Городысь школаосын удмурт кылэз дышетонын трос шуг-секытъёс пумисько. Начальной школаын анай кылмес дышетонлэн системаез вань ини (кылдытэмын нимысьтыз программа, школаосы вуэмын А.Н. Журавлёвалэн "Анай кыл" сериен книгаосыз, соослы урокъёсъя методической юрттэт сётӥсь пособие), нош шор ёзо классъёсын пиналъёс дышетско на национальной школаослы дасям учебникъёсъя ик. Отын сётэм материал соослы туж секытэн сётӥське. Удмурт кыллы дышетонэз капчиятон понна, та книгаосъя ик 5-тӥ класслы календарно-тематической планирование дэмласько. Со Р.И. Даниловалэн но Г.Д. Даниловлэн 4-тӥ класслы гожтэм учебникъёссыя лэсьтэмын. 5-тӥ классын удмурт кылъя урокъёсын, начальной классъёсын сямен ик, дышетӥсьёслэсь вераськон но гожъяськон кылзэс волятонлы трос дыр висъяно луэ. Сое пайдаё радъян, пиналъёслэсь кылтӥрлыксэс узырмытон но паськытатон вылысь, планме лексической темаосъя сётӥсько. Созэ яке тазэ темаез эскерыку, словарной кылъёсты висъясько. Сое дышетскисьёс кыллюкамазы гожъяло. Пиналъёс бӧрысь урокъёсын та кылъёсты мукет темаосъя но юнматыны быгато. Лексической темаос бордын ужаку ик сётӥсько грамматикая выль тодон-валанъёс. Кылсярысь, -ос, -ёс суффиксъёсын кылъёсты шонер гожтонэз "Улосамы пырись каръёс" темая юнматыны луоз. УДМУРТ РЕСПУБЛИКАЛЭН КУН КЫЛЪЁСЫЗ НО УДМУРТ РЕСПУБЛИКАЫСЬ КАЛЫКЪЁСЛЭН МУКЕТ КЫЛЪЁССЫ СЯРЫСЬ Кутэмын Удмурт Республикаысь Кун Кенешен 2001-тӥ арын 27-тӥ ноябре Кыл - калыкъёслэн выжыысь выжые утиськись, ас радызъя азинскись, историен, культураен герӟаськем узырлык, со утиське кунэн. Удмурт Республика, удмурт калыклэн одӥг гинэ кун кылдэтэз луыса, амал сётэ удмурт кылэз - удмурт калыклэн национальной культураезлэсь инъетсэ - утьыны но азинтыны. Историын, культураын кылдэм сямъёсъя ӟуч кыл валтӥсь инты басьтэ Удмурт Республикаысь калыкъёслэн кусыпъёсазы. Удмурт Республикаысь уно выжыё калык пӧлын умоен лыдъямын нуналмысь трос пӧртэм кылъёсын вераськон. Та Закон Удмурт Республикаысь вань калыкъёсты гажамез возьматыса юнматэ кылъёсты кутон но азинтон удысысь общественной кусыпъёсты радъянын валтӥсь луонлыкъёсты, со кылъёс кутӥсько Удмурт Республикаысь калыкъёсын кунэн кивалтон, калыкез шуг- секытлэсь утён, экономика, культура но дышетон удысъёсын. Та Закон луонлык кылдытэ Удмурт Республикаысь кылъёсты утьыны, дышетыны но соослы гинэ тупась амалъёсын азинтыны, адямилэсь нациен герӟаськем данзэ, солэсь культуразэ но данзэ гажан мылкыд пыӵатыны. И ЙЫРЕТ. Огъя валатонъёс 1-ТӤ ЁЗЭТ. Та законын кутӥськись огъя валанъёс Россия Федерацилэн кун кылыз - ӟуч кыл. Удмурт Республикалэн кун кылъёсыз - ӟуч но удмурт кылъёс - соос кутӥсько, Удмурт Республикаын кусып возён амал луыса, Удмурт Республикаысь кун властья ёзъёс, Удмурт Республикаысь интыысь аскивалтонъя ёзъёс полномочиоссэс быдэсъяку но кыл пыр кусып возёнъя мукет удысъёсын, кудъёсыз право ласянь радъямез кулэ каро. Удмурт Республикаысь калыкъёслэн мукет кылъёссы - Удмурт Республикалэн кун кылъёсыныз лыдъяськисьтэм кылъёс. Удмурт Республикалэн кылъёсыз - Удмурт Республикалэн кун кылъёсыз, озьы ик Удмурт Республикаысь калыкъёслэн мукет кылъёссы. Вордскем кыл - адямилэн пичи дырысеныз тодэм кылыз. Люкенак улон интыос - Удмурт Республикалэн улосвылаз инты, кытын уноез калык вераське сыӵе кылын, кудӥзлы сётэмын ӧвӧл Удмурт Республикалэн кун кылъёсызлэн статуссы. 2-ТӤ ЁЗЭТ. УДМУРТ РЕСПУБЛИКАЛЭН КЫЛЪЁСЫЗ СЯРЫСЬ УДМУРТ РЕСПУБЛИКАЛЭН ЗАКОНЪЁСЫЗ 1. Удмурт Республикалэн кылъёсыз сярысь Удмурт Республикалэн законъёсыз пыкъясько Россия Федерацилэн Конституциез, "Россия Федерациысь калыкъёслэн кылъёссы сярысь" Россия Федерацилэн Законэз но Россия Федерациысь правоя норма луись мукет актъёс, Удмурт Республикалэн Конституциез вылэ, отчы пыро та Закон но Удмурт Республикаысь правоя норма луись мукет актъёс. 2. Та Закон кутӥське кылын кусып возёнъя сыӵе удысъёсын, кудъёсыз право ласянь радъямез кулэ каро, но уг радъя Удмурт Республикалэсь кылъёссэ кызьы кутонэз нуналмысь улонын адямиослэн официальной луисьтэм ваче кусыпъёсазы, озьы ик калык огазеяськонъёслэн но инмарлы осконэн герӟаськем огазеяськонъёслэн ужазы. 3-ТӤ ЁЗЭТ. КЫЛЭЗ БЫРЙЫНЫ НО КУТЫНЫ ЭРИК 1. Удмурт Республикаын уг яра котькыӵе кыллы пумит тушмоно но ултӥясь уж нуыны, нациосын ужан политикая Конституциен юнматэм инъетъёслы тупасьтэм могӟетъёс, зӥбетъёс но вылтӥянъёс кылдытыны. 2. Удмурт Республикаын котькуд адями но котькуд калык понна луонлыкъёс кылдытӥсько вордскем кылзэ утьыны но азинтыны, вераськон кылэз эркын бырйыны но кутыны. 3. Удмурт Республикалэн улосвылаз котькудӥз гражданин Удмурт Республикалэсь кылъёссэ гажаны кулэ. 4-ТӤ ЁЗЭТ. УДМУРТ РЕСПУБЛИКАЛЭН УЛОСВЫЛАЗ ГРАЖДАНЪЁСЛЭСЬ ПРАВООССЭС КЫӴЕ КЫЛЭЗ ТОДЭМЗЫ ЯКЕ ТОДЫМТЭЗЫ ШОРЫ УЧКЫТЭК УТЁНЪЯ ЛУОНЛЫКЪЁС. 1. Удмурт Республикалэн улосвылаз гражданъёслы луонлык сётӥське вордскем кылзэс кутыны. 2. Удмурт Республикалэн улосвылаз луонлык сётӥське адямилэсь но гражданинлэсь политикаен, экономикаен, улонын шуг-секытъёслэсь утёнэн, культураен, адямиен герӟаськем но мукет правоосты но эрикъёсты быдэсъяны, соизэ яке таизэ кылэз тодэм яке тодымтэ шоры учкытэк. 3. Удмурт Республикалэн улосвылаз гражданинлэн кылэз тодэмез яке тодымтэез муг уг луы солэсь кылэн герӟаськем правооссэ но мукет правооссэ сюбегатыны. 5-ТӤ ЁЗЭТ. УДМУРТ РЕСПУБЛИКАЛЭСЬ КЫЛЪЁССЭ УТЁН, ДЫШЕТОН НО КУТОН УДЫСЫН УДМУРТ РЕСПУБЛИКАЛЭН БЫДЭСЪЯНО УЖЪЁСЫЗ 1. Удмурт Республикалэсь кылъёссэ утён, дышетон но кутон удысын Удмурт Республикалэн быдэсъяно ужъёсыз пӧлы пыро: Удмурт Республикалэн кылъёсыз сярысь Удмурт Республикалэн законъёсыз; ӟуч но удмурт кылъёсты - Удмурт Республикалэсь кун кылъёссэ - огкадь правоен кутыны луонлыкъёс кылдытон; Удмурт Республикалэсь кылъёссэ утьыны но азинтыны луонлыкъёс кылдытон. 2. Удмурт Республика юрттэ удмурт кылэз утьыны, азинтыны но дышетыны Удмурт Республикалэн палэназ. 6-ТӤ ЁЗЭТ. УДМУРТ РЕСПУБЛИКАЛЭСЬ КЫЛЪЁССЭ УТЁНЪЯ, ДЫШЕТОНЪЯ НО АЗИНТОНЪЯ ПРОГРАММАОС 1. Удмурт Республикаысь Правительство дася Удмурт Республикалэсь кылъёссэ утёнъя, дышетонъя но азинтонъя программаослы инъетъёс, соос юнматӥсько Удмурт Республикаысь Кун Кенешын, Удмурт Республикалэн Президентэз дэмланъя. Программаосты чаклам дыръёсы быдэсъяны луонлыкъёс кылдыто Удмурт Республикаысь быдэсъясь властьлэн ёзъёсыз но Удмурт Республикаысь интыысь аскивалтонъя ёзъёс. Удмурт Республикалэн Президентэз, Удмурт Республикаысь Кун Кенешлэн депутатъёсыз, Удмурт Республикалэн Кун Кенешысьтыз депутат огазеяськонъёс, Удмурт Республикалэн Кун Кенешысьтыз ялан ужась комиссиос, Удмурт Республикалэн Кун Кенешысьтыз депутат фракциос, Удмурт Республикалэн Кун Кенешезлэн Президиумез, интыысь аскивалтонэ быръем ёзъёс, калык общественной огазеяськонъёслэн республикаысь ёзъёсыз, Удмурт Республикалэн улосвылаз улӥсь гражданъёс быгато ӵектонъёс пыртыны Удмурт Республикаысь Правительствоен дасяськись программаослы инъетъёсы. 2. Удмурт Республикалэсь кылъёссэ утёнъя, дышетонъя но азинтонъя программаосты быдэсъянэ коньдон висъяське Россия Федерациысь законъёсъя но Удмурт Республикаысь законъёсъя. ИИ ЙЫРЕТ. УДМУРТ РЕСПУБЛИКАЛЭН КУН КЫЛЪЁСЫЗ 7-ТӤ ЁЗЭТ. УДМУРТ РЕСПУБЛИКАЛЭСЬ КУН КЫЛЪЁССЭ ЭРКЫН ТОДЫНЫ АМАЛЪЁС 1. Удмурт Республикаысь кун властья ёзъёс но Удмурт Республикаысь интыысь аскивалтонъя ёзъёс, Удмурт Республикалэн улосвылаз тодон-валан сётӥсь учреждениос, Удмурт Республикалэсь кун кылъёссэ эрико тодон но кутон понна, луонлыкъёс кылдыто. 2. Ӟуч но удмурт кылъёсты дышетон предмет карыса эскерисько но дышетӥсько Удмурт Республикалэн улосвылаз огъя тодон-валан сётӥсь учреждениосын Россия Федерацилэн законъёсызъя но Удмурт Республикалэн законъёсызъя. 8-ТӤ ЁЗЭТ. УДМУРТ РЕСПУБЛИКАЛЭСЬ КУН КЫЛЪЁССЭ УТЬЫНЫ ЛУОНЛЫКЪЁС 1. Удмурт Республикалэсь кун кылъёссэ уте Удмурт Республика. Удмурт Республикаысь кун властья ёзъёс кыл куто но луонлыкъёс кылдыто, Удмурт Республикалэсь кун кылъёссэ улон-вылон, экономика но юриспруденция ласянь утён понна. 2. Удмурт Республикалэсь кун кылъёссэ улон-вылон ласянь утён чакла Удмурт Республикаын кыл пумысен политикаез наука куремъя ортчытыны, соосты утён, азинтон но дышетон понна. 3. Удмурт Республикалэсь кун кылъёссэ экономика ласянь утён чакла соосты утёнъя, дышетонъя но азинтонъя программаослы бюджетысь но мукет удысъёсысь коньдон висъяны, озьы ик та ужпумез быдэсъян понна налог тырон-бичанын льготаос сётыны. 4. Удмурт Республикалэсь кун кылъёссэ юриспруденция ласянь утён чакла Удмурт Республикалэн кун кылъёсыз сярысь Удмурт Республикалэсь законъёссэ юридической лицоосын но нимаз адямиосын тӥям понна кыл кутонэз юнматыны но улонэ пыӵатыны. 9-ТӤ ЁЗЭТ. УДМУРТ РЕСПУБЛИКАЫСЬ КУН ВЛАСТЬЛЭН ЁЗЪЁСАЗ УЖАН КЫЛ 1. Удмурт Республикаысь кун властьлэн ёзъёсаз уж нуиське Россия Федерацилэн кун кылыныз. Удмурт Республикаысь кун властьлэн ёзъёсаз Россия Федерацилэн кун кылыныз ӵош кутӥськыны быгатэ удмурт кыл. 2. Удмурт Республикаысь Кун Кенешлэн сессиосаз, солэн Президиумезлэн но ялан ужась комиссиосызлэн заседаниосазы, Удмурт Республикаысь Правительстволэн но солэн Президиумезлэн заседаниосазы депутатъёс но должностен муртъёс ас мылкыд каремзыя вераськыны быгато Удмурт Республикалэн кун кылъёсыз пӧлысь котькудӥныз, нош кулэ дыръяз Удмурт Республикаысь калыклэн мукет кылыныз, верамез тупамон берыктыса. 10-ТӤ ЁЗЭТ. УДМУРТ РЕСПУБЛИКАЛЭСЬ ЗАКОНЪЁССЭ НО УДМУРТ РЕСПУБЛИКАЛЭСЬ ПРАВОЯ НОРМА ЛУИСЬ МУКЕТ АКТЪЁССЭ, УДМУРТ РЕСПУБЛИКАЫСЬ ИНТЫЫСЬ АСКИВАЛТОНЪЯ ЁЗЪЁСЛЭСЬ ПРАВОЯ НОРМА ЛУИСЬ АКТЪЁССЭС ПЕЧАТЛАН КЫЛ 1. Удмурт Республикалэн законъёсыз, Удмурт Республикалэн правоя норма луись мукет актъёсыз, Удмурт Республикаысь интыысь аскивалтонъя ёзъёслэн правоя норма луись актъёссы официальной амалэн печатласькыны быгато Россия Федерацилэн кун кылыныз ӵош официальной амалэн удмурт кылын. 2. Удмурт Республикалэсь Законзэ, Удмурт Республикалэсь правоя луись мукет актъёссэ, Удмурт Республикаысь интыысь аскивалтонъя ёзъёслэсь правоя норма луись актъёссэс печатлан сярысь решение кутэ соиз ёзэт, кудӥз правоя норма луись актэз юнматӥз. ИИИ ЙЫРЕТ. УДМУРТ РЕСПУБЛИКАЫСЬ КАЛЫКЪЁСЛЭН УДМУРТ РЕСПУБЛИКАЛЭН КУН КЫЛЪЁСЫЗ ЛЫДЪЯСЬКИСЬТЭМ КЫЛЪЁССЫ 11-ТӤ ЁЗЭТ. УДМУРТ РЕСПУБЛИКАЫСЬ КАЛЫКЪЁСЛЭН УДМУРТ РЕСПУБЛИКАЛЭН КУН КЫЛЪЁСЫЗ ЛЫДЪЯСЬКИСЬТЭМ КЫЛЪЁССЫЛЭН ПРАВО ЛАСЯНЬ СТАТУССЫ 1. Удмурт Республикаысь сыӵе калыкъёслэн, кудъёсыз ас кунъёссылэсь яке ас улосвылъёссылэсь палэнын уло, озьы ик сыӵе калыкъёслэн, кудъёсызлэн ас кунъёссы но ас улосвылъёссы ӧвӧл, огазьын улон интыосазы официальной амалэн кусып возёнын Удмурт Республикалэн кун кылъёсыныз ӵош кутӥськыны быгатэ та интыысь калыклэн кылыз но. 2. Удмурт Республикаысь калыкъёслэсь Удмурт Республикалэн кун кылъёсыз лыдъяськисьтэм кылъёссэс огазьын улон интыосын кутон рад юнматӥське Россия Федерацилэн законъёсыныз но Удмурт Республикалэн законъёсыныз. 12-ТӤ ЁЗЭТ. УДМУРТ РЕСПУБЛИКАЫСЬ КАЛЫКЪЁСЛЭСЬ УДМУРТ РЕСПУБЛИКАЛЭН КУН КЫЛЪЁСЫЗ ЛЫДЪЯСЬКИСЬТЭМ КЫЛЪЁССЭС УТЬЫНЫ ЛУОНЛЫКЪЁС Ас кунъёссылэсь палэнын яке ас улосвылъёссылэсь палэнын улӥсь Удмурт Республикаысь калыкъёслэн кылъёссы но Удмурт Республикаысь сыӵе калыкъёслэн кылъёссы, кудъёсызлэн ас кунъёссы но ас улосвылъёссы ӧвӧл, Удмурт Республикаен утисько. Удмурт Республикаысь кун властьлэн ёзъёсыз кыл куто но луонлык кылдыто Удмурт Республикаысь калыкъёслэсь мукет кылъёссэс улон-вылон, экономика но юриспруденция ласянь утён понна. ИВ ЙЫРЕТ. УДМУРТ РЕСПУБЛИКАЛЭСЬ КЫЛЪЁССЭ КУТОНЫН ГРАЖДАНЪЁСЛЭН ПРАВООССЫ 13-ТӤ ЁЗЭТ. ВИЗЬНОДАН НО ДЫШЕТОН КЫЛЭЗ БЫРЙЫНЫ ПРАВО 1. Удмурт Республикаын улӥсь гражданъёслэн визьнодан но дышетон кылэз эрико бырйыны правозы вань. 2. Гражданъёслэн правозы вань школалэсь азьвыл, улӥ огъя но валтӥсь огъя тодон- валан вордскем кылын басьтыны но дышетон но визьнодан кылэз бырйыны, Удмурт Республикаысь тодон-валан сётӥсь радлыклэсь луонлыкъёссэ лыдэ поныса. 3. Удмурт Республикалэн улосвылаз гражданъёслэн вордскем кылын тодон-валан басьтыны правозэс быдэсъян понна, тырмымон кылдытӥсько тодон-валан сётӥсь учреждениос, классъёс, группаос, озьы ик соослы ужаны луонлыкъёс кылдытӥсько, Россия Федерацилэн законъёсызъя но Удмурт Республикалэн законъёсызъя. 4. Нылпиез соиныз яке таиныз кылын дышетӥсь но визьнодась учреждениез бырйыны право сётӥське анай-атайёслы яке соосты воштӥсь муртъёслы Россия Федерацилэн законъёсызъя но Удмурт Республикалэн законъёсызъя. 14-ТӤ ЁЗЭТ. УДМУРТ РЕСПУБЛИКАЛЭСЬ КЫЛЪЁССЭ ЭСКЕРОН, ДЫШЕТОН НО НАУКА ЛАСЯНЬ АЗИНТОН 1. Удмурт Республика улосвылаз улӥсь гражданъёслы луонлык кылдытэ Удмурт Республикалэсь кылъёссэ эскерыны но дышетыны. 2. Удмурт Республика луонлыкъёс кылдытэ Удмурт Республикалэсь кун кылъёссэ наука ласянь азинтыны но радъя Удмурт Респуликалэн кун кылъёсызъя специалистъёсты дасянэз. 15-ТӤ ЁЗЭТ. УДМУРТ РЕСПУБЛИКАЛЭН УЛОСВЫЛАЗ БЫРЪЁНЪЁСТЫ НО РЕФЕРЕНДУМЪЁСТЫ ДАСЯН НО ОРТЧЫТОН КЫЛ 1. Россия Федерациысь кун властьлэн ёзъёсаз, Удмурт Республикаысь кун властьлэн ёзъёсаз, Удмурт Республикаысь интыысь аскивалтонъя ёзъёсы быръёнъёсты, озьы ик референдумъёсты дасяку но ортчытыку кутӥсько Удмурт Республикалэн кун кылъёсыз. Огазьын улон интыосысь быръёнъя округын (участокын) кутӥськыны быгато Удмурт Республикаысь калыкъёслэн мукет кылъёссы. 2. Быръёнъёсъя бюллетеньёс но референдумын куара сётон бюллетеньёс Удмурт Республикалэн улосвылаз печатласько ӟуч кылын. Быръёнъёсъя тупатэм комиссилэн, референдумъя комиссилэн решениезъя бюллетеньёс печатласько ӟуч но удмурт кылъёсын, нош кулэ луись учыръёсы Удмурт Республикаысь калыкъёслэн кылъёсынызы соослэн огазьын улон интыосазы. В ЙЫРЕТ. КУНЭН КИВАЛТОНЫН, КАЛЫКЕЗ ШУГ-СЕКЫТЪЁСЛЭСЬ УТЁНЫН, ЭКОНОМИКАЫН, КУЛЬТУРАЫН НО ТОДОН-ВАЛАН СЁТОНЫН УДМУРТ КЫЛЪЁССЭ КУТОН 16-ТӤ ЁЗЭТ. УДМУРТ РЕСПУБЛИКАЫСЬ КУН ВЛАСТЬЛЭН ЁЗЪЁСЫЗЛЭН, КУН ПРЕДПРИЯТИОСЛЭН НО УЧРЕЖДЕНИОСЛЭН УЖАЗЫ КЫЛЪЁСТЫ КУТОН 1. Удмурт Республикаысь кун властьлэн ёзъёсызлэн, кун предприятиослэн но учреждениослэн ужазы кутӥсько Удмурт Республикалэн кун кылъёсыз. Удмурт Республикаысь кун властьлэн ёзъёсызлэн, Удмурт Республикаысь кун предприятиослэн но учреждениослэн ужазы Удмурт Республикалэсь кун кылъёссэ кутон рад юнматӥське Россия Федерацилэн законъёсыныз но Удмурт Республикалэн законъёсыныз. 2. Удмурт Республикалэн улосвылаз гражданъёс Удмурт Республикаысь кун властьлэн ёзъёсаз, Удмурт Республикаысь кун предприятиосы но учреждениосы ӵектонъёсын, куронъёсын но ӝожтӥськонъёсын вазиськыны быгато Удмурт Республикалэн кылъёсыныз. 3. Удмурт Республикаысь кун властьлэн ёзъёсаз, Удмурт Республикаысь кун предприятиосы но учреждениосы гражданъёслэн ыстэм ӵектонъёссылы, куронъёссылы но ӝожтӥськонъёссылы валэктон сётӥське вазиськем кылын. Вазиськем кылын валэктон сётыны луонтэм учыръёсы кутӥське Россия Федерацилэн кун кылыз. 17-ТӤ ЁЗЭТ. УДМУРТ РЕСПУБЛИКАЫСЬ ИНТЫЫСЬ АСКИВАЛТОНЪЯ ЁЗЪЁСЛЭН, МУНИЦИПАЛЬНОЙ ПРЕДПРИЯТИОСЛЭН НО УЧРЕЖДЕНИОСЛЭН УЖАЗЫ КЫЛЪЁСТЫ КУТОН 1. Удмурт Республикаысь интыысь аскивалтонъя ёзъёс, Удмурт Республикаысь муниципальной предприятиос но учреждениос ужазы куто Удмурт Республикалэсь кун кылъёссэ, озьы ик Удмурт Республикаысь калыкъёслэсь мукет кылъёссэс со калыкъёслэн огазьын улон интыосазы. 2. Та Законлэн 16-тӥ ёзэтэзлэн 1-3 люкетъёсаз юнматэм рад вӧлмытӥське Удмурт Республикаысь интыысь аскивалтонъя ёзъёслэн, Удмурт Республикаысь муниципальной предприятиослэн но учреждениослэн ужазы кылъёсты кутонэ но. 18-ТӤ ЁЗЭТ. ОФИЦИАЛЬНОЙ АМАЛЭН БУМАГАОС РАДЪЯНЫН КЫЛЪЁСТЫ КУТОН 1. Удмурт Республикаысь кун властьлэн ёзъёсаз, Удмурт Республикаысь интыысь аскивалтонъя ёзъёсын, Удмурт Республикаысь кун предприятиосын но учреждениосын но Удмурт Республикаысь муниципальной предприятиосын но учреждениосын официальной амалэн бумагаосты радъян нуиське Удмурт Республикалэн кун кылъёсыныз. Официальной амалэн бумагаосты нуонын Удмурт Республикалэсь кун кылъёссэ кутонэз радъяло Россия Федерацилэн законъёсыз но Удмурт Республикалэн законъёсыз. 2. Удмурт Республикаысь кун властьлэн ёзъёсызлэн, Удмурт Республикаысь интыысь аскивалтонъя ёзъёслэн, Удмурт Республикаысь кун предприятиослэн но учреждениослэн но Удмурт Республикаысь муниципальной предприятиослэн но учреждениослэн нимъёсынызы бланкъёс, печатьёс, штампъёс, штемпельёс но вывескаос лэсьтӥсько Удмурт Республикалэн кун кылъёсыныз. 3. Удмурт Республикалэн улосвылаз улӥсь гражданинлэсь кин луэмзэ возьматӥсь документъёсты, гражданской югдур пумысен актъёсыз кун ласянь пусъем сярысь свидетельствоосты, дышетскем сярысь документъёсты, ужан книжкаосты, ожгар билетъёсты Россия Федерацилэн кун кылыныз ӵош удмурт кылын но гожтыны луэ, законъёсын юнматэм радлыкъя. 19-ТӤ ЁЗЭТ. ОФИЦИАЛЬНОЙ ГОЖЪЯСЬКОНЫН КЫЛЪЁСТЫ КУТОН 1. Официальной гожъяськонын но Удмурт Республикаысь кун властьлэн ёзъёсызлэн, Удмурт Республикаысь кун предприятиослэн но учреждениослэн официальной кусыпъёссылэн мукет учыръёсазы Россия Федерацилэн кун кылыныз ӵош кутӥськыны быгатэ удмурт кыл. 2. Удмурт Республикаысь кун властьлэн ёзъёсызлэн, Удмурт Республикаысь кун предприятиослэн но учреждениослэн Удмурт Республикалэн палэнысьтыз адресатъёсын официальной гожъяськоназы но официальной кусыпъёслэн мукет учыръёсазы кутӥське Россия Федерацилэн кун кылыз. 20-ТӤ ЁЗЭТ. НОТАРИАЛЬНОЙ ДОКУМЕНТЪЁСТЫ РАДЪЯНЫН КЫЛЭЗ КУТОН Нотариуслы вазиськем гражданин ас мылкыд каремъя, нотариальной ужез нуонъя документъёс лэсьтӥсько Удмурт Республикалэн кун кылъёсыз пӧлысь котькудӥныз. 21-ТӤ ЁЗЭТ. ИВОР ВӦЛМЫТОН ЁЗЪЁСЛЭН КЫЛЗЫ 1. Ивор вӧлмытон ёзъёсын кутӥсько Удмурт Республикалэн кун кылъёсыз, озьы ик Удмурт Республикаысь калыкъёслэн мукет кылъёссы. 2. Радио-, теле-, видео-, кинохроника программаосты берыктыку но кык кылын сётыку кутӥсько Удмурт Республикалэн кун кылъёсыз, калыклэсь куронъёссэ лыдэ басьтыса, Удмурт Республикаысь калыкъёслэн мукет кылъёссы. 22-ТӤ ЁЗЭТ. УДМУРТ РЕСПУБЛИКАЛЭН УЛОСВЫЛАЗ ПРОМЫШЛЕННОСТЬ, ГУРТ ХОЗЯЙСТВО, СВЯЗЬ, ТРАНСПОРТ НО ЭНЕРГЕТИКА УДЫСЪЁСЫН КУТӤСЬКИСЬ КЫЛЪЁС 1. Удмурт Республикалэн улосвылаз промышленность, гурт хозяйство, транспорт, связь но энергетика удысъёсын кутӥське Россия Федерацилэн кун кылыз, нош кулэ дыръя - удмурт кыл. 2. Транспортлэн вань ёзъёсаз но энергетикаын ӝог кусып возёнын кутӥське Россия Федерацилэн кун кылыз. 23-ТӤ ЁЗЭТ. КАЛЫКЛЫ ЮРТТЭТ СЁТОН УДЫСЫН НО УЖБЕРГАТОНЫН КУТӤСЬКИСЬ КЫЛЪЁС 1. Калыклы юрттэт сётон удысын но ужбергатонын кутӥсько Удмурт Республикалэн кун кылъёсыз но Удмурт Республикаысь калыкъёслэн мукет кылъёссы. 2. Калыклы юрттэт сётон удысын но ужбергатонын бумагаос нуонын кутӥсько Россия Федерацилэн кун кылыз, озьы ик мукет кылъёс, ужбергатӥсьёс куспын кутэм огкылъёсын озьы чакламын ке. 24-ТӤ ЁЗЭТ. НАУКА УДЫСЫН КУТӤСЬКИСЬ КЫЛЪЁС 1. Удмурт Республикаын наука ужъёслы кыл быръён эркын ортче. 2. Удмурт кылын яке Удмурт Республикаысь калыкъёслэн мукет кылъёсынызы печатлам научной изданиосын наука ласянь эскеронъёцлы валтӥсь йылпумъянъёс сётӥсько Россия Федерацилэн кун кылыныз, нош кулэ дыръяз кунгожсьӧр кылын. 25-ТӤ ЁЗЭТ. КУЛЬТУРА УДЫСЫН КУТӤСЬКИСЬ КЫЛЪЁС Культура, искусство но тодон-валан сётон учреждениос Удмурт Республикалэн улосвылаз культураен, творчествоен герӟаськем ужез калык йылолъёсты лыдэ басьтыса нуо Удмурт Республикалэн кылъёсыныз, кулэ учыръёсы Удмурт Республикалэн кун кылъёсаз берыктыса. ВИ ЙЫРЕТ. ГЕОГРАФИЕН ГЕРӞАСЬКЕМ ОБЪЕКТЪЁСТЫ НИМАН НО ГОЖТОН КЫЛ, СЮРЕСЭЗ НО ИВОРЪЁСТЫ ПУСЪЁН НО ВОЗЬМАТОН КЫЛ 26-ТӤ ЁЗЭТ. ГЕОГРАФИЕН ГЕРӞАСЬКЕМ ОБЪЕКТЪЁСТЫ НИМАН НО ГОЖТОН КЫЛ, СЮРЕСЭЗ НО ИВОРЪЁСТЫ ПУСЪЁН НО ВОЗЬМАТОН КЫЛ 1. Удмурт Республикаын географиен герӟаськем объектъёслэн нимъёссы гожтӥсько тазьы: паллянын яке вылӥын - ӟуч кылын, бур палан яке улӥын - удмурт кылын. Таӵе учыръёсы уг яра историен герӟаськем нимъёсты, озьы ик аснимъёслэсь кылдэм нимъёсты воштыса гожтыны. 2. Удмурт Республикаысь быдэсъясь властьлэн ёзъёсыз луонлык кылдыто географиен герӟаськем объектъёслэсь нимъёссэс но гожтӥськемзэс возьматӥсь пусъёсты, сюрес но ивор пусъёсты но возьматонъёсты пуктылыны, Удмурт Республикаысь законъёсын юнматэм дыръёсы но радлыкъя, Россия Федерацилэн законъёсызъя но дуннелэн стандартъёсызъя. ВИИ ЙЫРЕТ. УДМУРТ РЕСПУБЛИКАЛЭН КУНГОЖ СЬӦРЫСЬ КУНЪЁСЫН, КАЛЫК КУСПО ОГАЗЕЯСЬКОНЪЁСЫН, РОССИЯ ФЕДЕРАЦИЛЭН СУБЪЕКТЪЁСЫНЫЗ КУСЫП ВОЗЁНАЗ КЫЛЪЁСТЫ КУТОН 27-ТӤ ЁЗЭТ. УДМУРТ РЕСПУБЛИКАЛЭН КУНГОЖ СЬӦРЫСЬ КУНЪЁСЫН, КАЛЫК КУСПО ОГАЗЕЯСЬКОНЪЁСЫН, РОССИЯ ФЕДЕРАЦИЛЭН СУБЪЕКТЪЁСЫНЫЗ КУСЫП ВОЗЁНАЗ КЫЛЪЁСТЫ КУТОН 1. Удмурт Республикалэн кунгож сьӧрысь ёзъёсыз но Удмурт Республикаысь кун властьлэн ёзъёсыз, кудъёсыз Удмурт Республика ласянь мукет калыкъёсын но кунгож сьӧрысь экономикаен кусыпъёс возё, асьсэлэн ужазы куто Удмурт Республикалэсь кун кылъёссэ но мукет паллэсь кылзэ (кылъёссэ). 2. Мукет калыкъёсын но кунгож сьӧрысь экономикаен кусып возён сярысь тупанкылъёс, кудъёсыз кутӥсько Удмурт Республикалэн нимыныз, Удмурт Республикаысь быдэсъясь властьлэн ёзъёсызлэн нимынызы, гожтӥсько Удмурт Республикалэн кун кылъёсыныз но мукет паллэн кылыныз (кылъёсыныз) яке мукет кылъёсын, тупанкылэз кутӥсьёс кенешемъя. 3. Мукет кунъёслэн, калык куспо огазеяськонъёслэн, Россия Федерациысь субъектъёслэн оскем муртъёсынызы Удмурт Республикалэн нимыныз ортчись вераськонъёсын кутӥське Удмурт Республикалэн огез кун кылыз яке мукет кылъёс, вераськонъёсты ортчытӥсьёслэн кенешемзыя. ВИИИ ЙЫРЕТ. УДМУРТ РЕСПУБЛИКАЛЭН КЫЛЪЁСЫЗ СЯРЫСЬ УДМУРТ РЕСПУБЛИКАЛЭСЬ ЗАКОНЪЁССЭ ТӤЯМ ПОННА КЫЛ КУТОН 28-ТӤ ЁЗЭТ. УДМУРТ РЕСПУБЛИКАЛЭН КЫЛЪЁСЫЗ СЯРЫСЬ УДМУРТ РЕСПУБЛИКАЛЭСЬ ЗАКОНЪЁССЭ ТӤЯМ ПОННА КЫЛ КУТОН 1. Удмурт Республикалэн кылъёсыз сярысь Удмурт Республикалэсь законъёссэ тӥясь юридической лицоослэн но нимаз муртъёслэн ужъёссы вутто кыл кутытонэ но эскерисько Россия Федерацилэн законъёсыныз но Удмурт Республикалэн законъёсыныз тупатэм радлыкъя. 2. Удмурт Республикалэн кылъёсыз сярысь законъёсты кутон удысын Удмурт Республикаысь кун властьлэн ёзъёсысьтыз но Удмурт Республикаысь интыысь аскивалтонъя ёзъёсысь должностен муртъёслэн ужзэс быдэсъямтэзы, кулэезъя быдэсъямтэзы яке ас полномочиоссылэн сьӧразы ортчемзы кыл кутытонэ вутто но эскерисько Россия Федерацилэн законъёсыныз но Удмурт Республикалэн законъёсыныз тупатэм радлыкъя. ИЪ ЙЫРЕТ. ЙЫЛПУМЪЯСЬ ВАЛАТОНЪЁС 29-ТӤ ЁЗЭТ. ТА ЗАКОНЭЗ КУЖЫМЕ ПЫРТОН Та Закон кужыме пыре, официальной амалэн печатлам бере 10 нунал ортчыса. Удмурт Республикалэн Президентэз А.А. Волков Ижевск город, 2001 арын 6 декабре, � 60-Р3. ОГЪЯ КУН ЭКЗАМЕНЪЁС СЯРЫСЬ Берло аръёсы асьме мерлыкын (обществоын) ортчизы но ортчо трос пӧртэмесь воштӥськонъёс. Палэнэ ӧз кыльы дышетон удыс но. Кемалась ик ӧвӧл Россиысь дышетонъя министерство шор ёзо школаын дас кык ар дышетонэ выжон концепциез дасяз. Нош берло воштӥськонъёс пӧлын нимысьтыз инты басьтэ огъя кун экзамен (ЕГЭ). Малы кулэ луиз со? Мар со сыӵе? Туннэ нуналлы шуг вераны, кунысьтымы пӧртэм вань дышетскисьёс одӥг кадь ӟеч но мур тодон-валанъёс басьто шуыса. Арысь аре пӧртэм школаосты йылпумъясьёслэн одӥг отметказы ик пӧртэм ӟечлыкен адӟиське. Вылӥ дышетскон заведениосы пырыны турттӥсьёс, аттестатазы ӟеч дунъето отметкаосын но, ӵемысь конкурсэз уг ортчо. Соин валче дышетсконзэс азьланьтыны быгато коньдоно семьяосысь пиналъёс гинэ, соослэн нылпиоссэс ӟеч репетитор доры но нимысьтыз дасяськон курсъёсы ыстыны луонлыкъёссы вань. Жаляса верано луэ, вылӥ дышетскон интыосы пырисьёсыз чакласа, гуртын улӥсь пиналъёслэн лыдзы арысь аре кулэсме. Солэсь мугзэ палэнысь утчано ӧвӧл, дыр. Кунгожсьӧръёс пусъемъя, асьме аттестатысь отметка, со кун дунъет ӧвӧл на, малы ке шуоно дышетӥсь аслыз ачиз отметка пуктэ , аслаз дышетэм нылпиосызлы.Тазьы луэ, кин дышетэ - со ик дунъя. Оло, соин но, дышетон удысысь куд-ог тырмымтэос адскытэк кылё, нылпилэн тодон-валанэзлы зэмос дунъет сётыны уг быгато. Та верамын зэмез вань. Дышетӥсь одӥг интыын кема аръёс ужаса, аслаз пиналъёсызлэсь басьтэм тодон-валанъёссэс мукет школаосысь нылпиосын ӵошатыны шугъяське. Бен, со бордын, вылды, мугез, кунгожсьӧрын Россиысь аттестатъёсты санэ басьтымтэзы но. Угось татчыозь ӧвӧл на дышетӥсьлэн ужезлы но дышетскисьлэн люкам тодон-валанэзлы кун ласянь нимысьтыз эрико (независимой) зэмос дунъет сётон. Конституциын юнматэмъя, котькуд пиналлы, кытын улэмзэ лыдэ басьтытэк, кыӵе семьяын будэмез шоры учкытэк, тазалыкез ласянь чаклатэк, кунамы ваньмызлы одӥг кадь луонлык кылдытыны кулэ тыро-пыдо тодонлык басьтыны. Соин валче, дышетон удысысь та выллем тырмымтэосты палэнтон вылысь, куинь ар ӵоже эскеронъёс ортчытэм бере, огъя кун экзамен ортчытонэ выжоно кариськизы. Кыӵеен бен адӟиське та экзамен кутскон сётӥсьёслы, эскерись-чакласьёслы? Нырысь ик, огъя кун экзаменъёс луозы нимысьтыз предметъёсъя, кудъёссэ сётоно луозы котькуд шор ёзо школаез йылпумъясьёс. Но татын кык пӧртэмлыкез огъян выллем луоз: а) огъя кун экзаменын басьтэм отметкаос лыдэ басьтӥськозы школаез быдтэм сярысь аттестатын но озьы ик вузэ пырыку но; б) быдэс Россия Федерациын кутӥськозы одӥг типьем ужъёс но одӥг мертэтъя (шкала) дунъян, со ик юрттоз пиналъёслэс тодон-валанзэс ӵошатыны. Дышетсконзэс йылпумъясьёс кык юнматэм (обязательной) экзамен сётоно луозы: (математика но ӟуч кыл), со сяна 2-3 асьсэос. Кылсярысь, технической но естественно-научной ВУЗ-ъёсы пырыны малпасьёслы физика, химия, биология предметъёс, гуманитарной - иностранной кыл, литература но история. Огъя кун экзаменлэн вань вариантъёсыз кык люкетлэсь кылдытэмын: базовой но конкурсной. Нырысь люкетаз эскериськоз кызьы шор ёзо школаез быдтӥсь пиналъёс валаллям нимысьтыз дышетскон предметъёсты. Кыкетӥяз учкозы макем ӟеч тодо дышетскисьёс быдэс дышетскон материалэз - туж ӟеч -"5"-лы, шоро-куспо "4"-лы. Котькуд дышетскисьлы сётэмын луоз куинь заданиен А,Б,С тест-эскерон. - "А" тестын сётэм валэктонъёс пушкысь быръёно луоз одӥгзэ шонер ответэз; - "Б" тестын - числоосын, кылъёсын, формулаосын вакчияк ватсаса быръем ответэз - "С" тестын дышетскись аслэсьтыз рос-прос малпанзэ, мур тодон-валанзэ но малпаськыны быгатэмзэ возьматыны кулэ, рассуждение, доказательство но мукет со выллем текстъёс кылдытэ. "А" но "В" тестъёсты эскерозы компьютеръёсын, нош куинетӥзэ ужез ("С") учкозы асьсэ школаысьтызы ик кун комиссиен ӵектэм кык дышетӥсьёс. Эскерись-чакласьёс берпум ужез учкемзы бере, ваньмыз тестъёс-бланкъёс пыртӥсько компьютере - нимысьтыз файлъёсы. Нош собере глобальной сетья Москваысь Калыкез дышетонъя министерстволэн эскеронъя (тестирования) Центраз келяськозы. 2-3 ар ӵоже эксперимент мыныку, огъя кун экзаменэз пиналъёс асьсэ дышетскем школаязы но азьланяз дышетскыны быръем вылӥ дышетскон интыязы сётыны уг быгато. Сое ортчытыны дасямын луоз нимысьтыз школаосын интыос но региональной комиссия. Отчы пырозы интыысь кивалтӥсьёс, шор ёзо школаысь дышетӥсьёс, вылӥ дышетскон интыосысь преподавательёс, анай-атайёс но мукет быръем муртъёс. Пусйыны кулэ, дышетскисьёслэсь тодон-валанзэс эскерисьёс асьсэос но уз тодэ, кинлэсь ужзэ соос эскерозы. Одӥг ласянь чакланы но ӵошатыны луоз дышетонлэсь ӟечлыксэ, мукет ласянь вузъёсы пыронын кылдэм ужъюгдурез сэрттыны-пертчыны юрттоз. Вылӥын верамы ни вал, огъя кун экзаменын басьтэм отметкаос ик инъет луозы вылӥ дышетскон заведениосы пырыны. Со сяна, котькуд дышетскисьлы (кыӵе предметъя со огъя кун экзамен сётӥз) нимысьтыз свидетельство сётӥськоз. Азьланяз дышетскыны мылкыд карись ЕГЭ-ын басьтэм свидетельствозэ пӧртэм дышетскон интыосы келяны быгатэ. Кылсярысь, свидетельстволэсь кӧня ке копиоссэ ыстыны луэ Россиысь пӧртэм вузъёсы. Озьы улон интыедлэсь палэнэ ветлытэк, дышетсконэз азинтыны луонлык кылдэ. Таяз учыре тодмоосъя но коньдон вылэ чӧлскыса гинэ, тодмо но дано дышетскон интыосы уд сюры. Оскыны кулэ сайкыт визьмыдлы но мур-тодон валанъёсыдлы. Огъя кун экзаменлэн одӥгез валтӥсь ужпумез - кыдёкысь гуртъёсын улӥсь но начар семьяосысь пиналъёслы вузъёсы пырыны юрттон вылысь оскымон луонлык кылдытон. Соин ик, гуртысь школаосын тодон-валанлэсь ӟечлыксэ будэтон сярысь али ик сюлмаськоно ни. Кылем арын июнь толэзе огъя кун экзаменын тодон-валанзэс эскеризы Россия Федерациысь 5 улосвылъёс: Чуваш, Марий Эл, Саха (Якутия) республикаос но Самара но Ростов областьёсысь 40 сюрс дышетскисьёс. Оглом вераса, огъя кун экзаменэ пыриськемъёслы луонлык кылдӥз нырысьсэ вылӥ дышетскон интыосы пырыны: кылсярысь, Саха (Якутия) республикаысь 51-ез пӧлысь 42-ез пӧртэм вузъёсы пыризы, нош 23-ез - экономикая вылӥ школае но сюрыны быгатӥзы. Азьланяз огъя кун экзаменъёсты ортчытыны озьы ик чакламын Россиысь дас куатяз улосвылъёсын. Туэ отчы нырысьсэ пыриське Удмурт Элькунмы но. Шаерысьтымы 18 сюрс 11 классэз быдтӥсь дышетскисьёс математикая тодон-валанзэс эскерозы огъя кун экзамен пыр. Журнал пыр вазиськеммы потэ удмурт кылъя но литературая, ӟуч кылъя но литературая дышетӥсьёслы. Таӵе ик огъя кун экзамен улонэ пыӵалоз тӥляд дышетон предметъёстыя но. Соин ик, туннэ ик малпаськыны кулэ, дыр, кудӥзъя программая дышетскисьлы огъя кун экзаменэз капчигес луоз сётыны - национальной школаослы гожтэм яке ӟуч школаослы? Тросэз школаос ӟуч кылъя ӟуч школаын кылдытэм программаос вылэ выжизы. Шонер-а меда со? Пусйыны кулэ, тестъёс огъя кун экзаменын удмурт но ӟуч школаослы чылкак пӧртэмесь луозы. Калыкез дышетонъя министерствоысь удмурт кылъя но лмтературая специалистъёс, Дышетӥсьёслэсь тодон- валанэс будэтонъя институтысь но озьы ик Удмурт Элькунысь дышетон удысын национальной ужпумъёсты тодон-эскеронъя институтысь наукая валтӥсь ужасьёс та вакытэ малпало ини тестъёс кылдытон-эскерон сярысь. Та тестъёсъя ик асьмелэн пиналъёсмы тодон-валанзэс эскерозы огъя кун экзаменын но. Соин ик, ваньмылы, огъя кужымен басьтӥськоно урокъёслэсь ӟечлыксэс будэтон, пиналъёслэсь мур малпаськыны быгатэмзэс дышетон сярысь. 1 Вань-а удмурт кылын огтглагольной оборотъёс ? Удмурт кылын вань трос пӧртэм отглагольной шуон афротаос (глагол бордысь пӧрмытэм кылъёсын оборотъёс). Тросэз соос огтусъемесь луо. Соин ӵош ик соос пӧртэм вераськон люкет луо но предложенилэн пӧртэм членъёсыз луо.Эскере: Колхозмы туэ трос етӥн кизем. Тулыс кизем но тысьсы ӟеч удалтэм. Дыраз кизем трослы пайдалыко луэ. Вылӥын сётэм примеръёсын нырысетӥез кизем кыл тодмотэм ортчем дырын верам глагол-сказуемой луэ, кыкетӥяз-причастие, куинетӥяз существительной луэ. Соослэн кыӵе морфологической категория луэмзы предложениын гинэ шараяське. Соин сэрен ӵемысь гинэ луыло трос янгышанъёс но ӵенгешонъёс, тужгес ик сыӵе тупамтэос пумисько бере, дыръя, понна, сэрен, вылысь ... послелогъёсын но союзъёсын кутыкумы. Вераны кулэ: удмурт кылын отглагольной конструкциос сярысь теориез нырысь ик кылдытӥз удмурт филологияя доктор П.Н. Перевощиков. Ваньзэ бере кылын верам конструкциосты со куинь люкетлы люке: а) дырез возьматӥсь обстоятельство луись отглальной оборотъёсын простой предложениос; б) бере союзэн герӟам придаточной предложениосын сложной предложениос; в) дифференцировать карымтэ сложной предложениос; Милям малпаммыя, отглагольной конструкциосыз эскерыкуз, П.Н. Перевощиков кык янгыш лэсьтэм. Нырысь ик, -м(-эм), -н, -он(ен) суффиксъёсын пӧрмем отглагольной существительнойёсты висъяны ӧвӧл быгатэм тодмотэм ортчем дыр формаослэсь; кыкетӥез, удмурт предложениосты ӟуч кылэ берыктэм сложной союзъёсын. Эскере: 1. Горд армия селе пырем бере, быдэс село кыӵе ке бадӟым праздник дыръя кадь шулдыр луиз (М. Лямин. Шудбур понна). "После того как Красная Армия вошла в село (кулэ вал берыктыны тазьы: после въезда Красной Армии в село), все село стало веселым как во время какого-то праздника". 2. Вазь кизем сезьы вуэм бере, соос араны кутскиллям (Удмурт сяськаос). "После того как созрел овес (кулэ вал: после созревания овса раннего сева), они начали жать". 3. Соос, клубысь потэмзы бере, азбарын кема сылӥзы. "Они, после того как вышли из клуба (кулэ вал: после выхода из клуба), долго стояли во дворе". Ваньмыз таӵе янгышъёс тупен-тупен валэктэмын вал А.В.Конюховлэн "Советской Удмуртия" газетэ 2, 4 июне 1963 арын поттэм статьяосаз. Жаляса вераны кулэ: малы ке та шонер но визьмо гожтэт статья санэ бастьытэк кылемын. Соин сэрен П.Н. Перевощиковлэн отглагольной оборотъёсты запятоен висъян сярысь правилоосыз пыртэмын вал 1954, 1957, 1959, 1984 аръёсы поттэм "Шонер гожъяськон но знакъёс пуктылон" правилоосы, бӧрысьгес ини школаослы дасям 6-8 классъёслы учебникъёсы но. Соосъя ик ужаськомы на али но. Милям малпаммыя, та янгышъёсты ӝегатскытэк тупатоно. Соос таӵеесь луыны кулэ. 1). Бере, дыръя, понна(вылысь), сэрен кылын союзъёсын (послелогъёсын ӧвӧл). 1. Нырысетӥез правило. Запятой пуктӥське бере, дыръя, понна (вылысь), сэрен (йырин) союзъёсын (послелогъёсын ӧвӧл) герӟаськись придаточной предложениосыз, куке соос возьмато мугез (причинаез яке целез). Соос сыло вошъяськись глаголъёс, -мын суффиксэн причастиос яке вань, ӧвӧл частицаос бӧрсьын но верало Малы? Ма понна? юанъёслы. Эскере примеръёсты. Та учырез шонер радъян понна одно ик лыдэ басьтоно тани тае. 1. Бере, дыръя, понна, вылысь, сэрен, йырин кылъёс огдырын ик послелог но союз луыны быгато. Предложениын союз луыкузы, соос сыло вошъяськись глаголъёс яке сказуемой луись вал, вань, ӧвӧл кылъёс бӧрсьын, яке -мын кылӥтэтэн пӧрмем причастиос бӧрсьын. Вылӥын верам союзъёс главной предложениез герӟало мугез (причинаез но целез) возьматӥсь придаточной предложениосты. Соку соос одно ик запятоен висъясько. Эскере: 1. Соиз но таиз но ӝуткало бере, лапкам сюлэмы интыысьтыз шук вырӟиз. ("Кенеш", 1: 9, 45 б). 2. Такем ӟеч учыр соку тупаз бере, мон вань аръёсме азьланьын ӟечезлы оскыса дышетски... (Отын ик, 45 б). 3. Учебник бордын ӵош ужам муртэз Р.М. Поторочин арестовать каремын ни бере, ӝоген со доры но вуозы, малпаз, луоз. (Отын ик 7 б). 4. Пичи дыръяз пие со турынэз сак учкем, ог кызь ар ортчыса вылысь тодмаз бере. ("Кенеш", 1: 2, 62 б). 5. Кагаздэс уд жаляське бере, мынам но сое олокыӵе ик жаляме ӧз поты. ("Кенеш", 1997:2, 56 б). 6. "Кенеш" журналлэн аслаз художникез ӧвӧл бере, редакцилы "палэнӥсьёсызлы" вазиськоно луэ. ("Кенеш", 1: 5, 44 б). 7. Мон тыныд киме но сюлэмме сётӥсько бере, солы оскы. (Е.Самсонов. Тулыс ӵукна). 8. Ваньмыз сыӵе вал бере, валамон ни, начар семьяысь нылпиослы одӥгезлы но дышетскыны ӧз кылды ("Кенеш", 1: 6, 33 б). (-м, -н, -ан(-ян), -он(ён) интэтъёсын пӧрмем существительнойёс но местоимениос бӧрсьын сылыкузы, бере, дыръя, понна, выльысь, сэрен, йырин, валче, улсын, вискын, дыре, вис кылъёс послелогъёс луо. Соку соос Ку? Ма понна? юанлы верало. Сыӵе вӧлскем обстоятельствоос но вӧлскем дополнениос запятоен уг висъясько. Эскере: 1. Граждан ож бырем бере Баринов Семён Макарович прокуратураын ужаз (И. Гаврилов). 2. Узы-боры вуэм бере пичи нылпиос, сарва яке кувшин кутыса, Четкер гурезе тубо (В. Широбоков). 3. Японской империалистъёсты пазьгем бере война чалмиз, дугдӥз (Лямин). Ӵемысь послелогъёс азьпалан сылӥсь существительнойёс, мукет существительнойёс сямен ик, 1-тӥ, 2-тӥ, 3-тӥ лицоез но трос лыдэз возьматӥсь итэтъёсын верамын луо. Сыӵе итэтъёс куддыръя послелогъёс борды но ватсасько. Эскере: 1. Одӥг но ӝыны ар ужамез бере Вавож райисполкомысь сюресъёс лэсьтон отделлы кивалтӥсе басьтӥзы ("Удмурт дунне", 2001, 16 март). 2. Викторен Линалэсь куасъёс вылэ султыса кошкемзэс тодэмез бере соос сьӧры ик вырӟизы (Е. Самсонов. Тулыс ӵукна. 25 б.). 3. Куноос азбаре пырем беразы ик пумиськизы та тодмотэм муртэн (Удмурт сяськаос). Ваньзэ та выллем предложениосты П.Н. Перевощиков берыктэм ӟуч кылысь сложной луись после того, как яке когда союзной кылъёсты уже кутыса. Озьы кылдӥллям пӧртэм "переходной синтаксической конструкциос". (Перевощиков "Правила удмуртской орфографии и пунктуации: проект, 1954. 88-89 б.). Соин ӵош ик, П.Н. Перевощиков скобкаосын шонересь берыктонъёс но сётылэ, нош правилоос кылдытэм ӟуч переводъёсызъя (Отын ик, 48-49 б.). Учке: 1. Академик В.Р. Вильямс гожъяз: "Трос пайда сётӥсь пудо вордонэз умой радъяны луэ, вож сиён вань дыръя гинэ" (Советской Удмуртиысь). Академик В.Р. Вильямс писал: "Высокопрдуктивное животноводство можно организовать только тогда, когда есть зеленый корм (только при наличии зеленого корма)". 2. Гурезь бамын лысо нюлэс, тӧл ӧвӧл дыръя, нырулыса кадь сылэ. Лес на склоне горы, когда отсутствует ветер (при отсутствии ветра), как будто дремлет. Скобкаосын сётэм переводъёсызъя ке эскероно, та предложениосты запятоен висъянлэн кулэез ӧвӧл. Послелогъёсын верам обстоятельствоос но дополнениос запятоен висъясько соку гинэ, куке соос мукет обстоятельствоез валэкто яке вӧлскем обстоятельствоосты асьсэды мукет обстоятельствоос валэктоно яке уточнять каро. Эскере: 1. Сыӵе-сыӵе шуг югдурын дыръям, ӵапак зачёт сётэм бере, со пединститутэ монэн адскыны пыре ("Кенеш", 1: 9, 45 б.). 2. Куддыръя, шӧмаськемез дыръя, кышнозэ мыжыкен но "кунояны" уг возьдаськы ("Кенеш" , 1: 4, 59 б.). 3. Москваын пумиськемзы бере, куинетӥ нуналаз, Максим Прокопьев кошкем ини асьме шаере ("Кенеш" , 1: 5, 62 б.). 4. Ӝытазе, собранилэн ортчемез бере, кино луоз. 5. Субботаосы, песянай кошкылон дыръя, кухняын вераны луонтэм шулдыр луэ вал. Запятоен висъян пумысен трос тупамтэос пумисько на -мен (-эмен), -мъя (-эмъя), - мтэен, -мтэысь, -мысь (-эмысь) кылӥтэтъёсын, суффиксъёсын пӧрмем отглагольной шуон оборотъёсты гожъянын. Деепричастиос бордын ужакуз, асьмелэн сӥё-дано тодосчимы П.Н. Перевощиков таӵе отглагольной шуон оборотъёсты адӟымтэ улэ кариськиз но таӵе формаосты нимысьтыз тупен-тупен ӧз эскеры ("Деепричастия и деепричастные конструкции в удмуртском языке", 1959). Та пумысен кӧня ке гинэ примеръёс сётэмын солэн "Знаки препинания при обстоятельственных отглагольных оборотах" (Правила удмуртской орфографии и пунктуации. Ижевск, 1954, 89-90 б.) статьяяз гинэ. Венгер тодосчи Д.Р. Фокош- Фукс, со дыре ик ужам учёной, ваньзэ таӵе формаосты (-мъя кылӥтэтэн пӧрмемъёссэ сяна) пыртӥз деепричастиос пӧлы. Милям чакламмыя, та ужпумез кык пумо радъяны луоно. Нырысетӥез сюрес: Д.Р. Фокош-Фукслэсь гожъямзэ лыдэ басьтыса, -мен, -мтэен, -мтэысь, -мысь кылӥтэтэн пӧрмем формаосты деепричастиос пӧлы пыртоно. Соку соосты ас валэктоно кылъёсын ӵош деепричастной оборотъёс шуоно. Соосты запятоен висъяно деепричастной оборотъёсты висъяны тупатэм правилоосъя ик. Кыкетӥез сюрес. -мен, -мтэен, -мтэысь, -мысь(т) кылӥтэтъёс ваньмыз ик пӧрмемын - м кылӥтэтэн макенимъёс бордысь, пӧртэм падеж кылӥтэтъёс ватсаса. Соин соосты вераны луэ на мукетэз лыдэз, кинлэнэз возьматӥсь кылӥтэтъёсын. Учке: бере кылеменым, бере кылеменыд, бере кылемысьтыз, бере кылемысьтымы, бере кылемысьтызы но мукет. Вылаз ик, куд-ог дыръя соос послелоген но верамын луо: куазь зорыса улэмен но куазь зорыса улэмен валче (яке йырин), озьы йыринтэменыз йырин (яке сэрен) но мукет. Та примеръёс вылысь адӟиськомы: вылӥын верам кыл- формаос макеним бордысь чылкак висъяськемын ӧвӧл на. Соин ик соосты деепричастиос пӧлы пыртыны но кӧня ке шугъяськоно. Предложениын таӵе формаос луо мугез (причинаез) возьматӥсь обстоятельствоос, нош ас валэктоно кылъёсынызы ӵош соос луо вӧлскем обстоятельствоос. Озьы бере, бере, дыръя, понна, выльысь, сэрен, йырин, валче послелогъёсын пӧрмем оборотъёсты сямен ик, соосты, милям малпаммыя, вӧлскем обстоятельствоос шуоно. Соку соосты запятоен висъянлэн кулэез уз ни луы. Тани тазьы: 1. Лымы трос луэмен тройкаен лыктыны быгатӥллямтэ. (Е. Самсонов. Тулыс ӵукна. 263). 2. Автобусын ӝокыт луэмысь укнооссэ усьтӥллям, соин ик, ыркыт омыр пырыса, мылкыдэз ӝутэ. (Е. Самсонов, Тулыс ӵукна. 15). 3. Улонмы йырчукин берыктӥськемен валче почта нуллӥсь эшмылэн сумкаез арысь аре векчия но векчмя. ("Кенеш", 1: 6, 29). 4. "Кышкыт паласькись висёнэн курадӟеменызы сэрен та виын ог-огзы доры ветлытэк уло, вылды",- малпа Миквор, урамлэн выллапалаз тубыса. ("Кенеш", 1: 10, 9). 5. Пуны уродъяськемысь Микворлэн вылтырыз пуэктыны ӧдъяз: лыктӥзы ук таоосыд. ("Кенеш", 1: 10, 9). 6. Озьы малпаськыса сылонъяз урам капка ӟукрак вазьса усьтӥськиз. ("Кенеш", 1: 10, 9). 7. Шобрет улысь ляб, ӟадырес куара кылӥськемысь со выльысь висисьлэн матаз мынӥз. ("Кенеш", 1: 10, 9). 8. Кышкасько, музъем шунамъя тыметэз тудву кырыны быгатоз. ("Кенеш", 1: 10, 11). 9. Матаз вуэмезъя Итчи воргоронлэн ымнырыз пужмер пуксем музэн тӧдектӥз, синъёсыз эшшо но жут тусоесь луизы. ("Кенеш", 1: 10, 12). 10. Кырӟанлэсь кылъёссэ умой тодымтэысьтыз, вылды, со ымдуръёссэ гинэ выретӥз. ("Кенеш", 1: 10, 13 ). 11. Кырӟамзэ куспетӥ каремысьтыз Миквор вожпотэмзэ мырдэм серметаны быгатӥз. ("Кенеш", 1: 10, 14). 12. Вало вамен луымтэен пехотаез ожтылэ кыскыны луонлык ӧй вал. ("Кенеш", 1: 10, 16). 13. Сое адӟемысьтыз Миквор шумпотӥз вал ини, нош яр йылысь юри васькыса учкемез бере валаз: дораз сузьтӥськыны нокызьы уз быгаты. ("Кенеш", 1: 10, 18). 14. Корка доразы сюрес усьтымтэен али висисьёсты ӵемысь носилкаен поттано луэ. (УД, 20 март). 15. Малпаськод, бадӟым изъян лэсьтэмысьтым кузёос лек кылын шуккиськизы? ("Кенеш", 1: 3, 43 б. ). 16. Нокин буйгатӥсь луымтэен Моко Олиез чакланы малпаз. ("Кенеш", 1: 3, 45 б.). Гажано лыдӟисьёс, удмурт кылэз дышетӥсьёс, книга, газет, журнал поттонниысь ужасьёс, та статьяез лыдӟемды бере одно ик вералэ вал асьтэлэсь малпанъёстэс, ӵектонъёстэс. Шонер гожъяськон но знакъёс пуктылон выль правилоосты ми печатланы малпаськом та арлэн пумаз ик. 1 Тулыс гур Кылъёсыз но гурез Юлия Байсаровалэн Тупатъяз Н.Шабалин Кылӥське тулыслэн куараез, Кылӥське солэн выль крезьгурез. Нош гурез туж шулдыр, ӵыдонтэм, Номыриин но ноку воштонтэм. Со гурын кылӥське жильыртэм, Ӟильыртэм, тюргетэм но шултэм, Шумпотон куаразэ сётыса, Вань дунне кадь вырӟе сайкаса. Вырӟытэ со крезьгур сюлэмез, Выль уже со ӝутэ мылкыдэз. Нош ужъёс ай уно, дыртоно, Гыроно, кизёно, усъяно. Туж вакчи ке но та тулысмы, Со сётэ выль кужым армылы. Ӧд ке дунъя солэсь кужымзэ, Улонлэсь но уд шедьты ӧрзэ. Ушаков Г.А., профессор Кызьы ужано изложение бордын? Покчи но шор ёзо классъёсын шӧдӥськымон инты басьтэ изложение. Бадӟымъёсаз классъёсын ӵемгес гожъяло ини сочинениос. Изложение, сочинение выллемгес ик, пиналъёслэсь кылзэс волятыны, йырвизьзэс но йырсазьзэс лэчытгес карыны, соослы умой сямъёс пыӵатыны но тодон-валанъёссэс будэтыны юрттэ. Умоез со бордын но - изложенилы дасяськон трос дырез кулэ уг кары, нош пайдаез бадӟым. Изложениез асьме школаосын кемаласен уже куто ини, соин ик солэн методикаез но умой-умой эскеремын. Озьы ке но, тырмымтэосыз но та пумысен ӧжыт ӧвӧл. Соос пӧлын уката но паськыт вӧлмемын изложениослэсь одӥг пумозэ гинэ уже кутон. Кызьы тодмо, вань текстлы матын но вакчиятэм изложениос. Туала школаын вань изложениосты текстлы матын карыса гожъяло. Зэм, соос кулэ. Соос вӧзын ик вакчиятэм изложениос но мед луысалзы. Ужпум тани ма бордын. Текстлы матын изложениос пиналъёслэсь кылзэс волятыны умой-умой уг юртто, соос йырсазьзэс гинэ лэчытгес каро. Дышетскисьёслэсь кылзэс волятыны уката но юртто вакчиятэм изложениос. Огдыре пиналъёслэн йырвизьзы но азинске. Угось таӵе изложениосты дышетскисьёс быдэсак асьсэ кылын гожто. Муртлэсь верамзэ аслаз кылыныз гожтыны йырсазь но, йырвизь но кулэ. Дышетскисьёслэн таӵе изложениосты дунъямтэзы уката но шӧдӥське егитъёслэн вузъёсын дышетскыкузы. Соос лекциосты но гожъяны, конспектъёс дасяны но уг быгато. Тае валась но школаын ужам преподавательёс лекцизылэсь тужгес кулэ интыоссэ, нимысьтыз висъяса, гожтыны косо. Жаляса верано луэ, тросэз преподавательёс тае уг верало, быдэс лекцизэс огкадь лыдӟо. Соку студентъёс преподавательлэсь верамзэ кылысь кылэ гожтыны тыршо. Но тазьы гожъяны нокин но уз вуы. Соин ик мае вуо, сое ик гожто. Собере асьсэос но уг валало ма гожтэмзэс. Изложениос бордын ужаку, эшшо одӥг янгыш пумиське на - текстэз лыдӟемлэсь азьло вакчияк вераны кулэ со сярысь. Дышетӥсьёс таӵе ивортон сёто, номыр уд шу. Мукетыз мыдлань - ваньмыз сямен таӵе ивортонъёс одӥг выллемесь. Котьку сямен ик авторзэ верало, солэсь куд-ог мукет произведениоссэ тодазы ваё на. Пиналъёсты изложенилы дасяны тазьы луоз, авторез тодмо писатель ке. Нош авторез тодмотэм писатель ке, солэн нимыз пиналъёслы номыр сярысь но уз вера. Шонергес луысал текстлэн темаеныз тодматыны, озьы пиналъёс изложенилы дасесь луысалзы. Изложениос бордын ужаку, эшшо одӥг тырмымтэ паськыт вӧлмемын. Текстлэн пуштросэз бордын дышетӥсьёс рос-прос ужало. Пӧртэм амалъёсты но куто: пиналъёс юанъёслы валэкто, быдэсак пуштроссэ верало, план дасяло. Таин артэ ик ӧжыт ужало текстлэн кылыз бордын: куд-ог шуг учыръёсты гинэ валкто но доска вылэ гожто. Озьы тӥни пиналъёслэсь вераськон но гожъяськон кылзэс волято текстлэсь кылзэ эскерытэк. Ма веранэз, мыдлань со. Туала методикалэн куронъёсызъя тани кызьыгес ужано вылэм. Возьматом сое Серафим Соколовлэн Кизили" журналын (1996-тӥ ар, 7-8 номер) потэм мадёсэз вылын. Зэм, Серафим Соколов тодмо писатель ӧвӧл, со кылъя тодосчи. Со уката но тунсыкъяське пӧйшуръёслэн, тылобурдоослэн, чорыгъёслэн нимъёсынызы, тодэм- валамзэ лыдӟисьёслы газет-журналъёс пыр ивортэ. Серафим Соколов. Комак. Туэ комаклэн арез. Вашкала дырысен озьы тупатэмын шунды ӝужан палан улӥсь калыкъёслэн календарьзыя. Бадӟым изъян ваеменыз, комак нокинлы уг кельшы, дыр. Со - йырйиськисьёс пӧлысь самой паськыт вӧлмемез. Та пӧйшурез котькытысь пумиталод, Арктикаын но Антарктидаын сяна. Комаклэн ӵыжы-выжыосыз луо пайда ваись но чебересь куо йырйиськисьёс: коньы, мый, юмыран, музъем комак но мукетъёсыз. Уло комакъёс уллёосын. Одӥг уллёысь комакъёс ог-огзэс тодмало, нош пӧлазы "мурт" ке вуэ, соку ик вылаз ожалско. Комак пиналъёссэ пушказ 22 сутка нуллэ. Араз сизьым пол пи вайыны быгатэ. Йырйиськисьёслэсь улон-вылонзэс эскерись тодосчиос таӵе тумошо учырен пумиськиллям. Со вылэм Америкаысь одӥгаз паркын. Отчы тодосчиос кӧлыны кылиллям. Одӥгез очкизэ шляпаяз понэм. Ӵукна султэм но, шляпаяз очкиез ӧвӧл ни, пе. Ӝоген тодосчиос кӧлон интыысьтызы комакез адӟиллям. Со, пе, ымаз пуньы укрчыса, ас гуаз пегӟиз. Со гуысь, очки сяна, олокыӵе но арбериос шедьтӥллям. Быдэс дуннее комакъёс вӧлмиллям Вьетнамысь, Кореяысь но Китайлэн шунды ӝужан палысьтыз. Асьсэ пыдъёсынызы но, поездъёсын но, пароходъёсын но, машинаосын соос вуиллям пӧртэм интыосы. Сямызъя комак туж чакласькись. Одӥг англи тодосчи таӵе эскерон лэсьтэм. Урдэсъёстӥз пасё фанера ящике мертаса чабей тысь понэм. Сое пуктэм комакъёслэн яратоно интыязы. Ӵуказеяз учке но пайме: ящикысь чабей одӥг граммлы но кулэсмымтэ. Кыкетӥ но куинетӥ нуналъёсаз чабеез ӧз исалэ. Ньылетӥяз гинэ кӧня ке тысьлы кулэстӥзы. Нош ваньзэ чабеез быдтӥзы арня ортчыса гинэ. Комакъёс нырысь нуналъёссэ чакласькизы, вылды. Тае лыдэ басьтыса, тодосчиос комакъёсты кутылыны таӵе амал ӵекто: нырысь ик та йырйиськисьёсты одӥг интыын сиськыны дышетоно. Отын одно ик медло капкан яке мукет кутылон арбери. Ог арня ортчыса гинэ, чакласьконзы быремен, комакъёс капканэ шедьылыны кутскозы. Кӧня ке комак ар сярысь. Солэн арез пӧртэм "пужыё", пе, луоз. Комаклэн ӵыжы- выжыосыз но сямъёссыя ог-огзылы уг тупало угось. Та аре асьмелы комак кадь чакласькись, музъем комак кадь тыршись, коньы кадь шаплы луоно, пе. Та текстэз изложенилы юнме ӧм быръе. Со пиналъёслэсь тодон-валанъёссэс узырмытоз, котырысь инкуазез яратыны, утьыны дышетоз. Та текст яркыт возьматэ, инкуазьлы одӥг улэп лул но (пайдаё-а со, асьмеос верамъя, изъянтӥсь-а со) мултэс ӧвӧл. Китайын тани одӥг вакыт ӟольгыриосын нюръяськыны шӧтазы. Уже кутӥзы ӟольгырилэсь ляб интызэ: со пуксьылытэк кема лобаны уг быгаты, из кадь усе. Вань калык кыре потӥз, пӧртэм арбериосын жингыр-куангыр карыса. Мискиньёсты одӥгтэм быдтӥзы. Ӟольгыриез янгыше уськытӥзы, со рисэз изъянтэ шуыса. Табере трос ю-нянь шыръяськоз шуо вал. Нош учконо ке, озьы ӧз луы: пӧртэм нымы-кибыос рисэз, ӟольгыри сярысь, данаклы уногес изъянто вылэм. Нош ӟольгыриос быдтэмын бере, нымы-кибыос уката аляны кутскизы. Ма кароно? Кунгож сьӧрысь коньдон тырыса басьтоно луизы. Тӥни озьы ик инкуазьлэн бурд улаз аслаз интыез вань комаклэн но. Сое быдтӥд ке, кин ке но мукетыз аляны кутскоз. Текстэз лыдӟемлэсь азьло ваньзэ тае ивортыны мултэс уз луы. Уз люкеты гороскопъя котьку арез кыӵе ке пудо-животлы, пӧйшурлы сӥзё шуыса ивортон но. Собере гинэ дышетӥсь текстэз лыдӟе, пиналъёслэсь сое кыӵе-мар валамзэс тодыны понна, кӧня ке юанъёс сётэ. 1. Кыӵе пӧйшуръёс комаклы матын ӵыжы-выжыос луо? 2. Малы комакъёс Арктикаын но Антарктидаын уг пумисько? 3. Автор комакъёслэсь кыӵе сямъёссэ пусъем? 4. Комаклэн кыӵе сямъёсызлы адӟем карыны ӧте автор? 5. Комакъёсын нюръяськыны кыӵе амал шедьтӥллям англи тодосчиос? 6. Текстлэн кутсконэз но пумыз тупало-а ог-огзылы? Тупало ке, маизъя? Пиналъёс текстэз шонер валаллям ке, дышетӥсь сое эшшо огпол лыдӟе на. Собере текстлэсь пуштроссэ асьсэос пиналъёс верало. Текстлы план ваньзы ӵошен но, ас куспазы но дасяны быгатозы. Одно ик ужаны кулэ мадёслэн кылыз бордын. Лексика ласянь. Доска вылэ ӟуч кылэ берыктыса гожтоно таӵе кылъёсты: мый - бобр, юмыран - суслик, музъем комак - сурок, йырйиськись - грызун. Одӥг уллёысь комакъёс ог-огзэс тодмало, нош "мурт" ке вуэ, соку вылаз ожалско. Та предложениысь "мурт" кылэз автор кавычкаосын кутэм. Малы? (Со переносной значениен кутэмын.) Та предложениысь ик ожалско кылэз солы матын луись кылъёсын воштыса утчалэ (нюръясько, улляло, тузо). Кызьы воштӥськиз предложенилэн пуштросэз? Автор шонер-а кутэм та кылэз? (Интыяз, шонер: комакъёслэсь мукет уллёысь пӧйшуръёсты лек адӟонтэм каремзэс возьматэ.) Морфология но шонер гожъяськон ласянь. Куд-ог шуггес кылъёсты доска вылэ гожтоно: уллё, сямызъя, дунне. Синтаксис но пунктуация ласянь. Быдэн одӥг пример бырйыса эскероно но валэктоно таӵе прекдложениосты: - висъям членъёсын; - сложносочинённой; - сложноподчинённой; - союзтэм. Текстлэн кылыз бордын рос-прос ужан юрттэ: - отысь кыл тӥрлыкъёслэсь кызьы кутэмез чакланы; - пиналъёслэсь кылзэс узырмытыны; - кылъёслэсь кылдэмзэс (этимологизэс) валэктыны; - янгышъёслэсь алыны; - пиналъёслэсь йырсазьзэс но йырвизьзэс лэчытгес карыны; - текстлэсь пуштроссэ шонер валаны; - текстлэсь темазэ, идеязэ, композицизэ, геройлэсь сямзэ, мадёслэн люкетъёсызлэсь кызьы герӟаськемзэс валаны. Озьыен, изложение - со котыр ласянь пайдаё амал. Со уката но пайдаё луэ дышетӥсьлэн со бордын ужамез туала методикая радъямын ке. 1 Библиотекалэн шыкысаз (январь, 2002) ЧЕБЕРЛЫКО ЛИТЕРАТУРА Абдулаев А. Ш. Чернобыльские рассказы. - Ижевск, 2001. - 112 с. Чернобыле ветлэм адямилэн веросъёсаз - вуоно ӟеч улонлы оскон, инкуазез утьыны отён. Кузнецов Г. А. Песня дня: Стихи. - Ижевск: Удмуртия, 2001. - 48 с. Лыдӟисьлы тодмо луо авторлэн пӧртэм газет-журналъёсын потылэм кылбуръёсыз. Нош та книга луэ нырысетӥез. Пельтэм Илля. Инсэрег: Кылбуръёс, кылэм-верам, поэма / Суредаз В. Мустаев. - Ижевск: Удмуртия, 2001. - 62 с. Илья Пельтемов - шаерысьтымы тодмо кылбурчи но бард - лыдӟисьёслы выль кылбуръёссэ ӵектэ. Авторлэн та книгаез кыкетӥез луэ. ИСТОРИЯ НО ЭТНОГРАФИЯ Атаманов М. Г. По следам удмуртских воршудов. - Ижевск: Удмуртия, 2001. - 216 с. Удмурт калыклэсь воршудэн улон вакытсэ эскерыса, тодосчи аслаз выль книгаяз котькудӥзлы воршуд нимлы валэктон сётэ, возьматэ солэсь азинскемзэ. Туала гуртъёслэн историзы, кыӵе воршудысен со кутске - та юанъёслы валэктон тунсыко луоз шаерчиослы, тодосчиослы, ваньмызлы, кин тунсыкъяське гуртэзлэн историеныз. Макаров Л. Д. Древнерусское население Прикамья в Ъ - ЪИ вв.: Учебное пособие. - Ижевск: Изд. дом "Удм. ун-т", 2001. - 140 с. Книга сӥземын Кам котырысь музъемъёсын улӥсь ӟуч калыклэн историезлы. Кызьы ӟучъёс вуизы Камдор музъеме, кызьы улӥзы дасэтӥ - дас одӥгетӥ дауръёсы, - та юанъёслы валэктон сётэмын, археологической шедьтосъёсты, фольклор материалъёсты эскерыса. Чураков В. С. Южные удмурты в Ъ - середине ЪВИ века (проблемы социально- политической истории: Автореф. на соискание ученой степени кандидата исторических наук. - Ижевск, 2001. Таиз бичетын тодосчи эскере лымшор пал удмуртъёслэсь дасэтӥ даурысен дас куатетӥ даурозь улэмзэс, шаерамы та вакытэ ортчись ужъёсты. Со сяна, автор ӵектэ удмурт калыклэсь улон но азинскон сюрессэ нимаз выжыослэн историзы вылэ пыкиськыса эскерыны, вашкала дырысен удмуртъёс сярысь тодмо иворез валэктыны, сое радъяны. Педагогика но методика Андриевская З. Н. Уроки для родителей, которые хотят, чтобы их дети хорошо учились в школе. - Ижевск: Изд-во ин-та усовершенствования учителей, 2001. - 44 с. Таиз бичетын сётэмын анай-атайёслы, дышетӥсьёслы нылпиосын ужан амалъёс, кудъёсыз юрттозы пиналъёслы школаын сётэм выль тодон-валанъёсты юнматыны но соосты улонын быгатыса уже кутыны. Березин Р. Ф., Широбоков В. Г. Лыдӟон книга. 4-тӥ класс. - Ижевск: Удмуртия, 2001. - Изд. 3-е, доп. - 159 с. Данилова Р. И., Данилов Г. Д. Удмурт кыл. 4-тӥ класс. - Ижевск: Удмуртия, 2001. - Изд. 3-е, доп. - 126 с. Журавлёва А. Н., Байсарова Ю. П. Анай кыл. 4-тӥ класс: Удмурт кылэз тодӥсьтэм пиналъёслы лыдӟон книга / Суредаз И. Леонтьева. - Ижевск: Удмуртия, 2001. - 159 с. Защита детства: социальные, правовые и медико-психолого-педагогические аспекты: Информ.-метод. изд-е / Ред. и сост. Пишкова О. В., Радевич А. Ф. - Ижевск: ИГОО "Центр социальных и образовательных инициатив", 2001. - 170 с. Методические подходы к организации олимпиад по физике / Сост. Крохина И. Г., Тронина С. П., Бовин В. П. - Ижевск: изд-во ин-та усовершенствования учителей, 2001. - 100 с. Книгаын сётэмын школаын физикая олимпиадаез радъяны дэмланъёс, ужъёс. Та бичет тунсыко луоз мукет дышетскон предметъёсъя ӵошатсконъёс ортчытӥсьёслы но. Мирошниченко Т. Е. Басовый ключ: Музыкальная грамота / Худ. Ефремова М. Ф. - Ижевск: Изд. дом "Удм. ун-т", 2001.- 35 с. Пиналъёслы крезьгуръя тодон-валанзэс но быгатонлыксэс будэтон книга ӟеч юрттӥсь но эш луоз. Молчанова Е. Н., Молчанова Л. А. Удмуртский народный костюм: Книжка - раскраска: Методическое пособие для детей младшего и среднего школьного возраста. - Ижевск: УИИЯЛ УрО РАН, 2001. - 24 с. Книгаысь буяны дэмлам суредъёс куинь люкетлы висъямын: вашкала удмурт дӥсь, ЪИЪ - ЪЪ даурлэн кутсконаз нуллэм удмурт дӥсь, выжыкылъёсъя но легендаосъя сцена вылын шудыны малпам удмурт дӥсь. Нылпиос татысь трос выльзэ тодозы - кыӵе вылӥллям вашкала чеберъяськон, пӧйшуран арбериос, со сяна, книга юрттоз пиналлы выль, туннэ нуналлы тупась удмурт дӥсь малпаны. Полезные привычки: Рабочая тетрадь для 2-го класса. - М., 2000. - 32 с. Тетрадьысь ужъёс юрттозы валаны, кыӵе выросъёс возьмато адямилэсь ӟеч яке урод мылкыдзэ, кызьы ӟечгес валаны солэсь верамзэ, адямилы ма ӟечсэ вае, нош марлэсь кулэ палэнскыны. Унозэ тетрадьысь ужъёсты кутыны луоно пӧртэм урокъёсын. СПОРТ Соловьёв Н. А., Варнавский И. А., Северухин Г. Б. История развития физической культуры и спорта в Удмуртии: Учеб. пособие. - Ижевск: Издат. дом "Удм. ун-т", 2001. - 783 с. Та удыслы сӥзем книгаос ӧжыт, соин ик выль книгалэн потэмез - лыдӟисьёс понна туж бадӟым шумпотон. Вераны кулэ, та книгаын шаерамы спортлэн революцилэсь азьвыл вакытысен туала дырозь азинскемез эскеремын. Авторъёсыз - шаерысьтымы спорт удысын кема аръёс ӵоже ужась адямиос, тодосчиос. СПРАВОЧНИКЪЁС Кто есть кто в Удмуртской Республике. - Ижевск: ЗАО "Регион-Пресс", 2001. - Изд. 2, доп. - 422 с. Справочниклэн кыкетӥ изданиез узырмытэмын шаерысьтымы предприятиос сярысь выль нимъёсын но кулэ луись иворъёсын. Книгае пыртэмын вордӥськем нуналъёсын нимаз люкет. Нош та ужез капчиятэ нимысьтыз адямиослэн нимъёсынызы указатель. 1 Шыкыс (Сентябрь, 2001) Чеберлыко литература Цегельник Э. Про Ваню и его друзей / Рассказы для детей младшего и среднего школьного возраста. - Глазов, 2001. - 208 с. "Планета детей" проектъя лэсьтэм книгаос сярысь лыдӟисьёс тодо ини, вылды. Та сериен потӥзы ни Даша Залётовалэн "Дашенькин Ижевск", Рома Пермяковлэн "История о скрипаче", Ася Корепановалэн "В нежной музыке созвучий", мукет трос нылпиослэн "Ижевск в костюме из листвы", "Стихи на полянке" кылбуръёсын но выжыкылъёсын чебер книгаоссы. Таиз но книга вольыт бумага вылын, чебер суредъёсын лэсьтэмын. Сое дасян бордын ужазы Глазкарысь суредасьёс. Книга, нылпиослы тунсыко учыръёс верам сяна, луонлык сётэ альбом лист вылэ лэсьтэм суредъёссэс зэмос книгаысь адӟыны. Амалтэк суредась яке кылбурчи луод! Черепанов В. Жил в селе Иван-дурак: Сказки для взрослых. - Ижевск, 2001. - 134 с. В. Д. Черепанов - ужбергатӥсь. Со сяна гожъя на тунсыко кылбуръёс-такмакъёс. Калык юморез уже кутыса, кылбурчи герӟа отысь суредъёсты туала улонэн. Озьы, так маке верам пӧрме туала политика, огъя улон шоры серемпыр учкон радлы. В. Черепановлэн та кыкетӥ книгаез луэ. Татчы пыризы "Жил в селе Иван-дурак" но "Как мужик с царём местами менялись" нимо мойыослы выжыкылъёс. Литература тодон Удмурт литературая антология: 8 - 11-тӥ классъёсын дышетскисьёслы лыдӟет / Текстъёсты бырйиз но дасяз В. Л. Шибанов. - Ижкар: РАН-лэн Уральской люкетаз пырись Удмурт историяя, кылъя но литературая институтэз, 2001. - 197 бам. Тодмо тодосчи, удмурт литератураез эскерись В. Л. Шибанов одӥг лыдӟетэ огазея удмурт литератураысь тужгес но адскымон, ас вакытсылы тупась чеберлыко текстъёсты. Книга кутске 1767-тӥ арын гожтэм кылбур текстэн но сое валэктонэн, литератураысь ЪИЪ даур усьтэмын Марклэсь но Матфейлэсь Ӟеч Иворъёссэс, вӧсяськон кылъёсты эскеронэн, Н. Ивановлэн "Калмез бакатыръёс" но Г. Верещагинлэн "Чагыр, чагыр дыдыке" ужъёсынызы. Тунсыко текстъёсын выль сямен усьтӥсько ЪЪ даурысь тодмо гожъясьёслэн нимъёссы. Узыр материалъёс но эскеронъёс вылын лэсьтэмын туала литература сярысь бамъёс. Валэктонъёс книгае радъямын нимаз рамкаосын, текст бӧрсьы сётэм юанъёс малпаськыто но вераськонэз выль ӧрын азьланьтыны юртто. Котькудӥз автор сярысь вакчияк но самой кулэ луисез ивор сётэмын. Книга воштонтэм юрттӥсь луоз бадӟым классъёсын дышетскисьёс, дышетӥсьёс, удмурт литератураен тунсыкъяськисьёс понна. Кылтодон Журавлёва А. Н. Суредъёсын кылсузьет. Удмурт, ӟуч, англи кылъёсын: Дышетскисьёслы пособие / Суредаз А. Леонтьев. - Ижевск: Удмуртия, 2001. - 160 с.: ил. 600 пала кылъёс радъямын 35 темая люкетъёсы. Семья, мугор люкетъёс, пудо- живот, бакча сиёнъёс, ӧнеръёс но мукет темаос сяна, пыр-поч усьтэмын вал тӥрлыкез возьматӥсь кылъёс, сётэмын удмурт лыдпусъёслэн вашкала дыръя гожтӥськемзы но. Книгалэсь англи кылын люкетсэ лэсьтӥз Н. В. Ильина, суредъёсты дасяз А. К. Леонтьев. Кыллюкам кулэ луоз удмурт, ӟуч, англи кылэз дышетыны кутскисьёслы. Педагогика но методика Вахрушева А. И. Удмурт кыл: 3-тӥ класслы дышетскон книга. - Ижкар: Удмуртия, 2001. - 183 бам. Учебник, тупатъянъёсын но ватсанъёсын, 3-тӥ ползэ поттэмын. Комарова А. М. Музыка в словарной работе в удмуртских детских садах. - Ижевск: Удмуртия, 2001. - 112 с. Научно-методической пособиын сётэмын нылпиосты котырысь дуннеез кылзыны, кылъёсты валаны юрттӥсь система. Со дышетэ пиналъёсты шонер но чебер вераськыны. Книгалы азькыл гожтӥз педагогика тодосъя доктор Г. Н. Никольская. Та лыдӟет тунсыко луоз анай-атайёслы, нылпи садъёсын, школаосын ужасьёслы, студентъёслы. Сагдеев А. М. Мир букв: Творческая тетрадь. - Ижевск, 2001. - 47 с. Тунсыко, пӧртэм пумо ужъёсын тетрадь чакламын пиналъёсты букваосыз тодманы но соосты гожъяны дышетонлы. Сётэмын букваосты буян, соосты вандылон, кулэ интые пуктыса лякон, пӧртэм сямен суредан ужъёс. Та книгаын ик вань пропись но "Кин ӝоггес букваез шедьтоз" шудон. Тетрадез ужазы пайдаё кутыны быгатозы анай- атайёс, нылпи садъёсын но школаосын ужасьёс. История Куликов К. И. "С этой минуты Россия спасена" (К 90-летию Бородинского сражения). - Ижевск: УИИЯЛ УрО РАН, 2001. - 112 с. Книгаын нырысьсэ печатламын М. И. Кутузовлэн, Екатерина, Павел, Александр, Франц монархъёслэн гожтэтъёссы, ожмаськем генералъёслэн но офицеръёслэн тодэваёнъёссы. Вань материалъёс басьтэмын Удмурт тодос институтлэн тодос фондысьтыз. Книга узырмытэмын буёло туспуктэмъёсын, литографиосын, факсимильной гожтэтъёсын. Куликов К. И., Иванова М. Г. Семантика символов и образов древнеудмуртского искусства: Научно-методическое пособие. - Ижевск: УИИЯЛ УрО РАН, 2001. - 64 с.: илл. 4 п. л. Туала суредан, гожъяськон, драма удысын вӧлмем этнофутуризм валатонэз авторъёс усьто вашкала текстъёсты, тӥрлыкъёсты эскеронэн. Кызьы валэктоно туала чеберлыко искусствоысь, нырысь учкыса, валантэм но валан понна куддыр секыт луись образъёсты? Вашкала мифъёсты эскерыса, вашкала арбериосты учкыса, вашкалаослэсь улон эсэпсэс валаса гинэ туала искусство валамон луоз. Озьы, авторъёс сэртто-пертчо вашкалаослэсь горд сюйлэсь, лылэсь, дэралэсь, кортлэсь пӧртэм арбериос лэсьтыны быгатэмзэс, вераськон но оскон сямъёссэс. Политические партии и движения в Удмуртии (по документам и материалам ЦДНИ УР): Информационный буклет / Комитет по делам архивов при Правительстве УР, Центр документации новейшей истории УР. - Ижевск, 2001. - 42 с. 1980-тӥ аръёслэн пумазы но 1990-тӥ аръёсы, политика но экономика удысын трос выль реформаос луэмен, тросэн кылдылӥзы выль огазеяськонъёс, партиос. Соосты эскеронлы сӥземын таиз бичет. Книга кулэ луоз дышетӥсьёслы, дышетскисьёслы, тодосчиослы.