Удмурт кыллы дышетон ужпумъёс Удмурт кыл - вань удмурт калыклэн вераськон кылыз, солэн йӧскалык лулчеберлык тусыз. Кыл бадӟым инты басьтэ нылпиез будэтонын но дышетонын. Анай кылыныз вераськыса, пинал быгатэ ас калыкеныз кусып тупатыны, солэсь тодонъёссэ басьтыны, йылолъёс утьыны, котырысь дунеез валаны. Кыл юрттэ нылпилэсь йырсазьзэ юнматыны, малпаськыны быгатэмзэ радъяны, пӧртэм мылкыдъёссэ кылдытыны. Нылпилэсь вераськон кылзэ волятыса, луонлык кылдытӥськом тодон-валанъёссэ, визьзэ муромытыны, умой сямъёс пыӵатыны, улонын аслыз тупась удыс бырйыны, огъя уже пыриськыны. Соин ик удмурт кыллы дышетонлэн нырысь ик валтӥсь ужпумез луэ нылпиослэсь вераськон но гожъяськон кылзэс узырмытон, сое волятон но азинтон. Нош кызьы покчи классъёсын радъялозы удмурт кыллы дышетонэз, кыӵе саклык висъялозы солы - азьланяз но озьыгес ик мыноз со. Угось пинал визьмын басьтэм тодон быдэс улонлы кыле. Бен, Калыкез дышетонъя министерство, анай кылмес дышетон удысын выль вамышъёс лэсьтӥз ни. Дасямын "Удмурт Элькунын дышетонъя Кун стандартлэн национально- региональной комитетэз". Отын сётэмын "Начальной школаын удмурт кыллы дышетонъя Кун стандарт". Соя ик дасямын покчи классъёсын удмурт кыллы дышетонъя программа. Со бордын ужаз Удмурт Элькунысь дышетон удысын национальной ужпумъёсын тодон- эскеронъя институтысь наукая старшой ужась Ю.Т. Байтерякова. Нош программалэсь 1-тӥ класслы люкетсэ дасяз РСФСР-ысь школалэн дано дышетӥсез, кема аръёс ӵоже Можга педучилищеын методикалы дышетэм Р.И. Данилова. Таяз номерамы тодматскыны дэмласьком соосын. Азьланяз печатлаломы на выль программая кӧня ке урокъёсты. Оскиськом, программа пумысь малпанъёстэс, ватсэтъёстэс но ӵектонъёстэс редакцие яке институтэ ивортоды шуыса. Начальной школаын удмурт кыллы дышетонъя Кун стандарт Покчи классъёсын удмурт кыллы дышетыку таӵе ужпумъёсты быдэстыны кулэ: - пиналъёсты удмурт кылын вольыт вераськыны, валаса лыдӟыны, шонер но чебер гожъяськыны дышетон; нылпиослэсь кылтӥрлыксэс узырмытон; удмурт кыл сярысь огъя валан сётон; - грамматикалы дышетэмен ӵош котькуд пиналлэсь нимысьтыз вань быгатонлыкъёссэ азинтон бордын ужан, пиналэз малпаськыны, котьмаин тунсыкъяськыны дышетон, котырысь улон сярысь тодон-валанзэ паськытатон; - удмурт калыклэн культураеныз тодматон; пиналъёслы ӟеч сямъёс, ас калыктэ, кылыдэ, вордскем шаередэ яратон мылкыд пыӵатон. Начальной школаез йылпумъяса, пиналъёс удмурт грамматикая, шонер но чебер гожъяськонъя, вераськон но гожъяськон кылзэс радъянъя ӟечесь тодон-валанъёс но быгатонъёс басьтоно. Дышетскисьёслэсь вераськон но гожъяськон кылзэс радъян, волятон но азинтон Пиналъёслы тодоно: вераськон но гожъяськон кылъёс сярысь, соослэсь пӧртэмлыксэс, кытын кутӥськемзэс; диалоген но монологен вераськонэз, соослэсь кызьы пӧрмемзэс; текстэз, солэсь тодметъёссэ, кылдэмзэ, пӧртэм типъем но жанръем луыны быгатэмзэ. быгатоно: сётэм темая текст кылдытыны, диалоген но монологен вераськыны; текстлэсь темазэ, валтӥсь малпанзэ вераны, йыръян сётыны, текстлэсь люкетъёссэ висьяны, план лэсьтыны, планъя текстлэсь пуштроссэ учкытэк мадьыны но гожтыны; ог 60-70 кыллэсь диктантъёс, 80-90 кыллэсь изложениос, 15-20 предложенилэсь сочинение гожтыны. Лексикая тодоно: кыллэн лексической значениез сярысь; одӥг но трос валатонэн кылъёс сярысь; огкадь но пумит валатонэн кылъёс сярысь; прямой но переносной пуштросэн кылъёс сярысь. быгатоно: вераськонын котькуд кылэз шонер кутыны; трос валатонэн, переносной пуштросэн кылъёсты, синонимъёсты, антонимъёсты шӧдыны, соосты вераськон кылэ малпанэз яркыт но чебер веран понна кутыны. Фонетикая, орфоэпияя но графикая тодоно: удмурт кылысь куараосты; согласной но гласной куараосты, соослэсь пӧртэмлыксэс; куараослэн кыллэсь валатонзэ воштыны быгатэмзэс; кузэн звонкой но глухой б-п, в-ф, г-к, ж-ш, з-с, д-т, з-ч, ж-ч согласнойёсты; чурыт но небыт луись д, з, л, н, с, т согласной куараосты; котьку чурыт луись б, в, г, ж, ӝ, к, м, п, р, ф, х, ц, ӵ, ш согласной куараосты; котьку небыт луись ӟ, ч, й согласной куараосты; ӝ, ӵ, ӟ аффрикатаосты; ӟуч кылысь пырем ф, х, ц, щ куараосты; основной орфоэпической нормаосты; куараосты букваосын возьматонэз, алфавитэз. быгатоно: кылысь куараоссэ чылкыт вераны но соосты букваосын шонер гожтыны; кыллы ударение пуктыны; кылэз ёзъёслы люкылыны, куараосъя но букваосъя сэрттыны-пертчыны. Шонер гожъяськыны дышетонъя тодоно: дышетэм правилоосты но орфограммаосты; быгатоно: кылысь орфограммаоссэ адӟыны; предложениысь кылъёссэ нимаз гожтыны; предложениысь нырысетӥ кылзэ бадӟым букваен гожтыны, пумаз тупась пус (., ?, !) пуктыны; аснимъёсыз бадӟым букваен гожтыны; небыт д, з, л, н, с, т согласнойёс бӧрсьы ь, е, ё, ю, я, и букваосты гожтыны; чурыт д, з, л, н, с, т согласнойёс бӧрсьы а, о, у, ы, и, э, ӧ букваосты гожтыны; кузэн звонкой но глухой согласнойёсты кыл шорын (согласной азьпалан) но кыл пумын шонер гожтыны; висъясь ь, ъ пусъёсын кылъёсты шонер гожтыны; кыл шорын кык полэс чурыт но небыт согласнойёсын кылъёсты гожтыны; кылъёсты чурысь чуре выжтыны; кыллэн кореньысьтыз согласнойёссэ шонер гожтыны; трос лыдын существительнойёсты шонер гожтыны; послелогез существительноен нимаз гожтыны. Кыл люкетъёсъя тодоно: кыллэсь морфемной люкетъёссэ (коренез, приставкаез, суффиксэз, кылпумез); котькуд кыл люкетлэсь терминзэ, определенизэ, кулэлыксэ; огкадь коренен кылъёсты; сложной кылъёсты; выль кыл пӧрмытӥсь но кыллэсь формазэ воштӥсь суффиксъёсты; быгатоно: пӧртэм амалъёсын (суффиксъёсын, приставкаен, кык кылъёсты огазеяса) выль кылъёс пӧрмытъяны; кылъёсты люкетъёсъя сэрттыны-пертчыны; огкадь коренен кылъёсты кыллэн грамматической формаосызлэсь висъяны. Морфологияя тодоно: вераськон люкетъёсты (существительноез, прилагательноез, глаголэз, местоимениез, послелогез); котькуд вераськон люкетлэсь терминзэ но определенизэ, вераськонын кулэлыксэ; быгатоно: вераськон люкетъёсты ог-огзылэсь висъяны, соослэсь лексической но грамматической тодметъёссэс вераны; текстын существительноез но личной местоимениез кулэ лыдын но падежын, глаголэз кулэ лыдын, дырын но лицоын кутыны, существительноез прилагательноен герӟаны но послелоген кутыны; предложениысь кылъёсты вераськон люкетъёсъя эскерыны: существительнойлэсь лыдзэ но падежзэ, местоименилэсь лицозэ, лыдзэ но падежзэ, глаголлэсь дырзэ, лыдзэ но лицозэ. Синтаксисъя но пунктуацияя тодоно: предложениез, солэсь тодметъёссэ но пӧрмемзэ; предложениослэсь веран мугзыя но интонацизыя пӧртэм луэмзэс; повествовательной, вопросительной, побудительной, восклицательной предложениосты, соослэсь кызьы пӧрмемзэс но гожтӥськемзэс; предложенилэсь главной но второстепенной членъёссэ, однородной членъёссэ, куспазы герӟаськемзэс, предложениын радъяськемзэс. быгатоно: огшоры синтаксической конструкциен пӧртэм предложениос малпаны, соосты текстъёсы пыртыны, интонация ласянь шонер вераны, лыдӟыны, гожтыку интонациез тупась пусэн (., ?, !) возьматыны; предложениысь главной но второстепенной членъёссэ шедьтыны, юанъёс пуктылыса, кылъёслэсь куспазы герӟаськемзэс эскерыны, главной членъёслэсь гинэ пӧрмем предложениосты второстепенной членъёсын вӧлмытыны, предложениын кылъёсты шонер радъяны; однородной членъёсын предложениос малпаны, однородной членъёссэ куараен но союзъёсын герӟаны, гожтыку запятойёссэ шонер пуктыны; огшоры предложенилы синтаксической разбор лэсьтыны: предложенилэсь видзэ, главной (подлежащеен сказуемойзэ) но второстепенной (кыӵезэ вератэк) членъёссэ вераны, гожен пусйыны, кылъёслэсь куспазы герӟаськемзэс юанъёсъя эскерыны. Ю.Т. Байтерякова, Удмурт Элькунысь дышетон удысын национальной ужпумъёсты тодон-эскеронъя институтысь наукая старшой ужась. 4 Виктор Шибанов, УдГУ-ысь доцент ТУАЛА УЛОН: ВИЗЫЛЪЁС НО МУРКОЖЪЁС (Генрих Перевощиковлэн "Тодьы куака" романэзъя, "Сюлэмтэм дунне" повестьёсын трилогиезъя но "Шелеп" повестезъя вераськон-малпаськон) (Та урокез ортчытыку, мар ватонэз, тросэз пиналъёс вань текстъёсты лыдӟемын уз луэ ай. Но уроклы со пыкет медаз лу вылэм, ӵапак та вераськон-малпаськон бере пиналъёслэн книгаосты лыдӟон мылкыдзы мед пуромоз. Дышетӥсь понна татын сётэм материал тырмыт потэ ке, кык урокъёсты со паръяса сётыны быгатоз. Но ӝутэм ужпумъёсты одӥг уроке но тэрытыны луоно кадь). Дышетӥсь: Туннэ асьмеос удмурт писательлэн Генрих Перевощиковлэн берло аръёсы гожъям ужъёсыныз тодматскомы. Автор дано луиз "Йыбыртты музъемлы" тетралогиеныз но "Йӧвалег" дилогиеныз, кудъёсаз социализм вакытысь тужгес но лэчытэсь нравственной ужпумъёс сэрттэмын-пертчемын. Нырысетӥяз колхозлэн председателез Николай Никитин, кыкетӥяз журналист-писатель Роман Овчинников сюлмасько, кызьы калык пӧлын адямилыкез утёно? Та ужпумез радъяны гинэ ӧвӧл, таче юанлы валэктон но шедьтыны ай шуглэсь шуг, - возьматэ Генрих Перевощиков. Берло дасо аръёсы, куке улон выль ӧре пыриз, Г. Перевощиковлэн дуннешодонэз уката но азьланьтӥськиз. Тае возьмато солэн "Тӧдьы куака" (1988 - 1990, 1992) романэз, "Сюлэмтэм дунне" (1994-1998) повестьёсын трилогиез (отчы куинь повесть пыре: "Ыш-ыш-ыш", "Об-об-об", "Эх-ма-а...") но "Шелеп" (2000) повестез. Ма сярысь бен та произведениос? Кыче ужпумъёс ӝутэмын отын? Кызьы азинске но воштӥське авторлэн улонмы, дуннемы шоры учконэз? Та но кӧня ке мукет юанъёслы туннэ асьмеос валэктон утчаны кулэ. Али тодамы ваём Г. Перевощиковлэсь биографизэ (улонсюрессэ). ПИНАЛЪЁС ПӦЛЫСЬ ОДӤГЕЗ: Генрих Ксенофонтович Перевощиков вордӥськиз 14-тӥ сентябре 1937-тӥ арын Эгра ёросысь Верх-Нязь (Пирнэзь) гуртын. Чутырьысь сизьым классъем школаез йылпумъямез бере, Якшур-Бодья но Дебес педучилищеосын дышетске, 1960-тӥ арын Ижкарысь Удмурт пединститутэз йылпумъя. Ини студент дыръяз ик - 1958-тӥ арысен - Удмурт радиоын берыктӥсь луыса ужа. Улонэзлэсь дас куать арзэ радиолы сӥзе: корреспондент, егитъёслы сӥзем передачаослэн редакторзы. Собере - Флор Васильевлэн ӵектэмезъя - Удмуртиысь писательёслэн огазеяськоназы литконсультант луэ. Ар ортчыса, 1977-тӥ арын, Генрих Ксенофонтович СССР-ысь писательёслэн Союзазы куто.1978 - 1981-тӥ аръёсы, Флор Васильев бырем бере, ачиз ик та огазеяськонэн кивалтэ. Собере дас арлэсь кема - писатель-профессионал. "Йыбыртты музъемлы" тетралогиез понна Кун премия басьтэ. 1992-тӥ арын, улон кӧшкемыт-шимес луэмен, "Кенеш" журналэ интыяське. 1993-тӥ арын Венгриын финн-угор писательёслэн Калыккуспо конгрессы ортче, Г. Перевощиков но отчы пыриське. 1995-ти арын вуылэ Хельсинкие - Финляндиысь но Удмуртиысь писательёслэсь ог-огенызы кусыпъёссэс тупатон ужрадэ. Туннэ нуналъёсы Элькунысьтымы калык писатель Генрих Ксенофонтович "Кенеш" журналын ужа. Дышетӥсь: 2001-тӥ арын коньывуон толэзе (� 10, 53-61-тӥ бамъёсын) "Кенешын" Генрих Перевощиковлэн творчествоез сярысь бадӟым материал потӥз - "Тӥрен" коть "тӥртэк"..." нимаське со. Али отысь кӧня ке тунсыко малпанъёсын тодматскомы. ПИНАЛЪЁС ПӦЛЫСЬ ОДӤГЕЗ: 4-5 минут ӵоже "Кенешын" вераськемысь кӧня ке люкетъёсты (ас быръемезъя) класс азьын вера. Отын мед возьматэмын луысал, мар малпа Г.Перевощиков суицид сярысь но кызьы со "Кенеш" вузбергатон фирмаын ужаны кутскылӥз. Дышетӥсь. Нош али асьмеос Г.Перевощиковлэн выль ужъёсыныз тодматскыны кутском. Нырысь ик эскером 1980-тӥ аръёслэсь пумзэс возьматӥсь "Тӧдьы куака" романэз. Текстлэсь пуштроссэ кылзэмдыя, валэктыны тырше, малы Иван Ушаков (романысь валтӥсь герой) "дон-кихот" образэн артэ пуксе? "ТӦДЬЫ КУАКА" РОМАНЛЭН ВАКЧИЯК ПУШТРОСЭЗ: Романлэн валтӥсь героез - Иван Ушаков (со ик "тӧдьы куака") афган тылжуысь сӧсырмыса потэ. Та война солэсь синзэ трос ласянь паськытгес усьтэ но дораз, Лудовыре, бертыса, Иван пӧртэм-пӧртэм тырмымтэосын шара нюръяськыны кутске. Зэмлык капчиен вормоз кадь, угось шаерын выльдӥськон мынэ ини. Но мар борды гинэ уг кутскы (гуртысь егитъёслэсь улон-вылонзэс но шутэтсконзэс умоятоно-а, школаын удмурт кыл дышетонэз радъяно-а, колхоззылэн историяз пыдлогес пырыны тыршоно-а), Иван азе котькытын валантэм бадӟым пыкет кылдэ. Пыкет, яке Система. Сое утись адямиос вордӥськемзыя кыӵе ке укылтэмъёс я нодтэмъёс ӧвӧл, соос шӧдскымон визьмоесь но кескичесь. Сыӵе ӧй луысалзы ке, колхоз председателез Трефиловез но, районлэсь кузёзэ Кудрявцевез но, обкомлэсь секретарьзэ Опаринэз но Система ачиз кемалась паньгатысал ни. Зэмлык понна нюръяськон Иван Ушаковлы туж секыт йӧтэ ("дон-кихотъёслы" бен ку капчи вал?). Сое юнме шорысь вытрезвителе вуттыло, партиысь кушто, солы пумит газетэз узато, КГБ-ез ӝуто, психбольницае ватыло; нош бератаз, лушкаськисен ялыса, тюрьмае пукто. Выльдӥськон ке ӧй мынысал, героймы таӵе тылӝуысь ӧй потысал ни. Зэм, Иванлэн матысь эшез Толя уг чида, эшсэ "вузаса", ачиз ошиськоно луэ. "Тӧдьы куака" романысь адӟиськом: Системалэн данак гыжкалъёсыз (шуом, Опарин, следователь Данилов), ужась адямиез зӥбон политиказэс ини выль вакытлы тупась карыны, "выльдыны" сюлмасько. Писатель меӵак вера: соослэн та ужзы зол пӧрме. Валамон луэ, Иван Ушаковез соос ас сюрес вылысьтызы пыраклы палэнтоно кариськозы, шӧдске. Иван - "тӧдьы куака" - тюрьмаысь мозмытэмзы бере, воксё шыпыт улыны дась вал ини. Но табере сое калык (ужась калык!) чылкыт сюлэмо но дӥсьтӥсь луэмез понна ӝутыны кутске. Азьвыл кузёоссэ шуныт интыосысьтызы палэнтон понна, сое Трефилов интые колхоз председателе быръё. Озьы ик районын но ӝуто. Матэктӥсь быръёнъёсын райкомысь Кудрявцевез вормыса, Иван Ушаков ӝоген депутат луыны кулэ. Но... уин дораз бертыкуз сое машинаен лёгало. Катьяськоз на-а Иван яке уз-а - созэ ини романэз лыдӟыса тододы. Но, уть ай, макем капчиен "катьясько" вуж Системалэн тросэз ляльчиосыз, кудъёсыз шумпотыса дасясько шаерзэс но калыксэс шимес курадӟонэ вуттыны. ПИНАЛЪЁС: Сервантесъя тодазы ваё но верало, мае возьматэ Дон-Кихот образ. Дон- Кихот, чылкыт сюлэмо адями, мукетъёслы умой карыны тырше, но ялон юмоке шеде. Нош адямиослы, пайда интые, ӵемгес бадӟым шугадӟон сюре. Озьыен, "дон-кихот" валатонэз паськыт пуштросэн но кутыны луэ, ӵапак тае ик "Тӧдьы куака" романаз Генрих Перевощиков ӟеч возьматэ. Дышетӥсь: Романэн тодматскемъя, юан кылдэ: кызьы меда вордскиз та произведение? Вал-а прототипъёс? Малы роман тазьы йылпумъямын? Ойдолэ кылзом, мар вера та сярысь ачиз Генрих Ксенофонтович. Та ласянь "Вордскем кыл" асьмелы умой луонлык сётӥз. Г.К. ПЕРЕВОЩИКОВ: "Афганистанын ожмаськон монэ, трос мукетъёссэ кадь ик, кутскем дырысеныз шугъяськытӥз. Валасько вал, газетъёс но, радио-телевидение но зэмлыкез уг верало. Огпол, Вавоже мыныкум, Афганистанысь сӧсырмыса вуэм егит солдатэн пумиськыны-вераськыны кылдӥз. Ӵапак со ик мынэсьтым синъёсме усьтӥз. Солэн сюлэмшугъяськемез романэ меӵак пыриз ке но, та пияш Ушаковлэн прототипез луиз шуыны уг быгатӥськы. Соку мыным оглом валамон луиз: косъяськон-приказъяськон (командно-административной) Система, Афганистанэ чуртнаськыса, нош ик туж бадӟым янгыш лэсьтӥз. Малы "нош ик" шуисько? Та системалэсь умойтэм дауртэмзэ мон "Йыбыртты музъемлы" тетралогиям ик возьматӥ ни вал - гурт улонэн герӟаськем палзэ. "Йӧвалег" дилогиям - мукет палъёссэ. Но Системалэн со сяна но сьӧлыкъёсыз ӧжыт ӧй вал, выльдӥськон кутскыса, со уката валамон луиз. Соин валче йырам малпан кылдӥз: талэсь вань шӧгзэ-кузьытсэ одӥг произведениын рос-прос возьматоно вылэм. Ушаковлэн сямен ик, кивалтӥсьёслэн но кисьтэм-басьтэм прототипъёсы татын ӧвӧл, соос - огъям (обобщенной) образъёс. Малы роман озьы йылпумъяське. "Берло веранзэ" ке шуоно, та романэ 1990-тӥ арын йылпумъямын ни вал, нош "Кенеш" журналын со кык ар улыса гинэ печатласькиз. Та дыр куспын кунамы бадӟым воштӥськонъёс ортчизы. Улонмы воксё мыдланес луиз но, сое пичильтык ке но возьматытэк кельтыны мон ӧй быгаты - тӥни озьы берло веран кылдӥз". (Г. Перевощиков). Дышетӥсь: Пиналъёс, эн малпалэ, Генрих Перевощиков азьло социализм вакытэз быдэсак сьӧд буёлъёс пыр гинэ адӟе шуыса. Писатель вера, отын трос ӟечез но вал, уката ик пиналъёсты дышетон-будэтон удысын. Ма, Ижын, пе, ваньмыз сямен школаос, улон юртъёс, эмъяськонниос, нылпи садъёс, трамвай-троллейбус сюресъёс но трос мукетыз соку лэсьтэмын вал. Нош али угось, "демократия" кузёяськыку? Асьсэлы, узыръёслы, банкъёс, "дворецъёс", офисъёс сяна, тыро-пыдо мар лэсьтӥське? Нош лушкаськисьёс, бомжъёс, наркоманъёс, чильтробер нылъёс, ужтэк кылемъёс, йырвандӥсьёс, кураськисьёс - ку таӵезэ адӟылӥськиз? -- шуэ Генрих Перевощиков. Нош тӥ, пиналъёс, мар малпаськоды та пумысен? Г. Перевощиковлэн мукетыз выль ужез - "Ыш-ыш-ыш" повесть -лыдӟисьёсты "Горбачев вакытысь" "Ельцин вакытэ" выжытӥз. Улонын бадӟымесь воштӥськонъёс ортчизы, шаермы пӧрмымтэ социализмысь пӧрмостэм капитализме зымиз. "Ыш-ыш-ыш" бере сокугес ик "Об-об-об" но "Эх ма-а..." потизы, огазьын соос "Сюлэмтэм дунне" нимо трилогия кылдытӥзы. Али, текстъёслэсь вакчияк пуштроссэс кылзыкуды, тыршелэ асьтэ понна валэктыны, малы тазьы - междометиос пыр - нимамын повестьёс но кызьы со нимъёс текстын ӝутэм ужпумъёсын герӟаськемын? "СЮЛЭМТЭМ ДУННЕ" ТРИЛОГИЛЭН ВАКЧИЯК ПУШТРОСЭЗ: Экономика куашка, калыклы уждун уг тыро, данаксэ ужысьтызы улляло - кызьы быгатозы, озьы ик, пе, мед улозы. Со дыре ик вылӥ кивалтӥсьёс (ваньбур поттон юскиськемын ке но) осконтэм бадӟым барышъёс потто но узырмо. Куать аресъем Нюралэсь атайзэ но ужысь уллязы. Кытчы пырыны тодытэк, со ассэ быдтэ - балконысен асфальт вылэ куштӥське. Ӝоген Нюралэсь анайзэ Тамара Михайловнаез но кивалтӥсьёсын даллашемез понна заводысь тузо. Егит анаен пичи ныл шимес югдуре шедё, соослэн сиён-юон басьтыны но коньдонзы ӧвӧл ни. Соку Нюра амал шедьтэ: анаезлэсь лушкемен ульчае кураськыны потэ (со ик семьяез быронлэсь уте). Повестез лыдӟисьес куать аресъем нылашлэн синмыныз "ельцин вакытысь" воштӥськонъёслэсь емышъёссэс котыр ласянь адӟыны но веръяны быгато. Кытчы гинэ уг вуы (фирмачъёс доры-а, кар кивалтӥсьёс дӥне-а), Нюраез возысьтызы ултӥяса улляло. Ма, эшъёсыз но сое весь серекъяло, мыскыллясько. Бен муминыз но. Одӥг пересь кураськись гинэ пичи нылашлы берпум нянь юдэссэ уг жаля... ("Ыш-ыш-ыш") Но тани чылкак ёрмем Тамара Михайловна кема уж утчамез бере одӥг фирмае интыяське. Гуртын будэм удмурт кышномуртлэн татын бадӟым быгатонлыкез шараяське. Дӥськут но пыдкук вузан удыс сокем умой радъяське - фирмаын Тамараез гажаны кутско, солы йӧн ужъёсты оско. Озьы ке но, улонэз каньыл уг ӧръяськы. Номыр мукетсэ вератэк, Тамара фирма кузёлы - "зӧкметлы" - дусым луыны кулэ. Улыса- вылыса со аслэсьтыз сямзэ, кужымзэ возьматыны дӥсьтэ. "Зӧкметмы" соку ик аслыз выль дусым шедьтэ но Тамараез улля -- уждунзэ но тырытэк. Со вакытэ ик мукет ласянь но кышкыт югдур кылдэ: пичи Нюра одӥгзэ азьвыл ултӥясьсэ (анаезлэсь кузёзэ) тодма но мытылыны кутске. Зӧкмет таяз учыре Нюраез сыче зол ӵыже - сое больницаын но утьыны туж шуг ини - со понна трос коньдон кулэ. Кытысь нош? Азьвылэнгес - ассэ, табере - каргам "зӧкметэз" быдтыны быгатымтэ Тамара Михайловна, копак шузимон калэ вуыса, психбольницае шеде. ("Об-об-об"). Нюралы но анаезлы секыт югдурысь потыны Сергей Бушмелев, "зӧкметлэн" азьвыл телохранителез, юрттэ - эмъяськыны но операция лэсьтыны коньдон шедьтэ. Сергеен Тамара ог-огзэс ярато, кузпалъясько. Нюра но талы туж шумпотэ. Но городын йӧнала уж шедьтытэк, семья гуртэ улыны выже. Соос фермеръёс луо. Ваньмыз умой радъяськиз кадь. Но тае тодэм "зӧкметлэн" азьвыл юрттӥсьёсызлы йыркурез сокем зол уртче - соосты кир-пазь карыса, ваньбурзэс киултоно кариське. Йӧнала корказэс но. Мафиен герӟаськыса, Сергеез сыӵе зол жугыса возе - соиз чидатэк вань кагазъёс улэ тани-тани гожтӥськоз ни кадь. Но Бушмелев уг сётӥськы, соин ик сое виё. Тамара Михайловнаен Нюра нош ик верантэм кайгуэ усё. Шедьтозы на-а соос азьланезлы кужым, ӵуказелы осконзы воксё уз кыс-а?.. ("Эх-ма-а...") ПИНАЛЪЁС вылӥын сётэм юанлы валэктон утчало: "Ыш-ыш-ыш" - та междометие возьматэ, макем кезьыт луиз адямилы дунне вылын (татын ик Нюралэн ульчаын кынмыса сылэмез), "Об-об-об" -- макем вӧсь луиз солы (вылаз ик, кыкез геройёсмы туж секыт висьыса больницае сюро), нош "Эх- ма-а..." - со курыт лулӟон, зэмлыклэн кужымезлы осконтэмен пыӵам мылкыд. Дышетӥсь: Пиналъёс, "Сюлэмтэм дуннелэн" тужгес бадӟым аспӧртэмлыкез тани мар бордын: Генрих Перевощиков валэктыны тырше, малы туала город удмуртъёсты мурт каре. Угось асьмеос туала городэ интыяськыны ӧм быгатэ ке, соку ӵуказе нуналмы понна нюръяськыны, бадӟым вожвылъяськонын (конкуренциын) вормыны ум быгатэ. Но урбанизацилэн мукет кышкытлыкез вань - со удмуртлыкмес котьку но быдтыны, ӟучомытыны тырше. Али ӧйдолэ нош ик аслыз писательлы вазиськом: Генрих Ксенофонтович, кызьы дуннеямы "зӧкметъёс" кылдо? Кыче соослэн психологизы? Асьтэос соосын пумиськылӥды-а? Г. ПЕРЕВОЩИКОВ: "Кызьы кылдо? Дунтэк басьтыса я лэсьтыса (зэм, лэсьтыса тросэз ик уг курадӟо), дуно вузало. Азьвыл соосты спекулянтъёс шуо вал. Одӥг гинэ пример. Эмъяськонниын мыным сыӵе-сыӵе антибиотик пуктылоно (укол) шуизы, мын, пе, аптекаысь басьты. Бордам тыро-пыдо коньдонэ ӧй вал бере, одӥг пол пуктымон гинэ басьтӥ - 25 манетэн. Доре бертыкум, мукет аптекае пыроно кариськи. Нош отын со ик - 4 манет но 60 коньыен! Но... мыным та чик осконтэм йӧтӥз. Шуисько: "Тады сӧриськемын, дыр, даурез ортчемын". Ӧвӧл, пе. Тазьы луэм: та эмъюмез мукет аптекаысь (созэ ворсаллям, кивалтӥсезлэн сьӧлыкъёсыз шараяськиллям) ас дунэныз вузаны ваиллям. Валады ини: со кивалтӥсь огпол пуктымон эмъюм понна гинэ 20 манет табыш поттэ вылэм... Шонерзэ вераса, котькуд басьтон-вузан удысын озьыгес. Эшшо кызьы "зӧкметъёс" кылдо? Калык ваньбурез (заводъёсты но!) капыртыса-киултыса (прихватизировать карыса) но отысь огшоры ужасьёслы пичилэсь пичи уждун тырыса. Бен мукет амалъёс но вань. Психологизы кыӵе? Узырмон, ӵуказе туннэлэсь тросгес коньдон (табыш) поттон. Котькыӵе амалэн. Мукетъёсты лёгаса но, взятка сётыса но, люкетӥсьёссэ виыса но. Валамон, сыӵе дыръя возьытлык сярысь уг верасько. "Шелеп" повестьысьтым Вечес (Соловьевлэн пиез) юнме уз шуы: "Возьытлык - вужмем валан. Кепыраса улӥ ке, мынам фирмае арняскын ӝуалоз но, штантэк кылё". Ваньмыз та пумысен эшшо куд-ог малпанъёсме "Кенеш" журналысь (2001, � 10) лыдӟыны быгатоды". (Г. Перевощиков). Дышетӥсь. Пиналъёс, асьмеос вуимы Генрих Перевощиковлэн "Шелеп" повестез борды. Печатласькиз со 2000-тӥ арын "Кенеш" журналын. Текстлэсь вакчияк пуштроссэ кылзыса тыршелэ валэктыны, маиныз та произведение азинтэ Генрих Перевощиковлэсь кык азьвыл ужъёссэ? Чаклалэ: татын геройёсыз но мукетэсь ни, югдуръёс но. Нош озьы ке но, куинь текстъёс куспын маке огазеясез но вань. Мар но мар? "ШЕЛЕП" ПОВЕСТЬЛЭН ВАКЧИЯК ПУШТРОСЭЗ: Выльдӥськон ортчемъя калык ваньбурез тус-тас карем кивалтӥсьёс сиё-дано усточиосты но ныг-пог каро ини. Кун премилэн лауреатэзлы Андрей Соловьевлы гожъяськемез понна гонорар тырем ӧвӧл, книгазэ поттыны но коньдон уг висъяло. Соку со книгазэ ужбергатӥсь фирма пыр поттоно кариське. Но таин валче сокем зол ӵуштаське - Андрей Васильевичлы, тюрьмае пуксёнтэм понна, туж трос коньдон шедьтыны кулэ. Кытысь?! Вылӥ "юлтошъёсыз" но, мукетъёс но солы мышкин берытско. Эсьма, ас пиез гинэ но - кужмо ужбергатӥсь (шонергес: коньдонбергатӥсь), атайзэ пытсэтлэсь мозмытыны пумит кариськиз. Лидия Григорьевна пиез сярысь таӵе иворлы нырысь-валысь ӧз оскы. Но собере, сыӵе мыскылэз-возьытэз чидатэк, ассэ ачиз быдтӥз. Андрей Соловьев чолак огназ кылиз. Шуг-секытысь потон понна, со аслэсьтыз квартиразэ вузано кариськиз. Книгапоттоннилэн кузёеныз тупатскиз ке, пичизэгес патер басьтэмез луоз на, оскытскиз со. Но Андрей Васильевичлы выльысь уг удалты: квартира вузам коньдонзэ олокинъёс лушкало. Озьы куке но сӥё-дано адями патерчи- пыдйылчи луэ. Улыса-вылыса, вань уксёез бырем бере, со воксё липеттэк кыле но из юртъерлэн муржолаз (подвалаз) улыны кутске. Серекъяса, гажаса но мыскылляса одӥгез сое Робинзон шуэ, мукетыз - Романтик. Вань кылем "узырлыксэ" сутэмзы-кайпалтэмзы бере Соловьев корка сиге каръяське. Сиёнэз но табере куяськон бакъёсысь шедьтэм мылесъёс гинэ луизы. Зэм, тырттэм ӟенеликъёс октыса, маке-маке басьяськылӥз на. Отысь ик - куяськонниосысь - дӥськут нерге но шедьтылӥз. Ма, адями озьы улыны быгатэ шат? Быгатэ ке, адями на-а со? Оло, ӧвӧлтэм бочы, пыд ул силё гинэ? Мае но адӟоно, мае но чидано оз лу улон пыдсы тюам Соловьев! Татысен со умой валаз, макем улӥе усьыны быгатэ вылэм адями, кыӵе катъёс табере асьме дуннеын кузёясько. Бен мукетсэ но: "куяськон бак" котырын жугиськисьёслэн но, муржолъёсын групповой секс пӧрасьёслэн но ымныръёссы ӵапак сыӵеесь ик, кыӵеесь соос кун кивалтӥсьёслэн но, выль улонэз бергатӥсьёслэн но. Кин тодэ, кызьы радъяськысал геройлэн азьпал улон-вылонэз, но тани солэн йӧнтэм кайгуо, векан сюрес вылаз Светлана нимо дышетӥсь кылдӥз... ПИНАЛЪЁС: Вылӥын сётэм юанлы валэктон утчало. Соос тани мае но мае мед адӟозы вылэм. 1. Азьло сямен ик, азьпал радэ потэ "чылкыт сюлэмо адями - шимес дунне" конфликт. Шимес дунне сыӵе адями азе вылысьтыз вылаз пыкетъёс пуктылэ, но соиз сётскытэк азьлань мыныны турттэ. 2. Азьвыл текстъёсын сямен ик, "Шелепын" но пумиське астэ быдтон (суицид). Та ужпум Г. Перевощиковлэн гожъямъёсаз - одӥгез валтӥсез. Пиналъёс мукетъёссэ но огазеясь тодметъёсты висъяны быгатозы. Дышетӥсь. Ойдолэ нош ик аслыз писательлы юанъёсын вазиськом: Вань-а Соловьёвлэн прототипез? Малы повестьын валтӥсь герой луиз писатель? Писатель-бомж туала вакытэ типичной ӧвӧл кадь ук? Г.К. ПЕРЕВОЩИКОВ: "Пумысеныз валэктыны кутско. Тазьы юаса: мынам романъёсысьтым, повестьёсысьтым тросэз-а валтӥсь геройёс типичноесь вал ини? Оло, "Йыбыртты музъемлы" тетралогиысь Николай Никитин? Но огез критик со сярысь шуиз: кызьы, пе, коммунист, семьяез вань вылысь, мукет нылмуртэ яратоз, вань-а сыӵе правоез? Вылаз ик, та коммунист партилэн планъёсыз шоры ожалске. Сыӵе мурт соку дыръя типичной вал шат? Нош "Йовалег" дилогиысь Роман Овчинниковен Рина? Яке, шуом, "Тӧдьы куака" романысь Иван Ушаков, "Ыш-ыш-ыш" повестьысь Нюра, "Эх-ма-а"-ысь Сергей Бушмелев? Ас вакытазы я гожтон вакытам огзы но соос типичноесь ой вал. Соин ик куд-огез понна критикъёс но, ӟеч малпаськыны яратӥсьтэм я критикъёсын йыромытэм дышетӥсьёс но (ма, вылӥ кивалтӥсьёс но), произведениосылэн кылзы понна кадь ик, монэ ичи ӧз "жуге" ни. Пӧлысьтызы тросэзлэсь (Никитин, Овчинников, Ушаков, Бушмелев) - улонэз мур валась я валаны тыршись, кӧня ке вамышлы ке но азьпаламы мынӥсь адямиослэсь - пӧртэм ласянь адӟем карыны луэ ке но. Соин ӵош ик та геройёс соосын огмылкыдо, огкадьгес югдуръёсы шедем адямиос пӧлын - типичноесь. Яке, дыр ортчемъя, данак мукетъёс пӧлын но (шуом, Нюра). Табере - Андрей Соловьев сярысь. Огласянь, со зэмзэ типичной ӧвӧл: огез но тодмо писательмы воксё со калэ ӧз вуы на кадь (озьы бере, прототипез но ӧвӧл). Но сыӵе шимес адӟонэ вуэм муртъёс пӧлын та бомж - Андрей нимо адями - типичной. Солэсь ортчыт, -- миллионъёсын векамон начармытэм, вылӥ кивалтӥсьёслы кулэтэм луэм дышетӥсьёс, врачъёс, рабочийёс, тодосчиос, пенсионеръёс пӧлын но. Озьы бере, Соловьев интыын туала вакытэ врач но, дышетӥсь но, мукетыз но луыны быгатысал. Озьы ке но, валтӥсь герое писателез бырйи. Малы? Нырысь ик, писательлэн ужез, улон-вылонэз, сюлмаськонъёсыз мыным матынгес. Собере, оло, янгышасько, но писатель адямиослэсь сюлэм-лулпуш висёнъёссэс но, обществолэсь висёнъёссэ- яраоссэ но ӟечгес шӧдэ кадь потэ, улонмылэсь пӧртэм-пӧртэм палъёссэ мур бугыртыны быгатэ. Мынам озьы пӧрмиз шуыны уг турттӥськы - зэмос писатель шоры кыӵе синмын учкемме но писателез герой карон мугме гинэ верасько" (Г.Перевощиков). Дышетӥсь (уроклы йылпумъян лэсьтэ, валтӥсь малпанъёсты тетраде вакчияк гожтытэ). Г. Перевощиковлэн берло куинь произведениосыныз тодматскыса, асьмеос таӵе малпанэ вуиськом: Г. Перевощиков котькуд выль ужаз котьку выль сямен валаны тырше, кудпала туала улонмы мынэ (куке кемалась ортчем исторической учыръёс отын валтись инты уг басьто). Мар со туалалык, кыӵе солэн тодметъёсыз, визылъёсыз но муркожъёсыз? "Чылкыт сюлэмо адями - шимес даур" ужпум котьку но лэчыт, огъя дунне мертэтъёсозь вуттыса возьматэмын. Кызьы таӵе мыдланес вакытэ адямилыкез утёно? - писательлэн гожъямъёсаз валтӥсь юан. Г. Перевощиковлэн мукетыз валтӥсь аспӧртэмлыкез - удмуртъёс пӧлын урбанизация но суицид ужпумъёсты (чеберлыко литература амалъёсын) эскерон бордын. Туала городэ интыяськон капчиен уг ортчы, геройёс лул-сюлэмысьтызы троссэ умойзэ ыштоно луо, кудӥз-огез улонэныз но люкиське... Пиналъёс, туннэ урокмыя кыче юанъёсты кылдӥзы? Гуртэ уж. Таче юанъёсъя-ужпумъёсъя асьтэлэсь малпанъёстэс тетрадяды вакчияк гожтэ: 1. Шаерысьтымы кыӵе социальной, политической но экономической ужпумъёс сэрттэмын-пертчемын Г. Перевощиковлэн берло произведениосаз? 2. Маиныз тӥледлы кельше Иван Ушаков (яке Сергей Бушмелев, яке Андрей Соловьев), нош маиныз - уг? 3. Кыӵе но кин луоз, тӥ сямен, Нюра, бадӟымгес будӥз ке? Дышетӥсь. Оло, аслыз Г. Перевощиковлы но юанъёстэс, ас малпанъёстэс ыстэмды потэ? Мар бен, со туж умой луысал. Генрих Ксенофонтович соослы одно ик вазиськоз - почта пыр яке газет-журналъёс пыр. Но эн вунэтэ: юан сётэмлэсь азьло, одно ик нырысь книгаоссэ лыдӟоно, сотэк, мон сямен, юанды тунсыко но пайдаё уз пӧрмы. Писательлэн Ижкарын улон адресэз таӵе: 426000, Ижкар, Карл Маркс урам, 405 номеро юрт, 4-тӥ кв. ПС. Генрих Перевощиков - дышетӥсьёслы но дышетскисьёслы. "Литературая дышетӥсьёслы али эрик сётэмын - куд-ог урокъёсын программае пыртымтэ произведениосты но эскерыны луонлык. Та гожъямъёсме кӧняез ке коть дышетӥсьёс урокъёсазы сэрттысалзы-пертчысалзы ке, мон туж шумпотысал. Малы озьы шуисько? Удмурт университетысь тодосчиос-дышетӥсьёс отчы дышетскыны пырисьёслы удмурт литературая программа дасяллям но отын нимме ик поттылӥллямтэ - югыт дуннеын сыӵе гожъясь ик ӧвӧл кадь". 1 БУДОНО ӦЖЫТ Дыртытэк Кылъёсыз Лидия Черновалэн Крезьгурез Александр Петровлэн Лымыпог ке лымыпог Генямы копак. Лымыен тырмем сапег - Тол Буба ӵапак. Кезьыт тӧл бамаз йӧтскем, Нырзэ чепыльтэм. Синкашез юг-юг гӧртэм - Геня сэзь, чырткем. Гурезе, шуэ, тубай, Ой-ой! Туж ӝужыт! Альпинист, пе, луо ай, Будоно ӧжыт. ТУЛЫС ЗОР Тулыс зор, Шуныт зор Шы-ыр! Кисьтэ Нырысьсэ. Пурысьтам музъемлэсь Со гылтэ Тыбырзэ. Тулыс зор, Шуныт зор Кечсинэз сайкатэ. Со кечсин сяськаед Синъёсты мальдытэ. Инкуазед вожектэ, Инкуазед выльдӥське. Сяськаё выль дӥсен Шуныт май йыгаське. ДЕТСАДЭ Мишилы тырмиз толон Куинь арес. Детсадэ, пе, мон ветло Табере. Мисьтӥськиз Миши сюлмо - Гажалод, Ымнырыз ӵыжыт улмо Кожалод. Одӥгназ ик кутчаськиз Со туннэ, Одӥгназ ик дӥсяськиз Шып гинэ. Шудонъёсыз лач кыллё Понназы, Огназы туннэ кылё - Мӧзмозы. КРЕЗЬЧИ Чебер вӧт адӟе Люба: Лэйкаса крезьгур лоба... Атаез ушъя кожа, Тыбырзэ гып-гып веша: - Ну, Люби, тынад талант! Луод быдӟым музыкант. Киосаз кожа скрипка - Собере шарак сайка... Кин ай шула сыӵе сэзь? Ой, лэйка ук чебер крезь! Со шырчик вуэм, шырчик! Тӥни кин вылэм крезьчи! 3 Ворпошуд (шудон-ӵошатскон) Борддоре ошемын вуюисез син азе пуктӥсь яркыт суред. Солэн турлы буёлъёсызъя дасяно фишкаос. Воспитатель. Пиналъёс, асьмеос туннэ вуюись доры мыноме, оло кин ке шудзэ шедьтоз. Юнме калыкын уг шуо: "Вуюись доры пал пыд йылаз тэтчаса вуид ке, со тыныд шуд сётоз". Нош со понна олокыӵе шуг-секытъёсты палэнтоно луоды, инкуазез утён но эскерон понна, пӧртэм юанъёслы шонер валэктонъёс сётоно. Огкылын вераса, шудон-ӵошатскон пыр пичияк визьёсмес сыналом. Дасесь-а тӥ? 1. Нырысь ик тэтчаса потоно луоз паськыт канава вамен. Кин ӧз быгаты, со азьлане уз мыны. 2. Кыӵе тылобурдо пыд улысьтымы лобӟыса кошкиз? (Суред возьматоно. Кин шонер валэктон шедьтӥз, солы горд фишка сётӥське). 3. Нош таиз кин? - Эбек. Малы кулэ соос? - Эбекъёс будосъёсты быдтӥсь нымы- кибыосты сиё. Садъёслы, бакчаослы бадӟым пайда ваё. (Кинлэн горд фишкаез вань ке, солы сётӥське мытӵужез, нош кинлэн ӧвӧл - гордэз). 4. Пал пыд йылын тэтчаса вуоно кызьпу доры. Кин нырысь ик вуиз, солы нош ик фишка сётӥське. Горд, мытӵуж, яке ӵуж, яке мукет буёлоез. 5. Кызьы шуо кызьпулэсь тӧдьы дэремзэ? - Туй. 6. Та трубаетӥ ялан сьӧд ӵын потыса улэ, вань омырез кырсёмытэ, сьӧдма. Кин сое погыртоз? (Трубаез уськытоно тупен лэзьыса). 7. Кыӵе будос, тылобурдо, губи нимъёс герӟаськемын шыр кылэн? - Шырбыж (подорожник), шыркӧжы (мышиный горошек), шырсяська (анютины глазки), шырпель (медвежье ухо), шыр душес (пустельга), шыр кучыран (лунь полевой), шырчик (скворец), шыргуби (сыроежка). Воспитатель. Ох, кыӵе шулдыр нюлэс куше вуим! Нош таӵе ӵыдонтэм интыос быдтэмын жуг-жаг куяса, ма гинэ татын уг лошъяськы! Нылпиос, ойдолэ ваньмы ӵош бичаламы сое. Нюлэсмы шулдыр, чебер мед луоз. (Шедьтыса верано инкуазьмес, шулдыр нюлэслэсь кырсёмытӥсь кылъёсты: бутылка, банка, пакет, корт, коробка но мукет). Котькуд юанлы шонер валэктэн понна, нылпиос басьязы пӧртэм буёло фишкаос. Кин нырысь ик вуюисьлэн буёлъёсыныз люказ 7 турлы фишка, со ик луэ самой шудоез но басьтэ кузьым. Шудонэз азьланьтыны луоз та выллем ик пӧртэм юанъёс сётъяса. Озьы покчи пиналъёс ваньзэ асьсэос адӟыса, бӧрысь вераны быгато ни: кызьы инкуазез чебер кароно, утёно но эскероно. 1 Р.П. Герасимова, Пичи Пурга ёросысь Гожня школаысь удмурт кылъя но литературая дышетӥсь. Г. Даниловлэн "Пиез дорын куноын" веросэзъя урок. Нырысь ик тодматсконо Г. Данилов писательлэн улон но творческой сюресэныз, собере гуртын улӥсь но ужась кышномуртэ ултӥяны пумит гожтэм веросэныз; нимысьтыз пусъёно писательлэсь удмурт дӥськутлэсь чеберзэ возьматэмзэ, шедьтоно Марпа апайлэсь секыт мылкыдзэ, куректонзэ усьтӥсь амалъёссэ. Кулэ луоз: 1. Г. Данилов кылбурчилы, прозаиклы, дышетӥсьлы, шаерчилы сӥзем бордгазет поттыны. 2. Г. Даниловлэн таӵе книгаосыныз выставка радъяны: Кыл дуннее - куное. - Ижевск, 1974. Ӵуказе лыктоз: Веросъёс, - Ижевск, 1978. Усьыло ӵужектэм куаръёс: Веросъёс. - Ижевск, 1981. Чагыр сюрес / Соавт. А. Леонтьев. - Ижевск, 1974. Табань сиён нуналэ: Кылбуръёс но выжыкыл - поэма. - Ижевск, 1988. Кырӟамтэ кырӟан - Ижевск, 1991 Можга - Ижевск, 1976. 3. Г. Данилов сярысь гожъям ужъёсын выставка: Писатели Удмуртии: Библиографический справочник. - Ижевск, 1989. Белоногов Н. Вань яратонзэ нуиз сьӧраз. - Кенеш, 1995, 2. Вичужанин А.Г. Стало домом родным: Очерки. - Ижевск, 1993. 4. Вашкала но туала удмурт дэремъёсын выставка ортчытыны. Уроклэн мынэмез: И. Дышетӥсь: Туннэ ужалом Г. Даниловлэн "Пиез дорын куноын" веросэз бордын, тодматском Григорий Даниловлэн улон но творческой сюресэныз. Г. Данилов сярысь. Со мынам удмурт кылъя но литературая дышетӥсе. Ужаз Можга педучилищеын. Удмурт пединститутэз йылпумъямез бере, нуылӥз литературной кружок. Тыршиз Можга ёрос газетын но. Печатламын книгаосыз. Куд-огъёсыз та выставкае но поттэмын. Гожъяз со нылпиослы но, егитъёслы но. Веросъёсаз возьматэ пиналъёслэсь куспазы эшъяськемзэс, ог-огзылы но бадӟымъёслы юрттэмзэс. Геройёсыз пыр дышетэ ужез сюлмысь яратыны, пӧяськисьтэм оскымон адями луыны. Вераськон ӝутэ урод сямъёслы пумит ( Дышетӥсь лыдӟе "Хваличкын" вероссэ). Г. Данилов гожтӥз Можга сярысь книга но. Туннэ асьме дорын куноын Г.Д. Данловен ӵош ужам мурт - Р.Ф. Березин, со кема аръёс тыршиз дышетӥсьёслэн тодон-валанзэс будэтонъя институтын. Вал удмурт кафедралэн кивалтӥсез, солы кыл сётоме. ( Р.Ф. Березин маде тодэ-ваёнъёссэ). ИИ. "Пиез дорын куноын" веросэз шара лыдӟон. Лыдӟо пиналъёс пичи люкетъёсын. Валэктоно кылъёс доска вылэ гожтэмын: нялтас - попутной разъезд - поезд дугдон инты мыскылляськем выллем - серекъяны, ултӥяны, мыскыл (сермес карыны), мактаны, макталляны - унижать, оскорблять, насмехаться. кунокуа кышно - юрт кузё кышно гольтыръяськыны - вукылэс вырон, вукылъяськон куа - 1) (тылыс); 2) (вӧсяськон корка) этика - греч. - обычай, нрав, характер этикет - фр. - установленный порядок поведения где-либо культурной - лат. - возделывание, воспитание, образование, развитие, почитание бефстроганов - сиёнэз лэсьто тазьы: сӥлез векчи вандо, собере нош ик векчи юдо (лапша кадь), сугонэз жарить каро, дасям сӥлез 2-3 минут вӧй пӧлын пӧзьто ӝог тыл вылын, собере пызен пызьнало, сурало сугонэн, ватсало перец, помидор, йӧлвыл, сылал, быректыто, сёто картошкаен. 0,5 кг сӥльлы - 3,4 стакан йӧлвыл, 2 йыр сугон, 1 пуньы пызь, 3 пуньы вӧй. Кыӵе кылъё валантэмесь? (Эскериськом доска вылэ гожтэм кылъёсты) ИИИ. Веросэз эскерон: - Пиналъёс, али асьмеос веросэз лыдӟим, кызьы малпаськоды, кыӵе ужпум пуктомы азямы, мар сярысь вераськомы? Пиналъёс мадё. Дышетӥсь: Табере ужалом устно ( выазительно) лыдӟон бордын; - эсером, кызьы кунояз анаез пиез дорын; - вераськом удмурт дэрем сярысь; - эскром, кинэ культурной адями шуо но мукет. - кин сярысь вераське веросын? - малы верослэн нимыз "Пие дорын куноын"? - кызьы кунояз анаез пиез дорын? - Сергей пумита анайзэ. Учком сценкаез. Дасяське вераны анай но Сергей сярысь малпандэс. (Семакина Г. но Зайцева В. сценка пукто). Дышетӥсь: Кызьы куное лыктэ анай? - Кызьы пумита анайзэ Сергей? - Нош кызьы учко удмурт дэрем шоры Гожня но Алганча-Игра гуртъёсын? Петрова Аня, Ботникова Настя но мон дасям вал юанъёс. Эскерон ортчытӥзы нылъёс. Кыӵе меда малпанэ вуизы пинал "тодосчиосмы"? Дасямы вал таӵе юанъёс: - Удмурт нылкышно кыӵе дӥсен чебер? - Удмурт дэремен анайдэс ветлыны лэземды потэ-а? Нылъёслы юан: - Кыӵе дӥсен яратӥськод ветлыны прздникъёсы? - Ужаны? - Гуртын? - Кызьы дӥсяськем нылкышноос чебер пото? - Сюан дыръя выль кен удмурт дэрем дӥся ке, вожед потэ-а? - Потэ-а ветлэмед удмурт дэремен? - Маин аспӧртэмлыко Гожнялаослэн дэремзы? (Власова Н. юалляськиз песянайёсызлэсь но вера та юанлы). - Кыӵе дэрем нулло Алганча-Играын? (вера Васильева Л.). Та кык нылъёс выставкае ошем дэремъёсыз возьматыса верало. Дышетӥсь ватса: пӧртэм интыын дӥськутлэн пӧртэм луэмез сярысь С. Виноградовлэн "Удмуртская одежда" книгаяз гожтэмын. (Возьматэ туала удмурт дэремъёсыз пӧртэм суредъёс, туспуктэмъёс вылысь). "Туклячи но кунокуа кышно" сценка пукто Мартынова Н. но Бекмачева О. Класслы юан: - Кин культурнойгес та кышномуртъёс пӧлысь? Малы? "Марья апай но тодмотэм пиосмурт" сценка пукто Данилова В. но Малышев К. Класслы юан: Ма вераны луоз таосыз геройёсмы сярысь? - Автор кыӵе амал кутэм улонысь учырез оскымон возьматон понна? (Диалог). Гуртэ уж: Юалляське дорады, кыӵе муртэ культурной шуо меда? 2. Библитеакысь утчалэ культура, этика, этикет сярысь книгаос но лыдӟелэ. Урокъя йылпумъян лэсьтон: - Кин янгыш анайлэн тазьы кунояны ветлэмез понна? - Ма муген гожтэм меда Г. Данилов таӵе верос? Нылпиос юанлы верало, дышетӥсь ватсэт лэсьтэ ... 1 В.Н. Годунова, Алнаш гуртысь черкогуртысь "Родничок" нылпи садын ужась. Вордӥськем шаермы Ӵук шудон Шулдыр удмурт кырӟан гур чузъяське. Пиналъёс но анай-атайёс ваньзы ӵош удмурт дӥсен дӥсяськыса залэ пыро. 1 пинал. Мар дунне вылын Котьмарлэсь дуно? Котькытчы но мын Солэсь мӧзмоно? 2 пинал. Мар дунне вылын Котьмарлэсь чебер? Со одӥг кылын - Вордӥськем шаер. Ф.Пукроков 3 пинал. Туж шулдыр вордӥськем гурт палмы, Мар меда вань солэсь чеберез! Вож тэльмы, бусымы, возь вылмы Вырӟытэ, шумпоттэ мылкыдэз. 4 пинал. Гурт пумын туж ческыт ошмесмы Уй-нунал дугдытэк жильыртэ. Со вадьсы мыкырскем вож бадьпу Тау карон кылъёссэ шыпыртэ. А.Уваров Шудонэз нуись. Туннэ асьмеос огазе люкаським вордӥськем шаермы сярысь вераськыны, удмурт кырӟанъёс кырӟаны, эктонъёс эктыны. Нош тӥ тодӥськоды-а, кызьы нимыз асьме селомылэн? Алнаш сярысь кырӟан кылзэмды потэ-а? (Воспитательёс но анай-атайёс Алнаш сярысь кырӟанэз кырӟало). Нуись. Пиналъёс, нош тӥ удмурт сямен кырӟаны быгатӥськоды-а? Кырӟало "Шур" кырӟанэз. Кылъёсыз И.Ивановлэн, крезьгурез Н.Постниковлэн. Со бӧрсьы ик кылӥське удмурт эктон гур. Нуись. Нош таиз кыӵе гур? Ма карыны со ӧте? Эктыны-а яке кырӟаны-а? Быдэсто "Ширъян" эктонэз. Эктӥсьёс кошкем бере, "Ку-ка-ре-ку-у!" шуыса "атас" пыре. Нуись. Учке ай, кин асьме доры лыктэм. А.Клабуковлэсь "Атас" кылбурзэ лыдӟо 2 нылъёс но атас дӥськутэн дӥсяськем пияш. 1 ныл. Атас, ойдо араны - Сюрлоед быжаз! 2 ныл. Атас, чаль пу вандыны - Пилаед йырад! Атас. Ай уг ваньмы ӧжытак, Азбарын уже лачак: Курегъёсты сюдоно, Забор йылын чоръяно, Мурт атасэз улляно, Душесэз но чаклано; Ӵукна бере кылёды шуыса, Сайкато мон тӥледды чоръяса. Ко-ко-ри-ка! Коля! Ри-та! "Ялыке, ялыке" - кырӟаса пыре Лӧпшо Педунь. Л.Педунь. Нылпи садды вӧзтӥ ортчисько вал но, шулдыр удмурт гурез кылыса, пыдъёс асьсэос татчы кыскизы. Кинъёс, пӧй, сыӵе шулдыр кырӟало? О-о, кӧня татын чебересь нылъёс, етӥзэсь пиос но чебер анайёс. Нош монэ тодмаськоды-а? Кин-о мон? Бен-бен, Лӧпшо Педунь. Мон мадиськонъёс, визьмо кылъёс, выжыкылъёс бичаса ветлӥсько. Адямиослы маскара учыръёс верасько. Тани али но песьтэр тырам мадиськонъёс. Кӧнязэ ке кылзоды-а? 1. Киосы мынам кузесь, Синёсы мынам сэзесь. Туж кыдёке адӟисько, Вань дуннеез шунтӥсько. (Шунды) 1 пинал. Нош мон шунды сярысь кылбур тодӥсько. Шунды Лыз инме шунды ӝутскиз, Пальпотӥз, золгес шунтӥз, Котыр улос шумпотӥз, Турын-куар но серектӥз. Н.Байтеряков Л.Педунь. Кыкетӥез мадиськонэ таӵе. Кезьытэн но пӧсь куазен Со ялан бугыр пӧзе. Дырдытӥ жильыртэ, Со дорысь салкым ыртэ. (Ошмес) Нош ӟуч сямен ошмесэз кызьы шуо? Нуись. Милям нылпи садмы но "Родничок" нимаське. Педунь агай, тодэмед потэ-а, малы озьы шуо? Л.Педунь. Тӥляд шулдыр кырӟанъёсты, жингрес куараосты, мыло-кыдо серекъямды жильыртӥсь ошмес шур кадь ялан чузъясько. Со куараосты кезьытэн но, пӧсь куазен но дугдылытэк мед кылӥськозы. Куинетӥзэ мадиськонме тодэмды потэ-а? Лэчыт венё бугор Диван улысь потӥз. Шорам со туж учке, Йӧл сётэмме вите. (Ӵушъял) Визьмоесь ик тӥ, пиналъёс! Озьы бере, ойдолэ мынэсьтым маскара веросме кылзоме. "Курка, ӵӧж но мукетъёс" веросэз вера. Нуись. Туж тау веросэдлы, Педунь агай. Жадид, дыр, ини. Ӧжытак шутэтскы. Нылъёсмы тӥледлы кырӟалозы. Нылъёс кырӟало "Анае но вордэм" кырӟанэз. 1 пияш. Ми но нылъёслэсь бере ум кылиське. Кырӟаны ыммы зубиськемын ӧвӧл. Кырӟало "Туж пичи на мон" кырӟанэз. Кылъёсыз Л.Саболэн, крезьгурез Н.Уткинлэн. Л.Педунь. Нылпиосмылэсь шудэм-кырӟамзэс учкыса, тӥляд но мылкыдды бурдъяськиз, луоз. Оло, шудон пӧл радъялоды. Кельшиз ке, пиналъёсты но оло адӟем карозы, асьсэос но шудыны ӧдъялозы. Мумы-бубыос "Дасэн шудонэн" шудо. Л.Педунь. Пукыны уг чидаськы ни мон но. Ойдолэ ваньмы круге султыса шудоме. Ачим шораз ширъяло, поръяло. ("Бергаса шудон" кырӟан. Кылъёсыз А.Клабуковлэн, крезьгурез Л.Пончаклэн). Л.Педунь. Мынам песьтэрам туж шулдыр кырӟанэ вань на. Ойдолэ ваньмы ӵош кырӟаломе. Ма, кытчы луэм кырӟанэ? Утчаське, кузь пельтӥз поттэ луд кечез (шудонэз). (Чузъяське "Луд кече" кырӟан. Кылъёсыз А.Клабуковлэн, крезьгурез Л.Пончаклэн. Лӧпшо Педунь утчасье песьтэрысьтыз). Песьтэрам эшшо маи ке но вал на. Шулдыр кырӟаны, чебер эктыны быгатэмды понна тӥледлы ваньдылы пичильтык салам сёто шуисько вал. Уськытыса кельтӥськем-а, мар-а? Потыса утчало ай. Нош тӥ монтэк шулдыръяське ини. (Шудо "Небыльток" шудонэн. Пумаз Лӧпшо Педунь пыре). Л.Педунь. Шедьтӥ ведь, шедьтӥ саламъёсме. Одӥгаз группае пыри но вань салам перепечъёсы ӝӧк вылазы ини. Кунояськыны витё. 1 1 Учёной эскере Б.И.Каракулов, Глаз пединститутысь Удмурт филологияя кафедралэн кивалтӥсез. Удмурт Элькунын анай кыллы дышетон ужпумъёс Тоталитаризм вакытэ СССР-ысь тросэзлэн нимаз кунъёсысь йӧскалыкъёслэн кылъёссылэн кутӥськемзы унолы сюбегамын вал. Та суред тужгес но яркыт адӟиське дышетон удысын. Ӟуч луисьтэм кылъёслы пумит ужрадъёс кат пыр ужаны кутско 1938- тӥ арысен. СНК но ВКП(б) "Йӧскалык республикаысь но областьёсысь школаосын ӟуч кылэз одно ик дышетон" сярысь курон пукто. Асьме республикаын но, со вылэ чӧлскыса, ӟуч кылэз дышетон заведениосты пытсаллязы, кызьы, кылсярысь, 1958-59 дышетскон аръёсы Глазовысь пединститутын кема ужам удмурт отделениез, соин ӵош ик удмурт кафедраез ворсазы. Удмурт кыллэн школаын кутӥськемезлэсь сюбегамзэ но каньылак валэктыны дышизы: анай-атайёс, пе, нылпиосэс дышетон кыл асьсэос быръё. Таӵе политика 90-тӥ аръёсозь кыстӥськиз. Командно-административной система трос калыко кунамы вань кылъёслы азинскыны огкадь луонлык ноку ӧз сёты. Соос сярысь сюлмаськись ӧй вал. Кылъёсты наука ласянь эскерон но ӝеганы кутскиз, куд-ог учыръёсы "научной" нимаськись ужъёс калыклэсь визьзэ суранэ гинэ вуттылӥзы. Озьы удмурт егитъёслэн дунне шоры учконзы пожаськиз: йӧс асваланзэс (национальной самсознанизэс) умой дунъяны соос ӧз ни быгатэ, лулчеберлыксы но начармыны кутскиз, соин улонын ас интызэс но валамысь дугдӥзы, мукет калыкен артэ асьсэды улӥе пуктыны кутскизы. Выльдӥськон вакытэ калыкъёс выльысь азинсконын куд-ог луонлыкъёс басьто, со йӧскалык лулчеберетэз вӧлмытонын шаермылэсь, калыкмылэсь историзэ азинтонын, анай кылзэ дышетонын но умой адӟиське. 1986 арын Глаз пединститутын но удмурт кыл выльысь жингыртӥз: школаосын покчиосты дышетыны ӧнерчиосты дасяны кутскимы. Нош 1993-тӥ арысен филология факультетын удмурт группа усьтӥське, соин ӵош ик - удмурт кафедра. Удмурт Республикаын йӧскалыко нимаськись школаослэн лыдзы но будӥз: 1990-91-тӥ дышетскон арын 346 школаын удмурт кылэз дышето ке вал, 1999- 2000-тӥ арын солэн лыдыз 408-озь вуиз. Удмурт ӧнерчиослэн тыршеменызы, удмурт классъёс шаерысьтымы каръёсын но усьтӥськыны кутско: нырысь ик Ижкарын, собере Воткинскын, Глазкарын. 2001-тӥ арлэн кутсконаз та классъёслы нылпиосты дасян садъёс Ижкарын 20 ке лыдъясько, Глазкарын удмурт группаос 29-тӥ но 46-тӥ нылпи комбинатъёсын гинэ вань. Куинетӥ арзэ удмурт кылэз дышето 16-тӥ школаын. Ӟуч программая ужась 3-тӥ номеро школаын 5-6-тӥ классъёсын удмурт фольклорез, литератураез ӟуч кылын дышето, удмурт йылолъёсын тодматско. Татын дышетскем нылпиос зэмос интернационалистъёс луо, соослэн мукет калыкъёсты ултӥяны мылкыдзы ноку уз ӝутӥськы шуыса оскон кылдэ. Та ӟеч ужъёсын артэ социологъёслэсь лыдпусъёссэс пуктӥськод ке, тыршеммылэн пайдалыкез трос ик уг адӟиськы на: анай кылзэс тодӥсьтэм нылпиосмылэн лыдзы арысь аре будэ. Та ужпумен сюлэмшугъяськисьёслэсь кужымзэс люкаса, мугъёссэс эскерыса, луонозэ тупатыны басьтӥськыны кулэ вылэм. Вераны кулэ, республикаысьтымы йӧскалыко лыдъяськись школаосамы удмурт калыклэн лулчеберетэзлы, кылызлы тырмыт уг на дышето. Анай кылзы пыр нылпиос дунне шоры аспӧртэмлыко учкемез мед валасалзы, кылзылэсь чеберлыксэ мед шӧдысалзы, со кылын ошмесо шаерамы бызись шуръёсмылэн жильыртэмзы выллем чылкыт вераськыны мед дышысалзы. Соос мед шӧдозы, нокыӵе но кыл улӥ радын но, вылӥ радын но луыны уг быгаты. Кылмылы асьмеос эрик сётыны быгатӥськом яке кулэтэм карыса серметаськом. Республикаямы нылпиосты будэтонъя дышетон система но, мон сямен, кылдытэмын ӧвӧл на. Йӧскалыко лыдъяськись школаосамы мукетъёсаз кадь ик трос кылъёслы дышетон (билингвизмы) но рос-прос радъямын ӧвӧл. Тани Глаз ёросын 22 школаос пӧлысь 17- ез йӧскалыко лыдъяське, нош анай кыл предмет выллем гинэ отын дышетӥське. Анай кылмы ӟучомымтэ нылпиосын тросаз школаосын удмурт кылъя но литературая урокъёсын гинэ кутӥське. Нош мукет предметъёсты республикаысьтымы ваньмаз сямен дышетскон заведениосын ӟуч кылын нуо. Озьыен, анай кылмы шунды пуксён палась дышетоно англи, немец кылъёс выллем дышетон предмет карыса гинэ пыртэмын. Озьы бере, йӧскалыко нимаськись котькуд школамес сыӵе мертэтэн англи школа яке немец школа радэ пыртыны быгатом. Озьы таосыныз кылъёсын но нылпиосмы вераськыны уг дышо, грамматикаысьтызы правилоосты тодэмзэс но кыллюкамъёсысь текстъёсты берыктыны быгатэмзэс адӟыса буйгатскиськом. Йӧскалык ужпумъёсты быдэстонын удмурт кылэз ӟуч кылын артэ Удмурт Республикалэн Конституциеныз кун кыл радын юнматон бадӟым вамыш луиз. Удмурт калыклэсь кылзэ озьы дунъян кун узырлык радын луэ. Соин ик кылмы сярысь - солэн ужамез, азинскемез сярысь - кун органъёс но сюлмаськыны кулэ. Туннэ нуналлы асьме республикаямы та ужлэсь кун органъёс палэнтӥсько, кык кылын вераськыны быгатӥсьёсты тросгес удмуртъёс пӧлысь гинэ шедьтыны луэ, ӟучъёс пӧлын удмурт кылэз тодӥсьёслэн лыдзы туж ӧжыт. Озьыен, зэмос билингвизмозь, кудӥз сярысь наука радын вераськон пуромылӥз Совето власть дыръя, кыдёкын вылэм ай. Солы нырысетӥ вамыш лэсьтэмын, нош кыкетӥзэ вамыштыны - кылъёс сярысь законэз кутыны - Кам шаерын выжызы луисьтэм адямиосты, гажано депутатъёсмес кышкатӥз. Озьыен, Конституцимылэсь ужамзэ кылмес серметаса воземмы бордысь адӟиськом. Асьмеос тодыны кулэ, кыкетӥ вамыш лэсьтыса но кутэм кат ужатэк кыльыны быгатоз, кызьы 20-тӥ аръёсы коми кылэз кун радэ поттыса но, улонэ пыриськыны со рос-прос ӧз быгаты. Кун кивалтэтлэн органъёсыз йӧскалыко ӧнерчиосын ӵош калык азьын кылмылэсь данзэ ӝутыны, калыклы дышетскыны катъёсын пусъем луонлык кылдытыны кулэ, кун кылъёсмес азинтон понна, тырмыт коньдон висъяно, калыкез дышетон удысын тырмыт тодонъёс сётон понна, научно-методической юрттэт сётоно. Сыӵе ужъёс пыр гинэ кылмес кун радын ужатыны быгатом. Берло вакыт кунысь йӧскалык политикалэн концепциез эскериськиз, йӧскалык лулчеберетэз азинтыны но йӧскалык кусыпъёсты тупатыны 2000-тӥ арозьлы план кутэмын, республикаысьтымы нылпиосты дышетонъя но будэтонъя выль программа юнматэмын вал. Центрысь кивалтэмез кӧнялы ке кулэстыса, Удмуртиысь школаосын но вузъёсын дышетонлэн радаз национально-региональной компонент пыртэмын. Озьы но дышетон удысын вылӥысен кузёяськонлэн кулэсмемез йӧскалыко нимаськисьёсазгес гинэ шӧдӥське. Таосыз но дышетскисьёссылэн кыӵе выжыысь луэмзыя но кыӵе кылъёсты, лулчеберетэз тодэмзыя ог-огзылэсь висъясько. Удмурт но ӟуч кылъёсты дышетӥсь пиналъёс али но азьло сямен кема дышетсконо луо, соин ик куд-ог школаосын кылъёсты дышетонын интегрировать карон амалзэс эскерыны быгатӥськомы. Республикаысьтымы дышетонъя министерство йӧскалыко нимаськись школаослы гинэ удмурт кылэз дышетонын альтернативной программаос ӵектэ, отчы капчиятэм программаос дэмласа. Ӟучомем классъёсты капчиятэм программая дышетыса, ачиз школа выпусникъёссызлэн тодон-валанъёссы понна огназ кыл кутоно уг луы ни. Милям малпаммыя, таӵе капчиятэм программая удмурт кылэз дышетон рад пумозяз чакламтэ, малы ке шуоно, сыӵе выпускникъёслэн тодон-валанзы республикаысьтымы вузъёсын но удмурт ӧнерчиосты дасяны тырмыт уг на луы. Ӟуч программая ужась школаослы документъёс Россиысь Федерацилэн Министерствоез сётэ, таяз национально-региональной компонентлы туж ӧжыт инты висъямын. Кылсярысь, ӟуч литератураез дышетыку, арняяз 1-2 час гинэ вордскем интыысь поэзиен тодматскыны луэ. Та уроклэн пуштросэз дышетӥсьлэн валамез но мукет йӧскалыклэсь лулчеберлыксэс дунъяны быгатэменыз герӟаськемын. Нош удмурт кылъя урокъёсты таӵе школаосын факультатив кадь гинэ ортчытъяны луэ. Озьыен, таӵе школаосын национально-региональной компонетлэн возиськемез дышетӥсьлэн тыршемез бордын возиське. Республикаысьтымы вузъёсын вылӥысен кузёяськонлэн кулэсмемез Россиысь мукет вузъёсын огкадьгес мынэ. Вылӥ школа котырысьтыз ёросъёслэн куронъёс ыныз герӟаськемын луэ, соин ик аслэсьтыз ужзэ но улонлэн куронъёсыныз тупатэ. Но вузлы аслаз кужыменыз гинэ воштонъёс пыртылыны ӵемысь секыт йӧтэ, шаерамы экономикалэн лябӟеменыз, вылӥ школа дырыз дыръя юрттэт басьтыны уг быгаты. Тани Глаз пединститутысь но удмурт отделениез усьтон быдэс республикалы кулэ вал. Мае ке выльзэ лэсьтон котьку коньдонэз кулэ каре. Институт ас кужыменыз гинэ удмурт студентъёслы материальной база нерге лэсьтыны тыршиз, нош республикаысьтымы йӧскалык лулчеберетэз азинтыны но йӧскалык кусыпъёсты тупатыны 2000-тӥ арозьлы планысь умой малпан кагаз вылэ кылиз. Пединститутэ ӧтем удмурт ӧнерчиослы но квартира пумысен ректоратэн сётэм кыл, 14 ар ортчыса но, кыл вылын ик кылиз. Берло вакыт выпускникъёсмылы уж чектӥсьёс тырмыт луымтэен, Глаз пединститутын удмурт отделенилэсь кулэлыксэ но чакласьёс вань ини. Улонамы трос ужпумъёсты кунгож сьӧр мертэтъёсын чакланы кутскимы (дышетӥсьлэсь уждунзэ гинэ малы ке берлолы кельтӥськомы), кылсярысь, Швециын выпускникъёсты уже интыян сярысь ачиз вылӥ школа уг сюлмаськы, со понна уже интыянъя бюроос нимысьтыз ужало. Асьмелэн но сыӵе организациос кылдытэмын ни. Туала школалы милям выпускникъёсмы та вакыт туж ик кулэ ӧвӧл бере, оло, ужмес но мукет сяменгес радъяны дыр вуэмын. 1998-тӥ арын ик, со сярысь малпаськыса, ми уй пал ёросъёсын дышетонъя огазеяськон кылдытӥм. Мугзэ солэсь тросэз соку ик валазы. Уго удмурт кылэз, лулчеберетэз эскерисьёс кемалась шӧдӥзы ни, уй пал но лымшор ёросъёсын соос огкадь уг возисько шуыса. Уй пал удмуртъёс, ӟуч кунэ лымшоръёслэсь ог 100 арлы азьло сюрыса, ӟучомем ӧре шедеменызы но азьпалтӥзы таоссэ. Соин ик татысь удмуртъёс йӧскалык асваланзэс ыштыны кутскеменызы но висъясько. Асьме вакытэ соослэсь выжызыя асваланзэс ӝутонын лымшор удмуртъёсын выллем ортчытэм ужрадъёс гинэ котьку уг тупало. Анай кыллы дышетонэз радъяку но, анай-атайёсын нимысьтыз пумиськон-вераськонъёс ортчытоно, нош нылпиослы тупамезъя куронъёс пуктоно луэ. Куд-ог дышетӥсьёслэн малпамзыя, ӟучомем нылпиослэсь анай кылзэс тодэм-валамзэс дунъян рад но мукетгес кулэ. Уй пал удмуртъёс асьсэос но трос пусъё лымшор удмуртъёслэсь висъяськемзы сярысь. Солэн мукет мугез но вань: республикалэн шоркарезлэсь палэнын луэменыз, Ижын ужась журналистъёс, писательёс, лулчеберетэз азинтӥсьёс уй пал ёросъёсы шергес вуыло, соингес ик газетъёсын, радиоын но телевидениын уй пал ёросъёс сярысь шер верало, Дэри, Пичи Пурга, Алнаш но Можга шаеръёсысь иворъёс отын тросгес луо. Ижкарын потӥсь журнал-газетлэн кылыз но уй пал удмуртъёслэн вераськетсылэсь шӧдскымон висъяське. Куд-огез уй пал удмуртъёс понна нимысьтыз литература кыл пӧрмытон сярысь сюлмаське на. Асьме вакытэ литература кыл кылдытон уж уроболы витетӥ питыран кылдытонлы кельшоз, дыр. Нош Удмурт Элькунысь уй пал ёросъёсын лулчеберет улонэз но, дышетонэз но радъянлы, соослы центр кылдытыны кемалась басьтӥськоно ни вылэм. Со центр пыр Калыкез дышетонъя министерство но аслэсьтыз йӧскалык ужпумъёсын герӟаськем сюлмаськонъёссэ быдэстыны быгатысал. Туалаез сярысь верано ке, та Министерстволэн но, Дышетӥсьёслэсь тодон-валанзэс будэтонъя институтлэн но, мукет органъёслэн ужъёссы шаермылэн уй пал школаосаз котьку тодмо уг луо. Табере кемалась малпам ужрадъёс улонэ пыӵатыны кутскемын. 28-тӥ мартэ 2001-тӥ арын уй пал ёросъёсын дышетӥсьёсын "Наукалэсь но практикалэсь азинсконъёссэ - дышетон учреждениослэн ужазы" нимо ИВ-тӥ научно-практической конференциосмес Глазкарысь 16-тӥ школаын ортчытӥмы. Азьло аръёсы конференциосын ӵошатыса, таиз но ӟучомем нылпиосын ужан ужпумъёсты эскеронэз азьланьтӥз. Берлоез научной ужрад уй палась удмурт дышетисьёслэсь бадӟым творческой кужымзэс но возьматыны быгатӥз ни. Со ӟеч азинскон. Литература Каракулов Б.И. О необходимости разграничения форм существования языка в связи с обучением литературному языку //Узловые проблемы современного финно-угроведения. Материалы 1 Всероссийской научной конференции финно-угроведов: Тез. докл. - Йошкар-Ола, 1995. - С. 327-328. Понимать друг друга. О проблемах межнациональных отношений в Удмуртской АССР. Ижевск: Удмуртия, 1990. 1 Визь борды визь. "Тӧл гурезе" Туэ потэм журналмылэн 4-тӥ номераз "Визь борды визь" люкетын печатламын вал Ульфат Бадретдиновлэн удмурт писательёслэн книга нимъёссыя кылдытэм "Тӧл гурезе" суредэз. Озьы пӧрмиз син азе яркыт пуксьымон верос. Отын нылпи писатель 35 удмурт писательёслэсь книга нимъёссэс пыртэм. Пусйимы вал, та ужез кутыны луоз кызьы ке литература урокъёсын, озьы ик внеклассной ужрадъёсын. Со сяна, журналмылэн редакциез лыдӟисьёсызлы вазиськиз вал одӥг юанэн: Кин ӝоггес тодоз веросэ пыртэм книга нимъёслэсь авторъёссэс? Вормисьёсызлы ӵектӥмы У. Бадретдиновлэн автографеныз книгаос. Жаляса верано луэ, сётэм ужмылы кык сяна валэктон ӧз вуы. Со но одӥгез но дышетӥсьёслэсь ӧвӧл. Таяз учыре (озьы ик ортчем дыръёсы но вал) дышетон удысын тыршисьёс дэмлам ужмес яке кулэтэмен лыдъязы, яке "монтэк но вазиськисьёс луозы ай" малпазы. Мар шуод на, кин ке вылэ чӧлскыса но оскиськыса улон сяммы пыдло пыӵамын уго, таки выжытӥз порыны кужыммы но, дӥсьтонлыкмы но уггес тырмы, лэся. Нырысез гожтжэт вуиз Алнашысь центральной библиотекаысь методист-краеведлэсь М.В. Губкиналэсь. Юанмылы валэктон сётэм сяна, Мария Васильевна шуныт кылъёс гожтэм журналмы пумысь но. Вакчияк тодматӥськом соин: Тау кариськомы журналдылы. Пуштросэз туж узыр. Туж юрттэ лыдӟисьёсмылы но, озьы ик асьмелы но ужамы. Журналъёсмы туж ик интыяз уг кыллё. Туж юртто сценариосты выль произведенилы сётэм дунъетъёсты. Трос материалъёс шедьтыны луэ "Сямъёс но йылолъёс" рубрика улысь. Берло аръёсы "Библиотекалэн "шыкысаз" выль рубрикады кылдӥз. Азьло аръёсы библиотекае вуо вал темпланъёс, соосъя ми тодыны быгатӥськомы вал кыӵе книгаос пото удмурт издательствоын. Табере милям сыӵе луонлыкъёсмы ӧвӧл ни. Соин ик та рубрикады милемлы туж юрттэ. Тыршиськом котькытчы вазиськыны, котькыӵе амалэн книга утчаны. Заочно дышетскисьёсмы но ӧжыт ӧвӧл. Соин ик, соослы но трос материалъёс кулэ. Удмурт кылмы но пока ӧз на вуны на. Но сюлэм шуг луэ: милям удмурт селоямы но нырысетӥ удмурт классэ мынӥсьёсмы ӧжытгес но ӧжытгес кылё. Та удмурт писательёслэн но поэтъёслэн книга нимъёссы таӵе ик син азямы пуксё, нош вунэмъёссэ справочникъёсъя утчано луиз ини... Мукетыз гожтэт - Можга ёросысь Бадӟымсурд (Вуж Березняк) гуртысь 10-тӥ классын (та дыре школаын берпуметӥ арзэ дышетске ни) дышетскисьлэсь Валентина Кутасовалэсь. Со но юанмылы рос-прос валэктон сётэм. М.В. Губкиналы но В. Кутасовалы шонер валэктонъёссылы тау карыса келяськомы "Тӧл гурезе" суредлэн авторезлэсь, нылпи писательлэсь У. Бадретдиновлэсь аслаз кинюртэменыз книгаоссэ. Нош мукетъёсызлы дэмласьком шонер валэктонъёсын тодматскыны. Оскиськом, урокъёсэс аспӧртэмлыко ортчытъясь дышетӥсьёслы одно ик юрттэт сётоз со. Валэктонъёс: "Ӟечбур ӵукна!" - Василий Широбоков; "Арама кузя" - Евгений Самсонов; "Ӵук лысвуос" - Василий Садовников; "Ыркыт тӧл" - Даниил Яшин; "Сайкыт ӵукна" - Николай Васильев; "Сюресъёс" - Фёдор Пукроков; "Тӧл гурезь" - Роман Валишин; "Льӧльшур палъёс" - Евгений Самсонов; "Вылӥысен учкеме потэ" - Фёдор Пукроков; "Шунды выллань, нунал азьлань" - Семён Самсонов; "Куинь кызьпуос улын" - Николай Байтеряков; "Ошмес син" - Фёдор Пукроков, Михаил Петров; "Сюрес дурын" - Ашальчи Оки; "Чале ми доры" - Герман Ходырев; "Вай бур кидэ" - Георгий Архипов; "Ошмес жильыртэ ваньмызлы" - Василий Широбоков; "Тулысысен сӥзьылозь" - Пётр Чернов; "Мон ворми тонэ, тӧл" - Олег Четкарёв; "Мон тодам ваисько" - Ашальчи Оки; "Жингыртӥсь возь вылъёсын" - Степанида Иванова; "Вож гужем" - Анатолий Леонтьев; "Чагыресь пилемъёс" - Людмила Кутянова; "Тузь омырен шокаса" - Александр Белоногов; "Ӝуало италмасъёс" - Александр Белоногов; "Вальс" - Роман Валишин; "Шуныт зор" - Куӟебай Герд; "Италмас" - Михаил Петров; "Шунды доры" - Флор Васильев; "Гуртысь гуръёс" - Николай Байтеряков; "Тӧдьы юсь" - Егор Загребин; "Нюлэс куараос" - Егор Загребин; "Шур ву сямен" - Николай Байтеряков; "Ортчеменыз пумиськон" - Трофим Архипов; "Югыт сюрес вылэ" - Куӟебай Герд; "Мар луоз ӵуказе" - Ульфат Бадретдинов. 1 Фоторепортаж Глаз ёросысь Слудка нылпи садын бадӟым уж нуо удмурт кылэз но культураез улоназы юнматонлы. Соин валче уно пӧртэм амалъёсты куто. Нылпи садэн кивалтӥсьлэн Л.Н. Симановалэн сюлмаськеменыз, татын кылдытэмын нимысьтыз этнографияя комната. Отын яркыт возьматӥське удмурт калыклэн улэм- вылэмез, сям-йылолъёсыз, гуртсылэн ортчем сюресэз но мукет. Та комнатаын ик ортчыло пӧртэм пумо ужрадъёс: гуртысь тунсыко адямиосын, усточиосын пумиськонъёс, соослэн ужъёсынызы адӟытонъёс. Нылпи садэ ветлӥсь пиналъёслэн ӵем кунооссы - пересь анайёс но атайёс. Соосты покчиос шулдырто кырӟанъёсынызы, кылан-буранъёсынызы. Пунэме уг кылё асьсэос куноос но. Сьӧразы соос одно ик ваё ческыт пӧрам удмурт сиён-юонъёссэс, тодмато калык йылолъёсын, вашкала кырӟанъёсын. Удмурт Элькунлэн кылдэмез дырысен 80 ар тырмонлы сӥзем смотр-конкурсын Слудка нылпи садысь этнографияя комната ёросын умоеныз лыдъямын. Фотосуредъёс басьтэмын Слудка нылпи садлэн архивысьтыз. Библиотекалэн "Шыкысаз" (июль 2001) Чеберлыко литература Голубев В. В. Пыраклы егитэсь: Очеркъёс, документальной повестьёс. - Ижевск: Удмуртия, 2001. - 232 с. Шаерамы вордскем но Быдӟым ожын бырем пиос сярысь очеркъёсын книга гожтӥз В. В. Голубев. Книгалэн авторез отставкаысь полковник, уно орденъёсын но медальёсын пусъем мурт, война пыр потэмын. Та вакытэ улэ Москваын. Ивашкин В. М. Турнан дыр: Стихи, поэмы, рецензии и очерки. - Ижевск: Издат. дом "Удм. ун-т", 2001. - 226 с. Ужысь ветеран, Удмуртиысь сӥё-дано журналист, Суоми шаерысь А. Кастрен нимо огазеяськонлэн премиезлэн лауреатэз В. Ивашкин тодмо луэ "Шуныт сюлэм" нимо кылбуръёсын книгаеныз (1976). Очеркъёсыз, кылбуръёсыз, рецензиосыз печатласькизы пӧртэм аръёсы "Молот" ("Кенеш") но "Вордскем кыл" журналъёсын, "Ӟечбур!" ("Дась лу!") но "Удмурт дунне", "Удмуртиысь комсомолец", "Удмуртская правда" газетъёсын, пӧртэм сборникъёсын. Таиз книга луэ соосты огазеясь бичет. Самсонов А. А. Сказочные сны: Стихи, басни, загадки /Пер. с удм. яз. А. Кузнецовой. - Ижевск: Удмуртия, 2001. - 16 с. А. Самсоновлэн выль книгаяз пырем кылбуръёс но басняос тунсыко потозы пиналъёслы но, арлыдоослы но. Мадиськонъёс юрттозы малпаськон ӧрез паськытатыны. Книга узырмытэмын В. Мустаевлэн суредъёсыныз. Федотова Т. А. Путь в небеса: Стихи / Предисл. И. Рябова; рис. С. Фёдоровой. - Ижевск: Удмуртия, 2001. - 120 с. Т. А. Федотова - Сюмси черко гуртысь кылбурчи. Солэн "Каравелла" кылбур сборникез (1999-тӥ арын лыдӟисьёс кие вуиз). Со сяна, Т. А. Федорова - 2000-тӥ арын Москваысь метроын луэм кышкыт учыр дыръя бырем кык нылъёслэн анайзы А. Колбинлэн апаез луэ. Та книгаез поттыны юрттӥз Элькунмылэн азьмуртэз А. Волков. Бичетэ пыризы Тамара Анатольевналэн кылбуръёсыз но Светлана нылызлэн суредъёсыз. Педагогика но методика Владимирова Р. Примерные планы-конспекты уроков по истории Удмуртии: Учеб.- метод. пособие. Ч. 2. - Ижевск: Изд-во ИУУ, 2001. - 112 с. Книгаын сётэмын Удмурт шаермылэн ЪЪ даурын ортчем сюресэз сярысь бадӟым но тунсыко материал. Внеклассной урокъёсты ортчытыны дышетӥсьёслы бадӟым юрттэт луоз со. Кызьы ортчиз шаерамы 1905-тӥ арын революция, кызьы азинскиз удмурт интеллигенцилэн сюресэз, мар со "лудорвай уж", кызьы шаерамы радио но телевидение кылдӥз, мае огазея финн-угор дунне, мар сярысь верало георгиевской киросъёс но элькунмылэн кун пусъёсыз, - ваньмыз сярысь вакчияк тодматскыны луэ. Муш но майсы: Покчиослы буян книга. - Ижевск: Удмуртия, 2001. - 8 с. Удмурт калык выжыкылъя книга удмурт но ӟуч кылъёсын гожтэмын, суредъёсын но чебермамын. Таяз книагын удмурт калык выжыкыл ӟуч кылын но сётэмын. Соин ик книга юрттоз покчиослы удмурт но ӟуч кылын лыдӟиськыны, кулэ буёл бырйыса суредъёсты буяны дышетскыны. Дасяз сое Т. А. Пояркова. Выжыкылэз ӟуч кылэ берыктӥз В. И. Емельянов, нош суредъёссэ лэсьтӥз В. В. Рубцов. Книга пайдаё луоз покчиослы. Дышетоз удмурт но ӟуч кылын лыдӟиськыны, кулэ буёлъёсты кутыса суреданы. Саушина И. К. Удмуртия в играх, загадках и кроссвордах: Учеб.-метод. пособие. - 2-е изд. - Ижевск: Изд-во ИУУ, 2001. - 88 с. Книгае огазеямын шаермылэн историезъя, этнографиезъя, литератураезъя, топонимикаезъя, инкуазезъя пӧртэм юанъёс, ужъёс но шудонъёс. Со сяна, ватсаса сётэмын 3-тӥ но 7 - 8-тӥ классъёсын спецкурс ортчытонлы программа, тематической план. Хлобыстова Т. А. Этика и речь: Программа и конспекты уроков для 5-7 кл. - 2-е изд. - Ижевск: Изд-во ИУУ, 2001. - 140 с. Этикая но риторикая нылпиослэсь тодон-валанзэс, быгатонлыксэс будэтонъя нимаз программа юрттоз пӧртэм предметъёсъя дышетӥсьёслы но, анай-атайёслы но. Ас малпандэ шонер вераны быгатон, астэ калыкын умой возён бордысен кутске котырысь адямиосты, инкуазез гажан, тӥрлыкез утён мылкыд. Нош со вылын кылдэ ини выль тодон-валан басьтонлы мылкыд сётӥсь инъет. Швалёва Т. Н. Тесты по грамматике немецкого языка: Учеб. пособие для сред. общеобразоват. шк. - Ижевск: Изд-во ИУУ, 2001. - 84 с. Пособие люкамын И. Л. Бимлэн дышетскон книгаосызъя ужась дышетӥсьёслы юрттӥсь ужъёс. Соос кулэ луозы пиналъёслэсь тодон-валанзэс эскеронын. Кылосбур Текст-2: Теория и практика. Междисциплинар. подходы: Материалы Всерос. науч. конф. в 2 частях / УдГУ. - Ижевск, 2001. - 179 с. Бичетэ пырем ужъёс сӥземын текстэз пӧртэм ласянь эскеронлы. Татысь шедьтыны луэ удмурт фольклор, туала литератураысь текстъёсты эскерыса лэсьтэм статьяосты, со сяна уно ужъёс сӥземын пӧртэм кылъёсты ӵошатонлы, кылысь кылэ берыктонлы. Кызьы текст эскеронэз ужазы куто культурологъёс, психологъёс, философъёс, историкъёс, кылосбур удысысь тодосчиос, кызьы азинске тодос малпан, - сое тодыны луоз татысь ужъёсын тодматскыса.. Шаертодон Завьяловский район: природа, история, экономика / Отв. ред. Ильминских Н. Г. - Ижевск: Ижев. полигр. комбинат, 2000. - 420 с. Книгаез гожтонэ пыриськизы трос тодосчиос, шаерчиос, ӧнерчиос, аспирантъёс но студентъёс. Татчы люкамын Завьял ёрос сярысь тунсыко иворъёс. Книга узырмытэмын буёло картаосын но туспуктэмъёсын, отын возьматэмын та ёросын будӥсь турын-куаръёс но писпуос. Та бичетын ӝутэмын Завьял ёрос понна тужгес но сюлэмшугъяськытӥсь ужпум - бадӟым промышленной шоркарлэсь инкуазьзэ утён. Красная книга Удмуртской Республики: Сосудистые растения, лишайники, грибы / Под ред. В. В. Туганаева. - Ижевск: Издат. дом "Удм. ун-т", 2001. - 290 с. Книга шаерамы шер пумиськись но пӧртэм мугъёсын бырон калэ вуэм будосъёс сярысь. Книга тунсыко луоз дышетӥсьёслы но дышетскисьёслы, пӧртэм удысъёсысь ӧнерчиослы. Справочникъёс Удмуртия, 2001 / М-во междунар. связей УР. - Ижевск: Ижев. полигр. комбинат, 2001. - 48 с. Справочникын сётэмын Удмурт Элькунлэн историезлэсь, инкуазез, кивалтэтэз, машина поттон, андан дурон, мувӧй но нюлэс дасян, пуктӥськон, гурт ужъёсыз, банк ёзнэтэз, кунсьӧр кусыпъёсыз, дышетскон но тодос, лулчеберет, спорт, туризм удысъёсыз сярысь ӟуч но англи кылын иворъёс. Книга узыр луэ Е. Н. Аксёновлэн чебересь но яркытэсь туспуктэмъёсыныз.