыл вераса, Толэзез ӝутэ кырӟаса. Кызэзлэн зарни йылъёсаз. Вайёсаз сизьым кизили, Туж чебер пишто - учкали. Нош мынэ азьлань ворттыса, Мусо юрт палаз дыртыса. Сюлэмаз кайгу каръяськем, Ож изьы солэн мыкырскем. Ильмариез ук со вузаз - Дурисез вайны кыл вераз - Пытсэтысь утем беразы, Плен улысь поттэм понназы, Похъёла уй пал дуннеын, Сариола бус шаерын, Ужпиез тани тып дугдӥз, Осмо выльвылэ со султӥз. Вяйнямӧйнен лӧбак ӝутскиз, Дӧдьыысь капчи со васькиз. Кебитын корт уж чузъяське, Гӧр дорын дурем кылӥське. Дуннемурт вал Вяйно пересь. Кебитэ пыриз со чупрес. Ильмари дурись гӧр дорын Чекычсэ тышка йыг но дым. Ильмари юа Вяйнолэсь: "Вяйнямӧйнен, ой, ӟеч пересь, Кытын-о тон вал та дырозь, Кытӥ тон ветлӥд татчыозь?" Вяйнямӧйнен, мӧй, визьнодо, Валэктэ тыро но быдо: "Мон отын улӥ но вылӥ, Мон отын бергай, бызьылӥ - Похъёла палан, кезьытын, Сариола лек шаерын, Мон ветлӥ лапплэн сюрестӥз. Синпӧртмась ёзлэн шаертӥз". Ильмаринен - ӟеч дуриськись, Кыл куспаз шуак пыриськиз. "Ой тон, Вяйно, мӧй, визьнодо, - Вазиськиз солы мылкыдо, - Ветлэмед сярысь мар мадёд? Дор палад вуса вералод?" - "Уй палан вань туж чебер ныл, Бызьымтэ, веськрес, юг сюсьтыл. Пиосыз кулэ карытэк, Туж ӟечсэ но со палэнтэ. Похъёла нылэз ушъяло, Чеберзэ-ӟечсэ данъяло. Выль толэзь югдэ синкаӵаз, Юг шунды пиштэ гадь бордаз. Кобы кизили - пельпумаз, Сизьым кизили - тыбыраз. Ой бен, Ильмари, зэм но тон, Дуриськон ужын туж усто - Шедьты ныл аслыд кышнолы, Бырйы тон сое весяклы. Быгатӥд ке сампо дурыны, Кыметсэ чебер пужъятны, Ӟеч ужлы ӟечен тырозы, Кузпаллы нылзэс сётозы". Ильмаринен пӧсь мылкыдо: "Ой тон, Вяйно, зол кылрадо, Зэм ик-а вуид дэмланы? Уй пала монэ келяны? Эрике мозмид шуыса, Утиськид пленлэсь малпаса. Ноку но мон та улытозь, Тыр толэзь яркыт пиштытозь, Уг, уг мын уйшор палъёсы, Сариолаысь юртъёсы. Со музъем ньылэ пиосыз, Со сие батыр муртъёсыз". Тӥнь соку, уть, Вяйно пересь, Ас кылзэ вера ни пезь-пезь: "Кыкетӥ паймон но луоз: Кыз будэ - йылаз сяськаос, Нош кызлэн лысэз зарнилэсь, Осмо луд пумын пиштэ весь, Кыз йылын толэзь, учкали, Вайёсаз сизьым кизили". Ильмаринен туж паймемын: "Шат луэ озьы дуннеын? Осконтэм, ачим тодытэк, Ас синмын сое адӟытэк". Вяйнямӧйнен, мӧй мурт, вера: "Ӧд ке оскы, я, бен, ярам, Верасько шонер яке уг, Тодыны сое уз лу шуг: Я, мыном, учком бен ӝоггес, Кыз йылэ будэм сяськаез". Дауръем мурт Вяйнямӧйнен, Кибашлы пи Ильмаринен, Кыз доры каллен вуизы, Осмо луд пуме дугдӥзы. Ильмари-дурись кыз улын Чиль пиштӥсь кызлы паймемын: "Вайёсын - сизьым кизили!" Вазиське ни Вяйно пересь, Эшезлы вера со пезь-пезь: "Ӝутскы ай, дурись, кыз йылэ, Толэзез кут-вай кыз улэ. Вай отысь сизьым кизили, Вайёсын югдо - учкали!" Ильмари-дурись сэзь вылэм: Ӝог тубиз вылэ - кыз йылэ. Басьто, пе, отысь толэзез, Сизьымзэ ик кизилиез? Зарни лыс окто, пе кызысь. Ильмари-дурись огпумысь Ин дорозь тыршиз ӝутскыны, Толэзез отысь кутыны, Кизилиосыз октыны. Сяськаё кыз, уть, шыпыртэ, Нап ваез солы ивортэ: "Воргорон тон макем нодтэм, Тон батыр но туж валасьтэм: Кыз йылэ тубид малпатэк, Йылӥяз ик чик визьнодтэк, Пӧяса лэсьтэм толэзьлы, Алданчи кизилиослы". Даурчи мурт Вяйно пересь Тункылэз кутскиз калленгес, Тӧлпери поттӥз, бергатӥз, Сильтӧллы сое пӧрмытӥз: "Тӧл, тон басьты та батырез, Пукты ай пыжад чалякгес, Вуттоно ӝоггес ик тае Сьӧд-пеймыт пала - Похъяе!" Тӧлпери кутскиз берганы, Нош омыр ӧдъяз шауланы. Ильмариненэз со ӝутӥз, Инметӥ сое ӝог нуиз - Пырак сьӧд-пеймыт Похъяе, Лек-шимыт Сариолае. 11. Ильмаринен сампо дуре но кышно кура Ильмари-дурись ӝог лобиз Пукыӵ ньӧл кадь ик со мынӥз. Тӧл сюрес кузя со ширтӥз, Тулыс тӧл нуиз сюрестӥз. Толэзьлэсь вылын со лобиз, Со ортчиз шунды улъёстӥ, Кизили югыт вадестӥ, Похъяе лобиз но вуиз. Азбаре пырак со пуксиз. Азбаре, мунчо азе ик, Пуныос ӧз кылэлэ чик. Ӧз но шӧдэ, уть, мар луиз! Ильмари озьы тӥнь вуиз. Похъёлаысь Лоухи кышно, Шер пинё пересь, лек сюрно, Азбараз со ӵапак сылӥз, Вуэм мурт шоры вазиськиз: "Кытысь тон сыӵе воргорон, Кытысь-мар батыр вуид тон? Тӧл сюрес кузя-а вуид, Тӧлпери дӧдьы-а шедьтӥд? Пуныос но ӧз, ӧз шӧдэ, Чик но чик, ява, ӧз утэ!" Пумитаз вазиз дуриськись: "Шат солы татчы мон лыктӥсь - Пуныос шорам утыны, Лусьтроос монэ пурыны Тодмотэм ӧслэн азьпалаз, Ят муртлэн капка выжыяз?" Похъёла кышно туж етӥз Лыктэм мурт шоры вазиськиз: "Тон тодмо ӧвӧл-а, куно, Ӧд-а адӟылы куке но Ильмари нимо устоез, Быгатӥсь, кибаш дурисез? Ми сое тани витиськом, Чидатэк сое возьмаськом - Похъёлаямы лыктэмзэ, Сампоез выльзэ дуремзэ?" Ильмаринен ӟеч дуриськись, Кыл вера, ачиз туж кескич: "Мон тодмо соин, адӟылӥ, Ильмаринен ӵош луылӥ. Ильмаринен - мон со, ачим, Дуриськон ужын усточи". Похъёлаысь Лоухи апай, Шер пинё пересь песянай, Коркаяз пыриз бызьыса, Тӥни таӵе кылъёс вераса: "Покчиез мынам нылоке, Дуное мынам, мусоке! Дӥся тон чебер дӥсьёстэ, Празднике нуллон вуремдэ, Чильтэръям дуро юбкадэ, Пужъятэм дуро дэремдэ, Чыртыяд тон ош весьёстэ. Пель бордад понод угыдэ, Гордмалод яркыт бамъёстэ, Буя льӧль чебер ымдурдэ. Ильмари вуиз дорамы, Даурзэ усто дурисьмы, Асьмелы со сампо дуроз, Кыметсэ чебер пужъятоз". Уй палан ныл туж чеберез, Зарезьлэн-мулэн сӥ-данэз, Со дӥсяз дӥсьсэ чеберзэ, Воштӥськон дырлы вуремзэ. Дӥсяськиз, чиль-дол воштӥськиз, Чеберзэ ӟечсэ керттылӥз, Туй поскес тыриз киосаз, Зарни е керттӥз кусъёсаз, Азбартӥ ортчиз туж мусо, Капкаысь потӥз капчи со, Мусогес луиз учкемез, Мугорыз ӝужыт, веськырес, Ымнырыз эшшо ӵыжытгес. Гадь вылыз пиштэ зарниен, Кымысыз мальдэ азвесен. Соку уй паллэн песяез Кунултэ, пыртэ дурисез - Похъёла корка пушъёсы, Сариолаысь юртъёсы. Кунозэ сюдӥз мыльымон, Батырез сектаз тырмымон, Туж сӥлы кариз пимуртэз, Собере сэраз бугорез: "Ой тон, Ильмари - ӟеч дурись. Дауръем усто лэсьтӥськись, Дур вал сампо тон мыным, бен, Кыметсэ чебер пужыен, Юсь тылы пумысь буёлэн, Муры скал бордысь нап йӧлэн, Йыдылэн чебер тысеныз, Пи ыжлэн гужем гонэныз. Ужамдэ ӟечен берыкто, Чеберзэ нылме мон сёто". Ильмари, усто дуриськись, Кыл вераз, тазьы вазиськиз: "Сампо дурыны быгато, Пужыё кымет но лэсьто, Мон азьвыл инбам но дури, Омырлы липет йӧндыри, Номыри ӧй вал дасяме, Кутскыны вылысь люкаме". Ильмари мынэ ни чоз-чоз - Сампо шуд-вуко со дуроз. Кебитлы инты утчано, Дуриськон тӥрлык шедьтоно. Кулэзэ ӧз лу шедьтэмез, Кебитсэс но ӟеч кӧрыксэс. Кӧрыксы ӧвӧл, пӧсь гӧрзы, Пеллянзы ӧвӧл, сандалзы, Молотлы гинэ но ныдзы. Ильмаринен - зэмос дурись, Абдраса тазьы со шуиз: "Ӵок уг оско ке, колӟоос, Тӧлопу монэ кожасьёс, Тододы ай, мон - мыльымтэ, Пыдйылам изись вылымтэ". Со утчаз инты пӧсь гӧрлы, Кӧрыклы но юн акарлы. Ог но кык нунал со ветлӥз, Усьсэаз гинэ ни шедьтӥз. Пужыё изэз со адӟиз, Юн меӵал изэз со синйиз. Дуриськись отчы ик дугдӥз, Тылӝузэ нялтас аратӥз. Огпумысь пуктэ кӧрыксэ, Ӵуказяз сазна сандалзэ. Тыл пушкы куштэ со кортсэ, Гӧр пушкы ватса дуронзэ. Пеллятэ гӧрзэ уаръёссэ, Гӧр доры пуктэ юнъёссэ. Кӧрыкез туж зол веттало, Тылӝуэз туж юн пелляло. Куинь нунал тыршо гӧр дорын, Куинь уйзэ выро ни отын, Пыдтышъёс но уть измемын, Чиньыос изэн сюрмемын. Ньылетӥ гинэ ӵукнаяз Ильмари ӟырдам гӧр дораз, Сэзь учке, мар вань тыл пушказ, Тылӝуо гурлэн пыдэсаз. Тыл пушкын геры кылдэмын, Амезез-зарни, пень пӧлын, Анданэз но, ут, зарнилэсь Кутонэз нош горд ыргонлэсь. Тусызъя чебер, йӧспӧртэм, Нош огез бен туж умойтэм: Со гыре муртлэсь бусызэ, Мурт гырон вылэ со везэ. Ильмари вал туж кибашлы, Нош ӧз шумпоты герылы, Юдэсэн сое чаль тӥяз, Тылӝуэ берен со куяз. Пельтыны косэ со тӧлэз, Пеллятэ золгес сильтӧлэз. Куашето ни, уть, сильтӧлъёс. Ӵук но ӝыт палась туж золос, Лымшорысь пельтэ ни шимес, Уй палась сю пол кӧшкемес. Ог но кык нунал ни пельтэ, Куинетӥ ӵуксэ жиетэ. Укнотӥ тыл бӧм шокыштэ, Тылгизьы ӧстӥ ӝог пельтэ. Бугрес ӵын инме позырске, Пилемен отын сураське. Ильмари дурись - усточи, Усьсэаз учке ни капчи, Кыӵе мар ужез пӧрмемын, Гӧр пыдсын маиз кылдэмын, Уть ай сампо йӧн-йӧн потэ Пужыё, чебер кыметэн. Ильмари сюлмо но тыршись, Даурзэ усто дуриськись, Дурыны кутскиз со ӝоггес, Молотэн тышказ кужмогес. Тани сампоез ӝог вуиз. Огпалтӥз ӟеч пызь со изӥз, Мукеттӥз сылал со поттӥз, Жиль коньдон - куинетӥ палтӥз. Я, бен, сампо, ужа дыбыр! Кыметэд берга ни зӥр-зӥр, Ӝыт акшан дыре жиетэ, Тыр сюсек сиён тырмытэ, Мукетыз мынэ вузаны, Бӧрысез - запас возьыны. Пересь Лоухи туж шумпотэ, Чебер сампоез со ӝутэ, Похъялан нуэ гурезяз, Ыргоно меӵал пушъёсаз. Сампо выжызэ мед лэзёз, Укмыс сажеме мед пыроз. Вордӥськем муаз выжызэ Со пыртоз пыдло одӥгзэ, Мукетсэ лэзёз ву коже, Бӧрысьсэ урдсаз, гурезе. Ильмаринен, ӟеч дуриськись, Ныл куран пумысь вазиськиз: "Сётоды-а, уд-а нылдэс, Самподы ини дась быдэс? Вукоды ворпо кымето". Уй пал ныл чебер но шудо, Но уд тод, солэн мар визьмаз. Вазиськиз, тазьы со вераз: "Кин кайта сяська вапуме, Усьсэаз чебер гужеме, Кикыез татын кырӟатоз, Пиоссэ шулдыр сильытоз, Шуак мон кошки ке дорысь, Ят пала кӧчи ке татысь? - Куреглэн сыӵе ышемез, Ӟазег пи быре озьыгес, Ягмульы питра но ыше, Мумизлэн нылыз озь кошке. Бырозы соку кикыос, Лобозы ваньмыз бурдоос, Тапалась дуно выръёсысь, Зарниям гурезь йылъёсысь, Котькудлэн но дыр чик ӧвӧл, Шат ужме кельтом мон шӧл-шӧл? Пумйылтэм гужем ужъёсы: Учконо тэлез, возьёсыз, Пыр узы-боры бичано, Ярдурез, нюкез ортчоно, Кырӟаса паськыт кушъёстӥ, Шудыса чебер тэльёстӥ". Ильмари - усто дуриськись, Даурзэ ужен данъяськись, Кайгуэн тырмиз но кысӥз, Кунэрес йырзэ мыкыртӥз - Малпаське, туна, курадӟе, Син азяз огзэ со адӟе: Одӥгзэ гинэ со малпаз, Кызьы со бертоз ас дораз, Кызьы со вуоз дор палаз Ят палась пеймыт Похъяысь, Кезьытысь, бусо шаерысь. Уй палась кузё кышномурт Вазиське солы: "Ой, ӟеч мурт, Ильмаринен, мар ӝожомид, Малы тон йырдэ мыкыртӥд, Шат потэ гуртад бертэмед, Ас дордэ тынад адӟемед?" Ильмари вазе: "Мар сюлмам? - Бертэме потэ ас палам, Даурме дорам быдтэме, Ас вордскем палам кулэме". Похъяысь песяй ӝог валаз, Батырез сюдӥз но сектаз. Со пиез пуктӥз пыж пушказ, Ыргонэн дурем пыж ныраз, Ӟеч тӧлэз косэ дыртыны, Уй палась золгес пельтыны. Ильмаринен - сэзь кебитчи, Дауръем сӥлы усточи, Кышкатэк дораз со потӥз, Зарезьёс вамен со кошкиз, Нуналзэ ортчиз со, кыксэ, Куинетӥ ӵуказ, бератсэ, Ваментӥз паськыт зарезез, Вамыштӥз дораз шаплыгес. Вордӥськем палаз со вуиз, Ас мусо гуртсэ со шедьтӥз. Вяйнямӧйнен - мӧй, визьнодо, Вазиське туж ӟеч мылкыдо: "Ильмари, выны, дурисе, Котьмае усто лэсьтӥсе, Самподэ дурид-а выльзэ, Чебертӥд-а вылкыметсэ?" Ильмаринен - сэзь, усточи, Ӟеч дурись, вазиз туж капчи: "Сампоед изэ ни вылез, Зол берга чибор кыметэз. Со изэ акшан вакытэ, Сюсек тыр сиён со поттэ, Сюсек тыр вузан тырмытэ, Сюсек тыр запас со лэсьтэ". Похъёлаын сюан 23. Вяйнямӧйнен но Ильмаринен Похъёлае кышно кураны мыно Вяйнямӧйнен, мӧй но визьмо, Йырвизьзэ тӥяз со кужмо: Вуэмзэ нылэз шедьтоно, Кышнолы сое курано. Со улэ кезьыт палъёсын, Сариола кын музъемын. Туж сӥлы со ныл уй палан, Туж йӧно визьмо котькудлань. Чеберъяз пыжзэ со лызэн, Ӝынызэ пыжзэ льӧль-гордэн, Зарниен буяз азьпалзэ, Азвесен тӧдьмаз мышпалзэ. Шор юбо пуктӥз пыж шораз, Тӧлпоос кыскоз на бордаз. Ог сюры борды горд тӧлпо. Мукетыз борды лыз тӧлпо. Лачмытак мынэ пыж дораз, Вамыштэ йӧно пыж палаз. Я мынэ батыр зарезьтӥ, Пумйылтэм зарезь дуннетӥ, Вазиське инме вӧсьёсын, Тэльмыре таӵе кылъёсын: "Инмаре, тон васькы пыжам, Утисе, тон лыкты дорам, Кужымтэм муртлы юрттыны, Шуг-лекын дыръям утьыны Бадӟымесь сайкыт вуосын, Лыз зарезь тулкым вылъёсын". Я, мынэ ни Вяйнямӧйнен, Нош дурись, сэзь Ильмаринен Мунчоын пӧсьын париськиз, Лычсузьымон пыриз, мисьтӥськиз, Ву пазяз вылаз, пыласькиз, Ымнырзэ париз чилямон, Синдурзэ миськиз пиштымон, Чыртыез кукей кадь вольыт, Мугорыз - пинал, дун-чылкыт. Берытскем бераз мунчоысь, Ӧз но тодмалэ огпумысь, Сокем вал чебер ымнырыз, Ӵыж-чебер пишто бамъёсыз. Вазиськиз тазьы собере: "Анникки, мусо сузэре, Вай али мыным дэремме, Воштӥськон дӥсьме дасяно, Эмеспи дӥсьме дасяно, Эмеспи дӥськут дӥсяно. Анникки лякыт но етӥз, Чылк векчи дэрем со вуттӥз, Дун, веськрес, чебер мугоръяз, Туж тупа парем вылтыраз. Штан ваиз, сюбег сыремын, Муминыз куке вуремын, Со дасям вылэм вынызлы. Туж тупа питрес макеслы. Кузь небыт пыдвыл со ӵектӥз, Ныл дыръяз мумиз, пе, керттӥз, Вынызлы, пезьгыт пыдкӧтлы, Ӟеч сием-юэм тыр куклы. Ку сапег ӟечсэ со ваем, Саксаын вурем, пе, вылэм. Кузь чагыр ыжгон пыдвылэн, Ныл дыръяз лэсьтэм маркеен. Чагыр дӥсь сётӥз на солы Дэремез вылэ дӥсяны. Юн пустол дукес но ваиз, Выль куско дукес со вуттӥз, Выль шуба - ог сюрс кыӵесэн, Сю пала чебер кильтретэн. Кускерттон-путо но ваиз, Анаез сое пужъятӥз. Зарниен керттӥз, чеберъяз, Куыса дасяз ныл дыръяз. Чиньыё пӧзьы но ваем, Йылъёсыз зарни пужыен. Лапп муртъёс сое лэсьтӥллям, Юн батыр килы сӥзиллям. Ӟеч йылсо изьы но вуттӥз, Ӵуж бабля йыраз изьятӥз. Атаез сое йӧндырем, Эмеспи дыръяз, пе, басьтэм. Ильмари, усто дуриськись, Кельышлы, чебер дӥсяськиз, Уарезлы соку вазиськиз: "Ужпиез кыткод кужмозэ, Кошовка быръёд чеберзэ Кузь сюрес вылэ потыны, Похъёла пала мыныны". "Гондыр ку тон вай на мыным Шунытэн вылаз пукыны. Тюлень ку но вай чалякгес Шобырто соин дӧдьыез". Ильмари, усто дуриськись, Корт дӧдьы вылаз со пуксиз, Нош ачиз тазьы вазиськиз: "Дӧдьыям тон лык, Инмаре, Биньгозыме кут, шудбуре. Уз, уз чиг шудбур гозыме, Уз тӥя Инмар дӧдьыме!" Ог нунал ворттэ, кык ворттэ, Куинетӥ ӵуказ но дыртэ. Куинетӥ ӵуказ дуриськись Вяйноез сутӥз, ӵош луиз, Огпумысь солы вазиськиз: "Ой, тон, Вяйно, туж ӟеч уром, Вай кидэ, огкыл тупатом: Ӵошатскон пыр ныл куралом, Мылкыдъяз гинэ ярашом. Уг басьто кужмысь нылмуртэз, Эриктэм уг нуо кенэз". Пересь Вяйно сэзь кариськиз: "Мон сюлмысь соглаш, - со шуиз - Зэм, кужмысь уг басьто нылэз, Эриктэм нуон - со шимес. Мед улоз нылмурт соиныз, Кин борды кыске сюлэмыз. Кӧт ӝожез ортчоз капчигес, Кур луон быроз чалякгес". Азьланьто соос мынонзэс, Котькинлэн аслаз сюресэз. Пыж мынэ - тулкым пазяське, Вал ворттэ - музъем зуркатске. Дыр уг ортчы трос - эсэпскын, Малпад ке, оло, син куспын. Уть, пуны утэ вырйылын, Куаньгетэ со зол юрт азьын, Уй палан весяк пеймытын, Юн, кужмо Сари шаерын. Нош пуны утэ ни лябгес, Ыргетэ Пурысь калленгес. Похъёла кузё вазиське: "Учкы ай, песяй, тон, иське, Малы-о Пурысь весь утэ, Юртъермес утись куальккетэ?" Нош кузё кышно валэктэ: "Дыр ӧвӧл, уже пумйылтэм - Тӥледыз ваньдэс сюдоно, Нуназе шыд-нянь вуттоно. Нянь пыжон, ческыт бискыли, - Лаёнэз кӧня - учкали. Нянь - бадӟым, пызе туж векчи, Кынаре-кате нош ичи". Уй палась кузё паймемын, Кышноос ужен ёрмемын, Нош нылъёс уже думемын, Гур дурын ке но шунтӥсько, Валесын ке но лошъясько. Похъёла кузё лабыртэ: "Пурысьмы юнме шат утэ? Мӧй пуны уз уты мугтэк, Шат утоз пужым пумитэ?" Пуныез шоры со учкиз - Кудлане утӥз-ыргетӥз, Тӧласькись вырйыл палъёсы, Кыдёкысь лулпу йылъёсы, Ӟеч валаз кузё та бордысь - Мар муген утэ, шол, Пурысь, Горд пыжен кин ке туж дыртэ, Лемменлахти сюм пыр лыктэ. Пужъятэм дӧдьы но дыртэ, Яр валлин ялан матэктэ, Вяйнямӧйнен, мӧй но етӥз, Похъёлае вазь ик вуиз. Ярдуре пыжзэ дугдытӥз, Лыз тӧлпо пыжзэ со пуктӥз, Корт поглет вылэ юнматӥз, Горд ыргон выжен со кельтӥз. Нош ачиз дыртӥз юртазы, Похъяысь липет улазы. Ӧс борды ӝамдэ ӝегатскиз, Мумыкор улэ со султӥз, Собере таӵе кылъёсын Вазиськиз капчи мылкыдын: "Мусо ныл, бызёд-а мыным, Монэн дась-а эш луыны, Вошъянтэм кузэн улыны, Кунулам курег луыны?" Уй пал ныл тазьы вазиськиз, Таӵе кыл вераз, со шуиз: "Зарезь мурт ӧвӧл мылкыдъям, Уясьёс ӧвӧл сюлэмъям. Зарезе нуэ тӧл визьдэс, Сильтӧлъёс куасьто визьноддэс. Уг, уг лу тыныд быземе, Тонэныд асме герӟаме, Весяклы эшед луэме, Валесъёс тыныд валеме, Миндэрдэ небыт воземе". Ильмаринен Похъёлаын паймымон ужъёс лэсьтэ Ильмаринен ӟеч дуриськись, Туж усто чебер лэсьтӥськись. Уй палась юртэ вамыштэ, Похъёла корка со дыртэ. Нош солы мусур чаль вутто, Карасэн чечы но сёто. Куноян кияз люкаське, Ильмари соку вазиське: "Улытозь но, шол, вылытозь, Юг зарни толэзь пиштытозь, Уг но йӧтты мон ымдурме, Ӧй ке адӟы ас басьтонме. Дасямын ни-а гажанэ, Дась ни-а мынам витёнэ?" Похъяысь песяй пыкиське, Пумитаз тазьы вазиське: "Нылмуртэз секыт дасяны, Витёндэ кема дӥсяны, Кутчамын ӧвӧл на пыдыз, Дась ӧвӧл на чик мукетыз. Яратон нылыд дась луоз, Басьтоно нылыд чаль вуоз, Кыйкаро лудэз ке гырид, Гырондэ ке ӟеч йӧндырид. Тон эн гыр муэз герыен, Чик эн йӧт сюез амезен. Хийси но гыриз со муэз, Лемпо но гыриз со лудэз, Туй-ыргон амезь юнматъяз, Тыл пушкысь сабан басьялляз. Эсьмаса, пие но, шудтэм, Гыронзэ кельтӥз быдтытэк". Ильмари-дурись, туж етӥз, Гӧр пушказ зарни со куштӥз, Тыл пӧлаз понӥз на азвесь, Герызэ дуриз соослэсь. Пыдкутчан лэсьтӥз анданлэсь, Штан-чалбар ладъяз корт листлэсь. Я, пыдзэ кутчаз соосын, Макессэ утёз кортъёсын. Дӥсяськиз со корт дэремен, Нош куссэ керттӥз анданэн. Чиньыё пӧзез вал кортлэсь, Огшоры пӧзез юн излэсь. Тыл бӧмо валэз со бырйиз, Улошо валэз со кыткиз. Гыроно муэз гырыны, Выльвылэз ӧдъяз ӝутыны. Адӟе: кый йыръёс коскасесь, Йыркобы лыос шимесэсь. Шието. Тае адӟемъяз, Ильмари тазьы, уть, вераз: "Э, тон, кый, Инмар кылдытэм, Тынэсьтыд йырдэ кин ӝутэм? Кин косӥз, я, кин лӧпкытӥз, Вылӥе йырдэ кыскытӥз? Чыртыед тынад куасаськиз? Нош али шонер возиськись. Кошкы тон ӝоггес пыд улысь, Ыш куаръёс пӧлы син азьысь, Гылӟы ӝог куакъёс улъёсы, Пегӟы вож турын пӧлъёсы. Мычиськид ке, уть, тон бырид, Укко куаӵ пилёз йыр шортӥд. Пасялоз андан ньӧлъёсын, Уськытоз со корт зоръёсын. Я, гыриз-быдтӥз кыйлудэз, Небӟытӥз сьӧд кый бусыез. Со бертӥз, вераз жингырес: "Мон гыри-быдтӥ кыйлудэз, Бугыртӥ сьӧд кый возёндэс. Кыйёсын ӝутӥ вань мудэс, Вае, бен, ӝоггес нылаштэс! Сётоды-а тӥ сётондэс?" Уй палась кузё кышномурт Пумитаз вазе ни чурт-чурт: "Нылашмес тыныд ваёзы, Кышнолы кияд сётозы, Туониысь гондыр ке кутӥд, Манаысь кион ке вуттӥд, Кӧшкемыт тэльысь-ӵаӵӵаысь, Кулэмъёс улон дуннеысь. Сю но вал сьӧсез кутӥсьёс, Нош ӧй вал отысь бертӥсьёс". Ильмари, усто дуриськись, Даураз киыз туж мынӥсь. Анданлэсь кортнэт со лэсьтӥз, Нюктозэ кортлэсь тупатӥз. Со сьӧсез кароз кылзӥськись, Нош ачиз тазьы вазиськиз: "Ӵынкыт ныл, буслэн нылмуртэз, Сипужен тон пужны бусэз. Кыдырты бустэ тон тыраз, Пӧйшурлэн сюрес вылъёсаз, Вамышъям медам кылӥськы, Сьӧсь пӧйшур медам кышкатскы!" Серметаз дурись кионэз, Нюктояз батыр гондырез, Туони пал нюлэс кыралын, Лызалэс пеймыт тэль шорын. Берытскиз. Вуиз но вазе: "Сёт нылдэ, кузё-песяе, Лек гондыр тыныд кутэмын, Манала кион вуттэмын!" Нош уй пал кузё-песяед Вазиське, уг луы со пужет: "Мон уг сёт ӵӧжме-нылокме, Зарезь выл чагыр бурдоме, Ӧд ке кут бадӟым чипеез, Ӝог бызись вуысь чорыгез, Нош сёто, сьӧсез ке кутӥд, Манала вожысь ке поттӥд, Кузь казез вуэ куштытэк, Капчи казь шуре пуктытэк, Сю мурт вал чипей кутӥсьёс, Огзы но ӧз бертэ соос". Ильмаринен, ӟеч дуриськись, Весяксэ усто лэсьтӥськись, Тыл пушкын дуриз ӧрӟизэ, Тылбӧмо лэсьтӥз со бурдзэ. Гижызэ дуриз анданлэсь, Макессэ дуриз со кортлэсь, Бурдъёссэ лэсьтӥз пыж бордлэсь. Тыбырыз вылэ со тубиз, Бурдъёсыз вискы лач пуксиз. Уть, ӧрӟи лобе сэзь, капчи, Бурдыныз шона туж шӧртчи. Чипеез ӧрысь со кутоз, Шим пинё сьӧсез со поттоз. Туонела шурысь, мур вуысь, Манала кулон шур вожысь. Пал бурдыз вуэ йӧтылэ, Мукетыз инме вутскылэ. Гижыез гыре зарезез, Нош нырыз зырӟе гурезез. Туониысь чипей но вуиз, Вупуны кожиз, матэктӥз. Туж пичи уд шу чипеез, Туж бадӟым уд малпа сьӧсез. Кык ож тӥр кузьда, шол, кылыз, Мажес ныд кадесь пиньёсыз. Куинь шур из выръёс кадь ымыз, Сизьым пыж кузьда тыбырыз. Дурисез турттэ сиыны, Улэпкын малпаз ньылыны. Тыл кадь лек ӧрӟи ӝог вуиз, Вожомем бурдо матэктӥз, Туж пичи уд шу бурдоез: Сю сажем кузьда ым дӥньыз, Ог куать ӧр пасьта ньылоныз, Кылыз куать шилэсь но кузьгес, Вить сюрло кузьда гижыез. Чипеез-сьӧсез со адӟиз, Чупырес сямзэ синйылтӥз. Ньӧл кадь ӝог васькиз, ӝабырскиз, Мертчиськиз сьӧмаз, кырмиськиз. Со ӝутӥз сьӧсез гижыяз, Тыпылэн паськыт йылӥяз. Отысен пужым вай вылэ Вырӟонтэм сое ӝиптылэ. Собере сӥльзэ шӧмъялтӥз, Чорыглэсь кӧтсэ кырылтӥз, Чепыльтӥз ӧжыт гадёнзэ, Вандыса куштӥз сьӧсь йырзэ. Ӧрӟилы кеськиз дуриськись: "Ой, ӧрӟи, урод уж лэсьтӥсь! Кыӵе тон, ӧрӟи, лэсянтэм, Ма луод сыӵе, туж йӧнтэм, Веръямед ини чипеез, Кыремед кӧтсэ, кипырмес. Кӧтысьтыз сӥльзэ кесямед, Вандыса йырзэ куштэмед!" Нош ӧрӟи андан гижыё - Пӧсектӥз. Лобиз лек шиё. Вылӥе инме ӝутӥськиз, Лыз пилем борды йӧтӥськиз. Пилемъёс лобо, ин ваське, Ӟукыртэ, инбам куасаське, Вуюись инмын тӥяськиз, Толэзьлэн сюрыз куасаськиз. Ильмари усто, туж етӥз, Сьӧсь чипей йырез но вуттӥз, Вармумиз доры кузьымен Вазиськиз солы лякытэн: "Медло та пукон весяклы Уй палась чебер коркалы". Уй палась песяй вазиськиз, Таӵе кыл вераз, со шуиз: "Бызёно нылмы вуэмын, Сюреслы ини дасямын. Сётоно луоз ӵӧжкаймес, Зарезьтӥ мусо уясьмес, Ильмаримылы кышнолы, Кузпаллы дурись батырлы - Пумозяз ӵошен улыны, Кунулаз курег луыны". Вяйномы, тае кылыса, Кайгуо но ӝож луыса, Бертонъяз лыктэм сюрестӥз, Кыл вераз, тазьы со шуиз: "Мар каром таӵе улонъям, Кызьы-о ӧз лыкты тодам Пиналысь кышно вайыны, Ас дыраз кузпал шедьтыны! Кудӥз ке ялан нукыртэ, Кин кышно вайны туж дыртэ, Собере жаля укыргес, Туж, пе, вазь кылдӥз семьяез". Вяйнямӧйнен юн-юн алӥз, Ваньмызлы вераз, со косӥз: "Мӧй дыръя нылэз курантэм, Ныл вылын синдэ возёнтэм, Ныл понна вожан поттонтэм, Гыостӥ вожвыл ветлонтэм, Егитъёс куспы пырсконтэм". Похъёлаын Ильмариненлэн сюанэз Сюанлы кема дасясько, Ӝӧк вылэ уно пуктӥсько Уй палась дано юртъёсын, Сариола пал улосын. Мар вутто бадӟым сюанэ, Ӝӧк сьӧрын котыр пуконэ, Ӟеч шулдыр мылкыд ӝутыны, Кема дыр ӵоже юыны, Ваньмызлы кӧтсэс тырыны, Сюдыны ваньзэс, сектаны? Карьялаын вал кунянзы, Суомиын пӧрмиз со ошлы. Со пичи но вӧш-вӧш ӧй вал, Нош кунян ӧй вал ни пинал, Хям дорын быжыз шонаськиз, Кем вадьсын йырыз сэзъяськиз. Котькудӥз сюрыз - сю сажем, Ымнырыз ог сю витьтонъем. Сэзь юрмег чырты котыртӥз Арня ӵож, оло, котырскиз. Ваёбыж лумбыт, дыр, лобиз - Сюрысьтыз сюраз вуылӥз. Ог толэзь коньы бызьылэ, Ош быжысь чырты лёг вылэ. Уть, кыӵе бадӟым ош вылэм Суоми шаерын со будэм. Карьяла палась басьтэмын, Похъёла эле вуттэмын. Сю батыр сюраз кырмиськиз, Сюрс батыр йыртӥз весь кыскиз. Ошаксы мынэ каньылля, Сари пал куарез чепылля. Нюр дурысь куртчке турынэз, Сильсьӧрыз зырӟе инбамез. Тӥни озьы ошез кыскизы, Похъёла пала нуизы, Нокинлы сое вандыны, Та бадӟым ошез ӵогъяны. Уй палан ӧвӧл дӥсьтӥсьёс, Чик ӧвӧл батыр выжыос. Будӥсьёс пӧлын но ӧвӧл, Пересьёс пушкын но ӧй вал. Сьӧд батыр ӝутске зарезьысь, Юн дӥсьтӥсь потэ тулкымысь Кыръёсы, вӧлмыт интые, Нюлэстэм паськыт дуннее. Мугоро ӧй вал со тужгем, Туж ӧй вал пичи но сокем. Ӵашалэн пушказ кылльысал, Пуж улын но со сылысал, Кикурез солэн вал кортлэсь, Ма, аслаз но тус анданлэсь. Йыр вылаз шлемез кӧльылэсь, Пыдкутчан излэсь-меӵаллэсь. Батырлэн пуртэз зарнилэсь, Пуртэзлэн ныдыз ыргонлэсь. 1: 1: Я, пудо вандӥсь но шедиз. 1: Сӥль качась но, уть ай, сюриз. 1: Суоми пал вандос ошаклы, 1: Кӧшкемыт бадӟым пудолы. 1: Ошакез батыр пумитаз - 1: Шуккалтӥз ошез чыртыяз. 1: Пыдесэз вылэ султытӥз, 1: Муз вылэ сое погыртӥз. 1: 1: Сиёнэз нош трос-а потӥз? 1: Ма, уз лу сокем тыр вылтӥз: 1: Сю вышкы сӥлез люкаськиз, 1: Сю сажем сӥльтырем лэсьтӥськиз. 1: Чучолё тямыс пыж вирез, 1: Куать бадӟым бекче пуш кӧез, 1: Ваньмыз со сӥлы сюанлы, 1: Сариолаын юонлы. 1: 1: Уй палась кузё кышномурт 1: Вышкыяз лэзиз ву тырмыт, 1: Ӝыныяз гинэ со лэзиз, 1: Йыды тысь отчы будэтӥз, 1: Ватсаса туг йыр трос понӥз, 1: Со кутскиз юон пӧзьтыны, 1: Юн кужмо мусур лэсьтыны! 1: Со сылоз выль пу бекчеын, 1: Кызьпулэсь лэсьтэм вышкыын. 1: 1: Толэзен изэз ӟырдато, 1: Аръёсын вуэз быректо. 1: Сутӥзы тыпы сурдъёсты, 1: Куасьтӥзы гудӟем вуосты. 1: Вань тулькъёс ини шеромо, 1: Ошмесъёс тросэз ни куасьмо. 1: Со кошке мусур пӧзьтонэ, 1: Кудӟытӥсь юон пуктонэ. 1: Уй палан сюан лэсьтонэ, 1: Ӝӧк сьӧрын шулдыр юонэ. 1: 1: Шормуӵын лыз ӵын лӧсъяське, 1: Мунырын тылбӧм тӧлаське. 1: Ӝутӥське нап ӵын ӵак-бусыр, 1: Инбаме тубе бус омыр. 1: Лек ӝуась уно тылскемлэсь - 1: Ӵын пушкын Похъя ӝыныез, 1: Карьяла сукыр ни быдэс. 1: 1: Уй паллэн кузё кышноез 1: Пӧраны кутскиз чалякгес. 1: Тыл вылын пӧзё пуртыос, 1: Тачырто кӧйын табаос. 1: Нянь котӥз, ныркиз шумесын. 1: Колдыос уно пыжемын. 1: Сюдоно трос ӟеч куноез, 1: Сектано дуно выжыез - 1: Похъёлаын кузь сюанын, 1: Сариолаын юонын. 1: 1: Уй паллэн кузё кышноез 1: Иворчи ыстӥз чалякгес. 1: Юромо косӥз но келяз, 1: Нош таӵе кылъёс со вераз: 1: 1: "Ой, мынам ляльчи нылоке, 1: Юрттӥсе мынам, ӟечоке! 1: Калыкез ӧтёд сюанэ, 1: Вань батыр ёзэз - юонэ. 1: Вай нёпо, ранӟись муртъёсыз, 1: Куректӥсь, куанер лулъёсыз, 1: Шудтэмез но вай, синтэмез, 1: Сӧсырмем но чут калыкез. 1: Синтэмзэ тон вай пыжъёсын, 1: Чут-сӧсыр муртэз вал вылын, 1: Ӧлексы муртэз - дӧдьыын. 1: 1: Ӧть ваньзэ Похъя калыкез, 1: Калевала пал улӥсез. 1: Визьмо Вяйно но мед лыктоз. 1: Вуж катъя кырӟась мед луоз. 1: Каукоез нош эн ӧть гинэ, 1: Ахтиез эн вай сюанэ - 1: Керетон-сурым со поттоз. 1: Сюанэз сурась со луоз". 1: 1: Уй паллэн кузё кышноез 1: Утялтэ ӧтем калыкез - 1: Вӧй чиля ымдур котыраз, 1: Табаньёс тыраз кикураз. 1: Кӧттырмон сюдэ кунозэ, 1: Котькинлэсь ӟечгес - эмессэ. 1: 1: Вӧш вылаз вал горд чорыгъёс, 1: Дуръёсаз пыжем парсь сӥльёс, 1: Чучолё тырем тэркыос, 1: Ческытэн тырмем тусьтыос. 1: Сюдоно, пӧй, ӟеч куноез, 1: Нош тужгес - гажан эмессес. 1: 1: Нош тани ляльчи нылоксы, 1: Котьку но юрттӥсь ӟечоксы, 1: Вынлыко юон кылдытӥз, 1: Дуз-сюмык котыр со лэзиз: 1: Тушъёссэс сурен гылтыны, 1: Шукыё сурен тӧдьманы - 1: Вань ӧтем куно муртъёслэсь 1: Нош тужгес - эмеспизылэсь. 1: 1: Кин али силёз-кырӟалоз, 1: Кин чебер усто мадьылоз, 1: Уй палан бадӟым юонын, 1: Сариолаын сюанын? 1: Шол уз кырӟалэ, дыр, ӟусъёс, 1: Уг ке кырӟало пукисьёс. 1: Шол уз кырӟалэ выж пулъёс, 1: Уг ке кырӟало куноос, 1: Шол уз жингыртэ укноос, 1: Уг ке шумпото кузёос, 1: Ӝӧк уз экты чик но шумприч, 1: Ӝӧксьӧръёс уг экто ке чик. 1: Гур уз гуреты ас понназ, 1: Гурласез ӧз лу ке вӧзаз. 1: 1: Я, бен, Вяйно, мӧй тодосчи, 1: Вашкала гуръя усточи, 1: Со кутскиз шулдыр поттыны, 1: Кырӟанъёс ӧдъяз мытыны. 1: Со бордын вал вань кырӟанъёс, 1: Кыл йылаз чебер мадькылъёс. 1: 1: Вяйнямӧйнен, мӧй, ушъянэс, 1: Шулдыръяз куно калыкез. 1: Кышноос горо котырак, 1: Пиосъёс кылзо пальтырак, 1: Ваньзы ик пуко паймыса, 1: Макем со кырӟа абдратса. 1: Шумпотон пушсэс тырмытӥз. 1: Кылзӥсьтэм муртэз но шунтӥз. 1: Бызись ныллы визь-кенешъёс 1: Тырмымон ваньмыз юизы, 1: Туж сӥлы куно луизы, 1: Похъёла гуртын сюанын, 1: Пиментолаын юонын. 1: Пересез ляльчи нылкышно 1: Визь-кенеш луиз сётоно: 1: "Кылзы ай, мынам нылоке, 1: Мон тыныд верай вал куке, 1: Ог сю пол визьмай вал астэ: 1: Эн данъя сокем курасьтэ. 1: Курасьёс, бен, зэм вуозы, 1: Туж сӥлы муртъёс лыктозы, 1: Астэ уть, зол сыл, луы юн. 1: Вераськы тазьы пиосын, 1: Вазиськы таӵе кылъёсын: 1: "Адӟонэ сыӵе дыр, мынам, 1: Шудбуре уз лу улонам, 1: Выль кенлы уз нуэ асме, 1: Ляльчиын уз лу улэме. 1: Ныл сямы урод, ваменэс, 1: Эриктэм уз пот луэмез, 1: Зӥбетэз уз пот чидамез. 1: Ог кыл ке монэ тышкасько, 1: Соослы кыкен вазисько. 1: Бабляям ке вань ӝабырскись, 1: Йырсие борды кырмиськись, 1: Бабляе понна мон мыро, 1: Пунэмзэ ваньзэ ик тыро". 1: 1: Тон ӧд анла визь-кенешме, 1: Ӟеч ужлы, визьлы нодъямме, 1: Тылӝуэ ачид мынӥськод, 1: Аймуртлы ляльчи тон луод, 1: Анайзы доры пыраклы 1: Тон кылёд ини ляльчилы. 1: 1: Дышетскон пушкы тон мынод. 1: Курадӟод отын, шугадӟод. 1: Шуг-лекен сётскоз дышетскон, 1: Кыстӥськоз кема курадӟон. 1: Биньгозы тыныд басьтэмын, 1: Жильыос ини дасямын. 1: 1: Кайгуэз ай тон шӧмъялод, 1: Шуг-лекез адӟод ай, адӟод: 1: Аймуртлэсь чурыт анлэссэ, 1: Бабалэсь из кадь ик кылзэ, 1: Шыднарлэсь кынтӥсь вазёнзэ, 1: Узьылэсь мышлань сылэмзэ. 1: 1: Ой бен тон, мусо сузэре! 1: Ваньзэ тон воштод табере: 1: Атайдэ воштод лекмуртэн - 1: Атайзы шуон аймуртэн. 1: Анайдэ воштод мукетэн - 1: Анайзы шуон бабаен. 1: Ас вындэ воштод шыднарен - 1: Ӧвӧлтэм но лек пияшен. 1: Сузэрдэ воштод музонэн - 1: Йӧнъяськись сямо узьыен. 1: Поръяськод ук вал кышеттэк, 1: Ветлӥськод вал чик кайгутэк. 1: Кышеттэк дорад тыршылӥд, 1: Мар мылыд потэ - лэсьтылӥд. 1: Нош бызён кышет - сюлмаськон, 1: Йыр кышет - со пуш куректон. 1: Тӧдь дэра кышет - ӝож улон, 1: Чалмаё изьы - кайгырон. 1: 1: Кыӵе ӟеч улон нылйырын, 1: Атыкай юртын нылдырын - 1: Эксэй кадь юртад тон улӥд, 1: Палаштэк гинэ, шол, ветлӥд. 1: 1: Нош тани кошкод дорысьтыд, 1: Ваньзэ басьты тон аслэсьтыд, 1: Нош дорад кельтод куинь сямдэ: 1: Лымшорам берад изёндэ, 1: Мумидлэсь мусо каронзэ, 1: Вӧй шуккем бераз вӧйняньзэ. 1: 1: Ваньзэ басьты тон ас сьӧрад, 1: Вӧтъёстэ нош вунэт дорад. 1: Нылъёслы тон кельты юртад 1: Шутэтскон-кыллён интыдэ, 1: Ӟус дуре - жингрес гуръёстэ, 1: Укное - капчи мылкыддэ, 1: Ӵужонлы - шулдыр бергандэ, 1: Шудондэ - шобрет улъёсы, 1: Лякыттэм дырдэ - гуртъёсы. 1: Дыг-азьтэм сямдэ выж выллы, 1: Яке сёт нылмурт эшедлы, 1: Куак пушкы сое мед нуоз, 1: Сусыпу пӧлы мед куштоз. 1: 1: Выль сямъёс тон кут, йылолъёс, 1: Вунэты вужзэ тон золос. 1: Атайдэ-ӟечтэ тон кельтод, 1: Аймуртлэсь кылзод но улод. 1: Тон солы улэ йыбыртъя, 1: Вазиськы солы нетэзъя. 1: Выль сямъёс тон кут, йылолъёс, 1: Вунэты вужзэ тон золос. 1: Бубайзы гур сьӧр кион ке, 1: Песяйзы мумы гондыр ке, 1: Шыднаред ӧсул убир ке, 1: Узьыед азбар кортӵог ке, 1: Тон озьы но луы сӥлы, 1: Йыбыртъя каньыл ваньзылы. 1: Аныкай коркад сямен ик, 1: Атыкай юртад сямен ик, 1: Кызьы йыбыртъяд бубидлы, 1: Мыкыръяд йырдэ мумидлы. 1: 1: Мылкыдыд оло нош кылдоз - 1: Гуртамед куке но потоз, 1: Куриськы но пот бускельне, 1: Нош лэзё ке, мын азьлане. 1: Мурт дорын куно луыкуд, 1: Возь астэ визьмо, кылдэ кут, 1: Эн лекаты ас юртъердэ, 1: Эн курла тон чик бабадэ! 1: 1: Выль кенъёс юам карозы, 1: Кышноос бордад мерскозы: 1: "Бабаед сётэ-а вӧйзэ, 1: Ас мумид музэн бусьтырзэ?" 1: Ноку но эн вазь: "Бабае 1: Уг, уг сёт, уг сюды вӧен". 1: Котьку шу юан дыръязы: 1: "Дурыен вае анайзы!" 1: Ӵок, ачиз вужзэ ке ваиз, 1: Тол ӵоже кыллем ке вӧйыз. 1: 1: Тани мар на вань веранэ, 1: Тани мар на вань ватсанэ: 1: Дорысьтыд али ке потӥд, 1: Мурт корка ӝоген ке вуид, 1: Эн вунэт вордэм анайдэ, 1: Ӝож эн кар мусо пересьтэ! 1: Тодад возь: "Мумид будэтӥз, 1: Гадьысьтыз тонэ сюдылӥз, 1: Со тонэн ӧз изь уйёссэ, 1: Вунэтэ вал ӵем сиськонзэ. 1: Кӧкыын тонэ ветталляз, 1: Сюлмаськиз, нылзэ весь жаляз". 1: 1: Кин куштэ вордэм анайзэ, 1: Ӝож каре сое пыраксэ, 1: Манала пала медаз мын, 1: Медаз лу со Туонелаын. 1: Манала солы ӟеч тыроз. 1: Пунэмзэ солы берыктоз. 1: Со тодмет, кин ке анайзэ, 1: Вунэтэ-куштэ пыраксэ". 1: Кураськись кышнолэн мадемез 1: Песянай пукиз выж вылын, 1: Пельпумаз шобыр возъямын, 1: Ӧс куспез гуртын волятӥсь, 1: Пуйыен ветлӥсь-кураськись. 1: Со тазьы вераз улэмзэ, 1: Тӥни тазьы мадиз вылэмзэ: 1: "Кылзы ай, монэ, сузэре, 1: Тон бызид ке выль юртъере, 1: Картэдлэн кузяз эн ветлы, 1: Кызьы мон улӥ, эн улы - 1: Картэдлэн кузяз - чирдэмъяз, 1: Эмеслэн гинэ мылкыдъяз. 1: Сяська кадь мон вал ас дорам, 1: Сусыпу вай кадь - ас гуртам, 1: Выль пушъет сямен мон будӥ, 1: Вылӥе асме мон ӝутӥ. 1: Горд эмезь монэ нимазы, 1: "Зарни ныл" монэ шуизы, 1: Вал "ӵӧжпи" нимы азбарын, 1: "Тютёпи" - коркан, юрт пушкын, 1: Нимазы "Вуӵӧж" агайёс, 1: Шуизы "ӟиллё" апайёс. 1: Мон "сяська" но вал азбарын, 1: "Узыен эмезь" бусыын. 1: Бызьылӥ пумтэм ярдуртӥ, 1: Тэтчаса ветлӥ возь вылтӥ, 1: Кырӟалляй нёжал шоръёсын, 1: Сильылӥ гурезь бамъёсын, 1: Куанылӥ шулдыр тэльёсын, 1: Серекъяй, шудӥ кушъёсын. 1: 1: Нылашлэн потэ быземез, 1: Мурт коркан потэ улэмез. 1: Нылашлы озьы кылдэмын, 1: Со понна нылаш будэмын: 1: Карт вӧзын выль кен луыны, 1: Анайзы понна тыршыны. 1: 1: Мон бызи картлы шуыса, 1: Нош басьтӥз баба кырмыса. 1: Куранзы дыръя сӥзизы, 1: Нуонзы дыръя данъязы: 1: Куать юрт, пе, кызлэсь ӝутэмын, 1: Кык пол трос бӧльмы лэсьтэмын. 1: Бусыос кузя амбаръёс, 1: Сюресъёс урдсын возь вылъёс, 1: Нош йыды бусы шур дурын, 1: Сезьымы пужым яг вӧзын, 1: Сюсекъёс юэн тырмемын, 1: Кутсамез витё обиньын. 1: Сю манет ни, уть, поттэмын, 1: Ай сюэз луоз басьтэмын". 1: Мон шузи, соглаш кариськи, 1: Мылкыды ӝутскиз, лӧпкытски. 1: Куать пыкет вылын юртъерзы, 1: Сизьым пуӵ вылын корказы. 1: Бусызы лекен тырмемын, 1: Синазькыль копак тэльёсын. 1: Азбар тыр мынам шудтэме, 1: Нюлэс тыр ӝожен бӧрдэме. 1: Сусекын кылле йыркуран, 1: Кабанын тросаз лек касан. 1: Даллашон сюэн верамын, 1: Кыкетӥ сюэз дасямын. 1: 1: Мон ӧй выр сокем ӝожаны, 1: Огкылысь тырши улыны. 1: Кылзӥськись потӥз луэме, 1: Ваменэс ӧз пот улэме. 1: Мон луд кеч музэн бызьылӥ, 1: Сэзь чайы сямен ик ветлӥ. 1: Изьыны мон бер выдылӥ, 1: Котькинлэсь но вазь султылӥ, 1: Нош ӧйлась монэ чик гажась, 1: Яратӥсь ӧй вал, мусоясь, - 1: Гурезез ке но берыкъяй, 1: Меӵалэз ке но тӥялляй. 1: 1: Ю-тысез гырын весь туи, 1: Кеньырез пужнӥ - шат сии? 1: Анайзы ваньзэ тыкылӥз, 1: Тыл чырты ваньзэ ньылылӥз. 1: 1: Мон ветлӥ, куанер, туж ӵемысь, 1: Юртамы одӥг кен вылысь, 1: Нюръёсысь ӝуйы вайылӥ, 1: Ӝуен пызь аслым котылӥ. 1: Гудӟемысь вуэз юылӥ, 1: Ву вылын гинэ мон улӥ. 1: Нош чорыг сии мон туж шер, 1: Корюшез сии ук, куанер, 1: Со но - казь вуысь кыскыку, 1: Казьёсыз пыже тырыку. 1: Анайзы соку сётылӥз, 1: Векчизэ гинэ мычылӥз. 1: Нунал тыр уг сёт вал, дышмон, 1: Одӥг пол ке но кӧттырмон. 1: 1: Анайзы дорын улыкум, 1: Ваньмыныз уртче ужакум, 1: Чуртнало вал весяк шугзэ: 1: Иншырын - кутэс секытсэ, 1: Нош етӥн сэстон бадӟымзэ, 1: Гид пушкын саник - кузьзэгес, 1: Малпазы - уз жадь, чидалоз, 1: Ма, эсьма, жадё вал пиос, 1: Пиосъёс ай мар - тыр валъёс! 1: 1: Куарето вал юнме монэ, 1: Куарето вал дауре гинэ, 1: Лекато вал вань сямъёсме, 1: Сьӧдмало вал весь ӟеч нимме. 1: Мон вылэ курлан усьылӥз, 1: Лекатон карган киськылӥз. 1: Тылгизьы сямен вуылӥз, 1: Инмысь корт зор кадь усьылӥз. 1: Мон соку но чик ӧй ӝожа, 1: Эшшо но уло, дыр, кожай, 1: Анайзы вылэ ужаса, 1: Лек баба понна тыршыса. 1: Кӧт ӧз веська ни быдтырзэ, 1: Чидаме ӧз лу ни зэмзэ, 1: Картэ сьӧсь кион кадь луиз. 1: Гондырлы, оло, со пӧрмиз. 1: Секыт зыр возиз со кияз, 1: Конгырок боды кунулаз. 1: Со жугиз монэ зӧк зырен. 1: Тышкалляз конгро бодыен. 1: Нош огпол басьтӥз сюлозэ, 1: Жугыны кутскиз кузпалзэ, 1: Муртэз ӧз, монэ - кышнозэ. 1: 1: Мон султӥ йӧ кадь валесысь, 1: Шунамтэ, кезьыт тушакысь. 1: Ӧс дорозь монэ со донгаз, 1: Йырсиме кырмиз киосаз, 1: Туж лекен кутӥз но кысказ. 1: Тӧлбуръя пальккиз бабляме, 1: Кӧс тӧлъя лэзиз йырсиме. 1: 1: Зӧк борддор сьӧрын туж чарак 1: Мон сылӥ, возьмай чапчара: 1: Чалмытскоз я уз лек-йӧнтэм, 1: Басылмоз я уз жалясьтэм. 1: Йыркуро картэ чалмытэк 1: Сьӧсь сямен выриз дугдытэк. 1: Нош тани мон копак кынми, 1: Пуэктӥ, мискинь, ӟонгырми. 1: Вуж амбар сьӧрын сылыса, 1: Ӧс сьӧрын кема кынмыса. 1: 1: Мон куштӥ мусо коркаме, 1: Аслэсьтым шуныт юртъерме. 1: Сюресэ потӥ азьлане: 1: Нюр вылтӥ горд сюй месыса, 1: Йӧ вуэз мултэс коласа, 1: Мон, куанер, мынӥ кыдёке, 1: Пыдйылчи сямен, калыке. 1: Юртъертэм, шалмем пыдйылчи, 1: Кураськись луи, куарулчи, 1: Кин йыга муртлэн ӧс сьӧраз, 1: Тодмотэм муртлэн капкаяз. 1: Трос муртэд котыр дуннеын, 1: Уноез асьме улосын, 1: Куаретоз монэ жалятэк, 1: Тышкаськоз синмам укыр лек. 1: Нош ӧжыт сыӵе ӟеч муртъёс, 1: Кин вера мусо ӟеч кылъёс, 1: Кин ке ӟеч кылын вазиськоз, 1: Кин ӧтёз монэ гур вылаз, 1: Зорыку пыри ке дораз, 1: Кезьытэн сюри ке корказ, 1: Йӧӟектэм дэрем сӧзыен, 1: Силь лымы пуксем шубаен. 1: 1: Нош азьвыл егит аръёсам 1: Чик ӧй оскысал даурам, 1: Ог сю мурт ке но верасал, 1: Ог сюрс мурт ке но оскытсал, 1: Та сюрес вылтӥ мынонме, 1: Та кабе тазьы ӝимонме, 1: Мар калэ али вуэмын, 1: Мар сюрес вылэ султэмын. 1: 1: Эмеспилы визь-кенешъёс. 1: Песятайлэн мадемез 1: Я, сётӥм ныллы дэмланъёс, 1: Вуоно кенлы визьнодъёс, 1: Вазиськом али вынмылы, 1: Визь тыром йыраз эмеслы: 1: "Эмеспи, тау кар шудэдлы, 1: Бӧкпӧриз тыныд кузпаллы. 1: Шудэд зол медло, шумпотмон, 1: Инмаред сётӥз данъямон. 1: 1: Ӟеч нылзэ келяз Кылдысин, 1: Бур кузьым дасяз вылысь ин. 1: Тон тау кар ныллэн бубизлы, 1: Нош тужгес тау кар мумизлы, 1: Ас нылзэс быдэ вуттӥзы, 1: Ас нылзэс тыныд кузьмазы. 1: 1: Эмеспи эше, гажанэ, 1: "Сэзь батыр" шуо мон тонэ. 1: Нылдэ эн ну выж миськыны, 1: Гулбечез - гидэз сузяны. 1: Со атай юртаз вал сюсьтыл. 1: Аныкай корказ - сяська ныл, 1: Со ӧз выр сэрег миськонэн, 1: Гулбечез, гидэз сузянэн. 1: Пукылӥз укно дуръёсын, 1: Бергалляз корка шоръёсын. 1: Ӝыт атай понна - шумпотон, 1: Ӵук анай понна - муспотон. 1: 1: Эмесэ, гажан нылмурттэ 1: Уть лякыт, мусо дыдыктэ, 1: Кыдёкысь ваем тютюдэ. 1: Мӧзмыны эн сёты, ятэ! 1: Туж мӧзмон дырыз ке вуиз, 1: Дор палзэ кушкон ке зӥбиз, 1: Тон валдэ пыртод вайыжад, 1: Тӧридэ кыткод дӧдьыяд, 1: Палдэ ну атай юртъераз, 1: Мумизлэн мусо коркаяз. 1: 1: Эн шу тон: "Мусо нылокмы, 1: Туж чебер пичи дыдымы, 1: Выжытэм азьын будэмын, 1: Тодмотэм юртысь потэмын - 1: Нылмылэн юртэз туж тодмо, 1: Выжыез котыр туж визьмо, 1: Сьӧд кӧжы тон кизь мертэтэн, - 1: Ваньмызлы усёз кӧжыен. 1: Етӥн тысь кизёд кудыен, 1: Со вуоз быдэн нюжаен. 1: 1: Ноку но, эмес пиоке, 1: Урод эн кар тон нылокез, 1: Эн визьма ляльчи урысэн, 1: Чик эн жуг сюмыс сюлоен. 1: Ньӧраса эн бӧрдыты, эн, 1: Корказяд эн сюд чапкыен, 1: Ведь азьвыл атай юртъераз, 1: Гажано анай коркаяз, 1: Визь ӧз тыре уар урысэн, 1: Чик ӧз жуге е сюлоен, 1: Ньӧраса ӧз жуге ноку, 1: Корказьын уг йӧт вал чапкы. 1: 1: Кузпалдэ уть, борд кадь ик сыл, 1: Ӧс янак кадь. Эн кар сюрныл, 1: Бабаез медаз сётъя тыш, 1: Аймуртэз медаз сое пыж. 1: Мурт калык медаз кары кур, 1: Вӧзмуртэд лексёз но укыр. 1: Шуозы: тон жуг кышнодэ, 1: Ӵектозы: тон визьма содэ, 1: Нош тон жаля ас кузпалдэ, 1: Эн, эн жугы ас гажандэ. 1: Тон сое куинь ар ук курад, 1: Та дырозь сое тон возьмад. 1: Дышеты тон ас кузпалдэ, 1: Муспотон, чебер улмодэ, 1: Дышеты сое ӧс сьӧрын. 1: Нодъя ар ӵоже юрт пушкын, 1: Визьмалод арзэ кылыныд, 1: Кыкетӥ арзэ синмыныд, 1: Вуисяз йыг кар пыдыныд. 1: 1: Ӧз ке кылзӥськы кышноед, 1: Ӧз ке валатскы дуноед, 1: Шашыысь тон чиг камышез, 1: Чуньыбыж тон вай кузьзэгес, 1: Соин визьма тон нылаштэ, 1: Мед кылзоз ог ар кенештэ, 1: Чуньыбыж куарен вешалод, 1: Шашыен мышказ йӧттылод, 1: Нош эн жуг на тон урысэн, 1: Чик эн йӧтылы кузь ньӧрен! 1: 1: Ӧз ке вала та визьмамдэ, 1: Ӧз ке анла чик нодъямдэ, 1: Юнгес ньӧр тон вай нюлэскысь, 1: Кызьпу вай тон чиг улыгысь. 1: Дӥсь улад тон вайы ньӧрдэ, 1: Медаз шӧд нокин ваемдэ, 1: Палыдлы сое возьматод, 1: Шуккытэк гинэ шонскылод. 1: Ӧз ке вала та визьмамдэ, 1: Ӧз ке кылзы ӟеч верамдэ, 1: Кышнодэ тон визьма ньӧрен, 1: Выль тӥям куаро улваен. 1: Ньыль сэрго корка пушъёсын, 1: Ӝужыям борддор сьӧръёсын. 1: Эн визьма, эн жуг бусыын, 1: Кышнодэ бусы межаын: 1: Ӵашпоттон вуоз гурт шоре, 1: Керетон - музон азбаре. 1: Бӧрдэмез вуоз мурт доры, 1: Ӵаш карон - пыдлось тэль сьӧры. 1: 1: Пельпумаз гинэ шуккылод. 1: Быгыто азяз чабкылод - 1: Ноку но синмаз мыжгатэк, 1: Пельдораз но чик йӧттытэк, - 1: Ведь синкаӵ вадьсаз лёг кылдоз, 1: Син улыз лыз-вож луылоз. 1: Шыднаред нялтас юалоз, 1: Аймуртэд ваньзэ валалоз. 1: Поттозы кылпум гырисьёс, 1: Горозы артысь кышноос: 1: "Оло, тон оже вуылӥд, 1: Ожгаре-а тон пырылӥд? 1: Шат кион пурем мискинез? 1: Шат гондыр посэм куанерез? 1: Эмеспи ӧй вал-а "пурись", 1: Кузпалэд ӧй вал-а "посӥсь"? 1: 1: Песятай кыллиз гур вылын, 1: Кураськись пересь шунытын. 1: Уть, тазьы вераз кураськись, 1: Вазиськиз тазьы гур вылысь: 1: "Карт ке тон, ноку палыдлэн, 1: Жоб-урод сямъяз эн ул, эн, 1: Кызьы ке паллэн чирдэмъяз, 1: Мон улӥ, мискинь, пыд улаз. 1: Нянь но сӥль солы басьтылӥ, 1: Вӧй но сур ялан вуттылӥ, 1: Котькыӵе чорыг октылӥ, 1: Сылалтэм сиён вайылӥ. 1: Сур басьяй тапал шаерысь, 1: Нош чабей - музон палъёсысь. 1: Номыриз ӧз вуы ӟечез, 1: Мылкыдыз ӧз луы каньылгес, 1: Шуак со корка пырылӥз, 1: Йырсие борды кутскылӥз, 1: Ымнырзэ шимес карыса, 1: Йыркурен синзэ усьтыса, 1: Урмыса сямен кесяськиз, 1: Вожомем кылын ораськиз. 1: "Зӧк берпал" монэ со кушиз, 1: "У, гынтул" нимын даллашиз. 1: 1: Мон шедьтӥ амал мукетсэ, 1: Ӟечсэгес малпай мон йӧнзэ: 1: Кызьпу вай вӧлӥ, со шӧдӥз - 1: "Бурдое мынам" со шуиз. 1: Сусыпу сузяй. Со адӟиз - 1: "Зарние мынам" со шуиз. 1: Бадьпу ньӧр кутӥ, тышкалтӥ, - 1: Ӟыгыртӥз монэ чыртытӥм". 1: Бызись ныл дореныз люкиське. 1: Ильмаринен кышноеныз гуртаз вуэ 1: Бызись ныл соку лулӟиськиз, 1: Лулскылӥз, пумен кайгыриз, 1: Каньылля ӧдъяз бӧрдыны, 1: Кыланы кутскиз, бураны: 1: "Кошкылон дыръёс туж матын, 1: "Ӟеч луэ" кылъёс ӧс дорын. 1: Кошконэ луэ секытгес, 1: Люкиськон дыры матынгес. 1: Ой, секыт татысь кошкыны, 1: Туж секыт дорме кельтыны, 1: Кельтыны дано гурткайме, 1: Туж сӥлы мусо коркаме. 1: Мон татын будӥ паймымон, 1: Эркынак веськрес ӝужай мон 1: Вож пинал нылок дыръёсам, 1: Быдэсмон зарни вакытам. 1: 1: тау тыныд, атай, быдэстӥд, 1: Ас нылдэ сюдӥд но вордӥд. 1: Тау сюдэм-вордэм ӟечедлы, 1: Ми понна тыршем ужедлы. 1: 1: Тау тыныд вордэм, ӟеч нэнэ, 1: Кӧкыын веттад тон монэ, 1: Гадь бордад монэ тон нуллӥд, 1: Йӧлыныз сюдӥд, будэтӥд. 1: 1: Тау тыныд, мусо вынкае, 1: Вынкае, сузэр-апае. 1: Бадӟым тау, дуно семьяе, 1: Эшъёсы, котькуд ёзкае. 1: Ныл дыры ортчиз тӥледын, 1: Люконтэм будӥ огинын. 1: Тон мынам вордэм атае, 1: Тон мусо вордэм анае, 1: Вань быдӟым дано выжые, 1: Бӧляке, йӧно кумые, 1: Эн тӥ мӧзме, эн куректэ, 1: Эн тӥ сётске ӝож вакытэ, 1: Тӥ дорысь кошки шуыса, 1: Тодымтэ пала бызьыса! 1: 1: Шол, отын но вань шундымы, 1: Отын но пиштэ толэзьмы, 1: Кизили пумтэм инбамын, 1: Ворекъя Кобы но отын. 1: Кыдёкын паськыт дуннеын, 1: Котырак пумтэм эльёсын, 1: Дор палам гинэ шат инбам, - 1: Атыкай юртъер вадесам?! 1: 1: Выльысь мон татчы ке лыктӥ, 1: Вордӥськем юртам ке бертӥ, - 1: Уз ни кыл нэнэ бӧрдэмме, 1: Уз адӟы атай синвуме, 1: Бӧрдӥ ке гурен доразы, 1: Кылбурай ке йыр вадьсазы. 1: Турын-куар будоз ни отын, 1: Сусыпу луоз ӝужамын. 1: Йыр вадьсаз монэ сюдӥсьлэн. 1: Бам вылаз монэ вордӥсьлэн. 1: 1: Выльысь ке татчы мон лыктӥ, 1: Азбаро юртам ке бертӥ, 1: Ненокин но уз лу ни тодмась, 1: Кык мар ке сяна: кемалась 1: Кенерлэн улӥ сурымаз, 1: Бусыысь ӵоглэн улӥяз, 1: Мон гозы думи пиналскын, 1: Возетлы дасяй вал отын. 1: 1: Вынылэн вань на пуныез, 1: Пичиысь сюдӥ визьмоез. 1: Дышетӥ сое ныл дыръям, 1: Со утоз, потоз пумитам, 1: Сайкымтэ гидкуа азьёсы - 1: Толалтэ жобась куазьёсы. 1: Со гинэ монэ тодмалоз, 1: "Кузёлэн нылыз" малпалоз. 1: 1: Нокин но тодаз уз ни вай, 1: Вордӥськем юртам ке бертай: 1: Азьлоез ик пыж возёнъёс, 1: Азьлоез ик вуж юртъеръёс, 1: Азьло кадь ик мур сиг сюмъёс, 1: Горд чорыг будон интыос. 1: 1: Ӟеч лу тон, вордскем интые, 1: Пул липет улын коркае, 1: Мед кылдоз вал нош бертыны, 1: Адӟиськон понна вуыны! 1: Ӟеч лу тон, мынам корказе, 1: Юр пулэн выжъям ӧс азе, 1: Мед кылдоз вал нош бертыны, 1: Адӟиськон понна вуыны. 1: 1: Ӟеч лу тон, мынам азбаре, 1: Палэзен пиштӥсь чебере, 1: Мед кылдоз вал нош бертыны, 1: Адӟиськон понна вуыны. 1: 1: Ӟеч луэ, вордскем интыос, 1: Узыен гордэсь яг кушъёс, 1: Возьёсысь пичи сюресъёс, 1: Сусыпу тэльысь кыралъёс, 1: Тыосысь сюэн шормуӵъёс. 1: Вуосысь сиго мур кожъёс, 1: Выръёсысь чебер кыз тэльёс, 1: Кыдёкысь нёжысь кызьпуос". 1: 1: Ильмаринен, ӟеч дуриськись, 1: Похъяысь вырӟиз азбарысь. 1: Пиналъёс гинэ кылизы, 1: Кырӟазы, тазьы гурлазы: 1: "Сьӧд бурдо вуиз тэль сьӧрысь, 1: Тэль сьӧрысь вуиз кыдёкысь, 1: Милесьтым ӵӧжмес амалтӥз, 1: Узымес пӧяз, лӧпкытӥз, 1: Улмомес лушказ но нуиз, 1: Чорыгмес кутӥз но куккиз, 1: Эрекчаз векчи коньдонэн, 1: Лӧпкытӥз азвесь уксёен. 1: Кин али ветлоз ярдуре, 1: Возьматоз сюрес шур дуре? 1: Вышкыос вутэк сылозы, 1: Карнанъёс бушесь улозы, 1: Корка выж луоз миськымтэ, 1: Бӧлетмы улоз ӵужытэк, 1: Кырсь уз луэ-а сюмыкъёс, 1: Курмозы чаша кутонъёс". 1: 1: Я, бен, Ильмари гонӟыртэ, 1: Эмеспи валзэ дыртытэ, 1: Дӧдьыез капчи нискылтэ, 1: Похъя шур кузя ыбыштэ. 1: 1: Вал бызе, дӧдьы ӝог мынэ, 1: Нуналэд питра но синэ, 1: Усьсэаз гинэ ӝытазяз 1: Адӟиськиз юртэз син азяз. 1: Ильмари, дурись, туж етӥз, 1: Капкаез доры ӝог вуиз. 1: 1: Юртъерзэ лэсьтӥз атаез, 1: Йӧндыриз сюдӥсь-вордӥсез. 1: Ильмарилэн ӟеч нэнэез, 1: Ӟечкылаз тазьы выль кенэз: 1: "Ой тон, сэзь чебер нылкае, 1: Льӧль бамо пиштӥсь сяськае, 1: Чебердэ, ӟечтэ ми тодӥм, 1: Ӟеч муртлэн шуса но кылӥм. 1: Тон сыӵе ик лу, ӟечокмы, 1: Тон сыӵе ик лу, выль кенмы. 1: Тон эн сюлмаськы, нуные, 1: Тон эн чигтӥськы, мусое, 1: Нюр вылэ тонэ ӧм вае, 1: Канава дуре, нёпое, 1: Нош ваим узыр интыысь, 1: Узыргес азе - узырысь. 1: Мусуро ческыт юртъерысь, 1: Ческытгес азе - ческытысь. 1: 1: Ӟеч улоз татын нылашмы, 1: Эркынак улоз дыдымы, 1: Мунчоын вӧлмыт лапчаос, 1: Нош коркан паськыт кузь ӟусъёс. 1: Атаед кадь ӟеч кузёмы, 1: Мумид кадь кузё-нэнэмы, 1: Картэдлэн ӟечесь вынъёсыз, 1: Мусоесь сузэркайёсыз!" 1: 1: Куноос ваньмыз сектамын, 1: Сектамын, ческыт сюдэмын. 1: Кӧттырмон сӥльёс пуктӥзы, 1: Мыльымон мыльым пыжизы, 1: Ӵужъемо сурен сектазы, 1: Чабей варсь юон удӥзы. 1: 1: Веръязы татын унозэ, 1: Шӧмъязы созэ но тазэ. 1: Ӵыж-горд пу тусьты пушъёсысь, 1: Туж чебер тэркы вылъёсысь. 1: Кутэм нянь ке, - басьты оген, 1: Вӧй ке, ванды, си куалдэтэн, 1: Горд чорыг быдэн басьтыса, 1: Лососез пукто юдыса. 1: Вандыло азвесь пуртъёсын, 1: Зарниен югдӥсь бамъёсын. 1: 1: Сур ӧй вал дунэн басьтэмын, 1: Мусурлы ӧй вал тыремын. 1: Мумыкор бордысь сур ӟизаз, 1: Ӵог ултӥ мусур весь вияз. 1: Ньылонъёс ӵакыт кӧсантэм, 1: Сюанысь калык мӧзмонтэм. 1: 1: Кин-о бен кырӟан гур мытоз, 1: Кин кырӟась-мадись бен луоз? 1: Вяйнямӧйнен, мӧй, оскымон, 1: Со кырӟась-мадись паймымон, 1: Крезьгурзэ мытӥз кылымон. 1: 1: Сергей Уваровлэн суредъёсыз. 1: 1: 1: 1: 1: 1: 1: 1: 1: "Яратонэ мынам" конкурсэ Дуннеын асьмеос кык кузя гинэ Мынам яратонэ вордӥськиз сӥзьыл (соку со мынам гинэ вал ай), таманлы шунды потаку, зоръёс кисьтыку, нырысьсэ пужмерскыку. Мылкыдме усьтыны дӥсьтытэк, со сярысь тыныд номыр ӧй поттылы, ас поннам уйёсы бӧрдылӥ. Школаысен асьмеос адскылӥм, куддыръя вераськылӥм, но мон мылкыдме ӧй усьты, тон сярысь малпанъёсме пушкам возьылӥ. Ма, тонэ но валаны уг луы вал угось, куд-ог дыръя бен дискотекаын эктыны ӧтьылӥд ик. Одӥгез сыӵе дискотека бере тон монэ келяд. Сюлэмы ӧжыт буйгаз - табере тон ваньзэ валад. Тау тыныд. Табере асьмеос яратом ог-огмес быдэс даур! Нокыӵе супыльтонъёс, вожъяськись синъёс шоры учкытэк. Та дуннеын асьмеос кык кузя гинэ - Тон но Мон! Кылӥськод-а, гажанэ? Асьмеды люко иськемъёс. Но мӧзмон - со урод шат? Мӧзмиськом ке, иське, ӵуказе нош пумиськом. Мед гинэ зэмалоз со возьманэ. Мон яратӥсько Тонэ! Марина Биякова. Балезино ёрос. 14-тӥ феврале Яратӥсьёслэн нуналзы Яратон, яратон, мар меда сыӵе тон? Ум, ми туннэ ум туналэ. Туннэ кыл сётом егит лыдӟисьёсмылы. Кылемаз "Дарт" бамамы ми "Яратонэ мынам" конкурс ялӥм вал, курим асьтэлэсь мылкыддэс шара усьтыны. Сыӵе дӥсьтӥсьёс трос ӧз шеде. Соин ик ӵектӥськом тӥледлы ваньзэ. П.С. Кинлы мар, милемлы кельшиз нимтултэм нылашлэн мылкыдзэ усьтэмез (тунсыкъяськисьёс понна нимтулыз редакциын). Соин ик сое пусйиськом синпель кузьымен. Ужысьтызы мозмытыны куризы Толон Армилы, обороная промышленностьлы но ожгар наукалы дурбасьтонъя движенилэн Удмуртиысь ёзэз пумитъяськон ужрад ортчытӥз. Люкаськемъёс отын куризы "ЕЭС" РАО-ысь кивалтӥсьёсты, озьы ик А.Чубайсэз ужысьтызы мозмытыны, озьы ик кыл кутытыны отставкаысь полковниклэн, Быдӟым Отечетственной войнаысь ожгарчилэн Александр Андреевич Ледовскийлэн кулэменыз валче янгыш луэм адямиосты. Со 2001-тӥ арын 15-тӥ январе кулӥз Тамбов городысь госпитальын. Удмурт театрлы 70 ар Учкисьлэн синмыныз Тодэ ваёнъёс но куд-ог малпанъёс Яратоно театрмылы 70 ар тырмиз. Отысь коллективлы выль вормонъёс сӥзьыса, ваньзэсты сюлмысь ӟечкылам потэ! 70 ар ӵоже кӧня спектакльёс пуктылэмын, учкисьёслэн йырвизьмазы но сюлмазы пырыны кӧня сюресъёс утчамын! Театр, трос шуг-секытъёс пыр потыса, данъяськымон сюресэз ортчиз. Али сое адӟиськом кык книгаосъя: В. В. Ложкинлэн историяя очеркез ӟуч кылын потӥз 1981-тӥ арын, Б. Е. Саушкинлэн ӵыжак выль книгаез - 2000-тӥ арын. Ӟуч книга театрлэсь 1977-тӥ арозь ужамзэ возьматэ, бадӟым списокын сётэмын 300 пала спектакльёс, дырын-дырын вужъёсыз доры выльысь берытскемез вератэк. Соиз но, таиз но книга тужгес вылӥ дунъя но нырысетӥ интые пуктэ классикае пырем кӧня ке произведениосты. Сыӵеосыз вунонтэм кылизы вылӥ идеяоссыя, чеберлыко пуштроссыя но озьы ик театре трос учкисьёс ветлэмъя, артистъёслэн умой шудэмзыя, улонэз мур возьматэмзыя. Мыным, городэ 16 арес дыръям лыктэм муртлы, театрен нырысьсэ тодматскыны кылдӥз, ӵапак сыӵе спектакльёс адӟыса: "Кезьыт ошмес", "Улэм потэ", "Сюан", "Аннок", "Вуж Мултан". Со спектакльёсын шудӥзы калыклэн тужгес яратоно артистъёсыз: Кузьма Ложкин, Клавдия Гаврилова, Яков Перевощиков, Васса Виноградова, Анна Чубукова, Анастасия Шкляева, Василий Садовников, Василий Гаврилов, Демьян Федотов, Григорий Овечкин... 7-тӥ классэз быдтыса, Иж педучилищее дышетскыны лыктӥ 1950-тӥ арын, нош табере Б. Саушкинлэн книгаезъя тодӥсько: "Кезьыт ошмес" выльысь пуктэмын вылэм со арын ик. Мыным но вань эшъёсылы та спектаклен тодматскон номырин ӵошатонтэм праздник луиз. Мӧйы артистъёслэн шудэмзы, вӧтам кадь ке но, ялан син азям на. Собере но удалтӥз мынам ёзъёсылы: ӵапак ми дышетскыку, театре ужаны лыктӥз Ленинградын дышетскем 16 выль артист. Удмурт калыклэн улоназ соос но ӝоген яркыт кизили кадь пиштыны ӧдъязы. Театрлэн ужъёсыз милемлы будыны юрттӥзы, улон шоры сэзьгес учкыны дышетӥзы. Выль спектакльёсты со вакытэ ми, студентъёс, адӟытэк ӧм кельтылэ, туж начар улыса но. Мынам кисыям, стипендия сяна, нокыӵе коньдон ӧз шедьылы. Озьы ке но, удмуртсэ но, ӟучсэ но театрез палэнэ ӧм кельтылэ. Ми сцена вылысь адӟылӥм, удмурт классикаез сяна, трос берыктэм пьесаосты, кунгож сьӧр писательёслэсь но, ӟуч кылын но шудылӥзы. "Аршин мал алан" спектакльысь пель сьӧрам кылӥське на Кузьма Ложкинлэн кырӟамез. Собере - "Кык кузёоослэн ляльчизы" (Гольдони), "Кышнояськон" (Н. Гоголь) но мукетъёсыз. Вераме потэ Ӟуч театрлэсь но егитъёслы сӥзем спектакльёссэ: В. Розовлэн, А. Арбузовлэн пьессаоссыя "Вечно живые", "В добрый час", "В поисках радости", "Годы странствий". Котькудӥз егитъёсты дышетон но визьнодан урок луэ вал. Улон сярысь малпаськыны дышетылӥзы, патриотизм, сэзь мылкыд, ӵуказе нуналлы оскон пыӵатылӥзы. Театрлэн ужамез Иж педучилищеын дышетсконамы но шӧдӥськылӥз. Дышетон программаез быдэсъянэ пыриськылӥзы аристъёс но. Шара лыдӟиськонъя но драмая кружокъёсты нуизы: удмурт люкетаз - Иван Кудрявцев, ӟучаз - Михаил Исаев. Ми Иван Ивановичлэн кивалтэмез улсын ужамы "Тулкымъяське лыз зарезь" пьесалэн люкетэз бордын. Яратӥм та артистэз, туж зол образъёс кылдытэмзэ адӟылӥм. Бадӟымесь рольёсты шдылӥз со. Вунэтод шат солэсь "Вуж юртысь" Олексанзэ, "Ӵук лысвуосысь" Михайловзэ, "Меӵ яр дурысь" "Ядыгаровзэ, "Кышнояськонысь" Яичницазэ, "Машенькаысь" Окаёмовзэ но мукетсэ? Малы ке та сӥё-дано артист сярысь книгаын ӧжыт верамын. Туж кулэ но дуно ужез быдэстӥз театрлэн азьвыл директорез Б. Е. Саушкин, историлы сӥзем книга кылдытыса. Трос малпаськонэ вуттэ со лыдӟисьёсты. Театрен валче адӟиськом нацимылэсь азинскемзэ но. Театрлэн улонэз но синучконын кадь возьматэ со. Шӧдӥське кунмылэн кивалтӥсьёсызлэн удмурт калык шоры, национальной политика шоры кызьы учкемзы. Борис Ефремович, театрлэн ужъёсызлы нимаз-нимаз дунъет сётылыса, артистъёслэсь пӧртэм рольёс бордын тыршемзэс пусйылыса, книгаяз интыен-интыен ӟугаськем малпанъёсты усьтылэ, соосты шарае поттылэ. Уг ваты тырмымтэосты, шуг-секытъёсты но. Огъя вераса, Б. Саушкинлэн книгаез Удмурт театрезлэн юбилеезлы - 70 аресэзлы усто кузьым луиз. Озьы дунъяло лыдӟисьёс но. Алигес книгалы презентация-эскерон ортчытыку, Борис Ефремовичлы дэмлазы сое эшшо азьланьтыны, берло дас аръёс сярысь но малпанъёссэ ватсаны. Яратоно артистъёсмы сярысь очеркъёс газетъёсын но журналъёсын данак печатламын ини, соосты но огазеяса поттӥсь мед луоз вылэм. Вань потэмез но. Тани М. Гавриловалэн "Ӵыдонтэм пумиськонъёс" книгаезлэн бадӟым люкетэз театрысь аристъёслы сӥземын, малы ке шуоно, со радиоын трос аръёс ӵоже диктор но редактор луыса артистъёсын арнялы быдэ пумиськылӥз, соосын уртче ужаз. Агаезлы Василий Яковлевич Перевощиковлы сӥзьыса, ас вакытаз усто книга поттӥз А. Я. Евсеева, тазэ но мон тунсыко потыса лыдӟи. Ваньмыз со театр искусствомылэн тунсыко историез. Кӧня ке кыл вераме потэ репертуар сярысь. Та ласянь театрлы котьку шуг вылэм, со сярысь гожъя книгалэн авторез но. Удмурт пьесаос тырмымтэлы ӝожтӥськылӥзы. Но луылӥзы ук ӟеч удалтэм аръёс но, 7-8 спектакль дасяло вылэм. Ку бен вал сыӵе дыръёс? Ӵапак "ог интыын лёгаськон" вакытэ, кудзэ туж курланы выро туала идеологъёс, историез мыдлане берыктӥсьёс. Кӧня ӟеч спектакльёс кылдытъямын вал Писательёсмылэн бадӟымесь произведениоссыя: "Бугырес тулыс", "Ӵук лысвуос", "Гаян", "Сюлэм куара", "Тӧлгурезь", "Йыбыртты музъемлы" но мукет. Соос радиолэн но телевиденилэн зарни фондазы кылемын, телевидениын ужасьёс медаз возьдаське вылэм ӟечъёссэ вуж спектакльёсты ӵемгес возьматъяны. 34-тӥ канал тырмыт уже уг кутӥськы. Артистъёсмылэн студиосын ужамзы но номырин мертантэм дуно. Устоосыз спектакльёс революция ӝутон яке сое азьланьтон мылкыдын пыӵамын вал. Тодады вае ай, маин йылпумъясько вал "Кезьыт ошмес" яке "Вуж Мултан"? Мӧйыос ӧз вунэтэ соку ай егит артистъёслэсь 50-тӥ аръёсы пуктэм "Семья" спектакльзэс, отын егит Ленинлэсь рользэ шудӥз Василий Перевощиков. Али обществоямы кузёяське астэ ачид гинэ тодон, узырмыны тыршон. Нош кин узырме? Тыр уло обществоысь дасмос люкетэз гинэ (ашкынэмъёс, адямилыксэс ыштэмъёс), оло, солэсь но ӧжытэз. Сютэм улӥсь семьяослэн лулчеберлык доры сузьтӥськыны кужымзы, ваньбурзы уг тырмы ни. Малы али калык театре ӧжыт ветлэ? Ӵапак со муген ик: начар улэменызы. Та вие вуттӥз реформаторъёслэн туала улонэз йырчукин берыктэмзы. Театре ветлӥсьёслэн лыдзы кулэсмемлэн мукет но мугъёсыз вань. Туж бадӟым муг: троссэ воштӥз телевизор. Нош телевидение учкисьёсыз кытчы валтэ? Одӥг авторлэн, узырмыны турттӥсь муртлэн (Влад Дубковскийлэн) книгаысьтыз шедьтӥ таӵе кылъёсты, соосты удмурт кылэ берыктӥ. Кызьы малпаськоды, шонер-а гожтэ со? "Ивор сётӥсь ёзъёслэн ужамзы пушказ ватыса возе трос гинэ кышкытлыкез. Телевизордэс лэзе ай, собере бӧрсьысь бӧрсе вань каналъёсты ужатыса эскере. Мае отысь адӟоды? Яке боевик фильмъёсты, кытын кадрлы быдэ адями виемез возьмато (табере кунгож сьӧрысь ваемаз гинэ ӧвӧл, асьме кунын поттэмъёсаз но), яке адӟоды катастрофаосты (музъем зурканэз, ву тудӟонэз, кужмо сильтӧлэз но мукетсэ): яке кылзоды заказать карем виён сярысь, иворез, дунъёслэн будонзы сярысь ивортонэз яке йырдэс поромытоз реклама. Сюлэмез небӟытӥсь ӟеч фильмез экран вылысь шер адӟылод, ичи луыло тодон-валан сётӥсь, ӟеч иворъёсын тырмытэм передачаос но. Асьмеос ваньзэ сое кулэ кариськом-а, ум-а, малпаськом-а, ум-а, телеэкранысь яке газет бамъёсысь вуись шукрес иворъёс йырсазямы пыӵатэк уг кылё, сюлме урод мылкыд кельто. Троссэ адӟонтэм карыны ӧдъяськод, ӵуказе нуналлы оскон быре. Сыӵе дыръя секыт луэ ни, нимысьтыз амалъёс утчаса но, асэсьтыд улон мылкыддэ ӝутыны, шумпотыса улыны. Соин ик, телевизордэс лэзьыкуды, нырысь ик малпаське, кыӵе арберилы, мае адӟон понна тӥ дасяськиды асьтэлэсь дырдэс экран азьын быдтыны? Оскиськоды-а, мылкыдэз ӝутӥсь иворъёсты адӟоды, умойзэ басьтоды шуыса?" Та кылъёслэн авторзы дэмла учкисьёсты, сыӵе программаослы дыр быдтэм интые, киязы ӟеч книга кутыны яке умой спектакль учкыны. Ӟечез уг тырмы ке, мае учкод? Культураен телевидениен кивалтӥсьёс уг шӧдо шат, телепрограммаос адямиез палэнэ валто шуыса - лулпушсэ тырмытыны туртто жуг-жаген, пумтэм сериалъёсын, адямиез мыскыллясь, урод малпанъёсты пыӵатӥсь фантастикаен. Зэм, фантастика котькыӵе луыны быгатэ, со яке наукая малпаськыны ӵектэ, яке шузияськыны дышетэ. Тӥни эшшо одӥгез муг - малы театрын учкисьёслэн лыдзы кулэсме. Та вакытэ сцена вылысь но туж шер адӟод зэмос геройёс сярысь спектакльёсты. Туала поколение кинлэсь адӟем карыны кулэ, кинлэсь со дышетскоз? Патриотизм тема вужмиз шат? Вераськыло, малпаськытӥсь, спектаклез, драмаез, трагедиез учкыны адямиос ӧжытгес ветло шуыса. Кылсярысь, театрын ӧжыт возьматоно луизы "Ваменэс адями" спектаклез. Нош отын валтӥсь героез зэмос улоныс басьтэмын ук, прототипез - туж бадӟым сюлмо но визьмо адями, Ужысь кык пол Герой Т. С. Мальцев, кудӥз вань улонзэ сӥзиз гурт улонэз азинтонлы. Таиз - но югдур туала куашкатэм улонэн герӟаськемын. Театрмылэн удалтэм ужъёсыз возьмато: солэн кужмыз вань азьпалан но азинсконъёс басьтылыны. Малпасько, репертуар ласянь шуг ке но, шедьылозы ай усто пьесаос, сыӵе ик лэчытъёсыз, яркытъёсыз, кыӵе вал "Жингрес сӥзьыл", "Насьток но Исьток", "Лысву сямен уг тӧлӟы синкыли" но мукетъёсыз. Собере, оло, удмурт драматургъёслэн усто ужъёсынызы ӵемгес тодматылоно ӟучъёсты, элькунысьтымы мукет калыкъёсты но? Сыӵе луонлык вань ук, актёръёслэн быгатонлыксы тырмыт. Нош ма меда лэсьтӥське финн-угор дуннеен асьме выжыысь бускель калыкъёслэн искусствоенызы тодматон ласянь? Трос пӧртэм калыко элькунамы удмуртъёс асьсэды гинэ тодыса улыны уг быгато ук, ог-огмы доры ялан сюрес утчано. Сыӵе югдурлэсь кулэзэ юн возьматӥз финн-угор калыкъёслэн ИИИ конгрессы но. Леонид Федоров, Удмурт Элькунысь дано журналист. ЯРАТОНЭ МЫНАМ ...Со дырысен ортчиз ини куать ар. Уг тдӥськы, кыӵе адями мон луысал, ӧй пумитсасал ке со прицме. "Шндыкар" лагерьын одӥг отрядэ шедим. нырысь со Толик Эркишев мыным чик ӧз кельшы. Пиналъёсын тырмем автобусын гитараеныз тани-тани ӝокатоз ини кадь потэ вал. Нош мукет нуналаз... Чебер, йӧно, мусо, кырӟаны-вераны быгатӥсь пияшлэн нылъёсыз тро вылэм. Ӧз, мон шоры пал синмыныз но со ӧз учкылы. Ма, кызьы, пе, кыӵе ке гуртысь, "пурысь шырпиез" синйылтоз-а?! Мон соку кепырась, возьдаськись вал. Шорам ваземысьтызы гинэ но гордэктылӥ. Ачим туж ӟеч валалляй - со мон шоры ноку уз учкы. Но сётскеме ӧз потылы. Кутски ас бордам ужаны: тырши комплексъёсылэсь куштӥськыны, быгатонлыкъёсме муромытыны, асме возьматыны. Шедьтӥ сюлэмыя ужан удыс, университетэ дышетскыны пыри. Со гинэ шат? Крезьгурез валаны, яратыны дыши, гитараен шудыны кутски. Школаын дышетскыкум мӧзмеменым ма арыны паймыса, драз жингыръяй, но вераськыны ӧй дӥсьтылы, трубкаме куштылӥ - кышкалляй. Яратонэным курадӟыса улыкум, киям карандаш, краска кутыса суредаськылӥ. Озьы ӧжыт сюлэмы буйгалляз. Ӝамдэлы. Собере выльысь... Лагерьын шутэтскыкумы огаз концертын Толик но кырӟаз. Соку мон кадь юн чабисез ӧй вал, дыр. Али но пель сьӧрам чузъяське на. "Ой, гитарае мынам" кырӟанэз. Иж шур дуре картошка пыжыны ветлыкумы но шуак синъёсмы пумиськизы. Кышкаменым мон соку зӥрак берытски... Кема аръёс ини нуллӥсько сюлэмам мон та выжыкылме. Мыным урод луыку, одно ик отчыберытскисько. Лэзисько тынэсьтыд кырӟанъёстэ но верасько аслым: "Чидано. Вормоно". Кема малпаськыса улӥ: гожтоно-а, ӧвӧл-а. Но сюлэмы ӧз чида. Котькин, котьма мед шуоз. Мон адями, вордӥськемын яратыны. Яратонэ палдурес ке но, мон солы тау карисько. Со понна мон валай, мар со сыӵе. Огпол учкемез, огпол ваземез монэ дунне вылысь самой шудо адями карылӥз. Со ӧжыт шат? Тау инмарлы, тон, Толик, та вань шуыса. Тынад шумпотонэд - со мынам шумпотонэ, тынад куректонэд - мынам куректонэ... Та гожтэтме лыдӟыса, тон монэ, оло, тодмалод. Мхм, радио пыр нош кылӥсько тынэсьтыд кырӟандэ. ...Яратон, ой, яратон, Я мӧзмон, я шумпотон. Нош малы бен куддыръя, Вайылэ со куректон... Озьы угось. Я, тырмоз. Ӧжыт гинэ ӧй вунэты тонэ Яратӥсьёслэн нуналэнызы, вордӥськем нуналэныд но 23-тӥ феврален ӟечкыланы. Жингрес куараед тросгес тросгес калыкез мед шумпоттоз (соку мон тон понна уката шумпото), шудо но котьку таӵе ик мыло-кыдо лу! Курисько, вождэ эн вай, Толик, быдэс шаерлы тонэ яратэмме шараямысьтым. Быгатысал ке мон та мылкыдме аслыд усьтыны... Трос уг куриськы, но одӥг-ог ке но тодад вайылы монэ - огшоры пичи нылмуртэ. Со тонэ я-ра-тэ! Ӟеч. Губи будэто... толалтэ Удмуртиын улӥсьёсты губиен уд паймыты. Но толалтэ ӝӧк вылэ выль губи вуэ ке, соиз ини паймымон. Тани Пичи Пургалась "Луч" КБО-ын ужасьёс выль 2001-тӥ арлы трос выль губи вузазы. Сое али но басьтыны луэ Пионер ураме интыяськем быткомбинатысь. Пурга бытовикъёс та выль уж борды кутскизы миым тулыс. Ужзы пӧрмиз. Табере толшоре та аспӧртэм сиёнлы басьяськисьёс но дышизы ни. Губизы - вешенка сорт. Со чебер, юн, уг нумырӟы. П.НИКОЛАЕВ. Кивалтӥсьёс юнматэмын Удмурт Республикалэн Президентэз А. А. Волков аслаз Указъёсыныз юнматӥз Удмурт Республикалэн Президентэзлэн но Правительстволэн Администрацизылы выль должностьёс. Юнматэмын: Организационно-контрольной ужъя управленилы кивалтӥсе - Антонов Владимир Анатольевич; Удмурт Республикалэн Президентэзлэн но Правительстволэн пресс-службазылы кивалтӥсе - Чулков Виктор Иванович; мобилизация ужъя ёзлы кивалтӥсе - Сенотов Николай Владимирович; Иворъёсын ужанъя управленилы кивалтӥсе - Роев Сергей Александрович; Калыкез кышкытлыклэсь утёнъя кенешлы секретаре - Ярославцев Александр Викторович; Удмурт Республикаысь Правительстволэн тӧроезлэн воштӥсезлэн В. А. Савельевлэн секретариатэзлы кивалтӥсе - Детинкин Геннадий Александрович. Корка пырон Вуиз кема возьмам нунал. Редакцимылэн кызь арлэсь кема пукем интыяз ми тазьы гожтыны быгатысалмы: Иж город, Воткае нуись сюрес, 10-тӥ иськем. 1980-тӥ ар 6-тӥ июль - 2001-тӥ ар 10-тӥ февраль. Нош озьы ум гожтэ. Редакцимы ӧз кулы - выжиз выль интые. Адресмы таӵе: 426008, Иж город, Маркс ульча, 274. Телефон 22-13-47. Кызь арлэсь кема ми нюръяським городлэн шораз выжон понна. Та дыр ӵоже республикаен кивалтыса вуттӥз вить мурт - Валерий Марисов, Петр Грищенко, Николай Сапожников, Валентин Тубылов, Александр Волков. Правительстволэн тӧроосыз но уно вал. Ваньзы сӥзьылӥзы редакциез калыклы матэгес карыны. Жаляса верано луэ: верам кылзы ошиськиз омыре. Александр Волков пумысен ӟечсэ но, маке-маке умойтэмзэ но вераны луысал. Нош кылем арын сентябре юн-юн оскытӥз: "Удмурт дунне" выжоз выль интые. Кыл сётӥз ке но - быдэстӥз. Лыдӟисьёс но, лыдӟисьтэмъёс но милемды куддыръя пыкылӥзы: Александр Александровичлы лекос матэ кариськыса, пе, тӥ удмуртъёслы сокем уд дурбасьтӥське ни. Редакция сыӵе кылъёсын сокем ик соглаш ӧвӧл. Газетмы Кун Кенешлэн но Правительстволэн лыдъяське бере, отысь кивалтӥсьёсын валче ужатэк, кыдёке уд кошкы. Пуриськыса одӥг ӟеч ужез но уд вырӟыты. Ми озьы ик кенешим редакция пушкын но. Ог-огмылы шуим: куспамы маке-маке лэчыт веранъёс вань ке, мед кылёзы вуж юртэ. Выль интые мынон - ӝегыт уж. Куамынлэсь уно адями, солэсь но трос ӝӧк-пукон, тачак компьютеръёс, шкафъёс, ӝажыос, книгаос, газетъёс... Вылаз ик, сояз возим 400 квадрат метр инты, таяз - кык пол ичигес. Ваньзэ келяно, пумитано, инъяно, туйнано... Тӥни сыӵе эли-кеби (эшки-кеби) вакытэ ми малпамы туннэлы пичигес газет поттыны. Собере, вис карыса, вуоно номермес пятницае гинэ тӥ доры келялом. Со понна, гажано лыдӟисьёс, вождэс эн вае. Поттымтэ номермес берлогес дасялом но тӥледлы одно вуттом. Алексей Шкляев. Куинь-ньыль ар талэсь азьло гинэ Святой Валентинлэсь нимзэ поттылӥсьёс трос ик ӧй вал ай. Нош туэ, малпаськом, нокинлы но валэктонэз ӧвӧл ни, кытысь потэмын та праздник. Соин ик ойдолэ мугзэ утчатэк ог-огмес ӟечкылалом но яратом. Кыӵе праздник кузьымтэк? Конечно, конечно. Ку на Яратӥсьёслэн нуналазы сяна, выльысь кузьмаськыны (умойгес басьтыны) муг сюроз. Мар кузьманы тӥ асьтэос кемалась малпады ни, дыр. Нош туж шугъяськиськоды ке, кузьмалэ сюлэм тусо чеберъям валентинка. Укыр огшоры? Соку кассета. Киноен, хитъёсын ӧвӧл, асьтэлэн Сое яратэмды сярысь вераменыды. Нош кызьы тӥ малпаськоды, кулэ-а та праздник кузпалъёс понна. Соослы сотэк но ваньмыз тодмо ук, озьы-а? Тодмо, соин ик... анлско. Семья кусыпъёсты эскерись психологъёслэн верамзыя, кузпалъяськыса нылкышно но пиосмурт ог-огзылы шуныт кылъёс куинь поллы шергес вералляло. Вот, вот, туннэ соосты тодады вае ай - нокыӵе кузьым кулэ уз луы. Трос-а кулэ милемлы... Политика Арня ӵоже дуннеын, странаын, шаерын Израильлэн но Палестиналэн кусыпъёсазы выль вакыт кутскиз, шуыны луоз. Кылем арня вискын еврей калык странаезлы выль премьер-министр бырйиз. Нюръяськон кык генералъёс куспын мынӥз. Азьвылэз премьер-министр Эхуд Барак палестинецъёсын одӥг кыл шедьтыны тыршылӥз, та понна котькыӵе амалъёсты уже кутыса. Но ваньмыз со но ӧз юртты тупаса улонэз утьыны миым Израиль но Палестина куспын ожмаськон выльысь пуромиз. Озьы Бараклэн данэз калык пӧлын чутрак кулэсмиз. Сое возьматӥзы ортчем быръёнъёс но. Отын вормиз Ариэль Шарон, азьвыл генерал. Солэсь верамъёссэ лыдэ басьтыса, аналитикъёс чаклало: выль кивалтӥсь палестинецъёсын "нуныяськыса-мараса" уз улы, берлань вамышъёс уз лэсьты, чурыт вераськон нуоз. Генераллэн, пе, сямыз сыӵе. Нош журналистъёс озьы уг шуо. Соос премьер-министрлэн улонысьтыз тунсыко учыръёссэ шедьтӥллям, соос сярысь ачиз Шарон но чалмыт улэ. Тани 40-тӥ аръёслэн пумазы Израиль но Палестина куспын нырысетӥ ожмаськон дыръя со кӧня ке эшъёсыныз ӵош пленэ шедем вылэм. Соосты мозмытӥллям, пленэ шедем палестинецъёслы воштыса. Арня талэсь азьло гинэ гожъям вал Приморьелэн губернаторез Евгений Надратенконлэн висьыны усемез сярысь. Та дыр ӵоже югдур чутрак воштӥськиз. Россилэн Президентэныз Владимир Путинэн кенешемез бере Евгений Наздратенко отставкае кошконэз сярысь вераз. Нош Москваын ужысьтыз мозмытэмын энергетикая министр Александр Гаврин. Президентлэн верамезъя, со ужзэ ӧз пӧрмыты. Владимир Владимирович ӵектӥз Александр Волошинлы "ЕЭС России" огазеяськонэн кивалтонэ кунлэсь адямизэ пыртыны на. Угось Приморьеын кылдэм секыт югдур понна ӵапак та предприятие но кыл кутэ. Соин соглаш РАО-лэн кивалтӥсез Анатолий Чубайс но. Ортчем арня вискын Владимир Путин визитэн Австрие вуылӥз. Та кунлэн канцлерезлэн но асьмелэн Президентмылэн кусыпъёссы зэмос эшъяськонлы пӧрмо ни, шӧдске. Соослэн кенешонъёссы ӝӧк сьӧрын гинэ ӧвӧл, куас вылын но ӧръяськизы. Тае ӧз ваты ачиз Владимир Владимирович но, неформальной вераськонъёс дыръя одӥг кыл шедьтыны капчигес, шуиз со. Кылсярысь, кык кивалтӥсьёс кенешизы Дукан шур вылын валче ужанэз радъяны. Россилэн Президентэз та пумысен премьер-министрен Михаил Касьяновен вераськылэм ни вылэм. Россия Дунай вылын ужанэ коньдон висъяны но дась. Пусйыны кулэ, Владимир Путинлэн дуннеез котыръян сюресъёсыз аспӧртэмлыкоесь. Тани Австрие странамылэн кивалтӥсьёсыз кызь ар ӵоже вуылӥллямтэ ни вылэм. Выль арняез Президентмы мытэ Украинаын Днепропетровск городын. Та страналэн кивалтӥсеныз Леонид Кучмаен со укмысэтӥзэ пумиське ни. Кенешонъёс ӧй вал на, нош политикъёс тупаса сямен солы йылпумъянъёс лэсьто ни. Кыӵеесь бен соос? Берлось толэзьзэ Киевын оппозиция паськытэсь пумитъяськон ужрадъёс ортчытъя (ӵапак та муген ик кык президентъёс Днепропетровскын пумисько). Западысь кунъёс Украиналы оскемысь дугдо. Та шукрес дырез пайдаен кутыны малпа, пе, Россия, Белоруссиез сямен ик аслаз бурд улаз басьтыны малпа. Белоруссиысь но берло нуналъёссэ тунсыко иворъёс вуизы. Пытсэт сьӧры келямын экс-премьерлэн Михаил Чигирьлэн 24 аресъем пиез Александр. - Мугез - лушкам автомобильёсын но воштос ёззъёсын вузкарон. Кечат-вамат ёз сьӧры шедемъёс пӧлын - тодмо писательлэн Василь Быковлэн племянникез но. Марий Эл Республика кемалась ик ӧвӧл выль президент бырйиз. Азьвылэз президент Вячеслав Кислицын келяз. Ивор вӧлмытӥсь ёзъёсын огвакытэ вӧлмиз вал, Кислицын коррупциен герӟаськемын шуыса. Нош алигес пытсэт сьӧры келямын солэн матысь эшез, республикаысь избиркомлэн тӧроез Юрий Петров. Югдурез утисьёслэн верамзыя, солэн кырсь ужъёсыз сярысь азьвылгес ик ини тодмо вал, но быръён кампания дыръя артистъёс ӧз ортче, угось соос куд-ог кужымъёсын одӥгезлы кандидатлы пумит нюръяськонэн лыдъямын луысалзы. Ю. Александрова. Выль амалъя дасяськоз Ижын но сьӧрлон улӥсь удмуртъёс берло дыре туж яратыса учкыло "Мылысь-кыдысь" нимо телеверанъёсты. Соосты дасясь но нуись журналистъёс Анна Федотова но Валерий Сидоров телестудиын меӵак кенешыло шаерысьтымы тужгес визьмо но дано адямиосын. Вуж амалъя берлоез телеверан возьматӥськоз 24-тӥ феврале. Учкись калыкез соку шумпоттоз витьымтэ кузьым. 23-тӥ феврале туж бадӟым но тунсыко концерт ортчоз Андан ӵыжатӥсьёслэн культура дворецазы. Ӵапак та нуналэ телеверанлы тырме куинь ар. Ӵапак та нуналэ луоз сю витьтонэтӥез пумиськон. Сцена вылын ортчем концерт телеэкранын возьматэмын луоз 3-тӥ мартэ но 10-тӥ мартэ. 17-тӥ мартысен телеверанлэн пуштросэз воштӥськоз: учкисьёс доры вуоз ини выль амалэн дасям "Мылысь-кыдысь". Котьку сямен ик радъяськылозы шаерысьтымы визьмо но дано адямиосын пумиськылонъёс. Таяз учыре адямиос телестудие меӵак жингыртылыны быгатылозы. Со дыре ик татын луылозы ӧтем адямиос. Соосыз но, таосыз но меӵак пыриськылыны быгатылозы аспӧртэмлыко шудонэ. Телефон номеръёсъя нимысьтыз лотерея но радъямын луоз. Шудооссэ узыр адямиос кузьымъёсын шумпоттозы. Учкылэ "Мылысь-кыдысь" телеверанэз. Е. Ромашова. Яратон но вожан Яратон но вожан Наташаен Лариса пичиысен эшъяськизы, ӵош школае ветлӥзы. Куд-огез вожъяськылӥзы соослэн эшъяськонзылы. Тани туннэ но соос клубысь ӵош куспазы ӟабыльтыса берто. - Наташа, тон мыным маке верало шуид вал, - вазиз Лариса. - Тани веранэ, - возьматӥз сад дурысь пичи ӟусэз. Татын ми Сергеен пукылӥськом. - Сергеен?! - кеськемзэ ӧз шӧды Лариса. - Бен-а, мар-о паймид? - Ӧ-ӧй, ӧй паймы, ш-шумпотӥ. Ой, Наташка, тон шудо. Оло, сюан сярысь но вераськиськоды-а, монэ эн вунэтэ, - суро-пожо мылкыдын дугдылытэк ӟабыльтэ Лариса. (Эх, тод вал соку Наташа, кыӵе кыйлы мылкыдзэ усьтӥз!) Уйбыт синзэ но ӧз кыльы Лариса - вожанэз ӧз сёты. *** Клуб азе трос калык люкаськем (субботаосы сьӧр гуртъёсысь трос егитъёс вуо). Сергей наташаез утчаз но ӧз шедьты. - Со туннэ уг пот шуиз, эн утчаськы - дораз матэктӥз Лариса. - Малы? - Уг мӧзмы, дыр. Солэн тон кадьёсыз... - Эн супыльты! - Я, эн лекъяськы, мон номыре но уг тодӥськы, номыр но тыныд ӧй вера, - умойяськыны кутскиз Лариса. Ф-фу, ӝокыт, ойдо ӧжыт котырском. - Мон возьмало на. - Ну соку ойдо Наташаос пала тубом. - Ойдо, - туж чаль соглаш луиз Сергей. Куинь-ньыль вамыш лэсьтыса ӧз вуэ, Лариса "канжаськиз". Сергей усем ныллы кизэ мычиз. Эшшо кӧня ке ортчыса, сюрес дурын сылӥсь сьӧр пиосты адӟыса кунулскиз. Вождэ, пе, эн вайы, а то ерыны кутскозы. Ӵап со куакъёс пӧлысь бӧрдэм куара кылӥськиз. - Ну, пожалуйста, лэзе, - тэльмыриз нылаш. - Наташа! - кеськиз Сергей. Озьы ик вань, куинь тодмотэм пиос нылашез куакъёс пӧлы шымыртӥллям. Сергейлэн мылкыдыз сураськиз: оло, эмзэ но, Лариса шонер вера. Соку малы бӧрдыса сылэ? Но пиос кема малпаськыса сылыны ӧз сётэ, Сергеез мырӟылыны кутскизы. - Кельше-а? Ха! Но тон ваньмы бӧрсьы гинэ. Сыӵе ултӥямез чидатэк Сергей вань кужмысьтыз мыжгиз Сьӧрло пилы. Ой, мар кутскиз отын! Ярам, Лариса клубысь ӝог пиосты вуттӥз. Сьӧрлось "сьӧсьёс" мотоосазы пуксьыса усьтыр-табыр лобатӥзы. Наташа Сергей борды ӟыгырскиз. Пияш Лариса пала берытскыса синмаз учкиз. - Мон... алдай, вождэс эн вае! - шуиз Лариса. Собере бызьыса дор палаз кошкиз. В.Григорьева. Вавож ёрос. Чур бугор Юонлэсь эмъяз... кеч Мынам картэ быдэс улонзэ юиз. Нылпиосмылэн пиналъёссы но вордскизы, нош со весь юэ. Та сьӧд кыльлэсь куштӥськиз одӥг нуналскын туж паймоно учыр бере. Одӥгаз празднике туклячиосмы куное ӧтизы. Юртсы бадӟым, куноос уно. Юо ӧжыт, со понна трос экто но кырӟало. Картэлы мӧзмыт потыны кутскиз. Соку ик адӟи ышиз шуыса. Вуиз ӵукна пал гинэ. Быдэсак посӥськемын, куалекъя. Бертом, шуэ, ӝоггес гуртэ бертом. Быдэс ар ӵоже сур гинэ но ӧз веръя. Одӥг пол телевизор пыр "кӧшкемыт" кино учким. Картэ малпамтэ шорысь шуэ: "Тодэмед потэ-а, малы юонлэсь куштӥськи. Монэн но ведь "кӧшкемыт" кино луиз. Тодӥськод на-а туклячиосмы доры юисьтэм куноослэсь ветлэмзэс. Соку мон бутыль кутӥ но садэ потӥ, куртчон вӧлдӥ. Юи но умме уси. Шоканы секыт луэмысь сайкай. Мон вылэ кин ке зӥбиськиз, пыдъёссэ гадь вылам тыриз но мыр-мыр шорам учке. Чёрт вал со: сюръёсыз, тушез, гижыё пыдъёсыз, зын гонэз, синъёсыз чиляло. Мон малпай, кулыса адэ вуиськем ни шуыса. Собере нош ик йырсазьме ыштӥ. Ӵукна сайкиськи - водка бекмыльтэмын, куртчон сиемын, котырам ваньмыз лёгамын. Озьыен, со уйвӧт ӧй вал". Ӝоген ми доры туклячимы лыктӥз. Картэ ужын вал, мон солы мади куноын луэм учыр сярысь. Соку сое кышкатэм вылэм. Кечсы адямилы юн дышемын, пе, ӵемысь корказы но кӧла. Яратэ, пыдъёссэ гадь вылэ тырыса, синме учкыны. Со нуналэ, кеч медаз люкеты шуыса, сарае пытсаллям, нош уин со пегӟем. Зэм, со сярысь мон картэлы ӧй вера, гожтэ "Аргументы и факты" газет. УДМУРТ ТЕАТРЛЫ 70 АР Трос-а кулэ шудо луон понна? Сюресъёс, сюресъёс... Тани сизьымдон ар ӵоже ни соос Драмая удмурт театрысь артистъёсты ялан кытчы ке валто: я мукет дауре, я мукет шаере... Котькуд пуктэм спектакль, дасям роль театрын ужась муртъёслы бадӟым шумпотон, озьы ик учкись калыкмы понна но: я соглаш луытэк споръяськон, я огшоры шутэтскон, куддыр визьнод басьтон но малпаськонэ усён. Театрлэн улонэз - вань калыклэн улонэз. Театрлэн историез - удмурт калыклэн историез. Мынам малпамея, театр - со синучкон: кыӵеесь ми, удмуртъёс, сыӵе ик асьмелэн театрмы. Янгыш адямиосты но утчано ӧвӧл, одӥг адями "куазез" воштыны уг быгаты. Театр, пе, "вешалка бордысен кутске"... Нош мыным потэ, театр кутске юрт бордысен. Театрын кызь ар пала ужатозям, кӧня проектъёсты чакламы ни, выль юрт тунаса! Нырысь проектэз учкеммы бере, мӧйы артистъёс вожъяськыса шуизы: "Ми со юртын ужаны ум вуттэ ни..." Табере ми егитъёсызлы ужасьёсмылы вераськом: "Ми театрлэсь выль юртсэ ум адӟе ни". Шонерзэ вераса, ми асьмелэсь юртмес но туж яратӥськом, нош выльзэ пуктон сярысь вераськон мылкыдэз лӧпкытэ. Оскон кылдэ ук, артысь элькунъёсын выллем зэмос дворецын ужам потэ. Драматургимы но сюлэмшугъяськытэ. Одӥг дыре уно гинэ авторъёс пьесаоссэс пыртыло вал, али дорамы сюрессэс вунэтӥзы. Гожтэмзэс лыдӟо милемлы, ми, артистъёс, асьмелэсь дэмланъёсмес вераськомы но - соос дорысьтымы кӧтсэс ӝож карыса кошко. Вань гожъяськисьёс чик вератэк но ӟеч тодо, жанръёс пӧлысь драматургия туж шугез луэ шуыса. Солэн аслаз чаклам законъёсыз, катъёсыз вань. Гажано пьеса гожъясьёс, ойдолэ валче ог-огмылы юрттыса ужаломы. Кылсярысь, А.Шкляев аслэсьтыз "Дор" пьесазэ артистъёсын, режиссёрен ӵош тупатъяса, усто спектакль пӧрмиз ук. Али кызьы удмурт калык пӧлын зэмос азьветлӥсь адямиос ӧвӧл, озьы ик театрамы но сьӧразы валтӥсьёс ӧвӧл, кудӥзлэн сюлмыз бадӟым, яратӥсь мед луысал, мукетъёсызлэсь одӥг висьлы ке но вылӥынгес мед луысал - йӧнъяськонэныз ӧвӧл, лулпуштросэныз, вылӥ интеллектэныз. Одӥг кылын вераса, ваньмыз гажан но яратон бордысен кутске. Мар карод, шаерамы вань улӥсь калык али сюрес вожын сылэ: вуж сямен улыны уг ни луы, нош вылезлы ӧм дыше ай, малы ке шуод, котькуд вордскем нунал мар ке выльзэ вае. Вуберганэ шедем муртъёс сямен дыртыса жомбылляськиськомы. Ог-огмы шоры дунъяса учкыны дырмы ик ӧвол. Ӵем дыръя сьӧд буёлъёсыз гинэ адӟиськом. Валэктонмы одӥг: улон сыӵе. Нош мон сямен, улон со сыӵе, кыӵеен мон сое адӟисько. Котькӧня ӝожтӥськы, ачид ке ӧд туртты, номыр уз воштӥськы. Ачид тыршытэк, муртлэн кисыысьтыз коньдонзэ котькӧня лыдъя, со тынад аслад ноку уз луы. Куд-ог егит артистъёс, асьсэлэсь талантсэс аналтыса, коньдоногес уже кошкизы. Нош асьсэос лушкем лулӟыло, сцена вылын шудӥсь эшъёссы шоры вожъяськыса учко. Оло, со шонер но? Калыклы номыр верамед уг поты ке, марлы сцена вылэ потод? Нош вань артистъёс лулзэс коньдон понна вузасалзы ке, театрын нокин ӧй кыльысалыз ни. Бен, вань адямиос пӧртэмесь бере, коньдон шоры учкеммы но огкадь ӧвӧл. Тани кылем гужем Башкортостан шаеретӥ гастрольын ветлыкумы, Нефтекамскысен одӥг воргорон юа: - Тазьы гастрольёсы потамды понна уждунды толэзяз ог дас сюрс манет луэ, дыр? Ми ог-огмы шоры учким, ӝогак йырамы чотамы но одӥг ымысь кадь шуиськом: - Шорлыдын басьтыса, сюрс вить сю манет усе, дыр. Воргорон киыныз гинэ шонтӥз: - Мон тӥ интыын тазьы курадӟыса ӧй но ветлысал. Мар шуод, шудо луон понна кинлы ке сюрс манетэн но тырме, нош кинлы ке сю сюрсэз но ӧжыт потэ. Уноез артистъёсмы одӥг уждун вылын гинэ уг пуко, выль амалъёс, сюресъёс утчало: кырӟанъёс, кылбуръёс гожъяло, школаосын но училищеосын кружокъёс нуо. Тани режиссура удысын но асьсэды эскерисьёс вань: Россиысь калык артистка Вероника Садаева, элькунысь калык артистъёс Виктор Стрелков но Вячеслав Байков, артист Кадим Галиханов. Артистка Валентина Бекманова гожтэм выль пьесазэ тупатъя. Шумпотӥсько соос понна, кинлэн сюлэмыз уг сӥя, уг буйга. Сыӵе адямилэн аслаз но лулпушкыз узырме, мукетызлы но жалятэк быгатонлыксэ сётыны быгатэ. М.Варфоломеев "Гуртысь маскарчиос" пьесаяз шуиз: "Артистъёс сюрес дурын будӥсь сяськаос кадь: ваньмызлы кулэ, но малы ке ваньмыз лёгало соосты..." Тани "Удмурт кенеш" огазеяськон кылдэм дырысен ни отчы пыриськись удмуртъёс артистъёсмес ялан пыкыло: "Тӥ нокыӵе общественной уже уд пыриськиське, номыре тодэмды уг поты..." Я, шуом "Удмурт кенешлэн" ӧтчамез 17-тӥ феврале филармонилэн юртаз 18 часэ кутске, нош та нуналэ театрын концерт ялэмын. Вань артистъёс театр борды вормыны луонтэм тунгон ошо но концерт учкыны лыктэм калыклы ӧс борды ялон лякыса кельто: "Гажано учкисьёсмы, вождэс эн вае, ми ваньмы "Удмурт кенешлэн" ӧтчамаз кошким". Таӵе маскаръяськеме, оло, умой ӧвӧл, но кин театре ветлэ, со ӟеч тодэ: шутэтскон нуналъёсмы милям вордӥськон нуналэ луо. Нош сизьымдон ар ӵоже театрмы мар бордын ужаз меда? Удмуртлыкмес, озьыен, кыӵе ке огазеяськонэ пыриськыса гинэ утьыны быгатомы на? 1999-тӥ арлэн пумаз Яр ёросысь Ютчино гуртэ нылпиослы пуктэм "Анчутка" выжыкылэн но чеберъям кыз котыртӥ Тол Бабаен но Лымы Нылэн интермедия дасяса вуылӥмы. (Вераны кулэ, котькуд Выль ар азьын выль выжыкыл но выльзэ шулдыръяськон дасяськомы.) Вуттӥзы милемды фермаысь "горд сэреге", отын тол куазь ульчаын кадь ик кузёяське вал. Кызьы дӥсьтэ воштод таӵе юртын? Шудыны малпанмы ик ӧй вал. Тани пиналъёс но вуо ни. Тол Бабаен но Лымы Нылэн пумиськыны-шулдыръяськыны шуыса, карнавал дӥсен лыктӥллям. Пумен пальтооссэс куяло ни, куд-огез саестэм дэрем коже но кыле. Нош ми соослы вераськом: - Дӥсяське, дӥсяське, костюмъёсты туж чебересь, но висьыны усёды ук. Милемды нокин алыны уг быгаты вал, кошкысалмы ке но, спектакльмес шудытэк. Нош пиналъёслэсь синъёссэс адӟыса валам: ми кошкыны ум быгатӥське, соос паймымонзэ, адӟылымтэзэ возьмало. Огкылысь кенешимы куспамы: - Шудоно. Пиналъёс янгышесь ӧвӧл, бадӟымесь адямиос понна соос кыл кутыны уг быгато. Та выллемесь учыръёс ӧжыт уг луо: я пась липето клубын ужано луэ, я сыӵе клубе шедиськод, кытын одӥг пукон но, одӥг ӝӧк но уг луы - ваньмыз кык-куинь кукъемесь. Кылем аре Башкортостан, Татарстан палъёсын В.Гавриловлэн но Л.Романовлэн пьесазыя "Яратон уг пересьмы" спектаклез ӟуч но удмурт кылын возьматъям. Бирск районысь Чишма пор гуртэ сюресмы вуттӥз. Клубе кӧня ке люкаськем калык паймыса юа: - Ма, вуиды ик-а, мар-а? Сценаез дасятозь, учкон залэ вырӟыны луонтэм калык люкаськем. Туж мыло-кыдо шудыны кутским спектакльмес. Калык чус пуке. Пумозяз шудытозямы, одӥг-ог серектӥзы ик. Спектакльмес йылпумъяса, вань люкаськем калыклы йыбырттӥм - огдышем сямен кужмо кичабонъёсты витиськом. Калык кынмем кадь пуке, ми но мар карыны ӟудӥмы ни: оло сылод на, оло сцена вылысь кошконо ни? Кивалтӥсьмы Леонид Романов учкись калыклы вазиське: - Быдтӥмы ни. Залын озьы ик чал-чал. Ми урдэс-урдэс кошкыны вырӟим ни, Леонид Григорьевич ӝож синъёсын залэ учкиз но милемлы вера: - Вань донгызъёс татчы люкаськиллям кадь. Сереммес мырдэм возьыса кошкимы гинэ, залысь но калык шыпак вырӟиз. Клублэн кузёез гинэ, ог 30-35 аресъем пияш, интыяз кылиз. Со милемлы тазьы валэктӥз: - Мон кӧня асме тодӥсько, гуртамы театрез адӟеме ӧй вал на. Башкир музъем вылысь поръёс доры одӥг-ог цирк гинэ вуылэ. Соос но, лыктыны мылкыд каремзы бере, ньылетӥ- витетӥ радаз гинэ сётэм кылзэс быдэсто. Сьӧразы кӧня ке коскам обезъянъёсыз но зӧк питонэз-кыез гинэ нулло. Спектакльды туж кельшиз, учкись калыклэн шок луиз - шумпотон мылкыдзэс кызьы возьматыны ик ӧз валалэ. Озьыен, ми данъяськыны быгатӥськом, та гуртын нырысетӥосыз вал шуыса. Ог вить-куать ар талэсь азьло Уфа дорысь ик Кушнаренково ёросысь чол-чол одӥгназ сылӥсь бадӟым удмурт Канлы гуртэ но нырысьсэ ми вуылӥмы вал. В.Котковлэн пьесаезъя "Пинал мылкыд - юмал йӧлпыд" спектаклез нуллӥм. Куд-огез учкисьёс залын зар-зар бӧрдыса пукизы. Спектакль йылпумъяськем бере юаськом бӧрдэмзылэсь мугзэ. Соос шуо: - Шумпотэменымы бӧрдӥськом. Лулмы рае вуиз кадь. Кыӵе чебер асьмелэн удмурт кылмы- визьмы - шур кадь жильыртэ. Нош мон соослы пумтэм пайми. Школаязы нимысьтыз удмурт классы вань, отын ик национальной костюмъёс ошылэмын. Со-а шумпотымон ӧвӧл? Мукет нуналаз ӵукна ик сюрес вылэ вырӟоно ни вал. Милемды ӝыны Канлы келяны лыктӥз, дыр. Егитъёсыз возьдаськысагес палэнын сылӥзы. Губырскем песянайёс бордамы ӟыгырскыса бӧрдо: - Адскыны кылдоз на меда? - Тӥ кемагес улыны тырше, ми нош вуом на, - милям асьмелэн но пушмы тыре. Театрлэн репертуараз трос данъяськымон спектакльёс, синмаськымон выжыкылъёс. Спектакльмес учкем пӧртэм палась, пӧртэм удысын ужась муртъёс ӵемысь верало: - Кыӵе тӥляд чебересь артистъёсты. Котырысьтыды омыр ик чылкыт но югыт. Кызьы, пе, сотэк? Одӥг спектаклез ик поттон бордын кӧня пӧртэм ужасьёсмы асьсэлэсь шунытсэс сёто! Суредась-художник, парикмахер, вуриськись, бутафор, столяр, электрик, радист... Нош контролёръёсмы милям кыӵе мыло-кыдоесь, котькуд пырем адямиез пальпотыса, капчи мылкыдын гинэ пумитало. Театр мон понна - кыкетӥ семьяе. Ужасьёсмес сузэр-вынъёсме кадь яратӥсько. Улонамы котькыӵе дыръёсмы луо, нош ӟечез котьку но унолы тросгес. Бадӟым праздникен - Удмурт театрлы 70 ар тырмонэн - ӟечкыласько вань ужасьёсмес, милям удысэнымы герӟаськем муртъёсты но театрез яратӥсь вань удмурт калыкез. Сӥзисько андан кадь юн тазалык, ӝутыны вормонтэм шудбур но ог-огмес яратыса, юрттыса валче улон! Нош театрлы - шудо сюрес. Римма НИКОЛАЕВА, республикаысьтымы дано артистка. Сьӧд кыль пудоез но погыртэ Сарапул ёросысь "Россия" эштосысь парсьёссы чумаен черлазы. Удмуртиын та учыр витетӥез ни. Шевыряловоын шлагбаум пуктӥзы ни, ветеринаръёс пудоез чакласа возё. Висён шараяськемын. Дышетско нефтяникъёс Кемалась ӧвӧл, Играысь нефть поттӥсьёслэн пусйымон нуналзы вал - ужаны кутскемзы дырысен соос музъемысь 60 миллион тонна сьӧд зарни кыскизы ни. Му вӧй кыскисьёсты ӟечкыланы ветлӥзы "Удмуртнефть" акционерной обществолэн генеральной директорез Е. Богомольный, Игра НГДУ-лэн начальникез Р. Абашев но Игра ёросысь администрацилэн йырыз В. Усков. Татысь ужасьёс ас удыссыя тодон-валанзэс но будэто. Кун Кенешлэн депутатэзлэн Евгений Богомольныйлэн сюлмаськеменыз Игралан усьтэмын Пермьысь нефтья колледжлэн филиалэз. Отын 52 мурт дышетске. П.Николаев. 02 ивортэ Героин, изьы, авто но кабак Милициын ужасьёс ноку но тэк уг пуко. Ижевскысь Карл Маркс ульчаысь 285-тӥ юрт дорын ӝегатэмын вал 23 аресъем Алексей. Солэсь 1,24 грамм героинзэ шедьтӥзы. Наркотикъёс асьме дорын но выжызэс пумен пыдло но пыдло лэзё ни. *** Кин кызьы коньдон поттэ туала вакытэ. Нош толалтэ уноез шӧртчиос узырмо изьыос чотын. Октябрь ёрос милициын ужасьёс кие шедиз 29 аресъем Марат Ф. Со мукетъёсыз сямен йыръёсысьтызы изьыосты ӧз ишка. Со вораськиз кабинетъёсын, дӥсь кылён интыосын. *** Ог 6 часын ӵукна ГИБДД-лэн патруль службая полказ ужасьёслы малы ке осконтэм потӥз Московский ульчаетӥ ширтӥсь ГАЗ автомобиль. Дугдытӥзы. Руль сьӧрын пуке вылэм 24 аресъем Юрий К. Возьматыны ӧз быгаты правозэ, машиналэсь документсэ но. Бӧрысь тодмо луиз: "Время-96" ООО-лэсь автозэ лобатэм Гагарин ульчаысь. *** Сарапулысь аракы поттон заводлэсь кудӟытӥсь юонъёссэ уноезлэн веръямез вань, луоз. Но Кам дурысь та городын "самопал" виятӥсьёс но уно гинэ шедьыло. Табере кабак поттонъя лушкем ужась цех шедьтэмын Кабаркаын но. Та ужен гуртазы выро вылэм 44 аресъем кузпалъёс Павел но Вера Л. Соослэсь талазы пробка юнматон арберизэс, пӧяськыса лэсьтэм 870 акциз маркаоссэс, 300-лэсь уно пробкаоссэс, этикеткаоссэс, ящикъёссэс. Завод но завод. Телевизор дуре - пистолетэн Кӧня пол асьмеды ало ни, ӧсъёстэс тодмотэмъёслы эн усьялэ шуыса. Пелямы ум понӥське, вунэтӥськом. Ижевскысь Нагорной ульчаысь 46-тӥ юртын улӥсь воргоронлэн квартираяз но озьы ик пыризы. Пистолетэн кышкатыса, кунгож сьӧрын поттэм телевизорзэ кайпалтӥзы но кошкизы. Таяз учыре милиция ӝог ужаз. Чагыр экранэз учкемзы потэм вылэм Леваневской ульчаысь 23 но 22 аресъем бомжъёслэн Янушлэн но Николайлэн. Телевизор берыктэмын, "Страж" пистолет таламын. Табере соос чагыр экран шоры учкозы кечат-вамат решётка пыр. Кӧттэ сапеген уд тыры Ижевскысь Новостроительной ульчаысь 95-тӥ нылпи садэ 24 аресъем анай пиналзэ котьку сямен ик ӵукна вайыса кельтӥз. Тол сапегъёссэ куштыса, мусокайзэ группаяз келяны кошкиз. Берытскиз но сапегъёссэ ӧз шедьты ни. Но 36 аресъем лушкаськисез Александрез кырмизы ик. Сапегъёсты кузёезлы берыктӥзы. Паймод, кин маин кӧтсэ тыре. Бырон ваиз тамак Сизьыметӥ февральлэн берло минутъёсаз тылпу ӝутскиз Можга ёросысь Ломеслуд гуртын. Юртъерлы уно изъян ваемын. Тылпу потэм 40 аресъем Ольгалэн юэм йырыныз тамак кыскемез бордысь. Мукетыз жаль: тылын быриз ачиз коркалэн кузёез но, солэн 6 аресъем Миша пиез но. Алюминь кӧче вал бигере Алнаш ёросысь Асаново совхоз-техникумлэн посёлок вӧзаз Алнашысь РОВД-ын но ГИБДД- ын ужасьёс ӝегатӥзы ГАЗ-330210 автомобилез. Машинаен кивалтэ вылэм артэ бигер республикаысь Менделеевск городысь 70 аресъем Равис бабай. Нош 450 кило алюминь кортэз келяны оскиллям Можгаысь "Оптимист" нимаз вузкарон предприятиын ужасьлы 33 аресъем Артурлы. Но таосыдлэн дуно кортэз элькунмылэн палэназ поттыны лэзён сярысь документсы вылымтэ. Мынэ эскерон. Корт но кулон Миым 22-тӥ декабре выжон уе Пичи Пургаысь дуно кортъёсты басьтон интыын виемын вал Б. Уголовной розыскын ужасьёс та пумысен ӝегатӥзы Агрызысь 21 аресъем Эдуардэз. Пуктэмын изоляторе. Антенна но мыноз Ижевск. Первомайской ульча, 28. 3 часын уин. Та вакытэ калык чыс-чыс уммен кӧлэ ни. Телевизоръёсты учкись ӧвӧл. Ӵапак сое лыдэ басьтӥллям, луоз, Якшур-Бодья ёросысь Чур посёлокысь (кыдёкысь куно!) 14 аресъем Мануэль, 15 аресъем Павел но азьвыл пукылэм 23 аресъем пияш Александр (таосыз Ижысь). Самой та куинь экеос ӝужыт юрт йылэ тубыса 4 телеантеннаосты сӧзнаса вуиллям. Кыдёке кошкыса ӧз вуэ: ГИБДД-лэн ДПС полкысьтыз милиционеръёс соосты дуно кортэнызы ӵош шымыртӥзы. Кайгу Пичи Пурга ёросысь Гожня гуртын Новая ульчаысь одӥгаз кирпичлэсь юртын нуназе шорын тылпу ӝутскиз. Отчы асьсэ понна кылемын вал 3 аресъем Настя, 2 аресъем Борис но 9 толэзьем Люба. Анайзы бускельзы дорысь берытскыкуз, корка гома вал ини. Со Любазэ поттыса вуиз ик, но со уг шока ни вал. тылын быризы мукетъёсыз но пиналъёс. Нырысь чакламзыя, тылпу потэм пиналъёслэн тылын шудэмысьтызы. Пуштӥз, куашкатӥз 10-тӥ феврале 17 час котырын Кизнер посёлокысь "Кизнермолпром" акционер огазеяськонлэн котельноез пуштӥз. Со изъянтӥз оборудованиез, липетэз, укноосты но ӧсъёсты. Пуштон дыръя ӧжытак сӧсырмыны шедиз 26 аресъем кочегар Александр. Нырысь йылпумъянъёсъя котельной пуштӥз кышкытлыклэсь правилоосты чакламтэ бордысь. Вылаз ик, эстӥськонзы ужа ни вылэм ог 25 ар ӵоже. Лушкем но шара "Р" отделын ужасьёс Ижевскысь "Охота" магазинысь 46 аресъем электрикез Николай Ф.-ез пӧйшурамез понна ӧз ӝегатэ. Со ваньмон дыръяз мукет амалэн "пӧйшура" вылэм. Кибашлы воргорон лэсьтылӥз вераськемъёсты лушкемен (акустика амалэз кутыса) кылзон аппаратура. Таламын пӧртэм арбериосыз. Табере следовательёс Николаен мукет интыын шара вераськозы ни. Сьӧд ужзэс уз ватэ 12-тӥ феврале 3 часын нуназе Ижевскысь Первомай ёросэтӥ (Ракетная ульча сьӧрын) ортчись чугун сюрес сьӧрысь лымы букосын шедьтэмын 48 аресъем Ларисалэн шӧйыз. Сое чыртыяз пуртэн бышкаллям. Сьӧд ужзэс пыдло ватон понна нылкышноез вииллям 17 аресъем Вячеслав, 19 аресъем Андрей (азьвыл пукемын ни) но 17 аресъем Игорь. "Возьмаськись" Ижевскысь Молодёжной ульчаысь 71-тӥ юртэ интыяськемын медициная ӝог юрттэт сётонъя станцилэн ёзэз. Отын висисьёслэсь ӧтемзэс витьыса уен-нуналэн сыло горд киросо машинаос. Одӥгзэ РАФ-22031 автоез синйылтэм одӥгаз акционер огазеяськонын возьмаськись луыса ужась 20 аресъем Андрей. "Возьмаськись" ворттылыса ӧз вуы... Подъездаз кылизы 13-тӥ феврале ог 22 час котырын Ижысь Майской ульчаысь 9-тӥ юртлэн подъездаз куинь дыдыос 14 аресъем Ольгаез жугизы но солэсь пель угыоссэ, азвесь зундэссэ, джинссэ, шарфсэ талазы. Милиция кыксэ апайёсты кырмиз ни. Со 63-тӥ школаын дышетскисьёс - 13 аресъем Кристина но 15 аресъем Екатерина. Бен, та ласянь но дыдыосмы вазь "кисьмало" вылэм. Н.БАЙТЕРЯКОВ. (Удмурт Республикаысь Югдурез утёнъя министерстволэн пресс- службаезлэн ивортонъёсызъя). Адями одӥг - ныпъет дас одӥг Светлана Смирнова туннэ ас вылаз трос ныпъет нуэ. Кызё пала должностьёсыз пӧлысь тани кӧняез ке: Кун Думаысь Нациосмылэн ужъёссыя комитетлэсь тӧрозэ воштӥсь. "Калыкъёслэн эшъяськонзы - Россилэн быдэслыкез" фракциос куспын кылдытэм группае пырись депутатъёслэн кивалтӥсьсы. "Калык депутат" огазеяськонлэсь кивалтӥсьсэ воштӥсь. Россиысь Калыкъёслэн ассамблеязылэн кенешеныз кивалтӥсьсэ воштӥсь. Удмуртилэн выль историезъя кӧня ке томен книга дасясь авторской коллективлэн одӥгез кивалтӥсез. Удмуртия: выль даур Арын кык гужем уг луы Сюрс арлыкез йылпумъясь ар элькунысьтымы крестьян калык понна урод ӧй вал. Гуртоос асьсэос но чырмыт ужаны выризы, куазь но тупаз, шуыны луоз. Тысё но пуртэсо юос 538 сюрс гектар киземын-будэтэмын вал. Азьло арен ӵошатыса, со 9 процентлы ичигес ке но, ю-нянь ог ньыльмос люкетлы уногес люкаськиз - 596 сюрс тонна. Валамон ни, гыроно, кизёно муос туннэ ваньмыз сямен эштосъёс-колхозъёс киын. Соин ик 95,7 процентэз ю тысь огъя хозяйствоосын будэтэмын, 4 процентэз - фермер бусыосын. Нош мукет культураосъя югдур таӵе: картофка кылем арын 11 процентэз гинэ эштосъёсын будэтэмын. 86,5 процентэз со копамын нимаз адямиослэн бакчаосысьтызы. Куд-ог ёросъёсын хозяйствоос чылкак дугдӥзы ни "кыкетӥ нянен" выремысь. Шуом, Сарапулын бичам картофка пӧлысь 2,6 процентэз гинэ эштосъёсын будэмын. Солэсь но ичи (0,4 процент) - Грах ёросын. Картофка борды мылысь-кыдысь басьтӥськыны ӧдъязы фермеръёс. Тани Шаркан ёросын соос ньыльмос люкетсэ будэто ни. Бакча сиёнъёсъя ке учконо, 85 процентэз урожай люкамын нимаз адямиослэн убоосысьтызы. Шумпоттӥзы Дэбесысь крестьян хозяйствоос. Соос ёросазы октэм-бичам бакча сиён пӧлысь 14 процентсэ будэтӥзы. Тани та таблица возьматэ гуртоослэсь 2000-тӥ арын кызьы ужамзэс. Ёросъёс Кылем арын ю тысь кутсамын (сюрс тонна) 2000-тӥ арын гектарысьтыз (центнерен) Элькунъя шоро-куспо лыдпусэн ӵошатыса (процентэн) 2000-тӥ арын Картофка копамын гектарысьтыз (центнер) Яр 17,9 8,0 72,1 64,5 Глаз 24,2 9,8 88,3 59,8 Юкаменск 22,5 9,6 86,5 82,4 Балезино 27,1 10,1 91,0 71,1 Красногорск 11,6 8,6 77,5 60,4 Кез 17,2 9,2 82,9 83,5 Дэбес 16,0 9,4 84,7 50,9 Игра 15,5 8,7 78,4 92,7 Якшур-Бодья 12,0 10,4 93,7 62,0 Шаркан 22,8 10,8 97,3 71,0 Селта 12,2 7,7 69,4 62,6 Сюмси 3,3 7,1 64,0 47,4 Ува 32,1 11,0 99,1 53,9 Вавож 26,8 14,4 129,7 103,5 Кизнер 13,5 8,4 75,7 45,9 Можга 46,4 12,1 109,0 85,9 Грах 17,3 11,6 104,5 6,0 Алнаш 46,1 17,6 158,6 60,0 Пичи Пурга 33,2 14,7 132,4 83,8 Кияса 17,6 9,7 87,4 28,9 Каракулино 33,4 12,9 116,2 26,7 Завьял 33,5 11,9 107,2 81,4 Вотка 21,0 10,1 91,0 73,4 Сарапул 44,4 12,2 109,9 76,4 Камбарка 2,6 7,5 67,6 41,1 Республикая 570,5 11,1 74,7 Кызьы тодмо, асьме республикаын кутэмын "Етӥн" программа. Со пумен быдэсъяське ни. Та культураез будэтыны шуг. Соин ик етӥнэн выро огъя хозяйствоос. Кылем арын люкамын 37,9 сюрс центнер етӥн куро. Котькинлэсь умой удалтӥз "уй пал буртчин" Красногорск ёросын. Отын гектарлы быдэ 7,5 центнер куро люказы. Умой ужало та ласянь кезъёс, играос но уваос. Удмуртилэн Президентэз Александр Волков етӥн будэтонэз азинтонлы бадӟым саклык висъя. Етӥн бусыоссэс паськытатӥсь хозяйствоослы ватсаса коньдон но висъяны чакламын. Ужез озьы радъян удысэз умоятыны одно ик юрттоз. Кӧня ке кыл верано на, дыр, пудо вордонын югдур сярысь. Татын умойтэм соиз: пудолэн лыдыз арысь аре кулэсме. Туэ ар кутсконлы республикаямы 127 сюрс скал лыдъяськиз. Азьлоеныз ӵошатыса, со 5,5 процентлы ичигес. Туж синэ парсь лыд. Та пудо 168 сюрс гинэ кылемын на. Огъя хозяйствоос лыдъяло, парсь вордон изъян гинэ вае шуыса. Кылем арын элькунмыя котькуд скаллэсь 2623 килограмм йӧл кыскемын. Котькытынлэсь трос - 2894 килограмм - Балезино ёросысь хозяйствоосын. Валля арын сярысь, со 11 процентлы уногес. Сводка пумын - камбаркаос. Соос 2000 килограмм но ӧз люкалэ. Тӥни сыӵе куӵо суред. Кин тырше-сюлмаське, со пусйымон азинскон басьтэ. Кин киыныз шонаса улэ, арын кык гужем луоз шуыса малпа, ю-нянь но тыро-пыдо уг люка, сӥль-йӧл поттонэз но куашкатэ. Али гурт хозяйствоосын отчётлы-быръёнлы сӥзем кенешъёс ортчыло. Та ужрадъёс мед пӧрмозы вылэм югдурез котыр ласянь эскеронлы но азьланезлы сюрес пусъёнлы. И. Максимов. Ӟырт кезьытъёс но небытэсь вылэм Вань на меда секытэзгес ас юртэдлэсь, матысь эшъёсыдлэсь, яратоно ужедлэсь люкиськонлэсь? Эшшо талы кужмысь косо ке... Совето Союз "пыргиськем" бере, кунгож сьӧры кылем ӟучъёс ас доразы мурт калыклы пӧрмизы. Улон-вылонын куд-ог правооссэс ыштыса, соос отысь кошконо луо. Озьы берло дас ар ӵоже Россие ог тямыс миллион адями вуиз, соос пӧлысь 15 сюрсэз - Удмуртие. Республикаысьтымы Миграционной службалэн чакламезъя, матысь дыре но дорамы вуисьёслэн лыдзы уз кулэсмы. Пумитам лыктэ нылкышно. Тусызъя но, манеръёсызъя но мукетъёсызлэсь номырин уг висъясьы кадь. - Монэ-а утчаськоды? - ?! Гуртоос веразы, татын, пе, Казахстанысь вуэмъёс уло. - Мон ик вань Татьяна. Уг тупаськы шат казашкалы? Уг, дыр. Выжыосы немецъёс палагес кыско угось. Анае - немка, Казахстанэ со война дыръя шедем. Атае, бен, ӟуч вылэм, но мон сое уг тодӥськы - анаеным гинэ будэмын. Каллен, дыртытэк вераськон манерыя шат казашкаослы укшасько ик. Таин валче гуртоос бадӟымъяськись шуыса шорам учкыло вылэм нырысь - али верало ни. Тазьы пумиським Татьяна Алексеевна Степановаен, Сюмси палъёсы вуылыкумы. Удмуртие со пересь анаеныз но пиналъёсыныз ӵош ар талэсь азьло Казахстанысь вуизы. Интыяськизы Сюмси ёросысь Дмитрошур гуртэ. Галя кенэз выжыосызъя та палась луэ. Но ачиз Галя Казахстанын ик вордӥськемын, Удмуртие татчыозь вуылэмез но ӧй вал. Озьы Степановъёс сюрес вылэ дасяськыкузы ӧз но тодылэ кытчы, кыӵе шаере потэмзэс. - Но Удмуртия милемлы соку ик кельшиз, - маде Татьяна Алексеевна. - Нырысь ик, куазеныз. Казахстанын угось кыр бусыос иськемъёсын кыстӥсько, толалтэ тӧлъёс ымнырез вандымон пельто - ураме потыны кышкалод. Нош татын ӟырт кезьытъёс но небытэсьгес пото. Небыт сямо та палан калыкез но. Татчыозь одӥг пол но ӧм шӧдылэ шорамы лекъяськыса учкылэмзэс. Гуртэ вуэммы бере ик колхоз квартира висъяз, уже интыяськонэн юрттӥз. Али Татьяна Алексеевна Бадӟым Инга фермаын зоотехник луыса ужа, Казахстанын но та удысын ик тыршиз угось - талы дышетскемез вань. Колхозэ ик интыяськизы Степановалэн пиосыз Виталий но Алёша. - Озьы калленэн-калленэн ке но пыд йыламы ӝутӥськыны турттӥськом, - азьланьтэ веранзэ Татьяна Алексеевна. Но кема, дыр, курадӟоно луоз на. Бен, Степановъёслэн туннэ улонзылы уд вожъяськы. Пумиськонмы азьын ог арня вазен гинэ, соос асьсэлы уродос ке но корка басьтӥллям - ялан колхозлэназ уд улы ук. Но "выль" корказылэсь кыӵезэ тазьы гинэ вералод - татын улыны ваньмыз уз соглашме. Мынам али но син азям, ӟоскыт, кезьыт корка. Отын Степановъёс укмыс кузя уло: тужгес пичиез - кутэтын кыллись Юленька. Тужгес арлыдоез тямыстон тямыс аресъем пересь анайзы Амалия Иогановна. Доразы кожакум, таос ваньзы гуртазы кемдӥзы. Татьяна Алексеевна пиосыныз ӵош нуназеяны бертӥллям. Бӧрсям ик пыриз Ирина нылыз, школаын урокъёсыз быриллям ни. Корка пичиен-а, мар-а пыд улын тыраз векчи пиналъёс бызьыло потӥз. Виталийлэн но Галялэн бадӟымъёсыз нылъёссы кыктоос кадь будо: ог ньыль аресъемесь адӟисько соос. Анечкаен Настя тусъёссыя но ог-огзылы укшало. Мертчан йырсиоссы пельпум уллапалозязы лэзьямын. Бабушсы котыре биниськиллям ук таосыд: кизэ кутыло, кытӥ-отӥ чыртыяз но ошиськыны вутско. - Мӧзмиды шат? - эркия соосты Татьяна Алексеевна. - Мырдэм-мырдэм дышо ни кадь таос выль интыын улонлы. Только мултэс возьдаськисесь будо ук. Ӵошен гинэ шудо. Ураме потыны ик кышкало. Бускель пиналъёсын эшъяськыны уг дӥсьто. Возьдаськись будэ, пе, Ирина но, Татьяна Алексеевналэн нылыз. Сюрес вылын кыскаськонъёсын валче, со ас ёзъёсызлэсь арлы беромыса дышетске. Оло эшъёсызлэсь бадӟымгес шуыса, оло дӥсяны дӥсез ӧвӧлысь кепыра. Ма бен, сизьыметӥ классын дышетскись нылашез валаны луэ - егит дыр со егит дыр ини. Но монэ таосыд озьы но мурт адями ӧз каре кадь. Тӥни кыӵе вожмаськыса сямен Казахстанысь ваем тенгеоссэс (манетъёссэс) возьматъяло соос. Аняен Настя бумага коньдонъёсты огез бӧрсьы мукетсэ бергато, Ирина соослы дунъет сётэ. Котькуд тенге вылын казахъёслэн тусбуйзы пуктэмын. Самой даноез казах, пе, луэ Ибн Насир аль Фараби, таид 500 манетын "кузёяське". Со бӧрсьы сыло Абай Кунанбаев, Чокан Валиханов, Курмангазы Сагырбаев но мукетъёсыз. - Казахъёс туж данъясько ас выжыысьтызы потэм тодмо адямиосын, - маде Татьяна Алексеевна. - Берло дыре со тужгес но зол шӧдӥськыны кутскиз. Вылӥ кивалтон ёзъёсысь ӟучъёсты палэнтыса, "асьсэлэнъёссэ" пуктӥзы. Казахстанын улӥсьёс одно, пе, тодыны кулэ казах кылэз. Ӟучъёслы пумит луэмзы огшоры казахъёслэн отысь кивалтӥсьёслэн кадь уг шӧдӥськы. Тодам лыктэ таӵе учыр. Удмуртие кошкыны документъёс дасяку, паспортъя службаын ужасьлэсь ма верамзэ ӧй вала, выльысь юано кариськи. Таид пумитам кесяськыны кутскиз ук. Кыӵе гинэ жоб кылъёсын ӧз тышкаськы. Эсьмаса, Удмуртиын чылкак мукет сямен пумитазы. Татысь паспортистка интыысьтыз султыса ик лад-лад валэктӥз, документъёсты кызьы гожъяны. Казахстанын Степановъёслэн хозяйствозы шоро-куспо лыдъяськиз. Соос куинь скал, кык-куинь кунян, кык-куинь парсь, ог дасо ыж но ньыль кеч вордылӥзы. Владимировка, кытын соос улӥзы, сокем бадӟым ӧй вал. Гуртоос куспазы тупаса, ог- огзылы юрттыса улӥзы. Улон кыӵе тодмантэм воштӥськыны быгатэ вылэм! Берло дыре татын тылтэк, шуныттэк пуконо луиз. Пудозэс югыт дыръя гинэ дыртӥд-вуттӥд утялтыса вуттылӥзы. Татьяна Алекссевна со вакытэ гуртысьтызы фермаын зоотехник луыса ужа вал. Макем вӧсь луыса учкылӥз со син куспын катьтэммись пудо шоры. Скалъёс йӧл сётэмысь дугдӥзы, кунянъёс ӧжыт вордскизы. Удмуртие Степановъёс туж кулэ арбериоссэс гинэ кутӥзы - ваньмыз ньыль сумкае тэриз. Кылем котырзэс Татьяна Алексеевна кельтӥз азьвыл картэзлы, солы ик кылиз корказы но. Юнме уд кушты ук, пе, нош вузаны ӧз быгатэ. - Картэным вазенгес люкиськи ни, - маде Татьяна Алексеевна. - Но кусыпъёсмес чылкак ӧм сӧре. Али но со гожтэт ысъя, пиналъёсын адӟиськон понна, татчы лыктыны малпа. Кышнояськем ни шуыса гожтэ. Казахстанын улонэн уг ушъяськы. Бен, улон ӧжыт ӧз сэрпалля ни Степановъёслэсь семьязэс. Но, шӧдӥське, котькуд шуккетэз Татьяна Алексеевна ас вылазгес басьтыны тырше, пиналъёссэ, пересь анайзэ утьыны турттыса. Тани али но кышномуртлэн одӥг сюлмаськонэз: тазэ корказэс ӧжытак тыро-пыдо утялтыса, аслыз мукет сэрег шедьтыны. Пиналъёсызлы сотэк но ӟоскыт, пе, татын. Сюлмаське Татьяна Алексеевна Казахстанэ кылем эшъёсыз сярысь но. Соослы но юрттэмез потэ. Галя эшсэ семьяеныз сьӧраз кыскемез потэ удмурт шаере. Э. Кумачева. Туспуктэмез В. Беломорскихлэн. Сессиысь Кивалтэт выльдӥське 13-тӥ феврале усьтӥськиз Кун Кенешлэн дас витетӥ сессиез. Отын эскерыны чакламын 24 ужпум. Соос пӧртэмесь, но уноез герӟаськемын асьме элькунын кивалтонэз выльдонэн. Сессиын нырысь ик кыл сётӥзы Россия Федерациысь Кун Думалэн депутатэзлы Светлана Смирновалы. Ас мылкыд каремезъя со депутатъёс азьын отчёт лэсьтӥз, пыр- поч вераз ар ӵоже Москваын но округын ужамез сярысь, тодматӥз федеральной программаосы пырон пумысен малпанъёсыныз. Думалэн депутатъёсыз, асьме президент но кивалтэт, Кун Кенеш кужымзэс огазеяса ужазы ке, республикамы умойгес улыны быгатоз, пусйиз Светлана Константиновна. Солэсь сыӵе мылкыдзэ умоен лыдъяз Александр Волков но. Депутатъёс эскеризы "Удмурт Республикаысь Правительство сярысь" Законлы инъетэз. Озьы ик учкемын кивалтэтлэн структураяз воштонъёс пыртон пумысен документ. Со кулэ луиз, республикаямы президент быръемен но быдэсъясь власть азьын сылӥсь ужпумъёс воштӥськемен. Кылсярысь, ӵектэмын премьерлы витетӥ воштӥсь юнматыны. Малы? Кызьы шуиз президентлэн но Правительстволэн аппаратэнызы кивалтӥсь Александр Горяинов, одӥгез воштӥсез быдэсак вырыны кулэ экономикаен. Уго туж трос уж люкаське Москваын но. Со герӟаськемын республикамылы ватсаса коньдон утчанэн, азинсконъя программаосты дасянэн. Куд-ог депутатъёс (В. Агашин, В. Соловьев, А. Малков) шугъяськемзэс веразы, озьы, пе, дас но воштӥсь тупатыны курозы шуыса. Но уноез ӵектонэн соглаш кариськизы. Витетӥ воштӥсе Президент но, депутат огазеяськонъёс но дэмлало Андрей Осколковез, "Удмуртнефтепродукт" огазеяськонлэсь валтӥсь директорзэ, Кун Кенеше быръем муртэ. Инъет карыса кутэмын Удмуртиысь дано памятникъёсты но история ласянь пусйымон луись интыосты утёнъя нимысьтыз элькун программа. Та пумысен сессиын вераськизы культурая министр Людмила Пескишева но ялан ужась комиссилэн тӧроез депутат Алексей Красильников. Программаез быдэстыны куинь ар ӵоже кулэ луоз ог куамын миллион манет коньдон. Сое висъялозы Россилэн но Удмуртилэн бюджетысьтызы, утчалозы мукет амалъёс но. Пусйыны кулэ: проект котыр ласянь чакласа дасямын. Сое умоен лыдъязы Лихачев нимо научно-исследовательской институтысь специалистъёс но. Сюлэмшугъяськыса вераськон мынӥз республикаямы наркоманилэн вӧлмемез пумысен. Таин сэрен йылэ ВИЧ-инфекциен курадӟисьёслэн лыдзы. Югдурез ӧжыт ке но коть тупатон вылысь, депутатъёс кутӥзы нимысьтыз программа. Пусйыны кулэ: таяз сессие депутатъёс малы ке но ӧжыт кузя лыктӥзы. Огдыре кворум но уг ни тырмы вал. Озьы ке но, нунал ӵоже повесткаысь ӝыныез пала ужпумъёс эскеремын. Вуоно вторнике сессия ужзэ азьланьтоз. И. Лебедев. ТАЗАЛЫК ЧАКЛАСЬКЕ! Виым сиись Январь пумын университетэтӥ кышкыт ивор вӧлмиз. Менингитлэсь кулӥз кунгожсьӧр кылъёсты дышетонъя факультетысь студентка Лена Малышева. Эшшо кӧняез ке нылъёс больницае келямын вал. Кӧня ке нунал ортчыса, эшшо куинь кулон, собере - эшшо, эшшо. Пӧлазы - кык аресъем пинал но. Врачъёслэн верамзыя, соослы юрттыны луысал, дырыз дыръя больницае ке вазиськысалзы. Но ӟырдам мугорез валесысь коскатэк ӝутыны уг лу ни уга, нош "скоройлэн" тонтэк но пыран адресъёсыз трос ай. Соос нырысь давлениен мурт доры дырто (таиныз пыкылыны уг яра бен), нош ӟырдам мугор - со так, пыэд. Озьы ик малпаськом асьмеос но, шобрет улын кылльыса, вылысьтыз вылаз антигриппин юиськом, нош вылтырмес эскерыны тодамы но уг лыкты. Кулэ вылэм. Угось нырысь учкыса, вылтырысь льӧль виштыосъя гинэ менингитэз грипплэсь висъяны луэ. Мукет тодметъёсыз гриппен огвыллемесьгес: мугор лябӟе, йыр висе, ньылон куректэ, пыэд кутэ... Мар бен со - менингит? Грипплэн бервылыз-а, нимаз висён-а? - юаськом ми Ижевскысь медакадемилэн паласькись висёнъёсъя кафедралэн кивалтӥсезлэсь профессорлэсь Геннадий Кустарниковлэсь. - Менингит - нимаз висён. Туж кышкыт но секыт. Ӵемгес висё лябӟем, ӵем висьылӥсь пиналъёс но егитъёс. Менингококк чаль палаське вераськыку, кызыку, кизьныку. Аслыз выль "сиён" утчатозь, ватӥськыса улэ ныр пушкын, ымын, ньылонын. Соин ик сое огшоры пыэдэн сурало. Зол иммунитетэн мугор соосты ворме. Нош ляб мугоре шедьыса, микроб лулсӥос но вирсэръёс пыр йырвиымозь вуэ, сое лябӟытэ. Тӥни соку чидантэм йыр висьыны кутске, ӧскем потэ. Пичи пиналъёслэн мугорзы коска, югытлэсь синзы вӧсь луэ. Эмъятэк кыкетӥ-ньылетӥ нуналаз висись йырсазьзэ ыштэ, кулэ. - Висён сокем ӝог погыртэ ке, адями мазэ-созэ валаса вуытозь ик кулоз ук? - Соин ик аслыд ачид юрттоно. Шӧдӥды умойтэмзэ - соку ик больницае (менингитэз стационарын гинэ эмъяны луэ). Малы одно ӝог юрттэт сётӥсь машинаез возьманэз, агайды, атайды, бускельды соослэсь ӝоггес ке келяны быгато. Тани алигес егит пи ачиз дорамы лыктӥз: телевизортӥ, пе, кылӥ вал ӵапак со горд виштыос сярысь. Озьы ик вань - менингит. Ӧжыт ӝегасал ке... Али со бурме ни. - Но одӥг кышкыт висён но бервылтэк уг кыльы... - Луылэ озьы, висёнэз бер эмъяны кутсконо ке (3-тӥ�5-тӥ нуналаз). Соку адями ляб кылыны кутске, синмыз сӧриське, керӟег луэ, йырсазьзэ ыштылэ, шергес йырвиымзы вуӟектэ яке шузи кылё. Но дырыз дыръя эмъяны кутсконо ке, адями быдэсак бурме. - Луэ-а кызьы ке утиськыны менингитлэсь? - Меӵак вераны уг луы. Кызьы шуод, имммунитетэд зол ке, мугорыд ачиз черъёслы пумитъяськоз. Но сое юнматыны кулэ. Зэм, али республикаысьтымы Тазалыкез утёнъя министерство та висёнэн нюръяськонъя нимысьтыз ужрадъёс кутӥз. Мылкыд карисьёс паласькись висёнъёсъя больницаын асьсэлы менингококклы пумит вакцина пуктыны быгатозы. Висисьёсын артэ улэм нылпиослы со висъяськоз дунтэк. З.ВАХРУШЕВА. ЧУР БУГОР Кӧня сылэ адямиез "данъян" Мао Цзэдунэз "быдӟым адямиен" лыдъян вакытэ Китайын но солэн палэназ улӥсьёс, солы дурбасьтэмзэс но юн гажамзэс возьматон понна, мӧля вылазы нуллӥзы Мао Цзэдунлэн тусбуйыз суредам пусъёс. 1966-тӥ�1976-тӥ аръёсы Китайын 4,8 миллиард пала сыӵе пусъёс поттэмын вал. Ӵапак сомында адями улэ вал соку дунне вылын. Кинлэн ӧй вал сыӵе пусэз, сое "Маолэн тушмонэныз" лыдъяллязы но страналэн улыны луонтэм пыдло улосъёсаз келяллязы яке меӵак быдтылӥзы. ХХ даурын таӵе вылэм учыръёслы вуоно поколениос кема гинэ, дыр, паймылозы на. Нош кӧня сылэ вал меда одӥг адямиез инмарез сямен вылӥе пуктон? Одӥг лыдпус гинэ: Мао Цзэдунэз данъясь пусъёс лэсьтонэ кошкем алюминийлэсь со аръёсы 39600 МиГ истребитель поттыны луэ вал. "Труд" газетысь, 1994 ар, 3-тӥ номер. Иж ракетаос оскымонэсь Ортчем ар пумын Греция но Кипр ӵош ожмаськыны дышетскон ортчытӥзы. "Тор-М1" зенитно-ракетной комплекслэсь ужамзэ эскеризы. Та комплекс поттэмын Ижевскысь электромеханической заводын. Та ракетаос туж шонер но туж ӝог быгато омырысь самолётэз яке мукет объектэз уськытыны. Тӥни соин ик Ижевскын лэсьтэм ракетаосты басьто кунгож сьӧры, басьтӥллям но эскериллям Грециен Кипр. Но ожмаськыны дышетскон - со шудон уж ӧвӧл. Лябе кылись бускель кунъёслы тунсыко потэм, мар даурто Грециен Кипр, шукрес техника басьтыса. Озьы Турцилэн РФ-4Е кык самолётсы-разведчикъёссы ӵап дышетскон вакытазы вуо. Но омыретӥ кунгожез выжыса вуэм самолётъёсты синйылтӥзы, ракетаосын шымыртӥзы. Та учыр но возьматӥз: Ижевскын поттэм зенитно-ракетной комплекс туала туж кужмо ож техника луэ но командаосты ӝог но шонер быдэсъя. П.СКОБЕЛЕВ. УДМУРТ КИЗИЛИОС Лыдӟисьёсмы дышизы ни, ми туэ котькуд пятница номерлэсь одӥг-кык бамзэ соизлы яке таизлы тодмо удмурт адямилы сӥзиськом шуыса. Туннэ редакция тодматэ тӥледыз Россия Федерациысь Кун Думалэн депутатэныз Светлана СМИРНОВАЕН. Мар вуттӥз кыдёкысь гуртын будэм нылашез бадӟым политикае? Кинэн со али эшъяське? Кытын адӟе ассэ азьланьын? Таӵе но мукет юанъёслы валэктон - "Югыт кузьмась" нимо интервьюын. Югыт кузьмась - Светлана Константиновна, ужамды но мар лэсьтэмды сярысь ивортонъёс газетамы ӵем печатласько. Но туннэ вераськем потэ вал асьтэос сярысь. Ойдолэ кутском таӵе юан бордысен. Тани ӵем кылоно луэ: политика - со кырсь маке. Озьы ке, малы тӥ, нылкышноос, отчы пыриськоно кожаськоды? - Политика пумысен сыӵе веранэн мон соглаш ӧвӧл. Бен, мукет удысъёсын сямен, отын но вань кырсь мылкыдъёсы выем муртъёс. Но ӟеч адямиос тросгес ук. Политикалэсь кырсьсэ гинэ адӟись муртъёслы тазьы но шуыны быгатӥсько: ми, нылкышноос, та уже сое чылкытгес карон вылысь ик мынӥськом. Учке ай, кин-о гуртады тросгес выре котырез утялтонэн, жуг-жагез ӵужонэн, дӥсь миськонэн? Озьы уго. Асьмелы туннэ туж уг тырмы вӧзысь адямилы юрттыны тыршон, ӟеч лэсьтыны сюлмаськон. Мон малпасько, политикаын кышномуртъёс тросгес луизы ке, асьме пӧлын ог-огдэ валан мургес выжыяськоз. Котьма шуэ, но обществолэсь висись интыоссэ нылкышно умойгес шӧдэ, котькуд ужпумез со сюлэм пыртӥз поттэ, пӧртэм мылкыдо адямиосты огазеяны быгатэ. Ачим сярысь ке верано, политикае вуи шуыса уг жаляськы. Со мыным луонлык сётэ кужымме эскерыны, кинлы ке коть ӟеч лэсьтыны, трос выльзэ тодыны. Валамон ни, пичи дыръям чик но ӧй но малпа вал, кытчы ке вылӥе, кивалтон удысэ шедё шуыса. Но озьы луиз... - Нациосъя комитетэн кивалтыкуды но, Кун Кенешлэн депутатэз луэмды бере но, али но - котьку ик тӥ сьӧры азьлань "мынэ" Байгурезьлэн туспуктэмез. Борддоре ошем чебер фото пинал дырдэс тодэ вайытэ, лэся? - Со шулдыр инты мон понна зэм но туж дуно. Чайковскийлэн крезьгуреныз, Кулаковалэн куасъёсыныз, Калашниковлэн автоматэныз ӵош Байгурезь но быдэс элькунмылэн одӥгез данъяськымон тодметэз луэ ук. Нош Дэбес палъёсын вордскемъёс понна со вераны луонтэм мылкыдъёсты бугыртӥсь гурезь. Арлы быдэ вазен со котырын турслёт но мукет ужрадъёс ортчыло вал. Ӵем отчы шутэтскыны но ветлылӥм. Тямысэтӥ классын дышетскыкум, Байгурезь дорын ортчизы спортивной ориентированиея элькун ӵошатсконъёс. Спортын соку вал сыӵе удыс - котырез возьматӥсь картая созэ яке тазэ интыез ӝог утчан-шедьтон. Мыным удалтӥз ас ёзъёсы пӧлын азьпала потыны. Кыӵе со бадӟым шумпотон вал пичи нылаш понна! Кин тодэ, оло, со нырысетӥ вормон ик азьланьын дӥсьтысагес вамышъяны кужым но сётӥз. Бӧрысь ини, Нациосъя комитетын ужакум, эшъёсыным вераським Ижын улӥсь дэбесъёсты землячествое огазеяны. Ӵектонэз умоен лыдъязы ёрос кузёос. Выль организацилы ним малпанэн ӧм курадӟе - "Байгурезь" шуим. Туннэ землячествомы асьме республикаын тужгес кужмоез. Олома но радъя. Сяме пыӵатыны турттӥськом арлы быдэ июне Байгурезь котырын огъя пумиськонъёс ортчытъянэз. Мед огазе люкаськозы Чупчи палан вазен будэмъёс, отын али улӥсьёс, мед ог-огзылы юрттыны, ог-огенызы данъяськыны тыршозы. - Туннэ асьмеос котьма сярысь шара вераськыны кенешим бере, мон быгатӥсько, вылды, куд-ог умойтэм сямъёсты сярысь но юаны. Матысь адямиостылэсь тазьы верамзэс кылылэм вань: Смирнова, пе, ачиз уен-нуналэн ужа, мукетъёсызлы но маза уг сёты. Куать часын, шуо, кошке ни кыдёкысь ёросэ бырйисьёсын пумиськыны, вить-куать интые вуылэ, бер уин дораз берытске но ӵуказеяз выльысь сюрес вылэ потэ. Озьы-а? Я, быръён вакытэ данакез кандидатъёс кӧлонэз вунэто, нош малы кулэ озьы астэ жалятэк ужаны мандат басьтэм бере? - Эшъёсы, зэм ик, та ласянь весь пыкылыны туртто. Тани туэ январь пумын но февральлэн кутсконаз быдэс арня ветлылӥм республикаетӥ. Ар ӵоже ужамлы йылпумъян лэсьтоно вал ук. Интыосысь кивалтӥсьёсын, активен тямыс огъя кенеш ортчытӥм, со сяна, ньыль-вить нимаз коллективъёсы ветлӥм на. Пятницае Сарапулысь укмыс час котырын ӝытазе берытским. Нош ӵуказеяз мыноно Москвае, нуназеозь пумиськоно на асьме министръёсын, мукет кивалтӥсьёсын. Соос доры дасяськытэк уд мыны ук. Бырйисьёслэсь вань куронъёссэс, гожтэтъёссэс кызьы ке но "сӥсъяно", удысъёсъя люкылоно. Доре уин куинетӥ часэ мыныку бертӥськиз ни. Кыкез юрттӥсьёсы дасям документъёсты ӵукнаозь печатласа пукизы. Ачим но валасько, озьы ужаны уг яра шуыса. Но мукет сямен уг быгатӥськы. Вот пичиысен дышемын - маке пусйид, кыӵе ке уж борды басьтӥськид, вутты сое пумозяз. Озьы ке ӧвӧл, кутсконэз ик ӧй вал. - Ма, асьмеос пӧлын, мон удмуртъёсты верасько, сыӵе чурыт сямо муртъёс укыр ӵем уг пумиськыло кадь. Кытысь меда со тӥляд? - Верамед шонер ӧвӧл, потэ мыным. Удмуртлэн ужез яратэмез котькинлы тодмо ук. Быгатэ со юн кариськыны но. Мон сямен, ӵем дыръя люкетэ мукетыз: удмуртъёс асьсэдыз уг дунъяло, весь малы ке но асьсэдыз мукет выжыосысь потэмъёслэсь улэгес пукто. Нош адями ачиз ассэ уг гажа ке, кин ке гажалоз шат сое? - Юанэлэсь палэнскиды кадь. Асьтэ сярысь ӧд вералэ ук... - Мар меда сыӵе-таӵеез? Уг тодӥськы, кин ке юри дышетӥз меда юн сямо луыны? Ачиз улон ке шат? Капчи ӧй вал пинал дыры. Будӥ огшоры гуртын. Семьяямы воргорон ӧй вал. Бабушмы кузёяськиз. Мынам анае - Елихонида Павловна - весь рядовойын ужаз, со бак кышномурт. Уг но кылы, уг но вераськы. Милемын ӵош улӥз анаелэн сузэрез. Со куинь пи будэтӥз. Ачиз фермаын скал кыскиз. Тӥни озьы сизьым кузя улӥм. Валамон ни, ужлэсь шӧмзэ пичиысен ик веръяськиз. Пу дасян но, турнан но, ваньмыз мукетыз но мыным тодмо. Вӧжогес луыса, гужемъёсы вынъёсыным колхозын ужам. Ӵукна вить часлы ик бызиськом вал конюховкае - уго вазь вуэмезлы ӟечгес уж шедьылӥз. Ньылетӥ классысен ас кожам улыны кутски, шуыны луоз. Школамы мукет гуртын вал бере, интернатэ интыяськи. Отысен ик кыстӥськи общественной уже. Мар но ӧм малпаллялэ соку! Пӧртэм-пӧртэм ужрадъёс ортчытъям. Улытозям тау карисько но каро анаелы но тётяелы, песянаелы. Та огшоры удмурт нылкышноос, дышетскемзы но тыро-пыдо ӧй вал ке но, вань сюлэм шунытсэс сётӥзы но сёто мыным. Соос дышетӥзы шонер малпаськыны, шонер лэсьтыны, шонер сюрес бырйыны. - Мон тодӥсько, пичи дыръяды тӥ туж синмаськемын вал дышетӥсьлэн ужезлы... - Зэм, асме со интыын адӟисько вал. Бӧрысь малпан воштӥськиз. Дорамы вуылӥзы Асан совхоз-техникумысь егитъёс. Соос сокем бурдъяськыса мадизы дышетскемзы, улэм-вылэмзы сярысь, мон аслым шуи: всё, мынӥсько Асанэ. Оло, озьы ик луысал но - дышетӥсьёсмы ӧз лэзе, нырысь, пе, аттестат басьтоно. 10-тӥ класс бере ми, куинь эшъёс, Ижысь сельхозэ пырыны кенешим. Али кадь син азям на отчы нырысьсэ мынэммы. Автобусмы дэрие нӧдыса тӥяськиз. Зураозь пыдын мыноно луиз. Кытчы-о пырод? Дэриез коласа ик вамышъям ни. Колонкаын пыдъёсмес миським но отӥяз автобусэн кошким. Студент дырме туж шуныт мылкыдын тодам ваисько. Номырин ӵошатонтэм шудо аръёс. Бен, вал дӥськутлы ёрмон, малэсь ке керпотон. Но уродэз вунэ ук. Кыӵе ӟеч адямиос дышетӥзы милемыз! Али но ваньзэ сямен ик нимын-тулын тодам возисько. - Сельхозинститут ик тӥледлы кузпал но кузьмаз ук. - Володяен тодматским комсомоллэн комитетаз. Со политсектор понна кыл кутэ вал. Эшъяським. Ӵош луыны кенешим. Институт бере монэ отчы ик ужаны кельтӥзы, Володя дышетскиз на. Первомай праздник азьын вераським ог-огмес ӵыжы-выжыосынымы тодматыны. Озьы Шарканозь вуим. Отысен Зар.-Медлае пыдын кошким. Тодмотэм сюрестӥ, кыӵе ке но лудъёс-нюлэсъёс пыр мынӥськом. Тани гуртэ но адӟиське ни. Но... пичи гинэ Медла шурмы, тудвуэн пачылмыса, Чупчилэсь паськыт вӧлскем. Мар кароно? Володя мукет ярдурысь, гурт пумысь пыж адӟиз. Кылиськиз но кезьыт вуэ омырскиз. Вуттӥз со лодкаез мон доры. Вот соку валай, та адями секыт учыре но вӧзам луоз шуыса. Соин ик Сюмси ёросысь Орловской посёлоке мыныкумы (отын уло Володялэн анай-атайёсыз), азьланьын кызьы-мар луоноез тодмо ни вал. Ми дыръя ик ини али гинэ кузпалъяськем егитъёс кытчы ке шутэтскыны кошкылӥзы. Выль сямлэсь бере кылёнтэм вылысь, гожтӥськеммы бӧрсьы, ӝӧк сьӧрын шулдыръяськытэк, ӵошен кӧня ке нуналлы кошким Ригае. Отысь вуыса дыртӥм стройотрядэ. Дэбес ёросын эшъёсынымы уртче ю шертон-куасьтон агрегат инъям. Соку люкаськем уждунмы туж дуно потӥз. Ма, отӥяз но коньдон пӧртэм сямен поттоно луылӥз. Володя соку дышетсконзэ йылпумъя ни вал. Нуназе дипломез бордын пукиз, мон институтысь комсомолэн кивалтӥ, нош уйзэ "Иж-Юпитер" бичан цехын ужам. Озьы семьямылы нырысетӥ машина уськытӥм. Кык питрано ке, асьмелэн вал со. Я, олома но верасько ни. Ваньмыз уго тодэ лыктэ... Вордскиз Антонмы. Дорамы, общежитие, ваимы анайме. Со отчы ик техничкае интыяськиз. Пимылы куинь толэзь тырмиз но, мон уже потӥ. Собере ӝоген Пермьысь аспирантурае пыри. Йыды будэтонъя научной уж бордын выри. Но монэ ӧтизы соку гинэ кылдэм выль кивалтон ёзэ - Егитъёсын ужанъя кун комитетэ. Тӥни сыӵе огшоры улон сюрес. Берло аръёссэ - весь калык пӧлын. "Удмурт дуннеез" лыдӟисьёс кытын ма ужамме тодо, дыр. - Тӥляд туж трос эшъёсты. Кивалтонэ вылэгес тубемен валче, соослэн лыдзы йылэ-а, кулэсме-а? - Асьме кылын "эш" шуэм трос валан сётэ. Друг, приятель, товарищ, коллега - учкы ай ӟучъёслэн "эшмылы" кыӵе гинэ тупасез кылзы ӧвӧл. Соин ик висъяны кулэ зэмос эшъёсты но тодмоосты. Лыдзыя вераны шуг. Тодӥсько созэ: кинэн умой-умой эшъяськи, шуом, студент дыръям, соосын али но тыршисько ӵемгес пумиськылыны, ваньмон дырез ӵош ортчытъяны. Тани берлозэ Удмуртие талэсь азьло вуылыкум но дыр шедьтӥ Вавожысь Ложкинъёсы дорын кӧня ке шутэтскыны, Уваысь Глазыринъёсме адӟыны. Ижын но оскымон эшъёсы вань. Ми соосын ог-огмылэн кытын-мар ужаммы шоры учкытэк эшъяськиськом. Со сяна, ӟеч кусып возисько асьме тодосчиосын, творчество удысын ужасьёсын. Валамон, Москваын но табере кылдо ни ӟеч тодмоос. Но туннэ мыным тужгес но матын луо юрттӥсьёсы. Соос котькуд ёросын вань. Ижысь общественной приёмнойын ужасьёссэ но вератэк кельтэме уг поты. Туж пӧртэмесь кадь соос, но ваньзы ик огъя малпанэн уло. Тани Геннадий Петрович Климентов арлыдо ни, со отставкаысь генерал-лейтенант. Владислав Прозоров - бизнесын ассэ эскерем егит удмурт воргорон, малпасько, кӧня ке ар ортчыса, со вылӥе ӝутскыны быгатоз. Николай Силин - Якшур-Бодьяын будэм мурт, туж яратэ ӝикыт ужанэз, ӝог вала пуктэм ужпумез. Зоя Пономарёваен Нациосъя комитетын но ӵош ужам. Али со наукаосъя кандидат луыны дасяське. Юрттӥсьёсы пӧлын озьы ик - Анатолий Марченко ("Удмуртторфлэн" директорез), Александр Прасолов (Лэсьтӥськонъя управленилэн кивалтӥсез), Татьяна Прокопьева ("Шундылэн" азьветлӥсез), Зоя Суворова (тодосчи). Пӧлысьтызы котькудӥз мыным дуно. Уго огнам мон нокызьы но ӧй быгатысал бырйисьёслэсь сюосын вуись куронъёссэс быдэсъяны. - Нош малы уд поттылӥське валтӥсез юрттӥсьты сярысь? - Ма, мыным шуг сое огшоры эшъёсы-юрттӥсьёсы пӧлы пыртыны. Владимир Владимировичлэн интыез мынам улонам вераны луонтэм бадӟым. Со кузпал но, юрттӥсь- индылӥсь но, дышетӥсь но, куаретӥсь но... Бен, со мынам зэмос юрттӥсе. Ужез умой тодэ-вала. Берло аръёсы кивалтӥз "Удмуртия" гостелерадиокомпаниысь аналитикая отделэн. (Со уго институт бере Россиысь Кун службая академиын дышетскиз на.) Туж яратэ компьютерез, мукет техникаез. - Кылӥськиз, тӥ табере семьядэс Москвае нуиды ни шуыса. - Чылкак озьы ӧвӧл. Мон малпасько вал: депутатын татчы шутэтскон нуналъёсы бертылыса гинэ ужаны быгато. Шуг вылэм. Мӧзмоно семьялэсь. Антонэ но курадӟе анайтэк. Соин ик квартира сётэмзы бере пиме сьӧрам выжтоно кариськи. Тани Выль арысен со Москваын школае ветлэ ни. Дыше кадь. Нош Володя... Шуг вераны, кытын со улэ. Мон Думаын ке, со - Ижын. Мыным округе бертоно ке, Москваын ужъёс люкасько. Антонэз но огназэ уд кельты ук. Озьы ик улом-ужалом ни, вылды. Но анае весяк татын. Ма, кузпалэ но Ижынгес ужа. Ми но пиеным луэмезъя Удмуртиын дырмес ортчытыны тыршиськом. Соку ик верано, дыр, таиз сярысь но: квартира депутатъёслы огдырлы сётӥське. Куинь ар ортчыса, сое государстволы берыктыны чакламын. - Светлана Константиновна, кытын тӥ луоды меда, кӧня ке ар ортчыса? - Тод вылэм, о-о. Ну, куинь арзэ, валамон, депутат ужез ик быдэсъяло на (Думаез возизы ке, Россиын олома но луыны быгатэ ук). Отӥяз... Шугъяськисько ма вераны. оло наука ас бордаз кыскоз... 90-тӥ аръёсы мон Москваысь кык академиын дышетски, туж мылкыд вань калык кусыпъёсты радъян опытэз, тодон-валанъёсме кызьы ке но огазеяны, мукетъёсыз дорозь вуттыны. Куке пӧрмоз меда? Сюлмы шӧдэ, со ужлы дыр но, кужым но шедьто шуыса. Мукет но малпанъёс трос. Огъя вераса, инмар утиз ке, олома но лэсьтыса вуттом на, дыр. Мон понна котьмалэсь главноез со бордын. Котькытын мед ужалом, котьку ик адямиослы пайда вайыны тыршо. Кин ке шуоз: о-о, таид макем чебер вера. Мед. Но калыкмылэн, элькунмылэн ӵуказе нуналыз монэ зэм ик сюлмаськытэ. - Телевидение пыр куке но поттылӥды вал Антонлы вын яке сузэр вордон сярысь... - Вал сыӵе кылъёс. Бер ӧвӧл на ук... 40 аресозь дыр вань на. - Куке но Кузьма Куликов тазьы шуиз: "Куд-ог адямиослэн нимзы асьсэлы туж тупа. Сыӵеос пӧлысь одӥгез - Светлана Смирнова. Тӧдьы йырсиё, сайкыт визьмо, яратӥсь сюлэмо кышномурт. Соин коть уйшоре пумиськы, вань котыр югыт луэ..." - Тау Кузьма Ивановичлы ӟеч кылъёсыз понна. - Шуд но тазалык тӥледлы, Югыт кузьмась нылкышно! Иван ЛЕБЕДЕВ. Шӧкыч Маскарчиос Калыклэсь уд палэнскы Ӟеч-бур, Шӧкыч уром! Мон "Удмурт дунне" газетлэн одӥгез матысь эшез. Кемалась дырысен, газет вуэ ке, нырысь ик "Шӧкыч" бамез лыдӟисько. Совето власть дыръя зол гинэ шияськод вал улон-вылонмес пожасьёсты. Нош туала вакытэ кинэ бен шияса быдтод на? Вылӥ кивалтӥсьёс вань улонмес йырин-чукин берыктӥзы ук. Тани Егор Гайдар телевизор пыр быдэс страналы кылымон шуиз: "Спекуляция - это элемент рыночной экономики"... Совето власть дыръя лушкаськись, спекулянт калыклы синазькыль мурт вал, сыӵеосты адями радэ ик ӧз пуктылэ. Тӥни соосты ик зол шияськод вал тон но, Шӧкыч уром. Нош табере таосыд туала улонлэн азьпал радаз мыно, соос, пе, туала улонлэн куронъёсызлы тупась адямиос. Мын но шия на соосты табере. Ярам ай, тон но мукет амал шедьтэм: улонысь йӧспӧртэм учыръёс сярысь ивортылыны кутскемед. Тани мон но одӥгзэ сыӵе учырме ивортыны кариськи. Яратод-а, уд-а, соиз ини тынад ужед. Кемалась вал со. Кавказ гурезьёстӥ походэ ветлыны шуд усиз. Соку малпаны ик уг луы вал, кытын ке та палан ожтыл ӝутскоз шуыса. Дас кык нунал калтыртӥм гурезьёстӥ. Одӥг уе одӥг часысен куинь часозь мыным возьмаськон черод кемдӥз. Кылылэм вал: куд-ог дыръя туристъёсты качасьёс но луыло, соин ик чакласькытэк уг луы. Ми, ньыльдон кузя огшоры туристъёс но ньыль кивалтӥсьмы. Оломалы бен со начальство шуонмы палатказэ ог сю вамыш палэнэ пуктӥз. Нош инты туж чебер, шулдыр. Инмын толэзь пиштэ - мыным юлтош. Кыдёкын ик ӧвӧл скал возьмасьёслэн тылскемзы адске. Мынам возьмаськон дыры тупаз ӵапак сур-сур изён выкытэ. Киям боды кутӥ но лагерьмес котыръясько: улӥысен вылӥе тубиськод ке, ог кык иськем луоз. Артэ шур бызе. Мон солэн ӵашетэмезлы дыши ни, котыр ваньмыз шыпыт, чалмыт потэ. Озьы ветлонъям турын зурод бервылэ вуи. Отын маке но ӵаштыртэ кадь. Оло, шыръёс, малпаса, бодыеным исано кожай. Нош отысь йыръёс ӝутскизы. Кык пияшъёс отчы каръяськиллям, сыӵе туристъёсты "дикарьёс" шуо. Я, ваньмыз умой ортчиз кадь, мон, лагерез котыртыса, тылскем дорамы пукси. Нырулыны кутскиськем. Шӧдтэк шорысь кивалтӥсьёслэн палатказы палась гудыртэм кадь шимес куара кылӥськиз: - Стой! Стрелять буду!.. - отӥыз верам кылъёс газетэ поттымон ӧвӧл. Мон копак шуэрски но шок-пуль доразы бызисько. Одӥгез скал кивалтӥсьёсмылэсь палатказэс яратэм, лэся, со борды ниръяськыны кутскем. Нош палатка пушкын зол гинэ курдаллям, зэмос шырмачъёс кожаллям. Мазэ-созэ валам беразы асьсэос горо ини, нош монэ тышкаськыны выро, урод, пе, возьмаськиськод. Тӥни со дырысен ялан малпасько: малы та кивалтӥсьёс кивалтоно калыксылэсь палэнско? Тани бадӟым полководец Александр Васильевич Суворов чик кер уг пот вылэм солдатэн ӵош одӥг шинелен шобырскыса кӧлыны но одӥг пуртыысь сиськыны. Тырмоз ни, пе... Дэбесысь педучилищеез быдтэм берам Кулига пала, Выль Унтемысь нылпи юртэ ужаны шеди вал. Татын монэ витё ни вылэм, туж ӟеч пумитазы. Но ужпум со бордын ӧвӧл. Нылпи юртысь эмъясь Иван Чайников квартира кузёез доры куно ӧтчаны шӧтам(ачиз со артысь гуртын улэ). Нош крезьгуртэк кыӵе со шулдыръяськон. Мон арганэн но, баянэн но шудыны йӧндырисько вал. Озьы Ваня монэ чортӥз но, мон но куно луи. Тани калык ӝӧк сьӧрысь но потэ ини, табере дыр вуиз мыным ужаны, эктон гуръёсты шудыны. Ванялэсь но корка кузёлэсь осконзэс быдэстыны. Вина уг юиськы: вань малпанэ - кырӟатыны, эктытыны мед быгато, нош юон нокытчы уз пегӟы. Ма, собере, кызьы пичильтык веръятэк куноямысь кошкод? Шудэмея шӧмаськем кышноослэсь лабыртэмзэс кылӥсько: - Ма, кыӵе-сыӵе юисьтэм гармонист шедьтӥллям? - Детдомысь, лэся, шуо. Сыӵе пияш сирота кылем, иське... - Детдом пи ӧвӧл со. Ужаны, пе, отчы вуэмын. - Мугорыз пичи ке но, ачиз мусо но пӧсь кӧльы кадь, шӧдӥське. Уть, кыӵе капчи шудэ. Умойгес тодоно ай та пияшез. Оло, эмеспилы но яралоз... Озьы ӝыт ноортчиз, куноос но кошкыло ини. Ваня, тау кариз, ми, пе, кошкиськом ини, нош тон шулдырты на калыкез. Мон нош, шулдыръяськон йылпумъяськиз ни шуыса, кузё кышнолэсь сётэм чарказэ кымалъясько ини. Ми палан стаканэн юыны дышемын бере, пичи чаркаосты гинэ-а уг вормы, малпасько. Ачим весь арганме кыскасько. Одӥгез нылкышно, мон шудэмъя, ялан лопыръяське на. Кузё кышнолэн чиданэз чигем вылэм ни. - Я, пиёке, шулдыртэмедлы тау. Нощ таиз, шузиез, уйбыт но, оло, уз дугды тэтчамысь. Тырмоз ни туннэ, ява. Соку гинэ валатски:дырыз дыръя чальтчыны ӧвӧл валаськем. Талы вина тырмымтэ на шуыса вылды, кузё кышно весь аракызэ удэ, нош мон, одӥг ке но эктӥсез вань шуыса, ялан арганме золъясько. Озьы тӥни, вина юисьтэм арганчи уллятэк кошкыны ӧз вала. Ураметӥ огнам вамышъясько, одӥг-ог коркаосын гинэ тылъёс пишто на. Озьы мон вуи гурт шорысь вить сэрего бадӟым корка доры. Отын контора но, клуб нерге но интыяськемын вал. Ӵапак соку отысь егитъёс пото. Соос тодо ни вал мынэсьтым кин луэмме. - Чырткем, Андреич! Оло, шулдыртод на милемды? Пыри клубе. Соку туж трос пӧртэм эктон гуръёс вал: "Коробейник", "Светит месяц", "Краковяк", "Сибиряночка", "Яблочко", "На реченьке" - ваньмыз тодэ но уг лыкты ни. Арганме золтӥ, егитъёс ширъяны кутскизы. Шумпотӥсько, быгатӥсько на кадь шуыса. Нош мар луиз ай таӵе? Арган золтэмын, йыры со вылэ лэзькемын. Кылӥсько, егитъёс оло мон сярысь, оло мукет сярысь ӟабыльто. Нош сазь-сазь кариськи но выльысь шудыны кутски. Егитъёс нош ик вырӟизы. Кема-а шудӥ, ӧй-а - нош ик каньсыраськем. Соку ини огез нылаш, клублэн кузёез, шуэ: - Я, Андреич, туннэ тырмоз-а, мар-а ини... Тӥни озьы, мултэс ӟистыны шедьтэменым одӥг ӝытэ кыкетӥзэ юмоке шедиськиз. Кӧня аръёс ортчизы ни собере, али ке но возьыт, со учырез тодам вайыкум. А. Корепанов. Игра ёрос, Шор Шадбег гурт. Шӧкыч Куноын - Чулён Онтон Кожойёс музъем люко Кылӥды-а, Москваысь Кун Думаын пукисьёс тулыс гырон-кизён азелы музъемез вузаны лэзён сярысь закон кутыны дасясько? То-то угось. Милям Кожой гуртамы улӥсьёслэн но, Думаын пукисьёслэн сямен ик, йыръёсмы думать каремысь уг дугдылы ни. Та ужпумез сэрттыны-пертчыны асьмелэн Кожой Думамы но кылдӥз. Кинъёс бен отчы пыро. Ма, кинъёс - о луоз? Гуртамы улӥсез но чиньыен но пыдчиньыен лыдъямон сяна ӧвӧл, дыр. Кинлэн мар веранэз вань, кинлэн пыдъёсыз вамышъяло на, ваньмыз ас мылкыдъёссэс вераны куашканы турттӥсь клубе чутышто. Озьы одӥг нуналэ бадӟым кенешон ӝутскиз. - Музъемез вузаны лэзён сярысь закон кутонзы мыным туж кельше ай - ымзэ мырдэм но кызьы бералъяса, ас мылкыдзэ вераны дыртӥз Тордӥ Микол. - Пушнерен шобырскем со сэрегме кӧня заводской юонэн воштыны луоз. Аршинлы быдэ - одӥг ӟенелик. - Ачид нош маин улыны малпаськод? - сачкытӥз пумитаз Базар Матрон. - Оло, кураськисе потод-а? - Малпаськод, бакча кузёосылы ужась ки кулэ уз луы? Ньылонме бичатыны кутскиз ке, турнаны но, картофка но копаны кужыме тырмоз на. - Ляльчие, иське, потод? - нокызьы уг буйгатскы Базар Матрон. - Нош мон кескичгес амал шедьтӥ ай. Бакчае кыедо-а? Кыедо. Инмарлы тау, скал вордыны быгатӥсько на. Гыбедэз тыбырам ныпъяло но, городэ шонто. Музъемлы туж ёрмо бере, басьтозы. Ведралы быдэ манет жильдо. Улытозямлы тырмоз мыным вузаськыны. Малы кулэ луоз на соку бакча сиён мерттыны? Ваньзэ городысь басьтыса ваё. Таослэсь вераськемзэс кылзыса, Горд Исьтё ка-ак! мыжгиз ук ӝӧк вылэ. - Уз пӧрмы малпанзы! Быдӟым ожысь ветеранэз гольык киын уз басьтэ сьӧрлось лыктэм басурманъёс. Пыӵалме кутыса, Сьӧд тэле партизанэ кошко. - Собере люкаськемъёс шоры учкиз но юаз: - Кин мон сьӧры мыныны дась? Шып луиз залын. Пумит но вераны уг дӥсьто, партизанэ но мынэмез нокинлэн уг поты. Тодо угось Горд Исьтёлэсь сямзэ, пумит ке вазид, кема малпаса уз улы, сачкытоз но тӥни йыр быдӟа мыжыкеныз. Соя кариськыса но ёрмод: маза уз сёты улыны, гозыен думиськем кадь сьӧрад ветлоз. Та секыт югдурысь гуртоссэ поттыны юрттӥз Ӟичы Вани. - Нюлэскытӥ ватскыса ветлытозь, мон аслам бакчаям тросгес из но кӧльы пырыос вортто ай. Соку адӟом кинлэн басьтэмез потоз сыӵе музъемез. Залын огыр-бугыр луиз. Кин музъемез вузан законлы дурбасьтэ, кин сялаське вылӥослэн таӵе малпанзылы. Ӧжыт гинэ йырсиоссы борды уг кырмисько на. Мон но кылме вератэк ӧй чида. - Сылэ ай, эшъёс, буйгатске! Асьмеос тазьы кыдёке ум вуэ. Ойдолэ ум дыртэ музъеммес саптаны но, сыномем пыӵалъёсын но урдысьяськыны. Москваос сяна, асьмелэн шаерамы но кивалтӥсьёс вань ук. Малпанъёсмес ваньмы гожтомы но, соослы келялом. Улыса адӟомы ни, кудмы шонер: ляльчи-а кариськоно, яке партизанъёс луоно. Ваньмыз соглаш луизы таӵе малпанэн. Озьы Кожой Думалэн таиз кенешез ворсамен лыдъямын вал. Кыӵеесь асьмеос, удмуртъёс? Куать ар талэсь азьло Ижысь Медициная кун академиын усьтӥськиз финн-угор выжыысь калыкъёслэсь тазалыксэс но пӧртэмлыксэс эскерись научно-исследовательской лаборатория. Шаркан ёросысь Пипьё, Гондырвай, Карсашур гуртъёсын улӥсьёс пӧлын куать ар талэсь азьло эскеронъёс ортчытэмын вал. Мар выльзэ тодӥзы учёнойёс? Та сярысь верало Медициная кун академиысь преподавательёс Вера Петровна Осотова, Евгений Николаевич Никитин, Галина Владимировна Павлова. Улон-вылонысь суредъёс Научно-исследовательской экспедицие потамъёс эскеризы 84 муртэ, тросэз соос пӧлысь 25-50 аресъемъёс. 41 процентэз пала гуртын улӥсьёс ужало колхозын. юалляськемъёс пӧлысь 35 процентэз служащийёс. 88 процентэз уло ас коркаосазы. Городын улӥсьёсын ӵошатоно ке, гуртоос тросгес пинал вордо. 39 процентэзлэн куинь но солэсь трос нылпизы, 24 процентэз кык нылпи будэто. Котькуд витетӥяз семьяын - вить нылпи. Нылпиосты яратон, трос пинал вордон удмуртъёслэн сямазы вашкала дырысен пыӵамын. Пусйымон соиз, та палась гуртъёсын анайёс нуныоссэс кема дыр ӵоже нонто. Одӥг выжыен сураськем семья кылдытон учыръёс ӧз пумиське. Огъя улон югдурзыя гуртын улӥсьёсты куанер уд шуы. Уж шоры учкемзы, ужын но семьяын ог-огенызы кусыпъёссы озьы ик тупамонэсь. Нылкышноос тамак уг кыско, нош пиосмуртъёс 15 пӧлысь 10-эз тамакен эшъясько. Со понна 70 процентэз нылкышноос вина юыло. Туж вылӥын астэ быдтон учыръёс. Котькуд витетӥяз, куатетӥяз семьяын сыӵе учыръёс вал ни. Ваньмыз сямен гуртын улӥсьёс ярато удмурт сиёнъёсты. Гужем дасяло эмъюм турынъёс. Висён мугъёссэс нылкышноос герӟало секыт ужаменызы, керӟегъяськеменызы. Удмурт сиёнлэн аспӧртэмлыкез Карсашур гуртын улӥсьёс пӧлын нимысьтыз юан-веран ортчытэмын вал удмурт сиёнъёсъя. Ваньмыз сямен сисько гуртазы, 80 процентэз пала удмурт сямъя пӧрамъёсты вылӥе пукто: ческыт но, пайдаё но, дунтэм но, пе. Ӵемгес пӧрало пересьмон (перепеч), табань, сяртчынянь, сезьпызь. Юалляськемъёс пӧлысь 50 процентэз сиськон дырзэс трослы висато, но тросэз тыршо нуналаз ньыль пол ик сиськыны. Ярато пӧсь сиёнъёсты, сылалозэ ческытэз воштэ, пӧзьтэмзэ - пыжемез. Ӝок вылын тросгес макарон, кеньыр, сӥль, картофка но мукет бакча сиёнъёс. Туж ӵем пыжисько, уката ик пызьлэсь пӧрамъёсты ярато. Сиёнэ мыно пӧртэм турынъёс но. Вазь тулыс ик сиыны кутско пульыбыжлэсь йылъёссэ, пушнерез, чырстурынэз но мукет турынъёсты. Толлы но пӧртэм сиёнъёс дасяло: сылалто, ӵынато, куасьто, мариновать каро, варення пӧзьто. Сиёнэз тросэз толйытэ гулбечын яке гуын. Тазалык Висьыкузы гуртоос вазисько эмъясьёс доры, уг палэнско туно-пеллёослэсь но. Вашкалаослэн эмъяськон амалысьтызы тужгес но кулэен лыдъяло турын-куарен йӧнатсконэз но мунчоез. Юан-веранэ пыриськизы 159 арлыдоос но 129 нылпи. Тросэзлэн соослэн эскеремын вирзы но иммунитетсы. Озьы ик эскеремын музъемлэн но вулэн ӟечлыксы. Анализъёс возьматӥзы: та палъёсын нылпиос ӧжытгес курадӟо аллергия висёнъёслэсь, иммунитетсы лябӟемын 10 процентэзлэн гинэ нылпиослэн (республикаысьтымы куд-ог ёросъёсын 20-25 процентозь вуэ). Эскеронъёс озьы ик шараязы: тросэзлэн адямиослэн пекляоссы висё, ӝушазы яраос кылдэмын. Нылкышноос шергес висё пыктос висёнъёсын. Воргоронъёслэн кема аръёсын кыстӥськись висёнъёссы пӧлын: остеохондроз, радикулит, бронхит. Со герӟаськемын секыт но тазалыклы изъян ваись ужъёсын. 12 процентэзлэн арлыдоослэн виразы гемоглобинзы уг тырмы. Тодосчиос озьы ик пусъё: Шаркан ёросын нуныос кузьгес мугоро вордӥсько, мукет ёросъёсысь нылпиосын ӵошатыса. Озьы ик та палась пиналъёс укыр возьдаськисесь, азьветлӥсь луон сямзы уг ик шӧдӥськы. Лапегесь ке но, тазаесьгес Гуртысь 7-15 аресъем удмурт пиос коми-пермякъёслэсь 3-5 сантиметрлы ӝужытэсьгес, но город пиослэсь соос 2-4 сантиметрлы лапегесьгес. Мугорзы но коми-пермякъёслэсь 2- 4 килограммлы секытгес, нош городысь пиослэсь 2-4 килограмм пала капчигес кыско. Удмурт нылъёслэн ӝуждалазы коми-пермякъёслэсь 5 сантиметрлы ӝужытгес, нош городысь огъёзъёсынызы соос одӥг ӝуждаесьгес. Огъя тазалыксы сярысь ке верано, Шаркан ёросысь нылпиослэн 7 арескысен шӧдӥське ни тазалыксылэн улӥ но шоро-кусполэсь улӥ луэмез. 9 арескысен огъя тазалыксы ӵоша ни городысь нылпиосын. Нош 11 арескысен гуртысь нылпиос городысь нылпиослэсь тазаесьгес ни. Таӵегес ик югдур 14 но 15 аресъем нылпиос пӧлын. Сое валэктыны луоз, дыр, город нылпиослэсь йырвизьзэс мултэс трос ужатэмен, жадьытэмен. Удмурт нылпиослэн лапег мугорзы выжылэн аспӧртэмлыкеныз герӟаськемын. Удмуртъёслэсь пумен лапег луэмзэс эскеронъёс но возьмато. Со, оло, сиськем бордысь но потэ. Тодосчиослэн малпамзыя, со герӟаськемын кӧё-вӧё но пызь сиёнъёсты мултэс яратэмен, витаминъёс но микроэлементъёс тырмымтэен. Шӧдӥськытэк уг кыльы секыт ужамзы но улон-вылон югдурзы. Нылпиослэн мугорзы но трослы ӧжыт кыске. Одӥгез муг - вож нуныослы тырмыт сиён уг шедьы. Нош мукет ласянь, гуртысь пиналъёс тросгес бызьыло-ветло, секыт ужъёсты быдэсъяло, городын улӥсь нылпиосын ӵошатыса. Мукет пӧртэмлыкъёс Удмуртъёслэн но ӟучъёслэн гемоглобиназы но пӧртэмлыкез вань. Лулмугорын кортлэн тырмымтэез тужгес но вылӥын Глазов, Сарапул ёросъёсын, ӧжытгес Вавожын но Алнашын, шоро-куспо - Шаркан ёросын. Шӧдиськытэк уг кыльы музъемлэн но сиёнлэн микроэлементъёсын начар луэмез. Малпаськонэ уськытэ таӵе югдур но: нылкышноослэн тужгес зол виркошкон вакытсы вить но солэсь трос нунал кыстӥське, секытэн луылӥзы ньыль пол но солэсь тросгес. Шаркан ёросын, уката ик Карсашурын, Пипьёын но Гондырвайын тужгес но трос удмуртъёс уло. Юалляськемъёс пӧлын одӥг но ӧй вал суро семья. Пусйыны кулэ сое но: экспедицие потамъёс али но туж шунытэн тодазы ваё гурт калыкен пумиськылонъёссэс но ужамзэс. Дасяз В.Чазова. Шаркан ёрос. Яратӥсьёслэн нуналазы - Чечняе Тупаны но кулэ: ӵапак Яратӥсьёслэн нуналазы куамын семьяос люкиськизы вордэм пиенызы, кузпалэнызы, атаенызы... Кык толэзь ӵоже соос табере чидатэк витёзы матысь адямиоссылэсь Чечняысь берытскемзэс. Нырысьсэ уг келяло ни Кыл кутытонъя управлениын ужасьёс асьсэлэсь эшъёссэс чечен музъем вылэ. Уноез соос пӧлысь "шӧмъязы" ини отын мынӥсь ожлэсь пӧсьсэ но, кезьытсэ но. Тани Григорий Владимирович Желудов, Кыл кутытонъя управленилэн кивалтӥсез, сизьыметӥзэ кошке ини отчы. Быдэсак пыр потэмын нырысетӥ чечен войнаез. Таяз учыре но солы оскемын бадӟым удыс. Со кивалтоз Россия Федерациысь Юстицияя министерстволэн Кавказысь оперативной группировкаеныз. - Мылкыдэз юась ӧвӧл, - шуэ генерал-майор, - ми понна одӥг гинэ кыл вань - "кулэ". Азьло ожъёсын но шаерысьтымы пиосмы ӟеч тодон-валанъёссэс, быгатонлыкъёссэс возьматӥзы. Уно гинэ тау карон гожтэтъёс вуизы Чечняысь. Али но озьы ик луоз. Эшъёсы оскымонэсь, вань шуг-секытъёсты вормыны дасесь. Ӟеч мылкыдын кошкиськом, сыӵе ик мылкыдын берытсконо мед луоз. Нош Сергей Воеводин нырысьсэ мынэ Чечняе. Со - "Ступени" газетлэн редакторез. - 1995-тӥ арысен куриськисько ини Кавказ палъёсы, - шуэ Сергей Борисович. - Вуиз кема возьмам нунал. Мон кивалто огдырлы кылдытэм пресс-службаен. Ӵош ужан понна, кусыпъёс тупато мукет редакциосысь, телевидениысь эшъёсын. Огъя материалъёс дасялом Чечняын службазэс нуись юстицияя удысын тыршисьёс сярысь. Семьяе, кузпалы но кык пиосы, жаль пото, укыр юн сюлмаськозы ини тон понна. Но тыршо соослы ӵемгес ачим сярысь ивортылыны. - Эсьма, мон ачим мынысал атае интые, - шуэ службазэ Кировын ортчись пиез Андрей (ӵапак отпуске кемдэм). - Мон понна кышкытлык ӧжытгес луысал. Али мон армиын, быгатонлыкъёсы, тодон-валанъёсы вылесь, собере мон егит но чупресгес... Вераськонмес куспетӥ карыса, Чечняе кошкисьёсты строе султыны ӧтизы. Шудо сюрес сӥзизы управлениысь кивалтӥсьёс, келяськыны лыктэм куноос. Собере кузь сюрес вылэ потӥсьёсты ваньзэс оген-оген бакель кариз Александр Невский соборысь священник отец Виктор. Со асьме пиослы котьку юрттыны дась луэмзэ вераз. Милемлы, епархиын ужасьёслы, юрттэт курыса вазиськизы ке, - шуиз отец Виктор, - черке ветлӥсь песяйёс уйзэс но кӧлытэк пыдвыл-пӧзь керттозы, шуныт дӥсь вурозы. Кык полкез но дӥсяны-кутчаны быгатом. Мар бен, ог-огедлы ӟеч карон мылкыд но ог-огдэ яратон мед юрттозы вань секытэз вормыны. Е. Камашева. Чур бугор Маин "ыбылӥськем" Сталин"? Россия Федерациысь Вооруженной Кужымъёсъя шор музейын ужасьёслэн верамзыя, Иосиф Виссарионович Сталинлэн ож тӥрлыкен коллекциысьтыз та вакытэ тодмо солэн кӧня ке люкетэз гинэ. Азьвыл со возиськиз Кремльын. Али музейын возьматӥське вальтер системаен 6 пистолет, браунинг системаен 2 пистолет, наган системаен кык револьвер, маузер системаен 2 пистолет но "ТК" (Тульский Коровина) пистолет. Чур бугор Оло июле, оло... Россия Федерациысь Правительство нош ик бюджет чотысь коньдон басьтӥсьёс сярысь сюлмаськемзэ возьматыны тырше. Тани 2001-тӥ арлы со таӵе график тупатӥз. Дышетӥсьёслэн, врачъёслэн, культура удысын тыршисьёслэн уждунзы будоз 1-тӥ июльысен яке 1-тӥ августысен. Военнослужащийёслэн - 1-тӥ августысен яке 1-тӥ сентябрьысен. Кун служащийёслэн - 1-тӥ сентябрьысен яке 1-тӥ октябрьысен. ЧУР БУГОР "Макарез" воштэ Ярыгин Ижевск быдэс дуннелы тодмо ни усто пыӵал тӥрлык лэсьтыны быгатэменыз. Кибашлы конструкторъёсмы тэк уг пуко: кылдо выль пумо пистолетъёс, карабинъёс автоматъёс, пӧйшуран пыӵалъя, спортэн вырон винтовкаос. Россиын алигес гинэ "вордскиз" сыӵе пистолет, кудзэ номырин но ӵошатыны уг луы. Макаровлэн пистолетэныз ("ПМ") но, Италиысь "береттаен" но. Нош кылдӥз со Ижевскысь механикая кун заводын. Нимазы сое "ПЯ" (Ярыгинлэн пистолетэз). Инженер-конструкторлэн Владимир Александрович Ярыгинлэн нимыз быдэс дуннелы тодмо. Талэсь азьло со кылдытӥз туж данэ потэм "Иж-35" спортъя пистолетсэ. Со уно зарни вайыны юрттӥз дуннелэн, Европалэн чемпионатъёсаз, Олимпиада шудонъёсын. Озьы М.Т.Калашников, Е.Ф.Драгунов но Г.Н.Никонов вӧзы ватсаськиз на эшшо одӥгез дано адями. Ижевскысь ньылезлы адямиослы сётэмын сыӵе дан, кинъёслэсь нимтулъёссэс нулло соослэн кылдытэм ож тӥрлыксы. Маиныз бен сокем усто данэ потэм "ПЯ"? Нырысь ик, мукет пистолетъёслэн обоймаязы патронэз 8 гинэ, нош Ярыгинлэн выль пистолетаз - 17. Со ыбылӥськисьлы секыт югдуре шедьыкуз юрттэ дуно дырез шыръяны, уго патронэз ӵемысь вошъян кытӥяз ӵоша улонлы. Со сяна, "ПЯ-лэн" 9 миллиметръем патронэзлэн лобон кужымез туж вылӥ. Со 25-30 метрысен тужгес юн бронежилетэз но пасятэ (огшоры "парабеллумлэн" патронэз со дыре лябытак гинэ пытьы кельтэ). Пистолет конструкциезъя лэсьтэмын озьы, соин лякыт ыбылӥськыны быгато бур киын но, паллян киын но. Конструктор та пистолетсэ кылдытон бордын 8 ар ужаз. - Ньыльдон ар ӵоже ини, - шуиз со, - армиын ӟеч "ужаз" Макаров. Со вакытэ та пистолет вань туала куронъёслы тупалляз, со туж оскымон вал. Нош 90-тӥ аръёслэн кутсконазы куронъёс воштӥськизы. Кулэяськон кылдӥз кужмогес патронэн но бадӟымгес магазинэн ож тӥрлык дасяны. Малы? Малы ке шуоно, дуннеысь унояз армиосын пехота утиськыны ӧдъяз бронежилетъёсын. Вылаз ик, потыны кутскизы "чудо-девяткаос" - бадӟыматэм магазинэн "парабеллумлы" 9 миллиметръем патронэн пистолетъёс. Нош ми азе ужпум пуктӥзы: кылдытоно сыӵе пыӵал, со трослы умойгес мед луоз кунгож сьӧрын поттэмъёсызлэсь, со мед пасялоз котькыӵе бронежилетэз. Озьы тӥни кылдӥз "ПЯ". Утиськонъя 14 ведомствоосысь - Обороная министерствоысь, ФСБ-ысь, МЧС-ысь но мукетъёсысьтыз специалистъёс тирысен паймем беразы паймизы солэн луонлыкъёсызлы: соос гинэ но, кин мишень шоры шергес ыбылӥз вал азьло, нош выль пистолетэн соос ваньзы "витьлы" дунъет басьтӥзы. Ож тӥрлыклэн огъя пуштросэз но быгатонлыкез Макаровлэн пистолетэз ПМ Ярыгинлэн пистолетэз ПЯ Калибрез 9 мм 9 мм Пулялэн нырысь ӝоглыкез 315 м/с 465 м/с Пистолетлэн секталаез (патронъёстэк) 0,73 кг 0,95 кг Магазинын патронъёсыз 8 патрон 17 патрон ТАЗАЛЫК Менингит - вашкала висён. Соин тросэн висиллям асьме эраозь И, ИИ, ИИИ вакытъёсы Италиын. 1805-тӥ арын - Европаын но Уй пал Америкаын. Нырысьсэ менингококк шараямын вал 1887-тӥ арын. Асьме дорын менингит тросэн вӧлмылӥз 1970-тӥ аръёсы. Туэ шаерамы ньыль мурт кулӥз ни. Кӧняез али эмъяське? Эпидемия ялыны уг луы на, но сыӵе кышкытлык вань. Менингит палаське омыр пыр, но со грипп ӧвӧл, тросэзлы уг пала. Менингококк кышка яркыт шунды сиослэсь, пӧсьлэсь-кезьытлэсь. Одӥг висись кык сюрс муртлы микробзэ кузьманы быгатэ. (Но ваньмыз висьыны уг кутско). Кызьы кужмоятоно иммунитетэз? Туж огшоры - ӝӧк вылады толбыт мед луоз чеснок, сугон, сылалтэм кубиста, чечы, лимон. Уте асьтэды кынмамлэсь, ёзвиостэс кыдатэ. Ненег сюлмысь кисьтӥськем суредъёс Туннэ суредасьмы Леонид Прозоров вордскем нуналзэ пусйысал. Укыр вазь кошкиз со пӧлысьтымы. Но кылизы суредъёсыз. Леонид Алексеевич карандашеныз но блокнотэныз ноку ӧз люкиськылы. Син шораз йӧтэм суредэз одно ик бумага вылэ кельтыны тыршылӥз. Меӵак но могак Вӧез вӧен уг зырало. Вуэм улмоез сиыны котькин дась. Кеньыро шыд пунэмтэм уг луы. Кинлэн нянь сиемез потэ, со пызь но вае. Пиньтэм муртэ мульыен уг куноято. Сиемед ке потэ, коӵыш шыр утчаны кошке. Чечыен нянь вылэ сылал уг пызьнало. Президентэн пумиськонъёс Удмурт Республикалэн Президентэз Александр Волков 12-тӥ феврале пумиськылӥз республикаысьтымы прокурорен Владимир Зыкинэн, Удмуртиысь Югдурез утёнъя министрен Владимир Щербаковен но Глазов городысь лингвистикая 14 номеро гимназилэн директореныз Ольга Тимощукен. Владимир Зыкинэн но Владимир Щербаковен вераськыкуз, Удмурт Республикалэн Президентэз сэрттӥз-пертчиз респубикаысьтымы правоосты утёнъя органъёслэсь ужзэс умоятонъя туннэ быдэстоно ужпумъёсты, вераз соослэсь кусыпъёссэс федеральной ёзъёсын уката юнматон сярысь. Тужгес бадӟым саклык висъямын вал наркоманиен но наркотикъёсын вузкаронэз кужмоятонлы. Кылсярысь, вераськемын матысь дыре "котырес ӝӧк" ортчытыны сыӵе министерствоосын но ведомствоосын, общественной организациосын, кудъёсыз герӟаськемын наркотикъёсты лушкем вузанэн, усыкмытӥсь суретъёсын висись адямиосты эмъянэн. "Удмуртия" ГТРК-ын чаклаське наркоманиез алонъя, тужгес но быдэ вуымтэос но егитъёс пӧлын, передачаос дасяны. Кызьы тодмо, Александр Волковез Удмурт Республикалы Президентэ быръемен валче куштӥськиз со Кун Кенешысь депутатлэсь ужзэ быдэсъянлэсь. Но Александр Волков бырйисьёслэн кулэяськонъёссы но сюлмаськонъёссы сярысь уг вунэты. Со пумысен ик вераськон мынӥз Ольга Тимощукен, та дырозь со Глазов городысь быръёнъя 54 номеро Левобережной округъя Кун Кенешысь депутатлэн Александр Волковлэн юрттӥсез вал, нош али луэ Удмурт Республикаысь Президентлэн юрттӥсез. Александр Волков Ольга Тимощукез но солэн нимыныз округысьтыз вань бырйисьёссэ оскытӥз, со вань сётэм кылъёссэ быдэстоз шуыса. Нуназе бере Александр Волковлэн кивалтэмез улсын Воткинск ёросэ чурыт эстӥськонэн ужась ракетаослэсь двигательёссэс быдтонъя завод пуктонэн герӟаськем ужпумъёсъя кенешон ортчиз. Солэн ужаз пыриськизы Удмурт Республикаысь Кун Кенешлэн Тӧроез Игорь Семёнов, республикаысьтымы Правительстволэн Тӧроезлэн воштӥсез Николай Хохлов, Удмуртиысь лэсьтӥськонъя, архитектурая но улон юртъёсты возёнъя министр Валерий Загайнов, Удмуртиысь кунсьӧр кусыпъёсъя министр Виктор Викулов, "Воткинский завод" кун предприятилэн генеральной директорез Виктор Толмачёв но мукет кивалтӥсьёс. Иворъёсты тросэн вӧлмытӥсь куд-ог ёзъёслэн гожъямъёссыя зэмзэ но Пермь улосысь кивалтӥсьёс та заводэз асьсэлэн музъем вылазы интыяны дась луо. Федеральной правительствоын та ужпумъя вераськон мынӥз, Александр Волковлэн Россия Федерациысь Правительстволэн Тӧроезлэн воштӥсеныз Илья Клебановен берлозэ пумиськыкуз. Табере ваньмыз потоз асьме республикаысь кивалтӥсьёс бордысь. Удмурт Республикаысь Президентлэн Александр Волковлэн верамезъя, та лэсьтӥськон пумысен политической зулёнъёсты дугдытыны дыр вуиз ни. Заводэз интыянъя но сое ужатонъя экологиен но экономикаен герӟаськем ужпумъёслы специалистъёс умой дунъет сётӥзы. Со йылпумъянъёсын республикаысьтымы кивалтӥсьёс соглаш луо. Удмурт Республикалэн Президентэз Александр Волков 16 часын пумиськиз воинъёсын- афганецъёсын. Соос "Металлург" культура двореце люкаськылӥзы бырем эшъёсэс буре вайыны. Александр Волков пусйиз: асьмелэнъёслэн Афганистанэ пырамзы пумысен советской кивалтӥсьёслэн ужзылы политической дунъет сётыны дыртыны кулэез ӧвӧл. Но Афганистан пыр потэм солдатъёс кышкасьтэмесьн зэмлыкез гажасесь адямиос вал. Республикаысьтымы кивалтӥсьёс воинъёслэн-афганецъёслэн, соослэн семьяоссылы, быремъёслэн семьяосыылы котьку висъязы но висъялозы туж бадӟым саклык. 1998-тӥ арысен 2000-тӥ арозь воинъёслы-афганецъёслы висъямын 20 квартира, нош 2001-тӥ арын улон инты басьтыны сётэмын эшшо 500 сюрс манет. 1999-тӥ арын медициная дунтэк юрттэт сётэмын Афганистанысь 61 ветеранлы, нош 2000-тӥ арын - 84 ветеранлы. Афганистанысь ветеранъёслэн огазеяськонъёссылы юрттон вылысь туэ республикалэн бюджетысьтыз висъяны чакламын 275 сюрс манет. Кызьы шуиз Александр Волков, ветеранъёслэн, соослэн семьяоссылэн, со войнаын быремъёслэн семьяоссылы юрттыны со тырмыт ӧвӧл. Но со юрттэт арысь аре йылоз. Со асьмелэн адямилыко луон пунэм тыронмы, сое одно быдэстоно. Александр Волков шуныт ӟечкылаз чечен оже ветлэм Алексей Занинэз. Солы кичабонъёс улсын республикаысьтымы военной комиссар Геннадий Барсков Мужество орден сётӥз. Удмурт Республикалэн Президентэзлэн но Правительстволэн пресс-службаез. Кизилиос верало 19.02-25.02 Така (Овен) 21.03-20.04. Таяз арняе тӥ эшъёсыныды ӵош трос лэсьтыны быгатоды, но шутэтскон сярысь но эн вунэтэ - жалялэ тазалыктэс. Мултэс ушъяськемды, вылтӥяськемды тӥледлы пумит берытскыны быгатоз. Арня пумын пунэмъёстэс берыктыны тырше. Шутэтскон нуналъёсты керӟеггес ортчозы. Чаклаське кудӟытӥсь юонъёслэсь, эмъюмлэсь. Маке басьтыны ке малпаськоды, возьмалэ на тупасьгес дырез. Ош (Телец) 21.04-21.05. Эн дыртэ кытчы ке коньдондэс поныны. Понедельнике чаклаське мултэс сиськемлэсь - мусты сое "уз чида". Уж дурады тӥледлы азьло сямен ик удалтоз. Кин ке ӟеч ӵектон сётоз - эн пумитъяське. Валаса быръе эш, ваньмызлы эн оске. Адямиос вожъясько ёрмытэк улэмдылы, со понна эн сюлмаське. Шутэтскон нуналъёсы шумпотон ваёз матысь адямиеныды лушкем кусыпъёсты. Эгызоос (Близнецы) 22.05-21.06. Арня керӟег ортчоз - яратоно муртэныды валамтэос кылдыны быгатозы, адямиосын огкыл шедьтыны шуг луоз. Соин сэрен эн палэнтэ бордысьтыды нылпидэс. Вань кышкытлык шудтэм учыре шедьыны - асьтэос руль сьӧры эн пуксьылэ. Пятницае югдур тупатскозгес. Кивалтӥсьты быгатонлыктэс пусъёз. Тросэз бадӟым уждун басьтоз. Шутэтскон нуналъёсы поталэ инкуазе, ветлэ театре. Кисло-кусло (Рак) 22.06-23.07. Умой вакыт кивалтӥсьёсын, спонсоръёсын кусып тупатыны. Кык чаклам ужды пӧлысь умой быдэсмоз огез гинэ. Тужгес секыт ортчоз четверг - вылады мултэс уж эн басьтэ. Вань кышкытлык шудтэм учыре сюрыны. Чаклаське! Лев 24.07-23.08. Кыӵе ке ужез быдэстыны кутскемдылэсь азьло малпаське, кызьы сое лэсьтоно. Кузпалэныды коньдон понна керетонъёс потозы, ёрмонысь потыны эшты юрттоз. Азьветлӥсь луэмды бадӟым ыштонэн берытскыны быгатоз - асьтэлы трос тушмон шедьтоды. Арня нуналэ сьӧрлось адямилы синмаськыны быгатоды. Нылмурт (Дева) 24.08-23.09. Эн дыртэ кивалтӥсьтылэсь премия курыны - уз вала. Вылаз ик кин ке солы тӥ сярысь урод супыльтэ. Четверге кема возьмам ивор басьтоды. Чаклалэ асьтэлэсь сямдэс, выросъёстэс - та нуналъёсы со тросэзлы уз кельшы. Шутэтскон нуналдэс эшъёсыныды ӵош ортчытэ. Пинь эмъясь доры ветлондэс берлолыгес кельтэ. Весъёс 24.09-23.10. Понедельник - секыт нунал. Эн чаклалэ бадӟым ужъёс лэсьтыны, документъёсы гожтӥськыны, гажан муртэныды пумиськыны. Малпанъёстэс быдэстыны быгатоды средае гинэ. Ваньмыз гылӟоз вӧй вылтӥ кадь. Субботаез яратон муртэныды ортчытэ. Шумпотон ваёз арня нунал но. Скорпион 24.10-22.11. Эн выре коньдон ужпумъёсын. Чаклаське пӧямзылэсь, лушкаськонлэсь. Семьяды керетонъёс потыны быгатозы, чидасьгес луэ. Тросгес дырдэс ортчытэ нылпиосыныды. Арня пумын кузпалэныды кусыпъёсты тупалозы, улонады выль вакыт кутскоз. Коньдон ужпумъёсты умой пала берытскозы. Ыбылӥськись (Стрелец) 23.11-21.12. Тӥляд кемалась гажам мурттылы мылкыддэс усьтэмды потэ ни, но ӧз дӥсьтылэ. Вералэ туннэ! Дӥсьтонды тырмоз кинэн ке нюръяськыны но. Сюлмаськон ваёзы анай-атаеныды кусыпъёсты. Эн тырше асьтэлэсь малпандэс кинлы ке думыны. Эн аналтэ гурт котырысь ужпӧрдэс. Арня нуналэ возиське маке басьтонлэсь - ӟеч вуз уз шедьы. Ӝытазе шулдыръяське. Сюро кеч (Козерог) 22.12-20.01. Выль ужъёс борды кутскыны эн дыртэ, изъян гинэ адӟоды. Кин ке коньдоно уж ӵектоз - эн пумитъяське, тӥ сое чаль быдэстоды. Удалтоз дышетӥсьёслы но общественной ужен вырисьёслы. Матысь адямиостылэсь кузьым басьтоды. Четверге потон уй адӟем вӧтты зэмалоз. Пятницае чаклаське сюрес вылын. Шутэтскон нуналъёсы тазалыктэс юнматэ, дырдэс пиналъёсыныды ортчытэ. Ву кисьтӥсь (Водолей) 21.01-19.02. Понедельнике умой луысал врач доры ке ветлысалды. Уж дурады валамтэос луозы. Чакласа возе коньдон пуйыдэс. Эн поталэ кузь сюрес вылэ. Мылкыдды туж вошъяськись луоз, соин ик ӟеч-ӟеч малпаськытэк, номыр борды но эн басьтӥське. Арня пумын удалтоз политикъёслы, журналистъёслы, артистъёслы. Чорыгъёс (Рыбы) 20.07-20.03. Арняды керӟег кутскоз, ӵош ужась эшъёсты тӥледды пыкылыны быгатозы. Эн керетэ кузпалэныды коньдон понна. Кин ке кема возем пунэмзэ берыктоз яке ватсаса коньдон вуоз. Уждэс огсыр радъялэ, сотэк тазалыкты лябӟоз. Арня пумын кивалтӥсьты кылдэс юаны быгатоз, дась луэ. Шутэтске, тросгес дырдэс гажан муртэныды ортчытэ. Шӧкыч Му-у-у! Ческыт ик та вож бумага. Одӥгетӥез кивалтӥсь: - Усто ук та! Одӥг-кык вож бумага понна сютэм Куӵоед пырыны-потыны луонтэм лымыез но городысь нюлыштыны дась. Кыкетӥез кивалтӥсь: - Озьыез озьы но... Кисые пыремзэ поттыны ки уггес ик ӝутскы. Суредэз И. Азимовлэн. Чур бугор Манетъёс, манетъёс Нырысетӥ мартысен Россиын ичиез уждун будоз 600 манетозь Россиын эшшо 7 миллион улӥсьёслэн уждунзы будыны кулэ. Владимир Путинлэн указэзъя 2001-тӥ арын 1-тӥ мартысен ичиез уждун 408-ысен будоз 600 манетозь. Нырысь ик сое ватсалозы сыӵе пересьёслы, кудъёсызлэн уг тырмы вал ужан стажзы яке ас вакытазы соос туж ичи уждунэн улӥзы. Со сяна, толэзяз 132 манетлы пенсизы будоз ужась пенсионеръёслэн, инвалидъёслэн но сюдӥсьсэс ыштэм семьяослэн. Умой ивор вань студентъёслы но. Самой усто дышетскисьёслы но кунмы коньдон висъя. Табере президентлэн стипендиез студентъёслы тупатэмын 400 манет но аспирантъёслы - 800 манет. Правительстволэн стипендиосыз луозы 300 но 800 манет. Ӵектӥськом "Хед энд шолдэр" кулэ уз луы ни. Тодӥськоды-а, сугон кӧм трос висёнъёслэсь юрттэ шуыса? Соин пукетэм ву умоятэ пекляослэсь, сюлэм быгытъёслэсь ужамзэс. Вашкала дырысен ик пересьёс шӧдӥзы ни сугонлэсь пӧртэм вирусъёты-бактериосты быдтыны быгатэмзэ. Со пайдаё луэ пӧртэм кынман висёнъёслы, грипплы пумит. Та понна таӵе сурет дасяно: 50 грамм пужым лысэз 2 литр вуэн кисьтоно, отчы ватсано 1 стакан пыргытэм сугон кӧм, 1 чечы пуньы солодка выжы. Ваньзэ тае ляб тыл вылын 20 минут пӧзьытэм бере, ватсано на 2 бадӟым пуньы мында легезьпу мульы. Со суреттэс 10-12 час мында зӧк одеял улын возьыны но сӥсъяны гинэ кылиз на. Выронэз отын ӧвӧл кадь, со понна пайдаез - шӧдскымон. Эскере! Сугон кӧм ӟеч юрттэ пӧртэм пӧськыосын нюръяськыны но. Та понна пӧзьтэм кӧмез сурало со мындагес ик подорожник куарен. Суретады ватсалэ на пызь но чечы, куарнянь лэсьтыны луытозь. Ваньмыз дась. Та суретэн зырам бӧрсьы, лек пӧськыды нунал-кык ортчыса пӧсьтоз. Эн гинэ вунэтэ солэсь бервылзэ спиртэн яке водкаен зыралтыны. Сугон кӧм юнматэ йырси выжыосты но. Сое пукетыса, одӥг-кык пол йырсидэс миськыса утчамды бере, нокыӵе "Хед энд шолдерсъёс" кулэ уз луэ ни. Журналистъёсын пумиськонъёс Будо выль кивалтӥсьёс Туала вакытэ кин дася та дырлы тупась кивалтӥсьёсты? Рынокез пыӵатонын но ужбергатонын соосты менеджеръёс яке выль "ӵужонъёс" шуо. Ӵапак со сярысь вераськон мынӥз Правительствоын. Журналистъёсын пумиськизы республикаысьтымы Наукая, вылӥ но шор профессиослы дышетонъя кун комитетлэн тӧроез Виктор Шудегов но солэн воштӥсез Олег Власов. Татчы озьы ик ветлӥзы Удмуртиысь Президентлэн кадръёсын ужанъя ёзэзлэн кивалтӥсез Александр Скобкарев, кунгож сьӧрын дышетскем адямиос. Кызьы ивортылӥм ни, куинь ар талэсь азьло Россиын кутэмын вал кивалтӥсьёс дасянъя нимаз кун программа. Сое Президентлэн программаез шуыса нимазы. Мар бен та дыр ӵоже лэсьтэмын? Ушъяськымонэз сокем трос ӧвӧл. Озьы ке но, шаерысьтымы 100 мурт кунгож сьӧрысь странаосын тодон-валанзэ будэтӥз. Ваньзы соос вуоно выль кивалтӥсьёс но куашкам (банкротэ шедем) предприятиосты ӝутӥсьёс луозы. Кунгож сьӧрын дышетскыны Удмуртилы арлы быдэ 50 инты сётӥське. Озьыен, куинь ар ӵоже асьмелэн ичигес адямиосмы музон кунъёсын тодон-валан басьтӥзы. Мугъёсыз пӧртэмесь. Одӥгез соос пӧлысь - берло дыре быдтэмын кивалтӥсь кадръёс дасян радлык. Азьло партия сое котьку но юн син азяз возиз. Александр Скобкарев люкаськемъёсты со сярысь тодазы вайытӥз. Нош рынокен экономикае выжон вакытэ вань удысъёсын. Озьы ик кун но интыысь кивалтон ёзъёсы ӟеч кивалтӥсьёс уката кулэ. Тӥни соин ик Александр Николаевич юнме шорысь ӧз шуы: - Кытын бадӟым опытэн кивалтӥсьёс ужало, отын котьку усто азинсконъёс басьто, уно ваньбур потто. Со бен вератэк но валамон. Но выль велосипед малпатэк, ӟеч ужасьёслэсь дышетсконо, ваньзэ умойзэ лыдэ басьтоно. Со понна ик кылдытэмын Президентлэн программаез. Со быдэс Россиын быдэсъяське. Нош шаерамы али мынэ ни туэлы дышетскыны мылкыд карисьёсты кутон-эскерон. Арлы быдэ сюлэсь уно куриськисьёс луо, но соос пӧлысь ӝыныез гинэ тодон-валанзэ кунгож сьӧрын будэтэ. Бумагаос дасяно луоз 15-тӥ мартозь. Собере соосты Москваын учкозы. Кинэ бен отчы куто но кытын соос дышетско? Котькудӥзлы одно ик тодоно одӥг коть кунсьӧр кылэз, арлыдзы 45 ареслэсь бадӟым медаз луы. Со сяна, кивалтонын 3- 4 ар ужаны кулэ. Дышетско соос Германиын, Франциын, Япониын, Канадаын, США-ын, Голландиын, Италиын но мукет кунъёсын. Кыӵе странаын асьме адями тодон-валан басьтэ, со кун ик котькудӥзлы 50 сюрс доллар коньдон висъя, расходъёсты ас вылаз басьтэ. Нош Москваысь со странае кошкыны уксё сётӥське кун бюджетысь. Пумиськон дыръя дышетскемез сярысь вакчияк вераз Павел Данилов. Али со "Ижнефтемаш" огазеяськонын валтӥсь бухгалтер. Солы но мукетъёсызлы Президент программая дышетскемзы сярысь дипломъёс сётӥз Виктор Шудегов. Г. Романов. ЧУР БУГОР Шутэтском ке, шутэтском Россиысь Правительство алигес постановление кутӥз. Со нимаське "Вылӥ азинлыкен ужанлы но шутэтсконлы луонлыкъёс кылдытон вылысь 2001-тӥ арын шутэтскон нуналъёсты выжтон сярысь". Ум тодӥське уж ласянь кызьы, но шутэтсконмы сярысь азьвылгес ик тодыса ӟечгес, дыр. 11-тӥ мартэ арня нунал шутэтсконмы выжтӥське 9-тӥ мартлы пятницалы (8-тӥ, 9-тӥ но 10-тӥ мартэ юиськом нылкышноос понна). 28-тӥ апреле кӧс нунал шутэтскон выже 30-тӥ апрельлы вордӥськонлы (ньыль нунал бӧрсьысь бӧрсе шулдыръяськиськом 29-тӥ, 30-тӥ апреле, 1-тӥ, 2-тӥ мае). Кӧс нуналэ 9-тӥ июне шутэтскон нунал выжоз вордӥськонлы 11-тӥ июньлы (10-тӥ, 11- тӥ, 12-тӥ юиськом Россилэн эрик басьтэмез понна). Выль ар но шумпоттыны кулэ. Кӧс нуналэ 29-тӥ декабре шутэтскон выжоз вордӥськонлы 31-тӥ декабрьлы (ма кароды со нуналъёсы, асьтэос тододы ни). ТАЗАЛЫК Умой адямиос Пож дуннеез сайя киосыныз Ӟеч кыл вераме потэ городысьтымы син эмъясь врач Валерий Петрович Смирнов сярысь. Алнаш ёросын вордскем удмурт воргоронэз татын ваньмыз яратӥзы. Аслэсьтыз ужзэ ӟеч тодэм сяна, со висисьёсты шуныт-небыт кылыныз буйгатыны выре, бурмемзылы оскытэ. Удмуртъёс шоры со котьку ас кылыныз вазиське. Кызь ар ӵоже больницаын ужатозяз, кӧня муртлы юрттӥз ни со! Куд-огез висисьёс солы вӧсяськыны дась. Валерий Петрович уго воштонтэм адями. Со трос аръёс ӵоже ини катарактаез эмъя. Кылем ар пумысен со пожаськем хрусталикез воштонъя операциос лэсьтыны кутскиз. Вужез - син азьын - ляб адӟись муртъёс дуннеез выльысь яркыт адӟыны кутско. Таӵе операциос азьвыл городамы ӧз лэсьялэ, но висисьёс ӧз кышкатске, соку ик визьмо врачлы оскиськизы. Операция дунтэм ӧвӧл ке но, черод бадӟым, али апрельлы гожтӥсько ни. Валерий Петрович - туж шудо адями. Со аслаз ужезлэсь емышъёссэ адӟе. Жаля огез сярысь гинэ: ӧз вутты аслаз песятаезлы юрттыны. Со катарактаен курадӟыса кулӥз. Соку Валерий армиын служить каре вал. Но ӵапак со учыр бере егит пияш малпаз одно син эмъясь врач луыны. А.ВАХРУШЕВА. Воткинск город. В.П.Смирнов - вылӥ категориен врач. Одӥг герӟетын библиотека, клуб, музей но мукетыз Республикаысьтымы культура удысын ужасьёслэн кылем арын тросэз ужрадъёссы герӟаськемын вал Быдӟым Вормонлы 55 ар, шаермылэн кунлыкезлы 80 ар тырмонэн но выль даурез, куинетӥ сюрс арлыкез (тясячелетиез) пумитанэн. Соин ик кылем ар понна йылпумъянъёс лэсьтонэз туэ паськытгес учкыны кулэ. Тазьы пусъемын вал республикаысьтымы культура удысэн кивалтӥсьёслэн паськытатэм кенешоназы. Культурая министерстволэн коллегиез ортчиз 8-тӥ феврале Удмурт кун филармониын. Культура удыслэн паськыт вамышъёсын азьлань мынэмез берло дыре тужгес адӟиське библиотекаослэн ужазы. Национальной библиотека пӧрмиз иворъёсты бичась центрлы, татын пыӵатӥсько выль технологиос, кылдытӥсько электрон каталогъёс, уже кутӥське Интернет. Библиотекаосты 2005-тӥ арозь азинтонъя сюресъёс пусъемын. Кык азьпал арлы чакламын "Удмуртилэн синпелетэз" программа. Бадӟым уж нуиське, фондъёсты утён, паськытатон вылысь. Одӥгез но выль потэм книга, газет син азьысь ышыса медаз кыльы, тросгес литература, одӥг ке но экземпляр мед вуоз гуртъёсы - таӵе сюлмаськонэз быдэсъяны юрттоз Библиотекаослэсь ужзэс умоятон сярысь закон, со ӝоген кутӥськыны кулэ. Берло дыре паськытаз Национальной музейлэн но ужез, куинь выль филиалэ кылдӥз. Татын ужасьёс али трос дыр висъяло котькуд арбериез наукалэн куронэзъя эскеронлы. Туннэ нуналлы тужгес бадӟым сюлмаськон гуртысь культура юртъёс, клубъёс пумысен. Соос ӵем дыръя шутэтскон юрт гинэ ӧвӧл, лыдӟиськон, кино возьматон инты но, музей но, киужъёсъя ӧнер юрт но луо. Но шаерысьтымы 2500 пала гуртъёсын ваньмаз ик таӵе луонлык ӧвӧл на, соин ик та ласянь ӵапак иназ луо автоклубъёс, соос пичи гуртъёслэсь улонзэс шулдырто. Шаерамы улӥсьёслэн шоро-куспо уждунзы сюрслэсь вылынгес ке, культура удысын ужасьёслэн со эшшо но улын - 982 манет: библиотекарьёслэн - 839, музейёсын ужасьёслэн - 792, клубъёсын - 547. Валамон, таӵе уждунэн толэзьысь толэзе пырпотыны капчи ӧвӧл. Культура удысын уждунэз будэтон выльысь, пӧртэм амалъёс утчасько. Трос интыосын асьсэ кужымен коньдон потто ни. Тани кибашлыослэн юртъёссы кылем арын 180 киуж понна 180 сюрс манет басьтӥзы. Искусствоя учреждениослэн ужзы но шӧдскымон умояз. Театръёс ар куспын 21 выль постановка дасяллям. Билет вузанъя, учкисьёслэн лыдзыя, гастрольёсы потанъя план ятырен быдэстэмын, пайда поттон, 1999-тӥ арен ӵошатыса, 200 процентлэсь трослы будӥз. Россиысь 80 регион пӧлын асьмелэн концерт, спектакль пуктӥсьёсмы 19-тӥ интыын, пайда поттонъя - 22-тӥ интыын. Таяз аре культура удысын лэсьтӥськонлы 180 миллион манет висъямын луоз. Чутыса ке но, азьлань мынӥськом, басьтэм вормонъёсмылы шумпотӥськом. Ас удыссылэн кызьы азинскемез сярысь веразы культурая министрлэн воштӥсьёсыз А. Т. Христофоров, С. М. Мутерко но Л. М. Масловская. Кенешонлэсь ужзэ радъяз культурая министр Л. И. Пескишева. Т. ПЕТРОВА. Ӧтиськом кенешонэ Приволжъе федеральной округлэн стратегической эскеронъёс ортчытонъя центрез 20-тӥ феврале Правительстволэн юртаз кенешон ортчытэ. Конференция ужалоз С. В. Чикуров кивалтэм улсын. Вераськон мыноз улосвылъёслэн туала вакытэ социальной но экономической азинсконзы пумысен. Кенешонэ пыриськозы республикалэн кивалтон ёзъёсаз ужасьёс, интыысь кивалтӥсьёс, общественной но политической организациослэн представительёссы, учёнойёс, экспертъёс, консультантъёс, журналистъёс. Конференция усьтӥськоз 12 часын Правительстволэн кенешонъёс ортчытъянъя залаз. Удмурт Республикая Валтӥсь федеральной инспекторлэн пресс-службаез. СЮЛЭМШУГЪЯСЬКЫТӤСЬ ЮГДУР Удмурт базар Рынокен улонлы адямиос дышизы ни, тросэз магазинъёсы уг ик ветло, октӥсько базаръёсысь. Татын угось дунтэмгес. Городъёсысь, черкогуртъёсысь но мукет улосъёсысь бадӟымесь но пичиесь вузкарон интыосы вузкарисьёслэн тачак палаткаос пуктылэмын. Одӥгез сыӵе пичи базар интыяськемын Ижысь Карл Маркс урамлэн но Широкий переулоклэн сэргаз. Кышномуртъёс одӥг пыдысьтызы мукетаз тэтчаса, киоссэс пелляса сыло. Шуныт кышетъёсын, гын сапегъёсын, зӧк шубаосын дӥсяськылэмын. Азязы, кесям картон коробкаос вылын, картофка, кешыр, кушман, йӧл, кубиста тыремын. Аспӧртэмлыкез та пичи базарлэн со гинэ: ваньмыз сямен вузкарисьёс - удмуртъёс. Котомкаосын, мешокъёсын ветло соос татчы ас хозяйствоязы поттэмзэс-будэтэмзэс вузаны. Гуртысь нылкышноос уксёлы ӟудэменызы тани тазьы кынмыса сылоно луо. Вазьгес султыса, скалзэс кыско но вузъёсынызы Иже мынӥсь автобусъёсы вырӟо. Вокзалысен трамваёзь кыдёкын ӧвӧл, вузаськон инты доразы ӝог гинэ вуо. Тыро мешокъёссэс сюрес вамен гинэ поттыны кыле на. Ветлонэз секыт ӧвӧл, соин но гуртоослы кельшем таиз базар. Но берло дыре кышномуртъёслэн йыр вадьсазы пильмаськиз, Октябрь РОВД-ын ужасьёс шунтэм интыысьтызы соосты улляны выро. Нырысетӥ феврале пересьёсыз автоматъёсын но курдатъяса ветлӥллям. Брангуртысь кышномуртэз картэныз ӵош милицилэн ёзаз нуиллям. Ӝыт, ужан нунал ортчем бере ини, ма карыны тодытэк лэзиллям. - Ми лушкам вуз ум ӵектӥське ук, ваньмыз ас тыршеменымы поттэмын, - шуэ Юськиысь пенсионер Анастасия Анатольевна Рысова. - Ма понна милемыз милицие пытсалод? Азьвыл сылэм интыямы чыры-пыры вузъёслы, сиён-юонъёслы палаткаос пуктылӥзы, милемлы инты ӧз кыльы ни отчы. Соин вылӥгес ӝутсконо луим. Табере татысь Буммаш яке Сенной базаре кошкыны косо. Нош отын гуртысь лыктэмъёслы дас метр инты кельтэмын. Сенной базарез лэсьтыны гуртоос валэн ветлӥзы, табере отын кыӵак "сьӧдъёс" кузёясько. Сюлэм вӧсь луэ - милемлы инты ӧз кыльы. Вылаз ик, отын пӧртэм гыжкалъёс ветло. Донгаськемъяд кисыысьтыд уксёдэ поттӥзы ке но, уд шӧды. Буммаше ке, одӥг транспортысь мукетаз пуксьылыса мыноно луэ - секыт. Та тыриськемъёсты тыбырад сокеме кыска ай! Утыр ик, вераськон куспамы, басьяськисьёс дугдо, кочон кубиста, кык йыр сьӧд кушман басьтӥзы. - Колхозын уксёез адӟыны уг луы. Алигес кызьы ке кык сю манет сётӥзы. Мар соин карод? Одӥг газ баллон сю куамын, сю витьтон манет сылэ, - вера Изгуртысь Маргарита Николаевна Беленская. - Картэ ӧвӧл, огнам куинь нылпиез будэтӥсько. Маин ке соосыз сюдоно-дӥсяно, соин тазьы вузаськоно луэ. - Вузды бырытозь, кӧня сылоно луиськоды? - юасько. - Ку кызьы. Куддыръя кык час куспын ваньмыз кошке, нош мукет нуналэ вузэд бырыны уг вала. Йӧл чалякгес кошке. Пластмасса посудае пуктылэм йӧлэсь юась луиз. - Скалды кунян ваиз-а? Йӧлды ческыт-а? Посудалэн пытсэтэ йӧлэз кӧня ке кисьтыса, басьяськись веръяз. Кельшиз. Кыксэ тыро посудаез дас одӥг манетэн басьтӥз. Мынам юалляськеме калыкез бугыртӥз, вераськонмы ялан милициысь улляны ветлӥсьёс вылэ выже. Басьяськисьёс но ас мылкыдзэс верало: - Эн кошкелэ, милемлы туж кельше вузды, юрт вӧзын ик. Омырен шоканы потон сямен чылкыт гурт сиён-юонъёсты басьтӥськод. - Кытысь ке лыктэмъёс кузёясько, нош асьмелы, музъем вылын тыршисьёслы, вузкарон инты но уг сюры. Гуртоос но басьяськисьёс огкадь малпанзэс, сюлмаськемзэс верало. Изгуртысь Татьяна Петровна Гущиналы вазиськеме бере кылӥ: - Ваньмызлэн татын сылӥсь кышномуртъёслэн бӧрдонъёссы огкадесь, мынам но кӧт висёнэ сыӵе ик. Кык нылпие, одӥгез училищеын дышетске, мукетыз алигес бызиз, юрттӥськытэк уг луы. Ужасько почтальонын, окладэ сизьым сю манет. Уг тырмы. - Сенной базаре тӥ потыны соглаш-а?- юасько мылкыдзэ. - Ӧвӧл. Инты понна отын куамын манет басьто. Нош ми ог-кык ведра картофка, кӧня ке кисьтэм йӧл (творог), йӧл ваиськом. Соку вань вузаськеммы мынон-ветлонлы, сылон интылы гинэ быроз. Озьыен, номырлы ветлыны, номырин улыны луоз. Маин ӧз кельше вузаськись гуртоос Ижысь Октябрь РОВД-лы, милиционеръёслэн валэктэмзы ӧз поты. Аккредитациды ӧвӧл шуизы но, азям ӧсэз ворсазы. Малпасько, ужась но тыршись калыкез кышкатъяса улытозь шумпотоно, инмысь юрттӥськемез возьматэк, соос асьсэос кӧт тырон амал шедьтӥллям шуыса. Со понна гуртоосты ушъяны гинэ луоз. Гуртысь сиён-юонлы город калык но шумпотэ. О.КОЖАНОВА. Сяська - укно дурын Нылпи - тымет пыдсын Кылем арын Удмуртиын, шудтэм учыре шедьыса, 90 пинал бырыны шедиз (сюрес вылын луэмъёсыз но криминал лыдэ басьтымтэ). Со сяна, 38 пинал улонысь кошкиз ас мылкыдызъя. Тросэз соос пӧлысь гуртын уло вал. Котькуд учыръя прокуратураын ужасьёс эскерон ортчыто, мугзэ утчало. Кылем арын нылпиослэн быремзы понна 7 кивалтӥсь вылэ уголовной уж ӝутэмын, дышетон ёзъёсын ужась 12 мурт юн алэмын. Но кызьы возьматӥзы эскеронъёс, тросаз учыръёсы нылпиос бырыны шедизы анай-атайёслэн янгышенызы. Гуртысь ужпӧрзы пӧлы выйыса, пичи пиналзэс чаклатэк кельто. Озьы кылем гужем Завьял ёросын азбарысь ву гопе усьыса выиз кык аресъем нылаш. Анай-атайлэн лумбыт ӵоже тодаз но ӧз лыктылы нылзылэсь кытынзэ тодыны, шӧдӥськизы ӝытазе гинэ. Гужем нуналлы быдэ радио, телевизор пыр ивортыло, тыметъёс, шуръёс дурын чакласькыны курыса. Но арлыдоос, оломарлы оскыса, пичи пиналзэс огназэ яке ачиз кадь ик кужымтэм эшъёсыныз пыласькыны лэзё. Кылем гужем озьы 26 пинал выйыны шедиз. Палэнын ке, палэнын, но пиналзэс ышто син азязы но. Озьы Селта ёросысь кык аресъем Дима гулбече мынӥсь электроез борды йӧтскыса кулӥз. Шыръёс йырйыса езэз изъянтӥллям вылэм, нош корка кузёослэн тодазы но ӧз лыктылы сое эскерыны. Мукетаз учыре анай-атай кышкытлыкез адӟыса вылысь но палэнтыны ӧз дыртэ. Озьы 16 аресъем пизы кулӥз, сете магнитофон лэзьыкуз (езэз бордын вилкаез вылымтэ). Нош кӧня вераллямын ни анайёслэн вож нуныоссэс ӝокатъямзы сярысь. Озьы ке Но, муртлэн янгышез визь уг лу, шӧдске. Анай вож пиналыныз артэ кӧлыкуз, суйзэ гинэ гадь вылаз поныса, нуны ӝока. Та учыр Можга ёросын вал. Анайёссы пачкатыса озьы кулӥз эшшо куинь нуны. Эшшо кык нуны кулӥз, гулбече усьыса. Мӧйыос бӧрсязы ӧсэз ке ворсасалзы, пиналъёссы соосты туннэ но шумпоттысалзы, вылды. Вазиськем потэ анай-атайёслы: пиналды понна тӥ кыл кутӥськоды, ӵемысь тӥ гинэ быгатӥськоды соосты шудо яке шудтэм карыны. Тани али тодӥськоды-а, кытын тӥляд пиналды? О.Сюрсина, Удмурт Республикаысь Прокуратураысь отделэн кивалтӥсь. Чур бугор Скал ворттылӥз "Жигулиен" Ульяновск улосысь ньыль лушкаськисьёс кунян ваёно скалэз кызьы ке машинае чуртнаны быгатӥллям но куанер пудоез сюрестэм интыетӥ 60 иськем ворттылытӥллям. ... Лушкаськисьёс но пӧртэмесь луо. Тужгес сукъёсыз маялтэм пудоез интыяз ик вандо но юдэсъёслы корало. Мукетъёсыз животэз жалям каро, гуртоос тодо уго, животэз жаляд ке, со но тонэ гажалоз, лякыт возиськоз. Манька скал кунян ваёно вал. Соин ик нокытын ужасьтэм ньыль воргоронъёс сое дуноенгес вузаны малпазы. Николаевъёслэсь скалзэс поттӥзы уин (та семьяын воргоронъёс ӧй вал бере, соос номырлэсь ӧз кышкалэ). Манькалэн нырысетӥ кунянэз луоно вал, соин ик вуоно анай ассэ лякытэн возиз. Поттыны поттӥзы, но ульчаысен скал ваменъяськыны ӧдъяз. Медаз бӧксы шуыса - скалъёс бӧксо ук! - ымзэ лякиськись пленкаен, скотчен, ӵоксазы. Собере, пыдъёссэ керттылыса, вужгес "Жигулие" чуртнаны кутскизы. Кызьы верало табере ӝегатэмъёс, скалэз "Жигулилэн" бер пуконъёсаз "интыяны" капчи уж вылымтэ - я сюръёсыз пыкъясько, я ноныосыз люкето, ма, собере берпалыныз укыр бергатэ. Сюро йырзэ укно пасетӥ поттоно луиз. Кызьы но озьы интыязы ик. Кызьы тэризы машинае ньыль воргоронъёс но скал - туж паймымон. Ведь улэп скалэз самолётэ гинэ но чуртнаны туж секыт. Кӧня ке час ӵоже Манька пассажир луыса ворттылӥз. Нош кызьы меда гибэдэдэшникъёс ӧз адӟе сое? Манькаез азьвыл ик басьтыны мылкыд карись воргорон воксё абдраз, кабинаысь мычиськем скал йырен машиналэсь матэктэмзэ адӟыса. Но самой секытэз вылэм на азьпалан - куанер скалэз табере автомобильысь поттыны уг луы ни, пыкъяське. Кызьы но озьы поттэмзы бере, лёлёен сюдӥсез кык "ӟенеликен" вузазы. Но лушкаськисьёсты ӝоген кырмизы. Паймоно кадь, скаллы номыр ик ӧз луы. Сое азьвыл кузёезлы берыктӥзы. Зэм, кунянэз вазьгес вордӥськиз, но тазалыкез номыр ӧвӧл. Кызьы тодмо луиз, та воргоронъёс кемалась выро ни вылэм скалъёсты лушкан ужен. Табере соос кулэезъя кыл кутоно луозы. Нош кызьы меда интыяло со быдӟа скалэз огшоры "Жигулие"? Бӧрысь валамон луиз - машиналэн ӧсъёсыз вить вылэм. Йыртэмасьёс (йырзы Николай Сафоров) нырысь басьтӥллям бер пуконъёссэ, скалэз пыртӥллям берысьтыз ӧсэтӥ. Пыдъёссэ керттылӥллям кӧтыз борды. Скал медаз лекаськы шуыса, йырзэ укное поттӥллям. Озьы ортчиллям 60 иськемез. Валамон ини, скал напсэ но, кизерзэ но кабинае лэзиз. Но гуртысь адямиос юрдӥсесь ӧвӧл... *** Та вӧзы тани мае ватсаны кулэ на: скаллэн кузьдалаез 180 сантиметр, "ВАЗ- 2102" автомашиналэн - 406, пасьталаез 195 сантиметр, автомобильлэн - 161, нырысетӥезлэн ӝуждалаез 160 сантиметр, автолэн - 146, пудолэн секталаез 300 кило, машиналэн багажаз 50 кило груз тэре. Сад-бакча чотын Секыт йырвисён вуиз сад-бакча возисьёслы но. Нош ик со герӟаськемын дуно кортъёсын. Кылем сӥзьыл куазь умой улӥз бере, лушкаськисьёс сое одно ик лыдэ басьтӥзы. Тани Завьял ёросысь Вуж Кены гурт сьӧрысь "Урал" сад-бакчаысь ог 45 пала юртъёс качамын вал. Кызьы тодмо луиз, "Газель" автомашинаен вуыса, лушкаськисьёс нуиллям теплицаосты, алюминийлэсь тусьты-пуньыосты, бакъёсты, вареньяен банкаосты, электроинструментъёсты. Одӥг кылын вераса, ваньзэ, ма шеде ки улазы. Та вакытэ лушкаськисьёс чалмытскизы - сюресъёс ӧвӧл. Нош город котырысь кооперативъёс сярысь ке верано, соослы маза уг сёто. Дуно кортэз бичасьёс нюжтӥськыса но вуо теплицаос дуре. Тани сельхозвыставка шуон вӧзысь "Вишенка" бакчаысь но уно гинэ теплицаос ышыны вуизы ни. Но та арня ӵоже Индустриальной ёрос милиция ӝегатӥз 30 аресъем бомжез Эрикез но 39 аресъем Василиез. Эфедрин н усыкмытэ Завьялово палась Пироггуртын но усыкмытӥсь суретъёсын вузкаро ни вылэм. Эфедрин эмъюмез наркотиклы пӧрмытыны дышиллям 32 аресъем Снежана но Якшур гуртысь пукылэм мурт Олег. Снежаналэн гуртысьтыз шедьтэмын на эшшо уно гинэ эфедрин но сое дасянъя мукет ватсэтъёс. Тазалык шоры чиньы пыр уг учко Ижевске вуылӥзы Германиысь клиникаослэн ассоциациысьтызы валтӥсь адямиос. Соос Удмуртия но Германия куспын тазалыкез утёнъя ӵош ужан амалъёс ӵектӥзы. Кызьы веразы немецъёс, Германиысь клиникаос Европаысь тужгес устоосыз пӧлы пыро. Эмъяськыны шуыса, татчы уно калык вуэ. Висисьёслэн сюлмаськонъёссы пӧртэмесь. Тросгес вазисько сюлэм, пуш ёзви висёнъёсын, лек пыктосъёсын курадӟисьёс. Туберкулёз, лулсэр висёнъёсты сяна, Германиын вань черъёслэсь эмъяло. Немецъёсын пумиськонэ люкаськем журналистъёс но эмъясьёс пӧлысь кин ке со юаз: СПИД-лэсь но-а, пе, дорады эмъяськыны луэ. - Бен. СПИД-лэсь но. Валамон ни, макем лекгес висён, сокем сое эмъян дуногес сылэ, - валэктӥзы пумитаз. - Басьтӥськысалмы, дыр, туберкулёзэн но, лулсэр висёнъёсын но нюръяськыны. Но нырысетӥзэ эмъян понна нимысьтыз куронъёс пуктэмын. Нош лулсэр висёнъёсын курадӟисьёсын ужан пыкъяське врачлэн но висисьлэн куспазы огкыл шедьтыны быгатымтэзы борды. Озьы ке но, немец кылэз тодымтэзы но, виза, страхование пумысен бызьылонъёс но медам кышкатэ адямиосты, оскыто немецъёс. Клиникаослэн ассоциацизы ваньзэ тае ас вылаз басьтэ. Со ик юрттоз переводчикъёсын но, кулэ луись эмъюмъёсын но. Кылиз на тодыны, кӧня ваньмыз та сылэ? Но пумиськон дыръя та юанлы ӝот-ӝот валэктон озьы ик ӧз кылӥськы кадь. Валатсконо гинэ луиз, укыр дуно. Соинтэк-а адямиосты доразы келян ужпум бордысь немецъёс соку ик выжизы оборудование сярысь вераськонэ. Соос Удмуртилы рентгенъя, пинь эмъянъя аппаратура, висисьёсты утялтонын кулэ луись арбериос, эмъюм ӵекто. Студентъёсты стажировкае кутон сярысь но кылпум поттылӥзы. Ӧйтӧд, но пумиськонэ люкаськем эмъясьёслэсь таиз но ӵектон мылкыдзэс сокем ӧз бугырты кадь. Пумиськон йылпумъяськем бере ӟудэм журналистъёслы Германилэн ӵектонъёсыз пумысен лад-лад валэктон сётӥз ни республикаысь тазалыкез утёнъя министр С. Г. Шадрин. - Немецъёслэн ӵектонъёссы тунсыко, но ассьмелы вормонтэм. Соослэн дунъёссы укыр вылӥын. Бен, асьме шаерамы но узыр адямиос шедёзы, но туж ӧжыт. Оло, туж кулэ дыръя предприятиос, организациос ас ужасьёссэс Германие эмъяськыны ыстозы ик. Но мон уг вера, Россиын но эмъясьёс немецъёслэсь лябесь шуыса. Визьмо, ас ужзэс тодӥсь-валась адямиосмы ӧжыт ӧвӧл. Бен, шугъяськонъёс кылдыло ик вужмем оборудованиен сэрен. - Германия ӵектэ ук выль аппаратура басьтыны? - Бен, таиз ласянь, оло, пыр-почгес малпаськоно на! Уго асьме эмъяськонниосысь оборудование берлозэ 1995-тӥ-1997-тӥ аръёсы басьтэмын ни. Табере со куашкан- бырон калэ вуэмын. - Сергей Геннадьевич, кызьы малпаськоды, вуоз-а сыӵе вакыт: Удмуртия висисьёссэ кун сьӧры келяно уз луы ни, вань висёнъёсын ас кожаз нюръяськыны быгатоз? - Республикаысьтымы стационаръёс, поликлиникаос урод уг ужало. Дорамы мукет городъёсысь, улосъёсысь висисьёс эмъяськыны лыкто. Нош шер пумиськылӥсь висёнъёсъя шаерамы нимысьтыз эмъяськонниос пуктонэз ӧвӧл, малпасько. Одӥг-кык висисез Москвае яке мукет бадӟым городъёсы эмъяськыны келяны дунтэмгес усёз. - Тӥляд малпамдыя, маин герӟаськемын Европаын улӥсьёслэн, асьмемын ӵошатыса, шергес висьылэмзы? - Соос асьмелэсь ӧжыт уг висё. Но висёнзэс ас дыраз дугдытыны быгато. Медициная вань куронъёсты чакласа, немецъёсыд ик арлы быдэ медосмотръёс ортчо. Соин ик висён муре пыӵаса уг вутты. Жаляса верано, асьмеос та ужпум шоры чиньы пыртӥмыгес учкиськом. Э. Кумачева. 01 ивортэ Телефонтэк тылэз уд вормы Январь толэзе шаерамы 175 пол тылпу пуромылӥз, соин сэрен 1,5 миллион манетлы изъян лэсьтэмын. Тылӝуэ сюрыса бырыны шедиз 21 адями, 19-эз сӧсырмиз. 39 пол тылпу потаз юыса чакласькытэк чильым кысконэн йырин. Югдур пӧртэм ӧвӧл таяз толэзе но. 6-тӥ феврале тылпу потӥз Ижысь Фурманов ульчаысь 35-тӥ юртын. Мугез - юэм йырын тамак кыскон. Ӵын пӧлын ӝокаса быриз ачиз корка кузё. Та нуналэ ик тылпу омырскиз Ижысь Богдан Хмельницкий ульчаысь 42 номеро юртын. Соин сэрен изъянмыны сюриз улон корка но ваньбур. Дэри ёросысь Березовка посёлокын пуромиз электроез бордысь. Сое кысыку, секыт югдур кылдӥз. Артэ эштосъёсысь тылпу кысон машинаос ӧз вуэ, малы ке шуоно, одӥгаз машинаын бензинэз вылымтэ, мукетыз сӧриськемын, нош куинетӥ хозяйствое ивортыны ик уг луы - телефон ӧвӧл. Озьы тӥни, гуртын улӥсь адямиос но юртъеръёсазы ӝуаса быро, нош ёросэн кивалтӥсьёслы нокыӵе но ӧвӧл. Шимес учыр луиз кылем арняе Пичи Пурга ёросысь Гожня гуртын. Ӵукна гурзэ аратыса, нылкышно бускельёсыз доры потэ. Ӵынэз шӧдыса, со нылпиоссэ потыны пыре. Укмыс толэзьем нылзэ поттыса вуэ, но солы больницаын но юрттыны ӧз быгатэ ни. Эшшо кык пиналэз - кык аресъем Боряез но куинь аресъем Настяез коркась шӧйын поттӥзы ни тылпу кысӥсьёс. Мискиньёс, тыллэсь кышкаса, диван сьӧры ватскиллям. Ӧз лу ни утьыны ваньбурез но. Пуромем тылпуэз кысыны куинь машина но ӧз быгаты. Вазиськиськом анай-атайёслы, дышетӥсьёслы: валэктэ пиналъёслы тылпу дыръя кызьы астэ возьыны, ӝуась коркась ӝоггес потыны кулэ, ӵын вӧлмыны кутскем бере, адями ӝока. АРХИВЫСЬ МАТЕРИАЛЪЁСЪЯ Удмуртия ХХ дауре 1976-тӥ ар Выль арысен Удмурт АССР-ысь югдурез утёнъя ёзъёс кутскизы выль паспортъёс сётъяны. Соосты нырысь ик басьтӥзы 16 арес тырмем егитъёс. 15-тӥ январе усьтӥськиз Удмурт областной партийной конференция. Со укмысэтӥ пятилеткалы йылпумъянъёс лэсьтӥз, азьланезлы ужрадъёс чаклаз. Феврале ортчиз КПСС- лэн ХХВ съездэз. Отын пусъемын вал, укмысэтӥ пятилеткалэн ужпумъёсыз быдэстымтэ шуыса. Съезд юнматӥз 1976-тӥ�1980-тӥ аръёслы дасэтӥ пятилеткалэсь планзэ. Таиз пятилетка ялэмын вал ӟечлыкъя пятилетка шуыса. Со экономикаез ӝутыны но калыклэсь улон-вылонзэ умоятыны кулэ вал. 9-тӥ апреле Воткинсклы сётэмын КПСС-лэн ЦК-езлэн, СССР-ысь Министръёслэн Кенешсылэн, ВЦСПС-лэн но ВЛКСМ-лэн ЦК-езлэн киысь кие вошъяськись Горд Знамяез, нош Воткинскысь машина поттӥсь завод пусъемын Ленин орденэн. 1976-тӥ ар понна нефтен узыр интыосты ӝог шедьтэмзы понна, СССР-лэн кун премиезлэн лауреатэз луизы Удмуртиысь нефть утчасьёс. Лэсьтӥськонын паськыт инты басьтыны кутскиз бригада подрядэн ужан амал. Ижевскысь ЭМЗ-ын кутскиз литейной производстволы выль корпус ӝутон. Ижевскысь ик юзмыт юонъёс поттон заводын вуттэмын производственной корпус. Отын одӥг часкын куать сюрс бутылкаосы юзмыт ву лэзьяны луэ вал. Лэсьтӥськонъя 2 номеро управлениысь коллектив Ижевскысь М.Горький урам но Широкий переулок сэргын нырысьсэ 16 этажъем улон корка пуктыны кутскиз. Октябре столицамылэн Центральной площадяз выль музыкально-драматической театрлы инъет лэсьтыны кутскемын. Глазовын кутскемын кыкетӥзэ тылобурдо вордон фабрика лэсьтыны, отын арскын куать миллион бройлер курегъёсты будэтыны чакламын вал. Йылпумъяськиз Воткинскысь сӥль поттон заводэз выльдӥзы но паськытатӥзы, собере отын нуналаз куать тонна колбаса поттыны кутскизы. Удмуртиысь промышленностьын вал таӵе адӟем карымонэз. Ижевск автозаводлэн конвейерысьтыз васькиз тямыс сю сюрсэтӥез автомобиль. Нырысетӥ Май праздник азьын Болгарие келямын уно "Иж-комби" автомашина. Чакламъя ужаны ӧдъяз Глазовысь "Химмаш" завод. Солэн продукциез ар ӵоже келяськиз шаерысьтымы 150 городэ, со сяна - Турцие, Алжире, Польшае, Монголие, Иранэ но Кубае. Августэ Сарапулысь Дзержинский нимо заводын поттэмын миллионэтӥез ожон. "Ижмаш" пусйиз кык юбилейзэ. 30 ар тырмиз мотоциклъёс поттыны кутскем дырысеныз, 40 ар - нылкышноослэн нырысьсэ мотопробеге пыриськемзы дырысен. Та юбилейёслы сӥзьыса, 30-тӥ июле ортчиз нылкышноослэн мотоциклэн кыкетӥзэ кыдёке ворттылонзы. Октябре Григорий Егорович Верещагинлы вордскемез дырысен 125 ар тырмиз. Со вал Императорлэн ӟуч географияя обществоезлэн членэз, Мултан ужъя судлэн экспертэз, этнограф, фольклорист, дышетӥсь но священник. Удмуртилэн культурая улоназ озьы ик вал трос пусйымонэз. Москваысь Горький нимо урамысь адӟытон залын 15-тӥ ноябрьысен 5-тӥ декабрёзь нырысьсэ ортчиз "Удмуртиысь художникъёс" экспозиция. Отчы ваемын вал 26 авторлэн 97 ужез. "Современник" издательствоын печатласькиз Роман Валишинлэн "Инвожо уйшоре но пиштэ" повестез. Воткинскысь П.И.Чайковскийлэн музей-юртаз возьматэмын театр костюмъёс. Соос ваемын вал отчы СССР-лэн Бадӟым театрысьтыз. Со дӥськутэн Чайковскийлэн произведениосызъя спектакльёсын шудӥллям тодмо артистъёс Павел Лисициан, Пантелеймон Норцев, Майя Плисецкая. "Леннаучфильм" киностудия Воткинскын кутскиз "П.И.Чайковский. Симфония - жизнь" научно-популярной телефильм пуктыны. СССР-ысь Связья министерство поттӥз Воткинскысь П.И.Чайковскийлэсь музей-юртсэ возьматӥсь маркаен конверт. Спортын нош ик азьпалан вал асьмелэн тодмо Галина Кулаковамы. Австриысь Инсбрук городын ХИ Тол олимпийской шудонъёсын со басьтӥз зарни но бронза медальёс. А.Мельницына, Удмурт Республикаысь ЦДНИ-лэн директорезлэн воштӥсез. Москваын "Удмуртиысь художникъёс возьматонэ пыриськемъёс. Ӟечкылан Пичи Пурга ёросысь Вуж Монья гуртын улӥсь анаймес Никитина Мария Захаровнаез ӟечкыласьком вордӥськем нуналэныз. Юн тазалык, капчи но задор мылкыд, ужаз - азинсконъёс. Котьку шудо лу, анаймы! Лена но Оля нылъёсыд. Менладшинёслэн семьязы вордскем нуналэныз ӟечкыла Раиса Исаковна Залоговаез, солы шудо-буро улон но ӟеч мылкыд сӥзе. Выляз дауре - вормонъёсын Алигес Вавож ёрос администрацилэн паськытатэм коллегиезлэн кенешез ортчиз. Отын районлэн ортчем арын ужамезлы йылпумъянъёс лэсьтэмын. Ужрадэ пыриськизы предприятиослэн, организациослэн но учреждениослэн, колхозъёслэн, эштосъёслэн, гурт кооперативъёслэн кивалтӥсьёссы, школаослэн директоръёссы, гурт администрациослэн йыръёссы. Мынӥз номыре ватытэк кенешон. Бадӟым пумиськонэ куноос но ветлӥзы: Удмурт Республикаысь Кун Кенешлэн Тӧроез Игорь Семёнов, Удмурт Республикаысь Правительстволэн тӧроезлэн воштӥсез Михаил Назаров, Кун Кенешлэн Вавож ёросъя депутатэз Виталий Соловьёв, калыкез дышетонъя министр Любовь Захарова, гурт удысъя но сиён-юонъя министрлэн нырысетӥ воштӥсез Василий НАГОВИЦЫН. Вераны кулэ, вылӥ кивалтӥсьёс юнме шорысь Вавож палъёсы ӧз вуылэ, дыр. Уго ёрос берло аръёсы республикаямы азьмынӥсьёс радэ потӥз. Со возиське гурт удыс чотынгес. Ю будэтон, пудо вордон ваньбурез сизьымдон процентсэ сётэ. Миым район картофка будэтонъя нырысетӥ интые потӥз, ю-нянь будэтонъя - куинетӥе. Али вавожъёс нырысетӥ интыез возё йӧл кысконъя. Кызьы пусйиз ёрос администрацилэн йырызлэн воштӥсез Геннадий Шубин, милям, пе, "Удмуртия" колхозмы гинэ, пе, йӧлзэ вуза быдэс Селта ёрос мында. Коллегиын вераськисьёс быдэс ёрослэсь улон-вылонзэ, сюлэмшугъяськонъёссэ, шумпотонзэ кыре поттӥзы. Александр Рябов, Вавож ёросысь гурт удысъя управленилэн кивалтӥсез: - Ми туэ но тыршом пудолэсь лыдзэ кӧнялы ке но йылэтыны. Тужгес бадӟым саклык висъяськом кунян ваёно скалъёслы. Озьы ик ум кулэстӥське гыроно-кизёно музъемъёсмес, нош "кыкетӥ няньлы" муосмес паськытатыны кенешим. Малпасько, туэ но лыдпусъёсмы кылем арынлэсь улӥын уз луэ. Миым хозяйствоос вузазы 739 тонна ю тысь, 1836 тонна картофка. Пудо вордон удысэз но, ю-нянь будэтонэз но юнгес азинтыны могӟет пуктэ техникалэн вужмемез. Шуом, "Удмуртия", Мичурин нимо, "Колос" хозяйствоосын техниказылы бадӟым саклык висъям сяна, луонлык шедьто на выльзэ но басьтыны. Мукетъёсыз сярысь озьы шуыны уг луы. Тани "Яголуд", "Рассвет", "Искра", "Лыстем", "Волипельга" эштосъёсын берло 4-5 ар ӵоже одӥг выль техника но ӧз басьтэ. Со 90-95 процентлы вужмемын ни. Та вакытэ районамы вань 467 трактормы, 160 автомобильмы, 117 комбайнмы, картофка копан 33 но пудо сиён дасян 35 комбайнмы. Меӵак вераны кулэ: машинно-технической парк тулыс бусы ужъёслы дась ӧвӧл на. Та арлэн кутсконаз милям вал 233 тонна соляркамы но 65 тонна бензинмы. Нош со кулэ 885 но 238 тонна. Тулыс бусы ужъёсты азинлыко ортчытон понна кулэ луоз 12 миллион манет: 7 миллионэз эстӥськон басьтыны, 5 миллионэз - техникаез тупатъяны но выльдыны. Миым вузамын вал 14 сюрс 196 тонна йӧл. Районмыя солэн шоро-куспо наплыкез луиз 3,79 процент. Сое лыдэ басьтыса ватсазы на эшшо 761 тонна. Хозяйствоосты басьтоно ке, йӧллэсь наплыксэ возьмато таӵе лыдпусъёс: "Луч" - 3,96 процент, "Удмуртия" - 3,81, "Колос" - 3,74, Калинин нимо - 3,84. Нош "Удмуртия" колхозын йоллэн наплыкез вал самой вылӥын - 4,11 процент. Ортчем арын йӧлмес нырысетӥ сортэн вузамы 91 процентсэ. Уноез хозяйствоос солэн ӟечлыкез сярысь тросгес сюлмаськыны ӧдъязы. Нош салкыматэм йӧлэз вузан будӥз 315 тонналы. Озьы ватсаса барыш но вуиз. Шӧдӥське йӧллэсь ӟечлыксэ эскеронъя месячникъёслэн но пайдазы. Пудо гидъёс тупатъясько дыраз, та ласянь шуг-секытъёс ӧвӧл. Одӥгез умойтэм: хозяйствоосамы ичигес гужем лагерьёс. Соин ик скал фермаос "шутэтскытэк" ужало. Нош выль гидъёс берло аръёсы воксё уг лэсьтӥсько ни, шуыны луоз. Зэм, миым ферма но кунян ваён отделение пуктэмын "Правдаын" гинэ. Азьланяз тросгес ужано ӟеч выжы пудо уськытон бордын. Солэсь выжызэ йылэтоно искусственной амалэн бызьытыса гинэ. Ӵем дыръя асьмелэн кылдо тодмотэм выжыысь пудоос. Ӟеч выжы пудо уллёлэн пайдаез но шӧдӥське. Тани Мичурин нимо колхозын кылем арын котькуд скалэсь 4512 кило йӧл кыскизы (1999-тӥ арынлэсь 285 килолы уногес), "Колосын" - 4417 (+367), "Удмуртиын" - 4119 (+181). Ньылез хозяйствоос 3 сюрс килолэсь уно йӧл басьтӥзы. Нош со дыре ик "Искраын" йӧл скалъёссы йӧл сётӥзы 1910 килограмм гинэ. Районамы сӥль вузамын 2238 тонна, яке 103 процент. Сое вузанзэс будэтӥзы ваньмыз сямен хозяйствоос. Пудоос суткаяз шорлыдын 529 граммлы куаизы. Нош "Удмуртиын" та лыдпус вуиз 669 граммозь, Мичурин нимо эштосын - 677 граммозь. Туэ пудоез толйытон урод уг ортчы. Ёросын котьку йыр пудолы дасямын 21 центнер сиён. Ньыляз хозяйствоын гинэ курозы уз тырмы. Но ми сое палэнысь ум ворттэ, асьмелэн ик тырмоз. Вавож районъя лыдъяське 17 хозяйство, со пӧлысь миым пайда басьтыса ужаз дасэз. Огъя пайда басьтэмын 30 миллион манет. Ёрос возиське Мичурин нимо, "Удмуртия", "Колос" хозяйствоос чотынгес. Мукетъёсаз югдур секытгес. Нянь будэтон сярысь ке верано, районмы та ласянь урод уг адӟиськы кадь. Нош хозяйствоосты ке басьтоно, воксё мукет суред пуксе. Миым гектарлы быдэ 14,4 центнер ю тысь кутсамын (1999-тӥ арын сярысь 4 центнерлы уногес). Няньзы тужгес удалтӥз "Удмуртиын" (25,6 центнер), со бӧрсьы мыно Мичурин нимо колхоз (22 центнер) но "Колос" (20,1 центнер). Нош со дыре ик "Рассветын" басьтэмын 5,4 центнер гинэ, "Искраын" 6,6 центнер, "Волипельгаын" но "Ниваын" быдэн 7 центнерен. Быдэс республикая ке учконо, вавожъёс урод уг адӟисько кадь, ми бере кылиськом алнашъёслэсь но пичи пургаослэсь гинэ. Ваньмаз ик хозяйствоосын агротехникалэсь куронъёссэ быдэсъясалзы ке, лыдпусъёс умоесьгес луысалзы. Техника тырмымтэен, арысь аре йылэ уже кутӥськымтэ музъемъёслэн быдӟалазы. Бусыосын аля кышкыт жуг-жаг - шепотурын (пырей). Со гурт удыслы туж бадӟым но бадӟым изъян вае. Аналтэм бусыос сюрс гектаръёсын лыдъясько. "Кыкетӥ нянь" гектарлы быдэ копамын 106 центнер. Со республикая самой вылӥ лыдпус. Нош картофка тужгес но удалтӥз "Колосын" - 207 центнер. Мичурин нимо колхозын со усиз 134 центнерен, Каменной Ключын - 18 центнер. Кемаласен тодмо ини, картофкаен бадӟым барыш басьтыны луэ шуыса. Но кытын но отын та культуралы кулэезъя саклык уг висъяськы. Специалистъёс ӵемысь чӧлско минерал сылалъёс тырмымтэлы, нош асьсэос будос сярысь умой уг сюлмасько. Картофкаез будэтон - секыт уж. Сое дыраз ӝутъяд, дыраз жуг-жагзэ урид ке, котькыӵе аре удалтэм картофка басьтыны луэ. Ум сюлмаськиське возён сярысь. Туэ толалтэ куазь кезьыт ке но ӧз улы, "Искраын" картофказэс кынтӥллям. Берло дыре ялан ӧжытгес вераськиськом музъемлэсь удалтонлыксэс ӝутон сярысь. Нош со арысь аре начарме, висе. Ялан ичигес поттӥсько минерал ватсэтъёс но кыед. Но со дыре ик куд-ог хозяйствоосын фермаоссы кыедын уяло. Кылем арын бусыосы гектарлы быдэ поттэмын 37 кило минерал сылалъёс но 2 тонна кыед. Нош музъемез ӟечгес возён понна асьмелы ӧжытсэ кулэ 70 кило удобрение но 7 тонна кыед. Зэм, кытын но отын музъемзэс умоятыны тыршо, трос аръем турынъёсты, куроез гырыса. Но трос аръем турынъёслы музъемъёсты паськытатонлыкез одӥг кышкытлыкез вань, одӥгаз аре солэсь кидыссэ басьтӥськом, мукетаз - ум. 2000-тӥ арын умояз чырс музъемъёсы известь поттон. Туж трос на фосфорен начар муос. Гурт удысын валтӥсь инты басьтэ кидысэз дасян но кисьтон. Татын но арысь аре сюлмаськонъёс уг быро. Огъя ёросмыя кидыс тырмыт дасямын. Кисьтэмез пӧлысь 73 процентэз куронъёслы со тупа, со пӧлысь 48 процентэз 1-тӥ но 2-тӥ классъемесь. Кидысэн тужгес но ӟеч ужа "Луч". Отын 100 процентэз ик кидыссы 1-тӥ но 2-тӥ классъемесь. Берло дыре ми тужгес но уно саклык висъяськом йыдылы (31 процент) но чабейлы (29 процент). Пумен кулэстӥськом сезьыез но кӧжыез. Кылем арын толйись юосты кизим 5433 гектар вылэ, яке планлэн 73 процентэз. Нырысь ик со озьы луиз кын улэ гырон бордын урод ужамлэсь. Со ужез асьмеос котьку ик берлолы кельтӥськом. Тани "Волипельга" толйись юосты арлы быдэ 650-700 гектар вылэ кизе ке вал, 2000-тӥ арын та лыдпус 350 гектарозь усиз. Со ужен но ӝегазы на. Утчано ке, сюресъёс усьтӥсько Геннадий Шубин, ёросысь администарцилэн йырызлэн экономика ужпумъёсъя воштӥсез, дас ар ӵоже вал районысь гурт удысъя управленилэн кивалтӥсез. Тани ма со вераз "Кенеш" журналлэн туэ потэм нырысетӥ номераз: "...Милям но куд-ог колхозъёсмы, пудозэс, мукет ваньбурзэс вузаса, капчиен гинэ улыны турттӥзы. Мар бен, вузазы, уждун сётъязы, нош собере, гольык кылизы но, асьсэды шонере поттон, калык азьын чеберъяськон понна, кивалтӥсьёсты курланы ӧдъязы: соос, пе, асьмеды таӵе калэ вуттӥзы. Нош дыр возьматӥз: озьы ужаса, куашкан калэ гинэ вуод. Ёросмылэн кивалтэтэз но та сярысь индылон кылъёссэ вералляз. Собере ӟеч возёсъёсысьтымы визьмо кивалтӥсьёсмылэсь ужамзэс но чаклатэк ӧз улэ ук. Соос уго дисциплиназэс чаклало, азьтэмъёссылэсь, юисьёссылэсь, ужан радэз тӥясьёслэсь кылзэс юало, вань удысъёссэс азинто. Соин ик улонзы но мукет интыосын кадь ӧз начармы. Сыӵе нодлыкоосмылэсь ужамзэс адӟыса, капчи сюрес утчасьёслы но визь пырыны кутскиз. Ляб ужасьёс азьвыл "Вай!" гинэ шуыны дышемын вал. Огпол соослы юртто, кык пол - ваньмыз пыдэстэм вышкые музэн кошке. Ужасьтэм муртлы уго дурыныз ке но кисьтад, югдур уз тупатскы. Ӵапак со кураськыны гинэ дышемъёсын йырин ик гуртэз курлаллязы, отын улӥсьёсты кыӵак азьтэмъёс радэ пыртылӥзы. Нош милям визьмо кивалтӥсьёсмы, гурт возёсъёсъя кивалтэтысьтымы ӧнерчиосмы чурыт кылзэс веразы, макем тросгес йӧл поттӥд, кунлэсь сокем бадӟымгес юрттэт но висъяськоз. ...Ужмес ӟеч-ӟеч ӧм радъялэ ке, асьмелэн будэтэм ю тысьмы ялан эстӥськон басьтыны гинэ кошкоз. Югдурез тупатон амалъёс утчаны тыршоно. Но та сярысь малпаськыса ужасьёсмы ӧжыт на. Быдэс элькунамы но. Мынам чакламея, гурт удысъя министерствомес асьмелэн кивалтэтамы тышканы гинэ быгато. Мукетъёссэ кышкатон понна, лэся. Министрез ялан вошъяло. Ма, кызьы озьы ужалод. Вузкаронъя министрез вошъяны луэ, нош гурт удысъя кыл кутӥсьсэ дас но, кызь но ар исано ӧвӧл, мед со ужалоз. Ёросъёсын но югдур пӧртэм-а? Мон Вавож ёросысь гурт удысъя ёзын ужаны кутскытозь, татын дас ньыль ар куспын сизьым валтӥсь агроном воштӥськиз. Иське, котькудӥз быдэн кык ар гинэ ужаса вуттӥз. Валтӥсь агроном одӥг арзэ ёросысь ужъёсын тодматске гинэ, кыкетӥ араз ужаны кутске но, солы мукет инты утчано ини". Геннадий Шубин (коллегиын вераськемезлэн люкетэз): - Валля арен ӵошатыса, миым промышленностья вузъёсты поттон быдэстэмын 146,5 процентлы. "Вавожагрохим" огазеяськонын со будӥз 9,7 поллы, "Сельстрой" огазеяськонын 4 поллы, сюресъёс лэсьтонъя но тупатъянъя управлениын - 3,5 поллы. "Вавожагрохимын" югдур тупатскиз сое банкротэн ялэм бере. Ужъёс секытэн мыно Какмож леспромхозын. 1999-тӥ арен ӵошатыса, татын вузъёс поттэмын 68,2 процентлы гинэ. Пердприятие пуксемын вуззэ басьтӥсь ӧвӧлэн но транспортъя кулэяськонъёслы дунъёс чутрак будэмен. Югдурез тупатон вылысь, администрация предприятилэсь социальной удыссэ ас вылаз басьтӥз. Виктор Абашев, ёросысь администрацилэн йырызлэн социальной ужпумъёсъя воштӥсез: - Районамы калыкез дышетон арысь аре умоя. Кутӥське предметъёсты мургес дышетон. Тросгес луо школаез медален йылпумъясьёс. Пиналъёсмы ӵемгес вормисе потыло республикаын ортчем олимпиадаын. Али Горд шундые но Водзимоньяе школаос пуктыны чакласьком. Книгаос басьтыны висъямы 150 сюрс манет. Бюджет чотын тыршисьёслэн пунэм тыронъёссы пытсамын электрокужым понна. Сюлэмшугъяськытэ калыклэн тазалыкезлэн уродмемез. Миым ёросамы вордскиз 240 нуны, кулӥз 256 адями. Уногес луизы сюлэм висёнъёсын курадӟисьёс, сӧсырмемъёс. Али 46 мурт висе туберкулёзэн. Кык семьяын шараямын вал кӧткыль висён (дизентерия). Районэ кемалась пуктоно ни вал паласькись висёнъёсъя отделенилы выль юрт. Таиз сылэ ини 1937-тӥ арысен. Калыклэсь тазалыксэ утёнын тыршисьёслэн толэзьлы шоро-куспо уждунзы вал 1 сюрс манет. Павел Вотинцев, ёрос администрацилэн йырызлэн лэсьтӥськонъя но архитектурая воштӥсез: - Лэсьтӥськон ужъёс быдэстэмын 11 миллион 750 сюрс манетлы. Кылем сӥзьыл йылпумъямын Тыловыл-Пельга школаез лэсьтон. Азьланьтӥське ёросысь культурая юртэз но со вӧзы искусствоосъя школаез ӝутон. Кужмогес но вылӥ ӟечлыкен ужаны ӧдъяз "Сельстрой" АО. Коньдон тырмыт висъяськиз ке, 2002-тӥ арын йылпумъяны луоз Зяглуд- Каксяысь школаез. Со та вакытлы липет улэ пыртэмын ни. Азьланьтӥське газ кыскон, ар ӵоже со пыртэмын 64 юртэ. Кылем арын чагыр эстӥськон вуиз "Луч" колхозэ. Но огъя районэз басьтоно ке, газэн шунтӥсько ай 18 процентэз улӥсьёс. Улон капчи ке но ӧвӧл, калык улон юртъёс лэсьтэ. Али 326 семья ас кужыменыз корка пуктэ, эшшо 77-езлы хозяйствоос чотын ссуда висъямын. Лэсьтӥськон тужгес но умой мынэ Мичурин нимо колхозын. Аркадий Юшков, "Удмуртия" колхозлэн тӧроез: - Паймод но бырод та улонлы! Возьыт мыным ӵош ужась эшъёсылэсь. Огъя странамыя калыклэн улон-вылонэз умоя кадь, нош гурт ялан берлань чигна. Арысь аре ичигес но ичигес коньдон висъяське. Гурт удыслы пумен льготаосты вандыло. Нош электрокужым понна кӧня дун тыроно. Али йӧлмес копейкаен вузаськом, нош бюджетэ со манетъёсын вуэ ни. Льготаосты одно ик кельтыны кулэ. Куке промышленность ӝутскыны кутске, гурт удыс куашканы ӧдъя. Озьы ке но, странамы мукет кунъёсысь кылем-мылем вузъёсты вае. Монэ туж сюлэмшугъяськыто будӥсь пиналъёсмы. Ку асьмеос соосты ӟечгес сюдыны кутском? Асьмеос соосты выжытӥзы вандӥськом ук. Соос гуртысьтызы школае сиён нуыны гинэ но кепырало ни. Нош пинал ваёно анайёс. Милям районамы 10 нылкышно пӧлысь 9-эз пинал вайыны Ижевске мынэ. Шуом, Калыкез дышетонъя министерстволы висъям коньдон бергаса-бергаса вуэ Тазалыкез утёнъя министерствое - пиналъёсты эмъяны. Миллионъёсмы кошко электрокужым но шуныт понна тыронлы. Коньдон коньдон мед лэсьтоз. Нош уксё юрттон понна гинэ ке висъяське, сое асьмеос соку ик сиыса быдтом. Людмила Прокашева, "Авангард" гурт кооперативлэн кивалтӥсез: - Бен, та ужын песятайёсмы но курадӟылӥзы, та вакытэ озьы ик улӥськом. Улонэз котьку но утьылӥзы нылкышноос. Тани куинь ар кивалтӥсь луыса ужасько ни. Лыктыкум югдур кыӵе секыт вал! Соку скаллы быдэ 1400 кило йӧл кыскылӥм. Концентратъёс ӧй вал, кӧс ӟег куро вылын улӥм. Гурт удысын кивалтон опытэ ӧй вал бере, пӧртэм литература но лыдӟоно луиз, мукет кивалтӥсьёсын но кенешылӥ. Озьы 1999-тӥ арын скаллы быдэ йӧл кысконмы 3000 килограммозь вуиз. Нош миым силос дасямы куинь арлы тырмымон. Кулэ вылэм пудо сиён утялтон комбайн. Мукет техникамылэн но ужан дырыз ортчемын ни. Паймыто дунъёслэн тупамтэзы. Со диспаритет шуонзы кекатыса возе ук. Уг луы шат электрокужым понна пунэм тыронъёсты быдтыны? Нош милям калыкмы ужась, капчизэ возьмаса улыны дышемын ӧвӧл. Весь малпасько хозяйствоме бере кылёнысь поттон сярысь. Нош кызьы? Ярам, ӟеч бускельёс вань. Туж тупаса, ог-огмылы юрттыса улӥськом Можга ёросысь "Россия" колхозэн. Вылӥ кивалтӥсьёслы курон одӥг гинэ: "Юрттэлэ!" Иван Перевощиков, "Луч" колхозлэн тӧроез: - Асьмелэн сыӵе бадӟым странамы, нош уноез улӥськом кураськисьёс чотын. Кулэмъёс вордскемъёслэсь уногес луизы. Сиён-юон поттон пумен кулэсме. Вунэтӥм музъемен ужан сярысь. Номыр ум лэсьтӥське со пумысен. Дунъёслэн аспӧртэмлыксы паймытэ. Со кылем арын вить пол будӥз. Таиз пумысен правительство мед сюлмаськоз ини. Отын ӟеч тодо ук югдурез. Кызьы дасяськиськом тулыс бусы ужъёслы? Малпасько но йырсиос ик пештыр ӝутско. Пумен аналтӥсько бакча сиён будэтонэз. Висёнъёс сярысь. Пудо висёнъёсын нюръяськон нуим, нош адямиез вунэтӥм. Табере куд- ог висёнъёс адямилэсь пудолы палало ни. Василий Наговицын, Удмурт Республикаысь гурт удысъя но сиён-юонъя министрлэн нырысетӥ воштӥсез: - Ёрос республикаямы одӥгез огсыр ужасез луэ. Со нырысетӥ интые потӥз картофка будэтонъя, минерал сылалъёс поттонъя. Сю скаллы быдэ 93 кунян басьтэмын. Районын трос гинэ ни асьсэлэн "академикъёссы". Колхоз тӧроосты сярысь верасько. Михаил Назаров, Удмурт Республикаысь Правительстволэн тӧроезлэн воштӥсез: - Районлэн ужамезлы дунъет сётэмын. Со республикая шӧдскымон вылӥе ӝутскиз. Та вакытэ элькунамы пайда басьтыса ужа 208 хозяйство, изъян адӟыса ужа 243 эштос. Мар вылез луоз туэ? Лизингъя ватсаса басьтыны чакламын быдэн 100 трактор но 100 комбайн. Соос МТС-ъёслы висъямын луозы, музъемлэсь быдӟалазэ лыдэ басьтыса. Ма кароно ляб хозяйствоосын? Нырысь ик воштоно кивалтӥсьёссэс. Собере огазеяно кужмо хозяйствоосын. Яке мыноно банкротъя системае. Игорь Семёнов, Удмурт Республикаысь Кун Кенешлэн Тӧроез: - Нырысь ик Президентлэн но Кун Кенешлэн нимынызы ӟечкыласько! Пумиськон возьматӥз, ужаны быгатӥськоды шуыса. Пӧрмиз номыре ватытэк шара вераськон. Ваньмыз син азе яркыт пуксиз. Вань тӥляд кужмо хозяйствоосты но, лябъёсыз но. Нош малы тӥ етӥнэн уд ужаське? Зэм, етӥн ишкон машинаосмы но ӧвӧл ни. Оло, со борды басьтӥськыны бер ӧвӧл на? Оскисько, туэ но вань будэтэмзэ утлятоды шуыса. Малы асьмеос улӥськомы? Вуоноез понна. Кытын ужъёс аналтэмын луизы ке, производство усиз ке, ваньмызлэсь кылзэ юн юалом. Ойдолэ, валче ужаломе. Николай БАЙТЕРЯКОВ. Удмурт Республикаысь Кун Кенешлэн Тӧроез И.Н.Семёнов но Вавож ёрос администрацилэн йырыз Т.В.Иноземцева. Коллегия ужан дыръя. Н.ГЛУХОВЛЭН туспуктэмъёсыз. Миллионъёсыз сисьмиллям Со коньдон ваньмыз сямен сисьмысал ни, со сярысь тодӥсь но ӧй луысал. Но солэсь кузёзэ Белоруссиысь "Химволокно" предприятилэн директорезлэсь воштӥсьсэ Виктор Надеждинэз шӧдӥзы, со кузьым басьтылэ шуыса. Предприятиез азьланезлы осконэн ужа ке но, сокем узыр уд шуы. Татын ужасьёслэн уждунзы сокем ӧжыт но, сокем трос но ӧй вал. Экономика удысын йыружъёсын нюръяськонъя ёзэ ивор вуиз: предприятие кунгож сьӧрысь банкъёсын миллион долларъёсын коньдон возе. Кытысь соос? Органъёсын ужасьёс Надеждинлэн улон интыяз утчаськыны мынӥзы но 50 сюрс долларзэ (США) но 70 сюрс марказэ (Германия) шедьтӥзы. Коньдон чакламзыя юнме кылле вылэм, кызьы верало, "уг ужа". Миллионерлэн уксёез аслыз но пайда ӧз вай, мукетъёсызлы но сётыны ӧз малпа. Бӧрысь утчаськон азьланьтэмын вал солэн эшшо кык коттеджаз но Москваысь квартираяз. Эскероно кариськизы гаражзэ но. Отысь 30 но 50 сюрс долларен билетъёссэ шедьтӥзы. Зэм, 30 сюрс баксъёс пӧлысь ӝыныез сисьмыны вуэм ни вылэм. Озьы узыр адями нырысетӥ ватосэз сярысь вунэтэм ни вылэм. О.УЛЕВИЧ. Пичиысен дышетыса Воткинскысь 6 номеро школаын 5-тӥ классын ик ини дышетыны кутскизы физикаез но химиез. Та класс начальной школаын дышетэмын вал кужмоятэм программая. Выль курс кылдытэмын дышетӥсьлэн А. Е. Гуревичлэн ӵектэмезъя. Солэн авторъёсыз туртто, нылпиос пичиысен физикаез но химиез, улонысь учыръёсазы адӟеменызы ӵошатыса, мургес валаны мед дышозы шуыса. Выль амалъя дышетон курс куиньлы люкыны чакламын. Нырысетӥез - 5-тӥ-6-тӥ классъёс понна. Та пиналъёсты физикалэн но химилэн инъетэныз тодмато, озьы инкуазез умойгес валаны дышето, огшорыесь техника арбериосын мылысь-кыдысь вырыны луонлык сёто. Вераськон чик уг мыны нылпиосты та секытэсь предметъёсын жадьымоназы дышетон сярысь, программа чакла та предметъёслы яратон пыӵатыны. Та классын эскерон но лабораторной ужъёс ортчытэм бере тодмо луиз: нылпиос физикаен но химиен туж тунсыкъясько но соослы чаклам программаез капчиен валало. П. Николаев. ӜӦК ВЫЛАДЫ - ЧЕСКЫТ СИЁН Шаерысьтымы сӥль комбинатъёс но колбаса лэсьтӥсьёс пӧлысь нимысьтыз висъяське усьтэм амалэн тыршись "ИМКО" акционер огазеяськон. Со бен бадӟым луэменыз гинэ ӧвӧл, данэ потэмын ческыт колбаса лэсьтэменыз но ужын выль амалъёс кутэменыз. Тани магазинъёсысь адӟыны луэ вакуум амалэн пакетэ тырем-вандылэм колбасаез но ӵынатэм сӥлез. Басьяськисьёслы со кельше, сыӵе сиён кема уг сӧриськы, ческыт шӧмыз но уг быры. Татын кык кибашлыос Людмила Колганова но Валентина Смолина лулысь-сюлмысь тыршо. Нырысетӥез кышномурт комбинатын 30 ар ужа ни, эшез - 18 ар. Кык чырмыт нылкышноос котькуд нунал 150-лэсь уно сыӵе пакетъёс лэсьто, аппаратсы чылкыт ужа, нош асьсэос ювелиръёс кадь сиёнэз чебер вандыло. Котькытын уж пӧзе, адямиос мылысь-кыдысь тыршо. Со вамышлы быдэ шӧдӥське-адӟиське. Тани колбаса тырон участокын куатетӥ арзэ мастер луэ ни Елена Старикова. Со вань ужъёсты валаса радъя-бергатэ. Участок пичи ӧвӧл, куамын мурт ужа. Соос кык сменаен тыршо. Котькудӥз азьын одӥг ужпум сылэ - сӥлез, чеснокез но мукетсэ валаса тыроно. Угось огазеяськон ГОСТ-я гинэ колбаса лэсьтэ. Тани полуавтоматэз ӟеч ужатэ Тамара Садакова. Опытэз бадӟым, татысь кошкылӥз ке но, выльысь комбинатэ лыктӥз. "ИМКО" ческыт сиён поттэ бере, со котьку пыриське пӧртэм адӟытонъёсы но ярмаркаосы. Басьяськисьёслы сӥль сиёнъёссы кельшо. Соин ик данакез продукцизы пусъемын уно дипломъёсын но медальёсын. Огазеяськонлэсь колбасазэ вылӥ дунъяз "Автралиана Дискавери Маркет" ("АДМ") калык куспо огазеяськон (ассоциация). "ИМКО"-лы сётэмын "2000-тӥ арлэн предприятиез" приз. Мукетыз шумпотымон ивор предприятие вуиз кылем арын ноябре. Удмурт Республикалэн кылдэмез дырысен 80 ар тырмон азьын Ижысь экспоцентр Йӧ дворецын ортчытӥз "Сиён- юон-2000" адӟытон. Отын "Украинская" сорт колбасалы сётэмын И степенё диплом но зарни медаль. Бен, таӵе наградаос инмысь уг усё. Соос басьтэмын быдэс коллективлэн тыршеменыз- сюлмаськеменыз. Кылемзэ арез азинлыко йылпумъяса, тазэ но умой мытӥз. Татын озьы ик трос кужымзэ, быгатонзэ сётэ валтӥсь директорлэн воштӥсез Сергей Максимов. Со огазеяськонын кемалась уг ке но ужа, производствоез ӟеч тодэ, калыкен огкыл ӝог шедьтэ. Соин ик Сергей Анатольевич коллективын гажано адями, солы ужасьёс юн оско. Тани солэн сюлмаськеменыз ик алигес Ижысь Соцгород микрорайонын "ИМКО" аслэсьтыз фирменной магазинзэ усьтӥз. Азьланьын соос уката тросгес мед луозы но кунгож сьӧрысь колбаса но, сӥль но, оло, ичигес басьтомы. Соин ӵош ик огазеяськонлэн колбасаез котькуд магазинын мед луоз. Г.РОМАНОВ. Валтӥсь директорлэн воштӥсез Сергей Максимов. Колбаса тырон участокысь мастер Елена Старикова. Ӵынатэм сӥлез но колбасаез пакетэ тырисьёс Людмила Колганова но Валентина Смолина. Туспуктэмъёсыз В.Беломорскихлэн. Пулэн чылкыт шокамез 90-тӥ аръёслэн кутсконазы шаерамы котькытын ик киужен вырись усточиослэн юртъёссы усьтӥськылыны ӧдъязы. Та удыслэсь бере ӧз кыле кизнеръёс но. 1993-тӥ арын кибашлыослэн юртсы кылдӥз. Татчы сюрес шедьтӥзы котыр гуртъёсысь ӧнерчиос, киужлы усто адямиос. Одӥгез соос пӧлысь - Вуж Бодья гуртысь В.Н.Кузнецов. Владимир Николаевичлэн пулэсь вӧлэм-чильпам горшокъёсыз, тусьтыосыз синмаськымон пӧрмылӥзы, Ижевскын но мукет интыосын выставкаосын возьматъяськылӥзы. Мӧйыослэсь адӟем карыса, егитъёс но табере будо. Светлана Зиле кызьпу туен ужа, солэсь бере уг кыльы Светлана Данилова но, пӧртэм лянэсъёс пӧрмытъя. Николай Утюгов ведраос лэсьтэ. Александр Гурьянов пуэз олокызьы но чильпа-чеберма. Кизнеръёслэсь быгатонлыксэс та толэзе адӟыны быгатӥськом Ижевскысь Сивков урамын Кибашлыослэн юртазы. Чеберлыко салонэ пырем бере ик син шоры йӧто Наталья Редуновалэн куролэсь кутам арбериосыз: валэн гырись (отын ик чуньы), кутэсэн бертӥсь адямиос, гадьзэс мычем атасъёс. Николай Мамаев, шӧдске, бадьпу ньӧрлэсь пуконъёс лэсьтыны яратэ, вольытэсь пӧрмиллям соос. Та адӟытонын ик - Людмила Кутергиналэн куиськемъёсыз. Кызьпу туйлэсь суредъёс но туж тунсыко. Огъя вераса, Кизнерысь кибашлыос тыршиллям вашкалаослэсь ки ужан амалъёссэс азинтыны, асьсэ сямен адӟытыны. Мукет ёросъёсын, шуом, Дэбес, Игра, Пичи Пурга палъёсын ӵошатыса, таос, оло, сокем ушъяськыны уг быгато на, но соослэсь адӟем каро, дышетско. Выль ар азьынгес доразы куное ӧтьылӥзы Вуж Моньялась эшъёссэс: быдэс шаерамы но палэнын тодмо усточиез Николай Тарасовез но солэсь юрттӥсьёссэ. Та пумиськон кемалы вунонтэм кылиз. Табере асьсэос но Пичи Пурга ёросэ потыны дасясько. Ижевскын Кизнерысь киужъёсын адӟытонэз усьтон кибашлыослэсь мылкыдзэс ӝутӥз. Котькуд усточиен тодматыса, ушъян кылъёссэ ӧз жаля кивалтӥсьсы Валентина Расомахина. Ужъёссы пумысен ӟеч кылъёссэс веразы аспал дано адямиоссы Аркадий Малков, Аверьян Христофоров, Елизавета Петрова но Василий Ванюшев. Чеберлык ласянь эскерись эксперт советлэн кивалтӥсез профессор Владимир Владыкин шуиз: - Кизнеръёс трос уже куто пуэз. Со вашкала дырысен удмуртлэн тужгес яратоно арбериез, аслаз чылкыт шокаменыз бордаз кыскись. Вашкалаос сямен ик таос тыршиллям сыӵе лянэсъёс-сарбаос лэсьтыны: отын йӧл уг чырса, сюкась кезьыт возиське. Со дыре ик бадьпу ньӧрлэсь кутам арбериос античностез тодэ вайыто... Озьы тӥни Кизнер пал усточиос асьсэлы вож сюрес усьто, вашкала выжыослэсь дышетскыса. Т.ПЕТРОВА. Культура Дуннеысь вань пиос ке тазьы Вожзэс медаз вае нылкышноос, но пиосмурт хорлэсь чебергес номыр ӧвӧл, шуэ Удмурт кун филармонилэн художественной кивалтӥсез Валерий Митрофанов. Малпасько, соин тросэз соглаш луозы. Пыр-пыр тӧдьы дэремъёсын веськрес, чебер пиослэн дискант но альт куараен М. Глинкалэсь "Славься"-зэ кырӟамзы лулпушез бугыртыса кисьтӥське, вунонтэм кыле. Нош мар пӧрме тенор но бас ке итӥсько? С. Прокопьев, "Многая лета". Высшой математика! Шумпотымон соиз: шаерамы улӥсьёс быгато асьсэлэсь сыӵе праздник кузьманы. Угось республикаысьтымы Культурая министерство арлы быдэ "Поющее мужское браство" фестиваль ортчытъя. Туэ со луоз сизьыметӥзэ. Праздник сӥземын Атыкай музъеммес утисьёслэн нуналзылы, пырисько но отчы пиосмурт кырӟасьёс гинэ. Шумпотымон соиз, азьвыл аръёссэ таӵе празднике кӧня ке коллектив сяна ӧз люкаськылы ке, туэ соос дас укмыс ни. Пӧлазы профессионалъёс но, районъёсысь самодеятельёс но. Вить коллектив лыктэ палэнысь. Екатеринбургысь, Пермьысь, Чайковскийысь, Казаньысь. Кык нунал ӵоже (24-25 феврале) дас укмыс хор кырӟалоз Операя но балетъя театрын. Кырӟалозы шуисько но, номыр уг шуиськы кадь. Бен, бен, угось соос кырӟалозы зэмос крезьгурез! Тани кыӵе репертуар ӵекто тӥледлы Праздникез дасясьёс: пичи пиослэн хорзы (дискант, альт) 1. С. Рахманинов - "Тебе поем" "Святой Иоанн Златоустлэн литургиысьтыз". 2. М. Глинка - "Славься". пинал пиослэн хорзы (дискант, альт, тенор, бас: 1. Д. Портнянский - "Слава Отцу и Сыну" "Куинь куараё литургиысь" (г.1) 2. В. Комраков - "Вечный Огонь". (пиосмуртъёслэн хорзы (тенор, бас) 1. Л. Сливухин - "Мужское братсво". 2. А. Рубинштейн - "Ноченька" ("Демон" операысь) огазеям хор (дискант, альт, тенор, бас) 1. П. Чесноков - "Да исправится молитва моя". 2. А. Новиков - "Дороги". 3. С. Прокофьев - "Многая лета" Крезьгурез ӧжыт ке но валасьёс тодо, макем шуг верам произведениосты кырӟаны. Соин ик дунъясьёс но шедёзы, дыр. Нош дунъялозы-а кырӟасьёсты кыӵе ке жюри? Уз. Праздник конкурс ӧвӧл, соин ик сое радъясьёс ас азязы сыӵе ужпум уг пукто. Валерий Митрофановлэн но Культурая министрлэн воштӥсезлэн Аверьян Христофоровлэн малпамзыя, таӵе фестивальёс юртто выль коллективъёсты шараяны, егит пиослы Атай музъемзэс гажан мылкыд пыӵатыны, соосты искусство пала берыктыны, палэнысь коллективъёсын кусып тупатыны но хоръёсын ужась специалистъёслы юрттэт сётыны. З. Рябинина. Вераме потэ ӟеч кыл Дышетӥсе ялан егит потэ Ачим пенсиын ни, нош нырысетӥ дышетӥсе весь тодам. Виктор Константинович Северьяновез Кизнер район тодэ, нош тыжмаосыз данъясько. Войналэн кыкетӥ араз со сӧсырмыса бертӥз. Пуктӥзы асьме гуртэ дышетӥсе. Виктор Константинович уж борды сюлмысь басьтӥськиз. Зӥбыт сямызлы ваньмыз синмаськизы. Али ке но син азям нырысетӥ урокез. Выль дышетӥсьмылэсь востэмзэ шӧдыса, одӥгез йӧнтэм нылаш, партаос вискы потыса, "концерт" возьматыны кутскиз. Ачиз но ӧз ик сакты, кызьы со парта сьӧраз ӵыж-горд луыса пуксиз. Быдэс класс шыпытаз. Дышетӥсьмы нырысетӥ уроказ ик ӟеч возьматӥз дисциплина пуктыны быгатэмзэ. Отӥяз ини дышетсконмы ас ӧртӥз кошкиз. Милемын ужан вискытӥз ик Виктор Константинович дышетскиз Можга педучилищеын, бӧрысьгес Ижевскысь пединститутын. Усто ужась дышетӥсез партие куто, визьнодо луэмзэ чакласа районамы потӥсь газетлы редакторе пукто. Семьяез улӥз Бемыжын ик, улон инты ӧз сётэ. Кӧня искьем люказ меда со Пыжмыйылысен Бемыжозь, гуртъёслэн виссы дас тямыс иськем ке? Дораз вуылӥз уйшорлы гинэ. Газет поталляз арня нуналэ но, субботае ужзы берозь кыстӥскылӥз, нош арня нуналэ уйшор бере потыса нош вамышъяз ужаз - понедельник ӵукна со ужаз вазь ӵукна ик вуылӥз. Бемыж районэз ворсамзы бере, партия сое нош ик ыстэ Удмурт Бемыже школалы директоре. Гуртамы ньыль классозь гинэ дышето вал, Виктор Константинович сюлмаськемъя, малпазы 8 классъем школа усьтыны. Кӧня бызьылоно луиз солы выль юрт пуктон понна - ачиз гинэ тодэ, дыр. Выль школаяз кӧня ке ужаса потӥз пенсие. Но ужзэ азьланьто нылпиосыз - пиез ёросысьтымы Саркуз гуртын дышетэ, нылыз - Возьпумын. Яратоно дышетӥсе али мӧйы ни, дышетӥсько ӟеч кылъёсме но тау каремме вераны. Чырткем улэ на, Виктор Константинович. Тӥ мыным трос аръёс талэсь азьло кадь егит потӥськоды. Н. Гусева. Можга город. ПРАВИТЕЛЬСТВОЫН Сётэм кылъёсты табере быдэсъяно Толон люкаськылӥз Правительствое пырисьёслэн, Президентлэн но Правительстволэн Аппаратазы пырисьёслэн, министерствоосысь но ведомствоосысь кивалтӥсьёслэн кенешсы. Сое нуиз Александр Волков. Президент нырысь ик тодматӥз выль указъёсын. Андрей Гальцин пуктэмын Президентлэн но Правительстволэн Администрацизылэн кивалтӥсезлы воштӥсе. Со интые, Удмурт Республикаысь Егитъёсын ужанъя кун комитетлы тӧрое, юнматэмын Гальцинлэн азьвыл воштӥсез - Андрей Лещинский. Правительстволэн Тӧроез Юрий Питкевич ивортӥз туннэ быдэсъяно ужпумъёсты. "Ижмаш" огазеяськонын, Воткаысь радиотехнологияя тӥрлык поттон заводын но ракета эстӥськонэз сутонъя завод ӝутонын мыно азьвыл чаклам ужрадъёс. Завьялово ёросысь "Восточный" совхозын кылдэм югдурез эскере Арбитражъя суд. Михаил Калашниковлэсь музейзэ лэсьтонэ коньдон висъяны кулэ. Шуг-секытъёс кылдо музеез кинлэн ваньбуреныз лыдъян ласянь. Тазалыкез утёнъя министр Сергей Шадрин мадиз паласькись висёнъёсын нюръяськон сярысь. Соос пӧлын 25 процентэз - пыэд (грипп). Берло дыре асьмелы бадӟым кышкытлык кылдытӥз менингит. Миым декабрьысен соин черлаз 29 мурт, ньылез кулӥз нырысь нуналэ ик, кыкез - берлогес. Кыль вуэмын данак районъёсы. ВИЧ (СПИД) шуге-леке вуттӥз 400-лэсь ятыр адямиез. Эшшо сю мурт пуке пытсэт сьӧрын. 96 процентэз уродэ усизы наркотикъёсын сэрен. Сыӵеос азьвыл сямен ик трос Глазовын, Балезиноын, Ярын. Берло дыре сюлэмшугъяськытэ Сарапул. Туберкулёз но сямзэ воштэ: сое антибиотикъёс уг вормо ни. Министр рос-прос дугдӥз нылпиосты сюдон вылэ. Александр Волков тазалыкез утён пумысь вазиськиз ивор вӧлмытӥсьёслы. СПИД-эн висисез йӧнатыны арскын кулэ 20 сюрс доллар. Сыӵе коньдон ӧвӧл. Соин ик калыклы нуналмысь пыӵатоно черлэсь курдан но утиськон мылкыд. Россиысь улосъёсын (субъектъёсын) но Белоруссиен ӵош ужанлы сӥзиз веранзэ кунсьӧр кусыпъёсъя министр Виктор Викулов. Минск татысь басьтэ сьӧд металл, эстӥськон, станокъёс, ож тӥрлык. Кусыпъёссэс юнмато Удмурт кун университет но Белорус кун университет, Ижысь Техникая кун университет но музон вузъёс. Москваын усьтэмын "Удмуртия" вузкарон юрт. Пӧртэм тупанкылъёс (соглашениос) гожтэмын Татариен, Башкириен, Марий Элэн, Пермь областен. Огкылысь ужанэ тросгес министерствоос мед пыриськозы. Александр Волкво дэмлаз: - Та ужен сюлмогес вырыны кулэ Промышленностья, Вузкаронъя но калыклы юрттэт сётонъя министерствоос. Асьме республикаысь ваем вузъёсты москваос соку ик басьто. Ярато сиён-юонэз, дӥськутэз, электротӥрлыкез. Кун Кенешлэн Тӧроез Игорь Семёнов куриз ог-огдэ гажаса ужаны. Со чакламъя, депутатъёс сессия дыръя пумиськоно луо Правительствоысь адямиосын, районъёсысь администрациослэн йыръёсынызы. Сессия дыръя депутатэз олокыӵе ужрадъёстӥ кысканы уг яра. Законъёслы инъетъёс (проектъёс) дасян ласянь Правительство чупресгес мед бергасал. Нюлэс хозяйствоын законъя кузё ӧвӧл, сикез олокин но кораса палэнэ нуэ, нош кылзэ юаны нокинлэсь. Александр Волков бадӟымгес саклык висъяны куриз районъёсы потанлы. Азьвыл сётэм кылъёсты быдэсъяны дыр вуиз, пусйиз со. Кылсярысь, нюлэскысь посёлокъёсъя. Игра ёросысь Меньйылын, кылсярысь, сюрслэсь уно калык. Чакламын 250 интыен школа инъяны. Нош леспромхоз ӧз ке ужа, посёлок быроз, нокыӵе школа кулэ уз луы. Ваньзэ лэсьтоно, сое улӟытон вылысь. А.Петров. Тудвулы дасяськон Удмурт Республикаысь Правительстволэн постановлениеныз городъёсысь но ёросъёсысь администрациослэсь йыръёссэс косэмын тулыс тудву кошкон вакытлы али ик дасяськыны, кулэ ужрадъёс кутыны. Кылдытоно кышкыт учыръёсты палэнтонъя нимысьтыз бригадаос, чаклано шуге-леке шедем адямиослы юрттонъя но дуно арбериосты тудву улэ шедемлэсь утёнъя ужрадъёс. Ву тудӟон вакытлы дасяськонъя нимысьтыз комиссия кылдытэмын. Соин кивалтоз Правительстволэн Тӧроезлэн воштӥсез Виктор Савельев. Доноръёс йылозы Республикаын кутэмын "Вирлэсь биопрепаратъёс" нимысьтыз программа. Солэн бадӟым люкетэз сӥземын вирзэс сётыны мылкыд карисьёслэсь лыдзэс йылэтонлы. Тазалыкез утён удыслы ар ӵоже кулэ луэ 24 сюрс литр вир. Нош али сое 14,5 сюрс литр сяна дасяны луонлык ӧвӧл. Таӵе югдурез лыдэ басьтыса, Правительстволэн Президиумез постановление кутӥз. Соя кылдытыны чакламын шудтэм учыръёс дыръя но шуге-леке шедемъёлы ӝегатскытэк юрттон понна доноръёсты возён. Соос 50 сюрс кузя луозы. Тупатэмын вир сётӥсьёслы нуналаз 40 манет коньдон тырыны. Озьы ик йылаз- пумаз вуттоно вир басьтонъя станциын тупатъян-выльдон ужъёсты. Удмурт Республикалэн Президентэзлэн но Правительстволэн пресс-службазы. "Единство" - огазеяськон понна Ортчем арня пумын "Единство" партилэн политсоветэз пумиськылӥз Россия Федерацилэн Законъёсын ужанъя ёзъёсызлэн представительёсынызы, депутатъёсын. Кенешон мынӥз Россилэн Президентэзлэн кун службая академиезлэн юртаз. Ӝутэм ужпумъёс пӧлын валтӥсез луиз законъёсты кылдытон, та ласянь Президентлэсь но Правительстволэсь кутэм решениоссэс улонэ пыӵатон, Кун Думаысь "Единство" огазеяськонэн, депутатъёслэн фракциосынызы но партийной организациосын огкыл шедьтон. Семинарлэн ужаз пыриськизы Президентлэн но Правительстволэн ыстэм муртъёсыз, "Единстволэн" кивалтӥсез С. К. Шойгу, политсоветэ но исполкоме быръемъёс. Удмуртиысь ветлӥзы В. С. Суркин - "Единстволэн" Удмурт Республикаысь ёзэзлэн исполкоменыз кивалтӥсь, республикаысь политсоветлэн членэз Н. П. Юшков, В. В. Дузилов, Р. А. Авзалов, И. Ю. Наумов. Кенешонэ пыриськемъёс кутӥзы вазиськон-заявление. Отын верамын, "Единство" партия вань быгатонозэ лэсьтоз, Россия кужмо но демократия ласянь юн государство мед луоз шуыса. "Единство" котыр ласянь юрттӥз Президентлы В. В. Путинлы. Макем оскымон луоз законодательстволэн инъетэз, сокем ӟечгес радъяськоз интыосын кивалтон но огкылысь ужан. В. Андреев. ГОРОД УЛОНЫСЬ Байлык инбаме медаз лобӟы Алигес Ижысь Октябрь ёросысь администрациен кивалтӥсьёс татысь улӥсьёсын пумиськон ортчытӥзы. Со герӟамын вал ёрос администрацилэн 2000-тӥ арын ужамезлы йылпумъянъёс лэсьтонэн. Вераськон кема кыстӥськиз. Ортчем арын ёрослы бюджетысь тырмыт коньдон ӧз вуы. Соин ик куд-ог чаклам ужъёс но быдэстытэк кылемын. Но вань пусйымонэз но. Нимысьтыз ортчытэм эскеронъёс возьматӥзы, ёросысь ог 40 процентэз дышетскисьёс мылкыд каро удмурт кылэз дышетыны шуыса. Али татысь ньыляз школаын удмурт но бигер кылъёсъя урокъёс нуисько ни. Но азьланяз таӵе школаослэсь лыдзэс будэтыса ӟеч луысал. Ёросын ужа Семья центр. Отысь специалистъёс ӵемысь поталляло интыысь школаосы. Пиналъёсын юн кусыпъёс возё. Саклык висъяське быдэ вуымтэослэсь ваньмон дырзэс пайдаё ортчытъянлы. Люкаськемъёс та ужпумъя ас ӵектонъёссэс но ватсазы на: выльысь улӟытоно вылэм, пе, дун тырытэк ужась кружокъёслэсь, пӧртэм клубъёслэсь ужзэс. Уго али тросэз егитъёс "шутэтско" подъездъёсын. Отысь ик пото наркоманъёс, юись- кыскисьёс, лушкаськисьёс. Металлургын улӥсьёс ӝожтӥсько городын урод сюресъёслы но йӧвалеген сэрен ӧжыт ӧй вал шуккиськон учыръёс. Сузяно вылэм, пе, липетъёс вылэ люкаськись лымыез но - угось тулыс липетэз пильылымон выроно луоз отын. Бен, быдэстоно ужъёс ӧжыт ӧвӧл. Соосты дэмен, огкылысь быдэстыса ӟечгес луысал. Металлургын улӥсьёс оско: кивалтӥсьёссы ас кожазы гинэ уз ужалэ. Соос калыклэсь дэмланъёссэ лыдэ басьтозы, ёрослы вуись коньдон юнме омыре уз лобӟы. В.Чернов, ужысь ветеран. Кизилиослы тыл шокчо адямиос... Шаерысьтымы куд-ог удысъёсын туэысен кивалто выль адямиос. Удмурт Элькунысь нациосын ужан политикая министрез Николай Мусалимовез воштӥз Яр ёрос кивалтэтлэн азьвыл йырыз Владимир Завалин, гурт удысъя министрез Петр Першинэз - Юкаменск ёрос кивалтэтлэн азьвыл йырыз Владимир Невоструев. Выль адями вуиз лулчеберлык удысэ. Шаерысьтымы культура удысэн герӟаськем ужпумъёс понна табере кыл кутэ Сюмси ёросысь калык депутатъёслэн кенешсылэн азьвыл тӧроез Людмила Пескишева. - Людмила Ивановна, мон понна та ивор шӧдтэк шорысь луиз. Нош Тӥ азьвыл ик-а тодӥськоды ни вал такем ӝужыт пуконды сярысь? - Киме сюлэм вылам поныса верасько: ачим но таӵе иворез чик ӧй витьы. Нырысетӥ нуналаз ик чылкак либырай. Удмурт Элькунмылэн Тӧроезлы Александр Александрович Волковлы выль удыс дэмламез бере ик шуи: "Та ужпум сярысь вераськыны мон дась ӧвӧл на. Ваелэ куинь нунал малпасько коть..." - Малпаськелэ, - монэн огкылысь луиз Александр Александрович. Куинь нунал ӵоже асэным ачим нюръяськи. Вуоно удысэлэсь ляб но юн интыоссэ котыр ласянь эскери-чаклай. Такем ӝужыт пукон ӵектэмез понна, вылӥ кузёмылы сюлмысьтым тау кари но котыръяськытэк-маратэк юай: - Александр Александрович, нош Тӥ оскиськоды-а мынам кужымелы? Удмурт Элькунмылэн Тӧроез пичи но куалектытэк шуиз: - Ӧй оскысал ке, таӵе вылӥ удыс ӧй но дэмласал. Кӧня ке дыр ӵоже ог-огенымы кенешылӥмы телефон пыр. Бератаз ӧй ни "ваменъяськы", ас кужымме но быгатонлыкме тодыса ик, дыр, шуи: - Выль ужелы мон дась. Оскисько Тӥляд юрттэттылы но. Отӥяз эскеризы-чаклазы Кун Кенешысь Наукая, культурая, калыкез дышетонъя но егитъёсын ужанъя комиссиын. Му вӧй поттон удысысь тодмо азьветлӥсьмы Валентин Иванович Кудинов мынэсьтым меӵак юаз: - Людмила Ивановна, Тӥляд азьвыл удысты туж кыдёкын кадь культуралэсь. Сюлмаськонъёстэс вормоды меда? Мон чимаса ӧй улы, Валентин Ивановичлы ивортӥ: - Бен, "Удмуртнефть" огазеяськонэ ыстысалзы ке, шуысал: та "бусы" мынам ӧвӧл. Бен, ёросысьтыд гинэ улон-вылонэз тодэмед чылкак уг вера на быдэс шаерысьтыд югдурез валамед сярысь. Озьы ке но, туннэ мон сеськытэк вераны быгатӥсько: ёрос депутатъёслэн кенешенызы кивалтыкум, тужгес трос сюлмаськоно луылӥз культура сярысь. Вал мукет но пумитъяськисьёс. Шаерысьтымы тодмо музъем ужась Николай Фёдорович Чувашов мыным йыркуръяськыса меӵкытӥз: - Аслаз вордӥськем ёросаз гурт улон-вылонэз копак куашкатӥз - одӥг ӟеч эштос но ӧвӧл ни тапалан. Малы сыӵе адямиез татчы ваёд - мед пукоз ас интыяз!.. Учке ай, кызьы луэ. Нокыӵе но сиён-юон ум ни дасяське, нокыӵе но эштос уг ни ужа, эктыса но кырӟаса гинэ на улӥськом. Нош культура - туж бадӟым удыс ук. Эктон-кырӟан гинэ ӧвӧл. Нырысь ик чебер медло аслад пушкыд. Нош сыӵеез уз луы, инкуазь сое тыныд ӧз сёты ке. Кызьы мытӥды нырысетӥ ужан нуналдэс? - Удмурт Элькунысь Кивалтэтын ивортӥзы толэзь ӵоже быдэстоно ужъёс сярысь. Отӥяз ньыль нунал ӵоже тодматскыны выри министерствоям тыршисьёсын. Соку ик шӧдӥ но валай: ас удыссэ котькудӥз туж ӟеч тодэ. Матысь дыре быдэстоно ужпуме таӵе: вуылоно шаерысьтымы культурая ужъюртъёсы, театръёсы, калыклы шумпотон ваисьёс дӥне, тодоно соослэсь сюлэмшугъёссэс, кайгуоссэс. Со сяна, али сюлмаськоно культура удысэн герӟаськем ужкагазъёс сярысь. Культура удысысь дуно макеосты утён пумысь вераськон радъяськоз Кун Кенешлэн тулыспалтолэзе ортчоно сессияз но. Алигес вуылӥ шаерысьтымы покчи усточиослэн школа-интернатазы, калыклэсь шутэтскон дырзэ тунсыко ортчытъян сярысь сюлмаськисьёс доры. Туж шумпотӥ: адямиос, котькыӵе кайгузэс вунэтыса, муш кадь ужало. Эшшо бадӟымез сюлмаськонэ таӵе: Культурая министерстволы аслэсьтыз тусбуйзэ шедьтыны юрттоно. Аслыз гинэ тупась пусъёсъя сое кыдёкысен мед тодмалозы. Быдэстоно ужъёс эшшо но трос. Одӥгез пумысен гинэ ӝожомылӥсько: малы меда уй- нуналаз кызь ньыль гинэ час? - Улон-вылон сюрестэс ӧръякуды, пиналъёсты кык ар ӵоже дышетӥды биологилы но химилы... - О-о, туж кемалась вал со. Можга педучилище бере дышетскыны пыри Удмурт кун пединститутысь биологияя но химияя факультетэ. Дышетсконме йылпумъяй но аслам ёросысьтым ик туж кыдёкысь Ключёвка посёлоке (Сьӧлта (Селта) музъемен артэ со) вуи. Татысь школа бадӟым вал (зэм, интыяськылӥз пу юртъёсы). Нош дышетскисьёсы - аслэсьтым ньыль ареслы гинэ пиналгес... Ӟуч кылъя урокын нылпиос одӥг пол мадизы асьсэлэн тужгес яратоно дышетӥсьсы сярысь. Мыным возьматӥзы одӥг пияшлэсь ужзэ. Мусо эке тазьы гожтэм: "Мынам яратоно дышетӥсе Людмила Ивановна..." Туж шуныт тодэ ваёнъёс кельтӥзы Ключёвкаын ужам аръёсы. Отӥяз семьяям кылдэм мугъёсын сэрен выжоно луиз Сюмсие. Сюлэмыя уж ӧз шедьы бере, ёрос газетлэн редакцияз лыктӥ. Ватытэк верасько: туж секыт вал нырысетӥ нуналъёсаз. Нылпиосты адӟылэме ик ӧз луылы. Тужгес курадӟылӥ нырысетӥ куарусёнэ (сентябре). Пиналъёсын пумиськонтэм вылысь, ужам вамышъякум, юри бырйылӥ читыр-чутыр сюресъёсты. Редакциын но нырысь-валысь чик ӧз пӧрмылы. Тодӥсько вал: та удыс мынам ӧвӧл. Ар, кык курадӟи. Нош куинетӥ араз маке но луиз: бӧрсьысь бӧрсе печатласькыны кутскизы ӟеч адямиос сярысь веранъёсы, сюлэмшугъяськытӥсь учыръёс пумысь кылужъёсы. Дас куинь ар тазьы "курадӟи". Отӥяз "синйылтӥзы" кадь: ёрос кивалтэтэ ӧтизы. Ньыль ар ӵоже малпаськылӥ егит сюлэмъёсты герӟан сярысь. Тодӥсько на: огпол ветлӥм Иже. Кыӵе ке ӵошатсконэ. Отын басьтӥм кыкетӥ инты. Со мон понна туж бадӟым кузьым луиз. Та ужам трос тодон-валан сётӥз шаерысьтымы семья ужпумъёсын вырись Надежда Кузьминична Коробейникова. Туж синмаськылӥ солэн кужмо, сюлмо, тыршись луэмезлы. Туж трос ӟечезлы дышетӥз монэ Надежда Кузьминична: бадӟым тау солы. Отӥяз бырйизы ёрос кенеше депутатэ, татысь ялан ужась ёзлы тӧрое. Собере дэмлазы исполкомлэн секретарез луыны, азьвылэз партилэн райкомаз выжемен валче. 1990-тӥ арын ортчизы быръёнъёс. Ваньмыз воштӥськиз: кенеш но, исполком но нимаз кариськизы. Кулэ луизы соослы тӧроос. Калыкен ужаны яратӥсько бере, малпаськыны кутски: кудзэ быръёно? Сюлэмыя луиз нырысетӥез: ёрос кенешлэн тӧроезлэн воштӥсезлэн удысэз. Зэм, ёрос исполкомлэн тӧроез огдыре ик вал ёрос кенешлэн кивалтӥсез. Солэсь сюлмаськонъёссэ висъяны малпазы. Одӥгаз сессиын малпаськыны ӧдъязы: кинэ быръёно ёрос кенешлы тӧрое? Депутатъёсты (нош соос сизьымдон кузя вал) куинь пол кужмысь кури: эн исалэ монэ. Озьы ке но, эшъёсы вормизы. Нырысетӥ нуналъёсаз татын но туж секыт вал. Калык малы ке тазьы малпаськылӥз: ёрос кенешлэн тӧроез туж тупа азьвыл партилэн райкомезлэн нырысетӥ секретаезлы. Туж кема курадӟи выль удысын. Утчай пӧртэм сюресъёс. Отӥяз кыӵе ке амалъёс шедьтӥ кадь: ёрос кенешлэн аслаз ымнырыз кылдӥз. Туннэ солэсь кылзӥсько, туннэ сое нокин но пыд улаз лёгыны уз дӥсьты ни. Дас ар ӵоже нуналмысь быдэсъяй одӥг ужез. Озьы ке но, калыклэсь ӧй акыльты. Кӧня ӟеч муртъёс вӧзамы! Трос вал таӵе учыръёс: адями дӥняд лыктэ кыӵе ке куронэн. Пушкыз быдэсак пачылмемын кинлы ке, малы ке йыркуръяськонэн. Нош кӧткайгузэ сюлмысьтыз кисьтэ ке, дорысьтыд туж каньыласа кошке. Зэм, туала депутатъёс ваньмыз сямен кыӵе ке эштосъёслэн, огазеяськонъёслэн кивалтӥсьёссы! Озьыен, соослы нырысь ик дуно асьсэлэн ужан интызы. Нош депутат луэмзы сярысь ӵем дыръя вунэто. Соин валче ик, кыӵе ке ужкагазэз кутыку но юнматыку, шобретэз котькудӥз ас палаз кыскыны турттэ. Таӵе адямиослы чик кулэ ӧвӧл асьсэ ёроссылэн, улосвылзылэн, бырйисьёссылэн сюлмаськонъёссы. Соослы нырысь ик матын асьсэ эштоссы, солэн кулэяськонъёсыз. Кызьы меда ужа туннэ ёрос кенешлэн выль тӧроез Александр Михайлович Чирков? Тэльбуго (биньгозы) мон киын дыръя, нылкышноос шуо вал: "Людмила Ивановна, тӥ доры лыктыкумы, син азямы нырысь ик пуктӥськомы кышномуртэ, собере ини - ёрос кенешлэсь тӧрозэ..." Нылкышно кивалтӥсь гинэ нылкышноез дырыз дыръя валаны но индылыны быгатоз. - Иже вуыса, вордӥськем палъёстэс уд вунэтӥське, дыр? - Сюмсиелэсь туж мӧзмисько. Кытысь меда шедьтод на ми палась выллем инкуазез? Кытысь меда пумиталод на милям улосвылысьтымы кадь ӟеч адямиосты? Толон гинэ учыртӥ аспалъёсме. Дыртонъям нырысь-валысь ӧй ик синйылты вал. Адӟи но - сюлэмы кытчы ке кошкиз. Весь вань тодмоосмес соку ик ӟыгыръяны, чупаны дась вал. Сыӵе ик зол яратӥсько Удмурт шаерме. Кемалась ик ӧвӧл Германие вуылӥ. Арня гинэ чидай - туж жади. Туж мӧзми асьме инкуазьлэсь. - Выль ужады кӧня ке нунал ӵоже тыршиськоды ни. Кыӵе ке учыр вырӟытӥз ни-а сюлэмдэс? - Культура юртъёсын, театръёсын тодматскон вакытам дорам нырысь ик лыктӥз Драмая удмурт кун театрлэн директорез Анатолий Андреевич Митрофанов. Удмурт сямен вераськыны быгатонэлы воксё уг оскиськы ни вал. Маке сярысь мадён понна, мыным нырысь ик час ӵоже ӟуч кылысь удмурт кылэ берыктыны выроно. Анатолий Андреевич Митрофановен нош быдэсак удмурт кылын вераськи. Валамон ини: Драмая удмурт кун театрлэн директорез сьӧраз ваиз быдэс бинет сюлмаськонъёс. Быгатэ вал ук со аслэсьтыз кайгуоссэ вылӥегес мыныса ивортыны. Озьы ке но, Анатолий Андреевич сыӵе вамыш ӧз лэсьты - нырысь ик лыктӥз Культурая министерствое. Ми тодыны кулэ шаерысьтымы ужъюртъёсмылэсь сюлэмшугъёссэс. Нокызьы но вунэтыны уг яра Ижысь эшъёсмес. Озьы ке но, нырысь ик бадӟым саклык висъяны кулэ гуртын улӥсь калыклы. Алигес вуылӥ покчи усточиослэн школа- интернатазы. Пиналъёс шоры учкыса валай: таос азьланяз луозы зэмос кибашлыос. Нош соос гуртын вордӥськемын ук. Арлыдо усточиосмы но зэмос удмурт калык пӧлын будэмын но кыдамын. Мукетыз учыр - Удмурт Элькунысь калык артисткалэн, Россия Федерациысь дано артисткалэн Леонора Викторовна Мамонтовалэн юбилей ӝытэз. Культурая министрлэсь "дӥсьсэ шӧдытэк", "Италмасэз" вань сюлмысьтыз яратӥсь кариськыса гинэ ай ӟечкылай дано эктӥсьмес. Нош ансамбльлэн чеебрлыкъя кивалтӥсез - Россия Федерациысь калык артист Анатолий Васильевич Мамонтов Леонора Викторовнаез данъян ӝытысен паймыса юаз: - Людмила Ивановна, кытысь шедьтӥды сыӵе чебер но шуныт кылъёс? Таӵеоссэ мон улытозям-вылытозям нырысьсэ кылӥ кадь... Ачим пумитаз пальпотыса шуи: - Анатолий Васильевич, ваньмыз со сюлэмысь лыктэ ук... Али но сомында ӧтёнъёс. Культурая министрлэн шутэтскон нуналъёсыз ик ӧвӧл ке но, одӥгез понна кӧт ӝож: ваньмаз нокызьы уг вуттӥськиськы. Иж мон понна чик но мурт ӧвӧл. Татчы азьвыл но ӵем вуылэменым, Удмурт Элькунысь Кивалтэтысь но, Кун Кенешысь но адямиосты, пӧртэм удысъёсъя министръёсты ӟеч тодӥсько. Нош искусствоез кемалась вань сюлмысьтым яратӥсько ке но, зэмос артистъёсын, театръёслэн кивалтӥсьёсынызы мыным ӟеч-ӟеч тодматсконо ай. Асэным ачим чик уг ушъяськиськы. Котьку шуисько: "Яркыт кизилиосты инмаръёс уг ӝуато. Соослы тыл шокчо адямиос..." Зэм, шугадӟонъёс туннэ но трос. Иже выжыкум, кузпалэлы ивортӥ: "Ӝыны ар, оло, ар ӵоже кызьы ке чидано луоз, дыр..." Катэ, борддор вылем оскымон утисе, чик пумитъяськытэк шуиз гинэ: "Инмар юрттэмъя, кызьы ке улом ай. Быгатэмея котьку дурбасьто тыныд. Нош ачид быдэсъя ас уждэ. Кулэ бере - кулэ. Адӟод ай: кӧня ке дыр ортчыса, аслад зарезед вуэз яратӥсь чорыг музэн уяны дышод..." - Леонора Викторовна Мамонтова, аслаз юбилей ӝытаз тӥлесьтыд шуныт ӟечкыландэс кылыса, вератэк ӧз чида: "Людмила Ивановна, кема аръёс ӵоже Тӥледлы культурая министр луыны мылкыд карисько..." - Кызьы пӧрмоз ини. Туж витисько: Культурая министерстволы бюджетын висъялозы нимысьтыз инты. Туж оскисько: Культурая министерство аслэсьтыз тусбуйзэ уз ышты. Удмурт Элькунысь культурая министрен Людмила Пескишеваен кенешиз газетлэн корреспондентэз Елена Виноградова. Удмурт Элькунысь культурая министр Людмила Пескишева. Тусбуйзэ пуктӥз Мударис Менладшин. Калыкен быръемъёс калык понна сюлмасько Толшор пумын Балезино ёрос администрация Турецкой гуртэ потаз. Кивалтӥсьёс, пӧртэм удысъёсъя специалистъёс, милициын но прокуратураын ужасьёс Турецкой администрацие пырись гуртъёсысь улӥсьёсын пумиськылӥзы, юрттэт сётӥзы. Врачъёс пӧйшур вордон фермае, школае но нылпи садэ вуылӥзы, висисьёсты эскеризы. Ортчытэмын "Егит семья" клублэн занятиез. Отчы люкаськылӥзы егит анайёс но атайёс. Соос семья кусыпъёсты радъянъя но нылпи утёнъя юанъёссылы валэктон шедьтӥзы. Кивалтӥсьёс, гурт калыкез кенешъёсы люкаса, адямиослэн пӧртэм юанъёссылы валэктонъёс сётъязы. Таӵе пумиськонъёс дыръя нокинлэн куронэз эскерытэк уг кыльы: кулэяськисьёслы пу, лэсьтӥськон нюлэс висъяське, нылпиослэсь, пересьёслэсь куронзэс лыдэ басьто. П.НИКОЛАЕВ. СПОРТ Ижевск ӧте ӵошатскыны Туэ, 10-тӥ�16-тӥ мартэ Ижевскын ортчоз "Газпром" ОАО-ын ужасьёслэн ИИИ Тол Спартакиадазы. Асьме дорын газовикъёс валля арын люкаськылӥзы ни вал, ӵапак соин ик нош бырйизы Ижевскез: спортсменъёслы кельше татын ӵошатсконъёсты радъямзы, туала куронъёсъя пуктэм спортзалъёс, стадионъёс, ӟеч специалистъёс. Ӵошатсконэ пыриськыны мылкыд каремзы сярысь ивортӥз ни 15 делегация: "Тюменьгазтрансгаз", "Пермтрансгаз", "Севергазпром", "Сургутгазпром" но мукетъёс - ваньмыз сюрс адями пала. Спартакиадаез радъясьёс возьмало Россиысь кизилиослэсь пыриськемзэс, но соиз рос-прос тодмо ӧвӧл ай. Но одно вуонзы сярысь ивортӥзы ни Спартакиадаез валтӥсез радъясь Борис Никитин, валтӥсь судья Владимир Тортышев, огазеяськонлэн Правлениезлэн кивалтӥсез Рем Вяхирев... Спортсменъёс нюръяськозы куас сюрес вылын, полиатлонын (куас, ыбылӥськон, гимнастика), шахмат пул вылын, эскерозы ки кужымзэс (армреслинг). Ужрадэз радъясьёс вань мылкыд карисьёсты ӧтё стадионъёсы но спортзалъёсы. Ӵошатсконъёс усьтӥськозы 11-тӥ мартэ Ижевскысь "Газовик-Газпром" стадионын. З.Кириллова. "Кенеш" журналлы - 75 "Кенеш" журналлэн матэктӥсь юбилеезлы сӥзьыса, унояз ёросъёсын но городъёсын пӧртэм ужрадъёс ортчыло. Тани тулыспал толэзьлэн кутсконаз писательёсты Пётр Куликовез, Генрих Перевощиковез но Петр Поздеевез Играос асьсэ доры куное ӧтьылӥзы. Трос калыкъем пайдаё пумиськонъёс вал Сеп гуртысь культура юртын, ёрос библиотекаын. Нош кылем арня вискын кенешчиосын пумиськыны мылкыд каризы "Ижмаш" огазеяськонын ужасьёс. Общежитизылэн огаз библиотекаяз нимысьтыз адӟытон радъямын вал. Библиотекарьёс Мария Савельевна Елмашева но Надежда Кузьминична Пономарева "Кенеш" журналын потылэм произведениос, статьяос пумысен люкаськем калык азьын туж шуныт мылкыдын вераськизы. Пумиськонэ лыктэмъёс та выллем ужрадъёсты отӥяз но ортчытъяны куризы. Завьял черкогуртысь библиотекарьёс но "Кенеш" журналлэн юбилеезлы сӥзем ужрадлы дасясько. 21-тӥ тулыспалэ ортчоно пумиськонэ ӧтемын Людмила Кутянова, Ольга Бородина но Олег Четкарёв. Вань та ужрадъёслы йылпумъян выллем луоз туэ 28-тӥ тулыспалэ. 17 часысен Удмурт кун филармониын ортчоз сӥё-дано ӝыт. Ӵапак та нуналэ 75 ар талэсь азьло юбилеяз лыктэм калыкез шулдыртозы шаерысьтымы тодмо кырӟасьёс Геннадий Ганьков, Геннадий Кузнецов, Светлана Смагина, Михаил Ворончхин, "Катанчи" театр но мукетъёсыз. Пырыны луоз дунтэк. Архивысь материалъёсъя Удмуртия ЪЪ дауре 1977-тӥ ар 1977-тӥ арын СССР-ысь Вылӥ Кенеш выль Конституциез юнматӥз. Солэн инъетаз кутэмын вал "азинскем социализм" сярысь концепция. Но солэсь азьло Валтӥсь Законэз эскериз вань калык. Кылсярысь, Глазовын эскеронэ пыриськизы ваньзы быдэ вуэм адямиос. Со понна ортчытэмын сюрслэсь уно кенешъёс. Удмуртиысь помышленность пыд йылаз йыг-йыг сылӥз. Ижевск автозаводлэн конвейерысьтыз васькиз миллионэтӥез "Москвич". Соин валче заводысь коллективез ӟечкылаз Л. И. Брежнев. Солэсь гинэ азьло Воткинскысь машина поттӥсьёс лэсьтӥзы ижевск "Москвичлы" миллионэтӥзэ радиатор. "Ижсталь" объединениын ужаны кутскиз 250 стан. Со сынӥсьтэм прокатэз, корт вандӥсь анданэз но туж юнэсь сплавъёсты нуйытыны чакламын вал. Ижевскысь 2 номеро ТЭЦ-ын пуктэмын турбогенератор, солэн кужымез 110 сюрс киловатт электрокужым сётэмын. Хладокомбинатлэсь люкыса, "Удмуртрыба" огазеяськон кылдытэмын. Отын чорыгез кезьыт но пӧсь амалэн ӵынатӥзы. Удмуртиысь нефтяникъёс кутскизы Ельниково месторождениысь му вӧй кыскыны. Умоен пусъемын Глазовысь тылобурдо вордон фабрика, солэн ужез возьматэмын ВДНХ-ын, адӟытонысь ваизы диплом, нош сизьымез азьмынӥсьёссы - медальёс. Лэсьтӥськисьёс калыкез ялан шумпоттылӥзы. Вуттэмын "Завьяловский" тепличной комбинат. Воткинскын усьтӥськиз "Октябрь" кинотеатр. Ужаны кутскиз Сарапулысь куинь сюрс номерлы туала аппаратураен телефон станция. 23-тӥ мае 12 час 18 минутэ Ижевскысь Москвае потӥз нырысез ӝоглыко "Удмуртия" поезд. Поездэн кивалтӥз Шамиль Утешевлэн бригадаез. Нош "ТУ-154" реактивной самолёт Москваысь Удмуртилэн столицаяз озьы ик нырысьсэ пуксиз, солэн борт вылаз вал 152 пассажир. Августэ ужаны кутскиз Удмурт телевиденилэн ньылетӥ каналэз, отын возьматӥськиз центральной телевиденилэн программаез. Удмурт АССР-ысь Писательёслэн союззылэн дэмламезъя, Ижевскын печатламын "Волга но Урал куспын" книга. Отчы пыризы башкир, пор, мордва, бигер, чуваш, удмурт но ӟуч писательёслэн произведениоссы. Воткинскысь нылпи крезьгуръя школаын кылдӥз калык филармония. Литератураез но кылбуретэз яратӥсьёс ӟечкылазы Олег Поскрёбышевез. "Страда" но "Матица" кылбур сборникъёсыз понна солы сётэмын Удмурт АССР-лэсь 1977-тӥ ар понна кун премизэ. Н. Мельницына, Удмурт Республикаысь ЦДНИ-лэн директорезлэн воштӥсез. Ижевскысь машина поттон заводлэн главной сборочной конвейерез. Люкетӥ йӧл шур бызе Кӧня ке ар талэсь азьло гинэ ай скал кыскисьёс нюръясько вал 3000 килограммен йӧл кыскон понна, собере ас азязы ужпум пуктӥзы 4000 килограммен кыскыны. Нош кылем арын Балезино ёросысь "Путь к коммунизму" эштосысь Каменное Заделье фермаысь доярка Надежда Николаевна Тютина котькуд скалэзлэсь шорлыдын 5277 килограмм йӧл кыскиз. Речка Люк фермаысь Надежда Ивановна Болтачева - 5140 килограмм. Огез секыт уж сётске бере, мукетсэ но вормо. Туэ басьтэмын выль вормон: азьмынӥсь дояркаос 5000 килограммлэсь уно йӧл кыскыны кутскизы. Оскон вань: Тютиналэн но Болтачевалэн лыдпусъёссы мукетъёссэ но скал кыскисьёсты ӟечгес ужаны ӧтёзы. П. Николаев. Мар луэ, компьютер ке "кызэ"? Кемалась ик ӧвӧл, программистъёс грипплэсь музэн кыӵе ке но "И лове ыоу" вируслэсь кышкаса улӥзы. Табере, пе, Интернетын шараямын выль вирус. Со "палаське" тодмо теннисисткалэн Анна Курниковалэн туспуктэмез пыр. Мыным, компьютеръёсын вырисьтэм муртлы, туала арын (возьыт бен) ваньмыз та валантэм, но тунсыко: кыӵе-сыӵе вирус, кызьы со лултэм мае ке быдтэ... Малпасько, лыдӟисьёс пӧлын мон кадьёс ӧжыт ӧвӧл, соин ик ойдолэ юаськом тодӥсь-валась муртлэсь. Сергей Акбаев, программист, "Удмурт дунне" газетлэн компьютер цехеныз кивалтӥсь: - Компьютер вирус туж тупа адямилэн висён вирусэзлы - пӧртэмлыкез со гинэ: нырысетӥяз учыре вирус - улэп. Со палаське адямилэсь адямилы кызыку, кизьныку... Нош кыкетӥяз - вирусэз компьютере Интернетэ, дискъёсы пыртэ кыӵе ке адями. Отчы сюрыса, со ассэ ачиз электронной почтаысь адресъёсъя ысъя. Шуом, пуксиз нылаш компьютер сьӧры, "пыриз" Интернетэ - солы сьӧрлось яратонэзлэсь гожтэт вуэм. Со, валамон, гожтэтэз "усьтэ" но... программаез вирусэн палаське. Тӥни сыӵе со "И лове ыоу". - Кыӵе со изъян вае? - Дискъёсысь информациез ӵуше, куддыръя компьютерез изъянтэ - сутэ. - Мар луыны быгатоз, вирус асьмелэн компьютерамы шедиз ке? - Тани туннэ газет компьютерын дась ни. Отысь солэсь вылтуссэ диске поттыса типографие печатланы гинэ келяно на, но шуом, кыӵе ке вирус шӧдтэк шорысь вуоз но ваньзэ ӵушоз. Милемлы газетэз выльысь лэсьтоно луоз. - Газетэз уй ӵоже лэсьтод, нош ма карозы бухгалтеръёс? - Вот таиз трослы кышкытгес. Али уго бухгалтеръёс, экономистъёс компьюетерлы оскиськыса вань информацизэс со пушкын возё. Озьы, вирус шедьыса, соос ваньзэ ыштыны быгатозы. Соин ик чакласькыса улоно, лыдпусъёсты возёно архивын но. - Вирус собыдӟа изъян вае бере, малы сое малпанэз вал, ӧчкарытэк мӧзмыт-а, мар-а? - Зэмос программистъёс ог-огзылы ноку но ӧч уг каро. Нош кинлы ке но, зэмзэ но, мӧзмыт, шӧдске. Вылаз ик озьы ӧчкарыса узырмыны луэ. - Кызьы?! - Одӥг американец Интернет пыр чакласа возем банкъёсысь счётъёсты. Вкладъёс бадӟымесь ке, тодӥськом, копейка лыдэ уг басьтӥськы ни - тӥни со гочатэм шӧртчиез. Шуом, А фирма В фирмалы куамын сюрс доллар ньыльдон цент ыстэ. Валамон, ньыльдон цент В фирма понна - номыр но ӧвӧл, соин ик та американецмы компьютерысь ньыльдон центэз "таласа" аслаз счётаз ыстэ. А но, В но номырзэ уг шӧдо, нош С киоссэ посэ - со уго сюрс та выллем фирмаослэсь центъёссэс капыртӥз но олокӧня миллионлы узырмиз. - Ну со понна бадӟым визь кулэ. Таиз вирус - "Анна Курникова" кышкыт-а? - Ӧвӧл. Со малпамын программистъёсты алон понна. - Малэсь? - Кышкытгес вирусъёслэсь. - Соослэсь кызьы ке утиськыны луэ-а? - Луэ. Али вань ни сыӵе программаос-вакционаос. Вань умой вирусъёс - паласькыса соос изъян уг ваё, программез, информациез ӵушиськемлэсь утё. З.ВАХРУШЕВА. ЭКОНОМИКА Мед луоз шуныт но югыт Тол вылтӥ Приморьеын кылдэм югдур городын улӥсь калыкез шуак сазёмытӥз: асьме вылтӥ но сыӵе адӟон уз погыльскы-а? Йӧӟектэм квартираос, кезьытлы чидатэк пилиськылэм гумыос, адямиослэн курадӟемзы. Шуккет вуэ витьымтэ шорысь. Отын кылдэм югдурез эскерисьёс верамъя, таӵе учыр луыны быгатоз котькуд регионын. Малыез тодмо, дыр. 1. ТЭЦ - городлэн сюлэмыз Ижевсклэн уй палаз пуксем ТЭЦ-2 ортчем арлэн пумаз пусйиз 25 аръем юбилейзэ. Сомында дыр ӵоже республикамылэсь шоркарзэ но вань ёросъёсты шунытэн но электротылэн возе, одӥг пол но вис карытэк, асьмеды шуге-леке вуттытэк. Огшоры учкыса, ваньмыз туж каньылэн ӧръяське кадь, нош предприятие вуылыса, мылкыд воштӥське: ма луоз, ТЭЦ- лэн котёлъёсыз, турбинаосыз одӥг часлы, кӧня ке минутлы ужамысь дугдӥзы ке? Со пумысен ас малпанзэ вера валтӥсь инженер Александр Сергеевич ТОЛСТИКОВ. (Вакчияк: йылпумъяз Томскысь политехнической институтэз. Кузпалэныз ӵош Ижевске вуизы инженерлэн дипломеныз, калык хозяйство куремъя.) Егит специалистъёслы удалтӥз: ӵапак соос вуон арын усьтӥськиз выль ТЭЦ. Вань оборудованиез ас киосынызы пуктӥзы. Александр Толстиков электромонтёрысен валтӥсь инженерозь будӥз. - Ижевскысь улон квартираос данакез ми борды юнматэмын, предприятиос - ӧжытгес. Ас понназы станциоссы вань "Буммашлэн", автозаводлэн, механической заводлэн. Но соос ваньзы герӟаськемын ТЭЦ-ен. Республикая верано ке, шаермылэн электрокужымлы кулэяськонэз 70 процентлы быдэсъяське ми чотын. Туннэ нуналлы ТЭЦ-2 солы оскем удысэз кулэезъя нуэ. Одӥг предприятие но, одӥг улон корка но тылтэк, шуныт вутэк кельтэмын ӧвӧл. Россия Федерацияя оглом учконо ке, ТЭЦ- 2 ас кужымезъя но ужамезъя сылэ устоосыз радын. Нош пуктэмын вал со 60-тӥ аръёслэн шоразы Ижевсклэн ӝотрак будэменыз. Самой та вакытэ асьме дорын ӝутскизы "Буммаш", автозавод но выль микрорайонъёс. Электрокужым но шуныт сётон понна кулэ луиз кыкетӥез ТЭЦ. Подрядчиклэсь ужзэ 1971-тӥ арын ас вылаз басьтӥз "ВоткинскГЭС- строй". Ньыль ар ортчыса, сентябрь толэзьлэн берпуметӥ нуналъёсаз, ву шунтӥсь котёл сётӥз ни нырысетӥ шунытсэ, нош 3-тӥ декабре городысь теплотрасса кузя вуиз квартираосы. 1975-тӥ арын ик Выль ар азьын ужаны кутскиз кыкетӥез ву шунтӥсь котёл. Вераны кулэез ӧвӧл, дыр, ма быдӟа шумпотон ваиз со бадӟым город понна. Эшшо одӥг вунонтэм нунал: 1976-тӥ ар, 30-тӥ декабрь, 21 час 45 минут. Та дырысен ТЭЦ-ын нырысьсэ "шокчиз" электрокужым сётонъя котёл. Нош 1977-тӥ арын 10-тӥ январе 11 час 36 минутэ одӥг номеро турбогенератор герӟаськиз СССР-лэн огъя энергосистемаеныз. Озьы, минутэн, часэн, нуналэн, толэзен паськытаз но юнмаз Ижевскысь кыкетӥ ТЭЦ. Али со ваньмыз историе кылемын ни. Но улон азинске. Мӧйымыны вуэм специалистъёсты вошто егитъёс. 1992-тӥ арысен ТЭЦ выльысь будыны ӧдъяз. Но чакламъя ваньмыз уг пӧрмы - ӧвӧл коньдон. Та ужпум ик али тужгес но сюлэмшугъяськытэ предприятилэсь кивалтӥсьсэ но инженеръёсты. 25 ар талэсь азьло пуктэм оборудование вужмиз, шуыны луоз. Нормативной документъёсын тупатэм дырыз кык-куинь ар ортчыса быроз. Отӥяз мар луоз - вераны кышкыт, но тодмо: огез агрегат тӥяськыса ужамысь дугдоз быдэс система. Приморьеын кылдэм югдуръя учконо ке, ог дас миллион интые (сомында коньдон кулэ луысал ас дыраз тупатъянэ-выльдонэ) кошкизы миллиардъёс. ТЭЦ-ын котькудзэ адямиез, вылӥ образованиен лыктӥсьёссэ но, туж эскерыса куто. Вераськон уг мыны юисьёс, ужлэсь пегасьёс сярысь. Татын кулэ вылӥ квалификациен электрикъёс, инженеръёс, машинистъёс, операторъёс. Дипломен вуэм егит специалистэз вуоно ужезлы кык ар пала дышето на ТЭЦ-ын. Сыӵе кадръёсъя политика. Мукет сямен уз лу: городлэн сюлэмаз тэшканъёс луыны кулэ ӧвӧл, тыл но шуныт сётӥсь предприятие пыре стратегической объектъёс радэ. 2. Ижен Россия данъяське Кызь вить ар ӵоже ужатозяз, ТЭЦ-2 пӧрмиз зэмос школалы. Россиысь валтӥсь энергетикъёс пӧлын трос гинэ та предприятиын будэмъёс. Соос пӧлын - Юрий Иванович Боровик, Николай Александрович Скворцов, Виктор Константинович Преснухин, Владимир Иванович Фомичев, Сергей Семёнович Перевалов, Алевтина Александровна Марценюк, Галина Серафимовна Юдинцова... Татын опыт люкамъёс кивалто мукет регионъёсысь теплоэлектроцентральёсын. Кылсярысь "Курганэнерголы" директоре юнматэмын Владимир Фомичев. Ма шуод, ас вакытаз страна туж бадӟым юрттэт сётӥз Удмуртилы, пӧртэм интыосысь егит специалистъёсты ыстыса: Томскысь, Ивановоысь, Оренбургысь... Тани кызьы тодаз вае со сярысь Т.Х.Толстикова: "Кузпалэным ӵош Ижевске ми вуимы 1976-тӥ арын 29-тӥ сентябре. "Удмуртэнергоын" соку ик шуизы: ужалоды кыкетӥ ТЭЦ-ын. Выль интыын монэ тужгес но паймытӥз музъем. Сибирьын со сьӧд-сьӧд, нош татын - ӵужпыръем-горд, юри буямын кадь. Коллективмы кельшиз: ваньмыз егитъёс, кӧня кулэ сомында ужаны дась вал. ТЭЦ-ен ӵош будӥзы пиналъёсмы но. Тросэз соос милемлы кивоштӥсь луизы ни. Улонад ТЭЦ кыӵе инты басьтэ шуизы ке, валэктонэ одӥг: ТЭЦ - мынам улонэ, Ижевск - кыкетӥ вордскем интые". Виталий Петрович Рыжков, электрокужым поттонъя станцилэн азьвыл директорез, Монголие ужаны ыстэмын вал. Но ТЭЦ-ын ужасьёс 1988-тӥ арын сое асьсэлы директоре быръё. Россиысь энергетика удысын таӵе эскерон нырысетӥез луиз, азьвыл котькудзэ кивалтӥсез пуктылӥз Москва, Главк. Станцилэн солэсь азьвыл директорез, Геннадий Илларионович Медведев, тодэ ваёнъёсаз гожтэ: - 1982-тӥ арын январьлэн кутсконаз монэ Москва Главке ӧтизы но шуизы: тӥледыз юнматӥськом Ижевскысь кыкетӥ ТЭЦ-лы директоре. Та дырозь мон ужай Чайковский городысь ТЭЦ-ын, котлотурбинной цехлэн начальникез луыса. Центр косэмъя, 14-тӥ январе выжи Ижевске. Кык нунал куспын выль объектэз кутӥ. Ужпумъёс трос вал. Валтӥсез - ужасьёслы ёрмон, со вуиз 30 процентозь. Удмуртия понна та удыс выль на, соин ик специалистъёс ӧз тырме. Соосты ӧтёно луиз мукет регионъёсысь. Нош кытысь шедьтод улон инты? Кадръёсты утчамен ӵош басьтӥським квартираос лэсьтон борды. Вакчи дыр куспын та ужпумъёсты йылаз-пумаз вуттӥм. Коллектив люкаськиз, оскымон специалистъёс кие шедизы энергокужым поттон но шуныт сётон. Ӝутӥм уждунлэсь быдӟалазэ. Старки посёлоке лэсьтӥм кык 70 квартираем улон корка. Ваньмыз со, валамон ини, Ижевск понна гинэ ӧз, быдэс республика понна пайдаен берытскиз. Та дыре ик мынэ цехъёслы кивалтӥсьёсты дасян. Ӧтемын вал Вячеслав Страхов, котлотурбинной цехе, нош электроцехе юнматэмын Александр Толстиков. Кыксы но - чупресэсь, утчаськись мылкыдоесь. Та кык егит специалистъёс ик юрттӥзы ӟеч коллектив кылдытыны. Озьы ке но, ТЭЦ-е ужаны лыктӥсез сокем трос ӧй вал. Дорамы ыстылӥзы пытсэт сьӧры шедемъёсты, ЛТП-ын эмъяськисьёсты, азьтэмъяськисьёсты. Кызьы соослы оскод оборудованиез, приборъёсты? Алигес вуэм дипломен специалистъёсты но выльысь кутскыса дышетоно луылӥз. Огъя вераса, ТЭЦ-ын кылдэм югдур ушъяськымон ӧй вал. Озьы кыстӥськиз 1986-тӥ арозь, кадръёс умой-умой интыяськытозь. Мон дырозь станциен кивалтӥз Геннадий Яковлевич Пушкарёв. Юнме шорысь сое атай интыын уг лыдъяло. Геннадий Яковлевич сюлмаськемен но бызьылэмен ӝутскиз та быдӟа предприятие. Мон ужаны кутскыса лэземын на берпуметӥез, ньылетӥез турбина гинэ. Выльдӥськон кутскон вакытэ ас интыме сётӥ Виталий Петрович Рыжковлы. Сизьым кандидат пӧлысь коллектив оскиз ӵапак та адямилы. Быръёнъёсы мон ӧй пыриськы, со вакытэ кивалтӥ ни Монголие ыстэм советской специалистъёсын-энергетикъёсын. Кыкетӥ ТЭЦ-ын ужам аръёсы сярысь уг жаляськы. Быдэс улонэлы со ӟеч школа луиз, нош нырысетӥ станцие вал Казахстанын. Ижевск мон понна - весяклы сюлмам пыӵам кырӟан. 3. Адямиез машинаен уд вошты Оло, воштод но? Тани ТЭЦ-лэн цехъёстӥз ортчоно ке, дугдылытэк ужась автоматъёс дорысь одӥг-ог операторез гинэ адӟод. Техника адямитэк но гуж-ж! каре, моторъёс одӥг секундлы но уг чалмыло. Соосын кивалто дежурной инженеръёс. Туннэ та постэз нуэ Михаил Юрьевич Юдаров. Азяз пуктэм приборъёс возьмато ваньзэ, мае тодыны кулэ таудысэз нуись специалист. Пичияк коть кытын ке кышкыт учыр кылдӥз ке, куаразэ сётоз сирена. Вераны кулэ, таӵе югдур сокем ӵем уг ке но луылы, котьку сак луэмез кулэ каре. Кыкетӥ ТЭЦ-ен туннэ кивалтэ Вячеслав Александрович Страхов. Предприятие со лыктӥз 1984-тӥ арын, котлотурбинной цехын начальник луыса ужамез бере. - Нырысь вуэм берам ик монэ паймытӥз нылкышноослэн лыдзы, - шуэ со. - Пиосмурт уж но, капчиезгес но - кышномуртъёс вылын. Ӧжыт уксёен кин-о татын возиськоз на? Станция уен-нуналэн ужаз вылӥ быгатонлыко специалистъёс ванен. Соос пӧлын мон туннэ верасал Н.Н.Мацкевичез, Ю.А.Барановез, В.Ф.Чумакез, В.Ф.Сытинэз. Трос лэсьтэмын ужан графикез радъян ласянь. ТЭЦ город сьӧрын пуксемен, курадӟоно вал мынон-ветлон ласянь, уката но уй сменаосы. Ужасьёсмы ӝыныез пала нылкышноос бере, кутоно луиз мукет ужрадъёс. Али котькудӥз смена ужа быдэн 12 час. Адямиослы со кельше, рабочийёс понна висъямын нимысьтыз автобусъёс. Кадръёс сярысь ке верано, Удмурт университетын табере ТЭЦ понна дасяло ни нимысьтыз теплоэнергетикъёсты. 2000-тӥ арын июнь толэзе нырысетӥосыз инженеръёс диплом басьтӥзы. Атайёссы, анайёссы борды вуизы нылпиоссы. Семьяен-семьяен выжы лэзизы ни Голиковъёс, Дремичевъёс, Соколовъёс... Владимир Михайлович Голиков кивалтэ производственно-технической отделэн, предприятилэн огеныз валтӥсь ёзэныз. Со пыр ортчо ТЭЦ-лэн "вирсэръёсыз", нуисько выльдон но тупатъян ужъёс, омырез чылкыт возён, дыраз шуныт ву но тыл сётон, документъёсты дасян. Владимир Голиков ТЭЦ-е ыстэмын вал 1976-тӥ арын, Ивановоысь энергетической институтэз йылпумъямез бере. 25 ар ӵоже ачиз но станциен ӵош будӥз, трос кивоштӥсьёсты дасяз ни. Владимир Михайловичлы туж уг кельшы туала энергосистемаез таркамзы, дунъёслэн дугдылытэк будэмзы. - Ми ужаны быгатӥськом газэн но, эгырен но, мазутэн но. Соос пӧлысь тужгес но дунтэмез - газ. Но солы лимит тупатэмын, мултэссэ уд куты. Эгыр сярысь ке верано, ТЭЦ-мылы мынэ Кузбассын поттэм эгыр гинэ, мукетыз уг тупа. Табере асьтэос лыдъялэ: Сибирьысь вуттэм эстӥськон кӧня манетлы усе, такеме вайыса!. Дунъёс сярысь: сюрс кубометр газ али сылэ 600 манет, одӥг тонна эгыр - 840, мазут - трослы дуно. Таизэ ум но кутӥське, возиськом шуге-леке вуылон учыръёслы. Эгыр дунтэм ке но, выронэз, сюлмаськонэз лачак. Кылем арын, туэлы шуыса, эстӥськон тулыс ик, дунтэм дунын вайыны быгатӥм, но самой умой луэ гужем вуттэмез. Лымы улэ шедьылыса, эгыр кынме, сое одно ик куасьтыны кулэ. Собере - изоно, пызьлы пӧрмытоно. Озьы гинэ векчи гумыос кузя вуэ эстон гуре. Владимир Михайлович, ТЭЦ-лэн уженыз тодматыса, тужгес но юн шугъятӥсь юанлы валэктон сётытэк ӧз чида: - Тыллы но шунытлы дунъёсты будэтэм понна, калык милемыз янгыше уськытэ, тышкаське. Ас уждунзэс будэтон вылысь, пе, юри озьы лэсьто. Со шонер ӧвӧл. ТЭЦ-ын коньдон дурысэн кисьтысалзы ке, дорамы лыктыны туж бадӟым черод кылдысал ни. Нош со ӧвӧл, уз но луы, малы ке шуоно, та удысэ дышыны но троссэ чиданы кулэ. Коньдон ваньмыз сямен мынэ эстӥськон басьтонэ, оборудованиез выльдонэ. Сотэк Приморьелэн адӟонэз вуоз Удмуртия вылэ. ТЭЦ-ын адями сярысь сюлмаськон сылэ валтӥсь интыын. Тае адӟоно социальной удысэз утемзыя но азинтэмзыя. Азьвыл аръёсы сямен ик, предприятилэн вань аслаз общежитиез, нылпи садъёсыз, теплицаез, профилакториез, тазалыкез утёнъя комплексэз. Ваньмыз со - дунтэк. Тол теплицаос интыяськемын 1,5 сюрс квадратной метр вылын. Татын будэтэм бакча сиёнъёс вуо нылпиослэн но ужасьёслэн ӝӧк вылазы. Кыӵе бакча сиён будэто? Огреч, помидор, сугон, пӧсьтурын, баклажан, кык-куинь пумо кубиста, горд но ӵуж кушман, кабачки... Ньылетӥ арзэ кусып возё Москваысь селекционеръёсын. Санаторий-профилакторийзы ужа 1986-тӥ арысен. Эмъяло трос пӧртэм амалэн. Пусъём на: Удмуртиысь шутэтскон интыос пӧлын со огез устоез луэ. Профилакторие ветлӥсьёс тау каро терапевтлы Любовь Дмитриевна Пестряковалы, венен эмъясь терапевтлы Ирина Александровна Кругликовалы, медсестраослы Светлана Михайловна Устюжаниналы, Мария Ильинична Глуховалы но мукетъёсызлы. Соос ужало ни санаторий-профилакторий усьтӥськем дырысен. Шумпотоно, таӵе вакытэ но калык сярысь сюлмаськись предприятиос вань на шуыса. Капчиен со уг сётскы. Но ТЭЦ-лы котьмалэсь дуно адямилэн тазалыкез. Солэсь визьзэ, быгатонзэ одӥг машина но уз вошты. П.С.ТЭЦ-2 сярысь гожъякум, ки улам шедиз "Энергетическая безопасность России" книга. Солэн авторъёсыз В.Бушуев, Н.Воропай но мукет тодмо специалистъёс странаын кылдэм югдурен ӵош эскеро быдэс дуннеез. Электрокужым, газ но эгыр дуноямез соос герӟало 1973-тӥ�1974-тӥ аръёсы кутскем кризисэн. Ӵапак соку, арабо-израильской конфликт бере, трос поллы ӝутскиз му вӧйлэн дуныз. Таин валче данакез странаос, энергетика ласянь асьсэды утён вылысь, пӧртэм ужрадъёс кутӥзы. 1990-тӥ арын Россиын кылдэм югдур эшшо но мургес кризисэ вуттӥз, солы муг луиз экономической, социально-политической, внешнеэкономической, внешнеполитической, технической кусыпъёслэн тэшкамзы но СССР-лэн огъя энергетической кужымезлэн лябӟемез. Топливно-энергетической комплексын кылдэм югдур возьматэ: Россия чутрак кулэстӥз шахтаослэсь лыдзэс. Со лэсьтэмы, Дуннеысь валютая фонд куремъя. Электрокужым сётӥсь оборудование вужмемын, выль станциос уг лэсьтӥсько. Куд-ог регионъёс возиськыны тыршо дунъёсты будэтон чотын, озьы ке но, югдур ялан уродме. Кышкытлык нырысь ик кылдоз Россилэн кыдёкысь сэрегъёсаз, отын, кытчы дыраз уг вуы эстӥськон. Собере матэктоз центр пала. Огез но регион таӵе адӟонлэсь утемын ӧвӧл, малы ке шуоно, энергосистема - одӥг. Шуге-леке вуонтэм понна, котькудӥз улосвыл сюлмаськыны кулэ тырмыт энергокужым но эстӥськон дасян сярысь. Жаляса верано, пӧртэм мугъёсъя та курон уг быдэсъяськы. Нырысь ик со герӟаськемын коньдон тырмымтэен. Кыкетӥез - государство пумен кыдёке палэнске та секыт ныпъетлэсь, регионъёс вылэ погыльтыса. Туж бадӟым оскон военно-промышленной комплекслы, энергетика удысэз радъянын со юрттоз шуыса. Газ, му вӧй, эгыр поттонэз радъяно выль системая, туала вакытлы тупась техникаен. Та ужез оборонка быдэсак ас вылаз басьтыны быгатоз. ТЭК-ез азинтон Россия понна луэ нырысетӥез стратегической ужпум. Книга гожтэмын 2000-тӥ арлэн кутсконаз, Приморьеын, Дальний Востокын кылдэм югдурлэсь азьвыл. Но авторъёс шӧдӥзы ни кышкытлыклэсь вуэмзэ. Л.МЕДВЕДЕВА. Лымы вылын футбол 23-тӥ�25-тӥ феврале Воткинск ёросысь Новый посёлокын ортчозы ВИИ республиканской тол шудонъёс. Ёзвиез кыдатонъя но спортъя кун комитетысь тол шудонъёсты радъясьлэн Вячеслав Беляевлэн верамезъя, ӵошатсконъёс туж тунсыко ортчыны кулэ. Спортсменъёс кужымзэс мерталозы спортзалын, стадионын, куас сюрес вылын но тирын. Ӵошатсконъёс кутскозы 23-тӥ феврале, шудонъёсты сӥё-дано усьтэм бере ик. Нырысь ик спортзалын кужымзэс мерталозы гимнастъёс, Стадионын футболэн шудыса кужымзэс мерталозы кык команда. Правительствоысь но администрациысь йыръёссылэн командаоссы. 24-тӥ феврале ӵукна 9 часысен кутскозы тирын винтовкаен ыбылӥськонъя ӵошатсконъёс. Нош 10 часысен куас вылэ султозы ёрос кивалтӥсьёс. Куас сюрес вылын нюръяськон кык нунал ӵоже мыноз. Ӝытъёсы, ӵошатсконъёс ортчем бере, чакламын шутэтскон ӝытъёс ортчытыны. Ӵошатсконэз радъяны юрттэВоткинск ёрослэн администрациез. П.КУЗНЕЦОВ. Архивысь материалъёсъя Удмуртия ЪЪ дауре 1978-тӥ ар Таяз арын Удмуртия кутӥз выль Конституция. Сое 31-тӥ мае огкылысь юнматӥз УАССР-ысь Вылӥ Кенеш. Нош та дырозь улӥмы 1937-тӥ арын кутэм Валтӥсь Законъя. Выль Конституция асьмемыз оскытӥз, азинскем социализм пуктӥськом шуыса. Та вакытэ Удмуртиын вылӥ ӟечлыко индустрия кылдэмын вал ни. Азинскиз нефть поттон - кыскизы кызь вить миллион тонна. "Ижмашлэн" конвейерысьтыз васькизы вить миллионэтӥ мотоцикл но вить сю сюрсэтӥез автомобиль. Сарапул радиозавод поттыны кутскиз "Урал-114" радиола. Августэ 261 вузлы Вылӥ ӟечлыкъя кун знак сётэмын. СССР-ысь ВДНХ-ын возьматэм арбериослы 21 медаль сётӥзы. 11-тӥ декабре СССР-ысь Вылӥ Кенешлэн Президиумезлэн Указэзъя Быдӟым Отечественной оже калыклэн геройлыко пыриськемез но калык хозяйствоын но культураын басьтэм азинсконъёсмы понна Ижевсклы сётэмын Октябрь революция орден. Та арын ик Ижевскын "Вуж аэропорт" нимаськись выль микрорайон лэсьтӥськыны кутскиз. Нырысьсэ ужазы гурт хозяйствоын тыршисьёс. 237,4 миллион тонна ю-нянь кутсазы соос. Шорлыдын котькуд гектарысь 16 центнер усиз. Но тросэз колхозъёс но совхозъёс азьло сямен ик бере кыльыса ужазы. Ляб азинскизы мелиорацияя ужъёс. Соиз умой: социальной улонын пусйымонэз трос вал. Ужаса улӥсьёслэн шоро-куспо уждунзы толэзяз 163 манетозь ӝутскиз. 1976-78 аръёсы улон коркаос ӝутскизы кык миллион квадратной метрлы, улон инты басьтӥз 37 сюрс семья. Кулэстэмын телевизоръёслы, холодильникъёслы, дӥськутлы дунъёс. Жаляса верано луэ, та арын улонысь кошкиз удмурт поэт Флор Иванович Васильев. Кулэм бераз ни солы сётӥзы Удмурт АССР-лэсь кун премизэ, "Куар усён толэзе" но "Арлэн вакытъёсыз" кылбур сборникъёсыз понна. 19-тӥ-24-тӥ июне Удмуртиын нырысьсэ ортчизы совето литературалы сӥзем нуналъёс. Соку Удмуртие вуылӥзы СССР-ысь калыкъёслэн писательёссы: Алексей Сурков, Людмила Татьяничева, Гевор Эмин, Владимир Карпов, Виталий Коротич, Булат Окуджава но мукетъёсыз. Удмурт писательёс пӧлысь та бадӟым празднике пыриськизы Трофим Архипов, Даниил Яшин, Олег Поскрёбышев. Соос вуылӥзы Ижевскысь, Глазовысь, Сарапулысь, Воткинскысь но Можгаысь бадӟымесь предприятиосы но отын пумиськылӥзы рабочийёсын, егитъёсын но интеллигенциен. "Италмас" ансамбльлы Москваын сётӥзы нырысетӥ степенё диплом. Удмурт кун университетлэн фольклоръя но этнографияя "Чипчирган" ансамблез гастрольёсын потаз Турцие. Ар ӵоже "Удмуртия" книга издательство сю пумо книгаос поттӥз - тиражез кык миллион. Музейёсы вуылэм 251 сюрс адями, киное - 25 миллион. Берло куинь арзэ пуктэмын витьтон культура юрт, кинотеатр но библиотека. Е. Ушакова, Удмурт Республикаысь ЦДНИ-ысь отделлэн начальникез. СССР-лэн обороная министрез Д. Ф. Устинов бырттэ Октябрь революция орден Ижевск городысь парторганизацилэн знамяез вылэ. Городлэн улонысьтыз Усе, усе, усе ялан лымы Кылем арняе Ижевскын эскеремын сюресъёслэн, тротуаръёслэн, транспорт дугдылонниослэн, азбаръёслэн толалтэ кызьы возиськемзы. Арня ӵоже шараямын 84 йыртэман учыр, 35 муртэ кыл кутытэмын. Соос пӧлын - "Ижсталь" Йӧ дворецлэн дирекциез, "Ландыш", "Чайка", "Спорткультторг" магазинъёс но мукетъёс. *** 19-тӥ феврале нуназе Ижевскын 89 лымы сузян машина ужаз. Автобус-троллейбус дугдылонниосты киын сузяло. Йӧвалегез луоен пазяло. Со понна машинаосты уин ужаны потто. Ижевск городлэн администрациез. Николай Никифоров Ӵужектэм туспуктэмъёс Верос Выль аре выжыса, дышем сямыя адресъёсын блокнотме эскерисько. Кыӵе воштонъёс пыртоно, кудзэ гожмано-сызмано? Уго одӥг ар ӵоже но тырмыт воштӥськонъёс луыло. Гожтэт пыр кусып возёно кудӥз ке адями чиптэм-чаптэм ыше, кудӥз ке воксё югыт дуннеен люкиське, мукетыз..., тонэ чик жалятэк, Иуда Искариот музэн, улӥ дунын вуза... Блокнотэлэсь берпуметӥ бамзэ усьтӥсько но, син азям пуксе кемалась дырысен возиськись адрес: Ижкар, 9-тӥ Январь урам... Тихонова М. П. Та нимтул доры вуыса, котькуд аре дыректэ сюлэм, бӧрысь - киысьтым ручкае: "Ӵушоно-а? Яке кельтоно-а?" Кема пукисько малпаськыса, Ватэтысь поттӥсько кык ӵужектэм туспуктэмъёсты. Жальмаса, ортчем аръёс вискы туж дуно арбериме ыштэм музэн учкисько соосты. Лулӟылӥсько, пальпотӥсько, ӝожасько но шумпотӥсько. Огыр-бугыр луэ мылкыдын. Уд вала: кызьы дунъяно, кыӵе синъёсын учконо? Огаз фотокарточкаын Тихонова - бускельысьтымы нылаш - Чупаш Марина. Шошмо шур дурысь лабрес бадьпуос вӧзын пальпотыса сылэ со. Мукетаз - ачим. Сяськаосын тулкымъяськись турнамтэ возь вылын. Та туспуктэмъёсты нокинлы возьматъяме ӧвӧл. Кесяны но, учогысь тылэ куштыны но жаль пото. Малы-о ватыса возисько? Мугез туж паймымон. Татын ми Маринаен Адамлэн но Евалэн "дӥськутэнызы" - шыр гольык. Кулэтэм интые ӝужам пуштырес, ненег гонъёсмы, инмарен кузьмам нылпи лэсьтон-вордон "тӥрлыкъёсмы" - шарак син азьын. Йырвизь ик зурка: "Ма, кызьы-о соку возьытлыкмес ыштӥм? Кин янгыш? Та ӵужектэм туспуктэмъёс - мынам адӟонэ-а, улонам малпатэк лэсьтэм вамыше-а, вераны-гожтыны луонтэм шумпотонэ-а?" О-о, кӧня юан гердъёс! Кӧня аръёс ӵоже ини уг быгатӥськы мон соосты пертчылыны, кулэ валэктонъёс сётыны... *** Ас вакытаз Чупаш Марина Турья гуртамы самой чеберез, самой кильтыроез нылмурт вал, дыр. Солэсь кылчин тусбуё чеберлыксэ гожтон вылысь, ӵошатонъёс, чебересь кылъёс утчаны ик шугъяськоно. Казакпиос сярысь веранэз ӧвӧл ни: веськрес, тыр мугоро нылмурт шоры учкыса, воргоронъёс гинэ но шоканзэс ыштылӥзы. Сад-бакчае выль выжыысь сяськалэн лопырскемез-усьтӥськемез мактал вал ук! Чеберлыкез синъёсты ик палёмытылӥз, жадьытозяд шораз учкиськод: уго кырсь-пож улонамы чеберлыклэсь нокин но ӧз акыльты на. Котырес бамыз тыр толэзь выллем, синъёсыз етӥн сяськаос, кожалод. Йырсиез, бигер нылъёслэн кадь, чиль-сьӧд. Йырси кутонэн юнматыса, тыбыр кузяз вӧлскемын. Пыдъюмылъёсыз котькуд казакпилэсь синъёссэ эркияллязы. Вольытэсь соос, ӵужмыт тусоесь. Малпалод: кыӵе ке усточи сюсьлэсь кисьтэм. Нылмурт но калык синъёслэсь ватыны ӧз тыршы пыдъюмылъёссэ - гуртамы нырысь ик вакчи юбка дӥсяз. Зэмлыкез ватонэз ӧвӧл, дыр: Марина вылын котькуд дӥсь чебер адскылӥз. Вузкарисьын ужась палкышно, Чупаш Наталья, одӥг гинэ нылзэ чебер дӥськутъёсын шумпоттылон понна, коньдонэз ӧз жаля, вылды. Сизьыметӥ классын дышетскыкуз, Тихонова ӝыт шудонъёсы потаны, быдэ вуэм егитъёсын ӵош эктонъёсы-кырӟанъёсы, концертъёсы пыриськылӥз ни. Арлыдоос но ӝогак ас пӧлазы пыртӥзы, эшен лыдъяны кутскизы. Кык ар ортчыса, укмысэтӥ классэз азинлыко йылпумъяме бере, атае мыным "Смена" фотоаппарат кузьмаз. Шумпотонэлэн йылыз-пумыз ӧй вал кадь. Кӧня ке нунал ортчыса, Чупаш Марина монэ возь вылэ ӧтиз. Тунсыкъяськыса юамелы пальпотӥз гинэ: - Велосипедэн котыръяськом, выль кырӟанмес йылаз-пумаз вуттом (ӵапак, бускель гуртъёсы потан вылысь, концерт дасяськомы вал). Фотоаппараттэ но сьӧрад басьты. - Яралоз, Марина, - шунды выллем мыняй шораз. Мукет кыл вераны, пумитъяськыны кужым ӧй шедьты ни. Гуртысь самой, самой, самоез мед ӧтёз ай! Быдэс дуннеез пыдын котыртыны ӧтьысал ке но, чик тунаськытэк сьӧраз вамыштысал, кожасько. Велосипедъёсмес Горло ты вӧзысь саюлэ кельтӥм но сяськаосын пачылмем возь вылтӥ Шошмо шур пала вамыштӥм. -Быдэс улонме, мушъёс сямен, йырез ческыт зынэн поромытӥсь, кӧттыро мӧль кузьмась сяськаос пӧлтӥ гинэ лобаса ортчытысал, дыр, - мылкыдзэ шараяз нылмурт. - Соос но огшоры гинэ уг лобало ук, - вазьытэк ӧй чида. - Асьсэ семьязы но калык понна сюлмасько. Чечы люканлэсь секытсэ асьсэос гинэ тодо, луоз. - Ӧвӧл, мынам соос сямен ужаме уг поты. Быдэс гумырелы сяськаё дуннее гинэ зумысал. Ма, собере лекаськон шизэс но пунэманы ярасал, вылды. Вылдӥсьёсмес лабрес бадьпуос, лулпуос вӧзы куяса, кема пылаським Шошмо шурлэн мугормес мусоясь ӧраз. Кыкнамы гинэ. Гуртысь калык шурлэн вылӥязгес, юри тупатэм интыын пылаське. Ярдуре потон азямы ни Марина вӧзам султӥз но небыт киосыныз мугорме маялтӥз. Синъёсыз чилекъяло, ымдуръёсыз дырекъяло. Мон но бакоми. Нылмурт киос возьытлыксэс воксё ыштӥзы кадь: гольык мугорме базарысь басьтоно вузэз музэн эскеро, кырмало. Бурыз паллянэзлэсь но дӥсьтӥсьгем кариськиз: чулькак гинэ плавкие улэ чуртнаськиз. Мон пӧсьвуаськи: пал кыл вазьыны но, пумитъяськыны но уг быгатӥськы. Валасько-шӧдӥсько: мугорам олокыӵе валантэм кужым ватсаське, ас киосы но Мариналэн мугораз кый музэн бинялскыны тыршо. Озьы огшап сылэммы бере, лычсузён но йырвизь бусаськон тӧлӟизы кадь. Мултэс синъёс адӟемлэсь курдаса, ярдуре потӥм но куакъёс пӧлы ватским. - Игорь, - секыт лулскыса (пичи, ненег булка кадесь нонокъёсыз ик ӝутъясько) вазиз нылмурт. - Ойдо воксё дӥськуттэк туспукты ай монэ. Мон соглаш луэмме вератозь ик сяськаё бюстгальтерез но кык чиньы пасьта трусикез лулпу вае ошиськизы. Мынам синъёсы ик кымысам кӧчизы кадь. Шоканы вунэтыса учкисько яратонлэн инмареныз - Венераен - кузьмам бабля гоно "вырйыл" шоры. Марина чингыли куараеныз серектэ: - Уждэ эн вунэты, Игорь. Кут ни фотоаппараттэ. Сотэк синъёсыд гопысьтыз тэтчозы. - Ма, ма... Ачид... - кылрадме сураса лабыртӥсько. Огез бӧрсьы мукетсэ туспуктӥ мон. Чупаш Марина дыртытэк дӥсяськиз но ,палэнэ кельтэм велосипедъёсмы пала вамыштӥм. Кускозь ӝужам турын пӧлтӥ вамышъяса ӝужыт шашыос доры вуэммы бере, бускеле ӵектӥз: - Табере тон вылдӥсьёстэ куя. Мон тынэсьтыд гольык мугордэ туспукто. Ымныры дарали кадь ӵыжектӥз. Сюлэмы луп-луп йыгаськыны ӧдъяз, быдэс мугорысьтым виры быректӥз, кожалод. Ноку но ӧй малпа: утёд ке, пиосмурт, нылмурт сярысь, керпотӥсьгем вылэм. - Малы-о йӧнтэм курадӟонэз, Марина? - пумитъяськыны вырисько на. - Мынэсьтым керпотӥськод, иське? - вӧзам матэктӥз со. Соку ик дэрем бирдыосме кыӵесысьтызы поттылыны, кускысьтым еме пертчылыны басьтӥськиз. Кык пол "шалькак!" вазиз фотоаппарат. Ми Маринаен, ваче ӟыгырскыса, нап турын пӧлы уськытским. - Эн дырты, Игорь, - синъёссэ кыньыса шыпыртэ Марина. - Мугорме нырысь маялля, чупа. "Рай капкаетӥ" пырыны эн дырты. Сыӵе дыре ӝог тӧлӟе нылмурт шумпотон, лычсузён мылкыд. - Кытысь-о ваньзэ тодӥськод? - О-о, мон та экзамен пыр ортчемын ни, - Чупаш Мариналэн ымдуръёсыз вӧлско. - Гольык мугорме мусоямлэсь тудӟытӥсь но гочатӥсь шӧмзэ тодэмын-валамын. Чигтылэм, лошъяськем сяськаос пӧлысь султыса, милям мылкыдъёсмы инсьӧрын поръяло на. Дырлэсь азинскемзэ, кыӵе вакытын-даурын улэммес ик вунэтӥм, кожалод. Вылдӥсьёсмес бырттыны-дӥсяны ум дыртӥське на. Нуназе куазен возьытлыкмес ыштӥм. Кый аслэсьтыз кӧттырзэ музэн, ӝог ньылӥз сое Чупаш Марина. Дор пала велосипедэн ширтыкумы ни вожан сямме кыре поттытэк ӧй чида. - Марина, кин-о гольык мугордэ нырысь мусояз? - Малы кулэ со тыныд? - Тодэме потэ. Кинзэ тодытэк но вожасько ни мон соин. Чупаш Марина гольтырес серектӥз но вакчияк валэктӥз: - Мыйыко воргорон. Кык нылпиослэн атайзы. - Ма-ар-р?! Асьме гуртысь-а? - Америкаысь луоз шат? Син азьтӥм соку ик вошъяськыса ортчо гуртысь мыйыко, кузпалэн улӥсь воргоронъёслэн тусбуйёссы. Нош соос Туръя гуртамы ичи вылымтэ. Горд, сьӧд, ӵуж мыйыко атайёс лачак гинэ люкасько. Кудӥз сярысь малпаны ик абдралод. - Уйёсы анае доры лушкемен кожалля со, - малпаськонме-тунаськонме куспетӥ карыса вазиз Марина. - Нош огаз уе анае дорын ӧз тупа. Куное кошкиз вал. Озьы арлыдо гуртое монэ мусояз, яратӥз. - Воксё ӧд пумитъяськы шат? - Нырысь пумитъяськи. Нош воргорон киос укыр небытэсь вылӥллям. Олокызьы мусояны, мугорлы кыкетӥ шокчон кузьманы йӧндыро. Мон йырсазьме ик ыштӥ кадь. Нуназе куазен вӧзам акшан лэзиськиз, оло? Мылпотытэк кадь ӵектӥсько на: - Мынэсьтым службаысь берытскемме возьма, Марина. Берытско но - кузпалъяськом, сюанмес шудом. - Улон возьматоз ай, Игорь, - велосипед педальёсаз ӝоггес лёганы кутске Чупаш Марина. Гурт ураме пыриськом люкиськыса: со ураметӥ ширтэ, мон - бакча беръёстӥ. *** Лушкем лэсьтэм туспуктэмъёсты ӵемысь огнам учкылӥ мон. Олокыӵе но бугырес мылкыдъёс, тодэ ваёнъёс кузьмаллязы соос. Бератаз, анай-атае, вын-сузэръёсы медаз адӟе-синйылтэ шуыса, туж пыдло ватӥ. Соин валче ик паськытаз кадь азьпалась инвис но. Олокӧня дасо аръёслы ваньмыз пусъемын, чотамын ни. Тани школаез йылпумъяло, Можга педучилищеез пырпотыса, дышетӥсь карисько. Ӝог ортчозы со аръёс: вордскем гуртам берытскыса, муспотон Чупаш Маринаен сюанмес шудом. Кылдоз выль семья, пуктомы выль юрт. Азбарын люр- ляр карыса шудозы, бызьылозы вить-куать муспотон нылпиосмы... Чебер выжыкылэз малпаны секыт вылымтэ. Сое улонэ пыӵатыны гинэ укыр секыт. Марина Балтасьысь "Шошмо" ресторанын официантка луыса ужаны кутскиз. Егит мылкыдлы вожан мугъёс тырмыт гинэ вал. Ас малпанъёсам олокызьы но сьӧлыкалляй мон бускель нылашез. Нош лушкаськон интыысеныз кырмымтэ адями лушкаськись ӧвӧл на, янгышен лыдъяськись мурт гинэ. Кроликъёслы сиён вайыны малпаса, кусо кутӥ но шур дурысь нёжалэ васьки. Татын, мускыт интыын, укыр ӟеч ӝужамын ӝакы сяська. Кечпиос укыр яратыса сиё сое. Кусоеным кӧня ке пол шонскыса гинэ вуи - сюрелась ӟег пӧлысь воргорон потӥз. Котыр утчалляське, монэ ӧз синйылты, лэся. Маке умойтэм луонзэ валатскыса музэн, мон ӝогак льӧмпу сьӧры ватски. Тодмай - гуртое Кытай Толя. Вылаз спортивной чалбар (брюки) но матросской тельняшка гинэ. Кыллы укыр шаплы, ужлы чырткем воргорон со. Яратыса кузпалъяськиз, кык нылпиоссы будо. Зэм, семья куспазы керетонъёслэн пуромемзы кылӥськылэ ик. Калык верамъя, ӝӧк вылысь тусьты-пуньыос но валче шалтырто, куара потто. Кытай Толяез сокем чебер воргорон уд шуы. Лапег мугоро, бадӟым, купрес ныро. Синъёсыз сюбегесь. Оло, синъёсыз понна, оло Китай кунгож вӧзын служить каремысьтыз, гуртоос солы Китаец кушемним сётӥзы вал. Бератаз ни Кытай Толялы пӧрмытскиз. Воргорон ымдурысьтыз сигаретсэ кияз басьтӥз но, кыӵе ке бурдо мактал, чияк! шултӥз. Мышказ учкемен валче, кышкатскем койык музэн, шур дурысь куакъёс пӧлы ышиз. Мон мазэ-созэ валаса ӧй вутты - ӟег пӧлысь потӥз Чупаш Марина. Вирсэрысьтым виры ӝогак быректӥз но, кӧня ке секунд ортчыса, тан-тан кынмиз. Азьлань но, берлань но сётскыны уг быгатӥськы ни. Одӥг малпан гинэ сюлэмме пыӵ сямен портэ: "Малы Марина Кытай Толяен юмша-мусояське?" Олокыӵе жоб кылъёс вераны дась луэмме шӧдыса, дӥсьтонлык шедьтыса тэтчи мон ватскем интыысьтым. - Юмшась пуны! - дыректӥз куарае. - Возьытлыктэ воксё ыштӥд ни шат? Нуназе куазен воргоронэн калтыртӥськод. - О-о, тон но утыны быгатӥськод шат, кучапи? - кунэрес мынектӥз нылмурт. - Тон... тон... азгынмем адями. - Я, я, эн вожа, - вӧзтӥм ортчиз Марина. - Монэ мусоян понна, нырулыд ӧз кӧса на тынад, Игорь. Пумитаз вазьыны кыл ӧй шедьты ни. Озьы уго: адями излэсь чурыт, сяська кадь ненег но кариськыны быгатэ. Нош таяз учыре Мариналэн кылъёсыз пуштӥсь дары кадь вал. Ас мылкыдме вормыны быгатымтэеным, бам вылам кылдӥзы бычырам синкылиос. Турынэн пуйыме но кусоме ӝутыса, гурезь бамалэтӥ ӝутскисько. Али адӟеме но кылэме катьтэммытӥз монэ, пыдессинъёсы ик либыразы. Ӧпкелисько: "Малы-о котьку ушъялляй мон Маринаез? Адямиез мултэс ушъян - йӧлэз шуныт азе пуктэм кадь. Чырса. Бен, арлыдоос юнме уг верало, дыр: кисьмам улмоез сиыны котькин дась". Чупаш Марина вуонояз тулысэ анай кариськиз. Бызьытэк ик. Нош кема ӧз кайгыры. Ас пизэ анаез вӧзы кельтыса, городэ шонтӥз. Ас шудзэ утчаса, вылды. Котькуд куинь ар куспатыса, выль кузпалэн вуылӥз со гуртамы. Чупаш Натальлэн вӧзаз ньыль внукъёсыз ни. Ӧйтӧд, малы-о, семья кылдытыса, улонын ас шудзэ шедьтыны уг быгаты Марина? Калык верамъя, бызьыны капчи, пиосмуртлы дэрем вурыны секыт. ... Туэ гужем нырысь гажанэ пересь воргоронэн ӵош бертӥз. Куатьтон кык арес ни картэзлы. Чупаш Мариналэн таиз кузпалэз укмысэтӥез луэ. Ма, аръёс ортчо ук - ӝегатыса уд возьы. Аслам кузпалъяськеме дырысен но кызь вить ар ортчиз ни. Туэ азвесь сюанмес шудӥм. Куноос лачак гинэ люкаськизы. Кырӟан-эктон жингыраку ик азбаре чылкыт омырен шоканы потӥ. Кема ӝегатэк, ӧс куара кылӥськиз но, вӧзам Чупаш Марина султӥз. - Игорь, вай ай сигареттэ, - куриз со сыномем ӟиры куараеныз. - Ӵындӥськод, оло? - О-о, - валантэм мынектӥз со. - Гумыр ортче ук, Игорь. Озьы-а? Уть ай, тӥ но азвесь сюандэс пусйиськоды ни. - Бен, аръёс ортчо, - соглаш кариськи мон. - Нош ачид шудӥд-а азвесь сюандэ? - Кинэн-о? Кудӥныз-о? - Нош та пересьлы малы бызёнэз на вал? - сюлэм ӧз чида ни лексьытэк. - Узыр со, Игорь, - мынектӥз Марина, буям, юри кузь будэтэм гижы йылыныз сигарет пумысьтыз пеньзэ куртконъяз. - Кема уз улы ни - чоньдоз. Нош висьыны усьыса, котыраз берганы тупаз ке - мон солы яд удо. Мынам йырсиосы ик пежырскизы. Мариналэн кылъёсызлэсь мугорысьтым виры кыкетӥзэ кынмиз. Кыл-куара поттыны валатэк сылӥсько. - Со туспуктэмъёсты возиськод на-а? - шорам сӥсъяса учко кышномурт синъёс. - Уг. Кузпалъяськеме бере ик ӝуась гуре сэрпалтӥ, - эрекчатэк амалы ӧз луы ни. Кин тодэм, ас понназ шумпотыны но шедьтоз: "Уть ай, яратэ вылэм монэ! Али ке но утялтыса возе со ӵужектэм туспуктэмъёсты". - Нош мон синпель кузьымез музэн утьыса возисько на. Котькуд кузпалэлы возьматъясько. - Возьыттэм. Нош картъёсыд ма шуо? - Кудӥз, сэпез пӧсьтымон, вожаны ӧдъя, кудӥз тон вылэ сяла, кудӥз тонэ ик ушъя. - Кеся я тылэ кушты соосты, Марина. - Уг, уг. Эн ик куры. Тодэ ваёнъёс ук со. Муш музэн, ческыт мӧль утчан вакытэз тодам вайыто. Чупаш Марина азьзэ-берзэ синйылтӥз но киме кутыса куриз: - Ойдо, сад-бакчаяд яке кеносад ватском. - Нош пересед? - Фи-и, - мыньпотӥз кышномурт. - Мар-ось курдалом мон со бакча сульдэрлэсь? Ойдо, кема ум ӝегалэ. Кышноед сактыса но уз вутты. - Уг, тон сьӧры уг мыны. Арганчиез вӧзад ӧтьыса шыпыртоно ке шат? Азьвыл тодмоед ук. - Кинэ, кинэ? - Кытай Толяез. - Вожаськод на, иське. Зэм, зэм. Вожатэк яратон - сылалтэк пӧзьтэм шыд мактал. - Кулэед собыдӟа, Марина, - зӥрак берытскыса, корка вамыштӥсько. ... Нош огнам кыльыкум, ӵужектэм фотоосты ватэтысь поттылыса учкылӥсько на. Выль блокнотам арысь аре выже Ижысь тодмо адрес но. Нош ик ог арлы. Вуоно бугыръяськытозям. Жингыртоз удмурт кырӟан Тазалык - байлык, шуо удмуртъёс. Тазалык луиз ке, байлык но луоз. Нош байлык луиз ке, ӝӧк вылмы тыр луоз. Ӝӧк вылмы тыр луиз ке, кӧтмы но тыр луоз. Кӧтмы тыр луиз ке, лулысь-сюлмысь ужаломы, шулдыр кырӟаломы. Таӵе мылкыдын ик улыны тыршиськомы ми. Возьматъяськомы концертъёс, пумиськылӥськомы гурт калыкен. Январь толэзе милемлы чабылӥзы Пичи Пурга ёросысь Эгралан, Куреггуртын, Баграш-Бигралан, Эдэйгуртын улӥсьёс. Ансамбльмы али узырме пинал кырӟасьёсын-верасьёсын. Озьы ик - пичиесь пушъетъёсынымы. Соос сюлэмез шумпотто, азьланезлы оскон кылдыто. Февраль толэзе вуылыны малпаськомы Можга ёросысь Карашур, Гозек, Быдӟымсурд гуртъёсы. 24-тӥ феврале, кӧснуналэ, бадӟым концерт возьматыны малпаськомы Драмая удмурт кун театрлэн юртаз. Шулдыръяськон кутскоз 16 часын. Лыктэлэ, гажано эшъёс, "Зарни шеп" ансамбльлэн фольклор ӝытаз. Ф.Михайлова. Пичи огазеяськонъёс кылдытъяно "Удмурт кенеш" ортчемаз кӧснуналэ туж кулэ ужрад ортчытӥз - ёросъёсысь, городъёсысь, гуртъёсысь мыло-кыдо ужась адямиосыз люкаськылӥзы дышетсконэ. Соосты шулдыр удмурт гурен, сюлмысь потэм шуныт кылъёсын, перепечен но мильымен пумитазы Ижысь Октябрь ёросын улӥсьёс. Соос татын гуртъёсын сямен ик огазеяськыса, ог-огзэс гажаса, удмуртлыксэс утьыны тыршыса уло. Усьтӥз та ужрадэз "Удмурт кенеш" огазеяськонлэн тӧроез В. К. Тубылов. Нош "кенешчиосты" ӟечкыланы нырысь ик кыл сётӥзы Ижысь Октябрь ёросысь администрацилэн йырызлы С. В. Протозановлы. Со удмуртъёслэсь сюлмаськонъёссэс валаны тырше. "Ми валамы, - шуиз со, - "Удмурт кенеш", солэн ёросысьтымы люкетэз югыт малпанъёсын уло, соослы юрттоно. Городамы котькыӵе выжыысь адямиосты гажаны дышетсконо". Таӵегес кылъёсын вазиськиз Сергей Владимирович удмурт калыклэн мыло-кыдо адямиосызлы. Та ёросын "кенешчиос" берло аръёсы ӟеч вамышъёс лэсьтӥзы. Татын тыршыса ужа Шаркан ёросысь лыктэм удмуртъёслэн дэменлыксы. Удмуртъёс люкаськыло ляб адӟисьёслэн, синтэмъёслэн "Спутник" предприятизылэн бадӟым залаз. Татын калыкен пумиськылонъёс ӟеч радъяськыло ини. Кырӟаны-вераны яратӥсьёслэн "Инвожо" но "Ивушка" ансамбльёссы вань. Дышетскон нуналлэн пумаз соос асьсэлэсь быгатэмзэс шулдыр но чебер возьматӥзы. Ёросысь огазеяськон ӟеч кусып возе Азин нимо библиотекаен, куд-ог школаосын. Ужан амалъёссы сярысь пыр-поч вераськиз "Удмурт кенешлэн" Октябрь ёросысь люкетэзлэн тӧроез З. Б. Петрова. Со тодматӥз аслаз сюлмо муртъёсыныз, ивортӥз пичи огазеяськонъёс кылдытъян амалъёс сярысь. "Спутник" предприятиын таӵе ёз кылдытэмын кык ар талэсь азьло. Солэн кивалтӥсез Е. А. Сырых вераськиз удмурт кылэз дышетон мылкыдзы, асьсэлэн ужъёссы но куронъёссы сярысь. Сюлэме пыӵаз ляб адӟись удмурт нылпиос сярысь сюлмаськемез. Куронэз-вазиськонэз таӵе: соос понна нимысьтыз удмурт букварь кылдытоно вылэм. Дышетскыны уг тырмо книгаос, чеберлыко удмурт ужъёсын тырмытэм кассетаос. Вераськонэ пыриськизы "Инвожо" ансамбльлэн старостаез А. И. Поткина, ёросъёсысь тӧроос - Кизнерысь С. П. Петрова, Ижысь Ленин ёросысь И. М. Викторов, Первомай ёросысь А. Л. Иванова но мукет "кенешчиос". Люкаськемъёс азьын Финн-угор калыкъёслэн куинетӥ бадӟым ӧтчамзы сярысь вераськиз солэн делегатэз, удмурт нылкышноослэн огазеяськонзылэн тӧроез тодосчи Г. А. Никитина. Со сяна, та нуналэ чебер концерт возьматӥзы "Октябрь" ёросысь ансамбльёс. Л. Федорова. Оскон Интернетэ - удмурт кылын Кылем арын газетмылэн 110-тӥ�114-тӥ номеръёсаз Пичи Пурга ёросысь Курчум-Норья гуртысь Петровъёс сярысь потӥз бадӟым материал: "Инкуазь та выжыез быдтыны выре. Но уг быгаты. Медаз пишмыты!" Та нуналъёсы редакциямы вуиз Алексей но Виктор Петровъёслэсь гожтэт. Ӟечбуресь! Гожто тӥледлы Петров кыкто вынъёс. Кинъёс-маос тодӥськоды на, дыр. Асьмелэсь шумпотэммес вераны турттӥськом. Сӥзьыл телефон пуктӥзы, тодмомы модем кузьмаз. Табере милемыз шедьтыны луоз Интернет пыр но, электрон почтаен но - асьмелэсь кема лэсьтэм страницаосмес адямиослы адӟытыны быгатӥм. Али милям куинь сайтмы. Огез Курчум гуртмы сярысь хттп://www.аз.ру/курцхум/, мукетыз Каймашур (Пуныгурт) сярысь - хттп://хоме.удмнет.ру/каимасхур/. Куинетӥяз ӧдъяськом вал ми кадь висисьёс сярысь мадьыны, интыез но вань ини. Жаляса вераны кулэ, таяз туж ӧжыт ай гожъямез. Курчум сярысь гожъямамы трос удмурт кылъёсыз. Соосты возьматон понна кулэ вал удмурт букваосын шрифт. Ми со бордын кема ик выриськом ини, но уг пӧрмы. Соин ик удмурт адями паймыса учкоз, кулэ символъёсты ӧз ке адӟы. "Удмурт дунне" газетэ вазиськоно кариським. Тӥляд ӧвӧл-а тодмоосты, кинъёс выро Интернетэ удмурт кылэз вӧлмытыны? Оло, милемлы но валэктысалзы, кызьыгес карыны? Собере ми вазиськиськом на миопатиен висисьёслы: мед лэзьялозы асьсэ сярысь гожтэтъёс. Трос адями пӧлын, оло, эмъясь яке тодӥсь мурт сюроз. Миопатиен висисьёсъя лэсьтоно вал база данных шуон. Висисьёс мед вералозы асьсэ сярысь: кызьы эмъяськыны выро, мар шуг-секытсы вань, кыӵе юрттэт возьмало, маин тунсыкъясько, ма ужаны быгато. Малпан тачак, но милям ваньзэ лэсьтэммы уг луы. Адямиен вераськыны кулэ, нош ми, коркан пукыса, нокинэн но ум адскиське. Соин ик куриськом газетады пичи гинэ статья лэсьтыны: висисьёс милемлы мед гожтозы, яке тӥ пыр мед вазиськозы. Алигес одӥг тодмомы милемлы юрттӥз шрифтъёсты тупатыны: Wиндоwс 98 вылэ потыса, удмурт букваосмы чылкак ышизы вал. Со вань букваосъя выль код но милемлы ыстӥз. Та гожтэтмес ӧдъяськом вал электрон почта пыр лэзьыны, но кӧня утчам - адрестэс ӧм шедьтэ. Малпамы факсэн лэзьыны, ӧз пӧрмы, ӝыт факсты кысэмын-а, мар-а? Берло номерысь гинэ адрестэс шедьтӥм. Табере гожъялом ини акыльтытозяды! Я, таин ваньмыз. Ӟеч луэ. Петров вынъёс. АРЪЁС НО АДЯМИОС Гольык пыд ураме уд поты 1965-тӥ арын Якшур-Бодья ёросысь Пестовка гуртысь пияш Николай Ажимов Люк-Шудья школаысь 8 классэз йылпумъяз но Ижевске вуиз. Пыдкутчан тупатъясь луыны малпаса, артист кадь чебер но веськрес пияш вазиськиз Воровский ульчаысь пыдкутчан фабрикае. Утыр дышетскиз, утыр ужаны дышиз. Нырысь быдэсъяз капчигес куронъёсты, пумен дышиз секытгес ужъёсты но лэсьтыны. Ужез кельшиз, кельшиз солэн ужамез катаоссэс, сапегъёссэс тупатъяны ваисьёслы но. Собере Коляез армие басьтӥзы. Службазэ ортчытыса, со нош ик берытскиз фабрикаяз. Ужзэ ӟеч пӧрмытэ ни вал бере, уждунэз дӥсяськыны но сиськыны тырмылӥз. Соин со ӝыт ужась шор ёзо школае пыриз, сое йылпумъяз. Тӥни собере ини кузпалъяськиз. Ажимов висъяськылӥз вылӥ ӟечлыко но ӝог ужаны быгатэменыз. Пушкин урамысь 222 номеро юртын бытъя салон усьтӥськем бере, сое отчы ӧтизы. Николай Ивановичез бригадире пуктӥзы. Бригада арысь аре ужан планъёссэ данаклы мултэсэн тырмытъяз. Вузкаронъя но калыклы юрттэт сётонъя министерство азьмынӥсьёсты адӟытэк ӧз кельты. Бригадирзылэн нимтулыз шедьылӥз УАССР-лэн Данъян пул вылаз, сое бырйылӥзы калык депутатэ. Но Ажимов ноку но дан сярысь ӧз малпаськылы. Солы пичи дырысеныз малы ке уг кельшы трос калык пӧлын ужаны. Соин ик ужан интызэ ачиз воштӥз. Табере со мынӥз Ворошилов урамысь бытъя юртэ. Татын но Ажимов котыре дышетскисьёсты люказы. Выльысь со кошкиз бадӟым коллективысь, таяз учыре - Татьяна Барамзина нимо урамысь мастерское. Но вуизы выль вакытъёс. Усто мастерлы дэмлазы ужбергатонэн вырыны. Но татын ар сяна ӧз чида Николай Иванович. - Ужбергатон - мон понна ӧвӧл, - шуэ со. - Бызьылоно, отчётъёс гожъяно, выт тыроно, нош мон - ужась адями. Бен, басьтӥ вал аслым оборудование, но таяз ужан интыям ваи. Татын ваньмыз сярысь сюлмаське директормы Р.Ф.Фархутдинов. Кивалтӥсе лякыт, соин гань-гань ужасько. Ваньмыз ас интыяз кадь. Н.И.Ажимовлэн выль ужан интыез - со Первомай ёросысь пенсионеръёслы улон-вылонын юрттэт сётонъя центр. Пыдкутчан тупатъясьлэн нырысь ужез - пенсионеръёслы юрттон, дунтэмгес тупатэм дунъёсъя ужан. Уждунэз бадӟым ӧвӧл ке но татын кельше солы. Мӧйыос со доры нуназеян вакытаз но пыро. Николай Иванович улон-вылонзы, тазалыксы сярысь юалляське. Быдэс юрт шуныт, каньыл мылкыдын тырмемын кадь. Пыдкутчан тупатъясьын 35 ар ужам мастерлэн ки пыртӥз потэм катаос быдэс вагонъёсын люкаськозы. Нош котькудӥз сьӧрын бадӟым но пичи шумпотон: ярантэм катаез адямилэн пыдаз поныны яраз. Пыдкуктэк угось одӥг вамыш но уд лэсьты. Тӥни соин адямиос солы тау каро. П.СКОБЕЛЕВ. Туспуктэмез М.Менладшинлэн. Оскы кужымедлы Кебитысь кылӥське молот жугем куара. Тодмо ини: отын ужа кужмо дурись. Вазь ӵукнаысен бер ӝытозь кужымзэ жалятэк тышка со секыт чекычсэ (молотсэ) ӟырдам тыл дурын. Мар веранэз: туж секыт. Озьы ке но, Пичи Пурга районысь "Дружба" эштосысь дурись Павел Анатольевич Збитнев таин гинэ уг буйгатскы: кебитын, кужым сяна, дуре на аслыз "вормон" но. Котькуд нунал ужъёсыз бере спортэн вырыны дыр шедьтэ. Тазьы тыршемзэ калык но адӟытэк ӧз улы: ужын но спортын азинсконъёсыз понна 1997-тӥ арын 3-тӥ ноябре Павел Анатольевичлэн нимыз пыртэмын Пичи Пурга ёросысь Данъян книгае. Спортэн тунсыкъяськыны кутскемез сярысь Павел Анатольевич тазьы вера: - Таӵе мылкыды кылдӥз, шуыны луоз, дас кык арескам. Соку мон нырысетӥ грамотаме куас вылын ӵошатсконъёс ортчем бере басьтӥ. Собере агае вераз: спортэн али вырытэк, армиын азьланяз секыт луоз. Верамзэ пелям понӥ но 10-тӥ-11-тӥ классъёсын нырысь ик ас поннам выри, отӥяз нюръяськонъя секцие гожтӥськи. Кивалтэ вал соин А. П. Ушаков. Табере ини дышетӥсеным ӵош ветлӥськом ӵошатсконъёсы. Агаелэн верамез но зэмаз: спортэн азьвыл ик выреме армиын зол юрттӥз. Нош службаысь бертыса, таӵе учыр тупаз: 1993-тӥ арын 28-тӥ ноябре шаерамы ортчизы гуртысь спортсменъёслэн шудонъёссы. Тӥни отчы пыриськыны дэмлаз Аксакшур гурт кенешлэн тӧроез В. И. Тихонов. Табере котькуд ар пыриськисько ини таӵе но та выллем ӵошатсконъёсы. Отын Павел Збитнев огшоры бызьылӥсь гинэ уг луы: ёрос ӵошатсконъёсын 1994-тӥ арысен басья ни нырысетӥ инты. Бере уг кыльылы шаер ӵошатсконъёсын но: куинь ар ньылетӥ инты басьямез бере, 1997-тӥ арын дуатлонын ӝутӥськиз азвесь медалёзь, спортъя мастерлы, Россилэн чемпионэзлы Денис Лекомцевлы келяса гинэ. Шудонъёсы выльысь пыриськыса, куинетӥ интые потӥз дуатлонын: данъязы медален, телевизорен. Ачиз верамъя, Павел Анатольевич туж ик уг яраты уяны. Соин ик триатлонын вормисе уг потылы. Таӵе муген ик Юкаменскын ортчем гурт шудонъёсын но ньылетӥ инты гинэ басьтӥз. Озьы ке но, мылкыдзэ ӧз куашкаты. Дуатлонын но триатлонын сяна, Павел Анатольевич мылысь-кыдысь ӵошатскылэ полиатлонын но. Таиз ини ортче толалтэ: егитъёс ыбылӥсько, куас вылын бызьыло, ӝутъясько. Таяз но егит воргорон ассэ быгатыса возьматэ, спортэн рос-прос тунсыкъяськемез адӟиське. Зэм, таӵе азинсконъёс спортъя мастеръёс но уг шедьто. Нош гуртысь огшоры дурись быдэс шаерамы тодмо луиз ни. Та адямиен ӟечгес тодматскеме бере, таӵе юанэ но кылдӥз: - Павел Анатольевич, улондэс спортэн быдэсак герӟаны но городэ лыктыны уд малпаське-а? - Аксакшурысьтым нокытчы кошкеме уг поты, - шуиз выль тодмое. - Мон кебитын но ужаны, спортэн но вырыны дыр шедьтӥсько. Туж яратӥсько гурт улонэз, гурт ужъёсты. Кытысь ваньзэ тае шедьтом на, вордӥськем палъёсысьтым кошки ке? Малпаськоно ке, кыӵе калык дорысьтыз лэзёз на "ӝуатскем кизилиез"? Табере соин данъяськозы, сӥлы карозы. Мар веранэз, гуртын Павел Анатольевичлы вожъяськисез но вань, дыр. Тросэзлэн со кадь ик кужмо но етӥз луэмез потэ, дыр. Нош ачиз та шӧртчи кинлэсь меда дышетскиз? - Спортсменъёс пӧлын туж трос адӟем карымон адямиос, - вера тодмое. - Туж сӥлы карисько Галина Кулаковаез, Тамара Тихоноваез. Озьы ик яра куас вылын бызьылӥсь Алексей Прокуроров. Шумпотыса учкисько "Спартак" футбол командамылэсь шудэмзэ. Бен, асьмелэн трос берпум кужымзэс сётыса тыршись спортсменъёсмы. Адӟем карыны луэ сьӧрлось эшъёсмылэсь но. Кылсярысь, В. Делилэсь, С. Бельмондолэсь. Таӵе адямиос шоры учкыса, мылкыд уката но ӝутскылэ. - Нош кыӵе ӵектонъёс сётысалды егитъёслы? - юасько эшелэсь. - Нырысь ик дэмласал спортэн эшъяськыны, - вера Павел Анатольевич. - Малы ке шуоно, астэ кыдатыса, дунне но туала улон шоры учкон воштӥське. Йырвизь сайкыта, тазалык юнма. Висёнъёс палэнэ кожо. Собере аслыд осконэд но будэ. Соин ик, гажано егитъёс, юонэн, тамакен, наркотикен эшъяськытозь бызьылэ, тэтчалэ, кужымдэс пайдаё уже кутэ. Спорт удысын ворекъясь кизилилы Павел Збитневлы сӥземе потэ аслыд юн оскон, ӵошатсконъёсын вормылон, мукетъёсызлы адӟем карымон луон. Светлана Арасланова, Удмурт кун университетын дышетскись. СЮРЕС Дыртод - уродэ вуод Сюрес уг яраты дыртӥсь муртэ. Кин меда уг вала тае? Бен, тодо ваньмыз. Озьы ке но, руль сьӧрын пукисьёс газ йылтӥсь педалез пыкиськытозяз зӥбоно кожало, ульча вамен потӥсьёс солань-талань учкытэк вамышъяло, сюреслэн ӟечлыкез понна кыл кутӥсьёс тырмыт коньдон уг висъяло шуыса ӝожтӥсько. Ӵапак отысь ик пото умойтэм учыръёс. "Удмурт дунне" туэ гожъяз ини кылем арын сюрес вылын кылдэм югдур сярысь. Но, мон малпасько, мултэс уз луы, куд-ог лыдпусъёсты выльысь тодэ ваим ке. Укыр уго шимесэсь соос. 2000-тӥ арын асьме республикаын транспортэн герӟаськем 1668 учыр лыдэ басьтэмын. Со пӧлысь 287-ез луиз, водительёс руль сьӧры юыса-шӧмаськыса пуксемен. Берло аръёсы сярысь, та лыдпус кӧня ке ичигес ке но, буйгатскыны нокызьы но уг яра. Уго юыса луэм учыръёсын гинэ миым 63 мурт бырыны шедиз, 359-эз сӧсырмиз. Сюрес вылын ӵем пумиськыло на возьытсэс ыштэм водительёс. Оло соос укыр кышкасесь, оло юн дӥсьтӥсесь. Мон верасько умойтэм учыр луэм интыысь пегӟыса кошкемъёс сярысь. Кылем арын сыӵеос пӧлысь 244-ез лыдэ басьтэмын. Валля арен ӵошатыса, 1,5 пол уногес. Шофёръёс дугдысалзы но юрттысалзы ке, 31 бырем но 236 сӧсырмем адямиос пӧлысь кӧнязэ ке коть утьыны луысал, вылды. Улон возьматэ, сюрес вылын ветлонъя правилоосты тӥясьёс но мукетъёсыз сярысь малпаськисьтэм муртъёс отӥяз одно ик шедё шуыса. Но сыӵе дыре кыл кутонлэн быдӟалаез шӧдскымон йылэ ни. Мед тодазы возьысалзы тае ваньмыз ик водительёс. Сюрес вылын кышкыт учыръёс кылдыло пыдын ветлӥсьёслэн чакласькымтэенызы- дыртэменызы но. Кылем арын 550 сыӵе ДТП лыдэ басьтэмын. Быремын 78 мурт, 500-эз сӧсырмемын. 2000-тӥ арын кулэсмиз транспортын нылпиосын луэм учыръёслэн лыдзы. Специалистъёслэн малпамзыя, озьы умоен берыктӥське школаосын но нылпи садъёсын валэктон ужез кужмоятон, дышетскон ар кутскон вакытэ "Фара" но мукет со выллем сяме пыӵась ужрадъёс ортчытъян. ГИБДД-ын ужасьёс чакласа возё умойтэм учыръёслэсь кыӵе нуналэ но кыӵе дыре луэмзэс. Син азе малпаськытӥсь суред пуксе. Толалтэ но тулыс, кылсярысь, тужгес но уно ДТП-ос луо пятницаосы. Кышкытлык кулэсме арня шорын - средае но четверге. Гужем но сӥзьыл, валамон ни, умойтэм учыръёслэн лыдзы чутрак будыны ӧдъя шутэтскон нуналъёсы. Мугез тодмо: руль сьӧры пуксё тол вылтӥ машиназылэсь шутэтскемъёс. Сыӵеос малпало, кӧня ке толэзь куспын ветлыны быгатонзы азьло кадь ик кылиз шуыса. Туж янгышало. Толэзьёсъя учконо ке, ваньмызлэсь "узыр" июль но август. Умойтэм учыръёс шергес луо январе-мартэ. Апрельысен соос шӧдскымон йылыны кутско. Уй-нунал ӵоже пусъем учыръёсты возьматӥсь суредэз учкыса валаськод: тужгес кышкыт час - 18. Мугез тодмо. Со дыре предприятиосысь-учреждениосысь водительёс сменазэс йылпумъяло, нош нимаз адямиос ас ужъёссыя сюрес вылэ пото ни. Ульчаосын транспортлэн лыдыз син азьын будэ. Отысь ик пото шимес учыръёс. Кызьы возьматэ статистика, сюрес вылын котькулэсь ичи ДТП луэ вить час ӵукнаысен сизьымозь. Кин кӧлонлэсь капчияк мозмытскыны быгатэ, оло, тае азьланьын лыдэ басьтоз но сюрес вылэ кӧнялы ке вазьгес потоз. Котькинлы тодмо: предприятиослэн но организациослэн транспортазы ответственностез валась, югдурлэсь воштӥськемзэ азьло ик шӧдыны быгатӥсь муртъёс ужаны кулэ. Уго машинаез валтон - соослэн ялан ужзы. Жаляса верано луэ: улонын малпамъя гинэ уг пӧрмы. Оло коньдонзэс шыръяны тыршыса, оло мукет муген данакез кивалтӥсьёс водительёслэсь быгатонзэс йылэтонлы тырмыт саклык уг висъяло, соос азе чурыт куронъёс пуктыны уг сюлмасько. Юнме шат кылем арын котькудӥз куатетӥез умойтэм учыр профессионалъёсын сэрен луэмын? Озьы 37 мурт быриз, 234-ез сӧсырмиз. Милемыз тужгес но шугъяськытэ Гурт хозяйствоя но сиён-юонъя министерствое пырись организациосын кылдэм югдур. Эштосъёсысь, колхозъёсысь транспортэз ужатӥсьёс правилоосты чакланэз кулэен туж ик уг лыдъяло, шӧдске. Куддыр тазьы палэнэ интыяськем гуртысь трактористэз дугдытӥськод но паймиськод. Шӧмаськемын, агрегатэз утялтымтэ, тормозэз но радызъя уг ужа. Тодӥськоды-а, кыӵе солэн нырысетӥ валэктонэз: "Дык мон уг малпаськы вал, татчы милицаос вуозы шуыса..." Сыӵеослэн нокызьы но валамзы уг поты: руль сьӧрын сазь луон нырысь ик соослы асьсэлы кулэ. Милям ужмы - сюрес вылын кышкытлыкез кулэстон, адямиосты утён. Тупатэм правилоосты тӥян учыръёс ӵем пумиськыло "Удмуртавтотранс" огазеяськонын но. Таиз ини чылкак валантэм. Уго татысь водительёслы оскемын калыкез нуон-ваён но. ГАИ-ын, берло аръёсы ГИБДД-ын уно аръёс ӵоже ужатозям, умой валай ни созэ: сюрес вылын ваньмыз сямен умойтэм учыръёс герӟаськемын дыртонэн. Правилоослэсь кыӵе куронзэс тужгес но ӵем тӥяло водительёс? Бен, 115-тӥ статьяез, кытын верамын тупатэм ӝоглыкез чаклан сярысь. Кылем арын со понна куаретэмын яке штраф тырытэмын 142 сюрс мурт. Тӥни макем бадӟым лыдпус. Лыдэ басьтэмын кышкытлыклэсь утиськонъя еосты думонэз кулэ карисьтэм 38,7 сюрс водитель. Сюрес вылын арысь аре люкытгес луэ. Туннэ асьме элькунын 404 сюрс автомототранспорт лыдъяське. Со пӧлысь 345 сюрсэз - нимаз адямиослэн. Ижын гинэ али 162 сюрс единица транспорт. Ӵошатон вылысь вералом: куинь ар талэсь азьло 37 сюрслы ичигес вал ай. Соин ик котькудӥз водитель, ураме потэм котькуд адями туж сак луыны кулэ. Малпаськымтэ дыртонлэсь, "я, номыр ик монэн уз луы ай" выллем шуонъёслэсь кызьы ке но мозмытскыны тыршоно. В. Афанасьев, Удмурт Республикаысь МВД-лэн Сюрес вылын утиськонъя кун инспекциезлэсь кивалтӥсьсэ нырысетӥ воштӥсь, милициысь полковник. ДЫШЕТОН УДЫС Тодон зарезьлы лазег интыос люкето Кылем арняе Калыкез дышетонъя министерстволэн паськытатэм коллегиез ортчиз. Отын 2000-тӥ арын ужамлы йылпумъянъёс лэсьтэмын. Кызьы улэ-шока меда асьме шаерын дышетон удыс? Тани февраль толэзьлэн пумаз Россиысь дышетӥсьёс пумитъяськон ужрадэ потыны малпало. Республикаысьтымы куд-ог школаослэн коллективъёссы но со ужрадэ пыриськон сярысь мылкыдзэс веразы ини. Калыкез дышетонъя министрлэн Л.Захаровалэн верамысьтыз нырысь ик пусйытэк уг луы ӟечсэ. Дышетонъя программаосты, законъёсты уже пыӵатон понна кылем арын республикалэн бюджетысьтыз коньдон тырмыт висъямын. Со юрттӥз куд-ог люкаськем пунэм тыронъёсты кулэстыны. Кылсярысь, дышетӥсьёслы коньдон тыремын книгаосты басьтон но коммунальной услугаос понна. Но азьвыл аръёсы люкаськем тыронъёслэсь мозмытскыны быдэсак ӧз на луы. Кылем арын 12 выль школа усьтэмын. Со сяна, ужаны кутскиз республикаысь нылпи юрт, тупатъямын Глазовысь, Кизнерысь нылпи юртъёс но Ижысь школа-интернат. Министерство бадӟымгес саклык висъяны ӧдъяз федеральной программаосты быдэстонлы. Озьы "Сирота нылпиос" программалы Москваысь 5,2 миллион манет коньдон вуиз. Со коньдон чотын автобус басьтэмын Орловоысь нылпи юртлы. Коньдонлэн бадӟым люкетэз висъямын нылпи юртъёсты лэсьтон-тупатъян ужъёслы. "Ӧлексы нылпиос" программая эмъяськон оборудование сётэмын Сарапулысь, Як.- Бодьяысь, Балезиноысь школа-интернатъёслы но Ижысь 15 номеро школалы. Ортчем арын коньдон висъямын вал профессиослы дышетон удыслы но. Коньдон кутэмын выль оборудование басьтыны но тупатъян ужъёслы. Огъя верано ке, 2000-тӥ арын министерство ас азяз пуктэм ужъёссэ, кудъёсыз герӟаськемын вал коньдон но методикая юрттэт сётонэн, быдэстэм кадь. Озьы ке но, дышетон азьын сылӥсь ужпумъёс лачак на. Соос арысь аре быдэсмытэк кылё. Вератэк уг луы таӵе "висись" яраосты. Берло 5-6 аръёсы тросэз школаос выльдыны ӧз быгатэ кабинетъёссэс, ӧз быгатэ басьтыны нокыӵе техника но компьютеръёс - талы нокыӵе бюджетъёсын коньдон висъяны учкемын ӧвӧл. Дышетӥсьёслы бадӟым пунэм тыронъёс кылемын книгаос басьтонлы (85 миллион манет) но коммунальной услугаослы (57,5 миллион манет). Та ласянь вуоно арын но, шӧдске, югдур уз воштӥськы, угось республикалэн бюджетаз коммунальной услугаосты тырон понна номыр учкемын ӧвӧл, нош книгаослы - 28 миллион манет гинэ. Туж секыт югдур выль учебникъёс басьтон ласянь. Ёрос администрациос но ас коже кивалтон ёзъёс ӧскытӥзы ке но вал, курадӟись семьяослы учебникъёс басьтыны юрттозы шуыса, та ужез пумозяз нуыны ӧз пӧрмытэ. Тужгес но ӧжыт коньдон висъязы Шаркан, Ува, Камбарка, Юкаменск, Грах, Алнаш ёросъёс, нош Ижысь администрация начар семьяослы учбеникъёсын воксё но ӧз юртты. Республикаямы туннэ 905 нылпи сад но 837 школа ужа. Но нылпиос ӧжыт вордӥськемен, соослэн лыдзы азьланяз кулэсмыны быгатоз. Нылпи садъёсы ветлӥсьёслэн лыдзы туннэ огъя республикая 2,6 процентлы кулэсмиз, нош Юкаменск, Яр, Кез, Кияса районъёсын - 45-50 процентлы. Кышкытлык кылдэмын малокомплектной школаослы, нылпиос тырмымтэен, коть туннэ ик 30-зэ пытсаны луэ ни. Дышетон удыслэн тужгес но сьӧд виштыез - дышетскисьтэм нылпиос. Кылем дышетскон арын 9-тӥ�11-тӥ классъёсысь 171 нылпи школазэс справкаен йылпумъяз, азьвыл арен ӵошатыса, со 1,5 поллы тросгес луэ. Дышетсконзэс аналтэм нылпиос тужгес но трос Балезино, Глазов, Камбарка, Кизнер, Каракулино, Селта, Сюмси ёросъёсын. Кинлэн со янгышез - семьялэн, школалэн? Бен, татын огъя улонлэсь уродмемзэ но янгыше уськытыны луэ, дыр. Но куд-ог учыръёсы школаос дышетонъя законъёсты тӥяло. Кылсярысь, нылпиез кыкетӥ арлы дышетскыны кельто, мумы-бубыосынызы кенешытэк. Одӥг классын кыкетӥ арлы дышетскыны кельтэмъёслэн лыдзы арысь аре огкадь (2 процент пала) возиське. Удмурт Республикалэн калыкез дышетон сярысь законаз лэземын ӧвӧл нылпиез 15 арес тырмытозь школаысь улляны. Озьы ке но, 2000-тӥ арын 56 быдэ вуымтэ нылпиез та закон ӧз утьы. Ляб дышетскись, укылтэмъяськись, винаен но наркотикъёсын эшъяськись пиналъёслэн лыдзы будэ. Но аналсконо шат соосын ужамысь? Калыкез дышетонъя министерство ӵектэ та уж борды мургес басьтӥськыны. Сыӵе нылпиосын ужан понна нимысьтыз программаос дасяно, котькуд нылпиен нимаз ужано. Нылпилэсь тазалыксэ, сямзэ, визьзэ но семья югдурзэ чакласа ужаса гинэ луоз сое урод сюрес вылэ султэмлэсь утьыны. Дышетӥсьёслэн тырмымтэзы вылэ ӝожтӥськыны уг яра. Туннэ школаосын 42 сюрс дышетӥсь тырше. Со пӧлысь 80 процентэз - вылӥ категориен специалистъёс. Дышетӥсьёслэсь тодон- валанзэс будэтонъя институт кылем арын 6 сюрс пала дышетӥсьлэсь тодонзэс выльдӥз- муромытӥз. Уй пал дышетӥсьёс понна та уж умой радъямын Глазовысь кун пединститутын. Но тамында дышетӥсьёс пӧлын туннэ нуналлы 6 процентэз гинэ егитъёс луо. Кылем арын школаосы 450 егит дышетӥсь вуиз но со дыре ик 176-ез школаосысь кошкизы. Мугъёсыз валамон: пичи уждун но улоннилы ёрмон. Ужаны кутскись дышетӥсьлэн уждуныз 300 манет. Озьы туннэ дунъяське дышетӥсьлэн дипломез. Луэ на, дыр, дышетон удысын кылдэм пумтэм тырмытэос сярысь вераны. Но со ёрмись, курадӟыса улӥсь дышетӥсьёс ик ас вормонъёсынызы паймыто. Шонер, со вормонъёс басьтэмын ас уждэ юн яратон но гажан чотын. Республикаысьтымы 12-аз школаын нылпиосты будэтонъя но дышетонъя пӧртэм эскеронъёс ортчыло. Сыӵе ужын азинсконъёс басьтэмзы понна ХХИ даурлэн школаез ним басьтӥзы ни Ижысь 24, 44, 48, 56 номеро школаос но Воткинскысь 11 номеро лицей. Вуоно арысен 12 ар дышетскон программаез эскерон бордын Удмуртиын 5 школа ужалоз. 2000-тӥ арын 8 предметъя олимпиадаос ортчизы. Отчы 700 нылпи пыриськиз. Тужгес но муресь тодон-валанзэс возьматӥзы Ижысь 11, 29, 30, 41 номеро школаосысь, Глазовысь физикая но математикая лицейысь, Воткинск лицейысь, Дэбес шор ёзо школаысь но Пичи Пурга гимназиысь дышетскисьёс. Россилэн олимпиадаосаз 57 нылпи ӵошатскиз, 18-эзлы дипломъёс сётэмын. Ортчем арын нимысьтыз саклык висъямын национальной школаосын дышетонэз азинтонлы. Юнматэмын национально-региональной компонетъя кун стандарт. Табере со 13 предметъя нуиськоз. Методика ласянь юрттэт сётӥське Удмуртилэн палэназ ужась 105 удмурт школалы. Удмурт кылъя но литературая республикаын радъям олимпиадаын умой дунъет басьтӥзы таӵе шор ёзо школаосысь: Мукшиысь (Як.-Бодья ёрос), Дэбесысь, Подшивалово но Изгуртысь (Завьял ёрос), Мувырысь (Шаркан ёрос), Гожняысь (Пичи Пурга ёрос) дышетскисьёс. Бигер кылэз пыӵатонъя адӟем карымон ужа Юндаысь шор ёзо школа (Балезино ёрос), нош пор кылъя Мари-Возжайской шор ёзо школа (Грах ёрос). Нылпиосты ужлы дышетон - со озьы ик одӥгез туж валтӥсь ужпум. Кытчы мыноз туэ егит мурт, нокыӵе ужлы дышетскемез ке ӧз луы? Уже интыянъя биржае гинэ шат. Тросэз училищеос, рынокен экономикае выжемен валче, статуссэс будэтӥзы, лицейёслы но колледжъёслы пӧрмизы. Соин сэрен профессилы дышетон вылӥегес ӝутскиз. Озьы ке но, та удысын туннэ уг тырмо мастеръёс, тросэзлэн квалификацизы туала куронъёслы уг тупа. Со муген ик оло таӵе учырез но валэктоно: котькудӥз 4-тӥез училищеез йылпумъям адями уже интыянъя центре черодэ султэ. Калыкез дышетонъя министрлы профессиослы дышетонъя воштӥсе табере юнматэмын выль адями. Со Иванов Андрей Олегович. Та удыс шоры выль синмын учкон, оло, куд-ог ужпумъёсты быдэстыны юрттоз. Мар чакламын дышетон удысын 2001-тӥ арын? Республикалэн бюджетысьтыз чакламын висъяны 1,5 миллион манет автобусъёс но 1 миллион манет спортинвентарь басьтыны. Со сяна, туэ нырысьсэ учкемын дотациос чотын улӥсь ёросъёслы 4 миллион манет сётыны сирота нылпиослы улонни басьтон понна. Гурт хозяйствоя министерство 6 миллион висъялоз, гурт училищеослэсь базазэс юнматон понна. Нош мар ӵектэ асьме республикамылы федеральной бюджет? Тросгес, пе, коньдон келямын луоз сирота нылпиосты сюдон понна, соку котькуд нылпи нуналаз 50 манет тыр сиськыны быгатоз. Со сяна, соослэсь стипендизэс толэзьлы быдэ 70 манетозь вуттыны учкемын. Россия Федерацилэн Калыкез дышетонъя министерствоеныз огкыл гожтэмын, гурт школаослы компьютеръёсын юрттон вылысь. Но компьютеръя классъёсты дасян сярысь котькуд ёросын роноос сюлмаськыны кулэ. Озьыен, кондонэн юрттэт дышетон удыслы министерствоен чакламын. Нош нылпиосты дышетон но будэтон котьку сямен ик дышетӥсьёс бордысь потоз ини. Т.БАННИКОВА. Табапуддэ кут ай али ой, уроме... Понедельникысен кутскиз Вӧйдыр. Та праздник вуэмын язычествоысь. Вашкала дырысен адямиос та нуналэ, Шундыез данъяса, со тусо котырес мильым, табань пыжылӥзы. Толэз келяса, гурезь вылысь дӧдьыен нискылазы, пеймытозь шулдыръяськылӥзы. Та дырысен адямиос сӥль сиемысь дугдылӥллям ни, кӧс утьыны дасяськиллям. Вӧйдыр йылпумъяське Прощёной арняен. Та нуналэ адямиос ог-огзэс простить карыны, кӧтӝожзэс, лексэс вунэтыны куро. Пумитазы "Инмар простить кароз" шуоно. Азьпалан - сизьым арня возиськон. И.КИРИЛЛОВА. Трос ужпумъёсты эскерозы Удмурт шаерысь поръёслэн "Одо Мари Ушем" огазеяськонзы но пор егитъёслэн "Ужара" дэменлыксы ӧтё асьсэ ӧтчамазы. Со ортчоз туэ 24-тӥ феврале. Дзержинский нимо культура юртэ люкаськемъёс огазеяськонъёсазы кутозы выль адямиосты, кенешозы финн-угор калыкъёслэн куинетӥ бадӟым ӧтчамазы эскерем ужпумъёс сярысь, кылзозы Сарапул, Вотка городъёсысь, Кияса ёросысь Усьвыр (Унур-Киясово), Грах ёросысь Иж-Бобья гуртъёсысь пичи дэменлыкъёслэн тӧрооссылэсь ивортонъёссэс, вераськозы Каракулино ёросысь Усть-Сакла гуртын ортчоно "Семык" праздник, пор культуралы сӥзем фестиваль (луоз Грах черкогуртын), Грах ёросысь Мари-Возжай но Иж- Бобья гуртъёсысь школаослы соосты кылдытӥсьёслэсь нимъёссэс сётон, "Ужара" дэменлыклэн уставез, солы кивалтӥсьёс быръён, финн-угор калыкъёслэн егитъёссылэн огазеяськонзы, "Одо Мари Ушем" ӵектэмъя, пор пиналъёсты Марий Элысь, Башкортостанысь вузъёсы дышетскыны пыртон пумысь. Е. Михайлова. Ватка удмуртъёс дӥньын Толон-валлян Ватка (Киров) улосын ортчизы удмурт культурая нуналъёс. Соосты радъяз Нациосын ужан политикая министерство. Слободской но Уни ёросъёсысь удмуртъёсын пумиськылӥзы "Удмурт кенеш" огазеяськонлэн тӧроез Валентин Тубылов, тодмо учёнойёс Кузьма Куликов, Людмила Христолюбова, Валентина Ившина, писательёс Никвлад Самсонов, Галина Романова, Семен Карпов, Илья Пельтэмов но мукетъёсыз. Пумиськонъёс сярысь Алексей Шкляевлэсь гожъямъёссэ лыдӟоды вуоно номеръёсысь. Вералом-а, ум-а?.. Пурысялэс но мӧзмылэс луысал, дыр, арлэн тужгес вакчи толэзез - тулыспал - та аспӧртэмлыко нуналтэк. Бен, тӥ соку ик валатскиды, луоз: Дунсьӧлыктэм (Святой) Валентинлэн, мукет сямен вераса, яратӥсь сюлэмъёслэн нуналзы сярысь вераськон мынэ. Тодмо кырӟанын сямен, "Вералом-а, ум-а?" шуыса тунаськонэз ӧвӧл. Вань мылкыддэ, лушкем малпанъёстэ кут но шарая та нуналэ. Юнме уг верало, дыр: "Яратон висёнлы укша: макем кема уд шараяськы сое, сокем кышкытгес кариське со, йӧнатскон понна, дырез но кулэ каре". Вашкала Римысь асьме пала вуэм Валентин ним яратӥсьёс понна аспӧртэмлыко пуслы- тодметлы пӧрмытскиз. Европае со вуиз Уильям Шекспирлэн бурдо учыръёсыз сьӧры. Та паймымон но сюлэмлы, мылкыдлы шумпотон кузьмась нуналлэсь кызьы кылдэмзэ вераны гинэ шугъясько. Зэм, олокыӵе но мадёсъёс, дауркылъёс кылдытэмын. Зэмлыко нимаськись тӧршоры кудзэ пуктыны гинэ паймоно. Нырысетӥез малпан-мадёс таӵе. Вашкалаос пусйылӥллям: тулыспал толэзьлэн 14-тӥ нуналаз быдэс инкуазь ас ымнырзэ тулыс пала берыктэ. Соку ик кутско, пе, бурдоос асьсэлы кузъёс бырйыны, яратон вакытсэс мыто. Кыкетӥез малпан. Римысь калыклэн календарезъя та дыре пусйыло вылэм Выль арез. Соин ик, вожо дыре музэн, нылъёс-пиос куспазы ортчытъяллям пӧртэм тунаськонъёс. Тодыны тыршо вылэм асьсэлэн вуоно кузпалзылэсь нимзэ. Куинетӥез мадёс. Та сям-йылол азинтӥське языческой шулдыръяськонъёс дырысен. Соку, пе, луылэм сыӵе нунал, ку егит пи яке нылмурт ас гуртоосыз азьын шараяны дӥсьтылэм ас лушкем яратон мылкыдзэ. Пусъё на тае но: ӵапак та шулдыръяськон дыре, пе, одӥгзэ дунсьӧлыктэм Валентинэз улонлэсь люкиллям (соос кык кузя луиллям). Мугзэ шараяса гожъясьёс ӧвӧл. Ньылетӥез легенда. Егит христиан осконысь Валентин нимо эмчи "яратон вакытэ" шедем, пе, пытсэт сьӧры. Сое пожасьёс но яратӥсьёс камера укноетӥз, пе, куялозы вылэм шуныт кылъёс, осконлык кузьмась чебересь суредъёс-гожтэтъёс. Тюрьмаысь эскерисьлэн кияз шедем одӥгез сыӵе гожтэт. Лыдӟем но валатскем: Валентин - усто эмчи, врач. Со доры ваем аслэсьтыз синтэм вордскем нылзэ. Чебер нылмуртлы Валентин синмаське но солы югыт дуннеез адӟонлыксэ берыктэ. Нылмурт но сюлмысь яратыны кутске "синмо луэм" эмчиез. Нош лек сюлэмо атаез егитъёслэсь ӟеч малпанзэс - огазе кариськонзэс - быдэстыны эрик уг сёты. Ӝоген Валентинэз улонлэсь люко. Котьма ке но, дунсьӧлыктэм Валентинлэн нуналыз лыдъяське яратӥсьёслэн нуналэнызы. Асьмелы но та ӟеч сямлэсь люкиськоно ӧвӧл, дыр. Уго вашкала Русьын тулыспал толэзез сюанъёс ортчытон дырен нимало на вылэм. Та нуналэ егитъёс вазисько вылэм инмарлы, асьсэлы чебер, ужась, чырткем но сабырлы, визьмо кузпалъёс курыса. Яратӥсьёслэсь нуналзэс пусйыны нокинлы но сьӧлык уз луы. Егитъёслы но, арлыдоослы но. Огзэ валаны кулэ: егит адями мукетызлэсь йырзэ ас палаз берыктыны уже медаз куты тусбуй чеберлыксэ гинэ. Со вылэ ватсаны кулэ на сюлэм чеберлыкез, шунытлыкез, чылкытлыкез. Соку адямиос кык полэс шудо карисько. Та нуналъёсы ог-огдэ чебересь открыткаосын ӟечкылан сяме пыӵамын. Кылсярысь, Англиын 1995-тӥ арын та нуналъёсы вузамын но ыстэмын, пе, вал 30 миллион открытка! Асьсэлэсь лопырскем мылкыдзэс кызьы шараян пумысь уг ёрмо туала егитъёс но. Кин кызьы быгатэ, озьы ик дауртэ. Газетъёс гожъязы вал: Индиын улӥсь Д.Саял рис тысь вылэ сю пол "Мон тонэ яратӥсько!" гожтыны йӧндырем но сое ас синмаськем нылмуртэзлы кузьмам. Калыкын пусъё на: "Кин та нунал ас яратонзэ шедьтыса кузпалъяськоз яке сюан шудоз, соослы гумыр ӵожазы юрттӥськоз дунсьӧлыктэм Валентин". Та тулыс нуналэ котькудмылы мед усёз яратон сярысь вераськыны, ог-огмылы шунытэсь кылъёс шыпыртыны муг. Нош яратондэс ӧд на пумиталэ ке, сак кариськелэ: та нуналэ нырысь пумитам адями я тусбуеныз, я сямыныз огкадь луоз, пе, тӥляд вуоно кузпалэныды. Соин ик чебер, визьмо, ужась, сабырлы адямиез мед пумиталоды! Николай Турин. Вуылэ выжыкылэ! Выль но выль ужъёсынызы шумпоттэ учкисьёссэ Операя но балетъя театр. 18-тӥ феврале "Кизилиос ворекъязы" концерт ортчоз. Отын чузъяськозы П. Чайковскийлэн шер быдэсъяськись крезьгуръёсыз. Кырӟалозы тодмо солистъёс Татьяна Силаева но Дмитрий Шиврин, егитъёс Яркова но Ермакова Натальяос. Соослэн куараоссы чузъяськыло опера-спектакльёсын, но таӵе концерт соослы котыр ласянь усьтӥськыны луонлык сётэ. Нош балетэз яратӥсьёс асьсэлы кемалась "Бахчисарай фонтанэ" билет басьтӥзы ни, дыр. Сое адӟыны луоз 4-тӥ мартэ. Бахчисарай дворецысь фонтан дурын луэм учыр сярысь чебер поэма син азе усьтэ чебер образъёсты. Поляк князьлэсь Мария нылзэ тала Гирей хан. Мариялэсь туганзэ Заморез "басьтыкузы" виё крым бигеръёс. Гирей Марияез яратэ, но солэн Зарема кышноез, вожанзэ вормытэк, сьӧлыктэм нылашез вие... Нырысьсэ та балет возьматэмын вал Ленинградысь Операя но балетъя театрын 1934- тӥ арын. Сое пуктӥз Р. Захаров. Асьме дорын ас сяменыз балетэз пуктэ Удмурт Республикаысь дано артистка Марина Кузнецова. Спектакльын экто артистъёс О. Фадеева, М. Мельников, А. Морозков, И. Тохманов. В. Лагунов. Кызь вить ар талэсь азьло (1976) СССР-ысь Связья министерство чеберъям почта конверт поттӥз. Со вылын суредамын дано композиторлэн П. И. Чайковскийлэн Воткинскысь музей-юртэз. Таиз конверт композиторлэн вордскем интыезлы сӥзем куинетӥез издание луиз. Та выллемгес суредэн ньылетӥез конверт поттэмын на 1986-тӥ арын но. Милям внештатной корреспондентмы краевед но, коллекционер Василий Рогалев редакцие ваиз П. И. Чайковскийлэн Воткинскысь музей-юртэзлэн тусэныз 1958-тӥ, 1968-тӥ, 1976-тӥ, 1986-тӥ аръёсы поттэм конвертъёссэ. СССР-ысь Связья министерство, П. И. Чайковскийлэн нимыныз герӟаса, ваньзэ сю пала конверт поттӥз. Армия. Ыштон-а, шедьтон-а? 23-тӥ февраль - Атыкай музъеммес утисьёслэн нуналзы. Зэм, та нуналэ асьмеос данъяськом вань пиосмес. Но вожзэс медаз вае мукетъёсыз, мыным потэ, та нунал - погонэн, шинелен ветлӥсьёслэн (ветлэмъёслэн) праздниксы. Кыӵе малпанэн уло соос туннэ, мар малпало армия, служба сярысь. Сергей Чикуров, Приволжск округысь Удмурт Республикая валтӥсь федеральной инспектор: - Государство армитэк нокызьы но улыны уз быгаты. Мон ас мылкыдыя военкоматэ мынӥз, ачим армие куриськи. Служить кари Германиын, разведбатальонысь взводлэн командирезлэн воштӥсез вал. Мон уг малпаськы, армиын служить карыса дырме ыштӥ шуыса. Армия юрттэ коллективын улыны, отысь аслэсьтыд интыдэ шедьтыны, шуг учырысь потон амал утчаны. Отысен ик валай, мон сямыя азьветлӥсь шуыса. Пётр Гречкин, отставкаысь полковник: - Туж вӧсь армия сярысь урод верамъёсты кылыны. Курлало армия сярысь номыр тодӥсьтэм адямиос. Мон куамын ар служить кари, соин ик отысь югдурез ӟечгес тодӥсько. Армия сярысь государство сюлмаськыны кулэ, малы ке шуоно, сое утё военнойёс, солдатъёс утё сое. Уг валаськы туала егитъёсты - али пиос нылъёслэсь но лябесь. Уз мыны армие таиз поколение, вуоноез, соку странаен мар луоз? Зэм, котьку шедёзы зэмос пиосмуртъёс, соос номыр шоры учкытэк, асьсэлэсь долгзэс быдэстозы. Лыдӟисьёсты "Курск" подлодка выем бере телевизор учкытэк ӧз улэ, дыр. Тодӥськоды, мар отын шуизы морякъёс: служитьтӥм но, служитьтом но! Мон оскисько, асьмелэн ӝоген данъяськымон Армимы луоз. Президент Владимир Путин - ачиз зэмос пиосмурт. Со гажа военнойёсты, ӟеч вала армилэсь кулэлыксэ. Андрей Алексеев, Культурая министерствоысь духовой инструментъёсъя оркестрысь валтӥсь дирижёр: - Мон служить кари Краснознамённой Среднеазиатской военной округысь оркестрын. Вал, дыр, секыт со вакытъёсы но: дедовщина, урод сиён, сямез тӥян, но тодэ кылёз ӟечез гинэ. Уг тодӥськы, быгатысал-а мон армитэк юн сямо луыны. Сюрс пол вераллямын ни, но верало эшшо огпол: зэмос пиосмурт луо армиын гинэ. Вань сыӵе япон калык веран: "Адями егит дыръяз ке шуг-секытэз уг адӟы, мӧйымыса сое коньдонэн ке но басьтыны кулэ". Мынам кык пиосы. Соосты армилэсь кельтон понна бызьылыны уг малпаськы. Зэм, мон соос понна сюлмасько, жаляло, дыр, но кытын ке но соос кыданы кулэ ук. Мария Исупова, войнаысь ветеран: - Война вакыт мон медсестра вал. Нокыӵе подвиг ӧй лэсьты, но туж данъяськисько шинелен ветлэменым. Внучкае али медакадемиез йылпумъя. Мон соин куддыръя вераськылӥсько солэн военнобязанностез пумысен. Татьяна - туала нылмурт, со чебер дӥсяськыны, ческыт сиськыны яратэ, но армие кутысалзы ке, мынысал, шуэ. Фёдор Суворов, журналист: - Армитэк кызьы улод? Тани удмуртъёслэн армизы ӧвӧл но, соин ик соос удмуртъёс. Мон служить кари Амур палан, секретной частьын. Часте вуттэмзы бере, асме сокем кужымтэм шӧдӥ - пытсэт сьӧры келязы кадь потӥз. Но пиосмурт армие ветлыны кулэ, сотэк со уз вала улонлэсь дунзэ. Тани та нуналъёсы Чечняысь пие бертӥз. Табере со улон шоры мукетгес синъёсын учке. Александр Водяный, кадет: - Малы ке но монэ ваньмыз жаляло, но мон номырлэсь уг кышкаськы, данъяськисько вуоно профессиеным. Одӥгез школаын ӵош дышетскем эше иса: али, пе, нылъёс военнойёслы уг бызё, ужбергатӥсьёсты утчало. Мон соин соглаш ӧвӧл. Шутэтскон нуналъёсы милемлы ураметӥ ортчыны маза ӧвӧл - нылъёс асьсэос тэбинё. Формаен пиос котьку йӧногес, оскымонгес адӟисько. Уката ик со генерал ке. Юалляськиз З.Рябинина. Армимы мед кужмогес луоз Россиысь воинъёс! Гажано ветеранъёс! Ыстӥсько тӥледлы солдат салам, музозь йыбырттыса ик шуныт ӟечкыласько та дано праздникен! Мыным, службаез ортчем адямилы, та нунал туж дуно но югыт. Соку уката данъяськиськод секыт война аръёсы Родинамес утем песятайёсмылэн но атайёсмылэн батыр ужъёсынызы. Нош ик тодэ лыкто службаез ӵош ортчытэм эшъёс. Соин ӵош уката но ӟечгес ужам потэ Армимес но Флотмес кужмогес карон понна. Службаысьтызы быдэс но таза мед берытскозы ваньмыз - рядовойысен генералозь. Асьмелэн чебер Россимы дунне вылын котьку нырысетӥ радъёсын мед ветлоз! Котькыӵе ужъёсады тазалык но азинсконъёс тӥледлы! Н.Сапожников, Россия Федерациысь Кун Думалэн депутатэз. Гажано эшъёс! Атыкай музъеммес утисьёслэн нуналзы Россиын праздникъёс пӧлын дано инты басьтэ. Та нуналэ асьмеос ӟечкыласьком ветеранъёсмес но, Россиын армиын та вакытэ службазэс нуисьёсты но, службалы али дасяськисьёсты но. Армия трос пол возьматылӥз, кунмес утёнын со кужмо но оскымон луэ шуыса. Россилэсь но Союзлэсь полководецъёссэ котьку тодазы возё, озьы ик азьланяз но возёзы на уно россиянинъёс. Берло аръёсы Россиысь армилы но, обществомылы, быдэс странамылы кадь ик, капчи ӧй вал. Оскисько, ваньмыз тупатскоз шуыса, армимы азьланяз но юн утёз Россилэсь кунгожъёссэ, ӟеч сямъёссэ. Гажано эшъёс, сӥзисько тӥледлы шудбур, тазалык, семьяосады мед луоз тупаса улон но азинлык! С.Чикуров, Удмурт Республикая валтӥсь федеральной инспектор. Асьмелэн пиосмы самой кужмоесь! Мон уг тодӥськы, кин вал нырысетӥ солдат. Но туннэ солы йыбырттэм потэ. Йыбырттэм потэ Атыкай музъеммес утись вань мукет пиосъёслы. Соослэн кужмо пельпумъёссы сьӧры ватӥськыса асьмелы номыр но кышкыт ӧвӧл ни. Асьме солдатъёс самой дӥсьтӥсь, сое пусъё кунгож сьӧрын но. Ма, кыдёке ветлонэз ӧвӧл - герой азямы. 23-тӥ февраль азьын Ижевск город администрациен радъям сӥё-дано ужрадын республикаысьтымы военной комиссар Геннадий Барсков Суворовлэсь медальзэ бырттӥз Вавож ёросысь Выль Бия гуртысь удмурт пияшлы Юрий Вахрушевлы. Россилэн Президентэзлэн Владимир Путинлэн Указаз гожтэмын: Чечен Республикаын бандформированиосын кышкатэк ожмаськемез понна. Юрий алигес гинэ Чечняысь вуиз. Куинь толэзь отын служить карытозяз (ожмаськытозяз) оломае но адӟоно луиз. Войналы кема дышонэз вылымтэ: тон шоры ке ыбыло, тон но ыбиськод. Одӥг пол эшеныз подвалъёсты эскерыса ветлыкузы кык чечен йырвандӥсьёс вылэ пыкиськизы. Тани со, зэмос нюръяськон: карта вылын яке улон, яке кулон - виссы сӥньыс кадь векчи. Но асьме солдатъёс сётскыны уг быгато! Одӥгзэ ыбизы, нош кыкетӥзэ штабе улэпкын вуттӥзы. Мукетаз учыре вистэм-вожтэм ыбылӥськон ӝутӥське. Егит пиос ож ортчем бере гинэ сазьтӥсько: осто, улэп кылиськем! Но одӥгез ож бере, Юра кема, номырзэ валатэк, йыр бордаз кырмиськыса улӥз: вӧзаз пуштыку, со нокыӵе ӧз кариськы вал, дышем суред. Нош берло тодӥз: со тыл пушкы шедем тужгес матысь эшез - Сергей. (Сое тодаз вайытыкум Юралэн куараез кытчы ке гуньдӥз кадь, киосыз куалекъяны кутскизы. Вождэ эн вай, сержант.) Бия пи гуртаз Чечняысь одӥг гинэ гожтэт ыстӥз. Со сярысь но жаля кадь - юнме, пе, анай-атаез куректытӥ. Пизэ пумитакуз Нина Ивановна туж бӧрдӥз: шумпотон, кайгуэз келян, пизэ жалян сураськыса бам вылтӥз синкылиен васькизы. Пиеныз данъяськон соку солэн тодаз но ӧй вал. Ма, али но уг тодо, дыр ай, медален пусъемзэс, шуэ Юрий. Мон ачим но ӧй малпалля, ожмаськемме кин ке дунъялоз шуыса. (Медаль вӧзы кыӵе ке юрттэт ке луысал на... З.Р.) Тау тӥледлы, Нина Ивановна но Валерий Анатольевич, зэмос пиосмурт будэтэмды понна. З.Рябинина. Чур бугор Кин кӧня сылэ? Тодмо поп-кизилиосмы сюанын, нылпи пылатонын, вордскем нуналэз пусъёнын шулдыртэмзы понна та мында коньдон басьто (долларъёсын): 1,5 сюрс Алиса Мон, Крис Кельми, Николай Трубач, Евгений Осин, Володя Лёвкин, Юлия Началова 2,5 сюрс Таня Буланова, Лада Дэнс, Лолита, Мурат Насыров, Аркадий Укупник, Сергей Пенкин, Юлиан 3 сюрс "Лицей", "Гости из будущего", Диана Гурцкая, Шура, Влад Сташевский, "ДеЦл" 4 сюрс Андрей Губин, Кристина Орбакайте, "Иванушки" 5 сюрс Маша Распутина, Алёна Свиридова, Александр Малинин, Борис Моисеев, Анита Цой, Александр Буйнов 8 сюрс манетысен Игорь Николаев, Наташа Королева, Лариса Долина, Валерий Леонтьев, Валерий Меладзе, Ирина Аллегрова, Владимир Пресняков, Ирина Понаровская. СЕРЕМ ПЫР Кин со - президент? Пияш атаезлэсь юа: - Кин со - президент? - Президент кивалтэ вань калыкен. Шуом, мон семьялэн президентэз. - Нош анай соку кин? - Анаед - коньдонъя министр. - Нош песянай? - КГБ-ын ужась. - Нош мон? - Тон - калык. Ӵуказеяз пияш атаезлэн ужаз жингыртэ: - Анай доры мукет президент лыктӥз, КГБ кӧлэ, нош калык сюлэмшугъяське. Юонзэ юиллям Вокзаллэн кивалтӥсез доры бызьыса пыре сюресчи. - Юрттэ вал, поездэ вунэтыса кельтӥ аракыен бутыльме! Тӥледлы сое ӧз пыртэ-а? - Ӧз. Но мон адӟи сое шедьтӥсь воргоронэз. Милиционеръёс сое кунултыса валтӥзы кытчы ке. Кышкатъяськись дневник Анаез пиезлэсь юа: - Петя, мон малы ке но тынэсьтыд дневниктэ уг адӟиськы. - Вася куриз вал, анай-атайме, пе, кышкато. Сӥльтэк кылизы Воргорон дораз кудӟыса бертэ но ӧс дорысен ик кышноезлы шуэ: - Всё, Маня, таяз толэзе сӥль басьтоно уд луы? - Койыкез шат погыртӥд? - Ӧй, вань уждунме юыса быдтӥ. Кизилиос верало 26.02-04.03 Така (Овен) 21.03-20.04 Кылды тупалоз котырысьтыды адямиосын. Умой луысал, общественной уже ке пыриськысалды. Секыт югдурысь потыны капчи амал шедьтоды. Но чаклаське коньдонэн, янгышамды бӧрдонэ медаз вутты. Тӥ мукетъёслы кельшыны турттӥськоды, но сое ваньмыз уг валало. Ӧжыт зӥбломытэ вожандэс но - ваньмыз тӥ киын. Субботае матысь адямиен кусыпты тупалоз - солы шуныт кылъёстэс эн жалялэ. Ош (Телец) 21.04-21.05 Уж дурады шӧдтэк шорысь удалтоз. Тыршемды азьланяз но ӟечен гинэ берытскоз. Тросгес саклык висъялэ кузпалдылы (тугандылы, пумиськон сярысь вераське, куное ӧте. Но мултэс вина юонлэсь возиське. Мартлэн нырысетӥ нуналаз кин ке мылкыддэс сӧроз. Вакыт тупа крезьгур кылзыны, поэзиен тунсыкъяськыны, суредаськыны. Эн керӟегъяське, кинлэн ке ассэ урод воземеныз йырин. Эгызоос (Кыктоос, Близнецъёс) 22.05-21.06 Таиз понедельник тӥ понна шудо нунал! Удалтоз ужын но, дышетсконын но, коньдон поттонын но. Мар малпады, лэсьтэ ваньзэ туннэ. Вторнике сӥзе асьтэды нылпиостылы. Арня пумын ӟеч вуз басьтыны быгатоды. Нош асьтэ шоры учкыны дыр ӧз вуы на-а? Ветлэ парикмахерское, мугордэс кыдатэ. Кисло-кусло (Рак) 22.06-23.07 Тӥледлы оскозы выль тунсыко уж - эн пумитъяське. Кин ке алданы турттоз. Чаклаське, со муртэн тӥ эшъяськиськоды. Маке лэсьтэмдылэсь азьло малпаське. Вакыт тупа творчествоен вырыны, маке выльзэ кылдытыны. Субботае шутэтскыны уз кылды - мылкыддэс куашкатоз матысь адямиды яке кыӵе ке секыт ивор. Лев 24.07-23.08 Кутске арнядэс праздникысен - куно ӧте яке асьтэос кытчы ке ветлэ. Та нуналэ басьтэм коньдондэс юнме эн пазялэ. Вторниклы нокыӵе бадӟым ужъёс эн чаклалэ. Секыт луоз четверг но - кивалтӥсьёслы вазиськытэк умойгес луоз. Шутэтскон нуналъёстэс дорады ортчытэ, тунсыко книга лыдӟе, ӟеч кофе пӧзьтэ. Нылмурт (Дева) 24.08-23.09 Чик кӧбератэк куре кивалтӥсьёстылэсь уждундэс будэтыны. Выль кутскем уждэс быдэстыны эшъёсты юрттозы. Та нуналъёсы ӟеч вуз басьтыны быгатоды. Арня шорын чаклаське шудтэм учыръёслэсь, мултэс вина, эмъюм юэмлэсь. Студентъёслы секытэн сётскозы экзаменъёс, зачётъёс. Шутэтскон нуналъёс шутэтскон понна сётӥсько, озьы-а? Соин ик эн сюлмаське быдэстымтэ ужъёсты пумысен, инкуазе поталэ, спортэн выре. Весъёс 24.09-23.10 Тӥ асьтэлы синмаськытыны быгатоды - пумиськылэ эшъёсыныды, гажан муртъёсыныды. Эн аналтэ тазалыктэс - врач доры ветлэ, солэсь ӵектонъёссэ быдэсъялэ. Ужъёсты умой мынозы. Удалтоз дышетӥсьёслы, искусство удысын тыршисьёслы. Скорпион 24.10-22.11 Кылды тупалоз ӵош ужась эшъёсыныды. Дыр вуиз бизнес сярысь малпаськыны. Арня пумын коньдон басьтоды яке ӟеч ивор кылоды. Шумпотон ваёзы ӵыжы-выжыосты. Ыбылӥськись (Стрелец) 23.11-21.12 Вузкарисьёс но ужбергатӥсьёс ӟеч барыш басьтыны быгатозы. Журналистъёс, писательёс усто уж гожтозы. Уж дурады трос лэсьтыны вуттоды. Мылкыдды кыскоз кельшымон муртэныды лушкем кусыпъёс тупатыны. Выль коллективе пырисьёс туж уз курадӟе. Стрелецъёслы умой луысал коньдон поттыны быгатӥсь муртъёсын тодматскыны. Сюро Кеч (Козерог) 22.12-20.1 Кизилиос азьло сямен ик юртто тӥледлы. Уж дурады ваньзэ лэсьтыса уд вуттӥське ке, басьтэ бумагаостэс дорады. Вӧтъёс быдэсмо. Арня пумын ӵош ужась эшъёстылэн пыкылэмзы потоз, мылкыддэс эн куашкатэ - соос вожъясько тӥляд ужаны быгатэмдылы. Шутэтскон нуналдэс ортчытэ семьяеныды, нылпиосыныды ӵош. Ву кисьтӥсь (Водолей) 21.01-19.02 Удалтоз сюрес вылын. Коньдон ужпумъёсты тупатскозы, но маке кулэ ӧвӧл эн басьтэ. Чаклаське урамъёсты выжыкуды. Котькуд нунал гажан муртты шумпотон кузьмалоз. Кусыпъёсты туж умой луозы. Дыр вуиз яратыны. Чорыгъёс (Рыбы) 20.02-20.03 Вань малпам ужды быдэсмоз, ӧд ке аналске. Эскере дорады вуись иворез. Арня шорын удалтоз дышетскисьёслы но студентъёслы. Тросэз шӧдозы творческой мылкыдзэс. Оло, спонсор но шедьтыны быгатоды. Арня нуналэ сӥзе асьтэды яратоно мурттылы. Кун Кенешлэн сессияз Витетӥ воштӥсь быръемын 20-тӥ феврале арня вис карыса азьланьтӥськиз Кун Кенешлэн дас витетӥ сессиез. Со кутскиз валтӥсь ужпум бордысен: Правительстволэсь структуразэ воштонысен. Удмуртиысь Президентлэн ӵектэмезъя Правительстволэн Тӧроезлы вить воштӥсь юнматыны чакламын. Александр Волков витетӥ воштӥсе дэмлаз "Удмуртнефтепродукт" ОАО-лэсь валтӥсь директорзэ Андрей Эдуардович Осколковез. Солэн кандидатураезлы дурбасьтӥзы Правительстволэн Тӧроез Ю.Питкевич, депутатъёс Р.Галиахметов, В.Хорошавцев, А.Марченко. Соос, ваньзы огкылысь кариськыса кадь, Андрей Эдуардовичлэсь пусйизы экономикаез, ужбергатонэз ӟеч тодэмзэ. Тазьы но шуизы: егитъёслы, пе, сюрес усьтоно. Мукетгес малпанэз вал депутатлэн В.Соловьёвлэн. Сыӵе бадӟым ужен вырыны А.Осколковлэн, опытэз, пе, ӧжытгес на. Кӧня ке дыр ӵоже солы зол хозяйственник вӧзын, пе, оло, пайдагес ужаны луысал на. Нош али Правительстволэн тӧроезлы воштӥсе бадӟым опытэн адямиез шедьтоно, депутатъёс пӧлын сыӵеос трос. Кылсярысь, малы меда та ужлы уг тупа В.Соловьёв? Рейганэз США-лы президентэ, пе, 69 аресаз бырйизы, нош мыным со дырозь ар но ӝыны кылемын на. Виталий Соловьёвлэн ассэ ачиз ӵектэмез депутатъёсты пальпотонэ гинэ вуттӥз. Лушкем куара сётыса, Правительстволэн тӧроезлы воштӥсе юнматэмын А.Осколков. Куара сётонэ пыриськем 83 депутат пӧлысь солы дурбасьтӥз 51-ез, 29-эз пумит луиз. Тау кылъёс верамез бере А.Осколков шуиз: - Ас ужам мон бадӟым саклык висъяны туртто бюджетлэсь доход люкетсэ коньдонэн умойгес тырмытон понна. Тыршо юрттыны пичи но шор предприятиослы ӝоггес пыдйылазы султыны. Ужбергатонэн вырись предприятиос огъя экономикаен сокем зол думиськемын ӧвӧл, соин ик соослы азинскыны сюрес усьтон понна чалякгес ужрадъёс малпаны луэ. Собере депутатъёс куд-ог законъёслэн инъетъёсазы ватсанъёсты эскеризы. П.Вершинин тодматӥз Кун Кенешлэн 2001-тӥ арын законъёс бордын ужаны чаклам планэныз. Куд-ог законъёслэн инъетъёссы палэнтэмын вал, кылсярысь, общежитиос сярысь. Та законлэн инъетэз дасямын вал Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссилэн тыршеменыз. Но кызьы шуиз Правительстволэн Тӧроез Ю.Питкевич али, пе, республикаямы луонлыкъёс кылдытымтэ на троссэ общежитиосты квартираослы пӧрмытыны. Сыӵе закон кутэмын луиз ке, кытчы асьмеос егит специалистъёсты улыны интыялом. Депутатъёс озьы ик юнматыны ӧз быгатэ Правительстволэсь ужзэ дунъян сярысь постановленилэсь инъетсэ. Угось отын пыр-поч учкемын ӧвӧл, кыӵе мертэтъёсын (критерийёсын) дунъяно солэсь ужзэ. Сессилэн нырысетӥ ужан нуналаз, 13-тӥ феврале, вылӥ дунъямын вал Удмуртиысь памятникъёсты утёнъя 2003-тӥ арозь программа. Но таяз сессиын со юнматэмын ӧй вал, сое эскерон дас куатетӥ сессие выжтэмын. Депутатъёслэн верамзыя, отын, пе, пумозяз ӧвӧл учкемын, кытысь коньдон шедьтоно памятникъёсты утён понна. Озьы ик вуоно сессилэн ужаз выжтэмын вал Кун Кенешысь депутатъёслэн статуссы сярысь законлэн инъетэз. Кызьы валэктӥз депутат Г.Абросимов, та законлэн инъетаз 60 пала ватсан ӵектэмын, но соосты улонэ пыӵатон сярысь нокыӵе амалъёс дэмламын ӧвӧл. Арлы быдэ асьме улонысь ышо куд-ог гуртъёслэн нимъёссы. Мугез одӥг: отысь калык палэнэ улыны кошке, нош гуртъёс быро. Куд-ог ёрос кенешъёслэн куремзыя, Кун Кенеш постановлениос дасям Алнаш, Дэбэс, Можга, Балезино ёросъёсысь кӧня ке бырем гуртъёсты лыдэ басьтэмысь дугдон сярысь. Озьы таяз сессиын 15 гуртлэн быремез сярысь постановлениос кутэмын. Та ужпумъёсын валче ик эскеремын Сарапул городлэсь но Сарапул ёрослэсь гожъёссэс (границаоссэс) воштон. Табере Октябрьский посёлоклэн музъемъёсыз но Ужуиха станция пыртэмын Сарапул городлэн музъемъёсыз пушкы. Гожъёсты воштонэз сессия юнматӥз. Вераны кулэ, та ужез быдэстон Сарапул ёросын улӥсьёслэсь мылкыдзэс лыдэ басьтыса лэсьтэмын. Озьы шуиз Кун Кенешлэн Тӧроез Игорь Семёнов. Президентлэн структураез кылдэмен валче, Кун Кенешлэн ужъёсыз трослы сюбегазы. Кылёз на-а шуом табере Кун Кенешлэн Данъян грамотаеныз пусъён? Кылёз. Грамоталэн вылтусыз азьвылэз кадь ик луоз. Депутатъёс таяз сессиын 20 пала ужпумез эскеризы. Кун Кенешлэн Тӧроезлэн И.Семёновлэн кивалтэмез улсын ваньмыз соос радызъя но юнме дырез быдтытэк сэрттэмын- пертчемын вал. Соин ик Кун Кенешлэн дас витетӥез сессиез нуназе бере йылпумъяськиз. Сессилэн пумаз шараямын вал ужрадэ лыктымтэ депутатъёслэн нимъёссы. Т.БАННИКОВА. Чур бугор Кортӵогъёсты куасаллясь Кужмыд вань - визь кулэ ӧвӧл ни, верало калыкын. Ижевскын улӥсь Иван Шутов таӵе веранэн ноку соглаш ӧз луылы. Сӥльвиро, сайкыт йырвизё но батыр кужымо адями ачиз ассэ кыдатӥз. Пичи дырысеныз Иван аслаз кизилиезлы осконэн улӥз. Нянь но тырмыт ӧз шедьылы, анай-атайтэк будӥз. Быдэ вуэмез бере ини, плотнике дышетскыса Ваня гольык пыдын ветлэм интыосаз вуылоно кариськиз. Паспортаз гожтэмын: Селта ёрос, Уни гурт. Озьы со тодӥз выжыосыз сярысь. Песятаез огкутскемен гуртысьтызы ӝужыт вукое ю тысен куинь мешок ӝутылӥз: одӥгзэ - пиняз, кыксэ - кунулаз. Кык пудъем гиряез капка йылтӥ азбаре сэрпалляз. Шулдыръяськон нуналъёсы гуртооссэ паймытъяз, корка липет йылэтӥ ки вылаз ветлыса. Тужгес но провор вал песятаезлэн песятаез - таиз быдэс корка борддорез вылэ ӝутыса, отчы изьызэ донгылӥз. Ошез молотэн кадь пыд йылысьтыз мыжгыса погыртылӥз. - Валай мон, - тодаз вае Иван Вениаминович, - малы ремесленной училищеын дышетскыкум мукетъёсызлэсь тросгес сюдыны кутскизы. Минутсэ но тэк пукыны ӧй быгаты секытсэ ӝуткатэк. Эшъёсме вылам ворттылытӥ, спортэн эшъяськи. Кужыме пӧзьыны ӧдъя гинэ, кӧт сюманы кутске. Тужгес но ӝытъёсы, сиськем бере. Нош соку быдэ вуымтэослы ужаны уг яра вал, уката ик кун чотын улӥсьёслы. Ярам, дунне вылын ӟеч адямиос вылӥллям на - одӥгез нылкышно директор магазинэ грузчике басьтӥз. Зэм, уждун ӧз тыре - ужаме понна нянь сётылӥзы, нош будӥсь адямилы ӵапак со ик кулэ вал. Ужаса поттэм паёке ӵош улӥсь дас кык сироталы но тырмылӥз на. Бен, кужымме одӥг-ог заводын практикаын но возьматылӥ. Кызьы ке секыт молотэз туж вылӥе ӝутыса кельтӥ. Бӧрысь вить мӧйы воргоронъёс сое мырдэм интыяз пуктӥзы. Университетъёсты йылпумъяны ӧз кылды. Дышетски отын, кытчы ыстэ вал улон. Тужгес бадӟым визь басьтӥ армиын. Мон вал спортъя ротаын, отын спортлэн кӧня ке удысъёсызъя мастере кандидат луи. Отысен Ленинградысь цирке шеди. - Дас кык ар ӵоже ужатозям, - вера батыр, - кунмес но, дуннеез но адӟи. Илья Муромецен ӵошатылозы вал. Мадёсысь батырен ӵошатоно ке, Иван Шутовлэн мугорыз ӝужыт ӧвӧл, быгытъёсыныз но сокем уг висъяськы. Нош кырмиз ке, уд мозмытӥськы ни. Кырмон кужымез ӝыны тонналы ӵоша. "Кортӵогъёсъя король". Усто быгатонлыкъёсыз понна Иван Шутов озьы нимамын вал рекордъёсъя асьме дорын поттэм "Диво" нырысетӥ книгаын. Батыр возьматӥз кык рекорд: 200 миллиметръем дас кык кортӵогез со зарезь гердэн (морской узел) керттӥз 2 минут 36 секундскын но 6 миллиметръем жильыез чигиз 26 секундскын. Нош кытчы кариз со рекордъёсыз понна премизэ? Вань коньдонзэ сётӥз лэсьтӥськон фирмаез азинтонлы. Озьы ик батыр уксёзэ висъяз аслаз Узи шор ёзо школаезлы но 4 номеро ГПТУ-лы. Та нуналъёсы, кылсярысь, со училищеын вуэн шунтон котёл бордын ужа. Ваньмон дыръяз Иван Шутов азьвыл сямен ик быгытъёсыныз "шудэ". Нош кызьы бен сотэк? Дано Самсонлэн амалэзъя со одӥг пол мыжгеменыз тӥя 6 миллиметръем золтэм жильыез но чельыеныз ӝутэ 64 килограммъем гиряез. Удмурт батырлэн выль рекордъёсыз нош ик пыртэмын "Диво" книгае. Иж шобырске лымыен Ижевск вылэ усе, усе, усе тӧдьы лымы. Оло, инкуазь юри озьы исам каре город кузёосты: быгатонлыкъёссэс но луонлыкъёссэс эскере. Ижевск администрациын ужасьёс верало ик, лымы сузясь тракторъёс уйёсы ужаны пото шуыса. Бен, уйшор уин отын но татын кылӥське соослэн гуретэм куараоссы. Бадӟым сюресъёс вылысь лымы ӵукналы утялтэмын луэ. Нош азбаръёсы кожон сюресъёс вылэ таёд. Кыӵе ке ужпумъёсъя, я огшоры кунояны асьтэ машинаен Ижевске потон азяды зол-зол сиське, кужым люкалэ. Яке вӧзады машина донгась пуктэ. Сотэк юмоке сюрыны быгатоды. Туспуктэмъёсыз В.Беломорскихлэн. Ваньдылы шудбур но тазалык! 23-тӥ февралез, Атыкай музъеммес утисьёслэсь нуналзэс, вань калык пусъе. Россиын кунмес утись воинэз котьку данъяллязы но гажазы. Странамылы секыт аръёсы Родинамес утьыны быдэс калык ӝутскылӥз. Тужгес но шуныт мылкыдын ӟечкыласько та праздникен дано ветеранъёсмес - фронтэ ветлэмъёсты но со мышкын тыршемъёсты. Ӟечкыласько соосты, кинъёс ожмаськизы Афганистанын но дуннелэн мукет интыосаз, отын но асьмелэн солдатъёсмы но офицеръёсмы данзэс ӧз ыштэ. Ӟечкыласько соосты но, кинъёс та дыре нуо секыт службазэс. Ваньмыз соослэн умой мед луоз. Ваньзы соос гуртазы таза мед берытскозы. Тӥледлы но семьяостылы, гажано утисьёсмы, шудбур но тазалык, тупаса улон. А.Салтыков, Ижевск городлэн мэрез. Городлэн улонысьтыз Синпӧет ӧвӧл та Китае тросэзлэн вуылэмез ӧвӧл ке но, отысь вузэз пичиез но, бадӟымез но ӟеч тодэ, озьы-а? Ӧвӧл! Тодӥськом базаръёсын вузаськись дунтэм силёез, нош зэмос ӟеч китай вузэз асьмелэн, оло, адӟылэммы но ӧвӧл ай. Соин ик Ижевскысь "Ориент" китай фирма та нуналъёсы сыӵе луонлык сётэ - Северной переулокысь 61 номеро юртын ужа китай вузъёсын адӟытон-вузкарон. Ижевск Сининь городэн кык ар ӟеч кусыпъёс возе ни. Нырысь Китай асьме "Ижстален" контракт гожтӥз. "Ижсталь" ӟеч вузэныз соосты оскытыны быгатӥз, Россиен ужаны луэ шуыса. Со бӧрысьгес ик китайёс быдэсак асьсэ уксёен асьме дорын фирма усьтӥзы. Соос вузало вылӥ ӟечлыкен лэсьтӥськон материал, теплицаос, кондиционеръёс, басмаос... Малпанзы вань, Ижевскын телевизоръёс, магнитофонъёс бичаны (быдэс дуннеын таӵе аппаратураез бичанъя Китай куинетӥ интыын сылэ, нош фильмъёсын компакт-дискъёс отын сяна, нокытын уг потто ай). Пресс-конференциын пукыса, специалистъёсты кылзыса, мон оски, Китай зэмзэ но ӟеч вуз поттыны быгатэ шуыса, но ураме потыса, соку ик пумиськи китай базарысь басьтэм дӥсен адямиосын. Малпасько, кайта сыӵеос шергес адӟиськозы ни. Малы? Малы ке шуоно, "Ориент" вузкарон кампанилэн кивалтӥсезлэн Изян Юань Лулэн верамезъя, Китайын урод вуз поттӥсьёс табере закон азьын кыл куто (шонергес: йырзэс сёто). Бен, страназылэсь данзэ быдтӥсьёсты табере отын судлэн решениезъя быдтыны быгато. Соин ик, оскем потэ, Россие ӟеч гинэ вуз вуоз (яке ачиз поттоз), нош калыклэн сое басьтыны коньдонэз луоз. З. Рябинина. Валэктэ юрист Сэрегез нуэ Россиысь Кун Думалэн депутатэзлэн С. К. Смирновалэн юрттӥсез адвокат Лилия Шкляева Нуные кык, уже ӧвӧл Укмыс ар ужай шутэтскон коркан. Миым июле сое ворсазы, милемды ужысь мозмытӥзы. Мон соку нуныме утялтон отпускын вал. 2000-тӥ арын ноябре вазиськи шутэтскон коркалэн кузёезлы - Чепца механической заводэ. Малы ке шуоно, милям организацимы бадӟымесь тыронъёсыз понна суд пыр сётэмын та предприятилы. Заводлэн кадръёсъя отделаз ивортӥ: мон огнам будэтӥсько кык нылпи, законъя мыным одно ик уж сётыны кулэ. Жаляса верано луэ: мыным ӧз юрттэ завод но, суд но. Т. Н. Валэктон утчалом Россия Федерацилэн Уж сярысь законъёсын кодексысьтыз. 170-тӥ ёзэт вера: секытэн нылкышноосты, куинь аресозь нуныен кышноосты, дас тямыс аресозь ӧлексы (инвалид) нылпиен адямиосты, огназ 14 аресозь пиналзэ будэтӥсь мумыез яке бубыез администрация кичӧлтэмъя ужысь мозмытыны уг яра, организациез быдтон учырез вератэк. Организация бырыку, сыӵе муртъёсты одно ик уже интыяно. Гожтэтлэн авторезлы уж сётыны кулэ шутэтскон коркалэсь правооссэ басьтӥсь. Правопреемник луыны быгатэ юридической лицо (организация) яке физической лицо (адями). Таизлы выже бырись предприятилэн, учрежденилэн, организацилэн ваньбурез но коньдонэз. Бырись организацилэсь правооссэ нокин уг басьты ке, вылӥ верам адямиослы уж шедьтыны кулэ калыкез уже интыянъя ёз (служба). Коньдон басьтӥськом чектэк Ми - векчи ужбергатӥсь шуонъёс. Огаз черкогуртысь (селоысь) универмаглэн сэрегаз чыры-пырыен вузкариськом. Дыраз тыриськом вытъёс (налогъёс), вуз возён но вузаськон интыос понна дун. Вузкаронъя куронъёсты (правилоосты) ум тӥяське. Нош барышмы бадӟым ӧвӧл, соин ик касса аппарат басьтыны ум быгатӥське. Сарапул ёрослэн администрацияз вазиським, сотэк ужаны мед лэзёз шуыса. Пӧламы вань пенсие потэмъёс но трос нылпиен адямиос. Вань-а милям чек сётытэк ужан правомы? Векчи ужбергатӥсьёс. Та ужпумъя 5215-1 номеро закон кутэмын 1993-тӥ арын 18-тӥ июне. Нимаське тазьы: "Калык пӧлын коньдон тырон-басьтонэз эскерись касса машинаосты кутон сярысь". Со куре: Россия Федерацилэн улосвылаз (территорияз) вузкаронын но юрттэт (услугаос) сётонын вань предприятиос, ужбергатӥсьёс, организациос, учреждениос но соослэн ёзъёссы (филиалъёссы) ужаны кулэ касса аппаратэн. Сотэк ужаны яра таӵе удысъёсын: 1. Киоскын газет-журнал но соосын герӟаськем арбери вузанын, огъя вузкаронын газет-журнал ичизэ 50 процент басьтэ ке но соосын ӵош вузаськись арбериослэн переченьзы Россия Федерацилэн улосысьтыз (субъектысьтыз) быдэсъясь (исполнительной) властен юнматэмын ке. Та учыре газет-журнал но мукет вуз понна басьтэм коньдон нимаз-нимаз лыдъяське. 2. Дуно бумага вузанын. 3. Городысь транспортын ветлон билетъёс но талонъёс вузанын. 4. Школаосын но соос выллем дышетон заведениосын ужасьёсты но дышетскисьёсты сюдонын. 5. Рынокын, ярамаркаын, адӟытонын (выставкаын) но мукет интыосын вузкаронын, татчы уг пыро отысь магазинъёс, павильонъёс, киоскъёс, палаткаос, автолавкаос, автомагазинъёс, автофургонъёс, контейнер выллем макеос, прицепъёс, прилавокъёс. 6. Уробоысь, корзинаысь, лотокысь ӧжытак сиён-юон ӧжыт но чыры-пыры котыр вузанын, бадӟым вузъёсты но нимысьтыз условиосын утёно сиён-юонэз вератэк. 7. Поездын чай но музон сиён-юон вузанын. 8.Гуртысь (райцентръёсын но город вылем посёлокъёсты вератэк) медпунктъёсын эмъюм вузанын. 9. Киоскъёсын мороженой но кудӟытӥсьтэм юонэз стаканэн вузанын. 10. Цистернаысь сурез, сюкасез, йӧлэз, будос вӧез, улэп чорыгез, карасинэз, нош озьы ик бакча сиёнэз вузанын. 11. Калыклэсь пияла посуда но куштӥськем арбериос басьянын, металлоломез вератэк. Пенсия басьтӥсьёс но трос нылпиё адямиос понна мукет куронъёс тупатэмын ӧвӧл. Пунэмен коньдон Матысь эше пунэмен коньдон куре. Сётыны мон дась, но ымы уг пыры расписка курыны. Ачим курдасько: туала вакытэ туж матысь агайёс-вынъёс но кытӥяз тушмонъяськыны шӧтало. Оло, коньдон сётэмме адӟисьёс (свидетельёс) луизы ке, нокыӵе бумага куроно ӧвӧл ни? С. З. Улон возьматэ: пунэмаськонын гожтэтэн лэсьтэм огкыллэсь (договорлэсь) оскымонэз номыр ӧвӧл. Озьы валэктэ Россия Федерацилэн Граждан кодексысьтыз 808- тӥ ёзэт но. Пусйыны кулэ: огкыл но расписка - пӧртэм макеос. Огкылын рос-прос пусъемын луэ: коньдон сётӥське пунэмен, отын ӵемысь гожтэмын луэ сое берыктон дыр но. Расписка - коньдон басьтэм сярысь гожтэт. Оло, со пунэмамын но ӧвӧл. Пунэмась но пунэмен сётӥсь куспын тупамтэос кылдыку, суд но куддыръя пумзэ- йылзэ уг шедьты. Огез адями судэ вае аслыз дурбасьтӥсь адӟисез, мукетыз - ас паласьтыз тодмозэ. Коньдон пунэман сярысь ӟеч огкыл лэсьтыны юрист юрттоз. Сое ӧтемды уг поты ке, документэ одно ик гожтэлэ коньдон сётӥсьлэсь но басьтӥсьлэсь фамилизэс, нимзэс, бубы нимзэс, паспорт номеръёссэс, улон интыоссэс, коньдонлэсь быдӟалазэ, сое берыктон дырез (процентэн яке проценттэк), коньдон сётэм дырез, огкыллэсь кужыме пыремзэ. Таӵе документэз одно ик нотариус дорын юнматоно ӧвӧл. Юнматыса но мултэс уз луы. Кык экземплярен огкыл гожтыса эшшо умойгес. Газет бамъёсамы ӵем ик уг шедьыло погонэн адямиос. Нош соос асьме калык пӧлын но трос гинэ пумиськыло. Одӥгез - Пётр Матвеевич ФОМИН - республикаысьтымы Граждан оборона ужпумъёсъя но кышкыт учыръёсъя кун комитетлэн тӧроезлэн нырысетӥ воштӥсез, полковник, техника наукаосъя кандидат. Соин кенешонэз лыдӟе 4-тӥ�5-тӥ бамъёсысь. Удмурт кизилиос Елизавета КАМАШЕВА Котьку дась мед луом, но кулэ медам луэ Пётр Матвеевич ФОМИН - республикаысьтымы Граждан оборона ужпумъёсъя но кышкыт учыръёсъя кун комитетлэн тӧроезлэн нырысетӥ воштӥсез, полковник, техника наукаосъя кандидат. Пусъемын "За военные заслуги" орденэн, Россиысь МЧС-лэн мӧля вылын нуллон "Гражданская защита. За успехи", "За заслуги" знакъёсын. Таӵе дано адямиен ми кенешиськом калыкмес, шаермес кышкытлыклэсь утён пумысь. - Тӥляд удысты воргоронъёслы матынгес ке но, погонэн муртъёсты тужгес но гажамме шӧдыса, тӥледын пумиськыны дэмлазы мыным. Соин ик, Пётр Матвеевич, вождэс эн вае, куд-ог юанъёсы валантэмгес ке потӥзы. Вакчияк вералэ вал асьтэлэн ужды сярысь. - Милям удысмы туж паськыт, со сярысь вакчияк гинэ вераны ик шуг. Граждан оборона ужпумъёсты ке басьтоно, ми эскерыса-чакласа возиськом предприятиосын, организациосын, министерствоосын но ведомствоосын ГО-лэсь куронъёссэ кызьы быдэсъямез. Городъёсын но ёросъёсын кылдытэмын граждан обороная нимысьтыз службаос. Соос котьку дась калыклы кышкытлык кылдыку ӝегатскытэк ужрадъёс кутыны. Ум тодӥське ук, мар луоз шаерамы туннэ, ӵуказе... Кин малпаз, Югославиын пӧртэм выжы калыкъёс куспын тупамтэос кылдэмен, бадӟым ож пуромоз шуыса? Тӥни сыӵе учыръёсы тужгес но бадӟым инты висъяське ГО-лы. Со радъяны кулэ быдэс кунлэсь улонзэ. Таӵе дыръя тужгес но секыт ужпум - калыкез городъёсысь мукет интыосы келянэз радъян, ватскон интыос дасян, кун понна туж кулэ документъёсты но пӧртэм дуно арбериосты утён. Комитетамы ик вань учебно-методической центрмы. Отын ялан дышетонъёс (учениос) ортчыло. Татын ик тодон-валанъёссэс, быгатонлыкъёссэс возьмато Кун Кенешын но Правительствоын ужасьёс, городъёсысь но ёросъёсысь администрациослэн йыръёссы. - Нош кышкыт учыръёсты палэнтонъя ужды кызьы радъямын, Пётр Матвеевич? - Мон сое ньыль люкетлы люкысал. Кутском толлы дасяськон бордысен. Улон юртъёс понна кыл кутӥсьёсын ӵош сюлмаськиськом коркаосы дыраз шуныт сётон сярысь, эскериськом вань котельнойёсты, му вӧй но чагыр эстӥськон гумыосты, чакласьком кӧня лымы усёнэз. Тулыс дасяськиськом тудвуэз пумитаны. Тани та нуналъёсы ортчиз кышкыт учыръёсъя комиссилэн кенешез. Отын чакламын ву тудӟон вакытэ ортчытоно ужрадъёс. - Кыӵегес луоз туэ тудву? - Азьло аръёсы манер ик. Но туэ лымы тросгес усиз, эшшо но уногес люкаськиз на ке, шунытъёс вазьгес ке вуизы, югдур секытгес луыны быгатоз. Но ми али ик дасяськом ини йӧ пуштытъянъёс, эскериськом шуръёсты, сюресъёс вамен ву кошкись гумыосты. Ву улэ шедем коркаосын улӥсьёс дыраз утемын луозы но соослы юрттэт сётозы нимысьтыз кылдытэм службаос: медициная, сиён-юонъя, югдурез утёнъя но мукет. Гужем милям сюлмаськонмы - палась висёнъёсын нюръяськон. Котькуд ар ик паськыт вӧлме дизентерия, трос висё пудоос но. Соин ик вис карытэк эскерыса возёно луэ скважинаосысь но башняосысь вулэсь ӟечлыксэ. - Республикаямы нош вань-а кышкыт учыре шедемъёслы юрттонъя нимысьтыз дасям адямиос - спасательёс? - Кылем арын кылдытэмын поисково-спасательной отряд. Отчы пыро Ижысь, Глазовысь, Сарапулысь, Каракулиноысь, Воткинскысь но та ёросысь быръем муртъёс. Ваньмыз 52 кузя. Эшшо 25 мурт висъямын на федеральной бюджет чотын. Соос ас интыосазы уй но нунал дежурство нуо. Кышкыт учыр сярысь ивортэм бере, вить минут куспын дась луыны кулэ. Чугун сюрес вылын маке луэ-а, корка пуштэ-а, йӧ улысь яке вуысь кинэ ке мозмытоно-а - ваньмаз соос пырисько. Миым нырысьсэ та отрядысь адямиос гужем пыласькон вакытэ чакласа возизы бадӟым шуръёсты, тыметъёсты. Ву улэ кошконлэсь утемын вал 238 мурт. Нош ми понна шудтэм учырлэсь одӥг адямиез утён но бадӟым вормон ини. Адямилэн улонэз номырин дунъянтэм. Спасательёсмылы ар ӵоже маза ӧвӧл. Пыласькон бассейнъёсты но эскерыса возёно, йӧ вылын чорыгасьёсты но чаклано, сюрес вылын пазьгиськем машина улэ шедем муртэ но поттоно. Тани та нуналъёсы гинэ телевизор пыр возьматӥзы дас куать этажъем коркалэн балконысьтыз нылашез утемзэс. Отын но милям ик нимысьтыз дасям адямиосмы ужазы. Юрттонъя службалэн 051 номеро телефонэзъя уй-нунал ӵоже шорлыдын 150-лэсь ятыр жингыртӥсьёс луо. Нош кышкыт учыръёсты палэнтонэ спасательёс толэзяз 450 пол потало. - Пётр Матвеевич, шаерамы трос-а луо кышкыт учыръёс? Кудӥз - тужгес но секытэз? - Туж трос. 1995-тӥ арысен та дырозь сюлэсь ятыр кышкыт учыр вал. Тужгес шимес югдур кылдылӥз, "Ижмашлэн" котельноез пуштыку. Со вал 1997-тӥ арын. Дыраз ужрадъёс кутэмын ӧй луысалзы ке, укмыс этажъем сюлэсь ятыр корка, соос пӧлын нылпи садъёс, больницаос, шуныттэк кыльысалзы. Нош омырын 28 градус кезьыт вал. Сю сюрс адями шуге-леке вуысал. Гумыосысь вуэз ӝог лэзьыны быгатӥм, озьы соос кынмыны ӧз вуэ. Кык нунал ортчыса, юртъёсы шуныт вуиз. Дасям корт гуръёсмы но мукет шунтӥськон арбериосмы нокинлы кулэ ӧз луэ. Трос уж лэсьто милемлы пичиесь котельнойёс. Арысь аре соос ӝуало Кизнер, Шаркан ёросъёсын. Тани сояз арня вискын ужам Кизнерысь но Шабердино гуртысь котельнойёсты кысонын. Котельнойёс сярысь кылпум поттӥм бере, Владимир Путин, кыӵе ке областьын котельнойёслэн туж ӵем ӝуаменыныз урод ужамзы пумысен шуиз вал, вот, пе, ысъяй со котельное Шойгуэз - югдур соку ик тупатскиз. Уг, пе, быгато вал шат сое коммунальной хозяйствоын ужасьёс радъяны. Ми югдурез со дырозь ӟырдатыны ум сётэ. Эсьма, асьмеос но кӧлалом котельнойёсын, уен-нуналэн соосты возьмалом, но югдурез асьмеос ик йылаз-пумаз вуттом. - Нош тӥ асьтэос ӧд пыриськылэ-а республикамылэн палэназ луэм бадӟым пуштонъёсы? - Асьме дорын но тырмо сыӵе учыръёс. Макем бадӟым тылӝу гомаз вал Сарапул ёросысь Ельниковской месторождениын. Ӝуаз вить сюрс тонна му вӧй. Тылпу кысӥсьёсын ӵош ньыль час ӵоже нюръяським гомась тылэн. Ӧжыт гинэ ӝегасалмы на ке, тылпуэз ӧм вормысалмы ни. Кык арня пала со ӝуасал. Малпаны ик кышкыт, кӧня ыштонъёс адӟысалмы соку. - Кемалась ик ӧвӧл, пуштӥз бускельёсмылэн Менделеевскысь химия заводзы. Солэн бервылъёсыз асьме доры ӧз вуэ-а? - Валамон, ӧз. Отын аммиак ук, со сыӵе ик нашатырь спирт. Вить сю метр кеме но со ӧз вӧлмы. Уката вакыт но тупаз - толалтэ. Гужем пӧсь куазен со омыре ӝог ӝутскысал. - Пётр Матвеевич, асьмеос маке уж сярысь гинэ вераськиськом. Ойдолэ, тӥ сярысь но кылпум поттоме ни, тодады ваём вордскем палъёстэс, егит дырдэс. - Вордски но будӥ мон Пичи Пурга ёросысь Курчум-Норья гуртын. Анае дышетӥз покчи класъёсысь нылпиосты, атае ужаз Пугачёвоын возьмаськонын. Семьямы бадӟым вал: куать нылпи, мон - витетӥез. Пичиысен ик малпасько вал лётчик луыны. Соин ик шумпотыса гожтӥськи самолёт модель лэсьтонъя кружоке. Но милемыз отын малы ке ракетаос гинэ лэсьтыны дышетӥзы. Мыным туж кельшо вал Циолковскийлэн книгаосыз. Отын трос гожъямын ракетаос сярысь, кызьы соосты лэсьто, кызьы соос лобало. Циолковский дышетэмъя, чиданэ чигымон утчасько вал лэсьтэм ракетаосылэсь секталазылэсь шорзэс, ӟуч сямен вераса, центр тяжести. Сое шонер шедьтыса, двигательлы матэгес кариськод ке, ракета туж кыдёке лобӟе. Нош эшъёсы сое уг чаклало вал, лэсьтэм арберизы чебер мед адӟиськоз шуыса сое наӵ-наӵ буяло но мынэсьтым ракетаме ноку уг суто вал. Ёросамы ортчылӥсь ӵошатсконъёсын котьку ӟеч интыос басьтылӥм. Ну, шумпотыса бертӥськом вал ини гуртомы! - Малы нош ӧз быдэсмы пичи дырысен малпанды, Пётр Матвеевич, лётчик ӧд луэ? - Дас классэз йылпумъяме бере, медкомиссиын шуизы: "Нюжтӥськыны вордскемез лобаны уз быгаты". Нош серекъятэк ке верано, мыным дэмлазы операция лэсьтыны. Сотэк, пе, авиацие сюрес пытсамын. Операция бере но со училищее ар ортчыса гинэ басьтозы. Со дырысен али ке но операция ӧз лэсьтэ на. Эмъясь враче шуэ: "Улонэдлы со чер кышкыт ӧвӧл. Сое кемагес ӧм ке исалэ, кемагес улод". Физикая но математикая ӟеч оценкаосме но куасэн бызьылонъя разрядме лыдэ басьтыса, военкоматын мыным ӵектӥзы Пермьысь ракетной войскоосъя вылӥ военно- командной инженерной училищее пырыны. Сое йылпумъяме бере, 1981-тӥ арын, ыстӥзы Эстониысь Выру городэ. Ужай отделенилэн кивалтӥсез, батареялэн командирезлэн воштӥсез луыса, собере батареялэн командирез вал. Отысь келязы Псков областьысь Остров городэ дивизионлэн штабеныз кивалтыны. Собере куинь ар дышетски Москваысь Дзержинский нимо военной академиын. Сое "витьёсын" гинэ йылпумъяй. Озьы 1992-тӥ арын вуи вордскем палъёсам, Ижевске. Луи Ленин ёросысь граждан обороная штаблэн кивалтӥсез - граждан обороная кивалтӥсьлэн воштӥсез. - Пётр Матвеевич, малы воштоно кариськиды удыстэс? Йылпумъяды ракетной училищеез, академиын но ракетаосъя ик тодон-валан басьтӥды... - Озьы ик малпай, таӵе юан сётоды шуыса. Тросэз со пумысен юало. 1992-тӥ арозь мон дышетски ракетаосын пуштытъяны. Нош академиын тросгес тодӥ но валай: асьме пала но ракетаос лобало ук - мукет палась. Кудӥз ке но со куке-соку одно ик усёз. Тӥни сыӵе кышкытлыклэсь ик калыкез, улосэз утёнэн герӟаськемын комитетмылэн ужез. - Озьыен, уд жаляське та удысэ вуэмдэс? - Чик уг. Шаермес, калыкмес кышкытлыклэсь утён - со дано уж. - Ку тӥ луиды Граждан оборона ужпумъёсъя но кышкыт учыръёсъя кун комитетлэн кивалтӥсезлэн нырысетӥ воштӥсез? - Туэ гинэ, январь толэзе. Со дырозь вал воштӥсез. - Кешьше-а выль пуконды? - Секытгес ик таяз пуконын. Дышом ай, удыс тодмо, эшъёс но соос ик. - Кытысь тӥ, Пётр Матвеевич, асьтэлы ужасьёс шедьтӥськоды? - Удмурт кун университетын ужа кык кафедра: ОБЖ-я но кышкыт учыръёсы утиськонэз радъянъя. Отын 60 пала егитъёс дышетско. Ми соосын матысь кусыпъёс тупатӥм. Шутэтскон вакытазы студентъёс трос юрттӥсько милемлы. Соос - вуоно кивоштӥсьёсмы. - Нош семьяяды будо-а сюрестэс азинтӥсьёс? - Бадӟымез пие дышетске Россиысь МЧС-лэн академияз, кыкетӥ курсысь курсант. Нош покчиез - 7-тӥ классын. Ветлэ крезьгуръя школае, но малпа спасатель луыны. - Кин выжые мынэм покчиез пиды - крезьгурен эшъяське? - Анае выжые, луоз. Со милям гитараен но, мандолинаен но, баянэн но шудэ. Туж чебер кырӟа но. - Асьтэос маин ке уд-а шудӥське? - А мынам йырам схемаос но формулаос гинэ. - Пинал дыръяды куасэн бызьылыны яратӥськоды вылэм. Али нош куас вылэ султылӥськоды на-а? - Толалтэ нуналъёс укыр вакчиесь, номырлы дыр уг тырмы. Яратӥсько тулысысен бер сӥзьылозь бакча котырысь ужъёсты: гудӥськонэз, мерттӥськонэз. Нош лэсьтӥськемысь воксё но ӧй дугдылысал. Курчум-Норьяе корка, мунчо пуктӥ, лапас, йӧгу лэсьтӥ. Кенер весь кутӥсько... Тятяе шуиз вал: котькуд воргорон корка ӝутыны, пи вордыны, яблокпу мерттыны кулэ. Коркамес ас ӵыжы-выжыосын веме люкаса ӝутӥм. Пиосы трос юрттӥськизы. Бакча котырысь ужез но ярато, тужгес но бадӟымез. Дорамы улыкуз ачиз ик кубиста, помидор уд дася, мерттэ, утялтэ вал. Чылкак песятаез выжые мынэм. Со - Россиысь дано агроном. Бакчаямы тямыс яблокпумы сяськая - котькудмылы быдэн кык. Туэ нырысь емышсэс веръям ини, быдэс корзина октӥм. Ма быдӟа шумпотон кузьмазы соос милемлы. Нош пиос вордӥ шуыны уг быгатӥськы на. Вот куке внукъёс вордскозы, соку ини шуо: "Тятя, мон вань куронъёстэ быдэстӥ". - Наукаен вырыны ку дыр шедьтӥськоды на, Пётр Матвеевич? Тӥ - техника наукаосъя кандидат. - Академиын дышетскыкум ик малпаськыны кутски кивалтон удысэз, кивалтӥсьлэсь ужзэ выль сяменгес, ӟечгес радъян сярысь. Туала техникалэсь азинсконъёссэ, автоматикаез, компьютеръёсын ужанэз пыӵатон пумысь. Кивалтӥсьлэн дырыз юнме медаз быры бумагаос пӧлын бугыръяськыса. Вань службаос одӥг герӟетын мед ужалозы но кулэ дыръя соосын ӝегатскытэк кусып тупатыны мед луоз. Тани али ми ӵапак со бордын тыршиськом, огъя дежурно-диспетчерской служба кылдытыны малпаськом. Кивалтон ужез радъянъя вань малпанъёсы пӧлысь витьтон процентэз уже кутӥське ини. Кытын ке кышкытлык кылдыку, чик дырез быдтытэк компьютер программая тодӥськом кытын кӧня техникамы, адямиосмы. Озьы ӝоггес палэнтэмын луэ кышкыт югдур но. - Оло, докторской борды но кутскоды? - Вань сыӵе малпан. - Ужады тӥ кивалтӥсь, кузё, нош гуртады? - Гуртын милям кузёос ӧвӧл. Кузпалэным огкадь правоосмы. Но со мынам семья куспысь, гурт котырысь вань ужъёсты радъясь луэ. Йырам кыӵе ке малпан лыктэ ке, солы одно ик дунъет сётэ кузпалы. Дэмла, кызьы-мар сое быдэстыны. Соя ик лэсьтӥськом но ваньмыз умой пӧрме. - Нош семья куспады кыӵе кылын вераськиськоды? - Удмуртэн гинэ. Покчиез пимы Эстониын вордскемын, удмурт кылэз чик уг тоды вал дор палъёсамы бертыку. Нош али шалтыр поттыса бӧтьыртэ. Шораз ӟуч сямен вазиськом ке, куаретэ милемыз. - Тӥ лякыт сямо, дыр, Пётр Матвеевич. Тани кӧня адямиос дорады пыразы ини, огез шоры но куарадэс ӧд будэтэ. - Созэ ужасьёсы шонергес вералозы. - Гороскопъя тӥ кин меда? - Дева. Тупасько, шуо, ас знакелы. Но гороскопын верамъёслы уг оскиськы. - Пётр Матвеевич, кышкыт учыръёс медаз луэ шуыса, тӥ ваньзэ чакласа-эскерыса возиськоды. Нош улонын котькуд вамыштэс чакласа лэсьтӥськоды-а? - Кызьы ваньзэ эскерыса вуод? Котькуд адями улоназ одӥг пол ке но янгыша, дыр. Но со мыдлань лэсьтэм вамыш дыраз тупатэмын мед луоз. Янгышамлэсь кышкаса улӥд ке, ноку но азьлань уд мыны. - Нош ик уж вылэ выжоно луиськом, Пётр Матвеевич. Лыдӟисьёсмы, уката ик Вотка палъёсын улӥсьёсыз, возьмало, дыр, таӵе юан сётэмме: "Бадӟым-а кышкытлыкез инкуазьлы но адямилэн тазалыкезлы Воткинск вӧзы пуктыны чаклам заводлэн?" - Адямилы но, инкуазьлы но со кышкыт ӧвӧл. Мон ачим ракетчик, ӟеч тодӥсько со ужпумъёсты. Чурыт эстӥськонэн ужась ракетаослэсь двигательёссэс омырын уз, гурын сутозы ук. Шуо, диоксин, пе, потоз ӵынэн ӵош. Асьме мунчо гуръёсысь, котельнойёсысь ӵын пырак омыре вӧлске. Нош со завод муръёетӥ кошкись ӵын нырысь потоз нимысьтыз лэсьтэм сузян арбериос пыр, собере гинэ омыре вӧлмоз. Город пушкын ӵындӥсь ТЭЦ- ёслэн, пуэн эстӥськись коркаослэн ӵынзы адямилэн тазалыкезлы бадӟымгес изъян ваё, тросгес кырсёмыто инкуазез. - Калыкез сюлэмшугъяськыто на Кизнерысь но Камбаркаысь химия ож тӥрлыкен тырмытэм складъёс. Соосты быдтон пумысен ӝутэм вераськон азьланьтӥське-а? - Кылем арня вискын гинэ Нижний Новгородын ортчиз та ужпумлы сӥзем бадӟым кенеш. Отын вераськон мынӥз химия ож тӥрлыкез быдтонъя технология сярысь. Со складъёсты одно ик быдтоно. Соосты чаклам дырлэсь кемагес возид ке, трос интыосын кышкыт югдур кылдоз. Солы котьку дась луоно. - Кыӵе ке газетын Сергей Шойгу шуиз вал, ми, пе, котьку дась мед луом, но кулэ медам луэ. Тӥ дась-а кышкыт учыръёслы, Пётр Матвеевич? - Дась, но сыӵе учыръёс медаз луэ вылэм. Сокумилям 051 службамы но кулэ ӧй луысал, куректон, кайгу но улонмес шергес сьӧдмасалзы. - Туннэ - Атыкай музъеммес утисьлэн нуналэз. Кыӵе кылъёс вераса ӝутоды бокалдэс? - Тупаса, эшъяськыса но кышкыт учыръёстэк улон понна! 02 ивортэ Кык ар ӵоже Февральлэн кык арняосыз ӵоже Удмуртиын пусъемын вал 804 йыруж, со пӧлысь 679-эз шараямын ни. Озьы ик шараямын 8 адями виён (10 пӧлысь), 16 вӧсь карон, 4 адямиез эриктэман (5 пӧлысь), 179 лушкаськон (278 пӧлысь). Ульчаосысь палэнтэмын 7079 юэмъёс, соос пӧлысь 3435-ез кӧлӥз сазьтӥськонниын, асьэды умойтэм воземзы понна тыриськон тупатэмын 2348 муртлы. Лушкасько компьютерын Ижевскысь "Радотехника" магазин пушкысь нимаз вузкарисьлэн Жуйковлэн вузкарон интыяз "Р" управлениын ужасьёс ӝегатӥзы 25 аресъем кык Александръёсты. Пытсэт сьӧрын пукем ужбергатӥсьёслэсь талазы компьютерлы программаосын 189 дискъёссэс. Соос пӧлысь уноез программаос ("Троянский конь", "Чернобыль" но мукетъёсыз) бадӟым изъян вайыны быгатысалзы учреждениослэн, предприятиослэн ЭВМ-ёссылы. Кык воргоронъёс янгыше уськытӥсько РФ-ысь УК-лэн 273-тӥ ёзэтзлэн 1-тӥ люкетэзъя. Паласэн бинялтыса Камбарка тымет дурысь Труд ульча палан шедьтэмын 57 аресъем бомжлэн Николайлэн шӧйыз. Вӧсь карыса вием воргоронэз паласэн бинялтӥллям. Адямиез быдтэмзы понна ӝегатэмын нылпи комбинатысь 21 аресъем возьмаськись Станислав но 22 аресъем Сергей. Караул, эриктэмало! 11-тӥ феврале выжон уе Воткинскысь базарын куинь тодмотэм воргоронъёс 18 аресъем Т. нылашез жугизы но эриктэмазы. Нылкышно милицие вазриськиз 14-тӥ феврале гинэ. Но югдурез утёнын тыршисьёс "ческытэз" яратӥсьёсты кырмизы. Нош кинъёс соос? Со рынокез возьмась 24 аресъем Вячеслав, базарысь 23 аресъем контролёр Михаил но Воткинск НГДУ-ын ужась Павел. *** 13-тӥ феврале ог 20 час котырын Можгаысь Кооперативной ульчаысь 9-тӥ юртысь одӥгаз квартираын эриктэмаллям 72 аресъем песянаез. Пересь кышно милицие ӵуказеяз гинэ вазиськиз ке но, эрказмем ӝегатэмын вал. Яратонэн "шудэмез" потэм Можга ёросысь Люга станциысь 17 аресъем Олеглэн. *** Таиз но учыр вал Можгаын. Ог 19 час котырын "Спутник" культура юрт мышкын эриктэмамын вал 19 аресъем И. Нош кырсь уж лэсьтэмез понна кутӥзы нылашлэсь тодмозэ 20 аресъем Анатолиез. Коблазы пыдъяськиз Ог 3 часын уин Алнаш ёросысь Пирогово гуртысь вал гид доры тодмотэм адямиос вуизы. Куамын куинь аресъем возьмаськисез керттылыса 10 сюрс манетлы дунъям коблаез нуизы. Алнашысь милиция лушкаськисьёсты со нуналэ ик ӝегатӥз. Вал чотын узырмемзы потэм бускель Татарстанысь Менделеевск ёросысь Камаево гуртысь пиослэн - Радиклэн но Назифлэн. Бакча сузясь Завьял ёросын трос гинэ сад-бакчаос интыяськемын. Валамон ини, толалтэ соос кузётэм кылё. Лушкаськисьёсын сэрен трос гинэ ужано луэ Завьял ёросысь югдурез утисьёслы. Соослэн син шоразы йӧтӥз Сепыги гуртысь 27 аресъем Сергей. Миым ноябре- денкабре со "Березка" сад-бакчаысь сизьымзэ юртэз сузяса вуэм. Утчаськон дыръя куд-ог лушкам ваньбур шедьтэмын ни. Огреч сиемез потэм Сарпулысь Птицефабрика ульчаысь 72 аресъем пенсионеркалэн юртаз укноетӥ 28 аресъем бускелез Сергей пырам но кык банка сылалтэм огречсэ маялтэм. Лушкаськись бускель ӝегатэмын, огреч кузёезлы берыктэмын. Кышетсэ гинэ но нуиллям Ижысь Октябрь ёросысь югдурез утёнъя ёзэ нылкышно вазиськиз. "Заря" сад-бакча интыяськем дачаысьтыз 11-тӥысен 17-тӥ февралёзь лушкаллям микроволнаен ужась "Самсунг" гурзэ, шунтӥськонзэ, радиоприемниксэ, нуиллям мамык кышетсэ гинэ но. Лушкам ваньбурзэ со дунъяз 6 сюрс 100 манетлы. Со мында манетлы узырмиллям ӝыт ужась 9 номеро школаын дышетскисьёс Александр (17 арес), 62-тӥ школаысь Андрей (15 арес), Сергей (15 арес) но Андрей (16 арес). Лушкам арбериоссы таламын. Тэк уг пукы вылэм Ижевскысь Буммашевской ульчаысь 32а юртын улӥсь 24 аресъем Марина та дыре уг ужа, декретын пуке. Но со тэк пукыны уг чида вылэм - эфедринлэсь наркотик лэсьтыны дышем. Табере солы уголовной кодексэн тодматсконо луоз. Н.Байтеряков. (Удмурт Республикаысь Югдурез утёнъя министерстволэн пресс- службаезлэн ивортонъёсызъя). Кырӟан мылкыдэз ӝутэ Озьы лыдъяло Шаркан ёросысь культура удысын ужасьёс. Соос, калыке потаса асьсэлэн кырӟаны-вераны быгатэменызы ужась адямиослэсь мылкыдзэс ӝуто. Адями уго ужен гинэ уг улы. Скал кыскисьлэн но, нянь будэтӥсьлэн но уж висказ шутэтскемез потэ. Алигес ёросысь культура удысын ужасьёс, огазе люкаськыса, ортчем арын ужамзылы йылпумъёнъёс лэсьтӥзы но выль ужрадъёс чаклазы. Ёросысь администрацилэн Данъян грамотаеныз пусъемын Быги культура юртысь А.Савельева, Зар.Вишурысь Л.Широбокова, шаертодон музейысь Г.Стрелкова, культура отделысь С.Калинина но Шаркан РДК-ысь коллектив. Культурая министерство "Салют, Вормон" фестивале пыриськемзы понна диплом сётӥз ветеранъёслэн калык хорзылы (кивалтӥсез А.Протопопов). Нош "Ритм" эктон группалэн кивалтӥсезлы Т.Максимовалы Удмурт Республикалэн Правительствоезлэн Председателезлэсь Ю.Питкевичлэсь тау карон гожтэт вуиз. П.НИКОЛАЕВ. Николай Никифоров Кышно курась Юмореска Шабей Володь ӧсэз вӧлак усьтӥз но, кырӟан нёръяса, кузпалэз доры вамыштӥз. - Если был б я султан, Я б имел трёх жён, И тройной красотой Был бы окружён... - Олокыӵе но выль кырӟанъёс нёжъяны кутскид ни, лэся. Азьвыл удмуртъёссэ гинэ "чоръяськод" вал. - Шумпотон мылкыды гадьысьтым уртче, Надёк. - Лӧпшам куараен вазиз Шабей Володь. - Мон туннэ аслэсьтым воргорон луэмме валай. Киосы интые, бурдъёс кылдӥзы кадь. - Котькуд нунал юид ке, инсьӧры но лобӟод. - Муг шеде гинэ, Надёк, - ӝӧк сьӧры интыяськиз Шабей Володь. - Ингушетиысь президентлэсь указзэ выльысь тодамы ваим но сюлмысьтымы "миським". - Кыӵе-сыӵе шумпотымон указ сярысь вераськод ай? - Воргоронъёслы эрик но шумпотон кузьманы турттэ вал ук. Огез но лушкемен палэнэ медаз кожалэ, пе, котькудӥз куинь-ньыль кышно возьыны мед быгатоз. - Нош тон малы сокем ымдуръёстэ вӧлъяськод ай, Володь? - мынектӥз кышномурт. - Тон со улосвылын уд улӥськы, мусульман но ӧвӧл. - Э-э, озьы эн шу, мусокае, - сиськемысь ик дугдӥз Володь. - Россеяын ӧжыт шат мусульманъёс? Живо-два та ужпумез бугыртозы. Нош Кун Думаысь депутатъёс оп! шуытозь кизэс ӝутозы. Жириновскиед ик вань пиосмурт калыкез сьӧраз валтоз. Асьме атасмы, дас вить кузпалъёсыз луыса но, бускелямы бызьылэ тани. Надя огдырлы могӟиз. Володез шудыса уг вераськы кадь. Депутатъёс олокыӵе йӧнтэм законъёс но пӧрало уга. - Оло, тон но куинь кузпал басьтыны малпаськод? - Оть-те на! Нош мон маин кулэс? Кулэ ке луиз, осконме вошто но мечете ветлыны кутско. - Озьыен, мон ярамысь дугдӥ ни? Ушъяськод вал кадь ук. - Укыр вазь пересьмыны кутскид, Надёк. Бордысьтыд мылкыдэз бичатӥсь шӧмыд тӧлӟыны кутскиз. Уть ай киноосын кыӵе йӧно француз кышноосты возьматъяло! Чебересь, веськресэсь, узыресь... - Француз кышноослэн, буяськон но валесын лошъяськон сяна, ужзы ӧвӧл, дыр. Коньдонзы но тырмыт, кузпалзылэсь лушкемен кыштыртыны но йӧндыро. - Тон мыдланес палзэ гинэ синйылтэмед, Надёк. Чеберлыксэс учкы тон, чеберлыксэс. - Ми но чебересь луысалмы, дыр, - секытак лулскиз кышномурт. - Мын ай, ужа со куашкам калэ вуэм фермаяд. Ваньзэ киын лэсьтоно. Дорад нош люр-ляр карись нылпиос, кудӟем картэд. Кудӥзлэн кисыосаз тӧл шула. Чеберлык сярысь малпаськод на, пе. Кытын ни милемлы лул-мылкыдэз сётыса ӟырдыт яратон? Ӝыт ке вуэ, кор музэн уськытскиськод валес вылэ: коть веша, коть мусоя соку. Эсьмаса, пыдчиньыосты гинэ но выртэм уг поты. - Во-во, шонер вераськод. Оло, улэп кышное вӧзын кӧласько мон, оло шӧй вӧзын! Соин ик дурбасьтӥсько сыӵе указлы. Ачид но каньылля шокчод. Юртъерын ньыль кышномурт - усто маке со! Дэмен уж капчи, шуэ асьме калык. - Воксё визьтэммид шат, Володь? Яке шудыса-серекъяса-а вераськиськод? - Оло, юнме юыса бертӥ кожаськод? Кышно кураса ветлӥ мон, проверка ортчытӥ. Сизьым корка пырай, ява! - Остэ-э! Вот ымныр пыжон! Вот, возьыттэм! Оло, соглаш кариськизы? - Малы-о уз? Мон вӧямтэ табаысь но табанез уськыто. Вузкарись Зина семьямес сиён-юонэн тыр возён сярысь сюлмаськоз, ӵыжыт Одоть юртъер котырысь ужпӧрез быдэсъялоз, нош Татьяна Викторовна нылпиосмес утялтоз, визьмалоз. Ваньдылы уж шедьто, мусоосы. - Остэ, инмаре! Сьӧлыклэсь курдамтэос но тырмыт вылэм ай гуртамы. - Соосты но валаны луэ, Надёк. Кузпалтэк тэльмыро уго. Эсьмаса, толэзьлы огпол ке но мусоясьсы луоз. Соос ик сектазы тани. Шабей Надя огдырлы могӟиз. Огшап малпаськыса сылӥз но, ватэтысь аракызэ поттыса, чаркаосы лэзьяз. Володь вӧзы пуксьыса чарказэ ӝутӥз но секытак лулскиз: - Вань секыт ужез, курыт кылъёстэ чидало, Володь, сюлмысьтым ярато но. Эн гинэ кузъяськы нокинэн. Ӵошен ик ортчытомы та гумырмес. Нылпи кулэ вал шуиськод, ньылетӥзэ но вордом. Тыро чарказэ кияз кутыса, пальпотытэк амалыз ӧй вал ни Шабей Володьлэн. Ма, толон гинэ Надяез люкиськонэн курдатӥз вал угось. Кыӵе кидысэд - сыӵе ю-нянед Сюмси ёрослы туэ Гурт хозяйствоя министерство 25 тонна сезьы, 5 тонна йыды, 7 тонна чабей, 4 тонна кӧжы, 1 тонна сьӧд чабей кидыс висъяны чакла. Ӟеч сортъем кидыс кизьыса, сюмсиос оло, туэ урожаен ваньзэс паймытозы ай. П. Николаев. Ялан ӝуась тылэз утись Тём пеймытлэсь но, урдскылӥсь пуныослэсь но уг кышка Виктор Петрович. Туж пыдлось гуртъёсы но сое вуттэ Ялан ӝуась тылэз утён, Родинамы понна улонзэс сётэм воинъёсты вунонтэм кельтон мылкыдыз. ...Сюрес вылын погмаськыны вуэм адямиез ӝыт пеймытэ выись гуртын дугдытӥз милиционер: - Сыл, кин тон? - Мынам пароле - Виктор Поздеев. Адями кошкиз азьлань. Сое дугдытӥсь ӧз луы ни. Сое тодо. Сое гуртын пуныос но тодмало. Уката ик - ас вордскем Зянкино палъёсаз. Тӧло, пелляськись куазь шоры учкытэк, Виктор Петрович алигес вуылӥз Красногорск но Юкаменск палъёсы, та ёросъёсысь Кионбыж (Васильево), Верх.-Уни, Пышкись (Пышкет) черкогуртъёсы, Малягуртэ, Ӟангагуртэ (Зянкиное), пумиськылӥз тунсыко адямиосын, школаын дышетскисьёсын, егитъёсын. Красногорскын шундыё кезьыт нуналэ сое шумпотыса пумитаз Лидия Никифоровна Филиппова, Нырысетӥ дунне оже пыриськем муртлэн нылыз. Унтер-офицер Никифор Филиппов ожъёсын Парижез утиз, Франциын со служить кариз берло маршал луэм Родион Малиновскиен одӥг ротаын (та сярысь "Удмурт дунне" гожъяз 1999-тӥ арын 27-тӥ июле). Никифор Васильевич Виктор Поздеевлэн визьнод сётӥсез но вал: 1950-тӥ арын со дэмлаз ӝыт ужась школае 9-тӥ классэ мыныны. Та нуналэ ӝыт, 6-тӥ феврале, куамын градус кезьыт дыръя, Виктор Петровичез возьмало ни вал Малягуртын. Татысь библиотекарь Василий Спиридонов гуртоосызлы дэмлам В.Поздеевлэсь "По следам подвига" книгазэ лыдӟыны. Соин ик авторлы трос юанъёс сётъязы. Нунал ортчыса, дышетӥсь-шаерчи Верх.-Уни школаысь музеен кивалтӥсьлы В.Г.Феофилактовалы кузьмаз туспуктэмъёс но "Удмурт дуннеын" потэм статьязэ. Валентина Георгиевна но, "Знак Почёта" орденлэн кузёез, Виктор Петрович азьын пунэме ӧз кыльы: Н.Бушмелевлэсь "В стороне юкаменской" книгазэ кузьмаз. Та книгаын, озьы ик "Ветераны Удмуртии" сборникын трос чуръёс сӥземын Т.Ф.Невоструевалы, школаын ньыльдон арлэсь кема ужам адямилы, калыкез дышетонысь отличниклы. Та паймымон кышномуртэн Пышкетын одно ик пумиськоно вал. Быдӟым Вормонлы 20 ар тырмон азьын 27-тӥ мартэ "Знание" обществоысь лектор В.П.Поздеев та школаын тодматскиз солэн атаеныз Федот Петровичен, Сталинград ож пыр потэм адямиен. Пышкет школалэн завучезлы соку туж кельшиз Брест крепостез утисьёс сярысь лекция. Ижысь лыктэм муртэ со дораз ӧтиз но омуль чорыген куноятӥз. "Та паймымон чорыгез Байкалысь ваиз мынам покчи пие, - шуиз Федот Петрович. - Нош таиз мынам нылы, дышетӥсь-химик". Со учкымон тусо, чагыр синмо егит нылкышно вал Тамара Федотовна. Табере ини со лулӟыса вераз: "Буби 33 ар талэсь азьло кулӥз, тямысэтӥ арзэ ӧвӧл ни яратоно братэ Эдуард но"... Данъяськыны луэ Т.Ф.Невоструевалэн Пышкетысь этнографияя музееныз. Кин гинэ татчы ӧз вуылы! Австриысь миллионер доктор Дайль, Венгер парламентлэн членэз священник Хайду Золтан, Финляндиысь Сара Хянникяйнен, мадьяр профессоръёс Тот но Кун... Соос татчы чилясь машинаосын, дыр, вуылӥзы. Нош нокыӵе тӧло-жобо куазьлэсь кӧберасьтэм сюресчиез Виктор Поздеевез Пышкетысь ветеранъёслэн кенешсылэн тӧроез Т.Ф.Невоструева доры дӧдьыяз пуктыса вуттӥз солэн дышетскисез, Вуж Безумысь механизатор Виктор Шкляев. Февраль тӧлъёс пумен пуромо. Номыр шоры учкытэк, 9-тӥ феврале тыраз калык люкаськиз Зянкиноысь клубе. Татысь школалэн директорез, Удмурт Республикаысь школалэн дано дышетӥсез Антонина Сергеевна Дряхлова Тамара Федотовналэн дышетскисез вылэм. Виктор Петрович кема витем куно, визьпог, тодосчи луэмзэ возьматӥз. Мадиз Удмуртиын кылдытэм 313 номеро дивизиысь ветеранъёсын Карелиын пумиськылэмез, мур кайгуэн пыӵам Сандормох нюлэс (татын ыбемын вал Куӟебай Герд) сярысь. Та учырез газетмы ивортӥз ӵапак куинь ар талэсь азьло, феврале. Нош 357 номеро стрелковой дивизия сярысь материал "Удмурт дуннеын" потӥз 1992-тӥ арын 29-тӥ октябре. Виктор Петровичлэсь та газетъёссэ Зянкиноысь пиналъёс, дышетӥсьёс но механизаторъёс киязы кутыса ик учкизы. Нош туспуктэмъёсысь соос адӟизы Советской Союзлэсь Геройзэ Георгий Томиловскиез, Брестэз утисез Горд Знамя орденлэсь кавалерзэ Дизьминоысь Григорий Веретенниковез, Витебск дорысь партизан отрядлэсь командирзэ Иван Очеевез. Ӧжытэз тодэ, дыр: 1942-тӥ арын 28-тӥ апреле маршал Климент Ворошилов Ижевск дорысен синпельлы час сётӥз 112-тӥ стрелковой бригадалэн комбатэзлы Василий Янковскийлы. (Та частьын службазэ ортчытӥз Зянкиноысь красноармеец Афанасий Поздеев, Виктор Петровичлэн агаез.) Ож бере маршал Константин Рокоссовский Янковскийлэн пельпум вылаз бырттӥз генерал-майорлэсь погонъёссэ. Таӵе полководецъёслэсь туспуктэмъёссэс учкон но соос сярысь мадемез кылзон - асэнызы пумиськем кадь. Зянкиноын улӥсьёслы со кемалы вунонтэм кылёз. Т.СОРОКИНА. Виктор Поздеев понна одӥгез дуноез туспуктэм луэ таиз: со лэсьтэмын 1985-тӥ арын 5 номеро ӝыт ужась школаын историкъёслэн семинарзы дыръя. "Тунсыко пумиськонъёс" клублэн кивалтӥсез В.П.Поздеев (сылэ) куное ӧтиз Иракысь азьвыл военной советникез майорез Валерий Эжбаевез, полковникез Анатолий Ракетскиез, 313 номеро дивизиысь артиллеристэз Алексей Кузнецовез но Брест крепостез утисез Пётр Немцовез. Мон - сэдык Изоискусствоосъя музейын усьтӥськиз Удмурт Элькунысь калык суредасьлэн, Россия Федерациысь дано суредасьлэн Менсадык Гариповлэн адӟытонэз. Со сӥземын художниклэн вордскемез дырысен витьтон вить ар тырмонлы. Огинэ люкаськылыса, Менсадык Гариповичез тодӥсьёс буре ваизы туж ӟеч но синмаськымон эшсэс. Юртэ лыктӥсь адямиос тодматскыны быгато суредасьлэн луло дыръяз быдэстэм ужъёсыныз. Соос сӥземын удмурт калыклэн вашкала дыръя ик кылдэм удысъёсызлы. Суредъёсысь адӟиськод мушкасьёсты, вуко изӥсьёсты, чорыгасьёсты. Татын ик - Менсадык Гарипович Гариповлэн аслыз сӥзем суредэз. Художниклэсь тусбуйзэ туж ӟеч возьматыны быгатэм Удмурт Элькунысь калык суредась, Россия Федерациысь калык суредась Пётр Васильевич Ёлкин но. Улонысь туж вазь кошкем дано удмурт суредась сярысь ӟеч кылъёссэс веразы Менсадык Гарипович Гариповлэсь суредъёссэ люкась Светлана Геннадьевна Государева, Удмурт Элькунысь калык суредась, Россия Федерациысь калык суредась, шаерысьтымы суредасьёслэн огазеяськонзылэн тӧроез Пётр Васильевич Ёлкин, история наукаосъя доктор профессор Кузьма Иванович Куликов, история наукаосъя доктор профессор Владимир Емельянович Владыкин, изоискусствоосъя музейлэн директорез Валентина Оскаровна Гартиг, мукет адямиос. - Мон - сэдык, - улэп дыръяз ачиз сярысь тазьы шуылэм Менсадык Гарипович. Зэм но, огшоры ӧй вал та адями. Туж укшалляз кыӵе ке выжыкылысь аспӧртэмлыко муртлы. Менсадык Гариповичен люкиськыку, калык туж трос вылэм. - Кыӵе ке бадӟым кивалтӥсез вато, дыр, - шуиллям адямиос. - Ӧвӧл, суредасез, - ивортӥллям соослы. Огшоры калык но тӥни кыӵе вылӥ дунъя вылэм та адямиез. Е. Ромашова. Чур бугор Ма понна кисьтӥм вирмес? Кытын но ку асьмеос пыриським "ялымтэ" ожъёсы? Испания: 1936-т ӥ-1939-тӥ аръёс. Финляндия: 1939-тӥ арын 30-тӥ ноябрьысен 1940-тӥ арын 13-тӥ мартозь. Западной Украинаез но Западной Белоруссиез СССР борды огазеян: 1939-тӥ арын 17-тӥысен 28-тӥ сентябрёзь. Китай: 1924-тӥ арын августысен 1927-тӥ арын июлёзь; 1929-тӥ арын октябре- ноябре; 1937-тӥ арын июльысен 1944-тӥ арын сентябрёзь; 1945-тӥ арын июле- сентябре; 1946-тӥ арын мартысен 1949-тӥ арын апрелёзь; 1950-тӥ арын мартэ-мае (ПВО-лэн войскоосызлэн группазы); 1950-тӥ арын июньысен 1953-тӥ арын июлёзь (Уй пал Кореяын оже пыриськем подразделениос). Венгрия: 1956-тӥ ар. Алжир: - 1962-тӥ 1964-тӥ аръёс. Египет (Огазеям Араб Республика): 1962-тӥ арын октябрьысен 1963-тӥ арын мартозь; 1967-тӥ арын июне; 1968-тӥ арын; 1969-тӥ арын мартысен 1972-тӥ арын июлёзь; 1973-тӥ арын октябрьысен 1974-тӥ арын мартозь; 1974-тӥ арын июньысен 1975-тӥ арын февралёзь (Черноморской но Тихоокеанской флотъёсысь тральщикъёс пыриськизы Суэцкой каналын минаосты утялтонэ). Йемен Араб Республика: 1962-тӥ арын октябрьысен 1963-тӥ арын мартозь; 1967-тӥ арын ноябрьысен 1969-тӥ арын декабрёзь. Вьетнам: 1961-тӥ арын январьысен 1974-тӥ арын декабрёзь. Сирия: 1967-тӥ арын июне; 1970-тӥ арын мартэ-июле; 1970-тӥ арын сентябре- ноябре; 1973-тӥ арын октябре. Ангола: 1975-тӥ арын ноябрьысен 1979-тӥ арын ноябрёзь. Мозамбик: 1967-тӥ-1969-тӥ аръёс; 1975-тӥ арын ноябрьысен 1979-тӥ арын ноябрёзь. Эфиопия но Сомали: 1977-тӥ арын декабрьысен 1979-тӥ арын ноябрёзь. Афганистан: 1978-тӥ арын апрельысен 1989-тӥ арын 15-тӥ февралёзь. Камбоджа: 1970-тӥ арын апрель-декабрь толэзьёс. Бангладеш: 1972-тӥ-1973-тӥ аръёс (СССР-ысь Военно-Морской флотлэн корабльёсыз). Лаос: 1960-тӥ арын январьысен 1963-тӥ арын декабрёзь; 1964-тӥ арын августысен 1968-тӥ арын ноябрёзь; 1969-тӥ арын ноябрьысен 1970-тӥ арын декабрёзь. Сирия но Ливан: 1982-тӥ арын июне. Татчы пыртэмын ӧвӧл Россия Федерацилэн улосвылаз но СНГ-ысь странаосын ортчем ожъёс: - армянъёс но азербайджанецъёс куспын Нагорной Карабах понна нюръяськон (1989-тӥ-1990-тӥ аръёс); - абхазъёслэн но грузинъёслэн ваче пумитъяськонъёссы (1993-тӥ-1994-тӥ аръёс); - Таджикистанысь власть но оппозиция куспын ожмаськон (1994-тӥ-1999-тӥ аръёс); - Молдавия но Приднестровье куспын пумитъяськон (1992-тӥ ар). Ӧтиськом кенешыны Мамонтъёс кемалась быризы, нош кышномуртъёс весь кивалто. Малы? Кемалась-кемалась, мамонтъёс улон вакытэ ай, музъем вылын матриархат вылэм. Туэ но со нуналъёс вуизы, лэся. Нылкышноос, валэз сямен, улонэз асьсэос кытконо луо. Малы шуод? Тросэз пиосмуртъёс лябӟизы угось. Кышномуртъёс одӥг ужысь мукетаз бызьыло, нылпиосты учкыны вутто, пӧрасько, мисьтасько. Нош пиосмурт ма ужа? Уж дурысь бертыса (ай кытын ке ужа ке), диван вылэ усе но газет кутэ яке синзэ вошъятэк чагыр экран шоры учке. Ваньмыз сярысь уг вераськы, но тросэз асьсэды тодмазы, луоз. Транспортын-а мынӥськод, эшъёс дорын-а пукиськод, пересен-а, пиналэн-а вераськиськод - ваньмыз пиосъёс вылэ ӝожтӥсько. Одӥг тодмое, Таня, огназ будэтэ нылпизэ. Атаеныз, кышноё пиосмуртэн, бадӟым яратонзы вылэм. Нырысетӥ аръёсы Слава котькуд ӝытэ сямен доразы вуылӥз, кузпалзэ кельтыны дасяськиз. Турттонэз туннэ дырозь кыстӥське. Пизылы дас арес тырмиз ни. - Со нефтяник луыса ужа, уксё трос басьтэ, - вера кышномурт, - озьы ке но, юрттӥськемзэ ум шӧдӥське. Берло дыре толэзьлы огпол пыралля ик. Пиеныз шудыса но, вераськыса но уг вутты. Слава кышнозэ уз кушты шуыса валаме бере, оло, кинэн ке тодматсконо, малпай. Учкисько: одӥгез юыса уг куасьмы, мукетыз ужтэк улэ. Кузпалъяськем эшъёслэн курадӟыса, жугемез, ултӥямез, калгись картъёссэс чидаса улэмзы шоры учки но огнам улоно кариськи. Азьвыл яратонэ куддыръя вуылэ ке но, сьӧраз одно ик ӟенелик кутэ. Юэ, юэ но погра. Кыӵеен адӟе сое пиез, соиз сярысь уг малпаськы. Пиосмурт йыг-йыг луыны кулэ. Солэн пельпумъёсыз сьӧрын котькыӵе тӧллэсь ватскыны мед луоз. Таӵеосын книга бамъёсын гинэ пумиськылӥ. Мукетыз нылаш, Галя, базарын емышъёсын вузкарисьлэсь нылпи ваиз. Таӵе "сьӧдъёс" сярысь шуо: "помидоръёслэн но гиряослэн рыцарьёссы". Соос - базар кузёос. Шедьто бызьымтэ, квартираен нылмуртэз. Ческыт кылъёс, кузьымъёс, ӟыгыръянъёс... Кӧня ке дыр ортчыса, улон инты, шунтэм валес - ваньмыз дась. Базарын зӥбыны кутскытозязы, милиция уллятозь лӧптыса уло. Берло лобӟыса кошко мукет городэ. Кузьымъёс, сяськаос, чебер нылъёс - ваньмыз выльысь кутске. Кӧня нылъёслэсь улонзэс тугазы ни таӵе "шырчикъёс". Тӥни одгез сыӵе рыцарь бырйиз Галяез. Ӵошенназы ар улэмзы бере, пиосмурт ышиз. Шудо яратон нуналъёсты миндэр вылэ кисьтэм синкылиос, викышъянъёс воштӥзы. Сюлме пыӵаз воргоронлы вожпотон. Но калленэн со быгыльскиз мукет яратонэ: нылашлэн кӧтаз будэ вал пиналыз. Пиез вордӥськем бере нылмурт солэсь атайзэ утчаз-шедьтӥз. Сюлмаз улӥз оскон: пичильтыкезлэсь мусо ымнырзэ адӟыса, пиосмурт одно берытскоз. Луиз мукет сямен. Одӥг шундыё нуналэ Галя басьтӥз телеграфе вераськыны ӧтись телеграмма. Сюлмыз тэтчаса, пыдъёссэ шӧдытэк бызиз нылаш телефон доры. Трубкаысь кылъёс мырдэм пыӵазы йырсазе: "Ноку но монэ эн утча. Нылпидэ кельты аслыд". Галялэсь ымнырзэ пӧсь синкылиос сутӥзы. Кӧлытэк ортчытэм уйёс гинэ тодо на солэсь бӧрдонзэ. Но нуналъёс ортчо, улон бызе. Сюлэм висён бурме. Туэ Галя ялонъёсын герӟаьскем удысын выре. Быдэс нуналзэ ортчытэ пыд йылаз, ӝыт кык аресъем пиналзэ нылпи садысь басьтэ но ӟыгыръя, чупа, тон мынам зарние, шуэ. Тани солэн улонэз, яратонэз. Нош пиез юа папазэ. Кызьы валэктод югдурез? Соин утча нылмурт кельшымон кузпал но атай. Тодматске пиосмуртъёсын, эшъяське, но дыр ортчыса, ваньзы соос ышо, омыре пазьгисько кадь. Та учыръёсын оген улӥсь нылкышноос сярысь верамын. Нош карто кышномуртъёс ваньзы-а умой уло? Люба Колялы бызиз кӧто луыса. Нылашлы соку дас куать арес вал, пияшлы - кызь. Ог-огзэс туж яратӥзы. Вордскиз пиналзы, солы куать толэзь тырмыса, нылаш интыяськиз фермае ужаны. Нылпиеныз пукиз анаез. Картэз колхозын ик ужаз, тракторист луыса. Туж тыршыса, пудо-живот вордыса, ог-огзэс валаса улӥзы.Но пичиен-пичиен Коля бордысь аракы пыӵам зын шӧдскыны кутскиз. Нырысь Люба ӧз оскы картэзлэн ӟенелик борды бинялтӥськемезлы. Дыр ваньзэ интыяз пуктӥз. Кыкетӥ нылпи ваемез бере, Кышнозэ котькуд юбо борды вожамъяськыса, яратонэз сое мыжгыны но быгатэ ни вал. Нылпиоссэ жаляса, Люба чидатӥське. Матысь адямиосыз но дышето: юисьтэмез пиосмурт туала дыре ӧвӧл, люкиськид ке, пиналъёсыд атайтэк кылёзы. Та выллем семьяос котькуд гуртын вань. Юон ваньмыз доры вуттӥськыны амал шедьтэ. Малы адями юэ? Шуг-секытъёслы чидатэк, дышем сямъя? Кылдэм югдурысь потон амалъёс адӟытэк, утчатэк но адями ӟенелик борды кырмиське. Ӵемгес курыт ву пӧлы выё пиосмуртъёс. Одӥгзэ талы валэктонэз кылӥ дагестан пиосмуртъёслэсь. Тодматски соосын гуртысьтымы нялтас машинаен Иже мыныку. Кенешон куспамы вераськонмы воргоронъёс вылэ выжиз. - Пиосмуртъёс, - шуисько, - вань ужъёссэс кышноослы куштӥзы, лябӟизы. - Укыр маке пиосмуртъёсты уд яратӥське, - куатаськизы пиос. - Милям ваньмыз мукет сямен. Кышномурт корка пушкын кузё, пиосмурт уксё поттэ, семьяез сюдон, утён сярысь малпаське. Пиосмуртлэн выжыез быре шуыса шугъяськиськоды ке - лыктэ ми доры. Юэмзы вылэ ке ӝожтӥськиськоды - татын воргоронлы аслыз эсэпсэ тодыны кулэ. Мултэс юон умойтэм учыръёсы вуттыны быгатоз. Нош малы тӥляд пиосмуртъёсты "куасьмыны уг вуо"? Тӥ кема ар ӵоже зӥбетын улэм калык. Басьтоно ке эксэй Россиез, огшоры гуртысь ужась воргорон пӧсь куазен но, кезьыт куазен но тыбырзэ ӧз куасалля. Кынмемысьтыз, жадемысьтыз, сю грамм лэзе, кӧня ке улыса - эшшо сю грамм. Аракылы дышыны кема ӧвӧл. Туэ ӟенеликтэк нокыӵе уж уг лэсьтӥськы. Курыт вуэз яратон вашкала дырысен тӥляд калыктылэн вираз пыӵамын ни. Зэмзэ но, татын кыӵе ке но герӟетэз вань, дыр. Малы ке Англиын, Франциын но мукет азьмынӥсь кунъёсын ресторанэ ял карыны пыро ке, отысь пограса уг пото. Нош асьмеос стаканъёсын, ӟенеликъёсын лыдъяськом ни. Татысь ик потэ тросэзлэн посмуртъёсмылэн лябӟемзы. Уг тырмы соослэн кужымзы вож кыез вормыны. Нош кышномуртлы нокытчы пырыны, юрттӥськисез ӧвӧл, ваньзэ аслыз ужано луэ. Туала вакытэ со ачиз ик кышномурт но, воргорон но. О. Кожанова. Шӧкыч Сюресвыл кураськисьёс Гаишникъёс верасько: - Петролэн вордскем нуналыз вуэ. Мар кузьмаськом? - Ойдолэ джип басьтом, - шуэ одӥгез. - Ӧжыт луоз со. - Иське, саунаен, бассейнэн кирпич юрт кузьмалом, - ӵектэ мукетыз. - Таиз но уз яра. - Соку вордӥськем нуналаз постэ огназэ кельтом возьмаськыны. - Таиз ини туж бадӟым кузьым луоз. Та выллем серем каронъёс юнме шорысь уг вордӥсько, дыр. Озьы шуыса, сюрес вылэ потоно кариськи. Кинъёс-о бен, руль сьӧрын ворттылӥсьёс сяна, ӟечгес тодо, кыӵеесь луыны быгато ГИБДД-ысь инспекторъёс. Одӥгысьтыз пост дорысь сюрес урдсы дугдӥ но машина возьмасько. Сылон сяменым синйылтӥ: формаен пиосмурт КамАЗ-эз дугдытӥз но водительзэ фургон сьӧры валтӥз. Собере, солэсь маке басьтыса, ӝогак кисыяз понӥз. Со куспын мон кабинае кечыртӥськи. Отын кык воргоронъёс пуко вал ни. Одӥгез мон кадь ик сюресчи, нялтас мынӥсь машинаен гуртысь городэ бертыны потэм. Мукетыз - водительлэн юлтошез. Таосыд кыдёке ветлӥсьёс вылӥллям - Пермь городэ яблок нуо. Сюресчи водительлэсь юаз: - Уксё сётӥды шат? - Одно ик. Витьтон манет. Милям "нылпиосмы" уго соос - сюдытэк-вордытэк уг луы. Ярам, тӥ палан трос уг куро ай. Нош Владимиртӥ потытозямы сюрс манет кисьтоно луим. Усьтэм ымъёсты ворсан понна, кивалтӥсьёсмы рейслы быдэ ньыль-вить сюрс манет висъяло. Трос? Ӧвӧл, ӧжыт. Шуныт шаеръёсысь быдэс Россия пыр тӥ пала ворттылӥськом ук. Ижевскысь "Ижсталь" завод дортӥ кожонэз ортчыса, тӧдьы "Жигули" вӧзын сылӥсь милиционер киыныз шонаса дугдыны куриз. Шофёрмы потӥз. Вить минут ортчиз- а, ӧз-а, серекъяса вуэ ини. - Мар луиз? - Юрттэлэ вал, пе, уксёен. Серемед потытэк серекъялод. Вань возьытлыксэс ыштӥзы ни та гаишникъёс. Машина номеръя кыдёкысь вуэммес адӟо но, кисыосмес сузяны кутско. Дугдылытэк кошкыны луысал, вӧзаз ужан машинаез уг адӟиськы угось. Таӵе дыръя дортӥзы ширтыны выль законодательство но лэзе. Курдыт, кин тодэ, матысь постэ жингыртоз но, сояз котырад зол-зол биниськозы. Дас поллы тросгес басьтытэк уз лэзе ни. Палэнысь вуэм та адямиос, оло, мултэссэ куасалто шуыса, Ижевскысен ини мукетаз машинае пуксёно кариськи. Ӝимиськем Тольятти автозаводысь тямысэтӥ автоколоннае пырись бадӟым машинае. Таизлэн но вӧзаз сюресчиез вылэм. Шофёр дугдылытэк вераське соин, серекъя. - Ижысьтыды заводэ автозапчастьёс нуллӥ. Ректэн пумиськи. Сьӧрам одӥг сюрс кызь манет коньдонэ вал, ваньзэ басьтӥзы, сютэмъёс. Дассэ ке но кельтэ шуэмелы серекъязы гинэ, милемлы, пе, со мултэс уз луы. Нош асьсэос, албастыос, сотовойёсын верасько. Ачим визьтэм, заводысь потыса, котьку дугдылытэк кошкисько вал. Нош таяз учыре машинаме пуктӥ но магазинъёстӥ ортчоно кариськи. Вуисько но, фургонэ кык палласянь иномаркаосын зӥбемын. Ма карод на. Тямыс ар сюрес вылын ветлытозям нырысьсэ таӵе юмоке сюри. Милиционеръёсын гинэ уг тырмы, рекет зӥбе на. Туннэ ӵукна, вить час котырын, ай соосыз но одӥгаз пост дорын дугдытӥзы. - Вай витьтон манеттэ, - шуэ инспектор. - Ӧвӧл. - Иське, кызьзэ. - Мынам вань документъёсы сьӧрам. Ваньмыз шонересь. Ма понна тыриськом? - Жаль потэ-а? Кутскиз ук монэ бызьылытыны: я номеръёсты сузяны косэ, я укноосты ӵушылытэ... Кыл вератэк ваньзэ лэсьтэме бере, ма борды ӝабыртӥськыны ӧз вала ни, одӥгзэ документме штани кисыяз донгем. - Кытын заводысь машинаен ветлыны лэзем документэд? - Ваньзэ тӥ кие сётӥ, - шуисько. - Тани учкы, ӧвӧл, - возьматэ бумагаосты. - Мар йырвизьме сураськоды, - ӧй чида ни мон. - Пуктэ соку машинаме штрафстоянкае. - Эн куашетэлэ, а то протокол гожто, правоостэс басьто. - Котьма каре, уксё уг сёт, - озьы шуыса, кабинаям пукси, изьыны выдӥ. Эсьма, ял каро, малпасько. Фургон котыртӥм кӧня ке гожыръямез бере, сюлэм сюпсисе укноям йыгаське: - Ме документъёстэ. Сменае йылпумъяське ни, выреме тонэныд уг пот. Нош ужаны кутскыкум ке сюрысалыд, сэзъялтысал ке сэзъялтысал ни мон тонэ. - Кылэмед вань-а анекдотэз, - нош ик вазиське водитель сюресчилы. - Кылзы мадё. Гаишник машинаез дугдытэ, шофёр паймыса юа: - Ма, нокызьы ӧй янгыша кадь ук? - Мынам нылпиосы тынэсьтыд янгышамдэ возьмаса уз улэ, вазе гаишник. Тӥни монэн но ӵапак со выллем учыр луиз. Сюрес вылын луэм вань та учыръёсты кылзыса, мынам кинлэн ке солэн быгытаз шиме мертчытэм потыны кутскиз. Асьсэлэсь кисызэс тырмтыон понна шофёрлэназ кепыратэк пырисьёсты вӧсь карыын шедьтэмлэсь азьло, дор пала аслам бурдъёсы вылын берытсконо кариськи. Кӧтӝожме кӧня ке гинэ буйгатӥз шофёръёслэсь кылэм таӵе ивор: шаерысьтымы ГИБДД-ын куд-ог ужасьёслэн киосыоссы Москва палъёсызлэсь пичиесьгес, пе. Кылсярысь, кунмылэн шор караз шӧмаськемъёслэсь витьтон доллар куро. Нош асьмелэн сю витьтон манетлэсь вылӥе уг ӝутскы. Иське, улом ай. "Шӧкычез" келяса ветлӥз О. Кожанова. Чур бугор Мар кароно куашкам мылкыд дыръя Тани мар ӵектэ "Нью-Йорк таймс". Туж умой юрттэ: соку ик уж борды басьтӥськон но мылкыдэз уродмытӥсь муглэсь мозмытскон; азинконъёсыд сярысь аслыд ачид тодэ вайытон; аслыд кыӵе ке шумпотон лэсьтон яке кузьым басьтон, яке ресторанын пукон; ӟечез сярысь малпаськон; астэ мукет адямиен, кинлы тынэсьтыд но секыт, ӵошатон. Ляб юрттэ: кинъёсын ке вераськыса огшоры дырез быдтон, нырысь бен мылкыд кӧнялы ке буйгалоз, нош собере выльысь урод луоз; аракы юон, наркотикъёсын вырон; секыт ужез быдэсъян. Пайдаез ӧвӧл: телевизор, кино учконлэн, книга лыдӟонлэн; аслад югдуред пумысен мукетъёссэ янгыше уськытонлэн; нюръяськытэк улонлэн; урод мылкыддэ кыре поттонлэн - бӧрдонлэн, кесяськонлэн. Та амалъёс уг юртто, ӵем дыръя люкето гинэ. Кин ватэмын Кремль борддор вӧзын? Нырысетӥ шайгуос татын кылдӥзы 1917-тӥ арын 10-тӥ ноябре. Соку татчы ватыны ваизы Москва ожъёсын быремъёсты - ваньмыз 238 корос. Кӧня ке нунал ортчыса, шайгуэ эшшо кык корос лэземын вал на. Но ваньмызлэн ватэмъёслэн нимъёссы тодмо ӧвӧл, туннэ нуналлы 60 палаезлэн гинэ тодмо. Бӧрысь татчы эшшо кӧня ке шайгуос лэсьтӥзы на. Озьы ватэмъёслэн лыдзы 300-озь вуиз. Кылсярысь, татын ватэмын таӵе тодмо адямиос: И. Арманд, Д. Рид, Ф. Артем (Сергеев), В. Воровский, В. Ногин, Н. Нариманов, П. Войков... Со сяна, Мавзолей но Сенат башня вискын интыяськемын на гранит бюстъёсын шайгуос. Нырысетӥез сыӵе шайгу лэсьтэмын 1919-тӥ арын Я. Свердловлы, 1925-тӥ арын - М. Фрунзелы, 1926-тӥ арын - Ф. Дзержинскийлы. Собере гранит плитаос улын кылдӥз на эшшо укмыс шайгу. Плитаос вылын гожтэмын М. Калининлэн, А. Ждановлэн, И. Сталинлэн, К. Ворошиловлэн, С. Будённыйлэн, М. Сусловлэн, Л. Брежневлэн, Ю. Андроповлэн, К. Черненколэн нимъёссы. Т. Банникова. УДМУРТИЯ: ВЫЛЬ ДАУР Мар вите азьланьын? Котькудмес шугъяськытэ республикамылэн ӵуказе нуналыз. Кыӵе со луоз? Ма бордысь потозы политикаын, экономикаын, мукет удысъёсын азинсконъёс но шуг-секытъёс? Кызьы воштӥськоз азьланьын улонамы общественной огазеяськонъёслэн интызы? Таӵе юанъёслы валэктон курыса, редакцимы вазиськиз тодмо политологлы, история наукаосъя кандидатлы Сергей БЕХТЕРЕВЛЫ. Тани ма со вераз: - Удмуртиын берло дас ар ӵоже мынӥз асьме конституциез выльдонъя реформа. Сое воштон, валамон ни, шӧдӥськиз вань удысъёсын. Та уж шараяз пӧртэм сӥосы пырись адямиослэсь кулэяськонъёссэс, соослэсь кивалтонэз выльдонын, граждан обществоез юнматонын интызэс. Реформа воштӥз "суверенитет" кыллэсь пуштроссэ, кун кивалтонлэсь системазэ. Нырысь-валысь асьме калык пумит вал президентлэсь постсэ тупатонлы. Но мылкыд пумен воштӥськиз. Ортчем даурлэн берпуметӥ араз республика аслыз президент бырйиз но мукет улосъёслэсь та ласянь висъяськемысь дугдӥз. Озьы асьме дорын ог-огмес валаса, тупаса улыны, адямиослы азьпала осконэн учкыны инъет кылдӥз. Президент быръён луонлык сётӥз "Удмуртилэн азинсконэз" концепция котырын республикаысь ваньзэ валтӥсь кужымъёсыз огазеяны. Со дыре ик адӟытэк кельтыны ум быгатӥське асьме олигархъёс куспын кылдэм шуг- секытъёсты. Бадӟым предприятиослэн но фирмаослэн кивалтӥсьёссы, властьысь адямиосын огазеяськыса, туннэ республикалэн улоназ шӧдскымон инты басьто. Шуыны луоз, соос Удмуртиын куазь "лэсьто". Уноез валтӥсь директоръёс Кун Кенеше быръемын. Соин ик политикалэн шорсюлмыз али выжемын депутатъёслэн фракциосазы. Кышкытлык вань, олигарх шуонъёс парламентлэн тӧроез улэ но гудӥськыны кутскозы шуыса. Политикаын партиослэн но общественной огазеяськонъёслэн интызы сярысь вераса пусйыны кулэ тани мае: Россия, соин ӵош Удмуртия но, берло дыре ас азязы ужпум пуктӥзы, шӧдске, Западной Европаын выллем кык-куинь валтӥсь партиосын система кылдытыны. Ӵапак соин герӟаськемын "Единстволэн", СПС-лэн (Союз правых сил) интыосын ёзъёсаз ортчись воштӥськонъёс. Керетонъёс-ӵашетонъёс но юнме шорысь уг потыло. Котькудӥз выль партия тырше куаразэ юнгес карыны. Нош вужъёсыз, соос пӧлын КПРФ но, кужымзэс пумен ышто. Соослэн интыязы али дӥсьтыса пыре ни "Россия" движение. Кызьы тодмо, Кун Дума инъет чотын кутӥз ни политической партиос сярысь законэз. Сое юнматӥзы ке быдэсак, уноезлэн огазеяськонъёслэн улонзы воштӥськоз. Мукет луоз национальной огазеяськонъёслэн но ужзы. Шуом, "Удмурт кенеш" но Бигеръёслэн общественной центрзы политикаен выронлэсь куштӥськоно луозы. Соос культураез азинтон бордын гинэ ужаны быгатозы на. Сыӵе условиосын асьме президент ог ласянь тыршоно луоз политикаысь валтӥсь кужымъёсты кызьы ке но огазеяны, соосты огкылэ вуттыны, мукет ласянь со сюлмаськоз аслэсьтыз властьсэ кужмоятыны. Котьма ке но, политикаын уж улонэз умоятыны но югдурез огсыр возьыны кулэ. Кылем ар та ласянь ӟеч йылпумъяськиз. Республикамылэн 2001-тӥ арлы социально-экономической программаез, кудзэ дасяз асьме Правительство но юнматӥз Кун Кенеш, туэлы но умоесь луонлыкъёс кылдытэ кадь. Но Россиысь экономикаын ялан вошъяськись югдур куддыр асьмелэсь малпанъёсмес туж сура. Калыклэн улонэз уг умоя уго. Дунъёс йыло, уждун уг окмы, вытъёслэн быдӟалазы будэ, странамылэн кивалтэтэз пенсионеръёслы, ветеранъёслы, трос нылпиё семьяослы юрттыны выро ке но, огъя улонын со сокем ик уг шӧдӥськы. Ваньбур поттонэз чутрак будэтыны али уг луы. Соин ик прпвительство та дыре возиське му вӧй, газ, музон сырьёез вузан чотын. Удмуртиысь экономикаын но матысь дыре ӝог воштӥськонъёс уз луэ. Уго тани автомашина поттонэз умоятонэ но, уно ар ӵоже утчам вылысь, асьме кивалтӥсьёс оскымон инвестор шедьтыны уг быгато. "Ижмаш" но юнме шорысь уг туртты кужымзэ му вӧй поттонын эскерыны. Но со уг вера, республикалэн улоназ ӟечез чик уз кылды шуыса. Та аръёсы сюрес усьтӥське шоро-куспо но пичи бизнеслы, гуртысь валаса ужасьёслы. Соослэн азинсконзы меӵак герӟаськемын политикаысь кужымъёсын но. Макем ӝоггес шедьтозы ас интызэс партиос но общественной огазеяськонъёс, сокем чалякгес тупатскыны кутскоз асьме улон. Атыкай музъеммес утисьёс! Ӟечкыласько тӥледыз армилэн но флотлэн праздникенызы. Россилэн нимыныз лэсьтэм дано ужъёс сярысь малпаськись пиосмы, Георгий Жуковлэсь но Александр Матросовлэсь ужзэ кыдёкысь гарнизонъёсын азинтӥсьёс вань бере, озьыен калык но Армия дэмен. Та дано нуналэ сӥзисько тӥледлы юн тазалык но шуд, ужан удысады но улонады вань малпанъёсты мед быдэсмозы. Вӧзады котьку но мед луозы оскымон эшъёсты. Тупаса улон но шудбур тӥляд юртъердылы, ӵыжы-выжыостылы но матысь адямиостылы. Ю.Маслюков, Россия Федерациысь Кун Думалэн депутатэз. Атыкай музъеммес утисьлэн нуналэныз! 23-тӥ февраль - Атыкай музъеммес утисьлэн нуналэз. Россиысь мукет праздникъёсын ӵош та нунал тужгес но бадӟым инты басьтэ. Сое пусъё котькуд семьяын, котькуд ужась коллективын. Та нуналэз пуштросэзъя но, нимызъя но вань калыклэн праздникеныз лыдъяны луоз. Атыкай музъеммес утисьлэн нуналаз асьмеос данъяськыса тодамы ваиськом Горд Армилэсь ортчем сюрессэ, Быдӟым Отечественной ожын басьтэм вормонъёсмес, пиосмылэсь но нылъёсмылэсь улонзэс жалятэк нюръяськемзэс. Туннэ но шаерысьтымы уноез пиосмы кышкатэк нюръясько Чечняысь йырвандӥсьёсын. Та праздник республикаямы улӥсьёс понна эшшо но матын, дуно соин, асьме предприятиосын лэсьтэм ож тӥрлык юрттэ кунмес тушмонъёслэсь утьыны. Гажано воинъёс, Быдӟым Отечественной ожысь ветеранъёс! Йыбырттӥськом но тау кариськом тӥледлы. сСемьяостылы сӥзисько юн тазалык, ӵуказе нуналлы оскон, семьяосады тупаса улон но ог-огдэ валан. Удмурт Республикалэн Президентэз А.А.Волков. Чер, эн ветлы ми дортӥ Наркомания верантэм ӝог аля. Со вуэ ни гуртъёсы но. Югдурез утён вылысь, Сюмсиысь ёрос администрация пӧртэм ужрадъёс ортчытъя. Быдэ вуымтэосын ужанъя комиссилэн тӧроез Ф.Чернова, милициын ужась А.Батуева, дышетскись егитъёслэн центрысьтызы специалист Л.Климова но психолог Г.Елмашева гуртъёсы потаса алэктон уж нуо. Анай-атайёслэн юанъёссы кылдо юон, нылпиослэн асьсэды быдтон пумысен но юанъёссы. Специалистъёс быгатэмзыя юрттэт сётыны тыршо. П.НИКОЛАЕВ. Выль ӵужон выль сямен ӵуже Ува ёросысь "Туклинской" эштос бере кылисьёс пӧлын ветлэ. Кылем арын со 16 миллион манет тыр изъян адӟиз. Валамон, сыӵе хозяйстволы кивалтӥсь но шедьтыны шуг. Но дӥсьтӥсь адями сюриз - Ижевскысь ужбергатӥсь А.Овчинников мылкыд кариз эштосэз пыд йылаз ӝутыны (солэн выжыосыз татысь потэмын). Кӧня ке толэзь талэсь азьло со кооператив кылдытӥз. Выль амалэн ужаса, выль кивалтӥсь хозяйствозэ шуг-секытысь поттыны малпа. Солы дурбасьто ужасьёсыз. П.НИКОЛАЕВ. Атыкай музъеммес утисьёслэн нуналзы азьын пумиськизы куинь поколениысь зэмос пиосмуртъёс: Ожысь Горд Знамя, Нахимов, Отечественной война орденъёслэн кавалерзы, отставкаысь капитан А.Головизнин, Ожысь Горд Знамя но Горд Кизили орденъёслэн но медальёслэн кавалерзы, Афганистанын ожмаськем подполковник А.Поумыткин но Тимур Штин - Голицын нимо пограничной институтысь курсант. Туспуктэмез В.Беломорскихлэн. Президентэн пумиськон 20-тӥ феврале Удмуртилэн Президентэз Александр Волков пумиськылӥз шаерамы интыяськем войсковой частьёслэн командиръёсынызы. - Мон шумпотӥсько, - шуиз со, - трос ужъёс шоры учкытэк, командиръёс Атыкай музъеммес утисьёслэн нуналзы азьын луонлык шедьто республикаысьтымы вылӥ кивалтӥсьёсын пумиськыны. Президент пумиськонэ лыктэмъёсты тодматӥз Удмуртиысь социально-экономической югдурен, "Удмурт Республикаез азинтон" программалэн азинскеменыз. Тужгес валтӥсь ужпумъёс пӧлысь республикаенымы кивалтӥсьёс адӟо экономикаез ӝутонэз. Но кызьы тодмо, экономика нырысь ик пыкъяське военно-промышленной комплекс вылэ. Президентлэн малпамезъя, промышленностьмы тазьы ик азинскиз ке, Удмуртия Россия Федерациысь кызь устоосыз улосъёс пӧлы пырыны быгатоз. Матысь аръёсы чакламын 60 выль школа, 15 больница но поликлиника (соос пӧлысь витез - нуны ваён юрт) пуктыны, мукет социальной ужпумъёсты быдэстыны. Александр Волков люкаськемъёслы озьы ик ивортӥз, туэ химия ож тӥрлыкез быдтон программая шаерамы ватсаса 200 миллион манет вуоз шуыса. Та коньдон кутӥськоз Кизнерысь но Камбаркаысь калыклэсь улон-вылонзэ умоятонэ. Пумиськон Атыкай музъеммес утисьёсын радъямын вал бере, вераськон мынӥз военнослужащийёслы, ветеранъёслы, Афганистанын но Чечен Республикаын оже пыриськемъёслы юрттэт сётон сярысь. Александр Волков командиръёсты праздникен ӟечкылаз но службазэс ӟеч нуыны мылкыд кариз. Военнойёсты озьы ик ӟечкылаз Удмурт Республикаысь Кун Кенешлэн Тӧроез Игорь Семёнов но Удмурт Республикая валтӥсь федеральной инспектор Сергей Чикуров. Республикаысьтымы военной комиссар генерал-майор Геннадий Барсков вань командиръёслэн нимынызы республикаысьтымы кивалтӥсьёслы тау каремзэ вераз. Удмурт Республикалэн Президентэзлэн но Правительстволэн пресс-службазы. Даниловлэн автомат-амфибиез Калашниковлэн автоматэз быдэс дуннелы тодмо ни. Нош алигес Ижевскын вордскиз Ярыгинлэн пистолетэз. Ваньмыз та ож тӥрлык ассэ котькытын умоен возьматӥз ни ке но, солэн вань одӥг тырмымтэез - соин уг луы ву улын ыбылӥськыны. Озьы ке но, та удысын ужъёс мыно вылэм. Алигес гинэ татчыозь нокинлы тодмотэм конструктор, техника наукаосъя доктор, Тулаысь артиллерияя инженеръёсты дасянъя институтысь профессор Юрий Данилов у улын ыбылӥсь автомат кылдытӥз. Соин ыбылӥськыны озьы ик луэ омырын но. Соку отчы пуктӥське Калашниковлэн магазинэз. Ву улын ыбылӥськыку кутӥсько нимысьтыз 26 патрон-дротикъёс. Выль пыӵалэн тунсыкъясько ни уно кунъёс. Н.Никитин. Дасэтӥез книга 1802-тӥ арын 8-тӥ сентябре Россиын тямыс министерствоос кылдытон сярысь манифест поттэмын вал. Ӵапак соку кылдӥз Югдурез утёнъя министерство - МВД-лэн вашкала выжыез. Тӥни со бордысен кутскыса туннэ нуналозь та министерстволэн улонысьтыз пӧртэм вакытъёс возьматӥсько Виктор Татариновлэн "Рыцари чести и отваги" выль книгаяз. Шонерзэ вераса, автор татын МВД-лэсь историзэ кыклы люке: Октябрь революцилэсь азьло но со бере, 1917-тӥ арын 10-тӥ ноябрьысен кутскыса. Югдурез утёнъя министр Владимир Щербаков книгалэн азькылаз гожтэ: "Виктор Татариновлэн выль ужез соин пусйымон: отын уже кутэмын архивысь материал, шер пумиськылӥсь фотодокументъёс. Автор МВД-лэн радъёсаз служить карыса но 1970-тӥ арын пенсие шутэтскыны кошкыса уг буйга: азьло ик поттӥз ни вал чекистъёслэн но милициын ужасьёслэн секыт службазы сярысь кӧня ке книгаос. Соос пӧлын - "Последняя явка" (1973), "Под ризой епископа" (1979), "Знакомьтесь, ГАИ" (1982), "Без права на ошибку" (1987), "Двуликий Янус" (1991). 1977-тӥ арын милицилэн ортчем сюресэз сярысь очеркъёсын "Такие будни" книгаяз потӥз. Ӵапак со, ватсаса но тупатъяса, инъет луиз та вылӥ верам выль книгаезлы". Озьыен, "Рыцари чести и отваги" В. Татариновлэн дасэтӥ книгаез луэ ни. Кышкытлыкен герӟаськем югдуръёсыз мур но оскымон возьматэмез вылӥ дунъямын: кылем арын Виктор Федоровичез кутӥзы Россиысь писательёслэн огазеяськоназы. Алигес Удмуртиысь МВД-лэн Дзержинский нимо культура юртаз ортчиз В. Татариновлэн та выль книгаеныз тодматскон. Виктор Федоровичез ӟечкылазы Югдурез утёнъя министерствоысь кивалтӥсьёс, эшъёсыз. Книгалэн туж кулэ луэмез но аспӧртэмлыкез сярысь веразы Удмуртиысь писательёслэн огазеяськонзылэн тӧроез Егор Загребин, "Луч" журналлэн валтӥсь редакторез Владимир Емельянов, писатель Леонид Емельянов но мукетъёсыз. Виктор Татаринов кылбурчи но вылэм. Семен Перевощиков солэсь поэмазэ удмурт кылэ берыктэмез сярысь вераз. Крезьгурчи Сергей Русских кылбуръёсызъя кык кырӟан пӧрмытэм: "Марш динамовцев" но "ГАИ на посту". Ачиз ик соосты кырӟаз. Виктор Федорович книгаезлэн кылдэмез сярысь тазьы вераз: - Ог куамын ар талэсь азьвыл Удмуртиысь МВД-лэн министрез генерал-майор Желнов монэ юрттыны куриз музейзэс кылдытыны. Мон пумит ӧй луы, малы ке шуоно, югдурез утёнын ужасьёс сярысь тырмыт материалэ люкаськемын вал ни. 1965-тӥ арысен кутскыса, странаысьтымы архивъёсын бугыръяськи. Марксизмъя-ленинизмъя институтлэн архиваз Феликс Дзержинскийлэн фондъёсысьтыз но кӧня ке утчаськи. Музей кылдытон бордын ужамен ӵош гожъяй "Такие будни" книгаме. Со луиз музеетӥ валтӥсь выллем. Со дыре ик - МВД-лэн историезъя аспӧртэм учебник. Ватсаса верано, В. Татариновлэн "Рыцари чести и отваги" книгаез Россиысь МВД- лэн 200 аръем юбилеезлы но Удмуртиысь МВД-лэн музеезлэн 30 ар тырмонэзлы туж усто кузьым луэ. Т. Петрова. ДЕПУТАТЛЭН ПОЧТАЫСЬТЫЗ Россиысь Кун Думалэн депутатэзлы Светлана Смирновалы нуналлы быдэ трос гожтэт вуэ. Бырйисьёс юало, куро, ӵекто... Уно вазиськонъёс пӧлысь огеныз туннэ тодматыны малпам лыдӟисьёсмес но. Уго таӵе гожтэтъёс ичи ӧвӧл. Маин тыром медоослы? Гажано Светлана Константиновна! Ӟудэм ӵӧж берлань уя шуэмзы сямен, ма карыны ёрмыса, мон тӥледлы гожтоно кариськи. Вералэ вал, маин меда пӧртэм городын ужам мурт колхозниклэсь? Милемлы, гуртоослы, пенсия ӧжыт тыро. Нош макем секыт ужаськиз война вакытэ? Мон тани дас кык арескысен курадӟемын. 45 ар ужам стаже. Басьтӥсько 600 манет пала. Кыкетӥ группаен инвалид луэме но пенсилэн быдӟалаез вылын уг шӧдӥськы. Пенсие 1983-тӥ арын потӥ. Уксёлы ёрмыса, бӧрысь школаын выж миськыны кутски. Уждунэ 40 манет гинэ вал, соин ик отчы мынӥсь ӧй вал. Райсобесын шуизы, оформиться карыны уг яра, пенсиез тыремысь дугдозы, пе. Пӧязы кадь. Соин ик кӧт но ӝож, лэся. Мон аслам юртам улӥсько. Отӥыз но, татӥыз но куашка ни. Вань ужъёсты медъяса быдэсъяно луисько. Гырисезлы но, тӥрен йыгасезлы но, коть кышномурт, коть пиосмурт медло со, бутылка пуктоно. Туж жаль, "всё для фронта" шуыса ужан вакытэ сютэм улэммы, ньыль ар ӵоже кускозь лымыетӥ нюлэс кораса ветлэммы, тазалыкмес ыштэммы му пыр вияз, лэся. Озьы ик векаськом ни. Мынам тани пыдкутчанэ одӥг - колоша. Коть бакчае пот, коть куное мын... Дунтэм шуыса басьтӥ ни пиосъёслы вурем куртка. Соин ветлӥсько. Ми кадьёслы коть газ понна тыронэз ӧжыт ке но мед кулэстысалзы. Эмъюм но тӥни макем дуно. Эн вунэтэ вал мӧйы калыкез. Л.Иванова, Можга ёросысь Горняк посёлокын улӥсь ветеран. Тёркинлэн огпарез Паймымон улонэз Геннадий Павлович Колосовлэн. Вордӥськиз со Москва котырын. Атаез предприятиен кивалтӥз, но война кутскем бере сое Ижевске ыстӥзы (ӵапак со кутскиз Ремзаводэз лэсьтыны). Геннадийлы соку 17 арес вал, войнае куриськыса но ӧз кутэ. Мукет егит комсомолецъёсын ӵош Горькие покчи командиръёсты дасянъя школае мынӥз, связист луиз. Толэзь улыса сое келяло Москвае, отын "Катюшаен" ожмаськыны дышетске. Ож сюресэз кутске 304-тӥ гвардейской миномётной полкын 1942-тӥ арын. Данъям БМ-13 ("Катюша") нырысь туж курадӟытӥз асьме солдатъёсты - бусыын, нюрын нӧдылӥз. Ньыль- вить кузя донгаса поттано луылӥз собыдӟа машинаез. Бӧрысьгес асьмелэнъёс нодъяськизы - "Катюшаез" американ "Студебекерлэн" шасси вылаз интыязы, озьы солы нокыӵе нӧд но кышкыт ӧй ни ал. Кыӵе ужез быдэсъяды тӥ ож мыныку юамелы, Геннадий Павлович шуиз: котькыӵе "Катюшаен" ожмаськисьёсты зэмзэ но озьы дышетӥзы уго: котькудӥз быгатӥз наводчик но, командир но луыны, танкез но валтыны. Ваньмыз ужазы огкылысь. Тунсыко потӥз соиз: ож азьын сётӥськись сю граммез солдатъёс черодэн юылӥллям (вань ке вань, ӧвӧл ке, ӧвӧл, пе). Озьы огезлы огполскын ӝыны литр мында сюрылэм. Но соин йырин янгыше сюрылон учыръёс вылӥллямтэ - ваньзэ, пе, валаса, ӟеч быдэсъям. "Катюша" - лушкем установка вал, сое туж утьыса, ватыса возизы. Интыысь интые но выжылӥзы уйёсы гинэ. Гуртъёсы, городъёсы ӧз ик пыраллялэ, бусыосы дугдылӥзы. Война ӵоже дивизион огпол гинэ ыштон адӟиз. Со вал Сталинград ож дыръя Ростов-на- Дону палан. Одӥгез установка, колонналэсь кыльыса сюрессэ ыштӥз, немецъёс ки улэ сюриз. Соос ӟучъёсты сётӥськыны косо. Асьмелэнъёслэн озьы гинэ сётскемзы ӧз поты, но матысен "Катюша" тушмонъёсты йӧттыны но уг быгаты. Соку малпазы огзэ ке но солдатэз утьыны. Снарядъёс лобазы немецъёслэн йыр вадьсытӥзы. Со ӵоже одӥгез боецмы асьмелэнъёс пала выжиз. Мукетъёсыз геройёс музэн быризы. Тӥни кытын зэмаз "огез ваньмыз понна, ваньмыз нош огез понна" шуэм. Геннадий Павлович ожмаськыса вуиз Прагаозь. Мозмытӥз Румыниез, Венгриез, Польшаез, Болгариез, Австриез, Чехиез. Пусъемын трос орденъёсын но медальёсын - соос чеберто геройлэсь туспуктэмъёссэ. Зэм, пӧлысьтызы огез но ожъёс дыръя лэсьтымтэ - туспуктӥсь шедьысал, но ӧз лэзьылэ - дивизион секретной вал. Тужгес но дунъя Геннадий Павлович "За отвагу" медальзэ. Егит сержантэз косӥзы эскерон пунктэн кусып тупатыны. Езэн ӝыны иськем мында ортчыса, сӧсыртэм связист вылэ пыкиськиз. Тӥни малы кема связь вылымтэ. Сое синйылтыса, вылды, кин ке ыбылыны кутскиз. Немец! Соин ик пеймытозь кык связистъёс ву кыремын пукизы. Пумитазы мукет ласянь лыктэ на вылэм эшшо одӥг связист. Озьы соос куинь кузя одӥг немецез кымазы, сое штабе нуизы. Трос пол сӧсырмылэм муртлы война бере уже интыяськыны шуг вал. 1947-тӥ арын гинэ тодмоезлэн ӵектэмезъя интыяськиз "Ижмаш" заводэз тылпулэсь утёнъя часте. Озьы кутскиз Колосовлэн кыкетӥ ожмаськон сюресэз. Выльысь кутӥз присяга. Отделенилэн командирез, инспектор, карауллэн кивалтӥсез куамын куать ар ужатозяз кӧня улонэз утиз меда лек тыллэсь но ӵынлэсь? Геннадий Павлович ужаку тылпу кысыны валъёсын потазы ай. Солэн ужан сюресэз - Удмуртиысь тылпу кысӥсьёслэн ортчем сюрессы. "Али ужало ни туала техникаен, но пожаръёс кулэсмо" - сюлмаське Геннадий Павлович али но. - Туж ӝож, - шуэ со, - тылпу кысӥсьёс шоры чиньы пыр учкемысьтызы но - предприятиос кулэстыны кутскизы тылпу кысӥсьёслэсь лыдзэс. Тодазы ваё кайгу адӟыкузы гинэ". Кема пуким ми Геннадий Павловичен улон-вылон сярысь вераськыса. Мон мыло-кыдо кылзӥ аслэсьтым дышетӥсьме. Туспуктэмъёссэ учкылон сямен синйылтӥ одӥгзэ - со егитъёслэн театразы Василий Тёркинлэсь рользэ шудэ. Ну, ӵапак киноын кадь! Зэмзэ но, та роль Колосовлы туж тупа - со али но Тёркин - чупрес солдат, юн сямо, кужмо воргорон но тунсыко адями. Ю. Чирков. Дуно эшъёс! Туннэ Россиын улӥсьёс пӧлысь уноез тодаз ваёз та веранэз: "Вань сыӵе уж - Родинаез утьыны!" Асьме странаын та профессия ваньмызлы ик матын: кин ке но службазэ быгатыса нуэ, кин ке солы дышетэ, кин ке матысь муртсэ армие келя но бӧрысь чидаса вите. Соин ик 23-тӥ феврале огъя, ваньмылэн асьмелэн праздникмы луэ. Сюлмысьтым ӟечкыласько ваньдэсты Атыкай музъеммес утисьёслэн нуналэнызы. Сӥзисько тупаса но огсыр улон, тазалык, шуд. Вань ӟеч малпанъёсты мед быдэсмозы! Светлана СМИРНОВА, Россия Федерациысь Кун Думалэн депутатэз. Тазалык, азинсконъёс, эшъяськон! Туннэ пусъёно праздник тужгес дуно но вунонтэм соос понна, кинъёс улонзэ герӟазы кунмес утёнлэн, соос тодо, кыӵесо армиын но флотын службаез нуон. Огдыре ик Атыкай музъеммес утисьёслэн нуналзы ваньмызлэн праздникез, уго асьмелэн кунмы котьку висъяськылӥз армилэн но калыклэн юн кусыпъёсыныз. Россиысь воинъёс вань ӟечсэ гинэ басьтылӥзы Родинамес дауръёсын утись ожгарчиослэсь. Та секыт вакытэ но, армиын выльдӥськонъёс мыныку, соос котьку дась пезьдэт сётыны, соос пырисько Россимылэсь огъя быдэслыксэ утёнэ, Чечен Республикаын терроризмен нюръяськонэ. Ожгар кужымъёсты юнматонэ пырисько Удмуртилэн музъем вылаз интыяськем частьёсысь военнослужащийёс, обороная заводъёсамы ужасьёс. Обороналэсь кужымзэ утёнлы но юнматонлы республикаысь кун властьёслэн ёзъёсыз азьланяз но котьку туж бадӟым саклык висъялозы. Та нуналэ ӟечкылам потэ вань ветеранъёсты, соосты, кинъёслэн али улонзы герӟаськемын кунмес утёнэн но сое юнматонэн. Тӥледлы но матысь адямиостылы юн тазалык, службадэс нуонын азинсконъёс, зэмос солдат эшъяськон. И.Семёнов, Удмурт Республикаысь Кун Кенешлэн Тӧроез. Театр шулдырмиз Удмурт театр 70 аръем сюресэз ортчиз. Адями понна со мӧйы арлыд ини. Нош театрлэн ӵапак сяськаяськон дырыз, шуыны луэ. Зэм но, театр берло аръёсы трослы егитомиз. Москваысь Щукин нимо училищеез, Уфаысь искусствоосъя институтэз йылпумъяса пыд йылазы юн-юн султэмъёс бӧрсьы ГИТИС-ын но Щепкин нимо училищеын дышетскемъёс берло дасо аръёсы асьсэды умой-умой возьматыны вуизы ни. Та нуналъёсы, 16-тӥ-17-тӥ феврале, театрлэн вуж юртэз выльмиз, чеберскиз кадь. Артистъёс портретъёс вылысь эшшо но шулдыргес, пальпотыса учко. Вылӥынгес, фойеын, театрлэсь 70 ар ӵоже ортчем сюрессэ возьматӥсь адӟытон: туспуктэмъёс, гожъямъёс. Татын ик телевидениысь операторъёс, режиссёръёс бергало, юбилейлы сӥзем передача дасяло... Зэм, Удмурт театр пусъе 70 ар тырмонзэ. Сцена вылын, кырымпыдэс вылын кадь, быдэс коллектив: актёръёс, режиссёръёс, соослэн юрттӥсьёссы. Котькудӥзлэн синъёсаз шуныт тылсиез вань. Туннэ соос асьсэос учкисьёс выллем: залэз эскеро, ӟечкыланы лыктэмъёсын кенешо кадь. Тани соос доры вылысьтыз вылаз тубо ӟечкыласьёс. Вылӥ кивалтӥсьёс пӧлысь - Кун Кенешысь огеныз комиссиен кивалтӥсь А. Г. Красильников, Удмурт Правительстволэн тӧроезлэн воштӥсез Н. А. Харина, культурая министрлэн воштӥсез С. М. Мутерко, калыкез дышетонъя министрлэн воштӥсез Г. Н. Васильева, нациосын ужанъя министрлэн воштӥсез Е. Н. Петрова но мукетъёсыз. Та ӝытэ куд-ог артистъёсмес нимысьтыз сӥлы каризы. Удмурт Республикаысь дано артист ним басьтӥзы Екатерина Яковлева, Ольга Зорина, Валерий Мадзеков но Валентина Моисеева. Со сяна, театрысь кӧня ке ужасьёс пусъемын Данъян грамотаосын. Кызьы, пе, ас эшъёссэс ӟечкылатэк кылёзы матысь бускельёссы? Операя но балетъя театрысь актёръёс парен-парен потылӥзы но пӧртэм спектакльёсысь кырӟан- эктонъёссэс кузьмазы. Тужгес но мылкыдзэ сётӥз театрысь "палдэм шелеп" - Удмуртиысь калык артист Юрий Яковлев (куке но уго Удмурт театр музыкально- драматической вал, собере татысь артистъёс отчы но татчы висъяськизы). Ӟечкылан сяменыз калыкез кӧттырымоназы серекъятӥз Мунё театрысь актёр, Россиысь калык артист Александр Перевозчиков. Солэн маскаосыз пӧлын, паймод, Анатолий Ушаковлы но тупасез вал. Театрлэн сцена вылаз нырысетӥ радын пуко тужгес сӥё-дано адямиос, элькунамы но, Россиын но данъям артистъёс Нина Бакишева, Валентина Загуляева, Вероника Садаева, Геннадий Соловьев, театрлэн кивалтӥсез Анатолий Митрофанов, азьвыл директорез Борис Саушкин, тодмо крезьгурчи Николай Шкляев, литературая люкетэн кивалтӥсь Анна Евсеева (солэн тыршеменыз выставкалы узыр материал бичамын, юбилейлы чебер буклет поттэмын). Татын ик - билет вузанъя кузё, ожысь ветеран Александра Иосифовна Алексеева. Туж мусоесь, чебересь, йӧноесь но даноесь туннэ театрын ужасьёсмы. Соослэн вань быгатонлыксы, та нуналозь кыӵе тубатэ ӝутӥськемзы адӟиськиз спектакльысь люкетъёсын шудэмзыя. Кык ӝытэз ик верано ке, возьматэмын вал "Эш-Тэрек", "Айна", "Кезьыт ошмес", "Йыромем тури", "Чебер апайёс", "Дуринчи кар", "Ой, чебер нылъёс", "Пинал мылкыд - юмал йӧлпыд", "Яратон уг пересьмы", "Кикы нош силе но силе..." спектакльёсысь люкетъёс. Ас кырӟанъёсынызы шумпоттӥзы Валентина Меняйло но Валентина Загуляева, Ольга Зорина но Алевтина Корепанова, Елена Сунцова но Елена Шишкова, Валентина но Геннадий Бекмановъёс. Театрлэн улонысьтыз серемес учыръёсыз вераз Вячеслав Байков. Концертэз радъянэ- дасянэ трос кужымзэ сётӥз Россиысь искусствоосъя дано ужась, Удмуртиысь калык артист Леонид Романов. Театрлэн администрациез сюлмысьтыз тау каре спонсоръёсызлы: Завьял ёросысь "Восточный" совхозлы, Ижевск птицефабрикалы, Вавож ёросысь "Луч" колхозлы но мукетъёсызлы. Соослэн висъям коньдонзы театрысь коллективлы юрттӥз кунооссэс пумитаны-утялтыны. Азьпалан юрттоз на вужмем тӥрлыкъёссэс кӧня ке но выльдыны. Кузьымъёс пӧлысь тужгес шупотымонэз вал компьютер но 50 сюрс манет уксё. Соосты сётӥз Кун Кенеш. Но калыкын шуо ук: кузьым валлэсь пиньзэ уг учко. Котькудӥз кузьмаз, мар быгатӥз. Кин ке - шуныт мылкыдзэ гинэ. Со нош, оло, самой дуноез. Т. Петрова. Шӧкыч Суредась пальпотэ Калык шулдыръяське бере, урод ум улӥське ай. Суредэз Леонид Мельниклэн. Зортэм зоръёс кыдыраку... сонетъёслэсь тугоко Кытысь шедьтод турлы кылъёс, Ньӧлъёс сямен мед лобӟозы Тынад сюлмад шонер соос, Нош мед оскон пыӵатозы. Мынам уг лу сыӵе шурдыт Вераськеме тонэн ваче. Уг пужнӥсько кылъёс тырмыт, Кылиськомы куке уртче. Вождэ эн вай мыным, эн, эн, Эзель кадь ик со яратон, Уд вала тон сое ноку. Туннэ ке но гурла сюлэм, Толэзь кадь ик кезьыт нош тон, Уд лыктӥськы ук мӧзмыку. *** Мон тодӥсько ултӥямдэ, Мукетъёсын сызласькыса. Нош мон уг каргаськы тонэ, Уг калгиськы сьӧлыкаса. Тон валасал ке сюлэмме, Бен, жалясал, дыр, кӧня ке... Тонэн потэ пумиськеме, Оло кин ке нош юриське? Я ӵок, укыл, ачид тодод, Пӧяськыны тон дышемын, Уг поты мон но пумитад. Озьы кылдэм, кытчы пырод, Кык тылскемъёс выллем лудын, Кыстозямы югдом оград. *** Куректыса калык пӧлын, Уг шӧдӥськы дыр ортчемез. Сюлэм нош котьку тон дорын - Мыным потэ ӧчкаремез. Оген улон секыт вылэм, Тӧлъя поръясь муртлэн кадь ик. Адӟон лябӟе ни синъёсын, Киос уг вормо ни саник. Озьы тӥни, чик янгыштэк, Янгышаськем аслым ачим, Коть бӧрд, коть серекъя, коть кул. Соин дыртэм потэ, керек, Тырмоз кӧня сиим-юим, Кин ке но мед вӧлоз ни пул. *** Тонэ потэ нош данъяме, Мыным сяська кадь потӥськод. Потэ уждэ но дунъяме, Сюлмо мушлы тон кельшиськод. Тон ваньмызлы кынар сётскод, Уд жаляськы ноку астэ. Ачид нош ку меда ӝутскод, Малы уд шыръяськы дандэ? Усьсэ ваньзэ вунэтӥськод, Сётэм кылыд тӧлъя-буръя Кошке, ыше уй визылэ. Нош кыл быжтэм, тон тодӥськод, Берло сое уд ни кабъя, Сыӵе дыръя пельтэм кылэ. *** Кинлы шудбур, кинлы синву Вае, дыр, яратон сьӧраз. Нош со мыным ваиз тудву, Нуэ, нуэ монэ ӧраз. Тӥни соку умой валай, Кыӵе кышкыт со яратон... Уен-нунал далай утчай Солэсь эмъюм но утиськон. Нош пайдаез ӧвӧл вылэм, Уг лу солэсь мозмытскыны, "Ӧвӧл эмъюм но малпаллям. Тонэн гинэ потэ улэм, Мон дыртӥсько адӟиськыны, Оло потод нош пумитам? *** Малы синъёс мынам мӧзмыт, Синучконэ но учкылӥ. Отчы потаз тынад тусыд, Соку шуак буйгатскылӥ. Куддыр мон чылкак паймылӥ, Кызьы луло на мон туннэ? Соку лушкем валатскылӥ - Монэ уте яратонэ. Соку выльысь кать пырылӥз, Сэзъялскылӥз вань мугоры, Кыре потны вал дась сюлэм. Соку улон берытскылӥз Тонэн уртче нош мон доры, Мон кудӟылӥ соку шудэн. *** Кызьы улод лулӟылытэк, Тонэн ваньмыз герӟаськемын. Лулӟон уг кылды, дыр, мугтэк, Со улонэн тугаськемын. Синву но юнме, дыр, уг пот, Лулвирсэръёс чигиськыку. Кыдтэм муртэд гинэ уг тод, Уг бӧрды со люкиськыку. Уд шӧдылы, усёд гуэ, Ваньмыз кошкоз соку мыдлань, Солань уд мын, уд мын талань. Тодэ ваён монэ зӥбе, Куректонэ кыске берлань, Нош осконэ нуэ азьлань. *** Нош тон кытын-о та дыре, Шат куспамы поръясь шуръёс? Ӟеч малпанъёс лыкто йыре, Верам потэ шуныт кылъёс. Сюлэм пушкад шат тынад из, Уд шӧдӥськы тон номыре? Яратонэз кин ке вииз, Улытозяз со кайгыре. Тынад сямен ик туж потэ, Шумприч мынам но улэме, Сюлэм, вылды, измымтэ на. Керпотонэ монэ быдтэ, Уг лу синмад но учкеме, Огпол ке но коть карга на. *** Кӧня аръёс мон синмаськи, Кӧня чидай ултӥямдэ... Нош мон киям асме кутӥ, Тодам ваи верам кылдэ... ...Куке, дыр, ӵош вал асьмеос, Выльысь татын пумиськимы. Юнме шорысь сыӵе кылъёс Уг уло, дыр, сюлэмамы. Вандэм сяська но улэ на, Пушъе, югдэ со кинлы ке, Вуэз ке вань, уг куасьмы со. Лымы усе, лымы шуна, Сюлэм ӝожен нош тымиське, Кинлы меда оске на со? *** Зортэм зоръёс кыдыраку, Куддыр суч-суч ик котмоно. Секыт кылъёс нош кылыку, Турнам турын кадь пограно. Мед шуозы озьы, тазьы, Сюлмы мынам уз воштӥськы. Зоро зоръёс нош усёзы, Азьло кадь ик пиштоз шунды. Нош ӟыгырто тонэ бордам, Бамы бамыд борды йӧтоз, Итӥськозы юн киосмы. Тон улӥськод мынам сюлмам, Шупу нош ик юг-юг пурӟоз, Шудэн тырмоз нуналъёсмы. Ф. Суворов. Ӟечкылан 23-тӥ феврале 80 арессэ пусъе Шаркан ёросысь Быги гуртысь Клавдия Тимофеевна Гурьянова. Секытсэ но, курытсэ но чидамын со. Ож аръёсы ужаз сик коранын. Пенсие потытозяз тыршиз "Восход" колхозын. Ужысь ветеран ним басьтӥз. Капчи ӧй вал, дыр, дас одӥг пинал будэтыны но. Со понна мар быдӟа шумпотон со, куке али тыныд кызь вить адями нэнэ шуыса вазиське. Яратоно анаймылы но песянаймылы юн тазалык, шудбур но байлык сӥзиськом. Эшшо кема-кема милемды шумпотты на. Гажаса но яратыса Антоновъёс, Маковъёс, Гурьяновъёс, Яркинъёс но мукетъёсыз. Постановление Правительства Удмуртской Республики от 19 февраля 2001 года � 191 г.Ижевск О внесении изменений и продлении срока действия постановления Правительства Удмуртской Республики от 31 января 2000 года � 119 "О квотировании рабочих мест и предоставлении налоговых льгот работодателям, обеспечивающим условия производственной деятельности для лиц, особо нуждающихся в социальной защите" В целях обеспечения рабочими местами граждан, особо нуждающихся в социальной защите, стимулирования их трудоустройства и в соответствии со статьей 181 Кодекса законов о труде Российской Федерации, статьями 5, 13, 25 Закона Российской Федерации "О занятости населения в Российской Федерации", статьями 20, 24 Закона Российской Федерации "О социальной защите инвалидов в Российской Федерации", статьями 13, 25 Закона Удмуртской Республики "О занятости населения в Удмуртской Республике", статьей 20 Закона Удмуртской Республики "О бюджете Удмуртской Республики на 2001 год" Правительство Удмуртской Республики ПОСТАНОВЛЯЕТ: 1. Продлить на 2001 год срок действия постановления Правительства Удмуртской Республики от 31 января 2000 года � 119 "О квотировании рабочих мест и предоставлении налоговых льгот работодателям, обеспечивающим условия производственной деятельности для лиц, особо нуждающихся в социальной защите". 2. Внести следующие изменения в постановление Правительства Удмуртской Республики от 31 января 2000 года � 119 "О квотировании рабочих мест и предоставлении налоговых льгот работодателям, обеспечивающим условия производственной деятельности для лиц, особо нуждающихся в социальной защите": 2.1. Пункт 1 изложить в следующей редакции: "1. Установить по Удмуртской Республике на 2001 год организациям, независимо от организационно-правовых форм и форм собственности численностью свыше 30 человек, за исключением общественных объединений инвалидов и находящихся в их собственности организаций, квоту для приема на работу граждан, особо нуждающихся в социальной защите, в размере 3,5 процентов от среднесписочной численности работающих в организации, в том числе размер квоты для инвалидов должен составлять не менее 3 процентов. Работодателям, привлекающим иностранную рабочую силу, устанавливается дополнительная квота для трудоустройства безработных граждан, особо нуждающихся в социальной защите, равная численности привлеченных иностранных работников". 2.2. Пункт 2 изложить в следующей редакции: "2. Определить размер квоты с предоставлением налоговых льгот из бюджета Удмуртской Республики в 2000 рабочих мест для трудоустройства категорий граждан, особо нуждающихся в социальной защите и испытывающих трудности в поисках работы, в соответствии со статьей 5 Закона Удмуртской Республики "О занятости населения в Удмуртской Республике". Численность нижеперечисленных категорий граждан, особо нуждающихся в социальной защите, подлежащих трудоустройству, должна составлять не менее 60 процентов от установленного размера квоты: инвалидов; молодежи в возрасте до 18 лет, впервые ищущей работу; детей-сирот, лиц из числа детей-сирот и детей, оставшихся без попечения родителей в возрасте до 23 лет; выпускников общеобразовательных учреждений, а также учреждений начального и среднего профессионального образования". 2.3. В пункте 3 слова "штрафа за отказ в приеме на работу инвалида в пределах установленной квоты заменить словами "стоимости одного рабочего места инвалида на 2001 год" и далее по тексту. 2.4. В подпункте 3.1 пункта 3 слова "на 2000 год" заменить словами "на 2001 год". 2.5. Пункт 5 исключить. 2.6. В пункте 7 слово "своевременно" заменить словами "в срок до 1 августа". 3. Контроль за выполнением настоящего постановления возложить на заместителя Председателя Правительства Удмуртской Республики Савельева В. А. Председатель Правительства Удмуртской Республики Ю. С. Питкевич. Республикаысьтымы гурт спортсменъёслэн ВИИ тол шудонъёссы Вормисьёс тодмоесь Воткинск ёросысь Новый посёлок 23-тӥ феврале ас дораз люказ 24 ёросысь 700 пала спортсменъёсты. Куинь нунал ӵоже тол многоборьеын ӟырдыт нюръяськон мынӥз. Куас сюрес вылэ нырысь ик вырӟизы ветеранъёс. Вить иськеме бызьылонын нырысь интые потӥз Шаркан ёросысь Николай Баталов. Нылкышноос пӧлын куинь иськемез самой ӝог ортчиз Игра ёросысь Валентина Чиркова. Егит пиос но воргоронъёс дас иськеме бызьылӥзы. Асьсэ арлыдзыя нырысь интые потӥзы Шарканысь Андрей Вахрушев но Максим Вылегжанин. Нылкышноос пӧлын вить иськем сюресэз тужгес шаплы ортчизы Шарканысь Екатерина Воронцова но Игралась Валентина Чуракова. Тол многоборье - полиатлон но аслэсьтыз кужмо спортсменъёссэ шараяз. Ыбылӥськыса, ки кужымзэс эскерыса но куасэн бызьылыса ёросысь Сергей Кожевников но Шаркан ёросысь Антонида Трефилова. Семьяын ӵошатскисьёс пӧлын нош ик тужгес шӧртчи луэмзэс возьматӥзы Игра ёросысь Кабачигуртысь Лекомцевъёс: Герман, Нина но Ирина. Семьяос нимаз-нимаз но, эстафетаын но бызьылӥзы. Мукет интыос понна ӵошатскон пуромиз Пичи Пургаысь Демидовъёс, Завьялысь Трофимовъёс, Сюмсиысь Лялинъёс, Як.-Бодьяысь Виноградовъёс но Шарканысь Корепановъёс куспын. Кужмо нюръяськем бере, районъёс куспын эстафетая ӵошатсконъёсын вормизы шарканъёс, соос бӧрсьы - играос. Озьы, огъя зачётын вормисе потӥзы Шаркан ёросысь спортсменъёс, кыкетӥ интые - Игра ёросысь. Куинетӥ луизы можгаос. Таослэн вормонзылы юрттӥз, дыр, Бадӟым Уча администрацилэн кивалтӥсезлэн Сергей Фалалеевлэн ыбылӥськонын нырысетӥ инты басьтэмез. Кыкетӥ группаысь командаос вормисьёс: Глазов, Яр но Дэбес. Спортъя ВИИ тол шудонъёс туж умой радъямын вал. Куазь но юрттӥз гуртысь спортсменъёсмылы вылӥ вормонъёс басьтыны. Ӵошатсконъёслэн кызьы мынэмзы сярысь газетысьтымы лыдӟоды на. Т. Петрова. Дарт Вормы астэ ачид Та нылмуртэн мон тодматски кылем сӥзьыл егитъёслэн форумазы. Нырысь Таира Керимова паймытӥз кырӟаменыз. Залын пукизы пӧртэм калыкъёсысь егитъёс. Азербайджанъёс пӧлазы кӧня ке сяна ӧй вал, но со сыӵе кырӟаз! Азербайджан кылэз ноку кылымтэос но кизэс туж кема но зол чабизы. Собере бӧрсяз ик сцена вылэ потӥз муспотон Лейла нылыз. Чебер куараеныз но задор тэтчаменыз таиз но учкисез туж чаль "басьтӥз". Мон возьмай на удмуртъёслэсь паймытэмзэс, но бӧрсьысь бӧрсе чузъяськизы бигер кырӟанъёс. Таосыз но умой кырӟало, но Таираез ыштэмлэсь кышкаса кошки сое катанчи сьӧрысь утчаны. - Ой, кыӵе умой! А то ми учкиськом, ваньмызлэсь интервью басьто, милесьтым уг, - шумпотӥз со кин луэмме тодыса. Таира выжыезъя азербайджан, но семьязы улӥз Санкт-Петербургын. Со будӥз интеллигентъёслэн семьяязы - пичи дырысеныз ик вольыт вераськиз кык кылын, шудӥз крезьгуро инструментъёсын. Тунсыкъяськиз дуннеысь культуралэн но искусстволэн историенызы. Визьмо, шӧртчи нылаш паймытъяз эшъёссэ но, дышетӥсьёссэ но. Нош доразы ветлӥсь куноос (соос пӧлын, пе, луыло вал туж тодмо кырӟасьёс но крезьгурчиос. Кылсярысь, Газманов) сое "кизили" гинэ шуылӥзы. Таира ачиз но оскыны кутскиз ни вал со - кизили, солы паськыт инвисъёс сӥземын шуыса. Ма, тодмо адямиос буд гинэ, юрттом шуылӥзы ук. Но ваньмыз чигиз огвие. Таира кылиз анай-атайтэк. Шудтэм учыр талаз соослэсь улонзэс. Нылаш нокинлы кулэ ӧз ни луы, доразы куноос но ветлэмысь дугдӥзы. Нокыӵе кырӟан солэн йыраз но ӧй вал ни, кызьы ке ас понназ улыны дышетсконо - тӥни мар сое шугъяськытӥз нырысь ик. Огезлэсь куректонлэсь сазьтӥськыса ӧз вутты, мукетыз шуккиз - кулӥз одӥг гинэ выныз но. Синвуэн бӧрдылӥз со ӝытъёссэ, нош ӵуказеяз номыр луымтэ кадь калык пӧлы сураськылӥз, школае ветлӥзы, кышкалляз жалямзылэсь. Школазэ йылпумъям бере, Таира мединститутэ пыриз. А тазьы но луо мон врач, висисьёсты эмъяло, вормонъёсылы шумпото но... сютэм пуко. Соин ик Таира ватсаса Тибет медициналы дышетскиз. Али, пе, Санкт-Петербургын сое умой врачен лыдъяло. Я, ваньмыз радъяськиз кадь, ваньмыз умой, тырмыт. Но сюлэмыз озьы но уг буйгатскы. Тон эшшо маке карыны кулэ! - шуэ со аслыз ачиз но кунсьӧр кылъёсты дышетэ. Кӧня ке дыр ӵоже дышиз англи, китай, япон кылъёслы, кутскиз мукет странаосы ветлыны. Быземез бере буйгатскиз ни вал кадь. Картэз - умой, коньдонлы уг ёрмы. Таира ваиз пи. Кузпалыз шуиз: тырмоз, кыкеныз, жадёд. Со валалляз жадёз шуыса, угось нунызэ дораз утялтыса пукыны дырыз ӧй вал. Но юри ваиз кыкетӥзэ. Кызьы пиме огназ кельтом, - шуиз со. Ма собере жади ке, мед. Со жадён бӧрысь шумпотонэн берытске ук. Таира со вамышезлы туж шумпотэ - Лейлаез тани ваньзэс паймытъя ни. Солы луыса ик Таиралэн эшшо одӥг быгатонлыкез шараяськиз - нылызлэсь кырӟаны мыло- кыдо луэмзэ шӧдыса, со нылпиослы кырӟан гожъяны кутскиз. Кыӵе ке концертын кырӟамез бере, Лейла доры бызьыса лыктылӥзы крезьгуръя школаослэн кивалтӥсьёссы: - Кытысь таӵе зол кырӟан шедьтӥд? - Дорысь, - пальпотылӥз со пумитазы. Таиралэн соку ик тодаз лыктӥз аслаз шудо пичи дырыз. Кыӵе потэ вал кырӟаме, - лулӟылӥз со. Собере аслэсьтыз ачиз юаз: а кин мыным али кырӟаны люкетэ? Адямиос ньыльдон аресказы но кутско. Со ӝытэ ик гожтӥз яратон сярысь кырӟан. Кӧня ке улыса сое кырӟаны учыр но тупаз - городын ортчиз самодеятельной крезьгурчиослэн фестивальзы. Таираез соку ик синйылтӥзы, мукет конкурсъёсы, фестивальёсы донгаськыса кужым быдтоно ӧз ни луылы, сое асьсэос ӧтьылӥзы. - Таира, нош эмъян удыстэ аналтӥд шат? - юасько мон солэсь. - Ӧй, мар тӥ! Эмъян но кырӟан - со туж тупась ужъёс ук, соиз но, таиз но адямиез бурмытэ. - Кызьы вутскиськоды? - Суткаын 24 час. Вутскисько на книга но лыдӟыны, спортзалъёсы но ветлыны, дышетскыны но... - Эшшо? - Эшшо Адями ассэ жаляны кулэ ӧвӧл, кыӵе ке вормон сярысь малпаськиськод ке, нырысь асзьтэмдэ вормы. - Нош адямилэн быгатонлыкъёсыз ке ӧвӧл. - Озьы уг луылы. Мыным, конечно, инмар тросгес сётэм. Пичи дыръям бадӟым ыштонъёсы понна, дыр, малпасько. Но ас азям чурыт куронъёс ӧй ке пуктылысал, улонам шумпотонэ ӧжытгес луысал. И. Кириллова. Власть бырйиськод ке, мед сузёз киыд Кылем арняе Ижевск городлэн мэрез Анатолий салтыков пыриськиз РФ-ысь Кун Кенешлэн президиумезлэн ужаз. Вераськон мынӥз интыысь аскивалтон сярысь. Президентлэн Владимир Путинлэн малпамзыя, Интыысь аскивалтон - со огшоры калыклы тужгес матысез власть. Власть, кудӥз дорозь котькудӥз огшоры адями киыныз сузьтӥськыны быгатэ. Власть, кудӥз нуналмысь быдэсъя тужгес лэчыт куляськонъёсты - урамъёсты утялтонысен кутскыса правоосты утёнэн, кусыпъёсты радъянэн йылпумъяса макем ӟеч ужало интыысь кивалтӥсьёс, скоем ӟеч югдур возиське быдэс странаын. Соин ик интысь аскивалтонлы бадӟымгес луонлыкъёс сётон но ужзэс ӟечгес азинтон понна, Владимир Путинлэн малпамезъя интыысь аскмвалтон ёзъёслэсь коньдон ужпумъёссэс тупатоно7 Кызьы? Вытъёс чотын. Кылсярысь, малы музъемлы, ваньбурлы, вузаськемлы вытъёс палэнэ кошко. Со сяна, радъяно ни интыын аскивалтонъя законъёсты. Федерация ласянь "интыосты" пачкатыны тыршо, кивалтоно биньгозызэс ас палазы кыско, соосыз - пумитъясько. Сыӵе ченгешонын чдано луэ огшоры адямилы. Рос-просгес басьтӥськоно ни вылэм Интысь аскивалтонэ быръёнъёс ортчытъян борды но. Али отчы шедё ай ас понназыгес сюлмаськисьёс, куддыръя йыртэмасьёс но. Уг дасясько быгатӥсь, визьмо кивалтӥсьёс. Кивалтонэ шедьыны кулэ рос-прос адямиос. Соос улонэз умой пала тупатыны мед быгатозы. Ижевск город администрацилэн пресс-службаез. Оскон Калык понна но калыкен ӵош Калыкез улон-вылонын утёнъя министерство кылем арын ужамезлы йылпумъянъёс лэсьтӥз. Азьло аръёсын ӵошатыса, югдур та удысын пумен тупатске. Шуг-секытъёс кылдытэ пенсиосъя законлэн туала куронъёслы тупамтэез, вылаз ик, калыклы пенсия тыриське вуж но выль законъя. Пенсилэн быдӟалаез но весь вошъяське. Ваньзэ сое лыдъяно-чотано. Специалистъёс уг тырмо. Тодӥсь-валась адямиослэн тырмымтэзы мукет ёзъёсын но шӧдӥське. Туэ арлы министерство ас азяз пуктэ бере нимаз-нимаз адямиослы тросгес юрттэт сётон ужпумез, кадръёсты дасян валтӥсь интыын сылыны кулэ. Сое пусйиз Калыкез улон-вылонын утёнъя министр Светлана Андреева но. Нош мар лэсьтэмын но азьланезлы чакламын, созэ ини возьмато быдэстэм ужъёс. Пенсиос 2000-тӥ арын ньылетӥ кварталэ шоро-куспо уждунлэн быдӟалаез 10 процентлы будӥз. Соя Россия Федерацияя шоро-куспо уждунлэн быдӟалаез 1 сюрс 523 манет тупатэмын. Соин алче 10 процентлы будӥз пенсилэн быдӟалаез но, компенсациос лыдэ уг басьтӥсько. Куинь толэзь куспын шоро-куспо уждун эшшо будӥз ке, мае пенсиос нош ик йылозы. Нош 1-тӥ мартысен тужгес ӧжыт пенсилэн быдӟалаез 600 манет луоз. Нылпи пособиос Республикаысьтымы 312 сюрслэсь ятырез пинал толэзьлы быдэ сётӥськись пособие басьтыны кулэ. 2001-тӥ арлэн кутсконаз пунэм тыронъёс 546,5 миллион манет тыр люкаськизы, нош республикаысьтымы казна висъяны чаклаз 200 миллион манет гинэ. 2000-тӥ ар понна пособие быдэсак тыремын трос нылпиё анайёслы, январьысен июлёзь - нырысетӥ категорие пырись семьяослы, кӧня ке пунэм тыронъёс берыктэмын 1997-тӥ� 1998-тӥ аръёс понна. Республикаысьтымы Калыкез улон-вылонын утёнъя министерство таяз арын пунэм тыронъёссэ берыктоз 1998-тӥ ар понна ваньмызлы ик пособие басьтӥсьёслы, категориослы люкылытэк. Туэ ар понна но пособиос ваньмызлы ик сётӥськозы, коньдон висъяськоз Россия Федерацилэн бюджетысьтыз федерация казначейство пыр. Пособиослы чаклам коньдонэз мукет кулэяськонъёслы кутыны уз луы ни, озьыен, та ар понна выльёсыз пунэм тыронъёс уз люкаське ни. Нош 1999-тӥ арлы пособиос сётӥськозы 2002-тӥ арын гинэ. Вераны кулэ на, таяз арын пособие сётӥськоз со семьяослы, кинлэн адямилы быдэ огъя доходэз 10 сюрс 47 манетлэсь ӧжыт луоз. Будӥз пособилэн быдӟалаез но, 2000-тӥ арын 1-тӥ январьысен со луиз 80 манет 50 копейка (вал 67 манет 21 копейка). Инвалидъёслы юрттэт Республикаямы 80 сюрслэсь ятыр инвалидъёс лыдъясько. 1999-тӥ арлэн пумаз министерствоын кылдытэмын медико-социальной экспертизая, реабилитацияя но юрттэт сётонъя отдел. Али лэсьтӥськон ужъёс мыно синтэмъёслэн "Спутник" огазеяськоназы инвалидъёслы реабилитацияя центр усьтонъя. Быдӟым Отечественной войнаысь инвалидъёслы федерация бюджет чотын 2000-тӥ арын висъямын 83 "Ока" автомобиль, 115 кресло-коляска. Республикаысьтымы бюджет чотын висъямын 396 кресло-коляска. Сарапулысь колледжын инвалид нылпиос понна кылем арын усьтӥськизы выль специальностьёс. 250 мурт туннэ дышетске портнойлы, изьы вурисьлы, теле-, радио-, видео- аппаратураез, бытовой техникаез тупатъясь мастерлы, бухгалтерлы, страховой ужъёсъя специалистлы. Азьланяз, оло, инвалидъёс вылӥ образование но басьтыны быгатозы. Заочно - дистанционной амалъя дышетскон сярысь вераськонъёс мыно Удмурт кун университет но министерство куспын. Ленинградэз утисьёслы - кык пенсия Ленинградын блокада дыръя ужамъёс, "За оборону Ленинграда" медаль басьтэмъёс, Россия Федерацилэн Президентэзлэн Владимир Путинлэн указэзъя войнаысь ветеранъёсын оградэ пуктӥсько. Табере соос но кык пенсия басьтозы. Республикаямы сыӵе адямиос 150 пала лыдъясько. Интернат юртъёсты выльдон-тупатъян Республикаямы усьтэмын 12 интернат юрт, улэ отын 3 сюрс 338 мурт. Но туннэ нуналлы со тырмымон ӧвӧл, огшоры интернат юртэ 192 мурт черодын сылэ, нош лулсэр висёнъёсын герӟаськемъёсаз - 92 мурт. Тросэз юртъёс 60 арлэсь кема сыло ини, соин ик тупатон-выльдонэз кулэ каро. Та ужъёслы кылем арын висъямын вал 9 миллион манет, но уже кутӥськиз 13 миллион манет. Ар ӵоже трос лэсьтӥськон ужъёс быдэстэмын, кылсярысь: Сюмси ёросысь Пижил интернатын 104 интыем кӧлан юрт ӝутэмын; Сарапулысь интернатын но Сарапулысь инвалидъёслы колледжын тупатъян-выльдон ужъёс ортчытэмын; Як.-Бодья ёросысь Канифольнойысь нылпиослы интернат юртын сиён пӧран интыез тупатъямын, 120 интыем кӧлан юртэз пуктон йылпумъямын; Як.-Бодья ёросысь Маяк посёлокысь интернатын 96 интыем кӧлан юрт ӝутэмын но мукет. Юрттэт сётон Шаерамы усьтэмын калыклы юрттэт сётонъя 32 центр, 6 "Семья" центр, арлыдоослы улыны чаклам 4 юрт. Юрттэтлы кулэяськись адямиосты синйылтыса возё ваньмаз сямен ик городъёсын но ёросъёсын: сиён-юон, дӥськут висъяло, эмъюмен юртто, улон юртъёсазы утялтӥсько. Ёрос администрациос эскерыса возё улон интылы кулэяськись ожысь ветеранъёсты. 4 сюрс 35 муртлы улон интызэ выльдоно-тупатоно. 2000-тӥ арлэн нырысетӥ ӝыныяз 534 пенсионерлы улон юртсэ но квартиразэ тупатэмын ни. Инвалидъёслы но ветеранъёслы юрттэт сётонъя югдур таяз арын умойгес луыны кулэ. "Ветеранъёс сярысь" но "Россия Федерациысь инвалидъёсты улон-вылонын утён сярысь" Законъёсты быдэсъянэ республикамылы ог люкетэз коньдон висъяськоз Россия Федерацилэн бюджетысьтыз федерация казначейство пыр. Та коньдонэз мукет кулэяськонъёсы кутыны уз луы ни. Городъёсысь но ёросъёсысь администрациос асьсэос но луонлыкъёс утчаны кулэ та адямиослы юрттон ласянь. Законын чалкам тросэз льготаос али уг быдэсъясько на. Ветеранъёс понна вань шумпотымон ивор. Городысь но город котырысь транспортын соос ӝоген дунтэк ветлыны быгатозы. Удмурт Республикалэн бюджетаз солы висъямын 20 миллион манет. Семья но пиналъёс Калыкез улон-вылонын утёнъя министерство та ужпумъёсты но синйылтыса возе. Бадӟым саклык висъяське инвалид нылпи будэтӥсь но трос нылпиё семьяослы. Россия Федерациын но республикаямы пӧртэм программаос кутэмын. 2000-тӥ арын 21 сюрс 288 семьялы пӧртэм юрттэт сётэмын. 2001-тӥ арын 1-тӥ январьысен трос нылпиен семьяослы юрттэт сётӥськоз, огъя доходзы адямилы быдэ 460 манетлэсь ӧжыт луиз ке. Семьялы но нылпиослы юрттэ 27 учреждение. Соос пӧлын: инвалид нылпиослы реабилитацияя центр; быдэ вуымтэослы юрттэт сётонъя центр; нылпиослы 3 приют; 6 "Семья" центр; семьялы но нылпиослы юрттэт сётонъя 10 центр. Огъя верано ке, араз соос 100 сюрс нылпилы но семьялы юрттэт сёто. Котькуд учреждение 2000-тӥ арын, шорлыдын вераса, 3 сюрс 716 семьялы, нылпиослы но нимаз адямиослы юрттӥз. Министерствое вазиськонъёс 2000-тӥ арын калыкез улон-вылонын утён ёзъёсы вазиськиз 672 сюрслэсь ятыр адями. 1999-тӥ арын тросгес вазиськылӥзы ке пенсиосты ӝегатэм пумысен, кылем арын адямиослэн трос юанъёссы кылдылӥзы пенсизэс лыдъян-чотанъя. Вуж но выль законъёсъя пенсия тырон трос валамтэос кылдытэ. Адямиосты сюлэмшугъяськытэ ӧжыт пенсия басьтэмзы но. Министерствое 3 сюрс 42 вуэм гожтэт пӧлысь 46 процентэз герӟаськемын пенсия басьтонэн. 17 процентлы кулэсмизы нылпи пособиосъя вазиськонъёс. Нош льготаосъя, санаторийёсын но курортъёсын эмъяськонъя, шуг-секытэ сюрем пенсионеръёслы но семьяослы юрттон пумысен юанъёс уг кулэсмо. Гожтэтъёс ыстэм сяна, сюлэмшугъяськытӥсь ужпумъёсынызы адямиос лыкто министерствое но. Кылем арын юанъёсын вазиськиз 7 сюрс 159 мурт. Министерствоын кылдытэмын калыкен ужанъя нимысьтыз отдел. Мӧйы адямиослы но висисьёслы вылӥ этажъёстӥ юалляськыса ветлонэз ӧвӧл ни. Пенсиосъя, пособиосъя, кыӵе ке льготаос яке группа сётон пумысен, семья ужпумъёсъя юанъёсты кылдӥзы ке, специалистъёс тӥледлы кулэ валэктонъёс сётозы пырон ӧс доры радъям нимаз кабинетын. Ижевсклэн палэназ улӥсьёс вазиськыны быгатозы котькуд нунал, нош Ижевскын улӥсьёс - понедельнике но пятница нуналъёсы. Л. МАЛЫХ. Ваучерме сётӥ вал фондэ. Басьто-а отысь коньдон? Гажано редакция. Ми таӵе юанэн тӥ доры вазиськиськом. 1992-тӥ арын ваучеръёсмес сётӥмы инвестицияя фондэ. Но татчыозь нокыӵе но дивиденд ӧм на басьтэ. Вань-а кыӵе ке оскон коньдонмес берыктыны. Валэктэ вал газет пыр: мар милемлы кароно, кытчы вазиськоно? Шаркан черкогурт. Перевозчиковъёслэн, Корепановъёслэн, Хохряковъёслэн семьяоссы. Та выллем гожтэтъёс редакцие ялан вуыло. Валэктонъёс басьтон вылысь вазиським Правительствоысь Дуно кагазъёсъя но фондъёсын рынокъя комитетэ. Кытчы вазиськыны быгато вкладчикъёс компенсациос басьтон понна? Юнматэмын асьме республикаын ужам таӵе компаниослэн списоксы. 1. "РДС" АОЗТ (люкетэз) 2. ФК "Русская недвижимость" АОЗТ(люкетэз) 3. ИК "Хопёр-Инвест" ТОО (люкетэз) 4. "Гермес-Финанс" АОЗТ(люкетэз) 5. ПКФ "Инфакс" ТОО 6. "Ломбард-Ипотека" ТОО 7. "Муниципальный Ломбард-Ипотека" АОЗТ 8. "Валентина" ИЧП 9. "Вита" ИЧП 10. "Лирида" ТОО 11. Вузкарон юрт "Тинчлик" АОЗТ 12. "Кизили"Торгово-промышленной фирма 13. "Российский селенг" АОЗТ 14. "Возрождение России" АОЗТ 15. "ЛАВВ" ИЧП 16. "Оливия" ИЧП 17. "Вече"пичи предприятие 18. "Озирис" ИЧП 19. "Агроинвест" Трастовой компания(люкетэз) 20. "Нейт" ПКФ 21. "Плутон" ИЧП 22. "Корпорация "Урал" АОЗТ 23. "Камский торговый дом" Инвестиционной компания 24. "Апри-2" ИЧП 25. "Стройжилфонд" ИЧП 26. "Игла" ТОО 27. "Жилищное строительство "Стимул" ТОО 28. "Касса взаимопомощи" Уральский народный центр 29. "Твип" АОЗТ 30. "Воткинское компьютерное общество" ТОО 31. "Зевс" ИЧП Ижевскын улӥсь вкладчикъёс вазиськыны быгато комитетэ таӵе адресъя: М. Горький нимо урам, 73 номеро юрт, 198-тӥ комната, 4-тӥ этаж 12-тӥ февральысен 6-тӥ мартозь. Лыктыны луэ нуналлы быдэ, шутэтскон нуналъёсты вератэк 14.00 часысен 17.00 часозь. Но нырысь 78-53-35 телефон пыр гожтӥськоно. Мукет ёросъёсын но городъёсын улӥсьёс компенсациос басьтон понна вазиськыны кулэ администрацие. Сьӧре кутоно таӵе документъёсты: паспорт, коньдон (вклад) понэм сярысь но кыӵе категорие пыртэм сярысь бумагаос. Компенсация басьтыны уг ни быгато: азьвыл сое басьтэмъёс: акционеръёс, "МММ" АООТ-лэн вкладчикъёсыз но акционеръёсыз, кудъёсыз ужало банкъёс, страхованиея организациос, пенсиосъя фондъёс но чекъёсын инвестицияя фондъёс пушкын. Компенсациос тырон понна вань вкладчикъёс ньыль категорилы люкемын. Нырысетӥ категорие пыртэмын Быдӟым Отечественной ожын сӧсырмемъёс, мукет кунъёсын ожмаськем но сӧсырмем адямиос, концлагерьёс пыр потэм быдэ вуымтэ нылпиос, пленэ сюрыса сӧсырмемъёс. Кыкетӥ категорие пыртэмын 1-тӥ, 2-тӥ, 3-тӥ группаосысь инвалидъёс. Куинетӥ категория - Быдӟым Отечественной войнае пыриськемъёс, фронт мышкын ужамъёс (куать толэзь ӵоже ужамын ке), тушмонэн киултэм музъемъёс вылын ужамъёс, концлагерьёс пыр потэмъёс, война вакытэ пал кылем кузпалъёс, Чернобыль АЭС-ын радиация улэ сюремъёс но отын быремъёслэн кузпалъёссы. Та категорие ик пыро 80 аресъем но солэсь арлыдо вкладчикъёс. Дасяз Т. Банникова. Удмурт Республикалэсь сӥлы карон нимъёссэ сётон сярысь Удмурт Республикалэн Президентэзлэн Указэз Сӥлы карон нимъёс сётоно: Удмурт Республикаын наукаез азинтонын вормонъёс басьтэмез понна "Удмурт Республикаысь наука удысысь дано ужась" Месяц Геннадий Андреевичлы - Россиысь наукаосъя академилэн вице-президентэзлы; Тазалыкез утён удысын вылӥ азинсконъёссы но уно аръёс ӵоже сюлмысь тыршемзы понна "Удмурт Республикаысь тазалыкез утён удысын дано ужась" Баталов Олег Вениаминовичлы - Нылга больницалэн валтӥсь врачезлы; Гельман Лев Петровичлы - республикаысь психиатрияя больницаысь отделениен кивалтӥсьлы; Горев Александр Анатольевичлы - Октябрь ёросысь Санитарияя но эпидемиологияя кун центрысь санитарияя но гигиеная люкетэн кивалтӥсьлы, Ижевск город; Горохов Эдуард Ивановичлы - Удмурт Республикаысь санитарияя но эпидемиологияя кун центрысь омырез но вуэз эскеронъя люкетэн кивалтӥсьлы; Дмитриев Владимир Рафаиловичлы - санитарияя валтӥсь кун врачлэн воштӥсезлы; Колодкин Дмитрий Евгеньевичлы - республикаысь сюлэм висёнъёсъя диспансерысь лабораториысен кивалтӥсьлы; Яковлева Галина Владимировналы - "Центральная районная аптека � 11" кун унитарной предприятилэн директорезлы, Шаркан ёрос; Культура удысын вылӥ азинсконъёссы но уно аръёс ӵоже сюлмысь тыршемзы понна "Удмурт Республикаысь культура удысысь дано ужась" Драчев Владимир Вениаминовичлы - "Культурно-спортивный комплекс" "Металлург" учреждениысь валтӥсь инженерлы, Ижевск город; Запольский Александр Аркадьевичлы - "Удмуртия" ГТРК-ысь электромеханиклы; Плотников Алексей Алексеевичлы - искусствоосъя 11 номеро нылпи школалэн директорезлы. Калыкез дышетон удысын вылӥ азинсконъёссы но уно аръёс ӵоже сюлмысь тыршемзы понна Удмурт Республикаысь калыкез дышетон удысысь дано ужась Пушин Сергей Степановичлы - 66 номеро шор ёзо школаысь крезьгуръя дышетӥсьлы, Ижевск город; Хмелев Валерий Леонидовичлы - Пичи Пургаысь нылпи творчествоя центрысь дышетӥсьлы. Промышленность удысын вылӥ азинсконъёсыз но уно аръёс ӵоже сюлмысь тыршемез понна "Удмурт Республикаысь промышленность удысысь дано ужась" Самохвалов Геннадий Васильевичлы - акциосын "Камбарский завод газового оборудования" огазеяськонысь ёзэн кивалтӥсьлы. Лэсьтӥськон удысысь вылӥ азинсконъёсыз но уно аръёс ӵоже сюлмысь тыршемез понна "Удмурт Республикаысь дано лэсьтӥськись" Салтыков Леонид Арсентьевичлы - райполэн лэсьтӥськонъя правлениеныз кивалтӥсьлэн воштӥсезлы, Юкаменск ёрос. Экономика удысын вылӥ азинсконъёсыз но уно аръёс ӵоже сюлмысь тыршемез понна "Удмурт Республикаысь дано экономист" Сизов Анатолий Николаевичлы - Сарапул городысь администрацилэн кивалтӥсезлэн воштӥсезлы. Удмурт Республикалэн Президентэз А. А. Волков. Ижевск город, 2001-тӥ арын 12-тӥ феврале. � 23. ДАРТ Кытын кыллиськод, нимтэм солдат? "Быдӟым ожын ивортэм бырем одӥгез ке но солдат шедьтэмын но ватэмын ӧз луы, милям сюлэмъёсмы уз буйгалэ", - сыӵе ӧтён улсын ужало республикаысьтымы "Долг" общественной огазеяськонэ пыремъёс. Таяз арын апрель толэзе огазеяськонлы дас кык ар тырмоз ни. Та дыр куспын со будӥз но юнмаз. Огазеяськонлэн ужаз пырисько школаосын, профтехучилищеосын но вузъёсын дышетскись пиос но нылъёс. Шаерамы кылдытэмын бырем солдатъёсты утчась дас вить отряд. Котькуд аре соос потало ож бервылъёсы. Быдӟым ож дыръя Удмуртиын кылдытэмын вал 92-тӥ стрелковой дивизия. Солэсь сюрессэ табере ортчо туала егитъёс. Аспалъёссылэсь гинэ ӧвӧл, оло, ӵыжы-выжыоссылэсь но нимъёссэс соослы выльысь берыктыны кылдэмын. Ортчем дыр но нюр му солдатъёслэсь лысьӧмъёссэс гинэ ӧвӧл, нимъёссэс но ватыса возё угось. "Долг" огазеяськонэ пыремъёс дас ар ӵоже шедьтӥзы но быремъёслэн огъя шайвылазы ватӥзы 1968 солдатъёслэсь но офицеръёслэсь лысьӧмъёссэ. Озьы ик шедьтэмын сюлэсь ятыр медальонъёс. Кылсярысь, одӥгысьтыз медальысь номер юрттӥз кызь ожгарчиослэсь нимъёссэс шараяны. Кылем арын гинэ Россилэн пӧртэм улосвылъёсысьтыз 119 быремъёсты шедьтӥзы Удмуртиысь пиос но нылъёс. "Долг" огазеяськонэ пыремъёс таяз арын нош ик сюрес вылэ потыны дасясько. Витез тужгес но устоосыз отрядъёс экспедицие тямыс пол поталлязы. Огазеяськонлы котыр ласянь юрттэ республикаысьтымы, Удмурт Элькунысь Правительство, Егитъёсын ужанъя кун комитет "Долг" Огазеяськонлэн одӥгез устоез ёзэз ужа Глазовысь педагогической институтын. Отысь "Феникс" отрядэн кивалтэ Тимур Кутявин. Азьлань вераськонмес азинтом соин. - Тимур, кызьы сюрес шедьтӥд та огазеяськонэ? - 1996-тӥ арозь милям пединститутамы вал ышем-бырем ожгарчиосты утчась отряд. Стдентъёс дышетсконзэс йылпумъязы но, та уж огдырлы чалмиз. 1999-тӥ арын ми, студентъёс-историкъёс, ӵош люкаським но огазеяськонэз выльысь улӟытон сярысь ужпум ӝутӥм. Герӟаським республикаысьтымы "Долг" огазеяськонэн, солэн кивалтӥсез Фаиль Фазиевич Ибрагимов котыр ласянь юрттӥз милемлы. "Феникс" огазеяськонамы али куамын мурт пыре. - Нылъёс но пӧлады вань-а? - Бен, нылъёс но пырисько та уже, школаын дышетскисьёс но вазисько дорамы. Карелие потакумы тани сизьымез школаын дышетскисьёс сьӧрамы ветлӥзы. - Вань мылкыд карисьёсты огазеяськонады кутӥськоды яке кыӵе ке конкурс пыр потоно? - Мылкыд карисьёс туж трос. Тулыс пал ортчытӥськом Быдӟым Отечественной ожъя олимпиада. Собере куинь толэзьзэ пиналъёс дышето утчаськон ужъя теориез, отын ик практикаез но вань. Но дышетскиськом кабинетъёсын, кытчы ке палэнэ потатэк. Со занятиос ик возьмато ни, кинлэн кыӵе тодон-валанъёсыз. Устоосыз гужем каникулъёс дыръя пото сюрес вылэ, кутске зэмос уж. - Кышкытлык но вань ук. Шуом, граната яке мукет ож тӥрлык пуштоз. - Бен, сыӵе арбериосты ми трос шедьтӥськом. Ӵемысь соос пуштыло но. - Иське, тӥ асьтэос ик сапёръёс но? - Озьы но шуыны луоз, дыр. Шер дыръя отрядъёс сьӧры зэмос сапёръёс пото. Но ми со пуштылӥсь арбериосты сыръясь интыосы выйытӥськом яке, ваньзэ огинэ люкаса, огӵошен пуштытӥськом пыдлось нюлэсъёсын. - Утчаськонъёс дыръя кыӵе ке но вунонтэм учыръёс но сюлэме кылё, дыр? - Ваньзэ сое кылын гинэ вераны уз луы, адӟыны, ветлыны кулэ со ож сюресъёстӥ. Тани мынам али ке но сюлэмам кылем арын сентябре Ленинград областьысь Синявино вырйылэ потаммы. Отысь ми шедьтӥмы пуштэм бере кылдэм бадӟым гуэз. Милям отрядмы отысь поттӥз дас вить солдатлэсь лысьӧмзэ, вить медаль шедьтӥм на. Ньыльзэ со пӧлысь лыдӟыны быгатӥм, али со бырем солдатъёслэсь ӵыжы-выжыоссэс шедьтон бордын ужаськом. Шедьтӥмы на пусъем пуньы но е. Та гуысь ваньмыз кызь куинь солдатлэн лысьӧмыз поттэмын. Юрттӥзы Челябинскысь эшъёсмы. Мар тужгес но сюлэмез бугыртӥз? Быремъёсты ваньзэс огинэ куяллям но вылтӥз кӧня ке гинэ сюен согиллям. - Утчаськон сюресъёс кытчы но кытчы вуттылӥзы ни глазовъёсты? - Кык ар ӵоже милям отрядмы потаз ни Карелие, Ленинград областе, Новороссийске, Мурманске. Нырысь "Долген" ӵош кӧня ке кузя потамы, али ас поннамы ветлӥськомы ни. Тани Синявино вырйылын 2000-тӥ арын ортчиз буре ваён вахта. Отрядмы отын туж умой ужаз. Та дыр куспын бырем солдатъёсты трос ӧм шедьтэ ке но, ожъёс ортчем интыосын ӟеч тодматскыса вуттӥм. - Нош кызьы пумитало тӥледды со палан улӥсьёс - юртто-а? - Юрттон мылкыдзы туж ик уг шӧдӥськы. Ӵем дыръя пыкылэмъёсты но кылӥськом: малы, пе, музъемын кыллись лыосты бугыръянэз на. Татчыозь кыллизы, отчы ик мед кылёзы. Но куке бырем солдатлэсь ӵыжы-выжыоссэ шедьтӥськод, адямиез сямен ватӥськод сое, сыӵе малпан йырысь тӧлзе. Со бордын ик милям ужмы. Быремъёсты буре ваёно, нош со понна тодыны кулэ соослэсь нимъёссэс. Усьтэ ай котькудзэ ик буре ваён книгаез - вылысьтыз вылаз гожтэмын: ивортэм ышиз. Ми туж кулэ ужен выриськом - адямиослы берыктӥськом ыштэм нимзэс. - Нош уз луы-а озьы: тӥ дышетскондэс быдтоды но, "Феникс" ужамысь дугдоз? - Дышетсконмес ми быдтӥськом ни таяз аре, но кутскем ужмы соин уз кысы, малпасько. Отрядмы кыкетӥ курсысь студентъёсын кужмояз, нырысетӥ курсысь студентъёсты но ас бордамы кыскиськом. Милемлы ужаны туж юртто институтлэн кивалтӥсьёсыз, Глазов городысь администрация. - Оло, асьтэлэн музейды но вань ни? - Милям вань интыосы потаса возьматъян экспозицимы. Сояз арын фотовыставка радъямы. Сюрс пала пиналъёс адӟыны ветлӥзы сое - ас ужамы ми тросгес пыкъяськиськом школаын дышетскисьёс но ожысь ветеранъёс вылэ. Нош таяз арлы бадӟым малпанэн улӥськом: Ижевскын выллем музей кылдытом. Интымы вань, экспонатъёсмы тырмыт, ӝажыос гинэ кулэ на, отӥыз ваньмыз радъяськоз ни. Л. Малых. Милям асьмелэн героймы! Военкоматысь адямиос школаямы лыктозы шуыса, милемлы сельсоветын ужасьёс ивортӥзы. Малызэ ӧз вералэ. Соосын ӵош лыктӥзы Пуӵоысь кык пиос: Яшин Ефим но Федотов Дима. Линейкаысен ини соос ваньмес паймытӥзы. Офицеръёс Ефим сярысь ӟеч кылъёс веразы, приказ лыдӟизы но гадяз Мужество орден бырттӥзы. Зол - азямы улэп герой сылэ! Ефимез ваньмыз кизэ кутылыса ӟечкылазы, нош милям со сярысь тросгес тодэммы потыса, классамы ӧтим. - Ефим Васильевич, тӥ асьтэос-а чечняе мыныны малпады? - Ӧй. Служить кари Костромаын. Ваньмыз умой вал. Но доре бертыса, мар карыны ӧй вала: гуртын йӧназ уж но, уждун но ӧй вал. Городысь но уж ӧй шедьты. Армиын служить карыкум, мылкыды вал прапорщикъёсыз дасян школае мыныны. Со малпанме быдэстон вылысь мынӥ военкоматэ, ыстӥзы Дагестанэ. Отысен ини 1999-тӥ арын октябре Чечняе мынон вылысь контракт гожтӥ. Сюри зенитной дивизионэ. Но отын кема ӧй улы, пехотаын адямиос уг тырмо вал, соин ик отчы куриськи. - Кышкыт ӧй вал-а нырысь отчы вуэмды бере? - Кышкытгес ик. Угось Чечняе пыреммы бере ик ыбылӥськон кутскиз, нош мыным автомат но ӧз на сётэ вал. Соин ик окопын пуконо луи. - Ку нырысьсэ зэмос оже пыриськиды? - Грозный дорын вань гурезё интыос. Огзэ вырйылзэс чечен боевикъёслэн азьветлӥсьлэн нимыныз нималлязы. Тӥни со вырйылэз басьтоно вал. Отчы асьмелэнъёс азьвылгес сизьым муртэ кельтӥллям ни вылэм. Но таяз учыре ваньмыз чакламъя луиз - вырйылэз басьтӥм, одӥг адямимес но ыштытэк. Отысен тӥни шимес суредэз адӟи - музъеме согем асьме разведчикъёсты шедьтӥм. Чеченъёс соосты туж сантэмаллям. Тӥни сыӵеез адӟыса, юзырес луэ - тонэ но котькуд минутэ озьы карыны быгатозы. Со бӧрсьы боевикъёслэсь мозмытӥм на одӥг бадӟым больницаез. Кыкетӥзэ ӧм быгатэ, трос калыкмес ыштӥм ке но. Сӧсырмиз взводмылэн командирез но. - Ма понна орден сётӥзы? - Вырйылэз ӝог но ыштонъёстэк басьтэммы понна. - Грозный городэз адӟид-а? - Ханкала палтӥ пырим Грозные. Заводъёсыз, училищеез (13 номеро ПТУ-эз) мозмытӥм. Отын но солдатъёс быризы. - Кыӵе бен улэ чечен калык? - Коркаоссы асьмелэн кадь ӧвӧл: улыно-вылыноесь, кирпичлэсь. Коркаос вискын ог куинь метръем кирпичлэсь лэсьтэм заборъёс, укно синъёссы стекло-пластиклэсь. Корка куашкамын ке, со вӧзын кирпич ваемын ини. Ку лэсьтӥськемзэс адӟыны уг луы. Боевикъёсыз но адӟыса вуттоно ӧвӧл, шуак олокытысь ыбылӥськыны кутско. Частной секторез басьтыку, солдатъёс уката быризы. Ротаысь котькуд ож бере кызез-куамынэз быре. Боевикъёс интыез умой тодо, соосты кырмыны шуг, пазьгиськыса куинь-ньыль кузя "ужало". - Тужгес но секыт дыръёсыд сярысь вера вал. - Куинь пол котыртэме шедьылӥ. Одӥг пол дас куинь мукет солдатъёсын боевой уже мынӥм. Грозныйысь куашкам кварталын вал со. Огпалтӥз боевикъёс ыбыло, нош мукет палтӥз - асьме батальонысь солдатъёс. Асьме батальонэн кусып ӧвӧл, соин ик ыбыло. Кӧня пол рация пыр техника кури, мыным я связь алама шуо, я эшшо маке. Вить час котыртэмын улӥм, пал пыд йылын сылоно луиз, вырӟыны дӥсьтытэк. "Русский Ваня, сдавайся!" - кесясько боевикъёс, аллах акбарзэс дугдылытэк тодазы ваё. Кыксэ эшъёсме виизы. Одӥгез Пермьысь вал. - Трос верало но гожъяло отысь мурӝолъёс сярысь. - Грозныйын соос туж бадӟымесь. Шӧдӥське: кемалась войналы дасяськиллям. Эмъюмзы туж трос. Ваньмыз кунгож сьӧрысь. Операция но отын ик лэсьтыны луоно. Тросаз боеприпасъёс кыллё. - Кыӵе вал бертон сюресэд? - Сюресэ каньыл ик ӧй вал. Грозныйысен бертыны куриськеммы бере, пыӵалмес октӥзы, справка сётӥзы, собере одӥг село доры нуыса кельтӥзы. Проездной но ӧз сётэ. Матысь станция дорозь пыдын мынӥмы, отысен поездэ пуксим. Уксёмы ӧй вал бере, трос шуг-секытъёсын пумиським, багаж отсекын но бертоно луиз. Дӥськут сьӧд, ӝуамын. Толэзьёсын мисьтӥськытэк ветлы ай. Мисьтӥськем гинэ ӧвӧл, кытӥяз ву юыны но ӧз шедьы. Ымнырез миськыны быгатӥськод ке, со туж бадӟым шумпотон ини. - Нош мар сиылӥды? - Походной кухня луымтэ дыръя кӧс паймес сиылӥм. Шумпотылӥм, эстӥськыны ке луылӥз, соку пыдкутчанмес куасьтыны быгатылӥм. - Выльысь мынынын мылкыдды ӧвӧл ни-а? - Нокин но отчы мыноно медаз луы. Прапорщик луон сярысь малпанэ но пыраклы тӧлӟиз. Вераськизы Бадӟым Сибы школаысь 9-тӥ классын дышетскисьёс, дышетӥсьсы - О. Михайлова. Нылкышноосты ӟечкылалоз кырӟась 6-тӥ мартэ Удмурт кун филармонилэн юртаз ортчоз Удмурт Элькунысь сӥё-дано артистлэн Геннадий Ганьковлэн концертэз. Со сӥземын луоз Нылкышноослэн нуналзылы. Та ӝытэ чузъяськозы Геннадий Николаевичлэн тужгес чебер но тужгес жингрес кырӟанъёсыз. Удмурт Элькунысь сӥё-дано артистэн Геннадий Ганьковен ӵош калыкез шулдыртозы эстрадая "Лулгур" ансамбльысь кырӟасьёс Надежда Уткина, Ирина Габитова, Иван Григорьевых, маскарчи Анатолий Григорьев, Владимир Соловьёв, пинал кырӟась Сергей Галкин, "Чулпон" ритм-балет. Концерт кутскоз ӝыт куать часын. Билетъёс вузасько филармонилэн кассаяз. Дас аръем сюрес Валлян Ижевскысь "Аксион" культура дворецын ортчиз Удмурт Республикаысь ӟуч культурая огазеяськонлэн кенешез. Со сӥземын вал огазеяськонлэн 10 ар тырмонэзлы. Люкаськемъёс азьын кызьы ужамзы сярысь доклад лэсьтӥз обществолэн тӧроез, Кун Кенешлэн депутатэз Михаил Кокорин. Со пусйиз, общество пыд йылаз йыг-йыг сылэ ни шуыса. Огазеяськонэз юбилееныз ӟечкылаз Удмурт Республикалэн Президентэз Александр Волков, огазеяськонлэн ужаз мылысь-кыдысь пыриськемъёсты: Граховоысь Надежда Савинаез, Уваысь Галина Трефиловаез, Удмурт университетысь профессорез искусствоведэз Евгений Шумиловез Данъян грамотаосын пусйиз. П. Скобелев. АРХИВЫСЬ МАТЕРИАЛЪЁСЪЯ Удмуртия ХХ дауре 1979-тӥ ар 1979-тӥ арлэн кутсконаз лыдъязы быдэс Союзысь вань калыкез. 17-тӥ январьлы Совето Союзын улэ вал 262,4 миллион адями. Удмуртиын - 1494 сюрс, со пӧлысь 976 сюрсэз (65 %) - городын но 518 сюрсэз (35 %) гуртын. Но гурт калык тросэн кошкылӥз городъёсы. Национальностья лыдпусъёс таӵе вал: ӟучъёс - 58,3 %, удмуртъёс - 32,1 %, бигеръёс - 6,6 %. 36 процентлэсь тросэз (548,8 сюрсэз) улӥзы Ижевскын. Берло кызь ар ӵоже город калык кык пол йылӥз. Со герӟаськемын вал обороная промышленностез уката азинтэмен. 4-тӥ мартэ СССР-ысь Вылӥ Кенеше быръёнъёс ортчизы, Удмуртиысь бырйисьёс куараоссэс огкылысь сётӥзы КПСС-лэн ЦК-езлэн Генеральной секретарезлы Леонид Ильич Брежневлы. Быръёнъёсы пыриськизы котьку сямен ик 99,9 процентэз бырйисьёс. Удмуртилэсь быръемын вал 11 депутат, соос пӧлын тодмо конструктор Михаил Тимофеевич Калашников. Феврале митингъёсын ужаса улӥсьёсмы каргазы Китайлэсь социализм лэсьтӥсь Вьетнам вылэ урдскемзэ. Декабре Удмуртия нош ик огкылысь дурбасьтыны кутскиз Афганистанлы. Нош 26-тӥ�27- тӥ декабре асьмелэн пичигес войскомы та странае пыриз, коммунизм лэсьтон мылкыдын кивалтыны малпась властьлы юрттон вылысь. Но юрттэт ӧз пӧрмы, со понна Афганистанын кылдӥз граждан ож, асьме солдатъёс отын 10 ар ӵоже ожмаськизы. Та "юрттэммы" асьмелэсь сюрсъёсын пиосмес быдтӥз, сӧсыртӥз, экономикамес лябӟытӥз. Но Удмуртия азьло сямен ик ӟеч тыршиз. 1970-тӥ арен ӵошатыса, промышленной вузъёс поттон 2,2 поллы будӥз. "Ижмашлэн" конвейерысьтыз васькиз 100 сюрсэтӥез "Иж- Планета" мотоцикл. Феврале Камбаркаысь машина лэсьтӥсьёс Вьетнаме келязы быдэс партия тепловозъёс. СССР-лэн ВДНХ-яз Удмуртиысь возьматэмын вал: Воткинск ГЭС-ын трансформаторъёсты выль сямен сӥятон амал, Сюмси ёросысь Сюрек леспромхозын писпу куаръёслэсь пудо сиён дасян цехлэн макетэз, выльдэм станокъёс но мукетыз. ВДНХ-ысь ваизы кык азвесь но вить бронза медаль. Но Удмуртиысь дас вить предприятиос ас азязы пуктэм ужпумъёссэс ӧз быдэстэ. Умой тыршизы нянь будэтӥсьёс, кунлы келямын 246 сюрс тонна нянь (планлэсь 20 сюрс тонналы вылтӥ). Ижевскын куартолэзе усьтӥськиз кардиологияя центр. Аэропорт тросэнгес самолётъёсты кутыны ӧдъяз, солы сётэмын вал вылӥ категория. Толшоре ик Ижевске лобало ни вал СССР-лэн куамын тямыс городъёсысьтыз самолётъёс. Феврале Ижевскысь нырысетӥ зодчийлы С.Е.Дудинлы вордскемез дырысен 200 ар тырмиз, та юбилей пусъемын научной конференциен. Сӥзьыл Глазовысь В.Г.Короленко нимо кун пединститут пусйиз аслэсьтыз 40 арес тырмонзэ. 1979-тӥ арозь институт дасяз тямыс сюрс дышетӥсьёсты, "РСФСР-лэн но УАССР-лэн сӥё-дано дышетӥсьсы" дано ним сётэмын ни вал куамынэзлы выпускникезлы. Толсуре художниклы П.В.Ёлкинлы СССР-ысь художествоя Академилэн дипломез сётэмын. Спортъя ялан азьпалан ветлӥз Галина Кулакова. Биатлонын чемпион луиз Сергей Журавлёв. Е.УШАКОВА, Удмурт Республикаысь ЦДНИ-ысь отделлэн начальникез. СССР-ысь Вылӥ Кенеше быръёнъёс дыръя Ижевскысь Индустриальной ёросысь быръёнъёсъя Юбилейной участокын. ЭКОНОМИКА Балезиноос ужзэс выльдо Фоторепортаж Балезиноысь литейно-механической завод сярысь берло дыре тодмантэм воштӥськиз, али но син шорын ялан выльдӥське, уката чеберске. Предприятие 50 арлэсь кема поттэ ни калыклы, коммунальникъёслы, нянь пыжисьёслы кулэ вузъёс. Но берло дыре усьтэм амалэн ужась огазеяськон шӧдскымон паськытатӥз лэсьтоно вузъёссэ. Табере со поттэ автомашина ёзъёс, тылпу кысон тӥрлыкъёс но музон. Ваньмыз со вылӥ ӟечлыкен кошке. Предприятилэн усто но огсыр ужамез шӧдӥське производствое вуэм бере ик. Котькытын чылкыт, ӝикыт, номыр мултэсэз ӧвӧл. Адямиос ас интыосазы мылысь-кыдысь тыршо. Тани коллектив данъяське кортъя модельщикен Виталий Дмитриевен. Со - кибашлы адями, татын 30 ар пала ужа ни. Солы самой вылӥ, 6-тӥ разряд, сётэмын. Гажало сое ӵош ужась эшъёсыз. - Мон заводэн гогыеным кадь думиськемын ни, - серем пыр шуэ Виталий. - Мукет интые выжон сярысь малпан йырам но уг пыралля. Завод сюдэ-вордэ, улон инты пуктыны юрттэ. Берло аръёсы умой уждун басьтӥськом. Кызьы калык шуэ, ӟечысь ӟечсэ уг утчало. Бен, таӵе ужасьёсын завод арысь аре выль азинсконъёс басьтэ. Озьы ке но, нимысьтыз пусъем потэ на формовщикез Николай Перевозчиковез. Адями лулысь-сюлмысь тырше, оскем ужзэ вить чиньызэ кадь ӟеч тодэ. Востэм сямо воргорон дырыныз лыдъяськытэк ужа, кулэ дыръяз уин но, шутэтскон нуналъёсы но заводэ лыктоз. Огазеяськонын вань ужъёс радызъя мыно. Умой пуктэмын лыдъян-чотан. Бухгалтеръёс одӥг лыдпусэз но уз суралэ. Ас удыссэ тужгес но валаса нуэ Альфия Касимова. Бадӟым опытэн бухгалтер ваньмызлы юрттэ, одӥг юанлы но валэктон сётытэк уз кельты. Вераны кулэ, предприятие уката ик азинскиз но рынокын ас интызэ шедьтӥз огазеяськонэ выль кивалтӥсь Николай Князев лыктэм бере. Куашкан калэ вуэм заводэз со быдэс коллективен ӵош йыг-йыг пыд йылаз пуктӥз, выль ужан амалъёс пыӵатӥз. Табере со шаерамы одӥгез азьмынӥсь но умой ужась предприятие луиз. Нош миым валтӥсь директорлэн воштӥсез Александр Чайников Ижевскысь татчы ужаны лыктӥз. Со но троссэ вера, урод азе визьмо адями ноку уз интыяськы. Кивалтӥсьёс куспазы одӥг кыл ӝог шедьтӥзы. Со нош ик бадӟым оскон сётэ заводлэн азьланезлы, выль вормонъёс басьтонэзлы. Огазеяськон уго туэ но усто ужа, басьяськисьёсыз вузъёссэ шумпотыса басьто. Тӥни соин ик кык толэзьлы планзэ но мултэсэн быдэстӥз ни. Ватсам потэ на, 300-лэсь кӧня ке ятыр ужасьёссы пӧлысь ӝыныезлэсь уноез кышномуртъёс луо. Соин ик 8- тӥ Мартэн, нылкышноослэн шулдыр тулыс праздникенызы ӟечкыласа, ваньмызлы, быдэс коллективлы сӥзиськом юн тазалык но шудо-буро улон! Г. Романова. Модельщик Виталий Дмитриев. Бухгалтер Альфия Касимова. Формовщик Николай Перевозчиков. Директорлэн воштӥсез Александр Чайников. Туспуктэмъёсыз В.Беломорскихлэн. "Дакта-2000" - милицилы кузьым Таяз учыре Удмурт Республикаысь Югдурез утёнъя министерствое журналистъёсты ӧтчазы бадӟым шумпотонэн валче. Милициын ужасьёс басьтӥзы чылкак туала аппаратура - "Дакта-2000" дактилоскоп. Соин туж вакчи дыр куспын йыртэмасьлэсь кин луэмзэ тодыны луэ чиньы пытьыосызъя. Кызьы пусйиз та пумиськонын Югдурез утёнъя министр, милициысь генерал-лейтенант Владимир Щербаков, та аппаратураен шараямын ни 10 сюрс йыруж. Тани Машиностроитель посёлокын адями виисьлэсь кин луэмзэ тодыны "визьмо" машиналы 2 час гинэ кулэ луиз. Выль приборен тодматсконэ ветлӥз Удмурт Республикалэн Президентэз Александр Волков но. Правоосты утён удысын ужасьёслы юрттӥм но азьланяз но юрттом, - шуиз со, озьы ик тыршом уждунъёсты но будэтыны. Дактилоскоп басьтыны коньдон висъямын республикалэн бюджетысьтыз. Озьы ик уксёен юрттӥз "Удмуртторф" акционер огазеяськонлэн генеральной директорез Анатолий Марченко. Министр солы сётӥз "Милициысь отличник" пус. "Дакта-2000" прибор лэсьтэмын Минскысь одӥгаз заводын. Отысь вуэм специалистлы Виктор Ревинскийлы сётӥзы асьме дорын лэсьтэм дуно кузьым. Беларусь Республикаысь куно оскытӥз, Удмуртиысь милициен кусыпъёсмес азьланяз но юнматом шуыса. Зэмзэ но табере милицилы ужаны трослы капчигес луоз, йыружъёс данаклы ӝоггес шараяськозы. Н. Байтеряков. Архивысь материалъёсъя Удмуртия ЪЪ дауре 1980-тӥ ар Йылпумъяськиз 16-тӥ пятилетка. Ваньбур поттон йылӥз 51,6 процентлы. Нош Воткинскысь машина поттон завод, "Удмуртэнерго" управление, Можгаысь машинаослы ёзъёс поттон завод, Ижевскысь подшипник поттон завод вить аръем планъёссэс тырмытӥзы 1979-тӥ арын ик. 29 процентэз продукция потӥз вылӥ ӟечлыкен. 19-тӥ апреле коммунистической субботнике пыриськиз 825 сюрс адями. Со сӥземын вал Ленинлэн вордскемез дырысен 110 ар тырмонлы. Та нуналэ 4 миллион манетлы вуз поттэмын. Гурт хозяйствоын выжизы бригада амалэн ужанэ. Калык хозяйствоын со вакытэ тыршиз 10970 бригада. СССР-лэн ВДНХ-ез мотоциклъёсты ӟеч бичамез понна, умоен пусйиз слесарез В. Швейкинэз, промышленностьлы роботъёс кылдытэмез понна Воткинскысь машина потон заводысь слесарьлэсь бригадирзэс В. Доронинэз СССР-лэн кун премиез сётэмын Воткинск мотозаводысь токарьлы Л. С. Лыткинлы. Улон-вылон умояз. Городын улӥсьёс пӧлысь 80 процентэз нимаз квартираосын улӥзы. Шоро-куспо уждун ӝутскиз 172,7 манетозь. 1980-тӥ арын ужаз 134 эмъяськонни, амбулаториослэн поликлиникаослэн лыдзы вуиз 194-ёзь, медпунктъёслэн - 177-озь. Удмуртиысь вузъёсын 46 специалистъёслы дышетӥзы, ужаз 36 профтехучилище. 1-тӥ сентябре ӧсъёссэ усьтӥз 859 шор ёзо школа. Ижевскын усьтӥськиз изобразительной искусствоя музей, Удмурт кун университетын - Кам но Вятка шуръёс куспын улэм вашкалаосмылэн музейзы. Ужаны кутскиз Ижевскысь пионеръёслэн юртсы. Усьтӥськиз Песочной урамысь выль телецентр. Куартолэзе пусйизы П. И. Чайковскийлы 140 ар тырмонэз. Соин валче Воткинскын ортчиз нырысетӥез нылпи фестиваль. 19-тӥ июле Москваын усьтӥськизы ЪЪИИ Олимпия шудонъёс. Отчы спортивной пистолетъёс поттыса келяз Ижевскысь механикая завод. Пистолетъёслы СССР-лэн ВДНХ-ез бадӟым дунъет сётӥз. Олимпия шудонъёсы лыктэмъёс азьын концерт возьматӥз асьмелэн кырӟанъя но эктонъя "Италмас" ансамбльмы. Лэйк-Плесидын ортчем ЪИИИ тол Олимпиадаын Галина Кулакова куать кужмо спортсменъёс пӧлы пыриз, нош Красноярскын ортчем куасъёс вылын ӵошатсконъёс дыръя, 20 иськем бызьылыса, 35-тӥ зарни медальзэ басьтӥз. Е. Ушакова, Удмурт Республикаысь ЦДНИ-лэн отделэзлэн начальникез. Ижевскысь ужаса улӥсьёс 1 Май праздник демонстрациын. УАССР-ысь кырӟанъя но эктонъя "Италмас" ансамбль Москваын ортчем ЪЪИИ Олимпия шудонъёсын пӧсьтолэзе концерт возьматэ. Удмурт Республикаысь Егитъёсын ужанъя кун комитетлэн тӧроез сярысь Удмурт Республикалэн Президентэзлэн УКАЗЭЗ Удмурт Республикалэн Конституциезлэн 92-тӥ ёзэтысьтыз 7-тӥ люкетъя пуктӥсько: Лещинский Андрей Сергеевичез юнматоно Удмурт Республикаысь Егитъёсын ужанъя кун комитетлы тӧрое Удмурт Республикалэн Президентэз ужзэ быдэсъян вакытлы. Та указ кужыме пыре сое гожтэм нуналысен. Удмурт Республикалэн Президентэз А.А.ВОЛКОВ Ижевск город, 2001-тӥ арын 19-тӥ феврале. � 24. Лещинский Андрей Сергеевич Вордскиз 1959-тӥ арын 24-тӥ октябре Ижевск городын. Ӟуч. Дышетскемез вылӥ. 1982-тӥ арын йылпумъяз Удмурт кун университетэз, 1998-тӥ арын - Россия Федерацилэн Президентэз бордысь кун службая академиез "история" но "кунэн но интыосын кивалтон" специальностья. 1977-1982 - Удмурт кун университетын студент, Ижевск город; 1982-1986 - 317-тӥ отделын инженер-технолог, "Ижмаш" ПО-лэн 254 номеро цехаз вошъясь мастер; 1986 - 22 номеро шор ёзо школаын историлы дышетӥсь, Ижевск город; 1986-1988 - Ижевскысь гурт удысъя но сиён-юонъя институтын КПСС-лэн историезъя но научной коммунизмъя кафедралэн ассистентэз; 1988-1989 - Удмурт АССР-ысь валтӥсь кун архивлэн директорез; 1989-1990 - Ижевскысь гурт удысъя но сиён-юонъя институтын КПСС-лэн историезъя но научной коммунизмъя кафедралэн ассистентэз; 1990-1993 - 44 номеро гуманитарной лицейлэн директорезлэн воштӥсез; 1993-1995 - 86 номеро гуманитарно-юридической лицейлэн директорезлэн воштӥсез, Ижевск город; 1995-1997 - Удмурт Республикаысь Егитъёсын ужанъя кун комитетын отделэн кивалтӥсь; 1997-2001 - Удмурт Республикаысь Егитъёсын ужанъя кун комитетлэн тӧроезлэн нырысетӥ воштӥсез. *** Удмурт Республикалэн Президентэз А.А.Волков указъёсыныз юнматӥз выль должностьёс. Юнматэмын: Гальцин Андрей Иванович - Удмурт Республикалэн Президентэзлэн но Правительстволэн Администрацизылэн кивалтӥсезлы воштӥсе - Общественно-политической иворъёсъя управленилы кивалтӥсе; Богомольный Евгений Исаакович, акциосын "Удмуртнефть" огазеяськонлэн кивалтӥсез - Удмурт Республикалэн Президентэзлы му вӧй ужпумъёсъя штатэ пыртымтэ кенешчие. ГУРТ УДЫС Академиын дышето - гуртэ уг ӧтё Гурт удысъя но сиён-юонъя министерстволэн паськытатэм коллегиез эскериз кадръёсты дасян но техникаез тупатъян ужпумъёсты. Солэн ужаз пыриськизы Ижысь гурт удысъя кун академиысь специалистъёс но ёросъёсысь гурт удысъя управлениослэн кивалтӥсьёссы. Тулыс матэктэмъя, асьме вузъёсын но кысык вакыт кутске: дышетсконзэс йылпумъясь студентъёсты кытчы ке но уже интыяно. Гурт удысъя кун академиын 70 процентэз, нош техникумъёсын 80 процентэз гуртъёсысь вуэм егитъёс дышетско. Огласянь со умой кадь, тужгес но али, куке гуртъёсын специалистъёс пумен уг ни тырмо. Но ёросъёсъя ке учконо, академиын дышетскись студентъёслэн лыдзы туж пӧртэм. Кылсярысь, отын тужгес но трос егитъёс дышетско Завьял (237 адями), Игра (214 адями), Можга (111 адями), Воткинск (190 адями) ёросъёсысь. Нош Яр ёросысь 18 адями сяна ӧвӧл, Дэбес ёросысь - 27, со пӧлысь одӥг мурт но уг дышетскы зоотехнике. Озьы ик туж ӧжыт дышетскисьёс Кез, Шаркан, Сюмси ёросъёсысь. Малы озьы луэ? Асьсэ ёроссылы специалистъёсты дасян сярысь туж ляб сюлмасько гурт хозяйствоя управлениослэн кивалтӥсьёссы. Та ужез ас ёросъёсазы соос радъяны кулэ ук. Али тани академиын мынэ ини витетӥ курсын дышетскись студентъёсты уже интыян. Хозяйствозы сярысь сюлмаськись предъёс специалистъёсты бырйыны асьсэос татчы лыкто. Студентъёслы ивортоз кыӵе улон условиос гуртазы, вань-а нылпи садзы, школазы, кӧня уждун тупатозы специалистлы. Но малы ке таӵе амалэз тросэз кивалтӥсьёс уже уг куто. Котькуд аре академие дышетскыны куто на нимысьтыз тупатэм (целевой) наборъя. Сыӵе егитъёсты дышетон понна Правительство юри коньдон висъя. Кылем дышетскон арын отчы 225 адями бичамын, котькуд ёросысь быдэн укмыс адями, огъя вераса, вань специальностьёслы котькуд ёросысь быдэн одӥг адямиез дышетыны учкемын. Но та ужын но шекъёсыз вань. Дунтэк дышетскыны сётэм луонлыкез туж ляб уже куто уй пал ёросъёсын, соос мырдэм укмыс адями шедьтӥзы. Со дыре ик лымшор ёросъёсын дышетскыны мылкыд карисьёс котьку но тросгес луо. Пусйытэк уг луы таӵе умойтэм учырез: таӵе амалэн дышетонлэсь куддыръя палэнэ кылё зэмос визьмо но дышетскыса гуртазы ик берытскыны дась луись егитъёс. Министерстволэн коллегияз вераськон мынӥз гуртысь специалистъёслэсь тодон-валанзэс ӝутон сярысь но. Сыӵе дышетсконэз академиысь специалистъёс арлы быдэ радъяло ини, ёросъёсы потыса, угось гуртын улӥсьёслы городын дышетскон дуно йӧтэ. Академилэн ректорез В.В.Фокин шуиз: - Студентъёслэн дышетскеменызы нокин уг тунсыкъяськы. Соос нокинлы кулэ но ӧвӧл кадь. Тодам ваисько, кызьы азьло аръёсы дышетскисьёссэс эскерыны ялан вуылӥзы Пургаысь, Можгаысь землячествоослэн кивалтӥсьёссы. Ӧз вунэтылэ соосты колхоз предъёс но. Али кызьы луыса кошке, ньылетӥ курсысь студентъёс тодон-валанзэс эскерыны пӧртэм хозяйствоосы ӝутскем мылкыдын мыно, нош берто воксё но мылкыдтэк. Соосты отын уг но возьмало, бӧрысь доразы уже ӧтьыны но уг малпало. Эшшо паймиськомы на, малы егитъёс гуртэ уг берытско. - Мон валасько, - шуиз ректор, - студентъёсты выль техникалы дышетоно. Кылем арын академие куриськом вал одӥг коть "Доминатор". Ӧз сётэ. Нош кытын меда табере со комбайнъёс? Кадръёсты дасян но соослы гуртын ужаны луонлыкъёс кылдытон пумысен ас малпанъёссэс веразы ёросъёсысь гурт удысъя управлениослэн кивалтӥсьёссы но. Ува ёросысь кивалтӥсь Н.Власов уно ӵектонъёс сётӥз егит специалистъёслы но хозяйствоен кивалтӥсьёслы выль сямен уждун тырон сярысь. Вылӥ уждун тупатытэк нокинэ, пе, гуртэ уд кыскы. Со сяна, мукет сямен, пе, радъяно квартиралы ссудаос сётонэз. Ссуда басьтыны учкем куронъёс гуртын улӥсьёслы воксё уг тупало, уждунзы ичи, соин ик ссуда басьтӥсьлы кыл кутӥсь (поручитель) луыны кулэ юридической лицо, мукет сямен вераса - хозяйство. Соин ик туэ но, пе, ссудаос басьтыны быгатӥзы коньдоно муртъёс гинэ, Ува посёлокын улӥсьёс. Огъя верано ке, кадръёсъя ужпумез министерство арысь аре эскере. Но чутрак воштонъёс ортчытытэк, та удысын югдурез уд тупаты, дыр. Верам лыдпусъёс мӧзмыт мылкыд гинэ кельто. Кылсярысь, берло дыре гуртоослэн лыдзы 30 сюрс адямилы кулэсмем, нош хозяйствоосын кивалтӥсьёслэн лыдзы эшшо 44 адямилы синэм. Гурт удысъя но сиён-юонъя министерство куд-ог осконъёссэ герӟа "Кадръёс" программаен. Соя 112 ёзлы гурт хозяйствоен кивалтӥсьлы юрттэт сётэмын ни. Но со юрттэт тырмыт ӧвӧл ай. Гурт улонлы котыр ласянь саклык висъятэк, номыр уз воштӥськы. Т. Банникова. АДӞЕМ КАР! Экзаменъёсме сётъяме бере, бертӥ дорам. Гуртын ӝытъёсы номыр карыны луоз шуыса, сьӧрам ньыль-вить книга кутӥ. Шонерзэ вераса, соос пӧлысь одӥгзэ но ӧй лыдӟы. Угось нырысь нуналаз ик тодмоосы монэ клубе васькытӥзы. Урамысен ик бум-бум! кылӥське. Кыӵе ке концертлы дасясько, дыр, малпай. Озьы вылымтэ. Быдэс зал тыр пиналъёс, егитъёс но мӧйыос резь выро аэробикаен! Кык час тэтчало ни, жадёнэз уг валало. Эх, малпасько, нош мон паймыса улӥсько, мар каром шутэтскон нуналъёсы. Чаляк соос радэ султӥ. Дышымтэ вылысь соку ик вылтӥм ву васькыны ӧдъяз. Нош занятие ортчем бере рос-прос юалляськыны малпай. - Нырысь аэробикаен кружок школаын дышетскисьёслы гинэ ортчытъясько вал, - шуэ Елена Петровна Никитина. - Но вазиськизы гуртысь мукет егитъёс но, арлыдоос но. Ваньзы мыло-кыдо пырисько. Котькуд ӝыт телевизор дурын пукем сокем ик умой ӧвӧл, акыльтыса но вуттоно. Нош татын эктэм, тэтчам бере мугорлы но, мылкыдлы но капчи луэ. Тазэ шӧдӥ мон ас вылам но. Со сяна, моньяос жадёнэз веськато... Ӧвӧл, сурен ӧвӧл, мукет сямен, шудонэн. Сцена вылын спектакль пукто. Быгатонлыкъёссэс возьматъяллязы ни Выль ар праздникын но, Татьянаослэн нуналазы но... Тани али нош дасясько. Южтолэзе соос нюръяськозы коллективзы калык ним басьтон понна. Тӥни озьы, вуж моньяослэн мӧзмыны дырзы ик ӧвӧл. Эшшо баскетбол шудыны, куасэн бызьылыны но вуттӥсько на. Адӟем каре. О.Никитина, Удмурт университетын дышетскись. Кизилиос ӝужало Городъёсын, районъёсын ортчыло "Ӝужась кизилиос" конкурс. Отчы пырисько пиналъёс но 24 аресозь егитъёс. Йылпумъянъёс лэсьтэмын луоз март толэзе. Вормисьёс кырӟалозы 17 мартэ. Ижевскысь "Аксион" культура дворецын радъям гала- концертын. Ужрадэз радъяло Культурая министерство, Егитъёсын ужанъя кун комитет но "Шунды" дэменлык. Витаминэз парсьпи но яратэ Пичи Пургалась ветлаборатория 1994-тӥ арысен поттэ ни кызь вить пумо пудо эмъюм, сиён вӧзы ватсэтъёс, витаминъёс. Лабораторилэн кивалтӥсез Андрей Кузнецов верамъя, басьяськисьёссы уг бырыло, эмъюм юаса вуо нимаз пудо возисьёс но, хозяйствоос но. Соиз валамон - матысез дунтэм но, оскымон но. Татысь ог пыремен шедьтыны луэ скаллы но, парсьлы но, куреглы но эмъюм. П. Кузнецов. Кӧня йӧл кыскемын 21-тӥ февральлы Ёросъёс одӥг скаллэсь, килограммен 2001-тӥ арын 2000-тӥ арын 1. Вавож 9,4 8,8 2. Ува 8,9 8,5 3. Воткинск 8,5 7,4 4. Игра 8,5 7,9 5. Можга 8,4 8,5 6. Балезино 8,0 7,3 7. Завьял 8,0 8,3 8. Алнаш 7,8 7,4 9. Дэбес 7,4 6,0 10. Пичи Пурга 7,4 6,8 11. Грах 7,1 6,0 12. Глазов 6,8 6,1 13. Шаркан 6,7 5,9 14. Як.-Бодья 6,4 5,4 15. Камбарка 5,9 4,9 16. Кез 5,8 5,4 17. Юкаменск 5,2 4,6 18. Кизнер 4,9 4,5 19. Каракулино 4,9 3,9 20. Сарапул 4,9 4,5 21. Селта 4,5 4,4 22. Сюмси 3,4 3,2 23. Кияса 3,4 3,4 24. Яр 3,3 3,2 25. Красногорск 3,0 3,1 Юбилей Тыпы кыпы пушкын "кый" кылле Россия Федерациысь Кышкытлыклэсь утиськонъя службалэн Удмурт Республикая управлениезлы 80 ар тырме. Толон Ижевскысь "Металлург" культура дворецын" отын ужасьёсты ӟечкылазы республикаысьтымы Вылӥ кивалтӥсьёс. Нош юбилей азьын журналистъёслэн луонлыксы вал зэмос шпион ужлэн огпалыныз тодматскыны. Россия Федерациысь ФСБ-лэн историко-демонстрационной залаз ужасьёс (Москва) Ижевске туж тунсыко арбериос ваиллям. Тодӥськоды луоз, "ТАСС уполномочен заявить" кинофильмез. Полковник Игорь Ширляев оскытэ, отысь учыръёс зэмос улонысь басьтэмын шуыса (Юлиан Семёнов ужам КГБ-лэн документъёсызъя). Кылсярысь, картинаын возьматӥське, кызьы агент Трианон кулэ интые "ивор лушкась" эгыр ватэ. "Эгыр" улонын зэмзэ но вылэм, бӧрысь асьмелэнъёс сое шараязы. Со выллем лушкем приборъёсты дасоосын шараяло ӟуч разведчикъёс. Кылсярысь, супырӟем лӥял выжы, басмалэсь вурем вуж сумка, кӧс вай сэрпалтэмын вылэм асьме ворсам объектъёс котыре Америкаысь шпионъёсын. Соос вӧзтӥ ортчыку, тодэ но уз лыкты урод сумкаез ӝутыны, нош сумка кал пушкын вурӟем чиньы йыл быдӟа гинэ прибор вань лушкем иворез гожъяны быгатэ вылэм. Нош шпионлэсь туала фотоаппаратсэ шедьтыны туж шуг. Кӧня ке ар талэсь азьло ик соос "фломастерен", "зажигалкаен" тус пуктылӥзы ни. Зэм, ваньмыз сыӵе шедьтонтэм ӧвӧл. Охотской зарезьысь асьме разведчикъёс куать тоннаем "камбалаез" шараязы. Отчы куатьтон магнитофон интыямын вылэм. Син азе ик пуктыны кышкыт, мар быдӟа ыштон адӟысал государствомы, американецъёс отысь иворез басьтыса ке вуттысалзы. Та выллем учыръёс туж трос вераны луысал, дыр. Кыӵе бен странаос тужгес тунсыкъясько Россиен? Америка сяна, Англия, Германия, Швеция, Израиль, Китай, Корея, Зимбабве гинэ но. Валамон, соос асьсэ коже гинэ уг ужало. Юртто асьмелэнъёс: политикъёс, валтӥсь конструкторъёс, асьсэос разведчикъёс... Берло кык ар ӵоже гинэ ӝегатэмын укмыстон тямыс агент. Тросэз соос пӧлысь наркотик вӧлмытӥсьёс, теракт дасясьёс. Государстволэсь тайназэ утёнын пӧртэм странаосысь разведчикъёс котькудӥз ас понназы лушкем, кылтэм-ымтэм ужало ке, наркобизнесэн уртче нюръясько. Озьы берло дыре Швециысь но Россиысь асьмеды кышкытлыклэсь утисьёс тонна пала наркотик шедьтӥзы странаямы вуись сӥль консерваысь но сок банкаосысь. Лыдӟисьёслы тунсыко, дыр - вань-а шпионъёс шаерамы? Вань. Кылем арын гинэ Кышкытлыклэсь утиськонъя Удмурт управлениын ужасьёсын ӝегатэмын сизьым мурт. Но та адямиос иворез келяса ӧз вуттэ. З. Рябинина. Ужрад Россиын коньдон вань - эскерыны шуг Удмуртие люкаськылӥзы РосСия Федерациысь эскеронъя ёзъёслэн специалистъёссы. Ужрадлэн ужаз 18 улос пыриськиз. Со сяна, отчы ӧтемын вал Кун Кенешысь депутатъёс, республикаысьтымы ас коже кивалтон, вытъёсъя но коньдон ужпумъёсъя ёзъёслэн кивалтӥсьёссы. Кенешонэ люкаськемъёс тодматскизы Россиысь Лыдъян палаталэн но Удмуртиысь Эскеронъя кун комитетлэн ужаменызы. Вераны кулэ, эскеронъя удыс Россиын куать ар талэсь азьло гинэ кылдытэмын. Соин ик та ужын валамтэос трос гинэ на ай. Куд-ог эскерон ужпумъёсъя огкылэ вуон понна ик радъямын вал та кенешонлэн-семинарлэн ужез. Удмуртилэн Президентэз А.Волков Эскеронъя кун комитетлэсь ужамзэ умоен пусйиз, вить ар ӵоже, пе, уно тырмымтэос шараямын. Бюджетысь коньдон ӵем дыръя кулэезъя уг кутӥськы, палэнэ кошке. Сое чакласа возён - кун комитетлэн огез валтӥсь ужез улэ. Кун Кенешлэн Тӧроезлэн И.Семёновлэн верамезъя, кылем арын Эскеронъя кун комитетлэн тыршеменыз куамын вить миллион манет тус-тас карем коньдон шараямын вал. Но та комитетлы эшшо но пайдаёгес ужаны люкето законъёслэн лябзы. Кылсярысь, котьку но шуг-секытэн эскероно луэ акциосын огазеяськем предприятиослэсь ужамзэс. Кужмо законъёс ӧвӧлэн, предприятиос пӧртэм налог тыронъёслэсь палэнскыны туртто. Соин ик коньдонэз котыр ласянь чакланъя быдэс Россиын одӥг зол система юнматоно, шуиз И.Семёнов. Россилэн Лыдъян палатаысьтыз аудиторъёс таӵе шуг-секытъёс сярысь веразы. Музъемлы налог азьло интыысь налог тыронэ кошкылӥз, нош табере бюджетъя законын верамын, со, пе, федеральной казначействое мынын кулэ. ТатАрстанын тросэз налогъёс но акцизъёс республиказылэн бюджетаз кылё. Со федеральной законъёсты тӥям луэ. Сыӵе янгышез тупатон бордын кема ужано луоз на. Тросэз выт тырисьёс налог бичанъя ёзъёслэсь ватскыса уло, учётэ султытэк ужало. Розыскъя ёзъёслэн со бордын ужамзы уг поты, милям со ужмы ӧвӧл, шуо. Россилэн бюджетэз туж трос ыштонъёс адӟе улэп коньдонлэн бергамез сэрен, угось отысь нокыӵе налогъёс уг басьтӥсько. Нокыӵе странаын но сомында улэп коньдон адямиос киын уг возиськы. Налогъя кодексын ӧвӧл лэземын выт тыронэз сиён-юонэн сётыны. Но та курон но уг быдэсъяськы. Нош кыӵе бюджетэ мынынЫ кулэ административной штрафъёс понна бичам коньдон? Татын но али нокыӵе радыз ӧвӧл, куд-ог улосъёсын со коньдонэз федеральной бюджетэ келяло, нош куд-огаз асьсэ улосазы кельто. Удмурт Республикаысь Эскеронъя кун комитетлэн кивалтӥсез А.Кузнецов пусйиз, кенешонлэн-семинарлэн пайдаез азьланяз уж вылын шӧдӥськыны кулэ шуыса. Т.Банникова. Сьӧлыкъёслэсь куштӥськон дыр Атайлэн, Пилэн, Святой Духлэн нимыз понна! Гажано агай-вынъёс, сузэръёс! 26-тӥ февральысен кутскиз Быдӟым Визь - кӧс утён дыр. Со кыстӥськоз 15-тӥ апрелёзь, Быдӟымнуналозь (Пасхаозь). Сӥль, йӧл, вӧй, курег пуз уг ни сиё та виын. Средае но пятницае сяна, кӧс вӧйын сиён дасяны луэ. Визь дыр - со сиён ласянь гинэ чакласькон ӧвӧл, со - вань урод ужъёслэсь куштӥськон дыр. Мар ярантэм Инмар азьын, со ик ярантэм адямиос азьын но: керетон, жугиськон, юон, калгон, пӧяськон, лушкаськон. Кинлы соос кельшо? Нокинлы но уг. Инмар азьын соос ярантэм макеос, сьӧлыко ужъёс шуыса гожтӥсько. Тупаса, ог-огдэ яратыса, гажаса, юрттӥськыса улон - кинлы со уг кельшы? Котькинлы но кельше. Ачиз Дунне Кутӥсь Инмар яратыса улыны косӥз. Яратон, тупаса улон бордын возисько но дунне ачиз улонмы. Адямиез синазькыль карись тушмон - шайтан - дугдылытэк люкетэ, канжаськытэ, уськытэ, визез туга, уката ик утиськон сюрес вылэ султыны кутскись, Инмар пала кариськись муртлы. Но тушмонлэсь кышканы кулэ ӧвӧл, Инмар асьмелы утиськон понна Кирос сётӥз. Со азьын сьӧд кужымъёс сылыны уг чидало. Гажано агай-вынъёс, сузэръёс! Быдӟым визьлэн (кӧс утёнлэн) шор вадесаз, (туэ 18-тӥ мартэ, Православной черкъёсын ортче Кирослы йыбырттон арня. Та дыре черкъёсын лыдӟо котькуд адямилэн аслаз киросэз но сое нуон сюресэз сярысь Ӟеч Иворысь мадёнэз. Тани мар шуэ та пумысен Ачиз Утисьмы Иисус Христос: "Кин Мон сьӧры мыныны турттэ, аслэсьтыз ачиз мед куштӥськоз, кироссэ мед басьтоз но Мон бӧрсьы мед мыноз; уго кинлэн лулзэ утемез потэ, со сое ыштоз, нош кин Мон понна, Евангелия понна лулзэ ыштоз - со лулзэ утёз" (Марк 8:34-45). Мар шуэм со - аслэсьтыд ачид куштӥськон? Святой Черк дышетэмъя, со - асьме пушкын пукись шайтанлэсь куштӥськон. Уго со кескич маке асьмелэн сюлмамы пуке но вань урод сямъёсты, вань урод ужъёсты лэсьтэ. Со бордын - вылтӥяськон, ачимъяськон, ас мылпотэмъя капчиен улон, юон, калгон-юмшан, чеберъяськон, керетыса-даллашыса, жугиськыса, лушкаськыса улон, кулэтэм макеослы йыбыртъян но пумтэм трос мукет сьӧлык лэсьтон. Но Кузё-Инмармы уродлы сётӥськыны уг косы, со косэ киросмес басьтыны но Ас сьӧраз мыныны. Мар шуэм со - киросэз басьтон? Кирос - гадьын нуллон кирос сяна, со - курадӟытыса вием но кулонэз вормыса, султэм Христос Инмармылэсь чидамзэ адӟем карон. Асьмелы но чидаса, шумпотыса, Инмарлы тау карыса улоно, пӧртэм куректон-кайгуос, висёнъёс, ёрмыса-ӝикаса, ултӥяса улонъёс дорамы вуыку. Уго соос сётэмын ӧвӧл сьӧлыкъёсмы понна гинэ ӧвӧл, ӵем дыръя соос сётэмын асьмеды визьман, сузян-чылкытатон, Инмар пала берыктон но шайтанлэсь ужъёссэ быдэсъянлэсь куштӥськон понна. Асьмелэн музъем вылын улонмы вужер кадь гинэ: туннэ вань, ӵуказе ӧвӧл ни. Со вакчи дырлы гинэ сётэм даурмес Инмарлы яраны тыршыса улэм интые, Солы пумитъяськыса ортчытӥськомы. Макем синмаськиськомы, вожъяськиськомы, кӧтмы но пӧсь луэ, кытӥ-отӥ йырмы но кур туала арын улыны быгатӥсьёслы - узыр кивалтӥсьёслы, коммерсантъёслы, банкиръёслы, данлык пӧлын уясь артистъёслы - ваньмызлы, кинъёс кӧй-вӧй пӧлын майбыр уло: сиё-юо мае мылзы потэ, кунояськыса кунгож сьӧръёстӥ ветло; кинъёслэн вань иномаркаоссы, улыно-вылыноесь коркаоссы, - котьмарзы вань, Инмарлы осконзы сянаез. Сыӵе муртъёс сярысь уго Кузё-Инмармы шуиз: "Лулызлы изъян лэсьтыса, быдэс дуннеез аслыз басьтӥз ке, кыӵе пайдаез луоз адямилы" (Марк 8:36). Инмарлэсь улон сётӥсь Кироссэ кулэтэм карись узыръёсын артэ сыло кураськисьёс но начар улӥсьёс - Инмарлэсь Кироссэ кулэ уг ке каро, Инмарлэн курон- косонъёсызъя уг ке уло: лушкасько, юо, ужез уг ярато, урод кылъёсын верасько. Соос пӧлын ик адӟисько интеллигентъёс-атеистъёс но. Таосыз асьсэос но уг оско, мукет муртъёсты но дышето Инмартэк улыны. Коммунистъёс кивалтон аръёсы таӵеос калык пӧлтӥ атеистизмъя лекциос лыдӟыса ветло вал. Сьӧлыко улонлэсь куштӥськон понна, асьмелы ӵемгес учкыны кулэ Христослэн киросэз шоры. Уго Иисус Христос асьмелэн сьӧлыкъёсмы понна кирос бордын кулӥз, но со понна Инмысь Атаймес куриз дунне вылысь адямиослэсь сьӧлыкъёссэс куштыны. Кулонэз-быронэз Со вормиз но асьмелы Ин Эксэйлыке пырон ӧсэз усьтӥз, утиськонэ нуись сюресэз возьматӥз. Солэн Киросэз пыр асьмеос утиськон басьтӥмы. Тодэлэ вал: туала дунне вылын кӧня пумо, кыӵе но пӧртэм лек, сьӧд кужымъёс Утиськон Кирослы пумит султэмын. Сектантъёс, тужгес но шайтанлы йыбыртъясьёс (сатанистъёс) - киросэз сокем синазькыль каро, сое тӥяло, корало, йыруллань карыса суредало но улаз шайтанлэсь 666 лыдпуссэ пукто. Таӵе суредэз адӟиды ке, тодэ: та шаерын но (гуртын-а, городын-а) шайтанлы йыбыртъясьёслэн группазы кылдэмын ини шуыса. Та шимес, кышкыт адямиос сярысь ӵем кылоно ини радио, телевидение пыр, лыдӟоно газетъёсысь, нимысьтыз брошюраосысь. Уго али дыре соос туж трос йылыны кутскизы но улонмылы бадӟым кышкытлык кылдыто: трос адямиосты курбон сётӥзы ни. Но та сярысь берлогес, нимысьтыз вераськомы на). Гажано агай-вынъёс, сузэръёс! Христослэн Киросэз - со христиан калыклэн утиськонэз, йыромемъёслы югыт сётӥсь, ожмаськонъёс дыръя - вормон ваись, дуннеез юнматӥсь, чылкытатӥсь, висёнъёсты эмъясь, периосты ӵушкась. Кузё-Инмармы Иисус Христос асьмеды утён понна туж секыт курадӟонэз, сантэманэз чидаз. Со понна, лулмес утён понна, йыркурмес кысыны, азьвыл лэсьтэм сьӧлыкъёсмылэсь куштӥськыны кужым ум шедьтэ-а? Али Визь дыр, ӵапак тупась дыр - вӧсяськыса, лулын-мугорын чылкыт улыса, кӧс утьыса, черке мыныса сьӧлыкъёслэсь ӧбкельыса куштӥськон дыр, причастие басьтыса, дун-чылкыт луон дыр. Инмарлэн ӟеч эрикеныз визяны (кӧс утьыны) чик но секыт ӧвӧл, оскисьёс понна та мугорлэн, сюлэмлэн, луллэн праздник дырыз. Зэм ик - Аминь. Курадӟытыса вием Ермоген Инмарлэн престол азяз служба нуыны Ермоген кутскиз Казаньысен. Волга но Кам котырын улӥсь калыкъёсты - бигеръёсты, поръёсты, чувашъёсты, удмуртъёсты, мордваосты - язычникъёсты Иисус Христослэн утиськон ваись дышетонэныз югдытӥз. Визьмо, кивалтыны быгатӥсь архиереез ӝоген Москвае басьтӥзы но быдэс Ӟуч кунлы патриархе бырйизы. Ермоген патриарх черкъёсын кивалтон аръёсы Ӟуч кунын туж огыр-бугыр вал. Историкъёс со дырез ӟуч сямен смутное время шуо. 1608-тӥ арын Москваез котыртӥз Лжедмитрий, 1610-тӥ арын Москвае пыризы полякъёс-католикъёс. Ӟуч престолэ Владиславез пуктыса, Православие интые католичествоез юнматыны малпало вал соос. Улон ас ӧрысьтыз потӥз, соин сэрен трос вир кисьтӥськиз. Огшоры калык - зэмос оскисьёс, вордскем шаерзэс яратӥсьёс, Ермоген патриарх котыре биниськизы. Уго со уй но нунал, кышканэз чик тодытэк, Православиез утён понна нюръяськиз. Тушмонъёсты, ӟуч калыксэс вузась бояръёсты шарае поттылӥз, визьмаськыны ӧтьылӥз. Патриархез уксёен но байлыкен вормыны, асьсэ пала карыны тыршизы Ӟуч кунлэн тушмонъёсыз. Патриарх гожтэтэн вазиськиз ӟуч калыклы, тушмонлы пумит нюръяськыны ӧтьыса. Ӝоген Ермогенэз Чудов монастырьлэн кезьыт мурӝолаз пытсазы но сиён-юон сётытэк курадӟытыса виизы. Со вал 1612-тӥ арын 17-тӥ феврале, туала календарья - 2-тӥ мартэ. Курадӟытыса вием святой Ермоген патриархез сӥё-дано карыса та нуналэ Православной черкъёсын вӧсясько. Черкогуртын черк вылэм Шарканъёс трос аръёс ӵоже улӥзы черктэк. Нош 1837-тӥ арын 31-тӥ мартэ Синод гожтэм пуктон-косонэзъя (указэзъя), Сарапул уездэ пырись Шаркан (Лоллез) удмурт гуртэ черк усьтыны. 1839-тӥ арын пу черкын служба кутскиз. Та приходэ пыризы Шаркан котырысь гуртъёс: Корчумвай, Гуӵин, Байбек, Казес, Билиб, Быги, Тубоншур, Вукотло, Луовыр, Ляльшур но мукет. Вӧсяськись калык коньдон люкаса, 1867-тӥ арын из черк пуктӥзы. Туспуктон шоры учке ай - макем со чебер, бордаз синмез, мылкыдэз кыскись! 1918-тӥ арын 12-тӥ апреле Шарканын усьтӥськиз удмурт нылъёслэн монастырьзы Со пумысен тазьы гожтэмын вал Св. Синодлэн пуктон-косоназ: "вотяцко-иноческое общежитие с целью просветительства инородческого населения". Монастырьлы юртъерзэ сётӥз Л. Д. Родигин - татын улӥсь ӟуч воргорон, нош духовиксы луиз удмурт калыклэн сӥё-дано пиез протоиерей Иоанн Васильев. Черкын служба нуэм сяна, о. Иоанн научной ужъёс, кылбуръёс, веросъёс гожъяз. Осконлы пумит нюръяськонъя, шимес вакытэ - 1939-тӥ арын, чеберлэсь но чебер Инмар юртэз пуштытӥзы, выжыозяз турказы-тарказы. Туспуктэм лэсьтэмын ЪЪ даурлэн кутсконаз Март толэзе сӥё-дано нуналъёс. 4-тӥ март, арня нунал: кутске Православной осконэз данъян арня (Торжество Православия) 18-тӥ март, арнян нунал: кутске Кирослы йыбырттон арня (Крестопоклонная) 22-тӥ март, четверг: 320-тӥ арын Армениысь Севастия улосын Христос Инмарлы оскемзы понна курадӟытыса вием 40 воинэз сӥё-дано карыса вӧсяськон нунал. 24-тӥ март, суббота: кулэм ӵыжы-выжыосмес, та дуннеысь кошкем христиан калыкез буре ваён нунал. 31-тӥ март, суббота: Ваньмызлэсь Дун-Чылкыт Инмар Анаез данъян нунал (Акафист чирдон нунал) Кыл кутытон кыл пӧсьтытон ӧвӧл 2000-тӥ арын Удмурт Республикаысь управление ужасьёсыз пӧлын конкурс ялӥз вал. Отрядэн кивалтӥсьёс пӧлысь тужгес лыдъямын Сергей Гаврюшов, Сарапулысь 5 номеро испраивтельной колониысь отрядлэн кивалтӥсез. И. Артемьева. Чур бугор Кытын Россилэн шорыз? Кӧня ке ар талэсь азьло Новосибирскын странамылэсь столицазэ, Москваез, мукет интые воштон сярысь конференция ортчиз. Отын тодосчиос со пумысен пӧртэм ӵектонъёссэс веразы. Зэм, со уж вылын ноку уз быдэсмы. Но география ласянь ке учконо, зэмзэ но кытын меда Россилэн шорыз? Котькуд улослэн вань аслаз шорыз. Европалэн шорыз Украинаын, Закарпатьеысь Рахов город дорын. Тисса шур дуре пуктэмын излэсь юбо. Мрамор пул вылэ латин текстэн гожтэмын: "Европалэн шорыз. Шонер но весяклы быръем инты. 1887-тӥ ар". Азилэн шорыз интыяськемын Кызыл городлы матысь тайгаын. Татын но куке-соку юбо сылӥз. Нош совето вакытэ Тувалэн шоркараз Кызылын кылдӥз дано инты - куинь сэрего стелаен бетонлэсь шар, отчы гожтэмын: "Азилэн шорыз". Россилэн географияя центръёсыз куинь - Россия империлэн, Совето Союзлэн но Россия Федерацилэн. Россия империлэн шорызлэсь координатъёссэ лыдъяз быдӟым ӟуч химик Дмитрий Менделеев. Пиеныз Иванэн, Петербург университетысь математикая факультетысь студентэн, соос кулэ формула поттӥзы. 1906-тӥ арын, кулэмезлэсь одӥг ар азьлогес, со научной ужаз воштонъёс пыртӥз: "Быдэс Россилэн шорыз интыяськемын Туруханск городлэн лымшор палазгес... Со пустыняё интыос..." Менделеев лыдъялляз: страналэсь экономиказэ азинтонлы юртто куинь центръёс. ЪИЪ но ЪЪ дауръёс вискын нырысетӥез промышленностья центр интыяськемын вал Петербург но Москва вискын, кыкетӥез, калыклэн лыдызъя - Тамбов вӧзын, куинетӥез, улосвыллэн быдӟалаезъя - Сибирьын, Красноярск улосын, Туруханск вӧзын. Азьвыл Россия империлэн шораз буре ваён нырысетӥез пус пуктэмын вал 1983-тӥ арын 24-тӥ августэ, быдӟым учёнойлэн вордскемез дырысен 150 ар тырмонэзлы дасяськонэн валче. Сое шимес тайгае ке пуктоно, нокин адӟись уз луы. Соин ик сое адскымон интые поттӥзы - Таз шурлэн бурпал ярдураз. Татчы вертолётъёсын поръян гумыослэсь лэсьтэм ньыль метръем колонна ваизы. Вылӥяз интыямын туйлэсь корабль - Санкт-Петербурглэн пусэз. Отын улӥз но ужаз вал Дмитрий Менделеев. Дано тодосчилэсь ужзэ азьланьтыны мылкыд кариз техника наукаосъя доктор, али академик Петр Бакут. Таиз утчано кариськиз СССР-лэсь шорзэ. 1974-тӥ арын гужем СССР-лэн шораз Тюмень улосэ, Обь но Енисей вискы, кошкиз экспедиция. Соин кивалтӥсь луиз "Турист" журналлэн валтӥсь редакторезлэн воштӥсез Николай Тарасов. Экспедицилы вуоно вал Таз шурлэн кутскон интыяз. Совето Союзлэн шораз соос вуизы вертолётчикъёслэн юрттэменызы сэрен гинэ. Соос машинаоссэс сыръясь нюре туж секытэн пуктӥзы. Та интыын али ке но огдырлы пуктэм пус сылэ. Петр Бакутлэн формулаезъя Россия Федерацилэсь географияя шорзэ лыдъяны секыт ӧй вал. Солэн координатъёсыз - шунды ӝужан долготая 94 градус 15 минут но уй пал широтая 66 градус 25 минут. Со интыяськемын Красноярск улосын, Эвенкия автономия округын Тура посёлоклы 410 иськемын, Улӥ Тунгуска шурлэн ярдураз. Россилэн шорыз отын, кытын Виви тыысен кутске сыӵе нимын ик шур. Лӧбык Сандралэн "ишанэз" Маскарчиос Нылкышноослэн озьы ни: кык кузя луо ке, отын кутске вераськон, нош кытын куинь кузя - отын быдэс кенеш. Та ласянь пӧртэм ӧвӧл Уӵыгуртын но. Шорульчаысь вуэн колонка дорын вазь ӵукнаосы ик ӵаш! вазе ни. Ма сярысь гинэ уг верасько-ченгешо нылкышноос ву нуон сьӧркын, кинлэсь гинэ лысьӧмзэ уг мисько-сэсто. Нылкышноослэсь ӵаш-ш! каремзэс кылзыса, Иворчи Микта одӥг пол ӧз чида, йыркурен сялскыса, пу лопатка пасьта сьӧд тушсэ маялтӥз но нылкышноос шоры мыжыксэ урдӥз. - Нош ик-а кинлэсь ке лысьӧмзэ гылтӥськоды-миськиськоды ни, албасты басьтонъёс, тьфу! Ма, нёжто ымды но уг жадьылы, вазь ӵукнаысен бер ӝытозь олома сярысь но супыльтыса!? - Нош тынад мар ужед ай милям вераськон куспамы пыриськыны? Мын, кытчы вырӟид, вамышты! Зульым Маринаед ке пӧртэм луысал. Куд-ог дыръя, шуо, трос супыльтонтӥяз эстэм гурзэ но вунэтэ. Нылкышноос тазьы ӵаш-маш вырон сямен, шок-пуль шокаса, доразы вуиз Лӧбык Сандра. - Осто, инмар, осто, инмар! Оломае но адӟод, ява! - колонка вӧзысь скамья вылэ ведра-карнанъёссэ жинграк куштӥз Сандра. Ма, юнмезэ Лӧбык шуиллямтэ сое. Нылкышноос паймыса учко Сандра шоры: - Я бен, Лӧбык, вера ни ук, мар луиз. Онтонэд-а, мар-а нош ик кышкатӥз, жугиз? Яке мукет пиритча луиз? - Кыӵе-мар пиритча, пе, луоз! Пиритчалэсь но кышкыт, ява! Одӥг кылын вераса - ишан! - Ма, кыӵе сыӵе ишанэз адӟид? - чабкисько, абдрало нылкышноос. - Я, ужпум озьы вал: Исьтёпанэ ужысь бертон азьын мунчо ӧйась эсты. Гылтӥськыны ву уз тырмы шуыса, берпуметӥзэ ву ваи мунчо азе но копак пайми: малы-о, пӧй, мунчоям тыл ӝуа, мон ӧй ӝуатъя кадь ук? Табере вуэн ведраосме но мунчое пыртыны уг ни дӥсьтӥськы, ява! Котьма мед луоз, пӧй, кирос поныса, ӧсэз шарак усьтӥ! Ачим кышкаменым пыд йылысьтым усисько ни вал, яватэ! Учкисько но - полатьын жальыр пыласькыса пуке - кин шуоды?.. - Я, кин бен, вера ук ӝоггес, - кышноос чидатэк витё Сандралэсь верамзэ. - Кин, кин? Кин-о луоз, Мунчо Марья сяна! Уд тодӥське-а солэсь сямзэ? - Курмем веникен берпалаз тышкаса улля вал сое мунчоысьтыд! - гор-гор серекъяло нылкышноос. Соослэсь серекъямзэс кылыса, уже мынӥсьёс но дугдыса кылзо, мар, пе, та нылкышноослэн вазь ӵукна ик мылкыдзы лӧптӥз ай? - Ачид но Марьяен ӵош пырид ни, вылды, мунчояд? - нылкышноос нош но нош лӧпкыто Сандраез. - Нош со Мунчо Марья Исьтёпанэныд ӵош ке пырсал мунчое? - куд-огез нылкышноос исам но каро Сандраез. - Пыро, пе, мон со албасты кышноен! Нош Исьтёпанэн ӵош луысал ке, мон со Марьядылэсь ыж гон кадь тугаськем пурысь йырсиоссэ оген-оген ишкысал, ява! Эшшо ке, албасты кышно, йырсиоссэ мынам мунчоям миськыса улэ на. Курмача! Таӵе кылъёсты кылыса, люкаськем калык гор! серекъя. - Я, мар бен, отын тумошоез? Мон дорын гинэ со мунчое юатэк-вератэк уг пыры, вылды, ук! Кылем арняе Петька Оги дорын юатэк-вератэк пыласькем, - йыркуръяське Сандра. - Сандра шонер вера, - со борды итӥськиз Петька Оги. - Талэсь азьло со Марья Федул Оринаос дорын пыре вылэм мунчое. Умой коть, Орина Марьялэсь ымнырзэ суэн зыраса уллям. - Ма, со Марья асьмелэн мунчоосамы юатэк-вератэк пыроз-пыласькоз, нош солэн пиез, Митька, Ижын пуэн вузкарыса ветлоз, калыкез алдалоз. Таиз но, мумиз сямен, эшъёсыз дорын гинэ мунчоын пыре-пылаське, - бугыръясько нылкышноос. - Ох, кескичесь ик со Кырныж выжыос. Юнме озьы шуиллямтэ соосты. Митьказы но пересьёссы выжые, дыр, - верасько нылкышноос. - Ма, быдэс выжызы соослэн сыӵе, - паськыт тушсэ маялляса сылэ Иворчи Микта. - Ма, тон, Микта, со Марьялы матын, ульча пумынгес улкод бере, вера вал, мыдъят, кинлэн ке мунчояз юатэк-вератэк пырид на ке, тэкитэн яке суэн зыраса лэзёзы, - серекъяло люкаськемъёс. - Ма, монэ кабзэ-а, мар-а шузи кожаськоды? - йырыз кур луиз Иворчи Микталэн. - Сокем кулэ ке, вералэ асьтэос! Нош мынам мунчоям мерскиз ке, лызэ-сьӧмзэ сэсто-посо! - Ма, со Марья ведь учконтэм ӧвӧл, малы лызэ-сьӧмзэ посод, оло, вешалод но? Уть сарвылъёсыз но солэн токыль-токылесь, - Миктаез серекъяло люкаськемъёс. - Кулэез вал со Мунчо Марьяды, - нылкышноос дорысь йыркурен палэнскиз Микта. Нылкышноос серекъязы-серекъязы но, эшшо кинлэсь ке лысьӧмзэ гылъяса-миськыса гурт палазы дыртӥзы. Озьы ини та гуртын: котькыӵе учыръёсты тодод-кылод колонка дорын. Евгений Николаев. Якшур-Бодья ёрос, Селычка посёлок. Чур бугор Мае возьмато американ долларысь гожъёс? С буква - штат (стате) кыллэн нырысетӥ букваез, сое люко кык гожъёс - англи букваысь - У - унитед (огазеям). УС - Огазеям Штатъёс. пус кутӥське ЪИЪ даурлэн шорвадесысеныз. Чур бугор Мафия уг кӧлы Туннэ нуналлы Россиын радъям йыруж лэсьтӥсьёс киулазы возё 40 процентозь нимаз вузкарисьёслэсь но 60 процентсэ кунлэсь предприятиоссэ, озьы ик 50-80 процентсэ банкъёсты. Та лыдпусъёсын тодматӥз Кун Думаысь кышкытлыклэсь утиськонъя комитетлэн кивалтӥсезлэн воштӥсез Александр Куликов. Депутатлэн верамезъя, коррупция кунлы араз 15 миллиард манетлы изъян вае, нош кырсь ужен выронэ кыскемын 9 миллион пала адями. Серемес верос Марым, эшъёс... Арез йылпумъянлы сӥзем кенеше калык клуб тыр люкаськиз. Бускельёсыз пӧлын пуке Макар Петрович но - лапег мугоро, паськыт пельпумо, чильк-вальк кисьтаськись сьӧд йырсиё воргорон. Вылаз дӥсямын сьӧд костюм, тӧдьы дэрем. Собраниын кӧня ке мурт вераськем бере, Макарез но трибуна сьӧры потыны косӥзы. Ю-нянь октонын вормемед сярысь, пе, мадь. Нош солэн калык азьын ноку но вераськемез ӧвӧл. Тани Макар трибуна сьӧрын пельпумъёссэ ӝутъяса сылэ. - Марым, эшъёс, бускельёс... Мон ведь, марым... Ма, асьтэос тодӥськоды ук, гуртын монэ кызьы шуо: одӥгез Ыж йыр, мукетыз Вермут. Мыным та кылъёс егитысен ик арыкман люгы сямен лякиськизы. Малпалоды, озьы шуэмзылы йыры кур луэ? Чик но уг. Бускельёсыз гурак! серекто. - Мар со ыж? - вранзэ азинтэ Макар. - Ыж со ыж. Асьмелы со сӥль сётэ. Нош кыӵе шашлык пӧрме солэсь, кылдэ ик нюлод. Куэз но дуно маке. Солэсь шуба, тулуп вуро. Нош гонэз? Сапег гындо, пӧзь кертто. Ваньзэ вераса быдтод шат ыжлэсь кулэ луэмзэ? - Макар Петрович, тон милемлы кызьы ужамед сярысь вера, "ыждэ" бӧрысь мадёд, - куспетӥ кариз собраниез нуись. - Эн дырты, ваньзэ радызъя верало. Кытысь кылдӥзы та нимъёсы шуиськоды-а? Уд тодӥське. Мынам но куке егит дыры вал. Нош чебересь, мусоесь нылъёсын юмшаны ӧз кылды... Макар бам вылысьтыз нюлам шапыкъёссэ саес пумыныз ӵушиз но веранзэ азьланьтӥз. - Чебересь нылъёсын пумиськыкум, кылтэм-ымтэм луылӥ. Со понна ик ыж йыр ним лякизы. Воже ӧз поты, ачим янгыш, туж востэм вал уга, ыж сямен кышкаса улӥ. Огпол ӝытазе Лазар Сандӥен пумиським. Инмын одӥг пилем но ӧвӧл, кизилиос гинэ шорамы ворекъяса сямен учко. Сандӥе сюлэмез портӥсь кылъёс вера но вера, нош аслам кылы быгыльмиз. Гуньдӥ. Бак адями сямен бордаз вамышъясько. Сандӥ магазинын вузкаре вал. Пӧртэм мугъёс шедьтыса, лавкае вуылыны кутски. Вузъёссэ радъясько, тырттэм вина ящикъёссэ поттылӥсько. Ну, малпасько, яратэме сярысь ваньзэ кисьто ни. Азьло ик кылъёс но бырйыса дасяй. Нош Сандӥез адӟисько гинэ, вань верано кылъёсы сурасько, йырысь тӧлӟе. Огпол магазинэ быдэс машина "Вермут" вина ваизы. Ӵапак бен отчы-а кемдыны кулэ вал мыным. Сандӥлы юрттытэк кошкыны умой ӧз поты. Огзэ бӧрсьы мукетсэ вина ящикъёсты пыртылӥсько. Умой-умой эскерись ӧвӧл. Кык бутылказэ кутӥ но шофёрлэн кабинаяз ватӥ. - Тон ящикъёс сярысь эн вера, ужамед пумысен иворты, - ӝӧк сьӧрын пукисьёс куро Макарез. - Озьы, эшъёс. Сандӥе лыдъяз но кык бутылкаез уг тырмы. Нош со куспын шофёр но солэн эшез ватэм бутылкаосме бушатӥллям ни. Лушкаськемме Сандӥ валаз, калык азьын ик шуиз: "Ну, Вермут Петрович, потты кисыысьтыд уксёдэ. Ньылонэд кӧс, йырыд кудӟемын. Озьы-а?" Залын пукисьёс гор-р! серекто, нош Макарлэн бам вылтӥз ву шапыкъёс вияло. - Эн дыртэ, бускельёс, веранме быдтӥсько ни. Оло, уд но оске? Вермут нимез но куамын ар пала нуллӥсько ни. Дыши мон со борды, Макар нимме чылкак вунэтӥ кадь. Со учыр ик монэ курытсэ веръянлэсь но эмъяз. Ымам но уг тыриськы ни. Тӥни озьы, со бордысь ик пото, дыр, ужын азинсконъёс но. М. Мосов. Улон виштыос Мычем кие коньдон ачиз пыре Мычем киын сылӥсь яке азязы буш посудаен пукись алама дӥсяськем адямиосты вокзалъёсын, черк азьёсын тросгес пумиталод. Гуртъёсын соос уг адӟисько ке, городын сыӵе костаськисьёс тырмо. "Сётэлэ вал няньлы", - кыстӥсько тӥ пала киос. Дортӥзы ортчыса, уноез мынӥсь-ветлӥсьёс копейкаен ке но юрттыны тыршо. Сюлэмды вырӟиз ке, кураськисьёс тау карозы, инмар тыныд юрттоз, шуозы. Йырдэс урдыса ке кошкиды, тодэлэ: кушем кылъёс бӧрсяды одно ик кылӥськозы. Паймоно кадь, юисьёсыз кураськисьёсыз но проказаен висисьёсыз Россиын котьку сьӧлыктэм адямиосын лыдъяллязы. Озьы учконо ке, укыр трос кылчинъёс пӧламы кылдӥзы ни. Куд-огеныз соосын вераськон понна вуи Александр Невский нимо собор доры. Ӧс азёзь кыстӥськись пагӟетъёс вылын чурен-чурен пуко кышномуртъёс но пиосмуртъёс. Вуж курень шубаен, бездэм пурысь кышетэн дӥсяськемез доры юалляськыны дугдэме бере, мукетъёсыз кышкатскыса лобатӥзы. - Кытысь тӥ? Кызьы татчы вуиды? Юанъёсме кылытэк сямен, пересь лоп-лоп гинэ каре синъёсыныз. Вить манетме поттыса возьматӥ, юанъёсылы валэктон сётӥды ке, шуисько, кузьмало. Кылыз сэраз. Пенсие потытозяз кышномуртлы сизьым ар кылемын. Но со отчыозь улыны уг малпа, куло, шуэ. Чиган нылмурт улонзэ озьы суредам. Азьло улэм Пичи Пурга ёросысь одӥгаз гуртын. Анай-атайёсыз кулэм бере, ӵыжы- выжыосыз юртъерысь улляллям. Кураськисьлэн вань кык нылпиез. Уло интернатын. Соос возьдасько анайзылэн черк вӧзын кураськыса пукемезлэсь. - Ма карод на, керпотӥсько ке но, кызьы мукет сямен улом? - шуэ ачиз. Лякиськем ымдуръёссэ кышномурт мырдэм усья, кудӟем синъёсыз жӧломемын. - Малы юиськоды? - Кынмисько, соин ӧжытэн оскалтӥсько. Кытын кӧласько-а? Подъездъёсын уг изиськы. Ӧсъёсы йыгаськыса ветлӥсько, куриськисько кӧлыны. Кузёосыз уксё юало, одеколон басьтыны косо. Та кышномурт понна уйлы изён инты мед луоз, вӧзаз юон шедиз на ке, номыр кулэ ӧвӧл ни. Нылпиосыз сярысь со уг ик малпаськы. Ваньзэ кулэзэ тодэме бере пыри черк пушкы. Кӧня ке улыса, мукетыныз кураськисен верасько, малпай. Потӥ. Учкисько, одӥгез пересь тубат вылэ кыӵе ке ӟустари поныса пуксьыны вуэм ни. Матэктӥ. "Кузьымтэк" вераськемез таизлэн но ӧз пот. Юанъёсылы валэктонъёс сётӥды ке, буш уг кельты, шуи. Таизлэн вань вылэм пу коркаез, бакчаез. Гужем черк доры со уг пота - емышъёс, картофка будэтэ. Татын пукем сяна, калыкез уже интыянъя службаын учётын сылэ. Отысь коньдон басьтэ. Таиз но кышномурт супыляк кудӟемын вал, валэктӥз, кынмемен йырин, пе. Син улаз лыз-вож пуктэмъёсыз вань. Картэ жугиз, шуэ. Со ик татчы уксёлы ветлыны косэ. - Кытчы кариськоды люкам коньдондэс? - Няньлы быдтӥськом. - Нош ӟенелик уд-а басьяське? Йырыныз шона. - Ум. Верамезлы оскем улэ аналски. - Ма, ми сярысь гожъянэз? Татчы нуналлы быдэ, интернатысь пегӟыса, нылпиос кураськыны ветло. Уксё бичало но клей зынъяло. Мыным пенсие потытозь кема ӧвӧл ни. Соку коньдонэ тросгес луоз, татын уг пукы. Нош пиналъёсты ма возьма, улонзэс тазьы кутско бере? Веранзэ быдтыса, кышномурт возьмась синмын шорам учкиз. Мазэ валаса, пакетысьтым абрикосэн кутэмнянь поттӥ. Кураськись ымнырзэ кисыртӥз: - Пӧсь но ӧвӧл. Мышкысьтыз сушкаосын, няньёсын, пыжиськемъёсын тыриськемъёссэ поттӥз, мынэсьтымзэ но отчы интыяз. Тау карон но мар тодаз ик ӧвӧл. Черк дорысь вамышъян сяменым ас поннам тышкаськисько: пиналъёсты ултӥям каре. Нош созэ уг вала: со но мукет кураськисьёс пичиослы кырыж сюрес вылэ султон амал возьмато. Чиньы борды чиньы шуккытэк уксё поттонэз адӟыса косод на соосты кортӵог йыганы! Тодо уга, нуналлы быдэ киез мычыса возем понна дас манетысен сю витьтон манетозь уксё кисыяд пыроз. Ма кулэ на? Анай-атайзы ӧвӧлэн, пиналъёслы шонер сюрес нокинлы возьматыны, соин но озьы пӧрме но, дыр. Нош кызьы луоно нылпиоссэс кураськыны косӥсь мумы-бубыосын? Пумиськылэмды ӧвӧл-а уксё курыса магазинъёсын, вокзалъёсын сумкадэс яке кидэс кыскась пиналъёсын? - Дядяй, вай уксёдэ. Няньлы уг тырмы. Пӧлазы, зэмзэ, ӟудӥсьёсыз но вань. Но ӵемысь юись семьяосын нылпиос коньдон кураса ветло. Кураськисьёслэсь армизэс тырмыто на шуныт палъёсысь лыктэмъёс. Соос семьяен- семьяен "уж дуре" потало. Бадӟым городъёсысь ульчаосын чурен-чурен пукыны ярато. Казане вуылыкум синйылтӥ пичи "сьӧд" пияшлэсь кураськемзэ. Дӥськутэн вузкарись рынок дортӥ адямиос уллёен ветло. Пичильтык маке одӥгез, мукетыз борды биниське - сьӧраз бызе, котыртӥз тэтча. Котькудӥз сое жаля, коньдон сётэ. Вож нуныен кияз пукись кышномурт час-час но ӝынылы быдэ пияшлэсь люкам уксёзэ октэ. Нош пияш корт коньдонзэ гинэ сётка, кагазъёссэ штани кисыяз ватка. Кураськыса пукись анайлэн монэн вераськемез ӧз пот, нош ужасез бордам биниськиз: вай но вай уксёдэ. Дас манетэным люкиськоно луиз. Семьялэн ужан амалэз сярысь юалляськоно кариськи артэ солань-талань ветлӥсь милиционерлэсь. - Соос котькуд нуналэ татын пуко, - валэктӥз югдурез утись. Кышномурт - пияшлэн анаез. Адӟиськоды-а, кияз вож нуны - мунё со. Озьы алдасько. Нуналаз пияш сюрс манет пала бича. Анаезлы укыр ик уг куяло коньдон, нош пиез жаляло. Пияшлы куинь-ньыль арес сяна уд сёты. Кин солэсь пӧрмоз - вераны шуг. Одӥгез тодмо: данъяськымон адями со уз луы. Шуг-секытъёс улонамы трос, озьы ке но, вунэтоно ӧвӧл: нылпиос - улонлэн сяськаосыз. Кыӵе емышъёслы соос пӧрмозы, соиз ини асьме бордысь но потоз. Нылпиоссэс кураськыны лэзьясь мумы-бубыос азьланяз пиналъёссылэсь ӟечсэ уз адӟе. Бадӟымъёс жаль уг пото, нылпиослэсь улонзэс сурам-пожамзылы сюлэм вӧсь луэ. Кин тодэ, аръёс ортчыса, Александр Невский нимо собор вӧзын али пукисьёс сямен ик, туала егитъёс сыӵе ик мӧзмыт суредъёс уз кылдытэ меда? О. Кожанова. "Тӥледлы жингырто Нью-Йоркысь" Тодмо удмурт тодосчиез (учёноез) Виктор Туганаевез валлян ӟечкылазы 60 арес тырмеменыз. Ваньзэс азьпалтӥз али Нью-Йорке кошкем тодмоез Лев Гордон. Виктор Васильевичлы телефон пыр со жингыртэм ӵукна 6 часэ. Биология наукаосъя докторлы, "Удмурт Республика" энциклопедия лэсьтонэ уно кужымзэ сётэм профессорлы, уно удмурт но ӟуч книгаослэн авторзылы Удмурт кун университетын уно шуныт кылъёс веразы Кун Кенешлэн Тӧроез Игорь Семенов, Правительстволэн тӧроезлэн воштӥсез Наталья Харина, Ижлэн йырыз Анатолий Салтыков, "Удмурт кенеш" но "Дэмен" огазеяськонъёслэн тӧрооссы Валентин Тубылов но Альберт Разин, Алнаш районысь Советлэн тӧроез Кун Кенешысь депутат Нина Образцова, министерствоосысь, ведомствоосысь, вылӥ дышетон заведениосысь кивалтӥсьёс, книга но газет поттӥсьёс. - Тазьы ушъямдэс кылыса, - шуиз Виктор Туганаев, - огласянь, возьдаськоно, мукет ласянь - ачид шудо но пайдаё адями шуыса оскыны кутсконо. Виктор Васильевич нимысьтыз пусйиз Алнашысь удмурт луэменыз данъяськемзэ. Милям корреспондентэнымы нимаз вераськыкуз шараяз азьланяз быдэстоно ужъёссэ но. Эшъёсыныз ӵош со поттыны малпа Ижлэсь энциклопедизэ, нюлэслэсь энциклопедизэ, дася инмар доры вуэмъёс сярысь книга. А. Петров. УДМУРТ КИЗИЛИОС Галина Никитина: "Сюлэмъя быръем удыс тонэ уз аналты" Шуизы: гожтоно тодмо адями сярысь. Кема малпаськытэк бырйи Галина Аркадьевна Никитинаез. Куке-соку ми соин дышетскимы Удмурт кун университетлэн историяя факультетаз, собере ӵош ужаны кылдӥз "Нылкышно кенешлэн" исполкомаз. Бӧрысь тодӥ на, кыкмы ик одӥг нуналэ, одӥг кизили улын вордӥськеммы шуыса. Туннэ Галина Аркадьевна - история наукаосъя доктор. Ужа Россиысь Наукаосъя академилэн Урал люкетэзлэн Кылъя, литературая но историяя Удмурт институтаз. Мылысь-кыдысь кивалтэ удмурт нылкышноослэн огазеяськонэнызы. Со сяна, со луэ на институтлэн директорезлэн наука ужъёсъя воштӥсез. Солы сётэмын Удмурт Республикаысь наука удысысь сӥё-дано ужась ним. Солэсь улон сярысь мадемзэ кылзыса, таӵе малпанэ вуи: уг, уг быгаты адями ас кужымезлы оскыса гинэ кыӵе ке азинсконъёс басьтыны, вӧзаз улонэтӥ валтӥсь муртъёс ке уг сюро. Со ласянь Галина Аркадьевна - шудо адями. - Семьяысен кутске адямилэн сюресэз. Кыӵе тодэ ваёнъёс со тӥлед кельтӥз? - Вордӥськи Игра ёросысь Мазьги гуртын. Муми колхозын ужалляз, буби - школаын. Пинал дыръёсме туж шуныт мылкыдын гинэ тодам ваисько. Семья кусыпъёсмы туж умоесь вал. Ми, куинь сузэръёс, мон шоретӥез, юн яратӥськом вал атаймес. Вань шумпотонъёсмес, пинал куректонъёсмес нырысь ик солы вераллямы. Сыӵе серемес дыръёс но вал. Шузи-мази вакытам, 5-тӥ�6-тӥ классын дышетскыкум, мукет гуртысь пиослэсь гожтэтъёс вуылыны кутскизы. Атае милесьтым вазьгес гуртэ бертылӥз ке, гожтэтэз, анай кие медаз сюры шуыса, ӝогак ачиз басьтылӥз. Сое куддыръя ӵош ик лыдӟылӥм но. Ваньмыз со умой ӧй вал, дыр, но, атаймес юн гажаса, солы вожмы ноку ӧз потылы. Атаймы ми понна пыраклы эш кылиз. Пичи дырысен туж эшъяськи книгаосын. Мумы-бубыосы алылӥзы но. Туж кельшо вал выжыкылъёс. Атае шуиз, тырмоз ни, пе, выжыкылъёсты гинэ лыдӟыны, бадӟым книгаос борды басьтӥськы. Солэн дэмламезъя библиотекаысь Зоя Космодемьянская сярысь "Повесть о Зое и Шуре" книга басьтӥ. Озьы книгаос пыр кутскиз мӧйыослэн улоназы выжонэ. Собере туж ӵем ветлыны кутски песятаймы доры. Со 25 ар пала "Рассвет" колхозэн кивалтӥз. Доразы туж трос книгаос вал. Соос гуртамы нырысьсэ телевизор басьтӥзы. Быдэ вуымтэ дыръям нырысетӥ бадӟым кайгуэн но пумиськи: 8-тӥ классын, берпуметӥ экзамен сётон азьын, атаймы витьымтэ шорысь кулӥз. Сое яратон кужымме пумен быдэсак песятае борды выжтӥ. 8-тӥ классэз ушъян грамотаен йылпумъяй. - Визьмо нылпиослы дышетӥсьёс дэмлалляло вал 10-тӥ классэз йылпумъяны, собере институтэ пырыны. - Мынам озьы ӧз луы. Атаелэн агай-вынъёсыз (соос трос кузя) валэктӥзы: грамотаен, пе, экзаменъёстэк техникуме пырыны капчигес. Ойдо отчы дасяськы. Ӵектӥзы Сарапулысь радиотехникуме мыныны. Ялан врач луон сярысь малпаськисько ке но вал, мӧйыослы ӧй пумитъяськы. Отметкаосме учкыса, техникумын шуизы: "Кутомы тонэ, но синъёсыд лябесьгес, очки басьтоно". Городэз уг тодӥськы, кызьы, кытысь со очки шуонэз шедьтоно? Документъёсме берлань кутӥ но дорам бертӥ. - Озьыен, очки улон сюрестэс воштӥз? - Витьымтэ шорысь озьы луиз. Бертэме бере, песятае шуиз: "Дасяськы, ӵуказе Можгае мыном". Малы, кытчы мынӥськом - ӧй юа. Кепырай, вылды. Можга педучилищее вуимы. Монэ кырӟаны косӥзы, кылзӥзы но шуизы, тон, пе, училищее кутэмын. Озьы мон отын дышетскыны кутски. Со педучлище мыным сомында сётӥз! Вань дышетӥсьёс анай-атай интыын вал. Татын визьмаськи. Азьланяз филолог но, историк но кариськеме потӥз. Со гинэ ма! Юрист но луысал! Ньылетӥ курсысен дышетӥсьёс учительское ӧтизы. Галя, тӥляд, пе, луонлыкты вань горд диплом басьтыны. Но со понна чистописаниен но лыдӟонэн выльысь экзаменъёс сётоно. Мон соку ӧй малпаськылы, мар со сыӵе горд диплом. Но дышетӥсьёс монэ ялан синйылтыса возиллям, лэся. Вань улытозям соослы тау карисько. Кӧня визь-кенеш соос улонэз валасьтэм муртъёслы сётылӥзы. Училищеысь дышетӥсьёс дэмламъя ик университетэ сюрес усьтӥськиз. Но кыӵе факултетэз быръёно? Туж матысь адямие, песятае, 2-тӥ курсын дышетскыкум улонысь кошкиз. Кинлэсь визь-кенеш куроно? Апае бызьыса Латвиын улэ ни вал. Ӵыжы-выжыосы дэмлазы историяя факультетэз. Тӥни озьы одӥг экзаменме гинэ "витьлы" сётыса, Удмурт кун университетын студент луи. - Татысен наукае вольыт сюрес усьтӥськиз-а? - Огласянь со озьы, вылды. Туж бордаз кыскиз этнография. Нырысетӥ курсысен ик кельшизы Владимир Емельянович Владыкинлэн лекциосыз. Бӧрысь со ик луиз научной ужъёсъя кивалтӥсе. Удмуртъёслэсь сямъёссэс-йылолъёссэс тодон вылысь, гуртъёсы потамы. Диплом уже но этнографиен герӟаськемын. Университетэз озьы ик горд дипломен быдэстӥ. Но наукае вуон сюресме меӵак вольыт уд шуы. Одӥг ар ужано луи Чутыр школаын, ньыль ар - шаерысьтымы музейын. Нош соос вискын вал на бызён, нылпи ваён. Музейын ужакум ини витьымтэ шорысь пумиськи Владимир Емельяновичен, "Галя, одно ик дышетсконо", - шуиз со. Картэным кенешыса, аспирантурае мыноно кариськи таки. Капчиен ӧй пыры. Аръёс но ортчемын вал ини. Англи кыл но вунэмын. Документъёсы но дырыз дыръя аспирантурае вуиллямтэ. Та шуг-секытъёсты вормыны нош ик ӟеч адямиос юрттӥзы, соос пӧлын одӥгез вал Н. П. Павлов. - Нош пичи нылдэс кытчы кариды? - Куинь ар аспирантураын дышетскытозям, нылы сьӧрам вал. Ачим дышетскисько Москваысь университетын, картэ Казахстанысь Байконур космодроме ӵем вуылӥз, отын ракетаослы лобӟон интыос лэсьтылӥз, нылы нылпи садэ ветлӥз. Апае но, анае но нылме доразы возьыны пумит ӧй вал. Но мон шуи: "Мынам нылы, мынам ик сюлмаськонэ". Наука ужен кивалтӥсе Клавдия Ивановна Козлова юн сюлмаськиз нылме Москваысь огаз садике интяны. Меӵак верано ке, улонам котьку но ӟеч адямиос сюрылӥзы. Кин мон луысал соостэк! Аспирантураын дышетскыкум, ялан шӧдыса кадь улӥ: мыным та сюресэз ӟеч адямиос сӥзизы, соос азьын возьытэ ӧвӧл усёно, соослэсь осконзэс быдэстоно. - Наукае сюрес лёгемын. Уноез малпанъёсты быдэсмизы шуыны луоз ни. Озьыен, та ласянь удалтӥз? - Та институтын 16-тӥ арзэ тыршисько ни. 1999-тӥ арын доктор ужме быдэстӥ- ути. Со герӟаськемын удмуртъёслэн гурт общинаын улэменызы. Наукаен вырон понна институтын туж умоесь луонлыкъёс кылдытэмын. Собере директормы Кузьма Иванович Куликов но пыкмыса пукыны маза уг сёты. Татын куинь книгаосы потӥзы ни. - Галина Аркадьевна, асьме улонын нылкышнолы кыӵе ке сюбеггес инты кадь висъяло кадь. Кивалтонысь но политикаысь донгыны туртто. Оло, зэмзэ ик, нокытчы ӧвӧл месӥськоно? Быдэсъя ас уждэ гинэ но тӥни. - Куддыръя "Нылкышно кенешез" но политика ужъёсын выремез понна пыкыло. Но туала вакытэ кызьы меда политикае пыриськытэк улоно? Ул вал, но уг луы. Ачид ке политикае уд пыриськиськы, политика тонэныд кивалтыны кутске. Собере кин ке ик калыклы улонлэсь ӧрзэ валэктыны кулэ ук. Тӧллэсь кудпалась пельтэмзэ валамтэенымы но, дыр, ӵемысь янгышъёс лэсьтӥськомы. Тани берло аръёсы гинэ куинь быръён ортчиз - Кун Кенеше, Кун Думае но Удмуртилы президентэ. Калык пӧлын валэктон уж нуыса, данак гуртъёстӥ ортчоно луи. Соку мон эшшо но мур валай, макем секытэ шедемын отын улӥсьёс. Асьсэлы но осконзы быремын ни. Мар веранэз на мурт адямиослы, кандидатъёслы, депутатъёслы оскон сярысь. Соин ик юн сюлмаськоно калыклэсь асваланзэ ӝутон сярысь. Удмурт нылкышноослэн огазеяськонзы та ласянь номыр уг кары шуыса, мон ӧй верасал. Калыкен ужанлы трос дыр быре. Но солэсь кулэзэ валаса бергам потэ. Ярам, институтын со понна уг пыкыло. Мынам малпамея, институтмы удмурт движенилэн идеологияя центрезлы пӧрмиз ни кадь. Со шӧдӥськиз удмуртъёслэн берло съездзылы дасяськон дыръя но. Озьы ик со луыны кулэ, дыр. Институтын 24 адями ужа, 9-эз наукая докторъёс. Ми ваньмы калыклэн коньдонэныз дышетскемын. Табере калыкмылы кыӵе ке пайда вайыны быгатоно. - Удмуртилы президент быръемын. "Удмурт кенеш" мукет кандидат понна ужаз вал. Мар кароно табере, удмурт огазеяськонлы, Президентэн ваче ужан кусыпъёс тупатон понна. - Котькуд кунын властьлы дурбасьтӥсь партилы пумит оппозиция сылэ. Макем визьмо кивалтӥсь, сокем быгатыса со радъя оппозициен кусыпъёсты. Отысь со ӟечсэ уг, тушмонъёсты гинэ адӟе ке, номыр умоез уз пӧрмы. Мон соглаш: табере вань Президент, со шоры калыкен быръем адями шуыса учконо. Со калык понна ик ужаны кулэ. Но критика шуонлэсь нокытчы уд кариськы. Возиськыны быгатоно вылэм адямиез ултӥясь критикалэсь. - Мукет сямен вераса, ваче кыл (компромисс) шедьтоно? - Озьы. Но компромисс шуон но кык пумо луэ. Ялан мыкырскыса, кылзӥськыса, кивалтӥсьёслэн ымазы учкыса улыны уг яра, дыр. Сыӵе компромисс чебер ӧвӧл. Луоз озьы мыкырскыны - мугордэ но ӝутыны уд ни быгаты, кужымед уз тырмы. Ачид но уд шӧды пыдес вылад вуэмдэ. Мынам малпамея, адямилэн вань ке осконэз (убеждениез), сое котькуд ласянь гажалозы. Зэм, куд-ог дыръя зол мылкыдо адямиез, оло, сокем уг но ярато калыкын - котьку гажало. Берло быръёнъёс туж умой возьматӥзы кытчы вуттэ куд-огзэ мыкырскон сям. - Университетын дышетскыкуды тӥ пӧртэм ужъёсы пыриськылӥды. Нош пинал дыръяды сыӵе ик-а чырткем вал? - Школаын бырйизы пионеръёслэн дружинаенызы кивалтӥсе, та ужлэсь ӧз мозмытэ комсомолэ пыреме бере но. Педучилищеын политклуб нуи, огдыре ик студентъёслэн профкоменызы кивалтыны оскизы. Та ужен собере университетын но выри. Со сяна, "Историк" бордгазетлэн редакторез вал. Ялан пыриськылӥ куасэн ӵошатсконъёсы. Общественной ужъёс ялан сьӧрам ветлӥзы кадь. Институтэ ужаны лыктэме бере но татысь профкомлэсь ужзэ оскизы. Собере Ижысь горсоветлэн депутатэз вал. Табере тани ачим но ӧй шӧды, кызьы удмуртъёслэн "Нылкышно кенешенызы" кивалтыны бырйизы. Та уже туж мылкыд карыса, пыри шуэме уг поты. Но кӧня ке дыр ортчыса, со ужен "висьыны" кутски. - Семья кусыпъёстылы со уг-а люкеты? Командировкаос, семинаръёс, конгрессъёс. Тӥледыз дорысьтыды ик шуг шедьтыны ке? - Нош дорын гинэ ялан пукысал, оло картэлы ӝоггес синазькыль луысал? Кузпалы Игра ёросысь ик. Ог-огмес умой валаськомы кадь. - Тӥ но, Женя картты но - удмуртъёс. Нош нылпиосты удмурт сямен валало-а? - Бадӟымез Светлана вала, вераськыны но йӧндыре. Со туэ университетэз йылпумъялоз ни, дизайнере дышетскиз. Милемыз куд-ог дыръя пыкылэ, куспамы удмурт кылын ум вераськиське шуыса. Пичиез, Настямы, 8-тӥ классын. Англи кылын золгес тунсыкъяське. Но кыксы ик нылмы сямъёссыя быдэсак удмуртъёс. - Ваньмон дыръяды маин выриськоды? - Киужъёсты яратӥсько. Училищеын вожъяськыса учкылӥ лымшор палась нылъёслэн пужыятыса керттэм дӥсьёссы шоры. Но ачим та уж борды басьтӥськи аспирантураез йылпумъяме бере гинэ. Вуриськисько. Туж яратӥсько квартира пушме чеберманы. Но пӧраськон - со мынам уже ӧвӧл, лэся.. - Яратоно удмурт сиёнды вань, вылды? - Яратоно сиёнэ - табань. Москваын дышетскыкум, эшъёсы куро вал: пӧра ас калыкедлэсь сиёнъёссэ, кырӟа удмурт кырӟанъёсты. Сотэк ми кызьы валаломы, тон удмурт шуыса. Зэм, кырӟаны яратӥсько, нош пӧраны, тужгес но пыжиськыны, уггес пӧрмытӥськы. - Кызьы буйгатӥськоды урод мылкыддэс? Тросэз нылкышноос, кылсярысь, мисьтаськон борды кутско. - Мыным но со юрттэ. Асме книгаен буйгатӥсько на. Мылкыды туж урод дыръя пушкам ватскисько, асме сиыны кутскисько, ма, мон Скорпион ук. - Котькуд адями ассэ мар ке понна ик дунъяны кулэ. Сотэк гажалод шат мукетъёссэ? Мар понна тӥ яратскоды асьтэдыс? - Мон туж кема но трос дышетски ас ужелы, азинсконъёсы вань - со понна но мон асме но ужме гажаны кулэ. Сюлэмъя быръем удыс ноку тонэ уз вуза, уз аналты. - Матэктэ 8-тӥ Март. ма тӥ сӥзьысалды удмурт нылкышноослы? - Тазалык, шуныт кусыпъёс. Умоезлы осконзы медаз быры. Татьяна Банникова. Сибирьысь удмуртъёс дорын. 1974-тӥ ар. Шоретӥез Галина Корепанова (Никитина). Дуннеысь этнографъёслэн конгрессазы, Уфа, 1997-тӥ ар. "Малы Германиын фашистъёс формизы?" - таӵе ужпумлы сӥземын вал огез курсовой уже. 1975-тӥ ар. Галина Аркадьевна пичи нылыныз Настяен. Удмурт кун университетын дышетскон дыръя огаз демонстрациын (Галина паллянысен кыкетӥез). Можга педучилищеын дышетскон дыръя. ГОРОД УЛОН "Чутӥсь" медицина чутӥсьёсты уг аналты Февраль пумын Ижевскысь Тазалыкез утёнъя управлениын 2000-тӥ ар понна йылпумъянъёс лэсьтэмын. Та удысэ тырмыт коньдон ноку но уг висъяськы, озьы ке но, городысь эмъян учреждениос кылем арын умой ужазы. Ваньмызлэсь инвалидъёслэсь но Отечественной войнае пыриськемъёслэсь тазалыксэс эскеремын. Кулэсмизы нуныос пӧлын кулон учыръёс. Басьтэмын дас кык миллион манет тыр эмъян тӥрлык, со юрттоз адямиослэсь висёнзэс вазьгес шараяны, ӝоггес эмъяны. Бӧрдӥсьёс уз луэ Ижевск город администрацилэн Коньдон ужпумъёсъя управлениезлэн ивортэмезъя, кылем арня ӵоже город бюджетэ вуиз 382 миллион 60 сюрс манет коньдон. Со пӧлысь 1 миллион 400 сюрсэз висъямын ИПОПАТ-лы, миллионэз - ТТУ-лы, 17 миллион пала - жилищно- коммунальной хозяйстволы. Таяз толэзе дырыз дыръя уждун басьтозы городысь дышетӥсьёс но медикъёс. Соослы уждунлы шуыса тырмымон коньдон висъямын. Уз ёрме маин сюдыны нылпи садъёсысь пиналъёсты но, городысь дошкольной управленилы висъямын 2 миллион 147 сюрс манет пала коньдон, со пӧлысь 750 сюрсэз нылпиосты сюдонлы чакламын. Ижевск город администрацилэн пресс-службаез. Чур бугор Бигеръёс но татаръёс Бигеръёс Россиын лыдзыя (ӟучъёс бере) кыкетӥ интыын мыно. Укмыстонэтӥ аръёслэн кутсконазы дунне вылын 6,65 миллион бигер лыдъяське вал, со пӧлысь 5,52 миллионэз улэ Россиын, нош Татарстанын соос 1,76 миллион. Кызьы валэктэ "Татар энциклопедияя словарь" (Казань, 1999), бигеръёс люкисько куинь этнотерриториальной группалы: Волга но Урал котырысь бигеръёс, сибирь но астрахань бигеръёс, вань на бигеръёслэн польско-литовской группазы. Лыдзыя самой трос луо Волга но Урал котырысь татаръёс - 4 миллионлэсь уногес. Отчы ик пыро таӵе субэтнической группаос - казань бигеръё, касимов бигеръёс, мишаръёс, тептяръёс. 02 ивортэ Бандаын - куать кузя Можга городысь югдурез утёнъя отделын ужасьёс "Дорожник" кафе дорысен куать шӧртчи пиосты кырмизы. Соос кык нылкышнолэсь 7 сюрс манетсэс таланы ӧдъяло вал. Ваньзы соос уло пӧртэм интыосын. Тани со бандитъёс: 21 аресъем экспедитор Дмитрий, Пичи Пурга районысь 21 аресъем грузчик Сергей, Набережные Челныысь АТП-ысь 25 аресъем Дмитрий, Постольский посёлокысь 24 аресъем Владимир, озьы ик Пичи Пургаысь 30 но 22 аресъем нылашъёс Наталья но Ольга. Соослэсь ӝегатӥзы ВАЗ-21097 автомобильзэс. "Кужмо" нылкышно Яр ёросысь Пудем посёлокысь Куйбышев ульчаысь одӥгаз юртын 43 аресъем Клавдия карт луон нергееныз 38 аресъем Сергеен кабак юыса пукизы. Юонзы пумен быриз, нош мылкыдъёссы ӟырданы ӧдъязы. Собере жугиськон но пуромиз. Но нылкышно та "ожын" кужмогес вылэм. Воргоронлэн кӧтаз со пурт донгиз, Сергей интыяз ик кулӥз. Лызэ йыръёзы ни Ог 4 часын ӵукна Шаркан ёросысь Мишкинское гурт кооперативлэн фермаяз 4 тодмотэмъёс вуизы. Син куспын кык возьмаськисез керттылӥзы. Собере одӥгзэ скалэз пуртъязы но гыж-ж гинэ Шаркан�Воткинск тракт пала кыскизы. Ӵук лушкаськисьёсты кутӥзы Воткинскысь но Шарканысь милициын ужасьёс. Дунтэм сӥль сиемзы потэм Воткаысь рынокысь возьмаськись 38 аресъем Эльбрус, та городысь ик 14-тӥ ПТУ-ын 20 аресъем дышетскись Сергей. Городысь эшъёссылы "юрттӥллям" Мишкиноысь ик 19 аресъем Александр но 18 аресъем Владимир. Таосыз но ПТУ-ын дышетско. Сӥль таламын, пиос лы йыръё пытсэт сьӧрын. Видео но аудио Кин уин лушкаське, кин та кырсь ужен нуназе шорын выре. Озьы Якшур-Бодьяысь Мирный переулокын улӥсьлэн Ш-влэн корказ югыт куазен пыраллям но видеокамеразэ, телевизорзэ, видеомагнитофонзэ но видеокассетаоссэ поттӥллям. Изъян дунъямын 18 сюрс манет тыр. Видикъёссэс лушкаськисьёс пумозяз учкыса ӧз вуэ. Милиция ӝегатӥз тюрьмаын азьвыл пукемъёсты - 30 аресъем Алексеез но 19 аресъем Денисэз. *** Ӵапак та нуналэ ик нуназе шорын, усьтон бырйыса, аудиовидеоаппаратураез лушказы Ижевскысь Пушкинской ульчаысь 240-тӥ юртысь одӥгысьтыз квартираысь. Таиз узырлык дунъямын 53,1 сюрс манетлы! Таяз учыре но азьвыл пукемъёс шедизы - 28 аресъем вораськисьёс Владимир но Константин. Шуккиськизы КамАЗ но ВАЗ 22-тӥ феврале 11 час 20 минутэ Сарапул�Ижевск сюреслэн 19-тӥ иськемаз шуккиськизы кык автомобильёс - КамАЗ-5511 но ВАЗ-2110. Нырысетӥезлэн автолэн руль сьӧраз пукем Ижысь 40 аресъем воргорон, кыкетӥяз - Башкириысь 50 аресъем водитель. "Жигулилэн" кузёез но одӥгез пассажир быризы, кыкез больницае келямын. Кабардаысь кабак Ижевскысь Ленин ёрос милицилэн экономикаын йыружъёсын нюръяськонъя ёзаз ужасьёс Красин ульчаысь шедьтӥзы лушкемен водка возён но вузан интыез. Ильяслэсь талазы пӧяськыса лэсьтэм 192 ӟенелик кабаксэ. Кабардино-Балкариысь самопал дунъямын 5,7 сюрс манетлы. Э-эх, нылкышноос... Ма луиз та куд-огеныз нылкышноосын? Юо, тамак кыско, наркотикен "эшъясько", мугорзэс вузало, жугисько, пуртэн шонасько... адямиез виыло. Воргоронъёслэн праздниксы ортчем бере ӵуказеяз, 24-тӥ феврале, ог 7 часын ӵукна Камбарка ёросысь Ершовка черкогуртысь Советской ульчаысь 93 номеро юртын керетон ӝутскиз. Валамон ини, аракы юэм бере. 22 аресъем Оксана чыртыяз пуртэн бышкалтыса вииз 40 аресъем Игорь "туганзэ". Но жалянэз валасьтэм пиосъёс Ижевскысь Строительёслэн городокысьтызы 66-тӥ юрт дорын 23 час 30 минут котыре ог 30 аресъем воргоронъёс 20 аресъем Евгенияез пуртэн чыртыяз, кӧтаз но гадяз бышказы. Нылаш аслаз машинаеныз соосты Воткинской шоссе ульчаысен ваем вылэм. Тодмотэм йырвандӥсьёс "Жигулиез" киултӥзы. Сӧсырмем нылмурт больницаысен кулӥз. Туала вакытэ тодмотэм муртъёсты машинаен ворттылытон - кышкыт уж. Покчи "террорист" 27-тӥ феврале 12 час 19 минутэ 01 телефонэ ивортон вуиз. Жингыртӥсь мурт вераз: Холмогоров ульчаысь 83-тӥ школае понэмын пуштытон арбери. Отчы потазы Югдурез утёнъя министерстволэн, ОМОН-лэн, тылпулэсь утиськонъя управленилэн нимысьтыз службаоссы. Пуштытон арбери шедьтэмын ӧй вал. Кин ке пӧяськыса жингыртэм. Но сое шедьтӥзы. Со вылэм Холмогоров ульчаын улӥсь, та школаысь ик 8-тӥ классын дышетскись. 13 аресъем пияш милициын лыдэ басьтэмын ни вылэм. Зэм, арлыдызъя покчи "террористэз" пуктыны уг луы на. Но со понна "манетъёсын" визьмамын луозы пияшлэн анай-атаез. Туала вакытэ сыӵе "шудон" ой-ой-ой... дуно сылэ. Н. Байтеряков. (Удмурт Республикаысь Югдурез утёнъя министерстволэн пресс-службаезлэн ивортонъёсызъя). Гожтӥськон-2001 Шарканъёслэн "висёнзы" палаз бускеЛьзылы Ижысь, Можгаысь, Алнашысь, Селтаысь, озьы ик вань мукет ёросъёсысь лыдӟисьёсмы туннэ нуналозь тунаса улӥзы, дыр, ошпи соослэн гидазбаразы кожоз шуыса. Нош шуд усиз якшур-бодьяослы. Ох, сюлэмъёссы тэтчало ни, дыр, куд-огезлэн. Нош кин но со та вие гырпумыз доры сузьтӥськыны выре, луоз. Газетмылэсь палэнскемъёс сярысь озьы шуисько мон. Я бен, радызъя вералоМ ни лотерея ортчытон ужрад сярысь. Ӧжытак ӝегамы шуыса, лыдӟисьёс вожзэс уз поттэ, малпасько. Нырысь утчамы Шаркан ёросэ йыромем ошпиез - ӧз вунэтэ на, дыр, 2000-тӥ арын "Удмурт дуннелэсь" дуно кузьымзэ утӥз та ёросысь Мукабан гуртысь Людмила Федотова. Соин ик та палъёстӥ утчаськоно кариським. Шаркан ёрос администрацилэн йырыз Александр Прохоров редакцилы юрттӥськыны басьтӥськиз, утчаз - шедьтӥз ведь йыромем ошпиез. Ӝеганъёс луизы на выль юртэ выжонэн. Табере шумпотыса ивортӥськом, лотерея шудонлэсь нырысетӥ люкетсэ ортчытӥм ни кема возьмам выль интыын. Газетлы гожтӥськемъёслэсь лыдзэс чакласа, кылем арын сямен ик кылдытӥм ог-огзылэсь туж ик висъяськисьтэм округъёс. Кудаз ёросъёсын тужгес но трос лыдӟисьёсмы, соосты кыклы люким, нош ӧжыт гожтӥськемъёссэ - огазеям. Ваньмыз 16 округ луиз. 1. Алнаш - И 2. Алнаш - ИИ 3. Шаркан - И 4. Шаркан - ИИ 5. Пичи Пурга - И 6. Пичи Пурга - ИИ 7. Можга - И 8. Можга - ИИ 9. Завьялово 10. Игра 11. Балезино, Яр 12. Вавож, Ува 13. Кизнер, Киясово 14. Кез, Селта, Сюмси, Як.-Бодья 15. Глазов, Грахово, Дэбес, Каракулино, Юкаменск 16. Ижевск, Воткинск, Сарапул, Каракулино, Камбарка, республикалэн палэнысьтыз гожтӥськемъёс. Лотерея ортчиз 28-тӥ феврале. Кылдытэмын вал нимысьтыз комиссия. Отчы пыризы: кылбурчи Анатолий Уваров, "Удмуртия" гостелерадиокомпаниысь журналист Фёдор Миннигараев; удмурт егитъёслэн Ижевскысь "Эрик" огазеяськоназы пырем мурт, Удмурт кун университетысь студент Владимир Широбоков; "Удмурт дунне" газетысь валтӥсь журналист Геннадий Романов. Ужрадэ пыриськизы редакциын ужасьёс. Лыдпусэн шаръёсты поттыны оскемын вал Владимир Широбоковлы. Солэн киыз сузьтӥськиз 14-тӥ номер борды. Табере кулэ вал бырйыны та ньыль ёросъёс пӧлысь кудзэ ке одӥгзэ. Сюмсиын гожтӥськисьёсмы 30 мурт гинэ бере, соосты огазеяно кариським селтаосын. Таяз 203 мурт гожтӥськемын. Кезын "Удмурт дуннеез" басьтэ 263 мурт, Якшур-Бодьяын - 221 мурт. Ёросъёслы номеръёс сётӥм: 1. Кез; 2. Селта, Сюмси; 3. Якшур-Бодья. Шаркан ёросын вордӥськем студентлэн ошпиез кыдёке келямез потымтэ, лэся. Адӟытэк но кудыысь 3 номеро шарез поттӥз. Озьыен, кузьым кошкоз артысь ёросэ, Якшур-Бодьяе. Редакциямы пӧртэм ёросъёсысь ужасьёс люкаськемын бере, котькудӥзлэн но аспалъёсыз понна сюлмыз висиз. Тани Зинаида Рябининамы Селта палась. Туж зол, пе, кури вал инмарез, Володялэсь кизэ 14-тӥ номер пала мед валтоз шуыса. Нош кыкетӥзэ шарез поттыкуз, ӧжытгес вӧсяськем, лэся. Озьы ошпи селтаослэн но сюмсиослэн ныр ултӥзы ортчиз. Кезъёс понна но золгес курись вылымтэ, шӧдске, Геннадий Романовлэн туж потэ ке но вал со палась лыдӟисьёсын пумиськемез. Мар бен, таиз шудонмы берпуметӥез медаз луы. Соин валче милемлы но тросгес ёросъёсы потаны шуд мед усёз. Нош Якшур-Бодьяысь лыдӟисьёс пӧлын лотерея ортчытон дырмес матысь нуналъёсы тодом ни. Устоосыз газет вӧлмытӥсьёс - тодмо Та нуналэ ик йылпумъянъёс лэсьтӥм почтальонъёс пӧлын ялэм конкурслы. Ивортӥмы вал, газетмес 30-лэсь ятыр вӧлмытӥсьёс пӧлын ортчытэмын луоз лотерея. Шаерамы 62 сыӵе усто почтальонъёс люкаськизы. Улӥын сётӥськом соослэсь нимтулзэс, кытысь луэмзэс но кӧня газет вӧлмытэмзэс. Кизнер ёрос 1. Тихонов М.В. - Вуж Бодья - 57 2. Мухина Г.А. - Вуж Кармыж - 53 3. Оконникова Г.П. - Безменшур - 41 Пичи Пурга ёрос 4. Васильева Г.С. - Бобья-Уча - 147 5. Овчинникова Е.В. - Вуж Монья - 104 6. Исаева Е.Л. - Куреггурт - 95 7. Тарасова О.И. - Гожня - 84 8. Леонтьева Ю.Н. - Вуж Монья - 78 9. Макаров Л.В. - Арлан - 77 10. Романов И.Н. - Пуро-Можга - 63 11. Почегова Л.П. - Аксакшур - 61 12. Медведева В.М. - Ив.-Самарск - 60 13. Очеева Е.И. - Н.-Кечево - 52 14. Трифонова Г.П. - Кечево - 46 15. Филькина Э.Н. - Сундуково - 45 16. Маркова В.Г. - Ср.Юри - 44 17. Волкова Г.П. - Байситово - 37 18. Фирсова Р.А. - Уром - 34 Шаркан ёрос 19. Федотова Т.В. - Кельдыш - 72 20. Майорова Л.В. - Ляльшур - 103 21. Сутягина Е.В. - Карсашур - 38 22. Перевозчикова А.М. - Вортча - 31 23. Артемьева М.Л. - Зюзя - 32 24. Широбокова Е.В. - Зар.-Вишур - 32 25. Никитина Г.Н. - Мувыр - 32 26. Гуменникова Т.Н. - Мувыр - 39 27. Березина А.А. - Быги - 32 28. Голубина Т.Г. - Быги - 38 29. Темеева Э.Г. - Пороз - 36 30. Вахрушева Е.Н. - Зар.-Вишур - 61 31. Кельдибеков А.Г. - Кыква - 39 Можга ёрос 32. Марзина Е.Г. - Вылын Юри - 92 33. Кириллова А.С. - Н.Бия - 68 34. Бибикова Л.С. - Бадӟым Кибья - 36 35. Прозоров Г.И. - Горняк - 39 36. Григорьева А.А. - Трактор - 39 37. Тазетдинова Ж.Г. - Горняк - 30 38. Торопова В.А. - Трактор - 31 39. Смагина Л.А. - Пазял - 31 40. Сушкова Н.В. - Пазял - 34 Игра ёрос 41. Корепанова Т.Г. - Каргурезь - 54 42. Ложкина М.В. - Зянтемошур - 48 Кияса ёрос 43. Камашева Н.А. - Колошур - 32 44. Никитина Н.Ф. - Н.М.Салья - 50 45. Самсонова Т.Н. - Карамас-Пельга - 47 46. Иванова А.А. - Вуж Салья - 88 Завьял ёрос 47. Матвеева Ф.В. - Подшивалово - 68 48. Веревкина Л.Б. - Юськи - 43 Ува ёрос 49. Ефремов И.А. - Родники - 43 50. Пахомова В.Д. - Н-Вамья - 37 Алнаш ёрос 51. Пчельникова Л.А. - Средний Утчан - 74 52. Пантюхина А.А. - Нижнее Асаново - 75 53. Губкина Т.П. - Ромашкино - 80 54. Кубашев В.П. - Новые Алнаши - 33 55. Кедрова Е.А. - Кучеряново - 67 56. Алексеева А.Е. - Вуж Юмья - 32 57. Кузьмина Л.И. - Писей - 100 58. Михайлова Т.В. - Писей - 100 59. Кулакова И.Т. - Удмурт Тоймобаш - 200 60. Рафикова Л.П. - Муважи - 92 61. Лесникова Л.Н. - Чем-Куюк - 129 62. Шушпанова Е.Р. - Байтеряков -72 Котькуд почтальонлэсь нимзэ пусъем номеръёсын бумага юдэсэ гожтӥм. Ваньзэ сое нош ик интыямы кудые. Шудо нимъёсты кысканы оским Владимир Широбоковлы ик. "Завьяловский" санаторий-профилакторийын аслэсьтыз тазалыксэ дунтэмен юнматыны шуд усиз Кияса ёросысь Вуж Салья гуртысь Иванова эшлы. Шутэтскон пумысен соин нимысьтыз вераськом на. Укмыс мурт утӥз пӧраськыны дэмланъёсын дуно книгаосты. Тани соослэн нимъёссы: Вахрушева Е.Н. (Шаркан ёрос), Трифонова Г.П. (Пичи Пурга ёрос), Бибикова Л.С. (Можга ёрос), Сутягина Е.В (Шаркан ёрос), Почегова Л.П. (Пичи Пурга ёрос), Оконникова Г.П. (Кизнер ёрос), Верёвкина Л.Б. (Завьялово ёрос), Пантюхина А.А. (Алнаш ёрос), Ложкина М.В. (Игра ёрос). Газет-журнал нуллыны ярамон песьтэр шедиз Алнаш ёросысь Рафикова эшлы. Куиньзэ тужгес но устооссэ почтальонъёсты пусъёмы на нимаз дуно кузьымъёсын. Нырысетӥ интые потӥз Кулакова И.Т. (Алнаш ёрос); кыкетӥ луиз Васильева Г.С. (Пичи Пурга ёрос); куинетӥ интыын - Лесникова Л.Н. (Алнаш ёрос). Конкурслы йылпумъянъёс лэсьтыны юрттӥзы республикаысьтымы Почта кусыпъёсъя управлениын ужасьёс но ёросъёсысь почта ёзъёс. Вормисьёслы кузьымъёсты но соос пыр ик вуттыны тыршом. "Удмурт дунне" газетэз вӧлмытыны юрттэмзы понна ваньмызлы ик почтальонъёслы бадӟым тау кариськом. Л.Малых. "Шундыкар-2001" Удмурт егитъёслэн "Шунды" дэменлыксы Егитъёсын ужанъя кун комитетэн ӵош туэ июль толэзе "Шундыкар-2001" лагерь ортчыто. Лагере шедён понна, конкурсэ пыриськыны ӧтиськом 5-тӥ�11-тӥ классъёсын дышетскисьёсты, "Шунды" дэменлыке но "Родники" нылпи огазеяськонэ пырись муртъёсты. Конкурсэ пыриськисьёс одно ик удмурт кылэз тодыны но творчествоен вырыны кулэ. Куронъёс: Конкурс ортчытӥське суредан, архитектура, литература, крезьгур (эстрада но калык кырӟан), театр, тележурналистика, калык дӥськутлы дизайн, керамика, куиськон, ваньмон дырез радъян удысъёсъя. Конкурсэ пыриськыны мылкыд карисьёс ивортыны кулэ быдэсак нимтулзэс, вордӥськем арзэс, кытын улэмзэс, кыӵе классын дышетскемзэс, "Шундыкар" лагере ветлэмзэс, (ветлэмын ке) ку но кыӵе удысъёсы пыриськемзэс. Кыӵе ке удысэз бырйыса, тупатэм куронъёсты быдэстоно: 1. Суредан (5-тӥ�8-тӥ классын дышетскисьёс) - "Выль даур" темая куинь уж ыстоно, суреданы луоз пӧртэм амалэн. 2. Архитектура (9-тӥ�11-тӥ классын дышетскисьёс) - "Мынам уйвӧтъёсы" темая вить уж ыстоно, быдэстыны луоз пӧртэм амалэн. 3. Литература (6-тӥ�11-тӥ класс) - ыстоно дас кылбур яке 1-2 верос, легенда, зарисовка. 4. Крезьгур (калык кырӟан - 5-тӥ�8-тӥ классын дышетскисьёс, эстрада - 9-тӥ�11-тӥ классын дышетскисьёс) - ыстоно асьтэлэн кырӟаменыды аудио- яке видеокассета. 5. Тележурналистика (9-тӥ�11-тӥ классын дышетскисьёс) - гожтоно туала егитъёслэн висьытӥсь ужпумъёссыя передачалы сценарий. 6. Керамика (сюй мунё) - ыстоно город сюйлэсь яке пластилинлэсь лэсьтэм ужъёсын вить туспуктэм, шудонъёсты сярысь кыӵе ке мадёс малпано. 7. Калык дӥськутлэн дизайнэз (8-тӥ�11-тӥ классын дышетскисьёс) - калык шӧмъем туала костюмлы вить эскиз дасяно (формат Ә - альбом лист быдӟа). 8. Театр (6-тӥ�11-тӥ классын дышетскисьёс) - дасяно сценка, кылбур, басня яке монолог. 9. Куиськон (6-тӥ�11-тӥ классын дышетскисьёс) - ыстоно асьтэ киын куэм арбериосын туспуктэмъёс. 10. Ваньмон дырез радъян (8-тӥ�11-тӥ классын дышетскисьёс) - гожтоно кыӵе ке праздниклы сценарий. Конкурсэ дасям ужъёсты ыстоно 1-тӥ июнёзь. Ужъёсты дунъялозы "Шундыкар" лагерьын берло кык арзэ ужам специалистъёс. Конкурсъя йылпумъянъёс печатламын луозы республикаын но районъёсын потӥсь газетъёсын 1-тӥ июнь бере. Гожтэтъёсты но конкурсэ дасям ужъёсты ыстоно таӵе адресъя: 426051, Ижевск город, Советской урам, 1 номеро юрт, "Шунды" дэменлык. Тел. 51-07-96. "Шунды" дэменлыклэн правлениез. Чугун сюрес Кутэмын тупанкыл Поездъёс ветлозы Матысь нуналъёсы шаерамы ортчиз аспӧртэмлыко но пайдаё ужрад. Удмурт Правительство но Горький чугун сюрес куспазы тупанкыл гожтӥзы. Отын ваньмыз чакламын: кусыпъёс, мар лэсьтэ республика но чугун сюрес но мукет ужпумъёс. Соин ик чугун сюреслэн кивалтӥсез Хасян Зябиров пусйиз: "Удмуртиысь вылӥ кивалтӥсьёсын данак ужпумъёсъя огкыл шедьтӥм. Кылсярысь, улон юртъёсты интыосы сётонъя. Али чугун сюреслэн Ижысь ёзэзлэн 2000 квадратной метр улон интыез. Сое возён арысь аре секытэн сётске. Татын республика интересъёссэ но утиз. Улон коркаосын ӵош интыослы сётэмын луозы вузкарон но музон предприятиос". Нимысьтыз ӟырдыт вераськон вал республикаямы пригородной поездъёсын калыкез но груз нуллон сярысь. Малы ке шуоно, со бадӟым изъян вае. Соин ик правительство но сюрес сое шори люкозы. Правительство озьы ик кыл сётӥз 12 выль вагонлэсь дунзэ ас вылаз басьтыны. Мукет сямен вераса, чугун сюрес кун бюджетэ сомында выт (налог) уз тыры. Кыкезлы ик со умой. Кыкетӥез кулэ ужпум герӟаськемын вал льготаосты, соосты сётонъя амалъёсты воштонэн. Кылсярысь, пассажиръёс быдэсак тарифез тырозы, но соослы юрттэт вуоз социальной удыс пыр. Чугун сюрес но Правительство озьы ик кенешизы Ижысь но Сарапулысь железнодоржной вокзалъёсты ӵош тупатъяны. Сюрес тыронъёссэ пытсалоз интыысь бюджетъёсы выт сётонъя. Тупанкыл пайдатэм уз луы. Азьланьын кусыпъёсмы уката юнмалозы но со улонын одно ик шӧдӥськоз. Г. Васильев. Улон виштыос Пыдесъяськы яке адями лу Бышкись езъёсын котыртэм пурысь улонлэсь нокытчы уд пегӟы. Нуналъёсын, толэзьёсын, аръёсын кыстӥсько соос. Пытсэт сьӧрын пукисьёс азе куронъёс одӥг кадь пуктэмын ке но, котькудӥзлэн аслаз интыез, адӟонэз. Нош люкаськемын татчы пӧртэм адямиос: бомжысен кутскыса, зӧк кисыё муртозь. Пытсэт сьӧры шедемъёслэн ог-огенызы кусыпъёссы улӥ тубатысен вылӥёзь ӝутӥсько. Кутском улӥ каста бордысен. Отчы пыро "ултӥямъёс". Вераны кулэ, сыӵе адӟон гомосексуалистъёсты гинэ уг возьма. Шуом, кинэ ке лушкаськисен кутӥзы, мукетыз картаен шудыса келяз, нош пунэмзэ тырыны ӧз быгаты. Ярантэмъёссэ улӥ падӟае васькытыны кема ӧвӧл. Пытсэт сьӧрын пукисьёслэн асьсэлэн куронъёссы, нош со жалянэз уг вала. "Ултӥямъёсын" ваньмыз кивалто. Жугыны уг ик жуго, мыжыкъёсын урдӥськонъёс кемалась алэмын ни угось. Но кылзӥськисьтэмъёссэ дышетӥсьёс шедёзы ик. Вань кырсь ужез быдэсъян "ултӥямъёс" вылын: жуг-жаг поттон, выж миськон но мукетыз. Соослэн вылӥгес падӟаын сыло "мужикъёс". Таизлэн касталэн вайёсыз трос. Тужгес но улӥез - "чёртъёс". Соос чик уг сюлмасько чылкытлык сярысь. Куд-огез тэйӟектыса но ветлэ. Таосыз пукисьёс ӵемысь висё кӧткыль висёнъёсын. Озьы ке но, соос ваньмыз шоры киынызы шонтыны дась: пытсэт сьӧры шедён, со улон ӧвӧл ни, шуо. "Мужикъёс" пӧлын вань на "шныръёс" яке "холопъёс". Таосыз быдэсъяло кинлэсь ке курон-косонъёссэ. Сыӵеос пӧлы ӵемысь шедё юрттэттэк кылем пукисьёс: ӵыжы-выжыоссы, тодмооссы доразы уг ветло. Нош пыриськыса уло соос чай бервыл но сигарет пум понна, вылӥ падӟаын сылӥсьёслэсь мукет кылем-мылемъёс но палдо на. Вань "ляльчиос" ("батракъёс") но. Таосыз номырлы уг ёрмо ке но, кыӵе ке "ужзэс" шараямлэсь кышкаса, "кузёоссылэсь" кылзӥськоно луо. Пытсэт сьӧрын пукисьёс пӧртэм сямен учко "мужикъёс" шоры. Кин жаля, кин серем каре, кудӥз адӟымтэ улсы кельтэ. "Мужикъёс" бордысь потэ мукетыз вай: "ужась мужикъёс". Пытсэт сьӧрын сыӵеос трос ӧвӧл, уж ласянь секыт югдур кылдэмын угось. Таосыз пукисьёс котькуд нунал уже ветло. Возисько соос мукетъёсызлэсь палэнын. Асьсэос но нокытчы уг пырисько, соосты но исась ӧвӧл. Дырзы ужаса ортче. Пӧлазы вань "гордъёсыз" но. Отчы пыро: завхозъёс, бригадиръёс, дневальнойёс, общественной уже пыриськисьёс. Таосызлэсь адӟем карыны но луоз. Пытсэт сьӧрысь соосты ӵемысь вазьгес лэзё. Вератэк кельтӥ на "блатнойёс" сярысь. Таосыз уло "мужикъёс" чотын. Пумит номыр вераны дӥсьтытэк, соос вань курем-косонъёссэс быдэсъяно луо пытсэт сьӧрысь кузёослэсь. "Блатнойёс" ваньзэс ас ки улазы возьыны туртто - югдур соосъя гинэ мед луоз. Синйылтыса возё вань отрядъёсты, люкало "общаг" шуон маке. "Мужикъёс" отчы сёто чайзэс, кысконзэс, нош асьсэлы номыр уг йӧты. Кытчы ваньмыз со мынэ? Таиз сярысь "блатнойёс" гинэ тодо. Нош юалляськыса-утчаськыса ветлы ай, соку ик аслыд сюроз. Блатнойёс пӧлын но валасьёс куд-ог дыръя сюро, ваньзэс сьӧд буёлэн гинэ саптам уг поты. "Мужикъёслы" соослэсь чай, кыскон, эшшо мукет мар ке палдоз. Колонилэн огъя улонэз но соосты сюлмаськытэ. Но милям лагерямы сыӵеос чиньыен лыдъямон гинэ. Пытсэт сьӧры сюремъёслы адями луыны секыт, бордэ уродэз чальгес лякиське. Озьы ик ортче тӥни огез бӧрсьы мукетыз нунал. Соосты вакчиятон понна котькудӥз утча сюлэмызлы кельшись кыӵе ке но уж нерге. Кин ке дор палысьтыз ивор басьтоз но, кӧня ке дырлы сюлэмыз буйгатскоз, ӟечезлы оскон пыӵалоз. Нош умоезлы оскытэк секыт улыны. Пытсэт сьӧрысь та пурысь дуннеез но ӧжыт сайкытгес карыны луысал. Соиз ини асьсэос пукисьёс бордысь но потэ, кин кыӵе сюрес быръёз ни: яке "блатнойёс" азьын пыдесъяськыса улоно, яке "гордъёс" пала кариськыса, лагерь улонэ пичи ке но югыт тылси пыртоно. Калита, 8 номеро колониын пукись. Чур бугор Пыӵъёслэсь уте попугай Бостонын улӥсь Мелани пичиысен яратӥз пӧйшуръёсты. Кинэ гинэ со ӧз возьы пичигес квартираяз. Огвакытэ кык бадӟымесь кенӟалиос но улӥзы. Но соосты, бускельзэс кулытозяз кышкатэмзы бере, зоопарке сётоно луиз. Бӧрысь гуртаз коӵышпиез сяна ӧз ворды ни. Вань коӵышъёс сямен ик со но ассэ кузёен лыдъялляз. Ужысьтыз эшъёсыз попугай сётыны малпало вал. Нырысь пумитъяськиз. Собере тылобурдоез гуртаз ваиз, оло, пӧй, коӵышен одӥг кыл шедьтозы ай. Нылмурт ваем кунозэ коӵыш азе пуктӥз. Со нырысь куноез нюлыштӥз, мяугетӥз. Нош тылобурдо кышкамзэ чик ӧз возьматы. Писэй палэнскиз. Озьы попугай но коӵыш ӝытозь пӧртэм сэрегъёсын пукизы но ог-огзэс эскерыса улӥзы. Кусыпсэс эскероно луизы сояз ӝытазе ик. Мелани коӵышлэн тусьтыяз сиён понӥз но ӧтиз. Но тусьты доры нырысь попугай вуиз но коӵышлэсь сиёнзэ кокчаны ӧдъяз. Кӧтыз тырем бере, дыр вуиз кузёлы но сиськыны. Озьы кусыпъёс тупазы. Нылаш ӵуказеяз гуртаз бертӥз но паймымон суредэз адӟиз: коӵыш диван вылэ гань- гань золтӥськем, нош тыбыр вылаз попугай пуксем но гон пӧлысьтыз пыӵъёссэ кутылэ. Табере соос люкыны луонтэм эшъёс луизы. Шӧкыч Ой, Иже мыном, ыже Улэп анекдот: Мэриын пресс-конференция азьын одӥгез журналист шуэ: мон алигес Нижний Новгородысь бертӥ, отын лымы! Гужемозь уз быры. - Тау инмарлы, - лулӟе город администрациын ужась. Ваньмыз горо. Мукет номыр но уг кыльы ни уго. Город кивалтӥсьёслы котькӧня йыбыртты, котькӧня пыкылы, толыкез ӧвӧл. Асьсэос но тӥни, моӵсы сузьымтэзэс валаса, возьытлэсь утиськон понна, лымыёгес, пеймытгес, кырсьгес городъёсын ӵошатско. Зэм, мынам аслам ноку но Нижние вуылэме ӧвӧл (табере ветлэме но уг поты), но малы со шоры учконэз? Шоро-куспо, не чебер, не шуш кышномурт тани кин шоры учке? Эшшо шушъёсызгес шоры нокызьы но уг, озьы-а? Ваньмызлэн чебер кариськемез потэ. Нош город маин пӧртэм? Вань ук дунне вылын (ма, матысь иськемъёсын но) синмаськымон Казань, Йошкар Ола... Администрациын ужасьёс журналистъёс вылэ куатаськыса уло: тӥ, пе, асьтэ дорды сярысь юри урод гожъяськоды. О-о, ужмы милям ичи выжыкыл малпаса пукыны. Ма, ми инметӥ ветлӥськом-а, элитной коркаосын улӥськом-а, город транспортын-а ум ветлӥське? Ай нунал ӵоже чидамдэ ваньзэ гожтысал ке, "Шӧкыч" ӧй тырмысал, дыр. Тани, пожалуйста, нуналмысь суред. Огшоры журналист ӵукна султэ, пыласькыны шуыса кранзэ усьтэ но... ыш-ыш-ыш, йӧ ву бызе. Чиньыйылъёсыныз гинэ бамаз йӧтскылэ но толон ӝыт кисьтымтэ жагез шоры пыкиське. Ведраез кутыса, ураме потэ но жагзэ выль усем лымы вылэ кисьтэ - жагез тол ӵоже ЖРП ӧз поттылы на. Уже мынон сяменыз гылӟыса кык-куинь пол усе, зын, пеймыт переходэтӥ выжымтэеныз, Удмуртской урамын ӧжыт гинэ иномарка улэ уг сюры, отысь потыкуз, кыӵе ке липет вылысь ныр азяз ик кор зӧкта йӧ ӟузыри пазьгиське... Вот и гожъя со бере доредлы сӥзем чебер одаос. Ай самой тунсыкоез соиз - куд-огез (кылсярысь, Ижевск городысь административно-технической инспекция) оскытыны выро, соос городмес благоустроить карон понна вань кужымзэс поно шуыса. Соос бен асьсэос асфальт но уг вӧлдо, газон но уг турнало, но косо, пе. Озьы АТИ-лэн кивалтӥсезлэн Сергей Шумковлэн верамезъя, кылем арын 3000 предприятие эскеремын, 6145 йыртэман (ужзылэсь палэнскон) учыр шараямын, 417 кивалтӥсь кыл кутытэмын. Трос-а со та быдӟа город понна? Туж ӧ-жыт. Нош адямиослэсь ӝожтӥськон 400 гинэ вуиз. Паймымон, озьы-а? Мон тодӥсько мугзэ - яке адямиос маке воштӥськонлы уг оско, яке та инспекция сярысь кылылэмзы но ӧвӧл на (дыртӥсько тӥледлы телефон ивортыны - 52-56-77). Нош кык ар талэсь азьло та инспекция кылдыку, Сергей Павлович пресс-конференциын шуиз вал: ӝыны пятилетка ортчыса, Иж луоз город-сад! Со бен кылъёсызлэсь уг сеськы, ма, ачиз оске но, городмы пушъе шуыса: шор урамъёсысь туэ буям автовокзалэз но... аслаз инспекцилэсь чебер юртсэ тодэ вайытэ. А со сяна номыр. Кырсь, валантэм та город. Но мон сое яратӥсько - уг сяласькиськы, уг жагкиськы, писпуосты уг кораськы.. Малы сое кузёосыз уг ярато? З. Рябинина. Тодмо нимъёс но нуналъёс Март Вр. 5 12 19 26 Пк. 6 13 20 27 Вн. 7 14 21 28 Па. 1 8 15 22 29 Ба. 2 9 16 23 30 Кн. 3 10 17 24 31 Ар. 4 11 18 25 1 - 80 ар тырме Удмурт Республикаысь Кышкытлыклэсь утиськонъя ёзъёсты кылдытэм дырысен. 4 - 85 ар тырме вордскемез дырысен Советской Союзлэн Героезлы Фёдор Михайлович Дербушевлы. Вордӥськемын Кизнер ёросысь Вуж Трык гуртын. Висъяськиз, Днепр шурез басьтыку, 1943-тӥ арын; - 60 арес тырме "Удмуртская правда" газетысь журналистлы, УАССР-ысь культура удысысь дано ужасьлы Любовь Ивановна Катковалы; - 55 ар талэсь азьло (1946) Удмурт АССР-ысь Совнарком кутӥз Ижевскын нылпи кинотеатр усьтон сярысь постановление. 7 - 95 ар тырме вордскемез дырысен суредасьлы, СССР-ысь Суредасьёслэн союззылэн но "Удмуртсуредась" огазеяськонэ пыртэм муртлы Василий Алексеевич Жарскойлы (1906- 1973). 7-10 - 80 ар талэсь азьло Глазовын ортчиз партие пырисьтэм нылкышноослэн нырысетӥ уездной конференцизы. 10 - 70 ар талэсь азьло (1931) ВКП(б)-лэн Удмурт обкомезлэн бюроез Ижевскын Удмурт автономилы 10 ар нимо научно-исследовательской институт кылдытон сярысь постановление кутӥз. 1936-тӥ арысен со социалистической культурая институт, али - РАН-лэн Урал отделениысьтыз историяя, кылъя но литературая Удмурт институт. 12 - 20 ар талэсь азьло "Редуктор" заводлэн конвейерысьтыз потӥз ньыль миллионэтӥез редуктор. 15 - 60 ар тырме республикаысьтымы санэпидемстанцилы. 17 - 10 ар талэсь азьло ортчытэм референдумын Удмуртиысь 76,02 процентэз бырйисьёс СССР-ез утён понна куаразэс сётӥзы, 67,16 процентэз - РСФСР-лы президент быръён понна. 18 - 85 ар тырме вордскемез дырысен Иван Петрович Щёткинлы (1916-1988), УАССР-ысь дано дышетӥсьлы, Вавож ёросысь Гурезь-Пудга школалэн директорезлы; - 70 арес тырме Лев Евгеньевич Михайловлы - техника наукаосъя кандидатлы, профессорлы, Ижевскысь механикая институтысь кафедралэн деканлы, Удмурт Респубикаысь наука удысысь дано ужасьлы. 19 - 90 арес тырме вордскемез дырысен Советской Союзлэн Героезлы Анатолий Иванович Заболотскийлы (1911-1962). Быдӟым Отечественной война дыръя со Южной, Юго-Западной, Донской, 4-тӥ Украинской, 3-тӥ Белорусской фронтъёсын ожмаськиз. 22 - 95 ар тырме Василий Пантелеймонович Ципковскийлы, врачлы, судебной медициная экспертлы, медицина наукаосъя докторлы, Ижевскысь медициная кун институтысь профессорлы; - 65 арес тырме Борис Михайлович Сучковлы (1936), инженер-механиклы, техника наукаосъя докторлы, Удмуртиысь му вӧйя научно-исследовательской институтлэн директорезлы, РФ-ысь Естественной наукаосъя академилэн корреспондентэзлы, дано изобретательлы. 23 - 10 ар талэсь азьвыл Удмуртиын кылдӥз Бигеръёслэн общественной огазеяськонзы. 22-25 - 35 ар талэсь азьвыл Ижысь медициная институтын ортчиз Уралысь, Сибирьысь но Дальней Востокысь студентъёслэн научной огазеяськонъёссылэн зональной конференцизы. 23 - 85 ар тырме Валентина Ивановна Векшиналы, В.Г.Короленко нимо ӟуч драмтеатрысь валтӥсь суредасьлы, УАССР-ысь искусство удысысь дано ужасьлы. 23-30 - 15 ар талэсь азьвыл (1986) Глазовын ортчизы ВЛКСМ-лэн ЦК-езлэн "Зарни шайба" призэз понна нюръяськонъёс. Хоккейын ӵошатскизы Белоруссиысь, Украинаысь, Армениысь, Литваысь, Эстониысь, Казахстанысь но эшшо дас республикаосысь командаос. 24 - 100 ар тырме вордскемез дырысен Артемий Никитович Филипповичлы (1901-1961), медицина наукаосъя докторлы, Ижевскысь медициная кун институтысь кафедраен кивалтӥсьлы (1939-1951), профессорлы, СССР-ысь Наукаосъя академиысь академиклы; - 40 арес тырме Валерий Филлипович Попковлы, Советской Союзлэн Героезлы. Вордӥськемын Сюмси ёросысь Кильмезь посёлокын. Герой ним сётэмын 1989-тӥ арын, Афганистан Республикаын кышкатэк ожмаськемез понна. Военной лётчик 2500 пол инбаме ӝутскылӥз. 31 - 55 арес тырме Валерий Яковлевич Митрофановлы, Удмурт кун филармониысь чеберлыкъя кивалтӥсьлы, УАССР-ысь инскусство удысысь сӥё-дано ужасьлы, УАССР-лэн Кун премиезлэн лауреатэзлы. март - 75 ар талэсь азьвыл кылдытэмын Вань удмурт революционной писательёслэн ассоциацизы (ВУАРП). Пӧртэм вакытъёсы соин кивалтӥзы Куӟебай Герд, Д.Баженов, С.Бурбуров, М.Тимашев, М.Петров; - 65 ар талэсь азьвыл кылдытэмын Удмуртиысь ваньбур поттон кужымез эскерись огазеяськон. Чур бугор Дуннеысь самой самойёсыз Америкаысь тодосчи Майкл Харт туж кузь нимын книга поттӥз. Со нимаське: "Сто самых важных личностей в истории, раставленных по порядку". Отын вераськон мынэ данзыя туж вылӥ адямиос сярысь. Книгае нырысетӥен пыртэмын Магомет. Со пророк гинэ ӧй вал, со озьы ик вал мусульман религиез кылдытӥсь. Соин ик Христос куинетӥ интые кылемын, малы ке шуоно, христианствоез кылдытӥзы мукетъёсыз, нырысь ик Павел, со куатетӥ интыын. Списокез, инмарлы осконэн герӟаса, эшшо кык мурт пыртэмын: Будда - ньылетӥ интыын но Конфуций - витетӥын. Со понна кыкетӥ интые пыртэмын Ньютон. Сю адямиос пӧлысь 37-ез тодосчиос но изобретательёс луо. Уноез соос пӧлысь нырысь кызь мурт пӧлы пыртэмын: Гутенберг - 9-тӥ, Эйнштейн - 10-тӥ, Пастер - 12- тӥ, Галилей - 13-тӥ, Дарвин - 17-тӥ. Отӥяз инты висъямын политикъёслы но военачальникъёслы. Соос куамын. Бӧрысь мынэ философия - 14 адями (Марксысен кутскыса, со 100 пӧлын 11-тӥ интыын). 11 тодмо адямиос данэ потӥзы религия удысын. Соос списоклэн вылӥ радаз. Литература, искусство но музыка удысысь адямиос ичи сётэмын: Шекспир - 36-тӥ но Гомер - 94-тӥ, Микеланджело - 49-тӥ но Пикассо - 96-тӥ, Бетховен - 42-тӥ но Бах - 74-тӥ. География ласянь ке учконо, татын суред пӧртэм адӟиське. Африка сётӥз куинь гениез гинэ, Латинской Америка - одӥг, Боливар, Азия - 18, США - 7. Мукетъёсыз 71-ез вордскизы Европаын. Историе тужгес бадӟым пытьы кельтӥзы британецъёс. Соос 18 кузя. Соос пӧлысь витез (ваньзы списоклэн вылӥяз) - шотландецъёс. Пусйымон соиз: та калык дуннеысь вань улӥсьёс пӧлын одӥг процент но уг лыдъяськы, нош дано адямиоссы уно гинэ. Великобритания бӧрсьы мыно Германия но Австрия: 15 нимтул, Гитлерез но вераса. Собере 10 француз, 8 римлян но итальянец, 5 эллин, 4 испанец но Россиысь куинь адями: Ленин 15-тӥын, Сталин 63-тӥын, Петр Великий 91-тӥын. Кызьы валэктэ ачиз Майкл Харт, Ленин списоке теориез понна ӧз шедьы, шедиз практикаез понна, стратегия понна ӧз, шедиз тактикаез понна. "Со кивалтонъя сыӵе технология дасяз, кудӥз та дырозь коммунистъёслы луонлык сётӥз ваньзэ ки улазы юн возьыны". Удмуртия: выль даур Дыртӥсь муртэ музъем уг яраты Кызьы тодӥськоды, Россиын выль президентэн кылдытэм Кун Кенеш кылем толэзьлэн шораз эскерыны кулэ вал интыысь ас кивалтонэз азинтонэн герӟаськем ужпумез. Но та ёзлэн президиумаз быръем губернаторъёс огъя заседанилэсь азьло ортчытэм пумиськоназы малпанзэс воштӥзы, музъем пумысен вераськыны ӵектӥзы. Озьы ик луиз. Республикаослэн но мукет улосъёслэн кивалтӥсьёссы Владимир Путинэн ӵош пыр-поч кенешизы Музъем кодексэз кутон котыртӥ кылдэм югдур сярысь. Москваысь берытскыса, тани ма вераз журналистъёслы Удмуртилэн Президентэз Александр Волков: - Ми тазьы пусйим. Туэ 1-тӥ июне Кун Думае сётоно Музъемъя кодекслэсь котыр ласянь чаклам инъетсэ. Толэзь ортчыса, отчы вуттоно муосты кутонэн герӟаськем рамочной законъёсты. Соосты юнматэм бере, Россилэн субъектъёсыз мед быгатозы ас доразы асьсэлы тупась документъёс кутыны. Уго Россилэн пӧртэм сэрегъёсаз музъем но, со шоры кызьы но учкон ог-огзылэсь туж висъясько. Удмуртия ласянь ке верано, пусйиз Президент, музъеммес вузаны лэзёнэн дыртыны ми ум малпаське. Кема дырлы аренда яке кыӵе ке мукет амал - таиз луоз, нош гыроно-кизёно муосты вузлы пӧрмытыны вуом ай. "Музъемлы кузё кулэ", "Бусы мӧзмиз ни кузёлэсь" - та выллем ӧтёнъёс- йыръянъёс вань газет бамъёсысь уг ышыло кадь. Ма, валамон со. Шонер курон ук. Кин ке пумит шат, муослэн зэмос кузёзы мед луоз шуыса? Ӧвӧл. Мукет ужпум: кыӵеен асьме син азе пуксе со адями, кин быгатэгес муосысь уно пайда поттыны но со дыре ик музъемлэсь удалтонлыксэ утьыны? Та юанъёс котырын ик кема дыр ӵоже ни мынэ споръяськон. Огъёсыз шуо: СССР вакытэ кылдытэм колхозъёс кадь нокин но уз быгаты музъем сярысь сюлмаськыны, асьме палъёсын крестьян калык котьку но уртче кариськыса ужалляз уго. Соос тазьы верамзэс улонысь учыръёсын но лыдпусъёсын юнмато. Тани ук, пе, юн хозяйствоос котькыӵе вакытэ быгато пайдаё ужаны, ӟеч улыны луымон коньдон поттыны. Тодэ уськыто Вавож ёросысь Валентин Калининлэсь, Грахысь Михаил Крестьяниновлэсь, Завьялысь Валерьян Никитинлэсь хозяйствооссэс. Тӥни ук, шуо, та визьмо воргоронъёс макем йӧно ужало. Бен, озьы со. Тодмо нимъёс. Но трос шат сыӵеос? Таӵе юан пуктыса омырско гурт улонэз мукет сямен адӟисьёс. Таосызлэн малпанзы одӥг: музъемез адямилы пыраклы ӧд сёты ке, солэсь кузё ноку но уз пӧрмы. Сыӵе мурт одно ик огъя ваньбурез "асэстыны" выроз, производствоез паськытатон но муромытон сярысь рос-прос уз сюлмаськы. Малпанзэс юнматыса, музъемез вузаны-басьтыны лэзён понна луись муртъёс верало сыӵе колхозъёсты-эштосъёсты, кытын сяме пыӵамын лэсьтӥськон. Ӧвӧл, огшоры лэсьтӥськон ӧвӧл. Выль предлы аслыз улон юрт ӝутон сярысь мадё соос. Одӥгез пуксе куанер колхоз кузёлэн ӝӧк сьӧраз - кык-куинь этажен корка лэсьтэ но "ӟеч луэ" шуыса киыныз шонтэ. Кыкетӥез вуэ - со сюрестӥ ик вамыштэ. Куинетӥез арзэ- кыксэ "ёмырам" юртаз улыны чида ик но, отӥяз со но выльдӥськоно кожа. Сыӵе учыръёс республикаямы зэм но ичи ӧвӧл. Ма бен кароно? Кытын зэмлык? Шонер малпаськоды - шораз. Олань-талань шонаськеммы возьматӥз ни: уг яра ваньзэ одӥг кабен мертаны. Ӟучъёс сыӵе дыръя "под одну гребёнку" шуо. Гурт улонын соиз но, таиз но луыны кулэ. Дышемын адями бадӟым коллективын сюлэмзэ сётыса ужаны - мед тыршоз. Мукетызлэн ас кожаз кариськыса улэм-вылэмез потэ - пожалуйста! Тани тыныд музъем, тани тыныд юрттэт - эскеры кужымдэ, ум люкетэ. Уго югдурез валась мурт котькызьы но быгатоз удысэз радъяны, аслыз но, мукетъёсызлы но пайда вайыны. Таин валче куд-ог лыдпус ӵектэм потэ. Асьме элькунын тани дас ар ӵоже ни ужало крестьян (фермер) хозяйствоос. Та ар кутсконлы вераса, соос 3356 вал. Трос-а со? Кызьы учкод ни. 1991-тӥ арын сыӵеос 47 гинэ лыдъяськизы, кык ар ортчыса, 2212 луизы. 1997-тӥ арын 3626 хозяйство лыдъяськиз. Со бӧрсьы соослэн лыдзы пумен кулэсмыны ӧдъяз. Республикаысьтымы куке но кылдытэм 2 сюрс палаез фермер огазеяськонъёс туннэ нуналлы ужзэс дугдытӥзы. Ма сярысь вера та лыдпус? Гуртоос кужымзэс эскеризы но валазы: ныпъет секыт, вормыны уг луы. Югдурез тодӥсь специалистъёс та пумысен сокем ик уг куректо. Рынокен экономика ваньзэ интыяз пуктоз, кужмоосыз хозяйствоос кылёзы, пумен юнмалозы, лябъёсыз ас кожазы бырозы, шуо. Кин тодэ, оло, озьы но. Огез туннэ валамон. Рынок со умой, но ваньзэ соин гинэ валэктон быдэсак шонер ӧвӧл. Государстволы гурт хозяйствоын ужъёсты радъянлэсь палэнскыны уг яра. Ас куаразэ со одно ик вераны кулэ. Кулэяськисезлы юрттоно, сьӧраз ортчемзэ дугдытоно. Таӵе малпан пумен юнма, шӧдске, Россиысь но, интыосысь но кивалтӥсьёслэн йыръёсазы. Туннэ Дэбесын ортче агропромышленной комплексын югдурез эскеронлы сӥзем пумиськон. Радъяз сое Кун Думалэн депутатэз Светлана Смирнова. Семинаре ӧтемын витьтон пала специалист. Пӧлазы "колхозникъёс" но, "фермеръёс" но вань. "Котырес ӝӧк сьӧрын" соос верасько гурт улонэз умоятон сярысь. Пумиськонын лэсьтэм йылпумъянъёсты бӧрысь поттозы элькун кенешонэ. Ойдолэ сӥзём люкаськемъёслы ӟеч мылкыд. Мед лад-лад вераськозы, мед ог-огзэс кылыны быгатозы. Озьы луиз ке, возиськом ай. И. Максимов. Экономика Дышетэ Тасис Алигес шаерамы нырысьсэ ортчиз аспӧртэмлыко, тунсыко но пайдаё ужрад. Дорамы люкаськылӥзы Россилэн Северо-Восток улосъёсысьтыз адямиос. Картофка кидыс будэтонэз умоятонлы но ӟеч йӧл поттонлы сӥзем конференцие ветлӥзы Киров, Пермь, Свердловськ областьёсысь, Башкортостан, Коми, Марий Эл, Мордовия но Чувашия республиаосысь 40- лэсь уно специалистъёс но та удысэн герӟаськем кивалтӥсьёс. Но тужгес трос вал элькунысьтымы специалистъёс, Гурт удысъя но сиён-юонъя министерствоысь но Гурт хозяйствоя Удмурт кун научно-исследовательской институтысь (УГНИИСХ) кивалтӥсьёс но тодосчиос. Шаерамы Тасис программая дырын-дырын кунгож сьӧрысь куноос кемалась гинэ вуыло ни. Соос асьмеды пӧртэм удысъёсъя ужаны дышето. Тани берлоез сӥземын вал таза картофка кидыс уськытонлы но ӟеч йӧл кысконлы. Дорамы ветлӥзы Тасис проектлэн Самара но Ленинград улосъёсъя ёзъёсызлэн кивалтӥсьёссы Дэвид Кумбе но Дэвид Пеппер. Нырысез специалист рос-прос мадиз Самара улосын картофка кидыс будэтонэз радъямзы сярысь. Со понна татын кылдытэмын нимаз диагностической лаборатория. Сотэк угось картофка кидыслэсь ӟечлыксэ нокызьы уд эскеры. Нош берло дыре Россиын, озьы ик Удмуртиын но, картофка кидыслэн ӟечлыкез данаклы уродмиз. Асьмеос сое кыкетӥ нянен лыдъяськом ке но, та культураез будэтонлы ӧжыт саклык висъяське. Соин ик Тасис Проектлэн специалистъёсыз ӟеч кидыс уськытонъя амалъёс пыӵато. Со озьы ик герӟаськемын удалтэм картофка будэтонэн но шӧмзэ умоятонэн. Та ужпумъя конференциын, Дэвид Кумбе сяна, вераськизы республикаысьтымы Кун семенной инспекцилэн но УГНИИСХ-ысь агробиотехнологиосъя отделлэн кивалтӥсьёссы Александр Ломаев но Николай Донец. Соос возьматӥзы та удысын югдурез. Вераны кулэ, картофка трос висёнъёслы сётске, уката ик вирусъёслы. Со люкетэ урожайзэ будэтыны но ческыт шӧмыз быре. Та ужрадын кыкетӥез бадӟым ужпум сӥземын вал ӟеч йӧл поттонлы. Тая Тасис кӧня ке аръёс ужа ни Ленинград улосысь гурт хозяйствоосын. Со, кылсярысь, 22 хозяйствоын дас одӥг толэзь куспын йӧллэсь ӟечлыксэ кылын верантэм вылӥе ӝутӥз. Табере соос ваньзэ сямен (98 процентсэ) йӧлзэс экстра-класс но нырысетӥ классэн гинэ вузало. Кызьы бен сыӵе азинскон басьтэмын? Нырысь ик, кылдытӥзы нимаз ветлаборатория но 22 хозяйстволэсь огазеяськон. Соос огъя 120-136 сюрс тонна йӧл кыско, яке быдэс улосъя 28 процентсэ. Люкаськемъёслы кызьы ӟеч йӧл поттэмзы сярысь тупен-тупен мадизы Дэвид Пеппер, Удмуртиысь сиён-юонъёслэсь ӟечлыксэс эскеронъя инспекцилэн кивалтӥсез Казимир Мазец, Киров улосысь таӵе ёзлэн ик специалистэз Николай Колпащиков но мукет тодосчиос. Ватсаны кулэ, рынокын ас интыдэ шедьтон вылысь, нырысь ик сиён-юонлэсь ӟечлыксэ умоятоно. Кин та ужен выре, со пайда басьтэ, нош сотэк лёгаса кошкозы. Рыноклэн со туж чурыт куронэз, гожтымтэ законэз, шуыны луоз. Тани али асьмеос йӧллэсь напсэ гинэ учкиськом, нош Западын но музон кунъёсын кемалась эскеро ни белоксэ но адямилы мукет кулэ арбериоссэ. Соин ик котькуд сиёнлы сертификат сётоно, со адямилэсь тазалыксэ медаз уродмыты. Тӥни Тасис асьмеды ӟеч сиён-юон поттыны юнме шорысь уг дышеты. Г.Романов Тодматскон сэрег Аб.428. Ижевскын улӥсь удмурт нылкышно, 55 арес, пенсиын но ужасько, вылӥ образованиен. Эшъяськон понна тодматскысал Ижевскын яке райцентръёсын улӥсь 60-65 аресъем дышетскем, визьмо пиосмуртэн. Аб.429. Кузпалъяськон вылысь тодматскысал лякыт сямо, оскымон, визьмо но синмаськымон удмурт нылкышноен. Нылпиез ке вань, умой луысал. Ачим сярысь: 34/165, улӥсько Игра районын, дышетскемын, ужась, улон интылы но коньдонлы уг ёрмиськы. Яратӥсько инкуазез, чылкытлыкез, дунъясько зэмлыкез. Таӵе куронэ вань на: медаз вазиське кузь коньдон сьӧры уиськисьёс но капчи улон утчасьёс. Аб.430. Удмурт нылкышно, 48/160/50, улӥсько Можга районын, дышетскеме средне- специальной, огшоры сямо. Дас арзэ улӥсько ни огнам, нокыӵе ужлэсь уг кышкаськы. Тодматскысал 45-55 аресъем огшоры пиосмуртэн, урод сямъёсыз медаз луэ. Умой луысал, вазиськысалзы ке Можгаын, Ижын улӥсьёс. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Кизилиос верало 05.03-11.03 Така (Овен) 21.03-20.04 Тӥ асэныды данъяськыны быгатоды, трос ужез быдэстыны вуттоды. Но праздник азьын мылкыдды уродмоз - гажан нылмурттылы ӟеч кузьым басьтыны коньдон уд шедьтэ, ӝытпал ваньмыз интыяз пуксёз, тӥ умой шулдыръяськоды. Шуныт мылкыдъёсты возиськозы арня пумозь. Ош (Телец) 21.04-21.05 Умой вакыт вузкарыны, нылкышноосын кусып тупатыны. Уж дурады воштӥськонъёс луыны быгатозы. Мултэс эн чурыталэ - кузпалды куатаськоз. Та ласянь секыт нунал луоз пятница но. Арня нуналэ магазинэ эн дыртэ: тупась вуз басьтыны уд быгатэ. Со понна спортэн вырон шумпотон ваёз. Эгызоос (Кыктоос, Близнецы) 22.05-21.06 Тросгес саклык висъялэ нылпиостылы - соос тӥлесьтыд палэнско ни. Вешамтэ пинал лек будэ. Ужъёсты умой мынозы. Яратоно мурттылы татчыозь мылкыддэс ке ӧд усьтэ на, ӵап дырыз. Вӧзаз кыӵе ке кузьым басьтысалды на ке, эшшо умойгес луысал. Праздникез умой пусъёды. Нош шутэтскон нуналъёсы ужамды потоз. Мар бен, со тӥледлы пайдаен гинэ берытскоз. Кисло-кусло (Рак) 22.06-23.07 Понедельнике уж дурады валамтэос кылдозы - асьтэдыз мултэс дунъямды ӵош ужась эшъёстылы уз кельшы. Вторнике чаклаське коньдон ужпумъёсын выронлэсь. Празднике трос сюлмаськоно луоды, но та нуналэ улонады маке воштӥськыны быгатоз. Ваньмыз умой луоз. Шутэтскон нуналъёсы куно возьмалэ, семьяяды шумпотон луоз. Лев 24.07-23.08 Понедельнике тӥледыз алданы быгатозы, документ лэсьтыкуды, огкыл гожтыкуды. Мултэс вожамды уродэн берытскоз. Секыт йӧтоз арня шорын - ченгешонъёс, керетонъёс потозы. Празднике коньдон ужпумъёс сюлмаськытозы, пунэмдэс берыктыны курозы. Шутэтскон нуналъёсы ӟеч ивор басьтоды, но гажан муртэныды кылды уз тупа. Нылмурт (Дева) 24.08-23.09 Эскериське мултэс эмъюм юонлэсь. Кузпалэныды керетэмды ке уг поты, тырше соин небытгес вераськыны. Вторнике но асьтэды "кияды возьыны" тырше. Нош уж утчасьёслы туннэ удалтыны кулэ. Таяз празднике мылкыдды туж умой уз луы, соин ик мукетъёслэсь но сое быдтонтэм понна, кытчы ке кошкылэ. Эн вунэтэ гуртпӧрдэс. Умой луоз, туннэ мугордэс ке чылкытатӥды. Весъёс 24.09-23.10 Тросгес саклык висъялэ семьядылы. Умой ортчозы огкыл кутонъёс, командировкаос, коньдонэн герӟаськем ужъёс. Арня шорын но кыӵе ке пайда басьтыны быгатоды, выль адямиосын тодматскоды. Чаклаське мултэс ужамлэсь - со тазалыкты вылын шӧдӥськытэк уз кыльы. Шутэтскон нуналъёстэс сӥзе яратонлы. Ветлэ концертэ, театре, музее. Скорпион 24.10-22.11 Арня кутскыку ик ӵош ужась эшъёсыныды, ӵыжы-выжыосыныды керетон потоз - тӥ укыр вормытъяськись, ваньзэ ас мылкыддыя карыны тыршиськоды. Средае ужъёсты умой мынозы - уж дурады тыршемдэс ӟеч дунъялозы, оло, премия но сётозы. Праздник туж уз шумпотты - куноослэсь жадёды. Соин валче кузпалэныды керетон потыны быгатоз. Чаклаське пыэдлэсь, кынманлэсь. Ыбылӥськись (Стрелец) 23.11-21.12 Кивалтӥсьёсты тӥледды зӥбыны яке кыӵе ке кескич уже кыскыны быгатозы, соин ик понедельнике соослэсь палэнскысагес улэ. Удалтоз сюресчиослы, мукет культураосын тунсыкъяськисьёслы. Арня ӵоже трос уж лэсьтыны вуттоды. Гажан муртты тросгес саклык висъямдэс кулэ кароз. Тросгес дырдэс ортчытэ нылпиосыныды, эшъёсыныды, эн аналтэ спортэз. Сюро кеч (Козерог) 22.12-20.01 Вакыт тупа огкылъёс кутыны, коньдон бергатыны, но туж чакласькыны кулэ. Но лэсьтэ ваньзэ средаозь. Умой луысал, врач доры ке ветлысалды. Четверге вань ужъёсты умой мынозы. Арня пумын жадемдэс шӧдоды, шутэтске. Субботае, арняе потон уйёсы вӧтъёс быдэсмо. Ву кисьтӥсь (Водолей) 21.01-19.02 Тросгес дырдэс ортчытэ семьяеныды, куноысь но вазьгес бертылыны тырше. Вторнике тупа ужъя вераськонъёс, пумиськонъёс ортчытыны, маке но выльзэ, тунсыкозэ кылдытыны. Ӝыт возьмамтэ куно лыктоз. Празднике тӥ асьтэды туж шудоен шӧдоды: удалтоз маке басьтыкуды но, коньдонэн шудыкуды но. Гажан мурттылы татчыозь мылкыддэс ке ӧд усьтэ на, туннэ ӵап дырыз. Шутэтскон нуналъёсы тырше керетэм муртъёсыныды тупаны. Ӟеч вуз басьтыны быгатоды. Чорыгъёс (Рыбы) 20.02-20.03 Вытъя инспекцие яке нотариус доры ветлондэс берлолы кельтэ. Бускельёсыныды валамтэос кылдыны быгатозы. Удалтоз дышеткисьёслы - предметэз ӟеч тодэменызы дышетӥсьсэс но паймытозы. Празднике туж шулдыръяськемды уз поты - жадемды шӧдӥськоз. Эн пуксьылэ компьютер сьӧры, ужды уз пӧрмы. Урод мылкыдды возиськоз ӵуказеяз но. Шутэтскемды бере эн кышкалэ секыт ужез быдэстон борды басьтӥськыны, нош магазинъёстӥ ветлондэс берлолыгес кельтэ. Семьядэс ческыт пӧраменыды шумпоттэ. Лыдӟись вера Тырмоз гуртэз тарканы Сюлэмам али но мертчемын кык-куинь ар талэсь азьло ОРТ-ын вераськись чиновниклэн кылъёсыз. Быдэс страна кылымон со шуиз: "Вуозы сыӵе нуналъёс, адямиос нянь юдэс понна ог-огзылэсь гульымзэс йыръёзы..." Вераськись муртлэсь нимтулзэ йырам ӧй кельты. Но мыным, гуртын улӥсь адямилы, кылъёсыз ныж пуртэн бышкалтэм кадь потӥзы. Куд-огез, оло, тае кемалась вунэтысал ни. Мон малы меда сокем вӧсь луи? Та учырез выльысь тодам ваи, музъем сярысь вераськонъёс Кун Думаын ӝутскем бере. Депутатъёс, политикъёс пӧлын ӧжыт ӧвӧл сое вузлы пӧрмытыны дась луисьёс, крестьян калыклэсь мылкыдзэ чик санэ басьтытэк. Туала улон-вылонмес, пе, берлань ум берыктэ ни. Нош асьсэос ялан ушъяло эксэй кивалтон аръёсты, Совето властез, В.И.Ленинэз курласа. Отчыозь, пе, Россия мукет кунъёсы трос нянь келя вал, тужгес но Англие, Германие. Огзэ вераны "вунэто": со чотын узырмизы дворянъёс но помещикъёс, нош ужась калык сютэм но начар улӥз. Али но крестьянъёсты синтэм коӵышпи кожало, лэся, ялан пӧяны выро, историез йырчукин возьматыса. Кызьы-о ӟечен уд вайы 60-тӥ�70-тӥ аръёсты? Соку одӥг мурт но ужтэк ӧз пукы, магазинъёс бушесь ӧй вал, кузь черодъёсты но ӧм адӟылэ. Урод улонысь-а ужась адями арлы быдэ сямен зарезь дурын, санаторийын яке шутэтскон юртын отпусксэ ортчытъяз, дунтэк квартира басьяз, эмъяськиз, дышетскиз? Гуртъёс ӝутскыны ӧдъязы гинэ - соосты выжытӥзы ик тарказы. Музъем вылын ужасьёслы, пе, казнаысь туж трос коньдон кошке. Тӥни малы асьмеды сюдо быдэс дуннеысь кылем-мылем сиён-юонэн. Озьы пачказы колхозъёс, совхозъёс, фермер хозяйствоос. Кивалтӥсьёсмы валатэк, нош оло юри валаса вылысь, мурт шаерысь кузёосты узырмытӥзы. Асьмелэнъёслы сётыны жаль потэ. Кӧтмы тырымон сюдо ни "ножки Буша" сӥлен. Зэмен но, курег макесъёс вылтуссыя чебер, сиыны небыт, шӧмзыя гинэ зэмос сӥльлы уггес кельшо. Глазовысь тылобурдо фабрикалэн продукциез чылкак мукет, пӧзьтыку ик зумыт зыныз корка тыр вӧлме, сиемед потытэк но сиёд. Малы меда дорамы будэтыны луонозэ но зарезь сьӧрысь басьтоно, эшшо ке долларен? Москвае вуылыкум пайми тани малы: Казанской вокзал вадьсысь ик адӟи бадӟым букваосын "Американская картошка" гожтэмез. Иське, таиз туж ческыт, вылды, отысь- отысь ваё бере. Нош Россиын будэтэмез сисьме, утьыны кужыммы уг тырмы. Та ужез капчиятыны коньдон ӧвӧл. Мон Советской власть кивалтон вакытэ будӥ бере, ялам тодам ваисько вождьмылэсь верам кылъёссэ. Со шуиз: люкиськыса ужаса ёрмонысь ноку но уд поты. Жаль, крестьянъёслэсь улон-вылонзэс умоятонъя ас малпанъёссэ быдэстыны ӧз кылды. Коллективизация ортчытэм аръёсты Ленин вылэ ке но погыльтыны выро, ум вунэтэ: та ужез ортчытӥзы И.В.Сталин но солэн юрттӥсьёсыз. Игра�Зура сюрес вылын одӥг гурт луыны кулэ вал. Со Кутявин нимаське вылэм. Тӥни со пичи гинэ йӧно гуртэз, вань улӥсьёссэ кулак карыса быдтӥллям, пазяллям. Бервылаз кылем льӧмпуосты колодчаез мынам адӟеме вань на. Котькызьы мед луоз, но калык огазьын ужаны, выль сямен улыны пумен дышиз. Бадӟым ож кутскон азьын котькуд гуртын колхоз вал, улӥм умой, няньлы ёрмытэк. Ваньзэ сураз-пожаз война. Пыд вылазы султыны вырись хозяйствоос лябӟизы, воргорон кужым быриз, валъёс но техника фронтэ келямын вал. Кыкетӥез та выллем ож гурт вылтӥ погыльскиз, выльдӥськон кутскыса. "Удмурт дунне" газет куд-ог юн хозяйствоосты возьматъя на. Соос понна шумпотоно, мукетъёсыз ласянь куректоно. Уго данакез лябӟемын, кызьы меда ӝутскозы на? Али оскон вань Владимир Путинлы. Егит президент мед валасал гурт калыклэсь курадӟонзэ, медаз сёты музъемез вузаны-басьтыны. Нянь юдэс понна куспамы жугиськыны медаз кылды. Тӥни кыӵе висён позыръя гуртын улӥсьёслэсь сюлэмзэс. А.Корепанов. Игра районысь Шор Шадбег гурт. Ӟечбур, инспектор! Котькудӥз адями - городын-а, гуртын-а, ёрос центрын-а, посёлокын-а со улэ - одно ик пумиськоно луэ милициысь инспектореныз. Котькуд 3-3,5 сюрс улӥсьлы быдэ юнматӥське участокъя инспектор. Со аслаз микрорайоназ зэмос кузё луэ, тодэ ӟечсэ но, уродзэ но. Зэм, берло дыре улонамы кырсез тросгес пумиськылэ. Выльдӥськон шуонмы кутскем бере, улонмы огыр-бугыр луыса кошкиз. Уноез адямиос ужзэс ыштэмен чӧлскизы юон, лушкаськон, эрказъяськон вылэ. Вӧлмыны кутскиз наркомания, СПИД, туберкулёз. Вань со "висёнъёсын" нырысьик пумиськоно луэ инспекторлы. Кызьы верало калыкын, солы 200 пумо ужъёсты быдэсъяно луэ. Соин но, дыр, инспектор луыны мылкыд карисьёс трос уг шедё. Ар талэсь азьло Удмурт Республикаысь Югдурез утёнъя министерство участокъёсъя инспекторъёс пӧлын конкурс ялӥз. Ар ӵоже котькуд городын, котькуд ёросын мынӥз аспӧртэмлыко ӵошатскон. Самой устоосыз ини пыриськизы республикая конкурсэ. Кылем средае солы йылпумъянъёс лэсьтэмын. Милициын ужасьёс сяна, отчы ӧтемын вал городъёсысь но ёросъёсысь администрациослэн кивалтӥсьёссы. Бадӟым ужрадэ ветлӥзы Удмурт Республикалэн Президентэз Александр Волков, Удмурт Республикая валтӥсь федеральной инспектор Сергей Чикуров, Кун Кенешысь ялан ужась комиссилэн кивалтӥсез Михаил Кокорин. Ужрадэз усьтыса, Югдурез утёнъя министр генерал-лейтенант Владимир Щербаков милиция сярысь сюлмаськемзы понна тау кариз Президентэз, Кун Кенешез но Правительствоез. Кызьы со вераз, али милицилэн ужез сярысь Правительствоын дасяське нимысьтыз программа. Министр шумпоттӥз эшшо одӥг иворен: "Туннэ Президент гожтӥз Указ. Табере 1-тӥ мартысен вань инспекторъёслэн уждунзы 200 манетлы йылоз. Президент озьы ик аслаз фондысьтыз висъяз 2 миллион 100 сюрс манет. Конкурс ортчытыны чакласьком туэ но. Со ужлы 850 сюрс манет коньдон висъян сярысь Положение юнматэмын ни". Президент Александр Волков шуиз: "Гажано эшъёс! Асьмеос ваньмы одӥг ужез лэсьтӥськом. Берло дас аръёс ӵоже асьмеос трос ӟечсэ ыштӥм. Но калыкен ужанэз выльысь ӝутыны кулэ. Татын бадӟым инты басьтэ уполномоченной инспекторлэн но ужез. Улонысьтымы уродэныз но кырсеныз нюръяськыны асьме доры палэнысь нокин уз лыкты. Национальностьмылы зэмос кышкытлык кылдытэмын. Асьмелы экономикамес ӝутыны кулэ. Соку котькуд удыслы коньдон но тырмыт висъяськоз. Нимысьтыз ужано котькудӥныз адямиен, солы юрттоно. Саклык висъяно гурт администрациослэн кивлатӥсьёссылы. Тау ужамды понна!" тани вуизы самой шумпотымонэсь минутъёс - вормисьёсты данъян но пусъён. Уноезлы милиционеръёслы сётэмын данъян грамотаос, уждунъёссы вӧзы ватсаса уно окладъёс, кузьымъёс. Нош конкурсын нырысетӥ интые потӥз Ижевскысь Октябрь ёросысь югдурез утёнъя отделысь инспектор милициысь старшой лейтенант Алексей Широбоков. Солы сётэмын выль квартиралэсь усьтон но Удмурт Праивтельстволэн Данъян грамотаез. Кыкетӥ инты шедиз Играысь инспекторлы младшой лейтенантлы Петр Клементьевлы. Таизлы кузьмазы автомобиль. Ӟечкыласьком вормисьёсты ми но. Соин валче шуиськом - конкурс йылпумъяськиз, конкурс азьланьтӥське. Веранмес йылпумъяса ватсалом. Удмурт Республикалэн Президентэз пусйиз: азьланяз улон интыос лэсьтыны но басьтыны чакласьком нимысьтыз коньдон висъяны. Со пӧлысь 70 процентэз сётэмын луоз ёросъёсы. Н. Байтеряков. Удмурт Республикалэн Презиеднтэз А. А. Волков но Югдурез утёнъя министр В. Ф. Щербаков; Алексей Сидоров (Ижевск), Андрей Дегтярев (Сарапул), Алексей Широбоков (Ижевск); Играысь Петр Клементьев выль машинаез вӧзын; синпельлы фото. В. Беломорскихлэн туспуктэмъёсыз. Чур бугор Кин кӧня шутэтске Шунды пуксён палась уноезлэн кунъёслэн улон-вылонзы огвыллемесь, но отпускъёссы пӧртэмесь. Тужгес но бадӟымесь соос Финляндиысь промышленностьын ужасьёслэн но служащийёслэн. Соос араз шорлыдын 43,5 нунал шутэтско. Кыкетӥ интыын итальянецъёс - 43, собере мыно галландецъёс но немецъёс - быдэн 39 нунал. Списокез йылпумъяло США но Япония - 23 но 25 нунал. Озьы гожтэмын Германиысь экономикаез эскеронъя центрлэн отчётаз. Но отын ик тодосчиос пусъё на: огъя ужан дырлэсь быдӟалазэ ужамтэ нуналъёсъя гинэ дунъяны уг луы. Финляндиын, кылсярысь, ужан арнязы, Германиын но Голландиын сярысь, кузьгес, соин ик финнъёс ӧжыт ужало шуыны уг луы. Финляндиысь индустриын самой кузесь отпускъёс сётӥсько коньдон тырыса (араз 37,5), нош праздникъёсы коньдон тыриське куать нунал понна гинэ. Коньдон басьтыса тужгес трос шутэтско Испаниын, Португалиын но Япониын - быдэн 14 нунал. Россиын самой кузь отпусксы шахтаын ужасьёслэн - 67 нуналозь. 54 нунал шутэтско дышетӥсьёс. Сомында ик ялкаро Кун Думаысь депутатъёс. Соослы, кин ужа Президентлэн Администрацияз, Правительствоын, Вылӥ Судын, интыосысь администрациосын, отпуск тупатӥське 30 нунал. Соослэн отпусксы будыны быгатэ ужам стажзы чотын: 10-ысен 15 ар ужам понна ватсаське на 10 нунал, 15 арлэсь уногес ке, 15 нунал. Мукет организациос но предприятиос сярысь ке верано, соос шутэтскон дырзэс асьсэос тупатыны быгато. Но со сярысь верамын мед луоз ужан коллективлэн огкылаз, озьы ик со мед тупалоз Россилэн законодательствоезлы, отпуск 24 нуналлэсь ичи луыны кулэ ӧвӧл. Чур бугор Кӧня манет сылэ тыр улон? Америкаысь ньыль муртлэсь семьялы араз шорлыдын ог 39000 доллар усе. Со толэзяз 3500 доллар яке 98000 манет. 54 процентэз американецъёс лыдъяло: "туж шудо улон понна" соослы кулэ 5 поллы тросгес - араз 200000, толэзяз 16600 доллар яке ог 486800 манет. Эй-Би-Си телекомпания американецъёслы юан сётӥз: "Кӧня коньдонэн тӥ асьтэды узыр адямиен лыдъясалды?" Уно миллионеръёсын узыр странаын 1 миллион сярысь малпало 24 процентэз гинэ адямиос. Нош США-ысь уноез улӥсьёс - 54 процентэз - веразы, тыр улон понна соослы тырмоз 200 сюрс доллар но, со сяна, 44 процентэз 100 сюрс доллар но улыны окмоз шуизы. Архивысь материалъёсъя Удмуртия ЪЪ дауре 1981-тӥ ар 23-тӥ февральысен 3-тӥ мартозь Москваын ужаз КПСС-лэн ЪЪВИ съездэз. Отын вераськон мынӥз экономикаез научно-технической амалъя азинтоно шуыса. Съезд эскериз 1981-1985-тӥ аръёслы дас одӥгет пятилеткалы планъёсты но 1990-тӥ арозь быдэстоно ужпумъёсты. Капитальной лэсьтӥськонын бадӟымесь ужрадъёс ӧз чаклаське, партилэн кивалтон удысаз воштӥськонъёс ӧз ортче. Та ар историын тупаса улон понна нюръяськонэн тодмо кылиз. Мынӥз пыӵал-тӥрлык кулэстон но ядерной оружилы пумит нюръяськонын. Удмуртиын улӥсьёс тупаса улон понна коньдон бичазы. Кылсярысь, "Ижсталь" объединение тупаса улон фондэ 80 сюрс манет сётӥз, Воткинскысь машина поттон завод - 47,5 сюрс манет, Сарапулысь электрогенераторъёс поттон завод - 11,4 сюрс манет, Глазов ёросысь колхозъёсын но совхозъёсын ужасьёс - 1,5 сюрс манет. 1981-тӥ арын "Ижмашын" поттэмын вал куать миллионэтӥез мотоцикл, Ленин нимо заводын - ньыль миллионэтӥез редуктор. Ижевскысь радиозаводын тросэн лэсьтӥзы "Сириус-315 пано" радиола. Дасэтӥ пятилеткалы чаклам ужпумъёссэс умоен быдэстэмзы понна, "Буммашлы" но Воткинскысь машина поттонъя заводлы сётэмын Трудовой Горд Знамя орден. "Ижсталь" объединениысь тодосчиослы но специалистъёслы СССР-лэн Министръёссылэн Кенешсылэн премиоссы сётэмын. Озьы ик вылӥ дунъямын вал Воткинскысь машина лэсьтон заводысь Р. Н. Бабушкин бригадирлэн механосборочной цехезлэн нефтехимической промышленностьлы задвижкаос лэсьтонъя производствоез. Со "Ижмашлэн" вузъёсыз пӧртэм кунгож шаеръёсын тодмо луизы. 1981-тӥ арын Республикаысьтымы промышленность, 1913-тӥ арын сярысь, одӥг нуналскын ньыльполлэсь уно продукция поттыны быгатэ ни вал. Одӥг нуналскын гинэ "Ижмашын" 350 легковой машина но 857 мотоцикл поттӥськиз. Умояны ӧдъяз калыклэн улон-вылонэз. Тани Ижевскын ӝутскыны ӧдъяз кыкетӥез дас куать этажъем улон корка. Ӧсъёссэ усьтӥз "Удмуртия" магазин. Та арын Удмуртиын печатлаське 50 пала газет. Соос пӧлысь ньылез быдэс республикая вӧлме. Огъя тиражзы 490 сюрс экземплярлэсь ятыргес вал. Республикалэн ужазы ни Писательёслэн, Композиторъёслэн, Художникъёслэн но Журналистъёслэн союзъёссы, вить театр, филармония но цирк. 1-4 апреле Москваын ортчизы Удмурт АССР-ысь литературалы но искусстволы сӥзем нуналъёс. Та ужрадэ пыриськизы кырӟанъя но эктонъя "Италмас" ансамбль, музыкая театрлэн оркестрез, Удмурт АССР-ысь телевидениен но радиовещаниен кун комитетлэн хорез, самодеятельной коллективъёс, писательёс, художникъёс. Ваньмыз 470 адями. Та пумиськонъёс туж тунсыко но пайдаё ортчизы. Аслэсьтыз 50 арес тырмонзэ пусйиз Удмурт драмая кун театр. Та вакытэ солэн труппаяз ужаз 35 артист. Ӝыны даур тырмонзэ пусйиз Удмурт научно-исследовательской институт но. Та дыр ӵоже со печатлаз 176 книга, ортчытӥз 30 сюрс пала научной конференция, 70-лэсь уно пол экспедициосы потаз. Октябре Москваысь Третьяков галерея нырысьсэ басьтӥз Удмуртиысь художниклэсь А. П. Холмогоровлэсь (З. П. Михайловалэн портретэз) суредзэ. Декабре художниклы сётӥзы РСФСР-лэсь кун премизэ но калык художник ним. Е. М. Ушакова, Удмурт Республикаысь ЦДНИ-лэн иворъёсъя отделэзлэн начальникез. Удмурт областной парторганизацилэн КПСС-лэн ЪЪВИ съездаз ветлэм делегатъёсыз Москваысь Красной Площадьын (паллянысен буре): Ижевск механикая заводысь токарь Г. Н. Елабужев, Воткинск машзаводысь токарь Л. С. Лыткин, Ижевскысь вуриськон фабрикаысь дӥсь вандӥсь В. А. Сентякова, "Удмуртнефть" огазеяськонысь бурильщик А. А. Иванов, Сарапул радиозаводысь регулировщица Н. В. Горшенева, "Ижсталь" производственной огазеяськонысь андан пӧзьтӥсь Г. П. Мерзляков. Кылдэ удмурт культурая дэменлык Коми Элькунысь Сысольск ёросысь Заозерье гуртын кылдытэ удмурт культурая нырысетӥез дэменлык Сысольск ёросысь Визинга гуртысь вашкала культурая музейлэн директорез Татьяна Беляева ивортэмъя, алигес ортчиз татын вуоно дэменлыклэн нырысетӥ кенешез. Огазеяськонэз нимысьтыз юнматон вылысь дась ини устав но валтӥсь куронъёс. Заозерье гуртын уло куамынлэсь уно мӧйы удмуртъёс. Соос эркын верасько анай кылынызы. Ӟеч тодо удмурт культураез, удмурт сямъёсты-йылолъёсты. Вань удмурт дӥсьсы. Соослэн нылпиоссы, нунокъёссы (нылпиоссылэн пиналъёссы) но асьсэды удмуртъёс шуо. Оглом учконо ке, Заозерье гуртын уло дас ньыль выжыысь адямиос. Елена Карасева (Комиинформ). Кырӟало паньтэмъёс Ижысь "Эктон коркаез" тодӥсьтэмез ӧвӧл ни, дыр. Асьсэлэн эктыны-кырӟаны быгатэменызы соос кунгож сьӧрын улӥсьёсты но паймытъязы ни. Нош Можгалась усточиос люкаськыло "Кырӟан корка". Толэзьлы быдэ соос городын но районын улӥсь калык понна концерт возьмато, фольклор праздник ортчыто, Ижысь "Эктон коркаез" доразы ӧтчало. В. Кибардина. Кызьы улӥськод, фермер? Выль даур, кошкемез сямен ик, кутске музъем сярысь ужпумен но сюлэмшугъяськонэн. 1991-тӥ арысен коллективной хозяйствоос данакез куашказы, соос интые кылдылӥзы выль: фермеръёс, эштосъёс, кооперативъёс... Россия Федерацияя оглом учконо ке, гурт удыслэн 68 процентэз шедемын нимаз кузёос кие, 13 процентэз ужа на коллективной амалэн, кылемез - кин кызьы быгатэ но кинлы кызьы кельше. Кыӵегес югдур асьме дорын? 2001-тӥ арлэн кутсконаз фермеръёслэн лыдзы вуиз 3 сюрс 356-озь. Районъёсъя ке верано, тужгес но трос Завьялово котырын - 386 хозяйство. Кыкетӥ интыын - Грахово (317), куинетӥ - Як.-Бодья (211). 200-эз ортчо Алнаш но Сюмси, 100-лэсь ятыр Игра, Шаркан, Селта, Ува, Можга, Пичи Пурга, Каракулино, Воткинск но Сарапул районъёс. Фермеръёс вань городын улӥсьёс пӧлын но. Ижевскын соос 11, Сарапулын - 13. Фермеръёс киын - 72 сюрс 261 гектар музъем, со пӧлысь гыроно-кизёно муоссы 63 сюрс 802 гектар, республикая - 4,5 процентэз. Тамында гектарлы - 1100 трактор, 210 ю-тысь кутсась комбайн, куд-огезлэн гинэ вань тысь куасьтон но шертон техниказы. Кылем арлы йылпумъясьёсъя шаерамы будэтэм ю-няньлэн 4,2 процентэз усе крестьян (фермер) хозяйствоос вылэ, картофка - 22 но бакча сиён 6 процентэз. Оглом учкыса, со ӧжыт ӧвӧл, но кун ласянь умой-умой юрттэт луысал ке, та лыдпусъёс эшшо но будысалзы. Жаляса верано, 1995-тӥ арысен кутскыса, фермер луыны мылкыд карисьёс кулэсмизы. Мугез одӥг: гуртын будэтэм продукция дунтэм, нош энергокужым ялан дуноя. Тӥни ма кышкатэ адямиосты. Со дыре ик гуртын улӥсьёс пӧлын ог 10 сюрс мурт ужлы ёрмыса пуке. Выль кылдэм крестьян хозяйствоос ӵапак интыяз луысалзы. Вылаз ик, огазеяськонэ пыриськемъёс асьсэ кужымен коньдон люканы но техника басьтыны быгатысалзы. Крестьян (фермер) хозяйствоос (Удмурт Республикаысь Госкомитет ивортэмъя) 1.01. 2001-тӥ арлы 1991 1992 1993 1994 1995 1996 1997 1998 1999 2000 2001 Крестьян (фермер) хозяйствоос 47 701 2212 3166 3462 3604 3626 3559 3366 3421 3356 Музъем юнматэмын (га) 1961 18600 49948 76583 72515 73138 73608 73521 73238 70809 72261 1992 арысен фермер хозяйствослэн кулэсмемзы - - 36 117 568 795 988 1186 1503 1797 Продукция поттэын (тоннаен вераса): 1992 1993 1994 1995 1996 1997 1998 1999 2000 Ю тысь 18143 322040 37941 27652 31465 36813 19430 17382 24102 Картофка 6682 9500 23332 11493 8600 10087 9831 11768 13391 Бакча сиён 155 702 888 738 443 1344 460 2153 1710 Йӧл (ц) 286 8269 8683 8749 8413 8326 7002 7179 6556 Сӥль 1350 1723 1226 1180 1104 1030 837 829 874 Чечы (ц) 5 34,5 5 27 17,5 14,8 14,5 21,5 33,7 Чорыг 37 32 27 30 40 32 60 52 50 Ыжгон (ц) - 8,7 10 8,5 5,6 6,1 4,9 4,5 5,7 Вордоно пудолэн йырыз: 1993 1994 1995 1996 1997 1998 1999 2000 2001 Сюро таза пудо (КРС) ваньмыз 5087 9398 7350 8038 7711 7205 5956 6043 6335 Скал 2083 3724 3919 4217 3994 3744 3247 3170 3016 Парсь 2170 3298 3649 4542 4293 4376 3829 4742 4726 Ыж но кеч 3600 5040 4841 4305 3620 3334 3162 2857 2605 Музъем ужен вырем сяна, фермеръёс бадӟым саклык висъяло пудо вордонлы. Туннэ нуналлы соослэн лыдзы 6 сюрсэз ортче. Районъёсъя ке верано, сюро таза пудо трос Граховоын - 1468. Кысконо скал уллёзы - озьы ик грахъёслэн - 616 йыр, соос бере мыно сюмсиос - 281, селтаос - 201, завьяловоос - 199. Парсь вордон ласянь но Граховоысь крестьян (фермер) хозяйствоос висъясько. Удмуртия кема аръёс ӵоже данъяськылӥз ыж будэтонэн. Но берло вакытэ колхоз фермаосысь соосты уд пумита ни. Пайдазэ шӧдытэк, хозяйствоос чутрак куштӥськизы. Озьы ке но, ыж вордон удыс шаерамы ӧз быры, сое выльысь кутскыса радъязы нимаз кузёос - фермеръёс. Республикая али 2600-лэсь ятыр ыжъёс. Та ужен мыло-кыдо выро пургаос, ыжъёссы ог сюрс йыр. Соос бере мыно грахъёс. 100-лэсь ятыр ыж возё алнашъёс, завьяловоос, каракулиноос, сюмсиос, селтаос, играос, кезъёс. Ӧжыт ӧвӧл вал вордӥсьёс но. Крестьян хозяйствоосын сотэк нокызьы уг луы. Бакча гыроно, картофка мерттоно, пудо сиён дасяно - техникаез котькытчы уд куты. Крестьян хозяйствосын 300 йыр пала вал лыдъяське. Нимаз люкиськыса ужасьёс тужгес но яратыса басьтӥсько тылобурдо возён борды: ӟазег, ӵӧж, курег, курка вордо. Вань бӧдёно возисез но! Сӥльзэ но пузъёссэ ресторанэ келяло - адӟымтэ-кылымтэ сиён. Мукет сямен вераса - деликатес. Арлэн кутсконаз, Госкомстат ивортэмъя, фермер хозяйствоосын 14 сюрслэсь ятыр тылобурдо уллё пусъемын. Та удысъя но грахъёс азьпалан. Соос бере мыно завьяловоос, сюмсиос. Камбаркаос но бодьяос тылобурдоен уггес выро. Пудо вордон ноку но пайда уз сёты, тырмыт ӧд ке будэты тысё культураос, картофка но жалем сиёнъёс. Ю нянь будэтонъя кылем арын ӟечгес ужазы Алнаш районысь крестьян хозяйствоос, гектарезлы быдэ 19,8 центнер кутсазы. Картофказы удалтӥз дэбесъёслэн - гектарысьтыз 126 центнер лыктӥз. Бакча сиён ласянь ушъямон ужазы озьы ик дэбесъёс. Гектарезлы быдэ 400 центнер басьтӥзы. Республикаен ӵошатыса, ньыль поллы трос! Кылем арын таӵе урожай бсьтэмын: Районъёс Хозяйствоос Ю тысь Картофка Бакча сиён ц/га ц/га ц/га 1. Яр 14 9,3 121 80 2. Глазов 190 14,9 73 60 3. Юкаменск 58 12,4 112 260 4. Балезино 30 11,1 78 19 5. Красногорск 46 8,9 103 - 6. Кез 63 8,2 92 100 7. Дэбес 57 11,3 126 400 8. Игра 130 11,6 95 66 9. Як.-Бодья 81 10,7 84 100 10. Шаркан 65 15,8 120 222 11. Селта 71 6,3 63 200 12. Сюмси 181 7,3 29 - 13. Ува 114 10,4 81 124 14. Вавож 58 6,7 67 - 15. Кизнер 14 5,1 48 - 16. Можга 75 10,7 79 87 17. Грахово 308 10,9 18 - 18. Алнаш 180 19,8 61 36 19. Пичи пурга 71 18,9 108 - 20. Киясово 54 8,7 56 112 21. Каракулино 43 9,1 40 - 22. Завьялово 159 10,9 69 77 23. Воткинск 138 9,6 88 136 24. Сарапул 44 15,3 48 12 Ваньмыз крестьян (фермер) хозяйствоя 2258 11,4 84,3 121,2 Коллективной хозяйствоосъя 11,1 74,7 151 Шаерамы вань будэтэм продукция пӧлысь ю-нянез 4,2 процентсэ будэтӥзы нимаз хозяйствоос, картофкаез - 22 но бакча сиёнэз 6 процентсэ. Удмурт Республикаысь Крестьян (фермер) хозяйствоослэн, кооперативъёслэн огазеяськонзы (АККО УР) 2000-тӥ арын бусы ужлы йылпумъянъёсъя пусйиз тужгес но 17 районысь 58 кузёоосты. Устоосыз пӧлын: Владимир Николаевич Семенов, Можга ёросысь "Торос" крестьян хозяйство. Та районысь ик Александр Михайлович Редькин, Галина Васильевна Белозерова, Петр Гурьянович Леонтьев. Ува палан ужаны быгатэменызы тодмо Александр Николаевич Ашихмин, Грахово районын вылӥ урожай басьто Анатолий Николаевич Рябков, Семен Михайлович Ефремов... Пичи Пурга районын адӟем карымон луэ Михаил Александрович Леонтьев. Тужгес но трос нимъёс пусъемын Завьялово палан. Фермеръёс мыло-кыдо выро тысё культураосын, картофка но бакча сиён будэтонын. Арысь аре умой ужало Иван Александрович Аришик, Василий Васильевич Чернышев но мукетъёсыз. Ю-няньлэн удалтонлыкезъя ке ӵошатоно, котькинлэсь вылӥ урожай басьтӥз Воткинск районысь А. А. Попов. Гектарезлы быдэ 32,3 центнер кутсаз. Солэсь одӥг центнерлы гинэ ӧжытгес - Сарапул районысь Костино гуртысь Н. Г. Аристов но В. А. Пименов. Картофказы удалтӥз Красногорскысь "Елово" крестьян хозяйство (200 центнер) Шарканысь П. М. Киселев (191,1) ц) но Н. И. Собин (180 ц). Бакча сиён будэтӥсьёс туж ӧжыт. Озьы ке но, ӟеч кылъёс вераны кулэ Ува районысь Ф. М. Хамитова сярысь. Со сугон будэтэ. Кык гектар вылысь 260 центнер басьтӥз. Бакча сиёнзы удалтӥз Юкаменскысь "Шеп" крестьян хозяйствоын но (кивалтӥсез С. Н. Данилов). Ар ӵоже лыдпусъёсты учкыса, нимаз кузёос но кооперативъёс пӧлын ӟеч ужасез ӧжыт ӧвӧл. Озьы ке но, республикалэн огъя поттэм сиён-юонэз соослэн пайзы витемлэсь ӧжыт на. Талэн мугез валамон: гурт удыс (озьы ик фермеръёс но), ёрмо коньдонлы, техникалы, удобренилы. 90-тӥ аръёслэн кутсконазы соос туж мыло-кыдо басьтӥськизы вал выль амал борды, али осконзы ӧвӧл ни, "фермер странаез сюдоз" шуонлы. Озьы ке но, лёгем сюрессэс быгатэмзыя но ас валамзыя нуо. Капчи улон утчасьёсыз кемалась кошкизы ни, музъем борды кылизы со сярысь сюлмаськисьёсыз но выжыенызы бурдаз бурмемъёсыз. *** Фермеръёс сярысь веранэз йылпумъяса, амалтэк берытскем потэ ЪЪ даурлэн кутсконаз. Россиысь Госкомстат ивортэмъя, 10-тӥ аръёсы 71 губернияя кизёно муос йылӥзы 9,3 процентлы, ю-нянь 31 процентлы ятыр кутсамын, сое кунгож сьӧры вузан будӥз 46 процентлы. Нырысетӥ герман ож кутскытозь, Россия умой-умой радъяз пудо вордонэз но: валъёслэн но парсьёслэн лыдзы йылӥз 15,7 но 15,3 процентлы. Тырмыт возизы сюро таза пудо. 1900-1913-тӥ аръёсы техника будӥз 3,9 поллы, минерал сылалэз бусые поттон 6 миллион пудысен вуиз 35 миллионозь. 1913-тӥ арын адямилы быдэ 102,2 манетлы сиён-юон будэтэмын. Но Германиен ӵошатыса, со 3 поллы ӧжыт, Францилэсь - 3,3 поллы, США-лэсь - 7 поллы. Экономистъёс валэктэмъя, Россия бере кылиз вуж амалэн ужаменыз но ӧжыт урожай басьтэменыз. Нош со вакытэ странаын улӥсьёс пӧлысь 85 процентэз крестьянъёс вал. Национальной доходлэн 51,4 процентэз потӥз соос бордысь, 28-эз гинэ - промышленностьысь. Гурт удыслэсь юнмамзэ герӟало 1906-тӥ арын апреле Россилы югдурез утёнъя министре П. А. Столыпинэз юнматэмен но музъем ужъёсты выль сямен радъянъя реформаос ортчытэмен. Крестьянской банк соку туж ӟеч юрттӥз трос арлы кредит висъяса. Ортчемзэ тодытэк, азьлане сюрес ӧвӧл, шуо. Тӥни малы куд-ог дыръя берытскылыны кулэ, дыр, историе. Л. Медведева. Ящур машинае медаз кечырскы Россия Федерациысь Гурт хозяйствоя министерствоысь Пудоез эмъянъя департаментлэн ивортэмезъя, Великобритания улосвылын пудо-живот ящурен висе. Та кышкыт висён шаерамы медаз вӧлмы шуыса, Удмурт Республикаысь Пудо эмъянъя валтӥсь управление нимысьтыз ужрадъёс чаклаз. Озьы алэм дыр ӵоже нялтас мынӥсь-ветлӥсь машинаосын республикаямы вайыны уг яра улэп пудо-животэз, пӧртэм пумо сӥлез, чорыгез, йӧлэз но йӧллэсь сиёнъёсты, дась лэсьтэмъёссэ но вераса. Кышкытлык кылдыто пудо сиёнъёс но. Та куронэз чакласа возьыны косэмын Удмурт Республикаысь асветлӥсь машинаосты но мукет техникаез эскерыса возёнъя кун инспецилы. Л.Кимова. Мусо нылкышноос! Сюлмысьтым ӟечкыласько тӥледыз праздникеныды! Тӥ асьтэлэн чебереныды но яратонэныды шунтӥськоды милемды, пиосмуртъёсты. Тӥ котьку милемын артэ. Секыт вакытъёсы юрттыны тыршиськоды, вормонъёсы ӝутӥськоды. Улонамы кыӵе ке азинсконъёсмы вань ке, соос басьтэмын тӥледлы луыса. Тӥ, гажано анайёсмы но кузпалъёсмы, сётӥськоды милемлы улон кужым. Тӥ утиськоды семьялэсь шунытсэ. Шуд но тазалык, пумтэм яратон тӥледлы - весяклы. Удмурт Республикая Валтӥсь федеральной инспектор С.В.Чикуров. Мусо нылкышноос! Та тулыс нуналъёсы городын трос сяськаос. Тӥ но соос выллем ик - чебересь, яркытэсь. Тӥ чебертӥськоды городмес. Тӥ - милям тужгес бадӟым узырлыкмы. Али одӥг удысэз но син азе пуктыны уг луы нылкышноостэк - соос вуттӥсько котькытчы. Мон тау карисько тӥледлы нылпи будэтэмды, арыдоос сярысь сюлмаськемды, семьядылы шуныттэс сётэмды понна. Паймисько нылкышно кужымлы - соос туж секыт, быдэстонтэм ужез но капчиен лэсьто, пиосмуртъёсын артэ вормонъёс басьто. Паймисько нылкышнолэн аспӧртэмлыко, воштонтэм луыны быгатэмезлы. Ӟечкыласько тӥледыз 8 Мартэн! Зарезь мында сяська, шумпотон но яратон, ӟеч мылкыд сӥзисько. Ымнырысьтыды пальпотонды ноку медаз кысылы. Ижевск городлэн мэрез А. Салтыков. Мусо нылъёсмы Тӧдьы кызьпулэн арама югытаз Асьме нылъёсмы будо, пе, веськрес. Сюлэм но, зэмзэ, йыгаське кадь юнгес, Мусо нылъёсмы шоры учкыса. Дунне но соку уката паськыта, Пыдъёс капчиен вамышто соин ӵош. Таӵе нылкышно ке шорад пальыша, Соин, бен, зымод... зарезь пыдэсозь. Я, вае, эшъёс, со понна ӝутоме Туннэ пальккаськись тырвыло сюмыкмес. Зарни сюлэмыз понна тау шуоме, Медаз куасьмы - мед жильыртоз дун ошмес. Н.Ильин. Архивысь документъёсъя Нылкышноос вӧлъязы пельпумзэс 1921-тӥ арын 8-тӥ Мартэз соку гинэ кылдытэм Удмурт автономной областьысь нылкышноос шумпотыса пумитазы. Ӵукна ик Ижевскысь ож тӥрлык поттон завод доры киязы флагъёсын, ӧтёнъёсын (лозунгъёсын) чылкыт дӥсяськем нылкышноос люкаськизы. Соосты праздникен ӟечкылазы компартилэн Иж уездысь ёзысьтыз адямиос, заводлэн кивалтӥсьёсыз, Удмурт областьысь ревкомлэн нимыныз - Галанов, Агапитов, Казанцев. Нылкышноос данъязы Октябрь революциез - со нылкышноослы трос право сётӥз уго. Завод дорысь люкаськемъёс Горд площадьысь вынлыко шайгуос доры выжизы. Духовой оркестр шудӥз ватон гурез. Кутскиз митинг. Нылкышноос буре ваизы граждан ожын быремъёсты. Тросэз синкылизэс возьыны ӧз быгатэ. Та нуналэ Ижевскысь вань театръёсын но клубъёсын нылкышноослы дунтэк концертъёс, спектакльёс возьматӥзы. Ӟеч пусйизы нылкышно праздникез Сарапулын но. Ужан нунал вакчиятэмын вал. Нуназе бере сӥё-дано усьтӥзы городысь выль нылпи яслиез но нылпи столовоез. Ӝыт Политпросвещениея юртын уездысь нылкышноосты ӟечкылазы исполкомысь, егитъёслэн союзысьтызы, калыкез дышетонъя ёзысь, нылкышноослэн секциысьтызы адямиос. Озьы ик возьматэмын вал дунтэк концерт. А.Касаткина. Мусо нылкышноос! Нырысетӥ тулыс праздникен пӧртэм буёлъёсыз но мылкыдъёсыз вань. Со улӟись инкуазьлэсь йырез поромытӥсь шӧмзэ вуттэ, анай килэсь шунытсэ тодэ вайытэ, сюлэмын яратонэз сайкатэ, вуоноезлы оскон пыӵатэ. Со понна ик яратӥськом асьмеос та нуналэз. Вань анайёсты, нылъёсты, сузэръёсты-апайёсты ӟечкыласько 8-тӥ Мартэн! Тӥ котырын котьку ик мед луозы окымон эшъёсты, дорады но ужан-дышетскон интыяды мед кузёяськозы ог-огдэ валан но вӧзысь адямилы юрттыны тыршон. Светлана Смирнова, Россия Федерациысь Кун Думаысь депутат. Удмурт Республикалэсь сӥлы карон нимъёссэ сётон сярысь Удмурт Республикалэн Президентэзлэн Указэз Сӥлы карон нимъёс сётоно: Журналистика удысын вылӥ азинсконъёсыз но уно аръёс ӵоже сюлмысь тыршемез понна "Удмурт Республикаысь дано журналист" Бородина Ольга Федоровналы - "Кенеш" журналлэн кыл кутӥсь секретарезлы; тазалыкез утён удысын вылӥ азинсконъёсыз но уно аръёс ӵоже сюлмысь тыршемез понна "Удмурт Республикаысь тазалыкез утён удысысь дано ужась" Спивак Ирина Рафаиловналы - Иж городысь Ленин ёросысь санитарияя валтӥсь кун врачлы; законностез но право радлыкез юнматонын вылӥ азинсконъёссы но уно аръёс ӵоже сюлмысь тыршемзы понна "Удмурт Республикаысь дано юрист" Сажин Сергей Николаевичлы - Россиысь ФСБ-лэн Удмурт Республикая управлениезлэн секретариатысьтыз юрисконсультлы; "Удмурт Республикаысь правоосты утён ёзъёсысь дано ужась" Бобков Александр Анатольевичлы - Россиысь ФСБ-лэн Удмурт Республикая управлениысьтыз отделэн кивалтӥсьлы; транспорт удысын вылӥ азинсконъёссы но уно аръёс ӵоже сюлмысь тыршемзы понна "Удмурт Республикаысь транспорт удысысь дано ужась" Касаткин Юрий Митрофановичлы - Играысь автотранспортъя кун предприятиысь водительлы; Ситников Владимир Алексеевичлы - Россиысь ФСБ-лэн Удмурт Республикая управлениысьтыз отделениен кивалтӥсьлы; гурт удысын вылӥ азинсконъёссы но уно аръёс ӵоже сюлмысь тыршемзы понна "Удмурт Республикаысь гурт удысысь дано ужась" Корепанов Николай Сергеевичлы - "Россия" колхозысь валтӥсь зоотехниклы, Игра ёрос, Трубашова Людмила Андреевналы - гурт удысъя "Авангард" кооперативлэн кивалтӥсезлы, Вавож ёрос; экономика удысын вылӥ азинсконъёсыз но уно аръёс ӵоже сюлмысь тыршемез понна "Удмурт Республикаысь дано экономист" Несмелова Полина Петровналы - гурт удысъя управлениысь отделэн кивалтӥсьлы, Ува ёрос; мугорез кыдатон культураез но спортэз азинтонын вылӥ азинсконъёссы но уно аръёс ӵоже сюлмысь тыршемзы понна "Удмурт Республикаысь мугорез кыдатон культурая но спортъя дано ужась" Кельдияров Леонид Григорьевичлы - профессиослы дышетонъя 38 номеро лицейысь физкультурая дышетӥсьлы; Удалова Галина Васильевналы - республикаысь олимпийской резервъя нылпи школаысь тренерлы-дышетӥсьлы; Ускова Татьяна Алексеевналы - Глазовысь В. Г. Короленко нимо кун педагогической институтысь дышетӥсьлы; Удмурт Республикалэн Президентэз А. А. Волков. Ижевск город, 2001-тӥ арын 27-тӥ феврале. � 28. Ӟечкылан 8-тӥ Мартэ милям семьяямы кык полэс праздник вуэ. Та нуналэ вордӥськиз яратоно муртмы Николай Михайлович Малых. Вордӥськем дорез - Шаркан ёросысь Быги гурт. Кузпалме но атаймес сюлмысьтымы ӟечкыласьком вордӥськем нуналэныз. Сӥзиськом тазалык но шудо улон. Али кадь ик котьку лу егит мылкыдо, синмаськымон, ужад - гажано адями. Людмила кузпалыд, Вера нылыд но Андрей пиед. 8-тӥ Мартэн ӟечкыласько Шаркан ёросысь Вортча починка гуртысь шунтӥсь шундыме, мусо анайме Екатерина Яковлевна Перевозчиковаез; сузэръёсме Ангелинаез, Ольгаез, Натальяез; кенъёсме Людмилаез но Еленаез, бускель нылкышноосты; эшъёсме Люба, Катя, Лариса Широбоковаосты. Озьы ик та шулдыр праздникен ӟечкыламе потэ Быги гуртысь егитсэ но, пересьсэ но кумаосме; возем нылъёсме Ириночкаез но Анжелаез; чебер анайёсты-юсьёсты кык Ленаосты, Людаез, Светаез, Аннушкаез но солэсь нунызэ. Ваньдылы сӥзисько капчи мылкыд, сайкыт инбам, тупаса улон. Гажаса но яратыса Такъянды. Леонид ФЁДОРОВ Улытозяз эшъёс утчаз "Котькыӵе ужан удысын мед луод, вӧзад ӟеч мылкыдын визьмась, валэктӥсь, бурдъясь, ӟеч адями вань ке, улон ик шулдыргес, инвис ик паськытгес йӧтэ. Суй-пыд уг юскиськы, уката кужмогес ужам потэ". Та кылъёс басьтэмын Удмуртиысь калык кылбурчилэн Герман Ходыревлэн тодэ ваёнъёсысьтыз - Г.Д.Красильниковлы сӥзем очеркысьтыз. Малпасько, таӵе мылкыдын ортчиз Герман Алексеевичлэн аслаз улонэз но. Та ласянь Герми эше туж шудо вылэм - пинал дырысеныз вӧзаз визьмась, бурдъясь адямиос вылӥллям. Собере со егит дырысеныз ачиз трос эшъёсызлы-гожъяськисьёслы - мылкыд сётӥсь, визьмась, ӟеч адями луиз. Калык верамъя, ӟечез ӟечен ик берытске уго. Сое кылбурчилэн вань улонэз возьматэ. Кызьы меда будӥсь пи, Герми Ходырев, школаын, собере педучилищеын дышетскыса, туж вазь валаз, поэзия - солэн сюресэз, быръёно удысэз? Паймымон зол вал, дыр, мылкыдыз но быгатонлыкез. Арысь аре азинскиз талантэз. Вордскемын гуртысь ӟуч дышетӥсьлэн семьяяз. Нош удмурт кыллэсь чебер, жингрес луэмзэ шӧдэм ини, анаезлы но трос удмурт эшъёсызлы луыса. Собере пичиысен ик туж уно лыдӟиськем. Мон паймыса тодам вайылӥсько Германлэсь пинал дырысеныз котьмаин тунсыкъяськемзэ, трос поэтъёсты, удмуртъёссэ но, мукет калыкъёслэсь но кылбурчиоссэс тодыны тыршемзэ, гожтэтъёс пыр трос визьмо, дано адямиосын кусып воземзэ, собере соосын пумиськылэмзэ, озьы ик балалайкаен туж чырткем шудэмзэ. Сое котьку ӟеч мылкыдын кылзӥсько вал. 50-тӥ аръёс кутскыку, кыкнамы дышетским педучилищеын: мон - Ижевскын, со - Можгалан! Дышетсконзэ мынэсьтым кык арлы вазьгес быдэстӥз. Монэ ачиз шедьтӥз, шуыны луоз, дыр. Со вакытэ Гера газетъёсын печатласькылэ ни вал. Нош мынэсьтым "Советской Удмуртиысь" кӧня ке гинэ чуръёсме адӟыса, педучилищеямы гожтэт ыстэм, милемын, удмурт пиосын, эшъяськон мылкыдзэ вераса. Собере, дыр ортчыса, Гера вуиз Ижевске. Пастухов урамысь Печать юртын писательёслэн кыӵе ке но кенешазы нырысьсэ пумиським. Вуылӥз Можгалась эшмы общежитиямы но. Тодӥсько: Гера соку ик ини тросэзлы гожъяны кутскисьёслы эшъяськон кизэ мычылӥз. Улон сюресъёс кыкнамес вуттӥзы Удмурт пединститутэ. Улӥмы одӥг общежитиын. Вуж тодмоос сямен, ӵем пумиськылӥм. Ӵош ветлылӥм хоре, пӧртэм огазеясь ужъёс шедьылӥзы. Мынэсьтым кык ареслы бадӟымгес эше соку ик кылъя но литературая, историяя факультетамы тодмо вал ни кылбуръёс но кырӟанъёс гожъяны тыршись, балалайкаен шудыны яратӥсь луэменыз. Туж капчи но вазиськись, эшъёсыныз котьку огъя кыл утчась адями котыраз пиосты но нылъёсты ӝог люканы быгатэ вал. Институтэ пыремезлэсь азьло ужаса вуттӥз "Егит большевик" (отӥяз - "Удмуртиысь комсомолец") газетын. Удмурт газетъёсын кусып возылӥз, нылпиослы сӥзем кылбуръёссэ поттылӥз. Сюлме но йырсазе кылизы таӵе нуналъёс. Институтлэсь нырысетӥ курссэ йылпумъяме бере, 1955-тӥ арын, инвожо толэзе, ми, пӧртэм факультетъёсысь но группаосысь куамын куать нылъёс но пиос, туристъёс луыса, Кам дуре походэ потӥмы. Огшоры гинэ туристъёс ӧй вал ми, ваньмы кадь ик - удмурт хоре ветлӥсьёс, кырӟаны-вераны дышетскисьёс. Азьветлӥсьмы - усто крезьгурчи - баянист, институтэз соку гинэ йылпумъям мурт Геннадий Павлов. Солэн бур киыз луиз, дыр, Герман Ходырев, жадёнэз валатэк, балалайкаеныз крезьгур кисьтӥсь. Мынон сюрес выламы шедем гуртын концерт но возьматӥм, собере Кам дуре слётэ пӧртэм интыосысь туристъёс люкаськизы. Соос могӟетъёсты вормыны но кырӟаны-вераны быгатэмзэс возьматыса ӵошатскизы. Кам пала лыктыкумы, Шаркан ёросысь дас вить иськем кыстӥськись ӵем нюлэс пыр потоно луиз. Сюбег кужен сюрес вылтӥ. Ваньмес чибиньёс одолизы (соос миллион вал, дыр, бамъёсмы вылэ шапрак пуксё но виръёсмес юо. Киосамы - вож веникъёс, соосын бам вадестӥ шонаськытэк, одӥг вамыш но уд лэсьты. Нош Ходыревлэн чиньыосыз ялан балалйкаез вылтӥ бызьыло, веник кутэмез уг луы. Нылъёс со котырын такмакъёс кырӟало но Германлэсь бамъёссэ дугдылытэк веникъёсын маялляло, пумен крезьгур чузъяське. Тӥни кыӵе етӥз но крезьгурез, кылан-буранэз яратӥсь вал Герман Ходырев егит дырысеныз. Со котырын котьку шулдыр вал, мӧзмыны ӧз сётылы. Яратэ вал маскаръяськыны, куалтыр поттыса вераськыны. Капчи мылкыдо эш вал студент дыръяз но, ужан аръёсаз но. Но, валамон, ялан маскаръяськыса гинэ ӧз ветлы, тодӥсько юн малпаськись тусо лулэмзэ но. Дышетсконэз сокем капчиен ӧз сётӥськы, шӧдске. Вакытэз сыӵе вал: коньдонэн юрттӥсез ӧвӧлэн, секыт дыръёсыз но луылӥзы. Нылпиослы гожъясь усто кылбурчи луэмзэ Герман возьматӥз студент дыръяз ик. Со аръёсы потӥзы ук чебер вылтусо, нылпиосты ӟеч нодъясь книгаосыз - "Милям азбарамы" но "Кызьы мон будӥ". Бадӟымесь быгатонлыкъёсыз соку ик шӧдӥськизы. Институт бере газетъёсын ужаса, Г.Ходырев юн журналист но, писатель но луиз. 1963-тӥ арын журналистъёслэн но писательёслэн огазеяськонъёсазы пыриз. Ялан азьлань мынӥз, нылпи литератураез азинтыны тыршыса. Тодэ лыктылэ "Советской Удмуртиын" "Пинал куараос" бамез поттон бордын тыршыса ужамез. Со аръёсты Гера "Дась лу!" газетын ӵош ужан дыръямы но тодаз вайылӥз. Маин ке но вунэтонтэмесь кылизы соос писательлэн улоназ. Мынам но, лыдӟисьлэн, улонам (аслам творческой ужъёс борды рос-прос кутскон мылкыды ляб вал на: кужымелы ӧй оскы, лэся. Куинь ар школаын ужай. Лудорвайын дыръям удмурт писательёс гурт калыкен пумиськон ӝыт ортчытӥзы). Нош Германлэн ужъёсыз 60-тӥ аръёсы ӟеч ӧръяськизы. "Советской Удмуртия" газетлэн редакцияз эшъяськыса но ог-огзэс валаса ужазы Семён Перевощиков, Николай Васильев, Александр Вотяков но мукет гожъяськисьёс. Германлэн ваньзы сярысь тодэ ваёнъёсыз гожтыса кельтэмын. Ӵем дыръя соос чуръёссэс но ӵош кылдытъязы, ог-огзылы юрттылӥзы, "пӧсь гурысь потэм" кылбуръёссэс нырысь ик ог-огзылы лыдӟылӥзы. Г.Ходырев сюлэмызлы матысь эшез А.Вотяков сярысь, кылбурчи кулэм бере кӧня ке ар ортчыса, "Ӟечбур!" газетэ бадӟым очерк печатлаз. "Шаер азьын сюлмы чылкыт" нимаськиз со. Но сое нокыӵе книгаосаз пыртыса ӧз вуы. Эшезлэсь трос кылбуръёссэ, кырӟанъёссэ эскере, вылӥ дунъя, соос сярысь шуныт кылъёс гожтэ. Мынам малпамея, "Советской Удмуртилэн" историяз таӵе учыр данъяськымон вал. Собере куиньназылэн кылбуран творчествозы юн герӟаськемын вал Удмурт театрен: ваньзы ик пӧртэм спектакльёсысь кырӟанъёслы чуръёс кылдытъязы. Германлэн пинал дырысеныз поэзие, музыкае, гожъян удысэ вань сюлмыныз кыстӥськемез туж тросэзлы, тужгес но туала гожъяськисьёслы, адӟем карымон луэ. Трос адямиослэн сюлэмъёсазы со мур пытьы кельтӥз. Туэ монэ паймытӥз таӵе учыр. "Вордскем кыл" журнал 3-тӥ номераз печатлаз Флор Васильевлэсь но Герман Ходыревлэсь ог-огзылы ысъям гожтэтъёссэс. Соосты поттыны дасям Анатолий Перевозчиков, Г.Ходыревлэн семьяезлэн архивысьтыз шедьтыса. А.Перевозчиков шонер вера: "Герман Ходыревлы книгазэ (эсьма, кыксэ ай!) печатланы шуд усиз студент дыръяз ик, пединститутын дышетскыкуз. Нош Флор Иванович гожъяськон борды рос-прос басьтӥське, институтэз йылпумъямез бере, 50-тӥ аръёслэн пумазы. Герман Ходыревлэн книгаез но вал ни бере, Флор Васильев сое пыд йылаз йыг-йыг сылӥсь гожъясен лыдъя ни вылэм. Ф.Васильев туж шумпотэ но, вожъяське но вылэм Германэз Писательёслэн союзазы кутэмлы, озьы ик кылбуръёссэ ӟуч кылэ берыктӥсьёс шедьтэмезлы. Та ужез азинтыны нош ик юрттӥз трос калыкъёслэн кылбурчиосынызы кусып воземез, шырыт эшъяськон сямыз. Ф.Васильев сярысь ик верано на ке, Герман, таиз Москваын ЦКШ-ын дышетскыку, шӧдскымон трос юрттэм Флорлы, выль газетъёс но журнал ысъяса, отчы гожъямъёссэ интыяса. Кыксылэн но гожтэтъёссы туж шуныт мылкыдо, ог-огзэс мур гажанэн тырмемын. Г.А.Ходырев поэзие сюрес лёгемез сярысь трос гожъялляз, 1968-тӥ арын "Дась лу!" газетын ужаны кутскемез бере. Туж удалтӥз солы юрттӥсьёс ласянь. Егит дырысеныз эшъяськиз мӧйы писательёсын но. 50-тӥ аръёсы угось гожъяны кутскисьёсын трос ужаз Т.И.Шмаков. Солэсь визь-кенешъёссэ, юрттыны сюлмаськемзэ Герман Алексеевич пеляз понӥз, со сярысь ӧз вунэтылы, сюлмаз но йырсазяз возиз калык кылбурчи ним басьтыса но. Писатель сярысь тодэ ваёнъёссэ котькуд юбилееныз валче гожъялляз, дыр. Берлозэ Тимофей Иванович Шмаков сярысь гожтӥз со "Дась лу!"-э 1990-тӥ арын 2-тӥ мартэ - соку сюлмо кылбурчилы тямыстон арес тырмысал. Статьяезлэн йыръянэз таӵе вал: "Авторъёсын адӟем карымон ужаз". Герман Алексеевич вылӥ дунъялляз мукет но мӧйы писательёсты. Кылсярысь, визьмась, валэктӥсь, бурдъясь эшъёсыз пӧлы егит дыръяз ик пыртылӥз Михаил Петрович Петровез, Аркадий Николаевич Клабуковез но Геннадий Дмитриевич Красильниковез. Удмурт литератураез тужгес тодыны-валаны тыршисьёс кулэезъя мед дунъялозы вылэм Г.Ходыревлэсь асэныз ӵош ужам эшъёсыз сярысь сюлмысь гожъям очеркъёссэ. Огазеямын соос "Ӟеч визь-кенеш котьку дуно" книгае (потӥз 1989-тӥ арын). Та пичи гинэ книгазэ мон туж вылӥ дунъясько - литературоведъёслэн, критикъёслэн гожъямъёсынызы одӥг радэ пуктӥсько. Тодэ ваёнъёсыз сӥземын сюлэмызлы тужгес дуно но матын луись адямиосызлы, удмурт литератураысь тодмо кибашлыослы (озьы шуэ книгалэн авторез): Ашальчи Окилы, М.Петровлы, М.Покчи-Петровлы, М.Ляминлы, Н.Васильевлы, Афганистанын бырем журналистлы В.Глезденёвлы. Зэм, вань на Герми эшелэн мукет ӟеч адямиослы но сӥзем очеркъёсыз: Александр Вотяковлы (потӥз "Ӟечбур!" газетын гинэ 1992-тӥ арын 19-тӥ�22-тӥ южтолэзе), Геннадий Павловлы (Можга педучилищеын крезьгурчиез данъясь ӝыт ортчем бере гожтэмын вал, потӥз газетын), Анатолий Уваровлы (кылбурчилы 60 арес тырмемен валче). Но данакез очеркъёсыз та книгае ӧз пыре. Нылпиослы гожъясь калык кылбурчиез, со огдыре усто журналист но литературовед-критик вал шуыса, оло, куд-ог гожъяськисьёс но дышетӥсьёс уг но тодо. Очеркъёсаз Г.Ходырев яркыт возьматӥз литература но улон сярысь малпанъёссэ. Котькудӥзлы гожъяськисьлы кулэ дунъет сётылӥз, удмурт культураысь интызэ дунъяны дышетылӥз. Озьы ик поэзие сюрес лёгемзэ номыре ватытэк шараяны тыршиз, гожъяны кутскисьлы дэмлаллям кадь: утчалэ, шедьтэлэ асьтэлэсь сюрестэс, янгышъёслэсь утиськелэ, гожъяськыны дышетскелэ калык кылос (фольклор) вылын. "Ӟеч визь-кенеш котьку дуно" книгазэ Герман мыным таӵе кылъёс гожтыса кузьмаз: "Гажано Леонид Павлович Фёдоровлы, пинал дырысьтым тодмо но айбат эшелы, чупрес журналистлы, "Дась лу!"-ын ужам аръёсмес тодэ вайыса улон понна. Шудо, таза, батыр лу! 11-тӥ февраль 1991-тӥ ар". Эшъёсыз пӧлын Герми быдэ вуыса, дано писатель луыса но ӧз вылтӥяськылы. Со гинэ ӧвӧл, гожъяськыны тыршись муртъёс пӧлысь котькудӥзлы кизэ мычыны дась луылӥз. Али эшелэсь ӟеч мылкыдъёссэ, калыкез, нылпиосты гажамзэ пумен умойгес валасько ни кадь, но, ӵош ужакум, со сярысь трос ӧй малпаськылы, лэся. Герман Алексеевичен ми сыӵе ӟеч эшъёс вал шуыса, туала гожъяськись егитъёс пӧлысь куд-огез, оло, уз но оске ни. Солэн пӧртэм адямиосын эшлыко кусыпъёс возьыны быгатэмезлы мон туж синмаськылӥ. Куддыръя вожъяськылӥ но. Праздникъёсты но вордскем нуналъёсты пусъён дыръя со быгатэ вал котькудмылы туж ӝог кылбур чуръёс пӧраны, шуныт но пальпоттӥсь кылъёс шедьтыны. 1984-тӥ арын мон но Выль ар бордгазетамы, солы сӥзьыса, таӵе эшлыко шарж гожтӥськем: Будо тыпы выжыын Оскымон юн пушъетъёс. Котькудаз ньыль бӧлемыҥ Жингырто чебер чуръёс. Школаын - кылбурчиос. Дорамы но - поэтъёс! Кӧня бен али соос Атайзы - тыпы - вӧзын? Со Атай - етӥз Герми. Нылпиоссэ вешаса, Туннэ юн кизэс кырмиз. Бен, Герман Алексеевич вӧзын будӥзы кылбурчиос но, редакциямы ужасьёс но, туж трос школаосысь пиналъёс но. Гуртъёсы потаса, соос доры сюрес шедьтэ вал поэт. Поэзиын аслэсьтыз интызэ пинал дыръяз ик шедьтэм мурт вань улытозяз тыршиз нылпиос пӧлысь талантъёсты утчаны. Азьланьтӥз Тимофей Шмаковлэсь, Михаил Петровлэсь но мукетъёсызлэсь сюлмаськонъёссэс. Туж уно нылпиослы юрттӥз, юнкоръёс луыса, кылбурчиозь, писателёзь будыны. Кызьы вералля вал ачиз, "асьсэлэсь инвисъёссэс" шедьтыны. "Дась лу!" газетын дас тямыс но ӝыны ар ужамез сярысь тазьы гожъяз: "Бадӟым улон сюресэз ортчи мон татын. Газет баме статьяос, зарисовкаос, очеркъёс, веросъёс, кылбуръёс печатлам сяна, вань аръёсме кивалтӥ редакциысь литература но искусство отделэн. Мынам сюлмаськонэ таӵе вал: яркытэсь но муресь произведениос печатлано, пинал талантъёсты утчано, соослы будыны юрттоно. Со ласянь мон вань быгатонлыкме, тодон-валанме сётыны тырши". Кӧня школаосы вуылӥз меда, "Советской Удмуртиын" "Пинал куараос" бамез дасякуз, "Дась лу!"-ын ужакуз?.. Тыршылӥз удмурт кылъя но литературая дышетӥсьёсын кусып возьыны, литературно-творческой кружокъёс кылдытъяны. Юнкоръёслы, пинал кылбурчиослы туж уно гожтэтъёс ысъялляз. Будӥсь кужымъёсты ялан син азяз возьыны тыршиз. Тросэз азьло юнкоръёс, табере ини - тодмо писательёс но журналистъёс, гожтэтъёссэ уг вунэто. Оло, синпель чотын но возё на, луоз?.. Элькунамы вань сыӵе школаос, кытчы солэн пыдъёсыз котьку кыско вал. Кылсярысь, тужгес но гажаз Пичи Пурга ёросысь Вуж Монья школаысь коллективез, отысь дышетӥсьёсты, удмуртлыкез утьыса, вань сюлмысьтызы ужаны тыршисьёсты. Мон, кылсярысь, утьыса возисько калык кылбурчилэсь "Советской Удмуртиын" 1989-тӥ арын 16-тӥ апреле потэм "Кивоштӥсьёс будо" бадӟым статьязэ. Татын со школалэсь улонзэ котыр ласянь возьматӥз. Дышетӥсьлэсь ужзэ дунъяны быгатэ вал. "Дась лу!"-ын ужаса, ачиз но "Калыкез дышетонысь азьветлӥсь" ним нуллӥз ук. Тодам вайылӥсько школаосы нылпиос доры ӵош потам учыръёсмес но. Куке но вуылӥм Завьял ёросысь Подшивал гуртэ, мынам ӵыжы-выжыелэн, солэн матысь эшезлэн Александр Вотяковлэн вордскем гуртаз. Кылбурчиез буре вайыса но мукет ужпумъёсъя пумиськылӥм бадӟым но покчи пиналъёсын, дышетӥсьёсын. Солэсь азьло пырамы нылпи садэ, кенешимы визьнодасьёсын но нылпиосын. Кӧня ке паймыса но вожъяськыса кылзӥ Герман Алексеевичлэсь ньыль-куать аресъемъёсын но туж быгатыса, соосты гажаса вераськемзэ, покчиосты дырын-дырын серекъятыны быгатэмзэ. Котькуд аудиториен ӝог гинэ огъя кыл шедьтыны быгатылӥз, солы тупась, матын луись кылбуръёссэ лыдӟылӥз. Малпаськод вал, солэн "репертуарез" котьку дась шуыса. Ӟеч кусып возиз аслыз сюрес сётӥсь Можга педучилищеен. Со пала вуылыкуз, пыратэк ӧз кыльылы, дыр. Татын ужаз уго кемалась гажано эшез Геннадий Павлов. Соос но тодмо журналист Константин Михайлов (таиз но "Дась лу!"-ын кема аръёс ужаз) ог-огзытэк улыны ӧз ик быгатылэ кадь. Можга палъёсы вуо ке, дано крезьгурчиен адӟиськытэк ӧз кошкылэ. Ма меда сокем матэ кариз соосты? Малпасько, крезьгурез но поэзиез, творческой ужез, калыкмес яратон. Тодӥсько на: егит дыръязы ик Герман Алексеевич но Геннадий Иванович ӵош кылдытӥзы "Шулдыресь асьме садъёс" кырӟан. Отӥяз мукетъёсыз гуръёс кылдылӥзы. Та куинь воргоронъёслэн эшъяськонзы берпум нуналозязы ӝыны даур пала кыстӥськиз, луоз. Туж ӝожомыса верано луэ: куиньназы ик кема ӧз улэ. Улонысь бӧрсьысь бӧрсе кошкизы. Котькудзы ик - шӧдтэк шорысь. Озьы кылдэмын, дыр: ӟырдыт сюлэм малпамтэ шорысь ужамысь дугдэ. Герман Алексеевич Ходыревлэн улонысь кошкемез туж бадӟым ыштон ваиз нылпи литературамылы, озьы ик - литературоведенилы (трос тодэ ваёнъёссэ гожтыны медэ на вал), вань удмурт но финн-угор национальной движенилы (пӧртэм шаеръёсы вуылӥз, Удмуртилэн сьӧраз но эшъёсыз уно вал). Бадӟым кылбурчи-патриот но интернационалист. Ачиз нокинэ ӧз ӝожомытылы, улытозяз уно эшъёс утчаз но шедьтӥз. Адямиосты ӧз люкылы, тон бадӟым яке пичи шуыса. Ачимъяськон сямъёсыз ӧй вал, кенешыса улыны быгатылӥз. Куатьтон аресэз тырмон азяз туж визьмо но малпаськытӥсь валэктонъёс сётъяз "Удмурт дуннелэн" корреспондентэзлы, ӵош ужам эшезлы Кирилл Ломагинлы. Шуиз: "Та улонын вань ӟечез - ог-огдэ валам-дунъям, кенеш возем бордын". Талэсь визьмогем вераны шуг ни. Ӧйтӧд, ваньмыз-а меда эшъёсыз сое озьы ик валаны тыршылӥзы? "Дась лу!" газетын ужакумы, эшъёсыз пӧлын (нош мон артэ вал, "Кизилие" кошкытозяз) данэз но дуныз котьку вылӥын вал. Вань на, вань удмурт музъем вылын Чебер крезьгурчиос. Соос азьын мон бӧрдӥсько, Вань сюлмыным мон соослы Музъем дорозь йыбырттӥсько. Чеберез валась вань удмуртъёслэн нимынызы таӵе чуръёсын вазиськиз, луоз, аслаз лыдӟисьёсызлы Удмуртиысь калык кылбурчи Николай Семёнович Байтеряков. Та кылъёс верамын, мон сямен, усто крезьгурчи но кылбурчи, мынам эше Герман Алексеевич Ходырев сярысь. Тодӥсько: Г.Ходыревлы "Удмуртиысь калык кылбурчи" дано ним сётон сярысь Указ улэ Удмурт Элькунысь Вылӥ Кенешлэн Тӧроез В.К.Тубылов гожтӥськиз вал 1992-тӥ арын 22-тӥ октябре. Дано ним сётӥзы "Литература удысын пусйымон ужъёс лэсьтэмез но трос аръёс ӵоже мылысь-кыдысь тыршемез понна". Нош тыршиз со пинал дырысеныз, вань улонзэ поэзилы, нылпиосты будэтонлы сӥзьыса. Кылбураны быгатонлык инмар солы, оло, вордскемез бере ик сётэм. * Шаерысьтымы тодмо кылбурчи Герман Алексеевич Ходырев но тодмо драматург Степан Павлович Широбоков писательёслэн ӧтчамазы мыныкузы. * Кылбурчилэн ненег чиньыосыз туж ӟеч шӧдо балалайкалэсь жингыртӥсь сиоссэ. Геннадий Городиловлэн но Александр Кузнецовлэн туспуктэмъёссы. Удмурт Республикалэн Президентэз Александр Волков кылем арня вискын пумиськылӥз шаерысьтымы бадӟым предприятиослэн кивалтӥсьёсынызы. Пумиськонэ озьы ик пыриськизы Россиысь Кун Думалэн депутатъёсыз Юрий Маслюков но Николай Сапожников, Правительстволэн Тӧроез Юрий Питкевич, солэн воштӥсьёсыз Николай Хохлов, Виктор Савельев, Андрей Осколков но Сергей Касихин, Удмуртилэн Президентэзлэн но Правительстволэн Аппаратсылэн кивалтӥсез Александр Горяинов но промышленностья министр Андрей Армянинов. Ужрадын бадӟым инты висъямын вал 2000-тӥ арлы йылпумъянъёсъя но вуоно арлы ужпумъёсъя кенешез ортчытонлы. Со люкаськоз 27-тӥ мартэ. Пумиськонэз усьтыса, Александр Волков кыл сётӥз Юрий Маслюковлы. Со пусйиз Удмуртиысь предприятиослэн кивалтӥсьёссылэсь ас удыссэс быгатыса но валаса радъямзэс, соослэн вылӥ кивалтон ёзъёсын матысь кусыпъёссы юртто ужез огсыр нуыны. Республикамылэсь кылем арын басьтэм азинсконъёссэ пусъемен валче, Юрий Маслюков сюлэмшугзэ но вераз. Со герӟаськемын кунгож сьӧры вузам му вӧйлэсь но чагыр эстӥськонлэсь басьтэм табышлэн бадӟым люкетэзлэн палэнэ кошкеменыз. Со сяна, туж ӝог йыло электрокужымлы, чагыр эстӥськонлы дунъёс, транспорт тарифъёс. Оглом таӵе югдур куашкатыны быгатоз быдэс страналэсь экономиказэ. Промышленной предприятиослэсь кивалтӥсьёссэс озьы ик сюлэмшугъяськыто обороная заказъёсын кылдэм югдур. Та удыслы коньдон тырмыт висъямын шуыса буйгато ке но, оскон бадӟым ик ӧвӧл, пусйиз "Воткинский завод" кун предприятилэн кивалтӥсез Виктор Толмачев. Кылем ар понна Россиысь Обороная министерстволэн "Воткинский заводлы" 150 миллион пала пунэм тыронэз кылемын. Югдур пӧртэм ик ӧвӧл акциосын "Ижмаш" огазеяськонын но, кун солы 85 миллион манет коньдонзэ ӧз берыкты. мукетыз йыр висён - город кивалтӥсьёслэн шуныт понна пунэм тыронъёссэс берыктыны дыртымтэзы. Глазов администрация ӝыны ар ӵоже ини дун уг тыры механикая Чепецк заводлы, Воткинскысь мэрия 40 миллион манет коньдонзэ уг берыкты "Воткинский заводлы". Нош та администрациослы нимысьтыз шунытлы шуыса Коньдон ужпумъёсъя министерство дыраз коньдон висъяз. Кенешын ӝутэм ужпумъёсты сэрттыны-пертчыны луоз ӵош, огъя кужымен гинэ, пусйизы люкаськемъёс. Удмурт Республикалэн Президентэзлэн но Првительстволэн пресс-службазы Узырлыкмес утёно Библиотекаосын утиськись документъёс туж сюлэмшугъяськыто быдэс дуннеез. Соин ик, дыр, ЮНЕСКО-лэн 1986-тӥ арын ортчем бадӟым ӧтчамаз юнматэмын вал библиотекаосысь ужъёсты утёнъя куронъёс. Таӵе программаос кылдытэмын но ӟеч быдэсъясько США-ын, Швециын, Франциын, Канадаын, Австралиын но мукет кунъёсын. 2000-тӥ арын Россиын но кутэмын Россия Федерациысь библиотекаослэсь узырлыксэс утёнъя Национальной программа. Удмурт Элькунысь Национальной библиотека финн-угор калыкъёслэн печать культураысьтызы памятникъёсты утись-возись юрт луэ. Национальной программаез быдэсъян вылысь, 27-тӥ-28-тӥ феврале Удмурт Элькунысь Национальной библиотекаын ортчиз нимысьтыз дышетскон. Финн-угор литератураез утись библиотекарьёс кенешизы Россия Федерациысь дуно книгаосты возён, библиотекаосы вуись документъёсты но иворъёсты утён, библиотекаосы огъя узырлыкез кельтон сярысь. Е. Максимова. Синмаськыто дӥсьёс, туспуктэмъёс Сизьымдон аръем юбилееныз валче, Драмая удмурт кун театр дасям туж узыр адӟытон. Отчы интыямын театрлэн улонысьтыз туж дуно туспуктэмъёс но гожъямъёс. Адӟытонэз учкыса тодыны луэ театрысь азьвыл но туала актёръёс, азьло пуктылэм но туннэ возьматъяськись спектакльёс но трос мукетыз сярысь. Син шоры тужгес йӧто драматургъёс. Соос пӧлысь адскымонэз - Игнатий Гаврилович Гаврилов. Солэн "Вало ӧр куашетэ" пьесаезъя спектаклен ик 1931-тӥ арын 7-тӥ феврале усьтӥськиз Драмая удмурт кун театр. Та адӟытонын ик - актёръёслэн туж чебересь дӥсьёссы. Соос тодэ вайыто азьвыл но туала спектакльёсты. Театрлэн ортчем вамышъёсыныз тодматскыны луоз, гужем вуытозь. Е. Михайлова. Пиналъёсмылы шумпотон кузьмалом Данакез-а анай-атайёс туала арын нылпиоссылы пичи ке но праздник радъяны луонлык шедьто? Трос нылпиё семьяосысь, оген анай-атайёслэн пиналъёссы, нылпи юртъёсын будӥсь нылъёс но пиос уг быгато киноосы, театръёсы гинэ но ветлыны - яратоно выжыкылъёсысьтызы геройёсын пумиськыны. Тае лыдэ басьтыса, юрттэт сётонъя "Нылпиослэн тазалыксы" фонд но "Инфо- Панорама" газетысь ужасьёс шуг-секытэ шедем нылпиослы пичильтык ке но шумпотон кузьманы малпазы. 17-тӥ мартэ 12 часын Операя но балетъя театре соос люкалозы куанер семьяосын, нылпи юртъёсын будӥсь нылъёсты но пиосты. татын тунсыко ужрад ортчоз. Программае пыртэмын Ижевскысь устоосыз нылпи коллективъёслэн кырӟан- эктонъёссы, люкаськемъёсты серекъятозы клоунъёс. Озьы ик радъямын луозы пӧртэм викторинаос но конкурсъёс. Валамон, вормисьёс понна дасямын чебер кузьымъёс. Ужрадэ ӧтён билетъёс понна вазиськемды луоз "Инфо-Панорама" газетлэн редакцияз 25-80-88, 25-39-45, 25-39-42 телефонъёсъя яке юрттэт сётонъя фондэ "Нылпиослы тазалык" ("Здоровье детям" фондэ) 43-26-57 телефонъя. Э. Кумачева. Паймымонэсь ик та чебер апайёс-нылъёс, нылкышноос, сузэръёс, анайёс. Али гинэ синвузы пызьыраз, учкиськод но, сослэсь шудоез дунне вылын ӧвӧл ни кадь. Шуныт кылын вазь гинэ, пальышась синъёсын учкы гинэ, ненег сюлэм соку ик шуналоз: бӧрдонэз воштоз серектон, кунэрес мылкыдэс - шумпотон. Песянаелэн портретэз Мынам песянае Римма Николаевна Майкова улэ Можга ёросысь Чежебаш гуртын. Солы куатьтон арес ни. Песянае вань улытозяз ужаз фермаын, устоез ыж сюдӥсь вал. Али но со тэк улонэз, шутэтсконэз уг тодылы: керттӥське, пудо утялтэ. Пиналъёсыз дораз берто ке, котьку но ческыт пыжиськемъёсын утялтэ. Песянае кема аръёс ӵоже лыдӟе ини "Удмурт дунне" газетэз. Соин ик тӥляд редакциды пыр мынам ӟечкыламе потӥз сое 8-тӥ Мартэн - суредай портретсэ. Суреданы дышетскисько Можгаысь художественной школаын 2-тӥ классын, ветлӥсько удмурт группае. Катя Майкова. Приволжье Приморье уз луы Кык нунал ӵоже кылем арняе шаерамы ужаз Россилэн Президентэзлэн Приволжск округъя оскем муртэз Сергей Кириенко. Шаерамы со гужем вылтӥ гинэ вуылӥз ни вал, мар вуттӥз таяз учыре? - Химия ож тӥрлык утиськись интыосы ветлыса югдурез эскерон, сое быдтон пумысен азьланезлы ужрадъёс чаклан, - шуиз журналистъёслы Сергей Владиленович. Кызьы тодмо, Калык куспо конвенцияя 2012-тӥ арозь химия ож тӥрлыкез быдтыны кулэ. Тодмо соиз но - та "узырлыкмы" асьмелэн данак - быдэс Приволжск округынлэсь трос. Нош быдтон борды кутскылэмын но ӧвӧл на - со понна кулэ завод пуктыны. Та ужрадъёслы кылем арын 500 миллион манет висъямын вал, туэ - 6 миллиард, но С. Кириенколэн верамезъя, со туж ӧжыт. Округысь химия ож тӥрлыкез быдтонъя комиссилэн кивалтӥсез али вань "кышкыт" интыосы вуылэ. Пятницае со республикаысьтымы кивалтӥсьёсын ӵош ветлӥз Кизнере но Камбаркае. Зэмзэ ке, та интыосты Кириенко кышкытэн уг лыдъя. Складъёс котырын нуналаз кык пол эскеро омырез, лымыез, музъемез - нормалэсь вылтӥ кышкытлык та дырозь ӧз шараяськылы. Но калык озьы но керӟегъяське. Шуак "ынэз" усьтон возьматэм луиз уго. Али дуннеысь экспертъёс татын улӥсьёсты буйгатыны выро: та выллем заводъёс Америкаын ужало, омыр ӧз на уродмы. "Химиез" сутэм ӵын трос сӥс пыр потоз. Кириенко ачиз татысь улӥсьёсын вераськиз. Калыклэн мылкыдыз пӧртэм: кудӥз соглаш, кудӥз - пумит. Но Камбаркаын завод луоз ик - Щучье но Горной бере. Сыӵе решение вань ни. - Калыкез буйгатон понна, - шуиз Сергей Кириенко, - мон ачим ваньзэ син азям возьыны тыршо. Та ужрадэз туж чакласькыса быдэстоно, адямиос нокыӵе изъян медаз адӟе. Тыршом, солэсь номыре ватытэк - экспертъёс нуналлы быдэ калыкез тодматозы экологической югдурен. Камбаркаын али но ужа ни Калыкен кусып возён общественной центр (Швеция коньдонэн юрттэ), но кулэ луоз на Валтӥсь федеральной инспекторлэсь общественной приёмнойёссэ усьтыны. Вераны кулэ, общественной приёмнойёслэсь ужзэс Сергей Кириенко бадӟым кужымен лыдъя. Та нуналъёсы Приволжск округысь общественной приёмнойёсын ужасьёслэн ортчись семинаразы со шуиз: - Тӥ ужаны кулэ огшоры калык понна. Котькудӥз вазиськись аслыз валэктон, секыт югдурысь потон амал мед шедьтоз. Тӥ вуттыны кулэ адямиослэсь сюлмаськонзэс вылӥ кивалтӥсь доры. Зэм, общественной приёмнойёслэн ӧвӧл правовой статуссы, соос уг быгато прокуратураын ужасьёсын косъяськыны (нокин но уг быгаты), но вань туж трос учыръёс, кудъёссэ сэрттыны-пертчыны луэ вылӥ кивалтӥсьёс доры ветлытэк но. Куд-огезлы уго уг тырмы юристлэн огшоры валэктонэз, ӵектонэз гинэ. Приёмнойёслэсь ужзэс калык понна пайдаёгес карон понна, Сергей Кириенко ӵектӥз на калыклы юрттэт сётыны вань мылкыд карисьёсын огазеяськыса ужаны. Палэнтоно ӧвӧл партиосты, движениосты, газетъёсты, мукет общественной огазеяськонъёсты, депутатъёсты, яке депутатэ кандидатъёсты. Сергей Владимировичлэн малпамезъя, отын номыр уродэз ӧвӧл. Котькуд быръёнъёс азьын котькудӥз кандидат (нош соос ӧжыт ӧвӧл) дас мутлы ке но юрттыны быгатӥз ке, туж умой ни. Али шаерамы вить общественной приёмной ужа. Отын ужасьёслэн верамзыя, вазиськонъёсын, ӝожтӥськонъёсын вырӟылыны уг луы - адямиос уг валало, городысь лымы, яке квартираысьтызы кезьыт гумыос понна мукет власть кыл кутыны кулэ шуыса. Та ласянь югдур ӝоген воштӥськыны кулэ, оскытӥз Сергей Владиленович. Владимир Путин 25-тӥ декабре аслэсьтыз оскем муртъёссэ кенешыны ӧтчакуз вераз, кыл кутытон люкемын луоз шуыса. Котькудӥз кивалтӥсь аслэсьтыз ужзэ, интызэ тодыны кулэ: интыысь кивалтӥсь ке тон - быдэсъя интыысь уждэ, бырйиседлэсь куронзэ- косонзэ. Нош кыӵе ужпум пуктэ меда Президент аслаз оскем адямиез азе? Та юанлы Сергей Кириенко чик шугъяськытэк вераз: - Мукетъёсыз азе кадь ик - аслэсьтым ужме тодыны: Приволжск улосвылысь югдурез чакласа возьыны, шуг учыръёсты (Владивостокын выллем) алыны, законлэсь быдэсъяськемзэ эскерыны. Кылсярысь, али тыршоно кызьы ке но бадӟым тудвуэз алыны но... мукет толлы дасяськыны. Ваньзэ дырыз дыръя лэсьтӥм ке, общественной приёмнойёсы ӝожтӥськонъёс ӧжытгес вуозы. З. Рябинина. Правительствоын Пыӵалысен векчи чорыгозь Толон Правительстволэсь кенешсэ нуиз Юрий Питкевич. Президент Александр Волков Москваын пумиськонъёс ортчытъя. Ортчем нуналъёсы республикаын уно пумиськонъёс вал. Дорамы вуылӥз Иранысь делегация. Со тунсыкъяськиз асьме ож тӥрлыкен. Азьвылгес Иран сое Америкаысь басьяз ке, табере учке Россия но Удмуртия шоры. Россилэн Президентэзлэн Приволжск округе ыстэм муртэз Сергей Кириенко Юрий Питкевичен ӵош вертолётэн лобаз Кизнере но Камбаркае. Химия ож тӥрлыкез утёнын шуг-секытъёс вань. Кемалась ӝутэм пу юртъеръёс дары (порох) кадь куасьмемын. Соосты одно выльдоно. Оглом Юрий Питкевич куриз бадӟымесь ужрадъёсъя азьвыл ик ӟеч планъёс дасяны. Ортчем нуналъёсы Ижысь гостиницаосын интыос ӧз окмылэ. Кивалтӥсьёс одӥг ужрадысь музоназ бызьылыса сямен ветлӥзы. Азьланьын, 14-тӥ мартэ, йылпумъянъёс лэсьтэмын луоз гурт хозяйстволэн ужамезлы, 27-тӥ мартэ - промышленностьлэн ужамезлы, 10-тӥ апреле люкаськоз Кун Кенешлэн сессиез. Тамази Габричидзе ивортӥз тулыс ву тудӟонэз пумитаны дасяськонэз сярысь. Лымы усемын нормалэн 150 процентэз мында (60-70 сантиметр). Шоро-куспо температура 0 градуслэсь вылэ ӝутскоз 5-тӥ апрель котырын. Лымы шуналоз бергес, 10-тӥ апрель бере. Соку ик кышкытлык кылдоз. Иж тыметысь вуэз лэзёно ӧвӧл ке - ӵыпет куашканы быгатоз, лэзёно ке - Ленин но Первомай районъёсты ву басьтоз. Инкуазь узырлыкъёсъя министр Александр Кулагин верамзэ сӥзиз кӧня ке удыслы. Республикаысь Инкуазез утёнъя комитет быремен валче, министерство вылэ туж трос выль удысъёс усизы. Берло аръёсы нырысьсэ коньдон висъямын ву хозяйствоез умоятонъя. Удмурт шаерын 1400 тымет. 30 процентэз кыриськон калэ вуэмын. 20 процентэзлэн кузёез ӧвӧл. Адямиос вуэз дунтэк сямен басьто но уг шыръяло. Тыметъёсты выльдыны коньдон но уг люкаськы. Югдур умояз инкуазез утёнъя (экологияя) фондын. Миым, планъя 11 миллион манет интые, отчы люкаськоз 13 миллион 950 сюрс манет. 70 процентэз кошкиз вуэз чылкытатон макеос лэсьтыны, Горд книга дасяны, чорыг вордонэз умоятыны. Шараямын ву вылын 984 йыртэмась но нюлэскын 397 эрказъяськись (браконьер). Правительствоын кенеш та ивортонэн йылпумъяськиз. Удмурт Республикаысь Кун Кенешлэсь дас куатетӥ сессизэ люкан сярысь Удмурт Республикаысь Кун Кенешлэн Президиумезлэн постановлениез Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь дас куатетӥ сессизэ люкано 2001-тӥ арын 10- тӥ апреле Иж городын 10 часын. Удмурт Республикаысь Кун Кенешлэн Тӧроез И. Н. Семенов. Иж город, 2001-тӥ арын 27-тӥ феврале. � 213-ИИ. *** Сессиын эскерыны чакламын: Удмурт Республикалэн Президентэзлэн "Удмурт Республикаын югдур сярысь но Удмурт Республикаысь калыклы вазиськон" докладэз; Удмурт Республикалэн "Удмурт Республикаысь Кун Кенешлэн депутатэзлэн статусэз сярысь" Законэзлэн инъетэз; Удмурт Республикаысь Эскеронъя кун комитетлэн 2000-тӥ арын ужамезлы йылпумъянъёс но мукет ужпумъёс. "Улэ-вылэм семья" конкурсэ Оген куректон но секыт Семья. Котькуд адями ас сяменыз вала та кыллэсь пуштроссэ. Кин ке но син азяз пуктэ, дыр, аслэсьтыз семьязэ, кинлэн ке но тодаз лыктэ ӵыжы-выжыез яке вӧзаз улӥсь бускелез. Нош адями та улонын огназ ке улыны кылемын: семья-а со яке огназ улӥсь? Та бадӟым дуннеямы трос гинэ оген улӥсьёс - котькудӥзлэн аслаз кыӵе ке но мугез. Нош мынам мадеме потэ Екатерина Александровна Цыганова сярысь. Со - ожысь но ужысь ветеран. 80 ар ӵоже улытозяз котьмарзэ но адӟоно-чидано луиз та кышномуртлы: пичи дыръяз сием потыса улонэз, ож тылӝу пыр потонэз, война бере нош ик кӧт тырымон сиён ӧй вал, дӥськут но ӧз шедьылы. Озьы ке но, котькыӵе шуг-секытъёсыз вормыса, Екатерина Александровна ожысь бертэм бераз мынӥз Казане юристэ дышетскыны. Кытын гинэ ужано ӧз луы та кышномуртлы, котькытын тыршиз вань сюлэм шунытсэ сётыны, нюръяськиз зэмлык понна. Зэмлык понна нюръяськонъяз ик куд-ог вылӥ кивалтӥсьёсын но вожвылъяськонъёс кылдылӥзы. Мар ке борды кутскиз ке, йылаз-пумаз вуттытэк уз ни дугды угось. Трос гинэ пыкылэс кылъёс кылоно луиз со, унозэ уйёссэ изьытэк но потылӥз. Ӧз кылды Екатерина Александровналы семьяен улыны та пересь даурозяз. Шонерзэ ке верано, вал солэн кузпалыз. Нош картэзлэн юыса улэмезлы, юмшамезлы чидатэк люкиськоно кариськиз. Воргоронлэн янгышеныз ик нылпиоссы но ӧз вордӥське та дунне вылэ. Екатерина Александровналэн куке но анаез-атаез, кык вынъёсыз вал. Куинь нылпиос, куиньназы ик войнае ветлэмын. Пичиез вынзы сӧсырмыса бертӥз но кема ӧз ни чида, война вылтӥ ик кулӥз. Кыкетӥез озьы ик сӧсырмыса бертӥз. 1995-тӥ арын кулӥз. Нош Екатерина Александровналы инмар кузь арлыдзэ сётэм. Войнае ветлэмез но ужын ӟеч тыршемез пусъемын трос гинэ медальёсын но орденэн. Дас вить ар ӵоже артэ улытозямы, ми соин одӥг семья кадь луим ини. Али синмыз туж ляб адӟемен, нокытчы но потамез уг луы солэн. Соин ик дораз мыноно ке, туж шумпотэ, улэм-вылэмез сярысь маде. Мар ке шумпотонэз яке куректонэз ке вань, телефон пыр жингыртыса но ӧте. Ярам коть, улон интыез шуныт, югыт, газэз но, вуэз но коркаяз вань. Екатерина Александровналэн верамезъя, вань солэн корка пушказ матысь "эшъёсыз" но - телефонэз но телевизорез. - Та эшъёсы ке ӧй луысал, туж ёрмысал ни, нунал но кузь потысал. Телевизорез бус пыртӥ гинэ адӟисько на, озьы ке но, учкисько, вераськемзэс коть кылзӥськисько - дуннеын мар луэ тодэме потэ, - маде со. Корка пушкыз туж ӝикыт, чылкыт, укно дураз пӧртэм-пӧртэм сяськаос будо. Утялтӥсьсылэсь ки шунытсэ валаса сямен, соос вазь тулысысен бер сӥзьылозь буй-буй сяськаяло. - Мон али "райын" улӥсько, - серекъя Екатерина Александровна, - сиён-юонлы уг ёрмиськы, мар сиеме потэ - басьтӥсько, коньдонме уг жаляськы. Тау инмарлы, пенсия али дырыз дыръя сёто. Тау карисько вань юрттӥсьёсылы, монэ эскерисьёсылы, утялтӥсьёсылы. Ачиз но Екатерина Александровна быгатэмезъя тодмоосызлы юрттыны тырше: шонер улыны валэктэ, ӟеч визьнод сётэ - мӧйы муртлэн верам кылыз но кулэ угось ми кадь пинал муртъёслы. Пӧрам сиён-а ваёно, мар ке юрттоно-а, со туж тау карыса, ӟеч кылъёссэ вера. Одно ик юа-вера асьмелэн улэммы сярысь, тодэмез потэ, мар вылез вань милям семьяямы. Улонамы шумпотонмы яке куректонмы ке вань, со милемын ӵош шумпотэ но, куректэ но. - Табере мынам семьяе - тӥ, - шуэ Екатерина Александровна. - Кинэн мон артэ улӥсько, кин монэ учке-утялтэ. Вань осконэ кылемын юрттӥсьёсы, матысь бускельёсы вылэ. Тани таӵе кышномуртэн артэ улӥсько мон Пичи Пургалась одӥгаз бадӟым коркан. Ас ёзъёсызлы со матысь эш, ми кадь пиналгес муртъёслы - улыны валэктӥсь, шонер визьнод сётӥсь мӧйы адями. Та улонамы тросгес мед луозы вал ог-огедлы юрттыса улӥсь семьяос, соку оген улӥсь адямиос но асьсэды мултэсэн ӧй лыдъясалзы, дыр. А.Бочкарёва. Гажано нылкышноос! Вань праздникъёс пӧлысь 8-тӥ Март тужгес но югытэз, шунытэз. Котькуд адямилы со кузьма егит мылкыд, чеберезлы, ӟечезлы оскон. Адӟысалды ке, макем тыршыса суреда пинал дунне вылысь самой чебер сяськаез, песянаезлы, анаезлы, сузэрезлы кузьман вылысь! Сюлэмыз куалекъяса но бадӟым осконэн возьма та нуналэз егит пияш аслаз яратонэзлы сяська тугоко кузьманы но солэсь шудо синъёссэ адӟон понна. Нош уг утьы шат аслаз сюлэмаз азьвесям йырсиё воргорон бадӟым яратонзэ но тау карон кылъёссэ тужгес матысь адямиезлы, кудӥныз ӵош ортчизы быдэс улон сюрессэс? Нылкышноос бордысь потэ бадӟым яратон, ноку быронтэм чеберлык, азьланезлы оскон. Тӥляд небыт сюлэмо, чидась, визьнодо луэмды юрттэ вань шуг-секытъёсты вормыны, улонын шумпотон вайыны. Шаерамы огсыр, тупаса, ог-огдэ гажаса улон но тӥледын ик герӟаськемын. Мусо нылкышноос? Сюлмысьтым ӟечкыласько тӥледыз ХХИ даурысь нырысетӥ тулыс праздникен! Котьку но егит, чебер луэ, вань малпанъёсты мед быдэсмозы, нош семьяосады яратон но тупан мед кузёяськозы. Праздникен тӥледыз! Удмурт Республикалэн Президентэз А.А.Волков. Вордскемзэс та нуналъёс пусъё: Фоминов Александр Михайлович - Кун Кенешысь Аппаратэн кивалтӥсь; Черных Александр Геннадьевич - акциосын "Ижевский подшипниковый завод" - огазеяськонлэн валтӥсь директорез; Максютин Владимир Викторович - Можга ёрос администрацилэн йырыз. Лыдӟонъёс Куӟебай Герд сайкатэ мӧйызэ но, пиналзэ но Шоркарамы сяна, музон улосъёсамы но пумен ӵем ортчыло ини Куӟебай Гердлы сӥзем лыдӟонъёс. Алигес Пичи Пургалась национальной библиотекае но уно калык люкаськылӥз батырмылэсь ӟеч ужъёссэ туала вакытэ азинтон сярысь кенешыны. Вераны кулэ: та пумиськонэз умой радъяллям "Удмурт кенеш" огазеяськон, библиотекаосын ужасьёс но дышетӥсьёс. Мӧйыосын ӵош татын вал трос гинэ пиналъёс но. Библиотекаын та нуналлы дасяллям нимысьтыз адӟытон. Лыдӟыны луымон азе люкамын Куӟебай Герд сярысь книгаос, журналъёсы но газетъёсы гожъямъёс, туспуктэмъёс, Куӟебай Герд нимо премиен пусъем та палась лауреатъёс сярысь вакчияк иворъёс. Вераськисьёс котыр ласянь сэрттӥзы-пертчизы азьветлӥсьмылэсь бадӟымесь ужъёссэ, удмуртлыкмес ӝутон сярысь сюлмаськемзэ, шудбуро улонмы понна ас улонзэ сётэмзэ. Пумиськонэ люкаськемъёс трос умоесь ӵектонъёссэс веразы. Мӧйыос но, пиналъёс но выльысь тодэ уськытӥзы батыр удмуртлэсь визь-кенешъёссэ, поэмаоссэ, кылбуръёссэ. Шумпотоно: пиналъёс но бӧрсьысь бӧрсе лыдӟизы Куӟебай Гердлэсь кылбуръёссэ, нош интыысь артистъёс кырӟанъёссэ кырӟазы. Пургаос та пумиськонэ ӧтёно кариськиллям Куӟебай Герд нимо премиен пусъем лауреатъёссэс: Валентин Тубыловез, Никвлад Самсоновез но та чуръёсыз гожтӥсез. Зэм, Никвлад Самсонов ас палъёсаз бертылыны ӧз ваньмы - Дэбесын вал. Но люкаськемъёс умой ласянь пусйизы солэсь но журналистлэсь Зинаида Яковлевна Титовалэсь "Пурга кизилиосты" аратонын, будӥсь нылпиосылы анай кылмес яратон пыӵатонын, соосты чебер гожъяськыны дышетон удысын зол тыршемзэс. Люкаськемъёс шуныт кылъёс веразы Валентин Кузьмич Тубыловлы. Со угось трос кужымзэ сётӥз Пичи Пурга ёросэз но асьме кунмес азинтонлы. Ӟырдыт мылкыдын ужаз Удмурт Элькунлэн Вылӥ Кенешезлэн Тӧроез дыръяз. Али Кун Кенешлэн депутатэз Куӟебай Герд нимо премилэн лауреатэз кивалтэ "Удмурт кенеш" огазеяськонэн. Куӟебай Гердлы сӥзем лыдӟонъёсын зол ӧръяськиз пиналъёсты асьсэ кылын дышетонэз кужмоятон сярысь вераськон. Пичи Пургалан но уноез анай кылзэс ляб тодо ини. Озьы ик ӵектэмын вал ёросысь музеез ӝоггес узырмытыны, Пичи Пурга районлы сӥзем книгаез матысь дыре вуттыны, удмуртлыкмес ӝутӥсьёс пӧлысь усто ужасьёсты пӧртэм премиосын ӟечгес пусйылыны. Вуоно музее мон нуи писательёслэсь Семён Самсоновлэсь но Николай Васильевлэсь мыным корка пырон нуналамы кузьмам бадӟым чассэс. - Мон туннэ ик тае интыяло дуно синпельёс пӧлы, - шумпотыса шуэ музейлэн кивалтӥсез З.Я.Титова. - Ваелэ тросгес книгаостэс, тунсыко туспуктэмъёстэс, гожтэтъёстэс... Нош ёросмылы сӥзем книга сярысь ке верано, отчы трос гинэ гожъямъёс люкамын ни. Тодэмея та книгаез волятыны сётэмын Россиысь культура удысысь дано ужасьлы журналистлы, писательлы Василий Михайлович Михайловлы - кема аръёс ӵоже "Советской Удмуртия" газетлэн редакторез луыса ужам муртлы. Алигес соин пумиськылӥ, Юай вуоно книга сярысь но. - Тросэз гожъямъёс мӧзмытэсьгес, огшоры ивортонъёслыгес пӧрмемын соос, - шуэ Василий Михайлович. - Соосты рос-прос тупатъяно, лыдӟымонгес, чебергес кароно на. Отӥяз ини редактор волятоз на... Лауреатъёсты ӧтчамен валче, валамон ини, азьланяз кинъёсты премиосын пусъён сярысь ӵектонъёс но вал. Витез-а, куатез-а вераськисьёс дэмлазы вуоно арын Куӟебай Герд нимо премиен пусйыны "Зарни шеп" калык ансамбльлэсь кивалтӥсьсэ Федосья Михайловна Тубыловаез. Мон быдэсак огкылысь соосын. Вылаз ик, Пургала ветлэммы бере, ӵуказе улыса, "зарниос" жин-жин концерт возьматӥзы Ижевскын. Огшокчемен кадь ортчиз со. Туж зол. Мон малпасько вал ини: Удмурт театрмылэн вужмем юртэзлэн кытӥыз ке кужмо кичабонъёслэсь тани-тани тэшкалоз. Инмар утиз. Ӧвӧл, быдэс Россиын музонэз таӵе ансамбльмы ӧвӧл ни! Ваньмыз соослэн туж вольыт, чебер, синмаськымон но эсэпезъя пӧрме. Концерт сярысь кинъёс ке, оло, вералозы на ай ас малпанъёссэс. Федосья Михайловна туж быгатыса быръе вашкала кырӟанъёсты но, туалаоссэ но. Трос гуръёсъя ачиз кылбуръёс гожъя. Ансамбль унозэ нылпиосты но дышетэ ни чеберлы. Ачиз но Федосья Михайловна востэм сямо, зэмос удмурт кышномурт: ужаны яратӥсь, быгатӥсь, удмуртлыкмес гажась. Кытӥяз мон тазьы но малпасько: солэн сюлэмаз, оло, аслэсьтыз мылкыдзэ, удмурт кырӟанъёс, кылбурет но лулчебермы сярысь сюлмаськонъёссэ пыӵатыса кельтэм ачиз Ашальчи Окимы. Соин ик, мон сямен, туж шонер луысал, Федосья Михайловнаез Ашальчи Оки нимо премиен пусйысалзы ке. Сое тодо но гажало финн-угор выжыысь мукет калыкъёс но. Мон оскисько, та ӵектонэлы шаерысьтымы нылкышноослэн огазеяськонзы но, музонъёсыз но, удмуртлыкмес утисьёс, дурбасьтозы. "Зарни шеп" ансамбльлэн концертэз ик юрттӥз Ижын улӥсь пургаослэсь бӧляксэс кылдытон ласянь нырысетӥ вамыш лэсьтыны: та ӝытэ быръемын ужъёсты радъясь комитет. Кирилл Ломагин, Куӟебай Герд нимо премиен пусъем писатель. Сюмси палась иворъёс Тулыс нунал сюрес усьтоз Городын улӥсьёслэн сюресъёсты лымылэсь сузямтэзы вылэ ӝожтӥськемзы гуртоослы валантэм, дыр. Соослэн уго югдурзы, оло, эшшо шуггес - куд-ог гуртъёсысь толалтэ потыны нокыӵе сюрес ӧвӧл. Таӵегес суред Сюмси ёросын но. Хозяйствоос тракторлы, соляркалы ёрмемен, палэнысь гуртъёсты аналто. Соин ик 2001-тӥ арлы ёрос бюджетын сюресъёсты сузянлы нимысьтыз коньдон пусйемын. Но туэ лымы тулысозь, пе, мед кыллёз ни. *** Районысь депутатъёслэн сессиязы туж чурыт вераськиз Кун Кенешлэн Тӧроез Игорь Семенов. Тулыс ужъёслы дасяськемез юаса, со интыысь кузёосты асьсэлы тросгес луонлык утчаны косӥз. Кӧня, пе, район сётоз республика понна, сомында сётоз районлы республика. Но тулыс бусыос кизьытэк уз ик кыле, дыр, та ужлы Правительство коньдон висъяны чакла, шуиз Игорь Николаевич. *** Шаерамы туберкулёзлэн тросэн алямез бадӟым кышкыт кылдытэ. Районъёс пӧлысь тужгес трос - 260 мурт - висе Сюмси палан. Соин валче ӝегатскытэк "Туберкулёз" программа кутыны ӵектэмын. Шуге-леке шедем висисьёслы дырыз дыръя вир шедьтымтэен, трос ыштонъёс луыло. Югдурез тупатон вылысь Сюмсиын радъямын вал донорлэн нуналыз. 260 мурт ас мылкыд каремезъя вирзэ сётӥз. Ваньмыз 260 литр донор вир люкаськиз. Медикъёслэн верамзыя, соос матысь дыре юрттэт сётыны уз шугъяське ни. Т. Шубина. Гуртэз но чаклась медло Уно ужрадъёс вискын Сергей Кириенко дыр шедьтӥз ивор вӧлмытӥсь ёзъёслэн кивалтӥсьёсынызы пумиськыны. "Удмурт дуннеез" гуртынгес лыдӟо бере, мынам веранэ таӵе вал: - Городын укыр трос урттылӥськисьёс, нош гуртын лекос уно ачимъяськисьёс. Макем кыдёкынгес, сокем юнгес тӥляд адямилэсь правооссэ. Общественной приёмнойёс юрттыны быгатозы-а палэнын улӥсьёслы? Сергей Владиленович рос-прос мадиз кыдёкысь калыкен ужан амалъёс сярысь. Мукетъёслэн юанъёссы асьсэлэн. Ку Интернетын кыӵе ке радлык луоз? Мар люкетэ ивор вӧлмытӥсьёслы эрик сётыны? Ку Сергей Кириенко нырысьсэ коньдон поттӥз? - Интернетэз сюбег кабе шымыртыны уг луы. Со бордын ик дуныз: отысь кин мае утча, сое шедьтэ. Ивор вӧлмытӥсьёслэн бӧрдонзы мыным тодмо. Соосты кылзӥд ке, котькинлэн урод уло кадь. Алмаз поттӥсьёс но, му вӧй кыскисьёс но, машина лэсьтӥсьёс но ас удыссэс тужгес юн зӥбемын, шуо. Мон нырысьсэ коньдон поттӥ куатетӥ класс бере. Сочиын буш ӟенеликъёс люкай но сур поттон заводэ нуи. Оглом Сергей Владиленович одӥг лэчыт юанлэсь но ӧз пегӟы. А. Шкляев. Политика Арня ӵоже шаерын, странаын, дуннеын Политика - тунсыко удыс. Сое эскерись муртъёс, тодосчиос ваньзэ чакласа, лыдъяса-чотаса вераны быгато, кыӵе луоз улон сюресэз соизлэн яке таизлэн кивалтӥсьлэн. Сергей Кириенко - егит политик, но солы властьлэн вылӥ пуконаз но интыяськыны шуд усьылӥз ни, кӧня ке толэзь ӵоже Россиысь Правительствоен кивалтӥз. Берло дыре со ужа Россилэн Президентэзлэн Приволжск округъя оскем муртэз луыса. Та должносте пуксемез бере шаерамы кыкетӥзэ вуылӥз ни. Соку Правительствое выльысь берытскыны мылкыдыз сярысь журналистъёслэн юанзылы шонерак валэктон ӧз сёты. Но ивор вӧлмытӥсь ёзъёсын ужамзэ чакласа валаны луэ, Сергей Владиленович Москвае дасяське шуыса. Юнме шорысь шат со округаз медиа- огазеськон кылдытӥз. Республикамылэн кивалтӥсьёсыз тае одно ик лыдэ басьтыны кулэ, дыр. Берло дыре угось аналитикъёс трос верало ни Михаил Касьяновез отставкае келян сярысь. Нош выль премьер интыын соос адӟо кӧня ке муртъёсты, соос пӧлын Сергей Кириенко но. Бен, Россиын кужмоя президент власть. Владимир Путин дуннеын но данзэ, соин ӵош кунмылэсь данзэ, будэтыны тырше. Ортчем арня вискын со Азиысь кык странае вуылӥз. Лымшор Кореяын кенешонъёс дыръя пӧртэм ужпумъёс эскеремын. Соос пӧлысь одӥгез - Корея полуостровысь кык кунэз огазеян - вераськонъёсы мур пыӵамын вал, Владимир Путин талы пумит ӧвӧл. Пумиськонъёсын озьы ик сэрттэмын-пертчемын Транссибез Сеулэн герӟась чугун сюрес лэсьтон, Сахалинын ӵош му вӧй поттон, Иркутскысь Кореяе газ гумы кыскон сярысь но мукет ужпумъёс. Собере Россилэн Президентэз кошкиз Вьетнаме. Пусйыны кулэ, Вьетнам Социалистической Республика та вакытэ азьпала шӧдскымон вамыштӥз, солэн экономикаез арысь аре кужмоя. Владимир Путинэз дуно куноез сямен пумитазы. Таӵе ӟеч мылкыд кенешонъёсы но пыӵаз, лэся. Кылсярысь, одӥг кыл шедьтэмын пунэм тыронъёс ласянь. Вьетнам Россилы 1,5 миллиард доллар берыктыны кулэ. Со оскытӥз, арлы быдэ Россилы 100 миллион доллар келялоз шуыса. Нош Москва эшлыко кунлы туала ож тӥрлык вузалоз. Та вакытэ матысь зарубежьеысь 700 сюрс мурт Россиын пусйиськытэк (регистрацитэк) улэ. Соин ик Россия кунгожъёссэ юнматэ. Кылем арня вискын Россия но Грузия куспын улонэ пыӵаз виза-режим. Озьыен, табере мынон-ветлон понна адямиос посольствоосын документъёс басьяно луозы. Бен, та пумысен шуг-секытъёс данак кылдӥзы, кылдозы но ай. Но МВД-лэн паспортъя но визая управленияз оско, табере "нелегалъёс" ӧжытгес луозы. Нош военнойёслэн чакламзыя, сюрес пытсаськиз чечен боевикъёслы. Азьвыл уго соос огшоры калык пӧлын Грузиысь Чечняе но Чечняысь Грузие капчиен вуо вал. Ю. Александрова. Кун Кенешын Кызьы эскероно Правительствоез Кун Кенешлэн Президиумаз быръемъёс но аппаратаз ужасьёс вераськизы 10-тӥ апреле сессиын эскероно ужпумъёс сярысь. Отчы Вазиськонэн (Посланиен) потоз Президент Александр Волков. Миым ужамлы йылпумъянъёсын тодматоз Правительстволэн Тӧроез Юрий Питкевич. Кун Кенешлэн Тӧроез Игорь Семенов тунсыко ужпумез ӝутӥз. Удмурт парламентлэн правоез вань мукет кивалтон ёзъёсты эскерыны. Кылсярысь, Правительстволы яке отысь адямиослы оскымтэез верало, кызьы лэсьтӥськыны кулэ со? Законъёсын но, регламентын но чакламын ӧвӧл. Кин кичӧлто сётэ? Кӧня мурт сыӵе ӵектонэн потэ? Кӧня куара кулэ оскымтэез веран вылысь? Та ужпумез пумаз-йылаз вуттоно. Михаил Андрианов Кузьым Серемес верос Отделлэн начальникезлэн кабинетаз куиньназы ик. "Куиньмолэн" кенешез. Котькыӵе ужпум мед луоз - пичи-а, бадӟым-а - устоез кивалтӥсь сое месткомен но партбюроен кенешытэк уз сэртты-пертчы. - Эшъёс!.. - вазиз отделлэн кивалтӥсез Кузьма Петрович Валов, бадӟым ӝӧк сьӧрын пукись адямиос шоры учкыса. - Эшъёс! Ӧм вунэтэ-а асьмеос? Ныруламы ведь 8-тӥ март, Нылкышно нунал. Мынам аслам но тодам ӧй лыктысал но, туннэ, нуназеяса лыктыкум, ӝамдэлы магазинэ кожыны шедьтӥ. Ой-ёй-ёй!.. Ма лэсьтӥське, ява! Ур-вар каре калыкед магазиндэ, кузьым... кузьым бича... Асьмелэн отделамы ӧвӧл шат нылкышноосмы? Шат соос мукетъёслэн сярысь уродэсьгес, эшъёс?.. Ӧвӧл... Мон сямен, гажамонэсь асьмелэн но... Кузьма Петрович тазьы вераз но маке витьыса сямен учкиз месткомлэн председателез Гаврил Прохорович Марданов шоры. - Месткомлэн кыӵе малпанъёсыз та пумысен? - юаз со. Месткомлэн малпанъёсыз та пумысен кисьмаллямтэ на вылэм, лэся. Марданов эш пуконэныз юнме шорысь вырыны ӧдъяз, маке верамез потэ вал - ӝегатскиз. Соку парткомлэн членэз (татын секретарьзы ӧй вал, со быдэс управленилы одӥг) Михаил Спиридонович Эстомин эш вӧзаз пукисезлы ӝикытак гинэ вазиськиз: - Гажа, Гаврил Прохорыч, нылкышноосты... Гажа... - Кызьы гажатэк? - вырӟиз Марданов. - Соос профсоюзын ӧвӧл шат? Кузьма Петрович шуэм сямен, мукетъёслэн сярысь, пӧртэмесь но ӧвӧл. Ӟеч ужало. Коллективмес гажало. Советской армилэн нуналэзлы сӥзьыса, аслыд но маке кузьмазы кадь ук? Гажатэк шат... - Бен, бен, зэм ик... - серектӥз Эстомин, тодаз ваиз, лэся. - Пепельница кузьмазы. Тамак пень курткон. Чебер маке, албасты... - Ма, бен, кыскыны дышид ик-а ини? - серемпыр юаз Валов, папироссэ аратыса. - Тани соку, басьты... - мычиз "Казбек" папиросэн коробказэ. Маскаръяськыны яратэ Кузьма Петровичед. Куиньназы ик соос гор-гор серектӥзы. - Серекъяськом асьмеос, - шуиз Эстомин. - Зэм, мон понна солэн кулэез ӧвӧл, но валаны кулэ: гажаса сётэмын ук. Гуртын куноос вань дыръя яра... Ӧжытак серекъямзы бере, Мардановлэн нылкышно праздникез кулэезъя пумитан ласянь кыӵе ке усто планэз вордскиз, лэся. Пуконзэ ӝӧк пала зуркак кыскиз, кызйиз но дыртытэк шуиз: - Мон сямен, та ужез шуак-дуак, вылласянь косэмъя ортчытоно ӧвӧл... Уг яра озьы, мон сямен. Отделлэн кивалтӥсез шораз ӝотак учкиз но оло серекъяса, оло ӧжытак вогъяськыса пусйиз: - Ма, профсоюз кӧлэ ке, косыса но ортчытом. Ма сокемез?.. - Ӧвӧл, ӧвӧл... Тӥ ӧдгес валалэ монэ, Кузьма Петрович. Косыны луэ. Но мон сямен, татын вылласянь кичӧлтон медам шӧдӥськы. Вот ма. Та ужрадэз асьсэос, профсоюзлэн членъёсыз пыр, ортчытоно. Собере та ужез ас вылад гинэ быдэсак басьтоно ке, месткомлэн мултэс коньдонэз но ӧвӧл... - Соиз зэм: куанергес улӥськом, - пусйиз Валов. - Кыӵе бен аслад планъёсыд? -Мынам план... - шуиз Марданов. - Кӧня ке коньдон местком висъялоз, нош отӥяз асьмелы, воргоронъёслы, кисымес бугыртоно луоз. Пичиен бичалом, ма, асьме отделысь нылкышноосмы понна ук, кузьымлы! Та ужез мон... мон... ӵектысал Чалмаевлы... Генадилы. Со ДОСААФ-лэн но членэз, профсоюзлэн но... - Ха-ха, - серектӥз Валов. - Ма, тон укыр егит адямиез ӧд шедьты-а? - Чалмаев егит, тӥ сямен? Быдэ вуэм воргорон со. Сямызъя ӧжыт чалмытгес ке, асьмеос янгыш. Ӧжыт ужаськом егитъёсын... - Ӧжыт ужаськом: соиз зэм, - огкылысь луиз Эстомин. - Но укыргес востэм, дӥсьтӥсьтэм маке со: вот ма. Уз быгаты, дыр. Нылкышноослы кузьым ведь. Басьтоз маке кулэ ӧвӧл... Тон ик сереме усёд... - Малы уз быгаты? Быгатоз. Юрттомы ук. Оскыны кулэ пияшлы. Сотэк ку асьмеос, Михаил Спиридонович, егит гвардиез будэтомы, сое общественной уже рос-прос кыскомы? Ку?.. Оло, адямилэн талантэз ватскыса улэ?.. Кузьма Петрович Валов нукыртӥз: - Ӧвӧл ни... Куакаез бурдзэ шонамезъя тодмалод... Сыӵе со, Валов: номырлы мултэс уг оскы. Но Марданов но Марданов: месткомлэн председателез юнме ӧвӧл. Озьы шуиз бере, кыл вылаз сылоз. - Умойтэм вераськоды тӥ, - нёртӥз Марданов. - Дӥсьтӥсьтэм, востэм луон сямызлэн мугез, оло, воксё мукет? Кин тодэ?.. Адями сокем тю-тю ӧвӧл ук... Озьы, "кин тодэ" шуиз Марданов но аслэсьтыз чакламзэ пумозяз шараяно ӧз кариськы. "Уз вала начальство... - малпаз. - Сереме уськытоз..." Отделын далай ик сачкето ини, куддыр нылкышноос куспазы китыр-китыр серекъяло Геша Чалмаевлэсь "курадӟемзэ". Кызьы со дырын-дырын, лушкем, либыт но мусо учкылэ отделысь машинистка, пери кадь чупрес нылзы, Нина, шоры. Нылмуртэз но огшоры гинэ, мултэс учконэз ик ӧвӧл кадь: тӧдьы кысъем, чиедос, кыллы бырем. Но зэм верамын: яратон - лек... Геша пӧртэм амалъёс утчаз. Киное но билет басьтылӥз, куас вылын но нискыланы ӧтьылӥз Нинаез. Амал ӧз шедьты ни. Огпол, бордгазетлэн редколлегиезлэн куремезъя, статья но печатлаз газетэ. Бадӟым статья, спорт сярысь. Шумпотыса чаклаз: лыдӟоз-а, учкоз-а гажано Нинаез? Маке шуоз-а? Пери. Адӟем но ӧз кары, лэся. Кылпум но ӧз поттылы. Со дырысен зӥбиськиз Геша, яратонзэ ас пушказ гинэ нуллӥз, дурыстэм курадӟиз. Чалмиз. Восьмиз. Калыклэсь уд ватскы. Тодозы. Мардановлы та учыр сярысь нылкышноос сипыртыса ивортӥзы. "Егитысен котькинлэн сыӵе дырыз луэ", - серектӥз профсоюз кивалтӥсь. Нош отделын кин луэмзэ берло тодаз ваиз но малпаськыны кутскиз: "Общественной уже кысконо сое: ато усем мылкыдлы, адямилэн самой лек тушмонэзлы, сётскоз..." Нуналъёс ортчизы. Сыӵе уж ӧз шедьы. Вунэ но. Али ӵапак сыӵе учыр тупамлы Гаврил Прохорович но ачиз паймиз, шумпотӥз, ӟырдыт вераськыны кутскиз: - Мон сямен, - шуиз со, - адямиез общественной ужлэсь палэнтыны уг яра. Общественной уж гинэ адямиез бурдъя, сюрес усьтэ, улыны дышетэ. Одӥгезлы ум оске, мукетызлы... Кин-о кылемаз кенешын вераз, калыкен ужасьёс ичи шуыса? Кин? Асьтэос ук, Михаил Спиридонович. Али нош малы ке пумит ини профсоюзысь адямилы кыӵе ке уж сётыны... Мардановлэсь таӵе кылъёссэ кылыса, Эстоминэд йырберзэ гинэ кормыштӥз: - Ма мон, - шуиз со, - чылкак пумит ӧвӧл, мед ужалоз пияш... Мед возьматоз... Кузьма Петрович Валов ватсаз: - Ну мар? Ӧтёмы-а татчы?.. "Э, шӧдскиды-а? - вормемзэ валаса, ӝутскем мылкыдын малпаз Гаврил Прохорович. - Вот уго, озьы нуналмысь сюлмаськоно профсоюзлэн членъёсыз сярысь..." Кӧня ке улыса, начальниклэн кабинетаз дыртытэк пыриз шоро-куспо мугоро, восьтэтгес пияш. Пыриз но кыкнапал борд кузя рад-рад пуктылэм пуконъёс вылэ кудаз пуксьыны валатэк паймыса, лэся, ӧс доры ик дугдӥз. Собере маке юаны дасяськем тусо меӵак учкись кивалтӥсь адямиосты адӟыса, шымырак луиз, мазэ валатэк юаз: - Ӧтиды-а, Василий Петрович? - сэзьмыт вазиз. Пияшлэн куараез но, выросъёсыз но азьвыл кадь ӧз потэ ни ӧтисьёслы. Ог-огзэс витизы, лэся, чал-чал пукизы. Собере Марданов ӧдъяз: - Геша, али тынад мултэс ӝег ужед ӧвӧл. Ӧвӧл ведь? - юаз. - Профсоюз но администрация тыныд одӥг кулэ уж ӵектыны малпало. Гаврил Прохорович рос-прос мадиз, кыӵе, ма уж со, кызьы быдэстоно сое. Сокем мылысь-кыдысь, гажаса сямен вераськеменызы, оло, мукет муген, Гешалэн ымнырыз шундэктӥз, синъёсысьтыз паймемез тӧлӟиз. Пумит ӧй вал, лэся, ӵектонзылы, но маке ик сюлэмшугъяськытӥз кадь сое. - Озьыен, кузьымъёс? - юаз со. - Нош ӧй быгаты ке?.. Мыным носкиос но апае басьтылэ... - Апаед тынад мултэс коньдон быдтэмедлэсь кышка, - шуиз Марданов. - Ми тыныд мултэс ум сётэ, лыдъяса. Ма валантэм - юалод. Юрттом. Шугез ӧвӧл отын. Учкод, чаклалод, калык ма басьтэгес кадь... Эн вунэты: нылкышноосты асьмелы шумпоттоно. Витёнтэм шорысь мед луоз со... Та нуналысен Геша воштӥськиз. Отделысь ужасьёс но сое шӧдӥзы. Чупресгес луиз. Тусбуяз кыӵе ке сюлмаськон каръяськиз. Ӝӧк сьӧрын азьвыл чал-чал пукись пияш табере котырысьтыз адямиосын кенешылӥз басьтоно кузьымъёс пумысен. Кудӥзлы апайлы, ма кельшоногес. Геша часэн-часэн ышылӥз. Адӟысалды ке солэсь магазин ӝажы дорын вузкарисьёсын вераськемзэ, пӧртэм арбериосты учкылэмзэ. "Кудӥзлы бен али та ваза? Чебер ваза, - малпа со, - нунал югытын кизилиосын кильыр-кильыр ворекъясь пияла арбериез бергатыса. - Тупалоз та Васса Григорьевналы, со яратэ сяськаосты. Ужын но солэн ӝӧк вылаз стаканын котьку сяськаос луо. Алигес ӝожтӥськиз: нылызлэн пичи нылыз чебер вазазэ янгышен сӧрем. Кин тодэ, оло солэн мултэс чебер вал, оло ӧй, но таиз кузьым ук..." Басьтӥз Геша. Мукетыз ужасьсы, Лидия Сергеевна, комнатаяз чорыг вордэ, шуо. Кемалась утча ини со резинаен пульверизатор. Дуно ӧвӧл, но уд шедьты. Алигес Геша сое аптекаысь адӟиз. Ӝегатскытэк бызиз отчы. Зэм, тӥни, витринаын вань на... Сюлэмыз тэт-тэт жугиське. - Вае мыным резинаен пульверизатордэс, - вазе со аптекаын ужасьлы. - Ӧвӧл ни, - шуэ вузкарись. - Кызьы озьы ӧвӧл? Тӥни ук, витринаяды... - Витринаямы? - пайме вузкарись. - Одӥгез янгышен кылем на уга... Мелэ, басьтэ... Апаеныз но кенешиз Геша Ниналы кыӵе кузьым басьтон пумысь. "Синучкон?.." "Уг яра, - шуиз апаез. - Люкиськон со. Духи кадьёс синпель ӧвӧл. Туннэ вань, ӵуказе - тӧлӟись маке. Косынка, чебер косынка... Вот мар". Ӵуказеяз Геша косынка басьтӥз но уже вуытозяз малпа: кыӵе луоз Нина, та кузьымез адӟыса? Шумпотоз-а, уз-а? Кисыысьтыз поттыса, оскытэк нош но нош учкылэ кузьымез шоры. Учке, учке но понназ пальпотэ... Али Геша Чалмаев басьтылэм кузьымъёссэ шумпотыса возьматъясал, дыр, аслыз Гаврил Прохорычлы - кыӵе жаль: кытчы ке огнуналлы гинэ командировкае ыстӥзы, сое. Тани кык нунал ортчиз ини. Нош ӵуказе 8-тӥ март. Кузьымъёсты ачиз Валов учкылӥз, Кузьма Петрович. Умой, шуиз. Мукет номыр ӧз вера, ӧз выжыятъя. Кӧсытгес адями Кузьма Петровичед... Кивалтӥсь адями уго со... Сыӵе ик луыны кулэ, дыр... Гешалэсь та нуналъёсы кытчы ке ышылон мугзэ тодыса, нылкышноос но небытгес луизы. Гажаса верасько, кескичъёс. Нина но кылпум поттылэ. Огпол синпумтӥз чагыр синъёсыныз чилектӥз но меӵак шуиз: - Укыргес ватскыса шудӥськоды: тодскомы ведь... - Ма, бен, тодскоды ке, умой, - ватсаз Геша. - Кыӵе меда кузьымъёс октӥд ини? - гор-гор серектӥз пери ныл. - Адӟод ай... Вуиз нылкышноослэн кема витем нуналзы. Плановик Шура апай 8-тӥ мартлы сӥзем пичильтык доклад лэсьтӥз. Нылкышноос сое кылзон куспын ӧз вунэтылэ Гешаез но. Дырын-дырын лушкемен учкылӥзы ӝӧк ёрсын чалмыт пукись Чалмаев пала. Пияш, быдэстоно ужзэ валаса, герой сямен возиське. Куддыр пальышак потылэ. Азьпалан пукисьёслэсь сое синйылтэмзэс адӟымтэ улэ кариське. Докладчиклэн куараез, укно бордысь кутлэн куараез музэн, пель сьӧраз бозгетэ. Шура апайлэн докладэз кужмо кичабконъёсын йылпумъяськиз. Гешалэн сюлэмыз ик нёркак луиз. Таӵе дыръя котькинлэн мылкыдыз вылӥын. Доклад йылпумъяськем бере, Кузьма Петрович ас нимыныз отделысь вань нылкышноосты, мур гажаса, праздникен ӟечкылаз но кузьымъёс пумысен Геша Чалмаевлы кыл сётӥз. Егит пияш кызйиз. Гажаса но кепыраса учкиз нылкышноос пала. Соос но туж тунсыкъясько. Гешалэн бамыз ӵыжектӥз. Зэм, ӧз ыштӥськы: кытысь ке ӝогак графин поттӥз. Огшоры гинэ графин. Со вылын - зарнивуам чуръёс. Геша син дораз ик кариз но лад-лад лыдӟиз: "Гажано Роза Моисеевна, Тӥледды ӟечкыласа, 8-тӥ март нуналэ..." - Учкы, Гешаед... - шулдыр но ӝутскем мылкыдын сипырто котыраз. Роза Моисеевна со киысь кузьым - графин - басьтыку, ваньзы мылысь-кыдысь серектӥзы. Мыло-кыдо горизы. Малпазы, дыр, табере главбухсы Роза Моисеевна отделысь графинэн гуртаз йӧл уз нуллы ни, аслаз графинэз луоз. - Вот Гешаед... - гажам но паймем куараос ӧз чалмылэ берат но. - Вот Гешаед, учкы ява со шоры... Сыӵе ик ӝутскем мылкыдын мукетъёс но праздниклы сӥзем кузьымъёссэс басьтылӥзы Геша киысь. Ушъязы Гешалэсь быгатэмзэ. Но шонерак вераны кулэ: ушъямзы Гешалы инёк ке но вал, йырыз ӧз поромы. Ваньмыз умой ортчоно вал кадь. Зэм, берпуметӥ кузьыменыз юмоке усиз. Ниналэн косынкаеныз. Воксё берло гинэ Ниналы кузьымзэ сётыкуз синйылтӥз гажано нылыз вӧзын чалмытак гинэ пукись мӧйы нылкышноез, Даша апаез, отделысь возьмаськисьсэс. Адӟиз но - Гешалэн суй-пыдаз кин ке шуккалтӥз кадь, шальтрак луизы ёзвиосыз. Воксё вунэтӥз ук Геша нылкышно сярысь. Ма кароз на?.. Ниналэсь нимтулзэ веракуз, чилектэм кадь, таӵе малпан лыктӥз йыраз. Ма кароз на?.. Гешалэсь шуэрскемзэ татын пукисьёс адӟизы но ӧзгес валалэ. Нина азьын сыӵе луиз уга, малпазы. Гажаса учкизы кужмо нылмурт шоры, сокем усто пияшез курадӟытыны быгатэмез понна. Интыяз пуксьытозяз, сое синмыныз келязы, кузьымзэ, косынказэ, кутылыса учкизы. - Кузьымъёсы ӧвӧл ни, - ӵакмем куараен вераз Геша но пуксиз. - Ваньмыз берытскизы Нина вӧзын, ӧс дорын, пукись Даша апай пала. Геша сямен ик мӧйы нылкышноез али гинэ адӟизы кадь. Со, янгыше усем мурт сямен, кышет пумзэ кияз бергатыса пуке. - Нош Даша апайлы ӧвӧл шат? - Ниналэн куараез кылӥськиз. - Янгыш мон, эшъёс. Чылкак вунэтӥськем Даша апаез. Вунэтӥськем мон... - му пыр вияса кадь вазиз Геша. - Вунэтэмед?.. - куашетыса юаз пери ныл. Отын ик шуак берытскиз мӧйы нылкышно пала но солэн йыраз керттӥз Гешалэсь али гинэ сётэм косынказэ. - Мелэ, Даша апай... Мыным возьыт соослэсь кузьымзэс нуллыны. Одӥгезлы вань, мукетызлы ӧвӧл бере... Геша ма карыны валатэк пукиз. Со куспын вераськонэ пыриськиз Кузьма Петрович. Со алӥз Нинаез: - Малы, малы?.. Ми басьтомы Даша апайлы. - Басьтомы... Ваньмыныз ӵош кулэ вал. Ма на берло?!. - меӵкытӥз Нина, косынкаезлэсь куштӥськыса. - Ойдо, вунэтэм ке, эшшо чеберзэ кузьмалоз на Геша нылмуртлы... - серектӥз кин ке но. Геша сое ӧз кылы ни. Витёнтэм йылпумъяськиз Геша Чалмаевлэн кузьмаськонэз. Мукетъёслы серем вал ке, аслыз со кытчы пырон инты ӧз шедьты. Кыӵе синмын учкоз на табере Нина гинэ но шораз? Та гинэ уз тырмы - вамышезлы быдэ серекъялоз. Ӝытазе йырзэ ошыса вамышъяз со гуртаз. Бадӟым ульчае потӥз гинэ но - кин ке вазиз: - Эй, кузьмаськись, мар йырдэ ошид? Учкиз но - Нина дораз лыктэ. - Киное мынод ке, мултэс билетэ вань, - шуиз со пальпотыса. - Сузэрелы басьтэм вал но, уг ваньмы... - Киное?.. - Гешаез кин ке воштӥз кадь. - Киное?.. - юаз бурдъяськем мылкыдын. Со ӝытэ Геша нырысьсэ гуртозяз келяз отделысьтызы усто машинистказэс - Нинаез. Ажурный пуловер � Принадлежности: 500-600 г пряжи белого цвета (полиакрил); спицы для круглого вязания Н 3; крючок Н 4; 1,5 м шелкового шнура; искусственный жемчуг. � Вязка Резинка 1һ. Ажурный узор (см. схему 1). Волнообразный узор (см. схему 2). Внимание: 4-й, 8-й и т.д. ряды вязать не переворачивая полотно, т.е. с лицевой стороны, а следующий ряд, т.е. 5-й, 9-й и т.д, вязать вводя крючок не в вершину столбиков предыдущего ряда, а в их основание. Таким образом, из 4-го, 8-го, 12-го и т.д. рядов создается эффект канта. � Плотность вязки Квадрат ажурным узором 10һ0 см - 18,5 п. и 11 р. Квадрат волнообразным узором 10һ0 см - 18 п. и 11 р. Описание работы Средняя часть переда Связать цепочку из 76 воздушных петель и вязать ажурным узором. На высоте 50 см 01 нижнего края оставить вне работы 22 средние петли и вязать две части от разных клубков, убавляя со стороны горловины каждые 2 ряда: 1х4 п. и 1х3 п. На высоте 54,5 см закончить вязать плечи. Средняя часть спинки Вязать как перед, но для горловины оставить вне работы 28 средних петель и убавить через ряд 1х4 п. с обеих сторон горловины. Рукава + боковая часть Связать цепочку из 66 воздушных петель и вязать волнообразным узором, прибавляя в каждом втором ряду с обеих сторон: 16х2 п. и 5һ п. Для боковой части довязать с обеих сторон по 27 воздушных петель (всего по- лучится 194 п.). На общей высоте 42 см закончить вязание. � Сборка Сшить плечевые швы. Обвязать горловину двумя рядами столбиков без накида и одним рядом столбиков "рачий шаг". Боковые части пришить к средним частям. Для манжеты по краю рукавов набрать на спицы 46 петель и вязать 10 см резинкой 1һ, затем закрыть петли. Для пояса набрать на переде и спинке по 98 петель и связать спицами 10 см резинкой 1һ, затем закрыть петли. Вышить цветы (см. фото), украсить их жемчужинами, уложить и прикрепить шелковый шнур. Сшить остальные швы. Условные обозначения: о -воздушная петля И - столбик без накида Т -полустолбик - столбик с накидом - столбик с двумя накидами - 2 незаконченных столбика с двумя накидами "в одну вершину" из одной петли Лечитесь морковью Древнегреческий врач Гиппократ считал морковь одним из самых полезных даров природы. Данные современных исследований также свидетельствуют об этом. Так, морковь очень богата бета-каротином, который преобразуется в витамин А и необходим человеку для физического и умственного развития, нормального обмена веществ. К тому же витамин А � прекрасный антиоксидант. Благодаря ему предотвращается образование так называемых свободных радикалов, повреждающих клетки и способствующих развитию таких опасных болезней, как атеросклероз, гипертония, злокачественные опухоли, ревматоидный артрит, катаракта и др. Морковь богата и пектинами, которые связывают избытки холестерина. ДВЕ МОРКОВКИ СРЕДНЕЙ ВЕЛИЧИНЫ, СЪЕДАЕМЫЕ ЕЖЕДНЕВНО, СПОСОБНЫ ПОНИЗИТЬ СОДЕРЖАНИЕ ХОЛЕСТЕРИНА В КРОВИ НА 10-20 %. Этот овощ полезен также при заболеваниях, связанных с нарушениями минерального обмена (обменные полиартриты, остеохондрозы, желчнокаменная и мочекаменная болезни). МОРКОВЬ ПРЕПЯТСТВУЕТ РАЗВИТИЮ ОЖИРЕНИЯ БЛАГОДАРЯ НАЛИЧИЮ В НЕЙ ЙОДА И БОЛЬШОГО КОЛИЧЕСТВА КЛЕТЧАТКИ. Морковный сок широко применяют при малокровии и упадке сил как общеукрепляющее средство. Он эффективен при авитаминозах, заболеваниях почек и печени (для удаления, например, камней его пьют в течение нескольких месяцев по 1 ст. ложке 3-4 раза в день), расстройствах зрения, связанных с недостатком витамина А, и болезнях сердечнососудистой системы. Морковь используют в лечении онкологических больных. Впервые на противоопухолевые свойства этого овоща обратил внимание знаменитый русский хирург Н. И. Пирогов в 1875 г. В настоящее время установлено, что люди, регулярно употребляющие морковь, значительно реже болеют раком желудка, толстой кишки и печени. В основном это связано с тем, что бетакаротин, содержащийся в моркови, способствует укреплению иммунной системы, а это чрезвычайно важно и для профилактики преждевременного старения. ОДНАКО ЭФФЕКТИВНА ЛИШЬ СВЕЖЕНАТЕРТАЯ СЫРАЯ МОРКОВЬ. Теперь, когда основные работы в саду и на огороде закончены, самое время подумать о "пошатнувшемся" за летний сезон здоровье и подлечиться. Попробуйте воспользоваться нашими советами. При стоматите полощите полость рта свежеотжатым соком моркови 3-5 раз в день. Одновременно принимайте его внутрь натощак 2-3 раза в день по 1/3-1/2 стакана. При насморке смешайте в равных соотношениях (например, по чайной ложке) свежеотжатый сок моркови и растительное масло, добавьте несколько капель чесночного сока и закапывайте в нос (по 4-6 капель) 3-5 раз в день. При кашле у детей рекомендуется принимать по 1 ст. ложке свежеприготовленного сока моркови, разведенного с медом в соотношении 2:1 4-5 раз в день. При кашле у взрослых смешайте сок редьки, моркови (по полстакана) и 1 ст. ложку меда и принимайте по 1 ст. ложке каждый час. При ухудшении зрения (особенно в сумерках � так называемая "куриная слепота"), конъюнктивитах, катаракте и т. п. пейте свежеотжатый сок моркови по 1/2 стакана 2-3 раза в день перед едой. При общем упадке сил, больших физических и психических нагрузках выпивайте ежедневно по 1 стакану свежеотжатого морковного сока. При мигрени хорошо помогает смесь: сок огурца (3 части), сок моркови (2 части), сок из травы сельдерея (1 часть), сок свеклы столовой (1 часть). Принимают ее по 1/2 стакана 2 раза в день через час после еды. Курс лечения � 10 дней, повторять его нужно через каждые 3 месяца. Соки смешивайте непосредственно перед употреблением, храните их в холодильнике в отдельных бутылках. При невралгии тройничного нерва и других невралгиях, развивающихся на фоне нарушения обменных процессов, пейте морковный сок по 1/2 стакана 2-3 раза в день за полчаса до еды. При обменных артритах, остеохондрозе и радикулите принимайте по 1/3-1/2 стакана сока моркови 2-3 раза в день за полчаса до еды. При заболеваниях крови смешайте свежеотжатый сок свеклы и моркови в соотношении : 3 и пейте по 1/2-2/3 стакана 2-3 раза в день перед едой. При малокровии смешайте в равных количествах сок редьки, моркови и свеклы и принимайте по 1 ст. ложке 3 раза в день перед едой. Курс лечения составляет 2-3 месяца. При инфаркте миокарда, а также при анемии, истощении и гастритах с пониженной кислотностью принимайте по 1/2-1 стакану морковного сока со столовой ложкой меда (до или после еды) 2-3 раза в день. МОРКОВНЫЙ СОК ПРОТИВОПОКАЗАН ПРИ ОБОСТРЕНИЯХ ЯЗВЕННОЙ БОЛЕЗНИ И ОСТРЫХ ЭНТЕРИТАХ (ЗАБОЛЕВАНИЕ ТОНКОГО КИШЕЧНИКА). При гипертонии рекомендуется смешать по стакану морковного и свекольного соков, 100 г клюквы, 200 г меда, 100 мл спирта и настоять в темном месте 3 дня. Принимать по 1 ст. ложке 3 раза в день. Для снижения кислотности желудка и предотвращения метеоризма промытую и очищенную морковь (желательно сорта каротель) измельчите на мелкой терке, отожмите сок и принимайте его свежим по 1/2 стакана 1 раз в день. При хроническом энтероколите и склонности к поносам принимайте свежеотжатый сок моркови по 1/3-1/2 стакана 2-3 раза в день за полчаса до еды. При хроническом гепатите принимайте свежеотжатый сок моркови, разбавленный таким же количеством кипяченой воды по 1/3-2 стакана 3 раза в день за 20 минут до еды. При почечнокаменной болезни рекомендуется пить морковный сок по четверти стакана 3-4 раза в день в течение нескольких месяцев. При желчнокаменной болезни пейте сок моркови, смешанный с медом (1:1)по 1 ст. ложке 4-5 раз в день за 15-20 мин до еды. В лечебных целях используют и семена моркови в виде порошка или водного настоя. Для улучшения аппетита, пищеварения и как ветрогонное средство принимают по 1 г порошка семян моркови 3 раза вдень. При мочекаменной болезни (настой семян лучше изгоняет песок и камни из почек и мочевого пузыря, чем сок моркови) и приступах почечной колики настаивают семена моркови (2,5 ст. ложки семян моркови на 0,5 л кипятка) в термосе в течение 10-12 ч, процеживают и пьют по 1 стакану 3 раза в день. Настой семян моркови, оказывая выраженное спазмолитическое действие, хорошо способствует отхождению камней, растворяет соли, действует как мочегонное средство, уменьшает воспалительные явления в мочевых путях, стимулирует желчеобразование и желчевыделение (в связи с чем его применяют также при желчнокаменной болезни и дискинезиях желчных путей). НЕ ПЕРЕУСЕРДСТВУЙТЕ � УПОТРЕБЛЕНИЕ МОРКОВНОГО СОКА В БОЛЬШИХ КОЛИЧЕСТВАХ У ДЕТЕЙ И ВЗРОСЛЫХ МОЖЕТ ВЫЗВАТЬ СОНЛИВОСТЬ, ВЯЛОСТЬ, ГОЛОВНУЮ БОЛЬ, РВОТУ, СЫПЬ НА КОЖЕ И ПОВЫШЕНИЕ ТЕМПЕРАТУРЫ ТЕЛА. Луна в Марте Март 2001 24 марта в 02:10 - переход на летнее время Контакт с растениями нежелателен 9, 16, 25 Посадка на рассаду: томаты среднеспелые и раннеспелые, баклажаны, тыквы 1, 4, 5, 27, 28 капуста ранняя белокочанная, кольраби 17, 18, 19, 27, 28 огурцы ранние 27,28 сельдерей корневой, лук-порей 11, 12, 13, 22, 23 зелень, лук на "перо" 1, 2, 4, 5, 27, 28 базилик, майоран 1, 2, 4, 5, 27, 28 цветы: посадка семян хризантем, флоксов, астр на рассаду 4, 5, 12, 13, 27, 28 полив, подкормка 4, 5, 11-14, 22-24. Удобные, красивые, не колченогие Без стула немыслимо представить ни одно помещение. Но каждой комнате, будь то кухня, гостиная или детская, нужен свой стул. Соблюдая единство стиля Что же необходимо учитывать, подбирая стулья для дома? Прежде всего -стиль мебели, которая у вас уже есть. К современной мебели, например, лучше подойдут легкие стулья из металла, пластика, бамбука, тростника и дерева, сочетающихся друг с другом в различных комбинациях. Стулья бывают обычные и складные. Последние удобны для небольшой кухни, а вот для детской комнаты вряд ли подойдут, так как могут защемить пальцы малышам. Лучшим выбором в этом случае будет надежный устойчивый стул из дерева с высоко расположенной перекладиной под сиденьем и квадратными ножками. На такой стул ребенок может залезть, не рискуя упасть вместе с ним. Обращайте внимание на сиденья: если они будут съемными, то обивку при необходимости легче поменять. Королевская "одежка" Не только новые, дорогие, но и старые, еще не утратившие свою прочность стулья смогут украсить любую комнату. Их нужно просто одеть в чехлы, которые не сложно сшить самим. Нынешняя модная зачехленность радует глаз, привносит в повседневность ощущение праздника. "Одежда" ваших стульев должна гармонировать по цвету и фактуре с другими текстильными изделиями в комнате � шторами, декоративными подушками и покрывалами. Модели чехлов можно выбрать и простые, и более сложные. Не обязательно прятать под чехлом весь стул. Достаточно, например, закрыть только сиденье и наполовину спрятать ножки под "юбочкой" в сборку, закрепив сзади под спинкой красивым бантом. Есть модели, которые не требуют точной подгонки. Любой стул может стать настоящим произведением искусства. В самом деле, чехлы "с капюшоном" и кистоками, разнообразнейшими складками, цветными кантами, бантами станут неповторимым украшением любой квартиры или загородного дома. Попробуй начать новую карьеру � дизайнера "одежды" для собственных стульев. Болезни стволов и ветвей яблонь В старых, запущенных садах нередко можно встретить деревья с растрескавшейся и как бы обуглившейся корой. Это наиболее распространенная и вредоносная форма проявления черного рака. В народе это грибное заболевание называют иногда антоновым огнем или огневицей. Черный рак � очень опасная болезнь яблони, поражающая все наземные части деревьев. Харак- терно проявляется она на ветвях и штамбах: вначале образуется вдавленное буровато-фиолетовое пятно, иногда кора обесцвечивается, затем становится коричневой, граница здоровой и пострадавшей ткани покрывается складками или трещинами, из которых выступают черные бугорки � пикниды, или споровместилища грибов. В дальнейшем пораженная кора растрескивается и отпадает, обнажая почерневшую древесину. Особенно опасно заболевание скелетных ветвей и штамба, когда дерево может погибнуть за три-четыре года. Эта форма болезни в России встречается в центральных областях, в Поволжье, на Северном Кавказе, распространена на Украине, в Молдавии. "Воротами" для проникновения инфекции в ветви и штамб деревьев чаще всего служат по- вреждения коры морозом, солнечные ожоги, различные раны на коре. У молодых сильных деревьев наблюдается самозалечивание зараженных участков: они изолируются пробковым слоем, и болезнь не прогрессирует. Старые (20-25 лет) или ослабленные деревья более восприимчивы к черному раку, поэтому он сильнее распространен в старых, неухоженных садах. В более северных районах на коре ветвей и стволов яблонь встречается цитоспороз. При пора- жении им кора не чернеет, а сохраняет свой первоначальный красновато-коричневый цвет, при попытке отделить ее от древесины размочаливается. На отмирающей коре без особого порядка вы- ступают черные бугорки � пикниды, более крупные, чем у возбудителя черного рака. Из коры гриб переходит в камбий и затем в древесину, что приводит к полному усыханию ветвей, ствола и всего дерева. Возбудитель цитоспороза развивается вначале на мертвых или сильно ослабленных тканях � в местах механических повреждений, морозобоин, солнечных ожогов, затем отравляет токсинами соседние здоровые ткани и распространяется в них. В районах с влажным климатом � в Белоруссии и ряде районов Нечерноземья � на стволах, ветвях первого порядка и развилках яблонь встречается обыкновенный рак. На начальном этапе развития болезни симптомы его сходны с теми, которые вызывает черный рак. В дальнейшем в местах поражения появляются наплывы, почти полностью закрывающие рану или же, наоборот, располагающиеся концентрическими кругами по краям раны. В последнем случае, при так называемой открытой форме, раны обычно глубокие, доходящие иногда до сердцевины. Восприимчивы к обыкновенному раку и молодые, и старые деревья, но особенно опасен он, как и черный рак, и цитоспороз, для ослабленных взрослых деревьев. Устойчивость ко всем раковым заболеваниям снижается при излишне обильном плодоношении деревьев, запоздалой уборке урожая. Основное условие профилактики болезней коры ветвей и стволов � хороший уход за деревьями, правильная их обрезка, своевременное и рациональное внесение удобрений, обеспечивающие своевременное вызревание древесины. В северных районах менее восприимчивы к цитоспорозу деревья с низким штамбом. Чтобы уничтожить источники инфекции, сильно пораженные, не поддающиеся лечению деревья и отдельные скелетные ветви спиливают и немедленно сжигают. При черном раке собирают и сжигают также опавшие больные плоды и листья. Приствольные круги перекапывают. При уходе за молодыми плодоносящими деревьями очень важно правильно их обрезать. Причем в неорошаемых садах нельзя сильно обрезать деревья под урожайный год. По бокам раны надо сохранять жировые побеги, вызывающие приток питательных веществ. Благодаря этому ускоряется зарубцовывание ран. Для защиты от солнечных ожогов и морозов штамбы и толстые скелетные ветви осенью (в октяб- ре-ноябре) обвязывают или белят 3 % раствором извести. ПОЛНЕТЬ - ЗНАЧИТ СТАРЕТЬ Бывают же такие скверные дни! Сутра одни неприятности. Любимое платье, оказывается, уже не сходится. Зеркало отражает внушительный второй подбородок, складки на шее, тяжелые, полные плечи... "Когда же это я успела так растолстеть?" � с тоской вопрошаете вы зеркало. Полных людей, особенно среди женщин, становится все больше, по статистике сегодня каж- дая третья имеет вес, превышающий норму. В помещенной ниже таблице приведены предельные границы допустимой массы тела для тех, кто имеет хорошее физическое развитие. Вот теперь и считайте: если ваш вес выше предельного на 10-30%, то у вас уже ожирение И степени. При ИИ степени ожирения вес на 30-50% выше нормального. Затем следует ИИИ степень и, наконец, ИВ, серьезная болезнь, которую необходимо лечить. Итак, надо худеть! Но, увы, насколько легко набрать лишние килограммы, настолько трудно их сбросить. Начнем с самых простых правил. � Ограничьте свой аппетит. Избегайте жирной, сладкой, мучной пищи, а вот белков, витаминов, минеральных солей организм должен получать в достатке. � Возьмем за правило есть регулярно, в одно и то же время, а не перекусывать на ходу. � За столом должны царить мир и спокойствие. Неприятные разговоры, выяснение отношений оставьте на другое время. Не читайте за едой, не совмещайте ужин с просмотром телепередач. � Не торопитесь, ешьте медленно, тщательно пережевывая пищу: удовольствие получите больше, а съедите меньше. � Возьмите себе за правило съедать перед обедом и ужином целый, а не порезанный ка- пустный лист: сырая капуста содержит особое вещество � тартроновую кислоту, которая препятствует отложению жира. � Ешьте не реже четырех раз в день. Ужин � не позднее 19 часов. Сахара потребляйте 3-4 кусочка в день, пищу не досаливайте. На ночь достаточно выпить стакан кефира или съесть яблоко. Не стремитесь сбросить вес моментально, объявить на день или два в неделю полную голодовку: прежде всего она сильно ослабляет организм, а кроме того, после нее появляется прямо-таки "волчий" аппетит и мы за 2-3 дня восстанавливаем, а то и перегоняем свой прежний вес. Татьяна МИХАЙЛОВА. Николай Мрыхин Проталинки Весна. И, словно маленький, Я радуюсь весне. На солнышке проталинки, Где первым стаял снег. Они мне душу радуют И сердце веселят. Для ребятни наградою Ручьи заговорят. Во фраке грач надменный И важный, словно лорд, С достоинством, степенно Гнездо из прутьев вьет. Бабульки на завалинке Шерстят соседский грех... Веселые проталинки На солнечном бугре. Долой веснушки! Но зачем? Недаром французы называют веснушки "поцелуями солнца"! На наш взгляд, они только украшают лицо, придают ему пикантность. Но, судя по письмам, многие читательницы с нами не согласны. В прошлом выпуске "Хозяюшки" мы говорили о том, как предупредить появление веснушек. Ну, а если они уже высыпали? Тогда попробуйте приготовить следующие маски. � В кипящую воду опустите 30 ядер миндаля. Через 10 минут выньте их, очистите от кожуры и пропустите через мясорубку Сильно размешивая, добавляйте по капле одну чайную ложку воды и 15 г меда. Полученную смесь наносите ежедневно на кожу лица на 15 минут, а затем смывайте прохладной водой. � Нарежьте мелко пучок зелени петрушки, выжмите сок, добавьте равное количество некипяченого молока. Полученной кашицей смазывайте кожу лица (как минимум один раз в день), держите 15 минут, а затем смывайте водой комнатной температуры. �Умывайтесь не водой, а кислым молоком. �Протирайте лицо несколько раз в день смесью сока лимона или свежего огурца с одеколоном в пропорции 1:1. � Протирайте кожу лица соком огурца, лимона или репчатого лука. � Намотайте на спичку ватку, смочите глицерином и протирайте каждую веснушку по отдельности. От этой процедуры кожа лица начнет шелушиться, поэтому после нее необходимо воспользоваться жирным кремом. В заключение несколько полезных советов, как сделать кожу на лице белее и нежнее. � Смешать 1 часть буры и 5-6 частей воды и наносить на лицо на ночь. �Взбить один яичный белок, пену тщательно перемешать с соком одного лимона, добавить чайную ложку глицерина и полстакана любого одеколона. Полученным лосьоном смазывать кожу лица на ночь. � Взять 5 г мелко натертого хрена, залить 250 г столового уксуса, перелить в бутылку, закрыть прочной пробкой и поставить на 14 дней в темное и прохладное место. После этого процедить через ситечко или марлю, добавить полтора литра холодной воды и протирать кожу лица два раза в день утром и вечером. Наталья Сидорова. Для хозяйки Ряд несложных приспособлений помогает удобно оборудовать кухню. Ширина стола 60 см, длина 120-160 см. Под крышкой стола расположены выдвижные тумбы для посуды и продуктов. Вся секция легко выдвигается. Стол и навесной шкаф изготовьте из досок, фанеры и реек. Поверхность всех элементов окрасьте белой нитроэмалью. Для крышки стола выберите более плотное дерево или сделайте ее из многослойного пластика. Лампы прикрепите к нижней кромке навесного шкафа. Для предохранения стены от загрязнения используйте цветную пленку или обычную клеенку. Все выдвижные тумбы поставьте на колесики. Горизонтальные полки укрепите на вертикальной стенке при помощи металлических уголков. Ограждение полок сделайте из проволоки и смонтируйте на полках. Паркет Вам не хочется покрывать паркетные полы лаком, вы привыкли чтобы дерево "дышало". Пусть будет так. Но ни в коме случае полы не мойте: древесина от этого начнет коробиться. Основательно пройдитесь циклей, выскоблите добела каждую дощечку. Потом наносите мастику. Она бывает двух типов - водная и скипидарная. Водная лучше заполняет щели между дощечками, предотвращает всякий скрип. Пользуясь инструкцией, которая помещена на упаковке, нанесите мастику на пол, неплохо бы в два слоя. Навощенный паркет надо протирать ежедневно. Более серьезная уборка устраивается раз в месяц. Она должна быть лишь "влажной". Избегайте щелочей - их с успехом заменяют стиральные порошки (например, "Лотос"). Еде один совет: при каждой новой натирке не наносите мастику на всю поверхность комнаты. Ведь площадь эксплуатируется неодинаково. Если в "нехоженых" местах мастику наносить раз за разом, то она попросту начнет каменеть, чернеть. Еще раз про эпин После теоретического знакомства с ЭПИНОМ и его свойствами по садоводческой литературе я приобрела этот отечественный вариант японского природного биостимулятора. Опробовала его на огородных культурах и цветах открытого грунта, а также на комнатных растениях. Весной замачивала семена овощей и цветов при выращивании рассады. Всходы были дружные, и даже упрямые перцы взошли меньше чем за неделю. Рассада перцев и томатов на опрыскивание ЭПИНОМ перед пикировкой среагировала очень хорошо, она не стала вытягиваться, окрепла. А обработка ЭПИНОМ цветочных культур на участке способствовала их продолжительному и обильному цветению. Хочу отметить, что после двукратного опрыскивания растения легче переносили засуху и меньше поражались болезнями. Успешное применение ЭПИНА на даче вдохновило меня на эксперименты с комнатными питомцами. Зимой у растений, стоящих на подоконниках, корневая система страдает от переохлаждения, низкие влажность и освещенность также вредно отражаются на их состоянии. Цветы и плодовые культуры испытывают стресс, они подвержены заболеваниям и атакам вредителей. Мое мандариновое деревце настолько пострадало от щитовки, что даже после из- бавления от вредителя оно долго не могло оправиться, и я решила с ним расстаться. Но в последний момент вспомнила об ЭПИНЕ. Приготовила раствор (7 капель ЭПИНА на 100 мл теплой воды), добавила крупиночку марганцовки и начала опрыскивать буквально умирающее растение каждые 5-7 дней, используя свежеприготовленную смесь. Мандарин постепенно стал преображаться и вскоре порадовал меня здоровой, блестящей листвой и новыми побегами. Потом на нем появилось несколько бутонов, затем цветков, а сейчас уже завязались три мандаринчика. Положительные результаты были получены мною и на розах, и на сенполиях, и на бегониях. По-моему, ЭПИН � настоящая живая вода для растений. Л.Колотилова, действительный член МОИП ЭТО ПРИГОДИТСЯ Встроенные шкафы в квартире не должны выделяться. Оклейка их обоями непрактична, поэтому лучше покрасить шкафы в тон обоев или нейтральной краской � светло-серой или цвета слоновой кости. Кстати, так же можно покрасить и межкомнатные двери. Многие стали красить в кухне стены в яркие тона, иногда красные или "под кирпич", оклеивать их клеенкой с пестрым рисунком. Красный цвет действует возбуждающе, а ведь хозяйке приходится много работать в кухне. Лучше красить стены в светлые, спокойные тона � сероватый, желтоватый, зеленоватый, на фоне их хорошо будут смотреться веселые ситцевые занавески и кухонная утварь, на- пример расписной жостовский поднос, хохломская чашка. Клеенка, наклеенная на стену, выглядит грубо. Она хороша на столе � небольшое яркое пятно, на стенах этот же рисунок будет назойливым, утомительным. Лучше окрашивать стены не блестящей, а матовой масляной краской. ДЕТСКАЯ КРОВАТЬ Чтобы удлинить детскую кровать, в спинке, обращенной к ногам, выпилите все палочки, а затем их снова соберите в единую раму � решетку. Для этого возьмите два бруска, в которых предварительно сделайте отверстия для палочек. Собрав решетку и прикрепив ее металлическими петлями к горизонтальной поперечной прекладине кровати, установите решетчатую констукцию в горизонтальном положении. После этого возьмите два шнура (ремня) и прикрепите их вверху к спинке, а внизу к решетке. Подняв конструкцию в вертикальное положение, шнуры уберите, а чтобы боковая стенка не падала, к основной стойке кровати приделайте крючки, которые держат спинку. На решетку полжите дополнительный матрса, благодаря которому кровать может быть увеличена по длине на 40-60 см. Здоровья рассада - залог высокой урожая Большое разнообразие болезней присуще овощным культурам. И потери урожая от них иногда существенны. Предотвратить их, вырастить здоровую рассаду вам поможет биологический препарат Планриз. Планриз защитит растения от корневых гнилей, бактериозов, мучнистой росы, черной ножки, фитофторы. Начинать обработки необходимой уже с рассады, вырабатывая таким образом у растений иммунитет к этому комплексу болезней. Способ применения: - замочить семена на 1-2 часа в разговоре Планриза (1:10) - при появлении у рассады 3-4 листьев, опрыскивать ее через каждые 10 дней до высадки в грунт. Из расчёта 100 мл препарата на 10 л воды. Обработки можно совмещать с подкормкой любыми удобрениями. Приготовленный раствор использовать в день приготовления. А. Градобоева РЦАС "Удмуртский". Планриз против бактериозов капусты Капуста белокочанная поражается сосудистым и слизистым бактериозами. Развитие этих болезней приводит не только к редкому снижению урожая и качества капусты, но и увеличивает потери кочанов в процессе зимнего хранения. Слизистый бактериоз поражает взрослые растения в фазе завязывания кочанов. Инфекция передается через семена, а также проникает в растение через механические повреждения, ушибы, подмороженные поверхности. На листьях появляются маслянистые пятна, которые быстро увеличиваются в размере, пластинка загнивает. Сначала размягчается внутренняя часть кочерыги, затем вся она разлагается, превращаясь в слизистую массу неприятным запахом. Сосудистый бактериоз обнаруживается нередко через две-три недели после высадки рассады в грунт. Развитию заболевания способствует высокая температура в период вегетации. Листья начинают желтеть: сначала края, затем середина пластинки. Растения отстают в росте и не образуют кочанов. На срезе черешка листьев или стебля большого растения видны черные сосуды. Необходимость получения экологически чистой продукции придает большую актуальность биологической защите - применение в борьбе с болезнями биопрепаратов. Таковым является Планриз. Использовать его на капусте рекомендуют по следующей схеме. Обеззараживание семян - важнейший элемент в системе защиты капусты от бактериозов. В день посева замочить семена на 1-2 часа в растворе Планриза, (1:10). Одновременно снижаетя пораженность рассады черной ножкой. Эффективность достигает от 76 % до 94%. При выращивании рассады в пленочных теплицах необходимо следить за температурой и влажностью почвы и поводить необходимые подкормки. После появления всходов допускается полив слабым раствором марганцовокислой калия. Первую слабым раствором марганцовокислой калия. Первую подкормку следует проводить, когда появляется второй настоящий лист (20-30 г аммиачной селитры на 10 л воды на 1 м2 или навозом, разбавленным в 10 раз). Вторую подкормку - за неделю до высал|дки рассады. Рассада считается готовой для пересадки, когда имеется 4-5 листьев. Следующим необходимым мероприятием для защиты от бактериозов является обработка. корней рассады в болтушке из гнили и коровяка с добавлениеи в нее Планриза. (1:10). Система подкормки для всех сортов капусты одинакова: первая - через 12-15 дней после высадки рассады в грунт, вторая - в период смыкания рядов. первое опрыскивание Планризов необходимо при появлении первых смптомов бактериальных заболеваний, второе - через 20-25 дней после первого, при необходимости в годы с теплым влажным летом, возможно проведение третьей обработки. (100 мл препарата на 10 л воды). При обработке растений по первым очагам слизистого бактериоза пораженные ткани высыхают через двое суток и развитие мягкой гнили присотанавливается. В различные годы комплексное применение Планриза (обработка семян и двукратное опрыскивание в период кочанообразования) снижает развитие сосудистого бактериоза в 3-18 раз, а слизистого бактериоза в 5-12 раз. А. Градобоева, РЦАС "Удмуртский". Вошебный мир цветов и ароматов, музыки и волшебных красок - это выставка "Мир цветов" УМП "Декоративно-цветочные культуры". Гиациты 11 сортов, горшечные цветы, тюльпаны, цинерария и редкая у нас жёлтая кальцеолярия горка, водоем с фонтаном, прудик с рыбками - праздник уходящего дня влюбленных и скорой весны... Уютная скамеечка "Галя+Сережа" и множество роскошных букетов на "Дереве влюбленных" - вот что такое эта выставка. Готовили это чудо сотрудники УМП "ДЦК", их гостями-участниками стали более 90 человек из 15 городов России, а также специалисты из Голландии и России. это первая столь представительная выставка в Ижевске. В апреле наши цветоводы, со своей продукцией планируют выехать в Геную, а летом - провести в родном городе конкурс среди районов на лучшее цветочное оформление. Практически все, что было выставлено в экспозиции, можно купить в магазинах "ДЦК" и плучить ответы на свои вопросы у продавца-консультанта, можно заказать проект озеленеия своей усадьбы и его исполнение. Чувствуется по-всему: специалисты здесь выского класса! Рост, см Возраст, лет 20-29 30-39 40-49 50-59 60-69 мужчины женщины мужчины женщины мужчины женщины мужчины женщины мужчины женщины 150 54,3 51,5 59,7 56,9 62,4 60,5 61,0 57,7 59,3 59,6 152 56,1 53,0 61,7 59,0 64,5 62,5 63,1 59,6 61,5 58,9 154 57,8 55,0 63,6 61,1 66,5 64,4 65,1 62,2 63,9 61,0 156 59,5 56,8 65,4 62,5 68,3 66,0 66,8 63,4 64,7 6169 158 61,2 58,1 67,3 64,1 70,4 67,9 68,8 64,5 67,0 63,9 160 62,9 59,8 69,2 65,8 72,3 69,9 69,7 65,8 68,2 64,6 162 64,6 61,6 7160 68,5 74,4 72,2 72,7 68,7 69,1 66,5 164 66,3 63,6 73,9 70,8 77,2 75,8 75,6 72,0 72,2 70,4 166 67,8 65,2 74,5 71,8 78,0 76,5 76,3 73,8 74,3 71,5 168 69,3 66,5 76,2 73,7 79,6 78,2 77,9 74,8 76,0 73,3 170 70,7 68,2 77,7 75,8 81,0 79,8 79,6 75,8 76,9 75,0 172 72,1 69,8 79,3 77,0 82,8 78,2 77,9 74,8 76,0 73,3 174 73,5 71,3 80,8 79,0 84,4 83,7 82,5 79,4 79,3 78,0 176 74,8 72,8 82,3 79,9 86,0 84,6 84,1 80,5 81,9 79,1 178 76,0 74,2 83,6 81,4 87,4 86,1 85,5 82,4 82,8 80,9 180 77,4 75,9 85,1 82,9 88,9 88,1 87,0 84,1 84,4 81,6 Вернись, вишневый сад! Хлынувшее к нам в последние годы импортное фруктовое изобилие лишний раз подчеркивает оскудение собственных российских садов. Полузабытыми становятся традиционные культуры нашей средней полосы. Разве не так случилось с вишней? Все реже встречаешь ее на рынках даже в разгар сезона, чаще пробуешь засахаренную и заспиртованную в шоколадных конфетах. Редкой гостьей она стала на участках, а где еще и растет, то чаще всего плохо плодоносит. Вот и дрожат под топором последние вишневые деревца, освобождая место более урожайным культурам. В настоящее время в мире известно более тысячи сортов вишни, в нашем Госреестре их более пятидесяти. Но вот парадокс: чуть ли не 80 % всех существующих посадок в любительских садах до сих пор состоят из стародавних Владимирской и Любской. В последние годы, на мой взгляд, все-таки появились интересные вишневые новинки: Малиновка, Молодежная, Маяк, Звездочка и др. Хотелось бы поскорее получить от селекционеров по-настоящему надежные, урожайные, с вкусными плодами сорта для возрождения вишневых садов России. Почему не плодоносит вишня В последние годы садоводы-любители все чаще жалуются на то, что, несмотря на обильное цветение, они не получают хороших урожаев вишни. Отчего же это происходит? Во-первых, в течение пяти лет наблюдается поражение большинства "сортов" вишни коккомикозом. Эта грибная болезнь распространена повсеместно, особенно сильно она проявляется в дождливые годы. В начале лета на верхней стороне листьев появляются мелкие точки, которые впоследствии увеличиваются и сливаются в большие красновато-бурые пятна. На нижней стороне листьев под пятнами образуются слегка розоватые подушечки спороношения гриба. Плодоножки покрываются серым налетом, на плодах становятся заметны мелкие, углубленные в мякоть черные точки. При сильном поражении коккомикозом листья выглядят, как ошпаренные кипятком, преждевременно опадают, наблюдается вторичный рост побегов.. Плоды мельчают, остаются розовыми, безвкусными, не вызревают. Ранний летний листопад ослабляет растения, снижает их зимостойкость. Гриб зимует в тканях опавших пораженных листьев. В результате многолетних наблюдений за 60 сортами вишни были выявлены наиболее подверженные болезни, выпад 12-летних деревьев у них составил 60 %. Это сорта Черная крупная, Черная ранняя. Мелодия, Сания, Волжанка, Комсомольская, Лебедушка, Шоколадница, Малышка, Тургеневка и др. Хорошо сохранились и успешнее противостояли коккомикозу сорта Шпанка низкорослая, Сударушка, Лозновская, Любимица, Долгожданная и Северянка. Во-вторых, к потере урожая приводит поражение вишни монилиозом. В прежние годы это заболевание наблюдалось в южных районах и не захватывало среднюю полосу. Мяг- кие зимы и обилие осадков во время цветения вишни в 1997 и 1998 гг. вызвали вспышку монилиоза и в наших садах. Заражение обычно начинается весной: цветки буреют и засыхают, листья увядают и отмирают. В течение лета гибнут все новые и новые ветви, завязи покрываются серыми подушечками спороношения гриба, загнивают и сморщиваются. Дерево выглядит, как обожженное, сильное поражение ветвей и побегов может привести к его гибели. Болезнь особенно сильно распространяется в дождливые годы. Гриб зимует на опавших листьях, плодах и ветвях. В 1997 г. небольшой урожай дали вишни сортов Любимица, Долгожданная, Шпанка низкорослая, Лозновская, которые были только частично поражены монилиозом. В 1998 г. вишни вообще не плодоноси ли из-за полного засыхания цветков. В-третьих на продуктивность вишни значительное влияние оказывают отклонения погодных факторов от обычных. Все чаще уже в октябре и ноябре температура понижается до минус 18-23 оС, самым холодным бывает декабрь, а не январь и февраль. Все это вызывает стресс у растений и сильно их ослабляет. В такие годы камбий и проводящие пучки, питающие почки, подмерзают, что в дальнейшем приводит к массовому осыпанию завязей. Порой, во время цветения вишни, устанавливается холодная, дождливая погода, не способствующая опылению. В 1998 г. наблюдались оба этих неблагоприятных погодных явления, что привело к полной потере урожая вишни, черешни и сливы. К большому сожалению, число хорошо плодоносящих сортов вишни из года в год уменьшается. Если из 60 наблюдаемых сортов пять лет назад хорошо плодоносили 12, то в настоящее время только. Это Шпанка низкорослая. Любимица, Лозновская и мутант 4-6. Самая высокая урожайность у сорта Шпанка низкорослая, остальные ему значительно уступают. В настоящее время во ВНИИ люпина выведены новые сорта вишни � Сударушка и Кизиловая, которые проходят госсортоиспытания. Научная работа по созданию зимо- стойких, самоплодных сортов, хорошо плодоносящих даже при неблагоприятных условиях, а главное, устойчивых к коккомикозу и монилиозу, продолжается. Надеемся, что это приведет к возрождению культуры вишни в средней полосе. Это вы можете Меры защиты при коккомикозе. В годы массового распространения болезни для уничтожения зимующей стадии гриба за 2 недели до листопада опрыскайте кусты и деревья вишни 4%-ным раствором моче- вины (400 г на 10 л воды). После опадания листьев тщательно их соберите и сожгите. Проведите трехкратное опрыскивание в период вегетации (первое � сразу после цветения, второе � через 2-3 недели, третье � сразу после сбора урожая) одним из следующих препаратов: 0,4%-ным раствором хлорокиси меди (40 г на 10 л воды), 0,8%-ным раствором коллоидной серы (80 г на 10 л воды), 1%-ным раствором бордоской жидкости (100 г медного купороса и 100 г извести на 10 л воды). Меры защиты при монилиозе. Осенью обязательно вырезайте до живых тканей пораженные ветви, тщательно удаляйте усохшие плоды и все собранное сжигайте. Ранней весной, до распускания почек, проведите "голубое" опрыскивание деревьев и почвы под ними 3%-ным раствором бордоской жидкости (300 г медного купороса и 400 г извести на 10 л воды). В период вегетации проведите трехкратную обработку деревьев (первую � в фазе распускания бутонов, вторую � сразу после цветения, третью � спустя 2-3 недели) 0,4%-ным раствором хлорокиси меди (норму расхода см. выше) или 1%-ным раствором бордоской жидкости (норму расхода см. выше). По материалам книги А. Ф. Колосниковой "Вишня в каждом саду", Орел. 1995 Из истории моды Галстук (от немецкого слова "хальстух" - шейный платок). Изготовляется из натурального и искусственного шелка, шерсти и др. Существует несколько видов галстука: самовяз, регат, бантик и др. Цвет и рисунок правильно подобранного галстука должны сочетаться с расцветкой костюма, сорочки, с тоном шляпы и носков. Наиболее распространен галстук самовяз. Завязывать галстук можно разными способами. Концы галстука не должны иметь ни морщин, ни складок. Галтсук-регат, или готовый узел фабричного изготовления, имеет резиновую тесьму с застежной сзади, под воротником рубашки. Галстук-бантик надевается к выходному костюму (на балы, свадьбы, торжества, за исключениеи тех случаев, когда галстук-бантик является униформой), черный-нырядный, белый - праздничный (только к фраку), цветной - к пестрым костюмам. Размеры узла на галстуке и рисунок галстуков меняются в зависимости от моды. Актуальная информация Избыточный вес может иметь генетическое происхождение Американские и немецкие ученые привели доказательства того, что значительный избыточный вес часто не связан с неумеренным потреблением пищи, а обусловлен определенными на- следственными факторами. Ученые обнаружили генетический дефект, из-за которого жировые клетки размножаются практически неограниченно. Фисташки содержат вещества, разрушающие клетки Специалисты из Федерального института защиты здоровья потребителя (Германия) обнаружили, что некоторые пищевые продукты способны нанести ощутимый вред организму. Например, серьезную проблему представляют собой афлатоксины, входящие в состав фисташковых орехов. Эти вещества, являющиеся канцерогенными продуктами обмена плесневых грибков, были обнаружены в половине обследованных орехов, причем в количествах, которые определенно вредны для здоровья. Женщины чаще страдают раком легких, чем мужчины По мнению специалистов в области онкологии, в будущем десятилетии число женщин, больных раком легких, будет непропорционально расти. Это связано с тем, что доля курящих женщин в Европе продолжает увеличиваться. Вместе с тем легочная ткань представительниц слабого пола реагирует на вредные вещества сильнее, чем легочная ткань мужчин. Поэтому курение у женщин скорее приводит к повреждению клеток, что в свою очередь создает условия для заболевания раком. Мой опыт выращивания раннего картофеля Если у вас садово-огородный участок небольшой, а вы очень любите картофель, то лучше выращивать ранние сорта. Этим достигается несколько целей. Во-первых, молодой картофель будет на столе уже в июне. Во-вторых, освободившуюся после уборки картофеля площадь можно использовать для выращивания сидератов, редиса, редких культур. Кстати, картофель � замечательный предшественник для большинства культур, за исключением томата, перца, баклажана, физалиса и чеснока, В-третьих, очень хороши смешанные посадки раннего картофеля в качестве основной культуры с сопутствующими редисом, кресс-салатом и шпинатом. Эти растения хорошие соседи. Их можно выращивать на одном месте несколько лет подряд без снижения урожая. Ранние сорта картофеля капризнее при возделываний и менее урожайны, чем позднеспелые. Однако эти недостатки компенсируются тем, что картофель созревает очень рано и выращивать его выгодно, ведь на рынке он летом дорогой. Вот уже несколько лет я выращиваю раннеспелые сорта Удача и Жуковский ранний. Готовить участок под картофель начинаю в августе. После уборки огурцов и бобовых вношу 50 г/м2 доломитовой муки, содержащей кроме кальция магний, на который ранний картофель исключительно отзывчив. Эти предшественники у меня постоянные и доломитовую муку вношу ежегодно. Почву перекапываю и высеваю смесь озимой ржи белой горчицы из расчета 9 г/м2. Эти растения улучшают структуру почвы, обогащают ее органикой, азотом и фосфором, а зимой хорошо задерживают снег, что в весенний период увеличивает запасы влаги, в которой очень нуждается ранний картофель. Кроме того, рожь и особенно горчица выделяя эфирные масла подавляют пырей, осот и другие сорняки. Весной перед посадкой участок перекапываю и заделываю в почву перезимовавшую растительную массу. Благодаря использованию сидератов обхожусь без навоза. Ранний картофель выращиваю через рассаду. Хлопот, конечно, много, зато картофель поспевает на месяц раньше, чем при обычной посадке. Семенной картофель использую только свой. Перед закладкой на хранение клубни обязательно выдерживаю не менее 10 дней на свету, рассыпав в один слой, и периодически перемешиваю. Приблизительно за месяц до высадки картофеля на рассаду отбираю здоровые клубни массой не менее 60 г, промываю их теплой водой, замачиваю на 15 мин. в слабом растворе марганцовки, затем промываю и обрабатываю биостимулятором Гибберсиб-У, который способствует прорастанию глазков до всей поверхности клубней. Кроме того, этот препарат содержит полностью водорастворимые комплексные минеральные удобрения с микроэлементами. Для проращивания клубни прогреваю при температуре 23-25 �С два-три дня, затем укладываю в ящики из-под фруктов и ставлю на свет (но не на солнце!). В течение десяти дней поддерживаю температуру 18-20 оС. Затем снижаю ее до 14-18 оС и выдерживаю клубни еще две недели. В результате такой температурной обработки на клубнях образуются крепкие, толстые, темно-зеленые с фиолетовым оттенком ростки длиной 2-3 см с корневыми бугорками. Пророщенные клубни высаживаю в ящики (40х60 см), в которых устанавливаю съемные перегородки из фанеры, получаются ячейки 10һ0 см. Они нужны для того, чтобы образующиеся корни не переплетались и не повреждались при посадке. В каждую ячейку насыпаю торфонавозный компост слоем 3 см с добавлением удобрения "Кемира Картофельное" и золу, кладу по одному клубню и засыпаю их этой же питательной смесью слоем 5 см. Смесь готовлю так: на 0,5 кг торфонавозного компоста беру 1 ст. ложку удобрения "Кемира Картофельное" и 3 ст. ложки золы. Торфонавозный компост готовлю осенью. Высаженные клубни периодически опрыскиваю водой, но не поливаю. Появившиеся всходы опрыскиваю раствором мочевины (8 г на 1 л воды), которая способствует наращиванию зеленой массы ботвы, увеличивает урожайность, повышает содержание крахмала в клубнях и улучшает их вкус. Через три недели растения, достигшие в высоту 5-10 см, поливаю, и они готовы для высадки в лунки. Для защиты от грибных болезней перед высадкой рассады лунки поливаю раствором медного купороса (1 ст. ложка на 10 л воды), затем в каждую лунку вношу пол-литровую банку питательной смеси и хорошо перемешиваю с землей. Такой локальный способ внесения удобрений улучшает питание растений в начальный период роста. Для защиты от медведки при посадке рассады в лунки кладу по 1 ч. ложке истолченной яичной скорлупы, смешанной с небольшим количеством растительного масла. Рассаду высаживаю рано (обычно в конце апреля � первой декаде мая), когда начинают распускаться листья березы. Расстояние между лунками 25-30 см, между рядами � 60 см. Рассаду высаживаю так, чтобы 1/3 побегов располагалась над поверхностью почвы. После посадки рассаду укрываю пленкой и присыпаю землей ее края. Когда минует угроза заморозков, пленку снимаю. В течение вегетации провожу две-три подкормки удобрением "Кемира Картофельное". При второй подкормке в раствор добавляю 30 г сернокислого калия на 10 л воды. Ведро раствора расходую на 1-2 м2. Растения подкармливаю в фазе бутонизации. В этот период растениям необходим калий, он ускоряет развитие клубней и улучшает их качество. При недостатке в почве калия сырые и вареные клубни темнеют. Окучивание � необходимый прием, повышающий урожай раннего картофеля. Первый раз окучиваю, когда растения достигнут 15-20 см в высоту, второй � при появлении цветочных бутонов. Во время цветения картофеля ботву слегка пригибаю к земле, чтобы рост ее приостановился, а клубни быстрее формировались и созревали. Принято считать, что картофель в поливах не нуждается, но это не так. Потребность во влаге у него довольно высокая. Хороший полив в жаркую погоду значительно ускоряет развитие картофеля и всегда окупает себя. Особенно важно своевременно обеспечить растения водой в период интенсивного образования клубней � от полной бутонизации до прекращения роста ботвы. При поливе необходимо следить, чтобы вода не размывала гребни и не обнажала гнезда картофеля. После полива, как и после дождей, почву необходимо прорыхлить и одновременно поправить рядки. Поливы прекращаю за две недели до уборки. Как только цветки у растений картофеля раскроются, начинаю выборочную уборку. Обычно это бывает во второй декаде июня. Куст подкапываю и выбираю наиболее крупные клубни, затем вношу золу, окучиваю и поливаю, слегка уплотняю землю и мульчирую торфонавозным компостом. Сплошную уборку картофеля провожу с 20 июля до 5 августа. Урожай с 1 м2, как правило, составляет 2-4 кг. А. Русанов, овощевод-любитель. Макияж от "А" до "Я" Красота - это, конечно, страшная сила. Но не только. В первую очередь красота - это гармония. И если что-то в вашем облике нарушит эту гармонию, привлекательность исчезнет без следа. Допустим: вы элегантно одеты и у вас прекрасная прическа, но блеклые щеки и невыразительные глаза. Результат ясен - вас не заметят, как бы вы ни старались. Или наоборот - чересчур яркий, неправильно подобранный макияж. Сами понимаете, что в этом случае можно поразить собой, но поразить неприятно. Предлагаем вашему вниманию несколько практических советов профессионального визажиста Елены Добролюбовой, которые, надеемся, помогут вам создать изысканный и модный макияж лица. 1. Начинать нужно с домакияжа, то есть снять нанесенную ранее косметику. Ватный тампон при этом должен быть влажным и хорошо отжатым. На него наносится гель для снятия косметики с век. Следует отметить, что веки - первое звено в процессе снятия макияжа. 2. Затем удаляется косметика в лица при помощи специального молочка или тоника, подобранных по типу кожи. Для сухой и чувствительной - и молочко, и тоник; для нормальной и жирной - тоник; для проблемной - гель для умывания, молочко, тоник. 3. Теперь начинается второй этап - нанесение тонального крема-основы для дальнейшего макияжа. Подбирается от так: на ладонь кладется небольшое количество крема для того, чтобы выяснить, подходит ли он к данному типу лица и кожи. Если тональный крем на ладони не виден - значит, он вам подходит. Необходимо знать, что тональный крем должен быть или тон в тон с вашей кожей, либо на тон светлее. Небольшой нюанс: если вы вечером собрались в театр, на концерт или в гости, то надо учитывать, что там будет искусственное освещение. В этом случае рекомендуется брать тональный крем на тон светлее. Накладывается крем-основа влажным тампоном. Если вы хотите при помощи тонального крема убрать морщинки или мешочки под глазами, вам нужно выбрать крем с увлажняющим фактором, другие кремы нельзя класть под глаза, так как они сушат кожу. 4. Далее накладываетя пудра. Лучше использовать не компактную, а рассыпчатую, так как она более ровно ложится на лицо, придавая коже естественный матовый оттенок. Пудра также должна быть тон в тон или на тон светлее, но уже того тонального крема, который вы только что использовали. 5. После того как вы положили на лицо тональный крем и пудру, переходите к бровям. Их лучше подкрашивать тенями либо коричневого цвета, либо цвета хаки, тогда не будет ощущения, что они накрашены, и тем не менее вы их очень хорошо подчеркнете. 6. После этого накладываются тени, создавая переход от светлого к темному, чтобы подчеркнуть красивую форму глаз. Чтобы достичь плавного перехода, темные тени лучше наносить в обратном направлении, то есть сначала по всему веку светлые, затем - темные. Хотелось бы предупредить, что тени персиковых, салатовых и вообще теплых оттенков зрительно увеличивают объем глаз. То же самое можно сказать и о перламутровых и золотых. А вот тени обратного направления - без перламутра, без бликов - наоборот, создают впечатление маленьких глаз, зрительно уменьшая их объем. Такие оттенки хороши только для тех женщин, у которых глаза слегка навыкате. 7. Теперь переходите к подкрашиванию ресниц. Тушь наносится сначала на нижние реснички, а затем на верхние сверху и на верхние снизу для того, чтобы создать объем и как бы завить их. 8. От глаз переходим к губам. Чтобы придать им красивую форму, вам просто необходим контур для губ или карандаш, причем непременно без перламутра и с коричневым оттенком. При этом вы добиваетесь незаметного перехода от кожи к губам, так как именно этим цветом можно скорректировать форму губ. 9. Теперь при помощи кисточки покрасьте губы помадой. 10. И в завершение - нанесите румяна. Лучше пользоваться румянами нескольких тонов, перемешивая их. Причем совсем не обязательно брать только компактные, очень хороши и румяна в шариках. Для того чтобы получить превосходный результат, нужно наносить румяна, учитывая форму лица. Ну, например, если у вас круглое лицо, румяна следует класть только на середину щеки. А вообще женщине следует знать одно простое правило: при помощи ладошек придайте лицу ту форму, которую бы вы хотели иметь, и там, где остановился мизинец, должна остановиться кисточка, наносящая румяна. Кстати, не забудьте еще об одном правиле: румяна наносите не только на щеки, но и на шею, на лоб (около линии роста волос) и чуть-чуть на подбородок. И в качестве П.С. Сейчас в моду вернулись яркий макияж и подводка глаз. Ну вот вы и достигли совершенства. И все же не останавливайтесь на достигнутом - ведь, как известно, мода капризна и изменчива. И если совсем недавно натуральные, естественный тона доминировали в макияже, то сегодня на сцене Его Величество Цвет. Вы привыкли пользоваться одним, в крайнем случае двумя оттенками помады? Напрасно! Если вы считаете себя настоящей женщиной, то в вашей косметичке должно быть не менее пяти губных помад разных оттенков - под ваши платья, блузки, костюмы, даже под разное настроение. А вообще вам нас совет: не комплексуйте, экспериментируйте с удовольствием для себя и для Него, фантазируйте, будьте привлекательны, загадочны, непредсказуемы и уверены в себе, чтобы каждый раз, заглядывая в зеркало, вы видели там королеву. Сюрес урдсын уг сыло Шаертӥмы ортче Казань-Малмыж-Пермь-Екатеринбург федеральной сюрес. Сое лэсьтон борды басьтӥськизы Ижевскысь, Можгалась, Уваысь, Сюмсиысь, Селталась сюрес лэсьтӥсьёс. Алигес соос огазе люкаськыса кенешизы быдэстоно ужзы сярысь. "Удмуртавтодор "предприятие но Уваысь сюрес лэсьтӥсьёс куспын огкыл кутэмын. Туэ Уваос кызь иськем пала сюресэз асфальтэн шобыртыны но кык выж лэсьтыны кулэ. Сюрес лэсьтыны 222 миллион манет висъяны чакламын федеральной бюджетысь. Сюрес шупатозь кема на, но лэсьтӥськисьёс гужемез возьмаса уг уло, из-кӧльы вортто, кык-куинь сменаен ужало. Пуны дан Уваын ортчиз пӧйшурась пуныослы сӥзем адӟытон. Таяз радэ дунъет сётӥзы лайкаослы. Асьсэдыз возьматӥзы витьтон пала чебер пуныос. Уваысь лайкаосты кунгож сьӧрын но тодо, шуыны луоз. Кылем арын соос Россиысь конкурсэ пыриськизы, отысен пуныосты белорусъёс синйылтӥзы, кузёосынызы кусып тупатӥзы. Кинологъёслэн верамзыя, Уваысь лайкаос ӟеч выжыосынызы висъясько. Кема ар ӵоже ини пӧйшурась пуны возё нюлэскасьёс В. Дмитриев, А. Баранов, А. Огородников. С. Антонов. Коркатуй жингыртӥз Аслэсьтыз ужзэ ӟечгес но эркынгес радъян вылысь, Эктон корка утчаз но шедьтӥз выль сэрег - чылкак алигес гинэ выжиз Удмурт Элькунысь Куӟебай Герд нимо шаеръюртэ. Таин валче татын коркатуй вал. Эктон коркась пинал кырӟасьёсты-верасьёсты данак куноос ӟечкылазы. Ваньзы ик соос студилэн кивалтӥсезлы егит тодосчилы Андрей Прокопьевлы но татысь чебер но шӧртчи нылъёслы но пиослы сӥзизы ӟеч азинсконъёс но кузь даур. Вашкала йылолэз чакласа, азьланяз ӟеч улон сярысь малпаса, Эктон коркалэн кузёосыз выль юртэ нырысь ик лэзизы коӵышпиез. Лыктэмъёс пӧлысь тужгес дуноез куно мумыкоре йыгаз азвесь коньдон. Отӥяз тужгес тунсыкоез вал: коркатуе люкаськемъёс но Эктон коркась егитъёс валче кырӟазы-эктӥзы, вашкала удмурт шудонъёсты тодазы ваизы. Лыктэмъёслы тужгес яразы Кияса ёросысь Вуж Салья гуртысь но Бигер шаерысь Огырчи ёросысь Варклед-Бодья гуртысь удмуртъёслэн чебер кырӟанъёссы-эктонъёссы. Эктон коркась нылъёс-пиос туж етӥзэсь. Асьсэлэн чебер куараосынызы котьку паймыто Татьяна Шкляева, Надежда Дядькина, Наталья Камашева, Светлана Устинова, Павел Камашев, Валентина Куликова, Инна Васильева, Наталья Гусева, мукетъёсыз. Нош Андрей Прокопьев - Эктон коркалэн зэмос шорсюлэмыз. Бер ӝытозь чузъяськизы та юртын чебер удмурт гуръёс. Вуоноез пумиськон луоз та толэзьлэн берпуметӥ покчи арня нуналаз - 29-тӥ мартэ. Лыктэлэ Эктон корка! Е.Кузнецова. Школа но улон Котькуд нылпилы - нимаз мертэт Шаркан ёросысь Мувыр шор ёзо школалы дас ар тырмиз ке но, ассэ со трослы арлыдоенгес лыдъя. Мувыре улыно-вылыно выль карпич школа пуктэм бере Суронысь шор ёзо школа татчы выжиз угось. Огазеям лыдпус озьы сизьымдон арозь вуиз. Кылем арын ноябрь толэзе Мувырысь шор ёзо школаын сӥё-дано ужрад ортчиз. Отчы ӧтемын вал Суронысь но Мувырысь шор ёзо школаын дышетскем трос дано адямиос. Но Мувыр школа туннэ нуналэныз но данъяськыны быгатэ. Вераськиськом школалэн директореныз Василий Анатольевич ТУРОВЕН. - Школаямы бадӟым ужрад ортчытыны малпамы бере, выльдон-тупатъян ужъёс лэсьтытэк ӧз луы. Ас кужыменыз гинэ школа ӧй вормысал ваньзэ сое быдэстыны. Юрттӥз ёрос администрация, спонсоръёс утчамы. Школалы коньдонэн юрттӥзы "Му вӧй поттонъя удмурт огазеяськон" (кивалтӥсез Н.М.Граханцев) но Удмурт Республикаысь Кун Кенешлэн депутатэз Н.М.Фокин. Сӥё-дано ужрадамы сю куамын муртэ ӧтимы ке вал, сю палаез вуизы. - Кыӵе азинсконъёсын, выльдӥськонъёсын туннэ нуналэ данъяськыны быгатэ Мувырысь шор ёзо школа? - Нимысьтыз маин ке ушъяськыны вазь ай, берло аръёс капчиен уг сётско. Но та дырлы милям нырысетӥ сюлмаськонмы: школа бере нылпиос дышетсконзэс азьланьтыны мед быгатозы. Соин дышетон программамес выльдон бордын ужаськом. Кудӥзлы ке но предметлы тросгес саклык висъяны городын сямен милям уг луы. Но пиналлэсь кудпала кыстӥськемзэ дышетӥсьёс эскеро пӧртэм амалъёс пыр, тестъёсын ужало. Озьы дышетскисьёс кыӵе ке но предметъя нимаз консультациос басьтыны быгатозы. Сюлмаськытэ школаез пыд йылаз султытон но, коньдон ласянь туж трос шуг-секытъёс кылдо угось. Школалэн 13 гектар музъемез вань. Отын бакча сиён, картофка будэтӥськом. Но шуг-секытъёс кылдо техника ласянь, гурт хозяйстволы йыбырттытэк уг луы. Нош со дунтэм ӧвӧл. Спонсоръёс шедьтыса, трактор басьтыны малпаськом. Йӧл ласянь шугъяськонъёс медам луэ шуыса, одӥг скал вордӥськом. Вуоно арлы куинь йырозь вуттыны малпаськом. Вань кунянмы, порозпимы. Пиналъёсты сюдӥськом дунтэк. Йӧл, сӥль, бакча сиён школалэн аслаз тросэн луысал ке, дышетӥсьёс но сое басьтыны быгатысалзы. Озьы соос ӧжытгес думиськемын луысалзы гурт ужъёс котыре. Луонлык кылдысал пиналъёсын ӵош кытчы ке шутэтскыны потаны, театръёстӥ, музейёстӥ ветлыны. Пиналъёсын ужа бере, дышетӥсьлэн котыр ласянь тодон-валанъёсыз мед луозы. Та пумысен нимысьтыз программа дасяны чакласьком. Но кытчы ке потан понна автобус куроно луэ, нош со сюрс вить сю манет пала усе. Туж бадӟым малпанэн но осконэн улӥськом: школалэн аслаз автобусэз луиз ке, улонмы трослы югытгес луоз. - Кытчы ке палэнэ потаса гинэ пиналъёсты культуралы уд дышеты. Семья, гурт улон, школа улон озьы ик бадӟым инты басьто нылпиослы ӟеч сямъёс пыӵатонын. - Сюлмаськытӥсь ужпумъёс та ласянь трос. Калык тросэн юэ, ужлэсь палэнске. Культура ласянь калык пумен улӥе но улӥе лэзиське, нош пиналъёс сое адӟытэк уг уло. Соин ик школа та ужпумъёслэсь палэнскыны кулэ ӧвӧл. Дыр ортчыса, туннэ дышетскись пиналъёслэн нылпиоссы дорамы ик лыктозы. Нош кыӵеесь соос луозы? Калык пӧлы ӟеч сямъёсты вӧлмытонэз школа ас ки улаз кутыны турттэ. Азьлань вамышъёсмы кӧня ке шӧдӥсько ни. Анай-атайёс азьвыл юыса но уг кепырало вал школае пырыны. Али югдур воштӥськиз, мӧйыос но валазы куронмес. Шӧмаськемын-мар луо ке, асьсэос янгышсэс валало ни. Школаямы трос пиналъёс ветло палэнысь гуртъёсысь. Таосаз ини валэктон уж секытгес нуыны. Но шугъяськытӥсь семьяосъя ми гурт администрациен ӵош ужаськом. Пусйымонэз со но, Сурон гурт администрациын кылдытэмын калык пӧлын уж нуонъя пӧртэм удысын ужасьёсты огазеясь ёз. Отчы пыро кивалтӥсьёс, депутатъёс, дышетӥсьёс, эмъясьёс. Котькуд шугъяськытӥсь семья школаын пусъемын. Малпаськом, нырысь ик соос борды юн-юн басьтӥськоно - дышетсконын азинсконъёс тросгес пото семья бордысь. - Дышетсконын азинсконъёс ласянь ке верано, кыӵеесьгес тодон-валанъёссы Мувыр школаысь пиналъёслэн? - Дышетонын лыдэ басьтыны тыршиськом котькуд пиналлэсь нимаз быгатонлыкъёссэ, ӟуч сямен вераса - личностно-ориентированное обучение. Соя ик куронъёс пуктӥськом урокын. Котькуд пинал шӧдыны кулэ мар ке ласянь но будэмзэ. Ваньзэс одӥг мертэтъя мертаны уг яра: одӥгезлы дышетскон капчиен сётске, нош мукетызлы секыт йӧтэ. Шуом, 9-тӥ классын пиналлы 6-тӥ класслэсь программазэ сётӥд ке, со пӧрмытоз дышетскыны. Школае ветлыны мылкыдыз но луоз солэн. Нош золъёссэгес вузъёсы пырыны дасяськом. Ми ум уиськиське школаысьтымы ӟеч дышетскисьёсты тросгес поттон понна, нырысь интыын луыны кулэ ӟечлык - качество. "Ньыльлы" но "витьлы" дышетскисьёсмы районъя ӧжытгес ке но, вылӥ учебной заведениосы пырон ласянь школамы районъя 2-тӥ�3-тӥ интыын сылэ. Районын но республикаын ортчылӥсь олимпиадаосын но вормисьёс радын мынӥськом. Тани кылем дышетскон арын республикаямы ортчем удмурт кылъя но литературая олимпиадаын вормисе потӥз школаысьтымы 11-тӥ классын дышетскись Лариса Широбокова. Туэ со дышетске Удмурт кун университетысь удмурт филологияя факультетысь финн-угор люкетаз. Дышетскыны пыриз экзаменъёстэк. Та университетысь ик география факультетэ пыриз Сергей Поткин. Куд-огез дышетӥсьёс уг но оско вал солэн сыӵе луонлыкезлы, мукет предметъёсъя тодон-валанъёсыз вылӥын ӧй вал угось. Пияш ас понназ нимысьтыз программая дасяськиз но тӥни коньдон тырытэк дышетскыны пыриз. Ӟечлык ласянь ик верано ке, тросэзлэн четвертьын одӥг гинэ "куиньзы" потыны быгатоз. Шуо, уг луы-а, пе, со оценкаез "ньыльлы" тупатыны. Кытысь ке басьтыса сыӵе дунъет уг пукты ук дышетӥсь. Котькуд оценка пумысен дышетӥсьёсын вераськиськом. Пиналлы уг кельшы ке сыӵе дунъет, оценказэ тупатон ласянь куриськон гожтыны быгатоз. Тодон-валанзэ дунъялом экзамен пыр. - Сыӵе учыръёс школаяды вал ни-а? - Ӧй, пиналъёс соглаш луо пуктэм дунъетэн. Аттестат дышетскисьлэсь зэмос тодон- валанзэ мед возьматоз. - Василий Анатольевич, кызьы малпаськоды, туала дышетон система тупа-а туннэ нуналлэн куронъёсызлы? - Дышетон удысын воштӥськонъёс ортчытыны кулэ. Тани кинлы дышетскыны секыт йӧтэ, 9 класс бере дышетскемзы уг поты ни. Со пиналъёс 10-тӥ классэ но уг мыно, ужаны но соослы нокытын. Нылпиослэн кулэяськонъёссыя кулэ вылэм школаын профильной классъёс усьтыны. Нылъёс но пиос отын кыӵе ке но специальность мед басьтысалзы. Математикаез, физикаез дышетонлы саклык отын ӧжытгес мед висъяськоз. Нылпиосты улыны дышетоно, соку соос йыртэмаса ӧй ветлысалзы. Профильной классъёс усьтыны луысал визьмо но усточи нылпиос понна, кудъёсыз дышетсконзэс азьланьтыны малпало. Дас кык аръем дышетсконэ выжимы ке, куд-ог школаос ворсаськыны быгатозы. Соин ик али сюлмаськыны кулэ ни школалэн азьланез сярысь. Артысь гуртъёсысь шор ёзо школаосын кенешыса, Ляльшур, Петунька, Сосновка но милям школамы, профильной классъёс усьтоно. Котькудӥз кыӵе ке но удыслы бадӟымгес саклык висъялоз. Автобус ветлэ бере, нылпиос бырйыны быгатысалзы кудзэ ке но школаез. Интернат ласянь но шуг-секытъёс уз кылдэ. - Школаяды кыӵе ке но удысъя дышетон али радъямын-а? - 10-тӥ�11-тӥ классъёсын дышетскись пиналъёс понна 3-4 ар талэсь азьло фермеръёсты дасян программа дасяй вал. Нылъёс дышетскизы мушканлы но гурт котырысь ужъёсты быдэсъянлы (хозяйка усадьбы), нош пиос - мушканлы но машиноведенилы. Та предметъёслы тросгес саклык висъяса, нылпиосмы вузъёсы пыремысь дугдӥзы. Озьы та программалэсь куштӥським. Соин валче азинтӥм кружокъёсын ужанэз. Пиос трактористэ дышетско, пулэз вӧло, нош нылъёс пӧртэм киужъёслы дышетско. Котькуд классъя нимаз программа дасямын. Тросгес саклык висъям потэ вал крезьгурлы но эктонлы. Но ӧвӧл нимаз дышетскем специалистмы. Сыӵе дышетӥсь шедиз ке но, быгатомы-а солы уждун тырыны? - Азьло вакытъёсы пионер, комсомол огазеяськонъёс вал. Нош туала вакытэ пиналъёс маин "шудо"? - Школаямы кылдытэмын "Родники" пионер огазеяськон. Кылдытэмын дышетскисьёслэн комитетсы, со ик школаямы валтӥсь кивалтон ёз (орган) луэ. Люкемын со нимаз-нимаз удысъёсъя. Пичи классъёсын дышетскисьёс но, бадӟымъёсыз но пиналъёс комитетлэн валтэмез улсын пӧртэм ужрадъёс ортчытъяло, ӵошатско. Ар йылпумъяськыку, устооссэ пусйиськом. Комитетэн кивалтэ 10-тӥ классын дышетскись Алёна Варламова. Нош ужзэс радъяны юрттэ воспитательной ужъёсъя воштӥсе Ирина Борисовна Турова. - Василий Анатольевич, школалэн директорез луыса тӥ кӧня ке арзэ ужаськоды ни. Шӧдӥськоды-а асьтэлэсь будэмдэс, яке та аръёс ӵоже тӥ сыӵе ик кылиды? - Гуртысь дышетӥсь дышетӥсь гинэ луыны кулэ ӧвӧл. Тодон-валанъёс сётэм сяна, пиналъёсты со марлы ке мукетэзлы но мед дышетоз. Огвакытэ мынам дыры тырме вал драмкружок но нуыны. Пиналъёс али но сцена вылын шудонэ кыстӥсько, но бумага уж пӧлы выйыса, дыр ӧжыт кыле ни. Дас ньыль ар ӵоже школаын ужатозям, дас одӥг арзэ директор луыса ужасько. Но егитъёслы ӧй дэмласал мон сямен соку ик кивалтон уже басьтӥськыны. Директор луон понна дас вить арзэ ке но огшоры дышетӥсьын ужано. Мар мон лэсьтӥ та дас ар куспын, эшшо но тросгес лэсьтыны вуысал кадь потэ. Мар ке борды басьтӥськиськод ке, кыӵе ке коть опыт луыны кулэ. Сотэк рос-прос валаны уг луы макем ӟеч азинскозы ужъёс. Л.Малых. Туспуктэмез В.Беломорскихлэн. Валэктон "Удмурт дунне" газетын туэ 27-тӥ феврале потэм "Ваучреме сётӥ вал фондэ" статья бере уно мултэс юанъёсын адямиос табере вазиськыны кутскиллям Правительстволэн Дуно кагазъёсъя но фондъёсын рынокъя комитетаз. Статьяын вераськон мынэ вал кун фондъёсы вкладъёссэс сётэмъёс сярысь гинэ. Ваучеръёс пумысен юанъёсын жингыртыны кулэ акциосын огазеяськем "Центральной инвестиционной фондэ" таӵе телефонъёсъя: 43-08-03, 43-08-31. Кенешозы Россиысь фермеръёс 20-тӥ мартэ Москвае люкаськозы Россиысь фермеръёс но крестьян хозяйствоослэн кивалтӥсьёссы. Соос кылем арын ужамзылы йылпумъянъёс лэстозы, азьланезлы ужрадъёс чаклалозы. Удмуртиысь та бадӟым кенешонэ мынозы Валерий Кузьмич Усков (Игра районысь "Арго" крестьян хозяйство), Халитов Фарид Муллагалеевич (Ува район), Сергей Николаевич Данилов (Юкаменск районысь "Шеп" крестьян хозяйство). Ма сярысь вераськозы музъем ужасьёс? Коньдон ужпум, кредитъёс, техника басьтон, музъемез гырон-кизён. Валтӥсь интыын луоз музъем сярысь законэз эскерон. Л.Дмитриева. Чур бугор Кульчо сюбега Кӧня ке ар ӵоже куспазы нюръяськизы Смоленскысь милиционеръёс но йырвандӥсьёс. Вормизы Тигран Петросянлэн шырмачъёсыз. Соос пытсэт сьӧры пуктыны быгатӥзы тужгес "акылес ментъёсты". Решётка ӧслэн сопалаз сюриз радъям преступностен нюръяськон управленилэн кивалтӥсез подполковник Александр Ломтиков но. Петросянлэн медоосыз кыл вӧлдӥзы: милиционеръёс "Тӧдьы ньӧл" огазеяськон кылдытӥзы но йыртэман дуннеысь кузёосты ыбылӥзы. Зэм, Тигранлы аслыз но майбыр ӧй вал. Со Смоленскысь пегӟиз но Москвае ватскиз. Татын Петросянэз виизы. Смоленске каньыл улон ӧз вуы. Отчы бертӥз бандитъёслэн музон йырзы - Владимир Винокуров (кушем нимыз Винокур). Ас вакытаз со Тигранлы сётсконо луиз вал. Табере Винокур малпаз выльысь Смоленскен "кузёяськыны". Но ӧз удалты. Огпол Винокур куинь кузя возьмасьёсыныз ӵош вуиз "Житомир" ресторан доры. Машинаысь потӥзы гинэ - доразы тэтчизы Калашников автоматэн пиос. Пуромиз ури-бери ыбылӥськон. Ньыль воргорон пограз музъем вылэ. Ваньзылэн йырберъёссы пӧсямын "эскерон вылысь ыбон" шуонэн. Кӧня ке нунал улыса, эрике потӥз изоляторын арлэсь кема пукем подполковник Александр Ломтиков. Со гожтыса кыл сётӥз, нокытчы уз кошкы шуыса. *** Кемерово областьлэсь губернаторзэ Аман Тулеевез виыны дасяськи! Сыӵе ивор ваньместы жӧломытӥз. Сыӵе кырсь уж оскемын, пе, дано биатлонистлы Александр Тихоновлы. Нош радъясез - МИКОМ компанилэн йырыз Михаил Нивило. Нырысь со Тулеевен тупа вал, собере керетӥз но тушмон луиз. Тихоновез пытсазы, Живило пегӟиз кунгож сьӧры. Россия юрттэт куриз быдэс дуннеын ужась полицилэсь - Интерполлэсь. Интерпол Живилоез утчаз ӝыны ар ӵоже. Бератаз таиз ачиз лыктӥз Парижысь полицилэн участоказ. Озьы, пе, дэмлазы адвокатъёсыз. Живило оске, Франция солы пегӟон инты (убежище) сётоз шуыса. Бизнесменэз соку ик пуктӥзы тюрьмае. МИКОМ компанилэн пресс-службаез вӧлмытӥз ивор: Живилоез сьӧлыке уськыто юнме шорысь, алдаськыса. Кытын суд луоз? Тодмо ӧвӧл на. Оло, сое радъялозы Павел Бородинэн герӟаськем ужрадэз музэн. Нырысь ик Франциысь суд учкоз: малы Россия Живилоез сётыны куре? Россиысь Валтӥсь прокуратура но Интерполлэн Россиысь бюроез та ужпумъя бумага дасязы ни. *** Ося шуылӥзы Сергей Буторинэз. 90-тӥ аръёслэн шоразы со люказ "шырмач уллё". Отчы кыскиз азьвыл десантникъёсты но чекистъёсты. Москваын ыбылӥзы огзэ бӧрсьы мукетсэ бандитъёсты. Александр Биджамо (Алик Ассириец) виемын вал пырак Москваысь мэрия вадьсысь садын. Буторин юнмаз но шуак тодӥз: сое ассэ быдтыны медэ 1 номеро (адями виылӥсь) Александр Солоник. Таиз ватскемын Грециын, но кузь киосыз Россиёзь сузё. Грецие Ося ыстӥз матысь медооссэ Саша Солдат кивалтэм улсын. Таосыз виизы Солоникез но чебер дыдызэ Светлана Котоваез. Саша Солдат но музон йырвандӥсьёс сюризы тюрьмае, мукетъёсыз пегӟизы кунгож сьӧры. Ося, пе, операция лэсьтытыса, ымныр туссэ ик воштӥз. Вераськон мынэ сое Россие берыктон сярысь. Но Сергей Буторинэз татын туж сак возьмано луоз. Туж трос йыртэмасьёслэн сое судын адӟемзы уг поты. Выльвылэз ӝутонэ ас киыныз пыриськиз. Удмурт литератураын "гырымтэ муосыз" эскере. Кылбурчи мылкыдыныз чагыр инвисъёсы кыстӥське. Василий Михайлович Ванюшев. Со сярысь лыдӟоды 4-тӥ-5-тӥ бамъёсысь. Таӵе со сцена вылысен, кыло уӵы. Кылбурет удысэ нырысь вамышъёс. Можга педучилищеысь кружокын. Кивалтӥсьсы Екатерина Алексеевна Коновалова. Выльвылэз ӝутонын, Кустанай улосын. 1957-тӥ ар. Ванюшев - солдат. МГУ-ысь самой дуно эшъёсыныз артэ. Ас киыныд институтэз ӝутон капчи уж вылымтэ. Чур бугор Кытчы йыромиз тулыс? Кызьы верало, календарья тулыс 1-тӥ мартэ гинэ уг вуы вылэм. Тулыс асьме доры куное куинь пол лыктэ, пе. Астрономъёслэн чакламзыя, зэмос тулыс вуэ 21-тӥ-22-тӥ мартэ. Соку уй но нунал огкузьда луо. Нош зэмос ву жильыртыны ӧдъялоз ини 27-тӥ март бере. Толэзь пумын куазь 0 градуслэсь ӝутскоз. Туэ тулыс шунытгес луоз. Берло 13 аръёссэ март котьку но шуныт возиськылӥз. Милям ужмы туж тунсыко! Алигес университетын зарезь сьӧрысь журналистэн тунсыко пумиськон ортчиз. Куномы - Джонатан Мазлоу. Вуэм Нью-Джерси штатысь. Бен, бен, ӵапак со сярысь Би-би-си (иворъёсты вӧлмытонъя компания) одӥг но ӝыны час кыстӥськись кинофильм лэсьтӥз. Мазлоу - Америкаын тодмо журналист. Ужа со пичигес газетлэн редакцияз. Газетсы, пе, дунтэк вӧлмытӥське, но отын 60 процентэз - реклама, кылемезлы инты висъяське иворъёслы, лыдӟисьёслэн гожтэтъёссылы. Гужем, туристъёс вуылыку, газетлэн тиражез 1 миллионозь ӝутске но 128 бамен, пе, потэ. Мар пӧртэмез Россиысь но Америкаысь журналистикаын? Мазлоу верамъя, Россиысь журналист ужаз аслэсьтыз малпанзэ гожтэ, югдурез сэрттыны-пертчыны выре. Нош Американ лыдӟисьлы авторлэн мылкыдыз чик но тунсыко уг поты. "Тӥляд журналистъёсты, мон валамъя, калыкез дышетыны выро, созэ- тазэ валэктыны тыршо, - шуэ Мазлоу. - Нош ми палан озьы ӧвӧл. Америкаысь журналист малпаськыса уг улы, кызьы гожтом ай, лыдӟисьлы валамон мед луоз шуыса. Лыдӟись визьмо луыны кулэ, аслаз малпанъёсыз мед луозы. Милям ужмы маке сярысь ӝегатскытэк ивортыны". Табере валай, тӥни малы Америкаын журналистлы, редакцилы пумит судын ужъёс туж шер ӝутскыло. Джонатан газетын куамын ар, пе, ужа ни, но лыдӟисьёсын керетон чылкак одӥг пол гинэ потам ай. Америкаын кутскись журналист но быгатэ компьютерен ужаны, отысь кулэ ивор шедьтыны. Монэ паймытӥз на тани мар. Америкаысь законъёсъя, правительствоын ужасьёс журналистэз судэ кысканы но солэсь кытысь ивор шедьтэмзэ юаны-вераны уг быгато. Нош огшоры лыдӟись журналистэз эскерыны но, солэсь валэктонъёссэ курыны но, судэ сётыны но быгатэ. Номыр уд шуы, демократия... Милемлы, студентъёслы, тунсыко потӥз, кыӵе меда Америкаысь журналистлэн уждунэз? Пичигес газетын ужась араз ньыльдон сюрс доллар, пе, басьтэ. Но Мазлоулэн верамезъя, ваньмыз со электрокужым, эстӥськон, улон инты но машина понна тыриськыны кошке. Но куддыръя мукет шаеръёсы потаны луонлык шедьтылэ ик. Зэм, ар пумын кисыын, пе, тӧл шула. Котьма ке но, журналистика - туж тунсыко удыс, соин ик мон сое коньдонэн уг вошты, шуэ Джонатан. Тунсыко куноез кылзыса, мон буйгай - иське, быръем удысэ туж тунсыко. Мон уго Россиын гожъясько. Е.Никитина, Удмурт университетын дышетскись. Валэктэ Юрист Сэрегез дася Кун Думаысь депутатлэн С.К.Смирновалэн юрттӥсез адвокат Лилия Шкляева Монэ лушкемак улляны медо. Умоесь, гажано редакция! Уно аръёс ӵоже басьтӥсько газеттэс. Мынам вазиськеме потэ таӵе юанэн. 12-тӥ арзэ выж миськисько. Алигес сётӥзы бумага: монэ ужысь кулэстозы, пе. Ужпум тани ма бордын. Общежитие азьло вал "Удмуртнефть" ЖКК-ын. Собере ЖКК-ез поттӥзы ЗАО-е, табере сётӥзы "Ижевскнефть" НГДУ-лы. Администратормы мукетъёссэ лушкемен гожъятӥз НГДУ-е выжтон сярысь курон. Нош монэ, пе, отчы уг басьто, малы ке шуоно, ставка, пе, ӧвӧл. Но мыным озьы потэ: со, монэ улляса, интыям пуктыны турттэ аслэсьтыз адямизэ. Мыным 46 арес, вань 19 аресъем пие, дышетске колледжлэн 3-тӥ курсаз, стипендия уг басьты. Ачим дун тырисько дышетон понна. Басьтӥськомы пенсия 450 манет сюдӥсьмес ыштэмен валче. Тодэме потэ: быгатозы-а монэ улляны уж интыысьтым? Улӥськом со общежитиын ик. Али ужысь мозмытозы, собере улон интыдэ но бушатыны уз косэ-а? Нокыӵе документмы ӧвӧл улон интымылы. А.Матвеева. Ужлэсь мозмытон пумысен та сярысь ичизэ кык толэзьлы азьлогес иворто адямилы аслыз, та пумысен расписказэ курыса. Озьы косэ Россилэн Уж сярысь законъёсын кодексысьтыз 40-тӥ ёзэт (статья). Штатъёсты яке ужасьёслэсь лыдзэс кулэстэмен ӵо кивалтӥсьёс кинэ ке ужысь палэнто ке, та вакытэ ик солы асьсэ дорын музон инты дэмланы кулэ. 34-тӥ ёзэт валэктэ: ужасьёсты кулэстыку, вылӥгес азьлыкен но квалификациен тыршисьёслэн уже кыльыны бадӟымгес правозы луэ. Одӥг кадь азинлыкен но квалификацен адямиос полын вылӥгес дунъясько таӵе адямиос: кинлэн семьяез ӧвӧл уждун басьтӥсьёс, кинъёс кемагес ужазы татын. Адями общежитие каръямын ке татын ужаменыз валче6 сое отысь мукет улон инты сётытэк поттыны луэ нокыӵе мугтэк ачиз мылкыд карыса ужысь кошкыку, ужан дисциплинаез тӥяку яке йыртэмаку. Ужысь мукет муген мозмытэмъёсты нош озьы ик татын ичизэ дас ар ужамъёсты но общежитие сётӥсь организация бырыку мозмытэмъёсты отысь поттыны луэ, мукет улон инты сётыса гинэ. Таиз улон инты мед тупалоз огъя санитариен но технической куронъёслы. Озьыен, тӥоледды ужысь мозмытон сярысь кык толэзьлы вазьгес ивортоно, та организациын ик музон уж дэмлано, нош со ӧвӧл но тӥледды котьма ке но ужамысь дугдыто ке, тӥледлы Ижын ик мукетсэ улон инты ӵектоно, но таиз общежитие медаз луы ни. Оген анай лыдъяськисько вал 1997-тӥ арын пинал ваи. Соку мон оген анай лыдъяськисько вал. юрттэт (пособие) басьтӥ. 1999-тӥ арын 20-тӥ октябре гинэ лэсьтӥм атай луэм сярысь документ - свидетельство об установлении отцовства. Со дырозь юанэ-веранэ ӧз кылдылы, ваньмыз умой вал. Табере райсобесын шуизы: 1999- тӥ ар понна картэдлэсь уждун сярысь справказэ вай. Сётӥ. Сыӵе справкая сюри 2-тӥ укатегорие. 2000-тӥ ар понна пособие ӧй басьты. Юаме потэ. Кызьы справкаос люкало? Кулэ-а вал курыны картэлэсь 1999-тӥ ар понна уждунэз сярысь спарвказэ? Мон ведь 1999-тӥ арын 20-тӥ октябрёзь оген нылпи будэтӥсь анай вал на. Н.Спешилова. Кез район. Оген улӥсь анайёслы нылпи понна ватсам юрттэт уг сётӥськы, тупатэм радлыкъя атай тодмостэмын ке. Та нуналысен документ лэсьтэм бере, загс со сярысь ивортэ шугадӟонъёслэсь утён (социальной защитая) ёзэ. Соку воштӥське семьялэн огъя барышез (доходэз) но, нимаз адямилы быдэ усись пайда но. Ваньмыз со лыдъяське уждун сярысь но мукет бумагаосъя. Тӥни малы тӥлесьтыд пӧртэм справкаос куриллям. Тӥляд семьяды барыш будэм, нуныдылэн атаез дорады улыны кутскемен яке тӥляд алимент басьтыны праводы кылдэмен валче. Азьвылгес тӥ сюриськоды вал, дыр, нырысетӥ категорие, басьяды 100 процентлы будэтэм юрттэт. Тӥ азьын кык сюрес вал: 1. атаез тодмостоно, алиментъёс куроно, кыкетӥ категорие потоно но солы тупась юрттэт басьтоно; 2. ваньзэ азьвыл сямен кельтоно. Тӥ бырйиды кыкетӥ сюресэз. Журналистъёсын пумиськонъёс Москва биньгозызэ золтэ Шаерамы кулэсмо-а инкуазь узырлыкъёсмы, куасьмо-а шуръёсмы но ошмесъёсмы? Кызьы мынэ инкуазез но нюлэсэз утён? Та но куд-ог музон ужпумъёслы сӥземын вал правительствоын журналистъёсын пумиськон. Сое ортчытӥз республикаысьтымы инкуазь узырлыкъёсъя но инкуазез утёнъя министр Александр КУЛАГИН. Элькунмы кык толэзь ужаз ни выль даурын. Нош кызьы бен йылпумъяз та удыс кылем арез, мар йылаз-пумаз вуттымтэ? Александр Владимировичлэн ивортэмезъя, ар зэмзэ но капчи ӧй вал. Элькунамы миым 17-тӥ мае быдтэмын вал Инкуазез утёнъя кун комитет но Нюлэс хозяйствоя министерство. Та ёзъёс пыртэмын Инкуазь узырлыкъёсъя но инкуазез утёнъя министерствое. Выльдэмын кивалтон амалъёс - вылӥысен улӥозь. Воштӥське выт тырон кодекс. Но солэн ляб интыосыз но шараясько ни, власть солань-талань шонаське, нош Москва биньгозызэ уката золтэ, улосъёсысь пумен уногес выт кыске. Республикаямы миым бадӟымесь шудтэм учыръёс ӧй вал. Валля арын, кылсярысь, дас учыр пӧлысь пусйыны кулэ Камае 76 тонна мазут кисьтӥськемез. Со кошкиз сухогрузысь но 5 миллион манет тыр изъян ваиз. Умоен верам уг поты коммунальникъёс сярысь но. Та удыс шуръёсы но тыметъёсы трос гинэ лэзе ай кырсь вузэ. Республикаямы кылем арын инкуазез утьыны кык пол тросгес уксё висъямын вал. Со пӧлысь ӝыныез кутэмын та удысэз возьыны, нош кылемез - ву чылкытатонъёс (очистной сооружениос) лэсьтыны, Сарапул районын Нечкино парк усьтыны, кыр пӧйшуръёсты сюдыны, Ижысь Космонавтъёслэсь парксэс выльдыны но мукет интые. Министерство азьын озьы ик сылэ инкуазез эскерон ужпум. Тае экологъёс туэ но ялан син азязы возё. Инкуазь узырлыкъёсты утисьёс удыс умой радъязы лицензия сётъянэз. Кун ваньбур 5 арысен 25 арозь арендае сётӥське. Тани миым 10 му вӧй поттон интыосты вузанъя аукцион ортчытэмын. Куатьысьтыз нефть потто ни, ньылезъя али бумагаос дасяло. Та ужрад кун бюджетэ 2 миллион доллар коньдон пыртӥз. Оглом, нефть кысконъя гинэ 17 лицензиос сётэмын, нош музон инкуазь узырлыкъёсъя - эшшо 60. Туэ гужем чаклало 5 му вӧй кыскон интыез вузанъя аукцион ортчытыны, нош арлэн пумаз, дасяськыса вуизы ке, 9 нефть поттон интыез вузалозы на. Кун бюджетэ ватсаса коньдон вуыны кулэ. Шаерамы али куатьтонлэсь ятыр му вӧй кыскон интыос дасямын. Но ваньмыз соос пичиесь, отын нефтез ӧжыт. Тани Мишкино но Забегалово интыосын быдэн 10 миллион тонна нефть кылле ке, 5 выль интыын - 800 сюрс тонна гинэ му вӧез лыдъяське. Озьы ке но, 2003-тӥ арозь ваньзэ та интыосты уже кутоно, конкурс яке аукцион ортчытоно. Элькунамы витьтон арлэсь кема мынэ ни музъем узырлыкъёсты утчан. Озьы ке но, 40 процентэз со шедьтымтэ на. Тани миым республикаямы ваньзэ 7,7 миллион тонна му вӧй кыскемын, нош шедьтэмын (запас) - 6,6 миллион тонна. Тӥни та ужен бере кылиськом. Вылаз ик, матысь аръёсы ялан кулэсме нефть поттон. Со герӟаськемын "Удмуртнефть" огазеяськонлэн "Сиданко" огазеяськонэ шедеменыз. Нош инкуазь узырлыкъёсты утчанын нимысьтыз валтӥсь инты басьто "Удмуртгеология" но "Удмуртгеофизика" огазеяськонъёс. - Шаерамы 1400-лэсь уно тыметъёсмы, - веранзэ азьланьтӥз Александр Кулагин. - Но соослэн кузёоссы пӧртэмесь, одӥг куиньмосэз куашкан калэ вуэмын. Кылсярысь, гурт хозяйствоос ӵыпетъёссэс тупатъяны уг быгато: коньдонзы но, кужымзы но ӧвӧл. Миым 2 миллион манетлэсь унолы тыметъёс выльдэмын. Отчы пыро Иж пруд, Пудем (Яр), Туймы (Алнаш), Мельничата (Селта), Сюмси но музон тыметъёс. Вылаз ик, одӥг дасмосэзлэн кузёоссы ӧвӧл, аналтэмын. Туэ та ужъёслы 8 миллион манет уксё висъяны учкемын, со пӧлысь Иж прудэз чередьыны - 5 миллион. Туэ тудву, лымы укыр трос ке но, министрез уг кышкаты, миым, пе, талы 100 сюрс манет сётэмын вал. Туэ но югдур урод ӧвӧл. Зэм, асьмелэн ву но нюлэс туж дунтэм усе. Соин ик та узырлыкез шыръян но ӝикыт кутон ласянь туж ичи лэсьтӥське. Нош со дыре ик газовикъёс но энергетикъёс дунъёссэс будэто но будэто, нокыӵе уг карисько. Шаерамы, шуом, му вӧй поттӥсьёслэн лыдзы кык пол йылэ ке но, продукцизы ичигес люкаське, нош Западын, ужасьёслэсь лыдзэс 4 пол кулэстыса, уногес ваньбур люкало. Инкуазь узырлыкъёсмес изъянтӥсьёс-быдтӥсьёс трос на. Миым Чорыг инспекция сюрс пала браконьеръёсты кырмиз. Сыӵегес ик югдур пӧйшуръёсты утёнын, лицензиостэк 400 пала адями кутэмын. Пӧйшуръёсты сюдӥськом-утялтӥськом, чакласьком, нош браконьеръёс соосты жалятэк быдто. Берло дыре республикаямы чидантэм уродме юон ву. Тая ньыль ар талэсь азьло кун программа кутэмын ке но, коньдон висъямтэен, со уг быдэсъяськы. Ву гумыос вужмылэмын, соосты выльдыны-вошъяны уно уксё кулэ. Туннэ озьы ик пусйыны кулэ: та удысэн кивалтонын матысь дыре солань-талань шонаськонъёс, валантэм учыръёс кылдӥзы. Азьло ваньзэ ужпумъёсты республика но Москва куспазы быдэсъяло-эскеро ке вал, табере соос вискын Нижний Новгород, Приволжск округ кылдӥз, вань бумагаосты табере отчы нуллоно, возьматоно но гожтӥськытоно луэ. Нюлэс хозяйствоез возьыны туэ 24 миллион манет уксё висъямын. Ваньмыз со казначейство пыр ортче. Малы ке шуоно, нюлэс (98 процентэз) федерацилэн ваньбурез луэ. Отчы пыро шаерысьтымы ваньмыз нюлэс хозяйствоос (лесхозъёс). Соос тэлез аукцион пыр кораны сёто. Поттэм коньдон пӧлысь 60 процентэз асьмелы кыле, 40 процентсэ Москва басьтэ. Тӥни сыӵе югдур, Москва интыосын кужымзэ уката золтэ-юнматэ. Геннадий Романов. Даурлэн нылпиосыз Сяська бурдёс усьтӥсько Юнме уг верало, дыр, дунне вылын тужгес чеберез нылкышно - со нунынен нылкышно. Кӧня шунытэз, чылкытэз вӧлме та кык лулъёс бордысь. Пичильток кикиосыныз муспотон комок кыстӥське ни анаез борды, бамъёссэ, йырсиоссэ исам каре. Анай нош сое эркия, муося... Ӵапак таӵе вакытсы вуэмын ни Ижевскын Выль ар уе вордскем пиналъёслэн. Соослы, иське, кыре-буре поттон дыр вуэ. Тае чакласа но, 8-тӥ Мартэз лыдэ басьтыса но, вылды, нылкышноослэн "Гармония" лигазы выль ар азьын мытэм ужрадзэ йылаз-пумаз вуттыны малпаз. Вераськон мынэ выль даурысь нырысетӥ нылпиослы вордскемзы сярысь вкладъёсты сӥё-дано сётон но соосты дуно кузьымъёсын пусъён сярысь.Нылпиослэн творчество юртазы (Пионеръёслэн дворецазы) ӧтемын вал та уе вордскем дас кык пинал но соослэн анай-атайёссы, врачъёс. Куать пино куать ныл даурлэн нырысетӥ пиналъёсыз луизы. Тани соос: сцена вылэ радэн-радэн пото. Пичильтокъёс ваньзы огкадь муспотонэсь, турлы-турлы пӧрмытэмынэсь. Ева, Алексей, Никита, Маргарита, Богдан, Дима, Александр, Варвара, Мария, Сабина, Нэля, Владимир - чебересь нимъёс но бырйиллям анай-атайёс нуны комокъёссылы. Уг гинэ валало на таосыд, макем дуно пумитало соосты улон дуннеын. Зэмзэ вераса, кемалась адӟылэме ни вал та мында сяськаосты, кемалась кылэме ни таӵе шуныт верам кылъёсты. Анай-атаёсты но пичильтокъёсты ӟечкыланы лыктӥллям Ижевск городлэн мэрез Анатолий Салтыков, Тазалыкез утёнъя министрлэн воштӥсез Андрей Воздвиженский, городысь ёрос администрациослэн кивалтӥсьёссы, нылкышноослэн "Гармония" лигазы сётэм кылзэ быдэстӥз, котькуд пиналлы чекен книжка кузьмаз. Нош часъёс 12 пол шуккем бӧрсьы кык час ортчыса вордскем Ева Михайленколы но Алексей Жуковлы, коньдон сяна, пылесосэн но мисьтаськон машинаен "кузёяськоно" луоз на. Асьсэлэсь кузьымъёссэс дасяллям вылӥ верам кивалтӥсьёс, анай-атайёслэн ӵош ужась эшъёссы, ӵыжы-выжыоссы. Кичабонъёсын, ӟечкылан кылъёсын ӵош тодэ лыктэ мукетыз веран, пиналъёс улонлэн сяськаосыз луо шуыса. Иське, таӵе муспотон комокъёс вордӥсько ке, чеберезлы осконъёс уз кысэ. Э.Кумачева. Шӧкыч Машинаед вань ке - пук дорад Нылкышноослэн нуналзы азьын Петро выль машина басьтӥз. Егит кузпалзэ шумпоттыны малпаса, Ижетӥ котырскыны малпаз. Базаретӥ, пе, ортчом, магазинъёсы но кожалом. Валюшез укыр шумпотӥз. Йыраз дуно кулэсь изьы понӥз, чеберлы возёно пальтозэ но ӧз жаля таӵе учырлы. Картэз вӧзын пуке ни таид, йырзэ кузь-кузь золтыса: мед вожъяськозы бускель кышноос - со туннэ Ижетӥ ворттылоз. Эх, тодысал ке Петро кытчы потэмзэ. Валюшез йырысеныз пыдозяз лек кылъёсын шобыртӥз, чиль-дол пиштӥсь машиназэ но лэсянтэм кибыен ӵошатӥз. Нош мар понна? Машинаен ворттылӥсьёсты Ижын сылалэн-нянен уг возьмало вылэм. Шонерзэ вераса, гуртысь куноосты город урамъёс луоен-сылалэн ӧз пумиталэ. Отын но татын лымы пуктэмъёс, йӧ шобретъёс. Ярам, бадӟым сюресъёс вылтӥ ворттыны луэ ик вылэм ай. Кузпалъёс месӥськизы вал апайзы доры кожыны, кытын, пе? Азбар пала кожон сюрес вылысен лымые колӥськизы. Валюшлы машинаез донгатэк ӧз луы. Ярам, егит кышномуртлэсь курадӟемзэ валасьёс сюризы. Ньылоназы шӧм йӧтэм куинь воргоронъёс живо-два машинаез лёго-выро интыысь поттӥзы. Но Валюшлэн чебер пальтояз кырсь виштыос лякиськыса вуттӥллям ик. Йыркурзэ кышномурт кисьтоно кариськиз сюрес вылын возьмаськыса сылӥсь милиционерлы. Соизлэн урам тыр ченгешись кышномуртэн вераськыны кынарыз ӧз тырмы, ыстӥз ГИБДД-е. Отын, пе, тӥледлы вералозы янгыш луисьёсты. Петро кык киыныз, кык пыдыныз ик пыкиськиз вал. Сюрес вылын шудтэм учыръёсты эскерись-чакласьёс доры мынэмлэсь, кин, пе, ас мылкыд каремезъя ГАИ-ысь инспекторъёс доры мыриськиз. Но вормод шат вожомем нылкышноез? Кылзӥськытэк ӧйлась. Озьы магазинъёстӥ котырскем интые, Валюш погонэн адямиос азе султӥз. Кырсьмем пальтоеныз сэзъяса, валэктон куриз. Но ГИБДД-ын ужасьёслэн валэктонзы дась ни вылэм. Ижевск городлэн мэрезлы дасям гожтэтын ваньзэ тупен-тупен верамын: кытын но кыӵе урамын йӧ шобретъёс, гутёос кылдытэмын, пырон-потон интыос лымыен ворсамын. Отысь ик Валюш тодӥз, кыӵе шуг-секытъёсы вуттэ Ижевскысь сюресъёс вылын кылдэм югдур. Луоен-сылалэн сурет ӧжыт дасямен, тол сюресъёсты возёнъя куронъёс Ижевскын уг быдэсъясько. Соин валче сюресъёс йӧэн шобырско, нош со вуттэ шудтэм учыръёсы. Озьы таяз арын январь толэзе гинэ сюрес вылын 35 шудтэм учыр луиз, 8-эз герӟаськемын вал сюресъёсты урод воземен, 8 мурт шуккиськыны шедиз. Феврале югдур уката но секытгес луэ. Ижевскын сюресъёс вылын 39 шудтэм учыр луэ, 16-ез со пӧлысь нош ик герӟаськемын сюресъёсты утялтымтэен, соин валче 16 адями шуккиськыны шеде. Секыт югдур кылдыны быгатоз лымы шунан вакытэ, нош уин кынтыку. Сюресъёсты эскерись-чаклась предприяиослэн кивалтӥсьёссылэн верамзыя, луоен-сылалэн суретъёслэн ӟечлыксы но улӥын. Мынӥсь-ветлӥсьёслы но руль сьӧрын пукисьёслы трос шуг-секытъёс кыдыто на сюресъёс урдсы ӝутскем лымы гурезьёс. Матэктӥсь транспортэз адӟытэк, колёсаос улэ сюремзэ но адями валаса уз вутты. Сыӵе учыр луиз 19-тӥ феврале. Карл Маркс урамез но Октябрьский переулокез выжонын ВАЗ-212113 автомобильлэн водителез шуккытӥз 1-тӥ классын дышетскись Алексей Комаровез. Пияшлэн сарвылыз шуккиськиз. Шудтэм учырез эскерыку тодмо луиз: водитель синйылтыса ӧз вутты 2,2 метр ӝужда лымы гурезь сьӧрысь пияшлэсь шуак потэмзэ. Шуг луиз азбаръёсы пыран-потан но. Кытӥ гужем кык автомобиль ортче вал, али мырдэм но кызьы одӥгез потэ. Сыӵе югдур шуг-секытэ вуттэ ӝог юрттэт сётӥсь машинаослы. Нош тылпу потӥз ке, яке кыӵе ке авария кылдӥз? Нош адямиослэн улонзылы кышкытлык кылдэ. Ижевскын кылдэм та югдурез тодэмез бере, Валюшлэн керетон мылкыдыз басылскиз. "Ярам ай, пальтое гинэ наштаськыны шедиз, - малпаз со ас понназ. - Сузяй-марай ке, выль кадь ик луоз". Погонэн адямиослы кыл-куара но ӧз вера ни, берытскиз но потӥз. - Ойдо, Петро, йыр быгылес дыръя гуртэ бертомы, - либытак вазиськиз нылкышно картэзлы. Магазинъёстӥ ум ветлэ ни, тырмоз город омырен шокамен но. - Нош пальтоед понна кин дун тыроз? - ымзэ усьтӥз Петро. - Город кивалтӥсьёслэн мынам пальтоетэк но сюлмаськонъёссы тырмыт. Дор палаз вуыкуз, Валюшлэн йырыз нош ик йӧн-йӧн возиськиз. Л. Петухов. Конкурс "Нылпиослэн синкылизы - асьмелэн висёнмы" Кышкыт вераны, но туннэ улэп анай-атайёсмы вӧзын тросэз пиналъёсмы мултэс луизы. Урамъёсын ас понназы юмшась пиналъёслы паймонэз ӧвӧл ни. Пичиос ваче син кылемын ас сюлмаськонъёсынызы, висёнъёсынызы. Но малы асьмеос ӵемысь соос вӧзтӥ чурыт сюлэмын ортчиськом? Ум дыртӥське соослы небыт киосмес мычыны, шуныт кылмес вераны. Пӧлысьтымы котькудмы одӥг ке но писпу мерттӥм - быдэс сад пушъёз, нош одӥг ке но ёрмись пиналлы юрттыны быгатӥм - улонмы чылкытгес но шудогес луоз. Юрттэт сётонъя "Нылпиослы тазалык" фонд ӧте асьмеды вӧзамы будӥсь нылпиос шоры сакгес кариськыны. Таин валче 1-тӥ мартысен 1-тӥ июлёзь ортчоз "Нылпиослэн планетазы" ужрад. Та фондлэн ужез борды итӥськиськом ми но, газетын ужасьёс. Республикаысьтымы вузъёсын дышетскись студентъёслэсь витиськом нылпиослэн улонзы сярысь лэчыт, мур гожтэм ужъёссэс. Вормисьёс пусъемын луозы кузьымъёсын. Э. Васильева. Чур бугор Нылаш тракторез ӝутӥз США-ысь Айдахо штатысь 52 аресъем фермер Роберт Сэндлин бусыын трактореныз ужа вал. Вӧзаз ворттылыны пуксем 12 аресъем Мариза нылыз. Трактор азе шӧдтэк шорысь бадӟым из шедем, трактор бекмыльскем. Мариса тракторысь тэтчыны вуэм ик, нош атаезлы удалтымтэ - со трактор улэ пачкам. Роберт Сэндлинлэн пыдыз но куинь урдлыез чигем. Вӧсь луэмезлы чидатэк, со жоб куараен кеськем. Котыразы нокин ӧвӧлэн, Мариза тракторез ӝутыны огназ басьтӥськем. Секыт техникаез со кӧня ке секундскын лӧбак ӝутэм но берыктэм, атайзэ трактор улысь мозмытэм. Нош гуысь ӝутыны кужымыз тырмымтэ. Кытысь сомында кужмыз потӥз быдэ вуымтэ ныллэн? Отысь эмъясьёслэн валэктэмзыя, адями кышкакуз, стресс кылдыку, солэн вираз огвакытлы туж трос адреналин кылдэ, пе. Та гормон адямилэсь кужымзэ кӧня ке секундлы олокӧня дас поллы будэтэ. Тӥни соин, атаезлы кышкаытлык кылдыку, Мариза тракторез ӝутыны вормем, нош кышкытлык ортчем бере, атайзэ ӝутыны быгатымтэ ни, ӝог юрттэт сётӥсь машинаез ӧтёно луэм. Чур бугор Улонмы понна - 100 процент Россиын улӥсьёс 2001-тӥ арын улон инты воземзы понна солэсь 80 процентсэ тырыны кулэ. Но дунъёс котькытын пӧртэмесь. Москваын улисьёс тыро солэсь 60 процентсэ (Ижевскын но сомында ик дун тупатэмын), Белгородын со луэ 70 процент, Пензаын - 60, Ивановоын 45 процент... Улосъёс дунъёсты будэтыны уг дырто, малы ке шуоно, тыро интыосысь бюджет чотын. Кызьы ивортэ Россиысь Госстройлэн кивалтӥсез Анвар Шамузафаров, али странаямы улӥсьёс улон инты понна, 80 процент интые, тыро 30 процентсэ гинэ. Та вакытэ властьёс вань льготаосты воштыны чаклало (ожысь ветеранъёсты вератэк), нош узыръёслы 100 процентсэ ик тыроно луоз. Узыръёсын лыдъяськозы соос, кинъёслэн семьяязы уждунысьтызы квартира понна 22 процентлэсь уно коньдонзы мынэ. Сыӵеос пӧлы пыро Россиын улӥсьёс пӧлысь 93 процентэз. реформалэсь инъетсэ Правительствоын туэ 15-тӥ мартэ эскерыны кулэ. Нош улон инты понна 100 процент тыронэ выжыны чакламын 2003-тӥ арын. Удмурт кизилиос Удалтэмын ке, удалтэ - Василий Михайлович, литератураез эскерон удысын тӥ нырысетӥез удмурт доктор. Филология наукаын кыӵе инты басьтэмдэс улон эшшо возьматоз ай. Нош асьстэос кызьы малпаськоды, мар выльзэ усьтӥды ни тӥ удмурт литературоведение понна? - Нырысь ик вакчияк верало одӥг учыр сярысь. Удмурт литературалы сю ар тырмонэз Москваын пусйыку, Коста Хетагуровлэн юбилей ӝытаз ветлӥм. Вис дыръя дорам кык сьӧдэсь воргоронъёс-осетинъёс лыктӥзы. Юало, кин, кытысь. Удмуртиысь, шуисько, уд тодӥське. "Расцвет и сближение"? Тодӥськом, тодӥськом, шуо. Москваын уло вылэм, академикъёс. Давай ӝоггес, пе, докторскойдэ гожты, ми ВАК-ын, аттестацияя комиссиын... Зэм но, книгае быдэс Россиын тодмо луиз. Георгий Ломидзе, туж бадӟым тодосчи, "Литературной газетын" "Шаги в завтра" статья печатлаз, мон сярысь но гожтӥз. Россиысь, СССР-ысь писательёслэн ӧтчамъёсазы докладъёсын мынэсьтым нимме поттылӥзы. Со монэ бурдъяз, лӧпкытӥз. Аспирантураын туж шуген тема бырйимы. Басьтӥ - "Национальное и интернациональное в удмуртской и других младописьменных литературах". Тӥни озьы, нырысь ик вылез луиз Поволжьеысь литератураез ӵошатыса, типология ласянь эскереме. Учки, мар огъяез, мар пӧртэмез. (Чувашъёслэн, поръёслэн таӵегес эскеронъёссы вал ни.) Озьы шеди Поволжьеысь аспирантъёслэн ужъёсазы, источник луыса. Но тазьы гинэ нимы ӧй сюрысал докладъёсы. Со вакытэ - 60-тӥ аръёслэн пумазы - 80- тӥ аръёслэн кутсконазы - туж бадӟым дискуссия-эчешон вал национальной но интернациональной пумысен. Мон ӵапак со тулкым вылэ тупай. Соку кык ваче шуккиськонъёс вал. Огез, шуом, Виктор Чалмаев, ӟуч национализм понна гинэ черекъя. Мукетъёсыз, Дагестанысь Ахед Агаев кадьёс, интернациональноез национальнойтэк ас кожаз адӟо. Мон соиныз, таиныз гожтэт пыр кусып возьылӥ. Юрий Суровцев, Россиысь одӥгез валтись критик но литературовед, гожтӥз: "Дэмласько та книгадэ Россиын поттыны". Чингиз Гусейновез шедьтӥ Москваысен, со шуиз: "Юнме дырдэ эн быдты, выльзэ гожъя". Малпасько, вылӥ верам книгаям мон утьыны быгатӥ национальной луисьсэ, мар вань литератураямы. Со бордын но, дыр, выльзэ сётэме. - Тӥ "Расцвет и сближение" книгалэн емышъёсыз сярысь гинэ верады ай. Нош берло аръёсы, ми тодӥськом, кӧня кужымдэс сётӥды Григорий Верещагинэз поттон-ӝутон уже. - Зэм, берло дыре мон кыдёкегес кошкись выжыосмес бугыръясько. Эшшо но пыдлогес пырыны кулэ: шуом, кин ужаз нырысетӥ удмурт грамматикаез кылдытӥсен Пуцек- Григоровичен ӵош... Нош Верещагин борды кутскыса, со ӵошатон ужме азьланьтӥ: мар сётӥз та адями асьме культурамылы, кыӵе муртъёс мынӥзы соин артэ Урал но Волга вискын. Шуом, комиослэн Иван Куратовзы, Калистрат Жаковзы, мордваослэн Макар Евсевьевзы, чувашъёслэн Иван Яковлевзы - ваньзы огкадесь, но маин ке но пӧртэмесь. Быдэстоно ужпумзы одӥг вал: Ӟуч географической общество пыр, Ильминскийлэсь, Пуцек-Григоровичлэсь кутскем сюрессэс азьланьтыса, та пал калыкъёсты ас кылынызы дышетон, ас шаерзы сярысь тодонъёс люкан. Озьыен, таосын артэ асьме Григорий Верещагинэн пуктыса, Урало-Поволжьеысь лыдӟисьёслы усьтӥ солэсь значенизэ, аспӧртэмлыксэ. Мар чотын, кыӵе амалъёсын кылдэ чеберлыко литература. Фольклорез вератэк... - Тӥ вераськоды печатьын потӥсь литература сярысь. Нош мар чотын со кылдӥз? - Григорий Верещагинъя со умой адӟиське. Солэсь этнографияя очеркъёссэ синкретичной текстъёсыз сямен учкиськом: татын ваньмыз ӵош мынэ, прозалэн но, драматургилэн но, поэзилэн но инъетсы кылдэ. Нош мукет ласянь, вӧсяськон книгаос, берыктэмъёс литературалы ӝужаны луонлык сёто. Расим Юсуфов, философ но литературовед, та ужме трослы ӝутӥз, Верещагинэз, солэсь интызэ адӟиз быдэс дуннеысь историлэн, литературалэн "карта" вылысьтызы. - Нырысетӥ удмурт писательлэн, тодосчилэн, югдытӥсьлэн вордскемез дырысен туэ 150 ар тырмонэз пусйиськом. Солэсь кельтэм ужъёссэ калыке вуттон, печатлан кызьы радъямын? - Куать том ялӥм вал: "Вотяки... (дилогия 2 том), этнографияя статьяосыз, фольклоръя бичетэз, литературая сочинениосыз но лингвистикая ужъёсыз. Уж вылын ке, малпаммы трослы паськытаз. Ваньмыз люкаське дас книга. Ньылез со потӥз, туэ эшшо куиньзэ печатласьком, 2002-тӥ арын йылпумъян вылысь. Шонерзэ ке верано, ми, учёнойёс но, Верещагинэз ӧм усьтэ на. Солэн рукописьёсыз, асьме дорын сяна, кыллё на Санкт-Петербургын, Кировын, Архангельскын, Казаньын - та архивъёсы ветлоно ай. Тодмо ужъёсыз пӧлын - "Вуж мыж" ("Ранее обещанная жертва") повесть. Тазэ печатламы ни куинетӥ томлэн кыкетӥ книгаяз, этнографияя очеркъёсыз пӧлын. Верещагин асьмелы кельтӥз ньыль поэма (кыкез удмурт, кыкез ӟуч кылын), куать пьеса (ӟуч кылэ берыктэмъёсыз вань), кылбуръёс, веросъёс. Та берлоосыз - фольклор но литература вискын - информантъёс вылэ пыкиськыса гожъямын, удмурт кылын оригиналъёсыз кыльымтэ. Шонерзэ ке, котькуд верась мурт - аспӧртэм автор, сое ас кожаз печатланы луоно. Та вылын но тӥни адӟиське, кызьы кылдэ художественной литература. - Василий Михайлович, ойдолэ мукет удыстэс эскером. "Кенеш" журналлэн кылем арын потэм берпум номеръёсаз печатламын тӥляд но Михаил Худяковлэн "Дор выжы" эпосты. Тӥляд но - шуыны луэ: удмурт лыдӟись доры нырысь ик тӥ вуттӥды. Удмурт кылэ туж чебер берыктэмдылэсь азьло та эпослэсь кылдон мугъёссэ, выжыоссэ эскериды... - Зэм. Студентъёс али шуо: та дырозь ум тодӥське вал, эпосмы оло вань, оло ӧвӧл... Худяков та эпоссэ удмурт источникъёсъя гожтӥз, миссионеръёс - Герд, Верещагин, Мункачи, Первухин вылэ инъяськыса. Мынам ужпуме вал: сюжетъёсыз капчиенгес лыдӟисьёс доры вуттыны, яркыт карыны. Эпосын калык сямъёсъя улон-вылон возьматӥське ке, татын, чеберлыко эпосын, адямиослэн кусыпъёссы, ваче вуонъёссы но усьтӥсько. Эскере ай Эбгаез ик, кыӵе кужмоен, сямын но тусын-буен оскымон возьматэ сое Худяков. Но мадись мурт солэсь выросъёссэ, ассэ воземзэ умойтэмен лыдъя. Нош кыӵе бадӟым урок сётэ мадись мурт удмуртъёс книгазэс сутэм пумысен... Удмуртъёс асьсэос ик бӧрдӥзы. Кылдысинлэн туж вожез потӥз: удмуртъёс сётскизы уга. Зэмен но, кыӵе бадӟым урок... - Асьтэос оскиськоды ик-а, туж вашкала удмуртъёслэн книгазы вылэм шуыса? - Талы оскыны луэ но, уг но. Археологъёс туй вылэ гожъяськемез шедьтыны осконэн улӥзы. Но та дырозь ӧз шедьтэ на. Мон сямен, пусъёсын валэктонъёс вал ик, дыр. Сыӵе "книгалы" оскыны быгатӥсько. - Василий Ванюшев - тодмо удмурт кылбурчи но. Кызьы соос тупало - наука но поэзия? - Наука - нуналмысь сьӧд уж, няне. Поэзия - шумпотон. Куддыр "запой" луэ, асме кутэме уг луы ни, наукаез "сэрпалтӥсько". Гожъяськон, творчество пыр аслыд шумпотон басьтӥськод, аслыд ачид сое кылдытӥськод. Мукет дуннее пырыса улӥськод кадь. Сӥзьыл - тулыс сярысь, толалтэ гужем сярысь гожтӥське. Кылбуръёс ас сяменызы, капчиен лыкто, бурдъёс кылдыто. Тема сёто ке, кырӟанлы кылъёс но шуг ӧвӧл гожтыны. Дась гуръя - секытгес. Та ласянь ми эшъяськиськом Евгения Копысоваен. Пӧрмиз кадь потэ хорлы "Инмаре-кылчинэ" кырӟанмы-куриськонмы, "Азбука любви", "Удмурт кыл", "Пумиськон", "Италмас"... Поэма бордын ӝот-ӝот пуконо луэ. "Меми гожтэт" поэмаме Малеевкаын писательёслэн творчествоя юртазы гожъяй. Со зэмос учыръя кылдытэмын. Мемие, война вакытэ ньыль пиналъёсыныз кыльыса, атаймылы ивор ысъян понна, керосин лампа ӵындэмъя, печатной букваосын гожъяны дышетскиз. Та поэмаме редакторе Михаил Федотов учкиз но визькенешъёс сётӥз, тау солы. - Котькинлэн сямен ик, синмаськон бордысен но вордско, дыр, кылбуръёсты? Ӵем-а синмаськылӥськоды? Кыӵе нылкышноос кельшо? - Ӵем синмаськисько. Тросэзлы со сярысь уг но вераськы. Тани одӥг пол автобусысен одӥг нылкышно бордысь синме воштэме ӧз луы ни. Картэз сторож кадь вал. Со кышномурт тодыса но ӧз вутты, мон сое кылбурам кельтӥ ни шуыса. Лек нылкышноосыз уг яратӥськы. Лэчыт кусыпъёсы вуонтэм понна, соослэсь палэнскисько. Мон Водолей уга. Водолей урод адямиослэсь пегӟыса утиське. - Кызьы учкиськоды ушъямзы шоры? - Ушъян кылъёсыз серем улсы басьтӥсько. Виктор Туганаев профессор мыным шуылэ: "Тон туж ӟеч адями но, одӥг тырмымтэед вань: Алнаш районысь ӧвӧл". Ачим но маке серемессэ утчасько. - Тӥледлы ӵем дыръя верало, егит адскиськоды шуыса. Кыӵе "секретты"? - Ӵукна вазьгес султыса бызисько тэле. Иж шур дурын, пужымо ягын 40-50 минут зарядка лэсьтӥсько, турникын ӝуткаськисько. Кезьыт вуэз яратӥсько. Москваын докторской диссертациме гожъян дыръя, одӥг ар морж вал. Азьлогес Ижысен люкмесэ пырай. Куасэн нырысетӥ разрядэ вань. Коньки амалэн тымет вылтӥ ветлыкум, моржъёсыз синйылтӥ но эшъяськи. Йогъёслэн упражнениосынызы вырисько. Шунды ӝужан пал религия, кришна тунсыко потэ. Хатха-йога адямиез дышетэ инмар дорозь ӝутскыны. Тон сузя мугордэ: макем чылкыт мугорыд, сокем вылын лулыд. Самовнушение пыр, асме аслым оскытыса эмъяськыны быгатӥ. Кылын. Педучилищеын дышетскыкум, сюлэм висёнме шедьтӥзы вал. Гадь дорозь вуын чорыг кутылыса ветлылӥм угось. "Сюлэмлы но тренировка кулэ" шуэмысьтызы, мугорме кыдатон борды кутски. - Со ик юрттӥз, дыр, тӥледлы секыт висёнъёстэс вормыны... - Озьы, дыр. 1970-тӥ арын ог сю лемтэй бичай бордысьтым. Куртчиськемез пӧлысь огез висён кузьмаз. Ӝыны ар погылляськи. Ворми. Со дырозь кезьыт вуэн пыласькылӥ ни вал. Берлогес шыр висён кутӥ. Толэзь мында кылли... Ньыль полэс мынам вордскем нуналы. Святой Василий вылэм, Вуж Выль аре нуналзэ пусъё. Туж дышетскем адями, философ. - Выльысь вордсконо луысал ке, та сюресэз ик бырйсалды-а? - Та сюресэз ик, дыр... "Комсомолец Удмуртии" газетлэн редакторез луыса вуёми. Флор Васильев та газетлэн удмурт вариантэныз кивалтӥз соку, Герд, Петров сямен ик, туж сюлмаське вал будӥсь адями сярысь. Тынад, пе, очеркъёсыд исследовательлэн кадесь пӧрмо. Тӥни озьы мон Москвае МГУ-е мынӥ... - Бадӟым сюрес ортчемын. Табере тӥ наукаосъя доктор, научно-исследовательской институтын директорлэн наукая воштӥсез, университетын литературая бадӟым кафедралэн кивалтӥсез. Кызьы вуттӥськоды со быдӟа ужъёсыз нуыны? - Одно ик планъёс пусйылӥсько: быдэс арлы, арнялы, нуналлы. Асме чаклан дневнике но вань: кытӥы ке висе-а, маин эмъяськи, кыӵе кӧлӥ... Туж трос малпанъёсме ӧй быдэсты на. Али университетын уно дыр быре. - Яратонтэм ужды? - Бюрократ сямен бумагаос гожъян. Октябрьысен январёзь - куинь полэс отчёт... - Озьы ке но, тӥ туж удалтэм адями, мон шуысал. Сыӵе муртлэн ужъёсыз но удалтыны кулэ. Нош табере - газет бамын тӥледлы, зэмос джентльменлы, шуд усе асьме нылкышноосыз ӟечкыланы. Кыӵе чуръёс кузьмаськоды? - Яратэ, нылъёс, Яратон мурттэс - Яратон сӥньыс Мед вуттоз артэ. Яраты, меми, Вордэм нылпидэ, Яраты, нылпи, Юн уть мемидэ! Яратэ ваньды, - Ваньды, котькудӥз! Яратон бордысь Та дунне кылдӥз. - Тау! Вераськиз Татьяна ЧЕРНОВА. Та нуналъёс вордскемзэс пусъё "Удмрут дунне" газетлэн ветеранъёсыз: Хрулева Людмила Яковлевна; Стрелков Николай Филиппович; Суворов Федор Александрович. ХХ даур: яратоно нимъёс Елена ДРАПЕКО: "Бричкинаез уд куасалты" Асьмелэн поколенимы будӥз но кыдаз советской власть аръёсы поттэм литература но кино вылын. Сюлэмамы пыраклы кылемын но уло отысь геройёс, яратоно актёръёслэн тусбуйёссы. Тросэз учкизы, луоз, Борис Васильевлэн "А зори здесь тихие" повестезъя пуктэм фильмез. Егит нылъёслэн быремзы сюлэмез туннэ но бышкалтэ. Пӧлысьтызы огез, Лиза Бричкина, сыръясь нюре вые. Солэсь рользэ быгатыса шудӥз артистка Елена Драпеко. Ижевскын улӥсьёслы шуд усиз яратоно актрисаен асьме дорын пумиськылыны, юанъёс сётъяны. Но тросэз уг, дыр, тодо, киноын, театрын шудэм сяна, Елена Григорьевна мыло-кыдо пыриське на Россиысь парламентлэн ужаз. Озьыен, тодматске: Россиысь дано артистка, Ленинской комсомоллэн премиезлэн лауреатэз, Россия Федерациысь Кун Думалэн Туризмъя но культурая комитетэзлэн кивалтӥсез, Народно-патриотической огазеяськонлэн президиумезлэн членэз, КПРФ-лэн Кун Думаысь фракцияз ужась, "Духовное наследие Родины" межрегиональной движенилэн кивалтӥсез - ваньмыз со Елена Драпеко. Кун Думаысь ужан телефонэзъя депутатэз огкутскемен уд шедьты. Кусып тупатӥськомы факс пыр. Кӧня ке нунал ортчыса кылӥсько Елена Григорьевналэсь куаразэ: - Туннэ гинэ вуи командировкаысь, Ивановоысь. Мылкыды умой. Трос пумиськонъёсы ветлӥ. Газетты пыр шуныт кылъёс вераме потэ Удмуртиын, Ижевскын улӥсьёслы. Нылъёсты, нылкышноосты, песянайёсты - ваньзэсты ӟечкыласько Тулыс праздникен! Мон оскисько, асьмеос одно ик адском на шуыса. Е.Г.Драпекоен кусып тупатыны юрттӥзы КПРФ-лэн Удмурт рескомаз ужасьёс. Владимир Петрович Бодров, Кун Думае вуылыкуз, "Удмурт дунне" понна нимысьтыз ваиз тодмо артисткалэсь тусбуйзэ. Вералом на: вордскемын со Ленинградын. Анаез - математикая дышетӥсь, атаез - офицер. "Нош песятае гуртысь потэмын, крестьян семьяысь. Соин но, дыр, мон сокем яратыса шудӥ Лиза Бричкиналэсь рользэ", - ватсаз на актриса телефон пыр. - Сцена вылысь малы, кыӵе муген политикалэн пӧсь ӝуаз шедиз Елена Драпеко? Кудӥз ужез со понна валтӥсез луэ? - Валамон ини - Кун Думаысез, киноын шудӥсько ваньмон дыръям гинэ. Депутат мон луи КПРФ-лэн списокезъя. Кусып возисько 22 регионэн, чакласько культураез но туризмез радъянъя ужпумъёсты. Кема выроно луиз историяя но культурая памятникъёсты утёнъя законопроектэз кутон бордын. Комитетын со 7 ар пала кыллиз, нош дыр ортче, улон воштӥське. Законэз ӧд ке юнматы, кин тодэ, ма луоз ӵуказе дворецъёсын, музей-заповедникъёсын, калыклы туж дуно но тодмо интыосын, археологияя памятникъёсын... Кутскозы но соосты но аукционэ поттозы! Та ужез мон одно ик пумаз-йылаз вуттыны сюлмасько. Эшшо огез туж кулэ луись законопроект - туризмез выльысь улӟытон. Милям комиссимы дэмла таӵе амал: туристъёсты кунгож сьӧры келясь фирмаослы 20 процентъем НДС тупатоно, нош отысь туристъёсты Россие ваись фирмаосты налог тыронлэсь мозмытоно. Валэктонэз одӥг: иностранной туризм бюджетэ коньдон пыртэ, солэсь доход сётӥсь люкетсэ узырмытэ. Бадӟым уж нуим но нуиськом выль КЗоТ-эз юнматонъя, отын трос ай "лэйкась" интыосыз. - Елена Григорьевна, та документ творческой интеллигенцилы мар умойзэ сётоз, шуом, артистъёслы ик? - Жаляса верано, но огдышем репертуарен ужась театръёсты возён бюджет понна пумен секыт но секыт луэ. Соин ик кытын но отын воштӥськонъёс ортчозы. Кылсярысь, артистъёс потыны быгатозы контракт амалэ. Театрлэсь ог люкетсэ, оло, коньдоно муртъёслы, организациослы аренда улэ но сётыса. Валамон, куд-огез эшъёсмы ужтэк но кылёзы. Но кытчы пырод? Таӵе югдур кинематография вылтӥ погыльскиз ни. Советской Союзын 52 сюрс киноустановкаос пӧлысь данакез али быдтэмын. Кинотеатръёс пӧрмизы дӥськутэн вузкарись магазинъёслы, казинолы, мебель но машина салонъёслы. Огкутскемен быдтӥзы государственной луись билетъёсты, поттэм коньдон табере "паллянэ" кошке - лыдъясь-эскерись ёзъёс ӧвӧл. Ма вуиз асьме киноосмы интые? Боевикъёс, порно но мукет кырсь ужъёс. Зарезь сьӧрысь продукция учкисьлы ӝог акыльтӥз, киное ветлӥсь быриз. Нош малы озьы луиз? Государство коньдон висъямысь дугдэмен. Кужмоосыз фильмъёс кылдо спонсоръёс чотын гинэ, соос косэмъя но куремъя экран вылэ пото Америкалэсь адӟем карыса дасям кинолентаос. Валтӥсь художникъёсмы чалмизы - ӟеч малпанъёссэс улонэ пыӵатон понна коньдон уг шедьы. Тӥни малы учкись доры вуо "майтал шукыен" пачылмем сериалъёс. - Кызьы тӥ дунъяськоды асьме дорын поттэм сериалъёсты? - Сьӧрлось вуттэмъёссэ сямен ик. Визьме но, сюлэме но соос уг йӧто. Та пурысь бус пӧлын одӥг-ог умой кино ке пумиське - шумпотӥсько. Кылсярысь, С.Дружининалэн "Завещание императрицы" фильмез туж учкымон. - Елена Григорьевна, озьыен, коньдон вылэ культура ноку но ӧз ке вуылы ни, зэмос киноез егитъёсмы адӟытэк будозы? - Кин-о Россиез куанер шуэ? Коньдонмы тырмыт, но со туж ичи висъяське культура удысэ. Тӥни ма понна нюръяськыны выриськом ми, депутатъёс. Пичияк ке но азинсконъёсмы шӧдӥсько. Кутэмын кино сярысь закон, соя национальной фильмъёсты поттонын налог тыронъя льготаос учкемын. - Тӥ трос фильмъёсын сюлэме йӧтӥсь, яркыт рольёсты шудӥды. Кызьы малпаськоды, героиняосты пӧлысь кин меда туала улон-вылонамы ӧй чигиськысал, мукет идеологилы ӧй вузаськысал? - Конечно, Лиза Бричкина. "А зори здесь тихие" фильмысь яратоно образэ, Сибирьын лесниклэн семьяяз будэм огшоры ӟуч нылмурт. Чылкыт сюлэмо, Родиназэ яратӥсь, вордскем музъемез понна улонзэ сётыны дась - сыӵе вал Лиза Бричкина. Сыӵеос вылын возиське Россия. Мыным озьы ик туж кельше "Полынь - трава горькая" фильмысь герое - Дуся Микишина. Та огшоры ӟуч кышномурт ас вылаз басьтэ странамылэсь вань курадӟонзэ, вань секытсэ, вал сямен кыткиське пиосмурт уже но. "Безотцовщина" фильмын шудӥ Ольга Муромцеваез - ас кужымезлы оскись, шуг-секытъёсты вормись, ачиз понна но нылпиез понна нюръяськись но вормись муртэ. Мыным удалтӥз героиняосын. Туннэ нунал сярысь ке верано, ӵапак сыӵе нылкышноос улонлэсь кӧзэ бергато, соосты нокыӵе кужым но уз пыдесъяськыты. - Елена Григорьевна, тӥ тыршемен кылдӥз "Духовное наследие Родины" огазеяськон. Маин со выре? - "Духовное наследие Родины" вордскиз Алексей Подберёзкинлэн "Духовное наследие" огазеяськонэз интые, со кылдытэмын вал 1995-тӥ арын. Ужаз патриотической мылкыдын улӥсь адямиосты одӥг кужыме ӧръян бордын. Регионъёсысь ёзъёсын дурбасьтӥсьёсыз трос гинэ. Но парламентэ быръёнъёс азьын Подберёзкин шӧдтэк шорысь малпанъёссэ воштӥз, "Духовное наследиез" кельтыса, депутатэ кандидатэ мынӥз нимаз списокъя. Тае адӟыса, Санкт-Петербургын ми ӝегатскытэк ортчытӥм конференция, регионъёсысь делегатъёсты ӧтьыса но решение кутӥм, А.Подберёзкинэз "Духовной наследиысь" поттон сярысь. Кылдытӥм выль центр, ортчытӥм учредительной конференция. Валамон, ми понна та учырын номыр умоез ӧй вал. Но бадӟым ыштонэн но ӧз берытскы. Патриот мылкыдэн улӥсь интеллигенция политикае валаса пыриське. "Духовное наследие Родины" НПСР-лэн ёзэз луэ. - Жаляса верано, сое тӥ асьтэос но ӟеч адӟиськоды, творческой интеллигенция пӧлын но пӧртэм мылкыдъёс юмшало... - Озьы. Куд-огез азьло но кӧй-вӧй пӧлын уязы, али но шуныт кар шедьтӥзы. Кезьыт тӧлъёс сыӵеос дорозь ӧз вуэ. Но асьсэды дунъяны быгатӥсьёсыз султӥзы мукет радэ. Татьяна Доронина, Николай Губенко, Николай Бурляев вань калык азьын веразы Россиын кылдэм югдурен соглаш луымтэзы сярысь. Соосты уд косы доллар понна реклама роликъёсын шудыны, "капчи" сериалъёсын асьсэды возьматыны. Нош куд-огезлы, ма шуод ни, ма дэмлало - ваньмыз мынэ. Коньдонлэн зыныз ӧвӧл: кинлы быгатӥськод - вузаськы. Улон мукет пала воштӥськиз ке, сыӵеос нош ик ымнырзэс воштозы. Соослы дунъет сётоз калык. - Тӥ оскиськоды-а кинолэн азьлань нуналэз уз быры шуыса? - Одно ик. Со понна ми ужаськом. Вань кужымме, тодон-валанме сёто, Россиын улон чылкытгес, умойгес мед луоз шуыса. - Бадӟым тау тӥледлы вераськыны дыр шедьтэмды понна. Удмуртиын улӥсь нылкышноослэн нимынызы ӟечкыласьком 8-тӥ Мартэн. - Тау. Тӥледыз но озьы ик. Выльысь пумиськытозь! Людмила Медведева. Авторлэсь: та рубрика улын дасям пумиськонъёсты азинтом ар йылпумъяськытозь. Гожтэ, тодмо адямиос пӧлысь кинэн кенешемды, вераськемды потэ. Яке жингыртэ 22-13-47 телефонъя политикая но экономикая отделэ. Россиысь дано артистка Кун Думалэн депутатэз Елена Григорьевна Драпеко. Таиз снимок лэсьтэмын 1986-тӥ арын Ижевскын. Туспуктэмез Владимир Беломорскихлэн. Нылъёс-зенитчицаос. Лэсьтэмын "А зори здесь тихие" повестья. Суредэз Алевтина Мироновалэн. Удмуртия: выль даур Шыпыт ӧвӧл кышкыт Россилэн президентэзлэн оскем муртэзлэн Сергей Кириенколэн шаерамы вуылэмез выльысь бугыртӥз Удмуртиын утиськись химия ож тӥрлык котыртӥ вераськонъёсты. Укмыс миллиметръем корт ӝыны даур ӵоже одӥг миллиметрлы гинэ сыномемын ай, озьыен, ядэн вышкыос кема чидалозы на, Сергей Владиленовичлэн тазьы шуэмез кинэ ке, оло, буйгатӥз но. Со дыре ик асьмеос тодӥськом ук: данак адямиос бадӟым кузёослэсь оскытэмзэс воксё мыдлань валало. Э-э-э, таид озьы шуэ бере, маке но отын умойтэм, малпало сыӵеос. Югдурез умойгес валан вылысь, редакция вазиськиз Удмурт Элькунысь Химия ож тӥрлыкен герӟаськем ужпумъёсъя комитетлэн тӧроезлы Анатолий Фоминыхлы. - Ядъёслэн кышкыт луэмзы сярысь выльысь вераны кулэез ӧвӧл, дыр, ке но, - пусйиз Анатолй Аркадьевич, - та ужпум асьме республикаез туннэ туж шугъяськытэ. Химия ож тӥрлык али шаермылэн одӥгез "сьӧд" тодметэз луэ. Валамон, асьмеос огнамы солэсь мозмытскыны ум быгатэ, кулэ быдэс Россилэн, дуннеысь мукет азинскем кунъёслэн юрттэмзы. Со понна ик странамы юнматӥз нимысьтыз огкылъёс. Соосъя чакламын кышкыт суретъёсты 2012-тӥ арозь быдэсак быдтыны. Документъёсты кутэм дырысен, кызьы шуо, трос ву бызиз ни, нош шӧдскымон воштӥськонъёс ӧз луэ на. Одӥгез муг - Россиысь экономикалэн чутыса улэмез. Коньдон уг тырмы. Тани кылем арын Химия ож тӥрлыкез быдтонъя программалы (нош со Президентэн юнматэмъёсыз пӧлы пыре) ог ӝыны миллиард манет гинэ висъязы. Ай со пӧлысь но данакез кошкиз кык адресъя - Саратов улосысь Горный посёлоке но Курган улосысь Щучий посёлоке. Россилэн правительствоез ужпум пуктӥз ядъёсты быдтонъя производство нырысь ик отын радъяны. Огласянь со умой. Эшъёсмылэн ужзы пӧрмиз ке, отӥяз милемлы каньылгес луоз та удысэз асьме дорын радъяны. Ми малпаськом: та ар пумын Горныйын лэсьтӥськонэз йылаз-пумаз вуттозы ни. Соку ик кутскозы люизитэз (таиз яд Россиын тужгес трос) переработать карыны, солэсь мышъяк поттыны. Щучийын но ужъёс азинско. Тӥни соин валче Удмуртилы кылем арын 12 миллион манет гинэ висъямын вал - Кизнерлы но Камбаркалы быдэн куать миллион. Валамон, со туж ичи. Ярам коть, взаимозачёт но мар чотын ог 35 миллион ватсаса поттыны луиз на. Со но тырмыт ӧй вал. Туэлы бюджет дасякуз, Кун Дума химия ож тӥрлык шоры учконзэ ӧжытак воштӥз кадь. Та удыслы кылем арынлэсь куать пол трос коньдон висъяны тупатӥз. Соин ик асьмелы но уногес коньдон шедёз. Ми нырысь куриськом вал ог 600 миллионзэ. Озьы но тазьы кенешеммы-чакласькеммы бере, Москва 177 миллион манет висъяны тупатӥз. Ваньмыз сямен со мыноз асьме ёросъёсын инфраструктураез азинтонэ - социальной объектъёс, сюрес лэсьтонэ, газ кысконэ. Но кызьы оскытӥз Сергей Кириенко, Россиын ваньбур поттон йылэ но выт уногес люкаське бере, химия ож тӥрлыкез быдтонэ чакламлэсь вылтӥ но коньдон сётэмын луоз. Президентлэн Приволжск округысь полпредэзлэн та ужпум борды басьтӥськемез юнме шорысь ӧвӧл. Россиысь ваньмыз сямен кышкыт ядъёс татысь республикаосы но областьёсы интыямын. Соин ик С. Кириенколы ӵектэмын Россиысь комиссиен кивалтыны. Отчы пырозы улосъёслэн нырысетӥ адямиоссы. Асьме элькунмылэн нимыныз комиссиын ужалоз Президент Александр Волков. Солы та ужпум выль ӧвӧл. Ай 1998-тӥ арын Борис Ельцинэн ӵош Италие ветлыкуз, Александр Александрович отын вераськон нуиз асьмелы юрттэт сётон сярысь. Со пумысен правительствоос куспын огкыл но юнматэмын. Та ужпумез мон Сергей Владиленовичлы тодэ вайытӥ. Оскытӥз, туэ Кизнере Италиысь коньдон вуоз шуыса. Со уксёез социальной удысэ висъялом. Комитетамы ужасьёс понна умой соиз но: туннэ асьме Правительствоен кивалтэ Юрий Питкевич, химической ож тӥрлыкен герӟаськем ужпумъёсты ӟеч тодӥсь-валась мурт. Ваньмыз та оскон сётэ, удысамы воштӥськонъёс пумен шӧдскымонгес луозы шуыса. Озьыен, кышкытлык но ичигес луоз. *** Тӥни озьы вера комитетлэн кивалтӥсез Анатолий Фоминых. Солэн чакламезъя, Россиын али таӵе малпанэ вуо: яд возён котькуд интыын нимысьтыз завод ӝутыны кулэез ӧвӧл. Укыр дуно усёз со. Пайдаез но туж уз луы. Вылӥ кивалтӥсьёс чаклало Камбаркаын сыӵе предприятие лэсьтыны. Но ку со борды басьтӥськозы - тодмо ӧвӧл на. "Ошоно ӧвӧл кельтоно" - удмурт кылэ тазьы берыктыны луоз, дыр, тодмо ӟуч верамез. Кыӵе кылъёс вискы пуксёз запятой, озьы ик луоз, пе. Тазьы ик вераны быгатӥськом кадь химия ож тӥрлык котырын кылдэм югдур сярысь: "Шыпыт ӧвӧл кышкыт". Кытчыяз куриське запятой? Мед шедьтысал со ас интызэ нырысетӥ кыл бӧрсьы. И. Максимов. Бызьылытӥз Серемес учыр Ужея мыным ӵем гинэ скалъёс котырын бергано луэ, ас вакытам ветеринаре дышетски угось, али но тани трос вырисько одӥг скаллэсь кык кунян уськытон бордын. Мылкыды умой, котькуд аре чакласа возем скалъёсы пӧлысь ог ӝыныез одно ик кыкто кунян вае. Макем бадӟым шумпотон со техник-осеменаторлы Галялы но. Кызьы, пе, сотэк - арысь аре одӥгез но скалмы кунян вайытэк ӧз кыльы. Озьы ог- огмес валаса ужаськомы бере, кызьы ай 8 Март нуналэ Галялы шутэтскон нунал уд сёты. Праздник нуналэ вазь ӵукна ик скал кыскисьёсын ӵош фермае вуи. Осеменаторлэсь кабинетсэ усьтыса, инструментъёс но сурет дасяй. "Нырысь бызьылыто толло учкемъёссэ, ӝыт пал ини чаклало выльысь бызьылыны кутскись скалъёсыз", - малпай ас поннам. Озьы ик лэсьтӥ, висись пудоез но эмъяса вуттӥ, ӵош ужась мусо нылкышноосмес но праздникен ӟечкылай. Куанӥзы чебер апайёсы, аслым но вань ӟечсэ сӥзизы, чыртыям вакчи виятэмез пичиен сюриз на. Чыртые сюрем бере осеменаторское вуыса кузёяськыны кутски. Галялэсь спиртсэ поттӥ: воргоронъёсыз утялтэме потӥз. Со вискын дежурной слесарь Толя пыриз. Скал кыскисьёс, пе, шутэтскон сэреге ӧтизы. Отчы мынэмме тодӥсько на, собере мар вал, бус пыр гинэ тодам ваисько. Огаз киям чаклась-эскерись прибор, мукетаз - осеменаторлэн шприцез. Кӧня но кудзэ скалъёсыз бызьылытӥм Толяен ӵошен - номыре уг тодӥськы ни. - Ыш-ыш-ыш! Мар таӵе? - кынмеменым сайкаса, нокызьы уг валаськы аслэсьтым кытынме. Кӧт вылам мар ке но туж секыт арбери шунытак кылле, дырын-дырын ымныр шорам силос зынын шокчем ӧскемез ик поттэ. Кӧтурдэс вылам берытскыны турттӥсько. Кытын, пе, секыт мар ке зӥбыса возе. Собере ачим но мон кыӵе ке шай коросын кадь, котыр пеймыт, номыр уг адӟиськы. Киыным утчаськыны кутски. Вӧзам ик ужан арбериоссы костасько, нош кӧт вылам скаллэн йырыз вылэм. Соку гинэ валай, тусе умме усиськем шуыса. Ой, кыӵе возьыт, кыӵе возьыт! Кӧт куректэмен, ма карыны уг тодӥськы ни. Мар меда ӵуказе шуозы ӵош ужасьёсы? Кызьы меда скалъёсыз бызьылытӥ? Ох, сюроз ини Галялэсь. Бен, дыр ортчемъя, ваньмыз вунӥз, ӵошказ кадь. Толэзь пала улыса, Галяе шуэ, мар ке но скалъёслэн бызьылэмзы уг поты, нош дырыз кемалась вуэмын ини. Пушсэс эскерыса утчано, оло, маке висёнзы вань. Озьы ик лэсьтӥмы, ваньмыз умой, нокыӵе висёнзы ӧз шараяськы. Ойдо соку эстрофан пуктылом, шуисько (мумы пудолы гормональной препарат со). Та эмъюм скалъёсыз ошез кушкытоз, нош бызьылэм пудолы пуктӥськод ке, кунянзэс кушто. Мар бен, эстрофанэз мон уколэн пуктылӥ, нош ик ош мед кушкозы шуыса. Пинал пудо тросгес мед вордӥськоз шуыса тыршиськом ук! Кык сутка ортчыса, одӥгез дояркае лыктэ, со бӧрсьы мукетыз. Скалъёсмы, пе, кунян кушто кадь, ойдо учком. Зэмзэ но, эстрофанэз пуктылэм скалъёсы ваньзы ик кунян луон пи гердъёссэс пушкысьтызы поттазы. Чылкак паймиз Галя но. Соку мон валай ини, 8-тӥ мартэ "ӟеч" ужамелэн данлыкез та луэ шуыса. Галялы ваньзэ шонер вератэк ӧйлась... Тӥни со дырысен мыным оскон быриз. С. Ласточкин. Можга район, Ефремовка гурт. Чур бугор Пияшез быдтӥз аракы Марий Эл Республикаысь Мари-Турек ёрос больницаысь эмъясьёс сутка пала нюръяськизы кык аресъем пияшлэсь тазалыксэ утён понна. Сое кыдёкысь гуртысь вуттӥзы аракы юэмез бере уродмыса. Висисез эскерыса, медикъёс диагноз пуктӥзы: тазалыкез уродмемын мултэс аракы юыса. Врачъёс кема ке но нюръяськизы, пияшез утемзы ӧз луы ни. Кызьы веразы милициын ужасьёс, та юртын аракызы ноку ӧз бырылы. Пияш ӵап синйылтэм ватытэк кельтэм зын вуэз. Марий Элын аракы юон берло дыре туж алямын. Ар ӵоже гинэ отын юыса югыт дуннеен люкиське сюрс пала адями. Парсьёс визьтэммизы Румыниысь 69 аресъем фермер Георге Миску парсь гидзэ сузя вал. Малпамтэ шорысь бордаз "нуф-нуфъёс" урдскизы. Нырысь Георге шоры мерскиз одӥгез айы парсь. Собере куалектэм фермерез мукет пудоос но погыртӥзы. Соос воргоронлэсь одӥгзэ пельзэ, йырку люкетсэ но одӥг пуззэ ишкалтӥзы. Инмар юрттэмен гинэ, дыр, воргорон гидысь пегӟыса вуиз. Гид сузясьёс Курск улосысь одӥгаз ёросын ӝегатэмын пудо лушкасьёслэн кык бадӟым шайказы. Воръёс кӧня ке аръёс ӵоже ини "сузяса" возизы колхозъёслэсь но нимаз улӥсьёслэсь пудо гидъёссэс. Бандае огазеяськемын вылэм гуртоос но, Курскын улӥсьёс но. Та вакытэ базарын сӥльлы дунъёс вылӥын бере, узырмыны таӵе амалэн капчи вылэм. Меӵак но могак Со сярысь Нылкышнолы ноку но сомында ӧвӧл, кӧня солы сёто. Мынам арлыдъёсы: узырлыке кытын? Кин ке понна та нылкышно - инмар, кин ке понна - огшоры кышно. Дырын-дырын нылкышно картлы бызьылыны кулэ. Картлы бызён секыт ӧвӧл, секыт соин улон. Картлэсь умойгес луыны быгатэ туган гинэ. Туганлэсь умой - кык туган. Чебер но, визьмо но, узыр но, сюлмо но картлы бызён понна, ньыль пол бызьылоно луоз. Кышномуртлэн малпанъёсыз ӵемгес вошъясько, соин ик соос чылкытэсьгес. Ваньзэ простить каро! Но номыре уг вунэты. Чур бугор Дуннелэн вылтусыз воштӥськоз ЪЪИ дауре дуннелэн политической картаез быдэсак воштӥськыны быгатоз. Озьы лыдъяло географияя учёнойёс. 25-30 ар ортчыса, тазьы, пе, луыны быгатоз. Австралия ньыль кунлы люкиськоз. Европаын таӵе суред луоз: Испаниын кык нимаз кун кылдоз. Францилэсь висъяськоз Бретань провинция. Бельгия но кыклы люкиськоз. Норвегиысь, Швециысь но Финляндиысь саамъёс асьсэлы кун кылдытозы. Кӧня ке дыр ортчыса, саамъёслэн кунзы борды итӥськозы Канада но Россилэн уй пал улосъёсаз улӥсь калыкъёс. Россиын выль кунъёс кылдозы Дальней Востокын, Уралын но Сибирьын. Асэрик басьтозы Татарстан, Дагестан, Калининград, Тува но Буратия. Азиын Индия ыштоз Пенджаб но Кашмир улосъёссэ. Афганистан озьы ик куинь векчи кунлы люкиськоз. Казахстанлэн бадӟым люкетэз огазеяськоз Россиен. Китай но, пе, куинь автономилы люкиськоз. Африкаын но куд-ог узыр улосъёс ас кожазы азинскозы. Кылсярысь, кыклы люкиськоз Судан, куиньлы - ЮАР. Америкаез но бадӟымесь воштӥськонъёс возьмало. Бразилиын куинь автономия кылдыны быгатозы. Нош Канада карта вылысь воксё но ышоз. Мексика ньыль векчи юдэслы люкиськоз. Озьыен, США-лэн гожъёсыз чылкак мукетэсь луозы. Учёнойёслэн лыдъямзыя, выль даурын, пе, кунъёс вискын гожъёс, оло, кулэ но уз ни луэ, угось сокем матын луозы экономикаын кусыпъёс. Азьпалан - Чарли Чаплин Мар сярысь тужгес но трос кинофильмъёс кылдытэмын? Та ужпумез эскерем Римын печатласькись "Мессанджеро" газет. Быдэс дуннелы тодмо адямиос пӧлысь экранъёсын тужгес но трос возьматэмын Наполеон Бонапарт - 194 фильмын. Литератураын гожъямъёс пӧлысь - "Золушка" - 94 фильм. Туннэ нуналлы тужгес но зол актёрен лыдъяське Чарли Чаплин. Нош кӧня коньдон куро меда ужамзы понна тодмо артистъёс? 1910-тӥ арын актёр Генри Краус "Жерменаль" фильмын шудэмез понна нуналлы быдэ басьтэ вал 700 доллар. 40-тӥ-50-тӥ аръёсы Америкаысь "кизилиос" одӥг фильмын шудэмзы понна курыны кутскизы 500 сюрс доллар. Кылсярысь, соос пӧлы пыре вал Лиз Тейлор но. Но тужгес но трос коньдон басьтӥз Барбара Стрейзанд, "Сумашедшая" фильмын шудэмзэ со вить миллион долларен дунъяз. Огшоры гинэ фильм туннэ но огез дуноез луэ. Лидия Чернова Дуно дыр Кышноелы та нунал Кузьманы малпай сяська. Бертӥз но гуртэ ӝытпал - Со ачиз вылэм сяська. Казак дырме адӟи шат? - Сыӵе мусо пальышаз! Сузьтӥськиз, чупаз шуак... Кепырай... ...Дуно дыр, тон ӝега ай! Эн кошкы шуак-дуак. Шудо луон понна Кышномуртлы Шудо луон понна Ӧвӧл кулэ зарни гурезь. Огпол ке но Мусо кылзэ, Ой, кылысал ке картэзлэсь! Ӧвӧл ке яратон - Ӟоскыт. Вӧл-вӧл коркан Люкыт. Ӧвӧл ке яратон, Малы тыныд ваньбур? "Мыран!" шуид, дыр, тон - Мукет шудэз ӧд кур. 02 ивортэ Ох-ох-ох, кыскнлы гинэ ёрмиллям ук! Глазовын ӝегатэмын азьвыл пытсэт улэ шедьылэм 21 аресъем Евгений Щ. Со январь- февраль толэзьёс куспын ньыль квартираосысь лушкаськыны вутскем. Ижевскысь Баранов урамын куинь тодмотэм егит воргоронъёс 16 аресъем Александрлэсь, жугонэн кышкатыса, коньдонзэ талазы. Ленин ёросысь милиционеръёс та ужъя кырмизы азьвыл пытсэт улэ шедьылэм 16 аресъем Ильнатэз но 18 аресъем Владимир Г.-эз. Куинетӥзэ, 16 аресъем Валерий С.-эз, утчало. Бер ӝыт Ижысь Красной но М.Горькийлэн урамъёс вискысен Г. пенсионерез жугыса дӥсьсэ талазы. Киултӥзы солэсь кысконзэ гинэ но. Таоссэ но мурт чотын узырмыны малпасьёсты милициын ужасьёс ӝегатӥзы. Со вылэм 36 аресъем Иван Л. но 46 аресъем Василий З. Ӵошен лушкаськыны но каньылгес, пе Устинов ёросысь югдурез утёнъя отделын ужасьёс ньыль шӧртчи пиосты кырмизы. Соос февраль пумын П. гражданкалэн квартираяз пыраллям. Озьы азьвыл суд улэ кыскам 24 аресъем Антон К., 34 аресъем Сергей К. 65 сюрс манет сяна, Иж-79 пистолет, Иж-27 М но Иж 18 пыӵалъёс, "Сайга-410 К" карабин но мукет чыры-пыры лушказы. Йыртэмасьёслэсь юлтошъёссэс утчало. Кинъёс тӥ - маскаос? 4 час котырын ӵукна Глазовысь "Дружок" магазинэ маскаен кык воргорон пыриз. Вузкарисез жугыса, сооос 1 но ӝыны сюрс манет тыр вуз поттӥзы. Лушкаськисьёсты милициын ужасьёс ӝегатӥзы. Со вылэм азьвыл пытсэт сьӧрын "кунояськылэм" 24 аресъем Алексей П. но 24 аресъем Дмитрий Н. Ӝутэмын уж. Ох, наркоманъёс, наркоманъёс... Милициын ужасьёс Ижысь Воткинской урамын огвакытгес ик кык наркоманэз ӝегатӥзы. Азьвыл пытсэт улэ шедьылэм 24 аресъем Виктор Д.-лэсь 0,17 грамм героинзэ но 26 аресъем Дмитрий К.-лэсь 0,2 грамм героинзэ таламын. Кыксыя ик уж ӝутэмын. Шат сыӵе со - яратон? Яр ёросысь Озёрки гуртысь Д. кузпалъёс "шутэтскыны" малпаллям. Ӧзгес пӧрмы. Ӵошен кудӟытӥсь ву ӟизтэмзы бӧрсьы куспазы керетон пуромиз. 63 аресъем пенсионер николай Д. 62 аресъем Нина кышнозэ вожомыса ӵыжаны ӧдъяз. Кышномурт вӧсь луэмлы ӧз чида, шокамысь дугдӥз. Ӝутэмын уж. Нырысь ӧтча, собере кунояты Игра ёросысь азьвыл суд улэ кыскам 32 аресъем Сергей М., куное шуыса, Як.-Бодья черко гуртэ вуиз. Нуназе шорын, пумиськонзэс пусъем бере, кунолэн но Рамиля Х.-лэн кылзы тупамтэ, шӧдске. Сергей М. 22 аресъем нылашез пуртэн бышкалтӥз, ачиз пегӟиз. Милициын ужасьёс йырвандӥсез утчало, Рамиля эмъяськонние интыямын. Бускельёсмы дорын Алексей Шкляев Финн-угоръёс вискысь музъем кесэг Кык нунал ӵоже Киров областьысь Слободской но Уни районъёсын ортчизы удмурт культуралы сӥзем нуналъёс. Печатласьком Алексей Шкляевлэсь соослы сӥзем чуръёссэ. Тыл пельтэ, тӧл пельске Мар тодӥськом асьмеос Киров палъёс сярысь? Вазен, 1781-тӥ арозь, карзы Хлынов нимаськиз, 1934-тӥ арозь - Вятка. Удмуртъёс вашкала дыръя ваткаослы (вяткаослы) но калмезъёслы (килмезьёслы) люкиськылӥзы. Соослэсь нимаз тодметъёссэс асьмеос пумен вунэтӥськомы ни. Киров областьын сыӵе пӧртэмлыкъёсты шӧдо туннэ но сямъёсысь, дӥськутысь, куддыръя ымныр тусысь но. Али нокин но шонерак уз вера отысь удмуртъёслэсь лыдзэс - оло кӧня ке сюрс, оло дасо сюрс, оло сю сюрс. Малы ке шуоно, тачакез асьме выжы-кумъёс ӟучомо. Фамилиосмы ке шат огкадесь на - Будинъёс, Трефиловъёс, Аккузинъёс... Кылсярысь, быдэс дуннелы тодмо луэмын хоккейысь капкачи (вратарь) Александр Трефилов. Будэмын удмурт гуртъёслы матысь Кирово-Чепецк городын. Кин тодэ солэсь удмурт яке ӟуч луэмзэ? Аслэсьтыз уд юа - кыдёкын. Удмурт шаерез но Ватка улосэз юнгес герӟало - уг, адямиос уг - шуръёс. Отӥ бызё Чупчи но Лумпунь, асьме ошмесъёсысь кутскись Кам но Вятка. Ӵапак бускельёсмы одӥг ӧре огазеясько Чупчи но Вятка. Ӵапак отын та шуръёс пӧрмо пӧртэм судноослы уяны ярась ӧрлы. Бускель улослэсь аспӧртэмлыксэ мон адӟисько та ласянь но. Одӥг интыетӥ Коми но Удмурт шаеръёсты висъя ог 150 иськемъем Ватка музъем гинэ. 1200 ар талэсь азьвыл комиос но удмуртъёс ог-огзылэсь висъяськиллям но пӧртэм калыкъёслы пӧрмиллям. Оло, ӵапак та 150 иськемъем кесэг асьмеды, финн-угоръёсты, пыраклы люкиз. Оло, соин сэрен асьмеос люкиським, одӥг кужмо выжы ӧм луэ, нимаз кун (государство) кылдытыны ӧм пӧрмытэ. Отӥяз комиос висъяськизы зырянъёслы но пермякъёслы, асьмеос - калмезъёслы, ваткаослы, бесерманъёслы, уй палъёслы, лымшоръёслы, ӟучомисьёслы... Мар бен, историез выльысь уд берыкты ни. Нялтас мон шараясал курданме но. Тодосчиос (учёнойёс) монэ пыкылозы, дыр, вылӥ верам малпанэ историез мыдланьтэ шуыса. Федор Пукроковез музэн ик. Озьы ке но... Комилэн лымшор палаз, асьмелы матын люкетаз, Летка шур вань. Удмуртилэн уй палаз бызе Лытка шур. Уй пал удмуртъёс ӵуказеез аскы шуо, комиос - аски. Кар но мукет кылъёс чылкак огкадесь. *** Сюресмы кутсконаз ик кижи-кожи кошкиз. Дано "Эктон корка" фольклор студиысь арганчи ӵукна сизьым часэ пӧламы ӧз вуы. Сое Ижысь кык час пала утчамы - ӧм шедьтэ. Кошким арганчитэк. Азьпала потыса вералом: арганчи ӧвӧлысь чик ӧм курадӟе кадь. Сое туж усто воштӥзы Удмурт телевидениысь журналист, писатель но трос музон удысъёсын тодмо мурт Семён Карпов, Слободской районысь удмурт арганчи Василий Будин. Кыксы ик - Россия Федерациысь культура удысысь дано ужасьёс. "Эктон коркась" лэсянтэм арганчиез уно пол лек кылын тодамы вайылӥм на, пусъем ужрадъёс огез бӧрсьы мукетыз куашкамен сэрен, лумбыт ӵоже сютэм ветлэменымы сэрен, Киров городэз адӟымтэенымы сэрен. Студилэн кивалтӥсез Андрей Прокопьев бадӟымгес арлыдо луысал ке, куректыса копак пурысьтасал, вылды. Ярам, егит бере, пиньёссэ зол-зол куртчиз но чидатскиз ни. Нош шулдыръяськонъёс дыръя солэсь шӧртчиез адямимы ӧй вал. Дышем сямъя Киров город ульчаын но областьлэн адяминистрацияз ортчизы шуныт пумиськонъёс но кузьмаськонъёс. Собере милемды келязы Слободской районысь Светозарево гуртэ. Удмурт нимыз - Гырдор. Кин кызьы, вылды, нош мон туж шимем вал. Ӟуч сямен кылы сьӧлтаськылэ бере, кызьы вераськом? Предлогез послелоген сурамлэсь кепыраса, ма мадём калыклы? Дэймонэз копак вылымтэ. Кырӟан гинэ ӧвӧл, вераськон но Гырдорын радъяське удмурт сямен. Вордскем кылынызы бӧтьырто мӧйыос но, векчи шалякаос но. Удмурт шаере ноку вуылытэк. Ӵапак Гырдорын интыяськемын Киров областьысь Удмурт культурая центр. Любовь Анатольевна Будина кивалтэ та центрен, гуртысь культура юртэн, вань удмуртъёслэн "Удмурт кенеш" огазеяськонзылэн ёзэныз но... вылӥ верам дано арганчиен Василий Будинэн (картэныз). Сэзь кышномурт татчы быземын артысь Чола (Круглово) удмурт гуртысь. Берло дасо аръёсы удмурт калыклэн сямыз но тусыз-буйыз юн воштӥське. Пиосмы пумен шимесгес юо но уллане гылӟо. Нылъёсмы весь чеберско но... тордосэн курадӟытозь огнамы улом шуыса, я уг бызё, я ӟучъёсын но сьӧдъёсын нуны ваё. Ӟистон ласянь Ваткаысь пиосмуртъёсты урод кареме уг поты - ӧй адӟы. Покчиос возьматӥзы кырӟамзэс но, арганэн шудэмзэс но. Чебер нылъёс ласянь югдур отын но асьмелэн кадь. Ымныръёссы вольытэсь, мугоръёссы веськресэсь, кылъёссы шаплыесь. Тазьы ик азинскизы ке, удмурт чеберинаос дуннеез но вормозы, вылды. Шаплы кырӟась нылъёс доры лыктӥз тодмо историкмы Людмила Христолюбова: - Тӥлядъёс Удмурт университетэ яке Глазов пединститутэ мыно-а? Отын удмурт кылъя дышетӥсьёсты но дасяло. - Уг, проч уг мыно. - Немец, англи, венгри, финн кылъёсты университетамы дышето. Юри Венгриысь но Финляндиысь дышетӥсьёс дорамы ветло. Жаляса верано луэ: асьме вузъёс сярысь егитъёслэн кылылэмзы но ӧвӧл. Мар веранэз университетъёс сярысь, Глазовысь базаре ветлэм муртэ но мон мырдэм шедьтӥ бере? Раиса Ефимовна Кожина маде: - Пыр татын улко. Сизьымдас (сизьымдонэз озьы шуо) сьӧры потӥ ни. Вордски Чабаковка гуртын (ӟуч сямен Новосёлово). Куать ар дышетски но, война дыръя пытсазы Чолаысь школамес. Удмурт кылэз но кӧня ке дышетӥ вал. Куноосты удмурт сямен ӟечкылаз гурт адяминистрацилэн йырыз Вячеслав Валентинович Аккурин. Удмурт Республикаысь Нациосын ужан политикая министерствоын ужась Лариса Николаевна Буранова, делегацилэн кивалтӥсез, вераз Удмуртилэн палэназ улӥсь удмуртъёсын кусыпъёсты юнматон сярысь. Со понна нимысьтыз программа вань. Татысь библиотекалы удмурт книгаос кузьмаз. *** Калык выжыос татӥын олокызьы но пумисько. Тани пуке муспотон ныл Саитова Татьяна Валерьевна. Фамилиез кылемын 17-тӥ-18-тӥ дауре та пала лыктэм бигеръёслэсь. Ужа бигеръёс кошкем бере ӟучомем гуртын фельдшерын. Огдыре дышетске педагогикая кун университетлэн спорт люкетаз. Волейболэн шудэ. Аиз удмурт, мумиз пор (мари). Пинал дыръяз Татьяналэн ӟуч кариськемез потэ вылэм. Али мылкыдыз воштӥськем: - Шумпотӥсько, таӵе ӟеч удмурт гуртын улӥсько шуыса. Удмурт кыл сюлмам пыӵа. Пор сямен уггес валаськы. Кема кенешим соин сураськем виро адямиослэн мукет калыкъёс шоры кызьы учкемзы сярысь, ассэ кин кожамзы сярысь, кинэн кузпалъяськыны медэмзы сярысь. Вуим одӥг малпанэ: сураськем семьяын тупамтэос потыны быгато одӥг виро семьяын сямен ик. Керетон уг пуромы виръёс пӧртэмен. Со кылдэ сюрс ар талэсь азьло шараяськем муген ик - юэмен, азьтэмъяськемен, вожамен... *** Такем кыдёке лыктыса, валесын кема погылляськыны сьӧлык луысал. Ку-о мон пумисько ай Россиысь культура удысысь дано ужасен - Удмутилэн палэназ интыяськем кыдёкысь гуртын сыӵе дано ним басьтӥсен? Культура юртысь арганчиен Василий Васильевич Будинэн уйбыт сямен ветлӥм Гырдор ульчаетӥ. Куазь сайкыт, шыпыт, шуныт. Пыд улын пызырес лымы кежыртэ. Инбамез котыр ласянь югдыто яркыт кизилиос но тыл люкъёс. Воргорон возьматэ: - Отӥын озьы пиштэ Слободской. Сопалаз - Кирово-Чепецк. Кировлэн тылъёсыз уггес адско кадь. Ми, огъёзъёс, пияла синъёсмы бусатозь чакласьком инбамез. Юалляськемея Василий Будин кыл гозызэ пунэ. Диктофонэ тэк ас понназ берга. *** Вордски та районысь ик Будьпиын. Сое Будино яке Будьпинь шуыло. Отын почти вечак (вочак) уло Будинъёс. Ньыльдас коркан ик - удмуртъёс. Школаын нош кужмысь косылӥзы ӟучен вераськыны. Асьме куспамы удмуртэн бӧтьыртылӥм. Жаляса верано луэ: куанер улэменымы, мынам ермонь (гармонь) басьтыны соку ик ӧз быгатэ. Нотаосты тодытэк, тямыс класс бере, мынӥ Кировысь культурая училищее, калык инструментъёсын шудон люкетэ. Стипендия 30 манет. Ужаны келязы Киров областьысь Свеча районэ, Горький палагес. Районысь культура юртын оркестрен кивалтод, пе. Уждунэ 67 манет. Юн ӟеч вал райисполкомысь культура отделэн кивалтӥсь Зайченко. Сётӥз одӥг но ӝыны уждун. Шудӥ балалайкаен, домраен, пианинонен, баянэн. Кӧня ке ар ужаса кошки Горькие, профсоюзъёслэн культура юртазы. Дорамы огпол лыктӥз Владимирысь "Русь" кун ансамбль. Отын шудэме потӥз. Эскеризы. Кутӥзы оркестрысь баянистэ. Аи-мумы Будьпине ик кылемын. Агае весь гожъя: берты соос доры. Ачиз Кировысь Гурт хозяйствоя институт но Горькийысь вылӥ партшкола бере вань улонзэ герӟаз Мари Республикаен. Вал компартилэн райкомезлэн нырысетӥ секретарез, гурт хозяйствоя министр. Семьяе ӧвӧл бере, кутӥ но берытски. Слободское интыяськыны медӥсько вал - аи-муми эшшо матэгес каризы - Гырдоре. Кылдытӥм хор. Пӧртэм ужрадъёсын дипломъёс басьямы. Мон луи Россиысь культура удысысь дано ужась. *** Василий Будинлэн Люба кышноез вордскемын Чолаын. Йылпумъяз Кировысь Культурая училищеысь режиссурая люкетэз. Кема кивалтэ ни Гырдорысь культура юртэн. - Кузпалъяським но пока улӥськом ай, - пальпотэ Любовь Анатольевна. - Скалмы но ветылмы уань, парсьмы-ыжмы уань, курег-ӟазегмы уань. Аба (муш) ум возиське. Пудомы трос ке но, Иже дырын-дырын ветлӥсько. Слободское вуэм вылэм удмуртъёслэн съездазы ӧтён. Отчы кык кузя вуылӥм. Вераськон сяменымы куинь час сяна ӧм кӧлэ. Ӵукна сюрес вылэ вазь потоно бере, чорк! султӥ но клуб пала лашкинтӥ. Пумитам сюриз егит кышномурт: - Сайкатыны мынӥсько вал. Но Будинъёс дорын шуак тыл пельтӥз. - Кызьы пельтӥз? Ӝуатскиз кылэз озьы верало вылэм. - Нош тӧл пельтэмез кызьы шуиськоды? - Пельске. Мар бен, Удмуртиысь но Ватка улосысь удмуртъёс куспын котьку мед пельтоз тыл, шергес мед пельскоз тӧл. Азьвыл отчы ӵем ветлылӥзы Удмурт кун университетын дышетскисьёс, Удмурт музейысь дӥськут утчасьёс. Берло аръёсы кусыпъёс лябомизы. Калыкез дышетонъя министерствоямы ужась Валентина Михайловна Ившина оскытэмъя, удмурт кылмес Ватка палан но рос-прос дышетыны кутскозы. Кылмы луиз ке, музон удысъёс но герӟаськозы. Сыӵе осконэн кошким ми Гырдорысь. Тунсыко пумиськонъёс Эктонэн гожтэм мылкыд Андреен телефон пыр вераськыкум син азям пуксиз ӵышкем сьӧд йырсиё, пельёсаз угыосын пиосмурт. Вераськимы кафе дорын пумиськыны. Пайми: монэн ӟечбуръяськиз кузь сьӧд пальтоен, гольык йыро, химия лэсьтэм пельпумозь тӧдьы буям йырсиен интеллигент пиосмурт. Андрей - эктӥсь стриптизёр, ужа "Искусители" стрип-денс коллективын. Сцена вылын нимыз - Атилла. Яратэ Сарапулын поттэм сурез. Емышъёс пӧлысь кельшо хурма, банан но персик. Лыдӟиськыны дырыз уг кыльы ке но, учкылэ Бредбериез, Кингез но Пикулез. Кельшо кузь сьӧд йырсиё нылъёс, кузьмалля кема сылӥсь гербер сяськосты, хризантемаосты но - соос кемагес сылозы но Андреез тодазы вайытозы. Берло дыре тодмоссэ шумпоттылэ горшокъёсын будӥсь сяськаосын: вандэм сяська - кулэм сяська, шуэ. Ялкарон минутъёсы, луо ке соос, яратэ дораз телевизор азьын пукыны. Сериалъёс пӧлысь учкылэ "Крестная мать" фильмез но детективъёсты. Тележанръёс пӧлысь ярагес комедия. Яратэ чебер крезьгуръёсты, радиоез кылзыны. Адӟонтэм каре тамак зынэз но адямилэсь визьтэм но ляб луэмзэ. Стриптиз возьматъям сяна, Москваысь психолого-социальной институтлэн витетӥ курсаз дышетске. Вордскиз Сарапулын, отын ик уло мумы-бубыосыз. Пӧрамъёс пӧлысь яратэ мемиезлэсь мыльымзэ. - Андрей мар шуизы анай-атайёсыд, стриптиз возьматонын ужамдэ тодыса? - Соос адӟизы мынэсьтым ужам гожъямъёсме. Паймизы но тыршизы валаны. Бадӟым тау соослы. - Мар со сыӵе стриптиз? - Ожеговлэн словаряз тазьы валэктэмын: крезьгуръя кылиськон. Мон стриптизёр ӧвӧл, стриптизэс эктӥсь. Эктонлэн берпуметӥ люкетэз - стрингозь (ул дӥсёзь) кылиськон. Стриптизёр аслэсьтыз мугорзэ учкыны, яратыны кулэ. Монэ золгес ӝуато учкисьёслэн пиштӥсь синъёссы. Секыт, залын пукисьёсын ог-огдэ уд валаськы ке, нош огкыл шедьтыкум ке, укыр дӥсьтӥсь луыны быгатӥсько. - Тӥ понна мар со дӥсьтон? - Со оргазмлы кельшись мылкыд. Умой сцена, чебер интеръер, крезьгурлэн чылкыт шудэмез, капчи мылкыдо адямиос - соку ӧжытак стрингеным но шудыны быгатӥсько. Но ноку уг возьматъяськы яратонлы кылдытэм интыосме, со сцена понна ӧвӧл. - Стриптизлэнн кыӵе куронъёсыз вань? - Ми - актёръёс, сцена вылын асьмелэсь образмес кылдытӥськом. Котькудӥзлэн аслаз амалъёсыз, фишкаосыз. - Мар со фишка? - - Актёрлэн ужан амалыз, выросъёсыз (движениез), яке тодмо выросъёсты ас сямен возьматон. - Тӥляд фишкады? - Залын пукисьёсын ужан. Мон быгатӥсько учкисьёс пӧлысь нылашез киям (серекъя) нуллыны. Одӥг пол аукись кышномуртэз ки вылам ӝутӥ, бергатӥ, пуктӥ - со мынэсьтым быдэс йырлы ӝужытгес вылэм. Таӵе дыръя возьытэ усьыны медад шедьы шуыса. Шуом, выльысь сое киын нуллоно луисько. Сценалэн аслаз куронъёсыз. Чиньы-пыдыд ке но тӥяськемын, кутскем возьматонэз одно быдэстоно. Та нуналъёсы "Ижевск" шулдыртон комплексын эктӥ. Валась калык люкаськемын вал. Мыным удалтӥз чебер эктыны, вырыны быгатӥсь нылашен ужаны. Мылкыды бугыртӥськиз. Нылэз пукон интыяз келяса, адӟытонлэсь берпуметӥ люкетъёссэ возьматъяны ӧдъяй. Лӧптэм мылкыдын синучконъёслэсь лэсьтэм борддор вылэ зӥбиськи, нош со пилиськиз. Мылкыд куашказ. Вылаз ик, тыбырме вандӥськем. Таӵе югдурысь потыны быгатонлык кулэ, профессионализм. Сценалэн куронъёсызъя учкись тынэсьтыд шуге-леке сюремдэ медаз адӟы. Со тынад сюлмаськонъёсыд. - Ӵем-а пумиськыло таӵе учыръёс? - Пумиськыло. Огпол ӝутскем мылкыдын стрингелэсь бирдыоссэ пертчылӥ но, со сярысь вунэтӥськем. Берытскыкум стринге куашканы кутскиз. Соку мон позыртӥськи, чебер выросъёсын озьы юмокысь потыны быгатӥ мылкыды нош бурдъяськиз. - Андрей, тӥ дышетскиды стриптизлы? - Солы уг дышетско, кыӵе ке элементъёсызлы гинэ ке шат. Мугордэ яратытэк номыр уз пӧрмы. Соин одно ик салонъёстӥ, солярийёстӥ ветлоно. Аслэсьтыд имидждэ- образдэ кылдытоно. Но со ӧжыт, аслэсьтыд уждэ ӧд ке яраты, ӧд ке гажа. - Ваньмыз-а адямиос стриптиз шоры огкадь учко? - Котькудӥзлэн аслаз малпанъёсыз. Ӵемысь кылӥськом чурыт, вӧсь карись кылъёсты. Луылэ озьы но: золгес юэмъёс костюм, пыд борды кырмисько. Быгатыны кулэ астэ озьы пуктыны: клиент медам вожзэ потты, соку ик возьматоно солы вылӥынгес луэмдэ. Стриптиз медаз укша кырсь марлы ке, соин ик бордад йӧтылыны лэзёно ӧвӧл. Жаль потыса верасько, асьме дорын стриптизэз проституциен огазеяло. Лыдъяло, коньдон тырид ке, котьмар даурты отӥяз. Стриптиз асьме калык понна выль. Воргоронъёслэн сцена вылын эктэмзы тужгес уг кельшы пиосмуртъёслы. Тросэз соос милемлы вӧсь карись кылъёс верало, нош асьсэос учкыса сыло. Вань адӟытон ӵоже одно черекъялозы, но уз кошкелэ. Психологиысь мон тодӥсько: лек адями мукетъёсызлэсь лексэ гинэ синйылтэ. Мон малпасько, номеръёсмы но кельшо, но соос возьдаськисько зэмос мылкыдзэс сое возьматыны. Учкемез уг ке поты кошкы ук, малы артэ пукисьёслэсь мылкыдзэс куашкатонэз? Тазьы вырисьёс асьэлэсь улӥ культуразэс возьмато. - Андрей, улонын профессиен герӟаськем шуг-секытъёс кылдо-а? - Дышоно уин ужанлы, ялкароно луэ нуназе. Кырӟась артист аслэсьтыз куаразэ, вылтуссэ эскере, огшоры эктӥсь йырзэ, ымнырзэ, костюмзэ учке. Стриптизёр, репетициосы ветлэм сяна, костюмъёсты малпа, имиджез, стилез бордын ужа. Душе ӵемысь ветлоно, мугорез кремъёсын зырано. Азьло таин ӧй вырылы, но сцена косэ. Аслэсьтыд быгатонъёстэ возьматыку тон бордысь омыре ческыт зын мед лӧсъяськоз. Имиджез кылдытонлы уждунлэн бадӟым люкетэз кошке. Кышномуртъёслэн ужан пыдкутчанзы сю витьтон доллар сылэ. Парикъёс, дэремъёс - витьтон долларлэсь ятыр. Соос одӥген гинэ уг тырмо ай. Быдэсак гардероб октоно. - Кызьы тӥ улӥськоды сценалэн палэназ? - Ӵукна нырысьсэ сизьым часын султӥсько, чай юисько, кык-куинь бутерброд сиисько. Коркась ужъёсты лэсьтӥсько но вылльысь изьыны выдӥсько. Кыкетӥзэ сайкасько дас одӥг-дас кык яке дас куинь час котырын. Соку кӧт тырымон тыкисько. Ӝыт берпуметӥзэ сиськисько возьматон азьын куинь-ньыль час азьло. Мае оскалтэме потэ, ваньзэ сиисько. Мынтӥсько сомында, кӧняез ужаны уз люкеты. Ваньмызлэн аслаз куронъёсыз, нылъёс тани ӝыт ик усьытозязы сисько, изьыны кӧт тырыса выдо ни. - Кызьы кылдӥз "Искусители" стрип-денс? - Сыӵе ним сётӥзы милемды гажасьёс. Кутскыкумы ми куинь воргоронъёс вал, берлогес бордамы нылъёсты кутӥм. Нош али ми даслэсь тросгес. - Андрей, тӥледлы кин ке юрттэ-а? - Мынам туж трос эшъёсы. Имиджме кылдытонын тыршо "Вера Макс", "Ирина" салонъёсын, костюм кылдытыны но юрттӥсьёс трос. Эшъёстэк мынам номыри ӧй пӧрмысал, соос ик городъёстӥ ветлыны транспорт шедьто. Уже шоры учкыса возьмало выль вормонъёсме. - Адямиосты национальностья люкиськод-а? Шуом, ӟучъёс удмуртъёслэсь умойгес, нош бигеръёс... - Син вандэмъя но ку буёлъя адями сярысь кылдэм малпан - серемес. Адямилэн ымнырыз шуш, нош лулпушез чебер луыны быгатэ. Котькыӵе чечы посудаын но тэкитэсь пуньы пумиськылэ. Пӧртэм калык пӧлын но котькыӵеез адямиос вань. Удмуртия пыдло интыяськем улос. Мон уг вераськы со умойтэм шуыса. Татын но ӟечез вань. Калыклэн шӧдонэз, валанэз чылкытгес, мылкыдаз чеберъяськемез уг шӧдӥськы. Адямиос эктэмлы быдэ чабо, мыняло. Сюлэмзэс вырӟытэммы понна кин ке юон кузьма, кин ке - уксё: дас манетысен кутскыса, пумтэм лыдпусозь. Со - "чаевойёс". Данъяськисько - мынам искусствое пиосмуртъёслы кельше ке. Соос куро асьсэ нылъёссылы эктыны. - Кыӵе городъёсын тӥ эктӥськоды? - Глазовын, Воткинскын, Сарапулын, Екатеринбургын но Сочиын. Кык толэзьлы огпол ветлӥсько Москвае. Отын милям кӧня ке ужан интыосмы вань. Улӥ заведениосысен кутскыса, вылӥегес но вылӥегес ӝутскиськом. Америкаысь тодмо артистъёс тани кабакъёсын ужаны кутскылӥзы, милям но Москваын озьыгес ик луэ. - Шоркаре улыны кошкемды уг поты-а? - Луонлык луиз ке - ширто. Но соку дасяськоно луоз выль шуг-секытъёслы. - Кыӵе? - Тодмотэм бадӟым город. Укыр дуно улон, сиён-юонэз но вераса. Адямиос чурытэсь, котькуд вамышед понна уксё басьтыны дасесь. Ваньмыз вузаське, ваньмыз басьтӥське. Таӵе улонлы, бизнеслы дышыны кулэ. - Москваын учкисьёс мукетэсьгес-а? - Котькыӵе учкисьлэн бадӟымесь куронъёсыз. Но Москваын пиосмурт но кышномурт стриптиз одӥг пагӟа вылын сылэ. Соин ужаны каньылгес. Тодӥськод, нокинлы валэктоно ӧвӧл, тынад ужед умой шуыса, аслэсьтыд быгатонлыкъёстэ гинэ возьматы. Отын шӧдо тыршемез, но астэ яратытыны соосты секытгес луэ. Москвае ветлэмелы быдэ азьланезлы выль кужымен, ужан мылкыдын бертӥсько. - Андрей, тӥ вань улондэс стриптизёр ӧй вал, дыр, ук. Кытын азьло ужады? - Одӥг толэзьтэк дас ар ужай калыкез дышетон но ватсаса тодон-валан сётон удысын. Ӝутски директорлэн методической ужъя воштӥсез дорозь. - Малы кошкиды? - Школаын бадӟымесь куронъёс, нош уждунэз ичи. Вить интыын ужаса, уждунэ толэзяз тямыс сю витьтон манетозь люкаськылӥз. Дас часын ӵукна кошкыса, ӝыт кызь кык-кызь куинь часозь ышылӥ. Вылаз ик со пичи уждунэз дырыз дыръя ӧз сётъялэ. Аслад коньдонэныд окытлоно луылӥз методической литература. Ачим ӧй кошкы. Мыным кельше вал адямиосын ужаны, яратылӥ школаысь эшъёсме. Кивалтӥсьлы ярамтэ дышетӥсь пумит умойтэм гожтэт "пӧраны" косӥзы. Соглаш ӧй луы, монэ куризы кошкыны. Кылдэ юан: мар чылкытгес но мар кырсьгес? Мед мон кылиськонэн, но адямиослы шумпотон кузьмасько. Адскисьтэм шудонъёс монъя ӧвӧл. - Нош малы тӥ, Андрей, стриптизэ кошкиды? - Эшъёсы ӧтизы. Мон ньыль толэзь малпаськи, асме вормыны турттӥ. Та ужен возьдаськытэк вырыны быгато шуыса валаме бере гинэ вамыш лэсьтӥ. Школаез соку ик ӧй кушты. Ужай кык интыын. Куать часын ӵукна дорам вуыса, тямыс но ӝынылы дышетон интыям ветлылӥ. Ужаны быгатонлыкелы луыса гинэ нуназе час-час но ӝыны изьыны дыр висъялляй. - Нырысьсэ сцена вылэ потэмдэс тодӥськоды на-а? - Быдэс нунал куалекъяса улӥ. Мыным кулэ вал асме, аслэсьтым курданме вормыны. Сцена вылысен джинс бордам сьӧлтаськи, уси. Тырши, юмоке сюремме возьматытэк. Залын пукись эшъёсы берло веразы, учкисьёс усемме ӧвӧл синйылтӥллям. Нош мон сцена вылысь кошкем, бере гинэ чабонъёсты кылыса буйгатски. Куинетӥзэ сцена вылэ потыкум гинэ аслым оскыны кутски. Возьматонме быдтыса, адямиос со нуналэ монэ асэнызы эктыны куризы, нимысьтыз уксё тырыса. Укмыс курон вуиз. Таӵе эктонъёс быдэсъясько курисьлэн ӝӧк дораз яке нимаз кабинаын. Таӵе куронъёс шер луыло, дуныз бадӟым угось. (Серекъя). Огпол таӵе учыр но луиз. Кабинаын сюсьтыл ӝуа. Мылкыдыз бугыртӥськыса, нылаш йырзэ берлань кариз но, йырсиосыз ӝуаны кутскизы. - Азьланезлы кыӵе малпанъёсты? - Али мон кылдытӥсько эктон студия, вазиськыны быгатозы вань мылкыд карисьёс, арлыдзы шоры учкытэк. Андреен пумиськыкумы, стриптизэз адӟеме ӧй вал на, нош табере пияшлэсь ужамзэ адӟыса вань юанъёсы интыязы пуксизы. "Айвенго" клубе пырыкум ик адӟи ӝӧк сьӧрын пукись пиосмуртъёс азьын эктӥсь нылашез. Вылаз трусикез но бюстгальтерез гинэ кылемын вал ни, кӧня ке дыр ортчыса, берпуметӥ дӥсьёсыз усизы. Азяз гинэ сьӧд сяська суред кылиз. Пальпотӥсь ымнырыз шоры учкыса малпай, нылмурт ас выросъёсызлэсь шумпотон басьтэ шуыса. Адӟытонэз бере соин гримёрнойын пумиськи. Пайми лекъяськемезлы: - Огпол верай вал эн йӧтскылы бордам, ӧз вала, черектӥськоно луиз. Соку гинэ валай Андрейлэсь котькуд актёрлэн эктонын аслаз образэс шуэмзэ. Сцена вылын адями быдэсак воштӥське вылэм. Стрингъёс но син азям мукетгес пуксьылӥзы, нош со азьзэ ворсась бертӥз векчи возетэн маке гинэ вылэм,. Озьы ик пумиськыны кылдӥз "Трависти шоуысь" актёръёсын. Трависти трансвистит кыллэсь кылдэмын - нылкышно дӥсез нуллӥсь пиосмурт. Татысь пияшъёс сцена вылэ нылмурт дӥсьёсын потало. Огшоры улонын сое уг нулло ке но, озьы ке но, кышномурт выросъёс бордазы пыӵамын ни. Соосын артэ азьвыл ненекгес йӧтӥсь Андрей зэмос пиосмурт кадь адӟиськиз. О. Кожанова. *** Кышномуртъёслы тулыс мылкыд сяна Андрей сӥзе ӵемгес синучконэ учкылыны но вералляны: кыӵе мон чебер, пиосмуртлэсь мылкыдзэ бугыртыны, солы кельшыны быгатӥсь. Нылкышно ассэ утялтыны кулэ, воргорон соин артэ ассэ пиосмуртэн мед шӧдоз. Ӵемгес вералэ солы яратэмды, гажамды сярысь, ӟыгыръялэ, чупалллялэ. Ваньзэ тае воргорон быдэсак берыктоз тӥледлы. Удмурт Республикаысь Правительстволэн Тӧроезлэн воштӥсез сярысь Удмурт Республикалэн Президентэзлэн Указэз Удмурт Республикалэн Конституциезлэн 92-тӥ ёзэтысьтыз 6-тӥ люкетъя пуктӥсько: 1. Осколков Андрей Эдуардовичез юнматоно Удмурт Республикаысь Правительстволэн Тӧроезлы воштӥсе Удмурт Республикалэн Президентэз ужзэ быдэсъян вакытлы. 2. Та Указ кужыме пыре сое гожтэм нуналысен. Удмурт Республикалэн Президентэз А. А. Волков. Иж город, 2001-тӥ арын 28-тӥ феврале. � 31. Осколков Андрей Эдуардович Вордскиз 1964-тӥ арын 4-тӥ феврале Камбарка городын. Ӟуч. Дышетскемез вылӥ. 1986-тӥ арын йылпумъяз Ижысь механикая институтэз "корт вандон станокъёс но инструментъёс" специальностья. Россия Федерацилэн Правительствоысьтыз калык хозяйствоя академиын кылзӥсь. 1986-1987 - "Союзмашпроект" институтын отделэн кивалтӥсь, Иж город; 1987-1990 - Ижысь механикая заводын мастер, бюроен кивалтӥсь; 1990-1991 - "Лидер" кооперативын лэсьтӥськон ёзэн кивалтӥсь; 1991-1992 - акциосын "Аратон" фирмалэн коммерцияя директорез, Иж город; 1992-1996 - акциосын "АССО" огазеяськонлэн директорез, Иж город; 1996-1998 - "Холдинговая компания "АССО" ЗАО-лэн валтӥсь директорез, Иж город; 1998-1999 - "АССО" ФЭК ЗАО-лэн директорез, Иж город; 1999-2001 - "Удмуртнефтепродукт" ОАО-лэн валтӥсь директорез. Журналистъёсын пумиськонъёс Тамази Габричидзе: "Тудву уг кышкаты, но солы ӟеч дасяськоно" Кылем вторнике, 6-тӥ мартэ, журналистъёсын пумиськиз Удмурт Республикаысь Граждан оборона ужпумъёсъя но кышкыт югдуръёсъя кун комитетлэн кивалтӥсез Тамази Габричидзе. Люкаськемъёслы со мадиз тудвулэн кыӵе луэмез но солы дасяськемзы сярысь. Тулыс арлы быдэ вуэ, тудву кошке. Но туэ кыӵе со луоз? Куазез эскерисьёслэн лыдъямзыя, 10-11 ар ортчыса, ву огкадьгес но бадӟым луэ. Туэ шукрес ву кошкыны быгатоз. Малы ке шуоно, азьло аръёсын ӵошатыса, одӥг но ӝыны поллы тросгес лымы усемын, яке 60-70 сантиметр зӧкта. Озьыен, апреле куазь чутрак пӧсь, нуназе 10- 15 градус шуныт, кариськиз ке, тудву бадӟым изъян лэсьтыны быгатоз. Кызьы бен элькунмы солы дасяське? Удмуртиысь гидрометеоцетрлэн 8 станциосыз куазез чаклало (Иж, Воткинск, Сарапул, Можга, Глазов городъёсын, Игра посёлокын но Дэбес черкогуртын). Шуръёсты но выжъёсты эскерыны 11 постъёс кыдытэмын. Соос ужалозы Чупчи шур вылын (Глазов но Полом), Лоза (Игра), Вало (Вавож), Нылга (Нылга), Лумпунь (Шмыки гурт, Сюмси район), Адамка (Грах), Кама (Сарапул но Каракулино), Сӥва (Гавриловка гурт, Воткинск район) но Позимь шур (Ижевск). Иж шоркармы эшшо ватсаса вить постъёс лузы на: Иж шуръя Чернушка посёлокын, Люк шуръя - Шаберды посёлок, Позимъя - Кабаниха гурт но Сарапул сюрес вылысь выж. Тамази Георгиевичлэн ивортэмезъя, туэ март 1,5 градуслы шунытгес луоз. Лымшор районъёсын тудву кошкоз 10-тӥ-15-тӥ апреле, уй палан - 20-тӥ-25-тӥ апреле. шуръёсын ву 20-60 сантиметр кынмемын, нош музъем - 30-70 сантиметр. Шаерамы шудтэм учыръёслэсь утиськонъя тырмыт кутэмын нормативной актъёс но постановлениос, висъямын 560 сюрс манет коньдон. Со мыноз йӧэз пуштытъяны, постъёслэсь ужзэс радъяны, утён техника но оборудование басьтыны, адямиосты дышетыны но мукетызлы. Умоеныз ӵош озьы ик вераны кулэ, элькунысьтымы уноез тыметъёс тудвулы дасямтэ на. Соос вань Яр, Завьял, Вавож, Глазов, Пичи Пурга, Воткинск, Ува районъёсын. Али дыр вань на ваньзэ ӟеч-ӟеч дасяны. Г. Романов. Ӟечкылан Туэ 6-тӥ мартэ яратоно апаймылы Алевтина Михайловналы тырме 59 арес. Улэ со Можгаын, ужа ёрос библиотекаын. Война кутскон вакытэ вордӥськем ныллы туж секыт йӧтӥз няньтэк но сиёнтэк будыны. Атаез ожын быриз. Улон капчи ӧй вал война бырем бере но. Апаймы вань шуг-секытъёсты мемеенымы ӵош люкиз. Алевтина Михайловнаез ӟечкыласьком вордӥськем нуналэныз, сӥзиськом юн тазалык, капчи мылкыд, ваньзэ умойзэ гинэ, кема но шудбуро улон. Яратыса но гажаса Касьяновъёс, Лошкарёвъёс, Прокопьевъёс но Гоголевъёс. Вордӥськем нуналэныз ӟечкыласьком Алнаш ёросысь Туймыйыл гуртысь Раиса Егоровна Даниловаез. Бадӟым тау кареммы потэ тыныд нылпиосмес пыд вылазы султытыны юрттэмед понна. Кема аръёс ӵоже шудо но тазалыко улон сӥзиськом. Яратыса Лида но Галя апайёсыд. Арскын - куинь нуны. Кин уногес? Шулдыр ортчиз Ижысь Операя но балетъя театрын нылкышноосты ӟечкылан. Президент Александр Волков пусйиз уногес кышномуртъёслэсь берло дыре нуны вордыны дӥсьтэмзэс. Миым куинь пинал ваем кышномуртлы, Красногорск ёросысь вузкарисьлы Татьяна Васильевалы кузьмаз сяськаос, шудонъёс но чебер дӥськутлы коньдон. Кун Кенешлэн Тӧроез Игорь Семенов ӟечкыланэзлэсь бадӟым люкетсэ вераз удмурт сямен. Россилэн Президентэзлэн Приволжск округъя оскем муртэзлэн Удмурт Республикая валтӥсь инспекторез Сергей Чикуров кышноослы пальпотон кузьмаз таӵе кылъёсын: - Тӥляд чиданды пумтэм бадӟым, ми, воргоронъёс, асьмеды куддыръя умойтэм возиськом ке но. Доре бертӥськом кенешем дырлэсь бергес. Уждун ваиськом басьтоно бриллиантлэн дуныз сярысь ичигес. Бадӟым концертын йӧно шулдыръяськизы удмурт артистъёс но - Александр Перевозчиков, Геннадий Ганьков но мукетъёсыз. Кизилиос верало 19.03-25.03 Така (овен) 21.03-20.04 Тулыс вуиз! Ӵап дырыз кинэн ке тодматскыны? Коньдон ужпумъёсты умой мынозы: ӟеч барыш поттыны быгатоды. Вторнике выль ужъёс борды басьтӥськыны умой луоз. Огдыре мултэс трос лэсьтыны тыршиськоды, трос кужым кулэ каре дышетскон но. Соин ик лэсьтэ нырысь сыӵе ужез, кудӥз тӥледлы кельше. Ош (Телец) 21.04-21.05 Шумпотон ваёзы лушкем кусыпъёс. Но матысь дыре нылпи сярысь уд малпаськиське ке, чаклаське. Семьяяды ваньмыз умой луоз. Чаклаське ыштонъёслэсь, сюрес вылэ потанлэсь но таман возиське. Тросгес дырдэс висъялэ эшъёстылы, ӧте соосты куное. Арня нуналэз умойгес луоз огинын ортчытыса, калык пӧлы эн поталэ - уродэ сюрыны быгатоды. Эгызоос (Кыктоос, Близнецы) 22.05-21.06 Та нуналэ умой луоз гажам муртэныды пумиськон сярысь вераськыны. Нунал озьы ик тупа творчествоен вырыны. Вторнике удалтоз сюрес вылын. Нылъёс (пиос) шорады синмаськыса учкылозы. Умой ортчозы огкыл кутонъёс. Банкын, страховой компаниосын ужасьёс ӟеч барыш поттыны быгатозы. Субботае умой луысал шутэтскыны, вазьгес кӧлыны выдыны. Бадӟым давлениен курадӟисьёс тазалыксэс эскерыса мед возёзы. Кисло-кусло (Рак) 22.06-23.07 Тӥледлы оскозы кинлэн ке коньдонэныз кузёяськыны, но асьтэос бизнесэн выронлэсь возиське. Вторнике кулэ ивор шедьтоды. Уж дурады воштӥськонъёс ортчозы. Чакласькон ӧй люкетысал шофёръёслы, кышкыт тӥрлыкен ужасьёслы. Туж жаль, но шутэтскон нуналъёсы, тазалыкты лябӟемен, мылкыдды уродмоз. Та нуналэ эн чаклалэ операцие выдыны, мукет процедураос лэсьтыны. Пыэдлэсь утиськон понна, шунытгес дӥсяське, ӟеч сиське. Лев 24.07-23.08 Понедельнике быдэс нунал кельшисьтэм ужез быдэсъяно луоды, соин ик шулдыръяськыны дырды уз кыльы. Кыӵе ке арлыдо нылкышно тӥледлы ӟеч визь-кенеш сётоз. Мылкыддэс сӧрыны быгатозы осконтэм электроприборъёс - я тӥяськозы, я сутскозы. Коньдондэс пунэмен эн сётъялэ, асьтэос но эн кураське. Арня пумын коньдон ужпумъёсын чик вырытэк умойгес луысал. Субботае быгатонлыкъёстэс возьматыны ӟеч луонлык кылдоз. Нылмурт (Дева) 24.08-23.09 Тӥ понна таиз понедельник - шудо. Вань ужъёсты: квартира воштон, маке вузан- басьтон, банке коньдон понон, бызён-басьтон - ваньмыз вӧй вылтӥ кадь ортчоз. Ӵош ужась эшъёсыныды кусыптэс эн тӥялэ, керетонлэсь возиськыны тырше. Пятницае шудтэм учыръёс луыны быгатозы. Шутэтскон нуналъёсы асьтэды кужмысь ужаны эн косэ, со понна ик соос сётӥсько: кемагес кӧлон, инкуазе потан, шулдыръяськон понна. Весъёс 24.09-23.10 Арня кутскыку удалтоз бизнесменъёслы, юристъёслы, медикъёслы. Соослэн вань малпанъёссы быдэсмыны быгатозы. Будоз философиен, религиен, литератураен, наукаен тунсыкъяськон. Шумпоттэ асьтэды выль дӥсен. Нылкышноосын (пиосъёсын) кусыпъёсты сӧриськыны быгатозы. Шутэтскон нуналъёсы куное ветлэ, гажан мурттэс ӧте. Тазалыксэс чакласа возьыны кулэ сюлэменызы курадӟисьёс. Скорпион 24.10-22.11 Арня кутскыку ик тӥ син азьын луоды. Вакыт тупа дышетскыны. Матысь нуналъёсы улонады воштӥськонъёс луозы - гажан муртэныды кусыпъёсты юнмалозы. Ӵошатсконъёсын, эчешонъёсын вормоды. Трос кужымдэс быдтоно луоды, семья кусыпъёстэс радъян понна. Арня ӵоже трос лэсьтыса вуттоды, шутэтскон нуналъёсы но ужамды потоз. Ужалэ, но семьяды сярысь но эн вунэтэ. Ыбылӥськись (Стрелец) 23.11-21.12 Тӥ кемалась со сярысь малпаськиськоды ни, ваземзэ возьмаськоды? Вамыштэ пумитаз асьтэос! Соку асьтэос но валаса уд вуттэ, макем ӝог пӧрмоз ваньмыз. Ужлы дырды ичигес кылёз, но тулыс яратон понна малпамын ӧвӧл шат? Та нуналъёсы адямиосты асьтэлэн быгатонлыкъёсыныды паймытыны быгатоды. Возиське тодмотэм яке дырызлэсь ортчем сиёнъёсты веръямлэсь, со тазалыкты вылын шӧдӥськытэк уз кыльы. Сюро кеч (Козерог) 22.12-20.01 Удалтоз дышетӥсьёслы но дышетскисьёслы? Пиналъёс ӟеч отметкаосынызы шумпоттозы. Уж дурады ваньмыз огсыр мыноз. Сюлмаськон вайыны быгатозы нылпиосты яке кузпалды. Эн дыртэ сюрес вылын. Вӧтъёслы котьку оскыны уг яра. Коньдон ужпумъёсты умойскозы. Но соин валче шукрес ӝӧк дасятэк но яралоз - мултэс курыт сиён-юон тазалыкты вылын шӧдӥськыны быгатоз. Ву кисьтась (Водолей) 21.01-19.02 Понедельник тупа лыдъян-чотан техника басьтыны: яратон муртэн пумиськыны. Но средае ик маке басьтонлэсь но, кузпалэныды (туганэныды) керетонлэсь но возиськоно. Удалтоз искусствоен, литератураен тунсыкъяськись Водолейёслы. Пятницае туж умой ортчозы пӧртэм пумиськонъёс, кенешонъёс. Тӥледыз ваньмыз мылысь- кыдысь кылзозы. Ветлэ театре, концертэ, дискотекае, эн вунэтэ ӵыжы-выжыосты сярысь - соос тӥледды куное возьмало. Чорыгъёс (Рыбы) 20.02-20.03 Яратэ, яратэ, яратэ! Ваньмыз умой луоз. Кин ке но тунсыко уж ӵектоз - эн пумитъяське. Анай-атайёсыныды, зэм, валамтэос кылдыны быгатозы, но пумит кылдэс ӧд вералэ ке, керетытэк но ортчоз? Ӵош ужась эшъёсты тӥляд интыды шоры учкыло, соин ик пыдзэс пуктыло. Эскере дорады вуись иворез. Арня пумын туж жадёды, соин ик субботае шутэтске. Чаклаське мултэс вина, эмъюм юонлэсь. Валэктэ юрист Сэрегез дася Россиысь Кун Думаысь депутатлэн С. К. Смирновалэн юрттӥсез адвокат Лилия Шкляева Колхозлэсь юртсэ асэстысал Ӟечбуресь, гажано редакция! Туж оскыса вазиськисько тӥледлы, юанэлы лад-лад валэктон сётоды шуыса. Гожто тупен-тупен кыӵегес югдур. 1997-тӥ арысен улӥсько колхоз квартираын. Ачим колхозын ӧй ужа. Али пукисько, сюдӥсьме ыштэмен валче пенсия басьяса. Картэ ужаз колхозын. 1996-тӥ арын шудтэм учыре сюрыса бырыны шедиз. Быгато-а мон та квартираез асэстыны (приватизировать карыны)? Кытчы кулэ нырысь вазиськыны? С. Е. Алексеева. Пичи Пурга район, Сундуково гурт. Али данакез колхозъёс пӧрмытэмын пӧртэм эштосъёслы, огазеяськонъёслы, кооперативъёслы. Тӥледлы нырысь ик тодоно, кин луэ хозяйствоысь улон юртъёслэн кузёзы (собственниксы). Соя ик учконо ни, луоз-а тӥледлы огъя ваньбурез вузаны, уз-а. Валэктон сётозы ёросысь администрациын. Аръёсы "ышизы" Мон пенсионер 4 классэз быдтыса, колхозын ужай. Пенсие потыкум шуизы: 15 аресысен ужаме стаже тырме вуж законъя. Выль законъя армие ветлэм 3 арме кутӥзы, "Ышемын" 46-тӥ-47-тӥ аръёсы ужаме. Райсобесын санэ уг басьто адӟисьёслэсь (свидетельёслэсь) верамзэс. Колхозын сыӵе аръёс ӧвӧл шуо, районысь архивын - озьы ик. Ма каром? Валэктэ мыным. Анатолий Ефремов, 1934-тӥ арын вордскем маке. Пичи Пурга ёрос. Огъя пенсия "Россия Федерациын кун пенсиос сярысь" 1990-тӥ арын 20-тӥ ноябре кутэм Законъя тупатӥське тазьы: воргоронъёслы - 25 ар ужаса но 60 арес тырмыса; кышномуртъёслы - 20 ар ужаса но 55 арес тырмыса. Озьы вера 10-тӥ ёзэт (статья). Нош 11-тӥ ёзэт маде льготаосъя пенсие кошкон сярысь. Огъя ужам стаже пыре котькытын тыршем - коть колхозын, коть кооперативын. Со рабочий яке служащий ӧй вал ке но, кытын ке нимаз ужаз ке но, социальной страхование сюремын ке, стажез мынэ. Армиын но юдурез утён ёзъёсын ортчытэм вакыт озьы ик пыре огъя стаже. Ужам стажез возьматӥсь нырысетӥ документ лыдъяське ужан (трудовой) книжка. Ужам сярысь документъёс уг тырмо ке, югдурез эскере пенсия тупатонъя комиссия. Кулэ дыръяз со кылзэ адӟисьёслэсь верамзэс но. Тупамтэос потыку, югдурез эскере калыкез шугадӟонлэсь утёнъя вылӥезгес ёз. Атай шуон, пега Мон быземын ӧвӧл. Нылпиелэн атаез, нуны ваёнме тодыса пегӟиз. Милемыз кулэ ӧз кары. Солэсь алимент басьтон понна, мон вазиськыны турттӥсько вал. Алнашысь адвокат туж трос коньдон кулэ луоз шуиз. (10 сюрс манетлэсь трос). Валэктэ вал: эм ик-а сыӵе трос коньдон кулэ? Луоз-а мынам атай шуонлэсь алимент октэме? Трос-а коньдон кулэ вирлы ДНК анализ лэсьтыны? Тодэме потэ ваньзэ алимент басьтон сярысь. З. Света. Алнаш гурт. Алимент басьтон сярысь куронэн судэ вазиськыкуды, тӥледды мозмытозы кунлы судэн герӟаськем тыронъёслэсь. Озьы валэктэ РСФСР-лэн Граждан процессъёсъя кодексысьтыз 80-тӥ ёзэт. Курон (искен заявление) вӧзы кулэ: нылашлэн вордскем сярысь свидетельствоезлэн копиез, нылпиез тӥ вордӥськоды шуыса улон интыысь справка, вань ке ответчкилэн атай луэмез но уждунэз сярысь справка. Атай луэм сярысь вирлы ДНК анализ (экспертиза) лэсьто Москваын. Со сылэ 500 доллар пала. Али эскериське сыӵе ужез Удмуртиын быдэсъян сярысь ужпум. Бултыр но улонни Кык ар талэсь азьло кулӥз кышное. Табере шедьтӥ выль кузпал но выжоно кариськи со дӥне. Солэн аслаз юртъерез. Мынам квартирае ведомственной лыдъяське. Приватизация пыр аслым басьтыны уг луы. Малы ке шуоно, куать квартираен пу корка 50 процентлы вужмемын ни. Мон отысь кошки ке, ышоз-а квартирае? Та дыре улӥсько Дэбес ёросысь Лесагуртын улон интые Кезын. Аслым 62 арес, кышнолы - 61. В. Марьин. Бен, законъя сыӵе вуж квартираез приватизация пыр асьтэлы басьтыны уд быгатэ. Нош приватизацитэк регистрациысь куштӥськизы (выписаться кариськиды) ке, улон интыдэс ыштоды. АРХИВЫСЬ МАТЕРИАЛЪЁСЪЯ Удмуртия ХХ дауре 1982-тӥ ар Таиз ар калыклэн тодаз кылиз, дыр, улон-вылон котьма ласянь уродмыны кутскемен. Экономика куашканы ӧдъяз, социальной программаос ӧз быдэсъяське. КПСС-лэн ЦК-езлэн мае ортчем пленумез СССР-ын 1990-тӥ арозь сиён-юонъя программа юнматӥз. Чакламын вал агропромышленной огазеяськонъёс кылдытыны. Но та ужрадысь номыр ӧз пишмы. Кулэ вал бадӟымесь воштӥськонъёс ортчытыны. 11-тӥ ноябре кулӥз Леонид Ильич Брежнев. 12-тӥ ноябре КПСС-лэн ЦК-езлы Генеральной секретаре быръемын вал Юрий Владимирович Андропов. Кивалтонын кадръёс ласянь трос воштӥськонъёс ортчизы. Кутскемын вал кун, партийной но ужан дисциплинаез юнматыны, но жаляса верано луэ, озьы ик номыр ӧз пӧрмы. Андропов кутскиз ик вал юн дисциплина борды. Ноябре ортчиз КПСС-лэн ЦК-езлэн пленумез. Со эскериз, кызьы быдэсъясько 11-тӥ пятилеткалэн кык арлы чаклам ужпумъёсыз. Валтӥсь удысъёсъя планъёс ӧз быдэсъяське. Удмуртиысь ужаса улӥсьёс, СССР-лэн 60 ар тырмонэзлы социалистической ӵошатсконэ пыриськыса, ӟечгес ужаны тыршизы. "Ижсталь" объединениын Уралын нырысьсэ одӥг ар ӵоже пӧзьтэмын вал миллион тонна прокат. Ижевскысь радиозаводын поттыны кутскизы кассетаосын магнитофонъёс. Котькуд одӥг но ӝыны минутскын автопроизводстволэн конвейерысьтыз ваське вал "Иж" маркаен автомобиль. Воткинскысь машина поттон заводын лэсьтэмын куинь миллионэтӥез нылпи коляска но кутскемын пичиесь "Фея" мисьтаськон машинаос лэсьтыны. Якшур-Бодья ёросысь кирпич поттон завод шумпоттӥз лэсьтӥськисьёсты, силикат кирпич поттыса. Та вакытлы удмурт музъемысь кыскемын ни вал куатьтон одӥг миллион тонна му вӧй. Ижевскысь асфальт сюрес вуиз Татарстанозь. Удмурт АССР-ысь кун премия сётэмын "Ижсталь" объединениысь прокатной цехысь "блюминг" станлэн бригадаезлы, Можга ёросысь "Россия" эштосысь ю-нянь будэтонъя звенолы, Удмурт АССР-ысь телевидениея но радиовещаниея кун комитетлэн хорезлы но удмурт художниклы Пётр Васильевич Ёлкинлы. Е.УШАКОВА, Удмурт Республикаысь Выль историяя центрысь отделлэн начальникез. Можга ёросысь "Россия" колхозысь ю-нянь будэтонъя звено. Солы 1982-тӥ ар понна сётэмын УАССР-ысь кун премилэн лауреатэз. Нырысетӥ радын шораз звеньевойзы В.И.Романов. "Ижмаш" производственной объединенилэн мотопрозводствояз Л.И.Брежневлэн кулэменыз валче 13-тӥ мартэ ортчем траурной митингын. ПОЛИТИКА Арня ӵоже шаерын странаын дуннеын Та нуналъёсы Можгаын быръён кампания мынэ. Город аслыз мэр бырйыны кулэ. Тодады вайытӥськом, азьвылэз кивалтӥсь Игорь Николаевич Семёнов миым Кун Кенеше депутатэ быръемын вал, бӧрысь солы оскизы закон кылдытъясь ёзэн кивалтыны. Озьы ик вуоно субботае Кун Кенеше ватсаса быръёнъёс ортчозы. Кандидатъёс данак. Вакчияк вераса, вань кинэ бырйыны. Россилэн арня ӵоже улэм-вылэмез сярысь верано ке, нош ик абдратӥз Кун Дума. Отысь коммунистъёслэн фракцизы кемаласен кылпум поттылӥз ни Михаил Касьяновлэсь кабинетсэ отставкае келян сярысь. Кемалась ик ӧвӧл со борды "Единство" фракция итӥськиз. Тросэз понна та учыр туж паймымон но валантэм луиз. Ма, кызьы озьы? "Единстволэн" депутатъёсыз котьку но Кремльлы дурбасьтылӥзы ук. Аналитикъёслэн чакламзыя, таӵе югдур кылдӥз власть понна нюръяськонлэн ӟырдаменыз сэрен. Кужымзэс мертало силовой министерствоослэн но Президент администрацилэн азьветлӥсьёссы. "Единстволэн" Правительтвоез отставкае келян мылкыдыз но герӟаськемын, луоз, Александр Волошинлэн "шудонъёсыныз". Борис Ельцин вакытэ будэм но кыдам кивалтӥсь, со та вакытэ вань кужмыныз тырше аслэсьтыз кулэлыксэ Президентлы возьматыны. Ӝоген Кун Думаын куара сётон ортчоз. Чидалоз-а Михаил Касьяновлэн кабинетэз? Чидалоз, оско данакез политикъёс но ватсало на: та вакытэ Правительствоез воштон изъян гинэ ваёз нырысь ик странамылэн экономикаезлы, озьы ик дуннеысь мукет кунъёсын кусыпъёсмылы. Ислам фундаментализм нош ик сьӧсь луэмзэ возьматӥз. Та нуналъёсы Афганистанын талибъёс Буддалы сӥзем вашкала памятникъёсты куашкатӥзы. Та бадӟым из мугоръёс 1,5 сюрс ар талэсь азьло гурезез лусйыса лэсьтэмын но быдэс дуннелэн узырлыкеныз ялэмын вал. Нош талибъёс, осконзылы люкето шуыса, соосты пазьгыны малпазы. Быдэс дунне та кӧшкемыт ужлы пумитъяськиз, шуыны луоз. Талибъёслэн кивалтӥсьёсынызы пумиськылӥзы ООН-лэн Генеральной секретарез Кофи Аннан, ЮНЕСКО-ысь адямиос. Чурыт кылзэ вераз Россилэн Президентэз Владимир Путин но. Но пайдаез ӧз луы. Кызьы ивортэмын вал: Буддалэн из мугоръёсыз пуштытэмын. Но таин памятник понна нюръяськон ӧз йылпумъяськы на, шӧдске. Талибъёслы Япония вазиськиз ни, куашкатэм из чалепъёсты курыса. Соосты, пе, люкаса но огазеяса, оло, памятникез выльысь ӝутыны но вуоно поколениослы утьыны луоз. Малы бен талибъёс адӟемпотостэм каризы та из мугоръёсты? Соос оско исламлы, куинь бадӟым осконъёс пӧлысь одӥгезлы. Мукет амалэн вӧсяськисьёсты (христианство, буддизм) тушмонэн лыдъяло. Ю.Александрова. Валэктэ специалист Йӧл пыр кулон уг лыкты-а? Та вераськонэз ӝутыны муг сётӥз одӥг тодмоелэн кылъёсыз: скал, пе, вордӥськомы ке но, йӧлзэ ум сииське, городэ нуыса вузаськом. Скалзы лейкозэн висе. Нош басьтӥсь муртлы со кышкыт ӧвӧл-а? Пудо висён адямилы уз паласькы-а? Та шугъяськытӥсь юан ик вуттӥз газетлэсь корреспондентсэ Удмурт Республикаысь Пудо эмъянъя валтӥсь управление. Кенешиськом солэн кивалтӥсеныз Г.Н.Бурдовен. - Геннадий Николаевич, пудо висёнъёсъя олокыӵе но кышкыт ивор вуэ, уката ик Европаысь. Асьме дорын кыӵе югдур? - Удмуртиын улӥсьёсты мон туннэ оскытӥсько: вузкарыны лэзем интыосы но магазинъёсы вуэ ӟеч продукция. Ветеринарной служба та ласянь туж сак ужа. Но паласькись висён шедьтыны луоз сюрес дурын, магазин котырын вузкарисьёс пыр. Соослэсь сиён-юонзэс эскерись ӧвӧл. Шаерамы югдур умой ке но шуиськом, бускель республикаос, областьёс сярысь озьы вераны уг луы. Отын но татын пумиськыло туберкулёз, бруцелёз, сибирской язва, урмон (бешенство), хламедиоз. Адями чер пумен ӵемгес вӧлме пудо вылэ. Татарстанын, кылсярысь, 20 интыын кысконо скалъёслэсь шедьтэмын туберкулёз. Башкириын но Пермь областьын урмон висён пумиськылэ. Оренбург котырын но югдур ушъямон ӧвӧл, нош пудо сиён ӵапак отысь ваиськом. Висён вӧлме интыысь интые улыны кошкись калыкен но (миграция пыр). Та ласянь тужгес но эскериськоно луэ Кахахстанысь потэмъёслэсь. Отын алигес гинэ ящур вал, нош Волгоград но Саратов областьёсын - туберкулёз но бруцелёз. Тӥни малы ветеринария удыслы тужгес но сак луоно. Удмуртиез туннэ чылкыт регионъёс пӧлы пыртӥськом ке но (сюро таза пудоя), Сарапул районысь "Россия" СПК-ысь парсь вордон фермаын шараямын чума. Ялэмын карантин. Югдурез тупатон вылысь, кутӥсько пӧртэм ужрадъёс. Туннэ нокин но уз оскыты, Пичи Пургаын, Кичбаевоын но куд-ог музон комплексъёсын та выллем учыр уз пумиськы шуыса. Нош мугез одӥг: куке но соку азьмынӥсь фермаос али туж юн лябӟемын. Сиёнлы, коньдонлы ёрмыса, парсьёсты кытын но отын нунал пӧрат гинэ сюдо. Сютэм пудолэн пиез но нуйыр-найыр вордске, 2-3 нунал ортчыса кулэ. - Ветеринария ласянь ужез радъяны кыӵе шуг-секытэн пумиськоно луэ? - Уг тырмы коньдон. Озьы ке но, азямы ужпум пуктӥм республикаысь вань пудо уллёез араз 2 пол умой-умой эскерыны, тужгес но туберкулёз, лейкоз, бруцелёз ласянь. Палэнэ уг кылё нимаз хозяйствоос но. - Лейкозэн висись скал адямилэн тазалыкезлы маин кышкыт? - Та юанлы валэктон туннэ нуналозь умой-умой шедьтымтэ на. Но тодмо: лейкозлэн вирусэз, мугорамы йӧлэн ӵош пырыса, кужымез быдтэ, мукет висёнъёслы сюрес усьтэ. Уката но со шӧдӥське пичи пиналъёс вылын, медицинаын аллергия шуыса нимаське. Тӥни малы йӧлэз одно ик быректыны яке пастеризовать карыны кулэ. Соку лейкоз кышкыт ӧвӧл. Сӥль сярысь. Ветеринарной службаен эскерем сярысь пусэз (клеймоез) вань ке, озьыен, ваньмыз умой. Но кылем арын сюрс тонналэсь ятыр скал сӥль ярантэмен лыдъямын вал, со рыноке ӧз вуы. Ветеринаръёс-экспертъёс шуге-леке сюремлэсь утьыны быгатӥзы трос адямиез. Сӥль басьтыку, одно ик чаклано клеймозэ, отын куинь пумо пусэз луыны кулэ: И - республикалэн, ИИ - районлэн, ИИИ - врачлэн-экспертлэн. Рыноке ваем продукциез эшшо огпол кутскыса учке на отысь ветеринарной служба. "Кырсь" сӥль понна бадӟым коньдон тырон но мукет ужрадъёс тупатэмын. - Геннадий Николаевич, быдэ Европаез али кышкатэ Франциын но куд-ог мукет странаосын скалъёс пӧлын урмыса висёнлэн алямез, отысь сӥлез вузаны алэмын. Нош асьмеос огкыл гожтӥм Германиен... - Кунгож сьӧрысь сӥлез нырысьсэ ваим 1986-тӥ арын, соку ик урмон висён шараямын вал Великобританиын, бӧрысьгес - Ирландиын, Швециын... Франция алигес гинэ пыриз соос радэ. Кылдэм югдурез лыдэ басьтыса, туэ Удмурт Республикая поттоно луиз нимысьтыз приказ. Соя Францилэн 9 департаментысьтыз сӥль басьтыны но шаерамы вайыны алэмын. Та висён - огез кышкытэз но секытэз, вирусэз туж ӝог палаське адями борды. Висись пудоез шараяны шуг, сое валано, 5 ар ортчыса гинэ. Нош та дыр куспын кӧня мурт черлалоз? Адямилэн йырыз пороме, уммез быре, ветлыкуз шонаське. Собере йырвимыз кизерме но - кулэ. Милям службамы кунгож сьӧрысь ваем сӥлез туж сак эскере отын но, татысен но. Со быдэсак кошке переработкае, магазинъёсын, рынокын вузаны лэземын ӧвӧл. Скал сӥль али басьтӥськом Германиысь. Отын ужало Россиысь специалистъёс, эскеро пудо сиёнэз, музъемез, продукцилэсь кытын будэмзэ. Сослужба пыр ик тодмо луиз Франциын но Великобританиын вӧлмем висёнъёс сярысь. - Урмон висён Россиын ӧз пумиськылы на-а? - Ӧз. Но Украинаысь Ровенской областьын шедьтэмын ни. Кышкытлык бадӟым. Соин ик пудо вордон удыслы нимысьтыз саклык висъяно. Кунгож сьӧрысь асьмелы нокин но ӟеч сӥльзэ дунтэм дунын уз келя. - Эшшо одӥг висёнъя валэктондэс кылэм потэ на: хламедиоз. - Таиз висён венерической луэ, скаллы палаське адями мугорысь. Озьы ик туберкулёз но. Воткинск но Якшур-Бодья районъёсын шараямын вал сыӵе учыр. Ма шуод, асьмеос ваньмы улиськом одӥг музъем вылын, инкуазь вань улэпез понна - одӥг. Соин ик калыкез эмъян удыслы но, пудоез эмъясезлы но огкылысь, ӵош кариськыса ужано. Озьы гинэ дорамы вуись через вормод. - Геннадий Николаевич, берпуметӥез юанэ герӟаськемын нимысьтыз пудо-животлы вузаськись сиён-юон суретъёсын. Реклама зол мынэ. Нош та микродобавка шуонъёс тазалыкмы понна маин берытскозы? - Юанды шонер. Зэмен но, матысь дыре куд-огез соос вузкаронысь палэнтэмын луозы. Нырысь ик, коӵыш но пуны сиёнъёс. Соос лэсьтэмын висись пудо лыэн. Изэм лы, сӥль ватсамын мукет микродобавкаосы но. Таосыз поттэмын Россиын, но ватсэтъёсыз ваемын кунгож сьӧрысь. Мон малпамъя, гуртын вордоно пудолы, тылобурдолы сокем бадӟым кышкытлык уз вае, килограммен, тоннаен нокин уг сюды ук. Но чакласькыны кулэ. Л.Медведева. Геннадий Николаевич Бурдов, Удмурт Республикаысь пудо эмъян удысэн кивалтӥсь. Тодматӥськом Кун Кенеше депутатэ кандидатъёсын Владимир Щелконогов "Депутат лэсьтыны кулэ ваньзэ, калык ӟечгес мед улоз шуыса". В. П. Щелконогов. Владимир Щелконогов вордскиз 1948-тӥ арын 18-тӥ декабре Свердловск областьын крестьян семьяын. - 1971-тӥ ар - йылпумъяз Урал политехнической институтэз инженер- теплоэнергетик специальностья. - 1971-тӥ-1973-тӥ аръёс - службазэ нуиз Дальневосточной военной округын. Сое йылпумъяз старшой лейтенант луыса. 1973-тӥ арысен тырше электрокужымъя предприятиосын. Ужаны кутскиз турбинаосъя машинист луыса, производстволэсь вань тубатъёссэ ортчиз. 1990-тӥ арысен - акциосын "Удмуртэнерго" огазеяськонысь шуныт сётон ёзэн кивалтӥсь. Ужатозяз Владимир Щелконогов быгатӥз предприятиез выльдыны но йыг-йыг пыд йылаз ӝутыны. Урал улосысь та выллем предприятиос пӧлын луиз одӥгез устоез, азьмынӥсез. Владимир Щелконогов - Удмуртиысь дано энергетик. "Кенешлэн" ӝытэз Паймымон трос эшъёсыз вылэм "Кенеш" журналлэн. Удмурт кун филармоние тыраз калык люкаськиз: ижъёс, дэбесъёс, грахъёс, уваос... 28-тӥ феврале татын пусйизы журналлэсь 75 ар тырмонзэ. "Кенеш" журнал аслэсьтыз нимзэ вошъяз ке но (1935-тӥ арысен 1990-тӥ арозь со "Молот" шуыса нимаськиз), солэн быдэсъян ужпумез одӥг вал: удмурт писательёслэсь выль ужъёссэс печатлан, егит гожъясьёсын тодматон, литературалэсь, искусстволэсь кыӵе ӧретӥ азинскемзэс возьматон, выль произведениослы дунъет сётон. Литературно-художественной сяна, общественно- политической луэ бере, "Кенеш" палэнэ уг кельты мукет удысъёсыз но: тодмо политикъёсын, производствоысь азьмынӥсьёсын интервьюос сётылэ, синмаськымон адямиос сярысь очеркъёс печатла. Озьы ик наука но солэн бамъёсаз ас интызэ шедьтэ: татысь лыдӟыса, пӧртэм-пӧртэм учёнойёсмы сярысь тодӥськом. Журналлэн туннэ нуналыз, быдэстоно ужпумъёсыз сярысь мадиз солэн валтӥсь редакторез Петр Куликов. Ортчем сюрессэ тодэ вайытӥз критик, литературовед Александр Шкляев. Удмурт автономной областьлэн вить ар тырмонэзлы усьтӥськыса (кылдытӥзы сое Трофим Борисов но Куӟебай Герд), "Кенеш" журнал ас лыдӟисьёсыныз ӵош пӧртэм шуг-секыто, кожылӥсь сюресъёсыз ортчиз, нимзэ вошъяз, пытсаськылӥз, но туннэ нуналозь ас нимзэ-данзэ утиз. Туала "Кенешлэн" редакцияз 11 мурт ужа. Коллектив ог-огеныз тупаса, сюлмысь тырше. Журналлэсь пуштроссэ узырмытон, пӧртэмъян сярысь сюлмаське. Лыдӟисьёс доры выль сюресъёс утча. Кӧня ке пол поттӥзы ни удмурт кырӟанъёсын бичетъёс. Вакчиесь сценкаосын, пьесаосын, сценарийёсын, озьы ик юморлы сӥзем нимысьтыз номеръёс печатлазы. "Кенешлэн" ӝытаз коллективлы азьлань мыныны выль мылкыд, кужым сӥзьыса вераськиз Кун Кенешлэн Тӧроез Игорь Семенов. Ӟечкыласьёс уно гинэ вал. Соос пӧлын - министерствоослэн, пӧртэм огазеяськонъёслэн кивалтӥсьёссы, ёросъёсысь лыктэмъёс, газетчиос-журналистъёс. Бадӟым яке пичи кузьым, сяська вӧзы верам шуныт кыл кенешчиос понна кемалы вунонтэм кылёз. Та ӝытэ нимысьтыз сӥлы каремын вал "Кенешлэн" редакцияз ужась нылкышноос. "Поэзияя но критикая" отделлэн кивалтӥсезлэн Людмила Айтугановалы (Кутяновалы) сётӥзы Удмурт Республикаысь культура удысын дано ужась ним. Кыл кутӥсь секретарьлы Ольга Бородиналы - республикаысьтымы дано журналист ним. Печатья министерстволэн данъян грамотаосыныз пусъемын валтӥсь бухгалтер Галина Румянцева, корректор Любовь Александрова но компьютерен ужась Надежда Тырина. Сцена вылэ тубазы журналлэн авторъёсыз, геройёсыз но. Трросэзлы дасямын вылэм кузьымъёс. Нимысьтыз тау карыса, сцена вылэ ӧтизы "Кенеш" журналэз вӧлмытон понна тужгес юн сюлмаськисьёсты. Тани Лидия Степановна Кузьмина, Шаркан ёросысь Быги администрацилэн кивалтӥсезлэн воштӥсез, "Кенешлы" гожтӥськонэз гуртазы 40- 50 экземпляр котыре вуттылэ. Редакциез озьы ик шумпотто Балезиноысь Лидия Федоровна Иванова, Завьялысь Елизавета Ивановна Камашева но мукетъёсыз. Таӵе оскымон эшъёсызлы луыса, журналлэн тиражез туэ, кылем арын сярысь, трослы будӥз. Юбилейлы сӥзем ӝытэз нуыны, шулдыртыны юрттӥзы Удмурт театрысь артистъёс Ольга Чужанова, Вячеслав Байков, Ольга Зорина но Алефтина Корепанова, "Катанчи" театрысь Евгений Андреев но Андрей Ураськин, "Айкаысь" Светлана Смагина, Геннадй Кузнецов но Михаил Ворончихин, озьы ик - Геннадий Ганьков. "Кенеш" котькыӵе вакытэ кырӟанэн эшъяське вал. Соин ик та ӝыт крезьгуро пӧрмиз, калыкез шумпоттӥз. Т. Петрова. Тодматӥськом Кун Кенеше депутатэ кандидатъёсын Никитин Евгений Николаевич Ижевскысь быръёнъёсъя 2 номеро Чехов округъя депутатэ кандидат. Вордскиз 1954-тӥ арын 25-тӥ июле удмурт гуртын дышетӥсьлэн но нюлэс утисьлэн бадӟым семьяязы. Пиналысен ик азьветлӥсь, азьвалтӥсь луыса будӥз. 1973-тӥ арын отличиен йылпумъяз Можга городысь медучилищеез. Кӧня ке ужаз сьӧрлось пичи гуртын фельдшерын. Армиын батальонлэн медпунктэзлэн начальникез вал. 1981-тӥ арын отличиен быдэстӥз Ижевскысь мединститутын дышетсконзэ. Со дырысен ужа отын ик факультетской терапияя кафедраын, нырысь вал старшой лаборант, клинической ординатор, собере - ассистент, доцент. 1983-тӥ арысен Е. Н. Никитин терапевт луыса висиьёсты эмъя, консультациос сётылэ 1 Республиканской больницаын но мукет эмъян учреждениосын. Со вылӥ категориен врач- гематолог. Вир висёнъёсты эскере, соосты пайдаёгес эмъян амалъёс утча. Берло дыре тросгес саклык висъя шерамы железодефицитной малокровие вӧлмемлэсь мугъёссэ шараянлы но палэнтонлы. Алигес быдэстӥз та ужпумъя докторской диссертацизэ. Медакадемиысь эшъёсыныз ӵош калык пӧлы потаса, врач-тодосчи адӟе, макем уг тырмы гуртъёсын адямилэн тазалыкез сярысь сюлмаськон. Нош, кызьы тодмо, тазалык бордысь потэ калыклэн улон-вылонэзлэн ӟечлыкез, лучеберлыкез. Котырмес чылкыт но шулдыр кароно. Наркоманиез, йыружъёсыз палэнтоно. Ужась адями, будӥсь нылпиос сярысь сюлмаськон - нырысь интыын. Тазьы малпа Евгений Николаевич. Солэн аслаз но кык пиез будэ. Кузпалыз Нелли Алексеевна - врач, ужа асэныз артэ больницаын ик. Та ӟеч сюлэмо но капчи мылкыдо адями "Удмурт кенеш" огзеяськонлэн лекторез луэ. Висёнъёсыз алон-эмъян но тазалыкез утён пумысен визькетъёссэ кылыны луэ Удмурт радио пыр. Кун Кенешлэн депутатэз луыса таӵе быдэстоно ужпумъёсты нырысь интые пуктэ: - Республикамылэсь бюджетсэ кылдытӥсь экономикалэсь валтӥсь удысъёссэ, нырысь ик му вӧй поттонэз но мукет музъем узырлыкъёсты уже кутонэз, быдэсак син азяз возьыны кулэ асьме кун, государство. - Калыкез дунтэк эмъян но дышетон, тодон-валанъёс сётон вылысь луонлыкъёс кылдытоно. - Рабочийёслы, крестьянъёслы но бюджет удысын ужасьёслы кулэезъя уждун тыроно. - Вузаны сётоно ӧвӧл музъемез. - Ӝутыны уг яра ужаса улӥсьёслэн кисыязы шуккись дунъёсты, уката ик тыл но коммунальной услугаос понна тыронэз. Е. Н. Никитинэз Кун Кенеше депутатэ дэмла бырйисьёслэн группазы. Солэсь кандидатуразэ, программазэ умоен лыдъяло Удмурт Республикаысь Народно-патриотической союз, "Удмурт кенеш" огазеяськон, коммунистъёс, ветеранъёс но шерысьтымы тросэз ужась калык. Майбыр толъё Грах ёросъёсыысь улӥсьёс. Чагыр эстӥськон вуиз ини ёросысь уно гуртъёсы. Калыклэсь куронъёссэ ӝоггес быдэстыны юрттӥз ёросысь кенешлэн депутатэз Б. Фасахов. Адямиос бадӟым тау каремзэс верало газъя участоклэн кивалтӥсезлы В. Волковлы, ёросысь кивалтӥсьёслы. П. Николаев. Мороженой вузазы... дунтэк 8 Март азьын Бадӟым Пурга гуртын улӥсьёсты шумпоттӥз Игра райпо. Отын выль вӧл-вӧл магазин усьтӥскьиз. Табере отысь турлы вуз но, сиён-юон но басьтыны луоз. Нош магазинэз сӥё-дано уськом нуналэ пургаосты дунтэк мороженоен, конфетэн утялтӥзы. П. Николаев. В. С. Усковлы "Удмурт Республикаысь гурт удысысь дано ужась" сӥлы карон ним сётон сярысь Удмурт Республикалэн Президентэзлэн Указэз Гурт удысын вылӥ вормонъёс басьтэмез но трос аръёс ӵоже сюлмысь тыршемез понна "Удмурт Республикаысь гурт удысысь дано ужась" сӥлы карон ним сётоно Усков Валентин Семеновичлы - Игра ёрос администрацилэн йырызлы. Удмурт Республикалэн Президентэз А. А. Волков. Иж город, 2001-тӥ арын 28-тӥ феврале. � 32. Бюджетысь коньдон сярысь Кызьы кутӥське республикалэн казнаысьтыз коньдон, кытчы но кӧня со кошке? 2001-тӥ арлэн нырысетӥ декадаяз кутэмын 125,3 миллион манет яке март толэзьлы чакламлэн 35,2 процентэз. Со пӧлысь 39,8 миллионэз ыстэмын интыосысь бюджетэз юнматонэ: 32,3 миллион манет - дотациослы, 7,5 миллионэз - ссудаос висъянэ. Жилищно-коммунальной хозяйстволы та дыр ӵоже сётэмын 19,5 миллион манет. Отысь 10 миллионэз - Ижевсклы, Глазовлы - 5, Сарапуллы - 4,5 миллион манет. Куинетӥ интыын - гурт удыс. Бюджетысь солы висъямын 14,3 миллион манет. Отысь 10 миллионэз - эстӥськонлы, 1,3 миллионэз - будосъёсты утёнъя препаратъёслы, ӝыны миллионэз - крестьян но фермер хозяйствоослы, одӥг миллионэз - ӟеч кидыс уськытонлы. Капитальной вложениосы понэмын 15 миллион манет, автотранспортлы - 2 миллион, сомында ик - инкуазез но музъем узырлыкъёсты утёнъя удыслы. Социальной удыслы висъямын 10,4 миллион манет. Со быдэсак сямен кошкиз нылпи пособиосты тыронэ. Огмындагес коньдон басьтӥзы калыкез дышетон но эмъян удысъёс. Мартлэн нырысетӥ декадаяз нылпи пособиослы, ветеранъёслы но ӧлексы кылемъёслы юрттонъя федеральной бюджетысь коньдон ӧз вуы. И.Николаев. Таза ул! Пытьыос бус пӧлы медаз йыроме Ижысь СПИД-эн нюръяськонъя центре пыризы нылкышно но воргорон. Ог-огзылы туж тупало таосыд, синйылтӥ соку ик. Арлыдзыя 25-30 аресъемесь адӟисько, туссыя кыксы но синмаськымонэсь. Пуштрес йырсиё, валаса дӥсяськем нылкышно вӧзын ӝужыт, паськыт пельпумо воргорон ӵапак интыяз адӟиське. - СПИД-лы но РВ-лы вирез эскерыны луоз-а? - шыпытак юаз воргорон. - СПИД-лы - луоз, - пумитаз вазиз эмъясь но матэгес пуксьыны куриз. Валасько, муртъёслэсь куспазы вераськемзэс кылзыны умой ӧвӧл. Но, ма карод, амалтэк кылоно луи - центрысь ужась тодмоме возьмасько вал. Нылкышно воргоронлэсь ӧз кыльы, вӧзаз ик пуксиз, эшезлэсь киоссэ тып-тып кутӥз на. Соку валатски: иське, со ик яратонзэ эмъяны малпам. Та вискын эмъясь но воргоронлэсь юалляськыны ӧдъяз. - Наркоман-а? - Бен. - Ӵем-а бышкиськиськоды? - Нуналлы быдэ. - Иське, мугорды куре, сотэк уд быгатӥське. - Уг быгатӥськы. - Кышноосын улӥськоды-а? - Бен. - Кӧня нылкышноды? - Одӥг (малы ке серектӥз). - Нылпи шедёнлэсь, паласькись висёнъёслэсь кызьы ке утиськиськоды-а? - Котьку ум. Та пумиськон йырысьтым нокызьы ӧз кошкы ни. Со воргоронлэн но кышномуртлэн мӧзмыт тусъёссы али но син азям. Но та учыр сюлэмам эшшо но мургес пыӵаз, одӥг тодмое "наркоманъёсын" кушласькемез сярысь мадемез бере. - ?! Кызьы? Тон азьвыл наркоман вал? - Бен. Соку Ижысь Металлургъёслэн городоказы улӥськом на вал. Армиысь бертэме бере, азьвыл эшъёсы дортӥ юмшано, кожай, ваньзэс адӟеме потӥз, лэся. Ӵапак одӥгаз сыӵе ӝыт пуконъёс дыръя тодматски Сашаен. Кельшиз со мыным, тунсыко адями потӥз: визьмо вераське, трос тодэ. Ӝӧк вылысьтымы каньылэн бушась ӟенеликысь юонмес но веръяны пумитъяськиз: таид воксё юись шат, ас поннам малпай. Саша мукетъёсыз сярысь арлыдызъя трослы бадӟымгес вал, ог куамын аресъем адӟиськиз со. Оло, соин но ас бордаз кыскиз на монэ: кин уз шумпоты йӧн-йӧн эшлы. Бӧрысь Сашаен сюресъёсмы ӵемгес но ӵемгес вожвыл луылӥзы. Ӧй шӧды, кызьы соин туж матэ эшъяським. Ог нуналэ со монэ куное ӧтиз дораз. - Шонер ке валасько, со наркоман вылэм? - Бен. Саша дорын эшшо мукет пиосын тодматски на, со кадь ик наркоманъёсын. Таос монэ венен бышкиськыны кужмысь ӧз косэ, ӵектэмъяськизы гинэ. Зэмзэ вераса, мыным аслым тунсыко вал - мар со сыӵе? Бышкалтӥськи - кельшиз. Арня ортчыса, выльысь та юлтошъёсы пӧлы шеди - эшшо одӥг пол эскери. Собере эшшо но эшшо. - Валера, ӧд кышка-а соку, та суретэн веньлы воксё дышод шуыса? - Ми ӵемысь "винт" шуонэн бышкаським. - Ма со сыӵе? - Героинэз ацетонэн пӧзьтэм сурет. - Ма, Велера, тон оломае но тодӥськод вылэм! - Кин тодэ, наркотикъёсын эшласькон монэ, оло, воксё пӧлаз кыскысал, Сашаен луэм учыр монэ сокем ӧй кышкатысал ке. Одӥгаз сыӵе "шулдыръяськонъёсмы" дыръя солы туж урод луиз. Вирсэраз мултэс сурет лэзьыны шедьтэм. Соку ик давлениез ӝутскиз, лызэктӥз. "Скороез" ӧтьытэк ӧйлась. Мон соку сазьтӥськи кадь. Таӵе дыръя анай- атайдэ но тодад ваёд вылэм. - Шат та нуналысен ик героинлэсь куштӥськыны малпад? Нош ӵем-а озьы дырдэс ортчытъяды? - Оген пукылӥм ӝытлы быдэ сямен. Но бышкаськылӥм арняяз кык-куинь пол. - Кытысь басьяды наркотикъёсты? - Малпаськоды, соосты шедьтыны секыт? Туннэ котькуд сэрегын сямен вузало героинэз. Милям но тодмо интыосмы вал. Шугъяськонъёс кылдӥзы коньдонэн сэрен гинэ. Ма карод, лушкаськоно луылӥз. Мон та удысын пӧрмостэмгес адӟиськылӥ. Лушкам арбериосын вузкарыны гинэ яралляй. Телевизоръёс, магнитофонъёс ваньмыз ог 110 манет котыр сылылӥзы. - Малы? - 100 манетэз героинлы, 10 манетэз шприцъёс басьтыны кулэ луылӥз. Та бӧрсьы кык- куинь пол бышкиськи ик на. Ӧй чидалля курадӟемелы. Кужмы тырмысал-а меда огнам та висёнэн нюръяськыны - ӧйтӧд. Но соку мыным туж юрттӥз школаын ӵош дышетскем эше, та вакытэ со Медициная кун академиын дышетске ни вал. Юрттэт курыса, дӥняз ачим вазиськи. Со монэ валаз, самой секыт часъёсам вӧзам пукиз. - Валера, нош азьвыл "юлтошъёсыд" кытчы кариськизы? - Наркотикъёслэсь куштӥськемме тодэмзы бере но соос монэ мурт ӧз каре, тодӥсько. Ма ватонэз, али но одӥг-ог таосын пумиськылӥсько на, но туж шер. - ?! - Уг, уг. Уг бышкиськиськы ни. Тодӥсько ук, макем секыт бӧрысь солэсь куштӥськыны. Шӧдӥсько, Саша но мукетъёсыз но пиос куд-ог дыръя шорам вожъяськыса учкыло, та черлэсь мозмытскыны кужым шедьтӥ шуыса. *** Валера понна шумпотӥсько, дырыз дыръя со шедьтэм кужым та кышкыт висёнлэсь палэнскыны. Дырыз дыръя шедем солы юрттыны мылкыд карись эшез но. Оскисько, воргоронлы яратоно нылмуртэз но юрттӥз, шуыса. Ӵемгес пӧламы мед шедёзы вылэм таӵе сак, ӟеч сюлэмо адямиос. Угось наркомания - со эмъясьлэн гинэ сюлмаськонэз ӧвӧл, со ваньмылэн куректонмы. Сое вормыны луоно дэмен гинэ. Э.Кумачёва. Сюлэмшугъяськытӥсь югдур Пыӵал - со ӧвӧл кӧртӵал Вот улон-вылон-а?! Малы озьы шуоно луэ-а? Соин угось, туала вакытэ нокинэ но номырин но уд паймыты ни. Алигес тани кык кузя чорыганы яратӥсь воргоронъёс сьӧд пот тӥяны нюлэскы мынӥллям. Нюлэскы пырыса гинэ вутто но куаратэм пистолетъёсын ыбылӥськись пиос шоры дуак чукисько. Лӥялъёс вылэ пуктэм буш ӟенеликъёсты ыбыло вылэм егит пиос. Ӟенеликъёслэн жин-куан пазьгиськем куараоссы юнгес ӟузъясько вылэм, пистолетъёслэн сярысь. Шулӟектэм воргоронъёслы сьӧд пот тӥянэн йырин вылымтэ ни. Ыбылӥськисьёс мышсэс адӟемзылэсь азьло воргоронъёс кыштырак берлань вуж пытьыостӥзы город пала лобатӥллям. Дэймод угось, ӟенелик интые астэ но сачкытӥзы ке. Лымые согозы но соин ужез быриз. Адӟись-марась но уз луы. Кытысь шедьто егитъёс пӧртэм пыӵал тӥрлыкъёс? Котя туала вакытэ базарысь котькыӵе арбери но тӥрлык басьтыны луэ. Вузчиосын но соослэн медоосынызы, дилеръёсынызы огъя кыл гинэ шедьтыны быгаты. Куд-ог вузъёс, уката ик пыӵал тӥрлык пумысен базарын шара вераськисьёсты уд пумита. Малыез вератэк но валамон, дыр. Пыӵал - со кӧртчал ӧвӧл. Соин ик со выллем арбериосын вузкарисьёс туж лушкем выро. Та сярысь газетъёсысь но, ялонъёсысь но, Интернет пыр но, мукет удысъёсысь но иворъёс сётӥсь ӧвӧл. Озьы ик нокин но уг лыдъя, лыдъя ке но, уз вера, дыр, арлы быдэ кӧня пыӵал тӥрлык вузаське но кӧня табыш поттӥське. Нош туж тодэмед потӥз ке, куд-ог нимысьтыз огазеяськонъёсын но фирмаосын ужасьёслэсь яке Интернет пыр гинэ кӧня ке сумъям лыдпусъёс басьтыны луэ ик. Но со понна но суменак коньдон тырыны кулэ. Укыр мултэссэ юалляськыны ӧдъяськод ке, ас котырад тэбиньыны кутско, кытын улэмдэ юало но мукет со выллем лулвирсэръёсты зыгатӥсь юанъёс сётъяны кутско. Кышкыт. Мар ватонэз но веранэз, асьме шаерысь пӧртэм органъёсын ужасьёс, ӧнерчиос, кивалтӥсьёс - МВО, ФСБ - пыӵал тӥрлыкен лушкем вузкарон сярысь оскымон иворъёс но лыдпусъёс вераны уг ярато. Та пумысен юридической наукаосъя докторлэн Владимир Овчинскийлэн верамезъя, Россиын 1993-тӥ аре дас вить миллиард манетлы пыӵал тӥрлык вузамын (17,7 миллион доллар пала). Нош 1994-тӥ аре - 22 миллиард манетлы ини. Та лыдпусъёс туж пачкатыса верамын. Куд-ог оскымон ӧнерчиослэн лыдъямзыя, асьме странаын пыӵал тӥрлык арлы быдэ кӧня ке сю миллион долларъёслы вузаське. Та лыдпусъёс но куд-ог адямиослэсь лушкемен вузкаремзэс гинэ лыдэ басьтыса люкамын. Нош та сяна, вань на ук "пурысь" но "сьӧд" рынокъёс. Нош куд-ог государствоос кӧтсэс кышъяло пыӵал тӥрлык вузам чотын. Быдэс экономиказы со вылын гинэ возиське. Берло аръёсы Россиын гинэ пыӵал тӥрлыкен лушкемен вузкарон араз ог вить сю, куать сю миллион долларлы усе. Кытысь сомында пыӵал тӥрлык люкаське? Данакез со ыше армилэн складъёсысьтыз, ожгарчиослэн частьёсысьтызы, куд-ог кивалтӥсьёслэн нырулэменызы но мукет интыосысь но мукет мугъёсын. Пыӵал тӥрлыклэн дуныз угось огсыр но дуно сылэ. Кӧня сылэ бен "сьӧд" рынокын пыӵал тӥрлык? Револьвер "Наган" - ог 300 доллар; Макаровлэн пистолетэз (ПМ) - 500-1000 доллар; Пулялы тупатэм газ-пистолет (ПМ) - 200 доллар; Ӝог ыбылӥсь 5,45 калибръем пистолет (ПСМ) - 800-1300 доллар; Куаратэм пистолет (ПБ) - 1500-2500 доллар; Макаровлэн 12 патронъем пистолетэз (ПММ) - 1300-2000 доллар; Пистолет (ТТ) - 400-1200 доллар; Стечкинлэн пистолетэз (АПС) - 1500-3000 доллар; Пистолет "Глок-17" - 5000 доллар; Пистолет-пулемет ("Борз", "Иглз") - 200-300 доллар; Автомат АК-74 - 400-1000 доллар; Автомат АКА-47 - 1000-1500 доллар; Вакчиятэм автомат АКС - 800-1000 доллар; Винтовка (СВД) - 2000 доллар; Карабин "Тигр" - 1000 доллар; Куаратэм винтовка "Винторез" - 10-12 сюрс доллар; Автоматической винтовка (М-16) - 1000 доллар; Калашниковлэн ки пулемётэз (РПК) - 700 доллар; Калашниковлэн умоятэм пулемётэз (ПКМ) - 2000 доллар; Гранатомёт (АГС-17) "Пламя" - 1300-1500 доллар; Гранатомёт (ГП-25) - 1000 доллар; Гранатомёт "Муха" - 100 доллар; Гранатаос (Ф-1,РГД-5) - 50-100 доллар. Мар та вӧзы ватсалод на? Кинлэн кыӵе пыӵал тӥрлыклы кынарыз тырмоз, сыӵезэ ик бырйы но басьты. Кылем аре дасодӥг толэзь куспын гинэ кык но сизьым дасмос миллион йыружъёс лэсьтэмын. Та лыдпус шонерак йылаз-пумаз вуттымтэ на. Куд-ог ӧнерчиослэн верамзыя, йыружъёс куинь миллионлэсь ятыр лэсьтэмын. Нош мукет ӧнерчиослэн лыдъямзыя, та лыдпус ньыль поллы уногес. Озьыгес ик со луоз, дыр. Малы ке шуоно, Россиын котькуд тяп-ляп рэкетирлэн но кыӵе ке но пыӵал тӥрлыкез вань. Мар веранэз на, йыруж лэсьтӥсьёслэн радъям огазеяськонъёссы но пӧртэм группировкаос сярысь. Соослэн пыӵал тӥрлыксы данаклы ӟечгес но, тросгес но. ФСБ-лэн лыдпусъёсызъя Россиын улӥсьёс киын гинэ кык миллионлэсь ятыр пӧртэм пыӵал тӥрлык ватыса возиське. Ваньмыз вылӥ верам лыдпусъёс нош ог интыязы уг сыло. Пыӵал тӥрлыкез лушкан учыръёс Россиын арлы быдэ ог дас процентлы йыло. Со пӧлысь кызь вить, куамын процентэз пыӵал тӥрлык ялан выльдӥське но умоятӥське. Кибашлы адямиосмы асьмелэн угось туж трос. Нош со вие ик виясь вӧлдэтэз тупатъяны адямиос уг шедё. Паймод но бырод ява. Нош кин но малы пыӵал тӥрлык басьтэ но вуза? Нырысь ик йыруж лэсьтӥсь радъям огазеяськонъёс, собере огшоры йырвандӥсьёс, "пӧсь" интыосын улӥсьёс но огшоры адямиос. Соослэн тупен-тупен валэктэмзыя, пыӵал тӥрлык кулэ луэ астэ но семьядэ, аслэсьтыд дандэ но эриктэ утён понна. Сыӵе-а, мар-а ини та демократия шуонлэн йылолыз? Шорлыдын вераса гинэ но, Россиын пыӵал тӥрлык лушкем басьтӥсьёслэн лыдзы ог укмыс сю сюрс муртозь вуиз. Юнме шорысь шат пыӵал тӥрлык вузан-басьтон ог вить сю, куать сю миллион долларозь будӥз ини. Татчы уг пыры на пӧртэм боеприпасъёслэн дунзы. Озьы ик санэ басьтэмын ӧвӧл на "пурысь" но "сьӧд" рынокъёслэн тыршемзы. Угось "пурысь" рынокез саюлтыса возё кун кузёос но ӧнерчиос, соослы юрттӥсь чиновникъёс. Нош "сьӧд" рынокез капыртыса возё контрабандаен вырисьёс но соослэн "йыръёссы". Тае ваньзэ лыдэ басьтоно ке, кылем арын Россиын пыӵал тӥрлык вузан-басьтон куинь но тямыс миллиард долларозь вуиз. Озьы ке но, пыӵал тӥрлык вузан Россиын наркобизнеслэсь трослы бере кыле. Но мукетсэ но тунсыко мугез пусйытэк уг луы. Пыӵал тӥрлык вузан-басьтонлэн дэлетэз, огсыр табыш поттонэз, рентабельностез пайдаёгес луэ лушкем спирт поттонлэсь но проституциен выронлэсь. Пыӵал тӥрлык вузан рынокез сак чакласа возё йыруж лэсьтӥсь радъям огазеяськонъёслэн но пӧртэм группировкаослэн "йыръёссы". Оген та удысын ужаны туж кышкыт. Соосты ӝогак быдто яке ас ки улазы кыско пӧртэм огазеяськонъёс. МВД- лэн ивортэмезъя, Россиын пыӵал тӥрлык вузанъя но басьтонъя куинь сюрслэсь ятыр лушкем огазеяськонъёс тыршо. Тросэзлэн соослэн кун сьӧрысь огазеяськонъёсын кусыпъёссы тупатэмын. Пыӵал тӥрлыкен данакез вузкаро вылэм. Та удысын бере кылё таджикъёс гинэ. Но соослэн мукет удысын азинсконъёссы данаклы бадӟымгес. Соос угось сюлмысь тыршо наркобизнесын. Пусъем потэ мукетсэ но. Россиын гинэ али сизьым сю витьтон куать сюрс вагонлэсь ятыр пыӵал тӥрлык кылле. Сое лыдэ басьтон но утён понна уно аръёс кулэ луозы. Соин ик, та вие пыӵал тӥрлыклы ёрмисьёс уз луэ, дыр. Кӧня ке толэзь азьло Дальний Востокын пыӵал тӥрлыкен но пӧртэм боеприпасъёсын складъёслэсь пуштылэмъёссэс ӧд вунэтэ на, дыр. Юнме шат со малпаськоды? Куд-ог ӧнерчиослэн йылпумъянъёс лэсьтэмзыя, талэсь усто амал ӧвӧл на малпамын лушкам пыӵал тӥрлыклэсь но боеприпасъёслэсь лыдзэс ватыны. Тыл угось ваньзэ нюлыштэ. Серемес учыръёс но та удысын пумиськыло. Кылем арын возьматӥзы вал таӵе суредэз. Кема но усто ужамез, пыӵал тӥрлык возён складэз сак утемез но воземез понна, одӥг воинской частьысь прапорщикез пенсие сӥё-дано келязы. Нош со интые служить карыны лыктӥсь прапорщик, ӝажыос вылын кыллись пистолетъёслэсь ӟечлыксэс эскерыны малпаз. Сыномемын ӧвӧл-а, пе? Кӧня ке дасо пистолетъёсты вӧйын бекчее куштӥз но... ачиз, йырсазьзэ ыштыса, выж вылэ пограз. Ваньмыз пистолетъёс пулэсь но пластмассалэсь лэсьтэмын вылэм. Соос бекчеысь чиптэм-чаптэм вӧй вылэ лӧптӥзы уга. Озьы "сӥё-дано ужась" прапорщик, дас вить ар служить карытозяз, складысь вань пыӵал тӥрлыкез вузаса быдтӥське вылэм. Ярам коть, бер ке но, кырмыса вуттӥзы на. Тӥни озьы, кинъёс утьыны кулэ пыӵал тӥрлыкез, соос но укылтэмъяськыны кутско бере, мукетъёсызлэсь мар ӟечсэ витёнэз на. Пыӵал тӥрлыкез туж трос вузало лымшор палан. Та удысын, Чечня но Грузия куспын эркын ветлонэз дугдытэм бере, азьпала потӥз Ингушетия. Татын пыӵал тӥрлыкен вузкарон туж сабырлы но ӝот-ӝот радъямын. Кӧня адями таӵе ужен выре, бадӟым-а со огазеяськон, нокин уг тоды. Ӧнерчиослэн верамзыя, со огазеяськон государствоын государстволы пӧрмемын ини. Пыӵал тӥрлыкен вузкарись муртъёс асьсэды "батлакъёс" шуо. Пыӵал тӥрлыксы соослэн, Ингушетиысь МВД-ын ужасьёслэн сярысь, трослы умойгес но ӟечгес. "Батлакъёслэн" пыӵал тӥрлыксы али сомында люкаськемын, мылкыдзы луысал ке, соос туннэ ик правительствоез но сэрпалтыны быгатысалзы. Нош озьы уг луы. Пыӵал тӥрлык вузан угось туж бадӟым пайда вае. Кызьы шуо, ыжъёс но кесямтэ, кионъёс но васямтэ. Пыӵал тӥрлыксэс "батлакъёс" кытын гинэ уг вузало. Воштӥсь ёзъёс вузан магазинъёсын, лэсьтӥськон материалъёс вузан складъёсын но мукет интыосын. Валамон ини, вузкарон лушкемен радъямын. "Батлакъёслэсь" милициын ужасьёс но кышкаса уло. Соин ик соослы нокин уг люкеты. Нош калык чал-чал улэ. Йырвандӥсьёс туж яратыса басьто дас кык сюрс долларен сылӥсь "Винторез" шонер ыбылӥсь винтовкаосты. Сое угось дипломатэ но тэрытыны луэ. Кытысь вуэ пыӵал тӥрлык рыноке? Ӧнерчиослэн малпамзыя, куамын вить процент палаез со "сьӧд" рыноке вуэ, складъёсысь лушкаса. Со сяна, ог кызь вить процентэз - ож бусыосысь. Ог дас вить процентэз пыӵал тӥрлык заводъёсысь поттӥське, адямиосын бичаське. Сомында ик вуэ кунгож сьӧрысь Прибалтика но Кавказ пыртӥ. Кылемез люкаське на "следопытъёслэн" мултэс сюлмаськеменызы. Пыӵал тӥрлыкез вузан, та пумысен чурытэсь ужрадъёс кутон сярысь кагазъёс государствоын кык ар пала кыллё ини. Пыӵал тӥрлыкез лыдэ басьтон но утён сярысь правительство сӧзнэт но дасяз. Нош со кагазъёсты учкон но ужрадъёс кутон пумысен малы ке нокин но уг дырты. Та ужпумез сэрттыны-пертчыны, мукет сямен вераса, сомында пыӵал тӥрлыкез калык пӧлысь санэ басьтон, пусъён но лыдэ басьтон понна ог кызь вить ар кулэ луоз, пе. Ма кароно таӵе дыръя? "Сьӧд" рыноклэсь лушкем ужамзэ ӝот-ӝот радъяно, дыр. Со "сьӧд" медаз луы. Лушкемен вузкарон, уката ик пыӵал тӥрлыкен, нокытчы но - ожмаськонэ сяна - уз вутты. Сыӵе-а, таӵе-а мугъёсын, юнме шорысь асьме странаын одӥг час куспын кӧня ке дасо адямиос уг быро, дыр. Законъёсты ӟеч быдэсъясь но чаклась огшоры адямиос малы ке пыӵал тӥрлык басьтыны уг быгато. Нош йыруж лэсьтӥсьёс сое капчиен шедьто. Пыӵал тӥрлыкез вузан но басьтон сӧзнэтъёсты ӝегатскытэк ӧд ке радъя, та ужрадъёсты ӧд ке ӝогомыты, чурытэсь законъёс ӧд ке куты, таӵе секыт югдур уно аръёс уз воштӥськы на. Чылкак паймымон, малы та удысэн вырисьёс ымазы вӧй ӟузем муртъёс сямен, гань-гань уло? Зэмзэ но, кызьы шуо, мафия быронтэм-а, мар-а. Ф. Суворов. АРХИВЫСЬ МАТЕРИАЛЪЁСЪЯ Удмуртия ХХ дауре 1983-тӥ ар Июне сӥё-дано пусйизы Удмуртилэн Россия борды герӟаськемез дырысен 425 ар тырмонэз. Со вакыт республикалэсь знамязэ чеберъя ни вал куинь орден: Ленинлэн, Октябрь революцилэн но Калыкъёслэн эшъяськонзы орден. Калык хозяйствоысь 71-езлы азьмынӥсь ужасьлы сётӥзы Социалистической Ужысь Герой дано ним. 1983-тӥ арын вань мотоциклъёс пӧлысь котькуд куинетӥзэ потто вал Ижевскын, пӧйшуран пыӵалъёс пӧлысь - 89 процентсэ, редукторъёс пӧлысь - 70 процентсэ. Удмуртиын поттэм вузъёс кошкылӥзы дуннеысь 60 странаосы. Та арын поттэмын 6 миллион радиола, 2 миллион "Москвич". Ижевскысь механикая заводысь специалистъёслы спортсменъёслы но пӧйшурасьёслы усто пыӵал лэсьтыны кутскемзы понна сётэмын СССР-ысь Министръёслэн Кенешсылэн премиез. Инженеръёслы- конструкторъёслы В.А.Шиловлы но Я.М.Молодцовлы сётэмын 1983-тӥ ар понна Ленин комсомоллэн премиез. 1-тӥ августэ ужаны кутскиз СССР-лэн "Ужан коллективъёс но соослэн предприятиен кивалтонын интызы сярысь" Законэз. Ӵошатсконэ кыскемын вал Удмуртиысь но рабочийёс. Кылсярысь, "Ижстальын" та ӵошатсконэ нырысь ик пыриськиз В.Раков дурисьлэн бригадаез. Гурт хозяйствоын но адӟем карымон тыршизы. Кылсярысь, Сарапул ёросысь "Россия" но Завьял ёросысь "Путь Ильича" эштосъёсын котькуд гектарысь 30 центнерлэсь ятыргес ю тысь басьтэмын. Киясово ёросысь Ленин нимо но Глазов ёросысь "Кожильский" совхозъёсын котькуд скалзылэсь шорлыдын ичизэ 3500 килограмм йӧл кыскизы. Дырызлэсь вазь вуттэмын Удмуртиетӥ ортчись Уренгой�Помары�Ужгород газопровод. СССР-ысь ВДНХ-ын возьматэмын "Удмуртлес" огазеяськонлэн экспозициез но эстӥськон промышленностьысь калыклы поттэм вузъёс. Ижевскын вордӥськиз куать сю сюрсэтӥез улӥсь. Сарапулын пусйизы кавалеристкалэсь Н.А.Дуровалэсь вордскемез дырысен 200 ар тырмонзэ, соин валче сад мерттӥзы, музейын адӟытон ортчытӥзы но митингъёсы люкаськылӥзы. КПСС-лэн ЦК-езлэн решениезъя, Удмурт наркоманиен нюръяськон кутскиз. Соку ик ни кызь одӥг мурт наркоманэн лыдъямын, кык йыруж ӝутэмын, огез адями пытсэт сьӧры келямын. Ижевскысь кун медициная институтлы октябре тырмиз 50 ар. Вузлы сётэмын Калыкъёслэн эшъяськонзылэн орденэз. Со вакыт мединститутлэн куинь факультетъёсаз дышетскиз 2900 студент, нош ӝыны даур ӵоже дасямын 10257 специалист. Удмуртиын 9-тӥ но 10-тӥ пятилеткаосы гинэ нылпиослэн кулон учыръёсы 28,6 процентлы кулэсмиз, висьыса яке инвалид луыса пенсие потон учыръёс - 6 процентлы. Ар пумын Удмурт Республикаысь Культурая училищеысь "Зангари" ансамбль гастрольёсын потаз Монголие. Солы та аре ик сётэмын УАССР-лэн кун премиез. Е.УШАКОВА, Удмурт Республикаысь Выль историяя центрысь отделлэн кивалтӥсез. Ижевскысь мотоциклъёсты бичанъя валтӥсь конвейер. Ижевскысь мединститутлэн знамяез вылэ Калыкъёслэн эшъяськонзылы сӥзем орденэз быртто. Финн-угоръёсты висъясь кесэг Удмурт культурая нуналъёслэн кыкетӥ люкетсы радъяськиз Уни ёросын. Таиз интыяськемын Удмурт шаерен артэ. Вазен но, али но шӧдӥсько матысь кусыпъёс. Юнме-а асьме республикаын но, Киров область вӧзынгес, вань Уни нимо гуртъёс. Удмуртилы матынгес, удмуртилэсь кыдёкынгес Та музъем вылын 17-тӥ даурысен уло удмуртъёс. Озьы оскыто ӟуч тодосчиос (учёнойёс). Озьы кылдэмын Удмурт Порез (Пороз, дыр). Удмурт Сурвет, Пазял, Маги, Паром но музон гуртъёс. Уни ёрослэн уй палаз удмуртъёс каръяськизы ке, лымшор палаз вуизы вуж сямен вӧсяськись ӟучъёс (кернакъёс, староверъёс). Азьвыл соос улӥзы Москва но Владимир котырын, собере пегӟоно луизы кузёяськись черклэсь. Собере татӥын но пумен-пумен ӝутско черкъёс. "Россия" нимо вуж книга ивортэ: Глазов дорысен 90 иськемын вань вашкала дырысен вузкарись Уни гурт. 18-тӥ дауре со луиз Сарапул уездэ колония чотын пырись маке. Унигурт черкогуртлы (селолы) пӧрмиз 1762-тӥ арын. "Настольная книга о церквях и духовенстве Вятской губернии" гожтэ: 1762-тӥ арын 14-тӥ мартэ Кузонысь (Казаньысь) выль сямен пыртон контораысен черклы сётэмын инмарлы вӧсяськон книгаос. Гурт нимаськиз выль сямен пыртэм Гожня Уни но сюриз Малмыж ёросэ". Валля арын Кировын печатламын "Унинский район: история и современность" книга. Тӥни отын трос мадемын ортчем аръёс сярысь. 1812-тӥ арын униос но Наполеонлы пумит ожмаськиллям. Суровай, Пороз но музон волостьёсысь 290 мурт ожгарчиос луиллям. Мукетъёсыз коньдонэн но ваньбурен юрттӥллям французъёсын куашкатэм гуртъёсты ӝутыны. 1868-тӥ арын усьтӥське Порозысь больница, 1875-тӥ арын - Униысь аптека. Таиз маин пӧртэм вал 1897-тӥ арын ужаны кутскем библиотекаослэсь? Вить манетъем библиотекаос кыдытъяны кичӧлтӥз Ваткаысь тодмо адями А. П. Батуев. Со дэмлаз вить манет тыр книгаосын 3 сюрс библиотека усьтыны. Ӟеч малпан нырысь умой быдэсъяськиз, собере ӵакмиз. 1905-тӥ арын Униын кылдӥз сазь улонлы дурбасьтӥсь огазеяськон. Берлогес со огазеяськиз театрен. Син азяды пуктэлэ ай: артистъёс калыкез ӧтё юытэк улыны. Туннэ солы оскыны секыт. 1905-тӥ-1907-тӥ аръёсы Униысь крестьянъёс бугыръяськонэ пыриськиллям. Калыкез отчы лӧпкытъяллям дышетӥсьёс: Вылӥ Льӧмын Е. В. Шустов, Сретенская, Гожнялан М. Н. Шишкин, Князеваоын - К. И. Перескокова, Униын Ф. К. Баранов но В. А. Ермаков. Нялтас пусйыны кулэ: коммунизмлэн вжыосыз туннэ но татын юн шӧдӥсько. Таиз сярысь берлогес вералом ай. 1914-тӥ арын уноез униос выльысь пыӵал кутӥзы. Пороз волостьысь Кукуй гуртысь удмурт воргорон Григорий Павлович Леконцев басьтӥз соллдат понна тупатэм тужгес вылӥ наградаос - ваньзэ ньыль степенен Георгий орденъёсты. Пленэ сюрем трос немецъёс вуизы Уние Пленын шуод меда соосты? Тросэз семья кылдытӥзы, татысь адямиослэн юртъёсазы кунокуаын улӥзы. Вал асьсэлэн быдэсъясь (исполнительной) комитет шуонзы но. 1918-тӥ арлэн кутсконаз югдур копак бугырскиз. Кылдӥзы Советъёс. Ваньмыз ик соослы ӧз дурбасьтэ. Вал таза но лушкем бугыръяськонъёс. Та арын ик августэ Воткаын но Ижын мятеж ӝуткам сярысь ивор юн лӧпкытӥз Советлэсь тушмонъёссэ. Матэктоз тӧдьы отряд. Басьтӥз Сардыкез но Порозэз, ыктӥз Уни пала. Бугыръяськисьёслы пумуит городъёсты валтӥз Глазовлэн комендатэз Н. М. Токаев. Со выльысь улӟытӥз Советъёсты. Пермь паласен Колчак матэктэмен сэрен югдур выльысь лэчытомиз. Глазовысь горд организациос выжизы Уние. Огшоры адямиос марысь-мар ке, пегӟыны мед вуозы. 1919- тӥ арын гинэ улон ас ӧраз пыриз. Большевикъёс юнматскизы кема аръёслы. Униысь партячейкаен кивалтыны ӧдъяз И. Е. Гырдымов. Немецъёс выль война пуромытэм бере, униос выльысь султӥзы сьӧсьлы пумит. Князево сельсоветысь Юбер гуртысь Пётр Карачёв берлогес улӥз Кубаньын, отӥяз кошкиз фронтэ. 1943-тӥ арын та миномётчик пыриськиз Киев областьысь Чернобыль дорын ожмаськонэ. Гитлеровецъёс трос кужым люкаса омырскизы асьме батальон вылэ. Штаб сюре ни котыртэме. Сержант Карачёв асьмелэнъёсты атакае ӝутӥз, фашистъёслэсь пулемётсэс киултӥз но соосты азвесь зорен куноятӥз. Ӧтьымтэ куноос пегӟизы Тетерев шур сьӧры. 1943-тӥ арын 17-тӥ октябре Пётр Андрианович луиз Советской Союзлэн Героез. Удмурт Сурвай сельсоветысь Парон удмурт гуртысь И. А. Снигирев тушмон пулемётэз гуньдытӥз, со вылэ Александр Матросов сямен уськытскыса. Берлинысь рейхстаг вылэ кинюртэмзэ кельтӥз Уни районысь пи Ф. С. Тронин. Али Уни районын улэ ог 13 сюрс мурт. Котькуд дасэтӥез - удмурт. Ваньбур поттэ 19 бадӟым хозяйство, Пичи заводъёс дасяло вӧй, сӥль, кудӟытӥсьтэм юон. Кооперацияя комбинат пыже нянь, лэсьтэ макарон, колбаса. Милемды утялтыкузы пальпотӥзы: - Ӝӧк вылысь вань сиён-юон, аракы сянаез, асьмелэн. *** Районэн трос аръёс ӵоже кивалтэ ни асьсэлэн пизы - Пётр Михайлович Полянцев. Куасэн бызьылӥсь, кырӟась, арганчи. Вал интернатын воспитатель, райгазетын корреспондент, совхозын комсомол секретарь, комсомол обкомын но партилэн райкомаз инструктор. Огвакытэ солы дэмлазы Пичи Поломысь куашкам совхозэн кивалтыны. Азьвыл олокӧня директоръёс кошкиллям ни. Кезьыт декабрь толэзе татчы вуиз Полянцев. Сютэм пудо сюлэмез погыртымон бӧксэ. Силос но пызь сярысь вератэк ни, турын-куро но уг тырмы. Нош адямиосын мар луэмын? Кызез туннэ ик совхозысь кошкыны курисько. Кылемъёсыз пӧлысь куд- огез, паськыт гульымъёс, возьмаса гинэ уло: ку таиз кузё ӵемтоз но пегӟоз. Хозяйствоез нуонын ужамын ӧвӧл, та удыслы нимысьтыз дышетскымтэ - кошкыны кулэ. Мед шупчоз, совхозысь ваньбурез асьсэ куспын тарканы медаз люкеты. Пётр Михайлович арлыдоосын но кенешиз, егитъёсты но ӧз вунэты. Укылтэмъёс чаляк шӧдӥзы солэсь чурыт кылзэ но кужмо кизэ. Сюлмоос - адями сярысь сюлмаськемзэ. Куинь ар кулэ луиз совхозлы быдэс районын азьпала потыны. Егит директорлэн гадяз бырттӥзы орден. Полянцевез бырйылӥзы областьысь Советэ депутатэ. Россия Федерациысь калык депутатэ. Со вал пратилэн райкомезлэн нырысетӥ секретарез. 1997-тӥ арын луиз районысь администрацилэн йырыз. Ужан вискын йылпумъяз педагогикая институтэз, гурт удысъя (сельской хозяйствоя) институтэз, отличиен быдтӥз Москваысь Общественной наукаосъя академиез. Али быръемын областьысь Думае депутатэ, кивалтэ бюджетъя, коньдонъя но вытъя комиссиез. Пётр Михайлович туннэ но уг ваты компартилы матын луэмзэ. Районын пусъемын (регистрировать каремын) одӥг гинэ партилэн ёзэз - КПРФ-лэн. 80 коммунист огазеяськемын укмыс организацие. Фермер но крестьян хозяйствоос районын ӧз азинске. Нянь будэтэ но пудо вордэ 19 огъя хозяйство. Униын утемын потребкооперация, бытъя управление гуртъёсысь 14 пунктэз пыр кызь пумо юрттэт сётэ. *** Удмурт куноос вуылӥзы Астаркань (ӟуч сямен Астрахань) но Печкезь (Сибирь) гуртъёсы. Татысь уноез Глазовын но Ярын дышетскемын. Удмуртилы матын луэменызы, лэся, Удмурт шаерысь уй пал удмуртъёслэн висёнзы юн вӧлмемын. Данакез егитъёс удмурт сямен уг валало ни. Вордскем кыллы дышетон кемаласьгес аналтэмын. Усемгес мылкыдын кошки мон Униысь. Нош Ӟечезлы оскытэк улыны уг яра. Удмурт кыллы дышетон берло дас аръёсы умояз республикаысьтымы гуртъёсын но городъёсын но. Дыр вуоз но, асьмеос юрттыны быгатом бускель областьёсысь бӧлякъёсмы доры но. Со понна Нациосын ужан политикая но Калыкез дышетонъя министерствоос нуналмысь уж нуо. Алексей Шкляев. Удмурт Республикаысь Экономикая министерство ӧте нылпиосты школаосы нуны-вайыны автобусъёс висъянъя шара конкурсэ пыриськыны. Юанъёсын вазиськыны луоз таӵе адресъя: Иж город, Пушкин урам, 214 номеро юрт, Экономикая министерство, 78-тӥ комната но 25-00-22, 25-90-55 телефонъёсъя. Зарни гурезьёс ӧвӧл ни сизёно Саессэс пужалъяса ужаны кутсконо. В. М. Щекурин. Сюлэммес сётӥськом нылпиослы Ижевскысь нылпи садъёсын удмурт кылэз дышето кызь группаын но куать кружокын, ваньмыз - вить сю сизьымдон пинал. 12 номеро садын ужа нылпиосты ас культуразылы, кылзылы дышетон центр. Удмурт кылэз татын дышетэ куать группаысь сю куамын нылпи. 275-тӥ садын вить группаысь сю куамын вить пинал кылъя, историяя но удмурт культурая тодон-валан басьтэ. Национальной ужпумъёслы золгес саклы висъян понна, Ижевскын ортчиз удмурт кыллы дышетӥсь воспитательёс пӧлын конкурс. Ӵошатскон ортчиз кык турен. Нырысетӥяз удмурт кун университетысь дышетӥсьёс, Нылпи садъёсъя управлениысь но ёросъёсысь комиссие пырем специалистъёс воспитательёслэсь удмурт кылэз тодэмзэс-валамзэс эскеризы. Кыкетӥ тур нимаськиз "Сюлэмме сётӥсько нылпиослы". Ортчиз со нырысетӥ мартэ. Татчы пыриськиз вить воспитатель. Елена Петровна Калистратова, Первомай ёросысь 275 номеро нылпи садысь воспитатель. Ньыль ар гинэ ужа со дышетон удысын. Но та дыр куспын нылпиос но, мумы-бубыос но яратӥзы Елена Петровнаез. Раиса Петровна Чигвинцева, Ленин ёросысь, 215 номеро нылпи садысь воспитатель, пиналъёсын 1978-тӥ арысен ужа. Нылыз но анаезлэн сюрестӥз мынӥз, бырйиз дышетон удысэз. Надежда Андреевна Лебедева 1981-тӥ арысен ужа Устинов ёросысь 209 номеро нылпи садын. 1993-тӥ арысен дышетэ пналъёсты удмурт кыллы. Надежда Андреевна лыдъя: анай кылэз, сямъёсты-йылолъёсты, историез тодэм сяна, нылпиос данъяськыны кулэ удмурт луэменызы. Алевтина Яковлевна Кожевникова, Индустриальной ёросысь 208 номеро нылпи садын ужась. Дас куать ар ӵоже ни со ас шунытсэ нылпиослы кузьма. Татьяна Александровна Маркова ужа Октябрь ёросысь 207 номеро нылпи садын. Нылпиосыз удмурт кыллы дышетэ 1995-тӥ арысен. Гожъя чебересь кылбуръёс но кырӟанъёс. Воспитательёс пӧлын радъямын вал пӧртэм ӵошатсконъёс. Люкаськемъёс азьын асьсэды асьсэос но ушъязы, удмурт история но культура удысысь юанъёслы валэктонъёс сётӥзы. Психолог Татьяна Ивановна Алексеева тодыны тыршиз нылпиослэсь лулпушсэс валамзэс- шӧдэмзэс. Эшъёсынызы валче воспитательёс сцена вылын пуктӥзы удмурт шудонъёсты. Нылпи изьтон гурез но соос кырӟаса возьматыны кулэ вал. Радиозаводысь Егитъёслэн центразы данак куноос люкаськемын вал, соос пӧлын пукизы шаерысьтымы дано адямиос. Тросэз сцена вылысен ас мылкыдзэс веразы. Ваньмыз пӧлысь висъяськиз Кузьма Иванович Куликовлэн историяя но литературая институтлэн (УРО РАН) кивалтӥсезлэн кылъёсыз: - Тямыстонэтӥ аръёсы, удмурт движение азинскыны кутскон вакытэ, нылпиосыз вордскем кылзылы дышетон ужпумез ӝутӥмы. Соку одӥгез полковник шуиз: "Тон мар турттӥськод, нылпиос берло ог-огзэс бодыосын мед жугозы-а, мар-а?" Пӧрмиз мукет сямен. Кылэз дышетон удмуртъёслы но ӟучъёслы ог-огзэс умойгес валаны юрттэ. Сюлме пырись кылъёс веразы Удмурт кун университетысь дышетӥсьёс Тамара Ивановна Зеленина но Алла Николаевна Утехина. Синкылиостэк учкыны ӧм быгатэ, пе, пальпотӥсь нылпиос шоры. Адӟиське, кызьы соос ярато удмурт кылэз. Шумпотӥськом, вуоно поколение таӵе яратӥсь но лякыт киосын шуыса. Оскиськом: ӝоген ваньзэс ик пиналъёсыз удмурт кыллы дышетом. Конкурсын вормиз Татьяна Александровна Маркова, солы сётӥзы визьмо дышетӥсь ним. Кыкетӥ интыез басьтӥз Елена Петровна Калистратова - егит воспитатель. Мукетъёсызлы мусо, сюлмо, небыт воспитатель ним сётӥзы. Ваньзэсты соосты кузьымъёсын но коньдон премиосын пусйизы. О.Кожанова. Сӥлы каризы Кылемаз удмурт арня нуналэ Пичи Пурга ёросысь лыдӟиськон юртын туж шуныт пумиськон ортчиз - ёросысь дано ветеранъёслэн хорзы ас дораз куное ӧтчаз Улӥнь Юри гуртысь пукон корка ветлӥсьёсты. Татын ик аслаз выль кылбуръёсыныз тодматӥз Улӥнь Юри гуртын вордскем, будэм, али Пичи Пургалан улӥсь кышномурт Васса Васильева. Васса апаез сӥлы карыса вераськизы матысь эшъёсыз, гуртоосыз. Та пумиськонэ ик ветлӥзы вуж моньяос, баграш-биграос. Вуж моньяос Васса Александровналэн кылъёсызъя туж чебер кырӟан кылдытӥллям. Пумиськонэ лыктэмъёслы ӟеч кылъёссэ вераз Пичи Пурга ёрос кивалтэтлэн тӧроезлэн воштӥсез Валентина Ильинична Панфилова но. Н.Шутова. Толэз келялозы "Удмурт кенеш" огазеяськонлэн Ижысь Индустриальной ёросысь ёзэз тэк уг улы - ортчытъя данак тунсыко ужрадъёс. Таяз учыре 18-тӥ мартэ толэз келянлы сӥзем шулдыръяськон радъялоз Ижысь Авангард ульчаысь Кызьпу арамаын. Татын луоз трос тунсыкоез: мылкыд карисьёс пӧртэм шудонъёсы пыриськозы, валэн ворттылозы, ческыт мильым веръялозы. Соос понна ик ужалоз буфет. Толэз келянэ лыктэмъёсты шулдыртозы шаерысьтымы культурая училищеысь "Инвугур", "Зарни крезь", "Восточный" культура юртысь "Инвожо" ансамбльёс. Шулдыръяськон кутскоз нуназе дас кык часын. Е.Максимова. Тӧроын - 100 нунал Сомында кивалтэ ни Удмуртилэн парламентэныз Игорь Николаевич Семенов. - Тыршисько сыӵе мылкыдын но кужымен, кызьы дышемын мон ужаны котькыӵе удысын, - шуиз со журналистъёсын пумиськонэз дыръя. Мар бен лэсьтыны вуттӥз ни Кун Кенешлэн Тӧроез та дыр ӵоже? Кун Кенешлэн огез валтӥсь ужез - законъёсты дасян но юнматон, кутэмын ньыльдонлэсь уно пӧртэм законъёслэн актъёссы. Прокурорлэн пумит луэмезъя, куд- ог воштонъёс пыртэмын Удмуртилэн Конституцияз. Асьме депутатъёс туж дыраз кутӥзы сюрес понна тыронъёс тупатон сярысь законэз. Куд- ог улосъёсын сыӵе законэз кутыны ӝегазы, соин ик сюресъя фондъёс туж бадӟым ыштонъёс адӟизы, валэктӥз И. Семенов. Кылсярысь, Башкортостанын сыӵе ыштонъёс 5 миллиард тыр люкаськизы, Екатеринбургын - 2,5 миллиард манет. Матысь дыре Кун Кенешлэн сессияз эскеремын луозы Президентлэн А. Волковлэн кӧня ке ӵектонъёсыз. Огез герӟаськемын Кышкытлыклэсь утиськонъя советлэн ужаменыз, мукетыз Федерацияя Советэ Удмуртиысь адямиосыз быръёнэн. Кун Кенешлэн Александр Волков дыръя кылдытэм командаез туж быгатыса но радызъя ужа, шуиз И. Семенов. Озьы ке но, парламентлэн Тӧроез вератэк ӧз чида таӵе умойтэм учырез: куд-ог депутатъёс, пе, сессиосы ветлыны аналско. 100 депутат пӧлысь одӥг ужан нуналзэс но ӧз келялэ 21-ез. Игорь Николаевич палэнэ ӧз кельты Можгаын ортчоно быръёнъёсты но. Кызьы тодмо ини отын 18 мартэ бырйыны кулэ ёрос администрацилэсь кивалтӥсьсэ. - Мыным уг кельшы, - шуиз И. Семенов, - малы та ужрадэз куд-ог журналистъёс, кылсярысь, ГТРК-ысь, нош ик сьӧдманы кутскизы. Быръёнъёсын валче одно ик мынэсьтым нимме но поттылыны кутско. Журналистъёс таӵе юанъёс но сётъязы: - Мар вылез луоз Кун Кенешлэн ужан радаз? - Ваньмыз со тупен-тупен учкемын Удмуртилэн Конституцияз, - шуиз И. Семенов. - Кун Кенешлэн быдэстоно ужъёсыз пӧлы кельтэмын эскерон функциосыз. Та ужез азьланяз пыр-почгес но чурытгес нуоно. Кылсярысь, золгес чакласькыса возёно Правительствоен кутэм программаосты. Туннэ нуналлы соос 22 пала ини. - Мар тӥ асьтэлы сӥзьысалды? - Та бадӟым ужын чиданэ гинэ мед тырмоз. Оскисько: Президент, Правительство но Кун Кенеш куспын валамтэос уз кылдылэ. - Мар ке сярысь тӥ жаляды-а 100 нунал ӵоже? - Таиз юан мон понна витьымтэ шорысь. Берло аръёсы туж зол, лэся, Можга борды биниськиськем. Со сярысь гинэ шат жалясько. Но дыр ортчемъя, Ижевсклы но дышо, вылды. Пичиеныз нылыным али татын улӥсько ни. Югдур озьы тупамъя, мон Кун Кенешлэн Тӧроез луи. Карьера сярысь ноку но ӧй малпаськылы ке но. Улонэлэн сыӵе воштӥськоназ бадӟым инты басьтӥз туала Президентмы, со монэ та удысэн кивалтонэ ӵектӥз, нош тросэз депутатъёс солэсь малпанзэ умоен лыдъязы. Т. Банникова. Сударыни! Швейная фабрика "Зангари" поздравляет вас с наступлением весны! Приглашаем посетить наш фирменный магазин при фабрике (в субботу скидка на 5 %) и расширенную продажу пальто 15 марта в ДК "Ижмаш" с 10 до 18 часов. Тел.для справок 71-09-73. Удмурт Республикаысь Кун Кенеш мур куректэмзэ вера Кун Кенешлэн депутатэзлы Николай Семенович Сычевлы анаез улонысь кошкемен валче. Кун Кенешысь Аппаратын ужасьёслэн кенешоназы эскеремын вал азьвыл сётэм ужъёсты быдэсъян. Кылсярысь, мар кароно 17 номеро училищеен, кызьы радъяно Правительствоен, районъёсысь но городъёсысь администрациосын, Советъёсын, Думаосын кусыпъёсты. Кун Кенешлэн Тӧроез Игорь Семёнов нимысьтыз саклык висъяз Удмуртиысь суредасьёслэсь ужъёссэс утёнлы. Куд-ог ужбергатӥсьёс татын кузь коньдон жильдо, нош асьсэос суредасьёс ёрмыса уло. Учкемын куд-ог программаосты быдэсъян. Удмуртиын соос кызьлэсь уноез ужало кадь, нош коньдон ичи висъямен, пайдазы сокем уг шӧдӥськы на. Ялан ужась комиссиослэн тӧрооссы ивортӥзы выль законъёс дасян бордын тыршемзэс. Тодматӥськом Кун Кенеше депутатэ кандидатъёсын Депутатэ кандидат Л.Е.Зайцева Туала депутатъёс пӧлын вань предприятиослэн кивалтӥсьёссы, ужбергатӥсьёс, медицина удысын тыршисьёс, но ӧвӧл калыкез дышетонысь быръемъёс. Школаосын выльдӥськон ортчытон понна кулэ та ужез туж ӟеч тодӥсь-валась дышетӥсь. Ижысь 69 номеро шор ёзо школаысь коллектив депутатэ кандидатэ ӵектӥз Зайцева Любовь Евлампиевнаез. Со вордскиз 1954-тӥ арын Сюмси ёросын, бадӟым удмурт семьяын, пичиысен ас вылаз шӧмъяз крестьян ужез. Удмурт кун университетэз йылпумъяса, кызь вить ар ӵоже тырше ини школаын. Ужаз математикалы дышетӥсь, завуч луыса, нош али со 69 номеро школалэн директорез. Любовь Евлампиевналы сётэмын Калыкез дышетонысь отличник ним, со - Удмурт Республикаысь дано дышетӥсь. Школаын со сярысь шуо: "Со милям "зарнимы". Ноку тэк уг пукы, ялан выльзэ утча". Россия Федерацилэн Конституциез луонлык кылдытэ котькудӥзлы укмыс классъем образование басьтыны но, кун сое вань калык пӧлы вӧлмытыны кулэ. Пиналъёсын котькуд нунал пумиськылӥсьёс ӟеч валало нылпиосын, егитъёсын, семьяен герӟаськем ужпумъёсты. Школалэн директорез Зайцева нимаз уг висъя городлэсь но республикалэсь ужпумъёссэ, тырше соосты огъя сэрттыны-пертчыны. Политикае со мынэ калыклэсь куронъёссэ, кулэяськонъёссэ быдэстон понна, школаосын выльдӥськон мед юрттоз нылпиосмылэсь будон сюрессэс ӟеч ӧретӥ ӧръяны. Любовь Евлампиевна быръёнъёсы мыныса оске: 69 но 19 номеро школаослы матын улӥсьёс быръёнъёсын одно ик куаразэс сётозы Зайцева Любовь Евлампиевналы. АРХИВЫСЬ МАТЕРИАЛЪЁСЪЯ Удмуртия ХХ дауре 1984-тӥ ар 9-тӥ феврале кулӥз Юрий Владимирович Андропов. Со интые пуксиз 72 аресъем Константин Устинович Черненко. Выльысь пересь муртлэн вылӥ кивалтонэ лыктэмез соку ик возьматӥз, номыр но вылез уз кылды шуыса. 4-тӥ мартэ ортчизы СССР-ысь Вылӥ Кенеше быръёнъёс. Удмуртиын быръёнъёсы пыриськизы 99,9 процентэз бырйисьёс. Республикамылэсь 16 депутатъёс пӧлын вал андан пӧзьтӥсь, токарь, лэсьтӥськись но тракторист. УАССР-ысь Вылӥ Кенешлэн 200 депутатъёсыз пӧлысь 102-ез быръемын вал рабочийёс но колхозникъёс. Мартэ тырмиз 25 ар калык дружинаосты кылдытэм дырысен. Дружинаослэн лыдзы 130-озь вуиз, отчы пыриськизы 78 сюрс дружинникъёс, нуналлы быдэ урамъёсы потазы ог 1900 кузя. Малпаны кулэ ни вал, соос чотын гинэ но йыруж кулэсмоз шуыса. Бен, куд-ог дыръя алон учыръёс луыло вал ке но, ваньмыз со лэсьтӥськиз ньӧмыз понна гинэ. КПСС-лэн ЦК-езлэн апреле ортчем пленумаз общеобразовательной но профессиосъя школаосын реформаос ортчытон сярысь постановление кутэмын. Со реформаосты ортчытонэз быдэстоно вал 1990-тӥ арозь. Воштӥськонъёс кутскизы Удмуртиын но. Со вакыт шор ёзо дышетон удысын ужаз 30 сюрс дышетӥсь, соос пӧлын: СССР-ысь калык дышетӥсь - 1 мурт, РСФСР-ысь дано дышетӥсь - 31, УАССР-ысь дано дышетӥсь - 87, 1318-эз калыкез дышетонъя отличникъёс, 91-ез СССР-ысь дышетонъя отличникъёс. 30-тӥ сентябре БАМ-ез со паласен но та паласен лэсьтӥсьёс пумиськизы Чита областьын. Лена шур дурысен Амурозь чугун сюрес кыстӥськиз 3100 иськем. Ужазы отын Удмуртиысь комсомолецъёс но. Ижевскысь механикая заводын тросэн поттыны кутскемын пневматикая пистолетъёс но винтовкаос, Иж-34М но Иж-35М спорт пистолетъёс. Феврале Парижын ортчиз нылкышноослэн дуннеысь чемпионатсы, асьме команда отын ыбылӥськиз Ижевскын поттэм "4Би-6" винтовкаен. Калык куспо адӟытонын та винтовкалы сётэмын вал зарни медаль. Умоен лыдъямын Иж-2126 выль легковой машиналэн выль моделез. 1984-тӥ арын гурт хозяйствоосын выль сямен кутскизы музъемез гырыны - плоскорезной амалэн. Со кӧнялы ке юрттӥз удалтэм ю тысь басьтыны. Та ласянь умоен пусйыны кулэ Можга ёросысь "Заря", Балезино ёросысь Мичурин нимо колхозъёсты, Пичи Пурга ёросысь УАССР-лы 10 ар нимо но Сарапул ёросысь "Удмуртский" совхозъёсты. Но данакез гурт хозяйствоос таки ӝутскыны ӧз быгатэ. 1984-тӥ арын УАССР-лэсь кун премизэ басьтӥзы Сарапул электрогенератор производственной объединенилэн 3 номеро фрезер цехысьтыз бригада, Ува ёросысь "Дружба" эштосысь Кӧс Видзи фермаысь скал кыскисьёс но поэт Николай Семёнович Байтеряков. Мартэ Завьялово лесхозын ужасьёс ВДНХ-ын возьматъязы асьсэ киосын лэсьтэм кызьпу туйлэсь лэсьтэм арбериоссэс. Апреле Сарапулысь историяя но культурая музейын возьматэмын Быдӟым Отечественной ож дыръя Ленинградысь Ломоносовоысь, Петродворецысь, Пушкиноысь но Павловскысь музейёсысь-дворецъёсысь Сарапулэ ваем экспонатъёсты. Нимазы со адӟытонэз "Утем шедевръёс" шуыса. Сентябре Олимпиадаын ньыль пол чемпионка Галина Кулакова Калык куспо наградазэ - Олимпийской ордензэ басьтӥз. Со сётэмын спортын быдӟым азинсконъёс понна. Г.Кулаковалэн ӵошатсконъёсы пыриськыса куасэн ортчем сюресэз 120 сюрс километр люкаськем, со экваторетӥ куинь пол котырскымон люкаське. Е.УШАОВА, Удмурт Республикаысь Выль историяя центрысь отделлэн начальникез. Ижевскысь калык дружинникъёслэн слётазы. Со сӥземын дружинаосты кылдытэм дырысен 25 ар тырмонлы. Паллянысен буре: А.Н.Стрижов, А.Б.Шилов, Ю.Р.Крутовских но Г.С.Вихарева. Соослы сётэмын "За отличную службу по охране общественного порядка" медаль. Г.А.Кулакова. Аръёс но адямиос Шаермес утисез тушмонэн лыдъязы Алнаш ёросысь Кузьымгуртын Быдӟым Отечественной ожысь ветеран кык гинэ вань на - Оськин Николай Степанович. Мон Миклагаен одӥг урамын будӥ. Со вал Кузьымгуртысь нырысетӥез комбайнер. Дышетскись пинал, гужем каникулъёсы дыръя, солы юрттӥськылӥ. Егитъёс вошъяськылӥзы Миклагайлы, адӟем карыны тыршылӥзы. Но огнуналэ быдэс Кузьымгурт люкаськиз Оськинъёслэн корказы доры. Калык пӧлын кылӥськизы шыпыртэм кыъёс: Миклаез, пленэ сюрылэмез понна, вить арлы, пе, пукто, гепеушникъёс али ик сьӧразы нуозы, пе, ыжъёссэс, кеноссэс но вузалозы, шуо. Нылпиоссы пичиен но пересьёссы ванен гинэ, лэся, корказэс но скалзэс уг талало... Вить ар ортчыса, Оськин берытскиз, выльысь комбайнэн ужаны кутскиз. Властьёс сое ӧз ни йӧтылэ. Но Быдӟым Отечественной оже ветлэмен но ӧз лыдъялэ, нокыӵе сӥё-дано ужрадъёсы ӧз ӧтьылэ. медаль яке орден басьтон сярысь малпан ик ӧй вал. Но гурт калык солы оскылӥз, ноку но урод кыл ӧз вера. Но Николай Степанович ас понназ туж куректылӥз. Одӥг пол мыным но вазиськемез вань. Тон, пе, городын дышетскиськод, оло, отын зэмлык вань, утча ай. КГБ-лэн ёзаз ветлыса юалляськи. Отын ужасьёс архивысь документъёсты бугыръяса ивортӥзы: Н. С. Оськин пленэ шедем, немецъёс сое мукет солдатъёсын ӵош котыртэм бере. Кияз автоматэз вылэм. Советской солдат, пе, озьы пленэ сётскыны кулэ ӧй вал. Со кулэ вылэм, патронъёссэ быдтытозь немецъёсты ыбылыны, нош берпуметӥеныз ассэ ыбыны. Оськин ассэ ачиз ыбыса, ӧй ке но кулысал, предателен, пе, ӧй лыдъяськысал. Оськинэз, пленэ кутыса, Франция келяло. Отын сое эшъёсыныз ӵош партизанъёслы пумит нюръяськыны косылӥллям. Но со быгатӥз ик партизанъёс пала выжыны. Ортчизы аръёс. Политика воштӥськиз. Демократия Николай Степановичлы ӟеч ивор ваиз - пленэ сюрылэмез понна сое янгыш ӧз каре ни, оже ветлэмъёс пӧлы пыртӥзы. Озьы со басьтӥз орден но, бадӟыматэм пенсия но. Кема возьмано луиз зэмлыкез. Миклаагайлэн тазалыкез табере ляб ни, но 78 аресъем ожгарчилэн кемагес уэмез потэ на. Та вакытэз котькызьы мед курлалозы, но со умой. Эрик ёромонлэсь дуногес, - шуэ ожгарчи Оськин. П. Кузнецов. Шаркан шӧртчиослэсь тӧл гинэ шӧртчи 1-тӥ�3-тӥ мартэ шаркан музъем быдэс шаерысьтымы пиналъёсты люказ. Татын нырысьсэ Президентлы сӥзем тол шудонъёс ортчизы. Кык нунал ӵоже 34 командаысь егит спортсменъёс куспын ӟырдыт нюръяськон мынӥз. Туэ отчы городъёсысь но пиналъёс пыриськизы. Шудонъёсты зэмос Олимпиадаез кадь усьтӥзы. Стадионэ Шаркан ёросысь сӥё- дано спортсменъёс В.Вахрушева но Ю.Шкляев потӥзы. Турлы буёло флагъёсын, транспарантъёсын чеберъям стадионэз котыртӥзы, нош Тол шудонъёслэсь тылзэс (факелзэс) ӝуатӥз Россилэн кык пол чемпионэз, Шаркан школаысь 10-тӥ классын дышетскись Коля Хохряков. Егит спортсменъёсты ӟечкылазы но вормонъёс сӥзизы Шаркан ёрос администрацилэн йырыз Александр Прохоров, калыкез дышетонъя министр Л.Захарова, быдэс дуннелы тодмо луэм спортсменка Галина Кулакова, Правительствоын ужасьёс, спортысь ветеранъёс. Ужрадэз усьтэмзы бере ик школалэн спортзалаз полиатлонэн ӵошатсконъёс кутскизы. Куинь минут куспын котькинлэсь тросгес (26 пол) турникын ӝутӥськиз Можга ёросысь Саша Иванов. Но кыкетӥ нуналаз Ижевскысь Сергей Петров Сашаез ыбылӥськонын но куас сюрес вылын азьпалтӥз. Озьы Сергей Петров ваньзылэсь трос очко люкаса, Удмуртилэн чемпионэз луиз. Нылъёс пӧлын вормисе потӥз Шарканысь Настя Никитина. Ӵуказеяз пиос дас иськемъем куас сюрес вылэ потӥзы, нылъёс - вите. Иван Стрелковлы секыт йӧтӥз, луоз, Коля Хохряковен ӵошатскыны. Россилэн чемпионэз сюресэз тӧл кадь ӝог ортчиз, эшсэ 46 секундлы кельтӥз. Нылъёс пӧлын но нюръяськон пуромиз. Кужмогес вылэм Можгаысь Вера Степанова. Мукет нуналаз пиналъёс эркын амалэн со сюресэз ик ортчизы. Коля Хохряков одӥг секундлы нош азьпалтӥз Иван Стрелковез. Но вормонтэм, кужмо луэмзэ возьматӥз Вера Степанова. Финише кыкетӥ вуэм Наташа Виноградоваез быдэс минутлы азьпалтӥз. Озьы Вераен Коля командаоссылы трос очко ваизы. Командаос пӧлын играос вормозы, малпазы вал ваньмыз - нырысетӥ нуналаз соос азьпал потӥзы уго. Но кема эскерем-лыдъям бере, вормись луиз Шарканысь команда. Трослы бере кылиллямтэ Завьял ёросысь спортсменъёс, куинетӥ интыын - можгаос. Тӥни озьы, играос воксё интытэк кылизы - кыкетӥ нуналаз уго куас сюрес вылын ляб бызьылӥзы. Оглом, пиналъёслэн нырысетӥ тол шудонъёссы туж усто ортчизы. Ӵошатскем сяна, пиналъёс шулдыр ужрадъёсы пыриськизы, экскурсиосы потазы, ог-огенызы тодматскизы. Спонсоръёс сюлмаськиллям пиналъёсты ческыт сюдон пумысен. Соос пӧлын - Воткинскысь нянь пыжон комбинат. А.Вишурин. Кенешо но шутэтско Шарканъёслэн берлоез пумиськонзы дырысен кӧня ке толэзь ортчиз ни, озьыен, тросэз ог-огзылэсь мӧзмыса вуттӥзы ни, луоз, та дыр ӵоже. Соку ойдолэ "Шарканъёс кенешо но шутэтско" пумиськон ӝытэ. Ортчоз со 17-тӥ мартэ 14 часысен Удмурт драмтеатрын. Котьку сямен, Ижевскын улӥсь аспалъёссэс шулдыртозы Шарканысь усточиос, ӝытэ озьы ик пыриськозы та музъем вылысь потэм артистъёс но. Кырӟан-веран сяна, та пумиськонын луоз Шаркан землячестволэн ужез сярысь вераськон. Кинлэн аслаз вордӥськем дорез мусо но шулдыр потэ, мӧзмем сюлэмзэ усьтыны быгатоз аспалъёсыныз пумиськыса. Л. Кимова. Шыртыллы - 170 ар Али тыл поттон амалъёс ӧжыт ӧвӧл кадь, но шыртылтэк (спичкатэк) нокин но уг улы. Нош кылдытэмын вылэм со 170 ар талэсь азьло. Россиын спичка поттон фабрика усьтӥськиз Петербургын 1837-тӥ арын. Удмуртиын спичка уг лэсьто, сое ваё бускель Киров улосысь. Отысь Слободск городысь "Белка" фабрика быдэс Россиын тодмо. Веранэз ӧвӧл, макем капчиятӥз адямиослэсь улонзэс француз Шарлен Серна шыртыл кылдытыса, но соин валче кылдӥз кышкытлык но. Кызьы шуо, одӥг писпулэсь олокӧня сюрс спичка лэсьтыны луэ, нош одӥг спичкаен - олокӧня сюрс писпуэз быдтыны. В.Рогалёв. *** Праздник нуналъёс куректонэн берытскизы сое мултэс зол пусйисьёс понна. 8-тӥ мартэ Уваысь Ввилов но Нечунаев нылкышноостэк но праздник нуналэ ӧз мӧзме. Юонзы быриз уйшор котыр гинэ. Вавилов эшшо вина утчаны кошкем на, нош кудӟем Нечунаев тамакеныз умме усем. Ӵын пӧлысь тылпу кысӥсьёс сое шӧйын поттӥзы ни. Ижевскысь Завьялов кудӟыса дорозяз но вуымтэ, подъездын умме усем. Озьы но тамак аратэм на. Тамак пум дӥськутэз вылэ усьыса но быдэсак ачиз кенжиз, улэпкын ӝуаз. Вуж, урод электроезэн йырин тылпу потӥз Можга ёросысь Пойкагуртын. Юртъерез утьыны ӧз луы. Спорт Тулыс куазь но дыртӥсь куас Тямысэтӥ мартэ Игра ёросын ортчизы праздниклы сӥзем куасэн бызьылонъёс. Ӵошатсконъёсты радъяз Глазовысь кудӟытӥсь юонъёс поттӥсь завод. Та празднике лыктӥзы шерысьтымы пӧртэм сэрегъёсысь спортэн эшъяськисьёс. Спортсменъёсты ӟечкылазы но капчи сюрес сӥзизы Глазовысь кудӟытӥсь юонъёс поттӥсь заводлэн кивалтӥсез Н.Сорокин но Игра ёрос администрацилэн йырыз В.Усков. Вить, дас, кызь но куамын иськемъем куас сюрес вылын куспазы ӵошатскизы кык сюлэсь ятыр спортсменъёс. Вить иськемын 14-15 аресъем нылъёс пӧлын вормисе потӥз Игралась Елена Белых, пиос пӧлын - Балезиноысь Максим Лекомцев. Егит нылъёс пӧлын куас сюрес вылын вормизы Як.-Бодьялась Наташа Виноградова но Татьяна Медведева, пиос пӧлын - Завьял районысь Алексей Чухланцев. Тужгес шӧртчиосыз бызьылӥсьёс ӵошатскизы кызь но куамын иськемъем куас сюрес вылын. Таосыз пӧлын тужгес шаплы вылӥллям Сарапулысь Олег Периятинец но Глазовысь Ирина Баженова. Соослы ужрадэз радъясьёс чибориё телевизор кузьмазы. Мукетъёссэ но кузьымъёстэк ӧз кельтэ. - Табере таӵе ӵошатсконъёс арлы быдэ ортчылозы, - шуизы ужрадэз радъясьёс. А.Ившин. Удмурт университетын дышетскись. Тодматске Тубатысен учкыса Юрий Васильевич Кузнецов - "Удмуртия" издательстволэн выль директорез. Та интыын ужамезлы толэзь гинэ тырмиз ай. Книга поттон удысазы со самой егитэз. Чаклано ке, мукет кивалтӥсьёс пӧлын но тужгес егитэз луэ, дыр. Азьвыл сое Удмурт радиолэн корреспондентэз шуыса тодӥськом вал. Нош собере... - Юрий Васильевич, Правительстволэн Тӧроез Николай Ганза дорын ужаса ӧй ке вуттысалды, дӥсьтысалды-а меда таӵе бадӟым кун издательстволы кивалтӥсь кариськыны? Шуом, вылӥысен учкон татысен кутскиз ни, дыр? - Зэм вераськоды. Ӧй дӥсьтысал. Бен, журналистын ужаме дуннеез паськыт адӟыны дышетӥз. Нош кивалтон борды кутскыны кыӵе ке но тубатысен капчигес. Тодам ваисько: Правительстволэн тӧроезлы юрттӥсьын ужаны ӵектэмзы бере туж дӥсьтытэк мынӥ. Капчи уд шуы: ӵукна вазь кошкыса уд тодӥськы, ку мозмытскод. Семьяез ик ӧй адӟылы. Та уж монэ унолы дышетӥз. Кызьы калыкен ужаны, пӧртэм постановлениос дасяны, элькунысь огъя югдурез валаны. Нош самой дуноез - со кусыпъёс. Котькыӵе ужпумен тодмоед доры вазиськыны лякытгес ук. Эшъёс - самой бадӟымез узырлык. - Издательствоысь коллектив кызьы пумитаз тӥледыз? - Та нуналъёсы, южтолэзе, "Удмуртия" книгапоттонилы 81 ар тырме ини. Соин ик татын ужасьёс но - кужмоесь профессионалъёс. Уноез книга поттон удысын кызь арлэсь кема тыршо. Зэм, туннэ понна коллективамы мон самой егитэз. Соин ик вань но, луозы но ай, дыр, оскытэкгес учкылонъёс. Но ог-огмес валаськомы ни кадь. Угось малпаськонмы, сюлэмшугъёсмы одӥг: ужез умойгес радъяно. Выль синмын учкиськод ке, тазэ но, мукетсэ но воштоно кадь. Но огкутскемен ваньзэ чутрак уд берыкты. Дыр котьмае интыяз пуктоз. - Та вакытэ мар тужгес сюлэмшугъяськытэ книга поттӥсез? - Книгаосты вӧлмытон. Азьвыл кылдытъям базаос быризы. Со быдӟа организациез, книготоргез, син куспын куашкатӥзы. Али пӧртэм чыры-пыры магазинъёс - со нимаз вузкарисьёслэн. Котькудӥз доры уд вуы. Кулэез но ӧвӧл, дыр. Малы ке шуоно, туннэ потӥсь книгаослэсь пайда поттон сярысь малпанэз ик ӧвӧл. Но элькун бюджет чотын поттэм книгаос - кылбурен-а, прозаен-а со - одно ик котькуд библиотекае вуыны кулэ. Шаерамы али 500-лэсь уно школаын лыдӟиськонниоссы вань. 600 пала - Культурая министерстволэн. Чаклалэ асьтэос: туннэ кылбуръёсты 500 экземплярен, прозаез - 1000 экземплярен поттӥськомы. Озьыен, книгаосмы котькуд лыдӟиськонние уг вуо. Ичи тиражен поттыса, книгалэн асдуныз бадӟым луэ. Нош со книгаез ик, шуом, куинь сюрс экземплярен поттӥськод ке, асдуныз куинь-ньыль поллы кулэсме. Бюджет чотын поттӥськись книгаосты одно ик котькуд лыдӟиськонние кыкен-куинен ке но келяно вылэм. Дунтэк. Урод соиз но: туннэ понна книга поттон удысын нокыӵе кун программамы ӧвӧл. Кудӥз автор чырмытгес бызьылэ, со ик ужзэ печатланы коньдон шедьтыны быгатэ. Кудӥз бюджет чотын ик чуртнаське. Татын нырысь ик произведениослэсь ӟечлыксэс эскероно вылэм. Та арлы Писательёслэн огазеяськонэнызы ӵош юнматэм планамы 23 книга поттыны чакламын. Нациосын ужанъя министерство юрттэмен кутскиськом Куӟебай Гердлэсь куать томъем люкам сочинениоссэ поттыны. Куинь томез лыдӟисьёс доры туэ ик вуоз ни. Юн кусыпъёсмы Калыкез дышетонъя министерствоен. Туэлы чакламын 17 учебникъёс но методической пособиос поттыны. Азьланяз потэ вылэм улӟытэм школалы сериез. 1980-тӥ� 1990-тӥ аръёсы вуэмъёсыз учебникъёс кемалась сурыкмизы ни, луоз. Калыкез дышетонъя министерстволэсь куронъёссэ-заказъёссэ быдэсъянэн бере кылиськом на. Валамон, ваньмыз коньдон тырмыт сётымтэ бордысь потэ. Шаермылы сӥзем литератураез трос курисьёс. Тани ӝоген, шуом, соослы усто кузьым луоз Михаил Атамановлэн "Наши древние истоки - воршуды" книгаез. Асьсэ выжыосынызы тунсыкъяськисьёслы тросгес ӟуч кылын изданиос поттоно. Нылпи литератураез но умой вӧлмытыны луоно. Но сое печатлан туж дуно усе. Тани удмурт выжыкылъёсты поттӥм. Асдунзэ берыктон понна, асьме Правительство но, Президент но коньдон висъязы. - "Удмуртия" издательство берло аръёсы полиграфия ласянь туж усто, чебер быдэстэм книгаос поттэ. Со понна, валамон, трос кужым, коньдон кулэ. Кызьы малпаськоды та ужез азьпалан радъяны? - Зэм, сыӵе книгаосын ми кыдёке мыныны быгатысалмы, шуом, кунгож сьӧры но потыны. Тани али туж кулэ издание - "Удмуртия в изобразительном искусстве" - поттӥм. 125 манет сылэ, асдуныз кык пол трос. Изоискусствоя бадӟым, чебер книгаос трос уксёез "сиё". Нош мар веранэз "Удмурт Республикалэн энциклопедиез" сярысь. Вормонтэм бадӟым уж кадь вал со (ватсанъёс бордын али но ужаськом). Таиз 400 манет сылэ, нош асдуныз куинь-ньыль пол тросгес. Дуно ке но, ушъямон. Али та энциклопедилэсь адӟем карыса малпало ни Ижевскъя, Глазовъя, инкуазь узырлыкъёсъя, дышетон удысъя книгаос дасяны. Книга поттон дуно усе, типографие коньдон шур! гинэ быземен. Азьпалан цветоделениез ас киямы басьтыны кулэ. Соку продукцимылэн асдуныз трослы кулэсмоз, книгаосмы дунтэмалозы. - Асьтэлэн компьютеръёсты та ласянь юртто ини. Тырмыт-а соос али? - Али компьютермы куать. Луыны кулэ котькуд ужасьлэн. Редакторъёс но компьютерен ужаны мед быгатозы. - Азьвыл кивалтӥсь дыръя издтельствоын "корт" дисциплина вал. Выль кузё кызьы учке та шоры? - Мон творческой адямиосты валасько. Ужазинлык уг поты со бордысь, кӧня час уж дурад пукод, кӧня штандэ пӧськытод. Но адямилэн ас пушказ луыны кулэ ассэ ачиз кутӥсь но косӥсь кужымез. - Мон тодэмъя, тӥ асьтэос но кылбурчи яке кин ке мукет луыны быгатысалды. Кин вал со сюрес возьматӥсьёсты? - Мон Можга ёросысь Бадӟым Кибья школаын дышетски. Ольга Александровна Тарасова, литкружокен кивалтӥсьмы, "нерад каре" вал, кылбур-верос пӧраны косыса. Историяя факультетэ пырыны малпай. Нош Тихон Андреевич Марков, Можга ёрос газетлэн редакторез, монэ Урал университетэ мыныны ӝутказ, дэмлан кагаз сётӥз. - Табере индылон-косонэз возьманэз ӧвӧл. Тӥ "кыткиськемын" бадӟым уже. Кужымды мед тырмоз "возэз" нуыны. - Тау. Вераськиз Т.Петрова. Туспуктэмез В.Беломорскихлэн. Улэ-вылэ семья Туриос уло яратонэн Уддядиысь Аркадий Маня трос нылпи семьяын будӥз. Тунсыко потэ вал солы пичи сузэр- вынъёсызлэн шенгыль вераськемзы, шудэм-серектэмзы. Соин но, дыр, Карамас-Пельгаысь тямыс классэз йылпумъяса, Сарапулысь дошкольной училищее дышетскыны пыриз. Пиналъёсты яратэм сяна, Маня чебер кырӟаз-эктӥз, пӧртэм сяськаосын тунсыкъяськиз на. Тазэ ини со атаезлэсь адӟем кариз, вылды. Угось Аркадий Ильичлэн пӧртэм емышъёсыз котьку бакча тыр удалтылӥзы. Ачиз ик воргорон будосъёсызлы выль выжы но уськытъяны йӧндыриз. Ӝог ортчизы Сарапулын дышетскон аръёс. Дышетскыны пырыкуз, дас ньыль аресъем нылаш быръем ужезлэсь чебер палзэ гинэ син азяз пуктылӥз: муспотон пичильтокъёсын шудон- маскаръяськон, суредаськон, соослы выжыкылъёс, кылбуръёс лыдӟон. Но со сяна, воспитательлы пиналъёслэсь нырулзэс но ӵушоно луэ на вылэм, кӧлыны вылдтоно, бӧрдӥсьёссэ буйгатоно. Но Мани ӧз кышка таизлэсь но. Мария Аркадьевна луыса со вуиз Кияса ёросысь ик Вуж Сальялась нылпи садэ. Та гуртысь ик пумитаз со яратонзэ - Володя Беспаловез. Шудоесь ке шудоесь вал Машаен Володя сюан шудон нуналазы. Егитъёсты ӟечкыланы уно ӵыжы-выжыоссы, гуртооссы лыктӥзы. Выж зуркамон эктӥзы, шулдыръяськизы таосыд. Выль семьялы шуд сӥзизы... Озьы Уддядиын будэм ныл Салья гуртлы кен луиз. Яратӥзы выль кенэз Володялэн анаез но бӧлякъёс. Кызьы уз яратэ: Мария вазиськись, гурт котырысь ужъёсты чупрес быдэсъя, киужлы быгатӥсь, пужъятэмъёсысьтыз сяськаос улэпесь кадь адӟисько. Анайлы мар кулэ на, пиез шудэн пылаське ке. Беспаловъёслэн бӧрсьысь бӧрсе вордӥськизы Алёша но Слава пиоссы, кусыпсы кык арес гинэ луиз. Пиос тазаесь, чебересь будӥзы. Аръёс ортчемъя, семьяез шумпоттӥзы на Алёна но Наташа. Та семьяын улон шудбурен пачылмиз. Володя "Рассвет" колхозын - азьмынӥсь шофёр, солэн ужамез уно кузьымъёсын пусъемын. Атайзы рейсысь бертыкуз, сое пумитало муспотон нылпиосыз, яратоно кузпалэз. Выль корка пуктӥзы ни таосыд: югыт, шуныт пӧрмиз со. Доразы пырисьёс котьку синмаськыса учкылӥзы отысь чылкытлы, чебер, валаса басьтэм дуно ковёръёслы, диван-валесъёслы. Корка пумез шулдырто на нылпиослэн уно шудонъёссы. Тани Алёша Славикез дышетэ машинаосын "ворттылыны". Дыбырто, тэтчало, серекъяло, пуконъёсты поезд каро таосыд, утыр бӧрдонзэс но уг вунэто. Юнме удмурт калыкмы верамтэ, пиё, пиё коркае но, соин шулдыр коркае шуыса. Ужысь бертэм бераз, Володя куд-ог дыръя арганзэ кутылэ на - малпалляз, вылды, пиосыз но мед дышетскозы шуыса. Но малпамтэ шорысь Володяез кин ке но воштӥз кадь. Ялан малпаськись тусо ветлэ, ӧжыт вераське. Юонэз синазькыль карись адями, лушкаса вина юыны кутскиз. Уже уг пота, колхозысь кивалтӥсьёслэн вераськонъёссы но ӧз юрттэ. Малы сыӵе луиз со? Нылпиосыз шоры учкыса, мур лулӟылӥз, таосылэсь будэмзэс но уг адӟы ни, пе. Таӵе дыръя аслэсьтыз пичи дырзэ тодаз вайылӥз, вылды. Володя вож нуны дыръяз куро кабанысь шедьтэмын угось. Тракторист, бусыез гырыкуз, кылем куро бервылысь бинялтэм луло комокез синйылтэм. Озьы сое асьсэлы вордыны басьтӥз Сальялась семья. Еня апайлэн пичи пиез талэсь азьло гинэ кулӥз вал. Кайгырись сюлэмзэс буйгатон вылысь, шедьтэм пиез егит кузпалъёс асьсэлы каризы. Басьтэм пизэс асьсэлэн кадь ик эркиязы соос, берло вын-сузэръёс но кузьмазы на Володялы. Гурт калыклэсь ымзэ уд ворса, Володялэн эшъёсыз вордос шуыса исаллязы. Таӵе дыръя пичи пилэн сюлэмыз вожпотонэн пачылмылӥз, ӵем дыръя дораз бӧрдыса вуылӥз. Ассэ ултӥян сямыз Володялэн быдэ вуэм бераз но ӧз быры ни. Мария Аркадьевна кузпалзэ котьку лӥятыны тыршылӥз. Но берло номыр каремез ӧз луы ни солэн. Володя семьяезлэсь пеганы кутскиз, сое ялан чакласа-эскерыса гинэ улоно луиз. Та но ӧз юртты ни: одӥг чебер нуналэ улонзылэн самой пушъён вакытаз ньыль нылпиослэн атайзы ассэ ачиз быдтӥз. Гурт калык ас сяменыз дунъяз та учырез: веднамын та. Кас адямиос син уськытӥзы. Мария Аркадьевна понна улон кысӥз кадь. Ӵем дыръя пальпотӥсь ымнырыз сьӧдэктӥз. Нылпиосыз гинэ возизы кышномуртэз та вие - соосты кызьы ке но пыд йылазы ӝутоно. Со дыре Машалэн азьпал улонэз сярысь сюлмаськизы Уддяди гуртын улӥсь анай-атаез, уката ик Огыр песянайзы. Со ик синйылтэм ни гуртысьтызы огназ улӥсь Коля Марковез. Азьлогес ик синмаськыса но жаляса учкылэ вылэм со шоры улэм-вылэм кышномурт. Будӥз Коля висись анаез вӧзын, сузэр-вынъёсыз ӧвӧл. Анаез кулэм бере, со улӥз матысь ӵыжы- выжыоссы дорын. Армие ветлӥз, тракторен ужаз. Аслыз семья кылдытыны со ӧз дырты. Коля ачиз кылзӥськись, ужлэсь уг палэнтӥськы. Одӥг ог чарка шедьыкуз, бен, ӧз пумитъяськы. Ма, ужез но сыӵе уга: тракторен я соизлы, я таизлы пу, турын ваёно луэ, бакча гыроно. Таӵе адямиез дэмлазы Мария Аркадьевналы. - Дэмлам адямиен пумиськыны ачим мынӥ, - тодаз вае кышномурт. - Уддядиысь механизаторъёслэн со нуналэ кенешсы ортче вал, ваньзы люкаськемын колхоз контора доры. Отын ик - Марков Коля но. Озьы аслым кылдэм адямиме гуртэ пырем берам ик пумитай. Та нуналэ Марияен Коля огазе кариськон сярысь кенешизы. Сальялась но Уддядиысь улӥсьёс пӧртэм сямен дунъязы таослэсь огкылэ вуэмзэс. Мария Аркадьевнаез алылӥзы, Коля юылэ шуыса, нош Коляез - мурт нылпиосты будэтоно луоз шуыса. Кузпалъяськыны дасяськемъёс нокинлэсь ӧз кылзӥське. Озьы Мария Аркадьевна ньыль нылпиосыныз бертӥз Уддядияз. Выль семьялы колхоз корка висъяз, Беспаловъёслэн пиналъёссы соку воксё пичиесь на вал. Бадӟымез Алёша кыкетӥ классын дышетскиз, Славаик нырысетӥ классын, Алёна но Наташа куинь арес гинэ кылизы. Таос Коляез соку ик "папа" шуизы. Пиос маке лэсьтыны кутско ке, визь-кенеш курыса, одно папазылы вазисько, соиз юрттэ, лад-лад валэктэ. Коля туж каньыл но кибашлы адями вылэм. Юртъер котырзэс быдэсак выльдӥз: гид, мунчо, лапас ӝутӥз. Мариялэн но Колялэн эшшо кык нылъёссы вордскизы на. Табере нылпиос будӥзы, ваньзы ужало ни. Огвакыт секытгес ик йӧтӥз та семьялы. Куинез нылпиоссы огдырегес вузъёсын дышетскизы. Алёша но Слава дышетскизы Гурт удысъя академиын, агрономе но зоотехнике. Алёша Алексей Владимирович луыса ужаны интыяськиз школае, пиналъёсты со биологиялы дышетэ. Таид ӵужатаез выжые мынэм, адӟиське. Яратэ со сад-бакчаын ужаны, будосъёсын тунсыкъяське. Алёшалэн аслаз семьяез вань ни, будо кык нылпиосыз. Нимаз юрт но ӝутӥзы таосыд. Атайзы ӟеч юрттӥз. Ма мукетъёсызлы но нылпиосызлы трос лэсьтӥз ни. Пу корано-а, кирпич тыроно-а, гур ӝутоно-а - ваньмаз вуттӥське со. Берло аръёсы, кускызлы секыт луыса, тракторен ужамез ӧз луы ни солэн, дырзэ доразгес ортчытъя, внукъёссэ утьыны вуиз. Алёшалэн кузпалыз вера, соослэсь нылпиоссэс, пе, дедзы алвылаз будэтӥз. Аслэсьтыз семьязэ кылдытӥз ни Алёна но. Университетысь кылъя но литературая факультетсэ йылпумъяса, со дышетӥсь луиз. Бызиз, нылзэ будэтэ. Наташа но Наталья Владимировна ни. Со Киясаысь шор ёзо школаысь пиналъёсты суреданы дышетэ. Анаезлэсь сюрессэ бырйиз Таня. Со дышетске Ижевскысь педучилищелэн дошкольной люкетаз. 11-тӥ классэ ветлэ семьяысь самой покчиез нылзы Оля. - Оли но Тани вордӥськем бере курдай вал, Коля аслэсьтыз нылпиоссэ яратоз но, нырысь картэлэсьсэ ултӥяны кутскоз шуыса, - вера Мария Аркадьевна. - Курдаме юнме вылэм. Коля нылпиосты чик но тынадо-мынамо ӧз кары. Солы ваньмыз дуноесь, мусоесь вал. Нырысь син шоры йӧтӥсьтэм воргоронлэн макем чебер сюлэмыз вылэм. Музъемозь ик йыбырттӥсько картэ азьын монэ каньыл воземез понна, нылпиосылы вордэм атай луэмез понна. Кызьы будэтысал, дышетысал мон соосты огнам кышномурт йырыным? Мария Аркадьевна ачиз но синмаськымон нылкышно. Сӧ пӧртэм коллективъёсын ужано луиз. Котькытын эшъёсыныз огъя кыл шедьтыны быгатэ. Табере со аресызъя пенсие потӥз ни. Озьы ке но, али но егитъёслэсь кылемез уг поты. Клублэн сцена вылаз со задор кырӟа, быгатэмезъя бӧлякъёсызлы юрттэ. Р.Мазитова. Кияса ёрос, Уддяди гурт. Малпаськытӥсь югдур Коньдон дуре мыном-а Чечняе? "Тазьы улыны уг лу ни! Коньдон кулэ. Коньдонэ луиз ке, машина, квартира басьто, кышно быръё. Ас киыным аслэсьтым улонме вошто, ачид ӧд ке тыршы, мурт дядяй тон интые уз лэсьты шуылоз вал анае. Озьы ик со вань. Пельпумам йыры вань, визьмы вань, нокыӵе чалеп но уз шедьты монэ, мыноно, лэся, Чечняе. Эшъёсы отысь коньдонэн берто, мон нырысетӥез ӧвӧл. Кышкыт ик бен, но улэмед потэ ке, берга, шуо. А нош быри ке? Уг, мон уг быры, чалеп монэ уз йӧты, мон егит но шаплы, республикаын но куасэн бызьылыку нырысетӥ интыос гинэ басьтылӥ. Мон берто. Мыным туж кулэ коньдон". Та пияшез мон умой тодӥсько. Зол спортсмен сяна, умой дышетскиз. Но армиын солы удалтымтэ, уродэн гинэ тодаз вае служить каремзэ. Малы ке но ассэ уродэ уськытэ вал. Чечняе со мынӥз, зэмзэ но коньдонлы ёрмыса. Но кыӵеен со отысь бертӥз? Уг тодӥськы, тодэме но уг поты! Мон кышкасько соин вераськыны, шораз вазьыны. Бен, мон но Чечняе вуылысал, пи луысал ке, оло, валасал отысь бертэм солдатъёсты. Но мон Чечняе улытозям но ӧй мынысал. Кызьы адямиосты коньдон понна виылод? Со туж бадӟым сьӧлык, ас вылад ӧз ке усьы, нылпиосыд вылэ вуоз. Ӧйтӧд, ӧйтӧд! Бен, шудзэ котькудӥз ас сяменыз вала, отысь ик сое утча. Омар Хаям шуиз вал: "Куанер муртлы музъем райын улон - четлык". Ньыль ар талэсь азьло Коля Чечняысь ваиз сю сюрс манет пала коньдон. Ӝыныезлэсь тросэз коньдонэз юонлы кошкиз, кылемез - пунэмъёслы. Нош али азьлолэсь но куанер улэ - юон сое сьӧлтаз. Тодӥсько Чечняе ветлэм мукет пияшез но. Алексей армиысь туж чебер бертӥз: вина-сур уг юы, тамак уг кыскы вал, ӝужыт но учкымон. Берло Чечняе куинь пол ветлӥз, Выль арез кык пол отын пумитаз. Кӧня коньдон со отысь басьтӥз - ӧйтӧд. Но солы табере номыр кулэ ӧвӧл ни: ожмаськемез гинэ потэ на. Бертыса ӧз вуы, нош контракт гожтэм ини. Сю градусъем спиртэз юыны кутскыса, йырвизьмыз берыктӥськиз, лэся. Нош солэсь эшсэ кияз юн-юн кутӥз кышноез... - Кытын-о тӥ, удмурт пиос? Кытын-о тӥ, воргоронъёс? - Ми Чечняын. Зэм-а, ӧвӧл-а, но таӵе вераськонъёс ветло: Россия Федерациысь улосвылосъёсын ӵошатыса, Удмуртия нырысетӥосыз пӧлы пыре Чечняе мынэмъёсын. Косонэз ӧвӧл, асьсэос курисько, пе. Зэм ик-а ми сыӵе куанер улӥськом? Малы соку пӧсь шаеръёсысь адямиос дорамы коньдон поттыны лыкто? Ӧжыт коньдон уг берга ук соос киын. Бен, котькудӥзлэн но адямилэн узыр луэмез потэ, дыр. Но кызьы шуо калыкын, кин коньдонэз яратэ, со доры ик коньдон лыктэ. Котьма ке но, яратонлэсь бадӟым кужым дунне вылын ӧвӧл. Яратысалзы ке Чечняе дыртӥсь пиос ас шаерзэс, соос отчы ноку но ӧй мынысалзы: коньдон соос татысь но шедьтыны быгатысалзы. Оло, мон палдуресгес малпасько, но мыным озьы потэ. С. Петрова. Возьмаськом вазиськемдэс "Юридический Вестник Удмуртии" журналлэн редколлегиез ӵош ужан пумысен вазиське предприятиослэн, организациослэн, учреждениослэн кивалтӥсьёссылы, озьы ик шаерысьтымы нимаз-нимаз адямиослы. Правоя, музъем ужпумъёсъя, промышленностья, вузкаронъя, озьы ик тазалыкез утёнъя, дышетонъя культурая но мукет ужпумъёсъя калыклы кулэ луись юанъёсты, малпанъёсты кылдӥзы ке, яке кыӵе ке статья, заметка гожтыны мылкыд кариськоды, вазиське таӵе адресъёс: 426034, Ижевск город, Университетской урам, 1 номеро юрт, ньылетӥ корпус, Правоя институт, В.Н.Яковлев профессорлы. С.Бунтов. Кезьыт кизилиос 1999-тӥ ар... Огшоры лыдпус, огшоры вакыт. Оло, кин ке гинэ татысь берыктэм куинь "куать" лыдпусъёсты синйылтоз? Качиян ар луысал ке, калыклэн верамезъя, со трос шуг-секытъёс вайысал, пе, адямиослы, уно кыӵесъёс пыр потыны кылдысал. Камбаркаын улӥсь Курягинъёслэн семьяязы но апрель толэзе шунды улын нясь-нясь будӥсь кечсинъёслы паймылӥзы, котькуд вож будослы синмаськылӥзы. Надежда Николаевна но Герасим Александрович нырысетӥ тулыс сяськаос музэн шумпотӥзы нырысетӥ пизы понна. Юрий Курягинлэн ӟырдыт сюлэмаз кемалась нуллэм малпанэз быдэсмиз - табере солэн вись кузьда пельпум вылаз лейтенантлэн зарнивуам кизилиосыз пишто ини. Офицер луон понна, солы сизьым ар дышетсконо луиз. Пичи но шыпыт гинэ Камбарка город. Гуртын кадь гинэ Октябрь урам. Солэн пумаз ик, нюлэс дурын, сылэ Курягинъёслэн корказы. Кык квартираем юрт кызъёс но писпуос пӧлы ышемын. Палэнэ султыса, бычыраны кутскем вайёс пыр гинэ укно синъёсты адӟод. Урам кузя йӧн-йӧн вамышъясь пиосмуртэз тросэз тодмазы. Куд-огез укно дуре кариськыса ик синъёсынызы келязы ӵана бурд кадь сьӧд зарезь дӥськутэн пужым кадь ӝужыт мугоро воргоронэз. Камбарка город ву дурын ке но сылэ, татысь ӵем уд адӟылы военной морякъёсты, ӵемгес пумиталод речной флотын ужасьёсты. Улыг интыосын лопаткаен кык-куинь пол куштымон лымы кылле на, урам кузя бызись пичи шуръёс кӧсамын ӧвӧл на, ожо гинэ интыен-интыен вож-вож ӝужам ини, инмысь пиштӥсь шундылы шумпотэ, аслыз но мукет будосъёслы эшшо но тросгес няськыт тылсиоссэ куре кадь. Кенеръёс пурысесь, кылем арын буям укно наличникъёс гинэ соку ик син шоры йӧто, мылкыдэз югдыто. Таӵе инкуазь шорын Юрий Курягин сьӧд куака кадь адӟиське. Котькуд корка шоры учкыса, укно синъёсты лыдъяса мынэ кожалод. Нош сюлэмыз кыске но кыске урам пумысь кык квартираем юртэ. Отын уло солэн анай-атаез, Женя выныз. Мукетыз выныз армиын. Ма каро меда али Надежда Николаевна но Герасим Александрович? Витё меда пизэс? Каллен гинэ ӧс усьтӥськиз. Корказе пырон азе ик тодмо колошаос, ботинкаос но резина сапегъёс тыремын. Юра но ботинка шнурокъёссэ лябӟытӥз но, пыдкутчанзэ кутыса, корка пыриз. Анай-атайлэн сюлэмзы шӧдэ ни вал, матысь нуналъёсы Юра пизы бертыны кулэ шуыса. Азьло курсант гужемлэн нырысетӥ толэзяз ке вуэ вал, 1999-тӥ арын дырыз воштӥськиз. Озьы луиз: Санкт-Петербургысь С. М. Киров нимо общевойсковой вылӥ училище берпуметӥ офицеръёсты армилы дасяз. Вылӥысь кивалтӥсьёслэн малпамзыя, андан кадь юн кадръёсты будэтонъя дышетскон инты мултэс луиз. Со муген ик апрель толэзе ик азьвыл курсантъёслы дырызлэсь вазь офицеръёслэсь погонъёссэс сётӥзы. Вераськонъёс но вал: Чечняын югдур выль но выль командиръёсты кулэ каре. Оло, таӵе малпан но зэм. Курягинъёслэн семьяязы шумпотон ырак пельтӥсь тулыс тӧл кадь пыриз, мылкыдзэс лӧпкытӥз. Шоро-куспо улӥсьёслэн кема витем малпанзы быдэсмиз - Юра пизы, сизьым ар дышетскыса, аслаз сюлэмызлы кельшись удыс бырйиз. Табере та кырыж-мерыж мынӥсь сюрес вылысь урдэслань гинэ усёно ӧвӧл, дыртэмен валче канжаськод гинэ. Надежда Николаевналэн шумпотон синкылиосыз тани-тани тюр-тюр гинэ быльыралозы но ӵыж-ӵыж луэм бам вылтӥз погыльскозы кадь. Очки улысьтыз синлысъёсыз, оло, возизы. Шумпотон, данъяськон пуш тыраз, со синкылиен потыны тырше. Веськрес пилы кин уз синмаськы меда? Йырыз ӧжыт гинэ вӧлдэтэ уг йӧты, выж пулъёс вамыштэмезлы быдэ куаразэс сёто. Юрий Курягин кительзэ пельпум вылысьтыз мылпотытэк кадь гинэ куштӥз но ӵоге ошиз. Анай синъёс таӵе военной мундирез нырысьсэ адӟо: погонъёс вылэ зарнивуам пичи кизилиос юнматэмын, соосты векчи гож гинэ люке. Петлицаосыз чильк-вальк кисьтасько, шораз ик якорь кузёяське. Суворов училищеез йылпумъям сярысь пусэз анай-атайёсыз ньыль ар талэсь азьло адӟизы, нош табере со вӧзын вылӥ военной училищеез йылпумъям сярысь ромбик чеберъяське ни. Герасим Александрович паймыса но данъяськыса учкиз пиезлэсь офицерской кортиксэ. Та кезьыт тӥрлыкез солэн трос пол адӟылэмез вал ини. Кӧня ке ар ӵоже Герасим Курягин моряк вал. Семьяеныз улӥз Владивосток городын. Отын ик Юрий вордскиз. Нырысетӥ омыр шокчемез зарезьысь шӧмъёсын тырмемын вал, нырысетӥ вамышъёссэ но океан дурын лэсьтӥз. Ог-огзы шоры учкыса, Курягинъёс пизылэсь вань сюрессэ выльысь ортчизы кадь. малы со морской пехотинец луиз? Малы военной? Юралэн азьпалаз кылиз на вал уже йӧн-йӧн интыяськон, квартира басьтон но кузпалъяськон. Пияшлы улонлэн ӧрез умой- умой адске ни вал. Зэмос улон али кутске, нош ортчемез ветлыны дышетскон гинэ вал, кымысыд лыз-вож луон но янгышъёстэ валан. Школаысен ик Юрий Курягин малпаз военной луыны. Со юнме шорысь ӧй вал, дыр. Атаез но, песятаез но морякъёслэсь погонъёссэс нуллӥзы, солы киыз но, пыдыз но ӵыжы-выжыосызлэсь сюрессэс азьланьтыны. Тазалыкез сярысь ноку но сюлмаськемез ӧй вал, воргорон кадь будӥз, эшъёсыз пӧлын таза мугорыныз висъяськылӥз, улон но пӧртэм учыръёс шоры аслаз синмыныз учкеменыз анай-атайёссэ но паймытылӥз. Пияш дышетскыны пыре Свердловскысь Суворов училищее. Алигес гинэ 8-тӥ классэз йылпумъям Юра йырыныз но, пыдыныз но армия нимаськись зарезе омырскиз, солэн шуг-секытъёсыз пельпум вылаз зӥбиськизы. Тодэ вал, училищеын капчи уз луы шуыса, нош куке зэмзэ но отчы зымиз, суворовецлэн дӥськутэз туж секыт потыны кутскиз, сурон сапегъёс но, оло, узвесьлэсь кисьтэмын вал кадь. Берлань чигнаны сюрес ӧй вал ни - ма шуозы дораз, кыӵе синмын учкозы эшъёсыз, берен школае берытскиз ке? Ма вералоз ачиз? Юрий Курягин каллен-каллен суворовецлэн тубатэз кузя выллань тубыны кутскиз. Ачиз валаз, ма со, дежурствоын сылон, выж миськон, кухняын ужан, патруль луон но казармаын улон. Валаны кутскиз егитъёс пӧлын, вуоно офицеръёс пӧлын эшласьконлэсь кужымзэ. Суворов училищеын дышетскон туж ӝог ортчиз. Собере дыр вуиз вылӥ военной дышетсконние мыныны. Кытчы? - Пие, оло, тыловой училищее пырод? - индылэ вал атаез. - Отын гражданской специальность но басьтод. Марысь-мар ке, дипломед котькытын но яралоз. Собере тыловикъёслэн службазы но сокем секыт ӧвӧл, улонзы но мон урод ӧй шуысал. - Мон морской пехотинец луыны малпасько, - атаез вераса гинэ быдтӥз, соку ик вандыса кадь куштӥз пиез. - Мыным капчиез кулэ ӧвӧл. Мон сое ачим бырйи, атай. Мон пичи ӧвӧл ни. Со ик вань верамез луиз. Юрий Курягин кутэмын вал Санкт-Петербургысь командиръёсты дасянъя С. М. Киров нимо общевойсковой вылӥ училищее. Курсант Юрий Курягин зарезь сярысь тодыны кутскиз. Нош куке но йыраз вал меда, со но зэмос ожмаськонэ пыриськоз шуыса, кылсярысь, Чечняын? Та юанлы али вераны туж шуг. 1999-тӥ арын апреле удмурт пияшлэн дораз бертылэмез берпуметӥез луиз. 24-тӥ апреле берен Питере кошкиз, отысен ини - Мурманске. Татысь одӥгаз частьын лейтенант Юрий Курягин офицерской службазэ нуыны кутскиз. Чечняын нош ик йырзэс ӝутыны кутскизы законъёсты гажаса улыны мылкыд карисьтэмъёс. Солдат но офицер одӥг кадесь: вылӥысь приказ сёто ке, кизэс йыр бордазы каро но, "Есть!" шуыса, уж борды басьтӥсько. Сётэм приказэз сэрттыны- пертчыны, сое эскерыны яке дунъяны дыр уг сётӥськы. Десантно-штурмовой взводэз, кудӥныз кивалтыны оскизы егит офицерлы, Кавказ гурезьёсы ысто. Кутскиз зэмос улон, кудзэ ачиз Юрий Курягин бырйиз. Озьы луиз: 2000-тӥ арез, кытын куинь "нолез", солы пумитаны ӧз кылды. 30-тӥ декабре Юрий Курягинлэн взводэз Харачой дорысь вырйылэ интыяськиз. та гурезь йылысен вань котыр адске вал, тушмонъёсты кырымпыдэс вылын возизы, асьме солдатъёслы ортчыны сюресъёс усьтыло вал, боевикъёсты омырскыны ӧз лэзьылэ. Шӧдтэк шорысь соос вылэ дас вить пала тодмотэм адямиос омырско. Командирлэн быгатыса кивалтэмез улсын боевикъёс пазьгемын вал, кин кытчы пегӟиз, сӧсыртэмъёсыз но вал. Та ыбылӥськонын ик Курягин лейтенантлэсь но пыдзэ сӧсыртӥзы, но со эшъёссэ ӧз кушты, медсанчасте мыныны чутрак пумит кариськиз. Вылӥысь кивалтӥсьёс валазы, взводэз котыртыны быгатозы шуыса. Юрттон вылысь, Харачой дорысь 1406,0 номеро вырйылэ И. Шарашкин старшой лейтенантлэн разведгруппаез но С. Соболь старшой лейтенант авианаводчик ыстэмын вал. Озьы ик татчы вуиз десантно-штурмовой роталэн командирез А. Милашевич капитан. Боевикъёслы пумит асьме солдатъёслэн автоматъёссы, противотанковой гранатомётъёссы но гранатаоссы вал. Мукет нуналаз, 31-тӥ декабре, ӵукна 8 час 30 минутэ взвод вылэ боевикъёс палась огнемётъёсысь тылъёс лобаны кутскизы. Улос ик юг-юг луиз, музъем зурказ, омырын ваньмыз сураськиз - сюй но, лымы но, из пырыос но. Олокытысь-марысь аспӧртэмлыко катанчи сьӧрысь опорной пункт вылэ гранатаос вуизы. Шузи-мази ыбылыны кутскыса, "Аллах Акбар!" кесяськыса, ог сю-кык сю тушо воргоронъёс взвод пала омырскизы. Берлань нокытчы чигнаны, вакчи дыр куспын котькуд солдатлы валэктэмын вал, таӵе кышкыт дыръя кин ма карыны кулэ: кин азьпала потэ, кин соосты возьма. Курягин лейтенант ачиз но, автомат кутыса, гурезь йылэ тубисьёсты ӵышкыны кутскиз. Одӥгез бӧрсьы мукетыз, Исламлэн флагез улсын ӝамбыръяськисьёс, погыльскыса уллань питыразы. Федералъёс пӧлын но ыштонъёс кылдӥзы. Харачой гурезьын быриз роталэн командирез. Сӧсыртэм Курягин взводэныз кивалтэмысь ӧз дугды, солы приказъёс быгатыса сётъяз. Кылем солдатъёссэ ӝутыса, тушмонъёс вылэ потӥзы. Соку автоматъёсысь но гранотомётъёсысь ыбылыса, пулемётной расчётэз пазьго, изъёс сьӧры ватскем гранатомётчик но чалмиз. Кылем-мылемъёсыз кир-пазь луизы. Ньыльдон минут пала кыстӥськиз шузи-мази ожмаськон. Со дыр куспын Юрий Курягин лейтенант пыраклы историе кылиз. 1999-тӥ арын 31-тӥ декабре, Выль ар нунал азьын, 9 час 10 минутэ удмурт пияшлэн кужмо сюлэмыз жугиськемысь дугдэ. Тушмон пуля асьме офицерез 1406,0 номеро вырйылын турназ. Лейтенантлэн Курягинлэн быгатыса кивалтэмез улсын туж кулэ инты асьме десантно-штурмовой батальонлэн ки улаз ик кылиз. Ож йылпумъяськем бере, таӵе лыдпусъёс потӥзы: асьме ожгарчиосмы пӧлысь дас кыкез быронзэс гурезьын шедьтӥзы, куинез туж зол сӧсыртэмын вал, нош боевикъёсты верано ке, куспазы телефон пыр ивортэмзыя тодмо луиз: витьтон палаез асьсэ базаосазы ӧз берытске, кык поллы тросгес сӧсырмемъёссэ сьӧразы ик нуоно луизы. 2000-тӥ арын 3-тӥ январе Курягинъёслэн семьяязы тол шорын гудыртӥз кадь. Выль арез пумитам бере, кык нунал ортчыса, 8 часын ӵукна бускельзы йыгаськиз, ивортӥз, тӥледыз телефон дуре ӧтё шуыса. Анай-атайлэн сюлэм зуркак луиз, сое зӧк кирпичен зӥбизы кадь. Герасим Александрович, ӝогак дӥсяськыса, вӧзысь корка пала вамыштӥз. Кема ик ӧз улы, вуиз. Чал-чал ветлэ: ымзэ вуриллям, кожалод. Надежда Николаевна, бӧрсяз коӵыш кадь лёгаськыса, солань-талань ветлэ, оло, маке вералоз ик, дыр, шуыса. Быдэс мугораз омыр кыскемез бере гинэ ивортӥз, соослэн пизы, Юрий Курягин, Чечен Республикаын геройлыко бырем шуыса. Корка пушкын ваньмыз сураськиз-пожаськиз. Нырысь-валысь ӧз но валалэ, ма кароно, кинлы вазиськоно. Кавказ гурезьёсы мынӥсько шуыса, Юрий Курягин берпуметӥ нуналозяз ӧз ивортылы. Озьы ке но, Надежда Николаевна но Герасим Александрович шӧдӥзы ни вал, соослэн пизы вир кисьтӥськон интыын служить каре шуыса. Анай-атаез телевизор дорысь ӧз но кошкылэ ни, котькуд нунал сямен, иворъёсын передачаосты учкылӥзы. Тодэмзы потӥз, кытчы интыяськемын морской пехотинецъёс. Ноябре-декабре ик валазы, соослэн пизы Гудермес палан шуыса. Йыразы олокыӵе но умойтэм малпанъёс вуылӥзы, но оскизы, соослэн пизылы урод уз луы шуыса. Кызьы быроз кадь кужмо мугоро пияш, кудӥз ачиз ик бырйиз улон сюрессэ. Службазэ кутскиз вал морской пехотинецъёслэн базаязы. Отын курсант Курягин нырысетӥ курсэз йылпумъямез бере ик вал ини, нош 4-тӥ курс бере Мурманскын стажировказэ но ортчиз. Соин ик, дыр, вить эшъёсыныз ӵош кариськыса, Баренцево зарезь дуре служить карыны кошкиз. Январь толэзе Юрий Курягинэз ватӥзы Камбарка шайвылысь нимысьтыз интые. Татын геройёслэсь аллеязэс кылдытыны малпало. Мон ачим но ветлӥ та шайвылэ. Мугор ик юзыр-кезьыр луэ. Палэнын сыло кык из обелискъёс. Одӥгысьтыз морской дӥськутэн егит пияш чорк-чорк синъёсыныз шоре учке. Паллянэ султӥськод - тон пала кариське, бур пала мынӥськод но, синъёссэ тон бордысь, оло, уг но воштылы, кожалод. Надежда Николаевнаен но Герасим Александровичен ӵош Юра пизэс буре ваимы, кема чалмыса улӥмы. Нош шайвылэ лыктон азьын ми соослэн корказы кема гинэ вераськыса улӥмы. Син шорам зэмос воргорон пуксиз. Табере, тодэ ваён вылысь, Курягинъёслэн пизылэн тусбуйыз, морской дӥськутэз гинэ кылемын на. Военно-морской флаг вӧзын лейтенантлэн Юрий Курягинлэн туспуктэмез. Отын со йӧн-йӧн, серемез но уг поты, мур малпаське. Мугорызъя, визьмо синъёсызъя солы куамын арес сётод. Улон дыртытӥз, луоз, сое. Туспуктэм дорын ик офицерлэн кортикез. Со чильк-вальк кисьтаське. Утялто, эскеро, шӧдске. Герасим Александрович, мыным возьматыны шуыса, пиезлэсь офицерской мундирзэ поттӥз. Син шорам йӧтӥзы зарнивуам погонъёс вылысь ӵуж кизилиос, нош гадь бордаз - Россилэн Героезлэн медалез. Россилэн Президентэзлэн 2000-тӥ арын 25-тӥ сентябре поттэм Указэзъя удмурт пияшлы лейтенантлы Юрий Курягинлы Россилэн Героез дано ним сётэмын вал. Быремез бере. Юалляськыны кутскем бере, Юралэн анай-атаезлэн синъёсазы курыт синкылиос люкаськизы. Зарни кизили туж чиля, но малы ке уг шунты, зэмос кузёез сое уг нуллы. Мон адӟи трос гинэ гожтэтъёсты, газетъёсысь вандылэм статьяосты, Юрийлэсь курсант тетрадьзэ, спортын азинсконъёсыз понна грамотаосты но дипломъёсты. Лыдъянтэм туспуктэмъёс. Одӥгаз Юрий боксэн шудэ, мукетаз парадэ пыриське, эшъёсыныз ӵош пуке, ӵыжы-выжыосыныз берпуметӥзэ бертылыкуз лэсьтэмез но вань, нош тужгес секытэз - 200-тӥ грузэн герӟаськемез. Мар монэ паймытӥз на: паськыт пельпумо пиез "Дух" нимо кинофильмез пуктӥсьёс ӧтьылӥллям. Отын со солдатлэсь рользэ шудэм. Мыным кылдӥз на "луло" Юрий Курягинэз но адӟыны. Надежда Николаевна но Герасим Александрович туж дуно синпелез сямен возё видеое пуктэм суредъёсты. Отын курсант Курягин эшъёсыныз ӵош сюанын но военной парадын. Тӥни со гинэ кылиз на. Коркан чал-чал. Мундирын зарни кизили ворекъя. Мур малпаськыса пуко пиосмурт но кышномурт. Ма меда малпало соос? Ку меда бурмоз Кавказ гурезьёсын басьтэм яразы? Кӧня меда семьяосы пыроз на куректонэн сураськем-пожаськем шыпыт? Кошкыны дыр вуиз. Соку йыре малпан шуккиз: "Али нош ӧсэтӥ Юра пыриз ке, ма вазьыны кулэ мон? Ма вераны кулэ анай-атаезлы? Уг валаськы. Бен угось: та дунне вылын трос на валантэмез". Георгий Грязев, Удмурт телевидениысь журналист. Чечен ожын бырем офицер Юрий Курягин. Гурт улон Кузё-а тон музъем вылад? Туннэ Ижысь "Металлург" культура дворецын ортчоз гурт кивалтӥсьёслэн сяме пыӵам тулыс кенешонзы. Нош солэсь азьло, мартлэн кутсконаз, Дэбес черкогуртын вал "котырес ӝӧк сьӧрын" пайдаё вераськон. Сое радъяз Россиысь Кун Думалэн депутатэз Светлана СМИРНОВА. Пумиськонэ ветлӥзы агропромышленной комплексысь тодмо кивалтӥсьёс, гурт хозяйствоя академиын, кивалтон ёзъёсын ужасьёс. Люкаськемъёс трос малпанъёссэс шараязы. Ми дэмласьком тӥледлы, гажано лыдӟисьёс, соослэн куд-ог верамъёсынызы тодматскыны. С. СМИРНОВА, Кун Думалэн депутатэз: - Кылем толэзе бырйисьёсын пумиськонъёс ортчытъякум, уноез эшъёс туж шугъяськыса вераллязы гурт хозяйствоын кылдэм югдур сярысь. Ӵапак соку ик малпан кылдӥз та ужпумлы сӥзем "котырес ӝӧк" люканы. Дэбес ёрослэн кивалтӥсез Борис Урасинов ӵектӥз со пумиськонэз ас дораз ортчытыны. Кенешон ваньмылы кулэ. Агропромышленной комплексын югдурез умоятон вылысь, асьмелы пыр-поч вераськоно, мар кароно асьме республикаын, кудзэ ужпумез ӝутоно Россилэн Правительствояз, мар пумысен закон юнматоно Кун Думаын. Мон жаляса пусйисько, кылем ар ӵоже парламентын гуртлы юрттон ласянь одӥг закон но кутымтэ. Со возьматэ туала кивалтӥсьёслэсь крестьян уж шоры учкемзэс. Ойдолэ дэмен учкоме, мар туннэ асьмеос лэсьтыны быгатӥськом, ог-огмылы юрттон понна? А. МАКСИМОВ, "Кезский сырзавод" АО-лэн валтӥсь директорез: - Россиын таӵе умойтэм сям вань. Бумага вылын трос ӟеч решениос кутӥсько, нош улонын соос уг зэмало. Тани колхозъёсты воксё кекатӥзы ни энергетикъёс. Газ но туж дуно усе. Куд-огъёсыз, вань луонлыкъёссэс уже кутыса, котьма понна тыро, штрафъёслэсь мозмытско. Нош вылӥын куто со тыронъёсты "кысон" сярысь решение. Бере кылисьёс капчияк шокчо, устоосыз йырзэс кормало. Озьы-а асьмеос зол ужаны луонлык кылдытом? Минеральной сылал поттӥсь предприятиослы государство дотация сётэ, озьы гуртоос удобрениез дунтэмгес басьтыны быгато. Малы та амалэз кутонтэм мукет удысъёсын? Шуом, тулыс кизён но юосты октон вакытэ коть элекутрокужымез, эстӥськонэз крестьянъёслы пичигес дунын сётыны луэ ук, кун ласянь юрттэт луиз ке. Соку гурт хозяйствоос огкадь условиосын ужасалзы. Али трос верасько сиён-юон поттӥсьёслы огъя налог тупатон сярысь. Умой малпамын кадь. Пӧртэм фондъёсы нимаз тырытозь, урожайдэ утялтэмед бӧрсьы вытлы огпол коньдон шедьтод но - ужед быриз. Но шугъяськытэ соиз: налоглэн быдӟалаез шӧдскымон вылын уз луы меда? Уго выт тырон рад умой-умой чакламтэ на. С. СМИРНОВА: - Лыдэ басьтэ: котькуд хозяйство, котькуд предприятие ачиз бырйыны быгатоз, кызьы тыроно вытъёсты. Яке вуж сямен, яке арлы огпол. Нош пунэм тыронъёсъя чаклано ке, кылем толэзе милям депутат огазеяськонмы Россилэн Президентэныз пумиськыку, Владимир Путин кык сюрес пусйиз: гуртоослы дотация тыроно поттэм сиён-юонзы, ваньбурзы вылысь, ужаны быгатӥсьтэм предприятиосты, банкрот карыса, кужмоосыз борды юнматоно. Та пумысен но асьмелы кенешоно. А. Малков, Кун Кенешысь ялан ужась комиссилэсь тӧрозэ воштӥсь: - Котьмалэсь бадӟым шуг-секыт - дунъёслэн пӧртэм луэмзы. Заводъёс, эстӥськон, электрокужым сётӥсьёс соосты нуналмысь йылэто, нош гуртоослэн номыр но каремзы уг луы. Государство ласянь юрттэт но югдурез туж ик уг вошты. Асьмелэн вал умой законмы - агропромышленной комплекслы юрттон сярысь. Но али со уг ужа ни. Уго республикаямы быдтӥзы госзаказэз. Мон малпасько, государстволы та ужлэсь палэнскыны уг яра. Со ачиз чакланы кулэ, кӧня но мар поттоно. Кунгож сьӧрын котькуд сиён-юонъя планзы вань, соосты учкыса ик дотация но тупато, нош асьмеос ваньзэ ас эрказ лэзиськом. Ог дас процентэз хозяйствоос быгато асьсэ кужыменызы азинскыны. Асьмелы юнгес малпаськоно шоро-куспоосызлы юрттон сярысь. Но котьмалэсь азьло шедьтоно копак лябӟемъёсты калык радэ берыктон амал. Банкротэ выжтон, мон сямен, туж ик уг тупа. Палэнысь лыктэм управляющийёс уг сюлмасько ваньбур поттонэз радъян сярысь. Ужась коллективлэн кулэяськонъёсыз палэнэ кылё. Озьы ӧз луы шат Якшур-Бодья ёросысь "Якшурский" парсь вордон хозяйствоен? Ма отын туннэ вань на? Предприятиосын кивалтонэ та ужлы дась луисьтэм муртъёс медам шеде шуыса, асьмелы усьтоно нимысьтыз курсъёс. Ёрос администрациос но чиньы пыр учкыны куэ ӧвӧл та шоры. Мон малпасько, бырись хозяйствоослэн ваньбурзы гуртоослэн азбаръёсазы вуоз. Но та ужез законъя радъяно ук. Куд-ог улосъёсын со пумысен документъёс кутэмын ни. Асьме Кун Кенеш туэлы 70 миллион манет висъяз гуртоослы выль техника басьтыны. Со сяна, 19 миллион вуоз на тракторъёсты тупатъяны. Кутскон понна со ичи ӧвӧл ни. Но югдурез шӧдскымон тупатыны туэ уз луы на. Милемыз, депутатъёсты, туж шугъяськытэ кадръёсын ужаммы. Асьмеос уиськиськом лыд сьӧры. Нош ӟечлыкез ӧвӧл. Егитъёс выль условиосын пайдаё ужаны уг пӧрмыто. Оло, умойгес малпаськоно гурт специалистъёслы, кивалтӥсьёслы коньдонэн, лэсьтӥськон вузъёсын юрттон сярысь? Матысь дыре чакламын крестьян (фермер) хозяйствоосты азинтонъя выль программа кутыны. Таиз но уж туж кулэ. А. МАКСИМОВ: - Асьмелы дасяно югдурез воштонъя ӵектонъёсмес. Басьтом со "Якшурский" парсь вордон комплексэз ик. Малы отысь техника, мукет ваньбур туж дунтэматэмын? Кӧня ке мурт пыр ортчыса, солэн дуныз чутрак будэ но вужмем техникаез басьтӥсь мукет хозяйствоос трос коньдон сётоно луо. Валамон ни, со посредникъёслэн кисыязы кыле. В. КАРАКУЛОВ, Дэбес ёросысь "Труженик" эштослэн кивалтӥсез: - Гуртоослэн даурзы пумен кулэсме. Пиосъёс тужгес но вазь кошко улонысь, шерез гинэ пенсизэ адӟыны быгатэ. Механизаторъёслы кыӵе ке коть капчиятон тупатоно вал. Шуом, пенсие потон дырез кулэстоно. В. ПАСТУХОВ, "Каракулино-молоко" огазеяськонлэн кивалтӥсез: - Ми бордамы итӥм ёросысьтымы самой лябзэ хозяйствоез. Отын ваньбур поттон радэз быдэсак воштӥм. Ньыль толэзь куспын йӧл кыскон тямыс пол йылӥз. Урод шат? Начар хозяйствоос ичи ӧвӧл. Шонер ӵекто эшъёс: сыӵе коллективъёслы озьы гинэ коньдон сётэмлэн пайдаез уз луы. Уксё висъяно котыр ласянь чаклам программаосты быдэсъянэ, ужан амалъёсты выльдонэ. Коньдон ватсаса поттэм сиён-юонэн мед берытскоз. Властьлэн та ласянь сюлмаськемез уг шӧдӥськы. Со кышка на огъя тӥрлыкез, ваньбурез нимаз адямиос кие сётыны. А. МАКСИМОВ: - Югдурез воштыны юрттоз холдинг кылдытон. Ваньбур поттонэз, переработкаез, вузкаронэз - ваньзэ сое одӥг кульчое огазеяно. Котькуд ёзлэн ӟечгес ужаны мылкыдыз мед луоз. А. СОКОЛОВ, Удмурт Республикаысь экономикая министрез воштӥсь: - Тырмымтэослэн мугзы потэ со бордысь но: Россиын но, Удмуртиын но ӧвӧл умой- умой чаклам-дасям огъя аграрной политика. Кызьы шуо, система ӧвӧл. Я соиз борды, я мукетыз борды басьтӥськиськом, пумозяз ум вуттӥське - палэнскиськом. Озьы-а тупалоз югдур? Тани али кутэмын Удмуртиез азинтонъя программа. Отын пусъемын АПК-ысь тужгес но висьытӥсь ужпумъёс - ваньбур поттонэз йылэтон, муослэсь удалтонзэс будэтон, вылӥ ӟечлыкен кидыс дасян, нимаз адямиослэн хозяйствооссылы юрттон. Со понна чакламын кун коньдон сётыны. Но учке ай, кызьы со уксёез люке Гурт хозяйствоя но сиён-юонъя минитерство. Висъям коньдон пӧлысь ньыль процентэз висъямын муосты умоятонлы, кык процентэз - таза кидыс уськытонлы, сомындаез ик - пудо выжыез выльдонлы. Тӥни сыӵе "приоритетъёс". Кӧня ке ар ӵоже вераськиськом ни етӥн сярысь. Президент та борды ачиз кутскиз, соин ик та культуралы висъям бусыос паськытазы, урожай но уногес люкаськыны ӧдъяз. Но государстволэн коньдонэз уг мыны удысэз азинтонэ, хозяйствоос сое "сиыса" быдто. Таӵе сюрес рыноклэн куронъёсызлы уг тупа. Асьмелэн бадӟымез узырлыкмы - адямиос, тодӥсь-валась специалистъёс. Соос быгато ужаны. Лыдэ басьтоно мукетсэ но: экономикалэн законъёсыз аслаз. Коньдон ваньмызлы ноку но уз тырмы. Со шедёз кужмоез кие, кин быгатэ удыссэ валаса радъяны, воштӥськонъёслэсь ӧрзэс мукетъёсызлэсь вазьгес шӧдыны. Сыӵе мурт казнаысь сётэм одӥг манетэз кыклы пӧрмытоз, вӧзысьтыз лябӟем эшсэ азьлань кыскыны луонлык шедьтоз. Кужмо кивалтӥсьёслы юрттыса, асьмеос бӧрысь быгатом бере кылисьёсты ӧжыт ке но кулэстыны, пӧртэм эштосъёсты огазе карыны. Но со понна кивалтӥсь ёзъёсын ужасьёслы кулэ ог-огзэс валаны, ваньмызлы огъя ӟеч малпанэн улыны. Та вакытэ Удмуртия ужа азинсконъя концепция дасян бордын. Со пумысен олокытысь но ӵектонъёс вуо. Нош гуртоос шып уло. Соос вазисько ке но, куронзы одӥг - вае коньдон. Азьпала учкыны дышетскытэк, кыдёке ум вуэ. А. БЕЛОСЛУДЦЕВ, Каракулино ёросысь "40 лет Победы" эштослэн кивалтӥсез: - Туннэ азинскем хозяйствоос понна умой, соос вӧзын лябъёсыз вань ке. Малы? Сыӵе югдурын бускеледлы луэ мултэссэ кидысэз, пудоез, мукет ваньбурез вузаны. Умойтэм соиз но. Трос коньдон кутӥське адямиосты дышетонэ. Пайдаез туж уг шӧдӥськы. Уг дырто гуртоос выльзэ пыӵатыны. Басьтом районмес ик. Малпаськоды, кин ке коть тырше-а хозяйствоямы люкам опытэз ас дораз кутыны? Уг. Кулэ уг каро. Та ласянь но асьмелы малпаськоно ук. Эшшо одӥг люкетӥсь мугез верасал на. Дугдоно ни крестьян калыкез политикаен герӟамысь. Быръён ортче, собере кузёос кутско бугыръяськыны-юалляськыны, кин кызьы куаразэ сётӥз. Со лыдпусъёсъя отӥяз коньдонэз люкылыны кутско. Сыӵе ужан манер экономикаын югдурез тупатыны чик но уг юртты. М. УШКОВ, Вавожысь "Агропромхимия" предприятилэн кивалтӥсез: - Ляб хозяйствоез кужмоеныз огазеяло ке, гоударство юрттыны кулэ. Но улонын озьы котьку ик уг пӧрмы на. Туннэ мон кузёяськисько Вавожысь "Агропромхимилэн", "Агроснаблэн", РТП-лэн, вузкарон юртлэн данак акциосынызы. Вазиськи правительствое, "Яголуд" начар хозяйствоез бордамы кыскон понна, 300 миллион манет висъяны куронэн. Бюджетын сыӵе кулэяськонъёслы коньдон чакламын. Олокыӵе но муг шедьтыса, кивалтӥсьёслэн со уксёез сётэмзы уг поты. Нош мон лябӟем эштосэ та дырлы 1,5 миллион манет сётӥ ни, 13 ар ӵоже гырымтэ-кизьымтэ бусыосты отын со чотын выльысь утялтыны кутскизы. Сётозы-а, уз-а коньдон, тулыс ми одно ик со лудъёсы ю но мукет культураос кизём. Нош кун юрттэт луысал ке, пайдаез но ӝоггес шӧдӥськысал ук! Л. ПОСТНИКОВ, Нылга льнозаводлэн директорез: - Республикаямы кутэмын "Етӥн" программа. Умой со. Но продукцимылэн асдуныз бадӟым на. Али юри ӧтимы Ижысь сельхозакадемиысь тодосчиосты. Соос удысысьтымы шекъёсты шедьтыны выро. Быгатӥзы ке асдунэз кулэстон амал ӵектыны, тау шуом. Туннэ милям вузаны дасям ваньбурмы лачак. Но солы дунъёс укыр пичиен ум дыртӥське келяны. Мон сямен, асьме дорын эскероно, етӥнлэсь вузъёс лэсьтыса. Ӟеч шорт, дэра, басма поттыны кутским ке, етӥн будэтон пайда сётыны быгатоз. Соку ми но колхозъёслы мертчанзы, кидыссы понна коньдон дыраз берыктом, мукетъёсыныз но кусыпъёсмес юнматом. А. МАКСИМОВ: - Котькуд удысын луэ, вылды, холдингъёс кылдытыны. Эштосъёсты, предприятиосты ог-огенызы герӟано. Соку быгатом дась продукцимес но ӟечгес вузаны. Туннэ куд-ог сиён-юонэз тырмыт поттӥськом ни, нош со уг кошкы. Адямиос уг быгато вузмес басьтыны, уксёзы ӧвӧл. Н. ШУТОВА, Сюмсиысь "Тур" огазеяськонлэн директорез: - Агропромышленной комплексын воштӥськонъёс ортчытон бордын ужаны кулэ тодӥсь- валась адямиос: юристъёс, экономистъёс, мукет специалистъёс... Умой луысал, министерствоямы нимысьтыз отдел кылдытыса. Быгатӥськом ук асьмеос палэнысь но визьмо муртъёсты кыскыны. Тани Орёл городын вань "Агромир" фирма. Отысь эшъёс толэзь пумын дорамы лыктыны кулэ. Соос семинар ортчытозы. И. СЕМЁНОВ, Играысь сӥль комбинатлэн кивалтӥаез: - Милям предприятимы кадь огазеяськонъёс республикаын ӧз кыле ни, кытын ӝыныез акциос возисько на колхозъёс киын. Ёросысьтымы но Дэбесысь эштосъёс быгато пыриськыны комбинатлэн ужаз. Нош огъя югдур сярысь верано ке, ӟечез туж ик ӧвӧл. Государство валтӥсь хозяйствоослы зэмос юрттонэз кулэен уг лыдъя. Тани вал "Игринский" совхоз. Отын 1,5 сюрс сюро таза пудо возизы. Мар луиз? Банкрот каризы, мукет хозяйство борды думизы. Ми трос бызьылӥм ни, пӧртэм сюрес ӵектыса. Кылӥсь ӧз шедьы. Государство уг сюлмаськы аслэсьтыз рыноксэ утён сярысь. Асьме адямиослы кизэ мычем интые, со Западысь вузкарисьёслы эрик сётэ, отысь фермеръёслы юрттэ. Нош кыӵе ӟечлыкен сиён-юон вуэ кунгож сьӧрысь, ваньмыз тодо. Н. ГРЕКОВ, Глазов ёрос администрацилэсь кивалтӥсьсэ воштӥсь: - Тодӥськоды-а, ма асьмелы люкетэ? Москваысен кутскыса но Дэбесэн йылсаса, весь вераськиськом-вераськиськом, нош со кылъёсмес ужен ум юнматӥське. Тани Сталин ас вакытаз калыкез туж ӝог колхозъёсы пыртӥз. Мон али уг вераськы, шонер-а, ӧз-а со лэсьтӥз шуыса. Ужпум дыр бордын. Асьмеос дас ар курласьком ни асьмемыз но, вань историез но. Ярам коть, реформа шуонлэн дас кыкетӥ араз Владимир Путин ялӥз, гуртлэн ӵуказе нуналыз паськыт производствоен герӟаськемын шуыса. Вылӥын но валазы кадь, колхозъёсты быдтыны кулэ ӧй вал шуыса. Мон уг валаськы, куке эштосъёсты люкылыны ӧдъяло. Таиз, пе, зол, соиз ляб но озьы азьлань. Ужпум кузё бордын. Кытын кивалтӥсь кужмо, отын ваньмыз чакламъя радъяське. Москваысь но, Ижысь но тӧлъёс уг люкето сыӵеослы. Кӧня пол адӟылӥм ни, басьто зол кузёез кытчы ке, со интые ляб мурт шеде но, колхоз син азьын шальтра. Кадръёс - нырысь ик со борды кутсконо. Туннэ, жаляса верано луэ, данак интыосын гуртэ кылемын сыӵе адямиос, кин уз быгаты ни хозяйствоез ӝутыны. Озьыен, утчано югдурез тупатыны сюрес. Мукет сямен радъяно кредит висъянэз. Коньдон сётъяно сыӵе эштосъёслы, кин быгатоз сое тупатэм дыре берыктыны. Уксёез кутоно азинсконэ, ваньбур поттонэз паськытатонэ. Дотациосъя но учконо. Тупатоно кыӵе ке но мертэт, шоро-куспо лыдпус. Быгатӥз хозяйство ассэ возьматыны - басьты ватсаса коньдон. Ӧз пӧрмыты - вождэ эн вай, но тыныд юрттэт уз луы. Вань сыӵе хозяйствоос, кудъёсыз доходысьтызы шӧдскымон люкетсэ быдто социальной удыслы, сюрес лэсьтонэ, газ кысконэ, шуныт сётонэ. Нош со коньдонэз ужасьёслы люкылыны луысал ук! Та пумысен но ужрад кутоно ни. Котькуд хозяйстволэн аслаз пӧртэмлыкез. А. СОЛОВЬЕВ, "Удмуртавтодор" предприятилэн кивалтӥсез: - Республикаямы сюрес лэсьтон азинске нимысьтыз программая. Шуг-секытъёс вань ке но, югдур берло дыре тупатске. Тӥ, гурт кузёос, сое асьтэ вылын шӧдӥськоды. Ми быгатэммыя котькызьы тыршом тӥледыз ватсаса сюлэмшугъяськонъёслэсь мозмытыны. Сыӵе луонлык шедёз. С. Смирновалэн, мукет депутатъёсмылэн юрттэменызы, та арлы Россия асьме республикалы 278 миллион манет сётэ. Кылем арен 89 миллион вал. Пӧртэмез вань ук? В. НИКИТИН, Завьялово ёросысь "Путь Ильича" колхозлэн тӧроез: - Асьмелы умой-умой малпаськоно гуртысь социальной объектъёсты интыысь кивалтон ёзъёс кие сётонэз радъян сярысь. Россия вамыштэ сьӧсь капитализм лэсьтон сюрестӥ. Сое возьматэ куд-ог бадӟым кужымъёслэн Уж сярысь выль кодекс но мукет со выллем чурыт законъёс тупатыны тыршемзы но. Озьы луиз ке, огшоры калыклэн сюлмаськонъёсыз туж кыдёке пештозы. Велосипед выльысь малпаны кулэ ӧвӧл. Лыдэ басьтоно дуннеын люкам опытэз. Тани Финляндиын гыроно-кизёно муоссы тямыс процент гинэ. Озьы но сиён-юонлы уг ёрмо. Нош асьмелэн?.. Ю. ДОБРЯКОВ, Шаркан ёрос администрацилэсь кивалтӥсьсэ воштӥсь: - Нош ик берытскем потэ кадръёс вылэ. Тодӥськоды-а, туннэ районысьтымы эштосъёсын 32 валтӥсь специалистлэн интыез буш. Уг тырмо соос. Калык курадӟе. Нылпиоссэ ас коньдонэныз дышетэ. Палэнэ ветлыны, шутэтскыны луонлыкъёс сярысь веранэз ик ӧвӧл ни. В. Ковриго, сельскохозяйственной наукаосъя доктор, профессор: - Министерствоен вераськыса, азьло аръёсы асьме сельхозинститут дася вал кивалтӥсьёсты. Со ужез выльысь улӟытоно, ӟеч малэсь куштӥськыны уг яра. Азинскыны уз луы ӟеч технологиостэк но. Соос вань. Но уже уг кутӥсько. Правительствоын яке министерствоын, мон сямен, кылдытоно вылэм индылӥсь кенеш. Отчы пыртэм тодосчиос гуртысь кивалтӥсьёслы мед быгатысалзы визь-кенеш сётыны, пӧртэм юанъёссылы валэктон шедьтыны. Озьы ик уже кутоно вылэм асьме агропромышленной предприятиослэсь кужымзэс. Гуртоослэсь пичи техника но тӥрлык ласянь куд-ог куронъёссэс соос асьсэлы пайдаен быдэсъяны быгато. С. СМИРНОВА: - Ойдолэ мылкыдъёсмес ӵошатом на Музъем кодекс пумысен. Думаысь аграрийёс али ӵекто инъет чотын кутыны сыӵе проектэз, кудзэ дасязы кыкетӥ созывысь депутатъёс. Отын вань гыроно муосты уже кызьы кутон сярысь люкет. Россиысь Кун Кенешлэн берпуметӥ заседанияз Владимир Путин ӵектӥз та ужпумез улосъёс (субъектъёс) кие сётыны. Мед, пе, асьсэос чаклалозы. Кызьы тӥ учкиськоды сыӵе ӵектон шоры? А. МАЛКОВ: - Асьмелэн мылкыдмы вань-а, ӧвӧл-а, но гыроно муос рынокын "бергало" ни. Уго Конституциын шуэмын: котькуд адямилэн музъемлы кузё луыны правоез вань. С. СМИРНОВА: - Мон малпасько, Музъем кодексэз юнматоно. Но со сяна, кулэ но ватсаса кӧня ке нимысьтыз законъёс, кудъёсыз асьме муосты тус-тас каронлэсь утёзы. Озьы-а? *** "Котырес ӝӧк сьӧрын" вераськон кема кыстӥськиз. Люкаськемъёс ӵектонъёссэс огазеяны быгатӥзы. Со дэмланъёс куинь люкетлы висъямын. Нырысетӥез сётэмын Удмуртиысь правительствое, мукетъёссэ келялозы Россиысь быдэсъясь но быръем ёзъёсы. Ӝутэм ужпумъёсъя ужез азьланьтон вылысь, Дэбесэ лыктэмъёс ӵектӥзы куд-ог эшъёсты нимысьтыз группае огазеяны. Соослы туннэ ортчоно бадӟым кенешонын кыл курыны но кутскем удысэз бӧрысь но нуыны. "Удмурт дунне" но возьматылоз та адямиослэсь кызьы ужамзэс, ма лэсьтыны быгатэмзэс. Ӵектонъёсты луизы ке, гажано лыдӟисьёс, шумпотыса тодматском соосын но тыршом газет бамозь вуттыны. И. Максимов. В. Беломорских (фото). Пумиськонэз нуиз Светлана СМИРНОВА. Солы юрттӥз Дэбес ёрослэн кивалтӥсез Борис УРАСИНОВ. Алексей СОКОЛОВ гурт хозяйствоын кемалась ужа ни. Анатолий МАКСИМОВ мылкыдзэ шараяны котьку дась. Михаил УШКОВ - туала амалъёсын кивалтӥсьёс пӧлысь одӥгез. Юрий ДОБРЯКОВ котькуд кылзэ документэн юнматэ. Пумиськон дыръя Сюмсиысь Надежда ШУТОВА. Сӥль поттон удысын кышномуртъёс но ас интызэс шедьтыны тыршо. Кун Кенешлэн депутатъёсызлы Алексей СОЛОВЬЁВЛЫ но Аркадий МАЛКОВЛЫ вань ма сярысь сюлмысь кенешыны. Политика но экономика Мурт нянен калшано 1. Ортчем арлы йылпумъянъёс возьмато: гурт удыс лябӟе. Лыдпусъёс пыр адске картофкалэн синэмез, етӥн будэтон, сӥль, тылобурдо вузан кулэсмиз 7 процентлы, ӧжытгес кыскемын йӧл, кыскемын чечы, басьтэмын емыш но бакча сиён. Ар ӵоже странаын продукция поттон усиз 4-5 процентлы. Пусъём на: толйись юос арысь аре ӧжытгес но ӧжытгес луо, пудо йыр кулэсмиз на эшшо 5 процентлы, пудо сиён 4 процентлы ичи дасямын. Сыӵе югдур быдэс страная, оглом вераса. Улосвылъёс пӧлын вань ӟечгес улӥсьёсыз, но соос ӧжыт. 80-тӥ аръёсын ӵошатыса, гурт удыс экономика ласянь кык поллы лябӟемын, таӵе ыштонэз асьмеос ӧм адӟе коллективизация вакытэ но, Быдӟым Отечественной война пыр потыса но. Малы ке-а В.В.Путин Россиысь музъем ужасьёслэн Краснодарын кылем арын 10-тӥ феврале ортчем кенешоназы паймемзэ ватыны быгатытэк шуиз: "Кыӵе ке осконтэм лыдпусъёс!" Вераськон мынэ АПК-ын кылдэм югдуръя аслаз ик дасям докладэз сярысь. Вуылӥз со Кубаньысь огаз азьмынӥсь фермае но, "Колос" племзаводэ. Ас синмыныз адӟиз гурт удыслэсь "сыномемзэ". Нырысь ик быроз техника. Советской аръёсы басьтэм но юнматэм технической база туннэ вужмемын 80-90 процентлы, самой троссэ со чидалоз на 3-4 арзэ. Кризислэсь вуонзэ адӟон понна идеолог но, политик но луыны кулэез ӧвӧл, тае ас вылаз шӧдэ котькудӥз механизатор, котькуд эштослэн, колхозлэн кивалтӥсез. Югдурез мургес валан вылысь тодматскыны кулэ, дыр, Россиысь Статистикая кун комитетлэн лыдпусъёсыныз. Соос таӵеесь: 1989-тӥ�1999-тӥ аръёсты ӵошатыса, 10 ар куспын гинэ ю-нянь будэтон кулэсмиз 2,1 поллы, сахар кушман - 2,6 поллы, етӥн - 4,3 поллы; картофка - 13 процентлы тросгес но бакча сиён - 1 процентлы ятыргес. Картофкая верано ке, 70-тӥ аръёсын ӵошатыса, солэн огъя продукциез шӧдскымон кулэсмемын. Сыӵе ик югдур етӥн будэтонъя. Али асьмеос та культурая ХИХ даурысь 60-тӥ аръёсын огкадь луиськом. Пудо вордон удысэз ке басьтоно, сюро таза пудо тылобурдо сӥлья ӵошаськом 1971-тӥ арен, йӧл кысконъя - 1957-тӥ арен, курег пузъя усим 1965-тӥ арозь. Пудо улёез ке лыдъяно, скалъёслэн, ошъёслэн лыдзы туала мында вал ини ХИХ даурлэн пумаз, кысконо скалъёс - ХИХ даурлэн шораз, нош ыж но кеч сярысь ке верано - 1861-тӥ арын реформа ортчытозь, сомында йыр возиз ни Россиысь гурт удыс. Ӵошатон понна: 1933-тӥ арын вордӥллям 13,3 миллион скал, ыж но кеч - 23,4 миллион йыр. 1990-тӥ арын скалъёс - 20,8 миллион, 1999-тӥ арын - 12,9 миллион (кулэсмемын 1,6 поллы). Ыжъёс но кечъёс 1990-тӥ арын - 61,3 миллион, 1999-тӥ арын - 19 миллион йыр (кулэсмемын 4,4 поллы). Берло дас ар ӵоже сӥль будэтон усиз 1,4 поллы, йӧл - 1,7 поллы, парсь йыр кулэсмиз 2,2 поллы. Тӥни малы магазинъёс но рынок туж ӝог тырмизы кунгож сьӧрысь ваем продукциен. Кулэстэм пудо йырез, картофка, бакча сиён будэтонэз сямен, огкутскыса одӥг арскын уд йылэты. Нош ик дыр кулэ но тырмыт пудо сиён. Таиз ласянь югдур секыт: тысё но пуртэсо культураос, силослы киземъёсыз но берло аръёссэ удалтонлыксэс ыштӥзы. Тӥни малы миым та вакытэ 14 миллион тонналы фураж ӧжытгес кисьтэмын вал. Ас кужымен но асьме урожаен пудолы тырмымон ю тысь нокызьы но уд дася. Тӥни кытысь потэ пудо йырез кулэстон. 2. Та чуръёсты лыдӟыса, кудӥз-огез, оло, шуоз: "Кызьы сӥль, йӧл ӧвӧл, вань магазинъёс, рынокъёс сӥён-юонэн тырмемын ук! Черодъёс но быремын". Ваньмыз шонер. Уксёед ке тырмыт - котьмае басьты. Ӟечлыксэ ум ӵошатэ ни, таизэ арлыдо адямиос асьсэос нокыӵе эксперттэк умой валало, вылды. Гурт удысъя сиён-юон поттэмын 1990-тӥ ар 1999-тӥ ар кулэсмиз Пызь изэмын (млн.тонна) 20,7 12,2 1,7 поллы Кеньыр (сюрс тонна) 2854,0 868,0 3,3 поллы Нянь но булка (сюрс тонна) 18200,0 8957,0 2,1 поллы Будос вӧй (сюрс тонна) 1159,0 845,0 1,4 поллы Сахар пызь (млн.тонна) 3,8 6,8 1,8 поллы трос Ческыт сиёнъёс (сюрс тонна) 2800,0 1496,0 1,9 поллы Макарон, лапша (сюрс тонна) 679,0 2410,0 3,6 поллы Маргарин (сюрс тонна) 215,0 377,0 1,8 поллы трос Скал вӧй (сюрс тонна) 833,0 258,0 3,2 поллы Сӥль (сюрс тонна) 6600,0 1072,0 6,2 поллы Колбаса (сюрс тонна) 2300,0 944,0 2,4 поллы Сыр (сюрс тонна) 458,0 183,0 2,5 поллы Йӧл (сюрс тонна) 20800,0 5451,0 3,8 поллы Кызьы адӟиськом, 90-тӥ аръёсы будэмын сахар пызь но маргарин поттон гинэ, эшшо - кудӟытӥсь юонъёс. Сахар тросгес луиз Кубаысь тростниклэсь дасямзэ басьтэмысь дугдэмен валче но Украинаен производственно-экономической кусыпъёсмы лябӟемен. Малы маргарин ятыргес сиыны кутским? Та юанлы валэктон шедьтоды сётэм таблицаысь: нӧкы вӧй кулэсмиз 3 поллы, нош химилэсь дасям сиёнэз данъясь реклама нуналаз олокӧня пол берга вань телеканалъёсын. Тодмо кардиохирург Кристиан Бернард талы пумит вераз аслэсьтыз мылкыдзэ, маргаринэз "холестерин бомба" шуыса. Азьвылэн ӵошатыса, Россиын улӥсьёс туннэ туж ӧжыт сиё чорыглэсь дасям продукциез. Со дунояз, огшоры семьялы вормонтэм луиз. Озьы ик кулэсмиз сӥль, колбаса, курег пуз, вӧй басьтӥсьёслэн лыдзы. Ӝыныез калык туннэ улэ дунтэм сиён вылын: картофка, "Буш кукъёс", пудо тымус (субпродукт) но "химия суретъёс". Роскомстат лыдъямъя, адямилэн мугораз суткаяз 2775 калорийлы сиён люкаськыны кулэ. 1996-тӥ арын асьме дорын со усиз 2200-озь. Дуннеын тупатэм огъя норма - 3,200. 70-тӥ�80-тӥ аръёсын та лыдпус возиськиз 3300 котырын. Быдэс страная учконо ке, витьмос люкетэз (городысь узыръёс, кивалтӥсьёс, гуртысь ӟечгес улӥсьёс) сиён-юонлы ёрмонэз уг шӧдо, тазалыксы вылын со уг адӟиськы. Но калык пӧлын 52-53 процентэз урод сиське, 7-8 процентэз - сютэм улэ, шуыны луоз (суткаяз - 1520 калорий). Ваньмыз со шӧдӥське тазалыкмы вылы. Калык восьме, дырызлэсь вазь пересьме. Нош ма луэ армие мынӥсь пиосын? Нырысь толэзьёссэ соосты умой-умой сюдоно, собере гинэ киязы пыӵал тӥрлык сётоно. Врачъёс верамъя, висись пиналъёс пӧлысь ог 80 процентэз - куанер семьяосысь. Соос, емышъёсты вератэк, кӧт тырымон сӥль, йӧл, бакча сиён уг адӟыло. Гурт удыс тазьы ик куашказ ке, 5 ар ортчыса, 70-75 процентсэ сиён-юонэз Россия басьтоно луоз кунгож сьӧрысь. Нош отысь асьмелы кыӵе продукция келяло - вератэк но валамон. 3. Малы гурт удыс, сюдӥсь-вордӥсьмы, сокем ӝог лябӟиз, кынарзэ ыштӥз? Мугез трос. Нырысетӥез, кызьы пусъё социологъёс - агропромышленной комплекслэсь инъетсэ - колхозъёсты но совхозъёсты быдтон. Та уж коллективизация ортчытэм амалъя ик, дыртыса но малпаськытэк нуэмын. Колхозэ пыртонлэн коть мугез вал: городъёсысь сютэм кылем калыкез сюдон но индустриализация лэсьтонэз ӝогомытон. Нош коллективной хозяйствоез туала аръёсы куашкатон Россиез быдэсак пыдесъяськытӥз Америка но Европа азе. Фермеръёс улэ ватскыса куажгатэмын, нелькемын быдэс АПК. Озьы но сельхозпредприятиос (быдэс кылем колхозъёс, госхозъёс, подсобной сельхозпредприятиос, кооперативъёс) поттэм продукциенызы возьыны тыршо сиён-юон рынокез. Учке, ӵошатэ: Будэтэмын: (процентэн) Вань сиён-юон пӧлысь СХП ЛПХ ЕК но ФХ СХП-ос вузазы Ю-нянь 92,4 0,5 7,1 98,2 Сахар кушман 93,8 0,7 5,4 96,8 Шундыберган 86,0 1,3 12,7 93,5 Етӥн 98,1 0,3 1,6 99,0 Картофка 8,3 90,8 0,9 38,9 Бакча сиён 19,3 79,0 1,7 54,0 Сӥль 38,7 59,5 1,8 61,3 Йӧл 49,1 49,4 1,5 73,5 Курег пуз 70,1 29,6 0,3 94,7 Валэктон: СХП - сельхозпредприятие, ЛПХ - личной подсобной хозяйство, ЕК но ФХ - единоличной крестьян но фермер хозяйствоос. 90-тӥ аръёсы страная гыроно-кизёно музъем кулэсмиз 30 миллион гектарлы. Ю-нянь бусыос арлы быдэ 2 миллион гектарлы сино. Таин валче, 22-23 миллион тонналы ӧжыт ю тысь басьтӥськом. Техника сярысь. 10 ар куспын азьвыл басьтэмез куашказ, вылезлы коньдон ӧвӧл. Заводъёс сыло. 1985-тӥ арысен трактор поттон усиз 20 поллы, ю тысь кутсан комбайн - 56, культиватор - 70, трактор прицеп но полуприцеп - 91, турнан машина - 11 поллы. Умойгес югдур минерал сылалъёс ласянь. Соосты дасян трослы ик ӧз кулэсмы - 17,3 миллионысен 11,5 миллионозь. Пӧртэмлыкез кыӵе муосы шедемез бордын гинэ: азьвыл асьме бусыосы потэ ке вал, али данакез дунтэм дунэн кошке кунгож сьӧры. Нош котькуд тоннаез минерал сылал музъемлэсь удалтонлыксэ 2-2,5 тонналы ӝутэ. Озьыен, удобрениен ӵош кузьмаськом 15-20 миллион тонна ю-няньмес кунгож сьӧрысь кузёослы, нош отысь арлы быдэ Россия басьтэ ог 30 миллион тонна чабей, калыкез но пудоез сюдыны шуыса. Тӥни сыӵе рынок. 4. Мурт нянез кӧт тырымон уд сиы, калшалод. Калык тае ӟеч вала, соин ик чутрак пумит гыроно-кизёно муосты вузанлы. (Вераськон уг мыны сад-бакчаос но нимаз усадьбаос сярысь.) Гурт удысэз зӥбыны, тарканы вырисьёс сое олокызьы но уродэ уськыто, пыдэстэм вышкыен ӵошато: котькӧня, пе, коньдон кисьты - пайдаез уз лу. Луоз, кулэезъя, дыраз но тырмыт юрттӥд ке. Нош Россилэн бюджетаз 2000-тӥ арлы гурт удыслы сётыны чакламын вал 12 миллиард манет, яке 1999-тӥ арын будэтэм продукцилэн дунызлэн 2 процентэз (624,8 млрд. манет). США-ын та лыдпус - 20 процент (19-20 миллиард доллар), Канадаын - 25, Швециын - 50, Финляндиын - 65, Норвегиын - 75, Япониын - 80. Макем секытэн сётске музъемен ужан - сокем бадӟым юрттэт вуэ аграрно-промышленной комплекслы. Сыӵе сюресъя азинске но юнме дуннеысь сиён-юон поттон удыс. Л.Медведева. (Дасямын "Диалог" но "Политика и экономика" журналъёсъя). Витаминъёс - нуналлы быдэ Тол ӵоже адямилэн мугораз витаминъёс тырмемысь дугдо. Соин ик та вакытэ тазалык сярысь уката сюлмаськоно луэ. Легезьпу мульыен пукетэм ву. Та суретын туж трос С витаминэз. Со мугорез юнматэ, пӧртэм пумо кынман висёнъёслэсь юрттэ, пекляосты ӟеч ужатэ. Со понна 20 грамм куасьтэм легезьпу мульыез кезьыт вуын миськоно, векчи пыргытоно но ӝыны литр пӧсь вуэ поныса, ог 10 минут ӵоже пӧзьтоно. 4-6 час пукетыса, суретэз сӥсъяны гинэ кылиз на. Нуналаз ӝыны стаканэн куинь пол юоно. Ас мылкыд каремдыя, отчы ватсаны быгатӥськоды чечы яке сахар-песок. Сьӧд сутэрен пукетэм ву. Сьӧд сутэрын трос С, Р витаминэз, органической кислотаез, эфир вӧез. 2 бадӟым пуньы мында куасьтэм сутэрез, 2 стакан пӧсь вуэн кисьтоно но час ӵоже пукетоно. Та суретэз нунал куспын юоно. Зоя Тимофеевна Дедюхиналэн медальёсыз чыртывесьлы тырмымон. Вакчи дыр куспын соосты люказ. Спортэн бен 50-тӥ аръёсысен эшъяське ни, нош Россилэн капчи атлетикая чемпионатаз нырысьсэ 1998-тӥ арын гинэ пыриськиз. Ветеранъёс пӧлын куинь дистанциын вормиз. Со дырысен одӥг чемпионатэз но уг кельты. Нош 1999-тӥ арын Дуннелэсь Кубоксэ басьтӥз. З. Т. Дедюхина юн дурбасьтэ таза улонлы но мугорез кыдатонлы. Профессиезъя со врач, вань улонзэ сӥзиз калыклэсь тазалыксэ утён удыслы. Та тунсыко нылкышно сярысь лыдӟыны быгатоды 4-тӥ бамысь. Туспуктэмез Владимир Беломорскихлэн. Зарни куара Читыр-чутыр улон сюресъёс кузя ортчоно луиз Шаркан районысь Петухи гуртын вордскем удмурт нылашлы - шаерысьтымы калык артисткалы Валентина Пудовалы. Ачиз чебер, мугорыз пинал тӧдьы кызьпулэн кадь веськрес, мылкыдыз - инме лобись, нош мӧляезлэн пуштросэз гыбдаса кадь улэ: татын - ӟырдыт яратон, кисьтаськись шумпотон, улонлэн сюресъёсыз сярысь мур малпаськон, пыласькись шудбур, котькуд адямилэн сямен, кайгулэн шуг-секыт сэрегъёсыз. Пинал Валя улон-вылон но ужан сюрессэ мытӥз 1981-тӥ арын ас вордскем Шаркан районаз - Зюзяысь культура юртын чеберлыкъя кивалтӥсь луыса ужаны кутскиз. Кӧня ке дыр ортчыса валаны ӧдъяз: ӝуаса-гыбдаса улӥсь пинал сюлэмыз ӧте бадӟым сцена вылэ! Конкурсын ворме но, 1982-тӥ арын май толэзе кырӟанъя но эктонъя "Италмас" ансамбле басьто. Ансамбльысь хорлэн артисткаез луыса, вань кужымзэ сётэ кырӟан быгатонлыксэ ӝутонлы, сцена вылын выросъёссэ азинтонлы. Татын кык но ӝыны ар гинэ ужа но кошконо луэ дораз, пичи нылпизэ утялтон вылысь. Тӥни озьы быдэс куать арлы люкиське сценалэсь со. Кырӟаны кутскись нылашлы "Италмас" ансамбль луонлык сётӥз быгатонлыксэ ӝутыны, озьы ик бадӟым творческой сюрес вылэ бурдъясь луиз. 1990-тӥ арын Россилэн дано артистэз Николай Широких нимо-дано артистъёсыз но оскымон кырӟаны кутскись пиналъёсыз, музыкантъёсыз огазеяса, вашкала фольклор кырӟанъя "Айкай" нимо театр кылдытэ. Татчы ик ӧте Валентина Пудоваез но. Валентина "Италмас" ансамбльын ужаку, Николай Широких татысь оркестрен кивалтӥз. Тӥни соку бадӟым музыкант быгатӥз шӧдыны-валаны егит кырӟасьлэсь инмарен сётэм синмаськымон чебер куаразэ но азьланяз бадӟым вормонъёс басьтыны луонлыкъёссэ. Удмурт крезьгуръёсыз туж усто валась-тодӥсь, баянэн паймымон шудӥсь, концертмейстер, вераны луонтэм усто дышетӥсь Николай Александрович Широких кивалтэм улсын Валентина Пудова вакчи дыр куспын Удмурт шаерамы тужгес яратоноез кырӟась луиз. "Айкайын" ужакуз ик солы Удмурт Элькунысь калык артистка туж дано ним сётӥзы. "Айкайын" ужез туж етӥз но усто ке но азинске вал, Валентина валаны кутскиз: солы нимысьтыз паськыт сюрес кулэ. Театрысь кошке но Удмурт кун филармоние лыктэ, монэн, та чуръёсты гожтӥсен, пумиське. Ӵапак Пушкин ульчаысен, филармонилэн юртэз дорысен. Мон солэсь сюлмаськонъёссэ тодӥсько ни вал, соин ик меӵак верай: филармонилэн директорез Нина Кузьминична Таланова доры пыр, солы куриськон гожты. Валентиналы нырысь-валысь курадӟоно ик луиз: малы ке шуоно, репертуараз ваньмыз-ӧвӧлэн сизьым-укмыс гинэ кырӟан вал. Соин ик, вань кужымзэ, быгатонлыксэ, тодон-валанзэ огинэ люкаса, ӟырдыт мылкыдын концерт программа лэсьтон бордын ужаны кутскиз. Нырысетӥзэ кылзытыны быгатӥз вакчи дыр куспын. Со вал 1994-тӥ арын. Нош туннэ солэн репертуараз ог дасо нимысьтыз программалы тырмымон кырӟанъёсыз вань ини. Нош нимысьтыз ик пусъёно ке, Валентина Пудова аслэсьтыз яратоно калыксэ, солэсь йӧно, чебер луэмзэ но улон- вылонзэ быгатыса данъясь кышномурт, вераны луонтэм яркыт пиштӥсь кизили луэ. Асьме калык пӧлын туж вӧлмемын "Васькисько, васькисько..." удмурт калык кырӟан. Сое кин гинэ ӧз кырӟа ини! Тужгес яркыт нимтулъёс! Та кырӟанэз гажасьёс-яратӥсьёс пӧлысь мыным котькин вожзэ мед поттоз, шуо: та туж чебер крезьгур уно аръёс ӵоже аслэсьтыз нимысьтыз кырӟасьсэ витёно луэм. Синмаськымон кырӟанлэн кылбурез но, гурез но валчеяськыса, лӧптэм ыркыт тӧл выллем, ог-огзэс ӟыгыртыса, ваче кенешо кадь, артэ вамышто, нош кылзӥсьёсты буйгато, сюлэмъёссэс вылӥе, инме ӝуто, мур малпаськонэ уськыто. Тӥни озьы, Валентина Пудова аслэсьтыз яратоно кырӟанзэ калык пушкы вӧлмытӥз. Шумпотыса пусйыны кулэ: ортчем аръёс ӵоже Валентина уно удмурт кырӟанъёслы выль улон но соослы выль сямен чузъяськыны-жингыртыны луонлык сётӥз, паськыт сюрес усьтӥз. Асьме пӧлысь кин уг тоды "Кыткы, дядяй, пар валъёстэ" кырӟанэз? Та кырӟанэн герӟаськыса, артистка быдэс спектакль возьматэ. "Кыткы, дядяй, пар валъёстэ!" шуыса, пинал воргорон, малпанъёссэ усьтыса, сюлмысьтыз вазиське мемиезлы, дядиезлы, апайёсызлы, сузэръёсызлы, агайёсызлы, вынъёсызлы, кенакезлы. Пумтэм-йылтэм сюрес вылэ потон азяз. Соин, дыр, Валентина Пудова та кырӟанэз кырӟаку, туж трос кылзӥсьёслэн бамъёссы кузя синкылиоссы шапыр гинэ васько. Нош кыӵе ӝуась-ӟырдыт мылкыдын кырӟаса вера кытӥяз йӧнтэм, етӥз улэмзэ-вылэмзэ: Дассэ но яратӥ, Укмыссэ но вунэтӥ, Однако ӧз вун одӥгез! Быриз ук, быриз ук Каръян пинал дауре Дас тямыс арес пи понна! Учке ай, чебер, шаплы, вормыны, кортнаны луонтэм удмурт нылкышно вань сюлэмзэ яратонлы кузьма! Та кырӟанын Валентина, зарниен кисьтаськись, жингрес, чебер, кужмо куараеныз калыкез тыпак паймытыса, сцена вылын ширъяса-поръяса эктэ! Котькыӵе синмаськымон чебересь кылъёсын Валентина Пудоваез суреданы тыршы, крезьгурез яратӥсьёслы вазиськыса, меӵак верало: ӧвӧл на сое суреданы, со сярысь кылбураны быгатӥсь. Сое адӟемды, кылзэмды потэ ке, ветлэлэ концертъёсаз. Тӥни соку гинэ валалоды, кин со, Валентина Пудова. Николай Зубков, Удмурт Элькунысь но Россия Федерациысь дано кырӟась. Чур бугор Кин дунне вылын тазагец? Дуннеысь Тазалыкез эскеронъя огазеяськон странаослэсь черодзэс печатлаз. Нырысетӥ интыын сылэ Франция. Со бӧрсьы мыно: 2 - Италия; 3 - Сан-Марино; 4 - Андорра; 5 - Мальта; 6 - Сингапур; 7 - Испания; 8 - Оман; 9 - Австрия; 10 - Япония; 11 - Норвегия; 12 - Португалия; 13 - Монако; 14 - Греция; 15 - Исландия; 16 - Люксембург; 17 - Нидерланды; 18 - Великобритания; 19 - Ирландия; 20 - Швейцария; 21 - Бельгия; 22 - Колумбия; 23 - Швеция; 24 - Кипр; 25 - Германия; 26 - Саудовской Аравия; 27 - Араб Эмиратъёс; 28 - Израиль; 29 - Марокко; 30 - Канада; 31 - Финляндия; 32 - Австралия; 33 - Чили; 34 - Дания; 35 - Доминика; 36 - Коста- Рика; 37 - США; 38 - Словения;39 - Куба; 40 - Бруней; 41 - Новая Зеландия; 42 - Бахрейн; 43 - Хорватия; 44 - Катар; 45 - Кувейт; 46 - Барбадос; 47 -Таиланд; 48 - Чехия; 49 - Малайзия; 50 - Польша; 51 - Доминикан Республика; 52 - Тунис; 53 - Ямайка; 54 - Венесуэла; 55 - Албания; 56 - Сейшель шормуӵъёс; 57 - Парагвай; 58 - Южной Корея; 59 - Сенегал; 60 - Филиппины; 61 - Мексика; 62 - Словакия; 63 - Египет; 64 - Казахстан; 65 - Уругвай; 66 - Венгрия; 67 - Тринидад но Тобаго; 68 - Сент-Люсия; 69 - Белиз; 70 - Турция; 71 - Никарагуа; 72 - Беларусь; 73 - Литва; 74 - Сент-Винсент но Гренадины; 75 - Аргентина; 76 - Шри-Ланка; 77 - Эстония; 78 - Гватемала; 79 - Украина; 80 - Соломон шормуӵъёс; 81 - Алжир; 82 - Палау; 83 - Иордания; 84 - Маврикий; 85 - Гренада; 86 - Антигуа но Барбуда; 87 - Ливия; 88 - Бангладеш; 89 - Македония; 90 - Босния и Герцеговина; 91 - Ливан; 92 - Индонезия; 93 - Иран; 94 - Багамы; 95 - Панама; 96 - Фиджи; 97 - Бенин; 98 - Науру; 99 - Румыния; 100 - Сент-Китс но Невис Федерация; 101 - Молдавия; 102 - Болгария; 103 - Ирак; 104 - Армения;105 - Латвия; 106 - Югославия; 107 - Куклэн шормуӵъёсыз; 108 - Сирия; 109 - Азербайджан; 110 - Суринам; 111 - Эквадор; 112 - Индия; 113 - Кабо- Верде; 114 - Грузия; 115 - Сальвадор; 116 - Тонга; 117 - Узбекистан; 118 - Коморы; 119 - Самоа; 120 - Йемен; 121 - Ниуэ; 122 - Пакистан; 123 - Микронезия; 124 - Бутан; 125 - Бразилия; 126 - Боливия; 127 - Вануату; 128 - Гайана; 129 - Перу; 130 - Россия; 131 - Гондурас; 132 - Буркина-Фасо; 133 - Сан-Томе но Принсипи; 134 - Судан; 135 - Гана; 136 - Тувалу; 137 - Берег Слоновой Кости; 138 - Гаити; 139 - Габон; 140 - Кения; 141 - Маршал шормуӵъёс; 142 - Кирибати; 143 - Бурунди; 144 - Китай; 145 - Монголия; 146 - Гамбия; 147 - Мальдивы; 148 - Папуа-Новая Гвинея; 149 - Уганда; 150 - Непал; 151 - Киргизстан; 152 - Того; 153 - Туркменистан; 154 - Таджикистан; 155 - Зимбабве; 156 - Танзания; 157 - Джибути; 158 - Эритрея; 159 - Мадагаскар; 160 - Вьетнам; 161 - Гвинея; 162 -Мавритания; 163 - Мали; 164 - Каме- рун; 165 - Лаос; 166 - Конго; 167 - Северной Корея; 168 - Намибия; 169 - Ботсвана; 170 - Нигер; 172 - Экваториальной Гвинея; 173 - Афганистан; 174 - Камбоджа; 175 - Южной Африка; 176 - Гвинея-Биссау; 177 - Свазиленд; 178 - Чад; 179 - Сомали; 180 - Эфиопия; 181 - Ангола; 182 - Замбия; 183 - Лесото; 184 - Мозамбик; 185 - Малави; 186 - Либерия; 187 - Нигерия; 189 - Центральной Африканской Республика; 190 - Мьянма; 197 - Сьерра-Леоне. Чур бугор Вить бадӟым вуэз Росгидромет 11-тӥ мартэ Россиез бадӟым тудву пумысен шумпоттӥз. Специалистъёслэн верамзыя, солэн бервылъёсыз, берло аръёсын ӵошатыса, туж шукресэсь луыны быгатозы. Ву улэ шедёзы Барнаул, Вятка, Владимир, Калуга, Курган, Курск, Липецк, Оренбург, Рязань, Тула, Уфа но Якутск котырысь интыос. Ву бадӟым ӝутскоз Уралын но Заволжьелэн уй палысьтыз шуръёсын. Синоптикъёслэн чакламзыя, ву нормалэсь метр но ӝынылы ӝутскоз. Кызь сантиметрлы ву бадӟымгес луоз Волгалэн но Вяткалэн уй палаз Кама но Белая шуръёсын. Висён погыртэ лябъёссэ Туберкулёз - паласькись секыт висён. Палочкаез шараямын 1882-тӥ арын немец бактериологен Роберт Кохен. Туберкулёз адямилы котьку кышкытлык кылдытъяз. Ӧжыт кулэсмылӥз со 70-тӥ аръёсы (БЦЖ вакцина кылдытэмен валче). 90-тӥ аръёсы но шаерамы туберкулёзъя огъя югдур урод ӧй вал, но 1998-тӥ арын луэм кризис соку ик шӧдӥскьиз ляб тазалыко, куанер адямиос вылын (туберкулёз уго нырысь ик палаське урод сиськись, висьылӥсь муртъёслы). Озьы 2000-тӥ арын Удмуртиын эпидемия ялэмын вал - 100 сюрс адями пӧлысь 103-езлэсь туберкулёззэ шараязы. Туберкулёз адямилэн тазалыкезлы котьку но бадӟым изъян вайылӥз, но берло аръёсы со уката кышкыт луиз - куд-огез висисьёс паласькемзы бере ар но улыса уг вутто. Озьы 1998-тӥ арын висисьёс пӧлысь дасо палаез ке кулылӥзы, 1999-тӥ арын та лыдпус 15-озь вуиз. Туберкулёзлэсь нокин но утемын ӧвӧл. Нылпиослы БЦЖ вакцина пуктыса но буйгатскыны уг яра - арлы быдэ туберкулиновой проба лэсьтоно, флюорография ортчоно. Озьы висёнэз вазьгес шараяны, эмъяны луоз. Тужгес капчиен висёнлы сётско ты, кӧтпуш висёнъёсын, сахар диабетэн курадӟисьёс, гормональной эмъюм юисьёс. Туберкулёз паласькыны быгатэ висись адямилэсь но, пудолэсь но. Бактерия мугоре шедьыса, лимфа нёредъёсы каръяське, отысен сое вир быдэс мугоре вӧлмытэ. Туберкулёзэн висемез соку ик валаны но уг луы, асьмеос уго малпаськом, туберкулёз ке - одно тыос висьыны кулэ. Но со чер пекляосты, кӧтулэз, сюрлыез, суез-пыдэз но висьытэ. Кызьы ке луэ-а бен сое тодманы, висёнэз пушке мур лэзёнтэм вылысь? Адямилэн кӧлэм потонэз быре, керӟег луэ, ӵем 37,2-37,4 градус температураез возиське, нёредъёсыз (лимфоузелъёсыз) пыкто, кӧдэктэ. Бӧрысь гинэ мӧля ӵогъяны кутске, кызон пӧсьтэ, мугор ӟырда. Туберкулёз тужгес ӝог аля пыэдэн, пужыен висем бере. Соин ик кынмаса ӵем висьылӥсь муртъёслы арлы одӥг пол одно ик флюорография ортчоно. Улон интыя больницаосын сое дунтэк лэсьто. Тодады возе: висёнэз капчигес алыны. В. Данилова. Вордскемзэс та нуналъёсы пусъё Абросимов Геннадий Егорович - Сарапулысь "Радиотехника" огазеяськонлэн валтӥсь директорез, Кун Кенешлэн депутатэз; Даутов Тахир Михайлович - акциосын "Ижевский завод нефтяного машиностроениея" огазеяськонлэн кивалтӥсез; Шаркин Владимир Николаевич - акциосын "Шаркан-трикотаж" огазеяськонлэн кивалтӥсез; Перевощиков Александр Павлович - Удмурт Республикалэн Президентэзлэн но Правительстволэн Администрациысьтызы отделэн кивалтӥсь; Смирнов Василий Евсеевич - "Удмурт дунне" газетын ужам мурт. Котькытчы вутске Игра пи Сергей Калинин пичи дырысеныз вуриськыны дышиз. Ачиз ик дӥсь вандэ. Ужа со "Зангари" вуриськон фабрикаын. Калинин котькыӵе ужез ӟеч быдэсъя. Вуриськем сяна, со магазиназы возьмаськись луыса но ужа. Капчи вазиськись, кибашлы пиосмуртэз ваньмыз ярато. П. Скобелев. Гуртын вузкарон Россиысь кооперацилы - 170 Сютэм улонысь малпазы декабристъёс Кылдытӥзы декабристъёс Сю сизьымдон ар талэсь азьло декабристъёс юнматӥзы "Бадӟым артель" ("Большая артель") огазеяськонзылэсь уставзэ. Сыӵе ним юнме шорысь ӧз сётэ, Забайкальеын, ссылкаын улон-вылонзэс кӧня ке но умоятон вылысь. Тӥни со луиз Россиын кооперацилэн вордскемез. Табере со лыдэ басьтэмын ни калык куспо (международной) кооперацилэн ёзэныз (альянсэн). Малы бен декабристъёс таӵе огазеяськон кылдытӥзы? Мугез одӥг вал. Сютэм кулонтэм но урод сиськонтэм вылысь, соос асьсэос басьтӥськизы бакча сиёнъёс будэтыны, пудо куйытыны но мукет ужпумъёсты быдэстыны. Кооперация - со зэмзэ но куанер улонысь потон. Сыӵе вакчияк валэктон. Малы ке шуоно, потребительской кооперативъёс кылдыны кутско странаын самой секыт, рабочий класс вордӥськон вакытэ. Заводъёсын но фабрикаосын ужасьёслэн ӧй вал музъемзы но, улон интызы но. Соос асьсэос утчаны ӧдъязы шуг-секытысь потон, асьсэлы сиён-юон дасян амалъёс. Нимаз адямиос, фабрикантъёс но ростовщикъёс угось туж дуно вузаськизы. Рабочий семьязэ сюдымон уждун ӧз басьтылы. Нош асьме республикаямы кооперация данаклы бер кутскиз. Малы ке шуоно, 1861-тӥ арын реформа бере, Россиын капитализм ӝог азинскиз, нош Удмуртиын со чик уг шӧдӥськы вал. Тани ЪЪ даур кутскон азьын шаерысьтымы городъёсын но промышленной посёлокъёсын ваньзэ-ӧвӧлзэ 3 процент пала калык улӥз. Со дыре ик Россиын со лыдпус 13 процент вал ни. Нырысетӥез потребительской огазеяськон республикаямы кылдӥз 1890-тӥ арын Сарапул городын. Солэн уставез возиське Шоро-куспо Прикамьеысь историяя но культурая музейын. Уставлэн нырысетӥ ёзэтаз ик тазьы гожтэмын: "Сарапулысь кооператоръёс асьсэлэн адямиоссылы вылӥ ӟечлыкен но дунтэм будэто сиён-юон но пайда басьтэмысьтызы коньдон люканы юртто". Ватонэз ӧвӧл, потребительской огазеяськонъёс калыклы юртто социальной ужпумъёссэс быдэсъяны, нош акционер огазеяськонъёс узырмон сярысь гинэ малпаськыса уло. Кооперациын котькудӥз пайщик огазеяськонлэн ужаз пыриське, кылзэ вера, нош акционер огазеяськонын акциос гинэ лыдэ басьтӥсько, быръёнъёсы пырисько. Асьме палан потребкооперация шуг но аспӧртэмлыко сюресэз ортчиз, куддыръя туж секыт ужпумъёсты быдэсъяз. Революцилэсь азьло кылдытэмын вал кӧня ке потребительской огазеяськонъёс, кылсярысь, Сарапулын, Воткинскын но Ижевскын. Ваньзы соос сюлмаськизы рабочийёслэсь улон-вылонзэс умоятон сярысь. "Военной коммунизм" аръёсы кооператоръёс ужасьёслы сиён-юон люконэн выризы. Котьку лыдэ басьто вал семьяез, нылпиосты. Соослэсь ужзэс чакласа возизы сиён- юонъя кун ёзъёс. Нош 20-тӥ но 30-тӥ аръёсы кооперация юн пыриськиз культурной революциез ортчытыны. Кооператоръёс кылдытъязы тодон-валан будэтонъя кружокъёс, гуртъёсын но городъёсын радио кыскизы, кино возьматъязы, книга вузазы но кооперация сярысь валэктон уж нуизы. Быдӟым Отечесттвенной война кооперация азе выль ужпумъёс пуктӥз: карточкаосъя вузъёс сётъяно, заготовкаос нуоно, эмъюм турынъёс но мукетсэ дасяно вал. Тӥни со дырысен 1990-тӥ арозь та удыс ялан азинскиз, огсыр ужаз. Юнматӥз материально-технической инъетсэ, паськытатӥз вузкаронэз, заготовкаоссэ но производствозэ, уката ик нянь пыжонзэ. Республикаямы огъя товарооборотын кооперация 25-27 процент басьтыны ӧдъяз. Кооперативной предприятиос арлы быдэ 110 сюрс тонна ёрос нянь, сушкаос но мукетсэ пыжо вал. Кооператоръёс кусыпъёс тупатӥзы мукет кунъёсын. отчы сырьё вузам чотын арлы быдэ 1 миллион манет тыр вуриськон, керттӥськон но музон материалъёс басьтылӥзы. Арысь аре умояз гуртын вузкарон. Отчы вуо вал нуналмысь кулэ но музон ӟеч вузъёс. Но та удысын югдур воштӥськиз выльдӥськон но рыноке выжон кутскем бере. Куке дунъёсты лэзизы, кооператоръёс куанермизы, оборотной средствооссы быризы, шуыны луоз. Нимаз вузкарисьёс пайда поттоно интыосты гинэ капыртӥзы, нош кыдёкысь гуртъёсы сылал, майтал, спичка но музон корт вузъёс ӧз нуллэ. Частникъёс узырмизы, вожмаськыса вузкарон ӟече ӧз вутты. Гурт калыклэсь мултэс сиён-юонзэ дунтэмен басьтыса, дуноен вузаллязы. Тӥни озьы республикаямы огъя товарооборотын берло дас ар ӵоже кооперацилэн люкетэз 4 поллы кулэсмиз. Тужгес но синӥзы заготовкаос но нянь пыжон (105 сюрс тонна интые, 15-17 сюрс тонна кылиз на - Г. Р.). Секыт ке но вал, матысь 2-3 ар ӵоже удмурт кооператоръёс азинскыны ӧдъязы. Миым элькунамы кооперацилэн люкетэз 8 процент луиз, нош 1998-тӥ арын 6 процент гинэ вал. Кызьы но маин бен кооператоръёс будон сюрес вылэ потӥзы? Нырысь ик, асьсэос тросгес калыклы вузъёс поттыны ӧдъязы. Удмуртпотребсоюзъя со лыдпус 38 процентозь вуиз. Со басьтэмын вань сиён-юон вузам пӧлысь. Ватсаны кулэ, та уж кооперацилы кӧня ке пайда но вае. Кыкетӥез, гуртысь вузкарисьёс берло дыре бытовикъёслэсь но ужзэс ас вылазы басьтӥзы. Соос адямиосты ватонъя но услугаос сётъяло ни. Тӥни соин ик Удуртиысь кооператоръёс Россиын арысь аре классной интыос басьтыло, И яке ИИ пото. Сыӵе вормонъёс угось инмысь уг усё. Соос басьтӥсько вань кооператоръёслэн мылысь-кыдысь тыршеменызы, тужгес но гуртысь вузкарисьёслэн чупрес тыршеменызы, ужазы выль амалъёсты кутэменызы но котькуд гуртэ вуэменызы. Нош азьланьын соос азьын уката бадӟымесь ужпумъёс сыло. Кооперацилэн 170 ар ортчем сюресэз капчи ӧй вал. Соос ужазы 4 эксэйёс, 7 валтӥсь секретарь но 2 президент дыръя. Котькудӥз та удыс шоры пӧртэм сямен учкылӥз. Озьы ке но, кооперация улэ но улоз. Верам потэ, гуртын вузкаронын данакез луо кышномуртъёс. Соин ваньзэсты соосты лулысь-сюлмысь ӟечкыласько Тулыс праздникен 8-тӥ Мартэн но ваньмызлы сӥзисько шудо улон но тазалык. Анатолий Синюшин, Москваысь потребительской кооперацияя университетлэн Иж ёзысьтыз кафедралэн кивалтӥсез. Чур бугор Ваньмыз кошкизы... алмазлы Мордовиысь Подгорное-Канаково гуртэ одӥг воргорон но ӧз кыльы ни: ваньмыз ужаны быгатӥсь пиосъёс кошкизы Якутие алмаз утчаны. Колхозэ кылизы на шалтрак нылкышноос, песятайёс но пиналъёс гинэ. Гуртысь школаын дышетскисез 23 гинэ, но соосын нокинлы ужаны, дышетӥсьёс но ваньмыз Севере пегӟизы. Нош та нуналъёсы гуртаз солдат бертӥз вал, таиз но алмаз дуре кӧчиз. Пуныослы шай Уфалэн пумаз усьтӥськоз пӧйшуръёслы шай. Пудо эмъясь Владимир Аскаров кивалтӥсьёсты оскытӥз, гурт пудоосты чакласькытэк копан кышкыт висён черъёс вӧлмытыны быгатоз шуыса. Выль шайлэн вуоно выль "кивалтӥсез" ньыль пудолы дунъёс но тупатӥз ни: ритуальной бригада потэм понна - 100-250 манет, пуныез ватон - 150- 300 манет, коӵышез - 80. Животсэс укыр жалясьёс шайвылэ памятник но пуктыны быгатозы. Таизлэн ини дуныз вылӥынгес. Чур бугор Керетӥзы сюан бере Буэнос-Айресысь егит нылкышно азьвыл картсэ туж капчиен судын вормиз. Ужпум тазьы вал: выль кенлэн картэз воксё йырситэк вылэм. Нош йырзэ чебер возьыны юрттэм парик. Пӧяськон малпамтэ шорысь потӥз кӧня ке толэзь ӵошен улэмзы бере. Одӥгаз шулдыръяськон ӝытэ "йырсиё" эмеспиез кин ке донгыны шедьтэм но парикез музэ палдэм. Сое адӟыса, выль кен кулыса усе ни вылэм. Йырсазьыз лыктэм бере со ӵуказеяз ик люкиськон сярысь судэ вазиське. Суд "пӧяськись" эмеспилы азьвыл кышноезлы 10 сюрс доллар тыриськон тупатэм. Валэктэ юрист Сэрегез дася адвокат Лилия Шкляева 7 манетъем алимент Мынам нылы картэныз нимаз улэ. Кык нылпиез вань. Одӥгезлы тырмиз ини 18 арес, мукетызлы - 12. 1997-тӥ арозь пособие басьяз. Табере категориослы люкизы. Нылме куинетӥе кельтӥллям. Малы озьы каризы? Табере сыӵе закон вань-а, мар-а? Кин картэныз судэн люкиськемын ӧвӧл, соослы уг тыриськы-а, мар-а? Нылы кӧня ке пол вазиськылӥз ини судэ алимент пумысен. Сое уг басьтылы 1993-тӥ арысен. Нылылы шуо: воргоронды нокытын уг ужа, мазэ-о тыроз? Райсобесын но сельсоветын котькуд аре бичало пособие пумысен справкаос: одно ик, пе, кулэ атайзылэн уждунэз сярысь бумага. Кытысь сое утчано? Егитъёс уг уло огинын, уг лэзьяло гожтэтъёс, уг адӟылӥсько 1993-тӥ арын 7-тӥ сентябрьысен. Валэктэ вал: кытчы милемлы вазиськоно? Алигес нылы ветлӥз райсобесэ. 1998-тӥ ар понна пособие тыро, нош солы шуиллям: куинетӥ категориосын ум ужаське на. Калык куинь толэзьлы уксё басьтоз, нош милемлы ӧвӧл. Эшшо огпол валэктӥсько: нылы суд пыр люкиськемын ӧвӧл, но алиментлы документъёс сётӥз вал 1994-тӥ арын май толэзьысен. Кык пол басьтыса вуттӥз ик, азьло уксёен со 7 манет вал. А.Васильева. Можга район. Нылпилы юрттэт (пособие) басьтонъя черод (категория) кылдытӥське семьяысь котькуд адямилы барыш (доход) усемъя. Куинетӥ категорие сюро сыӵеос, кытын ортчем ар понна барыш люкаськиз ичизэ кӧня коньдон кулэ луэмлэн (прожиточной минимум шуонлэн) 1,5-эз мында. Огъя доходэз лыдъян понна ик куро анай-атайлэн уждунзы сярысь бумагаос. Россия Федерацилэн Семья сярысь кодексысьтыз 106-тӥ ёзэтъя (статья) валэктэ: алимент басьтон пумысен вазиськыны луэ судэ. Сое но азьвыл тыронъёсты берыктыны коньдон уг окмы ке, адямилэсь ваньбурзэ но алимент чот карыны яра. Исполнительной листъя алимент курыны луэ берло куинь ар понна. Та ужез чакла судысь быдэсъясь мурт (исполнитель). Пегась анай-атайёсты шымыртыны луэ музон сямен но - уголовной ответственность улэ кыскыса. Со понна Россия Федерацилэн Уголовной кодексаз вань 157-тӥ ёзэт. Туэ арысен пособиосты тырозы, адямиосты нокыӵе категориослы люкылытэк. Коньдонэ банкын Мон вордскемын 1929-тӥ арын. Ужамын тылын. Вань 1992-тӥ арлэсь азьвыл усьтэм сберкнижкае. Телевизор пыр веразы: мон кадьёс компенсация басьто 2000-тӥ арын сентябрьысен. Ку зэмзэ ик мон курыны быгато коньдонме? Кӧня со луоз? Мар кулэ со понна? В.Николаев. Шаркан район. Миым 19-тӥ апреле Россиысь Правительство юнматӥз вкладъёс понна нырысетӥ (предварительной) компенсация ортчытон радлыкез. Отын лыдэ басьтӥське Россиысь Сбербанклэн ёзъёсаз 1991-тӥ арын 20-тӥ июнёзь понэм коньдон. 2000-тӥ арын 1-тӥ майысен сыӵе компенсация тыриське (нырысетӥ черодысь кельтос - наследство - басьтӥсьёсты но вераса): 1924-тӥ арын но азьвылгес вордскемъёслы; нырысетӥ группаен сӧсыръёслы; Атыкай музъем понна оже ветлэмъёслы. 2000-тӥ арын 1-тӥ сентябрьысен компенсация сётӥське кыкетӥ группаен сӧсыръёслы но 1940-тӥ арын но азьвылгес вордскемъёслы. Вклад 1 сюрс манетлэсь ичигес ке, нырысетӥ компенсация тыриське быдэсак, тросгес ке - 1 сюрс манет понна (1991-тӥ арын коньдонъя). Солэн быдӟалаез герӟаське коньдонлэн банкын кыллем дыреныз. Гуртысь квартираез асэстон Азьвылгес ми валэктон сётӥмы Игра районысь арлыдо дышетӥсьлэн А.Корепановлэн юанэзлы. Со улэ школалэн квартираяз, нош приватизация пыр аслыз басьтыны уг быгаты. Гожтӥмы: озьы лэсьтыны уг лэзьы Россия Федерацилэн 1995-тӥ арын 16-тӥ мае кутэм 74- ФЗ номеро законэз. Нимаське тазьы: "Кунлэсь но интыослэсь дышетонъя учреждениоссылэсь статуссэс утён но отын приватизациез алон сярысь". Алигес А.Корепанов та ужпумъя ик кыкетӥ гожтэт ыстӥз. Югдурез выльысь учконо луимы на. Вылӥ верам Законысь 1-тӥ ёзэт зэмен ик уг лэзьы гуртысь школаослэсь улон интыоссэс вузаны. Но Россия Федерациысь Конституцияя суд та ужпумез рос-прос сэрттэм-пертчем но 2000-тӥ арын 24-тӥ октябре постановление кутэм. Вылӥ верам курон лыдъямын Россия Федерацилэн Конституциезлы тупасьтэмен. Озьыен, алонэз санэ басьтоно ӧвӧл. Пиме нуозы-а армие? Монэ туж сюлэмшугъяськытэ азьпалась улонэ. Нокин но ӟеч валэктон уг сёт мыным. Гожтӥсько тӥледлы. Ветлӥ ини районысь кивалтӥсьёс но военкоматын ужасьёс дортӥ. Юанэ одӥг: нуозы-а пиме армие? Мынам куинь нылпие. Бадӟымезлы туэ луоз 18 арес, пичиезлы - кык. Шоретӥ пие пичиысен инвалид. Картэ кулӥз кылем арын. Матысь ӵыжы-выжыосы ӧвӧл. Пиме армие нуизы ке, кинэ мон юрттыны косом? Гуртын пу но турын понна зол выроно. Вумы гинэ но ӝыны иськемысь ваёно. Мар шуоз меда юрист? Оло, улон интыме-а воштоно? Шузимисько ини, лэся. А.Г. 1998-тӥ арын 28-тӥ мартэ кутэмын Россия Федерацилэн "Воинской обязанность но военной служба сярысь" Законэз. Армие мынонлэсь огдырлы мозмытэмын сыӵе муртъёс, кинъёслэн анайзы (атайзы), та адямиез сяна, эшшо утё на тямыс аресозь кык яке тросгес нылпи яке пиналысен ӧлексы муртэ но вордо карттэк (кышнотэк). Комиссие вайыны кулэ таӵе бумагаос: семья сярысь справка, армие басьтоно муртлэн вордскемез сярысь свидетельство, нылпиос сярысь документъёс, атай (анай) ӧвӧл шуыса возьматӥсь документ, инвалид луэм сярысь документ. Республикаысьтымы улон интыосты возён удысын ужасьёс Удысты кылдэм дырысен 80 ар тырмемен валче сюлмысьтым ӟечкыласько рабочийёсты, специалистъёсты, ветеранъёсты. Со бадӟым дыр ӵоже улон интыосты возёнъя удыс кӧня ке пичиесь ёзъёслэсь пӧрмиз Удмуртилэн экономикаяз но улоназ туж кулэ инты басьтӥсь комплекслы. Жилищно-коммунальной удыслэн огсыр но ӟеч ужамез бордысь потэ Калыклэн тазалыкез но ужан мылкыдыз, властьёсын но кунэн кусыпъёсыз. Туж данъяськисько быгатэменыды, кытӥяз лэсьтонтэмзэ но лэсьтоно луиськоды. Тӥляд тыршеменыды шаерамы эстӥськон вакыт ортче бадӟымесь шуг-секытъёстэк но учыръёстэк. Удысысьтыды 20 сюрслэсь уно адямиос возё миллион квадратной метръёсын улон интыосты, сюрсо иськемъёсын коммуникацияя ёзъёсты, сю но сю объектъёсты. Кытӥяз тӥляд ужды уг ке но адӟиськы, но сюлмысь тыршемды улон юртъёсамы сётэ шуныт, газ, электрокужым но ву, тӥ тупатъяськоды улон интыосты, шулдыргес кариськоды городъёсмес но гуртъёсмес. Ваньдылы сӥзисько юн тазалык, шудбур но азинлык, ужады вормонъёс. Тӥляд ужды мед юрттоз вань калыкмылэсь улон-вылонзэ огсыр возьыны. Удмурт Республикаысь Кун Кенешлэн Тӧроез И. Н. Семёнов. Тазалык Куазьлэн вошъяськемез - лулсэр висисьёс вылын Психиатръёс чакламъя, тулыс вуэмен, тросэз лулсэр висёнъёслэсь курадӟисьёс шуге-леке вуо. Куазьлэн вошъяськемез юн шӧдӥське соослэн мылкыдзы вылын. Тол пумын "жадьыны", шунытэз возьманы кутскись адямиосты эмъясьёс озьы ик лулсэр висёнъёсын черланы быгатӥсьёс пӧлы пырто. Таӵеослы, пе, тазалыксэс сакгес эскероно, пӧртэм сюлмаськон-сюлэмшугъяськонъёслэсь утиськоно. Оло, юрттэт курыса, невропатологъёс доры вазиськон но мултэс уз луы. Чур бугор Кыӵеесь мылкыдды? Кызьы ортчытэ адями котькуд нуналзэ, вазь ӵукнаысен кутскыса? Та юанлы валэктон шедьтон понна эскерон ортчытӥзы Россиысь калыклэсь мылкыдзэ тодонъя центрын ужасьёс. Котькинлэсь вазь сайкало огшоры ужасьёс: 43 процентэз - 6 часлэсь вазьгес ик. Соос дасяськыны кутско ужан нуналзылы, утялто корка котырзэс. Вазь султо уноез гуртын улӥсьёс (36 процентэз), пенсие потэмъёс (35 процентэз). Нош адями егитгес, дышетскемын, узыр семьяын но бадӟым городын ке улэ, со ужан нуналзэ бергес кутске. Столицаосын улӥсьёс валес вылысьтызы 6 часлэсь вазьгес султо 29 процентэз гинэ, 24 аресозь егитъёс сайкало 16 процентэз, вылӥ образованиен адямиос - 21 процентэз, узыръёс 22 но дышетскись пиналъёс - 3 процентэз. Ӵошатон понна: Европаын самой вазь султӥсь "атасъёс" луо чехъёс но венгръёс - 46,8 но 42,7 процент. Тужгес но кема кӧлыны ярато испанецъёс но ирландецъёс - дас вить мурт пӧлысь одӥгез гинэ куазь ӟардытозь сайка. Россиын котькудӥз куинетӥез улӥсь огшоры нуналэ душе пыре. Столицаын - 58 процентэз, гуртын - 18-эз. Татын шӧдӥське, ваньмызлэн душез ӧвӧл шуыса. Нош душе ӵемгес пырало узыр но кужмо сямо адямиос. Озьы ик кивалтӥсьёс (54 процент) но дышетскисьёс (51). Шараяськиз на мукет учыр но: адямилэн дышетскемез уногес ке, со ӵемгес керӟегъяське но мукетъёсыныз тросгес керетэ. Нылкышноос керӟегъясько уногес (28 процент), воргоронъёс ичигес - 19 процент. Кык поллы уногес (31) керӟегъясько бадӟым городъёсын, ӧжытгес гуртъёсын - 16 процент. Сыӵе адямиос туж шер пумиськыло 55 арес тырмем бере (8). Юалляськон ортчон нуналэ лавкаосы пыраз 54 процентэз калык. Зэм, нылкышноос тросгес вал (60), воргоронъёс 47 процентэз гинэ. Магазинъёсы уногес кожыло узыръёс но вылӥ образованиен адямиос (быдэн 69 процент). Шуг вал оскыны, отчы кивалтӥсьёс ӵемгес пырало шуыса - 72 процент. Валамон ини, вузкаронниосы шергес кожало гуртоос (41) но ужтэк пукисьёс - 42 процент. Нунал ӵоже адямиос мукет ужен но выризы: радио кылзӥзы (50 процентэз), газет лыдӟизы (51), уж дуразы вал (39), нуназезэ кӧлӥзы (26), шорлыдын 2-3 час ӵоже телевизор учкизы (91). Нош кыӵе ужлы ӧжытгес дыр быдтӥзы - журнал лыдӟизы (11), гуртсылэсь 50 иськемлэсь кыдёке ветлӥзы (5), компьютерен ужазы (4), черке ветлӥзы (1,4). Городысь транспортэн ӵемгес ворттыло Швейцариын улӥсьёс (57 процент), шергес - финнъёс (6). Юалляськон нуналэ черке уногес пыраллям Ирландиын - 5 процентлэсь уногес, тужгес но ӧжыт ветлӥллям шведъёс (1,4) но ӟучъёс. Эскеремын вал адямиослэн мылкыдъёссы но. Та ласянь лыдпусъёс ӧз шумпоттэ: Россиын улӥсьёс пӧлысь 23 процентэзлэн мылкыдыз умой вал, нош 31-лэн - урод. Бадӟым коньдон басьтӥсьёслэн куректонзы ӧжытгес, но шумпотонзы но сокем вылӥын ӧвӧл. Уноез мӧзмо инкуазьлэсь, городын улэмзылэсь. Мӧзмонэн тужгес "висё" кивалтӥсьёс - 35 процент, гуртазы пукись нылкышноос (22). Но самой шулдыр мылкыдын уло дышетскись егитъёс - 64 процент. Ялон Кызьы ивортылӥм ни вал, республикаямы ужа Россиысь Югдурез утёнъя министерстволэн валтӥсь штабысьтыз комиссия. Милициын ужасьёслэн ужзы пумысен юанъёстэс, ӵектонъёстэс тӥ сётыны быгатоды 55-73- 72 яке 55-75-75 телефонъёсъя. Нош 19-тӥ мартэ 15 часысен 20 часозь тӥледыз кылзыны быгатоз Россиысь Югдурез утёнъя министерстволэн Тылпуэн нюръяськонъя Валтӥсь управлениысьтыз отделэн кивалтӥсь Анатолий Николаевич Шлетич. Телефонэз - 22-69-32. Лыктыны луоз таӵе адресъя: Ижевск, Коммунаров урам, 325-тӥ юрт, 328-тӥ кабинет. Малы уг дунъяло "Танокез"? Мон ялан синмаськыса учкисько эктонъя "Танок" ансамбль шоры. Тани Нылкышноослэн праздниксы азьын но соос усто концертъёс возьматӥзы. Дас ар ӵоже ини та коллектив шумпоттэ учкисьёсты ӟырдыт эктонъёсыныз. Ӟуч, удмурт, мукет калык эктонъёс ог-огзэс вошто. Туж жаль, концертъёссэс кивалтӥсьёс уг адӟыло, шӧдске. Адӟысалзы ке, синйылтытэк ӧй кельтысалзы, дыр, кырӟасез Наталья Ивановаез, баянистэз Алексей Белослудцевез... Мон малпамъя, соослы кемалась дано ним сётыны кулэ ни. В.Чернов. Кенешизы музъем ужасьёс Тулыс бусы ужъёс кутскон азьын гурт удысын тыршисьёс люкаськылӥзы бадӟым кенешоназы. Со ортчиз Ижысь "Металлург" культура дворецын. Ужрадэз нуиз Удмуртилэн Президентэз А. Волков. Кенешонлэн ужаз озьы ик пыриськизы Кун Кенешлэн но Правительстволэн тӧроссы И. Семенов но Ю. Питкевич. Агропромышленной комплексэз азинтонлы туэ, кылем арын сярысь, кык поллы тросгес юрттэт висъямын. Озьы ке но, со тырмыт ӧвӧл. Соин ик гурт хозяйствоослы коньдонэн юрттэт сётон сярысь котькуд ёрослэн бюджетаз но учкемын луыны кулэ, шуиз А. Волков. Сотэк югдурез уд тупаты. Гурт удыслэн кылем арын ужамезлы йылпумъянъёс лэсьтӥз министр В. Невоструев. Нош кенеше люкаськемъёслэн юанъёссылы валэктонъёс сётӥз Правительстволэн тӧроезлэн воштӥсез М. Назаров. Та ужрадын ӝутэм ужпумъёс сярысь лыдӟыны быгатоды газетмылэн вуоно номерысьтыз. Т. Миронова. Чур бугор Лыз, горд, вож Берло дыре автомашинаослэсь вылтуссэс мукет сямен нимало. Ма со, шуоды, "Рапсодия", "гренадёр" яке "босфор"? Россиын но СНГ-е пырись странаосын тужгес вӧлмемын таӵе буёлъёс. "Сафари" - тӧдьыё-льӧль, "примула" - кизер горчица тус, "мираж - тӧдьыё-курень, "охра" - пеймыт-ӵуж, "реклама" - горд, "триумф" - пеймыт-горд, "пирано" - пеймыто-курень, "гренадёр" - гордо- курень, "терракот" - курень, "адриатика-лиус" - пеймыто-лыз, "рапсодия" - яркыт-лыз, "гольстрим" - пеймыт-вож, "пихта" - сьӧдо-вож. Улон юртъёсты возён удысысь ужасьёс! Сюлмысьтым ӟечкыласько тӥледыз удысты кылдэм дырысен 80 ар тырмонэн! Та дыр ӵоже республикаысьтымы жилищно-коммунальной хозяйство, бадӟым сюресэз ортчыса, кӧня ке пичи предприятиосысь пӧрмиз пӧртэм ужъёсты быдэсъясь бадӟым комплекслы. Ялан йыло та удысысь предприятиослэн калыклы юрттэт сётонъя ужъёссы. Кылем арын 1 миллиард 300 миллион манетлы пӧртэм ужъёс быдэстэмын. Чеберско городъёс, вож будосъёсын шобырско ульчаос но азбаръёс, выльдӥсько сюресъёс, тупатӥсько выжъёс, улон юртъёсы вуо шуныт, ву, чагыр эстӥськон но электротыл. Калыклэсь улон-вылонзэ ӟеч радъян бордын тырше кызь сюрсъем коллектив. Жилищно-коммунальной хозяйствоез выльдонъя уж ялан азинске. Улонэ пыӵало выль технологиос, умоя шуныт но электрокужым сётонъя удыс. Улон юртъёсты возён удысын тыршисьёслы сӥзисько юн тазалык, шудбур но тыро улон, ужазы бадӟым азинсконъёс. Удмурт Республикалэн Президентэз А. А. Волков. Удмурт кизилиос Улон иськемъёс Маин мерталод меда адямилэсь улонзэ? Нуналэн-арен, ӟеч ужъёсын, будэтэм нылын- пиен. Нош Зоя Тимофеевна Дедюхина ӵектыны быгатысал на эшшо одӥг мертэт- иськемъёс. Россилэн капчи атлетикая чемпионатъёсаз уно пол вормылэм мурт, со умой тодэ та мертэтлэсь дунзэ но данзэ. Дунне вылын 72 ар ӵоже улытозяз, кӧня искьемез ортчыны кылдӥз меда та кужмо но юн сямо нылкышнолы. Пичиысен ик Зоялы пыӵаз таӵе сям - дуннеез котыръян. Кузь сюрес вылэ нырысетӥзэ потэмзэ тодаз уг вайы ни. Укыр пичи вал ук ай со 30-тӥ аръёсы. Ортчемзэ син азяз пуктыны тырше анай-атаезлэн мадемъёссыя гинэ. Сизьгуртысь Дедюхинъёслэн семьязы тыро улӥз. Кык вукозы, гид азбар тыр пудо- животсы вал. Ваньмыз со капчиен ӧз сётӥськылы. Уен-нуналэн быдэс семьяен ужано- пӧсяно луылӥз. Сюлмаськем бордысь бай улон потэ, шуылӥз семьялэн кузёез, Зоялэн песятаез. Яков Иванович Дедюхин. Кык лек ожлэсь тылӝузэс шӧмъяно луиз со. Ас вакытаз япон но герман ожмаськонъёсы пыриськиз. Нырысетӥ мировой война дыръя немец ки улэ шедиз. Бӧрысь, пленысь мозмытскемез бере ини, паймылоз вал: Германиын макем бадӟымесь, пе, садъёссы, кыӵе ужась калык , пе, отын улэ, котькуд пичи музъем кесэгез дунъя, утялтыны выре. Яков Иванович ноку адӟылымтэ емышъёсты веръям, туж паймем шунды шорын ӵыж-ӵыж кисьмам помидоръёслы. Зоялэн бабушез но быгатӥсь, шаплы вылэм, зарни киё кышномурт, вуриськыны мастак, таӵе нылкышноосты удмурт гуртъёсысь шер пумиталод вал. Озьы тӥни Дедюхинъёслэн бадӟым дэмен улӥсь но ужась семьязы коньдон жильдыны, байлык люканы быгатылӥз. Яков Иванович пиосызлы шуыса ваче кык корка пуктӥз. Нош Совето власть таӵе муртъёсты кулакъёс пӧлы пыртӥз, кышкыт тушмонэн ялӥз. Дедюхинъёслэсь юртъерзэс, ваньбурзэс одӥгтэмак кысказы-качазы, нош асьсэды быдэс семьяен Архангельск улосэ келязы. - Мон архивын бугыръяськи, - шуэ Зоя Тимофеевна, - документъёс шедьтӥ. Семьямес янгыше уськытӥллям, ас вылаз мукет муртъёсты ужатъяз шуыса. Зоялэн атаез Тимофей Яковлевич, лэсьтӥськыны усто вал. Соин ик мурт шаерын но уж ӝог шедьтӥз. Улӥзы барак нергеын. Кот но кезьыт вал отын. Толалтэ нылпиос висьыны ӧдъязы. Воргорон виссэ шедьтӥз, кузпалзэ но куинь пиналъёссэ, нылпиоссэ поездэ пуктыса дор палъёсаз келяз. - Анаймылы туж секыт йӧтэм сюрес вылын, - синкылиоссэ уг ваты нылкышно. - Ми, нылпиос, куиньнамы ик векчиесь вал ай. Ӧйтӧд, вуысалмы-а меда вордскем интыосамы, чылкак тодмотэм адямиос ӧз юрттысалзы ке. Бен, лек, лулэз вандӥсь вакытэ но калыклэн ог-огдэ гажан но жалян мылкыдыз ӧз кысылы. Кӧня ке дыр ортчыса, Зоялэн атаез но Удмуртие берытскиз. Коькыӵе шуг-секытъёс мед луозы, ужез яратӥсь мурт сыӵе сямзэ уг ышты. Тимофей Дедюхин нош ик выль юрт лэсьтон борды басьтӥськиз. Таяз учыре - Ижевскын, огшоры корка гинэ ӧвӧл ай, улыно-вылыно. Веме люкан, муртъёсты ӧтён сярысь ӧз ик малпаськылэ, ваньзэ асьсэ семьяен лэсьтыны-бергатыны тыршизы. Но мытэм ужзэ Тимофей Яковлевичлы быдэстыны ӧз кылды. Уин лыктыса, сое нош ик кырмизы но выльысь кыдёкысь шаеръёсы келязы. Йылаз-пумаз вуттымтэ корказэс кышномурт йырын кузпалыз Анна Ивановна йылсаз. Мурт дуннеын укмыс ар ӵоже костаськыса, война бере ини Тимофей Дедюхин Иже берытскиз, туж паймиз но шумпотӥз кышноезлэн юртъер ӝутон борды басьтӥськемезлы. - Бӧрысь та коркамес вузамы Мешерысь семьялы, - вера Зоя Тимофеевна. - Та гуртын мамае быдэ вуэмын. Корка басьтӥсь семьямы аспӧртэм вал. Война вакытэ мешер кышномуртлэн пиналыз кулэм. Нылкышно фронтэ кошкем, отысь ожмаськись картсэ шедьтэм но, война йылпумъяськытозь соин артэ ветлэм. Анаен-атае Мешере улыны интыяськизы. Тодӥсько на, папае татысь вукое электротыл нырысьсэ пыртӥз. *** Юнме уг шуо, дыр, калыкын: кышномурт - ӝыны юрт. Солэн кужмыз юрттэ ук та дуннемес вордыны. Куинь нылпиосыз понна Анна Ивановна дась вал уен-нуналэн заводын ужаны, карточкаен басьтэм нянь сукырилэсь берпум пырыоссэ покчиосызлы сётыны. Тае пиналъёсыз но адӟытэк ӧз кельтылэ. - Школаын дышетскыкумы ни, - тодаз вае Зоя Тимофеевна, - урокъёс азьын убоосты гудыса кельтылӥм. Гужем ялан Мешер гуртын колхозын ужаллям, бакча сиён будэтылӥм, кутсам, арам. Со вакытэ транспорт но, мар но ӧй вал. Пыдын 16 иськемез ортчылоно луылӥз. Зэмзэ но, котькыӵе улонэз адӟыны кылдӥз, сютэм но улӥм, жадим но, кынмим но, но чиданмы тырмиз. - Шуг-секытъёс адямиез кыдато, дыр? - юасько нылкышнолэсь. - Озьы. Мон тае ачим, ас улонэ пыр шӧдӥ. Туала калыкез чакласькод но адӟиськод: тросэзлэн чиданзы уг тырмы, пичияк гинэ ӵемто, шугъясько но - юон вылэ чӧлско. Малпало, лэся, озьы капчи луоз шуыса. Макем янгышало соос. Адямилэн кужмыз - таза улон, мугорез кыдатон бордын. - Озьы шуиськоды бере, иське, асьтэлы улон сюреслы калыклэсь тазалыксэ утён удысэз юнме ӧд быръе? - Тодам ваисько: Ижын корка лэсьтон вакытамы мамае но, апае но, братэ но скарлатинаен туж зол висизы. Нош мымым та эзель ӧз паласькы. Семьяосылы туж юрттэме потӥз соку. Собере апае фармацевтэ дышетскиз. Мон но солэн пытьыез кузя вамыштӥ, шуыны луоз. 1946-тӥ арын медициная институтэ пыри. Сое йылпумъяса, тодмо удмурт профессор Александра Ивановна Перевощикова кивалтэм улсын педиатрияя кафедраын ординатураез быдтӥ. Собере ыстӥзы Ижысь лесозаводлэн больницаяз нылпи люкетэн кивалтыны. 1956-тӥ-1959-тӥ аръёсы Тазалыкез утёнъя министерствоын ужай. Бӧрысь куать ар ӵоже тазалыкез утисьёслэн профсоюззылэн шаерысьтымы комитетэзлэн тӧроез вал. Та ужын уно кужымез кулэ карылӥз, нош мынам пиосы пичиесь вал, собере кузпалы улонысь кошкиз, соин ик мозмытыны кури. Дас тямыс ар ӵоже ужай Ижевскысь санэпидемстанциын, быдэ вуымтэ нылпиослэн гигиеназыя отделэн кивалтӥ. Та удыс туж кельше вал. Шоркарысьтымы ваньзэ ик нылпи учреждениосты чакласа возьылӥм. Ньӧмыз понна ужамез ӧй чидалля. Тодам ваисько 24 номеро школаын луэм учырез. Отчы лыктэмелы быдэ синйылтылӥ: юрт тыро-пыдо утялтымтэ, туалетын майтал, бумага ӧвӧл. Со сярысь директорлы одӥг пол, кык пол верай - пайдаез ӧвӧл, югдур уг воштӥськы. Жалянэ быриз, кутӥ но штраф сётӥ. Та ивор городэ ӝог вӧлмем, мукет школаосы но вуэм. Озьы тросэзлы эм луиз. Пионерлагерьёсты эскерон амалэ но аслам вал. Шуом, одӥгаз лагере вуисько, отчы бадӟым капкаетӥ уг пыриськы, мукет инты шедьтӥсько но бызьылыса ӝог гинэ ваньзэ пыр-поч чакласько-эскерисько. Собере гинэ лагерьлэн кивалтӥсьёсыз доры вамыштӥсько. Нош соослы туж кельше вал, куке асьсэос милемды пумитало, ӝегатыны выро, со дыре шекъёссэс ватыны тыршо. Пенсие потыса, ужме воштӥ. Но кема дыр ӵоже мыным вераллязы на, санэпидемстанциын умой ужасько вал шуыса. Нылпи учреждениосты эскерем сяна, дышетӥсьёс, пионервожатойёс пӧлын валэктон ужез, дышетонэз радъяны сюлмаськылӥ ук. Та вакытэ Ижевскысь кыкетӥ нылпи больницаын диетолог луыса тыршисько. Аресэ бадӟым ке но ни, ужысь кошкеме уг поты на. Алигес отпуске ветлӥ. Акыльтӥ гуртын пукыса. Квартирае витетӥ этажын. Вӧлдэтысь ву вия. Сыӵе мӧзмыт суред шоры учкыса, шутэтскем кадь ик ӧй поты. - Зоя Тимофеевна, тӥ кузь улон сюресэз ортчиды. Кыӵе вакытэ секытгес вал? - Туннэ секыт шуэме уг поты. Кин ужа, со сиськытэк уг кылльы ук. Нош война вакытэ туж шуг вал. Тани мамаелэсь бызьылэмзэ тодам ваисько но чылкак паймисько, кытысь со кужым ваньмызлы шедьтылӥз. Ӧз чигиськы: куректонэз вормиз. Али мамаелы 94 арес. Куддыръя шуэ, малы, пе, монэ инмар уг басьты, вань ёзъёсы югыт дуннеысь кошкизы ни ук. Мон шуисько, тон кадьёс туж ичи, соин ик данъяськы, улонлы шумпот. Нош лушкаськисьёс соку но вал, али но вань. Уг вунэтӥськы война дыръя луэм учырез.Карточкаен нянь басьтӥ. Бордам ӝиптыса, сое дорам нуисько. Шӧдтэк шорысь бызьыса дорам воргорон вуиз, шуркак няньме кыскиз но пегӟиз. Нош алигес толэзь талэсь азьло нош ик та выллем учыре шеди. Сиён-юон басьтыса бертӥсько гуртам. Подъезд дорв вуи но, кыӵе ке воргорон возьманы курыса кеськиз. Малпай, со корка пырыны медэ шуыса. Нош со ымнырам шуккиз, сумкаосме кыскиз но пегӟиз. Сьӧраз уиськыны выри на, ӧй сутылы ни, пытьызэ ыштӥ. Подъезд доры берытски но адӟисько - документъёсын сумкае костаське, сиён-юонэн сумкаме ӧй шедты ни. Озьы тӥни, сюлмо адями котькыӵе вакытэ сюлмо луэ, нош урод мурт урод ик кыле. *** Дедюхина кадь адямиос вӧзын улон "пӧзе", кожалод. Спортэн эшъяськемез сярысь юанэлы Зоя Тимофеевна валэктӥз: - Мон котьма борды капчиен басьтӥськисько. 50-тӥ аръёсысен ини пыдын но куасэн бызьылонъя ӵошатсконъёсы пыриськисько. Котькуд отпускам турпоходъёсы ветлӥ. Быдэс Кавказэз котыртӥ. Дедюхиналэн вормонъёсыз сярысь верало уно грамотаосыз но медальёсыз. 1998-тӥ арын Зоя Тимофеевна тодӥз, Москваын Россиысь капчи атлетикалы 110 ар тырмонлы сӥзем чемпионат ортчоз шуыса. Ас мылкыд каремезъя коньдон люказ но отпуск басьтыса столицае кошкиз. Ӵошатсконъёсты радъясь комитетэз шедьтӥз, кужымзэ мертан сярысь мылкыдзэ вераз. Озьы сое 70-74 аресъемъёслэн группаязы пыртӥзы. 100, 300 но 5000 метръем дистанциосын 3 зарни медаль утӥз. Со дырысен арлы быдэ ӵошатсконъёсы пыриськылэ, медальёстэк берытскылэмез ӧвӧл. Вить чемпионатъёсын 16 медаль басьтӥз ни, 13 зарни но 3 азвесь. Ижевскын "Зенит" стадионын ялан ортчыло тупаса улонлы сӥзем ӵошатсконъёс. Отын спортсменъёс 2 миляе (3216 метре) бызьыло. Тужгес устооссэ лыдпусъёсты (результатъёсты) ООН-э келяло. Таза улон понна ӟырдыт нюръяськись мурт, Прага университетысь профессор Шри Чинмой ӵектэмъя, ӵапак та огазеяськонын быръё дуннеын вормисез. 1999-тӥ арын Музъем вылысь 70 но солэсь бадӟым аресъем нылкышноос пӧлын вормисен Зоя Дедюхина лыдъямын вал. Ижевсклэн мэрез Анатолий Салтыков Зоя Тимофеевналы сӥё-дано ужрадын Дуннелэсь Кубоксэ сётӥз. Сое шаерамы Америкаысь Сиэтл городысь ыстӥзы. - 2000-тӥ арын Молдавиысь кышномуртлы 12 секунд келяськем, - шуэ. Но мылкыдзэ уг куашкаты, азьланяз но ӵошатсконъёсы ветлыны малпа спортсменка. - Кунгож сьӧрын ортчись чемпионатъёсы но пыриськылысал, но коньдонэ ӧвӧл, спонсоръёс уг шедё, - жаля нылкышно. - Москваысь спортсменка мынэсьтым ляб бызьылэ, нош юрттӥсьёсыз вань бере, мукет кунъёсы но потаны быгатэ. Зэм, дунъяны ум быгатӥське асьмеос быгатӥсь муртъёсмес. Утэм медальёссэ но кубоксэ утьыны гинэ но юрттӥсь уг шедьы. Ӵош ужась эшъёсызлэсь сумка курыны быгатэм ик Зоя Тимофеевна. Нош сое больницалэн балансаз гожтӥллям. Озьы бере, ужысь кошкиз ке, со сумказэ но басьтозы?! Эриктэм серекъялод но бӧрдод но, ява. Кемалась ик ӧвӧл Зоя Тимофеевна Ижысь одӥгаз магазинэ пыриз. Син шораз йӧтӥзы сумкаос. Кема учкыса сылӥз соос шоры. Вузкарись-воргорон тае синйылтӥз но юа: - Маиныз тӥледлы, мӧйы муртлы, таӵе сумка кельшиз? - Медальёсы трос. Возьыны нокытын. - Иське, тӥ спортсменка? - паймиз вузкарись. - Вае ай мон тӥледлы та сумкаез дунтэк кузьмало. Табере Дедюхиналэн сумкаез кык луиз. Утылы гинэ медальёстэ. Тани дас нунал ортчыса, Пензаын ӵошатсконъёс луозы. Шаерысьтымы спорткомитет ӧз вера на, кин отчы мыноз, но Зоя Тимофеевна туж оске, сое палэнэ уз кельтэ шуыса. Гужем чемпионатлы но заявка сётӥз ни. Внукез Ваня данъяськыса шуэ: - Монэ бабуше сьӧраз басьтыны малпа. - Ачид нош бызьылӥськод-а? - юасько пиёклэсь. - Бызьылӥсько, - вазе со. - Милям коркамы вӧзын ик стадион вань, отчы потаськом. Зоя Тимофеевна пальпотыса кылзэ пичи Ванялэсь вераськемзэ. Юлия Александрова. Улон косӥз ке но, ӧз куаса Вордӥськем арзэ ӧй ке верасал, ожысь но ужысь ветеранлы Степан Петрович Лебедевлы мон нокызьы но ӧй сётысал аслэсьтыз арлыдзэ. Тямыстонзэ ортчыса но воргорон йыг-йыг возиське. Городысь квартираяз шуныт гур вылэз луысал ке но, ӧй чидасал со тэк пукыны: весь мар ке но ужано, кытчкы ке но дыртоно. Больницае мынон дыръёсыз луо ке, куаретӥсьёс но шедё: таза мурт эмъяськыса ветлоз-а, ма, пе. Тӥ юалэ маи мынам уг висьы, шуэ пумитазы Степан Петрович. Но висёнъёс азьын со уг йыбыртты. Визьмын но кужымен ужан юртто воргоронлы юн возиськыны. Вань солэн мукет но секретэз: адямиосын керетытэк улоно, котькудӥзлы капчи мылкыдын, пальышаса вазиськоно, шуэ со. Та дыр ӵоже кыӵе гинэ удысын ужаны ӧз кылды Степан Петровичлы, но котькытын сямен ик со вал кивалтон радъёсын. Вавож ёросысь Кионгуртын вордӥскьем пияш быдтӥз автодорожной техникумез. Дышетсконзэ йылпумъякуз ужаны ыстӥзы Ижевскысь Первомай ёросэ. Дорысьтыз атаеныз ӵош одӥг ӧсысь потӥзы. Со ик луиз пыраклы люкиськемзы. Атайзэ лэзё утильсырьёез бичасьёсты дасянъя Москваысь курсъёсы. Калыклэн тушмонэз шуыса, отысен ик пукто. Кызбы? Малы? Степан Петровичлэн верамезъя, сое янгыше уськытӥзы аран машиналэсь бергась ёззэ чигтэмез понна. Странаямы Германия ожалскем бере, Петр Лебедевез ысто ожмаськонэ. Отын со сӧсырмыны шеде. Пермьысь госпитальын кӧня ке эмъяськемез бере келяло Нижний Тагилэ. Отысен Степанлэн атаез кулэ. Ватэм интызэ тодӥсь ӧз луы ни. Но реабилитировать каризы ик. Ож тылӝулэсь палэнэ ӧз кыльы Степан Лебедев но. Армие сое басьтӥзы война кутскем бере гинэ. Дышетскиз полковой школаын, младшой лейтенантъёсты дасясь курсъёсын. Луиз разведвзводлэн командирез. Но часте вуыса, строевой командире пуктӥзы, пехотаын адямиос уг тырмо вал угось. Степан Лебедевлы кема ожмаськыны ӧз кылды. Одӥгаз ожын чалеп пельпумзэ сузмытӥз. Дор палаз вуыса, сое Вавожысь школае военруке пукто. Ужез туж сюлэмъяз вал, но курон-косонъёсты быдэсъятэк ӧйлась. Одӥг но ӝыны ар ужамез бере, Вавож райисполкомысь сюресъёс лэсьтон отделлы кивалтӥсе басьтӥзы. Куать ар отын ужаса вуттӥз, ыстӥзы дышетскыны партийной школае. Партие пырыны Степан Лебедев кематэк ӧз дӥсьты. Ожмаськон лудысен кышкасьтэм комсомолец коммунистъёслэсь радъёссэс йылэтыны малпа ни вал, сӧсырмыны шедеменыз партие пырыса ӧз вутты. Атаез пумысен пыкылӥсьёс ӧй вал ик бен, но кырыжак учкылэмзы одӥг-ог шӧдӥськиз ик. Раисполкомлэн кенешаз одӥг пол ченгешон потӥз сюресъёс лэсьтон пумысен. Степан Петровичлэн малпанэз мукетъёсызлы пумит луиз. Исполкоме быръем одӥгез мурт соку Лебедевез интыяз пуктыны дыртӥз, ми, пе, тодӥськом кинлэн тон пиез. Со сяна, номыр сыӵе-таӵе вераськонъёс ӧй вал ни. Но со но тырмыт луиз воргоронлы. Вавож райкомлэн нырысетӥ секретарез одӥг пол юаз: тон, пе, ньыльдон тямыс аресозь-а комсомолын ужалод, партие пырыны кулэ. Степан Петрович пумитъяськыны выриз ик, вазь ай шуыса. Соку секретарь меӵак вераз, ми тонэ пыртӥськом ук, атайдэ ум. Коммунистлэсь данзэ Степан Петрович Лебедев котьку вылӥ дунъялляз, ӧз туртты аслыз кыӵе ке пайда поттыны. Дас ньыль ар пала со кивалтӥз Ижевскысь горжилуправлениен. 60-тӥ-70-тӥ аръёсы та удысын ужаны капчи ӧй вал. - Удалтӥз - шуэ Степан Петрович. - Тямыс ар ӵоже дорожно-эксплуатационной участокен кивалтӥ, Ижевск-Глазов, Ижевск-Сарапул сюресъёсты утялтыса-эскерыса возим. Уй но нунал сюрес вылын, транспорт ӧй вал. Горжилуправлениын но капчи ик вылымтэ. Городын лэсьтӥськон уж зол мынэ вал соку, ужаны кутскем берам ордеръёс но ми пыр сётӥськылӥзы. Шуисько вал, ми улон квартираос люконын вырыны кулэ ӧвӧл, милям ужмы улон юртъёсты выльдон-тупатъян. Кык городэ ветлӥ мукетъёслэсь ужан амалъёссэс эскеронъя. Адӟем карим кировъёслэсь, кылдытӥм улон интыез вошъян ужен вырись бюро. Ай отын но шуг-секытъёс кылдӥзы, кык адямиен отдел кылдытыны штатной единица ум шедьтӥське. Ярам, одӥг муртэ горисполком висъяз, одӥгзэ милям управленимы. Ужаны капчигес луиз. Нош ужпумъёс тырмыт вал. Лэсьтӥсьёс туж трос ужъёссэс быдэстытэк кельто, выжлы ыль материал вӧлдо - куасьме ке, вискытӥз карандаш усе. Ву ласянь но трос ӝожтӥськонъёс вуо. Улӥсьёс лэсьтӥськисьёс доры уг мыно, милемыз куарето. Нырысетӥ куинь арзэ ужакум, котькуд приёме 70-75 адями пырпотэ вал мон дортӥ. Кызьы чидай, али ачим паймисько. Вал олокыӵе но учыръёс, квартира басьтон понна кузьмаськыны турттӥсьёсыз но луылӥзы. Но ӧз быгатэ Степан Петровичлэсь мылкыдзэ зӥбломытыны. Сомында ар ӵоже квартира ужпумъёс котырын бергаса, аслыз кык комнатаенэз но тырмыт потӥз, нош улӥзы ньыль кузя - кузпалыз но кык пиосыз. Солань но, талань но куасаны быгатымтэзы куд-огезлы сюлэмзыя ӧз кельшы, инты бушатэмзэ возьмазы. Степан Петрович ужысь кошкон сярысь куриськон но гожтоно луиз. Шедизы дурбасьтӥсьёс. Собере воргорон ачиз но вунэтӥз куриськонэз сярысь. Ар ортчыса тодаз вайытӥзы. - Россиысь областьёсысь но республикаосысь бадӟым городъёсын со вакытэ горжилуправлениын нокин но мон мында ӧз ужа, - шуэ Степан Петрович. - Пермьын со дыр куспын ньыль кивалтӥсь воштӥськиз, Кировын - куатез. Ужез секыт вал угось, ваньмыз ӧз чидалэ интыязы возиськыны. Котькыӵе шуг-секытъёслы дышем воргоронэз нокыӵе уж ӧз кышкаты. Но С. П. Лебедев ноку ӧз малпалля, пенсие потон аръёсаз Нагорныйысь психотерапевтической интернат юртлэн директорез луоз шуыса. Гуртын будэм воргорон синмаськиз инкуазьлэн чеберезлы, нош кыӵе уж сое возьма, соиз сярысь ӧз ик малпаськы. Кыллись висисьёс доры нырысь-валысь кысконтэк пыраны ӧз быгатъя, аспӧртэмлыко зынлэсь шоканэз ик пытсаськылӥз. Но котьмалы дышоно вылэм. Степан Петровичлэн адямиез валась но жалясь сюлмыз туж ӝог дышиз выль ужлы. Интернатын улӥсьёс но яратӥзы выль директорез. Кык-куинь мурт семья но кылдытӥз. Лебедевез со понна куаретӥзы ик бен. Сыӵе ини Степан Петровичлэн сюлэмыз: шуге-леке сюремъёслы котьку юрттыны дась. Али но со доры пӧртэм ужпумъёсъя вазиськисьёс трос гинэ. Лекъяськыны но со уг быгаты. Сталин кивалтыку, укыр вӧсь каризы ке но, Степан Петрович со вакытэз уг курла, мылкыдызъя коммунист ик кылемын. - Но коммунистъёс но котькыӵе вылэм, - шуэ со али. - Мынам анае Сталинэн огнуналэ кулӥз. Гуртэ бертыны кулэ, нош монэ траур ортчытыны косо. Кытчы пырод парторганизацилэн секретарез вал бере мон соку. Вавожысь шай вылысен люкиськи ини анаеным. Степан Петрович данъяське пиосыныз но: Пичи дырысен сюранаен будоно луизы ке но, соос адями радэ потӥзы. Пичиезлэн классысьтыз тросэз эшъёсыз пытсэт сьӧры сюризы, йыртэманы туж яратылӥзы. Нош Володяе военной луиз. Али Москваын улэ, Удмуртлыкез ӝутыны юрттэ. Бадӟымез быдтӥз Ижевскысь мединститутэз, пенсие потон дырыз вуэ ни. Уг вунэто нылпиосыз атайзэс. Кыдёкын Германиын улӥсь внучкаосыз но песятаенызы данъясько. Л. Малых. Город кенешоз 21-тӥ мартэ ортчоз Ижевскысь Город думалэн 32-тӥ сессиез. Эскеремын луоз Ижевскысь социально-культурной объектъёсты городлэн асваньбураз сётон сярысь юан. Кузьма книга Удмурт Республикаысь Югдурез утёнъя министерство "Кузьма библиотекалы книга" ужрад ялэ. Книгаос, справочникъёс, энциклопедиос ыстэмын луозы Грозный городысь нылпи приёмниклэн но огдырлы кылдытэм милицилэн библиотекаосазы. Оскиськом, котькуд семья пичи ке но юрттыны быгатоз. Юаськоно 55-78-22, 55-72-01 телефонъёсъя. Книга ваёно таӵе адресъя: Ижевск город, М.Горький урам, 17, МВД-лэн культурая центрез. Узей-тукляос нош паймыто Ува ёросысь Узей-Тукляысь кибашлыослэн юртсылы вить ар тырмиз. Толсур толэзе соослэн киужъёссы возьматӥськизы Уваын. Нош али, 12-тӥ мартэ, адӟытонзы усьтӥськиз Ижевскын Чеберлыко киужъёсъя устолык удысысь быгатӥсьёслэн шор юртазы (В. Сивков урамысь 173 номеро юртын). Узей-тукляослэн таӵегес выставказы вал ни кык ар талэсь азьло. Таяз соос ваиллям выль киужъёссэс. Кибашлыослэн юртсылэн кивалтӥсез Геннадий Сидоров берло вакытэ уката но ӝутскем мылкыдын ужа. Кылем арын сое кутӥзы Россиысь Суредасьёслэн огазеяськоназы. Художник лэсьтэ пулэсь скульптураос, соос удмурт мифологиысь сюжетъёсъя быдэстэмын. Талэсь адӟем каре ни, шуыны луэ, дышетскисез но, Сергей Гук, солэн ки улаз уло-ваё пуос озьы ик пӧртэм паймымон макеослы берытско. Кызьпу туен ужа МихаилШахтарин, нош али со пулэсь лэсьтэм тусьты-пуньыоссэ ваем. Михаил Гребин пичи сандыкъёсыз лакен шобыртэ, суредъёсаз удмурт пужыос адӟисько. Елена Жигалова ас мылкыдызъя кылзӥськытэ сюез: солэн борддоре ошоно суредъёсыз но, адями тусъёсыз (фигураосыз) но синмаськымон пӧрмо. Нош куиськонэн синэз пӧртма Надежда Сидорова. Узей-Тукляысь усточиослэн киужъёссылы дунъет сётыса вераськизы экспертъя кенеше пырись адямиос Владимир Владыкин, Кузьма Куликов, Маргарита Иванова, УдГУ-ысь искусствоосъя факультетлэн деканэз Владимир Кошаев но тодмо суредась профессор Семен Виноградов. Т. Сидорова. 02 ивортэ Усьтон бырйыса Ижевскысь Ленин ёросысь милиция ӝегатӥз Клубной ульчаын улӥсь 23 аресъем Алексеез. Сое янгыше уськыто, усьтон бырйыса, 9 квартираосы пырамез понна. Вор туэ январь-февраль толэзьёсы качаны вуэм Драгунов, Клубной, Баранов, Новостроительной ульчаосысь, Машиностроительёслэн посёлокысьтызы кввартираосты. Куд-огез лушкам ваньбур берыктэмын. Эскерон азьланьтӥське на. Тренировкае - тюрьмае Витетӥ мае уйшоре Можга ёросысь Вуж Какси культура юртлэн тренировка ортчытъян залаз куинь егит пиос эриктэмазы 17 аресъем Н.-ез. Югдурез утёнъя удысын тыршисьёс ӝегатӥзы "Знамя" колхозын ужась 20 аресъем Викторез, солэсь эшъёссэ 20 аресъем Владимирез но 19 аресъем Александрез. Табере пиослы "тренировка" ортчытоно луоз, дыр, кечато-вамато залын. Пересез но ӧз жалялэ Озьы ик бер уин Дэри ёросысь Ожмос черкогуртысь 72 аресъем О. пенсионеркалэн пудо вордон гидаз тодмотэм адямиос пыраллям но куанер пересьлэсь 2 парсьпизэ, 4 курегзэ "пыдъятӥллям". Пересь ыштэм ваньбурзэ 1 сюрс 540 манетлы дунъяз. Но милиция но уг кӧлы вылэм. Ӝегатэмын азьвыл пукем "экеос" - 25 аресъем Рудольф, 26 аресъем Андрей но 23 аресъем Екатерина. Куиньназы ик та гуртысь. Соослы юрттӥллям на Ижевскысь куноос - 21 аресъем Константин но 27 аресъем Василий. "Халявной" сӥль сиыны ӧз кылды таяз учыре соослы. "Автовор" Сарапулысь югдурез утёнъя отделын ужасьёс ӝегатӥзы азьвыл пукылэм 36 аресъем Алексеез. Туэ 13-тӥ январе со одӥгысьтыз гаражысь лушкам 8 автомобиль питран, аккумулятор, "Урал" автомагнитола. Та вакытэ "автовор" камераын шутэтске. Феррохром, пе, кулэ луиз Дуно но сьӧд корт лушкасьёслэн лыдзы таки уг кулэсмы. "Ижсталь" акционер огазеяськонлэн одӥгысьтыз складысьтыз 6-тӥ мартэ выжон уе ышиз 360 кило феррохром. Дунъяське 7 сюрс 600 манет тыр. Объединениысь возьмаськисьёс но Ленин ёросысь милиционеръёс кортэз лушкасьёсты кырмизы ик. Соос нокытын ужасьтэм воргоронъёс вылллям - 26 аресъем Владимир но 30 аресъем Александр. Вылӥе ӵемгес учкылэ Корка йылъёсысь йӧ ӟускиос шоры ӵемгес учкылэ та дыре. Воткинской шоссе ульчаысь 26-тӥ юрт йылысь йӧ люк усиз 60 аресъем Людмила вылэ. Вӧсь луиз йыркобыез, гадьыз. Сое утемзы ӧз луы ни, больницаысен кулӥз. 8-тӥ март "шулдыр" ортчиз Ортчизы, лэся, тулыс шулдыръяськонъёс. Табере куд-ог йылпумъянъёс. Юон дыр куд-ог интыосын кутскиз ни 7-тӥ мартэ нуназе бере. Озьы 7-тӥ-10-тӥ мартэ малпамтэ шорысь кулӥз 68 адями. Уноез шудтэм учыръёс потӥзы ӝӧк сьӧрын шулдыръяськон бере. Милиция праздникъёсы семьяос куспын керетонъёсты буйгатыны потаз 240 пол. Соиз умой ини, азьпалан шулдыръяськон кематэк уз луы ни. Таиз ини героин! Ижевскысь Шор площадьын ДПС-лэн полказ но ФСБ-ын ужасьёс ӝегатӥзы ВАЗ-2107 автомобилез. Отын пуко вал Чайковский городысь вынъёс - 27 аресъем Вадим но 31 аресъем Олег. Эскерон дыръя шедьтэмын 1 (!) килограмм героин. Оло сураськиз, оло... Аспӧртэмлыко пумитаз 8-тӥ мартэз Ижевскысь Квартальной проездын улӥсь 42 аресъем Светлана. Оло солэн йырыз аракы зынэн сураськиз, оло вожанэз пӧсьтӥз. Кутӥз но 47 аресъем картэзлэн Александрлэн сюлмаз пуртэн бышкалтӥз. Воргорон интыяз ик кулӥз. Кузётэм лавка Якшур-Бодья ёросысь Альман гуртысь магазинэз одӥг пол гинэ ӧз сузялэ ни. Нош возьмаськись яке сигнализация уг пукто. Райпо коньдонзэ жаля, луоз. Но лушкаськисьёс сое ик витьыса уло. Тани 7-тӥ мартэ выжон уе но праздниклы шуыса поттӥллям аракы, тамак но вӧзаз пӧртэм сиён-юон. Праздниксэс бен пусъёно луизы ни изоляторын. Анайзэ но адӟымтэ Селта ёросысь "Родники" эштосын ужась 29 аресъем Игорь, уно гинэ курытсэ кымалтэмез бере, ЮМЗ-6 тракторен "лобаны" ӧдъямез потэм. Правотэк "тракторист" Прой-Балма гуртысь ульчаетӥ ширтэ вал. Юэм йырыныз адямиез адӟымтэ ни. Питранъёс улын быриз солэн 59 аресъем анаез Алевтина. "Механизатор" сайкиськиз милициын гинэ. Нош солэсь анайзэ уд берыкты ни... "Анай-а" шуод сое? Вавожысь РОВД-ын ужасьёс "Луч" гурт кооперативын парсь сюдӥсь луыса ужасьлэн 29 аресъем Еленалэн кролик вордон гидысьтыз шедьтӥзы... вож нунылэсь шӧйзэ. Пинал вордскемын ни вылэм кылем арын декабре. Тодэ вайытон Берло дыре умойтэм учыръёс кылдӥзы пенсие потэмъёс пумысен. Соослэсь коньдон талало почтаосын, аптекаосын, магазинъёсын басьяськыкузы. Соин ик, чакласькыса улэ! Н. Байтеряков. (Дасямын Удмурт Республикаысь Югдурез утёнъя министерстволэн пресс-службаезлэн ивортонъёсызъя). Удмуртия: выль даур Ӵемгес эскерод - тросгес шыръялод Ӝоген ар тырмоз Россилы выль Президент быръем дырысен. Ваньмы асьмеос шӧдӥмы ни, со странаен кивалтонэз юнматыны тырше шуыса. Уго кужмо властьтэк югдурез тупатыны уз луы. Владимир Путин чакласа возе коньдон ужпумъёсты но. Кызьы радъямын та уж быдэс государствоын но асьме дорын? Мар вылез удысын? Та сярысь вера Россия Федерациысь Коньдон ужпумъёсъя министерстволэн Удмурт Республикая контрольно-ревизионной управлениеныз кивалтӥсь Николай ЛЕБЕДЕВ: - Коньдон лыдъямез яратэ. Та сярысь ваньмыз тодо. Озьы ке но, кун коньдонэз тус- тас карисьёс ичи ӧвӧл на. Соин ик ачиз улон косэ та удысын эскеронэз кужмоятыны, выль сямен радъяны. Со понна Президентлэн администрациез, Россиысь правительство ужало та пумысен нимысьтыз законлы инъет дасян бордын. Чакламын Президентлэсь указзэ но поттыны. Та уже озьы ик пыриське Россиысь Счётной палата но. 2001-тӥ арлы бюджетэз юнматыса, асьме странаын йылпумъяськиз, шуыны луоз, бюджетэн герӟаськем кусыпъёсты выльдонъя куинь ар талэсь азьло кутэм концепциез улонэ пыӵатон. Со юрттӥз выт бичанэз умоятыны, трансферт люкылонэз шонергес радъяны. Но та ужез азьланьтыны чакламын. Коньдон ужпумъёсъя министерство котыр ласянь эскерыны кутске Россилэн улосъёсаз бюджетэз дасямез но сое быдэстэмез. Валамон ни, нырысь ик учкемын луоз Федерацилэн бюджетысьтыз интыосы келям уксёез кутон. Вылӥысь коньдон республикаосы, областьёсы кошке пӧртэм сюресъёстӥ: я трансферт, ссуда чотын, я огъя программаосты быдэсъянэ. Ваньмыз со син азьын луыны кулэ. Министерстволэн контрольно-ревизионной ёзъёсыз 77 ар ужало ни. Та дыр ӵоже трос опыт люкамын. Эскерисьёс вань ужзэс интыосысь быръем но быдэсъясь органъёсын, правоосты утись учреждениосын ӵош нуо, арлы быдэ трос тырмымтэосты кыре потто. 2000-тӥ арын гинэ Удмурт Республикая контрольно-ревизионной управление 462 ревизия ортчытӥз. 228-аз эскеронысь коньдонэз кутон ласянь куронъёсты тӥян учыръёс шараямын. Бюджетысь 15,9 миллион манет мыдлань, азьло чалкамтэ удысэ быдтэмын, 200 сюрс манетлы ваньбур ыштэмын, тупатыса куронъёсты кулэезъя быдэсъямтэен, эшшо 65 миллион манет тус-тас каремын. Та дырлы ог 22 миллионэз берыктэмын ни. Кылемзэ ыштонъёсты шедьтон вылысь, уж азьланьтӥське. КРУ-лэн кужымез куддыр уг тырмы. Соин ик ми юрттэт куриськон правоосты утись ёзъёсын ужасьёслэсь. Кылем арын прокуратурае но мукет органъёсы эскеронъёсмыя 58 материал сётӥм. Соосъя 55,8 миллион манет ыштэм-быдтэм коньдонэз государстволы берыктыны кулэ. Ми ӵош эскерим, кылсярысь, Воткинскысь "Завод РТО" огазеяськонын кылдэм югдурез. Документъёсты пыр-поч чакласа тодмо луиз: предприятиысь ваньбур (юртъёс, ужан тӥрлык) кӧня ке пол пичиятэм дунын вузамын, озьы 31,9 миллион манетлы изъян лэсьтэмын. Асьме прокуратура та пумысен уголовной уж ӝутӥз. Туэ 19-тӥ феврале ортчем совещаниын Удмурт Республикалэн Президентэз Александр Волков "Завод РТО" акциосын огазеяськонын луэм учыр пумысен трос лек кыл вераз, югдурез чидантэмен лыдъяз. Пӧртэм тырмымтэосты шараязы эскерисьёс "Ремсервис" предприятиын, Воткинскысь машиностроительной техникумын, Играысь 36 номеро профтехучилищеын. Тупатэм куронъёсты тӥяса ужало Сарапулысь аракы поттон заводлэн кивалтӥсьёсыз. Солэсь огзэ складзэ эскерыку, 120 сюрс манетлы ваньбур шедьтэмын ӧй вал. Кытчы пыдъяськиз со - тодмо ӧвӧл. Россиын округъёс кылдытэм бере, ваче ужаны кутским Президентлэн оскем муртъёсыныз. Асьме республикая валтӥсь федеральной инспекторлэн косэмезъя эскерим "Удмуртия" кун телерадиокомпанилэсь коньдонэн ужамзэ но хозяйствоез нуэмзэ. Берло дыре Москва милемыз золгес чакланы куре бюджетысь ссуда чотын висъям коньдонэз. Удмуртиысь 228 учреждениослы но организациослы уждунэн сётэм уксёез кызьы кутон ласянь эскерыса тодмо луиз: 18,9 сюрс манет коньдон быдтэмын транспортлы но мукет кулэяськонъёслы. Озьы кӧня ке дасо ужасьёс уждунзэс дыраз бсьтыны ӧз быгатэ. Та выллем учыръёслы пум пононо ни. Но куддыр мукет сямен но луыса кошке. Кылсярысь, кылем арын 22 гурт хозяйствоослы, ӟеч кидыс будэтэмзы понна шуыса, юнме шорысь 73,8 сюрс манет тыремын. Кызьы тодмо, асьме шаерысь данакез вылӥ но шоро-куспо дышетскон заведениос Федерацилэн бюджетысьтыз висъям коньдон чотын возисько. Жаляса верано луэ, Россиысь та удысъя министерство аслэсьтыз учреждениоссэ туж шер эскере. Соин ик тырмымтэос но ӵем луыло. Тани Удмурт университетын гинэ 16 миллион манетлы пӧртэм шекъёс шараямын. Одӥгез бухгалтер, документ пӧраса, 80 сюрс манет коньдонэз киултэм. Россиысь Коньдон ужпумъёсъя министерство но асьме Правительство куспын огкыл гожтэмын. Соя управленимы эскерылэ ёросъёсысь но городъёсысь бюджетъёсты быдэсъямез. Кылем арын 138 сыӵе ревизия ортчытэмын, 3,8 миллион манетлы тырмымтэос кыре поттэмын. Странаямы кивалтон удысэз кужмоятон борды рос-прос басьтӥськизы бере, эскерись ёзъёсты но одно ик юнматозы. Сотэк коррупциез, рынок вакытэ алям мукет "висёнъёсты" быдтыны уз луы. Макем ӝоггес Кун Дума кутоз "Россия Федерациын коньдон ужпумъёсты кун ласянь эскерон сярысь" законэз, сокем ӝоггес калык шӧдоз эскерись органъёслэсь кулэ луэмзэс. Вуж блокнотысь чуръёс Алексей ШКЛЯЕВ Борис Ельцин кыкетӥзэ дасяськиз президент луыны... Та чуръёсты мон ӧжыт гинэ кызь ар ӧй ӵабъя, вить но дас аръёслы висатылыса. Весь утчасько валэктон: мон понна кин со, Борис Ельцин? Мынам Борис Николаевичез гажаме яке синазькыль кареме солы нокытӥяз уз йӧт. Но мон сяменгес малпасько, дыр, Россиысь уно миллион адямиос. Озьыен, мынам мылкыд пырые, мукетъёсыныз огазеяськыса, кужмо шурлы пӧрме. Таизлэсь куашетэмзэ Ельцин шӧдытэк ӧз кыльы, вылды. Пыртия кыл кутэ котьма понна Дас тямыс ар кивалтэмез бере, 1982-тӥ арын 10-тӥ ноябре, кулӥз Леонид Брежнев. Мыным озьы потӥз: партиысь кузёос, сое Кремль вӧзы ватыса, изьыоссэс мургес изьыязы, воротникъёссэс вылэгес ӝутӥзы, дӥсь бирдыоссэс юнгес тунгоназы. Ижын но югдур пӧртэмгес ӧй вал кадь. Янгышаськем. Москва палась, Юрий Андропов дорысь, ыркыт тӧл пельтӥз. Сое юнгес шӧдӥ Свердловскын. Уж вискам отысь вылӥ партшколаын дышетскыкум валай: СССР-ын маке но воштӥське. Учкы ай компартилэн Свердловск обкомезлэн нырысетӥ секретарез Борис ельцин шоры: кыӵе сэзь, егит, чебер! 1983-тӥ арын феврале мон сое куинь пол адӟи: кык пумиськонысь но одӥг телепередачаысь. Шӧдӥське: калыкен кенешыны рос-прос дасяськемын. Одӥг лэчыт юанлэсь но уг пегӟы. Яратоно кылъёсыз таӵеесь: - Леонид Ильич Брежнев шуылӥз: партия кыл кутэ котьма понна, партия понна нокыӵе чыры-пырыос ӧвӧл. Таӵе кылъёсты кылыз вераку, визьмыз малпа ни: кыӵе валэктон сётоно ай? Эн вунэтэ: 1983-тӥ арын лэчыт ужпумъёс тачак вал ни. Нош сюлэмзэс шара усьтыны дӥсьтӥсьёс - одӥг-ог гинэ. Борис Николаевичлэсь соку вераськемзэ туннэ гожъясько но абдрасько: мар бен отын лушкемез вал? Кыӵе ӝог дышим асьмеос эриклы! Эриклы но эрказмонлы. Тани Ельцинлэн ужан амалъёсыз пӧлысь куд-огез. Со шуак малпа Егитъёслэн дворецазы студентъёсын пумиськыны. Отчы уг ӧтё "вить" басьясьёсты но комсомолысь азьмынӥсьёсты. Нылъёсты но пиосты быръё яке алфавитъя, яке кыӵе ке валантэм лыдпусъёсъя. Ассэ нырысетӥ секретарез озьы адӟо таӵе йӧно ужрадъёсы ноку сюрылымтэос, институтысь уллян калэ вуэмъёс, стипендия басьтӥсьтэмъёс но со выллемъёс. Пайдаез кыӵе? Куать часъем пумиськон бере Борис Николаевич сюлмыныз шӧдэ пӧртэм мылкыдъёсты но кулэяськонъёсты. Мукет учыре секретарь шӧдтэк шорысь пыре кудаз ке огшоры школае. Малпаськоды, директорен пумиське-а? Уг. Школаысь парторганизацилэн секретареныз ваче син кенеше, собере гинэ дышетӥсьёсты ӧте. Мар но уг юало солэсь? - Областьлэн госавтоинспециысьтыз кивалтӥсьёс, пе, кузьым басьякузы сюриллям но ваньзы ыбиськиллям. Шонер-а? Ельцин. ГАИ-лэсь кивалтӥсьсэ толон гинэ адӟылӥ. Улэп но таза вал кадь. Ыбиськемъёссы сярысь ӧз поттылы. - Егитъёс кыӵе ке свастикаосын демонстрация нерге ортчытӥллям, пе. Ельцин. Бен, пиос кыӵе ке валантэм пусъёсын поталлям ульчае. Али соосын уж мынэ. (Эн вунэтэ: ӝокыт 1983-тӥ арын демонстрациос вал бадӟым праздникъёсы гинэ). - Кин но со спекуляциен выре. Вуж машиназэ дуноен вуза но выльзэ дунтэмен шедьтэ. Сьӧд "Волгаос" малы ке-а тросгес но тросгес луо? Ельцин. Оскелэ: спекулянтъёс кырмемын луозы. Нош обкоме выльёссэ сьӧд "Волгаос" басьяны мон ӧй лэзьы ни. (Таиз сӥзёнэз таки ӧз быдэсмы.) - Ку вылӥ лигае шедёзы "Автомобилист" командаысь хоккеистъёс но "Уралмашысь" футболистъёс? Ельцин. Леонид Ильич Брежне индылӥз: партия кыл кутэ котьма понна. Оскелэ: "Автомобилист" вылӥ лигае ӝутскоз туэ, "Уралмаш" - вуоно арын. Соослы висъялом тырмыт коньдон, шедьтом ӟеч тренеръёс. (Верам кылыз быдэсмиз, но арлы бере кельыса.) Тачак юанъёс вал нуналмысь улон-вылонъя. - Ожысь ветеранъёслы квартираос уг окмо. Свердловскын транспорт урод. Автобусъёсы мырдэм тэроно. Городмылэн шорыз аналтэмын. Телефонъёстэк ёрмиськом. Ельцин. Ожысь сӧсырмемъёсты но ветеранъёсты али лыдэ басьтӥськом. Кык-куинь арскын ваньзылэн квартираоссы луозы. Бен, транспорт урод ветлэ. Солы висъям коньдон али кошке метро лэсьтыны. Свердловсклэн шорыз зэмен ик синмаськымон ӧвӧл. Милемлы москваос сое чеберъянъя асьсэ проектсэс дэмлало вал. Ми соглаш ӧм кариське. Куиньзэ валтӥсь архитекторез ужысьтыз куштӥзы. Но ми асьме кылмы вылын юн сылӥськом. Городмес чеберъялом асьме проектъя. Свердловск луоз Совето Союзысь огез синмаськымон город. Телефонъёс таӵе ӝоглыкен пуктылӥм ке, вань куронъёсты быдэсъяны кызь пятилетка кулэ луоз. Амалъёс утчаськом та дырез вакчиятыны. (Сиён-юон ласянь Свердловск, Иж сярысь, чарак умойгес улӥз. Свердловсклэн Чехословакиен меӵак кусыпъёсыз вал. Сӥль, емыш, бакча сиён отысь вуылӥз. Нош калыкез буйгатод шат?). - Малы сомында вузъёс ӧвӧл магазинъёсын? Ельцин. Бен, тросэз уг окмы на. Но берло аръёсы вань ни помада, майтал, зарни, ковёръёс. Качы но чайник лэсьтыны кутском огаз заводамы. Колхозлы юрттыны мынэм адямиослы картош вузалом пырак хозяйствоын. Заводын ӟустари уг тырмы? Сое шыръяно. Та ласянь югдур уг умоя. - Сӥль вузало кыӵе ке спецмагазинъёсын гинэ. Ельцин. Сыӵе спецмагазинъёсты быдтом. Февральысен сӥлез талонъёсъя люкылом. Курег сӥль куинь пумо луоз. Ай кыӵе кивалтӥсь пӧрмоз? Валамон ини, сыӵе адямиез Москваын но, мукет интыосын но синйылтӥзы. Иже бертыса, мон тае мади партилэн Удмурт обкомезлэн кыкетӥ секретарезлы. Малпасько: асьмелэнъёс но кутскозы ӝабыр-ӝабыр берганы. Нош секретарь мон вылэ кезьыт ву кисьтӥз: - Свердловск область бадӟым. Ельцин тросгес вераськоно луэ телевизор пыр. Асьме калыклы ми тырмыт ивор сётӥськом пӧртэм пумиськонъёсын. Телевидениез та уже кыскыны уг яра. Собере - шӧдтэк шорысь: - Ай кыӵе кивалтӥсь пӧрмоз меда Ельцинлэсь? Туннэ вазь на вераны. Мон бакоми. Кыӵе кивалтӥсь пӧрмоз? Бен со кивалтӥсь ӧвӧл шат? Цвердловск область - СССР-ысь огез бадӟымез. Йыртӥян... Борис Николаевичез басьтӥзы Москвае, компартилэн ЦК-яз. Отын кивалтыны ӧдъяз лэсьтӥськонъя отделэн. Пуконэз вылӥын кадь. Нош берлогес гожтэм тодэ ваёнъёсаз Ельцин та пумысен кӧт ӝожзэ вералоз. Ставрополь обкомлэсь нырысетӥ секретарьзэ Михаил Горбачёвез, пе, соку ик ЦК-лы секретарь каризы, монэ - отделлы кивалтӥсь гинэ. Тӥни со дырысен пуромиз, вылды, та гондыръёслэн одӥг гуын пуриськонзы. Отӥяз Горбачёв луиз валтӥсь секретарь, Ельцин - огшоры секретарь, собере - партилэн. Москва горкомезлэн нырысетӥ секретарез. Столицаысь чиновникъёс Борис Николаевичлэн пыд улаз небыт ковёръёс ӧз вальылэ. Со, пе, Москваез но москваосты уг яраты, горкомысь но райкомъёсысь кивалтӥсьёсты кык-куинь полэс вошъя, аслыз тупыттэм дан утча. Берлоез веран шонер. Ельцин Кремльлэсь больницазэ воштӥз улон интыысьтыз поликлиникаен. Ужаны дырын-дырын ветлӥз пыдын но автобусэн. Калык сое пумтэм ушъяны ӧдъяз. Нош кузёос пумен золгес адӟемпотостэм каризы. Уката ик Москваысь огез секретарь ӝужыт юртлэн укноысьтыз ульчае тэтчем но ассэ быдтэм бере. Унь-мань лэсьтыса, Борис Никлаевичез Москва горкомлэн секретарьысьтыз куштӥзы. Собере Ельцин сэрпалтӥз партбилетсэ. 90-тӥ аръёсы Борис Николаевич лэсьтӥз лэсьтонтэмзэ. Луиз РСФСР-ысь Вылӥ Советлэн Тӧроез, Россилэн Президентэз. СССР-ез куашкатӥз, Михаил Горбачёвез кузёяськонысь палэнтӥз, компартиез "ворсаз". Ваче син Та вакытэгес мон Ельцин шоры кырыжак учкыны кутски. Лэсьтӥськонэн вырыкуз ай одӥг газетысь лыдӟисько таӵе кылъёссэ: 2000-тӥ арозь СССР-ысь котькуд семьялы нимаз квартира яке улон инты сётыны мон ӧй оскысал ке, лэсьтӥськон удысын одӥг нунал но ӧй ужасал. Мукет газетын та нуналъёсы ик вераз: "Улон инты-2000" программа - Горбачёвлэн эшшо огез быдэстонтэм ӧтёнэз. Отӥяз Борис Николаевич копак сьӧраз ортчиз. Россиысь одӥг адямилэн коть улонэз выльдӥськонэн йырин уродмиз ке, со выдоз рельсаос вылэ. Дас ар ӵоже возьмамы выдэмзэ. Кыл сётэ - оскытэ - вунэтэ, кыл сётэ - оскытэ - вунэтэ... 1991-тӥ арын куашкатэмын СССР. 1992-тӥ арын "сутэмын" вань калыклэн коньдонэз. 1993-тӥ арын пушкаосын ыбылэмын Россиысь Вылӥ Совет. Озьы калык арысь аре таркамын, зӥбемын, куанермытэмын, жуммытэмын. 1996-тӥ арын Ельцинлэн данэз котькулэсь улӥын вал. Чечняын вир кисьтон мур пытьы кельтӥз калыклэн визьмаз но, Президентлэн сюлэмаз но. Со кема малпаськиз: кыкетӥзэ пуксёно на-а Россилы йыре. *** Вить ар талэсь азьвыл, 1996-тӥ арын феврале, Удмуртиысь бадӟым газетъёслэсь кивалтӥсьёсэс шуак ӧтизы Екатеринбурге. Отчы мынӥм куинь кузя - "Известия Удмуртской Республики" газетлэн редакторез Герасим Иванцов, "Удмуртская правда" газетлэн кыл кутӥсь секретарез Владимир Козлов но мон. Екатеринбургысь вокзалын лыдтэм-чоттэм возьмаськисьёс-чакласьёс. Погонэн но, погонтэк но. Залэ но, кассае но пырыны уг лэзё, пропуск куро. Журналист куддыръя тэре вень пасе но. Герасим Степанович поттӥз редактор луэмзэ возьматӥсь удостоверенизэ. Со лэсьтэмын асьме республикаысь Кун Кенешын, пушказ суредамын Удмуртилэн гербез но флагез. Депутатлэн документэз кадь чебер. Учкиськом но - Иванцов азьын усьтӥсько ни ворсам ӧсъёс. - Нош тӥ кинъёс? - юало Козловлэсь но мынэсьтым. - Та дано персонаез возьмасьёс, - синмес кыньытэк алдаськом. Иванцовмы метр но ӝыны ӝужда, ми кык метрлы матынэсь - охраналы ум кельшиське шат? Котькытчы лэзё. Табере ми но делегация нерге лыдъяськиськом. Витиськом мукет свитаез - Борис Николаевич Ельцинэз. Со, пе, татын, вордскем палъёсаз, ивортыны кулэ: соглаш кариськоз-а, уз-а кыкетӥзэ нюръяськыны президент луон понна. Милемды каръязы чугун сюрес вокзал вӧзысь гостиницалэн вужгес комнатаосаз. Нокытчы потаны ӧз лэзе. Ельцин, пе, татын ни, шуак, оло, тӥ но кулэ луоды. Москваысь кыӵе ке воргорон шок-пуль шокаса вуиз: - Тӥ Удмуртиысь-а? Огзэ адямидэс дасялэ Борис Николаевич азьын вераськыны. Иванцов но Козлов возьматӥзы мон шоры: - Удмуртиысь ке, удмурт мед вераськоз. - Собере, - могӟиз пиосмурт, - кин-о тӥледыз таӵе кыжмем интые каръяз? Дасяськелэ выль номеръёсы выжыны. Дас минутскын интыяським та юртысь ик туж чылкыт комнатаосы. Нош мыным чебересь лампаослы но катанчиослы (штораослы) синмаськонэн йырин ӧвӧл. Мар верано Президентлы? Нырысь ик тодаз вайытоно Иже вуылыкуз Якшур гуртысь удмурт семьяе пырамзэ. Шуоно: удмуртъёс сокем урод адямиос ӧвӧл, но, асьсэ республикаязы ичи кыльыса, пумен вужере усё. Быръён азьын нюръяськонэ пыриськыны ӟуч сямен шуг, удмурт сямен ваньмыз уг валало. Малы ке-а Россиысь Кун Думаын одӥг удмурт но ӧвӧл? Тӥ ас вакытаз, Россиысь Вылӥ Советын Тӧро дыръяды, асьтэлы воштӥсь кариды чечен выжыысь Руслан Хасбулатовез. Озьы возьматӥды Россиысь пичи калыкъёслы дурваемдэс. Эн кышкалэ, тӥ вӧзын луизы ке ӟуч сямен могаса вераськисьёс но. Немецъёсын, французъёсын но мукетъёсыныз ӵошатыса, ӟучъёс вашкала дырысен гажало музон выжыосты. Италиын, Франциын, Германиын пичи калыкъёс кемалась сылмемын. Нош Россиын уноезлэн асьсэ кунъёссы вань. Табере азьлань вамыштоно - соослы азинскыны эрик сётоно. Татын одно эсэпсэ шедьтоно. Огпала куасалтӥд ке, Владимир Жириновский кадь ӟучлэсь но ӟучгес адямиос етӥзъяськозы. Музон пала шонскид ке, Джохкар Дудаев выллемъёс сьӧсьяськозы. Тӥни малы Президентлэн медло котыр ласянь малпам ӟеч программаез. Мыным кӧня ке ӵектон сётӥз на Герасим Иванцов. Милемды нуизы Егитъёслэн дворецазы. Уралысь предприятиос дасяллям паськыт адӟытон (выставка). Бадӟымесь директоръёс возьмато машина макетъёссэс, калыклы вузъёссэс. Экран вылын сэмберъясько пӧртэм танкъёс, машинаос, йӧзорез пазясь ракетаос, ачиз ветлӥсь пушка, зениткаос, куас бодыос, ляб нуныез утялтон кӧкы, утюг. Завод кузёос куалекъяло: адӟоз меда Ельцин техниказэс, ушъялоз яке курлалоз, коньдонэн уз юртты- а? Заллэн огпалаз витьтоно пукон но кузь ӝӧк вань. Отчы каръязы журналистъёсты. Тани лыктэ Борис Николаевич. Сьӧд костюмен. Зарнивуам галстукен. Амалтэк тодам ваисько, кыӵе вал со дас куинь ар талэсь азьвыл та дворецын ик. Пурысьтам, губырскем. Кисырскем. Секыт шока. Тужгес абдрай: дорамы матэктыкуз, одӥг журналист но интыысьтыз ӧз султы. Асме котькинлэсь визьмо возьматэме ӧз поты. Вылаз ик, улон уродмемен но Чечняын вир кисьтэмен сэрен, Ельцинлэн данэз туж улӥын вал. Оло, сое но возьматэмзы потӥз ваменэс журналистъёслэн. Борис Николаевич кунэрскиз: - Кинъёс-о татын сомында? Директоръёс? Кулэ ӧвӧл соос мыным! Кельтэлэ журналистъёсты гинэ. Ӝӧк сьӧры Ельцин вӧзы пуксизы Екатеринбург областьлэн губернаторез Эдуард Россель но Президентлэн пресс-секретарез Сергей Медведев. Пыэдэн курадӟыса ныр пыр вераськись Борис Николаевичлы ваизы ӝужыт стаканэн юон - йӧл выллем кыӵе ке тӧдьыалэс маке. Собере кутскиз вераськыны. Нырысь ик йӧттӥз Россилэн телевидениезлы: - Кыкетӥ программа ваньзэ урод каре. Адямиез весь парсь шуид ке, со зэмен ик оскыны ӧдъялоз. Нуналлы быдэ шӧйёс кыллё ке, мар со сыӵе? Алдаськыны уг яра. Умойзэ но шедьтоно. (Президент котырысь адямиос пӧлысь соку мон адӟи Эдуард Сагалаевез. Ӵуказеяз лыдӟи Ельцинлэсь Указзэ: Олег Попцовез РТР-лэн директорысьтыз куштоно, Эдуард Сагалаевез директоре юнматоно.) Юан. Связистъёс курдато, телевидениез, пе, кысомы. Нош президент быръён дыръя озьы лэсьтӥзы ке? Ельцин. Тӥ связистъёсты судэ сётэлэ. Собере мыным ивортэлэ. Оскелэ Президентлы. Ми быдэстӥм тужгес бадӟым ужпумез - прессалы эрик сётӥм. Булгаклы (соку вице-премьерлы) мон верало: озьы лэсьтыны уг яра. Уралын электрокужым окме. Булгак юри озьы лэсьтэ: центрысь власть зӥбе интыысь телепередачаосты, тӥ пичиесь шуыса. Юан? Огъя ваньбурез вузан пумысен ченгешонъёс весь мыно. Кин дыртытэ, кин ӝегатэ. Тӥляд малпанды кыӵе? Ельцин. Федерацилэн асваньбурез районэ выже. Мон та пумысен указ гожтӥ. Ивор вӧлмытон ёзъёс луо областьёслэн асваньбурзы. Вань ужпумъёсты быдэсъяно татын. Приватизация пумысен законъёс кулэ. Кун Думаын али ог 500 проект. 250-эз туж кулэ. Законъёс ӧвӧл бере, указъёс поттоно луэ. Конституцияя но, Выли судлэн решениезъя но указэз одно быдэстыны кулэ. Пресс-конференция йылпумъяськиз шӧдтэк шорысь. Озьы луиз: люкаськемъёс Президент пала шонскизы но, мон сюри со вӧзы ик, возьмаськисьёс вискы. Блокноттэ мыч но автограф кур. Мынам озьы лэсьтэме ӧз поты. Кондукторлы ӧчкарыса, пыдын мыно. Песянайлы ӧчкарыса, пельме кынто. Кышноелы ӧчкарыса, чиньыосме ӵого. Адями кульчоысь мырдэм мозми но Сергей Медведевез бышкалтыны вуи ик: - Удмуртиез обидиды, юан сётыны ӧд лэзе. (Кык ар улыса, Сергей Медведевез адӟи Москваысь Кремльын ортчись балысь. Пресс- секретарьысь куштэмын ни. Пыкылонме ӧй вера, малы ке шуоно, со сроть-сроть кудӟемын вал.) Тужгес паймымон дэмлан сётӥзы милемлы та нуналэ ик, ӝытазе Ельцинэн выльысь пумиськон азьын. Интыысь журналистъёс, пе, асьсэос номыр медаз гожъялэ, ваньзэ сётозы Москваысь тележурналистъёс но газетчиос. Вакчияк интервьюос басьтӥ ке но, "Удмурт дуннеям" ӧй гожты Борис Ельцин но Наина Ельцина сярысь, космонавт Василий Джанибеков но артист Геннадий Хазанов сярысь, тодмо журналистъёс Олег Попцов но Эдуард Сагалаев сярысь. Котьма ке но, вить ар ортчыса, мон вакчиякгес печатлано кариськи Борис Ельцинлэсь 1996-тӥ арын 15-тӥ феврале верамзэ. Лыдӟись мед адӟоз ни, мар сӥзиз Президент, кызьы данзэ ӝутыны выриз, кызьы быдэстӥз сётэм кылъёссэ. Меӵак вераса, кызьы асьмеды уйжомытыны быгатӥз. Быдэстонтэм сӥзёнъёс Союзлэн кивалтӥсьёсыз асьмелы кельтӥзы буш казна но 87 миллиард доллар тырон. Ми кылдытӥм экономикалы инъет. Зарни но валюта запасмы 13 миллиард доллар тыр. Вузъёсмы вань. Черодъёс быризы. Нижний Тагилысь Рождественский гожтэ тылпуэ сюремез сярысь. Люкам коньдонзэ ыштэм. Дыр вуиз пунэмен тыронъёсты берыктыны. Уралъёс вань из гурезьёсты пасялозы. Адямиос Россие бертыны туртто ни. Ивор вӧлмытӥсь ёзъёс эрик басьтӥзы. Туж огшоры луиз Президентэз но пыкылыны. Зэм, куддыръя нокыӵе мугтэк. Ку Россиын озьы вал? Пыкылон, алдаськон, кыл вӧлдон - ваньзэ чидано луэ. Уг поты Америкаын сямен судэтӥ ветлэме, отчы коньдонме кисьтэме, люкам коньдонэ мынам ӧвӧл. Нош оппозиция таӵе властез диктатура нима. Озьы со лушкем уг вера, котькуд сэргысь митингын шара курла. Чечня сярысь. Отын тачак янгышъёс вал. Соосты ӧвӧл ни лэсьтоно. Кошком - соос ыбылыны кутскозы. Та пумысен кык комиссия кылдытӥ. Мед ченгешозы но ӵектонъёс мед сётозы. Дудаев аслаз книгаяз дэмла Кавказ сьӧрын кун кылдытыны. Ужпумез быдэстом кӧня ке толэзьскын. Выльдӥськонлэсь нырысетӥ люкетсэ ортчим - дунъёсты эркын лэзим. Кутске кыкетӥ люкет - коньдонэз юнматон. Ужасьёсты улон-вылонын утёно. Кунгож сьӧрын али витё президент быръеммес. Коньдон сётэмысь дугдӥзы. Дуннеысь валютая фонд но али уг висъя. Асьмелы юрттонэ кысконо луиз Клинтонэз, Коллез, Мэйджорез. Мар-о тӥ Россиез мыскылляськоды-а? Огкылэ вуим. Дугдоно уждун но пенсия тыронэз ӝегатэмысь. Лякытгес луысал выль коньдон печатланы. Президент сётэ кылзэ: одӥг пу манет но ум печатлаське. Быгатӥськоды монэ ӟечкыланы (кичабонъёс). Куд-огез озьы куро ке но. Трос на йыртэманъёс но сьӧраз ортчонъёс. Со понна уголовной уж ӝутэмын валтӥсь прокурор Ильюшенко вылэ, Вологда областьысь администрацилэн йырыз вылэ, дуно металлъёсъя комитетысь Бычков вылэ. Евгений Матвеевич Бычков сюриз. Куром сое Свердловск областе келяны. Кузьым басьямзы понна Россиын судэ вуттэмын 1200 мурт. Нош кӧняез шараямтэ? Данакез шутэтско кунгож сьӧрын. Самолётъёс тырмемын. Нош адямиос толэзьёсын уждун уг басьяло. Акциосын огазеяськонлэн кивалтӥсез басьтэ 30 миллион манет. Ужась адями кык толэзь ӵоже уждун уг адӟылы. Тӥ дорын озьы. Возьыт ышемын. Сыӵе мурт кивалтыны уг быгаты, сое куштыны кулэ. АО-лэн советэз кыӵе уждун пуктэ, сыӵе уждун тыр ик ужано. Нырысь ик указ луоз уждунъя, собере - музон тыронъёсъя. Март толэзьысен уждунэн шуг-секыт уз кылды. Мартысен - июльысен ӧвӧл. Нош тросэз герӟаськемын интыысь бюджетэн. Котькудды понна мон уг ужа. Мартысен радъялом уждунэз, пенсиосты, пособиосты. Мон огшоры гинэ уг ялӥськы. Рос-прос пусйыны кулэ, кытысь но ку шедьтоно коньдон. Азьвыл пунэмен тыронъёсты берыктоно, ализэ уждунэз дыраз сётъяно. Банкъёсысь кивалтӥсьёс витё выльдӥськонэз, курдало меӵкыт воштӥськонъёслэсь. Оскон ӧвӧл на, выльдӥськон уз гуньды шуыса. Асьмеос выльысь лэсьтыны быгатом 1917-тӥ арын луэм янгышъёсты. Июне президентэз гинэ ум быръе - быръём котькудмылэсь азьпал улонзэ. Тазалыкез утёнъя верано ке, нылпиос пӧлын кулон учыръёс кулэсмизы. Нуныос уногес вордско. Уждун тыронъя чыртыям кыӵес лэсьтӥ. Залын 1482 мурт кылиз. Вкладъёслы индексация лэсьтӥськоз арлыдъя. Сыӵе адямиос 25 миллион. Поттом облигациос. Господин Президент шуиськоды? Мон ноку но господин ӧй вал. Юан. Горбачёв куштӥськиз ӵош ужам эшъёсызлэсь. Тӥ но сыӵе-а? Президентъёслы тупась сям сыӵе-а? Ельцин. Адямиос котькытын вошъясько. Кин ке умойгес ужа, кин ке уродгес. Чубайс - быгатӥсь адями, но янгышъёс лэсьтӥз. Со кылиз Президентлэн командаяз, Президент понна дурбасьтыса, валэктон уж нуоз. Со кивалтоз бизнесменъёслэн командаенызы. Янгышъёс понна кыл кут. Йыртэмам понна жалямзэс эн вить. Юан. Тӥ президент ӧд луэ ке, кинэ адӟиськоды президентын? Кивалтонын кыӵе секретты вань? Ельцин. Асьтэды президентэ кандидатэ дэмламды потэ ке, ойдолэ кенешом. Ваньзэ мадё. Быръёнъя валтӥсь комиссие 49 мурт ивор сётэм ни. *** Тӥни сыӵеесь вал мынам Борис Ельцинэн пумиськонъёсы. 1999-тӥ арын 31-тӥ декабре ужысь кошкыкуз, мон солэн пал кылызлы но уг оскиськы ни вал. Ужпум мон бордын ӧвӧл. Малы асьмеос сокем оскисесь? Кӧня луоз на асьмеды ныдъяса возьыны? Удмуртиысь Жилищно-коммунальной хозяйстволы - 80 ар Дорын но, сюлэмын но шуныт мед луоз Ма бордысен кутске котькуд адямилэн нуналыз? Шонер. Ӝуатӥськом тыл, берыктӥськом кранэз, мисьтаськиськом, плита вылын шунтэм сиёнэз сиыса дыртӥськом уже, васькиськом лифтэн, ӟечбуръяськиськом юртмы дорысь жуг-жагез утялтӥсь воргоронэн... Озьы ук? Котькуд вамышмы озьы я тазьы герӟаськемын жилищно-коммунальной хозяйствоын ужасьёсын. Уго соос пыр асьме доры вуэ электрокужым, ву, шуныт, трос мукетыз. Ваньмызлы солы сокем дышим ни, куддыр ум но малпаське: асьмелы умой мед луоз шуыса, уно сюрс адями тырше. Асьме республикаын соос 22 сюрслэсь трос. Ӵапак та нуналъёсы та эшъёс пусъё удыссылы 80 ар тырмонэз. Кутсконэз солэн огшоры вал. 1921-тӥ арын, Удмуртилэн шоркарез соку Глазовын вал. Уездысь коммунальной отдел огазеяз шаерысьтымы пӧртэм предприятиосты. Со пумен паськытаны но кужмояны ӧдъяз. Озьы та дырлы бадӟым огазеяськонлы пӧрмиз. Солэн кызьы ужаменыз табере меӵак герӟаськемын Удмуртиысь вань калыклэн улонэз. Удыслэсь кужымзэ возьматэ таӵе лыдпус - ЖКХ-ысь валтӥсь фондъёссылэн огъя дунзы 27 миллиард манет пала люкаське. Республикаысь ваньбурлэн со ньыльмос люкетэз. Кылем арын коммунальщикъёс миллиард но ӝыны манетлы ужъёсты быдэстӥзы. Али Россиын ӵем поттыло Приморьеез. Зэм, отын тол вылтӥ чидантэм югдур кылдӥз. Уно сюрс адямиос арняосын тылтэк-шуныттэк улӥзы. Асьмелэн та ласянь ӝожтӥськеммы уг луы. Бен, отӥ-татӥ пичи учыръёс кылдыло: я гумы пасяське, я шӧртчи муртъёс электроезэз вандыса чибориё корт чотын вузало, я эшшо мар. Но огъя югдурез коммунальной службаын ужасьёс чакласа возё, тырмымтэосты дыраз палэнтыны тыршо. Трос кужымзэс сёто соос улон юртъёсты возёнэ. Али ӝыныезлэсь ятырез квартираос нимаз адямиос кие выжтэмын ни, соин ик калык улон интызэ договоръёсъя утялтэ. Шуген ке но, республикаямы азьланьтӥське 60-тӥ-70-тӥ аръёсы ӝутэм улон коркаосты выльдон. Тросэз адӟизы ни, вылды, макем чебер луиз Ижевсклэн шораз (Советской но Карл Маркс урамъёслэн вожвылазы) интыяськем юрт. Чилясь пиялаосын пластик укноос, выльдэм балконъёс чылкак воштӥзы солэсь вылтуссэ. Ма, пушкыз но мукет луиз. Квартираос "паськытазы", котькудаз табере тупатэмын ву, шуныт, газ сётонэз мертась приборъёс. Пусйыны кулэ: шунытэз чакласа кутон пайдаен берытске. Кылем арын элькун ваньбуретэ пырись юртъёсы счётчик пуктон 2,5 миллион манет коньдонэз шыръяны юрттӥз. Кызьы тодмо, 1999-тӥ арын республикаямы огазеязы коммунальной хозяйствоез но лэсьтӥськон удысэз. Дыр возьматӥз та решенилэсь шонер луэмзэ. Лэсьтӥськонъя, архитектурая но ужан инты политикая министерство табере ваньзэ син азяз возе, пумиськылӥсь шуг-секытъёсты ӝоггес палэнтыны быгатэ. Котькытын сямен ик та удысын но тросэз возиське ӟеч адямиос вылын. Сыӵе муртъёс коммунальщикъёс пӧлын ичи ӧвӧл. Ваньзэсты ӟечкыласьком юбилеен, оскиськом, соос азьланьын но тыршозы асьме юртъёсты но, сюлэмъёсты но шунтыны. И. Кричев. "Шӧкычлы" - 50 ар Дунне-питран Йылпумъяны луонтэм сериал У-ю-йу! Шултэмлэсь но чаль ортче вылэм ук та дыред! Али гинэ вал кадь "Советской Удмуртия" газетлэн бамаз нырысьсэ "уа-а" (мытылӥсь "р" куараез вераны йӧндырытэк), куара сётэме. Соку отын ужась дядяйёс ымзэс ик усьтӥзы - "Паймод, ява" шуизы но сэрег висъязы, монэным арнялы быдэ лыдӟисьёссэс тодматъяллязы. Ох-хо-хо-о! Бурдъёстэк лобе ук та дыред! Серметэн-кортнэтэн оп! шуытозь но интыяз уд возьы вылэм. Табере тани туэ, коньывуон толэзе, витьтон арес (ӝыны даур!) шуккоз ни, яватэ. Сыӵе малпан йыртышкам шуккиз но, амалтэк ымы усьтӥськиз: мар ай, пӧй, мон татын бабыса улӥсько. Мукетъёсыз арессэс но, витьсэс но (дасэз сярысь кылпум пӧськылытэк ни!) быдэс эль тыр гырлыязы коканы тыршо - асьсэ сярысь дан потто... Нош мон маин пӧртэм: шие шат ни гӧртэм?!. Аслам кылъёсы, аслам мугоры, аслам шие музэн тул кадь мертчиз: таӵе дано нуналзы азьын мукетъёсыз быдэс арлы вазьгес дан поттыны ӧдъясалзы ни. Иське, мыным но сэзьмытгес кариськыны дыр вуиз. Уть ай, ӝыны ар сяна ӧвӧл ни ук, витьтон тырмытозь. Озьы бере, али ик, туннэ нуналысен ик, шуисько, ортчем сюресэ пӧлын копаськоно- бугыръяськоно. О-ёй-ёй! Маиз но ӧй вал отын! Арлыд будэмъя, газет баме висъям сэрегзы ёркыт луиз. Валазы нуйтӥськемме, укмыс аресме тырмытэмме. Выль арысен (1962) лыдӟисьёс кие толэзьлы быдэ журнал чотын келяллязы, нялтас, калыкез паймытӥд ни шуыса, ним но "Шӧкыч" сётӥзы. Бӧрысьгес арня нуналлы быдэ быдэс бам висъяллязы. Тӥни озьы! Э-э-эх! Дунне колёса ялан азьлань погля. Улыса-вылыса котьмалы дышод, озьы кулэ, вылды, шуод. Кин-о вазен малпалляз вал телевизор пыр аръёсын кыстӥськись сериалъёс пумысь. Нош табере соостэк нуналэд ик уз вордскы ни кадь потэ. Сыӵеос манер кариськыса но ӝыны даурме пусйыны турттӥськыса, мон но ас бамам сериалме возьматыны ӧдъясько. Отын чырыен-пырыен, юдэсэн-кесэген ортчем сюрес сярысь лабыртом-кенешом, пӧсьвуаськом-пушнераськом, гором-бӧрдом... Лыдӟисьёсы монэ но улонэн ӵош мед вамышъя кожалозы! Туннэ тани - нырысетӥ люкетэз Кыриськем тымет, яке... Алдар агайлэн лабыртонэз - Йыре уг тэры ай та? - гын шляпазэ посэ Алдар агай. - Дунне питран азьлань питырамъя, адямиед, огинтыяз кыллись улпуз музэн сӧриськиз ни кадь. Вашкала аръёсы, шуом, ог-огзылэсь чеплетсэ но, бергозызэ но юатэ-вератэк уд исаськы вал. Э, ма со пумысь кыл сэстонэз на! Кыриськем ӵыпетысь чорыгез гинэ но гуртоос куспын огмындаенгес люкыны тыршылӥм. Вукочи Лепсей гинэ шат кык-куинь мешоклы ятыргес бичаса вуттылӥз. Ныр улаз угось. Но со но, одӥг вердразэ ӧз ке но, бадӟым тусьтыен вуко тымет бакча мышкин огназ улӥсь Ӟинок доры тубалляз. Выль чорыг лым мед ӟузьылоз шуыса. Нялтас ачиз но маке со ӟузьылӥз-веръялляз, вылды. Сотэк Лепсейлэн кышноез но сурым ӝутыны ӧй тубасал, Ӟинокен ӧй йырсияськысал... Я, веранэ мукет ӧретӥ визылаз, лэся... А-а, ӵыпет пумысь ик тани, шуисько. Табере быдэс улон дуннемылэн ӵыпетэз кыриськиз. Сотэк та югдурез йыр пушкад тулъяны йӧнзэ уд шедьты. Только со ӵыпетысь чорыгез, э-э, ваньбурез шуыны медӥсько, кин кызьы быгатэ - озьы ик кача-кокча-кайпалтэ-капыртэ. Шунёкъёслы-нӧзьёслы гинэ пӧлы пум кыле. Ныроос, купрес киос нӧкы вӧй пӧлын уяло - асьсэды мон не мон каро, гадязы мыжго, "ми выль адямиос" шуо. Нош дӥсьтӥсьтэмъёс, уж дурын купырмемъёс пенсизэс но, уждун нергезэс но коньыен-кыкен сяна уг басьто... Э-э, аслам но пересьмемъям йырсазьылэн ӵыпетэз кыриськем ни, лэся. Нош ик малпанъёсы олокытчы йыромизы. Улон ӧрмылэн ӵыпетэз кыриськиз, шуи вал кадь. О, озьы ик вылэм, буко но карнан выллем кылъёс верасько. Алдасько кожады ке, асьтэос Ижысь Восточной ульчаысь 28 номеро юртэ кожалэ: адӟозы-учкоды-тододы. Соос ик ваньзэ ивортозы, кызьы южтолэзьлэн нырысь ӵукнаяз юртын улӥсьёс пӧлысь уноез чабкиськизы. Пыдлось патеръёсы пырись антенна кабельёсты выжыетӥз вандылыса нуиллям. Куд- огъёсызлэн телефон езъёссы шырӟемын. Мар карозы сыӵе адӟонэ усем мискиньёс? Кытчы кулэ отчы ивортозы. Телефон бакомемын бере, уж дурысеныз жиргыртӥз одӥгез кышномурт 02-е. Соосыз 37-88-80 номер сётӥзы. Таосыз гуньдытӥзы - сереме уськытӥзы: "Сыӵе гинэ эрказмемъёсын - лушкаськисьёсын - ми ум выриське. Нырысь вералэ, кин йыртэмаз: Петя, Коля... Соку адӟом... Утчалэ участковойдэс!.." Соосыз нош ӝыттэк уж дуразы уг возьматско. Пӧсьвуаськем кышномурт выльысь нырысь номераз жингыртӥз. Соосыз буйгатӥзы: вите, час ортчыса вуом. Кышномуртлы ужысьтыз куриськытэк ӧйлась. Оскытэм кунооссэ витёнъяз, час но ортчиз, кык но, ӝыны нуналэз но тӧлӟиз. Ӝытозь думем пуны кадь ӧс азяд уд сылы... Но одӥгзэ ӝотрак валаз но ӵогиз: тонэ утьыны пуктэм-юнматэм муртъёслэн но ӵыпетсы кыриськем бере, мар кароно на ми кадь окты-калтыослы?.. Аслэсьтым ватсан: "Паймод, ява"-ын яке ог куамын-кызё-дасо ар талэсь азьвыл "Шӧкычын" таӵе пелейӧттон потысал ке: толэзь, дыр, кулэ ӧй луысал горд погонэн мысклляськисьёсты но нялтас кизэс кузь лэзьясьёсты но шедьтыны. Пуш ужъёсъя министр мар лэсьтоно - ачиз тодысал. Таӵе ивортонэз санлатэк-лыдэ басьтытэк, пель сьӧртӥз келясал ке... ассэ, оло, пӧсь мунчое пыртысалзы. Вениктэк. Кытын кулэ - отын. Озьы вот!.. Но... Дунне вылын улыса-вылыса номырлы но уд паймы. Нош кулытэк кылёно луид ке, валаса уд вутты "Вайёс но улъёс" сэргы ӝымемдэ. Ма, сэмберъяськыны, мукетъёсызлэсь мыдронъяськыны яратӥсьёс котьку, котькытын вал но, вань но. Сыӵеос сярысь ачим но ӧжыт ӧй гожъялля. Кылсярысь: Чидан Дунне вылын самой чидасен лыдъямын куатетӥ дауре улэм монах Симеон. Бадӟым из вылын, нокытчы васькылытэк, ньыльдон вить ар ӵоже мыр-мыр пукыны чидам со. Будос Дакор городысь сад будэтӥсь индиец Раделас Бодкано кырымпыдэсаз базилик куакез выжыятӥз. Кырымпыдсаз кӧня ке сьӧд сюй понӥз: отчы кидыс донгиз но ву киськаса улӥз. Уйёсы нош кизэ кровать бордаз думылыса кӧлалляз. Витемез юнме ӧйлась - кӧня ке ар ортчыса, солэн кырым пыдсаз дас сантиметр ӝужда сад сяськаяз. Ӧз удалты Китайысь кызь кык аресъем У-Хоу кышномурт пытсэт сьӧры шедиз. Кенэмен вузкаремез понна. Ужтэк, огназлы пукыны укыр мӧзмыт шуыса, тюрьмалэн кивалтӥсезлэсь вень куриз со. Дӥськут кышъяны. Ӝыны ар куспын У-Хоу укнолэсь тямыс сантиметр зӧкта дурем кортъёссэ ваньзэ вандылӥз. Венен! Но курадӟонэз кышъяськыны но ӧз яра. Пегӟыны ӧз кылды - тӧл пельтӥз но укноысь кортъёсыз палдытӥз. Гажано иськавын-бӧляке, тон ноку но йырдэ ӧд тӥялля-а, "Серемес чуръёс", "Лыдӟод - мынектод", "Ӧжытак пальпотом" сэрегъёсысьтым чуръёсын тодматскылыса? Шузиосты- нодтэмъёсты, шуйноосты-нодсасьтэмъёсты ултӥяны но сереме уськытыны турттэ та, малпалляд, оло? Озьы-а, тазьы-а но... соослэсь визьмоосыз ик ӧвӧл кадь потэ мыным. Тани тодматске ай: Эшшо огпол - Кудӥз сюрес нуэ тӥ-и-ини со гуртэ? - юаллям азьтэмлэсь. Соиз выдыса кылле вылэм, пыдзэ ӝутыса гинэ возьматэм. - Азьтэм вылэмед, однако. Азьтэм луэмдэ эшшо одӥг пол возьматӥд ке, уксё сётом, - шуиллям солы. - Кисыям понэлэ, - шуэм азьтэм, интыысьтыз вырӟытэк. Колхоз пудо Азьтэм муртлы вераллям: - Эй, Ямай, бакчаяд колхоз уллё пырем ук. Мын, ӝоггес улля! Ямай шуэм: - Нош со понна трудодень гожтозы-а? Пудоез колхозлэн ук... Ӧй вырӟысал, пе Одӥг азьтэм ӵемтыса пограм. Ӧжытак мынэм но выльысь пештэм. Сыръясь дэрие усем ке но, вырӟыны дыртымтэ. Озьы кыллёнъяз, пе, шуэ: - Эх, кыкетӥзэ усёнме тодысал ке, нырысь пограме бере ик ӧй вырӟысал. Я, кема лыдӟиськиды ке, син азяды букваос ширъяны-берганы кутскозы, сотэк но поромем йырды висьыны ӧдъялоз. Соин ик "Художник пальпотэ" сэрегысьтым суредъёсты синйылтэ но... арнялы ӟеч луэ! Шӧкычез лулъяз Рашит Хайдар. Дэменлык но мед синмаськытоз Ӵуказе, 17-тӥ мартэ, Драмая удмурт кун театрын ортчоз шаркан ӝыт - та музъем вылын вордӥськем, будэм, дышетскем, улэм но ужам муртъёс огинэ люкаськыса кенешозы нуналмысь сюлмаськонъёссы, та музъем вылын вордӥськем, будэм, дышетскем, улэм но ужам адямиослэсь дэменлыксэс кылдытон сярысь. Ӝытэз шулдыртозы шаерысьтымы тодмо кырӟасьёс - Удмурт Элькунысь калык артистка Валентина Пудова, Удмурт Элькунысь дано артистка Ольга Зорина, Алефтина Корепанова, эктӥсь "Венец" шоу-балетлэн кивалтӥсез Эдуард Князев, "Шудон" фольклор ансамбль, Удмурт Элькунысь дано артист - Драмая удмурт кун театрысь актёр Виктор Стрелков, мукетъёс. Та ӝытэ ик вузкарозы керттэм, вурем дӥсен, ческыт сиён-юонэн. Шаркан музъем узыр дано адямиосыныз. Соос - кырӟась Валентина Пудова, Удмурт радиоысь журналист Галина Кондратьева, гожъясьёс Лия Малых, Людмила Хрулёва, тодмо кылбурчи Степан Широбоков, улонысь дырызлэсь вазь кошкем журналист Михаил Воронцов, куас вылын ӵошатскись Владимир Никитин, Удмурт Элькунысь экономикая министрлэн воштӥсез Алексей Соколов, "Удмурт дунне" газетлэн валтӥсь редакторез Алексей Шкляев, Удмурт Элькунысь Кивалтэтлэн аппаратаз ужась Александр Скобкарёв, Драмая удмурт кун театрлэн директорез Анатолий Митрофанов, Удмурт кун филармонилэн чеберлыкъя кивалтӥсез Валерий Митрофанов, мукет адямиос. Шаркан улос туж синмаськымон. Чебер тапалан инкуазь. Сыӵе ик усто мед луоз та музъем вылын вордӥськем, будэм, дышетскем, улэм но ужам адямиослэн дэменлыксы но. Е.Ромашова. Тазалык Эмъяло лазер сиос Наукалэн кыдёке азинскемез шоры учкытэк, тросэз висёнъёс асьмелы вормонтэм кылё. Соин ик выльысь но выльысь утчано луэ пайдаё эмъяськон амалъёсты. Берло аръёсы ас бордаз кыскыны ӧдъяз лазер терапия. Ма со сыӵе, ма со сётэ висисьёслы, маин кыске бордаз эмъясьёсты? Та юанъёслы валэктон курыса вазиським Ижевск городысь 2 номеро больницаысь лазер терапияя центрысь валтӥсь специалистлы Татьяна Викторовна Коваленколы. - Медицинаын туж трос удысъёс. Татьяна Викторовна, малы тӥ одно лазерен эмъянэз бырйиды, маин со тӥледды бордаз кыскиз? - Выжыысьтымы трос эмъясьёс потэмын, соин но, вылды, пичи дырысен ик мон врач луон сярысь малпалляй. Школаез йылпумъяме бере, Крымысь медициная институтэ дышетскыны пыри. Сое ӟеч йылпумъяй. Но вуз бере участокъя эмъясь луыса ужаны кема ӧз кылды, монэ мединститутысь студентъёсты дышетыны ӧтизы. Мединститутысь ик одӥг аре монэ Москвае ыстӥзы, тодон-валанэз будэтонъя курсъёсы. Ӵапак отысен нырысьсэ адӟи, кызьы лазерен эмъяло астмаез. Туж пайми но синмаськи соку таӵе эмъяськон амаллы. Бӧрысьгес ини Россиысь лазерен эмъянъя научной центрын тодон-валанъёс басьтыны кылдӥз. - Иське, та бӧрсьы ӟеч-ӟеч басьтӥськиды лазерен эмъян борды? - Мон оски, таӵе эмъяськон амал трос висисьёсты шуге-леке вуэмлэсь утьыны быгатоз шуыса. Соин ик лазерен терапиялы тросгес кужымме но дырме висъяно кариськи. Утчай луонлыкъёс, 1993-тӥ арын Симферопольын усьтӥ аслэсьтым центрме. Сыӵе ик центр усьтон вылысь ӧтизы монэ Удмуртие. Озьы Ижевскысь 2 номеро больницаын куинетӥ арзэ ужасько ни. - Татьяна Викторовна, котьма ке но, лазерен терапия сярысь адямиос туж ӧжыт тодо. Ма тӥ верасалды та эмъяськон амал сярысь? - Адямилэн мугораз ваньмыз ог-огеныз герӟаськемын. Соин ик нокыӵе висён ас кожаз уг кылды. Озьытэк-а котырад одӥгез чер аля ке, кыкетӥзэ одно возьма: шуо. Лазерен терапия вань висёнъёслэсь огдыре бурмыны юрттэ. Со висисез пӧртэм пумо эмъюмъёс сиёнлэсь мозмытэ. - Нош кызьы со шӧдӥське адями вылын? - Лазер сиос улын кыллем бӧрсьы, тямыс-дас нунал ортчыса ик, висисьлэн иммунитетэз ӝутӥськыны ӧдъя, висён муре пыӵамысь дугдэ. - Кыӵе висёнъёслэсь та эмъяськон амал тужгес пайдаё луэ? - Милям центрамы трос вазисько кема кыстӥськись висёнъёсын курадӟисьёс. Угось таӵе дыръя нокыӵе эмъюмъёс через вормыны уг быгато. Лазерен терапия ӵапак интыяз луэ сахарной диабет, склероз, коллаиноз висёнъёсын, куд-ог дыръя - лек пӧськыосын нюръяськыку. 80-тӥ аръёсы учёнойёс лазерен мугор пушкысь вирез но йӧнатыны дышизы. Солы луыса луонлык кылдэ сюлэм висёнъёсты но эмъяны. Пусйыны кулэ, лазер терапия медицинаын туж егит удыс луэ. Со нырысьсэ тодмо луиз ортчем даурысь 60-тӥ-80-тӥ аръёсы гинэ. Соин ик та эмъяськон амаллэн вуоноез ЪЪИ дауре луыны кулэ. Эмъясьёс талы юн оско. Э. Кумачева. Чур бугор Эгызоослэн кузпалзы одӥг Швециысь Юкселе-сунд городысь Свен-Ульф но Ульф-Свен эгызоос. Соос кисьтэм-басьтэм кадь ог-огзылы тупало. Пичи дырысенызы быдэ вуытозязы соослэн вань выросъёссы огкадесь вал. Синмаськизы но эгызоос одӥг нылашлы. Нылаш Свен-Ульфлы бызем бере ӧз но тодылы, солэн выныз но вань шуыса. Кыктоос кузпалъяськон азязы кенешизы ог-огзэсты обидьытэк улыны. Соин ик валессы но одӥг вал, шуыны луоз. Тереза кык пиосын улэ шуыса валаз толэзь ортчыса гинэ. Вынъёслэсь керетэмзэс со витьымтэ шорысь кылӥз барысен. Чур бугор Гагаринлэн "кыкетӥ" быремез Дунне вылысь нырысетӥ космонавтлэн Юрий Гагаринлэн улэмез но быремез сярысь олокыӵе но вераськонъёс ветло... Таизлы но мадёнлы оскыны шуггес кадь. Таиз учыр сярысь вераз Звездный городокысь азьвыл космобиолог витьтон аресъем Алексей Николаевич Александрович. Тани со: "Куке Гагаринлэн нимыз быдэс дуннелы тодмо луиз, со малпамтэ шорысь бадӟым сюлэмшугъяськонэн пумиськоно луиз. Уно сюрс советской адямиос, начар но урод улэмзылы чидатэк, нокытысь юрттэт шедьтыны быгатымтэенызы, зэмос калык геройлы Юрий Алексеевич Гагаринлы юрттэт курыса гожтэтъёс ысъяны кутскизы. Егит Брежнев кивалтон вакытэ асьме калыклэсь урод улэмзэ шарае ӧз поттылэ. Юрий солы туж паймиз... Нырысетӥ космонавт сямызъя ӝутскись мылкыдо адями вал. Кызьы ке Кремльын фуршет дыръя со фужерысьтыз шампанскоез Брежневлэн ымныраз пазьгиз но вылаз паймем генсек шоры сялӟиз на. ... Собере пластикая операция: уно аръёс ӵоже оген камераын пукон, тямыстон витетӥ арын июле мозмытон... Ельцинлэн администрациез Гагаринлы кузьмаз (нош паспортэзъя Юрий Юрьевич Михайловлы) Звездный городок дорысь Лукино гурт вӧзы пичигес юрт. Укмыстон куинетӥын "сьӧд октябре" Москваысь Щелковской шоссеетӥ ортче вал капчи бронетехникаен колонна. Лукино гурт доры вуыкуз, одӥгез снаряд малпамтэ шорысь Юрий Юрьевич Михайловлэн юртэз шоры шеде но со быре. Нош со Совето Союзлэн Героез Юрий Алексеевич Гагарин вал шуыса, нокин ӧз поттылы..." Конкурс "Сюлэммес сётом нылпиослы!" Ижевск городысь Калыкез дышетонъя управление но Егитъёсын ужанъя комитет ватсаса тодон-валан сётӥсь дышетӥсьёс пӧлын нырысьсэ ортчыто "Сюлэммес сётӥськом нылпилы" конкурс Конкурсэ пыриськыны быгато социальной педагогъёс, тренеръёс, дышетӥсьёс, вожатойёс, методистъёс. Конкурс ортче куать удысъя: 1. Чеберлыклы дышетон. 2. Наукалы но техникалы, экологилы дышетон. 3. Киужлы дышетон. 4. Туризмъя но шаертодонъя уж. 5. Мугорез кыдатонъя но спортъя уж. 6. Вожатойёслэн ужзы. Йылпумъянъёс лэсьтэмын луозы сӥзьыл. Вормисьёс пусъемын луозы дипломъёсын, грамотаосын но дуно кузьымъёсын. Конкурсэ пыриськыны мылкыд карисьёс асьсэ сярысь ивор сётыны быгато туэ 20-тӥ мартозь. Юанъёсын вазиськоно Ижевскысь Калыкез дышетонъя управление 51-28-53 телефонъя. Ижевск город администрацилэн пресс-службаез. Спартакиада ортчиз Быдэс арня ӵоже шаермылэн столицаяз кузёяськиз бадӟым спорт. "Газпром" акционер огазеяськон асьме дорын ортчытӥз куинетӥзэ тол Спартакиада. Кыкетӥез но со ортчиз вал асьме дорын ик. Но вань кӧня ке воштӥськонъёс но. Таяз учыре программае пыртэмын ӧвӧл хоккей но тол туризм, со понна ватсамын армспорт (киын кужымез мертан) но шахматэн шудон. Озьы ик нюръяськизы йӧ вылын чорыгасьёс но (таиз Спартакиада чотэ уз пыры). Спартакиадаез асьме дорын ортчытон сярысь вераськемын кылем арын акционер огазеяськонлэн правленияз. Та понна трос кужымзэ сётӥз "Спецгазавтотранс" предприятилэн генеральной директорез Владимир Тумаев. Со таӵе бадӟым ӵошатсконъёсты туж усто радъяны быгатэ уго. Таяз учыре но ӧтем куноос татчы лыктыны бадӟым мылкыдзэс веразы. Спартакиадаез ортчытонын бадӟым юрттэт сёто Удмурт Республикалэн Президентэз Александр Волков, Правительство. Спартакиадае лыктыны мылкыд каризы таӵе предприятиослэн командаоссы: "Тюментрансгаз" (Югорск), "Севергазпром" (Ухта), "Лентрансгаз" (Санкт- Петербург), "Пермтрансгаз" (Чайковский), "Самаратрансгаз" (Самара), Ноябрьгаздобыча" (Ноябрьск), "Надымгазпром" (Надым), "Югтрансгаз" (Саратов), "Центргаз" (Тула), "Сургутгазпром" (Сургут), "Волготрансгаз" (Нижний Новгород), "Уралтрансгаз" (Екатеринбург), "Таттрансгаз" (Казань), "Оренбурггазпром" (Оренбург), "Астраньгазпром" (Астрахань), "Спецгазавтотранс" (Ижевск). Н. Лялин. Тазалык Вузалозы тросгес наркотикъёс Матысь дыре аптекаосын тросгес наркотикъёс вузаны кутскозы. Таӵе куронэн Россиысь Тазалыкез утёнъя министерствое вазиськизы вал пыктосэн курадӟисьёс. Соос ӝожтӥськизы, аптекаосын, пе, уг тырмо вӧсь луонэз буйгатӥсь эмъюмъёс. Табере висисьёс огдыре витьтон эмъюм бирды яке ампула басьтыны быгатозы. Мугорын кема (12 час ӵоже) шӧдӥськись препаратъёс пӧлысь тросгес вузаськозы морфин. 10 миллиграммъем таблеткаез огдыре 160-зэ басьтыны лэземын луоз. Со сяна, пыктосъёслэн выжыоссы мугоре муре пыӵам дыръя, висисьёслы сое тросэнгес но вузаны лэземын. Пусйыны кулэ, вӧсь луонлэсь мозмытскон вылысь, специалистъёсын эшшо одӥг препарат дасямын - фентанил. Со пластырь кадь лэсьтэмын. Тазэ огкутскемен басьтыны 16-сэ лэземын луоз. Тулыс вуиз, тулыс Бен, туэ лымы шуак шупаны ӧдъяз. Городысь ульчаостӥ ву жильыртэ ни. Куазез эскерисьёслэн чакламзыя, туннэ пильмаськылоз, зор-кот уз усьы. Тӧл лымшор но шунды ӝужан палась секундскын 1-4 метре пельтоз. Уин 0-4 градус кезьыт, нуназе 2 градус шунытысен 2 градус кезьыт луоз. 17-тӥ мартэ пильмаськылоз. Тӧл шунды ӝужан паласен секундскын 4-7 метре пельтоз. Уин 2 градус шунытысен 2 градусозь кезьыт, нуназе 2-6 градус шуныт луоз. 18-тӥ мартэ пильмаськылоз, тӧл лымшор но шунды пуксён палась секундскын 3-6 метре пельтоз. Уин 2 градус шунытысен 2 градусозь кезьыт, нуназе 2-6 градус шуныт луоз. Тазалык Егит анайёслы Котькуд анай шӧдэ, нуныез висьыны кутске шуыса. Сое со нырысь ик нылпилэн мӧзмыт мылкыдызъя вала, собере пӧсь мугорызъя. Таӵе учыръёсы анай-атайёс соку ик кышкатско, доразы эмъясез ӧте. Нош мар сярысь вера адямилэн, озьы ик нылпилэн но ӟырдамез. Кышкано-а, ӧвӧл-а солэсь? Тани мае одно ик тодыны кулэ. Висись адями ӟырда ке - со туж умой. Иське, солэн мугорыз инфекциен нюръяське. Сыӵе дыръя висись ӵемгес шока, озьыен, вир пушкы тырмыт кислород лыктэ. Со сяна, мугор пушкы пӧртэм гормонъёс но тросгес вӧлмо, соос озьы ик юртто инфекциен нюръяськыны. Таза муртлэн температураез 37 градусозь луыны быгатэ. Нош солэсь вылӥегес ӝутске ке, шуом 38-39 градусозь, таӵе дыръя но анайёслы сокем куалектоно ӧвӧл. Кышкано, пиналлэн температураез 41 градуслэсь вылӥе ӝутскыку. Сыӵе учыре висён йырвиымез шукке. Мӧйыос понна таӵе кышкытлык кылдэ, температуразы 40 градуслэсь вылӥын ке луэ. Висись ӟырда ке, солэн ым пушкыз кӧса, юэмез потэ, угось со зол пӧся-нюла. Соин ик висись нылпилы но ялан юыны ӵектоно. Умойгес луоз быректэм вуэн гинэ сектаны. Кыӵе амалэн ӟырдамез кулэстыны луэ? Котькуд анайлэн дораз луыны кулэ эмъюмъёсыз. Нырысь ик аспирин но антибиотикъёс (кылсярысь, пенициллин). Со сяна, дышетсконо на таӵе эмъян амалъёслы: 1. Нылпилэсь быдэс мугорзэ зырано коттэм ӵушконэн яке спиртэн (водкаен). Собере шобыртоно одеялэн. 2. Висись нылпиез кӧня ке салкым вуын возёно. 3. Салкым вуэн клизма лэсьтоно. Куд-ог дыръя висись, температураез ӝутскыку, кынмыку сямен куалекъяны кутске. Сыӵе югдур возьматэ, инфекция вир пушкы но сюриз ни шуыса. Мар кароно та учыре? Нырысь ик, висись муртэз шуныт одеялэн шобыртоно. Кӧня ке минут ортчыса, со куалекъямысь дугдоз, нюланы кутскоз. Такем зол курадӟись нылпизэ анай юн чакласа возьыны кулэ. Куалекъяса висись нылпилэн тазалыкез арня ортчыса гинэ тупатскоз. Нош та дырозь со валесын кылльыны кулэ, ураме шудыны потаны уг яра. Н. Пестова, нылпи врач. Архивысь материалъёсъя Удмуртия ХХ дауре 1985-тӥ ар Выль ар праздник ортчиз гинэ но, Ижын улӥсьёс паймымон ивор тодӥзы, соос табере Устинов городын уло шуыса. Сыӵе постановление 1984-тӥ арын 27-тӥ толсуре кутэмын вал. Удмуртилэн столицаезлы мукет ним сётэмлы пумит кариськыса, уно адямиос КПСС-лэн ЦК-яз, обкоме но газетъёслэн редакциосазы вазиськылӥзы, 10-тӥ феврале городлэн шораз студентъёс но дышетскисьёс демонстрация ортчытӥзы. Озьы ке но, правительство ӧз дырты город нимез выльысь берыктыны. 10-тӥ мартэ кулӥз КПСС-лэн ЦК-езлэн генеральной секретарез К.У.Черненко. ЦК-лэн пленумез ортчиз ӵуказеяз. Отын генеральной секретаре бырйизы 54 аресъем М.С.Горбачёвез. 23-тӥ мартэ КПСС-лэн ЦК-езлэн пленумаз со ялӥз, шаерамы басьтэм бадӟымесь азинсконъёсын артэ уно тырмымтэосмы но вань шуыса. Шуг-секытъёсысь потон вылысь, со ӵектӥз научно-технической прогрессэз азинтыны, котькуд адямилэсь луонлыкъёссэ уже мургес кутыны но кивалтонэз умоятыны. Озьы кутскиз "выльдӥськон". 1-тӥ июне улонэ пыӵаны ӧдъяз партилэн но правительстволэн юонэн нюръяськонлы сӥзем постановленизы. Выль Правтельство ассэ чырмыт возьматыны ӧдъяз калык куспо ужпумъёсын но. 6-тӥ августэ СССР ядерной испытаниослы мораторий ялӥз. Ноябре Женеваын таӵе пумиськонъёс куать ар ӵоже вис луэм бере пумиськизы кык туж кужмо державаослэн азьветлӥсьёссы - М.С.Горбачёв но США-лэн президентэз Рональд Рейган. Вылӥ кивалтэтын кивалтӥсьёслэсь интыоссэс басьтӥзы выль адямиос, СССР-ысь Министръёслэн Кенешсылэн тӧроез луиз Н.И.Рыжков, кунсьӧр кусыпъёсъя министр - Э.М.Шеварднадзе, КПСС-лэн Москваысь город комитетэзлэн нырысетӥ секретарез - Б.Н.Ельцин. Воштӥськизы вылӥ кивалтӥсьёс Удмуртиын но. 13-тӥ декабре пенсие потӥз Удмурт обкомлэн нырысетӥ секретарез В.К.Марисов. Удмуртиен со кивалтӥз 12 ар. Сое воштӥз П.С.Грищенко. Грищенко вазен ужаз КПСС-лэн ЦК-яз инструктор луыса, собере Челябинскысь но Магнитогорскысь парторганизациосын. Мае быдэс шаермы паськыт пусйиз Быдӟым ожын Вормонлы 40 ар тырмонэз. Устиновын та вакытлы Арсеналлэн юртэз азьын Советской Союзлэн Геройёсызлэн, Удмуртиын вордӥськемъёслэн нимтулъёсынызы стелаос усьтэмын. 18-тӥ январе СССР-ысь ВДНХ-ын усьтӥськиз "Ижмаш" производственной объединение - машина поттонын азьмынӥсь предприятие" возьматон. Со вакыт СССР-ысь котькуд 7-тӥзэ машинаез но котькуд 3-тӥзэ мотоциклэз потто вал Удмуртиысь машина лэсьтӥсьёс. Апреле Удмуртиын пусйизы "Калевала" финн эпослэн печатласькемез дырысен 150 ар тырмонэз, нош августэ удмурт учёнойёс пыриськизы Сыктывкарын ортчем финно- угроведъёслэн конгрессазы. Та арын куасэн бызьылӥсь Тамара Тихонова, СССР-лэн сборной командаяз нюръяськыса, дуннелэн чемпионэз луиз. В.Трещев, Удмурт Республикаысь Выль историяя центрысь валтӥсь специалист. Устинов городлэн Октябрь ёросаз улӥсьёс ветеранъёслэн Быдӟым ожлы сӥзем митингазы. Ижевск механикая заводлэн 65 номеро цехез - социалистической ужын вормисе потэм вылӥ культураё цехлэн участокез. Кивалтон юнма - ужпумъёс кылё Удмурт Республикая Валтӥсь федеральной инспектор С. Чикуров кенешон ортчытӥз Ижевск городысь ас коже кивалтон ёзъёслэн кивалтӥсьёсынызы. Отын вераськон мынӥз быдэсъясь властьлэн интыысь федеральной но ас коже кивалтон ёзъёслэн кусыпъёссы сярысь. Талэсь азьло сыӵе ик кенешонъёс ортчизы ни вал Глазов, Можга, Воткинск городъёсын. Зэмзэ ик, федеральной округъёс кылдэмен валче, Россилэн улосъёсаз та дыре пӧртэм кивалтон структураос ужало ини. Алигес Удмуртие вуылӥз Россилэн Президентэзлэн Приволжск округъя оскем муртэз С. Кириенко. Кивалтон ёзъёслэсь туала улонын интызэс со тазьы суредаз. Нырысь интыын, пе, луыны кулэ федеральной, собере республикалэн вылӥ кивалтон, нош собере ини ас коже кивалтон ёзъёс. Озьы вылды со. Но кызьы шуиз Ижевсклэн мэрез А. Салтыков кивалтон ёзъёслэн кусыпъёссы, пе, нокыӵе законъёсын юнматэмын ӧвӧл ай. Ваньмыз со радызъя ужаны люкетэ. Кылсярысь, та дырозь кутымтэ на федеральной закон ас коже кивалтон ёзъёслэн быдэстоно ужъёссы сярысь. Озьы ик туж секытэн ужъёс мыно кун ваньбурез мунициалитетлы сётонъя - та ужпумъёс но федеральной законтэк быдэсъясько. Республикалэн прокурорезлэн воштӥсез А. Борзенков но Ижевск городлэн прокурорез А. Марданшин пусйизы, тросэз нормативной актъёс туала куронъ1слы уг ни тупало шуыса. Соос кужымтэесь ни бере, соосты воштыны кулэ. Вань сыӵе учыръёс но, куке ас коже кивалтон ёзъёс бюджетъя но выт бичанъя зконъёсты тӥяса ужало. Кылсярысь, Можга городлэн куать ар ӵоже уставез юнматымтэ вылэм. Удмурт Республикая Валтӥсь федеральной инспектор азьын озьы ик ивортонъёс лэсьтӥзы Югдурез утёнъя министерствоысь, налогъёсты бичанъя Удмуртилэн федеральной управлениысьтыз но военной комиссариатысь кивалтӥсьёс. Та удысъёсын но куд-ог ужпумъёс туж лэчыт сыло. Кылсярысь, али Ижын туж уг тырмо милиционеръёс. Городэз эскерыса возьыны нуналлы быдэ 80 пала гинэ милционеръёс пото, угось тросэз соос али службазэс Чечняын нуо. Оло, соин но Ижын та вакытэ йыртэман учыръёс йылӥзы. Берло кык толэзь ӵоже 2.265 йыртэман уж шараямын. Мукет сямен вераса, республикаын лэсьтэм вань йыружъёс пӧлысь 60 процентэз Ижын лэсьтэмын. Кудӟемъёсты кӧлатон интыос пумысен но меӵак ужпум пуктоно ни: яке соосты ворсано, яке возиськыны юрттоно. Кудӟемъёслэсь бичам штрафъёс малы ке городлэн бюджетаз люкасько, нош сазьтӥськон интыос коньдонлы ёрмо. Нош мар кароно пинал наркоманъёсын? Собыдӟа городын соос понна одӥг гинэ кабинет усьтэмын. Нош туннэ нуналлы али ик 300-зэ нылпиез эмъяны кулэ. Кытын соосты эмъяно? Сыӵе ик югдур бомжъёсын но. Улоннитэк но ужтэк калгись адямиос пӧлысь ӝыныез - пытсэт сьӧрысь мозмытэмъёс. Тросэз соос туберкулёзэн висё. Сыӵе адямиос понна но городын кемалась кыӵе е юрт усьтоно ни вылэм. Тӥни та выллем ужпумъёс эскеремын вал кенешонын. Юрттозы-а меда властьлэн интыысь федеральной ёзъёсыз та лэчыт ужпумъёсты вырӟытыны? Т. Банникова. Нылкышноос сярысь вакчи веранъёс Коньдон, яратон но улон Вал тютюпи, луиз юсь Можгалась ужбергатӥсь Лилия, куинетӥ арзэ рынокын парфюмериен но косметикаен вузкаре. Эшеныз ӵошен ветлэ Ижысь оптэн вузаськись фирмаосы. Вуыло Алнаше, Вавоже, Увае - та черко гуртъёсын арнялы огппол бадӟым рынок ужа. Нылъёс кадесь ик ужбергатӥсьёс пӧртэм палъёсысь лыктыло. Вузэзлы йылэтонъёс Лилия 20 процентлэсь бадӟым уг пукты. Кылсярысь, тямыстон манетэн басьтэм духизэ сюэн вуза. Нылаш рыноке нырысьсэ потӥз вал искусственной шубаен, керттэм изьыен. Вузэз но ӧжыт вал, ӝӧк вылаз буш инты медам кыль шуыса, тодмоезлэсь вузъёссэ пуктылӥз. Фирмаосын солы оскизы, тросгес вуз сётъяны кутскизы. Нылмурт туэ дырозь пунэмъёсысь ӧз поты ке но, пумиськылыкумы ялан ушъяськиз: диван, креслоос, портьера, укмыс сю манетэн чай юон сервиз басьтӥ. Кузпалыз вылэ гинэ ӝожтӥськемысь ӧз дугдылы: "дорын пуке, уг ужа, юэ, мон вылэ чӧлтӥськыса улэ. Люкиськыны малпасько, пе. Арня улыса адӟиськимы, нылаш картэз дорысь кошкем. Но Петяез визьмаськыны шӧтам, выжъёсты тупатъян огазеяськонэ интыяськем. Уксё вить-сизьым сюрсъёсын басьтыны кутскем. Семья выльысь огазеяськиз. Ваньмызлэсь шудо вал Настя нылзы. Табере Лилиялэн яратонэз арняосын командировкаосы ышылэ. Котькыӵе кышномурт сямен нылаш вожа но, сюлмаське но. Бертакуз картэзлэсь дӥськутъёссэ зынъя, кышномурт духиос пыӵамын ӧвӧл-а, пе. Картэз мӧзмемзэ мукет сямен возьматэ. Лилялэн кылъёсыз борды ӝабтӥське: эшед доры ветлӥд, ма отын карид, пиосмуртъёс но вал-а??? Ожытак керетэмзы бере ӟыгыртӥсько. Ог-огзылы гажамзы сярысь верало. Эх, удмурт сям Училищеез быдтэм бере Танялы тыро-пыдо ужан инты ӧз шедьы. Возьдаськись сямо, син шоры йӧтӥсьтэм нылаш ассэ пурысь шырен лыдъяз. Дышетскем интыяз гинэ огъя улон корка выж миськись пыртӥзы. Уждунэз пичи - сю тямыстон манет. Ярам, дунтэм улыны комната висъязы. Кастелянша пенсие кошкем бере, таиз борды но басьтӥськиз. Уждунъёссы огкадесь. Городын та уксёлы улыны уг луы. Соин кышномурт ураме потатэк сямен улэ. Нылпи ваён сярысь уг малпаськы, картэз но ӧвӧл ай. Аръёс ортчо, туэ кышномуртлы куамын арес тырмиз, кузпал шедьтыны шуггес но шуггес луиз. Угось пиосмуртъёс уксётэм нылашез кулэ уг каро. Возьдаськон сямыз но сое улӥе лэзе. Тае Таня умой валаз. Жуго ке но, чида Пиосмурт утялтэмзэ яратэ Зоя школаын берпуметӥ классъёсын дышетскыкуз, телеэкранъёсы нырысьсэ потӥзы "уй бубылиос" сярысь возьматонъёс: "Ангел", "Интердевочка". Фильмъёсын возьматӥзы чебер улонэз. Нылашлэн но сое утчамез потӥз. Эшеныз ӵошен экранысь кизилиослы укшатскыса чеберъяськизы, вакчи дэремъёс дӥсязы - нырысьсэ сюрес вылэ потӥзы. Уй бордаз бине, сьӧраз ӧте, пеймыт дыръя калгонъёстэк улон шӧмзэ ик ыштэ кадь. Тазьы луиз Зояен но. Котькуд ӝыт, акшан вакытэ, нылаш трассае потэ. Султэ огдышем интые, машинаос асьсэос дугдыло. Верасько дун сярысь. Басьтэ Зоя витьтонысен сю манетозь. Дуныз вошъяське пиосмурт куронъёслэсь. Сюрыло кышнооссэс буйгатыны курисьёс но, нылаш соглаш уг лу. Кыдёке ветлӥсь шофёръёс куддыръя сьӧразы ворттылыны ӧтчало. Сюдо-сектало. Уксё сёто. Луэ мукет сямен но - жуго. Пинал дыръяз сюрес кузя ӵошен бызьылэм эшез улэп ӧвӧл ни. Шӧйзэ шедьтӥзы сюрес дурысь: тышкаллям но машинаысь куштӥллям. Уй куспын Зоя вить сю-куинь сюрс манет коньдон поттэ. Но со тӧлӟыса сямен кошке. Висёнъёслэсь утиськон арбериос, чебер дӥськут, дуно косметика. Пиосъёслы кельшо чебер утялтэм нылъёс. Кылемез юонлы, кысконлы, ческыт сиёнлы но ужамез понна шырмачъёслы тыриськонэ кошке. Нылашлэн нылпиез ӧвӧл. Азьлань нуналъёсыз таӵе ик майбыро мед луозы, шуэ. Улонын троссэ адӟемын ке но, пайме пиосмуртъёслы: куд-огез кузпалъёссэс сюрес вылэ улляса лэзё, коньдон поттыны косо. Пенсия вӧзы - юрттэт Уксёез тырмымтэен, пенсие потыса, Галина Ивановна сема, тамак вузаны кутскиз. Тазалыкез вань ке, котькуд нуналэ пота автобус дугдылон интые. Вузкаре документъёстэк, выт бичасьёслэсь но милиционеръёслэсь пегаса. Семаен пуйыоссэ огпол ватыны вуымтэ. Кутӥзы. Нуналбыт возьыса лэзиллям. Курдатъянзы кышномуртлы нокытчы йӧтӥллямтэ: - Ма соос карозы, милям документъёсмы ӧвӧл, соин штраф сётыны уг быгато. Ми кадь вузкарисьёс трос уг. Пенсие ичи, быгатонэ вань дыръя бергало на. Кынмыса сылэмлэн пайдаез вань. Галяпай котькуд нунал куинь сю-ньыль сю манет тыр вузаське. Пӧлысьтыз витьтон-куаьтон манетэз барышен берытске. Ужа гуртын, шутэтске городын Куинь ар талэсь азьло Аня йылпумъяз кун университетэз. Анаез, школаысь дышетӥсь, нылзэ гуртэ кыскиз: - Городын егитъёслы ужан часъёс (урокъёс) ичи сёткало. Соин пиналъёс кык сю- вить сю манет гинэ окто. Нош гуртын специальностедъя адямиос уг тырмо. Озьы нылаш люкиськиз город улонэн, эшъёсыныз. Уксё ласянь зэмзэ но умойгес вылэм. Черко гуртысь школаын тачак дышетон часъёс пуктылӥзы. Вазь ӵукна кошкыса, ӝыттэк дораз уг вуы. Бертыса но тетрадьёс эскероно, план гожъяно. Уждунэз - тямыс сю манет пала. Квартира понна, сиён- юонлы быдтоно ӧвӧл. Вань тыршем коньдонэз кисыяз кыле. Аня мусо, чебер вераськись нылаш, тодмоосыз солэн трос гинэ. Ваньмыз соос школаен герӟаськемын: дышетӥсьёс, нылпиослэн мумы-бубыоссы. Нош зэмос эшъёс уг сюро. Пинал дырысь эшъяськемъёсыз - ӝыныез городын, кылемъёсыз кузпалъяськемын. Ваньмызлэн сямен нылпиоссы вань ни. Соин огъя сюлмаськонъёс уг сюро. Черкогуртысь тросэз воргоронъёс - Аня сярысь малпасько, но ныл сюлэм кельшымонзэ уг адӟы. Школаын шутэтскон нуналъёс, каникулъёс Аня понна но шумпотон. Та дыре нылаш вуылэ Ижевске кылем эшъёсыз доры. Пытсэт улын ортчытэм вань нуналъёсыз понна шулдыръяське: дискотекаостӥ, театръёстӥ, ресторанъёстӥ ветлэ. Сандыкысь тодэ ваёнъёс Лариса Михайловна бызиз бер. Ваиз кык нылпи. Картэныз ог-огзэс валаса улӥзы. Нылкышно ужаз училищеын преподаватель луыса. Семьязы бай ӧй вал ке но, колбасатэк, чечытэк ӧз улэ. Выльдӥськон кутскем бере ваньмыз воштӥськиз. Сандыксэ усьтыса, вуж арбериоссэ поттано луэ ни туэ. Тодаз вае: - Азьвыл котькуд аре шуныт палъёсы курортэ ялкарыны ветлылӥм. Асьме палъёсын вуз ӧжыт вал бере, дӥськут басьтыса вайылӥм. Кулэ-а со тыныд, ӧвӧл-а- уд малпаськиськы, кельше ке - басьтӥськод но тӥни. Соку ваньмыз дунтэм вал уго. Нош табере дэрем, сапег басьтон понна коньдон толэзьёсын люкано луэ. Пенсие потэмез бере картэз кулӥз. Со дырысен ортчизы аръёс, но яратонзэ тодаз вайыку, кышномуртлэн туннэ ке но бамъёсыз нюромо. Кузпалыз кошкем бере улонэз шугомиз. Вылаз ик, бадӟым нылыз люкиськем. Огназ пиналзэ вордыны дауртэ. Нош анай сюлэм нылпиезлэсь курадӟемзэ учкыны уг чида, юрттӥськыны тырше, уксё сётка. Пенсиез ӧжытэн, Лариса Михайловна арня нуналъёсы базаре потэ, азьвыл октэм арбериоссэ, пичи кылем дӥськутъёссэ вуза. Курадӟим ке но, шудо Лена сюлмо кышномурт. Улонэз пинал дыръя адӟем чагыр уйвӧтъёсын сямен ӧз пӧрмы ке но, куд-ог малпанъёсыз быдэсмизы. Кык комнатаен квартиразэс вуж коркалы воштыса, интыяз чебер бадӟым кирпич юрт ӝутӥзы. Аръёс ӵоже басьяськытэк сямен улӥзы. Картэзлэн но аслаз уждунзы пуктӥськонлы кошкизы. Туэ со нуналъёсты Ланалэн тодаз ваемез но уг поты. Нылпиоссы, ныл но пи, кампет, пряник, шудонъёс курылӥзы. Валэкъяно луылӥз: коньдон ӧвӧл, кӧня ке чидано на, коркамы вуиз ке, соку октӥськом ни. Пиналъёс ӧз валаллялэ, бӧрдылӥзы: тон гинэ номыр уд басьяськы, мукетъёсызлы оломар но окто. Тон милемды уд яратӥськы. Секыт нуналъёс ортчизы, нылпиос будӥзы. Ураметӥ ортчыса, адямиос корказы шоры берыкъясько, чеберезлы но бадӟымезлы паймо. Ужа Лена черкогуртысь больницаын, медсестра луыса. Пичи уждунэз вӧзы йылэ йӧл, чырсатэм йӧл (творог) вузамлэсь коньдон. Аръёс ӵоже пинал мылкыд кышномуртэз ӧз келля, скалэз, парсьёсыз котыртӥ берганъяз яратэ кырӟаны, нылпиосыныз ӵошен гурезьысь нискыланы ветлэ, лымы мунё лэсьтыны котало ваньзы ӵош. - Улонэ пӧрмиз, мон шудо адями, - шуэ Лена. О. Кожанова. Мылкыд Кактусъёс но кизили зор Ушъяськеме потэ: милям, играослэн, асьмелэн Горд книгамы вань. Нош лэсьтӥз сое Играысь 1 номеро школаысь биологиен дышетӥсь Дмитрий Леонидович Поздеев. Та тунсыко уже кыскыны быгатӥз дышетскись пиналъёсты но. Дмитрий Леонидович пиналъёсын ӵош сикъёстӥ-бусыостӥ, нюкъёстӥ-нюръёстӥ ветлэ, Игра котырын шер пумиськылӥсь, бырон кулэ вуэм будосъёсты утчаса. Ньыль ар ӵоже ӧжыт лэсьтэмын ӧвӧл ни. Озьы Горд книгае выжизы дас пумо орхидея, ашальчи, векчи ваё коньыбыж, гереций нимаськись тӧдьы губи, намер ӝужда гинэ будӥсь эмезьпу, пунысутэр но трос мукетыз. Горд книгаез узырмытон бордын тыршо Дмитрий Леонидовичлэн дышетскисьёсыз но. Тани Дима Никандровский али Ижевскысь сельхозакадемиын дышетске ни. Кылем арын со Россиын ортчем "Подросток" конкурсэ пыриськиз, "Нюлэс будосъёсты утён" номинациын Дималэн Игра ёросысь шер пумиськылӥсь будосъёслы сӥзем рефератэз грамотаен пусъемын вал. Нош районамы басьтэм вормонъёс сярысь веранэз ик ӧвӧл ни. Али бадӟым оскон сётэ 10-тӥ классын дышетскись Слава Менчинский. Кылем арын солэн рефератэз Ижевскын пусъемын вал. Али сое Москваын эскеро. Оскиськом, Удмуртиысь пияшлэн ужез ваньзэс паймытоз. Дмитрий Леонидович юнме шорысь биолог ӧз луы. Пичи дыръяз ик со яратылӥз нюлэскытӥ юмшаны, паймылӥз выль шедьтэм будослы, емышлы, губилы... Нош университетэ вуыса, нырысьсэ кактусъёсты адӟиз но... быдэс улытозязлы синмаськиз. Ӝоген солэн коллекцияз та бышкиськись будосъёс куамын пала вал ни. Трос аръёс ортчыса но, кактусъёсты гажамысь ӧз дугды. Школаысь кабинетэзлэн укно вылаз соос корольёс кадь сыло. Вань Дмитрий Леонидовичлэн эшшо аспӧртэм сямыз. Со значокъёс, пӧртэм коньдон люка. Тунсыкъяське астрономиен - инмын ортчись паймымон учыръёсты чаклатэк уг кельты. Кылем арын туж сак чакласа улӥз Толэзьлэсь пытсаськылэмзэ. Нош Шарканын, пе, "северной сияние" но луылэ. Озьы чакласькыса дауртонъяз юмоке но шедьылэмез вань. - Сылӥсько, - шуэ Дмитрий Леонидович, - огпол сюрес вожын, кизили зорез витьыса. Уин куинь час котыр вал. Дорам милиционер лыктӥз но документъёсме курыны кутскиз. Вань мылкыдэз куашкатӥз, озьы соку кизили зорез адӟыны ӧйлась. Нош со зэмзэ но вылэм - ӵукна пал ини инбам кизилиоссэ дурен кисьтэм. Дмитрий Леонидович чидатэк вите ни гужемез. Со утчаськон ужзыя видеофильм дасяны малпа - соку вань играос интыысь Горд книгаен тодматскыны быгатозы. Эшшо, дышетӥсьлэн малпанэз быдэсмиз ке, 4-тӥ школа сьӧрын, оло, паймымон инкуазь сэрег усьтӥськоз ай. Нош али урамын кезьыт на. Дмитрий Леонидовичлэн чакланъёсызъя, шуныт таман уз вуы ай. Л.Корепанова. Игра посёлок. ЮАН-ВЕРАН Кытын дышето парихмахере? Кытын, ку но кызьы парикмахере дышетскыны луэ? Кылылӥ куинь-ньыль толэзьем курсъёс сярысь. Дунэн-а, дунтэк-а дышето? М.Васильева. Шаркан ёрос. Удмурт Республикаысь Вузкаронъя но калыклы юрттэт сётонъя министерствоын оско "Удмуртбыт", "Удмуртбытсервис" АО-лы но 28 номеро "Мода" лицейын басьтэм парикмахеръёслэн дипломъёссылы. Куиняз ик дышето дун тырыса. Коньдонтэк дышетскон понна вазиськоно луоз ёросъёсысь уже интыянъя службаосы. Луонлыксы вань ке, курондэс быдэстозы. "Удмуртбыт" 9 классэз йылпумъямъёслы дышетсконо куинь ар. Нырысетӥ курсысен студентъёс ӝыны арнязэ ветло егитъёсты дышетонъя (ЦОМ) 17 номеро школае, шор ёзо образование басьтон вылысь. Парикмахере дышетэм сяна, таяз арын маникюръя, педикюръя тодон-валанъёс сётӥзы, дышетӥзы визажистэ. Вуоно арын но та специальностьёслы дышетыны чаклало. Ар понна кык сюрс манет тыроно. 11 классэз йылпумъямъёс дышетско дас толэзь. Специальностьсыя гинэ тодон-валанъёс басьтозы. Тыроно куинь сюрс куать сю манет. Пырон экзаменъёс ӧвӧл, ортчытӥсько кызь часъем подготовительной курсъёс. Татын эскеро: луоз-а адямиез парикмахере дышетыны, собере сёто дэмлан (рекомендация). Со курсъёсыз ортчем понна сю манет тыроно луоз. Арлыд шоры учкытэк дышетскыны быгатозы вань мылкыд карисьёс, но дышетсконо луоз алигес школаез йылпумъямъёсын ӵош. Дышетсконэз йылпумъям бере сётозы кун куронъёслы тупась диплом: йырси ӵышконъя куинетӥ разрядэн кышномурт но пиосмурт мастер. Тужгес кибашлыосызлы ньылетӥ разряд тупато. Адрес: Ижевск город, Красноармейской урам, 109а номеро юрт. "Удмуртбытсервис" АО Дышето 11 классэз йылпумъямъёсты гинэ. Таяз сёто йырси ӵышконъя кышномурт но пиосмурт мастерлэсь свидетельствозэ, тупато разряд. Дышетсконо дас толэзь. Толэзяз тыроно куинь сю тямыстон манет. Адрес: Ижевск город, Карл Маркс урам, 1б номеро юрт. 28 номеро лицей Куто 11 классэз йылпумъямъёсты гинэ. Дышетсконо дас толэзь. Толэзяз тыроно куинь сю укмыстон манет. Басьтэмды луоз кун куронъёслы тупась диплом. Ваньмаз дышетскыны кутско нырысетӥ сентябрьысен. Лицейын вань на кык но ӝыны толэзьем курсъёс. Тодон-валанъёс сёто арня нуналъёсы. Дышетсконо куамын куинь час, тыроно куинь сю манет. Та образованиен уже уг куто, но семьяез, тодмоосты ӵышкыны-чеберъяны луоз. Та нуналъёсы люкало выль группа. Вазиськоно 11-тӥ мартозь. Адрес: Ижевск город, Халтурин урам, 2а номеро юрт. Дышетскон понна тырон: вань гожтэм лыдпусъёс, пичи уждун будэмъя, 20 процент пала йылозы. О.Кожанова. Нимъёссы кельтэмын весяклы Кивалтӥсьёс юрттэмен, туж но туж кулэ книга поттӥллям Пичи Пурга ёросысь ожысь но ужысь ветеранъёс. Мыным сое кузьмазы Атай музъеммес утисьёслэн нуналзы азьын, 22-тӥ феврале (тулыспалэ). Сюлэмы дыректыса ик киям кутӥ. Татчы угось гожтэмын мынам ӵыжы-выжыосы но, ёросысьтымы трос тодмоосы но. Сузьет юромо печатламын ӟуч кылын - ваньмыз лыдӟыны мед быгатоз шуыса. Нимыз солэн - "Вернулись с победой". Бадӟым тау дуно кузьымдылы, аспалъёсы! Табере тае мон ялан ӝӧк вылам возё. Весь учкыло, лыдӟыло. Валля тулыс, 9-тӥ Мае, ожъёсын быремъёсты быдэс гуртэнымы буре вайыкумы, мыным огез мӧйы кышномурт тазьы вазиськиз: - Эте, нош Васук апайдэ тодӥськод на-а? Со но ведь ожъёсы ветлӥз. - Тодӥсько, - шуисько. - Ми сое ваньмы бӧрдыса келям оже. Нош апай синкылиоссэ ӵушылӥз но, йӧн-йӧн кариськыса, котомказэ кутӥз. Собере шуэ: - Эн бӧрдэ! Возьмалэ! Мон одно ик берто. Нылмуртъёсты, оло, тушмон но жалялоз, пуля но погыртыны кепыралоз... - Нош кытын вал со ожъёсын? - юа ӵыжы-выжые. - Уг тодӥськы ни. Пичи вал. Кылылӥ, Украиналэн шунды пуксён палаз вал шуыса. Стрелочника вылэм, пуляос но бомбаос улын снарядъёсын поездъёсты ожмаськисьёс доры келяллям. Жаль, туж жаль: ӧй юалля кытӥ-кытӥ ортчемзэ. Но Васук апай бертӥз! Сыӵе таза, чебер, чылкыт! Зэм ик луиз верамез: пуля ӧз погырты сое. Оло нош милям вӧсяськеммы но юрттӥз... Ури-бери учкисько книгаысь солэсь нимзэ. Вань ведь! Вунэтӥллямтэ! Кирос мемеелэн нылыз мыным мукет ласянь но дуно. Ижысь педучлищеын дышетскыкум, монэ пырак лекциысь басьтӥзы Тихоокеанской Флотэ. Шудэ вылэм: городысь ӵапак адӟи асьме гуртысь нылэз, Кебенэй Санукез. Мын, шуисько, чаляк берт но милямъёслы вера, монэ армие басьтӥзы шуыса. Ӵуказе поездмы кошкоз асьме станциетӥ. Огырчиез ортчыса, эшелонмы ӵукна вазь ик вуиз станциямы. Сюресъёс куинез ик буш ке но вал, инмаре поезд дугдылӥз ук быдэс минутлы. Мемейме но нюнюэлэсь пизэ но адӟи. Синмаськем нылы гинэ ӧй вал - возьдаськон вань ук. Котомказэс ӧй басьты, сиёнмы трос вал. Мемеез адӟеме луиз берлосез... Али малпасько: Васук апай дугдытъяз, дыр, поездэз юри мон понна! Малы медам ӧй юалля со сярысь ноку но? Ӧвӧл ни апае. Фронтысь бертыса, со кема ужаз чугун сюрес станциямы. Озьы, кулэмез бере коть солы тау кареме потэ, быдэс составез дугдытъямез понна. Дӥсьтонэз понна. Сыӵе мур малпаськонэ вуттӥз пургаосылэн дуно кузьымзы. Милям ёросысьтымы лек тылӝуын быремъёс пыртэмын Буре ваён книгалэн 6-тӥ но 8- тӥ томъёсаз. Нош кызьы весяклы тодын возьытэк кельтод вормыса бертэмъёсты? Туж тросэз соос, уката ик юн сӧсырмыса бертэмъёсыз, ӝог кулӥзы. Пересьмонзы вуыса, эзель нуэ но нуэ мукетъёссэ батыръёсмес. Соин ёросысьтымы ожъёсы ветлэмъёс асьсэлэн нырысетӥ люкаськемазы 1992-тӥ арын 22-тӥ июне куризы вал бертэм солдатъёс сярысь но книга поттыны. Улонмы уродмемен, али гинэ сыӵе бичет поттэмын. Отын - котькуд гуртъя, котькуд сельсоветъя, нимысьтыз алфавитъя - Быдӟым Вормонмес дурисьёс. Вакчияк гинэ ивортонъёсын адӟиське котькудӥзлэн ортчем сюресэз, наградаосыз, война бере кытын улэмез но ужамез. Книгалы азькыл гожтэм ёросысь ветеранъёслэн кенешсылэн тӧроез "Маяк" газетлэн азьвыл редакторез Д. В. Крестьянинов. Оглом вераса, Пичи Пурга ёросысь ожъёсы келямын вылэм 6460 адями, пӧлазы 125-ез - нылкышноос. Бертӥллям 2850-эз гинэ, соос пӧлысь 48-эз нылкышноос. Кыӵе но сюресъёсты, курадӟонъёсты адӟемын ӧвӧл соос, кыӵе бадӟымесь подвигъёс лэсьтӥллям! Ожъёс бере но уноезлы наградаос сётэмын. Тани Гожняысь Александр Михайлов сюрылэм пленэ. Возиллям Германиысь но Франциысь концлагерьёсын. Отысь пегӟем но фашистъёсын ожмаськем Франциысь Пумитъяськонъя огазеяськонын. Американецъёс немецъёсты уллям бере, ар пала возиллям на ай советской адямиослэн лагерязы. Нош Курчум-Норьяысь егит нылаш Прасковья Байсарова, эсьмаса, куиняз фронтъёсын ожмаськыны вуэм! Кинлэн кӧня шудэз, сыӵе ик адӟонэз. Тани Пугачёво посёлок сокем ик бадӟым ӧвӧл ке но, отысь тушмонэз вормыса бертӥллям 140-лэсь ятырез батыръёсмы, нош куд-ог гуртъёсысь - чылкак дасэз-куамынэз гинэ. Туж жаль: тросэз батыръёсмы сярысь кулэмзы бере номыре гожтыса кельтэмын ӧвӧл ни. Тани Пуро-Можга гуртысь куамынэзлэн войнае ветлэмъёслэн ку кулэмзы но пусйымтэ. Куд-огезлэн айы нимзы но верамтэ. Орденъёссы, медальёссы но гожтымтэ. Ярам коть, нимтулъёссы весяклы кылемын. - Таӵе книгаез поттоно вал ни 30-40 ар талэсь азьвыл, - шуэ Д. В. Крестьянинов. - Соку егитъёсмы тросгес тодысалзы атайёссы-анайёссы, песятайёссы сярысь. Зэм, куд-ог учыръёсы асьсэос но ӵыжы-выжыоссы янгышесьгес, дыр. Улэп дыръяз ичи юалляськизы атайзылэн, агайёссылэн ож сюресъёссы сярысь. Вылаз ик, войнае ветлэмъёс ӧз яратылэ ож сюресъёссы сярысь мадьылыны, тодазы вайылыны. Бератазгес комсомолмы но асьмелэн быриз - азьло коть соос выро вал та ужен. Школаос но берло вакытэ лябӟытӥзы, шуыны луоз, нылпиосты мӧйыослэн ӟеч ужъёссы пыр дышетонэз. Ма, собере асьсэос но книгаез кылдытӥсьёс пӧртэм сяменгес тыршизы, вылды. Тырмыт ӧз вазиськылэ архивъёсы, ӧз выжыятъялэ улонысь кошкемъёс сярысь юалляськыкузы. Таизлы но ужзылы туж бадӟым тау ни. Книгаез йылсась Д. В. Крестьянинов меӵак вера мылысь-кыдысь тыршисьёсты. Тани соос пӧлысь куд-огез: Улын Юриысь Никита Ильич Ильин, "Радист" эштосысь но "Югдон" колхозысь ветеранъёс Иван Васильевич Быков но Николай Яковлевич Баранов, Ильинск гурт администрациысь ветеранъёслэн кенешсылэн азьвыл тӧроез Римма Константиновна Евсеева (куиньназы ик улонысь кошкемын ни), Аксакшурысь ветеран Дмитрий Иванович Баймурзин, Шор Кечолысь Валентин Кузьмич Яранцев но музонъёсыз. Мыным туж яраз Пугачёво посёлокысь эшъёслэн мылысь-кыдысь гожъямъёссы. Пумен ичи но ичи кылё ож ӝуосыз адӟемъёсмы, Быдӟым Вормонэз ваисьёсмы. Табере улэп бертэмъёсыз но пыраклы кельтэмын книгае. Ноку уз ыше ни нимъёссы! Соин туж дуно "Вернулись с победой" книга. Азьланяз, оло, быдэс кунмыя та выллем одӥг коть бичет дасяно луоз Афганистанын но Чечняын ожмаськемъёс сярысь. Таӵе тодын возён книгаос мед луысалзы чальгес ваньмаз ёросъёсын. Шумпотӥсько: пургаос ваньмызлы адӟем карымон ужаллям. Кирилл Ломагин, запасысь офицер, писатель. Г.Е.Верещагинлэн вордскемез дырысен 150 ар тырмонлы Нимыз дауръёсын улоз Григорий Егорович (Георгиевич) Верещагин - нырысетӥез удмурт писатель (поэт, прозаик, драматург), тодосчи (этнограф, фольклорист, лингвист), дышетӥсь, югдытӥсь, православилэн миссионерез но священнослужитель. 1888-тӥ арысен со Императорской Ӟуч географической обществое пыриз. Вордскиз 1851-тӥ арын 13-тӥ октябре Вятка губерниысь Глазов уездысь Полом черкогуртын (али Кез ёросэ пыре), кулӥз 1930-тӥ арын 27-тӥ августэ Ижевскын. Дышетскиз Сарапулысь реальной училищеын. Ужаз Сосновка, Шаркан черкогуртъёсын, Сарапул уездысь Ляльшур гуртын (али Шаркан ёросэ пыре) волостной писарь, дышетӥсь луыса. Духовной сан басьтыса, 1895-тӥ�1900-тӥ аръёсы Алабгоын диакон вал, нош 1900-тӥ�1927-тӥ аръёсы - Сарапул уездысь Брангуртын (али Пичи Пурга ёросын) священник. Школаын со Закон Божий урокъёсты нуиз. 1927-тӥ арын сое священник луонлэсь мозмытӥзы, Совето властьлы юрттэмез но удмурт калыклэсь улонзэ выльдонэ пыриськемез понна: со уго Россиысь удмуртъёслэн Алабгоын ортчем нырысетӥ ӧтчамазы ветлӥз (1918), озьы ик калыкез югдытӥсьёслэн Сарапулын ортчем нырысетӥ съездазы но вал (1920), удмурт писательёслэн нырысетӥ ӧтчамазы докладэн вераськиз (1921), удмурт-ӟуч но ӟуч-удмурт кыллюкамъёс, удмурт кыллэсь грамматиказэ дасяз, "Руководство к изучению вотского языка" научно-методической уж поттӥз (1924). Творчество борды кутскемез бере нырысь аръёсаз ик Григорий Верещагин Россиын гинэ ӧвӧл, Финляндиын, Венгриын но тодмо луиз аслаз литературно-этнографической ужъёсыныз: "Вотяки Сосновского края" (С.-Петербург, 1884, 1886) но "Вотяки Сарапульского уезда Вятской губернии" (С.-Петербург, 1889), солы географической обществолэн кык азвесь медальёсыз сётэмын. Та этнография ласянь дуно текстъёс пушкын вань чеберлыко прозалы тупась люкетъёсыз но. "Чагыр, чагыр дыдыке..." кылбур, кудӥз пыриз кыкетӥяз очерке калыклэн нуны веттан гурез шуыса, лыдъяське удмурт кылын нырысьсэ печатлам художественной произведениен. Вятка но Кам котырысь удмуртъёслэн но ӟучъёслэн кылоссыя ужъёссэ Г.Верещагин печатлаз Сарапулысь, Вяткаысь, Казаньысь, Москваысь, Архангельскысь но Санкт-Петербургысь периодикаын. Соос пӧлысь тужгес тодмоосыз: "Общинное землевладение у вотяков Сарапульского уезда" (1895), "Остатки язычества у вотяков" (1909), "К этнографиии вотяков Прикамского края" (1912- 1914). Кӧня ке кылбуръёссэ удмурт кылын поттӥз 1924-тӥ арын "Гудыри" газетын но "Руководство к изучению вотского языка" книгаын. Кельтэм ужъёсыз пӧлысь уноез - "Батыр дӥсь", но "Зарни чорыг" поэмаосыз (удмурт кылын), куать пьесаез (удмурт но ӟуч кылын), "Загубленная жизнь" но "Скоробогат-Кащей" (ӟуч кылын), "Вуж мыж" ("Раннее обещанная жертва") повестез - рукописьёсын ик кылизы но, учёнойёс тыршемен али печатласько. Али Россиысь Наукаосъя Академилэн Урал люкетэзлэн историяя, кылъя но литературая Удмурт институтэз поттыны дася Г.Е.Верещагинлэсь люкам сочинениоссэ. Ваньмыз со укмыс книга луоз, ньылез лыдӟись доры вуиз ни. Григорий Верещагин гожъяз удмурт но ӟуч кылын. Куд-ог кылбуръёсыз берыктэмын чуваш, венгер, финн кылъёсы. Та адями удмурт литературалэн, наукалэн ӝужанэз, кутсконэз понна бадӟым уж лэсьтӥз. Со сяна, ХИХ даурлэн пумаз Мултан ужъя судлэн кыказ сессиосаз эксперт- этнограф вал. В.Г.Короленколэн верамезъя, удмуртъёсты юнме шорысь янгыше уськытэмлэсь утён, оправдательной приговор гожтон понна со бадӟым уж лэсьтӥз. *** Г.Е.Верещагинлэн вордскемез дырысен 150 ар тырмонлы дасяськон но сое пусъён вылысь, кылем арын кылдытэмын оргкомитет. Отчы пыризы Удмурт Правительствоысь но Кун Кенешысь, Писательёслэн огазеяськонысьтызы, "Удмурт кенеш" огазеяськонысь, ёрос администрациосысь кивалтӥсьёс, куд-ог профессоръёс -этнографъёс, фольклористъёс, литературоведъёс. Оргкомитет туэ выльысь люкаськылӥз. Юбилеен валче ортчытоно ужрадъёс пумысен выльысь кенешемын. Правительстволэсь постановленизэ быдэсъян вылысь, министерствоослэн, ёрос администрациослэн кивалтӥсьёссылы косэмын юбилеен герӟаськем ужрадъёсыз умой ортчытъяны, кулэ интыяз уксё шедьтыны. Г.Верещагинлэн 150 ар тырмон юбилеезлы сӥзем ужрадъёс пӧлысь тужгес пусйымонъёсыз таӵеесь: люкам сочинениоссэ поттон (та сярысь вылӥын верамын). быръем произведениоссэ удмурт но ӟуч кылын нимаз книгаосын печатлан, "Г.Е.Верещагин но Урал-Поволжье котырысь калыкъёслэн этнокультура ласянь азинсконзы" научно- практической конференция, Кез, Шаркан но Пичи Пурга ёросъёсын Верещагинлы сӥзем лыдӟонъёс, солэн творчествоезъя устоезлы научной ужлы, литературной произведенилы но нылпиос куспын сочиненилы конкурсъёс, Шаркан но Пичи Пурга ёросъёсын музей комнатаос усьтон, та адямилэн нимыныз герӟаськем интыосын буре ваён пул шуккон. Пусъем ужрадъёс пумен быдэсъясько. ГТРК-лэн телеканалъёсаз мыно Г.Верещагин сярысь передачаос. Школаосын ортчыло тодосчиосын-верещагиноведъёсын пумиськылонъёс. Дышетӥсьёслэсь тодон-валанзэс будэтонъя институт учёнойлэсь но писательлэсь творчествозэ эскеронъя-дышетонъя семинаръёс ортчытъя. Та нуналъёсы но уж азьлань мынэ. Шаркан ёросысь удмурт кыллы дышетӥсьёсын, музейёсын кивалтӥсьёсын, библиотекарьёсын лекция-семинар ортчытӥз Г.Верещагинлэсь творчествозэ, улэм-вылэмзэ мур тодӥсь адями, филология наукаосъя доктор Василий Ванюшев. Та нуналъёсы Кез ёросын Верещагинлы сӥзем лыдӟонъёс но мукет ужрадъёс мыно. К.Каксин. "Мыным кельше бугрес улон" Журналистика удыс монэ пичи дырысеным ик паймытъяз но бордаз кыскылӥз. Выль адямиосын тодматскон, дуннеез котыръян, астэ чагыр экранысь адӟон мылкыдме бурдъялляз. Но бадӟым будэмъя, журналистъёсын тодматскыса валаны кутски, макем секыт но огыр-бугыр вылэм та уж. Самой "пӧсь" йӧтэ иворъёсты дасясьёслы. Телевидениын - со "Шаерез" дасясьёс. Улонмылэн бызись ӧрезлэсь котькуд палдурзэ возьматыны, иворъёсты рос-прос, дыраз сётыны тыршо татысь ужасьёс. Нош ваньзэ син азяз возьыны тырше Светлана Семёркина. Солэн ужамез, улэм-вылэмез сярысь вераны курыса, мон вазиськи солы. - Светлана Денисовна, кыӵе луыны кулэ туала телевидениын ужась журналист? - Телевидениын ужаны туж секыт. Отысь астэ шедьтон понна тыршоно гижысь-пиньысь, яратоно со ужез. Журналистлэн пельёсыз котьку сак луыны кулэ. Кытысь мае кылод, адӟод - одно йыре кельтыны тыршоно. Иворъёсты дасясьёслэн гань-гань пукыны дырзы чик ӧвӧл, соос котьку пыд вылын. Журналист котыр ласянь визьмо луыны кулэ, политикаез но экономикаез мед валалоз - туннэ улонамы со бадӟым инты басьтэ уго. - Нош кылэз тодон ласянь мар шуысалды? - Мон пумитъяськисько корреспондентъёсмылэн ӟуч кылын малпаськемзылы. Ӟуч но удмурт кылъёслэн грамматиказы пӧртэм, соин сыӵе амалэн пӧрмытэм ужзы чылкак сюлэмам уг лякиськы. Шуг-секытъёс кылдо выль кылъёс пумысен но. Ми соосты кутӥськом, нош учкись ваньмыз ик, оло, уг но вала. Куддыр шекъёсмы пото дыртэммы бордысь но. - Али ужась егит журналистъёс кельшо-а тӥледлы? - Кельшо. Улонмы воштӥське, соин ӵош журналистлы но бере кылёно ӧвӧл. "Шаерысь" корреспондентъёсмы тыршо котыр ласянь визьзэс будэтыны. Кылсярысь, Ф. Миннигараев но А. Слесарев филология факультетэз йылпумъямзы сяна, экономическояз дышетско. Соосты мон котькытчы ыстыны быгатӥсько - ваньзэ валало, рос-прос ивор лэсьто. Пӧртэм темаосъя, жанръёсъя усто сюжетъёс вутто. - Асьтэлы ужды кельше-а? - Кивалтӥсь луыны - уг, нош журналистын кельше. Но гожъяськыны дыры уг кыльы, иворъёс трос дырез быдто. - Кызьы малпаськоды, тӥледын капчи-а ужаны? - Секыт, дыр. Мон бадӟымесь куронъёс пуктӥсько. Куддыр керетонъёстэк но уг луы. - Малпанъёс улонэ мед пыӵалозы шуыса, мар нырысетӥ интыын сылыны кулэ: аслад тыршемед яке эшшо маке? - Мон малпамъя, ваньзэ адями ас киыныз лэсьтэ. Нокин солы дасьсэ уз сёт. Бадӟым инты басьтэ ас кужымедлы оскон. Оскид ке, ваньмыз умой пӧрмоз. Адями нырысь ик ассэ гажаны но яратыны кулэ. Кызьы шуо, вошты аслэсьтыд малпанъёстэ, соку воштӥськоз улонэд. - Быдэсмытэк кылем малпанъёсты чик ӧвӧл шат? - Мыным пичи дырысеным кельшизы журналистика но медицина. Бырйи журналистикаез. Та удыс мынам гороскопея но ӵапак тупа (мон - Овен). Школаын дышетскыкум гожъяськылӥ ёрос газетамы, но ноку ӧй малпалля: радиое, телевидение вуо шуыса. Соос мыным синсузёнтэм потылӥзы. Но медицинаен тунсыкъяськисько али но. Калык амалъёсъя эмъяськыны тыршисько. - Тодӥськоды на-а асьтэлэсь нырысьсэ экранэ потэмдэс? - Ой, тодӥсько (серекъя). Туж кышкыт вал. Азьло передачаез нырысь гожтӥськом вал кассета вылэ, собере ини эфире поттылӥзы. Камера азе пуксьыса, дышетэм кылъёсме ваньзэ вунэтӥ. Кык предложениез вить пол верай, дыр. Кивалтӥселы В.Д.Михайловлы уз пӧрмы, шуисько. Нош со ӟеч кылъёсыныз юрттӥз, оскиз мыным. Камера пыр учкисез шӧдыны дышетӥз. Сыӵе быгатонлык нырысетӥ интыын сылыны кулэ. Ӧд ке быгаты, учкисьлэсь сюлэмзэ ас бордад карыны уд быгаты. Камера азьын ма верано вал ай, со кылэз медам вунэты шуыса пукид ке, синъёсыд бушесь луозы. Передачаез умой нуыны быгато Т. Денисова, А. Слесарев. Чебер, ас бордаз кыскись ымныр тус сяна, мед луоз ненег куараед, визьмыд, вӧзад ӟеч операторед, визажистэд. Огнад гинэ троссэ уд лэсьты. - Туала удмурт телевиденилэн умой но урод палъёсыз. - Али уно выль каналъёс потэмен, туж бадӟым конкуренция. Тросэз лэсьтӥське коньдонэн. Соин йырин, тросэз малпанъёсмы быдэсмытэк кылё. Но шумпотӥськом соизлы - вань визьмо специалистъёсмы, журналистъёсмы. Кылсярысь, Л. Вахитов, В. Сидоров, А. Борисов, П. Денисов. Россиын ортчылӥсь конкурсъёсын вормисе потало. - Телевидениын ужаськоды бере, бертыса телевизор учкемды ик уг поты ни, дыр? - Дорам вуыса но, мынам уже азьланьтӥське. Учкисько, кызьы одӥг ужрадэз возьматэ ОРТ, РТР, НТВ. Угось улонмы туж ӝог воштӥське. "Шаерез" учкеме бере, ТВС-э, НР-э поттӥсько, собере "Песочная, 13" мынэ. Газет-журнал но лыдӟисько. Кулэзэ пусйыса, блокнотам гожтӥсько. Соин арня куспын туж зол жадисько. Дас кык часлэсь вазь ноку уг выдӥськы. Киноослы, сериалъёслы, тунсыко передачаослы дыры ичи кыле. - Нош кызьы тӥ шутэтскиськоды? - Зарезь дуре, шуныт палъёсы уг ветлӥськы. Уг чида мон отын шунды шорын кылльыны. Гань-гань улыса шутэтскыны уг быгатӥськы. Лулы потыны турттэ. Сюлэмы кыске анай гуртам (вордӥськи Татарстанысь Бавлы ёросын), гужем - сад-бакчаям. Толалтэ куасэн нюлэскытӥ поръясько. Кельше инкуазьлы паймыса, пуш дуннеям, малпанъёсам выйыса, вераськыса ветлыны. Озьы мон ганяк луисько, кужым басьтӥсько. - Пӧраськыны яратӥськоды-а? Кудӥз сиёнды тужгес ческыт пӧрме? - Яратӥсько, но шер пӧрасько. Вӧзам уло нылы но племянницае. Мон ужысь бертыкум, соос дась пӧрамен витё ни. Яратӥсько мильым, зыретэн табань пыжыны. - Азьланезлы кыӵе малпанъёсты? - Трос аръёс ӵоже ини нуллӥсько мон туж бадӟым малпанме: адямилэн лулпуш дуннеезлы, ассэ гажамезлы сӥзем передача лэсьтыны. Удмурт калык ассэ яратыны мед дышоз, пуш кужымзэ мед шӧдоз. Котькудмы "мон - чебер, йӧно, визьмо..." малпанэн улӥм ке, огъя калыкмылэн шудэз ӵуказе нуналэ но сыӵе луоз. Визьмо, ужась, кибашлы удмуртъёсмы номырин но мукетъёслэсь лябыт ӧвӧл. Со узыр но кужмо луыны кулэ. О.Никитина, Удмурт кун университетын дышетскись. Шаркан палась иворъёс Нылкышно ке тон азьын Туала арын нылкышно кивалтӥсьёсын калыкез уд паймыты ни, но Шаркан районын соос туж трос. Зэм, ёрос администрацилэн йырыз Александр Прохоров солы шум гинэ потэ - нылкышно кивалтӥсьёс сюлмоесьгес, тыршисесьгес, пе, - кутскем ужзэс гижысь-пиньысь лэсьто. Нылкышноос асьсэос но уг пумитъясько секыт ужез быдэсъянлэсь. Соин валче уг вунэто семьязэс но, нылпизэс но. Асьсэды но утялтыны, кырӟаны-вераны но вуттӥсько. Нылкышно праздниклы сӥзем "Сударыня" конкурсын соос зэмос чеберинаос кадь вал? Дунъясьёс нимысьтыз висъязы Шаркан больницаысь валтӥсь врачлэсь воштӥсьсэ Нина Чувашоваез. Нош учкисьёс синмаськиллям Шарканысь 3 номеро нылпи садлэн кивалтӥсезлы Надежда Трониналы. Конкурсэ пыриськемъёс кузьым басьтӥзы, шулдыръяськизы. Одӥг нуналлы ке но секыт ужзы сярысь вунэтылӥзы. Уксё будэ... бакчаын Кыква школаын дышетскисьёслы районысь вань пиналъёс вожъясько. Отысь усточиос уго стипендия басьтыса дышетско? Сыӵе шуд усе ӟеч дышетскисьёслы но школаын, районын ортчылӥсь ӵошатсконъёсын вормисьёслы, нырысетӥ инты понна сёто куамын манет, кыкетӥос басьто кызь манет , куинетӥос - дас. Трос уд шуы, но пиналэз со бурдъя, азьланяз уката тырше. Кытысь кыкваослэн сыӵе луонлыксы? Бакчаысьтызы. Бен, пиналъёс асьсэос ужаса коньдон потто: школалэн сизьымдон вить гектар быдӟа музъемез, гид тыр пудоез. Та школа районын но, республикаын но азьпал радъёсын ветлэ. Директорлэн Владимир Вотинцевлэн тыршемез - син азьын. Гыром-кизём, нянё улом Берло дыре паймоно кадь: хозяйствоос трактористъёслы ёрмыны кутскизы. Но районын югдур ӝоген тупатскыны кулэ. Алигес гинэ 40 номеро ПТУ-ысь тракторист-машинист луыса потӥзы 24 егитъёс. Соос ньыль толэзь ӵоже дышетскизы. Нош понедельникысен выль группа дышетске ни. Гырытэк-кизьытэк ум кыле, озьыен. О. Сидорова. Суредъёсын - дано муртъёс "Удмуртия" издательство чеберлыкез яратӥсьёсты туэ но шумпоттӥз ини ӟеч ужъёсыныз: югыт дуннеез алигес гинэ адӟиз "Удмурт шаер суредасьёслэн ужъёсазы" альбом. Художникъёс сярысь веранъёсты люкам но поттыны дасям искусствовед Адель Поляк. Альбом ивортэ пӧртэм амалъёсын суредасьёс сярысь. Книгаен тунсыкъяськыкуд тодыны быгатод Удмурт шаерысьтымы искусствоосъя дано ужасьёс Анатолий Аникин, Валентин Белых, Генрих Верещагин, Россия Федерациысь искусствоосъя дано ужась Георгий Векшин, Удмурт Элькунысь калык суредасьёс Семён Виноградов, Пётр Ёлкин, Анатолий Русских, Пётр Семёнов, Россия Федерациысь дано суредась Менсадык Гарипов, Удмурт Элькунлэн Кун премиезлэн лауреатъёсыз Юрий Лобанов, Александр Ложкин, Ильяс Нурмухаметов, Борис Постников, Россия Федерациысь калык суредась, Россия Федерациысь И. Е. Репин нимо премилэн лауреатэз Алексей Холмогоров но данак мукетъёсыз сярысь. Альбом пушкы интыям суредъёсысь учыртод шаерысьтымы тодмо адямиосты син шоры соку ик йӧто улонысьтымы дырызлэсь вазь кошкем гожъясьёс Герман Ходырев, Роман Валишин, Гай Сабитов, эмъясь Семён Ворончихин, мукет адямиос. Шумпоттэ соиз: куд-ог суредасьёслэн ужъёссы басьтэмын Третьяков галереяе (Удмурт Элькунысь калык суредасьлэн, Россия Федерациысь дано суредасьлэн, Удмурт Элькунлэн Кун премиезлэн лауреатэзлэн Менсадык Гариповлэн - дас куать ужез, озьы ик - Удмурт Элькунысь искусствоосъя дано ужасьлэн Валерий Кононовлэн, Россия Федерациысь калык художниклэн Алексей Холмогоровлэн суредъёссы). Книгалэсь вылбамзэ чеберма Удмурт Элькунысь искусствоосъя дано ужасьлэн Николай Косолаповлэн "Удмурт ныл" суредэз (татын возьматэмын улосысьтымы тодмо адями - Удмурт радиокомитетэз кылдытӥсьёс пӧлысь одӥгез Анастасия Прохоровна Прохорова). Альбомлы азькыл гожтэм Удмурт шаерысь Суредасьёслэн огазеяськонзылэн тӧроез Пётр Ёлкин. Сузьетэз дасям бере ик тодмо луиллям шумпоттӥсь иворъёс: Россия Федерациысь дано суредась" ним сётэмын Пётр Ёлкинлы, Валерий Кононовлы, Анатолий Русскихлы. "Удмурт Элькунысь искусствоосъя дано ужась" ним - Вячеслав Михайловлы, Георгий Репинлы, Александр Ложкинлы. Е. Ромашова. Шонертон Кылем номерысь "Тазалык" бамын потэм "Эмъяло лазер сиос" материалын тодмо эмъясьлэн Татьяна Викторовна Ковалёвалэн фамилиез Коваленко потэмын. Янгыш луэм понна Татьяна Викторовна вожзэ медам потты. 2001-тӥ арын тулыс вакытлы сюресъёс кузя автотранспортэн мынон-ветлонэз кулэстон сярысь Удмурт Республикаысь Правительстволэн постановлениез Автомобиль сюресъёсты но сюрес дурысь сооружениосты утён сярысь куронъёсты лыдэ басьтыса, кудъёсыз юнматэмын РСФСР-ысь Министръёслэн Советсылэн 1969-тӥ арын 5-тӥ мартэ кутэм 129 номеро постановлениеныз, 2001-тӥ арын тулыс сюресъёсты изъянтэмлэсь утён вылысь, Удмурт Республикысь Правительство пуктэ: 1. Огъя кутӥськись сюресъёс кузя 2001-тӥ арын 1-тӥ апрельысен 45 нунал ӵоже ветлыны уг яра 10 тонналэсь уногес секталаен вань транспортлы, урод сюресъёсты ортчыны быгатӥсь автомобильёслы (ГАЗ-66-ез вераса) но вань маркаен тракторъёслы. Сюресъёс вылтӥ ветлыны лэзёно: шуге-леке шедемъёслы сиён-юон нуись-ваись машинаослы; автомобильёслы-рефрижераторъёслы, йӧл, пызь но ӝог уродмись сиён-юонэз нуллӥсь автомашинаослы; бензин, кизер эстӥськон, чагыр эстӥськон нуись-ваись нимысьтыз транспортлы; воинской частьёслэн но Югдурез утёнъя министерстволэн ас адямиоссэс нуись- ваись автотранспортсылы; гидротехникая но гидромелиорацияя сооружениосты тупатъясь-выльдӥсь транспортлы; калыкез нуись-ваись вань маркаен автобусъёслы, служебной автобусъёслы, вахта амалэн ужасьёсты нуллӥсь нимысьтыз автобусъёслы. 2. Удмурт Республикаысь городъёслэн но ёросъёслэн администрациоссылэн йыръёссылы дэмлано: огъя кутӥськись сюресъёс кузя автотранспортэн мынон-ветлонэз огдырлы кулэстыны; "Удмуртавтодор" унитарной кун предприятиен но Россиысь сюресъёсъя агентствоен юнматэм пропускен транзит автотранспортлы ветлыны луонлык кылдытыны. 3. Дэмлано предприятиослэн, лэсьтӥськись но мукет организациослэн, колхозъёслэн но совхозъёслэн, фермер огазеяськонъёслэн, кооперативъёслэн кивалтӥсьёссылы тулыс вакытлы тырмыт люканы кулэ луись материалъёс, оборудование, сырьё, кидыс, эстӥськон, вузкарись организациослы тырмыт вуз но мукет тужгес но кулэ луись грузъёс. 4. Горький чугун сюреслэн Ижысь ёзэзлы дэмлано секыт но бадӟым грузъёсты нуыны-вайыны предприятиослы но организациослы вагонъёс висъяны. 5. Удмурт Республикаысь сюресъёс вылын кышкытлыклэсь утиськонъя кун инспекцилэн управлениезлы радъяно сюресъёс кузя мынӥсь-ветлӥсь машинаосты ялан эскеронэз но юрттоно сюрес организациослы та постановлениез быдэстыны. 6. "Удмуртавтодор" унитарной кун предприятилы сюресъёс кузя ветлыны нимысьтыз пропуск сётъяны лэзёно но поттэм коньдонэз Удмурт Республикаысь сюресъёсъя фондэ висъяно. Нимысьтыз пропускъёслы бланкъёс лэсьтэм но соосты сётъям, сюресъёс кузя ветлӥсьёслы ивор сётонэз радъям понна тыронъёслы, озьы ик сюресъёсты изъянтэмлэсь утёнъя но соосты тупатъянъя ватсаса ужрадъёслы коньдон висъяно Удмурт Республикаысь сюресъёсъя фондысь. 7. Мукет ведомствоосты но организациосты сюресъёс вылтӥ ветлыны пропускъёс сётъяны лэзёно ӧвӧл. 8. Та постановленилэсь быдэсъяськемзэ эскерыны осконо Удмурт Республикаысь Правительстволэн тӧроезлэн юрттӥсезлы Г. Ф. Рябовалы. Постановлениез печатлано "Удмуртскя правда", "Известия Удмуртской Республики" но "Удмурт дунне" газетъёсын. Удмурт Республикаысь Правительстволэн Тӧроез Ю. С. Питкевич. Иж город, 2001-тӥ арын 12-тӥ мартэ. � 261. Гурт улон Бусые потон дыр вуэ Нош вуиз тулыс. Тани-тани бусы ужъёс кутскозы. Музъем ужасьёслэн одӥг сюлмаськонзы: дыраз бусые потоно. Одӥг нуналлы бере кылид, гырон-кизёнлэсь ӝегад ке - сӥзьыл уно ыштонъёс адӟод. Музъемлэсь шокамзэ гурт калык умой шӧдэ ни. Но луоз-а крестьянъёслы зэмос юрттэт техникаен, сылал-ватсэтэн, эстӥськонэн? Мар луоз азланяз музъемен, лэзёзы-а, уз-а сое вузаны? Та ужпумъёс палэнэ ӧз кыле гурт удыслэн (АПК) азинсконэзлы сӥзем кенешонын. Со радъямын вал ортчем арняе Ижысь "Металлург" культура дворецын. Кивалтӥсь ке зол - изъян ӧвӧл Гурт удысъя но сиён-юонъя министр В. Невоструев кылем арлы йылпумъянъёс лэсьтыса пусйиз, Правительство гурт хозяйствоослы юрттыны выриз ке но, ваньбур поттон вылын со ӧз шӧдӥськы. Ю тысь но етӥн будэтонъя гинэ шат куд-ог азинсконъёс вал. Али республикаямы 456 хозяйство лыдъяське. Со пӧлысь 213-ез гинэ барыш поттыса ужазы. Тужгес но трос пайда поттэмын йӧл вузанысь - 118 миллион манет. Со дыре ик 243-ез ляб хозяйствоос 180 миллион манет тыр ыштонъёс адӟизы. Министр пусйиз куд-ог усто хозяйствоосты - соос, улонлэн солань-талань шонаськонъёссы шоры учкытэк, ялан азинскыса ужаны быгато. Вавож ёросын сыӵе хозяйство куинь - Мичурин нимо, "Колос", "Удмуртия", Ува ёросын - Ленин нимо, Можга ёросын - "Заря", Грах ёросын - "Родина". Нош та хозяйствоосты азьпала валто совето вакытэ кыдам кивалтӥсьёс. Республикаямы туж ӟеч тодо ни соослэсь нимъёссэс. Тани соос - "музъем кизилиос": В. Калинин, В. Красильников, А. Юшков, А. Сырых, В. Иванов, М. Крестьянинов. Троссэ хозяйствоосты кекато кредитъёс понна люкаськем тыронъёс. Соин ик продукциез вузамлэн пайдаез уг адӟиськы, вань коньдон кошке кредит тыронъёслы. Тужгес но секыт югдурзы Сюмси ёросысь "Луч" колхозлэн, "Кенеш" эштослэн, Каракулино ёросысь "Гигант" ООО-лэн, Завьял ёросысь "Свобода" СПК-лэн. Мар мугъёс бен вутто хозяйствоосты сыӵе калэ? Валэктонэз одӥг: дунъёслэн будэмзы. 1990-тӥ арысен кутскыса, эстӥськонлы дунъёс 36 пол будӥзы, электрокужымлы - 46 пол, техникалы - 40 пол. Нош со дыре ик сӥль-йӧл продукцилэн вузан дуныз 2,5 поллы гинэ будӥз. Промышленной вузъёслы но сиён-юонлы дунъёс пӧртэмесь луо. Соин ик дунъёсъя югдурез тупатытэк, АПК-лы Правительство котькӧня коньдон висъяз ке но, ваньмыз пыдэстэм бекчее кадь кошкоз. Паймыто таӵе лыдпусъёс, 1990-тӥ арын республикаын пайдатэм ужась хозяйствоос 4 гинэ вылӥллям, 1995-тӥ арын соослэн лыдзы 276-ёзь вуэм ни. Берло дас аръёсы музъем ужасьёслэн уждунзы куинь поллы гинэ будӥз, шорлыдын вераса, солэн быдӟалаез кылем арын 650 манет котыр луиз. Но куд-ог хозяйствоосын ужасьёслэн уждунзы 250 манет сяна уг усьы. Соос пӧлы пыро Селта ёросысь "Родники", Яр ёросысь "Дружба", "Казановское", "Юрское" эштосъёс. Сыӵе уждун адямиез ултӥяз гинэ. Соинтэк-а тросэз специалистъёс гуртысь пегӟо. Гурт удысын тыршисьёслэн лыдзы дас ар ӵоже 32 сюрс муртлы кулэсмиз. Усто специалистъёсты но кивалтӥсьёсты ыштыса, хозяйствоос уката но ёрмон калэ вуо. Дышетскем муртъёсты ыштэмен, туннэ 44 хозяйствоен кивалто дышетскымтэ адямиос. Та ласянь тужгес но секыт югдур Кизнер ёросын: 23 хозяйство пӧлысь 9- эныз кивалто нимысьтыз дышетскымтэ адямиос. Гурт удысъя но сиён-юонъя министр уно тырмымтэосты пусйиз на. Вань соос пудо вордонын, йӧл кысконын. Верамын вал колхоз ваньбурез утьыны-шыръяны быгатымтэмы сярысь но. Ваньмыз со озьы, дыр. Ма, собере залын пукисьёс но сыӵе югдурез валатэк уг уло. Бусыосы 100 трактор вуоз Кенеше люкаськемъёс ялан возьмаса кадь улӥзы выль министрлэсь таяз арлы чаклам малпанъёссэ. АПК-лэн ужамез пыкъяськоз Удмуртиез 2001-тӥ арын азинтонъя программа вылэ, шуиз министр. Отын меӵак пусъемын, кӧня ю тысь, картофка, бакча сиёнъёс утялтоно, етӥн будэтоно, кӧня йӧл, сӥль, курег пуз поттоно. Умоятоно кадръёсты дасян политикаез. Солы бюджетын 14 миллион манет висъяны учкемын. АПК-лы техникаен юрттон вылысь чакламын 15-тӥ апрелёзь 100 трактор, нош 15-тӥ июлёзь 100 комбайн басьтыны. Та ужлэсь быдэсъяськемзэ ачиз Президент, пе, чакласа возёз. Туннэ нуналлы республикае вуэмын ни 16 КСК-100 комбайн но 11 трактор. Техника хозяйствоослы вузаськоз лизинг амалэн. Со понна нырысетӥ взнос тыронэз Правительство ас вылаз басьтоз. Озьы ик юрттэт сётэмын луоз техникаез РТП-ын тупатъян понна. Туэ бадӟымгес саклык висъяськоз ӟеч пудо выжы уськытонлы. Та ужен умой выро Воткинск но Балезино ёросъёсын. Со дыре ик солэсь пумен палэнско ни Можга, Завьял, Сарапул ёросъёсын. Ӟеч пудо выжы уськытон ужъёсын вырон понна бюджетысь 8 миллион манет висъяськоз. Сомында ик коньдон учкемын сётыны таза (элитной) кидыс дасян понна. "Етӥн" программаез уже пыӵатон понна висъяськоз 17 миллион манет. Тулыс бусы ужъёсты ортчытон понна огъя 860 миллион манет коньдон кулэ луоз. Нош вань хозяйствоослэн кынарзы чотын бусы ужъёслы шедьтыны луоз 500 миллион гинэ. Озьыен, коньдон нош ик уг тырмы. Эстӥськон басьтэмын луоз 80 миллион манетлы, сое хозяйствоослы вузалозы кык огазеяьсконъёс: "Удмуртнефтепродукт" но "АСПЕК". ГСМ-лы дун тазьы тупатэмын: 7100 манет одӥг тонна понна но 5 манет 96 копейка одӥг литр понна. Рынокын вузан дунлэсь со ӧжытгес луэ. Техникаез бусы ужъёслы дасян вылысь, нимысьтыз ӵошатскон ялэмын. Нырысетӥ но кыкетӥ интые потэмъёслы висъямын луоз быдэн одӥг трактор. Тӥни сыӵе ужъёсты быдэстыны чакламын 2001-тӥ арын. Пыӵалозы-а соос улонэ яке бумага вылэ гожтыса гинэ кылёзы-а? Таиз вань кивалтӥсьёс бордысь потэ ини. Нош гурт калык ужаны дышемын, сое азьпала валтыны гинэ быгатоно. Т. Банникова. Удмуртилэн Президентэз А. Волков оскытӥз: тулыс бусы ужъёсы потытозь, гуртъёсы 100 трактор вуоз. Гурт удысъя министр В. Невоструев. Туспуктэмъёсыз В. Беломорскихлэн. Продается сено в рулонах. Обращаться в Вавожский р-он по тел. (255) 5-83-43, после 18.00. Пудо будэтӥд - вуза ачид - Тӥ мыным котыръятэк вералэ, ку огшоры адями азбараз шуген будэтэм пудозэ городысь базарын ачиз вузаны быгатоз? - Президент Александр Волков вузкаронъя министрлэсь Пётр Пономарёвлэсь мадемзэ куспетӥ кароно луиз. - Ну, та ужпум шуг, вузкарон интыос огкылъёсъя арендае сётэмын, озьы ке но, ми МВД-ен ӵош ужрадъёс кутом... - Тазьы кенешом, - Президентлы нош ик кыл вискы пырытэк ӧйлась. - Тулыс но гужем гуртоос сӥль вузаны уг курадӟо. Но сӥзьылось тӥ рынокын радзэ шедьтыны одно ик кулэ. Кытчы гинэ гуртэ пумиськонэ уд вуиськы, котькытын та пумысен вераськон ӝуто. Мар-о мон тӥлесьтыд документъёстэс соослы люкылом-а? Лэсьтэ вань луонозэ - сӥзьыл крестьян калык сӥльзэ ачиз вузаны мед быгатоз. ... Президент дорын кык арнялы огпол ортчытъяськись кенешонъёс сяме пыӵало ни. Министръёс, мукет кивалтӥсьёс отын ас удысъёсазы кылдэм югдур понна кыл кутоно луо. Тани толон но уно эшъёслы зол гинэ пӧсяно луиз. Вылӥын верам суред одӥгзэ ужпумез эскеронэз гинэ возьматэ. Но отысь но валаны луэ, выльдэм власть рос-прос басьтӥське элькунамы улон-вылонэз ӟечгес радъян борды. Вузкаронъя министрлы чурыт кыл верамын вал асьме дорысь аракы поттӥсь заводъёс пумысен но. Кызьы тодмо, Россия соосты аслыз карыны турттэ, озьы республика уно миллион манет ыштон адӟоз. Али та предприятиос Удмуртилэн ваньбурез пӧлы пыро, соин ик асьмелы ваньзэ чаклано, вылӥын кутэм решение элькунмы понна умойтэмен медам берытскы шуыса, пусйиз А. Волков. Вылӥ кивалтӥсь доры люкаськемъёс озьы ик кенешизы тудвуэн нюръяськон, тылпулэсь утиськон, пӧртэм ёзъёсын кутоно норма луись актъёсты лыдэ басьтон но мукет ужпумъёс сярысь. О. Марков. Одӥг писэн кыкез шунско Веранэз ӧвӧл, ожысь но ужысь ветеранъёслы саклыкмы уг тырмы. "Ветеранъёс сярысь" Закон соослы льготаос сётыны чакла ке но, сыӵе луонлык шедьтыны шуг. Тани Глазов ёросын сыӵе льготаосты ас вылазы шӧдо дас процентэз гинэ ветеранъёс: кудӥз дунтэк газ басьтэ (баллонэн), кудӥз - дунтэм пу, сое но туж лыдъяса-мертаса сёто. Кылсярысь, одӥг коркан кык ветеран ке улэ, пу сётӥське одӥгезлы гинэ. Гур, пе, одӥг ук. Берен - вашкалае Ву кыскон насосъёс но гумыос вужмемен, Глазов районысь тросэз гуртъёс вутэк пуко. Коротайын пересьёсгес уло, но соос кыкетӥ арзэ ошмесысь ву нуллоно луо ни. Макшуръёс нош шумпотыса колодчаысь, ошмесысь ву нуллысалзы но... соос ӧвӧл. Али соослы гуртазы бойлерен (вышкыен) ву вортто, но со чылкытлыкез пумысен сюлмаськон кылдытэ. Соин ик али гурт администрациын кенешизы гуртъёсысь колодчаосты выльдон, ошмес синъёсты утялтыса возён пумысен. Та дырозь гуртъёсын улӥсьёс ву понна дун чик ӧз тырылэ, туэысен нош 16-20 манет, пе, тыроно луозы. Со уксё мыноз гумыосты вошъяны, насос басьтыны. Н. Дзюина. Гажано эшъёсы, тодмоосы! Бадӟым тау каремме верасько монэ 60 арес тырмонэным ӟечкыламды но шуныт кылъёсты понна. Туж тау со понна. Тӥляд А.Филипповды. 2001-тӥ арын 21-тӥ мартэ Удмурт Республикая валтӥсь федеральной инспекторлэн С. В. Чикуровлэн приёмнояз луоз телефон пыр меӵак вераськон. Со сӥземын ужбергатонэн герӟаськем ужпумъёслы. 16 часысен 18 часозь 25-40-61 номеро телефонъя валэктон сётозы Россия Федарациысь Юстицияя министерстволэн Удмурт Республикая управленияз. Иж городлэн администрациысьтыз пусъён палатаын ужасьёс, Ужбергатонъя комитетын но ужбергатонлы юрттонъя Удмурт центрын тыршисьёс. Общественной приёмнойлэн адресэз: Иж город, Карл Маркс ульча, 274 номеро юрт. Асьме дорын куноын "Сактонын" - Пол Райдер Кышномуртъёслэн 8 Март праздниксы азьын республикаысьтымы Кунсьӧр кусыпъёсъя министерствоын журналистъёсын пумиськиз дӥсь вуронъя дуннеысь тодмо дизайнер Пол Райдер. Со - Британиысь экспертъёслэн консультантсы. Модельер-магистр лекциос лыдӟылӥз Манчестерысь Салфорд университетын. Али со пиосмуртъёслы но кышномуртъёслы уно пумо выль дӥсь вурыны юрттэ. Кылдытэм дӥсьсэ ярато спортсменъёс но. Усто специалист-дизайнер выль дӥсь вуронъя валэктонъя сётъялляз ни Африкаысь, Австралиын кунъёсын но Италиын. Пол Райдер дорамы ветлӥз, "Сактон" акционер огазеяськонлэн ӧтемезъя. Со чакла 15 пумо выль костюм нуллӥсько, керттэм дэрем кылдытыны. Кызьы пӧрмоз, улон ачиз возьматоз. - Ачим мон туж огшоры дӥсяськисько, - шуэ кыдёкысь куно. - Со мед луоз шуныт, но ёркыт медаз луы. Галстук уг нуллӥськы. Мон ведь политик но, кивалтӥсь но ӧвӧл. Пумиськонэ озьы ик ветлӥз "Сактон" огазеяьсконлэн валтӥсь директорез Зоя Степнова. Со шуиз: - Ми ӵуказеез сярысь котьку малпаськом, 1-2 арлы азьпала учкиськом. Ведь огазеяськон 20-30 сюрс изделие поттэ. Но котьку нырысетӥ инты басьтэ классика - калыклы дышем дӥсь. Милям 4 художникмы-модельермы улонлэсь бере уг кылё. Арлы быдэ кык пол паськыт вузкарон ортчытъяськом. Вузъёсмы вань ни Москваысь "Удмуртия" вузкарон юртын. Дӥсьёсмы дунтэм вузасько. Москвичъёс куддыръя паймо, ява". - Бен, ушъяськемлы медаз пӧрмы, - ватса Зоя Ивановна. - Но куд-огез дӥсьмы басяськисьёслы уг кельшы. Сое ми котьку син азямы возиськом. Та ужпумез эскериськом кызьы ке магазинъёсын, озьы ик рынокъёсын. Тани алигес вузкарыны ветлӥм Перме но Екатеринбурге. Берлояз 500 сюрс манетлы вузкарим. Кӧняез ке дӥсьмы миым Россиысь 100 усто вузъёс пӧлы пыртэмын но медаль сётэмын. Кызьы сое умоен уд лыдъя. Огъя вераса, "Сактон" огинтыяз уг сылы, ялан азинске. Пол Райдер но татчы юнме шорысь ӧз лыкты. Дорамы соос вуиз Марий Республикаысь. Тӥни озьы кусыпъёсмы юнмало, со пайдаен гинэ берытско. Г. Романов. Таза улон СПИД котыръя дуннеез СПИД-эн висисьёслэн лыдзы син шорын йылэ. Котькуд минутлы быдэ дуннеысь дас одӥг муртлы ВИЧ-инфекция палаське. Та кышкыт инфекциен курадӟисьёс пӧлысь ӝыныез тямыс-дас ар куспын СПИД-эн висьыны кутске, нош дас одӥгетӥ араз - кулэ. Туж ӧжытэз гинэ ВИЧ-инфекциез мугоразы нуллӥсьёс кызь арлэсь кема улыны быгато. Эпидемия ог 18,8 миллион адямилэсь улонзэ талаз ини, эшшо 34,3 миллионэз та кышкыт черлэсь курадӟе. Со пӧлысь 5,4 миллионэз ВИЧ-инфекциез 1999-тӥ арын "шедьтӥз". Дуннеысь вань калык СПИД-лы пумит вакцина шедьтонлы осконэн улэ. Но 2000-тӥ арын июле Южной Африкаын ортчем Дуннеысь СПИД-эн нюръяськонъя 13-тӥ конгрессын верамын вал, матысь сизьым ар ӵоже таӵе эмъюм уз лу нв шуыса. Та малпанэ ик вуо клык куспо экспертъёс. Висёнлэсь мургес лэзиськемзэ ӝегатӥсь препаратъёс бен вань, но соос туж дуно сыло. Со сяна, котькуд висисьлы уг но тупало. Тани США-ын араз 500 сюрс адями 5 миллион доллар тыр эмъяське. Асьме дорын поттэм но кунгож сьӧр эмъюмъёсын (тимазидэн но фосфазидэн) Россиын ог 600 ВИЧ-инфекциез "нуллӥсь" адями эмъяське. Тужгес тросэз эмъяськисьёс наркотикъёсын "кушласько". Туннэ Россиын ВИЧ-инфекциен паласькемъёс ог 94 сюрс лыдъясько, со пӧлысь 436-ез висе СПИД-эн. ВИЧ-инфекциез нуллӥсь анайёслэсь 467 пинал вордскемын. Тросэз егит анайёс озьы ик наркотикъёсын "кушласько", нылпиоссэс будэтонлэсь палэнско. Асьме республикаямы туннэ нуналлы 446 ВИЧ-инфекция паласькемъёс тодмо, 11 мурт кулӥз, со пӧлысь 5-ез - СПИД-лэсь. Висисьёс шараямын шаерысьтымы 11-аз ёросын но 4 городын. Пӧлазы 343 - пиосмурт, 103 нылкышно, 13-24 аресозь - 308 адями, 25 ареслэсь мӧйгес - 137 мурт. ВИЧ-инфекциез нуллӥсьёс пӧлысь 334-ез нокытын уг ужа, 61 рабочий, 13 служащий, 33 школаосын но училищеын дышетскись, 4 студент. Тужгес кышкыт югдур кылдэмын Глазов, Ижевск, Сарапул городъёсын, Балезино, Яр ёросъёсын. ВИЧ-инфекциез нуллӥсьёс пӧлысь 415-ез (93 процентэз) та через наркотикъёс пыр шедьтӥллям. Наркотикъёс пӧлысь шаерамы тужгес паськыт вӧлмемын героин. Та шузимытӥсь сурет адямиез ас ӧраз туж ӝог кыскыны быгатэ. Глазове, отысен ини Балезино, Яр, Юкаменск но артысь мукет ёросъёсы кизер героин вуэ. Нош шаермылэн шор но лымшор палъёсаз со ӵемгес порошокен вӧлме. Наркотикъёсты ӵемгес вӧлмыто базаръёсын, школаосын но мукет дышетскон заведениосын, баръёсын, дискотекаосын. Туэ январь-февраль толэзьёс куспын гинэ республикаямы 112 муртлы ВИЧ-инфекция паласькиз. Ар куспын таослэн лыдзы 1000-лэсь ятыр луоз, вылды. Россия Федерациысь СПИД-эн нюръяськонъя центрысь специалистъёслэн чакламзыя, 2001-тӥ ар пумын Россиын ВИЧ-инфекциез нуллӥсьёслэн лыдзы 300-400 сюрсозь вуыны быгатоз, нош кык ар ортчыса, та лыдпус миллионлэсь ортчоз. Матысь дыре, кык-куинь ар куспын, ВИЧ-инфекцилэн нырысетӥ тулкымез ортчоз, отчы трсгес шедёзы наркоманъёс. Нош ньыль-вить ар ортчыса, та инфекция паськыт вӧлмоз пиосмуртъёслэн но нылкышноослэн матысь кусыпъёссы пыр. Соин ик туннэ асьмелы тужгес но сак кариськоно - та черлэн вотэсъёсаз медам шеде. Россия Федерациын но республикаямы кутэм "Анти-Вич/СПИД" программая 2000-тӥ арын республикаямы калыкез дунтэк эскерон, эмъян ужрадъёс радъямын вал. Кинъёслы ВИЧ- инфекция паласькыны бадӟым кышкытлык вань, соос пӧлын трос валэктон уж нуэмын. ВИЧ-инфекция шаермылэн уй палаз паськыт вӧлмемен сэрен, сопал ёросъёсын эпидемия вӧлмонлы пумит нимысьтыз ужрадъёс ортчытэмын. Отчы пыриськизы республикаысьтымы санитарно-противоэпидемической комиссия, Правительствоысь но ёрос администрациосысь та ужпумъёсын герӟаськем комиссиос. Ижевск, Глазов, Воткинск, Сарапул городъёсын, Балезино, Дэбес, Игра, Яр ёросъёсын ас мылкыд каремзыя но нимтулзэс шараятэк 2 сюрс 374 мурт ВИЧ-инфекцилэсь эскериськиз. Та вакытэ асьмелы ваньзэ лэсьтоно, кышкыт висёнлэсь утиськон понна. ВИЧ-инфекция бордад лякиськоз яке уз, соиз ини ачид бордысь но потоз. Угось та чер паласькыны быгатэ пиосмуртлэн но кышномуртлэн матысь кусыпъёссы пыр, озьы ик кырсь шприцез уже кутыса. Л. Кузелин, Республикаысьтымы СПИД-эн нюръяськонъя центрысь эпидемиологияя ёзэныз кивалтӥсь, тазалыкез утён удысысь дано ужась. Гожтэт ӧтиз сюрес вылэ Гуртъёсын ХХИ даурозь кыдёкын на Редакциямы Алнаш ёросысь Актэмыр гуртысь Николай Иванович Шишкинлэсь ӝог юрттэт сётӥсь ёзъёслэн ужамзылы ӝожтӥськон вуиз. Нырысетӥ феврале пиосмуртлэн давлениез ӝутскем но, нырысьтыз вир кошкыны ӧдъям. Юрттэт курыса жингыртэмлы райцентрысь машина вуымтэ. - Уин дас кык часозь туж трос вирме ыштӥ. Малы пумит луизы мыным юрттыны? - юа со. Та юанлы валэктон сётон понна вуи Алнаш ёрос больницаысь валтӥсь эмъясь Иван Николаевич Колесников доры. - Таӵе кӧтвисёнъёсты милемлы кемалась ӧз ни вераллялэ. Ӝог юрттэт сётӥсь машина нырысь ик пота нылпи ваёно кышномуртъёс, аресозь нылпиос доры, шуккиськон, вир кошкон но сюрес вылын шудтэм учыръёс дыръя. Со нуналэ дас куать ӧтён вылэм, нош ёросын одӥг гинэ машина, соин быръёно луиз. Та дыре сюресъёс умойтэмесь, нош машиналэн азьлань мынэмез, гуртысь потэмез ке ӧз луы мур лымыен, мукетъёсыз висисьёс ма карозы? Корка доразы сюрес усьтымтэен, али висисьёсты ӵемысь носилкаен поттано луэ. Ӝог юрттэт сётӥсь машиналэсь Актэмыре мынымтэзэ тодон вылысь, та учырез лад-лад эскерыны-учкыны малпам. Ӵуказеяз ӵукна гуртэ мынӥсь машинаын монэн ӵош пукиз валтӥсь эмъясьлэн воштӥсез Ф. П. Гирбасов, нырысетӥ феврале ӝог юрттэт сётонын ужам фельдшер И. Н. Алексеева, Байтэрек гурт администрацилэн кивалтӥсез М. Н. Тимашева. Алигес усьтэм сюрес вылын интыен-интыен пелляськем лымы вылтӥ ортчыкумы жалямы сьӧрамы лопата понымтэмес. - Таӵе сюресэз ми умоен лыдъяськом, - ивортӥз Марфида Назаровна. - Пельскем дыръя татӥ уд поты, сӥзьыл но тулыс сюрес вылын шуг-секытъёс кылдо. Гуртэ вуыса, Николай Шишкинлэн коркаез пала пыреммы ӧз луы. Вырӟим пыдын. Куноослы пиосмурт ӧз но паймы кадь. - Гожъяй. Укыр ӝож йӧтӥз угось, - собере висёнзэ мадьыны кутскиз. - Кызь сизьыметӥ январьысен давление тэтчаны кутскиз. Нырысетӥ феврале ӵукна ик виры виямен вазиськи гуртысь фельдшерлы Н. А. Синициналы. Ӝыт дас сизьым час котырын выльысь юрттэт куроно луи. Югытэн шуыса, пиме ыстӥ артэ урамысь юртэ райцентре жингыртыны. Отын фельдшеренымы вераськемзы потэм. Нина Александровна телефон доры ветлэм, берло нош дорам вуиз. Больницае дасяськыса, мон соку конюховкаын сумкаосын машина возьмай. Сюрес отчыозь гинэ усьтэмын вал. Нокин ӧз вуы. Уин кык часозь изьыны ӧй дӥсьты. Ӵуказеяз амбулаторие Байтэреке потай. Бергес ини ёрос больницае ветлӥ. Ӝог юрттэт сётӥсь фельдшер Ирина Николаевна валэктыны тыршиз: - Гуртъёсын фельдшеръёс вань ке, соос жингыртытэк нокытчы ум потаське. Малы ке шуод, алдаса ӧтчанъёс луыло. Кыдёке мынӥськод но, нокыӵе висись тонэ уг витьы. Фельдшеръёс асьсэос юрттыны быгато ке, озьы ик ум потӥське. Тӥ доры но со муген ӧм ветлэ. Куримы фельдшердэс висисез выльысь эскерыны. Тазалыкез умойгес ӧз ке луы, нош ик жингыртэ, вуом, шуи. Нина Александровна кыкетӥзэ милемын ӧз вераськы. Вань та кылэмез радъян понна пыримы медпунктэ. Н. А. Синицина та дыре адямиосты эмъя вал. Кык фельдшеръёс огкыл чаляк шедьтӥзы. Зэмзэ но Актэмырысез, юрттэт курыса, кыкетӥзэ ӧз вазиськылы. - Николай Ивановичлэн давлениез укыр вылӥ ӧй вал ни. Соин но, озьы ик телефон возись адямиослэн тылзы ӝуамтэен, доразы ӧй йыгаськы. Туж алама, гуртлы чаклам огъя телефон улон юртэ пуктэмын. Нош отысь кузёослэн бадӟым пунызы вань на. Медпунктын ке сылысал телефон, утыр ик жингыртысал. Нош тазьы уд тодӥськы: висисьтэ-а учкод, телефон доры-а бызёд. - Шонер, - малпанзэ вера Фёдор Павлович, - ӝог юрттэт сётонын ужась фельдшеръёс телефон пыр но вераны быгатысалзы кызьы эмъян сярысь. Соку гуртысь эмъясьёс но, машинаез возьматэк, висисьсылы пыр-поч юрттыны быгатысалзы. Мынам юанэ кылдӥз гурт администрацилэн кивалтӥсезлы: - Нош малы огъя телефон улон юртэ пуктэмын? - Дунтэмгес усе. - Нош кин уксёзэ тыре, колхоз? - Колхозникъёс. Сӥзьыл но тулыс дэри дыръя урамъёсы тыл ӝуатэммы но телефон понна арлы быдэ котькуд семьялэсь дас-кызь манетэн бичаськом. - Озьыен, уксё шыръямен, гуртоос асьсэлы умойтэм лэсьто. Тӥни кин янгыш, Николай Иванович, телефон но сюрес. Серем но, вӧсь но: Алнаш ёросын куамын укмыс медпунктлы куать телефон кылемын. Куке но со кызь тямыс вылэм. Ваньмыз уксё тырымтэ понна ишкаллямын. О. Кожанова. Кусыпъёс Америка, Америка... Кыӵе луонлыкъёсыз США-ысь университетлэн? Маин бордазы кыско отысь студентъёс? Ма соос тодо Россия, Удмуртия сярысь? Та юанъёслы пыр-поч валэктонъёс сётӥзы В. Е. Шудегов - Удмурт Республикаысь Наукая, вылӥ но шор профессиослы дышетонъя кун комитетлэн кивалтӥсез, В. А. Журавлев - Удмурт кун университетлэн ректорез, А. Я. Волков - Удмурт кун университетысь му вӧй поттонъя факультетлэн деканэз, В. И. Кудинов - та факультетысь ик преподаватель. Соос алигес гинэ берытскизы Америкалэн Соединённой Штатъёсысьтыз, ужазы Флорида штатлэн валтӥсь университетаз. Таяз учыре маин паймытӥз асьмелэнъёсты Америка? В. А. Журавлев: - Флорида штатэн нырысьсэ кусып тупатӥм 1993-тӥ арын, солы кутскон сётӥз историяя факультетмы. Али та ужез мыло-кыдо азинтэ му вӧй кысконъя факультет. Берло дыре гинэ отчы куинь делегация вуылӥз ни: нефтяникъёс, историкъёс, политологъёс, социальной удысъя вуоно специалистъёс. Кык университетъёс куспын мынэ экономикая но политикая курсъёсты нуон но программаос кылдытон ласянь бадӟым уж. Мыным удалтӥз вуылыны космической корабльёсты лэзёнъя центре. 8-тӥ мартэ ӵапак ми азьын инме ӝутскиз "Шатл". Вуылӥм та штатэ интыяськем космической техникалы сӥзем музее. Синмаськи Флоридаысь валтӥсь университетлы, тужгес ик материально-технической база ласянь. 35 сюрс студентлы - 30 сюрс компьютерзы. Сыӵе луонлыкозь милемлы туж кыдёкын на. Кужмо физикая но вычислительной математикая факультетсы, лазерья центрзы. Татысь пумитай одӥг вузын дышетскем тодмоосме но - Россиысь потэм учёнойёсты, преподавательёсты. Соос трос гинэ. Историкъёсын но политологъёсын пумиськылӥм "котырес ӝӧк" сьӧрын. Вераськон мынӥз Россиын кылдэм огъя политической но экономической югдур сярысь. Американецъёс малпамъя, СССР-ез быдтон - быдэс дунне понна туж бадӟым ыштон, трагедия. Россиез со трос дасо аръёслы берлане чигнатӥз, наукаез но музон валтӥсь удысъёсты выжыозяз уретӥз. Выльдӥськонэз музон сямен ортчытыны луысал, странаенымы кивалтысалзы ке экономикаез зол тодӥсь-валась муртъёс. Флорида штатлэн университетаз ми лыдӟим лекциос, вуылӥм пӧртэм экскурсиосы. Ваньмыз понна, сюресэз вераса но, коньдон тыриз та штатлэн администрациез. Удмурт кун университетлы сётэм - 250 сюрс долларъем гранд - со Россия Федерациысь калыкез дышетон удысэзлы висъям гуманитарной юрттэт, шонергес ке верано, технической факультетэз азинтонэ сётэм коньдон. Та амалэз США кутэ мукет странаосын ӵош ужанъя но. В. И. Кудинов: - Удмуртиын му вӧй поттонэн мон герӟаськемын 1973-тӥ арысен. Укмысэтӥ арзэ ужасько преподаватель луыса, дасясько инженеръёсты-нефтяникъёсты. Та дыр ӵоже вуылыны кылдӥз ни ог 30 странаосы. Монэ тужгес но шугъяськытэ англи кылэз тодымтэмы. Переводчик пыр вераськон - со вераськон ӧвӧл. Тӥни малы му вӧй поттӥсьёсты дасясь факультетын англи кылъя программаез кык поллы ватсано луим. Студентъёсмы басьто 2 диплом: инженер-нефтяник но переводчик. Ма сётоз та гранд асьмелы идеология ласянь - тодмо ӧвӧл на. Огез тодмо: Флорида штатын му вӧй уг потто, но татысь студентъёс та удысэз туж мыло-кыдо дышето. Мыным яраз соослэн котьмае тодыны тыршемзы, инкуазьлэн чылкытлыкез сярысь шугъяськемзы. Юан сётъязы Байкал ласянь но: ма луоз та чылкыт тыэн азьланяз? Жаляса верано, Америкалэсь асьмеос кылим ни 50-70 арлы - котьма ласянь, шутэтсконэз но вераса. Пичигес гинэ Орланда городлэн ньыль паркез, кыӵе но пӧйшуръёс, тылобурдоос отын ӧвӧл! Соос пыр будӥсь пиналъёс дуннеез валаны дышо. Мон, арлыдо адями, туж синмаськи чылк-чылк тыметын уясь льӧль фламинголы. А. Я. Волков: - Грант луонлык сётӥз куать пӧртэм программа кылдытыны, куинез быдэсъяське ни Флоридаысь университетэн ӵош. 3 ар куспын чаклам программаез пумаз-йылаз вуттоно. США-е мон кык пол лекция лыдӟыны ветлӥ ни, темаез одӥг: му вӧй поттон удыс. Флоридаысь валтӥсь университетын али дышетско ни но дышетскозы на асьмелэн студентъёсмы-отличникъёсмы. Отчы бырйиськом англи сямен ӟеч вераськись, соос ужало ни переводчиктэк. Вуоноосыз бадӟым пумиськонъёс-кенешонъёс ортчозы туэ май толэзе, сентябре но вуоно арын январе. Пусйыны кулэ, Удмурт кун университетысь куинезлы профессоръёслы сётэмын сертификат, соя США-ысь университетын лекциос лыдӟыны лэземын. Ми понна со бадӟым дан. В. Е. Шудегов: - Америкае ветлон оглом умой мылкыд кельтӥз. Ижевскысь делегациез пумитаз Флорида штатлэн губернаторез Д. Буш, туала президентлэн выныз. Вакчи дыр куспын быдэстэмын, шуыны луоз, бадӟым программа. Туж кельшиз университетлэн ужан амалэз. Ӟеч профессор асьме дорын лекция лыдӟонзэ йылпумъя ке гырлы куараен ӵош, отын лекцилы висъяське 20 минут. 30 минутэз - студентъёслэн юанъёссылы. Милемыз ӝог дышетӥзы ужан радлыксылы: лыдӟоно лекциосмес куспетӥ карыса, юан вылэ юан сётъяны кутскизы. Шӧдӥське, Америкаысь егитъёслэн тросгес тодэмзы потэ Россия сярысь, ма асьмемын луиз СССР-ез куашкатэм бере. Кызьы али улӥськом. Дорысьтымы отын дышетскись студентъёслы юанъёссы ӧй вал, шуыны луоз. Мынам сюлмам тужгес но йӧтӥз университетлэн столовояз сюдэмзы. Кыӵе но емыш ӧвӧл! Студентъёс мылкыд каремзыя нуналаз 5-6 пол сисько. Асьмелэн ке озьы луысал... Егит муртлы ӵапак та вакытэ кулэ ук ӟеч сиён, витаминъёс. Номыр уд шуы, тазалык сярысь сюлмаськон соос дорын валтӥсь интые пуктэмын. Орланда - одӥг этажъем город, общественной тарнспорт трос ӧвӧл. Соин ик ваньмыз сямен студентъёс ветло асьсэ машинаосын. Стипендия умой тыро, университетын дышетскисьёс данакез ужало. Россиысь студентъёслы кельше улыны кунокуаын, асьсэос сиён пӧрало. Озьы дас поллы дунтэмгес усе. Асьмелэсь егитъёсмес но соослэсь ӵошатыса, эшшо одӥгзэ пусъеме потэ: студент-американец вань быгатонлыксэ сётэ мур тодон-валан басьтон понна, мукет сямен вераса, со тодэ: ӟеч дышетскытэк, умой ужан инты уз шедьты. Ас кужыменыз улонэ сюрес лёге. Нош асьмелэн пиналъёсмы вузын дышетскыкузы но пуко на мумы-бубуоссылэн чырты сьӧразы. Кык университетъёс куспын тупатэм эшлыко выж юрттыны кулэ вылӥ быгатонлыкен специалистъёсты будэтыны. 250 сюрс доллар сётэмын куинь арлы ужаны, одӥг парта сьӧрын пукыны, лекциос лыдӟыны. Л. Медведева. Удмурт кун университетлэн ректорез В. А. Журавлёв но Флорида штатысь валтӥсь университетысь профессор Крипо Ричард космической техникая музейын (США, Флорида). Арня куспын кык праздник Кыӵе гинэ писпуос, куакъёс, турын-куар уг будо Буммаш тэльын, Пазял шурез кылдытӥсь одӥг чылкыт ошмес вадьсын?.. Пужым, кыз, ньылпу, кызьпу, беризь, бадяр, лулпу, пипу сярысь веранэз ик ӧвӧл: соос татын пумтэм-йылтэм. Тэлез чебер каро на мульы сётӥсь, сяськаяськись палэзьпуос, шупудъёс, льӧмпуос, легезьпуос, пашпуос но мукетъёсыз. Нош гужем кыралъёсын синмаськыто италмас, инвожо, купанча, гырлысяська, тӧдьы сяська. Валамон ини: таӵе узыр тэльын пӧйшуръёслы но, тылобурдоослы но улыны умой. Та нюлэс город пушкын ке но, отын ӵемысь пумитаны луэ койыкез, луд кечез, коньыез, чайыез, кыр парсез, ӵушъялэз, юрмегез. Та инты бордаз кыске городын улӥсьёсты. Татын соос шутэтско, турнало, пӧртэм мульыос но губиос бичало. Ми, "Инвожо" но "Ожо-вожо" ансамбльёсы ветлӥсьёс, татын дас арлэсь кема ини пӧртэм вашкала праздникъёсты но ортчытъяськомы. Тани туэ но ми, ожо-вожоос, эшъёсынымы ӵош люкаськылӥмы Вӧйдырез ортчытыны. Татӥ куас сюрес ортче, соин отчы вуыны шуг ӧвӧл. Тросэз удмуртъёс дырпусъя (календарья) улыны кутскизы ог сю ар талэсь азьло гинэ. Календарь ӧвӧл дыръя чаклаллязы куазез. Соя ужъёссэс быдэсъязы, праздникъёссэс ортчытъязы. Вашкала йылолъёсты улӟытӥськомы бере, праздникъёсмес но лэсьтӥськомы, календарь шоры учкытэк. Ӟучъёс Вӧйдырзэс феврале ке пусйизы, ми сое 3-тӥ мартэ ортчытӥмы чебер ошмес дорамы. Мон, кузпалъёс Алевтина но Юрий Николаевъёс, Раиса Туйматова, Николай Рябов татчы сюресэз кемалась тодӥськомы ини, нош Людмила Егорова, Альберт Нуриев, Сергей Нурутдинов но мукетъёсыз татын нырысьсэ вал. Валамон ини: праздник выль эшъёсмылы но яраз. Ческыт пӧрамъёсты оскалтэм бере, кырӟанъёс-шудонъёс-эктонъёс но шулдыргес луо. Тэль котьку бордаз кыске милемды: татысь ми бертӥськомы, кужым люкаса, капчи мылкыд басьтыса. Тазьы пумитамы нырысетӥ тулыс праздникмес но. Кӧня ке нунал улыса, ожо-вожоос пыриськизы нылкышносмес данъянэ. Кӧня ке эшъёсмы мынӥзы Чугун сюрес лэсьтӥсьёслэн культура дворецазы: отын угось сцена вылэ потаз огез арганчимы - Вячеслав Чирков. Со кырӟаз но, эктӥз но, арганэн но шудӥз, нош концерт бырем бере, Дамир Шайхутдиновен ӵош фойеын кема шулдыртӥзы на калыкез. Тросэз эшъёсмы нылкышно праздникез пумитазы Драмая удмурт кун театрын. татын сцена вылэ потазы "Айкай", "Инвожо", "Эктон корка". "Ожо-вожоос" сцена вылын ӧй вал ке но, Юрий Николаев арганчимы вӧзын соос лыктэмъёсын ӵош бер ӝытозь шулдыръяськизы. Озьы одӥг арня куспын ми понна кык праздник ортчиз. Куанер ке но улӥськомы, мӧзмонлы, куректонлы ум сётскиське. Али сцена вылэ трос ум потаське, озьы ке но, калыкез шулдыртыны быгатӥськомы. Со понна тужгес бадӟым тау арганчиосмылы Юрий Николаевлы но Вячеслав Чирковлы. Тол праздникъёс бере вис вал, вуизы тулысъёсыз. Азьпалан - Дӧдьы куштон, Будӟым нунал, Йӧ келян, Гуждор... Н. Возисов. Политика Арня ӵоже шаерын, странаын, дуннеын Кылем арня вискын шаерамы вуылӥзы Москваысь бадӟым куноос: Военно-Морской Флотлэн главкомез Владимир Куроедов но РАСУ-лэн кивалтӥсез Владимир Симонов. Соос кыкназы ик тунсыкъяськизы республикаысьтымы ож тӥрлык поттӥсь предприятиосын. Тани Владимир Куроедов вуылӥз Воткинскысь машина лэсьтон заводэ. Отын со вераськон нуиз флотлы кулэ луись ож тӥрлык сярысь, оскытӥз, воткаослы заказъёс луозы шуыса, заводын ужасьёс соосты ӟеч быдэстыны гинэ, пе, мед быгатозы. Нош кыӵе ож тӥрлык поттозы Воткинскын, главком ӧз шарая. Владимир Симонов республикамылэн кивалтӥсьёсыныз кенешиз Ижысь электромеханической завод пумысен. Со пусйиз, та вакытэ, пе, предприятиын коньдон ужпумъёсъя тырмымтэосты палэнтыны выро, азьвыл кивалтӥсьёс соосты, пе, данак лэсьтӥллям. РАСУ-лэн валтӥсь директорез озьы ик пусйиз, "Купол" ужлы ёрмыса уз пукы шуыса. Россиысь парламент ортчем арня дунъяз, шуыны луоз, Касьяновлэн кабинетэзлэсь ужзэ. Азьвылгес Правительствоез отставкае келян сярысь ӵектонэн коммунистъёс потӥзы вал. Шӧдтэк шорысь соослы дурбасьтӥз "Единство" фракция. Данакезлы "гондыръёслэн" таӵе вамышсы валантэм потӥз, "Единство" угось котьку ик Кремльлэсь ужзэ ӟеч дунъялляз. Нош паймонэз но вылымтэ, куара сётон азьын "Единстволэн" депутатъёсыз мылкыдзэс воштӥзы. Касьяновлэсь кабинетсэ отставкае келяны Дума ӧз быгаты. Тулыс вуыса Правительство "пазьгемын" луоз шуыса малпан ӧз быдэсмы, иське. Возьмалом, тулыс кема кыстӥськоз ук ай. Нош Россилэн Президентэз таӵе шудонъёслэсь пегӟыса сямен кыдёкысь Хакассие шутэтскыны кошкиз вал. Отысь дырызлэсь вазь берытсконо луиз. Чечен боевикъёс Стамбул-Москва рейсъя лобись ТУ-154 самолётэз киултӥзы но Афганистанэ лобыны косӥзы. Талибъёс доры самолёт ӧз вуы, пуксиз со Саудовской Аравие. Та страналэн спецслужбаосыз пассажиръёсты мозмытон вылысь операция ортчытӥзы. Со вакытэ бырыны шедиз кык мурт, соос пӧлысь одӥгез бортпроводница. Западысь журналистъёс пусйизы ни, Владимир Путин, пе, таяз учыре чылкак мукет вал, "Курск" подлодка выён вакытэн ӵошатыса. Со чик ӝегатскытэк Москвае берытскиз. Нош самолётэн луэм кышкыт учыр эшшо одӥг пол возьматэ на, Россилэн Президентэз чечен боевикъёс ласянь шонер уж нуэ шуыса. Ислам экстремизм - кӧшкемыт маке. Со угось выжыоссэ Европае но лэзе ни. Ас вакытаз НАТО, албанецъёслы юрттӥськом шуыса, Белградэз пуштытъяз. Собере ини Югославилэн Президентэз Милошевич кивалтонысь кошкиз. Нош югдур ӧз тупатскы. Косовоын каръяськем экстремистъёс ожмаськон пуромыто ни Македониын. Косовоын Тупаса улон понна контингентэ пырисьёс азе табере ӟырдыт ужпум ӝутске - ма кароно, выль ожмаськон медаз пуромы шуыса. Россилэн кунсьӧр ужъёсъя министрез Игорь Иванов та нуналъёсы Югославие кошкиз, интыяз эскерыны, кыӵе югдур кылдӥз Македониын. Вераны кулэ, 90-тӥ аръёсы Югославия но, Россия выллем ик, векчи кунъёслы люкиськиз. Табере ӵемгес кылпум ӝутскылэ ни выльысь союзной государство кылдытыны. Котьма ке но, дэмен тушмонлэсь но утиськыны капчигес. Юлия Александрова. Юрттозы коньдонэн 19-тӥ мартэ Удмурт Республикалэн Президентэз Александр Волков пумиськылӥз Россиысь Сбербанклэн Западно-уральской банкезлэн кивалтӥсеныз Владимир Верхоланцовен. Александр Волков но Владимир Верхоланцев кенешизы Удмурт Республика но Россия Федерациысь Сберегательной банк куспын ваче кенешон сярысь Протокол гожтон пумысен. Протокол чакла Удмуртилэсь экономиказэ огсыр азинтыны, банклэсь Удмуртилэн экономикаеныз ужъёсты кужмогес нуыны, калыкез банк ужъёсы оскымонгес кыскыны. Протоколын пусъемъя республикаын азинтӥськозы банкъёслэсь ёзъёссэс паськытатон, банкъёс уногес пыриськозы Удмуртиын нимаз корка лэсьтӥсьёслы льготаен коньдон висъян уже. Вань ужпумъёсты рос-прос эскерем бере, Удмурт Республика но Россия Федерациысь Сберегательной банк куспын Протокл гожтэмын. Удмурт Республикалэн Президентэзлэн но Правительстволэн пресс-службазы. Кун Кенешын Закон тузонэн медаз шобырскы Удмурт Республикалэн Кун Кенешаз кылдытэмын 9 ялан ужась комиссия. Огез соос пӧлысь - Бюджетъя, выт тыронъя но коньдон ужпумъёсъя - валтӥсьёсыз радын. Та комиссиен кыкетӥ созывзэ кивалтэ 79-тӥ Зура округъя депутат Софья Эльфатовна Широбокова. Со бордысь но потэ кыӵе бюджетэн улоз шаермы, кызьы быдэсъяськозы кутэм законъёс. Трос воштӥськонъёс пыртэмын выт октонын. Комиссия син азяз возе эскерись ёзъёслэсь ужамзэс, янгышъёсты тупатон понна кутэ нимысьтыз ужрадъёс, прокуратурае вазиськонэз вераса но. Законэз тӥян учыръёс сярысь иворто адямиос, комиссие быръем депутатъёс асьсэос но ӵем потало интыосы, пумиськыло бырйисьёсын. - Софья Эльфатовна, законъёсты быдэсъян капчиен уг сётскы. Кин тӥледлы юрттэ? - Комиссие быръемын, мон шуысал, вылӥ быгатонлыко адямиос, зэмос профессионалъёс. Соосын ужаны капчи. Кылем арын гинэ комиссия 11 пол люкаськылӥз, сэрттӥз-пертчиз туж кулэ ужпумъёсты. Кык пол интыосы потам - Ижысь "Продторг" но Игра районысь хозяйствоосы, предприятиосы. Отын нырысь ик эскерим бюджетэн но коньдонэн герӟаськем ужпумъёсты, пумиськылӥм активен. Милемыз шугъяськытэ пичи ужбергатонлэн азинскемез, та удысысь вытлэн бюджетэ вуись быдӟалаез. Макем пайдаё со бергалоз, сокем трос коньдон лыктоз интыосысь но республикаысь бюджетэ. Мон быръемын Удмуртиысь Эскеронъя кун комитетлэн коллегияз. Та комитетэн, министерствоосын но ведомствоосын ӵош ёросъёсысь администрациосын дышетон радъям, депутатъёсын пумиськонъёс ортчытъям. Эшшо огзэ пусйысал на: комиссие быръемъёс туж сак ужало Россия Федерацилэн Кун Думаысьтыз вуэм законъёслы инъетъёсын. Кылем ар ӵоже ми эскерим 280-зэ. Соосъя сётэм дэмланъёсмес но тупатонъёсмес ыстӥм Россилэн парламентаз. - Кутэм законъёс ваньмыз-а улонэ пыӵало яке куд-огез "вуныса" кылё-а? Кызьы чакласькоды соослэсь быдэсъяськемзэс? - Законъёслэсь пумаз-йылаз вуэмзэс эскерон - со милям валтӥсь ужмы. 2000-тӥ арын комиссия пыр-поч учкиз правительствоен кутэм вань постановлениосты но распоряжениосты, кудъёсыз герӟаськемын вал бюджет сярысь законэн. Ми пыр потӥз 430 документ, шараяськизы тырмымтэос но. Соос пӧлысь данакез тупатэмын вал. Кӧня ке пол кутскыса эскерим сюрес понна выт октонэз но бюджетэ пырисьтэм мукет фондъёсты. Умоен пусъемын медицинской страхованиея Удмурт территориальной фондлэн ужамез, куд-ог янгышъёссы вань на. - Кыӵе дунъет сётысалды Эскеронъя кун комитетлы? - Оглом учкыса, комитет трос лэсьтэ, уката но пайдаё ужаз 2000-тӥ арын. Эскерись ёзъёс ас интызэс шедьтӥзы, шуыны луоз ни. Милям комиссимы Эскеронъя комитетэн юн кусып возе. Огез жаль, законодательствоез пумаз-йылаз вуттымтэен, прокуратурае келям юанъёслы кулэезъя валэктон уг вуы. Вераськон мынэ бюджет коньдонэз интыосын тус-тас карон учыръёс пумысен. Со сярысь кылпум поттэмын луоз Кун Кенешлэн вуоно сессияз но. - Софья Эльфатовна, кызьы быдэсъясько республикаын кутэм целевой программаос? - Комиссилэн заседаниосаз ми эскерим соослэсь куд-ог инъетъёссэс, кылсярысь, юон вуэн герӟаськемзэ. Жаляса верано, кытын но отын, тужгес ик му вӧй поттон районъёсын, юон ву сураськемын сылал вуэн. Вужмем техника тае эскерыны уг вормы ни, ӝегатскытэк кутыны кулэ калыклэсь тазалыксэ утёнъя ужрадъёс. Эскеремын "Удмуртиысь егитъёс" программа. Татын но шекъёс шараяськизы: бюджетысь висъям коньдон малы ке ятыргес кошке аппаратэз возёнлы, интыосы ӧжытгес вуэ. Чурыт вераськон мынӥз республикаын 1999-тӥ-2000-тӥ аръёсы ортчытэм приватизация пумысен. Кутэм программая, сое быдэстонъя нокыӵе валэктон, экономика ласянь отчёт ӧм шедьтэ. Валантэмез татын трос гинэ. Куд-ог воштонъёс пыртэмын инкуазез утёнъя фондлэн ужезъя. Ми чутрак пумит та фондэз быдтонлы, озьы ик вань луонозэ лэсьтом, нюлэс хозяйствоя комитетэз утён понна. - Софья Эльфатовна, ортчемез ар республикалэн бюджетэз понна огез ӟечез вал. Нош туалаез сярысь ма вераны луоз? - Январь-февраль толэзьёсъя ке учконо, арлэн кутсконэз умой. Вытъёс чотын гинэ бюджетэ 1 миллиард 840 миллион манет пала коньдон люкаськиз, со пӧлысь 48 процентэз кошкиз федеральной бюджетэ. Кылемез - республикалэн но районъёслэн бюджетъёсазы. Нимаз адямиос сярысь ке верано, соослэн вытсы туэ 4 поллы тросгес. - Бюджетэ пунэмен тыронъёс (недоимка) бадӟым-а? - Бадӟым - 1 миллиард пала. Городъёс пӧлын та ласянь висъясько Ижевск, Сарапул, Воткинск, Глазов, Можга. Районъёс пӧлын - воткаос но можгаос. Мукетъёсызлэн тыронъёссы пичиесь. Дыр ӝог ортче. Ӝоген ужано луоз ни 2002-тӥ арлы бюджет бордын... - Выльзэ бюджетэз кутомы ни выль законопроектъя, Удмуртилэн Бюджетъя выль кодексэз вылэ пыкиськыса. Сое эскерон мыноз ни матысь дыре. Мынам малпанэ одӥг: кутэм закон мед ужалоз калык понна, тузонэн шобырскыса медаз кылльы. Л. Медведева. Лыдӟись вера малпанзэ Зэмос вераськонэз кылзэм потэ "Ингур" радиоез кылзыса, туж мылкыд ӝутске. Асьмелэн но кырӟанъёс вань ини, нош веранъёс малы ке но ӧжыт. Тани басьтом авторской нимам передачаосты. Ӟуч кылын соос ог вить-куать вань ик, удмуртэз чылкак одӥг-кык гинэ. Тани Милитина Гаврилова дася "Пумиськонъёс". Вань на "Уй кизилиос" нимам передача, туж тунсыко маке! Валериан Исламгариев умой нуыны быгатэ сое, ӧтем муртъёс но туж могаса уг уло, вераны быгато. Таиз передача али шер потаны кутскиз. Быдтыны ӧз быдтэ ке но, пуктэм дырызъя сое ӧжытэз кылзыны быгатэ. Малы бен асьмеос ум быгатӥське шедьтыны зэмос авторской передачаосыз? Мар-о асьмелэн ӧвӧл ни-а: мар-а ас малпанзэс, ас адӟемзэс вераны быгатӥсьёс? Оло, кин ке соосты кутыса возе? Кивалтӥсьёс пумит маке вераны шедьтозы шуыса кышкало, вылды. Азьло, коммунистъёс дыръя, ас малпанзэс шара верасьёсты нокытчы но уг лэзё вал, малпаллязы, соос куашкатыны быгатозы быдэс строез. Нош таиз власть нимаське демократической. Я, таиз политика ужпумъёслы сӥзем передачаос сярысь. Нош малы ӧвӧл культура но асьме улон-вылон сярысь верасез? Бен, умойзэ кылод ик ай, нош кыӵе шуг-секытъёс кылдэмын, созэ тодыны нокытысь. Кылыны кылӥд ке но, мар та сярысь малпало тодмо но гажано муртъёс - уд тоды. Репортаж гинэ медам лу вылэм со, зэмос вераськонэз кылзэм потэ. В.Петров. Пичи Пурга ёросысь Курчум Норья гурт. Быръён - 2001 Кинлы туннэ оске калык? Уг, нокызьы но уг луы асьмелэн быръёнтэк улэммы. Ӝыны арзэ но сотэк чиданы ум быгатӥське. Огъя ужрад уг ортчы ке, кытын ке коть калык куаразэ сётоно луэ. Кылем арня нуналэ "пӧсь" вал республикаысьтымы куинь интыын. Можгаос асьсэлы выль кузё шедьтӥзы, Глазовын но Ижын Кун Кенеше депутат бырйизы. Таӵе воштӥськонъёс кулэ луизы, элькунмылэсь вылӥ ёзъёссэ выльдэмен. Александр Волков но Наталья Харина выжизы властьлэн быдэсъясь люкетаз. Закон ӧз лэзьы ни соослы кисыязы мандат нуллыны. Нош Можгаын нырысетӥ "ымнырлэн" кабинетэз бушаз, Игорь Семеновез Кун Кенешлы тӧрое быръемен. Нырысь-валысь малпан кылдӥз вал, таиз "пичи" быръён шыпытак ортчоз шуыса. Озьы пӧрмиз Глазовын гинэ. Уго валтӥсь предприятилэн - механикая Чепца заводлэн - генеральной директореныз оградэ султон понна, туж узыр но кужмо луыны кулэ вал. Сыӵеос ӧз шеде. Владимир Рожденственскийлы пумит мыныны нокин ӧз дӥсьты. Ӧвӧл, кандидатъёс вал. Но, меӵак вераса, ньӧмыз поннагес. Соин но, вылды, куаразэс сётыны мылкыд каризы 30 процентэз гинэ бырйисьёс. Соос пӧлысь 77,5 процентэз луизы заводлэн кивалтӥсез понна. Озьы табере Кун Кенешын Александр Волков интые ужалоз ЧМЗ-лэн егит директорез. Чылкак музон югдур кылдӥз Ижысь Чехов округын. Отчы пыро Буммашысь "хрущёвкаосын", нырысетӥ элькун больница палась нюлэскы ышем Пищевик посёлокын, кыкетӥ колония вӧзы интыяськем общежитиосын но баракъёсын улӥсьёс. Огъя вераса, курадӟонэз нуналлы быдэ адӟись муртъёс. Татын мандат понна нюръяськиз куать адями - быдэн куинь воргорон но кышномурт. Азьлоез депутат шаерысьтымы валтӥсь гинеколог вал бере, соин, лэся, кужымзэс мертаны малпазы кык медикъёс: Татьяна Брызгалова, нылпи поликлиникаысь врач, Ижысь Думалэн депутатэз но удмурт эмъясь, Медициная академиысь дышетӥсь Евгений Никитин. Нюръяськонэ пыриськизы азьло быръёнъёсын кыдам эшъёс но - Владимир Щекурин, "Удмуртская ассоциация предприятий" нимо тодмотэм огазеяськонлэн кивалтӥсез но Владимир Щелконогов, юртъёсы шуныт сётӥсь предприятилэн директорез. Соос 1999-тӥ арын но шудзэс утчазы - соку ӧз шедьтэ. Таяз учыре малпанзэс быдэстон борды рос-прос басьтӥськизы. Нырысетӥез усьтӥз общественной приёмной, ортчиз вань юртъёстӥ, пыраз данак квартираосы, бырйисьёслы арнялы быдэ сямен газет вуылӥз. Кыкетӥезлэн но тусбуйыз калыклы тодмо луиз. Отын но татын ышылэмын вал солэн ӝуткась ӧтёнъёсыз. Сокем чупрес выремезлэсь округысь мукет кандидатъёс кышкатскизы, лэся. Кин ке но "сьӧд" сюрестӥ вамыштоно кожаз. Мандат басьтыны турттӥсьёс пӧлы пыриз Нина Щелконогова. Сое кыре поттӥсьёс малпазы, вылды, бырйисьёслэсь йырзэс огкадь фамилиосын суран вылысь. Куатетӥез кандидат вал та округлэн улосвылаз интыяськем 69-тӥ школалэн директорез Любовь Зайцева. Сюмси ёросын вордскем удмурт кышномурт калыкез дышетонын кемалась ужа ни, ӟеч тодэ удыссэ, адямиослэсь шугъяськонъёссэс. Гажало сое анай-атайёс но. Соин ик валэктон ужез радъяны, пумиськонъёс ортчытъяны солы шуг ӧй вал, дыр. Юрттӥсьёсыз но уно гинэ люкаськизы. 18-тӥ мартэ бырйыны лыктыны быгатысал округысь 12926 мурт. Куать часын ӝытазе соос пӧлысь ог 22 поцентэз гинэ куаразэ сётӥз. Кышкытлык кылдӥз, законын чаклам мында (25 процент) уз люкаськы шуыса. Озьы ик луысал, тямыстон кык мурт (!) быръён участокозь ӧй вуысал ке. Ярам ини, инмар утиз кадь. 1265 адями каразэ сётӥз школалэн директорез понна. Владимир Щекуринлы оскемзэ возьматӥз ог 600 мурт, укмыс бырйисьлы ичигес луизы Татьяна Брызгаловалэн дурбасьтӥсьёсыз. Соослэсь сю муртлы бере кылиз Владимир Щелконогов. Асьме врач (нялтас пусйыны кулэ: быръён кампания вакытэ солы дурбасьтӥзы коммунистъёс) 137 куара люказ. Сомында ик адямиос ваньмызлы пумит луизы. Тодмотэм Нина Щелконогова но пайзэ басьтӥз - 35 мурт со пала кариськиз. Тӥни сыӵе суред. "Город" но "республика" куспын ялымтэ ӵошатсконын вормиз кыкетӥез. Вера-а та учыр, ар ортчыса но мэрилэн кужымез лябгес луоз шуыса? Кин тодэ ини. Котьма ке но, Ижлы кузё быръёнлы дасяськонлэсь мынэмзэ уноез шӧдӥзы ни, вылды. Огъёсыз курлало кырсь пӧлы выем городэз, соосыз весь йыркуръясько элькунлэн кивалтӥсезлы. Макем матэгес луоз мэр быръён нунал, сокем ӟырдытгес ӧръяськоз та вожвылъяськон. Озьы луоз шуыса возьматӥз Можгалы кивалтӥсь быръён но. Татын кузё кариськон понна кужымзэ мертаз ньыль мурт. Вормыны луонлыкез вал кыкезлэн - городысь жилищно-коммунальной хозяйстволэн директорезлэн Сергей Пантюхинлэн но Удмурт промышленно-сроительной банклэн президентэзлэн Александр Соловьёвлэн. Таос куспын нюръяськон секытэн мынӥз. Уго котькудӥзлэн тыбыр сьӧраз сылӥзы республикаысьтымы политикаын валтӥсь кужымъёс. Нырысетӥезлы ватытэк дурбасьтӥз Игорь Семенов, соин одӥг предприятиын кема дыр ӵоже ужам мурт. Кыкетӥзэ город кузёын адӟыны туртто вал музон вылӥ кивалтӥсьёс. Юнме шат телеканалъёсын кылем арня куспын потӥзы ЖКХ-лэсь кивалтӥсьсэ сьӧдмась кӧня ке адӟытонъёс? "Ожмаськон" тазьы йылпумъяськиз: 18827 мурт пӧлысь 9709-эз (51,6 процент) куаразэ сётӥз Сергей Пантюхин понна, 38,2 процентэз бырйисьёс дурбасьтӥзы банкирлы. Пусйыны кулэ созэ но. "Черный пиар" шуонысь олокыӵе но амалъёсты табере тодӥзы можгаос но. Кылсярысь, кандидатэ ӵектэмын вал Пантюхинлэн "кыктоез" - сыӵе ик нимын-фамилиен адями. Кинлы ке но кулэ вал озьы кыскыны Сергей Аркадьевичлэсь куаразэ. Малпамъя ӧз луы. Быръёнъя комиссия кыкетӥзэ Пантюхинэз регистрировать ӧз кары. Кыӵе огъя малпан кылдэ, арня нуналэ ортчем быръёнлы йылпумъянъёсын тодматскыса? Кинлы оске туннэ калык? Жаляса верано луиськом: адямиослэн ӟеч воштӥськонъёслы осконзы берло дыре кулэсмиз. Со сярысь уг вера шат данак бырйисьёслэн куаразэс сётымтэзы? Нош участоке лыктӥсез дурбасьтэ солы тодмо юн кивалтӥсьлы - пиосмуртлы яке ас бордаз маин ке кыскыны быгатӥсь кышномуртлы. Кандидатэз ӟеч тодон - вормон понна кулэ луись одӥгез валтӥсь курон. Редакциын ужасьёс ӟечкылало быръем эшъёсты но сӥзё соослы азинсконъёс. И. Лебедев. Ӝужась кизилиос Зориз! Шаерысьтымы укмыстон пала нылъёс но пиос пыриськизы республикаямы ялэм "Ӝужась кизилиос" конкурсэ. Радъязы но ортчытӥзы сое удмурт егитъёслэн "Шунды" дэменлыксы, республикаысьтымы Егитъёсын ужанъя кун комитет, Калыкъёсын ужан политикая но Культурая министерствоос. Удмурт эстрадаез яратӥсьёс нырысь ӵошатскизы районъёсазы, нош 17-тӥ мартэ устоосыз пӧлысь устоосыз потӥзы Ижевскысь "Аксион" культура дворецлэн сцена вылаз. Кырӟасьёслэн арлыдзы пӧртэм - куатьысен кызь витёзь. Но пичиез но, бадӟымез но сюлмаське огкадь: пыдесъёссы куалекъяло, самой секыт куплетын куаразы быре... Юкаменскысь 9 аресъем Оля Ипатова шат нокинлэсь но, номырлэсь но уг кышка? Уть кыӵе сэзь сцена вылэ потэ. Со ик песянай сярысь кырӟанэныз усьтэ конкурсэз. Чебер кырӟа, куараез кужмо. - Та ик вормоз, - шуэ вӧзам пукись арлыдо пиосмурт. - О, ма, соос туж трос кузя ай, - йылпумъянъёс лэсьтыны дыртэмезлэсь алӥсько мон. - Адӟоды ай, вормоз, - аслэсьтыз кариз со. Оля кык кырӟан кырӟаса ышиз катанчи сьӧры. Нош бӧрсяз ӝытэз нуись Татьяна Денисова китӥз валтэ ни пичи гинэ юг-тӧдьы дыдыез. Та муспотон нылаш, пе, мынам паньтэме - Дэбесысь 7 аресъем Таня Пономарёва. Таиз но нылок чик кӧбератэк кырӟаз ӵуж комокъёс сярысь серемес кырӟанзэ. Бӧрсяз потэ Пичи Пургалась пичи "принцесса" - куать аресъем Маша Емельянова, собере - Киясаысь "ӵуж италмас" Ксюша Камашева... Покчиос огезлэсь зол мукетыз паймыто учкисьёсты, дунъясьёсты. Бӧрысь соосын вераськыса мон валай, малы соос сцена вылын бадӟым эшъёссылэсь дӥсьтӥсесьгес адӟисько. Мугез туж огшоры вылэм - покчиос сцена вылэ пото кырӟаны! Соос уг валало, кин со жюри, мар пӧртэмез конкурсэ огшоры пыриськисьлэсь-а, лауреатлэсь-а дипломзэ сётозы, гран-при-а басьтод? Тани Татьяна Денисовалэн паньтэмез (азьпал потыса верало ни: со покчиос пӧлын нырысетӥ луиз) кырӟамез бере вераськыкумы малпанъёсыныз кемалась гуртаз ни вал. Бертэме, пе, потэ ни, мунёеным шудэме. Кыӵе ке вормон, диплом солэн йыраз но ӧвӧл. Мар уд вера бадӟымъёсызгес сярысь. 10-14 аресъем кырӟасьёслэн ӵошатскон дартсы шӧдӥське ни. Соос тодо: кытын ке отын, залын, жюри пуке. Соослы, дунъясьёслы, туннэ "вузано" астэ. Нош соос туж копаськисесь: чебер кырӟамен гинэ уг яра, сценической образ, мастерство, пе, кулэ. Зэм, Шарканысь Юля Никитина та сярысь ӧз сюлмаськы, дыр. Сцена вылын ну сыӵе вырыны быгатэ. Жаль, тросэз арлыдо кырӟасьёсмы ӧз адӟе, кулэ вылэм. Юля огвие эктэ но, кырӟа но, залэн но кусып возе. Нош кыӵе микрофонэныз шудэ! Кожалод, вордскыкуз ик со борды ӝабырскем. Сцена вылэ потыкузы ик учкисез ас бордазы кыскизы кыктоос - Лейла но Милана Захваткинаос. Таосыз но чебер дыдыос Шарканысь. Синмаськизы дунъясьёс но. Инкуазь нылъёслы, огкадь тус сяна, огкадь чебер куара но сётэм. Но Алнашысь Света Ручкиналэсь золэз таяз группаын нокин ӧй вал. Света кырӟаны кутскемез бере ик жюрилэсь йырзэ ас палаз берыктӥз. "Тынэсьтыд пыд куарадэ" кырӟан ӵап пинал ныллы кырӟано кадь ук. Света сое туж мыло-кыдо быдэстӥз. "Выжыкыл дуннеез" нош ваньмызлэсь мылкыдзэс бугыртӥз. Черод вуиз егитъёслы. 16-20 аресъем нылъёс-пиос шоры учкыса, ачид сюлмаськыны кутскиськод. Таосызлы тани туннэ туж-туж кулэ вормон! Ӵап быдэ вуон вакытэ уго адямилы кулэ ас кужымедлы оскон. Ӵап та вакытэ усьтӥськем инвисъёс кыдёке вутто. Шугъяськытэ соиз но: тросэз кырӟась нылъёс ог-огенызы тодмо "Шундыкар" лагерья. Гужемлы быдэ соос отын пумисько, ӵош кырӟало, дискотекаосы ветло. Нош туннэ тани со эшъёс - тушмонъёс. Зэм, шара сое огзы но уг возьмато, катанчи сьӧрын вераськонзэс мукет ӧре выжтыны выро, сцена вылэ потыкузы, мед удалтон сӥземъясько. Нош ас понназы... Та пумысен бен нылъёсты пыкылыны уг луы: ӵошатскон - со ӵошатскон. Вормыны кулэ кужмоез. Сое бырйыны капчи ӧвӧл. Юнме жюри но ӧз шугъяськы, дыр. 16-20 аресъемъёс пӧлысь вормисез бырйыны соос кемагес выризы. Тани кенешысьтызы лушкемен диктофонэ гожъяме (кенешо Надежда Уткина, Надежда Чиркова, Андрей Ураськин, Александр Козырев): - Прохоровалы! - Ӧвӧл, кыкетӥ кырӟанэз ӧз пӧрмы. - Рябинина! - А Прохорова? - Романова но номыр ӧвӧл. - Нырысетӥ инты чик сётоно ӧвӧл, туж яркыт висъяськисез ӧй вал. - Нош гран-при? - Ручкиналы!!! - Солы, солы! - Мыным но кельшиз. - Бурановаез пусъёно. - Рябинина солэсь трослы вылынгес вал - кырӟан культураез но, образэз но. - Так, Рябинина, Буранова, Прохорова. Всё! Балъёсъя но озьы радъяське. - Эх, Смагин туннэ маке лябгес. Жаль. - Болтачева но урод ӧвӧл, но кеськысагес кырӟа. Ничего, выльысь пӧрмытоз. Тӥни озьы радъяськиз та группаын интыез люкон. 20-25 аресъемъёс пӧлын, жаляса верано луэ, нокин но дунъясьёсты но, учкисьёсты но ӧз паймыты. Концерт (конкурс) туж мыло-кыдо кутскиз ке вал, пумыз туж мӧзмыт пӧрмиз. Конкурсын учкисьлэсь малпанзэ уг ке но юало, со адӟиськытэк уг кыльы - бадӟымъёс сцена вылэ потэм бере, зал бушаз. Кылизы на конкурсэ пыриськисьёслэн ӵыжы-выжыоссы гинэ. Али но паймисько, кызьы жюри сыӵе бездыт кырӟасьёс пӧлысь нырысетӥзэ висъяз. Озьыен, кизилиосын та ӝытэ лыдъямын вал (фамилиос радъямын интыосъя) покчиос пӧлын: Таня Пономарева, Дэбес Оля Ипатова, Юкаменск Аня Щуклина, Можга 10-14 аресъемъёс пӧлын: Света Ручкина, Алнаш Лейла но Милана Захваткинаос, Шаркан Юля Никитина, Шаркан 15-20 аресъемъёс пӧлын: Ольга Рябинина, Ува Ирина Буранова, Шаркан Снежана Прохорова, Завьялово 21-25 аресъемъёс пӧлын: Сергей Кайсин, Можга Ольга Беляева но Светлана Пислегина, Завьялово Ольга Андреева, Кизнер Номинациосъя: аспӧртэмлыко луэмез понна - Татьяна Сунцова; сцена вылын ассэ быгатыса воземез понна - Юля Никитина, Шаркан; калык кырӟанэз вӧлмытэмез понна - Катя Попова, Игра; устоез костюм понна - Оля Рябинина. Тӥни озьы интыос люкемын. Вормисьёс пӧлын шалтырак нылъёс. Куд-огезлы усиз кык полэс дан! Светлана Ручкина, Ольга Рябинина но Юля Никитина понна та ӝытэ зэмос кизили зор усиз. Гран-при басьтӥсез ялэмзы бере, мон бызьыса мынӥ катанчи сьӧры. Света Ручкинаез алнашъёсыз котыртӥллям: ӟыгыръяло-чупало, ӟечкылало. Диктофонэн матэктэме бере, кӧня ке минутлы мозмытӥзы ик. Света зур-р! куалекъя, синъёсыз олокытчы учко, мар вераны уг тоды. - Мон ачим но уг валаськы, мар монэн, шумпотыса-а, мар-а тазьы куалекъясько, - вераськыны кутскиз со ӧжыт буйгамез бере. - Кӧня ар мынӥ мон та дырозь! - Ма, тыныд 12 арес гинэ ук ай! - Все равно кема. - Маизлы золгес шумпотӥськод: магнитофонэдлы-а, дипломедлы-а? - Мар со магнитофон, та минутъёсын ӵошатыса! Ольга Рябинина но вормонэныз туж данъяське, но тусызъя уд ик шӧды: нокыӵе кариськытэк, дораз бертыны дасяське. - Малы тон уд тэтчаськы? - Ой, тодӥськоды-а, мон та вормонэз сокема возьмай, соин ик жади, лэся. 1997-тӥ арын зональной конкурсын гинэ но ӧй вормы вал, нош али... Ой, мон туж шудо. - Малэсь ке кышкад-а? - Котьмалэсь: сценалэсь но, тыллэсь но, жюрилэсь но... эшъёсылэсь но. - Оксана Болтачеваен пырак огкадь кырӟанъёсты кырӟады... - Бен, соин ик тросгес сюлмаськи кадь. Учкиськомы огкадь кырӟанъёсты кылзыны умой ӧвӧл, дыр, но жюрилы ӵошатыны капчигес. Таяз, озьыен, мыным удалтӥзгес. - Оля, тынэсьтыд костюмдэ но пусйизы. - Тау синйылтэмзылы. Сцена вылэ потӥсь, малпасько, котьмаиныз висъяськыны кулэ. Мон тани татчы нимысьтыз парикмахерез ӧтчай, йырсиме тупатытӥ. Соин сцена вылысен тусы понна ӧй ни сюлмаськы. Туж жаль, тросэзлэн кырӟасьёслэн та ласянь сюлмаськемзы чик но ӧз шӧдӥськы: ӧй вал чебер причёскаос, костюмъёс. Огкутскемен, эшшо кӧня ке тырмымтэос сярысь. Трос огкадь кырӟанъёс чузъяськизы шуыса верам ини. Эшшо туж керӟегъяськытэ кырӟасьёслэн сцена вылын вырыны быгатымтэзы: яке дол-л сыло, яке радзэ валатэк тэтчало. Калык шӧмъем дэремен пото но туала крезьгуръя тэтчало, туала эстрада кырӟанэз кырӟало но туго кышетъёсын шонасько. Туж ӵем сураськылӥз фонограмма, кысылӥз микрофон. Таиз ини ужрадэз радъясьёс бордысь потылӥз, но кырӟасьёс, учкисьёс азьын извинить карыны куремзэс мон ӧй кылы, кӧня лулсэрзэс быдтӥзы, дыр, соин сэрен конкурсэ пыриськисьёс. Но котьма ке но, конкурс пӧрмиз. Ӝуатскизы выль кизилиос. Озьы малпало Удмуртиысь тодмо кырӟасьёс но. Валентина Пудова, Удмуртиысь калык артистка: - Туж шумпотӥсько егитъёс, пиналъёс понна. Соослы кырӟан сюрессэс мытыны капчигес луиз. Конкурс мыным кельше. Быдэссэ учкыны луонлыке ӧй вал ке но, мылкыды ӟеч кылиз - удмурт эстрада луоз! Туж синмаськи Ольга Рябининалы. Геннадий Бекманов, Удмуртиысь дано артист: - Удмурт кырӟан искусствомы ӝутӥське! Туж умой, пиналъёслы таӵе юрттэт сёто шуыса. Соосын золгес ужано вылэм но, жаляса верано луэ, дышетӥсьёс ӧвӧл. Надя Уткина гинэ выре тани, молодец! Туж кельшиз Ручкина, Прохорова. Монъя - Нефёдов, Романова. Шумпотӥсько, берло дыре егитъёс дӥсьтӥсесьгес луизы. Андрей Ураськин, Удмуртиысь дано артист: - Мон жюриын пуки ни вал 1997-тӥ арын, соин ик али ӵошатэме луэ. Пиналъёслэн быгатонлыксы будэ. Туж золэсь покчиос. Бадӟымъёсызгес лябесьгес - кинэ ке нимысьтыз висъяны шуггес вал. Куспамы кенешоно луиз. Александр Козырев, продюсер: - Конкурслэсь тросгес возьмай вал. Нимызъя ӧзгес луы. Эстрада кырӟанъёс борды итӥськизы калык кырӟанъёс. Пиналъёсын трос ужано на - ваньмыз укыр огшоры: ӧвӧл образ. Пусйысал Таня Сунцоваез, Юля Никитинаез, сузэръёсты Захваткинаосты. Надежда Уткина, жюрилэн тӧроез: - Малпанъёсыя ӧзгес пӧрмы. Возьмай вал, кужмогес кырӟасьёс луозы шуыса. Калык кырӟанъёсты умой быдэстӥзы, но конкурс эстрадалы сӥземын вал бере, таяз учыре соосты ӧм дунъялэ. З. Рябинина. Туспуктэмъёсыз Ю. Журналистъёсын пумиськонъёс Висён кунгожъёсты уг чакла Адямилы-а, пудолы-а кышкыт чер палаз, солы пумит нокыӵе ужрадъёс ӧд ке куты, висён быдэс дуннее паськыт вӧлмыны быгатоз. Соинтэк-а вань адямиосты туннэ сюлэмшугъяськытэ Великобританиын, табере ини Франциын но кылдэм югдур. Великобританиын та нуналлы 274 улосын шараямын скалъёслэн ящурен висемзы, нош Франциын укмыс департаментэ вӧлмемын ни та кышкыт чер. Одӥг-ог висён учыр шараямын Арабской Эмиратъёсын, Палестинаын. Кытысь но кин пыр трос вӧлмиз ящур, та нуналлы тодмо ӧвӧл на. Адямилы но пудолы кышкыт луись та чер странаямы медаз вӧлмы шуыса, Россия Федерациысь Гурт хозяйствоя министерствоысь Пудоез эмъянъя департамент улосъёс азе чурытэсь куронъёс пуктэ. Ящур шаерамы паласькымтэ ке но, Удмурт Республикаысь Пудо эмъянъя валтӥсь управлениын но буйгатскон мылкыдын уг уло. Управленилэн кивалтӥсез Геннадий Бурдов журналистъёсын пумиськонын валэктонъёс сётӥз та нуналлы странаын но шаерамы кылдэм югдур пумысен. Саратовын, Волгоградын, Оренбургын, Татарстанын, Башкортостанын туберкулёзэн, бруцеллёзэн, урмонэн (бешенствоен) висён учыръёс шаерысьтымы пудо эмъясьёсты тэк улыны маза уг сёто. Тани Каракулино ёросын шараямын вал кыр ӟичылэн ассэ укыр йӧспӧртэм воземез. Асьме пала Башкортостанысь, Татарстанысь вуыса, кыр пӧйшуръёс вайыны быгатозы урмон висён. Соин ик та улосвыл котырысь кунгожъёсты чакласа возьыны косэмын, дасямын урмонлы пумит эмъюм но. Ёрос администрация, озьы ик та ужпумъёсын вырись вань службаос югдурез чакласа возьыны кулэ. Висён шараямын Кыргызстан улосвылын но. Отысь вайыны уг яра сӥль, чорыг, йӧл сиёнъёс. Алэмын та кун пыр мынон-ветлон но. Нош быгатэ-а меда Россия Федерация мукет кунъёсысь ваем сӥльтэк улыны? Уг вылэм. Москваез сюдон понна гинэ, пе, 700 сюрс тонна сӥль кулэ. Озьы тӥни Россия Федерацие мукет кунъёсысь вуэ 2-2,5 миллион тонна сӥль. Ваньмыз со пыр-поч эскериське. Со сяна, палэнысь ваем сӥль мынэ переработкае. Озьыен, шаерамы улӥсьёслэн тазалыксы сярысь сюлмаськон вань. Геннадий Николаевичлэн верамезъя, туэ югдур умояз пудолэсь туберкулёз висёнзэ алонъя. Республикаямы нимысьтыз кутэм программая солы висъямын 1 миллион манет. Со тырмыт ӧвӧл ке но, коньдонэн ӝеганъёс уг шугъяськыло. Пудо эмъянъя управлениын туннэ нуналлы секыт югдур кылдэмын транспортэн. Пудоез эскерон-чаклан понна туж трос мынон-ветлонъёс луо, нош техника куашкан калэ вуэмын. Та нуналлы озьы ик туж кулэ веньтэм инъекторъёс. Вань та ужпумъёсты Правительство синйылтыса возе. Озьыен, югдур умоянлы оскон вань. Л. Малых. Калыкысь кылэм вал яратон тулыс лыктэ. Мынам но озьы ик луиз. Вить ар тырмиз ини со дырысен, но сюлэмы татчыозь ӧз буйга на. Секыт малпанъёсын выдӥсько но, султӥсько но. Туж сьӧлыкаськи мон Яратон азьын. Солэсь чылкыт маланъёссэ сантэмай, пожай... ...Вордӥськем нуналам Света эшеным пумиськыны вераським. Ӝыт со мон доры кыӵе ке тодмотэм пияшен вуиз. Макем йӧно, чебер со! Ӝужыт, синкашъёсыз сьӧд-сьӧдэсь. Света лушкем сипыртӥз: городской, песянаез доры бертӥз. Тӥни соку ми тодматским Сашаен. Клубын мон асме гольтыресгес вози. Адӟиськоды-а сэргын пукись пияшез, со туннэ мынам луоз! Нылъёс гор! серектӥзы. - Кытчы тон гогыедлэсь вылэ тэтчиськод? Городысь пи асьме кадьёс шоры уз учкы. Эшшо кызьы учкиз! Ӝытбыт Саша монэн артэ пукиз, ӵукна пал гуртам келяз. Собере уез-нуналэз сураз, шӧдске, казакпи. Юн тӧласькыку но, жаль зорыку но дорам лыктылӥз, сяська, конфет кузьмалляз. Нош кыӵе мусо кылъёс вералляз! Но ӝыны ар пумиськылэммы бӧрсьы мыным со акыльтыны ӧдъяз - мукет пиосын эшъяськыны кутски. Табере бырйылӥ узыръёссэ гинэ. Сашалэн номыриз ӧй вал, вылаз ик, дышетсконзэ но йылпумъямтэ ай. Мон сое улляй, ноку но ӧй яраты тонэ ӧвӧл кулэ мыным начар штаниен ветлӥсез шуи. Эшъёсыным ӧй ке ченгешысал, мон, пӧй, шорад но ӧй учкысал. Со номыр но пумит ӧз вера, берытскиз но кошкиз. Света эше монэ визьманы выриз, тышкаськиз. Мон Сашаез ӟыгыртыса бӧрдӥ-бӧрдӥ но солэн ӝожез ортчиз. Ми выльысь тупам. Вуиз мукетыз тулыс. Лыктӥз вылез яратон. Огпол Сашик сьӧры Петя выныз бертӥз. Пияш ӝытбыт мон котыртӥ бергаз, мон ӧй пумитъяськы. Сашик дорам шергес вуылӥз. Нош берлогес тодӥ: со аслыз мукет нылаш шедьтэм. Мон сое ымныраз сальылӥ, олокыӵе но юрӟым кылъёсын кесяськи. Номыр ӧз вазьылы. Озьы ик кошкиз городаз. Кӧня ке улыса, мон ӧй чида, Сашиклы гожтэт ыстӥ, простить карыны кури. ...Со вуиз. Таяз учыре со юн сямо вал. Мон яратӥсько тонэ, но ойдо умоен люкиськом, эш кылём шуиз. Уйбыт кӧлыны ӧй быгаты. Койка вылам кылльыса небыт тӧллэсь ӧсэ шуккылэм куаразэ кылзӥ. Тӧл шуккемъя, ӧс ялан ӟукыртэ, ачид янгыш шуэ кадь. Со дырысен ортчизы ини уно аръёс. Нодтэм йыры али гинэ валаз, кыӵе азвесез ыштэмме. Сашик бӧрсьы ӧжыт гинэ ӧй вал ини пиосы, но огезлэсь но мон шуныт мылкыдзэ ӧй на шӧды сыӵе. Соос бордын салкым. Нош алигес тодӥ, Сашик кузпалъяськем. Удалтӥз кыӵе ке шудпуйылы картэн. Ӵок, ачим янгыш. Т.ПЕРЕВОЗЧИКОВА. Шаркан ёрос. Правительствоысь иворъёс Кенешизы, кенешизы Туэ 16-тӥ мартэ Игра ёросын ортчиз Вотка, Дэбес, Селта, Шаркан, Якшур-Бодья но Игра районъёсысь гуртъёсъя но посёлокъёсъя администрациослэн кивалтӥсьёссылэн огазеям семинарзы. Солэн ужаз пыриськизы Удмурт Республикаысь Президентлэн но Правительстволэн Администрациезлэн кивалтӥсезлэн воштӥсез Андрей Гальцин, Игра ёрос администрацилэн кивалтӥсез Валерий Усков, Удмурт Республикаысь Ужъя кун комитетлэн кивалтӥсезлэн воштӥсез Михаил Трефилов. Отчы ветлэмъёс тодматскизы Правительстволэн интыосысь ёзъёсын ужан амалъёсыныз, учкизы Игра районысь Сепгурт администрацилэсь ужамзэ. Уногес ӝожтӥсько Удмурт Республикаысь Президентлэн но Правительстволэн Администрацияз кылем арын басьтэм гожтэтъёсъя но ӝожтӥськонъёсъя йылпумъянъёс лэсьтэмын. Президентлы но правительствое вуиз 1150 гожтэт но 800-лэсь уно ӝожтӥськон. Со, 1999-тӥ арын сярысь, 28 процентлы уногес. Уноез гожъясьёс верало властьлы оскемзы сярысь, оско экономикаын но политикаын югдур тупатсконлы. Ортчем вакытэн ӵошатыса, 35 процентлы уноез гожтэтъёс эскерон вылысь басьтэмын. Правительстволэн йырыз но солэн воштӥсьёсыз 74 процентсэ вуэм вазиськонъёсты сэрттӥзы-пертчизы но унозэ ӝожтӥськонъёсты келязы кар но ёрос администрациосы соосъя кулэ ужпумъёс кутон пумысен. Уноез гожтэтъёс герӟаськемын калыклэсь улон-вылонзэ умоятонэн. Та пумысен ӝожтӥськонъёс йылӥзы ог 9 поллы. Администрацилэн ужаз ӵемгес пумиськыло улон интыен, ужен, уждун будэтонэн герӟаськем ужпумъёс. Иворъёс вӧлмозы ӝоггес Россиын но Удмуртиын, озьы ик быдэс дуннеын потӥсь литературая материалъёсын ӝоген тодматыны быгатоз нимысьтыз кылдытэм ёз. Республикаысьтымы Культурая министерстволы косэмын нимысьтыз ёз кылдытыны. Та вакытэ республикаысьтымы библиотекаосын огъя лыдъясько 130 электронной ёзъёс. Инкуазез кырсёмытэм понна Удмурт Республикаысь Правительстволэн кутэмезъя, котырысь инкуазез кырсёмытэм понна туэлы выль дунъёс пуктэмын. Табере со вуиз 94 процентозь. Чорыг дуноя Табере лушкемен чорыгам понна одӥг налим яке линь понна тыроно луоз 250 манет. Удмурт Республикаысь Президентлэн но Правительстволэн пресс-службазы. Вуэ зэмос тулыс Мартэз лыдъяло самой чагыр толэзен. Уго шунды ӵемгес потаны ӧдъя, тылобурдоос но тросгес шулдыръясько. Зэм, тулысэз мытэ март. Календарья ке учконо, со кутске нырысетӥ нуналаз. Фенологъёс тулыслэсь вуэмзэ лыдъяло нырысетӥ пукись вуос потонысен. Метеорологъёс валэкто: тулыс кутске соку, куке омыр 0 градусысен пумен шуныт луыны ӧдъя. Нош астрономъёс куазьлэсь нокыӵе мыдланьяськемзэ лыдэ уг басьто. Соос понна тулыс кутске 21-тӥ мартэ. Соку уйлэн но нуналлэн кузьдалазы огкадь луо. Ӟуч писатель Виталий Бианки нюлэс календаряз 21-тӥ мартысен дырез нима "кӧлэмысь сайкан толэзь" шуыса. Уго ӟольгыриос та вакытэ огзылы-огзы пар утчало ни, каръёссэс дасяло. Луд кечъёслэн но вуэ сюан ортчытон дырзы. Март пумын соослэн пиоссы вордско ни. Сяськая бадьпу, угыоссэ поттэ пучы. Пумен берто сьӧд куакаос, юберъёс, чечегъёс, мукет бурдоос. Музъем Шундыез быдэсак котыртэ 365 сутка 5 час 48 минут 46,1 секунсдкын. Шундылэсь ар ӵоже кизилиос котыртӥ ортчемзэ эклиптика шуыса нимало. Эклиптика но инбам экватор кык пол огазеясько. Со луэ тулыс но сӥзьыл. Нырысетӥяз, 21-тӥ мартэ, Шунды лымшор полушариысь уй палаз выже, нош кыкетӥяз, 23-тӥ сентябре, уй палысьтыз лымшор палаз выже. Эклиптика уй пал точкалы тужгес кыдёкын луэ 22-тӥ июне, нош лымшор точкаын - 22-тӥ декабре. Б. Никитин. Супыльтон сэрег Кытчы ышиз мадонна? Мон тӥледлы али сыӵе ивор верало! Но лушкемен, тӥледлы гинэ. Удмурт мадоннаез - Любовь Быковаез кемалась-а сцена вылысь ӧд адӟылэ ни? Кемалась. Маке но турттэ Любаша: ар ӵоже кык сяна кырӟан но ӧз гожты, сцена вылэ потанъёсыз но шеромизы. Кожаськоды, сое Козырев улляз? Ӧз! Ӧд синйылтэ-а, "Мылысь-кыдысьлэн" ӝытаз кыӵе со потаз? Одно ик, бен-а? Веськрес, чебер нылмурт интые кырӟаз быгыльскем кышномурт. Вот сое ик вераны турттӥсько - мадонна, пе, нуны возьма. Мон, конечно, рос-прос уг тодӥськы, но тӧлтэк писпу уг выры. Вылаз ик, тодӥ на, Быкова, пе, декабрь толэзьысен больничнойын улэ ни. Огкылын вераса, тӥни сыӵе сюрприз. Вуоно "Дарт" бам потытозь, мон одно ик ваньзэ тодыны тыршо но тӥледлы мадё. Тӥ но маке ӧд кылылэ-а? Гожтэ. Кыл нуллӥсь Андрей Клементьев. Россия Федерациысь правительстволэн ӵектэмезъя, туэ 25-тӥ мартысен 28-тӥ октябрёзь странаямы "гужем" дыр тупатӥське. Соин валче 25-тӥ мартэ 2 часын (интыысь дыръя) Россия Федерация улосвылын дыр одӥг часлы азьлань берыктӥськоз. Сюлэм вӧсь Юрттэт курыса вазиськон Аслым мыным пичи дырысен шуг-секытэз адӟоно луиз. Анаеным ӵошен гинэ пудо вордӥмы, кыкнамы пу но турын дасяллям. Быдэ вуэм берам артэ гуртысь пи юаны лыктӥз. Тодмотэм муртлы бызён сярысь ноку ӧй малпалля. Кык час кенешем бере мылкыды берытскиз, анаелы но юрттыны быгато шуыса малпай, лэся. Улон нош мукет ӧретӥ кошкиз. Анае озьы ик огназ улӥз, огназ кулӥз. Кӧня но кызьы курадӟиз, ачиз гинэ тодэ, вылды. Нош асме мар возьма вал мукет гуртын. Адямиез тодытэк, нокин но медаз бызьы картлы. Яратон ӧз пушйы семьяямы. Пӧртэм мугъёсъя керетонъёс ӧз чалмылэ. Картэ нэнэеныз ӵошен юыны кутскиз. Улон секыт луэмъя, уждун сётъямысь дугдӥзы. Семьямы одӥг пенсия вылын улӥз. Сазь дыръяз нэнэез шыпыт улэ, нош кудӟе ке (сыӵе дыр ӵемгес но ӵемгес луэ ни), улля ваньмес: - Мон тӥледыз сюдыса возисько! Мынэ кытчы мынӥськоды! Мон нылме ваё, соин уло. Тӥ азьтэмесь!.. Собере олокыӵе жоб кылъёс омырез вандо. Картэ но нэнэезлы дурбасьтэ. Пумит вераны кутскисько ке, жугыны ӧдъя. Чиданэ быриз ни. Кык пиосме кызьы ке но ӟеч адями кароно вал. Соос "витьлы" гинэ дышетско, нош керетонъёс бере урокъёс сярысь малпаськод на шат? Сыӵе семьяын улыса, марлы дышозы соос. Кемалась кошкысал ни пиосыным таӵе курадӟонлэсь, уг шедьтӥськы улон но ужан инты. Соин ик газет пыр вазиськоно кариськи. Туж курисько, юрттэлэ вал, пожалуйста, кин быгатоз. Тужгес но кивалтӥсьёс, ужбергатӥсьёс. Мынам туж ужаме потэ! Уждун басьтыса, пиналъёсме сюдыны, будэтыны мед быгато, улон сюресме мед шедьто. Котькыӵе ужлы соглаш, уждун гинэ мед тырозы, улон сэрег кыӵе ке мед луоз на. Оло, городын улӥсь мӧйыослы юрттӥсь кулэ? Аслым мыным куамын куать арес, самой ужан вакытэ. Ужаны быгато машинистка луыса, пудо вордонын, оглом - кытчы дэмлалозы. Туж курисько: кин быгатоз юрттыны милемлы, ивортэлэ редакцие, адресэ отын. Ӟечезлы оскыса, К. К. Университет ӧте тодматскыны Март-апрель толэзьёсы тросэз вузъёс, техникумъёс, училищеос вуоно дышетскисьёс понна асьсэлэсь ӧсъёссэс усьто. Школаез йылпумъясьёс понна со туж кулэ ужрад. Угось арлы быдэ кыӵе ке но воштӥськонъёс луо экзаменъёсты сётонын, документъёсты кутонын. Собере ялан выль факультетъёс, выль специальностьёс усьтӥсько. Кылем арняын та ужпумъёсъя Удмурт кун университетын журналистъёслы пресс-конференция ортчытэмын вал. Университетэн тодматскон нуналъёс вуоно абитуриентъёслы туэ ортчозы кык нунал ӵоже: 31-тӥ мартэ но 1-тӥ апреле 11 часын. Лыктоно нырысетӥ корпуслэн актовой залаз. 31-тӥ мартэ университет возьма городысь дышетскисьёсты, нош 1-тӥ апреле - гуртысь дышетскисьёсты. Кызьы валэктӥз Удмурт кун университетлэн ректорез В. Журавлёв, экзаменъёсты сётонын бадӟымесь воштӥськонъёс уз луэ. Уз, пе, воштӥськы университетэ документъёсты кутон понна тупатэм дун но. Со понна кылем арын 250 манет тырыны учкемын вал. Удмурт кун университетын дышетскыны мылкыд карисьёс вань юанъёсынызы татчы лыктыса тодматскыны быгатозы. Т. Миронова. Удмурт Республикалэн Президентэзлэн распоряжениез Удмурт Республикалэсь правоя норма луись актъёсызлэсь копиоссэ Россия Федерациысь Юстицияя министерстволэн Удмурт Республикая управленияз ыстон сярысь Россия Федерацилэн Президентэзлэсь 2000-тӥ арын 10-тӥ августэ "Россия Федерациын огъя правовой инъет кылдытонъя ватсаса ужрадъёс кутон сярысь" поттэм 1486 номеро Указэзлэсь 2-тӥ ёзэтсэ быдэсъян вылысь: 1. Удмурт Республикалэн законъёсызлэсь копиоссэ, Удмурт Республикалэн Президентэзлэсь, Правительстволэсь правоя норма луись актъёссэс сизьым нунал куспын, озьы ик официальной печатной изданиез, кудаз поттэмын Удмурт Республикалэн норма луись актъёсыз, Россия Федерациысь Юстицияя министерстволэн Удмурт Республикая управленияз келянэз ас вылазы басьтытоно Удмурт Республикалэн Президентэзлэсь Администрацизэ но Правительствоез. Та актъёс пырозы Россия Федерацилэн субъектъёсызлэн правоя норма луись актъёсын федеральной регистраз. 2. Удмурт Республикаысь министерствоослэн, кун комитетъёслэн но ведомствоослэн кивалтӥсьёссылы луонлык кылдытоно министерствоосын, кун комитетъёсын но ведомствоосын кутэм правоя норма луись актъёслэсь копиоссэс, озьы ик официальной печатной изданиез, кытын поттэмын та правоя норма луись акт, сизьым нунал куспын келяны Россия Федерациысь Юстицияя министерстволэн Удмурт Республикая управленияз. 3. Удмурт Республикаысь Кун Кенешлэн Аппаратэзлы дэмлано Кун Кенешлэсь правоя норма луись актъёсызлэсь копиоссэ но официальной печатной изданизэ, кудӥз печатламын та документъёс, озьы ик сизьым нуналскын ыстыны РФ-ысь Юстицияя министерстволэн Удмурт Республикая управленияз. 4. Распоряжение быдэсъяськыны кутске гожтэм нуналысен. Удмурт Республикалэн Президентэз А. А. Волков. Ижевск город, 2001-тӥ арын, 5-тӥ мартэ. � 21-РП. Чаклаське - ВИЧ-инфекция Ёросъёс но городъёс ВИЧ-инфекциен паласькемъёс Туннэ нуналозь Со пӧлысь 2001-тӥ арын Котькуд 100 сюрс адямилы Алнаш Балезино 75 27 186,1 Вавож Воткинск Глазов 1 1 4,7 Грах Дэбес Завьялово 1 1,8 Игра Камбарка 2 8,7 Каракулино Кез 1 3,4 Кизнер Киясово Красногорск Пичи Пурга Можга Сарапул 1 4,4 Селта Сюмси Ува 1 2,4 Шаркан 1 4,4 Юкаменск 2 2 15,7 Як.-Бодья 1 4,2 Яр 35 7 176,8 Районъёсъя 121 38 20,5 Ленин 3 Устинов 21 4 Индустриальной 12 1 Октябрь 16 2 Первомай 4 1 Ижевск городъя 57 9 8,7 Сарапул 39 12 36,6 Воткинск 4 3,9 Глазов 225 61 211,7 Можга Городъёсъя 325 82 31,1 Республикая 446 120 27,3 Ватсан: 446 ВИЧ-инфекциен паласькемъёс пӧлысь 11 мурт кулӥз, со пӧлысь 5-ез - СПИД-лэсь. Россиын котькуд 100 сюрс адямилы 64,8 ВИЧ-инфекциез нуллӥсь лыдъяське. Буйгатӥсьёс трос, юрттӥсьёс ӧвӧл Кылем декабре ортчиз быдэс Россиысь ветеранъёслэн съездзы. Солэн ужаз пыриськизы асьме республикаысьтымы но ветеранъёс. Отысь вуэмзы бере ветеранъёс ӵош люкаськыса вераськизы-кенешизы. Съездын вераськон мынӥз "Ветеранъёс сярысь" Законлэн туннэ нуналлы тупамтэез сярысь. Республикаысь кивалтӥсьёс ветеранъёслы юрттыны интыосысь кивалтӥсьёсты косо. Но буш кисыысь мар поттод? Куддыр ветеранъёслэн огазеяськонзылы шуыса коньдон висъяське ик, но со мукет азе кутӥське. Озьы ёрмисьёслэн куронзы куронэн ик кыле. Урод пуктэмын мӧйыослы-пенсионеръёслы медицинской юрттэт сётон. Эмъюм туж дуно, нош льготая басьтыны луонлык ӧвӧл. Ӟырдыт вераськон потӥз пенсионеръёслы улон коркаос лэсьтон, тупатъян пумысен. Ветеранъёслэн улон инты висъяны курыса вазиськонъёссы аръёсын эскерытэк кыллё. Арлыдоослэн туж кӧтсы ӝож правительствомылэн пенсиосты будэтъянэн "шудэмез". Шудон сяна, кызьы шуод на бен сое? Туннэ сю манетлы ватсало но, ӵуказеяз дунъёсты кык поллы будэто. Съездын та пумысен умой вераськиз Валентина Матвиенко. Со ветеранъёсты нош ик буйгатыны, умоезлы оскытыны выриз. Зэм, нокин но ӧз оскы. Республикаысьтымы ветеранъёслэн огазеяськонзылэн кенешаз вераськизы шаерысьтымы вылӥ кивалтӥсьёс. Оло, таосыз маин ке но юрттыны быгатозы арлыдоослы. Матысь муртлэсь юаны но каньылгес уго. В. Смирнов. Инкуазь 22-тӥ мартэ - Вулэн нуналыз Шур бызе, бызе, бызе, Вуэз пожаське... Адями, пе, сиёнтэк толэзь улыны быгатэ, нош вутэк - арня. Ӧйтӧд, кин сое малпам, вылаз эскерем, мон вутэк одӥг нунал но ӧй чидасал. Ву - со юон но, эмъюм но, чылкытлык но. Берпуметӥез ласянь юанъёс кылдо. Бен, вулэсь чылкыт уд луы шуон вашкалае кылиз. Но асьме бордысь уг поты шат солэн чылкытэз? Нуналлы быдэ шаерысьтымы шуръёсы, тыметъёсы асьсэлэсь кырсь бервылъёссэс кисьто заводъёс, предприятиос. Фермаосысь кыед ву пырак пичи шуре ваське. Соин ик паймонэз ӧвӧл паласькись кӧтпуш висёнъёслэн тросэн алямзылы. Врачъёслэн верамзыя, туннэ 80 процентэз висёнъёс пото вулэн уродысьтыз. Мар кароно? Кырсёмытоно ӧвӧл но чылкытатоно. Чылкытатоно тыметъёсты, ву басьтӥсь но сётӥсь сооружениосты, гумыосты... Та ужъёслы нимысьтыз коньдон висъяно. Городъёсын улӥсьёслэн туннэ чылкыт ву юыны луонлыксы вань ик ке (туала ужбергатӥсьёс дась дун ву но кранысь вуэз чылкытатон арбериос но ӵекто) тросаз гуртын улӥсьёслэн нокыӵе но вузы ӧвӧл. Тани Глазов ёросысь кӧня ке гуртын нырысьсэ вутэк уг толъё ни. Насосъёс ӵем тӥяськемен, гумыос сисьмо, кивалтӥсьёс огзэ вошто, мукетыз - сӧриське. Нош самой огшорыез насос 12 сюрс манет сылэ. Со но кемалы ик уг тырмы. Соин али коротайёс ошмесысь ву нуллоно луо. Макшуръёс бен таизлы но шумпотысалзы, но гуртазы колодчаоссы но, ошмесъёссы но ӧвӧл. Али соослы гуртазы бойлерен (вышкыен) ву вортто, но со чылкытлыкез пумысен сюлмаськон кылдытэ. Соин ик али гурт администрациын кенешизы гуртъёсысь колодчаосты выльдон, ошмес синъёсты утялтыса возён пумысен. Та дырозь гуртъёсын улӥсьёс ву понна дун чик ӧз тырылэ, туэысен нош 16-20 манет, пе, тыроно луозы. Со уксё мыноз гумыосты вошъяны, насос басьтыны. Мар бен, дун ву дунтэк уг луы. *** Вуэз вашкалаосмы туж сӥлы карылӥллям. Та нуналэ соос вуэз пожанлэсь: дӥсь, выж миськонлэсь ало вылэм. Черке ветлыса, дун (святой) ву басьтылӥллям, соин корказэс, гидкуазьзэс пазяло, ымнырзэс пылато вылэм. Эн дыртэ, мода сьӧры уиськыса, сиытэк-юытэк улыны. Мылкыдзы ке вань, озьы мед дауртозы туж таза адямиос гинэ. Нош висисьёслы врачъёс тросгес ву юыны ӵекто. Ву мугорысь токсинъёсты поттыны юрттэ. Мугорын вулэсь тырмымтэзэ озьы ик ас вылазы туж ӝог шӧдо визьмын ужасьёс. Йырвиым но лулсэръёс умой мед ужалозы шуыса, умой луоз ческыт, голькыт ву юыны. З. Вахрушева. Вормы астэ ачид Пиналъёс быръё... Республикаысьтымы наркологической диспансерлэн быдэ вуымтэосын ужанъя кабинетэз интыяськемын Воткинской шоссе урамысь 124 номеро коркан. Нылпиосты татчы вутто анай- атайёссы, шергес дышетскон интыысьтызы но быдэ вуымтэосын ужанъя комиссиос лэзьямен. Кыӵе шуг-секытъёсын пумиськоно луэ татын ужасьёслы? Со сярысь маде валтӥсь эмъясь Светлана Рауфовна Садовникова: - Наркомания - социальной висён. Сыӵе кыӵесэ сюремъёсты эмъяны шуг но, дуно но. Милям ӧвӧл асьме стационармы. Пиналъёсты лэзьяськом психиатрической клиникае. Отын быдэ вуымтэослы висъяны быгато вить-дас койка гинэ. Наркоманилэсь одӥг муртэ эмъян нуналаз сюрс манет пала усе. Соин милемлы тырмыт коньдон мед висъясалзы. Дорамы лыктэмъёсты дунтэк эскериськом СПИД-лы но РВ-лы. Висисьёслы лэсьтӥськом интоксикациос, капельницаос. Эскерон учётын сылӥсьёс понна дунтэк. Нош нырысьсэ вазиськемъёс мугоразы кыӵе наркотиклэсь но макем зол пыӵамзэ эскерыны 90 манет тыроно луозы. Ӵемысь таӵе анализэз бӧрсьысь вить пол лэсьтоно луэ, озьыен, 450 манет тыр усе со. Трослы дунтэм луэ валэктон уж нуон. Татчы пыриськыны кулэ дышетон удысын, МВД-ын но мукет интыосын ужасьёс. Нырысетӥез тубат. Кутскиськом таза адямиос бордысен. Ортчытъяськом лекциос, ужрадъёс. Анай-атайёс мед быгатозы чалякгес валаны, шӧдыны пиналъёссылэсь шуге-леке шедемзэс. Нош нылпиослы чакламын пӧртэм тренингъёс. Татын возьматыны тыршиськом мылкыдэз трос мукет амалъёсын но ӝутыны луэмез. Быдэ вуымтэос тодыны кулэ, ма возьма соосты наркотикез быръемзы бере но кыӵе чеберлыко луыны быгатоз улонзы со суреттэк. Вань та тодон-валанъёссэ кутыса, пинал ачиз бырйыны быгатоз ини, мар солы кулэ, нош мар - ӧвӧл. Пиналлы ветлыны кулэ бассейнэ, суреданъя, кырӟанъя школае, пӧртэм кружокъёсы. Солэн дырыз медаз кыльы отчы-татчы шонаськыса ветлыны. Нош со понна кутоно огъя дышетон программа. Отын одно ик лыдэ басьтоно наркотикъёсын герӟаськем шуг- секытъёсты. Нош али мар лэсьтӥське? Школаосы наркологъёсты ӧтчало, эмъясь лекциос лыдӟе. Таин вань ужрадъёс быро. Кыкетӥез тубат. Ужаськом сыӵе семьяосын, кудъёсаз пиналъёс йырез шузимытӥсь суретъёс борды кыстӥськымтэ, но ӵыжы-выжыоссы пӧлын вань наркоманъёс. Куинетӥез тубат. Юрттӥськом висись адямиослы. Валэктыны тыршиськом: наркоман луэмен улон уг быры. Киосты лэзьяно ӧвӧл. Нюръяськоно. Но кыӵесысь потыны туж шуг. Соин ик валэктӥськом: наркотиктэк улон трослы каньылгес. Умой луысалыз, кабинетамы психологъёс, психотерапевтъёс луысалзы ке. Милям висисьёсмы аспӧртэмлыкоесь, соосын огкыл шедьтыны кулэ, пӧртэм ужпумъёсты валэктыны быгатоно. Куддыръя уже интыянэн но выроно луэ. Адямиез эмъюмен гинэ йӧнатыны уг луы, солэсь лулзэ бурмытоно. Огшоры эмъян секыт югдурысь потыны уг юртты. Толэзь-толэзь но ӝыны больницаын кылльыса, пиналъёс нош ик вуо азьвыл интыосазы, эшъёссы доры. Берпуметӥосыз гочато, берлань кыӵесэ кыскыны выро. Соин ӵемысь ужаммы юнме луэ. Шаерамы кулэ вылэм наркотикъёс пӧлы выем быдэ вуымтэос понна реабилитацияя центр. Отын ик мед луозы мунчо, сауна, пӧртэм кружокъёс но пӧртэм ужрадъёс. Таӵе центрын ар пала улыса, пинал каньылэн быгатысал огшоры улонэ вамыштыны. Туэ таӵе луонлык ӧвӧл. Телевизорез учкыса, газетъёсты лыдӟыса нокызьы ум оскиське на висёнлэн сокем матэктэмезлы. Малпаськом: ортчоз-ай, бордамы уз йӧтскы, мынам семьяелы одно удалтоз. Озьы мед луоз. Но вунэтоно ӧвӧл сьӧсьлэсь артэ ветлэмзэ. Пиналъёсыныды вераськоно, югдурез валэктоно. Туннэ сюлмаськемды ӵуказе пайдаен берытскоз. Курдато арысь аре будӥсь лыдпусъёс. 2000-тӥ арын 1-тӥ январьлы Ижевскын 100 сюрс быдэ вуымтэос пӧлын 89-эз наркоманъёс вылӥллям. Туэ 1-тӥ январьлы 100 сюрс нылпилы быдэ 166-ез вень вылэ пуксиз. Та лыдпус котькуд аре, 1997-тӥ арысен кутскыса, кык поллы будэ. Быдэсак Удмуртиын лыдпус ичигес - витьтон сизьым но кык дасмос. Умойтэмгес югдур Глазовын, Камбаркаын, Игралан, Сарапулын. Россиын 100 сюрс быдэ вуымтэослы 143 наркоман лыдъяське. Секытгес учыр Самараын - 377, Кемеровоын 100 сюрс пиналлы 354-ез - наркоман. Быдэ вуымтэос пӧлын ортчытэмын юан-веран: вань-а тӥляд наркотикъёсты яке йырез поромытӥсь мукет суретъёсты утчамды? Котькуд витетӥез вань шуиз. О. Кожанова. Егитъёслэн огазеяськонъёсазы Дас куинь пумо шудоос (республикаысьтымы Егитъёсын ужанъя кун комитетлэн 2000-тӥ арын ужамез сярысь) Республикаямы берло дыре егит муртъёслы тросгес саклык висъяське. Но соин валче сюлмаськонъёс уг быро. Кылем арын Егитъёсын ужанъя кун комитет аслыз ужан понна тужгес висьытӥсь ужпумъёсты пусйиз: - егитъёслэн ог-огзылэсь висъяськемзы: образование, уж, улон-вылонын огкадь юрттэт басьтыны быгатымтэзы; - демография югдур, семья кусыпъёслэн уродмемзы (нылпи ӧжытгес вордӥське, кузпалъёслэн люкиськон учыръёссы йыло); - тазалыксылэн лябӟемез (йыло лулсэр висёнъёсын курадӟисьёс, ВИЧ-инфекциен паласькемъёс); - йыруж лэсьтон учыръёслэн йылэмзы; - ужлы ёрмон. Шумпоттӥсез ӧжыт. Но кун комитет уг юскиськы, егитъёслэсь ужпумъёссэс сэрттонэ-пертчонэ пӧртэм министерствоосты но ведомствоосты кыске. Озьы кылем арын со ужзэ таӵе удысъёсъя нуиз: - егитъёсын ужасьёслэсь тодон-валанзэс будэтон; - пиналъёслэсь но егитъёслэсь ваньмон дырзэс, гужем каникулъёссэс пайдаё радъян; - шаерысьтымы промышленной предприятиосын ужась егитъёсын кусыпъёс возён; - быдэ вуымтэос понна пӧртэм клубъёс усьтон, егитъёслэн но нылпиослэн огазеяськонъёссылы юрттон; - егитъёслы атыкай музъемдэ гажан мылкыд пыӵатон; - шугъяськисьёслы улон-вылоназы юрттон; - егит семьялы юрттон; - таза улонэз... - мукет кунъёсысь егитъёсын кусып возён; - республикаысьтымы районъёслэсь но городъёслэсь кивалтӥсьёссэс уже кыскон. 2000-тӥ арын кун комитет слётэ огазеяны быгатӥз пӧртэм предприятиосын ужась егитъёсты. Отчы пыриськизы электромеханической заводысь, радиозаводысь, "Спецгазавтотрансысь", "Удмуртавтодорысь", "Буммашысь" но эшшо дасо пала предприятиосысь егитъёс. Соос ог-огзылэн ужан амалъёсынызы тодматскизы. Нош ар пумын заводын ужась егитъёс понна нырысьсэ радъямын вал КВН. Пиналъёслэсь но егитъёслэсь ваньмон дырзэс радъян туж трос кужымез кулэ каре. Егитъёсын ужасьёс уго сое пайдаё карыны тыршо. Нимысьтыз саклык висъяло усточиослы но шуг нылпиослы. Ар ӵоже та ласянь лэсьтэм ужез ваньзэ вераса ик уд быдты. Студентъёс понна гинэ дасо пала шулдыръяськон ужрад ортчытэмын. Егит муртъёс тужгес яратӥзы КВН-ъёсты. Но геитъёс шудыса-серекъяса гинэ уг уло, соос быгато данъяськыны историенымы. Вормонлы 55 ар тырмонлы сӥзьыса пыриськизы республикаямы ялэм конкурсъёсы. Азьланьтэмын спортъя но мугорез кыдатонъя ужъёс. Али Егитъёсын ужанъя кун комитетлэн бурд улаз 13 огазеяськонъёс: - "Родники"; - "Долг"; - "Шунды"; - Егитъёслэн авиационной лигазы; - Студентъёслэн-медикъёслэн ассоциацизы; - бигер егитъёслэн "Иман" огазеяськонзы; - культурая но творчествоя "Солнцеворот" центр; - дышетскись пиналъёслэн ассоциацизы; - "Фудокан" спортивной клуб; - пинал туристъёслэн огазеяськонзы; - скаутъёслэн ассоциацизы; - пор егитъёслэн "Ужара" огазеяськонзы; - "Будо-лицей". Ваньмызлы та огазеяськонъёслы кун комитет котыр ласянь юрттэт сётэ. Жаляса верано луэ, улон-вылонмылэн секытэз нырысь ик шукке пиналъёсты но егитъёсты. Семьяосын кусыпъёс куашкало, нылпиос урамын кыстасько, урод муртъёсын кушласькыса, наркотикъёс вылэ пуксё, кышкыт висёнъёсын черлало. Та ласянь кун комитетэн нимысьтыз подпрограммаос кылдытэмын. Соя ялан уж нуиське. 2000-тӥ ар ӵоже 103816 адями юрттэт курыса психологъёслы вазиськылӥз. Шаерамы туж паськыт ортчиз "Кузьма аслыд улон" ужрад. Секцие пыриськемъёс наркотикъёслэсь, малпаськытэк тупатэм кусыпъёслэсь куштӥськыны ӧтизы - со бордысь потэ уго куректон. Кун комитет палэнэ уг кельты егит семьяосты но. Специалистъёслэн индылонэнызы сяна, юрттэмын вал коньдонэн но. 502 егит семья 8435 сюрс манет тыр улон интылы кредит басьтӥз (1999-тӥ арын - 192 семья). *** Удмурт "Шунды" быдэс Россиез мальдытӥз (Удмурт геитъёслэн "Шунды" дэменлыксылэн 2000-тӥ арын ужамез сярысь) Удмурт Республикамылы Президент быръёнэн валче, "Шунды" дэменлыклэн но ужаз воштӥськонъёс ортчизы. Кылдӥзы выль проектъёс, потӥзы выль азьветлӥсьёс. Кылем арын шӧдскымон юнмазы мукет финн-угор кунъёсын кусыпъёс. Ваньмыз со юрттэ огазеяськонлы ӟечгес ужаны. Но "Шундылэн" программаяз пусъем ужпумъёс - удмурт егитъёслэн улон-вылонын сюлмаськонъёссы - ужпумен ик кылё. Егит удмуртъёс пӧлын ӧжыт ужбергатӥсьё, экономикаен, политикаен тунсыкъяськисьёс. Уг шӧдӥськы азьветлӥсь луон мылкыдзы - общественной уже гинэ но кыскыны туж секыт. 2000-тӥ арын "Шунды" ужаз азьвыл программаосызъя ик. Лулчеберет: Июль толэзе "шундыос" Марий Эл шаерысь "Ӟардон" ансамбльлэн 25 аръем юбилей ужаз пыриськизы. Июле Алнаш ёросысь Кузебай гуртын ортчиз "Эру" праздник. Ужрад сӥземын вал пиналъёслэн быдэ вуэмзылы. Пыриськизы Кизнер, Алнаш, Грах, Можга, Пичи Пурга, Кияса, Селта, Вавож ёросъёсысь егитъёс. Октябре дэменлыклы 10 ар тырмиз. Солы сӥзем ужрадъёс ортчизы тросаз районъёсын. "Вож тулкым": Гужем Пичи Пурга ёросын ортчиз нылпиослэн экологической лагерьзы. Пиналъёс кык арня ӵоже инкуазьын улӥзы, сое эскерыны, утялтыса возьыны дышетскизы. "Шунды си": Шаерысьтымы школаосын кылдытъямын "Шундылэн" выль ёзъёсыз. Ужазы соос пыкъясько калык педагогика но калык психология вылэ. Со юрттэ нылпиослы ассэ валаны, кыӵе калыкысь потэмзэ валаны, соин данъяськыны. Финн-угор егитъёсын валче ужан: "Шунды" дэменлык финн-угор калыкъёслэн ассоциациязы одӥгез азьветлӥсез огазеяськон луэ. Кылем арын но со мыло-кыдо пыриськиз МАФУН-лэн ужаз. Май толэзе шаерысьтымы Национальной музейын ортчиз этнофутуризм амалэн суредасьёслэн "Мушому" выставказы. Июле кӧня ке удмурт нылпиос шутэтскизы Ханты-Мансийскын радъям лагерьын. Августэ "Эктон корка" пыриськиз Эстониын ортчем ӵыжы-выжы луись калыкъёслэн нуналъёсазы. Декабре Финляндиын ортчиз Дуннеысь финн-угор калыкъёслэн ИИИ конгрессы. "Шунды" дэменлыкысь адямиос солэн ужаз пыриськизы. Россиысь общественной огазеяськонъёсын валче ужан: "Шунды" пыриз Россиысь калыкъёслэн ассамблеязы. Ассамблея валтӥсь ужпумен лыдъя пӧртэм калыкъёслэсь государствоен кусыпъёссэс тупатонэз. Россиысь калыкъёслэн огазеяськонзы тупаса улыны, ӵош ӟеч ужъёс лэсьтыны юрттэ. "Шунды" мыло-кыдо пыриське ассамблеялэн ужаз. Июне Москваын ортчиз РКА-лэн 2-тӥ съездэз. Ноябре быдэс Россиысь егитъёс люкаськизы асьме доры. Ижевскын ортчиз "Мы - Россияне" форум. И. Кириллова. ВУЗКАРОН УДЫСЫСЬ Дунтэм, дуно машина Кин кызьы уксё поттэ. Семьядэ умойгес сюдон-вордонлы, байгес улонлы государство туннэ пумит ӧвӧл. Дырыд дыръя выт гинэ тыр. Уксё люканы каньылгес вузкарон удысын, соин тросэз адямиос отчы кыстӥсько. Кин маин вузкаре, нош Воткинскысь одӥгез тодмое - машинаосын. Эшеныз ӵошен поездэн толэзьлы быдэ Москвае ветло. Шоркарын ӵыжы-выжыосыз дорын кӧлало. Газетъёсысь ялонъёсъя куинь нуналысен арняозь кельшымон машина утчало- басьто. - Берло дыре шуггес луиз, - шуэ Анатолий. - Умойёсызгес, дунтэмъёсызгес чаляк кошко. Угось ми кадь ужасьёс-вырисьёс трос гинэ ни. Вань асьсэлы машина басьтыны ветлӥсьёсыз но. Соослы ӵемысь уг удалты. Малы ке шуоно, вуо, кытысь ке вераськемъёсты кылыса. Нош кызьы со лэсьтӥське, пыр-поч уг тодо, уг валало. Таяз ветлэмам ваи укмыстон тямысэтӥ арын поттэм укмысэтӥ "Жигулиез". Сылэ сюрс вить сю доллар (ньыльдон кык сюрс тямыс сю манет). Нырысь сое буяло, мазэ-созэ тупатъяло но куатьтон сюрс манетэн вузало. - Асьтэос буяськоды шат? - Уг, сервисэ сётъясько. Нош мукет тупатъян ужъёсты ас киын дауртӥсько. - Кӧня барыш поттӥськоды озьы вузкарыса? - Поездлы билет дунэз, Москваын улэмез, трассаетӥ ширтонэз (бензинлы трос ик уксё быре) лыдъятэк, куинь-сизьым сюрс манет киям вуэ. Ку кызьы укшалоз. - Кӧня дыр быре бертон сюрес вылэ? - Толалтэ кызь-кызь кык час. Кезьытэн кык час мында гинэ ялкарыны висъяськом. Салонын шуныт мед луоз шуыса, изьыку но машинаез кысылоно ӧвӧл. Ваньмыз со коньдон. Соин ик, синъёс ворсаськыны кутскыку, кафее пырыса, кык ӵаша кофе юисько но, выльысь трасса вылэ потӥсько. Озьы ик дор пала вуоно. - Уез-нуналэз учкытэк ветлӥськоды. Ку секытгес? - Уин синъёс жадё, висьыны ик кутско. - Ваем машинаез шуг-а вузаны? - Учко, кыӵе арын поттэмзэ. Вылезгес чаляк кошке. Огпол машинаез ваи гинэ но, Пермьысь басьтӥсь сюриз. Уйзэ изьытэк, пушсэ вошъяй-тупатъяй. Ӵукнаяз Перме лобӟи. Кык сутка изьымтэ бере, руль сьӧрын пукыкум, син азе оломар но пуксе. Ярам, номыр ӧз луы, быдэскын городэ вуи. Машинаме келяй. Берен автобусэн бертӥ. - Машинаен нялтас ветлӥсьёс сюрес вылын трос-а пумиськыло? - Одӥг-ог сюрыло. - Дунэн-а нуллӥськоды? - Автобус дунъёсъягес ик курисько. - Ӵем-а шуг-секытъёсын пумиськылоно луэ? - Котькыӵе сюрес секыт. Берпуметӥзэ ветлыкум, уксёен валче правоме ыштӥськем. - Кызьы дорады вуиды? - Ачим пайми - удалтӥз. Умой, сюреслы кельтэм уксёез нимаз понӥськем. - Кельше-а тӥледлы таӵе уж? - Шуг ке но, алама ӧвӧл. Семьялы уксёе тырме. Дорын таӵе уждуно уж шедьтыны шуг. Зэмзэ но адями сюрс-сюрс вить сю манет басьтэ ке, со ӟеч улэ ни шуиськом. Нош курадӟытэк, сюлмаськытэк улон понна уждун толэзяз кык-куинь поллы вылӥгес луыны кулэ. Соин но тросэз адямиос кыстӥсько ужбергатон удысэ, утчало уксё поттыны выль амалъёс. Ӵошатон вылысь, Ижевскысь рынокын машина дунъёс таӵеесь: 1991-тӥ арын поттэм ВАЗ-2109 - 49 сюрс; 1993-тӥ арын поттэм ВАЗ-2109 - 48 сюрс; 1993-тӥ арын поттэм ВАЗ-21093 - 17 сюрс; 1997-тӥ арын поттэм ВАЗ-2106 - 63 сюрс. О. Кожанова. (Лыдпусъёс басьтэмын "Из первых рук" газетысь). Дэменлык кылдӥз Ижевскын улӥсь Шаркан палъёс кылдытӥзы асьсэлэсь дэменлыксэс (землячествозэс). Кутӥзы выль устав, бырйизы правление. Тӧрое быръемын чупрес нылкышно Алевтина Ивановна Поткина. Кенешемзы бере возьматэмын вал концерт. Шулдыртӥзы асьсэ палась ӝужам "кизилиоссы" артистъёс Светлана но Алексей Ложкинъёс, Евгений Перевозчиков, Виктор Стрелков но Эдуард Князев "Венец" ансамбленыз. Т. Сидорова. Удмурт Элькунысь национальной театр мартэ таӵе ужъёссэ возьмтаоз: 20 мартэ - Леонид Романов "Любовь не стареет" (Кык ёзэн ӟуч кылын комедия - 18 часэ. 21 мартэ - Владимир Котков "Пинал мылкыд - юмал йӧлпыд" (Кык ёзэн комедия) - 18 часэ. 23 мартэ - Анатолий Григорьев "Эмезь кисьмаку" (Кык ёзэн комедия - фарс) - 18 часэ. Нылпиослы выжыкыл 25-30 мартэ - "Андрей-Стрелок и Марья-Голубка" 10.00 но 13.00 часэ. Архивысь материалъёсъя Удмуртия ЪЪ дауре 1986-тӥ ар Таиз ар луиз выльдӥськонлэн кыкетӥ арез. Феврале ортчиз КПСС-лэн ЪЪВИИ съездэз. Солэн решениосызъя чакламын вал шаерын экономикаез азинтыны но калыклэсь улон-вылонзэ умоятыны, пуш но кунсьӧр политикаез выльдыны. Мукет решениосынызы ӵош съезд кутӥз таӵезэ но: 2000-тӥ арлы котькудӥз совето семья нимаз патер басьтыны кулэ. Азьланьтӥськиз юонэн нюръяськон. КПСС-лэн ЦК-ез но СССР-ысь Министръёслэн Кенешсы ужатэк пайда поттонлы, спекуляцилы но калык ваньбурез лушканлы пумит нюръяськонэз кужмоятонлы сӥзем постановление кутӥзы. 20-тӥ феврале СССР-ын лэземын вал "Мир" орбитальной станция. 26-тӥ апреле луиз кызетӥ даурлэн самой кышкыт шугадӟонэз. Чернобыльысь АЭС-лэн одӥгез энергоблокез пуштӥз. Солэсь бервылъёссэ быдтонэ пыриськизы Удмуртиын улӥсьёс но. Со понна "Ижмашын" лэсьтэмын вал кышкыт интыосын ужаны быгатӥсь роботэн уробо. Апреле кинотеатръёсын возьматэмын Юрий Германлэн "Проверка на дорогах" кинофильмез. Азьвыл со калыклы адӟытыны лэземын ӧй вал. Со бордысен кутскизы мукет ватэм кинофильмъёсты но возьматъяны. Та тулысысен гужем но тол дыре выжон 1-тӥ апреле но октябре ӧз ни ортчылы, со понна кутӥськылӥзы ортчись толэзьёслэн арня нуналъёссы. 1-тӥ сентябрьысен Удмуртиысь вань предприятиос, ваньбур поттонэз ӝогомытон вылысь, кык но куинь сменаен ужаны ӧдъязы. Ижевскын улӥсьёс азьланьтӥзы городлы мукет ним сётэмлы пумитъяськонзэс. августэ егитъёс "Ми - Ижевск понна!" ӧтён улсын демонстрация ортчытыны дасяськиллям вылэм, но милиция соосты улляны быгатӥз. 8-тӥ-14-тӥ декабрёзь Удмуртиын ортчизы Совето литературалы сӥзем нуналъёс. Отчы пыриськизы Андрей Вознесенский, Сергей Залыгин, Андрей Дементьев но мукет тодмо писательёс но кылбурчиос. Соос но Удмуртилэн столицаяз улӥсьёсты "ижевчанъёс" шуыса нималлязы. Сатирик Александр Иванов пырак ӧтиз городлэн вуж нимыз понна нюръяськыны. Таяз арын йылпумъяськиз Игра-Глазов сюресэз асфальтэн шобыртон. Со луонлык кылдытӥз Глазов-Ижевск автобус сюресэз усьтыны. "Ижмашын" поттэмын вал тямыс миллион мотоцикл. Мартэ УАССР-ысь кырӟанъя но эктонъя "Италмас" ансамбль пусйиз 50 арес тырмонзэ. Ижевскын ортчем юбилее ветлӥзы СССР-ысь калык артист Махмуд Эсамбаев но Борис Моисеевлэн калык эктонъя ансамблез. Июль пумын печатласькиз покчи нылпиослы нырысетӥез "Кизили" кун журнал. Августэ Удмуртиын нырысьсэ ортчиз Городлэн нуналэз. Таӵе кутсконэз сётӥз Камбарка. Гужем Кез ёросын эстон но удмурт этнографъёс ӵош экспедиция ортчытӥзы но уй пал удмуртъёслэн улэм-вылэмзы сярысь документальной фильм пуктӥзы. Феврале Ижевскысь Валерий Медведцев Норвегиысь Холменколенеын ортчись дуннелэн чемпионатаз ваньзэ куинь зарни медальёсты утӥз, биатлонэн ӵошатсконъёсын таӵеез нырысез вал. В. Трещев, Удмурт Республикаысь Выль историяя центрысь валтӥсь специалист. КПСС-лэн ЪЪВИИ съездэзлэн Удмурт областной парторганизациысьтыз делегатъёсыз. Ижевскысь механикая заводысь роботъёсын ужась комплекс, со чакламын автомобильлэн бер мостэзлы детальёс дасяны. 2001-тӥ арын 22-тӥ мартэ 11 часын Удмурт Республикая валтӥсь федеральной инспекторлэн приёмнояз калыкез кутоз Удмурт Республикаысь военной комиссар Г. В. Барсков. Приёмнойлэн адресэз: Иж город, Карл Маркс ульча, 274 номеро юрт, юалляськыны луоз 25-40-61 телефонъя. Сю сюрес - огез тынад Берло дыре Игра ёросын улӥсьёс кыӵе ке профессия басьтон пумысен уг курадӟо. Нокытчы кошкылытэк, Игралан ик мылкыдъя дышетскон удыс бырйыны луэ. РОСТО-лэн автошколаяз дышето водительёсты. "Игратехсервис" ООО мылкыд карисьёсты компьютерен ужаны дышетэ, 36 номеро училище дася электрооборудованиез ужатонъя техник-электрикъёсты. Играла интыяськемын УдГУ-лэн, Иж ГТУ-лэн, Глазовысь пединститутлэн, Пермьысь му вӧйя колледжен филиалъёссы. Озьыен, Игра ӝоген узырмоз инженеръёсын, экономистъёсын, юристъёсын, дышетӥсьёсын. Л. Корепанова. Толэзьлы быдэ Кылемаз покчи арня нуналэ люкаськылӥзы "Удмурт кенеш" огазеяськонлэн исполкомез но "Герд" газетлэн редколлегиез. Татысь адямиос кенешизы матысь дыре быдэстоно ужъёссы сярысь. "Гердлэн" редакторез Александр Вахрушев ивортӥз газетлэн вуоно пуштросэз, удысъёсыз, вылтусыз сярысь. Та ужпумъя асьсэлэсь малпанъёссэс веразы "Удмурт дунне" газетлэн валтӥсь редакторез Алексей Шкляев, солэн воштӥсез Иван Лебедев, история наукаосъя доктор профессор Кузьма Куликов, удмурт нылкышноослэн кенешсылэн тӧроез Галина Никитина, мукет адямиос. "Удмурт кенешлэн" кивалтӥсьёсыз куремъя, огазеяськонлэсь ужзэ возьматӥсь бам луоз "Удмурт дунне" газетын но. Со потылоз толэзьлы одӥг пол. Печатласькыны кутскоз апрельысен. Та ужпумъя асьсэлэсь мылкыдъёссэс веразы исполкомысь адямиос Нина Малых, Вячеслав Михайлов, Лидия Иванова. Люкаськемъёс пӧлын ӟырдыт вераськон пуромиз "Известия Удмуртской Республики" газетлэн Россия Федерациысь Кун Думалэн депутатэзлэсь Светлана Смирновалэсь малпанзэ мыдланьтыса ивортэмез пумысен. Люкаськемъёс таӵе малпанэ вуизы: мыдланьтыса ивортэмез одно ик палэнтоно. Та нуналэ ик кенешемын удмурт гожъясьёсын валче ужан, "Герд" газетэз сьӧрло но вӧлмытон, Удмурт радиолэн иворъёсын но крезьгурен "Визыл" программаяз арняяз огпол кык минут ӵоже вераськылон пумысь. Отысь ик тодыны луоз "Удмурт кенеш" огазеяськонлэн толло, туннэ, ӵуказе нуналыз сярысь. Таин валче ик кенешемын Удмурт телевиденилэн 34-тӥ каналаз но вераськылон сярысь. Та пумысен юрттэт курыса вазиськемын луоз шаерысьтымы вылӥ кивалтӥсьёслы. Та ужпумъя вераськиз "Удмурт кенеш" огазеяськонлэн тӧроезлэн воштӥсез Галина Шушакова. Та нуналэ ик ивортэмын Данъян книгае пыртэм адямиос сярысь. Соос - азьветлӥсьёс Тамара Ивановна Бочкарёва, Семён Андреевич Ильин, Нина Яковлевна Савельева, Борис Иванович Русских, Валентина Николаевна Широбокова. Удмуртъёс котькытын яратыса пумитало "Яратэ!" кырӟанэз (кылъёссэ гожтӥз Владимир Котков, крезьгурзэ кылдытӥз Алефтина Корепанова, тупатъяз Евгения Копысова). "Удмурт кенеш" огазеяськонлэн-а, шаерысьтымы вань удмуртъёслэн-а гурзы луоз со - та пумысен малпськоно ай. Та нуналэ ик кенешемын удмурт культурая "Дэмен" огазеяськонлэн вуоно ӧтчамез сярысь. Со ортчоз 31-тӥ мартэ. Кенешез нуиз огазеяськонлэн тӧроез Валентин Тубылов. Е. Ромашова. Терроризмлы пумит 16-тӥ мартэ Удмуртиысь МВД-ын бадӟым кенеш ортчиз. Вераськон мынӥз 19-тӥ�29-тӥ мартэ туэ быдэс Россиын "Вихрь-антитеррор" ужрад ортчытон сярысь. 19-тӥ мартысен милиция ас ужзэ кужмоятэ. Нимысьтыз саклык висъяськоз вокзалъёсты, аэропортъёсты, автостанциосты, машина сылон интыосты, бадӟым сюресъёсты эскеронлы. Чакласа возёзы школаосты, нылпи садъёсты. Удмуртиысь Югдурез утёнъя министерство калыкез сакгес кариськыны куре. Трос калыко интыосын, подъездъёсын маке но осконтэмзэ синйылтӥды ке, "02" телефонъя милицие ивортэ яке 55-73-73, 55-75-75 телефонъёсъя. Эн тырше асьтэ кужымен кышкытлыклэсь палэнтыны. Со понна нимысьтыз адямиос, дышетэм пуныос, кулэ луись тӥрлыкъёс вань. Тулыс апай вуиз Кылем арня нуналэ шулдыр вал Ижевскысь Авангард урамысь Кызьпу арамаын. Городысь удмуртъёс татчы люкаськылӥзы толэз келяны. Вераны кулэ, шоркарамы таӵе праздник нырысьсэ вал. Сцена вылын кырӟам куараос кыдёкысен ик ӧтизы калыкез. Шутэтскыны лыктэмъёс азе потазы тодмо артистъёсмы Михаил Ворончихин, Геннадий Кузнецов, Светлана Смагина, Пётр Романов, Елена Сунцова, Алексей Ложкин, Андрей Ураськин. Шулдыртӥзы "Айкай", "Эктон корка" но "Инвожо". Мылкыд карисез татын быгатӥз вал вылын ворттылыны, сцена вылысен такмакъёс кырӟаны, эктыны, пӧртэм пыжиськемъёсын кунояськыны. Огшап ваньмыз вырӟизы учкыны, кызьы ӝуа Тол кенаклэн сульдэрез. Со интые вуиз ӵыжыт бамо Тулыс апай. Т. Николаева. 12 аресъем Радфис тылпуысь куинь пиналэз утиз Башкириысь Кармаскалинской ёросысь одӥгаз общежитиын пропанэн баллон куштӥз. 1 кышномурт быриз, 23 мурт шедиз эмъяськонниосы, со пӧлысь 9-эз - реанимацие. ... Кӧшкемыт гудыртэм бере, шузимем калык ураме кыстӥськиз. Пуромем тылпу син азьын быдэс улон юртэз ньылыны ӧдъяз. Огвакыт адямиос ма карыны ӟудӥзы кадь, суй-пыдъёссы юскиськизы. Таза мугоро воргоронъёс гинэ но долказы тылпу шоры. ... 12 аресъем Радфис ӧз куалекты, ӧз кышкатскы. Со сэзь вамыштӥз ӝуась юрт пала. Кызьы верало пияшлэн атаез но анаез, пуштэм куараез кылэм бераз ик Радфис куинетӥ классын дышетскись Артур вынзэ сайкатӥз но ураме келяз. Ачиз берытскиз ӵыжы-выжыысьтызы ик сизьым аресъем Регина дуре. Региналэн анай-атаез та вакытэ доразы вылымтэ. Ӵын пӧлын жӧлмам нылашез, Радфислы укно пиялаосты сӧрыса поттоно луиз, ачиз ик солы искусственной дыхание лэсьтӥз. Та бӧрсьы но Радфис ӧз буйгатскы: общежитиысь эшшо одӥг пичи пияшез поттӥз. Адӟисьёс верамъя, та вакытэ солэн дӥсез ӝуаны кутскемын ни вал. ... Радфис ньылетӥ пияшез утьыны малпаз. Та дыре юртын кыкетӥзэ газэн баллон пуштӥз - Радфис йырсазьзэ ыштӥз... Утем пиналъёс пӧлысь ваньзы улэп, таза кылизы. Ачиз Радфис сутӥз синъёссэ, ымнырзэ, киоссэ. Мугораз 12 процент куэз сутскемын. Али пичи герой реанимациын кылле, дораз нокинэ пыраны уг лэзё. Но эмъясьёс оскыто, Радфис улэп кылёз, шуыса, синъёсыз но адӟозы. Бен, сутскем интыосаз вурысъёс кылёзы ик. Асьмемыз уте нюръяськон 2000-тӥ арын "Кенеш" журналлэн 11-тӥ�12-тӥ номеръёсаз печатласькиз тодмо ӟуч тодосчиен Михаил Худяковен кылдытэм кузьмадёс. Удмурт кылэ берыктӥз кылбурчи но тодосчи Василий Ванюшев. Аслаз улон-вылонэз, ортчемез но вуоноез сярысь малпаськись калык кызьы ке но вераны турттэ соос сярысь. Вашкала дауръёсы со малпанъёс-чакланъёс пырылӥзы турлы выжыкылъёсы но мадёсъёсы. Ымысь ыме, пельысь пеле, даурысь дауре, выжыысь выжые кошкылӥзы но вуизы асьме дырозь. Соиз умой: Михаил Худяков ас дыраз соосты, пазьгиськем макеосты, огазе карыны сюлмаськем. Куд-ог тодосчиослэн чакламзыя, Куӟебай Герд но таӵе бадӟым чеберлыко ужен пумиськылэм. Но удмурт калыклэн сыӵе, вылды, шудтэм даурез: бурдъёссэ вӧлъяны кутске гинэ, тылыоссэ соку ик ишкало. Нош, котьма ке но, калыкмылэн визьмо мадёсъёсыз шедьтӥзы асьме доры сюрес. Нырысь лыдӟем бере ик валано: дуннелэсь кылдэмзэ, ортчем улонзэ но азьпал дырзэ валэктонын вашкалаосмы мукет калыкъёслэсь пӧртэм ик вылӥллямтэ. Удмуртъёс азьвыл малпало вылэм, нырысь ик дунне вылын туж бадӟымесь адямиос - зэрпалъёс - улӥллям шуыса. Тани басьтоно ке англи калыкез, соослэн но малпамзыя вылӥллям зэрпалъёс но (великанъёс), пичи адямиос но (лилипутъёс). Нош Библиез басьтоно ке, отын дунне пум вуон сярысь трос поттылэмын. Шонер, дыр: вал пӧртэм кунъёс, ортчылӥзы дауръёс, ышылӥзы соос, кылдылӥзы выльёсыз. Оло нош сыӵе бадӟымесь воштӥськонъёс сярысь малпаса ик вордӥськылӥзы аспӧртэмлыко мадёсъёс. Историез гожъясьёс ӧй вал бере, оло нош,пӧртэм выжыкылъёс, мадёсъёс гинэ вуттӥзы на улон-вылон дунне сярысь малпанъёсты, солэн пумыз сярысь веранъёсты. "Му вылысь ӟег куроез Ӝутыны сизьым кузя Туртскозы пычкиськыса, Вал интые шыръёсыз Ветлозы кыткылыса. Йыръёссы со шыръёслэн Луозы парсьлэн кадь ик: Кузь ныро, бадӟым ымо - Учкыса кӧшкемалод. Тӥнь озьы пумен-пумен Адями выжы быроз. Асьмеос ини туннэ Вуиськом со вапуме" ,- шуэ Михаил Худяков кылтодон наукаосъя докторен Василий Ванюшевен удмурт кылэ яратыса берыктэм кузьмадёсаз. Тодосчилэн Василий Ванюшевлэн верамезъя (со тодэ вайытэ Даниил Яшинлэсь кылъёссэ), "эпос амалэн гожтоссэ Михаил Худяков кылдытыны кутскем Октябрь революцилэсь азьло ик". Озьы тӥни ХХ даурлэн кутсконаз мытӥськем уж лыдӟисьёс доры вуиз даурлэн пумаз гинэ. Отчы пыртэмын дас кырӟан - Инмарлэн, Кылдысинлэн но Куазьлэн улон-вылон вакытсы сярысь, зэрпалъёс сярысь, ыштэм шуд сярысь, воршуд но Донды батыръёс, Калмез батыръёс, тушмонъёсын нюръяськон но вуоно вакытъёс сярысь гуръёс. Котькудӥз - нимаз чеберлыко уж. Выжыкыл но зэмос улон, мадёс но зэмлык, тодэ ваён но вуоноез сярысь мур малпаськон чильпаськыса-чильпаськыса люкаськиллям огазе. Чеберлыко ужлэн синмаськымон синпелетэз шуыны луысал та бадӟым эпосэз. Огломак басьтыса, кузьмадёс туж ӟеч мылкыд кылдытэ, сое берыктӥсь сюлмысь ужамен. Зэмос выжыкыл дунне но усто радъям чуръёс чеберъяло сое. Юн, ӝужыт тӧдьы кызьпу Оло нош ӧтиз дораз - Шур вадьсысь вырйыл бамын Вӧсяськон радзы араз. Вал отын му гырисьёс но, Пӧйшурась, мушкась калык, Ваткаос но, калмезъёс но Потэмъёс Шудӟа пӧлысь... Огымысь, огпол шокчем кадь, Вань калык кылзэ вераз: Куремысь соку дугдоз, пе, Дор палаз кошкоз, бертоз, пе, Кылдысин - утисьсылэн - Му вылэ потэм бераз. Каньыл лыдӟиське, озьы-а? Выжыдэ яратон но, чуръёсты вольыт сузьйыны быгатон но, кылбурчилэн произведение борды шуныт мылкыдын басьтӥськемез но шӧдӥське. Удмурт гожъяськисьёс яратоно удыссы борды ӝыт, ужзылэсь мозмытскыса гинэ басьтӥськыны быгато бере, соку ик валано, макем кема тыршем берыктӥсь эпос бордын. Берыктон ужез кудӥз каньыл кожа. Нош со - сыӵе ик секыт уж. Таӵе ик луэ кылбур, повесть яке мукет произведение гожтон. Оригиналэзлэн лулыз-сюлмыз кыльыса, отчы ватсасько на аслаз берыктӥсьлэн кылтӥрлыкен ужаны быгатонлыкез но лулыз-сюлмыз. Удмурт материал борды басьтӥськыса, этнограф М.Худяков солэсь палэнскыны быгатымтэ ни. "Дорвыжылэсь" огъя пуштроссэ чаклано ке, асьме шӧм но мылкыд ӟеч шӧдӥсько, соосты муромытэ на В.Ванюшев но. Огъя уж сярысь шуныт кыл вераса, тае но ватсам потэ: эпос нош но нош, ручка кутыса, лыдӟемез кулэ каре. Сотэк уз лу: волятон уж туж кема кыстӥське. Кылсярысь, тани эпосысь адями бырон сярысь чуръёс. Югыт дуннелэн быронэз сярысь верало уноезлэн калыкъёслэн мадёсъёссы. Асьмеос ини туннэ Вуиськом со вапуме. Тӥни таӵе ӝотак веран - мылкыдэз сӧрон, зӥбон яке дырызлэсь вазь бырыны дасяськон ӧвӧл-а? Кызьы тон, лыдӟись эше, учкиськод ачид, выжыед, вуоно даур-нуналъёсыд шоры? Быри, шуиськод-а? Та пумысен кӧня ке малпанъёсме вераны дӥсьтысал. Басьтом удмурт кылмес. Данак интыосын "малы кулэ со удмурт кылэд" шуисьёс шедёзы. Тросэз шумпото, вань ӟеч сямъёссылэсь али ик куштӥськыны быгато ке. Озьы ик лэсьто но. ХВИ даурын удмуртъёс статистикае ик ӧз шедьылэ ни. Нош асьмеос али но улӥськом, ХХИ дауре но выжимы. Тыршим, тыршим но бырыны ӧм сётске. Озьыен, тыршоно. Кылэз утён сярысь малпаськоно. Нюръяськон уте асьмемыз. Соин ик, ӝотак верам кылъёс интые, оло нош умой луысал, азьпал улон-вылон сярысь пичияк, ньыль чурен гинэ коть малпандэ-мылкыддэ гожтыса. Ватсаме потэ на тани мае. Эпосын вань кулэм Можга батырез октон-калтон суред. Со пыртэмын тямысэтӥ кырӟанысь ньыльдонэтӥ люкетэ. Мон сое куштысал яке воштысал. Тани малы. Малмыжысь ӟуч М.Худяков аслаз эпосаз удмуртъёслэсь поръёсын жугиськемзэс пыртэм ке, со шонер. Нош чылкак умойтэм кадь поръёслэсь вӧсян сямзэс возьматон суред. Яке со зэмзэ но эпосэ пыремын Мултан ужлэн бервылъёсыныз сэрен? Яке гожтӥсьлэн зэмзэ но сыӵе осконэз, малы ке шуоно, ты, мус, сюл котыртӥ трос бергамын вал удмуртъёсты янгыше уськытыны турттон дыръя. М.Худяков тодытэк ӧз улы, дыр, вылаз ик, уж Малмыжын эскеремын. Я, шуом, со ХХ даурлэн кутсконаз гожтэмын вал, нош ХХИ даурлэн кутсконаз печатлатэк но ярасал. Ойдолэ ог-огмес, вашкала выжыосмес сыӵе сереме уськытонъёслэсь утёме но ог-огмылы дурбасьтыны сюлмаськоме. Соку бырон даурмы но туж кемалы, кыдёке сэрпалтэмын луоз. Нош кыӵе ке научной ужъёсын со суредэз возьматӥсь чуръёсты кельтыны ярасал, дыр. Озьы но - туж чакласькыса гинэ. Тӥни сыӵе чыры-пыры дэмланъёс. Нош огломак басьтоно ке, "Дорвыжы" - синмаськымон синпелет. В. Ванюшев сое нимаз книгаен поттон азяз волятӥз на ке, нош со озьы ик кароз но, дыр, бадӟым уж зэмзэ но чебер кисьтаськыса улоз калык пӧлын. Трос дауръёс ӵоже. Виктор Ивашкин, Удмурт радиоысь журналист. Ин сьӧры мон лобасал, вань дуннез адӟысал Кызьы меда кылдэм дунне? Мар со инсьӧр? Кин, кыӵе адямиос лобало отчы? Пичи дыръя котькудӥз пинал со сярысь малпаське. Ма, арлыдоос но инсьӧрен (космосэн) герӟаськем вань юанъёслы валэктон уг тодо, дыр. Нош тодӥськоды-а тӥ, Удмуртиысь но тодмо учёнойёс ракета поттон понна трос кужымзэс сётӥзы шуыса? Уд? Соку дыртэ Юрий Гагаринлэн космосэ лобемез дырысен 40 ар тырмонлы сӥзем "Адями. Музъем. Космос" выставкае. Отысь тӥ озьы ик адӟыны быгатоды Музъеммылэсь туспуктэмъёссэ, телескопъёсты, дирижабльёслэсь, космической корабльёслэсь, луноходъёслэсь, спутникъёслэсь макетъёссэс. Выставкаез радъясьёс сюлмаськиллям астрономияя урокъёс, "котырес ӝӧкъёс" ортчытон сярысь но. Выставка ужа Ижевскысь "Галерея" центрын 10 часысен 18 часозь. Экскурсиос пумысен юалляськоно 43-33-68, 43-25-70 телефонъёсъя. Чур бугор Инбаме кошкон 19-тӥ мартэ Москваын ватӥзы бортпроводницаез Юлия Фоминаез. Телевизор пыр ивортӥзы, Юляез террорист вандӥз шуыса. Но адӟисьёс верало - со кулӥз пулялэсь. Самолётлэн командирез Берлинэ лобон сярысь ивортэмез бере, бортпроводницаос террористъёслы веразы, люкъёсты, ӧсъёсты лач ворсано шуыса. Юля кыкетӥ салонысь ӧсэз ворсаны султӥз - тӥни соку ик террористлэн пуляез йыраз йӧтӥз. Лайнерез сьӧсьёс басьтэм бере, Юля ассэ йӧно возиз - со аслаз улонэз сярысь сюлмаськыса ӧз ватскы, пассажиръёсты буйгатыны выриз. Террористъёслэн син шоразы но тӥни ӵапак со йӧтӥз. Юля вань секыт, кышкыт ужез котьку ас вылаз басьтылӥз. Озьы луиз таяз учыре но. Юля Фоминалы 28 арес гинэ вал. Солэн кылиз 9 аресъем Яна нылыз, Сергей картэз, пересь анаез. Яна анайзэ ватыку жӧлмаса сылӥз, ӧз бӧрды. Пинал яке та кышкыт кайгулы уг оскы, яке анаезлэн кадь юн сямыз синкылиослы эрик уг сёты. ... Кӧня пол келялляз Яна анайзэ инбаме. Но со котьку берытскылӥз. Табере кошкиз пыраклы. Кин со - регент? Яке малы "пумыз вуэмын ни кадь..." Огшоры адями - ачиз сярысь шуэ Таня. Мон шуисько: огшоры адямиос ӧвӧл. Котькудӥз маин ке но тунсыко. Нош Таня Владимирова школаын дышетскыкуз ик мыло-кыдо, чупрес луэменыз син шоры йӧтылӥз. Кӧня меда пиос нылашлэсь, чиган чеберзэ малпаса, лушкемен лулӟылӥзы. Ортчизы аръёс. Кинэ кытчы, нош Таняез соос черке вуттӥзы. Ӝыны ар улыса нылаш регентлэсь - черкын кырӟась хорен кивалтӥсьлэсь - дипломзэ басьтоз. - Мынам тодэмея, черке ӵемысь мӧйы адямиос, висисьёс яке бадӟым куректонэ усемъёс лыкто. Нош тон? - Пичи дыръям кылылӥ, гуртысьтымы (Ильинскысь) черкез тупатъяса музей карозы шуыса. Мыным черк ик мед кылёз кадь потэ вал. Соин ик черк усьтӥськемлы туж шумпотӥ, отчы лыктӥ. Ӝоген отец Вячеслав клиросэ (кырӟан интые) ӧтиз. Собере Кибьяын вӧсяськон коркан ужай. Дышетскеме уг тырмы шуыса шӧдӥсько вал, Пермьысь соку гинэ усьтэм регинской школае мынӥ. Татын крезьгуръя но черк дисциплинаосъя, кылсярысь, нравственной богословиея, черклэн историезъя, черкын кырӟанъя тодон-валанъёсме будэтӥсько. Нырысь аръёсаз туж секыт вал, но, инмар юрттэмъя пумен дыши. - Таня, тон тодӥськод: ЪВИИИ дауре удмуртъёсты ултӥяса, вӧсь карыса, кужмысь христианствое пыртыны выризы. Шат со черклэн катъёсызъя? Инмаръя? - Нокинэ но кужмысь карыны уг яра. Инмар асьмелы ачиз быръён эрик сётэм. - Мыным Константин Великийлэн верамез кельше. Христианъёслэсь вӧсяськемзэс адӟыса, язычникъёс асьсэос, пе, христианствое пырыны кутскиллям. Нош кужмысь каремлэсь урод гинэ луэ, бугыръяськон ӝутске. Дырыз вуиз ке, адями ачиз лыктоз, кин куректонэн, кин ас эрикеныз. Язычество шоры мон уродэн учкисько, мед быроз кадь потэ. Соос, кыӵе ке истуканъёслы вӧсяськыса, асьсэды гинэ ултӥяло. Мур малпаськизы ке, шӧдозы но валалозы но: инмар одӥг. - Вождэ эн вайы, но "истуканъёслы" вӧсясько шуиськод, нош обросъёс со сыӵе ик аспӧртэм "идолъёс" шуыны уг луы-а? - Уг. Икона - со аслаз инмарлэн кельтэмез ук. Со ӵушконэз ымныраз понӥз но, отчы паймымон киын лэсьтымтэ суред кылиз. - Кылэме вань, пӧртэм осконъёс пӧлысь, пе, христианство - ултӥям, ляб адямиослэн осконзы... - Со чик но озьы ӧвӧл. Чаклалэ ай асьтэос но, кӧня визьмо адямиос, философъёс, писательёс, инмарлэсь катъёссэ лыдӟыса но пыр-поч учкыса, улонлэсь кудпала выжемзэ чакласа, нош ик инмар доры вуо. - Таӵе ӟуч калык веран: "Инмартэк сюрес паськытгес"... - Инмарез тодытэк улӥсь адями трос сьӧлыка, котьма карыны дась. Нош инмар шуэ: паськыт сюрес кузя мыныны эн дырты, пе, со тонэ кырыже вуттоз. Сюбег сюресъя мынӥсь чаклаське ни, номыр уродзэ уг лэсьты. Инмар причастие но, литургия но юнме кылдытымтэ. Ас сьӧлыкъёсыд понна кыл кутыны быгатоно. Визяны гинэ ӧвӧл, урод кыллэсь но, малпанлэсь но возиськыны тыршоно. Дьяволлы черке ветлӥсьтэм адями кулэ ӧвӧл. Со шуэ: таиз сотэк но мынам ни". Нош ялан вылӥе тубись адями сюлмаськытэ. Макем вылэгес ӝутӥське, макем инмарез золгес валаны кутске, сокем дьявол кескичгес выре тросгес визь сынанъёс (искушениос) ысъя. - Туала тодосчиос лыдъямъя, Иисус Христос зэм но улэм, адямиосты эмъяны быгатэм, паймымон пуш кужымо адями вылэм. Озьы бере, сое огшоры эмъясь (целитель) гинэ шуыны уг луы шат? - Иисус - инмар выллем адями - богочеловек. Со асьме сьӧлыкъёсмес басьтыны лыктэмын. Нош целительёслы Инмар кужым уг сёт, соин ик соос сатаналэн кужыменыз ужало. Пӧртэм сыӵе эмъясьёс, экстрасенсъёс пыр сатана адямилэсь лулзэ, кужымзэ басьтэ. Адями малпа, со бурмиз шуыса, нош бӧрысьгес эшшо но секыт луыны быгатоз. Монэ туж сюлэмшугъяськытэ телевидение. Со пыр, тужгес но рекламаосын, зол гипноз мынэ. Адями ужысьтыз жадьыса бертэ, телевизорзэ лэзе. Гань-гань кариськем муртэ гипнозэ пыртыны капчи. Кӧшкемыт 25-тӥ (бесовский) кадр сярысь тросэз тодо, али сое кутыны лэземын ӧвӧл ни. Нош азьвыл передачаос вискы, киное пыртыло вал. Адями номыр сыӵе-таӵезэ уг адӟы, но визьзэ ыштыны кутске. Кӧлэмед потэ ке - "сазёмытозы" яркыт реклама, куараосын, буёлъёсын шудон. Телевизор - туала адями понна инмар но, мар но луэ ни. - Лулчеберетмес утён понна мар бен кароно? - Адямилэсь нравственностьсэ усьтыны черк гинэ быгатоз. Запад шоры учкыны тыршисьёсты туж жалясько. Америка юромо Россиез быдтыны выре. Пичиослы гинэ но кыӵе кӧшкемыт мультфильмъёс лэсьто. - Асьмеос туж ӟеч адӟиськом, кызьы калыкмы юыса, кыскыса, ассэ наркотикен шузимытыса лябӟытэ. Нош кызьы малпаськод, али черклэн вань-а кужымез мур пыӵам сьӧсь мылкыдъёсын нюръяськыны? - Вераны ик уг тодӥськы. 70 ар инмартэк улӥмы, адями туннэ но шонер сюрес уг шедьты на. Али сыӵе - пумыз вуэмын ни кадь... Котькытын компьютеръёс, адямилэн йырыз уг ужа ни. ИНН шоры пумит учкисько. Со печать ӧвӧл на, но сатаналэн пусэз ни. Мон малпасько, азьланьын - кӧшкемыт суд. Инмар шуэ: "Берпуметӥез луоз нырысетӥ..." Озьы сьӧлыко адями но инмар доры берытскыса чылкытатскыны быгатэ. Инмар - со яратон. Яратонлэн пумыз ӧвӧл. Нош адямиос уг кыло, уг валало - урод кужымлэн ки улаз сюремын. Но ваньмыз со пумйылтэм ӧвӧл. Ной, Содом но Гоморра вакытъёс ортчизы, озьы ик кӧшкемыт суд но вуоз. - Озьыен, одно ик черке мыноно? Уг луы-а ас поннад гинэ вӧсяськыны. Шуом, тон инмарлы оскиськод, улонын ӟечсэ гинэ лэсьтыны тыршиськод, нош черке уд ветлӥськы... - Огназ адями капчиенгес уродэзлы, визь сынанъёслы сётӥське, соин ик, куд-ог дыръя ке но, черке ветлоно. Татын адями чылкыта, солэн сюлэмаз ӟеч мылкыд, ӟеч малпанъёс пыӵало. Танялэн куд-ог мылкыдъёсыз тӥледлы матын, нош куд-огеныз тӥ ваче пумит но вуиськоды, дыр. Ма, бен, мон уг шуиськы: егит нылаш понна но ваньмыз та дуннеын огшоры но валамон ни. Юанъёс трос. Таня огинтыяз уг сылы, азьланяз богословияя институтэ пырыны мылкыдыз вань. "Кин тодэ ни, анай-атай вылын но ялан уд пукы, ужаны кутсконо", - "музъем" сюлмаськонъёсыз маза уг сёто. Нош мон оскисько: Танялэсь одно ик усто регент пӧрмоз. Малпанъёсты чылкытатӥсь инмар кырӟанъёс пыр нылаш быгатоз адями сюлэмъёсты вырӟытыны, озьы бере "пумыз" но уз вуы на... Е. Панфилова. Кизилиос верало 26.03-01.04 Така (Овен) 21.03-20.04 Ас кужымдылы оскемды юрттоз кыӵе ке ӵошатсконын вормыны, экзамен умой сётыны. Калык пӧлысь мултэс висъяськыны эн выре. Чакласа возе коньдон пуйыдэс. Кузь сюрес вылэ потатэк умой луоз. Субботае ужъя ченгешонъёс потыны быгатозы. Ош (Телец) 21.04-21.05 Понедельник тӥледлы ӟеч мылкыд кузьмалоз. Кыӵе ке нылкышно тӥледды узырмытыны быгатоз. Возиське маке вузан-басьтонлэсь. Ымдэс "тунгонаса" возе - малпаськытэк пӧсекъяса вераськемды уродэн берытскыны быгатоз. Кыктоос (Эгызоос. Близнецы) 22.05-21.06 Тунсыко малпанъёсты кивалтӥсьёстылы кельшозы, тӥледлы ӟеч уж ӵектозы. Понедельник тупа огкылъёс кутыны, документъёсы гожтӥськыны. Но маке но бадӟым арбери басьтонлэсь возиське. Четверге барыш басьтыны быгатоды. Уж дурады удалтоз. Быдэс арнялы чаклам уждэс туннэ ик быдэстоды ни. Кисло-кусло (Рак) 22.06-23.07 Туж умой нунал - вторник. Удалтоз котьма ласянь. Средае трос вераськонъёс, супыльтонъёс луозы. Кисло-куслоосты секыт уж возьма. Субботаез огшоры ортчытыса, умойгес луоз, дыр - семьяяды лек керетонъёс, валамтэос потыны быгатозы. Секыт йӧтоз та нунал экзамен сётӥсьёслы, калык азьын вераськисьёслы. Лев 24.07-23.08 Шумпоттэ гажан мурттэс пичильтык ке но кузьымен. Вторнике малпам ужъёстэс быдэстыны быгатоды. Нош ӵуказеяз ик уж дурады уз удалты ни - ӵош ужась эшъёсты, кивалтӥсьёсты малпам уждэс быдэстыны люкетозы. Арня пумын бадӟым инты висъялоды яратонлы. Кузпалды (туганды) вожамез сярысь вералоз. Нылмурт (Дева) 24.08-23.08 Эн дыртэ маке пумысен судэ вазиськыны, номыр умоез уз луы. Семьяяды керетонъёс потыны быгатозы. Пятницае дӥсьтонды тырмоз кивалтӥсьтылы уждундэс будэтон пумысен вазиськыны. Со пумит уз луы. Ӝыттэс сӥзе яратонлы. Весъёс 24.08-22.10 Дыр вуиз уж борды басьтӥськыны - йылпумъянъёс лэсьтэ, выль ужъёс чаклалэ, пумиськонъёс сярысь вераське, кусыпъёс тупатэ. Коньдон ужпумъёсты умойскозы. Арня пумын, оло, выль тунсыко уж ӵектозы, "будэтозы". Скорпион 24.10-22.11 Выль ужды тӥледды уз узырмыты, но визьнод басьтыны юрттоз. Удалтоз дышетскисьёслы но бизнесэн вырисьёслы. Гажан муртэныды кусыпъёсты ӟырдалозы. Шутэтскон нуналъёстэс семьяяды ортчытэ. Ыбылӥськись (Стрелец) 23.11-21.12 Пукыны дыр ӧвӧл - ужалэ! Ӵош ужась эшъёсыныды кусыпъёсты умой луозы. Яратон муртты вань ке, ӵап дырыз загсэ ветлыны. Средае эн выре музъем, корка басьтон ужъёсын. Кылдэс чаклалэ эшъёсыныды, тодмоосыныды вераськыкуды, шуак вӧсь карыны медад шедьтэ вал. Сюро Кеч (Козерог) 22.12-20.01 Маке вылез борды басьтӥськыны эн дыртэ. Эн пыриське лотереяен шудонэ, эн оске урод вӧтъёслы. Удалтоз рекламаен, книга поттонэн вырисьёслы. Тӥляд уж дурын вормонъёстылы куд-огез вожъяське, но со пумысен эн сюлмаське. Семьяяды коньдонэн йырин керетон потыны быгатоз. Та уе адӟем вӧтъёс быдэсмо. Ву кисьтӥсь (Водолей) 21.01-19.02 Понедельнике умой луоз ӵош ужано муртъёсын кусыпъёс тупатыны. Сюрес вылын удалтоз - барыш поттыны быгатоды. Урод мылкыддэс кузпалды, нылпиосты вылэ "кисьтыны" эн дыртэ, мукет буйган амал утчалэ. Пумиське эшъёсыныды, асьтэлы кузьым басьтэ. Чорыгъёс (Рыбы) 20.02-20.03 Удалтоз коньдон ужпумъёсын. Куд-огзэ возьма ужъя будэтон. Эн выре кин ке понна дурбасьтыны, асьтэлы со уродэн берытскоз. Арня пумын тазалыктылы саклык висъялэ. Чур бугор Чигымтэ чидан Лариса Савицкая шедемын Гиннеслэн книгаяз. Огпол гинэ ӧвӧл, кык пол: авиакатастрофае шедьыса, самолётысь 5220 метръем ӝуждалаысь усьыса улэп кылемез понна но вань курадӟемезлы 75 манет гинэ юрттэт сётэмзы понна. Луымтэ сюан Со вал 1981-тӥ арын. Кызь ар талэсь азьло. Эмеспилы но выль кенлы - быдэн кызь арес. Егит кузпалъёс озьы вераськизы: нырысь ветлозы выль кенлэн анай-атайёсыз доры Владивостоке, собере - эмеспилэн дораз - Комсомольск-на Амуре городэ, бӧрысь Благовещенске - асьсэлэн улон интыязы. Бен, Лариса, мае ке шӧдыса кадь самолётэ билетъёссэс воштыны турттэ ик вылэм: одӥг нуналлы вазьгес яке бергес. Но самолётэ билетъёс ӧй вал. Собере малы 24-тӥ августэ лобон уродгес луыны кулэ 25-тӥ августэ лобонлэсь? Лариса малпаз, самолёт пуштӥз шуыса. Солэн киосыз но ымнырыз кезьыт тылын сутскизы кадь. Ньыльдон градус кезьыт. Самолётлэн вӧлдэтэз воксё кеськиз. Гражданской самолёт шуккиськиз мукет самолётэн. Солэн люкетъёсыз сизьым иськеме пазьгиськизы. Дыр в ал ачиз но Лариса. Но сое пуконэн валче потон пала сэрпалтӥз. Йырсазьзэ ыштӥз. Мар малпа адями кулон азяз? Верало, адями кулонзэ вала ке, туж вакчи дыр куспын вань улон-вылонэз, пе, тодэ лыктэ. Ларисалэн номыр сыӵе-таӵеез ӧй вал. Небытгес усьыса мед кулом шуыса гинэ малпам. Огшаплы тодаз ваем киноысь учырез. Егит нылаш, авиакатастрофае шедьыса, каллен омыретӥ уяса васькем, пуконын пукыса. Ларисалэн пуконэз шуккиськем нюлэскысь писпуос борды, собере - корт выж вылэ. Со омыретӥ 8 минут ӵоже усем. Йырсазьзэ ыштыса вить час кыллем. Шедьтӥзы Ларисаез катастрофа бере, куинь нунал ортчыса. Куинь нунал со нюлэскын пуконысьтыз султылытэк улӥз. Дӥськутэз котмемын, киосыз лызэктэмын, пиньёсыз тӥямын. Котыр усьылэм корт арбериос пӧлын пилиськымтэ лимонадэн одӥг бутылка. Но Ларисалэн юэмез но, сиемез но, кӧлэмез но уг поты вал. Яратоно Володяезтэк солэн улэмез ӧз поты. Куинетӥ нуналаз гинэ со адямиосты утчаны кошкиз. Соку со уг тоды на вал, йырвиымез зол зуркамын, киосыз, урдлыосыз но сюрлыез витетӥ тӥяськемын шуыса. Нылашез синйылтӥзы солдатъёс. Сое спиртэн зыразы но вертолётэн ёрос больницае келязы. Отысь эмъясьёс воксё паймиллям, кызьы Лариса пыд йылаз ветлэм на шуыса. Закон но зэмлык Эмъянниысь потыкуз, Лариса ветлыны гинэ ӧвӧл, ас понназ пукыны но ӧз быгаты. Шымырскыса, мугорзэ шонертыны быгатытэк улӥз. Юрттӥз туно-пеллё. Ларисалэсь бурмем кизэ выльысь тӥяз, сюрлызэ тупатъяз. Ларисалэн ӝожтӥськыса ветлонъёсыз нокыӵе пайда ӧз вае. Психобольницае келянэн кышкатъяллязы. Ларисалэн анаезлы шуиллям: "Авария пумысен шып мед улоз". Соин Лариса, сокем юн висьыса но, котьку шып улоно луиз. Сое шудтэм учыре шедемен валче инвалидэн но ӧз лыдъяллялэ. Адями вить иськемысь усьыса но ӧз кулы бере, со - адӟись. Тӥни соин "Аэрофлот" Ларисалэн нырысь эмъяськемез понна гинэ 75 манет тыриз. Адӟись луисьлы инвалидность уг сётӥськы. Тӥни соин Лариса дунтэмен эмъюм басьтыны но уг быгаты. Пи вордоно криськиз ик 21 аресказ Лариса выльысь пыд йылаз султӥз. Сюлмысьтыз ӧз кошкылы Володяез. Озьы со 25 аресказ нылпи вордӥз. Ӧз бызьы. Вордытозяз институтэ лекциосы ветлӥз. Яратыса дышетӥз химиез. Соин но, дыр, Гоша пиез туж гажа та предметэз. Эмъясьёс тодо вал, Лариса самолётысь усемын шуыса. 25 аресъем кышномурт 25 час пияны курадӟиз ке но, огпол но куаразэ поттымтэ, соин но, дыр, пизэ кӧттӥз поттӥллямтэ. Табере Гошалы 15 арес ни. Тросэз малпало вылэм, сыӵе вылӥысь усьыса, Лариса быдэсак инмар пала берытскоз шуыса. Но Лариса озьы ӧз лэсьты. Адӟон Солэн адӟонэз семьяяз берытскиз. Оло, со улэп кылемез понна, инмарлы тау карыны быгатымтэеныз. Пинал ваемез бере кык толэзь ортчыса, авиакатастрофаын мумиз быриз. Ларисалэн киосыз юскиськизы, ужамысь дугдӥзы. Пичи Гошазэ будэтыны туж курадӟиз. Лариса пиеныз ӵош Москвае кошкиз потӥз, Благовещенск угось солы адӟем потонтэм луиз. Нырысь улӥз эшез дорын. Собере патер басьтӥз. Дышетскемез вань бере, ужтэк ӧз улы. Инмар солы котьку кужым сётылӥз: ужалляз кык-куинь интыын. Фирма кылдытӥз. Тазалыксэ эскерыны но операция лэсьтыны коньдон люказ. Мукет пиосмуртэ, яратӥз. Но нош ик... пери шуккиз. Яратоно пиосмуртэз вӧзысьтыз ышиз. Анайзэ утялтылӥз 14 аресъем Гоша. Ар ортчыса Лариса выльысь катьяськиз. Таза улон Ижевскысь туберкулёзэз эмъянъя больницае юнме шорысь ӧм вуылэ. Фтизиатръёслэн матэктӥсь нуналзы сяна, милемды отчы вуттӥз та секыт висёнлэн берло аръёсы уката паськыт вӧлмемез. 2000-тӥ арын Удмуртиын эпидемия ялэмын вал: котькуд 100 сюрс адями пӧлысь 103-езлэсь туберкулёззэ шараямын. Озьы шаерамы висисьёслэн лыдзы 4 сюрс 483- ёзь вуиз. Ӧжыт ӧвӧл кулэмъёс но - 282 мурт. Туберкулёз уг учкы адямилэн арлыдыз шоры, со уг жаля пичи пиналъёсты. Соин ик БЦЖ вакцина пуктыса но буйгатскыны уг яра, арлы быдэ эскериськыны кулэ. Одно пусъёно тани мае но. Та висёнэз ваись палочкаос адямилэсь, тыоссэ сяна, мукет пуш ёзвиоссэ но быдтыны быгато, соос пыӵало лы, ку пушкы. Ижевскысь клинической больницаысь эмъясьёс ӵапак таӵе формаен туберкулёзэн нюръясько. Ми вераськонмес мытӥм татысь эмъясен, рентгенологен Виктор Никитич БАЙТЕРЯКОВЕН. - Виктор Никитич, вераськонмес лыдпусъёс бордысен мытомы, малпасько. - Асьме республикаын но 100 сюрс адямилы туберкулёзэн 100 висись лыдъяське ке, эпидемия сярысь ялӥськом ини. Озьы 2000-тӥ арын дорамы та секыт висёнлэсь курадӟисьёслэн лыдзы 103,4-ёзь вуиз. Ӵошатон понна вералом: 1999-тӥ арын котькуд 100 сюрс адямилы 86,6 висись лыдъяськиз. Кылем ар ӵоже республикая 1 сюрс 684 адямилэсь туберкулёз шедьтэмын. Со пӧлысь 488-эзлэн висёнзы усьтэм формаен вал. Та секыт висёнэн курадӟисьёс трос Можга, Камбарка, Каракулино, Кияса, Сарапул, Як.-Бодья ёросъёсын, ӧжытгес - Юкаменск, Алнаш, Грахово ёросъёсын. - Туберкулёз - капчиен паласькись висён шуиськом. Соин ик валантэмгес потэ, малы артысь ёросъёсын висисьёслэн лыдзы сокем пӧртэм. Кылсярысь, та секыт висён паськыт вӧлмемын шуиськоды Киясово, Сарапул ёросъёсын, со дыре ик Пичи Пургалан со шер пумиське. - Туберкулёзэн висисьёслэн лыдзы калыклэн рентгенъя кабинетъёсы ветлэмез, фтизиатръёслэн ужамзы бордысь потэ. Флюорографиез котькуд адями арлы быдэ ортчыны кулэ. Жаляса верано, шаерысьтымы улӥсьёс пӧлысь 67,4 процентэз гинэ та куронэз чырмыт быдэсъя. Данакез доразы пукисьёс, пенсионеръёс дасо аръёсын уг вуыло рентгенъя кабинетъёсы. Гуртын улӥсьёслы райцентре потыны машина-автобус гинэ но кулэ дыръяз уг шедьы ай, куд-огезлэн, вылды, сюрес вылэ коньдонэз но ӧвӧл. Озьы адями кык-куинь аръёс но туберкулёзэн висьыны быгатоз. - Нош ачиз уг шӧды, озьы-а? - Бен, туберкулёз соин ик кышкыт, адями уг шӧды висьыны кутскемзэ. Висёнэз муре пыӵаку гинэ шат со ӝог жадемез, сиён мынымтэез вылэ ӝожтӥськыны кутске, температураез 37,1-37,2 возиське, мугорыз нюла. Но таӵос но туж шер вазисько ай эмъясь доры, юрттэт курыса. - Виктор Никитич, нош пумиськыло-а быдэс семьяен висисьёс? - Тырмыт гинэ. Туберкулёз угось капчиен палаське тусьты-пуньы пыр но, майтал- ӵушкон пыр но. Городын та висёнэз туж капчи "шедьтыны" транспортысь. Отын угось калыкез котьку тыраз луэ. Нош кытысь-о тодод, кыӵе адями вӧзад сылэ. Гуртын туберкулёз пудо бордысь но паласькыны быгатэ. Таӵе учыръёс ӧжыт уг шараясько. Туберкулёз ӝог кутске ляб сиськись адямиос борды, кема кыстӥськись висёнъёсын курадӟисьёслы. Тани нош ик лыдпусъёс вералом. Туберкулёзэн курадӟисьёс пӧлысь 49 процентэз - ужтэк кылемъёс, 26 процентэз - бомжъёс (улон интытэк кылемъёс), быдэн 12 процентэз - сӧсыръёс но пенсионеръёс. Та висён ӝог аляны быгатэ ты висёнъёсын, сахар диабетэн, ӝуш висёнъёсын курадӟисьёс борды, вина юись, тамак кыскисьёс котыре. Али вераськиськом СПИД-эн висисьёслэн вӧлмемзы сярысь. Соос пӧлысь котькудӥз сямен озьы ик туберкулёзэн висьыны кутске. - Нош маин валэктыны луоз туберкулёзэн висисьёслэн лыдзылэсь будэмзэ? - Котьма ке но, тросэз потэ улон-вылонмылэн куанермемез бордысь. Угось ӧжыт, витаминъёстэк сиськемен валлин адямилэн иммунитетэз лябӟе, озьы мугор висёнлы пумит нюръяськыны уг быгаты ни. Сьӧразы трос висёнъёс ваё мукет кунъёсын улон интытэк кылемъёс. Кылсярысь, Кавказ палась вуисьёслэн кылылэмзы но ӧвӧл БЦЖ вакцина сярысь. Алигес амнистия ортчиз. Со но юн шӧдӥськиз висисьёслэн лыдзы вылын. Пытсэт сьӧрысь потэмъёс тросэз секыт формаен туберкулёзлэсь курадӟо. - Кыре-буре потэмзы бере, таос ваньзы ик вазиськизы меда туберкулёзъя диспансеръёсы? - Ӧз, вылды. Мынам аслам но ужатозям сыӵе учыр вал. Медициная институтэз йылпумъяме бере, куинь ар тубдиспансерын участокъя врач луыса ужай. Самой соку мон доры шедиз пытсэт сьӧрысь потэм воргорон. Туберкулёз муре пыӵамен, со туж лябӟемын ни вал. Озьы ке но, эмъяськыны пумит луиз. Кулӥз со висисе. - Та понна участокъя врачез янгыш каризы, дыр, ук? - Озьыгес луиз ини, мар карод. - Виктор Никитич, шуиськом, туэ 282 мурт туберкулёзэн висьыса кулӥз. Кинъёс со? Шат огзэс но соосты утьыны ӧз луы ни? - Таос ваньзы ик эмъясьёс доры беромыса вазиськизы, иське. Пӧлысьтызы куд-огез ас кожазы, калык амалъёсъя йӧнатӥськыны турттӥзы, луоз. Но туберкулёз - секыт висён, озьы гинэ со уг ортчы. Тани алигес но дорамы вуиз вал воргорон, одӥгез тыэз быдэсак сисьмемын. Солы нокызьы но юрттыны ӧм быгатэ ни. - Кызьы валасько, пумиськыло сыӵе учыръёс: адямилэн тыосыз чылкытэсь, нош мукет пуш ёзвиосыз кемалась висё? - Ӵем дыръя озьы ик луэ. - Нош кызьы таӵе дыръя висёнэз шараяно, флюорография возьматоз ук, адямилэн туберкулёзэз ӧвӧл шуыса. - Туберкулёз палочкаос мугорысь кулэтэменыз ӵош пото. Соин ик соосты адӟыны луэ "клинической минимум" шуон анализъёсысь гинэ но. Тодӥськоды ук, участокъя врач котькуд висисез пӧртэм анализъёс лэсьтыны косэ. Со анализъёсты ик келя вылэм тубдиспансеръёсы, эскерыны отысь та висёнэз вӧлмытӥсь палочкаоссэ. Жаляса верано, республикаысьтымы больницаос огкылысь ужаны ӧз дыше на. Лыдпусъёс возьмато, туберкулёз ӵемгес тыос борды аля шуыса. Но фтизиатръёс малпамъя, талы оскиськыны уг яра. Угось мукет пуш ёзвиосы алям туберкулёз ӵем дыръя шараяськытэк кыле. - Тыосты сяна, кыӵе пуш ёзвиосты ӵемгес сӧре туберкулёз? - Тужгес ӵем - пекляосты но нуны ваён ёзвиосты (висисьёс пӧлысь 47 процентэзлэсь), лыосты но ёзвиосты - суставъёсты (25 процентэзлэсь), синъёсты но тӧдьы нёредъёсты (лимфоузелъёсты (24 процентэзлэсь), куэз, кӧт пушез (4 процентэзлэсь). Таос пӧлысь тужгес кышкытэз - туберкулёз пыӵа ке лыосы но ёзвиосы. Куддыръя та чер быдэс сюрлыез но сӧре угось. Таӵе дыръя адями улытозязлы сӧсыр кыле. Туберкулёз ӵемгес пыӵа пиналъёслэн но пересьёслэн лыосазы. Озьы пиналъёс пичиысен инвалид луо. - Нош быгатэ-а туберкулёз огдыре пӧртэм ёзвиосы кырмиськыны? - Таӵе учыръёс но ӵем пумиськыло. - Фтизиатръёслэн ужзы секыт но кышкыт шуим ке, ум янгышалэ, вылды. Таӵе висисьёсын ужаса, соос асьсэос но черланы быгато ук? - Пӧламы али но пумиськыло туберкулёзэн курадӟись эмъясьёс. Но ма карод, татын но кинлы ке ужано. Тросэз эмъясьёс дорамы мединститутэз, училищеез йылпумъямын. Мон но тубдиспансере мединститут бере вуи. Нырысь ӧсъёс борды но кутскылыны кышкасько вал - чельыен гинэ усьяськод соосты. Ваньмызлы дышиськод. Озьы ик мукетъёсыз но дышо, луоз. Дорамы данакезлэн врачъёслэн пенсие потон вакытсы вуэмын ни. Бен, егитъёс тубдиспансеръёсы ӧжытгес кыстӥсько. Но ужасьёслы чылкак ум ёрмиське. - Бадӟым тау. Матэктӥсь праздникеныды тӥледды. Вераськиз Э. Кумачёва. Туспуктэмъёсыз В. Беломорскихлэн. Рентгенолог В. Н. Байтеряков ӵош ужась эшъёсыныз эскеро флюорографияя снимокез. Рентгенлаборант М. Миронова. Медсестра В. Коковихина. Кысык ужан вакыт. Ты борды кутскем туберкулёз. Кӧня меда, кӧня меда Пургалан кизилиос... Пичи Пургалась чеберлыкез яратӥсьёслэн "Пурга кизилиос" центрзы быдэс шаермылы тодмо ни. Та нуналъёсы соос 10 ар тырмонзэс пусъё. 15 арес тырме покчиослэн яратоно "Кизили" журналзылы но. Пургаос та юбилейёсты огазеяса пусйыны малпазы. Шулдыр пумиськон ортчоз 28 мартэ 10 часын Пичи Пургалась ёрос библиотекалэн юртаз. "Пурга кизилиосысь" пиналъёс кырӟаса, вераса ас быгатонзэс возьматозы, суредъёсынызы паймытозы. Кин уг оскы, Пургалан зэмос кизилиос уло шуыса? Лыктэ пумиськонэ, асьтэос адӟоды. Е. Миннигараева. Спорт Король Укмысэтӥзэ шашкиен шудонъя дуннелэн чемпионэз луиз Алексей Чижов. 1998-тӥ арын Ижевскын ортчем чемпионатын со келяз вал Александр Шварцманлы. Аслаз дораз борддоръёсыз ӧз юрттэ. Туэ 22-тӥ феврале�13-тӥ мартэ кылем ар понна чемпионат ортчиз Москваын. Дас куать партиысь со дассэ "ничьяен" йылпумъяз, куатьсэ - вормиз. Дуннеысь шашкаиосъя федерацие 46 страна пыре. Отысь 16 тужгес кужмоосыз спортсменъёс (кылем арысен шашкиен шудонэз спортэн лыдъяло ни) люкаськизы Москвае. Кыӵе ке мугъёсъя ӧз быгатэ лыктыны Вирсман но Куперман. Алексей Чижов таяз учыре нокинлэсь но ӧз кышка. Ӵошатсконъёслы со ӝыны ар дасяськиз: вань шудӥсьёслэсь шудон амалъёссэс эскериз, шуггес комбинациос малпалляз. Ӵошатсконъёс кутскыку ик солы Голландиысь тужгес кужмо спортсменъёсын Клеркен, Крайненбринкен шудоно луиз. Ваньмыз умой мынӥз. Но чемпионатлэн люкетаз Алексей ӧжыт гинэ шуге-леке ӧз сюры - пыэд кутыса, ӟигарыз быриз. Шудыны туж секыт вал. Кыкетӥ люкетын ик пумиськиз азьвыл "тушмонэныз" Александр Шварцманэн. 1998-тӥ арлэн чемпионэз огъя лыдызъя Чижовлэсь берегес кыле вал, но асьме спортсменлы туж сётскемез ӧз поты. Шварцман керӟегъяськиз, пазяськиз. Со вылын ик "кутӥз" сое Чижов. Партия "ничьяен" йылпумъяськиз. Алексейлэн верамезъя, таяз чемпионатын со шашкиенлэсь трос тушмпонъёсызлэн лулсэръёсыныз шудӥз - кема аръёс ӵоже Ижевскысь шашки король Россиысь но, дуннеысь но котькуд кужмо спортсменлэсь сямзэс но, визьзэс но ӟеч тодэ ни. Тужгес удалтэм партиен лыдъя Белоруссиысь Анатолий Гантварген шудэмзэ. - Та дырозь соин 80 полъёс шудылӥм ни вал, - шуэ Алексей Чижов, - одӥг пол но ӧй вормылы. Таяз учыре удалтӥз. Удалтон бен лэчыт визьтэк ӧй луысал. Зэм, сое асьмелэн татчыозь уг дунъяло на. Дуннеысь чемпионатын вормемез понна Алексей Чижов, зарнивуам медаль сяна, номыр ӧз басьты. Одӥг манет но ӵошатсконъёсты дасясьёс коньдон ӧз шедьтэ. Соин ик вуоноосаз бадӟым ӵошатсконъёсы дунтэк пыриськыны Чижовлэн мылкыдыз ӧвӧл ни. Со малпаське сюлэмызлы кельшись ужен - компьютер графикаен - вырыны, тросгес дырзэ нылпизэ будэтонлы сӥзьыны. Оло нош город администрация юрттэмъя, Ижевскын усьтӥськоз Чижовлэн школаез. Со сярысь чемпионэз мэриын данъяку вераз Анатолий Салтыков. Алексей Чижовез выль вормонэныз ӟечкыласа, со Ижевск городлэн дано муртъёсыз пӧлы пыртон сярысь ивортӥз. *** Чижовлэн дышетскисьёсыз но "висисьёсыз" (нялтас вераса, соос Ижевскысен Якутскозь) солэсь вордскем городзэ ас понназы ЧИжевскен, пе, нимало ни. З. Рябинина. Пеляд пон! Яке "вись", яке изь Алексей Чижовлэн верамезъя, визьмо "висисьёс" спорсменлы ӵошатсконын юртто. Асьмелэн, пе, шашкиен шудӥсьёс понна "висьыны" уг быгато на - футболын кадь кесясько, индылыны кутско. Визьмын ӵошатскисьлы со туж люкетэ. 1998-тӥ арын Ижевскын ортчем чемпионатын келям мугзэ Алексей соин но герӟа. Ялан син шоразы возён, одно вормемдэ возьман, дыртытон шудӥсез малпаськон ӧрысьтыз поттэ. Владимир ЛЕБЕДЕВ - Удмурт Элькунлэсь Москваын ужась представительзэ воштӥсь. Улонзэ армиын ортчытэм адями али Россилэн шоркараз уте асьме республикалэсь, удмурт калыклэсь кулэяськонъёссэ. Соин ӟечгес тодматскыны быгатоды, газетысь 5- тӥ бамзэ лыдӟыса. Сюрс пӧртэм пӧлысь быръемез Удмуртиысь ӟуч фольклорез бичан но эскерон удысын куамын арлэсь кема тырше ни филология наукаосъя кандидат Удмурт университетысь ӟуч литературая но фольклоръя кафедраысь доцент Элеонора Алексеевна Тамаркина. Солэн кивалтэмез улсын ортчем аръёсы студентъёс калыке потаса бичазы туж уно кырӟанъёс-веранъёс, ваньмыз 141 сюрс пӧртэм. Э. А. Тамаркина та материал пӧлысь бырйыса дасяз но поттӥз "Романсовая лирика Удмуртии" книга. Татчы пыртэмын асьме шаерамы пумиськылӥсь романс выллем кырӟанъёс, озьы ик та сярысь тодон-валан сётӥсь статья, информантъёс сярысь ивортонъёс. Национальной библиотекаын 19-тӥ мартэ ортчиз книгаен тодматскон. Лыктэмъёс азьын вераськизы Удмурт университетысь филологияя факультетлэн деканэз Е. А. Подшивалова, тодосчиос Г. Н. Шушакова, А. С. Зуева, В. К. Кельмаков, З. А. Богомолова, Т. Г. Владыкина но С. В. Стародубцева. Ачиз Элеонора Алексеевна но мадиз та книгаез бордын ужамез сярысь. "Романсовая лирика Удмуртии" книгае пырем куд-ог кырӟанъёсыз быдэстӥзы культурая училищеысь калык хор, "Улыбка" ансамбль но шаерысьтымы калык артистка Анна Прокопьева. Т. Николаева. Очей Толилэсь - пӧсь салам Ивортӥмы ни вал "Очей Толилы - пӧсь салам" конкурсын вормисе потэмъёсты Очей Толи (Анатолий Ушаков) ӧтёз Серекъян нуналлы сӥзем ӝытэ. Со нунал матэктэ ни. 29-тӥ мартэ 19 часын Удмурт кун филармонилэн юртаз ортчоз "Кырӟан, серекъян, маскаръяськон" ӝыт. Тӥледды шулдыртозы но серекъятозы Анатолий Ушаков, Александр Перевозчиков, Вячеслав Иванов, Вячеслав Байков, Анатолий Григорьев, Рома Николаев, "Шулдыр ӝыт" ансамбль но мукетъёс. Вормисе потэмъёсты (Алнаш ёросысь Е. Смирноваез, Якшур Бодьяысь Э. Загребинаез, Глазов ёросысь Г. Баженоваез, Можга городысь В. Кузнецовез, Завьял ёросысь Н. Абашеваез, Алнашысь М. Митрофановаез) возьмало ӧтён билетъёс, но синпель кузьымъёс (ӧтён билет луоз кассаын, вазиськоно ӝыт кутскон азьын). Удмурт Республикаысь Кун Кенеше ватсаса депутатъёсты быръёнъёслы но Можга городлэн администрациезлы йыр быръёнлы йылпумъянъёс сярысь ивортон 2001-тӥ арын 18-тӥ мартэ ортчизы Удмурт Республикаысь Кун Кенеше быръёнъя 2 номеро Чехов но 54 номеро Левобережной округъёсъя ватсаса депутатъёсты быръён, озьы ик Можга городлэн администрациезлы йыр быръён. Удмурт Республикаысь Кун Кенеше 2 номеро Чехов округъя депутат быръёнэ пыриськиз 3313 бырйись (25,63 процент). Пусъем кандидатъёс понна сётэм куараос: Брызгалова Татьяна Дмитриевна - 581 (17,54 процент); Зайцева Любовь Евлампиевна - 1265 (38,19 процент); Никитин Евгений Николаевич - 137 (4,14 процент); Щекурин Владимир Михайлович - 595 (17,96 процент); Щелконогов Владимир Петрович - 496 (14,98 процент); Щелконогова Нина Николаевна - 35 (1,06 процент). Вань кандидатъёслы пумит сётэм куараос - 130 (3,93 процент). Удмурт Республикаысь Кун Кенеше кык номеро Чехов округъя депутат луиз Зайцева Любовь Евлампиевна, вордскемын 1954-тӥ арын, Ижысь 69 номеро школалэн директорез, улэ Ижын. Удмурт Республикаысь Кун Кенеше 54 номеро Левобережной округъя депутат быръёнэ пыриськиз 3769 бырйись (30,96 процент). Пусъем кандидатъёс понна сётэм куараос: Дмитриев Владимир Александрович - 196 (5,20 процент); Кириллова Марина Михайловна - 300 (7,96 процент); Рождественский Владимир Владимирович - 2921 (77,50 процент). Вань кандидатъёслы пумит сётэм куараос - 288 (7,64 процент). Удмурт Республикаысь Кун Кенеше 54 номеро Левобережной округъя депутат луиз Рождественский Владимир Владимирович, вордскемын 1954-тӥ арын, акциосын "Чепецкий механический завод" огазеяськонлэн валтӥсь директорез, улэ Глазов городын. Можга городлэн администрациезлы йыр быръёнэ пыриськиз 18827 бырйись (54,72 процент). Можга городлэн администрациезлы йыр быръёнэ пыриськемъёслэн куараоссы: Пантюхин Сергей Аркадьевич - 9709 (51,58 процент); Соловьев Александр Михайлович - 7193 (38,21 поцент); Стрелков Владимир Андреевич - 115 (0,61 процент); Топыркин Владимир Анатольевич - 721 (3,83 процент). Вань кандидатъёслы пумит сётэм куараос - 810 (4,30 процент). Можга городлэн администрациезлэн йырыз луиз Пантюхин Сергей Аркадьевич, вордскемын 1954-тӥ арын, Можгаысь жилищно-коммунальной хозяйствоя предприятилэн директорез, улэ Можга городын. Удмурт Республикаысь быръёнъя комиссия. "Янарыш" газетлы - 10 ар Удмуртиын 1991-тӥ арын март толэзьысен печатлаське "Янарыш" ("Возрождение") бигер газет. Та дыр ӵоже со будӥз толэзьлы одӥг пол ньыль бам бордысен арнялы быдэ тямыс бамен потӥсь газет дорозь. Али сое сизьым сюрслэсь ятыр семья басьтэ. Со вӧлме республикаысь кызь куинь городъёсы но ёросъёсы. Со сяна вуэ Татарстанысь Агрыз ёросэ но Пермь областьысь Чайковский городэ. "Янарышез" семьялэн газетэз шуыны луоз. Сое яратыса лыдӟо нылпиос но, егитъёс но, арлыдоос но. Отысь шедьтод нылпи выжыкылъёсты но, политикалы сӥзем ужъёсты но. Газет уг вунэты шаерамы улӥсь вить сюрс башкиръёс сярысь но. Соос понна толэзьлы быдэ потэ башкир кылын нимысьтыз приложение. Лыдӟисьёс вылӥ дунъяло литературалы сӥзем бамъёсты. Тани маин со но герӟаськемын, луоз. Редакциын ужало Татарстанысь писательёслэн огазеяськоназы пыртэм муртъёс: Чынгыз Мусин но Риза Шафи. Бамез дасян бордын сюлмысь тырше кылбурчи но критик Ибрагим Биектаулы. Адӟем карымон ужало литературая огазеяськонъёс, соос Ижын но Агрызын кылдытэмын. Гожъяны кутскисьёс отчы шумпотыса ветло, толэзьлы быдэ пумиськыло. Тодмо писательёс, кылбурчиос юртто соослэсь быгатонлыкъёссэс, тодон-валанъёссэс муромытыны, азинтыны. Озьы, редакция юрттэмен, лыдӟисьёс доры берло аръёсы вуизы Ижысь куать авторъёслэн книгаоссы. Соин ик редакциын ужасьёслэн мылкыдзы вань удыссэс паськытатыны, редакционно-издательской центр кылдытыны. Озьыен, малпало пӧртэм сборникъёс, методикая книгаос, брошюраос поттонэз ас вылазы басьтыны. Та ӵектонэз Печатья но иворъёсъя министерство умоен лыдъя но юрттыны дась луэмзэ вера. Бигер газетлэн ужаз эшшо одӥг адӟем карымонэз, пусйымонэз вань на. Со юн кусып возе городъёсысь но ёросъёсысь авторъёсыныз. Нош соос ог куатьтон пала лыдъясько. Котькуд кварталлы быдэ ортчыло пумиськонъёс. Ӵош люкаськыса, ог- огзылэн ужъёссылы дунъет сёто, тырмымтэоссэс пусъё, азьланяз сэрттоно-пертчоно ужпумъёс сярысь кенешо. - Сыӵе адямиос бордын газетмылэн кужымез, данэз, - шуо "Янарышын" тыршисьёс. - Соостэк газетмы пурысь, огвыллем луоз. Соос ӟеч тодо вӧзазы улӥсь бускельзылэсь сюлмаськонъёссэ, куронъёссэ, шумпотонъёссэ. Со сярысь ик гожто милемлы. Асьмеос но туж ӵем потаськом лыдӟисьёсынымы пумиськонъёсы. Соос пайдаё луо ми понна но, соос понна но. Сыӵе пумиськонъёс бере эшшо но трос гожтэтъёс вуо. Нош ми понна со - бадӟым шумпотон. Вазисько бере, озьыен, ми соослы кулэ, милемлы оско. Озьы ик ми юн эшъяськыса улӥськом ваньмыныз бигер огазеяськонъёсын. Огкылысь тыршиськом ас выжы калыкмес, солэсь кылзэ, историзэ утён но азинтон, культураез но вашкала йылолъёсты вӧлмытон бордын. Ужамы тросгес егитъёсты кыскыны турттӥськом. Соос ук азьпал улонмес азинтӥсьёс. Е. Николаева. Ялон Таиз ивортонмы Якшур-Бодья ёросысь лыдӟисьёсмы понна. Ошпиез витьыса, куд- огез, оло, вить луизы ни. Озьы ке но, ӧжытак чидатске на, гажано лыдӟисьёсмы. "Удмурт дунне" газетэн но якшур-бодьяосын шутэтскон ӝытмес но лотереяен шудонэз сояз арня вискын ортчытыны малпаськом ни вал газетмылы тужгес трос гожтӥськем Кыкваын, матысь гуртъёсын улӥсьёсты но отчы ӧтьыса. Палэнын улӥсь лыдӟисьёсмы ӝоже медаз усе: лотереяен шудонэ соос но пыриськозы. Ёросысь почта кусыпъёсъя ёзысь ужасьёсын вераськемын ни: котькуд лыдӟисьлэн гожтӥськон карточкаез (копиез) шудытонэ кутӥськоз. Одӥгез ӝегатэ - сюресъёс мыноно-ветлоно кадесь ӧвӧл. Та нуналъёсы Ёросысь почта ёзлэн кивалтӥсеныз Вера Григорьевна Артемьеваен кенешыса, пумиськонэз берлолыгес кельтӥм. Конкурс "Мон яратӥсько Ижевскез!" Ижевскысь Октябрь районлэн администрациез "Галерея" центрен но "СТИК" компаниен ӵош ортчыто "Мон яратӥсько Ижевскез" смотр-конкурс. Конкурсэ кутӥсько 16 аресозь нылпиослэн суредъёссы. Ужъёсты быдэстыны луэ пӧртэм амалэн (батик, керамика, скульптура...) Вормисьёс пусъемын луозы дуно кузьымъёсын. Куинь устоосыз гужем шутэтскон лагере путёвка басьтозы. Ижевск город администрацилэн пресс-службаез. Театр Лул шокчиз кырӟан Ньыльдон ар талэсь азьло Крезьгуръя но драмая удмурт театрлэн сцена вылаз пуктэмын "Наталь" опера - нырысетӥ удмурт опера кылдытӥз нырысетӥ удмурт крезьгурчи Г. А. Корепанов. Вераны кулэ: та учыр удмурт культуралы бадӟым шумпотон ваиз. Ваньмыз кутскиз кызетӥ аръёсы кырӟанъёс бичан бордысен. Та ужез азьланьтӥз крезьгурчи, Д. С. Васильев-Буглай. Удмурт кырӟанъёсты со вылӥ мертэтозь вуттӥз. Та уж борды отӥяз кутскиз крезьгурчи Н. А. Голубев. Нырысь ик Николай Александрович гожтӥз Драмая удмурт кун театрлэн "Вуж Мултан", "Кезьыт ошмес", "Италмас" спектакльёсызлы крезьгур. Та удысэз отӥяз узырмытӥз Н. М. Греховедов. Николай Максимович Греховодов кылдытӥз "Камит Усманов" нимо нырысетӥ удмурт крезьгуро драма (Игнатий Гавриловлэн спектаклез), "Сюан" нимо нырысетӥ крезьгуро комедия (Василий Садовниковлэн спектаклез). Малпаське вал на опера кылдытон сярысь. Зэм, та ужез быдэстӥз удмурт крезьгурчи Герман Корепанов. Герман Афанасьевич аслэсьтыз устолыксэ волятӥз вал ини, тодмо кырӟанъёс, кантатаос, удмурт спектакльёслы чебересь гуръёс кылдытыса. Нырысетӥ удмурт опера сайкатӥз Волга котырысь мукет шаеръёсты но. Одӥг вакытэгес ик, куатьтонэтӥ аръёсы, нырысетӥ операоссэс кылдытӥзы чувашъёс (Ф. Васильевлэн "Водяная мельница" операез), мордваос (мокшаос но эрзяос) (Л. Кирюковлэн ("Нормальная" операез), поръёс (Э. Сапаевлэн "Акпатыр" операез). "Наталь" операез нырысьсэ пуктыку, уже кыскемын вал шаерысь тужгес ӟеч кужымъёс. Сюлмысь кырӟазы Григорий Титов (Шестериков), Евгения Пахомова (Наталь), Маргарита Галасеева (Оки), Кузьма Ложкин (Булда), Геннадий Корепанов- Камский (Сандыр), Пётр Романов (Максим). Оркестр кужмояз татчы палэнысь ваем мукет музыкантъёс чотын. "Италмас" ансамбльлэн хораз кырӟазы на радиолэн хорысьтыз артистъёс. Операез кылдытон сярысь трос сюлмаськиз Н. М. Греховодов но. Озьы ик - пинал дирижёр Г. Н. Бехтерев. Та адямиос лулысь-сюлмысь басьтӥськизы нотаосты гожъян борды. Опералы инъет луиз Филипп Кедровлэн "Катя" повестез (операын нылкышнолэн нимыз воштэмын). Та тодмет туж тупа вал та аръёсысь удмурт драматургилы. Повестьын возьматэмын пичи гинэ удмурт гуртысь калыклэн империалистической война кутскыку но революцилэн нырысетӥ нуналъёсаз улэмез-вылэмез. Узыръёс но куанеръёс ваче вуыло, нылкышнолэн улонэз кайгуосыз чидатэк чигиське. Операзэ крезьгурчи калык крезьгуро драма шуиз. Зэм но, операын трос хорен герӟаськем сценаос. Соос суредало егитъёслэсь шулдыръяськонзэс, армие келянэз, гурт ӧтчамез. Трос хоръёс кылдыто оратория. Ораториын вераськисьлы матын ӟуч дышетӥсь Шестериков. Операысь кырӟанъёс тросэзлы туж матын но валамон. Катанчи усьтӥське но, кылӥське ваньмызлы тодмо ширъян гур. Сое чузъяськытэ хор. Собере ик адӟисько ни спектакльысь адямиос - Наталь, Максим, Шестериков. Чузъясько ариос. Соос туж тодмо. Максимлэн ариозоез, кылсярысь, басьтэмын куно пумитан "Пичи бекчеын" маскара кырӟанысь. Адями маде яратон сярысь. Туж тодмо удмурт гуръёс. Юнме шорысь-а со? Ачиз крезьгурчи тазьы валэктэ: операе со пыртӥз уно удмурт кырӟанъёс. Ваньмыз мед тодозы: удмурт кырӟанъёс вылын но зэмос опера кылдытыны луоно. Спектакльысь калык кырӟанъёс улон-вылонэз яке капчи мылкыдэз гинэ уг, кайгуэн герӟаськем учыръёсты но возьматыны быгато. Таӵе луэ оже келянэн герӟаськем суред. Татын кылӥське калыклэн бӧрдэмез, адӟиське солэн йыркуръяськемез но. Операез мылысь-кыдысь пумитазы кызьы ке крезьгурез яратӥсьёс, озьы ик - огшоры адямиос. Премьерае вуылӥзы тодмо крезьгурчиос Т. Н. Хренников (со вакытэ кивалтӥз СССР-ысь Крезьгурчиослэн огазеяськонэнызы) но А. И. Хачатурян. Кыкназы но туж ӟеч кылъёс веразы газетъёсын, радио пыр... Туала кылзӥсьёс понна но опера туж тунсыко. Со возьматэ ук асьмелэсь ортчем сюресмес. Операя но балетъя кун театр выльысь мед басьтӥськысал "Наталь" борды: та синмаськымон ужез туала егитъёс уг тодо ни. Р. Чуракова, музыковед. "Наталь" операын пӧртэм аръёссэ кырӟазы пӧртэм адямиос. Наталь - Удмурт Элькунысь дано кырӟась Евгения Степановна Пахомова. 1967-тӥ ар. Наталь - Удмурт Элькунысь дано но калык кырӟась Людмила Алексеевна Минина, Максим - Удмурт Элькунысь но Россия Федерациысь дано кырӟась Сергей Павлович Кудрявцев. 1985-тӥ ар. Инкуазь Лымы улысь мед потысал кечсин... Нуналлы быдэ пумиськылӥсь сюлмаськонъёсынымы йырин, асьмеос ӵемысь вунэтӥськом тужгес бадӟым сюлмаськонмес - инкуазез утёнэз. Угось инкуазьлэн чылкытлыкез бордысь потэ асьмелэн но нылпиосмылэн таза но кема (иське, шудо) улонмы. Шаерамы но инкуазь арысь аре уродме - шӧдӥськытэк уг кыльы транспортлэн йылэмез, завод ӵын, тэльёсты коран, шуръёсты аналтон... Али ке но уг бурмо дас вить ар талэсь азьвыл Чернобыльын луэм шудтэм учырлэн бервылъёсыз. Адямиослы шуныт но югыт гинэ сётыны чаклам атом вераны луонтэм бадӟым кайгу ваиз. Аварилэсь бервылъёссэ утялтонэ ветлэм адямиос туннэ курадӟо: тазалыксы лябӟемен ужаны уг быгато, нош пенсизы сиськыны гинэ ӧвӧл, эмъюмлы но уг тырмы. Обществомы берло дыре ӟеч валаз ни инкуазьлэсь законъёссэ - кызьы ми, озьы ик со. Соин ик ваньмылы огазеяськыса утёно сое туннэ ик! Югдурез ӧжыт ке но тупатон вылысь, Россиын арлы быдэ тулыс ортчыло Инкуазь кышкытлыклэсь утиськон нуналъёс. Сое ортчытонлы дурбасьто Президент, Россиысь Правительство, Кун Дума, министерствоос но ведомствоос, общественной огазеяськонъёс, профсоюзъёс, инкуазез утисьёс... Удмурт Республикаысь Правительство но инкуазез утёнлы бадӟым саклык висъя. Инкуазез утисьёслэсь кичӧлтонзэс умоен лыдъяса, со ачиз но пыриське та уже. Озьы туэ 15-тӥ апрельысен 5-тӥ июнёзь шаерамы ортчозы Инкуазь кышкытлыклэсь утиськон нуналъёс. Та дыр ӵоже инкуазез чылкытатонъя, кышкыт югдуръёсты палэнтонъя, калыкез дышетонъя ужрадъёс ортчытыны чакламын. Кылсярысь, Вулы, Музъемлы, Тылобурдоослы, Тазалыклы, Нылпиосты, Инкуазез утёнлы сӥзем нуналъёс. Одӥг нуналэз ке но ужрадэз ортчытӥсьёс малпало чылкыт омырез утёнлы сӥзьыны. Соин ик вазисько вань предприятиослы но нимаз машина возисьёслы - ойдолэ одӥг нунал ке но чидатском машинаосмес гаражысь поттытэк, соку, оло, нылпиосмы одӥг нунал ке но капчигес шокалозы. Таӵе ужрадэ кылем арын Завьял ёрос гинэ пыриськиз, но туэ, оло, мылкыд карисьёслэн лыдзы будоз - луэ ук одӥг нунал ке но транспорттэк чиданы. Огласянь туж умой, Инкуазь кышкытлыклэсь утиськон нуналъёс тулыс ортчо шуыса. Городын улӥсьёс ас вылазы шӧдӥзы ни асьсэлэсь ик ӝикыттэм луэмзэс: лымы улысь кечсин интые мычиське... кырсь жуг-жаг. Тулыс мылкыд соку ик тӧлӟе, озьы-а? Соин ик азьло дыръя сямен субботнике ӧтёнъёс кулэ уз луэ, дыр. Быгтэмезъя ваньмыз чылкытатоз аслэсьтыз азбарзэ, урамзэ... Котькудӥз чырыен-пырыен ке но юрттӥз, тулыс пушъёз вазьгес. З. Рябинина. Улонмы - историын Москваын ортчиз историкъёслэн-архивистъёслэн ИИИ ӧтчамзы. Отчы Россиысь 68 улосысь делегатъёс пыриськизы. Архивын ужасьёслэн огазеяськонзы азьвылгес усто радъям ужлы конкурс ялӥз вал. Улосвылъёсысь ёзъёс пӧлын Удмуртия куинетӥ интыез басьтӥз. Удмурт Республикаысь Архивъёсъя комитетлэн кивалтӥсез Надежда Коробейникова, историкъёслэн-архивистъёслэн огазеяськонзылэн кивалтӥсез Владимир Бобков но Кияса ёросысь депутатъёслэн кенешсылэн тӧроез Надежда Шатрова быръемын Архив ужъёсъя службалэн валтӥсь кенешаз. И. Григорьева. Ужамдэ ке ӧд возьматы, кин адӟоз 16-тӥ мартэ Можга ёросысь Быдӟымсурд шор ёзо школаын ортчиз паймымон ужрад. Со сӥземын вал удмурт кылъя но литературая дышетӥсьлэн Кутасова Нина Федоровналэн ужамезлы. 1977-тӥ арын Удмурт пединститутэз йылпумъяса вуиз со Быдӟымсурдэ. Со дырысен 24 ар ӵоже ини нуэ со ас удыссэ. Школаын Нина Федоровна нырысез вал, кинлы сётӥзы калыкез дышетон удысысь отличник ним. Та нуналэ Нина Федоровна усьтэм урок ортчытӥз Республикаысьтымы удмурт кылъя но литературая дышетӥсьёслы. Бадӟым класъёсын дышетскись пиналъёсты со тодматӥз писательлэн Г. К. Перевощиковлэн творчествоеныз. Жаляса вераны кулэ, ачиз автор та уроке лыктыны ӧз быгаты. Куноослы возьматэмын вал Нина Федоровна сярысь видеофильм. Нош кабинетын радъямын дышетӥсьлэн киужъёсыныз адӟытон. Дышетӥсьёс та ужрадлы выл дунъет сётӥзы. Та выллем пумиськылонъёсты котьку но дыышетӥсьёс возьмало. Озьы соос дышетско ог-огзылэн ужамысьтызы марзэ ке но умойзэ басьтыны. Собере сотэк дышетӥсьлэн ужез уз но адӟиськы. А. Краснов. Удмурт "пингвинъёс" Тулыс каллен ке но, вуэ. Ульчаысь лымы шунамен ӵош вырӟыны ӧдъяз йӧ но. Шаерысьтымы кышкыт учыръёсты палэнтӥсьёс нуналлы быдэ сямен вазисько калыклы йӧ вылын эскериськыны курыса. Но адями сыӵе маке - ас вылаз вуытозь уг куалекты. Озьы луиз кылем понедельнике Ижевскын улӥсь кык воргоронъёсын. "Удмуртнефть" огазеяськонын ужасьёс, Позимь шурын чорыгакузы, шуак йӧ вырӟиз. Воргоронъёсты йӧ Гольян палозь вуттэм. Гуртын улӥсьёс "пингвинъёсты" синйылтыса, спасательёслы ивортӥллям. Но вертолёт вуытозь, шур кузя уясь воргоронъёс кызьы ке ас кужыменызы ик ярдуре потыны быгатӥллям. Ярам ай, ваньмыз сокем урод ӧз йылпумъяськы - йӧ воргоронъёсты Кам шуре нуыны быгатысал. Соку соос зумыт чорыг сярысь ӧй малпаськысалзы ни, асьсэос чорыгъёслы сиён луысалзы. И. Кириллова. Тӥ понна, ветеранъёс Ижевскысь Первомай но Индустриальной районын улӥсь ветеранъёс понна, ЦУМ-ын усьтӥськемын промышленной вузъёсъя отдел. Устинов ёросысь ветеранъёс басьяськыны быгатозы Ворошилов урамысь 29 номеро юртэ интыяськем магазинысь. Пуштэмлэн бервылъёсыз уг бурмо 20-тӥ мартэ Ижысь город администрациын кенешизы Чернобыль АЭС-ын катастрофа луэм дырысен 15 ар тырмонлы сӥзем ужрадъёс ортчытон сярысь. Чакламын пуштонлэсь бервылъёссэ быдтонэ пыриськемъёслы Ижевскын памятник пуктыны, телемарафон, "пӧсь" телефон ортчытон (отчы пыриськозы городысь кивалтӥсьёс но Чернобыле ветлэмъёсты эмъясьёс). Конкурс Удмурт егитъёслэн "Шунды" дэменлыксы "Шундыкар" лагерьын ужаны мылкыд карись вожатойёс понна конкурс ялэ. Конкурсэ пыриськыны быгато нылпиосын ужаны быгатӥсь, етӥз, визьмо егитъёс. Одно ик тодоно удмурт кылэз, удмурт калык сямъёсты но йылолъёсты, историез. Конкурсэ пыриськон понна дасяно: - асэныд тодматон (визитной карточка); -куинь шудон (люкаськемъёс пӧлын ортчытоно); - улонысь кыӵе ке тунсыко учыръя сценка. Ӵошатскыны мылкыд карисьёс куриськонъёсын 15-тӥ апрелёзь вазиськыын кулэ районъёсысь егитъёсын ужанъя отделъёсы яке таӵе адресъя: Ижевск, Советской урам, 1 номеро юрт 202-тӥ комната. Удмуртия: выль даур Бусыямы уз пот ни жаг турын Йыръянэз лыдӟыса малпады ке тӥ, али гурт хозяйствоын югдур сярысь вераськон мыноз шуыса - янгышады. Туннэ кенешоме мукетыз сярысь. Бусы - со вань удысъёс, кытын кутӥське закон. Жаг турын - Россилэн огъя законодательствоезлы тупасьтэм документъёс. Валады-а? Соку ойдолэ тодматскоме та ужез ӟеч валась муртлэн малпанъёсыныз. Со кивалтэ Россия Федерациысь Юстицияя министерстволэн Удмурт республикая управлениеныз. Можга ёросын вордскем-будэм удмурт воргорон, генерал- майор Вячеслав ОСИПОВ. Вера асьме законъёсты быдэс странаын тупатэм куронъёсъя выльдон бордын ужамзы сярысь: - Ваньмызлы валамон кадь: Россия огъя государство лыдъяське бере, солэн котькуд сэрегаз законлэн кужымез огкадь луыны кулэ. Суверенитетлы но со выллем мукет макеослы мултэссэ синмаськемен, куд-ог улосъёс, тужгес но республикаос, 90-тӥ аръёсы улонзэс ас тодэмзыя радъяно кожазы. Конституциосазы, мукет валтӥсь законъёсазы пыртӥзы огъя кунлэн Конституциезлы чутрак пумит но луись валатонъёсты. Москва сыӵе учыръёсты адӟылытэк ӧз улы но, югдурез тупатонэз кулэен ӧз лыдъялля кадь. Ӵапак ар талэсь азьло Россилы выль президент быръемен ӵош гинэ власть сазьтӥськиз. Владимир Путин котыръятэк шуиз: государствоын кузё луыны кулэ огъя закон, со мед быдэсъяськоз ваньмаз субъектъёсын, солэн кужымез вӧлмыны кулэ котькуд кунмурт вылэ. Та чурыт куронэз быдэстон министерствомылэн валтӥсь ужпумезлы пӧрмиз. Вань управлениос ӝегатскытэк басьтӥськизы интыосын законъёслэсь Россилэн Конституциезлы тупамзэ эскерон борды. Котьмалэсь азьло ми Удмурт Республикаысь прокуратураен ӵош сыӵе документъёсын перечень дасям. Отчы норма луись правоя 28 акт пыриз. Котькудӥзлы юристъёсмы котыр ласянь дунъет сётӥзы. Бӧрысь управленимы кивалтӥсь ёзъёсы вазиськиз, со тырмымтэосты палэнтыны курыса. Вераны кулэ: элькунысьтымы вань министерствоосын но ведомствоосын ӵош вакчи дыр куспын 480-лэсь ятыр документ эскеремын вал. Озьы нырысетӥ список вӧзы кыкетӥзэ дасяно луиз на. Таяз 17 акт шедиз. Удмурт Республикаысь Кун Кенеш но Кивалтэт 34 законэ но постановление воштонъёс пыртӥзы но куронъёсмес озьы ӝог гинэ быдэстӥзы. Татын шӧдӥськиз, вылды, асьме кивалтӥсьёслэн, нырысь ик Александр Волковлэн, Россиын кун властез юнматон шоры ӟечен учкемзы. Уго соослэн мылкыдзы быдэсак тупаз, шуыны луоз, Владимир Путинлэн улонэз выльдонъя малпанъёсыныз. Но ваньмыз соку ик интыяз пуксиз шуыны нокызьы но ум быгатӥське. Кӧня ке ар ӵоже "пӧрам" ужъёсты озьы гинэ тупатыны уг луы. Та нуналлы Федерацилэн законодательствоеныз куд-ог куронъёсъя уг герӟасько на Удмурт Республикалэн сизьым законэз но вылӥ кивалтӥсь ёзъёслэн ньыль постановленизы. Куать законъя (соос пӧлын - кун служба сярысь, егитъёсын ужанъя кун политика сярысь, культура сярысь, калыкез дышетон сярысь но мукет) депутатъёсын огъя малпанэ вуим ни - матысь дыре соос пыртозы кулэ луись воштонъёс. Нош огшоры но чибориё кортэз вузан-басьтон, люкан-келян пумысен законъя огкылэ ӧм вуэ на. Озьы ик Правительстволэн кык постановлениезъя. Таосыз герӟаськемын кылем арлы нылпиослы пособие сётъян радэн но этил спиртэз законэн тупатымтэ учыръёсы кутон дыръя таланэн. Управленимы азе пуктэм ужпумъёсты быдэстонын зол юртто прокуратура но Удмурт Республикая валтӥсь федеральной инспектор. Ми ӵем пумиськылӥськом, ог-огмес малпанъёсынымы тодматӥськом, огъя сюрес утчаны тыршиськом. Соин но, вылды, асьме Элькун Приволжск округын законъёсты выльдон ласянь, мукет улосъёсын ӵошатыса, умой адӟиське. Сое мон шӧдӥ алигес Чебоксары городын ортчем кенешонын но. Отын Удмуртиез ӟечен веразы. Туэ февральысен управленимы кутскиз интыысь аскивалтонъя ёзъёслэсь правоя норма луись актъёссэс эскерон борды. Али дунъет сётӥськом улосвылъёсысь образованиослэсь уставъёссэс. Специалистъёсмы пыр-поч учкизы Завьял, Якшур- Бодья, Игра ёросъёслэсь но Ижевск городлэсь сыӵе документъёссэс. Азьло кутэм законъёсты но мукет актъёсты Россилэн законодательствоезлы тупамон карон сяна, ужасьёсмы басьтӥськизы мукет уж борды. Соос пыриськыны кутскизы Удмурт Республикаысь кун властьлэн ёзъёсаз кутоно документъёсты дасясь комиссиослэн ужазы. Озьы луонлык кылдэ янгышъёслэсь азьло ик палэнскыны, вуоно законлы яке постановленилы ӟеч инъет дасяны. Управлениысь юристъёс, валамон ни, эшъёсынызы ӵош али рос-прос ужало Удмурт Республикалэн шоркарезлэн статусэз сярысь, Удмурт Республикаысь калыкъёслэн кылъёссы сярысь но мукет законъёсты йылазы-пумазы вуттон бордын. Кусыпъёсмес юнматыны выриськом министерствоосын но. Соос понна дасямы нимысьтыз ӵектонъёс. Но куд-ог ведомствоос куронъёсмес пумозяз уг чаклало на. Но ӟечезлы оскон кужмоя. Удмурт Республикаысь Президентлэн но Правительстволэн администрацизылэн кивалтӥсезлэн туэ 12 феврале кутэм распоряжениезъя элькунысьтымы правоя норма луись актъёс нырысь-валысь эскеремын луыны кулэ Администрацилэн правоя управленияз. Пусъёно созэ но. Россиын законъёсын огъя "бусы" кылдытон но отысь "жаг турынэз" быдтон вылысь ик али кылдытӥське Федерацилэн улосъёсысь правоя вань актъёсын регистр. Мукет сямен вераса, улонмес радъясь котькуд документ лыдэ басьтэмын луоз. Та ужрад юрттоз кызьы ке огъя югдурез чакласа возьыны, озьы ик пайдаё луоз нимаз адямиос понна - соос асьсэлы кулэ луись законъёсты, постановлениосты ӝоггес шедьтыны но уже кутыны быгатозы. Туэ 5-тӥ мартэ Удмурт Республикалэн Президентэз Александр Волков поттӥз вань кивалтон ёзъёсты но учреждениосты правоя актъёссэс управлениямы одно ик келяны косӥсь распоряжение. Таиз но вамыш милемлы юрттоз азямы пуктэм ужпумъёсты быдэсъянын. "Пӧсь" кенеш Удмурт Республикая валтӥсь федеральной инспекторлэн Сергей Чикуровлэн калыкез пумитан интыяз валлян, вирнуналэ, ортчиз ужбергатонъя кенеш. Адямиослэн "пӧсь" юанъёссылы валэктӥзы шаерысьтымы Юстицияя министерстволэн управленияз ужась Надежда Васильевна Харина, ужбергатонъя Ижысь комитетлэн тӧроез Эдуард Фёдорович Мерзляков, шаерысьтымы ужбергатӥсьёслы правооссыя тодон-валан сётъясь юрист Эдуард Юрьевич Быков, Ижысь Устинов ёрос кивалтэтысь ужбергатӥсьёсты юнматонъя ёзлэн тӧроез Людмила Ивановна Сорокина, ужбергатонъя кун комитетысь юрист Марат Тагирович Шайхразиев. "Пӧсь" кенеш дыръя эскеремын пӧртэм ужпумъёс. Соос таӵеесь вал: ужбергатӥсьёсты дырыз дыръя шараян, соослэсь ужкагазъёссэс (документъёссэс) дасян но юнматон, ужбергатӥсьёслэсь юртъёссэс тодон, ужкагазъёсты (документъёсты) юнматыку кылдылӥсь шуг-секытъёс но мукетыз. "Пӧсь" юанъёслы валэктон мынӥз кык час ӵоже. Е. Михайлова. Удмурт Республикаысь Правительстволэн Тӧроезлэн воштӥсезлэн Харина Наталья Алексеевналэн секретариатэзлэн кивалтӥсез сярысь Удмурт Республикалэн Президентэзлэн УКАЗЭЗ 1. Бессогонов Николай Михайловичез юнматоно Удмурт Республикаысь Правительстволэн Тӧроезлэн воштӥсезлэн Харина Наталья Алексеевналэн секретариатэзлы кивалтӥсе Н. А. Харина ужзэ быдэсъян вакытлы. 2. Та Указ кужыме пыре сое гожтэм нуналысен. Удмурт Республикалэн Президентэз А. А. Волков. Иж город, 2001-тӥ арын 14-тӥ мартэ. � 37. Дунне-питран Йылпумъяны луонтэм сериал Э-э-эх! Макем визьмо вылӥллям вашкалаосмы: оген, пе, венез ӝутыны но секыт. Йырдэ музъем шар музэн бергатӥд ке, кылъёсылэн зэм луэмзы азяд телефон юбо мактал сылозы. Мырӟиськытэк уд ортчы. Уд ке оскиське, аслэсьтыз дунне адямилэсь, Лӧпшо Педуньлэсь, шуисько, юалэ. Солэн кылыз зарнилэсь-марӟанлэсь дуно. Мон солы аслэсьтым зол оскисько, верамзэ пумозяз кылзыны ӵектӥсько. Юболы быдэ... кышно Лӧпшо Педуньлэн чакламез Осто, шу! Куинь пол кутскыса, сизьымдон сизьым аресозям улӥсько-вылӥсько, нош таӵезэ нырысьсэ адӟисько. Я, бен, ваньзэ радызъя... Кырын шунды пиштэ. Тылобурдоос тулыс вуэмлы шумпотыса чирдо-чипсо. Нош мыным нокыӵе уг поты. Кыллисько валесын. Корка шортӥ мыд-мыдлань поръя быгыль-быгыль трубича кышное. Коть вордӥськем юртаз-ераз мед кошкысал-а, мар-а. Быдтӥ тазалыкме тонэн йырин, зӧк пуклё, лулӟылӥсько поннам, син пумтӥм кышное шоры учкылыса. Тыныд луыса, та калэ вуиськиз - кыскем-нием коньы мактал кылиськиз. Табере со ик монэ ныж бычкыен зыра: тон, пе, Педунь лулпыжет гинэ. Кыллиськод, вӧлдэтысь кутъёсыз лыдӟыса, пӧрмостэм. Эх, малпасько, султыса пурӟыты вылэм тае - ӟигары ӧвӧл. Нош кыӵе воргорон вал мон! Эх, ма... Аксымъёслэн висёнзы паласькиз уга. Егит дыръям ӵужай вералляз, умой кен синйылтыса возисько, пие. Дэмласьёсыз но чиньыен-пӧлыен лыдъяса быдтонтэм вал. Ӵужайлэсь ӧй кылзӥськы. Меӵак ӵоги: сьӧрлотӥ кышно кураса уг ветлы, асьме гуртысь ик кеӵевыл коркан улӥсь Марьюкез басьто но тӥни. Соослэн угось улэм-вылэмзы бусьтыр, юртсы йыг-йыг но, бадӟым но. Узыр вармумы доры огпол пырамед но вунэтонтэм кылёз шуыса малпай, лэся. - Шузи тон, шузи, - пыкылӥз соку ӵужае. - Сьӧрлось кышно басьтӥд ке, вармумид тонэ котьку сӥлы кароз, - итӥськизы мукет дэмласьёсы. - Вуэмедлы быдэ табань пыжоз, векчи виятэменыз куноятоз. Нош гуртын мар? Ву вылэ лӧптэм пукы кадь, ялан син азьын. Огпол пырод, кыкетӥзэ кожод - собере соослы акыльтод, адӟемпотостэм луод... Ӵужаелэн верамез вуэ учкем мактал луиз. Марьюкен кышнояськеммы дырысен кемалась куамын но куинь ар тырмиз ни вал. Улытозяз-вылытозяз вармуми шуонэ огпол гинэ сектаз. Соку но бервузэ удӥз кадь. Чурыт куртчем вылэм. Огпол кунояськыкум но пельняньзэ тэркые лыдъяса тыриз. Дасэн кӧтыд тыроз, пе. Одӥг гуртын улыса вылысь, сыӵе сямзэ ӧй тодылы. Муртлэсь сюлзэ кыскоз, нош ас гидкуазьысьтыз тол шорын лымызэ но уз сёты. Кышное но анаез выжые мынӥз: маялтэк ӝужйиз - мугорзэ кык кузя ӟыгыртыны уд сузьы, нош аксым сямыз сизьым муртлы люкыса но йыр вылтӥ потымон кылёз... Мар ай мон берло вапумъёсме но сое чидано луисько на, шуи но, небыт валесысьтым султӥ. Ураме потӥ. Кырын усто! Тулыс омыр ёзвиосам выль тулкымен пальккиськиз, зӥбломем егит дырме тодам уськытӥз: мылкыдме пачылмытыны дусым шедьтоно вылэм. Йырам пужнӥськись малпанъёсыным луть-лать вамышъясько, бугыръяськись мылы-кыдыным пилемъёс сьӧртӥ лобасько. Ой! - Йыг! кымесеным мырӟиськи. Учкисько: юбо. Ма но ӧвӧл отын лякылэмын - ялонъёс ошылыны пуктэмын, кожалод. Синъёс одӥг бумага кесэг вылысь мукетаз чальтчо. "Уже кутӥськом тусбуйлы, чебер нылъёсты... Бадӟым уждунзы вӧзы висъялом патер... Вазиськоно... телефонъя", - лыдӟисько одӥгысьтыз, нош валэктон шеде мукетысьтыз: "Син мальдымон нылмурт тодматскысал..." Телефонэз вылӥысяз ялонысь ик пусъемын. Мар отын йырез сокем тӥянэз, адӟиське кыӵе ужез "бергатэмзы". Э-э! Йыркуосы лӧпто ни вал. Юболы быдэ вылэм сыӵе ялонъёс - асьсэды ӵектӥсь пивылэсъёс. Сыӵеосын ке кушласькид, сьӧдкыль кырмоз эшшо. Со СПИД шуонзы "не спит" шуо кадь. Нуналлы быдэ аля, азэ, вӧлме. Ай кылӥськиз: шаерамы кык вить сю пала муртлы паласькем ни, пе. Пересьмыса-уйжомыса шайтан адӟонэ сьӧлтаськод эшшо. Юболы быдэ ӟеч кышно сярысь уз ивортылэ. Уртчись йыркурме басылмытон вылысь, киоск пала кожи. Газет, пӧй, басьто, лыдӟисько но... юбо сярысь вунэто. Газетэз усьтӥ но... пыдессинъёсы либрак шальтразы. Туспуктэмъёсысь чеберайёс синмынызы кырмышто, ымпумынызы пальпото: "Тодматскысал узыр воргоронэн. Тел. 57- 70-91", "Мусо нылмурт тодматскысал воргоронэн (тодмо ни: такаен ӧвӧл!). Тел. 57-97-85", "Синмальдымон нылмуртлэн тодматскемез потэ. 25-96-52, 57-86-85"... Синъёсы бусаськизы, отӥосыз сярысь лыдӟыны кынары ӧз тырмы ни. Йыртышкам кин ке васькытӥз кадь. Сазёми. Бертыса Мрьюке вӧзы ик конгырско ай. Ныгыль-ныгыль мугорыныз мед посоз куасьмем лысьӧмме. Кин тодэ, оло, ёзвиосы но шудыны ӧдъялозы ай. Нокыӵе юбо сярысь малпаськытэк... Аслэсьтым ватсан: бен, юмоке усьыны кема ӧвӧл берпалынызы шудӥсьёсын. Сьӧдкыль но кырмод, сопал дуннее но чачыралод. Нош ортчем вапумез ке копыштоно? Кузь йырсиосыд гольык йырзэс возьматытэк ке но ветлылӥзы, гольык пыдзэс ватылыны ке но тыршылӥзы - одӥг-ог нальыке шедьылӥзы, лек куртчанги кырмылӥзы... Я, пыдлогес, лэся, пырисько, олома пумысь но сальтыртӥсько. Тырмоз но инсьӧртӥ лобаны, ортчемзэ бугыръяны. Бен, ветло вал супыльтонъёс: СССР-ын ӧвӧл, пе, секс. Нылпиосты туж ӵемысь, шедьтылӥмы отысь-татысь: я тулыс тудву вуттылӥзы, я кубиста йырын быгыльскылӥз, картоп копаку но бугырскылӥз, пельтэм букосысь но потылӥз... Нош гольык беръёс сярысь ке?.. Соиз пумысь малы ке ӧмгес тодылэ. Ай кылем даурысь 90-тӥ арлэн пумаз ачим но паймысагес гожъяй: "Кытчы пыризы гольык нылъёс? Соосты уз шедьты Шерлок Холмс но". Отӥяз мугзэ валэктӥ. Ижысь урамъёсы ялонъёс лякылӥзы: "ТКВ западно-германской фирма, "Премьера" творческой объединение, Удмурт госфилармония СССР-ын но Ижевскын нырысьсэ 26-тӥ- 28-тӥ ноябре "Ижсталь" йӧ дворецын возьматэ бадӟым спортивно-зрелищной "Американский кетч" шоу-программа. Отӥяз ивортэмын вал программае пыриськисьёс сярысь. Отын ик пусъемын "Эротическое шоу" но Москваысь "Новые амазонки" шоу- группаослэн лыктонзы пумысь. Но Ижын улӥсьёслы эротика учкыны ӧз кылды. Адӟизы Сыктывкарысь шоу-балетэз... гольык нылъёсты интые. Со понна табере вукылак потымон - гольыкъёс. Уй ужась кафе-а, ресторан-а - гольык нылъёсын синмыд тыроз. Нош кӧтыд ӧз тыры ке, нырысь шедем юбо бордысь телефонъя куангырты - тон эксэй, тон... Отӥзэ уг вера ни, сёровно коньдон пуйыды векчи... Шӧкычез бурдъяз Рашит Хайдар. Дышетэ эсперанто кылэз! Оскоды-а, уд-а, но удысъёсын герӟаськем калык куспо кыл но вань: математикъёслэн - со пӧртэм символъёс, формулаос, уравнениос; химикъёслэн - быдэс дуннеын кутӥськись Д. И. Менделеевлэн таблицаез но озьы ик олокыӵе но формулаос: медикъёслэн - вань эмчиослы валамон нимкылъёс; композиторъёслэн - кагаз вылэ суредам нотаос. Калык куспо сигналъёсты-пусъёсты куто зарезь вылын но, омырын но, музъем вылын но (сюрес дуръёсын). Балет - таиз но удыс тупа калык куспо кыллы, быдэс дунне сое ӟеч вала. Нош адямиослэн вераськоназы калык куспо кылзы ӧвӧл. Куд-ог тодосчиос вашкала дырысен ик ини малпаськылӥзы та ужпум пумысен, калык куспо кылъя ӵектосъёс (проектъёс) но кылдытъязы. Соос пӧлысь одӥгез, Заменгоф докторен "Эсперанто" нимамез, улонамы пыӵаз. Эсператноя ӟуч кылын нырысетӥез учебник потӥз 1887-тӥ арын. Со туж ӝог вӧлмиз дуннее. Табере эсперанто кылын потто книгаос, пукто спектакльёс, кинофильмъёс, печатлало 300-лэсь уно газет- журналъёс. Дасоосын радиостанциос эсперанто кылын передачаос дасяло, кылсярысь, Венаын, Варшаваын, Пекинын... Быдэс дуннеысь эсперанчиослэн огазеяськонзы но вань, озьы ик пӧртэм удысъёсъя но. Таӵе огазеяськонъёслэн ёзчиоссы ог-огзэс берыктӥсьёстэк но ӟеч валало: соос уго эсператно сямен эркынак верасько. Эсперанчиос ӵемысь люкаськыло конгрессъёсы. Отын соос верасько быдэс дуннеысь наука, культура но искусство удысъёсысь азинсконъёс сярысь Пӧртэм выжыысь адямиос ог-огзэс ӟеч валало. 2000-тӥ арын 15-тӥ-23-тӥ июле Москваын ортчиз эсперанчиослэн 73-тӥ калык куспо конгрессы (САТ). Татын ваньмыз эсперанто кылын гинэ вераськизы. Нош туэ 4-тӥ-11-тӥ мартэ Санкт-Петербург вӧзысь одӥгаз городын ортчиз Россиысь эсперанчиослэн 20-тӥ конгрессы (РЕК-20) но "Эсперанто - искусстволэн кылыз" нимо 13-тӥ калык куспо фестиваль (ЕОЛА-13). Туэ августэ мылкыд карисьёсты Ульяновск ӧтё Егитъёслэн 41-тӥ гужем эсперанто- лагерязы (ОКСЕЙТ-41). Таӵе лагерьёс паськыт вӧлмизы аспӧртэм но тунсыко программаоссы ванен. Ар ӵоже соос ужало дуннеысь ог 200 кунъёсын. Эсперантоез тодӥсь мурт нокыӵе берыктӥсьёстэк быдэс дуннеен кыл тупатыны, котькуд странаысь эшъёс шедьтыны, тодон-валанзэ муромытыны быгатэ. Кылрадъянэз (грамматикаез) капчи но котькинлы валамон луэмен, эсперанто трос пӧртэм кунсьӧр кылъёсты дышетыны мылкыдэз лӧпкытэ. Соин ик эсперанчиос пӧлысь уноез полиглотъёс луо. Эсперанто кылэз тодыса, адямиос ӟечгес валаны ӧдъяло дуннеез, пӧртэм калыкъёслэсь сямъёссэс но йылолъёссэс. Эсперанто сярысь Интернет пыр эсперанто кылын туж трос иворъёс шедьтыны луэ. Эсперантоез дышетон понна пӧртэм выжы калыкъёслы уно учебникъёс поттало. Кемалась ик ӧвӧл Б. Д. Чупинлэн эсперанто кылъя удмуртъёслы юри чаклам учебникез потӥз. Удмурт кылэ сое берыктӥз журналист Александр Лаптев. Б. Чупин, Эсперанчиослэн калык куспо огазеяськонзылэн ёзчиез. Эшме буре вайыса "Ӧрӟиослэн радысьтызы" шуыса алигес гинэ кадь, 1998-тӥ арын 12-тӥ ноябре, гожтӥм вал Александр Князев сярысь (соку солы 75 арес тырмиз). Туннэ Александр Иванович пӧламы ӧвӧл ни. 20-тӥ мартысен 21-тӥ мартэ выжон уе солэн сюлэмыз жугиськемысь дугдӥз. А. И. Князев 1969-тӥ арысен газетмылэн (соку ай "Советской Удмуртия" нимаськиз) Воткинск но Шаркан ёросъёсъя собкорез вал. Корреспонденциоссэ котьку ӝикыт, югдурез тодыса-валаса гожъяз, редакциямы "пӧсь" материалъёс вуттылӥз. Пенсие потыса но ми доры сюрессэ ӧз вунэты. Дэбес палась Улӥ Шудзялуд гуртын 1923-тӥ арын вордскем пияш бадӟым улон сюресэз ортчиз. Капчи ӧй вал со сюрес. Ӵапак ож тылӝуэ кемдӥз. Кышкасьтэм луэмез понна Горд Кизили орден, медальёс сётӥзы. Ож бере азьланьтэ быръем удыссэ: ас гуртаз школаын дышетэ, роноен кивалтэ. 50-тӥ аръёсы улонэз герӟаське газет поттон ужен. Александр Иванович ноку но тӧллы нялтас ӧз мыны, со котьку но вал нюръяськисьёслэн радазы. Дуно эшмылэсь улон шоры сэзь синмын учкемзэ, зэмлык понна тыршемзэ, юрттӥсь, лякыт сямо луэмзэ ноку ум вунэтэ. Солэн сайкыт тусбуез улоз сюлэмъёсамы. Редакциысь эшъёсыз. Эшъяськон мылкыд ноку медаз тӧлӟы Уно дауръёс ӵоже одӥг музъем вылын ог-огзэс гажаса, тупаса, ваче юрттӥськыса уло удмуртъёс но бигеръёс. Республикаямы та вакытэ 110 сюрс бигеръёс лыдъясько. Мукет выжы калыкъёслы сямен ик, соослы но вань луонлыкъёс кылдытэмын ас кылзэс, культуразэс, сямъёссэс азинтыны. Нациосын герӟаськем ужпумъёслы бадӟым саклык висъя кун власть, Нациосын ужан политикая министерство но мукет кивалтон ёзъёс. Солы луыса, республикаямы ужало кызьлэсь ятыр национально-культурной огазеяськонъёс. Огез соос пӧлысь - бигеръёслэн общественной центрзы. Январь пумын гинэ ортчиз солэн витетӥ бадӟым ӧтчамез. Кык сюлэсь ятыр делегатъёс дунъет сётӥзы организацилэн ужамезлы, сэрттӥзы-пертчизы Удмуртиын улӥсь бигеръёс азьын сылӥсь ужпумъёсты. Соос герӟаськемын кылэз утёнэн, культураез азинтонэн, пӧртэм выжы калыкъёс куспын эшъяськыса улонэз юнматонэн, республикалэсь экономиказэ ӝутонэн но мукет. Выль быръем правление нырысь нуналъёсысен ик ӟеч кусыпъёс тупатӥз городысь "Якташлар"("Бӧлякъёс") огазеяськонэн, тужгес визьмо-мудрон азьветлӥсьёслэн (аксакалъёслэн) кенешенызы но мукет выжы калыкъёслэн огазеяськонъёсынызы. Пумиськонъёс ортчизы Калыкез дышетонъя, Печатья но иворъёсъя министерствоосын, "Удмурт кенеш" огазеяськонэн, пыриськизы бигер огазеяськонъёслэн Сарапулын но Можгалан ортчем кенешъёсазы. Бигеръёслэн общественной центрзы тужгес но бадӟым саклык висъя школаосын нылпиосты вордскем кылын дышетонлы. Удмуртиысь кызь сизьым школаосын усьтэмын бигер классъёс, дас тямысаз нылпи садъёсын радъямын бигер группаос, Ижын ужа бигер гимназия. Удмурт кун университетын усьтэмын бигер пиналъёс понна кылъя но литературая люкет, нош педучилищеын - покчи классъёсын но нылпи садъёсын ужасьёсты дасясь ёз. Ортчем дас ар ӵоже та дышетон заведениосын дасямын сюлэсь ятыр дышетӥсьёс но воспитательёс. Тросэз соос адӟем карымон тыршо республикаын но солэн палэназ. Огазеяськонлэн сюлмаськеменыз ик шаерамы дас ар талэсь азьло потыны кутскиз бигер кылын "Янарыш" ("Возрождение") газет, эфире потӥзы "Хэерле кич!" ("Добрый вечер") телепередача но "Очрашу" ("Встреча") радиопрограмма. Ужъёс мыно покчиослы нимысьтыз телепередача дасян бордын. Ивор вӧлмытӥсь ёзъёс юртто республикаысьтымы городъёсысь но гуртъёсысь вань бигер огазеяськонъёслэсь ужзэс одӥг ӧретӥ ӧръяны, Удмуртиын улӥсь вань бигеръёсты огазеяны. Калыклэсь асваланзэ будэтонын бадӟым инты басьтэ ас выжыосыдлэсь культуразэс тодон, азинтон. Та удысын одӥгез валтӥсь ужпум - эстрадая но крезьгуръя творчестволы азинскыны "вож" сюрес усьтон. Ас калыкезлэсь крезьгурзэ, калык кырӟанъёсты мур гажась мурт ноку гажамысь уз дугды ас выжызэ, вордскем кылзэ. Тӥни соин ик бигеръёслэн центрзы сюлмаське художественной самодеятельностья коллективъёслы юрттыны, ӵемысь радъя концертъёс, кырӟанъя но эктонъя конкурсъёс, тюрк калыкъёслэсь фестивальёссэс, егит кырӟасьёсын пумиськонъёс. Кылсярысь, Камбарка ёросын аспӧртэмлыко ортчыло вашкала йылолъёслы сӥзем ужрадъёс. Можга данъяське сабантуйёсыныз. Нош Воткинскын кырӟаны-вераны быгатэменызы шумпотто покчиос. Синмаськымон ужрадъёс ортчыло Глазовын, кудӥз огазея Балезиноысь но Юкаменскысь бигеръёсты. Озьы центрлэн жадёнэз валатэк тыршеменыз, республикаын ӟеч луонлыкъёс кылдо кылэз, культураез улӟытыны, узырмытыны. Но ваньмыз малпамъя гинэ уг пӧрмы. Вунысагес кылё кыдёкысь гуртъёс. Коньдонлы луыса, отчы шер вуыло тодмо артистъёс, гожъясьёс, кылбурчиос. Гуртъёсын уг тырмо егит специалистъёс. Та бордын ик азьланяз лулысь-сюлмысь ужаны малпа огазеяськон. Солэн ӟеч ужъёсыз паськыт вӧлмизы ини республикае но солэн палэназ. Соинтэк-а огазеяськонлэсь дас ар тырмонзэ пусйыны сомында калык люкаськиз. "Металлург" культура дворецлэн залаз пуксьыны инты ик ӧй вал. Бигеръёсты ӟечкыланы лыктӥллям Москваысь, Татарстанысь, Башкортостанысь куноос, республикамылэн Президентэз Александр Волков, Кун Кенешлэн Тӧроез Игорь Семёнов, Удмурт Республикая валтӥсь федеральной инспектор Сергей Чикуров, нациосын ужан политикая министр Владимир Завалин, Печатья но иворъёсъя, Калыкез дышетонъя министерствоосын но мэриын ужасьёс, пӧртэм выжы калыкъёслэн огазеяськонъёсынызы кивалтӥсьёс. Куноосын тодматыса но люкаськемъёсты праздникен ӟечкыласа вераськиз бигер общественной центрлэн тӧроез Фнун Гавасович Мирзоянов. Собере со сцена вылэ ӧтиз огазеяськонлэсь тужгес но матысь юрттӥсьёссэ - городъёсысь но ёросъёсысь ёзъёслэсь кивалтӥсьёссэс. Соослы тау карыса, покчиос синпель кузьымъёс но сяськаос сётӥзы, егит усточиос шулдыр кырӟан кузьмазы. Куноослэсь ӟечкыланъёссэс залын пукисьёс юн кичабонъёсын пумитазы. - Нациосын герӟаськем ужпумъёсъёсты, пӧртэм калыкъёсын кусыпъёсты туж валаса, чакласькыса но котыр ласянь эскерыса радъяно, - шуиз Президент Александр Волков. - Соосты дыртытэк, нокинэ вӧсь карытэк сэрттыны-пертчыны тыршоно. Одӥг семьяен огазеяськыса, валче ужано асьмелы. Мон шумпотӥсько бигер калыкен юн, шуныт кусыпъёсмылы. Оскиськом, соос азьланьын но уз сӧриське. Республикаямы кутэмын нациосын ужан политикая нимысьтыз концепция. Отын пусъем уноез ужрадъёс улонэ пыӵало ини: школаосын йыло бигер классъёс, ужало нылпи садъёс но мукет. Нош республикалэн азинскон программаезъя чакламын огъя куатьтон выль школа усьтыны но культурая но тазалыкез утёнъя куамын юрт ӝутыны. Ваньмыз со лэсьтӥське асьме шаерын улӥсьёс понна, кыӵе выжыысь потэмзы шоры учкытэк. Трос вераськонъёс мыно Удмуртиын Эшъяськон юрт пуктон сярысь. Сыӵе юрт одно ик луоз! Пӧртэм нациен адямиос мед быгатозы ог-огенызы пумиськыса кенешыны, эшъяськыны, ог-огзылэн культураенызы, йылолъёсынызы тодматскыны. Зэм ик, эшъяськон бордысь потэ республикамылэн огсыр азинсконэз. Тупаса, ог-огдэ гажаса улон мылкыд пыӵамын вал та ӝытэ лыктэмъёслэн веранъёсазы, малпанъёсазы. Сыӵе мылкыд ноку медаз тӧлӟы. Е. Камашева. Йыг-йыг удмурт Москваын уг йыромы Та адями сярысь трос гинэ гожъязы, мадизы ини газетъёс, радио, телевидение. Угось Владимир Лебедев - туж тодмо удмурт воргорон. Москваын Удмурт Республикалэн Россилэн Президентэз бордын ялан ужась ёзэз вань. Ӵапак Владимир Степанович солэн кивалтӥсезлэн воштӥсез луэ. Та адямиез мон вить ар ӵоже тодӥсько ини: угось университетам дышетскись студентъёс Удмурт Республикалэн Москваын ялан ужась ёзэныз кусыпъёс возё, пӧртэм ужрадъёсы пырисько. Но мыным шуд усиз Лебедевен огшоры улон-вылонын но тодматскыны. Одӥг пол жингыртӥ уж дураз. Шуисько: мынам тӥ сярысь газетэ гожтэме потэ. Со пумитъяське: мар мон сярысь гожъянэз? Мон тыныд трос вераны быгато Москваын улӥсь туж тунсыко удмурт адямиос сярысь. Лыкты дорам арня пумын. Вераськом. Кепыраса но мараса мынӥ Крылатское. Кызьы пумиталоз сыӵе вылӥ адямилэн семьяез монэ, огшоры студенткаез? Кыдёке ик ширтоно луиз. Одӥг но ӝыны час метроын, собере автобусын ог дасо минут зуркано. Вуи кадь. Владимир Степанвочи пумитаны ачиз потӥз. Кышкаме чиптэм-чаптэм быриз кадь, ваземез бере: - Марина! Мар бен тон сыӵе жуммид ай? Берлозэ адӟыкум, тазагес вал кадь. Я, пыр, пыр. Али кенешом, сиськом, собере ошмес дуре ветлом. Эх, вазьгес вуоно вал тыныд: ву дуре нуназе лачак гинэ калык люкаське. Пырим... Владимир Степановичлэн кузпалыз но, Татьяна Михайловна, ӟечбуръяськиз. "Туж мусо но лякыт сямо кышномурт", - малпай ас поннам. Бен, Владимир Степанович но ушъяське: - Мынам кышное туж умой. Сомында ар ӵоже ини лад-лад улӥськом, ум керетӥське, ог-огмес весяк валаськом. Мынам Татьянае туж ческыт пӧра. Эшъёсмы но соин валче ярато дорамы куное ветлыны. Малпасько: мынам сямылэн трос умой нюжаосыз кылдӥзы но кыдазы ӵапак семьяен улыны кутскон вакытам. Зэм но, фотоальбомлэсь бамъёссэ берыкъяса валано, кыӵе шудо та семья. Владимир Степанович нош пумен валэктэ: - Тани мон Удмуртиын, тани Венгриын Кузьма куликовен ӵош, тани кышное эшъёсыныз, тани ми ӵошен Выль арез пумитаськом, тани Юля нылмы пуныен - туж яратэ пудо-животэз. Али но тани ипподроме кошкиз: валъёсын выре, соослы чыры- пыры сиён нуллэ, сузя-сына соосты, быдэс нуналзэ эшъёсыныз мусояськыны дась. Вераськонъямы Татьяна Михайловна сиён пӧрмытэм ини. Ӝӧк дуре чортӥз. Ческыт пӧрамез оскалтон куспын тодыны вуттӥ: Владимир Степанович сяськаосты яратэ. Уд но малпа ведь: кышномуртэн ужез кадь ук со. Но Татьяна Михайловна вера: - Ой, Володя ачиз сяськаосыныз выре. Монэ сяськаос бордазы оломарлы уг кыско. Картэ кытчы ке кошке ке, борддоре гожтӥсько: "Сяськаос вылэ ву киськано". Иське, вунэто ук. Мон ведь соослэсь нимъёссэс но уг тодӥськы. Одӥг пол юри кыллюкам пушкын бугыръяськи. Тужгес чебер сяськамылэн гинэ нимыз йырам кылиз - "Спатифилум". Собере ми Владимир Степановичен вамыштӥм ошмес дуре. - Мон ӵукна туж вазь султӥсько, - шуэ воргорон. Вить час котырын. Соин яратӥсько ву дуре ветлыны. Милям ошмесмы вӧсямын ук. Адямиез тачак гинэ люкаське. Кезьыт вуын пыласькисез но луэ. Нош мон ӵукна ик велосипедэным ширтӥсько но, черодын сылоно уг луы. Мынам ведь аслам валэ вань: пичи дырысен сыӵе сямы кылиз. Ижын дышетскыкум, гужемъёсы весяк Итчи-Дӧкъя (Бадӟым Кион) гуртэ бертылӥ. Анае вазь кулӥз, соин агаеным ӵош ӵужатаймы дорын шутэтскылӥм. Уе-нуналэ велосипед вылын ортчиз. Милям татын Олимпийской велотрассамы вань. Со кузя ворттылӥсько. Но сюресэз вакчиёмытон понна, юри нюкъёс-гопъёс пыр ширтӥсько. Озьы яратоно Удмурт шаере, пичи дыры но тодам лыкто. - Кемалась-а тӥ Москваын? - Кузпалэным татын дас вить ар пала улӥськом ини. Мон, военной бере, олокытчы но вуылӥ - Ленинградэ, Украинае, Красногорске но мукет интыосы. Берло дыре Ижын пӧртэм заводъёсын ужай. Но Москваысь курон вуиз: Обороная министерстволы Удмуртиысь адями, пе, кулэ. Ӵапак монэ бырйизы. Трос малпаськоно луиз. Мон интыын мукетыз соку ик таӵе шудо учыр борды ӝабырскысал, дыр: угось Россилэн шоркарез - туж ӟеч но шуныт инты. Но малы ке уг кыскы вал отчы. Юлямы соку вордскемын вал ини. Ма, асьмеос но туж егитэсь ӧй вал ни. Курон вань бере, мынӥ Москвае. Ар улыса, кышное но нылы вуизы. Кӧня ар ортчиз ини - та бадӟым но аляк городлы дышыны ӧй вуы на. Кӧня пол малпаллямы ми Удмуртие берытскыны. Но Юлямылэн кошкемез уг поты, со ведь татын будӥз, дышиз, вань эшъёсыз татын. Эшшо ке тани 1992-тӥ арын Удмурт Республикалэн Москваын ялан ужась ёзазвуи. Али ӵемысь аспал эшъёсынымы пумиськылӥськом, трос люкаськизы ини. "Герд" огазеяськон кылдытӥм. Сое улӟытон понна, трос кужымзэ сётӥз удмурт пияш, офицер, та дуннеысь туж вазь кошкем воргорон Владимир Юрьевич Танаев. Бадӟым сюлэмо, ӟырдыт мылкыдо вал со, уж пушкы быдэсак ышылӥз, одӥг пичильтыксэ но палэнэ кельтытэк. Со сярысь нимысьтыз гожтоно. Озьы ик милям туж трос мукет тодмо удмуртъёсмы вань на: Тамара ивановна Тепляшина, Юрий Борисович Малых, Глафира Николаевна Никольская,,, Соослэн но улон сюрессы туж тунсыко. - Нош тӥ ог-огеныды ӵем-а пумиськылӥськоды? - Азьло туж ӵем пумиськылӥмы: татын куд-огез туж кема улэ ук ини. Мӧзмо дорзылэсь, кылзылэсь, культуразылэсь. Куддыр адямиос люкасько но кошкемзы уг поты ни. Ачим нош уж бере соосын валче пукисько ини: мылкыдзы лӧптэмын ук. Нош 1993-тӥ-1994-тӥ аръёсы воштӥськонъёс кутскизы, ужтэк кылён сярысь вераськонъёс вӧлмизы. Егитъёс дорамы шергес но шергес кожаны кутскизы. Пенсионеръёс кылизы. Но ми ӧм куашкалэ, пумен паськытамы, дорамы пинал усточиос вуизы. Финн-угор выжыысь эшъёсынымы шуныт кусыпъёс возиськом, валче пӧртэм ужрадъёс, ӝытъёс ортчытъяськом. Тани Мадьяр культурая центр милемлы ас юртсэ висъялляз Ашальчи Окилэн но Куӟебай Гердлэн вордӥськемзы дырысен 100 ар тырмон юбилейёсты пумитаны. Милям асьмелэн брас-квинтетмы вань. Отын шудо военной академиысь удмурт пиос. - Владимир Степанович, тӥляд кылъёстыя валаны луэ: Удмурт Элькунлэн Москваын ялан ужась ёзэнызы тужгес но герӟаськемын военной адямиос. Тӥ но военной. Нош таӵе удыс сярысь пичиысен ик-а малпаськиды? - Ӧй. Зэм, куддыръя кылдылӥзы Суворов училищее пырон сярысь малпанъёс. Но мон школаез умой йылпумъяй, дышетсконме азьланьтэме потыны кутскиз. Армие мынон дыры но вуиз. Армиын службазэс куинь ар нуылӥзы соку. Мар кароно? Кин ке но мыным визьмо дэмлан сётӥз: армиын но вылӥ тодон-валан басьтыны луэ ук. Озьы ик лэсьтӥ мон. Собере ужан сюресэ кутскиз, кышнояськи. - Нош кузпалды кытысь? - Ма, Удмуртиысь ик. Мон дышетскыкум Иже бертылӥ. Угось татын уло вал тужгес усто эшъёсы - Олег Шибанов но Владимир Каракчеев. Соосын ӵош огпол кинлэн ке вордскем нуналаз мынӥмы. Отысен тодматски Татьянаен. Кыӵе но дыръёсы ӧй вал, со понна кылбуръёс но гожъяй. Али но кытын ке кыллё на. Озьы ик кузпалъяським. - Владимир Степанович, мон тодӥсько: тӥ Ижевскын будэмын, ӟуч школаын дышетскемын. Но удмурт кылын вераськыны турттӥськоды, озьы-а? - Бен, бен. Мон вордски наш-наш удмурт гуртын. Анае дышетӥсь вал. Но солэн калссаз дышетскыны ӧз кылды. Нырысетӥ классэ бурдъяськыса мынӥ. Пельпумам - дэра сумка, солэн пушказ - чернила возён пияла. Огпол линейка бере тубат кузя васькисько. Ух, канжаськи ук! Сумка вылам ик сапкиськи. Султӥсько но - вань дӥсе-кутэ чернилаен саптаськемын. Йыры кур луиз. Гуртын шуи: "Мон со школаяды уг ни мыны". Озьы монэ анае школалэсь одӥг арлы мозмытоно луиз. Нош ар ортчыса, семьяенымы кошким Вавоже. Отын калык ӟучомемын, соин ик удмурт классэ ӧй мыны. Нош кыкетӥ классэ мынон дыры вуиз но, Иже улыны кошким. 22 номеро школаын дышетскыны кутски. Агаеным ӟуч кылын вераськи. Нош гужемъёсты Итчи-Дӧкъя (Бадӟым Кион) гуртын ортчытылӥ. Тямысэтӥ, укмысэтӥ классъёсын дышетскыкум гинэ валатски, удмурт кылэз одно тодоно шуыса. Возьыт но луылӥз ук эшъёс, ӵыжы-выжыос азьын. Эшшо ке сереме уськытозы на. Соин ик кутски, гуртэ бертылыкум, удмурт сямен гинэ вераськыны. Нош али каньылгес ини. Дорам вуыку, Итчи-Дӧкъя (Бадӟым Кион) гуртлэн кутсконаз тодмоосыным шенгыль-пенгыль вераськисько, нош гурт пуме вуыкум, кылы воляны ӧдъя ини. - Нош нылды удмурт кылэз уг тоды-а? - Ӝожомыса верано луэ: уг тоды. Огпол малпаськи вал ини сое удмурт кыллы дышетон сярысь. Гужем, шуисько, гуртын шутэтскоз, пумен удмурт кыллы дышоз. Но мар меда сётоз одӥг гинэ толэзь?Ачим коть пинал дыръям быдэс гужемъёсме гуртын ортчытъяй. Шумпотӥсько одӥгезлы: пичильтыкме дышетӥ инкуазез гажаны, пудо- животэз яратыны. Гуртын шутэтскыкум, нылме ӵукна вить-куать часын сайкатылӥ. Юлялэн синмыз усьтӥськемын ӧвӧл ай - пудоез сюдыны потэ, сое возь вылэ келя. Зоро-кото дыръя но бакчаысь кунянэз вайыны лӧптыса мынэ. Нокинлэн дэриен наштаськемез уг поты, нош Юля понна со - бадӟым шумпотон. Одӥг пол ӵошен чорыганы мынӥм. Трос гинэ кутӥм. Нош нылы зар-р! бӧрдыны кутскиз: чорыгъёсты жаля. Улэпъёссэ берен шуре лэзёно луиз: мар бен карод на? Нош татын, Москваын, будэм пиналъёс? Мае адӟизы соос, вань пичи дырзэс кузьыли карын (улыно-вылыно корка пушкын) ортчытыса? Юляе понна шумпотӥсько. Инкуазез гажан, валан но яратон - солэн пыраклы сюлэмаз... Тазьы вераськонъямы, ошмес дуре но вуим, гурезь йылэ тубим. Владимир Степанович бинокльзэ поттӥз: - Чебер милям татын. Аляк ӧвӧл. Куддыръя луд кечъёс но тэтчало. Озьы ке но, Удмуртия, вордскем шаере, бордаз кыске. Йыромем мурт кожаськод астэ татын. Мон малпасько: улонысь кошкон дыры вуиз ке (котькинлы со пыр ортчоно ук куке-соку), берпумзэ шокчыкум, син азям пичи дырылэн тужгес шудо суредэз воректоз: Итчи- Дӧкъя (Бадӟым Кион) гурт, нюлэс, Вало шур... Зэм но, вордскем палъёс, яратоно интыосыд, нырысьсэ чорыгдэ кутэмед, нырысьсэ школае мынэмед, бускель улмопу садысь пунылэсь пегӟемед, нырысьсэ чупаськемед - ваньмыз весяклы сюлэме кыле, аръёс но ӵушыны уг быгато ни сое. Соин дорезлэсь палэнын улӥсь адями вордскем шаерезлэсь мӧзме. Марина Костылева. Владимир Степанович Лебедев. Театр фестивальлы дась Вуоно толэзе асьме дорын нош ик жингыртоз крезьгуро фестиваль. Со сӥземын П. И. Чайковскийлэн вордскемез дырысен 161 ар тырмонлы. Туэ программа узыр но тунсыко. Берло аръёсы татчы пыриськылэ асьмелэн Операя но балетъя театрмы но. Фестивалез со усьтоз П. И. Чайковскийлэн "Щелкунчик" балетэныз. Сое дасян бордын тырше балетмейстер Борис Мягков. Искусствоез яратӥсьёслы солэн нимыз тодмо Россиысь пӧртэм сценаосын ужъёсызъя. Театрлэн куремезлы туэ вазиськиз опера искусстволэн кизилиез Елена Образцова (та дырозь фестивальёсысь сое ӧм адӟылэ на вал). 27-тӥ апреле П. И. Чайковскийлэн "Пиковая дама" операяз со быдэстоз графинялэсь партизэ. Фестивальын возьматэмын луоз Дж. Вердилэн "Травиата" операез но. Юри дасям концертын чузъяськозы П. И. Чайковскийлэн романсъёсыз. Та кык ӝытэ ас быгатэмзэс возьматозы егит солистъёс Наталья Ермакова, Наталья Ярхова, Максим Гаврилов но Дмитрий Полкопин. Фестиваль йылпумъяськоз 29-тӥ апреле П. И. Чайковскийлэн "Лебединое озеро" балетэныз. Татын валтӥсь партиосыз - Одеттаез-Одиллиез но Зигфридэз - быдэстозы Санкт-Петербургысь Мариинской театрысь балетлэн солистъёсыз. В. Лагунов. Гулбеч кузё Толэзь но ӝыны ӵоже, четлыке шедьыса, гулбечын улӥз лушкаськись. Та дыр ӵоже со сылалтэмъёсын гинэ кӧтсэ тыриз. Матысь эшез но валасез комак гинэ вал... Кинлэн меда йырыз кур уг луы, мурӝолдэ сузяса кельто ке. Инженер Анатолий Павлов лушкаськисьёслы пумит тунсыко амал шедьтӥз, аспӧртэм четлык лэсьтӥз. Витьымтэ куно гулбече пыре, тубатъёс кузя ваське но... бӧрсяз шлач! зӧк корт ӧс ворсаське. Озьы адями четлыке шеде. Зэм, Анатолий Ефремович чик но ӧз малпа вал, сад-бакчаысьтыз четлыке солэн бускелез сюроз шуыса. Слесарь Иванов юылыны яратылӥз. Ужамез ӧз потылы, кышноеныз люкиськиз. Нош сием потэ. Мар кароно? Тодаз лыктӥз сад бакчаяз бускелезлэн гулбечез - зэмос продторг. Сузяно, малпаз амало тордос. Тыбыраз котомказэ ныпъяз но капчи мылкыдын толалтэлы кузёостэк кылем дачае вамыштӥз. Пичи четлыкын тём-тём, кезьыт. Ярам ай инженерлэн тямыстон банка пала сылалтэмъёсыз, салатъёсыз, верення-компотъёсыз вылӥллям. Сиёнлы Иванов ӧз ёрмы, куддыръя гырезь картофка, кешыр йырйиз на. Кыре потаны луонлыкез ӧй вал бере, бушам посудаосаз "ветлӥз". Кӧня ке нунал ортчыса, четлыкын ӵогӟоно кадь юрӟым зын вал ини. Но Иванов татын чылкак огназ вылымтэ. Арня пала дыр ортчем бере, лушкаськись ӧс сьӧрысь кыӵе ке куашетэмез кылӥз. Шумпотӥз. Мон татын! Поттэлэ монэ, кесяськиз со. Но, мозмытӥсьёс интые, дораз вуизы кык бадӟым комакъёс. Одӥгзэ вииз, нош кыкетӥеныз огкыл шедьтӥзы, ваче вераськизы, ӵош сиськизы. Мӧзмон вакытаз, чылкак шузимонтэм вылысь, Иванов кырӟаса пукиз. Куддыръя ассэ буйгатъяз: оло, отын, вылӥын, война ни? Яке дунне бырон? Вуж Выль ар азьын инженер дачазэ эскерыны лыктӥз. Со ик луиз Ивановлэн мозмытсконэз но. Кӧшкемыт ымныро, зынмем бомжез Анатолий Ефремович мырдэм тодмаз. Толэзь но ӝыны ӵоже мурӝолын пукемез воргоронлэн тазалыкез вылын шӧдӥськытэк ӧз кыльы. Йырыз сураськыса, лэся, шӧдтэк шорысь квартиразэ вузаз, бускелезлы телевизорзэ кузьмаз (лушкаськемез понна), нош ачиз монастыре кошкиз. "Выль басняос" Ӟичы кудо но мон Огсыр улон шорысь огпол Тэльын кужмо ӝутскиз сильтӧл. Уно изъян лэсьтӥз отын... Зӧк писпуос но тӥямын, Гуос, каръёс но таркамын. Кудӥз-огез сӧсырмыны, Шедиз соку шуккиськыны... Пичи, мискинь лул пӧйшуръёс, Мырдм тэтэ ай карисьёс Туж зол соку бен курдазы, Тросэз висьны но погразы. Кинлы нош мар сыӵе дыръя, Тупа, лэся, вакытэзъя... Ӟичы кудо нош со виын Сюлмаськонэ ӵокак усиз, Солэн угось йыраз тылын Таӵе малпан ӵап чилектӥз... ... Сильтӧл шӧлкын уз лу меда Ваньзэс ик копак колӟаны, Сьӧлыкъёстэ ӵушылыны? Визьмаз ини ӝогак мерта, Созэ-тазэ вузам чотын Кӧня луоз капыртыны? Кӧня гектар нюлэс куӵкиз Кӧня узы-боры куасьмиз, Кӧня эмезь вӧльы ӵакмиз, Но мукетыз чиптэм-чаптэм Тюаз-ышиз сильтӧл сэрен? Муртлэн куректонэз чотын Озьы Ӟичы кудо сикын Малпаз сэрыт байкомыны, Нош бератаз лобатыны. Посэ ни вал со киоссэ, Адӟе ни вал Швейцариез, Мултэс лӧптэменыз, лэся, Утыр уга кӧтаз йӧтӥз. *** Калтак, калтак, Ӟичы кудо, Аслам озьы луэ уго! Я мугорез чача басьтэ, Яке утыр кӧтэ йӧтэ. Ф. Суворов. Гондыр но Шелеп Тӧлъя-буръя поръян сямен, Капчи Шелеп мӧй Гондырлэн Сирес сьӧраз шуак дэмӟиз, Ӵабыштыны пичи шедьтӥз. Нош уӵыс кук талы паймиз, Тон туж шӧртчи вылэм, бурсӥз... Ачиз капчи, нош кормаське, Тынад кынар тырмыт иське, Шат пуктоно кивалтӥсе? Озьы Шелеп, шудо вылэм, Уске тупам кивалтӥсе. Парзэ нош пар утча шуо, Шелеп пӧртэм ӧй вал уго. Чебер Шелеп со котыраз Арня куспын лачак люказ. Шелеп - мар со, тодӥськоды, Куке, дыр, вал вӧлӥськемды. Я со кугӟа чырты сьӧры, Куддыр дэрем улэ пыре, Я со гижы улэ мертче, Вир пычкытозь ик вӧсь каре... Озьы тӥни Шелеп сэрен, Огез кыле ни чиньытэм. Мукетызлэн ньылон пыктэ, Яке пыдыз вӧсен чутэ. Со Шелепен мугор азэ, Кӧня пӧйшур ни курадӟе. Маза ӧвӧл ни Шелеплэсь, Кызьы мозмод со эзельлэсь? Со лекаське но лекаське, Со люкаське но люкаське. Гурезь быдӟа ни тугаськиз, Ӧвӧл нош тыл отчы понӥсь. (Ӧвӧл, лэся, нокин дӥсьтӥсь). *** Ужпум ӧвӧл ай со бордын, Кӧня пӧйшур быриз сикын. Ужпум али ни та бордын - Кӧня быроз на ай татын. Ф. Суворов. Улон-вылон Дунне вылын улон-вылон - Данакезлы, дыр, шумпотон. Нош вань меда куректӥсез, Улны-вылны акыльтӥсез? Пӧйшуръёслы мон паймисько, Кызьы соос уло-выло. Куддыр мыным соос, осто, Адямиос кадь ик пото. Ӵукна султо но мисьтасько, Нош собере "уже" дырто. Кудӥз ужа уйзэ гинэ, Нош мукетыз - нуназезэ. Бен, йылолыз татын мукет, Я медло, медло берекет! Малы но кин, кыӵе муген Уже ветлэ асьме музэн. Ӵӧжмер ёрме чорыг понна, Чайы тырше улвай понна, Нарды утча сюйысь нумыр, Нош сёр отысь кутэ ук шыр, Ваёбыжъёс сиё чибинь, Нош мар каре меда пингвин? Со тунсыко потӥз мыным, Огпол гинэ кылдӥз адӟын. Мумы пингвин чорыг утча, Айы пингвин кӧльы бича. Мумыезлы сётэ кӧльы, Кӧльы понна со дась усьны. Кудӥз, кызьы, кыӵе данэн Дыше угось, шол, улыны. Кинлы, кызьы кылдэм, вылды, Та дуннеын усьылыны, Кинлы, малы, кыӵе муген Кылдэм уже но ветлыны. *** Огез ветлэ мульы понна, Нош мукетыз - пульы понна. Куинетӥез - кӧльы понна, Ньылетӥез - кхе, кхе!.. понна. Ф. Суворов. Ӟеч малпанлы буш кисы люкетэ Удмурт Республикаысь Кун Кенешысь Промышленностья, инфраструктураез азинтонъя, вузъёсын но юрттэтъёсын рынокез кылдытонъя ялан ужась комиссилэн тӧроез В. М. Кушко толон журналистъёсын пумиськон ортчытӥз но комиссилэн берло толэзьёсы ужаменыз тодматӥз. Нырысь ик вераськон мынӥз огъя ваньбурез нимаз адямиос кие сётонэз азинтон ласянь. Но депутатъёслэн та пумысен трос гинэ юанъёссы кылдӥллям: "Кулэ меда котькуд предприятиез акциосын огазеяськон карыны? Котьку-а сыӵе вамыш пайдаен берытске? Кызьы та ужез чакланы кулэ государство? Пумиськонэ лыктэм журналистъёсты шугъяськытӥз мукетыз ужпум: "Приватизация огшоры калыкез укыр вӧсь уг кар меда?" Ас вакытаз С. Степашин шуиз вал: "90 процентэз предприятиос мукет кие тупатэм куронъёсты тӥяса сётэмын..." Б. Березовский ватсаз: "Приватизацилы йылпумъянъёсты выльысь эскерон быдэс Россиез вирен пылатоз". Виктор Кушколэн та ласянь малпанъёсыз сайкытэсьгес, со юн оске: "Кутскем ужез ми азьланьтом но - туж чакласькыса. Соку янгышъёс но ӧжытгес луозы". Владимир Михайлович озьы ик тодматӥз комиссилэн калыклы чылкыт ву сётонъя 2010-тӥ арозь быдэстыны чаклам программаез эскерон бордын ужаменыз. Юон вуэн секыт югдур шаерамы кемалась возиське ни. Чылкытатон машинаос ваньмыз сямен вужмемын. Соин ик комиссия та проектэз умоен лыдъям. Но... кытысь сомында коньдон шедьтод? Государство сяна, та уже одно ик пыриськыны кулэ предприятиос, фирмаос, нимаз ужбергатӥсьёс. Журналистъёсын пумиськонын вераськон мынӥз на калыкез нуон-ваён куронъёс (правилоос) ласянь. Берлозэ соос 1969-тӥ но 1987-тӥ арын юнматэмын вал. Дыр воштӥське, асьмеос рынок кусыпъёсы выжим, соин ик адямиосты нуон-ваёнэз но туала куронъёсъя радъяны тыршоно. Туннэ нунал понна туж кулэ луись программаосты быдэстон трос коньдонэн герӟаськемын. Нош промышленностьлэн азинскемез, кылем арен ӵошатыса, туэ лябгес. Озьыен, 2001-тӥ ар шуггес луоз. Ӟеч малпанъёс бумага вылэ гинэ медаз кыле шуыса, ваньмылы ик золгес пӧсяно луоз. Е. Миннигараева. Вордскемзэс та нуналъёсы пусъё Орехов Владимир Викторович - Вытъя управленилэн кивалтӥсез; Орлов Евгений Николаевич - Удмуртиысь профсоюзъёслэн кивалтӥсьсы; Боровик Юрий Иванович - акциосын "Удмуртэнерго" огазеяськонлэн валтӥсь директорез; Ахророва Галина Александровна - Иж городысь администрацилэн йырызлэн воштӥсез. Архивысь материалъёсъя Удмуртия ЪЪ дауре 1987-тӥ ар Выльдӥськонлэн куинетӥ арез СССР-ысь но Удмуртиысь ужаса улӥсьёслы трос воштӥськонъёс ваиз. Быдэс странаысь предприятиос хозрасчётэ выжыны кутскизы. Февраль толэзьысен заводъёслэсь директоръёссэс, цехъёслэсь но управлениослэсь киватӥсьёссэс, колхозъёслэсь тӧроссэс бырйылӥзы ни асьсэос ужась коллективъёс. Адямиосты нимаз ужаны лэзён сярысь закон потэм бере, тулыс быдэс шаерамы кылдылыны кутскизы нырысьёсыз кооперативъёс. КПСС-лэн ЦК-езлэн октябре ортчем пленумаз партилэн Москва городысь комитетэзлэн нырысетӥ секретарез Борис Николаевич Ельцин, реформаосты ляб ортчытэмзы понна, партиен кивалтӥсьёсты юн пыкылӥз. Со понна сое ужысьтыз мозмытӥзы. Октябрь революцилы 70 ар тырмонлы сӥзем сиё-дано кенешын КПСС-лэн ЦК-езлэн генеральной секретарез М. С. Горбачёв "Октябрь но выльдӥськон: революция азьланьтӥське" бадӟым докладэн вераськиз. Отын со вылӥ дунъяз Бухаринлэсь интызэ но юн курлаз Сталинэз. Кутскиз котьма сярысь "шара вераськон вапум". Литературая журналъёс паськыт печатланы кутскизы совето властез чурыт дунъясь произведениос. Соос пӧлын вал Михаил Шатровлэн, Владимир Дудинцевлэн, Анатолий Приставкинлэн гожъямъёссы. Выльысь печатласькыны кутскизы кема аръёс ӵоже зӥбет улын улэм писательёс Варлам Шаламов, Борис Пастернак, Андрей Платонов но Александр Солженицын. 8-тӥ декабре Вашингтонын шоро-куспо но матэ ыбылыны чаклам ракетаосты быдтон пумысен советско-американской огкыл гожтэмын. Со Удмуртилэсь палэнтӥ ӧз ортчы. Воткинскысь машина поттон заводын лэсьтӥськись РС-10 (Западын соосты "СС-20 шуо") ракетаосты быдтыны чакламын вал. Удмурт Республикалэн столицаяз улӥсьёс вормизы - городлы 8-тӥ июне берыктэмын Ижевск азьвыл нимыз. Со понна КПСС-лэн Удмурт обкомез 20-тӥ апреле ЦК-е гожтэтэн вазиськиз. Отын со шара верано луиз, Ижевскысь 90 процентэз улӥсьёс столицазылэсь нимзэ воштыны пумит луо шуыса но куриз та ужпумез выльысь экерыны. Соин ӵош ик городын кыдытэмын вал витетӥез ёрос. Сое Индустриальной ёрос бордысь люкизы но Устинов ёрос шуыса нимазы. Таизлы пумит луисьёс ӧй ни вал. УАССР-ысь Министръёслэн Кенешсылы выль тӧрое быръемын вал Геннадий Николаевич Дмитриев, калыклы бытовой юрттэт сётонъя азьлоез министр. Феврале кезьытъёс дыръя Кама-Ижевск ву гумы сӧриськиз, Ижевскын улӥсьёс вить нунал ӵоже пӧсь вутэк курадӟизы. Ижевскысь мебель поттонъя фабрика "Италмас" стенкаос лэсьтыны кутскиз, нош Сарапулысь радиозавод - "Урал-334" автомагнитола. Ар пумын ужаны кутскиз Вараксиноысь 350 метр ӝужда телевышка, нош февральысен мынэ ни вал республикаысь самодеятельной артистъёс куспын конкурс. Ноябре "Италмас" ансамбль вуылӥз Уй пал Кореяе, нош декабре Ижевскын ортчиз Поволжьеысь но Приуральеысь композиторъёслэн музыказыя фестивальзы. Июне Ижевскын озьы ик ужаз финно-угроведъёслэн всесоюзной коференцизы, со кыстӥськиз 4 нунал. Отчы ветлӥзы Венгриысь тодосчиос но. В. Трещев, Удмурт Республикысь Выль историяя центрысь валтӥсь специалист. Воткинск городын улӥсьёс 1987-тӥ арын 24-тӥ октябре митингын. Со сӥземын ядерной кышкытлыклы пумит, ортчытӥське: быдэс дунне вылысь таӵе нюръяськисьёслы дурбасьтыса. Лэчыт ужпум Мар луоз ӵуказе? Дас тямысэтӥ даурлэн пумаз физикъёс споръяськизы: мар со - тыл? Тыл (югыт) яке карпускула? Бӧрысь шуизы - тыл но, карпускула но. Озьыгес ик наркомания пумысен но али куспазы споръясько медикъёс но югдурез утисьёс. Огъёсыз шуо - висён, мукетъёсыз - йыртэман. - Но ужпум али со бордын ӧвӧл, ужпум - йыртэманэ вуттӥсь висёнэз алон, эмъян бордын, - шуизы кылем арняе наркомания пумысен Кун Кенешысь "котырес ӝӧк" сьӧры люкаськемъёс. Солэн ужаз пыриськизы Удмурт Республикалэн Президентэз, Кун Кенешысь, Правительствоысь, министерствоосысь но ведомствоосысь, Прокуратураысь, общественной огазеяськонъёсысь адямиос, черкын ужасьёс... Наркомания калыкмес пумен быронэ вуттэ. Туннэ ялыны луэ ни эпидемия сярысь. Арысь аре йылэ йырзэс наркотикен шузимытӥсьёслэн лыдзы. Туннэ республикаямы 2 сюрс адями лыдъяське. Нош кӧня лыдъямтэез? СПИД-эн висисьёс, ВИЧ-инфекция нуллӥсьёс пӧлысь 90 процентэз "адӟонзэс" шедьто вень йылысь. Наркотикен усыкмем мурт понна кысэ дунне. Со улэ одӥг нуналэн, одӥг минутэн. Аслыз "дозалы" коньдон шедьтон понна, чик малпаськытэк кышкыт йыруж лэсьтонэ мынэ. Кылем арын тани сюрс куинь сю йыруж наркотикъёсын йырин лэсьтэмын. Ньыль сю адями ӝегатэмын, наркотик вузакуз. 1999-тӥ арын наркотикез вӧлмытӥсь одӥг банда ке шараямын вал, 2000-тӥын - тямыс. Наркомания пыре семьяе. Валче бышкисько кузпалъёс, нылпиоссы. Шонергес ке нош, та висён семьяысь ик потэ. Семья пушкын кылдэм валамтэос, керетонъёс вутто пиналэз ульчае. Отысь со аслыз эш, дурбасьтӥсь утча. Кӧня ке ар талэсь азьло гинэ наркотикен эшъяськисьёслэн арлыдзы 17-19 арес ке вал, туннэ соослэн радазы - 12-13 аресъемъёс. Мар луоз асьмемын ӵуказе? Мар луоз, кызь- куамын ар ортчыса - дунне вылын пересьёс но ӧлексы нылпиос гинэ луозы ук! Соин ик, гырлы жугонэн ӵош ӝегатскытэк кыӵе ке ужрадъёс кутоно. Удмурт Республикаысь Правительствоын кылдытэмын нимысьтыз комиссия. Со выре наркотикъёслэн вӧлмемзылы пумит ужъёс нуонэн, ВИЧ-инфекциез алонэн. Республикаямы тая кутэмын нимысьтыз программа. Но огъя югдурез тупатон понна со туж ӧжыт. Кызьы шуизы "котырес ӝӧк" сьӧрын кенешисьёс, кулэ нимысьтыз закон, нош Правительстволэн тӧроезлэн одӥгез воштӥсез аслэсьтыз ужзэ быдэсак та ужпумлы сӥзьыны кулэ. Президент Александр Волков вань люкаськемъёсты косӥз наркотикъёсын герӟаськем ужпумлы тросгес саклык висъяны, соин нюръяськонэ тросгес кужым поныны. Котькудӥз валаны кулэ та черлэсь кышкытлыксэ. Государство огназ номыр карыны уз быгаты. Асьме бордысь потэ калыкмылэн ӵуказе нуналыз. Дуннеысь Тазалыкез утёнъя огазеяськонлэн чакламезъя, 7 процентэз калык наркотик вылын улыны кутскиз ке, со быроз быдэсак. Али висе ни 3 процентэз... З. Вахрушева. Туспуктэмъёсыз Н. Глуховлэн. Устоез хозяйство Уин нянь пыжо - ӵукна калыклы вутто Кин ке малпа ке, асьме улонын социализмлэн бервылъёсыз быдэсак быдтэмын ни шуыса, со шонер уз луы. Социализмлэн шормуӵъёсыз кылемын на куд-ог усто ужась хозяйствоосын, предприятиосын. Соос мукетъёсызлэсь висъясько таӵе валтӥсь тодметсыя: отын нырысетӥ интые пуктэмын адями сярысь сюлмаськон. Алигес вуылыны кылдӥз огаз сыӵе коллективе, кытын вань ужъёс быгатыса но ӟеч радъямын, соин ик котькуд ужась адями но татын ассэ умой шӧдэ. Со - Удмуртпотребсоюзлэн Балезиноысь ёзэзлэн (райполэн) нянь пыжон комбинатэз. Туннэ со районын гинэ ӧвӧл, республикаын но огез бадӟымез предприятие луэ. Балезиноын нянь пыжон комбинат ужаны кутскем дырысен дас вить ар гинэ ортчемын. Но со дыр ӵоже улонын олома но вал ини: Горбачёвен ялэм выльдӥськон, рыноке выжон, демократилы сюрес усьтон. Но тани мар шуиз комбинатлэн директорез Николай Михайлович Харыбин: - Ми ум палэнскиське сыӵе ужан амалъёслэсь, кудъёсыз пыӵатэмын вал социализмын улон дыръямы. Удмуртпотребсоюз арлы быдэ ми азе быдэстоно ужъёс пуктэ, со ик собере кылмес но юа. Мае ке лэсьтыны ӧд ке быгаты - валэкты. Соиз но умой: ӟеч тыршемез адӟо-ушъяло. Озьы ук со: ужзэ ке ӟеч быдэстӥськод, тыныд но дан, ужасьёсыдлы но умой. Нянь пыжон бордысен кутскыса, комбинатын вакчи дыр куспын эшшо кӧня ке цехъёс усьтӥзы на. Туннэ татын радъямын макарон, колбаса, ческыт сиён но юзмытӥсь вуос поттон. Со сяна, татын лэсьто на полиэтилен посуда. Нош берло дыре вуриськон удыс борды но басьтӥськизы на. Котькуд ужан удысын мар ке но выльзэ пыӵатыны тыршо. Басьтом тани макарон поттонэз ик. Малы ке вань макаронъёссы татын ӵуж-ӵужесь. Балезиноослэн пызьзы-а, мар-а мукетгес? Производствоен кивалтӥсь И. Касимова валэктӥз, макаронъёсты лэсьтонэ, пе, бетакаротин ватсаськом. Озьы тазалыклы но умой, макаронэз пӧзьтыны но капчи - со уг сылмы. Ческыт сиён поттон цехысь магазинъёсы 18 пумо пряникъёс, печенняос, кексъёс кошко. Басьяськисьёслы тужгес но кельшо "Снежинка", "Ромашка", "Бодрость" печенняос. Нош кинлэн меда оскалтэмез ӧвӧл повидлоен пряникъёсты? Соин ик калыклы кельшем продукциез тросэнгес дасяло. Ас поннам таӵе тодон-валан но басьтӥ: котькуд пыжосэ огкадь пызь уг кутӥськы вылэм. Кылсярысь, ческыт пӧрамъёс умойгес, удалто, пызьын клейковинаез ке ӧжыт. Тужгес но егит коллектив ужа юзмытӥсь вуос дасян цехын. Мастер Т. Вотинцева валэктӥз: - Вумы туж ческыт, сое угось куинь пол чылкытатӥськом. Собере буёло концентратъёсын чебермаськом. Узы, эмезь, лимон, апельсин - сыӵе пӧртэм шӧмыз луэ напитокъёсмылэн. Ваньзэ верано ке, соос 12 пумо. Сюкасьмы но адямиослы туж кельше. Вуэз кисьто полиэтилен "ӟенеликъёсы". Со посудаез но татын ик лэсьто. Ӵапак сыӵе уж бордын кемдӥз Р. Корепанов. Милем нырысьсэ адӟыны кылдӥз та ужез. Тани Рудольф Елизарович чиньы кузьда выллем гинэ полиэтилен заготовкаез (пробиркалы кельше) пӧсятыны пуктэ. Собере сое нимысьтыз автомат улэ пуктэ но кнопкаез зӥбыса пульдытэ. Мар шуод - техника. Син куспын "ӟенелик" кылдэ. Колбаса поттон цехын но ваньмыз радызъя мынэ. Сӥль гинэ медло. Но коллективын ӟеч тодазы ваё на 1998-тӥ арез, "сьӧд вторникез", куке долларлэн дуныз воштӥськемен, шуак дунъёс будӥзы. Озьыен, колбаса но дунояз. Сое басьтӥсьёс но туж ӧжыт луизы. Тӥни со вакытэ колбаса поттон чутрак кулэсмиз, 30 тоннаысен 6 тоннаозь но вуылӥз. Март толэзьлэн кутсконаз Балезиное люкаськылӥзы быдэс республикаысь райпоослэн, нянь пыжон комбинатъёслэн но переработкая предприятиослэн кивалтӥсьёссы. Балезиноослэн ужамзылы вылӥ дунъет сётӥз ачиз Р. Каримов - Удмуртпотребсоюзлэн кивалтӥсез. Соин но, вылды, Россия Федерациысь Центрпотребсоюзлэн президиумез Балезиноысь нянь пыжисьёслы ортчем арын пайда поттыса ужамзы понна юнме нырысетӥ инты ӧз сёты. Тӥни озьы балезиноослэн ужан амалъёсынызы тодматскон вылысь, татчы люкаськылӥзы республикаысь кооператоръёс. Комбинатлэн директорез, палэнысь лыктэм адями, Балезиноын дас одӥгетӥ арзэ улэ ин. Татын улӥсь калыклы дышиз ни. Ма, калык - со котькытын калык ук. Директорын - вить ар ни. - Ӵектӥзы та уже - пумит ӧй луы, - шуэ Николай Михайлович. - Лыктӥ, адямиосын тодматски. Тросэз татын 10-15 ар ужало ни. Выльысь ужаны ӧвӧл дышетоно. Соосты воштыны нокинэн. Собере адямиосты вошъян куддыръя номыр ӟечсэ уг сёты - коллективлэсь мылкыдзэ гинэ сӧре. - Тросгес выроно луиз выль службаос кылдытон бордын, - азьланьтэ веранзэ директор. - Табере вань ини маркетингъя службамы. Соин ик басьяськисьёслэсь кулэяськонъёссэс тодыса ужаськом: кинлы мар кельше, кыӵе продукцимес ӟечгес басьто, кудзэ уг - ваньзэ тодӥськом. Тыршиськом ужасьёсмылэсь быгатонлыксэс, тодон-валанзэс будэтыны. Куд-огезлы предприятимы чотын юрттӥськом кыкетӥ вылӥ образование басьтыны. Дышетскыны Ижевске, Москвае ысъяськом. Балезиноысь нянь пыжисьёс доры вуон азямы тодӥмы: татын, пе, одӥг адямилы быдэ республикаямы котькинлэсь трос нянь пыжо. Со, зэмзэ но, озьы вылэм. Кӧня ке дыр талэсь азьло предприятиын дӥсьтӥллям "Муссон" нимо гуръёс басьтыны. Выль гуръёсты балезиноос Удмуртиын котькинлэсь вазь эскериллям. Кельшем. Зэм, куинь гур интые, али огез ужа. Озьы ке но, нянь пыжон ласянь посёлокын нокин ӵошатскыны уз быгаты. - Милемын ӵошатскыны туж шуг, - валэктэ директор. - Предприятимы лекос бадӟым. Нунал ӵоже 5 тонналэсь трос нянь пыжиськом. Нош 3 номеро хлебозаводэн (таиз чугун сюреслэн лыдъяське) ми воксё артэ, векчи забор гинэ висъя, отын нунал ӵоже 1-1,5 тонна гинэ нянь потто. Со сяна, Балезиноын эшшо одӥг пекарня ужа на - таиз но ми понна конкурент луыны уг быгаты. Балезиноын нянь уин пыжо. Нош вазь ӵукна сое гуртъёсы нулло ини. Сиён-юонэз ӝегатскытэк гурт калыклы вуттон понна ик куке-соку кылдытэмын вал Удмуртпотребсоюз. Калыкен ужан амалъёсызлэсь со али но ӧз куштӥськы, валтӥсь ужен лыдъя. Пыдлось гуртъёсы, кытчы уг вуо ас вузъёсынызы коммерсант шуонъёс, вуо райпоысь кооператоръёс. Вераны кулэ, та районын кык райпо: Балезиноын но Карсовайын. Озьы кылдӥз районлэн быдӟалаез сэрен. Та дырозь соос куспын нокыӵе тупамтэос ӧй на вал. Вань гуртъёс кык райпоос вискын радызъя люкылэмын. Собере керетонъёс луыны но уг быгато, угось соослэсь ужамзэс Удмуртпотребсоюз ялан чакласа возе. Валче ужаса, котьмар ласянь капчигес. Басьтомы тани техникаез ик. Быгатысалзы шат балезиноос пыжем продукцизэс гурт калыклы вуттыны, тырмыт машинаоссы ке ӧй луысал. - Машиналы ке кулэяськиськом, райпое вазиськиськом. Ма, ми солэн люкетэз луиськомы, - шуэ директор. - Хозрасчёт амалэн ужаськом. Ог-огмылы юрттыны кулэ ке - юрттӥськом. Кылсярысь, гуртъёсын няньмес вузаськом, транспорт понна дун будэтытэк. Со расходъёсты потребобщество ас вылаз басьтэ. Соин ик няньмы калыклы дунтэмгес усе. Магазинъёслэн ӝажыосазы мукет сиён-юонмы но уг кылльы. Ми понна но со туж умой ужасьёсмылэн уждунзы магазинъёсысь вуэм коньдон бордысь потэ. Балезиноын вить магазин возиськом. Комбинат арлы быдэ 400-500 сюрс манет тыр пайда поттыса ужа. Уждун тыронэн татын бере уг кылё. Цехын ужасьёслэсь шоро-куспо уждунзэс тодэммы потӥз. Но со сярысь нокин меӵак ӧз вера. Ужасьёслэн ӟеч мылкыдзыя шӧдӥмы - татын уждунлы сокем уг ёрмо, журналистлэн уждунэзлэсь трослы вылӥынгес. Собере ачиз директор но мылкыдзэ тазьы шараяз. Таӵе бадӟым предприятие понна 2000 манет быдӟа уждун укыр, пе, пичи лыдъяськысал, Нянь пыжон комбинатын 180 пала ужасьёсыз. Гужем вакытэ тросгес но луэ. Данъяськыса сямен шуизы, милям, пе, татын профкоммы но ужа на, тросаз мукет интыосын сямен быдтымтэ. Котькыӵе шулдыръяськон ужрадъёс ортчытъяса, профком коллективез одӥг бадӟым семьяе огазеяса возе, шуг-секытъёсты вормыны юрттэ. Предприятилэн продукциез районысь гуртъёсы гинэ уг - палэнэ но кошке, кылсярысь, Глазове, Ижевске, Пермь улосэ. Коллективын кышкатэк басьтӥсько кыӵе ке но выль продукция поттон борды. Малпасько, пӧрало, выль сиёнзэс калыке потто, собере эскеро. Мар луоз? Басьтӥсь луоз-а, уз-а. Тани алигес "Зебра" нимо выль булка кылдытӥзы. Сое пуртэн шориськод ке, курень-тӧдьы гожъёсты адӟиськод, зэмзэ ик зебралэн куэзлы кельше. Озьы пӧрме, нянь колдыез какаоен но тӧдьыматэм пызен ке сураськод. Я бен, балезиноослэсь пыжиськон амалъёссэс ваньзэ ик ум шараялэ. Но магазинъёсысь синйылтӥм ке отын пыжем булкаоссэс, печення-прияникъёссэс, сушкаоссэс басьтыса оскалтыны эскером. Тӥни озьы экономикаын кылдэм шуг-секытъёслы сётскытэк, дырез азьпалтыса ужа Удмуртилэн уй палаз интыяськем нянь пыжон комбинат. Калык понна тырше. Т. Банникова. Туспуктэмъёсыз В. Беломорскихлэн. Туспуктэмъёс 1) Балезиноысь нянь пыжон комбинатлэн директорез Николай Михайлович Харыбин. Алигес со пусйиз вордӥськем нуналзэ. "Удмурт дунне" газетлэн нимыныз ӟечкыласа сӥзиськом солы тазалык, ваньбуро улон но уно-уно вормонъёс. Выль даурын но коллективды азьпал радъёсын мед луоз. 2) Механиклы Рудольф Елизарович Корепановлы полиэтилен посуда лэсьтон оскемын. 3) Экспедиторлэн Ольга Патыревалэн ужан нуналыз котькинлэсь вазь 4 часэ ӵукна кутске. 4) Одӥг сутка ӵоже адямилы 275 грамм нянь сиёно. Балезиноысь нянь пыжисьёс тупатэм нормаез кулэезъя быдэсто. Уй ӵоже пыжем нянез ӝоген магазинъёсы нуозы. 5) Екатерина Малинина нянь пыжонын 15 ар тырше ини. Со огез устоез нянь котӥсь. 6) Юзмытӥсь вуос поттон цехын егитъёсгес ужало. Соосын быгатыса кивалтэ Татьяна Вотинцева. 7) Хлебокомбинатын тросгес нылкышноос ужало, нош колбаса поттонын одӥг-ог воргоронъёс но вань. Салим Касимов - огез соос пӧлысь. Уть астэ ачид! Берло аръёсы нылпиосты дышетон программа воштӥське. Тани дасэтӥ арзэ ни школаосын дышето выль предметэз, нимало сое вакчияк: ОБЖ (Основы безопасноти жизнедеятельности), иське, астэ ачид утён. Та дыр куспын котькуд класслы учебник поттэмын. Соос тунсыкоесь, пӧртэм буёло туспуктэмъёсын, суредъёсын узырмытэмын. Соос нылпиосты дышето пичиысен ик чакласькыса улыны, ас улонзэс пӧртэм шуг-секытъёс дыръя утьыны, озьы ик мукетъёсызлы юрттэт сётыны. Выль предметэз нуись дышетӥсьёслы ӟеч юрттэт сёто республикаысьтымы дышетӥсьёслэсь тодон-валанзэс будэтонъя институтын. Вылӥ верам удысъя курсъёсын кивалтэ В. И. Камашев. Тани мар со вераз: - Удыс выль, часъёс ичи, данаказ школаосын урок нуыны специалистъёс дасесь ӧвӧл, нуо сое, кинлэн мылыз потэ. Огаз школаын ужа хирург, со вӧсь луон учыръёсты умой валэктэ, нош мукет ласянь тодон-валанъёсыз уг тырмо. Мукетаз школаын дышетэ милициысь азьло майор. Таиз пичи но уг тоды урок нуон методикаез. Мон ОБЖ-ез дышетӥсьёслы аттестация ортчытъяны вуылӥсько пӧртэм школаосы. Алигес ветлӥ Вавоже, Ижевскысь 27 номеро школае, дасяськисько Кизнере потаны. Пумиськылыкум утчасько тупась адямиосты. Та вакытэ выль группа люкасько. Отын 25 мурт. Одӥг но ӝыны ар ӵоже 1000 часъем программая дышетскыны, выль тодон-валанъёс басьтыны кулэ, ОБЖ-я урокъёсты кулэезъя дышетон вылысь. Дышетскем бере сётӥськоз диплом. - Нош ӟеч кадръёс шедьтыны луэ-а? - Али мынэ армиысь офицеръёслэсь лыдзэс кулэстон. Удмуртие гинэ берытскыны кулэ укмыс сю котыр офицер. Соос егитэсь, ужтэк уз пуке, киыз но пыдыз вылэм соосты ОБЖ- ез дышетонэ дасяны... Вань на эшшо одӥг выль иворе: институтамы алигес гинэ вӧл-вӧл выль кабинет висъязы, отын табере тросгес луизы методической пособиос, выль книгаос. Бен, астэ ачид утён нылпилы туж кулэ, адямиез солы дышетоно пичиысеныз. Зэмзэ но, малпаське ай, гажано эшъёс, Удмуртиын гинэ кӧня нылпиос но, мӧйыос но быро, машина улэ, тылпуэ но мукет шудтэм учыръёс шедьыса, ӵем дыръя соос асьсэос янгыш луо. Тӥни малы ОБЖ-ез дышетонлы одно ик бадӟым саклык висъяно. П. Кузнецов. Кибашлыос Ӵошен, пӧртэм киужен Мударис Менладшинлэн туспуктэмъёсыз милям газетамы но, мукетаз но ӵем адӟиськыло. Со котькытчы вуттӥське но ас адӟемзэ плёнка вылэ пуктыны дыртэ, снимокъёсыз синмаськымон пӧрмо. Кӧня ке пол фотовыставкаосы пыриськылӥз ни. 1998-тӥ арын солэн ужъёсыныз нимысьтыз адӟытон вал Башкортостанысь Янаул ёросын. Татысь Барабановка школаын дышетскыкуз ик та ужен тунсыкъяськыны кутскиз, ачиз фотокружок нуиз. Юн кусыпъёсыз герӟаськизы "Янаульские зори" ёрос газетэн. Туспуктэмъёсыныз вить ар бӧрсьысь конкурсын вормисе потылӥз. Армия бере Мударис рос-прос туспуктылӥсь луыны малпаз. Та ужлы Уфаысь училищеын дышетскиз. Но мылкыдыз удмурт пиез вуттӥз Удмуртие. 1984-тӥ�1987-тӥ аръёсы ужаз Кияса ёрос газетын. Отӥяз Ижевске Удмурт научно-исследовательской институтэ ужаны кариськиз. Та вакытэз "емышо" вал. Сое 1990-тӥ арын кутӥзы Россиысь журналистъёслэн огазеяськоназы. Москваын потӥсь "Фаворит" газетлэн ялэм конкурсаз кыкетӥ интые потӥз. Ижевскын "Том и Джери" конкурсын но со вормисьёс пӧлы сюриз. Мударис Менладшинлэн ужъёсыныз тодматскыны али быгато Киясаын улӥсьёс. Татысь выставкаос ортчытъян залын возьматӥсько солэн сьӧдо-тӧдьыё туспуктэмъёсыз, озьы ик чибориё-буёлоосыз. Татын ик - кузпалызлэн Нина Васильевналэн ковёръёсыз, салфеткаосыз, миндэр пуйыосыз, ӝӧккышетъёсыз. Соос синэз мальдытымон ик чебер пужыятэмын, чильпамын. Та нылкышно вордскемын уго Вуж Салья гуртын, пичиысен ик чеберлык борды кыстӥськон лулаз-вираз пыӵаз. Кытын гинэ ӧз ужа Нина Васильевна - трамвайлэн водителез, нылпи садын воспитатель, Национальной музейын реставратор луыса - киужъёслэсь ӧз люкиськылы. Бератаз сизьым толэзь дышетскиз на машинаен керттӥськыны. Тӥни озьы кык пӧртэм удысъёс одӥг ӧре кадь огазеяськизы, одӥг гурен кырӟало. Нина но Мударис Менладшинъёслэн семьязылэн та кыкетӥ выставказы ни. Нырысетӥез вал 1997-тӥ арын Ижевскысь Чеберлыко киужъёсъя юртын. Т. Сорокина. Мударис Менладшин но солэн туспуктэмъёсыз. Постановление Правительства Удмуртской Республики Об утверждении Порядка отчетности руководителей государственных унитарных предприятий, находящихся в государственной собственности Удмуртской Республики, общей собственности Российской Федерации и Удмуртской Республики, и представителей Удмуртской Республики в органах управления открытых акционерных обществ В целях повышения эффективности управления государственным имуществом и усиления ответственности руководителей государственных унитарных предприятий, находящихся в государственной собственности Удмуртской Республики, общей собственности Российской Федерации и Удмуртской Республики, и представителей Удмуртской Республики в органах управления открытых акционерных обществ, акции которых находятся в государственной собственности Удмуртской Республики, за результаты финансово-хозяйственной деятельности этих предприятий и открытых акционерных обществ, в соответствии со статьей 40 Закона Удмуртской Республики "О полномочиях органов государственной власти в Удмуртской Республике по владению, пользованию, распоряжению государственной собственностью Удмуртской Республики" Правительство Удмуртской Республики ПОСТАНОВЛЯЕТ: 1. Утвердить Порядок отчетности руководителей государственных унитарных предприятий, находящихся в государственной собственности Удмуртской Республики, общей собственности Российской Федерации и Удмуртской Республики, общей собственности Россиёской Федерации и Удмуртской Республики, и представителей Удмуртской Республики в органах управления открытых акционерных обществ. 2. Министерству имущественных отношений Удмуртской Республики в месячный срок разработать и утвердить Методические указания по заполнению форм отчетности руководителей государственных унитарных предприятий, находящихся в государственной собственности Удмуртской Республики, общей собственности Российской Федерации и Удмуртской Республики, и представителей Удмуртской Республики в органах управления открытых акционерных обществ. 3. Руководителям находящихся в Удмуртской Республики федеральных государственных унитарных предприятий и представителям Российской Федерации в органах управления находящихся в Удмуртской Республике открытых акционерных обществ, акции которых находятся в федеральной собственности, направлять в Министерство имущественных отношений Удмуртской Республики, наделенное полномочиями территориального органа Министерства имущественных отношений Российской Федерации, отчеты и доклады о финансово-хозяйственной деятельности организаций по формам и в сроки, установленные постановлением Правительства Российской Федерации от 4 октября 1999 года � 1116 "Об утверждении порядка отчетности руководителей федеральных государственных унитарных предприятий и представителей Российской Федерации в органах управления открытых акционерных обществ". 4. Признать утратившими силу: абзац третий пункта 1 постановления Правительства Удмуртской Республики от 23 сентября 1996 года � 633 "Об обеспечении представления интересов Удмуртской Республики в органах управления акционерных обществ (хозяйственных товариществ), часть акций (доли, вклады) которых находится в государственной собственности Удмуртской Республики; пункт 5.3. Положения о порядке осуществления Правительством Удмуртской Республики полномочий государства как собственника акций (долей, паев) в органах управления акционерных обществ, утвержденного постановлением Правительства Удмуртской Республики от 19 февраля 1996 года � 81 "О порядке осуществления Правительством Удмуртской Республики полномочий государства как собственника акций (долей, паев) в органах управления акционерных обществ". 5. Настоящее постановление вступает в силу со дня его официального опубликования. Председатель Правительства Удмуртской Республики Ю. С. Питкевич. Ижевск, 14 марта 2001 года. � 274. Педтехникум бордысен Удмуртиын калыкез дышетон удысын ужасьёс понна 2001-тӥ ар пусйымон луэ пӧртэм юбилейёсын. 80 ар талэсь азьло, Сарапулысь педкурсъёсты Иже вайыса, сокугес кылдэм Удмурт автономной областьлэн кивалтэтэз выль шоркарамы усьтӥз удмурт школалы дышетӥсьёсты дасясь педтехникум. Сое кылдытыны сюлмаськизы И. А. Наговицын, Г. Ф. Федотов, Я. И. Ильин, К. П. Чайников (Куӟебай Герд, со ик усьтыны юрттӥз Выль Мултан педтехникумез но). Гавриил Федотович Федотов, Шаркан черкогуртлы матысь Галич гуртын 115 ар талэсь азьло (1886) вордскем крестьян пи, Иж педтехникумлэн нырысетӥ директорез луиз. 1906-тӥ арысен удмурт школаосын ужам дышетӥсь, калыкез югдытӥсьёс пӧлысь одӥгез, трос лэсьтӥз шаерамы начальной школаосын дышетонэз радъян но азинтон удысын. Азинлыко ужаз Ижын. Дас ар ортчыса, сое пукто соку усьтӥськем Дэбес педтехникумен кивалтыны. 1935-тӥ арын дася но поттэ удмурт нылпиослы но гожтэт тодымтэослы букварь, со аръёсы ик - удмурт нылпиосты ӟуч кыллы дышетон букварь, озьы ик соосъя методической пособиос. Школаос трос аръёс ӵоже со букварьёсъя но пособиосъя ужазы. 1946-тӥ арын оштолэзе Г. Ф. Федотовлы сётэмын Удмурт АССР-ысь школалэн дано дышетӥсез ним. Берло аръёссэ дано дышетӥсь улӥз но ужаз Сарапулысь педтехникумын. 1956-тӥ -1980-тӥ аръёсы Иж педучилище ворсамын вал. Солэн ужаз бадӟым вис луиз. Дышетӥсьёсты дасян удысын юн шӧдскиз со. Кылем арлэн пумаз 20 арессэ пусйиз туала вакытэ ужась Иж педучилище но - табере со педколледж шуыса нимаське. Глазов пединститутлэн филиалэз луэ. Отын ик, Труд ульчаысь 88-тӥ юртын, усьтэмын элькунамы калыкез дышетонлэсь историзэ возьматӥсь музей. Татысь утчаськисьёс та вакытэ умойгес тодыны тыршо Иж педтехникумлэн нырысетӥ директорез Г. Ф. Федотов сярысь. Удмурт группаосын со сярысь беседаос ортчыло. Ватсаны кулэ на созэ: элькунамы вылӥ дышетсконниос (вузъёс) кылдӥзы ини 30-тӥ аръёсы. Удмурт кун пединститут ( 1972-тӥ арысен университет луиз) туэ 70 ар тырмонзэ пусъе, нош кылдӥз со, Иж педтехникум усьтӥськем бере ӵапак дас ар ортчыса. Л. Федоров. Политика Арня ӵоже шаерын, странаын, дуннеын Ортчем арня вискын Удмуртилэн Президентэз Александр Волков республикамылэн ужпумъёсыныз выриз. Кылсярысь, вторнике со Балезино ёросэ вуылӥз. Хоязйствоослэн, предприятиослэн но учреждениослэн кивалтӥсьёсынызы но ужаса улӥсьёсын кенешонъёс дыръя умой шӧдӥськиз: Президент экономика ужпумъёс борды ӝабыр-ӝабыр басьтӥське, ёросъёсы со толэзьлы быдэ потаны малпа, нош республикалэн Кивалтэтэз ласянь юрттэт луоз сыӵеослы гинэ, кин зэмзэ но азинскыны тырше. Пайдатэк ужасьёслы коньдон висъянлэн толыкез ӧжыт, котькӧня уксё кисьты жильды, со му пыр гинэ вия. Мар шуод, шаерамы но, иське, президент власть юнманы кутске. Та ласянь бускельёсмылэн опытсы бадӟым ни. Тани та нуналъёсы Татарстанын вылӥ должностен муртэз куинетӥзэ бырйизы ни. Куинетӥзэ вормиз Минтимер Шаймиев. Со 80 процентлэсь уно куараосты люказ. Мукетъёсыз ньыль кандидатъёс та лыдпусозь матэ но ӧз вуэ. Кин ке оло паймоз, кызьы озьы бигеръёс одӥг муртэ вылӥ должностен куинь пол быръё ни? Тодады вайытӥськом, Кун Дума таӵе законэз кӧня ке толэзь талэсь азьло кутӥз вал. Шутэтскон нуналъёсы люкаськылӥз Россиысь Аграрной партилэн ӧтчамез. Та ужрадын музъем ужасьёслы дурбасьтӥсьёс вераны кулэ вал, кызьы соос дунъяло музъемез вузан-басьтонэз. Аграрийёс шара веразы - соос талы пумит. Кун Думае быръёнъёс дыръя Аргарной партилэн кивалтӥсьёсыз Михаил Лапшин но Николай Харитонов куспазы керетӥзы вал. Озьы быръёнъёсы пӧртэм партиослэн бурдзы улын мынӥзы: огез - КПРФ-лэсь, мукетыз - ОВР-лэсь. Таяз ӧтчамын одӥг кыл шедьтон пала нырысетӥ вамыш лэсьтэмын вал. Харитонов шуиз, туала крестьянъёслы юрттон понна дэмен кариськоно, пе. Россилэн Президентэз Владимир Путин кылем арня вискын уно иськемъёсты ортчоно луиз, шуыны луоз. Нырысь-валысь со вуылӥз Швецилэн шоркараз Стокгольме. Отын со пумиськылӥз ЕЭС-э пырись кунъёслэн кивалтӥсьёсынызы, нош шутэтскон нуналъёсы Иркутскын кенешиз Японилэн премьер-министреныз. Азинтэмын вал ньыль Курил шормуӵъёс сярысь вераськон. Странаосмы соос пумысен витьтон арлэсь кема споръясько ни. Россилэн но США-лэн кусыпъёссы ортчем арня вискын ӟырдазы. Мугез - шпионъёс. Азьвылгес ФБР (Федеральное Бюро Расследований) аслаз ужасьёсыз пӧлысь Россия вылэ ужась муртэ шараяз. Соин валче Армерикаысь 50 ӟуч дипломат улляны чакламын. Ньылез соос пӧлысь США-ысь чик ӝегатскытэк кошкыны кулэ, мукетъёсыз - июль толэзёзь. Аналитикъёс чакламъя, таӵе учыр кемалась ӧй вал ни. Вашингтонысь выль администрация озьы возьматыны тырше аслэсьтыз кужымзэ. Угось берло дыре Россия американецъёслы кельшисьтэм уно вамышъёс лэсьтӥз, кылсярысь, Иранэн кусыпъёс тупатэ, солы ож тӥрлык вуза. США-лы со уг кельшы. Америкалэн выль Президентэз Джордж Буш Владимир Путинэн пумиськон сярысь уг но малпаськы, пе. Телефон пыр берлозэ соос январь толэзьлэн пумаз кенешиллям. Нош Владимир Путинэз таӵе югдур уг но сюлмаськыты, шӧдске. Яке со бугыръяськись мылкыдзэ ватыны быгатэ. Озьы-а, тазьы-а, но журналистъёсын Президент луэм дырысен одӥг ар тырмонлы сӥзем пумиськоназ со оскемзэ вераз, Россилэн но США-лэн кусыпъёссы ӧръяськозы ай шуыса. Ӵем озьы луылӥз ни ук: президент-республиканец нырысь-валысь Россиез куртчылыны ӧдъя, бӧрысьгес мылкыдыз воштӥське. Ӵапак тазьы Тӧдьы юртын ужзэ мытӥз вал ук Рональд Рейган но. Македониын югдур воштӥськыны кутскиз. Та странаысь армия но полицейскойёс Тетово город котыре каръяськем албан террористъёсты пазьгыны быгатӥзы. Македонилэн кивалтӥсьёсыз веразы, албанецъёсын кенешонэз, пе, кутском ожмаськон йылпумъяськем бере гинэ. Пусйыны кулэ, кунын улӥсьёс пӧлысь 40 процентэз - албанецъёс. Соослэн азьветлӥсьёссы куро кык калыкъёслэсь - македонецъёслэсь но албанецъёслэсь - конференцизэс кылдытыны. Югославилы пумит ожмаськон дыръя НАТО ожгарчиоссэ Македоние интыяз вал. Нош табере, юрттэм интые, отысь солдатъёссэ поттӥз. Македонецъёсты пыкылэ на, албанецъёслы пумит ожмаськонын секыт ож тӥрлык медаз кутӥськы, пе. Ю. Александрова. Егитъёс - Удмурт шаерын Туэ но шаерамы ортчоз "Россиысь егит усточиос П. И. Чайковскийлэн вордӥскьем музъем вылаз" нимо фестиваль. Таиз - ньылетӥез. Концертъёс луылозы Воткалась (Воткинскысь) музпедколледжын, озьы ик - Ижысь Андан ӵыжатӥсьёслэн культура дворецазы. Асьсэлэсь устолыксэс возьматозы Россиысь консерваториосын дышетскисьё, улосвыл, калык куспо конкурсъёслэн лауреатъёссы. Фестивальлэн куноосыз пӧлысь одӥгез аспал эшмы Ольга Дедюхина. Ольга Дедюхина дышетске Крезьгуръя Гнесинъёс нимо кун академиын. Россиысь духовой инструментъёсын шудӥсьёслэн Николай Римский-Корсаков нимо конкурссылэн лауреатэз. Ольга Дедюхинаен ӵош концертэ пыриськоз шаерысьтымы Культурая министерстволэн симфонической оркестрез (солэн валтӥсь директорез - калык куспо конкурсъёслэн лауреатсы Удмурт Элькунысь искусствоосъя дано ужась Николай Роготнев). Мукетыз куно - Нижний Новгородысь кун консерваториын дышетскись, Россиысь вокалистъёслэн конкурссылэн лауреатэз Михаил Журков. Куинетӥез куно - Нижний Новгородысь кун консерваториын дышетскись Руслан Разгуляев. Фестивале озьы ик пыриськозы Нижний Новгородысь кун консерваториын дышетскисьёс - вокалист Светлана Звонарева, гитарист Виктор Попов, аккордионистъёс Лариса Баева но Юлия Спивак. Фестиваль дыръя чузъяськозы Пётр Чайковскийлэн "Евгений Онегин", "Опричник", операосыз "Соловей", "Забыть так скоро", "Хотя бы в единое слово", "На землю сумрак пал" романсъёсыз. Концертъёсыз нуоз крезьгурчи, музыковед, Удмурт Элькунысь искусствоосъя дано ужась Юрий Толкач. Фестиваль кутскоз 5-тӥ апреле. Йылпумъяськоз 8-тӥ апреле. Е. Березкина. Меӵак кенешон Егитъёсты кыдатэ армия Удмурт Республикая валтӥсь федеральной инспекторлэн Сергей Чикуровлэн калыкез пумитан интыяз кылемаз покчи арня нуналэ адямиослэн "пӧсь" юанъёссылы валэктылӥз Удмурт Республикаысь военной комиссар генерал-майор Геннадий Барсков. Пӧртэм пумо вазиськонъёс вал та нуналэ. Геннадий Васильевич доры адямиос дырто, юрттыны быгатэмезлы туж оскыса. Жингыртӥз Ижын улӥсь кышномурт. - Пие армие кошкемез бере ик Нижний Тагилэ шедиз, - ивортӥз со. Алигес тодӥ: госпитальын эмъяське. Кыӵе ке иворез кемалась ӧвӧл ни. Кызьы тодоно пие сярысь? - Жингыртэ командирезлы яке госпитале, - ӝот-ӝот валэктӥз генерал-майор. - Ма, Нижний Тагилэ асьтэос но ветлыны быгатоды: кыдёкын ӧвӧл. - Нош госпитале пырыны лэзёзы меда? Отын тюрьмаын кадь, дыр? - Лэзёзы, лэзёзы: эн сюлмаське - кышномуртэ нош ик буйгатӥз генерал-майор. - Пие дышетске Ижысь 17-тӥ лицейын. Армие сое туэ басьтозы меда: дышетсконэз ай июле гинэ йылпумъяськоз, - сюлэмшугзэ уг ваты егит атай. - Дышетсконзэ йылпумъятозь уз исалэ, - нош ик ӝот-ӝот валэктэ Геннадий Васильевич. - Нош кыӵе ке вузэ пырыны малпа ке, туэ ик 10-тӥ сентябрёзь со сярысь ивортыны кулэ военкоматэ. - Тодмоелэн одӥг пиез гинэ. Сое но армие нуозы-а: эше ужамысь ӝоген дугдоз ук? - сюлэмшугъяське Ижысь мукетыз нылкышно. - Пияшез армие нуонлэсь номыр но уг алы, - ивортӥз Геннадий Васильевич. - Одно ик басьтозы. - Вералэ вал: наркотикъёсын эшъяськисьёсты но армие басьтӥськоды-а? - нош ик туж сюлэмшугъяськыса юазы телефон пыр. - Военкоматысен эмъясьёс ваньзэ шараялозы: эн сюлмаське. Нош пиды зэмзэ ик наркоман ке, армие солы нокыӵе сюрес ӧвӧл, - веразы юась муртлы. Военной доры огвие матэктӥз туж егит но муспотон пиёк. - Мон ньыль толэзьлэсь кема Чечняын ожмаськи, - ӧжытак дырекъяса вазиськиз со. - Нош со понна татчыозь нокыӵе но дун ӧз на тыре. Ижысь Октябрь ёросысь военкоматэ но, шаерысьтымы солдат анайёслэн комитетазы но вазиськылӥ ни, кышкытлыклэсь утиськонъя министрлы Игорь Сергеевлы но гожъямын ни - пайдаез ӧвӧл... Военком соку ик юаз пияшлэсь частьсэ. Собере шуиз: - Та ужпум борды али ик басьтӥськоз экономикая но коньдон ужпумъёсъя воштӥсе. Оскисько: ваньмызлэн йылыз-пумыз шедёз, - пияшез буйгатыны турттэ Геннадий Васильевич. Адями ужаз вамыштӥз туж капчи мылкыдын. Вераны кулэ: военкомлы та нуналэ вазиськылӥзы уно мӧйыос. Соослэн куронъёссы но пӧртэм пумо. - Быдӟым ожтылэ пыриськемъёсты малы меда ялан висъяны туртто? - сюлэмшугзэ уг ваты арлыдо воргорон. - Эмъясьёс но соосты пӧртэм сямен йӧнато: одӥгзэ - ӟечгес, мукетсэ - уродгес... - Быдӟым тылож вакытэ мон ньыль ар ӵоже Ижын ужай, - ӝожтӥське арлыдо агай. - Зэм, ожмаськемъёслэн радазы малы ке уг пырто. - Ожмаськись армиын вал-а тӥ? - Ӧй. - Озьы бере, шонер малпасько, - чик ӧз шугъяськы военком. - Татын асьсэос эмъясьёс янгыш, - ӝот-ӝот валэктэ генерал-майор. - Арлыдоосты висъяны уг яра. - Нылылэн пиезлэн сюлэмыз туж ляб: ньылетӥ этажозь мырдэм туба. Сое но армие басьтозы шат? - туж сюлэмшугъяськыса юа арлыдо кышномурт. - Пидылэн сюлэмыз зэмзэ ик висе ке, сое армие нокин уз басьты, - ивортэ военком. - Нош тазалыкез оскымонгес ик ке, лэсьтӥськонын ужалоз. - Юлтошелэн пиез эшъяськиз наркотикъёсты яратӥсьёсын, - жингыртэ мукетыз нылкышно. - Дорысьтызы дӥськутсэс потта но вуза. Али уг дышетскы. Ассэ ачиз буйгатэ: армие монэ нокин уз басьты... - Юлтошты Ижысь кыӵе ёросын улэ? - Устинов. - Устинов ёросысь военкомлы шыпытак гинэ мед жингыртоз но пизэ армие басьтыны мед куроз: ваньмыз умой луоз, - валэкто солы. Кӧня ке адями вазиськылӥз, улон инты курыса. - Камчаткаын монэ кулэстӥзы, - ӝожтӥськиз ог ньыльдон аресъем воргорон. - Отысен Иже бертоно луиз. Кык нылпие. Улӥсько кытын но отын. Али - варманае дорын. - Тӥледлы сётэмын луоз улон интылы сертификат. Чылкак эн юскиське ай: кыӵе ке осконды вань на. - Со кулӥз ини, - туж дӥсьтыса вераз та юанэн вазиськем воргорон. Мукетыз но вазиськон герӟаськемын вал улон инты сярысь сюлмаськонэн. - Тодмоелэн осконэз чик ӧвӧл ни: улон инты ласянь чылкак ёрмемын, - туж куалекъяса но бӧрдыса ивортӥз висись кышномурт. - Юрттэлэ вал. - Ньыльдон кык аресъем мурт улонысь кошкон сярысь малпаськыны кулэ ӧвӧл ай - мед вазиськоз ми доры, - шунытак но либытак веразы солы. - Тау, туж бадӟым тау! - кышномурт буйгаз кадь. *** Тулыс вуэмен, та нуналэ трос вал армия пумысь юалляськисьёс. Куд-ог егитъёс малы ке палэнтӥсько солэсь: одӥгъёсыз висё, мукетъёсыз дышетско, куинетӥосыз нокыӵе мугтэк пегало... Зэм, данакез валало ик та секыт но дано ужлэсь кулэлыксэ. Шуо: мукетъёсыз чидазы бере, мон но пырпотыны кулэ; армие ӧй мынысал но, кулэ бере - ветлоно. Куд-огез пумысен военкомлы шыпытак гинэ жингырто сюлмаськись анай-атайёссы: - Басьтэлэ пиме армие: маин сюдыны паймисько. Куд-огзэ ыстон вылысь, уже кутоно луэ милицилэсь кужымзэ. Сыӵеосты ӵемысь меӵак ӝабырто улон интыысенызы. Луылэ озьы но: пияш лэсьтэ кыӵе ке йыруж. Соку мумиз-бубиз туж дыртыто ини: чалякгес, чалякгес басьтэ пимес армие! Зэм, армиысь но прокуратура утчаса шедьтэ таӵеосты. Армие мынӥсьёс али ичи ик. Азьло тямыс адямиез гинэ мозмытыны луэ вылэм. Али сыӵеос ог кызь вить ёрос люкасько ини. **** Бен, пӧртэм пумо юанъёсын вазиськылӥзы адямиос та нуналэ. Чылкак паймытӥз соиз: егитъёс сярысь сюлмаськылӥзы соослэн анай-атайёссы, ӵыжы-выжыоссы, тодмооссы. Нош кытын асьсэос пиос? Кык час ӵоже мынӥз туж кулэ удысъёсъя вераськон. Сое возьматӥз Удмурт Республикаысь военной комиссарлэн генерал-майорлэн Геннадий Васильевич Барсковлэн юанъёслы ӝот-ӝот, визьмо но туж ӝог валэктыны быгатэмез. Е. Берёзкина. Арня талэсь азьло Можгалась ужаса улӥсьёс бырйизы город администрацилы йыр. Выль кивалтӥсь луиз С. А. Пантюхин, жилищно-коммунальной хозяйствоя предприятилэн директорез. С. А. Пантюхинэз быръёнъёсын вормонэныз ӟечкылало Удмуртилэн Президентэз А. А. Волков но Кун Кенешлэн Тӧроез И. Н. Семенов. Туспуктэмез Н. Глуховлэн. Кӧня сылэ шуныт? "Горкоммунтеплость" специальной предприятилы та нуналъёсы 25 ар тырмиз. Ижевскын шуныт сётон удысын одӥгез валтӥсь огазеяськон луэ. Али предприятилэн 17 котельноез. Та лыдпус бадӟым ик ӧвӧл кадь, но мукет ласянь учконо ке, "Горкоммунтеплость" Ижысь ог 300 сюрс улӥсьёслэн юртъёсазы шуныт вуттэ. Предприятилэн музъем ултӥ лэзем гумыосызлэн огъя кузьдалазы 275 иськем пала лыдъяське. Кезьыт нуналъёс туэ ортчизы ни. Туннэ "Горкоммунтеплосеть" данъяськыса вераны быгатэ: та тол вылтӥ шуныт сётонэз умой радъяз. Тупатъян-лэсьтон ужъёс 119 процентлы быдэстэмын. Кызьы нош сомында? Куддыръя уго, шуом, чакламъя 100 метр вужмем гумыез воштоно ке, ужъёс азьланьтӥськемъя адӟиськод: пусъемлэсь данаклы кузьгес гумы шуныт сётонлы чылкак ярантэм луэм ни. Соин ик ӵем гинэ азьвыл учкемезлэсь трос лэсьтытэк ӧвӧл. Кутскем ужез йылаз-пумаз вуттоно ук. "Горкоммунтеплосеть" туннэ нуналэн гинэ уг улы. Ас ужаз дуннеысь выль амалъёсты но кутыны тырше. Кылсярысь, Ижысь Металлург городокын музъем ултӥ километрлэсь ятыр пластик трубаос лэземын вал. Кортъёсыныз ӵошатыса, соос 2-3 поллы кемагес чидало. Со сяна, пластик гумыос шунытэз умой возё, пӧсь вулэн ӟечлыкез но вылӥынгес луэ. Нырысьсэ кутӥсько музъемез вылтӥз гудытэк гинэ (ултӥз пасяса) трубаосты лэзён амал но пенополиуретанэн шобыртэм трубаосты пуктон. Уж шоры выль синмын учкон азьланяз трос пайда вайыны быгатоз. Но экономикаын кылдэм югдур шуныт сётӥсьёс вылын но шӧдскытэк уг кыльы. "Горкоммунтеплосеть" вордскем нуналзэ 35 миллион манетлэсь ятыр тыриськонъёсын пумита. Лыдпуслэн быдӟымос люкетэз люкаське предприятилэн лэсьтэм ужъёсыз понна коньдон басьтымтэез бордысь. Кылсярысь, кылем ар ӵоже 12 миллион тыр лэсьтӥськон ужъёс быдэстэмын ке вал, 7,5 миллионзэ предприятилы али но ӧз тыре на. Озьы ке но, "Горкоммунтеплосетьлэн" кивалтӥсез Д. П. Щиголев оскытэ: "Тыриськымтэзы понна татчыозь нокинэ но шуныттэк ӧм кельтэ на. Приморьеын кадь шуг-секытъёс ӧй вал, уз но луэ. "Удмуртэнерго" огдыре электрокужым сётэмысь дугдылӥз. Отысь кивалтӥсьёсты валаны шуг. Кызьы 30 градус кезьытэн адямиосты шуныттэк кельтод? Бен, секыт, бен, коньдон уг тырмы, но ас уждэ тодоно, быдэсъяно ук. Собере валась адямиос тодо, кезьыт куазен шунытэз кысон-лэзён уродмытэ гумыосты но, огъя ужан радлыкез но тӥя. Азьланез сярысь малпаськоно ук..." Берло дыре предприятилэн сюлмаськонъёсыз йылӥзы. Заводъёс пыд йылазы султыны ӧдъязы, нош "Горкоммунтеплосеть" аслэсьтыз ужасьёссэ ыштыны кутскиз. Адями трос коньдон пала кыстӥське уго. Предприятиын ужасьёс, шорлыдын вераса, 1370 манет басьто. Нош ужзы туж секыт. Асьмеос шуныт квартираосын пукыку, соос тол куазен гудӟемъёсын, кизер дэриын, лымы, зор улын гумыосты уйбыт но тупатъяно луо: калыкез шуныттэк кельтыны уг яра. Тау тӥледлы, эшъёс! Шуныт мылкыдды ноку но медам сӥя. Е. Миннигараева. Книга ӝажыяды "Ваньзэ вераса бен быдтод шат?.." Лидия Черновалэсь "Улон - йыромон" книгазэ лыдӟем бере малпанъёс Туж шуныт кылъёсын, ӟеч мылкыд каронъёсын кузьмаз мыным Лидия Дмитриевна выль книгазэ. Таӵе кузьымлы шумпотоно: ас палъёсад будэм но быдэсмем адямилэн гожъямъёсызлы нимысьтыз ик аспӧртэмлыко матысь мылкыд кылдэ, куке отысь шедьтӥськод, пумитаськод ас палад верано кылъёсты, тодмо интыослэсь нимъёссэс. Но "Улон - йыромон" книга со понна гинэ мыным матын ӧз луы, нырысь ик, со бордаз кыскиз мылкыдъёсыныз, малпанъёсыныз. Книга котькуд ласянь тунсыко. Нырысь ик син азе усе вылтусыныз. Льӧльмыт инмысь вож музъем вылэ усё тӧдьы лымы пырыос, нош йыро-гопо музъем вылтӥ, вамен гожо сюресэтӥ мынэ адями, тыбыр сьӧраз пуйыэз. Секытэн ке но, вамен гожъёсты со быгатэ ортчыны, быгатэ со шуг-секытэз вормыны, соин но, дыр, суредасьлэн Дина Байковалэн адӟеменыз адями инмарен ӵошатэмын, сое возьматэ нимысьтыз тодмет. Книгалэн пичияк азькылаз гожтэмын: "Ваньзэ вераса быдтод шат мае адӟиз нылкышно ож вакытэ, вормонзэ но, вормонтэмзэ но пельпум вылаз ӝутыса, собере пал кышно - мӧзмон-чигиськонлэн поръятӥсь кожаз выйыса. Ас арлыдо ёзъёсызлэсь адӟем-чидамзэс возьматэ кыбурчи та чуръёсаз. Лидия Черноваез нылпиослы гожтэм книгаосызъя тодӥськом ке вал, лулпуш дуннеез шараяменыз, лирик луэменыз усьтӥське". Туж шонер дунъет сётэмын. Та кылбуръёсын Лидия Дмитриевналэн, шонергес - лирической героинялэн быдэс улэмез адӟиське: отын вордскем гуртэз, семьяез, будэмез, война аръёс, яратон, мӧзмон, кайгырон но вуоноезлы оскон. Нырысетӥ кылбуръёсаз ик син улэ шеде Ыты шур ним, озьыен, автор Ита палан вордскемын. Доре - Гондыркуш - син азям, Вуаз сялтымась лыз Ыты... ("Ветта монэ, инкуазе") Ожоё Ыты дур нёжалмы Быдэсак бус пушкы выемын. Гӧртылэм тӧдь кызьпу саюлын Мырдэмак адӟиське коркамы. ("Мемие, пумитам тон ӧд пот") Самой со коркан вордскемын вуоно кылбурчи, отын ик будэмын бадӟым семьяын, кызьы со гожтэ: Туж бадӟым семьяын будэмен, Ӟеч валай ӟег няньлэсь мон шӧмзэ. Бубамы люкылӥз шоремен Ӝӧк вылысь бичалляз пырызэ". ("Ӟеч валай ӟег няньлэсь мон шӧмзэ"). Бадӟым семьяын "улон вӧй вылтӥ кадь ӧз мын" ке но, огсыр улысалзы, вылды, со улонэз юн секыт ке ӧй карысал ожмаськон. Со ке ӧй луысал, али шуг ни вераны, кыӵе улон, кыӵе уж бырйысал аслыз егит ныл. Тросэзлэн, егитъёслэн сямен ик, Лидиялэн улонэныз но тодӥсьяськиз ожмаськон. Зура школаын сизьым классэз йылпумъямез бере, война вылтӥ 1942-тӥ арын со Иже лыктоно луиз но машиностроительной заводын ужаз. Со дыръёсы будэм мурт, мон тодӥсько, ас мылкыд каремезъя гинэ гуртысьтыз кошконо уг лу вал, кужмысьгес карыса ыстылӥзы. Тодӥсько на: гуртысьтымы егит нылэз Эляез Иже келязы ФЗО-ын дышетскыны, собере заводын ужаны. Туж мӧзмеменыз но сием потэменыз пегӟыса бертэм. Дӥсьсэ миськыса, кусказ юбка интые шобрет керттыса, бакчаязы потэм, кенер вылазы пуксем но туж зол но чебер куараен кырӟа: "Хороша страна Болгария, а Россия лучше всех". Россия интые ас вордскем гуртэзлы шумпотыса кырӟаз, дыр, вал, нош солэн миськем дӥсез но куасьмыны ӧз вуы, сое выльысь нуыны лыктӥзы ни. Мыным Лидия Дмитриевна со выллем мадёнъёсты ӧз поттылы, нош солэсь кылбуръёссэ лыдӟеме бере, со суред юн яркыт син азям пуксиз. Кылбурет удысын Л. Чернова тодмо луиз ни Можга ёросысь Пазял гуртын библиотекарьын ужакуз. 1927-тӥ арын вордскем но кузь сюресэз ортчем муртлэн улон но ужан сюрес вылаз оломаиз но вал, дыр, но тросгес, лэся, вылэм секытэз но кайгыронэз, сое шӧдоно кылбуръёсысь. Зэм но, учке ай, героинямы азьын пичиысен ик кузь сюрес. Со кылбурысь кылбуре выже. Нырысь со нылмуртэ дорысьтыз поттэ, собере, аръёс ортчыса, дырын-дырын бертымтэ гуртаз. Нош со сюрес вылын кӧня малпанъёс, тодэ ваёнъёс. "Мемие, пумитам тон ӧд пот", "Ветта монэ, инкуазе", "Дор пала вуэмъя", "Улон. Ӧтись сюрес", "Ми ӧм пылаське..." "Котькудӥз нунал" кылбуръёсын со сюреслэн тусыз ӟеч пуксе син азе. Огласянь, со "кӧттыр нянь понна нюлэскы сюрес", мукет дыръя, со "лук-лук жадьымон", нош "кемдэм комфорт - кырсь пудо вагон"... Бен, дорен люкиськонэ ӧтись сюрес "чик вальымтэ вылэм сяськаен", со куддыръя ымнырез бышка лек йӧзорен... Бертылон сюресэ уга кузь. Ӝутскыны кынары ни уг сузь. Кузь уйёс-нуналъёс - поездын, Котьмае малпаны тырме дыр. ("Мемие, пумитам тон ӧд пот"). Бен, озьы кылдэм ни гуртын вордскем но будэм пиналъёслы: бурд потэм бере, ас мылкыдзыя-а, муг шедемъя-а, косэмзыя-ыстэмзыя-а, палэнэ кшконо луо. Но, кылбурчилэн верамезъя, вакыт но уг сёты ӵушыны вордскем палъёслэсь чеберзэс, сюлэм весь доре куриське, нош азьын - укыр кузь сюрес. Куамынэтӥ аръёс котырын вордскемъёслы кемдӥз гинэ трос секытсэ адӟыны: кужым бырытозь ужанэз но, сылал интые сое возён дузэз пильылыса шыд пӧзьтонэз но, шорем няньтэк сиськонэз но, зугрес, ул кужлэсь куэм дӥсь нуллонэз но. Озьы луиз, бен, ожмаськонэн сэрен. Ож аръёс мертчиськемын со аръёсы будэмъёслэн йырвизьёсазы но, сюлэмъёсазы но. Ожмаськонэн сэрен ыштонъёс туннэ улонын но шӧдӥсько на. Йырвизьме кылемын пыраклы Ёрмон ар... кӧлымтэ уйёсыд. Восьтэт вал - ӟигартэм - кунолы... Бӧрысяз - сютэм лул, пу усы. ................................................. Мар адӟон-курадӟон Ньыль ар ӵоже! Синвуэн тымиськиз, дыр, мур кож. ("Туж курыт та тодэ ваёнмы"). Секытэсь ньыль аръёс котькуд ласянь кӧшкемытэсь но шимесэсь вал. Соос ӧз жалялэ адямиосты но, валъёсты но, мукет пудо-животэз но. Кылбурчилэн верамезъя, валъёсты гинэ но шае келяно луылӥз корт-андан пырыен. Ма вералод на адями сярысь. Гуртэ кылем калыклы чидано луиз пӧртэм ыштонъёсты. Тэльын, лудын станок дурын ышиз-быриз тазалык, егит дыр, яратон... Мынам лушкем лул-гажанэ, Кудлань нуиз тонэ сюрес? Усьтын ӧй ву яратонме - Весь каргасько на ож через. "Кытын, кытын тӥ?", "Огинын ӝӧк котыр", "Гудыръяз лек ож", "Ож лудысь ыстылэм гожтэтъёс", "Кайгырон", "Ой, аръёс-вакытъёс", "Кӧл, солдат", "Одӥг пиез вал анайлэн", "Пияш кемдӥз шимес йырйиськонэ", "Ӝегатом акшанэз", "Война - ӧм пылаське кӧй но вӧй пӧлын", ... Туж курыт тодэ ваёнмы", "Тӥледлы йыбырттом" - ваньмыз та кылбуръёс со секыт вакытлы сӥземын. Котькудаз - ыштон вӧсь луон, тодэ ваён, аръёслэн берыктыны луонтэмзы... Паймымон шонер кылъёс шедьтэ кылбурчи ваньзэ тае вераны. Нош со кылъёсты шедьтыны, со мылкыдъёсты вераны ӧй луысал, ас куэныд шӧдытэк секыт аръёс пыр потытэк. Кӧня нылъёс но пиос яратонзэс ӧз адӟе, ӧз пумиталэ, озьы ик ортчытӥзы вапумзэс. Мынам син азям - гуртысьтымы егит нылъёс, шудтэм акаосы. Соослэн но сюлэмъёссы кыскылӥзы ӝыт шудонъёсы. Гужем - бадяр я тополь улэ, толалтэ - конторае я школае. Эктон гуръёсты балалайкаен шудӥз егит ныл, парен-парен эктылӥзы нылэн нылъёс. Кылӥськылӥз яратонэз витён кырӟан. Со егитъёс. Нош пичи нылпиен кылем кышноос? Соослэн кыӵе секыт витёнзы вал. Гожтэтъёс, ож лудысь ыстылэм гожтэтъёс, Дуноесь синпельёс, вунонтэм ватосъёс... Нош ик, нош ик туннэ солдатка сюлэмез Вырӟыто, бӧрдыто - со уг тод кӧлонэз. Кылбуръёсысь вань чуръёс гожтыны курисько, лыдӟелэ на милемды, лыдӟелэ, куро кадь соос. Бен, зэм но, соос тодэ вайыто секыт аръёсты, но со дыре ик вазисько улэп кылемъёслы, али улӥсь егит но арлыдо адямиослы, улонзэс йӧногес мед улозы шуыса. Та книгаысь ожлы сӥзем кылбуръёс тужгес золъёсыз мыным потӥзы. Кылбур сборник темаен-темаен нимысьтыз люкылымтэ ке но, соос висъясько пуштросэнызы. Сборникез йылпумъяса, лулпуш мылкыдлы сӥзем кылбуръёс. Отын кылбурчи пайме трос арлыдо луэмезлы, ӧжыт жаля но, дыр, ортчемзэ, ӧжытак пальпотэ. Сыӵе мыным потӥз "Эн мерскы ай, эн кылбур..." Эн мерскы ай, эн шаян тӧл, Эн ишка пипу куаръёсыз. Малы дыртӥськод ай бен тон Кидэ нюртыны садъёсы?" Та вакытаз адямилы лякытэн гинэ улоно ни, дыр, вал, но солы люкето секытэсь тодэ ваёнъёс, соос изён уммез но улляло, нылпиослэсь мӧзмон но маза уг сёты... Кайгыронъёс трос, соин ик вазиськытэк но уг лу: "Ой, бен трос-а меда каръяно улонад, ой, бен вал ик меда пилемтэм вакытэд?" Книгаын ӧвӧл палэнтэмын яратон тема но. Зэм, со но тодэ ваёнъёс пыр адӟиське. Таосты лыдыса, куд-огез, оло, кин ке, тужгес егитэз, лыдӟись малпалоз но: ма-ось та арлыдо кышномурт яратон сярысь гожъя на? Мон соослы тодазы уськытысал А. С. Пушкинлэсь кылъёссэ: "Яратон -котькыӵе аресэд - уг юа..." Нош улон сюрес кузя кема мынэм муртлэн верамез та ласянь но туж иназ шуыса малпасько, малы ке шуоно, та дыре но "сюлэм-дыдык", та дыре но "пеймыт инмын чылкыт уя толэзь", вань мӧзмон но, выжан но, малпанъёсын инметӥ лобан но... Уйвӧтъёсын ке но, лул пушкын ке но, вань шудлы но умоезлы оскон. Туннэ со, оло, ӧс куспамы шуд ваёз? - Ӵуказе нуналлы шумпотон но кылёз. Таӵеесь мылкыдъёсыз бугыртӥзы Лидия Черновалэн "Улон-йыромон" книгаысьтыз чуръёс. Кылбурчилы юн тазалык, кема улон но гожъяськон удысын азинсконъёс сӥзисько. Милитина Гаврилова. Надежда Козырева Куазья - мылкыды Сьӧд пилем чагырзэ инбамлэсь котыртӥз, Ас сьӧраз ворсаса шундыез. Берпумзэ гудыри сик вадьсын гудыртӥз, Омыртӥ чузъяськиз куараез. Укноям шуныт кадь крезьгур, Кылбурам кылдыто зор шапыкъёс йыгасько, Со гурез чус коркан мон огнам кылӥсько - Малы такем мӧзмыт та лулгур? Зор кошкиз. Тузонэз лапкытӥз ас бӧрсяз, Омырез тӧдьы бус сайкытаз... Шундылэсь мылкыдзэ возьматӥз вуюись, Пӧртэмесь буёлэн суредаз. Лӧптэмын кыбуран тыл-ӟырдась сюлэмы, Чурысь чур гожтӥське кагазэ. Куазедъя воштӥське но кырӟа мылкыды, Со чагыр тылы пыр кисьтӥське. Шудо-а мон? Шудо-а мон? Ма шуыны уг тодскы. Ваньмыз тырме ни кадь та улонын. Малы бен сюлэмы мыным уг оскы? Кытчы ӧтё на со? Сӥзьыл ни урамын. Малы меда сётӥд выльысь оскон Вашкалае кылем яратонлы? Тырши вунэтыны ваньзэ.. Нош тон... Ӧд сёты кысыны тылгизьылы. Ваньмыз ортчиз ни кемалась. Тон кошкы. Ойдо тодэ ум вае ни вужзэ. Нош сюлэмдэ уд пӧя, уд но ӝошкы - Со аслэсьтыз лэсьтоз ужзэ. Ольга Лукина Ӧй, вылды Тырмыт ӧй сёты-а тыныд? Дырын шунтэм яратонме? Тырмыт ӧй усьты-а тыныд Тылын гомась пӧсь сюлэмме? Валай ни кадь мон, дуное, Шӧдӥ чильпам янгышъёсме. Ӟырдыт яратоно эштэ Тон палэнысь шедьтӥд бере, Тырмыт ӧй мусоя, вылды, Тӧл кадь эркын луэм йырдэ, Тырмыт ӧй ӟыгыръя, вылды, Батыр пужым кадь мугордэ. Тырмыт ӧй чупалля, вылды, Ческыт узы кадь ымдурдэ, Тырмыт ӧй вералля, вылды, Небыт либатылӥсь кылме. Макем тон кыдёкын... Кусыпмы кыдёкын, Лулъёсмы нош матын - Асьмелэсь юатэк, Уйёсы мӧзмыло, Асьмелэсь кылзытэк, Огинэ луыло. Асьмеос малпатэк, Ог-огзэс вожало. Бен, уло, дыр, одӥг Шундыен-толэзен. Шокало, бен, одӥг Кудӟытӥсь омырен. Гажаны кусыпмы Уг но люкет вылэм. Макем тон кыдёкын, Сомында ик матын. Людмила Обухова Лымы пыры ваське-ваське... Тылобурдо караз лобе... Писпу тӧлъя выре-выре... Мынам сюлэмы... пуэктэ. *** Лул гож. Со гож вамен Уг лу потэм Мынам, тынад - Ненокинлэн. Лул гож... *** Тынад кузьмам сяськаосыд - Кизилиос - вуын сыло. Яратонэн гомась сюлэмъёслы соос кельшо. Нина Решетникова Аред нош ортчиз Аред нош ортчиз. Нунал берытскиз, Шунды пальышаз, Тылсизэ нош лэзьяз, Юртъере пыриз, Пеймытысь поттӥз, Сюлэмез шунтӥз, Оскон кылдытӥз. Гыж-гажез ву гылтӥз, Котырак выльдӥськоз, Калыкез сэзъялтоз, Сэзь мылкыд кузьмалоз, Ӟеч сюрес возьматоз. Ас дундэ но ӝутоз - Озьы мед луоз. Бурдъяськисько Кырӟан Каллен гинэ лёгиськисько, Выж пулэз эскерисько. Азбаре но ке потӥсько, Инкуазьлы шумпотӥсько. Бакчае но ке пырисько, Ужам ужме дунъясько. Ульчае но ке выжисько, Синме инме чӧлтӥсько: Бурдоослы мон шонасько, Нош ик лыктэ , шуисько. Калыкен ке пумиськисько, Капчи мылкыд сӥзисько. Ачим но кадь бурдъяськисько, Ваньмызлы пальпотӥсько. "Лолита" - Ижевскын Удмурт национальной театр 1-тӥ апреле аслэсьтыз сценазэ сётэ Москваысь куноослы. В. Набоковлэсь "Лолитазэ" асьме дорын пуктыны дасяське Сергей Михайловскийлэн Литературая но драматургияя театрез. "Лолита" - ХХ даурысь тужгес ӵашетон, керетон поттӥсь роман - асьме вакытлы но тупа, отын возьматэм кусыпъёс туала моральлы, этикалы пумит кадь ке но луо. Режиссёр сценалы тупатэм ужаз утьыны тыршем авторлэсь малпанъёссэ, кылызлэсь кужымзэ. Постановка аспӧртэм соин: отын куинь гинэ романысь персонажъёс: Лолита, Гумберт но Куилти. Ваньмыз мукетыз - кадр сьӧрын. Геройлэн пуш куараез быдэс спектакль мынытозь шӧдӥське. Таӵе выль амаллы луыса, романэн азьвыл тодматскемъёс быгато сое нош лыдӟыса выллем потыны. Нош кин "Лолитаен" нырысьсэ пумиське, соос адӟо яратонын гожез ортчемен кылдэм вань шуг-секытъёсыз, пӧсь-сутӥсь мылкыдлэсь пуромемзэ но солы кортнэтэз, вузаськемез но оскымон луэмез - ваньмыз та туж усто мадёсын кадь усьтӥське. Суредысь суредэ действие мынэмъя шараяське спектакльлэн валтӥсь малпанэз: адями яратыны кулэ озьы, кыӵеен солы кылдэм. Но - обществоын "гожтэм но гожтымтэ" законъёслы пумит мынытэк. Спектакльын валтӥсь ролез шудэ "Ленком" театрысь актёр Владимир Кузнецов. (Со тодмо луэ таӵе спектакльёсъя: "Жестокие игры", "Юнона", "Авось", "Тиль", "Звезда и смерть Хоакина Мурьетты".) Вань быгатэмзэ, ӟырдыт мылкыдзэ сётыса шудэ со Гумбертлэсь рользэ: егит дыр яратонэз вазь кулэмен, 45 аресаз вуыса, юзматымтэ мылкыдыныз омырске но ассэ вормыны быгатонтэм думиське чылкак пинал ныл борды. Валтӥсь героинялэсь рользэ шудэ Щукин нимо вылӥ театральной училищеез йылпумъям егит актриса Анастасия Чуднова. Критикъёслэн малпамзыя, та актриса Лолиталэн ролезлы туж тупа. Набоковлэн кылдытэм образэз ӵапак солы гожтэмын кадь. Спектакльын драматургия жанрлэн вань пӧртэмлыкъёсыз уже кутэмын: комедилы тупась сценаос но, драматической повествованиез но вань, нош пумаз трагической кужымез весь будэ но будэ. Действиез азьланьтыны юртто Д. Пьяцола но Х. Иглесиас, соослэсь крезьгурзэс спектакльлы тупатэм С. Горбенко. Т. Сорокина. Маин ми пӧртэмесь? Котькуд ёросын вань асьсэлэн кылбур, кырӟан гожъясьёссы. Озьы ик - Якшур-Бодья палъёсын но. Кемалась ини вал соослэн огазе люкаськемзы. Соин ик кенешизы: таяз аре одно ик уртче улом, концерт бригада выллем кылдытыса, гуртъёсы поталом. Туэ арлэн кутсконаз соос люкаськизы ёросысь культура юртэ. Тросэз пӧсь табанез кадь ваиллям "пӧрамъёссэс": выль кырӟанъёссэс, кылбуръёссэс, юморескаоссэс. Ог-огзылэсь мӧзмиллям но, муртало но кадь ини. Валентина Николаевна Широбокова, азьвыл таӵе люкаськонъёсты радъясь, али но котькудӥз сярысь шуныт кыл вераны шедьтӥз, ог-огенызы тодматӥз. Ортчем дыр куспын егитгес гожъяськисьёс кылдӥллям уга. Соослэн кылтӥрлыксы лэчытгес, тодон-валанзы бадӟымгес. "Нош милям, - шуэ В. Н. Широбокова, - дирижёр боды интыын мажес вал, консерватория интыын - ӝыт шудонъёс". Эшеныз Галина Николаевна Ардашеваен ӵош соос кырӟазы асьсэлэсь пӧрмытэм гуръёссэс. - 1957-тӥ арын педучилищеез быдтэме бере, гуртын огнам крезьгур грамотаез тодӥсь вал, - мадёнзэ ӧръяз Р. И. Шкляева. - Егит дыръямы пумтэм-йылтэм концертъёсын ветлӥськиз. Мукшиын ӵапак ӧраз сюри. Хор кылдытӥм. Сюлэмам соку веттаськыса улӥллям ни вуоно крезьгуръёсы. Римма Ивановналэн нырысетӥ кырӟанэз вал ожын бырем атаез сярысь. Сое нырысьсэ быдэстӥз Ижевскын крезьгурчиослэн ӝытазы. Собере шоркарамы сюрессэ волятӥз. Кырӟанъёсызлы фонограмма лэсьтӥз. Пумен сборник дасян сярысь малпаськыны ӧдъяз. Крезьгурчиос Николай Шабалин но Александр Корепанов уго туж ӟеч дунъет сётӥзы кырӟан гуръёсызлы. Лӧпкытӥзы. Но та малпан олоку ай быдэсмоз. Ас книгадэ поттон понна, коньдон шедьтэм гинэ ӧвӧл, олокӧня ӧс кусыпъёсыз волятоно. - Милям Як.-Бодья палан улӥсьёсмы номырин но алнашъёслэсь пӧртэмесь ӧвӧл: кырзасьёсмы-верасьёсмы лачак гинэ. Но соосты ӝуткась-огазеясь ӧвӧл. Егор Егоровичмы коть, писательёслэн тӧрозы, милемлы мед юрттод вылэм. Тазьы ӝожтӥськем выллем верамзы зэм. Та люкаськонын гинэ но адӟиськиз, кӧня соос, нырысь ик - кылбурасьёс. Котькуд школаысь удмурт кыллы но литературалы дышетӥсьсы яке мукетыз кылбур-верос гожъян удысын ассэ эскере, пиналъёсыз но талы дышетэ, кружок нуэ. Сыӵеос пӧлын - Мукшиысь Надежда Кирилловна Гильманшина (кылбур сборниксэ но поттӥз ни), Вуж Ӟатчаысь Ольга Александровна Лукина, Ӵошкытысь Людмила Геннадьевна Обухова, Кекоранысь Нина Ивановна Вахрушева. Нырысь вамышъёс печатласько "Ошмес" ёрос газетын. Татысь валтӥсь ужасьсы, Эмма Загребина, ӵем гинэ куаразэ сётылэ Удмурт радио пыр но, газет-журналъёсын но. Нош тани солэсь уморескаоссэ туж усто лыдӟись шедиз. Со Кекоранысь Ирина Эсенкулова. "Медпунктын" учырез мадеменыз, эсьмаса, Удмурт филармониын но учкисьёслэсь кӧтсэс шугектытӥз. Кыла-бура, ас кырӟанзэ гурла, шуыны луэ, Нина Николаевна Решетникова сярысь. Дышетӥсь, редакциын ужась, лулпуш дуннеез - кылбур-кырӟан пӧлын. Котьма ке но, аргантэк-баянтэм шулдыр ӧвӧл. Таӵе дыръя котьку ӵап дыраз вуэ Аркадий Кузьмич Бекмачев. - Нырысетӥ уждунэным ик арган басьтӥ, - тодаз вае со. - Гуртысь клубын сотэк уг луы вал. Но монэ, 19 аресъем пинал муртэ, сельсоветлы председателе каризы. А. К. Бекмачев шор ёзо школаын но, крезьгурояз но ужаз (ужа - али со директор). Но мон тодӥсько ёросысь кульурая отделлэн кивалтӥсез вылэмезъя. Ӵапак соку, пе (али люкаськонын но тодазы ваизы), Аркадий Кузьмич аслаз машинаеныз но вуэ вал Мукшиын кылдытэм хорен ужаны. Сюлмын веттаськем гуръёс пачыласа пото. Аркадий Бекмачев, тупась кылбуръёс шедьтон ласянь шугъяське ке но, лачак кырӟанъёс пӧрмытӥз ини - А. Белоноговъя, Н. Байтеряковъя, Ашальчи Окия, З. Трухиная, Ю. Кузьминая, Я. Майковъя. Уг кышка, "Шур бызе" но, "Шур дурын" но нимоосыз кырӟанъёс вань ни шуыса, аслэсьтыз крезьзэ мытэ: кылыз-гурез сюлмаз лякиськиз бере, ма карод. Та пумиськонын Любовь Аркадьевна Лебедева, ёрос культура юртлэн кивалтӥсез, кунооссэ чаен сектаз. "Ялыке" ансамбльысь кырӟасьёсын Светлана Ивановаен но Галина Михайловаен ӵош жингрес гуръёссэс кузьмазы. Таӵе ӝӧк сьӧрын пукон кутсконэз понна вал. Ёросысь кыло-буроос нимысьтыз бригада выллем кылдытӥзы но Якшур-Бодьяысь гимназие, Выжо, Ӵошкыт гуртъёсы вуылӥзы ни. Юнме уг шуо: кырӟан ас сюрессэ шедьтэ. Татьяна Чернова. Нина Вахрушева Кӧлон гур Баб, баб, нуные, Пиньтэм пичи чечеге. Кынь, кынь синъёстэ, Чебер уйвӧтэд лыктэ. Пичи нылы бадӟым будоз, Анайлы юрттӥсь луоз, Туьсты-пуньыез миськоз, Корка пушез утялтоз. Ма кулэ на анайлы? Ма кулэ на атайлы? Быдэ вуо ке нылпиос, Шудзы гинэ мед луоз. Баб, баб, нуные, Пиньтэм пичи чечеге. Чечег сямен бурдъяськод. Атай юртысь тон лобӟод. Баб, баб, нуные, Мынам зарни бугоре, Кынь, кынь синъёстэ, Чебер уйвӧтэд лыктэ. *** Дырызлэсь азьвыл уд тэтчы - Тулыслэсь витёд вожзэ, Югыт льӧм зын сяськазэ, Ымнырысьтым ӵуж пужызэ, Мугорысьтым пӧсьвуамзэ, Турнано нап турынзэ. Нош тулыс бӧрсьы вите Кобыё пӧсь гужеме. Лунги-ланги ведраен, Буш, тыро выл мешокен, Жаль тури куараосын Лыктоз сӥзьыл кульчоосын. Нош собере тӧдьы капка Усьтоз небыт кесэгъёссэ. Тани тыныд тӧдьы дэра, Тани тыныд шуныт шуба. Ваньмыз интыяз султэ Дыр ортчемъя, дыр вуэмъя. Валасьтэмзэ но синтэмзэ Дыр дышетэ. Архивысь материалъёсъя Удмуртия ЪЪ дауре 1988-тӥ ар СССР-лэн но Удмуртилэн улоназы демократия пыӵаны кутскиз. Со сярысь оскымон ялэмын вал июнь-июль толэзьёсы КПСС-лэн ЪИЪ конференцияз. Отын вераськон мынӥз политикаын мур реформаос кутскон сярысь. Вань властез кенешъёс кие сётыны чакламын вал, пумен граждан обществе но правоя улӥсь кун кылдытон вылысь. Феврале армянъёс но азербайджанъёс куспын споръяськон пуромиз Нагорной Карабах пумысен. 7-тӥ декабре Арменилэн уй палаз музъем туж зол зурказ, соку быдэсак куашкатэмын вал Ленинакан но Спитак городъёс. Ленинакан городлы юрттыны Удмуртиысь отряд ветлӥз, соин кивалтӥз УАССР-ысь Госпланлэн тӧроез В. М. Еговкин. 15-тӥ мае, Женеваын тупамкыл гожтэм бере, ожгарчиосмы Афганистанысь потыны кутскизы. Ижевскын ялэмын вал воинъёслы-интернационалистъёслы сӥзем памятниклы конкурс. Июне КПСС-лэн ЦК-езлэн комиссиез (соин кивалтӥз Александр Яковлев) шонере поттӥз Бухаринэз но Рыковез, августэ - Зиновьевез но Каменевез. Озьы кутскиз Сталин репрессиос улэ шедемъёслы реабилитация. Сентябре Воткинске вуизы Америкаысь нырысетӥ инспекторъёс. Соос чакланы кулэ вал, Воткинскысь машина поттон заводын "СС-20" ракетаосты медаз ни лэсьтэ шуыса. Таӵе ужрад пусъемын вал шоро-куспо но матэ ыбылӥсь ракетаосты быдтон сярысь советско-американской огкылын. Ижевскысь автозаводын кутскизы "Москвич-2126" выль модель машина лэсьтыны. Воткинскысь газ аппаратура поттӥсь заводын Чехословакиысь специалистъёс басьтӥськизы "Татра-815" машинаосты тупатъян линиез дасян борды. Таяз арын йылпумъяськизы Удмуртиетӥ ортчись Ямбург-СССР-лэн шор ёросъёсыз газопроводэз кыскон ужъёс. Феврале Ижевскын усьтӥськиз "Аврора" кинотеатр. Тулыс городын ужаны кутскизы нырысетӥ видеосалонъёс. Июнь толэзе соослэн лыдзы куамынозь вуиз ни. Удмуртиын ар ӵоже усьтӥськиз ог 300 кооператив. 12-тӥ июне Ижевскын нырысьсэ ортчытэмын городлэн нуналэз. Мартэ-апреле быдэс элькунамы сӥё-дано пусъемын вал Куӟебай Герд но Ашальчи Оки вордскем дырысен 90 ар тырмон. Кутскемын вал соослы памятник пуктон понна коньдон бичаны. Нош сентябре 100 ар тырмиз Удмуртия автономилэн нырысетӥ кивалтӥсез И. А. Наговицын вордскем дырысен. Тодосчи М. Г. Иванова поттӥз "Иднакар" монографизэ. Со сӥземын вал вашкала удмурт кар бервылэз 1969-тӥ арысен кутскыса эскеронлы. Толалтэ ортчизы Канадаысь Калгариын тол олимпийской шудонъёс. Отын Тамара Тихонова, куасэн бызьылыса, 2 зарни но 1 азвесь медаль басьтӥз, нош биатлонист Валерий Медведцев - 1 зарни но 2 азвесь медаль. Ноябре Ижевскын улӥсь 24 аресъем Алексей Чижов Суринамеын шашкиен шудонъя дуннелэн чемпионэз луиз. В. Трещев, Удмурт Республикаысь Выль историяя центрысь валтӥсь специалист. Кин тросгес тодэ шаермы сярысь? Ачид астэ ӧд ке ӝуты, ачид астэ ӧд ке ушъя, кн ӝутоз но ушъялоз? Зэмзэ но ушъямон ортчиз республикаысьтымы нылпи искусствоосъя школаосысь бадӟым калссъёсын дышетскисьёслэн ӵошатсконзы. Татын пиналъёс йырвизьзэс сыназы Удмуртиысь искусствоя но культурая тодон-валанъёссы ласянь. Та ужрад ортчиз 23- тӥ мартэ Ижысь искусствоосъя 2 номеро школаын. Тросэз нылпиос пусъемын данъян грамотаосын но книгаосын. Нырысетӥ номеро диплом басьтӥзы Алнашысь Яна Куликова но Ижысь Ирина Мышкина. Гран-при но лауреат ним сётэмын Можгалась Константин Феофаловлы.. Залын учкисез тросгес луысал кеЮ ӵошатскон ӟырдытгес луысал, дыр. С. Петрова. Синучкон азьын Килез вормом асьмеос Дӥськут вылысьтыз киль лымы, малпасько, нокинлы шумпотон уг вайы. Тросэз соин нюръясько пӧртэм пумо шампунъёсын. Но ӵемысь соос уг юртто, куд-огез йыр миськонъёс асьсэос киль кылдыто. Кема йӧнатымтэ килё йыр лыдыны кутске, куддыръя экземаозь но вуэ. Киль лымы кылдэ зол кӧсомытэм ку вылын, умойтэм лэсьтэм химия бере. Кильлэсь ӵемысь курадӟо кӧс но кӧё йырсиен адямиос. Килез быдтон понна, миськон азьын йырез умой-умой сынано. Соку со кӧняез ке ву сьӧры кошкоз. Юрттозы нимысьтыз поттэм бальзамъёс, шампуньёс, кремъёс. Эмъяны луоз пӧртэм паросъёсын но суретъёсын, кудзэ тӥ асьстэос но дасяны быгатоды. 1. Кӧмызлэсь сузям ньыль лимонэз кызь минут пӧзьтоно литр вуын. Йыркуэз со паросэн коттылоно. 2. Куинь литръем посудае тросаз кӧмызлэсь сузям горд кушман пононо, тырозяз ву кисьтоно на. Арня ортчыса, вылаз пурысьтам потоз. Соку вуэз сӥсъяно. Та суретэз уже кутон азьын йырез миськоно пӧсь вуын небӟытэм 200-250 грамм вужмем ӟег нянен. Йыре зырам нянез гылто огшоры вуэн. Табере гинэ йырез миськыны луоз горд кушман вуэн, суралтоно сомында ик огшоры вуэн. 3. Нырез вандӥсь зын уг люкеты ке, кильлэсь эмъяськыны луоз чеснокен. Вуштон пыр лэзьыса, сое йыре зырано. Кык час возёно. Йырсиез миськоно чырс йӧлэн яке курег пузэн. Кӧс йырсиез утялтоно нимаз чаклам шампуньёсын, миськоно кырсь луэмезъя. Гылъяно май толэзе потэм пушнерлэсь, тыпы суллэсь яке тӧдьы сяськалэсь (ромашкалэсь) паросъёсын. Огшоры йырси нимаз утялтэмез кулэ уг кары. Миськоно тупась шампунен, но дырын-дырын бальзамъёсын утялтэм уз люкеты. Кӧс йырсиез шер миськоно. Кутоно будос вӧен сурам турын-куар суретъёсты. Дасяз О. Кожанова. Кивалтӥсь шедиз асьсэ пӧлысь Вить толэзь кивалтӥсьтэк улӥз республикаысьтымы одӥгез валтӥсез завод - "Купол". Но табере ваньмыз интыяз пуксиз. "Купол" электромеханической заводлы генеральной директоре Россиысь кивалтон системаосъя управление юнматӥз татысь азьвыл генеральной директорлэсь воштӥсьсэ Сергей Васильевез. Та интые ассэ вить адями ӵектӥз вал, но юн куронъёсъя ортчиз Сергей Васильев гинэ. РАСУ-лэн кивалтӥсез Владимир Симонов но "Антей" концернлэн кивалтӥсез Юрий Свирин, республикаямы вуылыкузы, Президентэн Александр Волковен пумиськылӥзы. Вераськоназы выль кивалтӥсьлэн кужымезлы оскемзэс веразы. Заводлэсь али ужамзэ но соос умоен пусъё, нош азьланяз "Купол" производствозэ уката паськытатоз. ТОР-ёс лэсьтэм сяна, поттоз кондиционеръёс, сплиж-системаос, инфузионной суретъёс но... самолётъёс. "Куполлэсь" выль кивалтӥсьсэ ӟечкыла "Антей" концернлэн генеральной директорез Ю. Свирин но Удмурт Республикалэн Президентэз А. А. Волков. Туспуктэмез Н. Глуховлэн. Таза лу! Висёнмес вӧяса уллялом Бускелелэн нылыз врач. Лида апай ӵем висьылэ бере, нылыз солы етӥн вӧй юыны косэм. "Соку ик тодам лыктӥз пинал дыры, - шуэ Лида апай, - анаймы тачак картошка пӧзьтылӥз, сое етӥн вӧе веттылыса сиылӥм, туж ческыт потылӥз. Табере тани етӥн вӧез эмъя но шуо. Зэм-а со? - юа Лидия Трофимовна. Азьвыл дыръя калык зэмзэ но етӥн вӧез яратыса, тросэн сиылӥз. Но странаямы огъя югдур уродмемен, етӥн будэтэмысь дугдӥзы. Озьы калык та ческыт, пайдаё сиёнтэк кылиз. Но ӟеч ужез улзытӥсь шедиз. Азьвыл военной офицер Леонид Григорьевич Болобан етӥн вӧй поттон борды басьтӥськиз. Отчыозь со кема дыр ӵоже висись кышноез вылын эскериз вӧйлэсь эмзэ. Но Леонид Григорьевичлы ӧз кельшылы вӧй поттон амал (технология). Соин ик со ас сяменыз лэсьтӥз - вӧй поттылӥзы пеймыт азьын кезьыт прессъёс улын. Озьы етӥн кидысысь вань пайдаё витаминъёсыз, кислотаосыз вӧе пызьыръяллязы. (Огшоры амалэн пызьыртыку, кидысысь ӝыныез пайдаё маосыз ке быро). Тӥни соин та етӥн вӧез Болобанлэн шуыса нимало. Аслаз шӧмызъя но, эмъяськонын пайдаё луэмезъя но со трослы висъяське вань мукет вӧйёслэсь. Врачъёслэн, учёнойёслэн валэктэмзыя, отын вань шер пумиськылӥсь, Омега-3 семействоысь кислотаос. Адямилы соос туж-туж кулэ, но со кислотаос (тужгес но линоленовеез) огшоры сиён-юонын шер пумиськыло. Нош ӵем-а асьмеос сииськом зарезьысь турын-куар, кӧй чорыг, соя вӧй. Соин ик мугормы та кислоталэн тырмымтэеныз курадӟе. Но табере тани амал шедиз. Болобан вӧй пызьыртыны кутэ вылӥ ӟечлыко кидысэз гинэ. Солэсь лэсьтэм вӧй юрттэ мусэнызы, мукет кӧтпуш висёнъёсын курадӟисьёслы. Та вӧез кема дыр ӵоже сиись-юисьёс ушъясько огъя тазалыксылэн умойскемезлы. Валась муртъёс сое юо вирзэс холестеринлэсь чылкытатон, сюлэм но пыктос висёнъёслэсь утиськон понна. Огкылын вераса, ваньзэ вераса уд быдты. Соин ик ойдолэ оскиськом визьмо муртъёслы. Россиысь медицина наукаосъя академиысь Сиськонъя институт ,трос эскеронъёс ортчытыса, та вӧйлы вылӥ дунъет сётӥз. Нош Тверьысь медициная академиын, Болобанлэн куремезъя, висисьёс вылын Виноградов профессор кивалтэм улсын нимысьтыз эскеронъёс ортчытэмын вал. Быръемын ӵем висьылӥсь нылпиос, кӧтпушенызы курадӟисьёс, секытэн ветлӥсь 25-32 аресъем нуны возьмась нылкышноос. Кӧня ке дыр ӵоже кызь нылкышноос нуналлы быдэ 2-3 пуньыен етӥн вӧй юылӥзы. Сое юыны кутскытозязы кыкез гинэ тазалыксыя нуны вайыны дась вал. Но ваньзы нылпизэс асьсэос ваизы. Кема курадӟисьёсыз чик ӧй вал. Нуныоссы таза вордӥськизы. Ваемзы бере дас укмысэз туж ӝог катьяськизы. Етӥн вӧйлэн эмез шӧдӥськиз быдэ вуымтэ нылпиослэн тазалыксы вылын но. Пыэдэн, шокам ёзвиосынызы ӵем курадӟись нылпиос шергес висьылӥзы, куд-огез воксё бурмизы. Но тужгес но зол юрттӥз етӥн вӧй ӝушенызы курадӟисьёслы. 72 процентэз язваен висисьёс веразы чальгес бурмемзы сярысь. Юыны кутскемзы берегес ик зӥбломиз вӧсьсы но. Сюлэмзы висись муртъёс етӥн вӧй ас мылкыдзыя юизы. Анализъёс лэсьтыса, тодмо луиз: вирысьтызы холестерин кулэсмем 13 процентлы! Та етӥн вӧйлэсь вылӥ ӟечлыксэ пусъё шаерамы улӥсьёс но. Удмуртиын сое вузаны кутскизы кылем гужем гинэ. Вӧй дуно ӧвӧл бере, сое басьяло егитъёс но, арлыдоос но, висисьёс но, висисьтэмъёс но (тазалык сярысь висемлэсь азьло сюлмаськоно уго). Туэ февраль толэзе "Фрахтъ" фирма (шаерамы Болобанлэсь вӧйзэ со вуттэ). "Оскы тазалыктэ Болобанлэн вӧезлы" ужрад ортчытӥз. Кинлы вӧй ӧз юртты, фирма со адямилы коньдонзэ берыктыны кыл сётӥз. Зэмзэ ке, асьсэос вузкарисьёс малпазы вал, сыӵе адямиос трос луозы шуыса. Но тодӥськоды-а кӧня мурт вазиськиз коньдонзэ берыктыны курыса? Дас ньыль гинэ. Соос пӧлысь витез соглаш луизы коньдон интые нош ик етӥн вӧй басьтыны. Со-а уг вера та вӧйлэсь пайдаё луэмзэ? Но ойдолэ кыл сётом сое ас вылазы эскеремъёслы: Клавдия Васильевна пенсионерка: - Мынам сюлэмы, суйёсы-пыдъёсы висьыло. Вирсэръёс тӧрнало ке, ветлэме ик уг лу ни.Кӧтыным но ялан курадӟисько. Етӥн вӧй сярысь кылэме бере ик, басьтоно кариськи. Эмез ӧз ке но лу, юнме уз быры, малпай - вӧй ук со, сиён-юонэ ватсало. Али тани туж шумпотӥсько - котьмар сиеме луэ, кӧты уг торды ни. Суйёсы-пыдъёсы но шергес висьыло. Галина Волкова, воспитатель: - Тулыс котьку сямен, усьтӥське язвае вал. Туэ толалтэ ик етӥн вӧй юыны кутски. Татчыозь - тьфу! тьфу! ӧй висьылы на, эмъюмтэк улӥсько. Марина фельдшер: - Мон кемалась тодӥсько ни вал, та вӧйын эмъяськыны луэ шуыса. Туж юрттэ сутскемез, кынмем интыез эмъяны. Ачим соин массаж лэсьясько. - Нош кин ас вылаз етӥн вӧйлэсь пайдазэ ӧз шӧды на, басьтэ, эскере. 27-тӥ-29- тӥ мартэ Ижевскысь "Ижсталь" Йӧ дворецын ортчоз "Медицина но тазалык адӟытон". Отысь тӥ етӥн вӧез дунтэменгес басьтыны быгатоды. Тросэн басьтӥсьёс понна фирма дунзэ нимысьтыз кулэстоз на. Вӧез басьтон но соин эмъяськон пумысен юанъёсын вазиськыны быгатоды 30-76-96 телефонъя. "Фрахтъ" фирма возьма тӥлесьтыд вӧй пумысен малпанъёсыныды гожтэтъёстэс таӵе адресъя: 426000, Ижевск город, Карл Маркс ульча, 1, Болобанлы. Вань гожтэтъёстэс фирмаын ужасьёс аслыз етӥн вӧй лэсьтӥсьлы - Леонид Болобанлы сётоз. Таза луэ. З. Рябинина. Город улон Йӧ вырӟиз Малы кулэ луиз таӵе комиссия? Людмила Николаевналэн малпамезъя, али иворъёсты вӧлмытонъя ёзъёс югдурез мыдланьтыса возьмато, интыысь аскивалтонэз куддыръя нокыӵе мугтэк курлало, учырез рос-прос эскерытэк, асьсэ малпанзы котыртӥ гинэ бергало. - Мыным туж ӝож, - шуэ со, журналистъёслэн асьсэлэсь дорзэс озьы саптамзылы. Мон ачим укмыс ар Лосино-Петровский городлэн мэрез вал, тодӥсько, мар со кисыяд копейкатэк интыен кивалтон. Вылаз ик, тынад городад интыяськем предприятие уг юртты, нош калык тонэ соин пыкылэ ке... Ватытэк верано ке, конгресс быгатэмезъя интыосысь кузёослы юрттыны тырше, ас палаз журналистъёсты кыскыса, иворъёсъя огъя пространство кылдытыны малпа. Берло дыре Россиысь ньыльдон город кузёос воштӥськизы. - Калык уг вала, - шуэ Людмила Николаевна, кивалтӥсьёсты ӵем вошъяса, уж уката ӝега шуыса. Угось мэр нырысетӥ сроказ ужаны дышетске ке, кыкетӥяз ужа ни. Пыриське-а Конгресс интыысь быръёнъёслэн ужазы юанлы Л. Куликова "уг" шуиз. Быръёнъёс, пе, калыклэн ужез. Но ӧз ваты, али ужась мэръёсты утьыса, пиар амалъёсты ужазы кутэмзэс. Тросэз огшоры адямиос уг но тодо на, дыр, кайта та вакытэ ижъёс асьсэлы нош кузё быръёзы шуыса. Со понна кузь ныро имиджмейкеръёс туннэ ик уйёссэс уг кӧлало ни. Политика - со сыӵе маке. З. Рябинина. Оскон Коньдон вань - юрттэт луоз Удмурт Республикаысь Калыкез улон-вылонын утёнъя министерствоын одӥг но ӝыны ар талэсь азьло кылдӥз Координационной совет. Министр, министрлэн воштӥсез, отделъёслэн кивалтӥсьёссы сяна, отчы пыремын республикаысьтымы та удысэн герӟаськем пӧртэм министерствоос но ведомствоос, общественной огазеяськонъёс. Сояз арня вискын Координационной совет кутӥз таяз арлы ужан план. Нош ныырсетӥ кварталэ эскероно ужпумъёс пӧлын вал "Ветеранъёс сярысь" но "Россия Федерациысь инвалидъёсты улон-вылонын утён сярысь" Законъёсты быдэсъянлы федерация коньдонлэн висъяськемез, республикаысьтымы ожысь ветеранъёсты эмъянъя госпитальлэн ужамез но Быдӟым Вормон дырысен 56 ар тырмонэз пусйыны дасяськон сярысь ужрадъёс. Кызьы ивортылӥмы ни вал газетамы, втееранъёс но инвалидъёс сярысь законъёслы 2001-тӥ арысен коньдон выль сямен висъяськоз, Россия Федерациысь казначейство пыр. "Ветеранъёс сярысь" Законэз быдэстонлы Россия Федерация республикамылы висъялоз 96 сюрс 135 манет, нош "Россия Федерациысь инвалидъёсты улон-вылонын утён сярысь" Законлы висъяны чакламын 86 сюрс 928 манет. Коньдон вуоз котькуд толэзе. Кык-куинь нунал куспын со интыосы келямын луоз. Калыкез улон-вылонын утёнъя министерство котькуд арняе эскере ёрос но город администрациосы висъям коньдонэз кулэезъя кутэмез. Ёросъёсысь калыкез улон- вылонын утёнъя отделъёс али бадӟым уж нуо юрттэтлы кулэяськисьёсъя нимысьтыз список (банк данных) дасянъя. Эскеронъёс возьмато, куд-ог адямиос юрттэт (льгота) басьто кӧня ке удостоверениея пӧртэм интыосысь. Ужан амалъёс тупатэмын калыклы юрттэт сётӥсь предприятиосын но. Огъя верано ке, республикая ветеранъёслы юрттэт сётыны предприятиослэн счётазы 62 процент пала коньдон висъямын, нош инвалидъёслы юрттонъя - 45,6 процент. Калыклы юрттэт сётон ужпумъёсъя пусйымон ужало Сарапул городысь, Пичи Пурга но Завьялово ёросъёсысь администрациос. Нош Дэбес, Можга, Ува ёросъёсын висъям коньдон ӝегаса кутӥське. Та ёросъёсын калыклы юрттэт сётӥсь предприятиосын огкыл кутон йылпумъямтэ на. Умояз инвалидъёслы но ожысь ветеранъёслы санаторийёсы но курортъёсы путёвкаос висъян. Россия Федерация коньдон висъямен валче луонлык кылдӥз 1200 путёвка басьтыны. Та ласянь палэнэ кылё ужысь ветеранъёс, законын соос понна чакламтэ эмъяськон путёвкаос висъяны. Но май толэзьысен соосты но возьма пичи ке но шумпотон. Ужысь ветеранъёс, ар йылпумъяськытозь, дунтэк ветлыны быгатозы транспортын. Л. Малых. Кӧльы кадь юн апайёс Алигес бертай Ӟунняшур (Юмьяшур) гуртам (Алнаш ёросын со). Татысен трос паймымонзэ кылӥ. Гуртамы улэ вылэм ёросысьтымы тужгес пересь мурт - Сарбей апай. Сарбей Салимовна Конькина. 1902-тӥ арын вордӥськем со Усо (Муважи) гуртын. Пинал дыръяз бызем Трофим Иванович Конькинлы. Картэз герман ожын бырем. Соос вордӥллям куинь пи. Таосызлэн быдэн кык нылпизы вордӥськем. Сарбей апайлэн куинез ик пиосыз, ньыльдон-витьтон арес тырмыса, улонысь кошко. Нош ачиз татчыозь чида. Гурт калык верамъя, Сарбей апай егит дыръяз тужгес кужмо ужась вылэм. Аракуз сьӧраз уиськыны уг луы вылэм. Али но, пе, бакчаысьтыз гужем уг пыра. Толалтэ ачиз вулы пичи ведраен ветлэ. Валлян арын Ӟунняшур гуртлы куинь сю ар тырмиз. Отчы Сарбей апай, нокин юрттытэк, огназ лыктӥз. Малпасько: сю арессэ гурт калык ӟеч пумиталоз. Кема, тазалыко но шудо-буро мед улоз Сарбей апай. Мукет бускеле, М. Г. Самарова, апаезлэн Решетникова (Овчинникова) Марфа Лаврентьевналэн юбилеяз (солы укмыстон вить арес тырмем) ветлэмзэ вераз. Со вордӥськемын Ӟунняшур гуртын ик. 1905-тӥ арын. Сизьым нылпи пӧлысь тужгес пичиез. Можга педучилищеез йылпумъяса ужам Алнаш но Можга ёросъёсын. Али улэ Можгалан - нылыз дорын. Нылъёсыз шутэтско ини. Таосызлэн нылпиоссы но ӝоген пенсие потозы. Марфа Лаврентьевналэн картэз герман ожын бырем. Укмыстон вить аресъем мурт куное ӧтем Ӟунняшурысь трос калыкез: уноез ӵыжы- выжыосыз та гуртын уло. Ӟунняшурлы куинь сю ар тырмонэ Марфа Лаврентьевна нылпиосыныз ӵош вуылӥз. Можгалась автобусэн лыктӥллям. Гуртлэсь юбилейзэ пусъёнын вераськиз тямыстон одӥг аресъем М. П. Зиновьева. Собере, Варзи шур дуре люкаськыса, мылысь-кыдысь вераськыса, кырӟаса пукизы ог- огзылы ӵыжы-выжы луись адямиос. А. Поляков, Ижын улӥсь. Наталь "Кошко монастыре!" Анайёс туж пӧртэмесь луо, кудӥз нылпизэ сюдыны-вордыны тырше, кудӥз понна - со мултэс сюлмаськон. Та кышномурт уг тоды вал, ньылетӥзэ нылпи вайыкуз, чиданэз пумаз вуоз шуыса. - Тазьы улыны мон уг быгатӥськы ини! Кошко монастыре! - малпаз но озьы ик кариз. Одӥгез пиез кышнояськемын ини, кыкез армиын, пичиез - дышетске... Вань шуг- секытэз ортчемын ини кадь. Оло, инмар ӧтиз, пиналъёсыз быдэ вуыса но кошконо кариськиз бере монастыре? Оло, зэмзэ но чидантэм секыт дыръёс вуизы? Шуо ук: адями утча умойзэгес, нош чорыг - мурзэгес. Капчиен-а сётскиз монастыре кошкон, соиз сярысь кышномурт ачиз гинэ тодэ, вылды. Семьяеныд кык-куинь нуналлы но люкиськиськод ке, малпаськемысь уд дугдӥськы, нош татын пыраклы кошконо, берытсконтэм вылысь. Монастыре кошкем бераз, картэз но пиез кӧня ке пол ветлӥзы нылкышно доры, берытскыны куризы. Бертыны соглаш луэм, пиез монастыре лыктэм нылэз кышно ваиз ке. Кышномурт ас семьяеныз мылпотэмезъя бергатэ, асэныз эксэй кышно кадь дан поттэ. Соин солы пумит вазьыны уг дӥсьто, кузяз ветло. - Монастыре кошки ке, тодды ай, кызьы монтэк улыны, мон доры лыктоды, пыдесъяськоды, мынэсьтым вань куронъёсме быдэстоды!.. Озьы ик луиз. Одӥг семья - одӥг бугор, одӥг герӟет, но котькудӥзлэн аслаз сямъёсыз, муртлы валантэм куронъёсыз. С. Петухова. Правительствоысь иворъёс 26-тӥ мартэ ортчиз Удмурт Республикаысь Правительстволэн Президиумез. Отын эскерем ужпумъёс пӧлын валтӥсь инты басьтӥз гурт удыслы бюджетысь кредит висъян. Эскеремын со сярысь нимыстыз кутэм положение, юнматэмын кредитъя комиссия. *** Ваньбур кусыпъёсъя министерсовез Правительстволэн постановлениеныз косэмын, Инкуазь узылыкъёсъя но инкуазез утёнъя министерстволэсь ваньбурзэ таласа, акциосын, Удмуртская геофизическая экспедиция" огазеяськонлы сётыны. Озьы та огазеяськонлэн вань акциосыз республикае кылёзы. *** Республикалэн бюджетысьтыз 50 сюрс манет коньдон висъямын Якшур-Бодья ёросысь Старые Зятцы черкогуртысь шор ёзо школалы. Со мыноз тылпу бервылэз утялтыны- палэнтыны. Эшшо 73 сюрс манет коньдон висъямын Селта ёросысь Колесурысь шор ёзо школалэсь лек тӧлпериен куашкатэм липетсэ выльдыны. Удмурт Республикалэн Президентэзлэн но Правительстволэн пресс-службазы. Наталь Сюлэм вӧсь Йыромем юсьпи Одӥгаз шутэтскон нуналэ монэ эше гуртаз куное ӧтиз. Ваньмыз туж ӟеч гинэ вал: шуныт пумитазы, ческыт сюдӥзы, салам келязы - мар бен кулэ на студентлы. Но ӝытазе клубе потыкумы, нылмуртлэсь бӧрдэмзэ кылэме али но сюлэмме позыръя на: - Мон уг быгатӥськы ни тазьы улыны, мар каром, кытчы пыром?! - Ой, нош ик мискинез обидё ни, тӥни ук дӥсьтэк корказяз поттӥллям, - лулӟылэ вӧзам сылӥсь эше. - Ми школаын соин ӵош дышетским вал, жаль потэ, нош юрттыны уг быгатӥськы. Матысь эшез ӧвӧл Элялэн... Кема вераським на нылаш пумысен. Дискотекаын шулдыръяськисьёс, лӧптэм мылкыдо егитъёс но бус пӧлы ышизы кадь. Кошкемелэсь азьло Эляен пумиськон сярысь гинэ малпай на. Эшелэн анаез пыр кусып тупатоно кариським. Ӵуказеяз ӵукна фермае ужаны мыныкуз, Эляез куное ӧтьыны курим. Сюранаез интые нылаш скал кыске вылэм со вакытэ. - Эн сюлмаське, нылъёсы, милям соин кусыпъёсмы тупало, одно ик лыктоз, - буйгатӥз Ленапай. Зэм но, нуназе бере ми Эляен чай юыса, бӧтьыртыса пукиськом ни вал. Шӧдӥ, нылаш туж визьмо вераське, кылбур-верос пӧретъёсыз но, пе, уно гинэ. Улонэз пиртэш толэзь кадь кезьыт шуыса уд малпа. Мӧзмытэсь синъёсызъя, кенешон куспамы секыт лулӟылэмезъя гинэ секыт мылкыдыз шӧдӥське. Анаез Эляез атайтэк ваем. Секыт висеменыз, со улонысь вазь кошкем. Озьы Эля нылпи юртэ сюре. Сьӧд йирсиё, бадӟым курень синмо муспотон пиналлы ӝог гинэ кузёос шедизы. Соку солы куинь арес сяна ӧй вал на. Нош али тани кыӵе тузӥ, веськрес чеберай луэмын ни. - Пиос тынад вамыш но лэсьтыны уг сёто, дыр, о-о? - Синмаськисьёс вань бен, но мон соослэсь палэнтӥ ортчоно луисько. Сюратае кылӥз- адӟиз ке... Та быдӟа будыса, огпол но дискотекае потаме ӧвӧл, эшъёсын ӵош гужем уйёсы поръянэз, тылскем дурын пуконэз но уг тодӥськы. Секыт вал вераськон: Элялы - мадьыны, нош милемлы - кылзыны. Сое валасез вань шуыса, лэся, нылаш быдэс улонзэ мадиз. - Пичиысен ик монэ сюратае адӟемпотостэм карыны кутскиз. Малы озьы йырсидэ кутӥд, малы тазьы ветлӥськод, та дэремдэ кыль ай но мукетсэ дӥся, малы озьы вераськиськод - солэн трос та выллем пыкылонъёсыз чыртыме кекато. Анай-атаед ултӥя бере, котырысь адямиос но кырыжен учко кадь потэ. Удмурт кун университетэ дышетскыны пыри вал, сюратае монэ Свердловске интыяз. Калык азьын чеберъяське, ваньзэ лэсьтыны дась луэмзэ возьматыны турттэ. Сотэк но коньдонлы ёрмиськом, уг валаськы, малы монэ сокеме келянэз вал. Городысь бертӥсько ке, со монэ мыжыкен сюдэ. Капчи тӧл кадь, пе, улонэд, котькытчы вуиськод, дыр, шуэ. Мон сяна, соос эшшо кык вордос пинал басьтӥзы на. Покчи классъёсын дышетско ай. Милемыз утялто шуыса, пенсия уно гинэ басьто. Но мар пайдаез - ваньзэ юыса быдто. Сюранае бен монэ уг ултӥя. Но дурбасьтыны уг дӥсьты - аслыз йӧтоз. Соин ик сюранайме уг пыкылӥськы. Сюратае нокытын уг ужа, улэ висемъяськыса. Толэзьлы быдэ дуно эмъюмъёс октэ, ачиз нош группае уг поты - кагазъёсын бызьылонэз, пе, трос. Нош мон дась сюдос шуэмысьтыз университетме но куштӥсько ни, лэся, толэзьлэсь ятыр уг дышетскиськы ни. Кошкыны коньдон ӧвӧл. Татчы магазинамы ужась кулэ, шуо, басьтӥськыны малпай вал. Кытын, пе! Отын калык пӧлын ужано, олокинэныз но вераськыны быгато - ӧз лэзьы. Тӥни озьы. Уже интыяськыны турттӥськод - уг кельшы, дорын пукиськод - тазьы но уг яра. Йырбыдтон сярысь но уно гинэ малпаськи. Пичи сузэр-вынъёсы жаль потэмен нош асме киям кутыны турттӥсько. Мон ке ӧй луы, вань секытэз соос вылэ усёз ук: юисьёс вӧзын сютэм улозы, кырсь пӧлы выёзы. - Эля, нош та кӧтжожъёстэ ӵыжы-выжыедлы ке усьтысалыд? - Одӥг уг ке удалты, уг удалты ни, лэся. Матысь выжые но мынам ӧвӧл. Ачим музэн ик, анае одӥг нылпи гинэ вылэм. Кинэ ке луысал ке, чик малпаськытэк татысь пегӟысал ни. Зэм мынам вань на пичильтык осконэ - зэмос атайме шедьтон. Кытын улэмзэ тодӥсько. Берло дыре соин адӟиськон сярысь тросгес малпаськыны кутски ни. Тани коньдон гинэ мед сётозы, кытчы ке ветлыны кулэ шуыса пӧяло но, ачим атайме утчаны кошко. Кышкасько ик: валалоз-а меда со монэ. Уго, аслаз семьяез, нылпиосыз вань. Туала арын нош трос пиналэз вордыны, пыд йылазы султытыны капчи уг йӧты. Озьы ке но, осконэ уг кысы. Оло таяз учыре удалтоз? Ваньмыз пӧрмысал ке, мон сузэр-вынме но сьӧрам кутысал. Нош али, татчыозь чидай бере, уг сётскы ни. Сомында синкыли кисьтыса, тыш сиыса ни. Таӵе улонэз одӥг пинал но медам тодылы. Мон пиньме куртчыса витё вормемме. Сокем возьматэме потэ сюратаелы адями луэмме. Оскисько, пӧрмыто шуыса. *** Егит эшелэн улон интыез верамын ӧвӧл, нимыз но воштэмын. Но со ужпумез уг вошты. Абдрасько, кызьы та нылашлэн чиданэз тырме? Воргоронлэн но киыз ӝутӥське ук сыӵе муспотон нылашез вӧсь карыны, синвузэ поттыны. Малы соку пиналъёсты басьтоно вал? Коньдон понна гинэ-а? Тазьы курадӟыса улытозь, Элялы но пичи сузэр-вынъёсызлы нылпи юртын ӟечгес луысал, выды. Оло, мукет ӟеч семьяе сюрысалзы. Но ма карод, адӟонлэсь уг пегӟы, шуо. Табере Элялы атаеныз пумиськонлы гинэ оскон кыле на. Светлана Никитина, Удмурт кун университетын дышетскись. Конкурслы йылпумъянъёс Гожтӥскон йылпумъяськымтэ на Удмурт Республикаысь Правительство ёросъёсысь но городъёсысь администрациос пӧлын кылем арын октябре ялӥз вал 2001-тӥ арлы газет-журналъёслы гожтӥськонэз радъянъя конкурс. Нырысетӥ интыез басьтӥзы дэбесъёс. Ёрос администрацилэн йырыз Б. В. Урасинов "Новый путь" ёрос газетлы но "Байгурезь" приложенилы гожтӥськонэз ӟечгес радъян понна нимысьтыз постановление кутӥз. Ёросысь почта кусыпъёсъя ёз но редакция пӧртэм ужрадъёс чаклазы, азязы пуктэм ужпумъёсты соос азинлыко быдэстӥзы. Кылем арен ӵошатыса, 2001-тӥ арын 1-тӥ январьлы "Новый путь" газетлэн тиражез 150-лы йылӥз - ваньмыз 1950 экземпляр. Нош "Байгурезьлы" 1400 адями гожтӥськиз, кылем арын 1-тӥ январьлы 500 мурт гожтӥськемын вал. Кыкетӥ инты сётэмын Шаркан ёрос администарцилы (йырыз - А. А. Прохоров). Ёрос администрацилэн коллегиез но Депутатъёслэн кенешсылэн президиумез кылем арын августлэн пумаз огъя кенеш ортчытӥзы. Отын эскеремын вал "Вестник" ёрос газетлы но "Инвис" приложенилы гожтӥськон ужрадъёс. Калыкез дышетон но культура учреждениослы ёрос администрацилэн казнаез чотын удмурт газетлы гожтон радъямын. Куинетӥ интые потӥз Воткинск ёрос администрация (йырыз - В. С. Варламов). Со бадӟым юрттэт сётӥз "Воткинские вести" но "Удмуртская правда" газетлы гожтӥськонэз радъянын. Ёросъёсысь почта кусыпъёсъя ёзъёс пӧлын гожтӥськонъя 2001-тӥ арлы ялэм конкурсын нырысетӥ люкетаз вормисе потӥз Шаркан ёросысь почта кусыпъёсъя ёз. 1000 улӥсьлы та ёросын газет-журналлы гожтӥськемын 462 мурт. 2000-тӥ арен ӵошатыса, гожтӥськон таяз арын 13 процентлы йылӥз. Кыкетӥ интыын Воткинск ёросысь почта кусыпъёсъя ёз. Республикаысьтымы городъёс пӧлын, татын улӥсьёс тужгес но трос лыдӟисько: 1000 улӥсьлы 220 мурт гожтӥськемын газет-журналъёслы. 2000-тӥ арен ӵошатыса, тиражъёс городъя 65 процентлы йылӥзы, гуртъя - 92 процентлы. Куинетӥ интые потӥз Каракулиноысь РУПС. Таяз арын ёросын 1000 улӥсьлы 473 лыдӟись луиз, йылӥзы газет-журналъёслэн тиражъёссы но. Конкурслэн кыкетӥ люкетэзлы йылпумъянъёс лэсьтэмын луозы таяз арын августэ. Ю. Басков, Удмурт Республикаысь Печатья но иворъёсъя министерствоысь валтӥсь специалист. Люкськылӥзы музъем ужасьёс Москваын ортчиз Россиысь Крестьян (фермер) хозяйствоослэн ассоциацизылэн ЪИИ съездэз. Отчы пыриськизы шаерысьтымы но делегатъёс. Съездын фермеръёслэн 2000-тӥ арын ужамзылы йылпумъянъёс лэсьтэмын, выль ужпумъёс чакламын. Кылем арын фермер хозяйствоослэн лыдзы трослы ик ӧз йылы - секыт уж троссэ уг гочаты. Но ас кожазы ужась крестьянъёс музъемзэс одӥг миллион гектарлы паськытатыны быгатӥзы. Фермеръёсты сюлмаськытэ выт тыронэз, статус сётонэз радъян ужпумъёс. Удмуртиысь фермеръёслэн конференцизы ортчоз 29-тӥ мартэ Ижевскысь тылобурдо вордон фабрикаын. И. Артемьева. Котыртӥ-котыртӥ, вань дуннеез котыртӥ... Татарстанысь Балтаси ёросысь Сыръя гуртысь Степан Максимович Сапожниковлэн тодэ ваёнъёсыз Мон армие кошки 1911-тӥ арын сӥзьыл (соку служба куинь ар вал ини). Нуизы Дальний Востоке. Служить кари Владивостокын 11-тӥ Сибирской полкын разведчикъёслэн командирзы луыса. Куинетӥ араз висьыны кутски брюшной тифен, собере со йыр бордам но кутскиз. Куинь толэзьлэсь уногес висьыса кылли. Озьы ке но, службалэсь ӧз мозмытэ, "годен" шуизы. 1914-тӥ арын гужем шорын кутскиз Германиен ож. Милемыз котькуд минутэ дась луыны косӥзы. Шуизы: немецъёслэн корабльзы туннэ вуоз Владивосток доры. Озьы ик луиз: корабль адскиз, со кӧня ке пол гинэ ыбыны вуиз ӟуч шормуӵ вылэ, но асьме корабльёс сое котыртӥзы но выйтӥзы туж вакчи дыр куспын. Милесьтым полкмес русско-германской фронтэ келязы 23-тӥ октябре. Монэ конной разведкае выжтӥллям вылэм ни, но тифен висеменым, соосын ӵош фронтэ кошкыны ӧй вуы. Ми кошким ини соослэсь шактой берлогес (кема улысагес). Фронтэ кошкыкум, дӥсьёсме одӥг бадӟым сандыке лёгаса тырыса, пунняса кельтӥ. Со отчы ик кылиз. 25 нуналскын вуим Варшавае (Польша соку асьмелэн вал). Отын куинь нунал шутэтским. Ньылетӥ нуналаз нуизы поездэн. Куинь нуналскын потӥм наступление. Мон полклэн знамённой взводаз вал. Азьлане мыныса-мыныса, передовое потӥм. Командирмы но, пушкаосмы но уг адско ни вал, туж ӧжыт кылиськеммы. Нярак (ваньмыз) ышизы, сураськизы мукет полкъёсын. Берлогес вуизы ни командирмы но одӥг пулемётчик. Со кутскиз немецъёсты ыбылыны. Немецлэн артиллериез тае адӟиз но, одӥг пол гинэ мертаськыса, шонерак йӧттӥз. Пулемётчик ӧвӧлак гинэ луиз. Нокыӵе юрттэт луымтэысь, командирмы но пегӟемысь, ми но сьӧрлань бызим. Полкмы пушкысь мон огнам гинэ кылиськем вал, лэся, ини. Котырам кӧня ке мурт гинэ кылиллям мукет полкъёсысь. Немец пала мыныкумы, мон весь кытын муртъёс (адямиос) ӧвӧл, отчы гинэ бызьыса мынӥсько вал, немец уго уно муртъёс шоры гинэ ыбылэ вал: то снарядэн, то пулемётэн. Соин гинэ тӥни мыным ӧз йӧты. Куинь нунал мында асьме полкез утчаса ветлӥ. Мырдэм шедьтӥ. Отысен милесьтым одӥг ротамес лэзизы тӧл вукоез басьтыны: отын немецъёс вал. Ми, тӧл вуко доры кык иськем вуытэк, узьым бусы шорысь каналын кыллим ог ӝыны час. Собере ротной командирмы "вперёд" команда сётӥз но, ми перебежкаен кошким тӧл вуко пала. Соку немецъёс кутскизы ыбылыны. Мынон-мынон сяменымы ми пӧлысь кин ке вазиз: "Эй, эшъёс, командирмы асьме пӧлын ӧвӧл!" Ми турттӥськом вал ини берлань берытскыны, соку ротамылэн командирезлэн юрттӥсез шуиз: "Мон командир интые, асьмеос всё равно улэп ум кыле ни". Нош бызим тӧл вуко пала. Ӧжыт гинэ мынӥм но, командирмы сӧсыр луиз. Солэсь чельызэ одӥг солдатмы биниз. Кӧня ке улыса, командирмылэн нырпысыяз пуля йӧтыса йыртӥз потӥз, лэся, - ӧз но выры ни. Собере ми нярак бызим берлань, кинлэн кытчы мылыз потэ. Мон паллян пал флангын вал но бызи эшшо но палэнэ бусые огнам. Нош ик полкез шедьтӥм но одӥг нунал шутэтским фронт мышкын. Милемлы нош пополнение сётӥзы, еврейёсты но латышъёсты, огпол но пыӵал кутылымтэ муртъёсты. Уин милемыз лэзизы передовое, нокыӵе сухой паёктэк (няньтэк но сухаритэк), винтовкалы патронъёстэк. Мынам гинэ вань вал вить патронэ запасэз. Передовойын одӥг сутка кыллим но, кыкетӥ уяз гинэ сухари ваизы. Интыяським пичи лапас доры окопе. Командирмы юаз: "Кин мыноз бур пал фланге патронлы? Отын вань шуо" Мон мыноно кариськи. Потӥ гинэ окопысь - немецъёс кутскизы ыбылыны. Мон чаляк лапас сьӧры кожи. Отысен мыным ӧз ни йӧты. Вещевой мешок шедьтӥ. Отын нянь, бамкышет но бритва вань вал. Мон няньзэ гинэ басьтӥ аслам сумкаям но кошки перебежкаен бур фланг пала. Одӥгетӥ выдӥ бадӟым сьӧд скал сьӧры, мыным медаз йӧты шуыса. Собере, немецъёс палангес ини, окопез адӟи но отчы бызьыса пыри. Отын ӵапак правофланговойёслэн командирзы рахатланыса (гань-гань) кылле вал. Соослэн но патронзы ӧвӧл вылэм. Мон нош интыен-интыен бызьыса, кытӥ-отӥ нюжтӥськыса вуи асьме окопамы ик. Отын юлтошъёслы сётъяй няньме но тамакме, соос туж шумпотӥзы. Окопын кылльыкум ини мон адӟисько немецез, со весь лопаткаен гудӟе но сюй куя. Умой гинэ мертаса ыби, но солы ӧз йӧты. Огполаз эшшо ӟечгес мертаса ыби но, со больше ӧз ни адскы. Мукет нуналаз ӵукна милесьтым паллян палангес немецъёс наступать каризы но, куро кабанэз ӝуатыса, асьме пала пыризы. Соку ӵынкыт вал. Ӧжыт улыса, милям пумитамы но лыктыны кутскизы немецъёс, ура карыса. Мон куинь патрон пӧлысь одӥгзэ ыби ачим, одӥгзэ сётӥ латыш пилы, но со ыбыны но уг тод вылэм, берен аслым ик сётӥз. Мон огпол гинэ ыбемен но немецъёс паллян пала пегӟизы. Ӧжыт улыса, нош ик мукет немецъёс люр-ляр потӥзы ми шоры. Мон та кык кылем патронме но ыби, немецъёс нош ик паллян пала кошкизы. Ӵынкытэн соос умой уг но адско вал. Соку немецъёс ми пумитэ ӧз ни лыктэ. Нош мышкамы котырак немецъёс вылӥллям. Куазь югыт вал ини. Кема ик ӧм улэ - мышласянь одӥг немец лыктэ ми доры. Окопе тэтчиз но куро пушкы пегӟем юлтошъёсты штыкеныз бышкаса утчаны кутскиз. Монэ ӧз шӧды вал али. Соку мон немецез шинель пумтӥз кыски но, монэ адӟиз. Мон юлтошъёсме потыны косӥ куро пушкысь. Озьыен тӥни, 1914-тӥ арын 23-тӥ декабре вал кадь, сюрим пленэ. Милемыз Германия пала нуизы. Одӥг гуртын умой сапегъёсмес вошъязы асьсэлэн начар сапегъёсынызы. Мон сапег тышме сюе лёгыса, кырыжтыса улӥ но, мынэсьтым ӧз басьтэ, тышкыз бытмем (бырем, пӧсьтэм) вылэм шуыса. Милемыз нуизы Польшаысь Лович городысь одӥг костёлэ (черке). Кык нунал отын кыллим. Куиньметӥ нуналаз гинэ одӥг кружка болтушка сётӥзы но станцие нуизы. Отысен келязы поездэн Германие. Сборной пунктэ ваським, землянкаосы. Одӥг одеял гинэ сётӥзы. Нуналлы огпол гинэ шыд, пичи нянь... Отысен лэзизы ини турлы интыосы: мон конюшняын но ужай. Улӥ баракын. Соку куинь нуналлы сётэм няньме педло потон сьӧртӥ (вискын) лушказы. Мон туж начарми, пыд йылам сылыны но уг ни быгатӥськы вал, ньыль пыдын ветлыны кутски. Отысен лэзизы Польша дорысь Котовицы городэ эгыр поттон шахтае. Отын ужай одӥг ар. Умой сюдӥзы. Мон куаи соку. Берло ини начар сюдыны кутскизы. Шыдзы но пож ву гинэ луиз. Уин ужасьёсын ми забастовка карыны кенешим. Нокинэ но ӧм лэзе ужаны мыныны. Лушкем гинэ учкыса ветлӥськом но вераськом, ужаны кутскид ке, вииськом шуыса. Ужамтэысьтымы начальникъёс ми доры васько но васько. Самой бадӟым начальниклы верамы, милемыз туж начар сюдо шуыса. Со шуиз: "Ойдо кутске ужаны. Сиён умой луоз, бертыса ик адӟоды". Зэм ик но, собере ик ӝукъёсын сюдыны кутскизы. Кема ик ӧз ортчы, виси золотухаен, Котовицыын ик кылли госпитальын куинь но ӝыны толэзь. Собере лэзизы Ландсдорф лагере. Отысен сюри одӥг гуртэ помещик доры ужаны. Одӥг ар мында улӥ. Отысен мон мукет немец дорын ужась кык пленнойёсын тодматски. Соос мукет гурт пумын уло вал. Одӥгез офицер монэным кенешиз пегӟыны. Полячкаос пыр лушкем лэзиз со мыным кык гожтэт. Берло гожтэтаз верам, ку но кытчы мыныса валче луыны план (чертёжен). Басьтыны косэм пичияк нянь, сылал, шырпы (спичка) но пурт. Мон Ляшкин юлтош доры пыри но верай (соку со пыдыз висьыса кылле вал), пегӟыса кошкисько, пока, ӟеч лу шуыса. Со бӧрдыса кылиз. Планысь чертёжъя мон, со офицерлэн кузёезлэн гид сигаз тубыса, куро пушкы пыри. Отын кылльыку, немец кузё аслаз пленнойёсыныз мажсаськыса бертӥзы но сиськыны пыризы. Ӧжыт улыса, офицер пленноед, Николаед, мынэсьтым пырем капкаме пушласянь пунняз но мон доры тубиз, но ми кыкнамы куро пушкын пукиськом. Соку ини ӝыт вал. Ӧжыт гинэ улӥм но кылӥськом: "Николай! Николай!" Вал кыткыса кошкизы милемыз утчаны. Бертӥзы уин гинэ. Нош ми весь кыллиськом куро пушкын гид сигын. Кыкетӥ нуналаз но пуким отын. Кошким уин гинэ. Озьы ветлӥм 19 сутка. Польша граница доры вуэм бере, нюлэскын дӥсьмес куасьтыса пукиськом вал. Николай, пегаса ветлыса тыгылеменыз (жадеменыз), лесник азе потэм но сюрем. Озьыен, мон но сюри ини. Лесник милемыз одӥг пичи гинэ городэ нуиз. Отысен Бейтуп городэ келязы. Отын мукет пленнойёс но уно вал. Допрос каризы но берен конвоен нуизы азьло интые, кытысен пегӟимы. Та помещиклэсь сахар заводэ ужась куриллям но, со монэ нош пегӟо шуыса лэзиз. Отын чукиндэр бытмытозь ужай. Собере нош лагере нуизы. Отысен нош мукет сахар заводын ужай. Уж бытмем бере, нош ик лагере ваё. Собере Австрия граница дорысь эгыр шахтае келяло. Со шахтаын мон грузчик луыса, эгыр комокъёсты кузь секыт корт тазэ тырыса, вагонеткаосты бушатъясько вал. Нош эгырез одӥг немец пыргытъяса мыным поттылыны дася. Одӥг пол со монэ эгырзэ бызьылыса поттаны косэ, но мон юри каллен вырыны кутски. Со, мыным вожез потыса, эгырез лапчыса тазам тырыкум, тыбырам бодыен шуккиз. Нош мон... Соку ик куиньметӥзэ но шуккиз но, эгыр тырон тазэн вань кужмысьтым пунэмзэ сётӥ. Со усыкмыса ик кылиз. Лампаме но дӥсьме басьтӥ но сменаысь бертӥсьёсын ӵош потӥ шахтаысь. Со понна монэ кык час бызьылытӥзы наказать карыса. Собере мон пыдме паровой труба борды юри кот кышет пыр сутӥ но, монэ мозмытӥзы. Бурмоно кадь луэ ке, нош сутӥсько. Озьы мон кык арнялэсь кема ӧй ни ужа. Кема ӧй ужа, пегӟыса потӥ Австрие. Шахтаысь потыса, фонарьме сдавать кари но, муртъёс пушкытӥ мыныса берытски, берен шахтаысь потон пала дыртыса кошки. А конвойёс строе султытон доры воксё ӧй мыны. Собере бызи. Мон сьӧры одӥг караульной но черекъяса бызе вал, но со кылиз, пересь маке вал, дыр. Ӝужыт куймалэсь (заборлэсь) лапеггес шорзэ шедьтӥ но мырдэм сузьыса тэтчыса потӥ. Чугун сюрес вамен выжыса шутэтски, собере кошки Австрие. Нокин но ӧз ни учыра. Границаез ву вамен потоно вал. Ву дурысь кык иськем мындаын мон шер гинэ нюлэскын картофка пыжыса пукисько вал. Нош нюлэс дурын бусыын одӥг пленной усыяса ветлэ вылэм ошакен, и со мынэсьтым ӵын поттэмез адӟем но лыктӥз. (Мон копак гольык пыд тяпаен вал, апрель толэзе кезьыт улэмен, котэн мынам пыды номыре но уг шӧды ни вал. Картофка пыжон дурам лӧськаса но мар шунтӥ пыдме). Та немец, дыр, шуыса, туж кышкай вал. Ми соин вераським но, тодӥ: со серб вылэм. Юай Австрие потыны сюрес, со мыным валэктӥз: - Ву вамен потыны выж вань, но только мынам немец кузёелэн коркаез шорын. Пуныез шӧдӥз ке, тонэ кутозы но виёзы. Тон солэсь юртсэ кыдёкетӥ котыртыса, туж каллен гинэ мын выж доры. Со выж вылтӥ немецъёс валэн но ветло, соос шоры эн учыра. Мон та серблэн верамезъя ик лэсьтӥ. Пуны но ӧз шӧды. Соку 10-11 час уин, пилемо но туж пеймыт вал. Мон выж вылтӥ шур вамен потӥ. Шур сопалан - Австрия. Одӥг гуртэ пыри. Отын рекрутъёс урамын асьсэ сямен кырӟаса ветло вал. Кӧня ке коркан тыл вал но, укноязы йыгаса, нянь курай. Собере кошки станцие. Отын поездэ пуксьыны луоз-а меда шуыса ветлӥ-ветлӥ, пуксьыны ӧй быгаты. Польшаысь Краков городэ мыно шуисько вал. Поездэ пуксьыны ӧй ни дӥсьты, кондукторъёс туж уно ветло вал. Соин мон бертон пала нюлэскы ог ӝыны иськеме кошки, а то куазь люгыт луэ вал ини. Отын лумбыт кылли. Ӝыт луэм бере потӥ станция дорысь кӧня ке коркаос доры. Одӥгаз пырыса сиён кури. Пересь кышно сётӥз бадӟым шорем нянь и кружка йӧл. Сое сиыса пукыкум, пушкысь бӧльмеысь (комнатаысь) потӥз бадӟым мыйыко туж таза пиосмурт. Мон солэсь туж кышкай, нош ик кутозы ни табере шуыса. Но со просто монэным тодматскиз. Мон юай, Кракове кыдёкын-а мынонэз. 40 иськемын, нюлэс пыр потыса, шуиз. Мон пудэн мыно ни шуисько вал но, пыд туж вӧсь луэмысь, станцие мыноно кариськи. Одӥг кондуктор мыным вераз: "Татын витьыса ул али пока, ӝоген поезд вуоз, пуксёд но кошкод, тонэн ӵош луоз тани та офицер", - со возьматӥз мон дорынгес ик пукись офицер шоры. Я ини, Краков пала мынӥськом. Вуим одӥг бадӟым станцие. Отын та офицеред но, мукетъёс но васькизы перрон вылэ калгыны. Станциын туж уно вал калык. Сомында муртлы мон пайми но потыса адӟо али шуи. Вагонысь васьки гинэ но, монэ соку ик кутӥзы солдатъёс, австро-венгер армилэн солдатъёсыз. Мон кадь муртъёсты соос туж уно кутӥллям вылэм ини, и милемыз, нярак огазе люкаса, со станциын куинь нунал возизы на. Ӧжыт ужатӥзы но. Табере Восток пала нуизы, военнопленнойёслэн лагерязы. Отын мон нош куинь толэзь мында улӥ. Ужатӥзы пӧртэм интыын. Сиён весь килька чорыг сёто вал. Огпол мон туж уно кезьыт ву юи, сю куасьмемен. Кезьыт пыӵаз но, кутски висьыны. Толэзь мында кылли больницаын. Собере ини Россиен но Австро-Венгриен военнопленнойёсын ваче вошъяськон кутскиз. Та вал 1918-тӥ арын июль-августэ. Мон висеменым азьло бертӥсьёслэн партиязы сюри. Ми бере офицеръёс бертоно вал. Милемыз Россие ваизы, куштӥзы Орша станцие. Отысен пыртӥзы асьме пала бертӥсь составлэн вагоназ. Ваизы Мыценское городэ и нуизы лагере, карантинэ. Отын кык арня возизы. Кӧня гинэ муртъёсты, одӥг уездэ бертӥсьёсыз, ваньзэ ӵош лэзьыны одӥг документ гожъязы. Мон Москва пыр ӧй берты. Отын, пе, али сюй гинэ сиё шуэмысьтызы кошки Брянск пыр. Отысен Казане бертыны весяк ӧз луы, малы ке шуоно, поезд Шикран станцие гинэ вуиз (Чувашиын). Солэн та палаз тӧдьыос жугисько вылэм али. Милемлы пудэн бертыны тупаз ини. Чебоксарын Волга вамен потто шуыса веразы но, кошким отчы. Мынӥм нуналэн ӝыны, вуиськом вал ини, куать иськем гинэ мынон кылем вал, но пумитамы сюрем муртъёс веразы: Волга вамен потыны уг ни луы, тӧдьыос-а, мар-а, пе, ыбыло. Ми табереяз со Шикран станция дортӥгес ик чугун сюрес вамен потыса кошким лымшор пала. Свияжскын ыбылӥськем куараос кылӥсько вал, и ми, палэнэтӥ котырскыса, Волга доры потыны турттӥськом вал но, тӧдьыос шоры учырамы. Одӥг гурт дортӥ ортчыку, тӧдьыослэн ньыль солдатсы, милемыз ньыльнамес ик кутыса, начальниксы доры штабе нуизы. Одӥг муртмес пыртӥзы, документэз басьтыса ӧжыт допрос каризы но лэзизы: котькытчы мынэ ойдо, пе. Ваським Волга шур дуре. Отын сылэ вал одӥг бадӟым пароход, но со ӝоген кошкоз ини, нокинэ но пуктоно ӧвӧл шуизы. Ву дурысь адӟим пыжез, но солэн полысъёсыз ӧй вал. Ветлон-ветлон сямен ми доры вуиз одӥг ӟуч, со ик ваиз кык поръян (полыс) и милемыз поттӥз. Волга тапала потэм бере, одӥг гуртэ пырыса кӧлӥм. Ӵукнаяз кошким нош ик пудэн Арск пала, кык нуналскын отчы вуим. Возьматскыны мынӥм Горд Армилэн комиссарез доры. Отысь записка басьтытэк, кӧлыны пырыны уг лэзё нокин доры но. Комиссар записка сётытэк возиз ог кык час мында. "Ойдо Красной Армие мобилизоваться каре", - шуэ со. Комиссар но, солэн кышноез но полякъёс вал, куспазы поляк сямен верасько. Кышноез шуэ: "Ойдо сёт ини записка. Адӟы, кыӵе соос жадиллям ни". (Мон поляк сямен валасько вал ини соку.) Собере гинэ картэз записка гожтыса сётӥз. Ми отысь потӥм но одӥг татарин доры пырим кӧлыны. Ӵукнаяз нош ик кошким пудэн Кильмезысь ӟуч пиен. Карадуван вуко дортӥ потыса вуимы Дюрык Серма гуртэ. Отын кӧлӥм. Нош ик ӵукнаяз потӥм но лымшор вадес вуим Ӟаные (Средний Кушкетэ), пырим Наталля (бадӟым агаелэн нылыз) доры. Со ӵапак курег пуз пуштыса пуке вал. Монэ адӟиз но шуэ: "Ма, Сьтапан, тон, лэся, ук". Отын умой гинэ сиським, арак дюим (юим), и ӵукнаяз Тимофей валзэ кыткыса ик монэ но ӟуч пиез ваиз доре. Озьыен тӥни, сентябрьлэн 23-аз 1918-тӥ арын бертыса пыри дӥне. Тимофей капкаез усьтӥз но черектӥз: "Степанды бертӥз!" Атай потӥз. Со пересьмем, какшам (жуммем), губырмем. Сизьым ар улыса бертӥ ке но, одӥг толэзь но ӧз тырмы дӥньын (дорын) улэмелы. Монэ сельсоветэн кивалтыны каризы. Соку самой кышкыт дыр вал. Колчакъёс та пала ик вуизы. Сельсовет председательын укмыс толэзь ужай. Горд Армие монэ ӧз басьтэ, военнопленнойын улэм мурт шуыса. Сапожников Яким Степановичлэн аслаз атаез Степан Максимович сярысь тодэ ваёнысьтыз (нылызлы гожтэмез). Та дневникез мон ачим бабаедлэсь (песятаедлэсь) юалляськыса гожъяй. Тазалыкез лябӟыны кутскемысь, ас улонзэ верамез потӥз. Со вераса-вераса пуке, мон сьӧраз гожъяса мынӥ. Солэсь историоссэ тӥ но, тӥляд нылпиосты но азьпалан мед тодозы шуыса гожъяй. Тынад бабаед Степан Максимович вордске куанер крестьян семьяын. Будэ со чебер шоро-куспо ӝуждалаё воргорон луыса. Туж ужась, чырткем но кыллы лэчыт луэ. Ноку но лушкаськытэк, муртлы секыт карытэк, общество понна тырше. 1931-тӥ аре колхозэ пыре. Колхозлы "Труд" ним сёто. Колхозэ пырыкуз, одӥг валзэ сиес тӥрлыкъёсын но уробоен валче сётэ. Колхозын сое полеводэ быръё. Толалтэ пӧртэм ужъёсыз быдэсъя. Колхозын вал гид лэсьтэмзы бере, бабаед конюх луыса ужаны кутске. 1941-тӥ аре война кутске. Степан Максимовичез, аресэз ортчемен, оже уг ни басьто. Сое Сыръя гуртын валъёслы осеменатор пунктын ужаны юнмато. Ожмаськон аръёсы колхозэ фуражез кельтытэк государстволы келято вал. Озьы уно валъёс сютэмен кулэмысь, Сапожников Степан Максимовичез тюрьмае пытсазы. Амнистие сюрыса, ар но ӝыны пукемез бере, бабаед бертӥз. Нош ик колхозын рядовой луыса ужа. 1951-тӥ арын, мон армие кошкем бере, бабайдэ юнмато гуртын тылпуэз чаклан уже. Отын тырше пенсие потытозь. Бабаед улӥз пересьмытозяз. 82 арес дыръяз, 1971-тӥ арын 15-тӥ ноябре кулӥз ракен туж курадӟыса висьыса. *** Мон, Нина Якимовна Крючкова, Степан Максимовичлэн внучкаез, пичи ке но вал соку, ӧй вунэты на бабаелэсь (песятаелэсь) тусбуйзэ. Тодам вайылӥсько монэ лыдӟыны, гожъяны дышетэмзэ. Финн кыллы но дышетыны выриз. Пиналъёсты яратэ вал, сюлмаськиз милемыз дышетон-визьмоян сярысь. Со кулыку, мыным куать арес гинэ ке но вал, али ке но син азям уйбыт коросэз вӧзын со шоры учкыса пукеме. Степан бабае улон-вылон сюресэныз вунэтонтэм пытьы кельтӥз ӵыжы-выжыосаз. Визьмо атае понна шумпотыса, тау карыса, ӵем лыдӟылӥсько гожъям тодэ ваёнъёсыз. Бабаелэн дневникез мыным история но этимология ласянь туж дуно документ луэ. С. М. Сапожников. Можгалан пумиськонъёс Кылем арня вискын Можгалан ортчиз С. А. Пантюхинлэн выль удыс борды кутскемезлы сӥзем кенеш. Алигес со быръёнъёсын вормыса луиз администрацилэн йырыз. Кенешлэн ужаз пыриськиз Удмуртилэн Президентэз Александр Волков. Со сюлмысь ӟечкылаз Сергей Пантюхинэз бадӟым вормонэныз но ужаз азинсконъёс сӥзиз. Ужрад бере А. Волков тодматскиз городысь 159 номеро аптекаез но 825 интыен школаез лэсьтон ужъёслэн кызьы мынэменызы. Тазалыкез утёнъя министерствоысь Аптекаосъя управленилэн кивалтӥсезлэн Николай Казюлькинлэн ивортэмезъя, огъя 520 квадрат метръем аптека йылаз-пумаз вуттэмын ини, та нуналъёсы возьмало кун комиссиез. Выль юртэз апрельлэн шораз усьтыны чаклало. Аптекаын, дась эмъюмъёсын вузкарем сяна, дасялозы городысь но ёросысь больницаослы пӧртэм укол суретъёс. Отын ужалозы массаж лэсьтон но укол пуктылон нимысьтыз кабинетъёс, нош туэ дежурство нуись врач висисьёсты но эскероз. Школаез лэсьтон ужъёс но чакламъя азинско. Соосты нырысетӥ сентябрёзь йылпумъяны малпало. Александр Волков та ужез ялан син азяз возьыны кыл сётӥз. Президент вуылӥз акциосын "Свет" огазеяськонэ но. Кемалась ик ӧвӧл отын усьтӥськиз пияла посуда лэсьтонъя выль цех. Со араз 110 миллион пияла тӥрлык поттыны чакла. Цехын пуктэмын туала куронъёслы тупась выль оборудование. Сюлмаськиллям ужасьёс сярысь но, вань шутэтскон, дӥсь возён, мисьтӥськон комнатаос. Та цехе лыктыны мылкыд карисьёс туж трос, уго татын тыршисьёслэн уждунзы толэзяз ог ньыль-куать сюрс манетозь вуэ. "Свет" заводлэн кивалтӥсезлы Владимир Мохначевлы Удмуртилэн Президентэз азьланяз эшшо но бадӟым вормонъёс басьтыны сӥзиз. Удмурт Республикалэн Президентэзлэн но Правительстволэн пресс-службазы. Чаклаське - нылпиос Кӧтсюман уг вала кышкытэз Котькуд нунал Андрей сайкалляз кырсь коркан, юонэн суро пыкмем зын пӧлын. Куинь аресъем Вася выныз нош дугдыны валатэк бӧрдэ но бӧрдэ. Сиён курыса, синъёсыз ик тӧрнамын ни мискиньлэн. Андрейлэсь но соку гинэ вордӥськем Василэсь анайзэ атайзы кулэ ӧз кары, мукет кышномурт доры кошкиз. Тӥни соку анайзы юыны кутскиз, дораз вайылӥз кудӟем воргоронъёсты. Озьы та семьялэн улон интыез пумен юон коркалы пӧрмиз... Андрей дас кык аресаз мынэ ни вал. Дышетскыны солы секыт йӧтылӥз. Но эшъёсызлэсь бере кылиз ке но, со котьку тыршиз урокъёссэ дасяны. Школа бере бызьыса дораз бертылӥз: нырысь ик Васиез сюдӥз, собере урокъёс борды басьтӥськылӥз. Нош доразы юон дыр кутске ке, Андрей Васяен город урамъёстӥ калтыртылӥзы. Бадӟым братэз пичи пилы атай интыын вал. Васи туж яратӥз Андреез, со кадь ик луэмез потӥз. Андрей нош пичи вынзэ котьку утьыны тыршылӥз. Буш ӟенеликъёс бича но я шоколад, я мороженой басьтэ солы. Выжыкылъёс но мадьылӥз. Вторнике урокъёс бере Андрей эшъёсыныз котьку сямен вокзалэ мынӥз. Пеймыт урамъёсты тыллэн югдэмез мальдытӥз. Адямиос я поездэ, я поездысь дырто. Вокзалын вӧлскемын пыжиськем зын. Пиос татчы ӵем гинэ ветлӥзы: куд-ог дыръя лушкаськылӥзы, куд-ог дыръя кураськылӥзы. - Андрей, ойдо котырском, - ӧтиз пияшез тужгес но матысь эшез Вова. Кызь-куамын минут ортчыса, соос выльысь эшъёссы пӧлын вал ни. Ушъяськизы лушкам коньдон пуйыен, пиос сое бушатыса но вуттӥллям. - О, шеф лыктэ! - пиослэн синъёссы ӧс пала берытскизы. Колян, со ик Братан, пырак пиос пала вамыштӥз. Солы туж кельше вал аслэсьтыз пичиосын кивалтыны. Школа бере Колян нырысь ик вокзалэ вамыштылӥз, собере ини юлтошъёсыз доры дыртылӥз: тасоызлэн мотоциклъёссы, машинаоссы вань. - Привет! - вазиськиз со пиослы. - Здорово, Колян! Кыӵе ужъёс? - Ваньмызлэсь умой. Нош тӥляд туннэлы кыӵе малпанъёс? - Ум тодӥське. Нуналыз туннэ кыӵе ке но удалтымтэ, - вазиськиз мӧзмыса сылӥсь Андрей. - Удалтымтэ, пе. Тӥни ук кияд коньдон пуйы. Мар кулэ на эшшо? Туннэ кема уг улы, ворттылыны мынӥськом. Ойдолэ, ураме потом-а, мар-а? Пиналъёс ваньзы ӵош потӥзы станцие. Лобӟыса сямен, вӧзтӥзы ортчиз поезд. - Пиос, нош тӥ тодӥськоды-а, алигес одӥгез мынам тодмое коньдонлы споръяськиз. Юэмез вал. Мынӥсь поезд азьын ик со рельсаос вамен потӥз. Ойдолэ асьмеос но эскером, - ӵектӥз Колян. Пумитаз вазись ӧз луы, йырзы дуногес уго. - Кышкаськоды-а, мар-а? Сю манет сёто кин поезд азьтӥ потоз. Я, кин дӥсьтоз? Ӧвӧл сыӵеез? Соку мон кошки. Колян берытскиз. Пыд улысьтыз выль усем лымыез мыд-мыд пала пазяса, со пеймытэ вамыштӥз. - Возьма! - шуак кеськиз Андрей но Колян доры бызиз. - Ойдо мон тонэныд споръясько. - Хм, соку вамыштом выж доры, - кезьыт синъёсын мертаз пияшез шеф. - Кытын пиос? Адӟись кулэ луоз. Вовка, лык татчы! Поездэз возьмаса сылӥсьёс ӧз но кылэ, ӧз но адӟе пиослэсь мар дауртэмзэс. Нош таосыз калыклэсь но выжлэсь палэнэгес кариськизы - нокинлэн син шораз медаз йӧтэ. Колян сю манет лыдъяз, вӧзаз кызь манет йылтӥз на: кышкасьтэм луэмед понна, пе. - Коньдонзэ сёто берло, поезд азьтӥ быземед бере. Тани кылӥськиз поезд куара, собере адӟиськизы тылъёс. Пумен матэ но матэ вуо соос, тани-тани вӧзтӥ ортчозы. Андрей платформаысь тэтчиз но, кӧня ке секунд куспын нырысетӥ рельса вамен потӥз, кыкетӥез вылэ лёгиськиз гинэ но, гылӟыса корт вылэ гаӵолскиз. - Андрей, ӝоггес! - кесяськизы пиос. - А-н-д-р-ей! - Вовалэсь куаразэ согизы вагонъёслэн дыбыртэмзы. Поезд укыр ӝог ветлэ вылэм. Машинист валаса но ӧз вуы мар луэмез. *** Пичи Василэн ымнырыз нош ик тӧрнамын вал. Таяз учыре пияш кӧт сюманлэсь ӧз бӧрды, синвуосын пылатӥз яратоно Андреезлэсь берпум сюрессэ. Шайгу вӧзын сылӥсь Васи доры Вовик матэктӥз но пияшлэсь шымырскем мугорзэ ӟыгыртӥз. - Васи, мон но тонэ Андрей сямен ик яратӥсько. Оскы, мон тынад бадӟым братэд луо. - Озьы шуыса, со пиёклэсь пасяськем керттэм изьызэ вешам кариз но, кырсь курткаезлэн кисыяз лушкемак сю кызь манет коньдон понӥз. Авторлэсь. Та учыр малпамын ӧвӧл. Ӟеч кӧл, Андрей! Изён интыед небыт медло. Вероника Кибардина, Удмурт кун университетын дышетскись. Наталь Оскод, оло, уд Шудтэм шумпотонэ Секыт висеменыз кузпалы улонысь туж вазь кошкиз. Весь ас поннам малпаськыса, куректыса но бӧрдыса, йыры сураськиз, лэся. Кузпалы ӝытъёсы бертылыны кутскиз. Мон солы туж шумпотӥ. Бертэ ке, сюдӥсько, мар ужамзэ юасько, со но милесьтым кыӵе улэм-вылэммес юа. Кузпалме адӟон понна, гурт ужъёсты ӝытазе куалекъяса лэсьтӥсько ни вал, собере чалякгес койка вылэ выдӥсько. Йырме шобрет улэ ватӥсько ке, со бертэ ни. "Шудтэм шумпотонэ" кыстӥськиз толэзьлэсь ятыр. Одӥг пол вераськеммес вӧзам кӧлӥсь пие кылэм. Атаезлэсь нимзэ кылыса кесяськыса бӧрдыны кутскиз. Бӧрдэмысьтыз кузпалылэн анаез но сайказ. Ваньзэ кылзэмез бере картэлэсь брюки бордысьтыз езэ басьтӥз но йыр улам понӥз. Ӵуказеяз со ӧз вуы ни. Нош уйшор котырын корка бордамы кин ке зырен туж зол шуккиз кадь: жингыртӥзы укно пиялаос, зурказ корка. Ми пиеным визьтэммыса пуксим, укно шоры учкыны ум дӥсьтӥське, пиялаос ӧвӧл, дыр, шуыса. Кӧня ке улыса учки ик, укно пиялаос огез но сӧриськемын ӧвӧл. Пиеным ӵукнаозь кӧлыны ӧм быгатэ ни. Нош семьяос нокин номыр кылӥллямтэ. Озьы пумиськонъёсмы дугдӥзы. Кӧня ке дыр ортчыса, та учыр сярысь врачлэсь юай: мар монэным луысал, шуисько, кема дыр ӵоже озьы кыстӥськысал ке. Со вакчияк вераз: шузимысалыд, пе. Табере мон мӧйыми ни. Пие кемалась кузпалъяськемын. Ӟукыртыса ке но, улыны вырисько. Огезлы гинэ паймисько, ма гинэ уг луы адямиен, дунне вылын улытозяз! В. Васильева. Пичи Пурга черкогурт. Наталь Быземед потэ-а, апие? Секыт ик та улонын нылмуртлы. Дышетсконо, дыраз бызьыны но вуттоно, уж шедьтоно, нылпи но вайыны бер кылёно ӧвӧл... Номыр уд шу, капчи ӧвӧл туала кышномуртлы, эшшо ке вӧзад номыре валасьтэм картэд. Соин ик, оло, туала пинал нылъёслэсь ӵем но ӵем кылоно луэ: - Уг бызьы, ас поннам уло. Оген йырын капчигес улыны. Шузиос мед бызёзы... Таӵе верамъёсты кылыса тодам лыкто вашкалаослэн улон вакытъёссы сярысь веранъёс. Со дыре уго кышномуртлэсь уг ик юало вал, потэ-а, уг-а солэн быземез, кельше-а кузпалыз. Курасьёс лыкто - нылдэ сёт. Сыӵе ини адӟонэз вылэм нылмуртлэн. Али нош ваньмыз чылкак пумит берыктӥське кадь. Шуо, быдэс дуннеын адямиослэн лыдзы нуналысь нуналэ ичиёме: нылпиос ӧжыт вордско, калык "пересьме", котыр улос кырсёме, аляло пӧртэм висёнъёс, пуромо ожъёс. Шуг-секытъёс зӥбемен ик. Туала кышномуртлэн семья сярысь валанэз но воштӥське. Тани Англиын та пумысен юалляськон ортчытӥллям. Тодмо луэм, 25-35 аресъем вить нылмурт пӧлысь куинез оген улонэз, пе, гажа, бызьыны, эшшо ик нылпи вордыны уг ик малпа. Ужез но, коньдон поттонэз соос котьмалэсь вылӥ дунъяллям. Англия асьмелы кыдёкын, озьы малпасьёс дорамы уз пумиське, шуоз кин ке. Озьы ик вылымтэ со. Уксё тырмымтэен, секыт улонэз ас вылазы "утчаса", нылмуртъёс бызьыны, пинал вайыны, сое будэтыны уг дӥсьто ни. Отысь ик потэ нылпиослэн ӧжыт лыдзы. Д. Дженкинс психолог верамъя, вакчи дыр куспын егит нылъёслэн улон шоры учконзы чылкак мукет луиз:"Анайёссы соослэн чакласькизы, уксёзэс асьсэлы, нылпиоссылы тырмытыны тыршизы, нош "выль нылкышноос" асьсэ понна гинэ уксёзэс быдтыны мылкыд каро, асьсэ кулэлыкъёссэс гинэ лыдэ басьто". Тодосчиос таӵе нылкышноослы ним но малпаллям ни - "сасси". Та кыл огдыре "огнам, визьмо, быгатӥсь пинал" шуэмез возьматэ. Уг тодӥськы, шудо карозы-а меда та "выль нылкышноос" котыр улонмес. Оло, песянайёссылэсь, анайёссылэсь ик сюрессэс быръёно вал? Асьмеды гинэ тодыса улӥм ке, азьланяз дым-дым огнамы ум кыле меда?! Уг тодӥськы, мар бордысь потэ егит нылъёслэн улон шоры тазьы учконзы: анайлэн данэз быре яке секыт улон озьы каре? Котьма ке но, мон ачим ваньмызлэсь вылӥе пуктӥсько Анаез. Со бордысь ук ваньмыз кутскон басьтэ: улон но, яратон но, ог- огедлы юрттон но, калыктэ гажан но. Калыкын шуо: "Инмар котькуд улэп макелы парзэ кылдытэм, адямилэн но одно парез мед луоз..." "Выль нылкышноослэн" малпанъёсынызы соглаш уг луиськы бере, мыным таиз веран визьмолэсь но визьмо кадь потэ. Сюлмаськись анай, ушъямон кышно - та кылъёс улонысьтымы ноку но медаз ыше. Адямилэн, калыклэн, кунлэн визьмыз адӟиськоз анаез, кышномуртэз дунъямез но данъямез бордысь. Соин ик, эшъёсы пӧлысь кин ке но бызьыны дасяське ке, мон сюлмысьтым шумпотӥсько со понна. Аслам нош мылкыды поръя: "Улон азьланьске. Яратон вань, вань..." Е. Никитина, Удмурт кун университетын дышетскись. Полиомиелит котыртӥмы медам берга Тазалыкез утёнъя министр С. Г. Шадрин но Удмурт Республикаысь санитарияя валтӥсь врач Н. А. Забродин шаерамы улӥсьёслы вазиськонэз потӥзы. Полиомиелит - секыт висён, гожтэмын вазиськонын. Пичи пиналэз со улытозязлы сӧсыр кельтыны, оло нош быдтыны но быгатоз. Полиомиелитлы эпидемия ялон вакытъёс ортчизы. Берло аръёсы Россиын но, Удмуртиын но солэсь курадӟисьёс ӧй вал. Но та лек вирус выльысь аляны быгатоз. Со уката ик пуромоз каньылэн ожъёс мынӥсь интыосын. Нош со палась вуэмъёсын ӵош капчиен вӧлмыны быгатоз быдэс Россие, озьы ик шаерамы но. Соин ик кӧшкемыт адӟонлэсь утиськыны быгатом прививка пуктыса гинэ. Полиомиелитлы пумит вакцина дунне вылысь сю сюрс пиналъёслэсь улонзэс утиз ни. 1996-тӥ арысен Удмуртиын но арлы быдэ та висёнлэсь утиськон нуналъёс ортчыло. Озьы шаерысьтымы куинь аресозь 250 сюрс нылпилы прививка лэсьтэмын. Санитарияя но эпидемиологияя комиссия туэ но март-апрель толэзьёсы арес тырмымтэ пиналъёслы вакцина пуктылон сярысь ужпум кутӥз. Озьы ик та ужрадэ кыскемын луоз планъя прививка басьтымтэ одӥг аресысен куинь аресозь нылпиос. Полиомиелитлы пумит нюръяськонэ котькудмы пыриськыны кулэ. Озьы гинэ вуоно кивалтӥсьёсмес таза будэтом. Э. Васильева. Дас ар куспын Дэбесысь калык киужъёсъя юртлэн аслаз йылолъёсыз кылдӥзы. Тужгес ӟеч ортчыло татын кыӵе ке сямлы сӥзем адӟытонъёс. Юртысь кибашлыослэсь ужъёссэс нош алигес воштӥзы ёрос гуртъёсысь бичам тӥрлыкъёс. Соос пӧлын - вашкала куэм дӥсь, удмурт пужыосын чебермам ӵушконъёс, шобыръёс, выжлёгетъёс. Одӥг кылын вераса, ваньмыз сю витьтонлэсь трос арбери. Одӥгез мукетызлы уг кельшы. Адӟытонэз радъян сярысь трос сюлмаськиз юртлэн кузёез Геннадий Кузьмин, выставкаосты радъясь Ольга Салтыкова. Владимир Беломорскихлэн гожтэмез но туспуктэмез. Глазовысь тылобурдо утисьёс дорын Валентина Ушакова: "Гурезе ӝог уд тубы" Уйпал Глазов городын огдыре ӵош кык бадӟымесь тылобурдо вордон фабрикаос ӝутскизы. Нырысезлы, шаерысьтымы одӥгезлы тужгес бадӟымезлы, усьтэм амалэн ужась "Удмуртская" птицефабрика акционер огазеяськонлы миым декабре 20 ар тырмиз. Та дыр ӵоже со огинтыяз ӧз лёгаськы, ялан азинскиз, будӥз но кужмояз. Кызь ар ӵоже со 125 сюрс тонна курег сӥль поттӥз но 270 миллион курен пуз басьтӥз. Предприятие зэмзэ но пуктэмын трос тылобурдо сӥль поттыны. Нуналлы быдэ татын 20 сюрс бройлер чипыосты вандо. Валля арын 6 сюрс тонна курег сӥль люказ. Али со 60 пумо продукция лэсьтэ но толэзьлы быдэ 10 миллион манет тыр калыклы сиён вуза. Нош тылобурдозэ сюдыны нуналлы быдэ 70 тонна сиён быдтэ. Сотэк уго ӟеч но ческыт сӥль уд потты. Валля арын фабрика привес басьтонъя быдэс Россиын 22-тӥ интые потӥз, бройлер чипыосыз нуналлы быдэ шорлыдын 35 грамлы йыло, нош туэ со лыдпусэз эшшо одӥг граммлы ӝутыны малпало. Нош инкубаторез нуналаз 30 сюрс чипы ӵогиське. Берло куинетӥ арзэ фабрикаен кивалтэ Валентина Ушакова. Бадӟым опытэн специалист жуг-секытлэсь ӧз кышка, кышномурт та ныпьетэз дӥсьтыса-а, дӥсьтытэк- а, но ас вылаз басьтӥз. Миым солы Россиысь гурт удысъя дано ужась ним сётӥзы. Туннэ "Удмуртская" птицефабрика огазеяськонлэн валтӥсь директореныз Валентина Ушаковаен вераськонмы. - Кыдёке кожатэк, Валентина Павловна, кенешонмес мытом фабрикалэн кызьы вордскемез но кызь ар ужамез бордысен. Кин сое утӥз, кыӵе вал ортчем сюресэз? - Валамон. Нырысь ик пусъеме потэ, фабрикалы ноку каньыл ӧй вал. Капчиез ӝӧк вылын, шуо, нош гурезе ноку ӝог уд тубы. Вал ӝутскон дырыз но, куашкан калэ вуон, огинтыяз сыръяса улон вакытэз но. Меӵак пусйыса, Глазовлэн лымшор-запад палаз, 1976-тӥ арын Лэсьтӥськонъя Чепца управление (ЧУС) тылобурдо вордон фабрика пуктыны ӧдъяз. Малпамын вал тае туж ӝог, дырызлэь вазь вуттыны. Малы ке шуоно, калык кулэяськиз бройлер курег сӥльлы, нош Удмуртиын таӵе фабрикамы ӧй на вал. Лэсьтӥськонэз ӟеч радъяны но чакланы кылдытӥзы нимаз штаб. Фабрикаез пуктонэ городысь 20 предприятиос (ЧМЗ "Металлист" завод, АТП, РСУ, ККП, "Межрайгаз" но мукетъёсыз) адямиоссэс ыстӥзы. Ӝоггес вуттон вылысь, дэмен, огъя кужымен ӟырдыт уж ӧръяськиз. Тӥни озьы 1979-тӥ арын вуттэмын вал мумы курегъёсты возёнъя 6 гид. Соосты ужась комиссия кутӥз но кыкез гид тылобурдоосын тырмиз. Вуоно араз фабрикалэн нырысетӥ городэз вуттэмын, нош 1981-тӥ арын - ваньмыз сямен курег гидъёс, котельной, инкубатор но тылобурдо вандон цех. матысь аръёсы лэсьтэмын 15 сюрс курег тэрымон гид но сиёнэз узырмытон цех. Фабрикаез пуктэмен ӵош огдыре ӝутӥзы тылобурдо утисьёслы улон коркаос но культура учреждениос. Вакчи дыр куспын, син азямы пуксизы ясли-сад, "Победа" культурно-спортивной комплекс но, 10 номкеро школа. 1982-тӥ арын 1-тӥ сентябре со ӧсъёссэ усьтӥз но шулдыр нылпи куараосын пачылмиз. Сое-а шумпотон уд шуы. Птицефабрикаез пуктӥз нырысетӥез директор Геннадий Пшенников. Со вал ужъёсты ӟеч радъясь но усто лэсьтӥськись. Соин ик Геннадий Григорьечич типовой проектэз герӟаны быгатӥз та интыен. Озьы 1980-тӥ арын фабрика нырысьсэ курег сӥль поттыны кутскиз. Та арын ик кивалтӥсез юнматӥз Виктор Младенцевез. Со йылаз-пумаз вуттӥз лэсьтӥськонэз но фабрика огсыр ужаны ӧдъяз. Виктор Павлович куать ар директор вал. 1986-тӥ арын сое воштӥз Александр Ушаков, та удысысь туж бадӟым опытэн специалист. Талэсь азьло со вал фабрикалэн валтӥсь зоотехникез. Александр Дмитриевичлэн тыршеменыз-сюлмаськеменыз фабрика бадымесь азинскеменыз фабрика. Со вить ар гинэ директор вал, со дыр ӵоже пыд йылаз султӥз но ялан паськытаз- выльдськиз. Усьтӥськизы выль ёзъёс, отделъёс, цехъёс но мукетыз. Та вакытэ укат ик трос сётэмын производствоез умоятонъя ӵектонъёс, выжыяськиз спорт но паськытазы культура ужрадъёс. Та дыре ик вуттэмын полуфабрикатъёс лэсьтон цех. Магазинъёсы вуизы нырысетӥ ӵынатэм курегъёс. Со вал 1989-тӥ ар. Но туж жаль, картэ улонэн юн вазь люкиськиз. Солэсь мытэм ужъёссэ табере ачим быдэсъясько. Вуиз 1990-тӥ ар. Кутскиз выльдӥськон, странаын югдур уродмиз. Воштӥськиз директор, но со выль условиосын ужаны, кивалтыны ӧз быгаты. Фабрика уллань но уллань гылӟыны ӧдъяз но 1997-тӥ арын банкротъёс пӧлы шеде ни вал. 1200 ужасьёс пӧлысь 470 мурт кылиз. Курег сӥль поттон гуньдӥз, шуныы луоз. Предприятиез ӝутыны мыным оскизы. - Кызьы дӥсьтӥды? - Оски ужаны быгатэмелы, та удысэз ӟеч тодэмелы но тылобурдо утисьёслы. Бен, капчи ӧй вал та уже кариськыны, уката ик кышномуртлы. Асме ачим вори, лэся. Шедизы оскымон юрттӥсьёс, тужгес но валтӥсь зоотехник Галина Петровна Семенова, коммерцияя юрттӥсе Олег Вячеславович Юхтин, валтӥсь ветврач Ольга Рафаиловна ВаноходоваЮ тылобурдо сиён дасян производстволэн но зоотехнической лабораторилэн кивалтӥсез Фаина Николаевна Минакова но мукетъёсыз. Ватсаны кулэ, валтӥсь зоотехник но ветврач фабрикаын 1980-тӥ арысен ужало. Музонъёсыз но татчы выжы лэземын ни. - Нош али ужъёсты кызьы радъямын? - Укмыс гидъёсын сю сюрс пала пузась курегъёс интыямын. Куинь гидъёсын чипыос возиськом. 120 нунал ортчыса, соосты мумы курегъёс пӧлы поттӥськом. Пузас курегъёсты поттӥськом племенной курег пузысь. Птицефабрика сыӵе курег пуз басьтэ Ленинград улосысь "Большевик" кун племзаводыс. Соин фабрика кемалась юнэсь кусыпъёс возе. Племзаводысь специалистъёс дорамы ортчытъяло всероссийской семинаръёс но дышетсконъёс. Малы ке шуоно, милям млеменной уж умой пуктэмын. Фабрика нуналлы быдэ 30-40 сюрс ӟеч курег пуз басьтэ. Отысь поттӥськом бройлер чипыос но соосты куайытӥськом. Вераны куэ, бройлеръёс ӝог будо, висёнъёслы уг сётско но сӥльзы ческыт луэ. Асьмелы со ик кулэ. - Валентина Павловна мар ватсасалды на инкубаторды сярысь? - Кызьы верай ни, инкубатормы вуттэмын 20 ар талэсь азьло. Со вал республикаямы самой бадӟымез промышленной инкубатор. Отчы пуктэмын ИУП-Ф-45 маркаен 15 инкубационной шкафъёс. Котькудаз 10 сюрс курег пуз тэре. Татын усто операторъёс тыршо. Отын котьку котьку чылкыт, нуналлы быдэ дезинфекция ортчыто но 30 сюрс ёрос чипы ӵогиське. Одӥг нуналъем чипыосты быръё: атас пиос куайытон гидъёсы кошко, соос ӝоггес будо но куинь нуналлы вазьгес вандӥськом. Бройлеръёсты 9 гидъёсын сюдӥськом-куайытӥськом но соос висъетъёсын (клеткаосын) уло. Таӵе амалэн бройлер чипыосты шунтӥськом КБУ-3 батареяосын. Гидъёсын котьку огкадь шуныт возиське. Атас бройлеръёсты 42 нунал куйытӥськом. Ужаськом кык сменаен. Со юрттэ электрокужымез шыръяны но умой привес басьтыны. Миым, кылсярысь, котькудӥз бройлер чипы нуналлы быдэ 35 грамм будӥз, нош 1981-тӥ арын со лыдпус кабзэ 15,4 грамм вал. Сюдӥськом асьме ю тысен гинэ. Комбикорм фабрикаын изӥськом, пӧлаз кулэ минерал ватсэтъёс тыриськом. Озьы курег сӥль ческыт луэ. Зэмзэ но, курегъёсты сюдонлы бадым инты висъяськом. Ю тысь сяна басьтӥськом шротъёс, минерально-витаминной ватсэтъёс. Фабрикалэн складаз 1,5 сюрс тонна сиён тэре, нош смена ӵоже со 100 тонна сётэ. - Тӥ калыклы сиён поттӥськоды бере, сое эскерон кызьы радъямын? - Та ласянь калык сюлмаськыны кулэ ӧвӧл. Милям зоотехнической лабораторимы ваньзэ чакла, ГОСТ-лэсь куронъёссэ юн сиёнъёсты, минерал ватсэтъёсты но музонзэ. Зоотехнической лаборатория озьы ик чакла курег гидъёсты тылобурдо сюдонэ но инкубаторлэсь ужамзэ. Ватсаны кулэ фабрика усьтӥськм дырысен ужа ветеринарно-производственной лаборатория. Со чакла курег гидъёсын санитариез, виёнъёсты сӥльлэсь ӟечлыксэ но музонзэ. Лабораториын та ужез быдэсъяло ветврач но куинь лаборант-фельдшеръёс. Соос юн эскеро оборудованилэсь ужамзэ, тараез, курег нуллсь автотранспортэз но мукетсэ. Лабораториын ужа биоцех. Со поттэ СПФ-1/56 ватсэт. Сое сиён пӧлы тыро пичи чипыослы, 1 нуналысен 10 нуналозь. Озьы тылобурдо кӧт висёнъёслы уг сётскы. Таӵе ватсэт нуналлы быдэ 1500 литр потӥськом. - Кызьы ужа курег вандон цехты? - Урод уг. Будэтэмзэ вандыны кулэ. Одӥг часкын 3 сюрс курег вандӥсбком, нош смена ӵоже - 20 сюрс. Фабрикаын номыр уг куштӥськы, ваньмыз уже кутӥське. Сыӵе технология малпамын. - Валентина Павловна, сӥль поттон капчиен уг сётӥськы. Сиёнды кытчы кошке? - Курег сӥльмес умой басьто Удмуртиын но. Сӥльмы озьы ик кошке Н. Новгородэ, Перме, Москвае но Россиысь музон каръёсы. Со юнме шорысь ӧвӧл. Сӥльлэн ӟечлыкез вылӥын, кунгож сьӧрысь ваеменыз уд ӵошаты. Берло дыре сое басьяськисьёс валаны кутскизы. Али фабрика 60 пумо курег сӥль сиёнъёс поттэ. Калыклы со кельше, уката ик ӵынатэмез. Огазеяськон калыклы вуза бройлер чипыос. Матысь дыре курег сӥльлэсь колбаса лэсьтыны ӧдъям. Со герӟаькемын консерваос лэсьтон цехез усьтонэн. Али ми 10 пумо курег сӥль консерваос лэсьтӥськом. Со урод ӧвӧл. Азьланьын малпаськом упаковкаез (бинялтонэз) радъяны. Со юрттоз рынокын интымес уката юнматыны. Курег сӥльмы шаерамы сокем трос уг ке но мыны, со милемды уг сюлэмшугъяськыты. Мугез тодмо: шаерамы бадӟымесь тылобурдо фабрикаос тырмыт. Вылаз ик, кунгож сьӧрысь вуэ трос курег сӥль, со ӧжыт гинэ дунтэмгес. Но солэсь ӟечлыксэ, изъян сётонзэ ум тодӥське. Ваньзэ вато. Нош ми ӟеч но ческыт сиён поттӥськом. Калык сое вала ни. Геннадий Романов. Директор Валентина Ушакова. Тани со бройлер курегъёс. Инкубаторын чипы ӵогиськиз. Тазьы туж ӝог будо бройлеръёс. Лабораториын ваньзэ пыр-поч эскеро. Курег вандон цехын. Сисько тылобурдо утисьёс. Вормы астэ ачид Сюанэз - аракытэк...? Шаерамы наркотиклэн вӧлмемез ваньмызлы тодмо. Кыӵесэ сюремъёс сярысь ӵемысь телевизорысь но газетъёсысь но кылӥськом. Адямиос дорозь вуттӥсько мугорез ёзомытӥсь лыдпусъёс. Визьмо муртъёс сьӧд кыез вормон понна люкаськыло, пресс- конференциос ортчытъяло. Ог-огенызы тодон-валанъёсын вошъяськыло. Та нуналъёсы Татарстанысь Нижнекамск городэ люкаськылӥзы Россиысь пӧртэм улосъёсысь юытэк, кыскытэк, йырез поромытӥсь суретъёстэк улонэз возьматӥсь огазеяськонъёс. Лыктэмъёсты пумитазы "Нижнекамскысь оптималистъёс". Оптималист терминэз малпаз Геннадий Андреевич Шичко (движенилэн дышетӥсез) оптимист кыллэсь. Со секыт югдурез валась но сое умоятыны быгатӥсь адями. Таӵе клубъёслэн лыдзы Россиын кемалась сю лыдпусэз ортчемын ни. Отчы ветлӥсьёс укмыстон процентэз азьвыл юисьёс, кыскисьёс но наркоманъёс. 1989-тӥ арысен Волга но Вятка котырысь оптималистъёс Удмуртилэн но Татарстанлэн пӧртэм улосъёсаз люкаськыло. Пумиськонъёсты малпазы но улонэ пыӵатӥзы Нижнекамскысь но Ижевскысь тазалыко улонъя клубъёс. Таяз вуизы Екатеринбургысь, Казаньысь, Заинскысь, Туймазы (Башкирия), Волгоград, Тобольск, Ульяновскысь но мукет палъёсысь Г. А. Шичколэн дышетэмезъя улӥсь но ужась адямиос. Люкаськемъёс кысконэз, юонэз но наркотикез ог-огзылэсь уг висъяло. Валэкто тазьы: поромытӥсь суретъёс пӧлысь тросэз нырысьсэ утчало тамакез, берло аракы борды бинисько, мукет вамышсы луыны быгатоз наркотик. Ӵемысь озьы ик луэ. Тросэзлы адямиослы валантэм луоз юонтэк ортчытэм сюанъёс но вордскем нуналъёс. Нош Нижнекамске люкаськемъёс понна - со огшоры улон. Соос адямиослэсь синъёссэс усьтыны, валэктыны тыршо: мылкыд йырез поромытыса гинэ уг ӝутӥськы, тазалыко улон но трослы шулдыргес луыны быгатэ. Шоразы учкыса валаськод шонер верамзэс. Тазалыкез утён но шутэтскон лагере люкаськемъёс лымы вылэ пуктэм палаткаын мунчо радъязы. Веникен шуккиськыса, лымы вылтӥ бызьылӥзы, ӝыт эктонъёс ортчытъязы. Со сяна, котькудзы концерт номеръёс возьматӥзы. Ялкарон куспазы семинаръёсын кенешизы. Ваньмызлэсь зол кысконлы, юонлы, наркотиклы пумит бугыръяськиз Хабаровск палась Биробиджан городысь вуэм Галина Шульгач. - Урамын сигаретъёсын вузаськисьёслэн йыразы кысконэн тырмытэм коробкаоссэс ик изьыясал. Галина Петровналэн тыршемезъя городысь ульчаосын тамак вузанэз дугдытӥллям ни. Кышномурт кивалтӥсьёс вылэ ӝожтӥськонъёссэ вераз, журналистъёслы но сюриз: - Кысконэн поромытэм визенызы вузаськисьёслы дурбасьто, шуо, мон, пе, соосты берпум копейкатэк кельтӥсько. Уг валало шат умойтэм выремзэс? Быдэ вуэм котькуд адями сигаретэз магазинысь басьтыны быгатоз. Нош ульчаын кысконэз одӥген-одӥген пичиос гинэ окто. Люкаськемъёс туж сюлэмшугъясько нылпиос понна. Юись семьяосысь пиналъёс, анайёссы-атайёссы шоры учкыса, ӵемысь соослэсь адӟем каро. Герӟало тае генетикаен но тазалыко улонэз адӟымтэенызы. Тазалыко семьяосын мемиослэн тыршемзы юнме уг луы, соослэн нылпиоссылы капчигес луоз сьӧд кыен нюръяськыны. Нош улон радмы соосты мукет пала кыске. Малы ке шуоно, реклама калык сямъёс но йылолъёс тросэз юонэн герӟаськемын. Нылпиослы веранъёс, выжыкылъёс гинэ но: "Что ели? Кашку. Что пили? Брашку". "Три медведя" сурлы рекламаез учкыса, тросэз пичиос юыны ветлӥ шуыса вераськыны кутско. Пиналъёс адӟо юись адямиослэсь серекъямзэс, шулдыръяськемзэс, малпало: сурет ческыт, сое одно ик утчаны кулэ. Паймоно кадь: юонлы, кысконлы рекламаез иворез вӧлмытӥсь ёзъёсысь палэнтӥзы, нош сур кылиз. Мугез таӵе: Кун Думаен кутэм законъя сур алкоголь пӧлы уг пыры. Вань законъёсты аръёсын учко, нош тазэ кык арня куспын кутӥзы. Озьыен, кинлы ке но кулэ асьмелэсь нылпиосмес юонэн эшласькытыны. Таӵе малпанъёссэс веразы ваньмыз сямен пумиськонэ лыктэмъёс. Нижнекамске ветлӥзы Удмуртиысь но: кызь кык адями - Ижевскысь, куинез - Алнаш ёросысь. О. Кожанова. Спорт Оген ӵошатскыны секыт Мартэ Удмурт кун университетлэн первоенствоез понна капчи атлетикая ӵошатсконъёс ортчизы. Отчы пыриськизы Ижевскысь вузъёсысь (УдГУ, ИГМА, ИжГТУ, МВЕУ), ДЮСШ-осысь но пӧртэм училищеосысь егитъёс. Нырысетӥ эстафетаын (1000х750х500х250 метре) зол нюръяськон пуромиз. Вормиз Удмурт университетысь но Восточно-Европейской университетысь огазеям команда. Нылъёслэн эстафетаязы но та вузъёсысь ик команда вормиз. Туэ спортсменъёс ӵошатскизы 4000 метръем сюрес вылын но. Татын тужгес кужмоез луиз МВЕУ-ысь калык куспо классъем спортъя мастер Юрий Гордеев. Урод ӧз возьматэ асьсэды Удмурт университетысь спортсменъёс но. Соос кыкетӥ интыосты басьтӥзы. А. Ившин. Татьяна Александровна Маркова ужа Октябрь ёросысь 207 номеро нылпи садын. Нылпиосты удмурт ныллы дышетэ 1995-тӥ арысен. Гожъя чебер кылбуръёс но кырӟанъёс. Ижевскын удмурт кыллы дышетӥсь воспитательёс пӧлын ортчем "Сюлэмме сётӥскьо нылпиослы" конкурсын нырысетӥ инты басьтӥз. Солы сётӥзы визьмо дышетӥсь ним. Наталь Вазиськон Анаез коньдонэн уд вошты Кузпалы монэ мурт дуннее огнам кельтӥз. Дас арлэсь ятыр ортчиз ни со кулэм дырысен. Нылпиосме пыд йылазы огнам ӝутӥ ни, дышетыны турттӥ. Скал, парсь вордӥ. Нунал куспын пуксет ӧй вал. Изьыны выдӥськод, висьыса умме усем уг луы. Уй куспын кык-куинь час изисько ке, тау шуисько, инмаре, ӟеч кӧлтӥд. Табере тани дымбырак огнам кыли, нылпиосылэн асьсэлэн семьяоссы вань ни. Туж мӧзмыт огнын улыны, ньыль борддорлы уг луы кӧтӝожез но, шумпотонэз но вераны. Ӝыт валесэ выдӥсько ке, сюлэмме кӧтӝож бугыртэ. Нылпиосме курадӟыса-курадӟыса дышетыны турттӥ, нош соос бертыны гинэ но уг быгато: уксё ӧвӧл, пе. Нош мама ке берпум копейказэ но ӧз жаля соос понна! Тазьы куректыса улоннам ӵемысь висисько но. Улӥсько мон гуртын, хозяйствое бадӟым, номырлы уг ёрмиськы. Но ваньзэ сое эскерыны, утялтыны кужым уг тырмы ни. Соин ик нылъёсы пала Ижевске улыны кариськысал: соослэсь но, нылпиоссылэсь но туж мӧзмисько. Вань, дыр, ӟеч сюлэмо, капчи мылкыдо, ачим кадь ик ужась, огназ улӥсь пиосмуртъёс. Ваньмыз юон пӧлы выйымтэ ук. Ачим мон улытозям ужамын нылпиосын. Матэктэ ни пенсие потон дыры. Кин ке, оло, вазиськоз, буйгатоз мӧзмыт улонлэсь. Редакцилэсь. Та гожтэтэз юри ӧм интыялэ "Тодматскон сэреге", быдэсак сямен сётоно кариським. Пӧламы ӧжыт ӧвӧл огназы кылем таӵе анайёс. Оло, газетысь та гожтэтэз лыдӟыса, нылпиоссылэн сюлэмзы небӟоз, анайзылы юрттон сярысь малпаськозы. Арлы быдэ - тужгес яркытъёсыз Туэ шаерамы нош ик ортчоз быдӟым ӟуч крезьгурчилэн Пётр Ильич Чайковскийлэн вордӥськем нуналэзлы сӥзем фестиваль. Таиз ньыльдон ньылетӥез луоз. Та ужрадъя кенешон ик алигес вал шаерысьтымы Культурая министерствоын. Кызьы ивортӥз Удмурт кун филармонилэн чеберлыкъя кивалтӥсез Валерий Митрофанов, таяз учыре но асьме доры лыкто "кизилиос". Соос пӧлысь одӥгез - Россиысь калык артистка Любовь Казарновская. Любовь Казарновская кырӟа дуннеысь тужгес ӟеч театръёсын. Солэн чебер но зарни куараез троссэ паймытэ. Мукетыз куно - Россиысь дано артистка, Москва кун академи филармониысь кырӟась Любовь Шарнина. П. И. Чайковскийлэн вордскем нуналэзлы сӥзем крезьгуро фестивале озьы ик пыриськоз тодмо скрипач - калык куспо конкурсъёслэн лауреатсы Дмитрий Коган. Дмитрий Коган таяз учыре тодматоз тодмо крезьгурчиослэн Иоганн Себастьян Бахлэн, Сергей Прокофьевлэн гуръёсынызы. Со сяна, шаерысьтымы симфонической оркестрен ӵош быдэстоз Сен-Санслэсь куинетӥ концертсэ. Таяз фестивале озьы ик вуоз А. П. Бородин нимо квартет. Та коллектив кылдӥз 1946- тӥ арын. Арлыдыз шоры учкытэк, егит возиське, ялан утчаське. А. П. Бородин нимо квартет кылзӥсьёсты тодматоз Пётр Ильич Чайковскийлэн, Людвиг ван Бетховенлэн ужъёсынызы. Балетэз яратӥсьёс шумпотозы Украинаысь Операя но балетъя ӟуч кун театрысь Балет труппалэн (чеберлыкъя кивалтӥсез - Украинаысь калык артист Вадим Писарев) спектакльёсызлы. Со возьматоз одӥг но кык актъем "Пер Гюнт", "Танго ангела", "Песни Соломона", "Баядерка" нимо балетъёсты. Кызьы ивортӥз Операя но балетъя кун театрлэн директорез Анетта Сидорова, таяз учыре фестивальлэн куноез луоз Россиысь одӥгез тодмо кырӟась Елена Образцова. Елена Васильевна али кырӟа Лондонын. Дорамы но пырак отысь вуоз. Елена Образцова кырӟалоз Пётр Чайковскийлэн "Пиковая дама" операяз. Пётр Ильич Чайковскийлэн вордӥськем но будэм музъем вылаз Елена Образцова - нырысьсэ. Со сяна, фестивальын кырӟалоз Россиысь но калык куспо конкурсъёслэн лауреатсы - Л.В. Собинов нимо Саратов кун консерваториысь пиослэн хорзы. Солэн чеберлыкъя кивалтӥсез но валтӥсь дирижёрез - Россия Федерациысь искусствоосъя дано ужась профессор Людмила Лицова. Быдӟым крезьгурчилэн вордӥськем нуналэзлы сӥзем фестивале табере пырисько асьме шаерысь но усточиос. Соос пӧлысь одӥгез - симфонической оркестр. Солэн кивалтӥсез Удмурт Элькунысь искусствоосъя дано ужась Николай Роготнев понна Россиысь тодмо оркестръёсын но соослэн дирижёръёсынызы пумиськылон - туж бадӟым шумпотон но тодон- валан люкан. Симфонической оркестр концертъёсыныз тодматоз Воткалан но Ижын улӥсьёсты. Со сяна, учкисьёсты но кылзӥсьёсты шулдыртозы Удмурт Элькунысь Культурая министерствоысь духовой инструментъёсъя "Арсенал-Брасс" кун оркестрысь ансамбльысь кырӟасьёс. Шаерысьтымы улӥсьёсты шумпоттозы Удмурт кун филармониысь кырӟасьёс но - Можгала, Увае, Эграла (Играла), Вотка ёросысь Новый посёлоке вуылозы Нина Варачёва, Елена Бускина. Фестиваль дыръя устолыксэ возьматоз Россиысь но калык куспо конкурсъёслэн лауреатсы но дипломантсы - шаерысьтымы искусствоосъя школа-интернатысь покчи но быдэ уэм пиослэн "Ингур" капеллазы (чеберлыкъя кивалтӥсез - Удмурт Элькунысь искусствоосъя дано ужась, Удмурт Элькунлэн Кун премиезлэн лауреатэз Валерий Митрофанов). Операя но балетъя кун театр возьматоз "Щелкунчик" но "Лебединое озеро" балетъёсты, учкисьёсты нош ик шумпоттоз тодмо итальян крезьгурчилэн Джузеппе Вердилэн "Травиата" операеныз. Татын кырӟалоз егит усточи Наталия Ермакова. П. И. Чайковскийлэн вордӥськем нуналэзлы сӥзем ньыльдон ньылетӥез крезьгуро фестиваль кутскоз 17-тӥ апреле. Йыдпумъяськоз 29-тӥ апреле. Фестиваль дыръя Ижын вань концертъёс ортчылозы Андан ӵыжатӥсьёслэн культура дворецазы. Кутскылозы ӝыт сизьым часын. Концертъёслы дунъёс чидамон - кызь, куамын, витьтон, куатьтон, сизьымдон, сю, сю витьтон манетозь. Зэм, Россиысь калык артистка Любовь Казарновская дуно сылэ - опера кырӟанэз яратӥсьёс кисыысьтызы поттоно луозы куинь сю-куинь сю витьтон манет. Фестивалез ортчытыны коньдонэн юртто Удмурт Элькунысь Кивалтэт, Удмурт Элькунлэн Президентэз, озьы ик - Москваысь адямиос. П. И. Чайковскийлэн вордӥськем нуналэзлы сӥзем нырысетӥез крезьгуро фестиваль ортчиз 1958-тӥ арын. Кызьы пусйиз Удмурт кун филармонилэн чеберлыкъя кивалтӥсез Валерий Митрофанов, та выллем фестивальёс азьвыл трос ик ӧй вал. Туэ уноез ӧвӧл ни. П. И. Чайковскийлы сӥзем крезьгуро фестиваль нош ялан улэ. Выжыосыз но пыдло кошкемын ини. Фестиваль будэтӥз, визьнодаз ини уно егитъёсты! Шаерысьтымы улӥсьёслы но со туж кулэ. Берло аръёс ӵоже гинэ ини дорамы вуылӥзы тужгес яркытъёсыз кизилиос. Зэм, мукет ласянь учконо ке, та бадӟым но кулэ ужрад уно сюлмаськонъёс но вае. Туж эскере чиданлыкез. Котькуд фестиваль йылпумъяськем бере ик ини малпаськыны кутскиськод вуоноез сярысь. П. И. Чайковскийлэн вордӥськем нуналэзлы сӥзем крезьгуро фестивальлэсь концертъёссэ арлы быдэ мыло-кыдо учко искусствоосъя школаосын дышетскись пиналъёс. Е. Берёзкина. Журналистъёсын пумиськонъёс Татын шуккиське даур куара Толон, 27-тӥ мартэ, журналистъёсын пумиськиз Удмурт Республикаысь Правительстволэн Архивъёсын ужанъя комитетэзлэн кивалтӥсез Надежда Коробейникова. Люкаськемъёслы со мадиз удыслэн миым ужамез но со азьын сылӥсь ужпумъёс сярысь. Та ужлэн кулэлыез шоры куд-огез туж капчиен учке. Озьы-а бен со? Чик но ӧвӧл. Архив калыклы, предприятиослы, организациослы но учреждениослы бадӟым юрттэт сётэ. Миым тани 24 сюрс муртлэн куронъёссы быдэстэмын. Со, валамон, бадӟым юрттэт. Со сяна, архив озьы ик возе дано но тодмо адямиослэсь кулэ документъёссэс но бумагаоссэс. Сыӵе архивъёссы вань ни Ашальчи Окилэн (Векшина), Семен Ворончихинлэн, Георгий Томиловскийлэн, Евгения Копысовалэсь но мукетъёсызлэн. Но жаляса верано луэ, кун архиве одӥг материал но ӧз вуы на дано конструктормылэсь Михаил Калашниковлэн. Мугзэ валаны луэ, со ваньзэ сётэм ни аслаз музеяз. Но кӧня ке документъёсыз кун архивын луысалзы ке, урод ӧй луысал. Шаерамы кӧня бен архивъёсмы? Нырысь ик, ужало 2 кун архивъёсмы - Удмурт Республикаысь Валтӥсь кун архив но Удмурт Республикаысь Выль историяя центр. Со сяна, шаерысьтымы город но ёрос администрациосын архивъёсъя отдел усьтэмын. Нош Иж администрацилэн ужасьъёсызъя нимаз архив отдел кылдытэмын. Вань архивъёсы республикаысьтымы 2639 организациос материалъёссэс сёто: со пӧлысь ЦГА-е - 233, ЦДНИ-е - 75 но интыысь архивъёсы - 2331. Оглом вераса, вань архивъёсын 1 миллион 154 сюрслэсь уно документъёс возисько. Надежда Кузьминичналэн ивортэмезъя, республикаысьтымы архивистъёс урод уг ужало, Россиын куинетӥ инты басьто, Санкт-Петербург но Татарстан бере. Собере мыно Самара, Архангельск, Тверь но Ставрополь улосъёс. Со пусъемын вал Россиысь историкъёслэн-архивистъёслэн огазеяськонзылы дас ар тырмонлы сӥзем научно- практической конференциын но историкъёслэн-архивистъёслэн куинетӥ съездазы. Татчы ветлӥз шаерысьтымы но делегация. Валтӥсь кенеше быръемын Надежда Коробейникова, солэн воштӥсез Владимир Бобков но Кияса ёросысь райсоветлэн тӧроез Надежда Шатрова. Кызьы шуо, та удыслэн но вань аслаз сюлмаськонъёсыз но ляб интыосыз. Кылсярысь, Валтӥсь кун архивлэсь юртсэ тупатъяны ичизэ 17 миллион манет уксё кулэ, нош туэлы ваньзэ-ӧвӧлзэ 2 миллион манетвисъямын. Азьланьын но тазьы ик луиз ке, сое ичизэ 7-8 ар выльдыны выром. Ватсаны кулэ: со юрт куашкан калэ вуэмен лыдъямын, борддоръёсыз пилиськылэмын. Соин ик та удыслы 1998-тӥ арын Камбарской урамын "Аксион-холдинг" огазеяськон корка висъяз. Но сое архивлы радъяно-тупатоно. Али отын лэсьтӥськон ужъёс усмой мыно. Кун комитет озьы ик бадӟым уж нуэ, документъёсты но музон бумагаосты возёнэз чакланъя. Миым тани 932 эскерон ортчытэмын. Соос пӧлын вал Гурт удысъя но сиён- юонъя, Коньдон ужпумъёсъя но Печатья но иворъёсъя министерствоос но мукетъёсыз. Архивистъёсты туннэ тужгес сюлэмшугъяськытэ электронной документъёсты возён. Та выль ужез радъяны угось трос коньдон кулэ. Г. Романов. Туннэ Удмурт Республикалэн Президентэз Александр Волков ужа Самара улосын. Со вуылоз "АвтоВАЗ" огазеяськонэ, пумиськоз солэн кивалтӥсьёсыныз. Собере кенешоз улослэн губернатореныз Константин Титовен. Гожтыны чакламын валче ужан сярысь тупанкыл. Чур бугор Азьлань! Я, кыӵе мылкыдды таяз арняе? Вазьгес сайкалляны дышиды-а? Дышоды. 28-тӥ октябрёзь уть кӧня дыр. Кунгож сьӧрын адямиос дырен шудо ни сю ар. Асьмелэн нырысьсэ со сярысь малпаськыны кутскизы 1917-тӥ арын. СССР-ысь Совнарком 13 ар ӵоже гужем дырез одӥг часлы азьпалтытъяз, нош 1930-тӥ арын сое берлань ӧз берыкты ни. Озьы ик улӥз СССР ваньзэс азьпалтыса 1981-тӥ арын электротылэз шыръян, югыт нуналэз уже пайдаёгес кутон вылысь, нош ик гужем дыр юнматӥз. Кыстӥськиз со 1-тӥ апрельысен 1-тӥ октябрёзь. Но 1-тӥ апрель котьку шутэтскон нуналэ ӧз тупалля, соин ик бӧрысьгес дырез воштонэз выжтӥзы мартлэн берпуметӥ нуналъёсаз. Кин малпам дырез вошъяны? Нырысь ик 1784-тӥ арын ай со сярысь малпаськем вылэм тодмо учёной Бенджамин Франклин. Солэн атаезлэн кӧйтыл поттон заводэз вылэм. Дырын-дырын со лулӟылэм: одӥг часлы ке но нунал кузьгес кыстӥськысал ке, кӧня кӧйтылэз шыръяны луысал. Но та малпанзэ Франклин ваньмызлы шараямтэ. Рос-прос югыт нуналэз кузятон сярысь вераськыны кутскиз 1906-тӥ арын англичанин Уильям Уиллет. Та ужпумъя со нимысьтыз памфлет но печатлам. Озьы 1908-тӥ арын тулыс Великобританиын часлэсь стрелкаоссэ кызь минутлы берлань каризы. Зэм, гужем вакыт пӧртэм странаосын пӧртэм дыре укша. Южной Америкаын, кылсярысь, гужем кыстӥське октябрьысен февралёзь. Иордания гужем дыръя улэ толалтэ но. Нош Япония дырез чик уг вошъя. Мар умоез дырез вошъянын? РФ-ысь Минтопэнерголэн лыдъямезъя, одӥг "югыт" час кык миллиард киловат-час элкутрокужымез шыръя. Дас процентлы кулэсмо, пе, йыртэман учыръёс. Нош Петербургысь акушерствоя но гинекологияя НИИ-ын ужасьёслэн малпамзыя, дырез воштон юрттэ тросгес нылпи вайыны. Ӵукна мултэс час луонлык сётэ яратӥсь муртъёслы кемагес валесын мусояськыны. Отӥыз - вератэк но валамон. Мар уродэз? Физиологъёслэн чакламзыя, дырез воштон мугор понна бадӟым шуккет луэ. Адямилэн кӧлонэз сӧриське, мугорыз лябӟе. Нырысетӥ арняяз котьку сямен йыло ӝог юрттэт сётонъя машинаез ӧтён учыръёс. Дырез воштон золгес шукке сюлэменызы но бадӟым вирзӥбетэн (давлениен) курадӟисьёсты. Веранэз ӧвӧл ни уже ӝеганъёс сярысь. Адями уж дураз дырыз дыръя вуыны тырше ик ке, лумбыт рос-прос ужамез уг луы. Сураське поездъёслэн, теплоходъёслэн ветлон дырзы. Куд-ог странаосын дырез воштон уе поездъёс, дырыз дыръя кулэ интые вуон понна, быдэс часлы дугдыло. Йылэ сюрес вылын шудтэм учыръёслэн лыдзы. Чур бугор Инмар сэрег Оренбург улосысь священник нылпи юртысь 48 нылпи басьтӥз. Нырысьсэ отец Николай нылпи юртэ пиналъёсты пылатыны шуыса лыктӥз. Коридор кузя мыныкуз, кырсь, зырымесь пиналъёс суйтӥз кысказы: - Тон мынам-а атае? Басьты монэ татысь, - синмаз ик учкылӥзы покчиос. Малпан лыктӥз соку ик. Нылпи юртысь дассэ пиналэз кутӥз, ас вылаз гожтӥз. Ёросын со сярысь гинэ вераськизы на. Кин ке умоен лыдъяз, кин ке пыкылӥз, бӧрсяз серем карылӥз: адӟом ай, мар пӧрмоз алкоголикъёслэн, наркоманъёслэн, проституткаослэн нылпиоссылэсь. Но супыльтонъёсты кылзыны дыр ӧй вал. Отец Николай валалляз: храмъёс пуктыса гинэ югдурез уд тупаты, адямиослэсь сюлэмзэс чылкытатыны, оскон пыӵатыны кулэ. Нылпи юртысь со 48 нылпиез басьтӥз. Ас вылаз гожтыса ӝынызэ гинэ вуттӥз. Люкыны со нокинэ уг малпа вал, но алигес потэм закон. Соя, пе, сизьым нылпилэсь трос ас вылад гожтыны уг яра. Валантэм закон. Но номыр уд кары. Соин ик ӝыныезлы басьтэм нылпиосызлы со опекун гинэ луиз на. - Но мон понна пӧртэмлыкез ӧвӧл, - шуэ отец Николай. - Ас вылам гожтэмъёсыз (усыновить каремъёсыз) но, гожтымтэосыз но огкаь. Соос ваньзы милемды кузпалэным анай-атай шуо. Одӥг пинал ваиз на ачиз кузпалы. Тӥни озьы ми улӥськом 51 кузя. Но ваньмыз та семьяын сокем капчи ӧвӧл. Пиналъёс уго бичамын шуг семьяосысь. Басьтӥз одӥг пол трос нылпиё атай кык кролик. Нылпиос соосын шудозы-утялтозы малпаз. Спонсоръёслэн юрттэмзыя, пуктӥзы корка. Огпалаз уло нылъёс, мукет палаз - пиос. Бадымъёсыз утялто пичиоссэ. Корка пушкын ик вань пичигес черк. Отын служба нуиське нимысьтыз нылпиос понна гинэ. Кӧня ке нунал ортчыса нош кин ке кроликъёсты вандэм. Ваньмыз шуэрскизы - кин? Йыртэмасез шедьтӥзы, пуртсэ со матрас улаз ватэм. Ай, пе, одӥгзэ пичи пиез вандыны ӧдъясько на вал. Малы пияш озьы дауртӥз? Вераськыса тодмо луиз: пияшлэн атаез семьяязы ялан жугиськыса улэм, кӧня ке муртэ пуртэн ӵогъям. Сиёнзы ӧвӧлысь пуныосты вандыса доразы вайылэм, пӧзьтылэм. Татын ваньмыз валамон. Но кызьы валалод дышетскем кышномуртэз? Ачиз врач нунызэ роддоме кельтэм, мискиньлэн кияз кык чиньыез ӧвӧлысь. - Туж ӝож, - шуэ отец Николай, - черке нылпизэс кельтыны выро таза, визьмо адямиос. Урод улэмзылы, ёрмемзылы ӝожтӥсько. Нош кытын государство? Малы со уг сюлмаськы куанер улӥсьёсыз сярысь? Отец Николай возе 180 гектар музъем, уте пудо. Быдэс семьязэ уже кыскыны выре. Но коньдон уг тырмы. Вылаз ик, эшшо Пенсиосъя фонд 200 сюрс манет куре. Соос туж умой тодо, татын кызь вить висись пересьёс уло шуыса. Соосты ялан утялтыса возёно. Нош мылкыд карисьёс уг шедё. Узыръёс но черклы уг сёткасько, соос тросгес коньдонзэс быдто рекламалы, асэнызы дан поттонлы. Соин ик утялтыны ветлӥсьёслы уждун тыроно луэ. Огвакыт черкын служба мынон дыръя ик вӧсяськисьёслэн коньдонзы ышылыны кутскиз. Отец николай шӧдылӥз, кин озьы выре. Татчы кемалась ӧвӧл куинь сютэм нылпиосты вайыса кельтӥзы. Юись анай-атайзы соосты кулэ кариллямтэ. Сиемзы потэмысь мар карыны валатэк пиналъёс лушкаськыны кутскиллям. Одӥг нылаш татчы Башкириысь лыктэм. Анаез сое проститутка карыны выре вылэм. Тросэз анай-атайёс тодо нылпизылэсь кытынзэ. Но адӟиськыны но, праздникъёсын ӟечкыланы но уг ветло. Одӥг Инмар гинэ тодэ, кӧня кужымзэ быдтэ отец Николай та нылпиосты умой адямиозь будэтон понна. Со ик чиданзэ но сётэ, дыр. Кизилиос верало 02.04-08.04 Така (Овен) 21.03-20.04 Удалтоз сюрес вылын. Но возиське шудонъёслэсь - одно ик келялоды. Арня вискын ӟеч коньдон басьтоды. Кузпалдылы уз кельшы тӥляд асьтэдыз кызьы воземды, керетон потыны быгатоз. Шутэтскон нуналъёсы жалялэ кустэс, сюрлыдэс, секыт ужез быдэсъямлэсь возиське. Ош (Телец) 21.04-21.05 Дорысь уж капчиен сётӥськоз. Вакыт тупа коммерциен вырыны. Арня пумын возьмало тунсыко пумиськонъёс. Шуг учырысь потон амал асьтэлы ик утчано луоз. Кыктоос (Эгызоос, Близнецы) 22.05-21.06 Тӥляд тодмоосыныды, бускельёсыныды, гажан муртэныды кусыпъёсты синмаськымонэсь. Узгес удалты экзаменын. Коньдондэс пунэмен эн сётъялэ. Та арняе огнады кылемды потоз, творчествоен вырыны мылкыдды ӝутӥськоз. Кисло-кусло (Рак) 22.06-23.07 Чик малпаськытэк гожтӥське документъёс, огкылъёс вылэ - ваньмыз умой луоз. Нуналлы быдэ быдэсъяно уж жадьытоз. Со понна мылкыддэс ӝутоз гажан муртты. Дорын кузё луэмдэс возьматыны кулэез ӧвӧл - сое ваньмыз тодо. Шутэтскон нуналъёсы куно ӧте яке концертэ ветлэ. Лев 24.07-23.08 Эн дыртэ выль проектъёс борды кутскыны, дуно арбери басьтыны. Ӵош ужась эшъёсыныды но кылды туж уз тупа. Таизэ арняез сӥзе асьтэды семьядылы, дорысь ужлы. Нылмурт (Дева) 24.08-23.09 Средае шудтэм учыръёс луыны быгатозы, та нунал дорадыгес пукыны тырше. Уж дурады ваньмыз умой луоз, коньдон ужпумъёсты тупасткозы. Тросгес саклык висъялэ нылпиостылы. Весъёс 24.09-23.10 Понедельник тупа уже интыяськыны. Кема возьмам юрттэт, коньдон басьтыны быгатоды. Удалтоз сюрес вылын. Но возиське дуно арбериос басьтонлэсь, лотереяен шудонлэсь. Умой ужзы мыноз дышетӥсьёслэн, гожъяськисьёслэн. Арня нунал керӟеггес ортчоз - асьтэды кияды возьыны тырше, котырысьтыды адямиос тӥляд сыӵе мылкыдды понна янгыш ӧвӧл. Скорпион 24.10-22.11 Трос дырез кулэ карозы коньдон ужпумъёс. Ӧжыт ке но шыръяны выре. Арня ӵоже туж жадёды, тазалыкты лябӟоз. Соин ик шутэтскон нуналъёсы тазалыктэс юнматонэн выре. Чаклаське мултэс вина юонлэсь, тодмотэм муртъёсын матысь кусыпъёс тупатонлэсь. Ыбылӥськись (Стрелец) 23.11-21.12 Понедельник тупа бизнесэн вырыны, экзаменъёс сётыны. Ӵуказеяз ик югдур воштӥськыны быгатоз. Умой луысал искусствоен, творчествоен вырыны, киное, театре ветлыны. Эшъёсты таяз учыре шумпоттозы. Сюро Кеч (Козерог) 22.12-20.01 Капчиен быдэстоды вань ужъёсты. Эн дыртэ кинлэсь ке пунэмаськыны яке банкын счёт усьтыны. Малпанъёсты каллен-каллен быдэсмыны ӧдъяло, но ушъяськыны вазь на. Кивалтӥсьтэс ӟеч уженыды паймытоды, оло, премиен но пусйыны уз вунэты. Ву кисьтӥсь (Водолей) 21.-1-19.02 Арня кутскыку ик нылпиосты шумпоттозы. Ужын котьку сямен ик йылыз-пумыз уг адӟиськы. Четверге уждун, премия басьтыны быгатоды. Но эн дыртэ сое быдтыны, коньдонды азьланяз яралоз. Субботае умой луысал черке ветлыны. Чорыгъёс 20.02-20.03. Ваньмыз умой луоз: уж дурады дунъялозы, оло, ватсаса коньдон но висъялозы. Вакыт тупа огкылъёсын ужаны, выль кусыпъёс тупатыны. Арня пумын матысь адямиосыныды но кусыпъёсты тупалозы. Кудды меда тӥ сакгес? Тулыс вуэмъя йырын олокыӵе но мылкыдъёс кылдо. Тани алигес малпан вордскиз: уз луы меда шедьтыны тужгес но сак лыдӟисьёсмес. Соин ик пичи ӵошатскон ялӥськом. Телефон пыр яке гожтэтэн ивортэ, ма герӟа газетмылэсь пятницаосы потэм берло куинь номеръёссэ. Жингыртоно таӵе номеръя: 25-82-89. Витиськом. Шонер валэктон сётись нырысетӥ лыдӟисьмес возьма синпель кузьым. Серемес чуръёс Йыромытӥз Кузпалъёс "Москвич" машинаен ширто. Кышноез картэзлы куаляк вазе: - Асьмеос ӧмтэ-о йыроме? - Малы? - Ма, та пуныез асьмеос огпол лёгам вал кадь ини? Йӧнасал... - Тамак кыскиськод-а? - юа врач висисьлэсь. - Уг, - шуэ соиз... - Жаль, жаль... - Малы? - Ма, тон тамактэ куштысал ке, соку ик йӧнасал. Пунэмаз - Ӵуказеозьлы пунэмен сюрс манет сётыны уд-а быгаты? - Быгато. Но ӵуказе ик ӧд ке берыкты, мон тыныд одӥг копейка но уг сётъя ни. - Озьы, иське!? Соку вай ай куинь сюрс манеттэ! Мӧзмыт, пе - Тазалыке лябомемен, монэ першал кык арня чеснок сиыны косӥз. - Кыӵе-о луиз бен? - Мӧзмыт, мӧзмыт! Нокин но матам уг ветлы ни. Юрттӥзы - Уть ай, - шуэ кышноез картэзлы, - со курег малы ке туж мӧзме, лэся, пус-пус ветлэ. Вандоно шат? - Вандоно ке вандоно но, - вазе картэз, - соку со серекъялоз-а, мар-а? Кышнояло, пе Пумисько кык пиос. - Кылзы ай, - шуэ одӥгез, - мон тонэ одӥг пол Лизаен адӟи на ке... - Йырме бералтод-а? - Уг. Мон тонэ соин кышнояло! Сюлмаськон - Машинистка шедьтӥд-а? - Шедьтыны шедьтӥ ай но, нош ик сюлмаськон! - Кыӵе? - Роман гожтыны ӧй кутскы на. Шӧкыч Ярмаркае Озьы кылдэмын ни та улонын. Пеймыт уез одно ик югыт нунал воштэ. Усем лымы но сульпаське, тудвуэн ӧръяське. Али гинэ тани югыт нуналъёсты пеймыт уйёсыд ӝокатыны дасясько ке вал, табере ӝомалэдлэсь-акшанэдлэсь кузёяськон дырзэ югыт куазед улляны вуттӥз ни. Дыр уго ваньзэ воштэ. Уть, нунал ортчыса, урмамы тулысэдлэн кыкетӥ толэзез кузёяськыны шӧталоз - 1-тӥ апрель вуоз. Бен, та нунал котькуд калыклэн сямаз маскаръяськонэн, серекъянэн пачылмыса пыремын. Куазь гинэ но та вакытэ адямилэсь мылкыдзэ шӧдэ кадь, укыр пӧечи кариське: зороз но, кынтоз но, мынектоз но, жобаськоз но... Кызьы дӥсяськыны йӧнзэ ик уд шедьты. Кин тодэ, оло, куазьлэсь таӵе йылолзэ ик адямиос но асьсэлы басьтӥллям. Арлы одӥг пол пӧяськыны-алдаськыны сьӧлык уз луы шуыса, оштолэзьлэн нырысетӥ нуналаз матысь юлтошъёссэс, выжы-кумъёссэс, пумитазы огшоры шедемъёсты гинэ но кутчаны туртто. Тодо: пӧямысьтыды нокин но йыркурзэ уз потты. Ваче мынектозы, горозы но люкиськозы, серекъян-маскаръяськонэз данъяса. Юнме шорысь шат та нуналэ, шунытэз шӧдыса музэн, улон интыосмес, юртъёсты, шуисько, шунтӥсьёс но шырыт сямо карисько. Патеръёсты шунтӥсь батарейкаос толбыт кыскем йӧл кадь гинэ няськыт уло вал ке, табере соос ӟырдатэм таба выллемесь. Няськыт гинэ ӟизась шуныт ву но нырысетӥ апреле быректыса-ӵажгетыса бызёз ай. Котыръятэк вераса, туэ нырысетӥ апрельлэсь вуэмзэ асьсэ манерен пумиталозы, шуо, вузкарон удысын тыршисьёс но пӧртэм базарчиос. Кызьы, юаськоды-а? Мугзэ лушкемак сипырто. Только бускельдылы шокыштыны эн шедьтэ. Тӥледды азьпалтыса магазинэ я базаре лобатоз со, нош асьтэос ӧжытак ӝегады ке, пӧлыпум сяна уд адӟе ни. Ужпум тани ма бордын колӟаськемын. Туэ выль вапумез, выль даурез мытӥм шуыса, лэся, ортчыт шумпотӥмы. Нош дунъёс асьмелэсь но зол эрказмизы - пыдэстэм лыз инбамозь тэтчизы. Но... уждун пумысь гинэ малы ке котьку сямен ик...вунэтӥзы. Коньылы-кыклы будэтэм-йылэтэм каремзы тып-тып кӧт кышъяны но уггес тырмы ни. Нош дӥськут-пыдкук пумысь ке - коть шыр гольык ветлы. Шуисько ук, лек пуны кадь куртчылӥськись дунъёслы луыса, магазинэ коть нырдэ эн возьматъя ни. Ма, базаретӥ юмшасьёслэн лыдзы но чараклы кулэсмиз. Шурез ӵыпид ке, ву люкаське но люкаське, шуо. Магазинъёсын-базаръёсын но югдур сыӵегес луиз: сиён-юон но пӧртэм пумо вузъёс тымиськизы. Соин ик вузкарисьёс но вузчиос йыртышсэс кормыштӥзы, ма карыны ӟудӥзы. Кема кыллем сиён-юон кӧшоме - коть ваньзэ куркуянэ кисьта. Нош отчы келяны транспорт кулэ, нош созэ эстӥськонтэк интыысьтыз одӥг вамышлы но уд вырӟыты. Кӧня коньдонэз юнме тӧлъя- буръя келялод?.. Озьы бере, балык, бастурма, бекон, корейка, ӵынатэм курег, пӧртэм-пӧртэм колбаса но мукет со выллем сиён-куртчонъёсты килозэ, манетэн-кыкен вузаса но мамында барыш пыртыны луоно, пе. Бере ӧз кыле пӧртэм пумо куослэсь, гоно дӥськутъёсын, изьыосын, пыдкутчанъёсын базарын сылӥсьёс но фирменной нимаськись магазин возисьёс. Кайта сӥзьылозь кытын утёд-возёд ай, пе, толалтэ нуллон котыръёсты? Шуба, дублёнка, изьы кадьёстэ кейёс кораса-сиыса быдтозы - изъянэн берыктозы. Нош али дас-кызь пол дунзэс кулэстыса вузаса но коньдоно гинэ луод. Озьы ик кенешизы - ярмарка нерге ортчытоно кариськизы. Соослэсь шыпыртэмзэс мон тӥледлы сипыртӥсько: ӵуказе бере, арня нунал шуыса, кема эн улэ вушйылыса- назьылляськыса, соку ик бызе городэ - сотэк... кылёды бере... Милемыз ӧз на азьпалтэ Кык арлы одӥг пол Огазе Араб Эмиратъёсын Абу-Даби городын ортчылэ ож тӥрлыкез возьматон. Отчы пырисько дуннеысь пӧртэм кунъёс. Кылсярысь, алигес ортчем ужрадын асьсэ продукцизэ возьматӥз 63 кун. Россилэн нимыныз адӟытонын возьматэмын вал Удмуртиын поттӥськись ож тӥрлык но. Республикаысьтымы делегациын вал Правительстволэн Тӧроез Ю. Питкевич. Кунсьӧр кусыпъёсъя министр В. Викулов, "Ижмаш" огазеясьлэн генеральной директорез В. Гродецкий но "Купол" электромеханикая заводлэн кивалтӥсезлэн воштӥсез Б. Нестеров. - Сыӵе бадӟым возьматонэ мон нырысьсэ сюри, - шуиз Ю. Питкевич. - Соин ик ваньмыз со туж паймымон вал. Ож тӥрлыкез возьматонын одӥг квадратной метр быдӟа но буш интыез ӧй вал. Правительстволэсь Тӧрозэ тужгес но паймытэм азьвыл республикаослэн, кылсярысь, Украиналэн, Казахстанлэн, Узбекистанлэн кӧбертэм луэмзы: Удмуртилэсь ож тӥрлыксэ асьсэлэн карыса, пе, адӟытонын возьмато. Озьы ик шуиз "Ижмашлэн" генеральной директорез но. Солы уката но кельшымтэ Румынилэн, Казахстанлэн асьме ож тӥрлыкмес укыр мыло-кыдо кариськыса мукет государствоослы ӵектэмзы. Сыӵе шӧртчиосты интыязы пуктоно, рынокысь палэнтоно, шуиз В. Гродецкий. Соос Совето Союз дыръя вузам ож тӥрлыкмес возьмато. Кӧня ке выльдо но рыноке потто. Та ужрадын асьме пыӵалъёслэсь данзэс туж умой утем тодмо конструктормы М. Калашников. Обороная предприятиосмылэн ужамзы сярысь нимысьтыз пресс-конференция но ортчытэм. - Сыӵе адӟытонъёсы Россия одно ик пыриськыны кулэ, - шуиз Ю. Питкевич. - Таӵе ужрадын гинэ умой валаськод, кыӵе государствоосын асьмеос золгес кусыпъёс тупатыны кулэ ож тӥрлыкмес умойгес вузан понна но озьы ик сое туала куронъёсъя выльдон понна. Жаляса верано, Россилэн вылӥ кивалтӥсьёсыз малы ке татчы ӧз пыриське. Со дыре ик араб государствоослэн татын вал корольёссы, шейхъёссы, обороная министръёссы - соос, кинъёс пыр ож тӥрлыкез вузан-басьтон сярысь огкылъёс гожтӥсько. Кыӵеен адӟиськиз бен Россия та адӟытонын Азиысь, Америкаысь, Ближний Востокысь странаос азьын? В. Гродецкий верамъя, та юанлы М. Калашников, пе, тазьы шуиз: "Милемыз ӧз на азьпалтэ". Тужгес но бадӟым саклык висъямын вал Ока-1, Ока-102, снайпер пыӵалъёслы, механикая заводлэн ТОР-ёсызлы но инбамез утёнъя (ПВО) тӥрлыкъёслы. ПВО тӥрлыкъёс сярысь ке верано, Россия сяна, соосты Китай гинэ возьматӥз на. Но китайёслэн но соос быдэсак асьсэлэн малпамын ӧвӧл, мукетъёслэсь асэстэмын. Таӵе бадӟым ужрадъёсын трос гинэ "шпион" шудонъёс но луыло. Соин ик пӧртэм адямиосын вераськыку, астэ сак возёно, шуиз Б. Нестеров. Тани Тайваньысь адямилэн туж тодэмез потэ вал, кыӵе оружие Удмуртия Китайлы вуза. Абу-Дабиын ож тӥрлыкез возьматон витетӥзэ ортчиз ини. Маин висъяськиз таиз ужрад азьлоосызлэсь? В. Викулов верамъя, таяз учыре, пе, ӵапак выль вооружение ӧй вал, шуыны луоз. Син азьын (улэпкын) возьматымонэз но сокем трос ӧй вал. Ож тӥрлыкез стендъёс вылысьгес гинэ адӟоно вал. Озьы ке но, туэ нырысьсэ шӧдӥськиз, куд-ог ожмаськон техника кӧня ке странаосын валче ужаса лэсьтэмын шуыса. Сыӵе амалэн лэсьтэм "тягаоссэ", кылсярысь, Беларусь Республика возьматӥз. Со техникалэн двигателез, кортэз, ыбылон тӥрлыкез пӧртэм государствоосын лэсьтэмын. Кин тодэ, оло, азьланяз ож тӥрлык поттонын валче ужан амал огез валтӥсез луоз, шуиз Ю. Питкевич. Асьме предприятиос понна таӵе адӟытонэ пыриськон туж пайдаё вал, валэктӥзы араб государствое вуылэмъёс. Сое но, пе, валамы: туала ож тӥрлыкъёсмес ми паськытгес ӵектыны кулэ сыӵе странаослы, кытын золгес американецъёс кузёясько. Со - Ближний Восток, Индия, Африка. Вераны кулэ, та ужрадэ пыриськыса, "Купол" ЭМЗ эшшо но золгес кусыпъёссэ юнматӥз Грециен. Со сяна, предприятие азьланяз валче ужаны малпа сыӵе кунгож фирмаосын, кудъёсаз потто пыӵал тӥрлыкъёслы уин адӟись прицелъёс. Асьмеос та ласянь бере кылиськом. Нош Югославиын югдур возьматӥз, американецъёслэн ож тӥрлыксы уингес ыбылӥз шуыса. Россия котьку данъяськылӥз ож тӥрлык поттон удысэныз. Но данъяськыса гинэ ке улӥд, бере кылёд. Соин ик ожмаськон техникамес выльдыны но тыршоно. Сотэк рынокын возиськыны уг луы. Таӵе огъя малпанэн йылпумъяськиз араб государствое вуылэм делегацилэн журналистъёсын пумиськонэз. Т. Банникова. Кияз крезез, сюлмаз кырӟанэз Нимтулыз: Митрофанов Валерий Яковлевич. Вордскемын: 31-тӥ мартэ 1946-тӥ арын. Ужан интыез: Удмурт кун филармониысь чеберлыкъя кивалтӥсь. Кизилиосъя: Ыж (Овен) - Пуны. Яратоно буёлъёсыз: лыз, вож, горд - вань яркытэз. Яратоно праздникъёсыз: Выль ар, 8-тӥ Март. Яратоно сиёнэз: пельнянь. Яратоно толэзьёсыз: май, июнь. Яратоно передачаосыз: "Иворъёс", "Мылысь-кыдысь", "Ялыке". Яратоно ужан тӥрлыкъёсыз: молот, струг. Ваньмон дыръяз яратэ: спортэн вырыны (марафон). Кыӵе сямо адямиос кельшо: усьтэм сюлэмо, малпанзэс меӵак вераны дӥсьтӥсесь. Пичи дыръям тракторист луон сярысь малпалляй. Уката ик со вакытэ туж тузӥ лыдъяськиз паськыт профилен механизатор луон. - Вордски мон Шаркан ёросысь Быги починка гуртын. Быги гуртэз тросэз тодо, починкаез тодӥсез ӧжытгес. Со туж чебер интые пуксемын. Тодӥсько на: пичи дыръям отысь урамъёсын вож-вож ожо будэ вал. Вал уробоен гинэ но со вылтӥ ворттылыны ӧз лэзьылэ. Сик кыдёкын ик ӧвӧл, губиез, эмезез - ведраен омыръямон. Милесьтым выжыосмес Митро Микоос шуылӥзы (тазьы нимало вылэм ӵужтятямес). Бакча мышкамы ик Митро Мико шуон ошмес но бызе вал. Отын туж ческыт, туж чылкыт вуэз бызиз. Эсьмаса, мисьтаськон тусез но зӧк-зӧк корлэсь туж быгатыса лэсьтэмын вал. Быги починкаын Митрофановъёс трос. Малпасько, ми выжыос ик ас дыраз утялтӥзы- сузязы та ошмесэз. Соин ик Шаркан палъёсы вуылӥсько ке, одно та гуртэ кожаны, отысь ошмес дуре васькыса, юзмыт вузэ шӧмъяны тыршисько. - Быги починкаын туннэ но ӵыжы-выжыосты уло, дыр? - Али отын анаелэн племянникез кылемын. Ачим та гуртын ньыль аресозь улэмын. Собере семьямы Сосновкае кошкиз. Татысен ик мон нырысетӥ классэ дышетскыны мынӥ. Зэмзэ вераса, пичи дыръям улон интыме ӵем вошъяно луи. Кыкетӥ-куинетӥ классъёсысен Як.-Бодья ёросысь школаосын ортчытӥ. Та бӧрсьы ог арлы гинэ Сосновкае берытскылӥ на. Витетӥ-дасэтӥ классъёсты йылпумъяй ни Можгалан. Отын улэ вал анаелэн сузэрез, мынам Рита апае. Со Можгалась крезьгуръя школаен кивалтӥз. Ас дораз ик интыяз монэ но. Озьы, огшоры школаен ӵош йылпумъяй крезьгуръя школаез. - Иське, крезьгур борды пичиысен ик кыстӥськиды? - Та сюресэз мыным анае бырйиз, шуыны луоз. Со ачиз но крезьгуръя училищеез йылпумъямын вал. Но война кутскемен, мытэм удыссэ уретоно луиз. Ожлэн нырысетӥ нуналъёсаз ик сое фонтэ басьтӥзы, артиллерийской полкын разведчик вал. Война бере крезьгур борды малы ке ӧз кыстӥськы ни. Сосновкаысь ик нылпи юртэ ужаны интыяськиз. Соин ик, аслыз зэмос крезьгурчи луыны ӧз кылды бере, мытэм удыссэ мон ке но мед азинтом потӥз, вылды. Озьы, Можгалась крезьгуръя школаез йылпумъяме бере, анае но Рита апае монэ крезьгуръя училищее интыязы. - Ӧд пумитъяське-а таӵе сюрес быръемзылы? - Пумитъяськыны ӧй пумитъяськы. Но ачим тракторист луон сярысь малпалляй. Уката со вакытэ туж тузӥ лыдъяськиз паськыт профилен механизатор луон. Гужемзэ ми, пичиос, нунал лумбытэн мӧйыос сьӧры ветлӥськом вал. Пудо сиён дасяны, ю-нянь калтыны юрттылӥм. Самой соку ну бергасько ни вал тракторъёс котыртӥ! Кытӥ-отӥ руль сьӧры но пуксьылыны кемдылӥз - таӵе дыръя лӧптылӥ ук. Училищеын дышетскыкум ик Ижысь куиняз нылпи садъёсын крезьгуръя часъёс нуи. Озьы пичияк ке но коньдон луылӥз. - Озьы ке но, улондэс тӥ крезьгурен герӟады. - Училищеын дышетскон вискын монэ армие басьтӥзы. Озьы куинь арзэ Жигулевск дорысь зенитно-ракетной войскоын ортчытӥ на. Арми бере ини пыр-почгес басьтӥськи крезьгурчилы дышетскон борды. Училищеез йылпумъяме бере, Культурая министерство монэ Казаньысь консерваторие ыстӥз. -Татысен ини зэмос крезьгурчилэн улонэз кутскиз. - Училищеын дышетскыкум ик Ижысь куиняз нылпи садъёсын крезьгуръя часъёс нуи. Озьы пичияк ке но коньдон луылӥз, садикын ик сюдылӥзы но. Студент понна со туж умой вал. Угось дорысь тырмыт коньдон ысъяны ӧз быгатылэ. Семьямы бадӟым вал, мон бӧрсьы эшшо ньыль сузэръёсы будӥзы. Казаньысь консерваторие пырем берам но малпасько вал, кызьы меда дышетском шуыса, Культурая министерство нокыӵе стипендия ӧз ысъялля. Озьы татын но уже интыяськоно луиз. Нырысь ик школаысь нылпи хорен кивалтӥ, собере Казаньысь телефон станциын ужась нылъёслэсь ансамбль кылдытӥм. Озьы дышетскон аръёсы ортчизы. Консерваториез йылпумъяме бере, выльысь Ижевске берытски. Культурая министерство монэ "Италмасэ" хормейстере ыстӥз. - Кыӵе арын вал со? - 1975-тӥ арын. Со вакытэ "Италмас" туж трос гастрольёсы потаз вал. Ансамбльын вить ар ужатозям, кӧня городъёсы вуылӥм! Тани синъёсме кынисько но озьы ик адӟисько Москва, Калуга, Рязань, Ярославль... Калининградысен Владивостокозь вуылымтэ городъёсмы ик ӧй вал кадь. Али но ӟеч тодӥсько, Владивостокысен кутскыса, кык толэзь ӵоже Сибирь пыр ортчеммес. Озьы "Италмасын" Анатолий Мамонтовен ӵош ужан аръёс мон понна бадӟым школа луизы. Но крезьгурчилэн ужез сыӵе: со быдэс улонзэ тодон-валан люкано луэ. Тани али но мон дышетскисько: табере ини "Ингурысь" пиосылэсь. Концерт дыръя ачим но пайми: кыӵе быгатӥсесь вылӥллям мынам пиосы! Макем зол чабизы соку москвичъёс удмурт капеллалы. - Валерий Яковлевич, калленэн "Ингур" капеллаысь пиос борды выжиськом кадь. - Пиосын 1993-тӥ арысен ужаны кутски. Татчыозь та капеллаен Анатолий Михайлович Щербаков кивалтӥз. Но ас мугъёсызъя со интызэ кельтӥз. Со вакытэ мон филармониын чеберлыкъя кивалтӥсь луыса ужасько ни вал. Озьы капеллаез утён мон вылэгес усиз. Соку пиосты оскытӥ: хормейстер шедьтом. Нуналзэ но пусйи. Но дыр вуиз - верам кылы уг быдэсмы. Мар кароно? Трамвае пукси, школа-интернатэ вуи но шуисько: "Ӟечбуресь, мон тӥляд выль хормейстерды". Басьтӥськи та удыс борды арлы гинэ шуыса. Ас кужымелы но ӧй оскы, вылды: угось "Италмасын" ужаме бӧрсьы дас куинь ар ортчемын ни вал. Та вискын культурая министрлэн воштӥсез луыса но, обкомын ужаса но вуттӥ. Но ар туж ӝог ортчиз. Ӵапак та вакытэ ик милемыз концертэн Москвае ӧтизы. Эшшо ке Чайковскийлэн залаз ай! Кызьы таӵе дыръя коллективез куштод? Мынӥм Москвае. Но самой та нунал ик мынэсьтым вань малпанъёсме воштӥз. Концерт дыръя ачим но пайми: кыӵе быгатӥсесь вылӥллям мынам пиосы! Макем зол чабизы соку москвичъёс удмурт капеллалы. Москва бӧрсьы мынэсьтым но, пиослэсь но шудоез ӧй вал кадь : ӝужыт гурезьлэн йылаз тубем кадь потӥз. - Озьыен, тӥляд та кизили нуналды луиз? - Озьы шуом ини. Та бӧрсьы капеллаысь кошкон мылкыды сайяськиз. Пӧрме бере - ужало, малпай. Кӧня ке ортчыса, милемды Эстоние ӧтизы. Отын вить арлы огпол кырӟанлы но эктонлы сӥзем нуналъёс ортчыло. Татын но милемыз туж шуныт пумитазы. Та бӧрсьы мылкыдмы эшшо бурдъяськиз. Малпаськыны кутским, оло, кыӵе ке конкурсъёсы но пыриськоно шуыса. Озьы 1998-тӥ арын Венгрие куриськон гожтӥм. Ӧтизы. Мынӥм. Татын но вань калыкез паймытӥм - конкурсысь зарни дипломен берытским. 1999-тӥ арын вуылӥм Финляндие. Татын со аре дуннеысь самой бадӟым конкурс радъямын вал. Ужрадэ дас куинь странаысь куатьтон куать хор пыриськиз. Со пӧлын вал США-ысь, Япониысь, Китайысь кырӟасьёс. Малпай: таяз учыре вормисьёс пӧлы нокызьы ум шеде ни. Янгышаськем, нош ик устоосыз пӧлын луим. Та бӧрсьы милемлы вераны кутскизы, ма, пе, кунгож сьӧртӥ гинэ ворттылӥськоды, сокем устоесь ке, Россиысь коллективъёсын нюръяськыса эскере. - ??? Шат Россиын ортчись ӵошатсконъёын шуггес вормыны? - Юнме уг верало, дыр, самой устоосыз хоръёс Россиын шуыса. Собере, оло вералод, оло уд, но татын жюриын пукисьёс тодмооссы, ас выжы калыкъёссы шорыгес учкыны туртто. Тани кылем арын Калугае ветлӥм. Отчы кык арлы одӥг пол пиослэн хоръёссы люкаськыло. Отын но коллективъёслэн кивалтӥсьёссы жюри котырын бергало ни: О, Лев Константинович, Лев Констинтинович! Мон озьы уг быгатӥськы, ваньмыз ас интыяз мед луоз кадь потэ. Соин ик жюрилэн син шораз адскылытэк турттӥсько. Тазьы "пегаса" ветлэмме шӧдыса ик, луоз, Москваысь тодмо профессор соку шуиз мыным: "Малпаськод, тӥледлы соку ик нырысетӥ степенё диплом сётозы? Адӟиськод-а, кызьы адямиос жюри котыртӥ бергало. Нош тон ас поннад ветлӥськод, нокинлы уд йыбыртъяськы, уд кырмышъяськы. Шонерзэ вераса, тӥ мыным ваньмызлэсь зол кельшиды, но шӧдӥсько: вормисе уд потэ". Зэмзэ но, соку милемлы кыкетӥ степенё диплом гинэ сётӥзы. Та конкурсын ми выль коллектив вал, репертуармы но мукетъёсызлэсь висъяськиз. Оло, соин но жюри соку ик вылӥе ӝутыны ӧз дӥсьты. - Маин бен репертуарды висъяськиз? - Мукет коллективъёс ӟуч кылын программа дасяллям. Ми вить кылын кырӟамы: удмурт, венгер, финн, эстон но ӟуч. - Валерий Яковлевич, нош кызьы, кытысь тӥ мукет кылъёсын кырӟанъёс бырйиськоды? - Туннэ ми дас кык кылын кырӟаьском ни. Азьланяз репертуармес эшшо паськытатыны чакласьком. Туж ӟеч луысал, вань финн-угор выжы калыкъёслэсь кырӟанъёссэс дышетыны быгатысалме ке. Кытысь утчаськом соосты? Милемлы туж ӟеч юртто Удмурт кун университетыст тодосчиос Бибинур Шараповна Загуляева, Петр Ильич Воронцов. Эстон кылын кырӟанъёсмес дышетӥм вал Эстоние дасяськыкумы, финн но венгер кылъёсын - Финляндин но Венгрие дасяьскыкумы. - Тӥ арлы быдэ Удмуртилэн палэназ вутскыны тыршиськоды. Туэлы кыӵе ке малпанъёсты вань-а? - Малпаллям, оло, Финляндие но поталом шуыса. Собере Грецие ветлон мугъёс но вал. Кылем арын ай Ватиканысь ӧтён гожтэт басьтӥм. Отын огдыре вить фестивальёсы пыриськыны ӵектӥзы. Адресмес интернет пыр шедьтӥллям, луоз. Угось табере татын но милемлы нимысьтыз сайт усьтэмын. Со сяна, одӥг чурен ке на дуннеысь хоръёслэн сайтазы пыртэм. Туэ Челябинске потаменымы буйгатсконо луом ни, дыр. Культурая министерстволэн но, республикалэн бюджетаз но коньдон ӧвӧл. Озьы кӧня ке кужым люкано луом. Но ми трос потаськом шаерысьтымы ёросъёсы. Туннэ ӵем вуылӥськом Селта, Сюмси, Игра, Дэбес, Глазов, Сарапул ёросъёсы, яратоно интыосмы - Шаркан, Як.-Бодья. Бен, капеллалэн концертъёсыз огшоры учкисьлы секытэнгес сётске. Угось ми шляферъёсты ум кырӟаське, ужаськом академической программаен. - "Ингурысь" пиос тӥляд улонады самой бадӟымез данды шуыны луэ-а? - Капеллалэн вормонъёсыз - со мынам гинэ ӧвӧл, со пиослэн но данзы. Адӟе вал, кызьы вань сюлэмзэс сётыса соос ветло репетициосы, потало концертъёсы. Нош республикалэн палэназ вуыло ке, макем бурдъяське мылкыдзы. Соин ик арлы быдэ кытчы ке но поталом шуыса оскытӥсько соосты. Нош кыл сётӥд - быдэсты, пиосы азьын медад саптаськы. Пиналъёс дышетӥсьёссылы оско ке, со туж бадӟым кужым: гурезьёсты берыктыны луымон. Мон пиосылы котьку верасько, ойдолэ зэмос профессионалъёс кадь ужалом шуыса. Ноку но мон тӥледын уг даллашы, ноку уг тышкаськы - тӥ огшоры дышетскисьёс ӧвӧл, тӥ крезьгурчиос. - Валерий Яковлевич, туж трос вераськиськом ни "Ингур" капелла сярысь. Озьы ке но эшшо одӥг юан сётэме потэ на. Кызьы пиосты бырйиськоды, кыытсь соосты шедьтӥськоды? Тани май пумын анай-атайёс асьсэос пиналъёссэс дорамы вайыны кутскозы ни. Ми соосты кылзӥськом, устооссэс бырйиськом. Кудъёссэ пиосты смотръёсысь синйылтӥськом. Тани кылем арын "Зарни италмас" смотр дыръя туж синмаськи Кезысь пияшлы. Сое дорамы ӧти, табере Кирилл солист луиз ни. Мон котьку шуисько, мынам пиосы - дуннеысь самой усто пиос. Асьмелэн учкисьёсмы туж шудоесь. Угось Россиысь табере шуг шедьтыны Чайковскийлэн фестиваляз пыриськымтэ коллективъёсты. - Валерий Яковлевич, табере калленэн филарммония борды выжом, малпасько. Татын чеберлыкъя (художественной) кивалтӥсь луыса ужаны кутскемды дырысен ӝоген дас ар тырмоз ни. - Бен, филармоние мон 1991-тӥ арын лыктӥ, обкомын ужаме бере. Но дас ар одӥг нунал кадь ортчиз. Мыным туж яра артистъёсын ужаны. Шумпотӥсько, асьмелэн сыӵе быгатӥсь удмурт коллективъёсмы - "Шулдыр ӝыт", "Катанчи" - вань шуыса. Быгатэммыя, дорамы ӧтчаськом Москваысь, Санкт-Петербургысь тодмо адямиосты. Трос дыр но, кужым но быре фестивальёсы дасяськонлы. Туэ тани Чайковскийлэн 44- тӥез фестивалез ортчоз ни. Асьмелэн учкисьёсмы туж шудоесь, угось Россиысь табере фестивале пыриськымтэ коллективъёсты туж шуг шедьтыны. - Кызьыгес адӟиське удмурт культуралэн азинсконъёссэ огъя Россиысь удысэн ӵошатыса? - Уралысь улосвылъёсын ӵошатыса ик, асьме артистъёслэн самой пичи уждунзы, туж ляб материально-технической базазы. Озьы ке но, асьмелэн ик вань симфонической оркестрмы. Быдэс Россиын чиньые тырымон духовой оркестръёс, асьмелэн со но вань. Берло аръёсы синмаськымон ужа Операя но балетъя театр. Асьмелэн вань "Италмасмы", "Айкаймы", мукет калыкъёслэн соос туж лябесь на. Филармониын али эшшо вылез коллектив кылдэ на, "Лулгур" шуыса нимаське со. Жаляса верано, ӧжытгес на асьмелэн удмурт кадръёсмы. Ӧвӧл хормейстеръёс, хореографъёс, уг тырмо режиссёръёс. Операя но балетъя театрын но тросгес удмурт артистъёс мед луозы вылэм. Бен, мыным ваньмыныз ужано луэ: удмурт-а со, ӟуч-а, бигер-а. Котькытын сямен ик, асьме крезьгурчиос пӧлын но данакез инмар выжыысь потэмъёс луо. Но ужакум котьку лыдэ басьтӥсько: дунне вылын одӥг гинэ Удмурт кун филармония. Татын удмурт аристъёс ӧз луэ ке, кытын соос луозы на? Берло аръёсы трос дырме быдтӥ политикаен, кунэн герӟаськем ужпумъёслы. Али тани 55 арес тырмонме пусъё ини, соин ик вань быгатонме, тодон-валанме егит дыръям быръем удысэлы сётыны турттӥсько. Отӥ-татӥ кыстаськыса ветлоно ӧвӧл ни. Кужыме быриз шуыны уг яра - филармониын но, капеллаын но туж трос быдэстымтэ ужпумъёс люкаськемын. Соосын йылаз-пумаз вуттоно. Бен, жаль "Тюрагай" хорез кельтыны. Татын мон ог 26 ар ужасько ни. Но огдыре кык коллективен ужаны туж секыт. Мон ачим но сиён пӧраны яратӥсько. Но та ужез ас вылам ӵемгес шутэтскон нуналъёсы басьтыны тыршисько. - Валерий Яковлевич, тӥ туж трос удысъёсты ас вылады кыскиськоды. Семья кусыпъёсты вылын со уг шӧдӥськы-а? - Кузпалы но дышетскемезъя крезьгурчи. Казаньын дышетскыкум ай тодматски чуваш нылэн, синмаськи. Бӧрысьгес кышнояським. Консерваториез йылпумъяме бере сое сьӧрам, Ижевске ваи. Али кузпалы крезьгуря нылпи школаын ужа. Соин ик доре кыкмы но бер ӝыт гинэ вуиськом. Пимы но пичи дырысен ик общественной ужъёсы пыриськыны яратэ. Школаын дышетскыкуз "Родники" огазеяськонын дырзэ ортчытъяз. Туэ со нырысетӥ арзэ Удмурт кун университетысь социальной коммуникациосъя факультетын дышетске. Отын КВН-лы команда кылдытыны вутскиз ини. Тӥни озьы, со но доре кӧлыны гинэ вуэ. Нылмы быземын - бордамы уг улы ни. Таиз суредась луыны малпаз. Университетысь ик дизайнъя факультетлэн витетӥ курсаз дышетске ни. - Собере, ӝыт жадьыку, куддылы ке сиён но пӧзьтоно луэ на, дыр? Мукет ужъёс но гурт котырын тырмыт. -Кудмы вазьгес вуиськом, со ик пӧраськыны кутске. Мон ачим но сиён дасяны яратӥсько. Но та ужез ас вылам ӵемгес шутэтскон нуналъёсы басьтыны тыршисько. Кухняе пытсаськисько но нокинэ люкетыны уг лэзиськы. - Пельнянь пӧраськоды-а? Угось со яратоно сиёнды шуиськоды? - Уг. Пельнянез пӧраны оген кемагес. Сое ӵемысь ӵошен кутӥськом мон пуштроссэ дасясько. -Валерий Яковлевич, тӥляд семьяды интернациональной луэ. Нылпиосты кыӵе кылын верасько? Удмурт кылэз валало-а? - Кузпалыным ӟуч сямен вераськиськом бере, пиналъёсмы но ӟучомыныгес кутскемын. Но гужемлы быдэ гуртэ ветлыса, удмурт сямен но валамъясько. Паспортаз нылмы удмурт гожтӥськиз вал. Берлояз калыклэсь гожъян дыръя со дас одӥг аресъем маке, шуэ: малы, пе, мон ӟуч гожтӥськом, Удмуртиын улӥсько ук. - Мар монэ паймытӥз, яратоно праздникъёсты пӧлы тӥ 8-тӥ Мартэз пыртӥськоды. - Туж яратӥсько кинлэсь ке мылкыдзэ ӝутыны кинэ ке шумпоттыны. 8-тӥ Март праздникъёс пӧлысь тужгес чеберез луэ, дыр. Та нуналэ ӵукнаысен ик телефон сьӧры пуксиськод, тодмо нылкышноостэ ӟечкыласькод, шуныт кылъёс вераськод. Малпасько, вань воргоронъёс тазьы лэсьто, дыр. - Тау Валерий Яковлевич, тунсыко вераськонды понна. Юбилееныды тӥледды! Элина Кумачева. Москваын пумиськонъёс Удмурт Республикалэн Президентэз Александр Волков 26-тӥ-27-тӥ мартэ Москваын ужаз. 26-тӥ мартэ Александр Волков пумиськылӥз "Газпром" ОАО-лэн правлениезлэн кивалтӥсеныз Рем Вяхиревен. Удмуртилэн Президентэзлэсь шаерамы уногес чагыр эстӥськон вуттон сярысь ӵектонзэ "Газпромлэн" кивалтӥсез умоен лыдъяз. Пумиськон дыръя озьы ик эскеремын Сюмси черкогуртэ газ гумы лэсьтонлы коньдон висъян сярысь ужпум, соя ӟеч амал шедьтэмын. Та вакытэ республикаямы чагыр эстӥськонэн вить организация кузёяське. Соин валче республика тарифъёсъя но инвестициосъя огъя политика нуыны уг быгаты. Удмуртиысь Правительство но "Газпром" ОАО куспын 2000-тӥ арын гожтэм тупанкылэз азинтыса, Александр Волков ӵектӥз газэн вырись организациосты огазеяны. Рем Вяхирев воштӥсьёссэ косӥз со ӵектонъёсты эскерыны но улонэ пыӵатон амалъёс шедьтыны. 27-тӥ мартэ Александр Волков Россия Федерациысь Центральной банклэн Тӧроеныз Виктор Геращенкоен кенешиз. Эскеремын спутник пыр кусыпъёсъя "Банкир-2" сетез дасянлы, инъянлы но уже кутонлы коньдон висъян ужпум. Кызьы тодмо, Центробанклэсь та заказзэ "Ижевский радиозавод" огазеяськон быдэстэ. Александр Волков озьы ик ивортӥз радиозаводлы спутник пыр кусыпъёсъя "Стела" станцилы воштос ёзъёс лэсьтэмез понна радиозаводлы Центробанклэн тыронъёсыз сярысь. Виктор Геращенко оскытӥз, коньдон висъямын луоз шуыса. Толон ортчиз Удмурт Республикаысь Правительстволэн паськытатэм кенешез. Отчы ӧтемын вал ёрос администрациослэн но валтӥсь предприятиослэн кивалтӥсьёссы. Вераськон мынӥз промышленностьлэн кылем арын ужамез сярысь. Пумиськонэз нуиз Президент Александр Волков. Удмурт Республикалэн Президентэзлэн но Правительстволэн пресс-службазы. Гажано Валерий Яковлевич! "Удмурт дунне" газетлэн редакциез вань сюлмысьтыз ӟечкыла тӥледыз юбилееныды! Та югыт дунне вылэ вордӥськыса, тӥ ноку ӧд утчалэ вольыт но ӵошкыт сюресъёс. Котьку мынӥськоды но мыноды тӧллы пумит. Соку гинэ лыкто угось выль вормонъёс. Соку гинэ синъёсын ворекъяло, пишто шумпотон ваись тылсиос. Нош соос туж яркытэсь но ӟырдытэсь: киын кутыны уд дӥсьты. Вордӥськем нуналэныды ӟечкыласа, эшшо огпол сӥзиськомы тӥледлы кӧльы кадь юн тазалык. Тазалыкты луиз ке, луоз шудбурды но, яратонды но. Яратэлэ "Ингурдэс" - со тӥледлы кузьмалоз на трос шумпотон но чебересь гуръёс. "Удмурт дунне" газетлэн редакцияз ужасьёс. Чур бугор Удмурт Республикаысь Егитъёсын ужанъя кун комитет но "Луч" журналлэн редакцияз удмурт литератураез кылдытӥсьлэн, Григорий Верещагинлэн 150 ар тырмонэзлы сӥзьыса, егит авторъёс пӧлын конкурс ялэ.Ӟуч кылын гожтэм кылбуръёсты но веросъёсты 15-тӥ апрелёзь ыстоно "Луч" журналлэн редакцияз. Адресэз: Ижевск, Советской урам,1. Тел. 51-35-61. Удмуртия вылэ усёз метеорит... Кылем арня вискын США-ысь космосэз эскерись тодосчиос азьын кӧшкемыт адӟон усьтӥськиз. Музъем шоры, пе, бадӟым ӝоглыкен ог 5.000 килограммъем метеорит лобе. Но, лыдъян-чотан лэсьтэмзы бере, куалектэм Америка буйгатскиз, угось метеорит, пе, Россилэн музъемъёсыз вылэ усьыны кулэ. Асьме службаос та иворез оскытэкгес пумитазы. Но ӝоген Югдурез утёнъя министерствое "Секретно" печатен юнматэм папка вуиз. Милемлы тодмо луиз: 5560 килограммъем метеорит Музъемлэн 58-600 уй пал широтаяз, 53-550 шунды ӝужан долготаяз интыяськем улосэ усёз. Нош со, гажано эшъёсмы, Удмуртия! Нимысьтыз службаос та иворез калык пельёслэсь ватыса возизы ке но, "Удмурт дунне" секыт иворез шараяно кариськиз. Берло лыдъямъёсъя, метеорит Музъем вылэ шутэтскон нуналъёсы вуоз. Таин валче, вань калык азе лэчыт куронъёс пуктӥськом: 1. Арня нуналэ дорады эн пуке. 2. Противогазъёстэс дасялэ (Метеорит пуштэм бере секыт газъёсын ӵогӟыны луоз). 3. Инмысь тодмотэм лобась макеез адӟиды ке, ури-бери пегӟе. 4. Эн вунэтэ, арня нуналэ - 1-тӥ апрель. Соин ик ульча кузя противогазэн бызьылӥсь адямиез адӟиды ке, тодэ, тӥ сяна но шузи-мази выжыкылъёслы оскисьёс вань на. Алӥз Е. Миннигараева. Уриськем улон "Удмуртия" издательствоын та нуналъёсы потӥз Сталин кивалтон вакытэ репрессия улэ сюремъёсты "Буре ваён книга". Сое поттыны юрттӥз Удмурт Республикалэн Президентэз Александр Волков но Удмурт Правительство. Шаерысьтымы репрессия улэ 8 сюрс сюремъёс пӧлысь та дырлы 60-эз гинэ улэп кылемын на. Пытсэт сьӧры, лагерьёсы келямъёслы тросэзлы ӧз кылды ни дор палъёссэс, ӵыжы-выжыоссэс адӟыны. Ӧз кылды берытскыны Петр Леонтьевич Лебедевлы но. Пётр Леонтьевич йылпумъяз Вавожысь 2 классъем школаез. Бадӟым Уча но Вавож волостьёс понна со одӥгез дышетскем адями вал. Граждан ож дыръя тӧдьыос сое Малмыжын пытсаса но возиллям. Собере колчаклэн армиез сое сьӧраз Новосибирскозь нуэм. Воргорон улэп кылемез бере, бертӥз дор палъёсаз Ужаз П. Л. Лебедев Бадӟым Уча волостьын потребобществолэн кивалтӥсез лыса но, кредитной товариществоын но. Вавож ёрсоысь Кионгуртын вордӥськем воргорон бускель Макарово гуртын вузкарисьын но улӥз. Но утиль-сырьё бичанын ужакуз сое ыстӥзы Москвае, та удысъя тодон-валанзэ будэтыны. Со вал 1939-тӥ арын. Советской властьлы пумит умойтэм ужа, урод кылъёс вӧлмытэ шуыса, сое отысен ик пытсэт сьӧры келяло. Петр Леонтьевич кык волостьысь ик калык гажа, вазиське вал ке но, кин ке но кырсь мылкыдо адями сюрем, саптам солэсь нимзэ. Рыбинскын кӧня ке пукемез бере Лебедевез келяло Нижний Тагилэ. 1942-тӥ арын со сютэм улыса висеменыз кулэ. 1965-тӥ арын Петр Леонтьевичез реабилитироват каро. Ӵыжы-выжыосыз озьы ик ӧз тодэ кытчы ватэм интызэ. Устоез чечы Ижысь техникая университетлэн одӥгаз юртаз толэзьлы кык пол люкаськыло мушкасьёс. Семинар выллем луэ со. Ортчытэ сое университетысь дышетӥсь Гелий Васильевич Ломаев. Со туж сюлмаське городысь мушкасьёслэсь огазеяськонзэс кылдытон пумысен. Соку мушкасьёслэн пӧртэм-пӧртэм амалъёссы узыр, опытсы ог-огзылы юрттысал ӵошатскыса ужаны. 15-тӥ мартэ туж умой вераськиз Сарапулысь усточи-мушкась Олег Григорьевич Кузнецов. Солэсь азинлыко тыршемзэ возьматэ таӵе учыр. Москваын выставкаын (Манежной площадьын) Кузнецовлэн чечыезлы туж вылӥ дунъет сётэмын. Москваын ик лабораториын ортчытэм анализъёсъя (сертификат - ог 20 пӧртэм куронъёсъя) Россиын та чечы куинетӥ инты басьтэм. Кузнецов 1200 кг чечызэ ӝог но дуно вузаны быгатэм. М. Михайлова. Чур бугор Чечыё уй ӧз пӧрмы Сюан бере нырысетӥ уяз ик Даниысь егит кузпалъёслэн кылзы ӧз тупа. Ӵукна сӧсыртэм выль кенэз больницае келязы. Ваньмыз туж умой вал кадь. Дас тямыс аресъем Ингрид но кызь ньыль аресъем Нильс ог-огзэсты туж яратӥзы, соослэн кусыпъёссылы тросэз вожъяськылӥзы. Нильс гажанзэ ки вылаз нуллыны дась вал. Кузпалъяськытозязы Ингрид туганэзлы вералляз кыӵеке сектае ветлэмез сярысь, но Нильс нокыӵе но ӧз кариськылы, сюан бере отчы ветлыны дырыз но, мылкыдыз но уз лу ни, малпаз. Сюанзэс ортчытӥзы ресторанын. Ӝыт егитъёс гостиницае кошкизы. Егит пиосмурт, валамон, чебер юсеныз вунонтэм уй сярысь малпаськиз. Но... ваньмыз берытскиз мыдлань. Ингрид, нокыӵе кариськытэк, картэзлы пограмон ивор вераз, мон, пе, сектаын кулытозям нылдырме утён сярысь кыл сётӥ. Нырысь Нильс ӧз оскы, гажанэз соин шудэ малпаз, быдэс уй умоен но, уродэн но ерыны выриз. Берло ини, чиданэз бырыса, егит кышнозэ туж зол тышказ. Судын Ингрид вераз сектае ветлэмез сярысь. Отын солы валэктӥллям, миллион нылъёс пиосмуртъёсын ӧз кушлаське ке, сомында ик куанер адямиос сютэм улэмысь дугдозы шуыса. Сыӵе вамыш, пе, лэсьтӥ, куанер адямиосты жаляса. Сётэм кылызлэсь чебер нылаш куштӥськыны уг ик малпа. Нильсэз ӝыны арлы пытсэт сьӧры пуктӥзы. Егит кышноеныз со люкиськыны малпа. Таӵезэ тушмонэдлы но уд сӥзьы, шуэ удалтымтэ карт. Чур бугор Бак пиосмурт, киосыныз шонаса, маке но юаны выриз йӧно дӥсяськем ортчисьлэсь. Суйтӥз, пиджактӥз кысказ, кытчы ке палэнэ чиньыеныз возьматъяз, соиз баклэсь мар юамзэ ӧз вала. Но вить минут ортчыса шуэрскиз - бак мурт солэсь коньдон пуйызэ кыскем! Котькуд городын кисыосты сузясьёс тачак. Кудӥз уллёен ветлэ, кудӥз - парен. Огназы ужасьёс шергес пумиськыло. Милиция ӝегатэ ӝыныезлэсь ӝынызэ гинэ. Малы? Нырысь ик, лушкаськисез китӥз кутыны кулэ. Собере ӵемысь адями, коньдон пуйызэ поттыку, номыре уг шӧдылы. Шӧдэ ик ке, ворен умоен люкиськыны выре, милициостӥ кыстаськыны яке мылыз уг поты, яке кышка (кин тодэ, потоз но пунэмзэ берыктоз). Кисы сузясьёс тросгес калтырто вокзалъёстӥ, рынокъёстӥ, транспортэтӥ. Берло дыре соос уката визьмо ужаны кутскизы - шузи, бак, артист карисько. ... Урамын нылкышно шуак йырсазьзэ ыштэ. Солэн кузэз, мар карыны валатэк, котыртӥз берга. Валамон ини, шеде кыӵе ке сюлмо адями, нылкышнолы юрттын кутске. Со куспын куанер кышномуртлэн кузэз Утисьсылэсь кисыоссэ сузя. Кисыосты сузяны быгатозы "кудӟемъёс", кырсь тыбырзэс сузяны ӵектӥськисьёс, ма, пересьёс гинэ но. Эн малпалэ, коньдон пуйыдэс сумка пыдсады поныса, сое поттыны шуг луоз шуыса. Лушкаськисьёс сое оп! шуытозь поттозы, шӧдылыса ик уд вуттэ. Кисы сузясьёс "ярато" сумказэс пельпум вылазы ошыса нуллӥсьёсты. Люкыт азьын отын бугыръяськонэз но ӧвӧл, еоссэ ванды но - сумка тынад. Кытчы ке мыныкуды, вань коньдондэс одӥг пуйые эн понэ. Транспортын, рынокын ватэм коньдондэс ялан эскерыса кутылӥды ке, бордады эриктэм лушкаськисьёсты кыскоды. Эшшо! Кисы сузясьёс туж ӵем калъясько гуртысь городэ лыктэмъёс сьӧры. Соос уго коньдонзэс ӵем поттыло, кыдёке уг поно (гуртын таӵе учыръёс ӧвӧл бере, мултэс чакласькон сярысь уг сюлмасько). Кыӵе ӵектон? Нуллэ коньдондэс пуш кисыосады: матынгес - оскымонгес. Инкуазь Шырчикъёс вуизы! 1-тӥ апреле серекъян праздник шуыса, пичиез но, бадӟымез но тодо. Нош тодо меда, 1-тӥ апрель - Тылобурдоослэн нуналзы шуыса? Ӵап та вакытэ уго асьме доры лымшор палась берытско бурдо эшъёсмы. Туэ шырчикъёсты адӟиды ни-а? Соос арня талэсь азьло вуизы. Жаляса верано луэ, инкуазьлэн уродмемез шӧдӥськытэк уг кыльы тылобурдоос вылын но. Удмуртиын бырон калэ вуэмын сапсан, тӧдьы быжо быркыт, сьӧд какся... Быдэс шаерамы быркытлэн одӥг гинэ карез вань на. Со улэ Играен Красногорской вискын. Тылобурдоосты эскерисьёс укшалляло сьӧд каксялэн вуылэм пытьыосыз вылэ но улон интызэ уг шедьто. Тэльёсты корамен, нюръёсты кӧсатэмен быре дукъя. Трос тылобурдо быре лудъёсы трос минерал ватсэтъёс, пестицидъёс пазямен. Берло дыре инкуазез утисьёс югдурез тупатон вылысь маке-маке лэсьто ик: ало хозяйствоосты нюлэсъёсты ядъёсын пазянлэсь, дукъя улон интыосты коранлэсь. Но со туж ичи. Умой луысал, котькудмы асьмеос пичи ке но кырӟась эшъёсмылы юрттысалмы ке: ӝикыт шырчик уморто лэсьтысалмы, толалтэ нянь пырыен, кӧй юдэсэн утялтысалмы. Кылзэ ай, шырчик шула... З. Кириллова. Вордскемзэс та нуналъёсы пусъё Пономарев Карл Александрович - история наукаосъя доктор, пофессор. Белоголовкин Даниил Ефимович - Кун Кенешлэн депутатэз. Удмурт Республикалэн Президентэзлэн Ижевск город думалэн но Воткинск город думалэн депутатъёссылы Вазиськонэз Гажано депутатъёс! Демократия амалэн азинскись туала обществолэн одӥгез валтӥсь инъетэз луэ кивалтон ёзъёс куспын быдэсъяно удысъёсты люкон. Сое лыдэ басьтыса, кылдытэмын нимаз быдэсъясь, калыкен быръем (представительной) но судъясь властьёс. Та амал люкетэ быдэс кивалтон удысэз одӥг адями кие сётыны, со луонлык кылдытэ быдэсъясь властьлэсь музъем но мукет узырлыкез, коньдонэз уже кызьы кутэмзэ эскерыса возьыны, властьлэн вань ёзъёсызлэсь оскем удыссэс кызьы быдэсъямзэс чакланы, ужзэс кулэезъя радъяны. Властез люкон принцип юнматэмын Россия Федерацилэн Конституциеныз. Со валтӥсь луэ кызьы ке Россия Федерациын кун ужез радъянын, озьы ик солэн улосъёсаз но. Удмуртилэн выльдэм Конституциезъя, республикаямы но кун уж радъяське кивалтон ёзъёс куспын удысъёсты люкон амалъя. Интыын аскивалтон но сыӵе ик власть. Со тужгес но матын луэ калыклы. Солэн югдурез шонер сэрттэмез-пертчемез бордысь потоз калыклэн огъя улон-вылонэз. Дышетон, тазалыкез утён, сюресъёслэн ӟечлыксы, жилищно-коммунальной хозяйстволэн кызьы ужамез но трос мукет ужпумъёс - ваньмыз понна кыл куто интыын аскивалтон ёзъёс. Интыосын аскивалтон но радъямын луыны кулэ вылӥ верам принципъёсъя - кивалтон удысъёсты люкон амалъя. Жаляса верано луэ, трос интыосын сое лыдэ уг басьто. Та вакытэ Иж но Воткинск городъёсын кылдытэмын интыын аскивалтон ёзъёслэн таӵе радлыксы: калыкен быръем орган - городысь дума, быдэсъясь орган - городысь администрация но солэн йырыз (городлэн мэрез), кудӥз кивалтэ кызьы ке калыкен быръем, озьы ик быдэсъясь ёзэн. Озьыен, таӵе югдур кылдӥз: городъёслэн мэръёссы эскерыса возё калыкен быръем ёзэз, озьы ик быдэсъясь органлэсь ужамзэ. Соин сэрен интыын аскивалтонлэн быдэсъясь ёзъёсыз - Ижысь но Воткинскысь город думаос - палэнтэмын "Россия Федерациын интыын аскивалтонэз радъянъя огъя принципъёс сярысь" федеральной законэн чаклам тужгес но валтӥсь удыссылэсь - быдэсъясь ёзлэсь ужзэ нуонлэсь. Вераськон мынэ интыын аскивалтон органъёслэсь но интыысь должностен адямиослэсь ужзэс эскерыса возён сярысь. Со пумысен верамын интыын кылдэтъёслэн (образованиослэн) уставазы ("Россия Федерациын интыын аскивалтонэз радъянъя огъя принципъёс сярысь" федеральной законлэн 15-тӥ ёзэтэзлэн 3-тӥ люкетысьтыз 6-тӥ подпунктаз. Озьы, калыкен быръем органъёслэн - город думаослэн - быдэсъясь властьлэсь ужзэ кулэезъя эскерыны луонлыксы ӧвӧлэн, быдэсъясь ёзъёс тырмыт уг быдэсъяло соослы оскем удыссэс. Со ик ӵемысь вуттэ калыклэсь кулэяськонъёссэ но правооссэ тӥян учыръёсы. Таин валче, мон, Удмурт Республикалэн Президентэз, Удмурт Республикалэсь Конституцизэ, адямиослэсь правооссэс но эриксэс утьыса вазиськисько тӥледлы, Ижевскысь но Воткинскысь город думаослэн депутатъёссылы уставъёсады таӵе воштонъёс пыртыны курыса: 1. Городлэн улосвылаз интыын аскивалтон нуиське калыкен быръем но быдэсъясь органъёс пыр. Калыкен быръем но быдэсъясь ёзъёс ас кожазы ужало. Соослэн быдэсъяно удыссы радъяське, интыын кылдэтъёслэсь уставзэс лыдэ басьтыса. 2. Интыын аскивалтонлэн калыкен быръем органэныз кивалтыны кулэ солэн йырыз, кудзэ ас пӧлысьтызы асьсэ коже быръё калыкен быръем органъёслэн депутатъёссы. 3. Интыын кылдэтъёслэн йырзы - калыкен быръем должностен мурт, кудӥз кивалтэ быдэсъясь ёзэн. Та воштонъёсты юнматон юрттоз калыкен быръем ёзъёслы интыын кылдэтъёслэн но быдэсъясь органъёслэн кивалтӥсьёссылэсь ужзэс юн эскерыса возьыны. Удмурт Республикалэн Президентэз А. А. Волков. Тунсыко пумиськонъёс Уй бубылиос лобало, "Уй королеваос" экто Та пиосты нырысьсэ адӟыкум, маин выремзэс тодыса малпай: ужас. Ненеггес выросъёссы ӧз кельше: кӧня ке паймытӥзы но курадӟытӥзы. Соку ик йырйыны кутскизы юанъёс: "Кызьы? Малы соос таин выро? Мукет уж уг сюры шат?" Соин продюсерзы Хазиева Гульнара Николаевна, "Уй королеваос" травести шоуэз учкыны ӧтьыкуз, соку ик соглаш луи. Иж тымет дуре интыяськем "Яхт клубе" эшеным уин дас одӥг часын пырим. Гульнара Николаевна милемыз ӧс дорын ик пумитаз. Пуктӥзы залысь буш ӝӧк сьӧры, дорамы матэктӥз официант. Дунъёсын книгазэ учкыса, синъёсы кымесам ик тубизы кадь. Но мар карод, буш ӝӧк сьӧрын пукыны адямиослэсь умой ӧвӧл, кӧт но сюма. Курим кызь манетэн мороженной, куамын куинь манетэн джин-тоник но дас одӥг манетэн чаша кофе. Пукон сямен адямиосты эскерисько. Куд-огезлэн милям сямен ик ӝӧк вылазы бушгес, нош мукетъёслэн шампанской, вина, салатъёс но мукет ческыт сиёнъёс пуктылэмын. Валады ни, луоз, ӝӧклэн тырезъя тодыны луэ адямилэн кисыез сярысь. Озьыен, та клубе ветло шоро-куспо но бай калыкъёс гинэ. Ӝомо-югдо залын шудэ крезьгур, лыктэмъёс экто. Учкисько час шоры: дас кык матэктэ. Кӧня ке улыса сцена вылэ потӥзы пияшъёс. - Нылкышноос но воргоронъёс! Тӥледыз суббота нуналэн ӟечкыла "Уй королеваос" травести шоу. Кутскиз адӟытон. Куинь чебер нылъёс (нылкышно дӥсен воргоронъёс) Пенелопа Галоген, Эдита Штурм, Тина Романтини чилясь дӥськут, нылкышно пыдкутчан нуллыны вордскизы кадь, ӝужытэсь каблукъёс вылын сыӵе усто ветло - нылмуртъёс но куд- огез озьы уз быгатэ. Син азе огез бӧрсьы мукетыз тодмо кырӟасьёслэн образъёссы пуксизы. Возьматон куспын нылъёс учкисьёсын ераськыны, серекъятыны вуылӥзы. Адӟытон ортчем бере, залын пукисьёс кужмо чабизы, "браво" черекъязы. Шоу сярысь умойтэм малпанъёсы пазьгиськизы. Татын номыр кырсез, улӥез вылымтэ. Пияшъёс зэмзэ лэсьто тунсыко, чебер, мылкыдэз ӝутӥсь адӟытон. Тужгес кельшиз берпуметӥез номер - "королеваос" парикъёссэс кушто но, вакчи ӵышкем йырсиё, мальдыт буяськем воргоронъёс асьсэды актёръёсын яло. Адӟытон бере пыри гримёркае. Слава (Эдита Штурм), Алексей (Тина Романтини), Руслан (Пенелопа Галоген), дэремъёссэс куяса но штанизэс дӥсяны вуытэк, буям ымныръёссэс ватаен, кремен чылкытато вал. Дӥсяськон-буяськон интызы бадӟым вылымтэ. Борддор борды тупатэм синучконъёс азьын косметикаен, парикъёсын тыро ӝӧкъёс, татын ик мисьтаськонзы. - Возьмамелэсь шоу трослы вылӥгес вылэм, кемалась таӵе концертъёсты ӧй учкылы ни. Тау. Паймытӥзы дуно, чебер дӥсьёсты. Тӥледлы соосты кин ке малпа, вуре? - Ӵемысь асьмеос. - Сценарий но асьтэос малпаськоды, шуоды? - Шонер. Ӵош пукиськом но гожъяськом. Адӟытонамы выжыкылъёс но вералляськом: "Курочка ряба, обалденная баба", "Теремок - публичный домок", "Эротические похождения колобка". Руслан: - Мон кутскисько мукетъёсыз асьсэлэсь малпанъёссэс будэто. Котькуд возьматонамы нимаз темаез серекъянэз вань, залын пукисьёсты но лушкемак пыӵкылӥськом. - Кема-а дышетскиды каблук вылын ветлыны? Слава: Туж кема. Алексей: - Мон ӧй курадӟы. Чаляк лобаны кутски. Руслан: - Тодам ваисько дас дӥг сантиметр ӝуждалаен нырысетӥ вамышъёсме, пыдъёсы зубектэмен, вӧсь луэмен бӧрдылӥ но. Ӝӧк улэ мыкыртӥськыса пияш горд туфли поттэ: - Таосты мыным ӵыжы-выжыосы Югославиысь ваизы. Берен ӝӧк улэ пыре. - Тазэ ачим малпай. Тросэз леопард кулэсь кожало. Паймо одӥг номерлы дуно пыдкутчан басьтэмелы. Нош со, огшоры басмаезлэсь вурыса, сьӧд туфли вылэ дӥсям маке. Таиз, тӧдьы туфли, куинь сю манет гинэ сылэ. Ми сое чилясьёсын лякылӥм но дуно, чебер пыдкутчанлы пӧрмытӥм. Озьы ик дэремъёсын но. Алёша поттӥз вылысьтыз вылаз ошылэм чебер дӥсьёсты. - Лызалэсэз куке но бызён дэрем вал. Ми сое йырси буёлэн чебермам. Гульнара: - Воргоронъёс ваньзы куамын укмысэтӥ быдӟалаен пыдкутчан нулло, пыдъёссы паськытэсь. Соин шуг-секытъёс кылдо. Руслан: - Нырысь возьдаськисько вал базарысь нылкышно туфли басьяны. Берло дыши. Аслад ужедлэсь возьдаськоно ӧвӧл. - Мон малпамея, пиосъёс нуллыны уз быгатэ векчи, котьку кесиськыны дась колготкиосты. Тӥляд соос кемалы-а чидало? Гульнара: - Пияшъёс соосты туж жаляса, эскерыса нулло. Алексейлэн чулкаосыз кемалы чидало. Мон со дыр куспын кыксэ кесьыны вуттӥ ни. - Синмаськымон макияжды. Кин тӥледыз буя? - Асьмеос. Адӟытон азьын пукиськом, час но ӝыны куспын буяськиськом. Анекдотъёс вераськом, образэ пыриськом. Руслан: - Мынам возьматонэ - Пенелопа Галоген - ваньзэ тодӥсь, котьмае адӟем кышномурт. Басьтэмын анае вылысь. Мамае вузкаронын берга, улонлэсь сьӧд но тӧдьы палъёссэ тодэ. Ми возьматылӥськом пиосмурт синмын адӟем нылмуртэз. Шорамы учкыса, нылъёс асьсэдыз синучконын кадь адӟыны быгатозы. Узыр костюмъёсынымы, ветлон манерен ми кельшиськом кышноослы. Адӟытон бере нылмуртъёс ӵемысь гримёркае пырало, кызьы буяськеммес юало, дышетэ вал, шуо. Соин чеберлыкъя салон усьтыны малпаськом. Слава: - Ми кышномуртъёсыз тодӥськом, адӟиськом, кызьы кышномуртэз чебер карыны .Кызьы соослы ӵышкиськыны, йырсизэс утялтыны кулэ. Гульнара: - Мон толэзяз кык пол имиджме вошъясько. Пияшъёс малпало. Мукет кышномуртъёслы но таӵе шумпотон сётыны тыршиськом. Салонамы вазиськем нылкышноослы воргоронъёс пӧртэм валэктонъёс сётозы. Лыктэмъёс быгатозы парикъёсты мертаны, учкозы- эскерозы, кыӵе буёл соослы кельше, ма кузьда йырси нуллоно. - Со понна тӥляд дышетскемды вань-а? - Славамы - косметолог-визажист, Руслан - спорт аэробикая Удмуртилэн кык пол чемпионэз, Алексей - экономист, эктӥсь. Милемын ужан сяна, магазинын вузкаре на. Алексей: - Туннэ мынам берпуметӥез ваозьматонэ вал. Матысь дыре кошкисько Америкае дышетскыны. - Кызьы тӥледыз пумитало учкисьёсты? Алексей: - Нырысь секыт вал. Адӟытонлэсь берпуметӥ люкетсэ кышкаса лэсьтӥм. Курдам усьтӥськыны, калыкъёс уз валалэ, малпам. Но, ваньмыз умой луиз. Адямиос сярысь алама малпаны уг яра вылэм. Азьвыл шоу бере шырпиос сямен пегӟылӥм. Табере ум возьдаськисе. Адямиос но милемлы дышизы. Гульнара: - Выль ужез ӧм усьтэ. Куамынэтӥ аръёсы поттэм фильмъёс "В джазе только девушки", "Здравствуйте, я ваша тётя" - травести. Телеэкранысь Верка Сердючка - травести. Руслан: - Нырысьсэ сое адӟыкум, серекъяса пукон вылысьтым усисько ни вал. Сыӵе со мыным кельшиз. Улонын трансвиститъёс трос. Ӧвӧл, секс шоры учкон сярысь уг вераськы. Тани - травести штань - пиосмурт дӥськут. Нош сое нулло кышномуртъёс. - Нош тӥ, пиос, улонын нылкышно дӥськутъёс нуллӥськоды-а? Гульнара: - Огшоры улонын соос зэмос воргоронъёс. Котькудӥзлэн вань яратоно нылыз. - Азяды туж трос пумо косметика, синъёс кытчы дугдыны ик уг валало. Кызьы тӥ соосты бырйиськоды? - Пӧлаз дуноез но, ӟечлыкоез но вань. Дунтэмъёсыз пӧлысь дас манетэн басьтэм чилясь тень гинэ. Уксёмес ум жаляське тональной кремлы, вуэн мисьтӥськисьтэм тушъёслы, ымдур буянъёслы. Пӧсяса сцена вылын убяськемъёсмы медаз виялэ. - Секыт-а пиосмртлы буяськонлы дышыны? - Ми дорын огвакытэ ужам одӥг пияш, макияжзэ вить пол но миськоно луылӥз. Нырысь ӧжыт буяськиськом вал, берло Москвае ветлыкумы валэктӥзы: буёл трос ке - умойгес. Шоу мальдытӥсь луыны кулэ. Ымдурез ӝыны ымнырлы буяськом. - Ӝӧк вадьсады горд, пурысь, курень, сьӧд парикъёс, пӧртэм йыр чеберъянъёс (коронаос, кокошникъёс) оышлэмын. Басьяськоды-а соосты? - Куреммыя театрын лэсьтыло. Куд-огез борды асьмеос вуттӥськиськом. Чебер луэмед потӥз ке, ваньзэ малпалод. - Нош дэремъёс? - Дунтэмез сылэ сизьым сю манет. Вазиськиськом вурисьёслы, троссэ асьмеос вурылӥськом. Пияшъёсыз венен но синьысэн - син азе шуг пуктыны. Венен уд бышкаськиське-а? - Ӵем гинэ. Но чебер луон понна чидано луэ. Алексей: - Ми "висись адямиос" - адӟытонэнымы улӥськом. Изён интылы, няньлы коньдонмы вань ке, кылемзэ косметикалы, дӥськутлы быдтыны быгатом. Руслан: - Ачид бордын ужад ке, вылад уксё ке ӧд жаля, сцена вылын астэ возьматыны быгатӥд ке - соку ужед пӧрмоз. Кутскыкум толэзяз сюрс манет уждунэ люкаськылӥз. Соку кык сюрс манетэн пыдкутчан басьтӥ. Мамае монэ шузи шуиз. - Мар веразы анай-атайёсты, травести шоуын ужамдэс тодыса? Руслан: - Анае но кык вынъёсы туж паймизы. Нырысетӥ малпанзы вал - эрказмемъёс. Таяз Выль аре семьяме адӟытонамы ӧти. Мон сцена вылын транс снегурочкаез шудӥ. Вань адӟытонмы нимысьтыз со нуналлы дасямын вал. Шоу бере анае шуиз: сексуальностьты, пе, ӧжыт. Ма вераны тодытэк, мон ымме гинэ усьтӥ. - Сцена вылын чебер луон понна тӥ салонъёстӥ, солярийёстӥ ветлӥськоды, луоз? - Ум, буяськемъёсмес кремен октӥськом. Турын-куарлэсь косметикаез уже кутӥськом. Слава: - Куэ нырысь висьылӥз. Вал изнэслэсь лэсьтэм синкашъёсты лякылэм бере синъёс гордэктылӥзы, пыктылӥзы. - Учкисьёс бордады уг тэбинё-а? - Гульнара Николаевна милемыз уте. Со шуэ: тӥ коктейль пушкын уясь чия выллем, калык шорады учкыны гинэ кулэ. - Удмуртиын травести коллективъёс тӥ сяна вань на-а? Слава: - Кылдылӥз но кык толэзьзэ гинэ чидазы соос. Огпол адӟим ми вылэ лэсьтэм кырсь пародизэс. Руслан: - Соос шоры учкыса возьыт йӧтӥз. Адӟытоназы кырсь серекъянъёс, веранъёс пыртылэмын вал. Вожзэс медам поттэ шуыса, учкисьёслы вазиськеме ик потэ вал. - Кӧня пумо возьматонъёсты люкаськемын? - Витьтон пала. Вань Удмуртиысь калык артисткалэн Маргарита Суворовалэн "Ялыке-ялыке" кырӟанэзлы адӟытонмы. Татын ми возьматӥськом калык дӥсез ас сяменымыз адӟеммес. - Тӥляд репетициосты луыло, дыр? Алексей: - Одно ик. Шорамы учкыса, адямиос малпало: улонмы шулдыръяськонэн гинэ тырмемын. Озьы ӧвӧл. Котькуд учкеммы, синкаш вырытэммы, киез, пыдэз пуктэммы малпамын. Тросэз возьматонъёсмы серем пыр лэсьтэмын. Кылсярысь, "Сам себе ты рулевой..." яке Ветлицкаялэн "Море плещется, мотыльки в глазах, соль и кубики льда" кырӟанъёслы. Алӥськом кытчы вутто наркотикен шудонъёс. Алёна Апиналэн "Я принесла тебе подарок" кырӟанэзъя сексын астэ утён сярысь вераськом. Слава залын пукисьёслы презерватив сётъяса ветлэ. Адӟытонъёсамы калыкез культуралы дышетыны турттӥськом. Адямиос отысь кулэзэ мед шедьтозы, палэнысен асьсэ вылын чидатэк умоезлы мед дышетскозы. Руслан: - Потэ сцена вылысь Зыкинаез возьматэме. - Малы? - Со тодмо адями - кизили. Быдэс поколение солэн кырӟанъёсыз вылын будэмын. Пиналъёсты соин томатэме, мукет паласен возьматэме потэ. Асме ӧжыт ке но кизилиен шӧдэме потэ. - Гульнара Николаевна, нош тӥ кызьы вуиды та бизнесэ? - Яратыса. Руслан: - Туэ ми кышноен картъёс луим. Ваньмыз туж огшоры вал: Гульнара ветлӥз адӟытонъёсамы. Гульнара:. - Мыным туж кельшиз Руслан. Огпол ӧй чида, пыри гримёркаязы. Но мон кадьёс трос. Руслан монэ нырысь адӟонтэм кариз. - Руслан: - Сьӧрам бызьылӥсь нылъёс трос ке но, секыт дыръя Гульнара гинэ юрттӥськиз. Озьы со возьматӥз зэмос яратэмзэ. Гульнара: - Пияшъёслы буяськыны юрттылӥ. Калленэн-калленэн малпанъёсы но быдэсмизы, Русланлы бызи. - Мар тӥляд ужады секытэз? Руслан: - Уг яратӥськы басма басьяны, мертаськонъёсы ветлыны. Мыным дэрем чаляк кулэ. Гульнара: - Секыт, учкисьёсын огкыл уг сюры ке. Руслан: - Сыӵе дыръя соосты улӟытыны турттӥсько. Юасько: трансвиститэз адӟиды-а? Мон со. Адӟытонэ лыктӥды бере, ялкаре, асьтэдыс йӧспӧртэм эн возе. Куддыръя чабонъёслэсь фонограмма но уг кылӥськы. Таӵе учкисьёс дыръя умойгес ужаськод, астэ шӧдӥськод. Залын пукисьёслэсь кужымзэс басьтӥськод, соослы аслэсьтыдзэ сётӥськод. Алексей: - Туннэ мон уӵы сямен чирдӥ. Слава: - Травистиез телевизор пыр учкыкуз, адями сое зэмен уг малпа. Нош ас синмыныз адӟыкуз, ассэ кызьы возьыны уг тоды. Ми нырысетӥосыз, соин милемлы шуг йӧтӥз. - Тӥледлы умойтэм кылъёс верало-а? Руслан: - Соослы дышоно ке но, котьку вӧсь кылыны. Милемды "мисько", извращенецъёс шуо. Нош асьсэос черекъясьёс умоесьгес шат? Кылсярысь, одӥгез кышномурт, адӟытонмес учкыкуз, кырыж учкиз шорамы. Берлогес мултэс юыса гримёркае пыре но Алексейлы шуэ: та тӧдьы чулкаосыныд ик монэ яраты. Кин-о бен калыклэсь пӧртэм: ми-а, соос-а? Гульнара: - Мынэсьтым ӵемысь юало, Руслан нылкышно дӥсен дыръя ог-огдэс уд яратӥське-а шуыса. Сыӵеослы валэктӥсько: огшоры улонысь яратӥсько пиосмуртэз, сцена вылысь - Пенелопаез. - Вераськонады кутӥськоды "трансвестит" кылэз. Тӥ понна со ултӥясь кыл ӧвӧл- а? - Руслан: - Нылкышно стриптиз возьматӥсьёсты "кривые титьки" шуо, соослэн мугорзы чебер, ваньмыз интыяз ке но. Озьы ик милям но. Травести - сцена вылын, трансухи нимаськисько, гримёркаын кушем ниммы со милям. Нош улонын ми огшоры пияшъёс. Пиосмуртъёс адӟытонзэс нылкышно дӥсьёсын пукто ке - со травести, нылмуртъёс пиосмуртъёслы укшатӥськом ке соку трависти шуо. Таӵе чыры-пырыосты Москваын тодӥм. Шоркарын милемды паймытӥзы ньыльдон-витьтон аресъем воргоронъёс, сцена вылын соос дас вить аресъем нылъёслы пӧрмо. Тӥни ма каре профессионализм но косметика. - Ужамы адямилэсь психологизэ тодытэк уг луы. Вожпотэмлы вожпоттэмен вазьыны уг яра. Вераськом тазьыгес: шундые мынам, тыныд мар ке уг кельшы-а? Урамын лымы трос, мын ай утялты сое. Яке, гажанэ, мар тон скал пушкытӥ потэм куро сямен выриськод? Адями верамме валаса уг вутты. Пуксе интыяз, кылзӥськыны кутске кӧня ке дыр ортчыса чабыны ӧдъя. - Тӥляд ужды огшоры улонады пусъет кельтэ-а? - Огез гинэ умойтэм, эшъёсын огинэ люкаськыку ялкарыны уг луы. Серемес учыръёсты верамдэ возьмало - астэ адӟытонын кадь шӧдӥськод. Сиськыку гинэ но астэ кызьы воземед шоры учко, тросэз ыме ик пырыны дасесь. - Кӧня часын изьыны выдӥськоды? - Ми уй адямиос. Кӧлыны выдӥськом ӵукна куать часын гинэ. Султӥськом нуназе. Одӥг час, куинь час котырын. Кӧня коньдон кияды вуэ шуыса юанэлы. Пияшъёс валэктӥзы: вӧйын няньлы тырме, куддыръя мызьлы кыле на, пе. Тунсыко шоу адӟыны кылдӥз ке но, бертыкум мылкыды пуксемын вал: коньдон кисьтэме сярысь жаляй. Вылаз ик, возьытэ усиськом вал ни. Кошкыкумы берпум копейкаосмес лыдъяса поттӥм. Ӝӧк сьӧрын пукеммы дуно усем. Дас процентсэ утялтӥсьёслы (официантъёслы) сётоно вылэм. Удалтӥз. Штраф но ӧз басьтэ, милицие но ӧз келялэ - сиськеммы понна гинэ уксё басьтӥзы. О. Кожанова. Пенелопа Галоген лыдӟисьёсмылы ӵектэ: эн турттэ кинлы ке укшатскыны, тӥ огнады таӵе чебер но визьмо. Яратэ асьтэды. Тросгес ужалэ: уж асьмелэсь мугормес но лулмес юнматэ. Та ӵектонъёсты быдэсъяды ке, семьяяды яратон но шумпотон пачылмоз. Эн вунэтэ: улон со бадӟым театр, нош асьмеос - ваньмы актёръёс. 1. Пенелопа Галони, со ик Верка Сердючка 2. "Аба" швед группаез выль сямен адӟон. Эдита Штурм но Пенелопа Галоген. 3. Эдита Штурм но Пенелопа Галоген. 4. "Уй королеваос" Эдита Штурм но Пенелопа Галоген. 5. Руслан возьматэ Пенелопаез. Чагыр экран Ыж гон тугон но Якубович яке кызьы Яковлевъёс шӧдтэк шорысь "Поле чудес" передачае сюризы Осконтэм оскон Ватонэз ӧвӧл, гуртын тросэз адямиос коньдонлы ёрмыса ужтэк пуконо луо. Сыӵе адӟон вуиз Пичи Пурга ёросысь Сосновка гуртысь егит кузпалъёслэн Яковлевъёслэн семьяязы но. Александр но Надежда ужтэк кылизы. Кызьы кык пизэс сюдоно? Песянайзылэн пенсиез вылын кыдёке-а кошкод? Соку ик кылдӥз ужбергатӥсь луон мылкыдзы: ыж гон тугон машина басьтыны малпазы. Вӧзысь гуртъёстӥ ветлыса, ужтэк сылӥсь вуж машина шедьтӥзы ик. Егит кузпалъёс доры калык кыстӥськыны ӧдъяз. Угось кудӥз-огезлэн дораз мешокъёсын лӧдымтэ ыж гонэз кылле вал. - Но вуж ыж гон тугонлэн ӟечлыкез туж урод вылэм, - вера Надя, - ыж гон гын сапегъёслы сяна ӧз яралля. Нош калык ми доры оскыса лыктэ. Мар кароно? Одӥг пол Илья но Кирилл пиосыз "Поле чудес" передачае Выль ар кузьым - компьютер курыса гожтэт пӧраллям. Анайзы борды но тэбинизы: гожты но гожты. Надя серекъяз гинэ. Удалтонлы ӧз оскылы, лотереяен гинэ но ноку шудэмез ӧй вал. Но ӝоген мылкыдыз воштӥськиз. - Адямиос лыкто, ыж гонзэс тугыны куро - ми ум быгатӥське. Кытчы соос мынозы на? - тодаз вае кышномурт. - Соин ик, оло, инмар пелям шыпыртӥз ни, картэ дорын ӧвӧлтэм дыръя Якубовичлы гожтӥ. Гожтӥ но вунэтӥ. Выль арозь кык арня сяна ӧй вал ни, малпай: беромиз ни куронэ... Удалтӥз ке удалтӥз! 29-тӥ декабре быдэс семья чагыр экран азьын пукиз. Питран вылын миллионлэсь ятыр гожтэтъёс кыллизы. Якубович тужгес но шудо адямиослэсь нимтулъёссэс лыдӟе. Шӧдтэк шорысь вера: - Надежда Яковлева, Малопургинский район... Ас пельёсызлы оскытэк, Надя картэз пала берытскиз: - Мон-а, мар-а? - Тон! - телевизор шоры долказ Саша. Леонид Аркадьевич быдэс Россия азьын оскытӥз: - Мон уг тодӥськы, мар со сыӵе ыж гон тугон, но дунне вылысь тужгес но ӟечез та арбери тӥледлы кузьмамын луоз. Вить минут ортчиз-а, ӧз-а, Яковлевъёс доры бускельзы вуиз. Ӵогам капкаетӥ кызьы пырем ни - ӧйтӧд. Олокытӥ мар гуртооссы, эшъёсы люкаськизы. Ӟечкыланъёс, ӝӧк сьӧрын пукон, Выль ар кузьымез "миськон"... Жингыртэ Москва Пересь Сандрапай семьяязы сыӵе бадӟым шуд вуэмлы нокыӵе ик ӧз кариськы - Ой, уг оскиськы, - киыныз гинэ шонтӥз со. 7-тӥ январе кензэ бускельёссы ӧтизы: телефон, пе - Москваысь жингырто. Надя трубкаез кутӥз: - Тӥ Выль ар кузьым куриды-а вал? - Бен. - Ыж гон тугон? - Бен. - Кутскизы ук оломар сярысь но юалляськыны? - Гуртады кӧня адями улэ? Ыж гон тугон машинаез пуктыны интыды сюроз-а? Кыӵе маркаен мед луоз кадь? Кытысь бен Надя марка сярысь тодоз ай, рос-прос выль машинаез адӟемез но ӧвӧл бере. Нош сӥзем кузьым 200 сюрс манетлэсь ятыр сылэ вылэм. Со москвичъёслы но укыр дуно потэм, лэся. Якубович мар сӥземзэ ачиз но валамтэ. - Тӥ милемыз штанитэк кельтоды, - ӝожтӥськем. Капитал-шоу, бадӟым машина интые, пичизэгес, 100 сюрс котырын сылӥсь станок дэмлам. Возьмалэ, пе, ивор сётом. Коньдон утчаса... Январь пумын телеграмма вуиз. Надежда Яковлеваез "Поле чудесын" шудыны ӧтё. Егит кышномурт кышкатскиз. Сюрес дунэз но гостиницаын улонэз аслыд, пе, тыроно. Нош коньдонзы ӧвӧл. Мар кароно? Спонсоръёсты утчатэк ӧйлась. 500 манет сётӥз Сосновкаысь "Сельхозхимилэн" кивалтӥсез М. А. Матвеев, 600 манет ёрос администарция. Озьы ке но, Москва дунъёсты чакласа, со туж ӧжыт вал. Мынӥзы Ижевске, вазиськизы Удмурт Республикаысь Правительстволэн Пичи ужбергатонлы юрттонъя кун комитетаз. Отын амало егитъёсты туж ӟеч пумитазы, кӧня коньдон кулэ луоз лыдъязы - сётӥзы. Я сюрес вылэ потыны дась кадь, - шумпотӥз Саша. Нош Надялэн сюлмыз интыяз ӧй вал. Малы, шуоды-а? Егит кышномурт куректӥз, кыӵе дэрем дӥсяса передачае потоз? Вазиськизы "Сактонэ". Вуриськон предприятилэн кивалтӥсез З. И. Степнова Надя азе пӧртэм дэремъёс поттыса юаз: кудӥз кельше? Озьы егит кышномуртлы, выжыкылысь Золушкалы сямен, выль дэрем кузьмазы. Шоулэн сьӧраз Москва. Останкино. Яковлевъёс куинь кузя лыктӥзы: Надя, сузэрез (соос кыктоос) но Саша картэз. Якубович вань куноосты люказ но аслэсьтыз вераськонзэ таӵе кылъёсын кутскиз: - Мынэсьтым ӵем юало, кытысь, пе, программаяды шудыны сыӵе идиотъёсты шедьтӥськоды... Ваньзы гор-гор серекъяло. Ма, нырысьсэ телекамера азе потэм адями олокыӵе но луоз, ойдо. Бӧрысьгес Леонид Аркадьевич валэктэм ни. Капитал-шоуын шудӥсьёс асьсэды капчи мед возёзы, пӧртэм тамаша учыръёс мед вералозы, пе. Быдэс Россия азьын кулэм муртэ ватэм кадь сылоно ӧвӧл. Ӧйтӧд, кинлы кызьы, но Надялы Якубович мултэс керӟег кадь потӥз. Кытысь ке пичи-пичи куашетэм яке телефон жингыртэм кылӥське ке, соку и к вераськонзэ куспетӥ каре, ужасьёсыз шик-шик ваньзэ палэнто, телефонэз кысо - кенешон азьланьтӥське. Собере администратор вераськиз, алӥз: - Останкино кузя эн бызьылэ, нокыӵе кизили-кырӟасьёс татын ӧвӧл. Утэм кузьымъёсты дорысь кыдёке эн кошке, ышиз ке, ми янгыш ӧвӧл. Лушкаськон учыръёс трос луо. Передачаез гожтон нуналэ вань шудӥсьёслэсь йырсизэс тупатъязы, ымныразы грим тыризы. Одӥг кышномурт тӧдьы дэремен лыктэм, нош алӥллям вылэм, дӥсьсы тӧдьы медаз луы шуыса. Быдэс студия воштос дэрем утчаса бызьылӥз. Я, ваньмыз дась. Питран азьын сылӥсь Надя юанэз ик ӧз кылы. Бӧрсяз 300 адями пуке, шораз мертам яркыт тылъёс палёмыто, ваньмыз чильк-вальк чиля. Осто, Инмаре, кытчы сюриськиз та, шыпыртӥз, дыр, егит кышномурт, нош йыраз вужмем пластинка сямен: "салам вераны вунэтоно ӧвӧл", "салам вераны вунэтоно ӧвӧл... Спонсоръёсызлы тау карыса вуттӥз ик, нош гуртоосызлы, ӵыжы-выжыосызлы вераны ымзэ усьтэм вал но - куспетӥ каризы. Надя Леонид Аркадьевичлы гын сапег но удмурт пужыё ыж гон пӧзь кузьмаз. Табере, оло, Якубовичлэсь но киоссэ асьме пӧзьёс шунтозы ни. Нош ыж гон тугон машина вӧзы "Томпсон" телевизор но пылесос ватсаськизы на. Тӥни озьы йылпумъяськиз Яковлевъёслэн тунсыко "ыж гон тугон" удалтонзы. Шонергес ке верано, ыж гон тугон машиназы соослэн али но ӧвӧл на. Жингыръязы Москвае. Толэзь ӵоже, пе, ваньзэ радъяны тыршом, но машинадэс асьтэос ик ваёды. Табере егит кузпалъёсты нош коньдон ужпум шугъяськытэ. Сюрес дун сяна, бадӟым налог но тыроно на уго. Илья но Кирилл пиоссылэн лулӟылонзы мукет: - Э-эх, компьютер ик мед утысалмы... Нош Сандрапай мудрон пылесос шоры учкыса пальпотэ: - Табере ковёръёс басьтоно луоз инь.... РС. Ватсаса ивортӥськом на: Надя Яковлевалэсь Капитал-шоуын шудэмзэ туннэ ӝыт учкыны быгатоды. Е. Панфилова-Миннигараева. Удмуртия: выль даур Трос лыдӟод - кужмо луод "Дуннеен али кивалтэ со, кин тросгес тодэ" - та веран туннэ паськыт вӧмемын. Иворлэн кужымез асьме улонын берло дасо аръёсы зэм ик шӧдскымон будӥз. Соин, вылды, воштӥськиз газетлэн интыез но. "Удмурт дунне" быгатэмезъя весь возьматэ ивор вӧлмытон ёзъёсын герӟаськем удысэз. Таяз учыре куд-ог йылпумъян лэсьтэм потэ та арлы гожтӥськонъя. Сыӵе вераськонлы талэсь азьлояз номерын кутскон сётӥз Печатья но иворъёсъя министерствоысь валтӥсь специалист Юрий Басков. Ми со кенешонэз азьланьтӥськом. Соку ик пусъём: лыдэ басьтэмын Почта кусыпъёсъя Удмурт управление пыр радъям гожтӥськон гинэ. Газет-журналэз мукет ёзъёсъя вуттон бадӟым инты уг басьты на бере, огъя югдурез оглом возьматыны луэ УФПС-лэн лыдпусъёсызъя. Выль даурлэн кутсконэзлы вераса, асьме республикаысь лыдӟисьёс доры вуись изданиослэн огъя лыдзы 335,6 сюрс экземпляр вал. Кылем арын сярысь со 18 процентлы уногес. Озьыен, газет-журнал басьтӥсьёс тросгес луизы. Шаерысьтымы улӥсьёс тужгес но ярато интыысь прессаез. Вань изданиос пӧлысь со ог ньыльдон процентсэ басьтэ. Быдэн куамын процент пала кыле быдэс республикаетӥ но странаетӥ вӧлмись газет-журналъёслы. Почта удысын тыршисьёс асьсэлэн ужамзылы дунъет сётыны быгато, котькуд сюрс улӥсьлы вуись изданиослэн лыдзыя. Россиын али, озьы учкыса, 217 экземпляр усе. Удмуртимы шоро-куспо лыдпуслэсь берегес кыле на. Асьме дорын сюрс муртлы басьто 206 газет-журнал. Но ёросъёсын югдур пӧртэм. Тани Грахово, Каракулино, Шаркан районъёсын 400-лэсь ятыр люкаське, мукет интыосын - кык пол ичи. Маин со герӟаськемын? Мугез трос. Но валтӥсез потэ газет вӧлмытӥсьёслэн кызьы ужамзы бордысь. Тани граховоосты ик басьтом. Татысь почтальонъёс, коркась корка ветло, калыкез каталогъёсын тодмато, вань юанъёсъя валэктон сёто. Соин ик 70 процентэз гожтӥськон адямиослэн доразы ортче. Озьы ик ужало завьялъёс, юкаменскъёс. Нош республикая верано ке, огъя гожтӥськонлэн ньыльмос люкетэзлэсь ичиез гинэ калыке потыса радъяське. Лыдпусъёсты ӵошатон возьматэ, кылем арын тужгес но ӟеч Алнашысь, Глазовысь, Воткинскысь, Юкаменскысь, Красногорскысь но Кизнерысь связистъёс ужазы шуыса. Кылсярысь, 2000-тӥ арлэн кутсконаз Алнаш ёросысь лыдӟисьёс доры 5664 экземпляр газет-журнал вуэ вал ке, туэ соос 10 сюрс пала басьтыны кутскизы (гожтӥськон 75 процентлы йылӥз). Ма, ваньзэ ик районъёсты ӟечен пусйыны кулэ. Нокытын но гожтӥськон ӧз кулэсмы уго. Малпаськонэ уськытэ ёрос но кар газет басьтӥсьёслэн лыдзы. Куд-ог интыосын соос туж трослы йылэмын. Тани Воткинскын (районэн ӵош) кылем арын сыӵеос ог 4 сюрс гинэ вал ке, туэ 13 сюрс пала луизы. Кызьы валэктӥз отысь Почта кусыпъёсъя ёзысь инструктор Надежда Рожкова, газет поттӥсьёс но, связистъёс но гожтӥськон вакытэ выль амалъёсты кутыны тыршизы. Кылсярысь, киоскъёсы огдыре вуттэмын вал "ВТВ плюс" газетлэн аспӧртэмлыко номерез. Издательёс солэн пушказ понӥзы нимысьтыз абонемент, кудӥзъя, пе, газетлы пичи дунын гожтӥськыны луэ. Калык дыртӥз почтае. Озьы кык арня куспын гинэ сыӵеос 1200 кузя люкаськизы. Выль издание лыдызъя азьпалтӥз уно аръёс ӵоже потӥсь ёрос газетэз. Таӵе но музон амалъёсты кутыны быгато ук кун но, интыосысь бюджет чотын газет-журнал поттӥсьёс но. Кылем арын республикаямы радъямын вал гожтӥськисьлэн нуналъёсыз. Та ужрад ватсаса тиражен берытскиз. Но куд-ог интыосын солэсь пайдаё луэмзэ ӧз валалэ на кадь. Кызьы оскытӥз УФПС-ысь печатез вӧлмытонъя отделлэн кивалтӥсез Татьяна Горячих, таяз арын но сыӵе нуналъёс ялэмын луозы, соосты дасян бордын почтовикъёс Печатья но иворъёсъя министерствоен но интыосысь кивалтон ёзъёсын ӵош ужалозы. Гожтӥськонэз ӟечгес радъян сярысь пыр-поч вераськон мынӥз та нуналъёсы ёросъёсысь но городъёсысь та ужен вырись инструкторъёс понна радъям нимысьтыз семинарын. УФПС-лэн кивалтӥсьёсыз отчы ӧтчазы элькун газет-журналъёслэсь редакторъёссэс но. Пумиськон пайдаё ортчиз. Ванмыз ик люкаськемъёс уртче ужаны дась луэмзэс возьматӥзы. Калыклэсь лыдӟиськыны мылкыдзэ ӝутон вылысь, соос туэ ватсаса ӵош ужрадъёс ортчытыны кенешизы. Муг шедиз бере, ми нош ик дыртӥськом лыдӟисьёсмылы, газетмес вӧлмытӥсьёслы тау кареммес вераны. Тодады вайытӥськом: "Удмурт дуннелы" гожтӥськон ар ӵоже ик мынэ. Пыралэ почтае - отын, оскиськом, тӥледлы юрттыны котьку дась. И. Максимов. Чур бугор Европаын 1-тӥ апрелез Шузилэн нуналэныз нимало. Исало ваньзэ. Кылем арын одӥгез прачечной ӧс азяз таӵе ялон ошиз: "Миськиськом но кышъяськом презервативъёсты". Визьмо ужбергатӥсьёс уже куто рекламалэсь луонлыкъёссэ. Кылсярысь, одӥг нянь пыжон комбинатлэн кивалтӥсез 1-тӥ апреле калыкез алдаз, та нуналэ пыжем кӧня ке тортын зарни зундэс луоз шуыса. Ваньмыз бен ӧз оске, но ӝыт магазинъёсысь торт шедьтыны шуг вал ини. Гуртын будэм тросэз пиос кадь ик, пичи дыръяз тракторист луон сярысь малпалляз. Но улон сюресэз сое крезьгурен герӟаз. Табере Валерий Яковлевич Митрофанов - шаерамы тодмо кизили сярысь лыдӟе 4-тӥ-5-тӥ бамысь. Ӟечкылан 31-тӥ мартэ 25 арес тырме Зинаида Андреевна Зиновьевалы. Алнаш ёросысь Варзи- Ятчи шор ёзо школаын со пиналъёсты кун кыллы дышетэ. Ми вань сюлмысьтымы ӟечкыласьком тонэ вордскем нуналэныд. Сӥзиськом юн тазалык, шудбур, чиданлык, яратон, вань ӟеч мылкыдъёсыд мед быдэсмозы. Кузьминъёслэн, Зиновьевъёслэн, Слесаревъёслэн, Чумаковъёслэн семьяоссы. Супыльтон сэрег "Зарни куаралы" Ижын зарни ӧз тырмы Ӧз шумпотты Николай Басков аслаз "зарни куараеныз" Ижевскын улӥсьёсты. Мартэ ортчытыны чаклам концертсэ тодмотэм дырозь выжтӥзы. Калыклы шуизы, Басков, пе, шуак висьыны усем. Но татын мугез мукет, шӧдске. Николай Басковлэн концертаз билетъёс туж дуноесь вал - 1300 манетысен 3800-озь, соин ик концертэз радъясьёс ваньзэ вузаны ӧз быгатэ. Та дырозь Ижевске вуылӥсь кырӟасьёс одӥгез но со быдӟа дун ӧз курылэ на. С. Сплетнева. Артистьёс маскаръясько 1961-тӥ арысен кутскыса, арлы быдэ 27-тӥ мартэ пусйиськом Театрлэсь калык куспо нуналзэ. Асьме дорын но со умой сямлы пӧрмиз: вань артистъёс Мунё театре люкаськыло капустник шуыса нимам шулдыръяськоназы. Кылем арын сыӵе праздникын нырысь интые потӥзы вал Драмая удмурт театрысь артистъёс. Туэ соослы, вормисьёслы сямен, шуд усиз капустникез усьтыны. Олокызьы но йӧспӧртэмъяськыса быгатэмзэс возьматӥзы, асьсэ эшъёссэс-учкисьёсыз (артистъёсыз) шулдыртӥзы Андрей Сергеев, Алексей Ложкин, Сергей Салтыков но Вячеслав Красноперов. Таяз учыре но соос туж тыршизы, но жюри ялӥз куинетӥ инты басьтэмзы сярысь. Нырысетӥ но кыкетӥ интыосы потӥзы Короленко нимо Ӟуч театрысь но Мунё театрысь артистъёс. Но тазьы интыосты люкылон - ньӧмыз понна гинэ, шуыны луэ. Таӵе шулдыръяськонын нырысь интыын - капчи мылкыд, маскаръяськон. Вань театръёс - Ижевскысь "Молодой человек" но, Сарапулысь Драмая театр но, Операя но балетъя кун театр но (Глазовысь "Парафраз" гинэ малы ке ӧй вал) - туж умой возьматӥзы асьсэлэсь творческой фантазизэс, малпанъёссылэсь вылӥетӥ лобаны быгатэмзэс. Театрлэн калык куспо нуналаз арлы быдэ луэ артистъёсты данъян. Туэ Удмурт Республикаысь калык артистка ним басьтэменыз ӟечкылазы Операя но балетъя театрысь валтӥсь балеринаез Марина Кузнецоваез. Дано артистка луиз та театрысь ик Светлана Ященко. Пӧртэм коллективъёсысь артистъёслы сётэмын Удмурт Правительстволэн но Культурая министерстволэн данъян грамотаоссы. Т. НИКОЛАЕВА