Инкуазез чаклась индылон-косонъёс Кемалась дырысен ик ини инкуазь адямилэн осконъёсаз вылӥ-улӥ сьӧрал кужымъёсын герӟаськемын вал. Дуннелэн куинь ёзъёсыныз кузёяськизы Инмар, (Му)-Кылдысин но Куазь. Инмар улӥз вылӥын (герӟаськемын со инма, илма вашкала финно-угор кылъёсын, омырез, инбамез возьматэ). Куазь - котыр улосын, инбам но музъем вискын, Му-Кылдысин - музъем пушкын. Куиньзэ ик та инмаръёсты нималлязы, буре вайылӥзы куриськон кылъёсын, вазиськылӥзы соослы, юрттэт но шуд-дэлет, азинлык курыса. Но та куинь вылӥ кужымъёс берлогес "вордскемын" шуыны луоз. Кылдэмзыя тужгес но вашкала луо инкуазьлэн пӧртэм мумы-анайёсыз: Шунды-мумы, Гудыри-мумы, Инву-мумы, Музъем-мумы, Инвожо мумы. Шунды-мумы аслаз пиезлэсь -шундылэсь - инбаметӥ ветлэмзэ уте-чакла, медаз йыромы шуыса, котькуд нунал солэн азьпалаз сюрес возьматыса мынэ. Музъем-мумы, верамзыя, улэ вырйылъёс, муӵъёс пушкын, соин ик соосты гудыны - копаны уг яра. Музъем-мумылы (ачиз кадь ик) сьӧд ошез курбон сётылӥзы. Но сӥзьыл курбон сётыны уг ни яра вал. Музъем-мумы со вакыт изе, пе. Гырон-кизён бере, музъемез, ю-нянь мед удалтоз шуыса "сюдылӥзы": пичи пу лопаткаен музъемез гудӟыса, отчы сиён понылӥзы (нянь ныр, табань, курег пуз, курег пуз табань). Тройча бере кыкетӥ нуналаз - музъем вордӥськон нунал. Соку музъемез гырыны, копаны, усыяны уг яра вал: вӧсь, пе, медаз луы. Музъемез зуркатыны гинэ но ӧз лэзьылэ. Соиз ик, та вакыт гершыд нергеез пӧрмытыкузы, вал ворттонэз нырысетӥ гинэ ортчыто вал. Нош капчи карыса, межа юбоосты, кабанлэсь лӧспуконзэ1 кыскало. Та бадӟым нуналъёсы ужаны ӧз лэзьылэ: - Музъем нуналэ луд вылэ эн поты: чача муртэз адӟыса кулод. Бусыысь межаосты Кылдысинлэн ветлон сюресъёсыз шуыса вераллязы. Му-Кылдысин утиз-вордӥз будӥсь ю-нянез. Со сярысь вера вашкала выжыкыл-мадёс но. "Валлян дыръя Кылдысин калык пӧлын улэм. Нош калык соку трос ик вылымтэ, музъем тросэн гыроно-кизёно анаоссы бадӟымесь вылӥллям. Ана куспысь межаос но туж паськыт вылӥллям. Межа вылтӥ, сюрес вылтӥ кадь ик, яратэ вылэм ветлыны Кылдысин. Кузь тӧдьы дӥсен, пурысьтам йырсиё но тушо ӝужыт Кылдысин шумпотыса учкем, кызьы удмуртъёс музъемзэс ужаллям. Нош дӥсясько вылэм соос Кылдысинлэн кадь юг-тӧдьы дӥсен. Котькуд усем шепез Кылдысин яратыса ӝутоз, нош межа вылэ потэмзэ палэнскыса ортчоз вылэм. Кылдысинлэн сюлмаськем-тыршеменыз музъем ӟеч ю-нянь сётэ вылэм". Таӵе осконъёслы луыса кылдэмын межа вылыны кӧлыны лэзёнтэм индылон-косонъёс: - Аналэн межаяз кӧлӥд ке, пери шукко. Гудыри-мумылэсь курыны кулэ зор-котэз но шуныт-няськыт нуналъёсты. Тулыс гудыри сайкатэ музъемез, вазьылэ-вера солы, ю-нянь кизён дыр вуиз шуыса. Гудыръям бере гинэ лэзьылӥзы пукыны но кылльыны музъем вылын: соку, пе, со шуна ини. - Нырысетӥ гудыри музъемез сайкатэ, собере турын будыны кутске. - Азьвыл гудыриез кылыкуд, музъем вылтӥ погыльскыны косо, бадӟым мед будод, шуо. - Нырысь гудыръяку погылляськоно, шуо. Ӧд ке, пе, погылляськы, аракуд кускыд жадёз. Гудыри-мумы ыстэ аслэсьтыз пизэ - инчилектэмзэ - шайтанэз ӵашйыны. Медаз ӵашйы шуыса, лысо писпу улэ зорлэсь ватскыны уг лэзё. Валэктонэз индылон- косонъёсын таӵе: - Куазь гудыръяса зорыку, ваё кыз улэ пырыны уг лэзё: кызлэн ваяз шайтан, пе, пуке. Со шайтанэз инмар ӵашйыкуз, шайтан адями борды кырмиське но, инмар шайтанэз но, адямиез но ӵош вие. Таӵе веранъёслэн зэмос мугзы пыдло ватэмын. Али котькуд дышетскись валэктыны быгатоз, огназы сылӥсь, ӝужыт писпуосты капчигес ӵашъе шуыса. Со сяна, кыз но, ньылпу но, туж пересь сиресь маръёс ке, интылэз бордазы ӝоггес кыско. Биологъёс верало: кызлэн но ньылпулэн кужымзы-биополезы, кызьпуэн, бадярен, пужемен, бадьпуэз ӵошатыса, секытгес, пеймытгес, шуге-леке вуттӥсь. Сое шӧдытэк ӧвӧл улӥллям вашкалаос но. Тапал но сопал дуннеез герӟало кыз но ньылпу: кыз улэ куясько йыр-пыд сётон дыръя, кызэ ошо яке кыз улэ кушто нюлэсмуртлы саламзэс. Инкуазь кужымез Инмарен ӵошатэмез, ог-огенызы воштэмез адӟиськомы трос индылон- косонъёсысь: - Куазь зорыку ньылпу улэ ке пырид, инмар ӵашъёз. - Куазь гудыръяку, кыз улын корт бордад медаз луы, иське, пе, инмар ӵашъёз. Гудыръяса зорон вакытэ ӧз лэзьылэ ишканы гудыри сяськаез (солэн мукет нимъёсыз - инмар сяська, инвожо сяська). Со сяська вылын, инмысь васькыса, гужемлэн шораз улэ, пе, Инвожо-мумы. Сое кур каронтэм вылысь уг яра ишканы солэсь сяськазэ. Нош пумит карид ке, сильзорзэ ыстоз, йӧзорен вань ю-нянез шуккоз: - Инмар сяськаез бичаны уг яра - ӵашъёз. - Гудыри сяськаез октӥськод ке, куазь гудыръя. Лек сильзоръёс гужемлэн шораз - инвожо толэзьлэн кыкетӥ палӝыныяз но турнан толэзьлэн кутсконаз - вуылӥзы. Та вакытэз иинвожо шуо вал. Солы пумит толалтэ пуксе уйвожо, вожодыр. Кыкез ик та вожо-дыръёс - шундылэн берытскон вакытэз. Берытскон, выжон вакыт - кышкыт маке. Осконъёсты чаклано ке, со - лек, вожзэ поттӥсь, маке но урод карись дыр-вакыт. Та дыре нуназе шорын ӧз лэзьылэ ужаны, куара-ланга поттыны, ву дурын шудыны, ву омыръяны, вуэз пожаны, уката ик ву дурын мисьтаськыны. Адями чакласькытэк улэ ке, одно ик ю-нянез изянме. - Милям ошмесамы уг лу мисьтаськыны - йӧ куштэ. Йӧзор дыръя укноетӥ ухват, гур суран, нянь куй кушто вал. Та сямысь нош ик адӟиське тылэз /гурез но соин герӟаськем арбериосты, нянез сӥлы карон. Оскизы, будосъёслы сямен ик, зор адямилы но будыны сётэ кужым: - Куазь зорыку, гольык пыд (гольык йыр), пе, ветлоно: бадӟым будод. Али но гуртъёсын шудэм-серекъям улсын косо на пиналъёсты зор ултӥ гольык пыд бызьылыны. Зорлэсь нянь будэтонын, адямилэн быдэс улоназ кужымзэ шӧдыса, сое данъяса, солы инву ним понӥллям. Удмуртъёслэн нимысьтыз инву гурзы но вылэм. Со вӧсь нерге гур, гершыд нуналъёсы кырӟано-данъяно гурзы. Со сярысь трос веразы ЪИЪ даурысь этнографъёс, но солэн крезьгурез гожтэмын ӧй вал бере, туала арын ышемын-быремын шуыса малпамы вал ини. Но шудмы вылэм на. 1993-тӥ арын Пичи Пурга ёросысь Гожня гуртын со крезьгурез гожтыны быгатӥм 1912 арын вордскем Скворцова Мария Александровналэсь. Инву гур шуыса та палан нимало вылэм Гужем юон гурез. Наука понна со туж бадӟым кузьым вал. Трос калыкъёслэн вал оскон-чакланъёссы, кытын верамын: зорлэн кузёосыз - зор азьын куараоссэс сётӥсь улэп макеос. Удмуртъёс, мукет калыкъёс сямен ик, зорез бакаен герӟаллязы: - Эбекез эн виы - куазь зороз. - Эбекез лёгыны шедьтыса ке виид - со нунал ик зороз. Зор-кот тырмыт ке, нянед но удалтоз. Ваньмыз сямен ик вӧсь кылъёсын адями куриз шуныт-небыт зоръёс ӵемгес мед луозы, нош сильзоръёс-тӧлпериос палэнэтӥ мед ортчозы шуыса. Кӧс аръёсы, зор курыса, нимысьтыз вӧсяськылӥзы: шур дурын ӝук сиылӥзы но вуэн пызяськылӥзы. Ошмесэ яке шуре куяллязы пурысь яке сьӧд такаез (сыӵе ик буёлзы луэ вал ук пилемъёслэн), ошмес пыдсысь дэри-напраез басьтыса, укноосты нашталлязы: со кырсез зор ву мед гылтоз шуыса. 1 Лӧспукон - сисьмонтэм вылысь кабан улэ тупатэм пуӵъёс. 1 "Шудбур понна" повестьлэн кылыз сярысь. Удмуртиысь калык писателез М.А.Ляминэз лыдӟисьёс умой тодо. Солэн быдэс творчествояз валтӥсь инты басьтэ "Шудбур понна" повестез. Идейно-художественной пуштросэз эскеремын, сэрттэмын-пертчемын ини пӧртэм ужъёсын, монографиосын но учебно-методической пособиосын. Нош кылтӥрлык сярысь, стилез сярысь нимысьтыз статьяос ӧвӧл на. Та ужпум- быдэс удмурт литературоведениын но кылтодонын одӥгез кулэ луись но одно ик эскерыны кулэ карись ужпум. Сое ваньмыз умой тодо, валамон со ваньмызлы. Но жаляса верано луэ, берло аръёсы чеберлыко произведениослэн кылзы сярысь вераськон одӥг-ог гинэ потылэ. Выль книгаослы рецензиосын но кыл сярысь вераськонмы кык-куинь предложениосын быре, нош куд-огаз со сярысь уд шедьты одӥг кыл но. Чеберлыко произведениослэсь кылтӥрлыксэс эскеронын нырысь интыын луыны кулэ соиз яке таиз произведениослэсь кыл ласянь аспӧртэмлыксэс возьматон, малы, кыӵе муген кутэ писатель пӧртэм чебер веранъёсты, визькылъёсты но мудрон веранъёсты, шиё, диалектной кылъёсты, кыӵе выль амалъёс сётэ удмурт кыллэсь узырлыксэ но пӧртэм луонлыкъёссэ уже кутыса. Пусйыны кулэ, одӥг ужын та произведенилэн кылызлы быдэсак лексико-стилистической дунъет сётыны шуг, соин ик мон дугдыло куд-ог ужпумъёс борды гинэ, верало аслэсьтым куд-ог малпанъёсме, чакланъёсме. Малпасько янгыш уг луы, дыр, повесть узыр пӧртэм чебер веранъёсын шуи ке. Собере ведь соостэк чеберлыко произведение но ӧвӧл, луыны но уг быгаты. Тани кӧня ке примеръёс гинэ: "Тӧдьы киос муртлэсь ужзэ ярато", "Пунылэсь быжзэ ӵогыса, сое ыж карыны уд быгаты", "Нянь- со пу ӧвӧл, сое нюлэскы мыныса уд кора", "Ымнырысь кырсез ӵушыны капчи, нош улонысь -туж секыт", "Тыршись адямилэн ыль пуэз но зол ӝуа" но мукет. Удмурт калык кыллэсь узырлыксэ кутэм сяна, М.Лямин быгатыса пыртэ пӧртэм чеберлыко веранъёсты но сочетаниосты, кудъёсызлэн инъетсы луэ ӟуч кыл: "Вужередлэсь кыдёке уд кошкы" - "От своей тени не убежишь"; "Москва бӧрдэмлы уг оскы"- "Москва слезам не верит"; "Чипыосты сӥзьыл лыдъяло"- "Цыплят по осени считают"; "Кырныжлэсь кырныж синзэ кокчалтоз шат"- "Ворон ворону глаз не выклюет"; "Соослэн йыр вылазы коть тул лусйы"- "Хоть кол на голове теши "; "Кортэз ӟырдам дыръяз дуро"- "Куй железо, пока горячо" но мукет. Куд-ог дыръя автор ӟуч кылысь огшоры берыктэмен гинэ уг буйгатскы, кылъёслэсь пуштроссэс воштэ, кылдытэ выль валан сётӥсь чебер веранъёсты, кылтэчетъёсты. Кылсярысь, "Кионлэсь кышкаса, тэле ветлӥсь ӧз быры на - ай", "... пежъянэз мешоке ватыны шуг, собере пӧяськонлэн пыдъёсыз туж вакчиесь". "Пилемтэм инмысь гудыриез уд кылы".Та вылӥ верам выражениослэн инъетсы луэ ӟуч кылысь пӧртэм сочетаниос: "Волков бояться в лес не ходить", "Шила в мешке не утаишь", "Как гром среди ясного неба". Куд-ог дыръя писатель умой тупатыса пыртэ аслаз произведениосаз зэмос удмурт выражениосты но: "Сюлэм сандык ӧвӧл, усьтыса уд учкы шуо ке но, та вынъёслэсь сюлэмзэс адӟоно". Повестьын пумиськыло писательлэн аслаз кылдытм кылъёсыз но пӧртэм грмматической формаосыз: - Вот умой! Я мынӥм тэльгуртамы ; Мартун нюняй бакчияз, музэ учкыса бодыез борды пыкъяськиз; Беков дорын мельникын кема ляльчияз; ... нош кызьы отысь потод, кытчы мынод, беглояськыса-а,мар-а, ветлод?; - Айда, паньтэм, эн комедъянъяськы; Сӥзьыланы кутскем писпуослэн куаръёссы зарни кадь ӵужекто ни; Туктымозь кык иськемала луоз; Тукля но Юбера гуртъёсысь пиналулӥ вуиз; - Уз шуэ, вералэ! - дэмен косо совпартшколецъёс. Ӵем дыръя М.Лямин уже кутэ семантической кыл пӧртэм амалэз: кыллэн вылтусыз воштӥськытэк, солэн пуштрсэз паськыта, яке мукет валантэм сётэмын луэ: "Трос пушкаос но отын сазнам". Вераськон мынэ пушкаосты пазьгем, сӧрылэм сярысь, нош сазнаны глаголлэн основной значениез сӧриськем мае ке тупатыны. Басьтом на эшшо одӥг пример. Мытылыны глаголлэн валатонэз "кинлы ке но пумит вазьыны", нош М.Лямин та кыллэсь пуштроссэ трослы паськытатэ". "Мон артель улонлы ноку но пумит ӧй вал, кышное матылэмен татчыозь куриськон ӧй сёты"; "Та тэльын Петыр куме ас отрядэныз узыръёслэн бугыръяськонзылы мытылӥз"; "Кезьытлы мытылыса, поезд кошкиз азьпала"; "Наговицинлы капчи дӥсяськеменыз кезьытлы мытылыны секытгес"; - "Капчи-а кожаськод берпум пиосмуртэз лэзьыны? Мытылӥсько мон, Микол, мытылӥсько"; "Укылтэм тушмон урмем кион сямен мытылэ но куд-ог интыосын ачиз контратакае потэ". Та выллем примеръёсты луысал йылтыны (кылсярысь, вадьсаны глагол сярысь), но вылӥ верам примеръёс вылысь адӟиськом, кызьы писатель паськытатэ кылъёслэсь пуштроссэс. Озьыен, полисемия - та произведениын одӥгез паськыт кутӥськись кыл пӧрмытон амал. Удмурт калык творчестволы матын луэмзэ возьмато калык кырӟанъёс , визькылъёс но мудрон веранъёс, мадиськонъёс, озьы ик калык осконъёс: "Туливить вуэ - йӧ чиге, нош кырӟа ке тюрагай - кебитысь герыдэ вай". Геройёсызлэсь кылзэс нимысьтыз чебер карон понна, автор уже кутэ вераськонын кутӥськись огшоры кылъёсты: "Коньдонзэ ӧз ке сёты, сое ваньмытом:" - "Бен корка пырыса лабыртом, кум;" - "Кин васькытӥз ?". Тодӥськом, нокыӵе но гожъяськон уж синонимъёстэк пыр уг поты. Соослэн чеберлыко произведениосын, публицистикаын, научной ужъёсын кутӥськемзы - мукет нимысьтыз бадӟым ужпум. Соин ик та ужам кӧня ке примеръёс гинэ сёто. "Ас сярысь вераны умой ӧвӧл: ваньзэ ӧд ке вера, кӧсыт луоз, ньылак верад ке, ушъяське шуозы": "... мон малпанме кыӵак верай. - Вань кылэмзэ - адӟемзэ одӥгтэм ??????..."; "- тау ӟеч кыллы, пересьмем-а? - Галина Петровна юалляське, - Сётскем ни, нош мылкыдыз сыӵе ик"; "- Васькыты, паньтэм, - кеськиз Микол. - Ыб, агай!"; - Ма пӧрмоно ук та, взводной, - ушъяз начдив. - Дышетскысал ке, пишмысал ... , - вазиз Бадяров"; "Ошмес дурысь пичи куш вӧзы интыяськизы Иже пегӟисьёс, ӧжытак шутэтскыны но гусъяськыны. Дыртыса сиськизы соос, ошмес вуэз юизы". Озьы М.Лямин диалектной кылъёсты кутыса, удмурт кыллэсь синонимической радзэ узырмытэ. Повестьысь инты нимъёсъя адӟиськом, главной геройлэн Бадяровлэн но куд-ог мукетъёсызлэн геройёслэн вордскем но будэм гуртсы - Вадогурт яке солы матын луись гуртъёс (Тукля, Сям, Выль Мултан но мукет гуртъёс), оглом вераса, Ва тупал. Отын ик ортчо основной событиос но. Озьы автор топонимъёс пыр повестьлэсь документальностьсэ муромытэ. Со сярысь асьмеос авторлэсь шонерак верамзэ ӵем пумитаськом: "Сӥзьыл но толалтэ та пал селоысь бӧрсьысь бӧрсьы ярмаркаос ортчо: Мултанын - Пукро, Удугуртын - Корсунской, Сямын - Михайловской, Седталан - Катерина, Вавожын - Микола"; "Ва тупалась Тукля вылэз но Монья вылэз Петыр (Бадяров - С.С.) картатэк но ас бакчазэс кадь тодэ". Кӧня ке дугдылэм потэ та повестьын диалектной кылъёсты кутонлэн мугез борды, соослэн интызы сярысь. Та ужпумъя вань трос пӧртэм малпанъёс но вераськонъёс. Кызьы но ку кутоно диалектизмъёсты? Кулэ-а соос? Кулэ ке, малы? Одӥг кадь валэктон та юанъёслы асьмеос ум шедьтэ. Одӥгез шуэ, диалектной кылъёсыз, пе, пыртоно чеберлыко произведение тросгес, соос узырмыто литературной кылэз, мукетъёсыз нош - меӵак пумит, соос, пе, литературной кылмес валантэм каро, куиньметӥосыз шуо, пыртоно, пе, чакласькыса, быгатыса, ньылетӥосыз чал-чал уло, номыр уг верало, малпало, лэся, та ужпум туннэ нуналлы лэчыт уг сыл шуыса. Но со - проблема. Мылмы потэ-а, уг-а, нош диалектизмъёс пумиськыло, трос пумиськыло асьме писательёслэн произведениосазы. Кылдэм югдурлэн палэнтӥз кошкыны ум быгатӥське. Асьмеос пыр-поч эскерыны кулэ малы, ма муген соиз яке таиз диалектной кыл чеберлыко произведениын. Соос пыр писательёс лыдӟисьёссылы воьмато, кытысь, кыӵе интыын вордскемын, будэмын соиз яке таиз герой, кытын ортчо действиос. Та повестьын но трос гинэ пумиськыло диалектной кылъёс. 1. Бековлэн сюлмыз ӝамдэлы небӟиз кадь. 2. Котыр синйылтӥз со Пашкинъёслэсь дэлетлы корка пушсэс. 3. Кам котыре сӥзьыл вань ӧдыеныз лӧсъськем ни. 4. Дауръёс ӵоже кылдэм йылол, кылык. 5. Калыклэн мылкыд шадыр. 6. Вылтырысьтызы ӟустари дӥськутсы мырдэм тупта. 7.- Ну, ладно, пыром Власов дӥне. 8. - Милемын мась карозы соос, ми ведь киямы пыӵал ӧм кутылэ. 9 - Асьме гуртмыя верано ке, паймоно кадь, егитъёс вочаксы дышетскыны малпало. 10. Артысь скамья вылын тузӥ адямиос пуко, куспазы мудрон верасько. 11. Кема ченгешем бере, аскы ӧтчам люкаса, отын ивортыны кенешизы. 12. Усьсэ куарсур нунал, со прздниклы вадогуртъёс дасясько. 13. Мопуд ма карыны ӟудыса пукиз, суйпыдыз солэн кема висем бере кадь юскиськемын. 14. Ужасьёс кытысь ке шкалик вина вуттӥзы, Микиез зыразы, кӧня ке удӥзы . 15. -Шонер ӧвӧл ук озьы верамед, эше, ваньзэ ӧд ятвылты шӧдске. Та вылӥ сётэм примеръёс вылысь адӟиськом, удмурт кыллэн пӧртэм диалектъёсысьтыз кылъёс пыремын повесте. Уй пал наречиын кутӥськись кылъёс усьсэ, аскы; тузӥ, ӟудыны - лымшор наречиысь; ӝамдэ, дэлет, ӧды, кылык, шадыр, тупта - Ува, Селта, Сюмси котырысь улӥсь удмуртъёслэн вераськонысьтызы; дӥне, мась, удыны, ятвылтыны - Якшур-Бодья котырын улӥсь удмуртъёслэн вераськоназы кутӥськись кылъёс; вочак - Завьялово котырын вӧлскем кыл. Таӵе суредэн валче нош ик юан пуксе: кинлэн, кыӵе геройлэн вераськоназ кутӥсько та диалектизмъёс? Ува - Селта - Сюмси - Вавож котырысь улӥсь удмуртъёслэн вераськонысьтызы кылъёслэн кутӥськемзы валамон - писатель, инты нимъёс пыр сямен ик, вера, геройёс тросэз вордскемын, будэмын но уло Ва тупал котырысь интыосын. Кыӵе геройлэн вераськоназ кутӥсько мукетъёсыз диалектной кылъёц? Тани басьтом котькудзэ со вылӥ сётэм кылъёсты: якшур-бодья вераськетысь кылъёс пумиськыло - ятвылтыны Власовлэн вераськоназ, удыны -автрлэн; мась - Бадяровлэн, Максим Миколлэн, Оксиньялэн - Кион Оле кышнолэн, Мопудлэ; дӥне - Пашкинлэн, Варуклэн, авторлэн; уй пал наречиысь усьсэ но аскы кутӥсько авторлэн кылъёсаз; лымшор наречиысь тузӥ но ӟудыса пумисько Бадяровлэн но авторлэн кылъёсазы; завьяловской вочак кыл пыртэмын Бадяровлэн вераськоназ. Бадяровлэн вераськоназ та диалектной кылъёслэн кутӥськемзылы валэктон шедьтыны луэ: со трос ветлӥз, пумиськылӥз пӧртэм интыосысь адямиосын, со кылъёсын тодматскиз но вераськоназ пыртылыны кутскиз. Нош мукетыз геройёс - Варук но Мопуд? Ведь повестьлэн пуштросэзъя соос нокытчы палэнэ ӧз поталэ. Кызьы со диалектной кылъёс соослы тодмо луизы? С.Соколов, доцент. МУКЕТЪЁСЫЗ МЕД ЛОБӞОЗЫ МАРСЭ Д.А. Яшинлэн лирикаез пумысен эссе-малпаськон В.ШИБАНОВ, доцент, кылбурчи Жаляса верано, тросэз кужмо усточиосмы сямен ик, Даниил Александрович Яшин но пичи дырысен атайтэк сирота кылиз но улонысь дырызлэсь вазь кошкиз. Сыӵе вал, шуыны луоз, ХХ даурысь быдэс удмурт литературалэн адӟонэз. Трос пӧртэм удысъёсын азинлыко ужаз Даниил Александрович. Доцент луыса дышетӥз пединститутысь но университетысь студентъёсты, пыриськиз пӧртэм калыккуспо конгрессъёсы; тодосчи луыса эскериз удмурт калык кылбуретэз но арлы быдэ потаз фольклор экспедициосы; кылбурчи луыса гожтӥз дас одӥг кылбур книга но кема дыр ӵоже кивалтӥз литературно-творческой кружокен, кытысь берло синмаськымон кужмо гожъяськисьёс потӥзы. Эшшо но трос мукет удысъёсты висъяны луысал на (учебникъёсты дасясь методист, критик, умой атай, маскарчи), кудӥз пумысен солэн огъёзъёсыз эшлыко шаржъёс но гожъязы. Мынам но, та чуръёслэн арторзылэн, улонэ, егит дыры трос ласянь герӟаськемын Д.А. Яшинэн. Даниил Александрович сюлмаськемен, 20 арес дыръям ик печатламын вал кылбур книгае (литкружокмы понна со бадӟым шумпотон луиз); быгатыса кивалтӥз диплом уженым, кудӥз Н.А. Некрасовлэн удмурт кылэ берыктэмъёсызлы сӥземын (азьвыл соос проф. Б.О.Корманэн ӵош вал, но собере огназ кылёно луиз); Д.А.Яшин тырше вал монэ Венгрие дышетскыны поттыны, проф. Петер Домокош доры, но тоталитаризмен сэрен секыт пыкетъёс кылдӥзы. Озьы ке но, Ленинградысь университетлэн аспирантураяз пыреме кыкмылы ик бадӟым вормон луиз. Д.А. Яшинлэн улон сюресысьтыз сыӵе яркытэсь учыръёс сярысь мон кӧня ке гожъяй ни, азьланяз но уг вунэты, дыр. Но туннэ мынам мукетыз сярысь вераськеме потэ. Угось йылпумъяськем ХХ даурмы - дунне калыклэн историысьтыз одӥгез тужгес но шимес вакыт. Мынам меӵак юаме но малпаськеме потэ: кыӵе инты басьтоз со даурын Д.А. Яшинлэн лирикаез? Соин валче азьпал радэ потозы 1950-70-тӥ аръёс, кытын, мон сямен, Д.А. Яшин но аспӧртэмлыко инты басьтэ. Зэмос лулчеберетлэн куронъёсыз туж бадӟымесь но туж вылӥесь - литературалэсь историзэ гожъясь тодосчиос сое умой тодо. Мынам но та куронъёсты лазегомытэме уг поты, озьы ке но, удмурт литературамылэсь 2 томъем "Историзэ..." гожтӥсь авторъёсын ченгешеме потэ ик, уката ик отын Д.А. Яшинлэн лирикаезлы укыр пичи инты висъямзы пумысен... ХХ даур удмурт поэзиысь ньыль нимъёсты азьпал радэ ӝутӥз: Кузебай Гердэз, Ашальчи Окиез, Михаил Петровез но Флор Васильевез. Та - зэмлык. Кин ке понна - курыт зэмлык, солэсь палэнэ уд ватскы. Озьы ке, кыӵе инты басьтэ Д.А.Яшинлэн лирикаез ХХ даурысь удмурт кылбуретын? Йылпумъянъёс берлогес лэсьтомы, нош али та пумысен кӧня ке малпаськонъёс. Нырысь ик, Д.А.Яшинлэн гожъяськыны кутсконэз тупаз сяськаяськись даурмес данъян вакытэ. Таӵе чуръёс вылын егитъёсты но дышетылӥзы, кылсярысь: "Сквозь века на века, навсегда, до конца: -- Коммунисты, вперед! Коммунисты, вперед!" (А.Межиров, 1947), "Если бы парни всей земли" (Л.Ошанин), "Убейте войну, прокляните войну, люди земли! Мечту пронесите через года!.." (Р.Рождественский, 1951), "Вамышты партиен ӵош! (М.Петров) но трос таӵ:е выллем. Мон уг вераськы, та поэзия урод маке луэ шуыса, чик но уг. Пусъеме гинэ потэ: та вакытэ кылдӥз вал мукетыз но литература (тодады вае Б.Пастернаклы Нобель премия сётэмен сэрен кылдэм югдурез), но егитъёсты сыӵе гожъямъёслы пумит узатылӥзы, гожъяськыны музон штампъёс-кабъёс вылын дышетылӥзы. Соин ик ӧвӧл паймоно, ӧвӧл кышкатсконо, малы-о Д.А. Яшинлэн кылбур книгаосаз ӵем гинэ партиез, политикаез, коммунизме сюресэз данъясь чуръёс пумиськыло шуыса. Шонерзэ верано ке, сыӵе кылбуръёсын ай социализм идеология сокем зол уг но кузёяськы, макем - вашкала дауръёсысь кылдэм фольклорно-утопической дунневалан но дуннешӧдон (со сярысь ми гожъямы ни вал С.Ф. Васильевен ӵош "Под тенью зэрпала" книгаямы). Кыкетӥез. Д.А.Яшин кылбурчи ӧй луысал ке, али удмурт поэзиын тросэз синмаськымон текстъёс озьы ик кылдэмын ӧй луысал, вылды. Кылсярысь, В.Романовлэн вань "Уг тодӥськы, ку синмаськи тыныд..." кылбурез, отын пияш-студент нылмуртлы конспектсэ валэктыны тырше - ньыль пол но, вить пол но: "Нылмурт сюлмын соку валад тон ваньзэ, Нош мон - философ - номырзэ ӧй вала". Тае лыдӟыса, Д.А. Яшинлэсь "Ортчисьтэм егит дыр" (1959) книгазэ тодӥсьёс соку ик шедьтозы таӵе чуръёсты: Учебникез мон лыдӟисько шара, Секыт интыоссэ валэктӥсько. Нош тон, ялан пальпотыса шорам, Пал кыл но юатэк кылзӥськиськод. ...Нырысь экзаменлы дасяськыны Сётысалзы на ке эшшо нунал! ("Нырысь экзамен азьын") Д.А. Яшинлэн та кылбурез ӧй луысал ке, кызьы пӧрмысал меда В.Романовлэнэз? Одӥг гинэ учыр Ф. Васильевлэн лирикаезъя. Куке Флор Иванович вера кык пӧртэм дыръёс сярысь ("Сонет" но мукет кылбуръёсъя), -- огласянь, туала техникалэн ӝоглыкез, мукет ласянь, лымы вылтӥ гылтись дӧдьы - соку, мон сямен, поэт споръяське Е.Евтушенколэн "Телега и ракета", Д.Яшинлэн "Бадӟым вамышъёсын" но мукетъёсызлэн таӵеесьгес кылбуръёсынызы. Споръяськонзылэн мугез таӵе: 1950-тӥ аръёслэн пумазы "эстрадной" лирикалэн куронъёсызъя Д. Яшин, Е. Евтушенко но огъёзъёссы выль техникалы сюлмысьтызы паймо. Нош Флор Васильев 1960-тӥ аръёслэн пумазы, куке азьпал радэ "шыпыт" ("тихая") лирика потэ, данъяны кутске мукет ӝоглыкез, мукет мертэтъёсты. Кин ке шуоз: оло нош, Ф.Васильев но В.Романов, кылбуръёссэс гожтыкузы, Д.Яшинлэн чуръёсыз сярысь чик но ӧз малпаське? Озьы пӧрмыны быгатэ кадь, но ум вунэтэ: кыксы ик - Ф.Васильев но, В.Романов но - егит дыръязы Яшинлэн литературно-творческой кружокез пыр потӥзы, дышетӥсьсылэсь поэзия сярысь малпанъёссэ соос умой тодо но шӧдо вал. Мукет ласянь, наукаын али бадӟым инты басьтыны кутске "интертекст" валатон, кудӥзлы луыса, вылӥын верам примеръёсты артэ пуктыны луэ соку но, куке авторъёс ог-огзылэсь гожъямъёссэс ӧз адӟылэ ке но. Куинетӥез. Вакытъёс ортчемъя, литература шоры учконъёс но зол воштӥськыны быгато. Туннэ нуналлэн нимысьтыз мон висъяй Кузебай Гердэз, Ашальчи Окиез, М. Петровез но Ф. Васильевез. Нош кин тодэ, уз быгаты меда вылез ХХИ даур ваньзэ йырчукин берыктыны? Соку мукет нимъёс шуак висъяськыны быгатозы. Одӥг гинэ чакласькон, яке гипотеза. Шуом, ХХИ даурысь "выль" адямилэн пушдуннеяз бадӟым инты басьтыны ӧдъялоз юмор (компьютеризацилы ӧчкарыса сямен, угось компьютер ас кожаз юмор кылдытыны уг быгаты). Озьы луиз ке, аспӧртэмлыко юмор-вапуме Д.Яшинлэн кылбуретэз, котьма шу но, серекъян ласянь вормоз ваньзэс ик вылӥын висъям ньыль классикъёсмес. Дунне историлэсь кожъёссэ но кожонъёссэ тодыны уг луы. Ньылетӥез. Гипотезаё дауръёсты утчатэк но, удмурт лирикалэн сюрес вылаз кылдэмын ни сыӵе инты, кытын Д.А. Яшин, мон сямен, котькинлэсь зол висъяськыны кутскылӥз. Со - сыӵе дыр, куке улонысь кошкиз Покчи-Петров, нош Флор Васильевлэсь гожъямъёссэ дунъятозь кӧня ке аръёс вал на - Комсомоллэсь премизэ басьтытозяз. Иське, со луэ 1960-66-тӥ аръёсы, шонергес вераса: кутсконысенызы 1960-тӥ аръёслэн шорозязы (поэзия шонер лыдпусъёсты уг чида!). Та вакчи дырез ик "Яшинлэн вакытэз" шуыса мон ниманы быгатысал. Мар бордын-о та вакытлэн пӧртэмлыкез? 1950-тӥ аръёслэн пумазы Россиысь литератураын зол чузъясько егитэсь Е. Евтушенколэн, А. Вознесенскийлэн, Р. Рождественскийлэн гожъямъёссы, кудзэ ӝоген "шара" ("громкая") лирика яке "эстрадная" шуыса нимало. Таӵе кылбуретлэн вал аслаз изъянъёсыз, но вал аслаз кыскись кужымез но. Ваньмыз та шӧдӥськиз Д.А. Яшинлэн творчествояз но. Удмурт литературае "шара" лирикалэсь шӧмзэ но чузъяськемзэ ваньмызлэсь умой вуттӥз М. Покчи-Петров, кудӥз, ас талантэзъя но Москваын дышетскемезъя, выль улонлэсь шокамзэ "Дор", "Тубат", "Кык сяськаос", "Значок" но со выллемесь кылбуръёсаз пыӵатӥз. Но Покчи-Петров шуак бырыны шеде, трос бадӟымесь малпанъёсыз быдэсмытэк кылё. Соосты азинто С. Широбоков, А. Бутолин, А. Клабуков, Д. Яшин, Г. Сабитов но мукетъёсыз. Али, музон нимъёсты ултӥятэк, мынам возьматэме потэ, Даниил Яшинлэсь лириказэ асьмеос тырмыт ӧм дунъялэ на шуыса. Угось ӵапак со кужмогес но мургес азинтэ "шара" литературалэсь куронъёссэ но лирикалэсь "ӝуась тылзэ" берло Флор Васильевлы сётэ. "Эстрадалэн" тодметъёсыз критикаын тырмыт но умой гожъямын ни. Со тодметъёс егит Яшинлэн кылбуретаз но чебер адӟисько. Тани кӧняез ке. Кылбуръёсын бадӟым инты басьтэ вазиськон - кылзӥсьёслы, озьыен, кылдэ огазеясь "ми" ("мон" валатонлы пумит): Вай, утчатэк шыпыт интыосты... ("Вамыштоно ке - мед кылёз пытьы") Нош соосыз, Кинъёс ӧвӧл ни асьмемын туннэ? (татын юан пус -?- кылзӥсьёслы) ("Адямиос пӧлы кылён понна") Со сярысь юаськод бере тон, Кутскиськод ни, вылды, гажаны. ("Ку кутске яратон") "Эстрада" лирикаын нимысьтыз саклык висъямын кылбурлэн пумызлы, солэн паймытӥсь эффектэз мед луоз: Вамыштоно ке -- мед кылёз пытьы, Вазиськоно ке - мед кылёз куара. ("Вамыштоно ке - мед кылёз пытьы") Бен! Кулыны но быгатэм кулэ, Адямиос пӧлы кылён понна. ("Адямиос пӧлы кылён понна") Ужасько бере калык понна, Космосэ шат лобӟозы монтэк? ("Мынэсьтым ӧз пӧрмы космонавт") "Пичи родинаез" но "бадӟым родинаез" артэ пуктоно ке, эстрадникъёс, "шыпыт" лирикъёсын ӵошатыса, вылӥгес дунъяло кыкетӥзэ; быдэс СССР-ез басьтэм сяна, соос кунгож сьӧр дуннелэсь но уг муртало (тодамы ваём Покчи-Петровлэсь "Дор"-зэ). Та пумысен тунсыко луо Д. Яшинлэн кылбуръёсысьтыз гидронимъёс но: Нева, Урал, Волга, Ока, но со дыре ик: Дунай, Миссисипи, Ганг. Географилэн быдэс дуннеозь но космос-инсьӧрозь паськытамез Д.А.Яшинлэн кылбуръёсаз музон тодметъёсъя но адӟиське. Но "эстрадалэн" кужымез сыӵеесь кылбуран амалъёс бордын гинэ ӧвӧл. "Шара" лирикаысь умойёсыз текстъёс ас вакытсылэсь тодметъёссэ, сюлмаськонъёссэ, огшоры адямиослэсь пуш улонзэс чебер но мур возьматӥзы. Ӵапак соиз понна мон тужгес но вылӥ дунъясько Д.А. Яшинлэсь 1960-тӥ аръёсысь лириказэ, кытын возьматэмын "лыз косынкаен" крановщица но колхозысь егит ныл бригадир Зина, кудӥз ю-няньлэсь кисьмамзэ эскерыны потӥз ("Со таӵе ик ныл", "Музъемлэн кузёез"), Иж заводысь сменалэн воштӥськемез, танклэн война бере бусыын гырыса ветлэмез, Ижкар шоры ӝутскем телемачта. Татын ик удмурт студентъёслэн институтэ пырыны курадӟемзы но экзаменъёс азьын сюлмаськонъёссы ("Сюрес вожын", "Экзамен азьын"). Таӵе чуръёсын, мон сямен, 1960-тӥ аръёслэн "лулзы" трослы мургес адӟиськиз, шуом, С. Широбоковлэн "Россия" сузьетаз яке Г. Сабитовлэн "Нош вуиз тулыс" кырӟаназ сярысь. Бен, татыназ монэным споръяськисьёс шедёзы, дыр, мон -- дась. Нош мар луиз 1960-тӥ аръёслэн кыкетӥ ӝыныязы, малы Д. Яшин - вылӥын вераммыя - поэзилэсь "ӝуась тылзэ" Флор Васильев кие кельтӥз но соин ӵошатскыны ӧз тыршы ни, ас лёгем сюрестӥз ик лачмыт вамыштӥз? Таӵе юанлы ачиз Даниил Александрович пальпотыса тазьыгес верасал, дыр: Мукетъёс мед лобӟозы Марсэ! Тазьы со шуиз ни вал "Мынэсьтым ӧз пӧрмы космонавт" кылбураз, кытын пусйиз, котькин ас удысаз тыршыны кулэ шуыса. Ужпум шаерамы "шара" лирика интые "шыпытэз" лыктыны кутскон бордын гинэ ӧвӧл: Д.А. Яшин трос дырзэ но кужымзэ сётыны кутске наукалы. Ӵошатэ: 1963-64 ар куспын со куинь (!) кылбур поттэ. Нош 1965-тӥ арын печатлаське ни "Удмуртская народная сказка" монографиез, 1967-тӥ арын филология наукаосъя кандидат луэ. Флор Васильев но Даниил Яшин куспысь верано югдур тодэ вайытэ аслэсьтым но улон сюресысьтым одӥг учырез, кудӥз ӵапак озьыгес ик ортчиз, шӧдске. 1980-тӥ аръёслэн шорозязы ми аспӧртэмлыко ӵошатским уйпалась эшеным Михаил Федотовен. Уг тодӥськы, но мыным потэ вал, кылбуран удысын Мишалы мон уг сётскиськы шуыса. Но собере мон кутски кандидат диссертациме гожтыны-радъяны но ӧй шӧдылы, макем зол но ӝог ортчем монэ лирика удысын М. Федотов. Аслэсьтым юасько: нош мон наукае ӧй мынысал ке, кыӵе меда югдур луысал?.. Таӵе ик юан сылӥз, дыр, Даниил Александрович азьын но. Бырйиз но шуиз: огвакытэ кыкез ик та ӧръёстӥ кошкыны кулэ. Ужпум - ас калыкедлы пайда лэсьтон бордын, кин ке сьӧры уиськон яке кинэн ке тэргаськон бордын ӧвӧл. Озьыен, Д. Яшин аслаз лирикаеныз поэзилэсь кык тулкымъёссэ ("шара" - "шыпыт") герӟаз. Но гожъямъёсаз нырысетӥезлэн тодметъёсыз, котьма ке но, валтӥсь луизы ("Зэрпал лёгет", "Странамылэсь данзэ бурдъязы" - Т.Тихоновалы но В.Медведцевлы сӥземын, "Мон Уралысь", "Маке но со порма" но мукет), озьы "выжыосыныз" поэт 1960-тӥ аръёслэн кутсконысьтызы эрико вакытэ, чебер егит дуннеяз кылиз кадь. Но куке шуиськом ке, 1960-тӥ аръёслэн кутсконзы "Яшинлэн вакытэз" луылэ шуыса, лыдэ басьтыны кулэ мукетсэ но. Та вакытэ удмурт поэт кылдытэ сыӵе юморез но сатираез, кудӥз удмурт лирикаез (быдэс литератураез ӧвӧл, лирикаез!) азинтонын верантэм бадӟым пайда вае. Нош юморлэн кулэлыкез тани мар бордын вал. Юморлы но сатиралы трос валатонъёс сётъямын ни вал, мынам али соос пӧлысь одӥгзэ (выльзэгес но валамонзэгес) висъяме потэ. Кин ке укыр вылэ тубыны, лобӟыны турттэ ке, юмор сое музъем вылэ васькытэ; озьы ик кин ке но укыр муре, мурдалае васькыны тырше ке, юмор сое ӝутэ но музъем вылэ серекъяса пуктэ. Иське, Серекъян (музъем выл) - со вылӥ ӝуждала но улӥ мурдала куспын. Лирикаын 1950-тӥ аръёс - со вылӥе ӝутскыны тыршон, улонмылэсь чеберзэ данъяны вырон, коммунизме ӝужаса "тубон". Нош 1960-тӥ аръёслэн пумысьтызы "шыпыт" лирика - со адямилэн лул-сюлэмаз пырыны тыршон, отысь вашкала инъетъёсты утчан, философи валатонъёслы нимысьтыз саклык висъян. Вакчияк верано ке, кылбурчи азьло вылэтӥ инметӥ лобаса ветлэ вал, табере пыдло мурдалае пырыны кутске. Соос вискын (ӵап 1960-тӥ аръёслэн шоразы) одно ик "музъем вылэ" лэзькыны кулэ вал - соку тунсыкоесь луыны кутско сыӵе темаос, кудъёсыз бусьтыр сиськонэн, кӧланэн, азьтэмъяськонэн, юмоке сюронэн герӟаськемын. Та удысын - мукетъёсыныз артэ - трос лэсьтӥз Даниил Яшин но. Солэн "Эшъёс ке вань" (1963) книгаяз вань нимысьтыз сузьет, кудӥз удмурт писательёслы, соосты "музъем вылэ" васькытонлы сӥземын: Ал. Волковлы, Арк. Клабуковлы, Аф. Лужанинлы, Мих. Воронцовлы, Гай Сабитовлы, Ник. Васильевлы, Сем. Перевощиковлы но мукетъёсызлы. Кылсярысь, Лужанинлы сӥзем чуръёсаз Д. Яшин шуэ, ас кылбуръёсыдлы геройёсты ортчем вакытъёсысь шедьтыны секыт ӧвӧл, малы-о уд утчаськы сыӵе геройёсты туала улонысь, туннала нуналысь? -- Андан пӧзьтӥсь но скал кыскись - Выль геройёс ӧвӧл ичи. Эн вунэты та эшъёсыз Юнгес кырӟа, кылбурчи! ("Афанасий Лужанинлы") Кызьы адӟиськом, Д.Яшин юромо тодэ вайытэ Лужанинлэсь "Осотовецъёс" поэмазэ, озьы верамезлэн индылон пуштросэз шудон-серекъян амал сьӧры ватске. "Ыркыт тӧл" (1964) сборникын эскероно ужпумлы - юморлы - сӥземын "Кылбур эскерон дыръя" но "Егит критиклы" серемес кылбуръёс, кудъёсаз "визьмо" критик егит гожъяськисьлы кылбурзэ эшшо но вакчиятыны косэ, тодытэк: соизлэн гожтэмез - кык чур гинэ; мукетаз, "марым" кыл сьӧры ватскыса но ас "марыменыз" сураськыса, критик аслэсьтыз куронъёссэ но валэктыны уг быгаты. Пумен-пумен Д. Яшин серекъян удысэ выжытэ "кышномурт - пиосмурт" кусыпъёсты но ("Улон - колёса...", "Огпол кильтрес нылмурт вераз мыным..."), кӧт тыронэз но ("Студентъёс колхозын", "Кин кызьы гожтысал"). Тани кызьы "мурдала" (визьмо) но "ӝуждала" (чебер) васькытэмын "музъем вылэ" "Огпол кильтрес нылмурт вераз мыным..." юморескаын: Огпол кильтрес нылмурт вераз мыным: -- Басьты монэ кышно: ӧвӧл на бер. Луоз, -- шуиз, -- вордскиз ке пиналмы, Тон кадь визьмо но мон кадь чебер. Но "визьмолыклэн" но "чеберлыклэн" артэ вуэмзы мукет герӟет но кылдытыны быгатэ, шуэ Яшинлэн героез: - Тонэ уг быгатӥськы басьтыны, - Лушкем гинэ солэн пеляз вази. - Вордскиз ик ке, луоз, дыр, пиналмы Ачим кадь шуш но тон кадь ик шузи. Озьыен, Яшин-юморист та но мукет кылбуръёсаз "вылэтӥ лобисько" кожасьёсты музъем вылысен кукъёстӥзы кырме но возьматэ, бурдъёсыныд тӧлвуко кадь гинэ уд шонаськиськы меда? Озьы ик "муре пыри" кожасьёсты сильсьӧртӥзы музъем вылэ ӝутэ но возьматэ, мурдалае чик но пырымтэ ай, пе, нош берпалыд воксё кыре мычиськемын кадь! Соин ик валамон, малы Д. Яшинлэн син шораз нырысь ик кылбурчиос мертчо, угось солэн юморез 1960-тӥ аръёсысь литератураын выль ӧръёсты утчанлы но вуж кабъёсты куашкатонлы сӥземын. Йылпумъяса тазьы вераны луоз. Д.А. Яшинлэн лирикаез тырмыт эскеремын ӧвӧл на. Туала выль амалъёсын гинэ ӧвӧл - тодмо луэм азьвылъёсыныз но. Нош поэт 1960- тӥ аръёсы "эстрада" лирикаысь выль "шыпыт" тулкым пала выж-герӟет лэсьтӥз, выль сямен малпаськись кылбурчиосты дасяз, вуж кабъёсъя ужасьёсты серекъян амалэн ӵушказ. М. Покчи-Петров бырем бере, удмурт кылбуретын кылдылӥз сыӵе дыр - сое али меӵак "Яшинлэн вакытэз" ниманы луэ ни кадь. Даниил Александрович аслыз дан понна ӧз уиськы, солы трос пол дуногес потэ вал вӧзаз мукетъёсызлэн ӝужамзы но азьлане мынэмзы. 1 Шор ёзо школа Р.И. Яшина, УдГУ-ысь доцент, наука удысысь сӥё-дано ужась. Зарни крезен жингыртӥз (Д.А. Майоровлэн кылбуръёсыз бордын 7-тӥ классын ужан) Д.А. Майоровлэн творчествоезлы одӥг час гинэ висъямын бере, соин ик та уроклы тужгес но ӟеч дасяськоно, нылпиосты чырмыт ужатоно. Урок азе таӵе ужпум пуктоно: тодматоно нылпиосты калык инструментъёсын, тужгес но крезен, эскероно Майоровлэсь "Зарни крезь", "Емышо сад" но "Мемиелы" кылбуръёссэ пуштроссы но чеберлыксы ласянь, "Зарни крезьзэ" ӟеч лыдӟыны (выразительно), текстсэ учкытэк вераны дышетсконо. Уроклы материал. 1) кылбурчилэн туспуктэмез; 2) крезь, кубыз но чипчирган инструментъёслэн тусбуйзы (крезь вань 9-тӥ класслы учебниклэн 2-тӥ бамаз; мукетъёссэ шедьтыны луоно "Удмуртская Република. Энциклопедия" книгаысь). 3) Майоровлэн кылбур сборникез но поэтлы сӥзем альбом-пособие. Уроклэн мынэмез. Урокын эпиграф чотын луыны быгатозы кылбуръёсысь ик чуръёс: 1. Мон турттӥсько котькинлэсь Секыт умзэс сайкатыны. 2. Кемалась лыктоно вылэм Та емышо садъёсы. 3. Дунне вылын Сеня кадьёс Туж уно ни быремын, Со понна со ӟеч нимъёс Ӧвӧл али вунэмын. Яке таӵе веранэз: "Историлэн пӧртэм вакытъёсаз калык аслэсьтыз трубадуръёссэ (крезьчиоссэ) будэтэ: соос ик калык мылкыдэз кырӟанъёсын возьмато". (В.Шекспир, англи драматург но поэт). Урок азе пуктэм ужпумъёсын тодматэм бере ик, нылпиосты лыдӟытоно учебникысь кылбурчилэсь биографизэ (33-34-тӥ б.), со тырмыт но усто сётэмын. Собере дышетӥсь юа пиналъёслэсь, кыӵе вашкала калык инструментъёсты соос тодо но кыӵеоссэ ас синмынызы адӟылӥзы, оло кудӥныз ке шудылӥзы но. Удмурт выжыосмылэн тужгес яратоно музыкальной инструментсы крезь вал. Тодмо луэ бадӟым крезь но пичи крезь. Пичи крезез нылпиос поннагес лэсьто вылэм (возьматэ 9-тӥ класслы учебникысь). Калык пӧлын крезен шудыны быгатӥсьёсты туж гажало вылэм, соосты крезьчи шуо вал. Удмурт мадь но даур кылъёсъя ортчем даурысь 20-тӥ аръёсы тодосчи-этнограф Михаил Григорьевич Худяков ӟуч кылын "Песнь об удмуртских батырах" эпос кылдытӥз. 2000- тӥ арын сое удмурт кылэ берыктӥз удмурт кылбурчи но тодосчи Василий Михайлович Ванюшев. Солэн кутсконаз ик тазьы гожтэмын. Вань калык татын шӧртчи, Пӧрмыто батыр ужъёс, Кырӟало данъян гуръёс Песятай мадёсазы. Пересьёс мадё татын Крезь шудэм-кырӟам улсын, Покчиос нош кылзӥсько, Визь кылъёссэс пыӵато, Вашкала батыръёс кадь Сэзь луыны дышетско. Озьыен, мадь но даур кылъёс (легендаос но преданиос) кылдылӥзы "крезь шудэм- кырӟам улсын". Крезьчиос вазен журналистъёс (ивор вӧлмытӥсьёс) но, кылбуранъёс кылдытӥсьёс но, (музыка) крезьгур кылдытӥсьёс но вылӥллям. Соин ик соос даноесь вал. Крезь сяна, тодмо вылӥллям чипчирган, шулан, узьыгумы, кубыз, тачыртон (тыкыртон) но мукет инструментъёс. Куд-огаз соос оркестрен шудыны тупало вылэм (тукыртон, шулан, пуньыос но туй заслонкаос), нош крезен, чипчирганэн но кубызэн нимаз но шудыны луэ вылэм. Малэсь но кызьы лэсьтылӥллям крезез? Та сярысь вера калыклэн дауркылыз. Тани со: "Одӥг вырйыло интыын нюлэс дурын ик будэм Мудор Кыз - Инмарен пусъем писпу. Туж пазьырес, веськрес, шонер вылэм но кема улэм со, та котырысь удмурт калыкез шумпоттытыса, угось та кыз улын одӥгез удмурт выжы Инмарлы вӧсяськылэм, отын ик курбон, йыр-пыд сётон ортчытылэм. Соин ик кызэз но Мудор Кыз шуиллям, со угось юрттылэм аслаз йылсо луэменыз асэныз Инмарен кусып возьыны. Дыр ортчыса, Инмарлэн ужась, тыршись удмуртлы ӟеч уж лэсьтэмез потэм но, со Кызэз ӵашъем. Адямилы верам: "Лэсьты талэсь Крезь - чебер жингыртоз". Воргорон кызэз выжыетӥз ик вандэм но, кӧня ке куасьтыса, солэсь Крезь лэсьтэм. Усто пӧрмем крезез, шудыны но со быгатэ вылэм. Бератаз крезь шудэмъя кырӟало- верало, экто-шулдыръясько вылэм. Тӥни со дырысен Крезез ӵашъем Кызлэсь гинэ лэсьтыны кутскиллям". (Д.А. Яшинэн фольклор эспедициын дыръяз 1983 арын гожтэмез). Дышетӥсь шедьтэ ке, кылзытэ крезен шудэмез пленка вылысь. Трос концертъёс возьматъя али Воткинскысь удмурт калык инструментъёсын шудонъя нылпи оркестр, озьы ик Ижевскысь искусствоосъя школаысь дышетӥсь Кунгуров. Солэн ик кивалтэмъяз усточиос выльысь калык инструментъёсты лэсьтыны кутскизы. Вазен крезь шудэмъя верало-кырӟало вылэм дауркылъёсты но мадьёсты, кырӟанъёсты. Соя ик выль гуръёс кылдыто вылэм. Озьыен, крезен шудӥсь-крезьчи тужгес гажано, дано адями вал калык пӧлын. Соин ик Даниил Майоров аслэсьтыз лирической геройзэ (ассэ но шуыны луоз) крезьчи карем но солэн нимыныз вань калыклы вазиськем. Табере рос-прос (выразительно) лыдӟом "Зарни крезь" кылбурзэ (лыдӟе ачиз яке усто лыдӟыны быгатӥсь дышетскись) 35-тӥ бамысь. Собере учебниклэн 36-тӥ бамысьтыз юанъёслы вератоно, со сяна, таӵе юанъёс пуктоно на: 1) Кыӵе чеберлыко образъёс но детальёс пыр адӟытэмын крезьчилэн крестьян пиос пӧлысь луэмез? (Кынмем, измем сюлэм; йӧлвыл). Озьыен, йӧлвыл - со татын ваньзэ умойзэ, ӟечсэ, ваньбурлыксэ возьматӥсь образ. 2) Кыӵе мылкыд нырысь интые поттэмын? (Яратон). Угось яратон ваньзэ ӟечсэ пуромытӥсь мылкыд. Сое кынмем, измем сюлэмъёслы, начар калыклы нуыны косэ крезьчи - лирической герой. Удмурт крестьян калыклэн куанер, курадӟыса улэмез сярысь гожъязы тодмо ӟуч писательёс но. Кылсярысь, М.Е. Салтыков-Щедрин гожъяз: "Бедная эта сторона, бедный это народ, но его надо любить". Сюлэмъёсты шунтон - со кылбурчилэн но валтӥсь ужез. Та ужпумлы вань кужымез сётыны ӧте Д.Майоров "Зарни крезь" кылбураз, кудзэ вань творчествоысьтыз программной кылбур шуыны луэ. Отын адӟытэмын кылбуран кредо (улонлэн валтӥсь ужпумъёсыз, творчестволэн куронъёсыз). ??... шудо улон понназ уг лыкты, со понна юн тыршыса ужано, нюръяськоно. Калыкмы вашкалаысен ик ӟеч вала вал: ужатэк номыр но понназ уг вуы, мурт чотын улонэз со сьӧлыкен лыдъяз, ачиз угось пачкатэмын вал эксэй империен. Октябрь революция бере дэмен ужан (коллективной труд) идея уката пуромытэмын вал. Дэмен, тыршыса ужанлы сӥзем Майоров "Емышо сад" кылбурзэ но. Таиз но гожтэмын калыклы вазиськон (воззвание) амалэн. Нош ик лыдӟо но пиналъёс верало, валэктон сёто учебникысь юанъёслы. Ватсаны луоно на таӵеоссэ: 1. Малы та кылбурын трос кутэмын глаголъёслэн ортчем дыр формаоссы? Шедьтэ соосты но вералэ, кыӵе чуръёсын соос кутэмын, маин герӟамын? 2. Кыӵе чур возьматэ кылбурлэсь валтӥсь идеязэ? (Емышез будэтоно вылэм дышетскемен, тыршемен). 3. Вуж куштӥськем но выль пушйись садъёсты ваче пумит пуктыса, мае вера автор? Кызьы нимаське та выллем чеберлыко (художественной) амал? (Антитеза - пӧртэм арбериосты, учыръёсты но мылкыдъёсты ваче пумит пуктыса веран; латин кылын анти - пумит, тезис - положение, умозаключение шуэмъёсты возьмато). Дышетӥсь. Даниил Афиногенович умой вала вал, улонысь умой пала воштӥськонъёс понназы гинэ уг вуо шуыса. Ӟеч улон понна нюръяськоно, нош нюръяськонын бадӟымесь ыштонъёс но луо. Майоровлэн огез агаез И мировой война дыръя быриз, кык мукетъёсыз - граждан ожын. Тужгес кайгыриз поэт, ӵошгес будэм агаез Сеня бырем бере. Та пумысен со лӥятӥсь кылъёсын вазиськиз анаезлы "Мемиелы" кылбураз. Сое лыдӟемлэсь азьло куд-ог тодмотэм кылъёсын тодматском, соос валэктэмын учебниклэн 37-тӥ бамаз гож улын, табере лыдӟом кылбурзэ. Кылбуръя юанъёс: 1. Мая валаны луэ, Сеня гордъёс палан (совето власть понна) нюръяськыса быриз шуыса? 2. Огназы кылем анайёслы юрттэт сётонэз ма пыр возьматэ кылбурчи? 3. Тӥ сямен, мар умойзэ, ӟечсэ сётӥз революция но граждан ож ужась калыклы, тужгес ик ӧжыт лыдо калыкъёслы? (Нырысьсэ кунлык соос басьтӥзы, огкадь правоё луон сярысь законъёс кутэмын вал, дун тырытэк дышетскыны, эшъяськыны быгатӥзы, вордскем кылэз но культураез азинтыны сюресъёс усьтӥськизы). Дыр кыле ке, кӧня ке дышетскисьёс кылбуръёсты шара лыдӟо на, калык инструментъёсты тодазы ваё. Доразы уж: умой тодоно Майоровлэсь биографизэ но учкытэк вераны вылысь дышетоно "Зарни крезь" кылбурзэ. Кыкетӥ урокын эскероно "Кылбур сярысь" темаез но таин валче эскероно куиньна кылбуръёслэсь метриказэс, размерзэс но рифмаоссэ, нялтас кылбуръёслэсь композицизэс (радъяськемзэс), быдэстоно учебникын сётэм юанъёсты но ужъёсты, дыр кылиз ке, Майоровлэсь куд-ог мукет кылбуръёссэ но лыдӟоно на ("Зарни крезь" сборникысь). Кылбур сярысь валэктонъёс валамон но тырмыт сётэмын учебникын но А.Ермолаевлэн "Поэзиен тодматскон" книгаяз. 1 ШЫКЫС Апрель 2001 Чеберлыко литература Ившин В. Н. Узел голосов: Стихи / Перевод с удм. В. И. Емельянова. - Ижевск: Удмуртия, 2001. - 232 с. В. Н. Ившин - 7 кылбур сборникъёслэн авторзы, тодмо луэ шаермылэн палэназ но. Кылбуръёсыз берыктэмын чуваш, мордва, бигер, эстон, пор, башкир кылъёсы. Солэсь кылбуръёссэ пӧртэм дыре берыктӥзы О. Поскрёбышев, Г. Иванцов, Г. Пагирев, Л. Одинцова, Т. Литвинова, А. Князев, И. Мазнина. Авторлэн В. Емельяновен берыктэм кылбуръёсыз нырысьсэ печатламын вал "Комсомолец Удмуртии" газетын 1978-тӥ арын. Ӟуч кылбурчи уно пол берытскылиз на В. Ившинлэн творчествоез доры. Озьыен, кылбурчилэн нырысетӥез ӟуч кылын книгаез луэ кык авторъёслэн кема аръёс ӵоже ӵош ужамзылы дунъет сётись мертэт, кык пӧртэм чеберлыко дуннеослэсь огкадь луэмзэс возьматӥсь герд. Кузебай Герд. Люкам сочинениос. Куать томен. 1-ти том: Кылбуръёс, поэмаос / Люказ, азькыл гожтиз но валэктонъёс сётиз Ф. К. Ермаков. - Ижевск: Удмуртия, 2001. - 352 с. Бичетлэн нырысетӥ томаз пыризы "Крезьчи" (1922), "Сяськаяськись музъем" (1927), "Лёгетъёс" (1931) книгаосы пырем кылбуръёс но поэмаос. Выль книгалэн азькылаз Ф. К. Ермаков, кема аръёс чоже Гердлэсь творчествозэ эскерись тодосчи, вера Кузебай Гердлэн улэмез но солэн ужъёсыз сярысь. Чернов В. Приёмыш: Повесть, очерки / Обществ. об-ние Лит. фонда России. - Ижевск, 2001. - 55 с. Тодмо журналистлэн, шаерысьтымы уно газет но журналпоттонниосын кема аръёс ӵоже ужам адямилэн, ужысь ветеранлэн В. В. Черновлэн та нырысетӥез книгаез луэ. Татчы пырем "Приёмыш" повестьлэн люкетъёсыз печатласькизы вал ини "Кенеш" журналлэн бамъёсаз. Авторлэн тросэз веросъёсыз сӥземын Быдзым Отечественной война вакытысь улонэз возьматонлы. Литературатодон Мерзлякова Н. И. Древнерусская литература в схемах и таблицах: Справочно- дидактическое пособие. - Ижевск: Издат. дом "Удм. ун-т", 1999. - 113 с. Книгае пыремын вашкала ӟуч литературая тодон-валан басьтыны юрттӥсь, выль темаосты юнматон вылысь быръем таблицаос но ужъёс. Книгаез уже кутыны быгатозы кылъя но литературая дышетӥсьёс, дышетскисьёс, студентъёс. Кылтодон Воронцова Т. А., Фрум О. А., Чиркова Н. И. Сто предложений для синтаксического разбора. - Ижевск: Издат. дом "Удм. ун-т", 2000. - 132 с. Сложной предложениосты эскерон - кылъя урокъёсын одӥгез секыт уж. Со пыртэмын абитуриентъёслэн билетъёсазы, дышетскисьёслы государственной экзаменъёсты сётись студентъёслэн юанъёсызъя. Та книга усто юрттэт луоз дышетӥсьёслы, дышетскисьёслы но, озьы ик студентъёслы но. Кельмаков В. К. Удмуртское языкознание: Зарождение. Этапы истории. Современное состояние: Препринт / Удм. гос. ун-т. Каф. общ. и фин.-уг. языкозн. - Ижевск: Издат. дом "Удм. ун-т", 2001. - 140 с. Та уж сӥземын нырысетӥ удмурт грамматикаллэн потон 225 ар тырмонэзлы. Книгаын чакламын удмурт кылтодонлэн кылдэмез дырысен азинскон сюресэз, возьматэмын удмурт кылтодон удысысь туннэ нуналлы ужпумъёс, эскеронэз кулэ карись юанъёс. Книга юрттэт луоз тодосчиослы, дышетӥсьёслы, студентъёслы. Педагогика Мальцева Э. Л. , Костина Н. М. Педагогика детского движения. - Ижевск: Издат. дом "Удм. ун-т", 2000. - 516 с. Нылпи огазеяськонъёслэн кылдон историзы, солы дунъет сётон, портэм сямен валэктон, огазеяськонлэсь кулэ луэмзэ, солэсь ужан радзэ радъянын инъет луись юанъёсты эскере та книга. Со кулэ луоз нылпиосын ужасьёслы: вожатойёслы, дышетисьёслы, кивалтисьёслы, анай-атайёслы, социальной психология удысын ужась тодосчиослы. Кунсьӧр кылъёсты дышетон Булдаков В. А. Тетрадь упражнений по немецкой грамматике. В 2 ч. - Ижевск: Издат. дом "Удм. ун-т", 2001. Ч.1. Морфология. - 41 с. Ч.2. Синтаксис. - 35 с. Немец кылъя ужан тетрадьын сётэмын тодон-валанэз юнматон ужъёс. Соя тодон- валанзэс муромытыны быгатозы бадӟым классъёсын дышетскисьёс но студентъёс. Гельберг С. Я. Курс истории английского языка. - Ч. 1. - Ижевск: Издат. дом "Удм. ун-т", 2001. - 212 с. Книгае люкамын англи кыллэн историезъя лекциос. Кыкети люкетаз радъямын шер пумиськись вашкала англи кылын текстъёс, вакчияк хрестоматия, тодон-валанэз радъяны юрттӥсь ужъёс, глоссарий. Книга юрттоз та удысъя дышетскисьёслы, дышетӥсьёслы. Этнография Косарева И. А. Традиционная одежда периферийных групп удмуртов (косинской, слободской, кукморской, шошминской, закамской) в конце ЪИЪ - начале ЪЪ в.: Монография. - Ижевск: УИИЯЛ УрО РАН, 2000. - 228 с., карты. Та ужын нырысьсэ возьматэмын палэнын улӥсь удмуртъёслэн ог-огзылэсь портэм луэмзы, эскеремын соослэн ӥсьсы, чеберъяськон амалъёссы. Книга узыр луэ туспуктэмъёсын, палэнысь удмуртъёслэсь улон интызэс возьматӥсь картаосын. Лидия ЧЕРНОВА Тулыслэн тодметъёсыз 1. Тӧл небыт-небыт ыртэ, Шӧдӥське: тулыс дыртэ. *** 2. Сьӧд куакаос вуизы: Тол сюресэз сьӧдмазы. *** 3. Ӟузыри шарак потэ: Ой, ӵуж шунды бичатэ! *** 4. Садамы шултӥз крезьчи. Нимыз солэн. . . сьӧд шырчик. 5. Пучы мозмиз тэбетысь; Серектӥз кытысь-марысь. *** 6. Бамалэ улӟем кечсин, Соин шудэ шунды си. 7. Шундыед зол-зол ужа, Син куспын лымы ӵыжа. *** 8. Тюрагай - бусы кузё - Марӟан крезьзэ, уть, кизе. *** 9. Нюртака но ӟукыртэ: Тулысэз данъян дыртэ. Нюр палан ӝакы кызэ, Юз вуэз, луоз, ӟузем. 10. Эх! Тулыс вуиз, тулыс! Луд кечлы - жалем колыс! Мадиськонъёс Кин ай сайка Югаку, Кызэз кока: - Тук-тук - тук! Сайкатэ ваньзэ, - Уг изь. Писпуэз эмъясь со. . . (сизь). Лумбыт-лумбыт Тэтчасько Турын-куар пӧлын. Ӟечырасько, Шудӥсько Ӟикыртӥсь скрипкаеным, Кин-о мон? Тодскоз луоз. . . Мон вож . . . (ӟоз). Мугорыз быдэс-быдэс Йылсо венё, ӵогырес. Бугор шуса эн кутэ! Кин-о со? Тодӥд отэ?.. (ӵушъял). У-у-у!!! - кин ке вузэ. Мон дэйми, дэйми кабзэ. Сьӧсь. Утча, шуо, сиён. Тодӥд луоз?.. Со - (кион). Инметӥ лоба "сяська" - Кубиста вылэ васька. (бубыли). Улӥсько сикын, Эркын. Кӧласько тыпы Гыркын. Монэ тол уг курдаты, Сиёнтэк уг шымырты. Мон уго туж сюлмаськись. Гужембыт тырши, Ӧй изь. (коньы). Кин меда лушкем-лушкем Ӵӧж гид котыр котырскем? Пытьызэ но, зэм ук, зэм, Кузь быжыныз со ӵужем, (ӟичы). Ӵыжало, воже уг пот - Тэтчало капчи: Оп - оп!.. "Гол!" - кесько ке, лӧптӥсько. Тон но монэн шудӥськод. (туп). Нюр вылэ толон васькам, Ӵыжыт весь кин ке кисьмам. Одӥгзэ понӥ ымам - Позырскиз бамы мынам. Та "весь" вылэм. . . (нюрмульы). Кечырскиз кенер кузя, Емышез вал йыр быдӟа. . . (тыква). Котькин но ветлэ азьлань. Мон гинэ ялан берлань. . . (рак). Вожъяськи - Лёни, малы тон педло Гольык пыд потад? Ачид быдӟа ук, толон Юг-юг пужмераз. - Син шорам эктӥсь ӟазег Ӵапак учыраз. Вожъяськи солы зэмзэ, Учкыса шораз. Ӟазеглы но, мон сямен ик, Туж, дыр, шумпотӥз - Со но бен кема, кема ик Сулепын эктӥз. 1 Люкина Н.М.,Глазов пединститутысь удмурт филология кафедраысь дышетӥсь. Кыл волятонын орфоэпилэн кулэлыкез Пиналъёслэсь кылзэс волятон - одӥгез кулэ луись ужпум. Нуналысь нуналэ тыршоно соослэсь вераськон кылзэс узырмытыны, волятыны, малпанзэс радызъя но шонер вераны мед быгатозы шуыса.Пусъеме потэ: та выллем темалы сӥзем материалъёс вал ини "Вордскем кыл" журналын М.Р. Сельченковалэн (1992 � 1), М.Р. Фёдоровалэн (1990 � 1) ужъёсазы. Огъя учконо ке, школаосын, мынам малпамея, устной литературной вераськонлы саклык тырмыт уг висъяськы на. Сое шӧдыны луэ Глазкарысь пединститутын дышетскись удмурт студентъёслэн вераськемысьтызы но. Литературной кылын чебер, вольыт вераськыны уг быгато. Соос пӧлысь тросэз ӟучомемын. Та ласянь уйпал ёросъёсын ужась дышетӥсьёслы секыт усе. Пединститутэ дышетскыны пырем студентлэн вераськон кыллэсь нормаоссэ чакламез уг шӧдӥськы. Занятиосын асьсэ пал манерен верасько. Соин ик сюлмаськиськомы нырысетӥ курсысен ик литературной кылын вераськыны мед тыршозы. Удмурт кыллэн литературной нормаосыныз нимысьтыз пособиос ӧвӧл ке но, пиналъёсты куараосты шонер вераны дышетыны кулэ. Соин ик кыл волятонын орфоэпия нимысьтыз инты басьтэ. Куараосты шонер но чылкыт вераны дышето пичи классъёсын ик, пӧртэм артикуляционной гимнастикаос ортчытъяса. Котькуд удмурт фонемаез веран понна, тодыны кулэ буквалэсь значенизэ. Соин ик, орфоэпической ужъёсты ортчытъяны кулэ бадӟым классъёсын но. Орфоэпия эскере куараослэсь вераськонын воштӥськемзэс, валэктэ кызьы соосты вераны кулэ литературной кылын. Фонетической законъёс вылэ пыкиськыса, нимысьтыз правилоос кылдытэ. Удмурт кылын чылкыт но вольыт веран - вордскем кылынызы вераськисьёслы чурыт курон луыны кулэ. Арысь аре тодон-валанзэс будэтыса, пиналъёс литературной кылын вераськыны, анай кылмылэсь чеберлыксэ но аспӧртэмлыксэ валаны кутско. Уйпал ёросысь удмурт пиналъёс тросэз ӟучомемын бере, соос рос-прос асьсэ кылын вераськыны уг быгато. Ӟуч шӧмын вераськонлэн бервылэз ик герӟаськемын луоз кылсярысь порядковой числительнойёсты веран но: витетӥ интые верало витет'ӥ (точкаен ӥ азьын согласноез небыт веран). Орфоэпия но орфография куспазы юн герӟаськемын. Мукет сямен вераса, удмурт кылын куараосты шонер веран куронъёс гожъяськон правилооос бордысь пото. Но мынам чакламея, порядковой числительнойёсты шонер гожъяло, правилооосты тодо, нош чылкыт, вольыт вераны уг быгато. Та выллем янгышъёсты палэнтон вылысь пиналъёслэсь вераськемзэс чакланы кулэ. Со понна кылъёсты урокысь уроке тодэ ваёно, соосты шонер но шара верано. Озьы ик вераськон (речевой) аппаратэз но волятыны кулэ, ӟуч вераськон шӧм (акцент) медаз шӧдӥськы шуыса. Анай кылыныд пӧртэм ужъёс лэсьтоно, кылсярысь шуг кылъёсты, кыл тэчетъёсты, веранъёсты но предложениосты шара веран, кылъёсын ударениоссэ шонер пуктон но мукет амалъёс. Мон сямен, ӟуч кылын ик герӟаськемын, дыр, ӧ куараез э гласноен суран. Диалектологиын тае диалектной аспӧртэмлык шуыса эскериськом. Куара шуккиськон (акустика) ласянь учконо ке, ӧ матын луэ ӟуч кылысь кыллэн кутсконаз сылӥсь э - лы (эхо, этот) но ӧ фонемаез вераку, ымез паськыт устӥськом, ӧжытак ымдуръем луэмез шӧдӥське, кыл берлань кыскемын. Пумисько таӵе умойтэм веранъёс эй,ӧй, лэсйас'кэ, лӧсйас'кэ, кэн'а, кӧн'а. Орфографиын но таӵе ик янгыш пумиське. Кылэз волятон бордын ужаку, лыдэ басьтыны кулэ ударениез но. Татын тужгес но шӧдӥсько диалектной веранъёс, уг чакласькы литературной кылын куараосты чылкыт но шонер веран. Удмурт кылын ударение усе берпуметӥ слоге (фиксированной) но вань куд-ог учыръёс, кытын ударение берпум слог вылэ уг усьы. Тросэз соос диалектной аспӧртэмлык луыса кутӥсько ке но, асьмеос пиналъёсты литературной нормаосъя вераны дышетыны кулэ: кылсярысь, вераломы интые вераломы, витети интые витети. Дышетскисьёс куспазы пӧртэм сямен верасько ке но, урокъёсын занятиосын шонер мед вераськозы шуыса тыршоно. Литературной кылын вераськыны дышетӥськом бере, ударениез шонер пуктыны мед тодозы. Кызьы пусйимы вал ини, удмурт кылын куараосты шонер веран нормаос пото орфографической куронъёс пото орфографической куронъёс бордысь. Шонер гожъяськыны быгатӥськод ке, соосты озьы ик гожтод но. Кылэз орфоэпилэн нормаосызъя веран понна, дышетскисьёслы шонер орфограмма бырйыны кулэ. Та учыре кыл волятонын нимысьтыз шуг-секытъёс уг кылдо. Но вань на куараосты веран сыӵе нормаос, кудъёсыз гожъяськон правилоен уг тупало. Со, кылсярысь, герӟаськемын регрессивной ассимиляцилэн (азьпалан сылӥсь согласной куара бӧрсяз сылӥсезъя тупастке: н согласноез ӟ,ч аффрикатаос азьын небыт вераськомы, нош гожтыкумы небыт луэмзэ ум возьматӥське. Ӟ,ч небытэсь бере, соос асьсэя тупато азьпалаз сылӥсь н согласноез но. Кенӟали (кен'ӟали), мунчо (мун'чо) но мукет. Озьы ик небыт вераськомы ӟ, ч азьын сылӥсь д,т согласнойёсты но: быдӟым (быд'ӟым) яке быдӟым , кутчаны (кут'чаны) яке (кугганы). Занятиосын кыл волятон ужъёс ортчытыку, та учыръёсты лыдэ басьтыны кулэ, малы ке шуоно, дышетскисьёс пӧлын вылӥ верам согласнойёсты чурыт верасьёс пумиськыло. Со озьы ик орфоэпической янгыш луэ. Соин ик ваньзэ сое пиналъёслы валэктоно. Соку гинэ соос шонер но вольыт вераськыны быгатозы, валалозы удмурт кылмылэсь чеберзэ, жингрес но лэчыт луэмзэ. 1 Историысь чуръёс Ирина Останина, Ижысь 5 номеро школаысь 10-тӥ классын дышетскись. Нылкышно гимназия (Шаертодонъя олимпиадае вуэм ужъёс пӧлысь одӥгез) Ог дасо ар талэсь азьло Ижын выль дышетскон интыос, гимназиос но лицейёс усьтӥськизы. Калыкын вунэтэм кылъёс выльысь улӟизы. Угось кызетӥ даурлэн кутсконаз но гимназиос Ижын вал ни. 1907-тӥ арын 9-тӥ гудырикошконэ Иж заводысь активистъёс Нагорной но Заречной волостьёсын улӥсь калыкез ӧтчаме люказы. Вераськон мынӥз нылкышноос пӧлын дышетон удысэз радъян сярысь. Татын ик кылдытӥзы комитет. Со гимназия пумысен вань ужпумъёсты сэрттыны-пертчыны кулэ вал. Гимназиез кылдытонэ мылысь-кыдысь пыриськизы но коньдонэн юрттӥзы Ижысь вузчи (купец) Иван Бодалев, фабрика возисьлэн кузпалыз Анна Петрова, А.Дерябинлы памятникез кылдытӥсь И.Н. Ситников но мукетъёсыз. Нырысь гимназия возиськиз пичигес из юртын (али со ӧвӧл ни). Бератаз, рабочийёс юрттэмен, луонлык кылдӥз нимысьтыз бадӟым юрт ӝутыны. 1910-1911 аре прогимназия пӧрмытэмын вал нылкышно гимназилы. Эксэй правительство сое возьыны араз 250 манет висъялляз. Гимназие 8- 12 аресъем нылъёсты кутылӥзы. Соослы одно ик чача висёнлы пумит прививка пуктэмын луыны кулэ вал. Ӵошатон понна: туала нылпиослы школае мынон азязы пукто БЦЖ, АДСМ (дифтерилэсь), 2 прививка гордаклэсь (корь), паротитлэсь, полиомиелитлэсь. Гимназиысь нылъёс пеймыт-лыз дэрем нуллӥзы, вылазы - сьӧд айшет, праздник нуналъёсы - тӧдьы айшет. 1907-тӥ арын 11-тӥ шуркынмонэ гимназиез усьтонлы сӥзем праздник ортчиз. 6 часын ӝытазе кутскиз шулдыръяськон: кырӟан-веранъёс, шудонъёс, эктонъёс. Гимназилэн юртэз чеберъямын ньылпу вайёсын, флагъёсын. Сое вӧсяло Александро-Невской соборысь, Покров но Ильинск черкъёсысь ваем мудоръёсын. Бератаз нылпиосты куноято булкаосын, чаен. Гимназия борды юнматэмын вал попечительской совет но анай-атайёслэн комитетсы. Гимназиын дышетскисьёс пӧлысь ог 25 процентэз начар семьяосысь вал. Соин ик вылӥ верам огазеяськонъёс таӵе нылъёслы дышетскон дунэз пичиятылӥзы но мукет капчиятон амалъёс тупатъяллязы. 1908-тӥ арын гимназиын дышетскизы крестьян, мещан, дворян, черк котырын ужась семьяосысь 145 нылъёс. Арысь аре дышетскисьёслэн лыдзы йылылӥз, ваньмыз сямен нылъёс православной вӧсь осконэн герӟаськемын вал. Гимназиын таӵе предметъёсъя дышетскизы: закон божий, математика, ӟуч кыл, география, история, естествознание, чистописание, киужъёсъя. Гимназилэн тужгес но син шоры йӧтымон тодметэз - дышетскись нылъёс азе тупатэм юн куронъёс. Урокъёс кутскылӥзы молитва бордысен. Нылъёс кыл вератэк кылзӥськыны кулэ вал дышетӥсьёссылэсь, кивалтӥсьёссылэсь. Нылъёсты ӧз лэзьылэ ӝытъёсы 10 час бере юмшаны, концертъёсы, балъёсы ветлыны. Гимназиын ортчылӥзы литературалы сӥзем ӝытъёс (одӥгез сыӵеез Н.В. Гоголез буре вайыса ортчиз 1909-тӥ арын оштолэзе). Дышетскисьёс Сарапулэ, Казане, Москвае экскурсиосы ветлылӥзы. 1913-тӥ арын Нагорной волостьысь Бодалевский переулокын гимназилэн эшшо одӥг дышетскон юртэз усьтӥськиз. 1911 -тӥ арысен гимназиын 7 классъем программая ужаны кутскизы. Эшшо ар ортчыса ватсаськиз на 8-тӥез класс. Таяз дышетӥзы ни педагогикаез, дидактикаез. Гимназиын куд-ог предметъёсты дышетытэк но луэ вал, кылсярысь, француз но немец кылъёсты, суредаськонлы, педагогикая. Ижысь нылкышно гимназия 10 ар ӵоже вить выпуск лэсьтӥз. Педагогикая классэз медальёсын йылпумъямъёс домашней шуон наставницаос луизы, мукетъёсыз - дышетӥсьёс. 7 классэз быдтэмъёслы луонлык сётӥськиз школаосын ужаны. 1917-1918 аръёсы гимназиын 17 класс вал, 634 адями дышетскиз. Со пӧлысь, эмъясьёслэн чаклам-верамзыя, 102-ез ляб адӟисьёс, 41-ез - кырыжам сюрлыен, 198- эз - йыр висёнэн курадӟисьёс но мукет. 1918-тӥ арын толсуре нылкышно гимназиез пӧрмытӥзы 1-тӥ но 2-т ступенен совето школалы. Нылъёс сяна, татын дышетскизы ни пиос но. 45 минутъем урокъёс кык сменаен мынӥзы. Дышетскылӥзы 5 час ӝытозь, пеймыт луытозь (классъёсын тыл соку ӧй вал). Гимназилэн одӥгаз юртаз (али Свердлов ульчаысь 28 номеро юрт) граждан ож бере интыяськылӥзы рабфак, педтехникум, госпиталь, дышетӥсьёслэсь тодон-валанзэс будэтонъя институт. Мукетаз, кык этажо из юртын (али Свердлов ульчаысь 30 номеро юрт), 1917-1919-тӥ аръёсы ортчылӥзы выль улонэз радъянэн герӟаськем митингъёс. Отын вераськылӥзы И.Д. Пастухов, В.А. Азин но мукет тодмо адямиос. 1933-1935-тӥ аръёсы та юртэз кык этажозь йылтӥзы. Отын ужаны кутскиз Гурт ужъёсъя вылӥ коммунистической школа. Война аръёсы та юртэ интыяськылӥз Москваысь Бауман нимо институт. 1 Шор ёзо школаын В.Н. Орлова, Ижкарысь 31 номеро школаысь дышетӥсь. Шумпотыса верано, республмикаямы удмурт кылэз дышетон арысь аре паськыта шуыса. Ижкарысь та ужрад дас ар кыстӥське ини. Покчи нылпиос вордскем кылзэс А.Н. Журавлевалэн "Анай кыл" книгаезъя дышето, та учебниклы гожтэмын методической пособие но. Секытгес учыр шор ёзо классъёсын кылдэмын: ӧвӧл ӟучомем нылпиослы дасям учебникъёс, наглядно-дидактической материал. Тае лыдэ басьтыса дэмласько 5 класслы удмурт литературая календарно-тематической планирование, кудӥзъя уже кутыны луоз 4-тӥ класслэсь "Лыдӟон книга" учебниксэ (авторъёсыз Р.Ф. Березин но В.Г. Широбоков. Ижевск, 1994). Учебной планъя сётэм 4 час пӧлысь 3 чассэ удмурт граммматикалы висъяны дэмласько, нош одӥг чассэ - лыдӟон уроклы. 5-тӥ классын "Анай кылъя" ужась дышетӥсьёслы календарно-тематической планирование 1 колонка � п/п 1. 2. 3. 3. 5. 6. 7. 8. 9. 10. 11. 12. 13. 14. 15. 16. 17. 18. 19. 20. 21. 22. 23. 2 колонка Уроклэн темаез Ф.Васильев. Сыӵе ини мынам вордскем палы. Ф.Васильев. "Зарни сӥзьыл" Е.Загребин. Луд кеч. К.Герд. Кучапи. Выжыкылъёс. Эшъёс. Азьтэм адями. Ыргон коньдон. Огъясь урок. В.Широбоков. Мар самой ческыт? А.Вотяков. Лымы вера. К.Герд. Тол бабай. Е.Загребин. Кин ортчем пал куасэн? Изложение гожтон. Эшъёсмылы салам. А.Вотяков. Онтон Коли янгышаз. Огъясь урок. Калык кылос. Удмурт калык кырӟан. Лымы тӧдьы. Укно но шоръёсад. (Та урокез умой луоз ортчытыны крезьгуръя дышетӥсен ӵош). Визькылъёс но лэчыт веранъёс. Выжыкыл. Ачиз ветлӥсь кут. Адямиен алангасар. Огъясь урок. Тулыслы сӥзем кылбуръёс. (Д.Яшин. Тулыс; Ф.Пукроков. Кечсин; Широбоков. Италмас; Леконцев. Льӧмпу). А.Клабуков. Тю-тю Макси. Огъясь урок. 3 колонка. Час. 1 ч. 1 ч. 4 ч. 1 ч. 2 ч. 2 ч. 1 ч. 1 ч. 1 ч. 1 ч. 1 ч. 1ч. 1 ч. 3 ч. 2 ч. 1 ч. 1 ч. 2 ч. 1 ч. 4 колонка Ӝутоно ужпум. Вордскем шаермес дунъяны но гажаны дышетон. Луд кеч сярысь тодонъёссэс муромытон но паськытатон. Гурт пудо-животъёсты гажан мылкыд пыӵатон. Одӥгез ваньмыз понна, ваньмыз одӥгез понна. Та веранлэсь пуштроссэ усьтон. Ужаса поттэм ваньбурез дунъяны дышетон. Ортчем темаосъя пиналъёслэсь тодон-валанзэс юнматон но паськытатон. Нянь зарнилэсь но дуно" шуэмез валатон. Тол куазьлэсь чебер суредъёссэ шӧдыны дышетон. Улонлэсь вормонтэм кужымзэ валаны дышетон. Вадлэн сямъёсыныз тодматскон. Бурдо эшъёсмы сярысь сюлмаськыны дышетон. Огкылысь тупаса улыны дышетон. Лыдӟем произведениосъя толлэсь чеберлыксэ валан. Кырӟанлэсь улонын кулэлыксэ возьматон. Калык кылослэн пичи жанръёсыныз тодматон. Выжыкыл сярысь валатон. Калыклэн вашкала дырысен улонзэ капчиятон сярысь вераськон. - " - Калык кылосэ пырись текстъёсъя тодон-валанзэс муромытон но паськытатон. Тулыс куазьлэн чебереныз тодматон. Оскем ужез тыршыса лэсьтыны дышетоно. Ар куспын лыдӟем произведениосъя дышетскисьёслэсь тодон-валанзэс радъян. 5 колонка. Словарной кылъёс но кыл сочетаниос. Оскымтэдэс, уд оскиськы, эскерыны Чик жалятэк, синмаськыса уг ӵыдо Веттаськыса ворекъясь сӥям кугӟам лушкем мылпотытэк пыӵатӥллям шыпыртыса Уиськемед кутыны турттэмед сямъёсыз кык пумо вылтуссы урдэсъёсыз кӧтул ар воштӥськемъя кечат-вамат гань-гань улон ассэ ачиз утемез осконтэм ӵаштыртэмез сӥзьыл вордӥськемъёсыз гужемалаосыз ваемаз нонтэ нодтэм. Куды кутыса сюмыз шуг луыса синтэм визьтэммон тышкаське куӵориё чум азь чакланы аиз серметамын жобаны нюлышъяны Вазен медъяло гуждор куар бычырамон огыр-бугыр кыре-буре сэмберъясько лекасько кычомозы йылӥллям ас эрказы синйылтэм амалтыны артэ кайпалскем вугалмем гизьыр сыске тырмостэм кӧбер юлтош (1-тӥ выжыкылъя) кылтыртыса учыртэм ури-бери (2-тӥ выжыкылъя). Берытскем кузпалъяськиллям иськавын эркияса ву табанен шыкыс пал кыл культо куро тузонӟем ӝик-ӝик утялтэм сыномем нунал лумбыт Арлыдын Векчи ёзвие юр пу чатырске нырпыръем зыбекъя мушкась ёрмиз кыла-бура исаны дауртэ тэшкыльтэ йырдэ тӥя сирестӥз 2 урокъя умортоос кушын нап кырымпыдэс вожъяське тэргаськод дырдыетӥ чипсон бусасько ӝожомем серем викышъя буйга кечат 3 урокъя ӝожон урттылӥськись пӧям викышъяны синкашъёсыныз токма акшан гаӵоло легыриё ырос таманлы кабе пужнӥське буро веттаськыса люкиськонтэм син мальдымон юрмег зурод шара юмшало тӧлъя-буръя шимес тӧл пельтэм шатыр ваче тышкало чепылля ӟардон пал куас дол-дол шуэрскыса кӧшкеманы улосэ ӟар кезьыт ӧр нюжтӥськыса дыжен кузьдалаезъя полыс шашы кӧчем юлтош дэмен серыпу ӟуски етӥн ныпъяса ышыг юнматъя ӟонгырало мискиньёс зульым сукум сялбер туриж лӧптэмын гудӟыса ушъяло палэнскизы куиньнапалаз мертчан ворпо тӧри зэмлык шӧг геры амалын улытозяз улос шиетэ гырдалтоз ужпи абилэн 1 урокъя ворекъяло назьылскем ма муген ачиз ветлӥсь тодонме, быгатонме чоньдэм кутчам вожъяськозы кутэмнянь икак луыса кӧмечен гольык пыд ёркыт 2 урокъя ларгетыса мырӟиськем гаӵоло кӧттырмостэм ныр пельёсыз ньылоназ дэра кадь кӧдэктэм 3 урокъя йӧндыре сазьтӥськем паймоно арбери ошыку, ляльчиосты 1 урокъя алангасар йылсо мыйыкъёс айбат чӧлскем тыпы дӥнь артана олокытӥ-мартӥ пильылӥ уйшор пыӵ ӝажы 2 урокъя вуко кӧэз палэс тыросаз чӧлляськем узатыса бервылъёссэ толбыт кӧлэм пучы ӧрысьтызы ӧчкарыса мыняса ӝужа жугиз йӧзор кыдыръяз ӝожоз ваменскыса 1 урокъя ӵогиськизы бичаськыло кудые мылазьыз пыд кутчаны аказэ нӥзили вырйылэ 2 урокъя экемы кенос косэмезлы мышласянь ыбыштӥз ӝоктысалзы шулӟектэмын кучермиллям сюргозы сиес лӥятоз дурваисез 3 урокын учебникысь бамъёс 3-4 9-10 14-16 22-24 25-28 31-32 1 урок - 39-40 41-43 44-46 50-51 51-53 54-56 57-59 60 69-70 71-72 73-75 76-77 78 87-89 90 109-110 113-114 124-126 (1 глава) 126-129 (2-3 главаос) 7 колонка Вераськон кылэз радъян Наизусть Вольыт лыдӟон Сӥзьыл сярысь асьсэлы ярась кылбурез наизусть дышетон Энциклопедиысь шедьтыса пӧртэм пӧйшуръёс сярысь веран Люкетъёсъя пуштроссэ верано "Пуны - адямилэн эшез" темая верос малпан План лэсьтоно планъя пуштроссэ верано 1. Выжыкыллэн пуштросэзъя юанъёс малпан но соосъя текстлэсь пуштроссэ веран малы дышетэ та выжыкыл? Та юанъя малпанзэс веран. Леким буба сярысь валанзэс асьсэ кылын верано. Лыдӟем люкетъя юанъёс малпан. Суредо план лэсьтон. Кельшем люкетсэ яке быдэс кылбурез наизусть дышетон. Текстлы план лэсьтоно планъя пересказ дасяно. Изложение гожтыны план яке опорной юанъёс дасян. Нылпиослэсь покчи эшъёссы сярысь сюлмаськемзэс кылзоно. Вольыт лыдӟон но пуштросэзлы матын луись лэчыт веранъёсты шедьтоно. "Укно но шоръёсад" кырӟанэз дышетоно. Асьсэос малпало мадиськонъёс, визькылъёс. Рольёсъя вольыт лыдӟон. Котькуд геройлэсь устно вылтуссэ суредан. Пересказ бордын ужан. Книгаысь средъя пересказ лэсьтон. 91 б. Юанъёслы рос-прос валэктон сётон, ролья вольыт лыдӟиськон. Одӥгзэ кылбурез наизусть дышетоно. Суредъёс дасяно, соосъя диафильм лэсьтоно. Диафильм учкон. Шор ёзо школа Р.И. Яшина, УдГУ-ысь доцент, наука удысысь сӥё-дано ужась. Зарни крезен жингыртӥз (Д.А. Майоровлэн кылбуръёсыз бордын 7-тӥ классын ужан) Д.А. Майоровлэн творчествоезлы одӥг час гинэ висъямын бере, соин ик та уроклы тужгес но ӟеч дасяськоно, нылпиосты чырмыт ужатоно. Урок азе таӵе ужпум пуктоно: тодматоно нылпиосты калык инструментъёсын, тужгес но крезен, эскероно Майоровлэсь "Зарни крезь", "Емышо сад" но "Мемиелы" кылбуръёссэ пуштроссы но чеберлыксы ласянь, "Зарни крезьзэ" ӟеч лыдӟыны (выразительно), текстсэ учкытэк вераны дышетсконо. Уроклы материал. 1) кылбурчилэн туспуктэмез; 2) крезь, кубыз но чипчирган инструментъёслэн тусбуйзы (крезь вань 9-тӥ класслы учебниклэн 2-тӥ бамаз; мукетъёссэ шедьтыны луоно "Удмуртская Република. Энциклопедия" книгаысь). 3) Майоровлэн кылбур сборникез но поэтлы сӥзем альбом-пособие. Уроклэн мынэмез. Урокын эпиграф чотын луыны быгатозы кылбуръёсысь ик чуръёс: 1. Мон турттӥсько котькинлэсь Секыт умзэс сайкатыны. 2. Кемалась лыктоно вылэм Та емышо садъёсы. 3. Дунне вылын Сеня кадьёс Туж уно ни быремын, Со понна со ӟеч нимъёс Ӧвӧл али вунэмын. Яке таӵе веранэз: "Историлэн пӧртэм вакытъёсаз калык аслэсьтыз трубадуръёссэ (крезьчиоссэ) будэтэ: соос ик калык мылкыдэз кырӟанъёсын возьмато". (В.Шекспир, англи драматург но поэт). Урок азе пуктэм ужпумъёсын тодматэм бере ик, нылпиосты лыдӟытоно учебникысь кылбурчилэсь биографизэ (33-34-тӥ б.), со тырмыт но усто сётэмын. Собере дышетӥсь юа пиналъёслэсь, кыӵе вашкала калык инструментъёсты соос тодо но кыӵеоссэ ас синмынызы адӟылӥзы, оло кудӥныз ке шудылӥзы но. Удмурт выжыосмылэн тужгес яратоно музыкальной инструментсы крезь вал. Тодмо луэ бадӟым крезь но пичи крезь. Пичи крезез нылпиос поннагес лэсьто вылэм (возьматэ 9-тӥ класслы учебникысь). Калык пӧлын крезен шудыны быгатӥсьёсты туж гажало вылэм, соосты крезьчи шуо вал. Удмурт мадь но даур кылъёсъя ортчем даурысь 20-тӥ аръёсы тодосчи-этнограф Михаил Григорьевич Худяков ӟуч кылын "Песнь об удмуртских батырах" эпос кылдытӥз. 2000- тӥ арын сое удмурт кылэ берыктӥз удмурт кылбурчи но тодосчи Василий Михайлович Ванюшев. Солэн кутсконаз ик тазьы гожтэмын. Вань калык татын шӧртчи, Пӧрмыто батыр ужъёс, Кырӟало данъян гуръёс Песятай мадёсазы. Пересьёс мадё татын Крезь шудэм-кырӟам улсын, Покчиос нош кылзӥсько, Визь кылъёссэс пыӵато, Вашкала батыръёс кадь Сэзь луыны дышетско. Озьыен, мадь но даур кылъёс (легендаос но преданиос) кылдылӥзы "крезь шудэм- кырӟам улсын". Крезьчиос вазен журналистъёс (ивор вӧлмытӥсьёс) но, кылбуранъёс кылдытӥсьёс но, (музыка) крезьгур кылдытӥсьёс но вылӥллям. Соин ик соос даноесь вал. Крезь сяна, тодмо вылӥллям чипчирган, шулан, узьыгумы, кубыз, тачыртон (тыкыртон) но мукет инструментъёс. Куд-огаз соос оркестрен шудыны тупало вылэм (тукыртон, шулан, пуньыос но туй заслонкаос), нош крезен, чипчирганэн но кубызэн нимаз но шудыны луэ вылэм. Малэсь но кызьы лэсьтылӥллям крезез? Та сярысь вера калыклэн дауркылыз. Тани со: "Одӥг вырйыло интыын нюлэс дурын ик будэм Мудор Кыз - Инмарен пусъем писпу. Туж пазьырес, веськрес, шонер вылэм но кема улэм со, та котырысь удмурт калыкез шумпоттытыса, угось та кыз улын одӥгез удмурт выжы Инмарлы вӧсяськылэм, отын ик курбон, йыр-пыд сётон ортчытылэм. Соин ик кызэз но Мудор Кыз шуиллям, со угось юрттылэм аслаз йылсо луэменыз асэныз Инмарен кусып возьыны. Дыр ортчыса, Инмарлэн ужась, тыршись удмуртлы ӟеч уж лэсьтэмез потэм но, со Кызэз ӵашъем. Адямилы верам: "Лэсьты талэсь Крезь - чебер жингыртоз". Воргорон кызэз выжыетӥз ик вандэм но, кӧня ке куасьтыса, солэсь Крезь лэсьтэм. Усто пӧрмем крезез, шудыны но со быгатэ вылэм. Бератаз крезь шудэмъя кырӟало- верало, экто-шулдыръясько вылэм. Тӥни со дырысен Крезез ӵашъем Кызлэсь гинэ лэсьтыны кутскиллям". (Д.А. Яшинэн фольклор эспедициын дыръяз 1983 арын гожтэмез). Дышетӥсь шедьтэ ке, кылзытэ крезен шудэмез пленка вылысь. Трос концертъёс возьматъя али Воткинскысь удмурт калык инструментъёсын шудонъя нылпи оркестр, озьы ик Ижевскысь искусствоосъя школаысь дышетӥсь Кунгуров. Солэн ик кивалтэмъяз усточиос выльысь калык инструментъёсты лэсьтыны кутскизы. Вазен крезь шудэмъя верало-кырӟало вылэм дауркылъёсты но мадьёсты, кырӟанъёсты. Соя ик выль гуръёс кылдыто вылэм. Озьыен, крезен шудӥсь-крезьчи тужгес гажано, дано адями вал калык пӧлын. Соин ик Даниил Майоров аслэсьтыз лирической геройзэ (ассэ но шуыны луоз) крезьчи карем но солэн нимыныз вань калыклы вазиськем. Табере рос-прос (выразительно) лыдӟом "Зарни крезь" кылбурзэ (лыдӟе ачиз яке усто лыдӟыны быгатӥсь дышетскись) 35-тӥ бамысь. Собере учебниклэн 36-тӥ бамысьтыз юанъёслы вератоно, со сяна, таӵе юанъёс пуктоно на: 1) Кыӵе чеберлыко образъёс но детальёс пыр адӟытэмын крезьчилэн крестьян пиос пӧлысь луэмез? (Кынмем, измем сюлэм; йӧлвыл). Озьыен, йӧлвыл - со татын ваньзэ умойзэ, ӟечсэ, ваньбурлыксэ возьматӥсь образ. 2) Кыӵе мылкыд нырысь интые поттэмын? (Яратон). Угось яратон ваньзэ ӟечсэ пуромытӥсь мылкыд. Сое кынмем, измем сюлэмъёслы, начар калыклы нуыны косэ крезьчи - лирической герой. Удмурт крестьян калыклэн куанер, курадӟыса улэмез сярысь гожъязы тодмо ӟуч писательёс но. Кылсярысь, М.Е. Салтыков-Щедрин гожъяз: "Бедная эта сторона, бедный это народ, но его надо любить". Сюлэмъёсты шунтон - со кылбурчилэн но валтӥсь ужез. Та ужпумлы вань кужымез сётыны ӧте Д.Майоров "Зарни крезь" кылбураз, кудзэ вань творчествоысьтыз программной кылбур шуыны луэ. Отын адӟытэмын кылбуран кредо (улонлэн валтӥсь ужпумъёсыз, творчестволэн куронъёсыз). ??... шудо улон понназ уг лыкты, со понна юн тыршыса ужано, нюръяськоно. Калыкмы вашкалаысен ик ӟеч вала вал: ужатэк номыр но понназ уг вуы, мурт чотын улонэз со сьӧлыкен лыдъяз, ачиз угось пачкатэмын вал эксэй империен. Октябрь революция бере дэмен ужан (коллективной труд) идея уката пуромытэмын вал. Дэмен, тыршыса ужанлы сӥзем Майоров "Емышо сад" кылбурзэ но. Таиз но гожтэмын калыклы вазиськон (воззвание) амалэн. Нош ик лыдӟо но пиналъёс верало, валэктон сёто учебникысь юанъёслы. Ватсаны луоно на таӵеоссэ: 1. Малы та кылбурын трос кутэмын глаголъёслэн ортчем дыр формаоссы? Шедьтэ соосты но вералэ, кыӵе чуръёсын соос кутэмын, маин герӟамын? 2. Кыӵе чур возьматэ кылбурлэсь валтӥсь идеязэ? (Емышез будэтоно вылэм дышетскемен, тыршемен). 3. Вуж куштӥськем но выль пушйись садъёсты ваче пумит пуктыса, мае вера автор? Кызьы нимаське та выллем чеберлыко (художественной) амал? (Антитеза - пӧртэм арбериосты, учыръёсты но мылкыдъёсты ваче пумит пуктыса веран; латин кылын анти - пумит, тезис - положение, умозаключение шуэмъёсты возьмато). Дышетӥсь. Даниил Афиногенович умой вала вал, улонысь умой пала воштӥськонъёс понназы гинэ уг вуо шуыса. Ӟеч улон понна нюръяськоно, нош нюръяськонын бадӟымесь ыштонъёс но луо. Майоровлэн огез агаез И мировой война дыръя быриз, кык мукетъёсыз - граждан ожын. Тужгес кайгыриз поэт, ӵошгес будэм агаез Сеня бырем бере. Та пумысен со лӥятӥсь кылъёсын вазиськиз анаезлы "Мемиелы" кылбураз. Сое лыдӟемлэсь азьло куд-ог тодмотэм кылъёсын тодматском, соос валэктэмын учебниклэн 37-тӥ бамаз гож улын, табере лыдӟом кылбурзэ. Кылбуръя юанъёс: 1. Мая валаны луэ, Сеня гордъёс палан (совето власть понна) нюръяськыса быриз шуыса? 2. Огназы кылем анайёслы юрттэт сётонэз ма пыр возьматэ кылбурчи? 3. Тӥ сямен, мар умойзэ, ӟечсэ сётӥз революция но граждан ож ужась калыклы, тужгес ик ӧжыт лыдо калыкъёслы? (Нырысьсэ кунлык соос басьтӥзы, огкадь правоё луон сярысь законъёс кутэмын вал, дун тырытэк дышетскыны, эшъяськыны быгатӥзы, вордскем кылэз но культураез азинтыны сюресъёс усьтӥськизы). Дыр кыле ке, кӧня ке дышетскисьёс кылбуръёсты шара лыдӟо на, калык инструментъёсты тодазы ваё. Доразы уж: умой тодоно Майоровлэсь биографизэ но учкытэк вераны вылысь дышетоно "Зарни крезь" кылбурзэ. Кыкетӥ урокын эскероно "Кылбур сярысь" темаез но таин валче эскероно куиньна кылбуръёслэсь метриказэс, размерзэс но рифмаоссэ, нялтас кылбуръёслэсь композицизэс (радъяськемзэс), быдэстоно учебникын сётэм юанъёсты но ужъёсты, дыр кылиз ке, Майоровлэсь куд-ог мукет кылбуръёссэ но лыдӟоно на ("Зарни крезь" сборникысь). Кылбур сярысь валэктонъёс валамон но тырмыт сётэмын учебникын но А.Ермолаевлэн "Поэзиен тодматскон" книгаяз. 1 Люкина Н.М., Глазов пединститутысь удмурт филолгия кафедраысь дышетӥсь. Пиналъёслэсь кылзэс волятон - одӥгез кулэ луӥсь ужпум. Нуналысь нуналэ тыршоно соослэсь вераськон кылзэс узырмытыны, волятыны, малпанзэс радызъя но шонер вераны мед быгатозы шуыса.Пусъеме потэ: та выллем темалы сӥзем материалъёс вал ини М.Р. Сельченковалэн (1992 � 1), М.Р. Фёдоровалэн (1990 � 1) ужъёсазы. Огъя учконо ке, школаосын, мынам малпамея, устной литературной вераськонлы саклык тырмыт уг висъяськы на. Сое шдыны луэ Глазкарысь пединститутын дышетскись удмурт студентъёслэн вераськемысьтызы но. Литературной кылын чебер, вольыт вераськыны уг быгато. Соос пӧлысь тросэз ӟучомемын. Та ласянб уйпал ёросъёсын ужась дышетӥсьёслы секыт усе. Пединститутэ дышетскыны пырем студентлэн вераськон кыллэсь нормаоссэ чакламез уг шӧдӥськы. Занятиосын асьсэ пал манерен верасько. Соин ик сюлмаськиськомы нырысетӥ курсысен ик литературной кылын вераськыны мед тыршозы. Удмурт кыллэн литературной нормаосыныз нимысьтыз пособиос ӧвӧл ке но, пиналъёсты куараосты шонер вераны дышетыны кулэ. Соин ик кыл волятонын орфоэпия нимысьтыз инты басьтэ. Куараосты шонер но чылкыт вераны дышето пичи классъёсын ик, пӧртэм артикуляционной гимнастикаос ортчытъяса. Котькуд удмурт фонемаез веран понна, тодыны кулэ буквалэсь значенизэ. Соин ик, орфоэпической ужъёсты ортчытъяны кулэ бадым классъёсын но. Орфоэпия эскере куараослэсь вераськонын воштӥськемзэс, валэктэ кызьы соосты вераны кулэ литературной кылын. Фонетической законъёс вылэ пыкиськыса, нимысьтыз правилоос кылдытэ. Удмурт кылын чылкыт но вольыт веран - вордскем кылынызы вераськисьёслы чурыт курон луыны кулэ. Арысь аре тодон-валанзэс будэтыса, пиналъёс литературной кылын вераськыны, анай кылмылэсь чеберлыксэ но аспӧртэмлыксэ валаны кутско. Уйпал ёросысь удмурт пиналъёс тросэз ӟучомемын бере, соос рос-прос асьсэ кылын вераськыны уг быгато. Ӟуч шӧмын вераськонлэн бервылэз ик герӟаськемын луоз кылсярысь порядковой числительнойёсты веран но: витетӥ интые верало витет'ӥ (точкаен ӥ азьын согласноез небыт веран). Орфоэпия но орфография куспазы юн герӟаськемын. Мукет сямен вераса, удмурт кылын куараосты шонер веран куронъёс гожъяськон правилооос бордысь пото. Но мынам чакламея, порядковой числительнойёсты шонер гожъяло, правилооосты тодо, нош чылкыт, вольыт вераны уг быгато. Та выллем янгышъёсты палэнтон вылысь пиналъёслэсь вераськемзэс чакланы кулэ. Со понна кылъёсты укрокысь уроке тодэ ваёно, соосты шонер но шара верано. Озьы ик вераськон (речевой) аппаратэз но волятыны кулэ, ӟуч вераськон шӧм (акцент) медаз шӧдӥськы шуыса. Анай кылыныд пӧртэм ужъёс лэсьтоно, кылсярысь шуг кылъёсты, кыл тэчетъёсты, веранъёсты но предложениосты шара веран, кылъёсын ударениоссэ шонер пуктон но мукет амалъёс. Мон сямен, ӟуч кылын ик герӟаськемын, дыр, ӧ куараез э гласноен суран. Диалектологиын тае диалектной аспӧртэмлык шуыса эскериськом. Куара шуккиськон (акустика) ласянь учконо ке, ӧ матын луэ ӟуч кылысь кыллэн кутсконаз сылӥсь э - лы (эхо, этот) но ӧ фонемаез вераку, ымез паськыт устӥськом, ӧжытак ымдуръем луэмез шӧдӥське, кыл берлань кыскемын. Пумисько таӵе умойтэм веранъёс эй,ӧй, лэсйас'кэ, лӧсйас'кэ, кэн'а, кӧн'а. Орфографиын но таӵе ик янгыш пумиське. Кылэз волятон бордын ужаку, лыдэ басьтыны кулэ ударениез но. Татын тужгес но шӧдӥсько диалектной веранъёс, уг чакласькы литературной кылын куараосты чылкыт но шонер веран. Удмурт кылын ударение усе берпуметӥ слоге (фиксированной) но вань куд-ог учыръёс, кытын ударение берпум слог вылэ уг усьы. Тросэз соос диалектной аспӧртэмлык луыса кутӥсько ке но, асьмеос пиналъёсты литературной нормаосъя вераны дышетыны кулэ: кылсярысь, вераломы интые вераломы, витети интые витети. Дышетскисьёс куспазы пӧртэм сямен верасько ке но, урокъёсын занятиосын шонер мед вераськозы шуыса тыршоно. Литературной кылын вераськыны дышетӥськом бере, ударениез шонер пуктыны мед тодозы. Кызьы пусйимы вал ини, удмурт кылын куараосты шонер веран нормаос пото орфографической куронъёс пото орфографической куронъёс бордысь. Шонер гожъяськыны быгатӥськод ке, соосты озьы ик гожтод но. Кылэз орфоэпилэн нормаосызъя веран понна, дышетскисьёслы шонер орфограмма бырйыны кулэ. Та учыре кыл волятонын нимысьтыз шуг-секытъёс уг кылдо. Но вань на куараосты веран сыӵ нормаос, кудъёсыз гожъяськон правилоен уг тупало. Со, кылсярысь, герӟаськемын регрессивной ассимиляцилэн (азьпалан сылӥсь согласной куара бӧрсяз сылӥсезъя тупастке: н согласноез ӟ,ч аффрикатаос азьын небыт вераськомы, нош гожтыкумы небыт луэмзэ ум возьматӥське. Ӟ,ч небытэсь бере, соос асьсэя тупато азьпалаз сылӥсь н согласноез но. Кенӟали (кен'ӟали), мунчо (мун'чо) но мукет. Озьы ик небыт вераськомы ӟ, ч азьын сылӥсь д,т согласнойёсты но: быдӟым (быд'ӟым) яке быдӟым , кутчаны (кут'чаны) яке (кугганы). Занятиосын кыл волятон ужъёс ортчытыку, та учыръёсты лыдэ басьтыны кулэ, малы ке шуоно, дышетскисьёс пӧлын вылӥ верам согласнойёсты чурыт верасьёс пумиськыло. Со озьы ик орфоэпической янгыш луэ. Соин ик ваньзэ сое пиналъёслы валэктоно. Соку гинэ соос шонер но вольыт вераськыны быгатозы, валалозы удмурт кылмылэсь чеберзэ, жингрес но лэчыт луэмзэ. 1 Историысь чуръёс Ирина Останина, Ижысь 5 номеро школаысь 10-тӥ классын дышетскись. Нылкышно гимназия (Шаертодонъя олимпиадае вуэм ужъёс пӧлысь одӥгез) Ог дасо ар талэсь азьло Ижын выль дышетскон интыос, гимназиос но лицейёс усьтӥськизы. Калыкын вунэтэм кылъёс выльысь улӟизы. Угось кызетӥ даурлэн кутсконаз но гимназиос Ижын вал ни. 1907-тӥ арын 9-тӥ гудырикошконэ Иж заводысь активистъёс Нагорной но Заречной волостьёсын улӥсь калыкез ӧтчаме люказы. Вераськон мынӥз нылкышноос пӧлын дышетон удысэз радъян сярысь. Татын ик кылдытӥзы комитет. Со гимназия пумысен вань ужпумъёсты сэрттыны-пертчыны кулэ вал. Гимназиез кылдытонэ мылысь-кыдысь пыриськизы но коньдонэн юрттӥзы Ижысь вузчи (купец) Иван Бодалев, фабрика возисьлэн кузпалыз Анна Петрова, А.Дерябинлы памятникез кылдытӥсь И.Н. Ситников но мукетъёсыз. Нырысь гимназия возиськиз пичигес из юртын (али со ӧвӧл ни). Бератаз, рабочийёс юрттэмен, луонлык кылдӥз нимысьтыз бадӟым юрт ӝутыны. 1910-1911 аре прогимназия пӧрмытэмын вал нылкышно гимназилы. Эксэй правительство сое возьыны араз 250 манет висъялляз. Гимназие 8- 12 арескем нылъёсты кутылӥзы. Соослы одно ик чача висёнлы пумит прививка пуктэмын луыны кулэ вал. Ӵошатон понна: туала нылпиослы школае мынон азязы пукто БЦЖ, АДСМ (дифтерилэсь), 2 прививка гордаклэсь (корь), паротитлэсь, полиомиелитлэсь. Гимназиысь нылъёс пеймыт-лыз дэрем нуллӥзы, вылазы - сьӧд айшет, праздник нуналъёсы - тӧдьы айшет. 1907-тӥ арын 11-тӥ шуркынмонэ гимназиез усьтонлы сӥзем праздник ортчиз. 6 часын ӝытазе кутскиз шулдыръяськон: кырӟан-веранъёс, шудонъёс, эктонъёс. Гимназилэн юртэз чеберъямын ньылпу вайёсын, флагъёсын. Сое вӧсяло Александро-Невской соборысь, Покров но Ильинск черкъёсысь ваем мудоръёсын. Бератаз нылпиосты куноято булкаосын, чаен. Гимназия бордын юнматэмын вал попечительской совет но анай-атайёслэн комитетсы. Гимназиын дышетскисьёс пӧлысь ог 25 процентэз начар семьяосысь вал. Соин ик вылӥ верам огазеяськонъёс таӵе нылъёслы дышетскон дунэз пичиятылӥзы но мукет капчиятон амалъёс тупатъяллязы. 1908-тӥ арын гимназиын дышетскизы крестьян, мещан, дворян, черк котырысь ужась семьяосысь 145 нылъёс. Арысь аре дышетскисьёслэн лыдзы йылылӥз, ваньмыз сямен нылъёс православной вӧсь осконэн герӟаськемын вал. Гимназиын таӵе предметъёсъя дышетскизы: закон божий, математика, ӟуч кыл, география, история, естествознание, чистописание, киужъёсъя. Гимназилэн тужгес но син шоры йӧтымон тодметэз - дышетскись нылъёс азе тупатэм юн куронъёс. Урокъёс кутскылӥзы молитва бордысен. Нылъёс кыл вератэк кылзӥськыны кулэ вал дышетӥсьёссылэсь, кивалтӥсьёссылэсь. Нылъёсты ӧз лэзьылэ ӝытъёсы 10 час бере юмшаны, концертъёсы, балъёсы ветлыны. Гимназиын ортчылӥзы литературалы сӥзем ӝытъёс (одӥгез сыӵеез Н.В. Гоголез буре вайыса ортчиз 1909-тӥ арын оштолэзе). Дышетскисьёс Сарапулэ, Казане, Москвае экскурсиосы ветлылӥзы. 1913-тӥ арын Нагорной волостьысь Бодалевский переулокын гимназилэн эшшо одӥг дышетскон юртэз усьтӥськиз. 1911 -тӥ арысен гимназиын 7 классъем программая ужаны кутскизы. Эшшо ар ортчыса ватсаськиз на 8-тӥез класс. Таяз дышетӥзы ни педагогикаез, дидактикаез. Гимназиын куд-ог предметъёсты дышетытэк но луэ вал, кылсярысь, француз но немец кылъёсты, суредаськонлы, педагогикая. Ижысь нылкышно гимназия 10 ар ӵоже вить выпуск лэсьтӥз. Педагогикая классэз медальёсын йылпумъямъёс домашней шуон наставницаос луизы, мукетъёсыз - дышетӥсьёс. 7 классз быдтэмъёслы луонлык сётӥськиз школаосын ужаны. 1917-1918 аръёсы гимназиын 17 класс вал, 634 адями дышетскиз. Со пӧлысь, эмъясьёслэн чаклам-верамзыя, 102-ез ляб адӟисьёс, 41-ез - кырыжам сюрлыен, 198- эз - йыр висёнэн курадӟисьёс но мукет. Гимназилэн библиотекаяз люкамын вал тодмо писательёслэн Н.В. Гогольлэн, И.С. Тургеневлэн, А.И. Гончаровлэн, Ф.М. Достоевскийлэн, В.А. Жуковскийлэн, Л.Н. Толстойлэн, С.М. Соловьевлэн произведениосы. 1918-тӥ арын толсуре нылкышно гимназиез пӧрмытӥзы 1-тӥ но 2-т ступенен совето школалы. Нылъёс сяна, татын дышетскизы ни пиос но. 45 минутъем урокъёс кык сменаен мынӥзы. Дышетскылӥзы 5 час ӝытозь, пеймыт луытозь (классъёсын тыл соку ӧй вал). Гимназилэн одӥгаз юртаз (али Свердлов ульчаысь 28 номеро юрт) граждан ож бере интыяськылӥзы рабфак, педтехникум, госпиталь, дышетӥсьёслэсь тодон-валанзэс будэтонъя институт. Мукетаз, кык этажо из юртын (али Свердлов ульчаысь 30 номеро юрт), 1917-1919-тӥ аръёсы ортчылӥзы выль улонэз радъянэн герӟаськем митингъёс. Отын вераськылӥзы И.Д. Пастухов, В.А. Азин но мукет тодмо адямиос. 1933-1935-тӥ аръёсы та юртэз кык этажозь йылтӥзы. Отын ужаны кутскиз Гурт ужъёсъя вылӥ коммунистической школа. Война аръёсы та юртэ интыяськылӥз Москваысь Бауман нимо институт. 1 Чаклан кылъёс. Улонзэ но ужзэ радъян понна, адямилы кулэ вал тодыны инкуазьлэсь зэмос сӥ-радзэ: шундылэсь кызьы но ку ӝужамзэ но пуксемзэ, тӧллэсь кудпалась но кызьы пельтэмзэ, лымылэсь мурдалазэ, кыӵе вакытэ усемзэ но шунамзэ, зор-котлэсь тырмыт я мултэс луэмзэ. Пӧйшурась адӟе но чакла вал пӧйшуръёслэсь сямъёссэс, чорыгась - ву пушкысь но ву дурысь лулосъёслэсь асьсэды воземзэс. Нуналлы быдэ вошъяськись куазьлэн вал аслаз огсыр вакытъёсыз. Али асьмеос дышемын, та вакытъёс арез одӥг кадь люкетъёслы люко шуыса: 12 толэзь пӧлысь куинез шеде толалтэлы, куинез - тулыслы, быдэн куинен ик - гужемлы но сӥзьыллы. Нош вашкалаослэн музъем ужамзыя но пудо вордэмзыя эскероно ке, ар кык паларлы гинэ люкиське вылэм: ю-нянь кизён/пудоез кыре лэзён - ю-нянь октон/пудоез гидэ пыртон. Соин ик тулыс - гужемез но сӥзьыл-толалтэез гинэ висъяло вылэм. Та кык паларъёс - одӥг быдэслэн люкетъёсыз бере, куазь кыказ ик дыре ассэ одӥг кадь возе шуыса оско вылэм. Пӧртэмлыкез со гинэ: толалтэ кезьыт укша гужемлэн пӧсез, нош толалтэлэн шунытэзлы - гужемлэн салкымез: - Сӥзьыл куазь жобаса ке улӥз, тулыс но жобаса улоз. Толалтэ куазь кезьыт ке улӥз, гужем пӧсь луоз, шуо. Толэдъя гужем мынэ. Толалтэ шуныт - гужем салкым. Толалтэ трос лымыя - гужем трос зоре. Тулыс ке кӧс, сӥзьы но кӧс луоз. Ноябре ке ӧд кынмы, январе но уд чонгыра. Ар куспысь толэзь нимъёс пӧртэм уж удысэз чакласа кылдэмын. Пӧйшуран удыслэн "кибервылыз" кылемын "коньывуон", "кион сюан" толэзьёсы, музъем ужлэн - "турнан", "ӟег кизён", ю пыртон" толэзь нимъёсы. Нош огъя ке учконо - удмурт толэзь нимъёсын лыдэ басьтэмын инкуазьлэн ар ӵоже вошъяськемез, соин ик куд-огез кык полэс но, куинь полэс но луэмын. Январь - Толшор, Февраль - Кион сюан/Куака толэзь. Март - Куакатолэзь/Оштолэзь, Апрель - Оштолэзь/Кызьпу толэзь. Май - Куартолэзь/, Гуждор/Турын потон, Июнь - Инвожо/Лек толэзь. Июль - Кӧстолэзь/, Пӧсьтолэзь/Турнан толэзь. Август - Гудырикошкон/Ӟег кизён толэзь. Сентябрь - Куарусён/Ю пыртон толэзь, Октябрь - Пукротолэзь/Выль ӝук толэзь. Ноябрь - Коньы вуон/Шур кынмон/Йӧ кынмон толэзь. Декабрь - Толсур толэзь/Толмон/Толӟон толэзь. Куд-ог чакланъёс пуштроссыя осконъёсын огвыллемесь луо. Кутскон (инициальной) магилэн радызъя пӧрмытэмын арнуналъёсты лыдэ басьтыса кылдэм инкуазь сярысь веранъёс: - Оддокей шунтӥз ке, тулыс вазь вуоз. - Бладчо нунал/Дӧдьы куштон нунал ву потӥз ке, лымы ӝог шуналоз. - Гондыр султон нунал кезьыт ке луэ, кӧс ар луэ. - Ӵук мунчо уй пильмо ке луэ, пильмо луоз арез но, тӧло ке - тӧласькоз. - Ӵук мунчо уй/Великтэм уй куазь кынтӥз ке, ньыльдон уй кынтоз на, шуо. - Акаша нуналэ одно мед зороз. - Миколае (22 мае) зор ке луэ, пересьёс тодо, ар кӧс луоз шуыса. - Виле зоре ке, сӥзьыл зоро луоз. Ваньмыз сямен "нимам" арнуналъёс толэзьлэсь выль но вуж вакытсэ, вошъяськемзэ чакласа тупатэмын луо вал. Озьыен, соос тодмосто вакытлэсь кутсконзэ, нырысетӥ нуналзэ. Тросэз учыръёс адямилэн сознанияз радъяськылӥзы "кыӵе кутсконэз - сыӵ ик пумыз" малпанъя. Озьыен, арнуналъёсты пусйись чакланъёсын пӧлэстӥськизы зэмос тодонъёс но, вылӥ-улӥ сьӧрпал кужымъёслы оскон но. Толэзь виосты чакласа кылдытэм календарь, шундылэн бергамезъя лэсьтэмез сярысь, рос-просгес, ӝот-ӝот лыдъямон (28-29 нунал). Толэзез инмар чотэ пуктон, солы йыбыртон сям мусульман калыкъёс пӧлын вӧлмемын, удмуртъёслэн со палдуртэмын, инъет луэмын шундыя лэсьтэм календарьлы. Но толэзьлэсь туссэ чаклан сям та дырозь кылемын куд-ог чакланкылъёсын. - Толэзь ӝужакуз шонер ке, шулдыр, пе, луоз, гаӵоло ке - жобалоз. - Вордскем толэзь мынчырак (сэзь) луэ ке, со толэзе куазь чебер луоз. - Выль толэзь первой адскыкуз чонь ке луэ, та толэзь зоро луоз. - Выль толэзь бадӟым луэ ке, куазь шуныт луоз. - Толэзь вордскыкуз бадӟым луэ ке, куазь жобалоз. Осконъёсъя, толэзь куазьлэсь гинэ ӧвӧл, адямилэсь но азьпал улонзэ "адӟе": - Выль толэзь гаӵоло ке потӥз, пересьёс улон секыт луоз, шуо. Ӵошкыт ке луэ, капчи улон луоз, шуо. - Толэзь йылъёсыныз вылэ учке ке, секыт толэзь луоз, нылпи висёз. Ӝужась пинал толэзез бур паласен ке адӟид, умой луоз; паллян паласен ке адӟид, урод луоз. Толэзьлэсь утись-вордӥсь луэмез, адямилэн улоназ бадӟым инты басьтэмез сярысь малпан но оскон, кылемын удмурт культуралэн образъёсаз-пусъёсаз. "Толэзь- пужыез" шедьтӥськомы уйпал удмурт нылкышноослэн муресазьысьтызы-кабачиысь. Осконъёсъя, мылазь-мустор нырысетӥез син усён инты, соин ик сое утьыны кулэ. Дауръёс ортчемъя, пужыятэм муресазьёсты вошто чыртыкышъёс/уксётӥрлыкъёс но нимысьтыз чеберъянъёслы гинэ пӧрмо. Али но мылазямы нуллӥськомы пӧртэм весьёсты, киросэз. Одӥгаз келян кырӟанын вань таӵе кылъёс: Туала потэм пӧськыпиосыд янарак шоры йыбыртӥллям. Туала кошконо экеос тыр толэзь шоры йыбыртӥллям. (ИРЛИ : ФАП-29; �70). Валаны луэ, татын вераськон мынэ кузь сюрес вылэ потӥсь пинал пиос сярысь. Кузь, тодмотэм, кышкыт сюресъёс пӧлысь одӥгез - рекрутэ кошкон. Сюрес азьын йыбырскыса инмарлэсь, кулэм пересьёслэсь азинлык курон котьку вал но, луоз но, кызьы вал но, ,луоз улонэ кошкись егит калык. Но вунэтэмын ни табере толэзьлэн инмар луэмез, фольклор гинэ куд-ог дыръя со образэз тодэ вайытъя. Тани "Толэзьын сылӥсь ныл" сярысь выжыкыл-мадёнын но юнме шорысь-а толэзь гинэ жаля сирота нылэз но дораз басьтэ. ТОЛЭЗЬЫН СЫЛӤСЬ АДЯМИ. Адӟид-а куке толэӟын куаӟ чебер дыръя ведра карнанэн сылӥсь адямиез? Та сярысь пересьёс таӟы верасько. Ваӵкала дыръя одӥг ныллэн, мумиз кулса, айиз выль кышно басьтэм. Та сюрмумизлэсь куаенер ныл туж уно кур адӟем. Одӥг пол - йӧ вылэ султонэн но умысьтонэн вискын - со нылэз сюрмумиз ваӟ ӵукна кеӟытэн пурудэ вулы ыстэм. Сюрес вылын малпаса- малпаса со ныл туж бӧрдыны кутскем. "Таӟы курадӟытоӟ, - шуэм, - ӵок, йыры мед быроз!". Таӟы шуса, пуруд вылэ мынэм но люкмесэ тэтчем. Ненокыӟы но сое ву басьтымтэ. "Э, вылысь югыт тӧдьы толэӟе! - тэльмырем ёрмыса куанер ныл.- Адӟиськод-а медак та курадӟемме, ву но монэ уг басьты ни ук?!" "Адӟисько" - шуса, толэӟ со нылэз ведра карнанэныз валче нюппы гынэ вылэ ӝутэм. Со тырысь табере адке со ныл карнанэныз толэӟын. Гожтэмын Кузон губерниысь Вуж Ӟумъя гуртын. Печатламын Б.Мункачилэн ужаз 1887 арын. Куазьлэн но вал "секыт" но "капчи" дыръёсыз, нуналъёсыз. Чоттэм нуналэз секыт карылӥзы, чотозэ - капчи: - Понедельник зориз ке, быдэс арня зороз. - Суббота нуналэ зорыны кутскиз ке, быдэс арня зорыса улоз. - Вирнуналэ мисьтаськыны уг яра: секыт луоз. Адями кышкалляз, куалектылӥз, бӧрсьысь бӧрсе вуоно дыр-вакытлэн тодметъёсыз витёнтэм шорысь тугасько, сурасько ке вал; шӧдытэк-валатэк вуэм тодметъёсты герӟалляз секыт адӟонэн, умойтэм учыръёсын: - Туриос лымы вань дыръя ик лыктӥзы ке, ар секыт луоз. - Гудыри вазь, лымы дыръя ик, кылӥське ке, ар секыт луоз. - Гужем шорын улмопу ке сяськаяське, алама ивор луоз. - Кык шепо ю-нянь шедьтӥд ке, шудо луод. - Сяська арлы кык пол усьтӥськиз ке, мар ке но амала луоз. - Берпум Спас бере куазь гудыръяз ке, ар секыт луоз. - Писпу борды сӥзьыл куаръёс кылё ке, жугиськон потоз, шуо. Ӵем дыръя чакланъёсысь рос-прос висъяны уг луы зэмос но сьӧрпал кужымен герӟаськем тодон-валанъёсты. Тодон но шӧдон/оскон одӥг писпулэн кык вайёсыз выллем. Но шӧдон ӵем дыръя янгышаны быгатэ: - Туриос кошкыку/ вайзы уйпалан кузь ке луэ, сӥзьыл кузь луоз. - Коӵыш мисьтаськиз ке, ӵуказеяз шулдыр луоз. - Коӵыш бамзэ бур пыдыныз ке миське, куазь шулдырскоз, паллянэныз ке - зороз. - Ӟазегъёс но ӵӧжъёс зорыку чыртызэс кузь карыса зорлы пумит карыса мычизы ке, кема зороз али, шуо. - Кызьпу вылласянь ӵужектэ - тулыс вазь лыктоз, нош улласянь ке - беромоз. - Нырысь уйпалан ке гудыртӥз - тулыс юзмыт луоз, шунды ӝужан палан - кӧс но шуныт, шунды пуксён палан - мускыт, лымшор палан - пӧсь. - Сӥзьыл скал ым пумаз турын ке ваёз, чаль лымы усёз, толалтэлы сиён уз тырмы. Инкуазь сӥ-радэз валаса кылдытэм чакланъёс бӧрсьысь бӧрсе яке одӥгеныз йырин мукетыз луэм учыръёсты возьмато. Эскером таӵе чакланкылэз: - Писпуын куаръёс ӧвӧл дыръя кикы сильыны кутске ке, ю-нянь уз удалты. Соослэсь пуштроссэ валаны луэ, мукет чакланкылэз тодыса: - Кикы сильыны кутскиз - куазь кӧс луоз. Кыкезлэн ик та веранъёслэн мугъёссы со бордын: кикы, мукет тылобурдоосын ӵошатыса, вуэ зэмос шуныт куазен гинэ. Со дырозь писпуос куар лэзьыса ӧз ке вуэ - соослы ӧз тырмы шуныт но, мускыт но. Озьыен, кизем ю-нянь но соосты тырмыт басьтыны ӧз быгаты. Озьы ик сэрттыны-пертчыны луэ мукет чакланъёсты но: - Толалтэ липет борды кузесь йӧос кынмемын ке, тулыс кема кыстӥськоз. - Льӧмпу, палэзьпу сяськаяськиз ке - кезьыт луоз. Мукет калыкъёслэн сямен ик, удмуртъёслэн но чакланъёссы радъяськылӥз одӥг кадь тодметъёсъя. Шуныт яке кезьыт луэмез, куазь воштӥськемез учерто вылэм пӧйшуръёслэн, тылобурдоослэн, пудо-животлэн вылтуссы, выросъёссы вылысь: - Тур но сяла ӵем будӥсь нюлэскы пыро ке, куазь пельскоз. - Ӟольгыриос силё пӧлы ватско кезьыт яке пельскон азьын. - Коӵыш изьыкуз бамзэ пыдыныз ӵоксаз ке, кезьыт луоз. - Пуны лымы вылын погылляське ке, куазь жобаськоз. - Чонари кезьыт луон азьын гинэ вотэсаз пуксе. Кезьытлэсь яке шунытлэсь лыктэмзэ валало вылэм инбамлэн, шундылэн, толэзьлэн, кизилиослэн воштӥськемзыя: - Шунды но толэзь котыре вуюись кадь кульчоос кылдо- кезьытскоз. - Толалтэ ӵук ӟардонъёс ӝог бездо кезьыт кариськон азьын. - Инмын кизили трос ке- куазь кезьыт луоз. - Кизилиос каллен гинэ пишто ке, куазь шуныт кариськоз. - Зорыку ик сайкиськэ ке, куазь шулдыр луоз. Корка пушкысь тӥрлык гинэ но куазьлэсь воштӥськыны быгытэмзэ "шӧдоз" вылэм: - Самовар мукет куараен ӵашетеэ ке, куазь жобалоз. - Сылал посудаяз котме ке, куазь жобалоз. - Куазь жобан азьын пуртыысь кеньырен шыд лызэктэ. - Гур эстыку пу туж ке тэля, куазь жобалоз. Тросэз чакланкылъёс кылдэмын, адямилэсь тазалыксэс лыдэ басьтыса: - Ёзвиос висё ке, куазь жобалоз. - Сюлэм ӵуштаське ке, куазь жоба. - Изем ке потэ, куазь жобалоз. - Пыд ке кынме, кезьыт кариськоз. - Пель ке лыдэ - жобаськоз. Удмуртъёс сярысь кылем даурын печатлам ужъёсын ик ини верамын вал, кызьы соос туж чакласькыса но эскертӥськыса быдэсъяло пӧртэм уж удысъёссэс: гыро, кизё, арало. - Бадьпу куар копейка быдӟа - гырыны потоно. - Кызьпу куар петаклэсь паськыт ке - ю кизьыны бер луэ ини. - Кызьпулэн куарез ӧжыт на ке - кышкатэк няньдэ кизьы. - Сусыпулэн узыез-мульыез тӧлӟыку, етӥнэз кизёно. - Нырысь шырчикпи вазиз ке, пыш кизьны кулэ. - Шупу сяськаяськыку огреч мертто. Та выллем вакчи, нимысьтыз чеберъятэк кылдытэм веранъёс вашкала ӵыжы-выжыосмылы воштӥзы туала улонысьтымы пӧртэм дышетскон удысъёсты. Нянь будэтӥсь тодон- валанзэ герӟа агротехниклэн, метеорологлэн, ветеринарлэн ужъёсыныз. Зэмос тодон-валан дауръёсын пырыен-пырыен люкаськиз, выжыысь выжые асьме дорозь вуиз. Инкуазьлэн воштӥськемез сярысь иворъёсты радио но телевидение пыр котькуд нуналэ кылзӥськыны тыршиськом ке но, палэнэ уг кыльы вашкалаосмылэн тодэм- валамзы. Котькуд адями, ас улон-вылоназ, одӥг пол гинэ тодаз уг вайы пересьёслэсь верам кылъёссэс: - Лымы ке мур - ю-нянь удалэ. - Уӵы кырӟаны кутскиз - ву кулэсмоз. - Уйпалась тӧл зорез улля. - Сизь кырӟа куазь шулдырскон азьын. - Ваёбыжъёс вылӥетӥ лобало - куазь чебер кариськоз. - Ӝытпал чибиньёс уллёен ке лобало, ӵуказе шуныт луоз. - Сьӧд пилем лыктон азьын но мушъёс уг ватӥсько, азьло сямен ик ужало - зор уз луы.